Kinh tạng Tây Tạng (Kangyur Đại Học) — 013_འདུལ་བ།_པ

། ངེས་པའི་ཆོས་ཀྱི་གཏམ་ལ་སྟེ། དེ་ནི་དུགས་ཁང་གི་བྱ་བ་ཞེས་
བྱའོ། །དགེ་སློང་དུགས་ཁང་དུ་ཁྲུས་བྱ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་དུགས་ཁང་དུ་རྗེས་སུ་གནང་བ་ཡང་རྒྱགས་པའི་ཕྱིར་མ་ཡིན། དྲེགས་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན། འཁྲུལ་བའི་ཕྱིར་མ་ཡིན་གྱི་ལུས་འདི་གསོ་བའི་
ཕྱིར་རོ། །དུགས་ཁང་ལ་ཡོན་ཏན་རྣམ་པ་ལྔ་སྟེ། རྔུལ་དང་དྲི་མ་འབྱང་། པགས་པ་དང་མདངས་གསལ། པགས་པ་ལ་ནད་ཡོད་པ་རྣམས་འབྱིན། རླུང་དང་བད་ཀན་རྣམས་མེད་པར་བྱེད། དུགས་ཁང་ནི་ནད་མེད་པར་བྱེད་པའོ། །གཞན་ཡང་ཡོན་ཏན་རྣམ་པ་ལྔ་སྟེ།
རྔུལ་དང་དྲི་མ་འབྱང་། པགས་པ་དང་མདངས་གསལ། པགས་པ་ལ་ནད་ཡོད་པ་རྣམས་འབྱིན། རླུང་དང་བད་ཀན་རྣམས་མེད་པར་བྱེད། དུགས་ཁང་དུ་སྐྱོ་བ་བསྐྱེད་པར་བྱ་བའོ། །དགེ་སློང་གིས་དུགས་ཁང་དུ་ཁྲུས་བྱེད་པར་འདོད་ན་དེས་སྔར་མཁན་པོ་ལ་ཞུ་བར་བྱེད་བཀྲུ་
བའི་དུས་སུ་བཟོད་པར་བྱ། ཤེས་བཞིན་དུ་དུགས་ཁང་གི་ནང་དུ་འཇུག་པར་བྱ། སྐྱིལ་མོ་ཀྲུང་བཅས་ཏེ་འདུག་ལ་ན་བའི་འདུ་ཤེས་མངོན་དུ་གཞག་པར་བྱ། ཁྲུས་བྱ་མདུན་དུ་འདུག་ལ་མི་བདེ་བར་མི་བྱ། དྲན་པ་མངོན་དུ་བཞག་ལ་ལས་བྱ། དགེ་སློང་དག་ལས་ཀྱང་ལས་
བྱེད་པ་ཉམས་སུ་བླང་བར་བྱ། མཁན་པོ་དང་སློབ་དཔོན་ལ་མ་ཞུས་ཀྱི་བར་དུ་མཚུངས་པ་རྣམས་ལ་ལས་མི་བྱ། བྱེད་པ་ཡང་བདག་གིར་མི་བྱ། མཁན་པོ་དང་སློབ་དཔོན་དག་ཏུ་ཁོན་ཡོད་ན་དེ་དེ་དག་གི་དྲུང་དུ་མི་བསྐོར། དེ་སྟེ་ཆུ་བླུགས་པར་འདོད་ན་ཆུ་གྲང་མོ་དང་བསྲེས་ལ་ལུགས་ཤིག །

དེ་སྟེ་ཆུ་ཚ་ན་གྲོགས་ལ་ཡང་ཆུ་ཚའོ་ཞེས་སྦྲོན་ཅིག །ཤེས་བཞིན་དུ་ཁྲུས་བྱས་ལ་དུགས་ཁང་དེ་ན་ཁྲིའུ་དང་། རིལ་བ་དང་། ཉ་ཕྱིས་དང་། ཁྲུས་རས་དང་། དུགས་ཁང་གི་སྣོད་སྤྱད་གཞན་ཅི་ཡོད་ཀྱང་རུང་ལེགས་པར་བཀྲུས་ཏེ་གནས་གནས་སུ་གཞག་
པར་བྱ་བ་འདི་ནི་དུགས་ཁང་དུ་ཁྲུས་བྱེད་པའི་བྱ་བ་ཞེས་བྱའོ། །དུགས་ཁང་དུ་གནས་བརྟན་གྱི་བྱ་བ་གང་ཞེ་ན། དུགས་ཁང་དུ་དགེ་སློང་གནས་བརྟན་གྱིས་གསར་བུ་རྣམས་ལ་ཡོ་བྱད་ལ་ཞུགས་ན་བསླང་བར་མི་བྱ། དུགས་ཁང་དེར་ཆུང་ངུ་ན་ལུས་ལས་རྡུལ་བྱུང་བ་ཙམ་ཡང་བསླང་
བར་མི་བྱ། དེ་སྟེ་དེ་ན་དགེ་སློང་རྣམས་སྤྱོད་ལམ་རྣམས་མི་མཛེས་སམ། མི་བཟང་བར་འདུག་གམ། འོན་ཏེ་གཏམ་རྒྱུད་ལ་ཞུགས་ལ་དགེ་སློང་གནས་བརྟན་གྱིས་སླར་ཟློག་ཅིང་སྒོ་ཤིག །རྗེས་སུ་བསྟན་པར་བྱ། མཛེས་ཤིང་བཟང་བ་ལ་གཟུད་པར་བྱ། ཇི་ལྟ་བུ་དེར་
སྤྱད་པའི་ཆོས་བཅས་པ་དེ་ལྟ་བུར་གཟུད་པར་བྱ། དེ་དག་ཆོས་ཀྱི་གཏམ་ལ་གཟུད་པར་བྱ་བ་དེ་ནི་དུགས་ཁང་དུ་གནས་བརྟན་གྱི་བྱ་བ་ཞེས་བྱའོ། །མཁན་པོའི་བྱ་བ་གང་ཞེ་ན། མཁན་པོས་ལྷན་ཅིག་སྤྱོད་པའི་རྣམས་བསླབ་པར་བྱ། གསལ་བར་བྱ། བསྒོ་བར་བྱ།
རྗེས་སུ་བསྟན་པར་བྱ། སྡིག་པ་ལས་བཟློག་པར་བྱ། དགེ་བ་ལ་གཟུད་པར་བྱ། སྡིག་པའི་གྲོགས་པོ་ལས་བསྐལ་པར་བྱ། དགེ་བའི་བཤེས་གཉེན་ལ་གཞར་བར་བྱ། ལྷུང་བཟེད་ཀྱིས་བསྡུ་བར་བྱ། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་།
རྗེས་སུ་དྲན་པ་དང་། སླར་འདྲི་བ་དང་། ལུང་བསྒོ་བ་དང་། ཁ་ཐོན་ལ་གཞུག་པ་དང་། ཡིད་ལ་བྱེད་པ་ལ་གཞུག་པར་བྱ། ཉེས་པ་ལས་བསླང་བ་དང་། ན་ན་ནད་གཡོག་བྱ་བ་དང་། སྤོང་བ་ལ་གཞུག་པར་བྱ་བ་དང་། ནང་དུ་ཡང་དག་འཇོག་ལ་འཇུག་པ་དང་། བླ་མའི་
ཁྱད་པར་ཆུད་པར་བྱ་བ་ལ་མཚུངས་པར་སྤྱོད་དུ་གཞུག་པར་བྱ། ལྷན་ཅིག་སྤྱོད་པ་ཕྱོགས་གང་ན་མི་བདེ་བར་གནས་པ་དེ་ནས་དབྱུང་བར་བྱ་བ་དེ་ནི་མཁན་པོའི་བྱ་བ་ཞེས་བྱའོ།། །།འདུལ་བ་གཞུང་དམ་པ། བམ་པོ་ལྔ་བཅུ་རྩ་གསུམ་པ། ལྷན་ཅིག་སྤྱོད་པའི་བྱ་བ་གང་ཞེ་ན། ལྷན་

ཅིག་སྤྱོད་པས་མཁན་པོ་ལ་སྟོན་པའོ་སྙམ་དུ་འདུ་ཤེས་མངོན་དུ་གཞག་པར་བྱ། རིམ་གྲོ་བྱ། མྱུར་དུ་ལྡང་བར་བྱ། མྱུར་དུ་འགྲོ་བར་བྱ། གུས་པར་བྱ། ཞུ་བར་བྱ་སྟེ། ལྷན་ཅིག་སྤྱོད་པས་མཁན་པོ་ལ་མ་ཞུས་ཀྱི་བར་དུ་སྤྱད་འབྲིམ་པའི་ལས་མི་བྱ། གཙུག་ལག་ཁང་སྐྱོང་གི་རེས་
མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། སྔ་རེས་མི་བྱ། ཕྱད་རེས་མི་བྱ། ཟླ་རེས་མི་བྱ། ཀླུང་ལ་སྤྱོད་པར་མི་བྱ། རི་ལ་སྤྱོད་པར་མི་བྱ། དུར་ཁྲོད་དུ་སྤྱོད་པར་མི་བྱ། ལྗོངས་རྒྱུ་བར་མི་བྱ། རྐང་པ་བཀྲུ་བར་མི་བྱ། མལ་བཅའ་བར་མི་བྱ། ཆུ་
བཅུ་བར་མི་བྱ། གྲོང་དུ་འཇུག་པར་མི་བྱ། མཚམས་ཀྱི་ཕྱི་རོལ་དུ་འགྲོ་བར་མི་བྱ། མི་རིགས་པའི་གང་ཟག་ལ་གཞར་བར་མི་བྱ། དེ་ལྟ་བུའི་དྲུང་དུ་འདུག་པ་ཡང་བདག་གིར་མི་བྱ། དེ་འདྲ་བའི་དྲུང་ནས་བསྙེན་བཀུར་ཡང་བདག་གིས་བླང་བར་མི་བྱ། ལྷུང་བཟེད་ཀྱང་
བླང་བར་མི་བྱ། ཆོས་གོས་བླང་བར་མི་བྱ། ཟས་བླང་བར་མི་བྱ། སྨན་བླང་བར་མི་བྱ། ཡོ་བྱད་གཞན་གང་ཡང་རུང་བྱིན་ན་བདག་གིར་མི་བྱའོ། །དེ་ལྟ་བུ་ལ་བསྙེན་བཀུར་ཡང་མི་བྱ། ལྷུང་བཟེད་སྦྱིན་པར་མི་བྱ། ཟས་སྦྱིན་པར་མི་བྱ། སྨན་སྦྱིན་པར་མི་བྱ།
ཡོ་བྱད་གང་ཡང་རུང་སྦྱིན་པ་བདག་གིར་མི་བྱ། དེ་འདྲ་བའི་གང་ཟག་གི་དྲུང་ནས་ལུང་བསྒོ་བ་མི་བླང་། དྲན་པར་བྱ་བ་མ་ཡིན། ཡོངས་སུ་དྲི་བར་བྱ་བ་མ་ཡིན། ཡིད་ལ་བྱ་བ་མི་དྲི། དེ་ལྟ་བུ་དག་ལ་ཡང་ལུང་བསྒོ་བ་མི་སྦྱིན། དྲན་པ་མ་ཡིན། ཡོངས་སུ་དྲི་བ་
མ་ཡིན། ཡིད་ལ་བྱ་བ་ཡང་མི་བསྟན་ཏེ། བྱའོ་ཅོག་ཐམས་ཅད་ཀྱང་མཁན་པོ་ལ་མ་ཞུས་ཀྱི་བར་དུ་མི་བྱའོ། །ལས་རྣམ་པ་གསུམ་ནི་མ་གཏོགས་ཏེ། བཤང་གཅི་དང་། སོ་ཤིང་དོར་བ་དང་། མཚམས་ཀྱི་ནང་དུ་མཆོད་རྟེན་ལ་ཕྱག་བྱ་བའོ། །དེ་སྟེ་མཁན་པོའི་
ལྷུང་བཟེད་བཀྲུའམ། སྲེག་པ་ཞིག་ཏུ་གྱུར་ན་ཡང་དེ་ལ་ཅི་ནས་མཁན་པོའི་ལྷུང་བཟེད་ཀྱི་ལས་བདག་གིས་བྱའོ་སྙམ་མམ། གཞན་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པ་དེས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོའི་ཆོས་གོས་དྲུབ་པར་གྱུར་ཏམ། ཁ་བཀྲུ་བར་གྱུར་

ཏམ། ཁ་བསྒྱུར་བ་ཞིག་ཏུ་གྱུར་ན་ཡང་དེ་ལ་བདག་གིས་མཁན་པོའི་ཆོས་གོས་ཀྱི་ལས་རང་གིས་བྱའོ་སྙམ་མམ། གཞན་ལ་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱ། དེ་སྟེ་མཁན་པོ་ན་བ་ཞིག་ཏུ་གྱུར་ན་ཡང་དེ་ལ་
བདག་ཉིད་ཀྱིས་མཁན་པོ་ན་བའི་ནད་གཡོག་བྱའོ་སྙམ་མམ། གཞན་ལ་ནད་གཡོག་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱ། དེ་སྟེ་མཁན་པོ་ལ་ཐེ་ཚོམ་ཞིག་སྐྱེས་པར་གྱུར་ན། དེ་ལ་ཅི་ནས་བདག་གིས་མཁན་པོའི་ཐེ་ཚོམ་སྐྱེས་པ་
དེ་བདག་ཉིད་ཀྱིས་སླར་བསལ་ལོ་སྙམ་མམ། གཞན་མཁན་པོའི་ཐེ་ཚོམ་སེལ་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་སྡིག་པ་ལ་ལྟ་བར་གྱུར་ན་ཡང་དེ་ལ་ཅི་ནས་བདག་གིས་མཁན་པོ་སྡིག་པ་ལ་ལྟ་བར་གྱུར་པ་དེ་སླར་གཏང་
བར་བྱའོ་སྙམ་མམ། གཞན་ལ་སླར་གཏོང་བར་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་ལ་ཆད་པའི་ལས་ཤིག་མངོན་དུ་འབྱུང་ངམ་བྱུང་བར་གྱུར་ན། དེ་ལ་ཅི་ནས་བདག་གིས་མཁན་པོ་ཆད་པའི་ལས་ཀྱིས་གཅོད་པར་བྱེད་དམ་
བཅད་ཀྱང་རུང་སྟེ། དབྱུང་བར་བྱའོ་སྙམ་དུ་ལྷན་ཅིག་སྤྱོད་པས་སྤྲོ་བ་མྱུར་དུ་བསྐྱེད་པར་བྱའོ། །དེ་སྟེ་མཁན་པོ་ལ་སྤང་བའི་ལས་ཤིག་མངོན་དུ་བྱེད་པར་འགྱུར་རམ། བྱས་པར་གྱུར་ཀྱང་རུང་སྟེ། དེར་ཅི་ནས་བདག་གིས་མཁན་པོ་ལ་སྤང་བའི་ལས་ཤིག་མངོན་དུ་བྱེད་ཀྱང་རུང་
བྱས་ཀྱང་རུང་སྟེ། དབྱུང་ངོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་ལ་དགེ་འདུན་གྱི་ལྷག་མའི་ཉེས་པ་ཞིག་བྱུང་བར་གྱུར་ན། དེ་ལ་ཅི་ནས་བདག་གིས་མཁན་པོ་ལ་ཆད་པར་བྱེད་པ་བྱིན་ཅིག་པ་དང་། གཞི་ནས་བསླང་བའི་ཆད་པའམ།
ཆད་པ་བྱས་ཟིན་ནས་ཡིད་མགུ་བར་བྱ་བ་བྱིན་ཅིག་པའམ། གཞི་ནས་བསླང་སྟེ་ཡིད་མགུ་བར་བྱ་བའམ། ཡིད་མགུ་བར་སྤྱད་ནས་དབྱུང་བ་བྱིན་ཅིག་པར་ལྷན་ཅིག་གནས་པས་སྤྲོ་བ་བསྐྱེད་པར་གྱུར་ན་ནི་ལེགས། སྤྲོ་བ་མ་བསྐྱེད་ན་འདས་པ་དང་བཅས་པར་འགྱུར་རོ། །དེ་ལྟར་

ལྷན་ཅིག་སྤྱོད་པས་མཁན་པོ་ལ་བྱ་བ་ཅི་དང་ཅི་ཡོད་ཀྱང་རུང་སྤྲོ་བ་བསྐྱེད་པར་བྱ་བ་དེ་བཞིན་དུ་མཁན་པོས་ཀྱང་ལྷན་ཅིག་སྤྱོད་པ་ལ་བྱ་བ་ཅི་དང་ཅི་ཡོད་ཀྱང་རུང་སྤྲོ་བ་བསྐྱེད་པར་བྱ་སྟེ། ཞུ་བ་རྣམས་ནི་མ་གཏོགས་སོ། །ལྷན་ཅིག་སྤྱོད་པས་མཁན་པོའི་སྟན་གདིང་བར་བྱ། རྐང་
པ་བཀྲུ་བའི་ཆུ་དང་། ལྷམ་ཡང་བཤམས་ཏེ་ཕྱོགས་གཅིག་ཏུ་གཞག་པར་བྱ། རྐང་པ་བཀྲུ་བར་བྱ། བསྐུ་བར་བྱ། མལ་བྱའོ། །གཅི་བའི་སྣོད་དང་བཤང་བའི་སྣོད་བཤམས་ཏེ་གཞག་པར་བྱ། དེ་སྟེ་ལུང་ཞིག་མནོད་དགོས་པར་གྱུར་ན་ཡང་ལུང་མནོད་པར་བྱ། ཡིད་
ལ་བྱེད་པ་ཞིག་མནོད་དགོས་པར་གྱུར་ནའང་ཡིད་ལ་བྱེད་པ་མནོད་པར་བྱ། ཕྱོགས་གཅིག་ཏུ་སོང་སྟེ་འདུག་ནས་བསྒོམ་པར་བྱའོ། །ནང་པར་ལངས་ནས་གཅི་བའི་སྣོད་དང་བཤང་བའི་སྣོད་དབྱུང་བར་བྱ། མཁན་པོའི་རྐང་པ་ལ་མགོ་བོས་ཕྱག་བྱས་ཏེ། མཁན་པོ་བདེ་
བར་མཛད་དམ། བདེ་བར་བགྱིས་སམ། བདེ་བར་སྤྱད་དམ་ཞེས་དྲི་བར་བྱ། དེ་སྟེ་ན་བར་གྱུར་ན་ཡང་ན་བའི་སྨན་དང་། ནད་གཡོག་ལ་སྤྲོ་བ་བསྐྱེད་པར་བྱ། དེ་སྟེ་མི་ན་ན་ནི་བདེ་བར་ཡལ་བར་གཞག །དེ་སྟེ་དགེ་འདུན་གྱི་ཟས་ཤིག་གམ་མགྲོན་དུ་བོས་པའི་ཟས་ཀྱང་
རུང་སྟེ། དགེ་འདུན་གྱི་ཟས་ནི་མཁན་པོ་དང་དགེ་འདུན་གྱི་ཟས་མཆིས་ཀྱིས་དེང་དགེ་བ་བདེ་བར་སྤྱོད་ཅིག །དེ་སྟེ་བསོད་སྙོམས་ཀྱི་ཟས་ན་ཡང་མཁན་པོ་བསོད་སྙོམས་ལ་གཤེགས་ཀྱིས་ཆོས་ཤིག་ཅེས་བསྒོའོ། །ལྷན་ཅིག་སྤྱོད་པས་མཁན་པོ་ལ་སོ་ཤིང་དང་བདེ་བའི་ཆུ་
དང་། ལྕི་བ་དང་། ཕྱེ་མ་དབུལ་བར་བྱ། ནམ་མཁན་པོས་ལས་དེ་རྣམས་ཟིན་པ་དེ་ན་ལྷུང་བཟེད་དང་ཆོས་གོས་བསྟབ་པར་བྱ། དེ་སྟེ་དགེ་འདུན་དང་ལྷན་ཅིག་བསོད་སྙོམས་ལ་འཇུག་ན་ནི་མཁན་པོ་མདུན་དུ་བཏང་ལ་བདག་གིས་གྲལ་གང་དུ་བབ་པ་ནས་འགྲོ་བར་བྱ། དེ་སྟེ་གང་
ཟག་གི་བསོད་སྙོམས་ལ་འཇུག་ན་ནི་མཁན་པོའི་སྦྱར་མ་དང་ལྷུང་བཟེད་དང་ཁར་གསིལ་དབུལ་བར་བྱ། དེ་སྟེ་རླུང་དང་ཆར་པ་དང་དུས་གྲང་བ་ཞིག་ཏུ་གྱུར་ན་མཁན་པོའི་སྦྱར་མ་འོག་ཏུ་ཆུག་ལ་བདག་གི་སྟེང་དུ་ཕྱུང་ཤིག །དེ་སྟེ་ཡུལ་དྲོ་ན་བདག་གི་སྦྱར་མ་འོག་ཏུ་ཆུག་ལ་མཁན་པོའི་སྟེང་དུ་

ཕྱུང་ཤིག །ལྷན་ཅིག་སྤྱོད་པ་མཁན་པོའི་མདུན་དུ་སོང་ལ་ཟིལ་པ་ལ་སོགས་པ་བསལ་བར་བྱ། དེ་སྟེ་ཆུ་འགྲམ་མམ་གང་གཡང་ས་ཞིག་ན་མཁན་པོའི་ལག་པ་ནས་བཟུང་ཞིང་བརྟེན་པར་བྱ། དོང་ནས་གྲོང་འདབ་ཏུ་ཕྱིན་ན་སྦྱར་མ་དང་ལྷུང་བཟེད་དང་ཁར་གསིལ་དབུལ་
བར་བྱ། ཕུལ་ཏེ་མཁན་པོའི་མདུན་དུ་བཏང་ལ་གྲོང་གི་ནང་དུ་འཇུག་པར་བྱའོ། །དེ་སྟེ་སྐས་སམ། ཐེམ་སྐས་ཤིག་འཛེག་ན་ཡང་ལྷན་ཅིག་སྤྱོད་པ་སྔོན་དུ་འཛེགས་ལ་ལག་ནས་དྲང་བར་བྱ། དེ་ན་ཆོས་བཞིན་གྱི་རྙེད་པ་ཞིག་གྲུབ་ན་ཡང་བདག་གིས་བླང་བར་བྱ། བསོད་
སྙོམས་སྤྱད་དེ་སླར་གྲོང་གི་ཕྱི་རོལ་དུ་བྱུང་ན་མཁན་པོའི་སྦྱར་མ་དང་ལྷུང་བཟེད་དང་ཁར་གསིལ་བླངས་ལ་མཁན་པོའི་མདུན་དུ་བཏང་ནས་གཙུག་ལག་ཁང་དུ་འདོང་བར་བྱའོ། །དེར་ལྷགས་ནས་ལྷུང་བཟེད་དང་ཆོས་གོས་བཞག་སྟེ་མཁན་པོའི་རྐང་པ་བཀྲུ་བའི་ཆུ་དང་ལྷམ་བསྙེན་ཏེ་
བཞག་ལ་རྐང་པ་བཀྲུ་བར་བྱའོ། །དེ་ནས་དུས་ལ་བབ་པར་གྱུར་ན་མཁན་པོའི་ལྷུང་བཟེད་ཀྱི་གཞི་གདིང་ཞིང་ལྷུང་བཟེད་དབུལ་བར་བྱའོ། །བདག་གིས་ཟས་བཟང་བ་དང་ཞིམ་པ་དང་། དམ་པ་ཅི་ཡོད་པ་མཁན་པོ་ལ་དབུལ་བར་བྱ། མཁན་པོས་ཀྱང་ཚོད་རིག་
པར་བྱ། ཟས་ཀྱི་བྱ་བ་བྱས་པ་དང་། མཁན་པོ་ལ་བདེ་བའི་ཆུ་བསྙེན་པར་བྱ་ལྕི་བ་དང་ཕྱེ་མས་ལྷུང་བཟེད་བཀྲུས་ལ་ལྷུང་བཟེད་དང་ཆོས་གོས་སླར་གཞུག་པར་བྱ། མཁན་པོ་ལ་ཕྱག་བྱས་ནས་མཁན་པོ་འདི་བཞིན་བཞུགས་སམ། ཉིན་པར་སྤྱོད་པར་གཤེགས་སམ་
ཞེས་དྲི་བར་བྱ། དེ་སྟེ་ཉིན་པར་སྤྱོད་པར་འགྲོ་ན་ཡང་མཁན་པོའི་ཁྲིའུ་དང་གདིང་བ་དང་། རིལ་བ་སྤྱི་རིངས་ཁྱེར་ལ་མཁན་པོ་མདུན་དུ་བཅུག་སྟེ་ཉིན་པར་གང་ན་སྤྱོད་པར་འགྲོའོ། །སོང་ནས་མཁན་པོའི་སྟན་བཏིང་ལ་ལུང་མནོད་དགོས་ན་ཡང་ལུང་མནོད་པར་བྱ།
ཡིད་ལ་བྱེད་པ་མནོད་དགོས་ན་ཡང་ཡིད་ལ་བྱེད་པ་མནོས་ལ་ཕྱོགས་གཅིག་ཏུ་སོང་ནས་བསྒོམ་པར་བྱའོ། །དེ་ནས་དུས་ལ་བབ་ན་མཁན་པོའི་ཁྲིའུ་དང་། གདིང་བ་དང་། རིལ་བ་སྤྱི་རིངས་ཁྱེར་ཏེ། མཁན་པོ་མདུན་དུ་བྱས་ལ་འགྲོ་བར་བྱའོ། །དེ་སྟེ་གསོ་སྦྱིན་གྱི་དུས་

ལ་བབ་སྟེ། འདུ་བར་གྱུར་ན་ཡང་མཁན་པོའི་སྟན་ལྟེབས་ན་བརྐྱང་བར་བྱ། བརྐྱང་ན་ནི་ལེགས་པར་གདིང་བར་བྱ། དེ་ནས་དུས་སུ་བསྒོའམ། གཎྜཱི་བརྡུངས་ཀྱང་རུང་སྟེ། ལག་པ་གཡོན་པས་ནི་མཁན་པོའི་ལག་པ་ནས་བཟུང་། ལག་པ་གཡས་པས་ནི་མར་
མེ་ཐོགས་ཏེ་མཁན་པོ་མདུན་དུ་བྱས་ལ་གསོ་སྦྱིན་གྱི་གནས་སུ་འདོང་བར་བྱའོ། །སོ་སོར་ཐར་པའི་མདོ་བཀླགས་ཟིན་ན་མཁན་པོའི་དྲུང་དུ་སོང་ལ། མཁན་པོ་ཅི་གཤེགས་སམ། ཆོས་གསན་ཅིང་བཞུགས་ཞེས་དྲི་བར་བྱ། དེ་སྟེ་འགྲོ་ན་ལག་པ་གཡོན་པས་
མཁན་པོ་གཟུང་། ལག་པ་གཡས་པར་ནི་མར་མེ་ཐོགས་ཏེ་མཁན་པོ་མདུན་དུ་བྱས་ལ་གཙུག་ལག་ཁང་དུ་འདོང་བར་བྱའོ། །དེ་སྟེ་དུགས་ཁང་དུ་ཁྲུས་བྱེད་པ་ཞིག་ཏུ་གྱུར་ན་ནང་པར་སྔར་ལངས་ནས་མཁན་པོ་དེང་དུགས་ཁང་དུ་ཁྲུས་མཛད་ཀྱིས་ཆར་གསོལ་ཞེས་བསྒོ་བར་བྱ།
ལྷན་ཅིག་སྤྱོད་པས་མཁན་པོའི་ཕྱིར་དུགས་ཁང་དུ་སྟན་དང་ཁྲིའུ་དང་། རིལ་བ་སྤྱི་རིངས་དང་། ཁྲུས་རས་དང་དུགས་ཁང་གི་ཡོ་བྱད་གཞན་གང་ཡང་རུང་སྟེ་ཁྱེར་ཏེ་མཁན་པོ་མདུན་དུ་བྱས་ནས་དུགས་ཁང་དུ་འདོང་བར་བྱ། འོངས་ནས་ཀྱང་ཆོས་གོས་ཕྱོགས་གཅིག་ཏུ་
བཞག་ལ་མཁན་པོ་ལས་མི་ཉེ་མི་རིང་བར་འདུག་པར་བྱ། ནམ་མཁན་པོ་རྔུལ་བར་གྱུར་ན་དེ་ན་ལྷན་ཅིག་སྤྱོད་པ་དེས་དེ་ལ་རིམ་བཞིན་རྗེས་སུ་ལས་རྣམས་བྱ་སྟེ་བཀྲུ་བར་བྱའོ། །བཀྲུས་ནས་མདུན་དུ་བཅུག་སྟེ། གཙུག་ལག་ཁང་དུ་བསྐྱལ་བར་བྱ། དེའི་འོག་ཏུ་བདག་
ཉིད་བཀྲུ་བར་བྱ། དེ་སྟེ་ལྷན་ཅིག་སྤྱོད་པ་དེ་མཁན་པོའི་དྲུང་ནས་དགེ་བའི་ཆོས་མི་འཕེལ་བར་གྱུར་ན་མཁན་པོ་ལ་བདག་དགེ་སློང་མིང་འདི་ཞེས་བགྱི་བ་འདི་ལ་གཏད་དུ་གསོལ་ཞེས་སྨྲོས་ཤིག །མཁན་པོས་ཀྱང་དགེ་སློང་དེ་ལ་དགེ་སློང་འདི་ཅི་འདྲ། དེའི་རྗེས་སུ་
འབྲང་བ་དང་དྲུང་ན་འདུག་པ་ཅི་འདྲ། འདིའི་ལུང་རྣམས་སྟོན་ཏམ། དེ་སྟེ་མི་སྟོན། རྗེས་སུ་སྟོན་ཏམ། དེ་སྟེ་མི་སྟོན་པ་བརྟག་པར་བྱ། དཔྱད་པར་བྱ། དེ་བཞིན་དུ་བརྟགས་དཔྱད་ནས་དེ་སྟེ་རུང་བ་ཞིག་ཏུ་གྱུར་ན། དེ་ལ་གཏད་པར་བྱ། དེ་སྟེ་རུང་བ་མ་ཡིན་ན་གཞན་ལ་

གཏད་པར་བྱའོ། །དེ་སྟེ་མཁན་པོ་ཉིད་རུང་བ་མ་ཡིན་ལ་ཚུལ་དང་མི་ལྡན་ན་མ་ཞུས་པར་སོང་ཡང་བླ་སྟེ། འདི་ནི་ལྷན་ཅིག་སྤྱོད་པའི་བྱ་བ་ཞེས་བྱའོ། །སློབ་དཔོན་གྱི་བྱ་བ་གང་ཞེ་ན། སློབ་དཔོན་གྱིས་ཉེ་གཡོག་རྣམས་ཤེས་པར་བྱ་བ་ནས་སྔ་མ་བཞིན་
ཏེ། ཕྱོགས་གང་ན་ཉེ་གཡོག་དེ་ཉོན་མོངས་ཤིང་འདུག་པ་ཞིག་ཏུ་གྱུར་ན་ཕྱོགས་དེ་ནས་དགུག་པར་བྱ། དགུག་ཏུ་གཞུག་པར་བྱ་སྟེ། འདི་ནི་སློབ་དཔོན་གྱི་བྱ་བ་ཞེས་བྱའོ། །ཉེ་གཡོག་གི་བྱ་བ་གང་ཞེ་ན། ཉེ་གཡོག་གིས་སློབ་དཔོན་ལ་སྟོན་པའོ་སྙམ་དུ་འདུ་ཤེས་
མངོན་དུ་བཞག་ལ་རིམ་གྲོ་བྱ་བ་ནས། སྔ་མ་བཞིན་མ་ཞུས་ཀྱང་འགྲོ་བར་བྱ་བའི་བར་དུ་སྟེ། དེ་ནི་ཉེ་གཡོག་གི་བྱ་བ་ཞེས་བྱའོ། །དགེ་ཚུལ་གྱི་བྱ་བ་གང་ཞེ་ན། དགེ་ཚུལ་གྱིས་མཁན་པོ་དང་སློབ་དཔོན་ལ་སྟོན་པའོ་སྙམ་དུ་འདུ་ཤེས་མངོན་དུ་བཞག་ལ་རིམ་གྲོ་བྱ་བ་ནས་
སྔ་མ་བཞིན་ནོ། །དེ་སྟེ་མཁན་པོའམ། སློབ་དཔོན་སྡིག་པ་ལྟ་བར་གྱུར་ན་རང་གིས་སླར་གཏང་བར་བྱ། ཡང་ན་གཏོང་དུ་འཇུག་པར་བྱ་སྟེ། དེ་ལྟར་སྤྲོ་བ་སྐྱེས་ན་ནི་དེ་བཞིན་ལེགས། མ་སྐྱེས་ན་འདས་པ་དང་བཅས་པར་འགྱུར་རོ། །དེར་ཡང་དགེ་ཚུལ་ཕས་ཇི་ལྟར་
མཁན་པོ་དང་། སློབ་དཔོན་ལ་བྱུང་ཞིང་གྱུར་པའི་རྣམས་ཇི་ལྟར་གྱིས་ཤིག་ཅེས་སྤྲོ་བ་བསྐྱེད་པར་བྱ་བ་དེ་བཞིན་དུ་མཁན་པོ་དང་། སློབ་དཔོན་གྱིས་ཀྱང་དགེ་ཚུལ་ཕ་ལ་བྱུང་ཞིང་གྱུར་པའི་རྣམས་ཇི་ལྟར་བྱ་ཞེས་སྤྲོ་བ་བསྐྱེད་པར་བྱའོ། །དེ་ལ་ཞུ་བ་རྣམས་ནི་མ་གཏོགས་སོ། །
དགེ་ཚུལ་ཕས་མཁན་པོ་དང་། སློབ་དཔོན་གྱི་སྟན་གདིང་བ་ལ་སོགས་པ་བྱ་བ་སྔ་མ་བཞིན་ཏེ་བདག་ཉིད་ཐ་མར་བཀྲུ་བར་བྱ་བའི་བར་དུའོ། །འདི་ལྟར་དགེ་ཚུལ་ཕས་རྩྭ་སྔོན་པོ་མེད་པར་བྱ། མེ་ཏོག་རྣམས་བཏོག །འབྲས་བུ་རྣམས་བཏོག །སོ་ཤིང་རྣམས་སྦྱིན། ལྷུང་
བཟེད་ཀྱི་གཞི་ལོ་མ་རྣམས་སྦྱིན། རུང་བར་བྱ། དགེ་སློང་རྣམས་ལ་བྱིན་ལེན་དུ་གཞུག་པར་བྱ། མཛེས་པ་དང་། བག་ཡོད་པར་བསྒྲུབ་པར་བྱ། དེ་སྟེ་དགེ་ཚུལ་ཕ་དེ་མཁན་པོ་དང་སློབ་དཔོན་གྱི་དྲུང་ནས་དགེ་བའི་ཆོས་འཕེལ་བར་མི་འགྱུར་བ་ནས། སྔ་མ་བཞིན་མ་ཞུས་ཀྱང་སོང་

ཡང་བླ་བའི་བར་དུ་སྟེ། འདི་ནི་དགེ་ཚུལ་ཕའི་བྱ་བ་ཞེས་བྱའོ། །ནན་ཏན་དུ་བྱ་བ་གང་ཞེ་ན། དེ་སྟེ་དགེ་འདུན་གྱི་ཀུན་དགའ་ར་བར་གནོད་པ་ཞིག་བྱུང་ན་དེར་དགེ་སློང་གིས་ཇི་ལྟར་དེ་མི་ཤོར་ཞིང་ཟིན་པར་བྱ། དེ་སྟེ་རྣམ་གྲངས་གང་གིས་ཀྱང་ཟིན་པར་མ་གྱུར་ན་གཞན་དག་ལ་ནི་བབ་བབ་ཏུ་སྨྲ་བར་མི་
བྱའི། ཐོག་མར་རྒྱལ་པོའི་གནང་བ་རྣམས་ལ་བསྒོ་བར་བྱ། དེའི་འོག་ཏུ་བཙུན་མོ་དང་། གཞོན་ནུ་དང་། བློན་པོ་དང་། དེད་དཔོན་དང་། ཞང་བློན་དང་། ཞབས་འབྲིང་བ་རྣམས་ལ་བསྒོ་བར་བྱ། དེ་ལ་ནན་ཏན་དུ་བྱ་བ་ནི་ཇི་ནས་ཚིག་གིས་བསྟན་པ་ཙམ་གྱིས་ཐར་པར་འགྱུར་
གྱིས་དེ་ལ་གསང་བའི་ལས་རྣམས་མི་འབྱུང་བར་བྱ་སྟེ། དེ་ནི་ནན་ཏན་དུ་བྱ་བ་ཞེས་བྱའོ། །ཕྱི་བཞིན་འབྲང་བའི་དགེ་སྦྱོང་གི་བྱ་བ་གང་ཞེ་ན། ཕྱི་བཞིན་འབྲང་བའི་དགེ་སྦྱོང་གིས་སྔ་ན་མོའི་དགེ་སྦྱོང་ལས་རིང་ནས་ཀྱང་མ་ཡིན། ཤིན་ཏུ་བསྙེན་དེ་ཡང་མ་ཡིན། ཕྲག་པ་སྦྱར་
ཞིང་ཡང་མི་འགྲོ་བར་བྱ། ཁྱིམ་གྱི་ནང་དུ་འཇུག་ན་ཡང་གཏམ་གློ་བུར་དུ་དེ་ལ་མི་བྱ། ཕྱི་ནས་སྨྲ་བར་བྱ། དེས་བསྒོ་བ་རྣམས་བྱ། བཀུར་སྟིར་བྱ། བདག་དམན་པར་བྱ། འཇིགས་པ་དང་དབང་དུ་འགྱུར་བར་བྱ། དགེ་སྦྱོང་སྔ་ན་པོ་ཆོས་མ་ཡིན་པ་ཞིག་སྨྲ་ན་སླར་དགག་
པར་བྱ། ཆོས་བཞིན་དུ་སྨྲ་ན་རྗེས་སུ་ཡི་རང་བར་བྱ། དེ་ལ་ཆོས་བཞིན་པའི་རྙེད་པ་ཞིག་བྱུང་ན་བླང་བར་བྱ་སྟེ་འདི་ནི་ཕྱི་བཞིན་འབྲང་བའི་དགེ་སྦྱོང་གི་བྱ་བ་ཞེས་བྱའོ། །གྲོང་དུ་ཉེ་བར་འགྲོ་བའི་བྱ་བ་གང་ཞེ་ན། རིགས་སུ་སྟོན་པའི་དགེ་སློང་གིས་དྲེགས་པར་མི་བྱ།
ང་རྒྱལ་མི་བསྐྱེད། མི་བརྟན་པར་མི་བྱ། བྱུང་རྒྱལ་དུ་མི་སྨྲ། མི་གཙིགས་པར་མི་བྱ། ཡང་དག་པར་ཤེས་པར་བྱ། ཉེ་བར་གཞག་པར་བྱ། སེམས་མི་གཡེང་བར་བྱ། དགའ་བར་འགྱུར་བ་དང་། སྤྱོད་ལམ་མཛེས་པར་བྱ། ཤིན་ཏུ་བསྡམ་པ་དང་། ཤིན་ཏུ་བཀབ་
པ་དང་། སྒྲ་ཆུང་བ་དང་། མིག་གཉའ་ཤིང་གང་ཙམ་ལས་མི་གཡེང་བར་བྱ། བཀུར་སྟིར་བཅས། བདག་ཉིད་དམན་པར་བཅས། འཇིགས་པ་དང་། དབང་དུ་འགྱུར་བར་བཅས། ཡིད་དམན་པ་དང་། སེམས་ཕྱགས་མ་དང་འདྲ་བར་བྱ། རྙེད་པ་དང་བཀུར་སྟི་ལ་འདོད་པར་

མི་བྱ། ཕན་པར་བྱེད་པ་དེ་ནི་གྲོང་དུ་འགྲོ་བར་བྱེད་པའི་བྱ་བ་ཞེས་བྱའོ། །གྲོང་དུ་འགྲོ་བའི་བྱ་བ་གང་ཞེ་ན། དགེ་སློང་གྲོང་དུ་འགྲོར་འདོད་ན་ཤེས་བཞིན་དུ་འགྲོ་བར་བྱ། དྲན་པ་ཉེ་བར་གཞག་པར་བྱ། སེམས་མི་གཡེང་བར་བྱ། དབང་པོ་བསྡམ་པར་
བྱ། ཡིད་མི་གཡེང་བར་བྱ། སྔ་ཕྱི་ལ་འདུ་ཤེས་པ་དང་། བླ་འོག་ལ་འདུ་ཤེས་གཞག །དགེ་སློང་དྲན་པ་ཉམས་བཞིན་དུ་གྲོང་དུ་འགྲོ་ན་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། དགེ་སློང་འཁོད་པ་རྣམས་ལ་མ་བསྒོ་བཞིན་དུ་གྲོང་དུ་དུས་མ་ཡིན་པར་
འཇུག་པ་དང་། མ་བརྟགས་པར་སྟན་ལ་འདུག་པ་དང་། རིག་པའི་སྐྱེས་པ་མེད་བཞིན་དུ་བུད་མེད་ལ་ཆོས་ཚིག་ལྔའམ་དྲུག་ལས་ལྷག་པར་སྟོན་པ་དང་། བུད་མེད་དང་ལྷན་ཅིག་གཉིས་སུ་སྐྱབས་ཡོད་པ་དབེན་པ་ན་འདུག་པར་བྱེད་པ་དང་། སྨན་དང་ནད་དུ་བཅས་
པའི་གྲོང་དུ་ནན་གྱིས་སྟན་ལ་འདུག་པར་བྱེད་པའོ། །དགེ་སློང་དྲན་པ་ཉམས་བཞིན་དུ་གྲོང་དུ་འགྲོ་ན་གཞན་ཡང་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། ཕྱི་ཕྱིར་བུད་མེད་ལ་བལྟ་བ་དང་། ལྟ་བ་ལས་ཀྱང་གཏམ་དུ་འཛེར་བ་དང་། གཏམ་ཟེར་བ་ལས་ཆགས་
པར་གྱུར་པ་དང་། ཆགས་པར་གྱུར་པ་ལས་ཚུལ་བཞིན་མི་བྱེད་པ་དང་། ཚུལ་བཞིན་ཡིད་ལ་མི་བྱེད་པས་ན་མ་དད་བཞིན་མི་ཚངས་པར་སྤྱོད་པར་འགྱུར་ཏེ། ཉེས་པ་འབྱུང་བར་འགྱུར་བའམ། ཡང་ན་བསླབ་པ་ཕུལ་ནས་སླར་བབས་པར་འགྱུར་རོ། །དྲན་པ་ཉེ་བར་
བཞག་བཞིན་དུ་གྲོང་གི་ནང་དུ་འཇུག་ན་ཉེས་པའི་དམིགས་དེ་ལྟ་བུ་འབྱུང་བར་མི་འགྱུར་ཏེ། དེ་ནི་གྲོང་དུ་འགྲོ་བའི་བྱ་བ་ཞེས་བྱའོ། །གྲོང་དུ་ཉེ་བར་སོང་བའི་བྱ་བ་གང་ཞེ་ན། གྲོང་དུ་སོང་བའི་དགེ་སློང་གིས་གཏམ་སྣ་ཚོགས་མི་སྨྲ། གཏམ་ངན་པ་མི་བྱ། ཆོས་ཀྱི་
གཏམ་སྨྲ་བར་བྱ། གཏམ་རྒྱུད་མི་ཆད་པར་བྱ། ཁྱིམ་པའི་རྣམས་ལ་ཆོས་ཀྱི་གཏམ་ཡང་དག་པར་བསྟན། བསྟབས། ཡང་དག་པར་གཟེངས་བསྟོད་པར་བྱ། རབ་ཏུ་མགུ་བར་བྱ། སྐྱབས་སུ་འགྲོ་བའི་བསླབ་པའི་གནས་འཛིན་དུ་གཞུག །དུས་ཁྲིམས་ལ་

གནས་པ་དང་། ཚངས་པར་སྤྱོད་པ་ལ་གནས་པ་དང་། སྦྱིན་པ་དང་། དུལ་བ་དང་། སྡོམ་པ་དང་། སྐྱེས་བུ་དམ་པ་བསྙེན་པའི་ཆོས་ཉན་པ་དང་། ཚུལ་བཞིན་ཡིད་ལ་བྱེད་པ་དང་། ཆོས་དང་རྗེས་སུ་མཐུན་པའི་ཆོས་ལ་ནན་ཏན་དུ་བྱེད་པ་དང་། ལམ་མ་ཡིན་པ་ལ་
ལམ་མ་ཡིན་པར་དེ་ལྟར་ཡང་དག་པར་བསྒྲག་པར་བྱ། ཡེ་ཤེས་དང་ལྟ་བ་རྣམ་པར་སྦྱང་བར་བྱ་སྟེ། དེ་ནི་གྲོང་དུ་ཉེ་བར་སོང་བའི་བྱ་བ་ཞེས་བྱའོ། །གྲོང་དུ་ཉེ་བར་སོང་བའི་གནས་བརྟན་གྱི་བྱ་བ་གང་ཞེ་ན། གྲོང་དུ་སོང་བའི་དགེ་སློང་གནས་བརྟན་གྱིས་དེ་ན་དགེ་སློང་གསར་བུ་
རྣམས་ལ་བསྒོ་བར་བྱ། རྗེས་སུ་བསྟན་པར་བྱ། ཅི་རྒྱགས་པ་དང་། དྲེགས་པ་དང་། ལུས་ལ་འཚོག་པ་དང་། རྩེད་མོ་མི་བྱེད་པར་བྱ། དགའ་བར་འགྱུར་བ་ལ་གཞུག་པར་བྱ། ཇི་ལྟར་མཚུངས་པར་སྤྱོད་པ་བཅས་པ་ལ་གཞུག་པར་བྱ། དེ་དག་གིས་ཀྱང་
དེས་ཇི་ལྟར་བསྒོ་བ་དང་། རྗེས་སུ་བསྟན་པའི་ཚིག་རྣམས་ལ་མཉན་པར་བྱ་སྟེ། དེ་གྲོང་དུ་སོང་བའི་གནས་བརྟན་གྱི་བྱ་བ་ཞེས་བྱའོ། །གཞི་ན་གནས་པའི་བྱ་བ་གང་ཞེ་ན། གཞི་ན་གནས་པའི་དགེ་སློང་གིས་མདངས་བཟང་བ་དང་། ཁྲོ་གཉེར་དང་བྲལ་བར་བྱ། དྲན་པ་
ཐོག་མར་འགྲོ་བ་དང་། ཐོག་མར་སྨྲ་བར་བྱ་སྟེ། ཚུར་སྤྱོན་བདེ་བར་བྱོན་ནམ་ཞེས་ཚིག་སྙན་པ་དང་། ཚིག་ཡིད་དུ་འོང་བ་དང་། མགུ་བར་འགྱུར་བས་སྨྲ་བར་བྱ། གློ་བུར་དུ་ལྷགས་པའི་དགེ་སློང་དག་མཐོང་ནས་མཛའ་བའི་ཚུལ་གྱིས་མདུན་དུ་བསུ་བར་བྱ། སྙན་པའི་
ཚིག་གིས་རབ་ཏུ་དགའ་བར་བྱ། བདེ་བ་ལ་རེག་པར་སྤྱོད་དམ། བདེ་བར་ལྷགས་སམ་ཞེས་དྲི་བར་བྱ། དེ་སྟེ་རྒན་པ་ཞིག་ཡིན་ན་ནི་དེ་ལ་ཕྱག་བྱས་ནས་ལྷུང་བཟེད་དང་ཆོས་གོས་བླངས་ཏེ་གཙུག་ལག་ཁང་གི་ནང་དུ་བཅུག་ལ་སྟན་ལ་གཞག་པར་བྱ། རྐང་པ་བཀྲུ་ཞིང་བླ་
མར་བྱ། སྐོམ་ན་ཆུ་གྲང་མོ་བླུད་པར་བྱ། ཇི་ལྟར་ནུས་ཤིང་མགུ་བར་འགྱུར་བའི་ཆོས་བཞིན་བསྒྱུར་བར་བྱ། ཇི་ལྟར་རིགས་པ་བཞིན་མལ་སྟན་རྣམས་ཀྱང་སྦྱིན་པར་བྱ། ཇི་སྲིད་དུ་འདུག་པ་དེ་ལ་ཕ་དང་། ཕུ་ནུ་དང་། བུ་ལྟར་འདུ་ཤེས་མངོན་དུ་གཞག་ཅིང་གཟུང་བར་བྱའོ། །

ན་ན་ཡང་གཡེལ་བར་མི་དོར་ཏེ། དེ་ནི་གཞི་ན་གནས་པའི་བྱ་བ་ཞེས་བྱའོ། །ངལ་བསོ་བའི་བྱ་བ་གང་ཞེ་ན། གློ་བུར་དུ་འོངས་པའི་དགེ་སློང་གིས་གཙུག་ལག་ཁང་དུ་འོངས་ན་དེས་གཞི་ན་གནས་པའི་དགེ་སློང་དག་ལས་མལ་སྟན་གྱི་རྣམས་བརྐམ་
ཞིང་རིངས་ཐབས་སུ་དགུག་པར་མི་བྱ། སྣང་བའི་གནས་སུ་འདུག་པར་བྱ། སྤྱོད་ལམ་བཟང་བར་བྱ། ལེགས་པར་བགོ་བར་བྱ། ལེགས་པར་བསྡམ་པར་བྱའོ། །འདི་ཡང་ངལ་བསོ་བའི་བྱ་བ་ཡིན་ཏེ། གཞི་ན་གནས་པའི་དགེ་སློང་དག་གིས་དགེ་སློང་གློ་བུར་
དུ་ལྷགས་པ་མཐོང་ན་དེ་སྟེ་ངོ་ཤེས་ན་ངལ་བསོ་བར་བྱ། ཇི་ལྟར་མཚུངས་པར་སྤྱོད་པའི་ཆོས་བཅས་པ་བཞིན་དུ་མཚུངས་པར་སྤྱད་པར་བྱ། དེ་སྟེ་ངོ་མི་ཤེས་ན་བབ་བབ་ཏུ་ངལ་བསོ་བར་མི་བྱ། དགེ་སློང་དག་ལ་ཡང་ཚེ་དང་ལྡན་པ་འདི་སུའི་ལྷན་ཅིག་སྤྱོད་པ་ཡིན། འདི་
སྤྱོད་པ་ཇི་ལྟ་བུ་ཞེས་དྲི་བར་བྱའོ། །དེ་སྟེ་དེའི་སྤྱོད་པ་དང་། སྤྱོད་ཡུལ་དང་། ཚུལ་ཁྲིམས་དང་། སྡོམ་པ་དང་། མཚུངས་པར་སྤྱོད་པའི་རྣམས་རྟོགས་ན་གདོད་ངལ་བསོ་བར་བྱའོ། །དེ་གཅིག་པུ་ལ་གཙུག་ལག་ཁང་གཏད་པར་མི་བྱ། དགེ་འདུན་གྱི་མཛོད་
དང་། བང་བ་དང་། དགེ་འདུན་གྱི་མལ་ལ་དབང་དུ་གཞུག་པར་མི་བྱ། ཤིན་ཏུ་རྟོགས་པར་བྱས་ལ་གདོད་ཡིད་གཅུགས་པར་བྱ་བ་དེ་ནི་ངལ་བསོ་བའི་བྱ་བ་ཞེས་བྱའོ། །བར་སྣང་གི་བྱ་བ་གང་ཞེ་ན། བར་སྣང་ཐམས་ཅད་ནི་མཚམས་གཅིག་པ་མ་ཡིན་ཏེ། དེར་
གནས་པ་དང་། འདི་ན་གནས་པ་ལྷན་ཅིག་ཏུ་ལས་བྱ་ཞིང་བསྐྱོ་བ་ཡང་མི་བརྩན། འདི་ན་གནས་པ་དང་དེ་ན་གནས་པ་དག་ལྷན་ཅིག་ཏུ་ལས་བྱས་པར་མི་འགྱུར། བསྐྱོས་པ་ཡང་མི་བརྩན་ནོ། །དགེ་སློང་སྐྱ་རེངས་མ་ཤར་བར་ཆོས་གོས་མེད་བཞིན་དུ་སྟེང་དུ་མི་འབྱུང་། དབྱར་
ཚུལ་དུ་ཞུགས་ན་ཡང་ཞག་བདུན་ནམ། ཞག་བཞི་བཅུར་བྱིན་གྱིས་མ་བརླབས་པར་ནམ་མཁའ་ལ་བྱུང་ཞིང་གནས་པར་མི་བྱའོ། །དེ་སྟེ་བྱུང་ཞིང་གནས་ན་ཆོས་གོས་དང་བྲལ་བར་འགྱུར་ལ་དབྱར་ཀྱང་ཞིག་པར་འགྱུར་ཏེ། འདི་ནི་བར་སྣང་གི་བྱ་བ་ཞེས་བྱའོ། །གཏན་པའི་བྱ་བ་གང་ཞེ་ན། གཏན་

པ་ལ་ཡོན་ཏན་ལྔ་སྟེ། ཞག་གཅིག་གིས་བྲལ་བ་མེད། ཞག་བཅུའི་འདའ་བ་མེད། ཟླ་བ་གཅིག་གིས་འདའ་བ་མེད། ཇི་སྙེད་དུ་དགོས་པའི་གོས་རྣམས་བྱིན་གྱིས་མ་བརླབས་ཀྱང་འཆང་དུ་རུང་། སྟོད་གཡོགས་དང་མཐང་གོས་ཀྱིས་ལྗོངས་རྒྱུ་བར་རུང་ངོ་། །
གཞན་ཡང་གཏན་པ་ལ་ཡོན་ཏན་རྣམ་པ་ལྔ་སྟེ། འདུས་ཤིང་ཟ་བ་མེད། ཡང་ཡང་ཟ་བ་མེད། ཕྱི་མ་ལ་མ་བསྒོ་བར་འགྲོ་བ་མེད་ཆོས་གོས་ཇི་དགོས་པ་ཚོལ་དུ་རུང་། སྟོན་ཟླ་ཐ་ཆུངས་ནས་དཔྱིད་ཟླ་ར་བའི་བར་དུ་དབྱར་ཚུལ་དུ་ཞུགས་པའི་དགེ་སློང་དགེ་འདུན་གྱི་རྙེད་
པ་མ་བགོས་ཤིང་བཞག་པ་དེ་ཡང་གཏན་པ་བཏིང་བ་རྣམས་ཀྱིས་མ་དད་ན་གཞན་ལ་མི་སྦྱིན་ནོ། །དེ་ནི་གཏན་པའི་བྱ་བ་ཞེས་བྱའོ། །ཆུ་ཚགས་ཀྱི་བྱ་བ་གང་ཞེ་ན། དགེ་སློང་ཆུ་ཚགས་མེད་ན་ལམ་དུ་ཞུགས་ཤིང་འགྲོ་བར་མི་བྱའོ། །དེ་སྟེ་ཆུ་རྒྱུན་དུ་འབབ་ལ་དེ་ཡང་རུང་བར་གྱུར་
དེ་ཆུ་གཞན་དང་མ་འདྲེས་པ་ཞིག་གམ། ཁྲོན་པ་རུང་བ་ཞིག་གམ། རྒྱང་གྲགས་ཕྱེད་ཕྱེད་དུ་གཙུག་ལག་ཁང་རྒྱུན་ཆགས་པར་ཡོད་པ་མ་གཏོགས་ཏེ་དེ་ནི་ཆུ་ཚགས་ཀྱི་བྱ་བ་ཞེས་བྱའོ། །འཆག་སའི་བྱ་བ་གང་ཞེ་ན། བཅོམ་ལྡན་འདས་ཀྱིས་འཆག་ས་རྣམ་པ་གཉིས་
རྗེས་སུ་གནང་སྟེ། བསམ་གཏན་ལ་ཞུགས་པ་དང་། ཁ་ཏོན་ལ་ཞུགས་པའོ། །བསམ་གཏན་ལ་ཞུགས་པའི་འཆག་ས་ནི་ཁྲུ་བཅོ་བརྒྱད་དོ། །ཁ་ཏོན་ལ་ཞུགས་པའི་འཆག་ས་ནི་ཁྲུ་བཅུ་གཉིས་ཏེ་དེ་ནི་འཆག་སའི་བྱ་བ་ཞེས་བྱའོ། །འཆག་པའི་བྱ་བ་གང་ཞེ་ན།
དགེ་སློང་འཆག་པར་འདོད་ན་དེས་དྲག་ཏུ་ཡང་མ་ཡིན། དལ་ནས་འཆག་པར་བྱ། ཤེས་བཞིན་དུ་འཆག་པར་བྱ། དྲན་པ་ཉེ་བར་གཞག །དབང་པོ་ནང་དུ་གཞག །ཡིད་ཕྱིར་མི་དབྱུང་བར་བྱ། རྡེག་མི་འཆོས་པར་བྱ། ཕན་ཚུན་མི་འཁྱོར་བར་བྱ། དྲང་པོར་འཆག་པར་
བྱ། དེ་སྟེ་དྲང་པོར་འཆག་མི་ནུས་ན་སྲད་བུ་བྲེ་བར་བྱ། སྲད་བུ་བྲེས་པ་ལ་སྔུ་བུ་བཅུག་ནས་དེ་ལ་འཇུ་ཞིང་འཆག་པར་བྱ་སྟེ། འདི་ནི་འཆག་པའི་བྱ་བ་ཞེས་བྱའོ། །འཕྱེན་གྱི་བྱ་བ་གང་ཞེ་ན། སྟོན་པའི་མདུན་དུ་མི་གཏང་། མཆོད་རྟེན་གྱི་དྲུང་དུ་མ་ཡིན། མཁན་པོ་དང་སློབ་

དཔོན་གྱི་དྲུང་དུ་མ་ཡིན། བླ་མའི་དྲུང་དུ་མ་ཡིན། བླ་མར་བྱ་བའི་དྲུང་དུ་མ་ཡིན། གྲོང་གི་ནང་དུ་སྐྱེ་བོའི་མདུན་དུ་མ་ཡིན། ཕྱི་ཕྱིར་གཏང་བར་མི་བྱ། དེ་སྟེ་ཡང་ཕྱི་ཕྱིར་གཏོང་བ་ཞིག་ཏུ་གྱུར་ན་གནས་གུད་དུ་སོང་ལ་གཏང་བར་བྱའི། དེའི་རྐྱེན་གྱིས་གཞན་
ལ་མི་བདེ་བར་འགྱུར་བར་མི་བྱ་སྟེ། འདི་ནི་འཕྱེན་གྱི་བྱ་བ་ཞེས་བྱའོ། །གཞར་བའི་བྱ་བ་གང་ཞེ་ན། དགེ་སློང་གཞར་འདོད་ན་རྣོ་བའི་ཡོ་བྱད་ཀྱིས་གཞར་བར་མི་བྱ། རྩྭ་བསྡུས་པས་མི་བྱ། ལོ་མའམ། ར་དའམ། འཇམ་པ་གཞན་གྱིས་གཞར་བར་བྱ་སྟེ། དེ་ནི་
གཞར་བའི་བྱ་བ་ཞེས་བྱའོ། །བཤང་བའི་བྱ་བ་གང་ཞེ་ན། དགེ་སློང་གིས་བབ་བབ་ཏུ་བཤང་བར་མི་བྱ། རྩིག་པའི་དྲུང་དུ་མ་ཡིན། ཤིང་གི་དྲུང་དུ་མ་ཡིན། ཤེས་བཞིན་དུ་ཕྱོགས་གཅིག་ཏུ་བཤང་བར་བྱའོ། །དེ་སྟེ་ཕྱི་ཕྱིར་བཤང་བ་ཞིག་ཏུ་གྱུར་ན་བཤང་བའི་
གྱོ་མོ་དྲུང་དུ་གཞག་པར་བྱ། ཡང་ན་ཁུང་བུ་བརྐོ་བར་བྱ་སྟེ། འདི་ནི་བཤང་བའི་བྱ་བ་ཞེས་བྱའོ། །བཤང་སའི་བྱ་བ་གང་ཞེ་ན། དགེ་སློང་བཤང་སར་འགྲོ་བར་འདོད་པས་སྔ་ན་འདུག་པས་ཚོར་བར་བྱ་བའི་ཕྱིར་སེ་གོལ་གཏོགས་པར་བྱ། སྔོན་དུ་ཞུགས་པས་ལུད་པ་
དབྱུང་བར་བྱ། ཤེས་བཞིན་དུ་ནང་དུ་འགྲོ་བར་བྱ། ཆོས་གོས་ལེགས་པར་བརྫེས་ནས་འདུག་པར་བྱ། བཤང་སའི་ཁུང་བུར་རྐང་རྟེན་གཉིས་ལ་ལེགས་པར་བརྟགས་ནས་དབུས་སུ་འདུག་པར་བྱ། བཤང་བ་མི་འོང་བ་ལ་ནན་གྱིས་གཟིར་བར་མི་བྱ། འོང་བ་ལའང་དགག་
པར་མི་བྱ་སྟེ། དེ་ནི་བཤང་སའི་བྱ་བ་ཞེས་བྱའོ། །བཤང་སའི་ཁུང་བུའི་བྱ་བ་གང་ཞེ་ན། དགེ་སློང་བཤང་བར་འདོད་ན་དལ་ནས་བགས་ཀྱིས་ཤེས་བཞིན་དུ་བཤང་བར་བྱ། བཤང་སའི་ཁུང་ཁ་རྣམས་སུ་གོས་ཤིང་ཆགས་པར་མི་བྱ་སྟེ། འདི་ནི་བཤང་སའི་ཁུང་བུའི་བྱ་བ་
ཞེས་བྱའོ། །བཤང་སར་གནས་བརྟན་གྱི་བྱ་བ་གང་ཞེ་ན། བཤང་སར་དགེ་སློང་གནས་བརྟན་གྱིས་གསར་བུ་འདུག་པ་སླར་བསླང་བར་མི་བྱ། བཤང་སར་འདུག་པ་ལས་སླར་བསླང་བར་མི་བྱ་བ་ནི་ཆུང་ངུ་བཤང་སའི་ནང་དུ་ཞུགས་པ་ལས་སླར་བཟློག་པར་མི་བྱ་སྟེ། དེ་ནི་བཤང་

སར་གནས་བརྟན་གྱི་བྱ་བ་ཞེས་བྱའོ། །བཤང་སའི་ཁོར་ཡུག་གི་བྱ་བ་གང་ཞེ་ན། དགེ་སློང་བཤང་སའི་ཉེ་འཁོར་ན་འགྲེང་བར་མི་བྱ། འདུག་པར་མི་བྱ། འཆག་པར་མི་བྱ། ལུང་བསྒོ་བར་མི་བྱ། ལུང་ནོད་པར་མི་བྱ། དྲན་པར་མི་བྱ། སླར་འདྲི་བར་མི་བྱ།
རྣལ་འབྱོར་དང་ཡིད་ལ་བྱེད་པ་མི་བྱ། གཏམ་ལ་ཞུགས་ཤིང་མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། སོ་ཤིང་འཆའ་བར་མི་བྱ། ལག་པ་དང་རྐང་པ་བཀྲུ་བར་མི་བྱ། བྱའོ་ཅོག་ཐམས་ཅད་ཀྱང་བཤང་སའི་ཕྱོགས་ཀུན་ཏུ་མི་བྱའོ། །བཤང་
སའི་གནས་སུ་ངེས་པར་བྱ་བའི་རྣམས་ནི་མ་གཏོགས་ཏེ། འདི་ནི་བཤང་སའི་ཉེ་འཁོར་གྱི་བྱ་བ་ཞེས་བྱའོ། །གཅི་བའི་བྱ་བ་གང་ཞེ་ན། དགེ་སློང་གིས་བབ་བབ་ཏུ་གཅི་བར་མི་བྱ། རྩིག་དྲུང་དུ་གཅི་བར་མི་བྱ། ཤིང་དྲུང་དུ་གཅི་བར་མི་བྱ། ཤེས་བཞིན་དུ་ཕྱོགས་
གཅིག་ཏུ་གཅི་བར་བྱའོ། །དེ་སྟེ་གཅིན་སྙི་བར་གྱུར་ན་གཅིན་སྣོད་གྱོ་མོ་གཏད་པར་བྱ། ཡང་ན་ཁུང་བུ་བརྐོ་བར་བྱ་སྟེ། འདི་ནི་གཅི་བའི་བྱ་བ་ཞེས་བྱའོ། །གཅི་བའི་སའི་བྱ་བ་གང་ཞེ་ན། དགེ་སློང་གཅི་སར་འཇུག་པར་འདོད་ན་དེས་སྔ་ན་འདུག་པས་ཚོར་བར་བྱ་བའི་ཕྱིར་
སེ་གོལ་གཏོགས་ནས་སྔ་མ་བཞིན་ཏེ། མི་བྲོ་བ་ལ་ནི་མི་གཟིར། བྲོ་བ་ལ་ནི་མི་དགག་པའི་བར་དུ་སྟེ། འདི་ནི་གཅི་བའི་སའི་བྱ་བ་ཞེས་བྱའོ། །གཅི་བའི་ཁུང་གི་བྱ་བ་གང་ཞེ་ན། དགེ་སློང་གིས་གཅི་སའི་ཁུང་ཁར་བགས་ཀྱིས་ཤེས་བཞིན་དུ་གཅི་བར་བྱ། གཅིན་
ཁུང་གི་ཁར་མི་གཏོར་བ་དང་། མི་སྦྲེས་པར་བྱ་སྟེ། དེ་ནི་གཅི་སའི་བྱ་བ་ཞེས་བྱའོ། །གཅི་སར་གནས་བརྟན་གྱི་བྱ་བ་གང་ཞེ་ན། གཅི་སར་དགེ་སློང་གནས་བརྟན་གྱིས་གཅི་སར་དགེ་སློང་གསར་བུ་གཅི་ཞིང་འདུག་པ་བསླང་བར་མི་བྱ། གཅི་སར་འདུག་པ་ལས་
མི་བསླང་བར་བྱ་བ་ནི་ཆུང་ངུ་ན་གཅི་སར་ཞུགས་པ་ཡང་བཟློག་པར་མི་བྱ་སྟེ། འདི་ནི་གཅི་སར་གནས་བརྟན་གྱི་བྱ་བ་ཞེས་བྱ་བའོ། །གཅི་སའི་ཉེ་འཁོར་གྱི་བྱ་བ་གང་ཞེ་ན། དགེ་སློང་གཅི་སའི་ཉེ་འཁོར་དུ་འགྲེང་བར་མི་བྱ་བ་ནས་སྔ་མ་བཞིན་ཏེ། གཅི་བའི་ཉེ་འཁོར་གྱི་

བྱ་བ་ནི་མ་གཏོགས་སོ་ཞེས་བྱ་བའི་བར་དུ་སྟེ། དེ་ནི་གཅི་བའི་སའི་ཉེ་འཁོར་གྱི་བྱ་བ་ཞེས་བྱའོ། །བཀྲུ་བའི་བྱ་བ་གང་ཞེ་ན། དགེ་སློང་གིས་མ་བཀྲུས་ཀྱི་བར་དུ་སྟོན་པ་ལ་ལྟར་འགྲོ་བར་མི་བྱ། མཆོད་རྟེན་ལ་མ་ཡིན། མཁན་པོ་དང་།
སློབ་དཔོན་ལ་མ་ཡིན། བླ་མ་ལ་མ་ཡིན། བླ་མར་བྱ་བ་ལ་མ་ཡིན་ཏེ། ཕྱག་མི་བྱ། ཁ་ཏོན་མི་བྱ། ལུང་མི་བསྒོ། བླང་བར་མི་བྱ། དྲན་པར་མི་བྱ། ཀུན་དྲི་བར་མི་བྱ། གྲོང་དུ་འཇུག་པར་མི་བྱ། ཟས་ལ་འདུག་པར་མི་བྱ། སྐྱོ་མ་ལ་འདུག་
པར་མི་བྱ། ཐུག་པ་ལ་འདུག་པར་མི་བྱ། འཐུང་བ་ལ་འདུག་པར་མི་བྱ། ཆོས་བཤད་པ་ལ་འདུག་པར་མི་བྱ། ཕྱོགས་བཞིའི་དགེ་འདུན་གྱི་མལ་སྟན་ལ་འདུག་པར་མི་བྱ། ན་བར་གྱུར་ན་ནི་ཉེས་པ་མེད་དེ། ཡང་ན་མིའི་ལྷ་ཆུ་ཡིན་པར་གྱུར་ཏམ། དེ་སྟེ་
ཆུ་མ་འབྱོར་ཏམ། དེ་སྟེ་བཀྲུ་བར་མི་རུང་བའི་སྨན་ཅིག་བཏང་བ་ནི་མ་གཏོགས་ཏེ། དེ་ནི་བཀྲུ་བའི་བྱ་བ་ཞེས་བྱའོ། །བཀྲུ་བའི་གནས་ཀྱི་བྱ་བ་གང་ཞེ་ན། བཀྲུ་བའི་གནས་སུ་འགྲོ་བའི་དགེ་སློང་གིས་སེ་གོལ་གཏོགས་ནས་སྔ་མ་བཞིན་བཀྲུ་བའི་གནས་ཀྱི་དབུས་
སུ་འདུག་པར་བྱ་བའི་བར་དུ་སྟེ། འདི་ནི་བཀྲུ་བའི་གནས་ཀྱི་བྱ་བ་ཞེས་བྱའོ། །བཀྲུ་བའི་གནས་སུ་རྐང་པ་བཞག་པའི་གནས་ཀྱི་བྱ་བ་གང་ཞེ་ན། ཁྲུས་བྱེད་པར་འདོད་པའི་དགེ་སློང་གིས་བཀྲུ་བའི་ཚེ་བཀྲུ་བའི་གནས་སུ་ཁ་ཆུས་མི་དགང་བ་དང་། ཆུས་མ་གཤེར་བར་བྱ་
སྟེ། འདི་ནི་བཀྲུ་བའི་གནས་ཀྱི་རྐང་པ་བཞག་པའི་གནས་ཀྱི་བྱ་བ་ཞེས་བྱའོ། །ཁྲུས་ཀྱི་སར་གནས་བརྟན་གྱི་བྱ་བ་གང་ཞེ་ན། ཁྲུས་སར་དགེ་སློང་གནས་བརྟན་གྱིས་ཁྲུས་སར་དགེ་སློང་གསར་བུ་བསླང་བར་མི་བྱ། ཁྲུས་ལ་ཞུགས་པ་ལས་མི་བསླང་བ་ནི་ཆུང་ངུ་

ན་ཁྲུས་སར་ཞུགས་པ་ལས་བཟློག་པར་མི་བྱ་སྟེ། དེ་ནི་ཁྲུས་སར་གནས་བརྟན་གྱི་བྱ་བ་ཞེས་བྱའོ། །ཁྲུས་སའི་ཉེ་འཁོར་གྱི་བྱ་བ་གང་ཞེ་ན། དགེ་སློང་གིས་ཁྲུས་སའི་ཉེ་འཁོར་དུ་འགྲེང་ཞིང་འདུག་པར་མི་བྱ་བ་ནས་སྔ་མ་བཞིན་ཁྲུས་སའི་ཉེ་འཁོར་དུ་བྱ་བའི་རྣམས་ནི་མ་

གཏོགས་པའི་བར་དུ་སྟེ། དེ་ནི་ཁྲུས་སའི་ཉེ་འཁོར་གྱི་བྱ་བ་ཞེས་བྱའོ། །མཆིལ་མའི་བྱ་བ་གང་ཞེ་ན། དེ་ནི་དགེ་སློང་གིས་སྒྲ་དང་བཅས་པར་མཆིལ་མ་དོར་བར་མི་བྱ། ལྕེ་དྲིལ་བར་སོས་མནན་པར་མི་བྱ། སྟོན་པའི་སྤྱན་སྔར་མ་ཡིན། མཆོད་རྟེན་གྱི་དྲུང་དུ་མ་
ཡིན། མཁན་པོ་དང་། སློབ་དཔོན་གྱི་དྲུང་དུ་མ་ཡིན། བླ་མའི་དྲུང་དུ་མ་ཡིན། བླ་མར་གྱུར་པའི་དྲུང་དུ་མ་ཡིན། ཟན་ཟ་བ་ན་མ་ཡིན། འཐུང་བ་ལ་མ་ཡིན། ཡོངས་སུ་ལས་བྱ་བའི་སར་མ་ཡིན། དགེ་སློང་གིས་བབ་བབ་ཏུ་མཆིལ་མ་དོར་བར་མི་བྱ།
མཆིལ་མ་དོར་ནས་ཕྱལ་བར་མི་བྱ་སྟེ། ཡང་ན་རྐང་པས་ཉེས་ཤིག །ཡང་ན་སས་ཁོབ་ཤིག །དགེ་སློང་གིས་མཆིལ་མ་ཕྱི་ཕྱིར་དོར་བར་མི་བྱའོ། །དེ་སྟེ་ཕྱི་ཕྱིར་འདོར་ན་དེའི་རྐྱེན་གྱིས་གཞན་མི་བདེ་བར་མི་འགྱུར་བའི་ཕྱིར་གནས་གཞན་དུ་འགྲོ་བར་བྱ་སྟེ། དེ་ནི་
མཆིལ་མའི་བྱ་བ་ཞེས་བྱའོ། །མཆིལ་མའི་སྣོད་ཀྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མཆིལ་མ་དོར་བའི་ཕྱིར་མཆིལ་མའི་སྣོད་རྣམ་པ་གཉིས་གནང་སྟེ། རྫ་མཁན་གྱིས་བྱས་པ་དང་། བདག་ཉིད་ཀྱིས་བྱས་པའོ། །དགེ་སློང་
གིས་མཆིལ་མའི་སྣོད་དུས་དུས་སུ་བརྟག་པར་བྱ། བསྐམ་པར་བྱ། དབེན་པར་གཞག་པར་བྱ། ཤིན་ཏུ་བཀྲུ་བར་བྱ། ཅི་ནས་དེའི་རྐྱེན་གྱིས་ཕྱི་ཕྱིར་ཚོལ་བར་མི་འགྱུར་བར་བྱ་སྟེ། དེ་ནི་མཆིལ་མའི་སྣོད་ཀྱི་བྱ་བ་ཞེས་བྱའོ། །སོ་ཤིང་གི་བྱ་བ་གང་ཞེ་ན།
དགེ་སློང་གིས་སོ་ཤིང་རིང་པོ་བཅའ་བར་མི་བྱ། ཤིན་ཏུ་ཐུང་བའང་མ་ཡིན། ཤིན་ཏུ་སྦོམ་པ་ཡང་མ་ཡིན། ཤིན་ཏུ་ཕྲ་བ་ཡང་མ་ཡིན། ཡུན་རིང་དུ་ཡང་མ་ཡིན། སྟོན་པའི་སྤྱན་སྔར་མ་ཡིན། མཆོད་རྟེན་གྱི་དྲུང་དུ་ཡང་མ་ཡིན། མཁན་པོ་དང་། སློབ་
དཔོན་གྱི་ཐད་དུ་ཡང་མ་ཡིན། བླ་མའི་ཐད་དུ་ཡང་མ་ཡིན། བླ་མར་གྱུར་པའི་དྲུང་དུ་མ་ཡིན། མེ་ཁང་དུ་མ་ཡིན། བཀད་སར་མ་ཡིན། འཆག་སར་མ་ཡིན། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན། གནས་ཁང་དུ་མ་ཡིན། རིམ་ཁང་དུ་མ་

ཡིན། སྒོ་ཁང་དུ་མ་ཡིན། བཤང་སར་མ་ཡིན། རྩིག་པའི་དྲུང་དུ་མ་ཡིན། ཤིང་དྲུང་དུ་མ་ཡིན། གཙུག་ལག་ཁང་གི་ཕྱག་དར་བྱ་བའི་ཁོར་ཡུག་ཏུ་མ་ཡིན། སྐྱེ་བོ་མང་པོ་འདུ་བ་ཐམས་ཅད་དུ་ཡང་སོ་ཤིང་འདོར་བར་མི་བྱ། དགེ་སློང་གིས་རྣམ་
པ་གསུམ་དབེན་པར་བྱ་སྟེ། བཤང་བ་དང་། གཅི་བ་དང་། སོ་ཤིང་བཅའ་བའོ། །དགེ་སློང་གིས་སོ་ཤིང་འཆོས་ནས། དེ་བཞིན་དུ་མི་དོར་གྱི་ཆུས་བཀྲུ་བར་བྱ། ཡང་ན་རྡོག་པས་མཉེ་བར་བྱ། ས་ལ་དྲུད་པར་བྱས་ཏེ། འདི་ནི་སོ་ཤིང་གི་བྱ་བ་ཞེས་བྱའོ། །
སོ་དྲུད་པའི་བྱ་བ་གང་ཞེ་ན། དགེ་སློང་གིས་སོ་ཤིང་རྣོན་པོས་དྲུད་པར་མི་བྱ། བག་མེད་པར་ནང་དུ་གཞུག་པར་མི་བྱ། དལ་ནས་བགས་ཀྱིས་ཤེས་བཞིན་དུ་དྲུད་པར་བྱ། སོ་རྙིལ་དྲུད་པར་མི་བྱ་སྟེ། འདི་ནི་སོ་དྲུད་པའི་བྱ་བ་ཞེས་བྱའོ། །ལྕེ་བཞར་བའི་བྱ་བ་གང་
ཞེ་ན། དགེ་སློང་གིས་ལྕེ་བཞར་བ་རྣོན་པོས་བཞར་བར་མི་བྱ། བག་མེད་པར་ནང་དུ་གཞུག་པར་མི་བྱ། བགས་ཀྱིས་དལ་ནས་ཤེས་བཞིན་དུ་ལྕེ་བཞར་བར་བྱ། ལྕེའི་ཤ་བཞར་བར་མི་བྱ་སྟེ། འདི་ནི་ལྕེ་བཞར་བའི་བྱ་བ་ཞེས་བྱའོ། །རྣ་སྤབས་བྲུ་བའི་བྱ་བ་
གང་ཞེ་ན། དགེ་སློང་གིས་རྩེ་མོ་རྣོན་པོས་རྣ་སྤབས་བྲུ་བར་མི་བྱ། བག་མེད་པར་ནང་དུ་གཞུག་པར་མི་བྱ། བགས་ཀྱིས་དལ་ནས་ཤེས་བཞིན་དུ་རྣ་སྤབས་བྲུ་བར་བྱ། རྣ་བའི་ཤ་བྲུ་བར་མི་བྱ་སྟེ། འདི་ནི་རྣ་སྤབས་བྲུ་བའི་བྱ་བ་ཞེས་བྱའོ། །ཀུན་སྤྱད་པ་གང་ཞེ་ན། དགེ་
སྦྱོང་གི་ཡོ་བྱད་ཐམས་ཅད་མཚུངས་པར་སྤྱོད་པ་ནི་སྤྱད་པའོ། །མི་སྤྱད་པ་གང་ཞེ་ན། དེ་ལྟར་བཟློག་པ་ནི་མི་སྤྱད་པའོ། །མ་ལྟ་བུའི་བྱ་བའི་ཕུང་པོ་ཞེས་བྱ་བའི་ཕུང་པོ་གསུམ་པ་རྫོགས་ཏེ། མ་ལྟ་བུ་རྫོགས་སོ།། །།བཙུན་པ་འདུལ་བའི་ལུས་གང་ལགས།
དམིགས་པ་གང་ལགས། བྱིན་གྱིས་བརླབས་པ་གང་ལགས། མཚན་ཉིད་གང་ལགས། གླེང་གཞི་གང་ལགས། ངོ་བོ་ཉིད་གང་ལགས། འབྲས་བུ་གང་ལགས། ཨུ་པཱ་ལི་འདུལ་བའི་ལུས་ནི་དམིགས་པའོ། །དམིགས་པ་ནི་ནན་ཏན་ནོ། །བྱིན་གྱིས་བརླབ་

པ་ནི་ལུས་དང་ངག་དང་ཡིད་དོ། །མཚན་ཉིད་ནི་ལས་སོ། །གླེང་གཞི་ནི་བསྒྲགས་པའོ། །ངོ་བོ་ཉིད་ནི་ཉེས་པའོ། །འབྲས་བུ་ནི་མཐོ་རིས་དང་ཐར་པའོ། །འདུལ་བ་གཞུང་དམ་པ་རྫོགས་ཏེ། ཨུ་པཱ་ལིས་ཀུན་དྲིས་པ་རྫོགས་སོ།། །།ཐམས་ཅད་མཁྱེན་པ་
ལ་ཕྱག་འཚལ་ལོ། །འདུལ་བ་གཞུང་ནི་དམ་པ་འདི། །འཕགས་པ་ཉེ་བ་འཁོར་གྱིས་ནི། །མ་འོངས་པ་ཡི་གང་ཟག་གི། །མ་རྟོགས་ལ་སོགས་བསལ་བའི་ཕྱིར། །གཞི་དང་རྣམ་འབྱེད་ལ་སོགས་ཀྱི། །འགྲེལ་བཤད་ངེས་པ་དོན་གྱི་ལུང་། །ཞུས་ནས་རྒྱལ་
བས་བཀའ་སྩལ་ཏོ། །དེ་དག་རྣམས་ཀྱང་གང་ཞེ་ན། །སྤྱིའི་སྡོམ་ལ། ཞུ་བ་འདུལ་བྱེད་གཅིག་ལས་འཕྲོས། །ལྔ་ཚན་བཅུ་དྲུག་ཚན་དང་ནི། །གླེང་གཞི་རྐྱང་པ་གཏམ་གྱི་གཞི། །མ་ན་པི་ཀ་མ་མོ་དང་། །ལུས་སོགས་སྟོན་པ་ཐ་མ་སྟེ། །ལེའུ་དག་ཏུ་
ཡང་དག་འདོད། །ཐོག་མར་ཞུས་པ་དེ་ཡང་ནི། །རྣམ་འབྱེད་ལྟུང་བ་སྡེ་བཞི་དང་། །རང་བྱུང་ལ་སོགས་གཞི་རྣམས་ཀྱི། །གཏན་ལ་འབེབས་པ་དག་ཏུ་འདོད། །དེ་ཉིད་དྲིས་ལན་ཞེས་ཀྱང་བསྒྲགས། །དེ་ནས་འདུལ་བྱེད་དག་ཡིན་ཏེ། །ཕམ་པ་བཞི་དང་ལྷག་
མ་ཡི། །སྨྱན་གྱི་ལྟུང་བ་ཡན་ཆད་དག །གཏན་ལ་འབེབས་པར་བྱེད་པ་ཡིན། །དེ་ནས་གཅིག་ལས་འཕྲོས་པ་སྟེ། །གཅིག་ནས་བཅུ་ཡི་བར་དུ་ཡིན། །གཅིག་ལས་འཛེགས་པ་ཞེས་ཀྱང་བསྒྲགས། །དེ་ནས་འདུལ་བ་ལྔ་ཚན་ཏེ། །ལྔ་ལྔ་སྟོན་ཕྱིར་ལྔ་ཚན་ནོ། །བཅུ་
དྲུག་སྡེ་ཚན་སྟོན་པའི་ཕྱིར། །དེ་ནས་འདུལ་བ་བཅུ་དྲུག་ཚན། །གླེང་གཞི་ལ་ནི་སྒོ་ལྔ་ལས། །དང་པོ་བཞི་ལ་སྡོམ་གྱི་ནི། །ཚིགས་བཅད་བཅུ་བཅུའོ་ལྔ་པ་ལ། །སྡོམ་གྱི་ཚིགས་བཅད་དྲུག་ཡོད་དེ། །གླེང་གཞི་དག་ལ་བརྟེན་པའི་ཕྱིར། །གླེང་གཞི་ཞེས་ནི་བཏགས་པ་ཡིན། །
བྱང་བ་སྒོ་བཞི་རེ་རེ་ཡང་། །ཚིགས་བཅད་བཅུ་བཅུའོ་དེ་ཉིད་ལ། །སིལ་བུ་ཞེས་བྱ་བསླབ་པའི་གཞི། །རིགས་མི་མཐུན་པ་ཕྲ་མོ་རྣམས། །སྟོན་ཕྱིར་དོན་དང་ལྡན་པ་ཡིན། །འདུལ་བ་གཏམ་གྱི་དངོས་པོ་ནི། །ལྡེབས་ཀྱི་ཚུལ་དུ་བྱུང་བ་སྟེ། །སྡོམ་གྱི་ཚིག་གིས་བསྡུས་

པ་མེད། །མཱུ་ལ་ཞེས་པའི་སྒྲ་ཡི་དོན། །གཞི་དང་རྩ་བ་དངོས་པོ་ལའང་། །འཇུག་ཕྱིར་གཏམ་གྱི་གཞིར་ཡང་འགྱུར། །མ་ན་པི་ཀའི་སྒོ་དང་པོ། །ཚིགས་བཅད་བཅུ་ཡིན་གཉིས་པ་ལ། །ཚིགས་བཅད་བཅུ་དང་ལྷག་ཙམ་ཡོད། །ཤིན་ཏུ་ཕྲ་ཞིང་
ཆེ་བས་ན། །བྲམ་ཟེའི་བུ་མོ་ལྟ་བུ་ཞེས། །དོན་དང་མཐུན་པའི་མཚན་ཡིན་ནོ། །འདུལ་བ་མ་མོ་ལྟ་བུ་ལ། །བསྙེན་པར་རྫོགས་པའི་ཕུང་པོ་དང་། །རབ་ཏུ་ལྡན་དང་བྱ་བ་ཡི། །ཕུང་པོ་གསུམ་དུ་ཤེས་པར་བྱ། །མ་དང་འདྲ་ཕྱིར་མ་མོའོ། །ལུས་དང་དམིགས་པ་བྱིན་
བརླབ་དང་། །མཚན་ཉིད་གླེང་གཞི་ངོ་བོ་དང་། །འབྲས་བུའི་དོན་རྣམས་ཐ་མ་སྟེ། །ཨུ་པཱ་ལི་ཡིས་ཞུས་པ་ནི། །དེ་དག་རྣམས་ཀྱིས་རྫོགས་པ་ཡིན། །མཚན་གྱི་གྲངས་ཀྱི་རིམ་པ་དང་། །མཚན་གྱི་བཤད་པ་དེ་ཡིན་པས། །དེ་ལྟར་བསྔོགས་ནས་བལྟ་བར་བྱ། །
དེ་ལྟར་ན་གཞུང་དམ་པའི་བརྗོད་བྱ་དོན་གྱི་ལུས་ནི་དེ་དག་ཉིད་ཡིན་ལ། རྗོད་བྱེད་གཞུང་གི་ལུས་ནི་ཞུ་བ་མ་རྫོགས་པ་ལ་འགྲེལ་པར། འཕགས་པ་ཉེ་བ་འཁོར་གྱིས་ཞུས་པའི་གཞུང་རྒྱ་གར་ཡུལ་པ་ཡང་ཤ་ལོ་ཀ་ཉིས་སྟོང་ཙམ་གྱི་ཚད་ཅིག་ལ་ལན་སྤྱོད་པ་ཁོ་ནའོ་
ཞེས་ཡུལ་ཁ་ཅིག་ན་ཞུ་བ་མ་རྫོགས་པ་ལ་ཤ་ལོ་ཀ་ཉིས་སྟོང་ལས་མེད་པའང་བཤད་མོད་ཀྱི། བོད་དུ་འགྱུར་བའི་ཞུ་བ་མ་རྫོགས་པ་ལ་ཤ་ལོ་ཀ་སུམ་སྟོང་དྲུག་བརྒྱ་སྟེ་བམ་པོ་བཅུ་གཉིས་དང་། ཞུ་བ་རྫོགས་པ་ལ་ཤ་ལོ་ཀ་ཁྲི་ལྔ་སྟོང་དགུ་བརྒྱ་སྟེ། བམ་པོ་ལྔ་བཅུ་
རྩ་གསུམ་ཡོད་པས་སྤྱིར་བསྡོམས་ན་ཤ་ལོ་ཀ་ཁྲི་དགུ་སྟོང་ལྔ་བརྒྱ་སྟེ། བམ་པོ་དྲུག་བཅུ་རྩ་ལྔ་ཡོད་དོ།། །།བསོད་ནམས་ཆེན་པོའི་དཔལ་གྱིས་ཕྱོགས་ལས་རྣམ་པར་རྒྱལ་བ་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དང་མཚུངས་པ་རྒྱལ་པོ་ཆེན་པོའི་བླའི་མཆོད་
གནས་བདེ་བར་གཤེགས་པའི་གཞུང་ལུགས་མང་དུ་ཐོས་པ། རིག་པ་དང་གྲོལ་བའི་སྤོབས་པ་དགེ་བ་ཅན། ལུང་དང་རིགས་པའི་དབང་ཕྱུག །གངས་ཅན་གྱི་རྒྱུད་ཀྱི་མཁས་པ་ཆེན་པོ། སྡོམ་བརྩོན་དམ་པ་ཤཱཀྱའི་དགེ་སློང་འཇམ་པའི་དབྱངས་ཀྱིས། བཀའ་འགྱུར་ལེགས་

པར་བཞེངས་པ་རྣམས་ལས་འདི་དག་ནི་མཁན་པོ་ཆེན་པོ་མཆིམས་ཀྱིས་དགེ་བའི་བཤེས་གཉེན་རྒྱ་འདུལ་བ་འཛིན་པ་ཞལ་བཞུགས་པའི་དུས་ན། དགེ་བའི་བཤེས་གཉེན་འདུལ་བ་འཛིན་པ་ཞིང་མོ་ཆེ་བ་བྱང་ཆུབ་སེང་གེས་གཉེར་མཛད་ནས། ལུང་ཕྲན་ཚེགས་ཀྱི་བམ་
པོ་བཅུ་གཉིས་མ་ཚང་བ་དང་། གཞུང་བླ་མའི་ཞུ་བ་མ་རྫོགས་པ་བམ་པོ་བཅུ་གཉིས་དང་། སྡོམ་ཚིག་ཡི་གེ་ཚར་གཉིས་མ་ཚང་བ་རྣམས་བསམ་ཡས་མཆིམས་ཕུ་ལ་སོགས་པ་དབུས་གཙང་གི་གཙུག་ལག་ཁང་རྣམས་ནས་བཙལ་ཏེ། ལ་སྟོད་འོལ་རྒོད་ཀྱི་གཙུག་
ལག་ཁང་དུ་གནས་བརྟན་དྷརྨཱ་སེང་གེས་ལུང་སྡེ་བཞི་ཚང་བར་བཞེངས་པ་སྣར་ཐང་གི་གཙུག་ལག་ཁང་དུ་གདན་དྲངས་ཏེ། དེ་ལ་དཔེ་ཕྱི་མཛད་ནས་བཞེངས་པ་དང་། གཞན་ཡང་ཆུ་མིག་རིང་མོའི་གཙུག་ལག་ཁང་དང་། རུང་ཀླུང་ཤོད་གྲོག་གི་གཙུག་ལག་ཁང་གི་འདུལ་
བ་ལུང་ལ་སོགས་པ་རྣམས་ལ་གཏུགས་ཏེ་སྔ་ཞུས་ལེགས་པར་བགྱིས་ནས་བཞེངས་པ་སངས་རྒྱས་ཀྱི་བསྟན་པའི་རྩ་བ་ལེགས་པར་གསུངས་པ་དམ་པའི་ཆོས་འདུལ་བ་ལུང་སྡེ་བཞིའོ། །དེའི་བཀའ་འགྱུར་གྱི་དཔེ་ཕྱི་རྣམ་པར་དག་པ་རྣམས། མཁས་
པའི་འབྱུང་གནས་དཔལ་སྣར་ཐང་གི་གཙུག་ལག་ཁང་ནས་གདན་དྲངས་ཏེ། འཕགས་པ་འཇིག་རྟེན་དབང་ཕྱུག་གི་སྤྲུལ་པའི་སྐུ་ཆོས་རྒྱལ་སྲོང་བཙན་སྒམ་པོའི་ནང་བློན་ཆེན་པོ་མགར་སྟོང་བཙན་ཡུལ་ཟུངས་ཀྱི་རྒྱུད་པ། གཙུག་ལག་གཉིས་ཀྱི་མཛད་པས།
བསྟན་པ་རིན་པོ་ཆེའི་ཞབས་ཏོག་ལ་གཡེལ་བ་མི་མངའ་ཞིང་། འགྲོ་བ་མང་པོའི་མགོན་སྐྱབས་དམ་པར་གྱུར་པ་དཔལ་ལྡན་རྒྱལ་བའི་སྡེ་ཡིས། འགྲོ་བ་མ་ལུས་པའི་གནས་སྐབས་དང་། མཐར་ཐུག་གི་ཕན་བདེ་མ་ལུས་པའི་འབྱུང་གནས་རྒྱལ་
བའི་བསྟན་པ་རིན་པོ་ཆེ་ཡུན་རིང་དུ་གནས་ཤིང་། ཕྱོགས་ཀུན་ཏུ་དར་ཞིང་རྒྱས་པར་བྱ་བའི་ཕྱིར། བོད་ཁམས་སུ་སྨོན་ལམ་གྱི་སྟོབས་ཅན་མངའ་བདག་ལྷ་བཙན་པོ་བྱང་ཆུབ་སེམས་དཔའ་རྣམས་དང་། ལོ་པཎ་སྐྱེས་མཆོག་ཁྱད་པར་ཅན་རྣམས་ཀྱི་བདག་

རྐྱེན་ལ་བརྟེན་ནས། བདེ་བར་གཤེགས་པའི་གསུང་རབ་ཐོག་མཐའ་བར་དུ་དགེ་ཞིང་སྒྲོ་སྐུར་གྱི་མཐའ་དང་བྲལ་ལ་གཞུང་ལུགས་ངན་པའི་དྲི་མས་དབེན་པ་མདོ་སྡེ་དང་། རྒྱུད་སྡེའི་ཕྱོགས་སྔ་ཕྱིར་བོད་དུ་འགྱུར་རོ་ཅོག་རྣམས་མིའི་དབང་པོ་ཐོ་གེན་
ཐེ་མུར་གྱི་རིང་ལ། ཏི་ཤྲི་ཀུན་དགའ་རྒྱལ་མཚན་དཔལ་བཟང་པོ་བསྟན་པ་སྐྱོང་བའི་དུས། རྒྱལ་བའི་བསྟན་པ་ལྔ་བརྒྱ་བདུན་པའི་མཐར་ཉེ་བ། འགྲོ་བའི་བླ་མ་སྟོན་པ་གདུལ་བྱའི་ངོར་ཞི་བར་གཤེགས་པའི་ཚུལ་བསྟན་ནས། ལོ་སུམ་སྟོང་བཞི་བརྒྱ་
བརྒྱད་བཅུ་འདས་པ་མེ་མོ་ཕག་གི་ལོ་གསར་གྱི་ཟླ་བ་ཚེས་གྲངས་གཟའ་སྐར་བཟང་པོ་ལ་དབུ་བཙུགས་ཏེ། རྒྱལ་བའི་སྲས་པོ་རིག་པ་འཛིན་པ་བྱང་ཆུབ་དཔལ་ལྡན་གྱིས། བསྟན་པ་ལ་ཤེས་ནས་མི་ཕྱེད་པའི་དད་པ་བརྟན་པོས་ཀུན་ནས་བསླང་ནས་ཞལ་ཏའི་རིམ་པ་རྣམས་དང་།
རྒྱུའི་དངོས་པོ་བཟང་ཞིང་མང་ལ་ཁ་ན་མ་ཐོ་བ་མེད་པས་མཐུན་པའི་རྐྱེན་བསྒྲུབས་ནས། བསྟན་པའི་འབྱུང་གནས་དཔལ་ན་ལེན་དྲ་དང་མཚུངས་པ་སྤྲུལ་པའི་རྒྱལ་པོ་སེ་ཆེན་གན་གྱི་དགོས་ཀྱི་ལྷ་ཁང་དཔལ་གུང་ཐང་གི་གཙུག་ལག་ཁང་ཆེན་པོར་ལེགས་པར་བཞེངས་ཏེ། སྡེ་སྣོད་ཀྱི་
ཚུལ་ལ་ཅུང་ཟད་བློ་ཁ་ཕྱོགས་པ་ཐང་པོ་ཆེ་བའི་བཙུན་པ་ཀུན་དགའ་འབུམ་གྱིས་ཁ་ཏ་དང་། ཞུས་དག་གི་དང་དོས་པ་བགྱིས་ཤིང་། གཞན་ཡང་དད་པ་དང་བརྩོན་འགྲུས་ཆེ་ཞིང་བློ་གྲོས་གསལ་བའི་སྡོམ་བརྩོན་དམ་པ་མང་དུ་ཐོས་ཤིང་སྡེ་སྣོད་འཛིན་པ་མཁས་པ་རྣམས་ཀྱིས།
རྒྱ་གར་སྐད་ལ་སོགས་པ་ལེགས་པར་སྦྱར་བའི་སྐད་སོར་བཞག་རྣམས་ནི་སྔོན་གྱི་ལོཙྪ་བ་ཆེན་པོ་རྣམས་ཀྱིས་མཛད་པའི་བྱེ་བྲག་ཏུ་རྟོགས་བྱེད་ཆེན་པོ་དང་། སྒྲ་སྦྱོར་བམ་པོ་གཉིས་པ་ལ་སོགས་པ་ལ་བརྟེན་ནས་དག་པར་བྱས་ཤིང་། བོད་སྐད་རྣམས་ནི་ཡུལ་སྐད་དང་། འཕྲལ་
སྐད་ངན་པ་རྣམས་དང་མ་འདྲེས་པར་བོད་ཡུལ་གྱི་སྔོན་གྱི་བརྡ་མེས་མཁན་པོ་རྣམས་དང་། སྒྱུར་བྱེད་དམ་པ་སྔ་ཕྱིར་བྱོན་པ་རྣམས་ཀྱི་བརྡ་གསར་རྙིང་དང་། སྐད་གསར་བཅད་ལ་སོགས་པའི་རྗེས་སུ་འབྲངས་ནས་ད་དྲག་དང་། མ་མྱ་དང་། ས་སྩོགས་ལ་སོགས་པ་ཡོད་མེད་

རྣམས་མཁས་པ་རྣམས་ཀྱིས་ཇི་ལྟར་མཛད་པ་ལྟར་བརྡ་དོན་མ་ནོར་བར་དག་པར་བགྱིས་ནས། གཞི་དུང་གི་ས་གཞི་ལྟར་དཀར་འཇམ་མཁྲེགས་པ་ལྷོ་རྒྱལ་པོ་ལྷ་ཁང་གི་ཤོ་གུ་ལ། དམ་ཆེ་ཞིང་མདངས་གསལ་བ་ཨུཏྤལ་སྔོན་པོ་ལྟ་བུ་རྒྱ་ནག་ཆེན་པོ་ལས་འོངས་པའི་སྣག་
ཚས། འབུར་དཀྱུས་ཚུགས་གསུམ་ལ་མཁས་པའི་མཐར་ཕྱིན་པས་ཡི་གེའི་རིག་བྱེད་ལ་སློབ་དཔོན་གྱི་གོ་འཕང་ཐོབ་པས་དག་སྙོམས་མཛེས་པར་བཞེངས་པ་དཔོན་དཔལ་བཟང་རིན་ཆེན་དང་། སངས་རྒྱས་གྲགས་ལ་སོགས་པ་དབུས་གཙང་གི་ཡི་གེ་པ་ཡིད་གཞུངས་ཤིང་
མཁས་པ་རྣམས་ཀྱིས་ལེགས་པར་བྲིས་པ་ལ་ཞུས་དག་ལན་གསུམ་དུ་བགྱིས་ཏེ་བཞེངས་པ་རྣམས། ས་མོ་གླང་གི་ལོ་བཀྲ་ཤིས་ལོ་གསར་གྱི་ཟླ་བ་ལ་ལེགས་པར་གྲུབ་ཅིང་། འབྲས་བུ་དང་བསྒྲུབ་པའི་དུས་ཀྱི་ལྔ་བརྒྱ་ཕྲག་དྲུག་དང་། ལུང་མངོན་པའི་དུས་ཀྱི་
བཞི་བརྒྱ་བརྒྱད་བཅུ་རྩ་གཉིས་འདས་ལ། ལྷག་མ་མངོན་པའི་ལོ་བཅོ་བརྒྱད་དང་། མདོ་སྡེ། འདུལ་བ། རྟགས་ཙམ་འཛིན་པའི་ལྔ་བརྒྱ་ཕྲག་གསུམ་སྟེ། སྟོང་ལྔ་བརྒྱ་བཅོ་བརྒྱད་བསྟན་པའི་ལྷག་མར་ཡོད་པའི་དུས་སུ་བཀའ་འགྱུར་ལེགས་པར་གྲུབ་པ་
རྣམས་ལས་འདི་དག་ནི་ལུང་སྡེ་བཞིའོ། །འདུལ་བ་ལུང་ཕལ་ཆེ་བ་ལ་དགེ་སློང་ཕ་མའི་སོ་སོར་ཐར་པ་དང་། ཞུ་བ་མ་རྫོགས་པ་བཞེངས་པ་མེད་མོད་ཀྱི་འོན་ཀྱང་སོ་སོར་ཐར་པ་གཉིས་རྣམ་འབྱེད་གཉིས་ཀྱི་རྩ་བ་ཡིན་ཞིང་། རྣམ་འབྱེད་གཉིས་ནི་སོ་སོར་ཐར་པ་རྣམ་
པ་གཉིས་ཀྱི་འགྲེལ་པ་ཡིན་ལ། ཞུ་བ་མ་རྫོགས་པ་ནི་ཞུ་བ་དག་ཤོས་ཡིན་པའི་ཕྱིར་ལུང་རྣམ་འབྱེད་སོ་སོའི་དབུ་དང་། གཞུང་བླ་མ་མ་རྫོགས་པ་དབུ་ཉིད་དུ་བཞེངས་སོ། །ལུང་སྡེ་བཞིའི་གོ་རིམས་ནི་གཞི་དང་། རྣམ་པར་འབྱེད་པ་དང་། དེ་དག་གི་དཀའ་
བའི་གནས་ཞུས་ལན་གྱིས་གཏན་ལ་འབེབས་པ་གཞུང་བླ་མ་དང་། དེ་དག་ཏུ་མ་ཚང་བ་ཁ་སྐོང་བ་ཕྲན་ཚེགས་སོ། །དོན་གྱི་གོ་རིམས་དེ་ལྟར་ཡིན་ཡང་མཁས་པ་རྣམས་ཀྱིས་གཞི་དང་། རྣམ་པར་འབྱེད་པའི་རྗེས་ལ་ཕྲན་ཚེགས་དང་། དེའི་རྗེས་ལ་གཞུང་དམ་པ་ཉིད་

བྲིས་ཤིང་། ཀ་ཅོག་ལ་སོགས་པས་མཛད་པའི་མཚན་བྱང་དཀར་ཆག་ལས་ཀྱང་རིམ་པ་དེ་ཁོ་ན་ལྟར་འབྱུང་བས་འདིར་ཡང་གཞུང་དམ་པ་མཇུག་ཉིད་དུ་བྲིས་སོ། །འདི་རྣམས་ཀྱི་བམ་པོའི་གྲངས་ནི་ཤྭོ་ལོ་ཀ་སུམ་བརྒྱ་ལ་བམ་པོ་རེར་བྱས་ནས་
ལུང་གཞི་ལ་བམ་པོ་བརྒྱ་དང་དགུ། དགེ་སློང་ཕའི་རྣམ་འབྱེད་ལ་བམ་པོ་བརྒྱད་བཅུ་རྩ་གསུམ་དང་བམ་པོ་སུམ་ཆ། དགེ་སློང་མའི་རྣམ་འབྱེད་ལ་བམ་པོ་ཉི་ཤུ་རྩ་བརྒྱད། ཕྲན་ཚེགས་ལ་བམ་པོ་ལྔ་བཅུ་རྩ་དགུ། གཞུང་བླ་མའི་ཞུ་བ་མ་རྫོགས་པ་ལ་བམ་པོ་བཅུ་
གཉིས། ཞུ་བ་རྫོགས་པའི་གཞུང་དམ་པ་ལ་བམ་པོ་ལྔ་བཅུ་རྩ་གསུམ་སྟེ། བསྡོམས་ན་གཞུང་དམ་པ་ལ་བམ་པོ་དྲུག་བཅུ་རྩ་ལྔ་ཡོད་པས་སྤྱིར་ལུང་སྡེ་བཞི་ཆད་པ་ལ་བམ་པོ་སུམ་བརྒྱ་བཞི་བཅུ་རྩ་བཞི་དང་བམ་པོ་སུམ་ཆ་ཡོད་དོ། །སྔར་མ་ཚང་བ་རྣམས་
ཚང་བར་བཞེངས་པའི་ཚུལ་ནི་ཕྲན་ཚེགས་དང་། ཞུ་བ་མ་རྫོགས་པའི་མཇུག་དག་ཏུ་བྲིས་ཟིན་པའི་ཕྱིར་དེ་དག་ཏུ་བལྟ་བར་བྱའོ།། །།ཡེ་དྷརྨཱ་ཧེ་ཏུ་པྲ་བྷ་བཱ་ཧེ་དུན་ཏེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་
ཨེ་བྃ་བཱ་དཱི་མ་ཧཱ་ཤྲ་མ་ཎ།། །།