Kinh tạng Tây Tạng (Kangyur Đại Học) — 008_འདུལ་བ།_ཉ

་ཚིགས་སུ་བཅད་པ་དག་སྨྲས་པ། བདག་ནི་བཅོམ་ལྡན་བལྟ་བ་དང་། །དམ་ཆོས་ཉན་དང་དགེ་འདུན་ལ། །བསྙེན་བཀུར་བགྱིད་པས་ལན་འགའ་ཡང་། །ངོམས་ཤིང་ཕྱིར་སྤོང་མ་མྱོང་ངོ་། །འཕགས་པའི་

ཆོས་རྣམས་ཡང་དག་བླངས། །སེར་སྣ་འདུལ་ལ་བརྩོན་གྱུར་ཅིང་། །ཆོས་གསུམ་ཆོག་མི་ཤེས་པ་ཡིས། །ལག་བརྒྱུད་མི་གདུང་སྐྱེས་པར་གྱུར། །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་
རྗེས་སུ་ཡི་རངས་པ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་
ལ་ཞུས་པ། བཙུན་པ་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་མཆི་བ་དང་། བསླབ་པའི་གཞི་དག་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་ང་འདོད་ཆགས་དང་བྲལ་བ།
ཞེ་སྡང་དང་བྲལ་བ། གཏི་མུག་དང་བྲལ་བ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་གྲོལ་ཞིང་། ཐམས་ཅད་མཁྱེན་པ། ཐམས་ཅད་གཟིགས་པ།
མཁྱེན་པ་དང་ཤེས་བྱ་ཐམས་ཅད་ལ་མངའ་བརྙེས་པ་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་པ་འདི་ལ་ངོ་མཚར་ཅི་ཆེ། ང་འདས་པའི་དུས་ན་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་
མུག་དང་བཅས་པ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་དག་ལས་ཡོངས་སུ་མ་གྲོལ་བས་ཀྱང་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་
གཞི་དག་ལ་བཞག་སྟེ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་དེད་དཔོན་དཔའ་ཆེན་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་

འགྲན་པ་ཞིག་བྱུང་བར་གྱུར་ཏེ། དེ་དུས་གཞན་ཞིག་ན་ཚོང་པ་ལྔ་བརྒྱ་དང་ལྷན་ཅིག་དགོན་པའི་ལམ་དུ་ཞུགས་པ་དང་། ལམ་དེ་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་པར་གྱུར་ནས། དེད་དཔོན་དཔའ་ཆེན་དོན་མཐུན་གྱི་མདུན་དུ་འགྲོ་བར་
བརྩམས་པ་དང་། ཇི་ཙམ་ན་སྲིན་པོ་སྤུ་རལ་ཅན་དེ་བྲམ་ཟེའི་ཆ་ལུགས་སུ་མངོན་པར་སྤྲུལ་ནས་ལམ་གར་འདུག་སྟེ། དེད་དཔོན་དཔའ་ཆེན་ལ་སྨྲས་པ། དེད་དཔོན་ལམ་འདི་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་ནས་ཁོ་བོ་ཡང་ཚེགས་ཆེན་པོས་འོངས་ཀྱིས་ལམ་
གཞན་དུ་སོང་ཤིག །དེས་སྨྲས་པ། བྲམ་ཟེ་སྙིང་ལས་ཆུང་ངུར་གྱིས་ཤིག །དེས་ཁོ་བོ་ལ་བྱར་ཅི་ཡོད་འགྲོའོ། །དེ་སྐད་ཅེས་སྨྲས་པ་དང་། སྲིན་པོ་སྤུ་རལ་ཅན་དེ་འཁྲུགས་ནས་བཞིན་བསྒྱུར་ཏེ། ལག་པ་གཉིས་བརྐྱང་ནས་རལ་པ་ས་ལ་བླགས་ཏེ། མིག་དམར་
པོ་བྱས་ནས་མིག་གཉིས་བགྲད་དེ་སྨྲས་པ། དེད་དཔོན་ཇེ་ཁོ་བོ་ལ་རྒོལ་ལ་ཕྱིས་སོང་ཤིག །དེ་ནས་དེད་དཔོན་དཔའ་ཆེན་གྱིས་ཤིན་ཏུ་འཇིགས་སུ་རུང་བ་དེ་མཐོང་ནས་གཞུ་རྣ་དྲུང་དུ་ཐུག་པར་བཀང་སྟེ་མདའ་དག་འཕང་བར་བརྩམས་པ་དང་། དེ་དག་ཐམས་ཅད་རལ་པ་དག་
ལ་ཐོགས་སོ། །གཞུ་འཕངས་པ་དང་། དེ་ཡང་ཐོགས་སོ། །དེ་བཞིན་དུ་ཤིང་དང་བོང་བ་ལ་སོགས་པ་དག་འཕངས་ན་དེ་དག་ཀྱང་རལ་པ་དག་ལ་ཐོགས་སོ། །དེ་ནས་ཚམ་ཚོམ་མེད་པར་མཐུས་བརྒལ་བ་དང་། ལུས་ཐམས་ཅད་རལ་པ་དག་ལ་ཐོགས་ནས་སྲིན་པོས་ཚིགས་
སུ་བཅད་པ་སྨྲས་པ། ཁྱོད་ཀྱིས་ལག་གཉིས་རྐང་གཉིས་དང་། །ལྔ་པ་མགོ་ཡང་ཐོགས་གྱུར་ཅིང་། །ལུས་ཀྱང་ང་ཡི་ལུས་ལ་ཐོགས། །ཕྱི་ན་མ་ཐོགས་ཅི་ཞིག་ཡོད། །དེད་དཔོན་གྱིས་ཀྱང་ཚིགས་སུ་བཅད་པ་དག་སྨྲས་པ། ང་ཡི་ལག་གཉིས་རྐང་གཉིས་དང་། །
ལྔ་པ་མགོ་ཡང་ཐོགས་གྱུར་ཅིང་། །ལུས་ཀྱང་ཁྱོད་ཀྱི་ལུས་ལ་ཐོགས། །ཕྱི་ན་མ་ཐོགས་སེམས་ཡོད་དོ། །གསང་བ་ཇི་སྲིད་ཁོ་བོ་ཡི། །སེམས་དང་བརྩོན་འགྲུས་མ་ཉམས་པ། །དེ་སྲིད་ཁྱོད་དང་འགྱེད་བྱ་སྟེ། །བརྟན་བྱོས་ང་ལ་མི་གནོད་དོ། །སྲིན་པོས་ཀྱང་ཚིགས་

སུ་བཅད་པ་དག་སྨྲས་པ། གང་གིས་བརྩོན་འགྲུས་འདི་འདྲ་བ། །དཔའ་ཆེན་ཁྱོད་ལ་ཕྱག་འཚལ་ལོ། །ཁྱོད་ཀྱི་བརྩོན་འགྲུས་འདི་འདྲ་བས། །སྡུག་བསྔལ་ཀུན་ལས་འབྲོས་པར་ནུས། །དཔའ་ཆེན་ཁྱོད་དང་འདྲ་བ་ཡི། །གང་ཟག་མེད་པར་བདག་གིས་ཤེས། །ཁྱོད་ཀྱི་མཐུ་
ཡིས་ཚོང་པ་དག །བདེ་ལེགས་སུ་ནི་འདོང་ལ་རག །འབྱུང་པོ་ཀུན་ལ་སྙིང་བརྩེ་བ། །དེད་དཔོན་ཁྱོད་ལ་ཕྱག་འཚལ་ལོ། །ཁྱོད་ཀྱི་མཐུ་ཡིས་ཚོང་པ་དག །ཞི་བ་ཉིད་དུ་འདོང་ལ་རག །དེ་ལྟར་དེ་ན་དེད་དཔོན་དཔའ་ཆེན་གྱིས་སྲིན་པོ་སྤུ་རལ་ཅན་ལ་གང་ཐོས་ནས་སྲིན་པོ་སྤུ་རལ་ཅན་ལས་དྲི་མ་ཅན་དང་ཕྲལ་ཏེ་
བརྟུལ་ཞུགས་ལྔ་པོ་དག་ལ་བཞག་པ་དེ་འདྲ་བའི་ཆོས་བསྟན་པ་བྱས་སོ། །དགེ་སློང་དག་དེའི་ཚེ་དེའི་དུས་ན་དེད་དཔོན་དཔའ་ཆེན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་སྲིན་པོ་སྤུ་རལ་ཅན་གང་ཡིན་པ་དེ་ནི་གནོད་སྦྱིན་འབྲོག་གནས་ཡིན་ཏེ། དེའི་ཚེ་ཡང་ངས་འདི་
ལས་དྲི་མ་ཅན་དང་ཕྲལ་ཏེ་བརྟུལ་ཞུགས་ལྔ་ལ་བཞག་ལ། ད་ལྟར་ཡང་ངས་འདི་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་གོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་
འདས་ལ་ཞུས་པ། བཙུན་པ་ལག་བརྒྱུད་འབྲོག་གནས་ཀྱིས་ལས་ཅི་བགྱིས་ན་དེས་སྐྱེས་མ་ཐག་ཏུ་གནོད་སྦྱིན་གྱི་གཏོར་མར་སྩལ་ཅིང་། བཅོམ་ལྡན་འདས་དེ་ཐར་བར་བགྱི་བའི་སླད་དུ་བརྩོན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་
ལག་བརྒྱུད་འབྲོག་གནས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལག་བརྒྱུད་འབྲོག་གནས་ཀྱིས་ལས་བྱས་ཤིང་བསགས་པ་དག་
གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་ཏེ། འདི་

ལྟར་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་
རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་
པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་
འདི་དགེ་བསྙེན་དུ་གྱུར་ཏོ། །རི་བྲགས་ཤིག་ན་རྒྱལ་པོ་ཞིག་འདུག་པ་དེ་ཤིན་ཏུ་བྱ་གག་ལ་དགའ་ནས་གང་ཡང་རུང་བ་ལ་རྒྱལ་པོའི་ཕོ་བྲང་དུ་བྱ་བ་ཅུང་ཟད་བྱུང་ན་དེ་སུག་ཏུ་བྱ་གག་ཐོགས་ཏེ་རྒྱལ་པོའི་གན་དུ་འགྲོའོ། །ཇི་ཙམ་དུས་གཞན་ཞིག་ན་དགེ་བསྙེན་དེ་ལ་རྒྱལ་པོའི་
ཕོ་བྲང་དུ་བྱ་བ་ཅུང་ཞིག་བྱུང་ནས་དེ་དེ་བཞིན་སོང་བ་དང་། རྒྱལ་པོ་དེས་དེའི་དགོས་པ་མ་བསྒྲུབས་ནས་གཞན་དག་གིས་དེ་ལ་སྨྲས་པ། རྒྱལ་པོ་འདི་བྱ་གག་ལ་དགའ་བས་གལ་ཏེ་ཁྱོད་ལ་དགོས་པ་འགྲུབ་པ་དགོས་ན། དེ་ལ་བྱ་གག་ཕུལ་ཅིག །དེས་རྒྱལ་པོ་ལ་བྱ་གག་
གཅིག་ཕུལ་བ་དང་། རྒྱལ་པོས་དེ་ཕྱག་ཙང་གི་ཚང་མང་དུ་གཏད་ནས། དགེ་བསྙེན་དེའི་དགོས་པ་ཡང་བསྒྲུབས་སོ། །དགེ་བསྙེན་དེས་བསམས་པ། བདག་གིས་བྱ་གག་ཕུལ་བ་མ་ལེགས་པ་བྱས་ཀྱི་སོང་ལ་རིན་གྱིས་བླུའོ་སྙམ་ནས། དེས་ཕྱག་ཙང་གི་ལག་
པར་རིན་བྱིན་ཏེ། བྱ་གག་ཐར་བར་བྱས་ནས་སྨོན་ལམ་བཏབ་པ། བདག་གིས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར་བདག་གིས་བྱ་གག་ཕོངས་པར་གྱུར་པ་ཐར་བར་བྱས་པའི་དགེ་བའི་རྩ་བ་འདིས་བདག་

ཕོངས་པར་གྱུར་པ་ཐར་པར་བྱ་བའི་ཕྱིར་བཅོམ་ལྡན་འདས་བརྩོན་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་དགེ་བསྙེན་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ཏེ། དེས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་
ལས་དེའི་རྣམ་པར་སྨིན་པས་གནོད་སྦྱིན་གྱི་གཏོར་མར་བྱིན་ནོ། །ཕྱིས་འགྱོད་པ་སྐྱེས་ནས་ཐར་བར་བྱས་ཤིང་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ང་འདི་ཐར་བར་བྱ་བའི་ཕྱིར་བརྩོན་པར་གྱུར་ཅིང་ངས་འདི་གནོད་སྦྱིན་ལས་ཐར་བར་བྱས་སོ། །
ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལག་བརྒྱུད་འབྲོག་གནས་སྔོ་བསངས་ཅན་ལས་ཐར་བར་མཛད་ནས་ཕྱིར་མི་འོང་བའི་འབྲས་བུ་ལ་བཞག་པ་ལ་གཟིགས།
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་གཟུགས་ཅན་མ་ལས་ཐར་བར་བྱས་ནས་མངོན་པར་ཤེས་པ་ལྔ་ལ་བཞག་སྟེ། དེ་ཉོན་ཅིག །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་རྒྱལ་པོ་ཚངས་
བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་
ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པའི་ཆོས་ཀྱི་རྒྱལ་པོས་ཆོས་ཀྱིས་རྒྱལ་སྲིད་བྱེད་དུ་བཅུག་གོ། །དེའི་མདུན་ན་འདོན་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད།
དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་འབྲེལ་བ་ཞིག་

བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་
འབྲེལ་བ་དེའི་ཕྱིར་ཁྱེའུའི་མིང་རྐང་ལག་དྲ་བ་ཅན་ཞེས་བྱའོ་ཞེས་དེའི་མིང་རྐང་ལག་དྲ་བ་ཅན་ཞེས་བྱ་བར་བཏགས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་
དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་མ་འབྲེལ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱས་པར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་
འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་འབྲེལ་བ་མེད་པ་དེའི་ཕྱིར་ཁྱེའུའི་མིང་རྐང་ལག་དྲ་བ་མེད་ཅེས་བྱའོ་ཞེས་དེའི་མིང་རྐང་ལག་དྲ་བ་མེད་ཅེས་བྱ་བར་བཏགས་སོ། །དེ་གཉིས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་ན་བུ་ཐུ་བོ་རྐང་ལག་དྲ་བ་
ཅན་གྱིས་ཕ་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པ་མཐོང་ནས། དེས་བསམས་པ། བདག་འདི་འདས་ནས་མདུན་ན་འདོན་དུ་གྱུར་ན་བདག་ཀྱང་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པར་འགྱུར་ན། བདག་ཆོས་དང་ཆོས་མ་ཡིན་པས་
མདུན་ན་འདོན་བྱེད་དུ་བཅུག་ནས་སེམས་ཅན་དམྱལ་བ་ལ་གཞོལ་བར་འགྱུར་ན་མི་རུང་གིས་རྣམ་པ་ཐམས་ཅད་དུ་རབ་ཏུ་འབྱུང་ངོ་སྙམ་ནས། དེ་ཕའི་གན་དུ་སོང་སྟེ་སྨྲས་པ། ཡབ་བདག་རབ་ཏུ་འབྱུང་བར་ཅི་གནང་། ཕས་སྨྲས་པ། བུ་གང་གི་ཕྱིར་མཆོད་སྦྱིན་སྦྱིན་པར་
བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་མདུན་ན་འདོན་དེ་ཁྱོད་ཀྱི་ལག་མཐིལ་དུ་འོངས་ན་ཅིའི་ཕྱིར་རབ་ཏུ་འབྱུང་བར་བྱེད། དེས་ཚིགས་སུ་བཅད་པ་སྨྲས་པ། ནགས་ན་ཤིང་ཤུན་ཤུན་པའི་གོས་གྱོན་འབྲས་བུ་ཟ། །རི་དགས་གདུག་པ་

རྣམས་དང་ལྷན་ཅིག་གནས་བླ་ཡི། །མཁས་པ་འཇིག་རྟེན་ཕ་རོལ་འཇིགས་པས་རྒྱལ་སྲིད་ཕྱིར། །གསད་དང་བཅིང་དང་བརྡེག་པའི་ལས་དག་བྱར་མི་རུང་། །ཕས་དེ་དུས་ཀྱིས་འཆུ་བར་ཤེས་ནས་གནང་བ་དང་། དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་ཏུ་བྱུང་ནས་དེས་སྤྲོ་
བ་དང་། འབད་པ་དང་། བརྩལ་བ་བྱས་པས་མངོན་པར་ཤེས་པ་ལྔ་བསྐྱེད་པར་གྱུར་ཏོ། །བུ་གཉིས་པ་རྐང་ལག་དྲ་བ་མེད་ནི་གསང་ཚིག་གི་ཕྱིར་གསང་ཚིག་ཚོལ་དུ་ཡུལ་གཞན་དུ་སོང་ངོ་། །ལྷོ་ལམ་ན་རི་བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་
ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་མོ་ཞིག་བཙས་ནས། དེས་བསམས་པ། བདག་གིས་བུ་མོ་འདི་རིགས་
ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། རིགས་བྱེད་བཞི་བཀླགས་པ་ལ་སྦྱིན་པར་བྱ་སྟེ། གང་གིས་བདག་གི་དྲུང་ནས་རིག་བྱེད་བཞི་བཀླགས་པ་དེ་ལ་བདག་གིས་བུ་མོ་འདི་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་རྐང་ལག་དྲ་བ་མེད་དེ་ཕན་ཚུན་འཁོར་བ་ན་ལྷོ་
ལམ་དུ་ཕྱིན་ནས་དེས་ཕྱོགས་གཞན་ཞིག་ཏུ་ལམ་གྱིས་དུབ་པ་ངལ་བསོས་ཏེ་ཐོས་པ་གཅིག་ནས་གཅིག་ཏུ་བརྒྱུད་པས་བྲམ་ཟེ་དེ་ཐོས་ནས་དེའི་གན་དུ་སོང་སྟེ། མངོན་དུ་སྨྲ་བ་བྱས་ནས་སྨྲས་པ་བདག་མཁན་པོའི་ཞབས་ལ་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་
བྱེད་བཀླག་པའི་སླད་དུའོ། །བུ་དེ་བཞིན་གྱིས་ཤིག །དེས་དེའི་གན་དུ་རིག་བྱེད་བཀླག་པར་བརྩམས་པ་དང་། དེ་སྤྱོད་པ་གསལ་བས་དེའི་དྲུང་ནས་དུས་ཅུང་ཟད་ཅིག་གིས་རིག་བྱེད་བཞི་ལྷོགས་སོ། །ལྷོགས་ནས་བྲམ་ཟེ་དེས་དེ་ལ་བུ་མོ་བྱིན་ནོ། །བྲམ་ཟེའི་ཁྱེའུ་དེ་དེ་དང་ལྷན་
ཅིག་ཁང་ཏོག་ན་ཉལ་བའི་ཚེ་ཇི་ཙམ་ན་བུ་མོ་དེའི་བསིལ་ཡབ་ཤོད་དུ་ལྷུང་བ་དང་། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེས་བླངས་པ་དང་། དེས་དེ་མཐོང་ནས་སྔངས་པར་གྱུར་ཏོ། །ཡང་མར་མེ་ཤི་ལ་ཐུག་པ་དང་། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེ་

གསོས་སོ། །དེ་ཡང་དེས་མཐོང་ནས་ཡང་རྒྱ་ཆེར་སྔངས་པར་གྱུར་ཏེ། དེ་དང་ལྷན་ཅིག་བག་ཡངས་སུ་དགའ་མགུར་སྤྱོད་པར་མི་བྱེད་དོ། །བུ་མོས་སྨྲས་པ། རྗེའི་སྲས་ཁྱོད་ཅིའི་ཕྱིར་བདག་མཐོང་ན་དབང་པོ་རྣམས་སྡུད་ཅིང་བདག་དང་ལྷན་ཅིག་བག་
ཡངས་སུ་གཅུགས་པར་མི་བྱེད། ཁྱེའུས་སྨྲས་པ། ཁྱོད་ཀྱིས་འཆི་བདག་དང་ལྷན་ཅིག་གཅུགས་པར་བྱེད་པ་འགའ་མཐོང་ངམ། བུ་མོས་སྨྲས་པ། རྗེའི་སྲས་མ་འཇིགས་ཤིག་དང་། ཁོ་མོ་ཁྱིམ་ཐབ་ལ་འཁུ་བའི་སེམས་མི་བསྐྱེད་དོ། །ཁྱེའུས་སྨྲས་པ། འདི་ལ་
ཁོ་བོས་དུས་ཤེས་པར་བྱའོ། །བུ་མོ་དེ་སྐྱེངས་ནས་དེ་གཉིད་ལོག་པ་ལ་སྡོད་ཅིང་འདུག་གོ། །ཁྱེའུ་དེས་གཉིད་མ་ལོག་བཞིན་དུ་གཉིད་ལོག་པའི་ཆ་ལུགས་སུ་བྱས་ཏེ་འདུག་པ་དང་། བུ་མོ་དེས་དེ་གཉིད་ལོག་པར་རིག་ནས་གཟུགས་ཅན་མ་རྣམས་ཀྱི་ནང་དུ་སོང་ངོ་། །
ཁྱེའུ་དེ་ཡང་དལ་བུས་ལངས་ཏེ་དེའི་རྗེས་བཞིན་དུ་སོང་བ་དང་། ཇི་ཙམ་གཟུགས་ཅན་མ་དེ་དག་ཐམས་ཅད་སྒྲེན་མོར་བྱུང་ཞིང་སྐྲ་བཤིག་སྟེ། འཇིགས་འཇིགས་ལྟར་འདུག་པ་དག་མཐོང་ནས་དེ་ཤིན་ཏུ་སྔངས་ཤིང་སྐྲག་ནས་ཕྱིར་ལོག་གོ། །དེ་ཡང་དེའི་རྗེས་བཞིན་དུ་འོངས་
པ་དང་། དེས་སྨྲས་པ། བཟང་མོ་ཁོ་བོ་འདུག་མི་ཕོད་ཀྱིས་འགྲོའོ། །དེས་དེ་གདོན་མི་ཟ་བར་དུས་ཀྱིས་འཆུ་བར་ཤེས་ནས་སྨྲས་པ། རྗེའི་སྲས་གལ་ཏེ་ངེས་པ་ཁོ་ནར་འགྲོ་འདོད་ན་སོང་ལ་སུ་ལ་ཡང་མ་ཟེར་ཅིག །དེ་ཅང་མི་ཟེར་བར་བྲམ་ཟེ་དེའི་གན་དུ་སོང་སྟེ་སྨྲས་པ།
མཁན་པོ་ཁྱོད་བལྟས་ཀྱིས་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བུ་མོ་ཡང་ཁྲིད་ལ་སོང་ཤིག །མཁན་པོ་བདག་དེ་ཉིད་ཀྱིས་འཇིགས་པས་མཆིའོ། །བུ་ཅིའི་ཕྱིར་ཁྱོད་དེས་འཇིགས། མཁན་པོ་དེ་གཟུགས་ཅན་མ་ལགས་སོ། །བུ་ཅིའི་ཕྱིར་དེ་དེ་ལྟར་འགྱུར།
དེ་ཅང་མི་སྨྲ་བར་སོང་ངོ་། །བྲམ་ཟེ་དེས་བུ་མོ་ལ་སྨྲས་པ། བུ་མོ་ཁྱོད་ཁྱིམ་ཐབ་ཀྱང་རྗེས་སུ་མི་སྲུང་ངམ། ཡབ་དེ་ཇི་སྐད་མཆི། བུ་དེ་ན་རེ་ཁྱོད་གཟུགས་ཅན་མ་ཡིན་ཞེས་ཟེར་རོ། །ཡབ་བདག་གཟུགས་ཅན་མ་མ་ལགས་ཏེ། དེས་བདག་ལ་ཤོ་བེས་སྐུར་པ་བཏབ་

སྟེ་མཆིས་སོ། །དེ་ཅང་མི་སྨྲ་བར་འདུག་གོ། །གཟུགས་ཅན་མ་དེ་ཡང་ཀུན་ནས་དཀྲིས་པ་དྲག་པོས་ཀུན་ནས་དཀྲིས་པར་གྱུར་ནས། རྐང་ལག་དང་མིག་བསྒྱུར་ཏེ་ལམ་གར་སོང་ནས། དེའི་མདུན་དུ་འདུག་སྟེ་སྨྲས་པ། བུ་ཟན་མའི་བུ་ཁྱོད་ལ་ཁོ་མོས་སུ་ལ་ཡང་མ་ཟེར་
ཅིག་ཅེས་བྱས་ན། ཁྱོད་ཀྱིས་ཁོ་མོའི་ཕ་ཉིད་ལ་བྱས་ཀྱིས་ད་ནི་ཁྱོད་ལ་མཚམས་ཆེན་པོ་གཅད་པར་བྱའོ། །ཞེས་དེས་དེ་ལ་གནོད་པ་བྱ་བར་བརྩམས་པ་དང་། དེ་སྐྲག་པས་སྒྲ་ཆེན་པོ་ཕྱུང་སྟེ་འཕགས་པ་རྐང་ལག་དྲ་བ་ཅན་ལ་ཕྱག་འཚལ་ལོ། །འཕགས་པ་རྐང་ལག་
དྲ་བ་ཅན་ལ་ཕྱག་འཚལ་ལོ། །ཕྱག་འཚལ་ལོ་ཞེས་བརྗོད་པ་དང་། དེ་ནས་རྐང་ལག་དྲ་བ་ཅན་ལ་མངོན་པར་དགའ་བའི་ལྷ་མོ་གང་ཡིན་པ་དེ་མྱུར་བ་མྱུར་བར་སོང་སྟེ་རྐང་ལག་དྲ་བ་ཅན་ལ་སྨྲས་པ། འཕགས་པ་ཁྱོད་ཀྱི་གཅུང་པོ་གནོད་པ་དང་། ཉམ་ང་བ་དང་། མི་བདེ་
བར་གྱུར་གྱིས་དེ་ལ་དགོངས་སུ་གསོལ། དེ་རྫུ་འཕྲུལ་གྱིས་དེའི་གན་དུ་སོང་སྟེ་སྨྲས་པ། བུ་མོ་འདི་ལ་གནོད་པ་མ་བྱེད་ཅིག །འདི་ཁྱོད་ལ་ཅི་ཉེས་བདག་གིས་འདི་བཟློག་ན་འདིས་བདག་གི་ཕ་ལ་བདག་གཟུགས་ཅན་མ་ལགས་སོ་ཞེས་བགྱིས་ཀྱིས་བདག་གིས་འདི་བཟས་
ཁྱོད་བཞུད་ཅིག །དེས་སྨྲས་པ། སྲིན་མོ་འདི་ནི་བཀྲེན་པ་ཡིན་པས་འཁྲུག་པས་ཆོག་གིས་ཐོང་ཤིག །དེས་སྨྲས་པ། འཕགས་པ་དམ་ཚིག་གིས་གཏང་བར་བགྱི་སྟེ། གལ་ཏེ་རབ་ཏུ་འབྱུང་ནའོ། །དེས་སྨྲས་པ། སྲིང་མོ་ཐོང་ཤིག་དང་རབ་ཏུ་དབྱུང་ངོ་། །དེས་དེ་
བཏང་ནས་དེས་ཀྱང་དེ་རབ་ཏུ་ཕྱུང་སྟེ། གདམས་ངག་བྱིན་ནས་དེས་སྤྲོ་བ་དང་། འབད་པ་དང་། བརྩལ་བ་བྱས་པས་མངོན་པར་ཤེས་པ་ལྔ་བསྒྲུབ་པར་གྱུར་ཏོ། །དགེ་སློང་དག་དེའི་ཚེ་དེའི་དུས་ན་མདུན་ན་འདོན་གྱི་བུ་ཐུ་བོ་རྐང་ལག་དྲ་བ་ཅན་གང་ཡིན་པ་དེ་ནི་ང་ཉིད་ཡིན་ནོ། །
དེའི་ཚེ་དེའི་དུས་ན་དེའི་ནུ་བོ་རྐང་ལག་དྲ་བ་མེད་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ནོ། །དེའི་ཚེ་དེའི་དུས་ན་གཟུགས་ཅན་མ་གང་ཡིན་པ་དེ་ནི་སྔོ་བསངས་ཅན་འདི་ཡིན་ཏེ། ངས་དེའི་ཚེ་ཡང་ལག་བརྒྱུད་འབྲོག་གནས་འདི་གཟུགས་ཅན་མ་ལས་ཐར་བར་

བྱས་ཏེ་མངོན་པར་ཤེས་པ་ལྔ་ལ་བཞག་ལ། ད་ལྟར་ཡང་ངས་འདི་སྔོ་བསངས་ཅན་ལས་ཐར་བར་བྱས་ཏེ་ཕྱིར་མི་འོང་བའི་འབྲས་བུ་ལ་བཞག་གོ། །གང་གི་ཚེ་ལག་བརྒྱུད་འབྲོག་གནས་དུས་ལ་བབ་པ་དེའི་ཚེ་ན་སྔོ་བསངས་ཅན་ཀཽ་ཤཱམྦཱིར་སོང་ནས། ཀཽ་
ཤཱམྦཱི་བའི་སྐྱེ་བོའི་ཚོགས་ཀྱིས་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་པས་བུ་མོ་དེ་མ་སྨས་པ་ཁོ་ནར་འདིར་འོངས་སོ། །ཞེས་ཐོས་ནས་ཐོས་པ་གཅིག་ནས་གཅིག་
ཏུ་བརྒྱུད་པས་བད་སའི་རྒྱལ་པོ་ཤར་པས་ཐོས་པ་དང་། དེས་ཁྱིམ་བདག་གདངས་ཅན་བོས་ཏེ་སྨྲས་པ། ཁྱིམ་བདག་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་ནས་
བུ་མོ་དེ་མ་སྨས་པ་ཁོ་ནར་འདིར་འོངས་ཞེས་གྲག་ན། ཅི་དེ་བདེན་ནམ། འོན་ཏེ་བརྫུན། དེས་སྨྲས་པ། ལྷ་མད་དོ། །གལ་ཏེ་དེ་ལྟ་ན་ཅིའི་ཕྱིར་ང་ལ་མི་སྦྱིན། ལྷ་གསོལ་ལོ། །རྒྱལ་པོས་བཙུན་མོའི་འཁོར་གྱི་ནང་དུ་བཅུག་སྟེ་བསྙེན་བཀུར་མ་ལྔ་བརྒྱ་ཡང་བྱིན། ཉི་མ་
རེ་རེ་ཞིང་དྲི་དང་ཕྲེང་བ་རྒྱུའི་རིན་ཀཱརྵཱ་པ་ཎ་སྟོང་སྟོང་ཡང་བྱིན། ཁང་བཟངས་མེ་ཏོག་གི་སོ་ཞེས་བྱ་བ་ཡང་བྱིན་ནོ། །དེ་ལ་བུ་མོ་མངག་གཞུག་མ་སྒུར་མཆོག་ཅེས་བྱ་བ་ཞིག་ཡོད་པ་དེ་ཉི་མ་རེ་རེ་ཞིང་ཀཱརྵཱ་པ་ཎ་སྟོང་སྟོང་གིས་དྲི་དང་ཕྲེང་བ་རྒྱུ་དག་ཉོ་བར་བྱེད་དོ། །དེ་དུས་གཞན་ཞིག་ན་
སྤོས་འཚོང་གི་ཁྱེའུ་ཞིག་དང་ལྷན་ཅིག་སྟེན་པར་གྱུར་ནས་དེས་ཀཱརྵཱ་པ་ཎ་ལྔ་བརྒྱས་ནི་དྲི་དང་མེ་ཏོག་ཕྲེང་བ་དག་ཉོ་བར་བྱེད། ལྔ་བརྒྱ་ནི་དེ་དང་ལྷན་ཅིག་ཟ་བར་བྱེད་དོ། །སྤོས་འཚོང་གི་ཁྱེའུ་དེ་དད་པ་ཅན་ཡིན་པས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་
དུ་གདུགས་ཚོད་ལ་སྤྱན་དྲངས་ནས་དེས་སྒུར་མཆོག་ལ་སྨྲས་པ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་ཁྱོད་ཀྱང་ཤོག་ལ་བྲིམས་ཤིག །དེས་དེའི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་

གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ་སྤྱན་འདྲེན་བཏང་ནས། བཅོམ་ལྡན་འདས་ལ་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་
བཅོམ་ལྡན་འདས་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། སྤོས་འཚོང་གི་ཁྱེའུའི་བཀད་ས་ག་ལ་བ་དེར་གཤེགས་ནས། དགེ་སློང་གི་དགེ་འདུན་གྱི་གོང་དུ་
གདན་བཤམས་པ་ཉིད་ལ་བཞུགས་སོ། །དེ་ནས་སྤོས་འཚོང་གི་ཁྱེའུ་སྒུར་མཆོག་དང་བཅས་པས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད་སྟོབས་
པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས། ལྷུང་བཟེད་བཞག་པར་རིག་ནས་སྟན་ཆེས་
དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་ཀྱིས་སྒུར་མཆོག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་སྒུར་མཆོག་གིས་སྟན་དེ་ཉིད་ལ་འདུག་
བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་
མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་

ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་། བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་
རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་
དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་
བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་དེ་གཉིས་ལ་ཆོས་
བསྟན་པ་མཛད་ནས་གཤེགས་སོ། །སྒུར་མཆོག་གིས་སྤོས་འཚོང་གི་ཁྱེའུ་དེ་ལ་སྨྲས་པ། རྗེའི་སྲས་ད་ནི་བདག་གིས་གཞན་གྱི་ཏིལ་གྱི་ཕུབ་མ་ཡང་མ་བྱིན་པར་ལེན་པའི་རྔོ་མི་ཐོག་གིས་ཀཱརྵཱ་པ་ཎ་སྟོང་གི་ཡོ་བྱད་དག་སྩོལ་ཅིག །དེས་སྨྲས་པ། མ་ཉེས་ཀྱིས་ཤེས་དེས་དེ་
ལ་ཀཱརྵཱ་པ་ཎ་སྟོང་གི་ཡོ་བྱད་དག་བྱིན་ནོ། །དེས་དེ་ཁྱེར་ཏེ་སྔོ་བསངས་ཅན་གྱི་གན་དུ་སོང་བ་དང་། དེས་སྨྲས་པ། སྒུར་མཆོག་ཁྱོད་ཀྱིས་དེང་འདི་མགོ་ཕྱིར་བསྟན་ཏེ་ཉལ་བ་གང་ལས་ཐོབ། དེས་སྨྲས་པ། ཇོ་མོ་སྔོན་ནི་བདག་གིས་བརྐུས་ཀྱིས། ད་ནི་བདག་གི་སླན་ཅད་ཉོན་
མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བའི་ཡོན་ཏན་གྱི་རྣམ་པ་དེ་ལྟ་བུ་རྟོགས་སོ། །ཁྱོད་ཀྱིས་དེང་ཅི་བྱས། དེ་ཐོས་པ་འཛིན་པ་ཡིན་པས་སྐབས་དེ་རྒྱས་པར་སྨྲས་པ་དང་། དེས་སྨྲས་པ། སྒུར་མཆོག་ཁྱོད་ཀྱིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་

ཁོ་མོ་ལ་སྨྲོས་ཤིག །ཁྱོད་ཀྱི་ལས་ནི་དེ་ཡིན་ནོ། །དེས་སྨྲས་པ། མ་ནོངས་ཀྱིས་དེ་ལྟར་བགྱིའོ། །དེ་ནས་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་དེ་ལ་བརྗོད་དོ། །བཅོམ་ལྡན་འདས་ཀྱིས་སྒུར་མཆོག་ལ་རྨས་པ། སྒུར་མཆོག་ཁྱོད་བཙུན་མོའི་
འཁོར་ལ་ཆོས་སྟོན་ཏམ། བཅོམ་ལྡན་འདས་སྟོན་ཏེ། ཇི་ལྟར་སྟོན་བཅོམ་ལྡན་འདས་བདག་ནི་འགྲེང་སྟེ་སྟོན་ལ། དེ་དག་ནི་མཆིས་ཏེ་ཉན་ཏོ། །བཀའ་སྩལ་པ། གལ་ཏེ་དེ་དག་སྒུར་མཆོག་ཆོས་སྟོན་ཅིག་ཅེས་ཟེར་ན་མི་བསྟན་ཏོ་ཞེས་བརྗོད་པར་བྱའོ། །ཅིའི་
ཕྱིར་ཞེས་ཟེར་ན། འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱོད་པ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་ཡིན་ན། བདག་ཁྱེད་ཅག་གུས་པ་མེད་
པ། རྗེ་ས་མེད་པ། སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན་ཅེས་བརྗོད་པར་བྱའོ། །ཇི་ཙམ་དུས་གཞན་ཞིག་ན་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་བཙུན་མོའི་འཁོར་གྱི་ནང་དུ་སོང་བ་དང་། དེ་དག་གིས་དེ་ལ་སྨྲས་པ།
སྒུར་མཆོག་ཆོས་སྟོན་ཅིག །དེས་སྨྲས་པ། མི་སྟོན་ཏོ། །ཅིའི་ཕྱིར་འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་
ཐུགས་སུ་ཆུད་ན། བདག་ཁྱེད་ཅག་གུས་པ་མེད་པ་དང་། རྗེ་ས་མེད་པ་སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན། སྔོ་བསངས་ཅན་གྱིས་ཐོས་ནས་སེང་གེའི་ཁྲི་བཙུགས་སོ། །གཞན་དག་གིས་ཀྱང་སྟན་ནང་ཚངས་ཅན་བཏིང་ངོ་། །གཞན་དག་གིས་ཀྱང་
བཏེག་སྟེ་དེ་ལྟར་བཞག་ནས། སྒུར་མཆོག་སེང་གེའི་ཁྲི་ལ་འདུག་སྟེ། དེ་དག་ལ་གང་ཐོས་ནས་སྔོ་བསངས་ཅན་ལ་སོགས་པ་བུད་མེད་ལྔ་བརྒྱས་ཁྱད་པར་ཆེན་པོ་རྟོགས་ཏེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་

གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་སྒུར་མཆོག་ལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེས་ནས་དེ་དག་གིས་བད་སའི་རྒྱལ་པོ་ཤར་པ་ལ་སྨྲས་པ། ལྷ་
བདག་ཅག་སངས་རྒྱས་མཐོང་བར་འཚལ་ལོ། །དེས་སྨྲས་པ། དེ་ལྟར་བྱ་སྟེ། བཅོམ་ལྡན་འདས་ཀྱི་སྤྱན་སྔར་ཇེ་འགྲོའོ་ཞེས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་
གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་བད་སའི་རྒྱལ་པོ་ཤར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་མཆིས་འབྲང་གི་འཁོར་བཅོམ་ལྡན་འདས་མཐོང་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བཙུན་མོའི་འཁོར་གྱི་ནང་དུ་མི་འཇུག་གོ། །དེས་སོང་སྟེ་དེ་དག་ལ་སྨྲས་པ་དང་། སྔོ་བསངས་ཅན་གྱིས་སྨྲས་པ། ལྷ་གལ་ཏེ་བཅོམ་ལྡན་འདས་བཙུན་མོའི་འཁོར་གྱི་ནང་དུ་མི་གཤེགས་
ན་ཁང་བཟངས་མེ་ཏོག་གི་སོ་ལ་སྐར་ཁུང་མང་པོ་དག་གདོད་ཅིང་། བདག་ཅག་སྐར་ཁུང་དག་ནས་བཅོམ་ལྡན་འདས་ལ་ལྟ་བར་ཅི་གནང་། རྒྱལ་པོས་ཁང་བཟངས་མེ་ཏོག་གི་སོ་ལ་སྐར་ཁུང་ལྔ་བརྒྱ་བཏོད་དོ། །གང་གི་ཚེ་བཅོམ་ལྡན་འདས་ཕྱོགས་དེར་གཤེགས་
པ་དེའི་ཚེ་ན་བཙུན་མོའི་འཁོར་དེ་དག་གིས་བཅོམ་ལྡན་འདས་སྐར་ཁུང་ནས་མཐོང་ནས། མཆོད་པ་དང་བསྙེན་བཀུར་བྱེད་ཅིང་མེ་ཏོག་དག་དང་། སྤོས་དག་དང་། ན་བཟའ་དག་དང་། མེ་ཏོག་ཕྲེང་གི་ཆུན་པོ་དག་ཀྱང་འཐོར་བར་བྱེད་དོ། །སྣ་ཚོགས་གདུལ་ན་ཀུན་
དུ་རྒྱུ་མ་དུ་ཞེས་བྱ་བ་དེ་ལ་ཆུང་མ་བུར་མ་ཞེས་བྱ་བ་ཞིག་ཡོད་པ་དེ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་། ཉིང་ལག་ཐམས་ཅད་དང་ལྡན་པ་ཞིག་བཙས་ནས། དེའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་སོ། །

དེའི་ཉེ་དུ་དག་འདུས་ཤིང་ལྷགས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོའི་མིང་ཅིར་གདགས་ཞེས་དེའི་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། བུ་མོ་འདི་གཟུགས་བཟང་བ། བལྟ་ན་སྡུག་པ། མཛེས་
པ། ཡན་ལག་དང་ཉིང་ལག་ཐམས་ཅད་དང་ལྡན་ཞིང་། འདིའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་པས་བུ་མོ་འདི་ལ་དཔེ་མེད་པས་འདིའི་མིང་དཔེ་མེད་མ་ཞེས་བྱ་བར་གདགས་སོ་ཞེས་དེའི་མིང་དཔེ་མེད་མ་ཞེས་བྱ་བར་བཏགས་སོ། །དེ་བསྲིངས་ཤིང་བསྐྱེད་
ནས་ཆེན་མོར་གྱུར་ཏོ། །མ་དུས་བསམས་པ། བདག་གི་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན། ཐོས་པའི་ཕྱིར་ཡང་མི་སྦྱིན་གྱི། བདག་གིས་གང་འདི་དང་གཟུགས་མཉམ་པའམ། ལྷག་པ་དེ་ལ་སྦྱིན་ནོ་སྙམ་མོ། །དེའི་སྐབས་
སུ་བཅོམ་ལྡན་འདས་སྒྲ་མི་སྙན་དག་ཏུ་ལྗོངས་རྒྱུ་ཞིང་གཤེགས་པ་ན་སྣ་ཚོགས་གདུལ་དུ་བྱོན་ནས་སྣ་ཚོགས་གདུལ་ན་སྒྲ་མི་སྙན་གྱི་གྲོང་རྡལ་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་སྣ་ཚོགས་གདུལ་
དུ་བསོད་སྙོམས་ལ་ཞུགས་སོ། །སྣ་ཚོགས་གདུལ་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་མཛད་དེ། ཕྱི་མའི་ཟས་ཀྱི་བསོད་སྙོམས་ལས་སླར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་
པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་བཞུགས་སོ། །དེའི་ཚེ་ན་ཀུན་ཏུ་རྒྱུ་མ་དུ་མེ་ཏོག་དང་། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང་། ཀུན་དུ་རྒྱུ་མ་དུས་ཐག་རིང་པོ་ཁོ་ན་ནས་བཅོམ་ལྡན་འདས་ཤིང་ལྗོན་པ་ཞིག་གི་དྲུང་དུ་རྟེན་ཅིང་བྲང་འགྲོའི་
རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་བཞུགས་པ་མཛེས་པ། དད་པར་འགྱུར་བ། དབང་པོ་ཞི་བ། ཐུགས་ཞི་བ། མཆོག་ཏུ་སེམས་དུལ་བ། ཉེ་བར་ཞི་བ་དང་ལྡན་པ། གསེར་གྱི་མཆོད་སྡོང་ལྟར་འབར་བ་མཐོང་ངོ་། །མཐོང་

ནས་ཀྱང་དགའ་བ་དང་མཆོག་ཏུ་དགའ་བ་སྐྱེས་ཏེ་བསམས་པ། དགེ་སྦྱོང་མཛེས་པ་དད་པར་བྱ་བ་འདི་ལྟ་བུ་འདི་ནི་འཛམ་བུའི་གླིང་མཐའ་དག་གི་བདག་པོར་འོས་པ་ཡིན་ན། དཔེ་མེད་མའི་བདག་པོར་ལྟ་སྨོས་ཀྱང་ཅི་དགོས་ཏེ། བདག་གིས་མག་པ་རྙེད་དོ་
སྙམ་དུ་རིག་ནས། རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག །ངས་བུ་མོའི་མག་པ་རྙེད་ཀྱིས་རྒྱན་བྱོས་ཤིག་དང་དཔེ་མེད་མ་སྦྱིན་ནོ། །དེས་སྨྲས་པ། སུ་ལ་སྦྱིན། དེས་སྨྲས་པ། དགེ་སྦྱོང་གཽ་ཏ་མ་ལའོ། །དེས་
སྨྲས་པ། ཇི་ལྟར་འདོང་ངོ་ཞེས་དེ་མ་དུ་དང་ལྷན་ཅིག་འཕགས་པ་དང་། ལམ་གར་དེ་ལ་དྲན་པ་སྐྱེས་ནས་དེས་ཚིགས་སུ་བཅད་པ་སྨྲས་པ། བྲམ་ཟེ་བདག་གིས་དྲང་སྲོང་ཆེན་པོ་དེ། །སྣ་ཚོགས་གདུལ་དུ་བསོད་སྙོམས་ཞུགས་མཐོང་ནས། །དེས་མནན་ས་ཕྱོགས་མཐོན་པོ་
དམར་འགྱུར་ཞིང་། །བཏེག་ན་དམའ་བའང་མཐོན་པོ་ཉིད་དུ་འགྱུར། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །
གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །དེས་དཔེ་མེད་མ་གོས་དང་རྒྱན་དག་གིས་བརྒྱན་ཏེ་འཕགས་པ་དང་། བཅོམ་ལྡན་འདས་ཀྱང་ནགས་ཁྲོད་དེ་ནས་ནགས་ཁྲོད་གཞན་དུ་གཤེགས་སོ། །ཀུན་དུ་རྒྱུ་མ་དུས་བཅོམ་
ལྡན་འདས་ཀྱི་གདན་རན་བཏིང་བ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག །འདི་ནི་བུ་མོའི་མག་པའི་སྟན་རྩྭ་བཏིང་བ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པར་གྱུར་པའི་མལ་ནི་འཁྲུགས་པར་འགྱུར། །སྡང་
བའི་མལ་ནི་གྱ་ཚོམ་བུར་མར་འགྱུར། །རྨོངས་པའི་མལ་ནི་རྐང་པའི་མཐར་འགྲོ་འགྱུར། །འདི་ནི་ཤིན་ཏུ་ཆགས་བྲལ་གནས་ཡིན་ཏེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་

བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ཡི་ཕྱིར་ཡང་འདོད་ཡོན་སྟེན་པར་འགྱུར། །ཀུན་དུ་རྒྱུ་མ་དུས་བཅོམ་ལྡན་འདས་ཀྱི་ཞབས་ཀྱི་རྗེས་དག་མཐོང་ངོ་། །མཐོང་ནས་ཀྱང་
ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པའི་རྗེས་དག་ཡིན་ནོ། །དེས་ཚིགས་སུ་བཅད་པ་སྨྲས་པ། སྐྱེས་བུ་ཆགས་པའི་རྗེས་ནི་གསལ་མི་འགྱུར། །ཞེ་སྡང་ལྡན་པའི་རྗེས་ནི་ཟབ་པ་ཡིན། །རྨོངས་པར་གྱུར་པའི་རྗེས་ནི་ནོགས་པར་འགྱུར། །ཤིན་ཏུ་
ཆགས་བྲལ་རྗེས་ནི་འདི་འདྲ་སྟེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་
ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་གསུང་བསལ་བའི་སྒྲ་མཛད་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་ཀྱི་གསུང་བསལ་བའི་སྒྲ་ཐོས་སོ། །ཐོས་ནས་ཀྱང་ཆུང་མ་ལ་སྨྲས་པ། བཟང་མོ་འདི་
ནི་བུ་མོའི་མག་པའི་སྐད་བསལ་བའི་སྒྲ་གྲག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ཡི་སྐད་ནི་ངར་ངར་པོ། །སྡང་བའི་མི་ཡི་སྐད་ནི་རྩུབ་པ་ཡིན། །རྨོངས་པའི་མི་ཡི་སྐད་ནི་འཁྲུགས་པར་འགྱུར། །ཚངས་པའི་རྔ་སྒྲ་འདི་ནི་སངས་རྒྱས་ཏེ། །
ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་
ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་ཐག་རིང་པོ་ཁོ་ན་ནས་ཀུན་དུ་རྒྱུ་མ་དུ་ལ་གཟིགས་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་གཟིགས་པ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པ་ལྟ་བ་ཡིན་

ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ནི་རིག་རིག་ལྟ་བར་བྱེད། །སྡང་བའི་མི་ནི་དུག་དྲག་སྦྲུལ་བཞིན་ལྟ། །རྨོངས་པའི་མི་ནི་མུན་ཁྲོད་རྟོག་བཞིན་ལྟ། །ཤིན་ཏུ་ཆགས་བྲལ་གཉའ་ཤིང་ཙམ་དུ་ལྟ། །ཁྱིམ་ཐབ་དེ་ནི་གཞོན་ནུ་མི་སྟེན་
གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་
འགྱུར། །བཅོམ་ལྡན་འདས་འཆག་པར་མཛད་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་འཆག་པ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པ་འཆག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཇི་ལྟར་འདི་
སྤྱན་ཇི་ལྟར་གཟིགས་པ་དང་། །ཇི་ལྟར་འདི་སྐུ་བརྟན་པར་གཤེགས་པ་དང་། །ཇི་ལྟར་འདི་ཡི་སྒྲོས་དང་ཞལ་དག་ནི། །རྡུལ་དང་བྲལ་བ་ཉིད་དུ་སྣང་བ་ལས། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་
སུ་བཅད་པ་དག་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །གནས་འཇོག་གསེར་མདོག་ཨོ་ཏ་ལ་དག་ཀྱང་། །བུ་ཡི་དོན་དུ་
འདོད་པས་རྨོངས་གྱུར་ཏེ། །འདི་ནི་ཆོས་བཞིན་ཕུལ་བས་ཐུབ་རྣམས་ཀྱིས། །རྟག་པར་རྒྱུན་དུ་བུ་དག་བསྐྱེད་པར་གྱུར། །དེ་ནས་ཀུན་དུ་རྒྱུ་མ་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གི་བུ་མོ་དམ་པ་
གཟུགས་ལྡན་ཞིང་། །དར་བ་བརྒྱན་པ་འདོད་པ་དོན་གཉེར་བ། །ཁྱོད་ལ་འབུལ་བ་འདི་ལ་ཁྱོད་གཟིགས་ཤིང་། །མཁའ་ལ་དགུང་ཟླ་སྨིན་དྲུག་མཇལ་བ་ལྟར། །འདི་དང་ལྷན་ཅིག་ལེགས་པར་ཁྱོད་དགྱེས་མཛོད། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་

དཔེ་མེད་མ་ལ་རྗེས་སུ་ཆགས་པའི་ཚིག་བརྗོད་ན་དཔེ་མེད་མ་འདོད་ཆགས་ཀྱིས་གདུངས་ཏེ་དུས་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་བདག་གིས་འདི་ལ་ཁོང་ཁྲོ་བའི་ཚིག་བརྗོད་པར་བྱའོ་སྙམ་དུ་རིག་ནས་ཚིགས་སུ་བཅད་པ་བཀའ་སྩལ་
པ། བྲམ་ཟེ་ང་ཡིས་བདུད་ཀྱི་བུ་མོ་ནི། །སྲེད་མ་དགའ་བྱེད་དེ་བཞིན་དགའ་མོ་དག །ཕམ་བྱས་འདོད་པ་དག་ལ་ལན་འགའ་ཡང་། །ང་ཡིས་འདུན་པའི་སེམས་བསྐྱེད་མ་གྱུར་པས། །བཤང་དང་གཅི་བས་གང་བ་འདི་ལ་ནི། །རྐང་པས་རེག་པར་སྤྲོ་བའང་མི་སྐྱེད་དོ། །མ་
དུས་ཚིགས་སུ་བཅད་པ་གསོལ་པ། བདག་གི་བུ་མོ་ཡན་ལག་ཉམས་གྱུར་ཅིང་། །འདོད་ལྡན་ཡོན་ཏན་བྲལ་བར་གཟིགས་སམ་ཅི། །ཇི་སླད་འདོད་སྤྱོད་ཡིད་འོང་གཟུགས་དག་ལ། །འདུན་དྲག་བགྱིད་ལྟར་འདི་ལ་ཁྱོད་མི་མཛད། །བཅོམ་ལྡན་འདས་ཀྱིས་ཀྱང་ཚིགས་
སུ་བཅད་པ་དག་བཀའ་སྩལ་པ། བྲམ་ཟེ་རྨོངས་པ་གང་ཞིག་ཡུལ་འདོད་པ། །དེ་ནི་ཁྱོད་ཀྱི་བུ་མོ་འདི་སྒྲུབ་ཅིང་། །ཡུལ་ལ་ཆགས་ཤིང་ཁྲོ་བར་ཞུགས་གྱུར་པ། །འདི་ལ་རབ་རྨོངས་སྐྱེ་བོ་ཆགས་བྲལ་མིན། །ང་ནི་སངས་རྒྱས་ཐུབ་གཙོ་མངའ་བདག་སྟེ། །ང་ཡིས་བྱང་
ཆུབ་བླ་མེད་ཞི་བ་བརྙེས། །ཇི་ལྟར་པད་མ་ཆུས་མི་ཆགས་པ་ལྟར། །ཆགས་པ་མེད་པ་ཉིད་དུ་འཇིག་རྟེན་རྒྱུ། །ཨུཏྤལ་སྔོན་པོ་རྫབ་དང་ཆུ་ནང་ན། །རྫབ་དང་ཆུ་ཡིས་གོས་པ་མེད་པ་ལྟར། །བྲམ་ཟེ་དེ་བཞིན་ང་ཡིས་འཇིག་རྟེན་ན། །འདོད་པ་དག་ལ་རྣམ་གྲོལ་སེམས་
ཀྱིས་སྤྱོད། །དེ་ནས་དཔེ་མེད་མ་བཅོམ་ལྡན་འདས་ཀྱིས་བཤང་བ་དང་གཅི་བ་ཞེས་བྱ་བའི་ཚིག་གིས་ཀུན་དུ་སྤྱད་པས་རངས་པ་དང་བྲལ་ཏེ། ཡིད་མི་བདེ་བར་གྱུར་ནས་དེའི་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་མེད་པར་གྱུར་ཅིང་། ཞེ་སྡང་གི་ཀུན་ནས་དཀྲིས་པ་
སྐྱེས་པས་རུས་པ་དག་སྦོམ་པོར་གྱུར་ཅིང་། མིག་གཉིས་ཀྱང་མཆིང་བུ་ལྟ་བུར་གྱུར་ཏོ། །དེའི་ཚེ་ན་རྒན་ཞུགས་ཤིག་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཏོ། །དེ་ནས་བཅོམ་ལྡན་འདས་ལ་རྒན་ཞུགས་དེས་འདི་སྐད་ཅེས་གསོལ་ཏོ། །ཀུན་ཏུ་གཟིགས་

པ་བུད་མེད་བླང་མཛད་དེ། །བཅོམ་ལྡན་དེ་ནི་བདག་ལ་སྩལ་དུ་གསོལ། །དཔའ་བོ་བདག་གིས་དྲེགས་པས་བརྒྱན་པ་འདི། །ཅི་ནས་རྗེས་སུ་མཐུན་པ་སྤྱད་པར་བགྱི། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒན་ཞུགས་དེ་ལ་འདི་སྐད་
ཅེས་བཀའ་སྩལ་ཏོ། །མི་གཏི་མུག་ཅན་ངའི་མདུན་ན་མ་འདུག་པར་ཕར་སོང་ཤིག །དེ་ཁྲོས་ཏེ་ཚིགས་སུ་བཅད་པ་སྨྲས་པ། ཁྱོད་ཀྱི་ལྷུང་བཟེད་འདི་དང་ཆོས་གོས་འདི། །ཁར་བ་རིལ་བ་འདི་ཡང་ཟད་གྱུར་ཅིག །བསླབ་པ་འདི་ཡང་ཇི་ལྟར་མ་མ་ཡི། །པང་པར་
གཞོན་ནུ་འཛིན་ལྟར་རང་སྲེལ་ཅིག །རྒན་ཞུགས་དེས་དེ་སྐད་ཅེས་སྨྲས་ནས་བསླབ་པ་ཕུལ་ཏེ་ཉམས་པའི་ཕྱིར་ཞུགས་ནས་ཀུན་དུ་རྒྱུ་མ་དུ་ག་ལ་བ་དེར་སོང་སྟེ་ཕྱིན་ནས་ཀུན་དུ་རྒྱུ་མ་དུ་ལ་འདི་སྐད་ཅེས་སྨྲས་སོ། །མ་དུ་དཔེ་མེད་མ་ཁོ་བོ་ལ་བྱིན་ཅིག །དེས་ཁྲོས་ཏེ་སྨྲས་པ།
རྒན་ཞུགས་ཁྱོད་ལ་བལྟ་བ་ཡང་མི་སྦྱིན་ན་རེག་པ་ལྟ་སྨོས་ཀྱང་ཅི་དགོས། དེ་སྐད་ཅེས་སྨྲས་པ་དང་། རྒན་ཞུགས་དེས་ཀུན་དུ་རྒྱུ་མ་དུ་ལ་འདི་ལྟ་བུའི་ཀུན་ནས་དཀྲིས་པ་སྐྱེས་ཏེ་དེས་ཁྲག་ཚ་བ་སྐྱུགས་ནས་དུས་ལ་བབ་སྟེ་སེམས་ཅན་དམྱལ་བ་རྣམས་སུ་སྐྱེས་སོ།། །།འདུལ་
བ་རྣམ་པར་འབྱེད་པ། བམ་པོ་བདུན་བཅུ་རྩ་དྲུག་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་དཔེ་མེད་མ་བརྙེས་པ་ནམ་བཞེས་པ་ལ་གཟིགས། བཅོམ་ལྡན་འདས་
ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་རྙེད་པ་ན་མ་བླངས་ཏེ་དེ་ཉོན་ཅིག །དགེ་སློང་དག་སྔོན་བྱུང་བ་རི་བྲགས་ཤིག་ན་ལྕགས་མགར་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་
རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་བུ་མོ་གཟུགས་

བཟང་བ། བལྟ་ན་སྡུག་པ། མཛེས་པ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །ལྕགས་མགར་དེས་བསམས་པ། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི།
འདི་ལྟར་གང་བདག་དང་བཟོས་མཉམ་པའམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་སློང་མོའི་དོན་དུ་དེའི་ཁྱིམ་དུ་ཞུགས་པ་དང་། བུ་མོ་དེས་ཟས་ཁྱེར་ཏེ་ཕྱིར་བྱུང་བ་ན་བྲམ་ཟེའི་ཁྱེའུ་དེས་མཐོང་ནས་སྨྲས་པ། བུ་མོ་ཁྱོད་འགའ་
ཞིག་ལ་བྱིན་ནམ། འོན་ཏེ་མ་བྱིན། དེས་སྨྲས་པ། བདག་གི་ཕ་ཇི་སྐད་ཟེར་བ་དང་སྦྱར་ན་དེས་བདག་སུ་ལ་ཡང་སྦྱིན་པར་དཀའོ། །ཁྱོད་ཀྱི་ཕ་ཇི་སྐད་ཟེར། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་
ཡང་མི་སྦྱིན་གྱི། འདི་ལྟར་གང་བདག་དང་བཟོས་མཉམ་པའམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་ཞེས་ཟེར་རོ། །ཁྱོད་ཀྱི་ཕ་བཟོ་ཇི་ལྟ་བུ་ཤེས། ཁབ་གང་ཆུའི་སྟེང་ན་འཕྱོ་བ་དེ་ལྟ་བུ་ཤེས་སོ། །བྲམ་ཟེའི་ཁྱེའུ་དེས་བསམས་པ། འདི་ལྟར་བདག་འདི་དོན་དུ་
མི་གཉེར་མོད་ཀྱི་འདིའི་ང་རྒྱལ་བཅག་པར་བྱའོ་སྙམ་ནས། དེ་མཁས་པ་ཡིན་པས་དེས་བཟོའི་གནས་དང་། ལས་ཀྱི་གནས་དེ་དང་དེ་དག་ནས་ལྕགས་མགར་གྱི་མགར་སྤྱད་དག་བརྙས་ཏེ་ཁབ་གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་བརྡུངས་ཤིང་ཁབ་སྦོམ་པོ་གཅིག་བརྡུངས་
ནས་དེའི་མིག་ཏུ་ཁབ་ཕྲ་མོ་བདུན་བཅུག་ན་དེ་དང་ལྷན་ཅིག་ཆུའི་སྟེང་ན་འཕྱོ་བ་བརྡུངས་སོ། །དེས་དེ་དག་བརྡུངས་ནས་ལྕགས་མགར་དེའི་ཁྱིམ་དུ་འོངས་ཏེ་སྨྲས་པ། ཁབ་སུ་ཉོ་ཁབ་སུ་ཉོ་ཞེས་བྱས་པ་དང་། བུ་མོ་དེས་མཐོང་ནས་ཚིགས་སུ་བཅད་པ་སྨྲས་པ། གྲོགས་པོ་
ཁྱོད་ནི་སྨྱོས་པ་འམ། །འོན་ཏེ་སེམས་མེད་གྱུར་པ་ཡིན། །གང་ཕྱིར་ལྕགས་མགར་ཁྱིམ་དུ་ཁྱོད། །ཁབ་དག་འཚོང་དུ་འོངས་པར་གྱུར། །དེས་ཀྱང་ཚིགས་སུ་བཅད་པ་དག་སྨྲས་པ། བཟང་མོ་ཁོ་བོ་སྨྱོས་པ་མིན། །སེམས་མེད་གྱུར་པའང་མ་ཡིན་ཏེ། །ང་རྒྱལ་

བཅག་པར་བྱ་བའི་ཕྱིར། །ཁོ་བོས་བཟོ་དག་ཉེ་བར་བསྒྲུབས། །གལ་ཏེ་ཁོ་བོའི་བཟོ་འདྲ་བ། །ཁྱོད་ཀྱི་ཕ་ཡིས་ཤེས་གྱུར་ན། །ཁྱོད་དང་ནོར་གྱི་རྣམ་པ་ནི། །མང་པོ་གཞན་ཡང་སྦྱིན་པར་གྱིས། །དེས་སྨྲས་པ། ཁྱོད་ཀྱིས་བཟོ་ཇི་ལྟ་བུ་ཤེས། ཁབ་
གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་ཤེས་སོ། །དེས་མ་ལ་སྦྲན་པ། ཡུམ་བཟོ་བོའི་བུ་ཞིག་མཆིས་སོ། །དེས་སྨྲས་པ། འཇུག་ཏུ་ཆུག་ཤིག །དེས་འཇུག་ཏུ་བཅུག་པ་དང་། ལྕགས་མགར་གྱི་ཆུང་མས་སྨྲས་པ། ཁྱོད་བཟོ་ཇི་ལྟ་བུ་ཤེས། དེས་སྨྲས་པ་དང་། དེས་
ཁྱིམ་ཐབ་ལ་སྦྲན་པ། རྗེའི་སྲས་བཟོ་བོའི་ཁྱེའུ་འདིས་བཟོ་འདི་ལྟ་བུ་འཚལ་ཏོ། །དེས་སྨྲས་པ། གལ་ཏེ་དེ་ལྟ་ན་ཆུ་འོན་ཅིག་དང་བལྟའོ། །དེས་ཆུས་སྣོད་བཀང་སྟེ་ཕུལ་བ་དང་། དེས་ཁབ་གཅིག་བཅུག་ན་དེ་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང་། གསུམ་
པ་ནས་བདུན་པའི་བར་དུ་བཅུག་ན་དེ་ཡང་འཕྱོ་བར་བརྩམས་སོ། །དེས་ཁབ་སྦོམ་པོ་དེ་བཅུག་ན་དེ་ཡང་འཕྱོ་བར་བརྩམས་སོ། །ཡང་དེར་ཁབ་གཅིག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང་། གསུམ་པ་ནས་བདུན་པའི་
བར་དག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །ལྕགས་མགར་གྱིས་བསམས་པ། འདི་བདག་པས་བཟོ་ཆེས་ལྷག་པ་ཡིན་གྱིས་འདི་ལ་བུ་མོ་སྦྱིན་ནོ་སྙམ་དུ་རིག་ནས། བུ་མོ་དེ་རྒྱན་ཐམས་ཅད་ཀྱིས་བཀླུབས་ཏེ་ལག་པ་གཡོན་པས་བཟུང་ནས་ལག་པ་གཡས་པས་
རིལ་བ་བྷྲིང་གར་ཐོགས་ཏེ་བྲམ་ཟེའི་ཁྱེའུ་དེའི་མདུན་དུ་འདུག་ནས་སྨྲས་པ། བྲམ་ཟེའི་ཁྱེའུ་ཁྱོད་ལ་ཁོ་བོས་བུ་མོ་འདི་ཆུང་མར་སྦྱིན་ནོ། །དེས་སྨྲས་པ། ཁོ་བོ་འདི་དོན་དུ་མི་གཉེར་ཏེ། འདི་ལྟར་ཁོ་བོས་ཁྱོད་ཀྱི་ང་རྒྱལ་བཅག་པར་བྱ་བའི་ཕྱིར་བཟོ་ཉེ་བར་བསྟན་ཏོ། །དགེ་
སློང་དག་དེའི་ཚེ་དེའི་དུས་ན་བྲམ་ཟེའི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་ལྕགས་མགར་གང་ཡིན་པ་དེ་ནི་ཀུན་དུ་རྒྱུ་མ་དུ་འདི་ཡིན་ནོ། །དེའི་ཚེ་དེའི་དུས་ན་ལྕགས་མགར་གྱི་ཆུང་མ་གང་ཡིན་པ་དེ་ནི་བུར་མ་འདི་ཡིན་ནོ། །དེའི་ཚེ་དེའི་དུས་ན་ལྕགས་

མགར་གྱི་བུ་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། དེའི་དུས་ན་ཡང་ངས་དཔེ་མེད་མ་འདི་རྙེད་པ་ན་མ་བླངས་ལ་ད་ལྟར་ཡང་ངས་འདི་རྙེད་པ་ན་མ་བླངས་སོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ།
བཙུན་པ་རྒན་ཞུགས་འདི་དཔེ་མེད་མ་ལ་བརྟེན་ནས་ཚུལ་མ་ལགས་པས་སྡུག་བསྔལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདི་དཔེ་མེད་མ་ལ་བརྟེན་ནས་བཙུན་མོའི་འཁོར་
དང་བཅས་པ་ཚུལ་མ་ཡིན་པས་སྡུག་བསྔལ་བར་གྱུར་ཏེ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་སེང་གེ་ལྟ་བུ་ན་རྒྱལ་པོ་སེང་གེ་རལ་པ་ཅན་གྱིས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་
དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ། །
དེའི་ཚེ་ན་རྒྱལ་པོའི་ཕོ་བྲང་སེང་གེ་ལྟ་བུ་ན་དེད་དཔོན་སེང་གེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་
མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་
པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་པ་ཞུགས་པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་

ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག །བདག་
ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང་། ཁོ་བོ་དང་མཐུན་པར་སྐྱེ་ཞིང་
མི་མཐུན་པར་མི་སྐྱེ་བ་དང་། ཁོ་བོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང་། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ་མང་པོ་ཡང་རུང་བའི་སྦྱིན་པ་
དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་
ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང་། དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་
མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་། སེ་མོ་དོ་དང་། རྒྱན་གྱིས་བཀླུབས་པའི་ལུས་ལྷའི་བུ་མོ་
དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་དང་། ཤོད་ཀྱིས་གཞིར་མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུག་གོ། །དེ་ཟླ་བ་བརྒྱད་དམ་དགུ་འདས་ཏེ་

བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ་། །དེའི་
ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེའི་ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་འདི་དེད་དཔོན་སེང་གེའི་བུ་ཡིན་པ་དེའི་ཕྱིར་
ཁྱེའུ་འདིའི་མིང་སིང་ག་ལ་ཞེས་བྱའོ། །ཞེས་དེའི་མིང་སིང་ག་ལ་ཞེས་བྱ་བར་བཏགས་སོ། །ཁྱེའུ་སིང་ག་ལ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་
རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །
དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ནས། དེའི་ཡི་གེ་མཐར་ཕྱིན་ཅིང་འབྱེད་པ་དང་། ཀློག་པ་དང་། མཁས་པ་དང་། སྤྱོད་པ་གསལ་བ་དང་།
བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་རྟ་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་
འཁོར་གསུམ་པོ་རབ་དང་། འབྲིང་དང་། ཐ་མ་དག་རྣམ་པར་བཞག་གོ། །འདུག་པའི་གནས་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ། །སྐྱེད་མོས་ཚལ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ། །

དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་ཕ་ལ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་པར་ཅི་གནང་། དེས་སྨྲས་པ།
བུ་རེ་ཞིག་ཁོ་བོ་ལ་ནོར་གྱི་རྣམ་པ་མང་དུ་ཡོད་དེ། གལ་ཏེ་ཁྱོད་ཏིལ་དང་། འབྲས་དང་རྒྱ་ཤུག་དང་། རྒྱ་སྲན་ལ་སོགས་པ་ལ་སྤྱོད་པ་བཞིན་དུ་རིན་པོ་ཆེ་དག་ལ་སྤྱོད་པར་བྱེད་ཀྱང་དེ་ལྟ་ན་ཡང་ཁོ་བོའི་ལོངས་སྤྱོད་སྲབས་པ་ཉིད་དང་། ཡོངས་སུ་ཟད་པ་དང་། ཡོངས་
སུ་གཏུགས་པར་མི་འགྱུར་གྱིས། དེའི་ཕྱིར་ཇི་སྲིད་དུ་ཁོ་བོ་གསོན་པ་དེ་སྲིད་དུ་ཁྱོད་རྩེ་བར་གྱིས། དགའ་བར་གྱིས། དགའ་མགུར་སྤྱོད་པར་གྱིས་ལ་ཁོ་བོ་འདས་པ་དང་ནོར་བསྒྲུབ་པར་གྱིས་ཤིག །དེས་ཡང་དང་ཡང་དུ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་
པར་ཅི་གནང་། དེས་གདོན་མི་ཟ་བར་དུས་ཀྱིས་འཆུ་བར་ཤེས་ནས་སྨྲས་པ། བུ་དེ་ལྟར་གྱིས་ཤིག །འདི་ལྟར་ཁྱོད་ཀྱིས་འཇིགས་པ་དང་། འཇིགས་སུ་རུང་བ་དག་བཟོད་པར་བྱའོ། །དེས་རྒྱལ་པོའི་ཕོ་བྲང་སེང་གེ་ལྟ་བུར་དྲིལ་བསྒྲགས་པ་བྱེད་དུ་བཅུག་སྟེ། རྒྱལ་པོའི་
ཕོ་བྲང་སེང་གེ་ལྟ་བུ་ན་གནས་པ་དང་། ཡུལ་ཐ་དད་པ་ནས་ལྷགས་པའི་ཚོང་པ་ཤེས་ལྡན་དག་ཉོན་ཅིག །དེད་དཔོན་སིང་ག་ལ་རྒྱ་མཚོ་ཆེན་པོར་འཇུག་པར་འགྱུར་གྱིས། ཁྱེད་ཅག་ལས་གང་དེད་དཔོན་སིང་ག་ལ་དང་ལྷན་ཅིག་ཤོ་གམ་མེད་པ་དང་། ལ་གཅན་མེད་པ་
དང་། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་འདོད་པ་དེས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་གྱིས་ཤིག་ཅེས་བསྒོའོ། །ཚོང་པ་ལྔ་བརྒྱས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་སིང་ག་ལས་ཕ་མ་དང་། གཞན་ཡང་སྙིང་དུ་
སྡུག་ཅིང་འབྲེལ་བའི་རྩ་ལག་དག་ལ་བལྟས་ནས་ཉི་མ་དང་། ཚེས་གྲངས་དང་། ཡུད་ཙམ་དང་། སྦྱོར་བས་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་བྱས་ནས། ཤིང་རྟ་དག་དང་། ཁུར་དག་དང་། གླེ་བ་དག་དང་། སྤྱད་དག་དང་། རྔ་

མོ་དག་དང་། བ་ལང་དག་དང་། བོང་བུ་མང་པོ་དག་གིས་རྒྱ་མཚོ་ཆེན་པོར་འགྲོ་བའི་ཟོང་ཁྱེར་ཏེ་ཚོང་པ་ལྔ་བརྒྱའི་འཁོར་དང་ལྷན་ཅིག་འཕགས་སོ། །དེ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་ཚོང་
རྡལ་དག་ལ་རྣམ་པར་ལྟ་ཞིང་འགྲོ་བ་ན་རྒྱ་མཚོ་ཆེན་པོའི་འགྲམ་དུ་ཕྱིན་ཏོ། །དེས་རྙིང་པ་ལྔ་བརྒྱས་གྲུ་སྦྱར་ནས་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང་། སེལ་བར་བྱེད་པ་དང་། གྲུ་པ་དང་། རྐྱལ་ཆེན་པ་དང་། རླུང་ཡོར་ཐོགས་པ་དག་ཁྲིད་དེ་ལན་གསུམ་དྲིལ་
བསྒྲགས་པ་བྱས་ཏེ་རྒྱ་མཚོ་ཆེན་པོར་འཇུག་པར་བརྩམས་སོ། །དེ་ནས་ཚོང་པ་དེ་དག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བ་ཤེས་པར་དཀས། བདག་
ཅག་ནོར་སྒྲུབ་པ་དག་གིས་སོ་སོ། སོ་སོ་དག་ནས་ཕོངས་པའི་དོན་དུ་ཆུར་རྐྱལ་པ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ཁ་ཅིག་གིས་ནི་
ཀུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་དག་བཀུར་རོ་སྙམ་ནས། དེ་ནས་ནོར་སྒྲུབ་པ་དེ་དག་གིས་དེ་ལྟར་སོ་སོར་བརྟགས་ནས་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ། ཁ་ཅིག་གིས་ནི་ཤལ་མ་ལའི་སྤང་ལེབ་དག །ཁ་ཅིག་གིས་ནི་སྔས་ཤིང་
བལ་ཅན་དག །ཁ་ཅིག་གིས་ནི་ཀུ་བའི་གཟིངས་དག །ཁ་ཅིག་གིས་ནི་ར་རྐྱལ་དག་ཁྱེར་ཏེ་རྒྱ་མཚོ་ཆེན་པོར་ཞུགས་སོ། །དེ་དག་རྒྱ་མཚོ་ཆེན་པོའི་ནང་དུ་དོང་བ་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ། །དེ་དག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་
ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་པ་དག་ལ་ཞོན་ཏེ་འདི་ལྟ་སྟེ། ཁ་ཅིག་གིས་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་གིས་ནི་སྔས་ཤིང་བལ་ཅན་དག་ལ་ཞོན། ཁ་ཅིག་གིས་ནི་ཀུ་བའི་གཟིངས་དག་ལ་ཞོན། ཁ་ཅིག་གིས་ནི་ར་རྐྱལ་དག་ལ་ཞོན་ཏེ་

ཆུའི་སྟེང་ན་འཕྱོའོ། །དེ་དག་གི་ལས་ཀྱི་རྣམ་པར་སྨིན་པས་བྱང་ཕྱོགས་ནས་རླུང་ལངས་ནས་དེས་དེ་དག་ལྷོ་ཕྱོགས་ཀྱི་འགྲམ་དུ་བདས་པ་དང་། ཟངས་གླིང་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་དག་འཁོད་པ་དེ་དག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་
དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་རྒྱལ་མཚན་དགའ་བའི་གནས་དང་མཐུན་པ་དང་། ཕོངས་པའི་གནས་དང་མཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་མཐུན་པའི་རྒྱལ་མཚན་གཡོ་བར་བརྩམས་པ་དང་། དེ་དག་གིས་སྨྲས་པ། ཕུ་ནུ་མོ་དག་དགའ་
བའི་གནས་དང་མཐུན་པའི་རྒྱལ་མཚན་གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ་འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང་། ཇི་ཙམ་ན་སྐྱེ་བོ་ཕལ་པོ་ཆེའི་ཚོགས་ཆུར་
རྐྱལ་བ་སྣ་ཚོགས་དག་གིས་རྐྱལ་ཞིང་འོང་བ་མཐོང་ངོ་། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས་རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང་། ཕྲེང་བ་རྒྱུས་བཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ཇོ་བོ་དག་ཚུར་སྤྱོན།
བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་
མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག །འདི་དག་ནི་ཁྱེད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་
གྱི་གནས་དག་དང་། ཀུན་དགའི་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་།

མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས། ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང་། དགའ་བ་དང་།
དགའ་མགུར་སྤྱོད་པར་མཛོད་ཅིག །ཁྱེད་ཅག་ལས་འགའ་ཡང་ཤིན་ཏུ་མྱོས་པར་གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བཅོམ་ལྡན་འདས་ཀྱིས་དགེ་སློང་དག་ངས་འདི་ལྟ་སྟེ། སྐྱེས་པ་ལ་བུད་མེད་ཀྱི་གཟུགས་ཇི་ལྟར་ཆགས་པར་འགྱུར་བ་དང་། རྒྱགས་
པར་འགྱུར་བ་དང་། འདོད་པར་འགྱུར་བ་དང་། སྡུག་པར་འགྱུར་བ་དང་། བྱམས་པར་འགྱུར་བ་དང་། རྔོད་པར་འགྱུར་བ་དང་། བརྒྱལ་བར་འགྱུར་བ་དང་། འཆིང་བར་འགྱུར་བ་དང་། སྒྲུབ་པར་འགྱུར་བ་དང་། ཀུན་དུ་སྦྱར་བར་འགྱུར་བ་དེ་ལྟ་བུའི་གཟུགས་
གཞན་ཅིག་ཀྱང་ཡང་དག་པར་རྗེས་སུ་མ་མཐོང་ངོ་ཞེས་གསུངས་པས། དེ་དག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆེན་པོ་ལས་རྒལ་ཏེ་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་དེ་དག་དང་ལྷན་ཅིག་རྩེ་བར་བྱེད།
དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ་། །དེ་ནས་དེད་དཔོན་སིང་ག་ལ་འདི་སྙམ་དུ་སེམས་ཏེ། ཅིའི་ཕྱིར་བུད་མེད་འདི་དག་ལྷོ་ལམ་ཤིན་ཏུ་སྲུང་བར་སེམས། བདག་བུད་མེད་འདི་དང་ལྷན་ཅིག་ཉལ་ཞིང་དེ་གཉིད་
ལོག་པ་དང་མལ་དུ་ཞུགས་པར་རིག་ནས་ཁད་ཀྱིས་དལ་བུ་དལ་བུས་མལ་ཆེན་པོ་ལས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་འགྲོའོ་སྙམ་མོ། །དེ་ནས་དེད་དཔོན་སིང་ག་ལ་བུད་མེད་གང་དང་ལྷན་ཅིག་ཉལ་བ་དེ་གཉིད་ལོག་ཅིང་མལ་དུ་ཞུགས་པར་
རིག་ནས། ཁད་ཀྱིས་དལ་བུ་དལ་བུས་མལ་ཆེན་པོ་ནས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་སོང་བ་དང་། དེས་དེ་ན་སྐྱེ་བོ་ཕལ་པོ་ཆེ་སྨྲེ་སྔགས་འདོན་པའི་སྒྲ་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང་། ཀྱི་ཧུད་འཛམ་བུའི་གླིང་

དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཟེར་བ་ཐོས་སོ། །ཐོས་ནས་ཀྱང་དེ་འཇིགས་པ་དང་། སྐྲག་པ་དང་། སྔངས་པ་དང་། སྤུ་ཟིང་ཞེས་བྱེད་པར་གྱུར་ཏོ། །དེ་ནས་དེད་དཔོན་
སིང་ག་ལ་ཡུད་ཙམ་ཞིག་ཅང་མི་སྨྲ་བར་འདུག་སྟེ། འཇིགས་པ་དང་། སྐྲག་པ་དང་། སྔངས་པ་དང་། སྤུ་ཟིང་ཞེས་བྱེད་པ་དེ་དག་བསལ་ནས་ལྷོ་ལམ་དེ་ཉིད་དུ་སོང་བ་དང་། དེས་དེ་ན་ལྕགས་ཀྱི་གྲོང་ཁྱེར་ཆེན་པོ་འཕང་མཐོ་བ། ཐག་གྲུ་ཆེ་བ་ཞིག་མཐོང་ནས་དེས་གྲོང་
ཁྱེར་དེ་ལ་སྒེའུ་ཆུང་འགའ་ཞིག་ཡོད་དམ་སྙམ་ནས་ཁོ་ར་ཁོར་ཡུག་ཏུ་བྱུལ་ན། དེས་གྲོང་ཁྱེར་དེའི་ཁོ་ར་ཁོར་ཡུག་ཏུ་བྱུལ་བ་ན་གྲོང་ཁྱེར་དེ་ལ་ཐ་ན་བྱི་ལ་འཛུལ་བ་ཙམ་གྱི་སྒེའུ་ཆུང་ཡང་མ་རྙེད་དོ། །དེའི་བྱང་ཕྱོགས་ཀྱི་ངོས་ན་ཤིང་ལྗོན་པ་ཤི་རི་ཤ་ཆེན་པོ་འཕང་མཐོ་བ། ཐག་
གྲུ་ཆེ་བ་དག་ཡོད་ནས། དེ་ཤིང་ལྗོན་པ་ཤི་རི་ཤ་ཆེན་པོ་འཕང་མཐོ་བ། ཐག་གྲུ་ཆེ་བ་དེ་ལ་འཛེགས་ཏེ་སྐྱེ་བོ་ཕལ་པོ་ཆེའི་ཚོགས་དེ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅིའི་ཕྱིར་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང་། ཀྱི་ཧུད་འཛམ་བུའི་
གླིང་དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཤིན་ཏུ་སྨྲེ་སྔགས་འདོན་པར་བྱེད། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ནི་འཛམ་བུའི་གླིང་པའི་ཚོང་པ་ནོར་སྒྲུབ་པ་རྒྱ་མཚོའི་གྲུ་བསྒྲུབས་ཏེ་རྒྱ་མཚོ་
ཆེན་པོར་འཇུག་འདོད་ནས་ཁོ་བོ་ཅག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བར་ཤེས་པར་དཀས་བདག་ཅག་ནོར་སྒྲུབ་པ་དག་གིས་སོ་སོ་སོ་སོ་དག་ནས་ཕོངས་པའི་
དོན་དུ་ཆུར་རྐྱལ་བ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ཁ་ཅིག་གིས་ནི་ཀུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་

དག་བཀུར་རོ་སྙམ་ནས། དེ་ནས་ནོར་སྒྲུབ་པ་བདག་ཅག་གིས་དེ་ལྟར་སོ་སོར་བརྟགས་ནས། སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁ་ཅིག་གིས་ཤལ་མ་ལའི་སྤང་ལེབ་དག །ཁ་ཅིག་གིས་ནི་སྔས་ཤིང་བལ་ཅན་དག །ཁ་ཅིག་གིས་ནི་ཀུ་བའི་གཟིངས་དག །
ཁ་ཅིག་གིས་ནི་ར་རྐྱལ་དག་ཁྱེར་ནས་རྒྱ་མཚོ་ཆེན་པོར་ཞུགས་སོ། །བདག་ཅག་རྒྱ་མཚོ་ཆེན་པོའི་ནང་དུ་དོང་བ་ན་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ། །བདག་ཅག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་
པ་དག་ལ་ཞོན་ཏེ་འདི་ལྟ་སྟེ། ཁ་ཅིག་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་ནི་སྔས་ཤིང་བལ་ཅན་དག་ལ་ཞོན། ཁ་ཅིག་ནི་ཀུ་བའི་གཟིངས་དག་ལ་ཞོན། ཁ་ཅིག་ནི་ར་རྐྱལ་དག་ལ་ཞོན་ཏེ་ཆུའི་སྟེང་ན་འཕྱོའོ། །བདག་ཅག་གི་ལས་ཀྱི་རྣམ་པར་སྨིན་པས་
བྱང་ཕྱོགས་ནས་རླུང་ལངས་ནས་དེས་བདག་ཅག་ལྷོ་ཕྱོགས་ཀྱི་འགྲམ་དུ་བདས་པ་དང་། ཟངས་གླིང་འདི་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་འཁོད་པ་དེ་དག་བདག་ཅག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་
རྒྱལ་མཚན་དགའ་བའི་གནས་དང་མཐུན་པ་དང་། ཕོངས་པའི་གནས་དང་མཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་མཐུན་པའི་རྒྱལ་མཚན་གཡོ་བར་བརྩམས་པ་དང་། དེ་དག་གིས་སྨྲས་པ། ཕུ་ནུ་མོ་དག་དགའ་བའི་གནས་དང་མཐུན་པའི་རྒྱལ་མཚན་
གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ། འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང་། ཇི་ཙམ་ན་བདག་ཅག་ཚོང་པ་ཕལ་པོ་ཆེའི་ཚོགས་ཆུར་རྐྱལ་བ་སྣ་
ཚོགས་དག་གིས་རྐྱལ་ཞིང་འོང་བ་མཐོང་ངོ་། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས། རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང་། ཕྲེང་བ་རྒྱུས་བཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ཇོ་བོ་དག་ཚུར་སྤྱོན། བཞིན་

བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་
མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག །འདི་དག་ནི་ཁྱེད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་གྱི་
གནས་དག་དང་། ཀུན་དགའ་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་
དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས་ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་
སྤྱོད་པ་མཛོད་ཅིག །ཁྱེད་ཅག་ལས་འགའ་ཡང་ཤིན་ཏུ་མྱོས་པར་གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བདག་ཅག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆེན་པོ་ལས་རྒལ་ཏེ། དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་
བྱེད་དོ། །བདག་ཅག་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ་། །བུད་མེད་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་
ན་ཇི་སྲིད་དུ་འཛམ་བུའི་གླིང་པའི་ཚོང་པ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་མ་ཐོས་ཀྱི་བར་དུ་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །གང་གི་ཚེ་དེ་དག་གིས་འཛམ་བུའི་གླིང་

པའི་ཚོང་པ་རབ་ཏུ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་ཐོས་པ་དེའི་ཚེ་ན་དེ་དག་བདག་ཅག་གི་གན་དུ་འོངས་ཤིང་བདག་ཅག་ལས་གཞན་དག་ཟོས་ནས། འདི་ལྟར་སྐྱེས་བུ་ཟ་བ་ན་སྐྲ་དང་། སྤུ་དང་། སེན་མོ་དང་། སོའི་ལྷག་མ་གང་དག་
ཡིན་པ་དེ་དག་ཀྱང་མ་ལུས་པར་ཟ་བར་བྱེད་ཅིང་། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་བཞིན་དུ་ཁར་འཇུག་པར་བྱེད་དོ། །མ་ཟོས་པ་དེ་དག་གི་ལྷག་མ་ནི་ཁོ་བོ་ཅག་ཡིན་
ཏེ། ལྕགས་ཀྱི་མཁར་ཆེན་པོ་འདིར་བཅུག་སྟེ། བཟོད་ལྡན་བུད་མེད་དེ་དག་ནི་སྲིན་མོ་ཡིན་གྱིས་བཟོད་ལྡན་ཁྱོད་ཀྱང་བདག་ཉིད་སྲུངས་ཤིག །སིང་ག་ལས་སྨྲས་པ། ཤེས་ལྡན་དག་གང་གིས་ཁྱེད་ཅག་དང་ཁོ་བོ་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་
དུ་ཕྱིན་པར་འགྱུར་བའི་ཐབས་འགའ་ཡོད་དམ། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །དེ་ཅིའི་ཕྱིར་ཞེ་ན། བདག་ཅག་གིས་གལ་ཏེ་འདི་
སྙམ་དུ་ཀྱེ་མ་བདག་ཅག་ལྕགས་ཀྱི་གྲོང་ཁྱེར་འདིའི་འོག་བརྟོལ་ཏེ་འབྲོས་སོ་སྙམ་ན། དེ་འོག་ཉིས་འགྱུར་སུམ་འགྱུར་དུ་སྐྱེལ། གལ་ཏེ་འདི་སྙམ་དུ་ཀྱེ་མ་བདག་ཅག་ལྕགས་ཀྱི་གྲོང་ཁྱེར་འདིའི་སྟེང་ནས་རྒལ་ཏེ་འབྲོས་སོ་སྙམ་ན། དེའི་སྟེང་ཉིས་འགྱུར་སུམ་འགྱུར་དུ་སྐྱེ་
བའི་ཕྱིར་ཏེ། བཟོད་ལྡན་དེའི་ཕྱིར་ཁོ་བོ་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །ཁྱེད་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་
ཡོད་དོ། །ཤེས་ལྡན་དག་གང་གིས་ཁོ་བོ་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་དེ་གང་ཡིན། བཟོད་ལྡན་འདི་ན་བདག་ཅག་གིས་སྟེང་ན་ལྷ་དག་རྣམ་པར་རྒྱུ་བའི་སྒྲ་ཐོས་པ། ཀྱེ་འཛམ་བུའི་གླིང་པའི་ཚོང་པ་བྱིས་པ་དག་

འདི་ཉིད་ཀྱི་གསོ་སྦྱོང་བཅྭ་ལྔ་པ་ལ་བྱང་ལམ་དུ་དེང་ཤིག་དང་། དེ་ན་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བ་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང་། ནད་མེད་པ་དང་། སྟོབས་དང་ལྡན་པ་དང་། དབང་པོ་ཚིམ་པས་རོ་སྟོད་བསྲང་
སྟ