Kinh tạng Tây Tạng (Kangyur Đại Học) — 032_ཁྲི་པ།_ང

དུ་མེད་པས་ཉེ་བར་གནས་པ་ཡིན་ཞེ་ན། རབ་འབྱོར་
འགྲོ་བ་ལྔ་པོ་དག་ན། སེམས་ཅན་དུ་བསྡུ་བར་བསྡུས་པ་ལ་གང་ཡང་དག་པར་རྫོགས་པའི་སངས་རྒྱས་ཉིད་དམ། དེ་བཞིན་གཤེགས་པ་ཉིད་དམ། རང་བྱུང་བ་ཉིད་དམ། ཐམས་ཅད་མཁྱེན་པ་ཉིད་བསམ་པའམ། གཞལ་བར་ནུས་པའི་སེམས་ཅན་ནི་འགའ་
ཡང་མེད་ལ། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མཐུ་ཡིན་ཏེ། རབ་འབྱོར་རྣམ་གྲངས་དེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མཛད་པ་གཞལ་དུ་མེད་པས་ཉེ་བར་གནས་པ་
ཡིན་ནོ། །རབ་འབྱོར་ཇི་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པ་མཛད་པ་དཔག་ཏུ་མེད་པས་ཉེ་བར་གནས་པ་ཡིན་ཞེ་ན། རབ་འབྱོར་དཔག་ཏུ་མེད་པ་ནི་འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། རང་བྱུང་བ་ཉིད་དང་།

ཐམས་ཅད་མཁྱེན་པ་ཉིད་ཡིན་ཏེ། རབ་འབྱོར་འགྲོ་བ་ལྔ་པོ་དག་ན་སེམས་ཅན་དུ་བསྡུ་བར་བསྡུས་པ་ལ། གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། མཉམ་པའི་སེམས་ཅན་ནི་འགའ་ཡང་མེད་
ན། ལྷག་པ་ལྟ་ག་ལ་ཡོད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པས་རབ་ཏུ་ཕྱེ་བ་ཡིན་ཏེ། རབ་འབྱོར་རྣམ་གྲངས་དེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མཛད་པ་དཔག་ཏུ་མེད་པ་ནས། མཛད་པ་མི་མཉམ་པ་དང་། མཉམ་པའི་བར་གྱིས་ཉེ་བར་གནས་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ། ཚེ་དང་ལྡན་པ་རབ་འབྱོར་
གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅི་ཡང་དག་པར་རྫོགས་པའི་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། རང་བྱུང་ཉིད་དང་། ཐམས་ཅད་མཁྱེན་པ་ཉིད་བསམ་གྱིས་མི་ཁྱབ་པ་དང་། གཞལ་དུ་མ་མཆིས་པ་དང་། དཔག་ཏུ་མ་
མཆིས་པ་དང་། མི་མཉམ་པ་དང་མཉམ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། རབ་འབྱོར་འདི་ནི་བསམ་གྱིས་མི་ཁྱབ་པ་ཡིན་ཏེ། འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉིད་དང་།
དེ་བཞིན་གཤེགས་པ་ཉིད་དང་། རང་བྱུང་ཉིད་དང་། ཐམས་ཅད་མཁྱེན་པ་ཉིད་དོ། །རབ་འབྱོར་འདི་ནི་གཞལ་དུ་མེད་པ་ཡིན་ཏེ། འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། རང་བྱུང་ཉིད་དང་། ཐམས་ཅད་མཁྱེན་
པ་ཉིད་ཡིན་ནོ། །རབ་འབྱོར་འདི་ནི་དཔག་ཏུ་མེད་པ་ཡིན་ཏེ། འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། རང་བྱུང་ཉིད་དང་། ཐམས་ཅད་མཁྱེན་པ་ཉིད་ཡིན་ནོ། །རབ་འབྱོར་འདི་ནི་མི་མཉམ་པ་དང་མཉམ་པ་ཡིན་ཏེ།

འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། རང་བྱུང་ཉིད་དང་། ཐམས་ཅད་མཁྱེན་པ་ཉིད་ཡིན་ནོ། །རབ་འབྱོར་དེ་བཞིན་དུ་གཟུགས་ཀྱང་བསམ་གྱིས་མི་ཁྱབ་པ་དང་། གཞལ་དུ་མེད་པ་དང་། དཔག་ཏུ་མེད་པ་དང་།
མི་མཉམ་པ་དང་མཉམ་པ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བསམ་གྱིས་མི་ཁྱབ་པ་དང་། གཞལ་དུ་མེད་པ་དང་། དཔག་ཏུ་མེད་པ་དང་། མི་མཉམ་པ་དང་མཉམ་པ་ཡིན་ནོ། །རབ་འབྱོར་དེ་བཞིན་དུ་
སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ནོ། །རབ་འབྱོར་ཆོས་ཐམས་ཅད་ཀྱང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ། དེ་དག་ལ་ནི་སེམས་དང་
སེམས་ལས་བྱུང་བའི་ཆོས་རྣམས་མེད་ཅིང་མི་དམིགས་སོ། །རབ་འབྱོར་གཟུགས་ཀྱང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ཡང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །རབ་འབྱོར་དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །དེ་སྐད་
ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅིའི་སླད་དུ། གཟུགས་བསམ་གྱིས་མི་ཁྱབ་པ་དང་། གཞལ་དུ་མ་མཆིས་པ་དང་། དཔག་ཏུ་མ་མཆིས་པ་དང་། མི་མཉམ་
པ་དང་མཉམ་པ་ལགས་ཏེ་མ་མཆིས་པ་ལགས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བསམ་གྱིས་མི་ཁྱབ་པ་དང་། གཞལ་དུ་མ་མཆིས་པ་དང་། དཔག་ཏུ་མ་མཆིས་པ་དང་། མི་མཉམ་པ་དང་མཉམ་པའི་བར་དུ་ལགས་ཏེ་

མ་མཆིས་པ་ལགས། དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ལགས་ཏེ་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་
གཟུགས་ལ་ཡང་ཚད་མེད་དེ། དེའི་ཕྱིར་གཟུགས་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཚད་མེད་དེ། དེའི་ཕྱིར་
རྣམ་པར་ཤེས་པ་ཡང་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །རབ་འབྱོར་དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་ཚད་མེད་དེ། དེའི་ཕྱིར་རྣམ་པ་ཐམས་ཅད་མཁྱེན་པ་ཉིད་ཀྱང་བསམ་གྱིས་མི་ཁྱབ་
པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ་མེད་དོ། །གསོལ་པ། ཅིའི་སླད་དུ་གཟུགས་ཚད་མ་མཆིས་པ་ལགས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཚད་མ་མཆིས་པ་ལགས། དེ་བཞིན་དུ་སྦྱར་ཏེ། རྣམ་
པ་ཐམས་ཅད་མཁྱེན་པ་ཉིད་ཀྱི་བར་དུ་ཚད་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་གཟུགས་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ། དེའི་ཕྱིར་གཟུགས་ལ་ཚད་མེད་དོ། །རབ་འབྱོར་དེ་བཞིན་དུ་
གོང་མ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ཏེ། དེའི་ཕྱིར་རྣམ་པ་ཐམས་ཅད་མཁྱེན་པ་ཉིད་ལ་ཚད་མེད་དོ། །རབ་འབྱོར་འདི་ཇི་སྙམ་དུ་སེམས། བསམ་གྱིས་མི་ཁྱབ་པ་
ནས། མི་མཉམ་པ་དང་མཉམ་པའི་བར་གང་ཡིན་པ་དེ་ལ་གཟུགས་དམིགས་སུ་ཡོད་སྙམ་འམ། དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་དམིགས་སུ་ཡོད་སྙམ་འམ། གསོལ་པ། བཙུན་པ་བཅོམ་ལྡན་འདས་མ་མཆིས་ལགས་སོ། །

རབ་འབྱོར་རྣམ་གྲངས་དེས་ན། ཆོས་ཐམས་ཅད་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ནོ། །རབ་འབྱོར་འདི་དག་ནི་དེ་བཞིན་གཤེགས་པའི་དེ་བཞིན་གཤེགས་པའི་ཆོས་རྣམས་ཡིན་ཏེ། འདི་ལྟ་སྟེ། བསམ་གྱིས་མི་ཁྱབ་པ་དང་། གཞལ་
དུ་མེད་པ་དང་། དཔག་ཏུ་མེད་པ་དང་། མི་མཉམ་པ་དང་མཉམ་པ་སྟེ། དེའི་ཕྱིར་དེ་བཞིན་གཤེགས་པའི་ཆོས་རྣམས་ནི་བསམ་གྱིས་མི་ཁྱབ་པ། བསམ་པ་དང་བྲལ་བ། གཞལ་དུ་མེད་པ། གཞལ་བ་དང་བྲལ་བ། དཔག་ཏུ་མེད་པ། དཔག་པ་དང་བྲལ་བ། མི་
མཉམ་པ་དང་མཉམ་པ། མི་མཉམ་པ་དང་མཉམ་པ་དང་བྲལ་བ་ཡིན་ནོ། །རབ་འབྱོར་བསམ་གྱིས་མི་ཁྱབ་པ་ཞེས་བྱ་བ་དེ་ནི་བསམ་གྱིས་མི་ཁྱབ་པའི་ཚིག་བླ་དགས་ཡིན་ནོ། །གཞལ་དུ་མེད་པ་ཞེས་བྱ་བ་དེ་ནི་གཞལ་དུ་མེད་པའི་ཚིག་བླ་དགས་ཡིན་ནོ། །དཔག་ཏུ་
མེད་པ་ཞེས་བྱ་བ་དེ་ནི་དཔག་ཏུ་མེད་པའི་ཚིག་བླ་དགས་ཡིན་ཏེ། རབ་འབྱོར་རྣམ་གྲངས་དེས་ཀྱང་དེ་བཞིན་གཤེགས་པའི་དེ་བཞིན་གཤེགས་པའི་ཆོས་རྣམས་ནི་བསམ་གྱིས་མི་ཁྱབ་པ་ནས། མི་མཉམ་པ་དང་མཉམ་པའི་བར་དུ་ཡིན་ནོ། །རབ་འབྱོར་དཔེར་ན་ནམ་མཁའ་
ནི་བསམ་གྱིས་མི་ཁྱབ་པ་དང་། མི་མཉམ་པ་དང་མཉམ་པ་ཡིན་ནོ། །རབ་འབྱོར་དེ་བཞིན་དུ། དེ་བཞིན་གཤེགས་པའི་ཆོས་རྣམས་ནི་བསམ་གྱིས་མི་ཁྱབ་པ་དང་། མི་མཉམ་པ་དང་མཉམ་པ་དག་ཡིན་ཏེ། དེ་དག་ཀྱང་ལྷ་དང་། མི་དང་། ལྷ་མ་
ཡིན་དུ་བཅས་པའི་འཇིག་རྟེན་གྱིས་བསམ་པའམ། གཞལ་བའམ། བགྲང་བར་མི་ནུས་སོ། །དེ་བཞིན་དུ་དཔག་ཏུ་མེད་པ་ནི་དེ་བཞིན་གཤེགས་པའི་དེ་བཞིན་གཤེགས་པའི་ཆོས་རྣམས་ཡིན་ནོ། །དེ་བཞིན་གཤེགས་པའི་ཆོས་རྣམས་བསམ་གྱིས་མི་
ཁྱབ་པ་དང་། གཞལ་དུ་མེད་པ་དང་། དཔག་ཏུ་མེད་པ་དང་། མི་མཉམ་པ་དང་མཉམ་པའི་ལེའུ་འདི་བཤད་པ་ན་དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་ཉིས་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་

རྣམ་པར་གྲོལ་ལོ། །དགེ་བསྙེན་དྲུག་བརྒྱ་དང་། དགེ་བསྙེན་མ་སུམ་བརྒྱ་ནི་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །བྱང་ཆུབ་སེམས་དཔའ་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་སྟེ། དེ་དག་ཀྱང་བསྐལ་པ་བཟང་པོ་འདི་
ཉིད་ལ་ལུང་བསྟན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་པ་ལས། ཡོན་ཏན་གྱི་ལེའུ་ཞེས་བྱ་སྟེ་ཉི་ཤུ་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ནི་ཟབ་པ་ལགས་ཤིང་། བཙུན་པ་བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བགྱི་བ་ཆེན་པོས་ཉེ་བར་གནས་པ་ལགས་སོ། །བཙུན་པ་བཅོམ་ལྡན་འདས་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བགྱི་བ་གཞལ་དུ་མ་མཆིས་པ་
དང་། བགྱི་བ་དཔག་ཏུ་མ་མཆིས་པ་དང་། མི་མཉམ་པ་དང་མཉམ་པའི་བགྱི་བས་ཉེ་བར་གནས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ནོ། །ཇི་སྐད་
སྨྲས་པ་དེ་བཞིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བྱ་བ་ཆེན་པོས་ཉེ་བར་གནས་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་མི་མཉམ་པ་དང་མཉམ་པའི་བར་གྱི་བྱ་བས་ཉེ་བར་གནས་པ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་
ཕ་རོལ་ཏུ་ཕྱིན་པ་ལྔ་འདུས་པ་དང་། ནང་སྟོང་པ་ཉིད་འདུས་པ་ནས་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་དུ་འདུས་པ་དང་། དྲན་པ་ཉེ་བར་གཞག་པ་བཞི་འདུས་པ་དང་། དེ་བཞིན་དུ་སྦྱར་ཏེ་འཕགས་པའི་ལམ་ཡན་ལག་བརྒྱད་པའི་བར་དུ་འདུས་པ་དང་། དེ་བཞིན་
གཤེགས་པའི་སྟོབས་བཅུ་འདུས་པ་དང་། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་འདུས་པའི་ཕྱིར་རོ། །རབ་འབྱོར་དཔེར་ན་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ་ཡུལ་གྱི་མི་ལ་སྤྱོད་པ་ཐོབ་པའི་རྒྱལ་

པོའི་དགོས་པ་དང་། རྒྱལ་པོའི་བྱ་བ་གང་དག་ཡིན་པ་དེ་དག་ཐམས་ཅད་ནི་བཀའ་ལ་གཏོགས་པའི་མི་ལ་ཡོད་ཅིང་། བློན་པོ་ཆེན་པོའི་མི་ལ་ཡོད་པ་ཡིན་ཏེ། རྒྱལ་པོ་ནི་བྱ་བ་དེ་དག་ལ་སྙིང་ལས་ཆུང་བ་དང་། ཁུར་བོར་བ་ཡིན་ནོ། །རབ་འབྱོར་དེ་བཞིན་དུ་ཉན་ཐོས་ཀྱི་ཆོས་
རྣམས་སམ། རང་སངས་རྒྱས་ཀྱི་ཆོས་རྣམས་སམ། བྱང་ཆུབ་སེམས་དཔའི་ཆོས་རྣམས་སམ། ཡང་དག་པར་རྫོགས་པའི་སངས་རྒྱས་ཀྱི་ཆོས་གང་དག་ཇི་སྙེད་ཡོད་པ་དེ་དག་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པར་འདུས་ཤིང་། ཤེས་རབ་ཀྱི་ཕ་རོལ་ཏུ་ཕྱིན་པ་
ནི་དེ་དག་གི་བྱ་བ་བྱེད་པ་ཡིན་ནོ། །རབ་འབྱོར་དེ་ལྟ་བས་ན་རྣམ་གྲངས་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བྱ་བ་ཆེན་པོས་ཉེ་བར་གནས་པ་ཡིན་ཞིང་། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་མི་མཉམ་པ་དང་མཉམ་པར་བྱ་བའི་བར་དང་། གཟུགས་ལ་ཡོངས་སུ་འཛིན་
པ་མེད་ཅིང་མངོན་པར་ཞེན་པ་མེད་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡོངས་སུ་འཛིན་པ་མེད་ཅིང་མངོན་པར་ཞེན་པ་མེད་པ་དང་། དེ་བཞིན་དུ་གོང་མ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་
ཀྱི་བར་ལ་ཡོངས་སུ་འཛིན་པ་མེད་ཅིང་། མངོན་པར་ཞེན་པ་མེད་པར་ཉེ་བར་གནས་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཇི་ལྟར་ན་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་གཟུགས་ལ་ཡོངས་སུ་འཛིན་པ་མ་མཆིས་ཤིང་མངོན་པར་ཞེན་པ་མ་མཆིས་པར་ཉེ་བར་གནས་པ་ལགས། ཇི་ལྟར་ན་ཚོར་བ་དང་། ཇི་ལྟར་ན་འདུ་ཤེས་དང་། ཇི་ལྟར་ན་འདུ་བྱེད་རྣམས་དང་། ཇི་ལྟར་ན་རྣམ་པར་ཤེས་པ་ལ་ཡོངས་སུ་འཛིན་པ་མ་མཆིས་ཤིང་།
མངོན་པར་ཞེན་པ་མ་མཆིས་པར་ཉེ་བར་གནས་པ་ལགས། ཇི་ལྟར་ན་རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་ཡོངས་སུ་འཛིན་པ་མ་མཆིས་ཤིང་། མངོན་པར་ཞེན་པ་མ་མཆིས་པར་ཉེ་བར་གནས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་

ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་ཅི་ཁྱོད་ཀྱིས་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བའི་གཟུགས་དེ་ཡང་དག་པར་རྗེས་སུ་མཐོང་ངམ། གསོལ་པ། བཙུན་པ་
བཅོམ་ལྡན་འདས་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཅི་ཁྱོད་ཀྱིས་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བའི་ཚོར་བ་དེ་དང་། འདུ་ཤེས་དེ་དང་། འདུ་བྱེད་དེ་དག་དང་། རྣམ་པར་
ཤེས་པ་དེ་ཡང་དག་པར་རྗེས་སུ་མཐོང་ངམ། གསོལ་པ། བཙུན་པ་བཅོམ་ལྡན་འདས་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཅི་ཁྱོད་ཀྱིས་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བའི་
རྣམ་པ་ཐམས་ཅད་མཁྱེན་པ་ཉིད་ཀྱི་བར་དེ་ཡང་ཡང་དག་པར་རྗེས་སུ་མཐོང་ངམ། གསོལ་པ། བཙུན་པ་བཅོམ་ལྡན་འདས་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ལེགས་སོ་ལེགས་སོ། །ཇི་སྐད་སྨྲས་པ་དེ་བཞིན་ཏེ། རབ་འབྱོར་ངས་
ཀྱང་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བ་དེ་ཡང་དག་པར་རྗེས་སུ་མ་མཐོང་ངོ་། །དེ་བཞིན་དུ་ངས་ཀྱང་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བའི་ཚོར་བ་དེ་དང་།
འདུ་ཤེས་དེ་དང་། འདུ་བྱེད་དེ་དག་དང་། རྣམ་པར་ཤེས་པ་དེ་ཡང་དག་པར་རྗེས་སུ་མ་མཐོང་ངོ་། །རབ་འབྱོར་དེ་བཞིན་དུ་ངས་ཀྱང་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བའམ། མངོན་པར་ཞེན་པར་བྱ་བའི་རྣམ་པ་ཐམས་ཅད་མཁྱེན་པ་ཉིད་ཀྱི་
བར་དུ་ཡང་དག་པར་རྗེས་སུ་མ་མཐོང་སྟེ། རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས། གཟུགས་ལ་ཡོངས་སུ་གཟུང་བར་མི་བྱ། མངོན་པར་ཞེན་པར་མི་བྱའོ། །དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་

ཉིད་ཀྱི་བར་ལ་ཡོངས་སུ་གཟུང་བར་མི་བྱ། མངོན་པར་ཞེན་པར་མི་བྱའོ། །དེ་ནས་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཟབ་ཅིང་
མཐོང་བར་དཀའ་ལ་རྟོགས་པར་དཀའ་སྟེ། བརྟག་པར་མི་ནུས་ཤིང་རྟོག་གེའི་སྤྱོད་པ་མ་ལགས་ལ། ཞིབ་ཞིབ་མོ་བརྟགས་པའི་མཁས་པ་དང་། མཛངས་པས་རིག་པར་བགྱི་བ་ལགས་སོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་
གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས་མོས་པར་གྱུར་པ་དེ་དག་ནི་སྔོན་གྱི་རྒྱལ་བ་ལ་ལྷག་པར་བགྱི་བ་བགྱིས་པ་དང་། དགེ་བའི་རྩ་བ་དག་བསྐྲུན་པ་དང་། དགེ་བའི་བཤེས་གཉེན་གྱིས་ཡོངས་སུ་ཟིན་པ་དག་ལགས་སོ། །བཙུན་པ་བཅོམ་ལྡན་
འདས་གང་གི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་མཆིས་པ་དེ་དག་ཐམས་ཅད་དད་པས་རྗེས་སུ་འབྲང་བར་གྱུར་ཅིང་། དེ་བཞིན་དུ་ཆོས་ཀྱི་རྗེས་སུ་འབྲང་བ་དང་། བརྒྱད་པ་དང་། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་།
ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་དག་ཏུ་གྱུར་ཀྱང་དེ་དག་གི་ཤེས་པ་གང་ལགས་པ་དང་། སྤོང་བ་གང་ལགས་པ་བས་ནི་གང་ལ་ལ་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཉིན་གཅིག་ཙམ་ཞིག་བཟོད་པའམ། འདོད་པའམ། འཇལ་
བའམ། ཉེ་བར་རྟོག་པར་བགྱིད་ན། དེའི་ཤེས་པ་དང་། སྤོང་བ་དེ་ཉིད་ཆེས་མང་བ་ལགས་ཀྱི་སྔ་མ་དད་པས་རྗེས་སུ་འབྲང་བ་ནས། རང་སངས་རྒྱས་ཀྱི་བར་དེ་དག་གི་ཤེས་པ་དང་། སྤོང་བ་ནི་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དད་པས་རྗེས་སུ་འབྲང་བ་
རྣམས་ཀྱི་ཤེས་པ་དང་། སྤོང་བ་གང་ལགས་པ་དང་། དེ་བཞིན་དུ་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་མི་སྐྱེ་བའི་ཆོས་ལ་བཟོད་པ་ཐོབ་པ་ལགས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་འདོད་པ་ན་

སྤྱོད་པའི་ལྷ་དེ་དག་དང་། གཟུགས་ན་སྤྱོད་པའི་ལྷ་དེ་དག་ལ་བཀའ་སྩལ་པ། ལྷ་དག་ལེགས་སོ་ལེགས་སོ། །དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ལྷ་དག་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་
ཟབ་མོ་འདི་ཐོས་ཤིང་ཐོས་ནས་ཀྱང་མོས་པར་འགྱུར་ལ། མོས་ནས་ཀྱང་ཡི་གེར་འདྲིའམ། ཡི་གེར་འདྲིར་འཇུག་པའམ། དེ་བཞིན་དུ་འཆང་ཞིང་སྟོན་པ་ནས། ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་སུ་ཚུལ་བཞིན་དུ་ཡིད་ལ་བྱེད་པའི་བར་དུ་བྱེད་ན།
རིགས་ཀྱི་བུའམ་རིགས་ཀྱི་བུ་མོ་དེ་ནི་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་ཀྱིས་ཆེས་མྱུར་དུ་ཡོངས་སུ་མྱ་ངན་ལས་འདའ་བར་ང་སྨྲའི། ཉན་ཐོས་ཀྱི་ཐེག་པ་པའི་རིགས་ཀྱི་བུ་རྣམས་སམ། རིགས་ཀྱི་བུ་མོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བའི་མདོ་སྡེ་
གཞན་དག་ལ་བསྐལ་པའམ། བསྐལ་པ་ལས་ལྷག་པར་སྤྱོད་པས་ནི་མ་ཡིན་ནོ། །དེ་ཅིའི་ཕྱིར་ཞེ་ན། ལྷ་དག་འདི་ལྟར་དད་པས་རྗེས་སུ་འབྲང་བ་རྣམས་ནས། དགྲ་བཅོམ་པའི་བར་དག་དང་། རང་སངས་རྒྱས་རྣམས་ཀྱི་ཆོས་གང་ལ་བསླབ་པར་བྱ་བ་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་གང་ལ་བསླབས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཡང་དག་ཕུལ་གྱི་ཆོས་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདིར་རྒྱ་ཆེར་བསྟན་པའི་ཕྱིར་རོ། །དེ་ནས
འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཕ་རོལ་ཏུ་ཕྱིན་པ་ཆེན་པོ་ལགས་སོ། །བཙུན་པ་བཅོམ་ལྡན་འདས་འདི་ལྟ་སྟེ། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ནི་ཕ་རོལ་ཏུ་ཕྱིན་པ་གཞལ་དུ་མ་མཆིས་པ་དང་། ཕ་རོལ་ཏུ་ཕྱིན་པ་དཔག་ཏུ་མ་མཆིས་པ་དང་། ཕ་རོལ་ཏུ་ཕྱིན་པ་མི་མཉམ་པ་དང་མཉམ་པ་ལགས་ཏེ། བཙུན་པ་བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་བསླབས་ནས།

དད་པས་རྗེས་སུ་འབྲང་བ་རྣམས་དང་། བརྒྱད་པ་རྣམས་དང་། རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། རང་སངས་རྒྱས་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་
དབྱིངས་སུ་ངེས་པར་འབྱུང་ལགས་སོ། །འདི་ལ་བསླབས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་
མྱ་ངན་ལས་འདའ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ནི་བྲི་བའམ། གང་བར་མངོན་པ་མ་མཆིས་ལགས་སོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་ལྷ་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ། རྗེས་སུ་ཡི་རངས་ནས་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་ཐད་ནས་དོང་ངོ་། །དེ་དག་ཧ་ཅང་ཡང་མི་རིང་བ་ཞིག་ཏུ་རྫུ་འཕྲུལ་གྱིས་དོང་ནས་མི་སྣང་བར་གྱུར་ཏོ། །དེ་ལ་འདོད་པ་ན་སྤྱོད་པའི་ལྷ་
དེ་དག་ནི་འདོད་པའི་ཁམས་སུ་འཁོད་དོ། །གཟུགས་ན་སྤྱོད་པའི་ལྷ་གང་དག་ཡིན་པ་དེ་དག་ནི་གཟུགས་ཀྱི་ཁམས་སུ་འཁོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའི་
ཐེག་པ་པའི་གང་ཟག་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས། ཐོས་མ་ཐག་ཏུ་མོས་པར་འགྱུར་ཞིང་གོང་དུ་ཡང་ཡི་གེར་འདྲི་བ་དང་། འཛིན་པ་དང་། འཆང་བ་དང་། ཀུན་ཆུབ་པར་བགྱིད་པ་ནས། རྟག་ཏུ་ཚུལ་བཞིན་དུ་ཡིད་ལ་བགྱིད་པའི་བར་དུ་བགྱིད་པ་ཞིག་
ལགས་ན། དེ་གང་ནས་ཤི་འཕོས་ནས་འདིར་སྐྱེས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་ཟག་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་

འདི་ཐོས་ནས། ཐོས་མ་ཐག་ཏུ་མོས་པར་འགྱུར་ཞིང་། གོང་དུ་ཡང་ཡི་གེར་འདྲི་བ་དང་། འཛིན་པ་དང་། འཆང་བ་དང་། ཀུན་ཆུབ་པར་བྱེད་པ་དང་། རྟག་ཏུ་ཚུལ་བཞིན་དུ་ཡིད་ལ་བྱེད་པའི་བར་དུ་བྱེད་པ་དང་། གང་ལས་ཤེས་རབ་ཀྱི་ཕ་རོལ་
ཏུ་ཕྱིན་པ་ཟབ་མོ་འདི་ཐོས་པའི་ཕྱི་བཞིན་དུ་རྟག་ཏུ་རྗེས་སུ་འབྲང་བར་འགྱུར་ཏེ། རབ་འབྱོར་དཔེར་ན་བ་དྲུས་མ་བེའུ་སར་པའི་རྗེས་སུ་འབྲང་བར་བྱེད་པ་དེ་བཞིན་དུ། བྱང་ཆུབ་སེམས་དཔའི་ཐེག་པ་པ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས། ཐོས་མ་
ཐག་ཏུ་མོས་པར་འགྱུར་ཞིང་། གོང་དུ་ཡང་ཡི་གེར་འདྲི་བ་དང་། འཛིན་པ་དང་། འཆང་བ་དང་། ཀུན་ཆུབ་པར་བྱེད་པ་དང་། རྟག་ཏུ་ཚུལ་བཞིན་དུ་ཡིད་ལ་བྱེད་པའི་བར་དུ་བྱེད་པའི་བྱང་ཆུབ་སེམས་དཔའི་ཐེག་པ་པའི་གང་ཟག་དེ་ནི་མི་རྣམས་ཀྱི་ནང་ཁོ་ན་ནས་ཤི་
འཕོས་ནས་མི་རྣམས་ཀྱི་ནང་དུ་སྐྱེས་པ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་བྱང་ཆུབ་སེམས་དཔའི་ཐེག་པ་པའི་གང་ཟག་དེས་སྔོན་གྱི་ཚེ་རབས་དག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས། བཟུང་ཞིང་བཅངས་ལ། ཀུན་ཆུབ་པར་བྱས་པ་ནས།
ཚུལ་བཞིན་དུ་ཡིད་ལ་བྱེད་པའི་བར་དུ་བྱས་པ་ཡིན་ཞིང་། གོང་དུ་ཡང་ཡི་གེར་བྲིས་ཏེ། གླེགས་བམ་དུ་ཆུད་པར་བྱས་ནས། མེ་ཏོག་དང་། ཕྲེང་བ་དང་། བྱུག་པ་དང་། ཕྱེ་མ་དང་། མར་མེ་དང་། བདུག་པ་དང་། གོས་དང་། གདུགས་དང་། རྒྱལ་མཚན་དང་།
བ་དན་དག་གིས་བཀུར་སྟིར་བྱས་ཤིང་། དེ་བཞིན་དུ་བཙུན་པར་བྱས། རི་མོར་བྱས་ཏེ། དེ་དགེ་བའི་རྩ་བ་དེས་མི་ཁོམ་པ་བརྒྱད་རྣམ་པར་སྤངས་ནས། མི་རྣམས་ཀྱི་ནང་དུ་སྐྱེས་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་
རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའི་ཐེག་པ་པའི་གང་ཟག་གང་ཡོན་ཏན་དེ་དག་ཉིད་དང་ལྡན་ལ། སངས་རྒྱས་ཀྱི་ཞིང་གཞན་དག་ཏུ་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བགྱིས་ནས། དེ་ནས་

ཤི་འཕོས་ཏེ་འདིར་སྐྱེས་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས། ཐོས་མ་ཐག་ཏུ་མོས་པར་བགྱིད་ལ། མོས་ནས་ཀྱང་ཡི་གེར་འདྲི་བ་དང་། ཡི་གེར་འདྲིར་སྩོལ་བ་དང་། དེ་བཞིན་དུ་འཛིན་པ་དང་། འཆང་བ་དང་། ཚུལ་བཞིན་དུ་ཡིད་ལ་བགྱིད་
པར་འགྱུར་བ་ལྟ་མཆིས་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་ཟག་གང་སངས་རྒྱས་ཀྱི་ཞིང་གཞན་དག་ཏུ་སངས་རྒྱས་བཅོམ་
ལྡན་འདས་རྣམས་ལ་བསྙེན་བཀུར་བྱས་ནས། དེ་དེ་ནས་ཤི་འཕོས་ནས་འདིར་སྐྱེས་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས་ཐོས་མ་ཐག་ཏུ་མོས་པར་བྱེད་ལ། མོས་ནས་ཀྱང་ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། དེ་བཞིན་དུ་འཛིན་པ་དང་།
འཆང་བ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པའི་བར་དུ་བྱེད་པ་ཡང་ཡོད་དོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་བྱང་ཆུབ་སེམས་དཔའི་ཐེག་པ་པའི་གང་ཟག་དེས་སངས་རྒྱས་ཀྱི་ཞིང་དེ་དག་ཏུ་སངས་རྒྱས་བཅོམ་ལྡན་འདས་དེ་དག་ལས་ཤེས་
རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ལ། དེ་བཞིན་དུ་བཟུང་ཞིང་བཅངས་ཏེ། ཀུན་ཆུབ་པར་བྱས་པ་ནས། ཚུལ་བཞིན་དུ་ཡིད་ལ་བྱེད་པའི་བར་དུ་བྱས་པ་ཡིན་ཏེ། དེ་དགེ་བའི་རྩ་བ་དེས་དེ་ནས་ཤི་འཕོས་ནས་འདིར་སྐྱེས་པ་ཡིན་པའི་ཕྱིར་རོ། །རབ་འབྱོར་གཞན་ཡང་
བྱང་ཆུབ་སེམས་དཔའི་ཐེག་པ་པའི་གང་ཟག་གང་གིས་དགའ་ལྡན་གྱི་ལྷའི་རིས་དག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ཤིང་། ཚུལ་བཞིན་དུ་ཡིད་ལ་བྱེད་པའི་བར་དུ་བྱས་པ་དེ། དེ་ཚུན་ཆད་ལས་མི་དགེ་བ་བསགས་པ་ཟད་པར་བྱས་ནས། ཤེས་རབ་ཀྱི་ཕ་རོལ་
ཏུ་ཕྱིན་པ་ཐོས་པའི་དགེ་བའི་རྩ་བ་དེ་ཉིད་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པའི་རྒྱུས་མི་རྣམས་དང་སྐལ་བ་མཉམ་པར་སྐྱེས་པ་དེ་ཡང་ཡོན་ཏན་དེ་དག་ཉིད་དང་ལྡན་པར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་བྱང་ཆུབ་སེམས་དཔའི་ཐེག་པ་པའི་

གང་ཟག་དགའ་ལྡན་གྱི་གནས་སུ་སྐྱེས་པ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉིད་དྲིས་ཤིང་ཡོངས་སུ་ཞུས་པའི་ཕྱིར་རོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་
ཟག་གང་གིས་སྔོན་གྱི་ཚེ་རབས་དག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ལ། ཆོས་གསལ་བར་སྟོན་པ་དེ་ལ་མ་དྲིས་ཤིང་ཡོངས་སུ་མ་ཞུས་པ་འདིར་སྐྱེས་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་
འདི་ཉིད་ལ་སོམ་ཉི་ཉིད་དུ་གྱུར་ཅིང་། ཐེ་ཚོམ་ཉིད་དུ་གྱུར་ཏེ། སེམས་ཞུམ་པ་ཉིད་དུ་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་ཐེག་པ་པས་སྔོན་གྱི་ཚེ་རབས་དག་ཏུ་བསམ་གཏན་གྱི་ཕ་རོལ་ཏུ་ཕྱིན་པ་དང་། དེ་བཞིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་
པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པའི་བར་གྱི་ཟབ་མོ་འདི་ཐོས་ལ། ཆོས་གསལ་བར་སྟོན་པ་དེ་ལ་མ་དྲིས་ཤིང་ཡོངས་སུ་མ་ཞུས་པ་འདིར་སྐྱེས་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ན།
སོམ་ཉི་ཉིད་དུ་གྱུར་ཅིང་། ཐེ་ཚོམ་ཉིད་དུ་གྱུར་ཏེ། སེམས་ཞུམ་པ་ཉིད་དུ་འགྱུར་རོ། །རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་པའི་གང་ཟག་གང་གིས་སྔོན་གྱི་ཚེ་རབས་དག་ཏུ་ནང་སྟོང་པ་ཉིད་དང་། དེ་བཞིན་དུ་ཕྱི་སྟོང་པ་ཉིད་དང་། དེ་བཞིན་དུ་ཕྱི་ནང་སྟོང་པ་ཉིད་དང་།
དེ་བཞིན་དུ་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་འདི་ཐོས་ལ། ཆོས་གསལ་བར་སྟོན་པ་དེ་ལ་མ་དྲིས་ཤིང་ཡོངས་སུ་མ་ཞུས་པ་འདིར་སྐྱེས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉིད་ལ་སོམ་ཉི་ཉིད་དུ་གྱུར་
ཅིང་ཐེ་ཚོམ་ཉིད་དུ་གྱུར་ཏེ། སེམས་ཞུམ་པ་ཉིད་དུ་འགྱུར་རོ། །རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་པའི་གང་ཟག་གང་གིས་སྔོན་གྱི་ཚེ་རབས་དག་ཏུ་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་

དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། རྣམ་པར་ཐར་པའི་སྒོ་གསུམ་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་སྙོམས་པར་འཇུག་པ་དགུ་དང་། དེ་བཞིན་
གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་ཐོས་ལ། ཆོས་གསལ་བར་སྟོན་པ་དེ་ལ་མ་དྲིས་ཤིང་ཡོངས་སུ་མ་ཞུས་པ་འདིར་སྐྱེས་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ན། ཤེས་རབ་ཀྱི་ཕ་རོལ་ཏུ་ཕྱིན་པ་
ཟབ་མོ་འདི་ཉིད་ལ་སོམ་ཉི་ཉིད་དུ་གྱུར་ཅིང་། ཡིད་རྟུལ་བ་ཉིད་དང་། ཐེ་ཚོམ་ཉིད་དུ་གྱུར་ཏེ། སེམས་ཞུམ་པ་ཉིད་དུ་འགྱུར་རོ།། །།ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་པ། བམ་པོ་ཉི་ཤུ་གཅིག་པ། རབ་འབྱོར་གཞན་ཡང་བྱང་ཆུབ་སེམས་དཔའི་
ཐེག་པ་པའི་གང་ཟག་གང་གིས་སྔོན་གྱི་ཚེ་རབས་དག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ལ། འདི་ལྟ་སྟེ། ཉི་མ་གཅིག་གམ། གཉིས་སམ། གསུམ་འམ། བཞིའམ། ཉི་མ་ལྔར་ཡང་ཉམས་སུ་མ་བླངས་ཤིང་མ་བསྒོམས་པ་ནི་འདི་ལྟ་སྟེ། ཉི་མ་གཅིག་
གམ། གཉིས་སམ། གསུམ་འམ། བཞིའམ། ཉི་མ་ལྔར་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལས་འཕྲོགས་པར་མི་འགྱུར་གྱི། དེའི་འོག་ཏུ་ནི་ཐེ་ཚོམ་གྱིས་འཕྲོགས་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་ནན་ཏན་སྙིང་པོར་མི་བྱེད་པའི་གང་ཟག་
ནི་ཆོས་དེ་དག་མ་བསྒོམས་ཤིང་ནན་ཏན་མ་བྱས་པས་དེ་ལྟར་འགྱུར་བའི་ཕྱིར་རོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་ཟག་དེ་ནི་ཐེག་པ་ལ་ཞུགས་ནས་རིང་པོ་མ་ལོན་པ་དང་། དགེ་བའི་བཤེས་གཉེན་གྱིས་ཡོངས་སུ་ཟིན་པ་མ་ཡིན་པ་དང་། སངས་རྒྱས་
མང་པོ་ལ་བསྙེན་བཀུར་བྱས་པ་མ་ཡིན་པ་དེས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་མ་བྲིས་ཤིང་མ་བཟུང་ལ། མ་བཅངས་ཏེ། ཀུན་ཏུ་ཆུབ་པར་མ་བྱས་པ་དང་། མ་ཀླགས་པ་དང་། ཁ་ཏོན་དུ་མ་བྱས་པ་དང་། ལུང་མ་མནོས་པ་དང་། ཚུལ་བཞིན་དུ་ཡིད་

ལ་མ་བྱས་ཤིང་། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཡང་མ་བསླབས་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་
ཕ་རོལ་ཏུ་ཕྱིན་པ་ལ་མ་བསླབས་པ་ཡིན་པ་དང་། དེ་བཞིན་དུ་ནང་སྟོང་པ་ཉིད་ལ་མ་བསླབས་པ་ནས། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་ལ་མ་བསླབས་པ་དང་། དེ་བཞིན་དུ་དྲན་པ་ཉེ་བར་གཞག་པ་རྣམས་ལ་མ་
བསླབས་པ་དང་། ཡང་དག་པར་སྤོང་བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། འཕགས་པའི་ལམ་རྣམས་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་
སྙོམས་པར་འཇུག་པ་དགུ་དང་། དེ་བཞིན་གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་ལ་མ་བསླབས་པར་རིག་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔའི་ཐེག་པ་པའི་གང་ཟག་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་
འདི་ཡི་གེར་མི་འདྲི་ཞིང་། ཡི་གེར་འདྲིར་མི་འཇུག་པ་དང་། མི་འཛིན་པ་དང་། མི་འཆང་བ་དང་། ཀུན་ཆུབ་པར་མི་བྱེད་པ་དང་། མི་ཀློག་པ་དང་། ཁ་ཏོན་དུ་མི་བྱེད་པ་དང་། ལུང་མི་ནོད་པ་དང་། ཚུལ་བཞིན་དུ་ཡིད་ལ་མི་བྱེད་པ་དེ། ཇི་སྐད་བསྟན་པའི་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ཡང་ཉམས་སུ་མི་ལེན་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདིས་སེམས་ཅན་ལ་ཡང་ཕན་མི་འདོགས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་སེམས་ཅན་རྣམས་ཡང་དག་པར་འཛིན་དུ་མི་འཇུག་ན། དེ་ནི་ས་གཉིས་པོ་འདི་ལྟ་སྟེ།
ཉན་ཐོས་ཀྱི་སའམ། རང་སངས་རྒྱས་ཀྱི་སར་ཤེས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་མ་བྲིས་ཤིང་། ཡི་གེར་འདྲིར་མ་བཅུག །མ་བཟུང་། མ་བཅངས། ཀུན་ཆུབ་པར་མ་བྱས། མ་ཀླགས། ཁ་

ཏོན་དུ་མ་བྱས། ལུང་མ་མནོས། ཚུལ་བཞིན་དུ་ཡིད་ལ་མ་བྱས་ལ། དེས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཇི་སྐད་བསྟན་པ་ལ་ནན་ཏན་དུ་མ་བྱས་པའི་ཕྱིར་རོ། །རབ་འབྱོར་དཔེར་ན་རྒྱ་མཚོའི་གྲུའམ། གྲུ་བོ་ཆེ་ཆག་ཅིང་ཞིག་ན། དེ་ན་མི་གང་དག་འཚོ་
བར་འདོད་པ་དག་ཤིང་ལེབ་དག་གམ། ཤིང་དག་གམ། རྐྱལ་པ་དག་གམ། མི་རོ་དག་ལ་མི་འཇུ་ཞིང་། འཛིན་པར་མི་བྱེད་པ་དེ་དག་ནི། རྒྱ་མཚོའི་ཕ་རོལ་གྱི་འགྲམ་དུ་མ་ཕྱིན་པ་ཁོ་ནར་འཆི་བའི་དུས་བྱེད་པར་འགྱུར་རོ། །རབ་འབྱོར་དཔེར་ན་རྒྱ་མཚོའི་གྲུའམ།
གྲུ་བོ་ཆེ་ཆག་ཅིང་ཞིག་ན། དེ་ན་མི་གང་དག་འཚོ་བར་འདོད་པ་དག་ཤིང་ལེབ་དག་གམ། ཤིང་དག་གམ། རྐྱལ་པ་དག་གམ། མི་རོ་དག་ལ་འཇུ་ཞིང་འཛིན་པར་བྱེད་པ་དེ་དག་ནི་བདེ་བ་དང་། བདེ་ལེགས་སུ་མ་སྨས་མ་ཉམས་པར་རྒྱ་མཚོའི་འགྲམ་དུ་གནས་པར་རིག་
པར་བྱའོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་དད་པ་ཙམ་དང་། དགའ་བ་ཙམ་དང་ལྡན་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་མི་འདྲི་ཞིང་། ཡི་གེར་འདིར་
མི་འཇུག་པ་དང་། མི་འཛིན་པ་དང་། མི་འཆང་བ་དང་། ཀུན་ཆུབ་པར་མི་བྱེད་པ་དང་། མི་ཀློག་པ་དང་། ཁ་ཏོན་དུ་མི་བྱེད་པ་དང་། ལུང་ནོད་པར་མི་བྱེད་པ་དང་། ཚུལ་བཞིན་དུ་ཡིད་ལ་མི་བྱེད་ཅིང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདིར་ཇི་སྐད་བསྟན་པ་ལ་
ནན་ཏན་དུ་མི་བྱེད་པ་དེ་དག་ནི། བྱང་ཆུབ་སེམས་དཔའི་སྐྱོན་མེད་པར་མ་ཕྱིན་པར་ཉན་ཐོས་ཀྱི་སའམ། རང་སངས་རྒྱས་ཀྱི་ས་མངོན་སུམ་དུ་བྱེད་པར་འགྱུར་རོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་དད་པ་དང་། བཟོད་པ་དང་། རབ་ཏུ་
དགའ་བ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་བརྩོན་པ་མི་གཏོང་བ་ཡོད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡང་ཡི་གེར་འདྲི་ཞིང་། དེ་བཞིན་དུ་

འཛིན་པ་དང་། འཆང་བ་དང་། ཀུན་ཆུབ་པར་བྱེད་པ་དང་། ཀློག་པ་དང་། ཁ་ཏོན་དུ་བྱེད་པ་དང་། ལུང་ནོད་པ་དང་། ཚུལ་བཞིན་དུ་ཡིད་ལ་བྱེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདིར་ཇི་སྐད་བསྟན་པ་ལ་ནན་ཏན་དུ་བྱེད་ན། དེ་ལྟར་
ན་བྱང་ཆུབ་སེམས་དཔའི་ཐེག་པ་པ་དེ་དག་གི་དད་པ་དེ་དང་། བཟོད་པ་དེ་དང་། དང་བ་དེ་དང་། ལྷག་པའི་བསམ་པ་དེ་དང་། འདོད་པ་དེ་དང་། མོས་པ་དེ་དང་། གཏོང་བ་དེ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མི་གཏོང་བ་དེ་ཤེས་རབ་
ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་པ་དེ་ནི་འཕེལ་ཞིང་ཤིན་ཏུ་རྒྱས་པར་འགྱུར་ལ། དེ་དག་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་། རྣམ་པ་ཐམས་ཅད་མཁྱེན་པ་ཉིད་ལས་ཉམས་པར་མི་འགྱུར་རོ། །དེ་དག་ནི་སེམས་ཅན་རྣམས་ཡོངས་སུ་སྨིན་པར་བྱས། སངས་རྒྱས་
ཀྱི་ཞིང་དག་ཀྱང་ཡོངས་སུ་དག་པར་བྱས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར་གཞན་ཡང་དཔེར་ན་སྐྱེས་པའམ། བུད་མེད་ཅིག་བུམ་པ་སོ་མ་བཏང་བས་ཆུ་བཅུ་བར་སེམས་ན། སྐྱེས་པ་
འམ། བུད་མེད་དེ་ནི་མི་མཁས་པའི་རང་བཞིན་ཅན་དུ་རིག་པར་བྱ་སྟེ། བུམ་པ་སོ་མ་བཏང་བ་དེ་ནི་རིང་པོ་མི་ཐུབ་པར་འགྱུར་ཏེ། མྱུར་དུ་ས་ཐ་མལ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བུམ་པ་དེ་སོ་མ་བཏང་བ་ཉིད་ཀྱི་ཕྱིར་དང་། སྙི་བའི་ཕྱིར་རོ། །རབ་
འབྱོར་དེ་བཞིན་དུ་བྱང་ཆུབ་སེམས་དཔའི་ཐེག་པ་པའི་གང་ཟག་གཞན་དག་ཀྱང་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མི་གཏོང་
བ་ཡོད་དུ་ཟིན་ཀྱང་། འོན་ཀྱང་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ཞིང་། ཐབས་ལ་མཁས་པ་དང་བྲལ་ན། དེ་དག་དེ་བཞིན་དུ་བསམ་གཏན་གྱི་ཕ་རོལ་ཏུ་ཕྱིན་པ་དང་། དེ་བཞིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཐབས་ལ་མཁས་པ་དང་བྲལ་བ་དང་། དེ་བཞིན་དུ་ནང་སྟོང་པ་ཉིད་དང་། ཕྱི་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་དང་བྲལ་ཞིང་། ཐབས་ལ་མཁས་པ་དང་བྲལ་བ་དང་། དེ་བཞིན་དུ་དེ་དག་དྲན་པ་ཉེ་བར་
གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་ཡན་ལག་བརྒྱད་པ་དང་བྲལ་བ་དང་། ཐབས་ལ་མཁས་པ་དང་བྲལ་བ་དང་། དེ་བཞིན་དུ་སྦྱར་ཏེ། དེ་དག་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་
ཀྱི་བར་དུ་བསྒོམ་པ་དང་བྲལ་ཞིང་། ཐབས་ལ་མཁས་པ་དང་བྲལ་བར་འགྱུར་ཏེ། དེ་ལྟར་དེ་དག་རྣམ་པ་ཐམས་ཅད་མཁྱེན་པ་ཉིད་བསྒོམ་པ་དང་བྲལ་བ་དང་། ཐབས་ལ་མཁས་པ་དང་བྲལ་ན། དེ་དག་ནི་བར་མ་དོ་ཁོ་ནར་ཚུལ་མ་ཡིན་པས་ཆོས་དེ་དག་ལས་ཉམས་པར་འགྱུར་རོ། །རབ་འབྱོར་
བྱང་ཆུབ་སེམས་དཔའི་ཐེག་པ་པའི་གང་ཟག་དེ་དག་གི་བར་མ་དོ་ཁོ་ནར་ཚུལ་མ་ཡིན་པས་ཆོས་དེ་དག་ལས་ཉམས་པར་འགྱུར་བ་གང་ཞེ་ན། འདི་ལྟ་སྟེ། ཉན་ཐོས་སམ། རང་སངས་རྒྱས་ཀྱི་སའོ། །རབ་འབྱོར་དཔེར་ན་སྐྱེས་པའམ། བུད་མེད་ཅིག་གིས་བུམ་པ་སོ་བཏང་བས་
འདི་ལྟ་སྟེ། ཆུ་ཀླུང་ངམ། འབབ་ཆུའམ། མཚོའམ། མཚེའུ་འམ། ལྟེང་ཀའམ། ཁྲོན་པ་ནས་ཆུ་ཆུ་ན། སྐྱེས་པའམ། བུད་མེད་དེར་ཆུ་ཆུ་བ་དེ་ནི་མཁས་པའི་རང་བཞིན་ཅན་དུ་རིག་པར་བྱ་སྟེ། བུམ་པ་དེ་ནི་ཤིན་ཏུ་ཆུར་བཅུག་ཀྱང་ཞིག་པར་མི་འགྱུར་ཏེ།
སྐྱེས་པའམ། བུད་མེད་དེས་ནི་གར་དགའ་བར་བུམ་པ་དེས་ཆུ་བཅུ་བར་ནུས་སོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའི་ཐེག་པ་པ་གང་དག་ལ་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་
དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མི་གཏོང་བ་ཡང་ཡོད་ལ། དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཡང་མ་བྲལ་བ་དང་། ཐབས་ལ་མཁས་པ་དང་ཡང་མ་བྲལ་བར་བྱང་ཆུབ་སེམས་དཔའི་སྤྱད་པ་སྤྱོད་པ་ན། རབ་འབྱོར་དེ་ལས་གཞན་

པའི་བྱང་ཆུབ་སེམས་དཔའ་རྣམས་ཀྱིས་རིགས་ཀྱི་བུའམ་རིགས་ཀྱི་བུ་མོ་དེ་དག་ནི་བསམ་གཏན་གྱི་ཕ་རོལ་ཏུ་ཕྱིན་པས་ཡོངས་སུ་ཟིན་པར་རིག་པར་བྱ་ཞིང་། དེ་བཞིན་དུ་རིགས་ཀྱི་བུའམ་རིགས་ཀྱི་བུ་མོ་དེ་དག་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་།
བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་ནས། དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་ཟིན་པར་རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་འདི་
ལྟ་སྟེ། བར་མ་དོ་ཁོ་ནར་ཚུལ་མ་ཡིན་པས་ཉན་ཐོས་ཀྱི་སའམ། རང་སངས་རྒྱས་ཀྱི་སར་ཆོས་དེ་དག་ལས་ཉམས་པར་མི་འགྱུར་ཏེ། མ་སྨས་མ་ཉམས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར་
དཔེར་ན་རྒྱ་མཚོའི་གྲུ་བཅོས་ལེགས་མ་བྱས་པར་རྫས་ཀྱིས་ཀུན་ཏུ་བཀང་ནས། རྒྱ་མཚོ་རྒལ་བར་བྱེད་ན། རབ་འབྱོར་དེའི་ཕྱིར་རྒྱ་མཚོའི་ཚོང་པ་དེ་ལས་གཞན་པ་མཁས་པའི་རང་བཞིན་ཅན་རྣམས་ཀྱིས་གྲུ་འདི་བདེ་བ་དང་། བདེ་ལེགས་སུ་རྒྱ་མཚོའི་ཕ་རོལ་ཏུ་ཕྱིན་པར་མི་འགྱུར་
ཏེ། གྲུ་འདི་ནི་བར་མ་དོ་ཁོ་ནར་རྒྱ་མཚོར་འཇིག་པར་འགྱུར་ལ། གྲུ་ཡང་གཞན་དུ་སྣོད་དང་རྫས་ཀྱང་གཞན་དུ་ཐབས་ལ་མི་མཁས་པའི་ཚོང་པ་ཡང་གཞན་དུ་འགྱུར་ཏེ། ཚུལ་མ་ཡིན་པས་ཉམ་ཉེས་སུ་འགྱུར་བར་རིག་པར་བྱའོ། །རབ་འབྱོར་དེ་ལྟར་བྱེད་པའི་ཚོང་པ་
ཐབས་ལ་མི་མཁས་པ་དེ་དག་ནི་གནོད་པ་ཆེན་པོ་དང་ལྡན་པར་འགྱུར་ཞིང་། རིན་པོ་ཆེ་ཆེན་པོ་ལས་ཀྱང་ཡོངས་སུ་ཉམས་པར་འགྱུར་རོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་ལ་དད་པ་དང་། བཟོད་པ་དང་། དང་བ་དང་།
ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མི་གཏོང་བ་ཡོད་ཀྱང་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བ་དང་། ཐབས་ལ་མཁས་པ་དང་བྲལ་ན། དེའི་ཕྱིར་བྱང་ཆུབ་

སེམས་དཔའ་སེམས་དཔའ་ཆེན་པོ་གཞན་དག་གིས་རིགས་ཀྱི་བུ་དེ་དག་ནི་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པས་
ཡོངས་སུ་མ་ཟིན་པ་དང་། དེ་བཞིན་དུ་སྦྱར་ཏེ། རིགས་ཀྱི་བུ་དེ་དག་ནི་རྣམ་པ་ཐམས་ཅད་མཁྱེན་པ་ཉིད་ཀྱི་བར་དག་གིས་ཡོངས་སུ་མ་ཟིན་པར་རིག་པར་བྱ་སྟེ། བྱང་ཆུབ་སེམས་དཔའི་ཐེག་པ་པའི་གང་ཟག་དེ་དག་ནི་བར་མ་དོ་ཁོ་ནར་ཚུལ་མ་ཡིན་པས་ཆོས་དེ་དག་ལས་
ཉམས་པར་འགྱུར་ཞིང་གནོད་པ་ཆེན་པོ་དང་ལྡན་པ་དང་། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་དཀོན་མཆོག་རིན་པོ་ཆེ་ཆེན་པོ་དག་ལས་ཡོངས་སུ་ཉམས་པར་འགྱུར་རོ། །རབ་འབྱོར་བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་
ཀྱི་བར་མ་དོར་ཚུལ་མ་ཡིན་པས་ཆོས་དེ་དག་ལས་ཉམས་པར་འགྱུར་བ་གང་ཞེ་ན། འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་ས་ཡིན་ནོ། །རབ་འབྱོར་དཔེར་ན་རྒྱ་མཚོའི་ཚོང་པ་མཁས་པ་མཁས་པའི་རང་བཞིན་ཅན་ཞིག་གིས་རྒྱ་མཚོའི་གྲུ་དེ་ལེགས་
པར་བཙེམས་ཤིང་། ལེགས་པར་བཅོས། ལེགས་པར་བྱས་ལ། ལེགས་པར་བྱི་དོར་བྱ་བ་བྱས་ནས། རྒྱ་མཚོར་འཇུག་པར་བྱེད་ལ། བཅུག་ནས་ཀྱང་སྣོད་རྫས་སྣ་ཚོགས་བརྫངས་པར་གྱུར་ན། རབ་འབྱོར་དེའི་ཕྱིར་རྒྱ་མཚོའི་ཚོང་པ་དེ་ལས་གཞན་པ་མཁས་
པའི་རང་བཞིན་ཅན་རྣམས་ཀྱིས་གྲུ་འདི་ནི་རྒྱ་མཚོར་འཇིག་པར་མི་འགྱུར་ཏེ། ཚོང་པ་མཁས་པའི་རང་བཞིན་ཅན་དེ་དག་གླིང་གང་དུ་འདོད་པར་གྲུ་འདི་བདེ་བ་དང་། བདེ་ལེགས་སུ་ཕྱིན་པར་འགྱུར་བར་རིག་པར་བྱའོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའི་ཐེག་པ་པའི་
གང་ཟག་དེ་དག་ལ་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མི་གཏོང་བ་ཡང་ཡོད་ལ། དེ་དག་ཀྱང་ཤེས་རབ་ཀྱི་ཕ་རོལ་ཏུ་

ཕྱིན་པ་དང་ཡང་མ་བྲལ་བ་དང་། ཐབས་ལ་མཁས་པ་དང་མ་བྲལ་བར་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ན། རབ་འབྱོར་དེ་ལས་གཞན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རིགས་ཀྱི་བུ་དེ་དག་ནི་བསམ་གཏན་གྱི་ཕ་རོལ་ཏུ་ཕྱིན་པ་
དང་། དེ་བཞིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་ཟིན་པ་དང་། དེ་བཞིན་དུ་སྦྱར་ཏེ། རིགས་ཀྱི་བུ་དེ་དག་ནི་རྣམ་པ་ཐམས་ཅད་མཁྱེན་པ་ཉིད་ཀྱི་བར་
གྱིས་ཡོངས་སུ་ཟིན་པར་རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་སར་ཚུལ་མ་ཡིན་པས། ཆོས་དེ་དག་ལས་ཉམས་པར་མི་འགྱུར་ཏེ། མ་སྨས་མ་ཉམས་པར་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་རིག་པར་བྱའོ། །རབ་འབྱོར་དཔེར་ན་སྐྱེས་བུ་ལ་ལ་ཞིག་སྐྱེས་ནས་ལོ་ཉིས་སྟོང་ལོན་ཏེ། རྒས་ཤིང་འཁོགས་ལ་གཏུགས་པ་ཞིག་དེའི་ལུས་ལ་ཡང་འདི་ལྟ་སྟེ། རླུང་ལས་གྱུར་པའམ། མཁྲིས་པ་ལས་གྱུར་པ་
འམ། བད་ཀན་ལས་གྱུར་པའམ། འདུས་པ་ལས་གྱུར་པའམ། ནད་གང་ཡང་རུང་བ་ཞིག་བྱུང་ན། རབ་འབྱོར་དེ་ཇི་སྙམ་དུ་སེམས། ཅི་མི་དེ་གཅིག་པུ་ཁྲི་དེ་ལས་ལྡང་བར་ནུས་སྙམ་འམ། གསོལ་པ། བཙུན་པ་བཅོམ་ལྡན་འདས་མ་ལགས་སོ། །བཙུན་པ་བཅོམ་ལྡན་འདས་ཅི་སྟེ་མི་དེ་ལྡང་རྔོ་ཐོགས་སུ་ལགས་
ཀྱང་དེས་ནི་རྒྱང་གྲགས་གཅིག་གམ། གཉིས་སམ། གསུམ་འམ། དེ་ལས་ལྷག་པའི་ཤུལ་དུ་མཆི་བའི་རྔོ་མི་ཐོགས་ལགས་སོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་འདི་ལྟར་མི་དེ་ནི་རྒས་པ་དང་། བྲོ་ནད་ཀྱིས་ཉམ་སྨད་པའི་སླད་དུའོ། །བཅོམ་ལྡན་
འདས་ཀྱིས་བཀའ་སྩལ་པ། རབ་འབྱོར་དེ་བཞིན་དུ་ཅི་སྟེ། བྱང་ཆུབ་སེམས་དཔའི་ཐེག་པ་པའི་གང་ཟག་དེ་དག་ལ་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་

རྫོགས་པའི་བྱང་ཆུབ་ཏུ་བརྩོན་པ་མི་གཏོང་བ་ཡོད་དུ་ཟིན་ཀྱང་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ཞིང་། ཐབས་ལ་མཁས་པ་དང་བྲལ་ན། དེའི་ཕྱིར་བྱང་ཆུབ་སེམས་དཔའ་གཞན་དག་གིས་ཀྱེ་མ་རིགས་ཀྱི་བུའམ། རིགས་ཀྱི་བུ་མོ་དེ་དག་ནི་བསམ་གཏན་གྱི་ཕ་
རོལ་ཏུ་ཕྱིན་པ་དང་། དེ་བཞིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་དང་། དེ་བཞིན་དུ་སྦྱར་ཏེ། རིགས་ཀྱི་བུའམ་རིགས་ཀྱི་བུ་མོ་དེ་དག་
ནི་རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་པར་རིག་པར་བྱ་སྟེ། བྱང་ཆུབ་སེམས་དཔའི་ཐེག་པ་པའི་གང་ཟག་དེ་དག་ནི་འདི་ལྟ་སྟེ། ཚུལ་མ་ཡིན་པས་བར་མ་དོ་ཁོ་ནར་ཉན་ཐོས་ཀྱི་སའམ། རང་སངས་རྒྱས་ཀྱི་སར་ཆོས་དེ་དག་ལས་ཉམས་པར་འགྱུར་
རོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་ལ་མཁས་པ་དང་བྲལ་བའི་ཕྱིར་རོ། །རབ་འབྱོར་དཔེར་ན་མི་ལ་ལ་ཞིག་སྐྱེས་ནས་ལོ་ཉིས་སྟོང་ལོན་ཏེ། རྒས་ཤིང་འཁོགས་ལ་གཏུགས་པ་དེ་ཉིད་དེའི་ལུས་ལ་ཡང་འདི་ལྟ་སྟེ། རླུང་ལས་
གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའམ། འདུས་པ་ལས་གྱུར་པའི་ནད་གང་ཡང་རུང་བ་ཞིག་བྱུང་ལ། དེ་ཡང་ཁྲི་དེ་ལས་ལྡང་བར་འདོད་པ་དང་། མི་སྟོབས་དང་ལྡན་པ་གཉིས་ཤིག་ལྷགས་ནས། གློ་གཡས་གཡོན་ནས་བརྟེན་
ཏེ། དེ་ལ་འདི་སྐད་དུ་ཀྱེ་སྐྱེས་བུ་ཚུར་ཤོག །ཁྱོད་གར་དགའ་བ་དང་། སེམས་གར་འདོད་པ་དང་། གར་དགའ་བར་ཁོ་བོ་ཅག་གིས་བརྟེན་པས་ཇི་སྲིད་དུ་གནས་སུ་མ་ཕྱིན་གྱི་བར་དུ་ཁྱོད་འགྱེལ་དུ་དོགས་པ་ཅུང་ཟད་ཀྱང་མི་འབྱུང་ངོ་ཞེས་ཟེར་བ་དེ་བཞིན་དུ། རབ་འབྱོར་
བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་ལ་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་བརྩོན་པ་མི་གཏོང་བ་ཡོད་ལ།

དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བ་དང་། ཐབས་ལ་མཁས་པ་དང་མ་བྲལ་བ་ཡིན་ན། དེའི་ཕྱིར་དེ་ལས་གཞན་པའི་བྱང་ཆུབ་སེམས་དཔའ་རྣམས་ཀྱིས་རིགས་ཀྱི་བུ་དེ་དག་ནི་བསམ་གཏན་གྱི་ཕ་རོལ་ཏུ་ཕྱིན་པ་དང་། དེ་བཞིན་དུ་བརྩོན་
འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་ཟིན་པ་ནས། དེ་བཞིན་དུ་སྦྱར་ཏེ། རིགས་ཀྱི་བུ་དེ་དག་ནི་རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་ཟིན་པར་
རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་བར་མ་དོ་ཁོ་ནར་ཆོས་དེ་དག་ལས་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཤེས་
རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པ་དང་མ་བྲལ་བའི་ཕྱིར་རོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའི་ཐེག་པ་པའི་གང་ཟག་ཐབས་ལ་མི་མཁས་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའི་ཐེག་པ་པའི་གང་ཟག་ཁ་ཅིག་དང་པོ་ཉིད་དུ་
ཐབས་ལ་མི་མཁས་པས་སྦྱིན་པ་དག་སྦྱིན་པར་བྱེད་དོ། །དེ་བཞིན་དུ་ཐབས་ལ་མི་མཁས་པས་ཚུལ་ཁྲིམས་སྲུང་བར་བྱེད། བཟོད་པ་སྒོམ་པར་བྱེད། བརྩོན་འགྲུས་རྩོམ་པར་བྱེད། བསམ་གཏན་ལ་མཉམ་པར་འཇོག་པར་བྱེད། ཐབས་ལ་མི་མཁས་པས་ཤེས་རབ་
སྒོམ་པར་བྱེད་ཅིང་། དེ་ནས་དེ་དག་འདི་སྙམ་དུ་སེམས་ཏེ། བདག་ཅག་ནི་སྦྱིན་པ་དག་སྦྱིན་པར་བྱེད་པའོ། །སྦྱིན་པ་ནི་འདི་དག་སྦྱིན་པར་བྱའོ། །འདི་དག་ལ་ནི་སྦྱིན་པ་དག་སྦྱིན་པར་བྱའོ། །དེ་བཞིན་དུ་བདག་ཅག་ནི་ཚུལ་ཁྲིམས་སྲུང་བའོ། །བདག་ཅག་ནི་ཚུལ་ཁྲིམས་
དང་ལྡན་པའོ། །བདག་ཅག་ནི་བཟོད་པ་སྒྲུབ་པར་བྱེད་པའོ། །བདག་ཅག་ནི་བཟོད་པ་དང་ལྡན་པའོ། །བདག་ཅག་ནི་བརྩོན་འགྲུས་རྩོམ་པའོ། །བདག་ཅག་ནི་བརྩོན་འགྲུས་དང་ལྡན་པའོ། །བདག་ཅག་ནི་བསམ་གཏན་ལ་སྙོམས་པར་འཇུག་པར་བྱེད་པའོ། །བདག་

ཅག་ནི་བསམ་གཏན་དང་ལྡན་པའོ། །བདག་ཅག་ནི་ཤེས་རབ་སྒོམ་པའོ། །བདག་ཅག་ནི་ཤེས་རབ་དང་ལྡན་པའོ་སྙམ་དུ་སེམས་ཤིང་། དེ་དག་སྦྱིན་པ་རློམ་སེམས་སུ་བྱེད། སྦྱིན་པ་དེས་རློམ་སེམས་སུ་བྱེད། སྦྱིན་པ་ལ་རློམ་སེམས་སུ་བྱེད་དོ། །དེ་བཞིན་དུ་ཚུལ་ཁྲིམས་
དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དེ་རློམ་སེམས་སུ་བྱེད། ཤེས་རབ་དེས་རློམ་སེམས་སུ་བྱེད། ཤེས་རབ་ལ་རློམ་སེམས་སུ་བྱེད་དོ། །དེ་དག་ནི་བདག་ཏུ་འཛིན་པ་དང་། བདག་གིར་འཛིན་པར་ལྟུང་བའི་སྦྱིན་པ་དང་། ཚུལ་
ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་རྣམས་ཀྱིས་འཁོར་བ་ཉིད་རྣམ་པར་འཕེལ་བར་བྱེད་དོ། །དེ་དག་ནི་སྐྱེ་བ་ལ་སོགས་པའི་སྡུག་བསྔལ་དག་ལས་ཡོངས་སུ་མི་འགྲོལ་ལོ། །དེ་ཅིའི་ཕྱིར་ཞེ་ན། རབ་འབྱོར་
འདི་ལྟར་སྦྱིན་པའི་ཕ་རོལ་ཏུ་ཕྱིན་པ་ལ་ནི་རྣམ་པར་རྟོག་པ་དེ་དག་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། སྦྱིན་པའི་ཕ་རོལ་ཏུ་ཕྱིན་པ་ནི་ཕ་རོལ་ཏུ་ཕྱིན་པ་མ་ཡིན་པའི་ཕྱིར་རོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་
འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་དེ་དག་མེད་དོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཕ་རོལ་ཏུ་ཕྱིན་པ་མ་ཡིན་པའི་ཕྱིར་རོ། །རབ་འབྱོར་གང་གི་ཚེ་བྱང་
ཆུབ་སེམས་དཔའི་ཐེག་པ་པའི་གང་ཟག་དག་སྦྱིན་པ་སྦྱིན་པར་བྱེད་པ་ན། དམིགས་པའི་ཕ་མཐའ་མི་ཤེས་ན་དེ་དག་སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་ཡིན་ནོ། །དེ་བཞིན་དུ་ཚུལ་ཁྲིམས་སྲུང་བ་དང་། བཟོད་པ་སྒོམ་པ་དང་། བརྩོན་འགྲུས་རྩོམ་པ་
དང་། བསམ་གཏན་ལ་སྙོམས་པར་འཇུག་པ་དང་། ཤེས་རབ་སྒོམ་པ་ན་དམིགས་པའི་ཕ་མཐའ་མི་ཤེས་ན། དེ་དག་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་ཡིན་ནོ། །ཕ་རོལ་ཏུ་ཕྱིན་པ་དྲུག་པོ་དེ་དག་གིས་ཡོངས་སུ་མ་ཟིན་ན། རྣམ་པ་ཐམས་ཅད་མཁྱེན་

པ་ཉིད་ཀྱིས་ཡོངས་སུ་མ་ཟིན་པ་ཡིན་ཏེ། དེ་དག་ནི་ཉན་ཐོས་ཀྱི་སའམ། རང་སངས་རྒྱས་ཀྱི་སར་ལྟུང་བར་འགྱུར་ཏེ། རབ་འབྱོར་དེ་ལྟར་ན་བྱང་ཆུབ་སེམས་དཔའི་ཐེག་པ་པའི་གང་ཟག་དག་ཐབས་ལ་མི་མཁས་པ་ཡིན་ནོ། །རབ་འབྱོར་ཇི་ལྟར་ན་བྱང་
ཆུབ་སེམས་དཔའི་ཐེག་པ་པའི་གང་ཟག་ཐབས་ལ་མཁས་པ་དག་ཡིན་ཏེ། ཉན་ཐོས་ཀྱི་སའམ། རང་སངས་རྒྱས་ཀྱི་སར་མི་ལྟུང་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀུན་ཏུ་འཛིན་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའི་ཐེག་པ་པའི་
གང་ཟག་དག་དང་པོ་ཉིད་དུ་ཐབས་ལ་མཁས་པས་བདག་ཏུ་འཛིན་པ་དང་། བདག་གིར་འཛིན་པར་མ་ལྷུང་བའི་སེམས་ཀྱིས་སྦྱིན་པ་དག་སྦྱིན་པར་བྱེད་དོ། །དེ་བཞིན་དུ་ཐབས་ལ་མཁས་པས་བདག་ཏུ་འཛིན་པ་དང་། བདག་གིར་འཛིན་པར་མ་ལྷུང་བའི་སེམས་ཀྱིས་ཤེས་
རབ་ཀྱི་བར་དུ་སྒོམ་པར་བྱེད་དོ། །སྦྱིན་པ་དེ་དག་སྦྱིན་པ་ན་འདི་སྙམ་དུ་བདག་ཅག་ནི་སྦྱིན་པ་དག་སྦྱིན་པར་བྱེད་པའོ། །སྦྱིན་པ་ནི་འདི་དག་སྦྱིན་པར་བྱའོ། །སློང་བ་འདི་དག་ལ་ནི་སྦྱིན་པར་བྱའོ། །དེ་བཞིན་དུ་བདག་ཅག་ནི་ཚུལ་ཁྲིམས་སྲུང་བར་བྱེད་པའོ། །བདག་ཅག་ནི་
ཚུལ་ཁྲིམས་དང་ལྡན་པའོ། །བདག་ཅག་ནི་བཟོད་པ་སྒྲུབ་པར་བྱེད་པའོ། །བདག་ཅག་ནི་བཟོད་པ་དང་ལྡན་པའོ། །བདག་ཅག་ནི་བརྩོན་འགྲུས་རྩོམ་པར་བྱེད་པའོ། །བདག་ཅག་ནི་བརྩོན་འགྲུས་དང་ལྡན་པའོ། །བདག་ཅག་ནི་བསམ་གཏན་ལ་མཉམ་པར་
འཇོག་པར་བྱེད་པའོ། །བདག་ཅག་ནི་བསམ་གཏན་དང་ལྡན་པའོ། །བདག་ཅག་ནི་ཤེས་རབ་སྒོམ་པར་བྱེད་པའོ། །བདག་ཅག་ནི་ཤེས་རབ་དང་ལྡན་པའོ་སྙམ་དུ་མི་སེམས་ཏེ། དེ་དག་ནི་སྦྱིན་པ་དེ་ལ་རློམ་སེམས་སུ་མི་བྱེད། སྦྱིན་པ་དེས་རློམ་སེམས་སུ་མི་བྱེད།
སྦྱིན་པས་རློམ་སེམས་སུ་མི་བྱེད། སྦྱིན་པ་ལ་རློམ་སེམས་སུ་མི་བྱེད་དོ། །དེ་བཞིན་དུ་ཚུལ་ཁྲིམས་དེ་དང་། བཟོད་པ་དེ་དང་། བརྩོན་འགྲུས་དེ་དང་། བསམ་གཏན་དེ་དག་དང་། ཤེས་རབ་དེ་ལ་རློམ་སེམས་སུ་མི་བྱེད། ཤེས་རབ་དེས་རློམ་སེམས་སུ་མི་བྱེད།

ཤེས་རབ་ཀྱིས་རློམ་སེམས་སུ་མི་བྱེད། ཤེས་རབ་ལ་རློམ་སེམས་སུ་མི་བྱེད་དོ། །དེ་ཅིའི་ཕྱིར་ཞེ་ན། རབ་འབྱོར་སྦྱིན་པའི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་དེ་དག་མེད་དེ། དེས་ན་རློམ་སེམས་སུ་མི་བྱེད་པའི་ཕྱིར་རོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་
རྣམ་པར་རྟོག་པ་དེ་དག་མེད་དེ། དེས་ན་རློམ་སེམས་སུ་མི་བྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་འདི་ནི་ཕ་རོལ་ཏུ་ཕྱིན་པ་མ་ཡིན་པའི་ཕྱིར་རོ། །དེ་བཞིན་དུ་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་འདི་ནི་ཕ་རོལ་ཏུ་ཕྱིན་པ་
མ་ཡིན་པའི་ཕྱིར་རོ། །དེ་ལྟར་ན་དེ་དག་གིས་ཕ་རོལ་ཏུ་ཕྱིན་པ་མ་ཡིན་པ་མངོན་པར་ཤེས་པ་དང་། དེ་དག་སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་ཟིན་པ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡང་དེ་བཞིན་ཏེ། ཕ་རོལ་ཏུ་ཕྱིན་པ་དྲུག་པོ་དེ་དག་གིས་ལེགས་པར་
ཡོངས་སུ་ཟིན་པའི་ཕྱིར། རྣམ་པ་ཐམས་ཅད་མཁྱེན་པ་ཉིད་ལེགས་པར་ཡོངས་སུ་ཟིན་པ་ཡིན་ནོ། །ལེགས་པར་ཡོངས་སུ་ཟིན་པའི་ཕྱིར་ཉན་ཐོས་ཀྱི་སའམ། རང་སངས་རྒྱས་ཀྱི་སར་མི་ལྟུང་བར་རྣམ་པ་ཐམས་ཅད་མཁྱེན་པ་ཉིད་ཀྱང་ཐོབ་པར་འགྱུར་རོ། །རབ་འབྱོར་
དེ་ལྟར་ན་བྱང་ཆུབ་སེམས་དཔའི་ཐེག་པ་པའི་གང་ཟག་ཐབས་ལ་མཁས་པ་ཡིན་ཏེ། ཉན་ཐོས་ཀྱི་སའམ། རང་སངས་རྒྱས་ཀྱི་སར་མི་ལྟུང་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཀུན་ཏུ་འཛིན་པ་ཡིན་ནོ། །གསོལ་པ། བཙུན་པ་བཅོམ་ལྡན་
འདས་བྱང་ཆུབ་སེམས་དཔའ་སེམས་དཔའ་ཆེན་པོ་ལས་དང་པོ་པས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བགྱི་ལགས། ཇི་ལྟར་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་
ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་ལ་ཇི་ལྟར་བསླབ་པར་བགྱི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ལ་བྱང་ཆུབ་སེམས་དཔའ་ལས་དང་པོ་པ་

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པར་འདོད་པ་དང་། དེ་བཞིན་དུ་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་
ཕ་རོལ་ཏུ་ཕྱིན་པ་ལ་སློབ་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་བྱེད་པ་དང་། དེ་བཞིན་དུ་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་
པའི་ཕ་རོལ་ཏུ་ཕྱིན་པ་སྟོན་པར་བྱེད་པའི་དགེ་བའི་བཤེས་གཉེན་དག་བསྟེན་པར་བྱ་ཞིང་བསྙེན་བཀུར་བྱའོ། །དེ་དག་ནི་བྱང་ཆུབ་སེམས་དཔའ་དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སྟོན་པར་འགྱུར་ཏེ། རིགས་ཀྱི་བུ་ཚུར་ཤོག །སེམས་ཅན་རྣམས་ལ་སྦྱིན་པ་གང་
ཅི་གཏོང་ཡང་རུང་། དེ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱོས་ལ། དེ་ཡང་མི་དམིགས་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོས་ཤིག །ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་གཟུགས་སུ་མ་རྟོག་ཤིག་དེ་
བཞིན་དུ་ཚོར་བའམ། འདུ་ཤེས་སམ། འདུ་བྱེད་རྣམས་སམ། རྣམ་པར་ཤེས་པར་མ་རྟོག་ཤིག །དེ་བཞིན་དུ་ཚུལ་ཁྲིམས་གང་ཅི་སྲུང་ཡང་རུང་། བཟོད་པ་གང་ཅི་སྒོམ་ཡང་རུང་། བརྩོན་འགྲུས་གང་ཅི་རྩོམ་ཡང་རུང་། བསམ་གཏན་གང་ཅི་ལ་སྙོམས་པར་
འཇུག་ཀྱང་རུང་། ཤེས་རབ་གང་ཅི་སྒོམ་ཡང་རུང་། དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱོས་ལ། དེ་ཡང་མི་དམིགས་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོས་ཤིག །དེ་བཞིན་དུ་ཁྱོད་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་དེ་གཟུགས་སུ་མ་རྟོག་ཤིག །དེ་བཞིན་དུ་ཚོར་བའམ། འདུ་ཤེས་སམ། འདུ་བྱེད་རྣམས་སམ། རྣམ་པར་ཤེས་པར་མ་རྟོག་ཤིག །ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་སྦྱིན་པའི་ཕ་རོལ་ཏུ་ཕྱིན་པར་མ་རྟོག་ཤིག །

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པར་མ་རྟོག་ཤིག །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་
ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་དག་ཏུ་མ་རྟོག་ཤིག །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་
བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། ལམ་དག་ཏུ་མ་རྟོག་ཤིག །མངོན་པར་ཤེས་པ་ལྔ་དང་། དེ་ལྟར་གོང་མ་བཞིན་དུ་སྦྱར་ཏེ། ཁྱོད་བླ་ན་མེད་པ་ཡང་དག་པར་
རྫོགས་པའི་སངས་རྒྱས་རྣམ་པ་ཐམས་ཅད་མཁྱེན་པ་ཉིད་དུ་མ་རྟོག་ཤིག་ཅེས་སྟོན་ཏེ། རབ་འབྱོར་བྱང་ཆུབ་སེམས་དཔའ་ལས་དང་པོ་པ་ཉིད་ཀྱིས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་པ་ལས། སྔ་ལྟས་ཀྱི་ལེའུ་ཞེས་བྱ་སྟེ།
ཉི་ཤུ་གཅིག་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅིའི་སླད་དུ། བྱང་ཆུབ་སེམས་དཔའ་ལས་དང་པོ་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པར་འཚལ་བ་དང་།
དེ་བཞིན་དུ་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་ལ་སློབ་པར་འཚལ་བས། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ཡང་དག་པར་སྟོན་པར་བགྱིད་པ་དག་དང་། དེ་བཞིན་དུ་བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་སྟོན་པ་དག་འདི་སྐད་དུ།

ཀྱེ་རིགས་ཀྱི་བུ་ཁྱོད་ཚུར་ཤོག །ཁྱོད་སེམས་ཅན་རྣམས་ལ་སྦྱིན་པ་གང་ཅི་གཏོང་ཡང་རུང་། དེ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱོས་ལ། དེ་ཡང་མི་དམིགས་པའི་ཚུལ་གྱིས། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ཡོངས་སུ་སྔོས་ཤིག །ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་སྦྱིན་པའི་ཕ་རོལ་ཏུ་ཕྱིན་པ་ལས་རྟོག་པར་མ་བྱེད་ཅིག །ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་
ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལས་རྟོག་པར་མ་བྱེད་ཅིག །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ནང་སྟོང་པ་ཉིད་དང་། ཕྱི་སྟོང་པ་ཉིད་དང་།
ཕྱི་ནང་སྟོང་པ་ཉིད་ནས། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་ལས་རྟོག་པར་མ་བྱེད་ཅིག །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། དབང་
པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། ལམ་ལས་རྟོག་པར་མ་བྱེད་ཅིག །དེ་ལྟར་གོང་མ་བཞིན་དུ་སྦྱར་ཏེ། ཁྱོད་རྣམ་པ་ཐམས་ཅད་མཁྱེན་པ་ཉིད་ཀྱི་བར་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་རྟོག་ཅིག །ཅེས་སྟོན་
པའི་དགེ་བའི་བཤེས་གཉེན་དག་བསྟེན་པར་བགྱི་ཞིང་བསྙེན་པར་བགྱི་བ་དང་། བསྙེན་བཀུར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ལྟར་གཟུགས་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །
དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་ལས་མི་རྟོག་ཅིང་རྣམ་པར་ཤེས་པ་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །དེ་བཞིན་དུ་སྦྱིན་པའི་ཕ་རོལ་ཏུ་ཕྱིན་པ་ལས་མི་རྟོག་ཅིང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་

པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །དེ་བཞིན་དུ་ནང་སྟོང་པ་ཉིད་
དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་ནས། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །དེ་བཞིན་དུ་དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་བ་རྣམས་དང་།
རྫུ་འཕྲུལ་གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། འཕགས་པའི་ལམ་ཡན་ལག་བརྒྱད་པ་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །དེ་བཞིན་དུ་སྦྱར་ཏེ། སངས་
རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་ལས་མི་རྟོག་ན། རྣམ་པ་ཐམས་ཅད་མཁྱེན་པ་ཉིད་དེ་རྗེས་སུ་ཐོབ་པར་འགྱུར་རོ། །རབ་འབྱོར་གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་ཡང་དག་པར་བསྟན་པ་ལ་སློབ་པར་འདོད་པའི་བྱང་ཆུབ་སེམས་
དཔའ་དེ་ལ། བྱང་ཆུབ་སེམས་དཔའ་འདི་སྐད་ཅེས་འདོམས་ཤིང་རྗེས་སུ་སྟོན་ཏེ། ཀྱེ་རིགས་ཀྱི་བུ་ཁྱོད་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་སྤྱོད་པ་ན། གཟུགས་ལ་འདོད་པ་མ་སྐྱེད་ཅིག །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་འདོད་པ་མ་སྐྱེད་ཅིག །དེ་ཅིའི་ཕྱིར་ཞེ་ན། ཀྱེ་རིགས་ཀྱི་བུ་གཟུགས་ནི་འདོད་པ་མེད་ཅིང་། འདོད་པར་བྱ་བ་མ་ཡིན་པའི་ཕྱིར་རོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དེ་བཞིན་ནོ། །དེ་བཞིན་དུ་ཀྱེ་རིགས་ཀྱི་བུ་ཁྱོད་ཤེས་
རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་སྤྱོད་པ་ན། སྦྱིན་པའི་ཕ་རོལ་ཏུ་ཕྱིན་པ་ལ་འདོད་པ་མ་སྐྱེད་ཅིག །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་

རབ་ཀྱི་ཕ་རོལ་ཏུ་ཕྱིན་པ་ལ་འདོད་པ་མ་སྐྱེད་ཅིག །ནང་སྟོང་པ་ཉིད་དང་། ཕྱི་སྟོང་པ་ཉིད་ནས། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་ལ་འདོད་པ་མ་སྐྱེད་ཅིག །དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་བ་རྣམས་དང་། རྫུ་འཕྲུལ་
གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། འཕགས་པའི་ལམ་ཡན་ལག་བརྒྱད་པ་དང་། མངོན་པར་ཤེས་པ་ལྔ་ལ་འདོད་པ་མ་སྐྱེད་ཅིག །དེ་བཞིན་གཤེགས་པའི་སྟོབས་བཅུ་ལ་འདོད་པ་མ་སྐྱེད་ཅིག །དེ་
བཞིན་དུ་སྦྱར་ཏེ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་ལ་འདོད་པ་མ་སྐྱེད་ཅིག །དེ་བཞིན་དུ་སྦྱར་ཏེ། རིགས་ཀྱི་བུ་ཁྱོད་རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་འདོད་པ་མ་སྐྱེད་ཅིག །དེ་ཅིའི་ཕྱིར་ཞེ་ན། ཀྱེ་རིགས་ཀྱི་བུ་རྣམ་པ་ཐམས་ཅད་མཁྱེན་པ་ཉིད་ནི་
འདོད་པ་མེད་པ་དང་། འདོད་པར་བྱ་བ་མ་ཡིན་པའི་ཕྱིར་རོ། །རིགས་ཀྱི་བུ་རྒྱུན་དུ་ཞུགས་པའི་འབྲས་བུ་ལ་འདོད་པ་མ་སྐྱེད་ཅིག །དེ་བཞིན་དུ་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་ལ་འདོད་
པ་མ་སྐྱེད་ཅིག །ཀྱེ་རིགས་ཀྱི་བུ་ཁྱོད་བྱང་ཆུབ་སེམས་དཔའི་སྐྱོན་མེད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འདོད་པ་མ་སྐྱེད་ཅིག །དེ་ཅིའི་ཕྱིར་ཞེ་ན། ཀྱེ་རིགས་ཀྱི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འདོད་པ་མེད་པ་དང་། འདོད་
པར་བྱ་བ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། ཀྱེ་རིགས་ཀྱི་བུ་ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་
བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་རང་གི་མཚན་ཉིད་ཀྱིས་སྟོང་པའི་ཆོས་རྣམས་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་ཞིང་། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བ་

དག་ནི་དཀའ་བ་བགྱིད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་རང་གི་མཚན་ཉིད་ཀྱིས་སྟོང་པའི་ཆོས་རྣམས་ལས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དེ་དག་ནི་དཀའ་བ་བྱེད་པ་ཡིན་ནོ། །རབ་འབྱོར་འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་སྒྱུ་མ་ལྟ་
བུ་དང་། རྨི་ལམ་ལྟ་བུར་ཤེས་ནས། འཇིག་རྟེན་རྣམས་ཀྱི་དོན་དང་། ཕན་པ་དང་། བདེ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་ཡིན་ཏེ། བདག་ཅག་ནི་འཇིག་རྟེན་རྣམས་ཀྱི་གནས་དང་། སྐྱོབ་པ་དང་། སྐྱབས་དང་།
དཔུང་གཉེན་དང་། གླིང་དང་། སྒྲོན་མ་འཛིན་པ་དང་། འོད་བྱེད་པ་དང་། དེད་དཔོན་དང་། ཡོངས་སུ་འདྲེན་པ་དང་། རྟེན་དུ་འགྱུར་བར་བྱའོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་ཡིན་ནོ། །རབ་འབྱོར་ཇི་ལྟར་ན་
བྱང་ཆུབ་སེམས་དཔའ་དག་འཇིག་རྟེན་རྣམས་ཀྱི་དོན་དུ་ཡང་དག་པར་ཞུགས་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་དག་སྦྱིན་པ་གང་གཏོང་བ་དེ་ཐམས་ཅད་སེམས་ཅན་རྣམས་ལ་སྡུག་བསྔལ་ལས་ཡོངས་སུ་ཐར་བར་བྱ་བའི་ཕྱིར་གཏོང་ངོ་། །དེ་བཞིན་དུ་ཚུལ་ཁྲིམས་
གང་སྲུང་བ་དང་། བཟོད་པ་གང་སྒྲུབ་པ་དང་། བརྩོན་འགྲུས་གང་རྩོམ་པ་དང་། བསམ་གཏན་གང་དག་ལ་སྙོམས་པར་འཇུག་པ་དང་། ཤེས་རབ་གང་སྒོམ་པ་དེ་དག་ཐམས་ཅད་སེམས་ཅན་ཐམས་ཅད་སྡུག་བསྔལ་ལས་ཡོངས་སུ་ཐར་བར་བྱ་བའི་ཕྱིར་བྱེད་དེ། རབ་
འབྱོར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ཀྱི་དོན་དུ་ཡང་དག་པར་ཞུགས་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ལ་ཕན་པར་ཡང་དག་པར་ཞུགས་པ་ཡིན་ཞེ་ན། རབ་འབྱོར་

འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བདག་ཀྱང་ཕ་རོལ་ཏུ་ཕྱིན་པ་དྲུག་ལ་སྤྱོད་ལ། སེམས་ཅན་ཐམས་ཅད་ཀྱང་ཕ་རོལ་ཏུ་ཕྱིན་པ་དྲུག་ལ་ཡང་དག་པར་འཛིན་དུ་འཇུག་ཅིང་འགོད་པར་བྱེད་དེ། རབ་འབྱོར་དེ་ལྟར་ན་བྱང་ཆུབ་སེམས་དཔའ་
སེམས་དཔའ་ཆེན་པོ་དག་འཇིག་རྟེན་རྣམས་ལ་ཕན་པར་ཡང་དག་པར་ཞུགས་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ལ་བདེ་བའི་ཕྱིར་ཡང་དག་པར་ཞུགས་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་བདག་ཀྱང་དགེ་བ་བཅུའི་ལས་ཀྱི་ལམ་དག་ལ་གནས་ལ། དེའི་འོག་ཏུ་སེམས་ཅན་གཞན་རྣམས་ཀྱང་དགེ་བ་བཅུའི་ལས་ཀྱི་ལམ་དག་ལ་འགོད་པར་བྱེད་དེ། རབ་འབྱོར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་
རྟེན་རྣམས་ལ་བདེ་བའི་ཕྱིར་ཡང་དག་པར་ཞུགས་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ཀྱི་གནས་སུ་གྱུར་པ་ཡིན་ཞེ་ན། གནས་པར་འོས་པའི་ཕྱིར་དང་། འཇིགས་པ་མེད་པའི་གྲོང་ཁྱེར་དུ་ཕྱིན་པར་བྱེད་པའི་
ཕྱིར་ཏེ། རབ་འབྱོར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ཀྱི་གནས་སུ་གྱུར་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ཀྱི་སྐྱོབ་པ་ཡིན་ཞེ་ན། རབ་འབྱོར་འདི་ལ་
བྱང་ཆུབ་སེམས་དཔའ་སེམས་དཔའ་ཆེན་པོ་དག་ངན་སོང་གསུམ་དུ་སྐྱེས་པ་དག་མཐོང་ནས། ངན་སོང་དེ་དག་ནས་སྐྱོབ་པར་བྱེད་ཅིང་། ཞི་བའི་གནས་ཀྱང་ཡང་དག་པར་འཛིན་དུ་འཇུག་ལ་འགོད་པར་བྱེད་དེ། རབ་འབྱོར་དེ་ལྟར་ན་བྱང་ཆུབ་སེམས་དཔའ་སེམས་
དཔའ་ཆེན་པོ་དག་འཇིག་རྟེན་རྣམས་ཀྱི་སྐྱོབ་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་རྣམས་ཀྱི་སྐྱབས་སུ་འོས་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་རྟེན་མེད་པའི་ཆོས་

སྟོན་ཏེ། འདི་ལྟ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། ར