Kinh tạng Tây Tạng (Kangyur Đại Học) — 055_མདོ་སྡེ།_ད

ན་དག་ལ་གཡོའི་སེམས་མི་སྐྱེད། འདོད་ཆགས་དང་ཞེ་སྡང་དང་གཏི་
མུག་གི་སེམས་མི་སྐྱེད་ཅིང་དེ་དག་དང་འགྲོགས་པར་མི་བྱེད། བྱང་ཆུབ་ཀྱི་སེམས་ཀྱང་མི་གཏོང་། ལྷག་པའི་སེམས་ཀྱང་འཁྲུགས་པར་མི་བྱེད་ཅིང་གཞན་ཡང་ཉེས་པ་དང་ལྡན་པའི་ཡིད་ཀྱི་རྟོགས་པ་དེ་དག་ཐམས་ཅད་བྱང་ཆུབ་སེམས་དཔའ་རབ་ཏུ་སྤོང་ཞིང་དེ་དག་དང་མི་འགྲོགས་ཏེ། དེ་ནི་
གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་དེ་ཡང་སྒྱུ་མ་ལྟ་བུའོ་ཞེས་བྱ་བ་ལ་འཇུག་གོ། །རྨི་ལམ་ལྟ་བུའོ་ཞེས་བྱ་བ་དང་། སྨིག་རྒྱུ་ལྟ་བུའོ་ཞེས་བྱ་བ་དང་། སྤྲུལ་པ་ལྟ་བུའོ་ཞེས་བྱ་བ་དང་། མིག་ཡོར་ལྟ་བུའོ་ཞེས་བྱ་བ་ལ་འཇུག་སྟེ། གང་ནས་ཀྱང་མ་འོངས་པ་དང་གང་དུ་ཡང་མི་
འགྲོ་བར་འཇུག་གོ། །བདེ་བ་ལ་རྨི་ལམ་ལྟ་བུར་འཇུག་གོ། །རྨི་ལམ་ལྟ་བུར་མི་རྟག་པར་འཇུག་གོ། །རྨི་ལམ་ལྟ་བུར་བདག་མེད་པར་འཇུག་གོ། །རྨི་ལམ་ལྟ་བུར་སྲོག་མེད་པར་འཇུག་གོ། །རྨི་ལམ་ལྟ་བུར་སྟོང་པར་འཇུག་སྟེ། ཡིད་དེ་ཡང་མི་དམིགས། མི་རྟོག །རློམ་སེམས་སུ་མི་བྱེད།
མི་ལྟ། མངོན་པར་མི་ཆགས་ཏེ། གཞོན་ནུ་དེ་ནི་ཡིད་ཀྱི་སྡོམ་པ་ཞེས་བྱའོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ཡིད་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་

ཕྱིར་ཞེ་ན། གཞོན་ནུ་ཡིད་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མི་ཁོམ་པ་ཐམས་ཅད་རྣམ་པར་སྤོང་ཞིང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པའང་ཐོབ་པར་འགྱུར་རོ། །སངས་རྒྱས་ཐམས་ཅད་ལས་ཀྱང་སངས་རྒྱས་ཀྱི་མངོན་པར་ཤེས་པ་
ཐམས་ཅད་དང་། མི་འཁྲུགས་པའི་སེམས་རྣམ་པར་གྲོལ་བ་ཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཡིད་ཀྱི་སྡོམ་པ་དག་ནི་ངས་བཤད་ཀྱིས། །གཡེང་བ་མེད་པའི་ཡིད་ཀྱིས་
ཐམས་ཅད་ཉོན། །ཇི་སྟེ་མྱུར་དུ་འཚང་རྒྱ་འདོད་ན་ཡང་། །ང་ལས་ཐོས་ནས་དེ་ལ་ནན་ཏན་བྱོས། །ཡིད་ཀྱི་སྡོམ་པ་གང་གིས་མཁས་པ་དག །མཆོག་ཏུ་རབ་ཞི་རྒྱ་ཆེ་མི་གཡོ་བ། །རྒྱལ་ཆོས་བསམ་ཡས་རྨད་དུ་བྱུང་བ་འཐོབ། །འདི་ནི་ཡིད་ཀྱི་སྡོམ་པ་དག་པར་བརྗོད། །ཡིད་ཀྱི་
སྡོམ་པ་གང་གིས་མཁས་པ་དག །སེམས་ཀྱང་རྣམ་གྲོལ་རྟག་ཏུ་མི་གཡོ་འཐོབ། །དེ་བཞིན་རྡོ་རྗེ་ལྟ་བུའི་ཏིང་འཛིན་མཆོག །འདི་ནི་ཡིད་ཀྱི་སྡོམ་པ་དག་པར་བརྗོད། །མཁས་པ་གང་གིས་ཉེ་བར་སྤྱོད་པ་ཡི། །འོད་ཟེར་དོན་ཆེན་བྱེད་པ་སྒྲུབ་པར་བྱེད། །གང་གིས་ཡན་
ལག་དྲུག་ཅུའི་དབྱངས་ཐོབ་པ། །དེ་ནི་ཡིད་ཀྱི་སྡོམ་པ་རྣམ་དག་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །སུམ་ཅུ་རྩ་གཉིས་མཚན་རྣམས་མྱུར་ཐོབ་འགྱུར། །སྟོབས་བཅུ་སངས་རྒྱས་ཡོན་ཏན་མ་ལུས་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་
པ་གང་གིས་མཁས་པ་དག །སོ་སོ་ཡང་དག་རིག་དང་མི་འཇིགས་དང་། །ཡོན་ཏན་མཆོག་ཏུ་རྨད་བྱུང་བསམ་ཡས་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །དྲན་པ་ཉེ་བར་གཞག་དང་རྫུ་འཕྲུལ་རྐང་། །ཡང་དག་སྤོང་དང་དབང་
སྟོབས་ལྔ་འཐོབ་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །ཚངས་པའི་གནས་བཞི་མ་ལུས་དེ་བཞིན་ཏེ། །སྟོང་ཉིད་མཚན་མེད་སྨོན་མེད་སྒོ་འཐོབ་པ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ཀྱི་སྡོམ་པ་དག་དང་གང་

ལྡན་པ། །སྙིང་རྗེ་གནས་དང་བཏང་སྙོམས་ཆེན་པོ་དང་། །སྤྱོད་འཇུག་བྱམས་པ་ཆེན་པོ་ཞི་བ་འཐོབ། །སྲིད་པ་ཀུན་ལ་དེ་ནི་ཕན་སེམས་འགྱུར། །ཡིད་ཀྱི་སྡོམ་པ་གང་གིས་མཁས་པ་དག །བྱང་ཆུབ་ཡན་ལག་བདུན་ཡང་མྱུར་འཐོབ་ཅིང་། །ལམ་མཆོག་
ཡན་ལག་བརྒྱད་པ་དེ་བཞིན་ཏེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །བཏང་སྙོམས་ཆེ་ལ་གནས་པ་དམ་པ་དང་། །སྙིང་རྗེ་གནས་མཆོག་དྲི་མ་མེད་པ་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་
མཁས་པ་དག །བདེ་བའི་རྣམ་རྟོག་ཞི་བ་དག་པའི་ཡིད། །ཡོན་ཏན་ཕྱུག་པས་རབ་ཏུ་དབེན་ཐོབ་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །ལོག་པའི་ལྟ་བ་ཕན་དང་མི་འགྲོགས་ཤིང་། །གནོད་སེམས་བརྣབ་སེམས་སྐྱེད་པར་མི་བྱེད་
པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །སྐད་ཅིག་ཙམ་ཡང་ཚུལ་འཆོས་མི་བྱེད་ཅིང་། །བླ་མ་ལ་ཡང་གཡོ་སྒྱུ་མི་བྱེད་དེ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །འདོད་ཆགས་ཞེ་
སྡང་ཡིད་ནི་སྐྱེད་མི་བྱེད། །དེ་བཞིན་གང་དུའང་གཏི་མུག་མི་སྐྱེད་དེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །བྱང་ཆུབ་ལས་ནི་སེམས་ཀྱང་མི་གཏོང་ཞིང་། །ལྷག་པའི་བསམ་པ་དག་ཀྱང་འཁྲུག་མི་བྱེད། །དེ་ནི་ཡིད་ཀྱི་སྡོམ་པ་མཆོག་
ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །ཡིད་ཀྱི་ཉེས་པ་མང་པོ་ཇི་སྙེད་གཞན། །ཀུན་དང་ལྷན་ཅིག་གནས་པར་མི་བྱེད་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ལ་སྒྱུ་མ་ལྟ་བུར་འཇུག་བྱེད་དེ། །རྨི་ལམ་འདྲ་ཞིང་དེ་བཞིན་སྨིག་རྒྱུ་འདྲ། །རྟག་ཏུ་མིག་ཡོར་
གྱི་ནི་མཚན་ཉིད་དེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །བདེ་བ་རྨི་ལམ་ལྟ་བུར་འཇུག་བྱེད་དེ། །དེ་བཞིན་མི་རྟག་སྟོང་པ་ཐེར་ཟུག་མུན། །ཡིད་ལ་དེ་ལྟར་མཁས་པ་འཇུག་པར་བྱེད། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ལ་སྲོག་དང་སེམས་ཅན་མེད་པར་

འཇུག །རྐྱེན་ལས་བྱུང་བ་མགལ་མེ་བསྐོར་བ་བཞིན། །ག་ལས་མ་འོངས་གང་དུ་མི་འགྲོ་སྟེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་དེ་གང་ནའང་ཉེ་བར་མི་དམིགས་ཤིང་། །རྟོག་པ་མེད་པར་རློམ་སེམས་མི་བྱེད་དེ། །དེ་ཡང་མི་ལྟ་མངོན་པར་ཞེན་མི་བྱེད། །
དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །དོན་དམ་བདེན་པ་རྨི་ལམ་འདྲ་བ་དང་། །མྱ་ངན་འདས་པ་རྨི་ལམ་མཚུངས་པར་འཇུག །གང་གིས་མཁས་པ་དེ་ལྟར་འཇུག་པ་ཡང་། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད།། །།འཕགས་པ་ཏིང་ངེ་འཛིན་གྱི་
རྒྱལ་པོའི་མདོ། བམ་པོ་བཅྭ་ལྔ་པ་སྟེ་ཐ་མ། གཞོན་ནུ་དེ་ལ་ལས་ཡོངས་སུ་དག་པ་ནི་འདི་ལྟ་སྟེ། སྲིད་པ་གསུམ་རྨི་ལམ་ལྟ་བུར་མཐོང་ནས་དེ་ལ་འདོད་ཆགས་དང་བྲལ་བ་སྐྱེད་དེ། གཞོན་ནུ་འདི་ནི་ལས་ཡོངས་སུ་དག་པ་ཞེས་བྱའོ། །གཞོན་ནུ་དེ་ལ་དམིགས་པ་ལས་
ཡང་དག་པར་འདའ་བ་གང་ཞེ་ན། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་རྣམས་སྒྱུ་མ་ལྟ་བུར་རིག་ནས་དེ་དག་འདོར་བ་སྟེ། འདི་ནི་དམིགས་པ་ལས་ཡང་དག་པར་འདའ་བ་ཞེས་བྱའོ། །དེ་ལ་ཕུང་པོ་ཡོངས་སུ་ཤེས་པ་གང་ཞེ་ན། འདི་ལྟ་སྟེ། ཕུང་པོ་རྣམས་ལ་སྨིག་རྒྱུ་
ལྟ་བུར་འཇུག་པའོ། །དེ་ལ་ཁམས་མཉམ་པ་ཉིད་གང་ཞེ་ན། འདི་ལྟ་སྟེ། ཁམས་རྣམས་སྤྲུལ་པ་ལྟ་བུར་ངེས་པར་སྤོང་བའོ། །དེ་ལ་སྐྱེ་མཆེད་སེལ་བ་གང་ཞེ་ན། འདི་ལྟ་སྟེ། སྐྱེ་མཆེད་མིག་ཡོར་ལྟ་བུར་ངེས་པར་སྤོང་བའོ། །དེ་ལ་སྲེད་པ་སྤོང་བ་གང་ཞེ་ན། འདི་ལྟ་སྟེ། ཆོས་ཐམས་
ཅད་ལ་མི་ལྟ་བའོ། །དེ་ལ་སྐྱེ་བ་མེད་པ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་པའོ། །དེ་ལ་བྱ་བ་ལ་འཇུག་པ་གང་ཞེ་ན། འདི་ལྟ་སྟེ། བརྩོན་འགྲུས་ལས་བྱུང་བའི་སྡུག་བསྔལ་ཆུད་མི་ཟ་བའོ། །དེ་ལ་རྒྱུ་བསྟན་པ་གང་ཞེ་ན། འདི་ལྟ་སྟེ།
ཕུང་པོ་བྲག་ཅ་ལྟ་བུར་མངོན་པར་སྒྲུབ་པའོ། །དེ་ལ་འབྲས་བུ་ཆུད་མི་ཟ་བ་གང་ཞེ་ན། འདི་ལྟ་སྟེ། ལས་ཀྱི་འབྲས་བུ་རྨི་ལམ་ལྟ་བུར་ཆུད་མི་ཟ་བའོ། །དེ་ལ་ཆོས་མཐོང་བ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་མཐོང་བའོ། །དེ་ལ་ལམ་བསྒོམ་པ་གང་ཞེ་ན། འདི་ལྟ་སྟེ། ཆོས་

ཐམས་ཅད་མི་དམིགས་པར་སྒོམ་པའོ། །དེ་ལ་དེ་བཞིན་གཤེགས་པ་དང་ཕྲད་པ་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱི་བསླབ་པ་སྒྲུབ་པའོ། །དེ་ལ་ཤེས་རབ་རྣོ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་སྐྱེ་བ་མེད་པར་བཟོད་པའོ། །དེ་ལ་སེམས་ཅན་
གྱི་རྗེས་སུ་འཇུག་པ་ཤེས་པ་གང་ཞེ་ན། འདི་ལྟ་སྟེ། དབང་པོ་མཆོག་དང་མཆོག་མ་ཡིན་པ་ཤེས་པའི་ཡེ་ཤེས་སོ། །དེ་ལ་ཆོས་ཤེས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་པའོ། །དེ་ལ་སོ་སོ་ཡང་དག་པར་རིག་པ་ལ་འཇུག་པ་ཤེས་པ་གང་ཞེ་ན། འདི་ལྟ་སྟེ། ཆོས་ཀྱི་
ཚུལ་ཡང་དག་པ་ཇི་ལྟ་བ་བཞིན་དུ་རྟོག་པའོ། །དེ་ལ་ཡི་གེ་རབ་ཏུ་དབྱེ་བ་ཤེས་པ་གང་ཞེ་ན། འདི་ལྟ་སྟེ། གསང་སྔགས་གསུམ་སྦྱོར་བར་ཤེས་པ་དང་། རྣམ་པ་དང་རྣམ་པ་མ་ཡིན་པ་ཤེས་པའོ། །དེ་ལ་དངོས་པོ་ལས་ཡང་དག་པར་འདའ་བ་ཤེས་པ་གང་ཞེ་ན། འདི་ལྟ་སྟེ། དངོས་པོ་
མེད་པར་རྟོགས་པའོ། །དེ་ལ་དབྱངས་ཤེས་པ་གང་ཞེ་ན། འདི་ལྟ་སྟེ། བྲག་ཅ་ལྟ་བུར་ཤེས་པའོ། །དེ་ལ་མཆོག་ཏུ་དགའ་བ་འཐོབ་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་ཤིང་། འབྱུང་བ་དང་སྡུག་བསྔལ་སྤངས་པ་དང་། ཁུར་བོར་བའོ། །དེ་ལ་ཆོས་ཀྱི་དགའ་
བ་མྱོང་བ་གང་ཞེ་ན། འདི་ལྟ་སྟེ། གདམས་པར་བྱ་བ་དང་། མགུ་བར་བྱ་བ་མི་གཏོང་བ་དང་། རང་གི་ཐེག་པའི་ལེགས་པ་མཐོང་བའོ། །དེ་ལ་གནས་པ་པོ་གང་ཞེ་ན། འདི་ལྟ་སྟེ། འཕགས་པའི་བདེན་པ་རྟོགས་པའོ། །དེ་ལ་དྲང་པོ་གང་ཞེ་ན། འདི་ལྟ་སྟེ། སྤྱོད་ལམ་བཅོས་
པ་མེད་པའོ། །དེ་ལ་བཞིན་ཁྲོ་གཉེར་མེད་པ་གང་ཞེ་ན། འདི་ལྟ་སྟེ། ཞེ་སྡང་མེད་པའོ། །དེ་ལ་དགེ་བ་གང་ཞེ་ན། འདི་ལྟ་སྟེ། འགྲོགས་ན་བདེ་བའོ། །དེ་ལ་མཉེན་པ་གང་ཞེ་ན། འདི་ལྟ་སྟེ། ཕ་རོལ་ལ་ཕན་པའི་དངོས་པོའོ། །དེ་ལ་གསོང་པོར་སྨྲ་བ་གང་ཞེ་ན། འདི་ལྟ་སྟེ། ཚུར་
ཤོག་ལེགས་པར་འོངས་སོ། །ཞེས་བྱས་པ་དང་མྱུར་དུ་ལྡང་བའོ། །དེ་ལ་བླ་མ་ལ་གུས་པ་གང་ཞེ་ན། འདི་ལྟ་སྟེ། བླ་མ་ལ་འཇིགས་ཤིང་དགེ་བའི་བཤེས་གཉེན་དུ་འདུ་ཤེས་པའོ། །དེ་ལ་བླ་མ་ལ་སྲི་ཞུ་བྱེད་པ་གང་ཞེ་ན། འདི་ལྟ་སྟེ། བླ་མ་ལ་རིམ་གྲོ་དང་གཡོག་བྱ་བའོ། །དེ་ལ་སྐྱེ་བས་ཆོག་ཤེས་

པ་གང་ཞེ་ན། འདི་ལྟ་སྟེ། སྐྱེ་བ་ཐམས་ཅད་ལ་ཆགས་པ་མེད་པའོ། །དེ་ལ་དཀར་པོའི་ཆོས་ཀྱིས་མི་ངོམས་པ་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་ཡོངས་སུ་ཚོལ་ཞིང་དགེ་བ་གང་ཡིན་ཞེས་ཚོལ་བའོ། །དེ་ལ་འཚོ་བ་ཡོངས་སུ་དག་པ་གང་ཞེ་ན། འདི་ལྟ་སྟེ། ངན་ངོན་གྱིས་
ཆོག་ཤེས་པ་དང་། ཚུལ་འཆོས་པ་མེད་པ་དང་། ཁ་གསག་མེད་པ་དང་། ཐོབ་ཀྱིས་འཇལ་བ་མེད་པ་དང་། རྙེད་པས་རྙེད་པ་ལ་འདོད་པ་མེད་པའོ། །དེ་ལ་དགོན་པར་གནས་པ་མི་གཏོང་བ་གང་ཞེ་ན། འདི་ལྟ་སྟེ། དགེ་བའི་ཆོས་རྣམས་ལ་བརྩོན་པ་མི་འདོར་ཞིང་བས་མཐའི་
གནས་མལ་ལ་མངོན་པར་དགའ་བ་དང་། ནགས་སྟུག་པོ་དང་། གཅོང་རོང་དང་། ཕུག་དང་སྨན་ཤོང་དུ་མངོན་པར་དགའ་བ་དང་། ཆོས་ཀྱི་དགའ་བ་མྱོང་བར་བྱེད་པ་དང་། ཁྱིམ་པ་དང་རབ་ཏུ་བྱུང་བ་རྣམས་དང་མི་འདྲི་བ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་
མ་ཆགས་པ་དང་། སྲེད་པ་སྤོང་བ་དང་། བསམ་གཏན་གྱི་དགའ་བ་མྱོང་བ་སྟེ། འདི་ནི་དགོན་པ་ལ་གནས་པ་མི་གཏོང་བ་ཞེས་བྱའོ། །དེ་ལ་ས་ལ་གནས་པ་ཤེས་པ་གང་ཞེ་ན། འདི་ལྟ་སྟེ། ཉན་ཐོས་ཀྱི་འབྲས་བུ་རྣམ་པར་གཞག་པ་ཤེས་པ་དང་། རང་སངས་རྒྱས་ཀྱི་ས་རྣམ་པར་གཞག་
པ་ཤེས་པ་དང་། བྱང་ཆུབ་སེམས་དཔའི་ས་རྣམ་པར་གཞག་པ་ཤེས་པའོ། །དེ་ལ་དྲན་པ་མི་ཉམས་པ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་པའོ། །དེ་ལ་ཕུང་པོ་ལ་མཁས་པའི་ཤེས་པ་གང་ཞེ་ན། འདི་ལྟ་སྟེ། ཕུང་པོ་
དང་ཁམས་དང་སྐྱེ་མཆེད་རབ་ཏུ་དབྱེ་བ་ཡང་ཤེས་ཤིང་དེ་ལ་མི་དམིགས་པའོ། །དེ་ལ་མངོན་པར་ཤེས་པ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། རྫུ་འཕྲུལ་གྱི་རྐང་པ་བཞི་ཐོབ་པ་དང་། རྫུ་འཕྲུལ་རྣམ་པར་འཕྲུལ་པའོ། །དེ་ལ་ཉོན་མོངས་པ་སེལ་བ་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་
སྡང་དང་། གཏི་མུག་སྤོང་བའོ། །དེ་ལ་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ཤེས་པ་གང་ཞེ་ན། འདི་ལྟ་སྟེ། སྔོན་གྱི་བྱིས་པའི་སྤྱོད་པ་ལ་སྨད་པ་དང་། ཉན་ཐོས་དང་རང་སངས་རྒྱས་ཀྱི་ས་མི་འདོད་པའོ། །དེ་ལ་ཁྱད་པར་དུ་འགྲོ་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་

སྟོབས་དང་། མི་འཇིགས་པ་དང་། སོ་སོ་ཡང་དག་པར་རིག་པ་སྒྲུབ་པའོ། །དེ་ལ་སྒོམ་པའི་རྒྱུ་འཐུན་པ་གང་ཞེ་ན། འདི་ལྟ་སྟེ། རྗེས་སུ་ཆགས་པ་དང་། ཁོང་ཁྲོ་བ་སྤངས་པའོ། །དེ་ལ་ལྟུང་བ་ལས་འབྱིན་པ་ལ་མཁས་པ་གང་ཞེ་ན། འདི་ལྟ་སྟེ། སོ་སོར་ཐར་པ་དང་། འདུལ་བ་སྡོམ་པའོ། །
དེ་ལ་ཡོངས་སུ་དཀྲིས་པ་གནོན་པ་གང་ཞེ་ན། འདི་ལྟ་སྟེ། ཉེས་པ་བཤགས་པ་དང་། ཕྱིས་སྡོམ་པའི་ལས་དགེ་བའོ། །དེ་ལ་རྗེས་སུ་ཆགས་པ་སྤོང་བ་གང་ཞེ་ན། འདི་ལྟ་སྟེ། ཁམས་གསུམ་གྱི་སྲེད་པའི་འཁྲི་ཤིང་ཐམས་ཅད་ཡང་དག་པར་འཇོམས་པ་དང་། དགེ་བའི་ཆོས་མ་སྐྱེས་པ་རྣམས་བསྐྱེད་པ་
དང་། དགེ་བའི་ཆོས་སྐྱེས་པ་རྣམས་ཆུད་མི་ཟ་བར་བྱའོ། །དེ་ལ་སྲིད་པ་ལས་ཡང་དག་པར་འདའ་བ་གང་ཞེ་ན། འདི་ལྟ་སྟེ། ཁམས་གསུམ་ལ་མི་དམིགས་ཤིང་ཡིད་ལ་མི་བྱེད་པའོ། །དེ་ལ་སྐྱེ་བ་དྲན་པ་གང་ཞེ་ན། འདི་ལྟ་སྟེ། སྔོན་གྱི་གནས་ཤེས་པའོ། །དེ་ལ་ལས་ཀྱི་རྣམ་པར་སྨིན་པ་ལ་ནེམ་ནུར་
མེད་པ་གང་ཞེ་ན། འདི་ལྟ་སྟེ། ཆད་པ་དང་རྟག་པ་རྣམ་པར་སྤོང་བའོ། །དེ་ལ་ཆོས་སེམས་པ་གང་ཞེ་ན། འདི་ལྟ་སྟེ། ཡང་དག་པ་ཇི་ལྟ་བ་བཞིན་དུ་སེམས་པའོ། །དེ་ལ་ཐོས་པ་ཡོངས་སུ་ཚོལ་བ་གང་ཞེ་ན། འདི་ལྟ་སྟེ། ཉན་ཐོས་ཀྱི་སྡེ་སྣོད་དང་། རང་སངས་རྒྱས་ཀྱི་སྡེ་སྣོད་དང་། བྱང་ཆུབ་
སེམས་དཔའི་སྡེ་སྣོད་ཀུན་འཛིན་ཅིང་སྒོམ་པའོ། །དེ་ལ་ཡེ་ཤེས་རྣོ་བ་གང་ཞེ་ན། འདི་ལྟ་སྟེ། རྨི་ལམ་ལྟ་བུར་མ་སྐྱེས་པ་ཤེས་པའོ། །དེ་ལ་ཡེ་ཤེས་ལ་སྲེད་པ་གང་ཞེ་ན། འདི་ལྟ་སྟེ། ཡེ་ཤེས་ཡོངས་སུ་ཚོལ་བའོ། །དེ་ལ་ཡེ་ཤེས་ཁོང་དུ་ཆུད་པ་གང་ཞེ་ན། འདི་ལྟ་སྟེ། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་པའོ། །དེ་ལ་ཅང་ཤེས་ཀྱི་ས་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་བསླབ་པའི་གནས་སོ། །དེ་ལ་རི་ལྟ་བུའི་སེམས་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་གཏོང་བའོ། །དེ་ལ་མི་གཡོ་བ་གང་ཞེ་ན། འདི་ལྟ་སྟེ།
ཉོན་མོངས་པ་དག་གིས་མི་འཕྲོགས་པའོ། །དེ་ལ་མི་སྒུལ་བ་གང་ཞེ་ན། འདི་ལྟ་སྟེ། མཚན་མ་ཐམས་ཅད་ཡིད་ལ་མི་བྱེད་པའོ། །དེ་ལ་ཕྱིར་མི་ལྡོག་པ་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་མི་འཇིག་པ་དང་། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་རྣམས་རྒྱུན་མི་

འཆད་པར་མཐོང་བའོ། །དེ་ལ་དགེ་བའི་ཆོས་ཕུན་སུམ་ཚོགས་པ་གང་ཞེ་ན། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པའོ། །དེ་ལ་སྡིག་པའི་ལས་ལ་སྨོད་པ་གང་ཞེ་ན། འདི་ལྟ་སྟེ། སྡོམ་པ་དང་སྡིག་པ་རྣམས་གཟོད་མ་ནས་མ་སྐྱེས་པའོ། །དེ་ལ་ཉོན་མོངས་པ་
མི་འབྱུང་བ་གང་ཞེ་ན། འདི་ལྟ་སྟེ། མ་རིག་པ་དང་། སྲིད་པའི་སྲེད་པ་དང་། ཁྲོ་བ་མི་སྐྱེད་པའོ། །དེ་ལ་བསླབ་པ་ཡོངས་སུ་མི་གཏོང་བ་གང་ཞེ་ན། འདི་ལྟ་སྟེ། ལས་ཀྱི་རྣམ་པར་སྨིན་པ་ལ་ཡིད་ཆེས་པ་དང་། སངས་རྒྱས་ལ་རི་མོར་བྱེད་པའོ། །དེ་ལ་ཏིང་ངེ་འཛིན་རྣམ་པར་གཞག་པ་གང་ཞེ་ན།
འདི་ལྟ་སྟེ། སེམས་དང་སེམས་ལས་བྱུང་བའི་ཆོས་རྣམས་སྐྱེ་བ་དང་། འཇིག་པ་མེད་པ་ལ་མཁས་པ་དང་། སེམས་རྩེ་གཅིག་པའོ། །དེ་ལ་སེམས་ཅན་གྱི་བསམ་པ་ཤེས་པ་གང་ཞེ་ན། འདི་ལྟ་སྟེ། དབང་པོ་མཆོག་དང་མཆོག་མ་ཡིན་པ་ཤེས་པའི་ཡེ་ཤེས་སོ། །དེ་ལ་སྐྱེ་བའི་ཁྱད་པར་
ཤེས་པ་གང་ཞེ་ན། འདི་ལྟ་སྟེ། འགྲོ་བ་ལྔ་རྣམ་པར་གཞག་པ་ཤེས་པའོ། །དེ་ལ་ཡེ་ཤེས་མཐའ་ཡས་པ་གང་ཞེ་ན། འདི་ལྟ་སྟེ། འཇིག་རྟེན་གྱི་དང་འཇིག་རྟེན་ལས་འདས་པའི་བཟོ་ལྷུན་གྱིས་གྲུབ་པ་ཤེས་པའོ། །དེ་ལ་ཚིག་གི་མཚམས་སྦྱར་བ་ཤེས་པ་གང་ཞེ་ན། འདི་ལྟ་སྟེ། དེ་བཞིན་
གཤེགས་པའི་ལྡེམ་པོ་ངག་ཤེས་པའོ། །དེ་ལ་ཁྱིམ་གྱི་གནས་ཡོངས་སུ་སྤངས་པ་གང་ཞེ་ན། འདི་ལྟ་སྟེ། ལུས་དང་སེམས་དབེན་ཞིང་མངོན་པར་བྱུང་བའོ། །དེ་ལ་ཁམས་གསུམ་ལ་མངོན་པར་མི་དགའ་བ་གང་ཞེ་ན། འདི་ལྟ་སྟེ། ཁམས་གསུམ་ཡང་དག་པ་ཇི་ལྟ་བ་བཞིན་དུ་མཐོང་བའོ། །
དེ་ལ་སེམས་མ་གོད་པ་གང་ཞེ་ན། འདི་ལྟ་སྟེ། སེམས་ཡོངས་སུ་མི་གཏོང་བ་དང་། མཉམ་པར་བཞག་པ་ཡོངས་སུ་མི་གཏོང་བའོ། །དེ་ལ་ཆོས་རྣམས་ལ་མངོན་པར་མ་ཆགས་པ་གང་ཞེ་ན། འདི་ལྟ་སྟེ། སྡུག་པ་ཐམས་ཅད་སྤོང་བའོ། །དེ་ལ་དམ་པའི་ཆོས་ཡོངས་སུ་འཛིན་པ་གང་ཞེ་ན། འདི་ལྟ་
སྟེ། སངས་རྒྱས་ཀྱི་བྱང་ཆུབ་ཡོངས་སུ་སྲུང་བ་དང་། མདོ་སྡེ་འདི་ལྟ་བུ་འཛིན་པའོ། །དེ་ལ་ཆོས་སྲུང་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ལ་སྨོད་པ་རྣམས་ཆོས་དང་འཐུན་པས་ཚར་གཅོད་པའོ། །དེ་ལ་ལས་ཀྱི་རྣམ་པར་སྨིན་པ་ལ་ཡིད་ཆེས་པ་གང་ཞེ་ན། འདི་ལྟ་སྟེ། ཁྲེལ་ཡོད་པས་

སྡིག་པའི་ལས་རྣམས་སྤོང་བ་དང་། དགེ་བའི་ཆོས་རྣམས་ཡོངས་སུ་བཙལ་བ་ལ་མངོན་པར་བརྩོན་པའོ། །དེ་ལ་འདུལ་བ་ལ་མཁས་པ་གང་ཞེ་ན། འདི་ལྟ་སྟེ། རང་བཞིན་གྱིས་ལྟུང་བ་དང་། ལྟུང་བ་མ་ཡིན་པ་ཤེས་པ་དང་། བཅས་པའི་ལྟུང་བ་དང་། ལྟུང་བ་མ་ཡིན་པ་ཤེས་པའོ། །དེ་ལ་རྩོད་
པ་རྣམ་པར་ཞི་བ་གང་ཞེ་ན། འདི་ལྟ་སྟེ། འདུས་པ་རྣམ་པར་སྤངས་པའོ། །དེ་ལ་འཐབ་པ་མེད་པ་དང་། རྩོད་པ་མེད་པ་གང་ཞེ་ན། འདི་ལྟ་སྟེ། འཇིག་རྟེན་པའི་གཏམ་མི་འདོད་པའོ། །དེ་ལ་བཟོད་པའི་ས་གང་ཞེ་ན། འདི་ལྟ་སྟེ། ལུས་དང་སེམས་ལ་གནོད་པ་བཟོད་པར་བྱེད་པའོ། །དེ་ལ་བཟོད་པ་ཡང་དག་
པར་འཛིན་པ་གང་ཞེ་ན། འདི་ལྟ་སྟེ། ཕ་རོལ་གྱིས་ངན་དུ་སྨྲས་པ་དང་། ངན་དུ་བརྗོད་པའི་ཚིག་གི་ལམ་རྣམས་བཏང་སྙོམས་སུ་འཇོག་ཅིང་བཟོད་པ་མི་འདྲལ་བའོ། །དེ་ལ་ཆོས་རབ་ཏུ་འབྱེད་པ་གང་ཞེ་ན། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་རྣམས་རབ་ཏུ་དབྱེ་བ་དང་། ཀུན་ནས་ཉོན་མོངས་པ་
དང་། རྣམ་པར་བྱང་བའི་ཕྱོགས་རབ་ཏུ་དབྱེ་བ་དང་། དེ་དག་མི་དམིགས་པའོ། །དེ་ལ་རྣམ་པར་གཏན་ལ་དབབ་པ་ལ་མཁས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་བརྗོད་དུ་མེད་པའོ། །དེ་ལ་རབ་ཏུ་དབྱེ་བ་ཤེས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་རྣམ་པར་གཞག་པ་གང་ལ་ངེས་པར་རྟོག་
པའོ། །དེ་ལ་ཆོས་ཀྱི་ཚིག་བསྒྲུབ་པ་ལ་མཁས་པའི་ཤེས་པ་གང་ཞེ་ན། འདི་ལྟ་སྟེ། ཆོས་རྣམས་ཡང་དག་པ་ཇི་ལྟ་བ་བཞིན་དུ་སྟོན་པའོ། །དེ་ལ་དོན་དང་དོན་མ་ཡིན་པ་འདྲེས་པ་བསྒྲུབ་པ་ལ་མཁས་པ་ཤེས་པ་གང་ཞེ་ན། འདི་ལྟ་སྟེ། ཆོས་རྣམས་རང་བཞིན་གྱིས་བླང་བ་དང་། གཞག་པ་མེད་པའོ། །
དེ་ལ་སྔོན་གྱི་མཐའ་ཤེས་པ་གང་ཞེ་ན། འདི་ལྟ་སྟེ། རྒྱུ་ཤེས་པའོ། །དེ་ལ་ཕྱི་མའི་མཐའ་ཤེས་པ་གང་ཞེ་ན། འདི་ལྟ་སྟེ། རྐྱེན་ཤེས་པའོ། །དེ་ལ་དུས་གསུམ་མཉམ་པ་ཉིད་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་ཐ་དད་དུ་བྱ་བ་མེད་པའི་དངོས་པོའི་ལུགས་ཀྱི་ཆོས་ཉིད་དོ། །དེ་ལ་འཁོར་གསུམ་
ཡོངས་སུ་དག་པའི་ཤེས་པ་གང་ཞེ་ན། འདི་ལྟ་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་ཆོས་རྣམས་མི་དམིགས་ཤིང་ཡིད་ལ་མི་བྱེད་པའོ། །དེ་ལ་སེམས་གནས་པ་གང་ཞེ་ན། འདི་ལྟ་སྟེ། སེམས་མི་དམིགས་པའོ། །དེ་ལ་ལུས་རྣམ་པར་གཞག་པ་གང་ཞེ་ན། འདི་ལྟ་སྟེ། ལུས་ལ་ཞུགས་པའི་རྗེས་སུ་

དྲན་པའོ། །དེ་ལ་སྤྱོད་ལམ་སྲུང་བ་གང་ཞེ་ན། འདི་ལྟ་སྟེ། གང་འདི་བསླད་པ་མེད་པའོ། །དེ་ལ་སྤྱོད་ལམ་མི་འཁྲུགས་པ་གང་ཞེ་ན། འདི་ལྟ་སྟེ། དགེ་བ་མི་སྤྱོམས་པའོ། །དེ་ལ་སྤྱོད་ལམ་རྣམ་པར་མི་རྟོག་པ་གང་ཞེ་ན། འདི་ལྟ་སྟེ། སྡིག་པ་འདོད་པ་དང་བྲལ་བའོ། །དེ་ལ་དབང་པོ་དང་བ་གང་ཞེ་ན། འདི་ལྟ་སྟེ།
ཆོས་ལ་ཞུགས་པའི་ཡིད་ལ་བྱེད་པ་དང་། རིགས་པར་སྨྲ་བ་དང་། དུས་ཤེས་པ་དང་། ཡང་དག་པ་ཇི་ལྟ་བའི་ཆོས་རྣམས་ཡང་དག་པར་རབ་ཏུ་སྟོན་པའོ། །དེ་ལ་འཇིག་རྟེན་ཤེས་པ་གང་ཞེ་ན། འདི་ལྟ་སྟེ། ཕར་འགྲོ་བ་དང་། ཕྱིར་འོང་བ་རབ་ཏུ་ཤེས་པའོ། །དེ་ལ་ལྷུག་པར་གཏོང་བ་གང་ཞེ་ན། འདི་ལྟ་སྟེ། དངོས་པོ་རྣམས་
མི་སྦེད་པ་དང་། སེར་སྣ་མེད་པའོ། །དེ་ལ་ལག་བརྐྱང་བ་གང་ཞེ་ན། འདི་ལྟ་སྟེ། འགེད་པའི་ངང་ཚུལ་ཅན་ནོ། །དེ་ལ་སེམས་འཛིན་པ་མེད་པ་གང་ཞེ་ན། འདི་ལྟ་སྟེ། དད་པ་རྙོག་པ་མེད་པའོ། །དེ་ལ་ཁྲེལ་ཡོད་པ་གང་ཞེ་ན། འདི་ལྟ་སྟེ། མུ་ཅོར་མི་སྨྲ་བའོ། །དེ་ལ་ངོ་ཚ་ཤེས་པ་གང་ཞེ་ན། འདི་ལྟ་སྟེ། མངོན་
དུ་གྱུར་པའོ། །དེ་ལ་མི་དགེ་བའི་སེམས་སྨད་པ་གང་ཞེ་ན། འདི་ལྟ་སྟེ། བྱིས་པའི་ཆོས་རྟོགས་པ་དང་། དེ་དག་དང་མི་འགྲོགས་པའོ། །དེ་ལ་སྦྱངས་པ་མི་གཏོང་བ་གང་ཞེ་ན། འདི་ལྟ་སྟེ། ཡི་དམ་ལ་བརྟན་པའོ། །དེ་ལ་སྤྱོད་པ་ཡང་དག་པར་འཛིན་པ་གང་ཞེ་ན། འདི་ལྟ་སྟེ། སྤྱོད་པ་ལ་བརྟུལ་བ་བསྐྱེད་པའོ། །དེ་
ལ་དགའ་བ་ཡང་དག་པར་སྤྱོད་པ་གང་ཞེ་ན། འདི་ལྟ་སྟེ། དགེ་བའི་ལས་ཀྱི་ཕན་ཡོན་ལ་སེམས་པའོ། །དེ་ལ་བླ་མ་དག་གི་སྟན་འདིང་ཞིང་ལྡང་བ་གང་ཞེ་ན། འདི་ལྟ་སྟེ། ང་རྒྱལ་བཅོམ་ཞིང་སྙོམ་ལས་མེད་པའོ། །དེ་ལ་ང་རྒྱལ་ཚར་གཅོད་པ་གང་ཞེ་ན། འདི་ལྟ་སྟེ། བདག་ཉིད་རྗེས་སུ་མི་དམིགས་ཤིང་རྩོམ་པ་མེད་པའོ། །དེ་
ལ་སེམས་རབ་ཏུ་གཟུང་བ་གང་ཞེ་ན། འདི་ལྟ་སྟེ། དཀར་པོའི་ཆོས་ཆུད་མི་ཟ་བར་ཤེས་པའོ། །དེ་ལ་སེམས་སྤྲོ་བར་བྱ་བ་གང་ཞེ་ན། འདི་ལྟ་སྟེ། བརྩོན་འགྲུས་ཆུད་མི་ཟ་བར་ཤེས་པའོ། །དེ་ལ་དོན་སོ་སོ་ཡང་དག་པར་རིག་པའི་ཤེས་པ་གང་ཞེ་ན། འདི་ལྟ་སྟེ། བདེན་པ་ཡང་དག་པ་ཇི་ལྟ་བ་བཞིན་དུ་རྟོགས་པའི་ཡེ་
ཤེས་སོ། །དེ་ལ་ཡེ་ཤེས་ཁོང་དུ་ཆུད་པ་གང་ཞེ་ན། འདི་ལྟ་སྟེ། འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་ཁོང་དུ་ཆུད་པའོ། །དེ་ལ་མི་ཤེས་པ་དང་བྲལ་བ་གང་ཞེ་ན། འདི་ལྟ་སྟེ། ཆོས་ཡང་དག་པ་ཇི་ལྟ་བ་བཞིན་ལ་སྒྲོ་འདོགས་པ་དང་བྲལ་བའོ། །དེ་ལ་སེམས་ཀྱི་འཇུག་པ་ཤེས་པ་གང་ཞེ་ན།

འདི་ལྟ་སྟེ། སྐྱེ་བ་དང་འཇིག་པ་མེད་པ་ཤེས་པའོ། །དེ་ལ་ཟས་སྒྲུབ་པ་ལ་མཁས་པ་གང་ཞེ་ན། འདི་ལྟ་སྟེ། ཤེས་རབ་རྣོ་བའོ། །དེ་ལ་སྒྲ་བརྗོད་པ་ཤེས་པ་གང་ཞེ་ན། འདི་ལྟ་སྟེ། ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་བསྟན་པའོ། །དེ་ལ་རྣམ་པར་གཞག་པ་ཤེས་པ་གང་ཞེ་ན། འདི་
ལྟ་སྟེ། ཡང་དག་པ་ཇི་ལྟ་བ་བཞིན་དུ་འཇུག་པ་ཤེས་པའོ། །དེ་ལ་དོན་རྣམ་པར་གཏན་ལ་དབབ་པ་གང་ཞེ་ན། འདི་ལྟ་སྟེ། འདུ་བྱེད་ཀྱི་ཕུང་པོ་ཆད་པའོ། །དེ་ལ་གནོད་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། སྲིད་པ་ལས་ཡང་དག་པར་འདའ་བ་དང་། གཞན་དག་ཀྱང་སྲིད་པ་ལས་ཡང་དག་པར་འདའ་བ་
ལ་འཛུད་པའོ། །དེ་ལ་སྐྱེས་བུ་དམ་པ་ལ་སྟེན་པ་གང་ཞེ་ན། འདི་ལྟ་སྟེ། སངས་རྒྱས་དང་མི་འབྲལ་བའོ། །དེ་ལ་སྐྱེས་བུ་དམ་པ་དང་འགྲོགས་པ་གང་ཞེ་ན། འདི་ལྟ་སྟེ། སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་ལ་སྟེན་པའོ། །དེ་ལ་སྐྱེས་བུ་དམ་པ་མ་ཡིན་པ་རྣམ་པར་སྤོང་བ་གང་
ཞེ་ན། འདི་ལྟ་སྟེ། དམིགས་པ་ཅན་དང་། ལེ་ལོ་ཅན་རྣམས་རྣམ་པར་སྤོང་བའོ། །དེ་ལ་བསམ་གཏན་མི་འདོར་བ་གང་ཞེ་ན། འདི་ལྟ་སྟེ། འདོད་པའི་ཚེར་མ་རྣམ་པར་སྤོང་བ་དང་། བསམ་གཏན་མི་གཏོང་ཞིང་དགའ་བ་མི་འདོར་བའོ། །དེ་ལ་བསམ་གཏན་ལ་མ་ཆགས་པ་གང་ཞེ་ན། འདི་ལྟ་སྟེ། ཁམས་
གསུམ་ལས་ཡང་དག་པར་འདའ་བར་མོས་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་མོས་པ་དང་། གོང་དུ་ཤེས་རབ་ཀྱི་སྣང་བ་ལ་མོས་པའོ། །དེ་ལ་མངོན་པར་ཤེས་པས་རྣམ་པར་འཕྲུལ་པ་གང་ཞེ་ན། འདི་ལྟ་སྟེ། མངོན་པར་ཤེས་པ་ལྔ་ལ་གནས་ནས་སངས་རྒྱས་ཀྱི་ཆོས་ཤེས་པར་དཀའ་བ་རྣམས་
གཞན་ལ་ཡང་དག་པར་རབ་ཏུ་སྟོན་པའོ། །དེ་ལ་མིང་གི་བརྡ་གང་ཞེ་ན། འདི་ལྟ་སྟེ། ཡོངས་སུ་མ་གྲུབ་པ་རྣམས་མིང་གིས་ཁོང་དུ་ཆུད་པའོ། །དེ་ལ་བརྟགས་པའི་ཐ་སྙད་གང་ཞེ་ན། འདི་ལྟ་སྟེ། འཇིག་རྟེན་གྱི་ཐ་སྙད་དོ། །དེ་ལ་བཏགས་པ་འཇོམས་པ་གང་ཞེ་ན། འདི་ལྟ་སྟེ། བརྗོད་པར་ཤེས་པའོ། །དེ་ལ་
འཁོར་བ་ལས་ལྡོག་པ་གང་ཞེ་ན། འདི་ལྟ་སྟེ། འཁོར་བའི་ཉེས་པ་ལ་སོ་སོར་རྟོག་པའོ། །དེ་ལ་རྙེད་པ་མི་འདོད་པ་གང་ཞེ་ན། འདི་ལྟ་སྟེ། ཡང་དག་པར་འདོད་པ་ཉུང་བའོ། །དེ་ལ་རྙེད་པ་དང་བཀུར་སྟི་མི་ལེན་པ་གང་ཞེ་ན། འདི་ལྟ་སྟེ། གདུང་བ་མེད་པ་དང་། སྡིག་པ་འདོད་པ་དང་བྲལ་བའོ། །དེ་ལ་

བསྔགས་པ་མ་ཡིན་པས་ཞུམ་པར་མི་འགྱུར་བ་གང་ཞེ་ན། འདི་ལྟ་སྟེ། ཕུང་པོ་དང་། ཁམས་ལ་ཡོངས་སུ་རྟོག་པ་ཤེས་པའོ། །དེ་ལ་ཡང་དག་པར་བསྔགས་པ་མི་ལེན་པ་གང་ཞེ་ན། འདི་ལྟ་སྟེ། དགེ་བ་མི་སྤྱོམས་པ་དང་། རྙེད་པ་དང་བཀུར་སྟི་ལ་བར་ཆད་དུ་རིག་པའོ། །དེ་ལ་བཀུར་སྟི་ལ་བཏང་སྙོམས་སུ་
བྱེད་པ་གང་ཞེ་ན། འདི་ལྟ་སྟེ། ལས་ཀྱི་རྣམ་པར་སྨིན་པ་རྟོགས་པའོ། །དེ་ལ་བསྟི་སྟང་མེད་པ་ལ་ཞུམ་པར་མི་འགྱུར་བ་གང་ཞེ་ན། འདི་ལྟ་སྟེ། རྣལ་འབྱོར་མི་གཏོང་བའོ། །དེ་ལ་སྨད་པས་མི་འཁྲུགས་པ་གང་ཞེ་ན། འདི་ལྟ་སྟེ། འཇིག་རྟེན་གྱི་ཆོས་ལ་སོ་སོར་རྟོག་པའོ། །དེ་ལ་སྟོད་པ་ལ་བཏང་སྙོམས་
སུ་བྱེད་པ་གང་ཞེ་ན། འདི་ལྟ་སྟེ། དགེ་བའི་ཆོས་ཚོལ་ཞིང་འབྱུང་བའོ། །དེ་ལ་རྙེད་པ་མེད་ཀྱང་སེམས་འགོང་བ་མེད་པ་གང་ཞེ་ན། འདི་ལྟ་སྟེ། བདག་གིས་བྱས་པའི་ཆོས་རྣམས་ལ་སོ་སོར་རྟོག་པའོ། །དེ་ལ་ཁྱིམ་པ་དང་མི་སྟེན་པ་གང་ཞེ་ན། འདི་ལྟ་སྟེ། ཟང་ཟིང་ཅི་ཡང་རྣམ་པར་སྤོང་བའོ། །དེ་ལ་རབ་ཏུ་
བྱུང་བ་དང་མི་སྟེན་པ་གང་ཞེ་ན། འདི་ལྟ་སྟེ། མི་རིགས་པ་ཡོངས་སུ་སྤོང་བ་དང་། རིགས་པ་ཡོངས་སུ་ཚོལ་བའོ། །དེ་ལ་སྤྱོད་ཡུལ་མ་ཡིན་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། སྒྲིབ་པ་ལྔ་རྣམ་པར་སྤོང་བའོ། །དེ་ལ་སྤྱོད་ཡུལ་ལ་རབ་ཏུ་སྤྱོད་པ་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་
བཞི་སྒོམ་པའོ། །དེ་ལ་ཆོ་ག་ཕུན་སུམ་ཚོགས་པ་གང་ཞེ་ན། འདི་ལྟ་སྟེ། ཕ་རོལ་རྗེས་སུ་སྲུང་བའོ། །དེ་ལ་ཆོ་ག་མ་ཡིན་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། བདག་གི་དགེ་བའི་ཆོས་རྗེས་སུ་སྲུང་བའོ། །དེ་ལ་རིགས་སུན་པར་མི་བྱེད་པ་གང་ཞེ་ན། འདི་ལྟ་སྟེ། ཤེས་ཀྱི་ཁེ་རྣམ་པར་སྤང་བའོ། །
དེ་ལ་བསྟན་པ་སྲུང་བ་གང་ཞེ་ན། འདི་ལྟ་སྟེ། ཆོས་ཡོངས་སུ་བཙལ་བ་སྒྲུབ་པ་དང་། ཆོས་ཀྱི་རྗེས་སུ་འཐུན་པའི་ཆོས་ཀྱི་ནན་ཏན་ནོ། །དེ་ལ་སྨྲ་བ་ཉུང་བ་གང་ཞེ་ན། འདི་ལྟ་སྟེ། ཞི་གནས་ཐོབ་པའོ། །དེ་ལ་མཉེན་པ་གང་ཞེ་ན། འདི་ལྟ་སྟེ། ལྷག་མཐོང་ཐོབ་པའོ། །དེ་ལ་ཚིག་གི་ལན་ལ་མཁས་པ་
གང་ཞེ་ན། འདི་ལྟ་སྟེ། ལན་དང་། ཡང་ལན་ཤེས་པའོ། །དེ་ལ་ཕས་ཀྱི་རྒོལ་བ་ཚར་གཅོད་པ་གང་ཞེ་ན། འདི་ལྟ་སྟེ། ཆོས་རྣམས་ཡང་དག་པ་ཇི་ལྟ་བ་བཞིན་དུ་སྟོན་པ་དང་། རྣམ་པར་གཞག་པར་བྱེད་པ་དང་། ཀླན་ཀ་ཚོལ་བ་ཚར་གཅོད་པའོ། །དེ་ལ་དུས་སུ་འགྲོ་བ་གང་ཞེ་ན། འདི་ལྟ་སྟེ། དུས་ཤེས་པའོ། །

དེ་ལ་སོ་སོའི་སྐྱེ་བོ་ལ་ཡིད་མི་རྟོན་པ་གང་ཞེ་ན། འདི་ལྟ་སྟེ། བྱིས་པའི་ཆོས་ལ་སྐྱོན་དུ་ལྟ་བའོ། །དེ་ལ་སྡུག་བསྔལ་བ་རྣམས་ལ་བརྙས་པ་མེད་པ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་སེམས་མཉམ་པའོ། །དེ་ལ་སྡུག་བསྔལ་བ་རྣམས་ལ་ནོར་རབ་ཏུ་སྦྱིན་པ་གང་ཞེ་ན། འདི་ལྟ་སྟེ།
འཇིག་རྟེན་གྱི་ཟང་ཟིང་གི་སྦྱིན་པའོ། །དེ་ལ་དབུལ་པོ་རྣམས་ལ་མི་སྨོད་པ་གང་ཞེ་ན། འདི་ལྟ་སྟེ། ཕ་རོལ་ལ་སྙིང་བརྩེ་བའི་བློའོ། །དེ་ལ་ཚུལ་ཁྲིམས་འཆལ་པ་རྣམས་ལ་སྙིང་བརྩེ་བ་གང་ཞེ་ན། འདི་ལྟ་སྟེ། ཕ་རོལ་ལྟུང་བ་ལས་བྱུང་ཞིང་ཚུལ་ཁྲིམས་ལ་རབ་ཏུ་འགོད་པའོ། །དེ་ལ་ཕན་པའི་དངོས་པོ་གང་ཞེ་ན། འདི་
ལྟ་སྟེ། གཞན་ལ་ཕན་པར་བྱེད་པའོ། །དེ་ལ་སྙིང་རྗེ་བའི་བློ་གང་ཞེ་ན། འདི་ལྟ་སྟེ། སེམས་ཅན་གྱི་མ་འོངས་པའི་སྡུག་བསྔལ་ལ་ལྟ་བའོ། །དེ་ལ་ཆོས་ཀྱིས་ཕན་གདགས་པ་གང་ཞེ་ན། འདི་ལྟ་སྟེ། གཞན་དག་ཡང་དག་པ་ཇི་ལྟ་བ་བཞིན་དུ་ཆོས་ལ་གཟུད་པའོ། །དེ་ལ་ཟང་ཟིང་ཡོངས་སུ་གཏོང་བ་གང་ཞེ་ན།
འདི་ལྟ་སྟེ། ཕུང་པོ་ཡོངས་སུ་གཏོང་བ་དང་། གཞན་ལ་ཟང་ཟིང་གིས་ཕན་འདོགས་པའོ། །དེ་ལ་སོགས་པའི་གནས་མེད་པ་གང་ཞེ་ན། འདི་ལྟ་སྟེ། ཟང་ཟིང་ལ་སྨོད་པ་དང་། སྲུང་བའི་ཉེས་པ་མཐོང་བའོ། །དེ་ལ་ཚུལ་ཁྲིམས་བསྔགས་པ་གང་ཞེ་ན། འདི་ལྟ་སྟེ། ཚུལ་ཁྲིམས་ཡོངས་སུ་རིག་པའོ། །དེ་ལ་
འཆལ་པའི་ཚུལ་ཁྲིམས་ལ་སྨད་པ་གང་ཞེ་ན། འདི་ལྟ་སྟེ། འཆལ་པའི་ཚུལ་ཁྲིམས་ཀྱི་ཉེས་པ་ཁོང་དུ་ཆུད་པའོ། །དེ་ལ་ཚུལ་ཁྲིམས་ཕུན་སུམ་ཚོགས་པ་དག་ལ་གཡོ་མེད་པར་སྟེན་པ་གང་ཞེ་ན། འདི་ལྟ་སྟེ། ཚུལ་ཁྲིམས་དང་ལྡན་པ་ལ་རྙེད་པར་དཀའ་བའི་འདུ་ཤེས་སུ་ཤེས་པའོ། །དེ་ལ་ཡོད་པ་ཐམས་ཅད་
གཏོང་བ་གང་ཞེ་ན། འདི་ལྟ་སྟེ། བསམ་པ་དགེ་བའོ། །དེ་ལ་ལྷག་པའི་བསམ་པས་མགྲོན་དུ་གཉེར་བ་གང་ཞེ་ན། འདི་ལྟ་སྟེ། ཕ་རོལ་ལ་བདེ་བ་འདོད་པའོ། །དེ་ལ་སྨྲས་པ་བཞིན་བྱེད་པ་གང་ཞེ་ན། འདི་ལྟ་སྟེ། བསམ་པ་དགེ་བ་ཕུན་སུམ་ཚོགས་པའོ། །དེ་ལ་རྒྱུན་མི་ཆད་པར་བསྙེན་བཀུར་བྱེད་པ་གང་ཞེ་ན། འདི་
ལྟ་སྟེ། དགེ་བ་གང་ཡིན་ཞེས་ཚོལ་ཞིང་འདྲི་བའོ། །དེ་ལ་དགའ་བ་མྱོང་བ་གང་ཞེ་ན། འདི་ལྟ་སྟེ། ཁོང་དུ་ཆུད་པའི་ཤེས་པ་དང་ལུང་གི་ཤེས་པའོ། །དེ་ལ་དཔེ་ཤེས་པ་གང་ཞེ་ན། འདི་ལྟ་སྟེ། འདྲ་བ་ཤེས་པ་དང་། གདམས་པ་ཤེས་པའོ། །དེ་ལ་སྔོན་བྱུང་བ་ལ་མཁས་པ་གང་ཞེ་ན། འདི་ལྟ་སྟེ། སྐྱེ་བ་

དྲན་པ་དང་། ཐོས་པ་མང་བའོ། །དེ་ལ་དགེ་བའི་རྩ་བ་སྔོན་དུ་འགྲོ་བ་གང་ཞེ་ན། འདི་ལྟ་སྟེ། བྱང་ཆུབ་ལ་ཤིན་ཏུ་འདུན་པ་དང་། གཞན་དག་ཀྱང་སྤྲོ་བར་བྱེད་པའོ། །དེ་ལ་ཐབས་མཁས་པ་གང་ཞེ་ན། འདི་ལྟ་སྟེ། སོ་སོར་འཆགས་པ་དང་། རྗེས་སུ་ཡི་རང་བ་དང་། གསོལ་བ་འདེབས་པ་དང་། དགེ་བའི་རྩ་
བ་ཡོངས་སུ་བསྔོ་བ་ལ་མཁས་པའོ། །དེ་ལ་མཚན་མ་སྤོང་བ་གང་ཞེ་ན། འདི་ལྟ་སྟེ། ཆོས་རྣམས་རྨི་ལམ་ལྟ་བུར་རྟོགས་ནས་དངོས་པོ་རྣམ་པར་འཇིག་པའོ། །དེ་ལ་འདུ་ཤེས་ཟློག་པ་གང་ཞེ་ན། འདི་ལྟ་སྟེ། ཕྱིན་ཅི་ལོག་འདོར་བའོ། །དེ་ལ་དངོས་པོའི་མཚན་ཉིད་འདོར་བ་གང་ཞེ་ན། འདི་ལྟ་སྟེ། མཚན་
ཉིད་མེད་པར་ཤེས་པའོ། །དེ་ལ་མདོ་སྡེ་མངོན་པར་སྒྲུབ་པ་ལ་མཁས་པ་གང་ཞེ་ན། འདི་ལྟ་སྟེ། དགེ་བ་དང་མི་དགེ་བའི་ཆོས་ཡང་དག་པ་ཇི་ལྟ་བ་རྣམས་དཔེ་དང་རྟོགས་པ་བརྗོད་པས་ཡང་དག་པར་རབ་ཏུ་སྟོན་པའོ། །དེ་ལ་བདེན་པ་རྣམ་པར་གཏན་ལ་དབབ་པ་གང་ཞེ་ན། འདི་ལྟ་སྟེ། རྣམ་པར་ཤེས་པ་འགོག་པ་དང་།
མིང་དང་གཟུགས་མི་སྐྱེ་བའོ། །དེ་ལ་རྣམ་པར་གྲོལ་བ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། རྡོ་རྗེ་ལྟ་བུའི་ཏིང་ངེ་འཛིན་ལས་མི་གཡོ་བ་དང་། མི་འཁྲུག་པའོ། །དེ་ལ་གཅིག་ཏུ་བརྗོད་པ་གང་ཞེ་ན། འདི་ལྟ་སྟེ། མུ་སྟེགས་ཅན་གྱི་གནས་སྨད་པ་དང་། མི་སྐྱེ་བར་ཤེས་པའོ། །དེ་ལ་མི་འཇིགས་པ་ཐོབ་
པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་རྣམས་རྟོགས་ཤིང་སྟོབས་བསྐྱེད་པའོ། །དེ་ལ་ཚུལ་ཁྲིམས་ཀྱི་གནས་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་དང་སོ་སོར་ཐར་པའི་སྡོམ་པའོ། །དེ་ལ་སྙོམས་པར་འཇུག་པ་ལ་འཇུག་པ་གང་ཞེ་ན། འདི་ལྟ་སྟེ། ཁམས་གསུམ་ལ་འདོད་ཆགས་དང་
བྲལ་བའོ། །དེ་ལ་ཤེས་རབ་ཐོབ་པ་གང་ཞེ་ན། འདི་ལྟ་སྟེ། ནུས་པ་ཤེས་པ་དང་། མི་དམིགས་པའོ། །དེ་ལ་གཅིག་པུར་དགའ་བ་གང་ཞེ་ན། འདི་ལྟ་སྟེ། འདུ་འཛིའི་ཉེས་པ་རྣམ་པར་སྤོང་བ་དང་། ཆོས་དཀར་པོ་མི་གཏོང་བའོ། །དེ་ལ་ཤེས་ཀྱི་ཁེ་ཆུང་ངུས་ཆོག་ཤེས་པ་གང་ཞེ་ན། འདི་ལྟ་སྟེ། ངན་ངོན་
གྱིས་མགུ་བའོ། །དེ་ལ་སེམས་ལ་རྙོག་པ་མེད་པ་གང་ཞེ་ན། འདི་ལྟ་སྟེ། སྒྲིབ་པ་རྣམས་རྣམ་པར་གནོན་པའོ། །དེ་ལ་བལྟ་བར་བྱས་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། དམིགས་པའི་ལྟ་བ་རྣམ་པར་སྤོང་བའོ། །དེ་ལ་གཟུངས་ཐོབ་པ་གང་ཞེ་ན། འདི་ལྟ་སྟེ། ཆོས་ཇི་ལྟར་མཐོང་བ་རྣམས་

ཡང་དག་པ་ཇི་ལྟ་བ་བཞིན་དུ་ཆགས་པ་མེད་པར་རབ་ཏུ་སྟོན་པའོ། །དེ་ལ་ཡེ་ཤེས་སྣང་བ་གང་ཞེ་ན། འདི་ལྟ་སྟེ། རང་བཞིན་ལ་འཇུག་པའོ། །དེ་ལ་གནས་གང་ཞེ་ན། འདི་ལྟ་སྟེ། ཚུལ་ཁྲིམས་ཀྱི་གནས་སོ། །དེ་ལ་གཞི་གང་ཞེ་ན། འདི་ལྟ་སྟེ། སེམས་ཀྱི་གཞིའོ། །དེ་ལ་རྟེན་གང་
ཞེ་ན། འདི་ལྟ་སྟེ། དད་པ་ལ་རྟེན་པའོ། །དེ་ལ་ནན་ཏན་གང་ཞེ་ན། འདི་ལྟ་སྟེ། ལམ་གྱི་ནན་ཏན་ནོ། །དེ་ལ་རྒྱུ་གང་ཞེ་ན། འདི་ལྟ་སྟེ། མ་རིག་པ་འཁོར་བའི་རྒྱུའོ། །དེ་ལ་རིགས་པ་གང་ཞེ་ན། འདི་ལྟ་སྟེ། རིགས་པ་ནི་ཐར་པའི་རིགས་པའོ། །དེ་ལ་ཚུལ་གང་ཞེ་ན། འདི་ལྟ་སྟེ། སྲེད་པ་རབ་ཏུ་སྤངས་
པའོ། །དེ་ལ་སྒོ་གང་ཞེ་ན། འདི་ལྟ་སྟེ། ཉེས་པ་སྤངས་པའོ། །དེ་ལ་ལམ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཤེས་པའོ། །དེ་ལ་ས་གང་ཞེ་ན། འདི་ལྟ་སྟེ། སྨོན་པ་མེད་པའི་ས་བཅུའོ། །དེ་ལ་སྐྱེ་བ་དང་བྲལ་བ་གང་ཞེ་ན། འདི་ལྟ་སྟེ། སྐྱེ་བ་བཅད་
པའོ། །དེ་ལ་ཡེ་ཤེས་ཀྱི་ས་གང་ཞེ་ན། འདི་ལྟ་སྟེ། རྨོངས་པ་མེད་པའོ། །དེ་ལ་མི་ཤེས་པ་སྤངས་པ་གང་ཞེ་ན། འདི་ལྟ་སྟེ། གཏི་མུག་སྤངས་པའོ། །དེ་ལ་ཡེ་ཤེས་གནས་པ་གང་ཞེ་ན། འདི་ལྟ་སྟེ། མི་གནས་པའོ། །དེ་ལ་རྣལ་འབྱོར་སྤྱོད་པའི་ས་གང་ཞེ་ན། འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་
ཅུ་རྩ་བདུན་གྱི་ཆོས་རྣམས་སྒོམ་པའོ། །དེ་ལ་བྱང་ཆུབ་སེམས་དཔའི་སྤྱོད་ཡུལ་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་གོ། །དེ་ལ་སྐྱེས་བུ་དམ་པ་སྟེན་པ་གང་ཞེ་ན། འདི་ལྟ་སྟེ། སངས་རྒྱས་ལ་སྟེན་པའོ། །དེ་ལ་སྐྱེས་བུ་དམ་པ་མ་ཡིན་པ་སྤངས་པ་གང་ཞེ་ན། འདི་ལྟ་སྟེ། མུ་སྟེགས་ཅན་
དམིགས་པར་ལྟ་བ་རྣམས་རྣམ་པར་སྤོང་བའོ། །དེ་ལ་དེ་བཞིན་གཤེགས་པས་གསུངས་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་སྟོབས་ལ་གནས་པ་ནས་རང་བཞིན་ཤེས་པས་ཐར་པའོ། །དེ་ལ་སངས་རྒྱས་ཀྱི་ས་གང་ཞེ་ན། འདི་ལྟ་སྟེ། དགེ་བའི་ཆོས་ཐམས་ཅད་ཐོབ་པའོ། །དེ་ལ་མཁས་པས་
རྗེས་སུ་ཡི་རང་བ་གང་ཞེ་ན། འདི་ལྟ་སྟེ། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་ཉན་ཐོས་དག་གིས་རྗེས་སུ་ཡི་རང་བའོ། །དེ་ལ་བྱིས་པ་དག་གིས་སྤངས་པ་གང་ཞེ་ན། འདི་ལྟ་སྟེ། བྱིས་པ་ཐམས་ཅད་ཀྱིས་རིག་པར་དཀའ་བའོ། །དེ་ལ་ཉན་ཐོས་དང་རང་སངས་རྒྱས་

ཀྱིས་ཤེས་པར་དཀའ་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་བསམ་གྱིས་མི་ཁྱབ་པའོ། །དེ་ལ་མུ་སྟེགས་ཅན་གྱིས་མ་ཡིན་པ་གང་ཞེ་ན། འདི་ལྟ་སྟེ། རྣལ་འབྱོར་པ་དག་གི་ལོག་པའི་ང་རྒྱལ་ལོ། །དེ་ལ་བྱང་ཆུབ་སེམས་དཔའ་དག་གིས་ཡོངས་སུ་གཟུང་བ་གང་ཞེ་ན། འདི་ལྟ་སྟེ། རྙེད་པར་
དཀའ་བ་དང་རྩི་ཆེན་པོར་གྱུར་པའོ། །དེ་ལ་སྟོབས་བཅུ་དག་གིས་ཁོང་དུ་ཆུད་པ་གང་ཞེ་ན། འདི་ལྟ་སྟེ། དཀའ་བའི་ཚུལ་གྱིས་སོ། །དེ་ལ་ལྷ་རྣམས་ཀྱིས་མཆོད་པར་བྱ་བ་གང་ཞེ་ན། འདི་ལྟ་སྟེ། བདེ་བ་ཐམས་ཅད་ཐོབ་པར་བྱེད་པའི་ཕྱིར་རོ། །དེ་ལ་ཚངས་པ་དག་གིས་ཕྱག་བྱ་བ་གང་ཞེ་ན། འདི་ལྟ་སྟེ།
ཐར་པ་ཐམས་ཅད་ཐོབ་པར་བྱེད་པའི་ཚུལ་གྱིས་སོ། །དེ་ལ་ཀླུ་རྣམས་ཀྱིས་ཕྱག་བྱ་བ་གང་ཞེ་ན། འདི་ལྟ་སྟེ། བག་ཆགས་ཐམས་ཅད་གཅོད་པའི་ཕྱིར་རོ། །དེ་ལ་གནོད་སྦྱིན་དག་གིས་རྗེས་སུ་ཡི་རང་བར་བྱ་བ་གང་ཞེ་ན། འདི་ལྟ་སྟེ། ངན་འགྲོ་ཐམས་ཅད་ཀྱི་ལམ་གཅོད་པའི་ཕྱིར་རོ། །དེ་ལ་མིའམ་ཅི་
དག་གིས་ཕྱག་བྱ་བ་གང་ཞེ་ན། འདི་ལྟ་སྟེ། ཐར་པའི་རབ་ཏུ་བདེ་བ་ཐམས་ཅད་ཐོབ་པར་བྱ་བའི་ཕྱིར་རོ། །དེ་ལ་ལྟོ་འཕྱེ་ཆེན་པོ་དག་གིས་རབ་ཏུ་བསྔགས་པ་གང་ཞེ་ན། འདི་ལྟ་སྟེ། འཁོར་བ་གཅོད་པའི་ཕྱིར་རོ། །དེ་ལ་བྱང་ཆུབ་སེམས་དཔའ་དག་གིས་བསྒོམ་པར་བྱ་བ་གང་ཞེ་ན། འདི་ལྟ་
སྟེ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པའི་ཕྱིར་རོ། །དེ་ལ་མཁས་པ་དག་གིས་ཀུན་ཆུབ་པར་བྱ་བ་གང་ཞེ་ན། འདི་ལྟ་སྟེ། ཕྱིར་མི་ལྡོག་པའི་ས་ཐོབ་པར་བྱེད་པའི་ཕྱིར་རོ། །དེ་ལ་ནོར་བླ་ན་མེད་པ་གང་ཞེ་ན། འདི་ལྟ་སྟེ། ལྷ་དང་མིའི་སྐྱེ་དགུ་ཕུན་སུམ་ཚོགས་པ་ཐོབ་པར་བྱེད་པ་
དང་། ཐར་པ་ཐོབ་པར་བྱེད་པའི་ཕྱིར་རོ། །དེ་ལ་སྦྱིན་པ་ཟང་ཟིང་མེད་པ་གང་ཞེ་ན། འདི་ལྟ་སྟེ། ཉོན་མོངས་པ་ཐམས་ཅད་གཅོད་པའི་ཕྱིར་རོ། །དེ་ལ་ན་བ་རྣམས་ཀྱི་རྩི་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་རབ་ཏུ་ཞི་བར་བྱེད་པའི་ཕྱིར་རོ། །དེ་ལ་མཛོད་ཤེས་
པ་གང་ཞེ་ན། འདི་ལྟ་སྟེ། བསྒོམ་པའི་ཕྱིར་རོ། །དེ་ལ་སྤོབས་པ་མི་ཟད་པ་གང་ཞེ་ན། འདི་ལྟ་སྟེ། ཡང་དག་པ་ཇི་ལྟ་བ་བཞིན་དུ་ཤེས་པ་དང་མཐོང་བའི་ཕྱིར་རོ། །དེ་ལ་མྱ་ངན་དང་བྲལ་བ་གང་ཞེ་ན། འདི་ལྟ་སྟེ། གནོད་པ་དང་། སྡུག་བསྔལ་དོན་མེད་པར་རྟོགས་ཤིང་འབྱུང་བ་དང་།

སྡུག་བསྔལ་བདག་མེད་པར་ཤེས་པའི་ཕྱིར་རོ། །དེ་ལ་ཁམས་གསུམ་ཡོངས་སུ་ཤེས་པ་གང་ཞེ་ན། འདི་ལྟ་སྟེ། སྒྱུ་མ་དང་རྨི་ལམ་ལྟ་བུར་རྟོགས་པའོ། །དེ་ལ་ཕ་རོལ་ཏུ་འགྲོ་བ་དག་གི་གཟིངས་གང་ཞེ་ན། འདི་ལྟ་སྟེ། ལྷག་པའི་བསམ་པས་ཡོངས་སུ་མྱ་ངན་ལས་
འདའ་བར་འདོད་པ་དག་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དུ་སྒོམ་པའི་ཕྱིར་རོ། །དེ་ལ་ཆུ་བོའི་ནང་དུ་སོང་བ་དག་གི་གྲུ་གང་ཞེ་ན། འདི་ལྟ་སྟེ། མྱ་ངན་ལས་འདའ་བ་ཐོབ་པར་བྱེད་པའི་ཕྱིར་རོ། །དེ་ལ་སྙན་པ་འདོད་པ་དག་གི་གྲགས་པ་གང་ཞེ་ན། འདི་ལྟ་སྟེ། ཆོས་རྒྱ་ཆེན་པོ་ཐོབ་
པར་བྱེད་པའི་ཕྱིར་རོ། །དེ་ལ་སངས་རྒྱས་རྣམས་ཀྱི་བསྔགས་པ་གང་ཞེ་ན། འདི་ལྟ་སྟེ། ཡོན་ཏན་མཐའ་ཡས་པའི་རྩིའི་སྦྱིན་བདག་ཏུ་གྱུར་པའི་ཕྱིར་རོ། །དེ་ལ་དེ་བཞིན་གཤེགས་པ་རྣམས་ཀྱི་སྙན་པ་གང་ཞེ་ན། འདི་ལྟ་སྟེ། ཡོན་ཏན་དང་བདེ་བ་ཐམས་ཅད་དང་ཐར་པའི་སྦྱིན་བདག་ཏུ་གྱུར་
པའི་ཕྱིར་རོ། །དེ་ལ་སྟོབས་བཅུ་དག་གིས་བསྟོད་པ་གང་ཞེ་ན། འདི་ལྟ་སྟེ། ཆོས་རིན་པོ་ཆེ་སྙེད་པར་དཀའ་བའི་སྦྱིན་བདག་ཏུ་གྱུར་པའི་ཕྱིར་རོ། །དེ་ལ་བྱང་ཆུབ་སེམས་དཔའ་རྣམས་ཀྱི་ཡོན་ཏན་གང་ཞེ་ན། འདི་ལྟ་སྟེ། ཆོས་འདི་ལ་བསླབས་པའི་ཕྱིར་རོ། །དེ་ལ་སྙིང་རྗེ་ཅན་དག་གི་
བཏང་སྙོམས་གང་ཞེ་ན། འདི་ལྟ་སྟེ། སངས་རྒྱས་ཀྱི་བྱ་བ་བྱས་པའི་ཕྱིར་རོ། །དེ་ལ་བྱམས་པས་ཞེ་སྡང་ཞི་བ་གང་ཞེ་ན། འདི་ལྟ་སྟེ། གཉེན་པོར་གྱུར་པའི་ཕྱིར་རོ། །དེ་ལ་ཐེག་པ་ཆེན་པོ་པ་རྣམས་དབུགས་འབྱིན་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ལ་བསམ་
པ་ཐམས་ཅད་ཡོངས་སུ་རྫོགས་པའི་ཕྱིར་རོ། །དེ་ལ་སེང་གེའི་སྒྲ་སྒྲོག་པ་དག་གི་ནན་ཏན་གང་ཞེ་ན། འདི་ལྟ་སྟེ། ཆོས་ཀྱི་མཆོག་དང་ཆོས་ཀྱི་དམ་པ་ཐོབ་པར་བྱེད་པའི་ཕྱིར་རོ། །དེ་ལ་སངས་རྒྱས་ཀྱི་ཡེ་ཤེས་ཀྱི་ལམ་གང་ཞེ་ན། འདི་ལྟ་སྟེ། དགེ་བའི་ཆོས་ཐམས་ཅད་ཐོབ་པར་བྱེད་
པའི་ཕྱིར་རོ། །དེ་ལ་ཆོས་ཐམས་ཅད་ཀྱི་ཕྱག་རྒྱ་གང་ཞེ་ན། འདི་ལྟ་སྟེ། ཕ་རོལ་ནས་ཚུ་རོལ་རྟོགས་པའི་ཕྱིར་རོ། །དེ་ལ་ཐམས་ཅད་མཁྱེན་པའི་ཡེ་ཤེས་མི་འཕྲོགས་པ་གང་ཞེ་ན། འདི་ལྟ་སྟེ། མི་དགེ་བའི་ཆོས་ཐམས་ཅད་སྤོང་བར་འགྱུར་བ་དང་། དགེ་བའི་ཆོས་ཐམས་ཅད་སྒྲུབ་པ་དང་། ཐར་

པ་ཐམས་ཅད་སྒྲུབ་པར་འགྱུར་བའོ། །དེ་ལ་བྱང་ཆུབ་སེམས་དཔའ་རྣམས་ཀྱི་སྐྱེད་མོས་ཚལ་གང་ཞེ་ན། འདི་ལྟ་སྟེ། བདག་གི་བདེ་བ་དང་དགའ་བ་དང་། མགུ་བ་ཐམས་ཅད་ཀྱིས་སེམས་ཅན་ཐམས་ཅད་ཀྱི་བདེ་བ་སྒྲུབ་པའི་ཕྱིར་རོ། །དེ་ལ་བདུད་ཀྱི་སྡེ་རྣམས་འཇིག་པར་བྱེད་པ་གང་ཞེ་ན། འདི་ལྟ་སྟེ།
སྟོབས་ཐམས་ཅད་ཡོངས་སུ་སྒྲུབ་པ་དང་། ཉོན་མོངས་པ་ཐམས་ཅད་ཞི་བར་བྱེད་པའི་ཕྱིར་རོ། །དེ་ལ་བདེ་བར་འགྲོ་བའི་རིག་པ་གང་ཞེ་ན། འདི་ལྟ་སྟེ། གཙེ་བ་ཐམས་ཅད་ཟད་པར་འགྱུར་བའོ། །དེ་ལ་དོན་གྲུབ་པ་རྣམས་ཀྱི་དོན་གང་ཞེ་ན། འདི་ལྟ་སྟེ། ཕུན་སུམ་ཚོགས་པ་ཐམས་ཅད་ཡོངས་སུ་སྒྲུབ་
པའི་ཕྱིར་རོ། །དེ་ལ་དགྲའི་ནང་དུ་སོང་བའི་སྐྱབས་གང་ཞེ་ན། འདི་ལྟ་སྟེ། དམིགས་པ་ཅན་ཐམས་ཅད་དང་ལོག་པར་ལྟ་བ་རྣམས་ཕམ་པར་བྱེད་པར་འགྱུར་བའི་ཕྱིར་རོ། །དེ་ལ་ཆོས་དང་ལྡན་པས་མུ་སྟེགས་ཅན་རྣམས་ཚར་གཅོད་པ་གང་ཞེ་ན། འདི་ལྟ་སྟེ། ཆོས་དང་ལྡན་པས་མུ་སྟེགས་ཅན་ཚར་གཅོད་
པའོ། །དེ་ལ་མི་འཇིགས་པའི་བདེན་པའི་རྣམ་པ་གང་ཞེ་ན། འདི་ལྟ་སྟེ། ཆོས་ཐམས་ཅད་ཡོངས་སུ་བརྟག་པ་དང་། ཕྱིར་བརྟག་པ་བཟོད་པའི་ཕྱིར་རོ། །དེ་ལ་སྟོབས་རྣམས་ཡང་དག་པར་བཙལ་བ་གང་ཞེ་ན། འདི་ལྟ་སྟེ། མ་ལོག་པའི་ཚུལ་གྱིས་སོ། །དེ་ལ་སངས་རྒྱས་ཀྱི་ཆོས་མ་འདྲེས་པ་བཅྭ་
བརྒྱད་ཀྱི་སྔ་ལྟས་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་ཐོབ་པར་བྱེད་པའི་ཕྱིར་རོ། །དེ་ལ་རྒྱན་གང་ཞེ་ན། འདི་ལྟ་སྟེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཐོབ་པར་བྱེད་པའི་ཕྱིར་རོ། །དེ་ལ་ཐར་པ་འདོད་པ་དག་གི་དགའ་བ་གང་ཞེ་ན། འདི་ལྟ་སྟེ། ཐོག་མ་དང་དབུས་དང་ཐ་
མར་དགེ་བའི་ཕྱིར་རོ། །དེ་ལ་བུའི་ཐུ་བོ་དག་གི་དགའ་བ་གང་ཞེ་ན། འདི་ལྟ་སྟེ། ཕའི་ནོར་སངས་རྒྱས་ཀྱི་ནོར་མྱོང་བ་ཐོབ་པར་བྱེད་པའི་ཕྱིར་རོ། །དེ་ལ་སངས་རྒྱས་ཀྱི་ཡེ་ཤེས་རྫོགས་པ་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་རྗེས་སུ་སྲུང་བ་དང་། དཀར་པོའི་ཆོས་ཐམས་ཅད་
གཞན་མ་ཡིན་པར་གསོ་བ་ཐོབ་པར་བྱེད་པའི་ཕྱིར་རོ། །དེ་ལ་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་མ་ཡིན་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་དཔག་ཏུ་མེད་པ་རྒྱ་ཆེན་པོ་ཡོངས་སུ་སྒྲུབ་པའི་ཕྱིར་རོ། །དེ་ལ་སེམས་རྣམ་པར་དག་པ་གང་ཞེ་ན། འདི་ལྟ་སྟེ། དྲི་མ་ཐམས་ཅད་སྤོང་

བར་འགྱུར་བའོ། །དེ་ལ་ལུས་ཡོངས་སུ་དག་པ་གང་ཞེ་ན། འདི་ལྟ་སྟེ། ནད་ཐམས་ཅད་རབ་ཏུ་ཞི་བའི་ཕྱིར་རོ། །དེ་ལ་རྣམ་པར་ཐར་པ་འདོད་པ་རྣམས་ཀྱི་ཡོངས་སུ་རྫོགས་པ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། ཞི་བར་སོ་སོར་
རྟོག་པ་ཡོངས་སུ་སྒྲུབ་པའི་ཕྱིར་རོ། །དེ་ལ་འདོད་ཆགས་ཀྱིས་ཀུན་ནས་ཉོན་མོངས་པ་མེད་པ་གང་ཞེ་ན། འདི་ལྟ་སྟེ། མི་འཆི་བའི་གནས་ཡོངས་སུ་སྒྲུབ་པའི་ཕྱིར་རོ། །དེ་ལ་ཞེ་སྡང་དང་བྲལ་བ་གང་ཞེ་ན། འདི་ལྟ་སྟེ། བྱམས་པ་ཆེན་པོ་ཡོངས་སུ་སྒྲུབ་པའི་ཕྱིར་རོ། །དེ་ལ་གཏི་མུག་གིས་མ་ཡིན་པ་
གང་ཞེ་ན། འདི་ལྟ་སྟེ། ཆོས་ཡང་དག་པ་ཉིད་ཡོངས་སུ་སྒྲུབ་པའི་ཕྱིར་རོ། །དེ་ལ་ཡེ་ཤེས་འབྱུང་བ་གང་ཞེ་ན། འདི་ལྟ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་དགོས་པ་ཤེས་པ་ཐམས་ཅད་སྐྱེ་བའི་ཕྱིར་རོ། །དེ་ལ་རིག་པ་སྐྱེ་བ་གང་ཞེ་ན། འདི་ལྟ་སྟེ། ཚུལ་བཞིན་ཡིད་ལ་བྱེད་པ་ཐམས་
ཅད་ཡོངས་སུ་སྒྲུབ་པའི་ཕྱིར་རོ། །དེ་ལ་མ་རིག་པ་སྤོང་བ་གང་ཞེ་ན། འདི་ལྟ་སྟེ། ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་བར་འགྱུར་བའི་ཕྱིར་རོ། །དེ་ལ་རྣམ་པར་གྲོལ་བའི་སྙིང་པོས་ངོམས་པ་གང་ཞེ་ན། འདི་ལྟ་སྟེ། འཕགས་པའི་ཆེ་བ་ཉིད་ཡོངས་སུ་སྒྲུབ་པའི་ཕྱིར་རོ། །དེ་ལ་ཏིང་ངེ་
འཛིན་གྱི་སྙིང་པོར་བྱེད་པ་དག་གི་མགུ་བ་གང་ཞེ་ན། འདི་ལྟ་སྟེ། བདེ་བ་དང་དགའ་བའི་བདེ་བ་ཐམས་ཅད་དང་། སེམས་རྩེ་གཅིག་པ་ཡོངས་སུ་སྒྲུབ་པའི་ཕྱིར་རོ། །དེ་ལ་མཐོང་བར་འདོད་པ་རྣམས་ཀྱི་མིག་གང་ཞེ་ན། འདི་ལྟ་སྟེ། བདག་ཉིད་ལྟ་བའི་ཕྱིར་རོ། །དེ་ལ་རྣམ་པར་འཕྲུལ་པར་འདོད་པ་རྣམས་ཀྱི་མངོན་
པར་ཤེས་པ་གང་ཞེ་ན། འདི་ལྟ་སྟེ། སྒྲིབ་པ་མེད་པ་དང་། འདོད་པར་འགྱུར་བའི་ཆོས་ཉིད་ཀྱི་ཕྱིར་རོ། །དེ་ལ་མངོན་པར་སྒྲུབ་པར་འདོད་པ་རྣམས་ཀྱི་རྫུ་འཕྲུལ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་མི་རྟོག་པའི་ཤེས་པ་སྒྲིབ་པ་མེད་པའི་ཕྱིར་རོ། །དེ་ལ་ཐོས་པར་འདོད་པ་རྣམས་ཀྱི་གཟུངས་གང་ཞེ་ན། འདི་ལྟ་སྟེ། ཆོས་
ཐམས་ཅད་མྱ་ངན་ལས་འདས་པ་དང་མཉམ་པའི་ཕྱིར་རོ། །དེ་ལ་དྲན་པ་མི་ཉམས་པ་གང་ཞེ་ན། འདི་ལྟ་སྟེ། མྱ་ངན་ལས་འདས་པར་དམིགས་པ་རང་བཞིན་གྱིས་རྣམ་པར་ཞི་བའི་ཕྱིར་རོ། །དེ་ལ་སངས་རྒྱས་རྣམས་ཀྱི་བྱིན་གྱི་རླབས་གང་ཞེ་ན། འདི་ལྟ་སྟེ། མཐའ་ཡས་པ་ཡོངས་སུ་སྒྲུབ་པའི་ཕྱིར་རོ། །དེ་ལ་

མགོན་པོ་རྣམས་ཀྱི་ཐབས་མཁས་པ་གང་ཞེ་ན། འདི་ལྟ་སྟེ། ཐམས་ཅད་བདེ་བ་དང་ལེགས་པར་འགྲོ་བའི་ཕྱིར་རོ། །དེ་ལ་ཕྲ་མོ་གང་ཞེ་ན། འདི་ལྟ་སྟེ། མྱ་ངན་ལས་འདས་པ་ལ་དམིགས་པ་རྣམ་པར་ཞི་བའི་ཕྱིར་རོ། །དེ་ལ་ཤེས་པར་དཀའ་བ་གང་ཞེ་ན། འདི་ལྟ་སྟེ། སོ་སོར་རིག་པར་དཀའ་བའི་ཕྱིར་རོ། །
དེ་ལ་མི་བརྩོན་པ་རྣམས་ཀྱིས་རིག་པར་དཀའ་བ་གང་ཞེ་ན། འདི་ལྟ་སྟེ། སྔོན་མ་ཐོས་པའི་ཕྱིར་རོ། །དེ་ལ་ཡི་གེ་རྣམས་ལྡོག་པ་གང་ཞེ་ན། འདི་ལྟ་སྟེ། ཚིག་གི་ལམ་ཐམས་ཅད་མི་དམིགས་པའི་ཕྱིར་རོ། །དེ་ལ་སྒྲས་ཤེས་པར་དཀའ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་བསམ་གྱིས་མི་ཁྱབ་
པའི་ཕྱིར་རོ། །དེ་ལ་མཁས་པ་དག་གིས་ཡོངས་སུ་ཤེས་པ་གང་ཞེ་ན། འདི་ལྟ་སྟེ། རིན་པོ་ཆེ་དོན་ཆེ་བའི་ཕྱིར་རོ། །དེ་ལ་ངེས་པ་དག་གིས་ཤེས་པ་གང་ཞེ་ན། འདི་ལྟ་སྟེ། བཀུར་སྟི་ཀུན་ཤེས་པའི་ཕྱིར་རོ། །དེ་ལ་འདོད་པ་ཉུང་བས་རྟོགས་པ་གང་ཞེ་ན། འདི་ལྟ་སྟེ། བཀུར་སྟི་མི་སྐྱེད་པའི་ཕྱིར་རོ། །
དེ་ལ་བརྩོན་འགྲུས་བརྩམས་པ་རྣམས་ཀྱིས་གཟུང་བ་གང་ཞེ་ན། འདི་ལྟ་སྟེ། བརྩོན་པ་མི་འདོར་བའི་ཕྱིར་རོ། །དེ་ལ་དྲན་པ་ཅན་གྱིས་བཅངས་པ་གང་ཞེ་ན། འདི་ལྟ་སྟེ། བྱས་པ་ཆུད་མི་ཟ་བའི་ཕྱིར་རོ། །དེ་ལ་སྡུག་བསྔལ་ཟད་པ་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་
མུག་སྤོང་བར་འགྱུར་བའི་ཕྱིར་རོ། །དེ་ལ་ཆོས་མི་སྐྱེ་བ་གང་ཞེ་ན། འདི་ལྟ་སྟེ། རྣམ་པར་ཤེས་པ་ཐམས་ཅད་འགོག་པར་འགྱུར་བའི་ཕྱིར་རོ། །དེ་ལ་བསྟན་པ་གཅིག་གང་ཞེ་ན། འདི་ལྟ་སྟེ། སྲིད་པའི་འགྲོ་བ་དང་། འཆི་འཕོ་དང་། སྐྱེ་བའི་གནས་ཐམས་ཅད་ཀྱི་ཆོས་ཐམས་ཅད་རྨི་ལམ་ལྟ་བུའོ་
ཞེས་ཆོས་ཐམས་ཅད་མི་སྐྱེད་པའི་ཕྱིར་རོ། །འདི་ནི་ཚིག་སུམ་བརྒྱ་པོ་འདི་རྣམས་རྒྱས་པར་བསྟན་པར་རིག་པར་བྱ་སྟེ། གཞོན་ནུ་འདི་ནི་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་
གསུངས་སོ། །སངས་རྒྱས་ཆོས་ནི་རྒྱ་ཆེ་སྟེ། །ཚུལ་ཡང་རྒྱ་ཆེར་བསྟན་པ་ཡིན། །ཆོས་རྣམས་རྒྱ་ཆེར་བསྟན་པས་ན། །ཡོན་ཏན་རྒྱ་ཆེན་ཐོབ་པར་འགྱུར། །ཇི་ལྟར་ནམ་མཁའ་རྒྱ་ཆེ་བ། །ཆོས་ཀྱི་མཚན་ཉིད་དེ་བཞིན་ཏེ། །རིན་ཆེན་འོད་ཟེར་རྒྱ་ཆེན་གང་། །དེ་ཕྱིར་ཤིན་ཏུ་རྒྱས་ཞེས་བྱ། །

སེམས་ཅན་སྤྱོད་པ་རྒྱ་ཆེ་སྟེ། །དེ་དག་བསྟན་པའང་རྒྱ་ཆེའོ། །ལུང་གི་དོན་ཡང་རྒྱ་ཆེ་བས། །དེ་ཕྱིར་ཤིན་ཏུ་རྒྱས་ཞེས་བྱ། །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ངེས་པར་བསྟན་པའི་ཆོས་ཀྱི་རྣམ་གྲངས་འདི་བཅོམ་ལྡན་
འདས་ཀྱིས་བཤད་པ་ན་སེམས་ཅན་དཔག་ཏུ་མེད་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སེམས་ཅན་དཔག་ཏུ་མེད་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །སེམས་ཅན་དཔག་ཏུ་མེད་པ་
དག་རང་བྱང་ཆུབ་ཏུ་སེམས་སྐྱེས་སོ། །སེམས་ཅན་དཔག་ཏུ་མེད་པ་དག་དགྲ་བཅོམ་པའི་འབྲས་བུ་མངོན་དུ་བྱ་བ་ལ་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་རབ་ཏུ་
འགུལ། ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཤར་ཕྱོགས་དམའ་
ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་སྟེ། འཇིག་རྟེན་ཀུན་ཏུ་སྣང་བ་དཔག་ཏུ་མེད་པ་དག་བྱུང་བར་གྱུར་ཏོ། །
ལྷའི་སྤོས་ཀྱི་ཆར་ཆེན་པོ་ཡང་མངོན་པར་བབ་བོ། །ལྷ་དག་ཀྱང་མེ་ཏོག་གི་ཆར་ཆེན་པོ་འབེབས་སོ། །ལྷའི་སིལ་སྙན་བརྒྱ་སྟོང་དག་ཀྱང་སྟེང་གི་བར་སྣང་ལ་རྡུང་ངོ་། །ལྷའི་ན་བཟའ་དག་ཀྱང་སྟེང་གི་ནམ་མཁའ་ལ་གཡོགས་ཤིང་ཚིག་འདི་སྐད་ཅེས་ཟེར་རོ། །གང་གིས་སྙིང་རྗེ་ཆེན་
པོ་ལ་འཇུག་པའི་ཆོས་ཀྱི་རྣམ་གྲངས་འདི་ཐོས་པར་འགྱུར་བའི་སེམས་ཅན་དེ་དག་ནི་རྙེད་པ་ལེགས་པར་རྙེད་པ་ཡིན་ཏེ། སེམས་ཅན་དེ་དག་སངས་རྒྱས་མང་པོ་ལ་བསྙེན་བཀུར་བྱས་པར་འགྱུར་རོ། །གང་གིས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་

རྣམ་པར་སྤྲོས་པའི་ཏིང་ངེ་འཛིན་འདི་ཐོས་པར་འགྱུར་ཞིང་ཐོས་ནས་ཀྱང་ཡི་གེར་འདྲི་བ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཉོན་མོངས་པ་མེད་པར་སྒོམ་པས་བསྒོམ་པ་དང་། མང་དུ་བྱེད་པ་དང་། གཞན་
ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་སེམས་ཅན་ཐམས་ཅད་ཀྱི་སྦྱིན་གནས་སུ་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཁྱོད་ཀྱིས་ཟུང་ཤིག །ལྷོགས་
ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་གཟུང་བར་བགྱི། བཅོམ་
ལྡན་འདས་ཀྱིས་བཀའ་སྩལ་པ། ཀུན་དགའ་བོ་མདོ་སྡེ་འདི་སྙིང་རྗེ་ཆེན་པོ་ལ་འཇུག་པ་ཞེས་བྱ་བར་ཟུང་ཤིག །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཞེས་བྱ་བར་ཡང་ཟུང་ཤིག །ཀུན་དགའ་བོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་
འདི་བདག་གིས་བཟུང་ལགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཟླ་འོད་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་དང་། གནས་གཙང་མའི་རིས་ཀྱི་
ལྷའི་བུ་དུ་མ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཇི་སྙེད་
པ་རྫོགས་སྷོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་དྷརྨ་ཏཱ་ཤཱི་ལས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་དྷརྨ་ཏཱ་སྭ་བྷཱ་ཝ་ཤཱུ་ནྱ་ཏཱ་ཨ་ཙ་ལ་པྲ་ཏི་སརྦ་ཨཱ་ལོ་ཀ་སཱུ་ཏྲ། བོད་སྐད་དུ། འཕགས་པ་ཆོས་ཉིད་རང་གི་ངོ་བོ་སྟོང་པ་ཉིད་ལས་མི་གཡོ་བར་ཐ་དད་པར་ཐམས་ཅད་ལ་སྣང་བའི་མདོ། །སངས་རྒྱས་དང་བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་དགས་ཀྱི་རྒྱལ་པོའི་ཆོས་ཀྱི་ཁང་པ་ན་ཡེ་ཤེས་ཀྱི་ཁྱད་པར་ལས་གྲུབ་པའི་རིན་པོ་ཆེ་སྣ་ཚོགས་ཀྱི་ཁྲི་ཆེན་པོ་བཤམས་པ་ལ། ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་
མི་གཡོ་བར་བཞུགས་སོ། །དེའི་ཚེ་གནས་དེར་བྱང་ཆུབ་སེམས་དཔའ་ཆེན་པོ་ཚད་མེད་གྲངས་མེད་པ་དག་ཀྱང་འདུས། ལྷ་དང་མི་དང་ལྷ་མ་ཡིན་ལ་སོགས་པ་འཁོར་ཕལ་པོ་ཆེ་ཐམས་ཅད་ཀྱང་འདུས་པར་གྱུར་ཏོ། །དེ་ནས་འཁོར་འདུས་པ་ཐམས་ཅད་ཀྱིས་བཅོམ་ལྡན་
འདས་ལ་ཡང་དང་ཡང་དུ་བསྐོར་བ་བྱེད་ཅིང་ཕྱག་འཚལ་ཏེ་རང་རང་གི་ཕྱོགས་ཕྱོགས་སུ་འདུག་སྟེ་མཆོད་པའི་མཆོག་ཐམས་ཅད་ཀྱིས་མཆོད་པར་བྱེད། བསྟི་སྟང་དུ་བྱེད། རི་མོར་བྱེད་པ་ལ་ཡིད་སྐྱོ་བར་མི་བྱེད་དེ། ཆོས་ཉན་པར་བརྩམས་ཏེ་མགོ་བཏུད་ནས་འདུག་པར་
གྱུར་ཏོ། །དེའི་ཚེ་བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་སྨོན་ལམ་དང་ཐུགས་རྗེའི་བྱིན་གྱི་རླབས་ཀྱིས་འཁོར་རྣམས་ཀྱི་སོ་སོར་སོ་སོའི་མོས་པ་དང་བསམ་པ་ཇི་ལྟ་བ་བཞིན་དུ་གསུང་སྒྲོག་པར་སྣང་སྟེ། བཅོམ་ལྡན་འདས་ནི་བདག་ལ་ཆོས་
སྟོན་ཏེ། གཞན་དག་ལ་ནི་མ་ཡིན་ནོ་སྙམ་མོ། །དེ་ཡང་འཁོར་ཕལ་པོ་ཆེ་དེ་དག་ལས་ཀྱང་ཁ་ཅིག་གིས་ནི་ཇི་ལྟར་སྣང་བ་བཞིན་དུ་ཡོད་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་ཆོས་ཐམས་ཅད་སེམས་ཙམ་ལས་མ་
གཏོགས་པར་གཞན་མེད་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་སེམས་ཉིད་ཀྱང་མ་སྐྱེས་པ་ཡིན་པར་བདག་ཅག་ལ་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་ཆོས་ཐམས་

ཅད་སྒྱུ་མ་བཞིན་དུ་སྣང་ཞིང་སྒྱུ་མ་བཞིན་དུ་མ་གྲུབ་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་ཆོས་ཐམས་ཅད་རང་བཞིན་གྱིས་མ་སྐྱེས་པ། ངོ་བོ་ཉིད་ཀྱིས་མི་གནས་པ། ལས་དང་བྱ་བའི་མཐའ་ཐམས་ཅད་དང་བྲལ་བ་རྟོག་པ་དང་རྟོག་པའི་
ཡུལ་ལས་འདས་པ། ཐོག་མ་མེད་པའི་དུས་ནས་སྤྲོས་པ་རྣམ་པར་དག་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །དེ་ནས་བཅོམ་ལྡན་འདས་ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་མི་གཡོ་བར་བཞུགས་པ་དེ་ལས་སྙིང་རྗེ་དང་ལྡན་པའི་སྐུར་བྱས་ནས་འཁོར་འདུས་པ་དེ་
དག་གི་ལྟ་བ་ཐ་དད་པར་གྱུར་པའི་རྟོག་པའི་མུན་པ་སེལ་བ་ཞེས་བྱ་བའི་འོད་ཟེར་ལྗགས་ཀྱི་དབང་པོ་ལས་སྤྲོས་ཏེ། འོད་ཟེར་དེས་ཕྱོགས་བཅུ་ཐམས་ཅད་སྣང་བར་བྱས་ནས་འཁོར་དེ་ན་བྱང་ཆུབ་སེམས་དཔའ་འཇམ་དཔལ་འདུག་པར་གྱུར་པ་ལ་བསྐུལ་བས་བྱང་ཆུབ་སེམས་དཔའ་འཇམ་
དཔལ་གྱིས་འཁོར་ཕལ་མོ་ཆེའི་རྟོག་པ་ལྔ་པོ་ཐ་དད་པར་གྱུར་པ་སེམས་ཀྱིས་ཤེས་ནས། ཅིའི་ཕྱིར་ཆོས་ཐམས་ཅད་ཀྱི་གཞི་གཅིག་ལ་ལྟ་བ་དང་མོས་པ་ཐ་དད་པར་གྱུར་སྙམ་སྟེ། བདག་གིས་བཅོམ་ལྡན་འདས་ལ་ཞུ་བར་བྱའོ་སྙམ་པ་དང་འོད་ཟེར་དེ་དག་བཅོམ་ལྡན་འདས་ཀྱི་
ལྗགས་ཀྱི་དབང་པོ་ལ་སླར་འདུས་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཇམ་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་འཁོར་འདུས་པ་འདི་དག་མོས་པ་དང་
རྟོག་པ་ཐ་དད་པ་འདི་ཅི་ལས་གྱུར། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ཀུན་ཡང་དག་པ་ལགས་སམ། འོན་ཏེ་ཁ་ཅིག་ནི་ཡང་དག་པ་ལགས་ལ་ཁ་ཅིག་ནི་ཡང་དག་པ་མ་ལགས་སམ། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་
དག་གིས་རྣམ་པར་གྲོལ་བ་ཐོབ་པར་མཚུངས་ལགས་སམ། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ལ་གང་ཟག་གི་རིགས་ནི་མཆིས་ལགས་སམ། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ལ་ཐ་དད་པར་སྣང་བའི་འཐུན་པའི་དཔེ་

ནི་ཇི་ལྟར་ལགས། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ལྟར་སོ་སོར་རྟོག་པའི་གང་ཟག་མ་འོངས་པའི་དུས་ན་ཡང་འབྱུང་བར་འགྱུར་བ་ལགས་སམ། བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ལ་སློབ་པའི་གང་ཟག་
རྣམས་དོན་ལགས་པ་དང་མ་ལགས་པར་རྩོད་པར་མི་འགྱུར་ལགས་སམ། བཅོམ་ལྡན་འདས་འཁོར་འདུས་པ་འདི་དག་གི་ཐེ་ཚོམ་གྱི་དྲ་བ་བཅད་པའི་སླད་དུ་བདག་ལ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་
ཁྱོད་འདི་སྐད་དུ་བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་འཁོར་འདུས་པ་འདི་དག་འདི་ལྟར་མོས་པ་དང་རྟོག་པ་ཐ་དད་པ་ཅི་ལས་གྱུར་ཞེས་ཟེར་བ་ནི་སྦྱངས་པ་དང་མ་སྦྱངས་པའི་དབང་ལས་ཤེས་པ་དང་། མོས་པ་ཆེ་ཆུང་ལས་གྱུར་ཏེ། སངས་རྒྱས་
རྣམས་ནི་སྦྱངས་པ་དང་བསགས་པ་དཔག་ཏུ་མེད་པས་རྩོལ་བ་མེད་པར་ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་མི་གཡོ་བ་གཅིག་པུ་ཡིན་ཏེ། འདི་ནི་སངས་རྒྱས་ཐམས་ཅད་ཀྱི་སྤྱོད་ཡུལ་ཡིན་ནོ། །ཆེར་སྦྱངས་པ་དང་ཅུང་ཟད་སྦྱངས་པ་རྣམས་ཀྱི་ནི་ཡང་དག་པ་ཡིན་པ་དང་མ་
ཡིན་པ་བརྒྱུད་པ་ལས་ཐོབ་པ་སྟེ། དེའི་ཕྱིར་ན་མོས་པ་དང་རྟོག་པ་ཐ་དད་པར་འགྱུར་རོ། །འཇམ་དཔལ་ཁྱོད་འདི་སྐད་དུ་ཆོས་ལ་བརྟག་པའི་མཐའ་ལྔ་པོ་འདི་དག་ཀུན་ཡང་དག་པ་ལགས་སམ། འོན་ཏེ་ཁ་ཅིག་ནི་ཡང་དག་པ་ལགས་ལ་ཁ་ཅིག་ནི་ཡང་དག་པ་མ་ལགས་སམ་ཞེས་
ཟེར་བ་ནི་ཆོས་ལ་བརྟག་པའི་མཐའ་ལྔ་པོ་འདི་དག་ཐམས་ཅད་ཀྱང་ཡང་དག་པ་ཡིན་པར་གཟུང་སྟེ། ཁ་ཅིག་གིས་ནི་ཆོས་ཐམས་ཅད་ཇི་ལྟར་སྣང་བ་བཞིན་དུ་ཡོད་པའི་ཆོས་སྟོན་ཏོ་སྙམ་པ་ཡང་ཡིན་ཏེ། ཅིའི་ཕྱིར་ཞེ་ན། འབྱུང་བ་བཞི་དང་དེས་བྱས་པ་རྣམས་ནི་ཐ་དད་དུ་སྒྱུ་
མ་བཞིན་དུ་ཡོད་པའི་ཕྱིར་རོ། ཁ་ཅིག་གིས་ནི་ཆོས་ཐམས་ཅད་ནི་སེམས་ཙམ་ལས་མ་གཏོགས་པ་གཞན་མེད་པའི་ཆོས་སྟོན་ཏོ་སྙམ་པ་ཡང་ཡིན་ཏེ། ཅིའི་ཕྱིར་ཞེ་ན། ཆོས་སྣ་ཚོགས་སུ་འདོགས་པ་རྣམས་རྟག་པ་ཐེར་ཟུག་ཏུ་བརྟགས་པའི་བག་ཆགས་སེམས་ལ་

བཞག་པའི་མཐུས་དུས་ཐམས་ཅད་དུ་བདག་དང་ཆོས་རྣམས་སུ་སྣང་བ་ཐ་སྙད་ཙམ་དུ་སྣང་ཡང་དོན་དུ་རང་བཞིན་མེད་དེ། སེམས་ཙམ་ལས་མེད་པའི་ཕྱིར་རོ། །ཁ་ཅིག་གིས་ནི་སེམས་ཉིད་ཀྱང་མ་སྐྱེས་པ་ཡིན་པར་བདག་ཅག་ལ་ཆོས་སྟོན་ཏོ་སྙམ་པ་ཡང་ཡིན་ཏེ། ཅིའི་ཕྱིར་ཞེ་ན།
འདི་ལ་དབྱིབས་སམ། ཁ་དོག་གམ། དུས་གསུམ་འམ། མཐའ་དབུས་མེད་པའི་ཕྱིར་རོ། །ཁ་ཅིག་གིས་ནི་ཆོས་ཐམས་ཅད་སྒྱུ་མ་བཞིན་དུ་སྣང་ཞིང་སྒྱུ་མ་བཞིན་དུ་མ་གྲུབ་པའི་ཆོས་སྟོན་ཏོ་སྙམ་པ་ཡང་ཡིན་ཏེ། ཅིའི་ཕྱིར་ཞེ་ན། ཆོས་ཐམས་ཅད་ནི་རྒྱུ་རྐྱེན་ལས་སྐྱེ་ཞིང་འབྱུང་
བའི་ཕྱིར་རོ། །ཁ་ཅིག་གིས་ནི་ཆོས་ཐམས་ཅད་རང་བཞིན་གྱི་མ་སྐྱེས་པ། ངོ་བོ་ཉིད་ཀྱིས་མི་གནས་པ། ལས་དང་བྱ་བའི་མཐའ་ཐམས་ཅད་དང་བྲལ་བ། རྟོག་པ་དང་རྟོག་པའི་ཡུལ་ལས་འདས་པ། ཐོག་མ་མེད་པའི་དུས་ནས་སྤྲོས་པ་རྣམ་པར་དག་པའི་ཆོས་སྟོན་ཏོ་སྙམ་
པ་ཡང་ཡིན་ཏེ། ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་གི་ངོ་བོ་ཉིད་ཕྱིན་ཅི་མ་ལོག་པ་དེ་ཡིན་པའི་ཕྱིར་རོ། །འཇམ་དཔལ་ཡང་ཁ་ཅིག་ཡང་དག་པ་མ་ཡིན་པར་ཡང་བཟུང་སྟེ། སྦྱངས་པ་ཆུང་བ། མོས་པ་དམན་པ། ཤེས་རབ་ཞན་པ་དག་གིས་རྟོག་པའོ། །ཁ་ཅིག་སྦྱངས་
པ་དང་མོས་པ་དང་ཤེས་རབ་འབྲིང་བ་རྣམས་ཀྱིས་རྟོགས་པའོ། །ལྷག་མ་ནི་ཡང་དག་པ་སྟེ་མཆོག་ཏུ་གྱུར་པའི་རྟོགས་པའོ། །འཇམ་དཔལ་ཁྱོད་འདི་སྐད་དུ་ཆོས་ལ་བརྟག་པའི་མཐའ་ལྔ་པོ་འདི་དག་གིས་རྣམ་པར་གྲོལ་བ་ཐོབ་པར་མཚུངས་སམ་ཟེར་བ་ནི་ཤེས་རབ་མཆོག་ཏུ་གྱུར་
པའི་རྟོགས་པ་ཡང་དག་པ་ལས་ལྷག་མ་བཞི་པོ་གཅིག་ལ་གཅིག་བརྒྱུད་པའི་ཁྱད་པར་གྱིས་ཉེ་རིང་ཡོད་ཀྱང་རྣམ་པར་གྲོལ་བ་འཐོབ་པར་མཚུངས་པར་བལྟའོ། །འཇམ་དཔལ་ཁྱོད་ཀྱིས་འདི་སྐད་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་གང་ཟག་གི་རིགས་ནི་མཆིས་ལགས་
སམ་ཞེས་ཟེར་བ་ནི་ཐེག་པ་ཆུང་ངུའི་རིགས་དང་ཐེག་པ་ཆེན་པོའི་རིགས་གཉིས་ཀས་ཆོས་ལ་བརྟག་པའི་མཐའ་ལྔ་ལས་བཞི་ལས་བརྒྱུད་ནས་ལྷག་མ་གཅིག་ཏུ་ཡང་དག་པ་ཕྱིན་ཅི་མ་ལོག་པ་སངས་རྒྱས་ཀྱི་སྤྱོད་ཡུལ་རྟོགས་པར་བྱའོ། །འཇམ་དཔལ་ཁྱོད་ཀྱིས་འདི་སྐད་དུ་

ཆོས་ལ་བརྟག་པའི་མཐའ་ལྔ་པོ་འདི་དག་ལ་ཐ་དད་པར་སྣང་བའི་འཐུན་པའི་དཔེ་ནི་ཇི་ལྟར་ལགས་ཞེས་ཟེར་བ་ནི་ཆོས་ཀྱི་གཞི་གཅིག་ལ་ཐ་དད་པར་རྟོག་པའི་དཔེ་ནི་འཛམ་བུའི་གླིང་དུ་ཉི་མ་འཆར་བས་བསྟན་ཏེ། འཛམ་བུའི་གླིང་དུ་ཉི་མ་འཆར་བ་དཔག་ཚད་བཞི་ཁྲིའི་
ནམ་མཁའ་ལས་འཆར་བའི་ཚེ་མི་རྣམས་ཀྱིས་རང་གི་གྲོང་ཁྱེར་དང་རི་འདི་ལས་ཤར་བར་སོ་སོ་ནས་རྟོག་གོ། །དེ་བཞིན་དུ་ད་ལྟར་གྱི་འཁོར་འདུས་པ་འདི་དག་གིས་ཆོས་ཀྱི་གཞི་གཅིག་ལ་སོ་སོར་རྟོག་གོ། །སོ་སོར་མཐོང་ངོ་། །སོ་སོར་འཛིན་ཏོ། །འཇམ་དཔལ་རྣམ་པར་
མ་བརྟགས་པའི་ཚེ་རང་གི་གྲོང་ཁྱེར་གྱི་རི་ལས་མི་འཆར་བ་མ་ཡིན་པ་བཞིན་དུ་ཆོས་ལ་བརྟག་པའི་མཐའ་འདི་དག་ཀྱང་ཡང་དག་པ་ཕྱིན་ཅི་མ་ལོག་པ་སངས་རྒྱས་རྣམས་ཀྱི་སྤྱོད་ཡུལ་ལས་མ་ལྟོས་པ་གཞན་བཞི་པོ་དེ་བཞིན་དུ་སྣང་ངོ་། །འཇམ་དཔལ་རང་གི་གྲོང་ཁྱེར་གྱི་རི་དེ་
ལས་ཡང་དག་པར་འཆར་བ་མ་ཡིན་པ་དེ་བཞིན་དུ་བཞི་པོ་ནི་རྟོགས་པའི་ཐབས་བློའི་རིམ་པ་ལ་དེ་ལྟར་སྣང་སྟེ། དོན་ཡང་དག་པ་ཉིད་མ་ཡིན་ནོ། །འཇམ་དཔལ་བརྟག་པ་ལྔ་པོ་འདི་དག་ལས་རྣམ་པར་གྲོལ་བ་མཚུངས་པ་ཐོབ་པའི་དཔེ་ནི་ནོར་བུ་རིན་པོ་ཆེས་བསྟན་ཏེ།
རིན་པོ་ཆེ་དེ་ཡང་སེམས་ཅན་རྣམས་ཀྱིས་བསྟེན་པའི་ལས་བྱས་པ་དང་མ་བྱས་པ་ཡོད་དེ། གང་ཟག་རྟོག་པ་མེད་པ་དང་ལོག་པར་རྟོག་པ་རྣམས་ནི་ཆོས་ལ་བརྟག་པའི་མཐའ་ལྔ་ལ་མི་བརྟེན་པ་སྟེ། རིན་པོ་ཆེ་བསྟེན་པའི་ལས་མ་བྱས་པའི་གང་ཟག་གིས་རིན་པོ་ཆེ་མ་
རྙེད་པ་དང་དགོས་པ་མི་འབྱུང་བ་བཞིན་དུ་དེ་དག་ལ་མི་དཔྱོད་མི་སེམས་པས་ཁམས་གསུམ་ལས་མི་ཐར་བ་ཡིན་ནོ། །བསྟེན་པའི་ལས་བྱས་པ་ནི་ཁྱད་པར་དུ་བསགས་པ་དང་ཆེར་བསགས་པ་དང་ཅུང་ཟད་བསགས་པ་རྣམས་ལ་རིན་པོ་ཆེའི་དགོས་པ་ཡང་རིམ་པ་གསུམ་
དུ་འབྱུང་བ་བཞིན་དུ་ཡང་དག་པ་ཕྱིན་ཅི་མ་ལོག་པ་དང་ལྷག་མ་བཞི་པོ་བརྒྱུད་པར་བརྟག་པ་ཐེག་པ་ཆེ་ཆུང་རིམ་པ་གསུམ་ཡང་དཔེ་རིམ་པ་བཞིན་ནོ། །ངས་བཤད་པའི་མདོ་སྡེ་བཅུ་གཉིས་དང་ཆོས་ལ་བརྟག་པའི་མཐའ་ལྔ་ཇི་ལྟ་བུ་ཡིན་པའི་དཔེ་ནི་རྒྱ་མཚོ་ལ་ཕྱོགས་བཞི་ནས་

ཆུ་འབབ་པས་བསྟན་ཏེ། ཕྱོགས་བཞི་ནས་ཆུ་བོ་བཞི་ཡན་ལག་མང་པོ་དང་བཅས་པ་ཕྱོགས་བཞི་ནས་བབ་ཀྱང་གཞི་རྒྱ་མཚོ་ཆེན་པོ་ལས་བབ་པར་འདྲ་བས་རྒྱ་མཚོ་ནི་ཕྱོགས་བཞི་ནས་འབབ་པའི་ཆུ་ཐམས་ཅད་ཀྱི་གཞི་ཡིན་ནོ། །སྤྱི་ཡིན་ནོ། །དེ་བཞིན་དུ་ཆོས་ལ་བརྟག་པའི་
མཐའ་ལྔ་ཐ་དད་ཀྱང་ངས་མདོ་སྡེ་བཅུ་གཉིས་བཤད་པ་ལ་རྟེན་པ་ཡིན་པས་མདོ་སྡེ་བཅུ་གཉིས་ནི་གཞི་ཡིན་ནོ། །སྤྱི་ཡིན་ནོ། །འཇམ་དཔལ་ཁྱོད་འདི་སྐད་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལྟར་སོ་སོར་རྟོག་པའི་གང་ཟག་མ་འོངས་པའི་དུས་ན་ཡང་འབྱུང་བར་འགྱུར་བ་ལགས་
སམ་ཞེས་ཟེར་བ་ནི་ད་ལྟར་ངས་ཆོས་རྣམས་ཀྱི་རང་གི་ངོ་བོ་ཉིད་ཇི་ལྟ་བ་བཞིན་དུ་སྟོན་པ་ན་ཡང་འཁོར་འདུས་པ་རྣམས་ལ་རྟོག་པ་འདི་ལྟ་བུར་ཐ་དད་པར་གྱུར་ན་ང་མྱ་ངན་ལས་འདས་ནས་ཐ་དད་པར་འགྱུར་བ་ལྟ་ཅི་སྨོས་ཏེ་ཆེས་མང་བར་འགྱུར་རོ། །འཇམ་དཔལ་ང་མྱ་ངན་ལས་འདས་ནས་
ལོ་ལྔ་བརྒྱ་དང་དགུ་བརྒྱ་དང་སྟོང་དགུ་བརྒྱ་དང་ཉིས་སྟོང་དང་ཉིས་སྟོང་ལྔ་བརྒྱའི་བར་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་སོ་སོར་རྟོག་པའི་གང་ཟག་རིམ་པར་འབྱུང་བར་འགྱུར་རོ། །འཇམ་དཔལ་ཁྱོད་འདི་སྐད་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་སློབ་པའི་གང་ཟག་
རྣམས་དོན་ལགས་པ་དང་མ་ལགས་པར་རྩོད་པར་མི་འགྱུར་ལགས་སམ་ཞེས་ཟེར་བ་ནི་མ་འོངས་པའི་དུས་ང་མྱ་ངན་ལས་འདས་ནས་ལོ་ལྔ་བརྒྱ་ནས་རྩོད་པར་འགྱུར་ཏེ། དེའི་ཚེ་གང་ཟག་རྣམས་མོས་པ་དང་ཤེས་རབ་ཆེ་ཆུང་གི་དབང་གིས་དོན་མ་ནོར་བར་རྟོགས་མ་རྟོགས་ཀྱི་བྱེ་བྲག་
མེད་པར་བདག་ཉིད་ཀྱི་དོན་མ་ཡིན་པ་ལ་ཡིན་ངེས་པར་བྱས་ཏེ། གཞན་གྱི་དོན་ཡིན་པ་ཡང་མ་ཡིན་པར་བསྒྲུབས་ནས་རྩོད་པར་འགྱུར་རོ། །གཞན་དྲུང་ན་འཁོད་ཅིང་ཉན་པ་རྣམས་ཀྱིས་ཀྱང་དོན་བཞིན་དུ་ཕྱོགས་འཛིན་པར་མི་བྱེད་ཀྱི། ཡུལ་གྱིས་བསྡུས་པ་དང་གཉེན་གྱི་ཕྱོགས་
འཛིན་པར་འགྱུར་རོ། །དོན་མ་ནོར་བར་ཤེས་པ་རྣམས་ཀྱིས་ཀྱང་མི་ཤེས་པ་རྣམས་ལ་བསྟན་པར་བྱ་བའི་ཕྱིར་མི་རྩོད་ཀྱི། སྨ་དབབ་པ་དང་ཤེད་གཅད་པའི་ཕྱིར་རྩོད་དེ། ཁྱོད་ཀྱི་དོན་གྱི་ངོ་བོ་ཇི་ལྟར་མཐོང་བ་སྨྲོས་ཞེས་དྲིས་ནས། དེས་སྨྲས་པ་དང་། དོན་མ་ནོར་ཡང་མདོ་སྡེ་གཞན་

ལ་བརྩམས་ནས་སྨྲ་བར་འགྱུར་རོ། །ཁྱོད་འདི་སྐད་ཟེར་ཞེས་ནོར་བ་གཞན་ལ་སྒྲོགས་པར་འགྱུར་རོ། །བདག་ཉིད་ལས་མ་གཏོགས་པ་གཞན་གྱིས་མ་ཤེས་ན་ཅི་མ་རུང་སྙམ་པར་འགྱུར་རོ། །བྱང་ཆུབ་ཀྱི་ཕྱིར་མ་ཡིན་གྱི་ཟང་ཟིང་གི་ཕྱིར་སྒྲོགས་པར་འགྱུར་རོ། །དེ་སྐད་
ཅེས་བཀའ་སྩལ་པ་དང་། འཇམ་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ལ་བརྟག་པའི་མཐའ་ལྔ་པོ་འདི་དག་ཆོས་ཀྱི་གཞི་གཅིག་ལ་ཐ་དད་པར་གྱུར་ན་ཆོས་ཀྱི་གཞི་དེ་ནི་གང་ལགས། དེ་ལ་ཇི་ལྟར་བརྟགས་ན་ནི་འཁྲུལ་པ་ལགས། དེའི་མ་ནོར་བའི་རང་གི་ངོ་བོ་
ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གཞི་ནི་ཕུང་པོ་རྣམས་སོ། །འབྱུང་བ་རྣམས་སོ། །ཁམས་དང་སྐྱེ་མཆེད་རྣམས་སོ། །དེ་དག་སྒྱུ་མ་བཞིན་ཐ་སྙད་ཙམ་དུ་སྣང་བ་ལས་རྟག་པ་དང་ཐེར་ཟུག་ཏུ་བཟུང་ན་འཁྲུལ་པ་ཡིན་ནོ། །རང་བཞིན་སྐྱེ་བ་མེད་པ་
ལ་དངོས་པོ་ཐ་སྙད་དུ་སྣང་བ་བསལ་ནས་མེད་པར་བརྟགས་ན་ཡང་འཁྲུལ་པ་ཡིན་ནོ། །དེའི་གཞི་མ་ནོར་བའི་རང་གིས་ངོ་བོ་ནི་ཆོས་དེ་དག་གི་རང་བཞིན་སྐྱེ་བ་མེད་པ་ཡིན་ནོ། །གསོལ་པ། འོ་ན་ཡུལ་འཁྲུལ་པའི་གཞི་མ་མཆིས་ན་ཡུལ་འཁྲུལ་པ་སྣང་ཞེས་བྱ་བ་ཇི་ལྟ་བུ་ལགས། བཀའ་
སྩལ་པ། ཆོས་སྒྱུ་མ་བཞིན་ཐ་སྙད་ཙམ་དུ་སྣང་ཞིང་ཡོད་པ་དེ་སེམས་འཁྲུལ་པས་སྣང་བར་ནི་མི་བཟུང་གི །ཆོས་དེ་དག་གི་རང་བཞིན་སྐྱེ་བ་མེད་པར་མ་ཤེས་ནས་རྟག་པ་ཐེར་ཟུག་ཏུ་བཟུང་བའི་འཁྲུལ་པའི་སྣང་བ་ལ་སེམས་འཁྲུལ་པ་ཡུལ་དུ་སྣང་བར་ཟུང་ཤིག །དེ་ཅིའི་ཕྱིར་
ཞེ་ན། ཆོས་རྣམས་ལ་གང་གིས་རྟག་པ་དང་ཐེར་ཟུག་ཏུ་བཟུང་ན་འཁོར་བར་འགྱུར་རོ། །འཁོར་བར་གྱུར་ན་ཕུང་པོ་དང་ཁམས་དང་སྐྱེ་མཆེད་རྣམས་ཡོད་པར་འགྱུར་རོ། །དེ་ཡོད་ན་བདེ་བ་དང་སྡུག་བསྔལ་རྣམས་མྱོང་བར་འགྱུར་རོ། །གང་གིས་ཆོས་རྣམས་ཀྱི་རང་བཞིན་སྐྱེ་བ་
མེད་པ་ཤེས་ནས་ཆོས་རྣམས་ཀྱི་དངོས་པོ་རྟག་པ་ཐེར་ཟུག་དང་། མེད་པ་དང་ཆད་པའི་མཐའ་གཉིས་པོ་བསལ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །དེ་ཐོབ་པ་དང་མཚན་དང་དཔེ་བྱད་དང་སངས་རྒྱས་ཀྱི་ཞིང་ཡོངས་སུ་དག་པར་སྣང་བར་འགྱུར་རོ། །

འཇམ་དཔལ་མདོར་ན་ཆོས་ཀྱི་རང་བཞིན་སྐྱེ་བ་མེད་པར་མ་ཤེས་ནས་ཆོས་རྣམས་ལ་རྟག་པ་དང་ཐེར་ཟུག་ཏུ་བཟུང་བས་འཁོར་བར་གྱུར་ནས། ཆོས་རྣམས་སྣང་བ་ལ་སེམས་འཁྲུལ་པ་སྣང་ཞེས་བྱའི། ཐོག་མ་ནམ་མཁའ་ལྟ་བུ་མེད་པ་ལས་སེམས་འཁྲུལ་པའི་མཐུས་ཆོས་རྣམས་
སྣང་བ་ནི་མ་ཡིན་ནོ། །འཇམ་དཔལ་མཐོང་བ་དག་པ་དང་མ་དག་པ་གཉིས་ཀྱིས་འཁོར་བ་དང་མྱ་ངན་ལས་འདས་པར་སྣང་བ་ལ་ཡང་ཡུལ་ནི་སེམས་སྣང་བ་ཡིན་ཞེས་བྱའོ། །དེ་སྐད་ཅེས་བཀའ་སྩལ་པ་དང་། འཁོར་འདུས་པ་དེ་དག་ཐམས་ཅད་ཡི་རངས་ཏེ། བཅོམ་ལྡན་འདས་
ཀྱིས་གསུངས་པ་ལ་མངོན་པར་བསྟོད་དོ།། །།ཆོས་ཉིད་རང་གི་ངོ་བོ་ཉིད་ལས་མི་གཡོ་བར་ཐ་དད་པར་ཐམས་ཅད་སྣང་བའི་མདོ་རྫོགས་སོ།། །།རྒྱ་གར་གྱི་མཁན་པོ་དཱ་ན་ཤཱི་ལ་དང་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །དཱ་ན་ཤཱི་ལའི་ཞལ་ནས་སྡེ་སྣོད་ཀྱི་བསྟན་
བཅོས་དང་དབུ་མའི་ལྟ་བ་ཐ་དད་རྣམས་འདི་ལས་འཕྲོས་པ་ཡིན་གསུང་སྐད།། ༄༅༅། །རྒྱ་གར་སྐད་དུ། ཨཱརྱ་པྲ་ཤཱན་ཏ་བི་ནིཤྩ་ཡ་པྲཱ་ཏི་ཧཱརྱ་ནཱ་མ་ས་མཱ་དྷི་མ་ཧཱ་ཡཱ་ན་སཱུ་ཏྲ། བོད་སྐད་དུ།
འཕགས་པ་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན།
བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་བྱང་ཆུབ་སེམས་དཔའ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་
པ་དང་། སྤྱན་རས་གཟིགས་དབང་ཕྱུག་དང་། སྨན་གྱི་རྒྱལ་པོ་དང་། སྨན་ཡང་དག་བྱུང་དང་། སྨན་མངོན་བསྒྲགས་དབྱངས་རྒྱལ་པོ་དང་། ལག་ན་པད་མ་དང་། ཉི་མའི་འོད་དང་། རྡུལ་མེད་རྣམ་པར་གནོན་དང་། ངན་སོང་སྤོང་དང་། ཡེ་ཤེས་བླ་མའི་ཡེ་ཤེས་ལྡན་དང་།

རིན་ཆེན་བླ་མའི་ཡེ་ཤེས་ལྡན་དང་། སེམས་ཅན་གྱི་སྐད་ཡེ་ཤེས་ལྡན་དང་། མེ་ཏོག་བླ་མའི་ཡེ་ཤེས་ལྡན་དང་། ཟླ་བའི་བླ་མའི་ཡེ་ཤེས་ལྡན་དང་། དྲི་མ་མེད་པའི་བླ་མའི་ཡེ་ཤེས་ལྡན་དང་། རྡོ་རྗེ་བླ་མའི་ཡེ་ཤེས་ལྡན་དང་། རྡུལ་མེད་བླ་མའི་ཡེ་ཤེས་ལྡན་དང་།
རྣམ་པར་སྣང་བྱེད་བླ་མའི་ཡེ་ཤེས་ལྡན་དང་། སྐར་མའི་རྒྱལ་མཚན་དང་། རིན་པོ་ཆེའི་རྒྱལ་མཚན་དང་། ལྷུན་པོའི་རྒྱལ་མཚན་དང་། ཆགས་མེད་རྒྱལ་མཚན་དང་། མེ་ཏོག་རྒྱལ་མཚན་དང་། དྲི་མ་མེད་པའི་རྒྱལ་མཚན་དང་། ཉི་མའི་རྒྱལ་མཚན་དང་། མཛེས་པའི་
རྒྱལ་མཚན་དང་། རྡུལ་བྲལ་རྒྱལ་མཚན་དང་། རྣམ་པར་སྣང་བྱེད་རྒྱལ་མཚན་དང་། སའི་གཟི་བརྗིད་དང་། རིན་ཆེན་གཟི་བརྗིད་དང་། བློ་གྲོས་ཆེན་པོའི་གཟི་བརྗིད་དང་། ཡེ་ཤེས་རྡོ་རྗེའི་གཟི་བརྗིད་དང་། དྲི་མ་མེད་པའི་གཟི་བརྗིད་དང་། ཉི་མའི་གཟི་བརྗིད་དང་། བསོད་ནམས་རི་
བོའི་གཟི་བརྗིད་དང་། ཡེ་ཤེས་སྣང་བའི་གཟི་བརྗིད་དང་། མཚུངས་མེད་དཔལ་གྱི་གཟི་བརྗིད་དང་། སའི་སྙིང་པོ་དང་། ནམ་མཁའི་སྙིང་པོ་དང་། རིན་པོ་ཆེའི་སྙིང་པོ་དང་། པད་མའི་སྙིང་པོ་དང་། ཉི་མའི་སྙིང་པོ་དང་། ཡོན་ཏན་རྣམ་པར་དག་པའི་སྙིང་པོ་དང་། ཆོས་ཀྱི་ཕྱག་རྒྱའི་སྙིང་པོ་དང་།
རྣམ་པར་སྣང་བྱེད་ཀྱི་སྙིང་པོ་དང་། ལྟེ་བའི་སྙིང་པོ་དང་། པད་མའི་དཔལ་གྱི་སྙིང་པོ་དང་། ཉི་མའི་མིག་དང་། རྣམ་པར་དག་པ་དྲི་མ་མེད་པའི་མིག་དང་། རྣམ་པར་སངས་པའི་མིག་དང་། ཆགས་པ་མེད་པའི་མིག་དང་། ཀུན་ཏུ་ལྟ་བའི་མིག་དང་། ཤིན་ཏུ་རྣོ་བའི་མིག་དང་། རྡོ་རྗེའི་མིག་
དང་། རིན་པོ་ཆེའི་མིག་དང་། ནམ་མཁའི་མིག་དང་། ཀུན་ནས་མིག་དང་། ལྷའི་ཅོད་པན་དང་། ཆོས་ཀྱི་དབྱིངས་སྣང་བའི་ནོར་བུའི་ཅོད་པན་དང་། བྱང་ཆུབ་ཀྱི་སྙིང་པོའི་ཅོད་པན་དང་། རྣམ་པར་སྣང་བྱེད་ཅོད་པན་དང་། སངས་རྒྱས་ཐམས་ཅད་བྱུང་བའི་སྙིང་པོའི་ཅོད་པན་དང་། འཇིག་
རྟེན་གྱི་ཁམས་ཐམས་ཅད་ལས་མངོན་པར་འཕགས་པའི་ཅོད་པན་དང་། དུས་ཐམས་ཅད་དུ་མངོན་པར་འཕགས་པའི་ཅོད་པན་དང་། ཀུན་ཏུ་རྣམ་པར་སྣང་བྱེད་ཅོད་པན་དང་། ཟིལ་གྱིས་མི་ནོན་པའི་ཅོད་པན་དང་། ཆོས་ཐམས་ཅད་ཀྱི་སྙིང་པོ་དེ་བཞིན་གཤེགས་པའི་སེང་གེའི་ཁྲི་འཛིན་པའི་

ཅོད་པན་དང་། ཀུན་ནས་ཆོས་ཀྱི་དབྱིངས་ནམ་མཁའ་སྣང་བའི་ཅོད་པན་དང་། ཚངས་པའི་དབང་པོའི་གཙུག་པུད་དང་། ཀླུའི་དབང་པོའི་གཙུག་པུད་དང་། སངས་རྒྱས་འཕྲུལ་པ་ཐམས་ཅད་སྣང་བའི་གཙུག་པུད་དང་། བྱང་ཆུབ་ཀྱི་སྙིང་པོའི་གཙུག་པུད་དང་། སྨོན་ལམ་རྒྱ་མཚོ་ཐམས་ཅད་ཀྱི་
དབྱངས་ནོར་བུ་རིན་ཆེན་རྒྱལ་པོའི་གཙུག་པུད་དང་། དུས་གསུམ་ཐམས་ཅད་ཀུན་ནས་དབྱངས་ཀྱི་གཙུག་པུད་དང་། དེ་བཞིན་གཤེགས་པ་ཐམས་ཅད་རྣམ་པར་འཕྲུལ་པའི་སྣང་བའི་རྒྱལ་མཚན་ནོར