Kinh tạng Tây Tạng (Kangyur Đại Học) — 051_མདོ་སྡེ།_ཇ

་བ་ཡི་ཕན་ཡོན་འདི་ཐོས་ནས། །མྱ་ངན་ང་འདས་མདོ་འདི་ཟུང་ཤིག་དང་། །དེ་དག་ཐེ་ཚོམ་མེད་པར་བྱང་ཆུབ་འགྱུར། །དམ་པའི་ཆོས་པད་མ་དཀར་པོ་ལས་དེ་བཞིན་གཤེགས་
པའི་རྫུ་འཕྲུལ་མངོན་པར་འདུ་བྱེད་པའི་ལེའུ་ཞེས་བྱ་བ་སྟེ་ཉི་ཤུ་པའོ།། །།བམ་པོ་བཅུ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་

ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི། ལུས་ལ་ཐོགས་སམ་གླེགས་བམ་
དུ་བགྱིས་ཏེ་འཛིན་པའི་རིགས་ཀྱི་བུའམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྨན་གྱི་རྒྱལ་པོ་རིགས་
ཀྱི་བུའམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བརྒྱད་ཅུའི་བྱེ་མ་སྙེད་ལ་བསྟི་སྟང་དུ་བྱེད། བཙུན་པར་བྱེད། རི་མོར་བྱེད། མཆོད་པར་བྱེད་ན། སྨན་གྱི་རྒྱལ་པོ་འདི་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་གཞི་
དེ་ལས་བསོད་ནམས་མང་དུ་སྐྱེད་དམ། གསོལ་པ་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་གྱི་རྒྱལ་པོ་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །སྨན་གྱི་རྒྱལ་པོ་རིགས་ཀྱི་བུའམ་རིགས་
ཀྱི་བུ་མོ་གང་ལ་ལ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལས། ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། ནན་ཏན་གྱིས་བསྒྲུབ་ན། སྨན་གྱི་རྒྱལ་པོ་རིགས་ཀྱི་བུའམ་རིགས་
ཀྱི་བུ་མོ་དེ་གཞི་དེ་ལས་དེ་བས་ཆེས་བསོད་ནམས་མང་དུ་སྐྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དམ་པའི་ཆོས་ཀྱི་རྣམ་གྲངས་འདི་ལུས་ལ་ཐོགས་སམ་གླེགས་
བམ་དུ་བགྱིས་ཏེ། འཛིན་པའི་རིགས་ཀྱི་བུའམ་རིགས་ཀྱི་བུ་མོ་དེ་བདག་གིས་བསྲུང་བ་དང་བསྐྱབ་པ་དང་སྦ་བའི་སླད་དུ་གཟུངས་སྔགས་ཀྱི་ཚིག་རྣམས་སྩལ་བར་བགྱིའོ། །ཏདྱ་ཐཱ། ཨནྱེ། མནྱེ། མ་ནེ་མ་མ་ནེ། ཙིཏྟེ་ཙ་རི་ཏེ། ཤ་མེ་ཤ་མ་ཡི་ཏཱ་བི། ཤཱནྟེ། མུཀྟེ། མུཀྟ་

ཏ་མེ། ས་མེ་ཨ་བི། ཤ་མེ་ས་མ་ས་མེ། ཛ་ཡེ། ཀྵ་ཡེ། ཨ་ཀྵ་ཡེ། ཨཀྵི་ཎི། ཤཱནྟེ། ཤ་མི་ཏེ་དྷཱ་ར་ཎི། ཨཱ་ལོ་ཀ་བྷཱ་སེ། པྲ་ཏྱ་བེཀྵ་ཎི། བི་བི་རུ་ཨ་བྷྱནྟ་ར་ཎི། བིཥྚེ། ཨ་ཏྱནྟ། པ་རི་ཤུད་དྷི། ཨུད་ཀུ་ལོ། མུད་ཀུ་ལེ། ཨར་ཌེ། པ་ར་ཌེ། ཤུ་ཀཱ་ཀྵི། ཨ་ས་མ་ས་མེ། བུད་དྷ་
བི་ལོ་ཀི་ཏེ། དྷརྨ་པ་རཱི་ཀྵི་ཏེ། སང་གྷ་ནི་ར་གྷོ་ཥ་ཎི། ནི་ར་གྷོ་ཥ་ཎི། བྷ་ཡཱ་བྷ་ཡ། ཤོ་དྷ་ནི་མནྟྲེ་མནྟྲཱ། ཀྵ་ཡ་ཏྲེ། རུ་དྲ་ཀཽ་ཤ་ལྱེ། ཨ་ཀྵ་ཡེ། ཨ་ཀྵཱ། བ་ན་ཏཱ་ཡཱ་པ་ལོ། ཨ་མནྱ་ན་ཏཱ་ཡ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི། སངས་རྒྱས་བཅོམ་ལྡན་འདས་གང་
གཱའི་ཀླུང་དྲུག་ཅུའི་བྱེ་མ་སྙེད་ཀྱིས་བཤད་པ་སྟེ། གང་གིས་མདོ་སྡེ་འདི་ལྟ་བུ་འཛིན་པ་ཆོས་སྨྲ་བ་འདི་ལྟ་བུ་དེ་དག་དང་འགལ་བར་བགྱིས་ན། སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་དེ་འཁུས་པ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྨན་གྱི་རྒྱལ་པོ་ཁྱོད་ཀྱིས་གཟུངས་སྔགས་ཀྱི་ཚིག་རྣམས་སྨྲས་པས། སེམས་ཅན་མང་པོའི་དོན་བྱས་ཤིང་སྨན་གྱི་རྒྱལ་པོ་སེམས་ཅན་རྣམས་ལ་སྙིང་བརྩེ་བའི་ཕྱིར་བསྲུང་བ་དང་བསྐྱབ་པ་དང་སྦ་བ་བྱས་པ་ལེགས་
སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་སྦྱིན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་། ཆོས་སྨྲ་བ་འདི་ལྟ་བུ་དག་གི་ཆེད་དུ་གཟུངས་སྔགས་ཀྱི་ཚིག་རྣམས་སྩལ་བར་བགྱི་སྟེ།
དེས་ཆོས་སྨྲ་བ་འདི་ལྟ་བུ་དེ་དག་ལ་གླགས་ལྟ་བ་གང་གིས་ཀྱང་གླགས་མི་རྙེད་པ་འདི་ལྟ་སྟེ། གནོད་སྦྱིན་ནམ། སྲིན་པོ་འམ། སྲུལ་པོའམ། གཤེད་བྱེད་དམ། གྲུལ་བུམ་མམ། ཡི་དགས་གླགས་ལྟ་བ་རྣམས་ཀྱིས་གླགས་མི་རྙེད་དོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་རབ་ཏུ་སྦྱིན་པས་དེའི་ཚེ་གཟུངས་སྔགས་ཀྱི་ཚིག་འདི་དག་སྨྲས་སོ། །ཏདྱ་ཐཱ། ཛྭ་ལེ། མ་ཧཱ་ཛྭ་ལེ། ཨུཀྐེ། མུཀྐེ། ཨ་ཌེ་ཨ་ཌ་བ་ཏི། ནྲྀ་ཊྱེ་ནྲྀ་ཊྱཱ་བ་ཏི། ཨིཊྚི་ནི། བིཊྚི། ཙིཊྚི་ནི། ནྲྀ་ཊ་ཊི་ནི། ནྲྀ་ཊ་ཊཱུ་བ་ཏི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་ཤིང་རྗེས་སུ་ཡི་རང་བ་སྟེ། གང་གིས་ཆོས་སྨྲ་བ་འདི་ལྟ་བུ་འདི་དག་དང་འགལ་བར་བགྱིས་ན། དེ་དེ་བཞིན་གཤེགས་པ་དེ་དག་ཐམས་ཅད་ལ་འཁུས་པ་ལགས་སོ། །དེ་
ནས་བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་སྨྲ་བ་དེ་དག་ལ་གློ་བ་བརྩེ་བས་སྨན་པ་དང་། བདེ་བ་དང་། བསྲུང་བ་དང་། བསྐྱབ་པ་དང་། སྦ་བའི་སླད་དུ་གཟུངས་སྔགས་ཀྱི་ཚིག་རྣམས་བརྗོད་པར་བགྱིའོ། །
ཏདྱ་ཐཱ། ཨཊ་ཊ། ནཊ་ཊེ། ཏ་ནཊ་ཊེ། ཨ་ན་ཏེ་ནཱ་ཏི། ཀུ་ན་ཊི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་གིས་ཆོས་སྨྲ་བ་དེ་དག་ལ་དཔག་ཚད་བརྒྱ་ཚུན་ཆད་དུ་བསྲུང་བར་བགྱིའོ། །རིགས་ཀྱི་བུའམ་རིགས་ཀྱི་བུ་མོ་མདོ་སྡེ་འདི་ལྟ་བུ་འཛིན་ཅིང་། ཆོས་སྨྲ་བ་དེ་དག་ལ་
ཡང་བསྲུང་བ་བགྱིས་པར་འགྱུར། བདེ་ལེགས་སུ་བགྱིས་པར་འགྱུར་རོ། །དེ་ནས་རྒྱལ་པོ་ཆེན་པོ་འཕགས་སྐྱེས་པོ་དྲི་ཟ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས། འཁོར་དེར་འདུས་པར་གྱུར་ཏེ། འདུག་པ་དེ་སྟན་ལས་ལངས་ནས་བླ་གོས་ཕྲག་པ་
གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་མདོ་སྡེ་འདི་ལྟ་བུ་འཛིན་པ། ཆོས་སྨྲ་བ་འདི་ལྟ་བུ་དེ་དག་བསྲུང་
བ་དང་། བསྐྱབ་པ་དང་། སྦ་བའི་སླད་དུ་གཟུངས་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། ཨ་ག་ཎེ་ག་ཎེ། གཽ་རི། གན་དྷ་རི། ཙཎྜ་ལི། མ་ཏང་གི། པུཀ་ཀ་སི། སང་ཀུ་ལེ། བྲུ་ཥ་ལཱི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི་སངས་
རྒྱས་བྱེ་བ་ཕྲག་བཞི་བཅུ་རྩ་གཉིས་ཀྱིས་གསུངས་ཏེ། གང་ཞིག་ཆོས་སྨྲ་བ་འདི་ལྟ་བུ་དེ་དག་དང་འགལ་བར་བགྱིད་ན། དེ་དག་ཐམས་ཅད་ལ་འཁུས་པ་ལགས་སོ། །དེ་ནས་སྲིན་མོ་འཕྱང་མ་ཞེས་བྱ་བ་དང་། སྲིན་མོ་རྣམ་པར་འཕྱང་མ་ཞེས་བྱ་བ་དང་། སྲིན་མོ་སོ་བརྩེགས་ཞེས་

བྱ་བ་དང་། སྲིན་མོ་མེ་ཏོག་སོ་ཞེས་བྱ་བ་དང་། སྲིན་མོ་ཅོད་པན་སོ་ཞེས་བྱ་བ་དང་། སྲིན་མོ་སྐྲ་ཅན་ཞེས་བྱ་བ་དང་། སྲིན་མོ་མེ་ཞེས་བྱ་བ་དང་། སྲིན་མོ་ཕྲེང་བ་འཆང་ཞེས་བྱ་བ་དང་། སྲིན་མོ་མདུང་ཅན་ཞེས་བྱ་བ་དང་། སྲིན་མོ་སེམས་ཅན་ཐམས་ཅད་ཀྱི་མདངས་འཕྲོག་ཅེས་བྱ་བ་
དང་། འཕྲོག་མ་བུ་དང་གཡོག་ཏུ་བཅས་པ་དང་། སྲིན་མོ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་མདོ་སྡེ་འདི་འཛིན་
པ་ཆོས་སྨྲ་བ་འདི་ལྟ་བུ་དེ་དག་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བདེ་ལེགས་སུ་འགྱུར་བར་བགྱིའོ། །ཅི་ནས་ཆོས་སྨྲ་བ་དེ་དག་ལ་གླགས་ལྟ་བ་དང་སྐབས་ཚོལ་བདག་གིས་ཀྱང་གླགས་མི་རྙེད་པར་བགྱིའོ། །དེ་ནས་སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་ཚིག་
འཐུན་པར་བཅོམ་ལྡན་འདས་ལ་གཟུངས་སྔགས་ཀྱི་ཚིག་འདི་དག་ཕུལ་ལོ། །ཏདྱ་ཐཱ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ནི་མེ། ནི་མེ། ནི་མེ། ནི་མེ། ནི་མེ། རུ་ཧེ། རུ་ཧེ། རུ་ཧེ། རུ་ཧེ། རུ་ཧེ། ཧ་སྟེ། ཧ་སྟེ། ཧ་སྟེ། ཧ་སྟེ། ཧ་སྟེ་སྭཱ་ཧཱ། འདི་སྤྱི་བོར་བཞག་ནས་ཆོས་སྨྲ་བ་
རྣམས་ལ་སུ་ཡང་འཁུ་བར་མ་གྱུར་ཅིག །གནོད་སྦྱིན་ནམ། སྲིན་པོའམ། ཡི་དགས་སམ། ཤ་ཟའམ། སྲུལ་པོའམ། གཤེད་བྱེད་དམ། རོ་ལངས་སམ། རེངས་པའམ། གནོན་པོའམ། བརྗེད་བྱེད་ཀྱི་གཟུགས་སམ། གནོད་སྦྱིན་གྱིས་བྱས་པའམ། མིས་བྱས་པའམ། མི་མ་
ཡིན་པས་བྱས་པའམ། རིམས་ནད་ཉིན་གཅིག་པའམ། ཉིན་གཉིས་པའམ། ཉིན་གསུམ་པའམ། ཉིན་བཞི་པའམ། རྟག་པའི་རིམས་སམ། ཐ་ན་རྨི་ལམ་ན་ཡང་བུད་མེད་ཀྱི་གཟུགས་སམ། སྐྱེས་པའི་གཟུགས་སམ། ཁྱེའུའི་གཟུགས་སམ། བུ་མོའི་གཟུགས་
ཀྱིས་ཐོ་འཚམས་པར་འགྱུར་བ་དེ་ནི་གནས་མ་མཆིས་སོ། །དེ་ནས་སྲིན་མོ་དེ་དག་གིས་སྒྲ་སྐད་གཅིག་ཏུ་ཚིག་འཐུན་པར་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །གང་གིས་གསང་སྔགས་འདི་ཐོས་ནས། །ཆོས་སྨྲ་བ་དང་འགལ་བགྱིད་པ། །དེའི་མགོ་ཚལ་

པ་བདུན་དུ་འགས། །ཨརྫ་ཀ་ཡི་དོག་པ་བཞིན། །གང་ཞིག་ཆོས་སྨྲ་འགལ་བགྱིད་པ། །མ་བསད་པ་ཡི་འགྲོ་གང་དང་། །ཕ་བསད་འགྲོ་བ་གང་ལགས་པའི། །འགྲོ་བ་དེ་ནི་དེར་མཆིའོ། །གང་ཞིག་ཆོས་སྨྲ་འགལ་བགྱིད་པ། །ཏིལ་འཚིར་དག་གི་འགྲོ་གང་དང་། །
ཏིལ་རྡུང་འགྲོ་བ་གང་ལགས་པའི། །འགྲོ་བ་དེར་ནི་དེ་མཆིའོ། །གང་ཞིག་ཆོས་སྨྲ་འགལ་བགྱིད་པ། །སྲང་ལ་གཡོ་བགྱིད་འགྲོ་གང་དང་། །བྲེ་འཆོས་འགྲོ་བ་གང་ལགས་པའི། །འགྲོ་བ་དེར་ནི་དེ་མཆིའོ། །དེ་སྐད་ཅེས་གསོལ་ནས། མདུང་ཅན་ལ་སོགས་པ་སྲིན་མོ་དེ་དག་གིས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་ཆོས་སྨྲ་བ་འདི་ལྟ་བུ་དེ་དག་ལ་བསྲུང་བར་བགྱིའོ། །བདེ་ལེགས་སུ་འགྱུར་བ་དང་ཆད་པ་སྤང་བ་དང་དུག་གཞིལ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་སྲིན་མོ་དེ་
དག་ལ་འདི་སྐད་ཅེས་བཀའ་སྩལ་ཏོ། །ཀྱེ་སྲིན་མོ་དག་ལེགས་སོ་ལེགས་སོ། །ཁྱོད་ཀྱིས་ཆོས་སྨྲ་བ་དེ་དག་ལ་བསྲུང་བ་དང་། བསྐྱབ་པ་དང་། སྦ་བགྱིས་ཤིག །གང་དག་ཐ་ན་ཆོས་ཀྱི་རྣམ་གྲངས་འདིའི་མིང་ཙམ་འཛིན་པ་དེ་དག་ལ་ཡང་། མདུང་ཅན་ཁྱོད་འཁོར་དང་བཅས་པས་
བསྲུང་བར་བྱ་ན། གང་དག་ཆོས་ཀྱི་རྣམ་གྲངས་འདི་མཐའ་དག་ཆུབ་པར་འཛིན་པ་དང་གླེགས་བམ་དུ་བྱས་ཏེ། རིམ་གྲོ་བྱེད་པ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། ལྷའི་བ་དན་དང་།
འབྲུ་མར་གྱི་མར་མེའམ། མར་གྱི་མར་མེའམ། སྤོས་མར་གྱི་མར་མེའམ། ཙམ་པ་ཀའི་མར་གྱི་མར་མེའམ། པར་ཤ་ཀའི་མར་གྱི་མར་མེའམ། ཨུད་པ་ལའི་མར་གྱི་མར་མེའམ། སྣ་མའི་མར་གྱི་མར་མེའམ། དེ་ལྟ་བུའི་མཆོད་པའི་ཡོ་བྱད་རྣམ་པ་མང་པོ་བརྒྱ་སྟོང་གིས་རིམ་
གྲོ་བྱེད་པ་ལྟ་ཅི་སྨོས་ཏེ། མདུང་ཅན་ཁྱོད་གཡོག་དང་བཅས་པས་བསྲུང་བར་བྱའོ། །གཟུངས་སྔགས་ཀྱི་ལེའུ་འདི་བཤད་པ་ན་སྲོག་ཆགས་དྲུག་ཁྲི་བརྒྱད་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དམ་པའི་ཆོས་པད་མ་དཀར་པོ་ལས་གཟུངས་སྔགས་ཀྱི་ལེའུ་

ཞེས་བྱ་བ་སྟེ་ཉི་ཤུ་རྩ་གཅིག་པའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་
སེམས་དཔའ་ཆེན་པོ་སྨན་གྱི་རྒྱལ་པོ་འཇིག་རྟེན་གྱི་ཁམས་མི་མཇེད་འདི་ན་རྒྱུ་བ་དང་། བཅོམ་ལྡན་འདས་འདི་དཀའ་བ་བགྱིད་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་གདའ། བཅོམ་ལྡན་འདས་གང་ཐོས་པས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་།
ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། འཇིག་རྟེན་གྱི་ཁམས་གཞན་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་འདི་དག་གིས་ཐོས་ནས་ཐམས་ཅད་དགའ་མགུ་རངས་ཤིང་
ཡིད་བདེ་བར་འགྱུར་བ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོའི་སྤྱོད་པ་གང་ཅི་ལགས་པའི་ཕྱོགས་ཙམ་ཞིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཤད་དུ་གསོལ། དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པས་གསོལ་བ་བཏབ་པར་མཁྱེན་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་ལ་འདི་སྐད་ཅེས་བཀའ་
སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་དུས་ན། བསྐལ་པ་གང་གཱའི་ཀླུང་གི་བྱེ་མ་སྙེད་དུ་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཉི་ཟླ་དྲི་མ་མེད་པའི་འོད་དཔལ་ཞེས་བྱ་བ་འཇིག་རྟེན་དུ་བྱུང་སྟེ། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེའི་བྱང་ཆུབ་སེམས་དཔའ་བྱེ་བ་བརྒྱད་ཅུའི་འདུས་པ་ཆེན་པོ་བྱུང་ངོ་། །གང་གཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་ཀྱི་ཉན་ཐོས་འདུས་པ་བྱུང་ངོ་། །དེའི་བསྟན་པ་ལ་བུད་མེད་མེད་པར་གྱུར་ཏོ། །
སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་དང་། ལྷ་མ་ཡིན་གྱི་རིས་མེད་དོ། །སངས་རྒྱས་ཀྱི་ཞིང་ཡང་ལག་མཐིལ་ལྟར་མཉམ་ལ་ཉམས་དགའ་བར་གྱུར་ཏོ། །ལྷའི་བཻ་དཱུརྱ་ལས་གྲུབ་པའི་ས་ཕྱོགས་རིན་པོ་ཆེ་དང་ཙན་དན་གྱི་ཤིང་ལྗོན་པས་བརྒྱན་ཞིང་། རིན་
པོ་ཆེའི་དྲ་བས་བྲེས་པ་དར་གྱི་ལྡ་ལྡི་མངོན་པར་རབ་ཏུ་སྤྱངས་པ་རིན་པོ་ཆེའི་པོག་ཕོར་ནས་བདུག་པས་བདུགས་པ་རིན་པོ་ཆེའི་ཤིང་ལྗོན་པའི་དྲུང་ཐམས་ཅད་ན་རིན་པོ་ཆེའི་མཁའ་རྟེན་མདའ་རྒྱང་གང་གི་ཚད་ཙམ་བྱས་པ་ཡོད་པ། རིན་པོ་ཆེའི་མཁའ་རྟེན་ཐམས་ཅད་ཀྱི་སྟེང་ན་ལྷའི་བུ་བྱེ་བ་
བརྒྱ་དག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་ལ་མཆོད་པ་བྱ་བའི་ཕྱིར། སིལ་སྙན་བྱེད་ཅིང་ཕེག་རྡོབ་པ་དང་རོལ་མོའི་སྒྲ་འབྱིན་ཅིང་འཁོད་དོ། །བཅོམ་ལྡན་འདས་དེ་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལས་བརྩམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི། ཉན་ཐོས་ཆེན་པོ་དེ་དག་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་རྒྱས་པར་རབ་ཏུ་སྟོན་ཏོ། །སྐར་མའི་
རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེའི་ཚེའི་ཚད་ནི་བསྐལ་པ་བཞི་ཁྲི་ཉིས་སྟོང་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་
དང་ཉན་ཐོས་ཆེན་པོ་དེ་དག་གི་ཚེའི་ཚད་ཀྱང་དེ་ཙམ་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཡང་། བཅོམ་ལྡན་འདས་དེའི་གསུང་རབ་ལ་དཀའ་བ་བྱེད་པ་ལ་བརྩོན་པར་གྱུར་ཏེ། དེ་ལོ་ཁྲི་ཉིས་སྟོང་དུ་འཆག་པ་

ལ་ཞུགས་ཤིང་བརྩོན་འགྲུས་ཆེན་པོ་བརྩམས་པས་རྣལ་འབྱོར་ལ་བརྩོན་པར་གྱུར་ཏོ། །དེ་ལོ་ཁྲི་ཉིས་སྟོང་འདས་ནས་གཟུགས་ཐམས་ཅད་ཡང་དག་པར་སྟོན་པ་ཞེས་བྱ་བའི་ཏིང་ངེ་འཛིན་ཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་
ཐམས་ཅད་ཀྱིས་མཐོང་ན་དགའ་བ་དེ་ཚིམ་ཞིང་མགུ་སྟེ་ཡི་རངས་ནས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། དེའི་ཚེ་འདི་སྙམ་དུ་སེམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་བརྟེན་ནས་གཟུངས་ཐམས་ཅད་ཡང་དག་པར་སྟོན་པ་ཞེས་བྱ་བའི་ཏིང་ངེ་འཛིན་
བདག་གིས་ཐོབ་པོ་སྙམ་མོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཡང་འདི་སྙམ་དུ་སེམས་ཏེ། འདི་ལྟར་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་
དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོད་པར་བྱའོ་སྙམ་ནས། དེའི་ཚེ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ཏིང་ངེ་འཛིན་དེ་ལ་སྙོམས་པར་ཞུགས་མ་
ཐག་ཏུ། དེའི་མོད་ལ་སྟེང་གི་བར་སྣང་ལས་མེ་ཏོག་མན་དཱ་ར་དང་། མན་དཱ་ར་ཆེན་པོའི་ལྷའི་མེ་ཏོག་གི་ཆར་ཆེན་པོ་མངོན་པར་བབ་པོ། །དུས་ཀྱི་རྗེས་སུ་འབྲང་བའི་ཙན་དན་གྱིས་སྤྲིན་བྱས་ཏེ། ཙན་དན་སྦྲུལ་གྱི་སྙིང་པོའི་ཆར་ཆེན་པོ་མངོན་པར་བབ་སྟེ། སྐར་མའི་རྒྱལ་པོ་མེ་ཏོག་ཀུན་ཏུ་
རྒྱས་པ་མངོན་པར་ཤེས་པ། དེ་ལྟ་བུའི་སྤོས་ཀྱི་རྣམ་པ་ཞོ་གཉིས་ཀྱི་རིན་དུ་འཇིག་རྟེན་གྱི་ཁམས་མི་མཇེད་འདིས་མི་ཆོག་གོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་
དགའ་བ་དྲན་པ་དང་ལྡན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་སོ། །ལངས་ནས་འདི་སྙམ་དུ་སེམས་ཏེ་ཅི་ལྟར་ལུས་ཡོངས་སུ་བཏང་བ་ལྟར་ནི་རྫུ་འཕྲུལ་གྱི་ཆོ་འཕྲུལ་དག་གིས། བཅོམ་ལྡན་འདས་ལ་མཆོད་པ་བྱས་པ་མ་ཡིན་ནོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་ཏུ་

རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་དེའི་ཚེ། ཨ་ག་རུ་དང་། དུ་རུ་ཀ་དང་། པོག་གི་ཁུ་བ་ཟ་ཞིང་ཙམ་པ་ཀའི་མར་ཡང་འཐུང་ངོ་། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་
མངོན་པར་ཤེས་པ། རྣམ་གྲངས་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ། རྟག་ཏུ་སྤོས་ཟ་ཞིང་ཙམ་པ་ཀའི་མར་འཐུང་བས་ལོ་བཅུ་གཉིས་འདས་པར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ།
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ། ལོ་བཅུ་གཉིས་པོ་དེ་འདས་ནས་རང་གི་ལུས་ལྷའི་རས་ཀྱིས་ཀུན་ཏུ་དཀྲིས་ནས་འབྲུ་མར་གྱིས་ཞེན་པར་བྱས་ཏེ་བདག་གི་བྱིན་གྱིས་བརླབས་བྱས་སོ། །བདག་གིས་བྱིན་གྱིས་བརླབས་
བྱས་ནས། དེ་བཞིན་གཤེགས་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོད་པའི་ལས་ཀྱི་ཕྱིར་བདག་གི་ལུས་ལ་མེ་འབར་བར་བྱས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ཀྱི་མར་མེ་འབར་བ་དེའི་འོད་ཀྱིས། འཇིག་རྟེན་གྱི་ཁམས་གང་གཱའི་ཀླུང་བརྒྱད་ཅུའི་བྱེ་མ་སྙེད་ཁྱབ་པར་གྱུར་ཏེ། འཇིག་རྟེན་གྱི་ཁམས་དེ་དག་གི་སངས་རྒྱས་བཅོམ་ལྡན་འདས་གང་གཱའི་ཀླུང་བརྒྱད་ཅུའི་བྱེ་མ་སྙེད་ཐམས་
ཅད་ཀྱིས་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བརྩོན་འགྲུས་རྩོམ་པ་ཡང་དག་པའོ། །འདི་ནི་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པ་ཡང་དག་པ་སྟེ། མེ་ཏོག་དང་། བདུག་
པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། ལྷའི་བ་དན་གྱིས་མཆོད་པ་དང་། ཟང་ཟིང་གིས་མཆོད་པ་དང་། ཙན་དན་སྦྲུལ་གྱི་སྙིང་པོས་མཆོད་པ་ནི་དེ་ལྟ་མ་ཡིན་ནོ། །རིགས་ཀྱི་བུ་སྦྱིན་པ་འདི་ནི་མཆོག་

སྟེ། རྒྱལ་སྲིད་ཡོངས་སུ་གཏོང་བའི་སྦྱིན་པ་ནི་དེ་ལྟ་མ་ཡིན་ནོ། །བུ་དང་ཆུང་མ་ཕངས་པ་ཡོངས་སུ་གཏོང་བའི་སྦྱིན་པ་ཡང་དེ་ལྟ་མ་ཡིན་ནོ། །རིགས་ཀྱི་བུ་གང་བདག་གི་ལུས་གཏོང་བའི་ཆོས་ཀྱི་མཆོད་པ་འདི་ནི་མཆོད་པ་ཁྱད་པར་ཅན་ནོ། །དམ་པའོ། །མཆོག་གོ། །ཕུལ་ལོ། །གྱ་ནོམ་
པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། སངས་རྒྱས་བཅོམ་ལྡན་འདས་དེ་དག་གིས་ཚིག་དེ་སྐད་ཅེས་གསུངས་ནས་དེ་ནས་ཅང་མི་གསུང་བར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་བྱང་ཆུབ་སེམས་དཔའ་སེམས་དཔའ་ཆེན་པོ་
སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ལ་འབར་བ་ལོ་བཅུ་གཉིས་ཀྱི་བར་དུ་ཞི་བར་མ་སོང་ངོ་། །དེ་ཕྱིས་ལོ་བཅུ་གཉིས་འདས་ནས་ཞི་བར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་
ཐམས་ཅད་ཀྱིས་མཐོང་ན་དགའ་བ་དེས། དེ་བཞིན་གཤེགས་པ་ལ་འདི་ལྟ་བུའི་མཆོད་པ་དང་ཆོས་ཀྱི་མཆོད་པ་བྱས་ཏེ། དེ་ནས་ཤི་འཕོས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱི་གསུང་རབ་ལ་
རྒྱལ་པོ་དྲི་མ་མེད་པས་བྱིན་པའི་ཁྱིམ་དུ་སྐྱེས་ཏེ། སྐྱིལ་མོ་ཀྲུང་བཅས་བཞིན་དུ་པང་པར་རྫུས་ཏེ་སྐྱེས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་སྐྱེས་མ་ཐག་ཏུ། དེའི་ཚེ་རང་གི་ཕ་མ་ལ་ཚིགས་སུ་བཅད་དེ་སྨྲས་པ།
རྒྱལ་མཆོག་འདི་ན་བདག་འཆག་ཅིང་། །དེར་གནས་བདག་གིས་ཏིང་འཛིན་ཐོབ། །བདག་གི་ལུས་ཕངས་ཡོངས་བཏང་སྟེ། །བརྩོན་འགྲུས་སྲ་བརྩམས་བརྟུལ་ཞུགས་ཆེ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་དེ་སྨྲས་ནས། རང་གི་ཕ་མ་ལ་འདི་སྐད་ཅེས་ཡབ་ཡུམ་བཅོམ་ལྡན་འདས་གང་ལ་བདག་གིས་མཆོད་ནས། སྒྲ་ཐམས་ཅད་ལ་མཁས་པའི་གཟུངས་ཐོབ་ཅིང་། དམ་པའི་ཆོས་པད་མ་དཀར་པོའི་ཆོས་

ཀྱི་རྣམ་གྲངས་འདི་ཡང་ཚིགས་སུ་བཅད་པ་བྱེ་བ་ཁྲག་ཁྲིག་བརྒྱ་སྟོང་གཏམས་པ་དང་། དཀྲིགས་པ་དང་མི་འཁྲུགས་པ་བྱེ་བ་ཕྲག་བརྒྱད་ཅུས། བཅོམ་ལྡན་འདས་དེ་ལས་ཐོས་པར་གྱུར་པའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེ་ད་ལྟར་ཡང་བཞུགས་ཏེ་འཚོ་ཞིང་གཞེས་ཀྱིས། ཡབ་ཡུམ་བདག་བཅོམ་ལྡན་འདས་དེའི་དྲུང་དུ་མཆིས་ན་ལེགས་སོ། །དེར་མཆིས་ནས་ཡང་བཅོམ་ལྡན་འདས་དེ་ལ་མཆོད་པ་བགྱིའོ་ཞེས་སྨྲས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་
པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེའི་ཚེ། ནམ་མཁའ་ལ་ཤིང་ཏ་ལ་བདུན་ཙམ་དུ་མངོན་པར་འཕགས་ཏེ། རིན་པོ་ཆེ་སྣ་བདུན་གྱི་ཁང་པ་བརྩེགས་པར་སྐྱིལ་མོ་ཀྲུང་བཅས་ནས་བཅོམ་ལྡན་འདས་
དེའི་དྲུང་དུ་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཕྱག་འཚལ་ཏེ་ཚིགས་སུ་བཅད་པ་འདིས་
མངོན་པར་བསྟོད་དོ། །དཔའ་བོ་མི་དབང་ཤིན་ཏུ་དྲི་མེད་ཞལ། །ཕྱོགས་བཅུ་འདིར་ནི་ཁྱོད་ཀྱི་འོད་ཟེར་མཛེས། །བདེ་གཤེགས་ཁྱོད་ལ་བདག་གིས་མཆོད་མཆོག་བགྱིས། །མགོན་པོ་ལྟ་བའི་སླད་དུ་བདག་འདིར་མཆིས། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ།
དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་འདི་སྨྲས་ནས། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་ཁྱོད་ད་དུང་བཞུགས་སམ། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་

དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ང་ཡོངས་སུ་མྱ་ངན་ལས་འདའ་བའི་དུས་ལ་བབ་སྟེ། རིགས་ཀྱི་བུ་ང་ཚེ་ཟད་པའི་དུས་ལ་བབ་ཀྱིས་རིགས་ཀྱི་བུ་ཁྱོད་སོང་ལ། ངའི་ཁྲི་ཤོམས་ཤིག་དང་ང་ཡོངས་སུ་མྱ་ངན་ལས་འདའོ། །
སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་
དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བསྟན་པ་འདི་ངས་ཁྱོད་ལ་ཡོངས་སུ་གཏད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་དང་། ཉན་ཐོས་ཆེན་པོ་འདི་དག་དང་སངས་རྒྱས་ཀྱི་བྱང་ཆུབ་འདི་དག་དང་། འཇིག་རྟེན་གྱི་ཁམས་འདི་དག་དང་། རིན་པོ་
ཆེའི་མཁའ་རྟེན་འདི་དག་དང་། རིན་པོ་ཆེའི་ཤིང་ལྗོན་པ་འདི་དག་དང་ངའི་བསྙེན་བཀུར་བྱེད་པའི་ལྷའི་བུ་འདི་རྣམས་ཀྱང་ཡོངས་སུ་གཏད་དོ། །རིགས་ཀྱི་བུ་ང་ཡོངས་སུ་མྱ་ངན་ལས་འདས་པའི་རིང་བསྲེལ་གང་ཡིན་པ་དེ་དག་ཀྱང་ཡོངས་སུ་གཏད་དོ། །རིགས་ཀྱི་བུ་ངའི་རིང་བསྲེལ་ལ་
ཁྱོད་ཀྱིས་ཀྱང་མཆོད་པ་རྒྱ་ཆེར་གྱིས་ཤིག །རིང་བསྲེལ་དེ་དག་ཀྱང་རྒྱས་པར་གྱིས་ཤིག །མཆོད་རྟེན་སྟོང་ཕྲག་མང་པོ་གྱིས་ཤིག །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ལ་དེ་ལྟར་རྗེས་སུ་བསྟན་ནས། དེའི་ནུབ་མོ་ནམ་གྱི་ཆ་སྨད་ལ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་
སུ་མྱ་ངན་ལས་འདས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས། བཅོམ་ལྡན་འདས་དེ་བཞིན་གཤེགས་པ་ཉི་ཟླ་དྲི་མ་མེད་པའི་འོད་དཔལ་དེ་ཡོངས་སུ་

མྱ་ངན་ལས་འདས་པར་རིག་སྟེ། ཙན་དན་སྦྲུལ་གྱི་སྙིང་པོ་སྤུངས་ནས་དེ་བཞིན་གཤེགས་པའི་སྐུ་བསྲེགས་ཏེ། དེ་བཞིན་གཤེགས་པའི་སྐུ་ཚིག་པ་ཞི་བར་རིག་ནས་རིང་བསྲེལ་བསྡུས་ཏེ་ངུ་ཞིང་ཆོ་ངེས་བཏབ་ནས་སྨྲེ་སྔགས་འདོན་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་
པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ངུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཏེ། རིན་པོ་ཆེ་སྣ་བདུན་གྱི་བུམ་པ་བརྒྱད་ཁྲི་བཞི་སྟོང་བྱེད་དུ་བཅུག་ནས། དེ་དག་གི་ནང་དུ་དེ་བཞིན་གཤེགས་པའི་
རིང་བསྲེལ་བཅུག་སྟེ། རིན་པོ་ཆེ་སྣ་བདུན་གྱི་མཆོད་རྟེན་འཕང་དུ་ཚངས་པའི་འཇིག་རྟེན་ལ་ཐུག་པ་གདུགས་ཀྱི་ཕྲེང་བས་ལེགས་པར་བརྒྱན་པ་དར་དང་དྲིལ་བུ་ལེགས་པར་སྤྱངས་པ་བརྒྱད་ཁྲི་བཞི་སྟོང་བྱས་ཏེ། དེས་མཆོད་རྟེན་དེ་དག་བྱས་ནས་འདི་སྙམ་དུ་བསམས་ཏེ་བདག་གིས་བཅོམ་ལྡན་འདས་
ཉི་ཟླ་དྲི་མ་མེད་པའི་འོད་དཔལ། དེ་བཞིན་གཤེགས་པའི་སྐུ་གདུང་ལ་མཆོད་པ་ནི་བྱས་ན་དེ་བས་ཀྱང་ལྷག་པ་ཆེས་ཁྱད་པར་དུ་འཕགས་པས་དེ་བཞིན་གཤེགས་པའི་རིང་བསྲེལ་ལ་མཆོད་པ་བྱའོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང་། ཉན་ཐོས་ཆེན་པོ་དེ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་
འཕྱེ་ཆེན་པོ་དང་། མི་དང་མི་མ་ཡིན་པའི་ཚོགས་དེ་དག་ལ་སྨྲས་པ། རིགས་ཀྱི་བུ་དག་ཁྱེད་ཐམས་ཅད་ཀྱིས། བཅོམ་ལྡན་འདས་དེའི་རིང་བསྲེལ་རྣམས་ལ་མཆོད་པ་བྱ་བར་སོམས་ཤིག །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། དེའི་ཚེ་དེ་བཞིན་གཤེགས་པའི་མཆོད་རྟེན་བརྒྱད་ཁྲི་བཞི་སྟོང་གི་མདུན་དུ། རང་གི་ལག་པ་བསོད་ནམས་བརྒྱས་བརྒྱན་པ་འབར་བར་བྱས་ཏེ། འབར་བར་བྱས་པས་ལོ་བདུན་ཁྲི་ཉིས་སྟོང་གི་བར་དུ་དེ་བཞིན་

གཤེགས་པའི་མཆོད་རྟེན་དེ་དག་ལ་མཆོད་པ་བྱས་སོ། །དེས་མཆོད་པ་དེ་བྱས་པས་འཁོར་དེ་ལས་ཉན་ཐོས་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་བཏུལ་ལོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་གྱུར་ཏོ། །
སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང་། ཉན་ཐོས་ཆེན་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཡན་ལག་མ་ཚང་བར་མཐོང་
ནས་ངུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཅིང་གཅིག་ལ་གཅིག་འདི་སྐད་དུ་སྨྲས་ཏེ་བདག་ཅག་གི་སློབ་དཔོན་རྗེས་སུ་སྟོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་འདི་ད་ལྟར་ཡན་ལག་མ་ཚང་ཞིང་ལག་པ་མེད་པར་གྱུར་ཏོ་ཞེས་ཟེར་རོ། །སྐར་
མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཉན་ཐོས་ཆེན་པོ་དེ་དག་དང་ལྷའི་བུ་དེ་དག་ལ་སྨྲས་པ་རིགས་ཀྱི་བུ་
དག་ཁོ་བོའི་ཡན་ལག་ཉམས་པར་མཐོང་བས་མ་ངུ་ཤིག །ཆོ་ངེས་མ་འདེབས་ཤིག །སྨྲེ་སྔགས་མ་འདོན་ཅིག །རིགས་ཀྱི་བུ་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཤིང་འཚོ་ཞིང་གཞེས་པའི་
སངས་རྒྱས་བཅོམ་ལྡན་འདས་དེ་དག་ཐམས་ཅད་ཁོ་བོས་དཔང་དུ་བཞག་སྟེ། དེ་དག་གི་སྤྱན་སྔར་བདེན་པའི་བྱིན་གྱིས་བརླབས་སོ། །བདེན་པ་དང་བདེན་པའི་ཚིག་གང་གིས་བདག་གི་ལག་པ་དེ་བཞིན་གཤེགས་པ་ལ་མཆོད་པའི་ཕྱིར་ཡོངས་སུ་བཏང་བས། བདག་གི་ལུས་གསེར་
གྱི་ཁ་དོག་ཏུ་འགྱུར་བའི་བདེན་པ་དང་བདེན་པའི་ཚིག་དེས། བདག་གི་ལག་པ་འདི་སྔོན་གྱི་བཞིན་དུ་གྱུར་ཅིག །ས་ཆེན་པོ་འདི་ལན་དྲུག་ཏུ་གཡོས་པར་གྱུར་ཅིག །བར་སྣང་ལ་གནས་པའི་ལྷའི་བུ་རྣམས་ཀྱིས་མེ་ཏོག་གི་ཆར་ཆེན་པོ་ཕོབ་ཤིག་ཅེས་བྱས་སོ། །སྐར་མའི་རྒྱལ་པོ་

མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བདེན་པའི་བྱིན་གྱིས་བརླབས་དེ་བྱས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་
རྣམ་པ་དྲུག་ཏུ་གཡོས་སོ། །སྟེང་གི་བར་སྣང་ལས་ཀྱང་མེ་ཏོག་གི་ཆར་ཆེན་པོ་མངོན་པར་བབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེའི་ལག་པ་དེ་ཡང་། འདི་ལྟ་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཉིད་ཀྱི་བསོད་
ནམས་ཀྱི་སྟོབས་བསྐྱེད་པ་དང་། ཡེ་ཤེས་ཀྱི་སྟོབས་བསྐྱེད་པ་དེས་སྔོན་གྱི་བཞིན་དུ་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་
པ་དེ་གཞན་ཞིག་ཡིན་སྙམ་དུ། ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་
སེམས་དཔའ་ཆེན་པོ་སྨན་གྱི་རྒྱལ་པོ་འདི་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་
རྒྱལ་པོ་བྱ་དཀའ་བ་བྱེ་བ་ཁྲག་ཁྲིག་བརྒྱ་སྟོང་དེ་སྙེད་བྱེད་དོ། །ལུས་ཡོངས་སུ་གཏོང་བ་ཡང་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་འདི་འདོད་པས། དེ་བཞིན་གཤེགས་པའི་མཆོད་རྟེན་དེ་དག་ལ་རྐང་པའི་མཐེ་བོང་འབར་བར་བྱའོ། །ལག་པའི་སོར་མོའམ་རྐང་པའི་སོར་མོ་གཅིག་གམ་ཡན་ལག་གཅིག་གམ་ལག་པ་འབར་བར་བྱའོ། །བྱང་ཆུབ་སེམས་དཔའི་ཐེག་པ་ལ་ཞུགས་པའི་རིགས་ཀྱི་

བུ་འམ་རིགས་ཀྱི་བུ་མོ་དེ་ནི་བསོད་ནམས་མངོན་པར་འདུ་བྱེད་པ་ཆེས་མང་དུ་སྐྱེད་དོ། །རྒྱལ་སྲིད་ཡོངས་སུ་བཏང་བས་ནི་དེ་ལྟ་མ་ཡིན་ནོ། །ཆུང་མ་དང་བུ་ཕོ་དང་བུ་མོ་ཕངས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ནགས་ཚལ་དང་
བཅས་པ་རྒྱ་མཚོ་དང་བཅས་པ་རི་དང་བཅས་པ་འབབ་ཆུའི་དངོ་དང་མཚོ་དང་མཚེའུ་དང་ཁྲོན་པ་དང་ཀུན་དགའི་ར་བ་དང་བཅས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་
དཔའི་ཐེག་པ་ལ་ཡང་དག་པར་ཞུགས་པ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཐམས་ཅད་ལ་སྦྱིན་པ་བྱིན་ན། སྐར་མའི་རྒྱལ་པོ་མེ་ཏོག་
ཀུན་ཏུ་རྒྱས་པ་མངོན་པར་ཤེས་པ། །རིགས་ཀྱི་བུ་འམ་རིགས་ཀྱི་བུ་མོ་དེ་ནི། རིགས་ཀྱི་བུ་འམ་རིགས་ཀྱི་བུ་མོ་གང་གིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལས། ཐ་ན་ཚིག་བཞི་པའི་ཚིགས་སུ་བཅད་པ་
གཅིག་ཙམ་འཛིན་པ་དེ་བསོད་ནམས་ཇི་སྙེད་ཅིག་སྐྱེད་པ་དེ་སྙེད་དུ་མི་སྐྱེད་དེ། དེའི་བསོད་ནམས་མངོན་པར་འདུ་བྱེད་པ་འདི་ནི་དེ་བས་ཆེས་མང་བར་བཤད་ཀྱི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་དང་
བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ཐམས་ཅད་ལ་སྦྱིན་པ་བྱིན་པ་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་འདི་ལྟ་སྟེ་དཔེར་ན་འབབ་ཆུའི་དངོ་དང་མཚོ་དང་མཚེའུ་ཐམས་ཅད་ཀྱི་ནང་ན་རྒྱ་མཚོ་ནི་མཆོག་ཏུ་གྱུར་པ་ཡིན་ནོ། །སྐར་
མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱིས་བཤད་པའི་མདོ་སྡེ་ཐམས་ཅད་ཀྱི་ནང་ན་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་

པ། འདི་ལྟ་སྟེ་དཔེར་ན་རི་ནག་པོ་དང་ཁོར་ཡུག་དང་ཁོར་ཡུག་ཆེན་པོ་ཐམས་ཅད་ཀྱི་ནང་ན་རི་རབ་ནི་རིའི་རྒྱལ་པོ་སྟེ་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེ་བཞིན་དུ། དེ་བཞིན་གཤེགས་པས་གསུངས་པའི་མདོ་སྡེ་ཐམས་
ཅད་ཀྱི་ནང་ན། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་རྒྱལ་པོ་སྟེ་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན་སྐར་མ་ཐམས་ཅད་ཀྱི་ནང་ན་ཟླ་བ་ནི་འོད་བྱེད་པའི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་
པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག་པར་འོད་བྱེད་པའི་མཆོག་ཏུ་གྱུར་པ་ཡིན་ནོ། །སྐར་མའི་
རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན་ཉི་མའི་དཀྱིལ་འཁོར་ནི་མུན་པ་མུན་གནག་ཐམས་ཅད་སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་
མི་དགེ་བའི་མུན་པ་མུན་གནག་ཐམས་ཅད་སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ན་བརྒྱ་བྱིན་ནི་ལྷ་རྣམས་ཀྱི་དབང་པོ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་
ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན་དབང་པོ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་འདི་ལྟ་སྟེ་དཔེར་ན། མི་མཇེད་ཀྱི་བདག་པོ་ཚངས་པ་ནི་
ཚངས་རིས་ཀྱི་ལྷ་ཐམས་ཅད་ཀྱི་རྒྱལ་པོ་སྟེ་ཚངས་པའི་འཇིག་རྟེན་ན་ཕའི་བྱ་བ་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་སེམས་ཅན་སློབ་པ་དང་མི་སློབ་པ་ཐམས་ཅད་དང་ཉན་ཐོས་དང་བྱང་ཆུབ་

སེམས་དཔའི་ཐེག་པ་ལ་ཡང་དག་པར་ཞུགས་པ་ཐམས་ཅད་ལ་ཕའི་བྱ་བ་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དང་ཕྱིར་མི་འོང་བ་དང་དགྲ་བཅོམ་པ་དང་རང་སངས་རྒྱས་རྣམས་ནི་བྱིས་པ་སོ་སོའི་སྐྱེ་བོ་
ཐམས་ཅད་ལས་འདས་པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ལས་འདས་ཤིང་མངོན་པར་འཕགས་ཏེ། མཆོག་ཏུ་གྱུར་པར་
རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་གང་དག་མདོ་སྡེའི་རྒྱལ་པོ་འདི་འཛིན་པ་དེ་དག་ཀྱང་སེམས་ཅན་ཐམས་ཅད་ཀྱི་གཙོ་བོར་གྱུར་པར་རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། ཉན་ཐོས་དང་
རང་སངས་རྒྱས་ཐམས་ཅད་ཀྱི་ནང་ན་བྱང་ཆུབ་སེམས་དཔའ་ནི་མཆོག་ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན་མཆོག་
ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་ནང་ན་དེ་བཞིན་གཤེགས་པ་ནི་ཆོས་ཀྱི་རྒྱལ་པོར་ཐབས་གསོལ་བ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་
རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ལ་དེ་བཞིན་གཤེགས་པ་དང་འདྲ་བ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དམ་པའི་
ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་འཇིགས་པ་ཐམས་ཅད་ལས་སྐྱོབ་པ། སྡུག་བསྔལ་ཐམས་ཅད་ལས་ཐར་བར་བྱེད་པ་སྟེ། སྐོམ་པ་རྣམས་ལ་མཚེའུ་དང་འདྲའོ། །གྲང་བས་ཉེན་པ་རྣམས་ལ་མེ་དང་འདྲའོ། །གཅེར་བུ་རྣམས་ལ་གོས་

དང་འདྲའོ། །ཚོང་པ་རྣམས་ལ་དེད་དཔོན་དང་འདྲའོ། །བུ་རྣམས་ལ་མ་དང་འདྲའོ། །ཕ་རོལ་དུ་འགྲོ་བ་རྣམས་ལ་གྲུ་དང་འདྲའོ། །ནད་པ་རྣམས་ལ་སྨན་པ་དང་འདྲའོ། །མུན་པ་མུན་གནག་གིས་བསྒྲིབས་པ་རྣམས་ལ་མར་མེ་དང་འདྲའོ། །ནོར་འདོད་པ་རྣམས་ལ་རིན་པོ་
ཆེ་དང་འདྲའོ། །ཁམས་ཀྱི་རྒྱལ་པོ་ཐམས་ཅད་ལ་འཁོར་ལོས་སྒྱུར་བ་དང་འདྲའོ། །འབབ་ཆུ་རྣམས་ལ་རྒྱ་མཚོ་དང་འདྲའོ། །མུན་པ་མུན་གནག་ཐམས་ཅད་སེལ་བའི་ཕྱིར་སྒྲོན་མ་དང་འདྲའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་
ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་སྡུག་བསྔལ་ཐམས་ཅད་ལས་རབ་ཏུ་ཐར་བར་བྱེད་པའོ། །ནད་ཐམས་ཅད་གཅོད་པའོ། །འཁོར་བའི་བཅིང་བ་ཉམ་ང་བ་ཐམས་ཅད་ལས་རབ་ཏུ་ཐར་བར་བྱེད་པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་གིས་དམ་
པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དང་གང་ཡི་གེར་འདྲི་བ་དང་གང་ཡི་གེར་འདྲིར་འཇུག་པ་དང་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་གིས་ཆོས་ཀྱི་རྣམ་གྲངས་འདི་བཟུང་ངམ་བསྟན་ཏམ། ཐོས་སམ། ཡི་གེར་བྲིས་སམ། ཡི་གེར་
འདྲིར་འཇུག་གམ། གླེགས་བམ་དུ་བྱས་ཏེ། བསྟི་སྟང་དུ་བྱེད་པ་དང་། བཙུན་པར་བྱེད་པ་དང་། བཀུར་སྟིར་བྱེད་པ་དང་། མཆོད་པ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་།
རོལ་མོའི་སྒྲ་དང་། ན་བཟའ་དང་། ཐལ་མོ་སྦྱར་བའི་ལས་དང་། མར་གྱི་མར་མེའམ། འབྲུ་མར་གྱི་མར་མེའམ། སྤོས་མར་གྱི་མར་མེའམ། ཙམ་པ་ཀའི་མར་གྱི་མར་མེའམ། སྣ་མ་དང་སྐྱ་སྣར་དང་། བར་ཤ་ཀ་དང་། ན་པ་མ་ལི་ཀའི་མར་གྱི་མར་མེའམ། མཆོད་པ་རྣམ་པ་མང་
པོ་དག་གིས་བསྟི་སྟང་དུ་བྱེད། བཙུན་པར་བྱེད། རིམ་གྲོར་བྱེད། མཆོད་པར་བྱེད་པའི་བསོད་ནམས་མངོན་པར་འདུ་བྱེད་པ་ཇི་སྙེད་ཅིག་འཕེལ་བར་འགྱུར་བའི་བསོད་ནམས་མངོན་པར་འདུ་བྱེད་པ་དེ་དག་གི་མཐའ་ནི། སངས་རྒྱས་ཀྱི་ཡེ་ཤེས་ཀྱིས་ཀྱང་རྟོགས་པར་མི་ནུས་སོ། །སྐར་

མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་ཞིག་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་འཛིན་པ་དང་སྟོན་པ་དང་ཉན་པའི་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་དེ་བསོད་ནམས་མང་དུ་སྐྱེད་པར་འགྱུར་རོ། །གལ་ཏེ་
བུད་མེད་གཅིག་གིས་ཆོས་ཀྱི་རྣམ་གྲངས་འདི་ཐོས་ནས་འཛིན་ན། དེ་ཉིད་བུད་མེད་ཀྱི་ལུས་ཀྱི་མཐའ་མར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བུད་མེད་གང་ལ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་ལྔ་བརྒྱ་པ་ཐ་མ་ལ་ཐོས་ནས་ནན་ཏན་
བྱེད་པ་དེ། འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། གང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་བཞུགས་ཏེ་
འཚོ་ཞིང་གཞེས་པ་དེར། དེ་པད་མའི་སྙིང་པོའི་སེང་གེའི་ཁྲི་ལ་འདུག་བཞིན་དུ་སྐྱེ་བར་འགྱུར་རོ། །དེ་འདོད་ཆགས་ཀྱིས་གཟིར་བར་མི་འགྱུར་ཏེ། ཞེ་སྡང་གིས་མ་ཡིན་གཏི་མུག་གིས་མ་ཡིན་ང་རྒྱལ་གྱིས་མ་ཡིན་སེར་སྣས་མ་ཡིན་ཁྲོ་བས་མ་ཡིན་གནོད་སེམས་ཀྱིས་མ་ཡིན་ཏེ། དེ་སྐྱེས་
མ་ཐག་ཏུ་མངོན་པར་ཤེས་པ་ལྔ་ཐོབ་པར་འགྱུར་རོ། །མི་སྐྱེ་བའི་ཆོས་ལ་བཟོད་པ་ཡང་ཐོབ་པར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེས། མི་སྐྱེ་བའི་ཆོས་ལ་བཟོད་པ་ཐོབ་ནས། དེ་བཞིན་
གཤེགས་པ་གང་གཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་མཐོང་བར་འགྱུར་རོ། །མིག་གི་དབང་པོ་ཡོངས་སུ་དག་པ་གང་གིས། སངས་རྒྱས་བཅོམ་ལྡན་འདས་དེ་དག་མཐོང་བར་འགྱུར་བ་དེ་འདྲ་བར་དེའི་མིག་གི་དབང་པོ་ཡོངས་སུ་དག་པར་འགྱུར་རོ། །སངས་རྒྱས་བཅོམ་ལྡན་འདས་
དེ་དག་གིས་ཀྱང་དེ་ལ་ལེགས་སོ་ཞེས་བྱ་བ་སྦྱིན་པར་འགྱུར་ཏེ། གང་ཁྱོད་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཐོས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་གསུང་རབ་ལ་ལུང་

མནོས་པ་དང་ཁ་དོན་བྱས་པ་དང་བསྒོམས་པ་དང་བསམས་པ་དང་ཡིད་ལ་བྱས་པ་དང་སེམས་ཅན་གཞན་དག་ལ་ཡང་རབ་ཏུ་བསྟན་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་མེས་ཚིག་པའམ་ཆུས་ཁྱེར་བར་
མི་ནུས་སོ། །རིགས་ཀྱི་བུ་ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་སངས་རྒྱས་བརྒྱ་སྟོང་གིས་ཀྱང་བཤད་པར་མི་ནུས་སོ། །རིགས་ཀྱི་བུ་ཁྱོད་ཀྱིས་བདུད་ཕྱིར་རྒོལ་བ་བཅོམ་མོ། །སྲིད་པའི་རྒྱ་མཚོ་ལས་བརྒལ་ཏོ། །དགྲའི་ཚེར་མ་དཀྲུགས་སོ། །སངས་རྒྱས་བརྒྱ་སྟོང་གིས་བྱིན་
གྱིས་བརླབས་སོ། །རིགས་ཀྱི་བུ་ལྷ་དང་བཅས་པའི་འཇིག་རྟེན་ན་ཁྱོད་འདྲ་བ་མེད་དོ། །དེ་བཞིན་གཤེགས་པ་གཅིག་པུ་མ་གཏོགས་པར་གཞན་ཉན་ཐོས་སམ་རང་སངས་རྒྱས་སམ་བྱང་ཆུབ་སེམས་དཔའ་གང་གིས་ཀྱང་། ཁྱོད་ལ་བསོད་ནམས་ཀྱིས་ཀྱང་རུང་། ཡེ་ཤེས་ཀྱིས་ཀྱང་
རུང་། ཤེས་རབ་ཀྱིས་ཀྱང་རུང་། ཏིང་ངེ་འཛིན་གྱིས་ཀྱང་རུང་སྟེ། ཟིལ་གྱིས་གནོན་པར་མི་ནུས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡེ་ཤེས་ཀྱི་སྟོབས་བསྐྱེད་པ་འདི་ལྟ་བུ་ཐོབ་པར་འགྱུར་རོ། །སྐར་མའི་
རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་ལ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་བཤད་པ་ཐོས་ནས། ལེགས་སོ་ལེགས་སོ་ཞེས་བྱ་བ་བྱིན་པ་དེའི་ཁ་ནས་ཨུད་པ་ལའི་དྲི་འབྱུང་བར་འགྱུར། དེའི་ལུས་ལས་ཀྱང་ཙན་དན་གྱི་དྲི་འབྱུང་བར་འགྱུར་རོ། །གང་
གིས་ཆོས་ཀྱི་རྣམ་གྲངས་འདི་འཆད་པ་ན་ལེགས་སོ་ཞེས་བྱ་བ་བྱིན་པ་དེའི་ཆོས་ཅན་གྱི་ཡོན་ཏན་གྱི་ཕན་ཡོན་དེ་དག་ནི། ངས་ད་ལྟར་གང་དག་བཤད་པ་དེ་འདྲ་བར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ལྟ་བས་ན་བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་སྔོན་གྱི་སྦྱོར་བའི་ལེའུ་འདི་ཅི་ནས། ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་འཛམ་བུའི་གླིང་འདི་ན་སྤྱོད་ཅིང་ནུབ་པར་མི་འགྱུར་བ་དང་། བདུད་སྡིག་ཅན་གྱིས་གླགས་མི་རྙེད་པ་དང་བདུད་ཀྱི་རིས་ཀྱི་ལྷ་དང་ཀླུ་དང་གནོད་

སྦྱིན་དང་དྲི་ཟ་དང་གྲུལ་བུམ་རྣམས་ཀྱིས་གླགས་མི་རྙེད་པར་བྱ་བའི་ཕྱིར་ངས་ཁྱོད་ལ་ཡོངས་སུ་གཏད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ལྟ་བས་ན་ཆོས་ཀྱི་རྣམ་གྲངས་འདི་འཛམ་བུའི་གླིང་འདིར་སེམས་ཅན་ནད་པ་ནད་ཀྱིས་བཏབ་པ་རྣམས་ལ་སྨན་ལྟ་
བུར་འགྱུར་བར་བྱིན་གྱིས་བརླབ་པར་བྱས་ཏེ། ཆོས་ཀྱི་རྣམ་གྲངས་འདི་ཐོས་ནས་ལུས་ལ་ནད་ཀྱིས་མི་ཟུག་གོ། །རྒ་བས་མ་ཡིན་དུས་མ་ཡིན་པར་འཆི་བས་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གལ་ཏེ་བྱང་ཆུབ་སེམས་དཔའི་ཐེག་པ་ལ་ཡང་
དག་པར་ཞུགས་པ་གང་ལ་ལས། མདོ་སྡེ་འདི་འཛིན་པའི་དགེ་སློང་དེ་ལྟ་བུ་དེ་མཐོང་ན། དེ་ལ་ཙན་དན་གྱི་ཕྱེ་མ་དང་ཨུད་པལ་སྔོན་པོས་མངོན་པར་གཏོར་བར་བྱའོ། །མངོན་པར་གཏོར་ནས་ཀྱང་འདི་སྙམ་དུ་རིགས་ཀྱི་བུ་འདི་ནི་བྱང་ཆུབ་ཀྱི་སྙིང་པོར་འགྲོ་བར་འགྱུར། འདི་ནི་རྩྭ་ལེན་པར་
འགྱུར། འདི་ནི་བྱང་ཆུབ་ཀྱི་སྙིང་པོར་རྩྭ་འདིང་བར་འགྱུར། འདི་ནི་བདུད་ཀྱི་ཕྱོགས་ཕམ་པར་བྱེད་པར་འགྱུར། འདི་ནི་ཆོས་ཀྱི་དུང་འབུད་པར་འགྱུར། འདི་ནི་ཆོས་ཀྱི་རྔ་རྡུང་བར་འགྱུར། འདི་ནི་འཁོར་བའི་རྒྱ་མཚོ་ལས་རྒལ་བར་འགྱུར་རོ་སྙམ་དུ་སེམས་བསྐྱེད་པར་བྱའོ། །སྐར་མའི་
རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས། མདོ་སྡེ་འདི་ལྟ་བུ་འཛིན་པའི་དགེ་སློང་མཐོང་ནས་དེ་ལྟར་སེམས་བསྐྱེད་པར་བྱས་ཏེ། དེ་ལྟར་ན་དེའི་ཡོན་ཏན་དག་ནི་དེ་བཞིན་གཤེགས་པས་
ཅི་འདྲ་བ་དག་བཤད་པ་དེ་འདྲ་བ་དག་ཏུ་འགྱུར་རོ། །སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གིས། སྒྲ་ཐམས་ཅད་ལ་མཁས་པ་དང་ལྡན་པའི་གཟུངས་ཐོབ་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས་ཀྱང་། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ལྟར་ཁྱོད་ཀྱིས་དེ་བཞིན་གཤེགས་པ་ལ་བསམ་གྱིས་མི་ཁྱབ་པའི་ཡོན་ཏན་གྱི་ཆོས་དྲིས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །

དམ་པའི་ཆོས་པད་མ་དཀར་པོ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་ཞེས་བྱ་བ་སྟེ་ཉི་ཤུ་རྩ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ།
སྐྱེས་བུ་ཆེན་པོའི་མཚན་སྨིན་མཚམས་ཀྱི་མཛོད་སྤུ་ནས་འོད་ཕྱུང་སྟེ། འོད་དེས་ཤར་ཕྱོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བཅྭ་བརྒྱད་ཀྱི་བྱེ་མ་སྙེད་དག་ཁྱབ་པར་བྱས་ཏེ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བཅྭ་བརྒྱད་
ཀྱི་བྱེ་མ་སྙེད་དེ་དག་འདས་པ་དེ་ན་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ཞེས་བྱ་བ་བཞུགས་ཏེ་འཚོ་
ཞིང་གཞེས་ལ། བྱང་ཆུབ་སེམས་དཔའི་དགེ་འདུན་རྒྱ་ཆེན་པོ་ཚད་མེད་པས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་མཛོད་སྤུ་ནས་འོད་གང་
བཏང་བ་དེས། དེའི་ཚེ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་སྣང་བ་ཆེན་པོས་ཁྱབ་པར་གྱུར་ཏོ། །འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཞེས་བྱ་བ་དགེ་
བའི་རྩ་བ་བསྐྱེད་པ་སྔོན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མང་པོའི་འོད་ཟེར་དེ་ལྟ་བུ་མཐོང་ཞིང་། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་ཏིང་ངེ་འཛིན་མང་པོ་ཐོབ་པ་འདི་ལྟ་སྟེ། རྒྱལ་མཚན་གྱི་རྩེ་མོའི་དཔུང་
རྒྱན་གྱི་ཏིང་ངེ་འཛིན་ཐོབ། དམ་པའི་ཆོས་པད་མ་དཀར་པོའི་ཏིང་ངེ་འཛིན་ཐོབ། དྲི་མ་མེད་པས་བྱིན་པའི་ཏིང་ངེ་འཛིན་ཐོབ། སྐར་མའི་རྒྱལ་པོ་རྣམ་པར་རོལ་པའི་ཏིང་ངེ་འཛིན་ཐོབ། རླུང་ལྟ་བུའི་ཏིང་ངེ་འཛིན་ཐོབ། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ཐོབ། ཟླ་བ་སྒྲོན་མའི་ཏིང་

ངེ་འཛིན་ཐོབ། སྒྲ་ཐམས་ཅད་ལ་མཁས་པའི་ཏིང་ངེ་འཛིན་ཐོབ། བསོད་ནམས་ཐམས་ཅད་ཀུན་ལས་བསྡུས་པའི་ཏིང་ངེ་འཛིན་ཐོབ། དད་པ་ཅན་གྱི་ཏིང་ངེ་འཛིན་ཐོབ། རྫུ་འཕྲུལ་གྱིས་རྣམ་པར་རོལ་པའི་ཏིང་ངེ་འཛིན་ཐོབ། ཡེ་ཤེས་ཏ་ལ་ལའི་ཏིང་ངེ་འཛིན་ཐོབ། བཀོད་པའི་
རྒྱལ་པོའི་ཏིང་ངེ་འཛིན་ཐོབ། དྲི་མ་མེད་པའི་འོད་ཀྱི་ཏིང་ངེ་འཛིན་ཐོབ། དྲི་མ་མེད་པའི་སྙིང་པོའི་ཏིང་ངེ་འཛིན་ཐོབ། ཟད་པར་ཆུབ་པའི་ཏིང་ངེ་འཛིན་ཐོབ། ཉི་མའི་འཁོར་བའི་ཏིང་ངེ་འཛིན་ཐོབ། དེ་བཞིན་དུ་སྦྱར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་
ཀྱིས། ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་ཀྱི་བར་དུ་ཐོབ་པར་འདུག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེའི་ལུས་ལ་འོད་དེས་ཕོག་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བ་དང་འཇམ་དཔལ་གཞོན་ནུར་གྱུར་པ་དེ་ཡང་བལྟ་བ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དེ་ཡང་བལྟ་བ་དང་། བྱང་ཆུབ་སེམས་དཔའ་རབ་ཏུ་སྦྱིན་པ་དེ་ཡང་
བལྟ་བ་དང་། བྱང་ཆུབ་སེམས་དཔའ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེ་ཡང་བལྟ་བ་དང་། བྱང་ཆུབ་སེམས་དཔའ་སྤྱོད་པ་ཁྱད་པར་ཅན་དེ་ཡང་བལྟ་བ་དང་། བྱང་ཆུབ་སེམས་དཔའ་བཀོད་པའི་རྒྱལ་པོ་དེ་ཡང་བལྟ་བ་དང་། བྱང་ཆུབ་སེམས་དཔའ་
སྨན་ཡང་དག་འཕགས་དེ་ཡང་བལྟ་བའི་སླད་དུ། འཇིག་རྟེན་གྱི་ཁམས་མི་མཇེད་དུ་མཆིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པས། བྱང་

ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་དེར་སོང་སྟེ་ཕྱིན་ནས། ངན་པའི་འདུ་ཤེས་བསྐྱེད་པར་མི་བྱའོ། །རིགས་ཀྱི་བུ་འཇིག་རྟེན་གྱི་ཁམས་མི་མཇེད་དེ་ནི་མཐོན་དམན་
ཅན་དང་། ས་ལས་གྲུབ་པ་དང་། རི་ནག་པོས་གང་བ་དང་། འཇིམ་ངན་གྱིས་ཡོངས་སུ་གང་བའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ཡང་སྐུ་ཐུང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་
ལུས་ཐུང་ངོ་། །རིགས་ཀྱི་བུ་ཁྱོད་ཀྱི་ལུས་ཐོབ་པ་ནི་དཔག་ཚད་བཞི་ཁྲི་ཉིས་སྟོང་ངོ་། རིགས་ཀྱི་བུ་ངའི་ལུས་ནི་དཔག་ཚད་འབུམ་ཕྲག་དྲུག་ཅུ་རྩ་བརྒྱད་ཡོད་དོ། །རིགས་ཀྱི་བུ་ཁྱོད་ནི་མཛེས་པ་བལྟ་ན་སྡུག་པ་གཟུགས་བཟང་བ་ཁ་དོག་བཟང་པོ་རྒྱས་པ་མཆོག་དང་ལྡན་པ། བསོད་ནམས་
བརྒྱ་སྟོང་བས་ཤིན་ཏུ་ལྷག་པའི་དཔལ་དང་ལྡན་པའོ། །རིགས་ཀྱི་བུ་དེ་ལྟ་བས་ན་འཇིག་རྟེན་གྱི་ཁམས་མི་མཇེད་དུ་ཕྱིན་ནས། དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་དང་སངས་རྒྱས་ཀྱི་ཞིང་དེ་ལ་ངན་པའི་འདུ་ཤེས་མ་སྐྱེད་ཅིག །དེ་སྐད་ཅེས་བཀའ་སྩལ་ནས། བྱང་ཆུབ་
སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་
ནི་དེ་བཞིན་གཤེགས་པའི་བྱིན་གྱི་རླབས་དང་། དེ་བཞིན་གཤེགས་པའི་སྟོབས་བསྐྱེད་པ་དང་། དེ་བཞིན་གཤེགས་པའི་རྣམ་པར་རོལ་པ་དང་། དེ་བཞིན་གཤེགས་པའི་བཀོད་པ་དང་། དེ་བཞིན་གཤེགས་པའི་མངོན་པར་འཕགས་པའི་ཡེ་ཤེས་ཀྱིས་འཇིག་རྟེན་གྱི་ཁམས་མི་མཇེད་དེར་
མཆིའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། དེའི་ཚེ་སངས་རྒྱས་ཀྱི་ཞིང་དེ་ནས་མ་གཡོས་ཤིང་། སྟན་དེ་ལས་མ་ལངས་པར་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་

དབྱངས་དེ་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ། དེའི་མོད་ལ་འཇིག་རྟེན་གྱི་ཁམས་མི་མཇེད་དུ། བྱ་རྒོད་ཀྱི་ཕུང་པོའི་རི་ལ་དེ་བཞིན་གཤེགས་པའི་ཆོས་ཀྱི་གདན་གྱི་དྲུང་དུ། པད་མ་ཆུ་བ་ནི་གསེར་འདབ་མ་ནི་དངུལ་སྙིང་པོ་ནི་པད་མ་དང་ནེ་ཙོའམ་ཅི་ལས་གྲུབ་པ་བྱེ་བ་ཁྲག་ཁྲིག་
བརྒྱ་སྟོང་ཕྲག་བརྒྱད་ཅུ་རྩ་བཞི་བྱུང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས། པད་མ་བཀོད་པ་བྱུང་བ་དེ་མཐོང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་འདི་ལྟར་ཆུ་བ་ནི་གསེར་འདབ་མ་ནི་དངུལ་སྙིང་པོ་ནི་པད་མ་དང་ནེ་ཙོའམ་ཅི་ལས་གྲུབ་པའི་པད་མ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་གདའ་བ་འདི་སུའི་སྔ་ལྟས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
བཀའ་སྩལ་ཏོ། །འཇམ་དཔལ་འདི་ནི་ཤར་ཕྱོགས་ལོགས་ནས་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་
ཏུ་རྒྱས་པ་དེའི་སངས་རྒྱས་ཀྱི་ཞིང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ཏེ། ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་མཉན་པའི་ཕྱིར། འཇིག་རྟེན་གྱི་ཁམས་མི་མཇེད་འདིར་འོང་བ་དེའི་སྔ་ལྟས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་དེས་དགེ་བའི་རྩ་བའི་ཚོགས་ཅི་བགྱིས་ན། དགེ་བའི་རྩ་བའི་
ཚོགས་བསགས་པ་དེས་འདི་ལྟ་བུའི་ཁྱད་པར་འདི་ཐོབ། བཅོམ་ལྡན་འདས་བྱང་ཆུབ་སེམས་དཔའ་དེ་ཏིང་ངེ་འཛིན་གང་ལ་སྤྱོད་པའི་ཏིང་ངེ་འཛིན་དེ་བཅོམ་ལྡན་འདས་བདག་གིས་མཉན་པར་བགྱིའོ། །བཅོམ་ལྡན་འདས་བདག་གིས་ཏིང་ངེ་འཛིན་དེ་ལ་སྤྱད་པར་བགྱིའོ། །བྱང་ཆུབ་སེམས་དཔའ་

སེམས་དཔའ་ཆེན་པོ་དེ་ཅི་འདྲ་བ་དང་ཁ་དོག་ཅི་འདྲ་བ་དང་གཟུགས་ཅི་འདྲ་བ་དང་རྟགས་ཅི་འདྲ་བ་དང་དབྱིབས་ཅི་འདྲ་བ་དང་དེའི་སྤྱོད་པ་ཅི་ལགས་པ། བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བལྟ་བར་བགྱིའོ། །བཅོམ་ལྡན་འདས་བརྡ་ལྟས་གང་གིས་
བསྐུལ་མ་ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་འཇིག་རྟེན་གྱི་ཁམས་མི་མཇེད་འདིར་མཆི་བར་འགྱུར་བ་དེ་ལྟ་བུའི་བརྡ་ལྟས་ཤིག་དེ་བཞིན་གཤེགས་པས་ལེགས་པར་མཛད་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཤཱཀྱ་ཐུབ་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་ལ་འདི་སྐད་ཅེས་གསུངས་སོ། །ཅི་ནས་བརྡ་ལྟས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འཇིག་
རྟེན་གྱི་ཁམས་མི་མཇེད་འདིར་མཆི་བ་དེ་ལྟ་བུའི་བརྡ་ལྟས་བཅོམ་ལྡན་འདས་ཀྱིས་མཛོད་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་གིས་དེའི་ཚེ་བྱང་ཆུབ་སེམས་དཔའ་སེམས་
དཔའ་ཆེན་པོ་སང་སང་པོའི་དབྱངས་བསྐུལ་བའི་ཕྱིར། འཇམ་དཔལ་གཞོན་ནུར་གྱུར་པ་འདི་རིགས་ཀྱི་བུ་ཁྱོད་ཀྱི་མཐུ་མཐོང་བར་དགའ་བས་རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་འདིར་ཤོག་ཅིག་ཅེས་དེ་ལྟ་བུའི་བརྡ་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
སང་སང་པོའི་དབྱངས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ། བྱང་ཆུབ་སེམས་
དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་ནས་མི་སྣང་བར་གྱུར་ནས། འཇིག་རྟེན་གྱི་ཁམས་མི་མཇེད་འདིར་འོངས་ཏེ། ཞིང་དག་ནི་རབ་ཏུ་

གཡོ་བར་བྱེད། པད་མའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་ལེན་ཅིང་། མིག་ནི་ཨུད་པལ་སྔོན་པོའི་འདབ་མ་འདྲ། བཞིན་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག །ལུས་ཀྱི་མདོག་ནི་གསེར་གྱི་ཁ་དོག་འདྲ་ལ། ལུས་བསོད་ནམས་བརྒྱ་སྟོང་གིས་
ནི་བརྒྱན། དཔལ་གྱི་ས་ནི་རབ་ཏུ་འབར། གཟི་བརྗིད་ཀྱིས་ནི་ཤིན་ཏུ་ལྷང་ངེར་གྱུར། ལུས་ནི་མཚན་རྣམས་ཀྱིས་རྣམ་པར་སྤྲས། ལུས་སྲེད་མེད་ཀྱི་བུའི་ལུས་ལྟར་ནི་མཁྲེགས་པ། རིན་པོ་ཆེ་སྣ་བདུན་གྱི་ཁང་པ་བརྩེགས་པར་ཞུགས་ཏེ། ནམ་མཁའ་ལ་ཏ་ལ་བདུན་ཙམ་ནས་བྱང་ཆུབ་
སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་འོངས་ཏེ། དེ་འཇིག་རྟེན་གྱི་ཁམས་མི་མཇེད་འདི་ག་ལ་བ་དང་བྱ་རྒོད་ཕུང་པོའི་རི་ག་ལ་བ་དེར་འོངས་ཏེ་ཕྱིན་ནས། ཁང་པ་བརྩེགས་པ་དེ་ནས་བབས་ཏེ། བརྒྱ་སྟོང་རི་བའི་མུ་ཏིག་གི་ཕྲེང་བ་ཐོགས་ཤིང་། བཅོམ་ལྡན་
འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་བཅོམ་ལྡན་འདས་ལ་མཆོད་པ་བྱ་བའི་ཕྱིར་མུ་ཏིག་གི་ཕྲེང་བ་ཕུལ་ལོ། །ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་བཅོམ་ལྡན་འདས་ལ་གནོད་པ་ཉུང་ངམ་ཉམ་ང་བ་ཉུང་ངམ་བསྐྱོད་པ་ཡང་ངམ། སྟོབས་དང་བདེ་བར་གནས་སམ་ཞེས་སྙུན་གསོལ་
ལོ། །བཅོམ་ལྡན་འདས་དེ་འདི་སྐད་ཅེས་ཀྱང་གསུང་སྟེ། བཅོམ་ལྡན་འདས་ཁྱོད་བཟོད་དམ། གཞེས་སམ། ཁམས་རྣམས་འཐུན་ནམ། ཁྱོད་ཀྱི་སེམས་ཅན་རྣམས་གོ་སླའམ། གདུལ་སླའམ། གསོ་སླའམ། གཙང་མ་འདོད་དམ། ཧ་ཅང་འདོད་ཆགས་མི་སྤྱོད་དམ།
ཧ་ཅང་ཞེ་སྡང་མི་སྤྱོད་དམ། ཧ་ཅང་གཏི་མུག་མི་སྤྱོད་དམ། བཅོམ་ལྡན་འདས་ཁྱོད་ཀྱི་སེམས་ཅན་དག་ཤིན་ཏུ་ཕྲག་དོག་ཅན་མ་ཡིན་ནམ། སེར་སྣ་ཅན་མ་ཡིན་ནམ། མར་མི་འཛིན་པ་མ་ཡིན་ནམ། ཕར་མི་འཛིན་པ་མ་ཡིན་ནམ། དགེ་སློང་དུ་མི་འཛིན་པ་མ་ཡིན་ནམ། བྲམ་ཟེར་མི་འཛིན་

པ་མ་ཡིན་ནམ། ལོག་པར་ལྟ་བ་མ་ཡིན་ནམ། སེམས་མ་དུལ་བ་མ་ཡིན་ནམ། དབང་པོ་མ་བསྲུངས་པ་མ་ཡིན་ནམ། བཅོམ་ལྡན་འདས་ཁྱོད་ཀྱིས་སེམས་ཅན་དེ་དག་གིས་བདུད་ཕྱིར་རྒོལ་བ་བཅོམ་མམ། བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་དེ། རིན་པོ་ཆེ་སྣ་བདུན་གྱི་མཆོད་རྟེན་གྱི་ནང་ན་བཞུགས་པ་ཆོས་གསན་པའི་ཕྱིར་འཇིག་རྟེན་གྱི་ཁམས་མི་མཇེད་དུ་གཤེགས་སམ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ལ་
ཡང་བཅོམ་ལྡན་འདས་དེ་འདྲི་བ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་དེ་བཟོད་དམ། གཞེས་སམ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་རིང་དུ་གཞེས་སམ་ཞེས་གསུང་ངོ་། །བཅོམ་ལྡན་འདས་བདག་གིས་ཀྱང་། བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ་བལྟ་བར་བགྱིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ། དེ་བཞིན་གཤེགས་
པས་ལེགས་པར་བསྟན་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་
རིན་ཆེན་མང་དེ་ལ་འདི་སྐད་ཅེས་གསུངས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་མཐོང་
བར་འཚལ་ནས་མཆིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ང་དང་

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཐོང་བར་འདོད་པ་དང་། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཉན་པ་དང་། འཇམ་དཔལ་གཞོན་ནུར་གྱུར་པ་བལྟ་བའི་ཕྱིར་འོངས་པ་ལེགས་སོ་
ལེགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། དེ་བཞིན་གཤེགས་པ་གང་གི་དྲུང་དུ་སྔོན་དགེ་
བའི་རྩ་བ་ཇི་ལྟ་བུ་ཞིག་བསྐྲུན། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་
དུས་ན་བསྐལ་པ་མཐོང་ན་དགའ་བ་ལ། འཇིག་རྟེན་གྱི་ཁམས་གཟུགས་ཐམས་ཅད་ཤིན་ཏུ་སྟོན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྤྲིན་དང་རྔ་སྒྲ་རྒྱལ་པོ་ཞེས་བྱ་བ་འདི་འཇིག་རྟེན་དུ་བྱུང་སྟེ། རིགས་ཀྱི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་
རྒྱལ་པོ་དེ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་སིལ་སྙན་བརྒྱ་སྟོང་རབ་ཏུ་བླངས་ཏེ། ལོ་ཁྲི་ཉིས་སྟོང་དུ་མཆོད་པ་བྱས་སོ། །རིན་པོ་ཆེ་སྣ་བདུན་གྱི་སྣོད་བརྒྱད་ཁྲི་བཞི་སྟོང་ཕུལ་ལོ། །རིགས་ཀྱི་བུ་དེ་བཞིན་གཤེགས་པ་སྤྲིན་དང་རྔ་སྒྲ་རྒྱལ་
པོའི་གསུང་རབ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དེ་ལྟ་བུའི་དད་པ་ཐོབ་པོ། །དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་ལ་མཆོད་པ་བྱས་ཤིང་

སྣོད་བརྒྱད་ཁྲི་བཞི་སྟོང་དེ་དག་ཕུལ་བ་དེ། གཞན་ཞིག་ཡིན་སྙམ་དུ་ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་གིས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་དེ་ལ་མཆོད་པ་བྱས་པ་དང་། སྣོད་དེ་དག་ཀྱང་ཕུལ་བ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ཉིད་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་
པོའི་དབྱངས་དེ་ནི་སངས་རྒྱས་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པ། ཡོངས་སུ་སྦྱང་བ་བྱས་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདིས་སྔོན་ཡང་སངས་རྒྱས་བཅོམ་ལྡན་འདས་གང་གཱའི་ཀླུང་གི་
བྱེ་མ་སྙེད་མཐོང་ངོ་། །པད་མའི་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་མཐོང་ངམ། པད་མའི་དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། པད་མའི་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ནི། གཟུགས་མང་པོས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏེ། འདི་ལྟ་སྟེ། ལ་ལར་ནི་ཚངས་པའི་གཟུགས་ཀྱིས། ལ་ལར་ནི་བརྒྱ་
བྱིན་གྱི་གཟུགས་ཀྱིས། ལ་ལར་ནི་དབང་ཕྱུག་གི་གཟུགས་ཀྱིས། ལ་ལར་ནི་དབང་ཕྱུག་ཆེན་པོའི་གཟུགས་ཀྱིས། ལ་ལར་ནི་དམག་དཔོན་གྱི་གཟུགས་ཀྱིས། ལ་ལར་ནི་མཆོག་གི་གཟུགས་ཀྱིས། ལ་ལར་ནི་འཁོར་ལོས་སྒྱུར་བའི་གཟུགས་ཀྱིས། ལ་ལར་ནི་
ཁམས་ཀྱི་རྒྱལ་པོའི་གཟུགས་ཀྱིས། ལ་ལར་ནི་ཚོང་དཔོན་གྱི་གཟུགས་ཀྱིས། ལ་ལར་ནི་ཁྱིམ་བདག་གི་གཟུགས་ཀྱིས། ལ་ལར་ནི་གྲོང་མིའི་གཟུགས་ཀྱིས། ལ་ལར་ནི་བྲམ་ཟེའི་གཟུགས་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །

ལ་ལར་ནི་དགེ་སློང་གི་གཟུགས་ཀྱིས། ལ་ལར་ནི་དགེ་སློང་མའི་གཟུགས་ཀྱིས། ལ་ལར་ནི་དགེ་བསྙེན་གྱི་གཟུགས་ཀྱིས། ལ་ལར་ནི་དགེ་བསྙེན་མའི་གཟུགས་ཀྱིས། ལ་ལར་ནི་ཚོང་དཔོན་གྱི་ཆུང་མའི་གཟུགས་ཀྱིས། ལ་ལར་ནི་ཁྱིམ་བདག་གི་ཆུང་མའི་གཟུགས་ཀྱིས།
ལ་ལར་ནི་གྲོང་མིའི་ཆུང་མའི་གཟུགས་ཀྱིས། ལ་ལར་ནི་ཁྱེའུའི་གཟུགས་ཀྱིས། ལ་ལར་ནི་བུ་མོའི་གཟུགས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏེ། རིགས་
ཀྱི་བུ་གཟུགས་འདི་སྙེད་ཅིག་ཀུན་ཏུ་སྟོན་པས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །ཁ་ཅིག་ལ་ནི་གནོད་སྦྱིན་གྱི་གཟུགས་ཀྱི་བར་གྱིས། བྱང་ཆུབ་སེམས་
དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། དམ་པའི་ཆོས་པད་མ་དཀར་པོའི་ཆོས་ཀ