Kinh tạng Tây Tạng (Kangyur Đại Học) — 045_མདོ་སྡེ།_ཀ

ས་སོ། །སྐུ་ཚེའི་ཚད་ནི་ལོ་བརྒྱད་ཁྲི་བཞི་སྟོང་ངོ་། །དམ་པའི་ཆོས་ཀྱང་ལོ་བརྒྱད་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྐྱེ་བོ་དགའ་བར་མཛད་པ་སྐྱེ་བའི་ཡུལ་ནི་འབྱོར་པའི་མཛོད་
ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བདུན་སྟོང་ངོ་། །ཡབ་ནི་ཀླུས་བྱིན་ཞེས་བྱའོ། །ཡུམ་ནི་མཐོང་ལེགས་ཞེས་བྱའོ། །སྲས་ནི་དྲི་མེད་བློ་ཞེས་བྱའོ། །རིམ་གྲོ་པ་ནི་མཛེས་གྲུབ་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡེ་ཤེས་འོད་ཟེར་ཞེས་བྱའོ། །རྫུ་འཕྲུལ་ཅན་
རྣམས་ཀྱི་མཆོག་ནི་རིན་ཆེན་རྣམ་པར་གྲགས་ཞེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་ས་ཡ་ཕྲག་བཞི་བཞིའོ། །སྐུ་ཚེའི་ཚད་ནི་ལོ་བཞི་ཁྲིའོ། །དམ་པའི་ཆོས་ནི་ལོ་བཞི་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ནི་དཔག་ཚད་བཅུ་གཅིག་
པ་སྟེ་གཅིག་ཏུ་ཟད་དོ།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ཉི་ཤུ་གཅིག་པ། དེ་བཞིན་གཤེགས་པ་རྨ་བྱའི་ང་རོ་སྐྱེ་བའི་ཡུལ་ནི་སྒྲ་དབྱངས་སྙན་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་གླིང་ཆེན་པོ་བཞི་པའི་འཇིག་རྟེན་གྱི་
ཁམས་བཅུ་དྲུག་ཙམ་མོ། །ཡབ་ནི་བསོད་ནམས་མཐའ་ཡས་འོད་ཅེས་བྱའོ། །ཡུམ་ནི་བསོད་ནམས་ཀྱི་ཚོགས་ཀྱི་གཟི་བརྗིད་ཅེས་བྱའོ། །སྲས་ནི་མཐུ་རྩལ་སྤྱོད་པའི་རྒྱལ་པོ་ཞེས་བྱའོ། །རིམ་གྲོ་པ་ནི་མཆོད་མཐོང་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བཀོད་པ་མཛེས་པར་སྒྲུབ་

པར་སེམས་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཏོག་མཆོག་འོད་ཅེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་བཞི་བཞིའོ། །སྐུ་ཚེའི་ཚད་ནི་ལོ་སུམ་ཁྲིའོ། །དམ་པའི་ཆོས་ནི་ལོ་སུམ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་
གཤེགས་པ་མ་ཞུམ་པ་སྐྱེ་བའི་ཡུལ་ནི་ཟིལ་གྱིས་མི་ནོན་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སྟོང་ངོ་། །ཡབ་ནི་མིའི་ཟླ་བ་ཞེས་བྱའོ། །ཡུམ་ནི་འོད་བཟངས་ཞེས་བྱའོ། །སྲས་ནི་ཕྱོགས་ལྟ་ཞེས་བྱའོ། །རིམ་གྲོ་པ་ནི་དོན་གྱི་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ལྷས་མཆོད་
ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཐའ་ཡས་ཏོག་ཅེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་བརྒྱད་ཁྲི་བཞི་སྟོང་ངོ་། །དམ་པའི་ཆོས་ཀྱང་ལོ་བརྒྱད་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །
མཆོད་རྟེན་ནི་དཔག་ཚད་བཅུ་པ་སྟེ་གཅིག་ཏུ་ཟད་དོ། །དེ་བཞིན་གཤེགས་པ་སྲིད་པའི་སྲེད་པ་དྲི་མ་སྤངས་པ་སྐྱེ་བའི་ཡུལ་ནི་རིན་ཆེན་འོད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་སྟོང་དྲུག་བརྒྱའོ། །ཡབ་ནི་རིན་པོ་ཆེའི་ཕུང་པོ་ཞེས་བྱའོ། །ཡུམ་ནི་གཟི་བརྗིད་གསལ་བ་ཞེས་བྱའོ། །
སྲས་ནི་ཟླ་ལེགས་ཞེས་བྱའོ། །རིམ་གྲོ་པ་ནི་རིན་ཆེན་མཆོག་ཏུ་གྲགས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གཡོ་བ་མེད་པའི་འགྲོས་ཀྱི་གཟི་བརྗིད་གནས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྷ་དད་སེམས་ཞེས་བྱའོ། །འདུས་པ་ནི་ལན་ཐེར་འབུམ་སྟེ། ཐམས་ཅད་ལ་ཡང་
དུང་ཕྱུར་ཕྲག་བཞི་བཞིའོ། །སྐུ་ཚེའི་ཚད་ནི་ལོ་དགུ་ཁྲིའོ། །དམ་པའི་ཆོས་ཀྱང་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྤྱོད་པའི་སྟེགས་སྐྱེ་བའི་ཡུལ་ནི་དགྲ་བཅོམ་བཀོད་ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་ཁྲིའོ། །ཡབ་ནི་མཛེས་
པ་ཞེས་བྱའོ། །ཡུམ་ནི་ཉི་མའི་སྙིང་པོ་ཞེས་བྱའོ། །སྲས་ནི་ཟླ་མཆོག་ཅེས་བྱའོ། །རིམ་གྲོ་པ་ནི་བཀོད་པ་ཡིད་འོང་མཛེས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐོང་བ་གཡོ་བ་མེད་པར་གནས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་རྣམ་པར་གྲོལ་བས་སྤོང་བའི་གཟི་བརྗིད་རྒྱལ་པོ་ཞེས་བྱའོ། །

འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་དགུ་བཅུའོ། །སྐུ་ཚེའི་ཚད་ནི་ལོ་དགུ་ཁྲིའོ། །དམ་པའི་ཆོས་ཀྱང་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ནི་དཔག་ཚད་བཅུ་དྲུག་པ་སྟེ་གཅིག་ཏུ་ཟད་དོ། །དེ་བཞིན་གཤེགས་པ་
ལྷ་མང་པོས་སྙན་པར་གྲགས་པ་སྐྱེ་བའི་ཡུལ་ནི་གྲགས་པ་མཐའ་ཡས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཅུའོ། །ཡབ་ནི་ལྷ་དགའ་ཕྲུག་གུ་ཞེས་བྱའོ། །ཡུམ་ནི་པད་མ་དཀར་པོའི་སྤོས་ཞེས་བྱའོ། །སྲས་ནི་སེང་གེའི་སྟབས་གནས་གཟི་བརྗིད་ཅེས་བྱའོ། །རིམ་གྲོ་པ་ནི་ཟླ་དཔལ་བླ་མ་
ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རྒྱན་བཀོད་པའི་རྒྱལ་པོ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བདེ་གནས་ཕྲུག་གུ་སྡུག་ཅེས་བྱའོ། །འདུས་པ་ནི་ལན་ལྔ་བཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་ལྔ་བཅུ་རྩ་དྲུག་དྲུག་གོ། །སྐུ་ཚེའི་ཚད་ནི་ལོ་དྲུག་ཁྲིའོ། །དམ་པའི་ཆོས་ཀྱང་ལོ་དྲུག་
ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རིན་པོ་ཆེའི་སྟབས་སྐྱེ་བའི་ཡུལ་ནི་རིན་པོ་ཆེའི་འོད་ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་འབུམ་མོ། །ཡབ་ནི་ཡུལ་འཁོར་དྲི་མ་མེད་ཅེས་བྱའོ། །ཡུམ་ནི་གཙུག་ན་རིན་པོ་ཆེ་ཞེས་བྱའོ། །སྲས་ནི་ཆོས་འོད་ཅེས་
བྱའོ། །རིམ་གྲོ་པ་ནི་སྒྲ་དབྱངས་མཆོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འཇིག་རྟེན་དགའ་བས་མཆོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྐྱོན་མེད་རིན་ཆེན་ཞེས་བྱའོ། །འདུས་པ་ནི་ལན་བཞི་བཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་གསུམ་གསུམ་མོ། །སྐུ་ཚེའི་ཚད་ནི་ལོ་སུམ་
ཁྲིའོ། །དམ་པའི་ཆོས་ཀྱང་ལོ་སུམ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ནི་དཔག་ཚད་བཅུ་བཞི་པ་སྟེ་གཅིག་ཏུ་ཟད་དོ། །དེ་བཞིན་གཤེགས་པ་ཕྱག་ན་པད་མ་བསྣམས་པ་སྐྱེ་བའི་ཡུལ་ནི་རིན་པོ་ཆེ་བཀོད་པ་མཐའ་ཡས་པ་ཞེས་བྱའོ། །རིགས་ནི་རྒྱལ་རིགས་སོ། །
འོད་ནི་གླིང་ཆེན་པོ་བཞི་པའི་འཇིག་རྟེན་གྱི་ཁམས་ལྔ་བཅུ་རྩ་བཞི་ཙམ་མོ། །ཡབ་ནི་གནས་པ་ལས་འདས་པ་ཞེས་བྱའོ། །ཡུམ་ནི་སྐྱོན་མེད་སེམས་ཞེས་བྱའོ། །སྲས་ནི་གཟི་བརྗིད་ཉི་མ་གསལ་ཞེས་བྱའོ། །རིམ་གྲོ་པ་ནི་དགའ་བ་སྣ་ཚོགས་ལ་གནས་པར་གྲགས་པ་ཞེས་བྱའོ། །ཤེས་རབ་ཅན་རྣམས་ཀྱི་

མཆོག་ནི་སེང་གེའི་ང་རོ་སྒྲ་སྒྲོགས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཐེག་མཆོག་དགའ་ཞེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་ཐེར་འབུམ་ཐེར་འབུམ་མོ། །སྐུ་ཚེའི་ཚད་ནི་ལོ་བཞི་ཁྲི་བཞི་སྟོང་ངོ་། །དམ་པའི་ཆོས་ཀྱང་ལོ་བཞི་ཁྲི་བཞི་སྟོང་གི་བར་དུ་གནས་སོ། །སྐུ་
གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དཔལ་སྐྱེ་བའི་ཡུལ་ནི་གཟི་བརྗིད་རྒྱལ་པོའི་འོད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་སྟོང་གི་འཇིག་རྟེན་གྱི་ཁམས་ཙམ་མོ། །ཡབ་ནི་བློ་གྲོས་བསོད་ནམས་གསལ་ཞེས་བྱའོ། །ཡུམ་ནི་ལྟ་མཆོད་ཅེས་བྱའོ། །སྲས་ནི་གཟི་བརྗིད་
མཐའ་ཡས་ལྟ་ཞེས་བྱའོ། །རིམ་གྲོ་པ་ནི་ཕྱོགས་དང་ཕྱོགས་མཚམས་འཇིག་རྟེན་མཆོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མིའི་ཟླ་བ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡོན་ཏན་དཔག་ཏུ་མེད་པའི་འོད་ཅེས་བྱའོ། །འདུས་པ་ནི་ལན་སུམ་ཅུ་རྩ་གསུམ་སྟེ། ཐམས་ཅད་ལ་ཡང་
ཕྱིར་མི་ལྡོག་པའི་བྱང་ཆུབ་སེམས་དཔའ་ཐེར་འབུམ་ཕྲག་ཉི་ཤུ་ཉི་ཤུའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །ཐམས་ཅད་བྱང་ཆུབ་ཏུ་ཡོངས་སུ་སྨིན་པར་བྱ་བའི་ཕྱིར། །དམ་པའི་ཆོས་ནི་ལོ་བྱེ་བའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དགྲ་ལས་རྒྱལ་བ་སྐྱེ་བའི་ཡུལ་
ནི་ཁ་དོག་ཟིལ་གྱིས་མི་ནོན་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དྲུག་སྟོང་དྲུག་བརྒྱའོ། །ཡབ་ནི་ལེགས་མཐོང་ཟླ་བ་ཞེས་བྱའོ། །ཡུམ་ནི་དགྲ་བཅོམ་དགའ་མཆོད་ཅེས་བྱའོ། །སྲས་ནི་ཡེ་ཤེས་མཆོག་རིགས་འཛིན་ཅེས་བྱའོ། །རིམ་གྲོ་པ་ནི་ལྟ་སེམས་ཞེས་བྱའོ། །ཤེས་
རབ་ཅན་རྣམས་ཀྱི་མཆོག་ནི་སེང་གེའི་མཐུ་རྩལ་སེམས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་གྲགས་པ་མཐའ་ཡས་གསལ་ཞེས་བྱའོ། །བྱང་ཆུབ་སེམས་དཔའ་རྣམས་ཀྱི་འདུས་པ་ནི་གྲངས་མེད་དེ། གང་གི་ཉིན་མོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འགྱུར་བའི་ཉིན་མོ་དེ་ཁོ་ན་ཡོངས་སུ་མྱ་ངན་ལས་འདའ་བར་ཡང་བྱེད་དོ། །སྐུ་ཚེའི་ཚད་ནི་ལོ་དགུ་ཁྲི་བཞི་སྟོང་ངོ་། །ཐམས་ཅད་བྱང་ཆུབ་ཏུ་ཡོངས་སུ་སྨིན་པར་བྱ་བའི་ཕྱིར། དམ་པའི་ཆོས་ནི་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །མཆོད་རྟེན་ནི་

ཐེར་འབུམ་ཕྲག་བཅུ་འབྱུང་ངོ་། །དེ་བཞིན་གཤེགས་པ་འབྱོར་ལྡན་གྲགས་པ་སྐྱེ་བའི་ཡུལ་ནི་རིན་པོ་ཆེ་ཐམས་ཅད་བཀོད་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སུམ་སྟོང་དྲུག་བརྒྱའོ། །ཡབ་ནི་རིན་ཆེན་མཆོག་ཅེས་བྱའོ། །ཡུམ་ནི་ཡོན་ཏན་རིན་ཆེན་འོད་
ཅེས་བྱའོ། །སྲས་ནི་མཆོད་འདོད་ཅེས་བྱའོ། །རིམ་གྲོ་པ་ནི་ཀུན་ཏུ་བཟང་པོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རིན་པོ་ཆེ་ཏོག་གི་རྒྱལ་མཚན་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་དོན་གྲུབ་བློ་གྲོས་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་ཕྲག་སྟོང་
སྟོང་ངོ་། །སྐུ་ཚེའི་ཚད་ནི་ལོ་བརྒྱད་ཁྲི་ལྔ་སྟོང་ངོ་། །དམ་པའི་ཆོས་ནི་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཡུལ་འཁོར་བཟང་པོ་སྐྱེ་བའི་ཡུལ་ནི་རིན་པོ་ཆེའི་འོད་དང་ལྡན་པ་ཞེས་བྱའོ། །རིགས་ནི་བྲམ་ཟེའོ། །
འོད་ནི་དཔག་ཚད་བརྒྱད་ཅུའོ། །ཡབ་ནི་གཟི་བརྗིད་ལེགས་སྦས་ཞེས་བྱའོ། །ཡུམ་ནི་མེ་ཏོག་བྱིན་ཞེས་བྱའོ། །སྲས་ནི་བསོད་ནམས་སྟོབས་ཞེས་བྱའོ། །རིམ་གྲོ་པ་ནི་རྫུ་འཕྲུལ་ཅན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བདེན་པའི་ཏོག་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་
འཁྲུལ་པ་མེད་པར་གནས་པ་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་སྟོང་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་ཉི་ཁྲིའོ། །དམ་པའི་ཆོས་ཀྱང་ལོ་ཉི་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་མེ་ཏོག་འོད་སྐྱེ་བའི་ཡུལ་ནི་མེ་ཏོག་
ཕུང་པོ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཁྲི་བཞི་སྟོང་ངོ་། །ཡབ་ནི་ཤེད་སྐྱེས་གཙོ་བོ་ཞེས་བྱའོ། །ཡུམ་ནི་ཟླ་སྡུག་འོད་ཅེས་བྱའོ། །སྲས་ནི་བལྟ་བས་མཐོང་ཞེས་བྱའོ། །རིམ་གྲོ་པ་ནི་བདུད་རྩིའི་སེམས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡེ་ཤེས་ཁ་ལོ་
སྒྱུར་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མེ་ཏོག་མྱ་ངན་འཚང་ཞེས་བྱའོ། །འདུས་པ་ནི་ལན་བཅྭ་ལྔ་སྟེ། ཐམས་ཅད་ལ་ཡང་བྱེ་བ་ཕྲག་སུམ་ཅུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་ཁྲི་དྲུག་སྟོང་ངོ་། །དམ་པའི་ཆོས་ཀྱང་ལོ་ཁྲི་དྲུག་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་

འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་སེང་གེའི་ང་རོ་སྐྱེ་བའི་ཡུལ་ནི་མི་ཐུབ་པའི་ཚོགས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ལྔ་བརྒྱའོ། །ཡབ་ནི་ས་མཆོག་ཅེས་བྱའོ། །ཡུམ་ནི་མེ་ཏོག་འོད་ཅེས་བྱའོ། །སྲས་ནི་སེང་གེའི་མཐུ་རྩལ་ཞེས་
བྱའོ། །རིམ་གྲོ་པ་ནི་རིན་ཆེན་མེ་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐའ་ཡས་དབྱངས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བཟང་མཆོག་ཏོག་ཅེས་བྱའོ། །འདུས་པ་ནི་ལན་བཅུ་གཉིས་ཏེ། ཐམས་ཅད་ལ་ཡང་འབུམ་འབུམ་མོ། །སྐུ་ཚེའི་ཚད་ནི་ལོ་ཁྲིའོ། །དམ་པའི་ཆོས་
ཀྱང་ལོ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཟླ་བ་ལྟར་ཤར་བ་སྐྱེ་བའི་ཡུལ་ནི་གློག་འོད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བཞི་ཁྲི་ཉིས་སྟོང་ངོ་། །ཡབ་ནི་བལྟ་སྡུག་ཅེས་བྱའོ། །ཡུམ་ནི་ཉི་མའི་བཞིན་ཞེས་བྱའོ། །སྲས་ནི་ཀུན་
ཏུ་ལྟ་ཞེས་བྱའོ། །རིམ་གྲོ་པ་ནི་ཀུན་ཏུ་མེ་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡོན་ཏན་མཐུ་རྩལ་སྟོབས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་གྲགས་པ་རྒྱ་ཆེན་ཞེས་བྱའོ། །འདུས་པ་ནི་ལན་བཅུ་སྟེ། ཐམས་ཅད་ལ་ཡང་འབུམ་འབུམ་མོ། །སྐུ་ཚེའི་ཚད་ནི་ལོ་དགུ་ཁྲིའོ། །
དམ་པའི་ཆོས་ཀྱང་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་འཇོམས་པའི་མཆོག་སྐྱེ་བའི་ཡུལ་ནི་སྣང་བ་མཐའ་ཡས་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སུམ་ཅུ་རྩ་དྲུག་གོ། །ཡབ་ནི་ཙན་དན་བཟང་པོ་ཞེས་བྱའོ། །ཡུམ་ནི་རིན་ཆེན་
མཆོག་ཅེས་བྱའོ། །སྲས་ནི་རིན་ཆེན་དཔལ་ཞེས་བྱའོ། །རིམ་གྲོ་པ་ནི་མཐུ་རྩལ་སྟོབས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ལྟ་མཆོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་རིན་ཆེན་མཐའ་ཡས་འོད་ཅེས་བྱའོ། །འདུས་པ་ནི་ལན་ཉི་ཤུ་རྩ་གཉིས་ཏེ། ཐམས་ཅད་ལ་ཡང་ཐེར་
འབུམ་ཐེར་འབུམ་མོ། །སྐུ་ཚེའི་ཚད་ནི་ལོ་ཉི་ཁྲི་ལྔ་སྟོང་ངོ་། །དམ་པའི་ཆོས་ཀྱང་ལོ་ཉི་ཁྲི་ལྔ་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་མི་གཡོ་བ་སྐྱེ་བའི་ཡུལ་ནི་བློ་གནས་ཞེས་བྱའོ། །རིགས་ནི་རྒྱལ་རིགས་སོ། །

འོད་ནི་དཔག་ཚད་ཁྲི་བདུན་སྟོང་ངོ་། །ཡབ་ནི་ལྷ་མཆོད་ཅེས་བྱའོ། །ཡུམ་ནི་མེ་ཏོག་ཅན་ཞེས་བྱའོ། །སྲས་ནི་ཡེ་ཤེས་མཆོག་ཅེས་བྱའོ། །རིམ་གྲོ་པ་ནི་རིན་ཆེན་མཐུ་རྩལ་ཅན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སེང་གེའི་སྒྲ་སྒྲོགས་ཞེས་
བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཆོད་གྲགས་ཞེས་བྱའོ། །འདུས་པ་ནི་ལན་ཉི་ཤུ་རྩ་གསུམ་སྟེ། ཐམས་ཅད་ལ་ཡང་ཐེར་འབུམ་ཕྲག་དྲུག་ཅུ་དྲུག་ཅུའོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་བདུན་ཁྲི་བདུན་སྟོང་གི་བར་དུ་གནས་སོ། །སྐུ་གདུང་
ནི་རྒྱས་པར་འགྱུར་རོ། །དེ་བཞིན་གཤེགས་པ་ཕན་པ་དང་ལྡན་པར་གཤེགས་པ་སྐྱེ་བའི་ཡུལ་ནི་སེང་གེས་བལྟས་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སྟོང་ངོ་། །ཡབ་ནི་གཟི་བརྗིད་ཡིད་འཐད་ཅེས་བྱའོ། །ཡུམ་ནི་རིན་ཆེན་འོད་ཅེས་བྱའོ། །སྲས་ནི་
འཇིག་རྟེན་དགའ་ཞེས་བྱའོ། །རིམ་གྲོ་པ་ནི་བདུད་རྩིའི་སྒྲོན་མ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བདེན་སྨྲ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཕྲ་བ་སྤོང་ཞེས་བྱའོ། །འདུས་པ་ནི་ལན་དྲུག་ཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་བདུན་བདུན་ནོ། །སྐུ་ཚེའི་
ཚད་ནི་ལོ་དྲུག་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་དྲུག་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་བསོད་ནམས་སྒྲོན་མའི་རྒྱལ་པོ་སྐྱེ་བའི་ཡུལ་ནི་བདུད་རྩིའི་སྤོས་ཞེས་བྱའོ། །རིགས་ནི་རྒྱལ་
རིགས་སོ། །འོད་ནི་དཔག་ཚད་ཁྲི་ཉིས་སྟོང་ངོ་། །ཡབ་ནི་བསོད་ནམས་ཀྱི་འབྱུང་གནས་ཞེས་བྱའོ། །ཡུམ་ནི་མེ་ཏོག་གི་ཏོག་ཅེས་བྱའོ། །སྲས་ནི་རིན་ཆེན་བཟང་པོ་ཞེས་བྱའོ། །རིམ་གྲོ་པ་ནི་རིན་ཆེན་མཐའ་ཡས་བཀོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་དབྱངས་བྱིན་
ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་རིན་ཆེན་མཐའ་ཡས་བཀོད་ཅེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་བདུན་བདུན་ནོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ཀྱང་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་

རྒྱས་པར་འགྱུར་རོ། །དེ་བཞིན་གཤེགས་པ་དབྱངས་ཀྱིས་བསྐུལ་བ་སྐྱེ་བའི་ཡུལ་ནི་ཡིད་དུ་འོང་བའི་དབྱངས་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་ཉིས་སྟོང་དྲུག་བརྒྱའོ། །ཡབ་ནི་སྒྲོན་མའི་རྒྱལ་པོ་ཞེས་བྱའོ། །ཡུམ་ནི་གཟི་བརྗིད་ཆེན་མོ་ཞེས་བྱའོ། །སྲས་ནི་
རིན་ཆེན་རྣམ་པར་གྲགས་ཞེས་བྱའོ། །རིམ་གྲོ་པ་ནི་འཁྲུལ་པ་མེད་པར་སེམས་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མིག་སྡུག་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བསོད་ནམས་སྒྲོན་མ་ཞེས་བྱའོ། །འདུས་པ་ནི་ལན་བཅུ་གསུམ་སྟེ། ཐམས་ཅད་ལ་ཡང་བྱེ་བ་ཕྲག་
དགུ་བཅུ་རྩ་དགུ་དགུའོ། །སྐུ་ཚེའི་ཚད་ནི་ལོ་བདུན་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་ཉི་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་གཽ་ཏ་མ་སྐྱེ་བའི་ཡུལ་ནི་དྲང་སྲོང་གཟི་བརྗིད་ཅེས་བྱའོ། །རིགས་ནི་བྲམ་
ཟེའོ། །འོད་ནི་དཔག་ཚད་ཁྲི་བཞི་སྟོང་ངོ་། །ཡབ་ནི་བསམ་གཏན་དགའ་ཞེས་བྱའོ། །ཡུམ་ནི་ཡིད་དུ་འོང་ཞེས་བྱའོ། །སྲས་ནི་ཙམ་པ་མཆོག་ཅེས་བྱའོ། །རིམ་གྲོ་པ་ནི་བདུད་རྩིའི་མེ་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐུ་རྩལ་སྟབས་ཞེས་བྱའོ། །རྫུ་འཕྲུལ་ཅན་རྣམས་ཀྱི་
མཆོག་ནི་བརྩོན་འགྲུས་བརྟན་པོའི་གོ་བགོས་པ་ཞེས་བྱའོ། །འདུས་པ་ནི་ལན་བརྒྱད་ཅུ་སྟེ། ཐམས་ཅད་ལ་ཡང་བྱེ་བ་བརྒྱ་ཕྲག་བཅྭ་བརྒྱད་བཅྭ་བརྒྱད་དོ། །སྐུ་ཚེའི་ཚད་ནི་ལོ་བཞི་ཁྲི་བཞི་སྟོང་ངོ་། །དམ་པའི་ཆོས་ཀྱང་ལོ་བཞི་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །
དེ་བཞིན་གཤེགས་པ་མདངས་སྟོབས་སྐྱེ་བའི་ཡུལ་ནི་ཡིད་འོང་མཐོང་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ཁྲི་བརྒྱད་སྟོང་ངོ་། །ཡབ་ནི་ཟླ་བའི་ཏོག་ཅེས་བྱའོ། །ཡུམ་ནི་ལྟ་བ་གསལ་ཞེས་བྱའོ། །སྲས་ནི་སྙིང་སྟོབས་མཆོག་ཅེས་བྱའོ། །རིམ་གྲོ་པ་ནི་བདེན་གྲོགས་ཞེས་
བྱའོ། །ཤེས་རབ་ཅན་རྣམས་ཀྱི་མཆོག་ནི་མཐུ་རྩལ་བཟང་པོ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡིད་དུ་འོང་བྱིན་ཞེས་བྱའོ། །འདུས་པ་ནི་ལན་བརྒྱད་ཅུ་རྩ་གཉིས་ཏེ། ཐམས་ཅད་ལ་ཡང་བྱེ་བ་ཕྲག་བརྒྱད་ཅུ་རྩ་རེ་རེའོ། །སྐུ་ཚེའི་ཚད་ནི་ལོ་བརྒྱད་ཁྲི་སུམ་སྟོང་ངོ་། །དམ་པའི་ཆོས་ནི་

ལོ་བདུན་ཁྲི་སུམ་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བློ་གནས་པའི་རང་བཞིན་སྐྱེ་བའི་ཡུལ་ནི་འོད་མཐོང་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་དགུ་བཅུ་རྩ་གཅིག་གོ། །ཡབ་ནི་ལྷས་མཆོད་ཅེས་བྱའོ། །ཡུམ་ནི་
ལྷས་མཆོད་མ་ཞེས་བྱའོ། །སྲས་ནི་བདེན་པའི་ཏོག་ཅེས་བྱའོ། །རིམ་གྲོ་པ་ནི་མཚན་བྱིན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཆོད་བཀོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡེ་ཤེས་ཀྱི་སྤོང་བ་ཞེས་བྱའོ། །འདུས་པ་ནི་ལན་ལྔ་བཅུ་སྟེ། ཐམས་ཅད་ལ་ཡང་འབུམ་ཕྲག་བཅུ་
དྲུག་བཅུ་དྲུག་གོ། །སྐུ་ཚེའི་ཚད་ནི་ལོ་བདུན་ཁྲི་སུམ་སྟོང་ངོ་། །དམ་པའི་ཆོས་ནི་ལོ་ལྔ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཟླ་བ་བཟང་པོ་སྐྱེ་བའི་ཡུལ་ནི་འཇིག་རྟེན་མངོན་པར་དགའ་བ་ཞེས་བྱའོ། །
རིགས་ནི་བྲམ་ཟེའོ། །འོད་ནི་དཔག་ཚད་སུམ་ཅུའོ། །ཡབ་ནི་ཟླ་མཆོག་ཅེས་བྱའོ། །ཡུམ་ནི་སྣང་བ་བྱིན་ཞེས་བྱའོ། །སྲས་ནི་རིན་ཆེན་དཔལ་ཞེས་བྱའོ། །རིམ་གྲོ་པ་ནི་ཡོན་ཏན་གྲགས་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡོན་ཏན་རིན་ཆེན་དབྱངས་ཞེས་བྱའོ། །རྫུ་འཕྲུལ་
ཅན་རྣམས་ཀྱི་མཆོག་ནི་ཡོན་ཏན་ཁ་ལོ་སྒྱུར་ཞེས་བྱའོ། །འདུས་པ་ནི་ལན་བདུན་ཅུ་རྩ་དྲུག་སྟེ། ཐམས་ཅད་ལ་ཡང་འབུམ་ཕྲག་བདུན་ཅུ་རྩ་བདུན་བདུན་ནོ། །སྐུ་ཚེའི་ཚད་ནི་ལོ་ཉི་ཁྲི་ཆིག་སྟོང་ངོ་། །དམ་པའི་ཆོས་ནི་ལོ་བདུན་ཁྲི་ཆིག་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །
དེ་བཞིན་གཤེགས་པ་བྱང་ཆུབ་ཡན་ལག་མེ་ཏོག་སྐྱེ་བའི་ཡུལ་ནི་བདུད་རྩིའི་མེ་ཏོག་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དགུ་ཁྲིའོ། །ཡབ་ནི་ཡེ་ཤེས་མེ་ཏོག་ཅེས་བྱའོ། །ཡུམ་ནི་ཆོས་ཀྱི་མེ་ཏོག་ཅེས་བྱའོ། །སྲས་ནི་སྟོན་པ་གྲགས་ཞེས་བྱའོ། །རིམ་གྲོ་པ་ནི་ཐར་པ་པད་མ་དཀར་པོ་
ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གྲགས་པའི་རྒྱལ་མཚན་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཤེས་རབ་མཐའ་ཡས་ཞེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་བྱེ་བ་ཕྲག་བཅུ་བཞི་བཅུ་བཞིའོ། །སྐུ་ཚེའི་ཚད་ནི་ལོ་དྲུག་ཁྲི་བཞི་སྟོང་ངོ་། །དམ་པའི་ཆོས་

ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བཀྲ་ཤིས་སྐྱེ་བའི་ཡུལ་ནི་མཐོ་བ་མེད་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བདུན་སྟོང་ངོ་། །ཡབ་ནི་ལེགས་མཐོང་ཞེས་བྱའོ། །ཡུམ་ནི་དལ་གྱིས་འགྲོ་ཞེས་བྱའོ། །
སྲས་ནི་སེང་གེའི་སྒྲ་ཞེས་བྱའོ། །རིམ་གྲོ་པ་ནི་དྲག་ཤུལ་སྡེ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ནོར་ལྷ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྟོན་པ་སེམས་ཞེས་བྱའོ། །འདུས་པ་ནི་ལན་བཅུ་དྲུག་སྟེ། ཐམས་ཅད་ལ་ཡང་ཐེར་འབུམ་ཕྲག་དགུ་བཅུ་དགུ་བཅུའོ། །སྐུ་
ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ནི་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ལེགས་སྟོན་སྐྱེ་བའི་ཡུལ་ནི་སྟོན་པའི་མཆོད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་
འབུམ་ཕྲག་བརྒྱད་དོ། །ཡབ་ནི་རིན་ཆེན་གྲགས་པ་ཞེས་བྱའོ། །ཡུམ་ནི་བློ་གྲོས་རྒྱ་ཆེན་ཞེས་བྱའོ། །སྲས་ནི་མཆོད་བྱིན་ཞེས་བྱའོ། །རིམ་གྲོ་པ་ནི་དགའ་བའི་གཟི་བརྗིད་གྲགས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རིན་ཆེན་གཟི་བརྗིད་གྲགས་ཞེས་བྱའོ། །རྫུ་འཕྲུལ་ཅན་རྣམས་
ཀྱི་མཆོག་ནི་སེང་གེའི་བློ་གྲོས་གྲགས་ཞེས་བྱའོ། །འདུས་པ་ནི་ལན་བདུན་ཅུ་རྩ་བདུན་ཏེ། །ཐམས་ཅད་ལ་ཡང་བྱེ་བ་ཕྲག་སུམ་ཅུ་རྩ་བཞི་བཞིའོ། །སྐུ་ཚེའི་ཚད་ནི་ལོ་དགུ་ཁྲིའོ། །དམ་པའི་ཆོས་ནི་ལོ་ཉི་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་
པ་ཡེ་ཤེས་གཟི་བརྗིད་སྟོབས་སྐྱེ་བའི་ཡུལ་ནི་གཞན་གྱིས་མི་ཐུབ་པའི་གཟི་བརྗིད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཏུ་མེད་དོ། །ཡབ་ནི་མྱ་ངན་བྱིན་ཞེས་བྱའོ། །ཡུམ་ནི་འཇིག་རྟེན་ཟླ་བ་ཞེས་བྱའོ། །སྲས་ནི་ཉི་མའི་འོད་ཟེར་ཞེས་བྱའོ། །རིམ་གྲོ་པ་ནི་ཡེ་ཤེས་གཟི་
བརྗིད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཤེས་རབ་ཉི་མ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྷ་མཆོག་མཆོད་ཅེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་འབུམ་ཕྲག་ཉི་ཤུ་རྩ་ལྔ་ལྔའོ། །སྐུ་ཚེའི་ཚད་ནི་ལོ་དགུ་ཁྲི་བཞི་སྟོང་ངོ་། །དམ་པའི་ཆོས་

ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དགེ་བའི་སྒྲོན་མ་སྐྱེ་བའི་ཡུལ་ནི་བདུད་རྩིའི་གཟི་བརྗིད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱའོ། །ཡབ་ནི་གྲགས་པའི་མཐའ་ཡས་འགྲོ་ཞེས་
བྱའོ། །ཡུམ་ནི་དགྲ་བཅོམ་མེ་ཏོག་རིན་ཆེན་གཟི་བརྗིད་ཅེས་བྱའོ། །སྲས་ནི་ལྷས་མཆོད་ཟླ་བ་ཞེས་བྱའོ། །རིམ་གྲོ་པ་ནི་གྲོལ་བའི་ཕུང་པོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བདེན་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བདེན་པའི་བློ་གྲོས་གཟི་བརྗིད་ཅེས་
བྱའོ། །འདུས་པ་ནི་ལན་དགུ་བཅུ་རྩ་གཉིས་ཏེ། ཐམས་ཅད་ལ་ཡང་བྱེ་བ་ཕྲག་སུམ་ཅུ་རྩ་ལྔ་ལྔའོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་མཐུ་
རྩལ་བརྟན་པོ་སྐྱེ་བའི་ཡུལ་ནི་ཐུབ་དཀའ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་སྟོང་ངོ་། །ཡབ་ནི་ཟླ་ལུས་ཞེས་བྱའོ། །ཡུམ་ནི་ཐར་པ་དམིགས་ཞེས་བྱའོ། །སྲས་ནི་གྲགས་ཆེན་ཞེས་བྱའོ། །རིམ་གྲོ་པ་ནི་དགའ་དབྱངས་འདམ་བུ་ཞེས་བྱའོ། །ཤེས་རབ་
ཅན་རྣམས་ཀྱི་མཆོག་ནི་གྲགས་གནས་རྒྱལ་མཚན་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ང་རོ་འཇམ་པའི་དབྱངས་ཞེས་བྱའོ། །འདུས་པ་ནི་ལན་བཅུ་བཞི་སྟེ། ཐམས་ཅད་ལ་ཡང་འབུམ་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ཀྱང་ལོ་བརྒྱད་
ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ལྷ་སྒྲ་སྐྱེ་བའི་ཡུལ་ནི་ཡིད་དུ་འོང་བས་བྱིན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བདུན་བརྒྱའོ། །ཡབ་ནི་ལྷ་མཆོད་ཅེས་བྱའོ། །ཡུམ་ནི་བཀོད་པ་ལེགས་མཐོང་ཞེས་བྱའོ། །
སྲས་ནི་མེ་ཏོག་གི་བློ་གྲོས་ཞེས་བྱའོ། །རིམ་གྲོ་པ་ནི་གཟི་བརྗིད་མདངས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཀུན་ཏུ་དགའ་བའི་དབྱངས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཟླ་བའི་ཏིང་ངེ་འཛིན་ཅེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་

ཡང་ཐེར་འབུམ་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་སུམ་ཁྲི་བཞི་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་རབ་ཏུ་ཞི་བ་སྐྱེ་བའི་ཡུལ་ནི་ཀུན་ཏུ་སྒྲ་ཞེས་བྱའོ། །
རིགས་ནི་བྲམ་ཟེའོ། །འོད་ནི་དཔག་ཚད་དགུ་ཁྲི་བརྒྱད་སྟོང་ངོ་། །ཡབ་ནི་བདེན་སྨྲ་ཞེས་བྱའོ། །ཡུམ་ནི་མེ་ཏོག་མ་ཞེས་བྱའོ། །སྲས་ནི་གཟི་བརྗིད་རིན་ཆེན་བདུན་ཞེས་བྱའོ། །རིམ་གྲོ་པ་ནི་བདུད་རྩི་ཤིས་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཀུན་ཏུ་མཐོང་བ་ཞེས་བྱའོ། །
རྫུ་འཕྲུལ་ཅན་རྣམས་ཀྱི་མཆོག་ནི་ཀུན་ཏུ་འགྲོ་བའི་སྟོབས་ཞེས་བྱའོ། །འདུས་པ་ནི་ལན་བརྒྱད་ཅུ་རྩ་བརྒྱད་དེ། ཐམས་ཅད་ལ་ཡང་ཐེར་འབུམ་ཐེར་འབུམ་མོ། །སྐུ་ཚེའི་ཚད་ནི་ལོ་བདུན་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །
མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཉི་མའི་ཞལ་སྐྱེ་བའི་ཡུལ་ནི་བཀོད་པ་མཐའ་ཡས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་ཁྲི་སུམ་སྟོང་ངོ་། །ཡབ་ནི་སྐྱོབ་པ་ཞེས་བྱའོ། །ཡུམ་ནི་ཁ་ལོ་སྒྱུར་བའི་ཏོག་ཅེས་བྱའོ། །སྲས་ནི་དབྱངས་
སྙན་ཞེས་བྱའོ། །རིམ་གྲོ་པ་ནི་བརྟུལ་ཞུགས་མི་ཚུགས་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བློ་གྲོས་ལེགས་གནས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འཇིག་རྟེན་ཀུན་ལས་ཤིན་ཏུ་འཕགས་པ་ཞེས་བྱའོ། །འདུས་པ་ནི་ལན་བརྒྱད་ཅུ་སྟེ། ཐམས་ཅད་ལ་ཡང་
བྱེ་བ་ཕྲག་ཉི་ཤུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་བདུན་ཁྲི་བཞི་སྟོང་ངོ་། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཐར་པའི་བརྟུལ་ཞུགས་སྐྱེ་བའི་ཡུལ་ནི་སྙན་པར་གྲགས་པའི་རྒྱལ་མཚན་ཞེས་བྱའོ། །རིགས་
ནི་རྒྱལ་རིགས་སོ། །འོད་ནི་དཔག་ཚད་སྟོང་ངོ་། །ཡབ་ནི་ཡིད་འོང་གྲགས་ཞེས་བྱའོ། །ཡུམ་ནི་ཡིད་འཐད་མཚན་མཐོང་ཞེས་བྱའོ། །སྲས་ནི་མཐོང་ཆེན་གྲགས་ཞེས་བྱའོ། །རིམ་གྲོ་པ་ནི་གཟི་བརྗིད་བློ་གྲོས་བདེ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སེམས་པ་རོ་གཅིག་པ་

ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བདུད་ཀྱི་དཔུང་རབ་ཏུ་འཇོམས་པའི་གཟི་བརྗིད་ཅེས་བྱའོ། །འདུས་པ་ནི་ལན་དགུ་བཅུ་རྩ་དྲུག་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་དགུ་ཁྲི་དགུ་སྟོང་ངོ་། །དམ་པའི་ཆོས་ཀྱང་ལོ་
དགུ་ཁྲི་དགུ་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཚུལ་ཁྲིམས་འོད་སྐྱེ་བའི་ཡུལ་ནི་ཁ་ན་མ་ཐོ་བ་མེད་ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བརྒྱད་ཁྲི་ལྔ་སྟོང་ངོ་། །ཡབ་ནི་སེང་གེའི་བརྟུལ་ཞུགས་བློ་ཞེས་བྱའོ། །ཡུམ་ནི་གཟི་
བརྗིད་མཐའ་ཡས་མཆོད་ཅེས་བྱའོ། །སྲས་ནི་མཆོད་གྲགས་ཏོག་ཅེས་བྱའོ། །རིམ་གྲོ་པ་ནི་ཡོན་ཏན་ཀུན་ཏུ་སྤྱོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གཟི་བརྗིད་སྣང་བ་མཆོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྷའི་མཐུ་རྩལ་སྟོབས་ཞེས་བྱའོ། །འདུས་པ་ནི་ལན་
དགུ་བཅུ་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་དུང་ཕྱུར་ཕྲག་བདུན་གྱི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བརྟུལ་ཞུགས་གནས་སྐྱེ་བའི་ཡུལ་ནི་དགྲ་བཅོམ་སྤོང་ཞེས་བྱའོ། །རིགས་
ནི་རྒྱལ་རིགས་སོ། །འོད་ནི་དཔག་ཚད་དུང་ཕྱུར་ཕྲག་བརྒྱད་དོ། །ཡབ་ནི་ཀུན་ཏུ་གཟི་བརྗིད་དཔལ་ཞེས་བྱའོ། །ཡུམ་ནི་ཡོན་ཏན་གསལ་མཆོད་མ་ཞེས་བྱའོ། །སྲས་ནི་ལྷ་མཆོག་མེ་ཏོག་མཆོད་གྲགས་ཞེས་བྱའོ། །རིམ་གྲོ་པ་ནི་ཁ་ལོ་སྒྱུར་བར་གྲགས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་
ནི་འགྲོས་བརྟན་དགེ་བ་ཡངས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མིའི་མཆོད་རྟེན་ཞེས་བྱའོ། །འདུས་པ་ནི་ལན་དགུ་བཅུ་རྩ་གཅིག་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་བརྒྱད་ཁྲི་བདུན་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་
སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་རྡུལ་མེད་སྐྱེ་བའི་ཡུལ་ནི་སྐྱོན་མེད་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་ཁྲི་ལྔ་སྟོང་ངོ་། །ཡབ་ནི་རིན་ཆེན་ཟླ་བ་ཞེས་བྱའོ། །ཡུམ་ནི་ཏོག་

བཟངས་ཞེས་བྱའོ། །སྲས་ནི་ཀུན་ནས་རིན་ཆེན་མེ་ཏོག་ཅེས་བྱའོ། །རིམ་གྲོ་པ་ནི་ཆེན་པོ་བྱིན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གཟི་བརྗིད་མཐའ་ཡས་ཕུང་པོའི་འོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཐུ་རྩལ་སྟོབས་གྲུབ་མཆོད་སྦྱིན་ཞེས་བྱའོ། །འདུས་པ་
ནི་ལན་བརྒྱད་ཅུ་རྩ་དྲུག་སྟེ། ཐམས་ཅད་ལ་ཡང་ཁྲི་ཕྲག་རེ་རེའོ། །སྐུ་ཚེའི་ཚད་ནི་ལོ་བདུན་ཁྲི་བདུན་སྟོང་ངོ་། །དམ་པའི་ཆོས་ནི་ལོ་བདུན་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྙིང་པོ་འཕགས་སྐྱེ་བའི་ཡུལ་ནི་མཛེས་པ་མི་གཡོ་བ་
ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཅུའོ། །ཡབ་ནི་བདུད་རྩིའི་བཀོད་པ་ཞེས་བྱའོ། །ཡུམ་ནི་བློ་གྲོས་གྲགས་མ་ཞེས་བྱའོ། །སྲས་ནི་ཆོས་ཀྱི་རྒྱལ་མཚན་ཞེས་བྱའོ། །རིམ་གྲོ་པ་ནི་ཡུལ་འཁོར་སྙོམས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་
ནི་ངན་སོང་སྤོང་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཀུན་ཏུ་གསལ་བ་ཏོག་ཅེས་བྱའོ། །འདུས་པ་ནི་ལན་བརྒྱད་ཅུ་སྟེ། ཐམས་ཅད་ལ་ཡང་ས་ཡ་ཕྲག་བརྒྱད་བརྒྱད་དོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་
པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་མིག་སྨན་སྐྱེ་བའི་ཡུལ་ནི་སྤོས་མཆོག་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་མཐའ་ཡས་སོ། །ཡབ་ནི་ཡོན་ཏན་ཐམས་ཅད་གྲགས་ཞེས་བྱའོ། །ཡུམ་ནི་ཡིད་འོང་བྱིན་
ཅེས་བྱའོ། །སྲས་ནི་བདེན་པའི་མེ་ཏོག་ཅེས་བྱའོ། །རིམ་གྲོ་པ་ནི་བསོད་ནམས་བློ་གྲོས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཚན་གྱི་མེ་ཏོག་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བཀོད་པ་མི་གཡོ་བ་ཞེས་བྱའོ། །འདུས་པ་ནི་ལན་བཅྭ་བརྒྱད་དེ། ཐམས་
ཅད་ལ་ཡང་ཐེར་འབུམ་ཕྲག་སུམ་ཅུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་ཉི་ཁྲི་ཉིས་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་འཕེལ་བར་མཛད་པ་སྐྱེ་བའི་ཡུལ་ནི་ཡུལ་འཁོར་མཆོག་ཅེས་བྱའོ། །

རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་ཁྲི་བཞི་སྟོང་ངོ་། །ཡབ་ནི་ལེགས་བཟང་ཞེས་བྱའོ། །ཡུམ་ནི་གཟི་བརྗིད་མཐའ་ཡས་མཐོང་ཞེས་བྱའོ། །སྲས་ནི་འཇིག་རྟེན་མཆོད་ཅེས་བྱའོ། །རིམ་གྲོ་པ་ནི་ཀུན་ཏུ་སྦེད་ཅེས་བྱའོ། །ཤེས་རབ་ཅན་རྣམས་
ཀྱི་མཆོག་ནི་བློ་གྲོས་མཐའ་ཡས་གྲགས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཉམ་པ་དང་མི་མཉམ་པའི་བློ་ཞེས་བྱའོ། །འདུས་པ་ནི་ལན་དགུ་བཅུ་རྩ་གཉིས་ཏེ། ཐམས་ཅད་ལ་ཡང་ས་ཡ་ཕྲག་བརྒྱད་བརྒྱད་དོ། །སྐུ་ཚེའི་ཚད་ནི་ལོ་བཞི་ཁྲིའོ། །དམ་པའི་ཆོས་ནི་ལོ་བརྒྱད་ཁྲིའི་
བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྤོས་ཀྱི་འོད་སྐྱེ་བའི་ཡུལ་ནི་བདུད་རྩིའི་སྤོས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ལྔ་སྟོང་དྲུག་བརྒྱའོ། །ཡབ་ནི་བདུད་ཟིལ་གྱིས་གནོན་པ་ཞེས་བྱའོ། །ཡུམ་ནི་ཡུལ་འཁོར་ལྷ་ཆེན་
ཞེས་བྱའོ། །སྲས་ནི་འབྱོར་གྲགས་ཞེས་བྱའོ། །རིམ་གྲོ་པ་ནི་འཕགས་བྱིན་འོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐུ་རྩལ་མི་གཡོ་བ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྷ་མཆོག་སེམས་པའི་དབྱངས་ཞེས་བྱའོ། །འདུས་པ་དང་པོ་ལ་ནི་ཉན་ཐོས་བརྒྱད་འབུམ་
མོ། །གཉིས་པ་ལ་ནི་དགུ་འབུམ་མོ། །གསུམ་པ་ལ་ནི་ས་ཡའོ། །སྐུ་ཚེའི་ཚད་ནི་ལོ་བདུན་ཁྲི་བདུན་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དུས་མཁྱེན་འོད་སྐྱེ་བའི་ཡུལ་ནི་རྣམ་པར་འབྱེད་པའི་སྡེ་ཞེས་
བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བརྒྱའོ། །ཡབ་ནི་གྲགས་པ་མཆོག་ཅེས་བྱའོ། །ཡུམ་ནི་སེང་གེའི་ང་རོ་ཞེས་བྱའོ། །སྲས་ནི་ཕྱོགས་མཆོད་ཅེས་བྱའོ། །རིམ་གྲོ་པ་ནི་དྲང་སྲོང་བློ་གྲོས་འགྲོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བཤེས་གཉེན་མཐའ་
ཡས་སྟོབས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཛེས་བྱིན་ཞེས་བྱའོ། །འདུས་པ་ནི་ལན་འབུམ་སྟེ། རེ་རེ་པོ་ཐམས་ཅད་ལ་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་དཔག་ཏུ་མེད་དོ། །སྐུ་ཚེའི་ཚད་ནི་ལོ་བྱེ་བའོ། །དམ་པའི་ཆོས་ཀྱང་ལོ་བྱེ་བའི་བར་དུ་གནས་སོ། །སྐུ་

གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དྲན་པའི་དབང་པོ་སྐྱེ་བའི་ཡུལ་ནི་གཟི་བརྗིད་ཕུང་པོ་འོད་ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་ཁྲི་ཉིས་སྟོང་ངོ་། །ཡབ་ནི་མཐུ་རྩལ་གྲགས་ཞེས་བྱའོ། །ཡུམ་ནི་མྱ་ངན་ལས་འདས་པའི་གཟི་བརྗིད་ཅེས་བྱའོ། །སྲས་
ནི་ཆོས་ཀྱི་མར་མེ་སྐར་མདའ་ཞེས་བྱའོ། །རིམ་གྲོ་པ་ནི་བདེན་པའི་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བཟང་ལྡན་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བློ་འདས་ཞེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་ཉི་ཤུ་རྩ་
ལྔ་ལྔའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ཀྱང་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཐོགས་པ་མེད་པའི་རྒྱལ་མཚན་སྐྱེ་བའི་ཡུལ་ནི་མཐའ་ཡས་བརྒྱན་ཞེས་བྱའོ། །
རིགས་ནི་རྒྱལ་རིགས་སོ། །འོད་ནི་དཔག་ཚད་བདུན་ཁྲིའོ། །ཡབ་ནི་ཟླ་བའི་གཟི་བརྗིད་མཐུ་ཞེས་བྱའོ། །ཡུམ་ནི་ཉི་མའི་གཟི་བརྗིད་ཕུང་པོའི་འོད་ཅེས་བྱའོ། །སྲས་ནི་ལྷ་དགའ་ཞེས་བྱའོ། །རིམ་གྲོ་པ་ནི་བརྟུལ་ཞུགས་རྫོགས་པ་ལྷ་མཆོད་གྲགས་ཞེས་བྱའོ། །ཤེས་རབ་
ཅན་རྣམས་ཀྱི་མཆོག་ནི་འབྱོར་པའི་བློ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཀུན་ལྷ་ཡེ་ཤེས་མཐོང་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་དགུ་དགུའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ཀྱང་ལོ་བརྒྱད་ཁྲིའི་བར་
དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བྱང་ཆུབ་མཆོག་བགྲོད་སྐྱེ་བའི་ཡུལ་ནི་ཡེ་ཤེས་སྣང་བ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བདུན་བརྒྱའོ། །ཡབ་ནི་བསོད་ནམས་ཁ་ལོ་སྒྱུར་ཞེས་བྱའོ། །ཡུམ་ནི་རིན་ཆེན་སྦྱིན་ཞེས་བྱའོ། །
སྲས་ནི་ང་རོ་བདེ་ཞེས་བྱའོ། །རིམ་གྲོ་པ་ནི་ལྷའི་བྱང་ཆུབ་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐའ་ཡས་བློ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཀུན་ཏུ་བློ་ཞེས་བྱའོ། །འདུས་པ་ནི་ལན་བཅུ་བཞི་སྟེ། ཐམས་ཅད་ལ་ཡང་འབུམ་ཕྲག་བཅུ་བཞི་བཅུ་བཞིའོ། །

སྐུ་ཚེའི་ཚད་ནི་ལོ་ཁྲི་བརྒྱད་སྟོང་ངོ་། །དམ་པའི་ཆོས་ཀྱང་ལོ་ཁྲི་བརྒྱད་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་སྤྱོད་པ་གསལ་སྐྱེ་བའི་ཡུལ་ནི་སྤྱོད་པ་དང་ལྡན་
ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དགུ་སྟོང་ངོ་། །ཡབ་ནི་ལྷ་མཆོད་ཅེས་བྱའོ། །ཡུམ་ནི་འབྱོར་པའི་འོད་ཅེས་བྱའོ། །སྲས་ནི་རིན་ཆེན་ཏོག་གི་རྒྱལ་མཚན་ཞེས་བྱའོ། །རིམ་གྲོ་པ་ནི་རིན་ཆེན་མཐའ་ཡས་མཛོད་ཅེས་བྱའོ། །ཤེས་རབ་ཅན་རྣམས་ཀྱི་
མཆོག་ནི་བསོད་ནམས་སྒྲོན་མ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མེ་ཏོག་འབྱོར་ཞེས་བྱའོ། །འདུས་པ་ནི་ལན་བཅུ་གཅིག་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་རྩ་བཞི་བཞིའོ། །སྐུ་ཚེའི་ཚད་ནི་ལོ་བརྒྱད་ཁྲི་བདུན་སྟོང་ངོ་། །དམ་པའི་ཆོས་ཀྱང་ལོ་བརྒྱད་ཁྲི་
བདུན་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རིན་ཆེན་དགྱེས་སྐྱེ་བའི་ཡུལ་ནི་ཟླ་བ་སྣང་བ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དགུ་བཅུའོ། །ཡབ་ནི་ལེགས་མཐོང་སྒྲོན་མའི་རྒྱལ་པོ་ཞེས་བྱའོ། །ཡུམ་ནི་མཐའ་
ཡས་འོད་ཅེས་བྱའོ། །སྲས་ནི་ཟླ་མཛེས་ཞེས་བྱའོ། །རིམ་གྲོ་པ་ནི་བློ་གྲོས་མཆོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཆོད་འོས་ཁ་ལོ་སྒྱུར་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཤིན་ཏུ་གྲགས་པ་ཞེས་བྱའོ། །འདུས་པ་ནི་ལན་དགུ་བཅུ་རྩ་དགུ་སྟེ། ཐམས་
ཅད་ལ་ཡང་ས་ཡ་ཕྲག་དགུ་དགུའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཆོས་ཀྱི་དབང་ཕྱུག་སྐྱེ་བའི་ཡུལ་ནི་བསོད་ནམས་
རྒྱལ་མཚན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་བརྒྱའོ། །ཡབ་ནི་སྒྲ་མཆོག་ཅེས་བྱའོ། །ཡུམ་ནི་བློ་གྲོས་གྲགས་ཞེས་བྱའོ། །སྲས་ནི་ཡེ་ཤེས་འབྱོར་ཅེས་བྱའོ། །རིམ་གྲོ་པ་ནི་འཇིག་རྟེན་མཆོད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་

ཆགས་མེད་རྟོག་སྤོང་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སེང་གེའི་མཐུ་རྩལ་སྤྱོད་པའི་སྟོབས་ཞེས་བྱའོ། །འདུས་པ་ནི་ལན་བརྒྱད་ཅུ་སྟེ། ཐམས་ཅད་ལ་ཡང་བྱེ་བ་ཕྲག་བརྒྱད་ཅུ་རྩ་བཞི་བཞིའོ། །སྐུ་ཚེའི་ཚད་ནི་ལོ་དགུ་ཁྲི་བརྒྱད་སྟོང་ངོ་། །དམ་པའི་ཆོས་ནི་ལོ་བརྒྱད་
ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ལྷ་ཐམས་ཅད་སྐྱེ་བའི་ཡུལ་ནི་འོད་འཕྲོ་ཏོག་ཅེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བརྒྱད་སྟོང་ངོ་། །ཡབ་ནི་ཟླ་མཐོང་ཞེས་བྱའོ། །ཡུམ་ནི་ཡིད་འོང་མེ་ཏོག་ཅེས་བྱའོ། །
སྲས་ནི་ཐར་པའི་རྒྱན་བཀོད་པའི་རྒྱལ་པོ་ཞེས་བྱའོ། །རིམ་གྲོ་པ་ནི་ཐར་པ་ལ་དགའ་བའི་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐུ་རྩལ་བརྟན་པོ་གཞན་གྱིས་མི་ཐུབ་པའི་སྟོབས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡོན་ཏན་ཀུན་ཏུ་གྲགས་ཤིང་རྣམ་པར་
འཕྲུལ་པར་གྲགས་པའི་སྤོབས་པ་ཞེས་བྱའོ། །འདུས་པ་དང་པོ་ལ་ནི་ཉན་ཐོས་བྱེ་བ་སྟོང་ཕྲག་བཅུའོ། །གཉིས་པ་ལ་ནི་བྱེ་བ་སྟོང་ཕྲག་ཉི་ཤུའོ། །གསུམ་པ་ལ་ནི་བྱེ་བ་སྟོང་ཕྲག་ལྔ་བཅུའོ། །བཞི་པ་ལ་ནི་བྱེ་བ་སྟོང་ཕྲག་བརྒྱད་ཅུའོ། །ལྔ་པ་ལ་ནི་བྱེ་བ་སྟོང་ཕྲག་བརྒྱའོ། །སྐུ་ཚེའི་
ཚད་ནི་ལོ་བདུན་ཁྲི་སུམ་སྟོང་ངོ་། །དམ་པའི་ཆོས་ནི་ལོ་བྱེ་བའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བཤེས་གཉེན་ཆེན་པོ་སྐྱེ་བའི་ཡུལ་ནི་རིན་པོ་ཆེ་མཐའ་ཡས་བཀོད་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དྲུག་
སྟོང་དྲུག་བརྒྱའོ། །ཡབ་ནི་འཇིག་རྟེན་ལས་འདས་པ་ཞེས་བྱའོ། །ཡུམ་ནི་སྒྲོན་མ་མཆོག་ཅེས་བྱའོ། །སྲས་ནི་ལེགས་མཐོང་བཟོད་ཅེས་བྱའོ། །རིམ་གྲོ་པ་ནི་གཟི་བརྗིད་ཕུང་པོ་མཐའ་ཡས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རྣམ་པར་སྣང་བྱེད་འོད་ཅེས་བྱའོ། །
རྫུ་འཕྲུལ་ཅན་རྣམས་ཀྱི་མཆོག་ནི་དགྲ་བཅོམ་གྲགས་ཞེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་བཅུ་དགུ་བཅུ་དགུའོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ཀྱང་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་

ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་བཤེས་གཉེན་བཟང་པོ་སྐྱེ་བའི་ཡུལ་ནི་གཟི་བརྗིད་ཆེན་པོ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཁྲིའོ། །ཡབ་ནི་མི་གཡོ་བར་གནས་པ་ཞེས་བྱའོ། །ཡུམ་ནི་
མཆོད་པ་འབྱོར་ཅེས་བྱའོ། །སྲས་ནི་ཐར་པ་དགའ་ཞེས་བྱའོ། །རིམ་གྲོ་པ་ནི་མྱ་ངན་འདས་པའི་སྙིང་པོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གྲགས་པ་བརྒྱན་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འབྱོར་དགའ་སེང་གེའི་སྟོབས་ཞེས་བྱའོ། །འདུས་པ་ནི་ལན་
བཅུ་གསུམ་སྟེ། ཐམས་ཅད་ལ་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་བྱེ་བ་ཁྲི་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་ཁྲི་བརྒྱད་སྟོང་ངོ་། །དམ་པའི་ཆོས་ཀྱང་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རབ་ཏུ་ཞི་བའི་
སྟབས་སྐྱེ་བའི་ཡུལ་ནི་ཡུལ་བཟང་མཆོད་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སུམ་ཁྲིའོ། །ཡབ་ནི་ཆོས་ཀྱི་ལྷ་ཞེས་བྱའོ། །ཡུམ་ནི་ཡིད་དུ་འོང་བའི་དབྱངས་ཀྱི་དབང་ཕྱུག་རྒྱལ་པོ་ཞེས་བྱའོ། །སྲས་ནི་དབང་པོ་དུལ་ཞེས་བྱའོ། །རིམ་གྲོ་པ་ནི་ས་གསལ་ཞེས་
བྱའོ། །ཤེས་རབ་ཅན་རྣམས་ཀྱི་མཆོག་ནི་སྣང་བ་མཐའ་ཡས་དཔལ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལག་ན་རིན་ཆེན་ཏོག་གི་རྒྱལ་མཚན་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་རྩ་བརྒྱད་བརྒྱད་དོ། །སྐུ་ཚེའི་ཚད་ནི་ལོ་
བདུན་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་ལྔ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བདུད་རྩིའི་བདག་པོ་སྐྱེ་བའི་ཡུལ་ནི་གྲགས་པ་སྤོང་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དྲུག་ཁྲི་དྲུག་སྟོང་ངོ་། །ཡབ་ནི་ཟབ་
པར་གྲགས་ཞེས་བྱའོ། །ཡུམ་ནི་དགྲ་བཅོམ་མཆོད་ཅེས་བྱའོ། །སྲས་ནི་དགྲ་སྤོང་ང་རོ་ཞེས་བྱའོ། །རིམ་གྲོ་པ་ནི་ཡུལ་གྲགས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འཇིག་རྟེན་དཔལ་གྲགས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྷ་གྲགས་ཐར་པ་ཞེས་བྱའོ། །

འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་དྲུག་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་དྲུག་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ལྷུན་པོའི་
འོད་སྐྱེ་བའི་ཡུལ་ནི་རི་བོ་བརྩེགས་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་འབུམ་མོ། །ཡབ་ནི་ལྷའི་མེ་ཏོག་ཅེས་བྱའོ། །ཡུམ་ནི་འབྱོར་གྲགས་ཞེས་བྱའོ། །སྲས་ནི་ཐར་པ་བརྩེགས་ཞེས་བྱའོ། །རིམ་གྲོ་པ་ནི་ལྷའི་འོད་ཟེར་ཞེས་བྱའོ། །ཤེས་རབ་
ཅན་རྣམས་ཀྱི་མཆོག་ནི་ལྷའི་ཟླ་བ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བློ་བརྟན་ཞེས་བྱའོ། །འདུས་པ་ནི་ལན་ཐེར་འབུམ་སྟེ། ཐམས་ཅད་ལ་ཡང་བྱེ་བ་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་བྱེ་བའོ། །དམ་པའི་ཆོས་ཀྱང་ལོ་བྱེ་བའི་བར་དུ་གནས་སོ། །སྐུ་
གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་འཕགས་པས་བསྟོད་པ་སྐྱེ་བའི་ཡུལ་ནི་བློ་གྲོས་གྲགས་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དགུ་ཁྲིའོ། །ཡབ་ནི་མཐའ་ཡས་སྦེད་ཅེས་བྱའོ། །ཡུམ་ནི་གྲགས་པའི་ཕྲེང་བ་ཞེས་བྱའོ། །
སྲས་ནི་ལྷ་སྦེད་ཅེས་བྱའོ། །རིམ་གྲོ་པ་ནི་གྲགས་པ་སྤོང་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འཇིག་རྟེན་ཀུན་གྱིས་མཆོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྟོན་པ་གྲགས་ཞེས་བྱའོ། །འདུས་པ་ནི་ལན་བཅྭ་བརྒྱད་དེ། ཐམས་ཅད་ལ་ཡང་བྱེ་བ་འབུམ་ཕྲག་
བཅྭ་བརྒྱད་བཅྭ་བརྒྱད་དོ། །སྐུ་ཚེའི་ཚད་ནི་ལོ་བརྒྱད་ཁྲིའོ། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྣང་ལྡན་སྐྱེ་བའི་ཡུལ་ནི་གཟི་བརྗིད་ཕུང་པོ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་
བརྒྱད་སྟོང་ངོ་། །ཡབ་ནི་ཟང་ཟིང་སྤངས་ཞེས་བྱའོ། །ཡུམ་ནི་མཆོག་སྦྱིན་ཞེས་བྱའོ། །སྲས་ནི་རྣམ་པར་གྲགས་པའི་རྒྱལ་པོ་ཞེས་བྱའོ། །རིམ་གྲོ་པ་ནི་མཐུ་རྩལ་རྡོ་རྗེ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བདུད་རྩིའི་སྙིང་པོ་ཞེས་བྱའོ། །རྫུ་འཕྲུལ་ཅན་རྣམས་ཀྱི་

མཆོག་ནི་དེད་དཔོན་ཆེན་པོ་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་དྲུག་ཅུ་རྩ་བདུན་བདུན་ནོ། །སྐུ་ཚེའི་ཚད་ནི་ལོ་དགུ་ཁྲིའོ། །དམ་པའི་ཆོས་ཀྱང་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་
གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་གཟི་བརྗིད་འབར་བ་སྐྱེ་བའི་ཡུལ་ནི་སྣང་བ་མཐའ་ཡས་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་ཁྲིའོ། །ཡབ་ནི་ལྷ་བདེ་ཞེས་བྱའོ། །ཡུམ་ནི་ཐར་པ་མཆོག་ཅེས་བྱའོ། །སྲས་ནི་མྱ་ངན་ལས་འདས་
པའི་མེ་ཏོག་ཅེས་བྱའོ། །རིམ་གྲོ་པ་ནི་སྲེད་མེད་གྲགས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཉོན་མོངས་པ་མེད་པར་གྲགས་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འཇིག་རྟེན་ཐམས་ཅད་དུ་གྲགས་པ་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་
ཡང་བྱེ་བ་ཕྲག་ལྔ་བཅུ་རྩ་དྲུག་དྲུག་གོ། །སྐུ་ཚེའི་ཚད་ནི་ལོ་བདུན་ཁྲི་ཉིས་སྟོང་ངོ་། །དམ་པའི་ཆོས་ནི་ལོ་བདུན་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་སྣང་བ་གཟིགས་སྐྱེ་བའི་ཡུལ་ནི་སྣང་བ་མཐའ་ཡས་ཞེས་བྱའོ། །རིགས་ནི་
རྒྱལ་རིགས་སོ། །འོད་ནི་དཔག་ཚད་བྱེ་བའོ། །ཡབ་ནི་འོད་ཟེར་ཡངས་པ་ཞེས་བྱའོ། །ཡུམ་ནི་ཡིད་འོང་གཟི་བརྗིད་ཅེས་བྱའོ། །སྲས་ནི་བདུད་རྩི་བཀོད་པ་ཞེས་བྱའོ། །རིམ་གྲོ་པ་ནི་བདེན་པའི་རྒྱལ་པོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མངོན་པར་ཤེས་པས་རྣམ་པར་
བརྩེ་བ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བྱང་ཆུབ་སྟོབས་ཞེས་བྱའོ། །འདུས་པ་ནི་ལན་བརྒྱད་ཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་དགུ་ཁྲི་དགུ་སྟོང་ངོ་། །དམ་པའི་ཆོས་ནི་ལོ་བྱེ་བའི་བར་དུ་གནས་སོ། །སྐུ་གདུང་ནི་རྒྱས་
པར་འགྱུར་རོ། །དེ་བཞིན་གཤེགས་པ་ལེགས་སྦྱང་རྣམ་པར་སྨིན་པ་སྐྱེ་བའི་ཡུལ་ནི་བྱང་ཆུབ་གསལ་བ་ཅན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་བརྒྱའོ། །ཡབ་ནི་ཡུལ་དགའ་ཞེས་བྱའོ། །ཡུམ་ནི་བདུད་རྩིའི་གྲགས་ཞེས་བྱའོ། །སྲས་ནི་ལྷ་བདེན་

ཞེས་བྱའོ། །རིམ་གྲོ་པ་ནི་འཇིག་རྟེན་བསྡུས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐོང་བས་སྤོང་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཐའ་ཡས་ཞེས་བྱའོ། །འདུས་པ་ནི་ལན་བཞི་བཅུ་སྟེ། ཐམས་ཅད་ལ་ཡང་འབུམ་ཕྲག་བཞི་བཅུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་བདུན་ཁྲི་
སུམ་སྟོང་ངོ་། །དམ་པའི་ཆོས་ནི་ལོ་བཞི་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ལེགས་དགྱེས་སྐྱེ་བའི་ཡུལ་ནི་འོད་ཟེར་ཡིད་དུ་འོང་བ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཁྲིའོ། །
ཡབ་ནི་ཆུ་ལྷའི་བདག་ཅེས་བྱའོ། །ཡུམ་ནི་ཤེས་རབ་འཕགས་ཞེས་བྱའོ། །སྲས་ནི་བདེན་པའི་སྟོབས་ཞེས་བྱའོ། །རིམ་གྲོ་པ་ནི་སེང་གེས་བྱིན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འོད་ཟེར་མཆོག་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཆོད་སྤངས་ཞེས་བྱའོ། །འདུས་པ་ནི་ལན་བདུན་
ཅུ་སྟེ། ཐམས་ཅད་ལ་ཡང་བྱེ་བ་འབུམ་ཕྲག་སུམ་ཅུ་རྩ་གཉིས་གཉིས་སོ། །སྐུ་ཚེའི་ཚད་ནི་ལོ་དགུ་ཁྲི་བཞི་སྟོང་ངོ་། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་མྱ་ངན་བྲལ་སྐྱེ་བའི་ཡུལ་ནི་གཟི་བརྗིད་ཡིད་དུ་འོང་བ་ཞེས་བྱའོ། །རིགས་ནི་རྒྱལ་རིགས་སོ། །
འོད་ནི་དཔག་ཚད་བདུན་ཁྲི་དགུ་སྟོང་ངོ་། །ཡབ་ནི་ཐར་པའི་རྒྱལ་མཚན་ཞེས་བྱའོ། །ཡུམ་ནི་འཕགས་པའི་མེ་ཏོག་ཅེས་བྱའོ། །སྲས་ནི་ཡོན་ཏན་ཀུན་སྦེད་ཅེས་བྱའོ། །རིམ་གྲོ་པ་ནི་ཡེ་ཤེས་འོད་ཟེར་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ལྷའི་སྒྲོན་མ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་
ཕུང་པོ་བཟང་པོ་འོད་ཅེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་བྱེ་བ་ཕྲག་སྟོང་སྟོང་ངོ་། །སྐུ་ཚེའི་ཚད་ནི་ལོ་ཉི་ཁྲི་བརྒྱད་སྟོང་ངོ་། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རིན་ཆེན་འོད་སྐྱེ་བའི་ཡུལ་ནི་ཀུན་ཏུ་ཡོན་ཏན་
ཅན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱའོ། །ཡབ་ནི་བློ་གྲོས་ཟླ་བ་ཞེས་བྱའོ། །ཡུམ་ནི་ངེས་པར་གྲགས་པ་ཞེས་བྱའོ། །སྲས་ནི་བདུད་རྩིའི་མིག་ཅེས་བྱའོ། །རིམ་གྲོ་པ་ནི་ཕྱོགས་གྲགས་རིན་ཆེན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མ་སྨད་གྲགས་ཞེས་བྱའོ། །

རྫུ་འཕྲུལ་ཅན་རྣམས་ཀྱི་མཆོག་ནི་ཀུན་ཏུ་བློ་ཞེས་བྱའོ། །འདུས་པ་ནི་ལན་ཉི་ཤུ་རྩ་གཉིས་ཏེ། ཐམས་ཅད་ལ་ཡང་ཐེར་འབུམ་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་དྲུག་ཁྲི་དྲུག་སྟོང་ངོ་། །དམ་པའི་ཆོས་ཀྱང་ལོ་དྲུག་ཁྲི་དྲུག་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་
རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་སྤྱོད་པ་དང་ལྡན་པ་སྐྱེ་བའི་ཡུལ་ནི་སྐྱེ་བོའི་མཆོད་རྟེན་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བདུན་ཁྲིའོ། །ཡབ་ནི་རིན་ཆེན་གྲགས་ཞེས་བྱའོ། །ཡུམ་ནི་མེ་ཏོག་མན་དཱ་ར་བའི་གཟི་བརྗིད་ཅེས་བྱའོ། །སྲས་ནི་ལེགས་མཐོང་དགའ་ཞེས་བྱའོ། །
རིམ་གྲོ་པ་ནི་མཐོང་ཆེན་བློ་གྲོས་གསལ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡུལ་འཁོར་ལྷ་སྦེད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བསམ་སྦྱིན་གྲགས་པ་ཞེས་བྱའོ། །འདུས་པ་ནི་ལན་སུམ་ཅུ་རྩ་བཞི་སྟེ། ཐམས་ཅད་ལ་ཡང་དུང་ཕྱུར་ཕྲག་བདུན་བདུན་ནོ། །སྐུ་ཚེའི་ཚད་ནི་ལོ་དགུ་
ཁྲི་སུམ་སྟོང་ངོ་། །དམ་པའི་ཆོས་ནི་ལོ་དགུ་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བསོད་ནམས་སྟོབས་སྐྱེ་བའི་ཡུལ་ནི་བསོད་ནམས་ཀྱི་ཕུང་པོའི་སྟེགས་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དུང་ཕྱུར་ཕྲག་བརྒྱད་དོ། །ཡབ་
ནི་བློ་གྲོས་གྲགས་པ་ཞེས་བྱའོ། །ཡུམ་ནི་སྙིང་རྗེའི་ཤུགས་ཅན་ཞེས་བྱའོ། །སྲས་ནི་སྙིང་སྟོབས་ཞུམ་པ་མེད་པའི་བློ་ཞེས་བྱའོ། །རིམ་གྲོ་པ་ནི་ལྷའི་ཟླ་བ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་རིན་པོ་ཆེས་རབ་ཏུ་བརྒྱན་པའི་གཟི་བརྗིད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཕྱོགས་
བལྟ་གྲགས་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་ས་ཡ་ཕྲག་དགུ་དགུའོ། །སྐུ་ཚེའི་ཚད་ནི་ལོ་ལྔ་ཁྲི་བཞི་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཡོན་
ཏན་རྒྱ་མཚོ་སྐྱེ་བའི་ཡུལ་ནི་བྱང་ཆུབ་སྒྲོན་མ་ཞེས་བྱའོ། །རིགས་ནི་བྲམ་ཟེའོ། །འོད་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་མོ། །ཡབ་ནི་ཡོན་ཏན་མཐའ་ཡས་གྲགས་ཞེས་བྱའོ། །ཡུམ་ནི་རིན་ཆེན་གྲགས་ཞེས་བྱའོ། །སྲས་ནི་ལྷའི་གྲོང་ཁྱེར་གཙོ་ཞེས་བྱའོ། །རིམ་གྲོ་པ་ནི་ཤེད་

རྫོགས་འདུ་ཤེས་བརྟན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཐོང་དགའ་བེའུ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བློ་གྲོས་སྐྱོན་མེད་ཅེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་རྩ་དགུ་དགུའོ། །སྐུ་ཚེའི་ཚད་ནི་ལོ་དགུ་ཁྲི་བཞི་སྟོང་ངོ་། །དམ་པའི་
ཆོས་ཀྱང་ལོ་དགུ་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རྨད་དུ་བྱུང་བ་སྐྱེ་བའི་ཡུལ་ནི་མཆོད་གནས་སྤྱོད་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བརྒྱད་ཅུའོ། །ཡབ་ནི་གྲགས་པ་མཐའ་ཡས་ཞེས་བྱའོ། །ཡུམ་ནི་ཉི་མའི་སྙིང་པོ་གཟི་
བརྗིད་ཅེས་བྱའོ། །སྲས་ནི་ཡིད་འོང་གྲགས་པའི་རྒྱལ་མཚན་ཞེས་བྱའོ། །རིམ་གྲོ་པ་ནི་ཕན་ལྡན་བློ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མཁས་པ་ལྷ་རྫས་རྫོགས་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་དྲེགས་འགྲོ་ཞེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་བྱེ་བ་
སྟོང་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་དགུ་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ང་རྒྱལ་སྤོང་སྐྱེ་བའི་ཡུལ་ནི་གཟི་བརྗིད་རྫོགས་པ་ཞེས་བྱའོ། །རིགས་ནི་བྲམ་ཟེའོ། །
འོད་ནི་དཔག་ཚད་སུམ་ཁྲི་ལྔ་སྟོང་ངོ་། །ཡབ་ནི་ཡུལ་འཁོར་ལྷ་ཞེས་བྱའོ། །ཡུམ་ནི་བློ་གྲོས་བསོད་ནམས་ཏོག་ཅེས་བྱའོ། །སྲས་ནི་མཐའ་ཡས་འོད་ཅེས་བྱའོ། །རིམ་གྲོ་པ་ནི་མཚན་གྱི་གཟི་བརྗིད་མེ་ཏོག་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སེང་གེའི་བློ་གྲོས་གྲགས་པ་ཞེས་བྱའོ། །རྫུ་
འཕྲུལ་ཅན་རྣམས་ཀྱི་མཆོག་ནི་རབ་མཆོག་གསལ་བ་ཞེས་བྱའོ། །འདུས་པ་ནི་ལན་དྲུག་ཅུ་སྟེ། ཐམས་ཅད་ལ་ཡང་འབུམ་ཕྲག་བཅུ་དྲུག་བཅུ་དྲུག་གོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་ཁྲི་དྲུག་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་
ཟད་དོ། །དེ་བཞིན་གཤེགས་པ་བདུད་བརླག་པར་མཛད་པ་སྐྱེ་བའི་ཡུལ་ནི་བྱང་ཆུབ་བཀོད་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་འབུམ་མོ། །ཡབ་ནི་རིན་ཆེན་གཟི་བརྗིད་ཀུན་ཏུ་སྦེད་ཅེས་བྱའོ། །ཡུམ་ནི་བཀོད་པ་དཔག་ཏུ་མེད་པའི་རྒྱལ་པོ་ཞེས་བྱའོ། །སྲས་ནི་རྣམ་པར་བརྩེ་བའི་ང་རོ་

ཞེས་བྱའོ། །རིམ་གྲོ་པ་ནི་བྱམས་པ་མཐའ་ཡས་བློ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་འབྲུག་སྒྲ་དབྱངས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འབྲུག་སྒྲ་མཐུ་རྩལ་ཞེས་བྱའོ། །འདུས་པ་ནི་ལན་དགུ་བཅུ་རྩ་དྲུག་སྟེ། ཐམས་ཅད་ལ་ཡང་འབུམ་ཕྲག་དྲུག་ཅུ་རྩ་དྲུག་དྲུག་གོ། །སྐུ་
ཚེའི་ཚད་ནི་ལོ་སུམ་ཁྲི་སུམ་སྟོང་ངོ་། །དམ་པའི་ཆོས་ནི་ལོ་འབུམ་གྱི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ཉི་ཤུ་གཉིས་པ། དེ་བཞིན་གཤེགས་པ་བག་ཆགས་ལས་རྒལ་བའི་སྟབས་སྐྱེ་བའི་ཡུལ་
ནི་བཀོད་པ་མཚུངས་པ་མེད་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བྱེ་བ་ཕྲག་འབུམ་མོ། །ཡབ་ནི་འཇིག་རྟེན་སྙན་པར་གྲགས་ཞེས་བྱའོ། །ཡུམ་ནི་བློ་གྲོས་བཟང་མོ་ཞེས་བྱའོ། །སྲས་ནི་དགའ་དང་གྲགས་ཞེས་བྱའོ། །རིམ་གྲོ་པ་ནི་གྲགས་པའི་བློ་གྲོས་གཟི་བརྗིད་ཅེས་བྱའོ། །ཤེས་རབ་
ཅན་རྣམས་ཀྱི་མཆོག་ནི་མིའི་ཟླ་བའི་འོད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྐྱེ་དབང་མཚུངས་ཞེས་བྱའོ། །འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་བྱེ་བ་ཕྲག་སྟོང་སྟོང་ངོ་། །སྐུ་ཚེའི་ཚད་ནི་ལོ་བརྒྱད་ཁྲི་བདུན་སྟོང་ངོ་། །དམ་པའི་ཆོས་ནི་ལོ་འབུམ་གྱི་བར་དུ་གནས་སོ། །སྐུ་གདུང་ནི་
རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་མི་ཕྱེད་པའི་བློ་མངའ་བ་སྐྱེ་བའི་ཡུལ་ནི་བྱང་ཆུབ་ངེས་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སུམ་སྟོང་སུམ་བརྒྱའོ། །ཡབ་ནི་གཟི་བརྗིད་འབྱོར་ཅེས་བྱའོ། །ཡུམ་ནི་གྲགས་ཆེན་རྒྱལ་མཚན་ཞེས་
བྱའོ། །སྲས་ནི་རྒྱལ་མཚན་གྱི་གཟི་བརྗིད་ཅེས་བྱའོ། །རིམ་གྲོ་པ་ནི་ཡན་ལག་མ་སྨད་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བདུད་རྩིའི་རིན་པོ་ཆེ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བློ་གྲོས་གྲགས་པ་སེམས་ཞེས་བྱའོ། །འདུས་པ་ནི་ལན་བཞི་བཅུ་སྟེ། ཐམས་ཅད་ལ་ཡང་དུང་
ཕྱུར་ཕྲག་ལྔ་ལྔའོ། །སྐུ་ཚེའི་ཚད་ནི་ལོ་དྲུག་ཁྲིའོ། །དམ་པའི་ཆོས་ནི་ལོ་དྲུག་ཁྲི་དྲུག་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་རྒྱ་མཚོ་སྐྱེ་བའི་ཡུལ་ནི་དགའ་བ་གསལ་བ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དགུ་ཁྲི་དགུ་སྟོང་ངོ་། །ཡབ་ནི་

རྒྱུ་སྐར་ཏོག་ཅེས་བྱའོ། །ཡུམ་ནི་བདེ་སྟོབས་གྲགས་ཞེས་བྱའོ། །སྲས་ནི་བག་ཡོད་གཟི་བརྗིད་ཅེས་བྱའོ། །རིམ་གྲོ་པ་ནི་མཁས་བརྩོན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་བློ་གྲོས་བདེན་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྤོས་ཀྱི་དབང་ཕྱུག་རྒྱལ་པོ་ཞེས་བྱའོ། །
འདུས་པ་ནི་ལན་དགུ་བཅུ་སྟེ། ཐམས་ཅད་ལ་ཡང་བྱེ་བ་ཕྲག་དགུ་བཅུ་རྩ་བཞི་བཞིའོ། །སྐུ་ཚེའི་ཚད་ནི་ལོ་བརྒྱད་ཁྲི་བཞི་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དག་པར་མཛད་པ་སྐྱེ་བའི་ཡུལ་ནི་གཟི་
བརྗིད་ཀྱིས་བརྒྱན་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་དྲུག་ཁྲི་བདུན་སྟོང་ངོ་། །ཡབ་ནི་རིན་ཆེན་མེ་ཏོག་ཅེས་བྱའོ། །ཡུམ་ནི་ཡོན་ཏན་རིན་ཆེན་མེ་ཏོག་ཅེས་བྱའོ། །སྲས་ནི་སེང་གེའི་བློ་གྲོས་གྲགས་པ་ཞེས་བྱའོ། །རིམ་གྲོ་པ་ནི་གཡོ་བ་མེད་པར་གནས་པ་ཞེས་བྱའོ། །ཤེས་
རབ་ཅན་རྣམས་ཀྱི་མཆོག་ནི་ཟླ་བའི་སྙིང་པོ་དཔལ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མངོན་པར་ཤེས་པས་རྣམ་པར་བརྩེ་བ་ཞེས་བྱའོ། །འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་དུང་ཕྱུར་ཕྲག་བཞི་བཞིའོ། །སྐུ་ཚེའི་ཚད་ནི་ལོ་བཞི་ཁྲི་བཞི་སྟོང་ངོ་། །དམ་པའི་ཆོས་ནི་ལོ་
བཞི་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཚོགས་ཅན་གྲོལ་བའི་རྒྱལ་པོ་སྐྱེ་བའི་ཡུལ་ནི་རིན་པོ་ཆེའི་མཆོག་ཅེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ལྔ་ཁྲིའོ། །ཡབ་ནི་ལུས་པ་མེད་པའི་
བློ་ཞེས་བྱའོ། །ཡུམ་ནི་ཀུན་ཏུ་རིན་ཆེན་ཞེས་བྱའོ། །སྲས་ནི་མེ་ཏོག་གཟི་བརྗིད་ཅེས་བྱའོ། །རིམ་གྲོ་པ་ནི་ཚྭ་རྒོ་བྱིན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སྲིད་པའི་སྲེད་པ་འཇོམས་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འཛིན་པ་དཔག་མེད་ཅེས་བྱའོ། །འདུས་པ་ནི་ལན་དྲུག་ཅུ་སྟེ།
ཐམས་ཅད་ལ་ཡང་དུང་ཕྱུར་ཕྲག་བདུན་བདུན་ནོ། །སྐུ་ཚེའི་ཚད་ནི་ལོ་དྲུག་ཁྲི་སུམ་སྟོང་ངོ་། །དམ་པའི་ཆོས་ཀྱང་ལོ་དྲུག་ཁྲི་སུམ་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་དགའ་བའི་འོད་སྐྱེ་བའི་ཡུལ་ནི་བྱང་

ཆུབ་སྤྱད་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་སུམ་ཁྲི་བརྒྱད་སྟོང་ངོ་། །ཡབ་ནི་ཡིད་འོང་གཟི་བརྗིད་ཅེས་བྱའོ། །ཡུམ་ནི་ང་རོ་སྙན་པའི་སེང་གེའི་སྒྲ་ཞེས་བྱའོ། །སྲས་ནི་བཞིན་གཙང་ཞེས་བྱའོ། །རིམ་གྲོ་པ་ནི་མཆོད་གྲགས་ཞེས་བྱའོ། །ཤེས་
རབ་ཅན་རྣམས་ཀྱི་མཆོག་ནི་བདུད་རྩིའི་སྐྱེད་མོས་ཚལ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་འཇིག་རྟེན་སེམས་ཞེས་བྱའོ། །འདུས་པ་ནི་ལན་དགུ་བཅུ་རྩ་བཞི་སྟེ། ཐམས་ཅད་ལ་ཡང་འབུམ་ཕྲག་དགུ་བཅུ་རྩ་དགུ་དགུའོ། །སྐུ་ཚེའི་ཚད་ནི་ལོ་དགུ་ཁྲི་བཞི་སྟོང་ངོ་། །དམ་པའི་
ཆོས་ཀྱང་ལོ་དགུ་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །བདེ་གཤེགས་བྱང་ཆུབ་རྒྱལ་མཚན་སྐྱེ་བ་ཡི། །ཡུལ་ནི་ཆོས་དག་སྣང་བར་བྱེད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བདུན་ཅུ་ཡབ་ནི་ལེགས་བཟང་ཡིན། །ཆུ་ལྷ་མཆོད་ཅེས་
བྱ་བ་རྒྱལ་བའི་ཡུམ། །སྲས་པོ་རྩི་སྨན་དཔའ་བོ་རིམ་གྲོ་པ། །ཕྱོགས་མཆོད་ཅེས་ནི་བྱ་བ་མཁས་པ་སྟེ། །གཏི་མུག་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །ཁམས་གསུམ་སྲིད་ལ་ངར་ནི་མི་འཛིན་པ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་
ཚེ་ལོ་གྲངས་བདུན་ཁྲི་ལྔ་སྟོང་ཡིན། །ཁྱུ་མཆོག་ཆེན་པོའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་བཞི་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་དྲུག་པ་གཅིག་གསེར་གྱིས་མཛེས་པར་བྱས། །མི་ཡི་འདྲེན་པ་ཡེ་ཤེས་རིན་ཆེན་གྱི། །སྐྱེ་བའི་
ཡུལ་ནི་ཐམས་ཅད་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་ལྔ་བརྒྱ་ཡབ་ནི་ལེགས་མཆོག་ཡིན། །འཇིག་རྟེན་མཆོག་མ་ཞེས་བྱ་རྒྱལ་བའི་ཡུམ། །སྲས་པོ་གྲོལ་འདོད་ཟླ་བ་རིམ་གྲོ་པ། །ཀུན་ཏུ་དགའ་ཞེས་བྱ་བ་མཁས་པ་སྟེ། །ཁ་ལོ་སྒྱུར་བའི་
རྒྱལ་པོ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །ང་མེད་ཚུལ་འཆོས་མེད་པའི་དགྲ་བཅོམ་པ། །བྱེ་བ་ཕྲག་ནི་ཉི་ཤུ་བཞི་བཞི་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་དྲུག་སྟོང་

བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་བརྒྱད་ཅུར་འབྱུང་། །མི་ཡི་འདྲེན་པ་ཤིན་ཏུ་བསིལ་བ་ཡི། །སྐྱེ་ཡུལ་ཡེ་ཤེས་རྣམ་པར་གྲགས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །སུམ་ཅུ་རྩ་གཉིས་ཡབ་ནི་ཚངས་བཟང་ཡིན། །
ཡེ་ཤེས་འོད་ཅེས་བྱ་བ་རྒྱལ་བའི་ཡུམ། །སྲས་པོ་ལྷ་ཡིན་བློ་གྲོས་རིམ་གྲོ་པ། །བློ་ལྡན་སྙོམས་པ་བློ་གྲོས་ཅན་ཡིན་ཏེ། །འཇིག་པ་མེད་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །དགྲ་བཅོམ་ཐམས་ཅད་ཕ་མཐར་ཕྱིན་པ་པོ། །བྱེ་བ་ཕྲག་ནི་དགུ་བཅུ་དགུ་
དགུ་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་རྒྱལ་མཚན་མཆོག་གིས་བརྒྱན། །འཇིག་རྟེན་མགོན་པོ་ཚངས་པ་
རྒྱལ་བ་ཡི། །སྐྱེ་བའི་ཡུལ་ནི་ལེགས་པར་སྦྱངས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་དྲན་ལྡན་ཡིན། །དགེ་བའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་ལྟ་བྱེད་གྲགས་པ་རིམ་གྲོ་པ། །ཡོན་ཏན་རྒྱ་མཚོ་ཞེས་བྱ་མཁས་
པ་སྟེ། །འཇིགས་པ་མེད་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་གཉིས་ཀུན་ལའང་། །འཇིག་རྟེན་དྲི་མ་དྲི་བྲལ་དགྲ་བཅོམ་པ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །འགྲོ་ལ་ཕན་ཕྱིར་དམ་པའི་ཆོས་
དག་ཀྱང་། །ལོ་གྲངས་དགུ་ཁྲི་བཞི་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱ་པ་གསེར་གྱི་རྣ་རྒྱན་ཅན། །སངས་རྒྱས་ཡེ་ཤེས་དགྱེས་པ་སྐྱེ་བ་ཡི། །ཡུལ་ནི་ཡོན་ཏན་ཀུན་གྱི་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་
འོད་ཀྱི་ཚད། །དཔག་ཚད་བརྒྱད་བརྒྱ་བརྟུལ་ཞུགས་དབང་པོ་ཡབ། །དབང་པོའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་སྐར་མཁན་སྣང་བྱེད་རིམ་གྲོ་པ། །མཐུ་རྩལ་བརྟན་པོ་ཞེས་བྱ་མཁས་པ་སྟེ། །ཀུན་ཏུ་གཙོ་ཞེས་བྱ་བ་རྫུ་འཕྲུལ་ཅན། །འདུས་པ་ལན་

གྲངས་དྲུག་ཅུ་གཉིས་ཀུན་ལའང་། །ལམ་རབ་མཆོག་མར་ཤིན་ཏུ་དུལ་བ་པོ། །བྱེ་བ་ཕྲག་ནི་དགུ་བཅུ་གསུམ་གསུམ་ཡོད། །མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་དྲུག་སྟོང་བར་དུ་གནས། །རྒྱལ་
བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་བརྒྱད་ཅུ་འབྱུང་། །རྒྱལ་བ་རྫུ་འཕྲུལ་ཏོག་གི་སྐྱེ་བའི་ཡུལ། །བསོད་ནམས་རྣམ་པར་སྣང་བར་བྱེད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་བཅུ་འབྱོར་པའི་དབང་པོ་ཡབ། །བསོད་ནམས་གྲགས་པ་
རྒྱལ་ཡུམ་སྲས་པོ་ནི། །བསོད་ནམས་ལེགས་ངེས་ཆོས་ལྡན་རིམ་གྲོ་པ། །ཡོན་ཏན་ཁ་ལོ་སྒྱུར་བ་མཁས་པ་སྟེ། །གནས་པ་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །རྨ་མེད་ཚུལ་འཆོས་མེད་པའི་དགྲ་བཅོམ་པ། །བྱེ་བ་སྟོང་ཕྲག་བདུན་ཅུ་
བདུན་བདུན་ཡོད། །མི་ཚེ་ལོ་གྲངས་བརྒྱད་ཁྲི་སུམ་སྟོང་ཡིན། །གྲགས་པ་མཐའ་ཡས་པ་ཡི་དམ་ཆོས་དག །ལོ་གྲངས་དགུ་ཁྲི་ཆིག་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཅུ་པ་རྒྱལ་མཚན་བྱེ་བས་བརྒྱན། །དེ་བཞིན་གཤེགས་པ་སྐྱེ་
དབང་མཚུངས་པ་ཡི། །སྐྱེ་བའི་ཡུལ་ནི་རྒྱལ་བའི་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དྲུག་ཅུ་སྦྱིན་སྲེག་འོད་འཕྲོ་ཡབ། །ཡོན་ཏན་ཚོགས་ཞེས་བྱ་བ་རྒྱལ་བའི་ཡུམ། །སྲས་པོ་དགེ་ལྡན་དགེ་བཟངས་རིམ་གྲོ་པ། །ཡོན་ཏན་སྣོད་ཅེས་བྱ་བ་མཁས་པ་སྟེ། །
ཡོན་ཏན་འོད་གསལ་བ་ནི་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་གསུམ་ལ་ཡང་། །ཞི་བ་གཏི་མུག་མེད་ཅིང་ཆགས་མེད་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་བདུན་ཁྲི་བརྒྱད་སྟོང་ཡིན། །རྣམ་གྲོལ་ཐོབ་པ་མྱ་ངན་འདས་ནས་ཀྱང་། །དམ་ཆོས་
ལོ་གྲངས་སྟོང་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་ཐེར་འབུམ་དག་ནི་བདུན་ཅུ་འབྱུང་། །དེ་བཞིན་གཤེགས་པ་ས་ཡི་དབང་ཕྱུག་གི། །སྐྱེ་བའི་ཡུལ་ནི་ལེགས་པར་གནས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་

བྱེ་བ་ཡབ་ནི་དོན་གནས་ཡིན། །བློ་གནས་བློ་གྲོས་རྒྱལ་ཡུམ་བྱང་ཆུབ་ནི། །སྲས་ཡིན་ལེགས་པའི་བྱང་ཆུབ་རིམ་གྲོ་པ། །ཤེད་སྐྱེས་དབང་ཕྱུག་ཅེས་བྱ་མཁས་པ་སྟེ། །དོན་ཡོད་སྣ་ཚོགས་པ་ནི་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་གཉིས་ཀུན་ལའང་། །སྟོན་ཅིང་སྒོམ་
པའི་མཐར་ནི་ཕྱིན་པ་པོ། །བྱེ་བ་ཕྲག་ནི་བདུན་ཅུ་རེ་རེ་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །གྲགས་པ་མཐའ་ཡས་པ་ཡི་དམ་ཆོས་དག །ལོ་གྲངས་ཉི་ཁྲི་ཆིག་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོས་ཁམས་གསུམ་གང་བར་
འགྱུར། །དེ་བཞིན་གཤེགས་པ་ཉི་མ་དགྱེས་པ་ཡི། །སྐྱེ་བའི་ཡུལ་ནི་གཟི་བརྗིད་བསྡུས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གསུམ་ཡོད་ཐོས་པའི་དབང་པོ་ཡབ། །དབང་པོའི་འགྲོས་ཞེས་བྱ་བ་རྒྱལ་བའི་ཡུམ། །སྲས་པོ་ཁ་སྒྱུར་གནས་པ་རིམ་གྲོ་པ། །
དམག་མའི་མཆོག་ཅེས་བྱ་བ་མཁས་པ་སྟེ། །རྣམ་པར་ངེས་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །སྲིད་པ་ཀུན་གྱིས་གོས་པ་མེད་པ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །རྒྱལ་བ་མྱ་ངན་འདས་ནས་
དམ་ཆོས་དག །ལོ་གྲངས་སུམ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བདུན་པ་གསེར་གྱི་བླ་རེར་ལྡན། །བདེ་གཤེགས་སྒྲ་གཅན་ཟླ་བ་སྐྱེ་བ་ཡི། །ཡུལ་ནི་ཏོག་རྣམས་སྣང་བར་བྱེད་ཅེས་བྱ། །རིགས་ནི་རྒྱལ་རིགས་ཡིན་ཏེ་
འོད་དཔག་ཚད། །བདུན་ཅུ་རྩ་གསུམ་ཡབ་ནི་ཏོག་བཟངས་ཡིན། །སྣང་བ་ཅན་ཞེས་བྱ་བ་རྒྱལ་བའི་ཡུམ། །སྲས་པོ་གཟི་བརྗིད་ལྡན་སྣང་རིམ་གྲོ་པ། །གྲགས་ལྡན་ཆེན་པོ་ཞེས་བྱ་མཁས་པ་སྟེ། །མྱ་ངན་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་
ཡང་། །འཇིགས་མེད་ཐང་ཆེན་ཕ་མཐར་ལེགས་གནས་པ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་དྲུག་ཁྲི་བརྒྱད་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་

ལ། །མཆོད་རྟེན་བཟང་པོས་ཁམས་གསུམ་གང་བར་འགྱུར། །དེ་བཞིན་གཤ