Kinh tạng Tây Tạng (Kangyur Đại Học) — 051_མདོ་སྡེ།_ཇ

ཏོར་ཏོ། །གང་ན་འཇམ་དཔལ་གཞོན་ནུར་གྱུར་པ་སྣང་བ་དེར་ནི་དེ་བཞིན་གཤེགས་པ་མངོན་སུམ་དུ་མཐོང་བ་ཡིན་ནོ། །འཇམ་དཔལ་གཞོན་ནུར་གྱུར་པ་གང་དུ་གནས་པའི་ས་ཕྱོགས་དེའང་མཆོད་རྟེན་དུ་འགྱུར་རོ། །གང་
གིས་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ཀུན་དུ་ཤེས་སམ། ཀུན་དུ་ཤེས་པར་འགྱུར་བའི་སེམས་ཅན་དེ་དག་གིས་ཀྱང་བསོད་ནམས་ཐམས་ཅད་ཡོངས་སུ་བཟུང་བ་ཡིན་ནོ་ཞེས་དེ་སྐད་ཀྱི་ཚིག་སྨྲས་སོ། །དེ་ནས་ཡང་འཇམ་དཔལ་གཞོན་ནུར་གྱུར་པས་
ཉན་ཐོས་ཆེན་པོ་ཤེས་རབ་སྒྲོན་མ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉན་ཐོས་རྣམས་ཀྱི་ནང་ན་ཤེས་རབ་ཆེ་བའི་མཆོག་ཏུ་བཅོམ་ལྡན་འདས་ཀྱིས་གསུངས་ན། ཅི་ཤེས་རབ་དེ་འདུས་བྱས་ཀྱི་མཚན་ཉིད་དམ་འོན་ཏེ་འདུས་མ་བྱས་ཀྱི་མཚན་ཉིད། གལ་ཏེ་དེ་འདུས་

བྱས་ཀྱི་མཚན་ཉིད་ཡིན་ན་ནི་སྐྱེ་ཞིང་འཇིག་པ་དང་ལྡན་པར་འགྱུར་རོ། །ཇི་སྟེ་འདུས་མ་བྱས་པའི་མཚན་ཉིད་ཡིན་ན་ནི་མཚན་ཉིད་གསུམ་ལས་ལྡོག་པར་འགྱུར་རོ། །སྨྲས་པ། འཇམ་དཔལ་འཕགས་པ་རྣམས་ནི་འདུས་མ་བྱས་ཀྱིས་རབ་ཏུ་ཕྱེ་
བར་སྟོན་ཏོ། །སྨྲས་པ། ཚེ་དང་ལྡན་པ་འདུས་མ་བྱས་པ་གདགས་པར་ནུས་སམ། སྨྲས་པ། འཇམ་དཔལ་དེ་ནི་མ་ཡིན་ཏེ། འདུས་མ་བྱས་ལ་གདགས་པ་གང་ཡང་མེད་དོ། །སྨྲས་པ། འོ་ན་ཇི་ལྟར་འཕགས་པ་རྣམས་འདུས་མ་བྱས་ཀྱིས་རབ་ཏུ་
ཕྱེ་བ་སྟོན། དེ་སྐད་ཅེས་སྨྲས་པ་དང་། ཉན་ཐོས་ཆེན་པོ་ཤེས་རབ་སྒྲོན་མ་དེ་ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་དེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་
ཏོ། །འཇམ་དཔལ་ཆོས་གང་ཐོས་པས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཆོས་ཀྱི་སྒོ་འགའ་ཞིག་རྩོམས་ཏེ། འཁོར་འདིར་ཁྱོད་ཀྱིས་སྟོན་ཅིག །འཇམ་དཔལ་གྱིས་
གསོལ་པ། བཅོམ་ལྡན་འདས་ཆོས་ཐམས་ཅད་ཀྱི་སྒོ་རྣམས་ཀྱི་བསྟན་པ་ཐམས་ཅད་ཀྱང་དབེན་པའི་སྒོ་སྟེ། དབེན་པའི་སྒོ་དེ་དག་དབེན་པ་ཉིད་དུ་སྟོན་ཏོ། །ཡང་དེའི་ཚེ་བྱང་ཆུབ་སེམས་དཔའ་ཆོས་ཀྱི་བློ་གྲོས་ཞེས་བྱ་བ་འཁོར་དེར་འདུས་པར་གྱུར་ཏེ་འདུག་པ་དེས་འཇམ་
དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་དེ་བཞིན་གཤེགས་པས་འདོད་ཆགས་དང་། ཞེ་སྡང་དང་། གཏི་མུག་བསྟན་པ་དེ་དག་ཅི་དབེན་པའི་སྒོ་སྟེ། དབེན་པའི་སྒོ་ཉིད་དུ་སྟོན་པ་ཡིན་ནམ། སྨྲས་པ། རིགས་ཀྱི་བུ་འདི་ཇི་སྙམ་དུ་
སེམས། འདོད་ཆགས་དང་། ཞེ་སྡང་དང་། གཏི་མུག་གང་ནས་བྱུང་། སྨྲས་པ། འཇམ་དཔལ་འདོད་ཆགས་དང་། ཞེ་སྡང་དང་། གཏི་མུག་ནི་རྟོག་པ་དང་། རྣམ་པར་རྟོག་པ་ལས་བྱུང་ངོ་། །སྨྲས་པ། རིགས་ཀྱི་བུ་རྟོག་པ་དང་། རྣམ་པར་རྟོག་པ་དེ་ཡང་

གང་ནས་བྱུང་། སྨྲས་པ། འཇམ་དཔལ་རྟོག་པ་དང་། རྣམ་པར་རྟོག་པ་ནི་ཕྱིན་ཅི་ལོག་ལས་བྱུང་ངོ་། །སྨྲས་པ། རིགས་ཀྱི་བུ་ཕྱིན་ཅི་ལོག་ཀྱང་གང་ནས་བྱུང་། སྨྲས་པ། འཇམ་དཔལ་ཕྱིན་ཅི་ལོག་ནི་ངར་འཛིན་པ་དང་། ང་ཡིར་འཛིན་པ་ལས་བྱུང་ངོ་། །
སྨྲས་པ། རིགས་ཀྱི་བུ་ངར་འཛིན་པ་དང་། ང་ཡིར་འཛིན་པ་ཡང་གང་ནས་བྱུང་། སྨྲས་པ། འཇམ་དཔལ་ངར་འཛིན་པ་དང་། ང་ཡིར་འཛིན་པ་ནི་འཇིག་ཚོགས་ལ་ལྟ་བ་ལས་བྱུང་ངོ་། །སྨྲས་པ། རིགས་ཀྱི་བུ་འཇིག་ཚོགས་ལ་ལྟ་བ་ཡང་གང་ནས་བྱུང་།
སྨྲས་པ། འཇམ་དཔལ་འཇིག་ཚོགས་ལ་ལྟ་བ་ནི་བདག་ལས་བྱུང་ངོ་། །སྨྲས་པ། རིགས་ཀྱི་བུ་བདག་ཀྱང་གང་ནས་བྱུང་། སྨྲས་པ། འཇམ་དཔལ་བདག་ནི་གང་ནས་ཀྱང་མ་བྱུང་སྟེ། འབྱུང་བ་མེད་པ་ནི་བདག་འབྱུང་བའོ། །དེ་ཅིའི་ཕྱིར་ཞེ་ན། འདི་ལྟར་བདག་
ནི་ཕྱོགས་བཅུར་ཡོངས་སུ་བཙལ་ཀྱང་མི་དམིགས་སོ། །སྨྲས་པ། རིགས་ཀྱི་བུ་ཆོས་གང་དག་ཕྱོགས་བཅུར་ཡོངས་སུ་བཙལ་ཀྱང་མི་དམིགས་པ་དེའི་སྒོ་ཅི་ཞིག་ཡོད། སྨྲས་པ། འཇམ་དཔལ་དབེན་པ་ཉིད་དེའི་སྒོའོ། །སྨྲས་པ། རིགས་ཀྱི་བུ་དབེན་པའི་སྒོ་ཅི་ཡིན།
སྨྲས་པ། འཇམ་དཔལ་སྒོ་མེད་པ་ཉིད་དབེན་པའི་སྒོའོ། །སྨྲས་པ། རིགས་ཀྱི་བུ་ཁོ་བོས་དེ་ལས་བསམས་ཏེ། ཆོས་ཐམས་ཅད་ཀྱི་སྒོ་རྣམས་ཀྱི་བསྟན་པ་ཐམས་ཅད་ཀྱང་དབེན་པའི་སྒོ་སྟེ། དེ་དག་དབེན་པའི་སྒོ་ཉིད་དུ་སྟོན་ཏོ་ཞེས་དེ་སྐད་སྨྲས་སོ། །བསྟན་པ་འདི་བཤད་
པའི་ཚེ་བྱང་ཆུབ་སེམས་དཔའ་བརྒྱད་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་དེར་རྒྱ་ཆེར་ཆོས་བསྟན་པ་བྱས་ནས་སྟན་ལས་ལངས་ཏེ་སོང་ངོ་། །ཚེ་དང་ལྡན་པ་རབ་འབྱོར་རྣམ་གྲངས་དེས་ཀྱང་ཉན་ཐོས་སམ། རང་
སངས་རྒྱས་གང་གིས་ཀྱང་འཇམ་དཔལ་གཞོན་ནུར་གྱུར་པ་དེའི་སྤོབས་པའི་རྒྱུན་གཅོད་ནུས་པ་མེད་ན། སྐབས་མ་ཕྱེ་བར་བདག་ཅག་ལྟ་བུས་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་སྨྲ་བར་ག་ལ་ནུས། དེ་ནས་ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་

སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུས་འཇམ་དཔལ་གཞོན་ནུར་གྱུར་པ་སངས་རྒྱས་ཀྱི་ཞིང་དུ་སྤྱད་པ་སྤྱོད་པ་ན་རྫུ་འཕྲུལ་གྱི་སྟོབས་དང་། ཆོ་འཕྲུལ་གྱི་རྣམ་པར་འཕྲུལ་པ་ཇི་སྙེད་ཅིག་མཐོང་། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར་
ཁོ་བོས་མངོན་པར་ཤེས་ཏེ། འཇམ་དཔལ་གཞོན་ནུར་གྱུར་པ་དང་ལྷན་ཅིག་སངས་རྒྱས་ཀྱི་ཞིང་དུ་སྤྱད་པ་སྤྱོད་པ་ན་སངས་རྒྱས་ཀྱི་ཞིང་གང་ཚིག་པ་དེ་དག་ནི་འཇམ་དཔལ་གཞོན་ནུར་གྱུར་པ་སོང་བ་དང་ཆུས་ཡོངས་སུ་གང་ཞིང་། པད་མ་མང་པོས་ཡོག་པར་གནས་པར་གྱུར་
ཏོ། །གང་དག་ཆུས་ཡོངས་སུ་གང་བ་དེ་དག་ནི་མེས་ཡོངས་སུ་གང་བར་གནས་པར་གྱུར་ཏེ། མེ་དེ་ཡང་རེག་ན་འདི་ལྟ་སྟེ་དཔེར་ན་ཙན་དན་སྦྲུལ་གྱི་སྙིང་པོའམ། ཀ་ཙ་ལིན་དིའི་གོས་ལྟ་བུར་གྱུར་ཏོ། །གང་དག་སྟོང་པ་ནམ་མཁར་གྱུར་པ་དེ་དག་ནི་ཆངས་པའི་
གཞལ་མེད་ཁང་གིས་བརྒྱན་ཅིང་བསམ་གཏན་ལ་སྙོམས་པར་ཞུགས་པའི་བྱང་ཆུབ་སེམས་དཔས་ཡོངས་སུ་གང་བར་གནས་པར་གྱུར་ཏོ། །གང་དག་འཆགས་པ་དེ་དག་ནི་འཇིག་པར་སྣང་ངོ་། །གང་དག་ངན་སོང་གིས་ཡོངས་སུ་གང་བ་དེ་དག་ནི་ངན་སོང་ཐམས་ཅད་དང་
བྲལ་བར་སྣང་སྟེ། སེམས་ཅན་དེ་དག་ཀྱང་བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་ཐོབ་པར་གྱུར་ཏོ། །བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་གང་ཞེ་ན། གང་ལ་སྙོམས་པར་ཞུགས་ན་བདག་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་སངས་རྒྱས་ཏེ། སེམས་ཅན་གང་དག་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གིས་གཟིར་བ་དེ་དག་གི་འདོད་ཆགས་དང་། ཞེ་སྡང་དང་། གཏི་མུག་ཤིན་ཏུ་སྤང་བར་བྱ་བའི་ཕྱིར་ཆོས་བསྟན་ཏོ་སྙམ་སེམས་པ་སྟེ།
གང་དེ་ལྟར་བྱམས་པའི་ཏིང་ངེ་འཛིན་ལ་སྙོམས་པར་འཇུག་པ་དེ་ནི་བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་ཞེས་བྱའོ། །ཚེ་དང་ལྡན་པ་རབ་འབྱོར་དེའི་ཚེ་དེའི་དུས་ན་ཁོ་བོའི་སེམས་ལ་སེམས་ཀྱི་རྣམ་པར་རྟོག་པ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་

གང་ཡིན་པ་དང་། བདག་གི་གང་ཡིན་པ་དེ་གཉིས་ནི་མཉམ་མོ་སྙམ་དུ་གྱུར་པ་དང་། འཇམ་དཔལ་གཞོན་ནུར་གྱུར་པའི་སེམས་ཀྱིས་ཁོ་བོའི་སེམས་ཀྱི་རྣམ་པར་རྟོག་པ་དེ་ཤེས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་མེ་འབར་བ་ན་འཇིག་རྟེན་གྱི་
བར་དུ་འདུག་སྟེ་ཁོ་བོ་ལ་འདི་སྐད་ཅེས་ཟེར་རོ། །ཅི་ཚེ་དང་ལྡན་པ་ཤཱ་རིའི་བུའི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་བརྒལ་བར་བྱའམ། འོན་ཏེ་ཁོ་བོའི་རྫུ་འཕྲུལ་གྱི་མཐུས་བརྒལ་བར་བྱ། ཁོ་བོས་དེ་ལ་འདི་སྐད་ཅེས་སྨྲས་སོ། །ཁོ་བོའི་རྫུ་འཕྲུལ་གྱི་མཐུའི་
མགྱོགས་པས་འཇིག་རྟེན་གྱི་ཁམས་འདི་ལས་བརྒལ་བར་བྱའོ་ཞེས། ཚེ་དང་ལྡན་པ་རབ་འབྱོར་ཁོ་བོའི་རྫུ་འཕྲུལ་གྱི་མཐུའི་མགྱོགས་པའི་ཆོ་འཕྲུལ་ཐམས་ཅད་བསྟན་ཏེ། འདོམ་གང་ཙམ་ཁོར་ཡུག་ཏུ་མེ་དེ་ཞི་བར་བྱས་ནས་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་ཉིན་
ཞག་བདུན་གྱིས་འཇིག་རྟེན་གྱི་ཁམས་དེ་བརྒལ་ཏོ། །དེ་ནས་དུས་གཞན་ཞིག་ན་དེ་བས་ཀྱང་ཤིན་ཏུ་རྒྱ་ཆེ་ཞིང་ཡངས་པའི་འཇིག་རྟེན་གྱི་ཁམས་སུ་མེ་འབར་བ་ན་འཇིག་རྟེན་གྱི་བར་དུ་འཇམ་དཔལ་གཞོན་ནུར་གྱུར་པ་འདུག་སྟེ། ཁོ་བོ་ལ་འདི་སྐད་ཅེས་ཟེར་རོ། །བཙུན་པ་
ཤཱ་རིའི་བུ་སུའི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་བརྒལ་བར་བྱ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་བརྒལ་བར་བྱའོ། །དེ་ནས་འཇམ་དཔལ་གཞོན་ནུར་གྱུར་པས་མངོན་
པར་འདུ་བྱེད་པའི་མངོན་སུམ་གྱི་རྫུ་འཕྲུལ་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་དེ་པད་མའི་དྲ་བས་གཡོགས་ཏེ་རྒལ་བར་གྱུར་ཏོ། །བརྒལ་ནས་ཁོ་བོ་ལ་འདི་སྐད་ཅེས་ཟེར་རོ། །བཙུན་པ་ཤཱ་རིའི་བུ་བདག་ཅག་གཉིས་ལས་སུའི་མཐུ་དང་ལྡན་པའི་རྫུ་
འཕྲུལ་གྱི་ཤུགས་མགྱོགས། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་འདི་ཇི་སྙམ་དུ་སེམས། བྱ་ལང་གུ་ལི་དང་། བྱའི་རྒྱལ་པོ་ནམ་མཁའ་ལྡིང་གཉིས་གང་གི་མཐུ་ཤིན་ཏུ་མགྱོགས། སྨྲས་པ། བཙུན་པ་ཤཱ་རིའི་བུ་བྱའི་རྒྱལ་པོ་ནམ་མཁའ་ལྡིང་གི་

མཐུའི་མགྱོགས་པ་ནི་ཚད་མེད་པ་སྟེ་དཔེ་བླང་དུ་སླ་བ་མ་ཡིན་ནོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་བྱ་ལང་གུ་ལིའི་མགྱོགས་པ་ལྟ་བུར་ནི་ཁོ་བོའི་རྫུ་འཕྲུལ་གྱི་མགྱོགས་པ་བལྟ་བར་བྱའོ། །ཇི་ལྟར་བྱའི་རྒྱལ་པོ་ནམ་མཁའ་ལྡིང་གི་
མཐུའི་མགྱོགས་པ་དེ་བས་ཀྱང་བརྒྱ་སྟོང་གིས་ཤིན་ཏུ་ལྷག་པར་ཁྱོད་ཀྱི་རྫུ་འཕྲུལ་མགྱོགས་པར་བལྟའོ། །དེས་སྨྲས་པ། བཙུན་པ་ཤཱ་རིའི་བུ་ཁྱོད་ཀྱི་སེམས་ཀྱི་རྣམ་པར་རྟོག་པ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་གང་ཡིན་པ་དང་། བདག་གི་གང་ཡིན་པ་དེ་
གཉིས་ནི་མཉམ་མོ་སྙམ་དུ་མ་གྱུར་ཏམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་སྐད་སྨྲས་པ་བཞིན་ཏེ། ཁོ་བོ་དེ་སྙམ་དུ་གྱུར་ཏོ། །དེས་སྨྲས་པ། ཅིའི་ཕྱིར་དེ་སྙམ་དུ་གྱུར། ཁོ་བོས་དེ་ལ་འདི་སྐད་ཅེས་སྨྲས་སོ། །ཉན་ཐོས་རྣམས་ནི་བག་ཆགས་ཀྱི་
མཚམས་སྦྱོར་བ་མ་བཅད་པའི་ཕྱིར་མི་མཉམ་དུ་ཟིན་ཀྱང་མཉམ་དུ་བདག་ཉིད་ཀྱིས་ཤེས་སོ། །དེས་སྨྲས་པ། བཙུན་པ་ཤཱ་རིའི་བུ་ལེགས་སོ། །ལེགས་སོ། །ཇི་སྐད་སྨྲས་པ་དེ་བཞིན་ནོ། །དེ་ཅིའི་ཕྱིར་ཞེ་ན། བཙུན་པ་ཤཱ་རིའི་བུ་སྔོན་བྱུང་བ་འདས་པའི་དུས་ན་རྒྱ་མཚོ་ཆེན་
པོའི་འགྲམ་ན་དྲང་སྲོང་ཆོས་འདོད་ཅེས་བྱ་བ་དང་། ཀུན་བྱིན་ཞེས་བྱ་བ་གཉིས་ཤིག་འཁོད་དེ། དེ་ལ་ཆོས་འདོད་ནི་ལྔ་མངོན་པར་ཤེས་ཤིང་མངོན་པར་ཤེས་པས་རྣམ་པར་རྩེ་བར་གྱུར་ཏོ། །ཀུན་བྱིན་ནི་རིག་པ་དང་སྔགས་ཀྱི་མཐུས་སྟེང་གི་བར་སྣང་ལ་འགྲོ་བར་གྱུར་ཏོ། །
དེ་ནས་དེ་གཉིས་དུས་དུས་སུ་སྤྱོད་པའི་ཕྱིར་རྒྱ་མཚོའི་ཚུ་རོལ་ནས་ཕ་རོལ་དུ་འདོང་ངོ་། །དོང་ནས་སླར་ལོག་ཅིང་རང་རང་གི་གནས་སུ་འཁོད་དོ། །དེ་ནས་དྲང་སྲོང་ཀུན་བྱིན་དེ་ཁོ་བོའི་རྫུ་འཕྲུལ་གང་ཡིན་པ་དང་། ཆོས་འདོད་ཀྱི་གང་ཡིན་པ་དེ་གཉིས་ནི་མཉམ་མོ་སྙམ་དུ་གྱུར་ཏོ། །དེ་
ནས་དུས་གཞན་ཞིག་ན་རྒྱ་མཚོའི་ཚུ་རོལ་ནས་ཕ་རོལ་དུ་དོང་སྟེ། སྲིན་མོའི་གླིང་དུ་ཕྱིན་པ་དང་། དེར་སྲིན་མོ་དེ་དག་གིས་ཡིད་དུ་འོང་བའི་རོལ་མོའི་སྒྲ་བྱས་པར་གྱུར་པ་ཡང་དྲང་སྲོང་ཀུན་བྱིན་གྱིས་ཐོས། སྲིན་མོ་དེ་དག་ཀྱང་མཐོང་ནས། ནམ་མཁའི་དཀྱིལ་ནས་སའི་སྟེང་དུ་ལྷུང་

ངོ་། །དེའི་རིག་པ་དང་སྔགས་ཀྱང་མ་རུང་བར་གྱུར་ཏོ། །དེ་ནས་དྲང་སྲོང་ཆོས་འདོད་སྙིང་རྗེ་བའི་སེམས་སྐྱེས་ནས་ལག་པ་གཡས་པས་བཟུང་སྟེ། སླར་རང་གི་གནས་སུ་ཁྲིད་ནས་བཞག་གོ། །བཙུན་པ་ཤཱ་རིའི་བུ་དེའི་ཚེ་དེའི་དུས་ན་དྲང་སྲོང་ཆོས་འདོད་ཅེས་བྱ་བ་དེ་གཞན་
ཞིག་ཡིན་པ་སྙམ་དུ་ཁྱོད་ཐེ་ཚོམ་མམ། ཡིད་གཉིས་སུ་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁོ་བོ་ཉིད་དེའི་ཚེ་དེའི་དུས་ན་དྲང་སྲོང་ཆོས་འདོད་ཅེས་བྱ་བར་གྱུར་ཏོ། །བཙུན་པ་ཤཱ་རིའི་བུ་དེའི་ཚེ་དེའི་དུས་ན་དྲང་སྲོང་ཀུན་བྱིན་ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་ཐེ་
ཙོམ་མམ། ཡིད་གཉིས་སུ་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁྱོད་ཉིད་དེའི་ཚེ་དེའི་དུས་ན་དྲང་སྲོང་ཀུན་བྱིན་ཞེས་བྱ་བར་གྱུར་ཏེ། ཚེ་དང་ལྡན་པ་ཤཱ་རིའི་བུ་དེའི་ཚེ་ཡང་མི་མཉམ་པར་བདག་དང་མཉམ་པ་ཉིད་དུ་བཞག་གོ། །དེ་ལྟར་དེ་ཕྱོགས་གཅིག་པའི་
ཡེ་ཤེས་དང་ལྡན་པའི་ཕྱིར་ད་ལྟར་ཡང་མི་མཉམ་བཞིན་དུ་བདག་དང་མཉམ་པར་བཞག་གོ། །ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་རབ་འབྱོར་ལ་ཡང་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་ཁོ་བོས་མངོན་པར་ཤེས་ཏེ། འཇམ་དཔལ་གཞོན་ནུར་
གྱུར་པ་དང་ལྷན་ཅིག་ཏུ་ལྷོ་ཕྱོགས་སུ་སངས་རྒྱས་ཀྱི་ཞིང་དུ་སྤྱད་པ་སྤྱོད་པའི་ཚེ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་མང་པོ་འདས་པ་ན་འཇིག་རྟེན་གྱི་ཁམས་རྒྱན་ཐམས་ཅད་ཀྱིས་བཀླུབས་པ་ཞེས་བྱ་བ་ན། བཅོམ་ལྡན་འདས་དེ་བཞིན་གཤེགས་པ་རིན་
ཆེན་སྲོག་ཤིང་ཞེས་བྱ་བའི་སངས་རྒྱས་ཀྱི་ཞིང་དུ་བཅོམ་ལྡན་འདས་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་ཕྱིན་ཏེ། དེ་ནས་ཡང་འཇམ་དཔལ་གཞོན་ནུར་གྱུར་པ་ཁོ་བོ་ལ་འདི་སྐད་ཅེས་ཟེར་རོ། །བཙུན་པ་ཤཱ་རིའི་བུ་ཁྱོད་ཀྱིས་གང་བདག་ཅག་
གིས་བརྒལ་བའི་སངས་རྒྱས་ཀྱི་ཞིང་དེ་དག་མཐོང་ངམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་མཐོང་ངོ་། །དེས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་སངས་རྒྱས་ཀྱི་ཞིང་དེ་དག་ཅི་འདྲ་བར་མཐོང་། དེ་ལ་ཁོ་བོས་འདི་སྐད་ཅེས་སྨྲས་སོ། །ཁ་ཅིག་

ནི་མེས་ཡོངས་སུ་གང་བའོ། །ཁ་ཅིག་ནི་ཆུས་ཡོངས་སུ་གང་བའོ། །ཁ་ཅིག་ནི་ནམ་མཁར་གྱུར་པའོ། །ཁ་ཅིག་ནི་འབྱོར་ཅིང་རྒྱས་པའོ། །ཁ་ཅིག་ནི་འཇིག་པའོ། །ཁ་ཅིག་ནི་འཆགས་པའོ། །ཁ་ཅིག་ནི་ངན་སོང་གིས་ཡོངས་སུ་གང་བའོ། །
ཁ་ཅིག་ནི་ངན་སོང་དང་བྲལ་བའོ། །སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་སངས་རྒྱས་ཀྱི་ཞིང་དེ་དག་ཇི་ལྟར་བལྟ་བར་བྱ། དེ་ལ་ཁོ་བོས་འདི་སྐད་ཅེས་སྨྲས་སོ། །གང་དག་མེས་ཡོངས་སུ་གང་བ་དེ་དག་ནི་མེས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ཆུས་
ཡོངས་སུ་གང་བ་དེ་དག་ནི་ཆུས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ནམ་མཁར་གྱུར་པ་དེ་དག་ནི་ནམ་མཁར་གྱུར་པ་ཉིད་དུ་བལྟ་བར་བྱའོ། །གང་དག་འབྱོར་ཅིང་རྒྱས་པ་དེ་དག་ནི་འབྱོར་ཅིང་རྒྱས་པ་ཉིད་དུ་བལྟ་བར་བྱའོ། །གང་དག་འཇིག་པ་དེ་དག་ནི་འཇིག་
པ་ཉིད་དུ་བལྟ་བར་བྱའོ། །གང་དག་འཆགས་པ་དེ་དག་ནི་འཆགས་པ་ཉིད་དུ་བལྟ་བར་བྱའོ། །གང་དག་ངན་སོང་གིས་ཡོངས་སུ་གང་བ་དེ་དག་ནི་ངན་སོང་གིས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ངན་སོང་དང་བྲལ་བ་དེ་དག་ནི་ངན་སོང་དང་བྲལ་བ་ཉིད་དུ་
བལྟ་བར་བྱའོ། །དེས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུའི་ཡེ་ཤེས་ཀྱི་ཡུལ་ཇི་ལྟ་བ་བཤད་པའང་དེ་བཞིན་ནོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་སངས་རྒྱས་ཀྱི་ཞིང་དེ་དག་ཇི་ལྟར་མཐོང་། དེས་སྨྲས་པ། ཚེ་དང་ལྡན་པ་ཤ་ར་དྭ་
ཏིའི་བུ་སངས་རྒྱས་ཀྱི་ཞིང་ཐམས་ཅད་ནི་ནམ་མཁའི་ཞིང་དུ་མཐོང་ངོ་། །དེ་ཅིའི་ཕྱིར་ཞེ་ན། འདི་ལྟ་སྟེ། མེས་ཡོངས་སུ་གང་བའམ། ཆུས་ཡོངས་སུ་གང་བའམ། འབྱོར་པ་རྒྱས་པ་འམ། འཇིག་པའམ། འཆགས་པའམ། ངན་སོང་གིས་ཡོངས་སུ་གང་
བའམ། ངན་སོང་དང་བྲལ་བ་དེ་དག་ནི་ཡང་དག་པ་མ་ཡིན་པའོ། །རྐྱེན་དེ་དག་ནི་གློ་བུར་དུ་བྱུང་བ་སྟེ། སྐྱེ་ཞིང་འཇིག་པ་དང་ལྡན་པའོ། །ནམ་མཁའ་ནི་རྐྱེན་གྱིས་བྱུང་བ་མ་ཡིན་ཏེ། རང་བཞིན་དུ་གནས་པ་ཉིད་དོ། །དེ་བཞིན་དུ་གློ་བུར་གྱི་ཉེ་བར་ཉོན་མོངས་པས་

སེམས་ཉོན་མོངས་པར་གྱུར་པ་ཞེས་བྱ་སྟེ། སེམས་ཀྱི་རང་བཞིན་ནི་ནམ་ཡང་ཉོན་མོངས་པར་གྱུར་པ་མེད་དོ། །ཚེ་དང་ལྡན་པ་ཤ་ར་དྭ་ཏིའི་བུ་འདི་ལྟ་སྟེ་དཔེར་ན་འདས་པའི་དུས་ན་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པས་བསྲེགས་པ་བྱུང་ཡང་ནམ་མཁའ་ལ་སྔོན་
ནམ་ཡང་ཚིག་པ་མེད་དོ། །ཚེ་དང་ལྡན་པ་ཤ་ར་དྭ་ཏིའི་བུ་དེ་བཞིན་དུ་སེམས་ཅན་རེ་རེས་ཀྱང་གང་གཱའི་ཀླུང་གི་བྱེ་མ་སྙེད་ཀྱི་མི་དགེ་བའི་ལས་མངོན་པར་འདུ་བྱས་ཀྱང་སེམས་ཀྱི་རང་བཞིན་ནི་ནམ་ཡང་དེ་བཞིན་དུ་ཉོན་མོངས་པར་གྱུར་པ་མེད་དོ། །ཚེ་དང་ལྡན་པ་ཤ་ར་དྭ་ཏིའི་
བུ་རིགས་ཀྱི་བུ་དང་། རིགས་ཀྱི་བུ་མོ་གང་ལ་ལ་རང་བཞིན་གྱིས་ཡོངས་སུ་དག་པའི་ཆོས་ཀྱི་དབྱིངས་དེ་ལྟ་བུ་ལ་འཇུག་པ་དེ་དག་ནི་ཀུན་ནས་ལྡང་བའམ། སྒྲིབ་པའམ། མངོན་པར་འདུ་བྱེད་པས་ཀུན་ནས་ལྡང་བར་འགྱུར་བ་ཆུང་ཟད་ཀྱང་མེད་དེ། འདི་ནི་ཀུན་ནས་ལྡང་བ་མེད་
པའི་ཆོས་ཀྱི་སྒོའོ། །ཆོས་ཀྱི་སྒོ་དེ་ལ་བརྟེན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་རང་བཞིན་ཡོངས་སུ་དག་པར་ཞུགས་ནས། ཉེས་པ་ལས་འབྱུང་བ་ལ་མཁས་པར་ཤེས་ཤིང་། དེའི་སེམས་ནམས་ཀྱང་སྒྲིབ་པའི་ཆོས་རྣམས་ཀྱིས་སྒྲིབ་
པར་མི་འགྱུར་རོ། །ཚེ་དང་ལྡན་པ་རབ་འབྱོར་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་དང་། ཆོས་བསྟན་པ་རྣམ་པར་འཕྲུལ་པ་ལས་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་
ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་ཀྱང་འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་ཏོ། །ཚེ་དང་ལྡན་པ་ཤཱ་རིའི་བུ་ཁོ་བོས་མངོན་པར་ཤེས་ཏེ། དུས་གཅིག་ཅིག་ན་བཅོམ་ལྡན་
འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདི་ཉིད་ན་དགེ་སློང་བརྒྱད་བརྒྱའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །དེའི་ཚེ་ན་མཉན་ཡོད་དུ་དུས་མ་ཡིན་པའི་

སྤྲིན་ཆེན་པོ་ཞིག་བྱུང་སྟེ། དེ་ལ་ཉིན་ཞག་བདུན་དུ་རྒྱུན་མ་ཆད་པར་དུས་མ་ཡིན་པའི་ཆར་ཆེན་པོ་བབ་བོ། །དེ་ན་དགེ་སློང་གང་དག་རྫུ་འཕྲུལ་ཆེ་བ། མཐུ་ཆེ་བ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་
ཐོབ་པ་དེ་དག་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་དུས་འདའ་བར་བྱས་ཀྱི། གང་དག་མ་ཐོབ་པ་དེ་དག་ནི་ཉིན་ཞག་བདུན་དུ་ཟས་ཆད་པར་གྱུར་ཏོ། །དེ་ནས་དགེ་སློང་དེ་དག་ཉམ་ཆུང་བ་དང་ལྡན་ཏེ། བཅོམ་
ལྡན་འདས་བལྟ་བའི་ཕྱིར་འདོང་ཡང་མ་ནུས་ནས་དེ་ལ་ཁོ་བོ་འདི་སྙམ་དུ་གྱུར་ཏེ། ཨེ་མའོ་དགེ་སློང་འདི་དག་ནི་རྗུད་པར་གྱུར་ན་བདག་བཅོམ་ལྡན་འདས་ཀྱི་དྲུང་དུ་སོང་སྟེ། ཚུལ་དེ་དག་བཅོམ་ལྡན་འདས་ལ་གསོལ་ལོ་སྙམ་དུ་གྱུར་ནས། ཁོ་བོ་བཅོམ་ལྡན་འདས་ག་ལ་
བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཨེ་མའོ་དགེ་སློང་འདི་དག་ཉིན་ཞག་བདུན་དུ་འཚལ་མ་ཆད་དེ་བཀྲེས་པས་ཉམ་ཆུང་བ་དང་ལྡན་ནས་
རྗུད་དེ། ཁྲི་དང་ཁྲིའུ་ལས་ལྡང་བ་དང་། བཅོམ་ལྡན་འདས་བལྟ་བའི་སླད་དུ་མཆི་བའི་རྔོ་ཡང་མི་ཐོགས་སོ། །དེ་ནས་བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སོང་སྟེ་འཇམ་དཔལ་གཞོན་ནུར་གྱུར་པ་ལ་ཚུལ་དེ་དག་སྨྲོས་ཤིག་དང་།
དེས་དགེ་སློང་གི་དགེ་འདུན་རྟས་པར་བྱེད་པར་འགྱུར་རོ། །ཁོ་བོས་བཅོམ་ལྡན་འདས་ཀྱི་ལྟར་མཉན་ནས་འཇམ་དཔལ་གཞོན་ནུར་གྱུར་པའི་གནས་ཁང་ག་ལ་བ་དེར་སོང་སྟེ་ཕྱིན་པ་དང་། དེའི་ཚེ་འཇམ་དཔལ་གཞོན་ནུར་གྱུར་པ་རང་གི་གནས་ཁང་ན་བརྒྱ་བྱིན་དང་། ཚངས་
པ་དང་། འཇིག་རྟེན་སྐྱོང་བ་རྣམས་ལ་ཆོས་སྟོན་པ་མཐོང་ངོ་། །འཇམ་དཔལ་གཞོན་ནུར་གྱུར་པ་དེས་ཀྱང་ཁོ་བོ་གནས་ཁང་གི་ནང་དུ་འོངས་པ་མཐོང་སྟེ། མཐོང་ནས་འདི་སྐད་ཅེས་ཟེར་རོ། །བཙུན་པ་ཀུན་དགའ་བོ་ཁྱོད་ཅིའི་ཕྱིར་རླུང་དང་ཆར་གྱི་ནང་ན་འདིར་འོངས། ཁོ་

བོས་འཇམ་དཔལ་གཞོན་ནུར་གྱུར་པ་ལ་ཚུལ་དེ་དག་སྨྲས་སོ། །དེ་ཁོ་བོ་ལ་ཀུན་དགའ་བོ་སོང་སྟེ་སྟན་ཐིང་ལ། གདུགས་ཚོད་བབ་ན་གཎྜཱི་རྡུངས་ཤིག་དེ་སྐད་ཅེས་ཟེར་ནས། ཁོ་བོ་འཇམ་དཔལ་གཞོན་ནུར་གྱུར་པའི་གནས་ཁང་ནས་བྱུང་སྟེ། དགེ་འདུན་གྱི་ཀུན་དགའ་
བར་སོང་ནས་སྟན་བཏིང་སྟེ། འཇམ་དཔལ་གཞོན་ནུར་གྱུར་པ་ཅི་གནས་ཁང་ནས་བྱུང་ངམ་ཞེས་འཇམ་དཔལ་གཞོན་ནུར་གྱུར་པའི་གནས་ཁང་དུ་ལྟ་ཞིང་ཕྱོགས་གཅིག་ཏུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་ལུས་ཐམས་ཅད་རྣམ་པར་འཇིག་པ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ནས་སྤྲུལ་པ་གཞན་ཞིག་སྤྲུལ་ཏེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་ལ་ཆོས་སྟོན་ཏོ། །དེ་གནས་ཁང་ནས་བྱུང་སྟེ་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་ན་ཁོ་བོས་ནི་མ་མཐོང་
ངོ་། །དེ་ནས་བདུད་སྡིག་ཅན་འདི་སྙམ་དུ་གྱུར་ཏེ། འཇམ་དཔལ་གཞོན་ནུར་གྱུར་པ་འདིས་སེང་གེའི་སྒྲ་བསྒྲགས་ནས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་ན་བདག་གིས་འདི་མིག་གིས་མི་རྩོལ་བར་བྱའོ་སྙམ་དུ་བསམས་ནས། དེས་དེ་ཉིད་ཀྱི་ཚེ་མཉན་
ཡོད་ཀྱི་གྲོང་ཁྱེར་ཆེན་པོའི་བྲམ་ཟེ་དང་། ཁྱིམ་བདག་དང་། གྲོང་འདབ་དང་། ཡུལ་མི་གང་གིས་ཀྱང་འཇམ་དཔལ་གཞོན་ནུར་གྱུར་པ་མི་མཐོང་བ་དང་། གང་ཡང་བསུར་མི་འོང་བ་དང་། སུ་ཡང་བསོད་སྙོམས་མི་འབུལ་བ་དེ་ལྟ་དེ་ལྟར་བྱིན་གྱིས་བརླབས་སོ། །
དེ་ནས་འཇམ་དཔལ་གཞོན་ནུར་གྱུར་པ་གང་དང་གང་དུ་སོང་བ་དེ་དག་ཐམས་ཅད་ན་སྒོ་དག་ཀྱང་བཅད་པར་སྣང་སྟེ། གང་ཡང་མི་བསུ་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བསམས་ན། ཨེ་མའོ་བྲམ་ཟེ་དང་། ཁྱིམ་བདག་འདི་དག་ནི་ཅི་ནས་ཀྱང་བདག་
མི་མཐོང་བ་དང་། གཏམ་མི་བྱ་བར་བདུད་ཀྱིས་བྱིན་གྱིས་བརླབས་སོ་སྙམ་དུ་བསམས་ནས། དེས་དེའི་ཚེ་གང་བདེན་པ་དང་། བདེན་པའི་ཚིག་དང་། བསོད་ནམས་དང་ཡེ་ཤེས་ཀྱི་ཚོགས་གང་དག་གིས་བདག་གི་སྤུའི་ཁུང་བུ་གཅིག་ལུས་ལ་སྐྱེས་པའི་བསོད་ནམས་

ཀྱི་ཕུང་པོ་དེ་ཡང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་བདུད་སྡིག་ཅན་རྣམས་ལ་མེད་པའི་བདེན་པ་དང་། བདེན་པའི་ཚིག་དེས་བདུད་ཀྱི་བྱིན་གྱི་རླབས་འདི་དག་མེད་པར་གྱུར་ཅིག །བདུད་སྡིག་ཅན་ཉིད་ཀྱང་ཁྱིམ་བདག་གི་ཚུལ་དུ་སྲང་དང་།
སུམ་མདོ་དང་། བཞི་མདོ་དག་ན་འཇམ་དཔལ་གཞོན་ནུར་གྱུར་པ་ལ་བསོད་སྙོམས་ཕུལ་ཅིག །ཕུལ་ཅིག །འདི་ལ་ཕུལ་ན་འབྲས་བུ་ཆེ་བར་འགྱུར་རོ། །གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ལ་ལོ་
འབུམ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས། གུས་པར་བྱས། ཕུ་དུད་དུ་བྱས་པ་བས། གང་གིས་འཇམ་དཔལ་གཞོན་ནུར་གྱུར་པ་ལ་བསོད་སྙོམས་སེན་མོའི་རྩེ་མོ་གང་ཙམ་ཕུལ་ན་དེའི་བསོད་ནམས་ཀྱི་ཕུང་པོ་ཆེས་མང་དུ་བསྐྱེད་པར་འགྱུར་རོ་ཞེས་སྒྲོགས་པར་
གྱུར་ཅིག་ཅེས་བདེན་པའི་བྱིན་གྱི་བརླབས་བྱས་སོ། །འཇམ་དཔལ་གཞོན་ནུར་གྱུར་པས་བྱིན་གྱི་རླབས་དེ་བྱས་མ་ཐག་ཏུ་དེ་ནས་དེ་ཉིད་ཀྱི་ཚེ་སྒོ་ཐམས་ཅད་ཀྱང་བྱེ་བར་གྱུར་ཏོ། །སྐྱེ་བོ་མང་པོ་ཐམས་ཅད་ཀྱང་བསུ་ཞིང་འཇམ་དཔལ་གཞོན་ནུར་གྱུར་པ་བདེ་བར་འོངས་སོ་ཞེས་
ཀྱང་རྗོད་དོ། །བདུད་སྡིག་ཅན་ཉིད་ཀྱང་ཁྱིམ་བདག་གི་ཚུལ་དུ་སྲང་དང་། སུམ་མདོ་དང་། བཞི་མདོ་དག་ན་འཇམ་དཔལ་གཞོན་ནུར་གྱུར་པ་ལ་བསོད་སྙོམས་ཕུལ་ཅིག །ཕུལ་ཅིག །འདི་ལ་ཕུལ་ན་འབྲས་བུ་ཆེ་བར་འགྱུར་རོ། །གང་གིས་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ལ་ལོ་འབུམ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས། གུས་པར་བྱས། ཕུ་དུད་དུ་བྱས་པ་བས། གང་གིས་འཇམ་དཔལ་གཞོན་ནུར་གྱུར་པ་ལ་བསོད་སྙོམས་སེན་མོ་གང་ཙམ་ཕུལ་ན་དེའི་བསོད་
ནམས་ཀྱི་ཕུང་པོ་ཆེས་མང་དུ་བསྐྱེད་པར་འགྱུར་རོ་ཞེས་སྒྲོགས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་ཅི་ནས་ཀྱང་ལྷུང་བཟེད་དེར་བསོད་པའི་བཟའ་བ་དང་། བཅའ་བ་དང་། མྱང་བ་ཕལ་ཆེར་བཅུག་པ་དེ་དག་ཐམས་ཅད་ཇི་ལྟར་སྣོད་སོ་སོར་བཅུག་པ་བཞིན་དུ་མ་

འདྲེས་པར་འདུག་པ་དང་། གང་དགེ་སློང་བརྒྱད་བརྒྱ་པོ་དེ་དག་དང་། བྱང་ཆུབ་སེམས་དཔའ་ཁྲི་ཉིས་སྟོང་པོ་དེ་དག་ལ་ཁ་ཟས་ཇི་ཙམ་གྱིས་ཆོག་པ་ལྷུང་བཟེད་དེས་བླངས་པར་འགྱུར་བ་དེ་ལྟ་དེ་ལྟར་རང་གི་ལྷུང་བཟེད་དེ་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་
ནུར་གྱུར་པས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་སྤྱད་ནས་མཉན་ཡོད་ཀྱི་གྲོང་ཁྱེར་གྱི་ཕྱི་རོལ་དུ་བྱུང་སྟེ། ལམ་ལས་བྱོལ་ནས་ལྷུང་བཟེད་དེ་སའི་སྟེང་དུ་བཞག་སྟེ་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ལྷུང་བཟེད་འདི་ཁྱེར་ལ་མདུན་དུ་
སོང་ཤིག །དེ་ནས་བདུད་སྡིག་ཅན་གྱིས་ལྷུང་བཟེད་དེ་ས་དེ་ལས་གདེག་པར་བྱས་ན་གདེགས་མ་ནུས་ནས། དེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ལྷུང་བཟེད་འདི་སའི་སྟེང་ནས་གདེག་པར་མ་ནུས་སོ། །སྨྲས་པ། སྡིག་
ཅན་ཁྱོད་ཀྱང་རྫུ་འཕྲུལ་ཆེ་ཞིང་མཐུ་ཆེན་པོ་དང་ལྡན་པ་ཡིན་ན་རྫུ་འཕྲུལ་གྱི་སྟོབས་ཀྱིས་ལྷུང་བཟེད་འདི་སའི་སྟེང་ནས་གདེག་པར་གྱིས་ཤིག །དེ་ནས་བདུད་སྡིག་ཅན་གྱིས་རྫུ་འཕྲུལ་གྱི་སྟོབས་ཀྱི་ཆོ་འཕྲུལ་ཐམས་ཅད་བསྟན་ཀྱང་ལྷུང་བཟེད་དེ་ས་དེ་ལས་ཐ་ན་སྐྲའི་རྩེ་མོའི་ཆ་
ཙམ་ཡང་གདེག་པར་མ་ནུས་ནས། དེ་ངོ་མཚར་དུ་གྱུར་ཏེ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁོ་བོ་ནི་འདོད་ན་རི་གཤོལ་མདའ་འཛིན་ཀྱང་ལག་མཐིལ་དུ་བླངས་ཏེ་ནམ་མཁའ་ལ་འདོར་ན་ཁོ་བོས་ལྷུང་བཟེད་ཆུང་ངུ་འདི་ལྟ་བུ་འདིས་འདིའི་
སྟེང་ནས་གདེག་པར་མ་ནུས་ན་དེ་ཅིའི་ཕྱིར་དེ་ལྟར་གྱུར། འཇམ་དཔལ་གྱིས་སྨྲས་པ། སེམས་ཅན་ཆེན་པོ་རྣམས་དང་། གང་ཟག་ཆེན་པོ་རྣམས་ཀྱི་སྟོབས་དྲངས་པ་ལྷུང་བཟེད་འདིར་བཅུག་སྟེ། དེའི་ཕྱིར་ཁྱོད་ཀྱིས་གདེག་པར་མ་ནུས་སོ། །དེ་ནས་འཇམ་དཔལ་
གཞོན་ནུར་གྱུར་པ་ཉིད་ཀྱིས་ལྷུང་བཟེད་དེ་ས་ལས་བླངས་ནས་བདུད་སྡིག་ཅན་ལ་བྱིན་ཏེ་འདི་སྐད་ཅེས་སྨྲས་སོ། །སྡིག་ཅན་ལྷུང་བཟེད་འདི་ཁྱེར་ལ་མདུན་དུ་སོང་ཤིག །དེ་ནས་བདུད་སྡིག་ཅན་དེ་སློབ་མ་བཞིན་དུ་ལྷུང་བཟེད་ཁྱེར་ཏེ་འཇམ་དཔལ་གཞོན་ནུར་གྱུར་པའི་

མདུན་དུ་སོང་ངོ་། །དེ་ནས་ལྷའི་བུ་དབང་སྒྱུར་ལྷའི་བུ་ཁྲི་ཉིས་སྟོང་གིས་ཡོངས་སུ་བསྐོར་ཅིང་མདུན་དུ་བདར་ཏེ་འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་ནས་ལྷགས་པ་དང་། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་མགོ་བོས་ཕྱག་
འཚལ་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་བྲན་བཞིན་དུ་འཇམ་དཔལ་གཞོན་ནུར་གྱུར་པའི་ལྷུང་བཟེད་ཁྱེར་ཏེ་མདུན་དུ་འགྲོ་བ་འདི་ཅི་ཞིག །བདུད་ཀྱིས་སྨྲས་པ། ལྷའི་བུ་མཐུ་དང་ལྡན་པ་རྣམས་དང་འགྲན་པ་ཅིའང་མེད་དོ། །ལྷའི་བུས་སྨྲས་པ། སྡིག་
ཅན་ཁྱོད་ཀྱང་རྫུ་འཕྲུལ་ཆེ་བ་མཐུ་ཆེན་པོ་དང་ལྡན་པའོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་བདུད་སྡིག་ཅན་གྱིས་ལྷའི་བུ་དབང་སྒྱུར་ལ་འདི་སྐད་ཅེས་སྨྲས་སོ། །ལྷའི་བུ་འདི་ལྟ་སྟེ། བདུད་ཀྱི་སྟོབས་ནི་གཏི་མུག་གི་སྟོབས་སོ། །བྱང་ཆུབ་སེམས་དཔའི་
སྟོབས་ནི་ཤེས་རབ་ཀྱི་སྟོབས་སོ། །བདུད་ཀྱི་སྟོབས་ནི་ང་རྒྱལ་གྱི་སྟོབས་སོ། །བྱང་ཆུབ་སེམས་དཔའི་སྟོབས་ནི་ཡེ་ཤེས་ཀྱི་སྟོབས་སོ། །བདུད་ཀྱི་སྟོབས་ནི་ལྟ་བ་འབྱུང་བའི་སྟོབས་སོ། །བྱང་ཆུབ་སེམས་དཔའི་སྟོབས་ནི་སྟོང་པ་ཉིད་ཀྱི་སྟོབས་སོ། །བདུད་ཀྱི་སྟོབས་
ནི་ཕྱིན་ཅི་ལོག་གི་སྟོབས་སོ། །བྱང་ཆུབ་སེམས་དཔའི་སྟོབས་ནི་བདེན་པའི་སྟོབས་སོ། །བདུད་ཀྱི་སྟོབས་ནི་ང་དང་ངའི་ཞེས་བྱ་བའི་སྟོབས་སོ། །བྱང་ཆུབ་སེམས་དཔའི་སྟོབས་ནི་བྱམས་པ་ཆེན་པོ་དང་སྙིང་རྗེ་ཆེན་པོའི་སྟོབས་སོ། །བདུད་ཀྱི་སྟོབས་ནི་འདོད་ཆགས་དང་
ཞེ་སྡང་དང་གཏི་མུག་གི་སྟོབས་སོ། །བྱང་ཆུབ་སེམས་དཔའི་སྟོབས་ནི་རྣམ་པར་ཐར་པའི་སྒོ་གསུམ་གྱི་སྟོབས་སོ། །བདུད་ཀྱི་སྟོབས་ནི་སྐྱེ་བ་དང་འཆི་བ་དང་། འབྱུང་བའི་སྟོབས་སོ། །བྱང་ཆུབ་སེམས་དཔའི་སྟོབས་ནི་སྐྱེ་བ་མེད་པ་དང་། འབྱུང་བ་མེད་པའི་ཆོས་ལ་
བཟོད་པ་རབ་ཏུ་ཐོབ་པའི་སྟོབས་སོ། །བདུད་སྡིག་ཅན་གྱིས་བསྟན་པ་འདི་བཤད་པའི་ཚེ་ལྷའི་བུའི་འཁོར་དེ་ལས་ལྷའི་བུ་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཉིས་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་

གྱུར་ཏོ།། །།བམ་པོ་གསུམ་པ། དེ་ནས་འཇམ་དཔལ་གཞོན་ནུར་གྱུར་པ་བདུད་སྡིག་ཅན་དང་ལྷན་ཅིག་ཏུ་ལྷུང་བཟེད་དེ་འཁོར་གྱི་ཁྱམས་སུ་བཞག་སྟེ་སོང་ཡང་ཁོ་བོས་མ་མཐོང་མ་ཐོས་ནས། གདུགས་ཚོད་ལ་བབ་པར་གྱུར་ཀྱང་འཇམ་དཔལ་གཞོན་ནུར་
གྱུར་པ་གནས་ཁང་དེ་ནས་བྱུང་བའམ་ཞུགས་པར་ཡང་མ་མཐོང་ནས། དེ་ལ་ཁོ་བོ་འདི་སྙམ་དུ་གྱུར་ཏེ། འཇམ་དཔལ་གཞོན་ནུར་གྱུར་པས་དགེ་སློང་གི་དགེ་འདུན་མ་བསླུས་སམ། བདག་བཅོམ་ལྡན་འདས་ཀྱི་དྲུང་དུ་སོང་སྟེ་ཚུལ་དེ་དག་གསོལ་ལོ་སྙམ་དུ་གྱུར་ནས། ཁོ་བོ་
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདུགས་ཚོད་ལ་བབ་ན་འཇམ་དཔལ་གཞོན་ནུར་གྱུར་པ་ནི་གནས་ཁང་དེ་ནས་མ་
བྱུང་ངོ་། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་འཁོར་གྱི་ཁྱམས་ཟླུམ་པོ་དེར་ཅི་ཡང་མ་མཐོང་ངམ། བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ན་ལྷུང་བཟེད་ཟས་ཀྱིས་གང་བ་
གཅིག་ཅིག་གདའོ། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སོང་ལ་གཎྜཱི་རྡུངས་ཏེ་དགེ་སློང་གི་དགེ་འདུན་སྡུས་ཤིག །བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་
འདི་དག་མང་པོ་ཞིག་མཆིས་ན་ལྷུང་བཟེད་གཅིག་གང་བའི་ཟས་ཀྱིས་ཇི་ལྟར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་སྙིང་ལས་ཆུང་བར་བྱོས་ཤིག །ཀུན་དགའ་བོ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་
སེམས་ཅན་ཐམས་ཅད་ཀྱིས་ལོ་འབུམ་དུ་ལྷུང་བཟེད་གཅིག་པོ་དེ་ལས་ཟོས་ཀྱང་ལྷུང་བཟེད་དེ་ནི་ཡོངས་སུ་ཟད་པར་མི་འགྱུར་རོ། །དེ་ཅིའི་ཕྱིར་ཞེ་ན། ལྷུང་བཟེད་དེ་ནི་འཇམ་དཔལ་གཞོན་ནུར་གྱུར་པས་བྱིན་གྱི་རླབས་ཀྱིས་བྱིན་གྱིས་བརླབས་ཏེ། འཇམ་དཔལ་གཞོན་ནུར་

གྱུར་པའི་སྦྱིན་པའི་ཕ་རོལ་ཏུ་ཕྱིན་པ་ནི་ཟད་མི་ཤེས་པའི་བསོད་ནམས་ལས་བྱུང་བའོ། །བཅོམ་ལྡན་འདས་ཀྱི་ལྟར་ཁོ་བོས་མཉན་ནས་སེམས་དགའ་བས་གཎྜཱི་བརྡུངས་ཏེ་དགེ་སློང་གི་དགེ་འདུན་ཡང་བསགས་སོ། །དེ་ནས་འཇམ་དཔལ་གཞོན་ནུར་གྱུར་
པས་གཎྜཱིའི་སྒྲ་ཐོས་ནས། ལྷའི་བུ་དེ་དག་དང་། བྱང་ཆུབ་སེམས་དཔའ་རྣམས་དང་འགྲོགས་ཏེ། རང་གི་གནས་ཁང་ནས་བྱུང་སྟེ། ཁྱམས་ཟླུམ་པོར་སོང་ནས་ལྷུང་བཟེད་དེ་ལས་བསོད་པའི་བཟའ་བ་དང་། བཅའ་བ་དང་། མྱང་བ་དང་། ཇི་ལྟར་སྣོད་སོ་སོ་ན་
བཞག་བཞག་པ་ལྟ་བུར་ཕན་ཚུན་མ་འདྲེས་པ་ཕལ་ཆེར་ཕྱུང་སྟེ་དགེ་སློང་མང་པོ་ཐམས་ཅད་ཀྱང་བརྟས་པར་བྱས་སོ། །བྱང་ཆུབ་སེམས་དཔའ་མང་པོ་ཐམས་ཅད་ཀྱང་ཚིམ་པར་བྱས་ཀྱང་ཟས་དེ་ནི་ཡོངས་སུ་ཟད་པའམ་གཏུགས་པར་མ་གྱུར་ཏོ། །དེ་ནས་བདུད་སྡིག་ཅན་གྱིས་འཇམ་
དཔལ་གཞོན་ནུར་གྱུར་པ་ལ་བར་ཆད་བྱ་བའི་ཕྱིར་ཤམ་ཐབས་ལེགས་པར་མ་བགོས་པ། བླ་གོས་ལེགས་པར་མ་གྱོན་པ། ཤ་ཚུགས་མ་ལེགས་པ། ལྷུང་བཟེད་རྡོལ་ཅིང་ཆག་པ། གོས་ངན་པ། སྣ་ལེབ་ལེབ་པོ་དང་། ཞར་བ་དང་། འཐེང་པོ་དང་། ཞ་བོ་དང་དེ་ལས་
ཁ་ཅིག་ནི་ཧ་ཅང་ཡང་རིང་བ། ཁ་ཅིག་ནི་ཧ་ཅང་ཐུང་བ། ཁ་ཅིག་ནི་ཧ་ཅང་གནག་པ། ཁ་ཅིག་ནི་ཧ་ཅང་དཀར་བ། ཁ་ཅིག་ནི་ཧ་ཅང་སྐེམ་པ། ཁ་ཅིག་ནི་ཧ་ཅང་སྦོམ་པ། ཁ་ཅིག་ནི་སྒུར་པོ། ཁ་ཅིག་ནི་མིའུ་ཐུང་སྟེ། དེ་དག་གཞོན་པའི་མཐའ་ནས་ཕྱག་འཚལ་ཞིང་
རྒན་པའི་མཐར་འདུག་སྟེ། སྐྱེ་བོ་མང་པོའི་ཚོགས་གང་གིས་མཐོང་བའི་སེམས་སྐྱོ་བར་འགྱུར་བའི་དགེ་སློང་བཞི་ཁྲི་སྤྲུལ་པར་གྱུར་ཏེ། དེ་དག་ལ་ཡང་ལྷུང་བཟེད་དེ་ནས་བསོད་པའི་བཟའ་བ་དང་། བཅའ་བ་དང་། མྱང་བ་ཕལ་ཆེར་ཕྱུང་སྟེ། བྱིན་ཀྱང་ལྷུང་བཟེད་དེ་ཟད་
པར་མ་གྱུར་ཏོ། །དེ་ནས་བདུད་སྡིག་ཅན་གྱིས་སྤྲུལ་པའི་དགེ་སློང་དེ་དག་རེ་རེས་ཀྱང་འབྲས་ཅན་ཡུལ་མ་ག་དྷཱའི་བྲེ་བོ་བཅུ་བཅུ་ཟོས་ཀྱང་ཚིམ་པར་མ་གྱུར་པ་དེ་ལྟར་བྱིན་གྱིས་བརླབས་སོ། དེ་ན་རུང་བྱེད་རྣམས་ཐམས་ཅད་ཡོངས་སུ་སྐྱོ་བར་གྱུར་ཀྱང་དེ་དག་ཚིམ་པར་བྱེད་མ་ནུས་སོ།

དེ་ནས་འཇམ་དཔལ་གཞོན་ནུར་གྱུར་པས་གང་དགེ་སློང་དེ་དག་ལྷུང་བཟེད་རྣམས་ཀྱང་ཡོངས་སུ་གང་ལ་ལག་པ་ན་ཡང་ཁམ་ཐོགས་ཤིང་ཁར་བཅུག་པའི་ཁམ་ཡང་མིད་མི་ནུས་ལ། དེ་དག་འགྲིན་པ་བཙིར་བ་བཞིན་དུ་མིག་ལོག་སྟེ་ས་ལ་ལྷུང་བ་དེ་ལྟར་བྱིན་གྱིས་བརླབས་སོ། །དེ་
ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱི་དགེ་སློང་འདི་དག་ཅིའི་ཕྱིར་ཟས་མི་ཟ། བདུད་ཀྱིས་སྨྲས་པ། འཇམ་དཔལ་བདག་གི་དགེ་སློང་འདི་དག་ནི་ཤི་ལ་ཐུག་པར་གྱུར་ན་ཁྱོད་ཀྱིས་དུག་དང་བསྲེས་པའི་ཟས་
མ་བྱིན་གྲང་། འཇམ་དཔལ་གྱིས་སྨྲས་པ། སྡིག་ཅན་དུག་མེད་པ་རྣམས་དུག་སྦྱིན་པར་ག་ལ་འགྱུར། གང་དག་དུག་སྲེལ་བ་དེ་དག་ནི་དུག་སྦྱིན་པར་བྱེད་ཀྱི། གང་དག་དུག་མི་སྲེལ་བ་དེ་དག་ནི་དུག་སྦྱིན་པར་མི་བྱེད་དོ། །སྡིག་ཅན་དུག་ཅེས་བྱ་བ་ནི་འདི་ལྟ་སྟེ། འདོད་ཆགས་
དང་། ཞེ་སྡང་དང་གཏི་མུག་སྟེ། དེ་དག་ཀྱང་ལེགས་པར་གསུངས་པའི་ཆོས་འདུལ་བ་ལ་མེད་དོ། །དུག་ཅེས་བྱ་བ་ནི་མ་རིག་པ་དང་། སྲིད་པའི་སྲེད་པ་དང་། ང་དང་ངའི་ཞེས་བྱ་བ་དང་། རྒྱུ་དང་། ལྟ་བ་དང་། མིང་དང་གཟུགས་དང་། རྗེས་སུ་ཆགས་པ་དང་། ཁོང་
ཁྲོ་བ་དང་། བདག་ཏུ་ལྟ་བ་དང་། གཞན་དུ་ལྟ་བ་དང་། སྒྲིབ་པ་དང་། ཀུན་ནས་ལྡང་བ་དང་། ཕུང་པོ་ལ་མངོན་པར་ཞེན་པ་དང་། ཁམས་ལ་རློམ་སེམས་སུ་བྱེད་པ་དང་། སྐྱེ་མཆེད་ལ་ཡོངས་སུ་འཛིན་པ་དང་། ཡུལ་ལ་ཆགས་པ་དང་། ཁམས་གསུམ་ལ་ཞེན་པ་དང་། བསྡུས་
པ་དང་། གཡེངས་པ་དང་། གཞག་པ་དང་། གདེག་པ་དང་། ཤི་འཕོ་བ་དང་། སྐྱེ་བ་དང་། འོང་བ་དང་། འགྲོ་བ་དང་། ལུས་ལ་མངོན་པར་ཆགས་པ་དང་། སྲོག་ལ་ཞེན་པ་དང་། སྡུག་པ་ཡིད་ལ་བྱེད་པ་དང་། ཕྱིན་ཅི་ལོག་ཏུ་གནས་པ་དང་། རྟེན་ཅིང་འབྲེལ་བར་འབྱུང་
བ་དང་མི་འཐུན་པ་དང་། ཆད་པར་ལྟ་བ་དང་། ཐེར་ཟུག་ཏུ་ལྟ་བ་དང་། འབྱུང་བར་ལྟ་བ་དང་། འཇིག་པར་ལྟ་བ་དང་། གཡོ་བ་དང་། རློམ་སེམས་དང་། རྟོག་པ་དང་། རྣམ་པར་རྟོག་པ་དང་། སོགས་པ་དང་། མདུད་པ་དང་། ཀུན་གཞི་དང་། ངེས་པའི་གཞི་དང་།

ཞེན་པ་དང་། ཁྱིམ་གྱི་གནས་ལ་དགའ་བ་དང་། ལེན་པ་དང་། འདོར་བ་དང་། སྟོང་པ་ཉིད་ཀྱིས་སྐྲག་པ་དང་། མཚན་མ་མེད་པ་ལ་གཡང་སར་འདུ་ཤེས་པ་དང་། སྨོན་པ་མེད་པ་ལ་གཤེད་མར་འདུ་ཤེས་པ་དང་། དམིགས་སུ་མེད་པ་ལ་དངོས་པོར་འདུ་
ཤེས་པ་དང་། ངེས་པར་འབྱུང་བའི་ཁམས་ལ་ཁ་ན་མ་ཐོ་བར་ལྟ་བ་དང་། ཆུ་བོ་ལས་རྒལ་བར་འདུ་ཤེས་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་ཆོས་མ་ཡིན་པར་འདུ་ཤེས་པ་དང་། ཡང་དག་པའི་ལྟ་བ་ལ་ལོག་པར་ལྟ་བར་འདུ་ཤེས་པ་དང་། ལོག་པར་ལྟ་བ་ལ་ཡང་
དག་པར་ལྟ་བར་འདུ་ཤེས་པ་དང་། དགེ་བའི་བཤེས་གཉེན་ལ་སྡིག་པའི་གྲོགས་པོར་འདུ་ཤེས་པ་དང་། སྡིག་པའི་གྲོགས་པོ་ལ་དགེ་བའི་བཤེས་གཉེན་དུ་འདུ་ཤེས་པ་དང་། སངས་རྒྱས་དང་མི་འཐུན་པ་དང་། ཆོས་སྤོང་བ་དང་། དགེ་འདུན་ལ་མ་གུས་པ་དང་། དགོན་
པའི་གནས་ལ་མངོན་པར་མི་དགའ་བ་དང་། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་མ་སྤངས་པ་དང་། རབ་ཏུ་འཛིན་པ་དང་། རྩོད་པ་འབར་བར་བྱེད་པ་དང་། བདེན་པ་ལ་བརྫུན་པར་འདུ་ཤེས་པ་དང་། བརྫུན་པ་ལ་བདེན་པར་འདུ་ཤེས་པ་དང་། འདོད་
པ་ལ་ཡོན་ཏན་དུ་འདུ་ཤེས་པ་དང་། འདུས་བྱས་ལ་བདེན་པར་འདུ་ཤེས་པ་དང་། འཁོར་བ་ལ་ཕན་ཡོན་རྣམ་པ་བཅུར་འདུ་ཤེས་པ་དང་། མྱ་ངན་ལས་འདས་པ་ལ་འཇིགས་པ་རྣམ་པ་བཅུར་འདུ་ཤེས་པའི་ཆོས་དེ་ལྟ་བུ་དེ་དག་ནི་དུག་ཡིན་ཏེ། སྡིག་ཅན་དེ་དག་ནི་ལེགས་པར་
གསུངས་པའི་ཆོས་འདུལ་བ་ལ་མེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་བསྟན་པ་ནི་བདུད་རྩི་བསྟན་པའོ། །སངས་རྒྱས་ཀྱི་བསྟན་པ་ནི་བདེ་བ་བསྟན་པའོ། །སངས་རྒྱས་ཀྱི་བསྟན་པ་ནི་སྤྲོས་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་མ་སྨད་པ་བསྟན་པའོ། །
སངས་རྒྱས་ཀྱི་བསྟན་པ་ནི་ཀུན་ནས་ལྡང་བ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་འབྱུང་བ་བསྟན་པའོ། །སངས་རྒྱས་ཀྱི་བསྟན་པ་ནི་འཐབ་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་རྩོད་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་བདག་

དང་གཞན་ལ་མི་གདུང་བ་བསྟན་པའོ། །སངས་རྒྱས་ཀྱི་བསྟན་པ་ནི་བྱམས་པ་དང་ལྡན་པའི་བསྟན་པའོ། །སངས་རྒྱས་ཀྱི་བསྟན་པ་ནི་གནས་དང་། སྐྱབས་དང་། གླིང་དང་། དཔུང་གཉེན་བསྟན་པའོ། །སངས་རྒྱས་ཀྱི་བསྟན་པ་ནི་དུལ་བ་དང་། ཞི་བ་དང་། རབ་
ཏུ་ཞི་བ་དང་། ཉེ་བར་ཞི་བ་བསྟན་པའོ། །སངས་རྒྱས་ཀྱི་བསྟན་པ་ནི་དག་པ་དང་། རྣམ་པར་དག་པ་དང་། ཡོངས་སུ་དག་པ་དང་། འོད་གསལ་བ་བསྟན་པའོ། །སངས་རྒྱས་ཀྱི་བསྟན་པ་ནི་ཡང་དག་པའི་ནན་ཏན་བསྟན་པའོ། །སངས་རྒྱས་ཀྱི་བསྟན་པ་ནི་མི་དཀྲུག་
པ་བསྟན་པའོ། །སངས་རྒྱས་ཀྱི་བསྟན་པ་ནི་ཤིན་ཏུ་དུལ་བ་བསྟན་པའོ། །སངས་རྒྱས་ཀྱི་བསྟན་པ་ནི་ཤིན་ཏུ་རྣམ་པར་དག་པ་བསྟན་པའོ། །སངས་རྒྱས་བསྟན་པ་ནི་བསྟོད་ཅིང་བསྔགས་པ་བསྟན་པའོ། །སངས་རྒྱས་ཀྱི་བསྟན་པ་ནི་ཞི་བ་དང་། རབ་ཏུ་ཞི་བ་དང་། ཤིན་
ཏུ་ངེས་པར་བསྟན་པའོ། །སངས་རྒྱས་ཀྱི་བསྟན་པ་ནི་གྲོལ་བ་དང་། རྣམ་པར་གྲོལ་བ་དང་། ཡོངས་སུ་གྲོལ་བ་བསྟན་པའོ། །སངས་རྒྱས་ཀྱི་བསྟན་པ་ནི་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཚར་གཅོད་པ་བསྟན་པའོ། །སངས་རྒྱས་ཀྱི་བསྟན་པ་ནི་བདུད་
ཐམས་ཅད་འཇོམས་པ་བསྟན་པའོ། །སངས་རྒྱས་ཀྱི་བསྟན་པ་ནི་སྐྱེ་བ་དང་། ཤི་འཕོ་དང་། འབྱུང་བ་ལས་ངེས་པར་འབྱུང་བ་བསྟན་པའོ། །དྲན་པ་ཉེ་བར་བཞག་པས་དྲན་པ་བསྟན་པའོ། །སྡིག་པ་ཐམས་ཅད་མི་བྱེད་པས་ཡང་དག་པར་སྤོང་བ་བསྟན་པའོ། །
ལུས་དང་སེམས་ཡང་བས་རྫུ་འཕྲུལ་གྱི་རྐང་པ་བསྟན་པའོ། །དད་པ་སྔོན་དུ་འགྲོ་བས་དབང་པོ་བསྟན་པའོ། །ཉོན་མོངས་པ་ཐམས་ཅད་ཀྱིས་མི་རྫི་བས་སྟོབས་བསྟན་པའོ། །འཐུན་པར་ཁོང་དུ་ཆུད་པས་བྱང་ཆུབ་ཀྱི་ཡན་ལག་བསྟན་པའོ། །འབྱུང་བས་ལམ་
བསྟན་པའོ། །སེམས་ཞི་བས་ཞི་གནས་བསྟན་པའོ། །རྣམ་པར་གྲོལ་བ་བསྐྱེད་པས་ལྷག་མཐོང་བསྟན་པའོ། །སླུ་བར་མི་བྱེད་པས་བདེན་པ་བསྟན་པའོ། །དོན་དང་། ཆོས་དང་། ངེས་པའི་ཚིག་དང་། སྤོབས་པ་དང་མི་འགལ་བས་སོ་སོ་ཡང་དག་པར་

རིག་པ་བསྟན་པའོ། །འདུས་བྱས་ལ་སྨོན་པས་མི་རྟག་པ་དང་། སྡུག་བསྔལ་བ་ཡོངས་སུ་བརྗོད་པ་བསྟན་པའོ། །ཡ་མཚན་ཅན་ཐམས་ཅད་སྤོང་བས་བདག་མེད་པ་བསྟན་པའོ། །མྱ་ངན་ལས་འདའ་བར་འགྲོ་བས་ཞི་བ་བསྟན་པའོ། །ཕ་རོལ་དུ་
འགྲོ་བས་ཕ་རོལ་དུ་ཕྱིན་པ་བསྟན་པའོ། །སེམས་ཅན་ཡང་དག་པར་སྡུད་པས་ཐབས་བསྟན་པའོ། །ཞེ་འགྲས་པའི་སེམས་མེད་པས་བྱམས་པ་བསྟན་པའོ། །འཚེ་བ་མེད་པས་སྙིང་རྗེ་བསྟན་པའོ། །མི་དགའ་བ་སེལ་བས་དགའ་བ་བསྟན་པའོ། །བྱ་བ་བྱས་
པས་བཏང་སྙོམས་བསྟན་པའོ། །ང་རྒྱལ་མེད་པས་ཡེ་ཤེས་བསྟན་པའོ། །བྱང་ཆུབ་ཀྱི་སེམས་བསྐྱེད་པས་དཀོན་མཆོག་གསུམ་གྱི་གདུང་མི་འཆད་པ་བསྟན་པའོ། །ཡང་འབྱུང་བ་མེད་པས་བདེ་བ་ཐམས་ཅད་དང་འཐུན་པ་བསྟན་པའོ། །བསྟན་པའི་བཤད་པ་འདི་
བསྟན་པའི་ཚེ་གང་བདུད་སྡིག་ཅན་དང་ལྷན་ཅིག་ཏུ་ལྷའི་བུ་གང་དག་ལྷགས་པ་དེ་ལས་ལྷའི་བུ་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཏེ། དེ་དག་གིས་བཅོམ་ལྡན་འདས་བདག་ཅག་ཀྱང་སངས་རྒྱས་ཀྱི་བསྟན་པ་དེ་ལྟ་བུ་དང་འཐུན་པར་
གྱུར་ཅིག་ཅེས་དེ་སྐད་ཀྱི་ཚིག་སྨྲས་སོ། །བཅོམ་ལྡན་འདས་ཀྱིས་ཀྱང་འཛུམ་པ་མཛད་དེ། ཁོ་བོས་འཛུམ་པའི་ཕྱིར་ཞུས་སོ། །ཞུས་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བདུད་ཀྱི་སྤྲུལ་པའི་དགེ་སློང་འདི་དག་ཁྱོད་
ཀྱིས་མཐོང་ངམ། བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མཐོང་ངོ་། །བདེ་བར་གཤེགས་པ་མཐོང་ངོ་། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཕྱི་མའི་དུས་ཕྱི་མའི་ཚེ་ལྔ་བརྒྱ་
ཐ་མ་ལ་དམ་པའི་ཆོས་འཇིག་པའི་ཚེ་ངའི་བསྟན་པ་ལ་དགེ་སློང་དག་ཕལ་ཆེར་འདི་བཞིན་དུ་ཤམ་ཐབས་ལེགས་པར་མ་གྱོན་པ། བླ་གོས་ལེགས་པར་མ་བགོས་པ། གོས་བརྟུལ་ཏེ་གྱོན་པ། ལྷུང་བཟེད་ཆག་པ། ཤེས་བཞིན་མེད་པ། སྤྱོད་ལམ་མི་སྡུག་པ། ལག་

ན་འཁར་བ་ཐོགས་པ། སྣ་ལེབ་ལེབ་པོ་དང་། ཞར་བ་དང་། འཐེང་པོ་དང་། ཞ་བོ་དང་། ལུས་ཀྱི་ཤ་ཚུགས་མ་ལེགས་པ་དང་། ནད་སྣ་ཚོགས་ཀྱིས་བཏབ་པ་དག་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེའི་ཚེ་དགེ་སློང་དག་ཕལ་ཆེར་
བསྙེན་བཀུར་ལ་ཆེད་ཆེ་བར་བྱེད་པ་རྙེད་པ་དང་བཀུར་སྟི་ལ་རྟེན་པ་དང་། བྱ་བ་སྣ་ཚོགས་ཀྱི་མི་ཁོམ་པས་བྲེལ་བ་དང་། འདུལ་བ་བོར་བ་དང་། སོ་སོར་ཐར་པ་འདྲལ་བ་དང་། མཚམས་ལས་འདའ་བ་དང་། ཚེ་འདི་ཆེད་ཆེ་བར་བྱེད་པ་དང་། ཚེ་རབས་གཞན་ཆེད་མི་ཆེ་བར་
བྱེད་པར་འགྱུར་ཏེ། དེ་དག་འདི་ལྟ་སྟེ། ཆོས་ཀྱི་ཕྱིར་ནི་མ་ཡིན་གྱི། བསྙེན་བཀུར་གྱི་ཕྱིར་ཞར་བ་དང་། འཐེང་པོ་དང་། ཞ་བོ་དང་། ལུས་ཀྱི་ཤ་ཚུགས་མ་ལེགས་པ་དང་། ནད་སྣ་ཚོགས་ཀྱིས་བཏབ་པ་འོངས་ཤིང་ལྷགས་པ་རྣམས་རབ་ཏུ་འབྱུང་བར་བྱེད་དོ། །བསྙེན་
པར་རྫོགས་པར་བྱེད་དོ། །ཀུན་དགའ་བོ་དེའི་ཚེ་དེའི་དུས་ན་ངའི་བསྟན་པ་འདི་ལ་བལྟར་མི་རུང་བ་དང་མཉན་དུ་མི་རུང་བར་འགྱུར་རོ། །ལྷ་རྣམས་ཀྱང་ཡིད་མི་དགའ་བར་འགྱུར་རོ། །བདུད་རྣམས་ཡི་རངས་ཤིང་དགའ་བ་དང་བཏང་སྙོམས་སུ་འགྱུར་རོ། །བཅོམ་ལྡན་
འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ན་བདུད་སྡིག་ཅན་རྣམས་ཡི་རངས་ཤིང་དགའ་བ་དང་བཏང་སྙོམས་སུ་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ལྟར་སྐྱེས་བུ་བླུན་པོ་དེ་དག་བདག་ཉིད་བདུད་ཀྱི་ལས་
བྱེད་པར་འགྱུར་ཏེ། དེ་ལ་བར་ཆད་བྱ་བའི་ཕྱིར་ཕྱིར་ཞིང་བདུད་སྡིག་ཅན་བརྩོན་པར་མི་འགྱུར་རོ། །དེ་ཅིའི་ཕྱིར་ཞེ་ན། བདུད་སྡིག་ཅན་ནི་མི་བརྩོན་པ་རྣམས་ལ་གླགས་མི་ཚོལ་གྱི། བདུད་སྡིག་ཅན་ནི་དགེ་སློང་གང་དག་ཡང་འབྱུང་བ་མེད་པར་བྱ་བའི་ཕྱིར་མགོ་དང་
གོས་ལ་མེ་འབར་བ་བཞིན་དུ་བརྩོན་པར་གནས་པ་དེ་དག་ལ་བདུད་གླགས་ཚོལ་ཏེ། ཀུན་དགའ་བོ་དེ་ལྟ་བས་ན་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་ཕྱིར་སྦྱོར་བར་བྱོས་ཤིག །བསྩལ་བར་བྱོས་ཤིག །

འབད་པར་བྱོས་ཤིག །བདུད་ཀྱི་ཕྱོགས་ཚར་ཆོད་ཅིག །དེ་བཞིན་གཤེགས་པའི་བསྟན་པ་འབར་བར་བྱོས་ཤིག །དམ་པའི་ཆོས་ཡོངས་སུ་ཟུང་ཤིག །ང་ལ་ཆོས་ཀྱི་མཆོད་པས་མཆོད་ཅིག །འདི་ནི་ཁྱོད་ལ་རྗེས་སུ་བསྟན་པ་ཡིན་ནོ། །བསྟན་
པ་འདི་བཤད་པའི་ཚེ་དགེ་སློང་ལྔ་སྟོང་གིས་ཚེའི་འདུ་བྱེད་སྤངས་པར་གྱུར་ཏེ། བདག་ཅག་གིས་བཅོམ་ལྡན་འདས་ཀྱི་དམ་པའི་ཆོས་རྣམ་པར་འཇིག་པ་མཐོང་བར་མ་གྱུར་ཅིག་ཅེས་དེ་སྐད་ཀྱི་ཚིག་སྨྲས་ནས། དེ་དག་སྟེང་གི་བར་སྣང་ལ་མངོན་པར་འཕགས་ཏེ། རང་གི་མེའི་
ཁམས་ཀྱིས་བདག་ཉིད་བསྲེགས་སོ། །ལྷའི་བུ་འབུམ་གྱིས་ཀྱང་དེ་དག་ལ་མཆོད་པ་བྱས་པར་གྱུར་ཏོ། །དགེ་སློང་ཉིས་བརྒྱ་ནི་ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དགེ་སློང་ཉིས་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་
རྣམ་པར་གྲོལ་ལོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་ཀྱང་འཁོར་དང་བཅས་ཏེ་བཅོམ་ལྡན་འདས་ཀྱི་སྤྱན་སྔ་ན་ཐལ་མོ་སྦྱར་ཏེ། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་དམ་པའི་ཆོས་རྣམ་པར་འཇིག་པ་མི་མཐོང་བར་བགྱི་བ་དང་། བཅོམ་ལྡན་འདས་ཆོས་ཀྱི་རྣམ་གྲངས་འདི་གང་དག་གི་རྣ་ལམ་དུ་གྲགས་པར་གྱུར་པ་དེ་དག་ནམས་ཀྱང་སེམས་ལེ་ལོའི་
དྲི་མས་ཀུན་ནས་མི་གནས་པར་བགྱི་བ་དང་། དེ་དག་བདུད་ཀྱི་ལས་བྱུང་ཞིང་བྱུང་བ་རྣམས་ཀྱི་དབང་དུ་མི་འགྱུར་བར་བཅོམ་ལྡན་འདས་སྐུ་ཚེ་རིང་དུ་བཞུགས་ཤིང་བསྐྱང་བར་གསོལ་ཞེས་སྨྲས་སོ། །ཚེ་དང་ལྡན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་
པར་འཕྲུལ་པ་དང་། ཆོས་སྟོན་པ་རྣམ་པར་འཕྲུལ་པ་ལས་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་ཡིན་ནོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་ཀྱང་

འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་ཏོ། །ཚེ་དང་ལྡན་པ་ཤཱ་རིའི་བུ་ཁོ་བོས་མངོན་པར་ཤེས་ཏེ། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ། ཁོ་བོ་ཡང་རབ་ཏུ་བྱུང་ནས་རིང་པོ་མ་ལོན་པ་ཞིག་
ན་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་དེ་བཞིན་གཤེགས་པ་རིན་ཆེན་སྲོག་ཤིང་གི་སངས་རྒྱས་ཀྱི་ཞིང་ནས་བཅོམ་ལྡན་འདས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་འདིར་དང་པོ་འོངས་པར་གྱུར་ཏེ། བཅོམ་ལྡན་
འདས་ཀྱང་མཉན་ཡོད་ཀྱི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདིར་དབྱར་གནས་པར་དམ་བཅའ་མཛད་དོ། །འཇམ་དཔལ་གཞོན་ནུར་གྱུར་པའང་དེར་དབྱར་ཟླ་བ་གསུམ་གནས་པར་དམ་བཅས་ནས། བཅོམ་ལྡན་འདས་ཀྱི་སྤྱན་སྔ་དང་། དགེ་
འདུན་གྱི་ནང་དང་བཀད་ས་དང་། གསོ་སྦྱོང་དང་། ཕྱག་འཚལ་བའི་ལས་ལ་ཁོ་བོ་ཅག་གིས་ཕྱིར་ནམ་ཡང་མ་མཐོང་བར་གྱུར་ཏོ། །དེ་ནས་དབྱར་ཟླ་བ་གསུམ་ཟད་དེ་འདས་པ་དང་། གསོ་སྦྱོང་དང་། དགག་དབྱེའི་ཚེ་འཇམ་དཔལ་གཞོན་ནུར་གྱུར་པས་བཞིན་བསྟན་ཏོ། །དེ་
ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་དབྱར་གྱི་ཟླ་བ་དེ་གསུམ་གྱི་ཚེ་གང་ན་འདུག་འདུག་དེས་སྨྲས་པ། བཙུན་པ་འོད་སྲུང་ཆེན་པོ་མཉན་ཡོད་ཀྱི་གྲོང་ཁྱེར་ཆེན་པོ་འདི་ཉིད་ན་རྒྱལ་པོ་གསལ་རྒྱལ་གྱི་བཙུན་མོའི་ནང་ནའོ། །དེ་ལ་ཁོ་བོ་འདི་སྙམ་དུ་གྱུར་ཏེ།
སེམས་དཔའ་འདི་ལྟ་བུ་ལྟུང་བ་དང་བཅས་པ་དང་ཡོངས་སུ་དག་པའི་དགེ་སློང་གི་དགེ་འདུན་དང་ལྷན་ཅིག་དགག་དབྱེ་བྱར་མི་རུང་ངོ་སྙམ་དུ་གྱུར་ནས། ཁོ་བོ་འཁོར་གྱི་ཁྱམས་དེ་ནས་བྱུང་སྟེ། འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་གཎྜཱི་བརྡུངས་སོ། །དེར་བཅོམ་
ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གནས་བརྟན་འོད་སྲུང་ཆེན་པོ་ཅིའི་ཕྱིར་གཎྜཱི་རྡུངས་པ་སོམས་ཤིག །དེས་གསོལ་པ། བཅོམ་ལྡན་འདས་བསམས་ན་བདག་བསྐྲད་པའི་སླད་དུའོ། །བཅོམ་ལྡན་

འདས་ཀྱིས་བཀའ་སྩལ་པ། འཇམ་དཔལ་ཁྱོད་ལ་མ་དད་པ་ཆེན་པོ་བྱེད་པར་མི་འགྱུར་བར་བདག་ཉིད་ཚངས་པར་བྱོས་ཤིག །རང་གི་སྤྱོད་ཡུལ་སྟོན་ཅིག །ཉན་ཐོས་ཆེན་པོ་རྣམས་མགུ་བར་བྱོས་ཤིག །དེ་ནས་འཇམ་དཔལ་གཞོན་ནུར་
གྱུར་པས་དེའི་ཚེ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཡང་དག་པར་སྟོན་པ་ཞེས་བྱ་བ་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པས་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་ཕྱོགས་བཅུ་ན་སངས་
རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ན་སྦྱངས་པའི་ཡོན་ཏན་སྨྲ་བའི་དགེ་སློང་འོད་སྲུང་ཆེན་པོ་འདྲ་བ་ཤ་སྟག་འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་གཎྜཱི་རྡུང་བར་སྣང་བར་གྱུར་ཏོ། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་
ཅིའི་ཕྱིར་གཎྜཱི་རྡུང་། བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དེ་དབྱར་ཟླ་གསུམ་དུ་བཙུན་མོའི་འཁོར་དུ་གནས་ནས་ཡོངས་སུ་དག་པའི་དགེ་སློང་གི་དགེ་འདུན་དང་ལྷན་ཅིག་དགག་དབྱེ་བགྱིད་པར་
འཚལ་ཏེ། དེ་བསྐྲད་པའི་སླད་དུ་བདག་གཎྜཱི་རྡུང་ངོ་། །དེ་ནས་བཅོམ་ལྡན་འདས་ཀྱིས་སྐུ་ཐམས་ཅད་ལས་འོད་ཕྱུང་སྟེ། ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཕྱོགས་བཅུ་ན་ཅི་སྣང་བ་ཇེ་ལྟོས་ཤིག །ཁོ་བོས་དེའི་ཚེ་བལྟས་ན་ཕྱོགས་བཅུ་ན་
འཇིག་རྟེན་གྱི་ཁམས་ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་ན། གནས་བརྟན་བདག་འདྲ་བ་ཤ་སྟག་འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་གཎྜཱི་རྡུང་བར་མཐོང་ངོ་། །འཇིག་རྟེན་གྱི་ཁམས་དེ་དག་ཐམས་ཅད་ན་ཡང་འཇམ་དཔལ་གཞོན་
ནུར་གྱུར་པ་སངས་རྒྱས་བཅོམ་ལྡན་འདས་དེ་དག་གི་ཞབས་ཀྱི་དྲུང་ན་འདུག་པར་མཐོང་ངོ་། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཆེན་པོ་ཁྱོད་ཅི་འཇམ་དཔལ་གཞོན་ནུར་གྱུར་པ་གང་ངའི་མདུན་ན་འདུག་པ་འདི་འམ། འོན་ཏེ་གང་

དག་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་ཚད་མེད་པ་ན། སངས་རྒྱས་བཅོམ་ལྡན་འདས་ཀྱི་ཞབས་ཀྱི་དྲུང་ན་འདུག་པའམ་གང་བསྐྲད་པར་འདོད། དེའི་ཚེ་ཁོ་བོ་ངོ་ཚ་བའི་ཚུལ་གྱིས་གཎྜཱི་དེ་ས་ལ་དོར་རོ་སྙམ་ན། དོར་ཡང་མ་ནུས་ནས་རྒྱུན་མ་ཆད་པར་སྒྲ་བྱུང་
སྟེ། རྒྱལ་བུ་རྒྱལ་བྱེད་ཀྱི་ཚལ་ན་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་ཐམས་ཅད་ནའང་ཆད་པ་མེད། ལྷག་པ་མེད། སྐྱེས་པ་མེད་པར་དེ་བཞིན་དུ་བྱེད་པར་སྣང་ངོ་། །ཁོ་བོས་དེའི་ཚེ་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤེས་པ་ཕྱོགས་གཅིག་པ་དང་ལྡན་པ་སྟེ། བྱང་ཆུབ་སེམས་དཔའ་ཡུལ་ཚད་མ་མཆིས་པ་རྣམས་ཀྱི་སྤྱོད་ཡུལ་མ་འཚལ་ནས་གཎྜཱི་བརྡུངས་པ་འཇམ་དཔལ་གཞོན་ནུར་གྱུར་པ་ལ་བཟོད་པ་གསོལ་ལོ། །བཅོམ་ལྡན་
འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཆེན་པོ་ཁྱོད་ཀྱིས་སངས་རྒྱས་ཀྱི་ཞིང་ན་འཇམ་དཔལ་གཞོན་ནུར་གྱུར་པ་འདི་སྙེད་མཐོང་བ་ཐམས་ཅད་དུ་ཁྱིམ་པའི་ཁྱིམ་དུ་སེམས་ཅན་ཡོངས་སུ་སྨིན་པར་བྱ་བའི་ཕྱིར་དབྱར་ཟླ་གསུམ་དུ་གནས་སོ། །འོད་སྲུང་
ཆེན་པོ་འཇམ་དཔལ་གཞོན་ནུར་གྱུར་པ་འདི་མཉན་ཡོད་ཀྱི་གྲོང་ཁྱེར་ཆེན་པོ་འདིར་བཙུན་མོའི་འཁོར་དུ་དབྱར་གནས་པར་དམ་བཅས་པས་ཀྱང་རྒྱལ་པོ་གསལ་རྒྱལ་གྱི་བཙུན་མོའི་འཁོར་ལས་བུད་མེད་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་
ཡོངས་སུ་སྨིན་པར་བྱས་སོ། །སྐྱེས་པ་ལྔ་བརྒྱ་དང་། ཁྱེའུ་ལྔ་བརྒྱ་དང་། བུ་མོ་ལྔ་བརྒྱ་དང་། སྨད་འཚོང་མ་ལྔ་བརྒྱ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བཞག་གོ། །སེམས་ཅན་མང་པོ་དག་ཀྱང་ཉན་ཐོས་ཀྱི་ཐེག་པར་
བརྟུལ་ཏེ་མཐོ་རིས་སུ་འགྲོ་བར་བྱས་སོ། །བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཇི་ལྟ་བུ་ཞིག་བཤད་པས་འཇམ་དཔལ་གཞོན་ནུར་གྱུར་པས་སེམས་ཅན་དེ་སྙེད་ཅིག་ཡོངས་སུ་སྨིན་པར་བགྱིས། བཅོམ་ལྡན་འདས་ཀྱིས་

བཀའ་སྩལ་པ། འོད་སྲུང་ཆེན་པོ་འཇམ་དཔལ་གཞོན་ནུར་གྱུར་པ་དེ་ཉིད་ལ་ཆོས་ཇི་ལྟ་བུ་ཞིག་བཤད་པས་སེམས་ཅན་དེ་སྙེད་ཡོངས་སུ་སྨིན་པར་བྱས་ཞེས་ཁྱོད་ཀྱིས་དྲིས་ཤིག་དང་། དེ་ཉིད་ཁྱོད་ལ་ལན་ལྡོན་པར་འགྱུར་རོ། །ཁོ་བོས་འཇམ་དཔལ་གཞོན་
ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་ཆོས་ཇི་ལྟ་བུ་ཞིག་བཤད་པས་སེམས་ཅན་དེ་སྙེད་ཡོངས་སུ་སྨིན་པར་བྱས། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་སེམས་ཅན་དེ་ལྟ་བུ་དེ་དག་ནི་ཆོས་བཤད་པས་ཡོངས་སུ་སྨིན་པར་མི་
འགྱུར་ཏེ། དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ་སེམས་ཅན་གང་དག་དགའ་བའི་རྩེད་མོས་ཡོངས་སུ་སྨིན་པར་འགྱུར་བ་ཡང་ཡོད། རབ་ཏུ་གཟུང་བ་དང་། ཚར་གཅད་པ་དང་། སྦྱིན་པ་རབ་ཏུ་སྦྱིན་པ་དང་། ཕོངས་ཤིང་དབུལ་བ་དང་། བཀོད་པ་ཆེན་
པོ་དང་། ཀུན་རྗོད་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་དང་། བརྒྱ་བྱིན་གྱི་གཟུགས་དང་། ཚངས་པའི་གཟུགས་དང་། འཇིག་རྟེན་སྐྱོང་བའི་གཟུགས་དང་། འཁོར་ལོས་སྒྱུར་བའི་གཟུགས་དང་། སངས་རྒྱས་ཀྱི་
སྐུ་དང་། རང་སངས་རྒྱས་ཀྱི་གཟུགས་དང་། ཉན་ཐོས་ཀྱི་གཟུགས་དང་། འཇིགས་པས་བསྡིགས་པ་དང་། ཚིག་རྩུབ་པོ་དང་། ཚིག་འཇམ་པོ་དང་། ཕན་གདགས་པས་ཡོངས་སུ་སྨིན་པར་འགྱུར་བ་ཡང་ཡོད་དོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་
པོ་སེམས་ཅན་གྱི་སྤྱོད་པ་ནི་སྣ་ཚོགས་པ་སྟེ། དེ་དག་བྱ་བ་ཡང་སྣ་ཚོགས་པ་ཉིད་ཀྱིས་ཡོངས་སུ་སྨིན་པར་འགྱུར་ཏེ། བཙུན་པ་འོད་སྲུང་ཆེན་པོ་དེ་ལྟར་ཡོངས་སུ་སྨིན་པའི་སེམས་ཅན་རྣམས་ཕྱིས་ཆོས་བཤད་པས་ཤིན་ཏུ་དུལ་བར་འགྱུར་རོ། །དེ་ལ་ཁོ་བོས་
འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་སེམས་ཅན་གྱི་ཁམས་ཇི་སྙེད་ཅིག་སྤྱོད་པ་འདིས་ཡོངས་སུ་སྨིན་པར་བྱས། དེས་སྨྲས་པ། བཙུན་པ་འོད་སྲུང་ཆེན་པོ་ཆོས་ཀྱི་དབྱིངས་ཇི་སྙེད་པའོ། །སྨྲས་པ། འཇམ་དཔལ་ཆོས་ཀྱི་དབྱིངས་

ཀྱང་ཇི་སྙེད། སྨྲས་པ། ནམ་མཁའི་ཁམས་ཇི་ཙམ་པའོ། །སྨྲས་པ། ནམ་མཁའི་ཁམས་ཀྱང་ཇི་ཙམ། སྨྲས་པ། སེམས་ཅན་གྱི་ཁམས་ཇི་སྙེད་པ་སྟེ། བཙུན་པ་འོད་སྲུང་ཆེན་པོ་དེ་ལྟར་ན་ཆོས་ཀྱི་དབྱིངས་དང་། ནམ་མཁའི་ཁམས་དང་། སེམས་
ཅན་གྱི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་འདི་ལྟར་སེམས་ཅན་གང་ཡང་ཡོངས་སུ་མྱ་ངན་ལས་འདས་པ་མེད་ན་འོ་ན་སངས་རྒྱས་འབྱུང་བ་དོན་མེད་པར་མི་འགྱུར་རམ། དེས་སྨྲས་པ། བཙུན་
པ་འོད་སྲུང་ཆེན་པོ་དཔེར་ན་སྐྱེས་བུ་ལ་ལ་ཞིག་མཁྲིས་པའི་རིམས་ཀྱིས་བཏབ་སྟེ། རྣམ་པ་སྣ་ཚོགས་སུ་བླ་བར་གྱུར་པ་དང་། དེ་ལ་ཁ་ཅིག་སྐྱེས་བུ་འདི་ནི་གདོན་གྱིས་བཏབ་བོ་སྙམ་དུ་གྱུར་ཏོ། །དེ་ནས་སྨན་པ་མཁས་པ་ཞིག་འོངས་ཏེ། སྐྱེས་བུ་དེ་ལ་མར་བླུད་པ་ལ་སོགས་
པའི་བྱ་བས་མཁྲིས་པའི་རིམས་དེ་ཞི་བར་བྱས་ནས། དེ་ཕྱིས་རྣམ་པ་སྣ་ཚོགས་སུ་མི་བླ་བར་གྱུར་ན། བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། དེ་ལས་ལྷའམ། ཀླུའམ། གནོད་སྦྱིན་བྱུང་བར་གྱུར་པ་ཡོད་དམ། དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་
དཔལ་དེ་ནི་མ་ཡིན་ཏེ། འོན་ཀྱང་མར་བླུད་པ་ལ་སོགས་པའི་བྱ་བས་མཁྲིས་པ་དེ་ཞི་བར་གྱུར་ཏོ། །འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་སྐྱེས་བུ་དེ་ལ་སྨན་པ་དེས་ཕན་པ་ཆེན་པོ་བྱས་པ་མ་ཡིན་ནམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་
དཔལ་ཇི་སྐད་སྨྲས་པ་དེ་བཞིན་ནོ། །དེས་སྨྲས་པ། བཙུན་པ་འོད་སྲུང་ཆེན་པོ་དེ་བཞིན་དུ། འཇིག་རྟེན་གནས་པ་ཕྱིན་ཅི་ལོག་གི་རིམས་ཀྱིས་བཏབ་པ་དག་བདག་མེད་ལ་བདག་ཏུ་འདུ་ཤེས་ཤིང་བདག་མེད་པ་ལ་བདག་ཏུ་མངོན་པར་ཞེན་ནས་འཁོར་བ་ན་འཁོར་རོ། །དེ་ལ་སངས་
རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་སྟེ། དཔེ་བསྟན་པ་དེ་དང་དེ་དག་དང་། ཆོས་ལ་གཞུག་པའི་སྒོ་དེ་དང་དེ་དག་གིས་བདག་ཏུ་འདུ་ཤེས་པ་ཡོངས་སུ་ཤེས་པ་དང་། ཕྱིན་ཅི་ལོག་སྤང་བར་བྱ་བའི་ཕྱིར་སེམས་ཅན་དེ་དག་ལ་ཆོས་འཆད་དོ། །

དེ་དག་ཆོས་ཐོས་ནས་འདུ་ཤེས་ཐམས་ཅད་དང་བྲལ་ཞིང་ཕྱི་ཕྱིར་ཞིང་མངོན་པར་མི་ཆགས་ཏེ། དེ་དག་བདག་ཏུ་འདུ་ཤེས་པ་སྤངས་ནས་ཆུ་བོ་ལས་བརྒལ་ཏེ། དེ་དག་བརྒལ་བ་དང་། ཕ་རོལ་ཏུ་ཕྱིན་པ་དང་། ཡོངས་སུ་མྱ་ངན་ལས་འདས་པ་ཞེས་བྱ་བའི་གྲངས་
སུ་འགྲོའོ། །བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། དེ་ལ་བདག་གམ་སེམས་ཅན་ནམ། སྲོག་གམ་སྐྱེ་བ་པོའམ། གང་ཟག་གང་ཡོངས་སུ་མྱ་ངན་ལས་འདས་པར་གྱུར་པ་ཡོད་དམ། ཁོ་བོས་དེ་ལ་སྨྲས་པ། འཇམ་དཔལ་དེ་ནི་མ་ཡིན་ཏེ། འོན་
ཀྱང་མཉམ་པ་ཉིད་ཡང་དག་པར་བསྟན་པས་ཕྱིན་ཅི་ལོག་སྤོང་ངོ་། །འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་འདི་ལྟ་བུའི་ཕྱིར་སངས་རྒྱས་འབྱུང་སྟེ། འདི་ལྟ་སྟེ། མཉམ་པ་ཉིད་ཡང་དག་པར་བསྟན་པའི་ཕྱིར་ཏེ། སྐྱེ་བའི་ཕྱིར་མ་ཡིན།
འགག་པའི་ཕྱིར་མ་ཡིན་གྱི། ཀུན་ནས་ཉོན་མོངས་པ་མེད་པ་འབའ་ཞིག་རྟོགས་པར་བྱ་བའི་ཕྱིར་རོ། །ཁོ་བོས་དེ་ལ་འདི་སྐད་སྨྲས་སོ། །འཇམ་དཔལ་བྱང་ཆུབ་སེམས་དཔའ་གང་དག་རང་བཞིན་དེ་ལྟ་བུའི་ཆོས་ཀྱི་དབྱིངས་ལའང་རྟོག་ཅིང་། སེམས་ཅན་ཐམས་
ཅད་ཡོངས་སུ་སྨིན་པར་བྱ་བའི་གོ་ཆ་ཡང་མི་འདོར་ལ། ཞུམ་པར་མི་འགྱུར། རངས་པར་མི་འགྱུར་ཞིང་རང་བཞིན་གྱིས་ཡོངས་སུ་མྱ་ངན་ལས་འདས་པའི་སེམས་ཅན་རྣམས་ཀྱི་ཕྱིར་གོ་ཆ་བགོས་པ་ནི་དཀའ་བ་བྱེད་པ་མ་ཡིན་ནོ། །དེས་སྨྲས་པ། བཙུན་པ་འོད་སྲུང་
ཆེན་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གོ་ཆ་ཆེན་པོ་བགོས་པ་ཡིན་ནོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་བྱང་ཆུབ་སེམས་དཔའི་གོ་ཆ་བརྩམ་པར་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ། བཙུན་
པ་འོད་སྲུང་ཆེན་པོ་བྱང་ཆུབ་སེམས་དཔའི་གོ་ཆ་ཆེན་པོ་ནི་སུམ་ཅུ་རྩ་གཉིས་ཏེ། གོ་ཆ་དེ་དག་བགོས་པའི་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་དོ། །སུམ་ཅུ་རྩ་གཉིས་གང་ཞེ་ན། བཙུན་པ་འོད་སྲུང་ཆེན་པོ་རྨི་ལམ་གྱི་རང་བཞིན་གྱི་

མཚན་ཉིད་ཀྱིས་འཁོར་བ་ཚད་མེད་པ་ཡོངས་སུ་འཛིན་པ་ནི་བྱང་ཆུབ་སེམས་དཔའི་གོ་ཆའོ། །བདག་མེད་པའི་མཚན་ཉིད་ཀྱིས་སེམས་ཅན་ཚད་མེད་པ་ཡོངས་སུ་སྨིན་པར་བྱེད་པ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་སྐུའི་མཚན་ཉིད་ཀྱིས་སངས་རྒྱས་ཚད་
མེད་པ་ལ་མཆོད་པ་དང་རིམ་གྲོ་བྱེད་པ་ནི་བྱང་ཆུབ་སེམས་དཔའི་གོ་ཆའོ། །བྲག་ཅ་དང་མཉམ་པ་ཉིད་ཀྱི་མཚན་ཉིད་ཀྱིས་སངས་རྒྱས་ཀྱིས་གསུངས་པ་ཐམས་ཅད་ཉན་ཅིང་འཛིན་པ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་དབྱིངས་སུ་ཡང་དག་པར་འདུ་བའི་མཚན་
ཉིད་ཀྱིས་སངས་རྒྱས་ཀྱི་ཆོས་ཐམས་ཅད་སྲུང་བ་ནི་བྱང་ཆུབ་སེམས་དཔའི་གོ་ཆའོ། །ཉོན་མོངས་པ་ཐམས་ཅད་རང་བཞིན་གྱིས་ཡོངས་སུ་དག་པའི་མཚན་ཉིད་ཀྱིས་བདུད་ཐམས་ཅད་འདུལ་བ་ནི་བྱང་ཆུབ་སེམས་དཔའི་གོ་ཆའོ། །ཡོད་པ་དང་མེད་པ་སེལ་བའི་རྟེན་ཅིང་འབྲེལ་
བར་འབྱུང་བ་ལ་འཇུག་པའི་མཚན་ཉིད་ཀྱིས་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཤིན་ཏུ་ཚར་གཅོད་པ་ནི་བྱང་ཆུབ་སེམས་དཔའི་གོ་ཆའོ། །ཕུང་པོ་ཐམས་ཅད་སྤོང་བའི་མཚན་ཉིད་ཀྱིས་བདོག་པ་ཐམས་ཅད་ཡོངས་སུ་གཏོང་བ་ནི་བྱང་ཆུབ་སེམས་དཔའི་གོ་ཆ་འོ། །
མངོན་པར་འདུ་བྱ་བ་མེད་པའི་མཚན་ཉིད་ཀྱིས་ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་གྱིས་ཡོ་བྱད་བསྙུངས་པ་ཐམས་ཅད་ཡང་དག་པར་ལེན་པ་ནི་བྱང་ཆུབ་སེམས་དཔའི་གོ་ཆའོ། །ཁོང་ཁྲོ་བ་མེད་པའི་མཚན་ཉིད་ཀྱིས་བཟོད་པ་དང་། དུལ་བ་དང་།
དེས་པ་ནི་བྱང་ཆུབ་སེམས་དཔའི་གོ་ཆའོ། །ལུས་དང་སེམས་དབེན་པའི་མཚན་ཉིད་ཀྱིས་བླང་བ་མེད་པ་དང་། དོར་བ་མེད་པའི་བརྩོན་འགྲུས་ནི་བྱང་ཆུབ་སེམས་དཔའི་གོ་ཆའོ། །རྟེན་ཐམས་ཅད་དབེན་པའི་མཚན་ཉིད་ཀྱིས་བསམ་གཏན་དང་། རྣམ་པར་ཐར་པ་དང་།
ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ནི་བྱང་ཆུབ་སེམས་དཔའི་གོ་ཆའོ། །མ་རིག་པའི་གཏི་མུག་གི་ལྟ་བ་ཡོངས་སུ་དག་པའི་མཚན་ཉིད་ཀྱིས་ཐོགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་བྱང་ཆུབ་སེམས་དཔའི་གོ་ཆའོ། །བྱ་བ་ཐམས་ཅད་

སྟོན་པའི་མཚན་ཉིད་ཀྱིས་ཐབས་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །ཞེ་འགྲས་པ་མེད་པའི་མཚན་ཉིད་ཀྱིས་བྱམས་པ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སོར་མོ་ལྔ་དང་ནམ་མཁའ་མཉམ་པའི་མཚན་ཉིད་ཀྱིས་སྙིང་རྗེ་ཆེན་པོ་ནི་བྱང་ཆུབ་
སེམས་དཔའི་གོ་ཆའོ། །ཡོངས་སུ་མི་སྐྱོ་བའི་མཚན་ཉིད་ཀྱིས་དགའ་བ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །བདེ་བ་དང་སྡུག་བསྔལ་བར་མི་བྱེད་པའི་མཚན་ཉིད་ཀྱིས་བཏང་སྙོམས་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །རྣམ་པར་གྲོལ་བ་ལག་མཐིལ་
དུ་འོངས་ཀྱང་ཐོབ་པར་མི་བྱེད་པའི་མཚན་ཉིད་ཀྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་མཚན་ཉིད་ནི་བྱང་ཆུབ་སེམས་དཔའི་གོ་ཆའོ། །སྐྱོན་མེད་པར་མི་ལྟུང་བའི་མཚན་ཉིད་ཀྱིས་ཐམས་ཅད་ཡིད་ལ་མི་བྱེད་པ་ནི་བྱང་ཆུབ་སེམས་དཔའི་གོ་ཆའོ། །སྒྱུ་མ་ལྟ་
བུའི་ཆོས་ལེགས་པར་ཤེས་པའི་མཚན་ཉིད་ཀྱིས་ཕུང་པོ་ལྔ་གཤེད་མ་ལྟ་བུར་གྱུར་པ་ཡོངས་སུ་སྲུང་བ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་དབྱིངས་མཉམ་པ་ཉིད་ཀྱིས་ཁམས་བཞི་ལ་སྦྲུལ་གདུག་པ་ལྟ་བུར་འཛིན་པ་ནི་བྱང་ཆུབ་སེམས་དཔའི་གོ་ཆའོ། །ཡུལ་
ཐམས་ཅད་ལ་མི་ཆགས་པའི་མཚན་ཉིད་ཀྱིས་སྐྱེ་མཆེད་དྲུག་ལ་གྲོང་སྟོང་པ་ལྟ་བུར་རྟོག་པ་ནི་བྱང་ཆུབ་སེམས་དཔའི་གོ་ཆའོ། །ཀུན་གཞི་མེད་པའི་མཚན་ཉིད་ཀྱིས་ཁམས་གསུམ་དང་མི་འདྲེ་བ་ནི་བྱང་ཆུབ་སེམས་དཔའི་གོ་ཆའོ། །སྲིད་པ་སེལ་བའི་མཚན་ཉིད་ཀྱིས་
ཆེད་དུ་སྲིད་པ་ལེན་པ་ནི་བྱང་ཆུབ་སེམས་དཔའི་གོ་ཆའོ། །ཕྱིར་མི་ལྡོག་པའི་མཚན་ཉིད་ཀྱིས་དཔའ་བ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སེམས་ཅན་ཐམས་ཅད་ལ་སོ་སོ་ཇི་ལྟར་འོས་པར་ཆོས་ཀྱི་སྨན་སྦྱིན་པའི་མཚན་ཉིད་ཀྱིས་སྨན་པ་ཆེན་པོ་ནི་བྱང་ཆུབ་
སེམས་དཔའི་གོ་ཆའོ། །ཐེག་པ་གསུམ་གྱི་ལམ་སྟོན་པའི་མཚན་ཉིད་ཀྱིས་དེད་དཔོན་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སངས་རྒྱས་ཐམས་ཅད་ལ་བྱས་པ་ཤེས་ཤིང་བྱས་པ་གཟོ་བའི་མཚན་ཉིད་ཀྱིས་དཀོན་མཆོག་གསུམ་གྱི་གདུང་མི་གཅོད་

པ་ནི་བྱང་ཆུབ་སེམས་དཔའི་གོ་ཆའོ། །མི་སྐྱེ་བའི་ཆོས་ལ་བཟོད་པ་ཐོབ་པའི་མཚན་ཉིད་ཀྱིས་ཆོས་ཐམས་ཅད་རང་བཞིན་གྱིས་སྐྱེ་བ་མེད་པའི་མཚན་ཉིད་ནི་བྱང་ཆུབ་སེམས་དཔའི་གོ་ཆའོ། །ཉན་ཐོས་དང་། རང་སངས་རྒྱས་ཐམས་ཅད་ཀྱི་ས་ལས་འདའ་བའི་མཚན་
ཉིད་ཀྱིས་ཕྱིར་མི་ལྡོག་པའི་ས་ཐོབ་པ་ནི་བྱང་ཆུབ་སེམས་དཔའི་གོ་ཆའོ། །སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་སངས་རྒྱས་ཀྱི་ཆོས་ཐམས་ཅད་ཇི་ལྟ་བ་བཞིན་དུ་རྟོགས་པའི་མཚན་ཉིད་ཀྱིས་བྱང་ཆུབ་ཀྱི་སྙིང་པོ་བརྒྱན་པ་ནི་བྱང་ཆུབ་སེམས་དཔའི་གོ་ཆའོ། །
བཙུན་པ་འོད་སྲུང་ཆེན་པོ་བྱང་ཆུབ་སེམས་དཔའི་གོ་ཆ་ཆེན་པོ་སུམ་ཅུ་རྩ་གཉིས་ནི་དེ་དག་ཡིན་ཏེ། གོ་ཆ་དེ་དག་བགོས་ན་འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པའི་
འཇིགས་པ་ནི་མེད་དོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་གོ་ཆ་དེ་དག་ལས་འགའ་ཡང་ཉན་ཐོས་དང་། རང་སངས་རྒྱས་རྣམས་ལ་མེད་དོ། །དེས་སྨྲས་པ། བཙུན་པ་འོད་སྲུང་ཆེན་པོ་དེ་བས་ན་ཉན་ཐོས་དང་། རང་སངས་རྒྱས་རྣམས་ནི་གོ་ཆ་
ཆེན་པོ་མ་བགོས་པ་ཞེས་བྱའོ། །བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། གོ་ཆ་གང་མཐུ་དང་ལྡན་པའི་འཕོང་གི་སློབ་དཔོན་གྱིས་བགོ་བར་བྱ་བའི་གོ་ཆ་དེ་མི་ཕལ་གྱིས་བགོ་བར་བྱའམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་དེ་ནི་མ་ཡིན་ཏེ། མི་
ཕལ་གྱིས་གོ་ཆ་དེ་བགོ་བར་མི་ནུས་སོ། །སྨྲས་པ། བཙུན་པ་འོད་སྲུང་ཆེན་པོ་དེ་བཞིན་དུ་གོ་ཆ་གང་བྱང་ཆུབ་སེམས་དཔས་བགོ་བར་བྱ་བ་དེ་དག་ཉན་ཐོས་དང་། རང་སངས་རྒྱས་ཐམས་ཅད་མི་གྱོན་ནོ། །བྱང་ཆུབ་སེམས་དཔའི་གོ་ཆ་འདི་བཤད་པའི་ཚེ་ལྷའི་བུ་ཁྲི་ཉིས་སྟོང་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །ཚེ་དང་ལྡན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་དང་། ཆོས་སྟོན་པ་རྣམ་པར་འཕྲུལ་པ་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་

ཡིན་ནོ། །དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་ཏེ། ཚེ་དང་ལྡན་པ་
ཤཱ་རིའི་བུ་ཁོ་བོས་མངོན་པར་ཤེས་པ་དུས་གཅིག་ན་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་གྱི་ཚལ་ཆེན་པོའི་ཁང་པ་བརྩེགས་པའི་ཁང་པ་ན། དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །ཚེ་དང་ལྡན་པ་ཤ་ར་
དྭ་ཏིའི་བུ་དེའི་ཚེ་གཅེར་བུ་མའི་བུ་བདེན་པ་པོ་ཞེས་བྱ་བ་གཅེར་བུ་པ་དྲུག་ཁྲིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། བསྟི་སྟང་བྱས། བླ་མར་བྱས། རི་མོ་བྱས། མཆོད་པ་བྱས་ཤིང་ཡངས་པ་ཅན་གྱི་གྲོང་ཁྱེར་ན་འདུག་གོ། །ཁོ་བོ་ཏིང་ངེ་འཛིན་ལ་སྙོམས་པར་
ཞུགས་ཏེ། གཞན་མུ་སྟེགས་ཅན་དེ་དག་གི་དགེ་བའི་རྩ་བ་ལ་བལྟས་ན། དེར་ཁོ་བོས་སེམས་ཅན་མུ་སྟེགས་ཅན་གདུལ་བར་བྱ་བ་བརྒྱ་ཕྲག་མང་པོ་མཐོང་ནས། ཁོ་བོ་དེར་སོང་སྟེ་དེ་དག་ལ་ཆོས་བཤད་དོ། །དེ་དག་ཁོ་བོས་ཆོས་བཤད་པ་ལ་སྲི་ཞུ་མི་བྱེད། རྣ་བླགས་
ཏེ་མི་ཉན། ཀུན་དུ་ཤེས་པར་བྱ་བའི་སེམས་ཀྱིས་མི་གནས་པའི་སྟེང་དུ་ཁོ་བོ་ལ་འཕྱ་སྨོད་གད་མོས་འདེབས་ཤིང་ཚིག་རྩུབ་པོ་དག་ཀྱང་རྗོད་དོ། །དེར་ཁོ་བོས་ཟླ་བ་གསུམ་དུ་སེམས་ཅན་དེ་དག་ལས་འགའ་ཡང་ཡོངས་སུ་སྨིན་པར་བྱ་མ་ནུས་ཏེ་སྐྱོ་བར་གྱུར་ཏོ། །ཁོ་བོ་སྐྱོ་
བར་གྱུར་ནས་སླར་སོང་ངོ་། །དེ་ལ་འཇམ་དཔལ་གཞོན་ནུར་གྱུར་པས་མུ་སྟེགས་ཅན་ལྔ་བརྒྱ་སྤྲུལ་ཏེ། བདག་ཉིད་སློབ་དཔོན་དུ་བཞག་ནས་འཁོར་ལྔ་བརྒྱ་དང་། གཅེར་བུ་མའི་བུ་བདེན་པ་པོ་གང་ན་བ་དེར་དོང་སྟེ་ལྷགས་པ་དང་། གཅེར་བུ་མའི་བུ་བདེན་པ་པོའི་རྐང་པ་གཉིས་
ལ་མགོ་བོས་ཕྱག་འཚལ་ནས་མདུན་དུ་འདུག་སྟེ། གཅེར་བུ་མའི་བུ་བདེན་པ་པོ་ལ་འདི་སྐད་ཅེས་སྨྲས་སོ། །བདག་ཅག་གིས་འཕགས་པའི་གྲགས་པའི་སྒྲ་དང་ཚིགས་སུ་བཅད་པ་རྒྱ་ཆེན་པོ་ཐོས་ནས་ལྗོངས་གཞན་ནས་ཡངས་པ་ཅན་གྱི་གྲོང་ཁྱེར་འདིར་མཆིས་ཏེ། ཁྱོད་

ནི་ཁོ་བོ་ཅག་གི་སྟོན་པའོ། །ཁོ་བོ་ཅག་ནི་ཁྱོད་ཀྱི་སློབ་མའོ། །ཁོ་བོ་ཅག་ཁྱོད་ལས་རྗེས་སུ་བསྟན་པ་ནོད་དོ། །ཅི་ནས་ཀྱང་དགེ་སྦྱོང་གཽ་ཏ་མ་དེ་དང་། དེའི་ཉན་ཐོས་རྣམས་མི་མཐོང་བ་དང་། ཅི་ནས་ཀྱང་དེ་ལས་མི་འཐུན་པའི་ཆོས་མི་ཐོས་པ་དེ་ལྟར་ཁོ་བོ་ཅག་ལ་མཛོད་
ཅིག །གཅེར་བུ་མའི་བུ་བདེན་པ་པོས་སྨྲས་པ། སྐྱེས་བུ་དམ་པ་དག་ལེགས་སོ། །ལེགས་སོ། །དད་པ་དང་ལྡན་པ། དང་བ་དང་ལྡན་པ་ཁྱོད་རིང་པོ་མི་ཐོགས་པར་ངའི་ཆོས་བསྟན་པ་འདི་ཤེས་པར་འགྱུར་རོ། །དེ་ནས་གཅེར་བུ་མའི་བུ་བདེན་པ་པོས་རང་གི་
འཁོར་རྣམས་ལ་སྨྲས་པ། ཚུར་ཤོག་ཁྱེད་ཅག་བྲམ་ཟེའི་བུ་ལྔ་བརྒྱ་པོ་འདི་དག་དང་ལྷན་ཅིག་ཏུ་ཀུན་དུ་དགའ་བ་དང་། འཐུན་པ་དང་། ཕན་ཚུན་ཆོས་ལ་དཔྱད་པ་དཔྱོད་ཅིང་ལྷན་ཅིག་ཏུ་གནས་པར་གྱིས་ཤིག །འདི་དག་གིས་གང་ཆུང་ཟད་ཅི་སྨྲས་པ་དེང་ཁྱེད་ཀྱིས་ཤིན་
ཏུ་ལེགས་པར་ཟུང་ཤིག །དེ་ནས་འཇམ་དཔལ་གཞོན་ནུར་གྱུར་པ་འཁོར་གཅེར་བུ་པ་ལྔ་བརྒྱ་སྤྲུལ་པ་དང་། གཞན་མུ་སྟེགས་ཅན་གྱི་ཉན་ཐོས་རྣམས་དང་ལྷན་ཅིག་ཏུ་འདུག་ནས། དེ་དག་གི་དཀའ་ཐུབ་དང་། བརྟུལ་ཞུགས་དང་། སྤྱོད་ལམ་དང་། བསླབ་པའི་
ཚིག་ཇི་ཙམ་དུ་རྒྱུན་མི་འཆད་པ་དེ་བས་ཀྱང་བདག་དང་འཁོར་ལ་ལྷག་པར་སྟོན་ཏོ། །སྐབས་སྐབས་སུ་དཀོན་མཆོག་གསུམ་གྱི་བསྔགས་བརྗོད་དོ། །སྐབས་སྐབས་ནི་གཅེར་བུ་མའི་བུ་བདེན་པ་པོའི་ཡང་དག་པའི་ཡོན་ཏན་བསྔགས་པ་བརྗོད་དེ། དེས་དེ་
དག་ཡིད་ཆེས་པར་བྱས་ནས་དུས་གཞན་དང་། ཚོད་གཞན་ཞིག་ན་མུ་སྟེགས་ཅན་གཞན་ཚོགས་པ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་བདག་ཅག་གི་བསྟན་བཅོས་པ་དང་། སྔགས་དང་། རིག་བྱེད་དང་། གཞུང་
ལས་འབྱུང་བ་བཞིན་དགེ་སྦྱོང་གཽ་ཏ་མ་དེའི་ཡང་དག་པའི་ཡོན་ཏན་བསྔགས་པ་ཡང་ཡོད་དོ། །དེ་ཅིའི་ཕྱིར་ཞེ་ན། འདི་ལྟར་དགེ་སྦྱོང་གཽ་ཏ་མ་ནི་རིགས་ཕུན་སུམ་ཚོགས་པ་ཕ་དང་མ་དག་པ། འཁོར་ལོས་སྒྱུར་བའི་རྒྱལ་པོའི་རིགས་སུ་སྐྱེས་པ། བསོད་ནམས་བརྒྱའི་

མཚན་དང་ལྡན་པ་སྟེ། བཙས་པ་ཙམ་ན་བརྒྱ་བྱིན་དང་། ཚངས་པས་ཡོངས་སུ་བླངས་ཤིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས། མ་བཟུང་བར་གོམ་པ་བདུན་བོར་ཏེ། ཚིག་ཀྱང་ང་ནི་འཇིག་རྟེན་གྱི་ཐུ་བོ་སྟེ།
སྐྱེ་བ་དང་འཆི་བ་མཐར་བྱའོ་ཞེས་དེ་སྐད་སྨྲ་ཞིང་། ཆུའི་རྒྱུན་གཉིས་བྱུང་སྟེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བས་ཁྲུས་བྱས། ལྷའི་དང་མིའི་རོལ་མོ་དག་ཀྱང་མ་བརྡུངས་པར་སྒྲ་བྱུང་། དེས་འོད་གང་གིས་ངན་སོང་ཐམས་ཅད་སོ་སོར་ཐར་པ་དང་།
བདུད་ཀྱི་གནས་ཐམས་ཅད་ཟིལ་གྱིས་གནོན་པ་དེ་ལྟ་བུའི་འོད་ཀྱང་བཏང་སྟེ། དབང་པོ་ཉམས་པ་ཐམས་ཅད་ཀྱང་དབང་པོ་མ་ཉམས་པར་གྱུར། ཡུད་ཙམ་དེ་ལ་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་ཞི་སྟེ་མཆོག་ཏུ་བདེ་བ་ཐོབ་པར་གྱུར། བྲམ་ཟེ་རིག་བྱེད་ཀྱི་
ཆོ་ག་ཤེས་པ་རྣམས་ཀྱིས་ཀྱང་དེ་སྟེ་ཁྱིམ་ན་འདུག་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །དེ་སྟེ་ནགས་སུ་སོང་ན་ཆོས་ཀྱི་རྒྱལ་པོ་སངས་རྒྱས་སུ་འགྱུར་རོ་ཞེས་བསྒོ་སྟེ། དེའི་འཁོར་ལོས་སྒྱུར་བའི་རྒྱལ་པོ་བོར་ནས་རབ་ཏུ་བྱུང་སྟེ། དེས་བྱང་ཆུབ་ཀྱི་སྙིང་པོར་
བདུད་ཀྱི་སྡེ་བྱེ་བ་ཕྲག་བརྒྱ་པ་བཏུལ་ཏེ་བྱང་ཆུབ་ཐོབ། དེས་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་བསྐོར་བར་མི་ནུས་པའི་ཆོས་ཀྱི་འཁོར་ལོ་བསྐོར། དེ་ཆོས་ཀྱང་སྟོན་ཏེ། ཚངས་པར་
སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ལ་དེའི་ཉན་ཐོས་དག་གི་ཐོག་མར་དགེ་བ་དེ་ནི་འདི་ལྟ་
སྟེ། ལུས་ཀྱི་ལེགས་པར་སྤྱོད་པ