Kinh tạng Tây Tạng (Kangyur Đại Học) — 003_འདུལ་བ།_ག

དོག་བཟང་པོ་གསལ་བ་གང་ཡིན་པ་དེ་ཡང་ནུབ་པར་གྱུར་པས་འཇིག་རྟེན་དུ་མུན་པ་བྱུང་བར་གྱུར་ཏོ། །གཽ་ཏ་མ་དག་ཆོས་ཉིད་ཀྱིས་འཇིག་རྟེན་
དུ་མུན་པ་བྱུང་ན་ཉི་མ་དང་ཟླ་བ་གཉིས་འཇིག་རྟེན་དུ་འབྱུང་བར་འགྱུར་རོ། །རྒྱུ་སྐར་དང་། སྐད་ཅིག་དང་། ཐང་ཅིག་དང་། ཡུད་ཙམ་དང་། མཚན་མོ་དང་། ཉིན་མོ་དང་། ཟླ་བ་དང་། ཟླ་བ་ཕྱེད་དང་། དུས་ཚིགས་དང་། ལོ་འཇིག་རྟེན་དུ་འབྱུང་བར་འགྱུར་
རོ། །དེ་རྣམས་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཁ་ཟས་ལ་ཆེས་ཉུང་ཟད་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་འགྱུར་རོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་འགྱུར་ཏེ། ཁ་ཟས་ཀྱི་

ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་མངོན་ཏེ། ཁ་དོག་རྣམ་པ་གཉིས་ཡོད་པས། ཀྱེ་སེམས་ཅན་ཁོ་བོ་ནི་ཁ་དོག་དང་ལྡན་ནོ། །ཁྱོད་ནི་ཁ་དོག་ངན་པ་ཅན་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །ཁ་དོག་གི་མངོན་པའི་ང་རྒྱལ་ཅན་དེ་
རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་སའི་བཅུད་དེ་ནུབ་པར་གྱུར་ཏོ། །གཽ་ཏ་མ་དག་སའི་བཅུད་དེ་ནུབ་པ་ན་སེམས་ཅན་དེ་རྣམས་ཚོགས་ཤིང་འདུས་ནས་འདི་སྐད་ཅེས་ཀྱི་ཧུད་བྲོ་བ་ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་
བར་གྱུར་ཏོ། །དཔེར་ན་ད་ལྟར་གྱི་མི་རྣམས་ཀྱིས་ཟས་ཞིམ་པོ་ཅུང་ཟད་ཅིག་ཟོས་ནས་སྔོན་གྱི་ཡི་གེ་དང་། ཚིག་དང་། ཚིག་འབྲུ་དེ་ཉིད་རྗེས་སུ་དྲན་ནས་འདི་སྐད་ཅེས་ཀྱི་ཧུད་བྲོ་བ་ཀྱི་ཧུད་བྲོ་བ་ཞེས་སྨྲ་བ་དེ་བཞིན་དུ་སེམས་ཅན་དེ་རྣམས་སའི་བཅུད་དེ་ནུབ་པ་ན་ཚོགས་
ཤིང་འདུས་ནས་འདི་སྐད་ཅེས་ཀྱི་ཧུད་བྲོ་བ་ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་བར་གྱུར་ཀྱང་སྨྲས་པ་འདིའི་དོན་ནི་འདི་ཡིན། སྨྲས་པ་འདིའི་དོན་ནི་འདི་ཡིན་ནོ་ཞེས་དེའི་དོན་ནི་མི་ཤེས་སོ། །གཽ་ཏ་མ་དག་སེམས་ཅན་དེ་རྣམས་ཀྱི་སའི་
བཅུད་དེ་ནུབ་པ་ནས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་འབྱུང་བར་འགྱུར་ཏེ། ཁ་དོག་ནི་འདི་ལྟ་བུ་ཡིན་ཏེ། དཔེར་ན་དོང་ཀའི་མེ་ཏོག་ལྟ་བུའོ། །རོ་ནི་འདི་ལྟ་བུ་ཡིན་ཏེ། དཔེར་ན་སྦྲང་མའི་སྦྲང་རྩི་བཙིར་བ་ལྟ་
བུའོ། །དེ་རྣམས་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཁ་ཟས་ལ་ཆེས་ཉུང་དུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར་ཏོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏོ། །ཟས་ཀྱི་ཚད་གཉིས་ལ་
བརྟེན་ནས་ཁ་དོག་རྣམ་པ་གཉིས་མངོན་ཏེ། ཁ་དོག་རྣམ་པ་གཉིས་ཡོད་པས་ཀྱེ་སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །ཁ་དོག་གི་མངོན་པའི་ང་རྒྱལ་ཅན་དེ་རྣམས་

སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་ས་ཞག་ནུབ་པར་གྱུར་ཏོ། །གཽ་ཏ་མ་དགས་ཞག་དེ་ནུབ་པར་གྱུར་པ་ན་སེམས་ཅན་དེ་རྣམས་ཚོགས་ཤིང་འདུས་ནས་འདི་སྐད་ཅེས་ཀྱི་ཧུད་བྲོ་བ་ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་གྱིས་སྡུག་བསྔལ་བར་
བྱེད་དོ། །དཔེར་ན་ད་ལྟར་མི་རྣམས་སྡུག་བསྔལ་བ་དང་། ཡིད་མི་བདེ་བ་འགའ་ཞིག་གིས་རེག་པ་ན་སྔོན་གྱི་ཡི་གེ་དང་། ཚིག་དང་། ཚིག་འབྲུ་དེ་ཉིད་རྗེས་སུ་དྲན་ནས་འདི་སྐད་ཅེས་ཨེ་མའོ་ཀྱི་ཧུད་ཨེ་མའོ་ཀྱི་ཧུད་ཅེས་སྨྲ་བ་དེ་བཞིན་དུ། སེམས་ཅན་དེ་རྣམས་ས་ཞག་
དེ་ནུབ་པ་ན་ཚོགས་ཤིང་འདུས་ནས་འདི་སྐད་ཅེས་ཀྱི་ཧུད་བྲོ་བ་ཀྱི་ཧུད་བྲོ་བ་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་བར་གྱུར་ཀྱང་སྨྲས་པའི་འདིའི་དོན་འདི་ཡིན། སྨྲས་པ་འདིའི་དོན་ནི་འདི་ཡིན་ནོ་ཞེས་བྱ་བར་དེའི་དོན་ནི་མི་ཤེས་སོ། །གཽ་ཏ་མ་དག་སེམས་ཅན་དེ་
རྣམས་ཀྱི་ས་ཞག་དེ་ནུབ་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་འབྱུང་བར་འགྱུར་ཞིང་ཁ་དོག་ནི་འདི་ལྟ་བུ་ཡིན་ཏེ། དཔེར་ན་ཤིང་ཀ་དམ་པ་ཀའི་མེ་ཏོག་ལྟ་བུའོ། །རོ་ནི་འདི་ལྟ་བུ་ཡིན་ཏེ། དཔེར་ན་སྦྲང་མའི་སྦྲང་རྩི་བཙིར་བ་ལྟ་
བུའོ། །དེ་རྣམས་དེ་ཟ་ཞིང་དེ་ཟས་སུ་ཟ་བ་ལས་ཚེ་རིང་ཞིང་ཡུན་རིང་དུ་གནས་སོ། །དེ་རྣམས་ལས་ཁ་ཟས་ལ་ཆེས་ཉུང་བར་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར་ཏོ། །ཁ་ཟས་ལ་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏོ། །ཟས་ཀྱི་
ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་ཡིན་ནོ། །ཁ་དོག་རྣམ་པ་གཉིས་ཡོད་པས་ཀྱེ་སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །ཁ་དོག་གི་མངོན་པའི་ང་
རྒྱལ་ཅན་དེ་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་མྱུ་གུའི་ཚལ་དེ་ནུབ་པར་གྱུར་ཏོ། །གཽ་ཏ་མ་དག་མྱུ་གུའི་ཚལ་དེ་ནུབ་པར་གྱུར་པ་ན་སེམས་ཅན་དེ་རྣམས་ཚོགས་ཤིང་འདུས་ནས་འདི་སྐད་ཅེས། མདུན་ནས་ཕར་སོང་མདུན་ནས་ཕར་སོང་ཞེས་

སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་བར་གྱུར་ཏོ། །དཔེར་ན་ད་ལྟར་མི་རྣམས་འགའ་ཞིག་ལ་ཚིག་དྲག་པོའི་ཚར་གཅད་པས་ཚར་གཅད་པར་འདོད་པ་ན་སྔོན་གྱི་ཡི་གེ་དང་། ཚིག་དང་། ཚིག་འབྲུ་དེ་དག་ཉིད་རྗེས་སུ་བཟླས་ཤིང་འདི་སྐད་ཅེས། མདུན་ནས་
ཕར་སོང་མདུན་ནས་ཕར་སོང་ཞེས་སྨྲ་བ་དེ་བཞིན་དུ་སེམས་ཅན་དེ་རྣམས་མྱུ་གུའི་ཚལ་ནུབ་པ་དང་ཚོགས་ཤིང་འདུས་ནས་འདི་སྐད་ཅེས། མདུན་ནས་ཕར་སོང་མདུན་ནས་ཕར་སོང་ཞེས་སྨྲ་ཞིང་སྨྲེ་སྔགས་འདོན་ལ་མྱ་ངན་དང་སྡུག་བསྔལ་བར་གྱུར་ཀྱང་སྨྲས་པའི་འདིའི་དོན་ནི་
འདི་ཡིན། སྨྲས་པ་འདིའི་དོན་ནི་འདི་ཡིན་ནོ་ཞེས་བྱ་བར་དེའི་དོན་ནི་མི་ཤེས་སོ། །གཽ་ཏ་མ་དག་སེམས་ཅན་དེ་རྣམས་ཀྱི་མྱུ་གུའི་ཚལ་ནུབ་ནས་མ་རྨོས་མ་བཏབ་པའི་འབྲས་སཱ་ལུའི་འབྲས་བུ་ཚོན་བཞི་པ་ཕུབ་མ་མེད་པ་སྦུན་མ་མེད་པ་ཤུན་པ་མེད་པ་དག་པ་གཙང་མ་སྐྱེས་
ཏེ། དེ་ནུབ་བརྔས་ན་ནང་སྐྱེ་ཞིང་སྨིན་པར་འགྱུར། ནང་བརྔས་ན་ནུབ་སྐྱེ་ཞིང་སྨིན་པར་འགྱུར་བས་བརྔས་ཤིང་བརྔས་ཀྱང་སླར་སྐྱེས་པས་བརྔས་པར་ཡང་མི་མངོན་ནོ། །དེ་རྣམས་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །གང་ནས་སེམས་ཅན་དེ་
དག་རྣམས་ཀྱིས་མ་རྨོས་མ་བཏབ་པའི་འབྲས་སཱ་ལུའི་འབྲས་བུ་ལ་ཁམ་གྱི་ཟས་སུ་རིམ་གྱིས་ཟོས་པ་དེ་ནས་དེ་རྣམས་ཀྱིས་དབང་པོ་ཐ་དད་པ་བྱུང་བར་གྱུར་ཏོ། །ཁ་ཅིག་ལ་ནི་སྐྱེས་པའི་དབང་པོའོ། །ཁ་ཅིག་ལ་ནི་བུད་མེད་ཀྱི་དབང་པོའོ། །དེ་ན་བུད་མེད་ཀྱི་དབང་པོ་ཅན་གང་
ཡིན་པ་རྣམས་དང་། སྐྱེས་པའི་དབང་པོ་ཅན་གང་ཡིན་པ་རྣམས་གཅིག་ལ་གཅིག་མིག་གིས་མིག་ཚུགས་སུ་ལྟའོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ཚུགས་སུ་ལྟ་བ་དེ་ལྟ་དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་ཞེན་ཏོ། །
ཇི་ལྟ་ཇི་ལྟར་ཞེན་པ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་གྱིས་སེམས་ཅན་ལ་ལོག་པར་ཞུགས་པ་མཐོང་ངོ་། །མཐོང་ནས་ཀྱང་ས་དང་། བོང་བ་དང་། གསེག་མ་དང་། གྱོ་མོས་གཏོར་ནས་འདི་སྐད་ཅེས་སེམས་ཅན་

ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་དོ། །སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་པ་ཡིན་གྱིས། ཀྭའི་སེམས་ཅན་ཁྱོད་ཀྱིས་ད་ཇི་ལྟར་སེམས་ཅན་སུན་དབྱུང་ཞེས་སྨྲའོ། །དཔེར་ན་ད་ལྟར་མི་རྣམས་བག་མ་བླངས་པ་ན་ཕྱེ་མ་དང་། དྲི་དང་།
ཕྲེང་བ་དང་། གོས་དང་། འབྲས་ཡོས་ཀྱིས་གཏོར་ནས་འདི་སྐད་ཅེས་བག་མ་བདེ་བར་གྱུར་ཅིག་ཅེས་ཟེར་བ་དེ་བཞིན་དུ་སེམས་ཅན་རྣམས་ཀྱིས་སེམས་ཅན་གྱིས་སེམས་ཅན་ལ་ལོག་པར་ཞུགས་པ་མཐོང་ནས་སས་གཏོར་ཞིང་བོང་བ་དང་། གསེག་མ་དང་། གྱོ་མོ་
རྣམས་ཀྱིས་ཀྱང་གཏོར་ནས་འདི་སྐད་ཅེས་སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་དོ། །སེམས་ཅན་ངན་པ་ཐ་ཆད་རྣམས་ནི་བྱ་བ་མ་ཡིན་པ་བྱེད་པ་ཡིན་གྱིས། ཀྭའི་སེམས་ཅན་ཁྱོད་ཀྱིས་ད་ཇི་ལྟར་སེམས་ཅན་སུན་དབྱུང་ཞེས་སྨྲ་བའི་དུས་གང་ཡིན་པ་དེ་ཡོད་
དོ། །གཽ་ཏ་མ་དག་དེ་ལྟར་ན་སྔོན་ཆོས་མ་ཡིན་པར་འདོད་པ་གང་ཡིན་པ་དང་། སྔོན་གྱི་འདུལ་བ་མ་ཡིན་པར་འདོད་པ་གང་ཡིན་པ་དེ་ནི་ད་ལྟར་ཆོས་སུ་འདོད། འདུལ་བར་འདོད་དོ། །སྔོན་སྨད་པར་བྱ་བར་འདོད་པ་གང་ཡིན་པ་དེ་ནི་ད་ལྟར་བསྔགས་པར་བྱ་བར་
འདོད་དོ། །དེ་རྣམས་ཀྱིས་དེ་ཞག་གཅིག་སྤངས་པ་ནས་ཞག་གཉིས་དང་། གསུམ་དང་། བདུན་དུ་ཡང་སྤངས་སོ། །གང་ནས་སེམས་ཅན་དེ་རྣམས་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ལྷག་པར་སྡིག་པ་ཅན་གྱི་བརྟུལ་ཞུགས་སྤྱོད་པ་དེ་ནས་དེ་རྣམས་
ཁང་པ་རྩིག་པ་ལ་བརྩོན་པར་བྱེད་དེ། འདིར་བདག་ཅག་བྱ་བ་མ་ཡིན་པ་སྤྱད་དོ། །འདིར་བདག་ཅག་བྱ་བ་མ་ཡིན་པ་སྤྱད་དོ་ཞེས་ཟེར་བས་ཁྱིམ་ཁྱིམ་ཞེས་བྱ་བར་གྲགས་ཏེ། གཽ་ཏ་མ་དག་འདི་ནི་འཇིག་རྟེན་དུ་ཁང་པའི་ལས་ཀྱི་མཐའ་རྣམས་བྱུང་བའི་རྩོམ་པ་དང་པོ་
ཡིན་ནོ། །དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་མ་ཡིན་ཏེ། དེ་ལ་རྒྱལ་བའི་དབང་པོའི་ཆོས་ལ་འདི་ནི་གཙོ་བོ་ཡིན་ནོ། །དེ་རྣམས་ནུབ་བཟའ་བ་དོན་དུ་གཉེར་བ་ཡང་དགོངས་ཀ་སཱ་ལུའི་ཆེད་དུ་འདོང་བར་བྱེད་དོ། །ནང་བཟའ་བ་དོན་དུ་གཉེར་བ་ཡང་ནང་པར་

སཱ་ལུའི་ཆེད་དུ་འདོང་བར་བྱེད་དོ། །དེ་ནས་སེམས་ཅན་སྙོམ་ལས་ཀྱི་རང་བཞིན་ཅན་ཞིག་གིས་ནང་པར་གྱི་སཱ་ལུ་ནུབ་མོ་བླངས་སོ། །དེ་ནས་སེམས་ཅན་ཞིག་གིས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྱེ་སེམས་ཅན་ཁྱོད་ཚུར་སཱ་ལུའི་ཕྱིར་འདོང་། དེ་ནས་སེམས་
ཅན་དེས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྱེ་སེམས་ཅན་ཁྱོད་རང་གི་སཱ་ལུ་ལ་སོམས་ཤིག །ཁོ་བོས་ནི་ནང་པར་གྱི་སཱ་ལུ་དོ་ནུབ་བླངས་སོ། །དེ་ནས་སེམས་ཅན་དེ་འདི་སྙམ་དུ་སེམས་ཏེ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་ཤིན་ཏུ་ལེགས་ཀྱིས། མ་ལ་
བདག་གིས་ཞག་གཉིས་ཀྱི་དང་། ཞག་གསུམ་གྱི་དང་། ཞག་བདུན་གྱི་བར་གྱི་སཱ་ལུ་བླང་ངོ་སྙམ་དུ་སེམས་ནས། དེས་ཞག་གཉིས་ཀྱི་དང་། ཞག་གསུམ་གྱི་དང་། ཞག་བདུན་གྱི་བར་གྱི་སཱ་ལུ་བླངས་སོ། །དེ་ནས་སེམས་ཅན་ཞིག་གིས་སེམས་ཅན་དེ་ལ་འདི་སྐད་
ཅེས་སྨྲས་སོ། །ཀྱེ་སེམས་ཅན་ཁྱོད་ཚུར་སཱ་ལུའི་ཕྱིར་འདོང་། དེ་ནས་སེམས་ཅན་དེས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྱེ་སེམས་ཅན་ཁྱོད་རང་གི་སཱ་ལུ་ལ་སོམས་ཤིག །ཁོ་བོས་ནི་ཞག་གཉིས་ཀྱི་དང་། གསུམ་གྱི་དང་། ཞག་བདུན་གྱི་བར་གྱི་སཱ་ལུ་
བླངས་ཟིན་ནོ། །དེ་ནས་སེམས་ཅན་དེ་འདི་སྙམ་དུ་སེམས་ཏེ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་ཤིན་ཏུ་ལེགས་ཀྱིས། མ་ལ་བདག་གིས་ཟླ་བ་ཕྱེད་དང་། ཟླ་བ་གཅིག་གི་སཱ་ལུ་བླང་ངོ་སྙམ་ནས། དེས་ཟླ་བ་ཕྱེད་དང་། ཟླ་བ་གཅིག་གི་སཱ་ལུ་བླངས་སོ། །གང་
ནས་སེམས་ཅན་དེ་རྣམས་ཀྱིས་མ་རྨོས་མ་བཏབ་པའི་འབྲས་སཱ་ལུའི་འབྲུ་སོགས་འཇོག་གི་ཡོངས་སུ་ལོངས་སྤྱད་པས་ཟོས་པ་དེ་ནས་སཱ་ལུ་དེའི་འབྲས་བུ་ཕུབ་མ་དང་། སྦུན་པ་དང་། ཤུན་པས་ཡོག་པར་གྱུར་ཏོ། །བརྔས་ཤིང་བརྔས་ན་ཡང་ཕྱིར་མི་སྐྱེ་བས་བརྔས་པར་
ཡང་མངོན་ལ། སཱ་ལུ་ཡང་སྦུབས་སམ་ཡལ་གའི་སྦུབས་ལ་ཡོད་པར་གྱུར་ཏོ། །དེ་ནས་སེམས་ཅན་དེ་རྣམས་ཚོགས་ཤིང་འདུས་ནས་ཤེས་ལྡན་དག་བདག་ཅག་སྔོན་ཡིད་ལས་བྱུང་བའི་གཟུགས་ཕུན་སུམ་ཚོགས་པ། དབང་པོ་མ་ཉམས་ཤིང་མ་ཚང་བ་མེད་པ། ཡན་

ལག་དང་ཉིང་ལག་ཐམས་ཅད་དང་ལྡན་པ། ཁ་དོག་བཟང་པོས་གནས་པ། རང་གི་འོད་དང་ལྡན་པ། ནམ་མཁའ་ལ་འགྲོ་ཞིང་དགའ་བ་ཟ་ཞིང་དགའ་བའི་ཟས་ཀྱིས་ཚེ་རིང་ཞིང་ཡུན་རིང་དུ་གནས་ལ། བདག་ཅག་སའི་བཅུད་ཁ་དོག་ཕུན་སུམ་ཚོགས་
པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏོ། །བདག་ཅག་སའི་བཅུད་ལ་ཁམ་གྱི་ཟས་ཀྱི་རིམ་གྱིས་ཟོས་ཏེ། གང་གི་ཚེ་བདག་གིས་སའི་བཅུད་ལ་ཁམ་གྱི་ཟས་ཀྱི་རིམ་གྱིས་ཟོས་པ་དེའི་ཚེ་བདག་ཅག་གི་ལུས་ལ་རྩུབ་པ་ཉིད་དང་ལྕི་བ་ཉིད་དག་
ཞུགས་པར་གྱུར་ཏེ། ཁ་དོག་བཟང་པོའི་གསལ་བ་གང་ཡིན་པ་དེ་ནུབ་པར་གྱུར་པས་འཇིག་རྟེན་དུ་མུན་པ་བྱུང་བར་གྱུར་ཏོ། །བདག་ཅག་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་པར་གྱུར་ཏོ། །བདག་ཅག་ལས་ཁ་ཟས་ཆེས་ཉུང་ངུ་ཟ་བ་གང་ཡིན་པ་དེ་ནི་ཁ་
དོག་བཟང་པོར་གྱུར། ཁ་ཟས་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ། ཁ་ཟས་ཀྱི་ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་མངོན་ཏེ། ཁ་དོག་རྣམ་པ་གཉིས་ཡོད་པས་ཀྭའི་སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་
ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་སའི་བཅུད་དེ་ནུབ་པར་གྱུར་ཏོ། །སའི་བཅུད་དེ་ནུབ་པ་ནས་ཞག་ཁ་དོག་
ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །བདག་ཅག་ལས་ཁ་ཟས་ཆེས་ཉུང་ངུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར། ཁ་ཟས་ཆེས་མང་
དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ། ཟས་ཀྱི་ཚད་གཉིས་ལ་བརྟེན་ནས་ཁ་དོག་གི་རྣམ་པ་གཉིས་མངོན་ནོ། །ཁ་དོག་རྣམ་པ་གཉིས་ཡོད་པས་ཀྭའི་སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་

ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་ས་ཞག་དེ་ནུབ་པར་གྱུར་ཏོ། །ས་ཞག་དེ་ནུབ་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་
ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་དེ་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །བདག་ཅག་རྣམས་ལས་ཁ་ཟས་ཆེས་ཉུང་ངུ་ཟ་བ་གང་ཡིན་པ་དེ་ནི་ཁ་དོག་དང་ལྡན་པར་གྱུར། ཁ་ཟས་ཆེས་མང་དུ་ཟ་བ་གང་ཡིན་པ་དེ་ནི་ཁ་དོག་ངན་པར་གྱུར་ཏེ།
ཟས་ཀྱི་ཚད་གཉིས་ལ་བརྟེན་ནས་ཁ་དོག་རྣམ་པ་གཉིས་མངོན་ནོ། །ཁ་དོག་རྣམ་པ་གཉིས་ཡོད་པས་ཀྭའི་སེམས་ཅན་ཁོ་བོ་ནི་ཁ་དོག་དང་ལྡན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གི་མངོན་
པའི་ང་རྒྱལ་ཅན་རྣམས་སྡིག་པ་མི་དགེ་བའི་ཆོས་དེ་དག་ཉིད་བླངས་པའི་རྒྱུས་མྱུ་གུའི་ཚལ་དེ་ནུབ་པར་གྱུར་ཏོ། །མྱུ་གུའི་ཚལ་དེ་ནུབ་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་ཚོན་བཞི་པ་ཕུབ་མ་མེད་པ། སྦུན་པ་མེད་པ། ཤུན་པ་མེད་པ། དག་པ། གཙང་མ་སྐྱེས་
ཏེ། དེ་ནུབ་བརྔས་ན་ནང་སྐྱེ་ཞིང་སྨིན་པར་འགྱུར། ནང་བརྔས་ན་ནུབ་སྐྱེ་ཞིང་སྨིན་པར་འགྱུར་བས་བརྔས་ཤིང་བརྔས་ཀྱང་སླར་ཡང་སྐྱེ་བས་བརྔས་པར་ཡང་མི་མངོན་ཏེ། བདག་ཅག་དེ་ཟ་ཞིང་ཟས་སུ་ཟ་བ་ལ་ཚེ་རིང་ཞིང་ཡུན་རིང་དུ་གནས་སོ། །གང་ནས་བདག་ཅག་གིས་
མ་རྨོས་མ་བཏབ་པའི་འབྲས་སཱ་ལུའི་འབྲུ་སོག་འཇོག་གིས་ཡོངས་སུ་ལོངས་སྤྱད་པས་ཟོས་པ་དེ་ནས་སཱ་ལུ་དེའི་འབྲས་བུ་ཕུབ་མ་དང་། སྦུན་པ་དང་། ཤུན་པས་ཡོག་པར་གྱུར་ཏོ། །བརྔས་ཤིང་བརྔས་པ་ཡང་སླར་མི་སྐྱེ་བས་བརྔས་པར་ཡང་མངོན་ལ། སཱ་ལུ་ཡང་སྦུབས་
སམ་ཡལ་གའི་སྦུབས་ལ་ཡོད་པར་གྱུར་པས་མ་ལ་བདག་ཅག་ཚོགས་ཤིང་འདུས་ལ་ཞིང་གཞལ་ཏེ་མཚམས་བཅད་ལ་འདི་ནི་ཁྱེད་ཀྱིའོ། །འདི་ནི་ངའི་འོ་ཞེས་མུ་ཐུག་བྲེ་བར་བྱའོ་ཞེས་དེ་རྣམས་ཚོགས་ཤིང་འདུས་ནས་ཞིང་དགོད་དེ་མཚམས་བཅད་མུ་ཐུག་བྲེས་སོ། །གཽ་ཏ་

མ་དག་འདི་ནི་འཇིག་རྟེན་དུ་མུ་ཐུག་བྲེ་བའི་ལས་ཀྱི་མཐའ་རྣམས་བྱུང་བའི་རྩོམ་པ་དང་པོ་ཡིན་ནོ། །དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་མ་ཡིན་ཏེ། དེ་ལ་རྒྱལ་བའི་དབང་པོའི་ཆོས་ལ་འདི་ནི་ཆོས་ཀྱི་གཙོ་བོ་ཡིན་ནོ། །དེ་ནས་སེམས་ཅན་ཞིག་གིས་
རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་ཞིག་གིས་སེམས་ཅན་དེས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་བླངས་པ་མཐོང་ངོ་། །མཐོང་ནས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའི་སེམས་ཅན་
ཁྱོད་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་ཅིའི་ཕྱིར་བླང་། ཀྭའི་སེམས་ཅན་སོང་ལ་ཁྱོད་ཕྱིན་ཅད་དེ་ལྟར་མ་བྱེད་ཅིག །སེམས་ཅན་དེས་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་བླངས་སོ། །སེམས་ཅན་
དེས་སེམས་ཅན་དེ་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་ལེན་པ་མཐོང་ངོ་། །མཐོང་ནས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའི་སེམས་ཅན་ཁྱོད་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་ཅིའི་ཕྱིར་
བླང་ཞེས་དེས་དེ་ཕར་དྲངས་ཚུར་དྲངས་ནས། ཅི་ཙམ་ན་འཁོར་གྱི་ནང་དུ་ཡང་ཁྲིད་དེ། ཤེས་ལྡན་དག་སེམས་ཅན་འདི་རང་གི་སཱ་ལུ་ཡོད་བཞིན་དུ་ལན་གཉིས་སམ་གསུམ་གྱི་བར་དུ་གཞན་གྱི་སཱ་ལུ་ལ་མ་བྱིན་པར་ལེན་ཏོ་ཞེས་སྤྱོས་སོ། །དེ་ནས་སེམས་ཅན་དེ་རྣམས་ཀྱིས་
སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའི་སེམས་ཅན་ཁྱོད་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་ལ་མ་བྱིན་པར་ཅིའི་ཕྱིར་བླང་། ཀྭའི་སེམས་ཅན་སོང་ལ་ཁྱོད་ཕྱིན་ཅད་དེ་ལྟར་མ་བྱེད་ཅིག །དེ་ནས་སེམས་ཅན་དེས་སེམས་ཅན་དེ་རྣམས་ལ་འདི་སྐད་ཅེས་སྨྲས་སོ། །
ཤེས་ལྡན་དག་སེམས་ཅན་འདིས་བདག་ལ་སཱ་ལུའི་ཕྱིར་ཕར་དྲངས་ཚུར་དྲངས་ཏེ། ཇི་ཙམ་ན་འཁོར་གྱི་ནང་དུ་ཡང་བྱུང་ནས་སྤྱོས་སོ། །དེ་ནས་སེམས་ཅན་དེ་རྣམས་ཀྱིས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའི་སེམས་ཅན་ཁྱོད་ཀྱིས་སེམས་ཅན་ལ་སཱ་ལུའི་ཕྱིར་ཕར་དྲངས་

ཚུར་དྲངས་ནས། ཇི་ཙམ་ན་འཁོར་གྱི་ནང་དུ་ཡང་བྱུང་ནས་ཅིའི་ཕྱིར་སྤྱོ། །ཀྭའི་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག །དེ་ནས་སེམས་ཅན་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་སཱ་ལུའི་ཕྱིར་ཕར་འདྲེན་ཚུར་འདྲེན་ཞིང་ཇི་ཙམ་ན་འཁོར་གྱི་ནང་དུ་
སྤྱོ་བ་ཡང་སྣང་བས། མ་ལ་བདག་ཅག་ཚོགས་ཤིང་འདུས་ལ་བདག་ཅག་གི་ནང་ན་སེམས་ཅན་ལྷག་པར་གཟུགས་བཟང་བ། ལྷག་པར་བལྟ་ན་སྡུག་པ། ལྷག་པར་མཛེས་པ། ལྷག་པར་བསོད་ནམས་ཆེ་བར་གྲགས་པ་གང་ཡིན་པ་དེ་བདག་ཅག་གི་ཞིང་རྣམས་ཀྱི་
བདག་པོར་བསྐོས་དང་། དེས་བདག་ཅག་ཆད་པས་གཅད་པར་བྱ་བ་རྣམས་ལ་ནི་ཆད་པས་གཅོད་པར་འགྱུར། ཕན་གདགས་པར་བྱ་བ་རྣམས་ལ་ནི་ཕན་འདོགས་པར་འགྱུར་ཏེ། བདག་ཅག་གི་ཞིང་དག་ལས་འཁྲུངས་པ་གང་ཡིན་པ་དེ་ལ་ཆོས་བཞིན་དུ་ཐོག་ཤེས་སྦྱིན་
པར་བྱའོ་སྙམ་ནས། དེ་རྣམས་ཚོགས་ཤིང་འདུས་ཏེ་དེ་རྣམས་ཀྱི་ནང་ནས་སེམས་ཅན་ལྷག་པར་གཟུགས་བཟང་བ། ལྷག་པར་བལྟ་ན་སྡུག་པ། ལྷག་པར་མཛེས་པ། ལྷག་པར་བསོད་ནམས་ཆེ་བར་གྲགས་པ་གང་ཡིན་པ་དེ་ཞིང་རྣམས་ཀྱི་བདག་པོར་བསྐོས་ཏེ་འདི་སྐད་
ཅེས་ཀྱེ་སེམས་ཅན་ཁྱོད་ཚུར་ཤོག །ཁོ་བོ་ཅག་ལ་ཆད་པས་གཅད་པར་བྱ་བ་རྣམས་ལ་ནི་ཆད་པས་ཆོད་ཅིག །ཕན་གདགས་པར་བྱ་བ་རྣམས་ལ་ནི་ཕན་ཐོགས་ཤིག །ཁོ་བོ་ཅག་གི་ཞིང་དག་ལས་འཁྲུངས་པ་གང་ཡིན་པ་དེ་ལས་ཁྱོད་ལ་ཁོ་བོ་ཅག་གིས་ཆོས་བཞིན་དུ་
ཐོག་ཤས་སྦྱིན་ནོ། །དེ་དེ་རྣམས་ལ་ཆད་པས་གཅད་པར་བྱ་བ་རྣམས་ལ་ནི་ཆད་པས་གཅོད། ཕན་གདགས་པར་བྱ་བ་རྣམས་ལ་ཕན་འདོགས་པར་བྱེད་ཅིང་། དེ་ལ་དེ་རྣམས་ཀྱི་ཞིང་དག་ལས་འཁྲུངས་པ་གང་ཡིན་པ་དེ་ལས་ཆོས་བཞིན་དུ་ཐོག་ཤས་འབུལ་ཏེ། སྐྱེ་བོའི་ཚོགས་
ཆེན་པོས་བཀུར་ཅིང་མང་པོས་བཀུར་བས་མང་པོས་བཀུར་བ་མང་པོས་བཀུར་བ་ཞེས་གྲགས་སོ། །ཞིང་རྣམས་ཀྱི་བདག་པོར་གྱུར་པ་ན་ཉམས་པ་ལས་སྐྱོབ་པར་བྱེད་པས་རྒྱལ་རིགས་རྒྱལ་རིགས་ཞེས་བྱ་བར་གྲགས་སོ། །ཆོས་ཀྱིས་སྐྱེ་དགུ་མགུ་བར་བྱེད་ཅིང་ཚུལ་

ཁྲིམས་ཉམས་སུ་བླངས་ཏེ་གནས། ཤེས་རབ་ཉམས་སུ་བླངས་ཏེ་གནས་པས་རྒྱལ་པོ་རྒྱལ་པོ་ཞེས་བྱ་བར་གྲགས་སོ། །གཽ་ཏ་མ་དག་རྒྱལ་པོ་མང་པོས་བཀུར་གྱི་ཚེ་མི་རྣམས་ཀྱི་མིང་སེམས་ཅན་སེམས་ཅན་ཞེས་བྱ་བར་གྱུར་ཏོ། །གཽ་ཏ་མ་དག་རྒྱལ་པོ་མང་
པོས་བཀུར་བའི་བུ་འོད་མཛེས་ཞེས་བྱ་སྟེ། གཽ་ཏ་མ་དག་རྒྱལ་པོ་འོད་མཛེས་ཀྱི་ཚེ་མི་རྣམས་ཀྱི་མིང་ཚུར་ཤོག་ཚུར་ཤོག་ཅེས་བྱ་བར་གྱུར་ཏོ། །འོད་མཛེས་ཀྱི་བུ་དགེ་བ་ཞེས་བྱ་སྟེ། གཽ་ཏ་མ་དག་རྒྱལ་པོ་དགེ་བའི་ཚེ་མི་རྣམས་ཀྱི་མིང་སྨེ་བ་ཅན་སྨེ་བ་ཅན་ཞེས་བྱ་བར་གྱུར་ཏོ། །གཽ་ཏ་
མ་དག་རྒྱལ་པོ་དགེ་བའི་བུ་དགེ་མཆོག་ཅེས་བྱ་སྟེ། གཽ་ཏ་མ་དག་རྒྱལ་པོ་དགེ་མཆོག་གི་ཚེ་མི་རྣམས་ཀྱི་མིང་སྤྲིན་མགྲིན་སྤྲིན་མགྲིན་ཞེས་བྱ་བར་གྱུར་ཏོ། །དགེ་མཆོག་གི་བུ་གསོ་སྦྱོང་འཕགས་ཞེས་བྱ་སྟེ། གཽ་ཏ་མ་དག་རྒྱལ་པོ་གསོ་སྦྱོང་འཕགས་ཀྱི་ཚེ་མི་རྣམས་ཀྱི་མིང་ཏ་ལའི་རྐང་ཏ་ལའི་
རྐང་ཞེས་བྱ་བར་གྱུར་ཏོ། །རྒྱལ་པོ་གསོ་སྦྱོང་འཕགས་ཀྱི་སྤྱི་བོར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང་ཁྱེའུ་གཟུགས་བཟང་
བ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། སྤྱི་བོ་ལས་སྐྱེས་པས་སྤྱི་བོ་སྐྱེས་སྤྱི་བོ་སྐྱེས་ཞེས་བྱ་བར་གྱུར་ཏོ། །གཞོན་ནུ་བྱུང་མ་ཐག་ཏུ་རྒྱལ་པོ་གསོ་སྦྱོང་འཕགས་ཀྱི་བཙུན་མོ་དྲུག་ཁྲིའི་ནང་དུ་བཀྲི་བ་དང་།
དེ་ཐམས་ཅད་ཀྱི་ནུ་མ་ལས་འོ་མ་ཟགས་ནས་རེ་རེས་ང་ལས་ནུ་ང་ལས་ནུ་ཞེས་སྨྲས་པས་ང་ལས་ནུ་ང་ལས་ནུ་ཞེས་བྱ་བར་གྲགས་སོ། །གཽ་ཏ་མ་དག་རྒྱལ་པོ་ང་ལས་ནུ་གང་གི་ཚེ་རྒྱལ་སྲིད་བྱེད་པ་དེའི་ཚེ་མི་རྣམས་སེམས་པར་བྱེད། འཇལ་བར་བྱེད། ཉེ་བར་རྟོག་པར་བྱེད་དོ། །
དེ་རྣམས་བསམས། གཞལ། ཉེ་བར་བརྟགས་ནས་བཟོའི་གནས་དང་ལས་ཀྱི་གནས་ཐ་དད་པ་དག་བྱེད་དུ་འཇུག་པས་དེས་ན། དེ་རྣམས་ཡིད་ལས་སྐྱེས་ཡིད་ལས་སྐྱེས་ཞེས་བྱ་བར་གྲགས་སོ། །གཽ་ཏ་མ་དག་རྒྱལ་པོ་དྲུག་པོ་འདི་དག་ནི་ཚེ་ཚད་མེད་ཅིང་ཚེ་དཔག་ཏུ་མེད་

པ་ཡིན་ནོ།། །།བར་སྡོམ་ལ། སེམས་ཅན་ཚུར་ཤོག་སྨེ་བ་ཅན། །སྤྲིན་མགྲིན་དང་ནི་དེ་བཞིན་དུ། །ཏ་ལའི་རྐང་དང་ཡིད་ལས་སྐྱེས། །སྔོན་གྱི་དེ་དྲུག་བསྡུས་པ་ཡིན། །གཽ་ཏ་མ་དག་རྒྱལ་པོ་ང་ལས་ནུའི་བརླ་གཡས་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་
ཏུ་མཉེན་ཏེ། དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང་ཁྱེའུ་གཟུགས་བཟང་ཞིང་བལྟ་ན་སྡུག་པ་མཛེས་པ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་དུ་བརྒྱན་པ་ཞིག་བྱུང་
སྟེ། བརླ་གཡས་པ་ལས་སྐྱེས་པས་མིང་མཛེས་པ་མཛེས་པ་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་བཞི་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ། །གཽ་ཏ་མ་དག་རྒྱལ་པོ་མཛེས་པའི་བརླ་གཡོན་པར་ཤ་རྨེན་
ཅིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང་ཁྱེའུ་གཟུགས་བཟང་ཞིང་བལྟ་ན་སྡུག་པ་མཛེས་པ། སྐྱེས་བུ་ཆེན་པོའི་མཚན་སུམ་བཅུ་རྩ་
གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། བརླ་གཡོན་པ་ལས་སྐྱེས་པས་མིང་ཉེ་མཛེས་ཉེ་མཛེས་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་གསུམ་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ། །གཽ་ཏ་མ་དག་
རྒྱལ་པོ་ཉེ་མཛེས་ཀྱི་རྐང་པ་གཡས་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །དེ་སྨིན་ནས་བརྟོལ་བ་དང་ཁྱེའུ་གཟུགས་བཟང་བ། བལྟ་ན་སྡུག་པ།
མཛེས་པ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། རྐང་པ་གཡས་པ་ལས་སྐྱེས་པས་མིང་མཛེས་ལྡན་མཛེས་ལྡན་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་གཉིས་ལ་རྒྱལ་སྲིད་ཀྱི་

དབང་ཕྱུག་ལ་དབང་བྱེད་དུ་འཇུག་གོ། །གཽ་ཏ་མ་དག་རྒྱལ་པོ་མཛེས་ལྡན་གྱི་རྐང་པ་གཡོན་པར་ཤ་རྨེན་ཞིག་སྐྱེས་པ་འཇམ་ཞིང་ཤིན་ཏུ་མཉེན་ཏེ། དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་དུ་ཅུང་ཟད་ཀྱང་གནོད་པ་མི་སྐྱེད་དོ། །
དེ་སྨིན་ནས་བརྟོལ་བ་དང་། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ་ཞིག་བྱུང་སྟེ། རྐང་པ་གཡོན་པ་ལས་སྐྱེས་པས་མིང་ཉེ་མཛེས་ལྡན་ཉེ་མཛེས་ལྡན་ཞེས་བྱ་བར་གྱུར་ཏོ། །གཞོན་ནུ་
དེ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པས་ད་དུང་ཡང་གླིང་གཅིག་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་འཇུག་གོ། །གཽ་ཏ་མ་དག་དེ་ལྟར་ན་རྒྱལ་པོ་མང་པོས་བཀུར་བའི་བུ་འོད་མཛེས་སོ། །འོད་མཛེས་ཀྱི་དགེ་བའོ། །དགེ་བའི་དགེ་མཆོག་གོ། །དགེ་མཆོག་གི་གསོ་
སྦྱོང་འཕགས་སོ། །གསོ་སྦྱོང་འཕགས་ཀྱི་ང་ལས་ནུའོ། །ང་ལས་ནུའི་མཛེས་པའོ། །མཛེས་པའི་ཉེ་མཛེས་སོ། །ཉེ་མཛེས་ཀྱི་མཛེས་ལྡན་དང་། མཛེས་ལྡན་ཀྱི་ཉེ་མཛེས་ལྡན་དང་། བཟང་པོ་དང་། ལེགས་བཟང་དང་། བཏང་བ་དང་། བཏང་བཟུང་དང་།
ཡན་ལག་དང་། ཡན་ལག་ཤིང་རྟ་དང་། ངན་སྤོང་དང་། སྐལ་ལྡན་ཤིང་རྟ་དང་། རྒྱ་མཚོ་དང་། རྒྱ་མཚོའི་བུ་དང་། རྒྱ་མཚོ་ཆེན་པོ་དང་། ཤ་ཀུ་ནི་དང་། ཤ་ཀུ་ནི་ཆེན་པོ་དང་། ཀུ་ཤ་དང་། ཉེ་བའི་ཀུ་ཤ་དང་། ཀུ་ཤ་ཆེན་པོ་དང་། ལེགས་མཐོང་དང་། ལེགས་
མཐོང་ཆེན་པོ་དང་། རབ་ཐོབ་དང་། རབ་ཐོབ་ཆེན་པོ་དང་། རབ་ཏུ་སྒྲ་བསྒྲགས་དང་། རབ་ཏུ་སྒྲ་བསྒྲགས་ཆེན་པོ་དང་། འོད་བྱེད་པ་དང་། རྟུལ་ཕོད་དང་། ལྷུན་པོ་ལྡན་དང་། ལྷུན་པོ་ཡོད་དང་། འོད་ཟེར་དང་། འོད་ཟེར་ལྡན་དང་། འོད་ཟེར་ཡོད་དང་།
ཀུན་ནས་འོད་ཟེར་རོ། །གཽ་ཏ་མ་དག་ཀུན་ནས་འོད་ཟེར་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡུལ་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་དགྲ་འདུལ་ཞེས་བྱ་བ་བྱུང་སྟེ། དགྲ་འདུལ་བར་བྱེད་པས་དགྲ་འདུལ་དགྲ་འདུལ་

ཞེས་བྱ་བར་གྱུར་ཏོ། །གཽ་ཏ་མ་དག་རྒྱལ་པོ་དགྲ་འདུལ་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་ལྔ་ཁྲི་བཞི་སྟོང་ཡུལ་དམག་གིས་མི་ཚུགས་པར་བྱུང་ངོ་། །དེ་རྣམས་ཀྱི་ཐ་མ་ནི་རྒྱལ་པོ་མ་རྒྱལ་བ་ལས་རྒྱལ་བ་ཞེས་བྱ་བ་བྱུང་སྟེ། མ་རྒྱལ་
བ་ལས་རྒྱལ་བར་བྱེད་པས་ན་མ་རྒྱལ་བ་ལས་རྒྱལ་བ་མ་རྒྱལ་བ་ལས་རྒྱལ་བ་ཞེས་བྱ་བར་གྲགས་སོ། །གཽ་ཏ་མ་དག་རྒྱལ་པོ་མ་རྒྱལ་བ་ལས་རྒྱལ་བའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་དྲུག་ཁྲི་སུམ་སྟོང་ཡུལ་བཱ་རཱ་ཎ་སཱིར་བྱུང་སྟེ། དེ་རྣམས་ཀྱི་
ཐ་མ་ནི་རྒྱལ་པོ་བཟོད་དཀའ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་བཟོད་དཀའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཀིམ་བི་ལའི་གྲོང་ཁྱེར་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཚངས་བྱིན་ཞེས་བྱ་བ་བྱུང་ངོ་། །གཽ་ཏ་
མ་དག་རྒྱལ་པོ་ཚངས་བྱིན་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གླང་པོ་ཆེའི་གྲོང་ཁྱེར་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་གླང་པོས་སྦྱིན་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་གླང་པོས་སྦྱིན་གྱི་བུ་དང་། ཚ་བོ་དང་།
ཡང་ཚ་དང་། སུམ་ཚའི་རྒྱུད་རྒྱལ་པོ་ལྔ་སྟོང་ཡུལ་རྡོ་འཇོག་ཏུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བལ་བུ་ཅན་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་བལ་བུ་ཅན་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་
བྲང་གིས་ཉལ་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཚན་པོ་ཆེ་འདུལ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་ཚན་པོ་ཆེ་འདུལ་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་མ་རྒྱལ་བ་ལས་རྒྱལ་བར་བྱུང་སྟེ། དེ་
རྣམས་ཀྱི་ཐ་མ་ནི་རྒྱལ་པོ་རྒྱལ་བྱིན་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་རྒྱལ་བྱིན་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་ཀུ་ནྱ་ཀུ་བ་ཛར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱལ་སྡེ་ཞེས་བྱ་བ་བྱུང་ངོ་། །

གཽ་ཏ་མ་དག་རྒྱལ་པོ་རྒྱལ་སྡེའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་ཁྲི་བརྒྱད་སྟོང་གྲོང་ཁྱེར་ཙམ་པར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཀླུའི་ལྷ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་ཀླུའི་ལྷའི་བུ་དང་། ཚ་བོ་དང་། ཡང་ཚ་དང་།
སུམ་ཚའི་རྒྱུད་རྒྱལ་པོ་ཉི་ཁྲི་ལྔ་སྟོང་གྲོང་ཁྱེར་ཏ་ལའི་ཕྲེང་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་མིའི་ལྷ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་མིའི་ལྷའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་ཁྲི་ཉིས་སྟོང་གྲོང་ཁྱེར་ཏ་མ་ལིར་བྱུང་སྟེ། དེ་
རྣམས་ཀྱི་ཐ་མ་ནི་རྒྱལ་པོ་རྒྱ་མཚོའི་ལྷ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་རྒྱ་མཚོའི་ལྷའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་ཁྲི་བརྒྱད་སྟོང་གྲོང་ཁྱེར་བ་སོའི་གྲོང་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བློ་གྲོས་བཟང་པོ་ཞེས་བྱ་བ་བྱུང་ངོ་། །གཽ་ཏ་
མ་དག་རྒྱལ་པོ་བློ་གྲོས་བཟང་པོའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་ཉི་ཁྲི་ལྔ་སྟོང་གྲོང་ཁྱེར་རྒྱལ་པོའི་ཁབ་ཏུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་མུན་སེལ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་མུན་སེལ་གྱི་བུ་དང་། ཚ་བོ་དང་། ཡང་ཚ་
དང་། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡང་གྲོང་ཁྱེར་བཱ་རཱ་ཎ་སཱིར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་དབང་ཕྱུག་ཆེན་པོའི་སྡེ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་དབང་ཕྱུག་ཆེན་པོའི་སྡེའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱད་
ཁྲི་བཞི་སྟོང་གྲོང་ཁྱེར་རྩྭ་ཅན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་རྒྱ་མཚོའི་སྡེ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་རྒྱ་མཚོའི་སྡེའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་སྟོང་ཡང་གྲོང་ཁྱེར་གྲུ་འཛིན་དུ་བྱུང་སྟེ། དེ་རྣམས་ཀྱི་ཐ་མ་ནི་
རྒྱལ་པོ་དཀའ་ཐུབ་སྤྱོད་ཅེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་དཀའ་ཐུབ་སྤྱོད་ཀྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཡང་གྲོང་ཁྱེར་རྩྭ་ཅན་དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་སའི་གདོང་ཞེས་བྱ་བ་བྱུང་ངོ་། །གཽ་ཏ་

མ་དག་རྒྱལ་པོ་སའི་གདོང་གི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་འབུམ་ཡང་གྲོང་ཁྱེར་བཱ་རཱ་ཎ་སཱིར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་སའི་བདག་པོ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་སའི་བདག་པོའི་བུ་དང་། ཚ་བོ་དང་། ཡང་
ཚ་དང་། སུམ་ཚའི་རྒྱུད་རྒྱལ་པོ་འབུམ་ཡང་གྲོང་ཁྱེར་དམག་གིས་མི་ཚུགས་པར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ས་འཛིན་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་ས་འཛིན་གྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་
གྲོང་ཁྱེར་མི་ཐི་ལར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ལྷ་ཆེན་པོ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་ལྷ་ཆེན་པོའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱད་ཁྲི་བཞི་སྟོང་ཡང་གྲོང་ཁྱེར་མི་ཐི་ལར་དྲང་སྲོང་གི་ཚངས་པར་སྤྱོད་པ་ལ་སྤྱད་
དེ། དེ་རྣམས་ཀྱི་ཐ་མ་ནི་རྒྱལ་པོ་མུ་ཁྱུད་ཅེས་བྱ་བ་བྱུང་ངོ་། །མུ་ཁྱུད་ལས་འབྱིང་བ་དང་། སྲ་བའི་མུ་ཁྱུད་དང་། རྐོ་བ་དང་། ཉེ་བར་རྐོ་བ་དང་། རྐོ་བ་ཡོད་པ་དང་། ཀུན་ནས་རྐོ་དང་། གྱ་ནོམ་སྣང་དང་། མཉམ་སྣང་དང་། ཐོས་པའི་སྡེ་དང་། ཆོས་ཀྱི་
སྡེ་དང་། རྟོགས་པ་དང་། རྟོགས་པ་ཆེན་པོ་དང་། རྟོགས་པའི་སྡེ་དང་། མྱ་ངན་མེད་དང་། མྱ་ངན་བྲལ་དང་། བརྟན་པའི་སྡེ་དང་། དགའ་བས་སྦྱར་དང་། གླེན་གསལ་དང་། སྐྱ་རེང་དང་། ཕྱོགས་ཀྱི་བདག་པོ་དང་། རྔུལ་ཅན་དང་། བདེ་བྱེད་དང་།
ཀུན་དགའ་དང་། མེ་ལོང་གདོང་དང་། སྐྱེད་པ་དང་། ཀུན་ནས་སྐྱེད་པ་དང་། སྐྱེ་བོའི་ཁྱུ་མཆོག་དང་། བཟའ་བཏུང་ཅན་དང་། བཟའ་བཏུང་མང་པོ་ཅན་དང་། མི་ཐུབ་པ་དང་། གཞན་གྱིས་མི་ཐུབ་པ་དང་། གནས་པ་དང་། ཤིན་ཏུ་གནས་པ་དང་།
སྟོབས་ཆེན་དང་། སྟོབས་ཆེན་ཞོན་དང་། ལེགས་པའི་བློ་གྲོས་དང་། བརྟན་པ་ཞོན་དང་། གཞུ་བཅུ་པ་དང་། གཞུ་བརྒྱ་པ་དང་། གཞུ་དགུ་བཅུ་པ་དང་། གཞུ་རྒྱལ་དང་། གཞུ་བཀྲ་དང་། གཞུ་སྲ་དང་། ཤིང་རྟ་བཅུ་པ་དང་། ཤིང་རྟ་བརྒྱ་པ་

དང་། ཤིང་རྟ་དགུ་བཅུ་པ་དང་། ཤིང་རྟ་ཁྲ་བོ་དང་། ཤིང་རྟ་རྒྱལ་དང་། ཤིང་རྟ་སྲ་བའོ། །གཽ་ཏ་མ་དག་རྒྱལ་པོ་ཤིང་རྟ་སྲ་བའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བདུན་ཁྲི་བདུན་སྟོང་གྲོང་ཁྱེར་ཀུན་དུ་སྣང་བར་བྱུང་སྟེ།
དེ་རྣམས་ཀྱི་ཐ་མ་ནི་རྒྱལ་པོ་ནམ་མཁའི་བདག་པོ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་ནམ་མཁའི་བདག་པོའི་བུ་ཀླུ་མཉམ་སྐྱོང་ངོ་། །གཽ་ཏ་མ་དག་རྒྱལ་པོ་ཀླུ་མཉམ་སྐྱོང་གི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡང་གྲོང་ཁྱེར་བཱ་
རཱ་ཎ་སཱིར་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་ཀྲྀ་ཀཱི་ཞེས་བྱ་བ་བྱུང་ངོ་། །དེའི་ཚེ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེའི་སྤྱན་སྔར་བཅོམ་ལྡན་འདས་བྱང་ཆུབ་སེམས་དཔས་མ་འོངས་པ་ན་བྱང་ཆུབ་པར་བྱ་བའི་ཕྱིར་སྔོན་སྨོན་ལམ་བཏབ་ནས་
ཚངས་པར་སྤྱོད་པ་སྤྱད་དེ། དགའ་ལྡན་གྱི་ལྷའི་རིས་སུ་སྐྱེས་སོ། །གཽ་ཏ་མ་དག་རྒྱལ་པོ་ཀྲྀ་ཀཱིའི་བུ་ལེགས་སྐྱེས་སོ། །གཽ་ཏ་མ་དག་རྒྱལ་པོ་ལེགས་སྐྱེས་ཀྱི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བརྒྱ་ཐམ་པ་ཡང་གྲོང་ཁྱེར་གྲུ་འཛིན་དུ་བྱུང་
སྟེ། དེ་རྣམས་ཀྱི་ཐ་མ་ནི་རྒྱལ་པོ་རྣ་བ་ཅན་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་རྣ་བ་ཅན་ལ་བུ་གཉིས་ཏེ། གཽ་ཏ་མ་དང་། བ་ར་དྭ་ཛའོ། །དེ་གཉིས་ལས་གཽ་ཏ་མ་ནི་མངོན་པར་འབྱུང་བར་དགའོ། །བ་ར་དྭ་ཛ་ནི་རྒྱལ་སྲིད་ལ་མངོན་པར་དགའོ། །དེས་
པ་ཆོས་དང་ཆོས་མ་ཡིན་པས་རྒྱལ་སྲིད་བྱེད་པ་མཐོང་ནས། དེས་བསམས་པ། བདག་ཡབ་འདས་ནས་རྒྱལ་པོར་གྱུར་ཏེ། བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱས་ནས་སེམས་ཅན་དམྱལ་བར་གཞོལ་བར་འགྱུར་བས་འདིར་ཅིའི་དུས་

ལ་བབ་ཅེ་ན། ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་དུ་བསམས་ནས། རྒྱལ་པོ་རྣ་བ་ཅན་གང་ན་བ་དེར་སོང་སྟེ་ཕྱིན་པ་དང་རྐང་པ་གཉིས་ལ་གཏུགས་ཏེ་གསོལ་བ་བཏབ་པ། ཡབ་མཁྱེན་པར་མཛོད་ཅིག །བདག་ནི་དད་པས་ཁྱིམ་ནས་ཁྱིམ་མ་
མཆིས་པར་རབ་ཏུ་འབྱུང་ངོ་། །དེས་སྨྲས་པ། བུ་གང་གི་ཕྱིར་མཆོད་སྦྱིན་མཆོད་པར་བྱེད་པ་དང་། སྦྱིན་སྲེག་སྲེག་པར་བྱེད་པ་དང་། དཀའ་ཐུབ་སྤྱོད་པ་དེ་དག་ནི་འདིའི་ཆེད་ཡིན་ཏེ། ང་འདས་ན་རྒྱལ་སྲིད་ལག་མཐིལ་དུ་འོངས་ཏེ་རྒྱལ་པོ་བྱེད་པར་འགྱུར་ན་ཅིའི་ཕྱིར་རབ་ཏུ་
འབྱུང་། དེས་སྨྲས་པ། ཡབ་བདག་གིས་ཆོས་དང་ཆོས་མ་ཡིན་པས་རྒྱལ་སྲིད་བགྱིད་རྔོ་མི་ཐོག་གོ། །དེ་ལྟ་བས་ན་མཁྱེན་པར་མཛོད་ཅིག་རབ་ཏུ་འབྱུང་ངོ་། །དེ་ནས་རྒྱལ་པོས་གལ་གྱིས་གཅུ་བར་ཤེས་ནས་གནང་ངོ་། །དེའི་ཚེ་བསྟི་གནས་ཞིག་ན་དྲང་སྲོང་མདོག་གནག་
ཅེས་བྱ་བ་གནས་སོ། །དེ་ནས་གཞོན་ནུ་གཽ་ཏ་མ་རྒྱལ་པོས་གནང་ནས་དགའ་ཞིང་མགུ་ལ་དགའ་བ་རྒྱ་ཆེན་པོ་དང་ཡིད་བདེ་བ་སྐྱེས་ནས་དྲང་སྲོང་མདོག་གནག་གང་ན་བ་དེར་སོང་སྟེ་ཕྱིན་པ་དང་སྤྱོད་ལམ་དུལ་བས་རྐང་པ་གཉིས་ལ་ཕྱག་བྱས་ནས་སྨྲས་པ། དྲང་སྲོང་ཆེན་པོ་བདག་རབ་
ཏུ་འབྱུང་བར་འདོད་ཀྱིས་བདག་རབ་ཏུ་ཕྱུང་ཤིག །དེས་དེ་རབ་ཏུ་ཕྱུང་ངོ་། །དྲང་སྲོང་མདོག་གནག་ནི་འབྲས་བུ་དང་། རྩ་བ་དང་། ཆུ་འཐུང་བས་དེ་ཡང་དྲང་སྲོང་གཽ་ཏ་མ་དྲང་སྲོང་གཽ་ཏ་མ་ཞེས་བྱ་བར་གྱུར་ཏོ། །ཇི་ཙམ་དུས་གཞན་ཞིག་ན་རྒྱལ་པོ་རྣ་བ་ཅན་ཤི་ནས། གཞོན་ནུ་བ་ར་
དྭ་ཛ་ཕའི་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་གོ། །ཇི་ཙམ་དུས་གཞན་ཞིག་ན་དྲང་སྲོང་གཽ་ཏ་མས་མཁན་པོ་ལ་སྨྲས་པ། མཁན་པོ་དགོན་པའི་ཟས་ཀྱིས་འཚོ་བར་རྔོ་མི་ཐོག་གིས་གྲོང་འདབ་ཏུ་གནས་པར་བགྱིའོ། །དེས་སྨྲས་པ། བུ་རུང་གིས་གྲོང་ངམ་དགོན་
པ་ན་གནས་པའི་དྲང་སྲོང་གིས་ནི་མདོར་ན་དབང་པོ་བསྲུང་བ་ཡིན་གྱིས། ཁྱོད་སོང་ལ་གྲུ་འཛིན་གྱི་ཉེ་འཁོར་དུ་ལོ་མའི་སྤྱིལ་བོ་བྱོས་ལ་འདུག་ཤིག །མཁན་པོ་བཀའ་བཞིན་འཚལ་ཞེས་སྨྲས་ནས། དྲང་སྲོང་གཽ་ཏ་མ་གྲུ་འཛིན་གྱི་ཉེ་འཁོར་དུ་ལོ་མའི་སྤྱིལ་བུ་བྱས་ཏེ་

གནས་སོ། །དེའི་ཚེ་གྲོང་ཁྱེར་གྲུ་འཛིན་ན་སྨད་འཚོང་མ་བཟང་མོ་ཞེས་བྱ་བ་དང་། སྐྱེས་བུ་གཡོན་ཅན་པད་མའི་རྩ་ལག་ཅེས་བྱ་བ་ཞིག་གནས་ཏེ། དེས་དེ་ལ་དགའ་མགུར་སྤྱད་པའི་ཕྱིར་གོས་དང་རྒྱན་དག་བསྐུར་རོ། །དེས་གོས་དང་རྒྱན་དག་ཐོགས་ནས་ཆས་
པ་ལས། ཡང་མི་གཞན་ཞིག་ཀཱར་ཥཱ་པ་ཎ་ལྔ་བརྒྱ་ཐོགས་པ་ཞིག་འོངས་ནས་བཟང་མོ་དགའ་མགུར་སྤྱོད་ཀྱིས་ཚུར་ཤོག །དེས་བསམས་པ། གལ་ཏེ་བདག་སོང་ན་ཀཱར་ཥཱ་པ་ཎ་ལྔ་བརྒྱ་ཡང་མི་འཐོབ་ལ་ཁྱིམ་དུ་འོངས་པ་སྤངས་ཏེ་གཞན་དུ་འགྲོ་བ་འདི་ནི་ལེགས་པ་
མ་ཡིན་ནོ་སྙམ་ནས་དེས་བུ་མོ་མངག་གཞུག་མ་ལ་སྨྲས་པ་སོང་ལ་པད་མའི་རྩ་ལག་ལ་ཇོ་མོའི་མཆིད་ནས་རེ་ཞིག་བདག་ལ་སྐབས་མ་མཆིས་ཏེ་སླད་ཀྱིས་མཆིའོ་ཞེས་སྨྲོས་ཤིག །དེས་དེའི་གན་དུ་སོང་ནས་སྨྲས་སོ། །མི་དེ་ཡང་བྱ་བ་མང་པོ་ཞིག་ཡིན་པས་དེ་དང་དེ་དགའ་མགུར་སྤྱད་
ནས་ཐུན་དང་པོ་ཉིད་ལ་སོང་ངོ་། །དེས་བསམས་པ། ནམ་ཚོད་རིང་དུ་ཡོད་པས་དེའི་སེམས་ཀྱང་བདག་གིས་བསྲུང་བར་ནུས་སོ་སྙམ་ནས་དེས་ཡང་བུ་མོ་དེ་ལ་བསྒོ་བ། པད་མའི་རྩ་ལག་གི་གན་དུ་སོང་ལ་ཇོ་མོའི་མཆིད་ནས་སྟ་གོན་བགྱིས་ལགས་ན། སྐྱེད་མོས་ཚལ་གང་
དུ་མཆི་ཞེས་སྨྲོས་ཤིག །དེས་དེའི་གན་དུ་སོང་ནས་སྨྲས་པ་དང་། དེས་སྨྲས་པ། ཁྱོད་ཀྱི་ཇོ་མོ་སྐད་ཅིག་ལ་སྐབས་མེད་སྐད་ཅིག་ལ་སྐབས་ཡོད་ཅེའམ། བུ་མོ་དེ་དེ་དང་རིགས་མི་འཕྲོད་པ་ཞིག་པས་དེས་སྨྲས་པ། རྗེའི་སྲས་སྐབས་མ་མཆིས་པ་ནི་མ་ལགས་མོད་ཀྱིས་དེ་ཁྱོད་ཀྱི་
གོས་དང་རྒྱན་དག་གིས་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ། །དེའི་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་དང་བྲལ་བར་གྱུར་ཅིང་གནོད་སེམས་ཀྱི་ཀུན་ནས་དཀྲིས་པ་སྐྱེས་ཏེ། དེ་མི་བཟོད་པ་སྐྱེས་ནས་སྨྲས་པ། བུ་མོ་སོང་ལ་བཟང་མོ་པད་མའི་
རྩ་ལག་ན་རེ་སྐྱེད་མོས་ཚལ་ག་གེ་མོ་ཞིག་ཏུ་ཤོག་ཅེས་བྱོས་ཤིག །དེས་སོང་ནས་བཟང་མོ་ལ་སྨྲས་པ་དང་། དེ་ནས་དེ་སྐྱེད་མོས་ཚལ་དུ་སོང་བ་དང་སྐྱེས་བུ་གཡོན་ཅན་པད་མའི་རྩ་ལག་གིས་སྨྲས་པ། ཁྱོད་ཁོ་བོའི་གོས་དང་རྒྱན་གྱིས་སྐྱེས་པ་གཞན་དང་ལྷན་ཅིག་དགའ་མགུར་

སྤྱད་པར་རིགས་སམ། དེས་སྨྲས་པ། རྗེའི་སྲས་དེ་ནི་བདག་གིས་ནོངས་ཏེ། འོན་ཀྱང་བུད་མེད་ནི་རྟག་ཏུ་སྐྱོན་ཅན་ལགས་པས་བཟོད་པར་མཛོད་ཅིག །དེ་ནས་དེ་མི་བཟོད་པ་སྐྱེས་ནས་རལ་གྲི་ཤུབས་ནས་ཕྱུང་སྟེ་བསད་དོ། །དེ་ནས་བུ་མོ་མངག་གཞུག་མས་ཇོ་མོ་བསད་
དོ། །ཇོ་མོ་བསད་དོ་ཞེས་ཀུ་ཅོའི་སྒྲ་ཆེན་པོ་བཏོན་པ་སྐྱེ་བོའི་ཚོགས་ཀུན་གྱིས་ཐོས་ནས་བརྒྱུགས་པ་དང་། དེ་ཇི་ཙམ་ན་བསྟི་གནས་དེ་ཉིད་ན་དྲང་སྲོང་གཽ་ཏ་མ་གནས་སོ། །དེ་ནས་སྐྱེས་བུ་གཡོན་ཅན་པད་མའི་རྩ་ལག་དེ་སྐྲག་ནས་རལ་གྲི་ཁྲག་ཅན་དྲང་སྲོང་གཽ་ཏ་མའི་མདུན་
དུ་བོར་ནས་སྐྱེ་བོའི་ཚོགས་ཆེན་པོ་དེ་ཉིད་ཀྱི་ནང་དུ་ཞུགས་སོ། །སྐྱེ་བོའི་ཚོགས་ཆེན་པོས་དེ་རལ་གྲི་ཁྲག་ཅན་མཐོང་ནས་རབ་ཏུ་བྱུང་བ་འདིས་བཟང་མོ་བསད་དོ་ཞེས་དེ་ནས་དྲང་སྲོང་གཽ་ཏ་མ་དེ་བསྐོར་ཏེ་མི་བཟོད་པ་སྐྱེས་ནས་སྨྲས་པ། ཀྭའི་རབ་ཏུ་བྱུང་བ་དྲང་སྲོང་གི་རྒྱལ་མཚན་
ཐོགས་ནས་འདི་འདྲ་བའི་ལས་བྱེད་དམ། དེས་སྨྲས་པ། ཅི་བྱས། དེ་རྣམས་ཀྱིས་སྨྲས་པ། བཟང་མོ་དང་ཁྱོད་ལྷན་ཅིག་དགའ་མགུར་སྤྱད་ནས་དེ་བསད་དོ། །དེས་སྨྲས་པ། ཁོ་བོའི་སྡིག་པ་ཞི་བས་ལས་དེ་མི་བྱེད་དོ་ཞེས་དེས་ཞི་བ་སྨྲས་ཀྱང་སྐྱེ་བོའི་ཚོགས་ཆེན་པོ་
དེས་ལག་པ་ཕྱིང་ཀ་ལོག་ཏུ་དམ་དུ་བཅིངས་ནས་རྒྱལ་པོ་ལ་ཕུལ་ཏེ། ལྷ་རབ་ཏུ་བྱུང་བ་འདིས་བཟང་མོ་དང་ལྷན་ཅིག་དགའ་མགུར་སྤྱད་ནས་དེ་བཀུམ་ལགས་སོ། །རྒྱལ་པོ་རྣམས་ནི་མི་རྟོག་པ་ཡིན་པས་དེས་སྨྲས་པ། གལ་ཏེ་དེ་ལྟར་གྱུར་ན་རབ་ཏུ་བྱུང་བ་འདི་ངས་སྤངས་
ཀྱིས་གསལ་ཤིང་ལ་ཤོན་ཅིག །དེ་ནས་རབ་ཏུ་བྱུང་བ་དེ་མེ་ཏོག་ཀ་ར་བཱི་རའི་ཕྲེང་བ་མགུལ་དུ་བཏགས་ཤིང་སྐྱེས་པ་གོས་སྔོན་པོ་གྱོན་པ། ལག་ན་མཚོན་ཐོགས་པ་རྣམས་ཀྱིས་ཡོངས་སུ་བསྐོར་ནས་ལམ་པོ་ཆེ་དང་། ཚོང་དུས་དང་། བཞི་མདོ་དང་། སུམ་མདོ་རྣམས་
སུ་བསྒྲགས་པའི་སྒོར་བསྒྲགས་ཏེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཕྱུང་ནས་གསོན་པོ་ཉིད་དུ་གསལ་ཤིང་ལ་གཤོན་ནོ། །དེའི་མཁན་པོ་མདོག་ནག་དེ་དུས་དུས་སུ་དེའི་བསྟི་གནས་སུ་འགྲོ་བ་ཡིན་པས། ཇི་ཙམ་དུ་དུས་གཞན་ཞིག་ན་སོང་བ་ལས་མ་མཐོང་ནས་དེས་

ཕན་ཚུན་དུ་བཙལ་བར་བརྩམས་པ་དང་། ཇི་ཙམ་ན་དེ་གསལ་ཤིང་ལ་གཤོན་པར་མཐོང་ནས་དེ་སྐད་མི་གསལ་ཞིང་མིག་མཆི་མས་གང་ལ་སྙིང་རྗེ་བའི་ཚིག་གིས་དལ་བུ་དལ་བུས་སྨྲས་པ། ཀྱི་ཧུད་བུ་འདི་ཅི་ཞིག །དེས་ཀྱང་སྐད་མི་གསལ་ཞིང་ཡི་ཆད་ལ་གནད་དུ་
བབ་པའི་གནོད་པའི་ཚོར་བ་སྐྱེས་ཤིང་གདུངས་པས་སྨྲས་པ། མཁན་པོ་གཞན་ཅི་ལགས། ལས་ལགས་མོད། དེས་སྨྲས་པ། བུ་རྨ་ཕྱུང་བའམ། གནོད་པ་ཞིག་མ་བྱས་གྲང་མཁན་པོ་བདག་གི་ལུས་ཀྱིས་རྨ་ཕྱུང་གི་སེམས་ཀྱིས་ནི་མ་ཡིན་ནོ། །བུ་ཇི་ལྟར་ཤེས། མཁན་
པོ་བདེན་པ་གསོལ་གྱིས་གསོན་ཅིག །བདེན་པ་དང་བདེན་པའི་ཚིག་གང་གིས་བདག་གི་ལུས་ཀྱིས་རྨ་ཕྱུང་གི་སེམས་ཀྱིས་མ་ཡིན་ན། བདེན་པ་དང་བདེན་པའི་ཚིག་དེས་མཁན་པོའི་པགས་པའི་མདོག་ནག་པོ་གང་ཡིན་པ་འདི་གསེར་གྱི་ཁ་དོག་ཏུ་གྱུར་ཅིག །བདག་ཉིད་ཆེན་
པོ་དེ་ལྷག་པའི་བསམ་པ་གོམས་པ་ཡིན་པས་ཚིག་སྨྲས་མ་ཐག་ཏུ་དྲང་སྲོང་མདོག་གནག་གི་པགས་པ་ནག་པོ་མི་སྣང་ཞིང་གསེར་གྱི་ཁ་དོག་ཏུ་གྱུར་ཏོ། །ཀུན་དུ་དྲང་སྲོང་མདོག་ནག་གསེར་གྱི་ཁ་དོག་ཏུ་གྱུར་ཏོ་ཞེས་སྒྲ་གྲགས་པས་དེའི་མིང་གསེར་མདོག་ཅེས་བྱ་བར་གྱུར་ཏོ། །
དེ་ངོ་མཚར་མཆོག་ཏུ་གྱུར་ཏོ། །དེ་ནས་དྲང་སྲོང་གཽ་ཏ་མས་སྨྲས་པ། མཁན་པོ་བདག་ནི་འདི་ནས་ཤི་འཕོས་ནས་འགྲོ་བ་ནི་གང་། སྐྱེ་བ་ནི་གང་། ཚེ་ཕྱི་མ་ནི་གང་ཞིག་ལགས། དེས་སྨྲས་པ། བྲམ་ཟེ་རྣམས་ན་རེ་བུ་མེད་པ་རྣམས་ལ་འགྲོ་བ་མེད་དོ། །ཞེས་ཟེར་ན་ཁྱོད་
ཀྱིས་བུ་འགའ་བསྐྱེད་པ་ལྟ་ཡོད་དམ། མཁན་པོ་ཡབ་ཀྱིས་རྒྱལ་སྲིད་ཀྱི་སླད་དུ་སྤྲོ་བ་བསྐྱེད་པ་ན་བདག་གཞོན་ནུ་ཉིད་དུ་རབ་ཏུ་བྱུང་བས་བུད་མེད་ཀྱི་རྒྱུས་ཀྱང་མ་འཚལ་ན། བདག་གིས་བུ་བསྐྱེད་པ་ལྟ་ག་ལ་མཆིས། བུ་གལ་ཏེ་དེ་ལྟ་ན་སྔོན་ཡུལ་ལ་སྤྱད་པ་རྗེས་སུ་དྲན་པར་
གྱིས་ཤིག །མཁན་པོ་ཚོར་བ་དྲག་པོས་ཉེན་པས་ད་ནི་བདག་གི་གནད་རྣམས་ཆད་ཅིང་ཚིགས་རྣམས་བྱེ་སྟེ། འགུམ་པ་གཅིག་པུ་དྲན་པར་བས་ན། ཇི་ལྟར་སྔོན་གྱི་ཡུལ་ལ་སྤྱད་པ་རྗེས་སུ་དྲན་པར་འགྱུར། དེའི་མཁན་པོ་མངོན་པར་ཤེས་པ་ཐོབ་པ་ཡིན་པས་དེས་རྫུ་

འཕྲུལ་གྱིས་རྫི་ཆར་ཆེན་པོ་སྤྲུལ་ནས་ཆར་བའི་ཐིགས་པས་དེའི་ལུས་ལ་ཕོག་པ་དང་། དེ་ནས་ཆར་པ་དང་རླུང་གྲང་མོས་རེག་པས་སྡུག་བསྔལ་རྣམ་པར་མནན་ནས། དེས་སྔོན་གྱི་ཡུལ་ལ་སྤྱད་པས་རྗེས་སུ་དྲན་པར་བྱ་བར་བརྩམས་སོ། །གང་གི་ཚེ་དེས་འཁྲིག་པའི་
འདོད་ཆགས་རྗེས་སུ་དྲན་པར་བྱས་པ་ལས་ཁུ་བའི་ཐིགས་པ་གཉིས་ཁྲག་དང་ལྷན་ཅིག་ལྷུང་ངོ་། །བསམ་གྱིས་མི་ཁྱབ་པའི་གནས་ནི་བཞི་སྟེ། བདག་སེམས་པ་དང་། འཇིག་རྟེན་སེམས་པ་དང་། སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་སེམས་པ་དང་།
སངས་རྒྱས་རྣམས་ཀྱི་སངས་རྒྱས་ཀྱི་ཡུལ་སེམས་པའོ། །ཁུ་བའི་ཐིགས་པ་དེ་གཉིས་སྒོང་གཉིས་སུ་གྱུར་ནས་ཉི་མ་ཤར་བའི་དུས་ཀྱི་ཚེ་ཉི་མའི་འོད་ཟེར་གྱིས་སྨིན་ནས་རྡོལ་བ་དང་ཁྱེའུ་གཉིས་ཤིག་བྱུང་ནས། དེ་དང་ཧ་ཅང་ཡང་མི་རིང་བའི་བུ་རམ་ཤིང་གི་ཚལ་གསེབ་དེར་
དེ་གཉིས་ཞུགས་སོ།། །།འདུལ་བ་གཞི། བམ་པོ་བརྒྱད་བཅུ་གཅིག་པ། དེ་ནས་ཉི་མའི་འོད་ཟེར་ཤིན་ཏུ་ཚ་བ་བྱུང་སྟེ། ཉི་མའི་འོད་ཟེར་གྱིས་དྲང་སྲོང་གཽ་ཏ་མ་གདུངས་ནས་ཤིའོ། །དེ་ནས་དྲང་སྲོང་གསེར་མདོག་འོངས་ནས་ཤི་བ་མཐོང་ནས་དེས་གསལ་
ཤིང་གི་ཉེ་འཁོར་དུ་བལྟས་ན་སྒོ་ང་རྡོལ་བའི་ཁོག་པ་གཉིས་ཤིག་འདུག་ནས་དེ་ཕན་ཚུན་རྗེས་གཅོད་ཅིང་བུ་རམ་ཤིང་གི་ཚལ་གསེབ་ཏུ་ཞུགས་པ་ལས། ཇི་ཙམ་ན་ཁྱེའུ་གཉིས་ཤིག་མཐོང་ངོ་། །དེས་འདི་གཉིས་སུའི་བུ་ཡིན་ཞེས་བསམ་པ་ལ་ཞུགས་པ་དང་། དྲང་སྲོང་
གཽ་ཏ་མའི་ཡིན་པར་གྱུར་ནས། དེ་ནས་དེ་ལྷག་པར་སྡུག་པ་སྐྱེས་ཏེ། དེས་དེ་གཉིས་བསྟི་གནས་སུ་ཁྲིད་ནས་བསྣུན་བསྙོད་དེ། དེ་གཉིས་ཀྱི་མིང་བཏགས་པ། ཉི་མ་ཤར་བའི་ཚེ་ཉི་མའི་འོད་ཟེར་གྱིས་སྨིན་པར་བྱས་པ་ལས་འདི་གཉིས་སྐྱེས་པར་གྱུར་པས་དེ་བས་
ན་ཉི་མའི་རིགས་ཡིན་པས་ཉི་མའི་རིགས་ཉི་མའི་རིགས་ཞེས་བྱ་བར་གྱུར་ཏོ། །དྲང་སྲོང་གཽ་ཏ་མའི་བུ་ཡིན་པས་མིང་གཉིས་པ་གཽ་ཏ་མ་གཽ་ཏ་མ་ཞེས་བྱ་བར་གྱུར་ཏོ། །རང་གི་ཡན་ལག་ལས་སྐྱེས་པས་མིང་གསུམ་པ་ཡན་ལག་སྐྱེས་ཡན་ལག་སྐྱེས་ཞེས་བྱ་བར་གྱུར་ཏོ། །

བུ་རམ་ཤིང་གི་ཚལ་གསེབ་ནས་རྙེད་པས་མིང་བཞི་པ་བུ་རམ་ཤིང་པ་བུ་རམ་ཤིང་པ་ཞེས་བྱ་བར་གྱུར་ཏོ། །ཇི་ཙམ་དུས་གཞན་ཞིག་ན་རྒྱལ་པོ་བ་ར་དྭ་ཛ་བུ་མེད་པར་ཤི་ནས་བློན་པོ་རྣམས་འདུས་ནས་གྲོས་བྱ་བར་བརྩམས་པ། ཤེས་ལྡན་དག་ད་སུ་ཞིག་
རྒྱལ་པོར་དབང་བསྐུར་བར་བྱ། གཞན་དག་གིས་སྨྲས་པ། དེའི་གཅེན་གཽ་ཏ་མ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ། རྒྱལ་སྲིད་འདི་ནི་དེའི་རིགས་རྒྱུད་དུ་འོས་པ་ཡིན་པས་དེ་དབང་བསྐུར་རོ། །དེ་ནས་དེ་རྣམས་ཀྱིས་གྲོས་བྱས་ནས་དྲང་སྲོང་གསེར་མདོག་གི་དྲུང་དུ་སོང་
སྟེ་སོན་པ་དང་། རྐང་པ་གཉིས་ལ་གཏུགས་ནས་སྨྲས་པ། དྲང་སྲོང་ཆེན་པོ་གཽ་ཏ་མ་གང་དུ་མཆིས། དེས་སྨྲས་པ། ཁྱེད་ཅག་ཁོ་ནས་བསད་དོ། །དེ་རྣམས་ཀྱིས་སྨྲས་པ། དྲང་སྲོང་ཆེན་པོ་བདག་ཅག་གིས་དེ་མཐོང་བར་ཡང་མི་དྲན་ན་ཇི་ལྟར་བསད། ཁོ་བོས་ཁྱེད་ཅག་
དྲན་པར་བྱའོ། །མ་ནོངས་སོ། །དེས་དེ་རྣམས་དྲན་པར་བྱས་པ་དང་། སྨྲས་པ། དྲང་སྲོང་ཆེན་པོ་གལ་ཏེ་དེ་ལྟ་ན་སྡིག་པ་སྤྱོད་པ་དེ་མིང་ཙམ་སྨོས་པ་ཡང་བསྒྲགས་པ་མ་ཡིན་གྱིས་ཞོག་ཤིག །དེས་སྡིག་པའི་ལས་ཅི་བྱས། འདི་དང་འདིའོ། །སྐྱོན་མེད་པ་གནོད་པ་མི་
བྱེད་པ་དེས་སྡིག་པའི་ལས་མ་བྱས་པར་ཁྱེད་ཅག་གིས་བསད་དོ། །དེ་ལྟར་ཅི་མངོན། དེས་ཇི་ལྟར་གྱུར་པ་རྒྱས་པར་སྨྲས་པ་དང་། དེ་རྣམས་ཡིད་མི་བདེ་བ་སྐྱེས་ནས་སྨྲས་པ། དྲང་སྲོང་ཆེན་པོ་གལ་ཏེ་དེ་ལྟ་ན་དེས་མ་ལགས་ཀྱི་བདག་ཅག་གིས་སྡིག་པའི་ལས་བགྱིས་སོ་ཞེས་
དེ་རྣམས་དེ་སྐད་དུ་གཏམ་སྨྲ་བར་བྱེད་པ་ན། ཁྱེའུ་དེ་གཉིས་ཀྱང་དྲང་སྲོང་གི་དྲུང་དུ་འོངས་སོ། །བློན་པོ་རྣམས་ཀྱིས་སྨྲས་པ། དྲང་སྲོང་ཆེན་པོ་ཁྱེའུ་འདི་གཉིས་སུའི་ལགས། དེས་སྨྲས་པ། དེ་ཁོ་ནའི་བུའོ། །དེ་རྣམས་ཀྱིས་སྨྲས་པ། འདི་གཉིས་ཇི་ལྟར་སྐྱེས།
འདི་གཉིས་ཀྱི་མིང་ཅི་ལགས། དེས་བྱུང་བ་དང་བཅས་པ་རྒྱས་པར་སྨྲས་པ། བློན་པོ་རྣམས་ཀྱིས་ཐོས་ཏེ་མཆོག་ཏུ་ངོ་མཚར་སྐྱེས་ནས་དེ་རྣམས་ཀྱིས་དྲང་སྲོང་དེ་ལ་གསོལ་བ་བཏབ་ནས་དེ་གཉིས་ལས་གཞོན་ནུ་ཕུ་བོ་ཤེས་རྒྱལ་སྲིད་ཀྱི་དབང་བསྐུར་བས་དབང་བསྐུར་བ་ལས་དེ་ཡང་

བུ་མེད་པར་ཤིའོ། །དེ་ནས་ཅིག་ཤོས་ནུ་བོ་དབང་བསྐུར་ནས། དེའི་མིང་རྒྱལ་པོ་བུ་རམ་ཤིང་པ་ཞེས་བྱ་བར་གྱུར་ཏོ། །གཽ་ཏ་མ་དག་རྒྱལ་པོ་བུ་རམ་ཤིང་པའི་བུ་དང་། ཚ་བོ་དང་། ཡང་ཚ་དང་། སུམ་ཚའི་རྒྱུད་རྒྱལ་པོ་བུ་རམ་ཤིང་པ་བརྒྱ་ཡང་གྲོང་ཁྱེར་གྲུ་འཛིན་
དུ་བྱུང་སྟེ། དེ་རྣམས་ཀྱི་ཐ་མ་ནི་རྒྱལ་པོ་བུ་རམ་ཤིང་པ་འཕགས་སྐྱེས་པོ་ཞེས་བྱ་བ་བྱུང་ངོ་། །གཽ་ཏ་མ་དག་རྒྱལ་པོ་བུ་རམ་ཤིང་པ་འཕགས་སྐྱེས་པོ་ལ་བུ་བཞི་སྟེ། སྐར་མདའ་གདོང་དང་། ལག་རྣ་དང་། གླང་པོ་ཆེ་འདུལ་དང་། རྐང་གདུབ་ཅན་ནོ། །དུས་གཞན་
ཞིག་ན་དེའི་བཙུན་མོ་དམ་པ་ཤི་ནས་དེ་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་གོ། །བློན་པོ་རྣམས་ཀྱིས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་ནས་ཐུགས་མི་དགྱེས་ཤིང་བཞུགས། དེས་སྨྲས་པ། ངའི་བཙུན་མོ་དམ་པ་ཤི་ན་ཅིའི་ཕྱིར་སེམས་
ཁོང་དུ་ཆུད་ཅིང་མི་འདུག །ལྷ་གལ་ཏེ་དེ་ལྟ་ན་ཉི་འོག་གི་རྒྱལ་པོ་རྣམས་ལ་བུ་མོ་མཆིས་ན། ཅིའི་སླད་དུ་རྗེའི་བཙུན་མོ་དམ་པ་མི་བཙལ། རྒྱལ་པོས་སྨྲས་པ། གཞོན་ནུ་འདི་དག་ནི་རྒྱལ་སྲིད་མངོན་པར་འདོད་པས་ཕྱིར་རྒོལ་བ་འདི་དག་ཡོད་ན་ང་ལ་སུ་ཞིག་བུ་མོ་སྟེར་
བར་འགྱུར་ལྷ་དགོངས་ཤིག་དང་། བདག་ཅག་གིས་བཙལ་ལོ། །ཇི་ཙམ་ན་རྒྱལ་པོ་གཞན་ཞིག་གི་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ་བཙུན་མོ་དམ་པར་འཚམ་པ་ཡོད་པ་དེ་དེ་རྣམས་ཀྱིས་བརྟགས་ཏེ་རྒྱལ་པོ་དེའི་དྲུང་དུ་དོང་ནས་དེ་རྣམས་ཀྱིས་
གཅིག་ནས་གཅིག་ཏུ་བརྒྱུད་དེ་རྒྱལ་པོ་ལ་རིག་པར་བྱས་པ་དང་། རྒྱལ་པོས་བསྒོ་བ་ཁུག་ཤིག །དེ་ནས་དེ་རྣམས་རྒྱལ་པོའི་སྤྱན་སྔར་དོང་ནས་རྐང་པ་གཉིས་ལ་གཏུགས་ཏེ་ཐོག་མར་གཏམ་བྱས་ནས་འདུག་གོ། །གཏམ་གྱི་སྐབས་རྙེད་ཅིང་རྒྱལ་པོའི་ཞལ་མཐོང་ནས་
སྨྲས་པ། ལྷ་བཀྲ་ཤིས་པར་གྱུར་ཅིག །བཀྲ་ཤིས་པར་གྱུར་ཅིག །རྒྱལ་པོས་སྨྲས་པ། ཤེས་ལྡན་དག་ཁྱེད་ཅི་གསོལ། རྒྱལ་པོ་བུ་རམ་ཤིང་པ་འཕགས་སྐྱེས་པོའི་བཙུན་མོ་དམ་པ་གུམ་ནས་དེའི་ཆེད་དུ་སྲས་མོ་སློང་ངོ་། །རྒྱལ་པོས་སྨྲས་པ། འཐབ་རིར་

བབ་པའི་མཆོག་ཡིན་པས་རུང་ན་འོན་ཀྱང་དམ་ཞིག་བཅའ་སྟེ། གལ་ཏེ་ངའི་བུ་མོ་ལ་ཁྱེའུ་ཞིག་ཡོད་པར་གྱུར་ན་དེ་གལ་ཏེ་རྒྱལ་སྲིད་ཀྱི་དབང་ཕྱུག་ལ་གཞག་པ་ལྟ་ན་སྦྱིན་ནོ། །ལྷ་བཀའ་བཞིན་འཚལ། མཆིས་ལ་ལྷ་ལ་སྙན་དུ་གདགས་པར་
གསོལ་ལོ་ཞེས་དེ་རྣམས་དོང་ནས་རྒྱལ་པོ་བུ་རམ་ཤིང་པ་འཕགས་སྐྱེས་པོ་ལ་ཇི་ལྟར་གྱུར་པ་སྨྲས་པ་དང་རྒྱལ་པོས་སྨྲས་པ། ཤེས་ལྡན་དག་གཞོན་ནུ་ཆེས་ཕུ་བོར་གྱུར་པ་རྒྱལ་སྲིད་ལ་མངོན་པར་དགའ་བ་རྣམས་སྤངས་ཏེ། ནུ་བོ་རྒྱལ་སྲིད་ལ་འཇོག་པ་དེ་ནི་འོས་པ་མ་ཡིན་
ནོ། །ལྷ་དོན་དེ་ལ་ངེས་པ་མ་མཆིས་ཏེ། རེ་ཞིག་བཙུན་མོ་བླངས་ལ་ལྷ་དེ་དང་ལྷན་ཅིག་རྩེད་མོ་དང་། དགྱེས་པ་དང་དགྱེས་དགུར་སྤྱོད་པར་མཛོད་ཅིག་དང་། དེ་ལ་ཁྱེའུ་བཙའ་བར་འགྱུར་རམ། འོན་ཏེ་བུ་མོར་འགྱུར་རམ། ཅི་མ་མཆིས་པར་འགྱུར་སུས་འཚལ། རྒྱལ་པོས་
སྨྲས་པ། ཤེས་ལྡན་དག་གལ་ཏེ་དེ་ལྟ་ན་དེང་ལ་ལོང་ཤིག །དེ་རྣམས་དོང་ནས་བསུ་སྟེ། ཇི་ཙམ་ན་རྒྱལ་པོའི་དཔལ་གྱི་འབྱོར་པ་ཆེན་པོས་བླངས་ནས་དེ་ཡང་རྒྱལ་པོས་མངོན་པར་འདོད་པར་གྱུར་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་
བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་པ་དང་། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བཙས་སོ། །
བཙས་ནས་དེའི་བཙས་པའི་བཙས་སྟོན་རྒྱ་ཆེར་བྱས་ཏེ། ཁྱེའུ་འདིའི་མིང་ཅིར་གདགས་ཞེས་མིང་འདོགས་པར་བྱེད་དེ། བློན་པོ་རྣམས་ཀྱིས་སྨྲས་པ། ལྷ་འདི་ལྟར་མ་སྐྱེས་པ་ཉིད་ནས་རྒྱལ་སྲིད་ལ་མངོན་པར་དགའ་བས་དེའི་སླད་དུ་ཁྱེའུའི་མིང་རྒྱལ་སྲིད་དགའ་ཞེས་བྱ་
བར་བཏགས་སོ། །ཁྱེའུ་རྒྱལ་སྲིད་དགའ་མ་མ་བརྒྱད་ལ་རྗེས་སུ་གཏད་དེ་ཞེས་བྱ་བ་ནས་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ་ཞེས་བྱ་བའི་བར་གོང་མ་བཞིན་དུའོ། །དེ་རྒྱལ་ཚབ་ཀྱི་རྒྱལ་སྲིད་ལ་མ་བཞག་པ་དེ་དེའི་ཞང་པོ་རྒྱལ་པོས་ཐོས་ནས།

དེས་དེ་ལ་ཕོ་ཉ་བཏང་སྟེ། ཚིག་རྩུབ་མོ་དང་བཅས་པའི་སྤྲིང་ཡིག་སྤྲིང་བ་ཁྱོད་ཀྱིས་སྔོན་ཁས་བླངས་ཤིང་དམ་བཅས་པ་བཞིན་གལ་ཏེ་བྱེད་ན་དེ་ལྟ་ན་ལེགས། གལ་ཏེ་དེ་ལྟར་མ་བྱས་ན་ཁྱོད་ཀྱི་མཐུ་དང་བརྩོན་འགྲུས་ཀྱི་ཕ་རོལ་གནོན་པ་གང་ཡིན་པ་དེས་སྡོད་ཅིག །ཁོ་བོ་དེར་
འོངས་ནས་ཡུལ་འཁོར་བུར་མར་བརླག་གོ། །རྒྱལ་པོ་དེ་མཐུ་ཆེན་པོ་དང་ལྡན་པ་དེས་ཐོས་ནས་སྐྲག་སྟེ་བློན་པོ་རྣམས་བསོགས་ནས་སྨྲས་པ། ཤེས་ལྡན་དག་ང་ལ་རྒྱལ་པོ་དེས་འདི་སྐད་ཅེས་སྤྲིང་ན་དེ་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ། ལྷ་རྒྱལ་སྲིད་དགའ་
རྒྱལ་ཚབ་ཏུ་དབང་བསྐུར་ལགས་མོད། དེས་སྨྲས་པ། ཤེས་ལྡན་དག་གཞོན་ནུ་ཆེས་ཕུ་བོར་གྱུར་པ་རྒྱལ་སྲིད་ལ་མངོན་པར་དགའ་བ་རྣམས་སྤངས་ཏེ་ནུ་བོ་རྒྱལ་སྲིད་ཀྱི་དབང་བསྐུར་བ་འདི་ནི་འོས་པ་མ་ཡིན་ནོ། །དེ་རྣམས་ཀྱིས་སྨྲས་པ། ལྷ་རྒྱལ་པོ་དེ་ནི་སྟོབས་དང་བཞོན་པ་རྒྱ་
ཆེ་བས་གལ་ཏེ་འདིར་མཆིས་ན་གདོན་མི་འཚལ་བར་ཡུལ་བུར་མར་རློག་པ་གང་ལགས་པའི་གནས་དེ་མཆིས་པས་རྒྱལ་སྲིད་དགའ་རྒྱལ་ཚབ་ཀྱི་དབང་ཕྱུག་ལ་དབང་བསྐུར་ལ་གཞོན་ནུ་དེ་རྣམས་ནི་སྤྱུག་ཏུ་གསོལ། རྒྱལ་པོས་སྨྲས་པ། ཤེས་ལྡན་དག་སྐྱོན་མེད་ཅིང་གནོད་པ་
མ་བྱས་པའི་གཞོན་ནུ་རྣམས་ཇི་ལྟར་སྤྱུག །ལྷ་བདག་ཅག་ནི་བློན་པོ་ལགས་ཏེ། ལྷ་ལ་སྨན་པར་བགྱི་བ་ལྷུར་ལེན་པ་ལགས་པས་སྐྱོན་མ་མཆིས་པ་དང་། ནོངས་པ་མ་བགྱིས་པ་ཡང་སྤྱུག་ལ། སྐྱོན་མཆིས་པ་དང་ནོངས་པ་བགྱིས་པ་ནི་བཞག་གོ། །རྒྱལ་པོས་བཏང་སྙོམས་
སུ་བཞག་ནས་ཅང་མི་སྨྲ་བར་འདུག་གོ། །བློན་པོ་རྣམས་ཚོགས་ནས་ཕན་ཚུན་དུ་གྲོས་བྱ་བར་བརྩམས་པ། ཤེས་ལྡན་དག་ཐབས་ཤིག་བཤམ་པར་བྱ་སྟེ། དེས་ན་རྒྱལ་པོ་གཞོན་ནུ་རྣམས་ལ་ཐུགས་བྱུང་བར་གྱུར་པ་ཞིག་བྱའོ་ཞེས་དེ་ནས་དེ་རྣམས་ཀྱིས་སྐྱེད་མོས་ཚལ་བྱི་དོར་
བྱས་པ། རི་མོ་སྣ་ཚོགས་བྲིས་པར་ཤིན་ཏུ་དྲི་ཞིམ་པོའི་པོག་པོར་ཉེ་བར་བཞག །དར་གྱི་ཆུན་ཕྱང་མང་པོ་བཏགས། མེ་ཏོག་སྣ་ཚོགས་ཀྱིས་དགའ་དགའ་ལྟར་བྱས་པ་ཞིག་བྱེད་དུ་བཅུག་གོ། །དེ་ནས་དེ་རྣམས་ཀྱིས་བློན་པོ་རྣམས་ཀྱིས་སྐྱེད་མོས་ཚལ་དེ་བྱི་དོར་བྱེད་པ་རྒྱང་

རིང་པོ་ནས་མཐོང་ནས་གཞོན་ནུ་རྒོད་བག་ཅན་དེ་རྣམས་སྐྱེད་མོས་ཚལ་གྱི་ཕྱོགས་སུ་དོང་ངོ་། །བློན་པོ་རྣམས་སྐྱེད་མོས་ཚལ་བྱི་དོར་བྱས་ནས་སྒོར་བྱུང་བ་དང་། གཞོན་ནུ་རྣམས་ཀྱིས་དྲིས་པ། འདི་སུའི་སྐྱེད་མོས་ཚལ། དེ་རྣམས་ཀྱིས་སྨྲས་པ། ལྷའི་ལགས་
སོ། །དེ་རྣམས་སླར་ལོག་པར་བརྩམས་པ་དང་། བློན་པོ་རྣམས་ཀྱིས་སྨྲས་པ། གཞོན་ནུ་རྣམས་ནང་དུ་ཞུགས་ཤིག །ཅིའི་ཕྱིར་སླར་ལྡོག །དེ་རྣམས་ཀྱིས་སྨྲས་པ། ལྷའི་སྐྱེད་མོས་ཚལ་ཡིན་ན་འདིར་འཇུག་ཏུ་ག་ལ་རུང་། བློན་པོ་རྣམས་ཀྱིས་སྨྲས་པ། ལྷའམ་གཞོན་ནུ་
རྣམས་རོལ་པ་འདི་འགལ་བ་ཅི་མཆིས་དེ་རྣམས་ནང་དུ་ཞུགས་ཏེ་རྩེ་བར་བརྩམས་སོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་སྐྱེད་མོས་ཚལ་ལེགས་པར་བྱི་དོར་བགྱིས་ལགས་ཀྱིས། ལྷ་གཟིགས་པའི་དུས་ལ་བབ་ལགས་སོ། །རྒྱལ་པོ་ཆས་པ་དང་སྐྱེད་མོས་ཚལ་ན་ཀུ་ཅོའི་སྒྲ་
ཐོས་སོ། །ཐོས་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་སྐྱེད་མོས་ཚལ་ན་ཀུ་ཅོའི་སྒྲ་གྲག་ན་འདི་ན་སུ་ཞིག་འདུག །བློན་པོ་རྣམས་ཀྱིས་སྨྲས་པ། ལྷ་གཞོན་ནུ་རྣམས་སོ། །གལ་ཏེ་དེ་ལྟ་ན་ངས་གཞོན་ནུ་རྣམས་སྤངས་སོ། །བློན་པོ་རྣམས་ཀྱིས་རྐང་པ་གཉིས་
ལ་གཏུགས་ཏེ་སྨྲས་པ། ལྷ་བཟོད་པར་མཛད་ཅིང་གཞོན་ནུ་རྣམས་མི་སྤང་བར་གསོལ། རྒྱལ་པོས་སྨྲས་པ། དེ་བཞིན་དུ་བྱའོ་ཞེས་གཞོན་ནུ་དེ་རྣམས་སྤྱུག་པར་ཆས་པ་དང་། རྒྱལ་པོའི་རྐང་པ་གཉིས་ལ་གཏུགས་ནས་སྨྲས་པ། ལྷ་གལ་ཏེ་དེ་ལྟ་ན་བདག་ཅག་འཁོར་
གྱི་སྐྱེ་བོ་མང་པོ་དང་ལྷན་ཅིག་མཆི་ན་དེ་ཅི་ནས་ཀྱང་མི་དགག་པ་དེ་ལྟར་བཀའ་སྩལ་པའི་རིགས་སོ། །རྒྱལ་པོས་བསྒོ་ནས་དེ་རྣམས་ཆས་པ་ན། དེ་རྣམས་ལ་དགའ་བའི་ཕོ་བྲང་འཁོར་གྱི་མི་སྐྱེ་བོའི་ཚོགས་ཆེན་པོ་དང་དེ་རྣམས་ལྷན་ཅིག་ཆས་ཏེ་ཞག་བདུན་གྲོང་ཁྱེར་གྲུ་འཛིན་གྱི་སྒོ་
ཕྱེ་ནས་སྐྱེ་བོའི་ཚོགས་རྒྱུས་སོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་གལ་ཏེ་གྲོང་ཁྱེར་གྱི་སྒོ་མ་བཀུམ་ན་རིང་པོ་མི་ཐོགས་པར་གྲུ་འཛིན་སྟོངས་པར་འགྱུར་རོ། །གལ་ཏེ་དེ་ལྟ་ན་སྒོ་ཆོད་ཅིག །དེ་ནས་གཞོན་ནུ་དེ་རྣམས་རང་རང་གི་སྲིང་མོ་ཁྲིད་ནས་མཐར་གྱིས་རི་བོ་

གངས་རི་དང་ཉེ་བ་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་ཕྱིན་ནས། དེ་རྣམས་ཀྱིས་དེར་ལོ་མའི་སྤྱིལ་པོ་དག་བྱས་ཏེ་གནས་བཏབ་སྟེ་རི་དགས་བསད་ཅིང་བསད་ནས་འཚོ་བར་བྱེད་ཅིང་དུས་གསུམ་དུ་དྲང་སྲོང་སེར་སྐྱའི་བསྟི་
གནས་སུ་དོང་བར་བྱེད་དོ། །ལང་ཚོ་དང་དར་ལ་བབ་པའི་དྲེགས་པས་ཟིན་པས་འདོད་ཆགས་ཀྱིས་ཤིན་ཏུ་ཉེན་ཏེ་ཤ་བྲི་ངན་པ་སྐྱ་བོ་བསེང་བསེང་པོར་གྱུར་ཏོ། །ཇི་ཙམ་དུས་གཞན་ཞིག་ན་དྲང་སྲོང་སེར་སྐྱས་དེ་ལྟ་བུ་མཐོང་ནས་དྲིས་པ། ཁྱེད་ཅག་ཅིའི་ཕྱིར་སྐྱ་བོ་བསེང་བསེང་
པོར་གྱུར། དེ་རྣམས་ཀྱིས་སྨྲས་པ། དྲང་སྲོང་ཆེན་པོ་བདག་ཅག་འདོད་པའི་འདོད་ཆགས་ཀྱིས་ཤིན་ཏུ་ཉེན་པས་སོ། །དེས་སྨྲས་པ། རང་རང་གི་སྲིང་མོ་སྤོངས་ལ། མས་དབེན་གྱི་སྲིང་མོ་རྣམས་དང་ལྷན་ཅིག་འདུག་ཤིག །དྲང་སྲོང་ཆེན་པོ་བདག་ཅག་གིས་དེ་ལྟ་
བུ་བགྱིར་རུང་ངམ། ཤེས་ལྡན་དག་འདི་ལྟར་རྒྱལ་རིགས་རྒྱལ་སྲིད་སྟོར་བ་རྣམས་ཀྱིས་རུང་ངོ་། །དེ་ན་དེ་རྣམས་དྲང་སྲོང་གི་ཚིག་ནི་ཚད་མ་ཡིན་ནོ་སྙམ་ནས་འདོད་པའི་འདོད་ཆགས་ཀྱིས་ཉེན་པས་དགའ་བ་དང་མགུ་བ་སྐྱེས་ཏེ་མས་དབེན་གྱི་སྲིང་མོ་རྣམས་དང་ལྷན་ཅིག་རྩེ་བར་
བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྣམས་དང་དེ་དག་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བུ་ཕོ་དང་བུ་མོ་དག་བཙས་ཏེ་དེ་རྣམས་ཆེན་པོར་གྱུར་པ་དང་། བསམ་གཏན་གྱི་ཚེར་མ་ནི་སྒྲ་ཡིན་པས་དྲང་སྲོང་སེར་
སྐྱའི་སེམས་རྩེ་གཅིག་པ་ཉིད་དུ་མ་བཏུབ་ནས་དེས་སྨྲས་པ། ཤེས་ལྡན་དག་མཐོང་ཟིན་གྱིས་ཁོ་བོ་གཞན་དུ་འགྲོའོ། །དྲང་སྲོང་ཆེན་པོ་ཅིའི་ཕྱིར། བསམ་གཏན་གྱི་ཚེར་མ་ནི་སྒྲ་ཡིན་པས་སེམས་རྩེ་གཅིག་པ་ཉིད་དུ་མི་བཏུབ་པས་སོ། །དྲང་སྲོང་ཆེན་པོ་ཁྱོད་འདི་ཉིད་ན་
བཞུགས་ཤིག །བདག་ཅག་གཞན་དུ་མཆི་ན་འོན་ཀྱང་སའི་ཕྱོགས་ཤིག་བདག་ལ་ཕོག་ཤིག །ཤེས་ལྡན་དག་རུང་ངོ་། །དྲང་སྲོང་བདག་ཉིད་ཆེན་པོ་དེ་རྣམས་ནི་འདོད་པ་བཞིན་ཡིད་ལ་རེ་བ་འགྲུབ་པ་ཡིན་པས་དེས་གསེར་གྱི་བྱ་མ་བུམ་བླངས་ཏེ་ཆུའི་རྒྱུན་གྱིས་

གྲོང་ཁྱེར་གྱི་རྣམ་པ་དག་བྲིས་ནས་དེ་རྣམས་ཀྱིས་གྲོང་ཁྱེར་བརྩིགས་སོ། །དྲང་སྲོང་སེར་སྐྱས་དེ་རྣམས་ཀྱི་གནས་ཀྱི་ཕྱིར་གཞི་ཡོངས་སུ་བཏང་བས་སེར་སྐྱའི་གཞི་སེར་སྐྱའི་གཞི་ཞེས་བྱ་བར་གྱུར་ཏོ། །དེ་རྣམས་དེར་འཕེལ་བར་གྱུར་པས་སྐྱེ་བོའི་ཚོགས་ཆེན་པོར་
གྱུར་ཏེ་དོག་པས་འཕེལ་ཆེ་བར་མ་གྱུར་ཏོ། །ལྷ་རྣམས་ཀྱི་སེམས་ཀྱིས་དེ་རྣམས་ཀྱི་སེམས་ཤེས་ནས་ཕྱོགས་གཞན་ཞིག་བསྟན་པ་དང་། དེ་རྣམས་དེར་སོང་སྟེ་གྲོང་ཁྱེར་ཅིག་ཤོས་བརྩིགས་ནས་ལྷས་བསྟན་ལྷས་བསྟན་ཞེས་བྱ་བར་གྱུར་ཏོ། །དེ་ནས་དེ་རྣམས་ཚོགས་ཤིང་འདུས་
ནས་ཕན་ཚུན་གྲོས་བྱ་བར་བརྩམས་པ། ཤེས་ལྡན་དག་གང་གི་ཕྱིར་བདག་ཅག་སྤྱུགས་པ་ནི་རིགས་མཉམ་པ་ལས་ཆུན་མ་བླངས་པ་དེ་ལས་གྱུར་གྱིས། དེ་ལྟ་བས་ན་བདག་ཅག་ལས་སུས་ཀྱང་རིགས་མཉམ་པ་ལས་ཆུན་མ་བླང་བར་མི་བྱ་སྟེ། གཅིག་ཁོ་ནས་ཆོག་ཤེས་
པར་བྱའོ། །དེ་རྣམས་རིགས་མཉམ་པ་གཅིག་ཁོ་ན་ལས་ཆུང་མ་གཅིག་ལེན་གྱི་རིགས་མཉམ་པ་ལས་ཆུང་མ་གཉིས་པ་ནི་མི་ལེན་ཏོ། །དེ་ནས་དུས་གཞན་ཞིག་ན་རྒྱལ་པོ་འཕགས་སྐྱེས་པོ་བུ་སྡུག་པ་རྣམས་རྗེས་སུ་དྲན་ཏེ་བློན་པོ་རྣམས་ལ་སྨྲས་པ། ཀྱེ་གྲོང་པ་དག་གཞོན་
ནུ་དེ་རྣམས་ད་ལྟ་གང་ན་འདུག །དེ་རྣམས་ཀྱིས་རྒྱལ་པོ་ལ་སྨྲས་པ། ལྷས་ནོངས་པ་འགའ་ཞིག་ལས་སྤྱུགས་པ་ལས་དེ་རྣམས་རང་རང་གི་སྲིང་མོ་ཁྲིད་དེ་འདི་ནས་མཆིས་པ་ན་གངས་རི་དང་ཉེ་བ་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་
ཧ་ཅང་ཡང་མི་རིང་བ་ཞིག་ཏུ་གནས་བཏབ་སྟེ། རང་རང་གི་སྲིང་མོ་སྤངས་ཏེ་མས་དབེན་གྱི་སྲིང་མོ་རྣམས་དང་ལྷན་ཅིག་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་དོ། །དེ་རྣམས་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་
པར་བགྱིད་པ་ན་བུ་ཕོ་དང་བུ་མོ་དག་བཙས་སོ། །གྲོང་པ་དག་གཞོན་ནུ་རྣམས་ཀྱིས་དེ་ལྟར་བྱེད་ཕོད་དམ། ལྷ་རྔོ་ཐོག་ལགས་སོ། །དེ་ནས་རྒྱལ་པོ་བུ་རམ་ཤིང་པ་འཕགས་སྐྱེས་པོས་རོ་སྟོད་བསྲང་ནས་ལག་པ་གཡས་པ་བརྒྱང་སྟེ་ཆེད་དུ་བརྗོད་པས་ཆེད་དུ་བརྗོད་པ། ཀྱེ་མ་གཞོན་ནུ་

རྣམས་ནི་ཕོད་པ་ཡིན་ནོ། །ཀྱེ་མ་གཞོན་ནུ་རྣམས་ནི་ཤིན་ཏུ་ཕོད་པ་ཡིན་ནོ་ཞེས་སེམས་ཅན་དབང་ཆེན་པོས་ཚིག་ཏུ་ཕྱུང་སྟེ། ཀྱེ་མ་གཞོན་ནུ་རྣམས་ནི་ཕོད་པ་ཡིན་ནོ། །ཀྱེ་མ་གཞོན་ནུ་རྣམས་ནི་ཤིན་ཏུ་ཕོད་པ་ཡིན་ནོ་ཞེས་བྱས་པས་དེ་རྣམས་ཤཱཀྱ་ཤཱཀྱ་ཞེས་བྱ་བར་གྱུར་ཏོ། །
དེ་ནས་དུས་གཞན་ཞིག་ན་རྒྱལ་པོ་བུ་རམ་ཤིང་པ་འཕགས་སྐྱེས་པོ་ཤི་ནས་རྒྱལ་སྲིད་དགའ་རྒྱལ་སྲིད་ལ་དབང་བསྐུར་ཏོ། །དེ་ཡང་བུ་མེད་པར་ཤི་ནས་སྐར་མདའ་གདོང་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་གོ། །དེ་ཡང་བུ་མེད་པར་ཤི་ནས་ལག་རྣ་རྒྱལ་པོར་གྱུར་
ཏོ། །དེ་ཡང་བུ་མེད་པར་ཤི་ནས་གླང་པོ་ཆེ་འདུལ་རྒྱལ་པོར་གྱུར་ཏོ། །དེ་ཡང་བུ་མེད་པར་ཤི་ནས་རྐང་གདུབ་ཅན་རྒྱལ་པོར་གྱུར་ཏེ། དེའི་བུ་གནས་འཇོག་གོ། །གཽ་ཏ་མ་དག་གནས་འཇོག་གི་བུ་ས་ཁྱིམ་མོ། །གཽ་ཏ་མ་དག་རྒྱལ་པོས་ཁྱིམ་གྱི་བུ་དང་། ཚ་བོ་དང་། ཡང་
ཚ་དང་། སུམ་ཚའི་རྒྱུད་རྒྱལ་པོ་ལྔ་ཁྲི་ལྔ་སྟོང་གྲོང་ཁྱེར་སེར་སྐྱའི་གཞིར་བྱུང་སྟེ། དེ་རྣམས་ཀྱི་ཐ་མ་ནི་ཤིང་རྟ་བཅུ་པ་དང་། ཤིང་རྟ་བརྒྱ་པ་དང་། ཤིང་རྟ་དགུ་བཅུ་པ་དང་། ཤིང་རྟ་ཁྲ་བོ་དང་། ཤིང་རྟ་རྒྱལ་དང་། བརྟན་པའི་ཤིང་རྟ་དང་། གཞུ་བཅུ་པ་དང་། གཞུ་བརྒྱ་
པ་དང་། གཞུ་དགུ་བཅུ་པ་དང་། གཞུ་རྒྱལ་དང་། གཞུ་བཀྲ་དང་། གཞུ་བརྟན་ནོ། །གཽ་ཏ་མ་དག་གཞུ་བརྟན་ལ་བུ་གཉིས་ཏེ། སེང་གེའི་འགྲམ་དང་། སེང་གེའི་སྒྲའོ། །གཽ་ཏ་མ་དག་འཛམ་བུའི་གླིང་གི་གཞུ་ཐོགས་ཇི་སྙེད་ཡོད་པ་དེ་རྣམས་ཀྱི་ནང་ན་ནི་སེང་གེའི་
འགྲམ་མཆོག་ཏུ་གྲགས་སོ། །གཽ་ཏ་མ་དག་སེང་གེའི་འགྲམ་ལ་བུ་བཞི་སྟེ། ཟས་གཙང་དང་། ཟས་དཀར་དང་། བྲེ་བོ་ཟས་དང་། ཚད་མེད་ཟས་སོ། །བུ་མོ་གཙང་མ་དང་། དཀར་མོ་དང་། བྲེ་བོ་མ་དང་། ཚད་མེད་མའོ། །ཟས་གཙང་ལ་བུ་གཉིས་ཏེ། བཅོམ་
ལྡན་འདས་དང་། ཚེ་དང་ལྡན་པ་དགའ་བོའོ། །ཟས་དཀར་ལ་བུ་གཉིས་ཏེ། ཚེ་དང་ལྡན་པ་རྒྱལ་དང་། ཤཱཀྱའི་རྒྱལ་པོ་བཟང་ལྡན་ནོ། །བྲེ་བོ་ཟས་ལ་བུ་གཉིས་ཏེ། མིང་ཆེན་དང་། ཚེ་དང་ལྡན་པ་མ་འགགས་པའོ། །ཚད་མེད་ཟས་ལ་བུ་གཉིས་ཏེ། ཚེ་དང་

ལྡན་པ་ཀུན་དགའ་བོ་དང་། ལྷ་སྦྱིན་ནོ། །གཙང་མའི་བུ་ནི་ལེགས་པར་རབ་སད་དོ། །དཀར་མོའི་བུ་ནི་ཕྲེང་བ་ཅན་ནོ། །བྲེ་མོ་མའི་བུ་ནི་བཟང་ལེན་ནོ། །ཚད་མེད་མའི་བུ་དགེ་འཕེལ་ལོ། །བཅོམ་ལྡན་འདས་ཀྱི་སྲས་ནི་སྒྲ་ཅན་ཟིན་ཡིན་ཏེ།
གཽ་ཏ་མ་དག་མང་པོས་བཀུར་བའི་རྒྱུད་ཚེ་དང་ལྡན་པ་སྒྲ་ཅན་ཟིན་དུ་རྫོགས། སྲིད་པའི་བྲེང་རྒྱུན་ཆད། སྐྱེ་བའི་འཁོར་བ་ཟད་དེ། ད་ནི་ཡང་སྲིད་པ་མེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོའི་གཏམ་རྫོགས་པར་མཁྱེན་ནས།
བཞེངས་ཏེ་བཞུགས་སོ། །བཞུགས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ལེགས་སོ། །ལེགས་སོ། །མཽད་གལ་གྱི་བུ་ཁྱོད་ཀྱིས་དགེ་སློང་རྣམས་ཀྱི་མདུན་དུ་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ནས་ཆོས་ཀྱི་གཏམ་
སྨྲས་པ་ཡང་ཁྱོད་ལེགས་སོ། །མཽད་གལ་གྱི་བུ་ཡང་ཁྱོད་ཀྱིས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་ཏེ་ཆོས་ཀྱི་གཏམ་རྟག་ཏུ་སྨྲོས་ཤིག་དང་། དེས་ན་དེ་རྣམས་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །དེ་ནས་བཅོམ་ལྡན་འདས་
ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་སྔོན་གྱི་ཤཱཀྱ་རྣམས་ཀྱི་རིགས་རྒྱུད་ལས་བརྩམས་པའི་ཆོས་ཀྱི་གཏམ་ཆོངས་ཤིག །ཟུང་ཤིག །ལྷོགས་ཤིག །དེ་ཅིའི་ཕྱིར་ཞེ་ན། དགེ་སློང་དག་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་
པའི་ཆོས་ཀྱི་གཏམ་ནི་དོན་དང་ལྡན། ཆོས་དང་ལྡན་པ་ནས། ཚངས་པར་སྤྱོད་པའི་བར་དང་ལྡན་པ་ཡིན་ཏེ། དགེ་སློང་དག་རིགས་ཀྱི་བུ་དད་པས་རབ་ཏུ་བྱུང་བས་ཤཱཀྱ་རྣམས་ཀྱི་སྔོན་གྱི་རིགས་རྒྱུད་ལས་བརྩམས་པའི་ཆོས་ཀྱི་གཏམ་གཟུང་ཞིང་བཀླག་པའི་རིགས་སོ། །
དེ་ནས་སེར་སྐྱའི་གཞིའི་ཤཱཀྱ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །དེའི་ཚེ་གྲོང་ཁྱེར་སེར་སྐྱའི་གཞི་ན་རྒྱལ་པོ་སེང་

གེའི་འགྲམ་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ།
འབྲས་དང་བུ་རམ་ཤིང་གི་ཕྲེང་བ་དང་བ་ལང་དང་། མ་ཧེ་ཕུན་སུམ་ཚོགས་པ་ན་བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །གྲོང་ཁྱེར་ལྷས་བསྟན་དུ་རྒྱལ་པོ་ལེགས་པར་རབ་སད་ཅེས་བྱ་བ་རྒྱལ་སྲིད་བྱེད་དུ་འཇུག་སྟེ། འབྱོར་པ་དང་རྒྱས་པ་དང་། བདེ་
བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ། འབྲས་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་
པ་ན་བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །རྒྱལ་པོ་ལེགས་པར་རབ་སད་ཀྱི་བཙུན་མོ་དམ་པ་གཟུགས་བཟང་བ། བལྟ་ན་སྡུག་པ། མཛེས་པ་ཡུལ་གྱི་བཟང་མོ་ལུམ་བི་ནི་ཞེས་བྱ་བ་ཡོད་དོ། །ལྷས་བསྟན་ན་ཁྱིམ་བདག་ཕྱུག་ཅིང་ནོར་
མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེའི་ཀུན་དགའ་ར་བ་མེ་ཏོག་ཕུན་སུམ་ཚོགས་པ་དང་། འབྲས་བུ་ཕུན་སུམ་ཚོགས་པ་དང་། ཆུ་ཕུན་སུམ་
ཚོགས་པ་དང་། བྱ་སྣ་ཚོགས་སྐད་འབྱིན་པས་དེའི་ཀུན་དགའ་ར་བ་དགའ་དགའ་ལྟར་འདུག་པ་དེར་རྒྱལ་པོ་དུས་དུས་སུ་བཙུན་མོའི་འཁོར་དང་ལྷན་ཅིག་ལྷགས་ནས་དེ་ན་དགའ་བའི་རྩེད་མོ་ཉམས་སུ་མྱོང་བར་བྱེད་དོ། །ལུམ་བི་ནིས་དེ་མཐོང་ནས་འདོད་པ་སྐྱེས་
ཏེ། དེས་སྨྲས་པ། ལྷ་ཀུན་དགའ་ར་བ་འདི་བདག་ལ་སྩལ་དུ་གསོལ། རྒྱལ་པོས་སྨྲས་པ། ཀུན་དགའ་ར་བ་འདི་ཁྱིམ་བདག་གི་ཡིན་ན་ཇི་ལྟར་སྦྱིན། གལ་ཏེ་ཁྱོད་ལ་ཀུན་དགའ་ར་བ་དགོས་ན་ཁྱོད་ཀྱི་ཕྱིར་དེ་བས་ལྷག་པར་བཟང་བ་གཞན་ཞིག་བྱའོ། །དེ་ནས་

རྒྱལ་པོ་ལེགས་པར་རབ་སད་ཀྱིས་ལུམ་བི་ནིའི་ཆེད་དུ་དེ་བས་ཁྱད་པར་དུ་འཕགས་པའི་ཀུན་དགའ་ར་བ་ཞིག་བྱེད་དུ་བཅུག་ནས་དེའི་མིང་ལུམ་བི་ནིའི་ཚལ་ཞེས་བྱ་བར་གྱུར་ཏོ། །རྒྱལ་པོ་སེང་གེའི་འགྲམ་ལ་ཡུན་རིང་པོ་ནས་ཀྱེ་མའོ་བདག་གི་རྒྱུད་ལ་འཁོར་
ལོས་སྒྱུར་བ་སྐྱེ་བར་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །རྒྱལ་པོ་ལེགས་པར་རབ་སད་ལ་ཡང་ཡུན་རིང་པོ་ནས་ཀྱེ་མའོ་བདག་ནི་སེང་གེའི་འགྲམ་དང་ལྷན་ཅིག་གཉེན་དུ་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །ཇི་ཙམ་དུས་གཞན་ཞིག་ན་དེ་བཙུན་
མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་འདས་པ་ན་བུ་མོ་གཟུགས་བཟང་ཞིང་བལྟ་ན་སྡུག་པ། མཛེས་པ། ཡན་ལག་དང་ཉིང་ལག་
ཐམས་ཅད་དང་ལྡན་པ་ཞིག་བཙས་སོ། །བཙས་པ་དེའི་གཟུགས་བཟང་པོས་རྒྱལ་པོ་ལེགས་པར་རབ་སད་བཙུན་མོ་འཁོར་དང་བཅས་པ་དང་། ལྷས་བསྟན་ན་གནས་པའི་སྐྱེ་བོའི་ཚོགས་རྣམས་མཆོག་ཏུ་ངོ་མཚར་སྐྱེས་ཏེ། ཐེ་ཚོམ་དུ་གྱུར་ནས་ཅི་འདི་བུ་མོ་ཡིན་ནམ།
འོན་ཏེ་ལས་སྣ་ཚོགས་སྤྲུལ་པའི་སྒྱུ་འཕྲུལ་ཡིན་སྙམ་མོ། །དེའི་བཙས་པའི་བཙས་སྟོན་ཉི་མ་བདུན་གསུམ་ཉི་ཤུ་གཅིག་ཏུ་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ལྷས་བསྟན་ན་གནས་པའི་སྐྱེ་
བོའི་ཚོགས་ལམ་པོ་ཆེ་དང་། ཚོང་དུས་དང་། བཞི་མདོ་དང་། སུམ་མདོ་རྣམས་སུ་གླེང་བ་ཁ་ཅིག་གི་མཆིད་ནས་ནི་འདི་བུ་མོ་ཁོ་ན་ལགས་ཏེ་སྔོན་གྱི་ལས་ཀྱི་རྣམ་པར་སྨིན་པས་གཟུགས་བཟང་ཞིང་ཁ་དོག་ཕུན་སུམ་ཚོགས་པར་གྱུར་ཏོ་ཞེས་མཆིའོ། །གཞན་དག་གི་མཆིད་
ནས་ནི་འདི་བུ་མོ་མ་ལགས་ཀྱི། འོ་ན་ཅི་ཞེ་ན། ལས་སྣ་ཚོགས་པས་སྤྲུལ་པའི་སྒྱུ་འཕྲུལ་ལགས་སོ་ཞེས་མཆི་ལགས་པས་དེ་བས་ན་བུ་མོའི་མིང་སྒྱུ་འཕྲུལ་ཞེས་གདགས་སོ་ཞེས་དེའི་མིང་སྒྱུ་འཕྲུལ་ཞེས་བཏགས་སོ། །བུ་མོ་སྒྱུ་འཕྲུལ་མ་མ་བརྒྱད་ལ་རྗེས་སུ་གཏད་དེ་

ཞེས་བྱ་བ་ནས་ཆེན་མོར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ལ་མཚན་མཁན་རྣམས་ཀྱིས་ལུང་བསྟན་པ་མཚན་ཕུན་སུམ་ཚོགས་པ་དུ་མ་དང་ལྡན་པའི་བུ་ཞིག་བཙའ་བར་འགྱུར་ཞིང་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་བསྟན་ཏོ། །ཡང་