Kinh tạng Tây Tạng (Kangyur Đại Học) — 008_འདུལ་བ།_ཉ

བར་བརྩམས་ཏེ། དེ་ལམ་གྱི་ཕྱེད་དུ་སོན་པ་དང་། བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་
དང་ཆོས་གོས་ཚིག་ནས་དེས་དེར་སོང་བ་དང་། ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་ཁྱོད་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི །གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་
ཞིང་། དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་
གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་
ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ཅིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་
པའམ། གཞན་ཡང་དེ་ལྟ་བུ་གང་ཡིན་པའོ། །དུས་མ་ཡིན་པར་ཞེས་བྱ་བ་ནི་དུས་མ་ཡིན་པ་གཉིས་སུ་སྟེ། སྐྱ་རེངས་མ་ཤར་བ་དང་ཕྱེད་ཡོལ་བར་རོ། །གྲོང་དུ་ཞེས་བྱ་བ་ནི་གང་ན་སྲང་དང་། བཞི་མདོ་དང་། སུམ་མདོ་དག་ཡོད་པར་རོ། །འཇུག་ཅིང་ཞེས་བྱ་བ་ནི་འགྲོ་

ཞིང་ངོ་། །དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་།
ངན་འགྲོ་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་
འགྱུར་ཞེ་ན། དགེ་སློང་གིས་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་མ་ཡིན་པ་ལ་ཡིད་གཉིས་ཟ་བས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་ལ་དུས་མ་ཡིན་པར་འདུ་ཤེས་པས། གྲོང་དུ་འཇུག་ན་ཉེས་བྱས་སུ་འགྱུར་
རོ། །དུས་ལ་ཡིད་གཉིས་ཟ་བས་གྲོང་དུ་འཇུག་ན་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བཙུན་མོ་ཕྲེང་ལྡན་མས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷས་
དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་སྩལ། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་སྩལ་ཅིང་། འཕགས་པ་འཆར་ཀ་ལྷའི་ནི་ཆུང་པོ་གྲོགས་ལགས། བདག་གི་ནི་སློབ་དཔོན་ལགས་ཏེ། དགེ་སློང་རབ་ཏུ་གྲགས་པ་དེ་ལྟ་བུ་ཡང་བཙན་ཐོང་
དུ་བཀུམ་ན་དགེ་སློང་རབ་ཏུ་མ་གྲགས་པ་གཞན་དག་ལ་བཀའ་མཆིད་ཀྱང་སུ་རྨེད་པར་འགྱུར། ལྷས་འཕགས་པ་འཆར་ཀ་དེ་སུས་འགུམས་སུ་སྩལ་བ་དང་སུས་བཀུམ་པ་བཀས་རྨ་བར་ཅི་གནང་། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཞོ་ཤས་འཚོ་བ་དག་ལ་བསྒོ་བ། ཤེས་
ལྡན་དག་དེང་ལ་འཕགས་པ་འཆར་ཀ་དེ་སུས་གསོད་དུ་བཅུག་པ་དང་། སུས་བསད་པ་སྨྲོས་ཤིག །དེ་དག་དེ་རྨེད་ཅིང་ཕྱོགས་དེར་དོང་བ་དང་། དེ་དག་གིས་དེ་ན་བུད་མེད་རྒན་མོ་དེ་མཐོང་ཞིང་། དེས་ནི་དེ་དག་མ་མཐོང་བ་ན། བུད་མེད་རྒན་མོ་དེས་བྱུང་རྒྱལ་དུ་སྨྲས་པ། ཕྱོགས་

འདིར་ཁྱིམ་དད་པར་བྱེད་པ་རྣམས་ཀྱི་མཆོག་དེ་སྦས་པ་ནི་དེ་དང་དེ་དག་གིས་བསད་དོ། །དེ་དག་གིས་དེ་ཐོས་ནས་སྨྲས་པ། རྒན་མོ་ཅི་ཟེར། རྒན་མོ་དེས་སྨྲས་པ། ཅང་མི་ཟེར་རོ། །དེ་དག་གིས་དེ་བཟུང་སྟེ་བསྡིགས་ནས། དེ་སུས་བསད་སྨྲོས་ཤིག་ཅེས་བྱས་པ་དང་། དེས་
སྨྲས་པ། བྲམ་ཟེའི་བུ་མོ་འདིས་གསོད་དུ་བཅུག་གོ། །ཆོམ་རྐུན་པའི་དམག་དཔོན་འདིས་བསད་དོ། །དེ་དག་གིས་ཀྱང་བསྡིགས་ཏེ། ཅི་དེ་གཉིས་ཁོ་ནར་ཟད་དམ་ཞེས་རྨས་པ་དང་། དེས་སྨྲས་པ། གཞན་ཡང་གཡོན་ཅན་ལྔ་བརྒྱ་ཡོད་དོ། །རྒྱལ་པོའི་མི་དེ་དག་
གིས་བྲམ་ཟེའི་བུ་མོ་དེ་དང་། ཆོམ་རྐུན་པའི་དམག་དཔོན་དེ་དང་། གཡོན་ཅན་ལྔ་བརྒྱ་པོ་དེ་དག་བཟུང་སྟེ་རྒྱལ་པོ་ལ་ཕུལ་ནས་སྨྲས་པ། ལྷ་འཕགས་པ་འཆར་ཀ་ནི་བྲམ་ཟེའི་བུ་མོ་འདིས་འགུམས་སུ་སྩལ་ཏེ། ཆོམ་རྐུན་པའི་དམག་དཔོན་འདིས་བཀུམ་མོ། །གཡོན་
ཅན་ལྔ་བརྒྱ་པོ་འདི་དག་གི་དམག་དཔོན་ནི་འདི་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེང་ལ་བྲམ་ཟེའི་བུ་མོ་འདི་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག །ཆོམ་རྐུན་པའི་དམག་དཔོན་འདི་ནི་རྒྱ་སྐྱེགས་ཀྱི་ཁང་པར་ཆུག་ལ་སྲེགས་ཤིག །གཡོན་ཅན་
ལྔ་བརྒྱ་པོ་འདི་དག་ནི་ལག་པ་དང་རྐང་པ་དག་ཆོད་ཅིག །དེ་དག་གིས་བྲམ་ཟེའི་བུ་མོ་དེ་ནི་རྟེའུ་དམུ་རྒོད་ཀྱི་རྐང་པ་གཉིས་ལ་བཏགས་སོ། །ཆོམ་རྐུན་པའི་དམག་དཔོན་དེ་ནི་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །གཡོན་ཅན་ལྔ་བརྒྱ་པོ་དེ་དག་ནི་ལག་པ་དང་རྐང་པ་
དག་བཅད་དོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན། ལས་དེའི་རྣམ་པར་སྨིན་པས་སྡང་བ་མ་མཆིས་པ་དང་། གནོད་པ་མ་བགྱིས་
བཞིན་དུ་དེ་གཉིས་ཀྱིས་བཀུམ་པར་གྱུར་ཅིང་། དེ་གཉིས་ཀྱང་བཀུམ་པར་གྱུར། གཡོན་ཅན་ལྔ་བརྒྱ་པོ་དག་ཀྱང་ལག་པ་དང་རྐང་པ་དག་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་

བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་
རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་
སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་བྱེད་དུ་བཅུག་
པའི་ཚེ་ཉམ་ང་བ་དང་བཅས་པའི་དུས་བྱུང་བ་ན་མུ་སྟེགས་ཅན་དག་གིས་ལོ་བཅུ་གཉིས་སུ་ཐན་པ་འབྱུང་ངོ་ཞེས་ལུང་བསྟན་ནས། རྒྱལ་པོ་ཚངས་བྱིན་གྱིས་དྲིལ་བསྒྲག་པ་བྱེད་དུ་བཅུག་སྟེ། གང་ལ་ལོ་བཅུ་གཉིས་ཀྱི་ཟན་ཡོད་པ་དེ་ནི་འདུག་ཤིག །གང་ལ་མེད་པ་དེ་ནི་སོང་ཤིག་ཅེས་
བསྒོའོ། །དེའི་མདུན་ན་འདོན་དེ་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་ཏུ་འཇུད་པ་དེ་ལ་བྲམ་ཟེའི་ཁྱེའུ་དེ་དག་གིས་སྨྲས་པ། མཁན་པོ་བདག་ཅག་ལ་ལོ་བཅུ་གཉིས་ཀྱི་འཚལ་མ་མ་མཆིས་ཀྱིས་བདག་ཅག་མཆིའོ། །དེས་སྨྲས་པ། བུ་དག་འཁོད་ཅིག་དང་ཁོ་
བོས་ཁྱེད་ལ་མཁོ་བ་བསྟབས་པར་བྱའོ། །རྒྱལ་པོ་ཚངས་བྱིན་གྱི་རྨི་ལམ་ན་བདག་གི་རྒྱུ་མ་དག་གིས་གྲོང་ཁྱེར་ཐམས་ཅད་དཀྲིས་པར་མཐོང་ངོ་། །མཐོང་ནས་ཀྱང་དེ་གཞི་འདིས་བདག་རྒྱལ་སྲིད་ལས་ཉམས་པའམ། ཚེའི་བར་ཆད་འབྱུང་བའམ། གཅིག་ཏུ་མི་འགྱུར་གྲང་སྙམ་དུ་འཇིགས་པ་
སྐྱེས་པར་གྱུར་ནས། དེས་རྨི་ལམ་དེ་མདུན་ན་འདོན་དེ་ལ་བཟླས་པ་དང་། མདུན་ན་འདོན་དེས་བསམས་པ། ལྷས་རྨི་ལམ་བཟང་པོ་ཞིག་གཟིགས་མོད་ཀྱི། འོན་ཀྱང་བྲམ་ཟེའི་ཁྱེའུ་དག་གི་རྙེད་པའི་བར་ཆད་དུ་གྱུར་ན་མི་རུང་གིས། ངན་པར་བསྙད་པར་བྱའོ་སྙམ་ནས།

དེས་རྒྱལ་པོ་ལ་སྨྲས་པ། ལྷས་རྨི་ལམ་ངན་པ་ཞིག་གཟིགས་པས། གཞི་འདིས་རྒྱལ་སྲིད་ལས་ཉམས་པའམ། སྐུ་ཚེའི་བར་ཆད་འབྱུང་བའམ་གཅིག་ཏུ་འགྱུར་རོ། །རྒྱལ་པོས་སྨྲས་པ། འདི་ལ་ཅི་ཞིག་བྱ། དེས་སྨྲས་པ། ལྷ་བ་ལང་གི་མཆོད་སྦྱིན་སྩལ་
བར་བགྱིའོ། །རྒྱལ་པོས་སྨྲས་པ། དེ་ལྟར་བྱའོ། །དེས་བ་ལང་སྟོང་ཕྲག་དུ་མ་དག་བསོགས་པ་དང་། རྒྱལ་པོ་ཕྱིར་བྱུང་ནས་རྒྱལ་པོས་བ་ལང་དེ་དག་མཐོང་བ་དང་། བ་ལང་དེ་དག་གིས་བ་ལང་གི་འུ་སྒྲ་ཆེན་པོ་ཕྱུང་ངོ་། །རྒྱལ་པོས་དེ་དག་མཐོང་ཞིང་ཐོས་ནས། དེ་སྙིང་
རྗེ་སྐྱེས་ཏེ་མདུན་ན་འདོན་ལ་སྨྲས་པ། འདི་དག་ཐམས་ཅད་གསད་པར་བྱའམ། མདུན་ན་འདོན་གྱིས་བསམས་པ། རྒྱལ་པོ་འདི་དག་ཐམས་ཅད་བསད་པར་མི་འདོད་དོ་སྙམ་ནས། དེས་སྨྲས་པ། ལྷ་ཐམས་ཅད་དགུམ་པར་མི་བགྱིའོ། །དེའི་ཚེ་ན་རྔ་བྲན་ཞིག་རྔ་བྲན་མོ་
ཞིག་ལ་རྒྱབ་རྒལ་བྱེད་ནས་མདུན་ན་འདོན་གྱིས་སྨྲས་པ། ལྷ་རྔ་བྲན་དང་རྔ་བྲན་མོ་འདི་གཉིས་དགུམ་པར་བགྱིའོ། །བྲམ་ཟེའི་ཁྱེའུ་དེ་དག་གིས་ཀྱང་ལག་པ་བརྐྱང་སྟེ། འདི་གཉིས་ལགས་སོ་ཞེས་བསྟན་ནས། དེ་གཉིས་བཤས་པ་ན་སེམས་གཡོས་པ། བདག་ཅག་
གཉིས་སྡང་བ་མེད་པ་དང་། གནོད་པ་མ་བྱས་བཞིན་དུ་བསད་པ་གང་ཡིན་པ་དེ་ཐམས་ཅད་ནི་མདུན་ན་འདོན་འདི་དང་། བྲམ་ཟེའི་བུ་ལྔ་བརྒྱ་པོ་འདི་དག་གི་ལེ་ལན་ཡིན་གྱིས། བདག་ཅག་གཉིས་གང་དང་གང་དུ་སྐྱེས་པ་ན། བདག་ཅག་གཉིས་ཀྱིས་མདུན་ན་འདོན་འདི་སྡང་བ་
མེད་པ་དང་། གནོད་པ་མ་བྱས་བཞིན་དུ་གསོད་པ་དང་། བྲམ་ཟེའི་ཁྱེའུ་ལྔ་བརྒྱ་པོ་འདི་དག་ཀྱང་ལག་པ་དང་རྐང་པ་དག་གཅོད་དུ་འཇུད་པར་གྱུར་ཅིག་ཅེས་སྙམ་དུ་དམ་བཅས་སོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཚངས་བྱིན་གང་ཡིན་པ་དེ་ནི་ད་ལྟར་ཀོ་ས་ལར་བྱུང་བའི་རྒྱལ་
པོ་གསལ་རྒྱལ་ཡིན་ནོ། །དེའི་ཚེ་དེའི་དུས་ན་རྒྱལ་པོ་ཚངས་བྱིན་གྱི་བཙུན་མོ་གང་ཡིན་པ་དེ་ནི་ད་ལྟར་བཙུན་མོ་ཕྲེང་ལྡན་མ་ཡིན་ནོ། །དེའི་ཚེ་དེའི་དུས་ན་མདུན་ན་འདོན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་ཡིན་ནོ། །དེའི་ཚེ་དེའི་དུས་ན་བྲམ་ཟེའི་ཁྱེའུ་ལྔ་བརྒྱ་པོ་གང་དག་ཡིན་

པ་དེ་དག་ནི་ད་ལྟར་གཡོན་ཅན་ལྔ་བརྒྱ་པོ་དག་ཡིན་ནོ། །དེའི་ཚེ་དེའི་དུས་ན་རྔ་བྲན་གང་ཡིན་པ་དེ་ནི་ད་ལྟར་ཆོམ་རྐུན་པའི་དམག་དཔོན་ཡིན་ནོ། །དེའི་ཚེ་དེའི་དུས་ན་རྔ་བྲན་མོ་གང་ཡིན་པ་དེ་ནི་ད་ལྟར་བྲམ་ཟེའི་བུ་མོ་ཡིན་ཏེ། མདུན་ན་འདོན་དེ་དང་བྲམ་ཟེའི་ཁྱེའུ་ལྔ་བརྒྱ་པོ་དེ་དག་
གིས་རྔ་བྲན་དང་རྔ་བྲན་མོ་དེ་གཉིས་སྡང་བ་མེད་པ་དང་། གནོད་པ་མ་བྱས་བཞིན་དུ་གསོད་དུ་བཅུག་པའི་ལས་དེའི་རྣམ་པར་སྨིན་པས་ད་ལྟར་ཡང་ཆོམ་རྐུན་པའི་དམག་དཔོན་འདི་དང་། བྲམ་ཟེའི་བུ་མོ་འདི་གཉིས་ཀྱིས་འཆར་ཀ་དང་། གཡོན་ཅན་ལྔ་བརྒྱ་པོ་དག་སྡང་བ་མེད་པ་དང་།
གནོད་པ་མ་བྱས་བཞིན་དུ་གསོད་དུ་བཅུག་གོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས། ཉོན་
མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་མཚོན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་འཆར་ཀ་ཉིད་ཀྱིས་ལས་ཚོགས་རྙེད་
པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། འཆར་ཀ་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་
དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་
ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ། རང་སངས་

རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་འཇིག་རྟེན་དུ་བྱུང་ངོ་། །ཇི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་
རི་དགས་དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་། བྱ་མང་པོ་དག་དྲུངས་དབྱུང་བའི་ཕྱིར་དང་། ཉམས་པར་བྱ་བའི་ཕྱིར་དང་། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང་། རྙི་དང་རྙོང་མང་པོ་དག་
འཛུགས་པར་བྱེད་དོ། །དེའི་རྔོན་སྤྱད་དང་། རྙི་དང་རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས། ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས། དེ་སྔ་དྲོ་ཤམ་ཐབས་
བགོས། ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས།
དེ་རི་བྲགས་ནས་བྱུང་སྟེ། འདི་ནི་ཞི་བའོ་འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས། ལོ་མ་ལྷགས་པ་དག་བླངས་ཏེ་འདུག་ནས་ཟས་
ཀྱི་བྱ་བ་བྱས་ཏེ་ལག་པ་གཉིས་བསྙལ་ནས། ཁ་བཀྲུས་ཏེ་ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས། བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་།
དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ། མཚེའུ་དེ་ག་ལ་བ་དེར་སོང་ནས་དེས་རྔོན་སྤྱད་དང་། རྙི་དང་། རྙོང་དེ་དག་བྱུལ་བར་བརྩམས་པ་དང་། རི་དགས་གཅིག་ཀྱང་མ་མཐོང་ནས། དེ་འདི་སྙམ་དུ་སེམས་ཏེ།

བདག་གི་རྔོན་སྤྱད་དང་། རྙི་དང་། རྙོང་འདི་དག་དོན་ཡོད་པ་ཡིན་ན། གང་གི་ཕྱིར་དེར་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང་། མིའི་རྗེས་མཐོང་ནས་དེ་རྗེས་དེའི་ཕྱི་བཞིན་དུ་སོང་བ་དང་།
རང་སངས་རྒྱས་སྤྱོད་ལམ་ཞི་བས་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས། གལ་ཏེ་བདག་གིས་འདིའི་སྲོག་བཅད་པར་མ་བྱས་ན། འདི་དག་གིས་ངེས་པར་བདག་གི་འཚོ་བ་གཅོད་པར་
བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་
ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་ཉམས་པར་གྱུར་ན་མི་རུང་གིས། ད་འདི་ལ་ལག་ནས་དྲང་བ་ཞིག་བྱའོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་
དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་
སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར། སྟེང་གི་ནམ་མཁའ་
ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ། རྨ་ལྷན་གྱིས་གླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་གླན་པར་མཛད་ན། དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་

བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས། དེའི་ཕྱིར་ད་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་
རྣམ་པ་སྣ་ཚོགས་དག་རྣམ་པར་བསྟན་ནས། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས། དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས། ཕུང་པོ་དེ་འོ་མས་
ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས། ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་དག་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་
སྙན་དག་གིས་མཆོད་པ་བྱས་ནས། རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས།
བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན། རྔོན་པ་གང་ཡིན་པ་དེ་ནི་འཆར་ཀ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱིས་བསྣུན་པ་གང་ཡིན་པའི་ལས་དེའི་
རྣམ་པར་སྨིན་པས། བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མཚེའུ་འགྲམ་དེ་ཉིད་དུ་རི་དགས་སུ་སྐྱེས་ཤིང་། མཚོན་གྱིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་
དེ་མཚོན་གྱིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན། ལས་དེའི་རྣམ་པར་སྨིན་པས་

འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་པ་དང་། འདིས་སྟོན་པ་མཉེས་པར་བགྱིས་ཤིང་། ཐུགས་བྱུང་བར་མ་བགྱིས་པ་དང་། འདི་དུས་ལ་བབ་པའི་ལུས་ལ་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོ་འཁོར་
དང་བཅས་པས། ལུས་ཀྱི་མཆོད་པ་བགྱིས་པ་དེ་ལྟ་བུའི་ཡོན་ཏན་གྱི་ཚོགས་ཐོབ་པར་གྱུར། དགེ་སློང་དག་འཆར་ཀ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་
ཤིང་བསགས་པས། འཆར་ཀ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་
ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་
ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་
གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །གངས་ཀྱི་སུལ་ཞིག་ན་རང་སངས་རྒྱས་ལྔ་བརྒྱ་གནས་ཏེ། དེ་ན་རང་སངས་རྒྱས་གཅིག་ཅིག་ན་བར་གྱུར་ནས་གཞན་དག་གིས་དེ་ལ་སྨྲས་པ། ཁྱོད་བཞུད་ལ་
སྨན་པ་ལ་རྨོས་ཏེ་ཆོ་ག་མཛོད་ཅིག །དེ་རི་བྲགས་གཞན་ཞིག་ཏུ་སོང་ནས་མཚན་མོ་རྫ་མཁན་གྱི་ར་བ་ཞིག་ཏུ་གནས་པར་ཁས་བླངས་པ་དང་། དེ་མཚན་མོ་ན་བར་གྱུར་ནས་དུས་ལ་བབ་བོ། །རྫ་མཁན་དེས་དེ་མཐོང་ནས་དེས་བསམས་པ། རབ་ཏུ་བྱུང་བ་འདི་རྫ་སོ་བཏང་བ་དང་། མ་

བཏང་བ་དག་གི་ནང་དུ་དུས་ལ་བབ་པས་འཇིག་རྟེན་ནི་གཙང་སྦྲ་འདོད་པ་ཡིན་པས། གལ་ཏེ་སྐྱེ་བོ་དག་གིས་ཚོར་བར་གྱུར་ན་འགའ་ཡང་སྣོད་ཉོ་བར་མི་འགྱུར་རོ་སྙམ་ནས། དེས་རང་སངས་རྒྱས་ཀྱི་ལུས་དེ་ཕྱག་དར་གྱི་ཕུང་པོ་ཞིག་ཏུ་སྦས་ཏེ་བཞག་གོ། །རང་སངས་རྒྱས་གཞན་དག་
གིས་བསམས་པ། བདག་ཅག་གི་ཚངས་པ་མཚུངས་པར་སྤྱོད་པ་དེ་གར་སོང་སྙམ་ནས་བལྟས་པ་དང་། ཇི་ཙམ་ན་ཡོངས་སུ་མྱ་ངན་ལས་འདས་པར་མཐོང་ནས་དེ་དག་གིས་དེ་ཉིད་ནས་སྤོས་ཀྱི་ཤིང་དག་སྟེང་གི་ནམ་མཁའ་ལས་ཁྱེར་ཏེ་འོངས་ནས་རྫ་མཁན་གྱི་ར་བར་བབས་པ་དང་།
རྫ་མཁན་གྱིས་དེ་དག་མཐོང་ནས། དེས་སྨྲས་པ། འཕགས་པ་དག་གར་གཤེགས། དེ་དག་གིས་སྨྲས་པ། ཚངས་པ་མཚུངས་པར་སྤྱོད་པ་ལ་མཆོད་པ་བྱེད་དུའོ། །རྫ་མཁན་གྱིས་སྨྲས་པ། འདིས་ཀྱང་ཁྱོད་ཀྱི་ཡོན་ཏན་གྱི་ཚོགས་ལྟ་བུ་དག་ཐོབ་བམ། དེ་དག་
གིས་སྨྲས་པ། ཐོབ་བོ། །རྫ་མཁན་གྱིས་སྨྲས་པ། བདག་གིས་འདི་ལ་བཀུར་སྟི་མ་ལགས་པ་བགྱིས་པས། ད་བཀུར་སྟི་བགྱི་བའི་བར་དུ་ཡུད་ཙམ་ཞིག་གཞེས་སུ་གསོལ། དེ་སོང་སྟེ་རྒྱལ་པོ་ལ་སྨྲས་པ། ལྷ་བདག་གི་ར་བར་རབ་ཏུ་བྱུང་བ་བརྟུལ་ཞུགས་
གྲུབ་པ་ཞིག་དུས་ལ་བབ་ཀྱིས། ལྷས་དེ་ལ་བཀུར་སྟི་མཛད་དུ་གསོལ། རྒྱལ་པོ་བཙུན་མོའི་འཁོར་དང་བཅས་པ་ཕྱིར་བྱུང་ནས། དེས་རང་སངས་རྒྱས་ཀྱི་ལུས་དེ་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་
དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་སོ། །རྫ་མཁན་དེས་
རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས། བདག་འདི་བས་ཆེས་ཁྱད་པར་དུ་འཕགས་

པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་བྱེད་པར་མི་འགྱུར་བ་དང་། བདག་དུས་ལ་བབ་པའི་ལུས་ལ་ཡང་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོའི་འཁོར་དང་བཅས་པ་མཆོད་པ་མཛད་པར་གྱུར་ཅིག་ཅེས་བཏབ་བོ། །དགེ་
སློང་དག་དེའི་ཚེ་དེའི་དུས་ན་རྫ་མཁན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་འདི་ཡིན་ཏེ། འདིས་དེའི་ཚེ་རང་སངས་རྒྱས་དེ་དུས་ལ་བབ་པའི་ལུས་དེ་ཕྱག་དར་གྱི་ཕུང་པོར་སྦས་པའི་ལས་དེའི་རྣམ་པར་སྨིན་པས་ནི་ད་ལྟར་འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་སོ། །འདིས་
དེའི་ཚེ་རང་སངས་རྒྱས་ཀྱི་ལུས་དེ་ལ་མཆོད་པ་བྱས་ཏེ་སྨོན་ལམ་དེ་སྐད་བཏབ་པའི་ལས་དེའི་རྣམ་པར་སྨིན་པས་ནི་ད་ལྟར་འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་ཏེ། འདི་དུས་ལ་བབ་པའི་ལུས་ལ་
སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོ་འཁོར་དང་བཅས་པས་ལུས་ཀྱི་མཆོད་པ་བྱས་པར་གྱུར་ཏོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཁྱིམ་དད་པར་བགྱིད་པ་རྣམས་ཀྱི་མཆོག་ཏུ་བསྟན།
དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན། སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་
སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་
སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་

འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ཀྱང་ཡོན་ཏན་འགའ་ཡང་མ་ཐོབ་སྟེ། བདག་གིས་
ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་
བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་
བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ །ཤཱཀྱའི་རྒྱལ་པོའི་གཙོ་བོ་དེས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས། སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཁྱིམ་དད་པར་བྱེད་པ་རྣམས་ཀྱི་མཆོག་
ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་
སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དུས་མ་ཡིན་པར་འགྲོ་བའི་ལྟུང་བྱེད་དེ་བརྒྱད་བཅུ་པ་རྫོགས་སྷོ།། །།

འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བརྒྱད་པ། སྡོམ་ལ། ཟས་བཅས་སྐྱ་རེངས་ད་གདོད་དང་། །ཁབ་རལ་དང་ནི་ཁྲི་རྐང་དང་། །བདལ་དང་གདིང་བ་གཡན་པ་དང་། །རས་ཆེན་བདེ་གཤེགས་ཆོས་གོས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་
བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེའི་ཁྱིམ་དུ་ཉེ་དགའ་དུས་དང་དུས་སུ་འགྲོ་ཞིང་དེས་དེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་གོ། །དུས་གཞན་ཞིག་ན་དེས་དེ་ལ་རྫས་ལས་བྱུང་བའི་བསོད་ནམས་བྱ་བའི་
གཞི་བདུན་པོ་དག་གི་བསྔགས་པ་རྒྱ་ཆེར་བརྗོད་པ་དང་། དེས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་ཅུང་ཟད་བགྱིའོ། །ཉེ་དགའས་སྨྲས་པ། ལེགས་ཀྱིས་དེ་བཞིན་གྱིས་ཤིག་ཅི་ཞིག་བྱེད། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་
ཚོད་གསོལ་ལོ། །ཁྱིམ་བདག་ཁྱོད་ཀྱིས་སེམས་རྒྱ་ཆེན་པོ་བསྐྱེད་ཀྱིས་གདུགས་ཚོད་གསོལ་ཅིག །འཕགས་པ་ཁྱོད་ཀྱིས་བདག་གི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་བདག་གི་སྡུམ་པར་གདུགས་ཚོད་ལ་སྤྱན་དྲང་བའི་རིགས་སོ། །དེས་དང་དུ་བླངས་སོ། །དེ་ནས་ཚེ་དང་ལྡན་པ་
ཉེ་དགའས་ཁྱིམ་བདག་དེ་ལ་ཨ་རོག་གྱ་ཞེས་བྱས་ཏེ་སོང་ནས་དེ་གཙུག་ལག་ཁང་དུ་སོང་སྟེ། དེས་ཁྱིམ་བདག་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཉེ་དགའས་ཁྱིམ་བདག་དེ་མ་
དད་པ་ཡིན་ན་ཁྱོད་ཀྱིས་ཇི་ལྟར་རྗེས་སུ་འཇུག་པར་བྱས། ཉེ་དགའས་སྨྲས་པ། ཚེ་དང་ལྡན་པ་དག་ཉེ་དགའ་ལ་དེ་ཙམ་ཡང་མི་གནས་སམ། རྗེས་སུ་འཇུག་པར་བྱས་པ་འབའ་ཞིག་ཏུ་མ་ཟད་ཀྱི་སྐྱབས་སུ་འགྲོ་བ་དང་། བསླབ་པའི་གཞི་དག་ལ་ཡང་བཞག་གོ། །དགེ་སློང་རྣམས་ཀྱིས་སྨྲས་པ།
ལེགས་པར་བྱས་ཀྱིས་འདོང་ལ་བཟའ་བར་བྱའོ། །ཆོས་ཉིད་ཀྱིས་ན་གང་གི་ངོར་དགེ་སློང་གི་དགེ་འདུན་སྤྱན་དྲངས་པ་དེ་དུས་སྔར་འགྲོ་བ་ཡིན་པས་ཚེ་དང་ལྡན་པ་ཉེ་དགའ་དུས་སྔར་དེར་སོང་ནས་དེས་ཁྱིམ་བདག་དེ་ལ་སྨྲས་པ། ཁྱིམ་བདག་ཁོ་བོ་ཁྱིམ་དུ་འགྲོ་བའི་ཁྱིམ་དག་ལྟའི་བར་དུ་ཁྱོད་རེ་ཞིག་

ཞལ་ཟས་སྟ་གོན་གྱིས་ཤིག །ཁོ་བོ་མ་འོངས་ཀྱི་བར་དུ་ཡང་ཁྱོད་ཀྱིས་རེ་ཞིག་བྲིམ་པར་མི་བྱའོ་ཞེས་སྨྲས་ཏེ་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱིམ་བདག་དེ་རྒྱུས་མི་ཤེས་པ་ཡིན་པས་དེས་སྤྱན་
འདྲེན་གཏོང་བར་མི་བྱེད་ཀྱིས་དུས་སྔར་ཤེག་ཤིག་དང་འདོང་ངོ་ཞེས་སྒོ་ཞིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་བསྒོ་བ་དང་། དགེ་སློང་རྣམས་ཆས་ཏེ་ལྷགས་སོ། །དེ་ནས་བཅོམ་ལྡན་འདས་དགེ་སློང་གི་
ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་དེའི་ཁྱིམ་ག་ལ་བ་དེར་གཤེགས་ཏེ་སྒོ་དྲུང་ན་གཞེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་དེ་ལ་སངས་རྒྱས་ལ་སོགས་པ་དགེ་
སློང་གི་དགེ་འདུན་སྒོ་དྲུང་ན་གཞེས་ཀྱིས་ཅི་བདེ་གྱིས་ཤིག་ཅེས་སྒོ་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ནང་དུ་སོང་སྟེ། ཁྱིམ་བདག་དེ་ལ་ཁྱིམ་བདག་སངས་རྒྱས་ལ་སོགས་པ་དགེ་སློང་གི་དགེ་འདུན་སྒོ་དྲུང་ན་གཞེས་
ཀྱིས་ཅི་བདེ་གྱིས་ཤིག །ཁྱིམ་བདག་གིས་སྨྲས་པ། འཕགས་པ་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་དག་བཤམས་ཀྱིས་བཞུགས་སུ་གསོལ། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་
ཁྱིམ་བདག་དེའི་མཆིད་ནས་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་བཤམས་ཀྱིས་བཞུགས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་སྐད་ཟེར་ན་ཁྱེད་ཅག་ཁོ་ནའི་ཕྱིར་སྟན་དག་བཤམས་པས་ཅི་བདེ་
བྱས་པར་བརྗོད་པར་བྱ་སྟེ། འདུག་པར་བྱ་ཞིང་འདི་ལ་འགྱོད་པར་མི་བྱའོ། །སངས་རྒྱས་ལ་སོགས་པ་དགེ་སློང་གི་དགེ་འདུན་བཞུགས་པ་དང་ཇི་ཙམ་ན་གདུགས་ཚོད་ལ་བབ་ཏུ་ཉེ་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་

ལ་ཁྱིམ་བདག་ལ་གདུགས་ཚོད་ལ་བབ་ཏུ་ཉེ་བས་ཞལ་ཟས་བྲིམས་ཤིག །ཟས་འདིས་ཁྱོད་ལ་ཅི་ཞིག་བྱ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང་། དེས་སྨྲས་པ།
འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་
མཆིད་ནས་ཉེ་དགའ་མཆིས་སམ་ཞེས་མཆི་ནས་བདག་གིས་མ་མཆིས་སོ་ཞེས་བགྱིས་པ་དང་། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་ཡུད་ཙམ་ཞིག་གཞེས་ནས་ཡང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་
དགའ་བོ་སོང་ལ་ཁྱིམ་བདག་ལ་གདུགས་ཚོད་ལ་བབ་ཀྱིས་ཞལ་ཟས་བྲིམས་ཤིག །ཟས་རུལ་བར་གྱུར་པ་འདིས་ཁྱོད་ལ་ཅི་བྱ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང་། དེས་སྨྲས་པ།
འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་
མཆིད་ནས་ཉེ་དགའ་མཆིས་སམ་ཞེས་མཆིས་ནས། བདག་གིས་མ་མཆིས་སོ་ཞེས་བགྱིས་པ་དང་། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་སོང་ལ་ཁྱིམ་བདག་ལ་ཉེ་དགའ་འོངས་པར་
མ་གྱུར་ན་ཟན་སྦྱིན་པར་མི་བྱེད་དམ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་དེ་སྐད་སྨྲས་པ་དང་། དེས་སྨྲས་པ། འཕགས་པ་མི་གསོལ་ལོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་

བོས་གསོལ་པ། བཅོམ་ལྡན་འདས་མི་གསོལ་ལོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། གཞན་དབང་ཐམས་ཅད་སྡུག་བསྔལ་ཏེ། །བདག་དབང་ཐམས་ཅད་བདེ་བ་ཡིན། །ཐུན་མོང་དག་གིས་གནོད་བྱེད་དེ། །འབྲེལ་པ་ཤིན་ཏུ་འདའ་
བར་དཀའ། །ཇི་ཙམ་ན་གདུགས་ཚོད་ཀྱི་མཐའ་ལ་བབ་པ་ན་ཉེ་དགའ་འོངས་ནས་དེས་སྨྲས་པ། ཁྱིམ་བདག་མི་འབྲིམ་པར་ཅི་སྡོད། དེས་སྨྲས་པ། འཕགས་པ་ཁྱོད་ཀྱི་ཞལ་ནས་ཁོ་བོ་མ་འོངས་ཀྱི་བར་དུ་རེ་ཞིག་བྲིམ་པར་མི་བྱའོ་ཞེས་བྱུང་ལ་ད་འདི་སྐད་ཅེས་གསུང་ངམ། ཉེ་དགའ་ཤགས་མེད་ནས་ཅང་
མི་སྨྲ་བར་འདུག་གོ། །དེ་ནས་ཁྱིམ་བདག་དེས་བྲིམ་པར་བརྩམས་པ་དང་། ཇི་ཙམ་ན་གདུགས་ཚོད་ཡོལ་ནས་དགེ་སློང་ཁ་ཅིག་གིས་ནི་ཟན་ཐོབ་ནས་ཟན་བཅད་པ་བྱས། ཁ་ཅིག་གིས་ནི་ཟན་མ་ཐོབ་པ་ཁོ་ནར་ཟན་བཅད་པ་བྱས་ནས་བཅོམ་ལྡན་འདས་ཀྱིས་ཡོན་བཤད་པ་མཛད་དེ་གཤེགས་སོ། །
ཉེ་དགའ་ངོ་ཚ་བར་གྱུར་པའི་སྙིང་གིས་དེ་ཉིད་དུ་འདུག་གོ། །དེའི་ཉིན་མོ་གསོ་སྦྱོང་གི་ཞལ་ཏ་པ་རྒན་པའི་མཐའ་ལོགས་སུ་འདུག་སྟེ། དགེ་སློང་རྣམས་ལ་ཡང་དག་པར་བསྒོ་ཞིང་སྨྲས་པ། བཙུན་པ་ཉེ་དགའ་མ་མཆིས་སམ། འགའ་ཞིག་གིས་དེའི་འདུན་པ་བླངས་སམ། དགེ་སློང་རྣམས་ཀྱིས་
སྨྲས་པ། དེ་མ་འོངས་ཏེ་སུས་ཀྱང་དེའི་འདུན་པ་ཡང་མ་བླངས་སོ། །དགེ་སློང་གཞན་དག་གིས་སྨྲས་པ། ཚེ་དང་ལྡན་པ་དག་ཉེ་དགའས་བདག་ཅག་སྔ་དྲོ་ཟང་ཟིང་གི་ཆེད་ལ་ཆེས་ཐོ་བཙམས་ལ། ད་ནི་ཆོས་ཀྱི་ཆེད་ལ་ཐོ་འཚམ་པར་བྱེད་དོ། །དགེ་སློང་དོན་ཆུང་ངུ་དག་ཅིའི་ཕྱིར་དགེ་སློང་དག་ཟས་དང་བཅས་
པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་འདི་ལ་
དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཟས་དང་བཅས་པའི་ཁྱིམ་

དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་
རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་
བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་
ལྟར་བཅའ་བ་མཛད་དོ།། །།དགེ་སློང་ནད་ངན་ཅན་དག་འཁོད་པ་དག་གིས་ཡུན་རིང་དུ་འདུག་མི་ནུས་ནས་དགེ་སློང་ནད་གཡོག་རྣམས་ཀྱིས་ནད་པའི་བྱ་བ་ཉམས་པར་བྱེད་ཅིང་། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་ནས་བཅོམ་ལྡན་འདས་ཀྱིས་བཀའ་
སྩལ་པ། ཁྱིམ་པ་འདུག་པ་ལ་བསྒོ་བར་བྱའོ། །བཅོམ་ལྡན་འདས་ཀྱིས་ཁྱིམ་པ་འདུག་པ་ལ་བསྒོ་བར་བྱའོ། །ཞེས་བཀའ་སྩལ་ནས། དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས། དགེ་སློང་དེས་དེར་འགྲོ་བར་བརྩམས་ཏེ། དེ་ལམ་གྱི་ཕྱེད་
དུ་སོན་པ་དང་། བདག་གིས་ཁྱིམ་པ་འདུག་པ་ལ་མ་བསྒོའོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་ཁྱིམ་པ་འདུག་པ་ལ་བསྒོ་བར་བྱེད་པ་དེ་སྲིད་དུ་དེའི་ལྷུང་བཟེད་དང་། ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན།
དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི །གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ། །ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་

བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་
པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་
པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་ཕྱི་དྲོ་ཁྱིམ་དག་ཏུ་རྒྱུ་ཞིང་ཁྱིམ་པ་འདུག་པ་ལ་མི་སྒོ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཟས་དང་བཅས་པའི་ཞེས་བྱ་བ་ནི་མགྲོན་དུ་བོས་པ་
དང་བཅས་པའིའོ། །ཁྱིམ་དུ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་དུའོ། །མགྲོན་དུ་བོས་ནས་ཞེས་བྱ་བ་ནི་བསོད་སྙོམས་ཀྱི་ཕྱིར་རོ། །སྔ་དྲོ་ཞེས་བྱ་བ་ནི་སྔ་དྲོ་ཉིད་དེ་ཁྱིམ་གཉིས་ལས་ལྷག་པར་རྒྱུ་ནའོ། །ཕྱི་དྲོ་ཞེས་བྱ་བ་ནི་ཕྱི་དྲོ་ཉིད་དེ་ཁྱིམ་གསུམ་ལས་ལྷག་པར་རྒྱུ་ནའོ། །ཁྱིམ་དག་ཏུ་
ཞེས་བྱ་བ་ནི་བྲམ་ཟེ་དང་། ཁྱིམ་བདག་གི་ཁྱིམ་དག་ཏུའོ། །རྒྱུ་ཞིང་ཞེས་བྱ་བ་ནི་འགྲོ་ཞིང་ངོ་། །ཁྱིམ་པ་འདུག་པ་ལ་མི་སྒོ་ན་ཞེས་བྱ་བ་ནི་དེ་ན་ཁྱིམ་པ་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་
དམྱལ་བ་དང་། དུད་འགྲོ་དང་ཡི་དགས་ངན་སོང་དང་ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན། དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་
བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་ཁྱིམ་གཉིས་ལས་ལྷག་པར་རྒྱུ་ཞིང་ཕྱི་དྲོ་ཡང་ཁྱིམ་གསུམ་ལས་ལྷག་པར་རྒྱུ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེའི་ངོར་མགྲོན་དུ་

བོས་པ་མ་ཡིན་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གྲོང་རྒྱུ་བའི་ལྟུང་བྱེད་དེ་བརྒྱད་བཅུ་རྩ་གཅིག་པ་རྫོགས་སྷོ།། །།སྒོ་གཏན་གྱི་བསླབ་པའི་གཞིའི་བར་སྡོམ་ལ། དགའ་བོ་
ཉེ་དགའ་ཞག་བདུན་དང་། །བཟང་བྱིན་སྡུམས་བྱེད་ཚུལ་ཁྲིམས་དང་། །ནག་པོ་ཚིགས་བཅད་འཆར་ཀ་དང་། །བཅུ་དང་བསླབ་གཞིའི་རིམ་པ་དང་། །གྲོང་ཁྱེར་གཉིས་དང་གཡུལ་གཞི་དང་། །ལྷ་མོ་ཁར་ཕོར་འཕྱང་བ་དང་། །སྔོ་བསངས་རྒྱལ་སྲིད་པོག་ཀ་ན། །མ་ལ་ཁར་བ་བྱིན་པ་དང་། །ལྷམ་
གྱི་དབང་ཕྱུག་མཉན་ཡོད་དང་། །སྔོན་གྱི་ཚུལ་དང་ནོར་བཟངས་དང་། །དྲང་སྲོང་རྣམས་དང་གཙུག་ལག་ཁང་། །མགུ་བྱེད་དང་ནི་གཟུངས་བྱེད་དང་། །སྟོང་ཐུབ་དང་ནི་འབྲོག་གནས་དང་། །ལག་བརྒྱུད་དང་ནི་སྔོ་བསངས་ཅན། །མི་གདུང་རྣམས་སུ་སྐྱེས་པ་དང་། །དཔའ་ཆེན་དང་ནི་སྒུར་མཆོག་དང་། །
དཔེ་མེད་མ་དང་ལྕགས་མགར་དང་། །སིང་ག་ལ་དང་ཤར་པ་དང་། །སྙན་སྨྲ་དང་ནི་ཚིག་པ་དང་། །སྒུར་དང་ཐོས་པ་འཛིན་པ་དང་། །བྲན་མོ་དང་ནི་བྲམ་ཟེ་མོ། །མགུ་བྱེད་དཔལ་ལྡན་གྱུར་པ་དང་། །ཤཱ་རིའི་བུ་ནི་ཞུགས་པ་དག །སྒོ་གཏན་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་
མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགོན་པ་དང་ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩྭ་སྤྱིལ་དང་། བླ་གབ་མེད་པ་དང་།
དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་འདི་དག་ཏུ་བསམ་གཏན་གྱིས་ཤིག །དགེ་སློང་དག་བག་ཡོད་པར་བསྒྲུབས་ལ་ཕྱིས་འགྱོད་པར་མི་འགྱུར་བར་གྱིས་ཤིག །འདི་ནི་ངའི་གདམས་ངག་དང་རྗེས་སུ་བསྟན་པ་ཡིན་ནོ། །བཅོམ་ལྡན་འདས་ཀྱིས་དགེ་སློང་
རྣམས་ལ་དེ་སྐད་ཅེས་བཀའ་སྩལ་ནས། དགེ་སློང་རྣམས་དགོན་པ་དང་། ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩྭ་སྤྱིལ་དང་། བླ་གབ་མེད་པ་དང་། དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་དག་ཏུ་ཞུགས་ཏེ། ཁ་ཅིག་ནི་རི་

རབ་ཀྱི་བང་རིམ་ན་བསམ་གཏན་བྱེད། ཁ་ཅིག་ནི་གསེར་གྱི་རི་བདུན་པོ་དག་ལ། ཁ་ཅིག་ནི་མཚོ་ཆེན་པོ་མ་དྲོས་པ་ན། ཁ་ཅིག་ནི་རྫིང་བུ་དལ་གྱིས་འབབ་པ་ན། ཁ་ཅིག་ནི་རྣལ་འབྱོར་པའི་སྐྱེ་བོ་དང་རྗེས་སུ་མཐུན་པའི་གྲོང་དང་། གྲོང་རྡལ་དང་། ཡུལ་དང་ཡུལ་འཁོར་དང་། རྒྱལ་པོའི་ཕོ་བྲང་
གི་ཕྱོགས་དེ་དང་དེ་དག་ན་བསམ་གཏན་བྱེད་དོ། །རིའི་རྒྱལ་པོ་རི་རབ་དཔག་ཚད་བརྒྱད་ཁྲི་ནི་ཆུའི་ནང་དུ་ནུབ། དཔག་ཚད་བརྒྱད་ཁྲི་ནི་ཆུ་ལས་མངོན་པར་འཕགས་ཏེ་དེ་ལ་དཔག་ཚད་འབུམ་དྲུག་ཁྲི་ཡོད་དོ། །རིའི་རྒྱལ་པོ་རི་རབ་ཀྱི་ངོས་རེ་རེ་ལ་དཔག་ཚད་བརྒྱད་ཁྲི་བརྒྱད་ཁྲི་ཡོད་དེ། དེ་དག་ལ་དཔག་
ཚད་སུམ་འབུམ་ཉི་ཁྲི་ཡོད་དོ། །རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་བྱས་པ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། དེར་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་པར་གནས་པས་
འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་སྟེ། དེས་རི་རབ་
ཀྱི་བང་རིམ་ལ་གནས་པའི་རི་དགས་དང་། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དེ་ན་དགེ་སློང་གང་དག་རི་རབ་ཀྱི་བང་རིམ་ན་བསམ་གཏན་བྱེད་པ་དེ་དག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་
གྱུར་ནས་དེ་དག་དབྱར་གྱི་ཟླ་བ་གསུམ་པོ་དག་འདས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་ལྷགས་པ་དང་། དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁྱེད་ཅག་ག་ལས་འདིར་འོངས།
ཁྱེད་ཅག་དབྱར་གང་དུ་གནས་པར་ཁས་བླངས། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་རི་རབ་ཀྱི་བང་རིམ་ནས་འདིར་འོངས་སོ། །བདག་ཅག་རི་རབ་ཀྱི་བང་རིམ་དུ་དབྱར་གནས་པར་ཁས་བླངས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་

ཕྱིར་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་གྱུར། དེ་དག་གིས་སྨྲས་པ་ཚེ་དང་ལྡན་པ་དག་རི་རབ་ཀྱི་བང་རིམ་དུ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་
པར་གནས་པ། ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་
སྟེ། དེས་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །བདག་ཅག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་གྱུར་ཏོ། །དགེ་སློང་རྣམས་ཀྱིས་སྨྲས་
པ། ཚེ་དང་ལྡན་པ་དག་ཁྱེད་ཀྱིས་དེ་གཉིས་གདུལ་བར་མི་ནུས་སམ། དེ་དག་གིས་སྨྲས་པ། ཚེ་དང་ལྡན་པ་དག་རེ་ཞིག་དེ་གཉིས་བདག་ཅག་གིས་གདུལ་བ་མ་ཡིན་ནོ། །འོ་ན་སུས་གདུལ་བ་ཡིན། ཉན་ཐོས་ཆེན་པོས་གདུལ་བ་ཡིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་
འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགོངས་པ། དེ་གཉིས་གང་གིས་གདུལ་བ་ཡིན་སྙམ་ན། དགེ་སློང་མཽད་གལ་གྱི་བུ་ཆེན་པོས་གདུལ་བ་ཡིན་པར་གཟིགས་ཤིང་མཁྱེན་ནས། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་རི་རབ་ཀྱི་བང་རིམ་
ན་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ལ་སོམས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་མཉན་ཡོད་ནས་མི་སྣང་
བར་གྱུར་ཅིང་། རི་རབ་ཀྱི་བང་རིམ་དུ་སོན་པར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་སོ། །དེའི་ཚེ་ན་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་གཉིད་ལོག་པར་གྱུར་ནས་དེས་སེ་གོལ་གྱིས་སད་པར་བྱ་བར་བརྩམས་ན་དེ་གཉིས་མ་སད་དོ། །དེས་དེ་གཉིས་ཀྱི་སྟེང་དུ་

བཅག་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་དེ་གཉིས་ཀྱི་ལྟོར་ཞུགས་ཏེ་སྤྲིན་ཆེན་པོ་བཞིན་དུ་འབྲུག་བསྒྲགས་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་ཀླུ་ཆེན་པོའི་ལུས་ཀྱིས་རིའི་རྒྱལ་པོ་རི་རབ་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་པ་
དང་། དེ་གཉིས་ཁུར་ལྕི་བས་མནན་པས་སད་དེ་ཇི་ཙམ་ན་ཀླུ་ཆེན་པོ་ཞིག་གིས་བདག་ཅག་གཉིས་མནན་པར་མཐོང་ནས་དེ་གཉིས་ཀྱིས་བསམས་པ། ཀླུ་རྫུ་འཕྲུལ་ཆེན་པོ་ཞིག་བྱུང་སྟེ་བདག་ཅག་གཉིས་གནས་འདི་ནས་ཉམས་པར་གྱུར་གྱིས་བྲོས་ཏེ་འདོང་ངོ་སྙམ་དུ་རིག་ནས་སྐྲག་སྟེ།
བྲམ་ཟེའི་ཁྱེའུའི་ཁ་དོག་ཏུ་བདག་ཉིད་མངོན་པར་སྤྲུལ་ནས་འབྲོས་པར་བརྩམས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས། དེ་གཉིས་ཀྱི་མདུན་དུ་འདུག་སྟེ་སྨྲས་པ། ཀླུའི་དབང་པོ་གཉིས་གར་འདོང་། དེ་གཉིས་ཀྱིས་སྨྲས་པ།
ཀླུ་རྫུ་འཕྲུལ་ཆེན་པོ་ཞིག་བྱུང་སྟེ། བདག་ཅག་གཉིས་འདི་ནས་ཉམས་པར་གྱུར་གྱིས་འབྲོས་སུ་འགྲོའོ། །དེས་སྨྲས་པ། ཚུར་ཤོག་ཀླུ་དེ་ཅི་འདྲ་བ་བལྟའོ། །དེ་གཉིས་དེ་དང་ལྷན་ཅིག་ཕྱིར་ལོག་པ་དང་། ཇི་ཙམ་ན་མི་སྣང་ནས་དེ་གཉིས་ཀྱིས་སྨྲས་པ། འཕགས་པས་བདག་
ཅག་གཉིས་ལ་ཀུ་རེ་མ་བགྱིས་སམ། དེས་སྨྲས་པ། དེ་ཡིན་ནོ་འོ་ན་བདག་ཅག་གཉིས་ཀྱིས་ནོངས་པ་ཅི་བགྱིས། རྒ་བའི་ཆོས་ཅན་ཁྱེད་གཉིས་ཀྱིས་སངས་རྒྱས་ཀྱི་ཕོ་ཉ་འོངས་པ་ལ་མ་བསམས་སོ། །འཕགས་པ་ཁྱོད་སངས་རྒྱས་ཀྱི་ཕོ་ཉ་ལགས་སམ། སངས་རྒྱས་ཀྱི་ཕོ་ཉ་ཡིན་ནོ། །
འཕགས་པ་གལ་ཏེ་ཁྱོད་སངས་རྒྱས་ཀྱི་ཕོ་ཉ་ལགས་ན་བདག་ཅག་གཉིས་ཀྱིས་ཅི་བགྱི་བ་སྩལ་དུ་གསོལ། ཚུར་ཤོག་བཅོམ་ལྡན་འདས་ཀྱི་སྤྱན་སྔ་ཁོ་ནར་འདོང་ངོ་། །འཕགས་པ་མ་ནོངས་ཏེ་དེ་བཞིན་བགྱིས་བཞུད་དོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཀླུའི་
རྒྱལ་པོ་དགའ་བོ་དང་། ཉེ་དགའ་གཉིས་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་

འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གང་གི་སླད་དུ་བདག་ལ་བཀའ་སྩལ་པའི་ཀླུའི་རྒྱལ་པོ་དགའ་བོ་དང་ཉེ་དགའ་དེ་གཉིས་ནི་འདི་ལགས་སོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་ལ་འདི་སྐད་ཅེས་བཀའ་སྩལ་ཏོ། །ཀླུའི་
དབང་པོ་ཁྱེད་གཉིས་སྔོན་གྱི་ཉེས་པར་སྤྱད་པས་ཀླུའི་སྐྱེ་གནས་ངན་པར་སྐྱེས་ཤིང་ཁྱེད་གཉིས་ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་། རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོགས་པ། གཞན་གྱི་སྲོག་བཅད་པས་འཚོ་བར་བྱེད་དེ། འདི་ནས་
ཤི་འཕོས་ན་ཁྱེད་གཉིས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་གཉིས་ཀྱིས་ཅི་ཞིག་བགྱི་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་ཚུར་ཤོག་ངའི་
དྲུང་དུ་སྐྱབས་སུ་འགྲོ་བ་དང་། བསླབ་པའི་གཞི་དག་ལོང་ལ་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་རྣམས་ལ་མི་འཇིགས་པ་བྱིན་ཅིག །དེ་གཉིས་ཀྱིས་གསོལ་པ། བཙུན་པ་བདག་ཅག་གཉིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང་། བསླབ་པའི་གཞི་དག་ལེན་
ཅིང་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་རྣམས་ལ་མི་འཇིགས་པ་སྩོལ་ཏོ། །དེ་གཉིས་ཀྱིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་
སྤྱན་སྔ་ནས་དོང་ངོ་། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ཀླུའི་ནང་དུ་སྐྱེས། ལས་ཅི་བགྱིས་ན་དེས་རིན་
པོ་ཆེ་སྣ་བཞི་ལས་བགྱིས་པའི་གནས་མངོན་པར་གྲུབ་ཅིང་ལྷའི་བདུད་རྩིའི་ཟས་དང་སྦྲང་རྩིའི་ཆང་གི་བཏུང་བ་དང་། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར། ལས་ཅི་བགྱིས་ན་དེས་ན་བསྐལ་པར་གནས་པ་ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་

རྔོ་མི་ཐོག་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་གཉིས་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་། བསགས་པས་འདི་གཉིས་ཀྱིས་ལས་བྱས་ཤིང་།
བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་
དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །
དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་
ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་ཚེ་ན་གྲོང་ཁྱེར་བཱ་རཱ་ཎ་སཱི་ན་
རྒྱལ་པོ་ཀྲྀ་ཀཱི་ཞེས་བྱ་བ་རྒྱལ་སྲིད་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང་། བ་ལང་དང་མ་ཧེ་ཕུན་སུམ་ཚོགས་
པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །རྒྱལ་པོ་ཀྲྀ་ཀཱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་

འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་ཞེས་ཐོས་སོ། །ཐོས་ནས་ཀྱང་
རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ། རྒྱལ་པོ་ཀྲྀ་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་
བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་ཀུན་དུ་འགྲོ་བ་ལྟར་བཟང་བ་མཐོང་ངོ་། །མཐོང་མ་དག་ཏུ་རྒྱལ་པོ་ཀྲྀ་ཀཱི་བཅོམ་ལྡན་འདས་འོད་སྲུང་ལ་ཤིན་ཏུ་དད་པ་སྐྱེས་ནས་ཡང་དག་པར་རྫོགས་
པའི་སངས་རྒྱས་འོད་སྲུང་ག་ལ་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲྀ་ཀཱིའི་བསམ་པ་དང་། བག་ལ་ཉལ་དང་། ཁམས་
དང་རང་བཞིན་ཐུགས་སུ་ཆུད་ནས་གང་ཐོས་ན། རྒྱལ་པོ་ཀྲྀ་ཀཱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་
རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་
གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་

དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་
བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་
ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །ཞེས་སྨྲས་ཏེ་སྟན་ལས་ལངས་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལན་གསུམ་
བསྐོར་བ་བྱས་ཏེ་ཞབས་གཉིས་ལ་མགོ་བོས་ཕྱག་འཚལ་ནས་སོང་ངོ་། །གང་གི་ཚེ་རྒྱལ་པོ་ཀྲྀ་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བ་དེའི་ཚེ་ན་དེ་དོན་གྱི་གནས་སུ་འདུག་སྟེ། བློན་པོ་དང་གྲོང་ཁྱེར་པ་དང་། ཡུལ་མི་རྣམས་ལ་སྨྲས་པ།
ཀྭའི་བློན་པོ་དང་། གྲོང་ཁྱེར་པ་དང་། ཡུལ་མི་དག་ཉོན་ཅིག །ངས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བས་ད་ངས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་མི་ནུས་ཀྱིས་དེའི་ཕྱིར་ཁྱེད་ཀྱིས་གཞོན་ནུ་ལེགས་
སྐྱེས་རྒྱལ་སྲིད་ཀྱི་དབང་ཕྱུག་གི་བདག་པོར་ཞོག་ཤིག །ང་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྲ་དང་། ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ལ་བློན་པོའི་མཆོག་དགའ་
བོ་དང་། ཉེ་དགའ་ཞེས་བྱ་བ་གཉིས་ཤིག་ཡོད་པ་དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་སྨྲས་པ། ལྷས་མཚན་མ་ཙམ་འབའ་ཞིག་མཛོད་ཅིག་དང་བདག་ཅག་གཉིས་ཀྱིས་ཆོས་ཀྱིས་ལྷའི་རྒྱལ་སྲིད་བགྱིད་དུ་སྩལ་ཏོ། །རྒྱལ་པོས་སྨྲས་པ། གལ་ཏེ་དེ་ལྟ་ན་བྱེད་

དུ་ཆུག་ཤིག །དེ་གཉིས་ཀྱིས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་གཉིས་ཀྱི་ཉེ་དུ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་དེ་དག་དེ་གཉིས་
ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག །ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག །དེ་གཉིས་ཀྱིས་དེ་དག་ལས་ཐོས་ནས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་
བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་དག་ཡང་དེ་གཉིས་ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག །ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག །སེམས་ཅན་དམྱལ་
བ་ལ་གཞོལ་བར་འགྱུར་བར་མ་བྱེད་ཅིག །དེ་གཉིས་ཀྱིས་སྨྲས་པ། འཕགས་པ་དག་བདག་ཅག་བློན་པོ་དག་ནི་རྒྱལ་སྲིད་བགྱིད་དུ་སྩོལ་བ་གསང་ཚིག་མཐུན་པས་འཚོ་བ་ལགས་པས་གཅིག་ཏུ་ཆོས་ཀྱིས་རྒྱལ་སྲིད་བགྱིད་དུ་སྩོལ་བའི་རྔོ་མི་ཐོག་སྟེ། ངེས་པར་ཁོ་ནར་ཁྱད་པར་
ཅན་མ་ལགས་པ་དག་ནི་ཚར་བཅད་པར་བགྱི་ཞིང་ཁྱད་པར་ཅན་དག་ནི་ཡོངས་སུ་བསྐྱང་བར་བགྱི་འཚལ་ལོ། །དེ་དག་གིས་སྨྲས་པ། གལ་ཏེ་དེ་ལྟ་ན་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་ཆུག་ལ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་
དགེ་འདུན་དང་བཅས་པ་ལ་ཕུལ་ལ། དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་བྱིན་ཅིག །དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ཅིག་དང་། དེས་ཁྱོད་གཉིས་ལ་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །དེ་གཉིས་ཀྱིས་
སྨྲས་པ། འཕགས་པ་དག་མ་ནོངས་ཀྱིས་དེ་བཞིན་བགྱིའོ་ཞེས་དེ་གཉིས་ཀྱིས་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ཞིང་། དགེ་སློང་རྣམས་ལ་ནི་

གཞོན་ནུའི་ཡོངས་སུ་སྤང་བ་བྱིན། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ནོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཀྲྀ་ཀཱིའི་བློན་པོའི་མཆོག་དགའ་བོ་དང་། ཉེ་དགའ་ཞེས་བྱ་བ་དེ་གཉིས་ནི་ད་ལྟར་ཀླུའི་རྒྱལ་པོ་དགའ་བོ་དང་། ཉེ་དགའ་འདི་གཉིས་ཡིན་
ཏེ། དེ་གཉིས་ཀྱིས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པ་གང་ཡིན་པ་དེས་ནི་ཀླུ་རྣམས་ཀྱི་ནང་དུ་སྐྱེས་སོ། །ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་
བཅས་པ་ལ་ཕུལ་བ་གང་ཡིན་པ་དེས་ནི་རིན་པོ་ཆེ་སྣ་བཞི་ལས་བྱས་པའི་གནས་མངོན་པར་གྲུབ་ཅིང་ལྷའི་བདུད་རྩིའི་ཟས་དང་། སྦྲང་རྩིའི་ཆང་གི་བཏུང་བ་དང་། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར་ཏེ། དགེ་སློང་རྣམས་ལ་གཞོན་ནུའི་ཡོངས་སུ་སྤང་བ་བྱིན་པ་
དང་། དགེ་སློང་མ་རྣམས་ལ་བཙུན་མོའི་འཁོར་གྱི་ཡོངས་སུ་སྤང་བ་བྱིན་པ་གང་ཡིན་པ་དེས་ནི་བསྐལ་པར་གནས་པ། ས་འཛིན་པ་འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་
སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་
སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཀོད་པ་དེའི་ཚེ་ན་དེ་གཉིས་ཚེས་བརྒྱད་
དང་། ཚེས་བཅུ་བཞི་དང་། ཚེས་བཅོ་ལྔ་ལ་རི་རབ་ཀྱི་བང་རིམ་དུ་འོངས་ནས་བཅོམ་ལྡན་འདས་ལ་བསྙེན་བཀུར་བྱེད་དོ། །དེ་གཉིས་གང་གི་ཚེ་མཚན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་གཞལ་མེད་ཁང་པའི་ཆ་ལུགས་ཀྱིས་བསྙེན་བཀུར་བྱེད་ཅིང་། གང་གི་ཚེ་ཉིན་མོ་

བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་ཁྱིམ་བདག་གི་ཆ་ལུགས་ཀྱིས་བསྙེན་བཀུར་བྱེད་དོ། །དུས་གཞན་ཞིག་ན་དེ་གཉིས་ཉིན་མོ་ཁྱིམ་བདག་གི་ཆ་ལུགས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་ངོ་། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་རྒྱལ་
བྱེད་ཀྱི་ཚལ་ག་ལ་བ་དེར་སོང་ངོ་། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་རྒྱལ་པོ་དེ་གང་གི་ཚེ་བཅོམ་ལྡན་འདས་ཀྱི་སྤྱན་སྔར་འགྲོ་བ་དེའི་ཚེ་ན་བདག་བཅོམ་ལྡན་འདས་ཀྱི་སྤྱན་སྔར་སོང་བ་ན་འགའ་ཞིག་བདག་ལ་མངོན་སུམ་དུ་ལྡང་བར་མི་འགྱུར་བ་མེད་གྲང་སྙམ་ནས་མི་དག་པའི་མཐའ་
ཅན་གཏོང་བར་བྱེད་པ་ཡིན་པས་དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རྒྱལ་བྱེད་ཀྱི་ཚལ་གྱི་སྒོར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀྭའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག །མི་དག་པའི་མཐའ་ཅན་དེས་ལྷ་བཀའ་བཞིན་
འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང་། ཇི་ཙམ་ན་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བྱེད་པ་མཐོང་ངོ་། །མཐོང་ནས་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་
སྟེ་ཕྱིན་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་གསོལ་ཏོ། །ལྷ་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བགྱིད་དེ་དེ་གཉིས་ལྷའི་ཡུལ་ན་གནས་པ་དག་ལགས་གོར་མ་བཀུམ་མོ། །རྒྱལ་པོས་བསམས་པ། ཁྱིམ་བདག་དེ་གཉིས་བདག་གི་
ཡུལ་ན་གནས་པ་ཡིན་པས་དེ་གཉིས་ཀྱིས་བདག་མཐོང་ན་མངོན་དུ་ལྡང་བར་འགྱུར་གྲང་སྙམ་ནས་དེ་བཅོམ་ལྡན་འདས་ག་ལ་བ་དེར་སོང་ངོ་། །ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་
དེ་གཉིས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས་རེ་ཞིག་དམ་པའི་ཆོས་ལ་བསྙེན་བཀུར་བགྱིའམ། འོན་ཏེ་རྒྱལ་པོ་ལ་བསྙེན་བཀུར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་རེ་ཞིག་དམ་པའི་ཆོས་ལ་བསྙེན་

བཀུར་གྱིས་ཤིག །སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང་། །སངས་རྒྱས་གང་
དག་མ་བྱོན་དང་། །སངས་རྒྱས་མྱ་ངན་སེལ་མཛད་པ། །ད་ལྟར་མང་པོ་གང་བཞུགས་དག །ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང་། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་
ཅིང་། །བདག་ཉིད་ཆེན་པོ་མངོན་འདོད་པ། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །དེ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་མངོན་དུ་ལྡང་བར་མ་བྱས་པ་དང་། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་གཉིས་བདག་གི་ཡུལ་
ན་གནས་པ་དག་ཡིན་ན་བདག་ལ་མངོན་དུ་ལྡང་བར་མི་བྱེད་དོ་སྙམ་ནས་དེ་ཁྲོ་བས་ཀུན་ནས་དཀྲིས་བཞིན་དུ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་འདི་ཁྲོ་བས་ཀུན་ནས་དཀྲིས་སོ་སྙམ་ནས་བཀའ་མཆིད་
གཞན་དག་མཛད་པར་བརྩམས་ཏེ་ཆོས་སྟོན་པར་མི་མཛད་པ་དང་། དེས་གསོལ་པ། བཅོམ་ལྡན་འདས་ཆོས་བསྟན་དུ་གསོལ། །བདེ་བར་གཤེགས་པ་ཆོས་བསྟན་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚིགས་སུ་བཅད་པ་དག་བཀའ་སྩལ་པ།
རབ་ཏུ་དང་སེམས་མེད་པ་དང་། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བཏུལ་བྱས་ཤིང་། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདི་སྤོང་བ། །དེས་ནི་
ལེགས་གསུངས་ཤེས་པར་འགྱུར། །རྒྱལ་པོ་རྒྱ་ཆེར་དེ་གཉིས་ལ་ཁྲོས་ཏེ་བསམས་པ། འདི་གཉིས་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་བཀུམ་མོ་སྙམ་དུ་རིག་ནས་སྡོད་ཅིག་ཅེས་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་

འཚལ་ནས་སྟན་ལས་ལངས་ཏེ་སོང་ངོ་། །གང་གི་ཚེ་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཉིན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་དེ་གཉིས་ཀྱི་ཞོ་ཤས་འཚོ་བ་དག་གིས་རི་རབ་ཀྱི་བང་རིམ་ནས་མཉན་ཡོད་ཀྱི་བར་གྱི་ལམ་ཇི་སྲིད་པའི་ལམ་གྱི་ངོས་
གཉིས་སུ་རྩིག་པ་དངར་ཏེ་འཁོད་པར་བྱེད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་གང་གི་ཚེ་ཁྱིམ་བདག་འདི་གཉིས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བར་གྱུར་པ་དེའི་ཚེ་ན་འདི་གཉིས་ཀྱི་མགོ་བོ་དྲུངས་ནས་ཆོད་ལ་ས་ལ་སྒྱེལ་
བར་གྱིས་ཤིག །ཚིག་དེ་སྐད་ཅེས་སྨྲས་པ། ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཀྱི་ཞོ་ཤས་འཚོ་བ་དག་གིས་ཐོས་སོ། །ཐོས་ནས་ཀྱང་དེ་དག་འཁྲུགས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་སྟེང་དུ་རྡོ་རྗེ་རྩེ་གཅིག་པ་དང་། འཁོར་ལོ་དང་མདའ་བོ་ཆེ་དང་། མཚོན་
རྩེ་གཅིག་པ་ལ་སོགས་པའི་མཚོན་དག་འཕང་བར་བརྩམས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཀོ་ས་ལར་བྱུང་བའི་རྒྱལ་པོ་
གསལ་རྒྱལ་འཁོར་དང་བཅས་པ་དང་། མཉན་ཡོད་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་བཀའ་མཉན་ནས། བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་
ལ་སྙོམས་པར་ཞུགས་པའི་བྱེ་བྲག་གིས་རྡོ་རྗེ་རྩེ་གཅིག་པ་དང་། འཁོར་ལོ་དང་། མདའ་བོ་ཆེ་དང་། མཚོན་རྩེ་གཅིག་ལ་སོགས་པའི་མཚོན་དེ་དག་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་།