Kinh tạng Tây Tạng (Kangyur Đại Học) — 051_མདོ་སྡེ།_ཇ

ས་པ། མགུལ་རྒྱན་དང་། རྣ་ཆ་དང་། ཕྲེང་བ་དང་། རྒྱན་སྣ་ཚོགས་དང་། བྱུག་པ་ཤིན་ཏུ་བཟང་བ་དག་སྣང་ངོ་། །དེ་དག་རྟག་ཏུ་སངས་རྒྱས་དང་། ཆོས་དང་།
དགེ་འདུན་ལ་མངོན་པར་དད། ཆོས་ལ་སེམས་རྩེ་གཅིག་པར་བྱེད་པ། བྱམས་པ་ལ་གནས་པར་བྱེད་པ། བཟོད་པ་སྒོམ་པར་བྱེད་པ། མྱ་ངན་ལས་འདའ་བ་སེམས་པར་བྱེད་ལ། མི་དག་གིས་སྐྱོ་བར་བྱེད་པ་སྟེ། རིགས་ཀྱི་བུ་དེ་འདྲ་བའི་མིའམ་ཅི་མངོན་པར་དགའ་བ་དག་
གནས་སོ། །བ་སྤུའི་ཁུང་བུ་དེ་ཉིད་ན་རི་བརྒྱ་ཕྲག་དུ་མ་ཡོད་དེ་ཁ་ཅིག་ནི་རྡོ་རྗེའིའོ། །ཁ་ཅིག་ནི་དངུལ་གྱིའོ། །ཁ་ཅིག་ནི་གསེར་གྱིའོ། །ཁ་ཅིག་ནི་ཤེལ་གྱིའོ། །ཁ་ཅིག་ནི་མེ་ཏོག་པད་མ་དམར་པོའིའོ། །ཁ་ཅིག་ནི་རིན་པོ་ཆེ་ཨིན་དྲ་ནཱི་ལའིའོ། །ཁ་ཅིག་རིན་པོ་ཆེ་སྣ་བདུན་གྱི་
སྟེ། རིགས་ཀྱི་བུ་བ་སྤུའི་ཁུང་བུ་དེ་ན་མཚན་མ་དེ་འདྲ་བ་དག་སྣང་ངོ་། །རིགས་ཀྱི་བུ་བ་སྤུའི་ཁུང་བུ་དེ་ན་ཤིང་དཔག་བསམ་དུ་མ་དང་། བྱི་རུའི་ཤིང་དང་། ཙན་དན་གྱི་ཤིང་དང་། སྤོས་ཀྱི་ཤིང་དུ་མ་དག་དང་། རྫིང་བུ་བརྒྱ་སྟོང་ཕྲག་དུ་མ་དག་དང་། ལྷའི་གཞལ་མེད་ཁང་ཤེལ་
དང་དངུལ་དང་ལྡན་པ། ཤིན་ཏུ་བཟང་བ་ཡིད་དུ་འོང་བ་མཛེས་པ། དེ་འདྲ་བའི་གཞལ་མེད་ཁང་དག་ཀྱང་བྱུང་སྟེ། གཞལ་མེད་ཁང་དེ་དག་ཏུ་མི་འམ་ཅི་རྣམས་ངལ་བསོའོ། །ངལ་བསོས་ནས་ཆོས་ཀྱི་གཏམ་བྱེད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པའི་གཏམ་བྱེད། ཚུལ་

ཁྲིམས་ཀྱི་ཕ་རོལ་ཏུ་ཕྱིན་པའི་གཏམ་བྱེད། བཟོད་པའི་ཕ་རོལ་ཏུ་ཕྱིན་པའི་གཏམ་བྱེད། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་གཏམ་བྱེད། བསམ་གཏན་གྱི་ཕ་རོལ་ཏུ་ཕྱིན་པའི་གཏམ་བྱེད། ཤེས་རབ་ཀྱི་ཕ་རོལ་ཏུ་ཕྱིན་པའི་གཏམ་བྱེད་དེ། དེ་ལྟར་ཕ་རོལ་ཏུ་ཕྱིན་
པ་དྲུག་གི་གཏམ་བྱས་ནས། བདག་བདག་གི་འཆག་སར་འཆག་སྟེ། འཆག་ས་ཁ་ཅིག་ནི་གསེར་གྱི་རིའོ། །འཆག་ས་ཁ་ཅིག་ནི་དངུལ་གྱི་རིའོ། །འཆག་ས་དེ་དག་གི་ཁོ་ར་ཁོར་ཡུག་ན་དཔག་བསམ་གྱི་ཤིང་སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ། ལྷའི་
རྒྱན་རབ་ཏུ་འཕྱང་བ། ཅོད་པན་དང་། རྣ་ཆ་དང་། ཕྲེང་བའི་ཆུན་པོ་རབ་ཏུ་འཕྱང་བ། དཔུང་རྒྱན་རབ་ཏུ་འཕྱང་བ། རྐང་པའི་གདུ་བུ་རབ་ཏུ་འཕྱང་བ། སེ་མོ་དོ་དང་སེ་མོ་དོ་ཕྱེད་པ་རབ་ཏུ་འཕྱང་བ། རིན་པོ་ཆེའི་སེ་མོ་དོ་རབ་ཏུ་འཕྱང་བ་དག་ཡོད་དེ་འཆག་ས་དེ་ན་ཤིང་དཔག་བསམ་དེ་
དག་ཁང་པ་བརྩེག་མ་ལྟ་བུར་འདུག་སྟེ། འཆག་ས་དེ་ན་མིའམ་ཅི་དག་འཆག་གོ། །འཆག་པའི་ཚེ་འཁོར་བ་ལ་སྐྱོ་བ་ལ་རྗེས་སུ་སེམས་ཏེ། ཀྱེ་མའོ་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །འཆི་བ་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །དབུལ་བ་དེ་ཡང་སྡུག་
བསྔལ་ལོ། །ཀྱེ་མའོ་སྡུག་བསྔལ་ལོ། །འདོད་ཅིང་མཛའ་བ་དང་བྲལ་བ་དང་། མི་འདོད་ཅིང་མི་མཛའ་བ་དང་ཕྲད་པ་དེ་ཤིན་ཏུ་མི་བཟད་པར་སྡུག་བསྔལ་ལོ། །ཐིག་ནག་པོ་གདབ་པར་སྐྱེས་པ་དང་། འོ་དོད་འབོད་པར་སྐྱེས་པ་དང་། ཧ་ཧ་ཞེས་ཟེར་བའི་སེམས་ཅན་དམྱལ་བ་
ཆེན་པོར་སྐྱེས་པ་དང་། མེའི་རྫ་མར་སྐྱེས་པ་དང་། རྡོ་རྗེའི་རི་ལ་སྐྱེས་པ་དང་། ཡི་དགས་ཀྱི་གྲོང་ཁྱེར་དུ་སྐྱེས་པའི་སེམས་ཅན་དེ་དག་ཤིན་ཏུ་སྡུག་བསྔལ་ལོ། །ཞེས་དེ་ལྟར་མིའམ་ཅི་དེ་དག་ལུས་ལ་སེམས་སོ། །བསམས་ནས་མྱ་ངན་ལས་འདའ་བའི་དབྱིངས་ལ་སེམས་ཏེ། རིགས་ཀྱི་
བུ་དེ་ལྟར་མིའམ་ཅི་ཆོས་ལ་མངོན་པར་དགའ་བ་དག་རྟག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མིང་གི་རྗེས་སུ་དྲན་པར་བྱེད་དེ། དེའི་ཚེ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་

དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དཀོན་པའོ། །སེམས་ཅན་རྣམས་ཀྱི་ཕ་དང་མར་གྱུར་པའོ། །སེམས་ཅན་ཐམས་ཅད་ལ་མི་འཇིགས་པ་སྦྱིན་པར་བྱེད་པའོ། །སེམས་ཅན་ཐམས་ཅད་ལ་ལམ་སྟོན་པར་བྱེད་པའོ། །སེམས་ཅན་ཐམས་ཅད་ལ་དགེ་བའི་བཤེས་གཉེན་དུ་
གྱུར་པ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དེ་ལྟ་བུའོ། །དེའི་མིང་འཛིན་པ་ཡང་དཀོན་ཏེ། དེ་དག་དེའི་ཡི་གེ་དྲུག་པའི་རིག་སྔགས་ཀྱི་མིང་གི་རྗེས་སུ་དྲན་ན་དེའི་ཚེ་བ་སྤུའི་ཁུང་བུ་དེ་དག་ཏུ་སྐྱེའོ། །སླར་འཁོར་བར་མི་
འཁོར་རོ། །བ་སྤུའི་ཁུང་བུ་ནས་བ་སྤུའི་ཁུང་བུར་འགྲོའོ། །བ་སྤུའི་ཁུང་བུ་དེ་དག་ན་ཡང་མྱ་ངན་ལས་འདའ་བའི་ས་ཚོལ་བའི་བར་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་
གེ་དྲུག་པའི་རིག་སྔགས་ག་ལས་བཙལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ནི་དེ་བཞིན་གཤེགས་པས་ཡང་མི་མཁྱེན་ན་བྱང་ཆུབ་སེམས་དཔས་ལྟ་ཅི་སྨོས། དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་
པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་གིས་ཀྱང་མི་མཁྱེན་ཏམ། བཀའ་སྩལ་པ། རིགས་ཀྱི་བུ་ཡི་གེ་དྲུག་པའི་རིག་སྔགས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་
སྤྱན་རས་གཟིགས་ཀྱི་སྙིང་པོ་དམ་པའོ། །གང་དག་སྙིང་པོ་དམ་པ་ཤེས་པ་དེ་དག་ནི་ཐར་པ་ཤེས་པའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་འགའ་ལ་ཡང་ཡི་གེ་དྲུག་པའི་རིག་སྔགས་
འཚལ་བ་མ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ནི་སུས་ཀྱང་མི་ཤེས་ཏེ། འདི་ནི་རྣལ་འབྱོར་དཔག་ཏུ་མེད་པའི་ཕྱིར་བསྒྲུབ་དཀའ་བའོ། །དེ་བཞིན་གཤེགས་པ་ཉིད་ཀྱིས་ཀྱང་མི་མཁྱེན་ན་བྱང་ཆུབ་

སེམས་དཔར་གྱུར་པས་ལྟ་ཅི་སྨོས། རིགས་ཀྱི་བུ་ཡི་གེ་དྲུག་པའི་རིག་སྔགས་འདིའི་ཕྱིར་དེ་བཞིན་གཤེགས་པ་ཐམས་ཅད་ཀྱང་བསྐལ་པ་བཅུ་དྲུག་ཏུ་ཀུན་དུ་གཤེགས་ན་བྱང་ཆུབ་སེམས་དཔར་གྱུར་པས་ལྟ་ཅི་སྨོས་ཏེ་ག་ལ་ཞིག་ཤེས། འདི་ནི་བྱང་ཆུབ་སེམས་
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྙིང་པོ་དམ་པའོ། །འགྲོ་བའི་དཀྱིལ་འཁོར་ན་ཡོངས་སུ་འཁྱམ་ཡང་སུས་ཀྱང་ཡི་གེ་དྲུག་པའི་རིག་སྔགས་ཆེན་མོ་སུས་ཀྱང་མི་ཤེས་སོ། །གང་ཡང་ཡི་གེ་དྲུག་པའི་རིག་སྔགས་ཆེན་མོ་འདི་རྟག་ཏུ་འཛིན་ཅིང་ཟློས་
པ་ལ་བརྩོན་པའི་སེམས་ཅན་དེ་དག་ནི་བསོད་ནམས་དང་ལྡན་པ་ཡིན་ནོ། །དེ་དག་ཟློས་པར་བྱེད་པའི་ཚེ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཕྲག་དགུ་བཅུ་རྩ་དགུ་འདུ་བར་འགྱུར་རོ། །བྱང་ཆུབ་སེམས་དཔའ་རྡུལ་ཕྲ་རབ་དང་མཉམ་པ་དག་འདུ་བར་འགྱུར་རོ། །ཕ་
རོལ་ཏུ་ཕྱིན་པ་དྲུག་སྒོ་ན་གནས་པར་འགྱུར་རོ། །གཞན་ཡང་ལྷའི་སྡེ་སུམ་ཅུ་རྩ་གཉིས་ཀྱི་ལྷའི་བུ་དག་འདུ་བར་འགྱུར་རོ། །རྒྱལ་པོ་ཆེན་པོ་བཞི་པོ་དག་ཀྱང་ཕྱོགས་བཞི་སྲུང་བར་འགྱུར་རོ། །ཀླུའི་རྒྱལ་པོ་རྒྱ་མཚོ་མཆིང་རྣམ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་
འཇོག་པོ་ལ་སོགས་ཏེ། ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་སྲུང་བར་བྱེད་དོ། །གཞན་ཡང་ས་བླའི་གནོད་སྦྱིན་དག་ནི་བླ་གབ་མེད་པར་སྲུང་བར་བྱེད་དོ། །རིགས་ཀྱི་བུ་དེའི་བ་སྤུའི་ཁུང་བུ་རེ་རེ་ལ་ཡང་དེ་བཞིན་གཤེགས་པ་བྱེ་བ་དག་བཞུགས་སོ། །བཞུགས་ནས་
རིགས་ཀྱི་བུ་ཁྱོད་འདི་འདྲ་བའི་ཡིད་བཞིན་གྱི་ནོར་བུ་རྙེད་པར་བྱ་བ་ཐོབ་པར་གྱུར་ཅིང་ཁྱོད་ཀྱིས་རུས་ཀྱི་རིགས་བདུན་བརྒྱུད་དུ་ཐོབ་པར་བྱས་པ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་ལྟོ་ན་སྲོག་ཆགས་གནས་པ་དེ་ཐམས་ཅད་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་
ཏེ་ལེགས་སོ་ཞེས་བྱ་བ་སྦྱིན་པར་མཛད་དོ། །ཡི་གེ་དྲུག་པའི་རིག་སྔགས་ཆེན་མོ་འདི་ལ་ལ་ཞིག་གི་ལུས་ལ་འཆང་ན་རིགས་ཀྱི་བུ་དེའི་ལུས་ནི་རྡོ་རྗེའི་ལུས་སུ་རིག་པར་བྱའོ། །རིང་བསྲེལ་གྱི་མཆོད་རྟེན་དུ་རིག་པར་བྱའོ། །དེ་བཞིན་གཤེགས་པའི་ཡེ་ཤེས་བྱེ་བར་རིག་པར་བྱའོ། །

རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་ན་དེ་ནི་སྤོབས་པ་མི་ཟད་པར་འགྱུར་རོ། །ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ། །བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་འགྱུར་རོ། །དེ་ཉི་མ་རེ་རེ་ཞིང་ཡང་ཕ་
རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་རིག་འཛིན་གྱི་འཁོར་ལོས་སྒྱུར་བའི་དབང་ཐོབ་པར་འགྱུར་རོ། །ལ་ལ་ཞིག་ལ་དབུགས་ཕྱིར་འབྱུང་བ་དང་ནང་དུ་རྔུབ་པར་བྱེད་ན་བྱམས་པས་ཀྱང་རུང་ཞེ་སྡང་བས་ཀྱང་རུང་སྟེ། དེ་དག་ཐམས་ཅད་བྱང་ཆུབ་སེམས་དཔའ་
ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ལ་ལ་ཞིག་ལག་གིས་རེག་པས་ཀྱང་རེག་པར་བྱེད་ན་དེ་དག་ཐམས་ཅད་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །བུད་
མེད་དང་། སྐྱེས་པ་དང་། ཁྱེའུ་དང་། བུ་མོ་དག་གིས་མཐོང་བ་ཙམ་དང་། རི་དགས་དང་། བྱ་དང་། བ་ལང་དང་། བོང་བུ་ལ་སོགས་པས་ཀྱང་མཐོང་ན་དེ་དག་ཐམས་ཅད་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །སྐྱེ་བ་དང་། རྒ་བ་དང་། ན་བ་དང་། འཆི་བ་དང་།
མཛའ་བ་དང་བྲལ་བའི་སྡུག་བསྔལ་མེད་པར་འགྱུར་རོ། །རྣལ་འབྱོར་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དེ་ལྟར་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་ན་སྐུལ་བར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་བསམ་གྱིས་མི་ཁྱབ་པ་དང་བསམ་གཏན་དཔག་ཏུ་མ་མཆིས་པ་ཟིལ་གྱིས་གནོན་པར་བགྱིད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱ་ངན་ལས་འདའ་བ་སྟོན་པར་
བགྱིད་པ་ཐར་བར་འཇུག་པར་བགྱིད་པ། ཆོས་ཀྱི་མཛོད་ཡོངས་སུ་གང་བར་བགྱིད་པ། འཁོར་བ་རྩ་བ་ནས་འབྱིན་པར་བགྱིད་པ། འགྲོ་བ་ལྔ་སྐེམས་པར་བགྱིད་པ་སེམས་ཅན་དམྱལ་བ་དང་ཉོན་མོངས་པ་རྣམས་འཇོམས་པར་བགྱིད་པ་དང་། བྱོལ་སོང་གི་སྐྱེ་གནས་སུ་

གཏོགས་པ་རྣམས་སྒྲོལ་བར་བགྱིད་པ། ཆོས་ཀྱི་རོ་མྱོང་བར་བགྱིད་པ། ཐམས་ཅད་མཁྱེན་པའི་ཡེ་ཤེས་བཤད་པ་བས་མ་འཚལ་བ་བདག་གིས་ཇི་ལྟར་ཐོབ་པར་བགྱི། བཅོམ་ལྡན་འདས་གང་བདག་ལ་ཡི་གེ་དྲུག་པའི་རིག་སྔགས་སྩོལ་བ་དེ་ལ་འཛམ་བུའི་
གླིང་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དབུལ་བར་འཚལ་ལོ། །བཅོམ་ལྡན་འདས་གལ་ཏེ་བྲིར་གྲོ་ག་དང་སྨྱུག་གུ་མ་མཆིས་ན། བདག་གི་ཁྲག་ལས་སྣག་ཚར་བགྱིས། པགས་པ་བཤུས་ཏེ་གྲོ་གར་བགྱིས། རུས་པ་བཅོམ་སྟེ་སྨྱུག་གུར་བགྱིས་ཀྱང་།
བཅོམ་ལྡན་འདས་བདག་གི་ལུས་ལ་སྐྱོ་བ་མ་མཆིས་ཏེ་དེ་ནི་ཕ་མ་དང་། བླ་མའི་ཡང་བླ་མར་འགྱུར་རོ། །དེ་ནས་བཅོམ་ལྡན་འདས་ཀྱིས་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཡི་གེ་དྲུག་པའི་རིག་སྔགས་འདིའི་ཕྱིར་འཇིག་
རྟེན་གྱི་ཁམས་རྡུལ་ཕྲ་རབ་དང་མཉམ་པའི་འཇིག་རྟེན་གྱི་ཁམས་སུ་སོང་བར་ང་དྲན་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་བསྙེན་བཀུར་བྱས་པས་ཀྱང་ངས་དེ་བཞིན་གཤེགས་པ་དེ་དག་ལས་མ་ཐོབ་མ་ཐོས་ནས། དེའི་ཚེ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དམར་པོའི་མཆོག་ཅེས་བྱ་བ་དེའི་སྤྱན་སྔར་ངས་
མཆི་མ་ཕྱུང་བ་དང་། དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རིགས་ཀྱི་བུ་དེ་ལྟར་སྙིང་རྗེ་རྗེ་ལྟར་མཆི་མ་མ་འབྱིན་པར་རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ཞེས་བྱ་བ་
བཞུགས་ཏེ་འཚོ་ཞིང་གཞེས་པ་དེ་ཡི་གེ་དྲུག་པའི་རིག་སྔགས་ཆེན་མོ་འདི་མཁྱེན་གྱིས་སོང་ཞིག་ཅེས་བཀའ་སྩལ་ནས་རིགས་ཀྱི་བུ་དེ་བཞིན་གཤེགས་པ་པད་མ་དམ་པའི་དྲུང་དུ་སོང་ངོ་། །དེ་བཞིན་གཤེགས་པ་པད་མ་དམ་པའི་སངས་རྒྱས་ཀྱི་ཞིང་ག་ལ་བ་དེར་སོང་སྟེ་ཕྱིན་ནས། བཅོམ་

ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ཡི་གེ་དྲུག་པའི་རིག་སྔགས་ཆེན་མོ་དེའི་མིང་གི་རྗེས་སུ་དྲན་པ་ཙམ་གྱིས་སྡིག་པ་ཐམས་ཅད་འབྱང་བར་འགྱུར་བ། བྱང་ཆུབ་སེམས་དཔའ་རྙེད་པར་དཀའ་བ་ཐོབ་པར་འགྱུར་བ་ཐོབ་པར་འཚལ་ལོ། །
དེའི་སླད་དུ་བདག་འཇིག་རྟེན་གྱི་ཁམས་ཉོན་མོངས་པ་ཅན་དུ་མར་ཕྱིན་ཏེ་འདིར་མཆིས་ཀྱང་དོན་མ་མཆིས་པའི་ཚེགས་སུ་གྱུར་ཏོ། །དེ་ནས་དེ་བཞིན་གཤེགས་པ་པད་མའི་མཆོག་ཡི་གེ་དྲུག་པའི་རིག་སྔགས་ཆེན་མོ་འདིའི་ཡོན་ཏན་བསྔགས་པ་གསུང་བ་རིགས་ཀྱི་བུ་འདི་ལྟ་སྟེ་དཔེར་
ན་ངས་རྡུལ་ཕྲ་རབ་ཀྱི་ཚད་ནི་གཟུང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་རྒྱ་མཚོ་མཆིང་རྣམ་གྱི་བྱེ་མ་ནི་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་
མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་སྐྱེས་བུ་ལ་ལ་ཞིག་གིས་ཁྱིམ་དཔག་ཚད་བརྒྱ་ཐམ་པར་བྱས་ཏེ། འཕང་དུ་དཔག་ཚད་ལྔ་བརྒྱར་བྱས་ལ། དེ་ཏིལ་གྱི་འབྲས་བུས་ཡོངས་སུ་གང་བར་བྱེད་དེ་དེ་ན་ཁབ་ཙམ་གྱི་བུ་ག་ཡང་མེད་
ལ། དེའི་སྒོར་སྐྱེས་བུ་མི་རྒ་མི་འཆི་བ་ཞིག་བཞག་སྟེ། དེས་བསྐལ་པ་བརྒྱ་འདས་ཤིང་ཏིལ་གྱི་འབྲས་བུ་གཅིག་ཕྱིར་འདོར་ཏེ། རྣམ་གྲངས་དེས་ཁྱིམ་གྱི་རྨང་དང་གཞི་ཡན་ཆད་ཟད་ཅིང་མེད་པར་འགྱུར་གྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་
བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་བཞིར་མི་རྣམས་ཀྱི་ལས་ནས་དང་། གྲོ་དང་འབྲས་དང་། རྒྱ་སྲན་དང་བལ་སྲན་ལ་སོགས་པ་དང་། རྒྱ་ཤུག་དང་། སྲན་ཆུང་ལ་སོགས་པ་རྣམ་པ་སྣ་ཚོགས་པ་བྱས་ཏེ། ཀླུའི་རྒྱལ་པོས་ཀྱང་དེར་དུས་
དུས་སུ་ཆར་པའི་རྒྱུན་ཕབ་ནས་འབྲུ་དེ་དག་གྲུབ་པ་དང་སྨིན་ཅིང་སྨིན་ཅིང་བརྔས་ནས་འཛམ་བུའི་གླིང་དུ་གཡུལ་གཅིག་བྱས་ལ། ཤིང་རྟ་དང་ཁུར་དང་བམ་པོ་དང་སྐོན་པས་བསྐྱས་ཏེ་གཡུལ་དེའི་ནང་དུ་བཅུག་ནས་བ་ལང་དང་བོང་བུ་དག་གིས་བཅགས་ཏེ་ཕུང་པོ་ཆེན་པོར་བྱས་ཀྱང་། རིགས་

ཀྱི་བུ་ངས་འབྲུ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་འདི་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་ཆུ་བོ་ཆེན་པོ་འཛམ་བུའི་གླིང་དུ་ཉིན་མཚན་དུ་འབབ་པ་འདི་ལྟ་སྟེ། སི་
ཏ་དང་གང་གཱ་དང་། ཡ་མུ་ན་དང་། སིན་དྷུ་དང་། པ་ཀྵུ་དང་། ཤ་ཏ་དྲུ་དང་ཙན་དྲ་བྷ་ག་དང་། ཨཻ་ར་བ་ཏི་དང་། སུ་མ་ག་ད་དང་། ཧི་མ་ཀ་ལ་དང་། ཀོ་ད་པ་རི་རྣམས་ཆུ་བོ་རེ་རེ་ཞིང་འཁོར་ལྔ་བརྒྱ་ལྔ་བརྒྱ་ཡོད་པ་ཉིན་མཚན་དུ་རྒྱ་མཚོ་མཆིང་རྣམ་དུ་འབབ་བོ། །རིགས་ཀྱི་བུ་ཡི་གེ་དྲུག་
པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ཡང་དེ་བཞིན་དུ་འཕེལ་ལོ། །དེ་བས་ན་ཆུ་བོ་ཆེན་པོ་དེ་དག་ནི་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་བར་
མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྐང་པ་བཞི་པའི་རིགས་བ་ལང་དང་། བོང་བུ་དང་། མ་ཧེ་དང་། རྟ་དང་། བལ་གླང་དང་། ཁྱི་དང་། ཝ་དང་། ར་དང་། ཕྱུགས་དེ་དག་དང་། དེ་བཞིན་དུ་སེང་གེ་དང་། སྟག་དང་། ཏ་རཀྵ་དང་། རི་དགས་དང་། སྤྲེའུ་དང་། རི་བོང་
དང་ཕག་ལ་སོགས་པ་དང་། བྱི་བ་དང་། བྱི་ལ་ལ་སོགས་པ་དེ་དག་གི་སྤུ་ནི་ངས་རེ་རེ་ནས་བགྲང་ནུས་ཀྱི། ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྡོ་རྗེའི་ལྕགས་ཀྱུ་ཞེས་བྱ་བའི་
རིའི་རྒྱལ་པོ་འཕང་དུ་དཔག་ཚད་དགུ་ཁྲི་དགུ་སྟོང་། འོག་ཏུ་དཔག་ཚད་བརྒྱད་ཁྲི་བཞི་སྟོང་ཡོད་དེ། རིའི་རྒྱལ་པོ་རྡོ་རྗེའི་ལྕགས་ཀྱུ་དེའི་ངོས་རེ་རེ་ཞིང་དཔག་ཚད་བརྒྱད་ཁྲི་བཞི་སྟོང་ཡོད་ལ་རིའི་རྒྱལ་པོ་དེའི་ངོས་ལ་སྐྱེས་བུ་མི་རྒ་མི་འཆི་བ་ཞིག་ཡོད་ནས་དེས་བསྐལ་པ་གཅིག་འདས་
ཤིང་ཡུལ་ཀ་ཤི་ཀ་ནས་བྱུང་བའི་གོས་ཀྱིས་ལན་ཅིག་ཕྱིས་ཏེ། དེ་ལྟར་བྱས་ཀྱང་དེ་ཟད་ཅིང་དེངས་པར་འགྱུར་གྱི། ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་མཆིང་རྣམ་ཆེན་

པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་ཞེང་དུ་རྟ་རྒོད་མའི་གདོང་གི་མཐའི་བར་དུ་དཔག་ཏུ་མེད་པ་ངས་སྐྲའི་རྩེ་མོའི་བརྒྱའི་ཆས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །
རིགས་ཀྱི་བུ་འདི་ལྟ་སྟེ་དཔེར་ན་ཤིང་ཤིར་ཥའི་ཚལ་གྱི་ལོ་མ་ནི་རེ་རེ་ནས་ངས་བགྲང་ནུས་ཀྱི་ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་ཀྱི་ཕུང་པོ་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་ཆེན་པོ་བཞི་ན་གནས་པའི་སྐྱེས་པ་དང་བུད་མེད་དང་། ཁྱེའུ་དང་བུ་མོ་
དེ་དག་ཐམས་ཅད་བྱང་ཆུབ་སེམས་དཔའ་ས་བདུན་པ་ལ་གནས་པར་གྱུར་ན། གང་བྱང་ཆུབ་སེམས་དཔའ་དེ་དག་གི་བསོད་ནམས་ཀྱི་ཕུང་པོ་དེ་བས་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་ནི་ཤིན་ཏུ་ཆེའོ། །རིགས་ཀྱི་བུ་འདི་ལྟ་སྟེ་དཔེར་ན།
ཟླ་བ་བཅུ་གཉིས་པའི་ལོའམ། ཟླ་བ་ལྷག་པ་དང་བགྲངས་པས་ཟླ་བ་བཅུ་གསུམ་གྱིས་ལོ་ཚང་བར་གྱུར་པར་ཉིན་མཚན་དུ་ཆར་པ་བབ་ན་རིགས་ཀྱི་བུ་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་
ནི་ངས་བགྲང་མི་ནུས་སོ། །འདི་ལྟ་སྟེ་རིགས་ཀྱི་བུ་མང་དུ་བརྗོད་མི་དགོས་ཀྱི་ང་དང་འདྲ་བའི་དེ་བཞིན་གཤེགས་པ་བྱེ་བ་གནས་གཅིག་ཏུ་ལྷའི་བསྐལ་པར་ན་བཟའ་དང་། བཤོས་དང་མལ་སྟན་དང་། ན་བའི་རྐྱེན་གྱི་སྨན་གྱི་ཡོ་བྱད་ཀྱིས་གནས་པར་བྱས་ཏེ། བསྙེན་བཀུར་
ཐམས་ཅད་བྱས་ཀྱང་དེ་བཞིན་གཤེགས་པ་དེ་དག་གིས་ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་ཀྱི་ཕུང་པོ་བགྲང་མི་ནུས་ན། ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། བསམ་གཏན་གྱི་གནས་སུ་ལྡང་བ་ནི་བསམ་གྱིས་མི་ཁྱབ་སྟེ།
རིགས་ཀྱི་བུ་ང་ནི་སྒོམ་པའི་བརྩོན་པ་ལ་བརྩོན་པར་གྱུར་པ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཆོས་དེ་ཡང་བྲ་བ། མི་གསལ་བའི་ཆོས་མ་འོངས་པ། ཤིན་ཏུ་སྙིང་པོར་གྱུར་པའི་ཆོས་ཏེ་དེ་དགེ་བ་ལ་གནས་པ་དེ་བཞིན་དུ་རིགས་ཀྱི་བུ་

ཡི་གེ་དྲུག་པའི་རིག་སྔགས་ཆེན་མོ་ཡང་ཐབས་མཁས་པའོ། །རིགས་ཀྱི་བུ་ངས་ཀྱང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་འཁྱམ་ཞིང་སོང་ནས་དེ་བཞིན་གཤེགས་པ་སྣང་བ་མཐའ་ཡས་ཀྱི་སྤྱན་སྔར་ཐལ་མོ་སྦྱར་ཏེ་ཆོས་ཀྱི་ཤུགས་ཀྱིས་མཆི་མ་
བྱུང་བ་དེའི་ཚེ་དེ་བཞིན་གཤེགས་པ་སྣང་བ་མཐའ་ཡས་པས་ད་ལྟར་དང་མ་འོངས་པ་མཁྱེན་ཏེ། དེས་ཀྱང་རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོའི་རིག་པའི་རྒྱལ་མོ་བསྒོམ་པའི་བརྩོན་འགྲུས་བྱ་བར་འདོད་དམ་ཞེས་བཀའ་སྩལ་ནས། བཅོམ་ལྡན་འདས་བདག་འཚལ་ལོ། །
བདེ་བར་གཤེགས་པ་བདག་འཚལ་ཏེ། ཇི་ལྟར་སྐོམ་གྱིས་གདུངས་ནས་ཆབ་ཚོལ་བ་དེ་བཞིན་དུ་བཅོམ་ལྡན་འདས་བདག་ཀྱང་ཡི་གེ་དྲུག་པའི་རིག་སྔགས་ཆེན་མོ་ཚོལ་དུ་འཇིག་རྟེན་གྱི་ཁམས་སུ་མཆིས་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་ལ་བསྙེན་བཀུར་
བགྱིས་ཀྱང་གང་ལས་ཀྱང་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་མ་ཐོབ་ཀྱིས། བཅོམ་ལྡན་འདས་ཁྱོད་ནི་མགོན་ནོ། །ཁྱོད་ནི་སྐྱབས་སོ། །རྟེན་ནོ། །དབང་པོ་ཉམས་པའི་ནི་མིག་ཏུ་གྱུར་ཅིག །ལམ་སྟོར་བའི་ནི་ལམ་དུ་གྱུར་ཅིག །ཉི་མ་ཚ་བས་ཚིག་པ་རྣམས་ཀྱི་ནི་གདུགས་
སུ་གྱུར་ཅིག །ཤུལ་གྱི་བཞི་མདོ་ཆེན་པོར་ནི་ཤིང་སཱ་ལ་ཆེན་པོ་བཞིན་དུ་གྱུར་ཅིག །ཆོས་ཀྱིས་ཡོངས་སུ་སྐོམ་པ་ལ་ནི་མཐའ་ཡས་པ་སྟོན་པར་གྱུར་ཅིག །སེམས་ཤིན་ཏུ་བརྟན་པའི་ནི་གོ་ཆར་གྱུར་ཅིག །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བྱ་ཀ་ལ་པིང་ཀའི་དབྱངས་ཀྱིས་བཀའ་སྩལ་པ། རིགས་ཀྱི་བུ་ལྟོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ཡི་
གེ་དྲུག་པའི་རིག་སྔགས་ཆེན་མོའི་ཕྱིར་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མར་གཤེགས་ཀྱིས་རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་གསོལ་ཅིག །དེ་བཞིན་གཤེགས་པར་གྱུར་བཞིན་དུ་ཀུན་དུ་གཤེགས་སོ། །དེ་ནས་བཅོམ་ལྡན་འདས་ལ་བྱང་ཆུབ་

སེམས་དཔའ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །དཀྱིལ་འཁོར་བརྒྱད་ཀྱིས་སྩལ་བར་བགྱི་སྟེ། བཅོམ་ལྡན་འདས་ཇི་ལྟར་ན་མེ་ཏོག་པད་མ་ལྟ་བུའི་ཕྱག་རྒྱ་འཛིན། ཇི་ལྟར་ན་ནོར་བུ་འཛིན་པའི་ཕྱག་རྒྱ་རྟོགས་པར་འགྱུར། ཇི་ལྟར་ན་རྒྱལ་པོའི་དབང་
པོ་ཐམས་ཅད་ཀྱི་ཕྱག་རྒྱ་རྟོགས་པར་འགྱུར། ཇི་ལྟར་ན་དཀྱིལ་འཁོར་ཡོངས་སུ་དག་པ་རྟོགས་པར་འགྱུར་ཞེ་ན། དཀྱིལ་འཁོར་གྱི་མཚན་མ་ནི་འདི་ལགས་ཏེ། གྲུ་བཞི་ལ་ཁྲུ་ལྔ་ཁོར་ཡུག་ཙམ་དུ་བགྱིས་ཏེ། དཀྱིལ་འཁོར་གྱི་དབུས་སུ་ནི་སྣང་བ་མཐའ་ཡས་བྲིའོ། །དེ་
བཞིན་གཤེགས་པ་སྣང་བ་མཐའ་ཡས་ཀྱི་སྐུ་ལ་ནོར་བུ་རིན་པོ་ཆེ་ཨིན་དྲ་ནཱི་ལའི་ཕྱེ་མ་དང་། མར་གད་ཀྱི་ཕྱེ་མ་དང་། པད་མ་རཱ་གའི་ཕྱེ་མ་དང་། ཤེལ་གྱི་ཕྱེ་མ་དང་། གསེར་དང་དངུལ་གྱི་ཕྱེ་མ་གཏོར་བར་བགྱིའོ། །གཡས་ཕྱོགས་སུ་ནི་བྱང་ཆུབ་སེམས་དཔའ་ནོར་བུ་
རིན་པོ་ཆེ་འཛིན་པར་བགྱིའོ། །གཡོན་ཕྱོགས་སུ་ནི་ཡི་གེ་དྲུག་པའི་རིག་སྔགས་ཆེན་མོ་བགྱི་སྟེ། ཕྱག་བཞི་པ་ཁ་དོག་འདམ་བུའི་མདའ་རྒྱུ་བཞིན་དུ་དཀར་བ། རྒྱན་སྣ་ཚོགས་ཀྱིས་བརྒྱན་པ་ཕྱག་གཡོན་པར་པད་མ་བགྱིའོ། །པད་མའི་སྟེང་དུ་ནོར་བུ་བགྱིའོ། །
ཕྱག་གཡས་པར་སྔགས་ཀྱི་ནོར་བུ་བགྱིའོ། །ཕྱག་གཉིས་ཐལ་མོ་སྦྱར་བ་རྒྱལ་པོའི་དབང་པོ་ཐམས་ཅད་ཅེས་བྱ་བའི་ཕྱག་རྒྱ་བགྱིའོ། །ཡི་གེ་དྲུག་པའི་རིག་སྔགས་ཆེན་མོ་དེའི་ཞབས་ཀྱི་འོག་ཏུ་རིག་འཛིན་བགྱི་སྟེ། ལག་པ་གཡས་པ་ན་པོག་ཕོར་ཐོགས་ཤིང་བདུག་
པར་བགྱིའོ། །ལག་པ་གཡོན་པ་ན་རྒྱན་རྣམ་པ་སྣ་ཚོགས་ཀྱིས་གང་བའི་སྐོན་བུ་ཐོགས་པར་བགྱིའོ། །དཀྱིལ་འཁོར་དེའི་གྲྭ་བཞིར་རྒྱལ་པོ་ཆེན་པོ་བཞི་སྟེ། ལག་ཆ་སྣ་ཚོགས་ཐོགས་པར་བགྱིའོ། །དཀྱིལ་འཁོར་དེའི་གྲྭ་བཞིར་བུམ་པ་གང་བ་ནོར་བུ་རིན་པོ་ཆེ་སྣ་ཚོགས་སྩལ་བ་
གཞག་གོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་དཀྱིལ་འཁོར་དུ་འཇུག་པར་འཚལ་ན་དེས་རུས་ཆགས་ཀྱི་རྒྱུད་ཐམས་ཅད་ཀྱི་མིང་བྲིས་ལ་ཐོག་མ་ཁོ་ནར་དཀྱིལ་འཁོར་དེར་མིང་དེ་དག་སྩལ་བར་བགྱི་སྟེ། དེ་དག་ཐམས་ཅད་མིའི་སྡུག་བསྔལ་ཐམས་ཅད་སྤངས་ཤིང་

སྲིད་པ་ཐ་མ་པའི་བྱང་ཆུབ་སེམས་དཔར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་སློབ་དཔོན་གྱིས་གནས་མ་ལགས་པ་ལ་སྩལ་བར་མི་བགྱི་སྟེ། ཡང་ན་ནི་དད་པས་མོས་
པ་ལ་སྩལ་བར་བགྱིའོ། །ཡང་ན་ནི་ཐེག་པ་ཆེན་པོ་ལ་དད་པས་མོས་པ་དག་ལ་སྩལ་བར་བགྱིའོ། །མུ་སྟེགས་ཅན་ལ་སྩལ་བར་མི་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་ནོར་བུ་རིན་པོ་ཆེ་ཨིན་དྲ་ནཱི་ལའི་ཕྱེ་མ་དང་། མ་ར་ཀ་ཏ་དང་། གསེར་དང་དངུལ་གྱི་ཕྱེ་མ་དག་རིགས་ཀྱི་བུའམ་རིགས་ཀྱི་བུ་མོ་དབུལ་པོ་ལ་མེད་དོ། །བཅོམ་
ལྡན་འདས་ཕྱེ་མ་དེ་དག་ཚོན་སྣ་ཚོགས་ལས་སྦྱར་ཞིང་། མེ་ཏོག་སྣ་ཚོགས་དང་། བདུག་པ་སྣ་ཚོགས་སུ་བགྱིའོ། །རིགས་ཀྱི་བུ་གལ་ཏེ་ཡུལ་གཞན་དུ་སོང་ངམ། གནས་དང་ཐབས་ལས་བབས་པ་དག་ལ་མེད་དོ། །དེའི་ཚེ་སློབ་དཔོན་གྱིས་ཡིད་ལ་དཀྱིལ་འཁོར་བགྱི་སྟེ།
སློབ་དཔོན་གྱིས་ཕྱག་རྒྱའི་མཚན་མ་བསྟན་པར་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །
རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ང་ལ་བྱིན་ཅིག །ངས་སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་དེས་འཁོར་བ་ལས་ཡོངས་སུ་ཐར་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ད་ནས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་འདི་བྱིན་ནོ། །ཨོཾ་མ་ཎི་པད་མེ་ཧཱུཾ།། །།བམ་པོ་བཞི་པ་སྟེ་ཐ་མ།

གང་གི་ཚེ་ན་ཡི་གེ་དྲུག་པའི་རིག་སྔགས་ཆེན་མོ་འདི་བྱིན་པ་དེའི་ཚེ་གླིང་བཞི་དང་ལྷའི་གནས་དང་བཅས་ཏེ། ཤིང་ཆུ་སྐྱེས་ཀྱི་འདབ་མ་བཞིན་དུ་འགུལ་ལོ། །རྒྱ་མཚོ་མཆིང་རྣམ་བཞི་ཡང་འཁྲུགས་སོ། །བགེགས་དང་བར་ཆད་བྱེད་པ་ཐམས་ཅད་ཀྱང་སྐྲག་གོ། །གནོད་སྦྱིན་དང་།
སྲིན་པོ་དང་། ནག་པོ་ཆེན་པོ་བུད་མེད་མང་པོ་དང་བཅས་པ་ཡང་བྲོས་སོ། །དེ་ནས་དེ་བཞིན་གཤེགས་པ་པད་མའི་མཆོག་གིས་བལ་གླང་གི་སྣ་དང་འདྲ་བའི་དཔུང་པ་ཕྱུང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་མུ་ཏིག་གི་སེ་མོ་དོ་རིན་བརྒྱ་
སྟོང་རི་བ་ཕུལ་ལོ། །དེས་ཀྱང་བླངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ལ་ཕུལ་ལོ། །དེས་ཀྱང་བླངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལ་ཕུལ་
ལོ། །དེ་ནས་ད་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་གིས་ཡི་གེ་དྲུག་པའི་རིག་སྔགས་ཆེན་མོ་འདི་བླངས་ནས་འཇིག་རྟེན་གྱི་ཁམས་པད་མ་ག་ལ་བ་དེར་གཤེགས་སོ། །རིགས་ཀྱི་བུ་དེ་ལྟར་ངས་སྔོན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལས་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་སྤྱོད་པ་བདག་གིས་
ཇི་ལྟར་ཐོབ་པར་བགྱི། བཅོམ་ལྡན་འདས་དཔེར་ན་བདུད་རྩི་ཐོབ་ན་རོ་མྱོང་བས་ཆོག་མ་འཚལ་བ་དེ་བཞིན་དུ། བཅོམ་ལྡན་འདས་བདག་ཀྱང་ཡི་གེ་དྲུག་པའི་རིག་སྔགས་ཆེན་མོ་ཐོས་པ་ཙམ་གྱིས་ཆོག་མ་འཚལ་ཏོ། །སེམས་ཅན་གང་དག་ཡི་གེ་དྲུག་པའི་རིག་སྔགས་ཆེན་མོ་
འདི་འཛབ་ཏུ་བགྱིད་པ་དང་། ཉན་པ་དང་། སེམས་པ་དང་། བསམ་པ་ལྷག་པས་འཛིན་པ་དེ་དག་ནི་བསོད་ནམས་དང་ལྡན་པ་ལགས་སོ། །བཀའ་སྩལ་པ། རིགས་ཀྱི་བུ་གང་ཡི་གེ་དྲུག་པའི་རིག་སྔགས་ཆེན་མོ་འདི་འདྲིར་འཇུག་པ་དེས་ནི་ཆོས་ཀྱི་ཕུང་པོ་བརྒྱད་ཁྲི་བཞི་

སྟོང་འདྲིར་འཇུག་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་ཕྲ་རབ་དང་མཉམ་པ་ལྷའི་གསེར་རིན་པོ་ཆེ་ལས་བྱེད་ཅིང་བྱས་ནས་ཉིན་གཅིག་བཞིན་དུ་རིང་བསྲེལ་འཇུག་པ་དེའི་འབྲས་བུ་རྣམ་པར་སྨིན་པ་ནི་ཡི་
གེ་དྲུག་པའི་རིག་སྔགས་ཆེན་མོའི་ཡི་གེ་འབྲུ་གཅིག་གི་འབྲས་བུ་རྣམ་པར་སྨིན་པ་ཙམ་སྟེ། ཡོན་ཏན་བསམ་གྱིས་མི་ཁྱབ་བོ། །ཐར་པར་ཤིན་ཏུ་གནས་པའོ། །རིགས་ཀྱི་བུའམ་རིགས་ཀྱི་བུ་མོ་གང་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་པ་དེ་ནི་ཏིང་ངེ་འཛིན་འདི་དག་
ཐོབ་པར་འགྱུར་རོ། །འདི་ལྟ་སྟེ། ནོར་བུ་རིན་པོ་ཆེ་འཛིན་ཅེས་བྱ་བའི་ཏིང་ངེ་འཛིན་དང་། སེམས་ཅན་དམྱལ་བ་དང་བྱོལ་སོང་སྐེམས་ཞས་བྱ་བའི་ཏིང་ངེ་འཛིན་དང་། རྡོ་རྗེའི་གོ་ཆ་ཞེས་བྱ་བའི་ཏིང་ངེ་འཛིན་དང་། རྐང་པ་ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་དང་། ཐབས་མཁས་
པ་ཐམས་ཅད་ཅེས་བྱ་བའི་ཏིང་ངེ་འཛིན་དང་། འཐོར་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་འཇུག་པ་ཞེས་བྱ་བའི་ཏིང་ངེ་འཛིན་དང་། བསམ་གཏན་གྱི་རྒྱན་ཅེས་བྱ་བའི་ཏིང་ངེ་འཛིན་དང་། ཆོས་ཀྱི་ཤིང་རྟ་ལ་འཇུག་པ་ཞེས་བྱ་བའི་ཏིང་ངེ་འཛིན་དང་། འདོད་ཆགས་དང་
ཞེ་སྡང་ལས་ཡོངས་སུ་ཐར་བར་བྱེད་ཅེས་བྱ་བའི་ཏིང་ངེ་འཛིན་དང་། མཐའ་ཡས་བེའུ་ཞེས་བྱ་བའི་ཏིང་ངེ་འཛིན་དང་། ཕ་རོལ་ཏུ་ཕྱིན་པ་དྲུག་འཆང་ཅེས་བྱ་བའི་ཏིང་ངེ་འཛིན་དང་། རི་རབ་ཆེན་པོ་འཛིན་ཅེས་བྱ་བའི་ཏིང་ངེ་འཛིན་དང་། སེམས་ཅན་སྲིད་པ་ལས་སྒྲོལ་ཞེས་བྱ་བའི་
ཏིང་ངེ་འཛིན་དང་། སངས་རྒྱས་ཀྱི་ཞིང་ཐམས་ཅད་སྟོན་ཅེས་བྱ་བའི་ཏིང་ངེ་འཛིན་དང་། དེ་བཞིན་གཤེགས་པ་ཐམས་ཅད་གཟིགས་ཞེས་བྱ་བའི་ཏིང་ངེ་འཛིན་དང་། གནས་ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་རྣམས་ཏེ། རིགས་ཀྱི་བུ་གང་ཡི་གེ་དྲུག་པའི་རིག་སྔགས་ཆེན་མོའི་རྒྱལ་
མོ་འཛིན་པ་ནི་དེ་ལྟ་བུ་ལ་སོགས་ཏེ་ཏིང་ངེ་འཛིན་བརྒྱ་རྩ་བརྒྱད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གང་དུ་མཆི་བར་བགྱི། ཡི་གེ་དྲུག་པའི་རིག་སྔགས་ཆེན་མོ་གང་དུ་

འཐོབ་པར་འགྱུར། རིགས་ཀྱི་བུ་ཡུལ་ཁོར་མོར་འཇིག་པའི་གྲོང་ཁྱེར་ཆེན་པོ་ན་གང་ཡི་གེ་དྲུག་པའི་རིག་སྔགས་ཆེན་མོ་འཛིན་པར་བྱེད། ཀློག་པར་བྱེད། ཚུལ་བཞིན་ཡིད་ལ་བྱེད་པའི་ཆོས་སྨྲ་བ་ཡོད་དོ། །བཅོམ་ལྡན་འདས་ཡུལ་ཁོར་མོར་འཇིག་གི་གྲོང་ཁྱེར་ཆེན་པོར་
ཆོས་སྨྲ་བ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་བདག་མཆིའོ། །ལེགས་སོ། །ལེགས་སོ། །རིགས་ཀྱི་བུ་དེ་ལྟར་གྱིས་ཤིག །གང་ཡི་གེ་དྲུག་པའི་རིག་སྔགས་ཆེན་མོ་འདི་འཛིན་པའི་ཆོས་སྨྲ་བ་དེ་དག་ནི་དཀོན་པའོ། །ཆོས་སྨྲ་བ་
དེ་དག་ནི་དེ་བཞིན་གཤེགས་པ་དང་མཉམ་པར་བལྟ་བར་བྱའོ། །འགྲོ་བའི་བསོད་ནམས་ཀྱི་འགྲམ་དང་འདྲ་བར་བལྟ་བར་བྱའོ། །ཕུང་པོ་བཞིན་དུ་བལྟ་བར་བྱའོ། །ཕྱིན་ཅི་མ་ལོག་པར་གསུང་བ་བཞིན་དུ་བལྟ་བར་བྱའོ། །རིན་པོ་ཆེའི་ཕུང་པོ་བཞིན་དུ་བལྟ་བར་
བྱའོ། །དམ་པ་སྦྱིན་པར་བྱེད་པའི་ཡིད་བཞིན་གྱི་ནོར་བུ་བཞིན་དུ་བལྟ་བར་བྱའོ། །ཆོས་ཀྱི་མཛོད་བཞིན་དུ་བལྟ་བར་བྱའོ། །འགྲོ་བ་སྒྲོལ་བར་བྱེད་པ་བཞིན་དུ་བལྟ་བར་བྱའོ། །རིགས་ཀྱི་བུ་ཆོས་སྨྲ་བ་དེའི་བྱེད་པ་མཐོང་ནས་ཐེ་ཙོམ་མི་སྐྱེ་བར་བྱའོ། །རིགས་ཀྱི་བུ་ཁྱོད་
བྱང་ཆུབ་སེམས་དཔའི་ས་ནས་འཕོས་ཤིང་ངན་སོང་དུ་སྐྱེས་ས་རེ། ཆོས་སྨྲ་བ་དེ་ནི་ཚུལ་ཁྲིམས་ཉམས་པ། སྤྱོད་པ་ཉམས་པ། ཆུང་མ་དང་། བུ་དང་། བུ་མོས་ཡོངས་སུ་བསྐོར་བ། ངུར་སྨྲིག་ཀྱང་བཤང་བ་དང་གཅི་བས་ཡོངས་སུ་གང་བ། སྤྱོད་ལམ་མ་བསྡམས་པ་
ཡིན་ནོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་འཚལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་བྱང་
ཆུབ་སེམས་དཔའ་ཁྱིམ་པ་དང་། རབ་ཏུ་བྱུང་བ་དང་། ཁྱེའུ་དང་། བུ་མོ་བརྒྱ་ཕྲག་སྟོང་དུ་མས་ཡོངས་སུ་བསྐོར་ཏེ་སོང་ནས་ཆོས་སྨྲ་བ་དེ་ལ་མཆོད་པའི་ལས་བྱ་བའི་ཕྱིར་ལྷའི་གདུགས་དང་། ལྷའི་ལྷམ་དང་། ཅོད་པན་དང་། རྣ་ཆ་དང་། ཕྲེང་བའི་ཆུན་པོ་དང་། དཔུང་

རྒྱན་དང་། སེ་མོ་དོ་དང་། སེ་མོ་དོ་ཕྱེད་པ་ཕྲག་པ་ནས་འཕྱང་བ་དང་། སྙན་གྱི་གོང་རྒྱན་དང་། སོར་གདུབ་ཀྱི་རྣམ་པ་དང་། གཞན་ཡང་གོས་རྣམ་པ་སྣ་ཚོགས་པ་རྒྱའི་ཡུལ་ནས་བྱུང་བ་དང་། རིག་འཛིན་གྱིས་བསྐུལ་བ་དང་། ཡུལ་ཀ་ཤི་ཀ་ནས་བྱུང་བའི་
གོས་དང་། མས་བགྲུ་བའི་གོས་དང་། གཞན་ཡང་མེ་ཏོག་སྣ་ཚོགས་པ་འདི་ལྟ་སྟེ། མེ་ཏོག་ཨུད་པལ་དང་། ཀུ་མུ་ད་དང་། པུན་ད་རཱི་ཀ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། ཨུ་དུམ་བ་ར་དང་། གཞན་
ཡང་ཤིང་གི་མེ་ཏོག་རྣམ་པ་སྣ་ཚོགས་པ་ཙམ་པ་ཀ་དང་། ཀ་ར་བཱི་ར་དང་། བད་ཏ་ལ་དང་། ཨ་ཏི་མུཀྟ་དང་། བཱ་ར་ཤི་ཀཱ་དང་། ཀུན་ད་དྷྱ་ཥི་ཏ་དང་། སུ་མ་ན་དང་། བི་མཱ་ན་ཀ་ལ་སོགས་པ་དང་། འདབ་མ་བརྒྱ་པ་ངུར་པས་མཛེས་པར་བྱས་པ། བྱ་ཤ་རི་ཀ་དག་མོས་པར་བྱས་
པ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་གྱི་ཁ་དོག་དང་། གཞན་ཡང་འབྲས་བུ་དང་། མེ་ཏོག་གི་རྣམ་པ་སྣ་ཚོགས་དག་ཁྱེར་ནས་ཡུལ་ཁོར་མོར་འཇིག་གི་གྲོང་ཁྱེར་ཆེན་པོ་ག་ལ་བ་དེར་སོང་སྟེ། མཐར་གྱིས་ཁོར་མོར་འཇིག་གི་གྲོང་
ཁྱེར་ཆེན་པོར་ཕྱིན་པ་དང་། ཆོས་སྨྲ་བ་ག་ལ་བ་དེར་སོང་སྟེ་ཕྱིན་ནས་རྐང་པ་ལ་མགོ་བོས་ཕྱག་འཚལ་ཏེ། དེས་དེ་ཚུལ་ཁྲིམས་ཉམས་པ། སྤྱོད་པ་ཉམས་པ། སྤྱོད་ལམ་མ་བསྡམས་པ་མཐོང་ནས་གདུགས་དང་། ལྷམ་དེ་དག་དང་། གོས་དང་། རྒྱན་དང་། དྲི་དང་།
བྱུག་པ་དག་གིས་མཆོད་པ་ཆེན་པོ་བྱས་ནས་ཆོས་སྨྲ་བ་དེའི་མདུན་དུ་ཐལ་མོ་སྦྱར་ཏེ། ཀྱེ་མའོ་ཆོས་ཀྱི་གཏེར་མྱོང་བར་མཛད་པ། བདུད་རྩིའི་གཏེར་བསགས་པ་ལྟ་བུ་རྒྱ་མཚོ་དང་མཉམ་པ་ཁྱོད་ལ་དཔག་མི་ནུས་སོ། །མིར་གྱུར་པ་ཐམས་ཅད་ཀྱི་སྣོད་དུ་གྱུར་པའོ། །
ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དག་ཁྱོད་ལས་ཆོས་ཉན་ཏེ། ཁྱོད་ལ་ཆོས་ཉན་པའི་ཚེ་ཐམས་ཅད་འདུ་བར་བགྱིད་དོ། །ཁྱོད་ནི་རྡོ་རྗེ་ཆེན་པོ་དང་མཉམ་པའི་

ཆོས་ཀྱི་རྣམ་གྲངས་འཆད་པར་མཛད་དོ། །སེམས་ཅན་འཁོར་བའི་བཅིང་བས་བཅིངས་པ་མང་པོ་དག་ཡོངས་སུ་ཐར་བར་མཛད་དོ། །སེམས་ཅན་གང་ཁོར་མོར་འཇིག་གི་གྲོང་ཁྱེར་ཆེན་པོ་ན་གནས་ཤིང་རྟག་ཏུ་ཡོངས་སུ་སྡུད་པར་མཐོང་བ་དེ་དག་ནི་བསོད་ནམས་དང་ལྡན་
པ་ལགས་སོ། །དེ་མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་པ། དཔེར་ན་མེས་ནགས་ཀྱི་འདབ་མ་མྱུར་དུ་འཚིག་པར་བགྱིད་པ་དེ་བཞིན་དུ་ཁྱོད་མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་ཀྱིས་ཀྱང་མཁྱེན་ཏོ། །གཞན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་། ཚངས་པ་དང་། འཇུག་སྲེད་དང་། དབང་ཕྱུག་ཆེན་པོ་དང་། ཉི་མ་དང་། ཟླ་བ་དང་། རླུང་གི་ལྷ་དང་། ཆུའི་ལྷ་དང་། མེའི་ལྷ་དང་།
ཆོས་ཀྱི་རྒྱལ་པོ་གཤིན་རྗེ་དང་། རྒྱལ་པོ་ཆེན་པོ་བཞི་དག་ཀྱང་ཁྱོད་ལ་མཆོད་པའི་ལས་བྱ་བའི་ཕྱིར་མཆིའོ། །དེ་ནས་ཆོས་སྨྲ་བ་དེས་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འགྱོད་པ་མ་སྐྱེད་ཅིག །གྲོགས་པོ་ཉོན་མོངས་པ་ནི་ཆགས་པའོ། །སྤྱད་པའོ། །འཁོར་
བའི་མཚན་མའོ། །སྐྱེ་དགུའི་འཁོར་ལོ་སྐྱེད་པར་བྱེད་པའོ། །གང་ཡི་གེ་དྲུག་པའི་རིག་སྔགས་ཆེན་མོ་ཤེས་པ་དེ་ནི་འདོད་ཆགས་དང་། ཞེ་སྡང་དང་། གཏི་མུག་གིས་མི་གོས་ཏེ། དཔེར་ན་འཇམ་བུའི་ཆུ་བོའི་གསེར་དྲི་མས་མི་གོས་པ་དེ་བཞིན་དུ་རིགས་ཀྱི་བུ་གང་གི་ལུས་
ལ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཐོགས་པ་དེའི་ལུས་ལ་འདོད་ཆགས་དང་། ཞེ་སྡང་དང་། གཏི་མུག་གིས་མི་གོས་སོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བས་རྐང་པ་ལ་དམ་དུ་བཟུང་སྟེ་འདི་སྐད་ཅེས་གསོལ་ཏོ། །དབང་པོ་ཉམས་པའི་མིག་ཏུ་
གྱུར་ཅིག །ལམ་སྟོར་བ་ལ་ལམ་སྟོན་པར་མཛོད་ཅིག །བདག་ཆོས་ཀྱིས་སྐོམ་པ་ལ་ཆོས་ཀྱི་རོས་ངོམས་པར་མཛོད་ཅིག །བདག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ས་བོན་སྩོལ་ཅིག །ཆོས་ཀྱི་སྐབས་དང་། ཤིན་ཏུ་གནས་པའི་ཚུལ་གྱི་གནས་

ཡོངས་སུ་དག་པ་སྩོལ་ཅིག །མི་ཕྱེད་པའི་དགེ་བ་ཐོབ་པའི་ཞེས་འགྲོ་བ་ཐམས་ཅད་མཆིའོ། །ཚིག་སྙན་པ་བླ་མས་བདག་ལ་ཡི་གེ་དྲུག་པའི་རིག་སྔགས་ཆེན་མོ་སྩོལ་ཅིག །དེས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་
མངོན་པར་རྫོགས་པར་འཚང་རྒྱ་བར་བགྱིའོ། །ཆོས་ཀྱི་འཁོར་ལོ་རྣམ་པ་བཅུ་གཉིས་བསྐོར་བར་བགྱིའོ། །སེམས་ཅན་ཐམས་ཅད་འཁོར་བའི་སྡུག་བསྔལ་ལས་ཡོངས་སུ་ཐར་བར་བགྱིའོ། །སྔོན་མ་ཐོས་པའི་ཆོས་ཐོས་པར་བགྱིའོ། །ཡི་གེ་དྲུག་པའི་རིག་
སྔགས་ཆེན་མོའི་རྒྱལ་མོ་འཐོབ་པ་ཐོབ་པར་བགྱིའོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་བདག་ལ་སྩོལ་ཅིག །མགོན་དང་། སྐྱབས་དང་། རྟེན་དུ་གྱུར་ཅིག །གནས་མ་མཆིས་པ་རྣམས་ཀྱི་གནས་སུ་གྱུར་ཅིག །དེ་ནས་ཆོས་སྨྲ་བ་དེས་དེ་ལ་འདི་
སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ནི་དཀོན་པའི་ཚིག་སྟེ། འདི་ནི་རྡོ་རྗེའི་ཚིག་གོ། །འདི་ནི་རྡོ་རྗེ་མི་ཕྱེད་པའི་ཚིག་གོ། །བླ་ན་མེད་པའི་ཡེ་ཤེས་ཀྱི་ཚིག་གོ། །མི་ཟད་པའི་ཡེ་ཤེས་ཀྱི་ཚིག་གོ། །ལྟག་ན་མེད་པའི་ཚིག་གོ། །ཐར་པར་
འཇུག་པར་བྱེད་པའི་ཚིག་གོ། །དེ་བཞིན་གཤེགས་པའི་ཡེ་ཤེས་རྣམ་པར་དག་པའི་ཚིག་གོ། །འདོད་ཆགས་དང་། ཞེ་སྡང་དང་། གཏི་མུག་དང་། འཁོར་བའི་སྡུག་བསྔལ་ཡོངས་སུ་སྤོང་བའི་ཚིག་གོ། །ཐབས་མཁས་པ་ཐམས་ཅད་ཀྱི་ཚིག་གོ། །བསམ་གཏན་
དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་གཞོག་པའི་ཚིག་གོ། །ཆོས་ཐམས་ཅད་ལ་འཇུག་པར་བྱེད་པའི་ཚིག་གོ། །རྟག་ཏུ་ལྷ་རྣམས་འདོད་པར་བྱེད་པའི་ཚིག་གོ། །རིགས་ཀྱི་བུ་གང་ཐར་བར་འདོད་པ་གནས་སྣ་ཚོགས་སུ་རབ་ཏུ་བྱུང་བ། བགོ་བ་སྣ་ཚོགས་
སུ་རབ་ཏུ་འབྱུང་བ་འདི་ལྟ་སྟེ། དབང་པོའི་བགོ་བ་དང་། དཀར་པོའི་བགོ་བ་དང་། བསྟེན་པའི་བགོ་བ་སྟེ། ཉི་མ་བརྟགས་ནས་དབང་ཕྱུག་ཆེན་པོ་ལ་རབ་ཏུ་འབྱུང་ངོ་། །འཇུག་སྲེད་དང་། ནམ་མཁའ་ལྡིང་དང་། གཅེར་བུ་པ་དང་། རི་མི་དང་། གནས་དེ་དག་ཏུ་རབ་ཏུ་འབྱུང་སྟེ་

དེ་དག་ལ་ཡང་ཐར་པ་མེད་དོ། །མགོན་ཡང་མ་ཡིན། །བརྟུལ་ཞུགས་ཅན་ཡང་མ་ཡིན་ནོ། །ལྷ་མང་པོ་དང་། ཚངས་པ་དང་། འཇུག་སྲེད་དང་། དབང་ཕྱུག་ཆེན་པོ་དང་། བརྒྱ་བྱིན་ལྷའི་དབང་པོ་དང་། ཉི་མ་དང་། ཟླ་བ་དང་། རླུང་གི་ལྷ་དང་། ཆུའི་ལྷ་དང་། མེའི་
ལྷ་དང་། ཆོས་ཀྱི་རྒྱལ་པོ་གཤིན་རྗེ་དང་། རྒྱལ་པོ་ཆེན་པོ་བཞི་དག་རྟག་ཏུ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་སློང་ངོ་། །དེ་དག་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཇི་ལྟར་བསླང་བར་བགྱི། བཅོམ་ལྡན་འདས་ཇི་ལྟར་ན་ཡི་གེ་དྲུག་པའི་རིག་སྔགས་
ཀྱི་རྒྱལ་མོ་ཆེན་མོ་བདག་ཅག་གིས་ཐོབ་པར་འགྱུར། ཐར་པ་ལ་གཞོལ་བར་འགྱུར། །སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། དཔེར་ན་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དེ་བཞིན་གཤེགས་པ་ཐམས་ཅད་སྐྱེད་པར་གྲགས་པ་སྟེ། དེ་ཡང་ཐལ་མོ་སྦྱར་ནས་ཡི་གེ་དྲུག་པའི་
རིག་སྔགས་ཀྱི་རྒྱལ་མོ་ཆེན་མོ་ལ་ཕྱག་འཚལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་མང་པོ་དང་བཅས་པ་ལྟ་ཅི་སྨོས། རིགས་ཀྱི་བུ་འདི་ནི་འབྲས་ལྟ་བུར་སྙིང་པོར་གྱུར་པ་ཡིན་ཏེ། རིགས་ཀྱི་བུ་འདི་ལ་ཆུང་ཟད་
བཟླས་པས་ཀྱང་ཐེག་པ་ཆེན་པོའི་རྣམ་པ་མང་པོ་མདོ་དང་། དབྱངས་ཀྱིས་བསྙད་པ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། རྟོགས་པ་བརྗོད་པ་དང་། འདི་ལྟ་བུ་འདས་པ་དང་སྐྱེས་པའི་རབས་དང་། ཤིན་ཏུ་རྒྱས་པ་
དང་། ཆོས་རྨད་དུ་བྱུང་བ་དང་། གཏན་ལ་ཕབ་བ་བསྟན་པ་དང་། ཞི་བ་དང་། ཐར་པ་ཡང་ཐོབ་པར་འགྱུར་རོ། །མང་དུ་བཤད་ཅི་དགོས་ཏེ་གཞན་མ་བྱེད་ཅིག །སའི་ནང་དུ་གཏོགས་པ་ལ་སྙིང་པོར་འཛིན་པ་ཅི་ཡིན་ཞེ་ན། དེ་ལྟར་འབྲས་ནི་སྙིང་པོར་འཛིན་ཏེ། ཁྱེར་
ནས་བདག་གི་ཁྱིམ་དུ་སྣོད་རྣམས་ཡོངས་སུ་བཀང་སྟེ་འཇོག་གོ། །བཞག་ནས་ཉི་མའི་ཚུལ་བཞིན་དུ་ཉི་མ་ཚ་བ་ལ་སྐེམས་སོ། །བསྐམས་ནས་གཏུན་ལ་བརྡུངས་ཤིང་ཕུབ་མ་རྣམས་སེལ་ཏོ། །དེའི་སྙིང་པོ་ནི་འབྲས་རྨེའུ་ཡིན་ནོ་ཞེས་དེ་ལྟར་འཇོག་སྟེ། དེ་བཞིན་

དུ་རྣལ་འབྱོར་གཞན་དག་ཕུབ་མ་དང་འདྲའོ། །རྣལ་འབྱོར་ཐམས་ཅད་ཀྱི་ནང་ན་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་འདི་ནི་འབྲས་རྨེའུར་གྱུར་པའོ། །རིགས་ཀྱི་བུ་དེའི་ཕྱིར་བྱང་ཆུབ་སེམས་དཔའ་སྦྱིན་པའི་ཕ་རོལ་ཏུ་ཕྱིན་པའི་ཕྱིར།
ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཕྱིར། བཟོད་པའི་ཕ་རོལ་ཏུ་ཕྱིན་པའི་ཕྱིར། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཕྱིར། བསམ་གཏན་གྱི་ཕ་རོལ་ཏུ་ཕྱིན་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པའི་ཕྱིར་ཚོགས་འབྱིན་ཏོ། །རིགས་ཀྱི་བུ་བཟླས་པ་གཅིག་བྱས་པས་
ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ལ་ལ་ཞིག་གིས་ལག་པས་རེག་པས་རེག་ན་དེ་དག་ཀྱང་ཕྱིར་མི་ལྡོག་པའི་ས་འཐོབ་པར་འགྱུར་རོ། །རིགས་ཀྱི་བུ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་འདི་ཡང་དེ་ལྟ་བུ་སྟེ། དེའི་མིང་འཛིན་པ་ཡང་དཀོན་ནོ། །
མིང་ལན་ཅིག་བཟུང་ན་དེ་བཞིན་གཤེགས་པ་ཐམས་ཅད་ལ་ན་བཟའ་དང་། བཤོས་དང་། མལ་སྟན་དང་། ན་བའི་རྐྱེན་གྱི་སྨན་གྱི་ཡོ་བྱད་དང་། ཡོ་བྱད་ཐམས་ཅད་ཀྱིས་བཀུར་སྟིར་བྱས་པར་འགྱུར་རོ། །དེ་ནས་ཆོས་སྨྲ་བ་དེ་ལ་སྒྲིབ་པ་ཐམས་ཅད་རྣམ་པར་སལ་བས་འདི་
སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བདག་ལ་སྩོལ་ཅིག །དེ་ནས་ཆོས་ཀྱི་མཁན་པོ་དེ་སེམས་ཤིང་འདུག་པ་ལས་དེ་ལ་ནམ་མཁའ་ལས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ་། །དེ་ནས་ཆོས་སྨྲ་བ་དེ་སྒྲ་ག་ལས་
བྱུང་ཞེས་བསམས་པ་དང་། དེ་ནས་ཡང་ནམ་མཁའ་ལས་བྱང་ཆུབ་སེམས་དཔའ་འདིས་དཀའ་བ་སྤྱོད་པ་དུ་མ་ལ་བརྩོན་པར་བྱས་ཀྱིས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ་། །དེ་ནས་ཆོས་སྨྲ་བ་དེས་ནམ་མཁའ་ལ་བལྟས་པ་དང་། འདམ་
བུའི་མདའ་བཞིན་དུ་ཁ་དོག་དཀར་བ། རལ་བའི་ཅོད་པན་འཆང་བ། ཐམས་ཅད་མཁྱེན་པ་མགོ་ལ་བཞག་པ། ལག་པ་ན་མེ་ཏོག་པད་མ་བཟང་པོ་ཐོགས་པ། པད་མའི་དཔལ་གྱིས་བརྒྱན་པ་དེ་འདྲ་བའི་གཟུགས་མཐོང་ནས། བྱང་ཆུབ་སེམས་དཔའ་སྒྲིབ་པ་ཐམས་ཅད་

རྣམ་པར་སེལ་བ་ལ་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཁྱོད་ལ་སྦྱིན་པར་གནང་ངོ་ཞེས་སྨྲས་པ་དང་། གུས་ཤིང་ཐལ་མོ་སྦྱར་ཏེ་ལེན་པར་རྩོམ་མོ། །ཨོཾ་མ་ཎི་པད་མེ་ཧཱུཾ།
འདི་བྱིན་མ་ཐག་ཏུ་ས་རྣམ་པ་དྲུག་ཏུ་གཡོས་སོ། །ཏིང་ངེ་འཛིན་འདི་དག་ཀྱང་སྒྲིབ་པ་ཐམས་ཅད་རྣམ་པར་སེལ་བས་ཐོབ་སྟེ། མི་ཟད་པའི་ཆོས་ཉིད་ཅེས་བྱ་བའི་ཏིང་ངེ་འཛིན་དང་། བྱམས་པ་དང་། སྙིང་རྗེ་དང་། དགའ་བ་ཞེས་བྱ་བའི་ཏིང་ངེ་འཛིན་དང་། རྣལ་འབྱོར་སྤྱོད་
ཅེས་བྱ་བའི་ཏིང་ངེ་འཛིན་དང་། ཐར་པ་ལ་འཇུག་པར་འཇོག་ཅེས་བྱ་བའི་ཏིང་ངེ་འཛིན་དང་། ཐམས་ཅད་སྣང་བར་བྱེད་ཅེས་བྱ་བའི་ཏིང་ངེ་འཛིན་དང་། བཀོད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་དང་། ཆོས་འཛིན་པ་ཞེས་བྱ་བའི་ཏིང་ངེ་འཛིན་དང་། ཏིང་ངེ་འཛིན་དེ་
དག་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བླངས་མ་ཐག་ཏུ་མཁན་པོ་ལ་ཡོན་དུ་གླིང་བཞི་རིན་པོ་ཆེ་སྣ་བདུན་གྱིས་ཡོངས་སུ་གང་བ་འབུལ་བར་རྩོམ་པ་དང་། དེ་ནས་ཆོས་ཀྱི་མཁན་པོ་དེས་དེ་ལ་འདི་
སྐད་ཅེས་སྨྲས་སོ། །ཡི་གེ་གཅིག་གི་ཡོན་དུ་ཡང་མེད་ན་ཡི་གེ་དྲུག་པའི་རིག་སྔགས་ཆེན་མོའི་ལྟ་ཅི་སྨོས། རིགས་ཀྱི་བུ་ང་ནི་ཁྱོད་ལས་ལེན་པ་ཡང་མེད་དོ། །ཁྱོད་ཀྱང་བྱང་ཆུབ་སེམས་དཔར་གྱུར་པ་སྟེ། ཁྱོད་ནི་འཕགས་པ་ཡིན་གྱི་མ་འཕགས་པ་མ་ཡིན། རིགས་
ཀྱི་བུ་ཁྱོད་ནི་ངས་འདུལ་བ་ཡིན་ནོ། །དེས་དེ་ལ་མུ་ཏིག་གི་ཕྲེང་བ་རིན་བརྒྱ་སྟོང་རི་བ་ཕུལ་བ་དང་། དེས་སྨྲས་པ། རིགས་ཀྱི་བུ་ངའི་ཚིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕུལ་ཅིག །དེ་ནས་སྒྲིབ་
པ་ཐམས་ཅད་རྣམ་པར་སེལ་བས་ཆོས་སྨྲ་བ་དེའི་རྐང་པ་ལ་མགོ་བོས་ཕྱག་འཚལ་ཏེ་སོང་ངོ་། །རྙེད་པར་བྱ་བ་རྙེད་ཅིང་བསམ་པ་ཡོངས་སུ་རྫོགས་ནས་ཛེ་ཏའི་ཚལ་གྱི་གཙུག་ལག་ཁང་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཤཱཀྱ་ཐུབ་པའི་ཞབས་ལ་

ཕྱག་འཚལ་ནས་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་རྙེད་པ་རྙེད་དམ། བཅོམ་
ལྡན་འདས་དེ་བཞིན་ཏེ། ཇི་ལྟར་བཅོམ་ལྡན་འདས་ཀྱིས་མཁྱེན་པ་བཞིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་ཅུ་རྩ་བདུན་ཚོགས་ཏེ། དེ་བཞིན་གཤེགས་པ་དེ་དག་གིས་གཟུངས་སྔགས་འདི་གསུངས་སོ། །ན་མཿསབ་ཏཱ་ནཱཾ། སཾ་མྱག་སཾ་
བུད་དྷ་ཀོ་ཊཱཾ་ནཱཾ། ཏད་ཡ་ཐཱ། ཨོ་ཙ་ལེ་ཙུ་ལེ་ཙུ་ན་དེ་སྭཱཧཱ། གཟུངས་སྔགས་འདི་ནི་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་ཅུ་རྩ་བདུན་གྱིས་གསུངས་སོ། །བ་སྤུའི་ཁུང་བུ་དེ་འདས་ནས་ཉི་མའི་འོད་ཅེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་བྱེ་བ་
ཁྲག་ཁྲིག་བརྒྱ་སྟོང་དུ་མ་གནས་ཏེ། ཉི་མའི་འོད་ཅེས་བྱ་བའི་བ་སྤུའི་ཁུང་བུ་དེ་ན་གསེར་གྱི་རི་ཁྲི་ཡོད་དེ། རི་རེ་རེ་ཞིང་ཡང་རྩེ་མོ་ཉི་ཁྲི་ཉིས་སྟོང་ཡོད་ལ། རི་དེ་རེ་རེའི་ངོས་ནི་རིན་པོ་ཆེ་པད་མ་རཱ་གས་བརྒྱན། ངོས་རེ་རེ་ཞིང་ཡང་ལྷའི་ནོར་བུ་རིན་པོ་ཆེའི་སྐྱེད་མོས་ཚལ་ཤིན་
ཏུ་མཛེས་པ། ཤིན་ཏུ་དགའ་བར་བྱེད་པ་རྣམ་པ་སྣ་ཚོགས་དང་ལྷའི་རྫིང་བུས་བརྒྱན་པ། ཁང་པ་བརྩེགས་མ་བརྒྱ་ཕྲག་སྟོང་དུ་མ་ནི་ལྷའི་གསེར་དང་རིན་པོ་ཆེ་ལས་བྱས་ཤིང་མུ་ཏིག་དང་དར་གྱི་ལྡ་ལྡི་ནི་བྲེས། མུ་ཏིག་གི་སེ་མོ་དོ་བརྒྱ་དག་ནི་འཕྱང་ངོ་། །ཁང་པ་
བརྩེགས་མ་དེའི་ནང་ན་ཡིད་བཞིན་གྱི་ནོར་བུ་རིན་པོ་ཆེ་ཤ་རི་ད་ཀ་ཡོད་པས་ནི་བྱང་ཆུབ་སེམས་དཔའ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །དེའི་ཚེ་བྱང་ཆུབ་སེམས་དཔའ་དེ་དག་ཁང་པ་བརྩེགས་མ་དེར་འགྲོའོ། །དེར་སོང་ནས་ཀྱང་ཡི་གེ་དྲུག་པའི་
རིག་སྔགས་ཀྱང་རྗེས་སུ་དྲན་ནོ། །གང་གི་ཚེ་ན་རྗེས་སུ་དྲན་པ་དེའི་ཚེ་མྱ་ངན་ལས་འདའ་བ་རྟོགས་པར་འགྱུར་རོ། །མྱ་ངན་ལས་འདའ་བའི་ས་དེ་ལ་དེ་བཞིན་གཤེགས་པ་བདུན་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་

ཡང་མཐོང་ངོ་། །མཐོང་ནས་ཀྱང་སེམས་དད་པ་སྐྱེད་དོ། །བསྐྱེད་ནས་དེའི་ཚེ་བྱང་ཆུབ་སེམས་དཔའ་དེ་དག་ཁང་པ་བརྩེགས་མ་དེ་ནས་འབྱུང་ངོ་། །བྱུང་ནས་ཁ་ཅིག་ནི་འཆག་སར་འགྲོའོ། །ཁ་ཅིག་ནི་ཡིད་བཞིན་གྱི་ནོར་བུ་རིན་པོ་ཆེའི་སྐྱེད་མོས་ཚལ་དུ་འགྲོའོ། །
ཁ་ཅིག་ནི་རྫིང་བུ་དག་ཏུ་འགྲོའོ། །ཁ་ཅིག་ནི་ནོར་བུ་རིན་པོ་ཆེ་པད་མ་རཱ་གའི་རིའི་ངོས་ལ་འགྲོའོ། །དོང་ནས་སྐྱིལ་མོ་ཀྲུང་བཅས། ལུས་དྲང་པོར་བསྲང་སྟེ་དྲན་པ་མངོན་པར་བཞག་ནས་འཁོད་དོ། །རིགས་ཀྱི་བུ་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་དེ་ལྟ་བུ་
དག་གནས་སོ། །རིགས་ཀྱི་བུ་དེ་འདས་ནས་དབང་པོའི་རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་ཕྱིར་མི་ལྡོག་པ་བརྒྱ་ཕྲག་སྟོང་དུ་མ་གནས་ཏེ། དབང་པོའི་རྒྱལ་པོའི་བ་སྤུའི་ཁུང་བུ་དེ་ན་ལྷའི་གསེར་གྱི་རི་བརྒྱད་ཁྲི་ཡོད་དོ། །རི་དེ་དག་གི་དབུས་ན་ནོར་
བུ་རིན་པོ་ཆེ་མེ་ཏོག་པད་མ་ལྟར་སྣང་བ་ཞེས་བྱ་བ་ཞིག་ཡོད་དེ། གང་གི་ཚེ་བྱང་ཆུབ་སེམས་དཔའ་དེ་དག་སེམས་པར་གྱུར་པ་དེའི་ཚེ་དེ་དག་གི་བསམ་པ་གྲུབ་པར་འགྱུར་རོ། །དེ་ལྟར་བྱང་ཆུབ་སེམས་དཔའ་དེ་དག་རིའི་རྒྱལ་པོ་དེ་ལ་གནས་ཤིང་ཟས་དང་སྐོམ་གྱི་དྲན་པ་མི་སྒོམ་
མོ། །དེ་དག་འཁོར་བའི་སྡུག་བསྔལ་གྱིས་གཟིར་བར་ཡང་མི་འགྱུར་རོ། །དེ་དག་འཁོར་བའི་སྡུག་བསྔལ་གྱིས་གོས་པར་ཡང་མི་འགྱུར་རོ། །དུས་ཐམས་ཅད་དུ་མྱ་ངན་ལས་འདས་པ་ལ་སེམས་ཤིང་གནས་ཀྱི། དེ་དག་གི་ལུས་ལ་གཞན་སེམས་པ་མེད་
དོ། །རིགས་ཀྱི་བུ་དེ་འདས་ནས་སྨན་ཆེན་པོ་ཞེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་སེམས་ཐོག་མ་བསྐྱེད་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་གནས་སོ། །རིགས་ཀྱི་བུ་བ་སྤུའི་ཁུང་བུ་དེ་ན་རི་དགུ་ཁྲི་ཡོད་དེ། ལ་ལ་ནི་རྡོ་རྗེའི་རི། ལ་ལ་ནི་དངུལ་གྱིའོ། །
ལ་ལ་ནི་གསེར་གྱིའོ། །ལ་ལ་ནི་ནོར་བུ་རིན་པོ་ཆེ་ཨིན་དྲ་ནཱི་ལའིའོ། །ལ་ལ་ནི་པད་མ་རཱ་གའིའོ། །ལ་ལ་ནི་མ་ར་ཀ་ཏའིའོ། །ལ་ལ་ནི་ཤེལ་གྱིའོ། །རིའི་རྒྱལ་པོ་དེ་ལྟ་བུ་དག་ཡོད་དོ། །རི་རེ་རེ་ཞིང་ཡང་རྩེ་མོ་བརྒྱད་ཁྲི་ཡོད་དེ། རིན་པོ་ཆེ་སྣ་

ཚོགས་ཀྱིས་བརྒྱན་པ། ཤིན་ཏུ་མཛེས་པར་བྱས་པ་རྣམ་པ་སྣ་ཚོགས་པ་ཡིད་དུ་འོང་བ་དག་གོ། །རྩེ་མོ་དེ་དག་ལ་དྲི་ཟ་དག་གནས་ཏེ། དེ་དག་དུས་ཐམས་ཅད་དུ་བ་སྤུའི་ཁུང་བུ་ནས་སིལ་སྙན་འབྱུང་བ་འཛིན་ཏོ། །གང་སེམས་ཐོག་མ་བསྐྱེད་
པའི་བྱང་ཆུབ་སེམས་དཔའ་དེ་དག་ཀྱང་སྟོང་པ་ཉིད་དང་མཚན་མ་མེད་པ་ལ་སེམས་ཏེ། ཀྱེ་མའོ་སྡུག་བསྔལ་ལོ། །སྐྱེ་བ་དང་། རྒ་བ་དང་། ན་བ་དང་། འཆི་བ་སྡུག་བསྔལ་ལོ། །སྡུག་ཅིང་མཛའ་བ་དང་བྲལ་ཞིང་མི་སྡུག་ཅིང་མི་མཛའ་བ་དང་ཕྲད་པ་ནི་སྡུག་བསྔལ་
ལོ། །བསྟིར་མེད་པར་སྐྱེས་པ་ནི་སྡུག་བསྔལ་ལོ། །ཐིག་ནག་པོ་འདེབས་པར་སྐྱེས་པ་ནི་སྡུག་བསྔལ་ལོ། །སེམས་ཅན་ཡི་དགས་ཀྱི་གྲོང་ཁྱེར་དུ་སྐྱེས་པ་རྣམས་ནི་སྡུག་བསྔལ་ལོ་ཞེས་དེ་ལྟ་བུའི་ལུས་ལ་སྐྱོ་བ་དག་བསམས་ནས་དེའི་ཚེ་སྐྱིལ་མོ་ཀྲུང་བཅས་ཏེ།
ལུས་དྲང་པོར་བསྲངས་ནས་དྲན་པ་མངོན་པར་བཞག་སྟེ་རི་དེ་དག་ལ་གནས་སོ། །རིགས་ཀྱི་བུ་དེ་འདས་ནས་སྣ་ཚོགས་ཀྱི་རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་རང་སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་གནས་ཏེ་དེ་དག་ནི་འབར་བ་དང་། གདུང་བ་དང་། ཆར་
འབེབས་པ་དང་། གློག་གཏོང་བའི་ཆོ་འཕྲུལ་དག་བྱེད་དེ། བ་སྤུའི་ཁུང་བུ་དེ་ན་རིའི་རྒྱལ་པོ་བརྒྱ་ཕྲག་སྟོང་དག་ཡོད་དོ། །རིའི་རྒྱལ་པོ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་ལས་བྱས་པའོ། །རིའི་རྒྱལ་པོ་དེ་དག་ལ་ཤིང་དཔག་བསམ་རྣམ་པ་སྣ་
ཚོགས་པར་ཡོད་དེ། སྡོང་པོ་ནི་མུ་ཏིག་དམར་པོ་དང་། ལོ་མ་ནི་གསེར་དང་། དངུལ་ལས་བྱས་པའོ། །རིན་པོ་ཆེ་རྣམ་པ་དུ་མ་དང་རྒྱན་རྣམ་པ་སྣ་ཚོགས་པ་དག་ནི་འཕྱང་ངོ་། །ཅོད་པན་དང་། རྣ་ཆ་དང་། ཕྲེང་བའི་ཆུན་པོ་དང་། དཔུང་རྒྱན་དང་། སེ་
མོ་དོ་དང་། སེ་མོ་དོ་ཕྱེད་པ་དག་ཀྱང་རབ་ཏུ་འཕྱང་ངོ་། །ཡུལ་ཀ་ཤི་ཀ་ནས་བྱུང་བའི་གོས་དག་ཀྱང་རབ་ཏུ་འཕྱང་ངོ་། །གསེར་དང་དངུལ་གྱི་དྲིལ་བུ་དག་ཀྱང་སྒྲ་སིལ་སིལ་གྲག་སྟེ། དེ་འདྲ་བའི་རིའི་རྒྱལ་པོ་དེ་དག་ལ་རང་སངས་རྒྱས་དེ་དག་གནས་ཏེ།

མདོ་དང་། དབྱངས་ཀྱིས་བསྙད་པ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། རྟོགས་པ་བརྗོད་པ་དང་། དེ་ལྟ་བུ་འདས་པ་དང་། སྐྱེས་པའི་རབས་དང་། ཤིན་ཏུ་རྒྱས་པ་དང་། ཆོས་རྨད་དུ་བྱུང་བ་དང་།
ཆོས་གཏན་ལ་དབབ་པ་བསྟན་པའི་གཏམ་རྣམ་པ་དུ་མ་དག་ཕན་ཚུན་དུ་སྨྲ་སྟེ། དེའི་ཚེ་སྒྲིབ་པ་ཐམས་ཅད་རྣམ་པར་སེལ་བ་བ་སྤུའི་ཁུང་བུ་དེ་འདས་ནས་ཐམས་ཅད་ཀྱི་ཐ་མ་ན་བ་སྤུའི་ཁུང་བུ་རྒྱལ་མཚན་གྱི་རྒྱལ་པོ་ཞེས་བྱ་བ་ཞིག་ཡོད་དེ། བ་སྤུའི་ཁུང་བུ་དེ་ན་ཡང་དཔག་
ཚད་བརྒྱད་ཁྲི་བཞི་སྟོང་ཡོད་དོ། །བ་སྤུའི་ཁུང་བུ་དེ་ན་རི་བརྒྱད་ཁྲི་བཞི་སྟོང་ཡོད་དེ། རིན་པོ་ཆེ་སྣ་ཚོགས་ཀྱིས་བརྒྱན་པ་ཡིད་དུ་འོང་བ་རྣམ་པ་སྣ་ཚོགས་པའོ། །རིའི་རྒྱལ་པོ་དེ་ལ་ཤིང་དཔག་བསམ་བརྒྱ་ཕྲག་སྟོང་དུ་མ་ཡོད་དོ། །ཙན་དན་གྱི་ཤིང་བརྒྱ་ཕྲག་སྟོང་དུ་
མ་ཡོད་དོ། །བྱི་རུའི་ཤིང་བརྒྱ་ཕྲག་སྟོང་དུ་མ་དག་ཡོད་དོ། །བ་སྤུའི་ཁུང་བུ་དེ་ནས་ནི་རྡོ་རྗེ་ལས་བྱས་པའོ། །བ་སྤུའི་ཁུང་བུ་དེ་ན་གསེར་དང་རིན་པོ་ཆེ་ལས་བྱས་པའི་ཁང་པ་བརྩེགས་མ་དགུ་ཁྲི་དགུ་སྟོང་ཡོད་དེ། མུ་ཏིག་དང་དར་གྱི་ལྡ་ལྡི་ནི་བྲེས། མུ་ཏིག་
གི་སེ་མོ་དོ་ནི་དཔྱངས། དྲིལ་བུའི་ཕྲེང་བ་ནི་དཔྱངས། ཟླ་བ་བཞིན་དུ་བཟང་བའི་རིན་པོ་ཆེ་ས་ནི་སྣང་བར་བྱས་ཏེ། ཁང་པ་བརྩེགས་མ་དེ་ན་གསེར་གྱི་སྐས་རིན་པོ་ཆེ་ས་ཡོངས་སུ་སྤྲས་པ་རྣམ་པ་སྣ་ཚོགས་པ་དགའ་བར་བྱེད་པ་དག་ཀྱང་ཡོད་དོ། །ཁང་པ་བརྩེགས་
མ་དེ་དག་ན་དེ་བཞིན་གཤེགས་པའི་སྐུ་འཛམ་བུའི་གླིང་དུ་མངོན་པར་ཕྱོགས་ཤིང་ཆོས་འཆད་པ་ཡང་བཞུགས་ཏེ། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་བསྟན་པ་སྟོན་པར་མཛད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། ཚུལ་ཁྲིམས་
ཀྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། བཟོད་པའི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། བསམ་གཏན་གྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་

པ་སྟོན་པར་མཛད་དེ། དེ་ལྟར་དེ་དག་འཛམ་བུའི་གླིང་ན་གནས་པའི་མི་རྣམས་ལ་ཆོས་རྣམ་པ་སྣ་ཚོགས་དག་དུས་དུས་སུ་འཆད་དོ། །དེ་ལྟར་རིགས་ཀྱི་བུ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་
སྤུའི་ཁུང་བུ་དེ་དག་ཛེ་ཏའི་ཚལ་གྱི་གཙུག་ལག་ཁང་དུ་ཕྱིན་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། མི་དང་། མི་མ་ཡིན་པ་དང་། དབང་ཕྱུག་ཆེན་པོ་དང་། མཐུ་བོ་ཆེ་ལ་སོགས་ཏེ་ལྷའི་བུ་
ཚོགས་པ་དག་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་གིས་མཐོང་ངོ་། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བ་སྤུའི་ཁུང་བུ་གཞན་དག་མཆིས་སམ་མ་
མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་འདས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་གཡས་པའི་མཐེ་བོ་དེ་ལས་མཚོ་ཆེན་པོ་བཞི་འབྱུང་སྟེ་གཏིང་དཔོག་མི་ནུས་སོ། །གང་གི་ཚེ་ན་རྐང་པ་
གཡས་པའི་མཐེ་བོ་ལས་ཆུ་བྱུང་བ་དེའི་ཚེ་རྟ་རྒོད་མའི་གདོང་ལྟ་བུར་འབབ་སྟེ། དེའི་ཚེ་ཐལ་བའི་ཕུང་པོར་འགྲོའོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བྱིན་གྱིས་བརླབས་ནི་དེ་འདྲའོ། །དེ་ནས་བཅོམ་
ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བ་སྤུའི་ཁུང་བུ་དེ་ཡང་མ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་མེད་པ་ཡིན་ནོ། །དེ་ནས་བཅོམ་ལྡན་འདས་
ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་མཆིའམ། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་

ཀྱི་དབང་པོ་ནི་ཛེ་ཏའི་ཚལ་གྱི་གཙུག་ལག་ཁང་འདི་ཉིད་དུ་ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། དབང་ཕྱུག་ཆེན་པོ་རྒྱུ་དང་བཅས་ཏེ་ལུང་བསྟན་པའི་ཕྱིར་འོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་
གཟིགས་ཀྱི་དབང་པོས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་གྱི་ཁ་དོག་དང་། དངུལ་གྱི་ཁ་དོག་བཏང་ནས་ཁ་དོག་དེ་དག་ཛེ་ཏའི་ཚལ་གྱི་གཙུག་ལག་ཁང་དུ་སོང་ངོ་། །སོང་ནས་བཅོམ་ལྡན་འདས་ལ་ལན་གསུམ་བསྐོར་
ཏེ། བསྟིར་མེད་པའི་སེམས་ཅན་དམྱལ་བ་ཆེན་པོར་སོང་ངོ་། །སོང་ནས་བསྟིར་མེད་པའི་སེམས་ཅན་དམྱལ་བ་ཆེན་པོ་བསིལ་བར་གྱུར་ཏོ། །དེའི་ཚེ་ཛེ་ཏའི་ཚལ་གྱི་གཙུག་ལག་ཁང་དུ་ལྟས་བཟང་པོ་བྱུང་བར་གྱུར་པ་ཛེ་ཏའི་ཚལ་གྱི་གཙུག་ལག་ཁང་དེ་ལྷའི་གསེར་
རིན་པོ་ཆེར་སྣང་བར་གྱུར་ཏེ། ཛེ་ཏའི་ཚལ་གྱི་གཙུག་ལག་ཁང་དེ་ལྟར་སྣང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བདེ་བ་ཅན་གྱི་འཇིག་རྟེན་གྱི་ཁམས་ནས་བྱུང་སྟེ། ཛེ་ཏའི་ཚལ་གྱི་གཙུག་ལག་ཁང་ག་ལ་བ་དེ་ལོགས་
སུ་སོང་ནས་རིམ་གྱིས་ཛེ་ཏའི་ཚལ་གྱི་གཙུག་ལག་ཁང་ག་ལ་བ་དེར་ཕྱིན་ཏོ། །དེ་ནས་ཛེ་ཏའི་ཚལ་གྱི་གཙུག་ལག་ཁང་དུ་སོང་བ་དང་། དེའི་ཚེ་བཅོམ་ལྡན་འདས་ཀྱིས་བྱ་ཀ་ལ་པིང་ཀའི་དབྱངས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ངལ་ལམ། ཁྱོད་ཉོན་མོངས་སམ།
ཁྱོད་ཀྱིས་སེམས་ཅན་ཡོངས་སུ་སྨིན་པར་བྱས་སམ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་ཏེ། བདག་
གིས་དེ་ལྟ་བུའི་ལས་ཀྱིས་བསྒྲུབས་སོ། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་གང་ཁྱོད་ཀྱིས་དེ་འདྲ་བའི་ལས་ཀྱིས་བསྒྲུབས་པ་ལེགས་སོ་ལེགས་སོ། །ཞེས་བྱ་བ་བྱིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་

བཅོམ་ལྡན་འདས་ལ་མེ་ཏོག་པད་མ་ཕུལ་ནས། བཅོམ་ལྡན་འདས་ལ་དེ་བཞིན་གཤེགས་པ་སྣང་བ་མཐའ་ཡས་པས་མེ་ཏོག་པད་མ་འདི་དག་གསོལ་ཏེ་བསྙུང་བ་མ་མཆིས་སམ། འོ་བརྒྱལ་བ་མ་མཆིས་སམ། བཞེངས་པ་ཡང་ངམ། བདེ་བ་
ལ་རེག་པར་གནས་སམ་ཞེས་ཀྱང་གསུང་ངོ་ཞེས་སྨྲས་ནས། བཅོམ་ལྡན་འདས་ཀྱིས་བཞེས་ཏེ་གཡོན་ཕྱོགས་སུ་བཞག་གོ། །དེ་ནས་ལྷའི་བུ་དབང་ཕྱུག་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་
འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལུང་སྟོན་པའི་བཤད་པ་ཐོབ་པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོང་ཤིག་དང་ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་
པོས་ལུང་སྟོན་པར་འགྱུར་རོ། །དེ་ནས་ལྷའི་བུ་དབང་ཕྱུག་ཆེན་པོ་སོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་འཚལ་ནས་སྤྱན་རས་གཟིགས་ཀྱི་དབང་ཕྱུག་ཆེན་པོ་ཆོས་འཛིན་པ། པད་མའི་ཞལ། པད་
མ་ལ་དགྱེས་པ། ཕྱག་ན་མེ་ཏོག་པད་མ་བཟང་པོ་མངའ་བ། པད་མའི་དཔལ་དང་ལྡན་པ། ཡོངས་སུ་བསྐོར་བ་འགྲོ་བ་དབུགས་འབྱིན་པར་མཛད་པ། སའི་སྤྱན་མཆོག་མཛད་པ། སིམ་པར་མཛད་པ་ལ་ཕྱག་འཚལ་ལོ་ཞེས་ལྷའི་བུ་དབང་ཕྱུག་ཆེན་པོས་བྱང་
ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་དེ་ལྟར་བསྟོད་ནས་ཁ་རོག་སྟེ་འདུག་པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དབང་ཕྱུག་ཆེན་པོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་
བུ་ཁྱོད་ཅིའི་ཕྱིར་ཁ་རོག་སྟེ་འདུག །དེ་ནས་ལྷའི་བུ་དབང་ཕྱུག་ཆེན་པོས་འདི་སྐད་ཅེས་སྨྲས་སོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་སྩལ་དུ་གསོལ། །དེ་ནས་སྤྱན་རས་གཟིགས་ཀྱིས་གསུངས་པ། རིགས་ཀྱི་བུ་ཁྱོད་འཇིག་རྟེན་

གྱི་ཁམས་ཕྱེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་
རྒྱས་བཅོམ་ལྡན་འདས་དབང་ཕྱུག་ཅེས་བྱ་བར་འགྱུར་རོ། །དེ་ནས་ལྷ་མོ་ཨུ་མ་སོང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་མགོ་བོས་ཕྱག་འཚལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
ཀྱི་དབང་པོ་ལ་བསྟོད་པར་རྩོམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཆེན་པོ་སྲོག་སྦྱིན་པར་མཛད་པ། སའི་སྤྱན་མཆོག་མཛད་པ། པད་མ་བཟང་པོ་ཕྱག་ན་མངའ་བ། པད་མའི་དཔལ་དང་ལྡན་པ། ཡོངས་སུ་བསྐོར་བ། མྱ་
ངན་ལས་འདའ་བའི་ས་སྟོན་པ། ལེགས་པར་དགོངས་པར་མཛད་པ། ཆོས་འཛིན་པ་ལ་ཕྱག་འཚལ་ལོ་ཞེས་དེ་ལྟར་ལྷ་མོ་ཨུ་མས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བསྟོད་དེ་གསོལ་པ། བུད་མེད་ཀྱི་ལུས་སྨད་པ་ལས་བདག་
ཡོངས་སུ་ཐར་བར་མཛད་དུ་གསོལ། མངལ་ན་གནས་ཤིང་ཤ་མ་གང་བའི་སྡུག་བསྔལ་བ་དང་རྟག་ཏུ་འཛིན་པ་ལས་བདག་ཡོངས་སུ་ཐར་བར་མཛད་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་ལ་འདི་སྐད་ཅེས་
སྨྲས་སོ། །སྲིང་མོ་ཁྱོད་འཇིག་རྟེན་གྱི་ཁམས་གངས་ཀྱི་རིའི་གཡས་ཕྱོགས་ཀྱི་ངོས་སུ་ཨུ་མའི་དབང་ཕྱུག་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་
མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་འབྱུང་བར་འགྱུར་རོ། །དེ་ནས་ལྷ་མོ་ཨུ་མས་ལུང་བསྟན་པ་ཐོབ་བོ། །ལྟོས་ཤིག་སྒྲིབ་པ་ཐམས་ཅད་རྣམ་པར་སེལ་བ་བྱང་

ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། དབང་ཕྱུག་ཆེན་པོའི་ལེའུ་འདི་ཡང་བཤད་དོ། །དེ་ནས་བཅོམ་ལྡན་འདས་ལ་སྒྲིབ་
པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་སྤྱན་རས་གཟིགས་ཀྱི་དབང་པོ་མཆིས་ཏེ། ལོང་བ་དག་གིས་ནི་མིག་ཐོབ་བོ། །དེ་རིང་བདག་ནི་ཚེའི་འབྲས་བུ་མཆིས་པར་གྱུར་ཏོ། །བདག་དེ་རིང་ནི་བསམ་པ་བཞིན་དུ་གྲུབ་བོ། །
བདག་དེ་རིང་ནི་བསམ་པ་ཡོངས་སུ་རྫོགས་སོ། །བདག་དེ་རིང་ནི་བྱང་ཆུབ་ཀྱི་ལམ་ལ་བར་ཆད་མ་མཆིས་པར་གྱུར་ཏོ། །ལེགས་པར་དགོངས་པ་ཆོས་ཀྱི་སྐུ་མྱ་ངན་ལས་འདས་པ་སྟོན་ཏོ། །དེ་ནས་བཅོམ་ལྡན་འདས་ལ་ཡང་སྒྲིབ་པ་ཐམས་ཅད་རྣམ་པར་སེལ་བས་འདི་
སྐད་ཅེས་གསོལ་ཏོ། །བཅོམ་ལྡན་འདས་དེ་རིང་བདག་ལ་སྤྱན་རས་གཟིགས་ཀྱི་དབང་པོའི་ཡོན་ཏན་གྱི་བྱེ་བྲག་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། དཔེར་ན་རིའི་རྒྱལ་པོ་ཁོར་ཡུག་དང་། ཁོར་
ཡུག་ཆེན་པོ་དང་། རིའི་རྒྱལ་པོ་མུ་ཙི་ལིན་ད་དང་། རིའི་རྒྱལ་པོ་ནག་པོ་དང་། ནག་པོ་ཆེན་པོ་དང་། རིའི་རྒྱལ་པོ་གསུས་ཤོལ་དང་། རིའི་རྒྱལ་པོ་མི་སྟོན་པ་དང་། རིའི་རྒྱལ་པོ་ཐམས་ཅད་དུ་གཏོགས་པ་དང་། རིའི་རྒྱལ་པོ་འབར་བའི་ཁ་དང་། རིའི་རྒྱལ་པོ་རྩེ་མོ་
བརྒྱ་པ་དང་། རིའི་རྒྱལ་པོ་ཁང་པ་དང་། རིའི་རྒྱལ་པོ་ནོར་བུ་རིན་པོ་ཆེ་ཆེན་པོ་དང་། རིའི་རྒྱལ་པོ་སྟོན་པ་དང་། རིའི་རྒྱལ་པོ་དུས་མ་ཡིན་པར་སྟོན་པ་དང་། རིའི་རྒྱལ་པོ་དེ་དག་སྲང་གཅིག་ལ་བཏབ་ན། རིགས་ཀྱི་བུ་ངས་རིའི་རྒྱལ་པོ་དེ་དག་སྲང་འདི་སྙེད་ཅིག་གོ་ཞེས་
སམ། སྲང་བརྒྱའོ་ཞེས་སམ། སྲང་སྟོང་ངོ་ཞེས་སམ། བྱེ་བ་ཁྲག་ཁྲིག་བརྒྱ་ཕྲག་སྟོང་ཞེས་སམ། གྲངས་སུ་ཡང་། ཆར་ཡང་། བགྲང་བར་ཡང་ནུས་ཀྱི། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་བསོད་ནམས་ཀྱི་ཕུང་པོ་ནི་

བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་རྡུལ་ཕྲ་རབ་ཀྱི་ཚད་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་
ན་རྒྱ་མཚོ་མཆིང་རྣམ་ཆེན་པོ་ནི་ངས་ཐིགས་པ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་ཤིང་ཤིར་ཥའི་ཚལ་ནི་ངས་འདབ་
མ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། དཔེར་ན་རི་རབ་རིའི་རྒྱལ་པོ་ནི་གྲོ་གའི་ཕུང་པོར་གྱུར། རྒྱ་
མཚོ་མཆིང་རྣམ་ཆེན་པོ་ནི་སྣག་ཚར་གྱུར། གླིང་ཆེན་པོ་བཞི་ན་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་ནི་ཡི་གེ་པར་གྱུར་ཏེ། རིའི་རྒྱལ་པོ་མཐའ་ཡས་མུ་མེད་པ་ཡི་གེར་བྲིས་ཀྱང་ཡི་གེ་འབྲུམ་བུ་རེ་རེ་ནས་བགྲང་ནུས་ཀྱི། བྱང་
ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་ཕྲག་བཅུ་
གཉིས་དང་མཉམ་པའི་ན་བཟའ་དང་། བཤོས་དང་། མལ་སྟན་དང་། ན་བའི་རྐྱེན་གྱི་སྨན་གྱི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་དེ་དག་ལ་བསྙེན་བཀུར་བྱས་ན། དེ་བཞིན་གཤེགས་པ་དེ་དག་ལ་བསྙེན་བཀུར་བྱས་པའི་བསོད་ནམས་ཀྱི་ཕུང་པོ་དེ་ནི་
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྐྲའི་ཉག་མ་གཅིག་གི་རྩེ་མོ་ལ་གནས་པའི་བསོད་ནམས་དང་མཉམ་མོ། །སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་

རས་གཟིགས་ཀྱི་དབང་པོ་ནི་ཏིང་ངེ་འཛིན་བརྒྱ་ཕྲག་དུ་མ་དང་ལྡན་ཏེ། འདི་ལྟ་སྟེ། རབ་ཏུ་འཇོམས་ཞེས་བྱ་བའི་ཏིང་ངེ་འཛིན་དང་། རྒྱན་པར་བྱེད་ཅེས་བྱ་བའི་ཏིང་ངེ་འཛིན་དང་། རྒྱན་པར་མི་བྱེད་ཅེས་བྱ་བའི་ཏིང་ངེ་འཛིན་དང་། གློག་གི་སྤྱན་ཞེས་བྱ་
བའི་ཏིང་ངེ་འཛིན་དང་། བཟོད་པར་བྱེད་ཅེས་བྱ་བའི་ཏིང་ངེ་འཛིན་དང་། གཟི་ཅན་ཆེན་པོ་ཞེས་བྱ་བའི་ཏིང་ངེ་འཛིན་དང་། རྣམ་པར་བྱེད་ཅེས་བྱ་བའི་ཏིང་ངེ་འཛིན་དང་། རྡོ་རྗེའི་ཕྲེང་བ་ཞེས་བྱ་བའི་ཏིང་ངེ་འཛིན་དང་། དམ་པ་སྦྱིན་བྱེད་ཅེས་བྱ་བའི་ཏིང་ངེ་འཛིན་དང་། མཐུ་བརྒྱ་པ་
ཞེས་བྱ་བའི་ཏིང་ངེ་འཛིན་དང་། བཀོད་པ་མཐའ་ཡས་པ་ཞེས་བྱ་བའི་ཏིང་ངེ་འཛིན་དང་། སྤོབས་པའི་ཕུང་པོ་ཞེས་བྱ་བའི་ཏིང་ངེ་འཛིན་དང་། རྒྱལ་པོའི་དབང་པོ་ཞེས་བྱ་བའི་ཏིང་ངེ་འཛིན་དང་། རྣམ་པ་མང་པོ་ཞེས་བྱ་བའི་ཏིང་ངེ་འཛིན་དང་། རྡོ་རྗེའི་སྒོ་ཞེས་བྱ་བའི་ཏིང་ངེ་འཛིན་
དང་། རྟག་ཏུ་དམ་པ་སྦྱིན་བྱེད་ཅེས་བྱ་བའི་ཏིང་ངེ་འཛིན་དང་། དབང་པོ་ཡོངས་སུ་ཐར་བྱེད་ཅེས་བྱ་བའི་ཏིང་ངེ་འཛིན་དང་། ཞེ་སྡང་ཡོངས་སུ་ཐར་བྱེད་ཅེས་བྱ་བའི་ཏིང་ངེ་འཛིན་དང་། དབང་པོ་དམ་པའི་མིག་ཅེས་བྱ་བའི་ཏིང་ངེ་འཛིན་དང་། ཉིན་བྱེད་དམ་པའི་མིག་ཅེས་
བྱ་བའི་ཏིང་ངེ་འཛིན་དང་། ཆོས་ལ་མངོན་པ་ཞེས་བྱ་བའི་ཏིང་ངེ་འཛིན་དང་། རྡོ་རྗེའི་མངལ་ཞེས་བྱ་བའི་ཏིང་ངེ་འཛིན་དང་། ཤིན་ཏུ་སྟོན་པ་ཞེས་བྱ་བའི་ཏིང་ངེ་འཛིན་དང་། མྱ་ངན་འདའ་བྱེད་ཅེས་བྱ་བའི་ཏིང་ངེ་འཛིན་དང་། འོད་ཟེར་མཐའ་ཡས་སྒྲུབ་ཅེས་བྱ་བའི་ཏིང་ངེ་
འཛིན་དང་། རྣལ་འབྱོར་ཅེས་བྱ་བའི་ཏིང་ངེ་འཛིན་དང་། འཐོར་བ་ཞེས་བྱ་བའི་ཏིང་ངེ་འཛིན་དང་། འཛམ་བུའི་གླིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང་། སངས་རྒྱས་ཀྱི་ཞིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང་། བྱ་བ་བྱས་པ་ལ་མངོན་པ་ཞེས་བྱ་
བའི་ཏིང་ངེ་འཛིན་དང་། སྐྱེ་དགུའི་གནས་ཞེས་བྱ་བའི་ཏིང་ངེ་འཛིན་དང་། མི་ཟད་པར་བྱེད་ཅེས་བྱ་བའི་ཏིང་ངེ་འཛིན་དང་། བསྟིར་མེད་སྐེམས་ཞེས་བྱ་བའི་ཏིང་ངེ་འཛིན་དང་། རྒྱ་མཚོ་ལྟར་ཟབ་པ་ཞེས་བྱ་བའི་ཏིང་ངེ་འཛིན་དང་། འཁོར་བརྒྱ་པ་ཞེས་བྱ་བའི་ཏིང་ངེ་འཛིན་དང་། རིགས་

ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་དེ་དག་དང་ལྡན་ནོ། །སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། ལོག་པར་དད་སེལ་ཅེས་བྱ་བའི་དེ་བཞིན་གཤེགས་པ་རིག་པ་དང་རྐང་པར་ལྡན་པ། བདེ་བར་གཤེགས་
པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་དེའི་ཚེ་དེའི་དུས་ན་ང་བྱང་ཆུབ་སེམས་དཔར་གྱུར་ཏེ། དེའི་ཚེ་དེ་བཞིན་གཤེགས་པ་དེའི་སྤྱན་སྔར་བྱང་ཆུབ་སེམས་
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་དེ་ལྟ་བུ་ངས་ཐོས་སོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དང་འདི་འདྲ་བར་ཏིང་ངེ་འཛིན་གྱིས་འགྱེས་པ་ཡང་ངས་མཐོང་ངོ་། །གང་གི་ཚེ་ན་ཀུན་དུ་བཟང་པོ་རྡོ་རྗེ་གྱེན་དུ་འཕགས་
པའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཐོར་བ་ཞེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ཟླ་བ་དམ་པའི་མིག་ཅེས་བྱ་བའི་ཏིང་ངེ་
འཛིན་ལ་ཞུགས་པ་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཉི་མ་དམ་པའི་མིག་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་བྱུགས་པ་ཞེས་བྱ་བའི་ཏིང་ངེ་
འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནམ་མཁའ་མཛོད་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དབང་པོ་རྣམ་པར་བྱེད་ཅེས་བྱ་བའི་ཏིང་