Kinh tạng Tây Tạng (Kangyur Đại Học) — 013_འདུལ་བ།_པ

ིན་པ་འདོད་པ་དང་། དྲོད་ཆེ་བས་མ་སྨིན་པ་འདོད་པའོ། །
གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་རྣམས་ལྗོངས་སྤྱད་པ་སྤྱོད་པ་ན་རི་བྲགས་ཀྱི་གྲོང་གཞན་ཞིག་གི་གཙུག་ལག་ཁང་ཞིག་ཏུ་ཕྱིན་ན་དེའི་དགེ་སློང་དག་ཉིན་པར་སྤྱོད་པའི་ཕྱིར་དོང་སྟེ། གཙུག་ལག་ཁང་དེ་སྟོང་པར་ལུས་པ་དང་། དྲུག་སྡེ་པོ་རྣམས་དགའ་བོ་དང་ཉེ་
དགའ་བོ་གཙུག་ལག་ཁང་སྟོང་པ་མཚམས་མ་བཅད་པ་འདིར་བདག་ཅག་རྣམས་ཀྱིས་འདིར་གནས་ན་ཇི་ལྟར་གནས་པར་བྱ། མཚམས་བཅད་ཀྱིས་ཚུར་ཤོག་ཅེས་སྨྲས་ནས། དེ་དག་གིས་ལེགས་ཀྱིས་དེ་བཞིན་དུ་བྱའོ་ཞེས་སྨྲས་ནས། དེ་དག་གིས་མཚམས་བཅད་མ་
ཐག་ཏུ་སྔ་ན་གནས་པའི་དགེ་སློང་དག་ལྷགས་པ་དང་། དྲུག་སྡེ་པོ་རྣམས་ཀྱིས་དེ་ལ་ངལ་སོ་ཤིག་ཅེས་བྱས་ན། དེ་དག་གིས་སྨྲས་པ། ཚེ་དང་ལྡན་པ་རྣམས་འདི་ལྟར་ཁྱེད་ཅག་ནི་གློ་བུར་དུ་ལྷགས་པའོ། །ངེད་ནི་སྔ་ནས་གནས་པས་ན་ཁྱེད་ཅག་ལ་བདག་ཅག་གིས་ངལ་སོ་
ཤིག་ཅེས་བྱ་བའི་རིགས་སོ་ཞེས་པ་དང་། དྲུག་སྡེ་པོ་རྣམས་ཀྱིས་སྨྲས་པ། ཚེ་དང་ལྡན་པ་དག་བདག་ཅག་གིས་ཀྱང་མཚམས་བཅད་དོ། །དེ་དག་གིས་སྨྲས་པ། བདག་ཅག་གིས་ཀྱང་སྔར་མཚམས་བཅད་དོ་ཞེས་སྨྲས་ནས། དགེ་སློང་དེ་དག་ཅི་མཚམས་སྔ་མ་བརྩན་
ནམ། འོན་ཏེ་ཕྱི་མ་བརྩན་ཞེས་ཏེ་ཐེ་ཚོམ་སྐྱེས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གློ་བུར་བ་རྣམས་གཙུག་ལག་ཁང་དུ་ཞུགས་མ་ཐག་ཏུ་སྟོང་པར་མཐོང་ན་ཡང་མཚམས་
གཅད་པར་མི་བྱའོ། །ལམ་གྱིས་ངལ་བསོ་སྟེ་ཤིན་ཏུ་བརྟགས་ནས་སྔ་ན་གནས་པ་མེད་ན་གདོད་མཚམས་གཅད་པར་བྱའོ། །གཞན་དུ་ན་གཅད་པར་མི་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། ཛེ་ཏའི་ཚལ་གྱི་སྒོར་ཁྱིམ་པ་གཉིས་ཤིག་ཐབ་མོ་བྱུང་སྟེ། དེ་ན་དགེ་སློང་

གཅིག་འདུས་པ་དེ་ལ་གཅིག་གིས་དབང་བཅུགས་ནས། དེས་དེ་ལ་རྒྱལ་པོའི་ཕོ་བྲང་དུ་ཆེ་བཞི་བྱས་ཏེ་ཅིག་ཤོས་པོ་ཆད་པས་བཅད་པ་དང་། དེས་དེ་ལ་འཕྱའོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་
པ། དགེ་སློང་དག་ཁྱིམ་པ་དེ་འཕྱ་བ་ནི་ཡུས་ཀྱིས། དེ་བས་ན་དགེ་སློང་རྣམས་ཐབ་མོ་བྱེད་པའི་དྲུང་ན་མ་འདུག་པར་ཆེ་བཞི་ཡང་མ་བྱེད་པར་བྱོལ་ཏེ་སོང་ཤིག །དགེ་སློང་ཐབ་མོ་བྱེད་པའི་དྲུང་ན་འདུག་ཅིང་ཆེ་བཞི་བྱེད་ན་འདས་པ་དང་བཅས་པར་འགྱུར་རོ། །གླེང་གཞིའི་སྒོ་བཞི་
པའི་མདོའི་ཚིགས་སུ་བཅད་པ་བཅུ་པའོ། །གླེང་གཞིའི་སྒོ་བཞི་པ་རྫོགས་སོ།། །།མདོར་བསྡུས་པའོ། །བྱང་ཆུབ་སེམས་དཔའི་གཟུགས་རྣམས་དང་། །ཡུལ་བསྐོར་དང་ནི་ཡོན་གྱི་སྣོད། །ཀུན་འདུས་པ་དང་སྟེགས་བུ་དང་། །རྔ་ཆེན་འཁོར་ལོ་ཐ་མའོ། །མདོར་ན།
དྲང་སྲོང་ཆེན་པོས་གནང་བར་གསུངས་པ་ནི། །བྱང་ཆུབ་སེམས་དཔའི་སྐུ་གཟུགས་དང་། །སྟེགས་བུ་དང་ནི་རྒྱལ་མཚན་དང་། །བ་དན་ལྕགས་ཀྱི་ཀ་བའོ། །གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་གནང་ན། བདག་
གིས་བཅོམ་ལྡན་འདས་བྱང་ཆུབ་སེམས་དཔའི་སྐུ་གཟུགས་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བྱོས་ཤིག །བཅོམ་ལྡན་འདས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ལ་རྒྱལ་
མཚན་གྱིས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྐོར་ཅིག །བཅོམ་ལྡན་འདས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་གཟུགས་སྟེགས་བུས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། ཁྱིམ་བདག་གནང་གིས་སྟེགས་བུས་བསྐོར་ཅིག །ཡང་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་གཟུགས་ལ་ལྕགས་ཀྱི་ཀ་བས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྐོར་ཅིག །ཡང་

དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ལྕགས་ཀྱི་ཀ་བའི་སྟེང་དུ་བ་དན་གདགས་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཐོགས་ཤིག །གླེང་གཞིའི་སྒོ་ལྔ་པའི་མདོའི་
ཚིགས་སུ་བཅད་པ་དང་པོའོ།། །།མདོར་ན། བྱང་ཆུབ་སེམས་དཔའི་ཡུལ་བསྐོར་དང་། །དེ་བཞིན་རྒྱན་དང་བྱུག་པ་དང་། །ཁྱོགས་དང་ཤིང་རྟ་བ་དན་དང་། །གདུགས་དང་རྒྱལ་མཚན་སྙན་གྱི་རྒྱན། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་
མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ཀྱིས་ཡུལ་བསྐོར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།
ཁྱིམ་བདག་གནང་གིས་སྐོར་ཅིག །བྱང་ཆུབ་སེམས་དཔའི་རྒྱན་མེད་དེ་མི་མཛེས་ནས་ཁྱིམ་བདག་མགོན་མེད་ཟས་སྦྱིན་པས་དེ་སྟེ་བཅོམ་ལྡན་འདས་ཀྱིས་གནང་ན། བདག་གིས་བྱང་ཆུབ་སེམས་དཔའི་གཟུགས་ལ་རྒྱན་འབུལ་ལོ་ཞེས་གསོལ་པ་དང་། བཅོམ་ལྡན་འདས་
ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ལ་རྐང་པའི་རྒྱན་དང་རྣ་བའི་རྒྱན་ལ་སོགས་པ་ཡང་ཕུལ་ཅིག །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ལ་དྲིའི་རྒྱན་གྱིས་བརྒྱན་པར་བགྱིའོ་ཞེས་གསོལ་པ་དང་། བཅོམ་ལྡན་
འདས་ཀྱིས་བཀའ་སྩལ་པ། ཁྱིམ་བདག་གནང་གིས་བརྒྱན་པར་བྱོས་ཤིག །བྱང་ཆུབ་སེམས་དཔའི་གཟུགས་གྲོང་ཁྱེར་དུ་རྐང་པས་ཁྱེར་བ་དང་། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་
ཁྱོགས་ལས་གྲོང་ཁྱེར་དུ་བཀུར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཁྱེར་ཅིག །ཁྱོགས་ལས་ཁྱེར་ཡང་མི་མཛེས་པར་གྱུར་ནས་ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་

བདག་གིས་བྱང་ཆུབ་སེམས་དཔའི་གཟུགས་ཤིང་རྟ་ལས་བཀུར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་དེ་བཞིན་དུ་བྱོས་ཤིག །ཤིང་རྟ་ཡང་བ་དན་དང་གདུགས་མེད་པས་མི་མཛེས་པར་གྱུར་ནས། ཁྱིམ་
བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ཤིང་རྟའི་སྟེང་དུ་བ་དན་དང་གདུགས་དང་རྒྱལ་མཚན་ལ་སོགས་པས་བརྒྱན་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བརྒྱན་པར་བྱོས་ཤིག །
བྱང་ཆུབ་སེམས་དཔའི་གཟུགས་ལ་མེ་ཏོག་གིས་སྙན་གྱི་གོང་མ་བརྒྱན་ན་མི་མཛེས་པར་གྱུར་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ཀྱི་དབུའི་སྙན་གྱི་གོང་དུ་མེ་ཏོག་གི་རྒྱན་དབུལ་ལོ་ཞེས་གསོལ་
པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ཅིག །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། ཡོན་ཕུལ་བ་དང་ཡོན་དབུལ་བ། །དེ་བཞིན་ཕྲེང་བའི་སྣོད་རྣམས་དང་། །རོལ་མོ་རྣམས་ཀྱང་མི་
དགག་ཅིང་། །རྒྱན་ཚོགས་རྣམས་ཀྱང་མི་གཞིག་གོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་
སེམས་དཔའི་གཟུགས་ཀྱི་ཞབས་ལ་ཡོན་དབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ཅིག །དེའི་མཆོད་སྟོན་གྱི་ཚེ་ཡུལ་སྣ་ཚོགས་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། གཞན་
ཡང་བལྟ་བར་འདོད་པའི་ཕྱིར་ཕལ་མོ་ཆེ་ལྷགས་པ་རྣམས་ཀྱིས་དེ་ལ་ཡོན་དབུལ་བ་མངས་པས་རྙེད་པ་དེ་སུས་བཀུར་བ་དགེ་སློང་རྣམས་ཀྱིས་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་བཀུར་བར་བྱའོ་ཞེས་པ་དང་། དགེ་སློང་གནས་བརྟན་དག་གིས་

ཁྱེར་བ་དང་མི་དགའ་བ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་བཅའ་བར་བྱེད་པ་དང་། གཞན་ཡང་གཞོན་པ་དང་རྒན་པ་རྣམས་ཀྱིས་བཀུར་བར་བྱའོ། །དགེ་སློང་གནས་བརྟན་དང་། གནས་བརྟན་དག་གིས་ནི་བསྲུང་བར་བྱོས་
ཤིག །ཡོན་ཕུལ་བ་དང་། མེ་ཏོག་དང་། གོས་ལ་སོགས་པ་ཤིང་རྟའི་ཐོག་ཏུ་བཞག་པ་དང་། ཁ་ཅིག་ལྷུང་བ་མ་བྱིན་པར་ལེན་པ་དག་གིས་ཐུགས་ཐུབ་ཏུ་ཁྱེར་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ཤིང་རྟའི་སྟེང་དུ་ཕྲེང་
བའི་སྣོད་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བྱོས་ཤིག །དགེ་སློང་རྣམས་ཀྱིས་རོལ་མོ་རྣམས་ཀྱང་མ་ཞི། སྐྱེ་བོ་རྣམས་ཀྱང་སོ་སོར་མ་གྱེས་པར་གཟུགས་ཀྱི་རྒྱན་རྣམས་སྦས་པ་དང་། བྲམ་ཟེ་དང་ཁྱིམ་བདག་དད་
པ་དག་གིས་འཕགས་པ་དག་བདག་ཅག་ཇི་ལྟར་དད་པ་དེ་བཞིན་དུ་མ་དད་པ་ཡང་སྐྱེས་ཏེ། ཀྱེ་མའོ་ཁྱེད་ཀྱིས་རོལ་མོ་རྣམས་ཀྱང་ཞི་ལ། སྐྱེ་བོ་མང་པོ་ཡང་སོ་སོར་གྱེས་ནས་གཟུགས་ཀྱི་རྒྱན་རྣམས་བཀྲོལ་ན་ཅི་ཉེས་ཞེས་དཔྱས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་
ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་། ཁྱིམ་བདག་རྣམས་འཕྱ་བ་ནི་ཡུས་ཏེ། དེ་བས་ན་རོལ་མོ་རྣམས་ཀྱང་མ་ཞི། སྐྱེ་བོ་མང་པོ་ཡང་སོ་སོར་མ་གྱེས་པར་དགེ་སློང་རྣམས་ཀྱིས་གཟུགས་ཀྱི་རྒྱན་མ་རྟུལ་ཅིག །བརྟུལ་ན་
འདས་པ་དང་བཅས་པར་འགྱུར་རོ། །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་གསུམ་པའོ།། །།མདོར་ན། ཀུན་འདུས་པ་དང་དུས་སྟོན་དང་། །དཔྱིད་ཟླ་ཐ་ཆུངས་ཞལ་བསྲོ་དང་། །ལོ་ལྔ་དང་ནི་དྲུག་བྱས་ལ། །མཆོད་སྟོན་ཆེན་པོ་ཐ་མའོ། །སངས་རྒྱས་བཅོམ་
ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་ཡུལ་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་མཐོང་བ་དང་། ཡིད་དགའ་བ་

སྐྱེས་ནས་དེས་བསམས་པ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་འདི་ལྟར་དུས་སུ་སྦྱིན་པ་ནི་རྣམ་པ་ལྔ་སྟེ། ལྔ་གང་ཞེ་ན། གློ་བུར་དུ་འོངས་པ་དང་། འདོད་པ་རྣམས་ལ་སྦྱིན་པ་བྱིན་པ་འདི་ནི་སྦྱིན་པའི་དུས་དང་པོའོ། །ནད་པ་དང་ནད་གཡོག་ལ་སྦྱིན་པ་
བྱིན་པ་འདི་ནི་སྦྱིན་པའི་དུས་གཉིས་པའོ། །ལོ་ཉེས་ཤིང་ཕོངས་བྲེལ་བ་ལ་སྦྱིན་པ་བྱིན་པ་འདི་ནི་སྦྱིན་པའི་དུས་གསུམ་པའོ། །གང་སུ་ལ་ཡང་རུང་སྟེ་ལོ་ཐོག་གསར་པ་དང་། འབྲས་བུ་གསར་པ་དང་། གསར་ཐོག་དེ་དག་དེས་ཐོག་མར་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་
ལ་བྱིན་ཞིང་། དེའི་འོག་ཏུ་བདག་ཟ་བ་འདི་ནི་སྦྱིན་པའི་དུས་བཞི་པའོ། །གང་སུ་ཡང་རུང་སྟེ། རླུང་ལྡང་བའམ། ཡུལ་རྨུགས་པའམ། ཆར་འབབ་པའམ། གྲང་བ་ལ་སོགས་པ་དེ་ལྟ་བུའི་རྣམ་པས་རླུང་ལྡང་བ་དང་། ཡུལ་རྨུགས་པ་དང་། ཆར་འབབ་པ་དང་། གྲང་བ་ལ་ཟན་
ནམ། སྐྱོ་མའམ། ཐུག་པའམ། སྐོམ་ལ་སོགས་པ་དེ་དག་ཕྱིར་བྱུང་སྟེ། དགེ་འདུན་ལ་འབུལ་ཞིང་འཕགས་པ་འདི་ཟོས་ན་ལུས་ཀྱང་མི་གཤེར། ཆོས་གོས་ལ་ཡང་ཆར་གྱིས་མི་ཕོག་སྟེ་བདེ་བ་ལ་རེག་ཅིང་གནས་པར་འགྱུར་རོ་ཞེས་སྦྱིན་པ་འདི་ནི་སྦྱིན་པའི་དུས་ལྔ་པའོ། །
དེ་ལྟར་ན་འདི་ནི་ཡུལ་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་ལམ་གྱི་ངལ་བ་རྣམས་ལ་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་དེ་དག་འདུས་པའི་ཟས་སྦྱར་རོ་སྙམ་དུ་བསམས་ཏེ། བཅོམ་ལྡན་འདས་
ག་ལ་བ་དེར་སོང་སྟེ་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གློ་བུར་དུ་མཆི་བ་ཡུལ་སོ་སོ་ན་གནས་
པ་ལ་སྦྱིན་པ་བྱིན་པ་འདི་ནི་སྦྱིན་པའི་དུས་དང་པོ་ཞེས་བྱ་བ་ནས། སྔ་མ་ལྟར་བདེ་བ་ལ་རེག་པར་གནས་པར་བྱ་བ་འདི་ནི་དུས་ཀྱི་སྦྱིན་པ་ལྔ་པའོ་ཞེས་བྱ་བའི་བར་དུ་སྦྱིན་པའི་དུས་ལྔར་གསུངས་ན། ད་འདིར་བྱང་ཆུབ་སེམས་དཔའི་མཆོད་པ་ཆེན་པོ་ལ་ཡུལ་སོ་སོ་ནས་མཆིས་པའི་དགེ་

སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་གློ་བུར་དུ་མཆིས་པ་ལམ་གྱིས་ཡོངས་སུ་གདུངས་པ་དེ་རྣམས་ལ་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་འདུས་པ་དེ་དག་གི་ཟས་སྦྱར་རོ་ཞེས་གསོལ་པ་དང་། བཅོམ་
ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཟླ་བ་གང་ལ་བཙས་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དཔྱིད་ཟླ་ཐ་ཆུངས་ལ་
བཙས་སོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ཀྱི་ཕོ་བྲང་གི་ཞལ་བསྲོ་བར་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་བཅོམ་ལྡན་འདས་ལོ་དུ་ལགས་ནས་དབུ་སྐྲ་བྲེགས་
ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ལོ་ལྔ་ལོན་པ་ནའོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ལ་ལོ་ལྔ་ཞིང་ལན་གཅིག་མཆོད་སྟོན་སྦྱར་རོ། །ཞེས་གསོལ་པ་དང་། བཅོམ་ལྡན་འདས་
ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་བཅོམ་ལྡན་འདས་ཀྱིས་གཙུག་ཕུད་ལོ་དུ་ལགས་ནས་བཞག་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ལོ་དྲུག་ནའོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་
གཙུག་ཕུད་ཀྱི་མཆོད་སྟོན་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་ཟླ་བ་གང་ལ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་མངོན་དུ་ཆུད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།
ཁྱིམ་བདག་དཔྱིད་ཟླ་ཐ་ཆུངས་ལའོ། །དེ་སྟེ་བཅོམ་ལྡན་འདས་ཀྱིས་གནང་ན་བཅོམ་ལྡན་འདས་འཛམ་བུའི་གྲིབ་མ་ལ་གཟུགས་བཞུགས་པ་ལ་མཆོད་སྟོན་ཆེན་པོ་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །གླེང་

གཞིའི་སྒོ་ལྔ་པའི་མདོའི་ཚིགས་སུ་བཅད་པ་བཞི་པའོ།། །།མདོར་ན། རྩྭ་སྟན་དང་ནི་ཐེ་ཚོམ་དང་། །སྔ་ཕྱི་དག་ཏུ་འདུག་པ་དང་། །ཅ་ཅོ་དག་དང་ལམ་རྣམས་དང་། །གཎྜཱི་དུང་དང་རྔ་རྡུང་བའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་
མེད་ཟས་སྦྱིན་གྱི་ཀུན་དགའི་ར་བ་ན་བཞུགས་སོ། །བཅོམ་ལྡན་འདས་ཀྱིས་འདུས་པའི་ཟས་སྦྱོར་ཅིག་ཅེས་གསུངས་པ་དང་། དགེ་སློང་མང་པོ་རྣམས་སྟན་མེད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭའི་སྟན་སྦྱར་ཏེ་དེར་འདུག་ལ་བཟའ་བར་བྱའོ། །
བཅོམ་ལྡན་འདས་ཀྱིས་རྩྭའི་སྟན་ལ་འདུག་པར་བྱའོ་ཞེས་གསུངས་པ་དང་། དགེ་སློང་རྣམས་ཟན་ཟོས་པ་དང་ཐེ་ཚོམ་སྐྱེས་ནས་རྩྭ་སྟན་ཏེ་ཁྱེར་ཏེ་དོང་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་ཁྱེར་ཏེ་མ་འདོང་བར་ཕུང་པོར་བྱོས་ཏེ་ཞོག་ལ། གང་གི་ཚེ་དུས་སྟོན་ཡོངས་
སུ་རྫོགས་པར་གྱུར་པ་དེའི་ཚེ་ཐམས་ཅད་འོར་ཅིག །དགེ་སློང་རྣམས་སྟོན་མོའི་དུས་ལ་སྔ་ཕྱིར་འདུག་པས་གཞན་ཟན་ཟོས་ཏེ་སོང་བར་གྱུར། གཞན་གདོད་འོངས་པ་མ་ཐོབ་སྟེ་བྲེལ་བར་གྱུར་ནས། བཅོམ་ལྡན་འདས་ཀྱིས་གོ་རིམས་ཇི་ལྟ་བ་བཞིན་དུ་འདུག་ཤིག་ཅེས་གསུངས་སོ། །
དགེ་སློང་མང་པོ་འདུས་པ་དང་ཅ་ཅོར་གྱུར་པས་དུས་མ་ཤེས་ནས། བཅོམ་ལྡན་འདས་ཀྱིས་དུས་བརྗོད་པར་བྱོས་ཤིག་ཅེས་གསུངས་པ་དང་། དེ་དག་དེ་ཉིད་དུ་དུས་ལ་བབ་བོ། །དུས་ལ་བབ་བོ་ཞེས་བརྗོད་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཎྜཱི་བརྡུང་བར་བྱོས་ཤིག །
དེ་ལྟར་ཡང་གཞན་དག་ལ་གསལ་བར་མ་གྱུར་ནས། དེ་ལ་བཅོམ་ལྡན་འདས་ཀྱིས་སྔར་ནི་གཎྜཱི་ཆུང་ངུ་རྡུངས་ལ། ཕྱིས་གཎྜཱི་རྡུངས་ཤིག་ཅེས་གསུངས་སོ། །དེ་ལྟར་ཡང་གཞན་ཉིན་པར་གནས་པར་སོང་བ་རྣམས་ཀྱིས་མ་ཐོས་ནས། བཅོམ་ལྡན་འདས་ཀྱིས་དུང་ཁ་བསྡོམས་ཏེ་
བུས་ལ་རྔ་ཡང་རྡུངས་ཤིག་ཅེས་གསུངས་སོ། །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་ལྔ་པའོ།། །།མདོར་ན། དེར་ནི་རྔ་ཡང་བརྡུང་བར་བྱ། །དེ་ནས་ཤིང་རྟ་དབྱུང་བ་དང་། །དངོས་པོ་བྱུང་དང་རྙེད་པ་དང་། །ཇི་ལྟར་ཚུལ་བཞིན་བསྒོ་བར་བྱའོ། །སངས་རྒྱས་

བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་བ་ན་བཞུགས་ཏེ། བཅོམ་ལྡན་འདས་ཀྱིས་གཎྜཱི་དང་དུང་ཁ་བསྡོམས་པ་དང་རྔ་རྡུངས་ཤིག་ཅེས་བཀའ་སྩལ་ན། དེ་དག་གིས་གཎྜཱི་བརྡུངས་པའི་རྗེས་བཞིན་བརྡུངས་པ་དང་།
ནད་པ་དང་ལས་ལ་གཏོགས་པ་རྣམས་ལ་གནོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་ནད་པ་རྣམས་ཟས་མནོས་ཟིན་པར་གྱུར་ལ། ལས་བྱེད་པ་རྣམས་ཀྱང་ཟས་ཟོས་ཟིན་པ་དེའི་ཚེ་ན་གཎྜཱི་དང་དུང་ཁ་བསྡོམས་པ་དང་། རྔ་རྡུངས་ཤིག །མཆོད་སྟོན་
ཟིན་ཀྱང་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་སོ་སོར་མ་དོང་བ་དང་། བཅོམ་ལྡན་འདས་ཀྱིས་ཤིང་རྟ་ཕྱུང་ཤིག་དང་དེ་དོང་ནས་རང་འདོང་ངོ་ཞེས་གསུངས་པ་དང་། མཆོད་སྟོན་དེའི་ཚེ་དགེ་སློང་རྣམས་ཀྱིས་རྙེད་
པ་གྲུབ་པ་དེ་ཇི་ལྟར་བགོ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་རྒན་རིམས་སུ་མཉམ་པར་གོས་ཤིག །དགེ་སློང་མང་པོ་འདུས་པ་དེ་དག་ཅ་ཅོ་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཅུ་ཞིང་གཅིག་ཏུ་བགོ་བར་བྱའོ། །བརྒྱ་ཞིང་
གཅིག་ཏུའོ། །དེའི་འོག་ཏུ་སྟོང་ཞིང་གཅིག་ཏུ་རྙེད་པ་བགོ་བར་བྱོས་ཤིག །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་གལ་ཏེ་བཅུའི་ནང་ནས་གཅིག་དུས་ལས་འདས་ན་གུམ་པའི་ཡོ་བྱད་སུ་དབང་ཞེས་ཞུས་པ་དང་། བཅོམ་ལྡན་འདས་
ཀྱིས་བཀའ་སྩལ་པ། ཨུ་པཱ་ལི་དེ་སྟེ་བགོ་བའི་ཚེ་དུས་འདས་ན་ཤི་བའི་ཡོ་བྱད་དགེ་འདུན་འདུས་པ་དབང་གིས་སྤྱིར་གོས་ཤིག །འོན་ཏེ་བགོས་ནས་དུས་འདས་ན་ནི་དགུ་པོ་རྣམས་ཀྱིས་འཐོབ་བོ། །དེ་བཞིན་དུ་བརྒྱད་སྟོང་སྡེ་རྣམས་ལ་ཡང་སྦྱར་བར་བྱའོ། །གླེང་གཞིའི་སྒོ་
ལྔ་པའི་མདོའི་ཚིགས་སུ་བཅད་པ་དྲུག་པའོ།། །།གླེང་གཞིའི་སྒོ་ལྔ་པ་རྫོགས་ཏེ། གླེང་གཞི་རྣམས་རྫོགས་སྷོ།། །།རྐྱང་པའི་སྒོའི་མདོར་ན། ཕྱག་ནི་ཐོག་མར་བྱ་བ་དང་། །གཉིས་པའི་སྣོད་རྣམས་མ་ངེས་པ། །གསུམ་དུ་ཡོ་བྱད་རྣམས་ཀྱང་སྟེ། །དེ་ནི་རྐྱང་

བར་བཏགས་པའོ། །མདོར་བསྡུས་པ་ན། ཕྱག་འཚལ་བ་དང་གསིང་མ་དང་། །དེ་བཞིན་འཇོག་དང་ཉལ་དང་ཁྱི། །དེ་བཞིན་བཏུང་ཕོར་བུ་རམ་ཤིང་། །དེ་བཞིན་མར་དང་རྩ་བ་སྡོང་པོ་རྣམས། །མདོ་རྣམས་བསྡུས་པར་གསུངས་པའོ། །སངས་རྒྱས་བཅོམ་ལྡན་
འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་གཉིས་ཤིག་རྣམ་པར་གདོན་མི་ཟ་བའི་གཏམ་སྨྲ་བ་ལས་གཅིག་ལ་གཅིག་ཚིག་རྩུབ་པོ་སྨྲས་ནས་དེ་ལ་གཞོན་ནུས་རྒན་པོ་ལ་རབ་ཏུ་སྤྱོས་ཏེ། དེ་གནས་ཁང་
དུ་ཞུགས་ཏེ་འདུག་པ་དང་། གཞོན་ནུས་བདག་གིས་རྒན་པ་ལ་རབ་ཏུ་སྤྱོས་ཀྱིས་སོང་སྟེ་བཟོད་པར་གསོལ་ལོ་སྙམ་བསམས་ནས། དེས་དེའི་གནས་ཁང་དུ་སོང་སྟེ་རྐང་པ་གཉིས་ལ་གཏུགས་ནས་བཙུན་པ་བདག་གིས་ཁྱོད་ལ་རབ་ཏུ་སྤྱོས་པ་བཟོད་པར་མཛོད་ཅིག་ཅེས་
བཟོད་པ་གསོལ་བར་བྱེད་པ་དང་། དེ་ཆེར་ཁྲོས་ནས་གཙེས་ཏེ་གནོད་པ་བྱས་སོ་ཞེས་སྨྲས་པ་དང་། དགེ་སློང་དག་གིས་ཐོས་ནས་བརྒྱུགས་ཏེ་ཚེ་དང་ལྡན་པ་ཅིའི་ཕྱིར་འོ་དོད་འབོད་ཅེས་དྲིས་པ་དང་། དེས་སྨྲས་པ། ཚེ་དང་ལྡན་པ་འདི་འདི་ལྟར་བདག་གི་གནས་ཁང་དུ་
འོངས་ཏེ་གནོད་པ་བྱེད་པ་ལ་ལྟོས། དེ་དག་གིས་དེ་ལ་ཚེ་དང་ལྡན་པ་ཅིའི་ཕྱིར་ཁྱོད་ཀྱིས་དགེ་སློང་རྒན་པ་འདི་ལ་གཙེས་ཞེས་སྨྲས་པ་དང་། དེས་ཀྱང་ཇི་ལྟར་གྱུར་པ་སྨྲས་ནས་དེ་དག་ཅང་མི་སྨྲ་བར་འདུག་གོ། །དེས་བསམས་པ་དེའི་ཕྱིར་ན་བཅོམ་ལྡན་འདས་ཀྱིས་ཕྱག་བྱོས་
ཤིག་པར་གསུངས་ཏེ། ཇི་ནས་ངའི་ཉན་ཐོས་རྣམས་བྱམས་པའི་སེམས་དང་། ཕན་པའི་སེམས་དང་། བརྩེ་བའི་སེམས་ཀྱིས་རང་གི་དོན་སྒྲུབ་པར་འགྱུར་རོ་ཞེས་གསུངས་ན་འདི་ལྟར་འདི་ནི་བདག་མཐོང་ནས་མི་དགའ་བ་དང་། ཁྲོས་པར་གྱུར་ན་བདག་གིས་འདི་ལ་བཟོད་
པར་བྱས་ཏེ་ཅི་རུང་གིས་འགྲོའོ་སྙམ་བསམས་ནས་དེ་སོང་ནས་ཕྱིས་དེ་ལ་ཕྱག་ཀྱང་མི་བྱེད་ན་བཟོད་པར་བྱེད་པ་ལྟ་ཅི་སྨོས། དེ་ནས་དུས་ཕྱི་ཞིག་ན་དགེ་སློང་རྒན་པ་དེ་དགེ་སློང་གཞན་ཞིག་དང་ལྷན་ཅིག་འཆག་ཅིང་གཏམ་ཟེར་ཞིང་འཁོད་པ་དང་། དགེ་སློང་དེ་ཡང་དགེ་སློང་

དག་ལ་ཕྱག་འཚལ་བ་ལས་ཕྱོགས་དེར་འོངས་པ་དང་། འཆག་པའི་གྲོགས་ཀྱི་དགེ་སློང་དེས་དེ་ལ་སྨྲས་པ། ཚེ་དང་ལྡན་པ་འདི་ལྟ་བུའི་དགེ་སློང་ཚུལ་ཁྲིམས་དང་ལྡན་པ་འདི་ལ་ཅིའི་ཕྱིར་བཟོད་པར་མ་བྱས། རྒན་པ་དེས་འདི་ནི་འདི་ལྟར་སྡིག་པའི་སེམས་
ཁྲོ་བ་ཅན་ཏེ། ལྟོས་ཤིག་དང་ད་ཡང་ཁྱོད་ལ་ཕྱག་བྱེད་ཀྱི་ང་ལ་མི་བྱེད་དོ་ཞེས་སྨྲས་པ་དང་། དེ་བཞིན་དེས་ཕྱག་བྱས་པ་དང་། དེས་སྨྲས་པ། ཚེ་དང་ལྡན་པ་ཁྱོད་ཀྱིས་སྡིག་པའི་སེམས་ཅན་དེ་མཐོང་ངམ། ཚེ་དང་ལྡན་པ་མཐོང་ངོ་། །དེ་ནས་དེས་དེ་ལ་ཚེ་དང་ལྡན་པ་བདག་
གིས་གཞན་དུ་ཐོས་ན་གཞན་དུ་མཐོང་སྟེ། ཁྱོད་ནི་ངོ་ཚ་ཞེས་འགྱོད་པ་ཅན་བསླབ་པ་ལ་མོས་པའོ་ཞེས་ཐོས་ན། ཁྱོད་ཅིའི་ཕྱིར་དེ་ལྟར་མ་ཡིན་ཞེས་སྨྲས་པ་དང་། དེས་བཙུན་པ་བདག་གིས་ཇི་ལྟར་བགྱི། ཚེ་དང་ལྡན་པ་དགེ་སློང་ཚུལ་ཁྲིམས་དང་ལྡན་པ་འདི་ལྟ་བུ་ལ་ཁྱོད་ཀྱིས་
ཅིའི་ཕྱིར་བཟོད་པ་མི་བྱ་ཞེས་སྨྲས་པ་དང་། དེས་ཇི་ལྟར་གྱུར་པ་རྒྱས་པར་སྨྲས་པ་དང་། དེ་འཕྱ་བར་གྱུར་ནས། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་དགེ་སློང་དེ་འཕྱ་བ་ནི་ཡུས་ཀྱིས།
གང་རྣམ་པར་འཁོན་པ་དེ་བཟོད་པར་བྱའོ། །བཅོམ་ལྡན་འདས་ཀྱིས་གང་འཁོན་པ་དེ་བཟོད་པར་བྱའོ་ཞེས་གསུངས་པ་དང་། གཞན་ཞིག་གིས་བཟོད་པར་བྱས་ཀྱང་མ་བཟོད་ནས། བཅོམ་ལྡན་འདས་ཀྱིས་བཀའ་སྩལ་པ། གང་མི་སྤྱོད་པ་དེ་ཉེ་སྤྱོད་དུ་ཕྱིན་པ་དང་ཕྱག་བྱོས་ཤིག །དེས་
ཀྱང་ནད་མེད་ཅིག་ཅེས་སྨྲའམ་ཡང་ན་ཕྱག་བྱོས་ཤིག །དེ་ལྟར་མི་བྱེད་ན་གཉིས་ཀ་ལ་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་འཁོན་པའི་དགེ་སློང་ལ་བཟོད་པར་བྱའོ་ཞེས་གསུངས་པ་དང་། དགེ་སློང་གཉིས་ཤིག་རྣམ་པར་གདོན་མི་ཟ་བའི་གཏམ་སྨྲ་
བ་ལས་འཁྲུགས་པ་དང་། མཚང་འདྲུ་བ་དང་། འཐབ་པ་དང་། རྩོད་པར་གྱུར་ཏེ། དེ་གཉིས་ལས་དགེ་སློང་གཞོན་པས་དགེ་སློང་རྒན་པ་ལ་ཚིག་དྲག་པོ་མི་སྙན་པས་བློང་ཞིང་ཁྲོས་ཏེ་སྨྲས་པ་དང་། རབ་ཏུ་ཁྲོས་ནས་གནས་ཁང་དུ་ཞུགས་ཏེ་སྒོ་བཅད་ནས་དེས་ངན་

དུ་སྨྲས་པའི་ཚིག་དེ་ལྟ་བུ་སྒོམ་ཞིང་འདུག་གོ། །དེའི་བར་དུ་སངས་རྒྱས་བཅོམ་ལྡན་འདས་ཀྱིས་མི་མཁྱེན་པ་དང་། མ་གཟིགས་པ་དང་། མ་ཆུད་པ་དང་། རྣམ་པར་མི་མཁྱེན་པ་མེད་དེ་སངས་རྒྱས་བཅོམ་ལྡན་འདས་དག་ནི་ཆོས་ཉིད་ཀྱིས་ཐུགས་རྗེ་ཆེན་པོ་ཅན་འཇིག་རྟེན་
ལ་ཕན་འདོགས་པ་ལ་ཞུགས་པ། སྲུང་བ་གཅིག་པུ་དཔའ་བ། གཅིག་པུ་ཞི་གནས་དང་ལྷག་མཐོང་ལ་གནས་པ། གདུལ་བའི་དངོས་པོ་གསུམ་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིའི་མཐིལ་ལ་རབ་ཏུ་བརྟན་པ། མི་འཇིགས་པ་
བཞིས་འཇིགས་པ་མེད་པ། ཡན་ལག་ལྔ་རབ་ཏུ་རྣམ་པར་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་དྲུག་ལ་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་
བརྒྱན་པ། ལམ་ཡན་ལག་བརྒྱད་པ་སྟོན་པ། མཐར་གྱིས་གནས་ཤིང་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པར་གྲགས་པ། བརྒྱ་ཕྲག་བཅུ་ལས་དབང་སྒྱུར་བའི་མཆོག་ཏུ་བྱུང་བས་གང་འགྲིབས། གང་
འཕེལ། གང་སྡུག་བསྔལ་དུ་གྱུར། གང་དོག་པར་གྱུར། གང་གནོད་པར་གྱུར། གང་སྡུག་བསྔལ་དང་དོག་པ་དང་གནོད་པར་གྱུར། གང་ངན་སོང་ལ་གཞོལ། གང་ངན་སོང་ལ་འབབ། གང་ངན་སོང་ལ་རབ་ཏུ་བསྟན། གང་ངས་ངན་སོང་ལས་བཏོན་ཏེ་མཐོ་
རིས་སུ་ཐར་པའི་འབྲས་བུ་ལ་སོ་སོར་དགོད་པར་བྱ། གང་དགེ་བའི་རྩ་བ་མ་བསྐྱེད་པ་རྣམས་ནི་བསྐྱེད་པར་བྱ། གང་གིས་བསྐྱེད་པ་རྣམས་ནི་ཡོངས་སུ་སྨིན་པར་བྱ། གང་ཡོངས་སུ་སྨིན་པ་རྣམས་ནི་རྣམ་པར་དགྲོལ་བར་བྱའོ་ཞེས་ཉིན་ལན་གསུམ་མཚན་ལན་གསུམ་
དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཤིང་ཡེ་ཤེས་སྣང་བ་ལ་འཇུག་གོ། །ཡང་གསུངས་པ། ཆུ་སྲིན་གནས་པའི་རྒྱ་མཚོ་ནི། །དུས་ལས་འདའ་བར་འགྱུར་སྲིད་ཀྱི། །གདུལ་བར་བྱ་བའི་བུ་རྣམས་ལ། །སངས་རྒྱས་དུས་འདའ་མི་སྲིད་དོ། །དེ་ནས་

བཅོམ་ལྡན་འདས་གནས་གཞན་ཞིག་ཏུ་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་ལ་སོགས་པ་བྱུང་
སྟེ། ལ་ལ་ནི་འོག་ཏུ་འགྲོའོ། །ལ་ལ་ནི་སྟེང་དུ་འགྲོ་སྟེ། དེ་ལ་གང་འོག་ཏུ་སོང་བ་དེས་ནི་ཡང་འཚོ་བ་དང་། ཐིག་ནག་པོ་དང་། འདུས་པ་དང་། འོ་དོད་འབོད་པ་དང་། འོ་དོད་འབོད་པ་ཆེན་པོ་དང་། གདུང་བ་དང་། རབ་ཏུ་གདུང་བ་དང་། བསྟིར་མེད་པ་དང་། ཆུ་བུར་དང་།
རྒྱུན་དུ་ཆུ་བུར་དང་། ཨ་ཊ་ཊ་དང་། ཧ་ཧ་བ་དང་། ཧུ་ཧུ་བ་དང་། ཨུཏྤལ་དང་། པད་མོ་དང་། པད་མོ་ཆེན་པོ་ལ་སོགས་པའི་སེམས་ཅན་དམྱལ་བར་སོང་སྟེ། གང་ཚ་བའི་སེམས་ཅན་དམྱལ་བ་ལ་དེས་བབ་པ་ནི་བསིལ་བར་གྱུར། གང་གྲང་བའི་སེམས་ཅན་དམྱལ་བ་
དེ་ལ་བབ་པ་ནི་དྲོ་བར་གྱུར་ཏེ། དེས་སེམས་ཅན་དེ་དག་དེ་ལྟ་བུས་གཟིར་བའི་ཁྱད་པར་དེ་དག་བདེ་བར་བྱས་པ་དང་། དེ་དག་འདི་སྙམ་དུ་ཀྱེ་བདག་ཅག་རྣམས་འདི་ནས་ཤི་འཕོས་སམ་འོན་ཏེ་གཞན་དུ་སྐྱེས་ཞེས་བསམས་ན། དེ་དག་ལ་རབ་ཏུ་དད་པ་བསྐྱེད་པའི་ཕྱིར་
བཅོམ་ལྡན་འདས་ཀྱིས་སྤྲུལ་པ་བཏང་ནས་དེ་དག་གིས་སྤྲུལ་པ་མཐོང་བ་དང་། འདི་སྙམ་དུ་ཀྱེ་བདག་ཅག་རྣམས་འདི་ནས་ཤི་འཕོས་པར་གྱུར་པ་ཡང་མེད། གཞན་དུ་སྐྱེས་པ་ཡང་མེད་ཀྱིས། སྔོན་མ་བྱུང་བའི་སེམས་ཅན་འདི་མཐོང་བའི་མཐུས་ན་བདག་ཅག་གཟིར་བའི་
ཁྱད་པར་རྣམས་བདེ་བར་གྱུར་ཏོ་སྙམ་དུ་བསམས་ནས་དེ་དག་སྤྲུལ་པ་ལ་སེམས་མངོན་པར་དགའ་བར་གྱུར་པ་དང་། དམྱལ་བས་གཟིར་བའི་ལས་ཟད་པར་བྱས་ཏེ་གང་དུ་བདེན་པར་གྱུར་པའི་སྣོད་དུ་དེར་ལྷ་དང་མིའི་མཚམས་འཛིན་ཏོ། །གང་སྟེང་དུ་སོང་བ་དེས་ནི་རྒྱལ་ཆེན་
བཞིའི་རིས་ཀྱི་ལྷ་དང་། སུམ་བཅུ་རྩ་གསུམ་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་ལྷ་ཉེ་ཕན་དང་། ཚངས་ཆེན་དང་། ཆུང་སྣང་དང་། ཚད་མེད་སྣང་དང་། ཀུན་སྣང་དང་། དགེ་

བ་དང་། ཚད་མེད་དགེ་བ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། གྱ་ནོམ་སྣང་བ་དང་། འོག་མིན་གྱི་ལྷར་སོང་ནས་མི་རྟག་པ་དང་། སྡུག་བསྔལ་བ་
དང་། སྟོང་པ་ཉིད་དང་། བདག་མེད་པ་རྣམས་བསྒྲགས་ཏེ་ཚིགས་སུ་བཅད་པ་གཉིས་ཀྱང་བརྗོད་དོ། །འབྱུང་བར་བྱ་ཕྱིར་བརྩམ་པར་བྱོས། །སངས་རྒྱས་བསྟན་ལ་བརྩོན་པར་བྱོས། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱོས། །
གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་འབྱིན་པར་འགྱུར། །དེ་ནས་འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བསྐོར་ནས་བཅོམ་ལྡན་འདས་ཀྱི་ཕྱི་བཞིན་དུ་
འབྲང་ངོ་། །དེ་དག་གལ་ཏེ་བཅོམ་ལྡན་འདས་ཀྱིས་འདས་པའི་ལས་ལ་ལུང་སྟོན་བཞེད་པར་གྱུར་ན་བཅོམ་ལྡན་འདས་ཀྱི་རྒྱབ་ཏུ་ནུབ་བོ། །མ་འོངས་པའི་དུས་ལ་ལུང་སྟོན་པར་བཞེད་པར་གྱུར་ན་མདུན་དུ་ནུབ་བོ། །དམྱལ་བར་ལུང་སྟོན་པར་བཞེད་པར་གྱུར་ན་ཞབས་ཀྱི་
མཐིལ་དུ་ནུབ་བོ། །བྱོལ་སོང་དུ་སྐྱེ་བར་ལུང་སྟོན་པར་བཞེད་པར་གྱུར་ན་རྟིང་པར་ནུབ་བོ། །ཡི་དགས་སུ་སྐྱེ་བར་ལུང་སྟོན་པར་བཞེད་པར་གྱུར་ན་ཞབས་ཀྱི་མཐེ་བོར་ནུབ་བོ། །མིར་སྐྱེ་བར་ལུང་སྟོན་པར་བཞེད་པར་གྱུར་ན་པུས་མོར་ནུབ་བོ། །སྟོབས་ཀྱི་འཁོར་ལོས་སྒྱུར་བའི་
རྒྱལ་པོར་ལུང་སྟོན་བཞེད་པར་གྱུར་ན་ཕྱག་གཡོན་པའི་མཐིལ་དུ་ནུབ་བོ། །འཁོར་ལོས་སྒྱུར་བའི་རྒྱལ་པོར་ལུང་སྟོན་བཞེད་པར་གྱུར་ན་ཕྱག་གཡས་པའི་མཐིལ་དུ་ནུབ་བོ། །ལྷར་སྐྱེ་བར་ལུང་སྟོན་བཞེད་པར་གྱུར་ན་ལྟེ་བར་ནུབ་བོ། །ཉན་ཐོས་ཀྱི་བྱང་ཆུབ་ཏུ་ལུང་སྟོན་བཞེད་པར་
གྱུར་ན་ཞལ་དུ་ནུབ་བོ། །རང་བྱང་ཆུབ་ཏུ་ལུང་སྟོན་བཞེད་པར་གྱུར་ན་སྨིན་མཚམས་སུ་ནུབ་བོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་བཞེད་པར་གྱུར་ན་སྤྱི་བོའི་གཙུག་ཏུ་ནུབ་བོ། །དེ་ནས་འོད་ཟེར་དེས་བཅོམ་ལྡན་འདས་ལ་ལན་གསུམ་བསྐོར་བ་བྱས་

ནས་བཅོམ་ལྡན་འདས་ཀྱི་ཞབས་ཀྱི་རྟིང་བར་ནུབ་པ་དང་། དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཞུས་པ། ཇི་ལྟར་སྣང་བར་བྱེད་པ་ཤར་བ་བཞིན། །ཞལ་གྱི་ནང་ནས་བྱུང་བ་མང་པོ་ནི། །ཁ་དོག་རྣམ་པ་སྣ་ཚོགས་སྟོང་
ལྡན་པ། །གང་གིས་ཕྱོགས་བཅུ་ཀུན་ཏུ་སྣང་གྱུར་པའོ། །ཡང་ཚིགས་སུ་བཅད་དེ་གསོལ་པ། རྒོད་པ་ཞུམ་རྒྱགས་སྤངས་ནས་བྲལ་གྱུར་པ། །སྐྱེ་བོ་རྣམས་ཀྱི་རྒྱུར་གྱུར་སངས་རྒྱས་ཏེ། །རྒྱལ་བ་དགྲ་རྒྱལ་དུང་དང་པད་མོ་བཞིན་དཀར་བ། །རྒྱུ་མེད་འཛུམ་པ་ཉེ་བར་
སྟོན་མི་མཛད། །བརྟན་པའི་ཐུགས་མངའ་དེ་དུས་རང་གིས་མཁྱེན་མཛོད་ཅིག །རྒྱལ་བའི་དབང་ལ་ཐོས་འཚལ་ཉན་རྣམས་ལ། །བརྟན་ཞིང་ཐུབ་པའི་ཁྱུ་མཆོག་དམ་པ་ཡིས། །ཐེ་ཚོམ་བྱུང་བ་དགེ་བས་རྣམ་པར་བསོལ། །དོན་མེད་པར་ནི་རྒྱ་མཚོ་རི་རྒྱལ་བསྟན། །རྫོགས་
པའི་སངས་རྒྱས་འཛུམ་པ་མི་སྟོན་ཏེ། །བརྟན་པས་གང་ཕྱིར་འཛུམ་པ་བསྟན་པ་དེ། །སྐྱེ་བོ་མང་པོ་འདི་དག་ཐོས་པར་མོས། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་གང་དགེ་སློང་གཞོན་པ་དེས་དགེ་སློང་ལ་ཚིག་ངན་པས་མཚང་བྲུས་ཤིང་སྨྲས་པས་ཁྲོས་པ་མཐོང་ངམ། བཅོམ་ལྡན་འདས་མཐོང་ངོ་། །དེ་གནས་ཁང་དུ་ཞུགས་ཏེ་སྒོ་
བཅད་ནས་དེའི་ཚིག་ངན་དུ་སྨྲས་པ་དེ་ཕྱི་ཕྱིར་སྒོམ་ཞིང་འདུག་གོ། །དེ་ཁྲོས་པས་ཀུན་ཏུ་ཁེབས་ནས་ཕྱི་ཕྱིར་བསྒོམས་པས་ན་ཞེ་སྡང་གི་ས་བཅུ་རབ་ཏུ་བྱུང་སྟེ། དེ་དུས་འདས་ཏེ་ཤི་འཕོས་ནས་དེའི་གནས་ཁང་དེ་ཉིད་དུ་སྦྲུལ་གདུག་པར་སྐྱེ་བར་འགྱུར་རོ།། །།
འདུལ་བ་གཞུང་དམ་པ། བམ་པོ་སུམ་བཅུ་རྩ་བརྒྱད་པ། དེ་ལྟར་བཅོམ་ལྡན་འདས་ཚེ་དང་ལྡན་པ་ཀུན་དགའ་བོ་དང་ལྷན་ཅིག་གཏམ་གསུང་བའི་བར་དུ་དགེ་སློང་དེ་ཡང་ཚིག་ངན་དུ་སྨྲས་པ་དེ་ལན་མང་དུ་བསྒོམས་ཤིང་ཤིན་ཏུ་ཁྲོ་བས་ཀུན་ཏུ་ཁེབས་ཏེ་མང་དུ་བྱས་

པས་ཞེ་སྡང་གི་ས་བཅུ་པོ་ཐོབ་པས་ན་དེ་འཆི་འཕོས་དུས་འདས་ཏེ་དེའི་གནས་ཁང་ཉིད་དུ་སྦྲུལ་གདུག་པར་སྐྱེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྐྱེས་བུ་གཏི་མུག་ཅན་དེ་ནི་གནས་ཁང་དེ་ཉིད་དུ་སྦྲུལ་གདུག་
པར་སྐྱེས་ཀྱིས་དེར་སོང་ལ་དྲུང་དུ་ཕྱིན་ན་ངའི་ཚིག་གིས་ནད་མེད་ཅིག་ཅེས་བྱོས་ལ། འདི་སྐད་དུ་འདི་ལྟར་ཁྱོད་ངའི་བསྟན་པ་ལ་རབ་ཏུ་བྱུང་སྟེ། དགེ་སྦྱོང་གི་འབྲས་བུ་བཞི་ལས་གང་ཡང་རུང་དགེ་སྦྱོང་གི་འབྲས་བུ་རྟོགས་པར་འགྱུར་བ་ལས་ད་ཁྱོད་ཁྲོས་པའི་དབང་གིས་
ན་འདིར་སྦྲུལ་གདུག་པར་སྐྱེས་ཀྱིས་དགེ་སློང་དེ་ལ་བཟོད་པར་བྱོས་ཤིག །འདི་ལས་ཡང་དུས་འདས་ན་སེམས་ཅན་དམྱལ་བར་སྐྱེས་ས་རེ་ཞེས་སྒོ་ཤིག །བཙུན་པ་བཀའ་བཞིན་འཚལ་ཞེས་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ནས་དགེ་
སློང་དེ་ཁྲིད་དེ་དགེ་སློང་དེའི་གནས་ཁང་དུ་སོང་ནས་སྒོ་ལ་དལ་ནས་བགས་ཀྱིས་བརྡུངས་ཏེ་སྨྲས་པ། བཞིན་བཟངས་ཁྱོད་ལ་བཅོམ་ལྡན་འདས་ནད་མེད་ཅིག་ཅེས་གསུངས་ཏེ། འདི་ལྟར་ཁྱོད་ངའི་བསྟན་པ་ལ་རབ་ཏུ་བྱུང་ལ་དགེ་སྦྱོང་གི་འབྲས་བུ་བཞི་ལས་གང་
ཡང་རུང་དགེ་སྦྱོང་གི་འབྲས་བུ་རྟོགས་པར་འགྱུར་བ་ལས་ད་ཁྱོད་ཁྲོས་པའི་དབང་གིས་ན་འདིར་སྦྲུལ་གདུག་པར་སྐྱེས་ཀྱིས་དགེ་སློང་འདི་ལ་བཟོད་པར་བྱོས་ཤིག །འདི་ནས་དུས་བྱས་ནས་ཀྱང་སེམས་ཅན་དམྱལ་བར་སྐྱེས་ས་རེ་ཞེས་གསུང་ངོ་། །དེ་ནས་དེ་ཉིད་དུ་
ཁྲོས་པའི་དུག་བཏང་ནས་གནས་ཁང་ནས་ཕྱིར་མ་བྱུང་ཞིང་འདུག་པ་དང་། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་མཽད་གལ་གྱི་བུ་ཚུར་ཤོག །ཁྱོད་ཀྱིས་སྦྲུལ་གདུག་པ་གང་ན་བ་དེར་སོང་ལ་ཕྱིན་པ་དང་། འདི་སྐད་དུ་དགེ་སློང་དེ་
ལ་བཟོད་པར་བྱོས་ཤིག་ཅེས་བཀའ་སྩལ་པ་དང་། དེས་ཀྱང་དེར་སོང་སྟེ་སྨྲས་པ་དང་། དེ་ལྡེ་མིག་ཀྱོག་པོའི་བུ་ག་ནས་མགོ་ཙམ་བསྟན་ཏེ་ཕྱིར་ནང་དུ་ཞུགས་སོ། །དགེ་སློང་གིས་དགེ་སློང་ལ་སེམས་ཀྱིས་གནོད་པར་བྱས་པས་རང་གི་གནས་ཁང་དུ་སྦྲུལ་དུ་སྐྱེས་

སོ་ཞེས་སྒྲ་དེ་ལྟ་བུ་མཉན་དུ་ཡོད་པར་ཀུན་དུ་གྲགས་པ་དང་། ཀོ་ས་ལའི་རྒྱལ་པོ་གསལ་རྒྱལ་ནང་གི་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། གཞོངས་སུ་བཅས་པས་གང་སྒྲ་དེ་ཐོས་པ་དང་ལྟད་མོ་ལྟ་འདོད་པས་དེའི་ཡིད་བསྐྱོད་
ནས་ཛེ་ཏའི་ཚལ་དུ་དོང་ངོ་། །དེ་ནས་བཅོམ་ལྡན་འདས་ཀྱང་ཉན་ཐོས་ཆེན་པོ་ཀུན་ཤེས་ཀཽཎྜི་ནྱ་དང་། རླངས་པ་དང་། མིང་ཆེན་དང་། མ་འགགས་པ་དང་། ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། འོད་སྣང་དང་། ཀུན་དགའ་བོ་དང་། ནམ་གྲུ་ལ་སོགས་པས་བསྐོར་ཏེ་
རྒྱལ་པོ་གསལ་རྒྱལ་དང་དེའི་གནས་ཁང་དུ་བཞུད་ནས་བཅོམ་ལྡན་འདས་ཀྱིས་དེ་ཉིད་ཀྱི་སྐད་དུ་གསུངས་པ་དང་། དེ་རྟབས་བཞིན་དུ་གནས་ཁང་ནས་ཕྱིར་བྱུང་ངོ་། །དེ་ནས་བཅོམ་ལྡན་འདས་ཀྱིས་དེ་ཁྲིད་ནས་གཙུག་ལག་ཁང་ནས་ཕྱིར་ཕྱུང་སྟེ་ཛེ་ཏའི་ཚལ་གྱི་སྒོར་འཁོར་བརྒྱ་ཕྲག་
དུ་མ་དང་། དགེ་སློང་གི་དགེ་འདུན་གྱི་མདུན་ན་གདན་བཏིང་བ་དེ་ལ་བཞུགས་པ་དང་། དེ་ནས་སྦྲུལ་གདུག་པ་དེ་ཕན་ཚུན་ཀུན་དུ་སྐྱེ་བོ་མང་པོ་ལ་བལྟས་ཏེ་སྐྲག་ནས་བཅོམ་ལྡན་འདས་ཀྱི་གདན་ལོགས་སུ་རྒན་རིམས་ཀྱི་མཐར་བཅོམ་ལྡན་འདས་ལ་ལྟ་བཞིན་དུ་འཁྱིལ་ཏེ་
འདུག་གོ། །བཅོམ་ལྡན་འདས་ཀྱིས་དེ་ལ་བཀའ་སྩལ་པ། བཞིན་བཟངས་འདི་ལྟར་ཁྱོད་ངའི་བསྟན་པ་ལ་རབ་ཏུ་བྱུང་ནས་དགེ་སྦྱོང་གི་འབྲས་བུ་བཞི་ལས་གང་ཡང་རུང་དགེ་སྦྱོང་གི་འབྲས་བུ་རྟོགས་པར་འགྱུར་བ་ལས་ད་ཁྱོད་འདིར་ཤིན་ཏུ་ཁྲོ་བས་ཀུན་ཏུ་ཁེབས་ནས་ལན་མང་དུ་
བསྒོམས་ལ་དགེ་སློང་ལ་ཡང་སེམས་གདུག་པ་བསྐྱེད་པས་ད་ལྟར་སྦྲུལ་གདུག་པར་སྐྱེས་ཏེ། འཚེ་བ་དང་གསོད་པ་ལ་ཆགས་ཤིང་གཞན་གྱི་སྲོག་འཕྲོག་ཅིང་གཞན་འཚོ་བ་དང་ཕྲལ་ནས་འཚོ་བར་བྱེད་དེ་འདི་ནས་ཤི་འཕོས་ན་རྒྱུད་གང་དུ་སྐྱེ། གང་དུ་སྐྱེ་བར་འགྱུར། གང་དུ་
མངོན་པར་སྐྱེ་བར་འགྱུར། བཅོམ་ལྡན་འདས་ཀྱིས་གང་གི་ཚེ་དེའི་རིགས་དྲན་པར་བྱས་པ་དེའི་ཚེ་ངུ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་གསུངས་པ། ཁྱོད་ནི་བྱོལ་སོང་སྐྱེ་གནས་གྱུར། །མི་དལ་བར་ཡང་སྐྱེས་གྱུར་ན། །དོན་མེད་པར་

ནི་ཅི་ཕྱིར་ངུ་། །ད་ནི་ཅི་ཞིག་བྱར་ཡོད་ཀྱིས། །རྒྱལ་བ་ཐུགས་རྗེ་ལྡན་མངའ་ལ། །སེམས་ཀྱིས་ལེགས་པར་དད་སྐྱེས་དང་། །བྱོལ་སོང་སྐྱེ་གནས་འདི་སྤངས་ཏེ། །དེ་ནས་མཐོ་རིས་འགྲོ་བར་འགྱུར། །སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་ཆུད་མི་ཟོས་པས་
དེའི་ཀུན་དུ་གནས་པ་དེ་དང་བྲལ་བར་གྱུར་ཏེ། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། ཚུར་ཤོག་དགེ་སློང་ཁྱོད་ཀྱིས་སྦྲུལ་གདུག་པ་དེ་ལ་བཟོད་པ་བྱོས་ཤིག །བཅོམ་ལྡན་འདས་བདག་གིས་ཇི་ལྟར་བཟོད་པར་བགྱི། ཅི་དེའི་རྐང་པ་ལ་གཏུག་པར་
བགྱིའམ་ཞེས་གསོལ་པ་དང་། བཅོམ་ལྡན་འདས་ཀྱིས་དེ་ལ་ཇི་ལྟར་སྔོན་གྱི་དགེ་སློང་ཡིན་པར་མངོན་དུ་བྱས་ཏེ་ཐེ་ཚོམ་དུ་མི་བྱ་བར་བྱ། གཏུག་པར་བྱའོ་ཞེས་བཀའ་སྩལ་པ་དང་། སྟོན་པའི་བཀའ་བཞིན་དེས་རྐང་པ་ལ་གཏུགས་པ་དང་། དེས་དེའི་མགོ་བོ་ལ་རེག་པར་བྱས་
པ་དང་། དེ་གཉིས་སྐྱེ་བོ་མང་པོས་མཐོང་བ་དང་རབ་ཏུ་ངོ་མཚར་སྐྱེས་ནས་བཅོམ་ལྡན་འདས་ཀྱིས་སྐྱེ་བོ་མང་པོ་དེ་དག་ལ་དེའི་ཕྱིར་དེ་ལྟ་བུའི་ཚུལ་དུ་ཆོས་བཤད་དེ། དེ་ཐོས་པས་ན་སྲོག་ཆགས་བརྒྱ་སྟོང་དུ་མ་རྣམས་ཀྱིས་ནི་ཁྱད་པར་ཆེན་པོ་རྟོགས་པར་གྱུར་ཏོ། །སྦྲུལ་གདུག་
པ་དེ་ཡང་བཅོམ་ལྡན་འདས་ལ་སེམས་མངོན་པར་དད་ནས་དེ་དུས་འདས་པ་དང་སུམ་བཅུ་རྩ་གསུམ་གྱི་ལྷའི་གནས་བཟང་པོར་སྐྱེས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དེ་བས་ན་དགེ་སློང་རྣམས་འདི་དང་གཞན་དག་ཀྱང་ཁྲོ་བས་ཀུན་
ཏུ་ཁེབས་ན་ཉེས་པའི་དམིགས་སུ་འགྱུར་ཏེ། དེ་བས་ན་དགེ་སློང་གིས་ཁྲོས་པའི་དགེ་སློང་ལ་ཇི་ལྟར་དེའི་ཁྲོས་པས་ཁེབས་པར་གནས་པ། རྣམ་པར་བྱང་བར་གནས་པ་དེ་ལྟ་དེ་ལྟ་བུར་གསོལ་ལོ། །དེས་ཀྱང་སེམས་ཀྱིས་བཟོད་པར་བྱོས་ཤིག །གང་སྔ་དྲོ་ཁྲོས་
པ་ལ་དེས་ཕྱི་དྲོ་བཟོད་པར་གསོལ་ཅིག །གང་ཕྱི་དྲོ་ཁྲོས་པ་ལ་ནི་དེས་ནུབ་མོའོ། །གང་ནུབ་མོ་ཁྲོས་པ་ལ་ནི་དེས་ཕྱི་དེ་ཉིན་མོ་བཟོད་པར་གསོལ་ཅིག་ཅེས་གསུངས་ནས། བཅོམ་ལྡན་འདས་གདན་ལས་བཞེངས་ཏེ་ནང་དུ་ཡང་དག་འཇོག་ལ་འཇུག་པའི་ཕྱིར་གཙུག་

ལག་ཁང་དུ་གཤེགས་སོ། །ཆོས་ཉིད་ཀྱིས་ལྷའི་བུའམ་ལྷའི་བུ་མོ་ཡང་རུང་སྐྱེས་ནས་རིང་པོ་མ་ལོན་པར་གང་ནས་ཤི་འཕོས་གང་དུ་སྐྱེས། ལས་གང་ཡིན་ཞེས་སེམས་པ་རྣམ་པ་འདི་གསུམ་སྐྱེས་ཏེ། སྦྲུལ་གདུག་པ་ལས་ཤི་འཕོས་ནས། སུམ་
བཅུ་རྩ་གསུམ་གྱི་ལྷའི་རིས་བཟང་པོར་སྐྱེས་ཏེ་བཅོམ་ལྡན་འདས་ལ་སེམས་མངོན་དུ་དད་པ་བསྐྱེད་པར་མཐོང་ངོ་། །དེ་ནས་སྔོན་གྱི་སྦྲུལ་གདུག་པ་ལྷའི་བུ་དེས་འདི་སྙམ་དུ་བདག་འདིར་ཞག་ལོན་ཏེ། བཅོམ་ལྡན་འདས་ལྟར་འགྲོ་བར་མི་རིགས་ཀྱི། བདག་འདིར་ཞག་མ་ལོན་
པར་བཅོམ་ལྡན་འདས་ལ་ལྟར་འགྲོའོ་སྙམ་དུ་བསམས་ནས། དེ་ནས་ལྷའི་བུ་སྔོན་སྦྲུལ་གདུག་པ་དེ་དྲི་མ་མེད་པའི་རྣ་ཚ་འཕྱང་བཞིན་དུ་ཐོགས་ཤིང་དོ་ཤལ་དང་། སེ་མོ་དོས་ལུས་བརྒྱན་ཏེ། དེ་ཉིད་ཀྱི་ནུབ་མོ་ལྷའི་མེ་ཏོག་ཨུཏྤལ་དང་། པད་མོ་དང་། ཀུ་མུ་ད་དང་། པུཎྜ་
རཱི་ཀ་དང་། མན་དཱ་ར་བ་ལ་སོགས་པས་པང་བ་བཀང་སྟེ་སྣང་བ་ཆེན་པོས་ཛེ་ཏའི་ཚལ་ཐམས་ཅད་དུ་སྣང་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ་ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་ཀྱིས་དེའི་བསམ་པ་
དང་། བག་ལ་ཉལ་བ་དང་། ཁམས་དང་། རང་བཞིན་མཁྱེན་ནས་དེ་འདྲ་བའི་འཕགས་པའི་བདེན་པ་བཞི་ཡང་དག་པར་རྟོགས་པར་འགྱུར་བའི་ཆོས་བསྟན་ནས་ལྷའི་བུ་སྔོན་གྱི་སྦྲུལ་གདུག་པ་དེས་ཐོས་པ་དང་། འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་ཡེ་ཤེས་ཀྱི་
རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེས་བདེན་པ་མཐོང་བས་དགའ་བའི་ཚིག་གསུམ་སྨྲས་ཏེ། བཙུན་པས་ཕན་བཏགས་པ་འདི་ལྟ་བུ་ནི་མས་ཀྱང་མ་བགྱིས། ཕས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷས་ཀྱང་མ་
བགྱིས། སྡུག་པས་ཀྱང་མ་བགྱིས། བདག་གི་གཉེན་མང་པོས་ཀྱང་མ་བགྱིས། སྔོན་གྱི་ཕ་མེས་རྣམས་ཀྱིས་ཀྱང་མ་བགྱིས། དགེ་སྦྱོང་དང་བྲམ་ཟེས་ཀྱང་མ་བགྱིས་ཏེ། བཅོམ་ལྡན་འདས་ཀྱིས་བདག་གི་ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་

ལས་ནི་བརྒལ། ངན་སོང་གི་སྒོ་ནི་བཅད། མཐོ་རིས་དང་ཐར་པའི་སྒོ་ནི་ཕྱེ་ནས་ལྷ་དང་མིའི་གནས་སུ་བཞག་གོ། །ཁྱོད་མཐུས་ཤིན་ཏུ་མི་བཟད་ངན་སོང་གི། །ཉེས་པ་མང་དུ་ལྡན་པའི་ལམ་རྣམས་བཅད། །མཐོ་རིས་འགྲོ་བའི་ལམ་ཕྱིར་བསོད་ནམས་མཆོག །
མྱ་ངན་འདའ་ལམ་བདག་གིས་དེ་རིང་ཐོབ། །ཁྱོད་ལ་བརྟེན་པས་ཉེས་པ་མེད་པ་ཡི། །བདག་དེང་ཤིན་ཏུ་གཙང་བ་རྣམ་དག་མིག །འཕགས་པའི་ཡིད་དུ་འོང་བའི་ཞི་གནས་ཐོབ། །བདག་གིས་སྡུག་བསྔལ་རྒྱ་མཚོ་ཕ་རོལ་རྒལ། །སྐྱེ་བོ་ལྷ་དང་ལྷ་མིན་མི་ཡིས་མཆོད། །
སྐྱེ་རྒ་ན་དང་འཆི་ལས་རྣམ་པར་བྲལ། །སྲིད་པ་སྟོང་དུའང་མཐོང་བར་ཤིན་ཏུ་དཀའ། །ཐུབ་ཁྱོད་དེང་བདག་མཐོང་བས་འབྲས་བུར་བཅས། །དེ་ནས་སེ་མོ་དོ་ནི་འཕྱང་བཞིན་དུ། །ཞབས་གཉིས་ལ་ནི་ཕྱག་བྱས་དགའ་བ་སྐྱེས། །དགྲ་ཐུལ་དེ་ལ་གཡས་སུ་བསྐོར་ནས་ནི། །ལྷ་ཡི་
འཇིག་རྟེན་ལྷ་ཡི་ཡུལ་དེར་སོང་། །དེ་ནས་ལྷའི་བུ་སྔོན་སྦྲུལ་གདུག་པ་དེ་ཚོང་པ་ཁེ་ཐོབ་པ་ལྟར། རྣ་ཆུན་པ་ལོ་ལེགས་པ་ལྟར། དཔའ་བོ་གཡུལ་ལས་རྒྱལ་བ་ལྟར། ནད་པ་ནད་ཐམས་ཅད་ལས་ཐར་བ་ལྟར། ཇི་ལྟ་བུའི་ལོངས་སྤྱོད་དང་། བཅོམ་ལྡན་འདས་ཀྱི་དྲུང་དུ་འོངས་
པ་དེ་ལྟ་བུའི་ལོངས་སྤྱོད་དང་། རང་གི་གནས་སུ་སོང་བ་དང་། དགེ་སློང་དག་སྲོད་དང་ཐོ་རངས་ལ་མི་ཉལ་བར་ཐུབ་པར་བརྩོན་པར་སྤྱོད་པ་རྣམས་ཀྱིས་མཐོང་བ་བཅོམ་ལྡན་འདས་ཀྱི་དྲུང་ན་རྒྱ་ཆེར་སྣང་བ་མཐོང་ནས་ཐེ་ཚོམ་དུ་གྱུར་ཏེ། བཅོམ་ལྡན་འདས་ལ་བཅོམ་ལྡན་
འདས་ཅི་མདང་མཚན་མོ་བཅོམ་ལྡན་འདས་ལ་ཚངས་པ་འཁོར་གྱི་བདག་པོ་ལྟར་མཆིས་སམ། ལྷའི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དག་བལྟ་བའི་ཕྱིར་མཆིས་སམ་ཞེས་ཞུས་པ་དང་། དགེ་སློང་རྣམས་ཚངས་པའི་འཁོར་གྱི་བདག་པོ་ཡང་མ་ཡིན། ལྷའི་
དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ལ་སོགས་པས་ང་ལ་བལྟ་བའི་ཕྱིར་འོངས་པ་ཡང་མ་ཡིན་གྱི། གང་སྦྲུལ་གདུག་པ་དགེ་སློང་གིས་བཟོད་པར་བྱས་པ་དེ་ང་ལ་སེམས་མངོན་དུ་དད་ནས་དུས་ལས་འདས་པ་དང་། སུམ་བཅུ་རྩ་གསུམ་རིས་ཀྱི་ལྷའི་

གནས་བཟར་པོར་སྐྱེས་ནས་དེ་འདི་ལྟར་མདང་ངའི་དྲུང་དུ་འོངས་ཏེ་ངས་དེ་ལ་ཆོས་བསྟན་པ་དང་། བདེན་པ་མཐོང་ནས་རང་གི་གནས་སུ་སོང་ངོ་། །དེ་བས་ན་དགེ་སློང་རྣམས་ཀྱིས་འདི་ལྟར་བསླབ་པར་བྱ་སྟེ། གང་གིས་བཟོད་པར་བྱ་བ་དང་། བཟོད་
པའི་ཡོན་ཏན་བརྗོད་པར་བྱ་བ་དེ་ལྟར་དགེ་སློང་དག་ཁྱེད་ཀྱིས་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་ཡིད་མགུ་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །གླེང་གཞི་ནི་མཉན་དུ་ཡོད་པ་ན་སྟེ། བཅོམ་
ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བསྙེན་པར་རྫོགས་པར་བགྱིད་ན་ཚེ་དང་ལྡན་པ་རྣམས་བདག་ལ་བསྙེན་པར་རྫོགས་པར་མ་བྱེད་ཅིག་ཅེས་མཆི་བཞིན་དགེ་སློང་རྣམས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་
པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་རྫོགས་པ་ཞེས་མི་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པར་འགྱུར་རོ། །ཨུ་པཱ་ལི་དེ་ཅིའི་ཕྱིར་ཞེ་ན། བསྙེན་པར་རྫོགས་པ་ཉིད་ཀྱང་བསླབ་པ་འབུལ་ན་བསྙེན་པར་མ་རྫོགས་ཞེས་བྱ་ན་
བསྙེན་པར་རྫོགས་པར་བྱེད་པའི་ཚེ་ལྟ་ཅི་སྨོས། ཡང་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཅོམ་ལྡན་འདས་ཀྱིས་དགེ་ཚུལ་ཕ་རྣམས་ལོ་ཉི་ཤུ་ལོན་ནས་བསྙེན་པར་རྫོགས་པར་བྱོས་ཤིག་ཅེས་གསུངས་ན། དགེ་ཚུལ་ཕ་གཞན་དག་བདག་གི་ལོ་
གྲངས་ནི་མ་འཚལ། དེ་ལུས་བོང་ནི་ཆེ་སྟེ། དེ་དགེ་སློང་རྣམས་ཀྱིས་ལོ་གྲངས་མ་རྟོགས་པས་ཐེ་ཚོམ་སྐྱེས་ཏེ་བསྙེན་པར་རྫོགས་པར་མི་བགྱིད་ན་དེ་དག་ལ་ཇི་ལྟར་ནན་ཏན་བགྱི་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་དེ་ལྟ་བུ་ནི་མཚན་ལས་
སོ་སོར་རྟོགས་ལ་བསྙེན་པར་རྫོགས་པར་བྱོས་ཤིག །དེ་ལ་ཐེ་ཚོམ་དུ་མ་བྱེད་ཅིག །བཅོམ་ལྡན་འདས་ཀྱིས་དེ་ལྟར་མཚན་ལས་རྟོགས་ལ་བསྙེན་པར་རྫོགས་པར་གྱིས་ཤིག་ཅེས་གསུངས་པ་དང་། དགེ་སློང་རྣམས་ཀྱིས་དེ་གཅེར་བུར་ཕྱུང་སྟེ་མཚན་རྟོག་པ་ལ་ཞུགས་

པ་དང་། དེ་ཤིན་ཏུ་ངོ་ཚ་ནས་བཅོམ་ལྡན་འདས་ཀྱིས་བཀའ་སྩལ་པ། གཅེར་བུར་མ་དབྱུང་བར་བ་སོའམ་གོས་ཀྱི་གདང་ལ་ལྷུང་བཟེད་དམ་ཆོས་གོས་ཀྱི་སྣོད་ཞོག་ལ་འདི་ཕོབ་ཤིག་ཅེས་སྨྲོས་ལ། དེ་ནི་མཆན་ཁུང་དང་མཆན་ལ་རྟོགས་ཏེ་དེ་སྟེ་ཡོད་ན་བསྙེན་པར་རྫོགས་
པར་བྱའོ། །དེ་སྟེ་མེད་ན་བསྙེན་པར་རྫོགས་པར་མི་བྱའོ། །ཡང་ཞུས་པ། བཙུན་པ་དགེ་སློང་རྣམས་ཀྱིས་དགེ་སློང་ལ་དགེ་སློང་མའི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་
བསྙེན་པར་རྫོགས་པ་ཞེས་ནི་བྱ་སྟེ་བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པར་འགྱུར་རོ། །བཙུན་པ་དགེ་སློང་མ་ལ་དགེ་སློང་དང་། དགེ་སློང་མ་རྣམས་ཀྱིས་དགེ་སློང་གི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ་
བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། དགེ་འདུན་གཉི་ག་ཡང་འདས་པ་དང་བཅས་པར་འགྱུར་རོ། །རྐྱང་པའི་སྒོ་དང་པོའི་མདོའི་ཚིགས་སུ་བཅད་པ་ཐོག་མའོ།། །།མདོར་ན། གསིང་མ་གྲོང་དང་བསྡུས་པ་དང་། །སེམས་
བསྐྱེད་པས་ནི་གསོ་སྦྱིན་དང་། །གསད་པ་གསུམ་ཡང་དེ་བཞིན་ཏེ། །རྣམ་འབྱེད་དགེ་འདུན་ལྷག་མའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་ཅིག་འགྲོན་པ་མང་པོ་
དང་ལྷན་ཅིག་ལྗོངས་སྤྱོད་དུ་དོང་བ་དང་། དེ་དག་དེའི་ཚེ་གསོ་སྦྱིན་ལ་བབ་ནས་དེ་དག་གིས་ས་གསིང་མའི་ཕྱོགས་ཤིག་མཐོང་ནས་དེ་དག་གིས་སྨྲས་པ། ཚེ་དང་ལྡན་པ་དག་ཚུར་ཤེག །ས་གསིང་མའི་ཕྱོགས་ཕ་བི་ལ་གསོ་སྦྱིན་བྱའོ་ཞེས་དེར་དེ་དག་གསོ་སྦྱིན་བྱེད་པ་
ལ་ཞུགས་པ་དང་། འགྲོན་པ་མང་པོ་དག་འདས་ནས་དེ་དག་ཀྱང་ཕྱི་བཞིན་འདོང་བ་ལས་བར་དུ་རྐུན་པོས་བཅོམ་སྟེ་གཙུག་ལག་ཁང་དུ་ཕྱིན་པ་དང་། དགེ་སློང་རྣམས་ཀྱིས་མཐོང་སྟེ་བདེ་བར་འོངས་སམ། ཚེ་དང་ལྡན་པ་དག་བདེ་བར་འོངས་སམ། ཅི་བདེ་བར་སྤྱད་དམ་

ཞེས་སྨྲས་པ་དང་། བདེ་བར་ག་ལ་སྤྱད། ཅི་ཉེས། བདག་ཅག་ནི་རྐུན་པོས་བཅོམ་མོ། །དེ་ལྟ་བུར་གྱུར་པ་དགེ་སློང་རྣམས་ལ་སྨྲས་པ་དང་། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་
པ། གསིང་མ་ལ་ཆགས་པའི་ཕྱིར་གསོ་སྦྱིན་མ་བྱེད་ཅིག །བཅོམ་ལྡན་འདས་ཀྱིས་གྲོང་དང་ཉེ་བའི་འཁོར་དུ་གསོ་སྦྱིན་བྱོས་ཤིག་ཅེས་གསུངས་པ་དང་། དེ་ལས་དགེ་སློང་ཕྱེད་ནི་གྲོང་དུ་ཞུགས་ཕྱེད་ནི་ཕྱི་རོལ་དུ་འཁོད་པས་དེ་དག་མ་འདུས་པར་གྱུར་ནས་གསོ་སྦྱིན་མ་
བྱས་ཏེ། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་གྲོང་ན་གནས་པ་རྣམས་ནི་གྲོང་དུ་གསོ་སྦྱིན་བྱོས་ཤིག །དེ་བཞིན་དུ་དགེ་སློང་རྣམས་གསོ་སྦྱིན་བྱ་སྟེ་གསོ་སྦྱིན་ལ་མ་སྡོད་ཅིག །སྡོད་
ན་འདས་པ་དང་བཅས་པར་འགྱུར་རོ། །དགེ་སློང་དག་ཅིག་ཚོང་པའི་འགྲོན་པ་མང་པོ་དང་ལྷན་ཅིག་ཏུ་ལམ་དུ་ཞུགས་པ་དང་། དགེ་སློང་གིས་ཚོང་པ་ལ་བཞིན་བཟངས་བདག་ཅག་གསོ་སྦྱིན་བྱེད་ཀྱིས་དེའི་བར་དུ་སྐད་ཅིག་སྡོད་ཅིག་ཅེས་སྨྲས་པ་དང་། དེ་དག་གིས་འཕགས་
པ་རྣམས་འདི་ཕྱོགས་ན་རྐུན་པོས་འཇིགས་ཀྱིས་ཕྱི་བཞིན་སྤྱོན་ཅིག་བསྡད་དོ་ཞེས་སྨྲས་པ་དང་། དེར་སྡོད་གྲང་དེར་སྡོད་གྲང་སྙམ་ནས་དགེ་སློང་རྣམས་ཕྱི་བཞིན་དུ་འབྲང་ཞིང་དེ་དག་དོང་བ་ལས་ནམ་ནངས་སོ། །དགེ་སློང་རྣམས་ཀྱིས་དེ་ལྟར་གྱུར་པ་བཅོམ་ལྡན་འདས་ལ་
གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་གསོ་སྦྱིན་གྱི་ཚེ་གསོ་སྦྱིན་མ་བྱས་པར་མ་འགྲོ་ཤིག །ཡང་ན་འགྲོ་བཞིན་དུ་གསོ་སྦྱིན་བྱོས་ཤིག །དགེ་སློང་དག་གིས་འགྲོ་བཞིན་དུ་གསོ་སྦྱིན་བྱེད་པ་ལ་ཞུགས་པ་དང་། ཚོང་པ་རྣམས་ཀྱིས་
འཕགས་པ་བདག་ཅག་ནི་རྐུན་པོས་འཇིགས་པས་ཅང་མི་སྨྲ་བར་འགྲོ་ན་ཁྱེད་ཅིའི་ཕྱིར་ཅ་ཅོ་བྱེད་ཅེས་སྨྲས་ནས། དེ་ལྟར་གྱུར་པ་དགེ་སློང་དེ་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གསོ་སྦྱིན་རྒྱས་པར་མ་བྱེད་པར་

མདོར་བྱོས་ཤིག །དགེ་སློང་རྣམས་ཀྱིས་མདོར་བྱེད་པ་ལ་ཞུགས་པ་དང་། འོན་ཀྱང་ཚོང་པ་དེ་དག་གིས་དཔྱས་ནས། བཅོམ་ལྡན་འདས་ཀྱིས་བཀའ་སྩལ་པ། སེམས་བསྐྱེད་པ་ཙམ་གྱིས་བྱིན་གྱིས་རློབས་ཤིག །དེ་བས་ན་དགེ་སློང་རྣམས་ཆོས་གོས་བྱིན་གྱིས་བརླབ་
པ་དང་། གོས་བསྔོ་བ་དང་། གསོ་སྦྱིན་དང་། ཚུལ་ནས་བྱུང་བ་འདི་བཞི་ནི་སེམས་བསྐྱེད་པ་ཙམ་གྱིས་འགྲུབ་བོ། །དེ་ཡང་འདི་ལྟར་བྱ་སྟེ། སངས་རྒྱས་ལ་དམིགས་པའི་དྲན་པ་ཉེ་བར་བཞག་སྟེ། སེམས་བསྐྱེད་པར་བྱོས་ལ་གསོ་སྦྱིན་བྱིན་གྱིས་རློབས་ཤིག །དེ་ནས་
ཚིག་ཏུ་ཡང་བརྗོད་པར་བྱ་སྟེ། དེང་དགེ་འདུན་རྣམས་ཀྱི་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བྱ་བའི་ཡང་བཅོ་ལྔའི་གསོ་སྦྱིན་ཏེ། བདག་མིང་འདི་ཞེས་བྱ་བའི་བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་རང་གིས་བརྗོད་དེ་གསོ་སྦྱིན་བྱིན་གྱིས་
བརླབས་ལ། གང་གི་ཚེ་དགེ་འདུན་འདུས་པ་ཕྲད་པ་དེའི་ཚེ་དགེ་འདུན་དང་ལྷན་ཅིག་ཏུ་གསོ་སྦྱིན་བྱའོ། །དེ་ལྟར་ལན་གཉིས་དེ་ལྟར་ལན་གསུམ་དུ་བརྗོད་དེ་གསོ་སྦྱིན་དེ་ལྟར་བྱའོ། །གསོ་སྦྱིན་མི་བྱ་བ་ནི་མ་ཡིན་ནོ། །མ་བྱས་ན་འདས་པ་དང་བཅས་པར་འགྱུར་རོ། །
གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་ཅིག་གཞོངས་སྤྱད་པ་སྤྱོད་པ་ན་རྐུན་པོས་ཟིན་ནས་དེ་དག་གིས་ཀྱེ་བསམ་རླག་ཏུ་འཁོད་དེ་ཅི་བྱེད་ཀྱིས། མགོ་རེག་འདི་དག་གསད་དོ་ཞེས་སྨྲས་པ་དང་། དགེ་སློང་དག་གིས་བསམས་པ། བདག་ཅག་ནི་གསད་པར་
ཆད་པར་ལྟ་སྙམ་ནས་དེ་དག་གིས་རྐུན་པོ་ལ་ཀྱེ་ཅིའི་ཕྱིར་ངེད་གསད་ཅེས་སྨྲས་པ་དང་། རྐུན་པོས་སྨྲས་པ། ཁྱེད་ལ་རྒྱལ་པོ་དང་། ཕྱུག་པོ་དང་། ཚོང་དཔོན་དང་། དེད་དཔོན་རྣམས་རབ་ཏུ་དད་པས་ཁྱེད་ཀྱིས་དེ་དག་ལ་སྨྲས་པ་དང་། དེ་དག་གིས་ངེད་ལ་གནོད་པར་བྱེད་དོ་ཞེས་
སྨྲས་པ་དང་། དེ་ན་དགེ་སློང་གཞོན་ནུ་ཅིག་གིས་བརྫུན་དུ་སྨྲས་པ་ལས་བྱུང་བའི་ཉེས་པ་ལྟུང་བ་བྱུང་སྟེ། དེས་ཚེ་དང་ལྡན་པ་རྣམས་བདག་གིས་ལྟུང་བ་བྱུང་བ་བཤགས་པ་དེའི་བར་དུ་བསྡད་པར་ཅི་གནང་ཞེས་སྨྲས་པ་དང་། དེ་དག་གིས་དེ་ལྟར་ན་གནས་འདི་ཉིད་དུ་ཤོགས་

ཤིག་ཅེས་སྨྲས་པ་དང་། དེས་དགེ་སློང་གི་མདུན་དུ་འཆགས་པ་ལ་ཞུགས་ཏེ། དགོངས་ཤིག་ཚེ་དང་ལྡན་པ་རྣམས། བདག་མིང་འདི་ཞེས་བགྱི་བ་ཤེས་བཞིན་གྱི་བརྫུན་སྨྲས་པ་ལས་བྱུང་བའི་ལྟུང་བའི་ཉེས་པ་མཆིས་ཏེ། བདག་གིས་ཚེ་དང་ལྡན་པའི་
མདུན་དུ་བཤགས་སོ། །མཐོལ་ལོ། །མི་འཆབ་བོ། །བཤགས་ཤིང་མཐོལ་ན་བདག་ལ་བདེ་བར་འགྱུར་གྱི། མ་བཤགས་མ་མཐོལ་ན་ནི་མ་ཡིན་ནོ། །དེས་སྨྲས་པ། ཉེ་བར་མཐོང་ངམ། མཐོང་ངོ་། །ཕྱིན་ཆད་སྡོམ་པར་དམ་འཆའམ་དམ་འཆའོ། །དེ་ལྟར་ལན་
གཉིས་ལན་གསུམ་དུ་སྨྲས་པ་དང་། རྐུན་པོ་དེ་ཐམས་ཅད་ཀྱིས་ཐོས་ནས་དེ་དག་གིས་སྨྲས་པ། འཕགས་པ་ཁྱེད་རྣམས་བརྫུན་མི་སྨྲའམ། བཞིན་བཟངས་མི་སྨྲའོ་ཞེས་སྨྲས་པ་དང་། དེ་དག་མངོན་དུ་དད་ནས་འཕགས་པ་རྣམས་དེ་ལྟར་ན། དེང་ལ་སུ་ལ་ཡང་མ་སྨྲ་ཤིག་
ཅེས་སྨྲས་པ་དང་། ནད་མེད་ཅིག་སུ་ལ་ཡང་མི་སྨྲའོ་ཞེས་སྨྲས་ཏེ་དོང་ནས་དེ་དག་གཙུག་ལག་ཁང་དུ་ལྷགས་པ་དང་། ཐེ་ཚོམ་སྐྱེས་ནས་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་
ནགས་ཚལ་གྱི་དབང་པོ་རྐུན་པོའི་དྲུང་དུ་བཤགས་པ་ཡིན་གྱིས་དེ་ལ་ཐེ་ཚོམ་དུ་མ་བྱེད་ཅིག །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་གཞན་ཞིག་ལྗོངས་སྤྱད་པ་སྤྱོད་པ་ལ་རྐུན་པོས་ཟིན་ནས་དེ་དག་གིས་བསམ་རླག་ཏུ་འཁོད་དེ་ཅི་བྱེད་ཀྱིས་མགོ་རེག་འདི་དག་གསད་
དོ་ཞེས་སྨྲས་པ་དང་། དགེ་སློང་དག་གིས་བསམས་པ། བདག་ཅག་ནི་གསད་པར་ཆད་པར་ལྟ་སྙམ་ནས་དེ་དག་གིས་རྐུན་པོ་ལ་ཀྱེ་ཅིའི་ཕྱིར་ངེད་གསད་ཅེས་སྨྲས་པ་དང་། རྐུན་པོས་སྨྲས་པ། ཁྱེད་ལ་རྒྱལ་པོ་དང་། ཕྱུག་པོ་དང་། ཚོང་དཔོན་དང་། དེད་དཔོན་རྣམས་
མངོན་པར་དད་པས་ན་ཁྱེད་ཀྱིས་དེ་དག་ལ་སྨྲས་པ་དང་། དེ་དག་གིས་ངེད་ལ་དོན་མེད་པར་བྱེད་དོ་ཞེས་སྨྲས་ནས། དགེ་སློང་རྣམས་ཀྱིས་སྨྲས་པ། ཐོང་ཤིག་དང་སུ་ལ་ཡང་མི་སྨྲའོ། །དེ་དག་གིས་དེ་སྟེ་ཁྱེད་ཀྱིས་བཅོ་ལྔའི་དུས་ན་གཅིག་ཏུ་འདུས་ཤིང་འདོན་པ་དེ་ངེད་ཅག་ལ་

རྒྱས་པར་སྨྲ་བར་དམ་འཆའ་ན་གཏང་ངོ་ཞེས་སྨྲས་པ་དང་། དེ་ན་དགེ་སློང་ཅིག་གཞུང་ཁ་དོན་དུ་ལོབས་པས་དེ་བསད་ཀྱིས་འཇིགས་པས་སྐྲག་པས་སོ་སོར་ཐར་པ་མྱུར་དུ་བཏོན་པ་དང་། དེ་དག་མངོན་པར་དད་ནས་འཕགས་པ་ཁྱེད་ཀྱིས་དེ་ཐམས་ཅད་ཡང་དག་པར་བཟུང་
སྟེ་སྲུང་ངམ། ཞེས་སྨྲས་པ་དང་། དེ་དག་གིས་ཚེ་དང་ལྡན་པ་འདི་ནི་སྟོན་པའི་བཀའ་ཡིན་ན་ཅིའི་ཕྱིར་ཡང་དག་པར་འཛིན་ཅིང་མི་སྲུང་ཞེས་སྨྲས་པ་དང་། དེ་དག་གིས་འཕགས་པ་རྣམས་ལེགས་ཀྱིས་བཞུད་ལ་སུ་ལ་ཡང་མ་གསུངས་ཤིག་ཅེས་སྨྲས་པ་དང་། ནད་
མེད་ཅིག་མི་སྨྲའོ་ཞེས་སྨྲས་ཏེ་དོང་ནས་དེ་དག་གཙུག་ལག་ཁང་དུ་ཕྱིན་པ་དང་། དེ་དག་ཐེ་ཚོམ་སྐྱེས་ཏེ་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ནགས་ཚལ་གྱི་དབང་པོ་རྐུན་
པོའི་དྲུང་དུ་ཁ་ཐོན་བཀླགས་པ་ནི་ལེགས་པར་བཀླགས་པ་ཡིན་གྱིས་དེ་ལ་ཐེ་ཚོམ་དུ་མ་བྱེད་ཅིག །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་ཅིག་ཡུལ་བེའུ་ཞེས་བྱ་བ་ནས་ལྗོངས་སྤྱད་པ་སྤྱོད་ཅིང་དོང་བ་དང་། རྐུན་པོས་ཟིན་ནས་དེ་དག་གིས་ཀྱེ་བསམ་རླག་
ཏུ་འཁོད་དེ་ཅི་བྱེད་ཀྱིས་མགོ་རེག་འདི་དག་གསད་དོ་ཞེས་སྨྲས་པ་དང་། དེ་ལ་རྐུན་པོ་ཅིག་དགེ་སློང་གི་རྒྱུས་ཤེས་པས་དེས་དེ་དག་མཐོང་བ་དང་། སྙིང་རྗེ་སྐྱེས་ནས་དེས་དེ་དག་ཐར་པར་བྱ་ནི་མ་ནུས་ཀྱི་སྙིང་བརྩེ་བའི་ཕྱིར་ཀྱེ་འདི་དག་གསད་དེ་ཅི་རུང་གིས་རྩྭ་མ་བརྔས་པ་ལ་
བཅིངས་ཏེ་རྫས་ཕྲོགས་ལ་དོང་དང་དེ་ཉིད་རང་བཀྲེས་ཤིང་ཉམ་ཆུང་བས་གདུངས་ཏེ་སྲོག་དང་བྲལ་གྲང་ཞེས་སྨྲས་པ་དང་། དེའི་ནང་ནས་གཅིག་གིས་སྨྲས་པ། ཀྱེ་འདི་དེ་སྐད་སྨྲ་ན་ཇི་ལྟར་བྱ་ཞེས་སྨྲས་པ་དང་། ཁ་ཅིག་གིས་སྨྲས་པ། དེ་ལྟར་བྱ་བ་ནི་ལེགས་སོ་ཞེས་
ནས་དེ་དག་གིས་དེ་ལ་ཕྲོགས་ནས་རྩྭ་མ་བརྔས་པ་ལ་བཅིངས་ཏེ་དོང་ངོ་། །ཡུལ་བེའུ་ཞེས་བྱ་བའི་རྒྱལ་པོ་འཆར་པོ་དཔུང་གི་ཚོགས་ཡན་ལག་བཞི་པ་དང་རི་དགས་ཤོར་བའི་ཕྱིར་དོང་བ་དང་། དེ་དག་གིས་དེ་དག་རྒྱང་རིང་པོ་ནས་མཐོང་ནས་དེས་བློན་པོ་ལ་ཀྱེ་སྣང་བ་ཕ་བི་

རི་དགས་མ་ཡིན་ནམ་ཞེས་དྲིས་པ་དང་། དེས་ལྷ་མ་འཚལ་ཏོ་ཞེས་སྨྲས་ནས་རྒྱལ་པོ་དེར་ཉེ་བར་སོང་ནས་མི་ཡིན་པར་མཐོང་བ་དང་། དེས་ཀྱེ་མུ་སྟེགས་གཅེར་བུ་པ་ཡིན་ནམ་ཅི་ཞེས་སྨྲས་པ་དང་། དེ་དག་ལས་གཅིག་གིས་ལྷ་དེ་བཞིན་ནོ་ཞེས་སྨྲས་
པ་དང་། དེ་དག་ལ་དགེ་སློང་གི་རྒྱུས་ཤེས་པ་ཞིག་གིས་སྨྲས་པ། ལྷ་དེ་ནི་མུ་སྟེགས་གཅེར་བུ་པ་མ་ལགས་ཀྱིས། ལྷ་ཤཱཀྱའི་བུའི་དགེ་སློང་ངོ་། །ཇི་ལྟར་ཤེས། ལྷ་དེ་ལྟར་ལོགས་གཅིག་ནི་གནག །གཉིས་པ་ནི་དཀར་རོ་ཞེས་སྨྲས་པ་དང་། དེ་ནས་རྒྱལ་པོས་དེ་ལ་
དྲིས་པ། འཕགས་པ་ཁྱོད་ཅིའི་ཕྱིར་འདི་ལྟར་འདུག །ལྷ་བདག་ཅག་རྐུན་པོས་བཅོམ་མོ། །འཕགས་པ་འོ་ན་ཅིའི་ཕྱིར་དེ་ལྟར་འདུག །ལྷ་འདི་ལྟར་བཅིངས་སོ། །འཕགས་པ་འདི་འདྲ་བར་བཅིངས་པ་ཅིའི་ཕྱིར་གཅད་དེ་མི་འདོང་། ལྷ་བཅོམ་ལྡན་འདས་ཀྱིས་བདག་ཅག་གི་
བསླབ་པར་བཅས་པ་ས་བོན་གྱི་གྲོང་དང་སྲོག་ཆགས་ཀྱི་གྲོང་བཤིག་གམ་བཤིག་ཏུ་བཅུག་ན་ལྟུང་བའོ་ཞེས་བྱ་བའི་བསླབ་པའི་བཅིངས་པས་བཅིངས་སོ་ཞེས་སྨྲས་པ་དང་། རྒྱལ་པོ་དེ་དད་ཅིང་མངོན་པར་དགའ་ནས་དེས་དེ་དག་བཀྲོལ་ཏེ་རེ་རེ་ལ་ཡང་ཆོས་གོས་གསུམ་གསུམ་
བསྐོན་ནོ། །དེ་དག་གཙུག་ལག་ཁང་དུ་ཕྱིན་པ་དང་། བདག་ཅག་གིས་རྒྱལ་པོའི་མདུན་དུ་དེ་ལྟར་ལྟུང་བ་སྨྲས་སོ་ཞེས་ཏེ་ཐེ་ཚོམ་སྐྱེས་པ་དང་། དེས་དེ་ལྟར་གྱུར་པ་དགེ་སློང་རྣམས་ལ་རྒྱས་པར་སྨྲས་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏེ། བཅོམ་ལྡན་
འདས་ཀྱིས་བཀའ་སྩལ་པ། རྒྱལ་པོ་འདི་ནི་རྒྱལ་རིགས་སྤྱི་བོ་ནས་དབང་བསྐུར་བ། འཇིག་རྟེན་པ་ཐམས་ཅད་ཀྱི་གཙོ་བོ་ཡིན་པས་ན་གང་སྨྲས་པ་དེ་ནི་ལེགས་པར་སྨྲས་པ་ཡིན་གྱིས་དེ་ལ་ཐེ་ཚོམ་དུ་མ་བྱེད་ཅིག །གླེང་གཞི་ནི་མཉན་དུ་ཡོད་པ་ན་སྟེ། སངས་རྒྱས་བཅོམ་
ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ནོངས་པ་དང་བཅས་པས་ནོངས་པ་དང་བཅས་པའི་མདུན་དུ་ནོངས་པ་བཤགས་སུ་རུང་ངམ་ཨུ་པཱ་ལི་མི་རུང་ངོ་། །དེ་སྟེ་དངོས་པོ་མི་མཐུན་ན་ནི་རུང་ངོ་། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་གཅིག་ལ་དགེ་

འདུན་གྱི་ལྷག་མའི་ཉེས་པ་བྱུང་ནས་དེ་འགྱོད་པ་སྐྱེས་པ་དང་། དེ་སྐྱ་བོ་བསེང་བསེང་པོར་གྱུར་ལ་རིད་ཅིང་ཉམ་ཆུང་སྟེ། རྨྱ་ལ་ལུས་མ་བརྟས་པར་གྱུར་ནས་དེ་ལ་དགེ་སློང་དག་གིས་སྨྲས་པ། ཚེ་དང་ལྡན་པ་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ལ་རིད་ཅིང་ཉམ་ཆུང་
ལ་རྨྱ་སྟེ་ལུས་མ་བརྟས་པར་གྱུར་པ་དེའི་ནད་སྨྲོས་ཤིག་ཅེས་སྨྲས་པ་དང་། དེ་ཅང་མི་སྨྲ་ནས་ནམ་དེ་དང་མཛའ་བའི་དགེ་སློང་གིས་མཐོང་སྟེ་དྲིས་པ་དང་། དེས་དེ་ལ་རྒྱས་པར་སྨྲས་པ་དང་། དེས་ཚེ་དང་ལྡན་པ་དེ་ལྟ་ན་དགེ་སློང་རྣམས་ལ་བརྗོད་ཀྱིས་ཤོགས་ཤིག་ཅེས་སྨྲས་
སོ། །དེ་ལྟར་བརྗོད་ན་བདག་ཉིད་མཆིའོ་ཞེས་སྨྲས་པ་དང་། དེས་དེ་ལྟ་ན་ཚུར་ཤོག །ཡུལ་གཞན་དུ་དོང་ལ་དེར་དེ་དག་བཤགས་སོ། །ཞེས་སྨྲས་པ་དང་། དེས་ཀྱང་ཁས་བླངས་ནས་དེ་དང་དེ་ལྷན་ཅིག་ཏུ་ཡུལ་གཞན་དུ་སོང་བ་ལས་དེ་ལམ་ཕྱེད་དུ་དུས་འདས་
པ་དང་། དགེ་སློང་དེས་བསམས་པ། གང་གིས་དོན་གྱི་ཕྱིར་བདག་འགྲོ་བ་དེ་ནི་དུས་འདས་ན་ད་ཅིའི་ཕྱིར་འགྲོ། ཕྱིར་ལྡོག་གོ་སྙམ་ནས་དེ་ཕྱིར་ལོག་པ་དང་། དེ་ལ་དགེ་སློང་དག་གིས་བདེ་བར་འོངས་སམ། ཚེ་དང་ལྡན་པ་བདེ་བར་འོངས་སམ། ཅི་ཁྱེད་བདེ་བར་སྤྱད་དམ་ཞེས་
སྨྲས་པ་དང་། དེ་ངུ་བར་གྱུར་ནས་དེ་ལ་དགེ་སློང་དག་གིས་ཚེ་དང་ལྡན་པ་ཅིའི་ཕྱིར་ངུ་ཞེས་སྨྲས་པ་དང་། གང་བདག་དང་ལྷན་ཅིག་ཏུ་སོང་བའི་དགེ་སློང་དེ་དུས་འདས་པའི་ཕྱིར་རོ་ཞེས་སྨྲས་པ་དང་། དེ་དག་གིས་ཚེ་དང་ལྡན་པ་ཅིའི་ཕྱིར་ངུ་། འདུས་བྱས་ཐམས་ཅད་ནི་ཆོས་
ཉིད་ཀྱིས་དེ་བཞིན་ནོ་ཞེས་སྨྲས་སོ། །དེས་དེ་ནི་ཉེས་པ་དང་བཅས་བཞིན་དུ་དུས་འདས་སོ་ཞེས་སྨྲས་པ་དང་། དགེ་སློང་རྣམས་ཀྱིས་དེས་དམྱལ་བར་རིང་དུ་གནས་པར་གྱུར་པས་ན་ངུ་བ་འདི་ནི་རིགས་སོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་
འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་རིགས་ཀྱི་བུ་དེ་ནི་ཉེས་པ་དེ་ལས་ཕྱིན་ཏེ། ངས་ནི་བསམ་པ་ལས་ཉེས་པ་ཕྱིན་པར་གསུངས་ཀྱིས་ཆད་པའི་ལས་ཀྱིས་ནི་མ་ཡིན་ནོ། །དེ་ལྟ་བས་ན་གང་དེ་ལྟར་རང་བཞིན་གྱིས་ངོ་ཚ་བ་དང་

ལྡན་པ་དེས་གཅིག་གི་མདུན་དུ་ཤོགས་ཤིག་པར་གནང་ངོ་། །དེས་ནི་གཅིག་གི་མདུན་དུ་ཤོགས་ཤིག །དེ་ལ་ཐེ་ཚོམ་མ་བྱེད་ཅིག་ཅེས་གསུངས་པ་དང་། འདོད་ཆགས་དང་བྲལ་བ་མ་ཡིན་པ་སྐྱེ་བོ་ཐ་དད་པ་མདོ་སྡེ་འཛིན་པ་དང་། འདུལ་བ་འཛིན་པ་
དང་། མ་ལྟ་བུ་འཛིན་པ་ཁ་ཅིག་དང་། དགེ་འདུན་གྱི་གནས་བརྟན་དང་། གྲགས་པ་དང་། བསོད་ནམས་ཆེན་པོ་ཁ་ཅིག་གིས་མ་བརྟགས་པས་ན་དགེ་འདུན་གྱི་ལྷག་མའི་ཉེས་པ་བྱུང་སྟེ། དེ་དག་ཆད་པར་སྤྱོད་པ་ལ་ལྷན་ཅིག་སྤྱོད་པ་དང་། ཉེ་གནས་དང་བྲམ་ཟེ་དང་ཁྱིམ་
བདག་དང་གཞན་ཡང་རུང་ཉུང་ངུ་ཐོས་པའི་དགེ་སློང་རྣམས་ཀྱིས་ཀྱང་དཔྱས། ཁ་ཅིག་ནི་མི་དགའ་བར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཀྱང་ཕྱིས་མི་བྱ་བར་ཤིན་ཏུ་
བསམ་པ་བརྟུན་ཏེ་གཅིག་པོའི་མདུན་དུ་ཤོགས་ཤིག །འདི་ལ་ཐེ་ཚོམ་མ་བྱེད་ཅིག །རྐྱང་པའི་ནང་ནས་སྒོ་དང་པོའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། གཞག་པའི་རིགས་པ་གཞག་པར་བྱ། །བདུན་ལོན་ནས་ཀྱང་འགྲོ་བར་བྱ། །མཉམ་དུ་
མ་ཟིན་དེ་བཞིན་ཏེ། །གང་གི་ཀོ་བ་མི་རུང་བའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཀུན་དགའ་བོ་ལ་གཙུག་ལག་ཁང་སྐྱོང་གི་རེས་བབ་བོ། །ཡུལ་ཀོ་ས་ལའི་རྒྱལ་
པོ་གསལ་རྒྱལ་ཛེ་ཏའི་ཚལ་དུ་འོངས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་དྲུང་དུ་ཕྱིན་པ་དང་། རྐང་པ་ལ་ཕྱག་འཚལ་ནས་ཆོས་ཉན་པའི་ཕྱིར་མདུན་དུ་འདུག་གོ། །དེ་ནས་ཚེ་དང་ལྡན་པ་ཀུན་དགའ་བོས་མདོ་
སྡེ་ལ་ཞུགས་ནས་དེ་ལས་ཕྱེ་ནས་ཅུང་ཟད་ཙམ་ཞིག་རྒྱས་པར་བཤད་ནས། མདོར་འཆད་པ་ལ་ཞུགས་པ་དང་། རྒྱལ་པོས་འཕགས་པ་བདག་ལ་བྲེལ་བ་མེད་ཀྱིས་མདོར་མ་བཤད་ཅིག་ཅེས་སྨྲས་སོ། །དེ་བཞིན་དུ་ལན་གཉིས་ལན་གསུམ་དུ་སྨྲས་པ་དང་། ཚེ་དང་ལྡན་

པ་ཀུན་དགའ་བོས་རྒྱལ་པོ་ཆེན་པོ་ཁྱོད་ལ་བྲེལ་བ་མེད་ཀྱང་བདག་ལ་བྲེལ་བ་ཡོད་དོ་ཞེས་སྨྲས་པ་དང་། འཕགས་པ་ཀུན་དགའ་བོ་ཅི་ཞིག་བྲེལ་ཅེས་སྨྲས་པ་དང་། ཁང་སྐྱོང་བྱ་དགོས་སོ་ཞེས་སྨྲས་པ་དང་། འཕགས་པ་ཀུན་དགའ་བོ་ཡང་ལས་ཀྱི་རེས་མཛད་དམ།
ལྷ་བདག་ནི་དགེ་འདུན་གྱི་ནང་དུ་གཏོགས་པས་ན་ལས་བགྱི་འཚལ་ལོ་ཞེས་སྨྲས་པ་དང་། རྒྱལ་པོས་འདི་བདག་གིས་བྱ་བ་ཡིན་ནོ་སྙམ་དུ་བསམས་ནས། དེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་
འདི་སྐད་ཅེས་གསོལ་ཏོ། །བཙུན་པ་བདག་ནི་རྒྱལ་པོ་རྒྱལ་ཐབས་སྤྱི་བོ་ནས་དབང་བསྐུར་བ་སྟེ། གང་བདག་གིས་བགྱི་བའི་ལས་ནི་བདག་བགྱིད་དོ། །གང་ནང་གི་བཙུན་མོས་བགྱི་བའི་རིགས་པ་ཡང་ནང་གི་བཙུན་མོས་བགྱིད་དོ། །གང་གཞོན་ནུས་བགྱི་བའི་རིགས་པ་
ཡང་གཞོན་ནུས་སོ། །གང་བློན་པོའམ། བློན་པོ་ཆེན་པོའམ། དམག་དཔོན་ནམ། གྲོང་མི་འམ། གཞོངས་པ་ཡང་རུང་སྟེ་གཞོངས་པ་ཉིད་ཀྱིས་ལས་བགྱིད་དོ། །བཅོམ་ལྡན་འདས་ཀྱང་བླ་ན་མེད་པའི་ཆོས་ཀྱི་རྒྱལ་པོ་སྟེ། ཨེ་མའོ་བཅོམ་ལྡན་འདས་བརྩེ་བ་ཅན་
གྱིས་ཀྱང་གཞག་པར་འོས་པ་གཞག་ལ་ལས་ཀྱི་རེས་མི་བསྐོ་བར་ཅི་གནང་ཞེས་གསོལ་པ་དང་། རྒྱལ་པོ་གསལ་རྒྱལ་གྱིས་གསོལ་པ་བཞིན་བཅོམ་ལྡན་འདས་ཀྱིས་ཅང་མི་གསུང་བས་ཞལ་གྱིས་བཞེས་སོ། །རྒྱལ་པོ་གསལ་རྒྱལ་གྱིས་ཀྱང་ཅང་མི་གསུང་བས་ཞལ་
གྱིས་བཞེས་པར་རིག་ནས་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་བཅོམ་ལྡན་འདས་ཀྱི་དྲུང་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་མཉན་དུ་ཡོད་པ་ན་གནས་ཤིང་
འཁོད་པའི་དགེ་སློང་ཐམས་ཅད་འདུན་ཁང་དུ་སྡུས་ཤིག་ཅེས་གསུངས་པ་དང་། བཙུན་པ་བཀའ་བཞིན་འཚལ་ཞེས་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ་མཉན་དུ་ཡོད་པ་ན་དགེ་སློང་ཇི་སྙེད་གནས་པ་དེ་ཐམས་ཅད་འདུན་ཁང་དུ་བསྡུས་

ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མཉན་དུ་
ཡོད་པ་ན་དགེ་སློང་ཇི་སྙེད་གནས་ཤིང་མཆིས་པ་དེ་ཐམས་ཅད་འདུན་ཁང་དུ་འདུས་ཏེ་མཆིས་ལགས་ན། བཅོམ་ལྡན་འདས་ཀྱིས་ད་དུས་ལ་བབ་པར་དགོངས་ཤིག །དེ་ནས་བཅོམ་ལྡན་འདས་འདུན་ཁང་གང་ན་བ་དེར་བཞུད་དེ་བྱོན་ནས་དགེ་སློང་གི་དགེ་འདུན་གྱི་མདུན་ན་
གདན་བཏིང་བ་ལ་བཞུགས་ཏེ་བཞུགས་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་དེང་ཀོ་ས་ལའི་རྒྱལ་པོ་གསལ་རྒྱལ་ངའི་དྲུང་དུ་འོངས་ཏེ། ཨེ་མའོ་བཅོམ་ལྡན་འདས་གཞག་པའི་རིགས་པ་རྣམས་ནི་ཞོག་ལ། ལས་ཀྱི་རེས་ལ་བཀའ་སྩལ་པའི་
མི་རིགས་སོ་ཞེས་ཟེར་གྱིས་ཁྱེད་ཅག་གིས་དེང་ཕན་ཆད་གཞག་པའི་རིགས་པ་རྣམས་ལས་ལ་མ་བསྐོ་བར་ཞོག་ཅིག །བཅོམ་ལྡན་འདས་ཀྱིས་གཞག་པའི་རིགས་པ་རྣམས་ལས་ལ་མ་བསྐོ་ཤིག་ཅེས་གསུངས་པ་དང་། དགེ་སློང་དག་གིས་གང་གཞག་པར་རིགས་པ་མ་
ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པ་དང་། མང་པོ་འཆད་པ་དང་། དགེ་འདུན་གྱི་གནས་བརྟན་དག་ནི་གཞག་པར་རིགས་པའོ། །དེ་ལ་མདོ་སྡེ་འཛིན་པ་ནི་དེ་ཉིད་ལས་སོ། །དེ་
བཞིན་དུ་འདུལ་བ་འཛིན་པ་དང་། མ་ལྟ་བུ་འཛིན་པ་དང་། མང་པོ་ལ་འཆད་པ་དང་། དགེ་འདུན་གྱི་གནས་བརྟན་དག་ཀྱང་དེ་ཉིད་ལས་ཡིན་ནོ། །བཅོམ་ལྡན་འདས་ཀྱིས་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པ་དེ་ནི་དེ་ཉིད་ལས་ཡིན་ནོ་
ཞེས་གསུངས་པ་དང་། དྲུག་སྡེ་དག་གིས་མདོ་སྡེའི་ལེའུ་གཅིག་གཉིས་བཀླགས་ནས་ངེད་ཅག་ནི་མདོ་སྡེ་འཛིན་པ་ཡིན་པས་ན་ངེད་ལ་ལས་ཀྱི་རེས་མ་དབབ་ཅིག་ཅེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་

ལྡན་འདས་ཀྱིས་བཀའ་སྩལ་པ། གང་མདོ་སྡེ་ཐམས་ཅད་འཛིན་པ་དེ་ནི་མདོ་སྡེ་འཛིན་པ་སྟེ། དེ་ནི་ལས་ལ་མ་བསྐོ་ཤིག་དེ་བཞིན་དུ་ཕས་ཕམ་པ་གཅིག་གམ་གཉིས་ལྷོགས་པ་དག་གིས་ངེད་ཀྱང་འདུལ་བ་འཛིན་པའོ། །དེ་བཞིན་དུ་རབ་ཏུ་བྱེད་པ་གཉིས་བཀླགས་པས་
ཀྱང་ང་ནི་མ་ལྟ་བུ་འཛིན་པ་ཡིན་གྱིས་ལས་ཀྱི་རེས་ལ་མ་བསྐོ་ཤིག་ཅེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གང་འདུལ་བ་ཐམས་ཅད་འཛིན་པ་དང་། མ་ལྟ་བུ་ཐམས་ཅད་
འཛིན་པ་ནི་ལས་ལ་མ་བསྐོ་ཤིག །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་རི་བྲགས་ཀྱི་གྲོང་དག་ཅིག་ལོག་ནས་དམག་རུ་གཅིག་བཏང་བ་དང་། དེ་དག་གིས་སླར་བཅོམ་བཏགས་ནས་ལྷགས་སོ། །དེ་བཞིན་དུ་ལན་གཉིས་
ལན་གསུམ་དུ་བཏང་ཡང་སླར་བཏགས་བཅོམ་ནས་ལྷགས་སོ། །བློན་པོ་དག་གིས་གསོལ་པ། ལྷ་རི་བྲགས་ཀྱི་གྲོང་དག་གི་མཐུ་ནི་ཆེར་གྱུར། ལྷའི་མཐུ་ནི་འགྲིབས་ན་དེ་ལ་ལྷ་ཉིད་གཤེགས་ན་ནི་རི་བྲགས་ཀྱི་གྲོང་དེ་དག་ཀྱང་གདོད་ཁུགས་པར་འགྱུར་གྱི་གཞན་གྱིས་
མི་ནུས་སོ་ཞེས་སྨྲས་པ་དང་། རྒྱལ་པོས་ངའི་ཡུལ་ན་ཇི་སྙེད་མཚོན་ཆའི་མཐུས་འཚོ་བ་དེ་ཐམས་ཅད་མ་འཁོད་པར་ཤེག་ཤིག་ཅེས་དྲིལ་ཆེན་པོ་བསྒྲགས་སོ། །དེ་ནས་རྒྱལ་པོ་མཐུ་ཆེན་པོ་དང་ལྷན་ཅིག་ཏུ་གྲོང་རྡལ་དེར་ལྷགས་ནས་ཐམས་ཅད་བསྐོར་ཏེ་འཁོད་དོ། །འོན་
ཀྱང་དེ་དག་ནགས་ཚལ་སྟུག་པོ་ལ་བརྟེན་ནས་མ་ཕེབས་པ་དང་། བློན་པོས་ལྷ་ཁྱིམ་བདག་མགོན་མེད་ཟས་སྦྱིན་དེ་བསོད་ནམས་རབ་ཏུ་རྒྱས་ཤིང་ལྷ་རྣམས་ཀྱིས་ཡོངས་སུ་ཟིན་པས་དེ་འདིར་མཆིས་ན་གདོན་མི་འཚལ་བར་རི་བྲགས་ཀྱི་གྲོང་ཕེབས་པར་འགྱུར་རོ་ཞེས་སྨྲས་
པ་དང་། དེ་ནས་རྒྱལ་པོས་ཁྱིམ་བདག་མགོན་མེད་ཟས་སྦྱིན་ལ་བསྟི་སྟང་ཆེར་བྱས་ནས་ཁྱིམ་བདག་ཁྱོད་ཀྱི་ངོ་བལྟ་བར་འདོད་དོ་ཞེས་ཡི་གེ་སྤྲིང་ངོ་། །དེ་ཡི་གེ་དེ་ཐོས་མ་ཐག་ཏུ་རིངས་བཞིན་དུ་སོང་སྟེ་རི་བྲགས་ཀྱི་གྲོང་རྡལ་དེར་ཕྱིན་ཏོ། །འོན་ཀྱང་གྲོང་རྡལ་དེ་མ་ཕེབས་ནས་

ཁྱིམ་བདག་མགོན་མེད་ཟས་སྦྱིན་དེ་རིང་དུ་ཐོགས་པར་གྱུར་ནས། དེ་དགེ་སློང་རྣམས་མ་མཐོང་བའི་ཕྱིར་སྐྱ་བོ་བསེང་བསེང་པོ་རིད་ཅིང་ལུས་མ་བརྟས་པར་གྱུར་ནས། རྒྱལ་པོས་མཐོང་སྟེ་དྲིས་པ། ཁྱིམ་བདག་ཁྱོད་བུ་དག་དྲན་ནམ་ཞེས་སྨྲས་པ་དང་།
དེས་ལྷ་བདག་བུ་དྲན་པ་ནི་མ་ལགས་ཀྱི། འཕགས་པ་རྣམས་བལྟ་བར་འཚལ་བའི་སླད་དུའོ་ཞེས་སྨྲས་པ་དང་། རྒྱལ་པོས་བློན་པོ་དག་ལ་ངས་བཀའ་སྩལ་པ་སྐད་དུ་མ་ཟེར་བར་ཅི་ནས་འཕགས་པ་རྣམས་འདིར་བྱོན་པའི་ཐབས་སུ་སྦྱོར་ཅིག་ཅེས་ཡི་གེ་སྤྲིང་བ་དང་། བློན་པོ་
དག་གིས་ཡི་གེ་བཀླགས་ནས་གྲོས་བྱེད་པ་ལ་ཞུགས་ཏེ། ཀྱེ་དེ་ལ་ཐབས་ཇི་ལྟར་བྱ་ཞེས་སྨྲས་པ་དང་། བློན་པོ་རྒན་པོ་གཞན་ཞིག་གིས་དེ་ལྟ་བླས་དེའི་ཐབས་ཤིག་བདག་གིས་སྦྱར་ལ་དགྱེ་བར་བྱའོ་ཞེས་སྨྲས་ནས། དེས་ཛེ་ཏའི་སྒོ་ན་ཨར་ཌ་ཚངས་སྦྱིན་གྱི་སྐྱེད་མོས་ཚལ་ཞིག་
ཡོད་པ་རྙིངས་ཏེ། མདའ་ལྟ་བུའི་ཚལ་དུ་གྱུར་པ་དེ་བཅོས་ལེགས་བྱས། མཆོད་རྟེན་གྱི་དག་ར་ནས་སྐྱེད་མོས་ཚལ་དེར་ཡུར་བ་དྲང་ངོ་ཞེས་སྲད་བུ་བྲེས་པ་དང་། དེ་དག་ཉིད་ལ་གནོད་པས་ན་ལྷ་ལྟ་ཞིང་འདོང་བར་འགྱུར་རོ་ཞེས་ཏེ། དེ་ནས་དེ་དག་གིས་སྐྱེད་མོས་ཚལ་
རྙིང་པ་དེ་འཆོས་པ་ལ་ཞུགས། དབུ་སྐྲ་དང་སེན་མོའི་མཆོད་རྟེན་གྱི་དབུས་སུ་སྲད་བུ་བྲེས་ན་སྲད་བུ་འདིའི་རྒྱུད་བཞིན་དུ་ཡུར་བ་བརྐོའོ་ཞེས་སྨྲས་པ་དང་། དགེ་སློང་གཙུག་ལག་ཁང་ན་གནས་པ་དང་། ཉིན་པར་སྤྱོད་དུ་དོང་བ་དེ་དག་འདུས་ཏེ་བློན་པོ་དེའི་གན་དུ་དོང་ནས་བཞིན་བཟངས་
འདི་ཅི་ཞིག་རྩོམ་ཞེས་སྨྲས་པ་དང་། འཕགས་པ་རྣམས་ལྷས་བདག་ཅག་ལ་ངའི་ཕའི་སྐྱེད་མོས་ཚལ་རྙིང་པ་ཆོས་ཤིག་དང་། ང་དེར་འོང་ངོ་ཞེས་ཡི་གེ་མཆིས་པས་ན་འདི་དག་བདག་ཅག་གིས་ཕྱི་བདར་བགྱིས་ཏེ་དེར་ཆུ་དྲང་བའི་ཡུར་བ་བརྐོའོ་ཞེས་སྨྲས་པ་དང་། ཅི་ཁྱེད་ཀྱིས་
བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་གཞིག་གམ། དེ་ལྟར་མ་བྱེད་ཅིག་ཅེས་སྨྲས་པ་དང་། འཕགས་པ་དག་ལྷའི་བཀའ་བཞིན་ནི་བདག་ཅག་གིས་མི་བགྱིར་མི་རུང་སྟེ། བདག་ཅག་ལ་མགོ་གཉིས་སུ་མ་མཆིས་ཀྱིས་ལྷའི་བཀའ་བཅག་ཏུ་མི་རུང་ངོ་ཞེས་སྨྲས་

པ་དང་། བཞིན་བཟངས་ངེད་ཀྱིས་ལྷ་ལ་གསོལ་གྱིས་དེའི་བར་དུ་སྡོད་ཅིག་ཅེས་སྨྲས་པ་དང་། འཕགས་པ་བདག་ཅག་གིས་བསྡད་ཀྱིས་གསོལ་བ་མཛད་དུ་གསོལ་ཞེས་སྨྲས་པ་དང་། བཞིན་བཟངས་ལྷ་འདུག་པ་དེར་ཇི་སྲིད་ཡོད། འཕགས་པ་ལམ་རིང་ངོ་། །བཞིན་
བཟངས་ཞག་གཅིག་ནས་བདུན་གྱིས་སླར་འཁོར་ཏམ། སླར་མི་འཁོར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་དགེ་སློང་དག་སངས་རྒྱས་དང་ཆོས་དང་དགེ་འདུན་གྱི་ཕྱིར་ཞག་བཞི་
བཅུར་བྱིན་གྱིས་རློབས་ལ་མཚམས་ཀྱི་ཕྱི་རོལ་དུ་འདོང་བར་གནང་ངོ་། །དགེ་སློང་དག་གིས་ཇི་ལྟར་བྱིན་གྱིས་བརླབ་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་རྣམས་ཐིང་སྟ