Kinh tạng Tây Tạng (Kangyur Đại Học) — 013_འདུལ་བ།_པ

ི་བྱ། ལྕི་བས་ཞལ་ཞལ་འཇམ་པོར་བྱུག་པར་མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། བཀྲུ་བར་མི་བྱ། སྟོད་གཡོགས་

བགོས་བཞིན་དུ་རྩྭའམ། ཤིང་ངམ། ས་བཀུར་བར་མི་བྱ། སྟོད་གཡོགས་དང་བཤང་བའི་སར་འཇུག་པར་མི་བྱ། གཅི་བའི་སར་འཇུག་པར་མི་བྱ། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན་ཏེ། སྟོད་གཡོགས་དང་བཅས་མི་གཙང་བ་
ཐམས་ཅད་དུ་འཇུག་པར་མི་བྱའོ། །ལུས་ཀྱི་མཐང་ལ་བགོ་བར་མི་བྱ། རྔུལ་ཟན་དུ་གདིང་བ་མི་བྱ། རྒྱུན་དུ་སྤྱད་ཅིང་བགོ་བར་མི་བྱ་སྟེ། འདི་ནི་སྟོད་གཡོགས་ཏེ་འདི་ལྟར་ནི་སྟོད་གཡོགས་མི་སྤྱད་པའོ། །སྟོད་གཡོགས་དེ་འདི་ལྟར་སྤྱད་དེ། སྟོད་གཡོགས་བགོས་ནས་
ཆུའི་རྫ་མ་དགང་བར་བྱ། སྤྱད་པའི་རྫ་མ་དགང་། གཙང་མའི་རིལ་བ་དགང་། བཤང་སའི་རིལ་བ་དགང་། རྐང་པ་བཀྲུ་བའི་རིལ་བ་ཡང་དགང་བར་བྱ། སྣོད་བགོ་བར་བྱ། གཙུག་ལག་ཁང་སྐྱོང་བྱ། གཞན་གང་ཡང་རུང་སྟེ་རུང་བར་འགྱུར་བ་ཐམས་ཅད་ལའང་སྟོད་
གཡོགས་བགོ་བར་བྱའོ། །མཐང་གོས་ནི་ཐམས་ཅད་དུ་བགོས་ཏེ། ལུས་ཀྱི་མཐང་ལ་བགོ། རྟག་ཏུ་ཡང་བགོ་ཞིང་སྤྱད་པར་བྱའོ། །དགེ་སློང་གིས་མི་གཙང་བའི་སར་ཆོས་གོས་གཞག་པར་མི་བྱ། ལྗིད་ཀྱིས་མནན་པར་མི་བྱ། དྲུབ་པར་རིགས་ན་དྲུབ་པར་བྱ། བཀྲུ་
བར་རིགས་ན་བཀྲུ་བར་བྱ། ཁ་བསྒྱུར་བར་རིགས་ན་ཁ་བསྒྱུར་བར་བྱ། དགེ་སློང་གིས་ཚོན་ཆེན་པོ་རྣམ་པ་ལྔ་པོ་ཉིད་བཅང་བར་མི་བྱ་སྟེ། ཚོན་ཆེན་པོ་རྣམ་པ་ལྔ་གང་ཞེ་ན། འདི་ལྟ་སྟེ། ཐིང་ཤིང་དང་། ལེ་བརྒན་རྩི་དང་། རྒྱ་སྐྱེགས་དང་། གུར་གུམ་དང་། མཚལ་ལོ། །
ཤུན་ཕྲགས་ཀྲི་མ་ཤ་མ་གཏོགས་ཏེ། གཞན་ཁ་དོག་ངུར་སྨྲིག་ཏུ་འགྱུར་བ་ཤིང་གི་ཤུན་ཕྲགས་ལ་ཁ་དོག་ཅན་ཆོངས་ཤིག །དེ་ཡང་གཞན་མེད་པར་གྱུར་ན་གདོད་ཉེས་པ་མེད་དོ། །སྦྱར་མ་ངེས་པར་མཚན་མ་ཅན་དུ་བྱའོ། །སྟོད་གཡོགས་ལ་ངེས་པར་མེད་ལ་མཐང་
གོས་ལ་ཡང་ངེས་པར་མེད་དོ། །དགེ་སློང་ལ་ཆོས་གོས་ངན་ནམ་ཉུང་ན་ཚལ་བུས་ལོགས་ཤིག་ནས་གླན་པར་བྱ་སྟེ། ལྔའམ། བདུན་ནམ། དགུའམ། བཅུའམ། བཅུ་གཅིག་གམ། ལྷག་པར་ཡང་རུང་སྟེ། དེ་ལྟར་དགེ་སློང་གིས་སྦྱར་མ་སྤྱད་པ་ནི་སྦྱར་མར་སྤྱོད་ཅིག །

སྟོད་གཡོགས་སུ་སྤྱད་པ་ནི་སྟོད་གཡོགས་སུ་སྤྱོད་ཅིག །མཐང་གོས་སུ་སྤྱད་པ་ནི་མཐང་གོས་སུ་སྤྱོད་ཅིག །དགེ་སློང་གིས་ཇི་ལྟར་རང་གི་པགས་པ་བཞིན་དུ་ཆོས་གོས་ལ་བསྲུང་བར་བྱའོ། །ཅི་ནས་དེ་ཕྱི་ཕྱིར་བཙལ་མི་དགོས་པར་བྱ་སྟེ། འདི་ནི་ཆོས་གོས་ཀྱི་བྱ་བ་
ཞེས་བྱའོ། །གདིང་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གདིང་བ་རྣམ་པ་གཉིས་རྗེས་སུ་གནང་སྟེ། མལ་སྟན་ལ་བདེ་བའི་ཕྱིར་རོ། །སྟུག་ན་རིམ་གཅིག་བྱ། སྲབ་ན་ནི་རིམ་པ་གཉིས་སུ་བྱའོ། །དགེ་སློང་གིས་གདིང་བ་མ་བཏིང་གི་
བར་དུ་འདུག་པར་མི་བྱ། ཉལ་བར་མི་བྱ། གདིང་བ་གཅིག་རྐྱང་ལ་བསྔོ་བར་མི་བྱ། གདིང་བ་མེད་པར་ཞག་ཏུ་གནས་པར་མི་བྱ། དགེ་སློང་གིས་གདིང་བ་ལ་ནན་ཏན་དུ་བྱ། ལེགས་པར་བྱ། ཅི་ནས་དེ་ཕྱི་ཕྱིར་དེ་བཙལ་མི་དགོས་པར་བྱས་ཏེ། འདི་ནི་གདིང་བའི་བྱ་བ་
ཞེས་བྱའོ། །ཁབ་ཀྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཁབ་རྣམ་པ་གཉིས་རྗེས་སུ་གནང་སྟེ། ཆོས་གོས་དྲུབ་པའི་ཕྱིར་ཏེ། ལྕགས་དང་། ཟངས་ཀྱིའོ། །དགེ་སློང་རྣམས་ཀྱིས་ཁབ་མེད་བཞིན་ལྗོངས་ཀྱི་སྤྱད་པ་མ་སྤྱོད་ཅིག །དགེ་སློང་
གིས་ཁབ་ལེགས་པར་ཞོག་ཤིག །ལེགས་པར་བྱོས་ཤིག །ཅི་ནས་ཕྱི་ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཁབ་ཀྱི་བྱ་བ་ཞེས་བྱའོ། །ཁབ་རལ་གྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཁབ་རལ་རྗེས་སུ་གནང་སྟེ། ཁབ་རྣམས་སྦ་བའི་
ཕྱིར་རོ། །དགེ་སློང་གིས་ངོ་ཚ་མེད་པའི་དགེ་ཚུལ་རྣམས་ལ་ཁབ་རལ་མ་གཞག་ཅིག །མི་སྟོར་བར་བྱ། བསྙེན་པར་རྫོགས་ཀྱང་ཡིད་མི་ཆེས་ན་མ་ཡིན། འདི་ལྟར་ཡང་གང་ཟག་ལྔ་ལ་ཁབ་རལ་གཞག་པར་མི་བྱ་སྟེ། ངོ་ཚ་མེད་པ་དང་། ཁོན་ཡོད་པ་དང་། མི་མཛའ་བ་
དང་། དྲན་པ་ཉམས་པ་དང་། ཚུལ་བཞིན་མི་གནས་པ་ལའོ། །དགེ་སློང་གིས་ཁབ་རལ་ལེགས་པར་གཞག་པར་བྱ། ནན་ཏན་དུ་བྱ། ཅི་ནས་ཕྱི་ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཁབ་རལ་གྱི་བྱ་བ་ཞེས་བྱའོ། །ཐུག་པའི་བྱ་བ་གང་ཞེ་ན། བཅོམ་ལྡན་འདས་ཀྱིས་

དགེ་སློང་རྣམས་ལ་ཐུག་པ་རྗེས་སུ་གནང་སྟེ་བདེ་བར་སྤྱོད་པའི་ཕྱིར་དང་། སྦྱིན་པ་དང་སྦྱིན་བདག་རྣམས་ལ་བྱིན་པའི་ཆོས་རྣམས་ཡོངས་སུ་སྤྱོད་པའི་ཕྱིར་རོ། །དགེ་སློང་གིས་སྒྲ་འབྱིན་བཞིན་དུ་ཐུག་པ་མ་འཐུང་ཤིག །ཤེས་བཞིན་དུ་ཐུག་པ་སྒྲ་
བསྐྱུངས་ཏེ་འཐུང་བར་བྱ། དྲེགས་པའི་ཕྱིར་མ་ཡིན། ང་རྒྱལ་གྱི་ཕྱིར་མ་ཡིན། སྙེམས་པའི་ཕྱིར་མ་ཡིན། བཟང་བའི་ཕྱིར་མ་ཡིན་གྱི་ལུས་འདི་རྨ་གསོ་བའི་ཕྱིར་དང་གཟུང་བའི་ཕྱིར་ཏེ། འདི་ནི་ཐུག་པའི་བྱ་བ་ཞེས་བྱའོ། །ཆུའི་བྱ་བ་གང་ཞེ་ན། དགེ་སློང་
གིས་ཆུ་ཤིན་ཏུ་བརྟག་པར་བྱ། དང་བ། གསལ་བ། མ་རྙོགས་པ། མ་འདྲེས་པ། སངས་པ། གཙང་མ་ཡོངས་སུ་སྤྱད་པར་བྱ་སྟེ། འདི་ནི་ཆུའི་བྱ་བ་ཞེས་བྱའོ། །ཆུ་རྫའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཆུ་སྣོད་རྗེས་སུ་གནང་སྟེ།
དགེ་འདུན་དང་གང་ཟག་ལ་ཡང་རུང་ཞབས་རྟེན་དང་ཆུ་དགབ་པའི་ཁ་གབ་ཏུ་བཅས་པའོ། །དགེ་སློང་རྣམས་ཀྱིས་ཤིན་ཏུ་ལེགས་པར་ཁྲུས་ཏེ་སྐོམས་ལ་གཙང་མར་བྱ་སྟེ་བཅང་བར་བྱ། ལག་པ་རུང་བ་དང་། གོས་རུང་བས་ཆུ་གཞག་པར་བྱ། བྲིམ་པར་བྱ། བྲམ་ཟེ་དང་
ཁྱིམ་བདག་ལྷགས་ན་ཡང་བླུད་པར་བྱ། དགེ་སློང་རྣམས་ཀྱིས་ཆུ་རྫ་ཤིན་ཏུ་སྦ་བར་བྱ། ནན་ཏན་དུ་བྱ། ཅི་ནས་ཕྱི་ཕྱིར་བཙལ་མི་དགོས་པར་བྱ་སྟེ། འདི་ནི་ཆུ་སྣོད་ཀྱི་བྱ་བ་ཞེས་བྱའོ། །ཡོངས་སུ་སྤྱད་པའི་ཆུ་རྫའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་
རྣམས་ལ་ཡོངས་སུ་སྤྱད་པའི་ཆུ་རྫ་རྗེས་སུ་གནང་སྟེ། ཤིན་ཏུ་བཀྲུས། བསྐམས་ལ་གཙང་མར་བྱས་ཏེ་བཅང་བར་བྱ། བཀང་ནས་གཙུག་ལག་ཁང་གི་སྒོར་གཞག་པར་བྱ། ཡོངས་སུ་སྤྱད་པའི་རྫ་མ་དེ་དགེ་སློང་རྣམས་ཀྱིས་དབེན་པར་བྱ། ནན་ཏན་དུ་བྱ། ཅི་ནས་ཕྱི་
ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཡོངས་སུ་སྤྱད་པའི་ཆུའི་རྫ་མའི་བྱ་བ་ཞེས་བྱའོ། །གཙང་མའི་རིལ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་རིལ་བ་རྗེས་སུ་གནང་སྟེ། དེ་མཆོད་རྟེན་གྱི་དྲུང་དུ་གཞག་པར་མི་བྱ། དགེ་སློང་གིས་དེ་དུས་དུས་སུ་བརྟག་

པར་བྱ། བསྐམ་པར་བྱ། དགང་བར་བྱ་སྟེ། འདི་ནི་གཙང་མའི་རིལ་བའི་བྱ་བ་ཞེས་བྱའོ། །ཟས་ཀྱི་བྱ་བ་གང་ཞེ་ན། བཅའ་བ་ལྔ་དང་། བཟའ་བ་ལྔ་སྟེ། དགེ་སློང་རྣམས་ཀྱིས་བཅའ་བ་དང་། བཟའ་བ་རྣམས་ལས་གང་ཡང་རུང་སྟེ། བཟའ་བའི་ཚེ་དྲན་པ་མངོན་པར་
གཞག་པར་བྱ། ཟས་ལ་བརྟག་པར་བྱ། བཙལ་བའོ། །ནན་ཏན་གྱིས་བསྒྲུབས་པའོ། །དེ་དང་འདྲ་བའོ། །ཡོངས་སུ་སྤྱད་པའོ། །ཉམ་དུ་འགྱུར་བའོ། །འགྱེས་པའོ་སྙམ་དུ་ཤེས་པར་བྱས་ལ་བཟའ་བར་བྱའོ། །དྲན་པ་ཉེ་བར་བཞག་ཅིང་སེམས་མི་གཡེང་
བར་ཟས་ལ་རྒྱུ་མཐུན་པར་འདུ་ཤེས། ནད་པར་འདུ་ཤེས། གཞན་ལ་རག་ལས་པར་འདུ་ཤེས། རྐྱེན་དུ་འདུ་ཤེས། རྟེན་ཅིང་འབྲེལ་བར་འབྱུང་བར་འདུ་ཤེས། མངོན་དུ་བཞག་ལ་ཟས་བཟའ་བར་བྱ། འདུས་ཏེ་ཟ་བ་དང་། ཡང་ཡང་ཟ་བ་དང་། ཆོག་པར་བྱ་བ་
ལའང་དྲན་པ་མངོན་དུ་གཞག་པར་བྱ་སྟེ། དེ་ནི་ཟས་ཀྱི་བྱ་བ་ཞེས་བྱའོ། །བཟའ་བའི་བྱ་བ་གང་ཞེ་ན། དགེ་སློང་གིས་ཟན་བཟའ་བའི་ཚེའམ། སྐྱོ་མའི་ཚེའམ། ཐུག་པ་བཏུང་བའི་ཚེ་ཡང་རུང་དུས་བསྒོ་བའམ། གཎྜཱི་བརྡུངས་མ་ཐག་ཏུ་མྱུར་དུ་འོང་བར་བྱ། མྱུར་དུ་
འདུ་བར་བྱ། ཤེས་བཞིན་དུ་འགྲེང་བར་བྱ། ཤེས་བཞིན་དུ་འདུག་པར་བྱ། ཤེས་བཞིན་དུ་བཟའ་བར་བྱ། དྲན་པ་ཉེ་བར་བཞག་ཅིང་སེམས་མི་གཡེང་བར་བྱ་བ་དང་། ཆས་བཟང་བ་དང་། སྤྱོད་ལམ་དུ་ལྡན་པ་དང་། ཤིན་ཏུ་བསྡམས་ཤིང་རབ་ཏུ་དབེན་པར་བྱས་ལ། སྒྲ་
བསྐྱུངས་ཤིང་མིག་མི་གཡེང་ལ་མིག་གཉའ་ཤིང་གང་ཙམ་དུ་བལྟ། རིམ་གྲོར་བཅས། བདག་དམན་པར་བཅས། འཇིགས་པ་དང་། གཞན་གྱི་དབང་དུ་ཡིད་ལ་བསམས་ནས་རྡུལ་ཕྱག་གོ་སྙམ་པའི་སེམས་དང་། གནས་བརྟན་དང་། བར་མ་དང་། གསར་བུ་རྣམས་ལ་
བྱམས་པའི་སེམས་དང་། བརྩེ་བའི་སེམས་དང་། ཕ་དང་། བུ་དང་། ཕུ་ནུ་བོར་འདུ་ཤེས་མངོན་དུ་བཞག་སྟེ་སྟན་ལ་འདུག་པ་མཁས་པར་བྱ། བཟའ་བ་ལ་མཁས་པར་བྱ་སྟེ། འདི་ནི་བཟའ་བའི་བྱ་བ་ཞེས་བྱའོ། །ཟས་བཏང་བའི་བྱ་བ་གང་ཞེ་ན། དགེ་སློང་གིས་ཟས་བླངས་

ནས་སླར་གཏང་བར་མི་བྱ། བབ་བབ་ཏུ་གཏང་བར་མི་བྱ། ཟས་གང་ལ་གཏང་བར་བྱ་ཞེ་ན། མ་ལ་སྦྱིན་པར་བྱ། ཕ་དང་། ཕུ་ནུ་བོ་དང་། སྲིང་མོ་ལ་སྦྱིན་པར་བྱ། གཉེན་ལའང་སྦྱིན་པར་བྱ། ཀུན་དགའ་ར་བའི་ནང་དུ་ཁྱིམ་པ་འོངས་པ་ལའང་སྦྱིན་པར་བྱ། ཕན་
བཏགས་པ་ལ་སྦྱིན་པར་བྱ། མི་ཕན་པ་ལའང་སྦྱིན་པར་བྱ། ནད་པ་དང་། བཟུང་བ་དང་། བྲེལ་བར་གྱུར་པ་ལའང་སྦྱིན་པར་བྱ། དེ་སྟེ་བུད་མེད་སྦྲུམ་པ་ཞིག་འོངས་ན་ཡང་དྲན་པ་ཉེ་བར་བཞག་སྟེ་སྦྱིན་པར་བྱ། བྱོལ་སོང་ལའང་ཟས་ཆང་གཅིག་སྦྱིན་པར་བྱ། རབ་ཏུ་
འབྱུང་བར་འདོད་པ་ལའང་སྦྱིན་པར་བྱ། དེ་ཡང་དུམ་བུར་བྱས། ལྷག་མར་བྱས་ལ་སྦྱིན་པ་སྟེ། འདི་ནི་ཟས་གཏང་བའི་བྱ་བ་ཞེས་བྱའོ། །བསོད་སྙོམས་ཀྱི་བྱ་བ་གང་ཞེ་ན། དགེ་སློང་གིས་བསོད་སྙོམས་གུས་པར་བླང་བར་བྱ། རིམ་བཞིན་དུ་བླང་བར་བྱ་མུ་དང་
མཉམ་པར་མ་ཡིན། ཚོད་མ་དང་མཉམ་པར་མ་ཡིན། ཤེས་བཞིན་པ་དང་། དྲན་པ་ཉེ་བར་གཞག་པ་དང་། སེམས་མི་གཡེང་བ་དང་། མི་བོ་བ་དང་། ཇི་ཙམ་གྱིས་དེ་ཆོག་པར་འགྱུར་བ་དེ་ཙམ་དུ་བླང་བར་བྱ་སྟེ། འདི་ནི་བསོད་སྙོམས་ཀྱི་བྱ་བ་ཞེས་བྱའོ། །བསོད་
སྙོམས་སྤྱོད་པའི་བྱ་བ་གང་ཞེ་ན། བསོད་སྙོམས་སྤྱོད་པའི་དགེ་སློང་གིས་ཤེས་བཞིན་དུ་འཇུག་པར་བྱ། ཤེས་བཞིན་དུ་འདུག་པར་བྱ། ཤེས་བཞིན་དུ་འགྲེང་བར་བྱ། དྲན་པ་ཉེ་བར་གཞག་པ་དང་། སེམས་མི་གཡེང་བ་དང་། མཛེས་པ་དང་། སྤྱོད་ལམ་དུ་ལྡན་པ་
དང་། ཤིན་ཏུ་བསྡམས་པ་དང་། ཤིན་ཏུ་གཡོགས་པ་དང་། སྒྲ་བསྐྱུངས་པ་དང་། མིག་མི་གཡེང་ཞིང་གཉའ་ཤིང་གང་དུ་བརྟག་པ་དང་། དབང་པོ་བསྡམ་པ་དང་། ཡིད་ཕྱིར་མི་གཡེང་བ་དང་། སྔ་ཕྱིར་འདུ་ཤེས་པ་དང་། མ་ལྟ་བུའི་བུད་མེད་མཐོང་ན་མར་
འདུ་ཤེས་ཉེ་བར་གཞག །སྲིང་མོ་ལྟ་བུའི་བུད་མེད་མཐོང་ན་སྲིང་མོར་འདུ་ཤེས་ཉེ་བར་གཞག །བུ་མོ་ལྟ་བུའི་བུད་མེད་མཐོང་ན་བུ་མོར་འདུ་ཤེས་མངོན་པར་གཞག །བསོད་སྙོམས་སྤྱོད་པའི་དགེ་སློང་གིས་སྲང་དང་། ཚོང་འདུས་དང་། བཞི་མདོ་དང་། སུམ་མདོ་དང་། སྒོ་

ཁང་དག་གི་མཚན་མ་གཟུང་བར་བྱ། ཁྱིམ་གྱི་སྒོར་སོང་ནས་ཁར་གསིལ་དཀྲོགས་ཏེ་དལ་ནས་བགས་ཀྱིས་སྒོ་ལ་གཏུགས་པར་བྱ། དེ་སྟེ་བུད་མེད་གཉིད་ལོག་ན་སེ་གོལ་གཏོགས་ལ་སད་པར་བྱ་སྟེ། རྡུང་བ་ཞིག་ལ་ཞུགས་ན་གཏུན་བུ་ཐབས་གཉིས་གསུམ་རྡུང་བའི་བར་
དུ་བསྡད་པར་བྱ། འོན་ཏེ་སྲེག་པ་ཞིག་ལ་ཞུགས་ན་ཁུར་བ་གཅིག་བསྲེགས་ཀྱི་བར་དུ་བསྡད་པར་བྱ། དེ་སྟེ་འཐག་པ་ཞིག་ཏུ་གྱུར་ན། ལན་གཉིས་གསུམ་བསྐོར་གྱི་བར་དུ་བསྡད་པར་བྱ། དྲན་པ་ཉེ་བར་གཞག་པར་བྱ། སེམས་མི་གཡེལ་བར་བསོད་སྙོམས་
བླང་བར་བྱ། ཇི་ཙམ་ཆོག་པ་དེ་ཙམ་བླང་བར་བྱ། དེ་སྟེ་དགེ་སློང་བསོད་སྙོམས་སྤྱོད་པས་འདོད་ན་དགེ་འདུན་གྱི་ནང་དུ་བཟའ་བར་བྱ། མགྲོན་དུ་བོས་ན་ཡང་བདག་གིར་བྱས་ཏེ། བསོད་སྙོམས་སྤྱོད་པའི་བྱ་བ་ནི་དེས་གཏང་བར་བྱ་སྟེ། འདི་ནི་བསོད་སྙོམས་སྤྱོད་
པའི་བྱ་བ་ཞེས་བྱའོ། །ཟས་ནོད་པའི་བྱ་བ་གང་ཞེ་ན། ཟས་ནོད་པའི་དགེ་སློང་གིས་དུས་དང་ཚོད་རིག་པར་བྱོས་ལ་བསོད་སྙོམས་ལོང་ཤིག །ཤེས་པར་བྱ། དྲན་པ་མངོན་པར་གཞག་པར་བྱ། སེམས་མི་གཡེལ་བར་བྱ། མི་རྙོགས་པར་བྱ། མི་འདྲེས་པར་བྱ།
ཅི་ནས་ཀྱང་མཛེས་ཤིང་དབེན་པར་བྱ། ཅི་ནས་ཀྱང་དེ་ལ་མི་གཙང་བ་འབགས་པ་དང་། རིངས་ཤིང་བརྟུན་པའི་ཚུལ་དུ་མི་བྱ། གཙང་ཞིང་མཛེས་པར་བྱ། རིངས་ཤིང་འདུན་པ་ལྟར་འོང་བར་བྱ། སྐབས་སུ་མ་བབ་པའི་དོན་གཞན་མི་གཉེར། གཙུག་ལག་ཁང་དུ་སོང་
ནས་དགེ་སློང་དེ་ལ་བཞིན་གྱི་མདངས་བཟང་བ་དང་། ཁྲོ་གཉེར་མེད་པ་དང་། ཚིག་སྙན་པ་དང་། མགུ་བར་བྱོས་ལ་ཟན་ལོང་ཤིག །འདི་ནི་ཟས་ནོད་པའི་བྱ་བ་ཞེས་བྱའོ། །དགོན་པའི་བྱ་བ་གང་ཞེ་ན། དགོན་པའི་དགེ་སློང་གིས་མདངས་བཟང་བར་བྱ། ཁྲོ་གཉེར་མེད་
པར་བྱ། དྲན་པ་མངོན་པར་གཞག །ཐོག་མར་སྙན་ཚིག་བྱ། ཚུར་ཤོག་བདེ་བར་འོངས་སམ་ཞེས་ཚིག་སྙན་པས་བསུ། ཁྱེད་ཅག་ལེགས་པར་གནས་སམ། ལེགས་པར་སྤྱད་དམ། ལེགས་པར་བྱ་བ་བྱས་སམ། ཞེས་ཐོག་མར་དྲིས་ཤིག །དགོན་པའི་དགེ་སློང་

རྣམས་ཀྱིས་ཆུ་ལེགས་པར་གཟོས་ཏེ་ཞོག་ཤིག །ཆུ་སྣོད་ཀྱང་ཞོག་ཤིག །ཁ་ཟས་ཀྱང་གཟོས་ལ་ཞོག་ཤིག །ཟས་ཀྱི་སྣོད་ཀྱང་ཞོག་ཤིག །མེ་ཡང་གཟོས་ཏེ་ཞོག་ཤིག །ཞུགས་ལིང་ཡང་གཟོས་ཏེ་ཞོག་ཤིག །མར་མེ་དག་ཀྱང་གཟོས་ཏེ་
ཞོག་ཤིག །མེ་མར་གྱི་སྣོད་ཀྱང་གཟོས་ཏེ་ཞོག་ཤིག །མེ་མར་གྱི་སྙིང་པོ་ཡང་གཟོས་ཏེ་ཞོག་ཤིག །མར་དང་། འབྲུ་མར་དང་། སྦྲང་རྩི་དང་། སྣད་པའི་བཅིང་བ་ཡང་ཤོམས་ཏེ་ཞོག་ཤིག །ཀོ་བའི་དུམ་བུ་ཡང་ཤོམས་ཏེ་ཞོག་ཤིག །རྒྱུས་པ་དང་། འབྲེང་
བུ་དང་། སྨྱུང་བུ་ཡང་ཤོམས་ཏེ་ཞོག་ཤིག །ཁབ་དང་། གྲི་དང་། སྐུད་པ་དང་། ཟས་རྣམས་ཀྱང་ཤོམས་ཏེ་ཞོག་ཤིག །སྨན་རྣམས་ཀྱང་ཆོངས་ཤིག །བརྟན་པའི་ཁར་བ་ཡང་ཆོངས་ཤིག །དགོན་པའི་དགེ་སློང་རྣམས་ཀྱིས་མེ་ཤེལ་དང་། ཆུ་ཤེལ་
གཞན་ལ་མ་བསྟན་ཅིག །དགོན་པའི་དགེ་སློང་གིས་ཁྲོན་པ་རྒྱུས་ཤེས་པར་གྱིས་ཤིག །ཉེ་སྤྱོད་ལ་མཁས་པ་དང་། མཚན་མོ་ལ་མཁས་པ་དང་། ཡུལ་ཕྱོགས་ལ་མཁས་པ་དང་། དགོན་པའི་དགེ་སློང་གིས་མདོ་སྡེ་ལ་མཁས་པར་བྱ། འདུལ་བ་ལ་མཁས་པར་
བྱ། མ་ལྟ་བུ་ལ་མཁས་པར་བྱ། སྨྲ་བ་ལ་མཁས་པ་དང་། ཆོས་སྟོན་པ་ལ་མཁས་པ་དང་། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་
མཁས་པར་བྱ། དགོན་པའི་དགེ་སློང་རྣམས་ཀྱིས་ཆོས་ཤེས་པར་བྱ། དོན་ཤེས་པར་བྱ། དུས་ཤེས་པ་དང་། ཚོད་ཤེས་པ་དང་། བདག་ཉིད་ཤེས་པ་དང་། འཁོར་ཤེས་པ་དང་། གང་ཟག་ཤེས་པ་དང་། གང་ཟག་གི་ཁྱད་པར་ཤེས་པར་བྱ། དགོན་པའི་དགེ་སློང་
རྣམས་ཀྱིས་དྲེགས་པ་མི་བསྐྱེད། གཅམ་བུར་མི་བྱ། བཀུར་སྟིར་བཅས། དབང་གཞན་ལ་རག་ལས་པར་བཅས། ཁ་མི་རྒོད། ཚིག་བརྟན་པར་བྱ། ངོ་ཚ་དང་ཁྲེལ་ཡོད་པར་བྱ། གཏམ་མི་མང་བ་དང་། ཐབ་མེར་འགྱུར་བའི་རྣམས་མི་སྨྲ། བརྩོན་འགྲུས་སུ་བྱ། ལེ་ལོར་

མི་བྱ། དྲན་པ་ཅན་དང་ཤེས་བཞིན་དུ་སྤྱོད་པར་བྱ། དབང་པོ་དབེན་པར་བྱ། ཟས་ལ་ཚོད་ཟིན་པར་བྱ། བདག་གི་ཤེས་པར་མི་བྱ། སྲོད་དང་། ཐོ་རངས་ཀྱི་ཚེ་རྣལ་འབྱོར་བྱ་བ་ལ་ནན་ཏན་དུ་བྱ། གཉིད་ཀྱི་བདེ་བ་དང་། འཕྲེས་པའི་བདེ་བ་དང་། མལ་སྟན་གྱི་བདེ་བ་ཉམས་
སུ་མི་བླང་། དུས་སུ་སྤྱོད་པ་དང་། དུས་མ་ཡིན་པར་སྤྱོད་པ་ཤེས་པར་བྱ། སྟན་ལ་འདུག་པ་ལ་མཁས་པ་དང་། དགེ་སློང་གནས་བརྟན་རྣམས་ལ་མི་སྨོད་པ་དང་། དགེ་སློང་གསར་བུ་རྣམས་ལའང་མི་སྨོད་པ་དང་། དགོན་པའི་དགེ་སློང་གིས་བརྩོན་འགྲུས་ཡལ་བར་མི་བྱ།
མ་ཐོབ་པ་ཐོབ་པ་དང་། མ་ཆུད་པ་ཆུད་པ་དང་། མངོན་དུ་མ་བྱས་པ་མངོན་དུ་བྱ་བ་དང་། དགོན་པ་ལ་གནས་པའི་དགེ་སློང་གིས་ཆོས་ཀྱི་དབྱུག་པ་དང་། རིལ་བུ་དང་། ཕོ་ལོང་གིས་སྲོད་དང་ཐོ་རངས་ལ་རྣལ་འབྱོར་བྱོས་ཤིག །དགོན་པའི་དགེ་སློང་གིས་
མཚུངས་པར་སྤྱད་པའི་ཆོས་བཅས་པ་བཞིན་དུ་རྫོགས་པར་མ་བྱས་ན་འདས་པ་དང་བཅས་པར་འགྱུར་ཏེ། །འདི་ནི་དགོན་པའི་བྱ་བ་ཞེས་བྱའོ། །དགོན་པའི་གནས་བརྟན་གྱི་བྱ་བ་གང་ཞེ་ན། དགོན་པའི་དགེ་སློང་གིས་བྱ་བ་དེ་ལྟ་བུ་ལ་འཇུག་པར་བྱའོ། །དགེ་
སློང་གསར་བུ་རྣམས་དེ་ན་འཁོད་པ་ཀུན་ཤེས་པར་བྱ་བ་ནས་སྔ་མ་བཞིན་ཏེ། ཐམས་ཅད་དུ་ཡང་དགེ་སློང་གནས་བརྟན་གྱིས་ཐོག་མར་འཇུག་པར་བྱའོ། །རྒྱུད་གཏང་བར་མི་བྱ་བའི་བར་དུ་སྟེ། དགོན་པ་ན་བྱ་བའི་རྣམས་གཟུང་བར་བྱ། དགོན་པའི་བྱ་བ་རྣམས་
ལ་གཟུད་པར་བྱ། དེ་དག་གིས་ཀྱང་དེས་རྗེས་སུ་བསྟན་པའི་ཚིག་ལ་མཉན་ཅིང་བསྒྲུབ་པར་བྱ་སྟེ། འདི་ནི་དགོན་པའི་གནས་བརྟན་གྱི་བྱ་བ་ཞེས་བྱའོ། །གྲོང་འདབ་ཀྱི་བྱ་བ་གང་ཞེ་ན། གྲོང་འདབ་ཀྱི་དགེ་སློང་གིས་མདངས་བཟང་བར་བྱ་བ་ནས། སྔ་མ་བཞིན་ཏེ།
བདེ་བར་སྤྱོད་པའི་བར་དུའོ། །དགེ་སློང་དག་འོངས་ཤིང་ལྷགས་པའི་རྣམས་ལ་བདེ་བར་ཕྱིན་ཏམ་ཞེས་དྲི་བར་བྱ། ཇི་ལྟར་རྒན་རིམས་པ་དང་། ཇི་ལྟར་རིགས་པར་ངལ་བསོ་བར་བྱ། མལ་སྟན་དག་ཀྱང་ཇི་ལྟ་བུ་ཡོད་པ་སྦྱིན་པར་བྱ། དེ་སྟེ་སྔ་དྲོ་ལྷགས་ན་ནི་ཁ་ཟས་ཅི་འབྱོར་

པ་བཞིན་བགོ་ཞིང་སྦྱིན་པར་བྱ། དེས་ཟས་ཀྱི་འོག་ཏུ་འོངས་ན་བཏུང་བ་དང་། བུ་རམ་དང་། ཤ་ཁ་ར་དང་། ཧྭགས་དང་། ཧ་སེ་རྣམས་ཅི་འབྱོར་པ་སྦྱིན་ཞིང་ཚིམ་པར་བྱ། ནུབ་མོ་མལ་སྟན་ཀྱང་བགོ་ཞིང་སྦྱིན་པར་བྱ། རྐང་པ་བཀྲུ་བ་དང་། རྐང་པ་བསྐུ་བ་
ཡང་སྦྱིན་པར་བྱ། ཀུན་དགའ་ར་བའི་ཕྱིར་འབྱུང་བ་དང་། ནང་དུ་འཇུག་པ་དང་། ཉེ་འཁོར་དང་། བཤང་བའི་ས་དང་། གཅི་བའི་ས་དང་། སྐས་ཀ་དང་། ཐེམ་སྐས་དང་། གཅད་པ་དང་། དབྱེ་བའི་རྣམས་སོ་སོར་སྟོན་ཅིག །དགེ་འདུན་གྱི་བྱ་བ་བཅས་པ་རྣམས་
ཀྱང་སྒྲོགས་ཤིག །དེ་སྟེ་བསོད་སྙོམས་པ་ཞིག་ཡིན་ན་ཡང་སྤྱོད་ཡུལ་རྣམས་རིག་པར་སྟོན་ཅིག །འོངས་པ་ལ་ཡང་ཁ་ཟས་དང་སྐོམ་རྣམས་སྦྱར་བར་བྱ། དེ་སྟེ་འདུག་པར་གྱུར་ན་དེ་ལ་དྲིས་ཏེ་གནས་པར་གྱུར་ན། གནས་ཁང་དང་། ཁང་བུ་བརྩེགས་པ་ཡང་རུང་དབེན་
པར་རུང་བ་བྱིན་ཅིག །དེ་སྟེ་འགྲོ་བར་གྱུར་ན་རབ་ཏུ་མགུ་བར་བྱས་ལ་ཕྱི་བཞིན་དུ་བསྐྱལ་བར་གྱིས་ཤིག །དེ་སྟེ་ཁྱིམ་པ་དག་ལྷགས་ན་ཡང་གྲོང་འདབ་པའི་དགེ་སློང་གིས་མགུ་བའི་བཞིན་དང་། ཁྲོ་གཉེར་མེད་པར་གྱིས་ལ་མདུན་དུ་བསུ་སྟེ་ཚིག་སྙན་པར་གྱིས་ཤིག །སྟན་ཐིང་
ཤིག །དེ་སྟེ་ཁ་ཟས་དང་སྐོམ་དགོས་ན་ཡང་བྱིན་ཅིག །ཉལ་ན་ཡང་མལ་སྟན་བྱིན་ཅིག །དེ་སྟེ་ཆོས་ཉན་པར་འདོད་ན་དེས་ནུས་ན་བདག་ཉིད་ཀྱིས་ཆོས་ཀྱི་གཏམ་བྱོས་ཤིག །དེ་སྟེ་བདག་ཉིད་ཀྱིས་མི་ནུས་ན་དགེ་སློང་གཞན་སྐོས་ཏེ་ཆོས་ཀྱི་གཏམ་སྒྲོགས་ཤིག །གྲོང་
མཐའི་དགེ་སློང་གིས་བྲམ་ཟེ་དང་ཁྱིམ་བདག་གི་རྣམས་འོངས་ཤིང་ལྷགས་པ་ལ་སྦྱིན་པ་དང་། སྦྱིན་པ་ལ་འཇུག་པ་དང་། སྐྱབས་སུ་འགྲོ་བ་དང་། བསླབ་པའི་གཞི་འཛིན་པར་བསྟབས་པར་བྱོས་ཤིག །སྤོས་དང་། དྲི་དང་། མེ་ཏོག་ཀྱང་སྦྱིན་པར་བྱོས་ཤིག །མཆོད་
རྟེན་ལ་སྐོར་ཞིང་ཕྱག་འཚལ་དུ་ཆུག་ཤིག །ཅི་ནུས་སུ་བསླབས་བསྟན་ཏེ་གཏང་བར་བྱས་ཏེ་འདི་ནི་གྲོང་འདབ་ཀྱི་བྱ་བ་ཞེས་བྱའོ། །གྲོང་འདབ་ཀྱི་གནས་བརྟན་གྱི་བྱ་བ་གང་ཞེ་ན། གྲོང་འདབ་ཀྱི་གནས་བརྟན་གྱིས་བྱ་བ་དེ་འདི་ལྟ་བུ་ལ་འཇུག་པར་བྱའོ། །དགེ་སློང་གསར་བུ་དེ་ན་གང་

འཁོད་པ་དེ་ཀུན་ཤེས་པར་བྱ་བ་ནས་སྔ་མ་བཞིན་ཏེ། གྲོང་འདབ་ཀྱི་དགེ་སློང་གནས་བརྟན་གྱིས་ཐམས་ཅད་དུ་ཡང་ཐོག་མར་འཇུག་པར་བྱ། རྒྱུད་མི་གཏང་བར་བྱ་བའི་བར་དུ་སྟེ། གྲོང་འདབ་ཀྱི་བྱ་བ་རྣམས་ལ་དེ་དག་གཟུད་པར་བྱ། གྲོང་འདབ་པའི་བྱ་བ་རྣམས་ལ་འཛིན་པ་
གཞུག་པར་བྱ། བྱ་བ་བཟང་པོ་ལ་གཟུད་པར་བྱ། འདི་སྐད་ཅེས་བསྒོ་བར་བྱ་སྟེ། ཚེ་དང་ལྡན་པ་རྣམས་དྲན་པ་ཉེ་བར་ཞོག་ལ་གྲོང་འདབ་དུ་གནས་པར་བྱ་སྟེ། ཀུན་དགའ་ར་བ་ཕ་དང་། དགེ་ཚུལ་ཕ་དང་། བུད་མེད་རྣམས་ལ་རྒྱུན་དུ་ལྟ་བ་སྤང་བར་བྱས་ལ་ལྟ་ན་ཡང་
དྲན་པ་ཉེ་བར་བཞག་ལ་བལྟ་ཞིང་སྨྲ་བར་གྱིས་ཤིག །དྲེགས་པར་མ་བྱེད་ཅིག །དུས་དུས་སུ་ཆོས་ཀྱི་གཏམ་བྱ་བར་བྱ། སྤྱོད་ཡུལ་མ་ཡིན་པ་རྣམས་ལས་ནི་བཟློག་པར་བྱ། སྤྱོད་ཡུལ་རྣམས་ལ་ནི་གཟུད་པར་བྱ། དེ་དག་གིས་ཀྱང་དེས་བསྒོ་བ་དང་། བསྟན་
པའི་ཚིག་རྣམས་མཉན་ཅིང་འཇུག་པར་བྱ་སྟེ། འདི་ནི་གྲོང་འདབ་ཀྱི་དགེ་སློང་གནས་བརྟན་གྱི་བྱ་བ་ཞེས་བྱའོ། །གློ་བུར་དུ་འོངས་པའི་བྱ་བ་གང་ཞེ་ན། གློ་བུར་དུ་འོངས་པའི་དགེ་སློང་གིས་བབ་བབ་ཏུ་ཀུན་དགའ་ར་བའི་ནང་དུ་འཇུག་པར་མི་བྱ། ཀུན་དགའ་ར་བའི་སྒོ་
ཀར་ལྷུང་བཟེད་དང་ཆོས་གོས་ཞོག་ལ་དེ་སྟེ་ཆུ་ཡོད་ན་ནི་རྐང་པ་ཁྲུས་ཤིག །ཆུ་མེད་ན་ནི་རྡུལ་ཕྱི་བའི་ར་དའམ། ལོ་མ་དང་། ལོ་མ་རྙིས་པས་རྡུལ་ཕྱིས་ཤིག །བཤང་བ་བྲོའམ་གཅི་བ་བྲོ་ན་ཡང་གཤོང་ཤིག །གཅིས་ཤིག །དེ་ནས་ཆོས་གོས་གྱོན་ལ་ཕྲག་པ་གཡོན་
པས་ཆོས་གོས་ཀྱི་ཚང་ཐུར་དང་། ལྷུང་བཟེད་ཀྱི་སྣོད་རྣམས་ཐོགས་ཤིག །ལག་པ་གཡས་པས་ནི་ཁར་གསིལ་ཐོགས་ཤིག །ལག་པ་གཡོན་པས་ནི་ལྷམ་ཁྱེར་ཅིག །དེ་སྟེ་ཀུན་དགའ་ར་བ་རྩིག་པས་བསྐོར་ཏམ། ཤིང་ཐགས་ཀྱིས་བསྐོར་ཏམ། འོབས་ཀྱིས་བསྐོར་
བར་གྱུར་ན་ཤེས་བཞིན་དུ་སྒོ་ལ་མི་འདྲུད་བཞིན་དུ་ནང་དུ་ཞུགས་ཤིག །མཆོད་རྟེན་རྣམས་ལ་བསྐོར་བར་བྱ། ཤེས་བཞིན་དུ་དྲན་པ་ཉེ་བར་བཞག་ལ་སེམས་མི་གཡེང་། སྤྱོད་ལམ་མཛེས་པས་སྦྱར་ཞིང་། རབ་ཏུ་བཀབ་ནས་སྒྲ་བསྐྱུངས་ལ་མིག་མི་གཡེང་ཞིང་གཉའ་ཤིང་གང་ཙམ་

དུ་ལྟ་ཞིང་གཙུག་ལག་ཁང་གི་ནང་དུ་ཞུགས་ལ་སྣང་གཡེལ་ཆེ་བའི་ཕྱོགས་སུ་འདུག་ཤིག་དང་། ཅི་ནས་གཞི་ན་གནས་པའི་དགེ་སློང་དག་གིས་མཐོང་ནས་དགེ་སློང་འདི་ནི་གློ་བུར་དུ་འོངས་པ་ཞིག་གོ་ཞེས་ནས་དེ་དག་གིས་ངལ་བསོ་བར་བྱ་བར་འགྱུར། གློ་བུར་
དུ་འོངས་པའི་དགེ་སློང་གཙུག་ལག་ཁང་གི་ནང་དུ་ཞུགས་པ་དང་། གང་རིགས་པར་ཆོས་གོས་ཀྱི་ཚང་ཐུར་དང་། ལྷུང་བཟེད་ཀྱི་སྣོད་དང་། རིལ་བ་དང་། ལྷམ་རྣམས་གཞག་པར་བྱའོ། །དེ་ནས་དགེ་སློང་གནས་བརྟན་དག་ལ་བཀུར་སྟིར་བཅས། རི་མོར་བཅས།
འཇིགས་པའི་དབང་དུ་གྱིས་ལ་རྐང་པ་ལ་ཕྱག་བྱོས་ཤིག །དགེ་སློང་གསར་བུ་རྣམས་ལ་ཚིག་སྙན་པས་དགའ་བར་བྱོས་ཤིག །སྟན་ཇི་ལྟ་བུ་ཐོབ་པ་དེ་ལ་འདུག་པར་བྱ། གློ་བུར་དུ་འོངས་པའི་དགེ་སློང་ཟས་ཀྱི་ཚེའམ། བཏུང་བའི་ཚེའམ། ཐུག་པ་བཏུང་བའི་
ཚེའམ། ཕྱག་བྱ་བའི་ཚེའང་རུང་། བསྒོའམ། གཎྜཱི་བརྡུངས་ནས་དགེ་འདུན་འདུ་བའི་ཁར་འདུས་ཤིག །ལོ་གྲངས་དྲིས་ལ་གར་བབ་པའི་རིམ་བཞིན་དུ་འདུག་ཤིག །དེ་སྟེ་མལ་སྟན་འབྲིམ་ན་ཤིན་ཏུ་རྟོགས་ལ་ལོང་ཤིག །གནས་ཁང་བསྐོས་ན་ཅི་འདི་ན་
གནས་སམ་མི་གནས་ཞེས་དྲིས་ཤིག །དེ་སྟེ་གནས་ན་ནི་ཅི་བདེ་ཞེས་བྱོས་ཤིག །དེ་སྟེ་མི་གནས་པ་ཞིག་ཡིན་ན་ནི་དེས་ལྷུང་བཟེད་དང་ཆོས་གོས་ཕྱོགས་གཅིག་ཏུ་ཞོག་ལ་ཕྱག་དར་བྱ་བའི་ཕྱིར་ཕྱགས་མ་ཚོལ་ཅིག །ཆུ་རྫ་དང་ཤིང་སྟན་ཀྱང་ཚོལ་ཅིག །གནས་
ཁང་གི་སྒོ་དྲུང་དུ་འོངས་ན་ཡང་དལ་ནས་རྡུངས་ཤིག །འོན་ཏེ་དེ་ན་སྦྲུལ་ལམ། སྡིག་པའམ། རྐང་མངས་སམ། ཏེ་མ་པུ་ཀའམ། ཧེ་ལ་ཏ་ཀའམ། སྲོག་ཆགས་གདུག་པ་གཞན་དག་ཀྱང་རུང་སྟེ་ཡོད་ན་ཚོར་བར་བྱས་པར་འགྱུར་རོ། །དེ་སྒོའི་དཔྱིས་བླ་འོག་ཏུ་རྟོགས་
ཤིག །སྒོ་འཕར་ལའང་རྟོགས་ཤིག །དེ་ནས་སྒོ་དལ་ནས་ཕྱེ་སྟེ་ཤེས་བཞིན་དུ་ནང་དུ་ཞུགས་ལ་དབུས་སུ་འདུག་ནས་གྲྭ་བཞིར་སྦྲུལ་གྱི་གནས་སམ། སྡིག་པའི་གནས་སམ། སྲིན་བུའམ། སྦྲང་མའམ། གྲོག་སྦུར་གཞན་གྱི་གནས་ལྟོས་ཏེ། ཡོད་པར་གྱུར་ན་

དེ་དག་མི་གནོད་པའི་ཚུལ་དུ་ལོགས་ཤིག་ཏུ་འགྲོ་བར་གྱིས་ཤིག །དེ་ནས་གནས་ཁང་དུ་ཆག་ཆག་ཐོབ་ཤིག །ཕྱག་དར་བྱོས་ཤིག །ཕྱག་དར་འོར་ཅིག །ལྕི་བས་ཞལ་ཞལ་འཇམ་པོར་ཡུགས་ཤིག །དེ་ན་འདི་ལྟ་སྟེ། མལ་སྟན་ཁྲིའམ། ཁྲིའུ་ཤིང་ངམ། ཁྲིའུའམ།
ལ་བའམ། སྟན་ནང་ཚངས་ཅན་ནམ། གྲུ་བཞི་པ་དག་ཡོད་ན་ཕྱིར་བྱུང་ནས་དེ་སྟེ་རྒན་པོ་ཞིག་སྔར་འདུག་ན་ནི་སྐད་ཅིག་སྡོད་ཅིག །མ་ཡིན་ན་སེ་གོལ་གྱིས་དལ་ནས་གཏོགས་ཏེ་ཤེས་བཞིན་དུ་ནང་དུ་ཞུགས་ལ་རྐང་པ་ཁྲུས་ཤིག །གློ་བུར་དུ་འོངས་པའི་དགེ་སློང་གིས་གཞི་ན་གནས་
པའི་དགེ་སློང་རྣམས་ལ་འདི་ན་བསྡིགས་པའི་ལས་བྱས་པའམ། སྨད་པའི་ལས་བྱས་པའམ། བསྐྲད་པའི་ལས་བྱས་པའམ། སླར་བསྡུམ་པའི་ལས་བྱས་པའམ། མ་མཐོང་བས་སྤངས་པའི་ལས་བྱས་པའམ། སླར་ལས་མ་བྱས་པའི་ཕྱིར་སྤངས་པའི་ལས་བྱས་པའམ།
སྡིག་པ་ལ་ལྟ་བ་མ་བཏང་བའི་ཕྱིར་སྤངས་པའི་ཕྱིར་ལས་བྱས་པའམ། ཆད་པ་བྱེད་པའམ། གཞི་ནས་བསླང་སྟེ་ཆད་པ་བྱེད་པའམ། ཡིད་མགུ་བར་བྱེད་པའམ། གཞི་ནས་བསླང་སྟེ་ཡིད་མགུ་བར་བྱེད་པ་ཡང་རུང་སྟེ། དེ་ལྟ་བུ་དག་ཡོད་དམ་མེད་དྲིས་ཤིག །དེ་སྟེ་ཡོད་ན་ཡང་དེ་
དང་དེ་ལྟ་བུར་སྤང་བར་བྱའོ། །གཙུག་ལག་ཁང་ནས་ཕྱིར་འབྱུང་བ་དང་། ནང་དུ་འཇུག་པ་དང་། ཉེ་འཁོར་དང་། སྣམ་ཕྱི་ས་དང་། གཅི་ས་དང་། སྐས་དང་། ཐེམ་སྐས་དང་། སྒོ་བཅད་པ་དེ་དབྱེ་བ་ལ་སོགས་པ་རྟོགས་ཤིག །དྲིས་ཤིག །དགེ་འདུན་གྱི་བྱ་བ་བཅས་པ་ཇི་
ལྟ་བུ་དྲིས་ཤིག །གནས་ཁང་དུ་ཞུགས་ཏེ་སྟན་ཐིང་ལ་སྐྱིལ་མོ་ཀྲུང་ཆོས་ཏེ་ལུས་དྲང་པོར་སྲོང་ལ་དྲན་པ་མངོན་དུ་བཞག་སྟེ་རེག་པར་བྱ་བ་བརྒྱད་ལ་སྤང་བར་བྱའོ། །དེ་ནི་འདི་ལྟ་སྟེ། ནད་དོ། །སྐྲན་ནོ། །མཚོན་ནོ། །དུག་གོ། །མི་རྟག་པའོ། །སྡུག་བསྔལ་བའོ། །སྟོང་པ་ཉིད་དོ། །བདག་
མེད་པའོ་སྙམ་དུ་སོམས་ཏེ་འདུག་ལ། དེ་སྟེ་ནུས་ན་ནི་ཇི་སྲིད་ནུས་བཞིན་འདུག །འོན་ཏེ་ཡང་མི་ནུས་ན་ལངས་ཏེ་བཀླག་པ་གསུམ་བཀླག་གོ། །སྦྱིན་པའི་ཡོན་ཏན་བརྗོད་ལ་སྦྱིན་པའི་ཡོན་ཏན་བརྗོད་ནས་གཡས་ཕྱོགས་སུ་འཕྲེས་པར་བྱའོ། །རྐང་པས་རྐང་པ་མནན་ཏེ་སྣང་བའི་དྲན་པ་མངོན་དུ་

བཞག་ནས་ལྡང་བར་ཤེས་བཞིན་དུ་འདུ་ཤེས་བཞག་ནས་ཡིད་ལ་བྱེད་བཞིན་མཚན་མོ་ཟད་པའི་ཐོ་རངས་ཀྱི་ཚེ་རིངས་ཤིང་མྱུར་བར་ལོངས་ལ་དེ་ནས་སྐྱིལ་མོ་ཀྲུང་བཅས་ཤིང་ལུས་དྲང་པོར་བསྲངས་ཏེ་འདུག་ལ་སེམས་དྲན་པ་མངོན་དུ་བྱས་ཏེ་ལུས་འདིས་རེག་པར་བྱ་བ་བརྒྱད་སྤང་
བར་བྱ་སྟེ། འདི་ལྟ་སྟེ། ནད་དོ། །སྐྲན་ནོ། །དུག་གོ། །མཚོན་ནོ། །མི་རྟག་པའོ། །སྡུག་བསྔལ་བའོ། །སྟོང་པ་ཉིད་དོ། །བདག་མེད་པའོ་སྙམ་དུ་སོམས་ཏེ། དེ་ནས་ནམ་ནངས་ན་སོ་ཤིང་ཟོ་ལ་འོར་ཅིག །དེ་ནས་བྱ་བ་རྣམས་བྱོས་ལ་ཅི་དེང་དགེ་འདུན་གྱི་བཤོས་མགྲོན་དུ་
བཞུད་དམ། འོན་ཏེ་བསོད་སྙོམས་ལ་འཇུག་ཅེས་དྲིས་ཤིག །དེ་སྟེ་དགེ་འདུན་གྱི་བཤོས་མགོན་དུ་བཞུད་ན་དགེ་བའི་ཕྱོགས་ཅི་བདེར་སྤྱོད་ལ་བསོད་སྙོམས་གྱིས་ཤིག །དེ་སྟེ་བསོད་སྙོམས་ལ་འཇུག་ན་དེ་ནས་གྲོང་དང་། སྤྱོད་ཡུལ་དང་། དད་པའི་རིགས་གང་ཡིན་པ་དང་།
མ་དད་པའི་རིགས་གང་ཡིན་པ་དང་། རིགས་འདིར་བསླབ་པ་བྱིན་པ་མ་ཡིན་ནམ་ཞེས་དྲིས་ཤིག །ལྷུང་བཟེད་ཁས་ཕུབ་མ་ཡིན་ནམ་ཞེས་དྲིས་ཤིག །རྟ་མ་རུངས་པ་དང་། བ་ལང་མ་རུངས་པ་མེད་དམ་ཞེས་དྲིས་ཤིག །དེ་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཁྱེར་ཏེ།
ཤེས་བཞིན་དུ་བསོད་སྙོམས་ལ་འཇུག་པར་བྱའོ། །བསོད་སྙོམས་བསྐོར་ནས་ཟས་ཀྱི་བྱ་བ་བྱས་ཏེ། ཕྱིས་བསོད་སྙོམས་བླང་བ་དང་། ཟས་ཀྱི་བྱ་བ་སྤངས་ནས་ཆོས་གོས་དང་ལྷུང་བཟེད་བཞག་ནས་ཅི་བདེར་འདུག་པར་བྱ་བ་འདི་ནི་གློ་བུར་དུ་འོངས་པའི་བྱ་བ་ཞེས་བྱའོ། །གློ་བུར་དུ་འོངས་པའི་གནས་
བརྟན་གྱི་བྱ་བ་གང་ཞེ་ན། གློ་བུར་དུ་འོངས་པའི་དགེ་སློང་གནས་བརྟན་གྱིས་གློ་བུར་དུ་ལྷགས་པའི་དགེ་སློང་རྣམས་རིག་པར་བྱ། དེ་དག་ལའང་མདངས་བཟང་བར་བྱ། ཁྲོ་གཉེར་མེད་པར་བྱ། ཚིག་སྙན་པས་སྔར་དགེ་སློང་རྣམས་ལ་མགུ་བར་བྱ། གློ་བུར་དུ་ལྷགས་པའི་དགེ་སློང་རྣམས་
ཀྱི་ཕྱིར་མལ་སྟན་བརྙ་བར་བྱ། འདུག་འདུག་པ་ལས་མགྲོན་རྣམ་པ་ལྔར་བསྒོ་བར་བྱ་སྟེ། གཙུག་ལག་ཁང་དུ་གནས་ཁང་འདི་ཡིན་གྱིས་ལྟོས་ཤིག་ཅེས་བསྒོ་བ་དང་མལ་སྟན་འདི་ཡིན་ན་སྟན་ལྟོས་ཤིག་ཅེས་པ་དང་། ལྡེ་མིག་འདི་ཡིན་ནོ། །ཞེས་བསྒོ་ཞིང་གཏད་པ་དང་ལྔ་སྟེ། འདི་

ནི་གློ་བུར་དུ་འོངས་པའི་གནས་བརྟན་གྱི་བྱ་བ་ཞེས་བྱའོ།། །།འདུལ་བ་གཞུང་དམ་པ། བམ་པོ་ལྔ་བཅུ་རྩ་གཉིས་པ། འགྲོ་བའི་བྱ་བ་གང་ཞེ་ན། འགྲོ་བའི་དགེ་སློང་དེས་ཡུལ་ཕྱོགས་གང་ལོགས་སུ་འགྲོ་བ་དེའི་ཡུལ་ཕྱོགས་བརྟག་པར་བྱ། དེ་
ཕྱོགས་ནས་འོངས་པའི་དགེ་སློང་རྣམས་ལ་བར་ཆད་དུ་འགྱུར་བ་བརྒྱད་ལས་གང་ཡང་རུང་བར་ཆད་དུ་འགྱུར་བ་མི་འབྱུང་ངམ་ཞེས་དྲི་བར་བྱ། བདག་དེར་སོང་ནས་བསོད་སྙོམས་དང་ན་བའི་སྨན་དང་། བསྙེན་བཀུར་བྱེད་པས་བྲེལ་བར་མི་འགྱུར་རམ། བདག་ལ་
བསོད་སྙོམས་དང་། ན་བའི་སྨན་དང་། བསྙེན་བཀུར་བྱེད་པས་ཀྱང་རུང་བྲེལ་ཅིང་མ་རྙེད་པར་གྱུར་ན་ལུས་ཉམས་ཤིང་དུས་འདའ་བར་མི་འགྱུར་རམ་བདག་དེར་སོང་ན་ལུས་བདེ་བ་དང་སེམས་ལ་བདེ་བར་འགྱུར་རམ། བདག་དེར་སོང་ནས་དགེ་བའི་ཆོས་རྣམས་འཕེལ་བར་འགྱུར་
རམ། བདག་དེར་སོང་ན་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། དེས་པ་དགེ་བའི་ཆོས་ཅན། ལྟ་བ་མཚུངས་པ། གནས་པ་མཚུངས་པར་འགྱུར་རམ། བདག་ཐེ་ཚོམ་མ་སྐྱེས་པ་དེ་དག་མི་སྐྱེ་བར་བྱེད་དམ། སྐྱེས་པ་ཡང་སླར་སེལ་བར་བྱེད་དམ།
སྡིག་པར་ལྟ་བ་མ་སྐྱེས་པ་མི་སྐྱེ་བར་བྱེད་དམ། སྐྱེས་པའི་རྣམས་སླར་ལྡོག་པར་བྱེད་དམ། བདག་དང་ཚེ་དང་ལྡན་པ་དེ་དག་དང་ལྷན་ཅིག་ལུས་བདེ་བ་དང་སེམས་བདེ་བར་འགྱུར་རམ། བདག་ཚེ་དང་ལྡན་པ་དེ་དག་དང་ལྷན་ཅིག་ཏུ་དགེ་བའི་ཆོས་རྣམས་ལ་འཕེལ་བར་འགྱུར་
རམ་ཞེས་དྲི་བར་བྱ་སྟེ། དེ་ལྟར་ན་ཡུལ་ཕྱོགས་བརྟག་པར་བྱ་བའོ། །གྲོགས་རྣམས་ལ་བརྟག་པར་བྱ་སྟེ། ཚེ་དང་ལྡན་པ་འདི་དག་ཚུལ་ཁྲིམས་དང་ལྡན་ནམ། ཡོན་ཏན་དང་ལྡན་ནམ། དེས་པ་དགེ་བའི་ཆོས་ཅན་ཡིན་ནམ། ལྟ་བ་མཚུངས་སམ། གནས་པ་མཚུངས་སམ།
གལ་ཏེ་འདི་ལྟར་བདག་ལ་ཐེ་ཚོམ་མ་སྐྱེས་པ་ལ་མི་སྐྱེ་བར་བྱེད་དམ། སྐྱེས་པ་སླར་སེལ་བར་བྱེད་དམ། སྡིག་པར་ལྟ་བ་ལ་ཡང་མ་སྐྱེས་པ་ལས་མི་སྐྱེ་བར་བྱེད་དམ། བདག་ཚེ་དང་ལྡན་པ་དེ་དང་ལྷན་ཅིག་ཏུ་ལུས་དང་སེམས་བདེ་བར་འགྱུར་རམ། བདག་ཚེ་དང་ལྡན་པ་དེ་དག་དང་ལྷན་ཅིག་ཏུ་

དགེ་བའི་ཆོས་འཕེལ་བར་འགྱུར་རམ། གལ་ཏེ་ཚེ་དང་ལྡན་པ་འདི་དག་གིས་བདག་ལམ་དུ་ནད་ཀྱིས་བཏབ་ན་མི་འབོར་བར་འགྱུར་རམ་སྙམ་དུ་གྲོགས་པོ་ལ་བརྟགས་ནས། ལམ་ལ་བརྟག་པར་བྱ་སྟེ། བདག་ལམ་དེར་བར་ཆད་དུ་འགྱུར་བ་བརྒྱད་ལས་གང་ཡང་རུང་བ་འབྱུང་བར་མི་འགྱུར་
རམ། བདག་ལམ་དེར་བསོད་སྙོམས་དང་། ན་བའི་སྨན་དང་། བསྙེན་བཀུར་བྱེད་པས་བྲེལ་བར་མི་འགྱུར་རམ། དེ་སྟེ་བསོད་སྙོམས་དང་བསྙེན་བཀུར་བྱེད་པ་མེད་ན་གནོད་ཅིང་དུས་འདས་པར་མི་འགྱུར་རམ། བདག་ལམ་དེ་ན་ལུས་ལ་བདེའམ། སེམས་ལ་བདེ་བར་འགྱུར་རམ།
བདག་ལམ་དེར་དགེ་བའི་ཆོས་རྣམས་འཕེལ་བར་འགྱུར་རམ། དེ་སྟེ་བྲེལ་བར་མི་འགྱུར་ན་འགྲོ་བར་བྱའོ། །དེ་ལྟ་བུར་ཡུལ་ཕྱོགས་དང་། གྲོགས་དང་ལམ་རྣམས་བརྟགས་ལ་དེ་སྟེ་སང་འགྲོའོ་སྙམ་ན། དེས་མཁན་པོ་དང་། སློབ་དཔོན་རྣམས་ལ་བལྟ་བར་བྱ་དེ་སྟེ་བདག་ཡུལ་ཕྱོགས་
ནི་འདི་ལྟ་བུར། གྲོང་ཁྱེར་ནི་འདི་ལྟ་བུར་མཆིའོ་ཞེས་ཞུའོ། །མཁན་པོ་དང་། སློབ་དཔོན་གྱིས་ཀྱང་དེའི་ཡུལ་ཕྱོགས་བརྟག་པར་བྱ། ལམ་བརྟག་པར་བྱ། དགེ་སློང་གྲོགས་པོ་རྣམས་ལ་བརྟག་པར་བྱ་སྟེ། འདིའི་གྲོགས་པོ་དགེ་སློང་རྣམས་ཅི་འདྲ། འདིའི་འཁོར་ཅི་འདྲ། འདིའི་གྲོགས་
པོ་རྗེས་བཞིན་དུ་འདོང་བ་ཅི་འདྲ་བའི་རྣམས་རྟོགས་ལ་དེ་སྟེ་མཐུན་པར་གྱུར་ན་ནི་ཞུ་བ་ཡང་བྱིན་ཅིག །མཐུན་པར་མ་གྱུར་ན་མ་སྦྱིན་ཅིག །འགྲོ་བའི་དགེ་སློང་གིས་མ་ཞུས་པར་སོང་ན་འདས་པ་དང་བཅས་པར་འགྱུར་རོ། །དེ་སྟེ་ན་དགེ་བའི་ཆོས་འཕེལ་བ་ཞིག་ཏུ་འགྱུར་ལ་མཁན་པོ་དང་སློབ་དཔོན་
ཡང་ཚུལ་བཞིན་པ་ཞིག་མ་ཡིན་ན་མ་ཞུས་པར་སོང་ན་ཡང་བླའོ། །གནས་ཁང་ན་གནས་པའི་གནས་ཁང་དེ་ཆག་ཆག་གིས་གདབ་པར་བྱ། ཕྱག་དར་བྱ། ཕྱག་དར་དོར་བར་བྱ། ལྕི་བས་ཞལ་ཞལ་འཇམ་པོར་བྱུག་པར་བྱ། ནང་པར་སྔར་རྐྱང་པ་གསུམ་བཀླགས་བཀླགས་ནས་
སྦྱིན་པའི་ཡོན་ཏན་བརྗོད་པར་བྱ། ནམ་ལངས་ནས་མལ་སྟན་རྣམས་ཇི་ལྟ་བུར་དགས་པ་དེ་རྣམས་བསྔོས་ལ་གྲོངས་ཏེ་སྤྲུག་ཅིང་བརྡབ་པར་བྱའོ། །དེ་ནས་རྩིག་པ་ལས་སོར་བཞི་ཙམ་གྱིས་སྤོགས་ལ་བཅེར་ཏེ་བཞག་ནས་སྒོ་བཅད་དེ་ནང་གཏན་དང་། བླ་གཏན་ཆུག་ལ་དེ་ན་གནས་པ་དང་། གཞི་ན་

གནས་པའི་དགེ་སློང་རྣམས་ལ་གདོད་དེ་ལྟོས་ཤིག་ཅེས་བསྒོ་ནས་འགྲོ་བར་བྱའོ། །མལ་སྟན་ལ་སོགས་པ་ལ་ལྟོས་ཤིག་ཅེས་བསྒོ་བ་ལ་རྣམ་པ་ལྔ་སྟེ། གནས་ཁང་འདི་ལའོ། །གནས་ཁང་འདི་ལ་ལྟོས་ཤིག །མལ་སྟན་རྣམས་ལའོ། །མལ་སྟན་འདི་རྣམས་ལ་ལྟོས་ཤིག །
ལྡེ་མིག་གཏད་པ་དང་ལྔ་ཡིན་ནོ། །ཀུན་དགའ་ར་བའི་ཕྱི་རོལ་དུ་བྱུང་ན་དགེ་སློང་གྲོགས་པོ་རྣམས་ལ་བརྟག་པར་བྱ་སྟེ། རིང་དུ་མ་སོང་བར་སུ་ལ་ཡང་རུང་། བརྗེད་ཅིང་ལུས་པ་མེད་དམ་ཞེས་ཕན་ཚུན་དུ་དྲིས་ཤིག །དེ་སྟེ་བརྗེད་ཅིང་ལུས་པ་ཞིག་ཡོད་ན་དགེ་སློང་དེ་
སླར་ལོག་ལ་བླངས་ཏེ། འོངས་ཀྱི་བར་དུ་བསྡད་པར་བྱ་བ་འདི་ནི་འགྲོ་བའི་བྱ་བ་ཞེས་བྱའོ། །འགྲོ་བའི་གནས་བརྟན་གྱི་བྱ་བ་གང་ཞེ་ན། འགྲོ་བའི་གནས་བརྟན་གྱིས་ནང་པར་སྔར་ལངས་ནས་འདོང་བའི་དགེ་སློང་རྣམས་ལ་ཆར་གཞུག །དེ་དག་ལ་ཚེ་དང་ལྡན་པའི་རྣམས་
ལྷུང་བཟེད་དང་ཆོས་གོས་རྣམས་ལེགས་པར་ལོང་ལ་ཁྱེར་ཏེ་འདོང་ངོ་། །སུས་ཀྱང་བརྗེད་པར་མ་བྱེད་ཅིག་ཅེས་བསྒོ་བར་བྱ། དོང་བའི་འོག་ཏུ་དགེ་སློང་གནས་བརྟན་ཉིད་ཀྱིས་དེ་དག་གིས་བརྗེད་པ་ལྟ་ཡོད་དམ་མེད་ཅེས་བརྟག་པར་བྱས་ལ་ཐམས་ཅད་ཀྱིས་མཇུག་ནས་འགྲོ་བར་བྱའོ། །རིང་
པོར་མ་འཕགས་པར་དེ་དག་ལ་སུའི་ཡང་རུང་བརྗེད་ཅིང་ལུས་པ་ཅི་ཡོད་ཅེས་སྨྲ་བར་བྱ། དགེ་སློང་གནས་བརྟན་གྱིས་དགེ་སློང་དེ་ཐམས་ཅད་ལ་རྗེས་སུ་བསྟན་པར་བྱ་སྟེ། ཚེ་དང་ལྡན་པའི་རྣམས་ལས་གང་ཡང་རུང་སྔོན་དུ་འདོར་ཏེ་མ་འདོང་ཞིག །ཕྱིར་ནུར་ཏེ་མ་འཁོད་ཅིག །ཐམས་
ཅད་ལྷན་ཅིག་ཏུ་འདུས་ལ་ཕན་ཚུན་དུ་ལྟ་རྟོག་བཞིན་དུ་འདོང་བར་བྱའོ། །དགེ་སློང་གནས་བརྟན་གྱིས་ལམ་དུ་ཞུགས་པའི་ཚེ་བདེ་བ་དང་ལྡན་མི་ལྡན་རིག་པར་བྱས་ལ་བདག་ཉིད་ཀྱིས་འདི་དག་ལ་སྔོན་དུ་འདོར་ཏེ་འདོང་བ་ལྟ་ཡོད་དམ་མེད། ཕྱིར་ནུར་ཏེ་ལུས་པ་ལྟ་ཡོད་དམ་མེད། དེ་སྟེ་
སྔོན་དུ་འདོར་ཏེ་འདོང་བ་ལྟ་ཡོད་ན་ཡང་དེ་དག་བསྐུལ་ཞིང་འདོང་བར་བྱ། བདག་ཉིད་ཀྱང་དགེ་སློང་རྣམས་ཀྱི་དབུས་སུ་ཞུགས་ལ་འགྲོ་བར་བྱ། དེ་སྟེ་འགྲོ་མི་ཕོད་ན་ཉིད་ཀྱིས་ལྷུང་བཟེད་དང་ཆོས་གོས་ལ་སོགས་དགེ་སློང་དེ་དག་ལ་བསྒོས་ཤིང་བསྐུར་བར་བྱ། དེ་སྟེ་འགྲོ་མི་

ནུས་པ་ཞིག་ཏུ་གྱུར་ན་དགེ་སློང་དེ་དག་གིས་དགེ་སློང་དེ་ཕྲག་པའམ་ཁུར་དུ་ཁྱེར་ཏེ། དགོན་པ་དེ་ལས་ཕྱུང་ལ་གྲོང་འདབ་ཏུ་ཕྱིན་པར་གྱིས་ཤིག །དགེ་སློང་དེ་ལ་ཉེ་གནས་ཀྱི་དགེ་སློང་དེ་ཡང་བྱིན་ཅིག །ཉེ་གནས་དགེ་སློང་དེས་ཀྱང་དེའི་ཟན་དང་སྨན་
གཞན་ལས་ཚོལ་ཅིག །དེ་སྟེ་ལམ་དེ་འཇིགས་པ་དང་བཅས་པར་གྱུར་ན་རིངས་ཤིང་མྱུར་བར་དོང་སྟེ། དེ་ནས་བྱུང་བ་དང་ངལ་བསོ་བར་གྱིས་ཤིག །དེ་སྟེ་ཡང་ནུས་པར་གྱུར་ན་ནི་གང་ན་ཆུ་འགྲམ་མམ། ནགས་མཐའའམ། གསང་མ་སྔོན་པོའམ། ས་ཕྱོགས་
གར་དགའ་བ་ཞིག་ཏུ་རྟོགས་ཏེ་དགེ་སློང་རྣམས་ངལ་བསོར་གཞུག་པར་བྱ། ངལ་བསོས་ནས་ཀྱང་འདོང་བར་བྱ་སྟེ། དགེ་སློང་གནས་བརྟན་གྱིས་དེ་དག་ཀུན་ལ་ཀྱེ་ཐམས་ཅད་ཀྱིས་ཀྱང་འདིར་སྦྱིན་པའི་ཡོན་ཏན་རེ་རེ་རྗོད་ཅིག་ཅེས་བསྒོ་བར་བྱ། དགེ་སློང་ཐམས་ཅད་ཀྱིས་
སྦྱིན་པའི་ཡོན་ཏན་གྱི་ཚིགས་བཅད་བཀླགས་ཟིན་པ་དང་། དགེ་སློང་གནས་བརྟན་གྱིས་མཇུག་ཏུ་བྱིན་པའི་ཡོན་ཏན་གྱི་ཚིགས་བཅད་ལྷོགས་ཏེ་ས་ཕྱོགས་སུ་ལན་གཉིས་སམ་གསུམ་བརྟགས་ཏེ་འགྲོ་བར་བྱའོ། །གྲོང་འདབ་ཏུ་ཕྱིན་ན་ཡང་དེས་དགེ་སློང་རྣམས་ཀྱི་ཕྱིར་གནས་
བཙལ་བར་བྱ། མལ་སྟན་བཙལ་བར་བྱ། ཡང་ན་རྩྭ་དང་ལོ་མ་བཙལ་ཏེ། དེ་སྟེ་ཡང་འབྱོར་པར་གྱུར་ན་རྐང་པ་བཀྲུ་བ་དང་། རྐང་པ་བསྐུ་བ་དང་། བཙགས་པའི་བཏུང་བ་དང་། བུ་རམ་དང་། ཁན་ད་ལ་སོགས་པ་བསླང་བར་བྱའོ། །གཅི་བ་དང་བཤང་བའི་ས་
ཡང་དྲིས་བརྟགས་ལ་མཚན་མོ་གནས་པར་བྱའོ། །ཁྱིམ་གྱི་ལྷ་རྣམས་ཀྱི་ཕྱིར་ཡང་རྐྱང་པ་གསུམ་དང་། སྦྱིན་པའི་ཡོན་ཏན་བརྗོད་པར་བྱ། དེར་གནས་ན་ཡང་དགེ་སློང་གནས་བརྟན་གྱིས་དེ་དག་གི་ཟན་དང་ཐུག་པ་དང་སྐྱོ་མ་རྣམས་བསྟབས་ཤིང་བཙལ་ནས་དགེ་སློང་རྣམས་ལ་
བསྙོད་པར་བྱ། དེ་ན་དགེ་སློང་གསར་བུ་འཁོད་པ་རྣམས་ལ་སྨྲ་བར་བྱ། ཡང་དག་པར་སྨྲ་བར་བྱ། ཀུན་ཤེས་པར་བྱ། རྟོགས་པར་བྱ། བསྟན་པར་བྱ། རྗེས་སུ་བསྟན་པར་བྱ་སྟེ། ཅི་ནས་དེ་དག་དྲེགས་པ་ཅན་དང་། མི་རིགས་པ་དང་། རྩེད་མོ་ལས་བཟློག་པར་བྱ།

འགྲོ་བའི་དགེ་སློང་གནས་བརྟན་གྱིས་ཇི་ལྟར་མཚུངས་པར་སྤྱད་པའི་ཆོས་བཅས་པ་བཞིན་དུ་མི་བྱེད་ན་འདས་པ་དང་བཅས་པར་འགྱུར་རོ། །འདི་ནི་འགྲོ་བའི་གནས་བརྟན་གྱི་བྱ་བ་ཞེས་བྱའོ། །རྐང་པ་བཀྲུ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་
རྐང་པ་བཀྲུ་བའི་ཕྱིར་རྐང་པ་བཀྲུ་བ་རྗེས་སུ་གནང་སྟེ། དེ་དགེ་སློང་དག་རྗེས་སུ་དེ་དག་གིས་སྣོད་སྟོང་པར་མཐོང་ན་བདག་ཅག་ཉིད་ཀྱིས་དགང་བར་གྱིས་ཤིག །ཡང་ན་དགེ་སློང་གིས་ཀུན་དགའ་ར་བ་ན་གནས་པ་རྣམས་ལ་ཁོངས་ཤིག་པར་སྒོ་ཤིག །རྐང་པ་བཀྲུ་བར་བྱ་བ་འདི་
ཡང་ཡིན་ཏེ། དགེ་སློང་གིས་རྐང་པ་བཀྲུར་འདོད་ན་ཤེས་བཞིན་དུ་རྐང་པ་བཀྲུ་བའི་སར་འགྲོ་བར་བྱ། དེ་སྟེ་རྒན་པ་ཞིག་སྔ་ན་འདུག་ན་སྐད་ཅིག་སྡོད་ཅིག །སུ་ཡང་མེད་ན་ཤེས་བཞིན་དུ་ཞུགས་ལ་རྐང་པ་བཀྲུ་བར་བྱ། དགེ་སློང་གིས་རྐང་པ་བཀྲུ་བའི་སར་ཡུན་
རིང་དུ་འདུག་པར་མི་བྱ། སྙོམས་པ་ལ་འཇུག་པར་མི་བྱ། ལུང་བསྒོ་བར་མི་བྱ། དྲན་པར་མི་བྱ། འདྲི་བར་མི་བྱ། གཏམ་ལ་ཞུགས་ཤིང་མི་འདུག །མྱུར་དུ་རྐང་པ་བཀྲུས་ནས་ཤེས་བཞིན་དུ་སླར་འབྱུང་བར་བྱ་སྟེ། འདི་ནི་རྐང་པ་བཀྲུ་བའི་བྱ་བ་ཞེས་བྱའོ། །རྐང་པ་
བཀྲུ་བའི་གནས་བརྟན་གྱི་བྱ་བ་གང་ཞེ་ན། རྐང་པ་བཀྲུ་བའི་དགེ་སློང་གནས་བརྟན་གྱིས་དགེ་སློང་རྐང་པ་འཁྲུ་བ་ལ་ཞུགས་ནས་ཡང་མ་ཟིན་གྱི་བར་དུ་བསླང་ཞིང་དབྱུང་བར་མ་བྱེད་ཅིག །རྐང་པ་འཁྲུ་བ་ལ་ཞུགས་པ་ཞེས་བྱ་བ་ནི་ཆུང་ངུ་ན་རྐང་པ་ཆུས་གཤེར་བ་ཙམ་དུ་གྱུར་པའོ། །
དེ་སྟེ་དགེ་སློང་དག་སྤྱོད་ལམ་མི་མཛེས་པར་གྱུར་ཏམ། གཏམ་ལ་ཞུགས་ཤིང་འཁོད་ན་དགེ་སློང་གནས་བརྟན་གྱིས་དེ་དག་ཟློག་ཤིག །ལུང་བསྒོ་བར་བྱ། རྗེས་སུ་བསྟན་པར་བྱ། སྤྱོད་ལམ་མཛེས་པ་ལ་གཟུད་པར་བྱ། ཇི་ལྟར་རྐང་པ་བཀྲུ་བའི་གནས་བརྟན་གྱིས་མཚུངས་
པར་སྤྱད་པའི་ཆོས་ལ་གཟུད་པར་བྱ། འདི་ནི་རྐང་པ་བཀྲུ་བའི་གནས་བརྟན་གྱི་བྱ་བ་ཞེས་བྱའོ། །འདུག་པའི་བྱ་བ་གང་ཞེ་ན། གནས་དང་གཞི་ན་གནས་པའི་དགེ་སློང་གིས་ཚེས་བརྒྱད་དང་། བཅུ་བཞི་དང་། བཅོ་ལྔ་ལ་གཅིག་ཏུ་འདུས་ཏེ་སངས་རྒྱས་ཀྱིས་གསུངས་པའམ།

ཉན་ཐོས་ཀྱིས་གསུངས་པའི་ཆོས་ཀྱང་རུང་སྟེ་སྨྲ་བར་བྱའོ། །དེ་དག་ནང་པར་སྔར་སྒོའམ། གཎྜཱི་བརྡུངས་མ་ཐག་ཏུ་འདུ་བར་བྱ་སྟེ། མྱུར་དུ་འདུས་ནས་ཤེས་བཞིན་དུ་འཁོད་པར་བྱ། ཤེས་བཞིན་དུ་འཁོད་ནས་དྲན་པ་ཉེ་བར་གཞག་པར་བྱ། སེམས་མི་
གཡེང་བར་བྱ། སྤྱོད་ལམ་ཚོགས་ཤིང་ཕུན་སུམ་དུ་ལྡན་པར་བྱ། ཤིན་ཏུ་བསྡམ་པར་བྱ། ཤིན་ཏུ་དགའ་བར་བྱ། སྒྲ་བསྐྱུད་པར་བྱ། མིག་མི་གཡེང་ཞིང་གཉའ་ཤིང་གང་ཙམ་དུ་བལྟ་བར་བྱ། བཀུར་སྟིར་བཅས། བདག་དམན་པར་བཅས། འཇིགས་པ་
དང་དབང་དུ་འགྱུར་བར་བཅས། ཡིད་དམན་པ་ཕྱགས་མ་དང་འདྲ་བའི་སེམས་སུ་བྱ། གནས་བརྟན་དང་། བར་མ་དང་། གསར་བུའི་རྣམས་ལ་བྱམས་པའི་སེམས་སུ་བྱ། ཕན་པའི་སེམས་སུ་བྱ། རྗེས་སུ་བརྩེ་བའི་སེམས་སུ་བྱ་བ་དང་། ཕུ་ནུ་བོ་དང་། བུར་
འདུ་ཤེས་པ་ཉེ་བར་གཞག་པར་བྱ། སྟན་ལ་འདུག་པ་ལ་མཁས་པ་དང་། འདུག་ནས་ཡང་ཕྱི་ཕྱིར་ངེས་པའི་ཆོས་ཀྱི་གཏམ་གྱིས་མཚན་མོ་ནམ་ཟད་པར་བྱའོ། །དེ་སྟེ་མི་བདེ་ན་ཡང་སྤྱོད་ལམ་གཉིས་ཀྱིས་ནམ་ཟད་པར་བྱ་སྟེ། འཆག་པ་དང་། འགྲེང་བས་སོ། །དགེ་
སློང་རྣམས་འདུས་ནས་འཁོད་ན་ཡང་དུས་སུ་ཆོས་མཉན་པར་བྱ་སྟེ་བཀུར་སྟི་བྱ། མཉན་པར་བྱ། སྨད་པར་མི་བྱ། ཚུལ་བཞིན་དུ་འཇུག་པར་བྱ། གླགས་མི་བཙལ་བར་བྱ། ཆོས་ལ་བཀུར་སྟི་མངོན་དུ་གཞག་པར་བྱ། ཆོས་སྨྲ་བའི་གང་ཟག་ལ་ཡང་བརྙས་པར་
མི་བྱ། བདག་ཉིད་ལ་སྨད་པར་མི་བྱ། སེམས་གཅིག་ཏུ་ཐུབ་པ་དང་བཀའ་ཡིན་ནོ་བར་བསམ་པ་དང་། རྣ་བ་མི་གཡེང་བ་དང་། སེམས་གུས་པ་དང་། སེམས་ཐམས་ཅད་གཅིག་ཏུ་ཐུབ་པར་བསྡུས་ལ་ཆོས་མཉན་པར་བྱའོ། །དེའི་འོག་ཏུ་ལྷ་རྣམས་དང་། རྒྱལ་
པོ་དང་། ཡོན་བདག་དང་། སྦྱིན་པ་བྱེད་པ་རྣམས་ཀྱི་ཕྱིར་སྦྱིན་པའི་ཡོན་ཏན་གྱི་ཚིགས་བཅད་བཀླག་པར་བྱ་སྟེ། འདི་ནི་འདུག་པའི་བྱ་བ་ཞེས་བྱའོ། །འདུག་པའི་གནས་བརྟན་གྱི་བྱ་བ་གང་ཞེ་ན། འདུག་པའི་དགེ་སློང་གནས་བརྟན་གྱིས་སྔར་སྒོའམ་གཎྜཱི་བརྡུངས་ཀྱང་རུང་སྟེ།

དེ་ཐོག་མར་འགྲོ་བར་བྱ། ཐོག་མར་འགྲེང་བར་བྱ། ཐོག་མར་འདུག་པར་བྱ། འདུག་ནས་ཡང་སྐད་ཅིག་ཅང་མི་སྨྲ་བར་བྱ། དེ་ནས་བདག་ཉིད་ཀྱིས་ཆོས་སྨྲ་བར་བྱ། ཡང་ན་ནུས་པའི་དགེ་སློང་ལ་ཆོས་སྨྲོས་ཤིག་པར་བསྒོ་བར་བྱ། བདག་ཉིད་ཀྱིས་ཆོས་མ་སྨྲས་སམ།
དགེ་སློང་ནུས་པ་ཡང་མ་བསྒོ་ན་འདས་པ་དང་བཅས་པར་འགྱུར་རོ། །དེ་སྟེ་འཁོད་པ་ལ་ཡང་བྲམ་ཟེ་དང་ཁྱིམ་བདག་དག་ལྷགས་ན་དེས་དེ་དག་ལ་ཡང་ཆོས་ཀྱི་གཏམ་བྱ། དེ་སྟེ་གཞན་མུ་སྟེགས་ཅན་ཀུན་ཏུ་རྒྱུ་བ་སྐབས་ཚོལ་ལམ་གླགས་ཚོལ་ཞིང་ལྷགས་ན་དེ་དག་ལ་
ཡང་ཆོས་ཀྱིས་བརྒལ་བ་ལ་འཇུག་པར་བྱ། འདི་ནི་མི་རིགས་པའོ། །འདི་ནི་མི་འདྲ་བའོ། །འདི་ནི་མ་གྲུབ་པའོ་ཞེས་རིགས་པའི་ཆོས་ཀྱིས་གདུལ་བར་བྱ། ཁྲོ་བ་མི་བསྐྱེད་པར་བྱ། མ་ཁྲོས་པར་བྱ། མི་སྨད་པར་བྱས་ཏེ། འདི་ནི་འདུག་པའི་གནས་བརྟན་གྱི་བྱ་བ་
ཞེས་བྱའོ། །ཆོས་འཆད་པའི་བྱ་བ་གང་ཞེ་ན། ཆོས་འཆད་པའི་དགེ་སློང་གིས་བཀུར་སྟིར་བཅས། བདག་ཉིད་དམན་པར་བཅས་འཇིགས་པ་དང་དབང་དུ་འགྱུར་བར་བཅས། ཡིད་དམན་ཞིང་ཕྱགས་མ་དང་འདྲ་བའི་སེམས་སུ་བྱ་སྟེ། འཁོར་གྱི་ནང་དུ་ཞུགས་ལ་ཆོས་
བཤད་པར་བྱ་བ་ནི་རིགས་པ་དང་། གསལ་བའི་ཚིག་དང་། འབྲུ་དང་། མ་འཁྲུགས་པ་དང་། མ་འདྲེས་པ་དང་། འབྲེལ་བ་དང་། མ་འཁྲུལ་བ་དང་། སེམས་མི་གཡེང་བ་དང་། ཟང་ཟིང་གི་སེམས་སུ་མ་ཡིན་པ་དང་། ཆོས་ཉིད་ལ་ཡང་བཀུར་སྟི་མངོན་དུ་བྱ།
ཆོས་ཉན་པ་རྣམས་ལ་ཡང་བཀུར་སྟི་མངོན་དུ་བྱ། ཆོས་ལ་བརྙས་པ་མི་བྱ། ཆོས་ཉན་པ་རྣམས་ལ་ཡང་བརྙས་པ་མི་བྱ། བདག་ཉིད་ལའང་སྨད་པར་མི་བྱ། ཆོས་རྣམས་ལའང་ཆོས་ཉིད་དང་རྟེན་ཅིང་འབྲེལ་བ་ཡིན་པར་ཆུད་པར་བྱ་སྟེ། བྱམས་པའི་ཚུལ་དུ་བྱ། རྗེས་སུ་
བརྩེ་བ་དང་ཆོས་འདི་ཡུན་རིང་དུ་གནས་པར་འགྱུར་བར་བྱ། ཆོས་ཉིད་ལ་རྟེན་གྱི་ཟང་ཟིང་ལ་རྟེན་ཏེ་ཆོས་བཤད་པར་མི་བྱ། བཀུར་སྟིའི་ཐོག་མར་འཇུག་ལ་རྗེས་སུ་མཐུན་པ་དང་། རྗེས་སུ་འབྱོར་པར་བྱ། རིམས་སུ་བྱ་སྟེ། མགུ་བ་དང་། དད་པ་དང་། རངས་པ། སྤྲོ་བ་དང་།

མོས་པ་དང་། རིགས་པར་ལྡན་པ་དང་། འཁྲུག་པ་མ་ཡིན་པར་ཆོས་བཤད་པར་བྱ། ཇི་ལྟར་འཁོར་རྣམས་ལ་བྱམས་པའི་སེམས་དང་། རྗེས་སུ་བརྩེ་བའི་སེམས་སུ་གནས་པར་བྱ། རྙེད་པ་དང་བཀུར་སྟི་དང་གྲགས་པ་ནི་མ་ཡིན་ནོ། །ཆོས་འཆད་པའི་
ཚེ་བདག་ཉིད་ལ་བསྟོད་པར་མི་བྱ། གཞན་ལ་སྨད་པར་ཡང་མི་བྱ་སྟེ། འདི་ནི་ཆོས་འཆད་པའི་བྱ་བ་ཞེས་བྱའོ། །ཆོས་འཆད་པའི་གནས་བརྟན་གྱི་བྱ་བ་གང་ཞེ་ན། ཆོས་འཆད་པའི་གནས་བརྟན་གྱིས་གང་ན་ཆོས་འཆད་པ་དེར་འགྲོ་བར་བྱ། དགེ་སློང་འདི་ཆོས་བཞིན་དུ་
འཆད་པའམ་འོན་ཏེ་ཆོས་བཞིན་མ་ཡིན་པར་འཆད་མཉན་ལ། དེ་སྟེ་ཆོས་བཞིན་འཆད་ན་ནི་སྤྲོ་བ་བསྐྱེད་པར་བྱ། ཆོས་མ་ཡིན་པར་འཆད་ན་ནི་སླར་བཅོས་པར་བྱ་སྟེ། དེ་སྟེ་སླར་བཅོས་ནུས་ན་ལེགས། དེ་སྟེ་མི་ནུས་ན་ཇི་ལྟར་ནུས་ཤིང་ཅི་ཐུབ་ཐུབ་ཀྱིས་སྨད་པར་བྱ་སྟེ།
དགེ་སློང་འདི་ནི་ཆོས་མ་ཡིན། འདུལ་བ་མ་ཡིན། སྟོན་པས་བསྟན་པ་མ་ཡིན་གྱིས། བཅོམ་ལྡན་འདས་ཀྱི་ཆོས་ཀྱི་གཞི་མ་གཞིག་ཅིག །ཆོས་ཀྱི་སྤྱན་མ་གཞར་ཅིག །ཅེས་སྨྲོས་ལ། སྟན་ལས་ལངས་ཏེ་འགྲོ་བར་བྱ་བ་འདི་ནི་ཆོས་འཆད་པའི་གནས་བརྟན་གྱི་
བྱ་བ་ཞེས་བྱའོ། །དུས་ཀྱི་བྱ་བ་གང་ཞེ་ན། དགེ་སློང་རྣམས་དུས་དུ་འགྲོ་བར་བྱ་སྟེ། འདི་ནི་དུས་ཀྱི་བྱ་བ་ཞེས་བྱའོ། །དུས་མ་ཡིན་པའི་བྱ་བ་གང་ཞེ་ན། དགེ་སློང་གིས་དུས་མ་ཡིན་པར་གྲོང་དུ་འཇུག་པར་མི་བྱ། དེ་འདྲ་བའི་རྐྱེན་བྱུང་བ་མ་གཏོགས་ཏེ། འཁོད་
པའི་དགེ་སློང་ལ་མ་བསྒོ་བར་མི་འགྲོ་བ་ནི་དུས་མ་ཡིན་པའི་བྱ་བ་ཞེས་བྱའོ། །དུས་མ་ཡིན་པར་དགེ་འདུན་འདུ་བའི་བྱ་བ་གང་ཞེ་ན། ཚེས་བརྒྱད་དང་། ཚེས་བཅུ་བཞི་དང་། ཚེས་བཅོ་ལྔ་ལ་དགེ་འདུན་འདུ་བ་མ་གཏོགས་པར་དེ་ལས་གཞན་གྱི་ཕྱིར་དགེ་འདུན་འདུ་ཞིང་
དགེ་འདུན་གྱི་ལས་དང་། དགེ་འདུན་གྱི་བྱ་བ་དང་། དགེ་འདུན་གྱི་བྱེད་པ་རྣམས་ཡིན་ཏེ། དེ་ལ་སྔར་བསྒོའམ། གཎྜཱི་བརྡུངས་ཀྱང་རུང་མྱུར་དུ་འདུ་བར་བྱ། ཤེས་བཞིན་དུ་འདོང་བར་བྱ་བ་ནས་སྔ་མ་བཞིན་ཏེ། འདུག་པ་ལ་མཁས་པར་བྱ་བའི་བར་དུ་དེར་དགེ་འདུན་གྱི་གནས་

བརྟན་གྱིས་རྒན་རིམས་སུ་ཕྱག་བྱས་ནས་བདག་གི་སྟན་གང་ན་བར་འདུག་པར་བྱ། གནས་བརྟན་གཉིས་པོས་ཀྱང་དགེ་འདུན་གྱི་གནས་བརྟན་ལ་ཕྱག་བྱས་ནས་རང་གི་སྟན་གང་ན་བར་འདུག་པར་བྱ། དེ་བཞིན་དུ་གནས་བརྟན་གསུམ་པོ་དང་། བཞི་པོ་ནས་དགེ་སློང་གསར་བུའི་
བར་དུ་སྟེ། རྒན་རིམས་སུ་ཕྱག་བྱས་ནས་རང་གི་སྟན་གང་ན་བར་འཁོད་པར་བྱའོ། །དེར་དགེ་སློང་གནས་བརྟན་དང་། བར་མ་དང་། གསར་བུ་རྣམས་ཀྱིས་ཇི་ལྟར་ཆོས་བཞིན། ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་བཞིན་དུ་དེ་ལྟ་བུར་དགེ་འདུན་གྱི་ལས་བྱ།
དགེ་སློང་གནས་བརྟན་གྱིས་དགེ་སློང་རྣམས་ལ་སྤྱོ་བར་མི་བྱ། སྨད་པར་མི་བྱ། མ་གུས་པར་མི་བྱ་སྟེ། འདི་ནི་དུས་མ་ཡིན་པར་དགེ་འདུན་འདུ་བའི་བྱ་བའོ། །དུས་མ་ཡིན་པར་དགེ་འདུན་འདུ་བའི་གནས་བརྟན་གྱི་བྱ་བ་གང་ཞེ་ན། དུས་མ་ཡིན་པར་དགེ་འདུན་འདུ་བའི་
དགེ་སློང་གནས་བརྟན་གྱིས་དུས་མ་ཡིན་པར་འདུ་བ་ན་སྔར་བསྒོའམ། གཎྜཱི་བརྡུངས་ཀྱང་རུང་སྟེ། ཐོག་མར་འགྲོ་བར་བྱ། ཐོག་མར་འགྲེང་བར་བྱ། ཐོག་མར་འདུག་པར་བྱ་སྟེ། བཀུར་སྟིར་བཅས། ཡིད་དམའ་བར་བཅས། འཇིགས་ཤིང་དབང་དུ་འགྱུར་བར་བཅས།
ཡིད་ཕབ་ལ་ཕྱགས་མ་ལྟ་བུའི་སེམས་སུ་བཅས་ལ་དགེ་འདུན་གྱི་ནང་དུ་འགྲོ་བར་བྱ། རྒན་རིམས་སུ་ཕྱག་བྱས་ནས་རང་གི་སྟན་ལ་རབ་ཏུ་འཇུག་པར་བྱ། གནས་བརྟན་དང་། བར་མ་དང་། གསར་བུའི་རྣམས་ལ་ཡང་བྱམས་པའི་སེམས་སུ་བྱ། ཕན་པའི་སེམས་སུ་བྱ། རྗེས་སུ་
བརྩེ་བའི་སེམས་སུ་བྱ། ཕ་དང་། ཕུ་ནུ་བོ་དང་། བུར་འདུ་ཤེས་མངོན་དུ་བཞག །འཁོར་རྣམས་ལ་ཡང་བལྟ་བར་བྱས་ཏེ། གང་ཆས་སྡུག །གང་ཆས་མི་སྡུག །གང་མཛེས་པར་གྱུར། གང་མི་མཛེས་པར་གྱུར། གང་གིས་ལེགས་པར་བགོས། གང་གིས་མི་སྡུག་
པར་བགོས། གང་གིས་མཛེས་པར་ཆས་པ་དེ་དག་ལ་ནི་གཡེལ་བར་གཞག །གང་གིས་མི་མཛེས་པར་ཆས་པ་དེ་དག་ལ་ནི་སྦྲན་པར་བྱ། བསྒོ་བར་བྱ། གང་གིས་ལེགས་པར་བསྒོས་པ་དེ་དག་ལ་ཡལ་བར་གཞག །གང་གིས་མི་སྡུག་པར་བགོས་པ་དེ་དག་ལ་ནི་བརྡ་བྱ། དེས་

བརྡ་མ་ཚོར་ན་དྲུང་ན་འདུག་པ་ལ་བརྡ་བྱ། དྲུང་ན་འདུག་པས་ཀྱང་མ་ཚོར་ན་དགེ་སློང་གནས་བརྟན་གྱིས་དེར་ཅི་ནས་མི་འཁྲུལ་བའི་ཚུལ་དུ་སྦྲན་པར་བྱ། ཇི་ནས་ལེགས་པར་བགོས་པ་དང་། སྒྲ་ཆེར་མི་དབྱུང་བར་བྱའོ། །དགེ་སློང་གནས་བརྟན་གྱིས་འཁོར་གྱི་
ནང་དུ་བརྟག་པར་བྱ་བ་ནི་ཅི་འཁོར་འདི་དག་ཆོས་བཞིན་དུ་བྱེད་དམ། འོན་ཏེ་ཆོས་བཞིན་མ་ཡིན། དེ་སྟེ་ཆོས་བཞིན་ཡིན་ན་ཅི་བདེར་བྱོས་ཤིག་ཅེས་ལས་ཐམས་ཅད་དུ་བྱེད་དུ་ཆུག་ཤིག །དེ་སྟེ་ཆོས་བཞིན་མ་ཡིན་ན་ཆོས་བཞིན་པའི་ཕྱོགས་སུ་གནས་པར་བྱ། ཆོས་
བཞིན་དུ་འདྲི་བ་ལ་སྦྱིན། ཡང་ཅང་མི་སྨྲ་བར་སྟན་ལས་ལངས་ཏེ་འགྲོ་བར་བྱ། དེའི་ཕྱིར་རྩོད་པ་དང་། འཁྲུག་པ་རྗེས་སུ་འབྱུང་བར་མི་བྱ་བ་འདི་ནི་དུས་མ་ཡིན་པར་དགེ་འདུན་འདུ་བའི་གནས་བརྟན་གྱི་བྱ་བ་ཞེས་བྱའོ། །སྨྲ་བའི་བྱ་བ་གང་ཞེ་ན། རྒྱལ་པོའི་ཁབ་ཀྱི་
གྲོང་ཁྱེར་ན་མུ་སྟེགས་ཅན་ཀུན་ཏུ་རྒྱུ་བ་གཞན་དག་ཅིག་ཚེས་བརྒྱད་དང་། བཅུ་བཞི་དང་། བཅོ་ལྔའི་ཚེ། གཅིག་ཏུ་འདུས་ནས་ཆོས་སྨྲ་བ་དང་། དེ་ན་དེར་སྐྱེ་བོ་མང་པོ་འདུས་ནས་དེ་དག་ལ་རྙེད་པ་དག་ཀྱང་རྙེད་པར་གྱུར། བཀུར་སྟི་བྱེད། དེ་དག་གི་འཁོར་དག་ཀྱང་མང་
དུ་འཕེལ་བར་གྱུར་པ་དང་། ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོ་གསུང་རབ་འདི་ལ་དད་པར་གྱུར་ནས་དེས་འདི་སྙམ་དུ་བསམས་སོ། །མུ་སྟེགས་ཅན་ཀུན་ཏུ་རྒྱུ་བ་འདི་དག་ཆོས་བརྒྱད་ཅེས་བྱ་བ་ནས། དེ་དག་གི་འཁོར་དག་ཀྱང་མང་དུ་གྱུར་ཅེས་
བྱ་བའི་བར་དུ་སྔ་མ་བཞིན་ནོ། །འདི་ལྟར་དགེ་སློང་ཡང་ཚེས་བརྒྱད་དང་། བཅུ་བཞི་དང་། བཅོ་ལྔ་ལ་གཅིག་ཏུ་འདུག་ནས་ཆོས་སྨྲ་ན་བདག་ཀྱང་དེར་འགྲོ་སྟེ། རྒྱལ་པོ་ཡང་འགྲོའོ་སྙམ་ནས་སྐྱེ་བོ་མང་པོ་དག་ཀྱང་འདུ་བར་འགྱུར། དགེ་སློང་རྣམས་ཀྱིས་རྙེད་པ་ཡང་རྙེད་
ལ་བཀུར་སྟི་ཡང་འབྱུང་། འཁོར་རྣམས་ཀྱང་མང་དུ་འཕེལ་བར་འགྱུར། སྐྱེ་བོ་མང་པོ་ལའང་བསོད་ནམས་མང་དུ་འཕེལ། དགེ་སློང་རྣམས་ཀྱང་མི་འཇིགས་པར་འགྱུར། བསྟན་པ་ཡང་རྒྱས་པར་འགྱུར། དམ་པའི་ཆོས་ཀྱང་ཡུན་རིང་དུ་གནས་པར་འགྱུར། ཆོས་ཀྱི་སྒྲོན་

མ་ཡང་འབར་བར་འགྱུར། ཕྱི་མའི་སྐྱེ་བོ་རྣམས་ལའང་སྣང་བར་བྱས་པར་འགྱུར་རོ་སྙམ་ནས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོ་བཅོམ་ལྡན་འདས་གང་ན་བ་དེར་སོང་ནས་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་
ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་སྟེ། ཡུལ་མཉམ་དཀའི་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མུ་སྟེགས་ཅན་ཀུན་ཏུ་རྒྱུ་བ་གཞན་ནི་ཚེས་བརྒྱད་ནས། དེ་དག་གིས་འཁོར་དག་ཀྱང་མང་དུ་
གྱུར་ཏོ་ཞེས་བྱ་བའི་བར་དུ་སྔ་མ་བཞིན་ནོ། །འདི་ལྟར་དགེ་སློང་རྣམས་ཀྱང་ཚེས་བརྒྱད་ནས་ཕྱི་མའི་སྐྱེ་བོ་རྣམས་ལ་སྣང་བར་བགྱིས་པར་འགྱུར་ན་དགོངས་པར་ཅི་གནང་ཞེས་བྱ་བའི་བར་དུ་སྔ་མ་བཞིན་ནོ། །བཅོམ་ལྡན་འདས་ཀྱིས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་
ཅན་སྙིང་པོ་ལ་ཅང་མི་གསུང་བཞིན་དགོངས་སོ། །དེ་ནས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བཞིན་དགོངས་པར་ཤེས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་
འདས་ཀྱི་དྲུང་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཡུལ་མཉམ་དཀའི་རྒྱལ་པོ་མཁས་པ་གཟུགས་ཅན་སྙིང་པོ་སོང་ནས་རིང་པོ་མ་ལོན་པར་མཁྱེན་ཏེ། དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་དགེ་སློང་རྣམས་ངས་རྗེས་སུ་གནང་གིས་ཚེས་བརྒྱད་དང་། བཅུ་བཞི་དང་བཅོ་
ལྔ་ལ་གཅིག་ཏུ་འདུས་ནས་ཆོས་སྨྲ་བར་བྱའོ། །དེ་ཡང་འདི་ལྟ་བུར་སྨྲ་བར་བྱ་སྟེ། ཆོས་སྨྲ་བའི་དགེ་སློང་གིས་དོན་དང་ཚིག་གིས་འཁོར་རྣམས་གོ་བར་བྱོས་ཤིག །དེ་ན་དགེ་སློང་དག་ཚིག་ཐ་མལ་པར་སྨྲ་སྟེ་ཚིག་ཐ་མལ་པར་སྨྲས་པས་འཁོར་རྣམས་གོ་བར་མ་གྱུར་པ་དང་། དེ་ལྟར་
གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་དབྱངས་ཀྱིས་ཆོས་སྨྲ་བར་བྱའོ། །དེ་དག་གིས་ཇི་ལྟ་བུར་འདུག་བཞིན་དུ་སྨྲས་པ་དང་། འཁོར་དེ་དག་གིས་གོ་བར་མ་གྱུར་ཏེ། བཅོམ་ལྡན་འདས་ཀྱིས་བཀའ་

སྩལ་པ། རྗེས་སུ་གནང་གིས་སྟན་མཐོན་པོ་ཆོས་ཤིག །དེ་དག་གིས་མདོ་སྡེ་ཆེན་པོ་བསྡུས་ཤིང་སྨྲས་པ་དང་། ཐེ་ཚོམ་དུ་གྱུར་རྒྱས་པར་ཡང་མི་བྱེད་ལ་དེ་ཉིད་ཀྱིས་ཉི་མ་ཟད་པར་བྱེད་དེ། འཁོར་རྣམས་སྐྱོ་བར་གྱུར་ཏེ། བཅོམ་ལྡན་འདས་ཀྱིས་བཀའ་
སྩལ་པ། རྗེས་སུ་གནང་གིས་དོན་གྱི་དབང་དུ་ཅི་བདེར་རྒྱས་པར་བྱོས་ཤིག །དེ་དག་མདོ་སྡེའི་ལས་དོན་ཉི་ཚེ་ཐུས་ཏེ་གཏམ་བརྗོད་པར་བྱ། གསུངས་པའི་བཞིན་དུ་གཞུང་འཆའ་བར་འདོད་པ་དང་། དེ་དག་མདོ་སྡེའི་མཐའ་མ་རུང་བར་མི་འགྱུར་རམ། སྙམ་དུ་ཐེ་ཚོམ་དུ་གྱུར་
ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་མདོ་སྡེའི་དོན་ཉི་ཚེ་ཐུས་ལ་སྐབས་སྐབས་སུ་གཏམ་རྒྱུད་དུ་ཡང་བྱ། གསུངས་པ་ཡང་གཞུང་བཞིན་བྱོས་ཏེ་དོན་དང་ཚིག་ཏུ་འབྲེལ་བས་འཁོར་རྣམས་གོ་བར་གྱིས་ཤིག །མདོ་སྡེ་དེ་དག་ཀྱང་དེ་བཞིན་དུ་
གཟུང་བར་བྱའོ། །དེ་དག་གཉིས་འཁོར་ལྷན་ཅིག་ཏུ་འཁོར་གཅིག་ལ་འཆད་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་གཅིག་གི་ནང་དུ་གཉིས་ལྷན་ཅིག་མ་འཆད་ཅིག །གང་འཆད་པ་དེ་ནི་ཉེས་བྱས་སུ་འགྱུར་རོ། །དེ་དག་འཁོར་འཁོར་དུ་འཆད་
ནས་དེ་དག་འཁྲུགས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་འཁོར་དུ་མ་འཆད་ཅིག །འཆད་ན་འདས་པ་དང་བཅས་པར་འགྱུར་རོ། །དེ་ཡང་འཁོར་གཉིས་ལ་ཅིག་ཅར་འཆད་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ།
འཁོར་གཉིས་ལ་ཅིག་ཅར་མ་འཆད་ཅིག །གང་འཆད་པ་དེ་ཉེས་བྱས་སུ་འགྱུར་རོ། །འདི་ལྟར་འཆད་པ་ལས་གཉིས་པོ་འཁྲུག་པར་མི་འགྱུར་བ་དེ་ལྟ་བུར་བཤད་པར་བྱའོ། །དེ་དག་འཁོར་དེད་ཅིང་འདོང་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་དེད་ཅིང་
མ་འདོང་ཤིག །གང་འཁོར་དེད་ཅིང་འདོང་ན་འདས་པ་དང་བཅས་པར་འགྱུར་རོ། །བདག་ཅག་ཉིད་དང་དེ་འདོང་བ་ལ་ནི་ཉེས་པ་མེད་དོ། །དེ་དག་ཆོས་ཀྱི་སྒོ་ནས་རྙེད་པ་ཚོལ་ཏེ། ཆོས་འཚོང་བས་འཚོ་བར་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཆོས་ཀྱི་

སྒོ་ནས་རྙེད་པ་ཡང་མ་ཚོལ་ཅིག །ཆོས་འཚོང་ཞིང་འཚོ་བར་ཡང་མ་བྱེད་ཅིག །དེ་ནས་སྨྲ་བ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་དྲན་པར་བྱེད་པས་རྗེས་སུ་དྲན་པར་གྱིས་ཤིག །རྗེས་སུ་དྲན་པར་བྱེད་པའང་མེད་ནས་རིམ་གྱིས་སྨྲ་བར་གྱིས་ཤིག །
ཚིགས་བཅད་དང་དབྱངས་སུ་སྦྱར་ཞིང་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། བདག་ཉིད་ཀྱིས་སྨྲོས་ཤིག །ཡང་ན་དགེ་སློང་གཞན་ལ་ཆོལ་ཅིག །བཅོལ་བའི་གང་ཟག་ཀྱང་རིག་པར་བྱ། བདག་ཉིད་ཀྱིས་མི་སྨྲ། ཡང་ན་དགེ་སློང་གཞན་ལ་མ་བཅོལ།
བཅོལ་བའི་གང་ཟག་ཀྱང་ཤེས་པར་མ་བྱས་ན་འདས་པ་དང་བཅས་པར་འགྱུར་རོ། །དེ་དག་རིམ་བཞིན་དུ་བསྐོས་པ་དང་། འདི་ལྟར་ཞར་བ་དང་། གླེན་པ་དང་། སྒུར་པོ་དག་ལ་མུ་སྟེགས་ཅན་ཀུན་ཏུ་རྒྱུ་བ་གཞན་དག་དགེ་སྦྱོང་ཤཱཀྱའི་བུའི་ནང་ན་འདི་དག་འདི་ནི་སྐྱེས་བུ་དམ་
པའོ། །སྐྱེས་བུ་གཙོ་བོའོ། །སྐྱེས་བུ་མཆོག་གོ། །ཞེས་ཉེས་པ་ངོར་བརྗོད་ཅིང་འཕྱས་འདོགས་མི་སྙན་པ་ཟེར་བར་གྱུར་ཏོ། །ཇི་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ནུས་པ་ཡོད་ན་ཆོས་སྨྲ་
བ་རིམས་སུ་མ་བསྐོ་ཤིག །གང་ནུས་པ་དེ་བསྐོ་བར་བྱའི། འཁོར་འཁྲུག་པར་མི་འགྱུར་བ་དེ་ལྟ་བུ་བསྐོ་བར་བྱའོ། །སྨྲ་བའི་བྱ་བ་གཞན་ཡང་དུས་གང་དང་གང་དུ་ཡང་རུང་སྟེ། དགེ་སློང་རྣམས་འདུས་ཤིང་འཁོད་པ་དང་ཆོས་ཀྱི་གཏམ་ངེས་པ་རྣམས་བརྗོད་པར་བྱའོ། །
དེ་སྟེ་མི་ཤེས་ནའང་གཅིག་ལ་གཅིག་དྲི་བར་བྱ། གཅིག་ལ་གཅིག་ཞུ་བར་བྱ། བགམ་པར་མི་བྱ། གླགས་བཙལ་བའི་ཕྱིར་མི་བྱ། འཕྱས་བྱ་བའི་ཕྱིར་མི་བྱ། ཉམས་བསྐྱོད་པར་མི་བྱའི་ཅི་ནས་ཆོས་ལ་རིམ་གྲོ་དང་བཀུར་སྟིའི་ཕྱིར་དྲི་བར་བྱ། ཞུ་བར་བྱ་སྟེ། ཅི་དགེ་
བའམ། འོན་ཏེ་མི་དགེ་བའམ། ཅི་ཁ་ན་མ་ཐོ་བ་དང་བཅས་པའམ། འོན་ཏེ་ཁ་ན་མ་ཐོ་བ་མེད་པ་ཡིན། ཇི་ལྟར་བྱས་ན་དགེ་བར་འགྱུར་རམ། འོན་ཏེ་སྡིག་པར་འགྱུར་བ་ཞེས་བྱ་བ་འདི་ནི་སྨྲ་བའི་བྱ་བའོ། །མི་སྨྲ་བའི་བྱ་བ་གང་ཞེ་ན། གནས་གང་ན་དགེ་སློང་

རྣམས་སྨྲ་ཞིང་གཞན་ལ་བརྗོད་པར་མི་འདོད་པ་དེ་དག་གིས་ཇི་ལྟ་བུར་ཡིད་ལ་བྱ་བ་གྲུབ་པ་དེ་བཞིན་དུ་བསྒོམ་པར་བྱ། སྤྱོད་ལམ་བཞི་ལ་འཇུག་པར་བྱ། ཕན་ཚུན་དུ་མི་སྨྲ་བར་འཇུག་པ་ལ་རྒྱས་པར་བྱ་བ་ནི་འདི་ལྟ་སྟེ། ཀླུང་དགའ་ལྡན་གྱི་དགེ་སློང་རྣམས་
ཇི་ལྟ་བ་བཞིན་དུ་བྱ་སྟེ། འདི་ནི་མི་སྨྲ་བའི་བྱ་བ་ཞེས་བྱའོ། །དབྱར་ཚུལ་དུ་འཇུག་པའི་བྱ་བ་གང་ཞེ་ན། དབྱར་ཚུལ་དུ་འཇུག་པར་འདོད་པའི་དགེ་སློང་གིས་བསམ་པ་ཤིན་ཏུ་བསམས། བརྟག་པ་ཤིན་ཏུ་བརྟགས། ཤིན་ཏུ་དཔྱད་པ་བཞིན་དཔྱད་དེ། ཚུལ་དུ་
འཇུག་པར་བྱ་སྟེ། བདག་གནས་དེ་ན་དགེ་སློང་ཇི་ལྟར་ཚུལ་ཁྲིམས་དང་ལྡན། ཡོན་ཏན་དང་ལྡན། མཁས་པ་དང་ལྡན། དགེ་བའི་ཆོས་དང་ལྡན། ལྟ་བ་མཚུངས། གནས་པ་མཚུངས། གྲོགས་སུ་མཚུངས། ཡིད་གཅུགས་པ་དག་དང་ལྷན་ཅིག་གང་བདེ་
བར་འགྱུར་བ་ནི་འདི་ལྟ་སྟེ། འགྲོ་ན་ཡང་རུང་། སྨྲ་ཡང་རུང་བ་དག་གནས་དེ་ན་དགེ་སློང་མདོ་སྡེ་འཛིན་པ། འདུལ་བ་འཛིན་པ། མ་ལྟ་བུ་འཛིན་པ་གང་བདག་ཐེ་ཚོམ་མ་སྐྱེས་པ་ལས་ནི་མི་སྐྱེད། སྐྱེས་པ་ནི་དུལ་བར་བྱེད། སྡིག་པ་ལྟ་བུ་མ་སྐྱེས་པ་ལས་ནི་མི་སྐྱེད།
སྐྱེས་པ་ལས་ནི་དུལ་བར་བྱེད་པ་ཡོད་དམ། གནས་དེ་ན་བདག་ན་བ་དང་རྗེས་སུ་མཐུན་པའི་སྨན་དང་། ཟས་དང་། ཡོ་བྱད་དང་། བསྙེན་བཀུར་བྱེད་པར་འབྱོར་པར་འགྱུར་རམ། གནས་དེ་ན་བདག་གི་ལུས་ཀྱང་རུང་། སེམས་ཀྱང་རུང་བདེ་བར་འགྱུར་རམ། གནས་
དེ་ན་དགེ་སློང་དག་ཐབ་མོ་བྱེད་པ། མཚང་འདྲུ་བར་བྱེད། འཁྲུག་པར་བྱེད། རྩོད་པ་གླེང་བར་བྱེད་པ་ལྟ་མི་གནས་གྲང་། དེས་བདག་ལ་མ་ཐོབ་པ་ལས་ཐོབ་པ་དང་། མ་ཆུད་པ་ལས་ཆུད་པར་བྱ་བ་དང་། མངོན་དུ་མ་བྱས་པ་ལས་མངོན་དུ་བྱེད་པའི་བར་ཆད་དུ་མི་
འགྱུར། གནས་དེ་ན་དབྱར་གྱི་ནང་དུ་དགེ་འདུན་འབྱེ་བར་མི་འགྱུར་གྲང་ཞེས་དེ་བཞིན་དུ་བསམ་པ་ཤིན་ཏུ་བསམས། བརྟག་པ་ཤིན་ཏུ་བརྟགས། དཔྱད་པ་ཤིན་ཏུ་དཔྱད་དེ། ན་བའི་བསྙེན་བཀུར་བའི་གྲོགས་མཐུན་པ་དང་འགྲོ་བར་བྱ་སྟེ། འདི་ནི་དབྱར་ཚུལ་དུ་འཇུག་པའི་

བྱ་བ་ཞེས་བྱའོ། །དབྱར་ཚུལ་དུ་ཞུགས་པའི་བྱ་བ་གང་ཞེ་ན། དབྱར་ཚུལ་དུ་ཞུགས་པའི་དགེ་སློང་གིས་དོན་མེད་པའི་ཕྱིར་ཞག་གཅིག་ཀྱང་མཚམས་ཀྱི་ཕྱི་རོལ་དུ་འགྲོ་བར་མི་བྱ། དོན་ཅིག་ཡོད་པར་གྱུར་ན་དེས་ཞག་བདུན་ནམ། ཞག་བཞི་བཅུར་བྱིན་གྱིས་བརླབས་ལ་འགྲོ་བར་བྱ།
དེ་ཡང་དོན་གྱི་ཕྱིར་ཏེ། དོན་གང་གི་ཕྱིར་ཞེ་ན། དགེ་སློང་གི་དོན་ནམ། དགེ་སློང་མའི་དོན་ནམ། དགེ་ཚུལ་ཕའི་འམ། དགེ་ཚུལ་མའི་འམ། དགེ་བསྙེན་ཕའི་འམ། དགེ་བསྙེན་མའི་དོན་ཀྱང་རུང་། གཉེན་གྱི་དོན་ཀྱང་རུང་། བདག་གི་དོན་ཀྱང་རུང་། དེ་སྟེ་སངས་
རྒྱས་ལའམ། ཆོས་ལའམ། དགེ་འདུན་ལའམ། སྡུག་བསྔལ་ལའམ། ཀུན་འབྱུང་ལའམ། འགོག་པ་ལའམ། ལམ་ལ་ཡང་རུང་། ཐེ་ཚོམ་དུ་གྱུར་ཏམ། ཡིད་གཉིས་སུ་གྱུར་ཏམ། དོགས་པར་གྱུར་ཀྱང་རུང་། མ་ཐོབ་པ་ལས་ཐོབ་པའི་འདུ་ཤེས་སུ་གྱུར།
མ་ཆུད་པ་ལས་ཆུད་པའི་འདུ་ཤེས་དང་། མངོན་དུ་མ་བྱས་པ་ལས་མངོན་དུ་བྱ་བའི་འདུ་ཤེས་ཏེ། དེ་འདི་ལྟར་མུ་སྟེགས་ཅན་ཀུན་ཏུ་རྒྱུ་བ་གཞན་དག་གི་དོན་ལ་ཡང་རུང་། དེ་སྟེ་དགེ་སློང་དེས་གནས་དེར་དབྱར་དགེ་འདུན་འབྱེ་བར་འགྱུར་རམ། མཆོད་རྟེན་ནམ། གཙུག་ལག་ཁང་
ཡང་རུང་འདྲལ་བར་འགྱུར་རམ། ཚིག་པར་འགྱུར་བ་ཡང་རུང་སྟེ། དེར་དགེ་སློང་དེས་སངས་རྒྱས་ཀྱང་རུང་། ཆོས་སམ། དགེ་འདུན་གྱི་དོན་ལ་ཡང་རུང་སྟེ། ཞག་བདུན་ནམ། ཞག་བཞི་བཅུར་བྱིན་གྱིས་རློབས་ལ་འགྲོ་བར་བྱ་སྟེ། དེར་སོང་བ་ལས་ཞག་བདུན་ནམ།
ཞག་བཞི་བཅུར་ཡང་རུང་ལོན་པར་གྱུར་ན་དགེ་སློང་དབྱར་ཆད་པའི་ཉེས་པ་འབྱུང་བར་མི་འགྱུར་ཏེ། དེ་ནི་དབྱར་ཚུལ་དུ་ཞུགས་པའི་བྱ་བ་ཞེས་བྱའོ། །དབྱར་ཚུལ་དུ་ཞུགས་པའི་གནས་བརྟན་གྱི་བྱ་བ་གང་ཞེ་ན། དབྱར་ཚུལ་དུ་ཞུགས་པའི་དགེ་སློང་གནས་བརྟན་གྱིས་གཙུག་
ལག་ཁང་གི་རྣམས་དང་། མཆོད་རྟེན་གྱི་རྣམས་ཤེས་པར་བྱ། ཇི་ལྟ་བུར་རལ་ཚེམས་བྱ་བ་དང་། སུ་བྱེད་པ་ལ་སྤྲོ་བ་བསྐྱེད་པར་བྱ། བསྒྲག་པར་བྱ། སུ་མི་བྱེད་པ་དེ་ལ་ནི་བསྐུལ་བར་བྱ། དྲན་པར་བྱ་བ་འདི་ནི་དབྱར་ཚུལ་དུ་ཞུགས་པའི་གནས་བརྟན་གྱི་བྱ་བ་ཞེས་བྱའོ། །

དབྱར་ཚུལ་ན་གནས་པའི་བྱ་བ་གང་ཞེ་ན། དབྱར་ཚུལ་ན་གནས་པའི་དགེ་སློང་རྣམས་ཀྱིས་ལས་རྣམ་པ་གསུམ་བྱ་སྟེ། དབྱར་གང་དུ་གནས་པའི་གནས་ཁང་དེ་དག་གས་པ་དང་ཞིག་པའི་རྣམས་བཅོས་སུ་གཞུག་པར་བྱ། མཚན་རྟོག་པར་བྱ། མཚན་
རྟོག་པར་བྱེད་དུ་གཞུག །གནས་དེར་གོས་གང་རྙེད་པའི་གོས་དེ་གཏན་པར་གདིང་བར་བྱ། ཡང་ན་གདིང་དུ་གཞུག་པར་བྱ་བ་འདི་ནི་དབྱར་ཚུལ་ན་གནས་པའི་བྱ་བ་ཞེས་བྱའོ། །འཁོར་གྱི་བྱ་བ་གང་ཞེ་ན། འཁོར་གྱི་གཙོ་བོ་དེས་དུས་དུས་སུ་འཁོར་རྣམས་ལ་གང་ལེགས་
པར་སྤྱོད། གང་ལེགས་པར་མི་སྤྱོད་པ་དང་། གང་མཛེས་པར་སྒྲུབ་གང་མི་མཛེས་པར་སྒྲུབ་བརྟགས་ཏེ་གང་ལེགས་པར་སྤྱོད་ཅིང་མཛེས་པར་སྒྲུབ་པ་དེ་ལ་ནི་ཡོངས་སུ་བསྐྱང་བར་བྱ་སྟེ། ཚེ་དང་ལྡན་པ་ལེགས་སོ་ལེགས་སོ། །ཇི་ལྟར་ཁྱོད་སྤྱོད་པ་དེ་ལྟ་བུར་སྤྱད་པར་
བྱའོ་ཞེས་སྤྲོ་བ་བསྐྱེད་པར་བྱ། ཡང་དག་པར་དགའ་བར་བྱ། དེ་དུས་དུས་སུ་ཕྱི་ཕྱིར་བསྟན་པར་བྱ། བསླབ་པར་བྱའོ། །གང་ལེགས་པར་མི་སྤྱོད་དམ་མཛེས་པར་མི་སྒྲུབ་པ་དེ་ལ་གང་ལ་ཇི་ལྟ་བུར་འོས་པ་དེ་ལྟ་བུར་ཆད་པས་གཅད་པར་བྱ་བ་ནི་འཁོར་གྱི་བྱ་བ་ཞེས་བྱའོ། །
འཁོར་གྱི་ནང་དུ་བྱ་བ་གང་ཞེ་ན། དགེ་སློང་འཁོར་གྱི་ནང་དུ་དྲན་པ་ཉེ་བར་བཞག་ནས་འཁོར་གྱི་ནང་དུ་འགྲོ་བར་བྱ་སྟེ། འདི་ནི་རྒྱལ་རིགས་ཀྱི་འཁོར་ཏོ། །འདི་ནི་བྲམ་ཟེའི་འཁོར་ཏོ། །འདི་ནི་ཁྱིམ་བདག་གི་འཁོར་ཏོ། །འདི་ནི་དགེ་སྦྱོང་གི་འཁོར་ཡིན་ཏེ། དེར་བདག་འདི་
ལྟ་བུར་འགྲོ་བར་བྱ། འདི་ལྟ་བུར་འགྲེང་བར་བྱ། འདི་ལྟ་བུར་འདུག་པར་བྱ་སྟེ། འདི་ལྟ་བུར་སྨྲ་བར་བྱ། འདི་ལྟ་བུར་སྨྲ་བར་མི་བྱའོ་ཞེས་བྱ་བ་དེ་ནི་འཁོར་གྱི་ནང་དུ་འགྲོ་བའི་བྱ་བ་ཞེས་བྱའོ། །འཁོར་གྱི་ནང་དུ་ཞུགས་པའི་བྱ་བ་གང་ཞེ་ན། དགེ་སློང་འཁོར་གྱི་ནང་དུ་ཞུགས་
ན་དེས་གཏམ་སྣ་ཚོགས་མི་བྱ། གཏམ་མི་རིགས་པའི་རྣམས་མི་བྱ། འཁོར་རྣམས་རིགས་པར་བྱས་ལ་དེ་དག་དང་མཐུན་པའི་གཏམ་བྱ་བར་བྱ། གཏམ་བྱས་ནས་སྟན་ལས་ལྡང་བར་བྱ་བ་དེ་ནི་འཁོར་གྱི་ནང་དུ་ཞུགས་པའི་བྱ་བ་ཞེས་བྱའོ། །འཁོར་གྱི་ནང་དུ་ཞུགས་པའི་གནས་

བརྟན་གྱི་བྱ་བ་གང་ཞེ་ན། འཁོར་གྱི་ནང་དུ་ཞུགས་པའི་དགེ་སློང་གནས་བརྟན་གྱིས་འཁོར་རྣམས་ལ་འདི་དག་ཇི་ལྟ་བུའི་གཏམ་ལ་དགའམ། འོན་ཏེ་ཅང་མི་སྨྲ་བ་ལ་དགའ་ཞེས་འཁོར་རྣམས་ལ་བརྟག་པར་བྱའོ། །དེ་སྟེ་གཏམ་ལ་དགའ་བ་དག་ཅིག་ཡིན་ན་ནི་དེ་དག་ལ་དེ་དང་མཐུན་
པའི་གཏམ་བྱའོ། །དེ་སྟེ་མི་སྨྲ་བ་ལ་དགའ་བ་དག་ཅིག་ཡིན་ན་ནི་དེར་ཅང་མི་སྨྲ་བར་འདུག་པར་བྱ་སྟེ། འདི་ནི་འཁོར་གྱི་ནང་དུ་ཞུགས་པའི་གནས་བརྟན་གྱི་བྱ་བ་ཞེས་བྱའོ། །གསོ་སྦྱིན་གྱི་བྱ་བ་གང་ཞེ་ན། བཅུ་བཞིའམ། བཅོ་ལྔའི་གསོ་སྦྱོང་དེ་ཉིད་ཀྱི་ཚེ་རང་གི་རྒྱུད་ལ་བརྟག་
པར་བྱ་སྟེ། མཚན་མོའི་རྒྱུད་དང་། ཉིན་པར་གྱི་རྒྱུད་དེར་བདག་ལ་སྐབས་དེར་ལྟུང་བ་ལྟ་བྱུང་ངམ། དེ་སྟེ་བྱུང་བ་ཡོད་ན་དགེ་སློང་ཡིད་བརྟན་པ་ཞིག་རྙེད་ན་ནི་དེའི་མདུན་དུ་བཤགས་པར་བྱ། དེ་སྟེ་མ་རྙེད་ན་སེམས་ཀྱི་བྱིན་གྱིས་བརླབ་པ་དང་། དེ་སྟེ་ཉེས་པ་མ་བྱུང་ན་ནི་སེམས་
བསྐྱེད་པར་བྱ་སྟེ། བདག་ནི་ལྟུང་བ་དེ་ལས་ཡོངས་སུ་དག་གོ་ཞེས་ཚིག་ཏུ་བརྗོད་པར་བྱ། གསོ་སྦྱིན་ནི་ཚུལ་ཁྲིམས་ཡོངས་སུ་དག་པར་བྱེད་པ་སྟེ། འདི་ནི་གསོ་སྦྱིན་གྱི་བྱ་བ་ཞེས་བྱའོ། །གསོ་སྦྱིན་མངོན་དུ་བྱ་བའི་བྱ་བ་གང་ཞེ་ན། དགེ་སློང་གསོ་སྦྱིན་མངོན་དུ་བྱུང་ལ་མིན་
ན་དད་བཞིན་དུ་ཡང་འགྲོ་བར་བྱ་སྟེ། དེ་ཡང་ཤེས་བཞིན་དུ་འགྲོ་བར་བྱ་བ་ནས་སྔ་མ་བཞིན་ཏེ་འདུག་པ་ལ་མཁས་པར་བྱ་བའི་བར་དུའོ། །འདུག་ནས་ཀྱང་སོ་སོར་ཐར་པའི་མདོ་སྡེ་ལ་སྟོན་པའོ་སྙམ་དུ་འདུ་ཤེས་མངོན་དུ་གཞག་པར་བྱ། བཀུར་སྟི་བྱ། རིམ་གྲོར་བྱས་ལ་མཉན།
བླ་མར་བྱ། གཅེས་པར་བྱ། ཡིད་ལ་གཟུང་བར་བྱ། སེམས་གཅིག་ཏུ་བྱ། རྣ་བ་མི་གཡེལ་བར་བྱ། སེམས་ཐམས་ཅད་གཅིག་ཏུ་དམིགས་ནས་མཉན་པར་བྱའོ། །མཉན་ནས་ཀྱང་དེ་ལྟ་བུར་ནན་ཏན་བྱ། བསྒྲུབ་པར་བྱ་བ་དེ་ནི་གསོ་སྦྱིན་མངོན་དུ་བྱ་བའི་བྱ་བ་ཞེས་བྱའོ། །
གསོ་སྦྱིན་གྱི་ལས་ཀྱི་བྱ་བ་གང་ཞེ་ན། གསོ་སྦྱིན་གྱི་བྱ་བ་ལ་རྣམ་པ་ལྔ་སྟེ། གདོན་པ་དང་། བསྔོ་བ་དང་། དད་པ་ཡོངས་སུ་དག་པ་དང་། སྐབས་དབྱེ་བ་དང་། སེམས་ཀྱིས་བྱིན་གྱིས་བརླབ་པའོ། །གཞན་ཡང་གསོ་སྦྱིན་གྱི་ལས་ལ་རྣམ་པ་བཞི་སྟེ། ཆོས་བཞིན་མ་

ཡིན་ལ་མ་འདུས་པར་བྱེད་པ་དང་། ཆོས་བཞིན་མ་ཡིན་ལ་འདུས་པར་བྱེད་པ་དང་། ཆོས་བཞིན་ལ་མ་འདུས་པར་བྱེད་པ་དང་། ཆོས་བཞིན་ལ་འདུས་པར་བྱེད་པའོ། །དེ་ལས་ཆོས་བཞིན་བྱེད་པའི་གསོ་སྦྱིན་གྱི་ལས་དེ་ནི་འདི་ལྟ་སྟེ། ཆོས་བཞིན་བྱེད་པ་
ཡིན་ནོ། །དེ་ནི་གསོ་སྦྱིན་གྱི་ལས་ཀྱི་བྱ་བ་ཞེས་བྱའོ། །སོ་སོར་ཐར་པའི་བྱ་བ་གང་ཞེ་ན། བཅུ་བཞིའམ། བཅོ་ལྔའི་གསོ་སྦྱིན་དེ་ཉིད་ཀྱི་ཚེ་མཚམས་དང་ལས་ཀྱི་ནང་དུ་ཕྱིན་པའི་དགེ་སློང་ཇི་སྙེད་པ་དེ་དག་ཐམས་ཅད་གཅིག་ཏུ་འདུས་ཤིང་འཁོད་པ་དང་། དགེ་འདུན་གྱི་གནས་
བརྟན་དགེ་སློང་གིས་སོ་སོར་ཐར་པའི་མདོ་སྡེ་བཀླག་པར་བྱ། སོ་སོར་ཐར་པའི་མདོ་ལ་ཡང་སྟོན་པར་འདུ་ཤེས་མངོན་པར་གཞག་པར་བྱ། བཀུར་སྟི་དང་རིམ་གྲོར་བྱས་ལ་མཉན། བླ་མར་བྱ། གཅེས་པར་བྱ། ཡིད་ལ་གཟུང་བར་བྱ། མཚམས་གཅིག་ཏུ་བྱ། རྣ་བ་
མི་གཡེལ་བར་བྱ། གཞན་ཐམས་ཅད་གཅིག་ཏུ་ཐུབ་པར་བྱས་ལ་མཉན་པར་བྱ། ཐོས་ནས་ཡང་དེ་བཞིན་དུ་ནན་ཏན་བྱ། བསྒྲུབ་པར་བྱ་སྟེ། དེ་ནི་སོ་སོར་ཐར་པའི་བྱ་བ་ཞེས་བྱའོ། །སོ་སོར་ཐར་པ་ཀློག་པའི་བྱ་བ་གང་ཞེ་ན། སོ་སོར་ཐར་པ་ཀློག་པ་ལ་རྣམ་
པ་ལྔ་སྟེ། གསོལ་བ་བྱས་ནས་གླེང་གཞི་བཀླགས་ཏེ། ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲག་པར་བྱ་བ་དང་། དེ་ཡང་སོ་སོར་ཐར་པ་བསྒྲགས་ན་སོ་སོར་ཐར་པ་བཀླགས་པ་ཞེས་བྱ་སྟེ། འདི་ནི་སོ་སོར་ཐར་པ་ཀློག་པ་དང་པོའོ། །གསོལ་བ་བྱས་ནས་གླེང་
གཞི་བཀླགས། ཕས་ཕམ་པ་བཞི་བཀླགས་པ་ལ་ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲག་པར་བྱ་སྟེ། དེ་ཡང་སོ་སོར་ཐར་པ་ཀློག་པ་གཉིས་པའོ། །གསོལ་བ་བྱས་ལ་གླེང་གཞི་ཡང་བཀླགས། ཕས་ཕམ་པ་བཞི་ཡང་བཀླགས། དགེ་འདུན་གྱི་ལྷག་མ་བཅུ་
གསུམ་ཡང་བཀླགས་ནས་ལྷག་མ་ནི་ཐོས་པ་བཞིན་ནོ་ཞེས་བསྒྲགས་པ་ནི་སོ་སོར་ཐར་པ་བཀླགས་པ་ཡིན་ཏེ། འདི་ནི་སོ་སོར་ཐར་པ་ཀློག་པ་གསུམ་པའོ། །གསོལ་བ་བྱས་ལ་གླེང་གཞི་བཀླགས། ཕས་ཕམ་པ་བཞི་ཡང་བཀླགས། དགེ་འདུན་གྱི་ལྷག་མ་བཅུ་གསུམ་

ཡང་བཀླགས། མི་མངོན་པའི་ཆོས་གཉིས་པོ་ཡང་བཀླགས་ལ་ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲགས་པ་ཡང་སོ་སོར་ཐར་པ་བཀླགས་པ་ཡིན་ཏེ། འདི་ནི་སོ་སོར་ཐར་པ་ཀློག་པ་བཞི་པའོ། །རྒྱས་པར་སོ་སོར་ཐར་པ་ཀློག་པ་དང་ལྔ་སྟེ། འདི་ནི་སོ་སོར་ཐར་
པ་ཀློག་པའི་བྱ་བའོ། །སོ་སོར་ཐར་པ་ཀློག་པར་བྱེད་པའི་བྱ་བ་གང་ཞེ་ན། སོ་སོར་ཐར་པ་ཀློག་པའི་དགེ་སློང་གིས་སོ་སོར་ཐར་པའི་མདོ་དེ་ཁ་ཏོན་དུ་གསལ་པོར་བྱང་བར་བྱ། དྲན་པར་བྱ། གཏན་ལ་ཕེབས་པར་བྱ། ནམ་ཀློག་པའི་ཚེ་མི་འཁྲུལ་བར་ལེགས་པར་ཀློག་པར་
བྱ། དེས་བདག་གི་རྒྱུད་ཀྱང་བརྟག་པར་བྱ་སྟེ། མཚན་མོའི་རྒྱུད་དང་ཉིན་པར་གྱི་རྒྱུད་ལས། བདག་དེའི་སྐབས་སུ་ཉེས་པ་ལྟ་བྱུང་ངམ་མ་བྱུང་བར་བརྟག་སྟེ། དེ་སྟེ་ཉེས་པ་བྱུང་བར་གྱུར་ལ་ཡིད་བརྟན་པའི་དགེ་སློང་ཡོད་ན་དེའི་དྲུང་དུ་བཤགས་པར་བྱ། དེ་སྟེ་མེད་ན་
རེ་ཞིག་གསོ་སྦྱིན་བྱས་ལ་དེའི་འོག་ཏུ་བདག་གིས་ལྟུང་བ་ཇི་ལྟར་ཆོས་བཞིན་སླར་བཤགས་པར་བྱའོ། །སྙམ་དུ་སེམས་ཀྱིས་བྱིན་གྱིས་བརླབ་པར་བྱའོ། །ཇི་ལྟར་སོ་སོར་ཐར་པའི་མདོ་ལས་འབྱུང་བ་བཞིན་དུ་དེས་ནན་ཏན་དུ་བྱ་བ་དེ་ནི་སོ་སོར་ཐར་པ་ཀློག་པར་བྱེད་པའི་བྱ་བ་ཞེས་
བྱའོ། །གནས་བརྟན་གྱི་བྱ་བ་གང་ཞེ་ན། དེ་སྟེ་དགེ་སློང་རྣམས་ཁྱིམ་པའི་དེར་ཟན་ལ་མགྲོན་དུ་བོས་ན་དེའི་ཚེ་དགེ་སློང་གནས་བརྟན་གྱིས་སྔ་ཟད་དུ་ཤམ་ཐབས་བགོ་བར་བྱ། དག་རར་བྱུང་སྟེ་འདུག་པར་བྱ་བ་དེ་ནི་གནས་བརྟན་གྱི་བྱ་བ་ཞེས་བྱའོ། །བར་མའི་བྱ་བ་གང་ཞེ་ན།
དགེ་སློང་བར་མས་དགེ་སློང་གནས་བརྟན་མདུན་དུ་བྱས་ནས་གྲོང་དུ་འཇུག་པར་བྱ། དེ་སྟེ་གནས་བརྟན་བཤང་བའམ་གཅི་བ་ཞིག་ཏུ་ཐོགས་ནས་དེས་མི་རིང་བ་ཞིག་ཏུ་སོང་ལ་བསྡད་པར་བྱ། དེ་སྟེ་རིང་དུ་སོང་ན་གྲོང་འདབ་ཏུ་སོང་ལ་བསྡད་པར་བྱ། དེ་སྟེ་བྲམ་ཟེ་དང་ཁྱིམ་བདག་དག་
གིས་སྤྱན་འདྲེན་པ་བཏང་ན་ཡང་གནས་བརྟན་འོངས་ཀྱི་བར་དུ་ཅུང་ཟད་བསྡད་དེ་བྱའོ་ཞེས་སྨྲ་བར་བྱ། དེ་སྟེ་ལག་ཆུ་བཏང་ན་གནས་བརྟན་ལ་བསྡད་དོ་ཞེས་སྨྲ་བར་བྱ། དེ་སྟེ་གནས་བརྟན་འོངས་པར་གྱུར་ན་ཡང་འཁོད་པ་ཐམས་ཅད་ལྡང་བར་བྱ་སྟེ། འདི་ནི་བར་མའི་བྱ་བ་ཞེས་བྱའོ། །གསར་

བུའི་བྱ་བ་གང་ཞེ་ན། དགེ་སློང་གསར་བུས་གཙུག་ལག་ཁང་ཆག་ཆག་གདབ་པར་བྱ། ས་ཕྱག་པར་བྱ། ཕྱག་དར་དོར་བར་བྱ། ལྕི་བས་ཞལ་ཞལ་འཇམ་པོར་བྱུག་པར་བྱ། ཆུ་རྣམས་སོ་སོར་བཅུ་ཞིང་གཞག་པར་བྱ། སྟན་རྣམས་གདིང་བར་བྱ།
ཟན་རྣམས་སྐོ་སར་དྲང་བར་བྱ། དུགས་ཁང་དུ་བསྒྲུབ་པའི་རྣམས་བྱས་ཏེ། དེར་ཤིང་བསྐྱ་བར་བྱ། འབྲུ་མར་གཞག་པར་བྱ། ས་དང་ཕྱེ་མ་གཞག་པར་བྱ། ཆུ་གཞག་པར་བྱ། དགེ་སློང་གང་ལས་ཁས་ལེན་པ་དེ་དག་ལ་ལས་བྱ་བར་བྱ། གཞན་མཚུངས་པར་
སྤྱད་པ་གང་ཡང་རུང་སྟེ། ཐམས་ཅད་གསར་བུས་བྱ་བར་བྱ། འདི་ལྟར་ཡང་དགེ་སློང་གསར་བུས་དགེ་སློང་གནས་བརྟན་རྣམས་ལ་ཕ་དང་ཕུ་བོ་ལྟ་བུར་འདུ་ཤེས་ཉེ་བར་གཞག་ཅིང་བཀུར་སྟིར་བཅས། བདག་ལ་དབང་བཅས། འཇིགས་པ་དང་དབང་དུ་འགྱུར་བར་བཅས།
སངས་རྒྱས་དང་ཆོས་དང་དགེ་འདུན་ལ་དམིགས་བཞིན་པའི་སེམས་མངོན་དུ་གཞག་པར་བྱ། མཚུངས་པར་སྤྱད་པའི་ཆོས་རྣམས་ཇི་ལྟ་བུར་བཅས་པ་བཞིན་དུ་རྫོགས་པར་བྱ་བ་འདི་ནི་གསར་བུའི་བྱ་བ་ཞེས་བྱའོ། །གནས་བརྟན་དང་བར་མ་དང་གསར་བུའི་བྱ་བ་གང་ཞེ་ན། དགེ་སློང་
གནས་བརྟན་དང་བར་མ་དང་གསར་བུ་ཐམས་ཅད་ཀྱིས་ཀྱང་རབ་ཏུ་བྱུང་བའོ་སྙམ་དུ་སེམས་མངོན་དུ་གཞག་པར་བྱ། སངས་རྒྱས་བཅོམ་ལྡན་འདས་མགོན་མཛད་པ་ལ་མགོན་པོའོ་སྙམ་དུ་འདུ་ཤེས་མངོན་དུ་གཞག་པར་བྱ། མྱ་ངན་འདའ་བ་ལ་གཞོལ་བར་བྱ། བསླབ་
པའི་གཞི་ཇི་ལྟ་བུར་བཅས་པ་ལ་མཚུངས་པར་སྤྱད་པར་བྱ། བླ་མའི་ཁྱད་པར་དུ་ཆུད་པའི་ཕྱིར་ནན་ཏན་དུ་བྱ་སྟེ། འདི་ནི་གནས་བརྟན་དང་བར་མ་དང་གསར་བུའི་བྱ་བ་ཞེས་བྱ་བའོ། །དུགས་ཁང་དུ་བྱ་བ་གང་ཞེ་ན། དགེ་སློང་དུགས་ཁང་དུ་འཇུག་པར་འདོད་ན་དེས་ཤེས་
བཞིན་དུ་ནང་དུ་འགྲོ་བར་བྱ། ཤེས་བཞིན་དུ་ནང་དུ་འགྲེང་བར་བྱ། ཤེས་བཞིན་དུ་འདུག་པར་བྱ། དྲན་པ་མངོན་དུ་གཞག་ཅིང་སེམས་མི་གཡེང་བར་བྱ། སྤྱོད་ལམ་བཟང་བ་དང་། ཤིན་ཏུ་མཛེས་པ་དང་། ཤིན་ཏུ་བསྡམས་པ་དང་། སྒྲ་བསྐྱུང་བ་དང་། བཀུར་སྟིར་

བཅས། འཇིགས་པ་དང་དབང་དུ་འགྱུར་བར་བཅས། ཡིད་དམན་པའི་སེམས་ཕྱགས་མ་ལྟ་བུར་བྱ། གནས་བརྟན་དང་བར་མ་དང་གསར་བུ་ལ་ཡང་བྱམས་པའི་སེམས་སུ་བྱ། ཕན་པའི་སེམས་དང་རྗེས་སུ་བརྩེ་བའི་སེམས་སུ་བྱ། ཕ་དང་བུ་དང་ཕུ་ནུ་བོ་ལྟ་བུར་འདུ་ཤེས་
མངོན་དུ་གཞག་པར་བྱ། དགེ་སློང་དུགས་ཁང་གི་ནང་དུ་ཞུགས་ནས། གཏམ་སྣ་ཚོགས་མི་བྱ། གཏམ་མི་རིགས་པ་མི་བྱ། སྤྱོད་ལམ་གཉིས་ལ་འཇུག་པར་བྱ་སྟེ། འཕགས་པའི་ཅང་མི་སྨྲ་བའམ