Kinh tạng Tây Tạng (Kangyur Đại Học) — 051_མདོ་སྡེ།_ཇ

ྟར་ལྔ་བཅུ་པའི་མི་དེ་ཐ་ན་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་གཅིག་ལ་རྗེས་སུ་ཡི་རང་བ་ཡང་། བསོད་ནམས་འདི་སྙེད་
སྐྱེད་ན་མ་ཕམ་པ་གང་གིས་ངའི་མངོན་སུམ་དུ་ཆོས་ཀྱི་རྣམ་གྲངས་འདི་མཉན་ཏེ་ཐོས་ནས་རྗེས་སུ་ཡི་རང་བ་ལྟ་ཅི་སྨོས་ཏེ། མ་ཕམ་པ་དེའི་བསོད་ནམས་མངོན་པར་འདུ་བྱེད་པ་ནི་ཆས་དཔག་ཏུ་མེད་ཆེས་གྲངས་མེད་ཅེས་ངས་བཤད་དོ། །མ་ཕམ་པ་ཡང་རིགས་ཀྱི་བུའམ་རིགས་ཀྱི་བུ་མོ་
གང་གིས་ཆོས་ཀྱི་རྣམ་གྲངས་འདི་མཉན་པའི་ཕྱིར། བདག་གི་ཁྱིམ་ནས་བྱུང་སྟེ། གཙུག་ལག་ཁང་དུ་སོང་ལ། དེ་ཕྱིན་ནས་དེར་འགྲེང་ངམ་འདུག་སྟེ་ཆོས་ཀྱི་རྣམ་གྲངས་འདི་ཡུད་ཙམ་མཉན་ན། སེམས་ཅན་དེ་བསོད་ནམས་མངོན་པར་འདུ་བྱ་བ་དེ་ཙམ་བྱས་ཤིང་བསགས་
པས། དེ་ཚེ་རྗེས་ནས་ལུས་ཕྱི་མ་དང་བདག་གི་ངོ་བོ་ཕྱི་མ་ཐོབ་པ་ལ་གླང་གི་ཤིང་རྟ་འཐོབ་པར་འགྱུར་རོ། །རྟའི་ཤིང་རྟ་དང་། གླང་པོ་ཆེའི་ཤིང་རྟ་དང་། ཁྱོགས་ཀྱི་བཞོན་པ་དང་། གྲུའི་བཞོན་པ་དང་། ཁྱུ་མཆོག་གི་བཞོན་པ་དང་། ལྷའི་གཞལ་མེད་ཁང་ཐོབ་པར་འགྱུར་རོ། །
གལ་ཏེ་ཡང་མདོའི་ཆོས་སྒྲོག་པ་དེར་ཡུད་ཙམ་ཞིག་འདུག་སྟེ། ཆོས་ཀྱི་རྣམ་གྲངས་འདི་ཉན་ཏམ་ཕ་རོལ་འདུག་ཏུ་བཅུག་གམ་སེམས་ཅན་གཞན་ལ་སྟན་བགོས་ན། བསོད་ནམས་མངོན་པར་འདུ་བྱེད་པ་དེས། བརྒྱ་བྱིན་གྱི་སྟན་དང་། ཚངས་པའི་སྟན་དང་། འཁོར་ལོས་

སྒྱུར་བའི་སེང་གེའི་ཁྲི་ཐོབ་པར་འགྱུར་རོ། །མ་ཕམ་པ་གལ་ཏེ་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་མི་གཞན་ཞིག་ལ་འདི་སྐད་དུ། ཀྱེ་མི་ཁྱོད་ཚུར་ཤོག །དམ་པའི་ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ཉོན་ཅིག་ཅེས་སྨྲས་ལ། མི་
དེ་ཡང་སྤྲོ་བ་རྙེད་ནས་གལ་ཏེ་ཡུད་ཙམ་ཞིག་མཉན་ན་སེམས་ཅན་དེ་སྤྲོ་བའི་དགེ་བའི་རྩ་བ་མངོན་པར་འདུ་བྱས་པ་དེས། གཟུངས་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ལྷན་ཅིག་འགྲོགས་པ་འཐོབ་པོ། །བླུན་པོར་མི་འགྱུར་རོ། །དབང་པོ་རྣོ་ཞིང་ཤེས་
རབ་དང་ལྡན་པར་འགྱུར་རོ། །ཚེ་རབས་བརྒྱ་སྟོང་དུ་ཡང་ཁ་རུལ་ཅིང་མནམ་པར་མི་འགྱུར། དེ་ལ་ལྕེ་ནད་མེད་པར་འགྱུར། ཁ་ནད་མེད་པར་འགྱུར། སོ་སྔོན་པོར་མི་འགྱུར། སོ་མི་མཉམ་པ་མེད་པ་དང་། སོ་མི་སེར་བ་དང་། སོ་གྱེད་འདུམས་མེད་པ་དང་། སོ་སྔོ་བ་མེད་པ་
དང་། སོ་བྱུང་བ་མེད་པ་དང་། སོ་ཡོ་བ་མེད་པར་འགྱུར་རོ། །མཆུ་འཕྱང་དུ་མི་འགྱུར། མཆུ་ནང་དུ་སོང་བ་མ་ཡིན་པ་དང་། མཆུ་ལོག་པ་མེད་པ་དང་། མཆུ་ཤོ་རེར་མ་གྱུར་པ་དང་། མཆུ་ཡོ་བ་མེད་པ་དང་། མཆུ་གནག་པ་མེད་པ་དང་། མཆུ་མི་སྡུག་པ་མེད་པར་འགྱུར་
རོ། །སྣ་ལེབ་ལེབ་པོར་མི་འགྱུར། སྣ་ཡོན་པོར་མི་འགྱུར་རོ། །གདོང་རིང་པོར་མི་འགྱུར། གདོང་ཡོན་པོར་མི་འགྱུར། གདོང་ནག་པོར་མི་འགྱུར། གདོང་བལྟ་ན་མི་སྡུག་པར་མི་འགྱུར་རོ། །མ་ཕམ་པ་འདི་ལྟར་ལྕེ་དང་སོ་དང་། མཆུ་སྲབ་ཅིང་ཤིན་ཏུ་ལེགས་པར་འགྱུར།
སྣ་ཆེ་བ་དང་། བཞིན་གྱི་དབྱིབས་ལེགས་པ་དང་། སྨིན་མ་ལེགས་པ་དང་། དཔྲལ་བའི་དབྱེས་ཆེ་བར་འགྱུར། དཔེ་བྱད་རྫོགས་པ་ཐོབ་པར་འགྱུར་རོ། །དེ་བཞིན་གཤེགས་པས་གདམས་པ་དང་རྗེས་སུ་བསྟན་པ་ཡང་ཐོབ་པར་འགྱུར་རོ། །སངས་རྒྱས་བཅོམ་ལྡན་
འདས་རྣམས་དང་ཡང་མྱུར་དུ་ཕྲད་པར་འགྱུར་རོ། །མ་ཕམ་པ་ལྟོས། སེམས་ཅན་གཅིག་སྤྲོ་བར་བྱས་པས་ཀྱང་། བསོད་ནམས་དེ་ཙམ་སྐྱེད་ན་གང་གིས་བསྟི་སྟང་དུ་བྱས་ཏེ་མཉན་ཏམ། བསྟི་སྟང་དུ་བྱས་ཏེ་ཀློག་གམ། བསྟི་སྟང་དུ་བྱས་ཏེ་སྟོན་ཏམ། བསྟི་སྟང་

དུ་བྱས་ཏེ་རབ་ཏུ་འཆད་པ་ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཅིག་ནས་གཅིག་ཏུ་བརྒྱུད་པ་ལྔ་བཅུ་པ། །གང་གིས་མདོ་འདིའི་ཚིགས་བཅད་གཅིག་མཉན་ཏེ། །ཐོས་ནས་སེམས་དང་རྗེས་སུ་ཡི་རང་བའི། །
བསོད་ནམས་ཇི་སྙེད་འབྱུང་བ་དེ་ཉོན་ཅིག །གལ་ཏེ་སྦྱིན་བྱེད་མི་ཞིག་བྱུང་གྱུར་ཏེ། །རྟག་ཏུ་སེམས་ཅན་བྱེ་བ་ཁྲག་ཁྲིག་ལ། །གང་སྔར་ང་ཡིས་དཔེ་བྱས་དེ་དག་རྣམས། །དེ་ཀུན་ལོ་ཡང་བརྒྱད་ཅུ་ཚིམ་པར་བྱས། །མགོ་ལ་སྐྲ་དཀར་གཉེར་མ་ཀུན་བྱུང་སྟེ། །དེ་དག་རྒལ་ཉེར་
གནས་དེས་མཐོང་ནས། །ཀྱེ་མ་སེམས་ཅན་ཉོན་མོངས་འདི་དག་ཀུན། །ཆོས་ཀྱིས་འདི་དག་རབ་ཏུ་བསྟན་པར་བྱ། །དེ་ཡིས་དེ་རྣམས་ལ་ནི་ཕྱིས་ཆོས་སྨྲས། །མྱ་ངན་འདའ་བའི་ས་ཡང་རབ་ཏུ་བཤད། །སྲིད་པ་ཐམས་ཅད་དབུ་བ་སྨིག་རྒྱུ་འདྲ། །སྲིད་པ་ཀུན་ལ་མྱུར་དུ་ཡིད་བྱུང་
བྱོས། །སྦྱིན་པ་བྱེད་པའི་མི་དེའི་གན་ནས་སུ། །སེམས་ཅན་དེ་དག་ཀུན་གྱིས་ཆོས་ཐོས་ནས། །ཟག་པ་ཟད་ཅིང་ཐ་མའི་ལུས་འཛིན་པར། །དུས་གཅིག་དུ་ན་དགྲ་བཅོམ་ཐོབ་གྱུར་ཀྱང་། །གང་ཞིག་བརྒྱུད་དེ་ཚིགས་བཅད་གཅིག་ཐོས་ཤིང་། །རྗེས་སུ་ཡི་རང་བསོད་ནམས་ཇི་སྙེད་པ། །
དེ་ཡི་བསོད་ནམས་དེ་བས་ཆེས་མང་སྟེ། །བསོད་ནམས་ཕུང་པོ་སྔ་མས་ཆར་མི་ཕོད། །གང་གིས་བརྒྱུད་དེ་ཚིགས་བཅད་གཅིག་ཐོས་པ། །དེ་ལྟར་དེ་ཡི་བསོད་ནམས་མང་གྱུར་ཏེ། །དེ་དག་མཐའ་ཡས་ཚད་ཀྱང་ཡོང་མེད་ན། །མངོན་སུམ་ཐོས་པ་དེ་ནི་སྨོས་ཅི་དགོས། །གང་དེར་
སེམས་ཅན་གཅིག་ལ་འང་སྨྲས་པ་ནི། །བསྐལ་པ་བྱེ་བ་ཁྲག་ཁྲིག་དུ་མར་ཡང་། །མདོ་འདི་ཡང་ནི་ཤིན་ཏུ་རྙེད་དཀའ་ཡིས། །སོང་སྟེ་ཆོས་ཉོན་ཅེས་ནི་སྤྲོ་བར་བྱས། །སེམས་ཅན་དེ་དག་དེ་ཡིས་སྤྲོ་བྱས་ནས། །མདོ་འདི་ཡང་ནི་ཡུད་ཙམ་ཉན་བྱེད་པ། །དེ་ཡི་ལས་ཀྱི་འབྲས་བུ་མཉན་
པར་གྱིས། །ནམ་ཡང་དེ་ལ་ཁ་ཡི་ནད་མེད་འགྱུར། །དེ་ཡི་ལྕེ་ཡང་ན་བར་གཞར་མི་འགྱུར། །དེ་ཡི་སོ་རྣམས་འབྱུང་བར་མི་འགྱུར་རོ། །སྔོན་པོ་སེར་པོ་མི་འཐུན་གཞར་མི་འགྱུར། །མཆུ་མི་སྡུག་པར་ཡང་ནི་ཡོང་མི་འགྱུར། །དེ་གདོང་ཡོ་འམ་སྐམ་ཞིང་རིང་བ་མེད། །ནམ་ཡང་སྣ་

ལེབ་ཏུ་ནི་ཡོང་མི་འགྱུར། །སོ་དང་མཆུ་དང་བཞིན་གྱི་དཀྱིལ་འཁོར་དང་། །དེ་ཡི་སྣ་དང་དཔྲལ་བའི་དབྱིབས་ཀྱང་ལེགས། །མི་རྣམས་ཀྱིས་ནི་བལྟ་ན་སྡུག་པར་འགྱུར། །དེ་ཡི་ཁ་ནི་རུལ་བར་གཞར་མི་འགྱུར། །ཨུད་པལ་བཞིན་དུ་རྟག་ཏུ་དྲི་ཞིམ་པ། །དེ་ཡི་ཁ་
ནས་དྲི་ཡང་འབྱུང་བར་འགྱུར། །དཔའ་བོ་ཁྱིམ་ནས་གཙུག་ལག་ཁང་དུ་སོང་། །མདོ་སྡེ་ཉན་པའི་ཕྱིར་ནི་དེར་སོང་སྟེ། །སོང་ནས་དེར་ནི་ཡུད་ཙམ་དེས་ཆོས་མཉན། །དད་པའི་སེམས་ཀྱི་འབྲས་བུ་མཉན་པར་གྱིས། །དེ་ཡི་ལུས་ནི་ཤིན་ཏུ་དཀར་བར་འགྱུར། །བརྟན་པ་དེ་ནི་རྟ་ཡི་
ཤིང་རྟས་འགྲོ། །གླང་ཆེན་ཤིང་རྟ་མཐོན་པོར་འདུག་ནས་སུ། །རིན་པོ་ཆེ་ཡིས་བརྒྱན་པ་ཞོན་ཞིང་འཆག །ཤིན་ཏུ་སྦུད་པའི་ཁྱོགས་ཀྱང་དེས་ཐོབ་ནས། །དེ་དག་དུ་མ་མི་ཡིས་བཏེག་ཅིང་བཀུར། །ཆོས་ཉན་ཕྱིར་ནི་སོང་བ་གྱུར་པ་དེའི། །འབྲས་བུ་དགེ་བ་འདི་འདྲར་འགྱུར་བ་
ཡིན། །དེ་ནི་འཁོར་གྱི་ནང་དེར་འདུག་ནས་སུ། །དཀར་པོའི་ལས་རྣམས་བྱས་པ་དེ་དག་གིས། །ཚངས་པའི་སྟན་དང་རྒྱལ་པོའི་སྟན་རྣམས་དང་། །བརྒྱ་བྱིན་སྟན་རྣམས་ཀྱང་ནི་དེས་ཐོབ་འགྱུར། །དམ་པའི་ཆོས་པད་མ་དཀར་པོ་ལས་རྗེས་སུ་ཡི་རང་བའི་བསོད་ནམས་བསྟན་
པའི་ལེའུ་ཞེས་བྱ་བ་སྟེ་བཅུ་བདུན་པའོ།། །།བམ་པོ་བཅུ་གཅིག་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རྒྱུན་དུ་བརྩོན་ལ་བཀའ་སྩལ་པ། རིགས་ཀྱི་བུ་གང་ལ་ལ་ཆོས་ཀྱི་རྣམ་གྲངས་འདི་འཛིན་པའམ་
ཀློག་པའམ་སྟོན་པའམ་ཡི་གེར་འདྲི་བ་ཡང་རུང་སྟེ། རིགས་ཀྱི་བུ་དེ་མིག་གི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །རྣ་བའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །སྣའི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ལྕེའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །ལུས་
ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ཡིད་ཀྱི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །དེ་ཡོན་ཏན་བརྒྱ་ཕྲག་མང་པོས་དབང་པོ་དྲུག་གི་གྲོང་ཡོངས་སུ་དག་ཅིང་། ཤིན་ཏུ་ཡོངས་སུ་དག་པར་འགྱུར་རོ། །དེའི་ཕ་དང་མ་ལས་བྱུང་བའི་ཤའི་མིག་ཐ་མལ་པ་དེ་ལྟར་ཡོངས་

སུ་དག་པའི། མིག་གི་དབང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་དང་བྲག་དང་ནགས་སྟུག་པོར་བཅས་པ་དང་འོག་ཏུ་མནར་མེད་པའི་སེམས་ཅན་དམྱལ་བ་ཆེན་པོ་ལ་ཐུག་པ་ཡན་ཆད། སྟེང་དུ་སྲིད་པའི་རྩེ་མོར་ཐུག་པའི་བར་དུ་དེ་དག་ཐམས་ཅད་མཐོང་
ངོ་། །ཤའི་མིག་ཐ་མལ་པས་སེམས་ཅན་གང་དག་དེར་སྐྱེས་པ་དེ་དག་ཐམས་ཅད་ཀྱང་མཐོང་སྟེ། དེ་དག་གི་ལས་ཀྱི་རྣམ་པར་སྨིན་པ་འང་ཤེས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཁོར་གྱི་དབུས་སུ་མི་འཇིགས་པ། །
གང་ཞིག་མདོ་སྡེ་འདི་འཆད་ཅིང་། །ལེ་ལོ་མེད་པར་རབ་འཆད་པ། །དེ་ཡི་ཡོན་ཏན་ང་ལས་ཉོན། །ཡོན་ཏན་དག་ནི་བརྒྱད་བརྒྱ་ཡི། །དེ་ཡི་མིག་ནི་ཀུན་དུ་མཛེས། །དེས་ནི་དེ་མིག་དྲི་མ་མེད། །རྙོག་པ་མེད་ཅིང་དག་པར་འགྱུར། །ཕ་དང་མ་ལས་བྱུང་བ་ཡི། །དེ་ཡི་ཤ་ཡི་མིག་དེས་
ནི། །འཇིག་རྟེན་ཁམས་འདི་ཐམས་ཅད་ཀྱང་། །ཕྱི་ནང་བཅས་པ་རབ་ཏུ་མཐོང་། །ལྷུན་པོའི་རི་རབ་ཐམས་ཅད་དང་། །ཁོ་ར་ཡུག་ཀྱང་དེས་མཐོང་སྟེ། །རི་གཞན་གང་རྣམས་གྲགས་པ་དང་། །རྒྱ་མཚོ་དག་ཀྱང་མཐོང་བར་འགྱུར། །འོག་ཏུ་མནར་མེད་དམྱལ་བར་ཐུག །
སྟེང་དུ་སྲིད་པའི་རྩེར་གནས་པ། །བརྟན་པ་དེས་ནི་ཀུན་མཐོང་སྟེ། །ཤ་ཡི་མིག་ནི་དེ་འདྲའོ། །ད་དུང་དེ་ལ་ལྷ་ཡི་མིག །མེད་པས་ཤེས་པ་མ་ཡིན་ནོ། །དེ་ཡི་ཤ་ཡི་མིག་གི་ཡུལ། །དེ་དག་དེ་ལྟར་འགྱུར་བ་ཡིན། །རྟག་པར་རྒྱུན་དུ་བརྩོན་གཞན་ཡང་རིགས་ཀྱི་བུའམ་རིགས་
ཀྱི་བུ་མོ་དེས་ཆོས་ཀྱི་རྣམ་གྲངས་འདི་ཡང་དག་པར་བསྟན་ཅིང་གཞན་དག་ལ་ཡང་དག་པར་བཤད་ན། རྣ་བའི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མནར་མེད་པའི་སེམས་ཅན་དམྱལ་བ་ཆེན་པོ་ལ་ཐུག་པ་ཡན་ཆད། སྲིད་
པའི་རྩེ་མོ་ལ་ཐུག་པ་མན་ཆད་ན། ཕྱི་ནང་གི་སྒྲ་རྣམ་པ་མང་པོ་གང་དག་འབྱུང་བ་འདི་ལྟ་སྟེ། གླང་པོ་ཆེའི་སྒྲའམ། རྟའི་སྒྲའམ། རྔ་མོའི་སྒྲའམ། བ་ལང་གི་སྒྲའམ། རའི་སྒྲའམ། ཤིང་རྟའི་སྒྲའམ། ངུ་བའི་སྒྲའམ། མྱ་ངན་གྱི་སྒྲའམ། འཇིགས་པའི་སྒྲའམ། དུང་གི་

སྒྲའམ། དྲིལ་བུའི་སྒྲའམ། རྔའི་སྒྲའམ། རྩེད་མོའི་སྒྲའམ། གླུའི་སྒྲའམ། རོལ་མོའི་སྒྲའམ། སྐྱེས་པའི་སྒྲའམ། བུད་མེད་ཀྱི་སྒྲའམ། ཁྱེའུའི་སྒྲའམ། བུ་མོའི་སྒྲའམ། ཆོས་ཀྱི་སྒྲའམ། ཆོས་མ་ཡིན་པའི་སྒྲའམ། བདེ་བའི་སྒྲའམ། སྡུག་བསྔལ་
བའི་སྒྲའམ། བྱིས་པའི་སྒྲའམ། འཕགས་པའི་སྒྲའམ། ཡིད་དུ་འོང་བའི་སྒྲ་འམ། ཡིད་དུ་མི་འོང་བའི་སྒྲའམ། ལྷའི་སྒྲའམ། ཀླུའི་སྒྲའམ། གནོད་སྦྱིན་གྱི་སྒྲའམ། དྲི་ཟའི་སྒྲའམ། ལྷ་མ་ཡིན་གྱི་སྒྲའམ། ནམ་མཁའ་ལྡིང་གི་སྒྲའམ། མིའམ་ཅིའི་སྒྲའམ། ལྟོ་འཕྱེ་ཆེན་
པོའི་སྒྲའམ། མིའི་སྒྲའམ། མི་མ་ཡིན་པའི་སྒྲའམ། མེའི་སྒྲའམ། ཆུའི་སྒྲའམ། རླུང་གི་སྒྲའམ། གྲོང་གི་སྒྲའམ། གྲོང་ཁྱེར་གྱི་སྒྲའམ། དགེ་སློང་གི་སྒྲའམ། ཉན་ཐོས་ཀྱི་སྒྲའམ། རང་སངས་རྒྱས་ཀྱི་སྒྲའམ། བྱང་ཆུབ་སེམས་དཔའི་སྒྲའམ། དེ་བཞིན་གཤེགས་པའི་
སྒྲའམ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་ན། སྒྲ་ཅི་བྱུང་བ་ཇི་སྙེད་པ་དེ་དག་ཐམས་ཅད་རྣ་བའི་དབང་པོ་ཐ་མལ་པ་ཡོངས་སུ་དག་པ་དེས་ཐོས་ཏེ། རེ་ཞིག་ལྷའི་རྣ་བ་ནི་མི་སྒྲུབ་མོད་ཀྱི་སེམས་ཅན་དེ་དང་དེ་དག་གི་སྐད་དུ་རབ་ཏུ་རྟོགས་སོ། །སེམས་
ཅན་དེ་དང་དེ་དག་གིས་སྐད་ལ་རྣམ་པར་རྟོག་གོ། །རྣམ་པར་འབྱེད་དོ། །རྣ་བའི་དབང་པོ་ཐ་མལ་པ་དེས་སེམས་ཅན་དེ་དང་དེ་དག་གིས་སྐད་རྣམས་ཐོས་ཀྱང་། དེའི་རྣ་བའི་དབང་པོ་ལ་སྒྲ་དེ་དག་ཐམས་ཅད་ཀྱིས་ཟིལ་གྱིས་མི་ནོན་ཏོ། །རྟག་པར་རྒྱུན་དུ་བརྩོན་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་རྣ་བའི་དབང་པོ་འདི་ལྟ་བུ་ཐོབ་པར་འགྱུར་ཏེ། རེ་ཞིག་ལྷའི་རྣ་བ་ནི་མངོན་པར་མི་སྒྲུབ་བོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པས་གཞན་ཡང་འདི་སྐད་ཅེས་བཀའ་སྩལ་
ཏོ། །དེ་ཡི་རྣ་བའི་དབང་པོ་ཐ་མལ་པ། །རྙོག་པ་མེད་ཅིང་རྣམ་པར་དག་པར་འགྱུར། །འཇིག་རྟེན་ཁམས་འདི་དག་ན་མ་ལུས་པར། །རྣམ་པ་མང་པོའི་སྒྲ་རྣམས་དེས་ཐོས་ཏེ། །རྔ་བོ་ཆེ་དང་རྫ་རྔ་སྒྲ་སྙན་དང་། །པི་བང་གླིང་བུ་དང་ནི་པ་ལླ་ཀི །ཤིང་རྟ་བ་ལང་ར་དང་

ལུག་དག་དང་། །རྟ་དང་གླང་ཆེན་དག་གི་སྒྲ་ཡང་ཐོས། །འཇམ་ཞིང་ཡིད་འོང་གླུ་ཡི་དབྱངས་ཀྱང་ཐོས། །བརྟན་པ་དེ་ནི་དེ་ལ་ཆགས་པ་མེད། །གང་དང་གང་ན་སུ་དང་སུ་སྨྲ་བ། །བྱེ་བ་སྙེད་ཀྱི་མི་ཡི་སྒྲ་རྣམས་ཐོས། །ལྷ་ཡི་སྒྲ་དང་ཀླུ་ཡི་དབྱངས་རྣམས་ཀྱང་། །སྙན་ཅིང་ཡིད་དུ་
འོང་བ་རྟག་པར་ཐོས། །སྐྱེས་པ་བུད་མེད་དག་གི་སྒྲ་རྣམས་དང་། །ཁྱེའུ་དང་བུ་མོའི་སྒྲ་ཡང་དེ་བཞིན་ཐོས། །རི་དང་ཕུག་ན་གང་གནས་དེ་དག་དང་། །ཁུ་བྱུག་རྨ་བྱ་ཀ་ལ་པིང་ཀ་དང་། །བྱ་རྣམས་གང་དག་ཤང་ཤང་ཏེའུ་རྣམས་དང་། །དེ་དག་རྣམས་ཀྱི་སྒྲ་སྙན་འདིར་ཐོས་
སོ། །སེམས་དམྱལ་དག་ན་སྡུག་བསྔལ་གང་མྱོང་བ། །ཤིན་ཏུ་མི་བཟད་པ་ཡི་སྒྲ་རྣམས་དང་། །ཟས་ཀྱི་སྡུག་བསྔལ་དག་གིས་ཉེན་པ་ཡི། །ཡི་དགས་རྣམས་ཀྱི་སྒྲ་ཕྱུང་དེ་བཞིན་ཐོས། །ལྷ་མ་ཡིན་དང་རྒྱ་མཚོའི་ནང་གནས་དང་། །སྒྲ་འབྱིན་པ་དང་དེ་བཞིན་གཞན་དག་
དང་། །ཆོས་སྨྲ་བ་དེ་འདི་ན་འདུག་བཞིན་དུ། །སྒྲ་རྣམས་ཐམས་ཅད་ཐོས་ཏེ་ཆོད་པ་མེད། །དུད་འགྲོའི་སྐྱེ་གནས་དག་ན་ཕན་ཚུན་དུ། །སྨྲ་བར་བྱེད་པའི་སྒྲ་རྣམས་གང་ཡིན་པ། །རྣམ་པ་ཐ་དད་སྒྲ་རྣམས་མང་པོ་དག །དེ་ནི་འདི་ན་འདུག་བཞིན་དེ་དག་ཐོས། །ལྷ་གང་ཚངས་
པའི་འཇིག་རྟེན་གནས་པ་དང་། །གང་དག་འོག་མིན་དང་ནི་འོད་གསལ་ལྷ། །ཕན་ཚུན་དུ་ནི་སྒྲ་སྐད་གང་འབྱིན་པ། །དེ་དག་མ་ལུས་ཐམས་ཅད་དེས་ཐོས་སོ། །བདེ་བར་གཤེགས་ཀྱི་བསྟན་ལ་རབ་བྱུང་ནས། །དགེ་སློང་གང་དག་ཁ་དོན་བྱེད་པ་དང་། །འཁོར་གྱི་ནང་ན་
ཆོས་སྟོན་གང་ཡིན་པ། །དེ་དག་སྒྲ་ཡང་རྟག་ཏུ་དེ་ཡིས་ཐོས། །འཇིག་རྟེན་ཁམས་འདིར་བྱང་ཆུབ་སེམས་དཔའ་གང་། །ཁ་དོན་དག་ཀྱང་བྱེད་ཅིང་ཕན་ཚུན་དུ། །ཆོས་རྣམས་ཡང་དག་རྗོད་པར་གང་བྱེད་པ། །དེ་དག་སྒྲ་རྣམས་རྣམ་པ་ཐ་དད་ཐོས། །བྱང་ཆུབ་སེམས་
དཔའ་མདོ་འདི་གང་འཛིན་པས། །སངས་རྒྱས་བཅོམ་ལྡན་མི་འདུལ་ཁ་ལོ་སྒྱུར། །འཁོར་རྣམས་ལ་ཡང་ཆོས་མཆོག་གང་གསུང་བ། །དུས་གཅིག་ཏུ་ནི་དེ་ཡང་དེ་ཡིས་ཐོས། །མནར་མེད་ཡན་ཆད་སྟེང་དུ་སྲིད་པའི་རྩེ། །སྟོང་གསུམ་གྱི་ནི་ཞིང་འདི་ཐམས་ཅད་ན། །

ནང་ལོགས་དག་དང་ཕྱི་ལོགས་དག་ནས་ཀྱང་། །སེམས་ཅན་གང་གིས་སྒྲ་མང་ཕྱུང་བ་དང་། །སེམས་ཅན་ཀུན་གྱི་སྒྲ་རྣམས་ཐོས་གྱུར་ཀྱང་། །འོན་ཀྱང་དེ་ཡི་རྣ་བ་འགག་པ་མེད། །དབང་པོ་གསལ་ཞིང་གནས་དང་གནས་ཀྱང་ཤེས། །རྣ་བའི་དབང་པོ་ཐ་
མལ་དེ་ཙམ་མོ། །རེ་ཞིག་ལྷ་ཡི་ལ་ནི་འབད་མི་བྱེད། །ཐ་མལ་རྣ་བ་དེ་ནི་དེ་ལྟར་འདུག །འཇིགས་མེད་གང་གིས་མདོ་འདི་བཟུང་བ་ནི། །དེ་ཡི་ཡོན་ཏན་དག་ནི་དེ་འདྲར་འགྱུར། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་
འདི་འཛིན་ཏམ། རབ་ཏུ་སྟོན་ཏམ། ཁ་ཏོན་བྱེད་དམ། ཡི་གེར་འདྲི་བ་དེ། སྣའི་ཡོན་ཏན་བརྒྱད་བརྒྱ་དང་ལྡན་ཞིང་སྣའི་དབང་པོ་ཡོངས་སུ་དག་པར་འགྱུར་ཏེ། དེའི་སྣའི་དབང་པོ་ཡོངས་སུ་དག་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་གི་དྲི་རྣམ་པ་
མང་པོ་ཡོད་པ་འདི་ལྟ་སྟེ། རུལ་བའི་དྲིའམ་ཡིད་དུ་འོང་བའི་དྲིའམ་ཡིད་དུ་མི་འོང་བའི་དྲིའམ་མེ་ཏོག་རྣམ་པ་ཐ་དད་པའི་དྲི་འདི་ལྟ་སྟེ། སྣ་མའི་མེ་ཏོག་དང་། མ་ལི་ཀ་དང་། ཙམ་པ་ཀ་དང་། སྐྱ་སྣར་གྱི་དྲི་རྣམས་ཀྱང་ཚོར་རོ། །ཆུ་ལས་སྐྱེས་པའི་མེ་ཏོག་རྣམ་པ་མང་པོའི་དྲི་
རྣམས་ཀྱང་ཚོར་ཏེ་འདི་ལྟ་སྟེ། ཨུད་པ་ལ་དང་། པད་མ་དང་། ཀུ་མུ་ཏ་དང་། པད་མ་དཀར་པོ་རྣམས་ཀྱི་དྲི་དག་ཀྱང་ཚོར་རོ། །མེ་ཏོག་དང་འབྲས་བུའི་ཤིང་རྣམ་པ་མང་པོའི་མེ་ཏོག་དང་། འབྲས་བུའི་དྲི་རྣམས་ཀྱང་ཚོར་ཏེ། འདི་ལྟ་སྟེ། ཙན་དན་དང་། ཏ་མ་ལའི་འདབ་མ་དང་།
རྒྱ་སྤོས་དང་། ཨ་ག་རུའི་དྲི་ཞིམ་པོ་རྣམས་ཀྱང་ཚོར་རོ། །སྤོས་རྣམ་པ་ཐ་དད་པ་བརྒྱ་སྟོང་གནས་གཅིག་ན་འདུག་པ་ཐམས་ཅད་ཀྱང་ཚོར་རོ། །ཐམས་ཅད་ཀྱང་ཤེས་སོ། །སེམས་ཅན་གྱི་དྲི་རྣམ་པ་མང་པོ་ཡང་ཚོར་ཏེ་འདི་ལྟ་སྟེ། གླང་པོ་ཆེ་དང་། རྟ་དང་། བ་ལང་དང་། ར་ལུག་
དང་། ཕྱུགས་ཀྱི་དྲི་རྣམས་ཀྱང་ཚོར་རོ། །དུད་འགྲོའི་སྐྱེ་གནས་སུ་སོང་བའི་སྲོག་ཆགས་རྣམ་པ་མང་པོའི་ལུས་ཀྱི་དྲི་རྣམས་ཀྱང་ཚོར་རོ། །སྐྱེས་པ་དང་བུད་མེད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཁྱེའུ་དང་བུ་མོའི་ལུས་ཀྱི་དྲི་རྣམས་ཀྱང་ཚོར་རོ། །རྩྭ་དང་ཤིང་གེལ་པ་དང་

སྨན་དང་ནགས་ཐག་རིང་པོ་ན་འདུག་པའི་དྲི་རྣམས་ཀྱང་ཚོར་རོ། །དྲི་ཡང་དག་པར་ཚོར་ཏེ་དྲི་ཡང་དག་པར་ཤེས་མོད་ཀྱི། དྲི་དེ་དག་གིས་མི་འཕྲོགས། དེ་དག་གིས་མྱོས་པར་མི་འགྱུར་རོ། །དེ་འདི་ན་འདུག་བཞིན་དུ་ལྷ་དག་གི་དྲི་རྣམས་ཀྱང་ཚོར་ཏེ་འདི་ལྟ་སྟེ། ཡོངས་འདུ་
ས་བརྟོལ་གྱི་དྲི་རྣམས་ཀྱང་ཚོར་རོ། །མེ་ཏོག་མན་དཱ་ར་དང་མན་དཱ་ར་ཆེན་པོ་དང་མཉྫུ་ཥ་ཀ་དང་མཉྫུ་ཥ་ཀ་ཆེན་པོ་རྣམས་ཀྱི་ལྷའི་དྲི་རྣམས་ཀྱང་ཚོར་རོ། །ལྷའི་ཨ་ག་རུའི་ཕྱེ་མ་དང་ཙན་དན་གྱི་ཕྱེ་མ་དག་གི་དྲི་རྣམས་ཀྱང་ཚོར་རོ། །ལྷའི་མེ་ཏོག་རྣམ་པ་ཐ་དད་པ་བརྒྱ་སྟོང་གི་དྲི་དག་ཀྱང་ཚོར་རོ། །
དེ་དག་གི་མིང་རྣམས་ཀྱང་ཤེས་སོ། །ལྷའི་བུའི་ལུས་ཀྱི་དྲི་རྣམས་ཀྱང་ཚོར་ཏེ་འདི་ལྟ་སྟེ། ལྷའི་དབང་པོ་བརྒྱ་བྱིན་གྱི་ལུས་ཀྱི་དྲི་ཡང་ཚོར་རོ། །རྣམ་པར་རྒྱལ་བའི་ཁང་བཟངས་ན་རྩེ་དགའ་ཞིང་དགའ་མགུར་སྤྱོད་པའམ། ཆོས་བཟངས་ལྷའི་འདུན་ས་ན་སུམ་ཅུ་རྩ་གསུམ་པའི་ལྷ་
རྣམས་ལ་ཆོས་སྟོན་པའམ། རྩེ་དགའ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དེ་ཡང་ཤེས་སོ། །ལྷའི་བུ་གཞན་རྣམས་ཀྱི་སོ་སོའི་ལུས་ཀྱི་དྲི་རྣམས་ཀྱང་ཚོར་རོ། །ལྷའི་བུ་མོ་རྣམས་དང་ལྷའི་ཆུང་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ལྷ་གཞོན་ནུ་རྣམས་ཀྱི་ལུས་ཀྱི་
དྲི་རྣམས་ཀྱང་ཚོར་རོ། །ལྷ་གཞོན་ནུ་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་ཏེ། དྲི་དེ་དག་གིས་ཀྱང་མི་འཕྲོགས་ཤིང་མྱོས་པར་ཡང་མི་འགྱུར་རོ། །རྣམ་གྲངས་འདིས་སྲིད་པའི་རྩེ་མོའི་བར་དུ་སྐྱེས་པའི་སེམས་ཅན་དེ་དག་གི་ལུས་ཀྱི་དྲི་རྣམས་ཀྱང་ཚོར་རོ། །ཚངས་རིས་ཀྱི་
ལྷའི་བུ་རྣམས་དང་། ཚངས་པ་ཆེན་པོ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །རྣམ་གྲངས་འདིས་ལྷའི་རིས་ཐམས་ཅད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པ་དག་གི་སྐུའི་དྲི་
རྣམས་ཀྱང་ཚོར་རོ། །དེ་བཞིན་གཤེགས་པ་དག་གི་གདན་གྱི་དྲི་རྣམས་ཀྱང་ཚོར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གང་ན་བཞུགས་པ་དེ་ཡང་རབ་ཏུ་ཤེས་སོ། །དེའི་སྣའི་དབང་པོ་དེ་ཡང་དྲི་རྣམ་པ་མང་པོ་དེ་དང་དེ་དག་

གིས་མི་འཕྲོགས་ཏེ་ཉམས་པའམ་གནོད་པར་འགྱུར་བ་ཡང་མེད་དོ། །དེ་འདོད་ན་དྲི་དེ་དང་དེ་དག་གཞན་དག་ལ་ཡང་སྟོན་ཏེ། དེ་དྲན་པ་ཉམས་པར་འགྱུར་བ་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །
དེ་ཡི་སྣ་ཡི་དབང་པོ་རྣམ་དག་འགྱུར། །གང་རྣམས་འཇིག་རྟེན་ཁམས་འདི་ཐམས་ཅད་ན། །དྲི་ཞིམ་དྲི་མི་ཞིམ་པ་ཅི་ཡོད་པ། །དེས་ནི་རྣམ་པ་མང་པོའི་དྲི་ཡང་ཚོར། །སྣ་མའི་མེ་ཏོག་དྲི་དང་མ་ལི་ཀ །ཙན་དན་ཏ་མ་ལ་ཡི་འདབ་མ་དང་། །རྒྱ་སྤོས་དག་དང་ཨ་ག་རུ་ཡི་དྲི། །
མེ་ཏོག་འབྲས་བུ་སྣ་མང་དེ་དག་དང་། །སྐྱེས་པ་བུད་མེད་རིང་ན་འདུག་པ་དང་། །ཁྱེའུ་རྣམས་དང་ནི་བུ་མོ་དེ་དག་དང་། །སེམས་ཅན་རྣམས་ཀྱི་དྲི་ཡང་དེ་བཞིན་ཤེས། །དེ་ཡི་གནས་ཀྱང་དེས་ནི་དྲི་ལས་ཤེས། །འཁོར་ལོས་སྒྱུར་རྒྱལ་རྣམས་ཀྱང་དེ་ཡིས་ཤེས། །སྟོབས་ཀྱི་
འཁོར་ལོས་སྒྱུར་དང་རྒྱལ་ཕྲན་དང་། །དེ་བཞིན་ཁྱེའུ་དང་བུ་མོ་དེ་དག་དང་། །ཆུང་མའི་འཁོར་ཀུན་དྲི་ལས་དེ་ཡིས་ཤེས། །ཡོངས་སུ་ལོངས་སྤྱོད་རིན་ཆེན་རྣམ་མང་དང་། །སྤ་བ་གང་དག་ས་ལ་འདུག་རྣམས་དང་། །བུད་མེད་རིན་པོ་ཆེར་གྱུར་དེ་དག་ཀྱང་། །བྱང་ཆུབ་སེམས་
དཔའ་དེ་ཡིས་དྲི་ལས་ཤེས། །དེ་དག་རྣམས་ཀྱི་རྒྱན་རྣམས་ཅི་ཡོད་པ། །ལུས་ལ་བཏགས་པ་རྣམ་པ་སྣ་ཚོགས་གཟུགས། །གོས་དང་ཕྲེང་བ་བྱུག་པ་སྤོས་རྣམས་ཀྱང་། །དྲི་ལས་བྱང་ཆུབ་སེམས་དཔའ་དེ་ཡིས་ཤེས། །དེ་བཞིན་འགྲེང་དང་འདུག་དང་ཉལ་བ་དང་། །རྩེད་
མོ་དགའ་བ་མཐུ་སྟོབས་ཐམས་ཅད་ཀྱང་། །མདོ་སྡེ་དམ་པ་འདི་ནི་གང་འཛིན་པ། །བརྟན་པ་དེ་ཡི་སྣ་ཡི་སྟོབས་ཀྱིས་ཤེས། །སྤོས་མཆོག་འབྲུ་མར་དྲི་ཡང་དེ་བཞིན་ཏེ། །མེ་ཏོག་འབྲས་བུ་རྣམ་པ་མང་པོའི་དྲི། །དྲི་འདི་ག་གེ་མོ་ན་ཡོད་ཅེས་ཀྱང་། །འདུག་བཞིན་དུ་ནི་ཅིག་ཅར་
ཤེས་ཤིང་ཚོར། །རི་ཡི་ཕྲག་ནི་རྣམ་པ་སྣ་ཚོགས་ན། །ཙན་དན་མེ་ཏོག་རྒྱས་མང་གང་ཡོད་དང་། །སེམས་ཅན་གང་དག་དེ་ན་གནས་པ་ཡང་། །མཁས་དེས་དེ་དག་ཐམས་ཅད་དྲི་ལས་ཤེས། །ཁོར་ཡུག་ངོས་ལ་གང་དག་གནས་པ་དང་། །རྒྱ་མཚོའི་དབུས་ན་གང་དག་འཁོད་

པ་དང་། །ས་ཡི་དབུས་ན་སེམས་ཅན་གང་གནས་པ། །མཁས་པ་དེས་ནི་ཐམས་ཅད་དྲི་ལས་ཤེས། །ལྷ་དང་ལྷ་མ་ཡིན་ཡང་དེ་བཞིན་ཤེས། །དེས་ནི་ལྷ་མིན་བུ་མོ་དག་ཀྱང་ཤེས། །ལྷ་མ་ཡིན་གྱི་རྩེད་མོ་དགའ་བའང་ཤེས། །དེ་ཡི་སྣ་ཡི་དབང་པོའི་མཐུ་དེ་འདྲ། །ནགས་ཁྲོད་དག་
ན་རྐང་བཞི་གང་ཡོད་པ། །སེང་གེ་སྟག་དང་དེ་བཞིན་གླང་ཆེན་མཆོག །དེ་ནམ་ཧེ་བ་ལང་བ་མེན་རྣམས། །དེ་དག་གནས་པ་དེ་ཡི་སྣ་ཡིས་ཤེས། །བུད་མེད་གང་དག་སྦྲུམ་མར་གྱུར་པ་དང་། །ཁྱེའུ་འམ་འོན་ཏེ་བུ་མོ་གང་ཡིན་པ། །རུམ་ན་འཆང་བ་ཤིན་ཏུ་ངལ་བའི་ལུས། །དེ་ལ་གང་
ཡོད་དེ་ཡི་དྲི་ལས་ཤེས། །སེམས་ཅན་མངལ་དུ་ཞུགས་པའང་དེས་ཤེས་ཏེ། །རྣམ་པར་འཇིག་པའི་ཆོས་ཀྱང་དེ་ཡིས་ཤེས། །བུད་མེད་འདི་ནི་སྡུག་བསྔལ་རྣམས་དང་བྲལ། །བསོད་ནམས་ལྡན་པའི་བུ་ནི་འབྱུང་བར་ཤེས། །སྐྱེས་བུའི་བསམ་པ་མང་པོ་རབ་ཤེས་ཏེ། །བསམ་
པའི་དྲི་ཡང་དེ་བཞིན་དེ་ཡིས་ཚོར། །འདོད་ཆགས་ཞེ་སྡང་དེ་བཞིན་འཆབ་པ་དང་། །ཉེ་བར་ཞི་བའི་སེམས་ཀྱི་དྲི་ཡང་ཚོར། །ས་ལ་གཏེར་རྣམས་གང་དག་ཡོད་གྱུར་པ། །ནོར་རྣམས་དང་ནི་གསེར་དངུལ་འགྲོན་བུ་ཡིས། །ལྕགས་ཀྱི་སྒྲོམ་རྣམས་དེ་བཞིན་གང་བ་དག །དྲི་ལས་
བྱང་ཆུབ་སེམས་དཔའ་དེ་ཡིས་ཤེས། །མུ་ཏིག་ནོར་བུ་དོ་ཤལ་སེ་མོ་དོ། །རིན་ཐང་མེད་པའི་རིན་ཆེན་རྣམ་མང་པོ། །རིན་ཐང་མེད་པའི་མིང་དང་འོད་དབྱིབས་ཀྱང་། །དེ་དག་ཐམས་ཅད་དེ་ཡི་དྲི་ལས་ཤེས། །དེ་བཞིན་སྟེང་གི་ལྷ་ཡི་མེ་ཏོག་རྣམས། །མན་དཱ་ར་དང་མཉྫུ་ཥ་ཀ་དང་། །
ཡོངས་འདུའི་མེ་ཏོག་གང་དག་ཡོད་གྱུར་པ། །དཔའ་བོ་འདི་ན་འདུག་བཞིན་དེ་དག་ཚོར། །གང་གི་གཞལ་མེད་ཁང་རྣམས་ཅི་འདྲ་བ། །ཡངས་དང་འབྲིང་དང་དེ་བཞིན་ཆུང་ངུ་དང་། །དེ་ན་རྣམ་པ་སྣ་ཚོགས་གཟུགས་ཡོད་པ། །འདི་ན་འདུག་བཞིན་སྣ་ཡི་སྟོབས་ཀྱིས་ཚོར། །སྐྱེད་
མོས་ཚལ་གྱི་ས་ཡང་དེ་བཞིན་ཤེས། །ཆོས་བཟངས་དང་ནི་རྣམ་པར་རྒྱལ་བ་ཡི། །ཁང་བཟངས་མཆོག་ན་ལྷ་གང་འཁོད་པ་དག །དེ་ན་ལྷ་བུ་རྩེན་པའང་རྟག་ཏུ་ཤེས། །གང་ཞིག་གང་ན་ལས་ནི་བྱེད་པའམ། །འདུག་དང་ཉལ་དང་གང་དུ་འགྲོ་བ་ཡང་། །འདི་ན་འདུག་

བཞིན་དེ་དག་དྲི་ཡང་ཚོར། །ལྷ་ཡི་བུ་རྣམས་དེས་ནི་དྲི་ལས་ཤེས། །མེ་ཏོག་མང་བརྒྱན་ལྷ་ཡི་བུ་མོ་གང་། །ཕྲེང་བ་ཐོགས་ཤིང་ལྷབ་ལྷུབ་རྣམས་ཀྱིས་བརྒྱན། །གང་དང་གང་དུ་རྩེན་ཞིང་འདོང་བ་དག །བྱང་ཆུབ་སེམས་དཔའ་དེ་ཡིས་དྲི་ལས་ཤེས། །སྟེང་
དུ་སྲིད་པའི་རྩེ་མོའི་བར་གྱི་ལྷ། །ཚངས་པ་ཚངས་ཆེན་གཞལ་མེད་ཁང་རྒྱུ་བ། །བསམ་གཏན་གནས་སམ་འོན་ཏེ་ལངས་པ་ཡང་། །དེ་དག་དེར་ནི་དྲི་ལས་རབ་ཏུ་ཤེས། །འོད་གསལ་གྱི་ནི་ལྷ་ཡི་བུ་རྣམས་ཀྱང་། །འཆི་འཕོས་སྐྱེས་པ་གསར་དུ་འོངས་པ་ཤེས། །བྱང་ཆུབ་
སེམས་དཔའ་མདོ་འདི་འཛིན་པ་ཡི། །སྣ་ཡི་དབང་པོ་འདི་འདྲར་འགྱུར་བ་ཡིན། །དགེ་སློང་གང་རྣམས་བདེ་གཤེགས་བསྟན་པ་ལ། །མངོན་པར་བརྩོན་པ་འཆག་ཅིང་འདུག་པ་དང་། །ལུང་ནོད་ཁ་དོན་མོས་པའི་དགེ་སློང་རྣམས། །ཐམས་ཅད་བྱང་ཆུབ་སེམས་དཔའ་
དེ་ཡིས་ཤེས། །རྒྱལ་བའི་སྲས་པོ་ཉན་ཐོས་གང་ཡོད་པ། །ལ་ལ་རྟག་ཏུ་ཤིང་དྲུང་གནས་པ་དག །དགེ་སློང་འདི་ཞེས་བྱ་བར་འདིར་གནས་ཤེས། །དེ་དག་ཐམས་ཅད་མཁས་པ་དེས་ཤེས་སོ། །བྱང་ཆུབ་སེམས་དཔའ་དྲན་ལྡན་བསམ་གཏན་པ། །རྟག་ཏུ་ལུང་ནོད་ཁ་
དོན་འགའ་གང་དག །འཁོར་གྱི་ནང་ན་ཆོས་ཀྱང་རབ་འཆད་པ། །དེ་དག་དྲི་ལས་བྱང་ཆུབ་སེམས་དཔས་ཤེས། །བདེ་བར་གཤེགས་པ་ཐུབ་ཆེན་ཕྱོགས་གང་ན། །ཉན་ཐོས་དགེ་འདུན་མདུན་གྱིས་བལྟས་དབུས་ན། །ཕན་ཞིང་ཐུགས་བརྩེ་རབ་ཏུ་ཆོས་འཆད་པ། །
འཇིག་རྟེན་མགོན་པོ་དེ་ཡང་དྲི་ལས་ཤེས། །སེམས་ཅན་གང་རྣམས་ཆོས་འདི་ཉན་པ་དག །གང་རྣམས་ཐོས་ནས་དགའ་བའི་ཡིད་གྱུར་པ། །དེ་ན་རྒྱལ་བའི་འཁོར་རྣམས་ཐམས་ཅད་ཀྱང་། །འདི་ན་འདུག་བཞིན་བྱང་ཆུབ་སེམས་དཔས་ཤེས། །དེ་ཡི་སྣ་ཡི་སྟོབས་ནི་
དེ་འདྲར་འགྱུར། །དེ་ལ་ལྷ་ཡི་སྣ་ནི་ད་དུང་མེད། །ཟག་པ་མེད་པར་གྱུར་པ་ལྷ་ཡི་སྣ། །དེ་ཡི་སྔུན་དུ་འགྲོ་བར་འདི་འགྱུར་རོ། །རྟག་པར་རྒྱུན་དུ་བརྩོན་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དེས་ཆོས་ཀྱི་རྣམ་གྲངས་འདི་འཛིན་ཏམ་སྟོན་ཏམ་རབ་ཏུ་འཆད་དམ་ཡི་གེར་འདྲིར་

འཇུག་ན། ལྕེའི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་པའི་ལྕེའི་དབང་པོ་ཐོབ་པར་འགྱུར་ཏེ། དེ་ལྕེའི་དབང་པོ་དེ་ལྟ་བུས་རོ་གང་དག་མྱངས་པ་དང་རོ་གང་དག་ཚོར་བ་དང་རོ་གང་དག་ལྕེའི་དབང་པོ་ལ་རེག་པ་དེ་ཐམས་ཅད་ལྷའི་རོ་བྲོ་བ་དམ་པར་འགྱུར་རོ། །ཇི་ལྟར་ཡིད་དུ་མི་འོང་
བའི་རོ་གང་དག་ཡང་མི་མྱོང་བ་དེ་ལྟ་བུ་མྱོང་བར་འགྱུར་རོ། །ཡིད་དུ་མི་འོང་བའི་རོ་གང་ཡིན་པ་དེ་དག་ཀྱང་། དེའི་ལྕེའི་དབང་པོའི་སྟེང་དུ་རེག་ན་ལྷའི་རོ་བྲོ་བར་འགྱུར་རོ། །འཁོར་གྱི་ནང་དུ་སོང་ནས་ཆོས་གང་བཤད་པ་དེས་སེམས་ཅན་དེ་དག་དབང་པོ་ཚིམ་པར་འགྱུར་རོ། །མགུ་
བ་དང་ཡོངས་སུ་མགུ་བ་དང་མཆོག་ཏུ་དགའ་བ་སྐྱེའོ། །དེའི་སྒྲ་ཡང་ཟབ་ཅིང་ཡིད་དུ་འོང་ལ་མཉེན་ཞིང་སྙན་པར་འགྱུར་ཏེ། སྙིང་ལ་འབབ་པ་དང་དགའ་བར་འགྱུར་བ་དེས་སེམས་ཅན་དེ་དག་དགའ་མགུ་ཡི་རངས་པའི་སེམས་སུ་འགྱུར་རོ། །གང་དག་ལ་ཆོས་བཤད་པ་དེ་དག་
གིས་ཀྱང་དེའི་དབྱངས་འཇམ་ཞིང་སྙན་པ་ཡིད་དུ་འོང་བའི་སྒྲ་ཐོས་ནས། ལྷ་རྣམས་ཀྱང་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་དེའི་དྲུང་དུ་འགྲོ་བར་སེམས་སོ། །ལྷའི་བུ་དང་ལྷའི་བུ་མོ་རྣམས་ཀྱང་བལྟ་བ་དང་། ཕྱག་བྱ་བ་དང་། བསྙེན་
བཀུར་བྱ་བ་དང་། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །བརྒྱ་བྱིན་དང་ཚངས་པ་དང་ཚངས་རིས་ཀྱི་ལྷའི་བུ་རྣམས་ཀྱང་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །ཀླུ་དང་ཀླུའི་བུ་མོ་རྣམས་
ཀྱང་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །ལྷ་མ་ཡིན་དང་ལྷ་མ་ཡིན་གྱི་བུ་མོ་རྣམས་ཀྱང་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །
ནམ་མཁའ་ལྡིང་དང་ནམ་མཁའ་ལྡིང་གི་བུ་མོ་རྣམས་ཀྱང་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །མིའམ་ཅི་དང་མིའམ་ཅིའི་བུ་མོ་དང་གནོད་སྦྱིན་དང་གནོད་སྦྱིན་གྱི་བུ་མོ་དང་ཤ་ཟ་དང་ཤ་ཟའི་བུ་མོ་རྣམས་ཀྱང་

བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པར་བྱ་བའི་ཕྱིར་དྲུང་དུ་འགྲོ་བར་སེམས་ཏེ། དེ་དག་ཀྱང་དེ་ལ་བཀུར་སྟིར་བྱེད་བསྟི་སྟང་དུ་བྱེད་བཙུན་པར་བྱེད་མཆོད་པ་དང་། གསོལ་བར་བྱེད་དབུལ་བར་བྱེད་དོ། །དགེ་སློང་དང་། དགེ་
སློང་མ་དང་། དགེ་བསྙེན་དང་། དགེ་བསྙེན་མ་རྣམས་ཀྱང་ལྟ་འདོད་པར་འགྱུར་རོ། །རྒྱལ་པོ་དང་རྒྱལ་བུ་དང་། རྒྱལ་པོའི་བློན་པོ་རྣམས་ཀྱང་ལྟ་འདོད་པར་འགྱུར་རོ། །སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དང་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ།
བུ་དང་བཅས་པ། བློན་པོ་དང་བཅས་པ། བཙུན་མོའི་འཁོར་དང་བཅས་པ་དང་། གཡོག་འཁོར་དང་བཅས་པ་ཡང་བཀུར་སྟིར་བྱ་བའི་ཕྱིར་ལྟ་འདོད་པར་འགྱུར་རོ། །ཆོས་སྨྲ་བ་དེ་དེ་བཞིན་གཤེགས་པས་ཇི་སྐད་གསུངས་པ་བཞིན་ཡང་དག་པ་ཇི་ལྟ་བ་བཞིན་དུ་སྙན་པའི་ཆོས་
འཆད་དོ། །བྲམ་ཟེ་དང་ཁྱིམ་བདག་དང་། ཡུལ་གྱི་མི་གཞན་དག་ཀྱང་རྟག་ཏུ་རྒྱུན་མི་འཆད་པར་ཚེའི་མཐའ་མར་ཕྱིན་གྱི་བར་དུ། ཆོས་སྨྲ་བ་དེའི་ཕྱི་བཞིན་དུ་འབྲང་བར་འགྱུར་རོ། །དེ་བཞིན་གཤེགས་པའི་ཉན་ཐོས་རྣམས་ཀྱང་དེ་ལ་ལྟ་འདོད་པར་འགྱུར་རོ། །རང་སངས་
རྒྱས་རྣམས་ཀྱང་དེ་ལ་ལྟ་འདོད་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱང་དེ་ལ་གཟིགས་བཞེད་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེ་ཕྱོགས་གང་ན་འདུག་པ་དེའི་ཕྱོགས་སུ་དེ་བཞིན་གཤེགས་པ་གཟིགས་ཏེ་ཆོས་འཆད་དོ། །སངས་རྒྱས་
ཀྱི་ཆོས་རྣམས་ཀྱི་སྣོད་དུ་འགྱུར་ཏེ། དེ་ལྟར་དེ་ཟབ་ཅིང་ཡིད་དུ་འོང་བའི་ཆོས་རྣམས་ཀྱི་སྒྲ་འབྱིན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་ལྕེ་ཡི་དབང་པོ་མཆོག་ཏུ་འགྱུར། །ནམ་ཡང་ངན་པའི་རོ་ནི་ཡོང་
མི་མྱོང་། །རེག་མ་ཐག་ཏུ་ལྷ་ཡི་རོ་བྲོར་འགྱུར། །ལྷ་ཡི་རོ་བྲོ་ཤིན་ཏུ་ལྡན་པ་ཡིན། །རྣ་བར་སྙན་ཅིང་ཡིད་དུ་འོང་བ་དང་། །འཇམ་ཞིང་མཉེན་པའི་སྒྲ་སྐད་རབ་ཏུ་སྨྲ། །འཁོར་གྱི་དབུས་དེར་དགའ་བར་འགྱུར་བ་ཡི། །ཟབ་མོའི་དབྱངས་ནི་རྟག་པར་རབ་ཏུ་སྨྲ། །བྱེ་བ་ཁྲག་ཁྲིག་

དུ་མའི་དཔེ་རྣམས་ཀྱིས། །དེས་བཤད་པ་ལ་ཆོས་རྣམས་གང་ཉན་པ། །དེ་ན་དེ་ལ་མཆོག་ཏུ་དགའ་བ་སྐྱེད། །དེ་ལ་མཆོད་པ་དཔག་ཏུ་མེད་པ་བྱེད། །ལྷ་དང་ཀླུ་དང་གནོད་སྦྱིན་ལྷ་མིན་དང་། །གསང་བ་པ་དག་རྟག་ཏུ་དེ་ལྟ་འདོད། །ཆོས་འདི་ཤིན་ཏུ་གུས་པར་ཉན་པ་དེ། །ཡོན་ཏན་
འདི་དག་ཐམས་ཅད་དེ་ཡིར་འགྱུར། །འདོད་པར་གྱུར་ན་འཇིག་རྟེན་ཁམས་འདི་དག །དབྱངས་ཀྱིས་ཐམས་ཅད་དུ་ཡང་གོ་བར་བྱེད། །དེ་ཡི་དབྱངས་ནི་མཉེན་ཞིང་འཇམ་པ་སྟེ། །ཟབ་ཅིང་སྙན་ལ་ཤིན་ཏུ་དགའ་བར་འགྱུར། །རྒྱལ་པོ་ས་བདག་འཁོར་ལོས་སྒྱུར་བ་རྣམས། །མཆོད་
པའི་ཕྱིར་ནི་དེ་ཡི་དྲུང་དུ་འདོང་། །བུ་དང་ཆུང་མར་བཅས་ཏེ་ཐལ་མོ་སྦྱར། །རྟག་ཏུ་དེ་ལ་ཆོས་ནི་ཉན་པར་འགྱུར། །གནོད་སྦྱིན་རྣམས་ཀྱིས་རྟག་ཏུ་བཀུར་སྟི་བྱེད། །ཀླུ་དང་དྲི་ཟ་དག་གི་ཚོགས་རྣམས་དང་། །ཤ་ཟ་ཕོ་དང་ཤ་ཟ་མོ་རྣམས་ཀྱིས། །བསྟི་སྟང་རི་མོ་མཆོད་པ་རྣམས་
ཀྱང་བྱས། །ཚངས་པ་རྣམས་ལ་དེ་ནི་དབང་བྱེད་འགྱུར། །ལྷ་བུ་དབང་ཕྱུག་ཆེ་དང་དབང་ཕྱུག་དང་། །བརྒྱ་བྱིན་དེ་བཞིན་ལྷ་ཡི་བུ་གཞན་དང་། །ལྷ་ཡི་བུ་མོ་མང་པོ་དྲུང་དུ་འགྲོ། །སངས་རྒྱས་འཇིག་རྟེན་ཕན་ཞིང་ཐུགས་བརྩེ་གང་། །ཉན་ཐོས་བཅས་པས་དེ་ཡི་དབྱངས་ཐོས་
ནས། །ཞལ་སྟོན་པ་དང་བསྲུང་བ་དག་ཀྱང་མཛད། །ཆོས་འདི་འཆད་པ་ལ་ནི་དགྱེས་པར་འགྱུར། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་འཛིན་ཏམ་ཀློག་གམ་རབ་ཏུ་འཆད་དམ་སྟོན་ཏམ་ཡི་གེར་བྲིས་ན། དེའི་
ལུས་ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །དེའི་ལུས་ཡོངས་སུ་དག་སྟེ་པགས་པའི་མདོག་བཻ་དཱུརྱ་ལྟར་དག་ཅིང་སེམས་ཅན་རྣམས་ཀྱིས་མཐོང་ན་དགའ་བར་འགྱུར་རོ། །དེའི་ལུས་ཡོངས་སུ་དག་པ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་
སྣང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་གང་དག་འཆི་འཕོ་བ་དང་། སྐྱེ་བ་དང་། ངན་པ་དང་། བཟང་པོ་དང་། མདོག་བཟང་པོ་དང་། མདོག་ངན་པ་དང་། བདེ་འགྲོ་དང་། ངན་འགྲོ་དང་། རི་ཁོར་ཡུག་དང་། ཁོར་ཡུག་

ཆེན་པོ་དང་། ལྷུན་པོ་དང་། རིའི་རྒྱལ་པོ་རི་རབ་ལ་སེམས་ཅན་གང་དག་གནས་པ་རྣམས་དང་། འོག་ཏུ་མནར་མེད་པའི་སེམས་ཅན་དམྱལ་བ་ལ་ཐུག་པ་དང་། སྟེང་དུ་སྲིད་པའི་རྩེ་མོའི་བར་དུ་སེམས་ཅན་གང་དག་གནས་པ་དེ་དག་ཐམས་ཅད་ཀྱང་བདག་
གི་ལུས་ལ་སྣང་བར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའ་འམ། དེ་བཞིན་གཤེགས་པ་གང་ལ་ལ་དག་བཞུགས་པ་དང་། དེ་བཞིན་གཤེགས་པ་དེ་དག་ཆོས་གང་སྟོན་
པ་དང་། སེམས་ཅན་གང་དག་དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་པ་དང་། སེམས་ཅན་དེ་དག་ཐམས་ཅད་ཀྱི་ལུས་སོ་སོར་ཐོབ་པ་ཡང་། བདག་གི་ལུས་ལ་སྣང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེའི་ལུས་ཡོངས་སུ་དག་པའི་ཕྱིར་རོ། །དེ་ནས་དེའི་
ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཞིག་རྒྱ་ཆེ་མདོ་འདི་འཛིན་བྱེད་པ། །དེ་ཡི་ལུས་ནི་ཡོངས་སུ་དག་པར་འགྱུར། །རྣམ་དག་བཻ་དཱུརྱ་ལྟར་གྲུབ་པ་སྟེ། །རྟག་ཏུ་སེམས་ཅན་རྣམས་ཀྱིས་མཐོང་ན་དགའ། །མེ་ལོང་ཕྱིས་པར་གཟུགས་
བརྙན་སྣང་བ་བཞིན། །ལུས་ལ་འཇིག་རྟེན་འདི་དག་དེ་བཞིན་སྣང་། །སེམས་ཅན་གཞན་མིན་རང་བྱུང་དེ་ཡིས་མཐོང་། །ཡོངས་སུ་དག་པའི་ལུས་ནི་དེ་འདྲའོ། །འཇིག་རྟེན་ཁམས་འདིའི་སེམས་ཅན་ཅི་ཡོད་པ། །ལྷ་མི་ལྷ་མ་ཡིན་དང་གསང་བ་པ། །སེམས་དམྱལ་ཡི་དགས་
དུད་འགྲོའི་སྐྱེ་གནས་རྣམས། །ལུས་དེ་ལ་ནི་གཟུགས་བརྙན་སོ་སོར་སྣང་། །སྲིད་པའི་རྩེ་བར་གཞལ་མེད་ཁང་གི་ལྷ། །བྲག་རྣམས་དང་ནི་རི་དང་ཁོ་ར་ཡུག །གངས་རི་རི་རབ་ལྷུན་པོ་ཆེན་པོ་རྣམས། །དེ་ཡི་ལུས་ལས་རྣམ་པ་ཐམས་ཅད་སྣང་། །དེ་ཡི་ལུས་ལ་ཉན་ཐོས་
བཅས་པ་ཡི། །སངས་རྒྱས་རྣམས་དང་སངས་རྒྱས་སྲས་གཞན་ཡང་། །བྱང་ཆུབ་སེམས་དཔའ་གཅིག་པུ་གང་གནས་དང་། །ཚོགས་ལ་གང་དག་ཆོས་སྟོན་རྣམས་ཀྱང་སྣང་། །དེ་ཡི་རྣམ་དག་ལུས་ནི་དེ་འདྲ་སྟེ། །འཇིག་རྟེན་ཁམས་རྣམས་ཐམས་ཅད་དེ་ལ་སྣང་། །

དེ་ནི་ད་དུང་ལྷ་ཡིས་མ་ཐོབ་སྟེ། །དེ་ཡི་རང་བཞིན་ལུས་ནི་དེ་འདྲའོ། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་འཛིན་ཏམ་སྟོན་ཏམ་རབ་ཏུ་འཆད་དམ་
ཡི་གེར་འདྲི་འམ་ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་དག་པར་འགྱུར་རོ། །དེ་ཡིད་ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །དེས་དེ་དག་
ཁོང་དུ་ཆུད་ནས་དེའི་ཕྱིར་ཟླ་བ་གཅིག་ཏུ་ཆོས་སྟོན་ཏོ། །ཟླ་བ་བཞི་འམ་ལོར་ཡང་ཆོས་སྟོན་ཏོ། །ཆོས་གང་བཤད་པ་དེ་ལ་དེ་བརྗེད་ངས་པར་མི་འགྱུར་རོ། །འཇིག་རྟེན་པའི་འཇིག་རྟེན་གྱི་ཐ་སྙད་གང་དག་སྐད་དམ་སྔགས་ཅི་ཡོད་པ་དེ་དག་ཐམས་ཅད་ཆོས་ཀྱི་ཚུལ་དང་སྦྱོར་
རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་འགྲོ་བ་དྲུག་ཏུ་སྐྱེས་ཤིང་འཁོར་བའི་སེམས་ཅན་གང་ཇི་སྙེད་པ་དེ་དག་ཐམས་ཅད་ཀྱི་སེམས་ཀྱི་སྤྱོད་པའི་གཡོ་བ་རྣམས་ཀྱང་ཤེས་སོ། །གཡོས་པ་དང་བསམ་པ་དང་སྤྲོས་པ་རྣམས་ཀྱང་ཤེས་ཤིང་
རབ་ཏུ་རྟོགས་སོ། །རེ་ཞིག་འཕགས་པའི་ཡེ་ཤེས་མ་ཐོབ་ཀྱང་དེའི་ཡིད་ཀྱི་དབང་པོ་འདི་ལྟ་བུར་ཡོངས་སུ་དག་པར་འགྱུར་རོ། །ཆོས་ཀྱི་ངེས་པའི་ཚིག་གང་དང་གང་རྗེས་སུ་བསམས་ཏེ། གཏམ་སྟོན་པ་དེ་དག་ཐམས་ཅད་ཀྱང་ཡང་དག་པར་སྟོན་ཏོ། །དེ་བཞིན་གཤེགས་
པས་གསུངས་པ་ཐམས་ཅད་སྟོན་ཏོ། །སྔོན་གྱི་རྒྱལ་བས་མདོ་སྡེའི་རྣམ་གྲངས་བསྟན་པ་ཐམས་ཅད་འཆད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་ཡིད་ཀྱི་དབང་པོ་རྣམ་དག་འགྱུར། །གསལ་ཞིང་འོད་གསལ་
རྙོག་པ་མེད་པ་སྟེ། །ངན་པ་བཟང་པོ་དེ་བཞིན་བར་མ་དང་། །དེས་ནི་རྣམ་པ་མང་པོའི་ཆོས་རབ་ཤེས། །བརྟན་པ་དེས་ནི་ཚིགས་བཅད་གཅིག་ཐོས་ཀྱང་། །དེ་དོན་རྣམ་པ་མང་པོ་དེ་ཡིས་ཤེས། །ཟླ་བ་བཞི་འམ་དེ་བཞིན་ལོ་ཡི་བར། །རྟག་ཏུ་ཡང་དག་འབྲེལ་པར་རབ་ཏུ་

སྨྲ། །སེམས་ཅན་གང་རྣམས་འཇིག་རྟེན་ཁམས་འདི་ཡི། །ཕྱི་རོལ་དག་དང་ནང་ན་གང་གནས་པ། །ལྷ་མི་ལྷ་མ་ཡིན་དང་གསང་བ་པ། །ཀླུ་དང་དུད་འགྲོའི་སྐྱེ་གནས་གར་སོང་དང་། །འགྲོ་བ་དྲུག་ན་གནས་པའི་སེམས་ཅན་རྣམས། །དེ་དག་རྣམས་ཀྱིས་
རྣམ་པར་ཅི་བསམས་པ། །སྐད་ཅིག་ཏུ་ནི་ཐམས་ཅད་མཁས་པས་ཤེས། །མདོ་འཛིན་པ་ཡི་ཕན་ཡོན་འདི་དག་གོ །བསོད་ནམས་བརྒྱ་ཡི་མཚན་ལྡན་སངས་རྒྱས་ཀྱིས། །འཇིག་རྟེན་ཀུན་ལ་ཆོས་གང་རབ་བཤད་པ། །དེ་ཡི་རྣམ་པར་དག་པའི་སྒྲ་ཡང་ཐོས། །དེ་ཡིས་
ཅི་བསྟན་པ་ཡང་དེས་བཟུང་སྟེ། །ཆོས་ཀྱི་མཆོག་ཀྱང་མང་དུ་རྣམ་པར་སེམས། །དེ་ནི་རྟག་ཏུ་མང་པོ་སྟོན་པར་འགྱུར། །དེ་ནི་རྨོངས་པར་ནམ་ཡང་མི་འགྱུར་ཏེ། །མདོ་འཛིན་པ་ཡི་ཕན་ཡོན་འདི་དག་གོ། །དེས་ནི་མཚམས་དང་ཚིག་ཀྱང་རབ་ཏུ་ཤེས། །ཆོས་རྣམས་ཀུན་
གྱི་མཚན་ཉིད་མི་འཐུན་དང་། །དོན་དང་ངེས་པའི་ཚིག་ཀྱང་རབ་ཏུ་ཤེས། །ཇི་ལྟར་དེ་དག་ཤེས་པ་བཞིན་དུ་འཆད། །སྔོན་གྱི་འཇིག་རྟེན་དག་གི་སློབ་དཔོན་གྱིས། །ཡུན་རིང་འདིར་ནི་མདོ་སྡེ་གང་བཤད་པ། །དེ་ཡི་ཆོས་རྣམས་འཁོར་གྱི་དབུས་སུ་ཡང་། །འཇིགས་པ་མེད་
པར་རྟག་ཏུ་དེ་འཆད་དོ། །མདོ་འདི་བཟུང་བ་དང་ནི་བཀླགས་པ་ཡིས། །དེ་ཡི་ཡིད་ཀྱི་དབང་པོ་དེ་འདྲར་འགྱུར། །ད་དུང་མ་ཆགས་ཡེ་ཤེས་མ་ཐོབ་སྟེ། །འདི་ནི་དེ་ཡི་སྔོན་དུ་འགྲོ་བར་འགྱུར། །བདེ་བར་གཤེགས་པའི་མདོ་འདི་འཛིན་པ་ཡང་། །སློབ་དཔོན་གྱི་ནི་ས་ལ་འཇུག་
པ་ཡིན། །སེམས་ཅན་ཐམས་ཅད་ལ་ཡང་ཆོས་སྨྲ་སྟེ། །ངེས་ཚིག་བྱེ་བ་སྙེད་ལ་མཁས་པར་འགྱུར། །དམ་པའི་ཆོས་པད་མ་དཀར་པོ་ལས་སྐྱེ་མཆེད་དྲུག་རྣམ་པར་དག་པའི་ཕན་ཡོན་གྱི་ལེའུ་ཞེས་བྱ་བ་སྟེ་བཅོ་བརྒྱད་པའོ།། །།དེ་ནས་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་བཀའ་སྩལ་པ། མཐུ་ཆེན་ཐོབ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གང་དག་ཁ་ཅིག་ཆོས་ཀྱི་རྣམ་གྲངས་འདི་ལྟ་བུ་འདི་སྤོང་བ་དང་། མདོ་སྡེ་འདི་ལྟ་བུ་འཛིན་པའི་དགེ་སློང་དང་།

དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་གཤེ་ཞིང་མི་སྙན་པར་སྨྲ་བ་དང་། ཚོགས་པར་མི་དབྱུང་བའི་ཚིག་རྩུབ་པོ་ཟེར་བ་དེ་དག་གི་རྣམ་པར་སྨིན་པ་འདོད་པ་མ་ཡིན་པར་འགྱུར་ཏེ། དེ་ནི་ཚིག་གིས་བརྗོད་དུ་ཡང་མི་ནུས་སོ། །གང་དག་མདོ་སྡེ་འདི་ལྟ་བུ་འདི་འཛིན་
པ་དང་། ཀློག་པ་དང་། ཀུན་ཆུབ་པར་བྱེད་པ་དང་། འཆད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་གི་རྣམ་པར་སྨིན་པ་ནི་འདོད་པར་འགྱུར་ཏེ། ཇི་ལྟར་ངས་སྔར་བརྗོད་པ་དེ་ལྟ་བུར་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་
ཡོངས་སུ་དག་པ་ཐོབ་པར་འགྱུར་རོ། །མཐུ་ཆེན་ཐོབ་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ་ཚད་མེད་པ་བསམ་གྱིས་མི་ཁྱབ་པ་དེ་དག་གི་ཡང་ཆེས་ཕ་རོལ་དུ་གྱུར་པ་དེའི་ཚེ་དེའི་དུས་ན་ཐ་དད་དུ་གནས་པའི་བསྐལ་
པ་ལ། འཇིག་རྟེན་གྱི་ཁམས་ཆེར་འབྱུང་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་
རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིགས་བསྒྲགས་དབྱངས་ཀྱི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། མཐུ་ཆེན་ཐོབ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་
རྒྱལ་པོ་དེ་འཇིག་རྟེན་གྱི་ཁམས་ཆེར་བྱུང་བ་དེ་ན། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་ན་ཆོས་སྟོན་ཏེ། འདི་ལྟ་སྟེ་ཉན་ཐོས་རྣམས་ལ་ནི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་
བ་དང་། ཡིད་མི་བདེ་བ་དང་། འཁྲུག་པ་ལས་ཤིན་ཏུ་བཟླ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་

ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་དེ་བཞིན་གཤེགས་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །མཐུ་ཆེན་ཐོབ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེའི་ཚེའི་ཚད་ནི། བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གང་གཱའི་ཀླུང་བཞིའི་བྱེ་མ་སྙེད་དུ་གྱུར་ཏོ། །དེ་ཡོངས་སུ་མྱ་ངན་ལས་འདས་ནས་ཀྱང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་འཛམ་བུའི་གླིང་གི་རྡུལ་ཕྲ་རབ་
སྙེད་དུ་དམ་པའི་ཆོས་གནས་པར་གྱུར་ཏོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གླིང་བཞིའི་རྡུལ་ཕྲ་རབ་སྙེད་དུ་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཏོ། །མཐུ་ཆེན་ཐོབ་འཇིག་རྟེན་གྱི་ཁམས་ཆེར་འབྱུང་བ་དེ་ན། བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེ། ཡོངས་སུ་མྱ་ངན་ལས་འདས་པའི་དམ་པའི་ཆོས་དང་དམ་པའི་ཆོས་ཀྱི་གཟུགས་བརྙན་ཡང་མེད་པར་གྱུར་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་འཇིགས་བསྒྲགས་དབྱངས་ཀྱི་རྒྱལ་པོ་གཞན་ཡང་འཇིག་རྟེན་དུ་བྱུང་ངོ་། །མཐུ་ཆེན་ཐོབ་དེ་ལྟ་བུ་གཅིག་ནས་གཅིག་ཏུ་ཆེར་འབྱུང་བའི་འཇིག་རྟེན་གྱི་ཁམས་དེར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་
ཀྱི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་ངོ་། །མཐུ་ཆེན་ཐོབ་ཐ་དད་དུ་གནས་པའི་བསྐལ་པ་ལ། འཇིག་རྟེན་གྱི་ཁམས་ཆེར་འབྱུང་བ་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་འཇིགས་བསྒྲགས་དབྱངས་ཀྱི་རྒྱལ་པོ། དེ་བཞིན་གཤེགས་པ་ཐམས་ཅད་ཀྱི་ཐོག་མར་གང་བྱུང་བའི་བཅོམ་ལྡན་འདས་ཡོངས་སུ་མྱ་ངན་ལས་

འདས་པ་དེའི་དམ་པའི་ཆོས་ནུབ་པར་གྱུར་ཏེ། དམ་པའི་ཆོས་ཀྱི་གཟུགས་བརྙན་ཡང་ནུབ་པར་གྱུར་པའི་ཚེ། དེའི་བསྟན་པ་ལ་ང་རྒྱལ་ཅན་གྱི་དགེ་སློང་གིས་ཤིན་ཏུ་ནོན་པར་གྱུར་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་ཞེས་བྱ་བའི་དགེ་སློང་
ཞིག་བྱུང་ངོ་། །མཐུ་ཆེན་ཐོབ་ཅིའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྟག་ཏུ་བརྙས་པ་ཞེས་བྱ་ཞེ་ན། མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་སུ་མཐོང་ཡང་རུང་སྟེ།
དེ་དག་གི་དྲུང་དུ་སོང་ནས་འདི་སྐད་དུ། ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་བྱེད་དེ་ཁྱེད་ནི་མ་བརྙས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སུ་འགྱུར་རོ། །ཞེས་སྨྲའོ། །མཐུ་ཆེན་ཐོབ་རྣམ་གྲངས་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་སློང་དུ་གྱུར་པ་དེ། སེམས་ཅན་རྒྱང་རིང་པོ་ན་འདུག་པ་སུ་མཐོང་ཡང་རུང་སྟེ། དེའི་དྲུང་དུ་སོང་ཞིང་དེ་སྐད་དུ་ཡང་དག་པར་སྒྲོགས་པ་མ་གཏོགས་
པར། ལུང་ཡང་མི་ནོད། ཁ་དོན་ཡང་མི་བྱེད་དེ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དེ་དང་དེ་དག་གི་དྲུང་དུ་སོང་ནས། འདི་སྐད་དུ་ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་བྱེད་དེ་ཁྱེད་ནི་མ་བརྙས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་
ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྨྲའོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེའི་ཚེ་དགེ་སློང་ངམ། དགེ་སློང་མའམ།
དགེ་བསྙེན་ནམ། དགེ་བསྙེན་མའམ་སུ་དང་སུ་ལ་དེ་སྐད་བསྒྲགས་པ་དེ་དག་ཐམས་ཅད་ལས་ཕལ་ཆེར་དེ་ལ་ཁྲོ་ཞིང་གནོད་པར་སེམས་ལ་མ་དད་པ་སྐྱེད་དེ། དེ་ལ་གཤེ་ཞིང་སྤྱོས་ཏེ། ཅིའི་ཕྱིར་དགེ་སློང་འདི་མ་དྲིས་པར་བརྙས་པའི་སེམས་མེད་དོ། །ཞེས་བདག་ཅག་

ལ་སྟོན་ཏེ། བདག་ཉིད་ལ་བརྙས་པར་བྱེད་ཅིང་འདི་ལྟར་མ་བསམས་མི་འདོད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་ཅག་ལ་ལུང་སྟོན་ཅེས་སྨྲའོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེ་ལྟ་བུར་གཤེ་ཞིང་སྤྱོ་བས་ལོ་
མང་པོ་འདས་ཏེ། སུ་ལ་ཡང་མི་ཁྲོ་ཞིང་གནོད་སེམས་མི་བསྐྱེད་དོ། །དེ་ལྟར་དེ་ཡང་དག་པར་སྒྲོགས་པ་ལ་བོང་བ་དང་དབྱུག་པ་འཕེན་ཀྱང་། དེས་དེ་དག་ལ་ཐག་རིང་པོ་ནས་སྒྲ་ཆེན་པོར་བྱས་ཏེ། ཁོ་བོ་ཁྱེད་ལ་བརྙས་པར་མི་བྱེད་དོ་ཞེས་ཡང་དག་པར་སྒྲོག་གོ། །དེས་ང་རྒྱལ་ཅན་གྱི་
དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ལ་རྟག་ཏུ་རྒྱུན་མི་འཆད་པར་ཡང་དག་པར་བསྒྲགས་པས་དེ་དག་གིས་དེ་ལ་མིང་རྟག་ཏུ་བརྙས་པ་ཞེས་བཏགས་སོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ་འཆི་བའི་
དུས་བྱེད་པ་ཉེ་བར་གནས་ཏེ། འཆི་བའི་དུས་ཀྱི་ཚེ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཐོས་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེས་ཆོས་ཀྱི་
རྣམ་གྲངས་འདི་ཚིགས་སུ་བཅད་པ་དཀྲིགས་ཕྲག་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་བཤད་པ་དེ་ཡང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ། འཆི་བའི་དུས་ཉེ་བར་གནས་པའི་ཚེ་བར་སྣང་གི་སྒྲ་ལས་ཆོས་ཀྱི་རྣམ་གྲངས་འདི་ཐོས་སོ། །སུས་ཀྱང་མ་
སྨྲས་པར་དེས་བར་སྣང་ལས་སྒྲ་ཐོས་ཏེ། ཆོས་ཀྱི་རྣམ་གྲངས་འདི་བཟུང་ནས་མིག་རྣམ་པར་དག་པ་དང་། རྣ་བ་རྣམ་པར་དག་པ་དང་། སྣ་རྣམ་པར་དག་པ་དང་། ལྕེ་རྣམ་པར་དག་པ་དང་། ལུས་རྣམ་པར་དག་པ་དང་། ཡིད་རྣམ་པར་དག་པ་དེ་ལྟ་བུ་ཐོབ་བོ། །རྣམ་པར་དག་པ་
དེ་དག་ཐོབ་མ་ཐག་ཏུ་ཕྱིར་ཡང་ལོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུར་བདག་གི་སྲོག་གི་འདུ་བྱེད་བྱིན་གྱིས་བརླབས་ཏེ། ཆོས་ཀྱི་རྣམ་གྲངས་འདི་ཡང་དག་པར་བསྒྲགས་སོ། །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་ང་རྒྱལ་ཅན་གང་དག་ལ་

སྔོན་ཁྱེད་ལ་ཁོ་བོས་བརྙས་པར་མི་བྱེད་དོ། །ཞེས་བསྒྲགས་པ་གང་དག་གིས། དེའི་མིང་རྟག་ཏུ་བརྙས་པར་བཏགས་པ་དེ་དག་གིས། དེའི་རྫུ་འཕྲུལ་གྱི་སྟོབས་ཀྱི་མཐུ་དང་། དམ་བཅས་པའི་སྟོབས་ཀྱི་མཐུ་དང་། སྤོབས་པའི་སྟོབས་ཀྱི་མཐུ་དང་། ཤེས་རབ་ཀྱི་མཐུ་རྒྱ་ཆེན་པོ་
མཐོང་ནས། ཐམས་ཅད་ཀྱང་ཆོས་མཉན་པའི་ཕྱིར་ཕྱི་ན་འཁོད་པར་གྱུར་ཏོ། །དེས་གཞན་ཡང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བཙུད་དོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་
དཔའ་ཆེན་པོ་དེ། དེ་ནས་ཤི་འཕོས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དབྱངས་ཀྱི་རྒྱལ་པོ་ཞེས་བྱ་བར་མཚན་འཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་ཏེ། ཐམས་ཅད་དུ་ཡང་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བསྟན་
ཏོ། །དེ་སྔོན་གྱི་དགེ་བའི་རྩ་བ་དེས་རིམ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་སྒྲའི་རྒྱལ་པོ་ཞེས་བྱ་བར་མཚན་འཐུན་པ་བྱེ་བ་བརྒྱ་ཕྲག་ཉི་ཤུ་མཐར་གྱིས་མཉེས་པར་བྱས་ནས་དེ་ཐམས་ཅད་དུ་ཡང་། དམ་པའི་ཆོས་པད་མ་དཀར་པོའི་ཆོས་
ཀྱི་རྣམ་གྲངས་འདི་བཟུང་སྟེ། འཁོར་བཞི་ལ་ཡང་དག་པར་རབ་ཏུ་བཤད་དོ། །དེ་སྔོན་གྱི་དགེ་བའི་རྩ་བ་དེས་མཐར་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་སྒྲ་རྒྱལ་པོ་ཞེས་བྱ་བར་མཚན་འཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་
ནས། ཐམས་ཅད་དུ་ཡང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཉིད་བཟུང་སྟེ། འཁོར་བཞི་ལ་ཡང་དག་པར་རབ་ཏུ་བཤད་དོ། །ཐམས་ཅད་ན་ཡང་མིག་ཡོངས་སུ་དག་པ་དང་ལྡན་པར་གྱུར་ཏོ། །རྣ་བ་ཡོངས་སུ་དག་པ་དང་། སྣ་ཡོངས་སུ་དག་པ་དང་།
ལྕེ་ཡོངས་སུ་དག་པ་དང་། ལུས་ཡོངས་སུ་དག་པ་དང་། ཡིད་ཡོངས་སུ་དག་པ་དེ་ལྟ་བུ་དང་ལྡན་པར་གྱུར་ཏོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེས། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་དེ་སྙེད་ལ་བསྟི་སྟང་བྱས་བླ་

མར་བྱས་རི་མོ་དང་མཆོད་པ་དང་གསོལ་བ་དང་དབུལ་བ་བྱས་ཏེ་གཞན་ཡང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྟི་སྟང་དུ་བྱ་བ་དང་བླ་མར་བྱ་བ་དང་རི་མོ་དང་མཆོད་པ་དང་གསོལ་བ་བྱས་ནས། དེ་དག་ཐམས་ཅད་དུ་ཡང་དམ་པའི་ཆོས་པད་མ་དཀར་པོའི་
ཆོས་ཀྱི་རྣམ་གྲངས་འདི་བཟུང་སྟེ། སྔོན་གྱི་དགེ་བའི་རྩ་བ་དེ་ཉིད་ཡོངས་སུ་སྨིན་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོའི་བསྟན་པ་ལ། འཁོར་བཞི་རྣམས་ཀྱིས་རྟག་ཏུ་བརྙས་པར་གྲགས་ཤིང་། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་སྙེད་མཉེས་པར་བྱས་པ། བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་ཏུ་བརྙས་པ་དེ། གཞན་ཞིག་ཡིན་སྙམ་དུ་སོམ་ཉིའམ། ཡིད་གཉིས་སམ། ཐེ་ཚོམ་ཟ་བར་གྱུར་ན། མཐུ་ཆེན་ཐོབ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་
ཞེས་བྱ་བར་གྱུར་ཏོ། །མཐུ་ཆེན་ཐོབ་གལ་ཏེ་ངས་སྔོན་ཆོས་ཀྱི་རྣམ་གྲངས་འདི་མ་བླངས་མ་བཟུང་བར་གྱུར་ན། ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མི་འགྱུར་ཏེ། མཐུ་ཆེན་ཐོབ་དེ་ལྟར་ངས་སྔོན་གྱི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གན་ནས་ཆོས་ཀྱི་རྣམ་གྲངས་འདི་བཟུང་སྟེ། བཀླགས་པ་དང་བསྟན་པས་དེའི་ཕྱིར་ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ་བྱང་
ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེས་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་བརྒྱ་ཕྲག་མང་པོ་དག་ལ། བཅོམ་ལྡན་འདས་དེའི་བསྟན་པ་ལ་ཆོས་ཀྱི་རྣམ་གྲངས་འདི་ཡང་དག་པར་བསྒྲགས་ཤིང་། ཁོ་བོ་ཁྱེད་ལ་བརྙས་པར་མི་བྱེད་དོ། །

ཁྱེད་ཅག་ཐམས་ཅད་ཀྱང་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བྱས་པ་དང་། གང་གིས་བྱང་ཆུབ་སེམས་དཔའ་དེ་ལ་གནོད་སེམས་བསྐྱེད་པར་གྱུར་པ་དེ་དག་གིས་བསྐལ་པ་
བྱེ་བ་བརྒྱ་ཕྲག་ཉི་ཤུར་ནམ་ཡང་དེ་བཞིན་གཤེགས་པ་མ་མཐོང་ཆོས་ཀྱི་སྒྲ་ཡང་མ་ཐོས། དགེ་འདུན་གྱི་སྒྲ་ཡང་མ་ཐོས་སོ་བསྐལ་པ་སྟོང་ཕྲག་བཅུར་མནར་མེད་པའི་སེམས་ཅན་དམྱལ་བ་ཆེན་པོར་སྡུག་བསྔལ་མི་བཟད་པ་མྱོང་ངོ་། །དེ་དག་ཐམས་ཅད་ཀྱི་ལས་ཀྱི་སྒྲིབ་པ་དེ་ལས་
ཡོངས་སུ་ཐར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །མཐུ་ཆེན་ཐོབ་དེའི་ཚེ་དེའི་དུས་ན་སེམས་ཅན་དུ་གྱུར་པ། བྱང་ཆུབ་སེམས་དཔའ་སེམས་དཔའ་ཆེན་པོ་ལ་བསྟིང་
བ་དང་། འཕྱ་བ་བྱས་པ་དེ་དག་གང་ཡིན་སྙམ་དུ་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན། མཐུ་ཆེན་ཐོབ་འཁོར་འདི་ཉིད་ཀྱི་ནང་ན་བཟང་སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང་སེང་གེའི་ཟླ་བ་ལ་སོགས་པ་དགེ་སློང་མ་ལྔ་བརྒྱ་དང་བདེ་གཤེགས་སེམས་
པ་ལ་སོགས་པ་དགེ་བསྙེན་མ་ལྔ་བརྒྱ་སྟེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་སོ། །མཐུ་ཆེན་ཐོབ་ཆོས་ཀྱི་རྣམ་གྲངས་འདི་འཛིན་པ་དང་སྟོན་པ་དང་ལྡན་པའི་བསོད་ནམས་ཀྱི་ཕུང་པོ་དེ་ལྟར་དོན་ཆེ་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱེད་པར་འགྱུར་རོ། །མཐུ་ཆེན་ཐོབ་དེ་ལྟ་བས་ན་དེ་བཞིན་གཤེགས་པ་ང་ཡོངས་སུ་མྱ་ངན་ལས་འདས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཆོས་
ཀྱི་རྣམ་གྲངས་འདི་རྒྱུན་མི་འཆད་པར་གཟུང་བར་བྱའོ། །བསྟན་པར་བྱའོ། །བཀླག་པར་བྱའོ། །བཤད་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འདས་པའི་དུས་རྣམས་རྗེས་སུ་དྲན་པ་ནི། །འཇིགས་

བསྒྲགས་དབྱངས་རྒྱལ་རྒྱལ་བ་གང་བྱུང་བ། །ལྷ་མི་གནོད་སྦྱིན་སྲིན་པོའི་འདྲེན་པ་སྟེ། །མཐུ་ཆེན་དེ་ལ་ལྷ་དང་མི་ཡིས་མཆོད། །རྒྱལ་བ་དེ་ནི་མྱ་ངན་ཡོངས་འདས་ནས། །དམ་ཆོས་འཁྲུགས་པར་གྱུར་པ་ཐ་མ་ལ། །དེ་ན་བྱང་ཆུབ་སེམས་དཔའ་དགེ་
སློང་བྱུང་། །དེ་ཡི་མིང་ནི་རྟག་ཏུ་བརྙས་ཞེས་བྱ། །དེ་ན་དགེ་སློང་གཞན་དང་དེ་བཞིན་དུ། །དམིགས་པར་ལྟ་བའི་དགེ་སློང་དེ་གན་སོང་། །ཁོ་བོས་ཁྱེད་ལ་ནམ་ཡང་བརྙས་པ་མེད། །ཁྱེད་ཀྱིས་བྱང་ཆུབ་མཆོག་ཕྱིར་སྤྱད་པ་སྤྱོད། །དེ་བཞིན་རྟག་ཏུ་ཡང་དག་བསྒྲགས་པ་ན། །
གཤེ་ཞིང་བརྒྱད་པ་དེ་དག་བཟོད་པར་བྱེད། །འཆི་བའི་དུས་བྱེད་ཉེ་བར་གནས་པ་དང་། །དེ་ཡིས་མདོ་སྡེ་འདི་ནི་ཐོས་གྱུར་ནས། །དེ་ཚེ་མཁས་པས་འཆི་བའི་དུས་མ་བྱས། །ཚེ་ཡང་ཤིན་ཏུ་རིང་པོར་བྱིན་བརླབས་ཏེ། །རྣམ་པར་འདྲེན་པ་དེ་ཡི་བསྟན་པ་ལ། །དེ་ཚེ་མདོ་འདི་ཡང་ནི་རབ་
ཏུ་བཤད། །དམིགས་ཅན་མང་པོ་དེ་དག་ཐམས་ཅད་ཀྱང་། །དེ་ཡིས་བྱང་ཆུབ་ཏུ་ནི་ཡོངས་སྨིན་བྱས། །དེ་ནས་བྱང་ཆུབ་སེམས་དཔའ་ཤི་འཕོས་ནས། །སངས་རྒྱས་བྱེ་བ་ཕྲག་སྟོང་མཉེས་བྱས་ཏེ། །མཐར་གྱིས་བསོད་ནམས་བྱས་པ་དེ་དག་གིས། །མདོ་འདི་ཡང་ནི་རྟག་པར་
རབ་ཏུ་བཤད། །རྒྱལ་བའི་སྲས་དེས་བྱང་ཆུབ་ཡང་དག་ཐོབ། །ཤཱཀྱ་ཐུབ་པ་ང་ཉིད་དེ་ཡིན་ནོ། །དེ་ཚེ་གང་དག་དམིགས་ཅན་དགེ་སློང་དང་། །དགེ་སློང་མ་དང་དགེ་བསྙེན་གང་རྣམས་དང་། །དེ་ན་དགེ་བསྙེན་མ་རྣམས་གང་བྱུང་བ། །མཁས་པས་དེ་ཚེ་བྱང་ཆུབ་བསྒྲགས་གྱུར་པ། །
དེ་དག་རྣམས་ཀྱི་སངས་རྒྱས་བྱེ་མང་མཐོང་། །དེ་དག་ལྔ་བརྒྱ་མི་ཉུང་འདི་རྣམས་དང་། །དེ་བཞིན་དགེ་སློང་ཕ་དང་དགེ་སློང་མ། །ང་ཡི་མངོན་སུམ་དགེ་བསྙེན་འདི་དག་སྟེ། །ཐམས་ཅད་ང་ཡིས་ཆོས་མཆོག་ཐོས་བྱས་ནས། །ངས་ནི་འདི་དག་ཐམས་ཅད་ཡོངས་སྨིན་བྱས། །མྱ་ངན་
ང་འདས་དཔའ་བོ་འདི་ཀུན་ནི། །འདི་ན་མདོ་སྡེ་མཆོག་འདི་འཛིན་པར་འགྱུར། །བསྐལ་པ་མཐའ་ཡས་བྱེ་བ་མང་པོར་ཡང་། །འདི་འདྲའི་ཆོས་ནི་ནམ་ཡང་མི་ཐོས་ཏེ། །སངས་རྒྱས་བྱེ་བ་ཕྲག་བརྒྱ་འབྱུང་ན་ཡང་། །དེ་དག་ཀྱང་ནི་མདོ་འདི་མི་འཆད་དོ། །དེ་ཕྱིར་རང་བྱུང་ཉིད་ཀྱིས་

བརྗོད་པའི་ཆོས། །འདི་ལྟ་བུ་ཡི་རྣམ་པ་ཐོས་ནས་སུ། །ཡང་དང་ཡང་ནི་རབ་ཏུ་འདི་བཟུང་ལ། །མྱ་ངན་ང་འདས་མདོ་འདི་རབ་ཤོད་ཅིག །དམ་པའི་ཆོས་པད་མ་དཀར་པོ་ལས་རྟག་ཏུ་བརྙས་པའི་ལེའུ་ཞེས་བྱ་བ་སྟེ་བཅུ་དགུ་པའོ།། །།དེ་ནས་བྱང་ཆུབ་སེམས་
དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་སྟོང་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་གང་དག་ས་རུམ་ནས་འཐོན་པ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཡོངས་
སུ་མྱ་ངན་ལས་འདས་ནས། བདག་ཅག་གིས་སངས་རྒྱས་ཀྱི་ཞིང་ཐམས་ཅད་ན། བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གང་དག་ལགས་པ་གང་དུ། བཅོམ་ལྡན་འདས་ཡོངས་སུ་མྱ་ངན་ལས་འདའ་བར་འགྱུར་བ་དེ་དང་དེར་ཆོས་ཀྱི་རྣམ་གྲངས་འདི་རབ་ཏུ་བཤད་པར་བགྱིའོ། །
བཅོམ་ལྡན་འདས་བདག་ཅག་ནི་ཆོས་ཀྱི་རྣམ་གྲངས་རྒྱ་ཆེན་པོ་འདི་ལྟ་བུ་བཟུང་བ་དང་། ཀླག་པ་དང་། བསྟན་པ་དང་། རབ་ཏུ་བཤད་པ་དང་། ཡི་གེར་བྲི་བར་འཚལ་བ་ལགས་སོ། །དེ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་གང་
དག་འཇིག་རྟེན་གྱི་ཁམས་མི་མཇེད་འདི་ན་གནས་པ་དག་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་།
མི་མ་ཡིན་པ་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། བདག་ཅག་གིས་ཀྱང་ཆོས་ཀྱི་རྣམ་གྲངས་
འདི་ཡང་དག་པར་རབ་ཏུ་བཤད་པར་བགྱིའོ། །བཅོམ་ལྡན་འདས་ལུས་མི་གདའ་བར་བར་སྣང་ལ་གནས་ཏེ་དབྱངས་ཀྱིས་ཡང་དག་པར་བསྒྲག་པར་བགྱིའོ། །དགེ་བའི་རྩ་བ་མ་བསྐྲུན་པའི་སེམས་ཅན་རྣམས་དགེ་བའི་རྩ་བ་བསྐྲུན་པར་བགྱིའོ། །དེ་ནས་བཅོམ་ལྡན་འདས་

ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ། །སྔ་མ་ཚོགས་དང་ཚོགས་ཆེན་པོ་དང་ཚོགས་ཀྱི་སློབ་དཔོན་དེ་དག་གི་གཙོ་བོ་གཅིག་པོ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་ཁྱད་པར་ཅན་ཞེས་བྱ་བ། ཚོགས་དང་ཚོགས་ཆེན་པོ་དང་
ཚོགས་ཀྱི་སློབ་དཔོན་ལ་འདི་སྐད་ཅེས་བཀའ་སྩལ་ཏོ། །སྤྱོད་པ་ཁྱད་པར་ཅན་ལེགས་སོ་ལེགས་སོ། །ཁྱོད་ཀྱིས་དེ་ལྟར་གྱིས་ཤིག་དང་ཆོས་ཀྱི་རྣམ་གྲངས་འདིའི་ཕྱིར་ཁྱེད་དེ་བཞིན་གཤེགས་པས་ཡོངས་སུ་སྨིན་པར་བྱས་སོ། །དེ་ནས་བཅོམ་ལྡན་འདས་དེ་བཞིན་གཤེགས་
པ་ཤཱཀྱ་ཐུབ་པ་དང་། བཅོམ་ལྡན་འདས་ཡོངས་སུ་མྱ་ངན་ལས་འདས་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེ་མཆོད་རྟེན་གྱི་དབུས་ན་སེང་གེའི་ཁྲི་ལ་བཞུགས་པ་གཉི་ག་འཛུམ་པ་མཛད་ནས། གཉི་གའི་ཞལ་གྱི་སྒོ་
ནས་ལྗགས་ཀྱི་དབང་པོ་ཕྱུང་སྟེ། ལྗགས་ཀྱི་དབང་པོ་དེ་ཉིད་ཀྱིས་ཚངས་པའི་འཇིག་རྟེན་གྱི་བར་དུ་ཕྱིན་ནས། ལྗགས་ཀྱི་དབང་པོ་དེ་གཉིས་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་མང་པོ་བྱུང་ངོ་། །འོད་ཟེར་དེ་དག་ལས་འོད་ཟེར་རེ་རེ་ལས་ཀྱང་བྱང་ཆུབ་སེམས་དཔའ་བྱེ་བ་ཁྲག་
ཁྲིག་བརྒྱ་སྟོང་མང་པོ་ལུས་ཀྱི་མདོག་གསེར་གྱི་ཁ་དོག་འདྲ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། པད་མའི་སྙིང་པོའི་སེང་གེའི་ཁྲི་ལ་འཁོད་པ་དག་བྱུང་ངོ་། །བྱང་ཆུབ་སེམས་དཔའ་དེ་དག་ཀྱང་ཕྱོགས་དང་ཕྱོགས་མཚམས་ཀྱི་འཇིག་རྟེན་གྱི་ཁམས་བརྒྱ་སྟོང་
དག་ཏུ་དོང་སྟེ། ཕྱོགས་དང་ཕྱོགས་མཚམས་དེ་དག་ཐམས་ཅད་ན་བར་སྣང་ལ་འཁོད་ནས་ཆོས་སྟོན་ཏོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིན་ཆེན་མང་གི་ལྗགས་ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་མཛད་པ་དེ་བཞིན་དུ། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་གཞན་དག་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་གཤེགས་པའི་

རིན་པོ་ཆེའི་ཤིང་ལྗོན་པའི་དྲུང་དག་ན། སེང་གེའི་ཁྲི་ལ་སོ་སོར་བཞུགས་པ་དེ་དག་ཀྱང་ལྗགས་ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་མཛད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་དང་། དེ་བཞིན་གཤེགས་པ་རིན་ཆེན་མང་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པ་
རྫོགས་པའི་སངས་རྒྱས་དེ་དག་ཐམས་ཅད་ཀྱིས་ལོ་འབུམ་ཚང་གི་བར་དུ་རྫུ་འཕྲུལ་མངོན་པར་འདུ་བྱེད་པ་མཛད་དོ། །དེ་ནས་ལོ་འབུམ་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ལྗགས་ཀྱི་དབང་པོ་དེ་དག་བསྡུས་ཏེ། དུས་གཅིག་
ཏུ་སྐད་ཅིག་ཐང་ཅིག་ཡུད་ཙམ་ཅིག་ལ། ཐམས་ཅད་ཀྱི་མགུར་བསལ་བའི་སྒྲ་ཆེན་པོ་ཕྱུང་སྟེ་སེ་གོལ་གཏོགས་པའི་སྒྲ་གཅིག་མཛད་དོ། །མགུར་བསལ་བའི་སྒྲ་ཆེན་པོ་དེ་དང་སེ་གོལ་གཏོགས་པའི་སྒྲ་ཆེན་པོ་དེས། ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་
ཇི་སྙེད་པ་དེ་དག་ཐམས་ཅད་གཡོས་པར་གྱུར་ཏེ། གཡོས་རབ་ཏུ་གཡོས་ཀུན་ཏུ་རབ་ཏུ་གཡོས། འགུལ་རབ་ཏུ་འགུལ་ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག་ཀུན་ཏུ་རབ་ཏུ་ལྡེག་ག་། །སངས་རྒྱས་ཀྱི་ཞིང་དེ་དག་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་།
ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་སེམས་ཅན་ཇི་སྙེད་འཁོད་པ་དེ་དག་དེ་ན་འདུག་བཞིན་དུ་སངས་རྒྱས་ཀྱི་མཐུས་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་མི་མཇེད་འདི་མཐོང་སྟེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་
རིན་པོ་ཆེའི་ཤིང་ལྗོན་པའི་དྲུང་ན་སེང་གེའི་ཁྲི་སོ་སོ་ལ་བཞུགས་པ་དེ་དག་དང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིན་ཆེན་མང་རིན་པོ་ཆེའི་མཆོད་རྟེན་ཆེན་པོ་དེའི་དབུས་ན་སེང་གེའི་ཁྲི་ལ་བཞུགས་པ་དེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་ལྷན་ཅིག་ཏུ་བཞུགས་པ་དང་། འཁོར་བཞི་པོ་དེ་དག་ཀྱང་མཐོང་ངོ་། །དེ་མཐོང་ནས་

ངོ་མཚར་དུ་གྱུར་རྨད་དུ་གྱུར་ཤིན་ཏུ་དགའ་བ་ཐོབ་པར་གྱུར་ཏེ་བར་སྣང་ལས་སྒྲ་འདི་སྐད་ཅེས་ཐོས་ཏེ། ཀྱེ་གྲོགས་པོ་དག་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་དག་འདས་པ་ན། འཇིག་རྟེན་གྱི་ཁམས་མི་མཇེད་ཅེས་བྱ་བ་
དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ། ད་ལྟར་དམ་པའི་ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ཤིན་ཏུ་རྒྱས་པ་ཆེན་པོའི་མདོ་སྡེ། བྱང་ཆུབ་སེམས་དཔའ་རྣམས་ལ་གདམས་པ། སངས་
རྒྱས་ཐམས་ཅད་ཀྱིས་ཡོངས་སུ་བཟུང་བ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་དག་པར་རབ་ཏུ་འཆད་ཀྱིས། དེ་ལ་ཁྱེད་ཀྱང་ལྷག་པའི་བསམ་པས་རྗེས་སུ་ཡི་རང་བར་གྱིས་ཤིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་འཚོལ་ཅིག །མཆོད་པ་གྱིས་ཤིག་ཅེས་ཐོས་སོ། །དེ་ནས་སེམས་ཅན་དེ་དག་ཐམས་ཅད་ཀྱིས་བར་སྣང་ལས་དེ་ལྟ་བུའི་སྒྲ་ཐོས་ནས་དེ་ན་འཁོད་བཞིན་དུ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །
ཞེས་ཚིག་དེ་སྐད་སྨྲས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་མཆོད་པའི་ལས་ཀྱི་ཕྱིར་ཐལ་མོ་སྦྱར་ཏེ། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་
བཟའ་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རྣམ་པར་རྒྱལ་བའི་བ་དན་མང་པོ་འཇིག་རྟེན་གྱི་ཁམས་མི་མཇེད་འདི་ག་ལ་བ་དེ་ལོགས་སུ་འཐོར་རོ། །ཕྱང་ཕྲུལ་དང་བགོ་བ་དང་། སེ་མོ་དོ་དང་། དོ་ཤལ་དང་། ནོར་བུ་དང་། རིན་པོ་ཆེ་རྣམ་པ་མང་པོ་ཡང་གཏོར་ཏོ། །
མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རྣམ་པར་རྒྱལ་བའི་བ་དན་དང་། སེ་མོ་དོ་དང་། དོ་ཤལ་དང་། ནོར་བུ་དང་། རིན་པོ་ཆེ་གཏོར་བ་དེ་དག་ཐམས་ཅད་འཇིག་རྟེན་གྱི་ཁམས་

མི་མཇེད་འདིར་འོངས་ཏེ། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རྣམ་པར་རྒྱལ་བའི་བ་དན་རྣམ་པ་མང་པོ་དང་། སེ་མོ་དོ་དང་། དོ་ཤལ་དང་། ནོར་བུ་དང་། རིན་པོ་ཆེ་དེ་
དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་ཁེབས་པར་གྱུར་ཏེ། འཇིག་རྟེན་གྱི་ཁམས་གཞན་བྱེ་བ་ཁྲག་ཁྲིག་བརྒྱ་སྟོང་དེ་དག་དང་ལྷན་ཅིག་ཏུ་ཁེབས་པར་གྱུར་ནས་གཅིག་ཏུ་གྱུར་ཏེ། གང་དག་ན་དེ་བཞིན་གཤེགས་པ་དེ་དག་བཞུགས་པ། འཇིག་རྟེན་གྱི་
ཁམས་བྱེ་བ་ཁྲག་ཁྲིག་བརྒྱ་སྟོང་དེ་དག་ཐམས་ཅད་ཀྱི་སྟེང་གི་ནམ་མཁའ་བར་སྣང་ལ་མེ་ཏོག་གི་བླ་རེ་ཆེན་པོས་ཀུན་ཏུ་ཁེབས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྤྱོད་པ་ཁྱད་པར་ཅན་ལ་སོགས་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བཀའ་སྩལ་པ།
རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། མཐུ་བསམ་གྱིས་མི་ཁྱབ་པ་སྟེ། རིགས་ཀྱི་བུ་དག་ཆོས་ཀྱི་རྣམ་གྲངས་འདི་ཡོངས་སུ་གཏད་པའི་ཕྱིར། ངས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཆོས་ཀྱི་སྒོ་རྣམ་པ་ཐ་
དད་པ་དག་གིས་ཕན་ཡོན་གྱི་རྣམ་གྲངས་མང་པོ་བཤད་མོད་ཀྱི། ངས་ཆོས་ཀྱི་རྣམ་གྲངས་འདིའི་ཡོན་ཏན་བཤད་ཀྱང་ཡོན་ཏན་གྱི་ཕ་རོལ་དུ་མི་ཕྱིན་ཏོ། །རིགས་ཀྱི་བུ་དག་མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཐམས་ཅད་དང་།
སངས་རྒྱས་ཀྱི་གསང་ཆེན་ཐམས་ཅད་དང་། སངས་རྒྱས་ཀྱི་ཟབ་མོའི་གནས་ཐམས་ཅད་ངས་ཆོས་ཀྱི་རྣམ་གྲངས་འདིར་བཤད་དོ། །རིགས་ཀྱི་བུ་དག་དེ་ལྟ་བས་ན་ཁྱེད་ཀྱིས་ཀྱང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ལ་
གུས་པར་གཟུང་བར་བྱའོ། །བསྟན་པར་བྱའོ། །ཡི་གེར་བྲི་བར་བྱའོ། །བཀླག་པར་བྱའོ། །རབ་ཏུ་བཤད་པར་བྱའོ། །བསྒོམ་པར་བྱའོ། །མཆོད་པར་བྱའོ། །རིགས་ཀྱི་བུ་དག་ས་ཕྱོགས་གང་ན་ཆོས་ཀྱི་རྣམ་གྲངས་འདི་ཀློག་གམ་སྟོན་ཏམ་རབ་ཏུ་འཆད་དམ་ཡི་

གེར་འདྲིའམ་སེམས་སམ་འདོན་ཏམ་ཁ་ཏོན་བྱེད་དམ་གླེགས་བམ་དུ་བྱས་པ། ཀུན་དགའི་ར་བའམ་གཙུག་ལག་ཁང་ངམ་ཁྱིམ་མམ་གནས་སམ་ཤིང་དྲུང་ངམ་ཁང་པའམ་གནས་ཁང་ངམ་ཕུག་ན་འདུག་ཀྱང་རུང་སྟེ། ས་ཕྱོགས་དེར་དེ་བཞིན་གཤེགས་
པའི་ཕྱིར་མཆོད་རྟེན་བྱའོ། །དེ་ཅིའི་ཕྱིར་ཞེ་ན། ས་ཕྱོགས་དེ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་རིག་པར་བྱ་བ་དང་། ས་ཕྱོགས་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་སངས་རྒྱས་པར་རིག་པར་བྱ་བ་དང་། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དང་། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པར་རིག་པར་བྱ་བ་ཡིན་པའི་
ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མངོན་ཤེས་ཡེ་ཤེས་རབ་ཏུ་གནས་རྣམས་ཀྱི། །འཇིག་རྟེན་ཕན་པའི་ཆོས་ནི་བསམ་མི་ཁྱབ། །ལུས་ཅན་འདི་ཀུན་མཆོག་ཏུ་དགའ་བའི་ཕྱིར། །མཐའ་ཡས་སྤྱན་གྱིས་རྫུ་
འཕྲུལ་རབ་ཏུ་བསྟན། །འོད་ཟེར་སྟོང་རྣམས་རབ་ཏུ་ཀུན་འགྱེད་ཅིང་། །ལྗགས་ཀྱི་དབང་པོས་ཚངས་པའི་འཇིག་རྟེན་ཕྱིན། །བྱང་ཆུབ་མཆོག་ལ་ཞུགས་པ་དེ་དག་ཕྱིར། །ངོ་མཚར་གྱུར་པའི་རྫུ་འཕྲུལ་དེ་དག་བསྟན། །སངས་རྒྱས་རྣམས་ཀྱི་མགུར་སེལ་སྒྲ་མཛད་ཅིང་། །
སེ་གོལ་གཅིག་གི་སྒྲ་དག་གང་ཕྱུང་བ། །དེ་དག་ཕྱོགས་བཅུའི་འཇིག་རྟེན་ཇི་ཙམ་པ། །འཇིག་རྟེན་ཁམས་དེ་ཐམས་ཅད་གོ་བར་བྱས། །ཅི་ནས་དེ་དག་དགའ་ནས་ཕྱི་དུས་ན། །བདེ་གཤེགས་མྱ་ངན་འདས་ནས་མདོ་འཛིན་པར། །དེ་དག་དང་ནི་ཆོ་འཕྲུལ་གཞན་རྣམས་དང་། །
ཡོན་ཏན་རྣམས་ནི་ཕན་ཞིང་ཐུགས་བརྩེ་བསྟན། །འཇིག་རྟེན་རྣམ་འདྲེན་མྱ་ངན་འདས་པ་ན། །མདོ་སྡེ་མཆོག་འདི་གང་དག་འཛིན་པ་ཡི། །བདེ་གཤེགས་སྲས་པོ་རྣམས་ཀྱི་བསྔགས་པ་ནི། །བསྐལ་པ་བྱེ་བ་སྟོང་ཕྲག་མང་བརྗོད་ཀྱང་། །དེ་དག་གི་ནི་ཡོན་ཏན་མཐའ་ཡས་ཏེ། །

ཇི་ལྟར་ཕྱོགས་རྣམས་སུ་ནི་ནམ་མཁའ་བཞིན། །གང་དག་རྟག་ཏུ་མདོ་སྡེ་འདི་འཛིན་པ། །དེ་དག་ཡོན་ཏན་བསམ་གྱིས་མི་ཁྱབ་འགྱུར། །འཇིག་རྟེན་འདྲེན་པ་མྱ་ངན་འདས་འདི་དང་། །ང་དང་འདྲེན་པ་འདི་དག་ཐམས་ཅད་མཐོང་། །བྱང་ཆུབ་སེམས་དཔའ་མང་པོ་འདི་ཀུན་དང་། །
འཁོར་བཞི་རྣམས་ཀྱང་དེ་ཡིས་མཐོང་བ་ཡིན། །དེ་ཡིས་དེང་འདིར་ང་ནི་མཉེས་པར་བྱས། །རྒྱལ་བའི་དབང་པོ་མྱ་ངན་འདས་འདི་དང་། །ཕྱོགས་བཅུ་རྣམས་ན་གང་དག་གཞན་བཞུགས་པ། །འདྲེན་པ་དེ་དག་ཐམས་ཅད་མཉེས་པར་བྱས། །གང་ཞིག་མདོ་སྡེ་འདི་ནི་འཛིན་
བྱེད་པ། །འདས་དང་ད་ལྟར་མ་བྱོན་སངས་རྒྱས་དང་། །ཕྱོགས་བཅུ་དག་ན་གང་དག་བཞུགས་པ་ཡང་། །དེ་ཀུན་མཐོང་ཞིང་ཤིན་ཏུ་མཆོད་པར་འགྱུར། །མདོ་སྡེ་ཡང་དག་ཆོས་འདི་གང་འཛིན་པས། །བྱང་ཆུབ་སྙིང་པོ་རྣམ་པར་གང་དགོངས་པ། །སྐྱེས་མཆོག་རྣམས་ཀྱི་གསང་ཆེན་
ཤེས་པར་འགྱུར། །དེ་ནི་དེ་ཡང་མྱུར་དུ་རྗེས་སུ་སེམས། །གང་ཞིག་མདོ་སྡེ་དམ་པ་འདི་འཛིན་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །ཇི་ལྟར་རླུང་ནི་གང་དུའང་ཐོགས་མེད་བཞིན། །ཆོས་དང་དོན་དང་ངེས་པའི་ཚིག་ཀྱང་ཤེས། །འདྲེན་པ་རྣམས་ཀྱིས་དགོངས་ཏེ་གང་
གསུངས་པ། །མདོ་སྡེ་རྣམས་ཀྱི་མཚམས་སྦྱར་རྟག་ཏུ་ཤེས། །རྣམ་པར་འདྲེན་པ་མྱ་ངན་འདས་པ་ཡི། །མདོ་སྡེ་རྣམས་ཀྱི་ཡང་དག་དོན་དེ་ཤེས། །ཟླ་བ་ཉི་མ་འདྲ་བར་དེ་འགྱུར་ཏེ། །དེ་ནི་ཤིན་ཏུ་སྣང་ཞིང་གསལ་བྱེད་འགྱུར། །དེ་ནི་ས་ལ་རྒྱུ་ཞིང་དེ་དང་དེར། །བྱང་ཆུབ་སེམས་
དཔའ་མང་པོ་ཡང་དག་འཛུད། །དེ་བས་བྱང་ཆུབ་སེམས་དཔའ་མཁས་གང་དག །འདི་འདྲ