Kinh tạng Tây Tạng (Kangyur Đại Học) — 008_འདུལ་བ།_ཉ

ན་བཞུགས་ཤིང་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་
གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་རྒྱལ་པོ་གཟུགས་ཅན་སྙིང་པོ་ཡིན་ཏེ། དེ་སྐྱེས་དང་བཅས་པས་ངའི་གན་དུ་འོང་ངོ་། །དེ་བཞིན་གཤེགས་པའི་སྐྱེས་ནི་འདི་ལྟ་སྟེ། གདུལ་བའི་སྐྱེས་ལྟ་བུ་གཞན་མེད་དོ་ཞེས་བཀའ་སྩལ་
ནས་ཅང་མི་གསུང་བར་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་
པ་རྒྱལ་པོ་ཨུ་ཏྲ་ཡ་ན་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ན་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། བཅོམ་ལྡན་
འདས་ཀྱིས་དེ་ལ་དགེ་སློང་ཚུར་ཤོག་ཅེས་པས་རབ་ཏུ་ཕྱུང་ཞིང་། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་།

ལག་པ་ལྷུང་བཟེད་དང་། བྱ་མ་བུམ་གྱིས་འབྲེལ་པ་དང་། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་
ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་ཚེ་དང་ལྡན་པ་ཨུ་ཏྲ་ཡ་ན་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དེ་སྐྱེ་བོ་ཕལ་པོ་ཆེའི་ཚོགས་
ཀྱིས་མཐོང་ནས་གྲོང་ཁྱེར་རྒྱལ་པོའི་ཁབ་ཐམས་ཅད་དུ་བཅོམ་ལྡན་འདས་ཀྱིས་རྒྱལ་པོ་ཨུ་ཏྲ་ཡ་ན་རབ་ཏུ་ཕྱུང་རྫོགས་པར་བསྙེན་པར་མཛད་ནས་དེ་བསོད་སྙོམས་ལ་རྒྱལ་པོའི་ཁབ་ཏུ་ཞུགས་སོ་ཞེས་དེ་ལྟ་བུའི་སྒྲ་སྒྲོགས་པར་གྱུར་ཏོ། །དེ་སྐད་ཐོས་ནས་སྲོག་ཆགས་འབུམ་ཕྲག་དུ་
མ་དག་འདུས་པར་གྱུར་ཅིང་། ཁྱིམ་གྱི་ནང་ན་གནས་པའི་བུད་མེད་དག་ཀྱང་སྐར་ཁུང་དང་། སྐར་ཁུང་དྲ་བ་ཅན་དང་། ལན་ཀན་དག་གི་དྲུང་དུ་འཁོད་དེ་ལྟ་བར་བྱེད་དོ། །རྒྱལ་པོ་གཟུགས་ཅན་སྙིང་པོ་ལ་བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་ཨུ་ཏྲ་ཡ་ན་རྒྱལ་པོའི་ཁབ་ཏུ་
བསོད་སྙོམས་ལ་ཞུགས་ཏེ་སྲོག་ཆགས་འབུམ་ཕྲག་དུ་མ་དག་གིས་བསྐོར་ཅིང་མཆིས་སོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས་དགེ་སློང་ཨུ་ཏྲ་ཡ་ན་ག་ལ་བ་དེར་སོང་སྟེ་ཕྱིན་ནས་དགེ་སློང་ཨུ་ཏྲ་ཡ་ན་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །མི་དབང་གྲོང་ཁྱེར་སྟོང་དང་
ནི། །སྒྲ་སྒྲོགས་ཀྱང་ནི་སྤྱད་བྱས་ནས། །བོར་བའི་བསོད་སྙོམས་ཚོལ་བྱེད་པ། །ཇི་ལྟ་ཡོངས་སུ་མི་གདུང་ངམ། །གསེར་དང་དེ་བཞིན་དངུལ་གྱི་སྣོད། །སྲང་ཚད་བརྒྱ་པ་སྤྱད་བྱས་ནས། །ས་ཡི་ལྷུང་བཟེད་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །སཱ་ལུའི་འབྲས་ཆན་
གཙང་མ་དག །ཤ་ཡིས་བརླན་པས་སྤྱད་བྱས་ནས། །ཟན་དྲོན་ཁེངས་པ་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །སྲིན་བལ་རས་བལ་ཟར་མ་དང་། །ཀོ་ཏམ་ཀ་ཤིའི་གོས་སྤངས་ནས། །ཕྱག་དར་ཁྲོད་དག་སྲེལ་བྱེད་པ། །ཇི་ལྟ་ཡོངས་སུ་མི་གདུང་ངམ། །

རླུང་མེད་སྒོ་གཏན་བསྡམས་པ་ཡི། །ཁང་པ་བརྩེགས་པར་ཁྱོད་ཉལ་ནས། །ཤིང་ལྗོན་དྲུང་དུ་གནས་གྱུར་པ། །ཇི་ལྟ་ཡོངས་སུ་མི་གདུང་ངམ། །འཇམ་ཞིང་རས་བལ་འདྲ་བ་ཡི། །མལ་ཁྲི་དག་ལ་ཁྱོད་ཉལ་ནས། །རྩྭ་ཡི་སྟན་ལ་ཉལ་གྱུར་པ། །ཇི་ལྟ་ཡོངས་
སུ་མི་གདུང་ངམ། །བཙུན་མོ་མཚུངས་པ་ཡིད་འོང་བ། །གུས་པར་ཉལ་ཅིང་སྙན་སྨྲས་པ། །དུ་མ་ཁྱོད་ཀྱིས་རྣམ་སྤངས་པ། །ཇི་ལྟ་ཡོངས་སུ་མི་གདུང་ངམ། །གླང་ཆེན་གཉའ་དང་ཤིང་རྟ་དང་། །རྟ་ཡི་བཞོན་པས་ཁྱོད་སོང་ནས། །རྐང་པས་ས་ལ་རྒྱུ་བྱེད་པ། །ཇི་ལྟ་ཡོངས་སུ་མི་
གདུང་ངམ། །ནོར་མང་ལྡན་པའི་མཛོད་དང་ནི། །ཁང་པ་དག་ཀྱང་རྣམ་སྤངས་ཏེ། །ཅི་ཡང་མེད་པ་ཐོབ་གྱུར་པ། །ཇི་ལྟ་ཡོངས་སུ་མི་གདུང་ངམ། །ཨུ་ཏྲ་ཡ་ནས་སྨྲས་པ། རྒྱལ་པོ་གལ་ཏེ་གདུལ་དཀའ་བ། །གཞན་གྱི་ཟས་ཀྱིས་འཚོ་བྱེད་ན། །མ་གྲུབ་པས་ནི་དེ་འདུལ་ཏེ། །
གཉའ་ཤིང་བ་ལང་འདུལ་བ་བཞིན། །རྒྱལ་པོ་གཟུགས་ཅན་སྙིང་པོས་སྨྲས་པ། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་དུ་སྨྲ། །རྒྱལ་སྲིད་ཕྱེད་ནི་སྦྱིན་བྱ་ཡིས། །ཁྱོད་ནི་སྔོན་བཞིན་ལོངས་སྤྱོད་ཀྱིས། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་
དུ་སྨྲ། །ཡིད་ཀྱིས་གང་དང་གང་འདོད་པའི། །ལོངས་སྤྱོད་རབ་མཆོག་སྦྱིན་པར་བྱ། །ཨུ་ཏྲ་ཡ་ནས་སྨྲས་པ། རྒྱལ་པོ་གང་ཞིག་འཇིག་རྟེན་ན། །ལུས་ཀྱི་ཆོས་རེག་བཀྲེན་པ་མེད། །དེ་ནི་ངེས་པར་ལྷ་ཉིད་དང་། །ཡང་ན་མྱ་ངན་འདའ་བར་འགྱུར། །མི་དབང་གང་ཞིག་ཆོས་སྤངས་
ཞིང་། །འདི་ལ་ཆོས་མིན་དགའ་བྱེད་པ། །རྒྱལ་པོ་དེ་བཀྲེན་ཤེས་པར་བྱ། །མུན་ནས་མུན་པར་འགྲོ་བར་འགྱུར། །ཁྱོད་ལ་ཆོས་ནི་བསྟན་བྱ་ཡིས། །རྒྱལ་པོ་ཆེན་པོ་བདག་ལ་ཉོན། །ཆོས་ཐོས་འོག་ཏུ་རྒྱལ་པོ་ནི། །གང་དུ་འདོད་པར་འགྲོ་བར་འགྱུར། །ཡོན་ཏན་མེད་པའི་
ལུས་ལ་ནི། །གཅིག་ཉིད་ཡོན་ཏན་ཆེན་པོ་སྟེ། །ཇི་ལྟ་ཇི་ལྟར་གཟུང་བྱས་པ། །དེ་ལྟ་དེ་ལྟར་རྗེས་འཇུག་འགྱུར། །རྒྱལ་པོ་བཅུ་པའི་བཅུ་པོ་འདི། །སྐྱེས་བུའི་ཆེར་ནི་བརྗོད་པར་བྱ། །བུ་དང་ཆུང་མ་ནོར་དེ་ལ། །རྩེད་མོ་དགའ་བ་ཅི་ཞིག་ཡོད། །བུ་ཡིས་དགའ་བ་སྟོན་བྱེད་དེ། །

ཆུང་མས་ཁེངས་པ་རྗོད་པར་བྱེད། །ཆོམ་རྐུན་ནོར་ནི་སྒྲུབ་བྱེད་དེ། །རྒྱལ་པོ་དག་ནི་བཅིངས་ལས་གྲོལ། །མཐར་བྱེད་པ་ལས་སྨན་དག་དང་། །ནོར་དང་ཉེ་དུས་སྐྱོབ་མི་ནུས། །རིག་སྔགས་ཀུན་དང་དཔུང་དག་དང་། །དཔའ་བརྟུལ་གྱིས་ཀྱང་སྐྱོབ་ནུས་མིན། །འདི་ན་མཐུ་ཆེན་གནས་
མཐོ་ལ། །གནས་པའི་ལྷ་ཚེ་རིང་པོ་ཡང་། །དེ་ཡང་ཚེ་ཟད་ཉམས་འགྱུར་བས། །འཆི་ལས་དེ་རིང་སུ་ཞིག་འཐར། །མཐུ་ཆེན་ནོར་ལྡན་གྲགས་འབར་བ། །རྒྱལ་སྲིད་བྱས་པ་ཁྱབ་འཇུག་དང་། །མུན་བྱེད་སྒྲ་ངན་སྐྱ་བསེང་བུ། །དེས་ཀྱང་འཆི་བ་བཟློག་མ་ནུས། །རྒྱལ་པོ་སྡོམ་
བརྩོན་དཀའ་ཐུབ་དང་། །ལས་དང་བརྩོན་འགྲུས་རྟུལ་བ་དང་། །འཁོར་ཚོགས་རྒྱ་ཆེན་ནོར་དག་གིས། །འཆི་ལས་ཇི་ལྟར་ཐར་མི་ནུས། །བར་སྣང་རྒྱ་མཚོའི་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་འཆི་བདག་གིས། །མི་ཚུགས་འགྱུར་བའི་ས་
ཕྱོགས་མེད། །བར་སྣང་རྒྱ་མཚོ་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་ལས་རྣམས་ཀྱིས། །མི་ཚུགས་འགྱུར་བའི་ས་ཕྱོགས་མེད། །རུས་པ་ཐི་བའི་མདོག་འདྲ་བ། །བོར་ཞིང་ཕྱོགས་ཕྱོགས་རྣམ་འཐོར་བ། །གང་དང་གང་ཡིན་དེ་དག་ནི། །མཐོང་ན་འདི་
ལ་སུ་ཞིག་དགའ། །ཐོད་པ་དུང་གི་མདོག་འདྲ་བ། །བོར་ཞིང་ཀུ་བ་ལྷུང་ལྟ་བུ། །གང་དང་གང་ཡིན་དེ་དག་ནི། །མཐོང་ན་འདི་ལ་སུ་ཞིག་དགའ། །རྒྱལ་པོ་ཚ་ན་སྒྲིབ་བྱེད་ཅིང་། །གྲང་ན་གཡོག་པར་བྱེད་པ་ཡི། །ཁྱོད་ཀྱི་བདག་ཉིད་ཅེས་བྱ་བ། །གང་ཡིན་དེ་ཡང་འཆི་བས་
འཇོམས། །མི་ཡིས་ཇི་ཙམ་ཟས་ཟོས་ཤིང་། །གྱོན་ནམ་ཡང་ན་བྱིན་པ་དེ། །དེ་ཡི་རང་གིར་ཤེས་བྱ་སྟེ། །གཞན་ནི་བོར་ཏེ་འགྲོ་བར་འགྱུར། །མི་ཡི་རྐུན་པོས་མི་འཕྲོགས་དང་། །གཞན་དང་ཐུན་མོང་མ་ཡིན་པའི། །གཏེར་ནི་སྦྱིན་པའམ་ཡང་ན་ནི། །ལེགས་བྱས་གཞན་
གྱིས་སྦ་བར་བྱ། །སྟག་གིས་རི་དགས་བསད་འདྲེན་ལྟར། །ན་རྒ་འཆི་བས་ཁྱོད་མྱུར་འདྲེན། །མཛའ་བཤེས་བློན་ཚོགས་ཀུན་འདུས་པ། །ཁྱོད་ཀྱི་ནད་ནི་སེལ་མི་ནུས། །དེ་ལ་སྤྱད་ལྷག་ནོར་འབྲུ་དང་། །གསེར་དངུལ་གང་དག་ཡོད་པ་ལ། །བུ་དང་ཆུང་མ་འཁོར་བཅས་དག །

བགོ་སྐལ་ཉིད་དུ་སེམས་པར་བྱེད། །གལ་ཏེ་ཕ་ཤི་བུ་ལོན་ཆགས། །བུ་སྡུག་དེ་ལ་མེ་མི་ཁྱེར། །ཤི་ན་འཆི་བཞིན་མི་ངུ་ཞིང་། །བདག་གི་ཕའམ་རྗེར་མི་སྨྲ། །ཕྱུག་ཤེས་བདག་གི་ཕ་ཟེར་ཞིང་། །སྐྲ་བཤིག་མཆི་མའི་བཞིན་གྱིས་ངུ་། །མེ་ཡང་མདུན་དུ་
ཁྱེར་བྱེད་ཅིང་། །ཀྱེ་མ་འདི་ནི་ལྷར་འགྱུར་ཟེར། །གོས་ཀྱིས་བཀབ་བཞིན་ཁྱེར་བྱེད་ཅིང་། །མེ་བཏང་དེ་ནས་སྲེག་པར་བྱེད། །ཉེ་དུ་ངུ་ཞིང་གོས་གཅིག་གིས། །དེ་སྲེགས་སྤངས་ཏེ་ལོངས་སྤྱོད་བྱེད། །དེ་གཅིག་སྐྱེ་ཞིང་སྐྱེ་ཚེ་གཅིག །དེ་བཞིན་གཅིག་འཆི་འཆི་ཚེ་གཅིག །སྐྱེ་
འདིར་གཅིག་པུས་སྡུག་བསྔལ་མྱོང་། །འཁོར་བར་འགྱུར་ལ་གྲོགས་མེད་དོ། །དེ་མཐོང་འདི་ལ་དམ་པ་རྣམས། །རབ་འབྱུང་ཁྱིམ་ན་འདུག་མི་བྱེད། །དེ་དག་ཆགས་པ་ཀུན་བྲལ་ནས། །ཕྱིན་ཆད་མངལ་ན་འཇུག་མི་འགྱུར། །དེ་ནས་རྒྱལ་པོ་གཟུགས་ཅན་སྙིང་པོ་དགེ་སློང་
ཨུ་ཏྲ་ཡ་ནས་གོང་ནས་གོང་དུ་སྤོབས་པས་ལན་གླན་པས་ཅང་མི་སྨྲ་ཞིང་སྤོབས་པ་མེད་པར་གྱུར་ཏེ་སོང་ངོ་། །དེ་ནས་རྒྱལ་པོ་གཙུག་པུད་ཅན་གྱིས་རེ་ཞིག་ཇི་སྲིད་དུ་ཆོས་ཀྱི་རྒྱལ་སྲིད་བྱེད་དུ་བཅུག་ནས་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་ལ་བློན་
པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱིས་སྨྲས་པ། ལྷ་ཆོས་ཀྱིས་རྒྱལ་སྲིད་བགྱིད་དུ་སྩོལ་ལ། ཆོས་མ་ལགས་པས་བགྱིད་དུ་མ་སྩལ་ཅིག །དེ་ཅིའི་སླད་དུ་ཞེ་ན། ལྷ་ཡུལ་གྱི་མི་དག་ནི་མེ་ཏོག་གི་ཤིང་ལྗོན་པ་དང་། འབྲས་བུའི་ཤིང་ལྗོན་པ་དག་དང་འདྲ་བའི་སླད་དུ་སྟེ།
ལྷ་འདི་ལྟ་སྟེ། དཔེར་བགྱི་ན་མེ་ཏོག་གི་ཤིང་ལྗོན་པ་དང་། འབྲས་བུའི་ཤིང་ལྗོན་པ་དག་ནི་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་མེ་ཏོག་དང་། འབྲས་བུ་དག་འབྱིན་པར་བགྱིད་དོ། །ལྷ་དེ་བཞིན་དུ་ཡུལ་གྱི་
མི་དག་ཀྱང་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་དཔྱ་དང་ལོ་ཐང་དག་འབུལ་བར་བགྱིད་དོ། །དེ་དེ་གཉིས་ཀྱིས་བཟློག་པ་ན་རེ་ཞིག་ཇི་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་མ་ཡིན་པས་

རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་ལ་དེ་གཉིས་ཀྱིས་ལན་གསུམ་གྱི་བར་དུ་ཡང་སྨྲས་ན་སྲིད་པ་འཕོས་པ་དང་ལྡན་པས་བཟློག་ཀྱང་མི་སྡོད་དེ་དེ་ཁྲོས་ནས་བློན་པོ་གཞན་དག་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་
བཀའ་ལན་གསུམ་གྱི་བར་དུ་ཡང་གཅོག་པ་དེའི་ཆད་པ་ཇི་ལྟ་བུ་ཡིན། དེ་ན་བློན་པོ་སྐྱོན་ཆགས་པ་ཁ་ཅིག་གིས་སྨྲས་པ། ལྷ་འདི་ལ་རྨ་ཅི་འཚལ་ཏེ། དེའི་ཆད་པ་ནི་དགུམ་པ་ལགས་སོ། །ཚིགས་སུ་བཅད་པ་དག་ཀྱང་སྨྲས་པ། བློན་པོ་སྐྱོན་ནི་ཆགས་པ་དང་། །འགུལ་བར་
གྱུར་པའི་སོ་དང་ནི། །ཟས་ལ་སྐྱོན་ནི་ཆགས་པ་དག །ཕྱུང་བ་འབའ་ཞིག་བདེ་བར་གྱུར། །བློན་པོ་བློ་དང་ལྡན་གྱུར་ཅིང་། །ཤེས་རབ་དང་ནི་འདུལ་ལ་མཁས། །མཛོད་ནས་གོ་འཕང་གནས་པ་ནི། །གང་གིས་མི་གསོད་དེ་གསོད་འགྱུར། །རྒྱལ་པོ་གཙུག་པུད་ཅན་གྱིས་
སྨྲས་པ། ཤེས་ལྡན་དག་འདི་གཉིས་ནི་ངའི་ཡབ་ཀྱིས་བསྐོས་པ་ཡིན་པས་ང་འདི་གཉིས་གསོད་པར་མི་བྱེད་ཀྱིས། འདི་ལྟར་འདི་གཉིས་ཀྱིས་ངའི་མིག་སྔར་འདུག་པར་མི་བྱའོ་ཞེས་དེ་གཉིས་ཀྱི་སྒོ་བཟློག་ནས་སྐྱོན་ཆགས་པ་གཞན་གཉིས་ཤིག་བློན་པོར་བསྐོས་པ་དང་། དེ་
གཉིས་ཀྱིས་སྨྲས་པ། ལྷ་ཏིལ་མ་བརྡུངས་པ་དང་། མ་སྩལ་བ་དང་། མ་བསྲོས་པ་དང་། མ་བཙིར་བ་དག་གིས་ཏིལ་མར་མི་འབྱིན་ཏེ། མིའི་དབང་པོ་སྐྱེ་བོ་དག་ཀྱང་དེ་དང་འདྲའོ། །རྒྱལ་པོས་སྨྲས་པ། ཁྱེད་གཉིས་ཀྱིས་བྱས་པ་གང་ཡིན་པ་དེ་ནི་མཆོག་ཏུ་བརྩོན་པ་ཡིན་
ནོ། །དེ་གཉིས་ཀྱིས་ཡུལ་གྱི་མི་དག་ལ་གནོད་པ་བྱ་བར་བརྩམས་སོ། །ཇི་ཙམ་དུས་གཞན་ཞིག་ན་ཚོང་པ་ཞིག་ཟོང་ཐོགས་ཏེ་གྲོང་ཁྱེར་སྒྲ་སྒྲོགས་ནས་རྒྱལ་པོའི་ཁབ་ཏུ་ཕྱིན་པ་དང་། ཚེ་དང་ལྡན་པ་ཨུ་ཏྲ་ཡ་ནས་དེ་མཐོང་ནས་ངོ་ཤེས་ཏེ་སྨྲས་པ། ཇི་ལྟ་སྒྲ་སྒྲོགས་དག་
ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང་། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་

བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་མཐར་གྱིས་དྲི་བར་བརྩམས་པས། དེ་ན་བློན་པོ་གང་ནི་གཙོ་བོ་ཡིན། །གང་ནི་གཙོ་བོ་མ་ཡིན། གང་གི་དབང་གིས་ནི་
གཙུག་པུད་ཅན་ཡུལ་གྱི་མི་དག་ལ་གནོད་པ་བྱེད། དེས་སྨྲས་པ། ལྷ་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱི་སྒོ་ནི་བཟློག །སྐྱོན་ཆགས་པ་གཞན་གཉིས་ཤིག་ནི་བློན་པོར་བསྐོས་ཏེ། དེ་གཉིས་ཀྱི་དབང་གིས་གཙུག་པུད་ཅན་ཡུལ་གྱི་མི་དག་ལ་གནོད་པ་བགྱིད་དོ། །
ཨུ་ཏྲ་ཡ་ནས་སྨྲས་པ། ཀྭའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང་། ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་པུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་
བྱ་ཞིང་ཕན་པ་ལ་ངེས་པར་སྦྱར་བར་བྱའོ། །ཚོང་པ་དེས་ཟོང་བསྒྱུར་ཏེ་ཟོང་རིན་ཁྱེར་ནས་འཕགས་ཏེ་མཐར་གྱིས་སྒྲ་སྒྲོགས་སུ་ཕྱིན་ནས་དེས་ཉེ་དུ་རྣམས་ལ་གསང་སྟེ་སྨྲས་པ། ཤེས་ལྡན་དག་ཁོ་བོས་ཟོང་ཐོགས་ཏེ་རྒྱལ་པོའི་ཁབ་ཏུ་སོན་ནས་ཁོ་བོས་དེར་རྒྱལ་པོ་བགྲེས་པོ་མཐོང་
ནས། དེའི་ཞལ་ནས་ཀྭའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང་། ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་པུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་བྱ་ཞིང་ཕན་
པ་ལ་ངེས་པར་སྦྱར་བར་བྱའོ་ཞེས་བྱུང་ངོ་། །དེ་དག་གིས་ཀྱང་གཞན་དག་ལ་བརྗོད་ཅིང་དེ་དག་གིས་ཀྱང་གཞན་དག་ལ་བརྗོད་པས་དེ་ལྟར་སྒྲ་དེ་རྣ་བ་གཅིག་ནས་གཅིག་ཏུ་བརྒྱུད་པས་བློན་པོ་སྐྱོན་ཆགས་པ་དེ་གཉིས་ཀྱི་རྣར་སོན་ནས་དེ་གཉིས་ཀྱིས་བསམས་པ། གལ་ཏེ་རྒྱལ་
པོ་རྒན་པོ་འོང་བར་གྱུར་ན་དེས་གདོན་མི་ཟ་བར་ཧེ་རུ་ཀ་དང་། བྷི་རུ་ཀ་གཉིས་ཡང་བློན་པོའི་མཆོག་ཏུ་སྐོ་ཞིང་བདག་ཅག་གཉིས་ལ་གནོད་པ་བྱེད་པར་འགྱུར་གྱིས། དེའི་ཕྱིར་གང་གིས་དེ་ལམ་ཀར་གསོད་དུ་འཇུག་པར་འགྱུར་བའི་ཐབས་ཀྱི་རྣམ་པ་ཞིག་བྱའོ་སྙམ་ནས་དེ་གཉིས་ཀྱིས་

རྒྱལ་པོ་གཙུག་པུད་ཅན་ལ་སྨྲས་པ། ལྷ་རྒྱལ་པོ་བགྲེས་པོ་བྱོན་པར་འགྱུར་རོ་ཞེས་གདའོ། །དེས་སྨྲས་པ། དེ་རབ་ཏུ་བྱུང་བས་དེ་ཅིའི་ཕྱིར་འདིར་འོང་བར་འགྱུར། དེ་གཉིས་ཀྱིས་སྨྲས་པ། ལྷ་གང་གིས་གདུགས་གཅིག་རྒྱལ་སྲིད་བགྱིད་དུ་སྩལ་བ་དེ་ནི་རྒྱལ་སྲིད་མ་མཆིས་
པས་དགའ་བར་ག་ལ་འགྱུར་ཏེ། དེ་ཡང་རྒྱལ་སྲིད་བགྱིད་དུ་སྩོལ་བར་འཚལ་ལོ། །གཙུག་པུད་ཅན་གྱིས་སྨྲས་པ། གལ་ཏེ་དེ་རྒྱལ་པོར་གྱུར་ན་ང་ཉིད་ཀྱིས་གཞོན་ནུ་བྱས་ཏེ། འདི་ལ་འགལ་བ་ཅི་ཡོད། དེ་གཉིས་ཀྱིས་སྨྲས་པ། ལྷ་དེ་ནི་ཚུལ་དང་མཐུན་པ་མ་
ལགས་ཏེ་གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་ཡུལ་གྱི་མི་དག་གིས་ཐལ་མོ་སྟོང་དག་གིས་ཕྱག་བགྱིས་པས་རྒྱལ་སྲིད་བགྱིད་དུ་སྩལ་ནས་ཡང་ཇི་ལྟར་གཞོན་ནུའི་གནས་སུ་གནས་པར་མཛད་ཡུལ་འཁོར་ཡོངས་སུ་བཏང་བ་ནི་མི་སྡོ་ཡི་གཞོན་ནུའི་
གནས་སུ་གནས་པ་ནི་མི་རུང་སྟེ། འདི་ལྟ་སྟེ་དཔེར་བགྱི་ན་མི་ཞིག་གླང་པོ་ཆེའི་གཉའ་བར་མཆིས་ནས་རྟའི་རྒྱབ་ཏུ་མཆི་བ་དང་། རྟའི་རྒྱབ་ཏུ་མཆིས་ནས་ཤིང་རྟས་མཆི་བ་དང་། ཤིང་རྟས་མཆིས་ནས་རྐང་པ་གཉིས་ཁོ་ནས་མཆི་བ་བཞིན་དུ། རྒྱལ་སྲིད་བགྱིད་དུ་
སྩལ་ནས་ཡང་གཞོན་ནུའི་གནས་ན་གནས་པ་ཡང་དེ་དང་འདྲའོ། །དེ་གཉིས་ཀྱིས་བསླུས་ནས་དེས་སྨྲས་པ། འོ་ན་འདི་ལ་གང་རིགས། འདི་ལ་ཇི་ལྟར་བསྒྲུབ་པར་བྱ། དེ་གཉིས་ཀྱིས་སྨྲས་པ། ལྷ་དེ་འགུམས་སུ་སྩལ་བར་བགྱིའོ། །གལ་ཏེ་འགུམས་སུ་མ་
སྩལ་གོར་མ་བཀུམ་པར་བློན་པོ་སྐྱོན་ཆགས་པ་དག་དང་བསྡོངས་ཏེ་ལྷ་ཉིད་དགྲོངས་པར་བགྱིད་དོ། །དེ་སྐད་ཅེས་སྨྲས་པ་དང་། དེ་བཞིན་གྱུར་ཅིང་ཉམས་ཏེ་ཡུད་ཙམ་ཞིག་ཅང་མི་སྨྲ་བར་འདུག་ནས་མཆི་མས་བརྣངས་པའི་སྙིང་གིས་སྙིང་རྗེ་བཞིན་ཞུམ་པ་དང་། ཐོགས་
པའི་ཡིད་དག་གིས་སྨྲས་པ། ཤེས་ལྡན་གཉིས་ཇི་ལྟར་ཡབ་དགྲོངས་སུ་རུང་། དེ་གཉིས་ཀྱིས་སྨྲས་པ། ལྷས། ཕ་འམ་ཡང་ན་སྤུན་དག་གམ། །རང་ལས་སྐྱེས་པའི་བུ་ཡང་རུང་། །གལ་ཏེ་དགྲ་ཁྲོད་ཞུགས་གྱུར་ན། །ས་ཕུང་འཕེལ་བ་ཉིད་དུ་བྱ། །ཞེས་བགྱི་

བ་མ་གསན་ཏམ། ཡང་སྨྲས་པ། ལྷས་གང་ལ་བུ་ཕོ་སྟོང་བདོག་ཅིང་། ཐམས་ཅད་གྲུ་གཅིག་ཞུགས་གྱུར་པ། །དེར་ནི་དགྲ་བོ་གཅིག་ཏུ་བྱུང་། །དེ་ཡི་དོན་དུ་དེ་ནུབ་བྱ། །ཞེས་བགྱི་བ་མ་གསན་ཏམ། ལྷས་གཞན་དག་ནས། ཁྱིམ་གྱི་ཕྱིར་ནི་གཅིག་
གཏང་བྱ། །གྲོང་ཕྱིར་ཁྱིམ་ནི་གཏང་བར་བྱ། །ལྗོངས་ཕྱིར་གྲོང་ནི་གཏང་བྱ་སྟེ། །བདག་ཉིད་ཕྱིར་ནི་ས་གཏང་བྱ། །ཞེས་འབྱུང་བ་ཡང་མ་གསན་ཏམ། ལྷ་འདི་ལ་དགོངས་པར་བགྱི་བ་ཅི་ཡང་མ་མཆིས་ཏེ། དེ་ནི་དགུམ་པར་བགྱི་ལགས་པས་འགུམས་སུ་སྩལ་བར་བགྱིའོ། །
གལ་ཏེ་ལྷ་འདི་ལ་ཕྱི་ཤོལ་མཛད་ནས་ལྷ་ལ་རྗེས་སུ་ཆགས་པའི་གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་ཡུལ་གྱི་མི་གང་དག་ལགས་པ་དེ་དག་འཁྲུགས་པར་གྱུར་ན་གོར་མ་བཀུམ་པར་ལྷ་ལ་གནོད་པ་བགྱིད་པར་འགྱུར་རོ། །འདོད་པ་དག་ལ་བསྟེན་པས་ནི་
སྡིག་པའི་ལས་མི་བྱ་བ་ཅི་ཡང་མེད་པས་དེས་དེ་ལྟར་གྱིས་ཤིག་ཅེས་ཁས་བླངས་སོ། །དེ་ནས་བློན་པོ་སྐྱོན་ཆགས་པ་དེ་གཉིས་དགའ་བ་དང་མགུ་བ་དང་མཆོག་ཏུ་དགའ་བ་སྐྱེས་ནས་མི་གཤེད་མ་པ་དག་ལ་སྨྲས་པ། ཤེས་ལྡན་དག་དེང་ལ་རྒྱལ་པོ་རྒན་པོ་སོད་ཅིག་དང་ཁྱེད་ཅག་
ལ་ལོངས་སྤྱོད་དག་གིས་བགོ་བཤའ་བྱའོ། །རྒྱལ་པོ་དེ་ལ་ཕོ་བྲང་འཁོར་གྱི་མི་དང་ཡུལ་མི་ཐམས་ཅད་རྗེས་སུ་ཆགས་པས་དེ་གསོད་པར་སྤྲོ་བ་འགའ་ཡང་མེད་དོ། །དེ་གཉིས་ཀྱིས་དེ་དག་ལ་ལན་གསུམ་གྱི་བར་དུ་ཡང་དབྱིག་དང་། གསེར་དང་གྲོང་སྦྱིན་པ་ལ་སོགས་པས་
སྤྲོ་བར་བྱེད་ན་སྤྲོ་བ་འགའ་ཡང་མ་བྱུང་ནས། དེ་ནས་དེ་གཉིས་ཁྲོ་བས་ཀུན་ནས་དཀྲིས་པས་ཕྱག་སྦལ་སྲུང་བ་རྣམས་ལ་བསྒོ་བ། ཤེས་ལྡན་དག་དེང་ལ་མི་དེ་དག་བུ་དང་། ཆུང་མ་དང་རྩ་ལག་དང་མཛའ་བཤེས་དང་། ཉེ་དུའི་ཚོགས་དང་བཅས་པ་ཆིངས་ལ་ཆུག་ཤིག །
དེ་དག་གིས་ཐོས་ནས་སྐྲག་པར་གྱུར་ཏེ་སྨྲས་པ། ལྷ་ཉག་མི་བཞེས་སུ་གསོལ། བདག་ཅག་ནི་ཕྱག་རྗེད་བཀའ་ཉན་པ་དག་ལགས་ཀྱིས་མཆིའོ། །ཞེས་དེ་དག་གིས་རལ་གྲི་རྣོན་པོ་མཆན་དུ་བཅུག་སྟེ་འཕགས་སོ། །ཚེ་དང་ལྡན་པ་ཨུ་ཏྲ་ཡ་ན་དབྱར་གྱི་ཟླ་བ་གསུམ་པོ་

དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་པས་ལྷུང་བཟེད་དང་ཆོས་གོས་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཙུན་པ་བདག་གྲོང་ཁྱེར་སྒྲ་སྒྲོགས་སུ་ལྗོངས་རྒྱུ་ཞིང་མཆི་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་
ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་ཨུ་ཏྲ་ཡ་ན་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་
ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པར། ཇི་ལྟར་ལོངས་སྤྱོད་པའི་གནས་མལ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་ཐོགས་ནས་ལས་ཀྱི་སྟོབས་ཀྱིས་བདས་ཏེ་སོང་ངོ་། །ལས་ཀྱིས་རིང་དུ་འདྲེན་བྱེད་དེ། །རིང་ལས་ལས་ཀྱིས་འདྲེན་པར་བྱེད། །
གང་དུ་ལས་རྣམས་སྨིན་འགྱུར་བ། །དེར་ནི་ལས་ཀྱིས་རབ་ཏུ་འདྲེན། །དེ་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ནས་མཐར་གྱིས་རྒྱུ་ཞིང་འགྲོ་བ་ན་ལམ་ཀ་ན་རི་བྲགས་ཤིག་ཡོད་པ་དེར་བསོད་སྙོམས་ལ་ཞུགས་ནས་དེ་དེ་ནས་བསོད་སྙོམས་བརྒྱུས་ཏེ་སོང་བ་དང་། མི་གཤེད་མ་པ་
དེ་དག་དང་ཕྲད་ནས་དེ་དག་གིས་དེ་མཐོང་ངོ་། །དེས་ཀྱང་དེ་དག་ངོ་ཤེས་ནས་དེ་དག་དང་ལྷན་ཅིག་སྐྱེད་མོས་ཚལ་ཞིག་ཏུ་མཚན་མོ་གནས་པར་ཁས་བླངས་ནས་དེས་དེ་དག་ལ་དྲི་བར་བརྩམས་པ། ཇི་ལྟ་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་
ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང་། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེ་དག་གིས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །

རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །མི་མཆོག་ཁྱོད་ཀྱི་ཚུལ་དང་མཐུན་པ་ཡི། །འཕགས་དངོས་མངོན་བརྟགས་གང་ལགས་ཁྱོད་ཀྱིས་མཛོད། །ཞི་བ་དེ་ཡི་ཚུལ་མཐུན་གང་ལགས་པ། །དེ་ནི་དེ་རིང་ཉེ་བར་གཟིགས་པར་འགྱུར། །ཚེ་དང་ལྡན་པ་
ཨུ་ཏྲ་ཡ་ནས་སྨྲས་པ། ཤེས་ལྡན་དག་ཅི་དེང་དེར་འོང་བ་ལ་མངོན་པར་མི་དགའ་འམ། དེ་དག་གིས་སྨྲས་པ། ལྷ་མངོན་པར་མི་དགའོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་མི་འགྲོས་ཕྱིར་ལྡོག་པར་བྱའོ། །དེ་དག་གིས་ཚིགས་སུ་བཅད་པ་སྨྲས་པ། སྐྱེས་བུ་
དཔའ་ཁྱོད་སླར་ནི་གང་དུ་གཤེགས། །སྲས་ནི་ཁྱོད་གསོན་མངོན་པ་མི་དགའ་སྟེ། །བདག་ཅག་བྱུར་ངན་རྒྱལ་པོས་བསྐོས་རྣམས་ཀྱིས། །འདིར་ནི་ཁྱོད་དགྲོངས་སླད་དུ་མཆིད་ཀྱིས་འཚལ། །ཚེ་དང་ལྡན་པ་ཨུ་ཏྲ་ཡ་ནས་སྨྲས་པ། ཤེས་ལྡན་དག་ཁྱེད་ཅག་ང་གསོད་པའི་མི་
གཤེད་མ་པ་དག་ཡིན་ནམ། ལྷ་བདག་ཅག་ཁྱོད་དགྲོངས་པའི་གཤེད་མ་པ་དག་ལགས་སོ། །ཚེ་དང་ལྡན་པ་ཨུ་ཏྲ་ཡ་ནས་བསམས་པ། བཅོམ་ལྡན་འདས་ཀྱིས་བདག་ལ་ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ་ཞེས་བཀའ་སྩལ་པ་གང་ཡིན་པ་དེ་ནི་
འདི་ཡིན་པ་ལྟ་སྟེ། འཁོར་བ་ནི་རྣམ་པ་ཐམས་ཅད་དུ་ངན་པ་སྙིང་པོ་མེད་པ་འཇིག་པའི་ཆོས་ཅན་ཡིན་ནོ་སྙམ་དུ་རིག་ནས། དེ་དག་ལ་སྨྲས་པ། བཞིན་བཟངས་དག་ང་དོན་གང་གི་ཕྱིར་རབ་ཏུ་བྱུང་བའི་དོན་དེ་ངས་ད་དུང་མ་ཐོབ་ཀྱིས་རེ་ཞིག་ང་རང་གི་དོན་རྗེས་སུ་སྒྲུབ་ཀྱི་བར་དུ་ཡུད་ཙམ་
ཞིག་སྡོད་ཅིག །དེ་དག་གིས་ཕན་ཚུན་གྲོས་བྱས་ཏེ་སྨྲས་པ། ལྷ་དེ་ལྟར་མཛོད་ཅིག །དེ་ནས་ཚེ་དང་ལྡན་པ་ཨུ་ཏྲ་ཡ་ན་ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བས་འདུག་གོ། །བཅོམ་ལྡན་
འདས་ཀྱིས་མང་དུ་ཐོས་པ་ལ་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་གསུངས་

པས་དེས་བརྩོན་འགྲུས་བརྩམས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་
ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་འདི་ཉིད་ལ་རང་གི་མངོན་པར་ཤེས་པས་
མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་
མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་
ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་དགྲ་བཅོམ་པ་ཉིད་ཐོབ་ནས་རྣམ་པར་གྲོལ་བའི་དགའ་བ་དང་བདེ་བ་སོ་སོ་ཡང་དག་པར་རིག་
པ་ན་དེའི་ཚེ་ཚིགས་སུ་བཅད་པ་སྨྲས་པ། དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང་། །དེ་བཞིན་སྒྲིབ་ལས་ཐར་གྱུར་ཀྱང་། །རྒྱལ་པོའི་ཆོས་ལས་དེང་མ་ཐར། །ཅེས་སྨྲས་ནས་མི་གཤེད་མ་དེ་དག་ལ་སྨྲས་པ། བཞིན་བཟངས་དག་ངས་ཐོབ་པར་བྱ་བ་གང་ཡིན་པ་
དེ་ཐོབ་ཟིན་གྱིས་ད་ནི་ཁྱེད་ཅག་དོན་གང་གི་ཕྱིར་འོངས་པའི་དོན་དེ་ཐོབ་པར་བྱའོ། །དེ་དག་གིས་སྨྲས་པ། ལྷ་གལ་ཏེ་རྒྱལ་པོ་གཙུག་ཕུད་ཅན་བདག་ཅག་ལ་རྒྱལ་པོ་རྒན་པོས་འཆི་བའི་དུས་ཀྱི་ཚེ་ཅི་ཞིག་སྨྲས་ཞེས་རྨེད་ན། བདག་ཅག་གིས་དེ་ལ་ཇི་སྐད་བརྗོད་པར་བགྱི།

བཞིན་བཟངས་དག་དེ་ལ་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །ཞེས་བརྗོད་པར་བྱའོ། །གཞན་ཡང་འདི་སྐད་ཅེས། ཁྱོད་ཀྱིས་
མཚམས་མེད་པ་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང་། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེ་གཉིས་ཀྱིས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བྱ་དགོས་ཀྱིས་སྡིག་པ་སྣ་ཚོགས་ལས་
ཤོགས་ཤིག་དང་། དེ་ལྟ་ལས་བསྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་མཐར་ཐུག་པར་འགྱུར་རོ་ཞེས་བརྗོད་པར་བྱའོ། །ཚེ་དང་ལྡན་པ་ཨུ་ཏྲ་ཡ་ནས་ཡང་བསམས་པ། སེམས་ཅན་དེ་སེམས་ཅན་དམྱལ་བ་ཆེན་པོ་ལས་གཞོལ་བར་གྱུར་ན་མི་རུང་གིས་
རྫུ་འཕྲུལ་གྱིས་འགྲོའོ་སྙམ་ནས། དེས་རྫུ་འཕྲུལ་གྱི་ཐབས་གང་དང་གང་ཡིན་བརྩམས་ན་དེའི་ལས་ཀྱིས་ནོན་པས་རྫུ་ཞེས་བྱ་བ་ཙམ་ཡང་སྣང་བར་མ་གྱུར་ན་རྫུ་འཕྲུལ་ལྟ་སྨོས་ཀྱང་ཅི་དགོས། དེ་ནས་མི་གཤེད་མ་པ་དེ་དག་ལས་མི་སྙིང་རྗེ་མེད་པའི་སེམས་དང་ལྡན་པ།
འཇིག་རྟེན་ཕ་རོལ་བཏང་བ་གཅིག་གིས་རལ་གྲི་ཤུབས་ནས་ཕྱུང་སྟེ། དེའི་མགོ་དྲུངས་ནས་བཅད་ནས་ས་ལ་བསྒྱེལ་ཏོ། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་ན་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་
ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་འདོང་། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་
ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཅུ་ཟེར་དང་། ཨུཏྤལ་ལྟར་གས་

པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་
ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ། ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ།
དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །
དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་
འདོང་བ་དེ་དག་ནི་རྒྱལ་ཆེན་བཞི་པ་དང་། སུམ་བཅུ་རྩ་གསུམ་པ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་ཚད་མེད་འོད་དང་།
འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང་། སྡུག་
བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །

གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་
བཅོམ་ལྡན་འདས་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར།
སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་ལོང་བུར་ནུབ་པར་འགྱུར། ཡི་དགས་སུ་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བ་ལུང་སྟོན་པར་
བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བ་ལུང་སྟོན་
པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་
ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ཀྱི་མཐིལ་དུ་ནུབ་བོ་དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་
བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བརྡལ་བར་གྱུར་པ་ཅི་བཞིན་ནོ། །ཡང་ཚིགས་སུ་བཅད་པ་སྨྲས་པ། རྒོད་བྲལ་ཞུམ་དང་རྒྱགས་པ་རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་

གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པ། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟེན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་
དགེ་བ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་གློ་བུར་འཛུམ་མི་སྟོན། །བརྟན་ནས་ཅི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་
བོ་དེ་དེ་བཞིན་ནོ་དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་འདི་ལྟར། དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང་། །དེ་བཞིན་སྒྲིབ་
ལས་ཐར་གྱུར་ཀྱང་། །རྒྱལ་པོའི་ཆོས་ལས་དེང་མ་ཐར། །ཀུན་དགའ་བོ་གྲོང་ཁྱེར་སྒྲ་སྒྲོགས་ན་གནས་པའི་རྒྱལ་པོ་གཙུག་པུད་ཅན་སྡིག་པའི་གྲོགས་པོས་བསྐོར་བས་དགེ་སློང་ཨུ་ཏྲ་ཡ་ན། དགྲ་བཅོམ་པ་ཉིད་ཐོབ་པ་སྲོག་དང་བྲལ་བར་བྱས་ཏེ། དེས་ཕ་དགྲ་བཅོམ་པ་སྲོག་
དང་བྲལ་བར་བྱས་པས་ངེས་པར་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། །བཙུན་པ་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏམ། ཀུན་དགའ་བོ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏོ། །
ཚེ་དང་ལྡན་པ་ཀུན་དགའ་བོས་དེ་ཐོས་ནས་མཆི་མས་བརྣངས་ཏེ་འདུག་གོ། །དེ་ནས་གཤེད་མ་པ་མི་དེ་དག་གིས་ཚེ་དང་ལྡན་པ་ཨུ་ཏྲ་ཡ་ནའི་ལྷུང་བཟེད་དང་། ཆོས་གོས་དང་ཁར་གསིལ་ཁྱེར་ཏེ་གྲོང་ཁྱེར་སྒྲ་སྒྲོགས་སུ་ཕྱིན་ནས་དེ་དག་གིས་བློན་པོ་སྐྱོན་ཆགས་པ་དེ་གཉིས་ལ་སྨྲས་
པ། རྒྱལ་པོ་རྒན་པོ་བསད་དོ། །དེ་གཉིས་ཀྱིས་ཐོས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ་རྒྱལ་པོ་གཙུག་པུད་ཅན་ག་ལ་བ་དེར་དོང་ནས་སྨྲས་པ། ལྷ་དགྱེས་པ་སྐྱེད་ཅིག །ད་ནི་ལྷའི་རྒྱལ་སྲིད་ལ་ཚེར་མ་མ་མཆིས་སོ། །ཇི་ལྟར་གྱུར་ལྷའི་དགྲ་གང་ལགས་པ་དེ་

བཀུམ་མོ། །ངའི་དགྲ་གང་ཡིན། ལྷ་རྒྱལ་པོ་རྒན་པོའོ། །དེ་བསད་པ་ཇི་ལྟར་ཤེས། དེ་གཉིས་ཀྱིས་མི་གཤེད་མ་པ་དག་བསྟན་ཏེ་སྨྲས་པ། ལྷ་མི་འདི་དག་ནི་གཤེད་མ་པ་ལགས་ཏེ་འདི་དག་གིས་དེ་བཀུམ་མོ། །རྒྱལ་པོ་གཙུག་པུད་ཅན་གྱིས་དེ་དག་
མཐོང་ནས་སྨྲས་པ། ཤེས་ལྡན་དག་རྒྱལ་པོ་རྒན་པོ་ལ་དབང་ཇི་ཙམ་ཡོད། ལྷ་དེ་ལ་དབང་ག་ལ་མཆིས་ཏེ་ལྷུང་བཟེད་དང་། ཆོས་གོས་དང་ཁར་གསིལ་འདི་ལགས་སོ། །རྒྱལ་པོ་གཙུག་པུད་ཅན་གྱིས་དེ་མཐོང་ནས་བརྒྱལ་ཏེ་ས་ལ་སྒྱེལ་ནས་ཆུས་བཏབ་སྟེ་དབུགས་ཕྱིར་བྱུང་
ནས་སྨྲས་པ། ཤེས་ལྡན་དག་རྒྱལ་པོ་རྒན་པོས་འཆི་བའི་ཚེ་ཅི་སྨྲས། ལྷ་རྒྱལ་པོ་རྒན་པོ་སྲོག་དང་བྲལ་ཀར་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །
ཞེས་མཆིའོ། །གཞན་ཡང་འདི་སྐད་ཅེས། ཁྱོད་ཀྱིས་མཚམས་མེད་པའི་ལས་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང་། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་
གནས་པར་བྱ་དགོས་ཀྱིས་སྡིག་པ་སྡིག་པ་ལས་ཤོགས་ཤིག་དང་། དེ་ལྟ་ན་ལས་བསྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ། །ཞེས་མཆིའོ། །དེ་མྱ་ངན་གྱི་ཟུག་རྔུས་གཟིར་བས་འདམ་བུ་སྔོན་པོར་བརྔས་པ་བཞིན་དུ་རྙིས་པར་གྱུར་ནས།
དེས་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་བོས་ཏེ་སྨྲས་པ། ཤེས་ལྡན་གཉིས་ཁྱེད་གཉིས་ཀྱིས་ང་ལས་དེ་ལྟ་བུ་བྱེད་པ་ལས་མ་བཟློག་གོ། །དེ་གཉིས་ཀྱིས་སྨྲས་པ། ལྷས་བདག་ཅག་གཉིས་སྤྱན་ལམ་དུ་མ་བཞག་ན་ཇི་ལྟར་བཟློག་པར་བགྱི། དེས་བློན་པོ་སྐྱོན་ཆགས་པ་དེ་
གཉིས་མིག་ལམ་དུ་མི་སྣང་བར་བཞག་ནས་ཧེ་རུ་ཀ་དང་། བྷི་རུ་ཀ་གཉིས་ཕྱིར་བློན་པོའི་མཆོག་ཏུ་བསྐོས་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་གསང་སྟེ། ཚེ་དང་ལྡན་པ་རྒྱལ་དང་། སྐར་རྒྱལ་གྱི་མཆོད་རྟེན་གཉིས་ལ་ཁུང་བུ་གཉིས་བརྐོས་ནས་དེར་བྱི་ལའི་ཕྲུ་གུ་

གཉིས་བཞག་སྟེ། དེ་གཉིས་ཀྱིས་ཉི་མ་རེ་རེ་ཞིང་ཤ་སྲི་རེ་རེ་བྱིན་ནས་འདི་སྐད་ཅེས་རྒྱལ་དང་སྐར་རྒྱལ་གཉིས་བདེན་པ་དང་བདེན་པའི་ཚིག་གང་གིས་ཁྱོད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ། དད་པས་སྦྱིན་པར་བྱ་བ་ཆུད་གསན་པས་བྱི་ལའི་སྐྱེ་གནས་ངན་པར་སྐྱེས་པའི་བདེན་
པ་དང་བདེན་པའི་ཚིག་དེས་ཤ་སྲི་ལོང་ལ་རང་རང་གི་མཆོད་རྟེན་ལ་བསྐོར་བ་བགྱིས་ཏེ། རང་རང་གི་ཁུང་དུ་ཞུགས་ཤིག་ཅེས་སློབ་པར་བྱེད་དོ། །གང་གི་ཚེ་དེ་གཉིས་ལེགས་པར་ལོབས་པར་གྱུར་པ་དེའི་ཚེ་ན་བློན་པོ་སྐྱོན་ཆགས་པ་དེ་གཉིས་ཨུ་ཏྲ་ཡ་ནའི་བཙུན་མོའི་གན་དུ་སོང་སྟེ་
སྨྲས་པ། ལྷ་མོ་ཁྱོད་ཀྱི་སྲས་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ན་ཅིའི་སླད་དུ་ཁྱོད་བཏང་སྙོམས་མཛད། དེས་སྨྲས་པ། ཁྱོད་གཉིས་ཉིད་ཀྱིས་དེ་ལས་དེ་ལྟ་བུ་བྱེད་དུ་བཅུག་ན་ད་ཁོ་མོས་ཇི་ལྟར་བྱ། དེ་གཉིས་ཀྱིས་སྨྲས་པ། ལྷ་མོ་ཅི་གང་དུ་
བུམ་པ་ལྷུང་བ་དེར་དཔྱང་ཐག་ཀྱང་ལྷུང་བར་བགྱིའམ། དེས་སྨྲས་པ། དེ་ཤེས་ཏེ་རེ་ཞིག་དེའི་ཕ་བསད་པ་ནི་ཁོ་མོས་གསང་བར་བྱ་ན། དགྲ་བཅོམ་པ་བསད་པ་སུས་གསང་བར་འགྱུར། དེ་གཉིས་ཀྱིས་སྨྲས་པ། ལྷ་མོ་དགྲ་བཅོམ་པ་བསད་པ་བདག་ཅག་གཉིས་ཀྱིས་
གསང་བར་བགྱིའོ། །དེས་སྨྲས་པ། གལ་ཏེ་དེ་ལྟ་ན་ལེགས་སོ་ཞེས་དེ་དེའི་གན་དུ་སོང་སྟེ་སྨྲས་པ། སྲས་ཅིའི་སླད་དུ་ཁྱོད་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར། དེས་སྨྲས་པ། ཡུམ་ཁྱོད་ཀྱང་དེ་སྐད་ཅེས་ཅིའི་
ཕྱིར་ཁྱོད་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ཅེས་གསུང་ངམ། གང་གི་སླད་དུ་བདག་བློན་པོ་སྐྱོན་ཆགས་པ་གཉིས་ཀྱིས་བསླུས་པས་མཚམས་མེད་པའི་ལས་གཉིས་བགྱིས་ཏེ་ཡབ་སྲོག་དང་ཕྲལ་བ་གང་ལགས་པ་དང་། དགེ་
སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ལགས་པ་དེས་བདག་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བགྱི་འཚལ་ན། བདག་ཇི་ལྟར་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་མི་འགྱུར་

དུ་རུང་། དེས་སྨྲས་པ། སྲས་ཅི་མི་འཇིགས་པ་སྩོལ་ཅིག་དང་། གང་མེད་པ་དེ་བཀའ་མཆིད་བགྱིའོ། །དེས་སྨྲས་པ། ཡུམ་གསོལ་གྱིས་ཇི་ལྟར་ལགས་པ་གསུངས་ཤིག །སྲས་དེ་ནི་ཁྱོད་ཀྱི་ཡབ་མ་ལགས་ཏེ། འདི་ལྟར་བདག་གིས་ཟླ་མཚན་བཀྲུ་བའི་སླད་དུ་སྐྱེས་
པ་གཞན་དག་དང་ལྷན་ཅིག་དགའ་མགུར་སྤྱོད་པ་དེ་ལས་ཁྱོད་འཁྲུངས་སོ། །དེས་བསམས་པ། དེ་ལྟ་ན་ཕ་བསད་པར་མ་གྱུར་ཏོ་སྙམ་དུ་རིག་ནས་སྨྲས་པ། ཡུམ་གལ་ཏེ་དེ་ལྟ་ན་ཕ་བསད་པ་ནི་མ་མཆིས་ན་དགྲ་བཅོམ་པ་བསད་པ་མཆིས་པ་དེ་ཇི་ལྟར་མཐར་ཐུག་པར་བགྱི། དེས་
སྨྲས་པ། སྲས་འདི་ལ་ཤེས་པ་ལ་མཁས་པ་དག་སྨྲ་བར་བགྱི་སྟེ། དེ་དག་གིས་དེ་མཐར་ཐུག་པར་བགྱིད་པར་འགྱུར་རོ། །ཞེས་སྨྲས་ཏེ་སོང་ནས། དེས་བློན་པོ་སྐྱོན་ཆགས་པ་དེ་གཉིས་བོས་ཏེ་སྨྲས་པ། ཁོ་མོས་དེའི་ཕ་བསད་པ་ནི་བསལ་ཟིན་གྱིས་ད་ཁྱོད་གཉིས་ཀྱིས་དགྲ་བཅོམ་
པ་བསད་པ་སོལ་ཅིག །རྒྱལ་པོ་གཙུག་པུད་ཅན་གྱིས་བློན་པོ་རྣམས་ལ་བསྒོ་བ། བློན་པོ་གང་དག་ཤེས་པ་ལ་མཁས་པ་ཐམས་ཅད་སྡུས་ཤིག །དེ་དག་གིས་བློན་པོ་གང་དག་ཤེས་པ་ལ་མཁས་པ་ཐམས་ཅད་བསྡུས་པ་དང་བློན་པོ་སྐྱོན་ཆགས་པ་དེ་གཉིས་ཀྱང་དེར་འདུས་པར་གྱུར་
ཏོ། །དེ་ནས་རྒྱལ་པོ་གཙུག་པུད་ཅན་གྱིས་དེ་དག་ལ་སྨྲས་པ། ཤེས་ལྡན་དག་ངས་དགྲ་བཅོམ་པ་བསད་པ་གང་ཡིན་པ་དེ་ཇི་ལྟར་མཐར་ཐུག་པར་བྱ། དེ་ན་རྒྱལ་པོས་ཉེ་བར་འཚོ་བའི་མི་ཐམས་ཅད་ཀྱིས་ནི་མི་མཐུན་པར་སྨྲ་བར་བརྩམས་ཏེ། དེ་ན་ཁ་ཅིག་གིས་སྨྲས་པ། ལྷ་དེས་
དགྲ་བཅོམ་པ་ཉིད་མངོན་སུམ་དུ་བགྱིས་པར་སུས་མཐོང་། ཁ་ཅིག་གིས་སྨྲས་པ། ལྷ་དགྲ་བཅོམ་པ་དག་ནི་ཐམས་ཅད་མཁྱེན་པ་དང་འདྲ་སྟེ་ནམ་མཁའ་ལ་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་འདི་ལ་ཐུགས་ངན་བགྱིར་ཅི་མཆིས། དེས་སྨྲས་པ།
ཁྱེད་གཉིས་ཀྱང་དེ་སྐད་ཅེས་འདི་ལ་མྱ་ངན་བྱར་ཅི་ཡོད་ཟེར་རམ། ཁྱེད་གཉིས་ཉིད་ན་རེ་དགྲ་བཅོམ་པ་གསོད་དུ་བཅུག་གོ་ཞེས་མི་ཟེར་རམ། དེ་གཉིས་ཀྱིས་སྨྲས་པ། ལྷ་དགྲ་བཅོམ་པ་དག་མ་མཆིས་ན་དགྲ་བཅོམ་པ་དག་བཀུམ་པ་མཆིས་རེ་སྐན། དེས་སྨྲས་པ། ངས་མངོན་སུམ་ཁོ་

ནར་དགྲ་བཅོམ་པ་རྒྱལ་དང་། སྐར་རྒྱལ་གཉིས་ཀྱིས་འབར་བ་དང་། གསལ་བ་དང་། ཆར་འབབ་པ་དང་། གློག་འབྱིན་པའི་ཆོ་འཕྲུལ་དག་བྱས་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་མཐོང་བཞིན་དུ་ཁྱེད་གཉིས་ཀྱིས་དེ་སྐད་
ཅེས། དགྲ་བཅོམ་པ་དག་མེད་ན་དགྲ་བཅོམ་པ་བསད་པ་ཡོད་རེ་སྐན། ཞེས་ཟེར་རམ། དེ་གཉིས་ཀྱིས་སྨྲས་པ། ལྷ་ཇི་ལྟར་དེ་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བགྱི་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ། དེང་སང་ཉིད་དུ་ཡང་རང་རང་གི་
མཆོད་རྟེན་ན་མཆིས་པ་ལྷའི་མངོན་སུམ་དུ་བགྱིའོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཚུར་ཤོག་དང་ཅི་ཡང་དག་པའམ། ཡང་དག་པ་མ་ཡིན་པ་ལྟར་འདོང་ངོ་། །གྲོང་ཁྱེར་སྒྲ་སྒྲོགས་ཐམས་ཅད་དུ་ཇི་ལྟར་རྒྱལ་དང་། སྐར་རྒྱལ་
གཉིས་བྱི་ལའི་སྐྱེ་གནས་སུ་སྐྱེས་ཏེ་རང་རང་གི་མཆོད་རྟེན་ན་འདུག་ནས་རྒྱལ་པོ་ལྟར་སོང་ངོ་ཞེས་བྱ་བའི་སྒྲ་དེས་ཁྱབ་པར་གྱུར་ནས་སྲོག་ཆགས་འབུམ་ཕྲག་དུ་མ་དག་ལྟད་མོ་སྐྱེས་ནས་རྒྱལ་པོའི་ཕྱི་བཞིན་དུ་འབྲང་ངོ་། །དེ་ནས་བློན་པོ་སྐྱོན་ཆགས་པ་དེ་གཉིས་ཀྱིས་རྒྱལ་པོ་དང་
བཅས་པའི་འཁོར་འབུམ་ཕྲག་དུ་མའི་མདུན་དུ་སྨྲས་པ། རྒྱལ་དང་སྐར་རྒྱལ་གཉིས་ཉོན་ཅིག་བདེན་པ་དང་བདེན་པའི་ཚིག་གང་གིས་ཁྱེད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བྱ་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ་རང་རང་གི་མཆོད་རྟེན་ན་
འདུག་པའི་བདེན་པ་དང་བདེན་པའི་ཚིག་དེས་ཤ་སྲི་འདི་ལོང་ལ་རང་རང་གི་མཆོད་རྟེན་ལ་བསྐོར་བ་བགྱིས་ཏེ་རང་རང་གི་ཁུང་དུ་ཞུགས་ཤིག །དེ་སྐད་སྨྲས་པ་དང་། དེ་གཉིས་ཀྱིས་རང་རང་གི་ཁུང་ནས་བྱུང་སྟེ་ཤ་སྲི་བླངས་ནས་རང་རང་གི་མཆོད་རྟེན་ལ་བསྐོར་བ་བྱས་ནས་རང་རང་གི་ཁུང་
དུ་ཞུགས་པ་སྲོག་ཆགས་འབུམ་ཕྲག་དུ་མ་དག་གིས་མཐོང་ནས། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་གཟིགས་སམ། དེས་སྨྲས་པ་མཐོང་ངོ་། །དེ་གཉིས་ཀྱིས་སྨྲས་པ། ལྷ་དེ་ལྟར་ན་འཇིག་རྟེན་ན་དགྲ་བཅོམ་པ་དག་མ་མཆིས་ཏེ་དེ་ནི་སྐྱེ་བོའི་བཀའ་མཆིད་འབའ་

ཞིག་ཏུ་བས་སོ། །དེ་ནས་རྒྱལ་པོ་དེ་ལ་འཇིག་རྟེན་དགྲ་བཅོམ་པ་དག་ཡོད་དོ་སྙམ་པའི་ལྟ་བ་ཡོད་པ་གང་ཡིན་པ་དེ་མེད་པར་གྱུར་ཏོ། །དེ་ན་གང་དག་མ་དད་པ་དེ་དག་ལ་ནི་མེད་པར་ལྟ་བ་སྐྱེས་པར་གྱུར་ཏོ། །གང་དག་བར་མར་གནས་པ་དེ་དག་ནི་ཡིད་གཉིས་
ཟ་བར་གྱུར་ཏོ། །གང་དག་དད་པ་དེ་དག་ནི་གནོང་ཞིང་མི་དགའ་བ་དང་། མི་འཇིགས་པ་མེད་པར་གྱུར་ཏོ། །དེ་ནས་རྒྱལ་པོ་གཙུག་པུད་ཅན་གྱིས་བསམས་པ། གལ་ཏེ་འཇིག་རྟེན་ན་དགྲ་བཅོམ་པ་དག་མེད་ན་བདག་གིས་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འཁོར་ལྔ་བརྒྱ་དང་།
དགེ་སློང་མ་རི་མ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་དབུལ་སྙམ་ནས་དེས་དགེ་སློང་རྣམས་དང་། དགེ་སློང་མ་རྣམས་ཀྱི་བསོད་སྙོམས་བཅད་ནས་དགེ་སློང་རྣམས་དང་། དགེ་སློང་མ་རྣམས་ཀྱང་གྲོང་ཁྱེར་སྒྲ་སྒྲོགས་ནས་དོང་ངོ་། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དང་། དགེ་
སློང་མ་རི་མ་ནི་གདུལ་བ་ལ་ལྟོས་པས་དེ་ཉིད་ན་འཁོད་དོ། །ཇི་ཙམ་དུས་གཞན་ཞིག་ན་རྒྱལ་པོ་གཙུག་པུད་ཅན་གྲོང་ཁྱེར་སྒྲ་སྒྲོགས་ནས་ཕྱིར་བྱུང་བ་ན་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གྲོང་ཁྱེར་སྒྲ་སྒྲོགས་སུ་བསོད་སྙོམས་ལ་ཞུགས་པ་དང་། དེས་རྒྱལ་པོ་མཐོང་ནས་འདི་མི་དགའ་
བར་སེམས་པར་གྱུར་ན་མི་རུང་ངོ་སྙམ་ནས་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ཏུ་སྡོད་པ་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འདི་ང་མཐོང་ནས་མཐའ་གཅིག་
ཏུ་སོང་སྟེ་སྡོད། དེའི་ཕྱི་བཞིན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འཕགས་པ་ཀཱ་ཏྱཱ་ཡ་ན་ཆེན་པོའི་ཐུགས་ལམ་ན་ལྷ་ག་ཤེད་དུ་གཟིགས་མོ་དང་དགེ་མཚན་ལ་གཤེགས་པས་མི་དགྱེས་པར་དགོངས་པར་གྱུར་ན་མི་རུང་ངོ་སྙམ་པ་
དང་། ཚོན་གྱི་ལས་བགྱི་བ་དཀའ་བས་ཆོས་གོས་དག་རྡུལ་གྱིས་ཕོག་པར་གྱུར་ན་མི་རུང་ངོ་སྙམ་དུ་དགོངས་སོ། །རྒྱལ་པོ་ཅང་མི་སྨྲ་བར་སོང་ངོ་། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་གྲོང་ཁྱེར་སྒྲ་སྒྲོགས་སུ་བསོད་སྙོམས་བརྒྱུས་ཏེ་བྱུང་བ་ན་རྒྱལ་པོ་གཙུག་པུད་ཅན་ནང་དུ་འཇུག་

ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དེ་བཞིན་དུ་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ན་སྡོད་པ་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་འཕགས་པ་ཀཱ་ཏྱཱ་ཡ་ན་ཆེན་པོ་འདིས་སྔར་ང་མཐོང་ནས་
མཐའ་གཅིག་ཏུ་སོང་སྟེ་སྡོད་པའི་རྒྱུ་ནི་དེ་ཡིན་ན་ད་ལྟར་ཡང་མཐའ་གཅིག་ཏུ་སོང་སྟེ་སྡོད་པའི་རྒྱུ་ཅི་ཡིན། དེའི་ཕྱི་བཞིན་བློན་པོ་སྐྱོན་ཆགས་པ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འདིའི་མཆིད་ནས་ཁོ་བོ་ཕ་གསོད་པ་འདིའི་རྡུལ་གྱིས་མི་རེག་པར་བྱའོ་ཞེས་མཆིའོ། །
རྒྱལ་པོ་དེ་ནི་ཡོངས་སུ་མི་རྟོག་པ་ཡིན་པས་དེ་སྐད་ཐོས་ནས་ཁྲོ་བས་ཀུན་ནས་དཀྲིས་པར་གྱུར་ཏེ་འཁོར་ཐམས་ཅད་ལ་སྨྲས་པ། ཤེས་ལྡན་དག་ཁྱེད་ཅག་ལས་གང་དང་གང་ང་ལ་དགའ་བ་དེ་དང་དེས་དགེ་སྦྱོང་མགོ་རེག་འདིའི་སྟེང་དུ་ས་སྤར་མོ་རེ་རེས་གཏོར་ཅིག །སྐྱེ་བོའི་ཚོགས་
ཐམས་ཅད་ཀྱིས་ས་སྤར་མོ་རེ་རེ་གཏོར་ཏོ། །རྒྱལ་པོ་དེ་དཔུང་ཆེ་བ་ཡིན་པས་རེ་རེས་ས་སྤར་མོ་རེ་རེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་སྟེང་དུ་གཏོར་བ་དང་། དེའི་སྟེང་དུ་ས་ཕུང་ཆེན་པོ་རྣམ་པར་གནས་པར་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཀྱང་དེའི་དབུས་སུ་ལོ་མ་མ་
ཡིན་པའི་སྤྱིལ་བུ་མངོན་པར་སྤྲུལ་ཏེ་འདུག་གོ། །དེ་དག་དེ་ལས་འཐོར་བ་ན་བ་ལང་རྫི་དང་ཕྱུགས་རྫི་དག་གིས་མཐོང་ནས་དེ་དག་སྨོད་བཞིན་དུ་མཐའ་འཁོར་ཞིང་སྡོད་པ་ན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཕྱི་བཞིན་འབྲང་ཞིང་འོང་བ་ཕྱོགས་དེར་ཕྱིན་ནས་དེ་གཉིས་
ཀྱིས་དྲིས་པ། ཤེས་ལྡན་དག་འདི་ཅི་ཡིན། དེ་དག་གིས་སྨྲས་པ། རྒྱལ་པོ་འཐབ་ཀྲོལ་ཅན་ཕ་གསོད་པ་དེས་འཕགས་པ་ཀཱ་ཏྱཱ་ཡ་ན་ཆེན་པོ་ཉེས་པ་མེད་པ་གནོད་པ་མི་བྱེད་པ་སས་བཀབ་བོ། །དེ་གཉིས་མཆི་མས་བརྣངས་ཏེ་ངུ་བའི་བཞིན་གྱིས་བ་ལང་རྫི་དང་ཕྱུགས་རྫི་དག་དང་
ལྷན་ཅིག་ས་ཕྱག་པར་བརྩམས་པ་དང་། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་བྱུང་ནས་དེ་གཉིས་ཀྱིས་རྐང་པ་གཉིས་ལ་གཏུགས་ཏེ་དྲིས་པ། འཕགས་པ་འདི་ཅི་ལགས། དེས་སྨྲས་པ། ལས་དག་ཡིན་མོད་གཞན་ཅི་ཞིག་འབྱུང་བར་འགྱུར།། །།འདུལ་

བ་རྣམ་པར་འབྱེད་པ། བམ་པོ་བདུན་བཅུ་རྩ་གཉིས་པ། དེ་གཉིས་ཀྱིས་སྨྲས་པ། འཕགས་པ་གཙུག་པུད་ཅན་སྐྱེ་བོ་ཕལ་པོ་ཆེ་དང་བཅས་པས་ལས་འདི་ལྟ་བུ་བགྱིས་པ་གང་ལགས་པ་དེའི་རྣམ་པར་སྨིན་པ་ཅིར་འགྱུར། དེས་སྨྲས་པ། དེང་ནས་ཉི་མ་བདུན་ན་གྲོང་
ཁྱེར་སྒྲ་སྒྲོགས་སས་ནོན་པར་འགྱུར་རོ། །འཕགས་པ་རིམ་པ་ཇི་ལྟ་བུར་འགྱུར། ཚེ་དང་ལྡན་པ་གཉིས་རེ་ཞིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་
པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་
དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང་། དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ། །དེ་གཉིས་ཀྱིས་སྨྲས་པ། འཕགས་པ་ཅི་ལགས། བདག་ཅག་གཉིས་ཀྱང་ལས་དེའི་
ཆ་ཅན་ལགས་སམ། བཞིན་བཟངས་གཉིས་ཁྱེད་གཉིས་ནི་ལས་དེའི་ཆ་ཅན་མ་ཡིན་ནོ། །འཕགས་པ་གལ་ཏེ་དེ་ལྟ་ན་བདག་ཅག་གཉིས་ཀྱིས་གྲོང་ཁྱེར་འདི་ནས་ཇི་ལྟར་འབྱུང་བར་བགྱི། དེས་སྨྲས་པ། བཞིན་བཟངས་གཉིས་ཁྱེད་གཉིས་ཀྱིས་རང་གི་ཁྱིམ་ནས་ཆུ་ཀླུང་
གི་བར་དུ་ཕུག་རྐོར་ཆུག་ལ་ཁྱིམ་དྲུང་དུ་གྲུ་བཞག་སྟེ་སྡོད་ལ་གང་གི་ཚེ་རིན་པོ་ཆེའི་ཆར་འབབ་པ་དེའི་ཚེ་ན་རིན་པོ་ཆེ་དག་གིས་གྲུ་འགེངས་སུ་ཆུག་ལ་བྲོས་ཤིག །དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་གྲོང་ཁྱེར་སྒྲ་སྒྲོགས་སུ་ཞུགས་ནས་དེ་གཉིས་རྒྱལ་པོའི་གན་དུ་
སོང་སྟེ་སྨྲས་པ། འཕགས་པ་ཀཱ་ཏྱཱ་ཡ་ན་ཆེན་པོ་ལ་ཅུང་ཞིག་བགྱིས་སམ། ཅི་ན་དོག་སས་བཀབ། དེས་སྨྲས་པ། ཤེས་ལྡན་གཉིས་དེ་གསོན་ནམ། ལྷ་གསོན་ནོ། །ཅི་ཟེར། ལྷ་དེ་འདི་སྐད་ཅེས་དེང་ནས་གདུགས་བདུན་ན་གྲོང་ཁྱེར་སྒྲ་སྒྲོགས་དོག་སས་ནོན་པར་

འགྱུར་ཞེས་མཆིའོ། །རིམ་པ་ཇི་ལྟར་འགྱུར། དེ་གཉིས་ཀྱིས་སྨྲས་པ། ལྷ་དེ་འདི་སྐད་ཅེས་རེ་ཞིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་
པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་
དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ་ཞེས་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་བྲམ་ཟེ་གང་ལ་སློང་མོ་སྩལ་
ནས་ཡང་བཅད་ན་དེ་ལེགས་པ་ཅི་ཞིག་སེམས་ཏེ། ལྷས་དེ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་སྩལ་ནས་བཅད་ཅིང་སས་ཀྱང་གཡོགས་པས་དེ་འདི་སྐད་མཆི་བ་ལས་གཞན་པ་ཆེས་ཤིས་པའི་ཚིག་སྨྲ་བར་ག་ལ་འགྱུར། རྒྱལ་པོ་གཙུག་པུད་ཅན་གྱིས་བསམས་པ། དེ་
བདེན་ནོ་སྙམ་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཀྱིས་བཞིན་བསྒྱུར་ཅིང་ལག་པ་གཉིས་ཡོངས་སུ་དྲིལ་ཏེ་དོང་ངོ་། །དེ་ན་ཧེ་རུ་ཀ་ལ་བུ་སྔོ་བསངས་ཞེས་བྱ་བ་ཁྱེའུ་ཞིག་ཡོད་ལ། བྷི་རུ་ཀ་ལ་ཡང་བུ་མོ་སྔོ་བསངས་ཅན་ཞེས་བྱ་བ་བུ་མོ་ཞིག་ཡོད་ནས། ཧེ་རུ་ཀས་
ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཕུལ་ཏེ་སྨྲས་པ། འཕགས་པ་གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་འདི་ཁྱོད་ཉིད་ཀྱི་ཞབས་འབྲིང་བ་ལགས་སོ། །བྷི་རུ་ཀས་ཀྱང་བུ་མོ་སྔོ་བསངས་ཅན་དགེ་སློང་མ་རི་མ་
ལ་ཕུལ་ཏེ་སྨྲས་པ། འཕགས་མ་གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་ཀཽ་ཤཱམྦཱི་ན་ཁྱིམ་བདག་གདངས་ཅན་ཞེས་བགྱི་བ་བདག་གི་ཆུང་པོ་གྲོགས་ཤིག་མཆིས་པ་དེ་ལ་གཏད་དུ་གསོལ། དེས་ཁས་བླངས་སོ། །དེ་

ནས་དགེ་སློང་མ་རི་མ་བུ་མོ་སྔོ་བསངས་ཅན་ཁྲིད་དེ་རྫུ་འཕྲུལ་གྱིས་གྲོང་ཁྱེར་སྒྲ་སྒྲོགས་ནས་སོང་ནས། དེས་བུ་མོ་དེ་ཀཽ་ཤཱམྦཱིར་ཁྱིམ་བདག་གདངས་ཅན་ལ་གཏད་ནས་ཕྲིན་ཇི་སྐད་སྤྲིང་བ་ཡང་བཟླས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ནི་དེ་ཉིད་དུ་འདུག་གོ། །
བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱིས་ཁྱིམ་ནས་ཆུ་ཀླུང་གི་བར་དུ་ཕུག་རྐོར་བཅུག་སྟེ་ཁྱིམ་དྲུང་དུ་གྲུ་བཞག་ནས་བསྡད་དོ། །ཇི་ཙམ་ན་ཉི་མ་དེ་ལ་རླུང་མོ་ཆེ་བྱུང་ནས་དེས་གྲོང་ཁྱེར་སྒྲ་སྒྲོགས་དེ་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་བཞག་གོ། །ཉི་
མ་གཉིས་པ་ལ་མེ་ཏོག་གི་ཆར་འབབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་རྒྱལ་པོ་ང་ལས་ནུ་ལ་དགུང་བདུན་དུ་དབྱིག་གི་ཆར་བབ་ཅེས་གདའ་བས་ལྷ་ལ་ཡང་མེ་ཏོག་གི་ཆར་འདི་བབ་པས་རིང་པོ་མི་ཐོགས་པར་གོས་ཀྱི་ཆར་འབབ་པར་འགྱུར་
རོ། །ཉི་མ་གསུམ་པ་ལ་གོས་ཀྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གོས་ཀྱི་ཆར་འདི་བབ་པས་རིང་པོ་མི་ཐོགས་པར་དངུལ་གྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་
སྨྲས་པ། ལྷ་ལ་དངུལ་གྱི་ཆར་འདི་བབ་པས་རིང་པོ་མི་ཐོགས་པར་གསེར་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གསེར་གྱི་ཆར་འདི་བབ་པས་རིང་པོ་མི་ཐོགས་པར་རིན་པོ་ཆེའི་ཆར་འབབ་
པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་ཞུགས་ཤིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་བབ་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཀྱིས་རིན་པོ་
ཆེ་དག་གིས་གྲུ་འགེངས་སུ་བཅུག་སྟེ་བྲོས་སོ། །དེ་ན་ཧེ་རུ་ཀས་ཕྱོགས་གཞན་ཞིག་ཏུ་ཧེ་རུ་ཀའི་རྩལ་ཞེས་བྱ་བའི་གྲོང་ཁྱེར་རྩིག་ཏུ་བཅུག་ནས། དེའི་མིང་ཧེ་རུ་ཀའི་རྩལ་ཧེ་རུ་ཀའི་རྩལ་ཅེས་བྱ་བར་གྱུར་ཏོ། །བྷི་རུ་ཀས་ཀྱང་ཕྱོགས་གཞན་ཞིག་ཏུ་བྷི་རུ་ཀའི་རྩལ་ཅེས་བྱ་བའི་གྲོང་

ཁྱེར་རྩིག་ཏུ་བཅུག་ནས་དེའི་མིང་བྷི་རུ་ཀའི་རྩལ་བྷི་རུ་ཀའི་རྩལ་ཅེས་བྱ་བར་གྱུར་ཏོ། །ཉི་མ་བདུན་པ་ལ་སའི་ཆར་འབབ་པར་བརྩམས་པ་དང་། གྲོང་ཁྱེར་སྒྲ་སྒྲོགས་སུ་སྒྲ་མཐོན་པོ་དང་། སྒྲ་ཆེན་པོ་བྱུང་ནས་རྒྱལ་པོས་སྨྲས་པ། ཤེས་ལྡན་དག་སྒྲ་མཐོན་པོ་དང་། སྒྲ་ཆེན་པོ་དེ་
ཅི་བློན་པོ་རྣམས་ཀྱིས་སྨྲས་པ། ལྷ་སའི་ཆར་བབ་བོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་ག་ན་འདུག་ཚོལ་ཅིག །དེ་དག་གིས་བཙལ་བར་བརྩམས་པ་དང་། ཇི་ཙམ་ན་དེ་གཉིས་བྲོས་པར་ཚོར་ནས། དེ་དག་གིས་
རྒྱལ་པོ་ལ་སྨྲས་པ། ལྷ་དེ་གཉིས་བྲོས་ཏེ་མ་མཆིས་སོ། །དེ་ནས་རྒྱལ་པོ་གཙུག་པུད་ཅན་འབྲོས་པར་བརྩམས་པ་དང་། མི་མ་ཡིན་པ་དག་གིས་སྒོ་བཅད་དོ། །ཁྱེའུ་སྔོ་བསངས་ཀྱིས་སྨྲས་པ། འཕགས་པ་གྲོང་ཁྱེར་དུ་སྒྲ་མཐོན་པོ་དང་སྒྲ་ཆེན་པོ་བྱུང་བ་འདི་ཅི་ལགས།
ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། བུ་སྐར་ཁུང་ནས་ཁར་ཕོར་ཕྱིར་ཕྱུང་ཤིག །དེས་སྐར་ཁུང་ནས་ཁར་ཕོར་ཕྱིར་ཕྱུང་བ་དང་སས་ཕྱེད་ཙམ་གང་བར་གྱུར་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་མོ། །
ཇི་ཙམ་ན་ཡང་ཁར་ཕོར་ཕྱི་རོལ་དུ་ཕྱུང་བ་དང་བྱུར་བུར་གང་བར་གྱུར་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་ནི་སྤྱོད་ཡུལ་མེད་པར་གྱུར་གྱིས་འགྲོའོ་སྙམ་མོ། །དེ་ནས་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་གང་ཡིན་པ་དེ་ཚེ་དང་ལྡན་པ་ཀཱ་
ཏྱཱ་ཡ་ན་ཆེན་པོ་ག་ལ་བ་དེར་སོང་སྟེ་ཕྱིན་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་ཀྱང་མཆི་སྟེ་འཕགས་པའི་བསྙེན་བཀུར་བགྱིའོ། །དེས་དང་དུ་བླངས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྔོ་བསངས་ལ་སྨྲས་པ། བུ་ཆོས་གོས་ཀྱི་གྲྭ་
ནས་ཟུང་ཤིག་དང་འདོང་ངོ་། །དེས་ཆོས་གོས་ཀྱི་གྲྭ་ནས་བཟུང་བ་དང་དེས་ཁྱེའུ་སྔོ་བསངས་ཁྲིད་དེ་རྫུ་འཕྲུལ་གྱིས་སྟེང་གི་ནམ་མཁའ་ལས་སོང་ངོ་། །སྒྲ་སྒྲོགས་ན་གཉུག་མར་གནས་པའི་ལྷ་མོ་ཡང་རང་གི་རྫུ་འཕྲུལ་གྱིས་དེའི་ཕྱི་བཞིན་སོང་བ་དང་། གྲོང་ཁྱེར་སྒྲ་སྒྲོགས་

ཀྱང་སས་ནོན་པར་གྱུར་ཏོ། །དེ་དག་མཐར་གྱིས་ཁ་ར་བ་ན་ཞེས་བྱ་བའི་རི་བྲགས་སུ་ཕྱིན་ནས་དེ་དག་དེ་ན་གཡུལ་གྱི་གཞི་ན་འཁོད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཁྱེའུ་སྔོ་བསངས་གཡུལ་གྱི་གཞིར་བཞག་སྟེ་བསོད་སྙོམས་ལ་ཞུགས་པ་དང་། ལྷ་མོ་
དེའི་མཐུས་གཡུལ་གྱི་གཞི་དེར་འབྲུ་འཕེལ་བར་གྱུར་ནས་དེ་ན་མི་གང་འདུག་པ་དེས་ཁྱེའུ་དེ་མཐོང་ནས་དེའི་གན་དུ་སོང་སྟེ་སྨྲས་པ། ཀྱེ་ཁྱེའུ་ཁྱོད་ཀྱི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེས་སྨྲས་པ། ཁོ་བོའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་པ་
མ་ཡིན་ཏེ། འདི་ལྟར་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་ཕྱོགས་ག་གེ་མོ་ཞིག་ན་འདུག་པ་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེ་དེའི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། ལྷ་མོ་བདག་གྲོང་དུ་མཆི་སྟེ་སླར་
མཆིའི་བར་དུ་རེ་ཞིག་ལྡེ་མིག་དང་། ལྡེ་མིག་ཀྱོག་པོ་འདི་གཟུང་ཞིང་ཁྱོད་ཀྱིས་བདག་མ་ལགས་པ་གཞན་སུ་ལ་ཡང་མི་སྩལ་བར་གསོལ། དེས་བླངས་པ་དང་། མི་དེ་ཡང་རི་བྲགས་སུ་སོང་ནས་རི་བྲགས་ན་གནས་པའི་སྐྱེ་བོའི་ཚོགས་བསྡུས་ཏེ་སྨྲས་པ། ཤེས་ལྡན་དག་གྲོང་
ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་གཡུལ་གྱི་གཞི་ན་འདུག་པས་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ནས་བདག་གིས་དེའི་ལག་ཏུ་ལྡེ་མིག་དང་། ལྡེ་མིག་ཀྱོག་པོ་བྱིན་ཏེ་བདག་གིས་དེ་ལ་བདག་གྲོང་དུ་མཆི་སྟེ་སླར་མཆིའི་བར་དུ་ལྡེ་མིག་
དང་། ལྡེ་མིག་ཀྱོག་པོ་འདི་གཟུང་ཞིང་ཁྱོད་ཀྱིས་བདག་མ་གཏོགས་པ་གཞན་སུ་ལ་ཡང་སྩལ་བར་མི་བགྱིའོ་ཞེས་སྨྲས་ཀྱིས། དེའི་ཕྱིར་གྲོང་མི་རྣམས་ལ་གལ་ཏེ་བདག་གི་བུ་གཙོ་བོར་དབང་བསྐུར་ན་ཁོ་བོ་བདག་ཉིད་སྲོག་དང་འབྲལ་བར་གསོལ་བ་འདེབས་ཏེ། དེ་ལྟ་ན་ལྷ་མོ་
བདག་ཅག་གི་གནས་ནས་གར་ཡང་འགྲོ་བར་མི་འགྱུར་བས་ཁྱེད་ཅག་ལོངས་སྤྱོད་དག་གིས་མངོན་པར་འཕེལ་བར་འགྱུར་ཞིང་ཡམས་ཀྱི་ནད་ཐམས་ཅད་ཀྱང་ཉེ་བར་ཞི་བར་འགྱུར་རོ། །དེ་དག་གིས་དེའི་བུ་གཙོ་བོར་དབང་བསྐུར་ནས་དེས་ཀྱང་བདག་ཉིད་སྲོག་དང་བྲལ་བར་བྱས་སོ། །དེ་

ནས་དེ་དག་གིས་གནས་དེ་ཐམས་ཅད་སྤོས་དང་མེ་ཏོག་གིས་མཛེས་པར་བྱས་ཤིང་གདུགས་དང་རྒྱལ་མཚན་གྱིས་བརྒྱན་ཏེ། གཏོར་མ་ཐོགས་ནས་ལྷ་མོ་དེ་ག་ལ་བ་དེར་དོང་སྟེ་ཕྱིན་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་མོ་ཁྱོད་འདི་ཉིད་ན་བཞུགས་པར་གསོལ། དེས་
སྨྲས་པ། ཁོ་མོ་ནི་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསྙེན་བཀུར་བྱེད་པ་ཡིན་པས་འདི་ན་ཁོ་མོའི་གནས་མེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། ལྷ་མོ་ཁྱོད་ཀྱིས་གང་ལས་ལྡེ་མིག་དང་། ལྡེ་མིག་ཀྱོག་པོ་བླངས་པ་སོམས་ཤིག །དེས་བསམ་པ་ལ་ཞུགས་
པ་དང་། ཇི་ཙམ་ན་མི་དེ་དུས་ལ་བབ་པར་མཐོང་ནས་དེས་གནས་དེ་ན་གནས་པའི་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁོ་མོ་དམ་ཚིག་གིས་གནས་པར་བྱ་སྟེ། གལ་ཏེ་ཁོ་མོའི་གནས་གཞི་ཇི་ལྟ་བུ་བྱེད་དུ་འཇུག་པ་དེ་ལྟ་བུར་འཕགས་པའི་གནས་གཞི་ཡང་བྱེད་དུ་འཇུག་
ན་ཁོ་མོ་འདུག་གོ། །དེ་དག་གིས་ཁས་བླངས་ནས། དེ་དག་གིས་ལྷ་མོ་དེའི་གནས་ཇི་ལྟ་བུ་བྱེད་དུ་བཅུག་པ་དེ་ལྟ་བུར་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་གནས་ཀྱང་བྱེད་དུ་བཅུག་གོ། །ལྷ་མོ་དེའི་གནས་སུ་མར་མེ་བཙུགས་པ་གང་ཡིན་པ་དེ་དེས་ཁྱེར་ཏེ་ཚེ་དང་ལྡན་པ་ཀཱ་ཏྱཱ་ཡ་ན་
ཆེན་པོའི་གནས་སུ་འཛུགས་པར་བྱེད་དོ། །དེ་མར་མེ་ཁྱེར་ཏེ་འགྲོ་བ་རྩིག་དྲུང་ན་འདུག་པའི་མི་ཞིག་གིས་མཐོང་ནས་དེས་བསམས་པ། ལྷ་མོ་འདི་འཕགས་པ་ཀཱ་ཏྱཱ་ཡ་ན་ཆེན་པོའི་གན་དུ་འདོང་བས་འགྲོའོ་སྙམ་པ་དང་། དེས་དེའི་སེམས་ཤེས་ནས་ཁྲོས་ཏེ་རི་བྲགས་འདི་ན་གནས་
པའི་སྐྱེ་བོའི་ཚོགས་འདི་ནི་སྡིག་པའི་སེམས་ཀུན་དུ་སྤྱོད་པ་ཡིན་ཏེ། འཕགས་པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་སྐུར་བ་འདེབས་པར་བྱེད་དོ་སྙམ་ནས། དེས་རི་བྲགས་དེར་མི་ངས་ཕྱུང་སྟེ་སྐྱེ་བོ་ཕལ་པོ་ཆེ་ཤི་བར་གྱུར་ནས་སྐྱེ་བོ་ཤི་བའི་རོ་ཕྱིར་
འབྱིན་པ་ན་ཁྲི་དང་ཁྲི་དག་འདོམ་པར་གྱུར་ཏོ། །གནས་དེ་ན་གནས་པའི་སྐྱེ་བོའི་ཚོགས་ཀྱིས་ལྟས་པ་དག་བཀུག་སྟེ། དྲིས་པ། འདི་ཅི་ལས་གྱུར། དེ་དག་གིས་སྨྲས་པ། ལྷ་མོ་འཁྲུགས་སོ། །དེ་དག་གིས་དེ་ལ་བཟོད་པ་གསོལ་བར་བརྩམས་པ་དང་། དེས་སྨྲས་

པ། ཁྱེད་ཅག་འཕགས་པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་སྐུར་པ་འདེབས་པར་བྱེད་དོ། །དེ་དག་གིས་ཡང་སྨྲས་པ། ལྷ་མོ་བཟོད་པ་མཛོད་ཅིག་དང་འགའ་ཡང་བསྙེན་བཀུར་མ་ལགས་པ་བགྱིད་པར་མི་འགྱུར་རོ། །དེས་སྨྲས་པ།
དམ་ཚིག་གིས་བཟོད་པར་བྱ་སྟེ། གལ་ཏེ་ཁྱེད་ཅག་ཁོ་མོ་ལ་ཇི་ལྟར་བསྙེན་བཀུར་བྱེད་པ་དེ་ལྟར་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཡང་བྱེད་ན་བཟོད་པར་བྱའོ། །དེ་དག་གིས་སྨྲས་པ། ལྷ་མོ་ཆེས་ཁྱད་པར་དུ་འཕགས་པར་བགྱིས་བཟོད་པར་མཛོད་ཅིག །དེས་དེ་དག་ལ་བཟོད་པར་
བྱས་སོ། །དེ་དག་གིས་ཀྱང་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཆེས་ཁྱད་པར་དུ་འཕགས་པའི་བསྙེན་བཀུར་བྱས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་ཉིད་དུ་དབྱར་གནས་པར་ཁས་བླངས་ནས་ཁྱེའུ་སྔོ་བསངས་ཁྲིད་དེ་ལྷ་མོ་ལ་སྨྲས་ནས་འཕགས་པ་དང་། ལྷ་མོས་སྨྲས་པ།
འཕགས་པ་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་ཕོར་བྱིན་ནས་དེས་དེ་ལ་ཁས་ཕུབ་སྟེ་མཆོད་རྟེན་དུ་བྱས་ནས་དུས་སྟོན་བྱེད་དུ་བཅུག་ནས། ཁར་ཕོར་གྱི་དུས་སྟོན་ཁར་ཕོར་གྱི་དུས་སྟོན་ཞེས་བྱ་བའི་མིང་དུ་
གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ཆོས་གོས་ཀྱི་གྲྭ་ནས་འཇུས་ཏེ་དེ་འཕྱང་ཞིང་འགྲོ་བ་བ་ལང་རྫི་དང་ཕྱུགས་རྫི་དག་གིས་མཐོང་ནས། དེ་དག་གིས་འཕྱང་བ་པ་འཕྱང་
བ་པ་ཞེས་བྱ་བའི་སྒྲ་ཆེན་པོ་ཕྱུང་བས་ཡུལ་དེའི་མི་རྣམས་ཀྱི་མིང་འཕྱང་བ་པ་འཕྱང་བ་པ་ཞེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རི་བྲགས་ཤིག་ཏུ་ཕྱིན་ནས་དེར་ཁྱེའུ་སྔོ་བསངས་ཤིང་ལྗོན་པའི་དྲུང་དུ་བཞག་སྟེ་བསོད་སྙོམས་ལ་ཞུགས་སོ། །རི་བྲགས་དེ་ན་
རྒྱལ་པོ་བུ་མེད་པར་དུས་ལ་བབ་ནས་ཕོ་བྲང་འཁོར་གྱི་མི་དང་བློན་པོ་དང་། ཡུལ་མི་དག་འདུས་ཏེ་སྨྲས་པ། ཤེས་ལྡན་དག་གང་ཞིག་རྒྱལ་པོར་དབང་བསྐུར་བར་བྱ། དེ་ན་ཁ་ཅིག་གིས་སྨྲས་པ། གང་བསོད་ནམས་དང་དབང་ཆེ་བར་གྲགས་པའོ། །ཁ་ཅིག་གིས་སྨྲས་པ།

དེ་ཇི་ལྟར་ཤེས་པར་བྱ། ཁ་ཅིག་གིས་སྨྲས་པ། རྟོག་པ་དག་བསྐོ་བར་བྱའོ། །དེ་དག་གིས་རྟོག་པ་དག་བསྐོས་ནས་དེ་དག་གིས་ཕན་ཚུན་བཙལ་བར་བརྩམས་པ་དང་། དེ་དག་གིས་ཁྱེའུ་དེ་ཤིང་ལྗོན་པའི་དྲུང་ན་གཉིད་ལོག་པ་མཐོང་ནས། དེ་དག་གིས་དེའི་མཚན་མ་གཟུང་
བར་བརྩམས་པ་དང་། ཇི་ཙམ་ན་ཤིང་ལྗོན་པ་གཞན་དག་གི་གྲིབ་མ་ཤར་ཕྱོགས་སུ་གཞོལ་བ་དང་། ཤར་ཕྱོགས་སུ་འབབ་པ་དང་། ཤར་ཕྱོགས་སུ་བབ་པར་གྱུར་ན་ཤིང་ལྗོན་པ་དེའི་གྲིབ་མས་ཁྱེའུ་དེའི་ལུས་མི་གཏོང་བར་མཐོང་ངོ་། །མཐོང་ནས་ཀྱང་གྲོས་བྱ་བར་
བརྩམས་པ། ཤེས་ལྡན་དག་ཁྱེའུ་འདི་བསོད་ནམས་དང་དབང་ཆེ་བར་གྲགས་པ་ཡིན་གྱིས་འདི་དབང་བསྐུར་བར་བྱའོ། །དེ་དག་གིས་དེ་སད་པར་བྱས་ཏེ་སྨྲས་པ། ཁྱེའུ་རྒྱལ་སྲིད་ལོང་ཤིག །ཁྱེའུས་སྨྲས་པ། ཁོ་བོ་རྒྱལ་སྲིད་དོན་དུ་གཉེར་བ་མ་ཡིན་ཏེ། ཁོ་བོ་ནི་
འཕགས་པ་ཀཱ་ཏྱཱ་ཡ་ན་ཆེན་པོའི་བསྙེན་བཀུར་བ་ཡིན་ནོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཐོས་ནས་ཅི་ཁྱེའུ་འདི་ལ་རྒྱལ་སྲིད་དུ་འགྱུར་བའི་ལས་དག་ཡོད་དམ་མེད་སྙམ་དུ་བསམས་ནས་ཡོད་པར་མཐོང་ནས་དེས་སྨྲས་པ། བུ་རྒྱལ་སྲིད་ལོང་ལ་འདི་ལྟར་ཁྱོད་ཀྱིས་ཆོས་ཀྱིས་
བྱེད་དུ་ཆུག་ཤིག །དེས་མནོས་ཏེ། དེ་དག་གིས་དེ་དབང་བསྐུར་ནས་ཁྱེའུ་སྔོ་བསངས་ཀྱིས་དེར་རྒྱལ་སྲིད་བྱེད་དུ་བཅུག་པས་སྔོ་བསངས་ཀྱི་རྒྱལ་སྲིད་སྔོ་བསངས་ཀྱི་རྒྱལ་སྲིད་ཅེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་བོག་ཀ་ནར་ཕྱིན་ནས། ཚེ་དང་ལྡན་པ་
ཀཱ་ཏྱཱ་ཡ་ན་ཆེན་པོའི་མ་བོག་ཀ་ནར་སྐྱེས་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐོང་ནས་སྨྲས་པ། བུ་ཁྱོད་ཡུན་རིང་ཞིག་ལོན་ནས་མཐོང་ངོ་། །བུ་ཁྱོད་ཡུན་རིང་ཞིག་ལོན་ནས་མཐོང་ངོ་། །དེའི་ནུ་མ་གཉིས་ལས་ཀྱང་འོ་མའི་རྒྱུན་འཛག་གོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་
པོས་དེ་ལ་ཡུམ་ཡུམ་ཞེས་བག་ཕབ་པ་དང་། དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཟན་བྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེའི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་ཁོང་དུ་ཆུད་ནས་གང་ཐོས་ནས། དེས་སྟན་དེ་ཉིད་ལ་འདུག་

བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པར་བྱས་སོ། །དེས་བདེན་པ་མཐོང་
ནས་བཙུན་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་
མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་ཡི་དགས་དག་ནས་ནི་རྐང་
པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། དཀའ་བ་བྱེད་པའི་མ་ལ་ནི། །བུ་ཕོ་བཟང་པོས་གང་བྱ་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་མཐོ་རིས་གཞོལ་བར་གྱུར། །ངན་སོང་དག་ནས་
ལེགས་ཕྱུང་ཞིང་། །ཁྱོད་ཀྱིས་མཐོ་རིས་ཐར་པ་ལ། །རབ་ཏུ་འབད་པས་བདག་བཞག་སྟེ། །ཁྱོད་ཀྱིས་དཀའ་བ་ལེགས་པར་མཛད། །ཚོང་པས་ཁེ་སྤོགས་རྙེད་པ་ལྟར། །མཐོ་རིས་རྙེད་པ་བདག་གིས་རྙེད། །དགེ་བའི་བཤེས་གཉེན་རྣམས་ལ་ནི། །ཉེ་བར་བརྟེན་པ་བཟང་བ་ལགས། །
དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བུ་མོ་བཟང་མོ་དེ་བདེན་པ་དག་ལ་བཞག་ནས་སྨྲས་པ། ཡུམ་བལྟས་ལགས་ཀྱིས་བདག་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་བ་
བྱིན་ནས་དེས་མཆོད་རྟེན་བྱས་ཏེ། དེར་བཙུགས་ནས་ཁར་བའི་མཆོད་རྟེན་ཁར་བའི་མཆོད་རྟེན་ཞེས་བྱ་བའི་མིང་དུ་གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་དབུས་སུ་འགྲོ་འདོད་ནས་ཡུལ་སིན་

དུར་ཕྱིན་པ་དང་། དེ་ནས་བྱང་ལམ་ན་གནས་པའི་ལྷ་མོ་གང་ཡིན་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བདག་ལ་ཡང་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་བསམས་པ། བཅོམ་ལྡན་འདས་
ཀྱིས་ཡུལ་དབུས་སུ་ལྷམ་སྒྲོག་གུ་ཅན་བཅང་བར་མི་བྱའོ་ཞེས་བཀའ་སྩལ་པས་འདི་དེ་ལ་སྦྱིན་ནོ་སྙམ་ནས། དེས་ལྷམ་སྒྲོག་གུ་ཅན་དེ་དེ་ལ་བྱིན་པ་དང་། དེས་གནས་གཞི་བྱེད་དུ་བཅུག་སྟེ་དེར་བཞག་པ་དང་། ཁ་ཅིག་གིས་ནི་ལྷམ་གྱི་དབང་ཕྱུག་ཅེས་བྱ་བར་ཤེས་སོ། །ཁ་ཅིག་
གིས་ལྷམ་གྱི་གཞི་ཞེས་བྱ་བར་ཤེས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐར་གྱིས་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེས་སྨྲས་པ། ཚེ་དང་ལྡན་
པ་དག་ཅུང་ཟད་བདེ་བར་ཡང་བརྒྱུས། ཅུང་ཟད་སྡུག་བསྔལ་བར་ཡང་བརྒྱུས་སོ། །དགེ་སློང་རྣམས་ཀྱིས་སྨྲས་པ། ཇི་ལྟར་བདེ་བར་བརྒྱུས། ཇི་ལྟར་སྡུག་བསྔལ་བར་བརྒྱུས། དེས་སྨྲས་པ། སེམས་ཅན་གྱི་བྱ་བ་བྱས་པ། གང་ཡིན་པ་དེ་དག་ནི་བདེ་བར་བརྒྱུས་པ་
ཡིན་ནོ། །རྒྱལ་པོ་གཙུག་པུད་ཅན་དང་། གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་ཀྱིས་བདག་སས་མནན་པ་གང་ཡིན་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཚེགས་ཆེན་པོས་བྲོས་པ་གང་ཡིན་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ། །
དགེ་སློང་དོན་ཉུང་ངུ་དག་གིས་སྨད་དེ་སྨྲས་པ། དེ་ནི་ཕ་གསོད་པ་ཡིན་ཏེ། དེས་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་པ་ཉེས་པ་མེད་པ་གནོད་པ་མི་བྱེད་པ་བསད་དེ། འདི་ནི་དེའི་མེ་ཏོག་ཙམ་ཡིན་གྱི་འབྲས་བུ་ནི་གཞན་འབྱུང་བར་འགྱུར་རོ། །དགེ་སློང་རྣམས་ཐེ་
ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཨུ་ཏྲ་ཡ་ནས་ལས་ཅི་བགྱིས་ན་དེས་ཕྱུག་པ་ནོར་མང་ལ་ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང་། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་

མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བགྱིས་ནས་མཚོན་གྱིས་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཨུ་ཏྲ་ཡ་ན་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་
བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཨུ་ཏྲ་ཡ་ན་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་
འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་
བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག །སྔོན་བྱུང་བ་