Kinh tạng Tây Tạng (Kangyur Đại Học) — 045_མདོ་སྡེ།_ཀ

ེས་ན་ཕ་རོལ་ཏུ་ཕྱིན་པའི་མིང་ཐོབ་སྟེ། འདི་དག་ནི་བྱང་ཆུབ་སེམས་དཔའི་ལྷག་མ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་
རིག་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བླ་མ་རྣམས་ལ་རེ་བ་མེད་པར་སྦྱིན་པ་བྱིན་པ་གང་གི་རྣམ་པར་སྨིན་པས་བསྐལ་པ་སྟོང་དུ་འཇིག་རྟེན་པའི་ཟང་ཟིང་ལ་ཡོངས་སུ་སྤྱོད་ཅིང་གནས་ཀྱང་ལུས་ཀྱི་མཐུ་ཉམས་པ་མེད་པ་གང་ཡིན་པ་དེ་ནི་རིག་པ་ཡོངས་སུ་བསྔོས་པའི་སྦྱིན་པའི་ཕ་རོལ་
ཏུ་ཕྱིན་པའོ། །བྱང་ཆུབ་ཀྱི་སྙིང་པོ་དམ་པ་མཆོག་ཐོབ་པས་ཆོས་ཐམས་ཅད་ལ་འགྱོད་པ་མེད་པར་འགྱུར་ཞིང་། གང་གིས་ཐམས་ཅད་མཁྱེན་པ་ཉིད་རྫོགས་པར་བྱང་ཆུབ་པའི་ཚུལ་ཁྲིམས་གང་ཡིན་པ་དེ་ནི་རིག་པ་ཡོངས་སུ་བསྔོས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །
གང་ཐམས་ཅད་མཁྱེན་པ་ཉིད་ལ་དམིགས་ཤིང་། དམིགས་སུ་མེད་པའི་ཆོས་རྣམས་ལ་བཟོད་པ་གང་ཡིན་པ་དེ་ནི་རིག་པ་ཡོངས་སུ་བསྔོས་པའི་བཟོད་པའི་ཕ་རོལ་ཏུ་ཕྱིན་པའོ། །ལམ་ལ་གནས་པའི་སྒྲིབ་པ་ལྔ་རབ་ཏུ་ཞི་བར་འགྱུར་བའི་བརྩོན་འགྲུས་གང་ཡིན་པ་དེ་ནི་རིག་པ་

ཡོངས་སུ་བསྔོས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བྱང་ཆུབ་མངོན་པར་རྫོགས་པར་སངས་རྒྱས་པས་ལྷའི་མིག་དང་། སྔོན་གྱི་གནས་རིག་པ་འཐོབ་པར་འགྱུར་བའི་བསམ་གཏན་གྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་རིག་པ་ཡོངས་སུ་བསྔོས་པའི་བསམ་
གཏན་གྱི་ཕ་རོལ་ཏུ་ཕྱིན་པའོ། །ཟག་པ་ཟད་པར་བྱེད་པ་སངས་རྒྱས་ཀྱི་སྤྱན་འཐོབ་པར་འགྱུར་ལ་རྟག་ཏུ་ཆོས་ཐམས་ཅད་མངོན་དུ་སྣང་བར་འགྱུར་བའི་ཤེས་རབ་གང་ཡིན་པ་དེ་ནི་རིག་པ་ཡོངས་སུ་བསྔོས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་བྱང་ཆུབ་སེམས་དཔའི་
རིག་པ་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རིག་པའི་ཁྱད་པར་ལ་གནས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། གང་གིས་དམ་པའི་ཆོས་གནས་པར་བྱེད་ཅིང་བསྟན་པ་ལ་འཇུག་པའི་ཆོས་གནས་པ་གང་ཡིན་པ་དེ་ནི་རིག་པའི་ཁྱད་པར་ལ་གནས་པའི་སྦྱིན་པའི་
ཕ་རོལ་ཏུ་ཕྱིན་པའོ། །གང་ན་དེ་བཞིན་གཤེགས་པ་བག་ཆགས་ཀྱི་མཚམས་སྦྱོར་བ་དང་བྲལ་བ། ཐ་ན་ལུས་ཀྱི་རྣམ་པར་རྟོག་པ་དང་ངག་གི་རྣམ་པར་རྟོག་པ་མེད་པ་གང་ཡིན་པ་དེ་ནི་ཚུལ་ཁྲིམས་སོ། །འཇིག་རྟེན་པའི་ཆོས་ལ་རྟོག་པ་མེད་པ་གང་ཡིན་པ་དེ་ནི་བཟོད་པའོ། །
ཉན་ཐོས་དང་རང་སངས་རྒྱས་རྣམས་ཀྱིས་ཟིལ་གྱིས་མ་ནོན་པས་མྱ་ངན་ལས་འདས་པ་ཇི་སྲིད་པར་དུས་ཐམས་ཅད་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །སེམས་ཅན་ཐམས་ཅད་ཀྱི་སེམས་ཀྱི་རྣམ་གྲངས་ཤེས་ཤིང་སྒྲ་ལ་རྟོག་པ་གང་ཡིན་པ་དེ་ནི་བསམ་གཏན་
གྱི་ཕ་རོལ་ཏུ་ཕྱིན་པའོ། །དུས་ཤེས་པ་ལས་མི་འདའ་ཞིང་བདག་ཡོངས་སུ་གྲོལ་བར་བྱེད་པའི་ཤེས་རབ་གང་ཡིན་པ་དེ་ནི་རིག་པའི་ཁྱད་པར་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་རིག་པའི་ཁྱད་པར་ལ་གནས་པའི་ཕ་རོལ་ཏུ་ཕྱིན་པ་དྲུག་གོ། །
དེ་ལ་སངས་རྒྱས་འབྱུང་བ་ཕུན་སུམ་ཚོགས་པར་བྱེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སངས་རྒྱས་འབྱུང་བའི་དུས་ན་ལོངས་སྤྱོད་ཆེན་པོར་འགྱུར་ཞིང་ཚད་མེད་པ་གཟུང་བའི་ཕྱིར། གང་འཕགས་པ་རྣམས་ལ་སྦྱིན་པ་བྱིན་པ་གང་ཡིན་པ་དེ་ནི་སངས་རྒྱས་འབྱུང་བ་ཕུན་སུམ་

ཚོགས་པར་བྱེད་པའི་སྦྱིན་པའོ། །ཐར་བར་ཡོངས་སུ་བསྔོས་ཤིང་ཉོན་མོངས་པ་ཟད་པར་བྱ་བ་དང་། སངས་རྒྱས་འབྱུང་བར་འགྱུར་བའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སྟོན་པ་མངོན་སུམ་དུ་གྱུར་པ་ན་སྦྱངས་པའི་ཡོན་ཏན་ལ་སྐྱོ་བ་མེད་པར་
འགྱུར་བའི་བཟོད་པ་ནི་དཔེར་ན་འོད་སྲུང་ཆེན་པོའི་ལྟ་བུ་གང་ཡིན་པ་དེ་ནི་བཟོད་པའོ། །སྨོན་ལམ་དང་ལྡན་པའི་བརྩོན་འགྲུས་ནི་དཔེར་ན་རྒྱལ་པོ་བསོད་ནམས་འཕགས་ཀྱི་ལྟ་བུ་གང་ཡིན་པ་དེ་ནི་བརྩོན་འགྲུས་སོ། །སངས་རྒྱས་རྗེས་སུ་དྲན་པ་ལ་དམིགས་པའི་བསམ་
གཏན་གང་ཡིན་པ་དེ་ནི་བསམ་གཏན་ནོ། །ངེས་པར་འབྱེད་པས་ཡོངས་སུ་བསྔོས་པའི་ཤེས་རབ་ནི་དཔེར་ན། སངས་རྒྱས་འོད་སྲུང་གི་ཚེ་ལྔ་པོ་དག་གི་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་སངས་རྒྱས་འབྱུང་བ་ཕུན་སུམ་ཚོགས་པར་བྱེད་པའི་ཕ་རོལ་ཏུ་
ཕྱིན་པ་དྲུག་གོ། །དེ་ལ་དྲན་པ་ཉམས་པ་མེད་པར་བྱེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། གཞན་གྱི་བསམ་པ་ཇི་ལྟ་བ་བཞིན་སྦྱིན་པ་གང་ཡིན་པ་དེ་ནི་སྦྱིན་པའོ། །ལུས་དང་ངག་ཡོངས་སུ་བསྲུང་བ་ཉེ་བར་བསྒྲུབ་པ་ལ་བརྩོན་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་
སོ། །དམ་པའི་ཆོས་ནུབ་པའི་དུས་སུ་ཡི་དམ་ལ་བརྟན་པ་ཟབ་མོ་ལ་བཟོད་པ་ལས་ངེས་པར་འབྱུང་བའི་བཟོད་པ་གང་ཡིན་པ་དེ་ནི་བཟོད་པའོ། །ཉེ་བར་བསྒྲུབ་པ་ལ་བརྩོན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །སྟོང་པ་ཉིད་ཀྱི་རྣམ་པས་ཡོངས་སུ་བཟུང་
བའི་བསམ་གཏན་གང་ཡིན་པ་དེ་ནི་བསམ་གཏན་ནོ། །ཡིད་མི་བདེ་བས་རབ་ཏུ་ཕྱེ་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་དྲན་པ་ཉམས་པ་མེད་པར་བྱེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་སངས་རྒྱས་འབྱུང་བ་རབ་ཏུ་འཐོབ་པ་ཁྱིམ་གྱི་དངོས་པོ་ལ་
གནས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཡན་ལག་ལྔ་ཕུན་སུམ་ཚོགས་པའི་སྦྱིན་པ་སྟེ་ལྔ་གང་ཞེ་ན། སྟན་ཕུན་སུམ་ཚོགས་པ་དང་། ཡུལ་ཕུན་སུམ་ཚོགས་པ་དང་། འཁོར་ཕུན་སུམ་ཚོགས་པ་དང་། འདོད་པར་བྱ་བ་ཕུན་སུམ་ཚོགས་པ་དང་། ཆགས་པར་

བྱ་བ་ཕུན་སུམ་ཚོགས་པ་གང་ཡིན་པ་དེ་ནི་སྦྱིན་པའོ། །མངོན་པར་ཞེན་པ་མེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །སེམས་ཅན་དུ་འདུ་ཤེས་པ་སྤངས་པའི་བཟོད་པ་གང་ཡིན་པ་དེ་ནི་བཟོད་པའོ། །མཉམ་པ་ཉིད་དུ་མཐོང་བའི་བརྩོན་འགྲུས་གང་
ཡིན་པ་དེ་ནི་བརྩོན་འགྲུས་སོ། །མཉམ་པ་ཉིད་དུ་རྟོགས་པའི་སེམས་སྨོན་པ་མེད་པ་ལ་དམིགས་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །འཕགས་པའི་བདེན་པའི་ཚུལ་གྱིས་ངེས་པར་འབྱུང་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་སངས་
རྒྱས་འབྱུང་བ་རབ་ཏུ་འཐོབ་པ་ཁྱིམ་གྱི་དངོས་པོ་ལ་གནས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ངེས་པར་འབྱུང་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཟག་པ་མེད་པའི་སྦྱིན་པ་དང་ལྡན་པ་མ་ཡིན་པའི་སེམས་ཀྱི་སྦྱིན་པ་གང་ཡིན་པ་དེ་ནི་སྦྱིན་པའོ། །མྱ་ངན་ལས་འདས་
པ་དང་ལྡན་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ཁམས་གསུམ་གྱིས་ཡིད་བྱུང་བའི་བཟོད་པ་གང་ཡིན་པ་དེ་ནི་བཟོད་པའོ། །དྲན་པ་ཉེ་བར་གཞག་པ་ལས་ངེས་པར་བྱུང་བའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །བྱམས་པ་ལ་གནས་ཤིང་སྲིད་
པ་ལ་སྨོད་པར་གནས་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །ཡིད་མི་བདེ་བས་རབ་ཏུ་ཕྱེ་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་ངེས་པར་འབྱུང་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མང་དུ་ཐོས་པ་བསྒྲུབ་པའི་ཕ་རོལ་ཏུ་
ཕྱིན་པ་དྲུག་གང་ཞེ་ན། གདམས་ངག་དང་ལྡན་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །ཆོས་ཡོངས་སུ་གཟུང་བའི་དོན་དུ་ལུས་དང་སྲོག་གཏོང་བའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །དམ་པའི་ཆོས་ནུབ་པའི་དུས་ཀྱི་ཚེ་ཆོས་ཡོངས་སུ་གཟུང་བའི་དོན་
དུ་གང་བྱང་ཆུབ་སེམས་དཔའ་བདག་ཉིད་ཡོངས་སུ་གཏོང་བའི་བཟོད་པ་གང་ཡིན་པ་དེ་ནི་བཟོད་པའོ། །གཟུངས་དང་ལྡན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །རྟེན་ཅིང་འབྲེལ་པར་འབྱུང་བས་རབ་ཏུ་ཕྱེ་བའི་བསམ་གཏན་གང་ཡིན་པ་དེ་ནི་བསམ་

གཏན་ནོ། །སོ་སོ་ཡང་དག་པར་རིག་པས་རབ་ཏུ་ཕྱེ་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་མང་དུ་ཐོས་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རབ་ཏུ་བྱུང་བའི་ངང་ཚུལ་རྒྱུན་མི་འཆད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཆོས་སྨྲ་བ་རྣམས་
ཀྱིས་གཞན་གྱི་བསམ་པ་ཇི་ལྟ་བ་བཞིན་བསྟན་པ་ཡང་དག་པར་ལེན་དུ་འཇུག་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །སྙིང་རྗེ་ཆེན་པོས་ཡོངས་སུ་བསྒོས་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ལྷག་པའི་ང་རྒྱལ་མེད་པའི་བཟོད་པ་གང་ཡིན་པ་དེ་ནི་བཟོད་པའོ། །
བསྒོམས་པའི་སྟོབས་དང་ལྡན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །བྱང་ཆུབ་ཀྱི་ཡན་ལག་དང་མཚུངས་པར་ལྡན་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །མི་སྐྱེ་བའི་ཆོས་ལ་བཟོད་པ་དང་ལྡན་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ།
འདི་དག་ནི་རབ་ཏུ་བྱུང་བའི་ངང་ཚུལ་རྒྱུན་མི་འཆད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མངོན་པར་ཤེས་པ་ལ་གནས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། རྗེ་ས་དང་མ་བྲལ་ཞིང་སློང་བ་ལ་ཡོངས་སུ་གཏོང་བས་གཟུང་བའི་སྦྱིན་པ་གང་ཡིན་པ་དེ་ནི་སྦྱིན་པའོ། །མི་གནས་
པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །འགྱོད་པ་མེད་པའི་བཟོད་པ་གང་ཡིན་པ་དེ་ནི་བཟོད་པའོ། །སྨོན་ལམ་གྱིས་རྣམ་པར་འཕྲུལ་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །སྣང་བས་རྣམ་པར་དཔྱད་པའི་བསམ་གཏན་གང་ཡིན་པ་དེ་ནི་བསམ་
གཏན་ནོ། །སྦྱོར་བའི་སའི་རྣམ་པ་ལ་དམིགས་པས་ལེགས་པར་ཡོངས་སུ་བཟུང་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་མངོན་པར་ཤེས་པ་ལ་གནས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མངོན་པར་ཤེས་པ་རྒྱུན་ཆད་པ་མེད་པའི་ཕ་རོལ་ཏུ་ཕྱིན་པ་
དྲུག་གང་ཞེ་ན། དེ་བཞིན་གཤེགས་པའི་མཆོད་རྟེན་དང་པོར་ཞལ་བསྲོ་བའི་སྦྱིན་པ་གང་ཡིན་པ་དེ་ནི་སྦྱིན་པའོ། །ལམ་ལ་ཞུགས་པའི་ཤེས་རབ་ཀྱི་དབང་པོ་དང་ལྡན་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ཡང་དག་པའི་མཐའ་ལས་ངེས་པར་བྱུང་

བའི་བཟོད་པ་གང་ཡིན་པ་དེ་ནི་བཟོད་པའོ། །གཟུགས་ཀྱི་འདུ་ཤེས་རྣམ་པར་བཤིག་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །རྣམ་པར་ཐར་པས་ངེས་པར་བྱུང་བའི་བསམ་གཏན་གང་ཡིན་པ་དེ་ནི་བསམ་གཏན་ནོ། །ལྷག་མཐོང་གི་ཡོ་བྱད་
ཞི་གནས་ཀྱི་ས་ལ་གནས་པ་གཟུངས་ཀྱིས་ཡོངས་སུ་སྦྱང་བ་བྱས་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་མངོན་པར་ཤེས་པ་རྒྱུན་ཆད་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ལུས་འདོད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སོ་སོར་བརྟགས་པའི་
སྟོབས་ཅན་མི་མཛའ་བ་རྣམས་ལ་ཡོངས་སུ་གཏོང་བའི་སྦྱིན་པ་གང་ཡིན་པ་དེ་ནི་སྦྱིན་པའོ། །ཉམ་ཆུང་བ་རྣམས་ལ་མཐུ་མི་སྟོན་པས་ཉམས་པ་མེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ལས་ཀྱི་སྒྲིབ་པ་ལ་ཇི་མི་སྙམ་པའི་བཟོད་པ་གང་ཡིན་པ་དེ་ནི་བཟོད་
པའོ། །མི་མཛའ་བ་སྤངས་པའི་བརྩོན་འགྲུས་ནི་དཔེར་ན་རྒྱལ་པོའི་བུ་དགེ་བའི་བློ་གྲོས་ཀྱི་ལྟ་བུ་གང་ཡིན་པ་དེ་ནི་བརྩོན་འགྲུས་སོ། །སྙིགས་མའི་དུས་ཀྱི་བསམ་གཏན་གང་ཡིན་པ་དེ་ནི་བསམ་གཏན་ནོ། །ཐར་པ་ལ་གནས་པས་ངེས་པར་འཁོར་བར་བྱ་བར་སྦྱོར་དུ་
འཇུག་པའི་ཤེས་རབ་ནི་དཔེར་ན་ཀུན་ཏུ་རྒྱུ་རྟོགས་བྱེད་ཀྱི་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་ལུས་འདོད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་གནས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། འཁོར་བར་ངན་སོང་གསུམ་གྱི་ཕྱིར་སྦྱིན་པ་ནི་དཔེར་ན་རི་དགས་
ལ་རྔོན་པ་བྱེད་པའི་རྣམ་པར་སྨིན་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །སངས་རྒྱས་འབྱུང་བ་དང་བྲལ་བའི་ཚུལ་ཁྲིམས་ནི་དཔེར་ན་ལྷ་ཆེན་པོས་གཅིག་ནས་གཅིག་ཏུ་བསྟན་པ་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །བརྙས་པས་སྡུག་བསྔལ་བར་གྱུར་ཀྱང་འཁྲུག་པ་
མེད་པའི་བཟོད་པ་ནི་དཔེར་ན་བཟོད་པར་སྨྲ་བའི་ལྟ་བུ་གང་ཡིན་པ་དེ་ནི་བཟོད་པའོ། །ཚེགས་ཆེན་པོའི་གནས་སྐབས་ཐོབ་པས་སྒྱིད་ལུག་པ་མེད་པའི་བརྩོན་འགྲུས་ནི་དཔེར་ན་རྒྱ་མཚོ་ཆེན་པོར་ནོར་བུ་རིན་པོ་ཆེ་ལྟ་བུ་གང་ཡིན་པ་དེ་ནི་བརྩོན་འགྲུས་སོ། །བཙུན་མོའི་འཁོར་

གྱིས་མི་འཕྲོགས་པའི་བསམ་གཏན་ནི་དཔེར་ན་རྒྱལ་པོ་གཞོན་ནུ་སེང་གེའི་ལྟ་བུ་གང་ཡིན་པ་དེ་ནི་བསམ་གཏན་ནོ། །ཡུལ་གྱི་ནང་དུ་སོང་ཡང་ཡོངས་སུ་གཏོང་བ་ཐམས་ཅད་ལ་དམིགས་པའི་ཤེས་རབ་ནི་དཔེར་ན་ཡུལ་ཀ་ཤིའི་རྒྱལ་པོས་མགོ་བྱིན་པ་ལྟ་བུ་གང་ཡིན་པ་དེ་ནི་ཤེས་རབ་སྟེ།
འདི་དག་ནི་གནས་པའི་ཕ་རོལ་ཏུ་ཕྱིན་པ་དྲུག་གོ །དེ་ལ་ལྡན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་ནི་དཔེར་ན་རྒྱ་མཚོ་ཆེན་པོའི་རུ་སྦལ་ལྟ་བུ་གང་ཡིན་པ་དེ་ནི་སྦྱིན་པའོ། །གཞན་ལ་ཕན་པར་བརྩོན་པའི་ཚུལ་ཁྲིམས་ནི་དཔེར་ན་
འགྲོན་པ་རྣམས་སྦྲུལ་ཆེན་པོས་བསྐོར་བ་ལས་སེང་གེས་ཐར་བར་བྱས་པ་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །མཉན་པའི་ཕྱིར་བཟོད་པ་ནི་དཔེར་ན་དྲང་སྲོང་ལྷའི་རྒྱལ་པོས་ཚིགས་སུ་བཅད་པའི་ཕྱིར་མགོ་ཡོངས་སུ་བཏང་བ་ལྟ་བུ་གང་ཡིན་པ་དེ་ནི་བཟོད་པའོ། །བྲམ་ཟེའི་ཁྱེའུ་ཡིས་
དོན་ཇི་ལྟ་བ་བཞིན་དུ་བསམས་པའི་རེག་པ་ལྔ་སྤང་བའི་ཕྱིར་གནས་ཤིང་གཞན་ལ་བརྩེ་བར་ཡོངས་སུ་བསྔོས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །བསམ་གཏན་ནི་དཔེར་ན་མུ་སྟེགས་བྱེད་རྩིབས་ཀྱི་མུ་ཁྱུད་བྱུང་བ་གཞན་ལ་སྙིང་བརྩེ་བ་དང་ལྡན་པ་ལྟ་བུ་གང་ཡིན་
པ་དེ་ནི་བསམ་གཏན་ནོ། །སྐྱེ་བོ་མང་པོ་ཡོངས་སུ་སྨིན་པར་བྱེད་པའི་ཤེས་རབ་ནི་དཔེར་ན་སྲེག་པའི་སྐྱེས་པའི་རབས་ཀྱི་ལྟ་བུ་གང་ཡིན་པ་དེ་ནི་ཤེས་རབ་སྟེ། །འདི་དག་ནི་ལྡན་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་མང་པོའི་ཕ་རོལ་ཏུ་ཕྱིན་པ་དྲུག་གང་ཞེ་ན།
འཇིག་རྟེན་ལ་ཕན་པར་བྱ་བའི་སྦྱིན་པ་ནི་དཔེར་ན་འབེལ་མའི་ལྟ་བུ་གང་ཡིན་པ་དེ་ནི་སྦྱིན་པའོ། །ཚངས་པའི་འཇིག་རྟེན་ལ་གནས་ཏེ་འཛམ་བུའི་གླིང་གི་མི་རྣམས་ལས་བྱ་བ་ལ་འཇུག་པར་བྱེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །སེམས་ཅན་གྱི་ཕྱིར་བདག་
ཡོངས་སུ་གཏོང་བའི་བཟོད་པ་ནི་དཔེར་ན་རྒྱ་མཚོ་ནི་ཤི་བའི་རོ་དང་མི་གནས་པས་སེམས་ཅན་རྣམས་དགྲོལ་བའི་དོན་དུ་རྒྱ་མཚོ་ཆེན་པོར་བདག་ཉིད་ཡོངས་སུ་གཏོང་བ་ལྟ་བུ་གང་ཡིན་པ་དེ་ནི་བཟོད་པའོ། །སྐྱེ་བོ་མང་པོ་ཡོངས་སུ་སྨིན་པར་འགྱུར་བའི་བརྩོན་འགྲུས་ནི་དཔེར་ན་རྒྱ་

མཚོར་དེད་དཔོན་བསོད་ནམས་ཁྱིམ་ལག་རྐྱལ་གྱིས་རྒལ་བ་ལས་རིག་པར་བྱ་བ་ལྟ་བུ་གང་ཡིན་པ་དེ་ནི་བརྩོན་འགྲུས་སོ། །གཞན་ལ་ཕན་པར་ཡོངས་སུ་བསྔོས་པའི་བསམ་གཏན་ནི་དཔེར་ན་བྲམ་ཟེའི་བུ་ནོར་གྱི་བློ་གྲོས་ཀྱིས་སེམས་ཅན་རྣམས་བདེ་བ་ལ་སྦྱར་བའི་
ཕྱིར་ལོ་སྟོང་ཕྲག་བརྒྱད་ཅུར་བྱམས་པ་བསྒོམས་པ་གང་ཡིན་པ་དེ་ནི་བསམ་གཏན་ནོ། །འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་ལས་ཤིན་ཏུ་རྣམ་པར་གདོན་མི་ཟ་བའི་ཤེས་རབ་ནི་དཔེར་ན་རྒྱལ་པོ་བློ་བཟངས་ཀྱིས་སྔོན་གྱི་ཚུལ་ཤིང་ལོང་ལས་རིག་པར་བྱ་བ་ལྟ་བུ་
གང་ཡིན་པ་དེ་ནི་ཤེས་རབ་སྟེ། འདི་དག་ནི་རྣམ་པར་སྨིན་པ་མང་པོའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཡོངས་སུ་མྱ་ངན་ལས་འདས་པའི་སྦྱིན་པའི་རྣམ་པར་སྨིན་པ་མི་ལྡོག་པ་ནི་དཔེར་ན་རྒྱལ་རིགས་ཀྱིས་ཆུ་བོ་གང་
གཱར་དེ་ལ་སོགས་པའི་སྦྱིན་པའི་ལྟ་བུ་གང་ཡིན་པ་དེ་ནི་སྦྱིན་པའོ། །བཏང་སྙོམས་ཡོངས་སུ་བཟུང་ཞིང་ཕྱིར་མི་ལྡོག་པ་ཟག་པ་ཟད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །བྱང་ཆུབ་ཐོབ་པའི་བཟོད་པ་གང་ཡིན་པ་དེ་ནི་བཟོད་པའོ། །ལུས་ཀྱི་འདུ་བྱེད་
འདོར་བའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །ཆོས་ལ་བཏང་སྙོམས་པས་རབ་ཏུ་ཕྱེ་བས་བྱང་ཆུབ་ཀྱི་སྙིང་པོར་སྐྱོ་བ་མེད་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །བྱང་ཆུབ་ཀྱི་ཡེ་ཤེས་སྟོན་པས་ཤེས་རབ་ཀྱིས་རབ་ཏུ་བཟུང་བ་ནི་དཔེར་ན་བྲམ་
ཟེའི་བུ་བྱིས་པ་དཔེར་བརྗོད་པ་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རྣམ་པར་སྨིན་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མངོན་པར་དགའ་བ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། མྱ་ངན་ལས་འདས་པའི་སྦྱིན་པ་ནི་དཔེར་ན་དགའ་བའི་སྔོན་
གྱི་ཚུལ་ལས་ཤེས་པར་བྱ་བ་གང་ཡིན་པ་དེ་ནི་སྦྱིན་པའོ། །འདུས་བྱས་ཀྱིས་ཡིད་བྱུང་ཞིང་མྱ་ངན་ལས་འདས་པའི་བསམ་པ་ཅན་གྱི་ཚུལ་ཁྲིམས་ནི་དཔེར་ན་བྱང་ཆུབ་སེམས་དཔའ་བརྩོན་འགྲུས་ལ་སྤྱོད་པའི་སྔོན་གྱི་ཚུལ་གང་ཡིན་པ་དེ་ནི་ཚུལ་ཁྲིམས་སོ། །ཆགས་པ་མེད་

པའི་བཟོད་པ་ནི་དཔེར་ན་ཡུལ་ཀ་ཤིའི་རྒྱལ་པོའི་མགོ་བཅད་ཀྱང་འཁྲུག་པ་མེད་པ་གང་ཡིན་པ་དེ་ནི་བཟོད་པའོ། །སེར་སྐྱའི་གནས་ནས་བྱུང་སྟེ། བསོད་སྙོམས་ལེན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །ཚངས་པར་སྤྱོད་ཅིང་ཡན་ལག་བཞི་དང་ལྡན་
པ་སྤུ་ཟིང་ཞེས་བྱེད་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །གྲོང་ཁྱེར་དང་མཚུངས་པའི་ཤེས་རབ་ནི་དཔེར་ན་འཇིག་རྟེན་པ་མ་ལུས་པ་ཐམས་ཅད་སྙོམས་པར་ཞུགས་པ་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་མངོན་པར་དགའ་བ་མེད་པའི་ཕ་རོལ་
ཏུ་ཕྱིན་པ་དྲུག་གོ། །དེ་ལ་དུས་སུ་བྱིན་པ་དང་མཚུངས་པར་ལྡན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྡུག་བསྔལ་བར་འགྱུར་བ་རྣམས་ལ་སྦྱིན་པ་གང་ཡིན་པ་དེ་ནི་སྦྱིན་པའོ། །རུ་སྦལ་གྱི་སྐྱེས་པའི་རབས་ཀྱི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །མངོན་
དུ་སྡུག་བསྔལ་བས་ལུས་དང་ངག་ལ་གནོད་པ་མེད་པའི་བཟོད་པ་ནི་དཔེར་ན་བཟང་བརྩམས་ཡན་ལག་བཅད་ཀྱང་འཁྲུག་པ་མེད་པའི་བཟོད་པ་གང་ཡིན་པ་དེ་ནི་བཟོད་པའོ། །སངས་རྒྱས་འབྱུང་བ་ན་བརྩོན་པ་ནི་དཔེར་ན་སངས་རྒྱས་མངོན་སུམ་དུ་བྱེད་ཅིང་དེ་བཞིན་གཤེགས་
པའི་ཏིང་ངེ་འཛིན་རྒྱ་མཚོ་ལ་ལོ་སུམ་ཁྲིའི་བར་དུ་རྨུགས་པ་དང་གཉིད་མི་འབྱུང་བ་གང་ཡིན་པ་དེ་ནི་བརྩོན་འགྲུས་སོ། །བཙུན་མོའི་འཁོར་ན་གནས་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །འཁོར་བ་ན་གང་དུས་དང་མཚུངས་པར་ལྡན་པའི་ཤེས་རབ་གང་དང་གང་
དུ་བདག་དང་གཞན་ལ་ཕན་པར་འགྱུར་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་དུས་སུ་སྦྱིན་པ་དང་མཚུངས་པར་ལྡན་པའི་ཕ་རོལ་ཏུ་ཕྱིན་པ་དྲུག་གོ །དེ་ལ་འོད་ཀྱི་ཕ་རོལ་ཏུ་ཕྱིན་པ་དྲུག་གང་ཞེ་ན། མར་མེའི་ཕྲེང་བ་སྦྱིན་པ་གང་ཡིན་པ་དེ་ནི་སྦྱིན་པའོ། །གཞན་
ལ་ཕན་པའི་ཚུལ་ཁྲིམས་ནི་དཔེར་ན་སྲེག་པའི་སྐྱེས་པའི་རབས་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །ཆོས་ལ་ངེས་པར་རྟོགས་པའི་བཟོད་པ་གང་ཡིན་པ་དེ་ནི་བཟོད་པའོ། །འབྲུ་མར་གྱི་སྦྱིན་པ་ལ་བརྩོན་པ་གང་ཡིན་པ་དེ་ནི་བརྩོན་འགྲུས་སོ། །བྱང་ཆུབ་སེམས་དཔའི་བསྐལ་

པ་དང་པོ་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །ཆོས་ལ་བཟོད་པ་ལས་ངེས་པར་བྱུང་བའི་ཤེས་རབ་ནི་དཔེར་ན་བྲམ་ཟེའི་བུ་སྤྲིན་གྱི་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་འོད་ཀྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་འོད་མཐའ་ཡས་པའི་ཕ་རོལ་
ཏུ་ཕྱིན་པ་དྲུག་གང་ཞེ་ན། ཐབས་ལ་མཁས་པའི་སྦྱིན་པའི་ཕ་རོལ་ཏུ་ཕྱིན་པ་དྲུག་གི་རྣམ་པར་སྨིན་པས་སངས་རྒྱས་ཀྱི་ཞིང་མཐའ་ཡས་པར་སངས་རྒྱས་ཀྱི་འོད་ཀྱིས་འགེངས་པ་གང་ཡིན་པ་དེ་ནི་སྦྱིན་པའོ། །མི་སྐྱེ་བའི་ཆོས་ལ་བཟོད་པ་ཐོབ་པས་ཡོངས་སུ་བསྔོ་བའི་ཚུལ་ཁྲིམས་
གང་ཡིན་པ་དེ་ནི་ཚུལ་ཁྲིམས་སོ། །ཆོས་ལ་འདུ་ཤེས་པའི་བཟོད་པ་ཡོངས་སུ་བསྔོ་བ་གང་ཡིན་པ་དེ་ནི་བཟོད་པའོ། །སྟོང་པ་ཉིད་ལ་སྒོམ་པར་དགའ་བའི་བརྩོན་འགྲུས་ཡོངས་སུ་བསྔོ་བ་གང་ཡིན་པ་དེ་ནི་བརྩོན་འགྲུས་སོ། །ཕྱིར་མི་ལྡོག་པའི་བསམ་གཏན་ཡོངས་སུ་བསྔོ་
བ་གང་ཡིན་པ་དེ་ནི་བསམ་གཏན་ནོ། །ས་བརྒྱད་པ་ལ་གནས་པའི་ཤེས་རབ་ཐམས་ཅད་དུ་ཡོངས་སུ་བསྔོ་བ་གང་ཡིན་པ་དེ་ནི་ཤེས་རབ་སྟེ། འདི་དག་ནི་འོད་མཐའ་ཡས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་བདེ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཤི་
བ་ལ་ཐུག་པའི་སྦྱིན་པ་གང་གི་རྣམ་པར་སྨིན་པས་དགའ་ལྡན་ནས་ཤི་འཕོས་པ་ན་ཡི་དགས་རྣམས་ཀྱི་བཀྲེས་པ་ཕྱིད་པ་གང་ཡིན་པ་དེ་ནི་སྦྱིན་པའོ། །ཤི་བ་ལ་ཐུག་པ་རྣམས་བཅིངས་པ་ལས་དགྲོལ་བའི་ཕྱིར་བདག་ཉིད་གཏོང་བའི་ཚུལ་ཁྲིམས་ནི་དཔེར་ན་རྒྱལ་པོའི་བུ་ལེགས་བྱིན་གྱི་
སྔོན་གྱི་ཚུལ་གང་ཡིན་པ་དེ་ནི་ཚུལ་ཁྲིམས་སོ། །བཟོད་པ་ནི་དཔེར་ན་ཉའི་སྐྱེས་པའི་རབས་ལས་གྲོག་སྦུར་དེ་དག་གིས་བདག་གི་ཤ་ཟོས་ནས་བདེ་བར་གྱུར་ན་ལེགས་སོ་ཞེས་བྱ་བ་གང་ཡིན་པ་དེ་ནི་བཟོད་པའོ། །རྟའི་རྒྱལ་པོ་རྔོག་ལྡན་སྡུག་བསྔལ་བ་རྣམས་ལ་སྙིང་བརྩེ་བའི་
ཕྱིར་བརྩོན་པ་གང་ཡིན་པ་དེ་ནི་བརྩོན་འགྲུས་སོ། །ནད་ཀྱི་བར་གྱི་བསྐལ་པའི་བསམ་གཏན་ནི་དཔེར་ན་བྲམ་ཟེའི་བུ་དེ་བི་དྷ་འཛམ་བུའི་གླིང་དུ་རེག་པ་ལྔ་ཞི་བར་བྱེད་པ་ལྟ་བུ་གང་ཡིན་པ་དེ་ནི་བསམ་གཏན་ནོ། །ཚོང་པ་ལྔ་བརྒྱ་དང་རྒྱལ་པོའི་སྲས་མོ་བུ་མོ་ལྔ་བརྒྱ་དག་ཐར་བར་

བྱས་པ་དང་། སྲིན་མོ་བྱེ་བ་ཕྲག་ལྔ་མིར་བྱས་པའི་ཤེས་རབ་ནི་དེད་དཔོན་གྱི་སྔོན་གྱི་ཚུལ་ལས་ཤེས་པར་བྱ་བ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རྣམ་པར་སྨིན་པ་བདེ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཕྱིར་མི་ལྡོག་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཉན་ཐོས་
དང་རང་སངས་རྒྱས་ཀྱི་ཐེག་པ་ལ་རེ་བ་མེད་ཅིང་མི་དམིགས་པས་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོས་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །མི་བལྟ་བའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །དེའི་ངོ་བོ་མ་ཡིན་པའི་བཟོད་པ་གང་ཡིན་པ་དེ་ནི་བཟོད་པའོ། །
ཐབས་མཁས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །རིག་པ་སྐྱེད་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །མཉམ་པ་ཉིད་ཀྱི་སའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་ཕྱིར་མི་ལྡོག་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་
དགའ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། སངས་རྒྱས་འབྱུང་བ་ན་སེམས་ཅན་ཐམས་ཅད་ལ་སྦྱིན་པ་གང་ཡིན་པ་དེ་ནི་སྦྱིན་པའོ། །སངས་རྒྱས་འབྱུང་བའི་དུས་སུ་རྣམ་པར་སྨིན་པའི་ཚུལ་ཁྲིམས་ནི་དཔེར་ན་གཞོན་ནུ་དཔལ་མཐུའི་སྔོན་གྱི་ཚུལ་ལྟ་བུའོ། །བཟོད་པ་ནི་
དཔེར་ན་རྒྱལ་པོ་བསོད་ནམས་རྒྱ་ཆེན་གྱིས་བདག་འབའ་ཞིག་བདེ་བར་མ་གྱུར་ཅིག །བདག་ཀྱང་བདེ་བར་གྱུར་ལ་གང་གཞན་ཡང་བདེ་བར་གྱུར་ཅིག་ཅེས་གང་སྨྲས་པ་ལྟ་བུ་གང་ཡིན་པ་དེ་ནི་བཟོད་པའོ། །གཟུངས་རབ་ཏུ་ཐོབ་པར་འགྱུར་བའི་བརྩོན་འགྲུས་གང་ཡིན་
པ་དེ་ནི་བརྩོན་འགྲུས་སོ། །སེམས་ཅན་རྣམས་ཀྱི་རྣམ་པར་སྨིན་པ་བདེ་བར་ཡོངས་སུ་བསྔོས་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །ས་བརྒྱད་པ་ཕྱིར་མི་ལྡོག་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་དགའ་བའི་ཕ་རོལ་ཏུ་ཕྱིན་པ་དྲུག་གོ། །
དེ་ལ་རྣམ་པར་དག་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། མངོན་པར་ཞེན་པ་མེད་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་བསྒྲུབ་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ལུས་ལ་མི་ལྟ་བ་དང་། སྲོག་ལ་

མི་ལྟ་བའི་བཟོད་པ་གང་ཡིན་པ་དེ་ནི་བཟོད་པའོ། །ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་དང་མཚུངས་པར་ལྡན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །རྟོག་པ་མེད་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །བྱང་ཆུབ་
བསྒྲུབ་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རྣམ་པར་དག་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་འཇིག་རྟེན་པའི་ཆོས་ལས་འདས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། རྣམ་པར་སྨིན་པ་འདུས་མ་བྱས་དང་ལམ་བདེ་བ་སྒྲུབ་པའི་སྦྱིན་པ་གང་ཡིན་པ་དེ་ནི་
སྦྱིན་པའོ། །ལམ་ལ་ཞུགས་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །བྱང་ཆུབ་ལ་ཐེ་ཙོམ་མེད་པའི་བཟོད་པ་གང་ཡིན་པ་དེ་ནི་བཟོད་པའོ། །མཐོང་བའི་ཆོས་ལ་བདེ་བ་སྒྲུབ་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །འགོག་པའི་སྙོམས་པར་
འཇུག་པ་དང་མཚུངས་པར་ལྡན་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །དྲན་པ་ཉེ་བར་གཞག་པ་ཡོངས་སུ་སྦྱང་བ་བྱས་ཤིང་། བདེན་པ་ཡོངས་སུ་བཟུང་བ་བྱ་བ་བྱས་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་འཇིག་རྟེན་པའི་ཆོས་ལས་འདས་
པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་སྐྱེ་བ་བཀོད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྐྱེས་པ་ཙམ་གྱིས་སྟོང་གསུམ་དུ་སྦྱིན་པ་སྦྱིན་པར་བྱེད་པ་གང་ཡིན་པ་དེ་ནི་སྦྱིན་པའོ། །སྐྱེས་པ་ཙམ་གྱིས་སེམས་ཅན་ཐམས་ཅད་བདེ་བར་གྱུར་པ་གང་ཡིན་པ་དེ་ནི་ཚུལ་ཁྲིམས་སོ། །སྐྱེས་
པ་ཙམ་གྱིས་སེམས་ཅན་གནོད་སེམས་ཅན་རྣམས་གནོད་པར་མི་བྱེད་པ་གང་ཡིན་པ་དེ་ནི་བཟོད་པའོ། །སྐྱེས་པ་ཙམ་གྱིས་སེམས་ཅན་སྟོང་ཕྲག་རྣམས་མྱ་ངན་ལས་འདས་པ་ལ་བརྩོན་པ་ནི་དཔེར་ན་འོད་སྲུང་དང་པོར་རབ་ཏུ་བྱུང་བ་གང་ཡིན་པ་དེ་ནི་བརྩོན་འགྲུས་སོ། །སྐྱེས་པ་
ཙམ་གྱིས་སེམས་ཅན་རྣམས་དྲན་པ་ཐོབ་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །སྐྱེས་པ་ཙམ་གྱིས་སེམས་ཅན་དམྱལ་བར་གྱུར་པ་ཆོས་བརྗོད་པ་རྣམས་ཐ་ན་ཀུན་ཏུ་བརྗོད་ཅིང་མངོན་པར་བརྗོད་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་སྐྱེ་བ་བཀོད་

པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རིགས་ཕུན་སུམ་ཚོགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། འཁོར་གྱི་ལོངས་སྤྱོད་ཆེན་པོའི་སྦྱིན་པ་གང་ཡིན་པ་དེ་ནི་སྦྱིན་པའོ། །འཁོར་ཁ་ན་མ་ཐོ་བ་མེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །འཁོར་གཅིག་ལ་
གཅིག་མངོན་པར་དགའ་བའི་བཟོད་པ་གང་ཡིན་པ་དེ་ནི་བཟོད་པའོ། །འཁོར་མ་བཏང་བར་རང་གི་བྱ་བ་རྣམས་ལ་བརྩོན་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །ལེགས་པར་བསམ་པ་སེམས་ཤིང་འཁོར་དུལ་བའི་བསམ་གཏན་གང་ཡིན་པ་དེ་ནི་བསམ་
གཏན་ནོ། །འཁོར་ཐམས་ཅད་ཀྱི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རིགས་ཕུན་སུམ་ཚོགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་འཁོར་ཕུན་སུམ་ཚོགས་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། འདུས་པ་ཆེན་པོ་དག་ལ་ལོ་
ལྔའི་བར་དུ་ཡང་དག་པར་ལེན་དུ་འཇུག་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །སྐྱེ་བོ་མང་པོའི་འབྱོར་པ་སྐྱོ་བ་མེད་པའི་ཚུལ་ཁྲིམས་ནི་དཔེར་ན་ཀུན་ཏུ་རྒྱུ་རྟོགས་བྱེད་ཀྱི་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །སེམས་ཅན་མང་པོའི་ཕྱིར་བཟོད་པ་ནི་དཔེར་ན་ནོར་ལྔ་བྲེ་
གང་གི་ཕྱིར་རྒྱ་མཚོ་ཆེན་པོར་ཆུ་སྲིན་མ་ཀ་རའི་ཁར་ཞུགས་པ་དང་། ཡང་དཔེར་ན་ནོར་ལྔ་བྲེ་གང་གི་ཕྱིར་ཁྲོན་པར་སོང་བ་གང་ཡིན་པ་དེ་ནི་བཟོད་པའོ། །སྐྱེ་བོ་མང་པོ་ལ་བསྐྱབ་པའི་ཕྱིར་བརྩོན་པ་ནི་དཔེར་ན་ནོར་བུའི་ཕྱིར་རྒྱ་མཚོ་ཆེན་པོ་བསྐམ་པར་བརྩམས་པ་གང་ཡིན་པ་དེ་ལྟ་
བུ་སྟེ། དེ་ནི་བརྩོན་འགྲུས་སོ། །མུ་སྟེགས་བྱེད་རྩིབས་ཀྱི་མུ་ཁྱུད་ཀྱི་བསམ་གཏན་སེམས་ཅན་རྣམས་ལ་ཕན་པ་དང་ལྡན་པ་གང་ཡིན་པ་དེ་ནི་བསམ་གཏན་ནོ། །སྐྱེ་བོ་མང་པོ་ལ་ཕན་པའི་ཕྱིར་བརྩོན་པའི་ཤེས་རབ་ནི་དཔེར་ན་རི་དགས་ཀྱི་རྒྱལ་པོ་བློ་བཟངས་ཀྱིས་རི་དགས་ལྔ་
བརྒྱ་རྒྱར་ཆུད་པ་རྣམས་གཞན་རི་བོང་དང་ལྷན་ཅིག་ཏུ་ཐར་བར་བྱས་ནས་འབྲོས་སུ་བཏང་བ་དང་། འཛམ་བུའི་གླིང་པའི་སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་དག་ལ་བཀོད་པ་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་འཁོར་ཕུན་སུམ་ཚོགས་པའི་

ཕ་རོལ་ཏུ་ཕྱིན་པ་དྲུག་གོ། །དེ་ལ་འཁོར་མི་ཕྱེད་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཕྲ་མའི་ཚིག་སྤངས་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །བྱམས་པ་ལ་དམིགས་པའི་ཐོགས་པ་མེད་པའི་སེམས་ཀྱི་ཚུལ་ཁྲིམས་ཀྱི་གོ་བགོས་པ་
གང་ཡིན་པ་དེ་ནི་ཚུལ་ཁྲིམས་སོ། །སེམས་མཉམ་པའི་བཟོད་པ་གང་ཡིན་པ་དེ་ནི་བཟོད་པའོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་ཟང་ཟིང་མེད་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །གཟུངས་རབ་ཏུ་ཐོབ་པའི་བསམ་གཏན་གང་ཡིན་པ་དེ་ནི་
བསམ་གཏན་ནོ། །རྣམ་པར་གྲོལ་བས་ཡོངས་སུ་བཟུང་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་འཁོར་མི་ཕྱེད་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་ཡོངས་སུ་དག་པ་བསྐྱེད་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་
གང་ཞེ་ན། ནད་པ་མགོན་མེད་པ་རྣམས་ལ་གསོས་སྦྱིན་པ་གང་ཡིན་པ་དེ་ནི་སྦྱིན་པའོ། །སྡུག་བསྔལ་གྱིས་ཉམ་ཐག་པ་རྣམས་ཡོངས་སུ་སྐྱོབ་པ་གང་ཡིན་པ་དེ་ནི་ཚུལ་ཁྲིམས་སོ། །བླ་མས་སྤྱོས་པ་བཟོད་ཅིང་མི་ཁྲོ་བ་གང་ཡིན་པ་དེ་ནི་བཟོད་པའོ། །མངལ་ན་
ཀུན་ཏུ་རྨོངས་པ་གསོ་བར་བྱེད་པ་དང་། བསྟན་པ་ལས་མངོན་པར་འཕགས་པ་རྣམས་ལ་སྟོན་པ་དང་། དགེ་སློང་མ་རྣམས་ལ་རྗེས་སུ་བསྲུང་བའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །གཞན་ལ་ཕན་པའི་ཕྱིར་མ་ལ་བསྙེན་བཀུར་བྱེད་པ་གང་ཡིན་པ་
དེ་ནི་བསམ་གཏན་ནོ། །སྐྱེ་བོ་མང་པོའི་འགྱོད་པ་སེལ་བའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རྣམ་པར་སྨིན་པ་ཡོངས་སུ་དག་པ་བསྐྱེད་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཕྱོགས་རྣམ་པར་ལྟ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཐོགས་
པ་མེད་པར་མིག་སྦྱིན་པ་གང་ཡིན་པ་དེ་ནི་སྦྱིན་པའོ། །སྒྲིབ་པ་མེད་པའི་སེམས་ཀྱི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །བསམ་པ་ངེས་པའི་བཟོད་པ་གང་ཡིན་པ་དེ་ནི་བཟོད་པའོ། །སྐྱོ་བ་མེད་པའི་མངོན་པར་ཤེས་པ་མ་བསྒྲུབས་པ་སྒྲུབ་པ་གང་ཡིན་པ་དེ་

ནི་བརྩོན་འགྲུས་སོ། །ལྷའི་མིག་གི་ཕྱིར་ཡོངས་སུ་སྦྱང་བ་བྱས་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །སྒྲ་དང་བརྡ་རབ་ཏུ་རྟོགས་པར་བྱེད་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་ཕྱོགས་རྣམ་པར་ལྟ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་
ཡོངས་སུ་ཤེས་པ་སྒྲོགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྦྱིན་པའི་རྣམ་པར་སྨིན་པ་སེམས་ཅན་རྣམས་ལ་ཡོངས་སུ་བསྔོས་ཤིང་། གཞན་ལ་ཕན་པའི་རྣམ་པར་སྨིན་པ་གང་ཡིན་པ་དེ་ནི་སྦྱིན་པའོ། །བག་ཆགས་ཀྱི་མཚམས་སྦྱོར་བ་དང་བྲལ་བའི་ཚུལ་ཁྲིམས་གང་ཡིན་
པ་དེ་ནི་ཚུལ་ཁྲིམས་སོ། །སྙིང་རྗེ་མེད་པ་མ་ཡིན་པ་ལས་ངེས་པར་བྱུང་བའི་བཟོད་པ་གང་ཡིན་པ་དེ་ནི་བཟོད་པའོ། །ཟིལ་གྱིས་ནོན་པ་མེད་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །ཚད་མེད་པས་ཡོངས་སུ་བཟུང་བའི་བསམ་གཏན་གང་ཡིན་པ་དེ་ནི་བསམ་
གཏན་ནོ། །ངེས་པར་འབྱེད་པའི་ཆ་དང་འཐུན་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་ཡོངས་སུ་ཤེས་པ་སྒྲོགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བག་ཡོད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བྱང་ཆུབ་ཏུ་ཡོངས་སུ་བསྔོས་པའི་སྦྱིན་པ་ནི་དཔེར་ན་བློན་
པོ་ས་གའི་ལྟ་བུ་གང་ཡིན་པ་དེ་ནི་སྦྱིན་པའོ། །གནད་བཅད་པ་ལ་གནས་ཀྱང་ལས་ལ་རྟོན་པའི་ཚུལ་ཁྲིམས་ནི་དཔེར་ན་རྔོན་པ་དཔའ་རྟོགས་ཀྱིས་སེང་གེའི་གནད་དུ་བསྣུན་པ་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །ལེགས་པར་གསུངས་པའི་དོན་དུ་མེའི་ཕུང་པོར་མཆོང་བའི་བཟོད་པ་
གང་ཡིན་པ་དེ་ནི་བཟོད་པའོ། །འདུས་བྱས་ལ་འབར་བར་མཐོང་ཞིང་མྱ་ངན་ལས་འདས་པའི་བསམ་པ་ཅན་གྱི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །རྒྱལ་སྲིད་ཐམས་ཅད་སྤངས་ཏེ་གཅིག་པུར་རི་ལ་ཉོན་མོངས་པ་ཅན་མ་ཡིན་པར་གནས་ཤིང་གྲགས་པ་དང་འཁོར་
མང་པོར་ལྡན་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །རོ་མྱང་བ་མེད་པའི་ཤེས་རབ་གང་ཡིན་པ་དེ་ནི་དཔེར་ན་རྒྱལ་པོའི་བུ་མཉམ་སེམས་ཀྱིས་རྒྱལ་སྲིད་བཏང་ནས་ཁ་ན་མ་ཐོ་བ་མེད་པའི་ལས་ཇི་སྙེད་པ་དག་གང་ཡིན་སྙམ་ནས་དྲི་མ་དང་བྲལ་བར་གྱུར་པ་གང་ཡིན་པ་

དེ་ནི་ཤེས་རབ་སྟེ། འདི་དག་ནི་བག་ཡོད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྫི་བ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ལེན་པ་མང་པོ་རྣམས་ལ་ཐོགས་པ་མེད་པའི་སེམས་ཀྱིས་སྦྱིན་པ་གང་ཡིན་པ་དེ་ནི་སྦྱིན་པའོ། །གཡོ་མེད་པའི་ཚུལ་ཁྲིམས་
གང་ཡིན་པ་དེ་ནི་ཚུལ་ཁྲིམས་སོ། །བསྒོམས་པ་ལས་ངེས་པར་བྱུང་བའི་བཟོད་པ་གང་ཡིན་པ་དེ་ནི་བཟོད་པའོ། །ཆོས་མཉམ་པ་ཉིད་ལ་གནས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །ཕྱིར་མི་ལྡོག་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །
ཆོས་ཐམས་ཅད་རྣམ་པར་འཇོག་པའི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་རྫི་བ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མྱ་ངན་ལས་འདས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཡི་དགས་ཀྱི་འཇིག་རྟེན་ལ་དམིགས་ཤིང་གང་སེམས་ཅན་སྡུག་བསྔལ་བ་
མཐོང་ན་སྦྱིན་པ་གང་ཡིན་པ་དེ་ནི་སྦྱིན་པའོ། །དུད་འགྲོའི་གནས་སུ་ཕྱིན་ནས་སེམས་ཅན་སྡུག་བསྔལ་བ་མཐོང་ན་ཡིད་བྱུང་བའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །དམིགས་པ་མེད་པའི་ཐོས་པ་དང་། རེག་པར་དཀའ་བ་མཐོང་ན་བཟོད་པ་གང་ཡིན་པ་དེ་ནི་
བཟོད་པའོ། །ལོག་པ་སྤོང་བའི་རབ་ཏུ་དབྱེ་བ་ལ་ཡིད་བྱུང་བའི་བརྩོན་འགྲུས་ནི་དཔེར་ན་ཀུན་ལས་བུད་མེད་སྤངས་པ་ལྟ་བུ་གང་ཡིན་པའོ། །ཐར་པ་ལ་དམིགས་པའི་བསམ་གཏན་ནི་དཔེར་ན་ཤིང་འཛམ་བུའི་གྲིབ་མ་ལྟ་བུ་གང་ཡིན་པ་དེ་ནི་བསམ་གཏན་ནོ། །འཁོར་བའི་
སྐྱོན་རབ་ཏུ་ཞི་བར་བྱེད་པའི་ཤེས་རབ་ནི་དཔེར་ན་རྒྱལ་པོ་རབ་ཏུ་འབྱུང་བའི་ཕྱིར་ཁྱིམ་ནས་བྱུང་བ་དང་། དཔེར་ན་སྤུ་ཟིང་ཞེས་བྱེད་པའི་ཤེས་རབ་ཡོངས་སུ་དཀར་བའི་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་མྱ་ངན་ལས་འདས་པའི་ཕ་རོལ་ཏུ་ཕྱིན་པ་དྲུག་གོ། །
དེ་ལ་དབང་ཆེ་བར་གྲགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྙིང་རྗེ་མེད་པ་མ་ཡིན་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །ལྷག་པའི་ང་རྒྱལ་མེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །མ་ཞུམ་པའི་བཟོད་པ་གང་ཡིན་པ་དེ་ནི་བཟོད་པའོ། །བླ་མ་ལ་

བསྙེན་བཀུར་བྱས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །སེམས་ཅན་ཡོངས་སུ་སྨིན་པར་བྱ་བའི་བསམ་གཏན་ནི་དཔེར་ན་རྒྱལ་པོའི་བུ་མེ་ཏོག་ལྟ་བུའི་གང་ཡིན་པའོ། །རབ་ཏུ་བྱུང་བ་གང་གི་ཡན་ལག་དང་ཉིང་ལག་གཏུབས་ཀྱང་ནམ་ཡང་ཉམས་པར་མ་གྱུར་
པའི་ཤེས་རབ་དོན་དམ་པ་དང་ལྡན་པ་གང་ཡིན་པ་དེ་ནི་ཤེས་རབ་སྟེ། འདི་དག་ནི་དབང་ཆེ་བར་གྲགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་སྐུལ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། གང་ལེན་དུ་འཇུག་ཅིང་སྤྲོས་པ་དང་བཅས་པའི་སྦྱིན་པ་གང་ཡིན་པ་དེ་ནི་སྦྱིན་པའོ། །
ཕན་པའི་དངོས་པོ་དང་ལྡན་ཞིང་ལེགས་པར་སྦྱིན་པ་སྐུལ་བའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །དུལ་བའི་གནས་སུ་གདམས་ངག་རྗེས་སུ་སྟོན་པའི་བཟོད་པ་གང་ཡིན་པ་དེ་ནི་བཟོད་པའོ། །ཆོས་མཉན་པ་དང་བསྒྲགས་པ་ལ་བརྩོན་པའི་བརྩོན་འགྲུས་གང་
ཡིན་པ་དེ་ནི་བརྩོན་འགྲུས་སོ། །སེམས་ཅན་ཡང་དག་པར་ལེན་དུ་འཇུག་པའི་བསམ་གཏན་ནི་དཔེར་ན་འཁོར་ལོས་སྒྱུར་བའི་རྒྱལ་པོ་མིག་བཟངས་ཀྱི་ལྟ་བུ་གང་ཡིན་པའོ། །ཐེ་ཙོམ་ཅན་གྱི་ཐེ་ཙོམ་གཅོད་ཅིང་དོར་བར་འདོད་པ་རྣམས་ལ་ཆོས་བསྟན་པའི་ཕྱིར་རྗེས་སུ་བསྲུང་
ལ་རབ་ཏུ་འཇོག་པ་བཏང་སྙོམས་ཅན་གྱི་ཤེས་རབ་གང་ཡིན་པ་དེ་ནི་ཤེས་རབ་སྟེ། འདི་དག་ནི་སྐུལ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བརྗེད་ངས་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཁ་ཏོན་དང་ལྡན་པ་རྣམས་ལ་སྦྱིན་པ་གང་ཡིན་པ་དེ་ནི་སྦྱིན་པའོ། །དཀོན་
མཆོག་གསུམ་ལ་མི་ཕྱེད་པ་ཐོབ་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །ཐོས་པའི་ཕྱིར་བཟོད་ཅིང་ལུས་ཀྱི་སྡུག་བསྔལ་བཟོད་པ་ནི་དཔེར་ན་བགོ་བ་དེས་པའི་ཡན་ལག་བཅད་པ་ལྟ་བུ་གང་ཡིན་པ་དེ་ནི་བཟོད་པའོ། །མན་ངག་དང་ཁ་ཏོན་བྱ་བའི་བརྩོན་འགྲུས་
གཞན་ལ་རྗེས་སུ་བསྲུང་བ་གང་ཡིན་པ་དེ་ནི་བརྩོན་འགྲུས་སོ། །བསམ་གཏན་པས་དུས་སུ་ཡང་དག་པར་ལེན་དུ་འཇུག་པའི་བསམ་གཏན་གང་ཡིན་པ་དེ་ནི་བསམ་གཏན་ནོ། །རྙེད་པ་དང་། བཀུར་སྟི་ལ་མི་རྟོག་པའི་སྤྱོད་ལམ་ལ་གནས་ནས་ཆོས་སྦྱིན་པའི་ཤེས་རབ་གང་

ཡིན་པ་དེ་ནི་ཤེས་རབ་སྟེ། འདི་དག་ནི་བརྗེད་ངས་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཞབས་ཤིན་ཏུ་གནས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཞབས་ས་ལ་འཇོག་པ་ན་སྙོམས་པ་དང་། འདེགས་པ་ན་སྙོམས་པ་གང་ཡིན་པ་དེ་ནི་སྦྱིན་པའི་
རྣམ་པར་སྨིན་པའོ། །བདེ་བར་གནས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །གཞན་གྱིས་ཉམས་པར་བྱར་མི་ནུས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །འཁྲུལ་པ་མེད་པར་གནས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །
ཞབས་རེག་པས་སེམས་ཅན་བདེ་བར་འགྱུར་བ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །གོ་ཆས་ཇི་ལྟར་འདོད་པ་བཞིན་སྐྱེ་བར་འགྱུར་བ་གང་ཡིན་པ་དེ་ནི་ཤེས་རབ་ཀྱི་རྣམ་པར་སྨིན་པ་སྟེ། འདི་དག་ནི་ཞབས་ཤིན་ཏུ་གནས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་
འཁོར་ལོ་རྩིབས་སྟོང་དང་ལྡན་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། འཁོར་ལོས་སྤྲས་པ་སྒྲུབ་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །རྩིབས་ཕན་ཚུན་མ་འདྲེས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །འདོད་ཆགས་ཀྱི་དབང་གིས་
མི་གོས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །བུམ་པ་ལྟ་བུ་དང་བཀྲ་ཤིས་དང་། གཡུང་དྲུང་འཁྱིལ་པས་བརྒྱན་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །འཁོར་ལོའི་འོད་འབྱེད་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །འོད་
སྣ་ཚོགས་གཏོང་བ་གང་ཡིན་པ་དེ་ནི་ཤེས་རབ་ཀྱི་རྣམ་པར་སྨིན་པ་སྟེ། འདི་དག་ནི་འཁོར་ལོ་རྩིབས་སྟོང་དང་ལྡན་པ་སྒྲུབ་པར་བྱེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་རྟིང་པ་ཡངས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། རྟིང་པ་ཡངས་ཤིང་ཤིན་ཏུ་སྲབ་
པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །རྟིང་པ་ཡངས་པ་ཟླུམ་ཞིང་ཤིན་ཏུ་མཁྲེགས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །རྟིང་པ་ཡངས་ཤིང་ཡོངས་སུ་རྫོགས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །རྟིང་པ་ཡངས་ཤིང་སྟབས་

ལེགས་པར་བཞུད་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །རྟིང་པ་ཡངས་ཤིང་མདོག་སྣུམ་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །རྟིང་པ་ཡངས་ཤིང་ལེགས་པར་གྲུབ་ལ་མཁྲང་བ་གང་ཡིན་པ་དེ་ནི་ཤེས་རབ་ཀྱི་རྣམ་པར་སྨིན་པ་སྟེ། འདི་
དག་ནི་རྣམ་པར་སྨིན་པ་རྟིང་པ་ཡངས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་ཞབས་ལོང་བུའི་ཚིགས་མི་མངོན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཞབས་ལོང་བུའི་ཚིགས་མི་མངོན་ཞིང་ཤིན་ཏུ་མཁྲེགས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །
ཞབས་ལོང་བུའི་ཚིགས་མི་མངོན་པ་ཆུ་དང་ལྡན་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཞབས་ལོང་བུའི་ཚིགས་མི་མངོན་ཞིང་འཇམ་ལ་མདངས་དང་ལྡན་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཞབས་ལོང་བུའི་ཚིགས་མི་མངོན་ཞིང་མཐོན་
དམན་མེད་པ་གང་ཡིན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཞབས་ལོང་བུའི་ཚིགས་མི་མངོན་ཞིང་ཡངས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ཞབས་ལོང་བུའི་ཚིགས་མི་མངོན་ཞིང་སྤ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་
ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཞབས་ལོང་བུའི་ཚིགས་མི་མངོན་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་སོར་མོ་རིང་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། སོར་མོ་རིང་ལ་མི་མཉམ་པ་མེད་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་
ཕྱིན་པའི་རྣམ་པར་སྨིན་པའོ། །སོར་མོ་རིང་ལ་ཤིན་ཏུ་འབྲེལ་བ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །སོར་མོ་རིང་ཞིང་སྣུམ་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །སོར་མོ་རིང་ལ་རིམ་གྱིས་གཞོལ་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་
པར་སྨིན་པའོ། །སོར་མོ་རིང་ལ་སེན་མོ་ཟངས་ཀྱི་མདོག་ལྟ་བུ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །སོར་མོ་རིང་ལ་ཚིགས་མི་མཐོ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སོར་མོ་རིང་བའི་ཕ་

རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་ཕྱག་དང་ཞབས་དྲ་བ་ཅན་གྱི་ཕ་རོལ་ཏུ་ཕྱིན་པ་དྲུག་གང་ཞེ་ན། ཕྱག་དང་ཞབས་དྲ་བ་ཅན་ཚང་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ཤིན་ཏུ་གནས་ཤིང་མཉམ་པ་གང་ཡིན་པ་དེ་ནི་ཚུལ་ཁྲིམས་ཀྱི་
རྣམ་པར་སྨིན་པའོ། །ཕྱག་དང་ཞབས་དྲ་བ་ཅན་མི་རྩུབ་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཕྱག་དང་ཞབས་དྲ་བ་ཅན་གསེར་གྱི་མདོག་ལྟ་བུ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ཕྱག་དང་ཞབས་དྲ་བ་ཅན་ཤིན་ཏུ་མཁྲེགས་པ་གང་ཡིན་
པ་དེ་ནི་བསམ་གཏན་གྱི་རྣམ་པར་སྨིན་པའོ། །ཕྱག་དང་ཞབས་དྲ་བ་ཅན་སྤ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཕྱག་དང་ཞབས་དྲ་བ་ཅན་གྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་བྱིན་པ་རི་
དགས་ཨེ་ནེ་ཡའི་ལྟ་བུའི་ཕ་རོལ་ཏུ་ཕྱིན་པ་དྲུག་གང་ཞེ་ན། ལེགས་པར་སྐྱེས་པ་ཡོངས་སུ་རྫོགས་ཤིང་རིམ་གྱིས་གཞོལ་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །འཇམ་ཞིང་མི་མངོན་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཤིན་ཏུ་སྦྱངས་པ་གང་
ཡིན་པ་དེ་ནི་བཟོད་པའི་རྣམ་པར་སྨིན་པའོ། །གཤེགས་པར་སྤྱོད་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ཀུན་ནས་ཤིན་ཏུ་རྣམ་པར་ཕྱེ་བ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ཁ་དོག་སྣང་བ་མཐོང་ན་དགའ་བ་གང་ཡིན་པ་དེ་ནི་ཤེས་
རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་བྱིན་པ་རི་དགས་ཨེ་ནེ་ཡའི་ལྟ་བུའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་གསང་བའི་སྦུབས་ཀྱི་ཕ་རོལ་ཏུ་ཕྱིན་པ་དྲུག་གང་ཞེ་ན། གསང་བའི་སྦུབས་ཁ་དོག་མཛེས་པ་གང་ཡིན་པ་དེ་ནི་སྦྱིན་པའི་
ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཤིན་ཏུ་སྦས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཚེམས་ཚང་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཕྱག་གི་རི་མོ་སྙོམས་ཤིང་ཤིན་ཏུ་ལེགས་པར་གྱུར་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་

པར་སྨིན་པའོ། །མི་འཇིགས་པ་སྦྱིན་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །གཞན་བལྟ་བའི་ཕྱིར་སྤྲུལ་པ་ཉེ་བར་བསྒྲུབ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་གསང་བའི་སྦུབས་ཀྱི་ཕ་རོལ་ཏུ་
ཕྱིན་པ་དྲུག་གོ། །དེ་ལ་རྣམ་པར་སྨིན་པ་ལྟེ་བ་ཟབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཟབ་ཅིང་རིམ་པར་འཚམ་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ལྟེ་བ་གཟི་བྱིན་དང་ལྡན་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །
ཟབ་ཅིང་མདངས་ཡོད་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ལྟེ་བ་ཡངས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ལྟེ་བ་རྒྱས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ལྟེ་བ་མ་ཞུམ་ཞིང་སྤ་བ་གང་ཡིན་པ་དེ་ནི་ཤེས་
རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ལྟེ་བ་ཟབ་པའི་ཕ་རོལ་ཏུ་ཕྱིན་པ་དྲུག་གོ།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དྲུག་པ། དེ་ལ་རྣམ་པར་སྨིན་པ་སྤུ་རེ་རེའི་ཕ་
རོལ་ཏུ་ཕྱིན་པ་དྲུག་གང་ཞེ་ན། སྐུའི་སྤུ་གྱེན་དུ་ཕྱོགས་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །མདོག་མཐོན་ཏིང་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །སྣུམ་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཁ་དོག་མཛེས་པ་
གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །གཡས་སུ་འཁྱིལ་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ཕན་ཚུན་མ་འཛིངས་ཤིང་མི་འགྲེང་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སྤུ་རེ་རེའི་
ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་གསེར་གྱི་མདོག་ཅན་གྱི་ཕ་རོལ་ཏུ་ཕྱིན་པ་དྲུག་གང་ཞེ་ན། གསེར་མདོག་གསེར་གྱི་ཁ་དོག་ཅན་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །གསེར་གྱི་མདོག་ཅན་མདངས་དང་ལྡན་པ་གང་ཡིན་པ་དེ་ནི་ཚུལ་

ཁྲིམས་ཀྱི་རྣམ་པར་སྨིན་པའོ། །གསེར་གྱི་མདོག་ཅན་སྐྱོན་མེད་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །གསེར་གྱི་མདོག་ཅན་བལྟར་རུང་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །གསེར་གྱི་མདོག་ཅན་དྲི་མ་མེད་པ་གང་ཡིན་པ་
དེ་ནི་བསམ་གཏན་གྱི་རྣམ་པར་སྨིན་པའོ། །གསེར་གྱི་མདོག་ཅན་འོད་རྒྱ་ཆེ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་གསེར་གྱི་མདོག་ཅན་གྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་སྐུ་རོ་སྟོད་སེང་གེ་འདྲ་
བའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྐུ་རིམ་པར་འཚམ་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །སྐུ་རོ་སྟོད་ལེགས་པར་འབྲེལ་བ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །སྐུ་རོ་སྟོད་མཁྲེགས་པ་གང་ཡིན་པ་དེ་ནི་བཟོད་པའི་རྣམ་
པར་སྨིན་པའོ། །སྐུ་རོ་སྟོད་བལྟ་ན་བཟང་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །སྐུ་རོ་སྟོད་ཤིན་ཏུ་ཡངས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །སྐུ་རོ་སྟོད་སེང་གེའི་ལྟ་བུ་མི་ཤིགས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་
པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སྐུ་རོ་སྟོད་སེང་གེ་འདྲ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་བདུན་མཐོ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། བདུན་མཐོ་བ་ཡོངས་སུ་རྫོགས་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་
སྨིན་པའོ། །མཐོ་བ་བཀྲ་ཤིས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །མཐོང་ན་ཡིད་དགའ་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །མཐོ་བ་སྙོམས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །མཐོ་ཞིང་མ་ཞུམ་ལ་མཛེས་པ་གང་
ཡིན་པ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །འཇམ་ཞིང་སྣུམ་ལ་དང་ཞིང་གསལ་ལ་མཐོ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་བདུན་མཐོ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་

པར་སྨིན་པ་ཕྱག་རིང་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། བདུག་སྤོས་ཀྱི་སྦྱིན་པ་དང་གཏོང་བའི་སྦྱིན་པས་ཕྱག་རིང་བ་མ་བཅད་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །མི་མཐོ་ཞིང་གནས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །
ཚིགས་སྲ་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །རིམ་གྱིས་གཞོལ་ཞིང་རིང་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ཕྱག་སྟོབས་ལ་ཕ་རོལ་གནོན་པས་བསྐྱད་དུ་མེད་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །མཐོང་ན་མདངས་དང་
ལྡན་ཞིང་འདོད་པར་འགྱུར་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཕྱག་རིང་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་སྐུ་ཁྲིལ་བག་ཆགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཤིན་ཏུ་ཁྲིལ་བག་ཆགས་
པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །གཡོ་བ་མེད་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཕྱོགས་ཤིན་ཏུ་རྣམ་པར་འབྱེས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །སྐུ་རིམ་པར་འཚམ་པ་གང་ཡིན་པ་དེ་ནི་བརྩོན་
འགྲུས་ཀྱི་རྣམ་པར་སྨིན་པའོ། །ཚིགས་མི་མངོན་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །བལྟ་ན་སྡུག་ཅིང་སེམས་ཅན་ཐམས་ཅད་དགའ་བར་བྱེད་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སྐུ་ཁྲིལ་
བག་ཆགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་མགུར་དུང་ལྟ་བུའི་ཕ་རོལ་ཏུ་ཕྱིན་པ་དྲུག་གང་ཞེ་ན། དུང་ལྟར་བྱིན་གྱིས་ཟླུམ་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཤིན་ཏུ་གནས་པ་གང་ཡིན་པ་དེ་ནི་ཚུལ་ཁྲིམས་ཀྱི་
རྣམ་པར་སྨིན་པའོ། །རྩེའུ་ཆུང་མི་མངོན་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ལེགས་པར་གྲུབ་ཅིང་སྙོམས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ཤིན་ཏུ་གཞོན་ཤ་ཆགས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །

གཅད་དུ་མེད་ཅིང་དབྱེར་མེད་ལ་མི་མཐོ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་མགུར་དུང་ལྟ་བུའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་སྒྲོས་བིམ་པ་ལྟར་དམར་བའི་ཕ་རོལ་ཏུ་ཕྱིན་པ་
དྲུག་གང་ཞེ་ན། སྒྲོས་བིམ་པ་ལྟར་དམར་ཞིང་འཛུམ་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །སྒྲོས་བིམ་པ་ལྟར་དམར་ཞིང་ལེགས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ལྟག་འོག་ལེགས་པར་འབྱོར་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །
གསུང་བ་དང་མི་གསུང་བར་གྱུར་པ་ན་རྟག་ཏུ་བལྟ་ན་ཡིད་དུ་འོང་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །བྱི་རུ་ལྟར་སྣང་བ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །བལྟ་ན་བརྟག་ཏུ་རུང་ཞིང་བལྟ་བས་མི་ངོམས་པ་གང་ཡིན་པ་དེ་ནི་ཤེས་རབ་ཀྱི་ཕ་
རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་སྒྲོས་བིམ་པ་ལྟར་དམར་བའི་ཕ་རོལ་ཏུ་ཕྱིན་པ་དྲུག་གོ །དེ་ལ་རྣམ་པར་སྨིན་པ་ཚེམས་མཆེ་བ་དཀར་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཤིན་ཏུ་དཀར་བ་གང་ཡིན་པ་དེ་ནི་གོས་དཀར་པོ་བྱིན་པའི་རྣམ་
པར་སྨིན་པའོ། །ཚེམས་དཀར་ཞིང་མདངས་དང་ལྡན་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །བར་གྱི་དྲི་མ་བསལ་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཚེམས་དཀར་ཞིང་མཁྲེགས་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །དྲི་
ཞིམ་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ཡིད་དུ་འོང་ཞིང་མདངས་དང་ལྡན་ལ་འོད་གསལ་བ་བལྟ་བས་མི་ངོམས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཚེམས་མཆེ་བ་དཀར་བའི་ཕ་རོལ་
ཏུ་ཕྱིན་པ་དྲུག་གོ། །དེ་ལ་ཚེམས་མཉམ་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཚེམས་ལྟག་འོག་མཉམ་པ་གང་ཡིན་པ་དེ་ནི་ཚེམས་མཉམ་པས་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཚེམས་ལྟག་འོག་ཕྱིར་མ་གྱེད་ཅིང་ལེགས་པར་གྲུབ་པ་གང་

ཡིན་པ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཀུན་ནས་ཐགས་བཟང་བ་གང་ཡིན་པ་དེ་ནི་བཟོད་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཚེམས་ཟླུམ་པ་གང་ཡིན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །མ་གྲུགས་
ཤིང་ཆུ་སྒོ་མ་དོད་ལ་སྲ་བ་གང་ཡིན་པ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །འོག་མ་ཡང་ལྟག་མ་དང་འཚམ་ལ་ལྟག་མ་ཡང་འོག་མ་དང་འཚམ་པ་མཚམས་ཐད་ཀར་འབྱོར་པ་བལྟ་ན་སྡུག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་
སྨིན་པ་སྟེ། འདི་དག་ནི་ཚེམས་མཉམ་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཚེམས་བཞི་བཅུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཚེམས་བཞི་བཅུ་ཚང་བ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཚེམས་ཐགས་བཟང་
བ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཚེམས་མ་གཙིགས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཚེམས་རྣོ་བ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །ཚེམས་ལེགས་པར་གྲུབ་པ་གང་ཡིན་པ་དེ་ནི་བསམ་གཏན་གྱི་རྣམ་
པར་སྨིན་པའོ། །ཚེམས་ཤིན་ཏུ་བརྟན་ཞིང་ཡིད་དུ་འོང་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་ཚེམས་བཞི་བཅུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ལྗགས་རིང་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྙན་
གྱི་བུ་ག་རྒྱ་ཆེར་འགེབས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ལྗགས་དྲི་མས་མ་སྦགས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ལྗགས་རྐན་ལ་འབྱར་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ལྗགས་ཤིན་ཏུ་རྒྱ་ཆེ་བ་གང་ཡིན་པ་དེ་
ནི་བརྩོན་འགྲུས་ཀྱི་རྣམ་པར་སྨིན་པའོ། །མཚན་དང་ལྡན་པར་གྲུབ་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །དེ་པད་མ་འདབ་མ་བརྒྱ་པའི་ཁ་དོག་ཏུ་ལེགས་པར་གནས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་ལྗགས་

རིང་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་ཚངས་པའི་དབྱངས་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། དབྱངས་གསང་མཐོ་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །དགའ་བར་འགྱུར་བའི་དབྱངས་གང་ཡིན་པ་དེ་ནི་ཚུལ་
ཁྲིམས་ཀྱི་རྣམ་པར་སྨིན་པའོ། །དབྱངས་སྣ་ཚོགས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །དབྱངས་ཟིལ་གྱིས་མི་ནོན་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །དབྱངས་རྒྱུན་ཆད་པ་མེད་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །
སྒྲ་དང་བརྡ་ཐམས་ཅད་ལ་དབྱངས་སྙན་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་ཚངས་པའི་དབྱངས་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །གཞན་ཡང་ལུས་དང་སེམས་བདེ་བར་བྱེད་པ་གང་ཡིན་པ་དེ་ནི་
སྦྱིན་པའི་རྣམ་པར་སྨིན་པའོ། །རྣར་སྙན་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །སྙིང་སིམ་པར་བྱེད་པ་གང་ཡིན་པ་དེ་ནི་བཟོད་པའིའོ། །འཁོར་ཐམས་ཅད་མི་འདོར་བར་གོ་བར་བྱེད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །བྱ་ཀ་ལ་པིང་ཀའི་སྒྲ་ལྟ་བུའི་དབྱངས་གང་ཡིན་
པ་དེ་ནི་བསམ་གཏན་གྱིའོ། །ཐེ་ཚོམ་གཅོད་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་སྨིན་པ་ཚངས་པའི་དབྱངས་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་མཚན་རོ་བྲོ་བའི་མཆོག་དང་ལྡན་པར་བསྒྲུབ་པའི་ཕ་རོལ་ཏུ་
ཕྱིན་པ་དྲུག་གང་ཞེ་ན། ཞལ་ཟས་ཐམས་ཅད་ཐུགས་སུ་བྱོན་ཅིང་རོ་བྲོ་བའི་མཆོག་དང་ལྡན་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ཞལ་ཟས་གསོལ་ནས་བདེ་བར་འཇུ་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ཞལ་ཟས་མཛེས་པར་གསོལ་བ་གང་ཡིན་པ་དེ་ནི་
བཟོད་པའིའོ། །ཞལ་ཟས་མང་ཉུང་འདྲ་བར་འཇུ་ཞིང་ཁམས་འཁྲུག་པ་མེད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །གཟི་བྱིན་དང་ལྡན་པ་གང་ཡིན་དེ་ནི་བསམ་གཏན་གྱིའོ། །མྱུར་དུ་སྤང་བར་རུང་ལ་ཧ་ཅང་ཡང་མི་གྲང་ཧ་ཅང་ཡང་མི་ཚ་བ་གང་ཡིན་པ་དེ་ནི་ཤེས་རབ་ཀྱི་

ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རོ་བྲོ་བའི་མཆོག་དང་ལྡན་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་འགྲམ་པ་སེང་གེའི་ལྟ་བུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། འགྲམ་པ་སེང་གེའི་ལྟ་བུ་རྒྱས་པ་གང་ཡིན་པ་དེ་ནི་སྦྱིན་
པའི་རྣམ་པར་སྨིན་པའོ། །འགྲམ་པ་སེང་གེའི་ལྟ་བུ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །འགྲམ་པ་སེང་གེའི་ལྟ་བུ་ལེགས་པ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །མཐོང་ན་དབང་ཆེ་བར་གྲགས་པ་གང་ཡིན་པ་དེ་ནི་བརྩོན་འགྲུས་ཀྱི་
རྣམ་པར་སྨིན་པའོ། །ཐམས་ཅད་དུ་མ་ཉམས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །མདོག་འཇམ་ཞིང་བལྟ་ན་སྡུག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་འགྲམ་པ་སེང་གེའི་ལྟ་
བུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་ཞལ་སྲོག་ཆགས་གོ་བའི་མདོག་ལྟ་བུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཞལ་སྲོག་ཆགས་གོ་བའི་མདོག་འདྲ་ཞིང་མཁྲེགས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ཞལ་
སྲོག་ཆགས་གོ་བའི་མདོག་འདྲ་བར་ཤིན་ཏུ་ངེས་པ་གང་ཡིན་པ་དེ་ནི་ཚུལ་ཁྲིམས་ཀྱི་རྣམ་པར་སྨིན་པའོ། །ཞལ་སྲོག་ཆགས་གོ་བའི་མདོག་ལྟ་བུར་སྤ་བ་གང་ཡིན་པ་དེ་ནི་བཟོད་པའི་རྣམ་པར་སྨིན་པའོ། །ཞལ་གཉེར་མ་མེད་པ་གང་ཡིན་པ་དེ་ནི་བརྩོན་འགྲུས་ཀྱི་རྣམ་པར་སྨིན་པའོ། །
ཞལ་སྙོམས་པ་གང་ཡིན་པ་དེ་ནི་བསམ་གཏན་གྱི་རྣམ་པར་སྨིན་པའོ། །ཟླ་བ་དང་ཉི་མའི་འོད་ལྟ་བུར་ཐམས་ཅད་ཀྱིས་ཟིལ་གྱིས་མི་ནོན་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་ཞལ་སྲོག་ཆགས་གོ་བའི་མདོག་ལྟ་
བུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་སྤྱན་མཐོན་ཏིང་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། དགའ་བར་འགྱུར་བའི་སྤྱན་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །སྤྱན་གྱི་དཀྱུས་རིང་བ་གང་ཡིན་པ་དེ་ནི་

ཚུལ་ཁྲིམས་ཀྱིའོ། །སྤྱན་ལེགས་པ་དང་ལྡན་པ་གང་ཡིན་པ་དེ་ནི་བཟོད་པའིའོ། །སྤྱན་ཐོགས་པ་མེད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །ཐག་རིང་པོར་གཟིགས་པ་དང་འབྲེལ་བ་གང་ཡིན་པ་དེ་ནི་བསམ་གཏན་གྱིའོ། །མ་ལུས་པ་གཟིགས་ཤིང་མཐའ་
ཡས་པར་གཟིགས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་སྤྱན་མཐོན་ཏིང་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་ཤངས་མཐོ་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་
ཞེ་ན། ཤངས་མཐོ་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ཤངས་དཀྱུས་རིང་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ཤངས་མདངས་དང་ལྡན་པ་གང་ཡིན་པ་དེ་ནི་བཟོད་པའིའོ། །ཤངས་ཡིད་དུ་འོང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །མཐོང་
ན་དགའ་ལ་ངོམས་པ་མེད་པ་གང་ཡིན་པ་དེ་ནི་བསམ་གཏན་གྱིའོ། །ཡིད་དུ་འཐད་པའི་དྲི་སྣོམ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། །འདི་དག་ནི་བྱང་ཆུབ་སེམས་དཔའི་ཤངས་མཐོ་བ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་
དཔའི་མཛོད་སྤུ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། མཛོད་སྤུ་དཀར་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །མཛོད་སྤུ་གཡས་སུ་འཁྱིལ་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །མཛོད་སྤུ་སྤ་ཞིང་ཟིལ་གྱིས་མི་ནོན་པ་གང་ཡིན་པ་དེ་ནི་བཟོད་པའིའོ། །མཛོད་
སྤུ་རིང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །ཤིན་ཏུ་འཁྱིལ་ཅིང་ལེགས་པར་གནས་པ་གང་ཡིན་པ་དེ་ནི་བསམ་གཏན་གྱིའོ། །འོད་མཐའ་ཡས་པས་ཁྱབ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་མཛོད་སྤུ་བསྒྲུབ་
པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་དབུའི་གཙུག་ཏོར་དང་ལྡན་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། མཐོན་ཏིང་འཁྱིལ་བར་གྲུབ་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །གཡས་སུ་འཁྱིལ་པ་གང་ཡིན་པ་དེ་ནི་

ཚུལ་ཁྲིམས་ཀྱིའོ། །རྡུལ་གྱིས་མ་གོས་པ་གང་ཡིན་པ་དེ་ནི་བཟོད་པའིའོ། །སྤྱི་གཙུག་བལྟར་མི་མངོན་པ་གང་ཡིན་པ་དེ་ནི་བརྩོན་འགྲུས་ཀྱིའོ། །རྟག་ཏུ་བལྟ་བར་བྱ་བ་གང་ཡིན་པ་དེ་ནི་བསམ་གཏན་གྱིའོ། །ཆར་དང་རླུང་གིས་མི་ཤིགས་པ་གང་ཡིན་པ་དེ་ནི་ཤེས་རབ་
ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་དབུ་གཙུག་ཏོར་དང་ལྡན་པ་བསྒྲུབ་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་མངོན་པར་འབྱུང་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། བར་ཆད་མེད་པར་འབྱུང་བ་གང་ཡིན་
པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཤིན་ཏུ་དུལ་བར་གཤེགས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ལྷ་མཐའ་ཡས་པ་དག་ཉེ་བར་འོང་བ་གང་ཡིན་པ་དེ་ནི་བཟོད་པའིའོ། །གནོད་སྦྱིན་དག་གིས་སྒོ་གདངས་པ་གང་ཡིན་པ་དེ་ནི་བརྩོན་འགྲུས་
ཀྱིའོ། །ནམ་མཁའ་ལ་སྤྱན་དྲངས་པ་གང་ཡིན་པ་དེ་ནི་བསམ་གཏན་གྱིའོ། །སྐྱེ་བོ་མཛའ་བ་ཐམས་ཅད་ལ་མི་ལྟ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་བྱང་ཆུབ་སེམས་དཔའི་མངོན་པར་འབྱུང་བའི་ཕ་རོལ་ཏུ་ཕྱིན་པ་དྲུག་གོ། །དེ་
ལ་བྱང་ཆུབ་སེམས་དཔའི་དུས་ཀྱི་ཕ་རོལ་ཏུ་ཕྱིན་པ་དྲུག་གང་ཞེ་ན། ཚལ་མེ་ཏོག་རྒྱས་པའི་དུས་སུ་གཤེགས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །དུས་ཚིགས་ཀྱི་མཆོག་ཏུ་ཕྱིན་པའི་ཚེ་གཤེགས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །རྒྱུ་སྐར་བཟང་པོ་
དང་ལྡན་པ་གང་ཡིན་པ་དེ་ནི་བཟོད་པའིའོ། །སྙོམས་པར་གཤེགས་པ་གང་ཡིན་པ་དེ་ནི་བརྩོན་འགྲུས་ཀྱིའོ། །ངན་སོང་ཐམས་ཅད་རབ་ཏུ་ཞི་བར་བྱེད་པ་གང་ཡིན་པ་དེ་ནི་བསམ་གཏན་གྱིའོ། །ངན་སོང་དུ་སོང་བའི་སེམས་ཅན་ཐམས་ཅད་སྣང་བར་བྱས་ནས་གཅིག་ལ་
གཅིག་སྨྲ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་དུས་ཀྱི་ཕ་རོལ་ཏུ་ཕྱིན་པ་དྲུག་གོ། །དེ་ལ་དུས་ཤེས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། གཉིད་ལོག་པ་ན་ཐུན་ཐ་མ་ལ་རབ་ཏུ་བྱུང་སྟེ། གཤེགས་པ་གང་ཡིན་པ་དེ་ནི་

སྦྱིན་པའི་རྣམ་པར་སྨིན་པའོ། །བདག་ཉིད་རབ་ཏུ་བྱུང་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །འདུན་པ་ཅན་ལ་བཀའ་སྩལ་ཏེ་བཏང་བ་གང་ཡིན་པ་དེ་ནི་བཟོད་པའིའོ། །རབ་ཏུ་བྱུང་བ་ལ་བརྟེན་ནས་ཡུལ་ཀ་ཤི་ཀའི་ན་བཟའ་སྤངས་ཏེ། ཆོས་གོས་
བཞེས་པ་གང་ཡིན་པ་དེ་ནི་བརྩོན་འགྲུས་ཀྱིའོ། །ཐར་པ་ལ་རེག་པར་མཛད་པ་གང་ཡིན་པ་དེ་ནི་བསམ་གཏན་གྱིའོ། །ཡུལ་མ་ག་དྷཱའི་བདག་པོ་ཡོངས་སུ་སྨིན་པར་མཛད་པའི་སླད་དུ་གྲོང་ཁྱེར་དུ་གཤེགས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་
སྨིན་པ་སྟེ། འདི་དག་ནི་དུས་ཤེས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་དབྱེ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཐུགས་བརྩེ་བའི་སླད་དུ་རྒྱལ་པོའི་ཁབ་ཏུ་བསོད་སྙོམས་ལ་གཤེགས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །ལྷ་རྣམས་ལ་
ཆོས་སྟོན་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །རྒྱལ་པོའི་ཁབ་ཏུ་གཤེགས་ནས་རི་ལ་བཞུགས་པ་གང་ཡིན་པ་དེ་ནི་བཟོད་པའིའོ། །སྐུ་དྲང་པོར་བཞུགས་པ་གང་ཡིན་པ་དེ་ནི་བརྩོན་འགྲུས་ཀྱིའོ། །བསམ་གཏན་ལ་དགོངས་པ་གང་ཡིན་པ་དེ་ནི་བསམ་གཏན་
གྱིའོ། །རྟེན་ཅིང་འབྲེལ་པར་འབྱུང་བ་ལ་རྣམ་པར་རྟོག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྣམ་པར་དབྱེ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་འཇིག་རྟེན་དང་འཐུན་པར་འཇུག་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སློངས་མོ་
ལ་གཤེགས་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །སྒྱུ་རྩལ་ཤེས་ཀྱི་བུ་རིང་དུ་འཕུར་དང་རངས་བྱེད་ཀྱི་བུ་ལྷག་སྤྱོད་ཀྱི་ཐད་དུ་གཤེགས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །འདི་ནི་ལམ་མ་ཡིན་ནོ་ཞེས་སྤངས་ནས་གཤེགས་པ་གང་ཡིན་པ་དེ་ནི་བཟོད་པའིའོ། །
ལོ་དྲུག་ཏུ་བཞུགས་པ་གང་ཡིན་པ་དེ་ནི་བརྩོན་འགྲུས་ཀྱིའོ། །མཁའ་ཁྱབ་ཀྱི་བསམ་གཏན་གང་ཡིན་པ་དེ་ནི་བསམ་གཏན་གྱིའོ། །མི་སྤྱོད་སྙམ་ནས་ཞལ་ཟས་གསོལ་ཏེ། བྱང་ཆུབ་ཀྱི་སྙིང་པོར་བཞུད་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ།

འདི་དག་ནི་འཇིག་རྟེན་དང་འཐུན་པར་འཇུག་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྟོགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བདུད་འདུལ་བ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །སྟོང་གསུམ་གྱི་སེམས་ཅན་ཐམས་ཅད་ལ་བདེ་བར་བྱེད་པ་གང་ཡིན་པ་དེ་ནི་ཚུལ་ཁྲིམས་
ཀྱིའོ། །སེམས་ཅན་ཐམས་ཅད་ལ་དམིགས་ཤིང་དམ་བཅས་པ་མི་འདྲལ་བ་གང་ཡིན་པ་དེ་ནི་བཟོད་པའིའོ། །སྟོང་གསུམ་ལ་སྒྲིབ་པ་མེད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །བསམ་གཏན་བཞི་ལ་སྙོམས་པར་འཇུག་པ་གང་ཡིན་པ་དེ་ནི་བསམ་གཏན་གྱིའོ། །རིག་
པ་གསུམ་རྗེས་སུ་འཐོབ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྟོགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་སྤོང་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། སེར་སྐྱའི་གནས་ན་ལོར་ཉེ་བར་སྙེན་པ་གང་ཡིན་པ་དེ་ནི་སྤོང་བའི་སྦྱིན་པའི་
ཕ་རོལ་ཏུ་ཕྱིན་པའོ། །འགོག་པ་ལ་བརྩོན་ཞིང་ཁམས་གསུམ་ལ་མི་གནས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །མི་སྐྱེ་བ་ལ་དམིགས་པ་གང་ཡིན་པ་དེ་ནི་བཟོད་པའིའོ། །སེམས་ཅན་ལ་བལྟ་བའི་སྙིང་རྗེ་དང་སྤྱོད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །སྐྱོན་སྤོང་བ་
ངེས་པར་འབྱེད་པའི་ཆ་དང་འཐུན་པ་གང་ཡིན་པ་དེ་ནི་བསམ་གཏན་གྱིའོ། །ཡན་ལག་བརྒྱད་རབ་ཏུ་ཐོབ་ཅིང་མ་འབགས་ལ་ནག་ནོག་མེད་པའི་ཚུལ་ཁྲིམས་ཅན་འདོད་ཆགས་སྤོང་བའི་ཕྱིར་དང་། མ་རིག་པ་གཞོམ་པའི་ཕྱིར་རིག་པ་སྐྱེད་ཅིང་ཆོས་ཐམས་ཅད་ལ་སྒྲིབ་པ་མེད་པ་
སྤོང་བ་ཆེན་པོ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་སྤོང་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྡོ་རྗེ་ལྟ་བུའི་ཕ་རོལ་ཏུ་ཕྱིན་པ་དྲུག་གང་ཞེ་ན། རྡོ་རྗེ་ལྟ་བུའི་ཏིང་ངེ་འཛིན་བསྒྲུབ་པ་ཐོབ་པ་གང་ཡིན་པ་དེ་ནི་སྦྱིན་པའི་རྣམ་པར་སྨིན་པའོ། །
དམིགས་པ་མི་འདོར་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ཕྱིན་ཅི་མ་ལོག་པར་འཛིན་པ་གང་ཡིན་པ་དེ་ནི་བཟོད་པའིའོ། །ཐམས་ཅད་དུ་འཐུན་པར་འཇུག་པ་གང་ཡིན་པ་དེ་ནི་བརྩོན་འགྲུས་ཀྱིའོ། །རང་གི་ཡོན་ཏན་ཤེས་ནས་བག་ཆགས་ཀྱི་མཚམས་སྦྱོར་བ་སྤོང་བ་གང་

ཡིན་པ་དེ་ནི་བསམ་གཏན་གྱིའོ། །སེམས་ཅན་ཐམས་ཅད་ཀྱི་བསམ་པ་དང་ཤེས་པ་མ་ལུས་པར་མངོན་པར་རྫོགས་པར་བྱང་ཆུབ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་རྡོ་རྗེ་ལྟ་བུའི་ཕ་རོལ་ཏུ་ཕྱིན་པ་དྲུག་གོ། །
དེ་ལ་མུན་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བྱང་ཆུབ་མངོན་པར་རྫོགས་པར་འཚང་རྒྱ་བ་ན། གང་དག་ལྷ་རྣམས་འཇིག་རྟེན་གྱི་མགོན་པོ་རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་བརྗོད་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་
པའོ། །ངན་སོང་རབ་ཏུ་ཞི་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །དབང་པོ་ཚང་བ་གང་ཡིན་པ་དེ་ནི་བཟོད་པའིའོ། །སེམས་ཅན་རྣམས་ལ་ཉོན་མོངས་པའི་མི་གནོད་པ་གང་ཡིན་པ་དེ་ནི་བརྩོན་འགྲུས་ཀྱིའོ། །སིལ་སྙན་མ་དཀྲོལ་བར་སྒྲ་འབྱུང་བ་གང་ཡིན་པ་དེ་
ནི་བསམ་གཏན་གྱིའོ། །སྟོང་གསུམ་དུ་སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང་། ལྷ་རྣམས་ཀུན་དགའ་བའི་སྒྲ་བརྗོད་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་སྨིན་པ་སྟེ། འདི་དག་ནི་མུན་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་
ཟིལ་གྱིས་མི་ནོན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྟོང་གསུམ་དག་ན་ཤིང་ལྗོན་པ་དག་ལས་དུས་མ་ཡིན་པར་མེ་ཏོག་དང་འབྲས་བུ་དག་འབྱུང་བ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །སེམས་ཅན་རྣམས་སྡུག་བསྔལ་གྱི་ཚོར་བ་ཐམས་ཅད་
དང་བྲལ་བ་གང་ཡིན་པ་དེ་ནི་ཚུལ་ཁྲིམས་ཀྱིའོ། །སེམས་ཅན་ཐམས་ཅད་ཤིན་ཏུ་དབང་པོ་ཚང་བར་གྱུར་པ་གང་ཡིན་པ་དེ་ནི་བཟོད་པའིའོ། །ལག་མཐིལ་ནས་ཉེ་བར་བཟུང་སྟེ་སྟོང་གསུམ་དག་ན་བླ་ན་མེད་པ་བཅུ་ཟིལ་གྱིས་མི་ནོན་པ་གང་ཡིན་པ་དེ་ནི་བརྩོན་འགྲུས་ཀྱིའོ། །
གཅིག་ལ་གཅིག་བསྔགས་པ་མང་པོ་རྗོད་ཅིང་ལྷ་རྣམས་ལ་བདུད་རྩི་སྟོབས་པ་གང་ཡིན་པ་དེ་ནི་བསམ་གཏན་གྱིའོ། །བདུད་བཞི་བཅོམ་པ་དང་མི་མཉམ་པ་དང་མཉམ་པའི་ཡེ་ཤེས་མངོན་པར་རྫོགས་པར་སངས་རྒྱས་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་

སྨིན་པ་སྟེ། འདི་དག་ནི་ཟིལ་གྱིས་མི་ནོན་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བདུད་ཀྱི་དཔུང་འཇོམས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྟོང་གསུམ་གྱི་འཇིག་རྟེན་གྱི་ཁམས་སུ་བྱང་ཆུབ་མངོན་པར་རྫོགས་པར་འཚང་རྒྱ་བ་ན། སེམས་ཅན་ཐམས་ཅད་བཀྲེས་པ་དང་བྲལ་བ་གང་
ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་སྨིན་པའོ། །ཉོན་མོངས་པའི་བདུད་སུ་ལ་ཡང་གནོད་པ་མེད་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །ལྷའི་བུའི་བདུད་སུ་ལ་ཡང་གནོད་