Kinh tạng Tây Tạng (Kangyur Đại Học) — 013_འདུལ་བ།_པ

་ལོ་ཅན་ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་ལྡན་ན་བསྐྲད་པ་ཡིན་ཏེ། ལྔ་གང་ཞེ་ན། མ་དད་པ་ཡིན། རིམ་གྲོ་མེད་པ་ཡིན། ལེ་ལོ་ཅན་
ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་། ཉེ་གནས་ཆོས་ལྔ་དང་ལྡན་ན་མི་བསྐྲད་པ་ཡིན་ཏེ། ལྔ་པོ་དཀར་པོའི་ཕྱོགས་སུ་སླར་རྣམ་པ་ལྔར་བཟློག་སྟེ་བརྗོད་པར་བྱའོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་

ལྡན་ན་བཟོད་པར་བྱ་བ་མ་ཡིན་ཏེ། མ་དད་པ་ཡིན། རིམ་གྲོ་མེད་པ་ཡིན། ལེ་ལོ་ཅན་ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་ལྡན་ན་བཟོད་པར་བྱ་བ་ཡིན་ཏེ། དཀར་པོའི་ཕྱོགས་སླར་
རྣམ་པ་ལྔར་བཟློག་སྟེ་བརྗོད་པར་བྱའོ། །མདོར་ན། བྱིན་ལེན་གསུམ་དང་ཞིག་པ་དང་། །ཀླུ་དང་ཉེས་པ་བཤགས་པ་དང་། །མ་ནིང་ཕོ་དང་མ་ནིང་མོ། །རུང་བའི་གནས་དང་རྡུལ་གཉིས་སོ། །བྱིན་ལེན་རྣམ་པ་ལྔ་སྟེ། ལུས་ཀྱིས་ལུས་ལ་བྱ་བ་དང་། ལུས་
ཀྱིས་ལུས་ལ་ཟིན་པ་དང་། ལུས་ཀྱིས་ཟིན་པས་ལུས་ལ་བྱ་བ་དང་། ལུས་ཀྱིས་ཟིན་པས་ལུས་ཀྱི་ཟིན་པ་ལ་བྱ་བ་དང་། བཞག་པའི་བྱིན་ལེན་དང་ལྔའོ། །ཇི་ལྟར་ལུས་ཀྱིས་ལུས་ལ་བྱ་ཞེ་ན། ལག་ནས་ཕྱིན་ལ་ལག་གིས་བླངས་པའོ། །ཇི་ལྟར་ལུས་ཀྱིས་ལུས་ལ་ཟིན་པ་ཞེ་
ན། ལག་ནས་བྱིན་ལ་ལྷུང་བཟེད་དུ་བླངས་པའོ། །ཇི་ལྟར་ལུས་ཀྱིས་ཟིན་པས་ལུས་ལ་བྱ་ཞེ་ན། སྣོད་ཀྱིས་བྱིན་ལ་ལག་ཏུ་བླངས་པའོ། །ཇི་ལྟར་ལུས་ཀྱིས་ཟིན་པས་ལུས་ཀྱིས་ཟིན་པ་ལ་བྱ་ཞེ་ན། སྣོད་ནས་བྱིན་ལ་སྣོད་དུ་བླངས་པའོ། །ཇི་ལྟར་བཞག་པའི་བྱིན་ལེན་བྱ་
ཞེ་ན། སྨོད་པ་ཞེས་བྱ་བའི་མི་ཡོད་དེ། དེ་དག་གི་ཕ་དང་ཕུ་བོ་དག་ཀྱང་སྨོད་ན་གཞན་ལ་ལྟ་ཅི་སྨོས་ཏེ། དེ་དག་གི་མདུན་དུ་ལྷུང་བཟེད་བཞག་ནས་འདི་སྐད་ཅེས་སྨྲའོ། །བཞིན་བཟངས་དེ་སྟེ་བཏང་བར་གྱུར་ན་ལྷུང་བཟེད་འོ་ནིའི་ནང་དུ་ལུགས་ཤིག །དེ་དག་གིས་ཀྱང་ལྷུང་
བཟེད་དེར་བླུགས་པར་གྱུར་ན་དེ་ནི་བཞག་པའི་བྱིན་ལེན་ཞེས་བྱའོ། །གཞན་ཡང་བྱིན་ལེན་ལྔ་སྟེ། ཁྲིའི་སྟེང་དུ་བྱིན་ལེན་བྱ་བ་དང་། ཁྲིའུ་དང་། ཁྲིའུ་ཆུང་ངུ་དང་། ཐུ་བ་དང་། ལྷུང་བཟེད་ཀྱི་གཞིར་རོ། །རྣམ་པ་ལྔས་ནི་བྱིན་ལེན་བྱས་ཀྱང་བྱིན་ལེན་བྱས་པར་མི་
འགྱུར་ཏེ། མ་བཏང་བཞིན་ལེན་པ་དང་། བཟའ་བར་མི་སེམས་པར་ལེན་པ་དང་། གཞན་དུ་འདུ་ཤེས་ཏེ་ལེན་པ་དང་། མདུན་དུ་མ་འདུག་པར་ལེན་པ་དང་། རང་བཞིན་ཅན་མ་ཡིན་པ་ལས་བླངས་པའོ། །རྣམ་པ་ལྔས་བྱིན་ལེན་བྱས་ཀྱང་བྱིན་ལེན་འཇིག་པར་འགྱུར་

ཏེ། ལྔ་གང་ཞེ་ན། ཕྲོགས་པ་དང་། ཤོར་བ་དང་། བོར་བ་དང་། སླར་བབས་པ་དང་། དུས་བྱས་པའོ། །ཀླུའི་རང་བཞིན་ལྔ་སྟེ། ལྷག་མ་རྣམས་ནི་སྤྲུལ་པ་ཡིན་ཏེ། རང་བཞིན་འབྱུང་བ་དང་། རང་བཞིན་གྱིས་འཆི་བ་དང་། རང་བཞིན་གྱིས་ཉལ་བ་དང་།
རང་བཞིན་གྱིས་ཁྲོ་བ་དང་། རང་བཞིན་གྱིས་མི་ཚངས་པར་སྤྱོད་པ་འཁྲིག་པའི་ཆོས་བྱེད་པའོ། །ཉེས་པ་ལྔ་སྟེ། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་བཤགས་པ་དང་། ཉེས་བྱས་སོ། །ཉེས་པ་བྱུང་བ་རྣམ་པ་ལྔ་སྟེ།
ལུས་ལས་ཉེས་པ་འབྱུང་གི་ངག་ལས་མ་ཡིན་པ་ཡང་ཡོད། ངག་ལས་ཉེས་པ་འབྱུང་གི་ལུས་ལས་མ་ཡིན་པ་ཡང་ཡོད། ལུས་དང་སེམས་ལས་ཉེས་པ་འབྱུང་གི་ངག་ལས་མ་ཡིན་པ་ཡང་ཡོད། ངག་དང་སེམས་ལས་ཉེས་པ་འབྱུང་གི་ལུས་ལས་མ་ཡིན་པ་ཡང་ཡོད།
ལུས་དང་སེམས་དང་ངག་ལས་ཉེས་པ་འབྱུང་བ་ཡང་ཡོད་དོ། །ཉེས་པ་ལས་འབྱུང་བ་ཡང་ལྔ་སྟེ། མཐོང་བས་འབྱུང་བ་དང་། བསྒྲགས་པས་འབྱུང་བ་དང་། ཐོག་མ་ནས་མ་བྱས་པས་འབྱུང་བ་དང་། བྱིན་གྱིས་བརླབས་པས་འབྱུང་བ་དང་། བཤགས་པས་
འབྱུང་བ་དང་ལྔའོ། །མ་ནིང་ཕོ་ལ་རྣམ་པ་ལྔ་སྟེ། རང་བཞིན་གྱི་མ་ནིང་དང་། ཟླ་བ་ཕྱེད་ཀྱི་མ་ནིང་དང་། ཕྲག་དོག་གི་མ་ནིང་དང་། ཆགས་པའི་མ་ནིང་དང་། ཉམས་པའི་མ་ནིང་ངོ་། །རང་བཞིན་གྱི་མ་ནིང་གང་ཞེ་ན། རང་བཞིན་གྱིས་མ་ནིང་དུ་གྱུར་པའོ། །
ཟླ་བ་ཕྱེད་ཀྱི་མ་ནིང་གང་ཞེ་ན། ཟླ་བ་ཕྱེད་ནི་ཕོར་འགྱུར། ཟླ་བ་ཕྱེད་ནི་མོར་འགྱུར་བའོ། །ཕྲག་དོག་གི་མ་ནིང་གང་ཞེ་ན། གཞན་ལོག་པར་ཞུགས་པ་མཐོང་ནས་དེ་ཡང་གདོད་ལོག་པ་བྱེད་པར་གྱུར་པའོ། །ཆགས་པའི་མ་ནིང་གང་ཞེ་ན། དེ་ལ་གཞན་གྱིས་སྤྱོད་
ཅིང་བཙིར་ན་གདོད་བྱེད་པའོ། །ཉམས་པའི་མ་ནིང་གང་ཞེ་ན། གང་གིས་ཕོ་མཚན་སྲོག་ཆགས་ཀྱིས་ཟོས་པའམ་མཚོན་གྱིས་ཆོད་པའོ། །མ་ནིང་མོ་ཡང་རྣམ་པ་ལྔ་སྟེ། མཚན་གཉིས་ཀ་ཡོད་པ་དང་། སྒོ་གཉིས་འབྲེལ་བ་དང་། རྒྱུན་དུ་ཟག་པ་དང་། ཟླ་

མཚན་མེད་པ་དང་། མཚན་མ་ཙམ་ཡོད་པའོ། །རུང་བའི་གནས་ལྔ་སྟེ། དངོས་པོ་ཟིན་པ་དང་། དངོས་པོ་མ་ཟིན་པ་དང་། དངོས་པོ་བོར་བ་དང་། སྔ་ནས་ཡོད་པ་དང་། མ་འདུག་པ་དང་ལྔའོ། །རུང་བའི་གནས་དངོས་པོ་ཟིན་པ་གང་ཞེ་
ན། དངོས་པོ་དེ་རྣམས་ཐམས་ཅད་ཡོངས་སུ་རྫོགས་པ་ཡིན་ནོ། །གང་བྱིན་གྱིས་བརླབས་པ་རྣམ་པ་གསུམ་གྱིས་བྱིན་གྱིས་བརླབས་ཏེ་སེམས་བསྐྱེད་པ་དང་། གཅིག་ལ་གཅིག་ཏུ་སྨྲས་པ་དང་། གསོལ་བ་བྱས་པའོ། །རུང་བའི་གནས་དངོས་པོ་མ་ཟིན་པ་གང་
ཞེ་ན། ཆུང་ངུ་ན་རྨང་རྡོ་ཙམ་ཡང་བརྩིགས་པའོ། །དེ་ཡང་བྱིན་གྱིས་བརླབས་པ་རྣམ་པ་གསུམ་པོ་དེ་བཞིན་བྱིན་གྱིས་བརླབས་པ་ཡིན་ནོ། །རུང་བའི་གནས་དངོས་པོ་བོར་བ་གང་ཞེ་ན། གང་མངོན་དུ་རུང་བའི་གནས་སུ་བྱིན་གྱིས་བརླབས་པ་ལས་བོར་ཏེ། སླར་རུང་བའི་
གནས་སུ་བྱིན་གྱིས་བརླབས་པ་རྣམ་པ་གསུམ་པོ་དེས་བྱིན་གྱིས་བརླབས་པ་ཡིན་ནོ། །རུང་བའི་གནས་སྔ་ནས་ཡོད་པ་གང་ཞེ་ན། མུ་སྟེགས་ཅན་ཡ་མཚན་སྣ་ཚོགས་རྣམས་ཐུན་མོང་དུ་གྱུར་པ་སྟེ། དགེ་འདུན་གྱིས་བྱིན་གྱིས་བརླབས་པ་འདི་གསུམ་གྱིས་བྱིན་གྱིས་
བརླབས་པ་ཡིན་ནོ། །རུང་བའི་གནས་སུ་མ་འདུག་པ་གང་ཞེ་ན། དེ་ནི་སྔ་ནས་རུང་བའི་གནས་མེད་པ་ལས་རྩིག་པས་བསྐོར་ཏམ། སབ་མོས་བསྐོར་ཏམ། འོབས་ཀྱིས་བསྐོར་ཀྱང་རུང་དེར་དགེ་འདུན་གྱིས་ས་ལ་རི་མོ་བྲིས་སམ། ཕུར་པ་བཏབ་བམ། རྩིག་
པས་བསྐོར་ཏམ། མཚན་མ་གཞན་ཅི་བཙུགས་ཀྱང་རུང་སྟེ། བྱིན་གྱིས་བརླབས་པ་རྣམ་པ་གསུམ་པོ་དེས་རུང་བའི་གནས་སུ་བྱིན་གྱིས་བརླབས་པ་ཡིན་ནོ། །རྡུལ་རྣམ་པ་ལྔ་སྟེ། ཟས་རྡུལ་དང་། བཏུང་བ་རྡུལ་དང་། དྲི་རྡུལ་དང་། སྨན་རྡུལ་དང་། རྡུལ་ཉིད་
རྡུལ་དང་ལྔ་ཡིན་ནོ། །གཞན་ཡང་རྡུལ་རྣམ་པ་ལྔ་སྟེ། བཟའ་བ་རྡུལ་དང་། བཅའ་བ་རྡུལ་དང་། ཐུག་པ་རྡུལ་དང་། བཞིབ་པ་རྡུལ་དང་། བལྡག་པ་རྡུལ་དང་ལྔའོ། །མདོར་ན། རྐུ་བ་དང་ཡང་སྐབས་འབྱེད་པ། །སྦྱིན་པ་དག་དང་གསོ་སྦྱིན་གནས། །བཀའ་

ལུང་སྟོན་པར་བྱེད་པ་དང་། །གྲོང་དུ་ཉེ་བར་འགྲོ་བ་གཉིས། །རྐུ་བ་རྣམ་པ་ལྔ་སྟེ། སྒྱུས་རྐུ་བ་དང་། མཐུས་རྐུ་བ་དང་། ཕྱིར་སྦྱིན་ནོ་ཞེས་ཟེར་ཞིང་རྐུ་བ་དང་། བརྣོགས་ཏེ་རྐུ་བ་དང་། བསྔོས་ཏེ་རྐུ་བ་དང་ལྔའོ། །གང་ཟག་སྐབས་འབྱེད་པར་མི་བྱ་བ་ལྔ་སྟེ། ངོ་ཚ་བ་མེད་
པ་དང་། བར་ཆད་ཡོད་པ་དང་། ཚིག་མི་བརྟན་པ་དང་། རང་བཞིན་དུ་མི་གནས་པ་དང་། ཕས་ཕམ་པ་བྱུང་བ་དང་ལྔའོ། །སྦྱིན་པ་ལྔ་བསོད་ནམས་མ་ཡིན་པར་བགྲང་སྟེ། མཚོན་བྱིན་པ་དང་། ཆང་བྱིན་པ་དང་། དུག་བྱིན་པ་དང་། བུད་མེད་བྱིན་པ་དང་། ཆོས་
མ་ཡིན་པ་བྱིན་པ་དང་ལྔའོ། །རྒྱུ་དང་རྐྱེན་ལྔས་གསོ་སྦྱིན་གྱི་གནས་སུ་མ་སོང་ཡང་ཉེས་པར་མི་འགྱུར་ཏེ། རྒྱལ་པོས་བར་ཆད་བྱས་པ་དང་། ཆུས་ཁྱེར་བ་དང་། མེས་ཚིག་པ་དང་། མི་མ་ཡིན་པས་བར་ཆད་དུ་བྱས་པ་དང་ལྔའོ། །བཀའ་ལུང་སྟོན་པ་ལ་རྣམ་པ་ལྔ་སྟེ།
སྨྱོན་པ་ཡིན་ཏེ་སེམས་འཁྲུགས་པ་ནད་ཀྱིས་གཟིར་བས་བཀའ་ལུང་སྟོན་པ་དང་། ཚུལ་འཆོས་པ་ཡིན་ཏེ། སྡིག་པ་ལ་དད་པས་ཚུལ་འཆོས་པས་བཀའ་ལུང་སྟོན་པ་དང་། བླུན་པ་ཡིན་ཏེ་བླུན་པ་ཉམ་ཆུང་བ་རྨོངས་པས་བཀའ་ལུང་སྟོན་པ་དང་། མངོན་པའི་ང་རྒྱལ་ཅན་
ཡིན་ཏེ། མངོན་པའི་ང་རྒྱལ་གྱིས་བཀའ་ལུང་སྟོན་པ་དང་། ཡང་དག་པར་རྣམ་པར་གྲོལ་བ་ཡིན་ཏེ། ཡང་དག་པར་རྣམ་པར་གྲོལ་བས་བཀའ་ལུང་སྟོན་པའོ། །གྲོང་དུ་ཉེ་བར་འགྲོ་བའི་དགེ་སློང་གྲོང་དུ་སོང་ན་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། ལྔ་གང་
ཞེ་ན། དགེ་སློང་འཁོད་བཞིན་དུ་ཤེས་པར་མ་བྱས་པར་དུས་མ་ཡིན་པར་གྲོང་གི་ནང་དུ་འགྲོ་བ་དང་། ལེགས་པར་མ་བརྟགས་པར་སྟན་ལ་འདུག་པ་དང་། བུད་མེད་ལ་ཚིག་ལྔ་ལས་ལྷག་པར་ཆོས་འཆད་པ་དང་། བུད་མེད་དང་ལྷན་ཅིག་གཉིས་སུ་སྟན་གཅིག་ལ་
འདུག་པ་དང་། སྨེན་ངན་དང་བཅས་པའི་གྲོང་དུ་ནན་གྱིས་སྟན་ལ་འདུག་པའོ། །གྲོང་དུ་ཉེ་བར་འགྲོ་བའི་དགེ་སློང་དྲན་པ་ཉམས་པར་གྲོང་དུ་སོང་ན་གཞན་ཡང་ཉེས་པའི་དམིགས་ལྔར་རིག་པར་བྱའོ། །བུད་མེད་ལ་རྒྱུན་དུ་བལྟ་བ་དང་། བལྟ་ཞིང་གཏམ་ཟེར་བ་དང་།

གཏམ་ཟེར་བ་ལ་འདྲིས་པ་དང་། འདྲིས་ནས་ཚུལ་བཞིན་མ་ཡིན་པ་ཡིད་ལ་བྱེད་པ་དང་། ཚུལ་བཞིན་མ་ཡིན་པ་ཡིད་ལ་བྱས་ནས་ཚངས་པར་སྤྱོད་པ་ལ་མི་དགའ་བར་འགྱུར་ཞིང་ཉེས་པ་ལྕི་བ་འབྱུང་བའམ། བསླབ་པ་ཕུལ་བའམ། སླར་བབས་པར་
འགྱུར་བའི་བར་དུའོ། །མདོར་ན། བསྙེན་རྫོགས་སོ་སོར་ཐར་པ་དང་། །ཡིད་གཅུགས་འདུལ་བ་ཐར་པ་དང་། །གཏན་པ་ལྔ་དང་དམན་པ་དང་། །མ་སྐྱེས་པ་དང་དོགས་པའོ། །རྣམ་པ་ལྔའི་ཕྱིར་ན་བསྙེན་པར་རྫོགས་པ་ཞེས་བརྗོད་དེ། མཁན་པོའི་མིང་ནས་
འབྱིན་པ་དང་། དགེ་འདུན་གྱི་མིང་ནས་འབྱིན་པ་དང་། བསྙེན་པར་རྫོགས་པར་འདོད་པའི་མིང་ནས་འབྱུང་བ་དང་། གསོལ་བ་བྱེད་པ་དང་། ལས་ཉམས་པར་མི་བྱེད་པ་དང་ལྔའོ། །སངས་རྒྱས་བྱུང་བའི་དུས་ན་བསྙེན་པར་རྫོགས་པ་ལྔ་སྟེ། ཡེ་ཤེས་མངོན་པར་
ཆུད་པ་དང་། སྟོན་པར་ཁས་བླངས་པ་དང་། བཙུན་པའི་ཆོས་ཁས་བླངས་པ་དང་། དགེ་སློང་ཚུར་ཤོག་ཅེས་སྨྲ་བ་དང་། སློབ་དཔོན་དང་མཁན་པོ་མེད་པ་སྟེ་དེ་ལྟར་ལྔའོ། །སོ་སོར་ཐར་པ་ཀློག་པ་ལྔ་སྟེ། གསོལ་བ་བྱས་ནས་གླེང་གཞི་བརྗོད་དེ་ལྷག་མ་ཐོས་
པའོ། །ཞེས་བསྒྲགས་པ་འདི་ནི་སོ་སོར་ཐར་པ་བསྒྲགས་པ་དང་པོའོ། །གསོལ་བ་བྱས་ཏེ་གླེང་གཞི་དང་ཕས་ཕམ་པ་བཞི་བཀླགས་ཏེ། ལྷག་མ་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གཉིས་པའོ། །གསོལ་བ་བྱས་ཏེ་གླེང་གཞི་དང་ཕས་
ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་བཀླགས་ཏེ། ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གསུམ་པའོ། །གསོལ་བ་བྱས་ཏེ་གླེང་གཞི་དང་ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་མི་
མངོན་པ་གཉིས་བཀླགས་ཏེ། ལྷག་མ་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་བཞི་པའོ། །མདོ་རྫོགས་པར་ཀློག་པ་དང་ལྔའོ། །ཡིད་གཅུགས་པར་འཛིན་པ་ལྔ་སྟེ། མཛའ་བ་ཡིན་ཏེ་ཡིད་དུ་འོང་བ་དང་། བཟོད་པ་ཡིན་ཏེ་མི་མཐུན་པ་མེད་པ་

དང་། བླ་མ་ཡིན་ཏེ་བཙུན་པར་བྱ་བ་དང་། གཅུགས་པ་ཡིན་ཏེ་ཅི་འདོད་པ་བཞིན་བྱེད་པ་དང་། འདུག་འཚོ་སྐྱོང་བ་སྟེ་དེ་འདི་སྙམ་དུ་སེམས་སོ། །བླངས་པ་དེ་ཐོས་ན་ཡང་དགའ་བར་འགྱུར་བའོ། །འདུལ་བ་ལྔ་སྟེ། སངས་རྒྱས་ཀྱི་ཚེ་དང་། རྟག་པ་དང་།
ཕྱོགས་གཅིག་པ་དང་། ཐམས་ཅད་དུ་འགྲོ་བ་དང་། ཉོན་མོངས་པ་འདུལ་བའོ། །གཞན་ཡང་འདུལ་བ་ལྔ་སྟེ། ཡུལ་འདུལ་བ་དང་། དུས་འདུལ་བ་དང་། གནས་འདུལ་བ་དང་། གང་ཟག་འདུལ་བ་དང་། འཁྲུག་པ་འདུལ་བའོ། །གང་ཟག་ལྔ་ལ་
འདུལ་བ་མི་བརྗོད་དེ། སྐབས་ཚོལ་བས་འདྲི་བ་དང་། གཙེ་བར་བསམས་ཏེ་འདྲི་བ་དང་། ཕྱས་གདགས་པར་བསམས་ཏེ་འདྲི་བ་དང་། བགམ་པར་བསམས་ཏེ་འདྲི་བ་དང་། ཉེས་པར་བརྗོད་པར་འདོད་པས་འདྲི་བའོ། །གཏན་པ་ལ་ཡོན་ཏན་ལྔ་སྟེ། ཞག་
གཅིག་གིས་འབྲེལ་བར་མི་འགྱུར་བ་དང་། ཞག་བཅུས་མི་འགྱུར་བ་དང་། ཞག་བཅུ་ལས་འདས་ཀྱང་མི་འགྱུར་བ་དང་། མ་བསྔོས་པར་གོས་ལྷག་པར་འཆང་བ་དང་། སྟོད་གཡོགས་དང་མཐང་གོས་ཀྱིས་ལྗོངས་རྒྱུ་ཞིང་སྤྱོད་པའོ། །གཞན་ཡང་གཏན་པ་ལ་
ཡོན་ཏན་ལྔ་སྟེ། འདུས་ཏེ་ཟ་བ་མེད། ཡང་ཡང་ཟ་བ་མེད། སྤྱན་མ་དྲངས་པར་འགྲོ་བ་དང་། ཆོས་གོས་ཅི་དགར་ཚོལ་བ་དང་། སྟོན་ཟླ་ཐ་ཆུངས་ནས་དཔྱིད་ཟླ་ར་བའི་བར་དུ་རྙེད་པ་ཅི་ཡོད་པ་དབྱར་ལྷན་ཅིག་ཏུ་གནས་པའི་དགེ་འདུན་དང་འདྲ་བར་བགོ་བའོ། །གང་ཟག་ལྔ་
གཏན་པ་འདིང་བར་མི་བསྐོ་སྟེ། དབྱར་མེད་པ་དང་། དབྱར་ཆད་པ་དང་། དབྱར་ཕྱི་མར་ཞུགས་པ་དང་། གཞན་དུ་དབྱར་ཚུལ་དུ་ཞུགས་པ་དང་། སྤང་བ་བྱས་པའོ། །གཞན་ཡང་གང་ཟག་ལྔ་གཏན་པ་འདིང་བར་མི་བསྐོ་སྟེ། སོ་སོར་གནས་པ་དང་། མི་གནས་པ་
དང་། རྗེས་སུ་ཕྱོགས་པ་དང་། བསླབ་པ་བྱིན་པ་དང་། ཞིག་པའོ། །གཞན་ཡང་གང་ཟག་ལྔ་གཏན་པ་འདིང་བར་མི་བསྐོ་སྟེ། མ་མཐོང་བས་སྤང་བར་བྱས་པ་དང་། སླར་ལས་མི་བྱེད་པའི་ཕྱིར་སྤངས་པ་དང་། སྡིག་པར་ལྟ་བ་སླར་མ་གཏང་བ་སྤངས་པ་དང་། རྗེས་

སུ་ཕྱོགས་པ་དང་། མི་གནས་པའོ། །གཞན་ཡང་གང་ཟག་ལྔ་གཏན་པ་འདིང་བར་མི་བསྐོ་སྟེ། ཆད་པ་བྱེད་པ་དང་། གཞི་ནས་བསླང་སྟེ་ཆད་པ་བྱེད་པ་དང་། ཡིད་མགུ་བར་བྱེད་པ་དང་། གཞི་ནས་བསླང་སྟེ་མགུ་བར་བྱེད་པ་དང་། ཡིད་མགུ་བར་
སྤྱད་པའོ། །གང་ཟག་ལྔ་རྣམས་རྙེད་པ་དབང་ལ་ཡོན་ཏན་མེད་དེ། དབྱར་མེད་པ་དང་། དབྱར་ཆད་པ་དང་། དབྱར་ཕྱི་མར་ཚུལ་དུ་ཞུགས་པ་དང་། དགེ་ཚུལ་ཕ་དང་། བསླབ་པ་བྱིན་པའོ། །གཞན་ཡང་གང་ཟག་ལྔ་རྣམས་རྙེད་པ་དབང་ལ་ཡོན་ཏན་མེད་དེ། མ་
མཐོང་བའི་ཕྱིར་སྤངས་པ་དང་། སླར་ལས་མི་བྱེད་པས་སྤངས་པ་དང་། སྡིག་པ་ལ་ལྟ་བ་སླར་མ་བཏང་བས་སྤངས་པ་དང་། ཉེ་བར་ཕྱོགས་པ་དང་། མི་གནས་པའོ། །གང་ཟག་ལྔ་རྣམས་རྙེད་པ་ཡང་མི་དབང་ལ་ཡོན་ཏན་ཡང་མེད་དེ། ཕ་བསད་པ་དང་། མ་བསད་
པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །གཞན་ཡང་གང་ཟག་ལྔ་དག་རྙེད་པ་ཡང་མི་དབང་ལ་ཡོན་ཏན་ཡང་མེད་དེ། མ་ནིང་དང་། དགེ་སློང་མ་སུན་ཕྱུང་བ་དང་། མུ་
སྟེགས་ཅན་དུ་སོང་བ་དང་། རྐུན་གནས་དང་། སྔོན་ཉེས་པ་བྱུང་བའོ། །བླ་མར་མི་བྱེད་པའི་ཆོས་ལྔ་སྟེ། མ་དད་པ་ཡིན། ཚུལ་ཁྲིམས་ངན་པ་ཡིན། ཉུང་ངུ་ཐོས་པ་ཡིན། སེར་སྣ་ཅན་ཡིན། ཤེས་རབ་འཆལ་བ་ཡིན་ནོ། །གང་ཟག་ལྔ་ནི་ཆོས་དང་འདུལ་བ་
འདི་ལས་མི་སྐྱེ་བའི་ཆོས་ཅན་ཡིན་ཏེ། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །གཞན་ཡང་གང་ཟག་ལྔ་ནི་ཆོས་དང་འདུལ་བ་འདི་ལས་མི་
སྐྱེ་བའི་ཆོས་ཅན་ཏེ། མ་ནིང་དང་། དགེ་སློང་མ་སུན་ཕྱུང་བ་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔོན་ཉེས་པ་བྱུང་བའོ། །ཆོས་ལྔ་དང་ལྡན་པའི་དགེ་སློང་སྡིག་པ་ལ་དོགས་པ་ཅན་ཡིན་ཏེ། གནོད་སྦྱིན་མོ་ལ་སྟེན་པ་དང་། སྨད་འཚོང་མ་

ལ་སྟེན་པ་དང་། ཡུགས་ས་མོ་ལ་སྟེན་པར་བྱེད་པ་དང་། གཞོན་ནུ་མ་ཆེན་མོ་ལ་སྟེན་པར་བྱེད་པ་དང་། མ་ནིང་མོ་དང་སྟེན་པར་བྱེད་པའོ། །མདོར་ན། མཚམས་གསུམ་ལྷག་མར་བྱས་པ་དང་། །མྱུར་དུ་གནས་པ་འགྲོ་བ་དང་། །གོས་དང་རུང་བས་སྨན་རྣམས་
དང་། །ཁབ་རལ་ཡང་ནི་དེ་བཞིན་ནོ། །རྣམ་པ་ལྔས་མཚམས་སླར་ཞིག་པར་འགྱུར་ཏེ། དགེ་འདུན་ཐམས་ཅད་དོང་བ་དང་། དགེ་འདུན་ཐམས་ཅད་བབས་པ་དང་། དགེ་འདུན་ཐམས་ཅད་ཤི་སྟེ་དུས་བྱས་པ་དང་། དགེ་འདུན་ཐམས་ཅད་ཕྱོགས་ཕྱོགས་སུ་
དོང་ཞིང་ཆད་པ་དང་། གསོལ་བ་དང་ལས་བྱས་པ་དང་ལྔའོ། །གཞན་ཡང་རྣམ་པ་ལྔས་ན་མཚམས་ཕྱིར་ཞིག་པར་འགྱུར་ཏེ། མཚན་མ་མེད་པ་དང་། དགེ་སློང་མེད་པ་དང་། རེ་བ་མེད་པ་དང་། མཚམས་གཞན་བསྐོར་བ་དང་། གསོལ་བ་དང་ལས་
དང་ལྔའོ། །རྣམ་པ་ལྔས་ན་ལྷག་མར་མ་བྱས་པ་ཞེས་བརྗོད་དེ། མངོན་སུམ་དུ་མ་གྱུར་པར་བཟའ་བ་དང་བཅའ་བ་ལྷག་མར་བྱེད་པ་དང་། བྱིན་ལེན་མ་བྱས་པར་བཟའ་བ་དང་བཅའ་བ་ལྷག་མར་བྱེད་པ་དང་། གཞན་ལ་མ་བསྒོ་བར་ལྷག་མར་བྱེད་པ་དང་། བསྙེན་
པར་མ་རྫོགས་པའི་མདུན་དུ་ལྷག་མར་བྱེད་པ་དང་། རང་བཞིན་དུ་མི་གནས་པའི་མདུན་དུ་ལྷག་མར་བྱེད་པའོ། །ལྷག་མར་བྱས་པ་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་དོ། །མྱུར་དུ་སྨྲ་བའི་གང་ཟག་ལ་ཉེས་པའི་དམིགས་རྣམ་པ་ལྔར་རིག་པར་བྱའོ། །ལྔ་
གང་ཞེ་ན། ལུས་ངལ་བར་འགྱུར། དྲན་པ་ཉམས་པར་འགྱུར། སེམས་ལ་གནོད་པར་འགྱུར། མིད་པ་འགག་པར་འགྱུར། ཟུར་མི་ཕྱིན་ཅིང་གོ་བར་མི་འགྱུར་ཏེ། མྱུར་དུ་སྨྲ་བའི་གང་ཟག་ལ་ཉེས་པའི་དམིགས་སུ་འགྱུར་རོ། །མྱུར་དུ་མི་སྨྲ་བའི་གང་ཟག་
ལ་ནི་ཡོན་ཏན་རྣམ་པ་ལྔར་འགྱུར་ཏེ། དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །གནས་གཅིག་ན་ཡུན་རིང་དུ་གནས་པའི་གང་ཟག་ལ་ཉེས་པའི་དམིགས་རྣམ་པ་ལྔར་འགྱུར་ཏེ། བྱ་བ་མང་པོར་འགྱུར། སྣོད་སྤྱད་མང་དུ་འགྱུར། ཡོ་

བྱེད་མང་ཞིང་གནས་ལ་སེར་སྣ་ཅན་དུ་འགྱུར། གནས་ལ་ཆགས་ཤིང་ཁྱིམ་ལ་སེར་སྣ་ཅན་དུ་འགྱུར། རིགས་ལ་ཆགས་ཤིང་ཁྱིམ་པ་དང་རབ་ཏུ་བྱུང་བ་དེ་དག་ལྷན་ཅིག་འདྲེས་པར་འགྱུར་རོ། །གནས་གཅིག་ན་ཡུན་རིང་དུ་མི་གནས་པའི་གང་
ཟག་ལ་ཡོན་ཏན་ལྔ་སྟེ། དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །རྟག་ཏུ་འགྲོ་བ་ལ་ཉེས་པའི་དམིགས་རྣམ་པ་ལྔར་འགྱུར་ཏེ། ཁོང་དུ་མ་ཆུད་པ་ཆུད་པར་མི་འགྱུར་བ་དང་། ཁོང་དུ་ཆུད་པ་རྣམས་ཉམས་པར་འགྱུར་བ་དང་། ཆོས་ཐོས་
པ་རྣམས་ཀྱང་བརྗེད་པར་འགྱུར། གནོད་པ་ཆེར་མྱོང་བར་འགྱུར། མཛའ་བོ་དང་ལྡན་པར་མི་འགྱུར་རོ། །རྟག་པར་མི་འགྲོ་བ་ལ་ཡོན་ཏན་ལྔ་སྟེ། དེ་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །རུང་བའི་གོས་ལ་རྣམ་པ་ལྔ་སྟེ། བལ་དང་། རས་
བལ་དང་། སྲིན་བལ་དང་། ལྡུམ་བུ་ཤ་ན་དང་། ཟར་མའི་གོས་སོ། །ཆོས་གོས་ལ་རྣམ་པ་ལྔས་ན་ཆོས་གོས་བྱིན་གྱིས་བརླབས་པ་ལས་སླར་ཞིག་པར་འགྱུར་ཏེ། ཕྲོགས་པ་དང་། བཏང་བ་དང་། སླར་ཕྱུང་བ་དང་། བབས་པ་དང་། དུས་བྱས་པའོ། །བསྔོས་
པ་ལས་ཀྱང་རྣམ་པ་ལྔས་ན་སླར་ཞིག་པར་འགྱུར་ཏེ། ཕྲོགས་པ་དང་། བྱིན་པ་དང་། སླར་ཕྱུང་བ་དང་། བབས་པ་དང་། དུས་བྱས་པའོ། །དེ་བཞིན་དུ་ལྷུང་བཟེད་བྱིན་གྱིས་བརླབས་པའང་བརྗོད་པར་བྱའོ། །དེ་བཞིན་དུ་སྨན་བྱིན་གྱིས་བརླབས་པ་དང་། སྨན་
བསྔོས་པ་ཡང་བརྗོད་པར་བྱའོ། །ཁབ་རལ་གང་ཟག་ལྔའི་དབང་དུ་མི་བྱ་སྟེ། ངོ་ཚ་མེད་པ་དང་། ཁོན་ཡོད་པ་དང་། ཆོག་མི་ཤེས་པ་དང་། དྲན་པ་ཉམས་པ་དང་། རང་བཞིན་དུ་མི་གནས་པའོ། །མདོར་ན། བཟའ་བ་ཕྱི་བཞིན་དགེ་སྦྱོང་དང་། །དགེ་བསྙེན་
དང་ནི་ནད་པ་གཉིས། །རབ་ཏུ་འབྱུང་བ་ལྔ་པོ་དང་། །ཡོན་ཏན་མང་པོ་དེ་བཞིན་ནོ། །ཟས་ཚོད་མེད་པ་ལ་ཉེས་པའི་དམིགས་རྣམ་པ་ལྔ་སྟེ། ལུས་ལྕི་བར་འགྱུར། ལས་སུ་མི་རུང་ཞིང་སྤོང་བ་ལ་མི་བཟོད་པ་དང་། དབུགས་ཕྱི་ནང་དུ་རྒྱུ་བ་ལ་མི་བདེ་བ་དང་། བཤང་

གཅི་མང་དུ་འགྱུར་བ་དང་། སྙོམ་པ་དང་གཉིད་ཀྱིས་སེམས་ཀུན་ཏུ་ནོན་པར་འགྱུར་བ་དང་། སེམས་རྩེ་གཅིག་ཏུ་མི་འགྱུར་ཞིང་གཞན་དུ་འགྱུར་བའོ། །ཟས་ཚོད་ཟིན་པ་ལ་ཡོན་ཏན་ལྔར་འགྱུར་ཏེ། དེ་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །ཆོས་
ལྔ་དང་ལྡན་ན་ཕྱི་བཞིན་འབྲང་བའི་དགེ་སྦྱོང་བཀྲི་མི་དགོས་ཏེ། ཤིན་ཏུ་མདུན་དུ་རིང་དུ་འགྲོ་བ་དང་། ཤིན་ཏུ་ཕྱི་ནས་ནུར་ཞིང་འོང་བ་དང་། སྙོགས་ཤིང་འགྲོ་བ་དང་། གཏམ་གྱི་བར་དུ་འཇུག་པ་དང་། རིགས་ཤིང་འོས་པར་རྙེད་པ་རྣམས་ལེན་མི་ནུས་པའོ། །
ལྷུང་བཟེད་གཉིས་དང་ལྷུང་བཟེད་དུ་ཐོགས་པ་རྙེད་པ་བླང་བར་ཡང་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་པའི་དགེ་བསྙེན་ནི་དགེ་བསྙེན་དྲི་མ་ཅན་ནོ། །དགེ་བསྙེན་སླུ་བའོ། །དགེ་བསྙེན་རུལ་བའོ། །དགེ་བསྙེན་
རིགས་ངན་དུ་རིག་པར་བྱ་སྟེ། ཚུལ་ཁྲིམས་ངན་པ་ཅན་ཡིན་ཏེ། བསླབ་པ་ཡོངས་སུ་རྫོགས་པར་མི་བྱེད་པའོ། །ལྟས་དང་བཀྲ་ཤིས་པ་ལ་བརྟེན་པ་ཡིན་ཏེ། ལྟས་དང་བཀྲ་ཤིས་པས་འདག་པར་ཡིད་ཆེས་ཀྱི་ལས་ཀྱིས་མ་ཡིན་པ་དང་། ལོག་པར་ལྟ་བ་ཡིན་
ཏེ་ལོག་པར་ལྟ་ཞིང་དགེ་སློང་ལ་མི་དགའ་བ་མང་དུ་ཡིན། གནས་བརྟན་དང་བར་མ་དང་། གསར་བུའི་དགེ་འདུན་ལ་དབང་བཟས་པ་ཡིན་ཏེ། དེས་དེ་ན་འཁོད་པའི་དགེ་སློང་ལ་སྨད་པའོ། །ཆོས་ལྔ་དང་ལྡན་པའི་དགེ་བསྙེན་ནི་དགེ་བསྙེན་པད་མ་ལྟ་བུ། དགེ་
བསྙེན་པུ་ཎྜ་རཱི་ཀ་ལྟ་བུ། དགེ་བསྙེན་དམ་པར་ལྟ་སྟེ། དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་པའི་ནད་པ་ལ་ནད་གཡོག་བྱ་བར་དཀའ་བ་ཡིན་ནོ། །ཚིག་མི་སྲུན་པ་ཚིག་མི་སྲུན་པར་གྱུར་པའི་ཆོས་རྣམས་དང་ལྡན་པ་དང་།
ནད་གཡོག་གིས་ལུང་བསྟན་པ་བཞིན་དུ་མི་བཏུབ་པ་དང་། གང་ཕན་པ་དང་གང་མི་ཕན་པ་མི་ཤེས་པ་དང་། སྨན་ལ་མི་སྟེན་པ་ཡིན་ཏེ། གང་བདག་ལ་ཡོ་བྱད་འབྱོར་བ་དེ་ཐམས་ཅད་གཞན་ལ་འཚོ་བ་དང་། ནད་རྣམས་དུབ་པ་དང་མ་དུབ་པ་མི་ཤེས་པའོ། །དེ་ཉིད་ལ་

དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་ན་ནད་པའི་ནད་གཡོག་དུ་བཅུག་པའི་མི་རིགས་སོ། །ཚིག་མི་སྲུན་པ་ཡིན་ཏེ། ཚིག་མི་སྲུན་པར་གྱུར་པའི་ཆོས་རྣམས་དང་ལྡན་པ་དང་། ནད་པ་ལ་ལུང་བསྟན་པ་བཞིན་མི་
བྱེད་པ་དང་། ནད་པ་ལ་ཕན་པ་དང་མི་ཕན་པ་མི་ཤེས་པ་དང་། ནད་པའི་སྨན་སྦྱོར་མི་ནུས་པ་དང་། ནད་པ་ལ་ཁ་ཟས་ཀྱི་ཕྱིར་ནད་གཡོག་བྱེད་ཀྱིས་ཆོས་ཀྱི་ཕྱིར་མ་ཡིན་ཞིང་སྨོད་པ་ཅན་ཡིན་ཏེ། ནད་པ་ལ་རབ་ཏུ་སྨད་ནས་ནད་པའི་བཤང་གཅི་དང་། མཆིལ་མ་དང་།
སྐྱུགས་པ་དང་། ཚད་པ་འདོར་དུ་མི་བཏུབ་ཅིང་སྨོད་པའོ། །དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་ཞིང་ལོ་བཅུ་ལོན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ་སྟེ། ལྔ་གང་ཞེ་ན། ཚུལ་
ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་ལ་མཁས་པ་དང་། འདུལ་བ་ལ་
མཁས་པ་དང་། མ་ལྟ་བུ་ལ་མཁས་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་རིག་པ་དང་། འདུལ་བ་རིག་པ་དང་། མ་ལྟ་བུ་རིག་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་
ལྡན་པར་གྱུར་པ་དང་། མང་དུ་ཐོས་པ་དང་། མདོ་སྡེ་ལ་གསལ་བ་དང་། འདུལ་བ་ལ་གསལ་བ་དང་། མ་ལྟ་བུ་ལ་གསལ་བའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། ལྷན་ཅིག་སྤྱོད་པ་དང་། ཉེ་གནས་མདོ་སྡེ་
དང་། འདུལ་བ་དང་། མ་ལྟ་བུ་སློབ་ཏུ་འཇུག་ནུས་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་འདུལ་བ་ལ་བསླབས་པ་ཡིན་ནོ། །གཞན་ཡང་

རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བསླབ་པ་ལས་ལྷག་པར་སྤྱོད་པའི་བསླབ་པ་དང་། འདུལ་བ་ལྷག་པ་དང་། སོ་སོར་ཐར་པ་ལྷག་པ་རྣམས་སློབ་པའོ། །གཞན་ཡང་རྣམ་པ་ལྔར་བརྗོད་དེ། དད་པ་དང་ལྡན་པ་ཡིན་ཏེ། ཚུལ་
ཁྲིམས་དང་ལྡན་པ་དང་། ཐོས་པ་དང་ལྡན་པ་དང་། གཏོང་བ་དང་ལྡན་པ་དང་། ཤེས་རབ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། ཤེས་རབ་དང་ལྡན་པ་དང་། ཏིང་ངེ་འཛིན་དང་ལྡན་པ་དང་། རྣམ་པར་གྲོལ་
བ་དང་ལྡན་པ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་ལྡན་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་འགྲུས་རྩོམ་པ་དང་། དྲན་པ་ཉེ་བར་འཇོག་པ་དང་། ཤེས་རབ་ཅན་དུ་གྱུར་པའོ། །གཞན་
ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། མཉམ་པར་འཇོག་པ་དང་། ཤེས་རབ་ཅན་དུ་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་
འགྲུས་བརྩམས་པ་དང་། ནང་དུ་ཡང་དག་འཇོག་ལ་བརྩོན་པ་དང་། ཤེས་རབ་ཅན་ཡིན་ནོ། །གཞན་ཡང་རྣམ་པ་ལྔར་བརྗོད་དེ། སློབ་པའི་ཚུལ་ཁྲིམས་ཀྱི་ཕུང་པོར་ལྡན་པ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་
ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། མི་སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་
པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཉེས་པ་བྱུང་བ་ཤེས། བཅས་པ་ཤེས། རྗེས་སུ་བཅས་པ་ཤེས། གནང་བ་ཤེས། རྗེས་སུ་གནང་བ་ཤེས་པའོ། །གཞན་ཡང་རྣམ་པ་

ལྔར་བརྗོད་དེ། བར་ཆད་དུ་འགྱུར་བ་ཤེས། བར་ཆད་དུ་མི་འགྱུར་བ་ཤེས། ལུང་བསྟན་པ་དང་། རྗེས་སུ་བསྟན་པ་དང་། གནས་བཅའ་བ་བྱེད་ནུས་པའོ། །གཞན་ཡང་རྣམ་པ་ལྔར་བརྗོད་དེ། ཉེས་པ་ཤེས། ཉེས་པ་མེད་པ་ཤེས། ལྕི་བ་
ཤེས། ཡང་བ་ཤེས། དེས་སོ་སོར་ཐར་པའི་མདོ་རྒྱས་པར་གོ་ཞིང་ཁ་ཏོན་དུ་ལོབས་པ་ཡིན་ནོ། །ཆོས་འདི་ལྔ་དང་ལྡན་ན་དེས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། བདག་ཉིད་ཀྱང་གནས་མི་བཅའ་བར་འདུག་པར་བྱ་སྟེ། ཐོག་མའི་
ལྔ་པོ་ཉམས་པ་གཉིས་ཏེ། བསྙེན་པར་རྫོགས་ནས་ལོ་བཅུ་ལོན་ནམ་དེ་བས་ལྷག་ཀྱང་རུང་སྟེ། ལྷན་ཅིག་སྤྱོད་པའམ་ཉེ་གནས་ཀྱང་རུང་སྟེ། ནད་པའི་ནད་གཡོག་བྱེད་དམ། ནད་གཡོག་བྱེད་དུ་འཇུག་ནུས་པ་དང་། ལྷན་ཅིག་སྤྱོད་པའམ་ཉེ་གནས་ཀྱང་རུང་སྟེ། ཐེ་
ཚོམ་བྱུང་ན་སླར་སེལ་ཏམ་སེལ་དུ་འཇུག་ནུས་པ་དང་། ལྷན་ཅིག་སྤྱོད་པའམ་ཉེ་གནས་སྡིག་པ་ལ་ལྟ་བར་གྱུར་ན། སླར་གཏོང་ངམ་གཏོང་ནུས་པར་གྱུར་པ་དང་། ལྷན་ཅིག་སྤྱོད་པའམ་ཉེ་གནས་གནས་འདི་ན་མི་དགའ་བར་གྱུར་ན། ཡུལ་གུད་དུ་ལེན་དུ་འཇུག་པར་བྱེད་
ནུས་པ་ཡིན་ཏེ། ཆོས་འདི་ལྔ་དང་ལྡན་ན་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། བདག་དང་གནས་མི་བཅའ་བར་འདུག་པར་བྱའོ།། །།འདུལ་བ་གཞུང་དམ་པ། བམ་པོ་ཉི་ཤུ་དགུ་པ། ལྔ་པོ་རྣམས་ཀྱི་མདོ་
བར་མའི་ཚིགས་སུ་བཅད་པ་བརྗོད་པར་བྱའོ། །ལོ་བཅུ་མདོ་སྡེ་བཞི་པ་དང་། །ལྷག་མར་སྤྱོད་དང་རྫོགས་པ་དང་། །གཉིས་སུ་བྱས་ཏེ་བརྩོན་འགྲུས་བརྩམས། །གཞན་ཡང་གསུམ་པ་ཕུང་པོ་དང་། །བྱུང་བ་ལ་ཡང་གཉིས་སུ་བྱ། །བར་དུ་གཅོད་དང་ཉེས་པ་
དང་། །ཐ་མར་བྱས་ནས་སྡེར་བསྡུས་སོ། །འདུལ་བ་མི་འཛིན་པ་ལ་ཉེས་པའི་དམིགས་ལྔ་དང་ལྡན་པ་ནི་ཟབ་པ་དང་། སྤོབས་པ་མེད་པ་དང་། བསམ་པ་མང་བ་དང་། འཇིག་རྟེན་གྱི་ཡི་གེར་ལྡན་པ་དང་། གོ་དཀའ་བའོ། །གང་ཟག་འདུལ་བ་འཛིན་པ་ལ་

ཡོན་ཏན་རྣམ་པ་ལྔ་སྟེ། རྒྱལ་བའི་ནང་གི་མཛོད་སྲུང་བར་འགྱུར་བ་ཡིན། བདག་གི་ཚུལ་ཁྲིམས་ཀྱི་ཕུང་པོ་སྦས་ཤིང་ཤིན་ཏུ་སྦས་པར་གྱུར་པ་དང་། དེ་ལ་ལུང་བསྒོ་བ་དང་། བསྟན་པ་གཞན་ལ་རག་མ་ལུས་པ་ཡིན། འཁོར་བཞི་འདུ་བར་འགྱུར་བ་ཡིན།
མཁས་པ་ཚངས་པ་མཚུངས་པར་སྤྱོད་པའི་གང་ཟག་འགྱོད་པ་སྐྱེས་པ་རྣམས་ཀྱི་སྐྱབས་སུ་གྱུར་པ་ཡིན་ནོ། །གཞན་ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། མི་འཇིགས་པར་དགེ་འདུན་གྱི་ནང་དུ་གནས་པ་དང་། དེས་བསླབ་པའི་གནས་
ཤིན་ཏུ་ཟིན་པར་གྱུར་པ་དང་། སྟོན་པས་བསྟན་པ་དག་འཕེལ་བར་བྱེད་པ་དང་། ཆོས་ཀྱི་རྗེས་སུ་སྒྲོགས་པར་བྱེད་པ་དང་། འདི་ལྟར་བསླབ་པའི་དབང་དུ་བྱས་ནས་འདི་ལས་ཕྱི་རོལ་པའི་སྤྱི་བོར་བསྒྲུབས་ཏེ་འདུག་པ་ཡིན་ནོ། །གཞན་ཡང་གང་ཟག་འདུལ་བ་
འཛིན་པ་ལ་ཡོན་ཏན་རྣམ་པ་ལྔ་སྟེ། འདུལ་བ་འཛིན་པའི་གང་ཟག་ཕྱོགས་གང་ན་གནས་པ་དེར་ང་སྣང་བར་གྱུར་པ་དང་། མངོན་དུ་སྣང་བར་གྱུར་པ་དང་། རབ་ཏུ་སྣང་བར་གྱུར་པ་དང་། ཕྱོགས་དེ་ངས་སྟོངས་པར་མ་གྱུར་པ་དང་། འདུལ་བ་འཛིན་པའི་གང་ཟག་
ཕྱོགས་གང་ན་འདུག་པ་དེའི་ཕྱོགས་སུ་དེ་བཞིན་གཤེགས་པ་ཕྲིན་ལས་ཆུང་བ་ཡིན་ནོ། །གཞན་ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། སྤངས་པ་ཤེས་པ་དང་།
རྗེས་སུ་གནང་བ་ཤེས་པའོ། །གཞན་ཡང་འདུལ་བ་འཛིན་པ་ལ་ཡོན་ཏན་རྣམ་པ་ལྔ་སྟེ། ཉེས་པ་ཤེས་པ་དང་། ཉེས་པ་མེད་པ་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། དེས་སོ་སོར་ཐར་པའི་མདོ་ཀློག་ཅིང་རྒྱས་པར་བསྒྲགས་པ་ཡིན་ནོ། །གཞན་
ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། བར་ཆད་དུ་འགྱུར་བ་ཤེས། བར་ཆད་མ་ཡིན་པ་ཤེས། ལུང་བསྒོ་བ་དང་། རྗེས་སུ་སྟོན་པ་དང་། གནས་བཅར་འཇུག་ནུས་པ་ཡིན་ནོ། །མདོར་ན། སྤངས་པར་གྱུར་དང་གཉིས་པ་དང་། །ཕྱག་

དེར་ཁྲོད་པ་གཉིས་སུ་བྱ། །རུང་བ་གཉིས་པ་བཟའ་བ་དང་། །བཅའ་བ་བུ་རམ་དེ་བཞིན་ནོ། །རྣམ་པ་ལྔས་ན་སྤངས་པ་ཞེས་བྱ་སྟེ། བཟའ་བར་མངོན་པ་དང་། བཟའ་བ་སྦྱིན་པར་མངོན་པ་དང་། བཟའ་བ་བྱིན་ལེན་བྱེད་པར་མངོན་པ་དང་།
བཟའ་བ་སྤོང་བར་མངོན་པ་དང་། སྟན་ལས་ལངས་པར་མངོན་པའོ། །ཇི་ལྟར་ན་བཟའ་བར་མངོན་པ་ཞེ་ན། བཟའ་བ་རྣམ་པ་ལྔ་དང་བཅའ་བ་རྣམ་པ་ལྔ་སླར་སྤོང་བར་བྱེད་པའོ། །ཇི་ལྟར་ན་བཟའ་བ་སྦྱིན་པ་མངོན་པ་ཞེ་ན། སྐྱེས་པ་དང་བུད་མེད་དང་མ་ནིང་དུ་མངོན་པའོ་
ཇི་ལྟར་ན་བཟའ་བ་བྱིན་ལེན་བྱེད་པ་མངོན་པ་ཞེ་ན། བཟའ་བ་ལྔ་དང་བཅའ་བ་ལྔ་འབྲིམ་པར་གྱུར་པའོ། །ཇི་ལྟར་ན་བཟའ་བ་སྤོང་བར་མངོན་པ་ཞེ་ན། བཟའ་བ་ལྔ་དང་བཅའ་བ་ལྔ་མི་འདོད་ཅེས་སྤངས་པ་ཡིན། ཇི་ལྟར་ན་སྟན་ལས་ལངས་པར་མངོན་པ་གང་ཞེ་ན། གང་
སྟན་ལས་ལངས་པའོ། །རྣམ་པ་ལྔས་ན་མ་སྤངས་པ་ཞེས་བྱ་སྟེ། དེ་ལྟ་བུ་ལས་སླར་བཟློག་པ་རྣམ་པ་ལྔར་བརྗོད་པར་བྱའོ། །གཞན་ཡང་རྣམ་པ་ལྔའི་ཕྱིར་མ་སྤངས་པ་ཞེས་བྱ་སྟེ། མི་རུང་བའི་བཟའ་བ་བཟའ་བ་དང་བཅའ་བ་བཅའ་བ་མི་རུང་བར་འདྲེས་པས་སྤོང་
བ་དང་། བཞག་པའམ་བཞག་པར་འདྲེས་པས་སྤོང་བ་དང་། མི་ཕན་པའམ་མི་ཕན་པར་འདྲེས་པས་སྤོང་བ་དང་། མི་འདོད་པའམ་མི་འདོད་པར་འདྲེས་པས་སྤོང་བ་དང་། མ་འགྲངས་པའམ་རྫོགས་པར་མ་གྱུར་པའོ། །རྣམ་པ་ལྔས་སྤངས་པ་ཞེས་བྱ་སྟེ། དེ་ལས་
སླར་བཟློག་པ་རྣམ་པ་ལྔར་བརྗོད་པར་བྱའོ། །གཞན་ཡང་རྣམ་པ་ལྔས་ལྷག་མ་དང་བཅས་པའི་ཚིག་གིས་སྤངས་པ་ནི་མ་སྤངས་པ་ཞེས་བྱ་སྟེ། རེ་ཞིག་ཆོག་གོ་ཞེས་ཟེར་བ་དང་། རེ་ཞིག་ཞོག་ཅིག་ཅེས་ཟེར་བ་དང་། རེ་ཞིག་བཟའོ་ཞེས་ཟེར་བ་དང་། རེ་ཞིག་མི་དགོས་
སོ་ཞེས་ཟེར་བ་དང་། རེ་ཞིག་འགྲངས་སམ་མ་འགྲངས་བལྟའོ་ཞེས་ཟེར་བ་འདི་ལྔ་ནི་མ་སྤངས་པ་ཞེས་བྱའོ། །རྣམ་པ་ལྔའི་ཕྱིར་སྤངས་པ་ཞེས་བྱ་སྟེ། ཆོག་གོ་ཞེས་ཟེར་བ་དང་། ཞོག་ཅིག་ཅེས་ཟེར་བ་དང་། ཟོས་ཟིན་ཏོ་ཞེས་ཟེར་བ་དང་། མི་དགོས་སོ་ཞེས་ཟེར་བ་

དང་། འགྲངས་སོ་ཞེས་ཟེར་བའི་ཚིག་ལྔ་པོ་ལྷག་མ་མེད་པ་དེ་ལྔ་ནི་སྤངས་པ་ཞེས་བྱའོ། །ཕྱག་དར་ཁྲོད་ཀྱི་གོས་རྣམ་པ་ལྔ་སྟེ། སྲང་གི་ཕྱག་དར་ཁྲོད་ཀྱི་གོས་དང་། ཆུས་ཁྱེར་བ་དང་། ཕྱག་དར་ཁྲོད་པ་དང་། དགོན་པ་ན་འདུག་པ་དང་། མཛོད་རྙིང་ཁྱེར་བ་དང་
ལྔའོ། །གཞན་ཡང་ཕྱག་དར་ཁྲོད་ཀྱི་གོས་ལ་རྣམ་པ་ལྔ་སྟེ། བ་ལང་གིས་ཟོས་པ་དང་། བྱི་བས་ཟོས་པ་དང་། བྱེའུས་ཟོས་པ་དང་། མེས་ཚིག་པ་དང་། མ་མས་བོར་བའི་ཕྱག་དར་ཁྲོད་དང་ལྔའོ། །རུང་བར་བྱེད་པ་ལ་རྣམ་པ་ལྔ་སྟེ། མེས་རུང་བར་
བྱ་བ་དང་། མཚོན་གྱིས་རུང་བར་བྱ་བ་དང་། སེན་མོས་རུང་བར་བྱ་བ་དང་། ནེ་ཚོས་རུང་བར་བྱ་བ་དང་། རྙིས་པས་རུང་བར་བྱ་བ་དང་ལྔའོ། །གཞན་ཡང་རུང་བ་ལྔ་སྟེ། བཏོན་པ་དང་། བཙལ་བ་དང་། བཅད་པ་དང་། གཤེགས་པ་དང་། ས་བོན་མ་ཡིན་
པའི་ཆོས་དང་ལྔའོ། །བཟའ་བ་ལ་རྣམ་པ་ལྔ་སྟེ། འབྲས་ཆན་དང་། ཕྱེ་ཚལ་བཙོས་པ་དང་། ཤ་དང་། ཉ་དང་། ཁུར་བའོ། །བཅའ་བ་ལ་རྣམ་པ་ལྔ་སྟེ། རྩ་བ་བཅའ་བ་དང་། སྡོང་བུ་བཅའ་བ་དང་། ལོ་མ་བཅའ་བ་དང་། མེ་ཏོག་བཅའ་བ་དང་།
འབྲུ་བཅའ་བའོ། །གཞན་ཡང་བཅའ་བ་རྣམ་པ་ལྔ་སྟེ། བག་ཙོས་བཅའ་བ་དང་། བརྔོས་པ་བཅའ་བ་དང་། ཁུར་སྐམ་བཅའ་བ་དང་། བུ་རམ་བཅའ་བ་དང་། ཆན་བཅའ་བའོ། །ཉམ་དམའ་བ་ལྔས་ན་བྱིན་གྱིས་བརླབས་པའི་བུ་རམ་བཅའ་བར་བྱ་སྟེ།
ཟན་ཆུང་ངུ་ཟོས་པ་དང་། ཟན་མ་ཟོས་པ་དང་། ནད་ཀྱིས་གཟིར་བ་དང་། ལམ་དུ་ཞུགས་པ་དང་། ལས་གསར་དུ་བྱེད་པའོ། །མདོར་ན། དུགས་ཁང་ཚུལ་ཁྲིམས་མི་བཟོད་པ། །དམ་ཆོས་མ་ཡིན་མཛའ་མང་བ། །ལྷུང་བཟེད་དང་ནི་བཟའ་བ་དང་། །
གོས་དང་བསོད་སྙོམས་དེ་བཞིན་ནོ། །དུགས་ཁང་ལ་ཡོན་ཏན་རྣམ་པ་ལྔ་སྟེ། ལུས་ཀྱི་དྲི་མ་མེད་པར་བྱེད་པ་དང་། པགས་པ་དང་མདངས་གསལ་བར་བྱེད་པ་དང་། པགས་པའི་ནང་ན་ནད་ཡོད་པ་འབྱིན་པ་དང་། རླུང་དང་བད་ཀན་དང་། མི་མཐུན་པར་བྱེད་པ་དང་།

དགེ་སློང་དག་གི་ནད་མང་པོ་དུགས་ཁང་གིས་མེད་པར་གྱུར་པ་དང་ལྔའོ། །དགེ་སློང་ཆོས་འདི་ལྔ་དང་ལྡན་ན་དགེ་འདུན་བདེ་བར་གནས་པའོ། །སོ་སོར་ཐར་པའི་སྡོམ་པས་བསྡམས་པ་དང་། སྤྱད་པ་དང་སྤྱོད་ལམ་དུ་ལྡན་པ་དང་། ཁ་ན་མ་ཐོ་བ་རྡུལ་ཙམ་
ལ་ཡང་འཇིགས་པར་བྱེད་ཅིང་བསླབ་པའི་གནས་ལ་དམ་བཅའ་སྟེ་བསླབ་པ་དང་། བདག་ལ་ལྟའི་གཞན་ལ་མི་ལྟ་བ་དང་། བཤེས་ཉུང་བ་ཤེས་པ་རབ་ཏུ་ཉུང་བའོ། །དེ་ལ་བཤེས་པ་ཉུང་བ་ནི་ཕྲད་འདོད་པའི་སྡུག་བསྔལ་མེད་པར་འགྱུར་བ་དང་། བདེ་བར་གནས་ཤིང་
གཞན་ལ་གནོད་པ་མེད་པས་བདེ་བར་གྱུར་པ་ཡིན། གཞན་གྱིས་མི་སྙན་པར་སྨྲས་པ་དང་། ཚིག་རྩུབ་པོར་སྨྲས་ཀྱང་གཞན་གྱིས་མི་གདུང་ཞིང་མི་བཟོད་པར་མི་འགྱུར་བའོ། །གང་ཟག་མི་བཟོད་པ་ལ་ཉེས་པའི་དམིགས་རྣམ་པ་ལྔ་སྟེ། མ་རུང་བ་ཡིན། གཏུམ་
པོ་ཡིན། སྐྱེ་བོ་མང་པོ་ལ་མི་སྡུག་པ་ཡིན། ཡིད་དུ་མི་འོང་བ་ཡིན། ཕྱིས་འགྱོད་པ་ཡིན་ནོ། །བཟོད་པའི་སྐྱེས་བུ་གང་ཟག་ལ་ཡོན་ཏན་རྣམ་པ་ལྔ་སྟེ། དེ་ཡང་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །མི་བཟོད་པ་ལ་ཉེས་པའི་དམིགས་རྣམ་པ་
ལྔ་སྟེ། དགྲ་མང་དུ་འགྱུར་བ་དང་། སྡུག་བསྔལ་བ་དང་ཡིད་མི་བདེ་བ་མང་དུ་འགྱུར། འབྱེ་བ་མང་དུ་འགྱུར། འགྱོད་བཞིན་དུ་དུས་བྱེད་པར་འགྱུར། ལུས་དང་བྲལ་ཏེ་ཤི་བའི་འོག་ཏུ་ངན་སོང་གི་རྒྱུད་སེམས་ཅན་དམྱལ་བར་སྐྱེ་བར་འགྱུར་བའོ། །བཟོད་པ་ལ་ཡོན་
ཏན་རྣམ་པ་ལྔ་སྟེ། དེ་ལས་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་དོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་འཇིག་རྟེན་དུ་དམ་པའི་ཆོས་མ་ཡིན་པ་རྣམ་པ་ལྔ་འབྱུང་བར་འགྱུར་ཏེ། ལྔ་གང་ཞེ་ན། དམ་པའི་
ཆོས་འཇིག་པ་ན། འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་མ་དད་པ་དང་། ངོ་ཚ་མེད་པ་དང་། ཁྲེལ་མེད་པ་དང་། ལེ་ལོ་ཅན་དང་། དྲན་པ་ཉམས་པ་དང་། སེམས་རྩེ་གཅིག་ཏུ་མི་བཏུབ་ཅིང་སེམས་འཁྲུགས་པར་འགྱུར་ཏེ། དེ་ལྟར་ན་དམ་

པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་དེ་ནི། འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་དང་པོ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་རྣམས་འཐབ་པ་དང་། མཚང་
འདྲུ་བ་དང་། འཁོན་པ་དང་། རྩོད་པར་འགྱུར་ཏེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི། འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་གཉིས་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་
དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་ཁ་ཅིག་ཚུལ་འཆོས་ཤིང་སྡིག་པ་ལ་ལྟ་བའི་ཆོས་པས་ཞི་གནས་ཙམ་ལ་རྟེན་ཅིང་བཀའ་ལ་ལུང་སྟོན་ཏེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་
དུ་དམ་པའི་ཆོས་མ་ཡིན་པ་འབྱུང་བ་གསུམ་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་རྣམས་ཚུལ་ཁྲིམས་ཉམས་བཞིན་དུ་འཆི་བའི་དུས་བྱེད་པ་དང་། ཚུལ་ཁྲིམས་དང་ལྡན་པ་ལ་སྐུར་བ་འདེབས་པ་སྟེ། དེ་
ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་བཞི་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་ཁྱིམ་བདག་གིས་རབ་ཏུ་བྱུང་བ་ལ་བྱ་བ་བྱས་
པས་དེ་དག་ནི་ལུས་དང་བྲལ་ཏེ་ཤི་ནས་ཡང་བདེ་འགྲོ་མཐོ་རིས་ཀྱི་ལྷར་སྐྱེའོ། །རབ་ཏུ་བྱུང་བ་ནི་མང་དུ་ངན་སོང་དུ་ལྷུང་སྟེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་ལྔ་པ་ཡིན་ནོ། །
ཆོས་རྣམ་པ་ལྔ་དང་ལྡན་པའི་གྲོགས་པོ་དང་མི་འགྲོགས་པར་བྱ། མི་བསྟེན་པར་བྱ་སྟེ། ལས་ལ་ཞུགས་པ་དང་། རྩོད་པ་ལ་ཞུགས་པ་དང་། རྒྱུན་དུ་འགྲོ་བ་ལ་ནན་ཏན་བྱེད་པར་གྱུར་པ་དང་། གཅེས་པ་དང་ལྷན་ཅིག་ཏུ་སྔོ་བར་བྱེད་པ་དང་། རྒྱལ་པོའི་འཁོར་དུ་གནས་

པའོ། །དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་དེ། ཐ་དད་པ་ལྔ་སྟེ། སྟོན་པ་ཐ་དད་པ་དང་། ཆོས་ཐ་དད་པ་དང་། དགེ་འདུན་ཐ་དད་པ་དང་། ལས་ཐ་དད་པ་དང་། ལམ་ཐ་དད་པའོ། །ལྷུང་བཟེད་འདི་ལྔ་མེད་ན་ཡང་མ་ཚོལ་ཅིག །ཡོད་
ན་ཡང་བཅང་བར་མ་བྱེད་ཅིག །ལྔ་གང་ཞེ་ན། ཤེལ་གྱི་ལྷུང་བཟེད་དང་། རྡོའི་ལྷུང་བཟེད་དང་། ཁར་བའི་ལྷུང་བཟེད་དང་། རིན་པོ་ཆེའི་ལྷུང་བཟེད་དང་། ལྷག་པའི་ལྷུང་བཟེད་དོ། །རྣམ་པ་ལྔར་དགེ་སློང་གིས་ཟན་ཟོས་ན་འདས་པ་དང་བཅས་པར་འགྱུར་ཏེ།
འདབ་མའི་སྣོད་དུ་ཟན་ཟ་བ་དང་། སྙིམ་པར་ཟན་ཟ་བ་དང་། ལྕེ་ཕྱུང་ལ་ཟན་ཟ་བ་དང་། མཆུས་ལེན་ཅིང་ཟན་ཟ་བ་དང་། ལག་པས་ཕུགས་སུ་ཕུལ་ཏེ་ཟན་ཟ་བའོ། །བརྟད་པའི་གོས་རྣམ་པ་ལྔ་སྟེ། འགྲོ་བས་ན་སྦྱིན་པ་དང་། འགྲོ་བའི་ཕྱིར་སྦྱིན་པ་དང་།
ནད་པས་ན་སྦྱིན་པ་དང་། ནད་པའི་ཕྱིར་སྦྱིན་པ་དང་། བརྟད་པ་བྱུང་ནས་སྦྱིན་པའོ། །རིངས་པའི་ཟན་ལ་ལྔ་སྟེ། འགྲོ་བ་དང་། ན་བ་དང་། ནད་གཡོག་དང་། ལས་བྱེད་པ་དང་། ཁང་སྐྱོང་རྣམས་སོ། །སྟན་རྣམ་པ་ལྔའི་སྟེང་དུ་མི་འདུག་པར་བྱ་སྟེ། དེ་
བཞིན་གཤེགས་པའི་དང་། དགེ་འདུན་གྱི་གནས་བརྟན་གྱི་དང་། སློབ་དཔོན་གྱི་དང་། མཁན་པོའི་དང་། ཆོས་འཆད་པའིའོ། །འདུལ་བའི་གཞུང་དམ་པ་ལས་ལྔ་པ་རྫོགས་སྷོ།། །།འདུལ་བ་བཅུ་དྲུག་སྟེ། མདོར་ན། སྨྲ་བར་བྱ་དང་རྒོལ་
བ་དང་། །ལན་འདེབས་གཟུ་བོ་འཛིན་གཉིས་དང་། །རྗེས་སུ་རིགས་དང་ཡོན་ཏན་དང་། །གནས་དང་བཤད་པ་དེ་བཞིན་ཏེ། །ལྟུང་བ་གཉིས་དང་ཆད་པའི་ལས། །རྣམ་པར་ཞི་གཉིས་བསོད་ནམས་མང་། །ཐ་མར་བྱས་ནས་སྡེར་བསྡུས་པའོ། །སངས་རྒྱས་
བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་རྒོལ་བའི་དགེ་སློང་གིས་དོན་གྱིས་རྒོལ་བར་འཚལ་ན་གནས་དུར་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་དོན་གྱིས་རྒལ་བར་བགྱི། ཨུ་པཱ་ལི་རྒོལ་

བའི་དགེ་སློང་གིས་དོན་གྱིས་བརྒལ་བར་འདོད་ན་གནས་བཅུ་དྲུག་ཏུ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ལ་དོན་གྱིས་བརྒལ་བར་བྱའོ། །བཅུ་དྲུག་པོ་གང་ཞེ་ན། བདག་དོན་གང་གིས་བརྒལ་བར་འདོད་པའི་དོན་
འདི་ཅི་བདེན་པ་ཡིན་ནམ་འོན་ཏེ་བརྫུན། དོན་གྱིས་བརྒལ་བ་དེའི་དུས་ལ་བབ་བམ་འོན་ཏེ་དུས་ལ་མ་བབ། དོན་འདིས་བརྒལ་བའི་སྐབས་སུ་བབ་བམ་འོན་ཏེ་སྐབས་སུ་མ་བབ། དོན་གྱིས་བརྒལ་བ་འདི་དོན་དང་ལྡན་པ་འམ་འོན་ཏེ་དོན་དང་མི་ལྡན། དེའི་འོག་ཏུ་
ཡང་བརྟག་པར་བྱ་སྟེ། དེ་ལ་མཐོང་བ་དང་ཐོས་པ་དང་དོགས་པ་གང་གིས་སྨྲ་བར་བྱ། ལུས་ཀྱིས་འདས་པའམ། ངག་གིས་འདས་པའམ། གྲོང་དུ་བྱས་སམ། དགོན་པར་བྱས་སམ། ནུབ་མོ་བྱས་སམ། ཉིན་པར་བྱས་སམ། ལྷག་མ་དང་བཅས་
སམ། ལྷག་མ་མེད་དམ། ཚེ་དང་ལྡན་པ་འདི་དགེ་བའི་གནས་ནས་བསླངས་ནས་དགེ་བའི་གནས་སུ་གཞག་པར་ནུས་སམ། ཨུ་པཱ་ལི་དོན་གྱིས་རྒོལ་བའི་དགེ་སློང་གིས་དོན་གྱིས་རྒོལ་བར་འདོད་པས་གནས་བཅུ་དྲུག་པོ་འདི་ལ་ཤིན་ཏུ་བསམ་པ་བསམས་
ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ལ་དོན་གྱིས་བརྒལ་བར་བྱའོ། །ཆོས་རྣམ་པ་འདི་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་མི་བྱ་སྟེ། ལྔ་གང་ཞེ་ན། དོན་གྱིས་རྒོལ་བ་དེ་རྣམ་པར་དག་པ་མ་ཡིན་པ་དང་། གཅིག་ནས་
གཅིག་ཏུ་ཟེར་བ་ལས་རྒོལ་བ་དང་། ཀུན་དགའི་གནས་བྱུང་བ་དང་། དགེ་ཚུལ་ཕའི་ཚིག་ལས་རྒོལ་བ་དང་། ཇི་ལྟར་ངེས་པར་གསུངས་པའི་མདོ་སྡེའི་ཚིག་མི་ཤེས་པ་དང་། གང་ལ་གནས་ནས་རྣམ་པར་སྦྱང་བ་དེའི་གནས་མི་ཤེས་པ་སྟེ། ཨུ་པཱ་ལི་ཆོས་རྣམ་
པ་འདི་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་མི་བྱའོ། །ཨུ་པཱ་ལི་ཆོས་རྣམ་པ་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་བྱ་སྟེ། དོན་གྱིས་རྒོལ་བ་དེ་རབ་ཏུ་དག་པ་ཡིན། གཅིག་ནས་གཅིག་ཟེར་བས་མི་རྒོལ་བ་དང་།

ཀུན་དགའ་ནས་བྱུང་བ་ཡིན་པ་དང་། དགེ་ཚུལ་ཕའི་ཚིག་ལས་རྒོལ་བ་མ་ཡིན་པ་དང་། ཇི་ལྟར་ངེས་པར་གསུངས་པའི་མདོ་སྡེའི་ཚིག་ཤེས་པ་དང་། གང་ལ་གནས་ནས་རྣམ་པར་སྦྱང་བ་དེའི་གནས་ཤེས་པ་དེས་ཨུ་པཱ་ལི་ཆོས་རྣམ་པ་དེ་ལྔ་དང་ལྡན་ན་དོན་
གྱིས་རྒོལ་བའི་དགེ་སློང་གི་ཚིག་གཟུང་བར་བྱའོ། །ཨུ་པཱ་ལི་ལན་གློན་པའི་དགེ་སློང་གནས་བཅུ་དྲུག་ཏུ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་བརྒལ་བའི་དགེ་སློང་ལ་སྐབས་དབྱེ་བར་གྱིས་ཤིག །བཅུ་དྲུག་པོ་གང་ཞེ་
ན། ཅི་ཚེ་དང་ལྡན་པ་འདི་ཚུལ་ཁྲིམས་དང་ལྡན་པ་ཡིན་ནམ། ཐོག་མ་ནས་བསྙེན་པར་རྫོགས་པ་ཡིན་ནམ། ངོ་ཚ་ཅན་ནམ། འགྱོད་པ་ཅན་ནམ། སྡོམ་པ་ཅན་ནམ། སློབ་པར་འདོད་པའམ། མང་དུ་ཐོས་པའམ། ཐོས་པ་འཛིན་པའམ། ཐོས་པ་བསགས་
པའམ། འདུལ་བའམ། ལྷག་པའི་འདུལ་བ་ལས་ངེས་པར་ཤེས་པའམ། ལུང་ཁ་ཏོན་དུ་ལོབས་པའམ། དེའི་འོག་ཏུ་ཡང་བརྟག་པར་བྱ་སྟེ། བདག་ལ་མཐོང་བས་སམ། ཐོས་པས་སམ། དོགས་པས་སམ། ལུས་ཀྱིས་འདས་པས་སམ། ཚིག་གིས་འདས་
པས་སམ། གྲོང་དུ་བྱས་སམ། དགོན་པར་བྱས་སམ། ནུབ་མོ་བྱས་པའམ། ཉིན་པར་བྱས་པའམ། ལྷག་མར་བཅས་པའམ། ལྷག་མ་མེད་པ་གང་གིས་སྨྲ་བར་བྱེད། ཚེ་དང་ལྡན་པ་དེས་བདག་མི་དགེ་བའི་གནས་ནས་བསླངས་ཏེ། དགེ་བའི་གནས་སུ་འཇོག་
པར་ནུས་སམ། ཨུ་པཱ་ལི་ལན་གློན་པའི་དགེ་སློང་གིས་གནས་བཅུ་དྲུག་པོ་འདི་ལ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་རྒོལ་བའི་དགེ་སློང་ལ་སྐབས་དབྱེ་བར་གྱིས་ཤིག །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་
ལན་གློན་པའི་དགེ་སློང་གི་ཚིག་གཟུང་བར་མི་བྱ་སྟེ། ལྔ་གང་ཞེ་ན། རྒོལ་བའི་དགེ་སློང་གིས་དྲིས་པ་བཞིན་དུ་ལན་མི་འདེབས་པ་དང་། དྲིས་ནས་བསམ་པ་མ་ཡིན་པ་སྟོན་པ་དང་། གཞན་གྱིས་གཞན་ལ་སྨྲ་བ་དང་། ཕྱི་རོལ་གྱི་གཏམ་སྡུད་པ་དང་། བྱང་བའི་

དགེ་སློང་མ་རུང་བར་བྱེད་པ་དང་། ཕྱོགས་འཛིན་པ་ལ་བརྟེན་པ་དང་། ཉེས་པ་མི་ཤེས་ཉེས་པ་མེད་པ་མི་ཤེས་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་ལན་གློན་པའི་དགེ་སློང་གི་ཚིག་གཟུང་བར་མི་བྱའོ། །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་ལན་གློན་
པའི་དགེ་སློང་གི་ཚིག་གཟུང་བར་བྱ་སྟེ། ལྔ་གང་ཞེ་ན། རྒོལ་བའི་དགེ་སློང་གིས་དྲིས་པ་བཞིན་དུ་ལན་འདེབས་པ་དང་། དྲིས་པའི་དོན་གཞན་དང་གཞན་དུ་མི་སྨྲ་བ་དང་ཕྱི་རོལ་གྱི་གཏམ་གཞན་མི་སྨྲ་བ་དང་། བྱང་བའི་དགེ་སློང་ལ་མ་རུང་བར་མི་བྱེད་པ་དང་། ཕྱོགས་
འཛིན་པ་ལ་མི་བརྟེན་པ་དང་། ཉེས་པ་ཤེས་ཉེས་པ་མེད་པ་ཤེས་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་དགེ་སློང་ལན་གློན་པའི་ཚིག་གཟུང་བར་བྱའོ། །ཨུ་པཱ་ལི་དེ་ལ་རྒོལ་བ་དང་ལན་གློན་པའི་དགེ་སློང་དག་རྩོད་པ་ཞི་བར་འདོད་པས་ཆོས་བཅུ་དྲུག་དང་
ལྡན་པའི་གཟུ་བོ་འདུལ་བ་འཛིན་པ་ཚོལ་ཅིག །བཅུ་དྲུག་གང་ཞེ་ན། ཚུལ་ཁྲིམས་དང་ལྡན་པ་དང་། ཐོག་མར་བསྙེན་པར་རྫོགས་པ་དང་། ངོ་ཚ་ཅན་དང་། འགྱོད་པ་ཅན་དང་། སྡོམ་པ་ཅན་དང་། སློབ་པ་འདོད་པ་དང་། མང་དུ་ཐོས་པ་དང་། ཐོས་པ་འཛིན་
པ་དང་། ཐོས་པ་བསགས་པ་དང་། འདུལ་བ་དང་། ལྷག་པའི་འདུལ་བ་ངེས་པར་ཤེས་པ་དང་། མདོ་སྡེ་དང་། ལུང་ཁ་ཏོན་དུ་ལོབས་པ་དང་། དེ་ལས་ཡང་དེའི་འོག་ཏུ་ཡང་བརྟག་པར་བྱ་སྟེ། ཅི་ཚེ་དང་ལྡན་པ་འདི་ལ་གཟུ་བོའི་དངོས་པོ་ཡོད་དམ། ཅི་
ཚེ་དང་ལྡན་པ་འདིས་སྔ་ནས་མ་འདྲེས་པའམ། ཅི་ཚེ་དང་ལྡན་པ་འདི་རྩོད་པ་སྔར་བྱུང་བ་ལ་མཁས་པའམ། ཅི་ཚེ་དང་ལྡན་པ་འདི་ལྷུང་བཟེད་ཀྱི་ཕྱིར་མ་ཡིན་ནམ། ཆོས་གོས་ཀྱི་ཕྱིར་མ་ཡིན་ནམ། ཟང་ཟིང་ཅུང་ཟད་ཙམ་གྱི་ཕྱིར་མ་ཡིན་ནམ། འདོད་པའི་ཕྱིར་
འགྲོ་བ་མ་ཡིན་ནམ། ཞེ་སྡང་དང་། གཏི་མུག་དང་། འཇིགས་པས་འགྲོ་བ་མ་ཡིན་ནམ། ཅི་ཚེ་དང་ལྡན་པ་འདི་འདོད་ཆགས་ཀྱིས་གཟིར་བ་མ་ཡིན་ནམ། ཞེ་སྡང་གིས་གཟིར་བ་མ་ཡིན་ནམ། གཏི་མུག་གིས་གཟིར་བ་མ་ཡིན་ནམ། རྒྱལ་བའི་གསུང་

ལས་འདའ་བར་བྱེད་པ་མ་ཡིན་ནམ། ཅི་ཚེ་དང་ལྡན་པ་འདིས་རིགས་པ་མི་རིགས་པར་མི་བྱེད་དམ། རིགས་པ་གཅོད་པར་མི་བྱེད་དམ། ཅི་ཚེ་དང་ལྡན་པ་འདི་སྟོན་པས་བསྟན་པ་ཆོས་དང་འདུལ་བས་རབ་ཏུ་ཞི་བར་བྱེད་དམ། ཅི་ཚེ་དང་ལྡན་པ་
འདིས་ཚེ་དང་ལྡན་པ་འདི་མི་དགེ་བའི་གནས་ནས་བསླངས་ཏེ། དགེ་བའི་གནས་སུ་འཇོག་པར་བྱེད་དམ། ཨུ་པཱ་ལི་རྒོལ་བ་དང་ལན་གློན་པའི་དགེ་སློང་དག་རྩོད་པ་ཞི་བར་འདོད་པས་ཆོས་བཅུ་དྲུག་པོ་དེ་དག་དང་ལྡན་པའི་གཟུ་བོ་འདུལ་བ་འཛིན་པ་བཙལ་བར་
བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་ཏེ། ལྔ་གང་ཞེ་ན། རྒོལ་བ་དང་ལན་གློན་པའི་དགེ་སློང་ལ་ཆོས་མ་ཡིན་པའི་ཕྱོགས་སུ་འཇུག་པ་དང་། རྒོལ་བ་དང་ལན་གློན་པའི་དགེ་སློང་ལ་འཐབ་པ་དང་།
མཚང་འདྲུ་བ་དང་། འཁོན་པ་དང་། རྩོད་པར་སྐུལ་བ་དང་། གཟུ་བོའི་དགེ་སློང་རྣམས་ཀྱི་མདོ་སྡེའི་ཚིག་མི་བརྩན་པར་བྱེད་པ་དང་། དགེ་སློང་གཅེས་པ་རྣམས་ལ་ཕྱས་འདོགས་པ་དང་། རྩོད་པའི་ཐོག་མ་དང་། བར་མ་དང་། ཐ་མལ་མི་མཁས་
པར་གྱུར་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་རོ། །ལྔ་གང་ཞེ་ན། རྒོལ་བ་དང་ལན་གློན་པའི་དགེ་སློང་ལ་ཆོས་ཀྱི་ཕྱོགས་སུ་འཇུག་པ་དང་། རྒོལ་བ་དང་ལན་གློན་པའི་དགེ་སློང་འཐབ་
པ་དང་། མཚང་འདྲུ་བ་དང་། འཁོན་པ་དང་། རྩོད་པར་མི་སྐུལ་བ་དང་། གཟུ་བོའི་དགེ་སློང་རྣམས་ཀྱི་མདོ་སྡེའི་གཞུང་བརྩན་པར་བྱེད་པ་དང་། དགེ་སློང་གཅེས་པ་ལ་ཕྱས་མི་འདོགས་པ་དང་། རྩོད་པའི་ཐོག་མ་དང་བར་མ་དང་ཐ་མ་ལ་མཁས་པར་གྱུར་
པའོ། །ཨུ་པཱ་ལི་དེ་ལ་གཟུ་བོ་འདུལ་བ་འཛིན་པ་དེས་རྩོད་པ་རབ་ཏུ་གཟུང་བར་འདོད་ན་གནས་བཅུ་དྲུག་ཏུ་བདག་དང་གཞན་ལ་ཤིན་ཏུ་བརྟགས་ལ་གདོད་རྩོད་པ་གཟུང་བར་བྱ་སྟེ། རྣམ་པ་བརྒྱད་ཀྱིས་ནི་བདག་ཉིད་ཤིན་ཏུ་བརྟག་པར་བྱ། རྣམ་པ་བརྒྱད་ཀྱིས་

ནི་གཞན་ཤིན་ཏུ་བརྟག་པར་བྱའོ། །བདག་ཉིད་བརྟག་པ་བརྒྱད་གང་ཞེ་ན། ཅི་བདག་རྩོད་པའི་ཐོག་མ་དང་བར་མ་དང་ཐ་མ་ལ་མཁས་པ་ཡིན་ནམ། ཅི་བདག་རྩོད་པ་དེ་ལ་ཐོག་མ་ནས་མ་འདྲེས་སམ། རྒོལ་བ་དང་ལན་གློན་པའི་དགེ་སློང་གི་བདག་གིས་ཚིག་འཛིན་ཏམ།
རྒོལ་བ་དང་ལན་གློན་པའི་དགེ་སློང་གི་བདག་གིས་ཚིག་ཉན་ཏམ་རྒོལ་བ་དང་ལན་གློན་པའི་དགེ་སློང་དག་གི་ཉེས་པ་བདག་གིས་རྣམ་པར་སྦྱང་ནུས་སམ། སོ་སོའི་ཕྱོགས་ལ་བདག་གིས་ཆོས་བཞིན་བསྒོ་བར་ནུས་སམ། བདག་གིས་རྩོད་པ་འདི་ལྟར་འདུལ་བ་དང་ཇི་ལྟར་སྟོན་
པས་བསྟན་པ་དེ་ལྟར་རྣམ་པར་ཞི་བར་ནུས་སམ། རྒོལ་བ་དང་ལན་གློན་པའི་དགེ་སློང་དག་བདག་གིས་མི་དགེ་བའི་གནས་ནས་བསླངས་ཏེ། དགེ་བའི་གནས་སུ་འཇོག་ནུས་སམ་སྙམ་པ་སྟེ། རྣམ་པ་བརྒྱད་ཀྱིས་བདག་ཉིད་ཤིན་ཏུ་བརྟག་པར་བྱའོ། །གཞན་ལ་བརྟག་པ་རྣམ་
པ་བརྒྱད་གང་ཞེ་ན། དགེ་འདུན་དེ་དག་གི་ནང་ན་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའི་དགེ་སློང་ལ་ཇི་ལྟར་བདག་གིས་རྒྱལ་བའི་གསུང་རབ་སྨྲས་པ་ལ་འཛིན་པར་འགྱུར་བ་ཡོད་དམ། དེའི་ཚེ་མདོ་སྡེ་འཛིན་པ་དང་། འདུལ་བ་འཛིན་པ་དང་།
མ་ལྟ་བུ་འཛིན་པའི་དགེ་སློང་གང་གིས་རྩོད་པ་འདི་ཇི་ལྟར་ཆོས་བཞིན་ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་དེ་ལྟ་བུར་ཞི་བར་བྱ་སྙམ་དུ་སེམས་པ་ཡོད་དམ། དགེ་འདུན་དེ་དག་ལས་དགེ་སློང་གནས་བརྟན་དང་བར་མ་དང་གསར་བུ་དག་གིས་སོ་སོའི་ཕྱོགས་ཀྱི་དགེ་
སློང་དེ་དག་ལ་ཇི་ལྟར་ཆོས་བཞིན་དུ་སླར་བཟློག་པར་བྱའོ་སྙམ་དུ་སེམས་པ་ཡོད་དམ། ཅི་རྩོད་པ་འདི་རྒྱལ་པོའི་ཕོ་བྲང་དུ་འགྱེད་པར་འགྱུར་རམ། རིགས་པའི་རིགས་ལ་འགྱེད་པར་མི་འགྱུར་རམ། ཅི་ཚེ་དང་ལྡན་པ་དེ་དག་རྩོད་པ་ཞི་བར་བྱ་བ་འདི་ལས་ཕྱི་རོལ་ཏུ་མི་ཚོལ་ལམ།
ཅི་ཚེ་དང་ལྡན་པ་དེ་དག་དགེ་འདུན་འདི་ཉིད་དུ་རྩོད་པ་ཞི་བར་བྱ་བ་ཚོལ་ལམ་སྙམ་པ་སྟེ། རྣམ་པ་འདི་བརྒྱད་ནི་གཞན་བརྟག་པར་བྱ་སྟེ། ཨུ་པཱ་ལི་དེ་ལྟ་བུར་རྣམ་པ་བཅུ་དྲུག་གིས་བདག་དང་གཞན་བརྟགས་ནས་རྩོད་པ་རབ་ཏུ་གཟུང་བར་བྱའོ། །ཨུ་པཱ་ལི་གཟུ་བོ་འདུལ་བ་

འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པར་འགྱུར་རོ། །ལྔ་གང་ཞེ་ན། རྩོད་པ་མི་ཤེས་པ་དང་། རྩོད་པ་འབྱུང་བ་མི་ཤེས་པ་དང་། རྩོད་པ་ཡང་དག་པར་གཟུང་བ་མི་ཤེས་པ་དང་། རྩོད་པ་ཞི་བར་བྱེད་མི་ཤེས་པ་དང་། རྩོད་
པ་ཞི་ནས་ཕྱིས་མི་འབྱུང་བར་བྱེད་མི་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པ་ཡིན་ནོ། །ལྔ་གང་
ཞེ་ན། རྩོད་པ་ཤེས་པ་དང་། རྩོད་པ་བྱུང་བ་ཤེས་པ་དང་། རྩོད་པ་ཡང་དག་པར་གཟུང་བར་ཤེས་པ་དང་། རྩོད་པ་ཞི་བར་བྱ་བ་ཤེས་པ་དང་། རྩོད་པ་ཞི་བར་གྱུར་ནས་ཕྱིས་རྩོད་པ་མི་འབྱུང་བར་བྱེད་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་
པ་དེ་ལྔ་དང་ལྡན་ན་རྩོད་པ་ཞི་བར་བྱེད་ནུས་པ་ཡིན་ནོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་རྩོད་པ་རབ་ཏུ་བཟུང་ལ་གནས་བཅུ་དྲུག་གིས་རྒོལ་བ་དང་ལན་གློན་པའི་དགེ་སློང་བརྟག་པར་བྱ་སྟེ། རྣམ་པ་བརྒྱད་ཀྱིས་ལན་གློན་པའི་དགེ་སློང་བརྟག་པར་བྱའོ། །
རྣམ་པ་བརྒྱད་པོ་གང་གིས་རྒོལ་བའི་དགེ་སློང་བརྟག་པར་བྱ་ཞེ་ན། སྤྱོད་པ་དང་། སྤྱོད་ཡུལ་དང་། མཛའ་བ་དང་། གྲོགས་བྱེད་པ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། མང་དུ་ཐོས་པ་རྣམས་སོ། །དེ་སྟེ་ཨུ་པཱ་ལི་གཟུ་བོ་འདུལ་
བ་འཛིན་པའང་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་སྡིག་པ་ཅན་ཏེ་སྡིག་པར་སྤྱོད་པ། མཛའ་བ་སྡིག་པ་ཅན། གྲོགས་པོ་སྡིག་པ་ཅན། ལུས་ཀྱི་ལས་སྡིག་པ་ཅན། ངག་གི་ལས་སྡིག་པ་ཅན། འཚོ་བ་སྡིག་པ་ཅན། ཐོས་པ་སྡིག་པ་ཅན་ཏེ། ཚེ་དང་
ལྡན་པ་འདིས་ནི་དག་པའི་དགེ་སློང་ལ་མ་རུང་བར་བྱེད་ནུས། དགེ་འདུན་ལ་ཡང་དེ་ལྟ་བུར་རྩོད་པ་འབྱིན་པར་ནུས་ཏེ། དེ་སྐད་དུ་མ་སྨྲ་ཤིག་ཅེས་བསྒོ་ཤིག །དེ་སྟེ་ཨུ་པཱ་ལི་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་དགེ་བ་ཅན་ཏེ།

སྤྱོད་པ་དགེ །སྤྱོད་ཡུལ་དགེ །མཛའ་བོ་དགེ །གྲོགས་པོ་དགེ །ལུས་ཀྱི་ལས་དགེ །ངག་གི་ལས་དགེ །འཚོ་བ་དགེ །ཐོས་པ་དགེ་བ་ཅན་ཏེ། ཚེ་དང་ལྡན་པ་འདིས་ནི་དག་པའི་དགེ་སློང་ལ་མ་རུང་བར་བྱེད་མི་ནུས་ཏེ། དགེ་འདུན་གྱི་ནང་དུ་ཡང་རྣམ་
པ་དེ་ལྟ་བུར་མི་འབྱིན་ཏོ་སྙམ་ནས་དེ་ལྟ་བུ་ལ་ནི་སྨྲོས་ཤིག་ཅེས་བསྒོའོ། །ཨུ་པཱ་ལི་རྣམ་པ་བརྒྱད་པོ་དེ་ལྟ་བུས་རྒོལ་བའི་དགེ་སློང་ལ་བརྟག་པར་བྱའོ། །ལན་གློན་པའི་དགེ་སློང་ལ་རྣམ་པ་འདི་བརྒྱད་ཀྱིས་བརྟག་པར་བྱ་སྟེ། སྤྱོད་པ་དང་། སྤྱོད་ཡུལ་དང་། མཛའ་
བ་དང་། གྲོགས་པོ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། མང་དུ་ཐོས་པའོ། །དེ་སྟེ་ཨུ་པཱ་ལི་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་སྡིག་པ་ཅན་ཏེ། སྤྱོད་པ་སྡིག་པ་ཅན། སྤྱོད་ཡུལ་སྡིག་པ་ཅན།
མཛའ་བོ་སྡིག་པ་ཅན། གྲོགས་པོ་སྡིག་པ་ཅན། ལུས་ཀྱི་ལས་སྡིག་པ་ཅན། ངག་གི་ལས་སྡིག་པ་ཅན། འཚོ་བ་སྡིག་པ་ཅན། ཐོས་པ་སྡིག་པ་ཅན་ཏེ། ཚེ་དང་ལྡན་པ་འདིས་ནི་རྣམ་པ་འདི་ལྟ་བུའི་གནས་སུ་འཇུག་པར་ནུས་སོ་སྙམ་ནས་དེ་ན་རྒོལ་བའི་དགེ་
སློང་ལ་ཚིག་འཇམ་པོར་སྨྲོས་ལ་ལན་གློན་པའི་དགེ་སློང་ལ་ཚིག་འདི་སྐད་དུ་སྨྲོས་ཤིག །ཚེ་དང་ལྡན་པ་ཁྱོད་དེའི་ཚེ་ན་ལུས་ཀྱི་འདུས་བྱས་ཇི་ལྟ་བུར་གྱུར། ངག་གི་འདུས་བྱས་ཇི་ལྟ་བུར་གྱུར། ཡིད་ཀྱི་འདུས་བྱས་ཇི་ལྟ་བུར་གྱུར་ཅེས་ཇི་ལྟ་བུར་ཁས་ལེན་པ་དེ་ལྟ་བུར་བྱེད་
དུ་ཆུག་ཅིག །ཨུ་པཱ་ལི་དེ་སྟེ་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་དགེ་བ་ཅན་ཏེ། སྤྱོད་པ་དགེ། སྤྱོད་ཡུལ་དགེ །མཛའ་བོ་དགེ །གྲོགས་པོ་དགེ །ལུས་ཀྱི་ལས་དགེ །ངག་གི་ལས་དགེ །འཚོ་བ་དགེ །ཐོས་པ་
དགེ་སྟེ། ཚེ་དང་ལྡན་པ་འདི་ནི་གནས་དེ་ལྟ་བུ་ལ་འཇུག་པར་མི་བྱེད་དོ་སྙམ་ན། ལན་གློན་པའི་དགེ་སློང་ལ་ཚིག་འཇམ་པོར་སྨྲོས་ཏེ། རྒོལ་བའི་དགེ་སློང་ལ་ཆོས་ཉིད་ཀྱིས་ཤེས་པར་བྱོས་ཤིག །རྣམ་པ་འདི་བརྒྱད་ཀྱིས་ནི་གཞན་ལ་བརྟག་པར་བྱོས་ཤིག །

ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པ་ཡིན་ནོ། །ལྔ་གང་ཞེ་ན། འཁྲུལ་པ་འཛིན་པ། གསང་བའི་ཚིག་འཛིན་པ། ཚིག་མང་པོ་འཛིན་པ། མ་ངེས་པར་འཛིན་པ། ཇི་ཙམ་ལན་གསུམ་གྱི་
བར་དུ་དམ་འཆར་མི་འཇུག་པ་ཡིན་ཏེ། གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་རོ། །ལྔ་གང་ཞེ་ན།
འཁྲུལ་པ་མི་འཛིན་པ། གསང་བའི་ཚིག་མི་འཛིན་པ། ཚིག་མང་པོ་མི་འཛིན་པ། མ་ངེས་པར་མི་འཛིན་པ། ལན་གསུམ་གྱི་བར་དུ་དམ་འཆར་འཇུག་པ་ཡིན་ཏེ། ཨུ་པཱ་ལི་གཟུ་བོ་འདུལ་བ་འཛིན་པ་རྣམ་པ་དེ་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་
རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་རྒོལ་བ་དང་ལན་གློན་པའི་དགེ་སློང་དག་བརྟགས་ལ་གནས་བཅུ་དྲུག་ཏུ་རིགས་པས་གཞག་པར་བྱ་སྟེ། བཅུ་དྲུག་པོ་གང་ཞེ་ན། རྒོལ་བའི་དགེ་སློང་དེ་རིགས་པར་བྱ། རྒོལ་བའི་དགེ་
སློང་དེ་བརྟག་པར་བྱ། ལན་གློན་པའི་དགེ་སློང་དེ་རིགས་པར་བྱ། ལན་གློན་པའི་དགེ་སློང་དེ་བརྟག་པར་བྱ། རྒོལ་བའི་དགེ་སློང་ལ་བཟོད་པ་གསོལ་བར་བྱ། ལན་གློན་པའི་དགེ་སློང་ལ་བཟོད་པ་གསོལ་བར་བྱ། རྒོལ་བའི་དགེ་སློང་དེ་གཏོང་དུ་གཞུག །
ལན་གློན་པའི་དགེ་སློང་དེ་གཏོང་དུ་གཞུག །རྒོལ་བའི་དགེ་སློང་དེ་དྲི་བར་བྱ། ལན་གློན་པའི་དགེ་སློང་དེ་དྲི་བར་བྱ། རྒོལ་བའི་དགེ་སློང་དེ་བྱེད་དུ་གཞུག །ལན་གློན་པའི་དགེ་སློང་དེ་བྱེད་དུ་གཞུག །རྒོལ་བའི་དགེ་སློང་ཚུགས་པར་བྱེད་དུ་གཞུག །ལན་
གློན་པའི་དགེ་སློང་ཚུགས་པར་བྱེད་དུ་གཞུག །རྒོལ་བའི་དགེ་སློང་ཡི་དམ་འཆར་གཞུག །ལན་འདེབས་པའི་དགེ་སློང་ཡི་དམ་འཆར་གཞུག །མདོ་སྡེ་བརྗོད་པར་བྱ། མདོ་སྡེ་བརྗོད་ནས་ཇི་ལྟར་ཆོས་བཞིན་ཇི་ལྟར་འདུལ་བ་བཞིན། ཇི་ལྟར་སྟོན་པས་

བསྟན་པ་དེ་ལྟར་རྩོད་པ་དེ་ཞི་བར་བྱ་སྟེ། ཨུ་པཱ་ལི་དེ་ལྟར་ན་གཟུ་བོའི་དགེ་སློང་གིས་གནས་བཅུ་དྲུག་ཏུ་རིགས་པས་གཞག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རིགས་པའི་གནས་སུ་འཇོག་ནུས་པར་མི་འགྱུར་རོ། །ལྔ་གང་ཞེ་ན།
རྗེས་སུ་འབྲང་བའི་ཆོས་ལྔ་མི་ཤེས་པ་སྟེ། ལྔ་གང་ཞེ་ན། རྒོལ་བ་མི་ཤེས་པ། ལན་གློན་མི་ཤེས་པ། ཆོས་བཞིན་མི་ཤེས་པ། ཆོས་བཞིན་མ་ཡིན་པ་མི་ཤེས་པ། ཡི་དམ་མ་བླངས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་
ན་རིགས་པའི་གནས་སུ་འཇོག་མི་ནུས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རིགས་པའི་གནས་སུ་འཇོག་ནུས་པར་འགྱུར་རོ། །རྗེས་སུ་འབྲང་བའི་ཆོས་ལྔ་ཤེས་པར་འགྱུར་རོ། །ལྔ་གང་ཞེ་ན། རྒོལ་བ་ཤེས་པ། ལན་གློན་ཤེས་
པ། ཆོས་བཞིན་ཤེས་པ། ཆོས་བཞིན་མ་ཡིན་པ་ཤེས་པ། ཡི་དམ་བླངས་པར་གྱུར་པའོ། །གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རིགས་པའི་གནས་སུ་འཇོག་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པ་རིགས་པའི་གནས་
བཅུ་དྲུག་ཏུ་གཞག་ལ་ཡོན་ཏན་བཅུ་དྲུག་མཐོང་ནས་མདོ་སྡེ་བསྒྲག་པར་བྱ་སྟེ། བཅུ་དྲུག་གང་ཞེ་ན། བདག་གིས་མདོ་སྡེ་བསྟན་ཏོ་སྙམ་ནས་མདོ་སྡེ་བསྒྲག་པར་བྱ། བདག་གིས་མདོ་སྡེ་དཔྱད་པར་བྱའོ་སྙམ་ནས། མདོ་སྡེ་བསྒྲག་པར་བྱ། བདག་གིས་འདུལ་
བ་རྗེས་སུ་འབྲང་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གི་ཚིག་བརྩན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་ངོ་ཚ་བ་མེད་པའི་ཕྱོགས་ལ་ཆད་པས་གཅད་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་
ཐམས་ཅད་མཁྱེན་པའི་གསུང་ལ་བསྒོ་ནུས་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། དགེ་འདུན་མཐུན་པར་བསྟན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་གཞན་ལ་བསྒོ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གི་

ཚིག་གཞན་གྱིས་གཟུང་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་དགེ་སློང་དག་གདོན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་མ་དད་པ་དག་དད་པ་ལ་ཞུགས་པར་འགྱུར་རོ་སྙམ་ནས་མདོ་སྡེ་བསྒྲག་པར་
བྱ། དད་པ་ལ་སླར་འཕེལ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། ངོ་ཚ་མེད་པའི་ཕྱོགས་ལ་བདག་གིས་ཆད་པས་གཅད་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། ངོ་ཚ་ཤེས་པའི་ཕྱོགས་ལ་བདག་གིས་གཟུང་བར་འགྱུར་རོ་སྙམ་ནས་མདོ་སྡེ་
བསྒྲག་པར་བྱ། རྩོད་པ་འབྱུང་བ་མི་འབྱུང་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། རྩོད་པ་ཞི་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། རྩོད་པ་ཞི་ནས་ཕྱིས་མི་སྐྱེ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་ཡུན་རིང་དུ་ཚངས་པར་
སྤྱོད་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། ཨུ་པཱ་ལི་གཟུ་བོ་འདུལ་བ་འཛིན་པས་བདག་གི་ཡོན་ཏན་བཅུ་དྲུག་པོ་འདི་མཐོང་ན་མདོ་སྡེ་བསྒྲག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་མདོ་སྡེའི་ཡོན་ཏན་མི་ཤེས་
པར་འགྱུར་རོ། །ལྔ་གང་ཞེ་ན། མདོ་སྡེ་ལ་མི་མཁས་པ་དང་། འདུལ་བ་ལ་མི་མཁས་པ་དང་། མ་ལྟ་བུ་ལ་མི་མཁས་པ་དང་། རྣམ་པར་འབྱེད་པ་ལ་མི་མཁས་པ་དང་། ལུང་ཁ་ཏོན་དུ་མ་བྱས་པར་གྱུར་པའོ། །ཨུ་པཱ་ལི་གཟུ་བོ་འདུལ་བ་འཛིན་
པ་ཆོས་རྣམ་པ་ལྔ་དང་ལྡན་ན་མདོ་སྡེའི་ཡོན་ཏན་ཤེས་པར་འགྱུར་རོ། །ལྔ་གང་ཞེ་ན། མདོ་སྡེ་ལ་མཁས་པ་དང་། འདུལ་བ་ལ་མཁས་པ་དང་། མ་ལྟ་བུ་ལ་མཁས་པ་དང་། རྣམ་པར་འབྱེད་པ་ལ་མཁས་པ་དང་། ལུང་ཁ་ཏོན་དུ་ལོབས་པ་སྟེ། ཨུ་པཱ་
ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེའི་ཡོན་ཏན་ཤེས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་གང་གིས་མདོ་སྡེ་ཤེས་པར་ནུས་པ་དེས་ནི་མདོ་སྡེ་འདི་ལས་ཡོན་ཏན་བཅུ་དྲུག་མཐོང་བས་ན་མདོ་སྡེ་བརྗོད་པར་བྱའོ། །གཞན་

ཡང་གནས་བཅུ་དྲུག་ཏུ་མདོ་སྡེ་བརྗོད་པར་བྱ་སྟེ། བཅུ་དྲུག་པོ་དེ་གང་ཞེ་ན། སངས་རྒྱས་ཀྱིས་གསུངས་པའི་མདོ་སྡེ་བརྗོད་པར་བྱ། ཉན་ཐོས་ཀྱིས་བཤད་པའི་མདོ་སྡེ་བརྗོད་པར་བྱ། སངས་རྒྱས་བྱུང་བའི་དུས་ཀྱི་མདོ་སྡེ་བརྗོད་པར་བྱ། ཕྱོགས་གཅིག་པའི་
མདོ་སྡེ་བརྗོད་པར་བྱ། ཐམས་ཅད་དུ་ཡོད་པའི་མདོ་སྡེ་བརྗོད་པར་བྱ། དེ་ཉིད་དང་འདྲ་བའི་མདོ་སྡེ་བརྗོད་པར་བྱ། འདུལ་བ་དང་ལྡན་པའི་མདོ་སྡེ་བརྗོད་པར་བྱ། འདུལ་བ་ལས་ལྷག་པའི་མདོ་སྡེ་བརྗོད་པར་བྱ། མདོ་སྡེའི་ཡོན་ཏན་བཙལ་ལ་མདོ་སྡེ་བརྗོད་པར་
བྱ། མདོ་སྡེའི་རྒྱན་བཙལ་ལ་མདོ་སྡེ་བརྗོད་པར་བྱ། མདོ་སྡེའི་གླེང་གཞི་བཙལ་ལ་མདོ་སྡེ་བརྗོད་པར་བྱ། མདོ་སྡེའི་ཆ་ཙམ་བཙལ་ལ་མདོ་སྡེ་བརྗོད་པར་བྱ། མདོ་སྡེའི་སྒྲ་བཙལ་ལ་མདོ་སྡེ་བརྗོད་པར་བྱ། ཨུ་པཱ་ལི་གཟུ་བོ་འདུལ་བ་འཛིན་པས་ཡོན་ཏན་བཅུ་
དྲུག་པོ་དེ་མཐོང་ན་མདོ་སྡེ་བརྗོད་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་མདོ་སྡེ་བརྗོད་པར་མི་ནུས་པར་འགྱུར་རོ། །ལྔ་གང་ཞེ་ན། དགེ་སློང་གི་འདུལ་བ་མི་ཤེས་པ། དགེ་སློང་མའི་འདུལ་བ་མི་ཤེས་པ། ཉེས་པ་
འདུལ་བ་མི་ཤེས་པ། རྩོད་པ་འདུལ་བ་མི་ཤེས་པ། ཉོན་མོངས་པ་འདུལ་བ་མི་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེ་བརྗོད་མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་
ལྔ་དང་ལྡན་ན་མདོ་སྡེ་བརྗོད་ནུས་པར་འགྱུར་རོ། །ལྔ་གང་ཞེ་ན། དགེ་སློང་གི་འདུལ་བ་ཤེས་པ་དང་། དགེ་སློང་མའི་འདུལ་བ་ཤེས་པ་དང་། ཉེས་པ་འདུལ་བ་ཤེས་པ་དང་། རྩོད་པ་འདུལ་བ་ཤེས་པ་དང་། ཉོན་མོངས་པ་འདུལ་བ་ཤེས་པ་དང་། ཨུ་པཱ་
ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེ་བརྗོད་ནུས་པར་འགྱུར་རོ།། །།འདུལ་བ་གཞུང་དམ་པ། བམ་པོ་སུམ་བཅུ་པ། དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་ཏུ་བརྗོད་ནས་གནས་བཅུ་དྲུག་ཏུ་འདུལ་བ་ལ་

བརྟག་པར་བྱ་སྟེ། བཅུ་དྲུག་གང་ཞེ་ན། ལུང་དང་། ལུང་བསྒོ་བ་དང་། དངོས་པོ་དང་། རྣམ་པར་འབྱེད་པ་དང་། སྤྱོད་པ་དང་། སྤྱོད་ཡུལ་དང་། ཉུང་ངུ་འདོད་པ་དང་། མང་དུ་འདོད་པ་དང་། མགུ་བ་དང་། མི་མགུ་བ་དང་། དགང་དཀའ་བ་
དང་། དགང་སླ་བ་དང་། གསོ་དཀའ་བ་དང་། གསོ་སླ་བ་དང་། རབ་ཏུ་གཅེས་པ་དང་། ཆོག་ཤེས་པ་སྟེ། ཨུ་པཱ་ལི་གནས་འདི་བཅུ་དྲུག་གིས་འདུལ་བ་ལ་བརྟག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་རྣམ་པ་ལྔ་དང་ལྡན་ན་ཉེས་པ་འབྱིན་མི་ནུས་
པར་འགྱུར་ཏེ། ལྔ་གང་ཞེ་ན། བྱུང་བ་མི་ཤེས། བཅས་པ་མི་ཤེས། རྗེས་སུ་བཅས་པ་མི་ཤེས། གནང་བར་མི་ཤེས། རྗེས་སུ་གནང་བར་མི་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་འབྱིན་མི་ནུས་པར་འགྱུར་
རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་འབྱིན་ནུས་པར་འགྱུར་ཏེ། ལྔ་གང་ཞེ་ན། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། གནང་བ་ཤེས་པ་དང་། རྗེས་སུ་གནང་བ་ཤེས་པའོ། །
ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་འབྱིན་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་འདུལ་བ་ཤེས་པར་བྱས་ལ་གནས་བཅུ་དྲུག་གིས་ཉེས་པ་བརྗོད་པར་བྱ་སྟེ། བཅུ་དྲུག་གང་ཞེ་ན། ལྕི་བ་
དང་། ཡང་བ་དང་། ལྷག་མ་ཡོད་པ་དང་། ལྷག་མ་མེད་པ་དང་། གནས་ངན་ལེན་དང་། ལུས་ཀྱི་དང་། ངག་གི་དང་། མི་དགེ་བ་དང་། ལུང་དུ་མི་སྟོན་པ་དང་། བཅས་པ་དང་། མ་བཅས་པ་དང་། མཐོལ་བར་བྱེད་པ་དང་། སྡོམ་པར་བྱེད་པ་དང་། འདུལ་
བ་ལས་འདས་པར་བྱེད་པ་དང་། ངན་དུ་སྨྲ་བར་འགྲོ་བ་སྟེ། ཨུ་པཱ་ལི་གནས་བཅུ་དྲུག་པོ་འདིས་འདུལ་བ་ཤེས་པར་བྱས་ལ་གནས་བཅུ་དྲུག་གིས་ཉེས་པ་བརྗོད་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་བརྗོད་མི་ནུས་པར་

འགྱུར་ཏེ། ལྔ་གང་ཞེ་ན། ཉེས་པ་མི་ཤེས་པ་དང་། ཉེས་པ་མེད་པ་མི་ཤེས་པ་དང་། ལྕི་བ་མི་ཤེས་པ་དང་། ཡང་བ་མི་ཤེས་པ་དང་། ལུང་ཁ་ཏོན་མི་ཤེས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་བརྗོད་
མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་བརྗོད་ནུས་པར་འགྱུར་ཏེ། ལྔ་གང་ཞེ་ན། ཉེས་པ་ཤེས་པ་དང་། ཉེས་པ་མེད་པ་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། གཞུང་ཁ་ཏོན་དུ་ཤེས་
པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་བརྗོད་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་འདི་དག་གིས་ཉེས་པ་བརྗོད་ནས་གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་
བྱའོ། །བཅུ་དྲུག་པོ་གང་ཞེ་ན། ཉེས་པ་ངོར་བརྗོད་པ་དང་། དཔྱས་འདོགས་པ་དང་། བསྒོ་བ་བཞིན་དུ་མི་ཉན་པ་དང་། ཅང་མི་ཟེར་ཞིང་མི་ཉན་པ་དང་། བསྡིགས་པ་དང་། དགར་བ་དང་། བསྐྲད་པ་དང་། སླར་བསྡུམ་པར་བྱ་བ་དང་། མ་མཐོང་བའི་
ཕྱིར་སྤང་བ་དང་། སླར་ལས་མི་བྱེད་པའི་ཕྱིར་སྤང་བ་དང་། སྡིག་པ་ལ་ལྟ་བ་སླར་མ་བཏང་བའི་ཕྱིར་སྤང་བ་དང་། ཆད་པ་བྱེད་པ་དང་། གཞི་ནས་བསླངས་ཏེ་ཆད་པ་བྱེད་པ་དང་། ཡིད་མགུ་བར་བྱེད་པ་དང་། གཞི་ནས་བསླངས་ཏེ་ཡིད་མགུ་བར་བྱེད་པ་དང་།
གཞི་ནས་བསླངས་ཏེ་སྨོས་པའོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་འདུལ་བ་བརྗོད་ནས་གནས་བཅུ་དྲུག་པོ་འདིས་ཆད་པའི་ལས་ཀྱིས་སྨ་དབབ་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་
པའི་ལས་ཀྱིས་སྨ་དབབ་མི་ནུས་པར་འགྱུར་ཏེ། ལྔ་གང་ཞེ་ན། འདོད་པས་འགྲོ་བ་དང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། ཆད་པའི་ལས་བྱས་པ་དང་། མ་བྱས་པ་མི་ཤེས་པའོ། །ཨུ་པཱ་ལི་

གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པས་གཅད་པའི་ལས་ཀྱིས་སྨ་དབབ་ནུས་པར་འགྱུར་ཏེ། ལྔ་གང་ཞེ་ན། འདོད་པས་མི་འགྲོ་བར་འགྲོ་བ་དང་། ཞེ་སྡང་གིས་མི་འགྲོ་བར་འགྲོ་བ་དང་། གཏི་མུག་གིས་མི་འགྲོ་བར་འགྲོ་
བ་དང་། འཇིགས་པས་མི་འགྲོ་བར་འགྲོ་བ་དང་། ཆད་པའི་ལས་བྱས་པ་དང་མ་བྱས་པ་ཤེས་པའོ། །དེ་ལ་གཟུ་བོ་འདུལ་བ་འཛིན་པས་གནས་བཅུ་དྲུག་གིས་ཆད་པས་གཅད་པའི་ལས་ཀྱིས་སྨ་ཕབ་ལ་གཞན་ཡང་གནས་བཅུ་དྲུག་གིས་ཆད་པའི་ལས་ཀྱིས་སྨ་
དབབ་པར་བྱ་སྟེ། བཅུ་དྲུག་པོ་གང་ཞེ་ན། ཚངས་པའི་ཆད་པས་བསྡིགས་པར་བྱ་བ་དང་། དད་པར་མི་འགྱུར་བར་ཚོར་བའི་ལས་བྱེད་དུ་གཞུག་པ་དང་། ལོངས་སྤྱོད་མི་མྱོང་བའི་ལས་བྱེད་དུ་གཞུག་པ་དང་། མིག་ལམ་ན་མི་སྣང་བར་བྱ་བའི་ལས་བྱ་
བ་དང་། དེའི་ངོ་བོ་ཚོལ་དུ་གཞུག་པ་དང་། གནོད་པར་བྱ་བ་དང་། སྨད་པར་བྱ་བ་དང་། སྤང་བར་བྱ་བ་དང་། ཕྱོགས་མེད་པར་བྱ་བ་དང་། སྤ་གོང་བར་བྱ་བ་དང་། ཞུམ་པར་བྱ་བ་དང་། འགྱོད་པ་བསྐྱེད་པར་བྱ་བ་དང་། རྣམ་པར་འགྱོད་པ་དང་། རྣམ་
པར་སླར་འགྱོད་པ་དང་། དམ་དེམ་དུ་གཞག་པ་དང་། གནད་དུ་དབབ་པ་དང་། ཉེས་སོ་ཞེས་བརྗོད་པའོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་
པ་ཆོས་རྣམ་པ་ལྔ་དང་ལྡན་ན་ཆད་པའི་ལས་ཀྱིས་སྨ་དབབ་མི་ནུས་པར་འགྱུར་ཏེ། ལྔ་གང་ཞེ་ན། འདུལ་བའི་དངོས་པོ་ལྔ་མི་ཤེས་པ་སྟེ། ལྔ་གང་ཞེ་ན། བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་པ་དང་། སྤང་བ་དང་
ལྔའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པའི་ལས་ཀྱིས་སྨ་དབབ་ནུས་པར་འགྱུར་ཏེ། ལྔ་གང་ཞེ་ན། འདུལ་བའི་དངོས་པོ་ལྔ་ཤེས་པའོ། །ལྔ་གང་ཞེ་ན། བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་

པ་དང་། སྤང་བ་དང་ལྔའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཆད་པས་གཅད་པའི་ལས་ཀྱིས་སྨ་དབབ་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་འདི་དག་གིས་ཆད་པས་གཅད་པའི་ལས་ཀྱིས་སྨ་
ཕབ་ནས་གནས་བཅུ་དྲུག་གིས་ལས་བྱའོ། །བཅུ་དྲུག་གང་ཞེ་ན། མངོན་སུམ་དུ་གྱུར་པ་ལ་ལས་བྱ་བ་དང་། མངོན་དུ་མ་གྱུར་ཀྱང་ལས་བྱ་བ་དང་། སྐབས་ཕྱེ་ནས་ལས་བྱ་བ་དང་། སྐབས་མ་ཕྱེ་ཡང་ལས་བྱ་བ་དང་། གླེངས་ལ་ལས་བྱ་བ་དང་། མ་གླེངས་ཀྱང་ལས་
བྱ་བ་དང་། དྲན་པར་བྱས་པ་ལ་ལས་བྱ་བ་དང་། དྲན་པར་མ་བྱས་ཀྱང་ལས་བྱ་བ་དང་། དྲིས་ལ་ལས་བྱ་བ་དང་། མ་དྲིས་ཀྱང་ལས་བྱ་བ་དང་། རྗེས་སུ་སྦྱར་བ་ལ་ལས་བྱ་བ་དང་། རྗེས་སུ་མ་སྦྱར་ཀྱང་ལས་བྱ་བ་དང་། སོ་སོར་ཤེས་པ་ལ་ལས་བྱ་བ་དང་། སོ་སོར་
མི་ཤེས་ཀྱང་ལས་བྱ་བ་དང་། གཏན་ལ་ཕབ་ལ་ལས་བྱ་བ་དང་། གཏན་ལ་མ་ཕབ་ཀྱང་ལས་བྱ་བ་སྟེ། གནས་བཅུ་དྲུག་པོ་འདི་དག་གིས་ལས་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་འདི་ལྔ་དང་ལྡན་ན་ལས་བྱེད་མི་ནུས་པ་ཡིན་ཏེ། ལྔ་གང་ཞེ་ན།
གསོལ་བའི་ལས་མི་ཤེས་པ་དང་། གསོལ་བ་དང་གཉིས་ཀྱི་ལས་མི་ཤེས་པ་དང་། གསོལ་བ་དང་བཞིའི་ལས་མི་ཤེས་པ་དང་། བསྒོ་བའི་ལས་མི་ཤེས་པ་དང་། བྱིན་གྱིས་བརླབས་པའི་ལས་མི་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་དེ་ལྔ་དང་ལྡན་ན་
ལས་བྱེད་མི་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་འདི་ལྔ་དང་ལྡན་ན་ལས་བྱེད་ནུས་པ་ཡིན་ཏེ། ལྔ་གང་ཞེ་ན། གསོལ་བའི་ལས་ཤེས་པ་དང་། གསོལ་བ་དང་གཉིས་ཀྱི་ལས་ཤེས་པ་དང་། གསོལ་བ་དང་བཞིའི་ལས་ཤེས་པ་དང་།
བསྒོ་བའི་ལས་ཤེས་པ་དང་། བྱིན་གྱིས་བརླབ་པའི་ལས་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་དེ་ལྔ་དང་ལྡན་ན་ལས་བྱེད་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་དེ་དག་གིས་ལས་བྱས་ལ་གནས་བཅུ་དྲུག་གིས་རྩོད་

པ་ཞི་བར་བྱེད་ན་ཉེས་པར་ཞི་བ་ཡིན་ཏེ། བཅུ་དྲུག་གང་ཞེ་ན། དེས་དགེ་འདུན་ལ་གསོལ་བ་མ་བྱས་པར་གྱུར་པ་དང་། རྒྱལ་བའི་བཀའ་དང་མི་མཐུན་པར་གྱུར་པ་དང་། ཕྱོགས་དང་ཕྱོགས་མ་ཡིན་པའི་དགེ་སློང་རྣམས་ལ་མ་བསྒོ་བར་མ་གྱུར་པ་
དང་། རྒོལ་བའི་དགེ་སློང་གི་འདུལ་བ་ཉམས་པར་གྱུར་པ་དང་། མ་དག་པའི་དགེ་སློང་གིས་ཉེས་པ་བཅབས་པར་གྱུར་པ་དང་། བྱུང་བ་མ་རུང་བར་གྱུར་པ་དང་། བཅས་པ་མ་རུང་བར་གྱུར་པ་དང་། རྗེས་སུ་བཅས་པ་མ་རུང་བར་གྱུར་པ་དང་། གནང་བ་
མ་རུང་བར་གྱུར་པ་དང་། རྗེས་སུ་གནང་བ་མ་རུང་བར་གྱུར་པ་དང་། རྒོལ་བའི་དགེ་སློང་ཡི་དམ་འཆར་མ་བཅུག་པར་གྱུར་པ་དང་། ལན་གློན་