Kinh tạng Tây Tạng (Kangyur Đại Học) — 055_མདོ་སྡེ།_ད

ན་གནས་པའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་མ་ཡིན་པ་གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་

ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ། གཟི་བརྗིད་ཆེ་བ། གཟི་བརྗིད་ཆེ་བ་ཆེ་ཞིང་ཆེ་བ་འོངས་ཤིང་ལྷགས་པ། དགེ་བའི་རྩ་བ་བསྐྱེད་པ། རྒྱ་ཆེན་པོ་ལ་མོས་པ་དེ་དག་ཐམས་ཅད་ཀྱང་འཁོར་དེར་ཚོགས་ཤིང་འཁོད་
པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེ་འདི་སྙམ་དུ་སེམས་ཏེ། གང་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཇི་ལྟ་བུའི་ཞུ་བ་ཞུས་པས་སངས་རྒྱས་ཀྱི་རིགས་ཀྱང་
ཡོངས་སུ་འཛིན་པར་འགྱུར་བ་དང་། ཆོས་ཀྱི་རིགས་ཀྱང་ཡོངས་སུ་བསྲུང་བར་འགྱུར་བ་དང་། དགེ་འདུན་གྱི་རིགས་ཀྱང་ཤིན་ཏུ་ཡོངས་སུ་འཛིན་པར་འགྱུར་བ་དང་། བདུད་ཀྱི་གནས་ཐམས་ཅད་ཀྱང་མོག་མོག་པོར་བྱས་པར་འགྱུར་བ་དང་། གང་ཟག་ལྷག་པའི་ང་རྒྱལ་ཅན་རྣམས་ཀྱང་ཤིན་ཏུ་ཚར་
ཆོད་པར་འགྱུར་བ་དང་། སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱང་དགེ་བའི་རྩ་བ་བསྐྱེད་པར་འགྱུར་བ་དང་། སེམས་ཅན་དགེ་བའི་རྩ་བ་བསྐྱེད་པ་རྣམས་ཀྱང་དགེ་བའི་རྩ་བ་རྒྱས་པར་འཕེལ་བར་འགྱུར་བ་དང་། སེམས་ཅན་གང་དག་བྱང་ཆུབ་ཏུ་སེམས་མ་བསྐྱེད་པ་དེ་དག་ཀྱང་བྱང་ཆུབ་ཏུ་
སེམས་བསྐྱེད་པར་འགྱུར་བ་དང་། སེམས་ཅན་གང་དག་བྱང་ཆུབ་ཏུ་སེམས་བསྐྱེད་པ་དེ་དག་ཀྱང་ཕྱིར་མི་ལྡོག་པར་འགྱུར་བ་དང་། གང་དག་ཕྱིར་མི་ལྡོག་པ་དེ་དག་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་
དམིགས་པ་ཅན་ཐམས་ཅད་དང་། བདག་ཏུ་མངོན་པར་ཞེན་པ་རྣམས་ཀྱང་ལྟ་བ་དེ་དག་ལས་བསྐྱོད་པར་འགྱུར་བ་དང་། སེམས་ཅན་དམན་པ་ལ་མོས་པ་རྣམས་ཀྱང་སངས་རྒྱས་ཀྱི་ཆོས་རྒྱ་ཆེན་པོ་ལ་མོས་པར་འགྱུར་བ་དང་། སེམས་ཅན་རྒྱ་ཆེན་པོ་ལ་མོས་པ་རྣམས་ཀྱང་མགུ་ཞིང་མཆོག་ཏུ་
དགའ་བར་འགྱུར་བ་དེ་ལྟ་བུའི་ཞུ་བ་ཀུན་ཞུ་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་

སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་དྲིས་པ་ལུང་བསྟན་པའི་ཕྱིར་ཁྱོད་ལ་དེ་བཞིན་གཤེགས་པས་རྟག་ཏུ་སྐབས་ཕྱེས། བློ་གྲོས་བརྟན་པ་ཁྱོད་ཅི་དང་ཅི་འདོད་པ་དེ་བཞིན་གཤེགས་པ་ལ་
ཞུས་ཤིག་དང་། ཞུ་བ་ཞུས་པ་དེ་དང་དེའི་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་
སེམས་དཔའ་ཆེན་པོ་ཏིང་ངེ་འཛིན་གང་ལ་གནས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་འགྱུར་བ་དང་། ཕྱོགས་བཅུར་སྣང་བའི་ཕྱིར་སྣང་བ་ཆེན་པོ་ཐོབ་པར་འགྱུར་བ་དང་།
བདུད་ཐམས་ཅད་ཚར་གཅད་པའི་ཕྱིར་ཤེས་རབ་རྒྱ་ཆེན་པོ་གྲགས་པས་རྣམ་པར་འཕྲུལ་པར་འགྱུར་བ་དང་། རང་བྱུང་གི་ཆོས་ཐོབ་པའི་ཕྱིར་ཡེ་ཤེས་ལ་དབང་དུ་འགྱུར་བ་དང་། མ་བསྟན་པའི་ཡེ་ཤེས་དང་ལྡན་པའི་ཕྱིར་གཞན་གྱི་དྲིང་ལ་འཇོག་པར་མི་འགྱུར་བ་དང་། ཕྱི་མའི་མཐའི་བསྐལ་པ་
བྱེ་བར་སྟོན་པའི་ཕྱིར་སྤོབས་པ་རྒྱུན་མི་འཆད་པར་འགྱུར་བ་དང་། ཚེ་བསྐལ་པ་དཔག་ཏུ་མེད་པར་འཛིན་པའི་ཕྱིར་རྫུ་འཕྲུལ་གྱི་རྐང་པ་ཐོབ་པར་འགྱུར་བ་དང་། སེམས་ཅན་ཉན་ཐོས་ཀྱི་ཐེག་པའི་ཆོས་ལ་མོས་པ་རྣམས་ལ་ཉན་ཐོས་ཀྱི་ཐེག་པ་སྟོན་པར་འགྱུར་བ་དང་། སེམས་ཅན་རང་སངས་
རྒྱས་ཀྱི་ཐེག་པའི་ཆོས་ལ་མོས་པ་རྣམས་ལ་རང་སངས་རྒྱས་ཀྱི་ཐེག་པ་སྟོན་པར་འགྱུར་བ་དང་། སེམས་ཅན་ཐེག་པ་ཆེན་པོའི་ཆོས་ལ་མོས་པ་རྣམས་ལ། སངས་རྒྱས་ཀྱི་ཐེག་པ་སྟོན་པར་འགྱུར་བ་དང་། ཉན་ཐོས་ཀྱི་ཆོས་རྣམས་ཀྱང་འཚལ་ཅིང་འཆད་ལ་ཉན་ཐོས་ཀྱི་ངེས་

པར་གྱུར་པ་ལ་ཡང་མི་འཇུག་པ་དང་། རང་སངས་རྒྱས་ཀྱི་ཆོས་རྣམས་ཀྱང་འཚལ་ཅིང་འཆད་ལ་རང་སངས་རྒྱས་ཀྱི་ངེས་པར་གྱུར་པ་ལ་ཡང་མི་འཇུག་པ་དང་། སངས་རྒྱས་ཀྱི་ཆོས་རྣམས་ཀྱང་འཚལ་ཅིང་འཆད་ལ་ཤིན་ཏུ་ཡོངས་སུ་མྱ་ངན་ལས་འདས་པ་ཡང་ཐོབ་པར་མི་བགྱིད་
པ་དང་། ཉན་ཐོས་ཀྱི་ཁ་དོག་དང་། གཟུགས་དང་། རྟགས་དང་། ཆ་བྱད་རྣམས་ཀྱང་སྟོན་ལ་བྱང་ཆུབ་ཀྱི་སེམས་དང་ཡང་མི་འབྲལ་བ་དང་། རང་སངས་རྒྱས་ཀྱི་ཁ་དོག་དང་། གཟུགས་དང་། རྟགས་དང་། ཆ་བྱད་རྣམས་ཀྱང་སྟོན་ལ་སངས་རྒྱས་ཀྱི་ཐུགས་རྗེ་ཆེན་པོ་དང་ཡང་མི་འབྲལ་བ་
དང་། ས་བཅུའི་སྟོབས་བསྐྱེད་པ་དང་ལྡན་པའི་ཕྱིར་སྒྱུ་མ་ལྟ་བུའི་ཏིང་ངེ་འཛིན་གྱིས་ངེས་པར་བྱུང་བས་དེ་བཞིན་གཤེགས་པའི་གཟུགས་དང་། ཁ་དོག་དང་། ཆ་བྱད་ཀྱང་སྟོན་པ་དང་། སྲིད་པ་ཐ་མ་དང་ལྡན་པས་དགའ་ལྡན་གྱི་གནས་རབ་ན་གནས་པར་ཡང་གདའ་བ་དང་། དགེ་བའི་རྩ་བའི་སྟོབས་
བསྐྱེད་པའི་ཕྱིར་མངལ་དུ་འཇུག་པ་དང་། བཙས་པ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བདུད་འདུལ་བ་དང་། བྱང་ཆུབ་ཀྱི་སྙིང་པོ་ཡང་སྟོན་པ་དང་། ཤེས་རབ་ཀྱི་སྟོབས་བསྐྱེད་པའི་ཕྱིར་བྱང་ཆུབ་ཀྱང་རྣམ་པར་འཚང་རྒྱ་བ་དང་། གསོལ་བ་གདབ་པ་དང་། ཆོས་ཀྱི་འཁོར་ལོ་
བསྐོར་བ་ཡང་སྟོན་པ་ནས་ཡེ་ཤེས་ཀྱི་སྟོབས་བསྐྱེད་པའི་ཕྱིར་སངས་རྒྱས་ཀྱི་ཡོངས་སུ་མྱ་ངན་ལས་འདའ་བའི་བར་དུ་ཡང་ཡོངས་སུ་སྟོན་པ་དང་། ཏིང་ངེ་འཛིན་གྱི་སྟོབས་བསྐྱེད་པའི་ཕྱིར་ལུས་འཇིག་པར་ཡང་སྟོན་པ་དང་། སྨོན་ལམ་གྱི་སྟོབས་བསྐྱེད་པའི་ཕྱིར། དམ་པའི་ཆོས་རབ་ཏུ་འཇིག་པར་
འགྱུར་བ་ཡང་སྟོན་པའི་ཏིང་ངེ་འཛིན་དེ་གང་ཡང་མཆིས་སམ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་གང་ལ་གནས་ན་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པ་རྣམ་པར་སྤྲུལ་པ་ཡང་སྟོན་ཅིང་གཟུགས་སུ་མཐོང་བ་ཐམས་ཅད་ཀྱང་སྟོན་ལ། ཤིན་
ཏུ་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་ཡང་མི་འགྱུར་བའི་ཏིང་ངེ་འཛིན་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་ལེགས་སོ་ལེགས་

སོ། །ཡང་བློ་གྲོས་བརྟན་པ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བ་དང་། ད་ལྟར་དང་། མ་འོངས་པའི་བྱང་ཆུབ་སེམས་དཔའ་རྣམས་ཡོངས་སུ་
གཟུང་བའི་ཕྱིར་ཞུགས་ཏེ། བློ་གྲོས་བརྟན་པ་ཁྱོད་དེ་བཞིན་གཤེགས་པ་ལ་དོན་དེ་ཞུ་བར་སེམས་པ་ལེགས་སོ། །ལེགས་སོ། །འདི་ལྟར་བློ་གྲོས་བརྟན་པ་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ།
ཐེག་པ་ཆེན་པོ་འདི་ལ་ཡོངས་སུ་སྦྱང་བ་བྱས་པ། ཐེག་པ་ཐམས་ཅད་ཀྱི་ངེས་པར་འབྱུང་བའི་ལམ་རྣམས་སུ་ངེས་པར་བྱུང་བ། བདུད་དང་། ཉོན་མོངས་པ་དང་། ཕྱིར་རྒོལ་བ་བཅོམ་པ། ཆོས་ལ་ཕན་གདགས་པའི་ཕྱིར་སངས་རྒྱས་ཀྱི་ཆོས་ལ་རང་དབང་ཡོད་པའི་ཡེ་ཤེས་དང་ལྡན་པ། བྱང་ཆུབ་
སེམས་དཔའི་ཡེ་ཤེས་ཡང་དག་པར་འཛིན་དུ་འཇུག་པ། བྱང་ཆུབ་སེམས་དཔའ་ཡོངས་སུ་སྡུད་པ། སངས་རྒྱས་ཐམས་ཅད་ཀྱི་ཆོས་ཀྱི་མཛོད་འཛིན་པའོ། །འདི་ལྟར་བློ་གྲོས་བརྟན་པ་ཁྱོད་ནི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ལ་ཞུ་བ་ཞུས་པའི་ལུང་བསྟན་པ་ཚར་
ཕྱིན་པའོ། །བློ་གྲོས་བརྟན་པ་ངས་ནི་སྐྱེས་བུ་དམ་པ་ཁྱོད་ལྟ་བུ་ཐེག་པ་ཆེན་པོ་ལ་ཡང་དག་པར་ཞུགས་པ་གོ་ཆ་ཆེན་པོ་བགོས་པ་མ་གཏོགས་པར་འཁོར་འདི་ན། ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་
ཆེན་པོའམ། མིའམ་མི་མ་ཡིན་པའམ། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པའམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་ཡང་རུང་སྟེ། གང་དེ་བཞིན་གཤེགས་པ་ལ་དོན་འདི་འདྲི་ནུས་པ་དེ་མ་མཐོང་ངོ་། །བློ་གྲོས་བརྟན་པ་དེའི་ཕྱིར་ལེགས་པར་རབ་ཏུ་ཉོན་ལ་
ཡིད་ལ་ཟུང་ཤིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་གང་དང་ལྡན་ན་ཡོན་ཏན་གྱི་བྱེ་བྲག་དེ་དག་དང་དེ་བས་ཀྱང་ཤིན་ཏུ་ཆེས་ཁྱད་པར་དུ་འཕགས་པ་གཞན་དག་ཀྱང་ཐོབ་པར་འགྱུར་བའི་ཏིང་ངེ་འཛིན་དེ་ངས་ཁྱོད་ལ་བསྟན་ཏོ། །བཅོམ་ལྡན་འདས་ལེགས་སོ་ཞེས་གསོལ་ནས།

བྱང་ཆུབ་སེམས་དཔའ་བློ་གྲོས་བརྟན་པ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ཅེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དག་ཏིང་ངེ་འཛིན་དེ་ལ་
གནས་ན། སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པ་རྣམ་པར་སྤྲུལ་པ་ཡང་སྟོན་ལ་ཤིན་ཏུ་ཡོངས་སུ་མྱ་ངན་ལས་འདའ་བར་ཡང་མི་འགྱུར། གཟུགས་སུ་སྟོན་པ་ཐམས་ཅད་ཀྱང་སྟོན་ལ་གཟུགས་ཀྱི་དེ་བཞིན་ཉིད་ལས་ཆོས་རྣམས་འཁྲུགས་པར་ཡང་མི་བྱེད། སངས་རྒྱས་ཀྱི་
ཞིང་ཐམས་ཅད་དུ་ཡང་འགྲོ་ལ་སངས་རྒྱས་ཀྱི་ཞིང་སྣ་ཚོགས་སུ་འདུ་ཤེས་པ་ཡང་མེད། སངས་རྒྱས་ཐམས་ཅད་དང་ཕྲད་པར་ཡང་འགྱུར་ལ་ཆོས་ཀྱི་དབྱིངས་ཐ་དད་པར་ཡང་མི་བྱེད། སྤྱོད་པ་ཐམས་ཅད་དུ་ཡང་སྣང་ལ་དེ་དག་ལ་སྤྱོད་པ་ཡོངས་སུ་དག་པ་ཡང་ཤེས། ལྷ་དང་མི་ཐམས་ཅད་ཀྱི་བདག་
པོ་ཡང་ཡོངས་སུ་འཛིན་ལ་དེ་དག་རྒྱགས་ཤིང་བག་མེད་པར་འགྱུར་བའང་མི་སྐྱེད། བདུད་ཀྱི་ཡུལ་ཐམས་ཅད་ཀྱང་སྟོན་ལ་བདུད་ཀྱི་ལས་ལ་གནས་པ་ཡང་མ་ཡིན། ཁམས་གསུམ་ཐམས་ཅད་དུ་ཡང་སྤྱོད་ལ་ཆོས་ཀྱི་དབྱིངས་ཀྱི་རང་བཞིན་ཤེས་པ་ལས་ཀྱང་མི་གཡོ། འཆི་བར་ཡང་མི་འགྱུར།
སྐྱེ་བར་ཡང་མི་འགྱུར། འགྲོ་བ་ཐམས་ཅད་དུ་ཡང་སྐྱེ་ལ་འགྲོ་བ་སྣ་ཚོགས་སུ་འདུ་ཤེས་པ་ཡང་མ་ཡིན། ཆོས་ཀྱི་ཚིག་རབ་ཏུ་དབྱེ་བ་ཐམས་ཅད་ཀྱང་སྟོན་ལ་ཡི་གེ་མཉམ་པ་ཉིད་དང་། ཆོས་ཀྱི་ཚུལ་རྟོགས་པ་ལས་ཀྱང་མི་གཡོ། གཅིག་ཏུ་མཉམ་པར་ཡང་བཞག་ལ་སེམས་ཅན་ཡོངས་སུ་སྨིན་
པར་བྱེད་པར་སྤྱོད་པར་ཡང་སྣང་ལ་མི་ཟད་པ་དང་མི་སྐྱེ་བ་ལ་བཟོད་པ་དང་ཡང་ལྡན་པ་ཆོས་རྣམས་ཀྱི་སྐྱེ་བ་དང་། འགོག་པ་ཡང་རྣམ་པར་འཇོག །ཐམས་ཅད་དུ་མ་ཞུམ་པའི་ཕྱིར་སེང་གེའི་རྩལ་གྱིས་ཀྱང་འགྲོ་ཞིང་འཇིག་རྟེན་པ་དང་འཇིག་རྟེན་ལས་འདས་པའི་བྱ་བ་ཐམས་ཅད་ན་ཡང་སྣང་ལ་པད་མ་བཞིན་
དུ་མི་ཆགས་པའི་ཕྱིར་རྟག་ཏུ་ཆོས་ཀྱི་ཀུན་དགའ་མཆོག་ལ་དགའ་ཞིང་མོས་པར་ཡང་འགྱུར་རོ། །དེ་ནས་ཉན་ཐོས་ཆེན་པོ་དེ་དག་དང་། བརྒྱ་བྱིན་དང་། ཚངས་པ་དག་དང་། འཇིག་རྟེན་སྐྱོང་བ་དག་དང་། ལྷའི་བུ་དག་དང་། ཐམས་ཅད་དང་ལྡན་པའི་འཁོར་དེ་འདི་སྙམ་དུ་སེམས་ཏེ། བདག་

ཅག་གིས་དཔའ་བར་འགྲོ་བའི་ཏིང་ངེ་འཛིན་གྱི་མིང་ཙམ་ཡང་སྔོན་མ་ཐོས་ན། རྒྱ་ཆེར་རྣམ་པར་ཕྱེ་ཞིང་བཤད་པ་ལྟ་ཅི་སྨོས་ཏེ། གང་བདག་ཅག་གིས་དཔའ་བར་འགྲོ་བའི་ཏིང་ངེ་འཛིན་གྱི་མིང་ཐོས་པས་ན་བདག་ཅག་གིས་རྙེད་པ་ལེགས་པར་རྙེད་དོ། །བདག་ཅག་འཁོར་འདིར་ལེགས་པར་འོངས་སོ། །བདག་
ཅག་གིས་དེ་བཞིན་གཤེགས་པ་ལེགས་པར་མཐོང་ངོ་། །བྱང་ཆུབ་སེམས་དཔའི་ཐེག་པ་བའི་རིགས་ཀྱི་བུའམ། རིགས་ཀྱི་བུ་མོ་གང་དག་དཔའ་བར་འགྲོ་བའི་ཏིང་ངེ་འཛིན་རྣམ་པར་ཕྱེ་སྟེ་བཤད་པ་འདི་ཐོས་ནས་མོས་ཤིང་ཡིད་ཆེས་ལ་དད་པ་དེ་དག་ཐེ་ཚོམ་མེད་པར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ཕྱིར་མི་ལྡོག་པར་འགྱུར་ན། གང་དག་ཐོས་ནས་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་སྟོན་པ་དང་། དེ་བཞིན་ཉིད་དུ་ནན་ཏན་བྱེད་པ་ལྟ་ཅི་སྨོས་སྙམ་མོ། །དེ་ནས་བརྒྱ་བྱིན་དག་དང་། ཚངས་པ་དག་དང་།
འཇིག་རྟེན་སྐྱོང་བ་དག་དང་། ལྷའི་བུ་དེ་དག་འདི་སྙམ་དུ་སེམས་ཏེ། གང་བདག་ཅག་གིས་དེ་བཞིན་གཤེགས་པ་ལ་མཆོད་པ་བྱ་བའི་ཕྱིར་ཁྲི་གང་ལ་བཞུགས་ནས། དེ་བཞིན་གཤེགས་པ་དཔའ་བར་འགྲོ་བའི་ཏིང་ངེ་འཛིན་འདི་སྟོན་པའི་ཆོས་ཀྱི་ཁྲི། སྐྱེས་བུ་དམ་པའི་ཁྲི། བཀོད་པ་ཆེན་
པོའི་ཁྲི། ཆོས་ཀྱི་འཁོར་ལོ་ཆེན་པོ་བསྐོར་བའི་ཁྲིའི་སེང་གེའི་ཁྲི་ངེས་པར་བཤམ་པར་བྱའོ་སྙམ་མོ། །ཁྲི་དེ་ལ་དེ་བཞིན་གཤེགས་པ་བཞུགས་ནས་དཔའ་བར་འགྲོ་བའི་ཏིང་ངེ་འཛིན་འདི་འཆད་པར་འགྱུར་རོ་སྙམ་མོ། །དེ་ནས་ལྷའི་བུ་རེ་རེ་ཞིང་ཡང་བདག་ནི་དེ་བཞིན་གཤེགས་པའི་སེང་
གེའི་ཁྲི་ཤོམ་གྱི་གཞན་ནི་མ་ཡིན་ནོ་སྙམ་མོ། །དེ་ནས་ལྷའི་བུ་དག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་གིས་དེ་བཞིན་གཤེགས་པ་ལ་མཆོད་པ་བྱ་བའི་ཕྱིར་རང་རང་གིས་སེང་གེའི་ཁྲི་སྣ་ཚོགས་པ། བལྟ་ན་སྡུག་པ། འཕང་མཐོ་བ། རྒྱ་ཆེ་བ། ཡངས་
པ། རས་བཅོས་བུ་བརྒྱ་སྟོང་དུ་མ་བཏིང་བ། སྟེང་གི་བར་སྣང་ལས་རིན་པོ་ཆེའི་གདུགས་དང་། རྒྱལ་མཚན་དང་། དྲ་བས་གཡོགས་པ། ཁོ་ར་ཁོར་ཡུག་ཏུ་རིན་པོ་ཆེའི་སྟེགས་བུས་བསྐོར་བ། གཡས་གཡོན་དུ་རིན་པོ་ཆེའི་ཤིང་ལྗོན་པ་དུ་མས་བརྒྱན་པ། དར་གྱི་ལྡ་ལྡི་བྲེས་པ།

མུ་ཏིག་གི་ཕྲེང་བ་དཔྱངས་པ། གདུགས་དང་། རྒྱལ་མཚན་དང་། བ་དན་སྒྲེང་བ། བླ་རེ་བྲེས་པ། གསེར་གྱི་དྲིལ་བུ་གཡེར་ཁའི་དྲ་བས་གཡོགས་པ། མེ་ཏོག་སྣ་ཚོགས་བཀྲམ་པ། གསེར་དང་། དངུལ་དང་། མུ་ཏིག་དང་། ནོར་བུས་བརྒྱན་པ། རྣམ་པ་ཐམས་
ཅད་ཀྱི་མཆོག་དང་ལྡན་པའི་རྒྱན་གྱི་བཀོད་པས་ལེགས་པར་བརྒྱན་པ། གསེར་ཕྱེ་བཀྲམ་པ། ལྷའི་ཙན་དན་དང་། སྤོས་དང་། ཕྲེང་བ་དང་། ཕྱེ་མ་དང་། བྱུག་པ་དང་། སྤོས་ཐམས་ཅད་ཀྱིས་བསྒོས་པ། མེ་ཏོག་སྣ་ཚོགས་གཏོར་བ། སྙིང་པོ་དམ་པ་དང་ལྡན་པའི་པོག་ཕོར་ནས་བདུག་པ་
བཤམས་པར་གྱུར་ཏེ། དེ་ལྟར་དེའི་སྐད་ཅིག་ཐང་ཅིག་ཡུད་ཙམ་ལ་དེ་བཞིན་གཤེགས་པ་ལ་མཆོད་པའི་ལས་བྱ་བའི་ཕྱིར་སེང་གེའི་ཁྲི་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བཤམས་པར་གྱུར་ཀྱང་འཁོར་དང་ས་ཆེན་པོ་ལ་སྒྲིབ་པར་ཡང་མི་བྱེད། ལྷའི་བུ་གཅིག་གིས་ལྷའི་བུ་ཅིག་ཤོས་ཀྱི་
ཁྲི་བཤམས་པ་ཡང་མ་མཐོང་སྟེ། ལྷའི་བུ་རེ་རེ་ཞིང་ཡང་བདག་གིས་བཅོམ་ལྡན་འདས་ཀྱི་སེང་གེའི་ཁྲི་བཤམས་པས་བདག་གི་སེང་གེའི་ཁྲི་ལ་དེ་བཞིན་གཤེགས་པ་བཞུགས་ཏེ། དཔའ་བར་འགྲོ་བའི་ཏིང་ངེ་འཛིན་འདི་འཆད་པར་ཤེས་སོ། །དེ་ནས་བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་དག་དང་། དེ་མ་ཡིན་པའི་ལྷའི་བུ་གཞན་དག་གིས་ཀྱང་བཅོམ་ལྡན་འདས་ཀྱི་སེང་གེའི་ཁྲི་བཤམས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་སེང་གེའི་ཁྲི་འདི་ཉིད་ལ་བཞུགས་ཏེ། དཔའ་བར་འགྲོ་བའི་ཏིང་ངེ་འཛིན་འདི་བཤད་དུ་
གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས། སེང་གེའི་ཁྲི་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་ལ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་མངོན་པར་སྤྲུལ་ནས། སེང་གེའི་ཁྲི་དེ་དག་ཐམས་ཅད་
ལ་དེ་བཞིན་གཤེགས་པ་དག་བཞུགས་པར་སྣང་བ་དེ་འདྲ་བའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་ནས། དེ་ན་ལྷའི་བུ་རེ་རེ་ཞིང་བདག་བདག་གི་སེང་གེའི་ཁྲི་དེ་ཉིད་ལ་དེ་བཞིན་གཤེགས་པ་བཞུགས་པར་མཐོང་གི་ཕན་ཚུན་དུ་གཅིག་གིས་གཅིག་གི་ཁྲི་ནི་མ་མཐོང་སྟེ། དེ་ནི་བརྒྱ་བྱིན་རེ་རེ་

ཞིང་བརྒྱ་བྱིན་གཉིས་པ་ལ་ཀྱེ་གྲོགས་པོ་དེ་བཞིན་གཤེགས་པ་ཁོ་བོའི་སེང་གེའི་ཁྲི་ལ་བཞུགས་ཀྱིས་ལྟོས་ཤིག་ཅེས་སྟོན་ཏོ། །གཉིས་པ་ཡང་གསུམ་པ་ལ་ཀྱེ་གྲོགས་པོ་དེ་བཞིན་གཤེགས་པ་ཁོ་བོའི་སེང་གེའི་ཁྲི་ལ་བཞུགས་ཀྱིས་ལྟོས་ཤིག་ཅེས་སྨྲའོ། །དེ་བཞིན་དུ་བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་དེ་དག་ཐམས་ཅད་དང་། ལྷ་དེ་དག་ཐམས་ཅད་ཀྱང་ཕན་ཚུན་གཅིག་ལ་གཅིག་ཀྱེ་གྲོགས་པོ་དག་དེ་བཞིན་གཤེགས་པ་ཁོ་བོའི་སེང་གེའི་ཁྲི་ལ་བཞུགས་ཀྱིས་ལྟོས་ཤིག་ཅེས་སྟོན་ཏོ། །དེ་ན་རེ་རེ་ཞིང་ཡང་རེ་རེ་དག་ལ་དེ་བཞིན་གཤེགས་པ་དཔའ་བར་འགྲོ་བའི་ཏིང་ངེ་འཛིན་འཆད་པ་
ཁོ་བོའི་སེང་གེའི་ཁྲི་ལ་བཞུགས་ཀྱི་ཁྱོད་ཀྱི་ལ་ནི་མ་ཡིན་ནོ་ཞེས་དེ་སྐད་ཅེས་སྨྲའོ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་དང་། ལྷའི་བུ་དེ་དག་གདུལ་བའི་དབང་དང་དཔའ་བར་འགྲོ་བའི་ཏིང་ངེ་འཛིན་འདི་ཡང་བརྩམ་པ་ཙམ་བསྟན་པ་དང་། ཐེག་
པ་ཆེན་པོ་ཡང་ཡོངས་སུ་བསྡུ་བ་བསྟན་པའི་ཕྱིར་དེའི་ཚེ་ཅི་ནས་ཀྱང་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་དང་། ལྷའི་བུ་དེ་དག་གིས་སེང་གེའི་ཁྲི་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་ལ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བཞུགས་
པར་མཐོང་བ་དེ་ལྟ་བུའི་ལྟས་བསྟན་ཏོ། །དེ་ན་འཁོར་དེ་དག་ཐམས་ཅད་ངོ་མཚར་དུ་གྱུར་ནས་བདག་བདག་གི་སྟན་དེ་དག་ལས་ལངས་ཏེ། ཐམས་ཅད་ཀྱིས་ཐལ་མོ་སྦྱར་ནས་དེ་བཞིན་གཤེགས་པ་ལ་ཕྱག་འཚལ་ཏེ། ཚིག་འདི་སྐད་ཅེས་ལེགས་སོ་ལེགས་སོ། །འདི་ལྟར་དེ་བཞིན་གཤེགས་
པས་ལྷའི་བུ་འདི་དག་གི་བསམ་པ་ཡོངས་སུ་རྫོགས་པར་མཛད་པ་ནི་ངོ་མཚར་ཏེ། སངས་རྒྱས་བཅོམ་ལྡན་འདས་རྣམས་ཀྱི་ཡུལ་བསམ་གྱིས་མི་ཁྱབ་བོ་ཞེས་སྨྲས་སོ། །དེ་ལྟར་ལྷའི་བུ་ཇི་སྙེད་ཀྱིས་སངས་རྒྱས་ཀྱི་སེང་གེའི་ཁྲི་བཤམས་པ་དེ་དག་ཐམས་ཅད་ཀྱིས་དེ་བཞིན་གཤེགས་པའི་
རྣམ་པར་འཕྲུལ་པའི་ཆོ་འཕྲུལ་འདི་ལྟ་བུ་འདི་མཐོང་ནས། ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཚིག་འདི་སྐད་ཅེས། བཅོམ་ལྡན་འདས་བདག་ཅག་ནི་དེ་བཞིན་གཤེགས་པ་ལ་མཆོད་པ་བགྱི་བ་དང་། སེམས་ཅན་ཐམས་ཅད་ཀྱི་སྡུག་

བསྔལ་ཞི་བར་བགྱི་བ་དང་། དམ་པའི་ཆོས་ཡོངས་སུ་གཟུང་བ་དང་། སངས་རྒྱས་ཀྱི་ཚུལ་རྒྱུན་མི་འཆད་པར་བགྱི་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཇི་ལྟར་ད་ལྟར་ན། བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་འཕྲུལ་པ་དེ་བཞིན་དུ་བདག་ཅག་ཀྱང་མ་འོངས་པའི་དུས་ན་སངས་རྒྱས་ཀྱི་ཡུལ་ལ་གནས་ཏེ། རྣམ་པར་འཕྲུལ་པར་བགྱིའོ། །དེ་ནས་བཅོམ་ལྡན་འདས་ཀྱིས་ལྷའི་བུ་དེ་དག་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ། །
ལེགས་སོ། །ལྷའི་བུ་དག་དེ་དེ་བཞིན་ནོ། །ལྷའི་བུ་དག་ཇི་སྐད་སྨྲས་པ་དེ་བཞིན་ཏེ། གང་སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བ་དང་། དམ་པའི་ཆོས་ཡོངས་སུ་གཟུང་བ་དང་། སངས་རྒྱས་ཀྱི་ཚུལ་རྒྱུན་མི་ཆད་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་པ་དེ་ནི་དེ་བཞིན་གཤེགས་པ་ལ་མཆོད་པའི་དམ་པ་ཡིན་ནོ། །དེ་ནས་ཚངས་པའི་འཁོར་དེའི་ནང་ནས་ཚངས་པ་མཉམ་པ་ཉིད་ལ་གནས་པ་ཞེས་བྱ་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་ཡང་དག་པ་གང་བདག་གི་སེང་གེའི་ཁྲི་ལ་བཞུགས་པ་
ལགས་སམ། གང་གཞན་གྱི་སེང་གེའི་ཁྲི་ལ་བཞུགས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚངས་པ་མཉམ་པ་ཉིད་ལ་གནས་པ་ལ་འདི་སྐད་ཅེས་བཀའ་སྩལ་ཏོ། །ཚངས་པ་ཆོས་ཐམས་ཅད་ནི་བདག་པོ་མེད་པའི་ཕྱིར་སྒྱུ་མ་ལྟ་བུར་བྱུང་བ། རྣམ་པར་སྒྲུབ་
པས་ཉེ་བར་གནས་པའི་མཚན་ཉིད་བྱེད་པ་མེད་པ་ཡོངས་སུ་རྟོགས་པ་ལས་བྱུང་བ་སྟེ། དེ་དག་ནི་ཇི་ལྟ་ཇི་ལྟར་འདོད་པ་དེ་ལྟ་དེ་ལྟར་རྣམ་པར་སྒྲུབ་བོ། །ཚངས་པ་དེ་བཞིན་གཤེགས་པ་འདི་དག་ཐམས་ཅད་ནི་ཡང་དག་པ་མ་ཡིན་ནོ། །ཚངས་པ་ཇི་ལྟར་ན་དེ་བཞིན་གཤེགས་པ་འདི་དག་ཐམས་
ཅད་ཡང་དག་པ་མ་ཡིན་ཞེ་ན། འདི་དག་ནི་བདེན་པ་མ་ཡིན་ཏེ། འདི་དག་ནི་མི་བདེན་པས་ན་དེའི་ཕྱིར་འདི་དག་ནི་ཡང་དག་པ་མ་ཡིན་ནོ། །བྱུང་བ་མ་ཡིན། འབྱུང་བར་འགྱུར་བ་ཡང་མ་ཡིན་པས་ན། དེའི་ཕྱིར་འདི་དག་ནི་ཡང་དག་པ་མ་ཡིན་ནོ། །འདི་དག་ནི་འབྱུང་བ་ཆེན་པོས་མ་

བསྡུས་པས་ན་དེའི་ཕྱིར་འདི་དག་ནི་ཡང་དག་པ་མ་ཡིན་ནོ། །འདི་དག་ནི་ཕུང་པོས་མ་བསྡུས། ཁམས་ཀྱིས་མ་བསྡུས། སྐྱེ་མཆེད་ཀྱིས་མ་བསྡུས་པས་ན། དེའི་ཕྱིར་འདི་དག་ནི་ཡང་དག་པ་མ་ཡིན་ནོ། །འདི་དག་ནི་ཡང་དག་པ་མ་ཡིན། སྐྱེས་པ་མ་ཡིན། བྱུང་བ་མ་ཡིན་པས་ན། དེའི་
ཕྱིར་འདི་དག་ནི་ཡང་དག་པ་མ་ཡིན་ནོ། །འདི་དག་ནི་ཡང་དག་པ་མ་ཡིན་ཏེ། ཐོག་མ་ཇི་ལྟ་བར་ཐ་མར་ཡང་དེ་བཞིན། བར་དུ་ཡང་དེ་བཞིན་པས་ན་དེའི་ཕྱིར་འདི་དག་ནི་ཡང་དག་པ་མ་ཡིན་ནོ། །ཚངས་པ་དེ་བཞིན་གཤེགས་པ་འདི་དག་ཐམས་ཅད་ནི་མཉམ་པ་སྟེ་ཁྱད་པར་མེད་དོ། །གསོལ་
པ། བཅོམ་ལྡན་འདས་ཅིའི་སླད་དུ་ན་དེ་བཞིན་གཤེགས་པ་འདི་དག་ཐམས་ཅད་མཉམ་སྟེ་ཁྱད་པར་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་དེ་བཞིན་གཤེགས་པ་འདི་དག་ནི་གཟུགས་ཀྱི་དེ་བཞིན་ཉིད་ཀྱིས་མཉམ། ཚོར་བ་དང་། འདུ་ཤེས་དང་། འདུ་
བྱེད་དང་། རྣམ་པར་ཤེས་པའི་དེ་བཞིན་ཉིད་ཀྱིས་མཉམ་པས་ན་དེའི་ཕྱིར་འདི་དག་ནི་མཉམ་མོ། །ཚངས་པ་དེ་བཞིན་གཤེགས་པ་འདི་དག་ཐམས་ཅད་ནི་ཐོག་མའི་མཐའི་དེ་བཞིན་ཉིད་ཀྱིས་མཉམ། ཐ་མའི་མཐའི་དེ་བཞིན་ཉིད་ཀྱིས་མཉམ། ད་ལྟར་བྱུང་བའི་དེ་བཞིན་ཉིད་ཀྱིས་མཉམ་མོ། །
ཚངས་པ་དེ་བཞིན་གཤེགས་པ་འདི་དག་ནི་སྒྱུ་མའི་ཆོས་ཀྱི་དེ་བཞིན་ཉིད་ཀྱིས་མཉམ། མིག་ཡོར་གྱི་ཆོས་ཀྱི་དེ་བཞིན་ཉིད་ཀྱིས་མཉམ་པས་ན། དེའི་ཕྱིར་འདི་དག་ནི་མཉམ་མོ། །ཚངས་པ་དེ་བཞིན་གཤེགས་པ་འདི་དག་ནི་མ་འོངས་པའི་དེ་བཞིན་ཉིད་ཀྱིས་མཉམ། ད་ལྟར་བྱུང་བའི་དེ་བཞིན་
ཉིད་ཀྱིས་མཉམ། མ་ཆགས་པའི་དེ་བཞིན་ཉིད་ཀྱིས་མཉམ་པས་ན་དེའི་ཕྱིར་འདི་དག་ནི་མཉམ་པ་ཞེས་བྱའོ། །ཆོས་ཐམས་ཅད་གང་དང་མཉམ་པ་འདི་དག་ཀྱང་དེ་དང་མཉམ། སེམས་ཅན་ཐམས་ཅད་གང་དང་མཉམ་པ་འདི་དག་ཀྱང་དེ་དང་མཉམ། སངས་རྒྱས་ཐམས་ཅད་གང་དང་མཉམ་
པ་འདི་དག་ཀྱང་དེ་དང་མཉམ། སངས་རྒྱས་ཀྱི་ཞིང་ཐམས་ཅད་གང་དང་མཉམ་པ་འདི་དག་ཀྱང་དེ་དང་མཉམ་པས་ན་ཚངས་པ་དེ་བཞིན་གཤེགས་པ་འདི་དག་ནི་མཉམ་པ་ཉིད་ལས་མི་འདའ་སྟེ། དེའི་ཕྱིར་འདི་དག་ནི་མཉམ་མོ། །ཚངས་པ་དེ་བས་ན་དེ་བཞིན་གཤེགས་པ་འདི་དག་ནི་མཉམ་

པ་ཉིད་ལས་མ་འདས་ཏེ། དེའི་ཕྱིར་འདི་དག་ནི་མཉམ་མོ། །ཚངས་པ་དེ་ལྟ་བས་ན་དེ་ལྟར་དེ་བཞིན་གཤེགས་པས་ཆོས་ཐམས་ཅད་མཉམ་པར་མངོན་པར་རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཆོས་ཐམས་ཅད་ཀྱི་མཉམ་པ་ཉིད་ལ་གནས་པ་ཞེས་བྱའོ། །
དེ་ནས་བཅོམ་ལྡན་འདས་ལ་ཚངས་པ་མཉམ་པ་ཉིད་ལ་གནས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་དེ་ལྟར་ཆོས་ཐམས་ཅད་ཀྱི་མཉམ་པ་ཉིད་མངོན་པར་རྫོགས་པར་སངས་རྒྱས་ལ། གཟུགས་ཀྱི་སྐུ་ཡོངས་སུ་གྲུབ་པ་ཡང་སེམས་ཅན་རྣམས་ལ་སྟོན་པ་
ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ་དེ་ནི་སྔོན་དཔའ་བར་འགྲོ་བའི་ཏིང་ངེ་འཛིན་སྦྱངས་པའི་ཁྱད་པར་ཡིན་ཏེ། དེའི་ཕྱིར་དེ་བཞིན་གཤེགས་པ་དེ་ལྟར་ཆོས་ཐམས་ཅད་ཀྱི་མཉམ་པ་ཉིད་མངོན་པར་རྫོགས་པར་སངས་རྒྱས་ནས། གཟུགས་ཀྱི་སྐུ་ཡོངས་སུ་
གྲུབ་པ་ཡང་སེམས་ཅན་རྣམས་ལ་སྟོན་ཏོ། །དེ་བཞིན་གཤེགས་པ་ལ་བལྟ་བ་བསྟན་པ་འདི་བཤད་པ་ན། ཚངས་པ་མཉམ་པ་ཉིད་ལ་གནས་པས་ཆོས་ལ་རྗེས་སུ་འཐུན་པའི་བཟོད་པ་ཐོབ་བོ། །ལྷའི་བུ་ཁྲིས་ཀྱང་ཆོས་ལ་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། །དེ་ནས་བཅོམ་ལྡན་
འདས་ཀྱིས་དེ་འདྲ་བའི་རྫུ་འཕྲུལ་བསྡུས་ནས། དེ་བཞིན་གཤེགས་པའི་སྐུ་དེ་དག་ཐམས་ཅད་མི་སྣང་བར་བྱས་པ་དང་། འཁོར་དེ་དག་ཐམས་ཅད་ཀྱིས་དེ་བཞིན་གཤེགས་པ་གཅིག་པུ་མཐོང་ངོ་། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་བརྟན་པ་ལ་བཀའ་སྩལ་
པ། བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ནི་བྱང་ཆུབ་སེམས་དཔའ་ས་དང་པོ་ལ་གནས་པས་མི་འཐོབ། ས་གཉིས་པ་ལ་གནས་པས་མ་ཡིན། ས་གསུམ་པ་ལ་གནས་པས་མ་ཡིན། ས་བཞི་པ་ལ་གནས་པས་མ་ཡིན། ས་ལྔ་པ་ལ་གནས་པས་མ་ཡིན། ས་
དྲུག་པ་ལ་གནས་པས་མ་ཡིན། ས་བདུན་པ་ལ་གནས་པས་མ་ཡིན། ས་བརྒྱད་པ་ལ་གནས་པས་མ་ཡིན། བྱང་ཆུབ་སེམས་དཔའ་ས་དགུ་པ་ལ་གནས་པས་མི་འཐོབ་ཀྱི། བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ནི་བྱང་ཆུབ་སེམས་དཔའ་ས་བཅུ་པ་ལ་གནས་པས་

འཐོབ་བོ། །བློ་གྲོས་བརྟན་པ་དེ་ལ་དཔའ་བར་འགྲོ་བའི་ཏིང་ངེ་འཛིན་དེ་གང་ཞེ་ན། འདི་ལྟ་སྟེ། ནམ་མཁའི་ཁམས་བཞིན་དུ་སེམས་བསྐྱེད་པ་ཤིན་ཏུ་ཡོངས་སུ་སྦྱང་བ་བྱས་པ་དང་། སེམས་ཅན་ཐམས་ཅད་ཀྱི་སེམས་ལ་རྟོག་པ་མངོན་སུམ་དུ་གྱུར་པ་དང་། སེམས་ཅན་ཐམས་ཅད་ཀྱི་དབང་པོ་
མཆོག་དང་། མཆོག་མ་ཡིན་པ་ཤེས་པ་དང་། གནས་དང་གནས་མ་ཡིན་པ་ལ་རྣམ་པར་ལྟ་བ་མངོན་སུམ་དུ་གྱུར་པ་དང་། ལས་རྣམ་པར་འབྱེད་པ་ཐམས་ཅད་ལ་ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་དང་། མོས་པ་སྣ་ཚོགས་ལ་འཇུག་པ་མི་བརྗེད་པ་དང་། ཁམས་སྣ་ཚོགས་
དང་། ཁམས་དུ་མ་དག་མངོན་སུམ་དུ་གྱུར་པ་དང་། ཚངས་པའི་དབྱངས་དང་། ཏིང་ངེ་འཛིན་གྱིས་རྣམ་པར་རྩེ་བ་དང་། རྡོ་རྗེ་ལྟ་བུའི་ཏིང་ངེ་འཛིན་མཐོང་ཞིང་ཤེས་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་གཅིག་ཏུ་གྱུར་པ་དང་། ཐམས་ཅད་དུ་འགྲོ་བའི་ལམ་
ཤེས་པས་རྣམ་པར་ལྟ་བ་དང་། སྔོན་གྱི་གནས་རྗེས་སུ་དྲན་པའི་ཤེས་པ་ལ་སྒྲིབ་པ་མེད་པ་དང་། ལྷའི་མིག་ཐོགས་པ་མེད་པས་མཐོང་བ་དང་། ཟག་པ་ཟད་པར་བྱ་བ་དང་། སྤང་བར་བྱ་བའི་ཕྱིར་དུས་གཅིག་ཏུ་འཐོབ་པ་ཤེས་པ་དང་། གཟུགས་དང་གཟུགས་མེད་པའི་མཉམ་པ་ཉིད་ལ་
འཇུག་པ་ཤེས་པ་དང་། གཟུགས་ཐམས་ཅད་སྟོན་ཅིང་རྣམ་པར་འཕྲུལ་པས་རྣམ་པར་རྩེ་བ་དང་། སྒྲ་སྐད་ཐམས་ཅད་བྲག་ཅའི་སྒྲ་དང་མཉམ་པ་དང་། དབྱངས་ཀྱི་ཡན་ལག་རྣམ་པར་དག་པ་དང་། གཟུངས་ལ་འཇུག་པ་ཤེས་པ་དང་། སེམས་ཅན་ཐམས་ཅད་ལེགས་པར་བཤད་པས་
ཚིམ་པར་བྱེད་པ་དང་། སོ་སོ་ཅི་རིགས་པར་ཆོས་འཆད་པ་དང་། དུས་དང་དུས་མ་ཡིན་པ་ལ་རྣམ་པར་ལྟ་བ་དང་། དབང་པོ་འགྱུར་བ་ཤེས་པ་དང་། ཆོས་འཆད་པ་དོན་མེད་པ་མ་ཡིན་པ་དང་། ཡང་དག་པའི་མཐའ་ལ་འཇུག་པ་ཤེས་པ་དང་། སེམས་ཅན་ཐམས་ཅད་རབ་ཏུ་གཟུང་
བ་དང་། ཚར་གཅད་པ་ལ་མཁས་པ་ཤེས་པ་དང་། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པ་དང་། སྤྱོད་ལམ་མ་བརྟགས་པ་དང་། རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་ཐམས་ཅད་ཡང་དག་པར་བཅོམ་པ་དང་། ཆོས་ཀྱི་དབྱིངས་ཐ་མི་དད་

པ་མཉམ་པའི་ངོས་ལ་འཇུག་པ་ཤེས་པ་དང་། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་སྐད་ཅིག་གིས་ལུས་སྟོན་པ་དང་། དེ་བཞིན་གཤེགས་པ་ཐམས་ཅད་ཀྱིས་ཆོས་བཤད་པ་འཛིན་ཅིང་མི་བརྗེད་པ་དང་། མིག་ཡོར་ལྟ་བུའི་ལུས་འཇིག་རྟེན་གྱི་ཁམས་ཐམས་
ཅད་དུ་རྣམ་པར་འཕྲུལ་པ་དང་། ཐེག་པ་ཐམས་ཅད་ཀྱི་ངེས་པར་འབྱུང་བ་སྟོན་པ་ལ་མཁས་པ་དང་། ཐེག་པ་ཆེན་པོ་ལས་མི་ཉམས་པ་དང་། དཀོན་མཆོག་གསུམ་གྱི་རིགས་འཛིན་པ་དང་། ཕྱི་མའི་མཐའི་མུར་ཐུག་པའི་བསྐལ་པར་གོ་ཆ་སྲ་ཞིང་ཡོངས་སུ་མི་སྐྱོ་བ་དང་། སྐྱེ་བའི་གནས་
ཐམས་ཅད་དུ་ཅི་རིགས་པར་བྱེད་པར་སྟོན་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ཤེས་པ་ལ་མཁས་པ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡེ་ཤེས་ཀྱིས་གཏིང་དཔག་དཀའ་བ་དང་། དབྱངས་ཀྱི་ཡན་ལག་ཐམས་ཅད་མངོན་པར་སྒྲུབ་པ་བསྟན་པ་ཤེས་
པ་དང་། ཆོས་ཐམས་ཅད་ལས་མངོན་པར་འཕགས་པའི་གནས་ཤེས་པ་དང་། བསྐལ་པ་གཅིག་ཏུ་བསྐལ་པ་གྲངས་མེད་པ་འཇུག་པ་དང་། བསྐལ་པ་གྲངས་མེད་པ་ལ་བསྐལ་པ་གཅིག་འཇུག་པ་དང་། ཞིང་ཐམས་ཅད་དུ་ཞིང་གཅིག་ཡང་དག་པར་འདུ་ཞིང་འཇུག་པ་དང་། ཞིང་
གཅིག་ལ་ཞིང་ཐམས་ཅད་སྟོན་པ་ཤེས་པ་དང་། སྐྲའི་ཁྱོན་གཅིག་ལ་སངས་རྒྱས་ཀྱི་ཞིང་བསམ་གྱིས་མི་ཁྱབ་པའི་འདུ་ཤེས་སུ་གྱུར་པ་འཇུག་པ་ཤེས་པ་དང་། སེམས་ཅན་གཅིག་གི་ལུས་ལ་སེམས་ཅན་ཐམས་ཅད་ཀྱི་ལུས་ཡང་དག་པར་འདུ་ཞིང་འཇུག་པ་ཤེས་པ་དང་། སངས་
རྒྱས་ཀྱི་ཞིང་ཐམས་ཅད་ནམ་མཁའ་དང་མཉམ་པ་ཉིད་དུ་རྟོགས་པ་དང་། རང་གི་ལུས་ལ་སངས་རྒྱས་ཀྱི་ཞིང་མ་ལུས་པ་ཐམས་ཅད་རྒྱས་པར་འགེངས་པ་དང་། རང་གི་ལུས་ལུས་ཐམས་ཅད་ཀྱི་རྗེས་སུ་འཇུག་པ་དང་། ཆོས་ཐམས་ཅད་མཚན་ཉིད་མེད་པར་རྟོགས་པ་ལ་མཁས་པ་
དང་། ཐབས་ཐམས་ཅད་ལ་མཁས་པ་དང་། ཐབས་ཐམས་ཅད་ལ་མཁས་པའི་བྱ་བ་ཤེས་པ་དང་། སྒྲ་སྐད་གཅིག་ཕྱུང་བས་ཆོས་ཀྱི་དབྱིངས་ཐམས་ཅད་དུ་གྲགས་པ་དང་། ཚིག་གཅིག་ལ་བརྩམས་ནས་བསྐལ་པ་གྲངས་མེད་པར་འཆད་པ་དང་། ཆོས་ཐམས་ཅད་སངས་

རྒྱས་ཀྱི་ཆོས་སུ་རྟོགས་པ་དང་། ཆོས་ཀྱི་ཚིག་རབ་ཏུ་དབྱེ་བ་ཐམས་ཅད་བསྟན་པ་ལ་མཁས་པ་ཤེས་པ་དང་། འགྲེ་བ་དང་འགྲེ་བ་མ་ཡིན་པ་ལ་མཁས་པ་ཤེས་པས་རྣམ་པར་དཔྱོད་པ་དང་། ཟུང་གི་རིམ་པ་དང་། སྣྲེལ་ཞིའི་རྒྱུད་བསྟན་པ་ཤེས་པ་དང་། བདུད་ཀྱི་ལས་ཐམས་ཅད་ལས་ཡང་
དག་པར་འདའ་བ་ཤེས་པ་དང་། ཐབས་ཆེན་པོ་ལ་མཁས་པས་ཤེས་རབ་དང་། ཡེ་ཤེས་ཀྱི་འོད་ཟེར་གཏོང་བ་དང་། ལུས་དང་། ངག་དང་། ཡིད་ཀྱི་ལས་ཡེ་ཤེས་སྔོན་དུ་འགྲོ་བ་དང་། མངོན་པར་འདུ་མི་བྱེད་པའི་རྫུ་འཕྲུལ་མངོན་དུ་གྱུར་ཅིང་ཐོབ་པ་དང་། སོ་སོ་ཡང་དག་པར་རིག་པ་
བཞིས་སེམས་ཅན་གྱི་ཁམས་ཐམས་ཅད་ཚིམ་པར་བྱེད་པ་དང་། ཆོས་ཀྱི་དབྱིངས་ཐམས་ཅད་ཀྱིས་ཀླས་པར་རྣམ་པར་འཕྲུལ་པ་སྟོན་པ་དང་། བསྡུ་བའི་དངོས་པོ་བཞིས་སེམས་ཅན་ཐམས་ཅད་ཡོངས་སུ་འཛིན་པ་དང་། འཇིག་རྟེན་གྱི་ཁམས་ཐམས་ཅད་དུ་སེམས་ཅན་གྱི་ཐ་སྙད་
ཐམས་ཅད་རྟོགས་པ་དང་། སྒྱུ་མ་ལྟ་བུའི་ཆོས་སྒྲུབ་པ་ལ་ཐེ་ཚོམ་མེད་པ་དང་། སྐྱེ་བ་ཐམས་ཅད་ལ་དབང་ཐོབ་པ་ཡོངས་སུ་རྫོགས་པ་དང་། ཡོ་བྱད་ལ་དབང་ཐོབ་པ་དང་། སེམས་ཅན་ཐམས་ཅད་བསམ་པ་བཞིན་དུ་ཚིམ་པར་བྱེད་པ་དང་། ཚུལ་ཁྲིམས་འཆལ་པ་དང་། ཚུལ་ཁྲིམས་
དང་ལྡན་པ་ལ་སྦྱིན་གནས་སུ་སེམས་མཉམ་པ་དང་། བྱང་ཆུབ་སེམས་དཔའི་གསང་བ་ཐམས་ཅད་ཐོབ་པ་དང་། འཇིག་རྟེན་གྱི་ཁམས་ཐམས་ཅད་དུ་འོད་ཟེར་གཏོང་བ་དང་། ཐམས་ཅད་མཁྱེན་པའི་རྒྱ་མཚོ་དུག་ཅན་པ་གཏིང་དཔག་དཀའ་བ་ཤེས་པ་དང་། སེམས་ས་དང་། ཆུ་དང་།
མེ་དང་། རླུང་དང་། མཉམ་པ་དང་། ཚིག་བསྟན་པ་ཐམས་ཅད་ལ་ཆོས་ཀྱི་འཁོར་ལོ་སྐོར་བ་དང་། དེ་བཞིན་གཤེགས་པའི་ས་ལ་འཇུག་པ་དང་། མ་བསྟན་པར་རང་གིས་བཟོད་པ་དང་། ཡེ་ཤེས་ཐོབ་པ་དང་། རིན་པོ་ཆེ་ལྟ་བུའི་སེམས་བསྐྱེད་པས་ཀུན་ནས་ཉོན་མོངས་པ་ཐམས་
ཅད་ཀྱི་དྲི་མས་མི་གོས་པ་དང་། སྤུ་གཅིག་གི་ཁུང་བུར་ཆུའི་ཕུང་པོ་ཐམས་ཅད་ཆུད་པར་བྱེད་ལ། ཆུ་ན་གནས་པའི་སེམས་ཅན་ལ་ཡང་གནོད་པར་མི་འགྱུར་བ་དང་། དགེ་བའི་རྩ་བ་ཚད་མེད་པའི་བསོད་ནམས་སྩོགས་པའི་སྙིང་པོ་ཡོངས་སུ་བསྔོ་བ་ལ་མཁས་པའི་བྱ་བ་ཤེས་པ་དང་།

སེམས་ཅན་ཐམས་ཅད་ཀྱི་སྤྱོད་པ་དང་། འཕྲུལ་པ་ལ་ཡེ་ཤེས་ཐོགས་པ་མེད་པ་དང་། སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་བྱང་ཆུབ་པ་ལ་དབུགས་འབྱིན་པ་ཐོབ་པ་དང་། རང་གི་ལུས་ཀྱི་སྨོན་ལམ་གྱིས་སེམས་ཅན་འཛིན་པའི་སྤྱོད་པའི་གནས་རྒྱུན་མ་
བཅད་པ་ཀུན་ཏུ་སྟོན་པ་དང་། སངས་རྒྱས་ཐམས་ཅད་ཀྱི་སྤྱོད་ཡུལ་ལ་འཇུག་པ་དང་། དེ་བཞིན་གཤེགས་པའི་ཡེ་ཤེས་ལ་རྣམ་པར་ལྟ་བ་མངོན་སུམ་དུ་གྱུར་པ་དང་། དེ་བཞིན་གཤེགས་པའི་གསང་བ་ལ་འཇུག་པ་དང་། རྩེ་བ་དང་། དགའ་བ་དང་། ལོངས་སྤྱོད་ཐམས་ཅད་ཀུན་ཏུ་སྟོན་
པ་དང་། སེམས་ཞི་ཞིང་རབ་ཏུ་ཞི་ལ་ཉེ་བར་ཞི་བ་དང་། ཐོས་པ་ཚད་མེད་པ་འཛིན་པ་རྫོགས་པ་དང་། ཐོས་པ་ཐམས་ཅད་ཀྱི་ནན་ཏན་རྒྱུན་མི་གཅོད་པ་དང་། འཇིག་རྟེན་གྱི་བྱ་བ་རྣམ་པ་སྣ་ཚོགས་ཀྱི་རྗེས་སུ་འཇུག་པ་དང་། འཇིག་རྟེན་གྱི་ཆོས་ཐམས་ཅད་ཀྱིས་མི་གོས་པ་དང་། བསྐལ་
པ་གྲངས་མེད་པ་སྔ་དྲོ་གཅིག་ཏུ་བྱིན་གྱིས་རློབ་ཅིང་ཆོས་འཆད་པ་དང་། སྤྱོད་ལམ་ཐམས་ཅད་དུ་ལྐུགས་པ་དང་། གྲུམ་པོ་དང་། རྣ་བ་མི་གསང་བ་དང་། གླེན་པ་དང་། འོན་པ་དང་། ལོང་བ་སྟོན་ཅིང་སེམས་ཅན་ཡོངས་སུ་སྨིན་པར་བྱེད་པ་དང་། ལྕེའི་དབང་པོས་སངས་རྒྱས་ཀྱི་ཞིང་མ་ལུས་པ་
ཐམས་ཅད་ཁེབས་པར་བྱེད་པ་དང་། སངས་རྒྱས་མེད་པའི་འཇིག་རྟེན་གྱི་ཁམས་སུ་སངས་རྒྱས་འབྱུང་བ་སྟོན་པ་དང་། ལག་ན་རྡོ་རྗེ་འབུམ་རྟག་ཏུ་ཕྱི་བཞིན་དུ་འབྲང་བ་དང་། སངས་རྒྱས་ཐམས་ཅད་ཀྱི་བྱང་ཆུབ་རང་བྱུང་གི་ཡེ་ཤེས་ལ་རྣམ་པར་ལྟ་བ་མངོན་སུམ་དུ་གྱུར་པ་དང་། རྟག་པར་འདུ་
ཤེས་པའི་སེམས་ཅན་རྣམས་ལ་སྲེག་པའི་བསྐལ་པ་སྟོན་པ་དང་། ཚེའི་ཚད་བསྐལ་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བྱིན་གྱིས་རློབ་པ་དང་། སེམས་ཀྱིས་སྐད་ཅིག་ཐང་ཅིག་ཡུད་ཙམ་ལ་སངས་རྒྱས་ཀྱི་ཞིང་ཐམས་ཅད་སྟོན་ཅིང་འགྲོ་བ་ཤེས་པ་དང་། ཉན་ཐོས་དང་། རང་སངས་
རྒྱས་ཐམས་ཅད་ཀྱི་སྤྱོད་ལམ་སྟོན་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་གཅོད་པ་དང་། ཞི་ཞིང་རབ་ཏུ་ཞི་ལ་ཉེ་བར་ཞི་བ་དང་། མཚན་མ་མེད་པ་ལ་གནས་པ་དང་། སིལ་སྙན་དང་། ཕེག་རྡོབ་པ་དང་། རོལ་མོའི་སྒྲ་དབྱངས་འབྱིན་པ་དང་། དེ་བཞིན་གཤེགས་པ་

ཐམས་ཅད་ལ་བལྟ་བ་དང་། བསྙེན་བཀུར་བྱ་བ་དང་། མཆོད་པར་བྱ་བ་རྒྱུན་མི་གཅོད་པ་དང་། ཐོས་པ་དང་། མཐོང་བ་དང་། ཕྱག་བྱ་བ་དང་། འདོད་པ་དང་། འགྲོ་བ་དང་། བསྟེན་པ་དང་། རྗེས་སུ་དྲན་པར་བྱས་ཏེ། སེམས་ཅན་མཐའ་ཡས་པ། ཚད་མེད་པ། ཡོངས་སུ་སྨིན་
པར་བྱེད་པ་དང་། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་གདུལ་བའི་སེམས་ཅན་ཇི་ལྟར་ཡོངས་སུ་སྨིན་པ་ལ་མངོན་པར་རྫོགས་པར་བྱང་ཆུབ་པ་དང་། རྣམ་པར་གྲོལ་བ་སྟོན་པ་དང་། བྱང་ཆུབ་སེམས་དཔའ་དག་མངལ་དུ་འཇུག་པ་དང་། བཙས་པ་དང་། མངོན་པར་འབྱུང་བ་དང་།
དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་འགྲོ་བ་དང་། བདུད་འདུལ་བ་དང་། བྱང་ཆུབ་མངོན་པར་རྫོགས་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདའ་བ་ཆེན་པོ་དང་། ལུས་འཇིག་པ་ཡང་སྟོན་ལ་བྱང་ཆུབ་སེམས་དཔའི་ཆོས་ཉིད་དེ་ཡང་མི་གཏོང་
ཞིང་ཤིན་ཏུ་ཕུང་པོ་མེད་པར་ཡང་མྱ་ངན་ལས་མི་འདའ་བ་འདི་ནི་བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ཅེས་བྱ་སྟེ། འདི་ནི་དཔའ་བར་འགྲོ་བའི་ཏིང་ངེ་འཛིན་གྱི་ཡུལ་ལོ། །གཞན་ཡང་དཔག་ཏུ་མེད་པ་དག་ཡོད་དོ། །དེ་ལ་འདི་སྐད་ཅེས་བྱ་སྟེ། ཇི་ལྟར་ནམ་མཁའ་དག་གྱུར་
ཅིང་། །རྡུལ་གྱིས་གོས་པར་མི་འགྱུར་བཞིན། །དཔའ་འགྲོ་ཏིང་འཛིན་གནས་པ་ཡང་། །ཡིད་ནི་དེ་ལྟར་སྒོམ་པར་བྱེད། །གང་ཕྱིར་ལུས་ཅན་ཐམས་ཅད་ཀྱི། །རྣམ་པར་བཅས་པའི་སེམས་ཤེས་པ། །དེས་ན་འདི་ནི་བདག་ཉིད་ཆེ། །དེ་ཡི་མཚན་མར་རབ་ཏུ་ཤེས། །དཔའ་འགྲོ་
རྟོགས་པར་ཁོང་ཆུད་པས། །སེམས་ཅན་དག་གི་དབང་པོ་རྣམས། །རྣོ་བ་དག་དང་རྟུལ་བ་དང་། །གནས་དང་གནས་མ་ཡིན་པ་ཤེས། །ལུས་ཀུན་རྣམ་པར་ཕྱེ་བ་དང་། །རྣམ་པར་སྨིན་པ་སྣ་ཚོགས་དང་། །སེམས་ཅན་རྣམས་ཀྱི་མོས་པ་ཡང་། །བདེ་གཤེགས་སྲས་དེས་ཤེས་
པར་འགྱུར། །སེམས་ཅན་ཁམས་ནི་མཁས་པ་ལ། །དེ་ནི་ཆགས་པར་འགྱུར་བ་མེད། །གང་ཕྱིར་དེ་ཡིས་མི་རྨོངས་པས། །ཚངས་དབྱངས་ཏིང་འཛིན་ཤེས་པར་འགྱུར། །རྡོ་རྗེ་སྙིང་པོའི་ཏིང་ངེ་འཛིན། །སྲ་བ་དེས་ནི་ཤེས་གྱུར་ནས། །ཏིང་ངེ་འཛིན་ལ་མཉམ་བཞག་སྟེ། །ལག་ན་

འདུག་བཞིན་མཐོང་བར་འགྱུར། །ཆོས་རྣམས་ཀུན་གྱི་ལམ་གྱུར་པ། །ཐམས་ཅད་དུ་ནི་གང་འགྲོ་བའི། །དམ་པ་ཐུབ་པས་བཤད་པ་སྟེ། །དེ་དག་འདིས་ནི་རྟོགས་པར་འགྱུར། །དེ་ནས་དེ་ཡི་སྔོན་གྱི་གནས། །ཤེས་པ་ལ་ནི་འཇུག་པར་འགྱུར། །ལྷ་མིག་དྲི་མ་མེད་པ་ཡིས། །
འགྲོ་བ་དག་ནི་མཐོང་བར་འགྱུར། །ཟག་པ་དག་ནི་ཟད་བྱས་ཀྱང་། །མཁས་དེ་མྱ་ངན་འདའ་མི་བྱེད། །གཟུགས་ཡོད་པ་དང་གཟུགས་མེད་པའི། །མཚན་ཉིད་གཅིག་པ་མཉམ་པ་ཤེས། །ཇི་ལྟར་སྒྱུ་མའི་མཁན་པོ་དག །སྣ་ཚོགས་རྣམ་པར་རྩེ་བ་ལྟར། །དཔའ་བོ་དེས་ནི་གཟུགས་
ཀུན་ཀྱང་། །ཏིང་ངེ་འཛིན་གྱིས་རིམ་གྱིས་སྟོན། །སྒྲ་ཀུན་གྱི་ནི་མཉམ་པ་ཉིད། །བྲག་ཅ་ལྟ་བུ་རྣམ་དག་དང་། །སེམས་ཅན་ཀུན་གྱི་སྐད་རྣམས་ཀྱང་། །སྐད་ཅིག་ཙམ་གྱིས་དེས་ཤེས་སོ། །གཟུངས་དང་ཡེ་ཤེས་ལྡན་པས་ན། །སྐད་ཀྱི་བྱེད་ལ་མྱུར་དུ་འཇུག །སྒྲ་དབྱངས་ཀྱི་ནི་ཐོག་མའི་
མཐའ། །ཇི་ལྟ་བཞིན་དུ་རྟོགས་པར་འགྱུར། །རྡུལ་མེད་དྲན་དང་བློ་གྲོས་ཀྱིས། །ཐུབ་པ་གཤེགས་པར་མྱུར་དུ་འཇུག །ལེགས་བཤད་པས་ནི་སེམས་ཅན་ལ། །སྡིག་པ་མེད་པ་ཡིད་དགའ་བྱེད། །སེམས་ཅན་རྣམས་ལ་ཅི་རིགས་པར། །དགྲ་བཅོམ་པ་ནི་ཆོས་འཆད་དེ། །མི་ཡི་དུས་
དང་དུས་མ་ཡིན། །བློས་ནི་རྣམ་པར་རྟོག་པར་བྱེད། །ཇི་ལྟར་དབང་པོ་རྣམས་འབྱུང་བ། །དེ་ལྟ་ཉིད་དུ་ཕྱི་ཕྱིར་ཞིང་། །ཆོ་ག་བཞིན་དུ་ཤེས་གྱུར་ནས། །བརྟན་པ་དམ་པ་དོན་ཡོད་སྟོན། །ཡང་དག་མཐའ་ནི་ཕྲ་བ་ཉིད། །ནད་དང་བྲལ་བས་རྟོགས་པར་འགྱུར། །སེམས་ཅན་བསྡུ་དང་ཚར་གཅད་
ལ། །དུས་རྣམས་ཀུན་ཏུ་མཁས་པར་འགྱུར། །རྟོག་དང་རྣམ་པར་རྟོག་ཀུན་བཅོམ། །ཀུན་ཏུ་རྟོག་པས་མ་བསྒྲིབས་པ། །ཕ་རོལ་ཕྱིན་པའི་ཕ་རོལ་ཐོབ། །སྤྱོད་ལམ་ལ་ནི་མི་རྟོག་གོ། །ཆོས་དབྱིངས་འདྲེས་པ་མེད་པ་ཡང་། །ཡེ་ཤེས་ཀྱིས་ནི་རྟོགས་པར་འགྱུར། །སངས་རྒྱས་གང་དག་
ཕྱོགས་བཞུགས་པ། །སྐད་ཅིག་ཏུ་ཡང་ཀུན་ཏུ་སྣང་། །དེ་བཞིན་གཤེགས་པ་ཐམས་ཅད་ཀྱི། །ཆོས་བསྟན་གང་དག་ཅི་ཡོད་པ། །དེ་ཀུན་ཤེས་རབ་ལྡན་པས་ལེན། །རྨོངས་པ་དག་ཏུ་འགྱུར་བ་མེད། །མིག་ཡོར་ལྟ་བུའི་ལུས་རྣམས་ཀྱིས། །ཞིང་ཀུན་དུ་ཡང་སྣང་བར་འགྱུར། །

ནད་མེད་ཐེག་པ་ཐམས་ཅད་པ། །བློ་ལྡན་སངས་རྒྱས་བཞིན་དུ་འཆད། །བརྟུལ་ཞུགས་བརྟན་པར་གྱུར་པ་དེ། །ཐེག་ཆེན་དེ་ལས་མི་ཉམས་ཏེ། །དཀོན་མཆོག་གསུམ་རིགས་གནས་བྱའི་ཕྱིར། །དེ་ལྟར་རྣམ་པ་གསུམ་དུ་འཆད། །ཕྱི་མའི་མཐར་ནི་གོ་བགོས་ཀྱང་། །དེ་ནི་སྐྱོ་བར་མི་འགྱུར་ཏེ། །
སྙིང་རྗེ་ལས་ནི་བྱུང་བ་སྟེ། །སེམས་ཅན་རིས་ནི་ཀུན་ན་སྣང་། །ཤིན་ཏུ་བློ་དང་ལྡན་པ་ཡིས། །སྐྱེ་བའི་མཚན་ཉིད་ཀུན་བསྟན་ཏེ། །མཁས་པས་སེམས་ཅན་ཐམས་ཅད་ནི། །མྱུར་དུ་ཡོངས་སུ་སྨིན་པར་བྱེད། །སེམས་ཅན་ཀུན་གྱི་བསམ་པ་དང་། །སེམས་ཀྱི་སྤྱོད་ཡུལ་ཤེས་པས་ན། །
དེ་བས་དེ་ནི་ཉན་ཐོས་དང་། །ལུས་ཅན་ཀུན་གྱིས་རྟོགས་པར་དཀའ། །གང་དུ་གཉིས་ནི་མེད་པ་དེར། །དབྱངས་ཀྱི་ཡན་ལག་ཀུན་སྒྲུབ་སྒྲུབ། །ཆོས་རྣམས་ཀུན་ལས་འཕགས་ཞི་བ། །གཞལ་ཡས་ཆོས་ནི་སྟོན་པར་བྱེད། །རྣམ་གྲོལ་ཤེས་པ་བསྐལ་གཅིག་ཏུ། །བསྐལ་པ་དུ་མ་སྟོན་པར་
བྱེད། །བསྐལ་པ་རྣམ་པ་དུ་མ་དག །བསྐལ་པ་གཅིག་ཏུ་སྟོན་པར་བྱེད། །ཞིང་ནི་རྣམ་པ་དུ་མ་དག །ཞིང་གཅིག་ཏུ་ནི་སྟོན་པར་བྱེད། །ཞིང་གཅིག་རྣམ་པ་དུ་མ་ཡི། །ཞིང་རྣམས་སུ་ནི་སྟོན་པར་བྱེད། །སྐྲ་ཡི་རྩེ་མོ་གཅིག་ཏུ་ཡང་། །ཞིང་རྣམས་ཐམས་ཅད་སྟོན་པར་བྱེད། །དེ་བཞིན་དུ་ནི་
ལུས་གཅིག་ལ། །སྡིག་མེད་ལུས་ཀུན་སྟོན་པར་བྱེད། །ཞིང་ཀུན་དཔེར་ན་ནམ་མཁའ་བཞིན། །དག་པ་ཉིད་དུ་རྟོགས་པར་འགྱུར། །དེ་ནི་བདག་གི་ལུས་ཀྱིས་ཀྱང་། །ཞིང་རྣམས་ཐམས་ཅད་ཁྱབ་པར་བྱེད། །བདག་གི་ལུས་དང་ཆོས་ཀྱི་དབྱིངས། །དེ་གཉིས་མཉམ་པར་རབ་ཏུ་ཤེས། །ཆོས་
ཀྱི་དབྱིངས་ནི་མཚན་མ་མེད། །སྣང་བ་མེད་པ་ཉིད་དུ་རྟོགས། །སྣ་ཚོགས་ཀྱི་ནི་ཐབས་ལ་མཁས། །སྒྲ་བསམ་མི་ཁྱབ་ནམ་མཁའ་བཞིན། །དོན་རིག་ཚིག་གཅིག་བརྩམས་བྱས་ནས། །བསྐལ་པའི་བར་དུ་འཆད་པར་བྱེད། །སེམས་ཅན་ཆེན་པོ་ཆོས་ཀུན་ལ། །སངས་རྒྱས་ཀྱིས་ནི་ཆོས་
སུ་རྟོགས། །ཚིག་གི་རབ་ཏུ་དབྱེ་བསྟན་ལ། །དེ་ཡི་མཁས་པ་འཇུག་པར་འགྱུར། །རྒྱུད་ཀྱི་རྣམ་པ་སྣ་ཚོགས་པ། །ཟུང་དང་སྣྲེལ་ཞི་སྒྲུབ་པར་བྱེད། །བདུད་ཀྱི་ལམ་ནི་མནན་གྱུར་ནས། །ལུས་ལས་འོད་ཟེར་གཏོང་བར་བྱེད། །དེ་ཡི་ལུས་དང་ངག་ཡིད་ཀྱི། །ལས་ནི་ཡེ་ཤེས་སྔོན་དུ་འགྲོ། །

དེ་ནི་ཚེ་རབས་ཚེ་རབས་སུ། །རྫུ་འཕྲུལ་མངོན་པར་ཐོབ་པར་འགྱུར། །སོ་སོར་རིག་པའི་སྟོབས་བསྐྱེད་པས། །དབང་ལྡན་ཆོས་ཀྱི་དབྱིངས་སུ་ནི། །རྣམ་པར་འཕྲུལ་པ་དུ་མ་བྱེད། །གཡོ་བ་མེད་པའི་གནས་འཆད་དོ། །བསྡུ་བ་རྣམ་པ་བཞི་པོ་ཡིས། །སེམས་ཅན་བུ་གཅིག་བཞིན་དུ་
སྡུད། །དེ་དག་གི་ནི་སྨྲ་བ་དང་། །སྒྲ་དང་སྐད་ཀྱང་ཤེས་པར་འགྱུར། །དེས་ནི་སྒྱུ་མ་འདྲ་བའི་ཆོས། །བྱིན་གྱིས་བརླབས་ནས་རྣམ་པར་འཕྲུལ། །སེམས་ཅན་ཐམས་ཅད་སྐྱེ་བར་གནས། །ནམ་མཁའ་ལྟ་བུར་སྣང་བར་འགྱུར། །རྣམ་ཐོས་བུ་ནི་ཇི་བཞིན་དུ། །ཡོ་བྱད་ཀུན་ལྡན་ཕྱུག་ཐོབ་ནས། །
སེམས་ཅན་རྣམས་ཀྱི་འདོད་པ་ཡི། །བསམ་པ་ཐམས་ཅད་རྫོགས་པར་བྱེད། །ཚུལ་ཁྲིམས་འཆལ་དང་ཁྲིམས་ལྡན་ལ། །དེ་ཡི་སེམས་ནི་དེ་ཚེ་མཉམ། །སངས་རྒྱས་རྣམས་ཀྱི་གསང་བ་ཡང་། །གང་ཟག་དམ་པས་ཤེས་པར་འགྱུར། །འོད་ཟེར་དྲ་བ་བྱས་ནས་ཀྱང་། །འཇིག་རྟེན་ཁམས་རྣམས་
ཁྱབ་བྱེད་དེ། །ཤེས་རབ་ལྡན་པས་གཏིང་དཔག་དཀའ། །རྒྱ་མཚོ་ཆེན་པོ་ཆུ་ལྡན་བཞིན། །ས་ཆུ་མེ་དང་མཚུངས་པ་དང་། །རླུང་དང་ནམ་མཁའ་འདྲ་བའི་ཡིད། །དེ་ནི་རྟག་པར་སེམས་ཅན་ལ། །སྙིང་བརྩེ་བ་ཡི་ཕྱིར་འཇུག་གོ། །སྲིད་པ་སེལ་བ་དེ་ཡིས་ནི། །མི་སྐྱེ་དམ་པའི་བཟོད་ཐོབ་ནས། །
ནོར་བུ་རིན་ཆེན་དག་པ་ལྟར། །དེ་བཞིན་ཉོན་མོངས་མི་གོས་སོ། །སྤུ་ཡི་ཁུང་བུ་གཅིག་ཏུ་ནི། །ཆུ་ཡི་ཕུང་པོ་ཀུན་འཇུག་ཅིང་། །བསྐལ་པ་ཆེན་པོ་རྣམ་པར་རྩེ། །དགེ་བ་ཕུན་སུམ་ཚོགས་པར་བྱེད། །ཡོངས་སུ་བསྔོ་བར་བྱ་བ་ལ། །དེ་ཡི་ཤེས་པ་མི་རྨོངས་ཏེ། །སེམས་ཅན་རྣམས་ཀྱི་སྤྱོད་
ཤེས་ནས། །འཕྲུལ་པ་ཆེན་པོ་བྱེད་པར་འགྱུར། །ཆོས་ཀུན་རྟོགས་པར་བྱ་བའི་ཕྱིར། །དེ་ཡི་སེམས་ནི་རྟག་པར་འཇུག །ལུས་ནི་སྦྱངས་ཤིང་རྡུལ་མེད་དེ། །མྱ་ངན་བྲལ་བ་སེར་སྣ་མེད། །སེམས་ཅན་རྣམས་ནི་གང་ལས་སྐྱེ། །དེ་ནི་སྨད་པ་མེད་པས་ཤེས། །སངས་རྒྱས་རྣམས་ཀྱི་
སྤྱོད་ཡུལ་ཡང་། །སྨྲ་བའི་མཆོག་གིས་རབ་ཏུ་ཤེས། །དེ་བཞིན་གཤེགས་པས་གང་མཁྱེན་པ། །དེ་ཀུན་ལ་ནི་རྟོག་པར་བྱེད། །སངས་རྒྱས་རྣམས་ཀྱི་གསང་བ་ཀུན། །དེས་ནི་རྗེས་སུ་རྟོགས་པར་འགྱུར། །གང་ཡང་རྩེ་དང་དགའ་བ་དག །དེ་དག་ཐམས་ཅད་དེས་སྟོན་ཏེ། །

ཐོས་པ་དག་ནི་ཚད་མེད་པས། །ཐོས་པ་རྒྱ་མཚོ་ཐོབ་པར་འགྱུར། །ཐོས་པ་ཚོལ་བས་ངོམས་པ་མེད། །འཇིག་རྟེན་ཆོས་དང་འཐུན་འཇུག་པ། །འཇིག་རྟེན་གྱིས་ནི་མི་གོས་ཏེ། །མཚེའུའི་པད་མ་ཇི་བཞིན་ནོ། །དེ་ནི་སྔ་དྲོ་གཅིག་ཏུ་ཡང་། །བསྐལ་པ་མང་པོ་སྟོན་པར་བྱེད། །བདག་ནི་གླེན་པ་
ལྐུགས་པ་ཡི། །དབྱིབས་དག་ཏུ་ནི་སྟོན་པར་བྱེད། །ལག་ན་རྡོ་རྗེ་སྟོང་དག་དང་། །འགྲོགས་ཤིང་སེམས་ཅན་སྨིན་པར་བྱེད། །རང་བྱུང་བ་ནི་རྟག་ཏུ་ཤེས། །དེ་ཉིད་ལ་ནི་རྟོག་པར་བྱེད། །བསྐལ་པ་བསམ་གྱིས་མི་ཁྱབ་པའི། །ཚེ་ནི་སྐད་ཅིག་གཅིག་ལ་སྟོན། །དེ་ནི་ཉན་ཐོས་རང་རྒྱལ་གྱི། །
བྱེད་པ་དག་ཀྱང་སྟོན་པར་བྱེད། །བྱང་ཆུབ་སེམས་དཔའི་སྤྱོད་པ་ལ། །རྟག་པ་ཁོ་ནར་རྗེས་སུ་འཇུག །སེམས་ཀྱིས་རྟག་ཏུ་ཞི་བ་དང་། །ཉེ་བར་ཞི་ཞིང་ཕུང་པོ་མེད། །སེམས་ཅན་དགའ་བར་བྱེད་པ་ཡི། །སིལ་སྙན་དཀྲོལ་བ་ཀུན་ཀྱང་ཤེས། །སངས་རྒྱས་རྣམས་ལ་ཕྱག་འཚལ་དང་། །
བསྙེན་བཀུར་བྱ་བ་གཏོང་མི་བྱེད། །མཐོང་བ་དང་ནི་ཐོས་པ་ཡིས། །སེམས་ཅན་མང་པོ་སྨིན་པར་བྱེད། །སྐད་ཅིག་ཏུ་ནི་སྣ་ཚོགས་པའི། །སེམས་ཅན་དག་ནི་སྟོན་པར་བྱེད། །དཔའ་བོ་ལ་ལར་བཙས་པ་དང་། །མངོན་པར་འབྱུང་དང་འཆི་བ་སྟོན། །ལ་ལར་ཡོངས་སུ་མྱ་ངན་འདའ། །ལ་ལར་
འཁོར་ལོ་བསྐོར་བའོ། །ལ་ལར་བདུད་རྣམས་རབ་ཏུ་འཇོམས། །ལ་ལར་དཀའ་བ་སྤྱོད་བྱེད་ཀྱང་། །སེམས་ཅན་ཐར་པར་བྱ་བའི་ཕྱིར། །ཤིན་ཏུ་མྱ་ངན་མི་འདའོ། །དཔའ་བར་འགྲོ་བའི་ཏིང་འཛིན་གྱི། །ཡུལ་ནི་འདི་འདྲ་འདི་ཡིན་ཏེ། །གང་གིས་ཏིང་འཛིན་དེ་ཐོབ་པ། །དྲི་མེད་དེ་ལྟར་
རྣམ་པར་རྩེ། །བློ་གྲོས་བརྟན་པ་དེ་ནི་དཔའ་བར་འགྲོ་བའི་ཏིང་ངེ་འཛིན་ཅེས་བྱ་སྟེ། དེ་ཡང་དཔའ་བར་འགྲོ་བའི་ཏིང་ངེ་འཛིན་གྱི་ཡུལ་ཡིན་ནོ། །གཞན་དག་ཀྱང་དཔག་ཏུ་མེད་པ་ཡོད་དོ། །བློ་གྲོས་བརྟན་པ་དེ་ལྟར་ན་དཔའ་བར་འགྲོ་བའི་ཏིང་ངེ་འཛིན་ནི་ཚད་མེད་པ་བསྟན་པའོ། །སངས་རྒྱས་ཐམས་
ཅད་ཀྱི་སྤྱོད་ཡུལ་དང་ཡུལ་བཀོད་པ་སྟོན་པའོ། །སེམས་ཅན་ཐམས་ཅད་ཉེ་བར་འཚོ་བའོ། །འགྲོ་བ་ཐམས་ཅད་ལ་ཕན་འདོགས་པའོ། །བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ནི་བཤད་པ་གཅིག་ཏུ་མི་བལྟ། སྤྱོད་ཡུལ་གཅིག་ཏུ་མ་ཡིན། རྣམ་པ་གཅིག་ཏུ་མ་ཡིན། དམིགས་པ་

གཅིག་ཏུ་མ་ཡིན། དོན་གཅིག་ལས་བྱུང་བར་མི་བལྟའོ། །དེ་ཅིའི་ཕྱིར་ཞེ་ན། བློ་གྲོས་བརྟན་པ་ཏིང་ངེ་འཛིན་ཐམས་ཅད་དང་། སྙོམས་པར་འཇུག་པ་ཐམས་ཅད་དང་། རྣམ་པར་ཐར་པ་ཐམས་ཅད་དང་། རྫུ་འཕྲུལ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་
པའི་ཤེས་པ་དེ་དག་ཐམས་ཅད་ནི་དཔའ་བར་འགྲོ་བའི་ཏིང་ངེ་འཛིན་གྱི་ནང་དུ་འདུས་ཤིང་ཆུད་པར་བལྟའོ། །བློ་གྲོས་བརྟན་པ་འདི་ལྟ་སྟེ། དཔེར་ན་ཆུ་མིག་དང་། མཚེའུ་དང་། རྫིང་དང་། ལྟེང་ཀ་དང་། ཆུ་བྲན་དང་། འབབ་ཆུ་དང་། འབབ་ཆུ་ཆེན་པོ་གང་ཇི་སྙེད་པ་དེ་དག་ནི་རྒྱ་མཚོ་ཆེན་པོར་
འདུས་པར་བལྟའོ། །བློ་གྲོས་བརྟན་པ་དེ་བཞིན་དུ་བྱང་ཆུབ་སེམས་དཔའི་ཏིང་ངེ་འཛིན་དང་། སྙོམས་པར་འཇུག་པ་དང་། རྣམ་པར་ཐར་པ་གང་ཇི་སྙེད་པ་དག་དང་། རྫུ་འཕྲུལ་ཐམས་ཅད་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པའི་ཤེས་པ་དེ་དག་ཐམས་ཅད་ནི་
དཔའ་བར་འགྲོ་བའི་ཏིང་ངེ་འཛིན་གྱི་ནང་དུ་འདུས་པར་བལྟའོ། །བློ་གྲོས་བརྟན་པ་འདི་ལྟ་སྟེ། དཔེར་ན་རྒྱལ་པོའི་དཔུང་གི་ཚོགས་ཡན་ལག་བཞི་པ་ཐམས་ཅད་ནི་དཔའ་བོ་གཡུལ་དུ་འཇུག་པའི་ལག་ཏུ་སོང་ཞིང་དབང་དུ་གྱུར་པ་ཡིན་ཏེ། དཔའ་བོ་གཡུལ་དུ་འཇུག་པ་གང་དང་གང་དུ་
འགྲོ་བ་དེ་དང་དེར་དཔུང་གི་ཚོགས་ཡན་ལག་བཞི་པ་ཡང་འགྲོའོ། །བློ་གྲོས་བརྟན་པ་དེ་བཞིན་དུ་ཏིང་ངེ་འཛིན་གྱི་སྒོའམ། སྙོམས་པར་འཇུག་པའི་སྒོའམ། ཆོས་ལ་གནས་པའི་སྒོའམ། རྣམ་པར་ཐར་པའི་སྒོའམ། གཟུངས་ཀྱི་སྒོའམ། མངོན་པར་ཤེས་པ་དང་། རིག་པ་དང་།
རྣམ་པར་གྲོལ་བའི་སྒོ་གང་ཇི་སྙེད་པ་ཆོས་ལ་གནས་པའི་སྒོ་དེ་དག་ཐམས་ཅད་ནི་དཔའ་བར་འགྲོ་བའི་ཏིང་ངེ་འཛིན་གྱི་ལག་ཏུ་སོང་བ་ཡིན། དབང་དུ་གྱུར་པ་ཡིན། མངོན་དུ་གྱུར་པ་ཡིན་ཏེ། བློ་གྲོས་བརྟན་པ་བྱང་ཆུབ་སེམས་དཔའི་དཔའ་བར་འགྲོ་བའི་ཏིང་ངེ་འཛིན་གང་དང་གང་དུ་འགྲོ་བ་དེ་དང་
དེ་ཉིད་དུ་ཆོས་ལ་གནས་པའི་སྒོ་ཐམས་ཅད་འགྲོའོ། །བློ་གྲོས་བརྟན་པ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་གར་འགྲོ་བ་དེར་རིན་པོ་ཆེ་སྣ་བདུན་ཡང་འགྲོའོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་གར་འགྲོ་བ་དེར་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱང་

འགྲོ་ཞིང་རྗེས་སུ་འབྲང་སྟེ། དེ་བས་ན་དཔའ་བར་འགྲོ་བའི་ཏིང་ངེ་འཛིན་ཅེས་བྱའོ།། །།བམ་པོ་གཉིས་པ། བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་ལོངས་སྤྱོད་བཙལ་ཏེ། སྦྱིན་པ་བགེད་པར་བྱེད་པར་མི་བལྟ་ཡི། བློ་གྲོས་
བརྟན་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རིན་པོ་ཆེ་གང་ཇི་སྙེད་པ་རྒྱ་མཚོ་ཆེན་པོ་ན་ཡོད་པའམ། ལྷའི་གནས་ན་ཡོད་པའམ། ཀླུའི་གནས་ན་ཡོད་པའམ། ས་ཆེན་པོའི་སྟེང་ན་ཡོད་པའམ། གནོད་སྦྱིན་གྱི་ལག་ན་ཡོད་པའམ། མིའི་འཇིག་རྟེན་ན་ཡོད་པའི་རིན་པོ་ཆེ་ཡང་
རུང་། ཟས་དང་། སྐོམ་དང་། གོས་དང་། བཞོན་པ་ཡང་རུང་སྟེ། དེ་དག་ཐམས་ཅད་ལ་དེ་དབང་ཕྱུག་ཏུ་གྱུར་པ་ཡིན། དབང་དུ་གྱུར་པ་ཡིན་ནོ། །གང་ལ་སྦྱིན་པར་འདོད་པ་དེ་ལ་སྦྱིན་པར་བྱེད་དེ། དེ་ཡང་སྔོན་གྱི་བསོད་ནམས་ཀྱིས་ཐོབ་པ་ཡིན་ན། ཡིད་ཀྱིས་རྫུ་འཕྲུལ་སྒྲུབ་པ་ལྟ་ཇི་སྨོས་ཏེ། བློ་
གྲོས་བརྟན་པ་དེ་ནི་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་སྦྱོང་བ་བྱེད་པའི་བྱེ་བྲག་ཏུ་བལྟའོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་ཚུལ་ཁྲིམས་ལེན་
པར་མི་བྱེད་དེ། དེ་ནི་ཚུལ་ཁྲིམས་ཀྱི་ཆོས་ཉིད་ལས་ཀྱང་མི་གཡོ་ལ་སེམས་ཅན་གཞན་གདུལ་བའི་ཕྱིར་ཚུལ་ཁྲིམས་ཀྱང་ལེན་པར་བྱེད། བསླབ་པ་ཡང་ཡོངས་སུ་འཛིན་པར་བྱེད། ཆོ་ག་དང་སྤྱོད་པ་ཡང་སྟོན་ལ་ལྟུང་བ་ལས་བྱུང་བར་ཡང་ཤེས། འཐོལ་བ་དང་། འཆགས་པར་
ཡང་བྱེད་ལ་དེ་ཐམས་ཅད་དུ་ལྟུང་བ་མེད་པའི་ཆོས་དང་ཡང་ལྡན་པ་ཡིན། དེ་སེམས་ཅན་ཡོངས་སུ་སྨིན་པར་བྱ་བའི་ཕྱིར་འདོད་པའི་ཁམས་སུ་སྐྱེ་སྟེ། འཁོར་ལོས་སྒྱུར་བའི་རྒྱལ་པོར་གྱུར་ནས། བུད་མེད་ཀྱི་ཚོགས་ཀྱིས་མདུན་དུ་བདར་ཅིང་། བཙུན་མོའི་འཁོར་གྱི་ནང་དུ་གནས་
ཏེ། འདོད་པ་ལ་ལོངས་སྤྱོད་པར་ཡང་སྣང་ཞིང་། བུ་ཕོ་དང་། བུ་མོ་དང་། ཆུང་མས་གཟིར་བའི་ཁྱིམ་ན་ཡང་གནས་ལ། དེ་ཡང་འདོད་ཆགས་དང་བྲལ་བ། ཏིང་ངེ་འཛིན་གྱི་ཆོས་ཉིད་ལ་གནས་པ། ཚུལ་ཁྲིམས་ཡོངས་སུ་དག་པ། ལེགས་པར་མཐོང་བས་སྲིད་པ་ལ་

སྐྱོན་དུ་ལྟ་བ་ཡིན་ཏེ། བློ་གྲོས་བརྟན་པ་དེ་ནི་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བ་བྱེད་པའི་བྱེ་བྲག་ཏུ་བལྟའོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་འཛིན་ལ་གནས་
པའི་བྱང་ཆུབ་སེམས་དཔའ་ནི་ཤིན་ཏུ་སྐད་ཅིག་པས་བཟོད་པ་ལ་གནས་པ་ཡིན། སེམས་ཅན་ཐམས་ཅད་མ་སྐྱེས་པས་བཟོད་པ་སྒོམ་པར་བྱེད། ཆོས་ཐམས་ཅད་མ་བྱུང་བས་བཟོད་པ་སྒོམ་པར་བྱེད། སེམས་ལ་གཟུགས་མེད་པས་བཟོད་པ་སྒོམ་པར་བྱེད། བདག་ཀུན་ནས་མི་སློང་བས་
བཟོད་པ་སྒོམ་པར་བྱེད། གཞན་མི་དམིགས་པས་བཟོད་པ་སྒོམ་པར་བྱེད། འཁོར་བ་ལ་རློམ་སེམས་མེད་པས་བཟོད་པ་སྒོམ་པར་བྱེད། མྱ་ངན་ལས་འདས་པའི་རང་བཞིན་གྱིས་བཟོད་པ་སྒོམ་པར་བྱེད། རང་བཞིན་གྱིས་དབྱེར་མེད་པས་བཟོད་པ་སྒོམ་པར་བྱེད་དེ། དེ་བཟོད་པ་ཡང་སྒོམ་ལ་
ཆོས་གང་ལ་ཡང་སྒོམ་པར་མི་བྱེད། སྒོམ་པ་དང་བྲལ་བར་ཡང་མི་བྱེད་དོ། །དེ་དེ་ལྟར་བཟོད་པ་ལ་གནས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་འདོད་པའི་ཁམས་སུ་སྐྱེ་སྟེ། གཤེ་བའི་དབང་པོར་ཡང་སྣང་ལ་ཆོས་ཉིད་ཀྱིས་གཤེ་བར་ཡང་མི་བྱེད། གནོད་སེམས་དང་ལྡན་པའི་དབང་
པོར་ཡང་སྣང་ལ་ངོ་བོ་ཉིད་བསྒོམས་པས་གནོད་སེམས་སུ་ཡང་མི་བྱེད། བསྙེན་པར་དཀའ་བར་ཡང་སྣང་ལ་ཆོས་གང་ལ་ཡང་ཉེ་བའམ། རིང་བར་ཡང་མི་གནས། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྤྱོད་ལམ་ཐམས་ཅད་རྣམ་པར་འཁྲུགས་པར་ཡང་བྱེད་ལ། ཆོས་ཀྱི་དབྱིངས་
འཁྲུགས་པར་ཡང་ཡང་དག་པར་རྗེས་སུ་མི་མཐོང་ངོ་། །དེ་ནི་བཟོད་པ་སྨྲ་བ་ཡང་རྗོད་ལ་རྟག་པ་དང་། བརྟན་པ་དང་། ཐེར་ཟུག་དང་མི་འགྱུར་བའི་ཆོས་ཅན་གང་ཡང་མི་བཟོད་དོ། །དེ་དེ་ལྟར་བཟོད་པ་དང་ལྡན་པས་གནོད་སེམས་དང་། ཐ་བ་དང་། ཞེ་སྡང་དང་། ཁྲོ་བ་མང་བའི་སེམས་
ཅན་རྣམས་ལ་གནོད་སེམས་དང་། ཐ་བ་དང་། ཞེ་སྡང་དང་། ཁྲོ་བ་སྤང་བའི་ཕྱིར་བཟོད་པའི་བསྔགས་པ་ཡང་རྗོད་ལ་གནོད་སེམས་དང་། བཟོད་པ་ཡང་མི་དམིགས་ཤིང་། དེ་དུས་ཐམས་ཅད་དུ་མ་སྣང་མ་ཉམས་སོ། །བློ་གྲོས་བརྟན་པ་དེ་ནི་དཔའ་བར་འགྲོ་བའི་ཏིང་ངེ་འཛིན་ལ་

གནས་པའི་བྱང་ཆུབ་སེམས་དཔའི་བཟོད་པ་ཡོངས་སུ་སྦྱོང་བར་བྱེད་པའི་བྱེ་བྲག་ཏུ་བལྟའོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་དགེ་བའི་ཆོས་ཐམས་ཅད་བཙལ་བའི་ཕྱིར་བརྩོན་འགྲུས་ཀྱང་རྩོམ་ལ་ལུས་ཀྱིས་རྟུལ་བ་ཡང་མ་
ཡིན། ངག་དང་སེམས་ཀྱིས་རྟུལ་བ་ཡང་མ་ཡིན་ཏེ། བརྩོན་འགྲུས་རྩོམ་པ་དེ་ཡང་ཇི་ལྟར་ན་བདག་ལ་བལྟས་ཏེ་དེ་བཞིན་ཉིད་དུ་སློབ་ཅིང་དེ་བཞིན་དུ་ནན་ཏན་བྱེད་པར་འགྱུར་སྙམ་ནས། སེམས་ཅན་ལེ་ལོ་ཅན་རྣམས་ཀྱི་ཕྱིར་སྟོན་ཏོ། །དེ་བརྩོན་འགྲུས་ཀྱང་རྩོམ་ལ་ཐམས་ཅད་དུ་རྩོམ་པ་
ཡང་མེད་དོ། །དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའ་དེས་ཆོས་ཀྱི་དབྱིངས་གནས་པ་ཉིད་མ་འོངས་མ་སོང་བ་རྟོགས་པའི་ཕྱིར་རོ། །དེ་དེ་ལྟར་གནས་པས་ལུས་དང་། ངག་དང་། སེམས་དང་བྲལ་བའི་བརྩོན་འགྲུས་ཀྱང་སྟོན་ལ་ཆོས་གང་ཡང་ཡོངས་སུ་གྲུབ་པར་ཡང་མི་མཐོང་
ངོ་། །དེ་བརྩོན་འགྲུས་བརྩམས་པར་ཡང་སྣང་ལ་དེ་ཕྱི་འམ་ནང་གི་ལུས་རྟུལ་བ་ཡང་མེད་དོ། །སངས་རྒྱས་ཀྱི་ཞིང་གྲངས་མེད་པར་འགྲོ་ཞིང་འོང་ཡང་ལུས་ཀྱི་ཆོས་ཉིད་ལས་ཀྱང་མི་གཡོའོ། །དེ་དགེ་བ་ཐམས་ཅད་རྩོམ་པར་ཡང་སྟོན་ལ་དེས་དགེ་བའམ། མི་དགེ་བའི་ཆོས་གང་ཡང་མི་
དམིགས་སོ། །ཐོས་པ་ཡོངས་སུ་ཚོལ་བར་ཡང་སྣང་ལ་དེ་སངས་རྒྱས་ཐམས་ཅད་ཀྱི་བྱང་ཆུབ་ལ་གཞན་གྱི་དྲིང་ལ་མི་འཇོག་པ་ཡང་ཡིན་ནོ། །མཁན་པོ་དང་སློབ་དཔོན་ཡང་ཚོལ་ལ་ལྷ་དང་བཅས་པའི་འཇིག་རྟེན་གྱི་སློབ་དཔོན་ཡང་ཡིན་ནོ། །ཐལ་མོ་སྦྱར་ཏེ་ཆོས་ཀུན་ཆུབ་པར་བྱེད་པར་
ཡང་སྣང་ལ་དེ་ཐོགས་པ་མེད་པའི་སྤོབས་པ་ཡང་ཐོབ་བོ། །གུས་པར་བྱེད་པར་ཡང་སྣང་ལ་དེ་ལ་ལྷ་དང་བཅས་པའི་འཇིག་རྟེན་ཡང་གུས་པར་བྱེད་དོ། །དེ་མངལ་ན་ཉལ་བར་ཡང་སྟོན་ལ་དེ་མངལ་གྱི་དྲི་མ་ཐམས་ཅད་ཀྱིས་ཀྱང་མི་གོས་སོ། །དེ་བཙས་པར་ཡང་སྟོན་ལ་དེས་ཆོས་གང་ཡང་
སྐྱེ་བའམ། འགགས་པར་ཡང་མི་མཐོང་ངོ་། །ཁྱེའུའི་གཟུགས་སུ་ཡང་སྟོན་ལ་དེ་དབང་པོ་ཐམས་ཅད་ཀྱང་ཡོངས་སུ་རྫོགས་སོ། །བཟོའི་གནས་དང་། ལུས་ཀྱི་གནས་དང་། རིག་པ་དང་། སྔགས་ཀྱི་གནས་དང་། རྩི་དང་། སྨན་དང་། ཡི་གེ་དང་། ལག་རྩིས་དང་། གྲངས་

དང་། རྩིས་སློབ་པར་ཡང་སྣང་ལ་དེ་བཟོ་ཐམས་ཅད་ཀྱང་རྟོགས་པར་ཁོང་དུ་ཆུད་དོ། །ན་བར་ཡང་སྟོན་ལ་དེ་ཉོན་མོངས་པའི་ནད་ཐམས་ཅད་དང་ཡང་བྲལ་ལོ། །རྒ་བར་ཡང་སྟོན་ལ་དེ་དབང་པོ་ཐམས་ཅད་ཉམས་པ་ཡང་མེད་དོ། །འཆི་བ་ཡང་སྟོན་ལ་དེ་སྐྱེ་བ་ཡང་མ་ཡིན། འཆི་
བ་ཡང་མ་ཡིན། འཆི་འཕོ་བ་ཡང་མ་ཡིན། འབྱུང་བ་ཡང་མ་ཡིན་ནོ། །བློ་གྲོས་བརྟན་པ་དེ་ལྟར་ན་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་དེ་འདྲ་བའི་བརྩོན་འགྲུས་སྤྱོད་པ་དང་ལྡན་པ་ཡིན་ནོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་
འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་རང་བཞིན་གྱིས་སྙོམས་པར་ཞུགས་པར་ཡང་ཤེས་ལ་ཏིང་ངེ་འཛིན་དང་། བསམ་གཏན་གྱི་སྤྱོད་པ་རྣམ་པར་འབྱེད་པ་ཡང་སྟོན་ཏོ། །དེ་སེམས་ཅན་སེམས་རྣམ་པར་གཡེངས་པ་རྣམས་ཏིང་ངེ་འཛིན་ལ་གཟུད་པའི་ཕྱིར།
བདག་བསམ་གཏན་ལ་གནས་པར་ཡང་སྟོན་ལ་ཆོས་ཀྱི་དབྱིངས་ལ་རྣམ་པར་གཡེངས་པའི་ཆོས་གང་ཡང་མི་མཐོང་ངོ་། །ཆོས་ཀྱི་དབྱིངས་གང་དང་མཉམ་པ་ཆོས་ཐམས་ཅད་ཀྱང་དེ་དང་མཉམ་པར་ཡིད་ལ་ངེས་པར་སེམས་ཤིང་གནས་ལ་དེ་ཏིང་ངེ་འཛིན་དང་། སེམས་རྩེ་གཅིག་པ་ལས་ཀྱང་མི་
གཡོའོ། །མཉམ་པར་ཡང་གཞོག་ལ་འོང་བ་དང་། འགྲོ་བ་དང་། འདུག་པ་དང་། འགྲེང་བ་དང་། འཆག་པ་དང་། ཉལ་བར་ཡང་བྱེད་དོ། །དེ་སྤྱོད་ལམ་ཐམས་ཅད་ཀྱང་སྟོན་ལ་གཅིག་ཏུ་སྙོམས་པར་ཞུགས་པ་ཡང་ཡིན་ནོ། །དེ་སྨྲ་བར་ཡང་སྣང་ལ་ཏིང་ངེ་འཛིན་གྱི་ཆོས་ཉིད་
དེ་ཡང་མི་གཏོང་ངོ་། །བློ་གྲོས་བརྟན་པ་དེ་ལྟར་ན་བྱང་ཆུབ་སེམས་དཔའ་གང་གི་ཚེ་ན་སེམས་ཅན་གཞན་རྣམས་དང་། གང་ཟག་གཞན་དག་ལ་ཕན་གདགས་པའི་ཕྱིར། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་འགྲོ་
ཞིང་འཇུག་པ་དེའི་ཚེ་ཡང་མཉམ་པར་གཞག་པ་ཉིད་ཡིན་ནོ། །གང་གི་ཚེ་ན་སེམས་ཅན་གཞན་རྣམས་དང་། གང་ཟག་གཞན་དག་ལ་སྙིང་བརྩེ་བའི་ཕྱིར་ཟས་ཟ་བ་དེའི་ཚེ་ཡང་མཉམ་པར་བཞག་བཞིན་དུ་ཟས་ཟའོ། །དེ་ཟས་ཟ་བར་ཡང་སྣང་ལ་བྱང་ཆུབ་སེམས་དཔའ་དེའི་ལུས་

གཅིག་ཏུ་མཁྲགས་པ། སྲ་བ། སྙིང་པོར་གྱུར་པ། རྡོ་རྗེ་ལྟ་བུ། ཁོང་སྟོང་མ་ཡིན་པ། མི་ཕྱེད་པ་ཡང་ཡིན་ནོ། །བྱང་ཆུབ་སེམས་དཔའ་དེའི་ཁོང་ན་ལོང་ཀ་དང་ཕོ་བ་ཡང་མེད། བཤང་བ་དང་གཅི་བ་ཡང་མེད། སྣབས་དང་མཆིལ་མ་ཡང་མེད། མི་གཙང་བ་ཡང་མེད། དྲི་མི་ཞིམ་པ་ཡང་
མེད་དོ། །དེ་ཟ་བར་ཡང་མི་བྱེད་ལ་མིད་པར་ཡང་མི་བྱེད། ཟ་བ་ཡང་མེད་དོ། །སེམས་ཅན་ལ་སྙིང་བརྩེ་བའི་ཕྱིར་དེ་ཟ་བར་ཡང་སྣང་ལ་དེ་ཐམས་ཅད་དུ་ཁ་ན་མ་ཐོ་བ་ཡང་མེད་པ་ཡིན་ཏེ། བློ་གྲོས་བརྟན་པ་དེ་ལྟར་ན་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་
བྱིས་པ་སོ་སོའི་སྐྱེ་བོའི་སྤྱད་པ་ཐམས་ཅད་སྤྱོད་པར་ཡང་སྣང་ལ་གང་དུ་ཡང་སྤྱོད་པ་ཡང་མེད། རབ་ཏུ་སྤྱོད་པར་ཡང་མེད། ཀུན་སྤྱོད་པ་ཡང་མེད་དེ། སྤྱོད་པ་ཐམས་ཅད་ལས་ཀྱང་ལོག་པ་ཡིན་ནོ། །བློ་གྲོས་བརྟན་པ་དེ་ནི་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་
དཔའི་བསམ་གཏན་གྱི་ཕ་རོལ་ཏུ་ཕྱིན་པའི་ངེས་པར་འབྱུང་བའི་ལམ་ཡོངས་སུ་སྦྱོང་བ་བྱེད་པའི་བྱེ་བྲག་ཏུ་བལྟའོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་དགོན་པ་ན་གནས་པར་ཡང་སྣང་ལ་དེ་ལ་དགོན་པ་ཇི་ལྟ་བར་དེ་ལ་
གྲོང་ཡང་དེ་བཞིན་ནོ། །དེ་གོས་དཀར་པོ་གྱོན་ཞིང་ཁྱིམ་གྱི་གནས་ན་གནས་པར་ཡང་སྣང་ལ་དེ་ལ་ཁྱིམ་ཇི་ལྟ་བར་རབ་ཏུ་བྱུང་བ་ཡང་དེ་བཞིན་ནོ། །བློ་གྲོས་བརྟན་པ་བྱང་ཆུབ་སེམས་དཔའ་ནི་ཁྱིམ་གྱི་ཆོས་ཀྱིས་ཀྱང་མི་གོས་ལ་རབ་ཏུ་བྱུང་བའི་ཆོས་ཀྱིས་ཀྱང་རློམ་སེམས་མེད་དོ། །དེ་ནི་
སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་བྱུང་བར་ཡང་སྣང་ལ་དེ་གང་དུ་ཡང་ཡ་མཚན་ཅན་གྱི་ལྟ་བར་འགྱུར་བ་ཡང་མེད། དེས་དག་པར་ཡིད་ཆེས་པ་ཡང་མེད་དོ། །དེ་ཡ་མཚན་ཅན་ཐམས་ཅད་ཀྱི་ཁ་དོག་དང་། གཟུགས་དང་། རྟགས་ཀྱང་སྟོན་
ལ་དེ་ལ་ཞུགས་པ་ཡང་མ་ཡིན། དེ་ལ་གཞོལ་བ་ཡང་མ་ཡིན། དེ་ལ་འབབ་པ་ཡང་མ་ཡིན། དེ་ལ་བབ་པར་ཡང་མ་ཡིན་ནོ། །བློ་གྲོས་བརྟན་པ་འདི་ལྟ་སྟེ། དཔེར་ན་འདྲོན་པ་ཕལ་པོ་ཆེའི་ལམ་མཚོན་པ་ཡོངས་སུ་འདྲེན་པ་དེ་ནི་ལམ་ཡང་སྟོན་ལ་ལམ་དེ་ཉིད་དུ་ཡང་འགྲོ་ཞིང་

སླར་ཡང་ལོག་ནས་འདྲོན་པ་ཕལ་པོ་ཆེ་གཞན་དག་ཀྱང་སྒྲོལ་ལོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་ཇི་ལྟ་བུའི་ཐེག་པའི་ལམ་ལ་གནས་པའི་སེམས་ཅན་དཔག་ཏུ་མེད་པ་དག་ལ་ལམ་སྟོན་
ཏེ། ཉན་ཐོས་ཀྱི་ཐེག་པའི་ལམ་ལ་གནས་པའི་སེམས་ཅན་དག་ལ་ནི་ཉན་ཐོས་ཀྱི་ཐེག་པའི་ལམ་སྟོན། རང་སངས་རྒྱས་ཀྱི་ཐེག་པའི་ལམ་ལ་གནས་པའི་སེམས་ཅན་དག་ལ་ནི་རང་སངས་རྒྱས་ཀྱི་ཐེག་པའི་ལམ་སྟོན། སངས་རྒྱས་ཀྱི་ཐེག་པའི་ལམ་ལ་གནས་པའི་སེམས་ཅན་
དག་ལ་ནི་ཐེག་པ་ཆེན་པོའི་ལམ་སྟོན་ཏེ། ངེས་པར་འབྱུང་བ་དེ་དག་ལ་སོ་སོ་ཅི་རིགས་པར་ལམ་བསྟན་ནས་སླར་ལོག་སྟེ། སེམས་ཅན་གཞན་དག་ཀྱང་སྒྲོལ་བར་བྱེད་པས་དེའི་ཕྱིར་སྐྱེས་བུ་དམ་པ་དེ་ནི་ལམ་མཚོན་པ་ལྟ་བུ་ཞེས་བྱའོ། །བློ་གྲོས་བརྟན་པ་འདི་ལྟ་སྟེ། དཔེར་ན་གྲུ་ལེགས་
པར་སྦྱར་བ་བྱས་པ་ནི་སེམས་ཅན་ཚད་མེད་པ་བསྒྲལ་བའི་ཕྱིར། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་ཞིང་བསྒྲལ་ནས། སེམས་ཅན་གཞན་བསྒྲལ་བའི་ཕྱིར་སླར་ཡང་ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་ངོ་། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་
བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་འཁོར་བའི་རྒྱུན་ལ་གནས་པའི་ཆུ་བོ་བཞིས་དེད་པའི་སེམས་ཅན་དག་མཐོང་ནས་དེ་དག་འཁོར་བའི་རྒྱུན་ལས་བསྒྲལ་བའི་ཕྱིར་སེམས་ཅན་དེ་དག་ཇི་ལྟར་མོས་པ་བཞིན་དུ་མྱ་ངན་ལས་འདའ་བ་སྟོན་པར་བྱེད་དེ། དཔའ་བར་
འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་དེ་གལ་ཏེ་ཉན་ཐོས་ཀྱི་ཐེག་པས་འདུལ་བའི་སེམས་ཅན་དག་མཐོང་ན། དེ་དག་ཡོངས་སུ་མྱ་ངན་ལས་བཟླ་བའི་ཕྱིར། དེ་ཡང་དེ་དག་དང་ལྷན་ཅིག་ཏུ་ཡོངས་སུ་མྱ་ངན་ལས་ཀྱང་འདའ་ལ། དེ་དཔའ་བར་འགྲོ་བའི་ཏིང་ངེ་
འཛིན་འདི་ཉིད་ཀྱི་སྟོབས་བསྐྱེད་པས་སླར་སྐྱེ་བར་ཡང་སྟོན་ཏོ། །དེ་གལ་ཏེ་རང་སངས་རྒྱས་ཀྱི་ཐེག་པས་འདུལ་བའི་སེམས་ཅན་དག་མཐོང་ན། དེ་དག་ཡོངས་སུ་མྱ་ངན་ལས་བཟླ་བའི་ཕྱིར་དེ་ཡང་དེ་དག་དང་ལྷན་ཅིག་ཏུ་ཡོངས་སུ་མྱ་ངན་ལས་ཀྱང་འདའ་ལ། དེ་དཔའ་བར་

འགྲོ་བའི་ཏིང་ངེ་འཛིན་འདི་ཉིད་ཀྱི་སྟོབས་བསྐྱེད་པས་སླར་ཡང་སྐྱེ་བར་སྟོན་ཏོ། །དེ་འཁོར་བ་ལས་མྱ་ངན་ལས་འདས་པར་ཡང་འགྲོ་ལ་སེམས་ཅན་གཞན་བསྒྲལ་བའི་ཕྱིར་སླར་ཡང་འཁོར་བ་ན་ཡང་སྣང་སྟེ། སྐྱེས་བུ་དེ་དག་ནི་མཉན་པ་ལྟ་བུ་ཞེས་བྱའོ། །བློ་གྲོས་བརྟན་པ་འདི་ལྟ་སྟེ།
དཔེར་ན་སྒྱུ་མ་མཁན་ནི་སྐྱེ་བོ་ཕལ་པོ་ཆེ་ཚོགས་པའི་མདུན་དུ་བདག་ཤི་བར་སྟོན་ཏེ། བདག་ཚིག་པའམ། ཟོས་པའམ། རྙིས་པའམ། སྐམས་པའམ། རྣམ་པར་འཐོར་བ་བསྟན་ནས། དེས་སེམས་ཅན་དེ་དག་ལས་ནོར་བླངས་ཏེ། སླར་འདུག་པར་བྱེད་དོ། །བློ་གྲོས་བརྟན་པ་དེ་
བཞིན་དུ་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ཡང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྐྱེ་བ་དང་། རྒ་བ་དང་། ན་བ་དང་། འཆི་བ་ཡང་སྟོན་ལ། དེ་སྐྱེ་བ་ཡང་མེད། རྒ་བ་ཡང་མེད། ན་བ་ཡང་མེད། འཆི་བ་ཡང་མེད་དོ། །བློ་གྲོས་བརྟན་པ་
དེ་ཡང་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའི་ཏིང་ངེ་འཛིན་ཡོངས་སུ་སྦྱོང་བ་བྱེད་པའི་བྱེ་བྲག་ཏུ་བལྟའོ། །བློ་གྲོས་བརྟན་པ་གཞན་ཡང་དཔའ་བར་འགྲོ་བའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་ཤེས་རབ་དང་ལྡན་པ་ཡིན་ཏེ། ཤེས་རབ་
རྣོ་བས་དེ་སེམས་ཅན་གྱི་རང་བཞིན་ཡང་མི་དམིགས་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་སེམས་ཅན་ཞེས་ཐ་སྙད་ཀྱང་འདོགས་སོ། །སྲོག་དང་གང་ཟག་གི་རང་བཞིན་ཡང་མི་དམིགས་ལ་སྲོག་དང་གང་ཟག་དུ་ཐ་སྙད་གདགས་པ་ཡང་ཐ་སྙད་དུ་འདོགས་
སོ། །ལས་དང་རྣམ་པར་སྨིན་པའི་རང་བཞིན་ཡང་མི་དམིགས་ལ་ལས་དང་རྣམ་པར་སྨིན་པ་ཡང་སྟོན་ཏོ། །འཁོར་བའི་ཉོན་མོངས་པའི་རང་བཞིན་ཡང་མི་དམིགས་ལ་འཁོར་བའི་ཉོན་མོངས་པ་ཡོངས་སུ་ཤེས་པ་ཡང་སྟོན་ཏོ། །མྱ་ངན་ལས་འདའ་བར་འགྲོ་བ་ཡང་མི་གཏོང་ལ་མྱ་
ངན་ལས་འདའ་བར་འགྲོ་བར་བྱ་བའི་ཕྱིར་ཆོས་ཀྱང་སྟོན་ཏོ། །ཆོས་གདགས་པ་ཡང་མི་དམིགས་ལ་དགེ་བ་དང་། མི་དགེ་བའི་ཆོས་རྣམ་པར་གཞག་པ་ཡང་སྟོན་ཏོ། །དེ་ཤེས་རབ་ཐོགས་པ་མེད་པའི་དམ་པའི་ཕ་རོལ་ཏུ་ཕྱིན་པས་འདོད་པའི་ཁམས་ལ་ཡང་མི་ཆགས་ལ་དེ་ན་

ཡང་སྣང་ངོ་། །གཟུགས་ཀྱི་ཁམས་ལ་ཡང་མི་ཆགས་ལ་དེ་ན་ཡང་སྣང་ངོ་། །དེ་གཟུགས་ཀྱི་ཁམས་ཀྱི་བསམ་གཏན་ལ་སྙོམས་པར་ཞུགས་པར་ཡང་སྣང་ལ་འདོད་པའི་ཁམས་སུ་ཡང་སྐྱེའོ། །གཟུགས་མེད་པའི་ཁམས་ཀྱི་སྙོམས་པར་འཇུག་པ་ལ་སྙོམས་པར་ཞུགས་
པར་ཡང་སྣང་ལ་གཟུགས་ཀྱི་ཁམས་སུ་ཡང་སྐྱེའོ། །དེ་ནི་འདོད་པའི་ཁམས་ན་སྤྱོད་པར་ཡང་སྣང་ལ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་པར་འཇུག་པ་ལ་ཡང་སྙོམས་པར་འཇུག་ཅིང་འདོད་པའི་ཁམས་སུ་ཡང་སྐྱེའོ། །དེ་བསམ་གཏན་དང་། བསམ་གཏན་གྱི་ཡན་ལག་
རྣམས་ཀྱང་ཤེས་ཤིང་མཉམ་པར་གཞོག་པ་དང་ལྡང་བར་ཡང་བྱེད་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་གང་དང་གང་དུ་འདོད་པ་དེ་དང་དེར་སྐྱེ་བར་ཡང་བྱེད་དོ། །དེ་ཐབས་དང་ཤེས་རབ་ཀྱི་ཡོངས་སུ་བཟུང་བས་སྤྱོད་པ་ཐམས་ཅད་ལས་ལྡོག་པ་ལ་ཡང་གནས་ལ་སེམས་ཅན་ཡོངས་
སུ་སྨིན་པར་བྱ་བའི་ཕྱིར་ཡང་སྤྱོད་དོ། །ཆོས་གང་ལ་ཡང་ཉེ་བར་མི་སྤྱོད་ལ་སྤྱོད་པ་ཐམས་ཅད་ལས་ཀྱང་མ་ལོག་པ་ཡིན་ནོ། །དེ་ནི་ངར་འཛིན་པ་དང་། ང་ཡིར་འཛིན་པ་དག་དང་ཡང་བྲལ་བ་ཡིན་ལ་ལེན་པ་དང་གཏོང་བར་ཡང་སྣང་ངོ་། །དེ་ཤེས་རབ་དང་ཡེ་ཤེས་དང་ལྡན་པས་
ཡེ་ཤེས་ཀྱིས་བྱས་པའི་ལས་ཐམས་ཅད་བྱེད་ཀྱི། ང་རྒྱལ་གྱིས་བྱེད་པ་ཡང་མ་ཡིན་ལ་ལས་དང་རྣམ་པར་སྨིན་པར་བརྗོད་པ་ཡང་མ་ཡིན་ནོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར། དེ་ལུག་ལྟར་ལྐུགས་པ་དང་། བླུན་པ་དང་། གླེན་པ་དང་། འོན་པར་ཡང་སྟོན་ལ་དེ་ཚངས་པའི་
སྒྲ་དང་། སྐད་དང་། དབྱངས་ཀྱི་སྒྲ་འབྱིན་པ་དང་ལྡན་པ་ཡང་ཡིན་ནོ། །དེ་བཟོ་ཐམས་ཅད་ཀྱི་ཕ་རོལ་ཏུ་ཕྱིན་ཅིང་ཤེས་རབ་ཀྱི་ཕ་རོལ་ཏུ་ཕྱིན་པས་ཅི་ཞིག་བཤད་ཅེས་མི་རྟོག །ཅི་ཞིག་སྨྲ་ཞེས་མི་སེམས། ཇི་ལྟར་བསྟན་པར་བྱ་ཞེས་ཚོལ་བར་ཡང་མི་བྱེད་ལ། འཁོར་གང་དང་
གང་དུ་འགྲོ་བ་དེ་དང་དེ་དག་ཏུ་ལྷུན་གྱིས་གྲུབ་ཅིང་། དཔའ་བར་འགྲོ་བའི་ཏིང་ངེ་འཛིན་གྱི་མཐུས་འཁོར་ཐམས་ཅད་ཀྱི་དབང་པོ་མཆོག་དང་། མཆོག་མ་ཡིན་པ་ཤེས་པའི་ཕྱིར་ཆོས་ལ་སྤོབས་པར་བྱེད་དེ། དེའི་ཡེ་ཤེས་བྲི་བའམ། གང་བར་ཡང་མི་འགྱུར་ཞིང་། འཁོར་ཐམས་ཅད་ཀྱང་

ལེགས་པར་བཤད་པས་ཚིམ་པར་བྱེད་དོ། །བློ་གྲོས་བརྟན་པ་འདི་ལྟ་སྟེ། དཔེར་ན་བུད་མེད་དམ། སྐྱེས་པའམ། ཁྱེའུའམ། བུ་མོས་སྣོད་ཆུང་ངུ་ཡང་རུང་། ཆེན་པོ་ཡང་རུང་སྟེ། ཇི་ཙམ་པ་དེ་ཁྱེར་ནས། ཆུ་མིག་གམ། མཚེའུའམ། རྫིང་ངམ། ལྟེང་ཀའམ། འབབ་ཆུའམ། རྒྱ་མཚོ་
ཆེན་པོར་སོང་སྟེ། སྣོད་དེ་དག་ཐམས་ཅད་ཡོངས་སུ་བཀང་ནས་སོང་ཡང་ཆུ་མིག་གམ། མཚེའུའམ། རྫིང་ངམ། ལྟེང་ཀའམ། འབབ་ཆུའམ། རྒྱ་མཚོ་ཆེན་པོ་དེ་ཡང་ཅུང་ཟད་ཀྱང་བྲི་བ་ཡང་མེད་ལ་སེམས་ཅན་དེ་དག་ཀྱང་ཚིམ་པར་བྱེད་དོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་
ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་འཁོར་གང་དང་གང་དུ་འགྲོ་ཡང་རུང་སྟེ། གལ་ཏེ་རྒྱལ་རིགས་ཀྱི་འཁོར་ཏམ། གལ་ཏེ་བྲམ་ཟེའི་འཁོར་ཏམ། གལ་ཏེ་ཁྱིམ་བདག་གི་འཁོར་ཏམ། གལ་ཏེ་དགེ་སྦྱོང་གི་འཁོར་ཏམ། གལ་ཏེ་བརྒྱ་བྱིན་གྱི་འཁོར་ཏམ། གལ་
ཏེ་ཚངས་པའི་འཁོར་དུ་འགྲོ་ན་ཡང་། དེ་དག་ཐམས་ཅད་ལ་ལྷུན་གྱིས་གྲུབ་ཅིང་ལེགས་པར་བཤད་པས་ཚིམ་པར་བྱེད་དེ། ཇི་ལྟ་བུར་རིགས་དང་། དབང་པོ་དང་། མོས་པ་ཇི་ལྟ་བ་བཞིན་དུ་ཆོས་འཆད་པ་བྱུང་ཡང་། བྱང་ཆུབ་སེམས་དཔའ་དེའི་ཤེས་རབ་དང་། ཡེ་ཤེས་དང་།
སྤོབས་པ་དང་། སྟོན་པ་ཡོངས་སུ་འབྲི་བ་ཡང་མེད་ལ་འཁོར་ཐམས་ཅད་ཀྱང་ལེགས་པར་བཤད་པས་ཚིམ་པར་བྱེད་དོ། །བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་མཐོང་མ་ཐག་ཏུ་ཡང་སེམས་ཅན་རྣམས་འདུལ་བར་བྱེད་དོ། །ཐོས་
པ་དང་། སྤྱོད་ལམ་དང་། བཤད་པ་དང་། མི་སྨྲ་བར་འདུག་པས་ཀྱང་སེམས་ཅན་དག་འདུལ་བར་བྱེད་དོ། །བློ་གྲོས་བརྟན་པ་འདི་ལྟ་སྟེ། དཔེར་ན་སྨན་གྱི་རྒྱལ་པོ་ཆེན་པོ་བལྟ་ན་སྡུག་པ་ཞེས་བྱ་བ་ནི་མཐོང་མ་ཐག་ཏུ་སེམས་ཅན་དག་གི་ནད་སེལ་བར་བྱེད་དོ། །བློ་གྲོས་བརྟན་པ་དེ་
བཞིན་དུ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་མཐོང་མ་ཐག་ཏུ་སེམས་ཅན་དེ་དག་གི་ནད་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་གི་ནད་རྣམས་སེལ་བར་བྱེད་དོ། །བློ་གྲོས་བརྟན་པ་འདི་ལྟ་སྟེ། དཔེར་ན་སྨན་གྱི་

རྒྱལ་པོ་ཆེན་པོ་འབྲལ་བ་ཞེས་བྱ་བ་དེས་བསྐུས་པའི་རྔ་ཆེན་པོ་གཡུལ་གྱི་ངོགས་སུ་བརྡུངས་ན། རྔའི་སྒྲ་དེ་ཐོས་མ་ཐག་ཏུ་སེམས་ཅན་རྣམས་ཟུག་རྔུ་རྣམས་ལྟུང་བར་འགྱུར། དུག་ཐམས་ཅད་ཀྱང་མི་དུག་པར་འགྱུར་རོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་
འདི་ལ་གནས་པའི་བྱང་ཆུབ་སེམས་དཔའི་མིང་ཐོས་མ་ཐག་ཏུ་སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པའི་ཟུག་རྔུ་རྣམས་ལྟུང་བར་འགྱུར། ལྟ་བར་གྱུར་པའི་དུག་ཐམས་ཅད་ཀྱང་མི་དུག་པར་འགྱུར་རོ། །བློ་གྲོས་བརྟན་པ་འདི་ལྟ་སྟེ། དཔེར་ན་སྨན་གྱི་ཤིང་
ལྗོན་པ་ནི་རྩ་བ་ནས་བྱུང་ཡང་སེམས་ཅན་རྣམས་ཀྱི་ནད་སེལ་བར་བྱེད་དོ། །སྡོང་པོའམ། ཡལ་གའམ། འདབ་མའམ། མེ་ཏོག་གམ། འབྲས་བུའམ། ཤུན་པའམ། གསོག་གམ། སྙིང་པོ་ལས་བླངས་ཀྱང་སེམས་ཅན་རྣམས་ཀྱི་ནད་སེལ་བར་བྱེད་དོ། །བསྒྲེང་ངམ། འགྱེལ་
ཏམ། དུམ་བུ་དུམ་བུར་བཅད་པ་ལས་བླངས་ཀྱང་སེམས་ཅན་རྣམས་ཀྱི་ནད་སེལ་བར་བྱེད་དོ། །བློ་གྲོས་བརྟན་པ་དེ་ལྟར་ན་སྨན་གྱི་ཤིང་ལྗོན་པ་ནི་སེམས་ཅན་རྣམས་ཀྱི་ནད་ཞི་བར་བྱ་བའི་འཚོ་བར་ནམ་ཡང་མི་འགྱུར་བ་མ་ཡིན་ནོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་
འདི་ལ་གནས་པའི་བྱང་ཆུབ་སེམས་དཔའ་ཡང་སེམས་ཅན་རྣམས་ཀྱི་ཉོན་མོངས་པའི་ནད་ཞི་བར་བྱ་བའི་འཚོ་བར་ནམ་ཡང་མི་འགྱུར་བ་མ་ཡིན་ཏེ། གང་དག་དེ་ལ་ཕན་པ་དང་། གནོད་པར་བྱེད་པ་དེ་དག་གི་ཉེ་བར་འཚོ་བར་ཡང་འགྱུར། གང་དེ་ལ་བཀུར་སྟི་བྱེད་པ་དང་། བཀུར་སྟི་མི་བྱེད་པ་
དེ་དག་ཉེ་བར་འཚོ་བར་ཡང་འགྱུར་རོ། །དེ་ཤི་ཞིང་ཤི་བའི་དུས་བྱས་པར་གྱུར་པའི་ཤ་ལ་གང་དག་ཟ་བ་དུད་འགྲོའི་སྐྱེ་གནས་སུ་སོང་བ་རྐང་གཉིས་པ་དང་། རྐང་བཞི་པ་དང་། རི་དགས་དང་། བྱའི་ཚོགས་དེ་དག་ཀྱང་བྱང་ཆུབ་སེམས་དཔའ་དེའི་སྔོན་གྱི་སྨོན་ལམ་དང་། ཚུལ་ཁྲིམས་ཀྱི་སྟོབས་
བསྐྱེད་པས་དེའི་འཆི་བའི་དུས་བྱས་ཏེ། ཤི་འཕོས་མ་ཐག་ཏུ་བདེ་འགྲོ་མཐོ་རིས་ཀྱི་འཇིག་རྟེན་ལྷའི་ནང་དུ་སྐྱེ་བར་འགྱུར་ཏེ། དེ་དག་ངན་སོང་དང་། ནད་རྣམས་དང་བྲལ་བར་འགྱུར་རོ། །བློ་གྲོས་བརྟན་པ་དེ་ལྟར་ན་སྨན་གྱི་ཤིང་ལྗོན་པ་ཞེས་བྱ་བ་དེ་ནི་དཔའ་བར་འགྲོ་བའི་ཏིང་ངེ་འཛིན་ལ་གནས་

པའི་བྱང་ཆུབ་སེམས་དཔའི་ཚིག་བླ་དགས་སོ། །བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་དེ་ལ་ནི་ཕ་རོལ་ཏུ་ཕྱིན་པ་དྲུག་པོ་འདི་དག་མ་བསྟན་པར་ཚེ་རབས་ཐམས་ཅད་དུ་རྟག་ཏུ་འཇུག་པར་འགྱུར་རོ། །གོམ་པ་འདོར་བ་ཐམས་ཅད་ལ་ཡང་
ཕ་རོལ་ཏུ་ཕྱིན་པ་དྲུག་པོ་འདི་དག་འཇུག་པར་འགྱུར་རོ། །དབུགས་རྔུབ་པ་དང་། འབྱུང་བ་ཐམས་ཅད་ལ་ཡང་ཕ་རོལ་ཏུ་ཕྱིན་པ་དྲུག་པོ་འདི་དག་འཇུག་པར་འགྱུར་རོ། །སེམས་བསྐྱེད་ཅིང་སེམས་བསྐྱེད་པ་ཐམས་ཅད་ལ་ཡང་ཕ་རོལ་ཏུ་ཕྱིན་པ་དྲུག་པོ་འདི་དག་འཇུག་པར་འགྱུར་རོ། །དེ་ཅིའི་
ཕྱིར་ཞེ་ན། འདི་ལྟར་བློ་གྲོས་བརྟན་པ་བྱང་ཆུབ་སེམས་དཔའ་དེའི་ལུས་ནི་ཆོས་ཀྱི་རང་བཞིན་ནོ། །གནས་པ་ནི་ཆོས་ཀྱི་རང་བཞིན་ནོ། །བློ་གྲོས་བརྟན་པ་འདི་ལྟ་སྟེ། དཔེར་ན་རྒྱལ་པོ་འམ། བློན་པོས་ཡན་ལག་གི་ཚོགས་འབུམ་དང་ལྡན་པའི་སྤོས་ཀྱི་ཕྱེ་མ་བཏགས་པ་རྡུལ་ལྟ་བུ་ཞི