Kinh tạng Tây Tạng (Kangyur Đại Học) — 003_འདུལ་བ།_ག

བཟེད་བཀྲུས་པས་རི་ནག་པོར་བསོད་སྙོམས་ཀྱི་ཕྱིར་ཞུགས་པ་ལྷུང་བཟེད་བཀྲུས་པ་དེ་བཞིན་དུ་སླར་ལོག་སྟེ་སྦྱིན་པ་ཡང་མ་རྙེད་དོ། །ཚིག་ཀྱང་མ་སྟེར་ཏེ་ཆུང་ངུ་ན་བསོད་སྙོམས་གཅིག་ཙམ་ཡང་མ་རྙེད་ན། འདིར་བཅོམ་

ལྡན་འདས་ཀྱི་ཉན་ཐོས་བྱིས་པ། བླུན་པ་མི་གསལ་བ། མི་མཁས་པ་འགའ་ཞིག་གིས་ཉོན་མོངས་པའི་དབང་གིས་རིགས་ཀྱི་བུད་མེད་དམ། རིགས་ཀྱི་ན་ཆུང་ལ་སྨྲས་སམ། རེག་གམ། ཁ་ངན་སྨྲས་པར་མ་གྱུར་གྲང་སྙམ་མོ། །དེའི་ཚེ་རི་ནག་པོའི་
བྲམ་ཟེ་དང་ཁྱིམ་བདག་རྣམས་ཀྱི་འདུན་ཁང་དུ་དགེ་བསྙེན་ལྔ་བརྒྱ་ཙམ་དགོས་པ་འགའ་ཞིག་གི་ཕྱིར་འདུས་ཤིང་འཁོད་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་རི་ནག་པོའི་བྲམ་ཟེ་དང་ཁྱིམ་བདག་རྣམས་ཀྱི་འདུན་ཁང་ག་ལ་བ་དེར་སོང་སྟེ་ཕྱིན་པ་དང་། རི་ནག་པོའི་
བྲམ་ཟེ་དང་ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་སྔོན་ནི་རི་ནག་པོ་འདི་ཞེས་བྱ་བ་ནས་བསོད་སྙོམས་གཅིག་ཀྱང་མ་རྙེད་དོ། །ཞེས་བྱ་བའི་བར་གོང་མ་བཞིན་དུའོ། །དེ་སྐད་ཅེས་སྨྲས་པ་དང་རི་ནག་པོའི་བྲམ་ཟེ་དང་ཁྱིམ་བདག་རྣམས་མིག་གནམ་དུ་བལྟས་
ནས་འདུག་གོ། །དེའི་ཚེ་དགེ་བསྙེན་ཆུ་ལ་རྩེ་ཞེས་བྱ་བ་འཁོར་དེ་ཉིད་དུ་འདུས་ཤིང་འདུག་པར་གྱུར་ཏོ། །དེ་ནས་དགེ་བསྙེན་ཆུ་ལ་རྩེས་ཚེ་དང་ལྡན་པ་ཀུན་དགའ་བོའི་ལག་ནས་བཟུང་སྟེ་མཐའ་གཅིག་ཏུ་དོང་ནས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་
པ་མཁྱེན་པར་མཛོད་ཅིག །རི་ནག་པོ་འདི་ན་དགེ་སློང་འགྲོ་མགྱོགས་དང་ནབ་སོ་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་དག་ཅིག་གནས་ཏེ་དེ་གཉིས་ཀྱིས་བུད་མེད་རྣམས་དང་ལྷན་ཅིག་ཁ་དཔྱ་ཟེར་ཞེས་བྱ་བ་ནས་ཚེ་དང་ལྡན་པ་ཀུན་དགའ་བོ་ཞེས་བྱ་བ་ནས། ཇི་ལྟར་གོང་
དུ་ཁྱིམ་སུན་འབྱིན་པའི་དགེ་འདུན་ལྷག་མའི་བསླབ་པ་ལ་བསྟན་པ་བཞིན་དུ་སྟེ། དགེ་སློང་འགྲོ་མགྱོགས་དང་ནབ་སོ་གཉིས་བསྐྲད་པའི་ལས་བྱོས་ཤིག་འདི་ལྟར་ཡང་བྱ་སྟེ། དགེ་སློང་གནས་བརྟན་རྣམས་དང་ལྷན་ཅིག་ཏུ་ལམ་ཀར་འདུག་ལ་གླེང་བར་བྱེད་པའི་དགེ་སློང་བསྐོ་
བར་བྱ་སྟེ། ཆོས་ལྔ་དང་ལྡན་པའི་དགེ་སློང་ནི་ཞེས་བྱ་བ་ནས་ལས་བྱ་བ་ནི་ཞེས་བྱ་བའི་བར་གོང་མ་བཞིན་དུའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འགྲོ་མགྱོགས་དང་ནབ་སོ་འདི་གཉིས་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་ལགས་ཏེ།

འདི་གཉིས་ཀྱིས་ཁྱིམ་སུན་ཕྱུང་བར་ཡང་སྣང་ཞིང་ཐོས་ལ་འཚལ། འདི་གཉིས་སྡིག་པའི་ཆོས་ཀུན་ཏུ་སྤྱོད་པར་ཡང་སྣང་ཞིང་ཐོས་ལ་འཚལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འགྲོ་
མགྱོགས་དང་ནབ་སོ་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་ལ་བསྐྲད་པའི་ཕྲིན་ལས་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ་ཞེས་བྱ་བ་ནས་དེ་བཞིན་དུ་ལས་བརྗོད་པ་གཉིས་དང་གསུམ་གྱི་བར་དུ་བརྗོད་པར་བྱའོ། །ཞེས་བྱ་བའི་བར་གོང་མ་བཞིན་དུའོ། །
སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་ཚོང་དཔོན་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་ཏུ་རྩེ་བར་
བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་འདས་ནས་རྒྱུ་སྐར་ཆུ་སྟོད་ལ་ཁྱེའུ་ཞིག་བཙས་ཏེ། དེའི་ཉེ་དུ་རྣམས་ཚོགས་ཤིང་
འདུས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ། ཁྱེའུའི་མིང་ཅིར་གདགས། དེ་དག་འདི་སྙམ་དུ་སེམས་ཏེ། ཁྱེའུ་འདི་ནི་རྒྱུ་སྐར་ཆུ་སྟོད་ལ་བཙས་པས་དེ་བས་ན་ཁྱེའུའི་མིང་ཆུ་སྟོད་ཅེས་བྱ་བར་གདགས་སོ། །ཞེས་
དེའི་མིང་ཆུ་སྟོད་ཅེས་བྱ་བར་བཏགས་སོ། །དེ་འོ་མ་དང་། ཞོ་དང་། མར་དཀར་དང་། ཞུན་མར་དང་། མར་གྱི་སྙིང་པོ་དང་གཞན་ཡང་ཡོ་བྱད་ཀྱི་ཁྱད་པར་གཙོ་བོ་གཙོ་བོ་དག་གིས་སྐྱེད་པར་བྱེད། སྲིང་བར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་
ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ནས། དེ་ཡི་གེ་མཐར་ཕྱིན་ཅིང་འབྱེད་པ་དང་། ཀློག་པ་དང་། མཁས་པ་དང་། སྤྱོད་པ་གསལ་བ་དང་། བརྟག་པ་བརྒྱད་པོ་ལ་མཁས་

པར་གྱུར་ཏེ། འདི་ལྟ་སྟེ་རིན་པོ་ཆེ་བརྟག་པ་དང་། གོས་བརྟག་པ་དང་། གཞི་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །ཇི་ཙམ་ན་དེའི་ཕ་ཤི་ནས་ཆུ་
སྟོད་ཁྱིམ་གྱི་དཔོན་པོར་གྱུར་ནས་དེས་ཚོང་ཁང་དུ་ཉོ་ཚོང་གི་ཟོང་བཀྲམ་སྟེ། ཉོ་ཚོང་གིས་འཚོ་བར་བྱེད་དོ། །དེ་དུས་གཞན་ཞིག་ན་བཅོམ་ལྡན་འདས་ཀྱི་སྤྱན་སྔར་སོང་བ་དང་། དེས་བཅོམ་ལྡན་འདས་མཐོང་ཞིང་དམ་པའི་ཆོས་ཐོས་པས་བཅོམ་ལྡན་འདས་ཀྱི་བསྟན་པ་ལ་དད་པ་སྐྱེས་
ཏེ། དད་པ་སྐྱེས་པས་རབ་ཏུ་འབྱུང་བ་མངོན་པར་འདོད་པར་གྱུར་ནས་དེ་མའི་དྲུང་དུ་སོང་སྟེ་སྨྲས་པ། ཡུམ་མཁྱེན་པར་མཛོད་ཅིག །བདག་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་བགྱིའོ། །དེས་སྨྲས་པ། ཁྱོད་ནི་ཁོ་མོའི་བུ་གཅིག་པ་ཡིན་པས་ཇི་
ཙམ་ཁོ་མོ་གསོན་གྱི་བར་དུ་རབ་ཏུ་མ་འབྱུང་ཤིག །ཁོ་མོ་ཤི་ནས་ཅི་དགའ་བ་གྱིས་ཤིག །དེས་སྨྲས་པ། ཡུམ་གལ་ཏེ་དམ་ཞིག་བཅས་ན་བདག་རབ་ཏུ་མི་འབྱུང་སྟེ། ཁྱོད་ཀྱིས་ཉི་མ་རེ་རེ་ཞིང་དགེ་འདུན་གྱིས་བསྐོས་པའི་དགེ་སློང་རྣམས་ལ་གདུགས་ཚོད་གསོལ་ལམ་དེས་
སྨྲས་པ། བུ་དེ་བཞིན་དུ་བྱའོ། །ཆུ་སྟོད་དེས་ཀྱང་ཅུང་ཟད་ཅི་བསགས་པ་དེ་ཐམས་ཅད་མ་ལ་གཏད་ནས་ཡུམ་འདིས་དགེ་སྦྱོང་དང་བྲམ་ཟེ་རྣམས་ལ་སྟོབས་ཤིག །དེའི་མ་དེ་སེར་སྣ་ཅན་སྤར་འཆུམས་པ་ཞིག་སྟེ། ཡོ་བྱད་ལ་ཞེན་པས་ཁྭ་ལ་གཏོར་མ་སྦྱིན་པའི་སྤྲོ་བ་
ཡང་མེད་ན། དགེ་སྦྱོང་དང་བྲམ་ཟེ་རྣམས་ལ་སྦྱིན་པ་ལྟ་སྨོས་ཀྱང་ཅི་དགོས་ཏེ། དགེ་སྦྱོང་དང་བྲམ་ཟེ་གང་དག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་པ་དེ་རྣམས་ལ་ཁྱེད་ནི་ཡི་དགས་དང་མཚུངས་ཏེ་རྟག་པར་གཞན་གྱི་ཁྱིམ་དུ་སྐྲུར་འོང་ངོ་ཞེས་ཁ་ཡང་ཟེར་རོ། །བུ་དེ་
ལ་སླུ་བར་བྱེད་དེ། ཁོ་མོས་དེང་དགེ་སློང་འདི་སྙེད་ཅིག་ལ་ནི་གདུགས་ཚོད་གསོལ་ཏོ། །དགེ་སྦྱོང་དང་བྲམ་ཟེ་འདི་སྙེད་ཅིག་ལ་ནི་བསོད་སྙོམས་ཕུལ་ལོ་ཟེར་རོ། །དེ་སེར་སྣ་བསྟེན་ཅིང་གོམས་པ་དང་ལན་མང་དུ་བྱས་པས་དེས་ན་ཤི་ནས་ཡི་དགས་རྣམས་སུ་སྐྱེས་སོ། །ཆུ་སྟོད་

ཀྱང་མ་དང་བྲལ་ནས་སྦྱིན་པ་དག་བྱིན་བསོད་ནམས་དག་བྱས་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་དུས་གཞན་ཞིག་ན་ཤིང་མྲག་ཤའི་ཚལ་ན་གནས་པ་དང་དེ་ལ་བརྟེན་ནས་ཤིང་མྲག་ཤའི་ཚལ་ན་གནས་པའི་ཁྱིམ་བདག་ནག་པ་བཅོམ་ལྡན་འདས་ཀྱི་
བསྟན་པ་ལ་དད་པ་སྐྱེས་ཏེ་དེ་སངས་རྒྱས་དང་། ཆོས་དང་། དགེ་འདུན་ལ་ལྷག་པར་བྱ་བ་བྱེད་ཅིང་། ཤིང་མྲག་ཤའི་ཚལ་དུ་ཡུལ་སྣ་ཚོགས་ནས་འོངས་པའི་དགེ་སློང་རྣམས་ཀྱི་རྟེན་དུ་གྱུར་ཏོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་ཆུ་སྟོད་རི་འོར་གཞན་ཞིག་ཏུ་བྱ་བ་ཅུང་ཟད་ཅིག་
བྱུང་སྟེ་དེ་དེར་སོང་ངོ་། །ཚེ་དང་ལྡན་པ་གར་མཁན་མའི་བུ་ཉེ་སྡེ་འཁོར་ལྔ་བརྒྱ་དང་ལྗོངས་རྒྱུ་ཞིང་སོང་བ་དང་ཤིང་མྲག་ཤའི་ཚལ་དུ་ཕྱིན་ཏོ། །ཁྱིམ་བདག་ནག་པས་འཕགས་པ་གར་མཁན་མའི་བུ་ཉེ་སྡེ་འཁོར་ལྔ་བརྒྱ་དང་ལྗོངས་རྒྱུ་ཞིང་སོང་སོང་བ་དང་འདིར་ཕྱིན་ཏོ་ཞེས་ཐོས་སོ། །
ཐོས་ནས་ཀྱང་ཚེ་དང་ལྡན་པ་ཉེ་སྡེ་གང་ན་བ་དེར་སོང་སྟེ་ཕྱིན་པ་དང་། ཉེ་སྡེའི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་ཚེ་དང་ལྡན་པ་ཉེ་སྡེས་ཁྱིམ་བདག་ནག་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད།
ཡང་དག་པར་འཛིན་དུ་འཇུག་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། །ཡང་
དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་ནག་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་ཚེ་དང་ལྡན་པ་ཉེ་སྡེ་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །འཕགས་པ་ཉེ་
སྡེ་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཚེ་དང་ལྡན་པ་ཉེ་སྡེས་ཁྱིམ་བདག་ནག་པ་ལ་ཅང་མི་སྨྲ་བས་ཁས་བླངས་སོ། །དེ་ནས་ཁྱིམ་བདག་ནག་པས་ཚེ་དང་ལྡན་པ་ཉེ་སྡེས་ཅང་མི་སྨྲ་

བས་ཁས་བླངས་པར་རིག་ནས། ཚེ་དང་ལྡན་པ་ཉེ་སྡེའི་རྐང་པ་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ནས་སོང་ངོ་། །དེ་ནས་ཁྱིམ་བདག་ནག་པས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་བར་
སྔར་ལངས་ཏེ་སྟན་བཤམས་སོ། །ཚེ་དང་ལྡན་པ་ཆུ་སྟོད་ཀྱང་རི་འོར་དེ་ནས་འོངས་ནས། ཇི་ཙམ་ན་སྟན་ཡང་མ་བཤམས་ཁ་ཟས་ཀྱང་མི་གཡོ་བར་མཐོང་ནས་ཀུན་དགའི་ར་བ་པ་རྣམས་ལ་སྨྲས་པ། ཤེས་ལྡན་དག་ཅི་སྟེ་སྟན་ཡང་མི་འདི་ངས་ཁ་ཟས་ཀྱང་མི་གཡོ་བར་སེམས་
ལས་ཆུང་ངུར་འདུག །ཅི་དགེ་སློང་གི་དགེ་འདུན་རྣམས་གདུགས་ཚོད་བཅད་དམ་སྨྲས་པ། ཁྱིམ་བདག་ནག་པས་དགེ་སློང་གི་དགེ་འདུན་ཞལ་ཟས་ལ་ཁྱིམ་དུ་སྤྱན་དྲངས་སོ། །ཅི་ཁོ་བོ་ལས་བརྟེན་ཏེའམ་ཁྱོད་ལས་བརྟེན་ཏེ་ནི་མ་ཡིན་ཏེ། འོན་ཀྱང་འཕགས་པ་གར་མཁན་
མའི་བུ་ཉེ་སྡེ་འཁོར་ལྔ་བརྒྱ་དང་ལྗོངས་རྒྱུ་ཞིང་གཤེགས་པ་ན་འདིར་བྱོན་ཏོ། །དེས་ཐོས་ནས་མི་བཟོད་པ་སྐྱེས་ཏེ་སྨྲས་པ། ཁོ་བོ་ནི་དེའི་བྱ་བ་ཐམས་ཅད་ཀྱི་སྔོན་དུ་འགྲོ་བ་ཡིན་ན་ཅིའི་ཕྱིར་དེས་ཁོ་བོ་སྤངས་ལ་ཚེ་དང་ལྡན་པ་གར་མཁན་མའི་བུ་ཉེ་སྡེ་ལས་བརྟེན་ཏེ། དགེ་སློང་གི་
དགེ་འདུན་སྤྱན་འདྲེན་རེ་ཞིག་སོང་ལ་བལྟའོ་ཞེས་དེ་ཁྱིམ་བདག་ནག་པ་གང་ན་བ་དེར་སོན་པ་དང་། ཇི་ཙམ་ན་ཁྱིམ་བདག་ནག་པ་སྟན་འདིངས་པར་བྱེད་པ་མཐོང་བ་དང་དེ་ལྷག་པར་ཡང་ཀུན་ནས་དཀྲིས་པར་གྱུར་ཏོ། །ཁྱིམ་བདག་ནག་པས་སྨྲས་པ། འཕགས་པ་གདན་ལེགས་
པར་བཏིང་ངོ་། །གདུགས་ཚོད་བཟང་པོར་བགྱིས་སོ། །ཁྱིམ་བདག་ནག་པ་ཏིལ་གྱི་ཁུར་བ་འཚོང་བའི་ཚོང་པ་ཡིན་པས་ཆུ་སྟོད་ཀྱིས་སྨྲས་པ། སྟན་ཡང་ལེགས་པར་བཏིང་གདུགས་ཚོད་ཀྱང་བཟང་པོར་བྱས་ན་འོན་ཀྱང་ཏིལ་གྱི་ཁུར་བ་མེད་དོ། །དེས་སྨྲས་པ། བཙུན་
པ་ཆུ་སྟོད་གློ་བར་ཆུད་དེ་འདི་ན་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་གོ་བར་འགྱུར་བས་རེ་ཞིག་དེའི་སླད་དུ་དཔེ་གསོན་ཅིག །བཙུན་པ་ཆུ་སྟོད་སྔོན་བྱུང་བ་འཛམ་བུའི་གླིང་གི་ཚོང་པ་རབ་ཏུ་མང་པོ་དག་ཅིག་རྒྱ་མཚོའི་གྲུ་བོ་ཆེ་བསྒྲུབས་ནས་ནོར་བསྒྲུབ་པའི་ཕྱིར་ཁྭ་

ཞིག་དང་བྱ་གག་མོ་ཞིག་ཐོགས་ཏེ་རྒྱ་མཚོ་ཆེན་པོར་ཞུགས་པ་ལས། ཅི་ཙམ་ན་བྱ་གག་མོ་དེ་དེ་ཕོ་མ་རྙེད་ནས་བྱ་ཁྭ་དང་ལྷན་ཅིག་གཅུགས་པར་གྱུར་ཏོ། །དེ་གཉིས་གཅུགས་པ་ལས་ཕྲུག་གུ་བྱུང་བ་དེ་ཁྭའི་སྐད་དང་བྱ་གག་གི་སྐད་གཉིས་ཀ་འབྱིན་པས་ཁྭ་ཡང་མ་ཡིན་བྱ་གག་
ཀྱང་མ་ཡིན་པ་དེ་བཞིན་དུ་ཁྱོད་ཐར་པའི་ཆེད་དུ་རབ་ཏུ་བྱུང་ན་ཐར་པའི་ལམ་ནི་མ་ཐོབ། བྱུང་རྒྱལ་ནི་སྨྲའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཆུ་སྟོད་ཀྱིས་ལྡེ་མིག་དང་ལྡེ་མིག་ཀྱོག་པོ་དག་དེའི་མདུན་དུ་བོར་ནས་ཆས་པ་དང་དེས་སྨྲས་པ། བཙུན་པ་ཆུ་སྟོད་གར་བཞུད།
མཉན་ཡོད་དུའོ། །ཕྱི་ལང་ཐོང་ལ་མ་བཞུད་པར་འདིར་བཞུགས་ཤིག །གང་ཁྱོད་སླར་བྱོན་ནས་བདག་ཁོ་ན་ལ་བཟོད་པ་གསོལ་བར་གྱུར་པའི་གནས་འདི་མཆིས་སོ། །དེས་དེའི་ཚིག་ཚིག་ཏུ་མ་བརྩིས་ཏེ་ལྷུང་བཟེད་དང་ཆོས་གོས་བླངས་ནས་མཉན་ཡོད་གང་ན་བ་དེར་རྒྱུ་ཞིང་
སོང་སྟེ། རིམ་གྱིས་རྒྱུ་ཞིང་སོང་བ་ན་མཉན་ཡོད་དུ་ཕྱིན་པ་དང་དེ་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་ཆུ་སྟོད་བྱོན་པ་ལེགས་སོ། །བྱོན་པ་ལེགས་སོ། །ཁྱོད་མཐོང་བ་ནི་བདག་ཅག་དགའ་ན་བྱོན་པ་ནི་མ་ཡིན་ནོ། །ཅིའི་ཕྱིར་ཁྱོད་ལ་བརྟེན་ནས་ཁྱིམ་བདག་
ནག་པ་ཤིང་མྲག་ཤའི་ཚལ་ན་སངས་རྒྱས་དང་ཆོས་དང་དགེ་འདུན་ལ་བྱ་བ་བྱེད་ཅིང་གློ་བུར་བ་མྲག་ཤའི་ཚལ་དུ་ལྷགས་པ་དང་། ཆས་པ་རྣམས་ཀྱི་ཡང་རྟེན་ཡིན་ནོ། །དེ་ནི་མད་ན་བདག་གིས་ཁྱིམ་བདག་ནག་པ་ལ་བརྙས་ཐབས་བགྱིས་སོ། །ཇི་ལྟ་བུ་དག་བྱས། དེས་ཇི་ལྟར་
གྱུར་བ་སྨྲས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་ཆུ་སྟོད་བརྙས་ཐབས་བྱེད་པ་དང་། གཞན་ཡང་དེ་ལྟ་བུ་དང་། མཐུན་པ་སུ་ཡང་རུང་བ་ལ་ཕྱིར་འགྱེད་པའི་ལས་
བྱོས་ཤིག །རྒྱུ་ལྔས་ཕྱིར་འགྱེད་པའི་ལས་བྱས་ན་ཆོས་མ་ཡིན་པའི་ལས་ཡིན་ཏེ་ཞེས་བྱ་བ་ནས། མངོན་སུམ་དུ་མ་གྱུར་པར་བྱེད་པའིའོ་ཞེས་བྱ་བའི་བར་གོང་མ་བཞིན་དུའོ། །འདི་ལྟར་ཡང་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་

རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ཆུ་སྟོད་འདིས་མྲག་ཤའི་ཚལ་གྱི་ཁྱིམ་བདག་ནག་པ་ལ་
བརྙས་ཐབས་བགྱིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་ཆུ་སྟོད་ཁྱིམ་བདག་ནག་པ་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ཕྲིན་ལས་མཛད་དོ། །འདི་ནི་གསོལ་བའོ། །ལས་བྱ་
བ་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་ཆུ་སྟོད་འདིས་མྲག་ཤའི་ཚལ་གྱི་ཁྱིམ་བདག་ནག་པ་ལ་བརྙས་ཐབས་བགྱིས་ཏེ། དེའི་སླད་དུ་དགེ་འདུན་གྱིས་དགེ་སློང་ཆུ་སྟོད་ཁྱིམ་བདག་ནག་པ་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ཕྲིན་ལས་མཛད་ན།
ཚེ་དང་ལྡན་པ་གང་དག་དགེ་སློང་ཆུ་སྟོད་ཁྱིམ་བདག་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ཕྲིན་ལས་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་
གཉིས་པ་དང་། གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ཆུ་སྟོད་ཁྱིམ་བདག་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ཕྲིན་ལས་མཛད་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་དགེ་སློང་
ཕྱིར་འགྱེད་པའི་ལས་བྱས་པའི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། ཕྱིར་འགྱེད་པའི་ལས་བྱས་པའི་དགེ་སློང་གིས་རབ་ཏུ་དབྱུང་བར་མི་བྱ་ཞེས་བྱ་བའི་བར་གོང་མ་བཞིན་དུའོ། །དེ་ལྟར་ཕྱིར་འགྱེད་པའི་ལས་བྱས་པ་དེ། སྐྲ་གྱེན་དུ་འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་
དགེ་འདུན་ལ་སྤུ་ས་ལ་ལྟུང་བ་ལྟ་བུར་བྱེད། འབྱུང་བར་བསྐྱོད། །མཚུངས་པར་ཉེ་བར་སྟོན། མཚམས་ཀྱི་ནང་དུ་འདུག་ནས་བསླང་བ་གསོལ་བར་བྱེད་དེ། ཁྱིམ་བདག་ལ་བརྙས་ཐབས་བགྱིད་པ་ཉིད་ཀྱང་སྤོང་ངོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་

པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་ཆུ་སྟོད་ཕྱིར་འགྱེད་པའི་ལས་བྱས་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་བསླང་བར་བྱོས་ཤིག །རྒྱུ་ལྔས་ཕྱིར་འགྱེད་པའི་ལས་བྱས་པ་བསླང་བར་བྱ་སྟེ། ལྔ་གང་ཞེ་ན།
སྐྲ་གྱེན་དུ་འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་ཞེས་བྱ་བ་ནས་ཁྱིམ་བདག་ལ་བརྙས་ཐབས་བྱེད་པ་ཉིད་ཀྱང་སྤོང་ངོ་ཞེས་སྨྲ་ན་ཞེས་བྱ་བའི་བར་གོང་མ་བཞིན་དུའོ། །བསླང་བ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་
པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་ཆུ་སྟོད་འདིས་མྲག་ཤའི་ཚལ་གྱི་ཁྱིམ་བདག་ནག་པ་ལ་བརྙས་ཐབས་བགྱིས་ནས་དགེ་
འདུན་གྱིས་དེ་ཁྱིམ་བདག་ལ་བརྙས་ཐབས་བགྱིད་དོ་ཞེས་ཕྱིར་འགྱེད་པའི་ཕྲིན་ལས་མཛད་ལགས་ཏེ། དགེ་སློང་ཆུ་སྟོད་ཕྱིར་འགྱེད་པའི་ཕྲིན་ལས་མཛད་ལགས་པ་འདི་སྐྲ་གྱེན་དུ་འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་ཞེས་བྱ་བ་ནས་ཁྱིམ་བདག་ལ་བརྙས་ཐབས་བགྱིད་པ་ཉིད་ཀྱང་
འདོར་རོ་ཞེས་མཆི་ན་ཞེས་བྱ་བའི་བར་གོང་མ་བཞིན་དུ་སྟེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་ཆུ་སྟོད་ཕྱིར་འགྱེད་པའི་ཕྲིན་ལས་མཛད་ལགས་པ་བསླང་བར་མཛད་དོ། །འདི་ནི་གསོལ་བའོ། །
དེ་ནས་ཁྱིམ་བདག་དེའི་དྲུང་དུ་སོང་ལ་བཟོད་པ་གསོལ་ཅིག་དང་བསླང་བར་འགྱུར་རོ་ཞེས་བརྗོད་པར་བྱའོ། །དགེ་སློང་རྣམས་ཀྱིས་དེ་ལ་དེ་སྐད་སྨྲས་པ་དང་དེ་མྲག་ཤའི་ཚལ་གང་ན་བ་དེར་རྒྱུ་ཞིང་སོང་སྟེ། རིམ་གྱིས་རྒྱུ་ཞིང་སོང་བ་དང་མྲག་ཤའི་ཚལ་དུ་ཕྱིན་ཏོ། །དེ་ནས་ལམ་གྱིས་
དུབ་པ་ངལ་སོས་ནས་ཁྱིམ་བདག་ནག་པ་གང་ན་བ་དེར་སོང་སྟེ་ཕྱིན་པ་དང་། ལག་པ་གཡས་པ་བརྐྱང་ནས་སྨྲས་པ། ཁྱིམ་བདག་བཟོད་པར་མཛོད་ཅིག །བཙུན་པ་ཆུ་སྟོད་བཟོད་བར་བགྱིས། གལ་ཏེ་དེ་ལྟ་ན་འདི་ཉིད་དུ་བཞུགས་ཤིག །རེ་ཞིག་གང་གིས་བདག་ལ་ཉེས་པ་

བྱུང་བ་དེ་ཚར་གཅོད་དུ་འགྲོའོ། །གང་གིས་བདག་ལ་ཉེས་པ་བྱུང་བ་ཞེས་བྱ་བ་ཅི་བདག་ལ་མི་ཟེར་རམ་སྙམ་མོ། །དེ་ནས་ཚེ་དང་ལྡན་པ་ཆུ་སྟོད་ཆུ་བོ་གང་གཱའི་འགྲམ་དུ་སོང་ནས་ཤིང་ཏ་ལའི་ལོ་མ་གསུམ་ལས་སྤྱིལ་པོ་བྱས་ཏེ་དབྱར་གནས་པར་དམ་བཅས་ནས་དེས་མི་རོའི་
ཀླད་པ་འདྲ་བའི་ལྷུང་བཟེད་བཅངས་ཏེ། དེ་དང་ཧ་ཅང་ཡང་མི་རིང་བ་ན་ལམ་ཞིག་ཡོད་པ་དེ་ནས་རྫིའུ་མོ་རྒྱུན་དུ་འགྲོ་བ་དེ་དག་ལ་དེས་ལྷུང་བཟེད་བཟེད་པ་དང་། དེ་དག་གིས་དེར་འོ་མའམ། ཞོའམ། དར་བ་བྱིན་པ་དེས་དེ་ལོངས་སྤྱོད་ནས་བསམ་གཏན་དང་། ཏིང་ངེ་འཛིན་དང་།
སྙོམས་པར་འཇུག་པའི་བདེ་བས་དུས་འདའ་བར་བྱེད་དོ། །ཇི་ཙམ་དུས་གཞན་ཞིག་ན་རྫིའུ་མོ་མ་སྨད་གཉིས་དོང་བ་དང་བུ་མོས་མ་ལ་སྨྲས་པ། མ་འཕགས་པ་འདི་ནི་ལྐུགས་པ་ཞིག་ཡིན་ནོ། །དེས་སྨྲས་པ། བུ་འདི་ནི་ལྐུགས་པ་མ་ཡིན་ཏེ། གདོན་མི་ཟ་བར་འདིས་འགའ་ཞིག་
ལ་ཚིག་གིས་ཉེས་པ་བྱས་པ་དེ་ཉིད་ཚར་གཅོད་པར་བྱེད་པ་ཡིན་ནོ། །མ་ཅི་དེ་དེ་ལྟ་བུ་ལགས་སམ། བུ་སང་ངས་ཁྱོད་ཀྱི་མངོན་སུམ་དུ་བྱའོ། །ཇི་ཙམ་ཕྱི་དེ་ཉིན་པར་དེ་ཞོའི་བུམ་པ་ཐོགས་ཏེ་བུ་མོ་དང་མ་སྨད་གཉིས་ཕྱོགས་དེར་ཕྱིན་པ་དང་ཚེ་དང་ལྡན་པ་ཆུ་སྟོད་ཀྱིས་ལྷུང་བཟེད་བཟེད་
བས་དེས་དེའི་ལྷུང་བཟེད་དུ་ཞོས་དགང་བར་བརྩམས་སོ། །ཚེ་དང་ལྡན་པ་ཆུ་སྟོད་ཀྱིས་ལྷུང་བཟེད་བསྒུལ་ཀྱང་དེས་མ་བཞག་པར་བླུགས་པ་དང་ཚེ་དང་ལྡན་པ་ཆུ་སྟོད་ཀྱིས་སྨྲས་པ། སྲིང་མོ་ཆོག་དོན་མེད་པར་ཕོ་བ་འདི་ཅིར་རུང་། ཁོ་བོ་ལྟ་བུའི་ལེན་པ་པོ་གཞན་ཡང་ཡོད་མོད། དེས་
སྨྲས་པ། བུ་མོ་ཁྱོད་ལ་ངས་སྔར་འདི་ལྐུགས་པ་མ་ཡིན་གྱི། གདོན་མི་ཟ་བར་འདིས་འགའ་ཞིག་ལ་ཚིག་གིས་ཉེས་པ་བྱས་པ་དེ་ཁོ་ན་ཚར་གཅོད་པར་བྱེད་པ་ཡིན་ནོ་ཞེས་མ་སྨྲས་སམ། མ་ཁྱོད་ཀྱིས་སྨྲས་སོ། །དེ་ནས་ཚེ་དང་ལྡན་པ་ཆུ་སྟོད་ཀྱིས་ལོ་གཉིས་ཀྱི་ནང་ལོགས་སུ་ཚིག་
གཅིག་སྨྲས་ནས་ལོ་གསུམ་པ་ལ་འདི་ལྟར་འཁོར་བའི་འཁོར་ལོ་ཆ་ལྔ་པོ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་དུ་ཟིལ་གྱིས་མནན་ནས་མུན་པའི་ཕུང་པོ་

བཅོམ་སྟེ་དགྲ་བཅོམ་པར་གྱུར་ནས་ཞེས་བྱ་བ་ནས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ་ཞེས་བྱ་བའི་བར་གོང་མ་བཞིན་ནོ། །དེ་ནས་ཚེ་དང་ལྡན་པ་ཆུ་སྟོད་ཀྱིས་དགྲ་བཅོམ་པ་ཐོབ་སྟེ། རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་ནས་
དེའི་ཚེ་ཚིགས་སུ་བཅད་ནས་སྨྲས་པ། བདག་གིས་ཏ་ལའི་ཤིང་གསུམ་ལས། །གང་གཱའི་འགྲམ་དུ་སྤྱིལ་བོ་བྱས། །མི་རོ་ཀླད་འདྲའི་ལྷུང་བཟེད་དང་། །ཕྱག་དར་ཁྲོད་པའི་ཆོས་གོས་བཅངས། །ལོ་གཉིས་ཀྱི་ནི་ནང་ལོགས་སུ། །བདག་གིས་ཚིག་གཅིག་སྨྲས་ནས་ནི། །ལོ་
གསུམ་པ་ཡི་ནང་ལོགས་སུ། །མུན་པ་ཡི་ནི་ཕུང་པོ་བཅོམ། །ཆུ་བོ་གང་གཱའི་འགྲམ་གནས་པའི། །དགྲ་བཅོམ་སེམས་ནི་རྣམ་གྲོལ་བ། །དབང་ལྡན་གནས་བརྟན་ཆུ་སྟོད་ཀྱིས། །ཚིགས་སུ་བཅད་པ་འདི་སྨྲས་སོ། །སངས་རྒྱས་བཅོམ་ལྡན་འདས་ཀཽ་ཤཱམྦཱིའི་གདངས་
ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འདུན་པ་ལྟུང་བ་བྱུང་བ་མ་མཐོང་ངོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་དང་།
གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་མཐོང་བར་བྱ་བའི་ཕྱིར་གནས་ནས་དབྱུང་བའི་ལས་བྱོས་ཤིག །རྒྱུ་ལྔས་ལྟུང་བ་མཐོང་བར་བྱ་བའི་ཕྱིར་གནས་ནས་དབྱུང་བའི་ལས་བྱས་ན་དེ་ནི་ཆོས་མ་ཡིན་པའི་ལས་དང་། འདུལ་བ་མ་ཡིན་པའི་ལས་ཡིན་ཏེ།
དེས་ན་དགེ་འདུན་ཡང་འགལ་ཚབས་ཅན་དུ་འགྱུར་རོ། །ལྔ་གང་ཞེ་ན། གླེང་བ་མ་བྱས་པ་དང་ཞེས་བྱ་བའི་བར་གོང་མ་བཞིན་དུའོ། །དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལྟུང་བ་
བྱུང་བ་ལ་ལྟུང་བ་མ་མཐོང་བ་དེའི་སླད་དུ་དགེ་འདུན་གྱིས་དགེ་སློང་འདུན་པ་ལྟུང་བ་མཐོང་བར་བགྱི་བའི་སླད་དུ་གནས་ནས་དབྱུང་བའི་ཕྲིན་ལས་མཛད་དོ། །འདི་ནི་གསོལ་བའོ། །ལས་བྱ་བ་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལྟུང་བ་བྱུང་

བ་ལ་ལྟུང་བ་མ་མཐོང་བ་དེའི་སླད་དུ་དགེ་འདུན་གྱིས་དགེ་སློང་འདུན་པ་འདི་ལྟུང་བ་མཐོང་བར་བགྱི་བའི་སླད་དུ་གནས་ནས་དབྱུང་བའི་ཕྲིན་ལས་མཛད་ན། ཚེ་དང་ལྡན་པ་གང་དག་དགེ་སློང་འདུན་པ་ལྟུང་བ་མཐོང་བར་བགྱི་བའི་སླད་དུ་གནས་ནས་དབྱུང་བའི་ཕྲིན་ལས་མཛད་
བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ་ཞེས་བྱ་བའི་བར་གོང་མ་བཞིན་དུ་སྟེ། ཇི་ལྟར་དམར་སེར་ཅན་རྣམས་ཀྱི་བཞིན་ནོ། །གླེང་གཞི་ནི་དེ་ཉིད་ན་སྟེ། ཚེ་དང་ལྡན་པ་འདུན་པ་ལྟུང་བ་བྱུང་
བ་ཆོས་བཞིན་དུ་ཕྱིར་མི་བྱེད་པ་དེ་ལ་ཚངས་པ་མཚུངས་པར་སྤྱོད་པ་ཕན་པར་འདོད་པ་རྣམས་ཀྱིས་ཞེས་བྱ་བའི་བར་གོང་མ་བཞིན་དུ་སྟེ། ཇི་ལྟར་རྣམ་པར་འབྱེད་པ་ལས་འབྱུང་བ་ལྟ་བུའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་
ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འདུན་པ་ལྟུང་བ་བྱུང་བ་སླར་མི་བྱེད་པ་དང་གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གནས་ནས་དབྱུང་བའི་ལས་བྱོས་ཤིག །རྒྱུ་ལྔས་ལྟུང་བ་བྱུང་བ་སླར་མི་འཆོས་པ་གནས་ནས་དབྱུང་བའི་ལས་བྱས་ན་དེ་ནི་ཆོས་
མ་ཡིན་པའི་ལས་དང་འདུལ་བ་མ་ཡིན་པའི་ལས་ཡིན་ཏེ། དེས་ན་དགེ་འདུན་ཡང་འགལ་ཚབས་ཅན་དུ་འགྱུར་རོ། །ལྔ་གང་ཞེ་ན། གླེང་བ་མ་བྱས་པ་དང་ཞེས་བྱ་བའི་བར་གོང་མ་བཞིན་དུ་སྟེ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་
གསན་དུ་གསོལ། དགེ་སློང་འདུན་པ་འདི་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་ཀྱིས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འདུན་པ་ལྟུང་བ་བྱུང་བ་ཕྱིར་མི་བགྱིད་པ་གནས་ནས་དབྱུང་བའི་
ཕྲིན་ལས་མཛད་དོ། །འདི་ནི་གསོལ་བའོ། །ལས་བྱ་བ་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལྟུང་བ་བྱུང་བ་ཆོས་བཞིན་དུ་ཕྱིར་མི་བགྱིད་པས་དེའི་སླད་དུ་དགེ་འདུན་གྱིས་དགེ་སློང་འདུན་པ་ལྟུང་བ་བྱུང་བ་ཕྱིར་མི་བགྱིད་པ་གནས་ནས་དབྱུང་བའི་

ཕྲིན་ལས་མཛད་ན། ཚེ་དང་ལྡན་པ་གང་དག་དགེ་སློང་འདུན་པ་ལྟུང་བ་བྱུང་བ་ཕྱིར་མི་བགྱིད་པ་གནས་ནས་དབྱུང་བའི་ཕྲིན་ལས་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ་ཞེས་བྱ་བའི་བར་
གོང་མ་བཞིན་དུ་སྟེ། དམར་སེར་ཅན་རྣམས་ཀྱི་བཞིན་ནོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་འཆི་ལྟས་ལ་འདི་ལྟ་བུའི་སྡིག་པའི་ལྟ་བར་སོང་བ་སྐྱེས་ཏེ། ཇི་ལྟར་བཅོམ་ལྡན་འདས་
ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གནས་ནས་དབྱུང་བའི་ལས་བྱོས་ཤིག །རྒྱུ་ལྔས་སྡིག་པའི་ལྟ་བར་སོང་བ་མི་འདོར་བ་གནས་ནས་དབྱུང་བའི་ལས་བྱས་ན་
དེ་ནི་ཆོས་མ་ཡིན་པའི་ལས་དང་། འདུལ་བ་མ་ཡིན་པའི་ལས་ཡིན་ཏེ། དེས་ན་དགེ་འདུན་ཡང་འགལ་ཚབས་ཅན་དུ་འགྱུར་རོ། །ལྔ་གང་ཞེ་ན། གླེང་བ་མ་བྱས་པ་དང་ཞེས་བྱ་བའི་བར་གོང་མ་བཞིན་དུ་སྟེ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་
བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་འདི་ལྟ་བུའི་སྡིག་པའི་ལྟ་བར་སོང་བ་སྐྱེས་ཏེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་བཅོམ་ལྡན་འདས་
ཀྱིས་ཆོས་བསྟན་པ་བདག་གིས་ཤེས་ཏེ་ཞེས་བྱ་བའི་བར་གོང་མ་བཞིན་དུ་སྟེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་ལ་གནས་ནས་དབྱུང་བའི་ཕྲིན་ལས་

མཛད་དོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་འདི་ལྟ་བུའི་སྡིག་པའི་ལྟ་བར་སོང་བ་སྐྱེས་ཏེ་ཞེས་བྱ་བ་ནས་དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་ཏེ་ཞེས་བྱ་བའི་བར་
གོང་མ་བཞིན་དུ་སྟེ། དགེ་འདུན་གྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་ལ་གནས་ནས་དབྱུང་བའི་ཕྲིན་ལས་མཛད་ན། ཚེ་དང་ལྡན་པ་གང་དག་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་ལ་གནས་ནས་དབྱུང་བའི་ཕྲིན་ལས་མཛད་པར་བཟོད་པ་དེ་དག་
ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ་ཞེས་བྱ་བའི་བར་གོང་མ་བཞིན་དུ་སྟེ། དམར་སེར་ཅན་རྣམས་ཀྱི་བཞིན་ནོ། །དེ་སྡིག་པའི་ལྟ་བར་སོང་བ་ཕྱིར་མི་འདོར་བ་གནས་ནས་དབྱུང་བའི་ལས་བྱས་པས་སྐྲ་གྱེན་དུ་
འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་དགེ་འདུན་ལ་སྤུ་ས་ལ་ལྟུང་བ་ལྟ་བུར་བྱེད་ཅེས་བྱ་བ་ནས། སྡིག་པའི་ལྟ་བར་སོང་བ་འདོར་རོ་ཞེས་སྨྲའོ་ཞེས་བྱ་བའི་བར་གོང་མ་བཞིན་དུ་སྟེ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་
ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་གནས་ནས་དབྱུང་བའི་ལས་བྱས་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་བསླང་བའི་ལས་བྱོས་ཤིག །རྒྱུ་ལྔས་སྡིག་པའི་ལྟ་བར་སོང་བ་མི་འདོར་བ་དེ་
གནས་ནས་དབྱུང་བའི་ལས་བྱས་པ་བསླང་བར་བྱ་སྟེ། ལྔ་གང་ཞེ་ན། སྐྲ་གྱེན་དུ་འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་དགེ་འདུན་ལ་སྤུ་ས་ལ་ལྟུང་བ་ལྟ་བུར་བྱེད་ཅེས་བྱ་བའི་བར་གོང་མ་བཞིན་དུ་སྟེ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་
རྣམས་གསན་དུ་གསོལ། དགེ་སློང་འཆི་ལྟས་འདི་ལ་འདི་ལྟ་བུའི་སྡིག་པའི་ལྟ་བར་སོང་བ་སྐྱེས་ཏེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་བཅོམ་ལྡན་འདས་ཀྱིས་ཆོས་བསྟན་

པ་བདག་གིས་ཤེས་སོ་ཞེས་སྡིག་པའི་ལྟ་བར་སོང་བ་མི་འདོར་བ་དེ་གནས་ནས་དབྱུང་བའི་ཕྲིན་ལས་མཛད་ལགས་ཏེ། དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་གནས་ནས་དབྱུང་བའི་ཕྲིན་ལས་མཛད་ལགས་པ་འདི་སྐྲ་གྱེན་དུ་འགྲེང་བ་ལྟ་བུ་དང་། སྐྲ་ཞིག་པ་ལྟ་བུར་
ཞེས་བྱ་བ་ནས་སྡིག་པའི་ལྟ་བ་ཡང་འདོར་རོ་ཞེས་མཆི་ན་ཞེས་བྱ་བའི་བར་གོང་མ་བཞིན་དུ་སྟེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་གནས་ནས་དབྱུང་
བའི་ཕྲིན་ལས་མཛད་ལགས་པ་སློང་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་འདི་ལྟ་བུའི་སྡིག་པའི་ལྟ་བར་སོང་བ་སྐྱེས་ཏེ་ཞེས་བྱ་བའི་བར་གོང་མ་བཞིན་དུ་སྟེ། དགེ་འདུན་
གྱིས་དགེ་སློང་འཆི་ལྟས་སྡིག་པའི་ལྟ་བར་སོང་བ་མི་འདོར་བ་གནས་ནས་དབྱུང་བའི་ཕྲིན་ལས་མཛད་ལགས་པ་འདི་སློང་བར་མཛད་ན། ཚེ་དང་ལྡན་པ་གང་དག་དགེ་སློང་འཆི་ལྟས་སྡིག་པའི་ལྟ་བར་སོང་བ་གནས་ནས་དབྱུང་བའི་ཕྲིན་ལས་མཛད་ལགས་པ་བསླང་བར་བཟོད་པ་དེ་
དག་ནི་ཅང་མ་གསུང་ཤིག །གང་དག་མི་བཟོད་པའི་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང་། གསུམ་པ་ཞེས་བྱ་བ་ནས་ཅང་མི་གསུང་བས་དེ་དེ་བཞིན་དུ་འཛིན་ཏོ། །ཞེས་བྱ་བའི་བར་གོང་མ་བཞིན་དུའོ། །སངས་རྒྱས་
བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དེས་སྐབས་དེ་དགེ་སློང་རྣམས་ལ་སྨྲས་པ། ཚེ་
དང་ལྡན་པ་དག་བདག་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ན་བདག་གིས་ཅི་དག་བགྱི་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་

ཀྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཟླ་བ་ཕྱེད་ཀྱི་སྤོ་བ་བྱིན་ཅིག་སྦྱིན་པ་ནི་འདི་ལྟར་བྱ་སྟེ། དགེ་སློང་འཆར་ཀས་གནས་མལ་བཤམས་
ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་རྒན་པའི་མཐར་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ནས་སྤོ་བ་གསོལ་བར་བྱའོ། །གསོལ་བ་ནི་འདི་ལྟར་བྱ་སྟེ། དགེ་འདུན་བཙུན་པ་
རྣམས་གསན་དུ་གསོལ། བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་
པ་དེའི་སླད་དུ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་དུ་
གསོལ། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདིས་ཆེད་དུ་བསམས་
ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀ་ཆེད་དུ་བསམས་
ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་འདི་ལ་ཟླ་བ་ཕྱེད་ཀྱི་སྤོ་བ་སྩལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་

ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་
སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩོལ་བར་མཛད་ན་ཚེ་དང་ལྡན་པ་གང་དག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་
ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩོལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང་གསུམ་པའི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་
ནས་དགེ་འདུན་གྱིས་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ།། །།འདུལ་བ་གཞི། བམ་པོ་
བདུན་བཅུ་གཅིག་པ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་སྐབས་དེ་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་
འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀས་ཆེད་
དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལས་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ན་བདག་གིས་ཇི་ལྟར་བགྱི་ཞེས་

པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱི་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དང་། གཞན་ཡང་དེ་ལྟ་བུ་
དང་མཐུན་པ་སུ་ཡང་རུང་བ་ལ་གཞི་ནས་སྤོ་བ་བྱིན་ཅིག །སྦྱིན་པ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ། དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་། དགེ་སློང་འཆར་ཀས་
རྒན་པའི་མཐའ་ནས་ཙོག་ཙོག་པོར་འདུག་ལ་ཐལ་མོ་སྦྱར་བ་བཏུད་དེ་ཚིག་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་
སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་
ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་
པ་ལ་དགེ་འདུན་ལས་གཞི་ནས་སྤོ་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་དུ་གསོལ་ཞེས་དེ་
སྐད་ལན་གཉིས་ལན་གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་

ཕྱེད་བཅབས་ཏེ་དགེ་སློང་འཆར་ཀ་འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་
ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་
བྱུང་བ་བཅབས་པ་ལ་དགེ་འདུན་ལས་གཞི་ནས་སྤོ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་
ལ་གཞི་ནས་སྤོ་བ་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་
འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་
བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་
འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩོལ་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་

ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩོལ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང་།
གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །
དེ་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་ཡང་བཟླས་ཏེ་བྱུང་བའི་སྐབས་དེ་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་
མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་
ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀ་ལ་དགེ་
འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་
ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ན་བདག་གིས་ཅི་དག་བགྱི་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་དགེ་སློང་འཆར་ཀ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཞི་ནས་བསླང་བ་བྱིན་ཅིག་དང་། སྦྱིན་པ་ནི་འདི་ལྟར་བྱ་སྟེ། གནས་མལ་བཤམས་
ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་། དགེ་སློང་འཆར་ཀས་རྒན་པའི་མཐའ་ནས་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ནས་ཚིག་འདི་སྐད་ཅེས། དགེ་འདུན་བཙུན་
པ་རྣམས་གསན་དུ་གསོལ། བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་
བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་
དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལ་གཞི་ནས་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་
ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། བདག་ལ་དགེ་འདུན་ལྷག་
མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་དགེ་འདུན་ལས་གཞི་ནས་བསླང་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་

ཡང་བཟླས་ཏེ་བྱུང་བ་བཅབས་པ་ལས་གཞི་ནས་བསླང་བ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་
ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་
ཏེ། དགེ་འདུན་གྱིས་དགེ་སློང་འཆར་ཀ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་
བྱུང་བ་བཅབས་ཏེ། དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ་དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་
བཅབས་པ་ལ་གཞི་ནས་སྤོ་བ་སྩལ་ཏེ། དེ་སྤོ་བ་གཞི་ནས་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་
འདུན་ལས་གཞི་ནས་བསླང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་
བསླང་བ་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདིས་ཆེད་དུ་

བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་
བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་
འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ཏེ། དེ་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་
དང་འདྲ་བ་ཡང་བཟླས་ཏེ་བྱུང་བ་བཅབས་ནས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་ནས་བསླང་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་
ཡང་བཟླས་ཏེ་བྱུང་བ་བཅབས་པ་གཞི་ནས་སྤོ་བ་སྩོལ་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩོལ་བར་མཛད་པར་བཟོད་པ་དེ་དག་ནི་ཅང་མ་གསུང་
ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང་། གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་
ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེས་དུས་གཞན་ཞིག་ན་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་

པའི་སྤོ་བ་སྤྱད། ལྟུང་བ་བར་མའི་གཞི་ནས་སྤོ་བ་སྤྱད། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་
འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་
བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀས་དགེ་
འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་
ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་
ནས་བསླང་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། བདག་གིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་
ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་ཡང་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་ཡང་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་ནས་བསླང་བ་ཡང་སྤྱད་ལགས་ན། བདག་གིས་ཅི་དག་

བགྱི་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་ཟླ་བ་ཕྱེད་
ཀྱི་སྤོ་བ་སྤྱད་ཟིན་པ་དང་། ལྟུང་བ་བར་མའི་གཞི་ནས་སྤོ་བ་སྤྱད་ཟིན་པ་དང་། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ཟིན་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཞག་དྲུག་གི་མགུ་བར་བྱ་བ་བྱིན་ཅིག །སྦྱིན་པ་ནི་འདི་
ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་བ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་། དགེ་སློང་འཆར་ཀས་རྒན་པའི་མཐའ་ནས་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ལ་འདི་སྐད་
ཅེས། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་
ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་
སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་
འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལས་གཞི་ནས་སྤོ་བ་སྩལ་ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ། བྱུང་བ་

བཅབས་ནས། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་ནས་བསླང་བའི་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་
བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་ཡང་སྤྱད་ལགས། ལྟུང་བ་བར་མའི་གཞི་ནས་སྤོ་བ་ཡང་སྤྱད་
ལགས། ཡང་བཟླས་པའི་ལྟུང་བའི་གཞི་ནས་བསླང་བ་ཡང་སྤྱད་ལགས་ཏེ། དགེ་འདུན་ལས་ཞག་དྲུག་གི་མགུ་བར་བགྱི་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་
པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མའི་གཞི་ནས་སྤོ་བ་སྤྱད་ལགས། ཡང་བཟླས་པའི་ལྟུང་བའི་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བ་སྩལ་དུ་གསོལ། དེ་སྐད་ལན་གཉིས་ལན་
གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་
ཏེ། དགེ་སློང་འཆར་ཀ་འདིས་ཆེད་དུ་བསམས་ཏེ། ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་
པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་བ་བར་

མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ཏེ། འདི་གཞི་ནས་སྤོ་བ་བགྱིད་བཞིན་པ་ལས་
དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་ནས་བསླང་སྟེ་སྤོ་བ་གསོལ་ཏེ། དགེ་འདུན་གྱིས་དགེ་
སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། དགེ་སློང་འཆར་ཀ་འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས།
ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་ཏེ། ཞག་དྲུག་གི་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་
འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས།
ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བར་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། དགེ་འདུན་གྱིས་དགེ་སློང་འཆར་ཀ་
འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་

ཏེ། དགེ་འདུན་གྱིས་དགེ་སློང་འཆར་ཀ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་
མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་
མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ཏེ། འདི་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་
ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་ནས་བསླང་སྟེ་སྤོ་བ་གསོལ་ནས། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། དགེ་སློང་འཆར་ཀ་འདི་ཆེད་
དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་
བ་སྤྱད་ལགས་ན། ཞག་དྲུག་གི་མགུ་བར་བགྱི་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བཅབས་པའི་
གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བར་སྩོལ་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་

འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་
བགྱི་བ་སྩོལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང་། གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་
སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་
གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་དུས་གཞན་ཞིག་ན་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད། ལྟུང་བ་བར་མ་
ལྟུང་བ་སྔ་མ་དང་འདྲ་བ་བཅབས་པའི་གཞི་ནས་སྤོ་བ་སྤྱད། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད། ཞག་དྲུག་གི་མགུ་བར་བྱ་བ་སྤྱད་ཟིན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་དགེ་སློང་འཆར་ཀ་ལ་ཆེད་དུ་བསམས་ཏེ་
ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་བདག་དགེ་
སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་

འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་
ལ་གཞི་ནས་སྤོ་བ་སྩལ་ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་
འདུན་ལས་གཞི་ནས་བསླང་སྟེ་སྤོ་བ་གསོལ་ནས། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་
པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་ཏེ། དགེ་འདུན་ལས་
ཞག་དྲུག་གི་མགུ་བར་བགྱི་བ་གསོལ་ནས། དགེ་འདུན་གྱིས་བདག་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་
ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བ་སྩལ་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་
སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་ནས་སྤོ་བ་སྤྱད་ལགས། ཞག་དྲུག་གི་མགུ་བར་བགྱི་བ་སྤྱད་ལགས་ན། བདག་གིས་ཅི་དག་བགྱི་ཞེས་པའི་སྐབས་

དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྤོ་བ་སྤྱད་པ་དང་། ལྟུང་
བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་པ་དང་། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་པ་དང་། ཞག་དྲུག་གི་མགུ་བར་བྱ་བ་སྤྱད་ཟིན་པ་དང་། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་དབྱུང་
བ་བྱོས་ཤིག །དབྱུང་བ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་། དགེ་སློང་འཆར་ཀས་རྒན་པའི་མཐར་ཙོག་ཙོག་པོར་འདུག་སྟེ་ཐལ་
མོ་སྦྱར་བ་བཏུད་ནས་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་
ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དགེ་འདུན་ལས་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ཏེ། བདག་
སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་
གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ལ་གཞི་ནས་སྤོ་བ་སྩལ་ཏེ། བདག་གཞི་ནས་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས།

བདག་དགེ་སློང་འཆར་ཀས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དགེ་འདུན་ལས་གཞི་ནས་བསླང་སྟེ་སྤོ་བ་གསོལ་ནས། དགེ་འདུན་གྱིས་བདག་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་
བཟླས་ཏེ་བྱུང་བ་བཅབས་པ་ལ་གཞི་ནས་བསླང་བ་སྩལ་ཏེ། བདག་དགེ་སློང་འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་
སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་ནས་བསླང་བ་སྤྱད་ལགས་ནས། ཞག་དྲུག་གི་མགུ་བར་བགྱི་བ་གསོལ་ཏེ། དགེ་འདུན་གྱིས་བདག་དགེ་སློང་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་
བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བའི་གཞི་ནས་བསླང་བ་སྤྱད་ལགས་པ་ལ། ཞག་དྲུག་གི་མགུ་བར་བགྱི་བ་སྩལ་ཏེ། བདག་དགེ་སློང་
འཆར་ཀས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་
ནས་བསླང་བའི་སྤོ་བ་སྤྱད་ལགས། ཞག་དྲུག་གི་མགུ་བར་བགྱི་བ་སྤྱད་ལགས་ཏེ། དགེ་འདུན་ལས་དབྱུང་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་
མའི་ལྟུང་བ་ཟླ་བ་ཕྱེད་བཅབས་པའི་སྤོ་བ་སྤྱད་ལགས། ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པའི་གཞི་ནས་སྤོ་བ་སྤྱད་ལགས། ལྟུང་བ་བར་མ་དང་འདྲ་བ་ཡང་བཟླས་པའི་ལྟུང་བ་བྱུང་བ་གཞི་ནས་བསླང་བའི་སྤོ་བ་སྤྱད་ལགས། ཞག་དྲུག་གི་མགུ་བར་བགྱི་བ་སྤྱད་

ལགས་ན་དབྱུང་བར་གསོལ། དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་
ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདིས་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་ཆེད་དུ་བསམས་ཏེ་ཁུ་བ་
ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་ཟླ་བ་ཕྱེད་ཀྱི་སྤོ་བ་སྩལ་ཏེ། འདི་སྤོ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། དགེ་སློང་འཆར་ཀ་འདིས་དགེ་འདུན་ལྷག་མའི་ལྟུང་བ་ལྟུང་
བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དགེ་འདུན་ལས་གཞི་ནས་སྤོ་བ་གསོལ་ཏེ། དགེ་འདུན་གྱིས་དགེ་སློང་འཆར་ཀ་འདི་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་