Luận tạng Tây Tạng (Tengyur) — Tập 201

ུ་ན་བ་དང་། །ཁ་གླལ་ལུས་གྲུགས་མཆིལ་སྣབས་མང་། །དྲོད་ཉམས་ཁ་མནམ་ཡིན་ཞེས་བྱ། །ཞེས་བྱ་བ་ལ། ཆམ་པ་ལ་སོགས་པ་དེ་རྣམས་ཀྱི་བླ་བརྣན་ནི་སྐད་འགགས་པ་ལ་སོགས་པ་
བདུན་ཡིན་པར་ཤེས་པར་བྱ། ནད་སྔ་ན་གནས་པའི་སྟེང་དུ་ནད་ཕྱི་མ་བྱུང་ནས་སྡུག་བསྔལ་དང་རྗེས་སུ་འབྲེལ་པར་བྱེད་པ་ནི་བླ་བརྣན་ཞེས་བྱའོ། །དེ་ལ་རླུང་གྱུར་ཀླད་པ་དང་། །རྩིབ་ལོགས་ཟུག་ཤ་ཡན་ལག་ན། །སྐད་འགགས་མགུལ་པ་སུབས་པར་འགྱུར། །
ཞེས་བྱ་བ་ལ། དེ་ལ་རླུང་གི་ཤས་ཆེ་བ་ལས་གྱུར་པའི་གཅོང་ཆེན་པོ་ནི། ཀླད་པ་ན་བ་ལ་སོགས་པའི་མཚན་མ་འབྱུང་བར་འགྱུར་རོ། །མཁྲིས་རྒྱས་རྐང་ལག་ཕྲག་པ་ཚ། །ཚད་འཁྲུ་ཁྲག་ཏུ་སློན་པ་དང་། །ཁ་མནམ་རིམས་འདེབས་མྱོས་པར་འགྱུར། །ཞེས་བྱ་
བ་ལ། དེ་ལ་མཁྲིས་པ་ཤས་ཆེ་བ་ལས་བྱུང་བའི་གཅོང་ཆེན་པོ་ནི། རྐང་པ་དང་ལག་པ་དང་། ཕྲག་པ་ཚ་བ་ལ་སོགས་པའི་ནད་ཀྱི་མཚན་མ་འབྱུང་བར་འགྱུར་རོ། །བད་ཀན་ལས་གྱུར་ཡི་ག་འཆུས། །སློན་ལུད་ལུས་དང་ཡན་ལག་ལྕི། །མཆིལ་སྣབས་མང་
ཞིང་ཆམ་པས་འདེབས། །དབུགས་མི་བདེ་སྐད་འགགས་དྲོད་ཉམས། །ཞེས་བྱ་བ་ལ། བད་ཀན་རྒྱས་པ་ལས་གྱུར་བའི་གཅོང་ཆེན་པོའི་ནད་ནི་ཡི་ག་འཆུས་པ་ལ་སོགས་པ་འབྱུང་བར་འགྱུར་རོ། །ནད་ཀྱིས་མེ་དྲོད་ཉམ་ཆུང་བས། །འབྱར་བཅས་བད་ཀན་རྒྱས་གྱུར་

ནས། །རྩ་སྤུབས་སྒོ་ནི་འགགས་པ་དང་། །ལུས་ཟུངས་དྲོད་ནི་ཆུང་གྱུར་པས། །དྭངས་མ་རང་གི་གནས་སུ་ནི། །མ་ཞུ་བླ་བརྣན་དེ་དང་དེ། །སྐྱེད་ཅིང་ཤ་སོགས་མི་འགྱུར་ལ། །ཁྲག་ནི་གྱེན་དུ་འབྱུང་བར་བྱེད། །ཅེས་བྱ་བ་ལ། རླུང་ལ་
སོགས་པའི་ནད་མེ་དྲོད་ཆུང་ཞིང་ནུས་པ་བྲི་བ་ལ་སོགས་པའི་རྒྱུས་འབྱར་བག་དང་བཅས་པའི་བད་ཀན་རྒྱས་པར་འགྱུར་ལ། རྩ་སྦུབས་ཀྱི་སྒོ་རྣམས་འགགས་ཤིང་བཀག་པར་གྱུར་པ་དང་། དེ་བཞིན་དུ་ལུས་ཟུངས་ཀྱི་དྲོད་ཉམ་ཆུང་བར་གྱུར་པས་དྭངས་མ་རང་གི་
གནས་སུ་ལེགས་པར་མ་ཞུ་ཞིང་སྨིན་པར་ནུས་པའི་དྭངས་མ་དེ་ལས་བླ་བརྣན་སྐད་འགགས་པ་དང་། བྲང་དུ་ན་བ་ལ་སོགས་པ་རང་གི་རྒྱུ་ལས་བྱུང་བ་དེ་དང་དེ་སྐྱེད་ཅིང་འབྱུང་བར་འགྱུར་ལ། དེས་ན་ཤ་ལ་སོགས་པའི་ལུས་ཟུངས་སུ་མི་འགྱུར་བ་དང་། དེ་བཞིན་
དུ་ཁྲག་གྱེན་དུ་འབྱུང་ཞིང་མཆིལ་མ་ལ་སོགས་པ་དང་ལྷན་ཅིག་འབྱུང་བར་འགྱུར་རོ། །ཁོང་པ་ཉིད་དུ་ཟས་འཇུ་བས། །དྭངས་མར་འགྱུར་བར་མི་བྱེད་ཅིང་། །ཕལ་ཆེར་དྲི་མ་ཉིད་འགྱུར་གྱི། །ལུས་ཟུངས་འཕེལ་བར་མི་བྱེད་དོ། །ཞེས་བྱ་བ་ལ། གང་གི་ཕྱིར་གཅོང་
ཆེན་པོའི་ནད་འདི་ཡོད་པ་ལ། ཁོང་པའི་དྲོད་ཀྱིས་ཁ་ཟས་འཇུ་བར་བྱེད་ཀྱི། མེ་དྲོད་གཞན་གྱིས་དྭངས་མ་ལ་སོགས་པའི་རིམ་པ་སྨིན་པར་མི་བྱེད་དོ། །དེའི་ཕྱིར་འཕྲལ་དུ་དྲི་མ་བཤང་གཅི་ཉིད་དུ་འགྱུར་བས་ཟུངས་རྣམས་འཕེལ་ཤིང་རྒྱས་པར་མི་བྱེད་དེ། དྭངས་མའི་
བཅུད་ལུས་ཀྱང་བརྟས་ཤིང་ཚིམ་པར་མི་བྱེད་དོ་ཞེས་བྱ་བའི་དོན་ནོ། །དྭངས་མ་ཁྲག་ཏུ་མི་འགྱུར་ན། །ཤར་འགྱུར་བ་ལྟ་སྨོས་ཅི་དགོས། །ཟད་བྱེད་ཅན་ནི་བཤང་འཕེལ་བ། །འབའ་ཞིག་གིས་ནི་གནས་པར་བྱེད། །ཅེས་བྱ་བ་ལ། གཅོང་ཆེན་གྱི་སྐྱེས་བུ་དེའི་
ལུས་ཟུངས་དྭངས་མ་ཞེས་བྱ་བ་གང་ཡིན་པ་དེ་ཡང་ཁྲག་ཏུ་མི་འགྱུར་ན། ཤའི་ལུས་ཟུངས་རྒྱས་པ་ལྟ་སྨོས་ཀྱང་ཅི་དགོས་ཏེ། ཟད་བྱེད་དང་ལྡན་པའི་སྐྱེས་བུ་བཤང་བ་འབའ་ཞིག་ཉེ་བར་འཕེལ་བས་གནས་པར་འགྱུར་གྱི། དྭངས་མས་ཁྲག་ལ་སོགས་པ་

འཕེལ་བར་མི་འགྱུར་རོ་ཞེས་འབའ་ཞིག་གི་སྒྲ་ངེས་པར་བཟུང་བ་ཡིན་ནོ། །མཚན་མ་ཆུང་ཡང་ཉམ་ཆུང་ཞིང་། །ནད་ཀྱིས་སྨན་གྱི་སྟོབས་མི་བཟོད། །སྤང་བྱ། ཅེས་བྱ་བ་ལ། ཆམ་པ་ལ་སོགས་པའི་མཚན་མ་རྣམས་དང་། དེ་བཞིན་དུ་སྙིང་ག་དང་རྩིབ་ལོགས་གཟེར་
བ་ལ་སོགས་པའི་ནད་ཀྱི་མཚན་མ་ཆུང་དུ་ཟིན་ཀྱང་། མི་མཉམ་སྟོབས་ཆུང་ཞིང་ནད་ཀྱིས་སྨན་གྱི་སྟོབས་བསྟེན་པར་མི་བཟོད་པ་གང་ཡིན་པ་དེ་ནི་སྤང་བར་བྱ་སྟེ་གསོར་མི་རུང་ངོ་། །དེ་ལས་གཞན་པ་ནི། །ཐམས་ཅད་ལྡན་ཡང་གསོ་བར་བྱ། །ཞེས་བྱ་བ་ལ།
དེ་ལས་གཞན་པའི་ནད་ཀྱིས་ཉམས་ཀྱི་སྟོབས་བཟོད་ཅིང་། ཉམས་སྟོབས་དང་ལྡན་པ་ནི་མཚན་མ་ཐམས་ཅད་དང་ལྡན་པ་ཡིན་ཡང་གསོར་རུང་བ་ཡིན་པས་ནད་པ་ཉམས་སྟོབས་དང་ལྡན་པ་ནི་རྣམ་པ་ཐམས་ཅད་དུ་གསོ་བར་བྱའོ། །དེ་ཡན་ཆད་དུ་གཅོང་ཆེན་པོའི་
ནད་བཤད་ཟིན་ནས། དེ་ནས་དེའི་འོག་ཏུ་དེའི་ཡན་ལག་ཏུ་གྱུར་པ་སྐད་འགགས་པ་ལ་སོགས་པའི་ནད་སྟོན་པའི་ཕྱིར་སྨྲས་པ་ནི། ནད་ནི་སྣ་རེ་འདུས་པ་དང་། །ཟད་བྱེད་ཚིལ་ལས་གྱུར་པ་དྲུག །སྐད་འགགས་ཀྱི་ནི་དབྱེ་བ་ཡིན། །ཞེས་བྱ་བ་ལ་སོགས་པ་ཡིན་ཏེ།
ནད་སྣ་རེ་རེ་ཞེས་པ་རླུང་དང་མཁྲིས་པ་དང་བད་ཀན་དང་སོ་སོ་ལས་གྱུར་པ་གསུམ་དང་། གསུམ་ཅར་འདུས་པ་ལས་གྱུར་ཏེ་བཞི་པ་དང་། ཟད་བྱེད་ལས་གྱུར་པ་དང་། ཚིལ་ལས་གྱུར་པ་སྟེ། དྲུག་པོ་དེ་དག་ནི་སྐད་འགགས་པའི་དབྱེ་བ་ཡིན་པར་ཤེས་པར་བྱའོ། །
དེ་ལས་རླུང་གཡོ་ཉམ་ཆུང་རྩུབ། །གྲེ་བ་གྲམས་གང་སྙམ་བྱེད། །དེ་ལ་སྣུམ་དྲོ་འོ་མས་ཕན། །ཞེས་བྱ་བ་ལ། དེ་ལ་སྐད་འགགས་པ་དྲུག་གི་ནང་ནས་རླུང་ལས་གྱུར་པའི་སྐད་འགགས་པ་ནི་གཡོ་ཞིང་སྐད་འགྱུར་ཏེ་མི་བརྟན་པ་དང་། ལུས་ཉམ་ཆུང་ཞིང་ཁོང་རྨྱ་བ་དང་། རྩུབ་
བག་ཏུ་གནས་པ་དང་། གྲེ་བ་ནས་ཀྱི་གྲ་མས་གང་བ་སྙམ་དུ་བྱེད་ཅིང་ན་བ་ཡིན་ལ། དེ་ལ་སྣུམ་བག་དང་། དྲོ་བ་དང་། འོ་མས་ཕན་པ་ཡིན་ནོ། །མཁྲིས་པ་ལས་གྱུར་རྐན་ལྐོག་ཚ། །སྐམ་ཞིང་སྨྲ་བར་མི་ནུས་འགྱུར། །ཞེས་བྱ་བ་ལ། མཁྲིས་པ་ལས་གྱུར་པའི་སྐད་

འགགས་པ་ནི། རྐན་དང་ལྐོག་མའི་ཕྱོགས་སུ་ཚ་བར་འགྱུར་བ་དེ་དག་ཉིད་སྐམ་པ་དང་། སྨྲ་བར་མི་ནུས་ཤིང་ཚིག་མི་ཐོན་པ་ཡིན་ནོ། །བད་ཀན་མགུལ་པ་བྱུགས་སྙམ་བྱེད། །སྐད་ཀྱི་གསང་དམའ་ངར་ངར་འཛེར། །ཐོགས་བཅས་
འགྱུར་རོ་ཐམས་ཅད་ཀྱི། །མཚན་མ་ཐམས་ཅད་ལྡན་པ་ཡིན། །ཞེས་བྱ་བ་ལ། དེ་ཡང་སྒྲ་ངར་ངར་པོར་འདོན་ཞིང་འཛེར་བ་དང་། ཐོགས་པ་དང་བཅས་པ་སྟེ། བར་བར་དུ་འཁྲུལ་ཞིང་བརྗེད་པར་འགྱུར་བ་ཡིན་ནོ། །ཐམས་ཅད་ཀྱི་ཞེས་ནད་གཞི་གསུམ་པོ་
ཐམས་ཅད་ལས་བྱུང་བའི་སྐད་འགགས་པ་ནི་མཚན་མ་གསུམ་པོ་ཐམས་ཅད་དང་ལྡན་པ་ཡིན་ནོ། །ཟད་བྱེད་ལས་ནི་དྲུད་སྙམ་བྱེད། །དུ་བས་བདུགས་ལྟར་ཤིན་ཏུ་ན། །ཞེས་བྱ་བ་ལ། ཟད་བྱེད་ཅེས་ཏེ་གཅོང་ཆེན་པོ་ལས་བྱུང་བའི་སྐད་འགགས་པ་ནི་ལྐོག་མ་
དྲུད་པ་སྙམ་དུ་སེམས་ཤིང་ན་བ་དང་། ལྐོག་མ་དང་རྐན་གྱི་ཕྱོགས་དུ་བས་བདུགས་པ་ལྟར་ཤིན་ཏུ་ན་བ་དང་སྨྲ་བ་ན་ཡང་དུ་བས་སུབས་ཏེ་སྨྲ་བ་སྙམ་དུ་སེམས་པར་འགྱུར་རོ། །ཚིལ་གྱུར་བད་ཀན་བདག་ཉིད་ཅན། །ཚིག་གི་བརྡ་སྤྲོད་མི་ནུས་འགྱུར། །ཞེས་བྱ་བ་ལ།
ཚིལ་ལས་གྱུར་པའི་སྐད་འགགས་པ་ནི་མགུལ་པ་བྱུགས་པ་སྙམ་དུ་བྱེད་པ་ལ་སོགས་པ་བད་ཀན་གྱི་སྐབས་སུ་བཤད་པ་དང་མཚན་ཉིད་འདྲ་བ་ཡིན་ནོ། །ཡང་དེ་བཞིན་དུ་ཚིག་བརྡ་སྤྲོད་པར་མི་ནུས་ཤིང་ཤིན་ཏུ་མི་གསལ་བར་སྨྲ་བ་ཡིན་ནོ། །འདིར་ནི་འདུས་
དང་ཐ་མར་སྤང་། །ཞེས་བྱ་བ་ལ། འདིར་སྐད་འགགས་པ་འདི་དག་གི་ནང་ནས་ནད་གཞི་ཐམས་ཅད་འདུས་པ་ལས་གྱུར་པ་དང་། ཚིལ་ལས་གྱུར་པའི་སྐད་འགགས་པ་ནི་གསོར་མི་རུང་བས་སྤང་བར་བྱའོ། །ཡི་ག་འཆུས་པའི་ནད་རྣམས་ནི། །ལྕེ་སྙིང་གནས་
པ་སོ་སོ་དང་། །འདུས་པ་དང་ནི་ཡིད་ཀྱི་ནི། །གདུང་བ་ལས་གྱུར་ལྔ་པ་ཡིན། །ཞེས་བྱ་བ་ལ། ཡི་ག་འཆུས་པའི་ནད་ནི་རླུང་ལ་སོགས་པའི་ནད་ལྕེ་དང་སྙིང་ག་ལས་གནས་པ་སོ་སོ་སྟེ། གསུམ་པོ་སོ་སོ་ལས་གསུམ་དུ་འགྱུར་ལ། འདུས་པའི་ནད་ལྕེ་དང་སྙིང་ལ་

གནས་པ་ལས་བཞི་པར་འགྱུར་རོ། །ཡིད་ཀྱི་གདུང་བ་མྱ་ངན་དང་ཁྲོ་བ་ལ་སོགས་པ་རྣམ་པ་དུ་མ་གསུངས་པ་ལས་ཡིག་འཆུས་པ་ལྔ་པར་འགྱུར་རོ། །ཁ་ནི་བསྐ་དང་ཁ་མངར་བྲོ། །རླུང་སོགས་གསུམ་དང་རིམ་བཞིན་སྦྱར། །ཞེས་བྱ་བ་ལ། རླུང་ལ་སོགས་པ་
ལས་ཡི་ག་འཆུས་པ་ལས་གྱུར་པའི་མཚན་མ་ནི་རིམ་བཞིན་ཁ་བསྐ་བ་ལ་སོགས་པར་འགྱུར་ཏེ། རླུང་ལས་གྱུར་པས་ནི་ཁ་བསྐ་བར་འགྱུར་རོ། །མཁྲིས་པ་ལས་གྱུར་བས་ནི་ཁ་ཁ་བར་འགྱུར་རོ། །བད་ཀན་ལས་གྱུར་པས་ནི་ཁ་མངར་བར་འགྱུར་རོ། །ཀུན་ལས་
གྱུར་པ་རོ་བྲོ་མེད། །ཅེས་བྱ་བ་ལ། ནད་གཞི་ཐམས་ཅད་འདུས་པ་ལས་གྱུར་པའི་ཡི་ག་འཆུས་པ་ནི་རོ་བྲོ་བ་མེད་པ་སྟེ། དྲི་ང་བ་ཡོད་མེད་ཀྱི་ངེས་པ་འདི་ལྟར་བྲོ་ཞེས་བྱ་བར་བརྡ་སྤྲོད་མི་ནུས་སོ། །མྱ་ངན་ཁྲོ་སོགས་ནད་ཇི་བཞིན། །ཞེས་བྱ་བ་ལ། མྱ་ངན་དང་
ཁྲོ་བ་ལ་སོགས་པ་ལས་གྱུར་པའི་ཡི་ག་འཆུས་པ་ལ་ནི་ནད་ཇི་ལྟ་བ་ཉིད་ལས་མི་འདའ་བ་ཡིན་ཏེ། རོ་བསྐ་བ་ལ་སོགས་པ་གང་ཡང་རུང་བ་དང་ལྡན་པ་ཡིན་ནོ། །དེ་ལ་མྱ་ངན་དང་འཇིགས་པས་གདུང་བའི་ཡིད་ལས་ནི་རླུང་འཁྲུགས་པར་འགྱུར་ཞིང་བསྐ་བ་ཡིན་ནོ། །
ཁྲོ་བ་ལས་གྱུར་པས་མཁྲིས་པ་སྐྱེད་པར་འགྱུར་བ་ཡིན་པས་ཁ་བ་ཡིན་ནོ། །འདོད་པས་གདུང་བ་ལས་ནི་བད་ཀན་འཁྲུགས་པས་མངར་བ་བྲོ་བ་ཡིན་ནོ། །སློན་བྲོ་ནད་གཞི་སྣ་རེ་ཀུན། །མི་སྡུག་ཡུལ་ལས་བྱུང་ལྔ་བ། །ཞེས་བྱ་བ་ལ། སློན་བྲོ་བ་ནི་རྣམ་པ་ལྔ་སྟེ།
ནད་གཞི་གསུམ་སྣ་རེ་ལས་བྱུང་བ་གསུམ་དང་། ཀུན་འདུས་པ་ལས་བྱུང་བ་གཅིག་དང་། མི་སྡུག་པའི་དོན་ནམ་ཡུལ་ཡིད་དུ་མི་འོང་བའི་ཡུལ་ལམ་དོན་གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་ལས་བྱུང་བ་ནི་ལྔ་པ་ཡིན་ནོ། །འདི་དག་སྟོད་དུ་རྒྱུ་བའི་རླུང་། །
འཁྲུགས་པས་ནད་ནི་ཐམས་ཅད་ཕུལ། །ཞེས་བྱ་བ་ལ། ཡི་ག་འཆུས་པ་འདི་དག་ནི་སྟོད་དུ་རྒྱུ་བ་ཞེས་བྱ་བའི་རླུང་འཁྲུགས་ཤིང་རང་གི་ཐ་མལ་པའི་རང་བཞིན་ལས་གཞན་དུ་གྱུར་པ་དེས་བད་ཀན་དང་མཁྲིས་པ་ལ་སོགས་པའི་ནད་ཐམས་ཅད་གྱེན་དུ་སློང་ཞིང་སྟོད་དུ་

ཕུལ་བས་ནམ་ཚོང་ཡན་ཆད་ནས་ཁའི་བར་དུ་ཁྱབ་པར་བྱེད་པ་ཡིན་ནོ། །དེ་རྣམས་བ་སློངས་ན་ཁ་ཚ་བྲོ། །མཆིལ་མང་ཡི་ག་འཆུས་སྔོན་བྱུང་། །ཞེས་བྱ་བ་ལ། སློན་བྲོ་བ་དེ་རྣམས་ལ་ནི་ནད་སློང་ཞིང་བསློངས་ནས་ཁ་ཚ་བྲོ་བ་ལ་སོགས་པ་སྔར་
བྱུང་བ་ཡིན་པས་ན། སྔོན་བྱུང་བ་སྟེ་འདི་དག་ནི་ནད་ཀྱི་སྔར་བྱུང་བའི་ཚུལ་ཡིན་ནོ་ཞེས་བྱ་བའི་དོན་ཡིན་ནོ། །རླུང་གྱུར་ལྟེ་བ་རྒྱབ་ཏུ་ཟུག །རྩིབ་ལོགས་ན་ཞིང་ཟས་སློན་ནས། །ཅུང་ཟད་འབྱུང་ཞིང་ཆད་པ་དང་། །རོ་བསྐ་ལྦུ་བ་ཅན་དུ་སྐྱུག །སྒྲེགས་པའི་སྒྲ་བཅས་
མདོག་གནག་ལ། །སླ་ཞིང་འབྱུང་དཀའ་སྒྲ་དང་བཅས། །ལུད་པ་ཁ་སྐམ་ཀླད་སྙིང་ན། །སྐད་འགགས་པ་དང་ཁོང་སྙོམ་བཅས། །ཞེས་བྱ་བ་ལ། རླུང་ལས་གྱུར་པའི་སློན་བྲོ་བ་ནི་ལྟེ་བ་དང་རྒྱབ་ཀྱི་ཕྱོགས་ན་ཞིང་ཟུག་པ་དང་། རྩིབ་ལོགས་གཟེར་བ་དང་། སྐྱུག་
པ་ཁ་ཟས་གྱེན་དུ་འབྱུང་བ་དང་། དེའི་འོག་ཏུ་ཅུང་ཟད་འབྱུང་ཞིང་བར་བར་དུ་ཆད་པའི་ཚུལ་གྱིས་རོ་བསྐ་བའི་རྣམ་པ་ལས་ལྦུ་བ་ཅན་སྐྱུག་པར་འགྱུར་རོ། །སྒྲེགས་པ་སྒྲ་དང་བཅས་པར་འབྱུང་བ་དང་། ཁ་དོག་གནག་པ་དང་། སླ་ཞིང་དྭངས་པར་འབྱུང་བ་དང་།
འབྱུང་བར་དཀའ་ཞིང་སྒྲ་དང་བཅས་པར་འབྱུང་བ་དང་། དེ་བཞིན་དུ་ལུད་པ་ལ་སོགས་པ་དང་བཅས་པར་འགྱུར་རོ། །མཁྲིས་གྱུར་ཐལ་ཆུ་འདྲ་བ་ལ། །དུད་ཁ་ལྗང་སྔོན་མདོག་སེར་སྐྱུག །ཁྲག་བཅས་རོ་སྐྱུར་ཚ་ཞིང་དྲོ། །སྐོམ་དད་བརྒྱལ་ཚ་གདུང་བཅས་ཡིན། །
ཞེས་བྱ་བ་ལ། མཁྲིས་པ་ལས་གྱུར་པའི་སློན་བྲོ་བ་ནི་ཐལ་ཆུ་དང་འདྲ་བར་འབྱུང་ཞིང་ཁ་དོག་དུད་ཁར་གནས་པའམ། དུ་བ་ལྟར་ཚ་ཞིང་དཀུ་བའི་སྒྲེགས་པ་དང་བཅས་པ་ཁ་དོག་ལྗང་ཁུ་དང་སྔོན་པོ་དང་སེར་པོ་སྐྱུག་ཅིང་ཁྲག་དང་བཅས་པར་འབྱུང་ལ། རོ་ནི་སྐྱུར་བ་དང་ཚ་
བ་དང་ལྡན་ཞིང་དྲོ་བའི་བག་ཏུ་སློན་ལ་སྐོམ་པ་ལ་སོགས་པ་དང་ལྡན་པར་འགྱུར་རོ། །བད་ཀན་ལས་གྱུར་སྣུམ་པ་བསིལ། །ནལ་ནལ་པོར་འདུག་དྲ་བ་རིས། །རོ་མངར་ལན་ཚྭ་བྲོ་ཚབས་ཆེ། །ཆགས་ཤིང་བ་སྤུ་བརྩེ་བར་བྱེད། །གདོང་སྐྲང་ཁ་ནང་མངར་བ་བྲོ། །སྙོམ་ཞིང་སྙིང་ན་

ལུད་པ་ཅན། །ཞེས་བྱ་བ་ལ། བད་ཀན་ལས་གྱུར་པའི་སློན་བྲོ་བ་ནི་སྣུམ་བག་ཏུ་སློན་ཞིང་སྐྲང་པ་དང་། བད་ཀན་གྱི་རྒྱུན་ནལ་ནལ་པོར་འཛག་པ་དང་། སྐྱུག་པ་དྲ་བ་རིས་སམ་སྐར་ཁུང་གི་ཚུལ་དུ་གནས་པ་དང་། རོ་མངར་ཞིང་ལན་ཚྭ་བྲོ་བ་དང་། ཚབས་ཆེ་ཞིང་
མང་དུ་འབྱུང་བ་དང་། གྲེ་བར་ཆགས་ཤིང་འབྱར་བ་དང་། བ་སྤུ་པགས་པ་བརྩེ་ཞིང་རེག་མི་བཟོད་པ་དང་། གདོང་སྐྲང་བ་ལ་སོགས་པ་དང་ལྡན་པ་ཡིན་ནོ། །གསུམ་ཆར་ལས་བྱུང་རྟགས་ཀུན་ལྡན། །འཆི་ལྟས་ལས་བཤད་གང་དེ་སྤང་། །ཞེས་བྱ་བ་ལ། རླུང་
ལ་སོགས་པའི་ནད་གཞི་གསུམ་ཆར་ལས་བྱུང་བ་ནི་མཚན་ཉིད་ཐམས་ཅད་དང་ལྡན་པ་སྟེ། དེ་ནི་གསོར་མི་རུང་བས་སྤང་བར་བྱའོ། །ཡང་འཆི་ལྟས་ཀྱི་སྐབས་སུ་བཤད་པའི་སློན་བྲོ་བའི་ནད་ཤུགས་དྲག་པ་དང་། བཤང་གཅི་བྲོ་བ་ལ་སོགས་པ་དེ་ཡང་སྤང་བར་
བྱ་སྟེ་གསོར་མི་རུང་ངོ་། །རུལ་དང་མི་གཙང་བཙོག་པ་དང་། །སྐྱུག་བྲོ་མཐོང་དང་ཐོས་སོགས་ཀྱིས། །ཡིད་གདུངས་སྙིང་ལ་ཕོག་གྱུར་སློན། །མི་སྡུག་ཡུལ་ལས་བྱུང་བ་ཡིན། །ཞེས་བྱ་བ་ལ། རུལ་པ་ལ་སོགས་པའི་དངོས་པོ་མཐོང་བ་དང་ཐོས་པ་དང་མནམ་པ་
དང་ཟོས་པ་དང་རེག་པ་དང་ཡིད་ལ་བྱེད་པ་ལ་སོགས་པས་ཡིད་གདུངས་ཤིང་སེམས་བཅོམ་པར་འགྱུར་ལ། སྙིང་ལ་ཕོག་ཅིང་གནོད་པར་གྱུར་ནས། སློན་པ་གང་ཡིན་པ་དེ་ནི་མི་སྡུག་པའི་ཡུལ་ལས་བྱུང་བ་ཞེས་བྱ་བ་སྟེ། མངོན་པར་མི་འདོད་པའི་ཡུལ་དང་ཕྲད་
པ་ལས་བྱུང་བའོ། །ཡིད་མི་བདེ་སྐོམ་སྲིན་བེའུ་སྣབས། །རླུང་སོགས་ཉིད་ལ་གནས་པར་བརྟག །ཅེས་བྱ་བ་ལ། སྲིན་བུ་ལ་སོགས་པ་བཞི་པ་ནི་རླུང་ལ་སོགས་པ་སློ་ན་བྲོ་བ་གསུམ་པའི་མཚན་ཉིད་ཇི་ལྟ་བ་བཞིན་དུ་བརྟག་ཅིང་དཔྱད་ལ་ཤེས་པར་བྱའི། རླུང་ལ་
སོགས་པ་མེད་པར་དེ་རྣམས་འབྱུང་བར་མི་འགྱུར་རོ། །ཡིད་མི་བདེ་བ་ནི་སྦྲུམ་མ་ཟླ་གཉིས་ལོན་ཕན་ཆད་མངལ་བསལ་ནས་འབྱུང་བ་ལ་བྱའོ། །གཟེར་དང་འཕར་དང་སྙིང་ན་བ། །བྱེ་བྲག་ཏུ་ནི་སྲིན་བུའི་ནད། །སྲིན་བུའི་སྙིང་ནད་མཚན་མ་ལས། །དེ་ནི་ཤེས་པར་བྱ་བ་

ཡིན། །ཞེས་བྱ་བ་ལ། སྲིན་བུའི་ནད་ལས་སྐྱེས་པའི་སློན་བྲོ་བ་ནི་གཟེར་ལ་སོགས་པའི་ཁྱད་པར་བཤད་པ་ཡིན་ལ། དེ་བཞིན་དུ་སྲིན་བུའི་ནད་ཀྱི་མཚན་མ་མིག་གནག་པ་ལ་སོགས་པ་ལས་ཤེས་པར་བྱའོ། །སྙིང་ནད་ནད་ནི་རེ་རེ་འདུས། །སྲིན་བུ་ལས་
གྱུར་རྣམ་ལྔར་བཤད། །ཅེས་བྱ་བ་ལ། སྙིང་ནད་ནི་རླུང་མཁྲིས་པ་བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། སྲིན་བུ་ལས་གྱུར་པ་སྟེ། རྣམ་པ་ལྔ་ཡོད་པར་བཤད་དོ། །རླུང་གིས་ཤིན་ཏུ་ཟུག་ཅིང་ན། །གས་དང་གཤགས་པ་སྙམ་དུ་སེམས། །བཅོམ་
སྙམ་སེམས་ཤིང་སྐམ་ལ་རེངས། །སྙིང་ག་སྟོང་སྙམ་ཟག་པར་བྱེད། །རྒྱུ་མེད་ཞུམ་ཞིང་མི་དགའ་ལ། །འཇིགས་ཤིང་སྒྲ་ནི་མི་བཟོད་ཅིང་། །འཕར་ཞིང་འགྲེ་ལ་གཅུས་སྙམ་བྱེད། །རྨོངས་བག་དབུགས་ཐུང་གཉིད་ཆུང་འགྱུར། །ཞེས་བྱ་བ་ལ། རླུང་ལས་གྱུར་པའི་
སྙིང་ནད་ནི་སྙིང་དུ་ཟུག་ཅིང་གཟེར་བ་དང་། བཙུགས་པ་ལྟར་ན་བ་དང་། དེ་བཞིན་དུ་སྙིང་གས་པ་སྙམ་དུ་སེམས་ཤིང་ན་བ་དང་། ཚལ་པར་གཤགས་པ་སྙམ་དུ་སེམས་ཤིང་ན་བ་དང་། གྲུགས་པ་སྙམ་དུ་སེམས་པ་དང་། ཁོང་སྐམ་པར་གྱུར་པ་དང་། རེངས་
ཤིང་གང་བ་སྙམ་དུ་སེམས་པ་དང་། སྙིང་ག་སྟོང་ཞིང་མེད་པ་སྙམ་དུ་སེམས་པ་དང་། ཟག་ཅིང་གཡོས་ལ་སེམས་འཕྱོ་བ་དང་། རྒྱུ་མེད་པར་གློ་བུར་དུ་སེམས་ཞུམ་ཞིང་མི་དགའ་སྟེ་མྱ་ངན་དུ་བྱེད་པ་དང་། འཇིགས་ཤིང་དངངས་པ་དང་། སྒྲ་མི་བཟོད་ཅིང་ཚིག་
ཐོགས་པ་ལ་སོགས་པ་ལ་འཁྲུལ་པ་དང་། འཕར་ཞིང་འགུལ་བ་དང་། ས་ལ་འགྲེ་ཞིང་ལྡོག་པ་དང་། སྙིང་གཅུས་པ་སྙམ་དུ་དུང་དུང་པོར་ན་བ་དང་། རྨོངས་བག་ཏུ་གྱུར་ཅིང་མི་དྲན་པ་དང་། དབུགས་ཐུང་ཞིང་འཚུབས་པ་དང་། གཉིད་ཆུང་ཞིང་ཡར་བ་སྟེ་མཚན་
ཉིད་དེ་དག་དང་ལྡན་པར་འགྱུར་རོ། །མཁྲིས་གྱུར་སྐོམ་དད་མགོ་འཁོར་བརྒྱལ། །ཚ་རྔུལ་སྙིང་སྐྱུར་ལུས་སྙོམ་བྱེད། །མཁྲིས་པ་སྐྱུར་བ་སློན་པར་བྱེད། །དུད་པ་ཁར་སོང་སེར་རིམས་འདེབས། །ཞེས་བྱ་བ་ལ། མཁྲིས་པ་ལས་གྱུར་པའི་སྙིང་ནད་ལ་ནི་སྐོམ་དད་ལ་

སོགས་པ་འབྱུང་བར་འགྱུར་རོ། །སྙིང་ག་སྐྱུར་བ་དང་ཚ་ཞིང་སྒྲེགས་པར་སྐྱུར་བའོ། །བད་ཀན་ལས་གྱུར་སྙིང་ག་རེངས། །ཁོང་ན་རྡོ་བཅུག་ལྟ་བུར་ལྕི། །དྲོད་ཉམས་མཆིལ་མང་ལུད་པ་ལུ། །གཉིད་ཆེ་སྙོམ་རིམས་ཡི་ག་འཆུས། །ཞེས་བྱ་བ་ལ། བད་ཀན་ལས་གྱུར་བའི་སྙིང་
ནད་ལ་ནི་སྙིང་ག་རེངས་ཤིང་མི་འགུལ་བར་ན་བ་དང་། ཁོང་ན་རྡོ་བཅུག་པ་ལྟར་སེམས་ཤིང་ནང་ན་རྡོ་ཡོད་པ་ལྟ་བུར་ལུས་ལྕི་བ་དང་། དེ་བཞིན་དུ་མེ་དྲོད་ཉམས་པ་ལ་སོགས་པ་འབྱུང་བར་འགྱུར་རོ། །ཉེས་གསུམ་མཚན་ཉིད་ཐམས་ཅད་ལྡན། །ཞེས་བྱ་བ་ལ།
རླུང་དང་བད་ཀན་དང་མཁྲིས་པ་གསུམ་འདུས་པ་ལས་བྱུང་བའི་སྙིང་ནད་ནི་དེ་གསུམ་ཆར་གྱི་མཚན་ཉིད་ཐམས་ཅད་དང་ལྡན་པར་འགྱུར་རོ། །སྲིན་བུས་མིག་ནི་གནག་པ་དང་། །མུན་པར་ཞུགས་སྙམ་བྱེད་སྙིང་འཕར། །ལུས་སྐམ་གཡའ་ཞིང་བད་ཀན་འཛག །
འདི་ནི་རྟག་ཏུ་སོག་ལེ་ཡིས། །སྙིང་ལ་འདྲུད་པ་ལྟ་བུར་སེམས། །མི་བཟད་ནད་དེས་མྱུར་གསོད་པས། །དེ་ནི་རིངས་པར་གསོ་བར་བྱ། །ཞེས་བྱ་བ་ལ། སྲིན་བུ་ལས་གྱུར་པའི་སྙིང་ནད་ནི་མིག་གནག་པར་གྱུར་པ་དང་། མུན་པའི་ནང་དུ་ཞུགས་པ་ལྟར་མུན་
འཐིབས་ཞེས་བྱེད་པ་དང་། སྙིང་འཕར་ཞིང་བརྒལ་བ་དང་། ལུས་སྐམ་ཞིང་ཤ་ཟད་པ་དང་། ཁ་ནས་བད་ཀན་ལྗན་ལྗིན་འཛག་པ་དང་། ཡང་རྟག་ཏུ་སྙིང་ལ་སོག་ལེས་འདྲུད་ཅིང་གཤགས་པ་ལྟ་བུར་སེམས་ཏེ། སྲིན་བུ་སྙིང་ན་བ་ཞེས་བྱ་བའི་ནད་མི་བཟད་པ་
དེས་ནི་མྱུར་དུ་གསོད་ཅིང་འཆི་བར་བྱེད་པས་རིང་ཞིང་མྱུར་བར་གསོ་བར་བྱ་སྟེ། གནད་ཆེན་པོ་སྙིང་ཞེས་བྱ་བ་འབུས་ཟོས་པ་ནི་བསད་པ་ཆེན་པོ་སྐྱེད་པར་བྱེད་པ་ཡིན་པའི་ཕྱིར་རོ། །དེ་ལྟར་སྙིང་ནད་ཀྱི་མཚན་ཉིད་བཤད་ནས། ད་སྐོམ་དད་ཀྱི་ནད་བཤད་པར་བྱ་སྟེ།
སྐོམ་དད་རླུང་མཁྲིས་བད་ཀན་དང་། །འདུས་པ་དྭངས་མ་ཟད་པ་དང་། །ནད་འདྲེས་པ་ལས་དྲུག་ཏུ་འགྱུར། །ཞེས་བྱ་བ་ལ། རླུང་ལ་སོགས་པའི་དབྱེ་བས་སྐོམ་དད་རྣམ་པ་དྲུག་ཡོད་དོ། །ནད་དང་འདྲེས་པ་ནི་རིམས་ལ་སོགས་པ་ནད་གཞི་གཞན་དང་འདྲེས་པའི་རྐྱེན་

ལས་སྐོམ་དད་དུ་གྱུར་པའོ། །དེ་ལྟར་གྱུར་པ་ཐམས་ཅད་ལ། །རླུང་མཁྲིས་གཉིས་ནི་རྒྱུ་ཡིན་ཏེ། །ཞེས་བྱ་བ་ལ། དེ་ལྟར་སྐོམ་དད་ཐམས་ཅད་ལྡང་ཞིང་འབྱུང་བའི་རྒྱུ་ནི་རྣམ་པ་གཉིས་ཏེ། མཁྲིས་པ་དང་རླུང་ཡིན་པར་ཤེས་པར་བྱའོ། །དེ་འཁྲུགས་
ལུས་ཟུངས་བསིལ་བ་ནི། །སྐམས་ནས་ལྡང་བར་འགྱུར་བ་ཡིན། །ལུས་ཀུན་འདར་ཞིང་མགོ་འཁོར་ཚ། །སྐོམ་དད་ཁོང་ཚ་རྨོངས་པར་བྱེད། །ཅེས་བྱ་བ་ལ། རླུང་དང་མཁྲིས་པ་དེ་དག་ལྡང་ཞིང་འཁྲུགས་པར་འགྱུར་བ་ནི་ལུས་ཟུངས་བསིལ་བ་སྟེ། དྭངས་མའམ་
བད་ཀན་སྐམས་ནས་ལྡང་ཞིང་འབྱུང་བར་འགྱུར་ལ། རླུང་དང་མཁྲིས་པ་འཁྲུགས་པར་བྱེད་པ་དེ་ཡང་ལུས་ཐམས་ཅད་འདར་ཞིང་མགོ་འཁོར་བ་ལ་སོགས་པ་བྱེད་པ་ཡིན་པར་ཤེས་པར་བྱའོ། །ལྕེ་དྲུད་མགུལ་བ་གློ་བ་དང་། །སྐམ་དང་སྐོམ་འཐུངས་རྒྱུ་བ་དང་། །
སྐམ་པས་སྐོམ་དད་སྐྱེ་བར་འགྱུར། །ཞེས་བྱ་བ་ལ། སྐོམ་དད་ཐམས་ཅད་ནི་ལྕེ་དྲུད་པ་ལ་སོགས་པ་སྐམ་ནས་འབྱུང་བ་ཡིན་པར་ཤེས་པར་བྱའོ། །དེ་རྣམས་ཀྱི་ནི་སྤྱི་མཚན་ཉིད། །ཁ་སྐམ་སྐོམ་གྱིས་མི་ངོམས་དང་། །ཟས་ལ་མི་དགའ་སྐད་འགགས་དང་། །གྲེ་བ་
ལྕེ་མཆུ་རྩུབ་པར་འགྱུར། །ལྕེ་འབྱིན་བྱེད་ཅིང་ཁོང་སྙོམ་ལ། །བླ་ཞིང་སེམས་ནི་མྱོས་པ་དང་། །དེ་བཞིན་སྐོམ་གདུངས་ནད་དུ་འགྱུར། །ཞེས་བྱ་བ་ལ། སྐོམ་དད་དེ་རྣམས་ཀྱི་སྤྱིའི་མཚན་ཉིད་དེ་ཐུན་མོང་གི་མཚན་ཉིད་དེ་སྐམས་པ་ནས་སྐོམ་དད་དུ་གྱུར་པའི་བར་གྱིས་
བསྟན་པ་ཡིན་པར་ཤེས་པར་བྱའོ། །དེ་ལ་སྐོམ་གྱིས་གདུངས་པའི་ནད་ནི་ནད་མི་འབྱུང་བར་བྱ་བའི་ལེའུ་ལས་བཤད་པ་ཡིན་ནོ། །ལུས་སྐམས་རྨྱ་ཞིང་འོན་པ་དང་། །རྨོངས་བག་མགོ་འཁོར་སྙིང་ནད་དེ། །འདི་ལྟ་བུ་ཡི་ནད་རྣམས་ནི། །སྐོམ་པས་གདུངས་ལས་སྐྱེ་བར་
འགྱུར། །ཞེས་བྱ་བ་ལ། ཡང་སྐོམ་དད་ཀྱིས་གདུངས་པ་ལས་ལུས་སྐམས་པ་ལ་སོགས་པའི་ནད་རྣམས་ཀྱང་སྐྱེ་བར་འགྱུར་རོ། །རླུང་གྱུར་ཁོང་རྨྱ་ཉམ་ཆུང་ལ། །མུར་འགྲམ་ཟུག་ཅིང་ཀླད་པ་འཁོར། །སྣ་ལྕེས་དྲི་དང་རོ་མི་ཚོར། །འོན་ཞིང་གཉིད་མེད་ཉམས་སྟོབས་

ཟད། །ཆུ་གྲང་འཐུངས་ན་སྐོམ་འཕེལ་འགྱུར། །ཞེས་བྱ་བ་ལ། སྐོམ་དད་ཀྱིས་གདུངས་པ་ལུས་སྐམས་པ་ལ་སོགས་པའི་ནད་རྣམས་ཀྱང་སྐྱེ་བར་འགྱུར་རོ། །རླུང་ལས་གྱུར་པའི་སྐོམ་དད་ནི་ཁོང་རྨྱ་བ་ལ་སོགས་པར་འགྱུར་ཏེ།ཚིག་གི་དོན་ནི་གོ་བར་ཟད་དོ། །
མཁྲིས་པ་ཁ་ནང་རོ་ཁ་བརྒྱལ། །མངར་པོར་མཐོང་ཞིང་རྟག་པར་ནི། །ཁ་སྐམ་ཁོང་ཚ་དབུགས་མནམ་པའོ། །ཞེས་བྱ་བ་ལ། མཁྲིས་པ་ལས་གྱུར་པའི་སྐོམ་དད་ནི་ཁའི་ནང་གི་རོ་ཁ་བ་ནས་དབུགས་མནམ་པའི་བར་དུ་འགྱུར་རོ། །བད་ཀན་ལྡང་བས་སྐོམ་རྒྱུའི་
རྩ། །བཀག་པས་རླུང་ནི་འཁྲུགས་གྱུར་ནས། །དེ་ཚེ་དེ་ཡིས་བད་ཀན་ནི། །འདམ་བཞིན་དེ་ཡིས་སྐེམ་པར་བྱེད། །མགུལ་པ་གྲ་མས་གང་སྙམ་སེམས། །གཉིད་ཆེ་ཁ་ནང་མངར་བར་བྲོ། །ལྟོ་བ་མགོ་བོ་ཚོར་བ་ཆུང་། །རྨོངས་བག་སློན་གྱུར་ཡི་ག་འཆུས། །
ལུས་སྐམ་ཁ་ཟས་མི་འཇུའོ། །ཞེས་བྱ་བ་ལ། བད་ཀན་འཁྲུགས་ཤིང་ལྡང་བས་ཆུ་རྒྱུ་བར་བྱེད་པའི་རྩ་སྒོ་རྣམས་སུ་རླུང་རྒྱུ་བ་བཀག་ཅིང་གཡོགས་པ་དང་། དེའི་ཚེ་རླུང་དེས་བད་ཀན་དེ་སྐམ་པར་བྱེད་པ་ནི་འདམ་ལྟར་སྐེམ་པར་བྱེད་དོ། །དཔེར་ན་ཕྱིའི་རླུང་གིས་
འདམ་སྐེམ་པར་བྱེད་པ་བཞིན་དུ་རླུང་གིས་བད་ཀན་སྐེམ་པར་བྱེད་དེ། དེ་ནས་བད་ཀན་སྐམས་པས་མགུལ་པ་གྲ་མས་གང་བ་སྙམ་དུ་སེམས་ཤིང་ཚལ་རྩུབ་པར་འགྱུར་རོ། །གཞན་ཡང་གཉིད་ཆེ་ཞིང་ཁའི་ནང་མངར་བར་བྲོ་བར་འགྱུར་བ་ལ་སོགས་པའི་མཚན་ཉིད་
རྣམས་ཀྱང་འབྱུང་བར་འགྱུར་རོ། །ཀུན་ལས་གྱུར་པ་རྟགས་ཀུན་ལྡན། །ཞེས་བྱ་བ་ལ། ནད་གཞི་གསུམ་ཆར་གྱིས་བསྐྱེད་པའི་སྐོམ་དད་ནི་འདུས་པའི་མཚན་ཉིད་ཐམས་ཅད་དང་ལྡན་པར་འགྱུར་རོ། །བེའུ་སྣབས་ལས་གྱུར་ཁ་ཟས་ནི། །མིད་དཀའ་རླུང་མཁྲིས་
ལས་གྱུར་ཡིན། །ཞེས་བྱ་བ་ལ། བེའུ་སྣབས་ལས་གྱུར་པའི་སྐོམ་དད་ནི་ཁ་ཟས་མིད་པར་དཀའ་ཞིང་ཐོགས་པར་འགྱུར་བ་དེ་ལས་ནི་མཁྲིས་པ་དང་རླུང་ལས་གྱུར་པའི་མཚན་ཉིད་དང་ལྡན་པར་འགྱུར་རོ། །ཚ་བས་ངལ་བས་འཕྲལ་དུ་ན། །ཆུ་གྲང་བསྟེན་གྱུར་སྐོམ་དད་

ཆེ། །ཁོང་པར་ཚ་བ་བསྡུས་པ་ཡིན། །སྐོམ་དད་དེ་ནི་མཁྲིས་སྐྱེས་ཡིན། །ཞེས་བྱ་བ་ལ། སྐྱེས་བུ་ཚ་བས་ངལ་ཞིང་དུབ་པར་གྱུར་ལ། དེ་འཕྲལ་དུ་དེའི་མོད་ལ་ཆུ་གྲང་བསྟེན་ཞིང་ཁྲུས་ལ་སོགས་པ་བྱས་པས། ཕྱི་རོལ་གྱི་ཚ་བ་ཁོང་པའི་ནང་དུ་
བསྡུས་ཏེ། དེའི་དབང་གིས་སྐོམ་དད་སྐྱེས་པ་གང་ཡིན་པ་དེ་ནི་མཁྲིས་པ་ལས་སྐྱེས་པ་འབྱུང་བ་ཡིན་ནོ། །གང་ཡང་ཆང་དྲགས་མེ་དྲོད་རྣོ། །སྣུམ་ཟོས་སྐྱེས་པའང་མཁྲིས་འབྱུང་ཡིན། །ཞེས་བྱ་བ་ལ། ཡང་སྐོམ་དད་གང་ཆང་མང་དུ་འཐུངས་ཤིང་དྲགས་པ་ལས་
གྱུར་པ་དེ་ཡང་མཁྲིས་པ་ལས་གྱུར་པ་ཉིད་ཡིན་པར་ཤེས་པར་བྱའོ། །ཡང་དེ་བཞིན་དུ་མེ་དྲོད་རྣོ་ཞིང་ཤས་ཆེ་བ་ལས་སྣུམ་ཟོས་པ་ལས་བྱུང་བའི་སྐོམ་དད་དེ་ཡང་མཁྲིས་པ་ལས་བྱུང་བར་ཤེས་པར་བྱའོ། །སྣུམ་ཞིང་སྐྱུར་དང་ལན་ཚྭའི་བག །ཟོས་པས་བད་ཀན་
ལས་སྐྱེས་འགྱུར། །ཞེས་བྱ་བ་ལ། ཁ་ཟས་སྣུམ་བག་ལ་སོགས་པ་ཟོས་པ་ལས་སྐོམ་དད་སྐྱེས་པ་ནི་བད་ཀན་ལས་བྱུང་བ་ཡིན་པར་ཤེས་པར་བྱའོ། །ཟད་བྱེད་ལས་ནི་སྐོམ་དད་འགྱུར། །དྭངས་མ་ཟད་དང་མཚན་ཉིད་འདྲ། །ཞེས་བྱ་བ་ལ། ཟད་བྱེད་ལས་སྐོམ་དད་དུ་
གྱུར་པ་གང་ཡིན་པ་དེ་ནི་དྭངས་མ་ཟད་པའི་མཚན་ཉིད་དེ། དྭངས་མ་ཟད་ནས་རྩུབ་ལ་སྐེམ། །ཉམ་ཆུང་སྒྲ་ནི་ཞེས་བྱ་བ་སྨོས་པ་ཡིན་པས་འདི་ཉིད་ལས་ཤེས་པར་བྱའོ། །ཁོང་སྐམ་གཅིན་ནད་རིམས་ནད་སོགས། །ཡུན་རིང་ནད་ནི་རིམས་སྐོམ་ནད། །གང་ཞིག་སྐོམ་དད་མི་
བཟད་སྐྱེས། །དེ་ནི་འདྲེས་ལས་བྱུང་བར་བཤད། །ཅེས་བྱ་བ་ལ། ཁོང་སྐམ་པ་ལ་སོགས་པ་དང་འདྲེས་པ་དང་སྐོམ་དད་གང་མི་བཟད་ཅིང་བརྣག་པར་དཀའ་བ་སྐྱེས་པ་དེ་ནི་འདྲེས་པ་ལས་བྱུང་བའི་མཚན་ཉིད་ཅན་ཡིན་པར་དྲང་སྲོང་རྣམས་ཀྱིས་བཤད་དོ། །ཡན་ལག་
བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ནད་གཞིའི་གནས་ཀྱི་ལེའུ་ལྔ་པའི་རྣམ་པར་འགྲེལ་པའོ།། །།དེ་ནས་ཆང་ནད་ཀྱི་ནད་གཞི་བཤད་པར་བྱའོ། །

ཞེས་བྱ་བ་ལ། རླུང་ལ་སོགས་པ་ལྡང་ཞིང་འཁྲུགས་པའི་གཞི་གཅིག་པ་དང་། ཉེས་པ་གསུམ་ལས་བྱུང་བར་ཚུལ་མཐུན་པས་གཅོང་ཆེན་པོའི་འོག་ཏུ་འདི་བརྩམས་པ་ཡིན་ནོ། །ཆང་གི་ནད་དུ་གྱུར་པས་ན་ཆང་གི་ནད་དམ། ཆང་ལས་མྱོས་པ་ལ་སོགས་པའི་
ཉེས་པར་གྱུར་པས་ན་ཆང་ནད་དེ། མྱོས་པའི་རྒྱུ་ལས་བྱུང་བའི་ནད་ཅེས་བྱ་བའི་དོན་ནོ། །དེ་ཡང་མྱོས་པ་ནི་སེམས་དང་ལུས་ཟུངས་འགྱུར་བར་བྱེད་པ་ཡིན་ལ། དེ་ཡང་ཆང་ལ་སོགས་པས་མྱོས་པར་གྱུར་པས་ན། དེའི་རྒྱུ་ནི་ཆང་ཡིན་པར་བཤད་དོ། །རྣོ་དང་དྲོད་
ཆེ་རྩུབ་དྲག་སྐྱུར། །ཉལ་པོ་འདོད་མྱུར་བྱེད་དང་ཡང་། །གསལ་དང་དང་བར་བྱེད་པར་བཤད། །མདངས་ནི་འདི་ལས་གོ་བཟློག་ཡིན། །ཞེས་བྱ་བ་ལ། ཆང་ནི་རྣོ་བ་ལ་སོགས་པ་ཡོན་ཏན་བཅུ་དང་ལྡན་པར་བཤད་ལ། མདངས་ནི་ཆང་གི་ཡོན་ཏན་ཇི་སྐད་དུ་བཤད་པ་འདི་
ལས་གོ་བཟློག་པའི་ཡོན་ཏན་དང་ལྡན་པ་ཡིན་ཏེ། རྔུལ་བ་དང་གྲང་བ་དང་སྣུམ་པ་དང་རགས་པ་དང་མངར་བ་དང་བརྟན་པ་དང་། ཡུན་རིང་པོར་བྱེད་པ་དང་། ལྕི་བ་དང་། འཇམ་པ་དང་། འབྱར་བག་ཅན་ཡིན་ནོ། །དུག་ཀྱང་རྣོ་སྩོགས་ཡིན་མོད་ཀྱིས། །སེམས་ལ་
གནོད་པར་བྱེད་པ་ཡིན། །ནུས་པས་འཆི་བར་བྱེད་པས་ན། །དུག་ནི་ལྷག་པར་མཐུ་ཆེའོ། །ཞེས་བྱ་བ་ལ། ཆང་གི་ཡོན་ཏན་རྣོ་བ་ལ་སོགས་པ་བཅུ་པོ་འདི་དག་ནི་ཆང་འབའ་ཞིག་ཏུ་མ་ཟད་ཀྱི་དུག་ལའང་ཡོད་མོད་ཀྱི། དེའི་ཁྱད་པར་ནི་སེམས་ལ་ལྷག་པར་གནོད་
ཅིང་འཁྲུལ་པར་བྱེད་པའི་རང་བཞིན་ཅན་གྱི་ནུས་པ་དུག་ལ་ཡོད་པས་ན། གང་གིས་འཆི་བར་བྱེད་པར་འགྱུར་བ་དེ་ལྟ་བུའི་ནུས་པ་དུག་ལ་ཡོད་པའི་ཕྱིར། དུག་གི་ནུས་པ་ཆང་བས་ལྷག་པར་མཐུ་ཆེ་ཞིང་ནུས་པ་ལྷག་པ་ཡིན་ནོ། །ཆང་ནི་རྣོ་སོགས་ཡོན་ཏན་གྱི། །
མདངས་ཀྱི་ཡོན་ཏན་རྟུལ་ལ་སོགས། །བཅུ་པོ་བཅུ་ཡིས་འཁྲུགས་བྱས་ནས། །སེམས་ནི་སྒྱུར་བར་བྱེད་པ་ཡིན། །ཞེས་བྱ་བ་ལ། ཆང་གི་ཡོན་ཏན་རྣོ་བ་ལ་སོགས་པ་བཅུས་མདངས་ཀྱི་ཡོན་ཏན་རྟུལ་བ་ལ་སོགས་པ་བཅུ་པོ་ཟིལ་གྱིས་མནན་ཞིང་འཁྲུགས་པར་བྱས་ཤིང་

ཀུན་དུ་དཀྲུགས་ནས་སེམས་སྒྱུར་ཞིང་རྣམ་པ་གཞན་དུ་གྱུར་པར་བྱེད་པ་ཡིན་ནོ། །ར་རོ་དང་པོ་གཉིས་པ་ཡིས། །བག་མེད་པ་ཡི་གནས་ལ་གནས། །རྣམ་རྟོག་ངན་འཇོམས་རྨོངས་པ་རྣམས། །བདེ་བ་ཡིན་སྙམ་སེམས་པར་འགྱུར། །ཞེས་བྱ་བ་
ལ། ར་རོ་བའི་ཤུགས་དང་པོ་དང་ར་རོ་བའི་ཤུགས་གཉིས་པས་ནི་བག་མེད་པའི་གནས་ལ་གནས་པ་སྟེ། བག་མེད་པའི་ཉེས་པར་སྤྱོད་པ་རྣམས་འབྱུང་བར་བྱེད་པའི་རྒྱུར་གྱུར་པ་ཡིན་ནོ། །དེ་ཉིད་ཀྱིས་ནི་རང་གི་རྣམ་རྟོག་ངན་པ་བཅོམ་ཞིང་སེམས་ཀྱི་ཀུན་དུ་རྟོག་
པས་བརླག་པར་གྱུར་པ་ཡིན་ལ། དེ་ཉིད་ནི་རྨོངས་པ་སྟེ། བྱ་བ་དང་བྱ་བ་མ་ཡིན་པ་མི་བྱེད་པ་སྟེ། དེ་རྣམས་ནི་ར་རོ་བའི་ཤུགས་དང་པོ་དང་། གཉིས་པའི་སྐབས་ལ་གནས་པས་ན། དེ་བདེ་བ་ཡིན་པར་ཤེས་ཤིང་ཤིན་ཏུ་བདེ་བ་ཁོ་ནར་འཛིན་གྱི། དེ་ལྟ་བུའི་
བདག་ཉིད་ཅན་གྱི་བདེ་བ་ཡིན་པར་ནི་མི་རྟོགས་སོ། །འདིར་བག་མེད་པ་ནི་ཚེ་ཕྱི་མའི་སྡུག་བསྔལ་གྱི་རྒྱུ་ལས་མི་དགེ་བ་རྣམས་འབྱུང་བའི་རྒྱུ་ལས་བྱ་ལ། དེ་འབྱུང་བའི་གནས་ལ་གནས་པ་ནི་ར་རོ་བའི་ཤུགས་དང་པོ་དང་གཉིས་པ་ལས་བྱུང་བ་ཡིན་ནོ་ཞེས་བྱ་བའི་དོན་ནོ། །
འབྲིང་དང་ཆེན་པོ་བར་གྱི་ཚེ། །རྡུལ་དང་མུན་པའི་རང་བཞིན་ཅན། །གླང་ཆེན་ལྕགས་ཀྱུ་མེད་པ་ལྟར། །རྨོངས་པས་མི་བྱ་ཅི་ཡང་མེད། །ཅེས་བྱ་བ་ལ། འབྲིང་དང་ཆེན་པོ་སྟེ་ར་རོ་བའི་ཤུགས་གཉིས་པ་དང་། གསུམ་པའི་བར་མཚམས་སུ་ཕྱིན་པའི་སྐྱེས་བུ་དེ་
རྡུལ་དང་མུན་པའི་རང་བཞིན་དུ་ཐོབ་པས་ན། མི་བྱ་བ་ཅི་ཡང་མེད་དེ་མི་དགེ་བ་ཐམས་ཅད་མི་བྱ་བ་ཅི་ཡང་མེད་དོ། །རྡུལ་དང་མུན་པའི་རང་བཞིན་ཅན། །སྨོས་པས་ནི་སྐྱེས་བུ་སྙིང་སྟོབས་ཅན་ནི་ནམ་མཁའ་ཡང་འདི་ལྟ་བུའི་གནས་སྐབས་ཅན་དུ་མི་འགྱུར་རོ་ཞེས་སྟོན་པ་
ཡིན་ནོ། །གླང་ཆེན་ལྕགས་ཀྱུ་མེད་པ་ལྟར། །ཞེས་བྱ་བ་བསྟན་པ་ནི་རང་དབང་ཅན་དུ་ཅི་དགར་སྤྱོད་པ་ཡིན་ཏེ། དཔེར་ན་གླང་པོ་ཆེ་མྱོས་པ་ལྕགས་ཀྱུ་མེད་པ་དག་ནི་མི་སྲུན་པའི་སྤྱོད་པ་ཐམས་ཅད་སྟོན་པར་བྱེད་པ་དང་འདྲ་བར་ར་རོ་བ་འབྲིང་དང་ཆེན་པོའི་བར་ཚིགས་སུ་

ཕྱིན་པ་ནི་སྐྱེས་བུ་རྨོངས་པ་སྡིག་པ་མི་དགེ་བའི་ལས་ཅི་ཡང་མི་བྱ་བ་མེད་དེ་ཐམས་ཅད་བྱེད་དོ་ཅེས་བྱ་བའི་དོན་ནོ། །འདི་ནི་ཁ་ན་མ་ཐོའི་གནས། །འདི་ནི་ཚུལ་ཁྲིམས་འཆལ་བའི་གཞི། །ཞེས་བྱ་བ་ལ། ར་རོ་བ་འབྲིང་དང་ཆེན་པོའི་བར་ཚིགས་ནི་ཁ་ན་མ་ཐོ་བ་སྟེ། སྨད་
པར་བྱ་བ་ཡིན་པས་བརྗོད་ཀྱིས་མི་ལང་བའི་སྡིག་པ་རྣམས་ཀྱི་གནས་དང་གཞི་ནི་འདི་དག་ཉིད་ཡིན་ནོ། །ཡང་འདི་ཉིད་ནི་ཚུལ་ཁྲིམས་འཆལ་ཞིང་བསླབ་པ་ཉམས་པའི་གནས་སམ་གཞི་ཡང་འདི་དག་ཡིན་ནོ། །འདི་གཅིག་ངན་འགྲོར་འགྲོ་བའི་ལམ། །མང་པོ་སྟོན་
པར་བྱེད་པ་ཡིན། །ཞེས་བྱ་བ་ལ། ར་རོ་བའི་གནས་སྐབས་ཀྱི་ཁྱད་པར་འདི་ཉིད་ནི་ངན་སོང་གསུམ་དུ་འགྲོ་བའི་ལམ་དུ་མའི་རྒྱུ་ཡིན་ཞིང་ལམ་མང་པོ་དེ་དག་ཏུ་ཁྲིད་ཅིང་སྟོན་པར་བྱེད་པའི་སློབ་དཔོན་ཡིན་ནོ། །ར་རོ་གསུམ་པའི་ཚེ་ན་ནི། །སེམས་མེད་པར་ནི་རོ་ལྟར་ཉལ། །
ཞེས་བྱ་བ་ལ། ར་རོ་བའི་ཤུགས་ཆེན་པོར་ཕྱིན་ཅིང་། དེ་ལ་གནས་པའི་ཚེ་ན་ནི་སེམས་མེད་པར་རོ་ལྟར་ཉལ་ཏེ། ཐོ་ཡོར་རམ། རྩིག་པའམ། མི་རོ་དང་འདྲའོ་ཞེས་བྱ་བའི་དོན་ནོ། །ཉེས་པའི་བདག་ཉིད་ཤི་བ་ལས། །ཤིན་ཏུ་མ་རུངས་གནས་སྐབས་ཐོབ། །ཅེས་བྱ་བ་ལ།
ཉེས་པའི་བདག་ཉིད་དེ་ཤི་བ་ལས་ཀྱང་ཆེས་ཐུ་བའི་མ་རུངས་པའི་གནས་སྐབས་ཐོབ་པར་འགྱུར་རོ། །ཆོས་དང་ཆོས་མིན་བདེ་དང་སྡུག །དོན་དང་དོན་མིན་ཕན་དང་གནོད། །གང་ལ་ཆགས་པ་མི་ཤེས་པ། །དེ་ལ་མཁས་པས་ཇི་ལྟར་བསྟེན། །ཞེས་བྱ་བ་ལ། གང་
ལ་ཆགས་ཤིང་མངོན་པར་ཞེན་ན་ཆོས་དང་ཆོས་མ་ཡིན་པ་ལ་སོགས་པ་ཤེས་ཤིང་རྟོགས་པར་མི་འགྱུར་བའི་ཆང་དེ་ལ་མཁས་པ་བློ་དང་ལྡན་པས་ཇི་ལྟར་བསྟེན་པར་བྱ་སྟེ། བསྟེན་པར་མི་བྱའོ་ཞེས་བྱ་བར་སྦྱར་རོ། །དེ་ལ་ཆོས་ནི་སྦྱིན་པ་གཏོང་བ་དང་། དཀོན་མཆོག་
མཆོད་པ་ལ་སོགས་པའོ། །ཆོས་མ་ཡིན་པ་ནི་སྲོག་གཅོད་པ་ལ་སོགས་པའི་སྡིག་པའི་ལས་བྱེད་པའོ། །བདེ་བ་ནི་མཐོ་རིས་ལ་སོགས་པའི་བདེ་བའོ། །སྡུག་བསྔལ་ནི་སེམས་ཅན་དམྱལ་བ་ལ་སོགས་པའོ། །དོན་ནི་རྒྱལ་པོའི་ཁྲིམས་སུ་བྱ་བའམ། དོན་དུ་བསྒྲུབ་པར་བྱའོ། །

དོན་མ་ཡིན་པ་ནི་གཞུང་ལུགས་འཆོལ་བའོ། །ཕན་པ་དང་གནོད་པ་ནི་བྱ་བ་དང་བྱ་བ་མ་ཡིན་པ་སྟེ། དེ་དག་གི་བྱེ་བྲག་མི་ཤེས་པའོ། །ཆང་ལས་མྱོས་འཇིགས་མྱ་ངན་དང་། །ཁྲོ་དང་སྲོག་དང་བྲལ་བ་ནས། །སྨྱོ་བྱེད་མྱོས་དང་བརྒྱལ་བར་
བཅས། །བརྗེད་བྱེད་བཅས་པ་ཀུན་སོང་ནད། །ཅེས་བྱ་བ་ལ། ཆང་ལ་ནི་མྱོས་པ་ལ་སོགས་པ་གནས་ཏེ། དེ་དག་གི་རྒྱུ་ཡིན་པའི་ཕྱིར་རོ། །ཀུན་སོང་ནད་ཅེས་བྱ་བ་ནི་འོག་ནས་བཤད་པའི་ནད་རོ་དང་འདྲ་བར་བྱེད་པ་སྟེ། མིང་གི་རྣམ་གྲངས་སུ་ན་ལྟུང་བར་བྱེད་
པ་ཞེས་ཀྱང་བྱའོ། །གང་དུ་དྲན་པ་ཉམས་གཅིག་ཡོད། །དེར་ནི་མི་དགེ་ཐམས་ཅད་འབྱུང་། །ཞེས་བྱ་བ་ལ། མང་དུ་སྨྲས་པས་ཅི་ཞིག་བྱ་སྟེ། གང་དུ་ཆང་གང་ལ་དྲན་པ་ཉམས་པ་གཅིག་པུ་ཡོད་པ་དེར་ནི། དངོས་པོ་གང་དང་གང་དག་ཡོད་པ་ཐམས་ཅད་
མི་དགེ་བའི་ཚུལ་ཐམས་ཅད་འབྱུང་ཞིང་ཆོས་མ་ཡིན་པ་ཉིད་དུ་འགྱུར་རོ། །མི་འཕྲོད་ཟས་ནི་ཟོས་པས་ཀྱང་། །ནད་དམ་ཡང་ན་འཆི་བར་འགྱུར། །ཞེས་བྱ་བ་ལ། གང་གི་ཕྱིར་མི་འཕྲོད་པའམ་མི་རིགས་པར་སྦྱར་བའི་ཟས་ཟོས་པས། ཟས་དེ་སྲོག་གི་རྟེན་ཡིན་
ཡང་ནད་ཉིད་སྐྱེད་པར་འགྱུར་བ་འམ། འཆི་བར་འགྱུར་བ་ཡིན་ན་ཆང་ལྟ་སྨོས་ཀྱང་ཅི་དགོས། ཆང་གི་སྡེ་ཚན་གསུམ་བློ་ལྡན། །ངོ་ཚ་སོགས་ཀྱང་འཇིག་པར་བྱེད། །ཅེས་བྱ་བ་ལ། གང་ཡང་ཆང་གི་ཉེས་དམིགས་ནི་ཤས་ཆེར་བསྟེན་པས་སྡེ་ཚན་གསུམ་ལ་སོགས་པ་
ཉམས་ཤིང་འཇིག་པར་བྱེད་པ་ཡིན་ཏེ། སྡེ་ཚན་གསུམ་ནི་སྐྱེས་བུས་བཙལ་བར་བྱ་བའི་ཆོས་དང་ནོར་འདོད་པའོ། །བློ་ནི་ཤེས་རབ་བོ། ཉམས་སྟོབས་ལྡན་དང་ཟས་ཟོས་དང་། །ཟས་ཆེར་ཟ་དང་སྣུམ་བག་ཟ། །སྙིང་སྟོབས་ལང་ཚོར་ལྡན་པ་དང་། །རྟག་ཏུ་ཆང་
འཐུང་དེའི་རིགས་སྐྱེས། །ཚིལ་དང་བད་ཀན་ཤས་ཆེ་ལ། །རླུང་དང་མཁྲིས་པ་ཤས་ཆུང་དང་། །མེ་དྲོད་ཆེ་ཞིང་བརྟན་པ་རྣམས། །ཤས་ཆེར་ར་རོར་མི་འགྱུར་རོ། །ཞེས་བྱ་བ་ལ། སྐྱེས་བུ་སྟོབས་དང་ལྡན་ཞིང་ཉམས་འཚག་བཟང་བ་དག་གིས་ཆང་འཐུངས་ན་ཤས་ཆེར་

ར་རོ་བར་མི་འགྱུར་ཞིང་དེའི་འགྱུར་བར་མི་སྐྱེའོ། །ཡང་དེ་བཞིན་དུ་ཁ་ཟས་ལེགས་པར་ཟོས་ཟིན་པའི་རྗེས་ལ་འཐུངས་པ་དང་། ཟས་ཆེར་ཟ་ཞིང་མང་དུ་ཟོས་པ་དང་། སྣུམ་བག་དང་ལྡན་པའི་ཁ་ཟས་ཟོས་པ་འམ། རང་བཞིན་གྱིས་སྙིང་སྟོབས་ཆེ་བ་དང་། ལང་ཚོ་དང་
ལྡན་ཞིང་དར་ལ་བབ་པ་དང་། རྟག་ཏུ་ཆང་འཐུངས་ཤིང་གོམས་པ་དང་། དེའི་རིགས་ལས་སྐྱེས་པ་སྟེ། ཆང་འཐུངས་ཤིང་སྲེད་པའི་རིགས་རྒྱུད་དུ་བྱུང་བ་དང་། བད་ཀན་དང་ཚིལ་གྱི་ཤས་ཆེ་ཞིང་མང་བ་དང་། རླུང་ངང་མཁྲིས་པ་ཤས་ཆེ་ཞིང་བརྟན་པ་སྟེ། དེ་
ཐམས་ཅད་ཀྱིས་ཆང་འཐུངས་སུ་ཟིན་ཀྱང་ར་རོ་བར་མི་འགྱུར་རོ། །དེ་ལས་བཟློག་པ་ཆང་དད་ཅན། །ཁྲོས་དང་ཆང་རྩུབ་སྐྱུར་ཤས་ཆེ། །མ་ཞུར་བཅས་དང་མང་འཐུངས་པ། །གང་ཡིན་ཤས་ཆེར་ར་རོར་འགྱུར། །ཞེས་བྱ་བ་ལ། དེ་ལྟར་ཇི་སྐད་བསྟན་པ་ལས་གོ་
བཟློག་པ་ཉམས་སྟོབས་ཆུང་བ་དང་། ཁ་ཟས་མ་ཟོས་པ་དང་། ཁ་ཟས་ཉུང་དུ་ཟོས་པ་དང་། རྩུབ་བག་ཟོས་པ་དང་། སྙིང་སྟོབས་ཆུང་བ་དང་། དར་ལ་བབ་པ་ལས་ཡོལ་བ་དང་། རྟག་ཏུ་ཆང་མི་འཐུང་བ་དང་། ཆང་འཐུངས་པའི་རིགས་སུ་མ་སྐྱེས་པ་དང་།
ཚིལ་དང་བད་ཀན་ཟད་པ་དང་། །རླུང་དང་མཁྲིས་པ་ཤས་ཆེ་བ་དང་། ཁོང་པའི་མེ་དྲོད་ཆུང་ཞིང་མི་བརྟན་པ་དག་གིས་ཆང་འཐུངས་ན་ཤས་ཆེར་ར་རོ་བར་འགྱུར། ཡང་དེ་བཞིན་དུ་ཆང་དད་ཅན་ཏེ་ཆང་ལ་སྲེད་ཅིང་ཡིད་རྟོན་པ་དང་ཁྲོས་ཤིང་འཁྲུགས་པ་དང་། ཆང་སྐྱུར་
ཞིང་རྩུབ་པ་ཤས་ཆེ་བ་དང་། དེ་བཞིན་དུ་ཆང་མ་ཞུ་བ་སྟེ། སྔ་དེ་ཞག་འཐུངས་པའི་ཆང་མ་ཞུ་བའི་རྗེས་ལ་འཐུངས་པ་དང་། དེ་བཞིན་དུ་ཤིན་ཏུ་མང་དུ་འཐུངས་པས་ཤིན་ཏུ་ར་རོ་བར་འགྱུར་རོ། །རླུང་མཁྲིས་བད་ཀན་ཀུན་ལས་བྱུང་། །ཆང་ནད་རྣམ་པ་བཞིར་
འགྱུར་རོ། །ཞེས་བྱ་བ་ལ། རླུང་ལ་སོགས་པའི་ནད་གཞི་རེ་རེ་དང་། ཀུན་འདུས་པ་ལས་གཅིག་སྟེ་ཆང་ནད་རྣམ་པ་བཞིར་འགྱུར་རོ། །ཀུན་ཀྱང་ཀུན་ལས་སྐྱེས་མོད་ཀྱི། །ཤས་ཆེ་བ་ལས་མིང་དུ་བཏགས། །ཞེས་བྱ་བ་ལ། ཆང་ནད་ཀུན་ཀྱང་ཉེས་པ་གསུམ་ཆར་

ལས་བྱུང་མོད། འོན་ཀྱང་ནད་གཞི་གང་དང་གང་ཤས་ཆེ་བ་དེ་དང་དེ་ལས་ཕྱེ་སྟེ་མིང་དུ་བཏགས་པ་ཡིན་ནོ། །དེ་རྣམས་ཀྱི་ནི་སྤྱི་མཚན་ཉིད། །རྨོངས་དང་སྙིང་ནི་ན་བ་དང་། །འཁྲུ་ཞིང་རྟག་ཏུ་སྐོམ་དད་ཆེ། །ཚ་གྲང་རིམས་འདེབས་
ཡི་ག་འཆུས། །མགོ་བོ་རྩིབ་རུས་ན་དང་འདར། །གནད་འཇིག་ལྟག་པ་ན་བ་དང་། །བརླ་རེངས་རབ་རིབ་ཁྱེར་བ་དང་། །ལུད་པ་དབུགས་མི་བདེ་གཉིད་མེད། །རྔུལ་ཆེར་འབྱུང་ཞིང་བཤང་བ་འགགས། །སྐྲང་ཞིང་སེམས་ནི་འཁྲུལ་བ་དང་། །བླ་ཞིང་སློན་པར་བྱེད་པ་
དང་། །མགོ་འཁོར་རྨི་ལམ་ངན་མཐོང་བའོ། །ཞེས་བྱ་བ་ལ། ཆང་ནད་དེ་རྣམས་ཀྱི་སྤྱིའི་མཚན་ཉིད་དེ་རྣམ་པར་དབྱེ་བ་མེད་པར་ཐུན་མོང་གི་རྟགས་ནི་འདི་དག་ཡིན་ནོ། །སེམས་རྨོངས་ཤིང་ཤིན་ཏུ་བླུན་བག་ཏུ་འགྱུར་བ་དང་། སྙིང་ན་ཞིང་འཕར་བ་དང་།
འཁྲུ་ཞིང་བཤང་བ་སླ་བ་དང་། རྟག་པར་རྒྱུན་མི་འཆད་པར་སྐོམ་དད་ཆེ་བ་དང་། རིམས་ཚ་བ་དང་གྲང་བའི་བག་དག་གིས་བཏབ་པར་འགྱུར་བའམ། ཡང་ན་ཚ་གྲང་སྟེ་མཁྲིས་པ་དང་བད་ཀན་གྱི་མཚན་ཉིད་དང་ལྡན་པར་འགྱུར་བ་དང་། མགོ་ལ་སོགས་པར་ན་བ་
དང་། ལུས་འདར་ཞིང་འགུལ་བ་དང་། གནད་རྣམས་འཇིག་ཅིང་འབྱེ་བ་སྙམ་དུ་སེམས་པ་དང་། ལྟག་པའི་ཕྱོགས་ན་ཞིང་ཟུག་པ་དང་། བརླ་རེངས་ཤིང་འགྱུར་བ་མི་བདེ་བ་དང་། མིག་རབ་རིབ་ཁྱེར་ཞིང་མི་གསལ་བ་དང་། ལུད་པ་ལ་སོགས་པ་འབྱུང་
བ་དང་། སེམས་འཁྲུལ་ཞིང་ཉམས་པ་ལ་སོགས་པའོ། །རླུང་གྱུར་ཁྱད་པར་གཉིད་མི་འོང་། །དབུགས་མི་བདེ་ཞིང་ཀླད་ན་འདར། །རྨི་ལམ་དུ་ནི་འཕྱན་ཞིང་འཕུར། །གཤིན་པོ་རྣམས་དང་གཏམ་སྨྲ་རྨི། །ཞེས་བྱ་བ་ལ། རླུང་ལས་གྱུར་པའི་ཆང་ནད་ནི་ཁྱད་
པར་བྱེ་བྲག་ཏུ་གཉིད་མི་འོང་བ་ལ་སོགས་པ་འབྱུང་བར་འགྱུར་བ་དང་། དེ་བཞིན་དུ་རྨི་ལམ་གྱི་ནང་ན་འཕྱན་ཞིང་ཡུལ་གཞན་ནས་གཞན་དུ་འགྲོ་བར་རྨི་བ་དང་། ནམ་མཁའ་ལ་འཕུར་ཞིང་ལྡིང་བར་རྨི་བ་དང་། སྔོན་ཆད་ཤི་བའི་ཉེ་དུ་ལ་སོགས་པ་གཤིན་པོ་རྣམས་དང་ལྷན་ཅིག་

གཏམ་སྨྲ་བ་རྨི་བར་འགྱུར་རོ། །མཁྲིས་ལས་ལུས་ཚ་སྐད་འགགས་དང་། །རྨོངས་བག་ཚད་འཁྲུ་སྐོམ་མགོ་འཁོར། །ལུས་མདོག་ལྗང་དང་སེར་བ་དང་། །མིག་དང་མཁུར་ཚོས་དམར་བར་འགྱུར། །ཞེས་བྱ་བ་ལ། མཁྲིས་པ་རྒྱས་པ་ལས་གྱུར་པའི་ཆང་ནད་ནི་ལུས་
ཚ་བ་ལ་སོགས་པར་འགྱུར་རོ། །བད་ཀན་གྱིས་སློན་སྙིང་ན་དང་། །གཉིད་ཆེ་གྲང་འདར་ཡན་ལག་ལྕི། །ཞེས་བྱ་བ་ལ། བད་ཀན་ཤས་ཆེ་བ་ལས་གྱུར་པའི་ཆང་ནད་ནི་སློན་པ་ལ་སོགས་པ་འབྱུང་བར་འགྱུར་རོ། །གྲང་འདར་ནི་གྲང་ལྷགས་ཀྱིས་ཕོག་པའི་ལུས་
འདར་བའོ། །ཀུན་སྐྱེས་མཚན་ཉིད་ཀུན་དང་ལྡན། །ཞེས་བྱ་བ་ལ། ནད་གཞི་ཀུན་འདུས་པ་ལས་བྱུང་བའི་ཆང་ནད་ནི་མཚན་ཉིད་ཀུན་འདྲེན་མ་དང་ལྡན་པ་ཡིན་ནོ། །ཆང་སྤངས་པ་ལས་འཕྲལ་དུ་ནི། །མང་དུ་འཐུང་ངམ་མ་གོམས་འཐུངས། །དེ་ལས་འཇོམས་དང་
ལུས་སྐམ་ནད། །རླུང་ལས་སྡུག་བསྔལ་ལྡན་པ་འབྱུང་། །ཉམ་ཆུང་བ་ལ་མཆོག་ཏུ་འབྱུང་། །ཞེས་བྱ་བ་ལ། ཆང་དང་འཕྲོད་པར་གྱུར་པ་ལས་ཀྱང་དེ་སྤངས་ཏེ་དུས་ཡུན་རིང་པོར་ལོན་པ་ལས་ཆང་དེ་ཉིད་མོད་ལ་མང་དུ་འཐུངས་པའམ། ཡང་ན་སྔར་མ་གོམས་པའི་ཆང་
གཞན་འཐུངས་པར་གྱུར་ན། རྒྱུ་དེ་ལས་འཇོམས་བྱེད་ཅེས་བྱ་བའི་ནད་དང་ལུས་སྐམ་ཞེས་བྱ་བའི་ཆང་ནད་གཉིས་པོ་རླུང་ལ་སོགས་པ་ལས་སྡུག་བསྔལ་ཞིང་གསོ་བར་དཀའ་བ་འབྱུང་བར་འགྱུར་རོ། །རྣམ་པ་དེ་གཉིས་ནི་སྐྱེས་བུ་ཉམས་སྟོབས་ཆུང་བ་ལ་མཆོག་ཏུ་ཤས་ཆེར་
འབྱུང་བར་འགྱུར་རོ། །འཇོམས་པས་བད་ཀན་མཆིལ་མ་མང་། །ལྐོག་མ་སྐམས་ཤིང་གཉིད་རབ་ཆེ། །སྒྲ་གྲག་མི་བཟོད་གློང་བག་འགྱུར། །ཞེས་བྱ་བ་ལ། ཆང་ནད་འཇོམས་པར་བྱེད་པ་ཞེས་བྱ་བ་དེའི་མཚན་མ་བད་ཀན་དང་མཆིལ་མའི་ལྗན་ལྗིན་མང་དུ་འབྱུང་བར་
འགྱུར་བ་དང་། དེ་བཞིན་ལྐོག་མ་སྐམ་པ་ལ་སོགས་པ་འབྱུང་བར་འགྱུར་རོ། །ལུད་སྐམ་ཡན་ལག་མགོ་རབ་ན། །སྙིང་ནད་མགུལ་ནད་རྨོངས་བག་དང་། །ལུད་པ་སྐོམ་དད་སློན་རིམས་འདེབས། །ཞེས་བྱ་བ་ལ། ཆང་ནད་ལུད་པ་སྐམ་པ་ཞེས་བྱ་བ་བྱུང་བར་གྱུར་ན། དེའི་

མཚན་མ་ནི་ཡན་ལག་དང་མགོ་བོ་ཤས་ཆེར་ན་ཞིང་མི་བདེ་བ་ནས་རིམས་ཀྱིས་འདེབས་པའི་བར་དུ་འབྱུང་བར་འགྱུར་རོ། །གང་ཞིག་ཆང་རྣམས་སྤངས་པས་ནི། །དབང་པོ་ཐུལ་ཞིང་བརྟགས་ཏེ་བྱེད། །ནམ་ཡང་དེ་ལ་ལུས་སེམས་ཀྱི། །སྐྱོན་
རྣམས་འབྱུང་བར་མི་འགྱུར་རོ། །ཞེས་བྱ་བ་ལ། སྐྱེས་བུ་གང་ཞིག་ཆང་སྤངས་ཤིང་ཆང་མི་འཐུང་བའི་བརྟུལ་ཞུགས་བླངས་པ་དེ་ནི་དབང་པོ་ཐུལ་ཞིང་ཞི་ལ་བརྐམ་ཤས་ཆུང་བ་དང་། བརྟགས་ཏེ་བྱེད་པ་སྟེ་བྱ་བ་རྣམས་ལ་བློ་སྔོན་དུ་སོང་བས་འཇུག་པར་འགྱུར་
བ་དང་། དེ་བཞིན་དུ་ཡང་སྐྱེས་བུ་དེའི་ལུས་ལ་དུས་ནམ་ཡང་ལུས་དང་སེམས་ཀྱི་ནད་ཀྱི་སྐྱོན་རྣམས་འབྱུང་བར་མི་འགྱུར་ཏེ། ལུས་ལས་བྱུང་བའི་ནད་རིམས་ལ་སོགས་པ་དང་། སེམས་ལས་བྱུང་བའི་ནད་བརྗེད་བྱེད་ལ་སོགས་པ་འབྱུང་བར་མི་འགྱུར་ཞིང་དེའི་
གནོད་པས་ཉེན་པར་མི་འགྱུར་རོ། །རྡུལ་དང་མུན་པ་མི་འཕྲོད་ཟས། །མཆོག་ཏུ་བསྟེན་ལས་ནད་གསུམ་འབྱུང་། །དྭངས་མ་ཁྲག་དང་སེམས་རྒྱུ་བའི། །རྩ་སྦུབས་བཀག་པ་ལས་བྱུང་བ། །མྱོས་དང་བརྒྱལ་དང་ཀུན་སོང་ནད། །ཕྱི་མ་བཞིན་དུ་སྟོབས་རབ་ཆེ། །
ཞེས་བྱ་བ་ལ། རྡུལ་དང་མུན་པའི་རང་བཞིན་ལ་མཆོག་ཏུ་བསྟེན་པ་དང་། ཁ་ཟས་མི་འཕྲོད་པ་ཟ་བ་ལ་མཆོག་ཏུ་བསྟེན་ཅིང་གནས་པར་བྱེད་པ་མི་ལ་མྱོས་པ་དང་བརྒྱལ་བ་དང་། ཀུན་དུ་སོང་བ་ཞེས་བྱ་བའི་ནད་དེ་རྣམ་པ་གསུམ་འབྱུང་བར་འགྱུར་རོ། །དེ་ཡང་དྭངས་
མ་དང་ཁྲག་དང་སེམས་རྒྱུ་བར་བྱེད་པའི་རྩ་སྦུབས་ལུས་ལ་གང་དག་ཡོད་པ་དེ་བཀག་ཅིང་ཆོད་པ་ལས་འབྱུང་བར་འགྱུར་ཞིང་རྒྱུ་བྱེད་པ་ཡིན་ལ། ཡང་དེ་དག་ནི་ཕྱི་མ་བཞིན་དུ་སྟོབས་དང་ནུས་པ་ཆེ་བ་ཡིན་ཏེ། དེ་ན་མྱོས་པ་བས་ནི་བརྒྱལ་བ་སྟོབས་དང་ལྡན་པ་ཡིན་ལ།
དེ་བས་ནི་ཀུན་དུ་སོང་བ་སྟོབས་དང་ལྡན་པ་ཡིན་ནོ། །འདིར་མྱོས་ནད་སྣ་རེ་རེ་ཀུན། །ཁྲག་ཆང་དུག་རྣམས་ལས་ཀྱང་འབྱུང་། །ཞེས་བྱ་བ་ལ། འདིར་མྱོས་པ་དང་བརྒྱལ་བ་དང་ཀུན་དུ་སོང་བ་ཞེས་བྱ་བ་གསུམ་གྱི་ནང་ནས་མྱོས་པ་ནི་རྣམ་པ་བདུན་ཏེ། ནད་གཞི་རེ་རེ་ལས་

གྱུར་པ་གསུམ་དང་། འདུས་པ་ལས་གྱུར་པ་དང་། ཁྲག་དང་ཆང་དང་དུག་ལས་གྱུར་པ་རྣམས་སོ། །དེ་དག་ཀྱང་ཕྱི་མ་བཞིན་དུ་སྟོབས་ཆེ་བ་ཡིན་ནོ། །རླུང་ལས་གཏམ་ལ་ཆགས་པ་དང་། །མང་སྨྲ་ཉུང་སྨྲ་སྤྱོད་པ་འཁྲུལ། །ལུས་ནི་རྩུབ་གནག་དམར་བ་ཡི། །མྱོས་པ་རླུང་
ལས་སྐྱེས་པ་ཡིན། །ཞེས་བྱ་བ་ལ། རླུང་ལས་གྱུར་པའི་མྱོས་པ་ནི་གཏམ་སྨྲ་བ་ལ་ཆགས་པར་འགྱུར་བ་དང་། མང་དུ་སྨྲ་བ་ལ་དགའ་བ་དང་། མྱུར་དུ་སྨྲ་ཞིང་རིངས་པར་སྨྲ་བ་དང་། སྤྱོད་པ་འཁྲུལ་ཞིང་ཉམས་པ་དང་། ལུས་རྩུབ་པ་དང་། དམར་བའི་བག་ཏུ་
གནས་པ་ནི་རླུང་ལས་སྐྱེས་པ་ཡིན་ནོ། །མཁྲིས་པ་ལས་ཁྲོ་དམར་བ་དང་། །སེར་པོར་སྣང་ཞིང་རྩོད་ལ་དགའ། །ཞེས་བྱ་བ་ལ། མཁྲིས་པ་ལས་གྱུར་པའི་མྱོས་པ་ནི་ལུས་ཀྱི་མདོག་དམར་ཞིང་སེར་བར་སྣང་བ་དང་། རྩོད་ཅིང་འཐབ་མོ་ལ་དགའ་བ་ཡིན་ནོ། །བད་ཀན་
ཚིག་ཉུང་འབྲེལ་སྨྲ་སྐྱ། །སེམས་ལས་ཆེ་ཞིང་ལེ་ལོ་ཆེ། །ཞེས་བྱ་བ་ལ། བད་ཀན་ལས་གྱུར་པའི་མྱོས་པ་ནི་ཚིག་ཉུང་ཞིང་འབྲེལ་པར་སྨྲ་བ་དང་། ཁ་དོག་དཀར་ཞིང་སྐྱ་བ་དང་། སེམས་ལས་ཆེ་ཞིང་ལེ་ལོ་ཆེ་བ་ཡིན་ནོ། །འདུས་པ་མཚན་ཉིད་ཀུན་དང་ལྡན། །
ཞེས་བྱ་བ་ལ། འདུས་པ་ལས་གྱུར་པའི་མྱོས་པ་ནི་མཚན་ཉིད་ཀུན་དང་ལྡན་པའི་མཚན་ཉིད་ཅན་ཡིན་ནོ། །ཁྲག་ལས་མིག་དང་ཡན་ལག་རེངས། །མཁྲིས་པའི་མཚན་ཉིད་ལྡན་པ་ཡིན། །ཞེས་བྱ་བ་ལ། ཁྲག་ལས་གྱུར་པའི་མྱོས་པ་ནི་མིག་སེར་ཞིང་ཧར་བག་ཏུ་གནས་
པ་དང་། ཡན་ལག་རེངས་ཤིང་འགྱུར་མི་ཤེས་པ་ཡིན་ནོ། །གཞན་ཡང་མཁྲིས་པས་མྱོས་པའི་མཚན་ཉིད་ཁྲོ་བ་དང་། མདོག་དམར་ཞིང་སེར་བ་དང་རྩད་པ་ལ་དགའ་བ་ཡིན་ནོ། །ཆང་གིས་ཡན་ལག་སྐད་སྤྱོད་འགྱུར། །ཞེས་བྱ་བ་ལ། ཆང་ལས་གྱུར་པའི་མྱོས་
པ་ནི་ཡན་ལག་དང་སྐད་དང་སྤྱོད་པ་གཞན་དུ་འགྱུར་བ་འབྱུང་བར་འགྱུར་ཏེ། ཡན་ལག་འགྱུར་བ་ནི་ལུས་རྣམས་གཞན་དུ་འགྱུར་བའོ། །སྐད་འགྱུར་བ་ནི་སྐད་གདངས་ཉམས་ཤིང་འགགས་པའོ། །སྤྱོད་པ་འགྱུར་བ་ནི་ལུས་དང་ངག་དང་ཡིད་ཀྱི་སྤྱོད་པ་ཉམས་ཤིང་སྔར་

གནས་པ་ལས་གཞན་དུ་གྱུར་པའོ། །དུག་གིས་འདར་ཞིང་གཉིད་རབ་ཆེ། །དེ་ནི་ཀུན་ལས་མྱོས་ཚབས་ཆེ། །ཞེས་བྱ་བ་ལ། དུག་གིས་མྱོས་པར་གྱུར་པ་ནི་འདར་ཞིང་ལུས་འགུལ་བ་དང་། གཉིད་ཤིན་ཏུ་ཆེ་ཞིང་སྟུག་པ་ཡིན་ནོ། །དེ་ནི་མྱོས་པ་
ཀུན་ལས་ཤིན་ཏུ་ཚབས་ཆེར་མྱོས་པ་ཡིན་ཏེ་ནད་ཀྱིས་གནོད་པ་སྐྱེད་པར་བྱེད་པ་ཡིན་ནོ། །ཁྲག་སོགས་པ་ཡིས་རླུང་སོགས་པའི། །མཚན་ཉིད་ལྷག་པར་ཤེས་པར་བྱ། །ཞེས་བྱ་བ་ལ། ཁྲག་དང་ཆང་དང་དུག་ལས་གྱུར་པའི་མྱོས་པ་ལས་རླུང་ལ་སོགས་པའི་ནད་
རང་གི་མཚན་ཉིད་ལྷག་པར་མཚན་ཉིད་ཀྱིས་ཤེས་པར་བྱའོ། །དེ་ནི་འདི་སྐད་སྟོན་པ་ཡིན་ཏེ། ཁྲག་དང་ཆང་དང་དུག་གི་མཚན་ཉིད་བཤད་མོད་ཀྱི། རླུང་ལ་སོགས་པ་གང་ཡང་རུང་བ་ལྷག་པར་གནས་པ་ཡིན་ནོ་ཞེས་ཤེས་པར་རོ། །དེ་ལྟར་མྱོས་པའི་མཚན་ཉིད་
བཤད་ནས། བརྒྱལ་བའི་མཚན་ཉིད་བཤད་པར་བྱ་སྟེ། བརྒྱལ་བ་རླུང་གི་བདག་ཉིད་ཅན། །ནམ་མཁའ་དམར་སྔོ་གནག་པར་ནི། །མཐོང་ཞིང་མུན་པར་ཞུགས་སྙམ་སེམས། །མྱུར་དུ་སངས་པར་བྱེད་པ་དང་། །སྙིང་ན་འདར་ཞིང་མགོ་འཁོར་ལ། །སྐེམ་ཞིང་
བཞིན་མདོག་དམར་ནག་འགྱུར། །ཞེས་བྱ་བ་ལ། བརྒྱལ་བའི་ནད་རླུང་ལས་གྱུར་པའི་བདག་ཉིད་ཅན་ལ་ནི། སྐྱེས་བུས་ནམ་མཁའི་མེ་ཏོག་ཁ་དོག་དམར་བ་དང་སྔོ་བ་དང་གནག་པར་མཐོང་བར་འགྱུར་ཞིང་མུན་པར་ཞུགས་པ་སྙམ་དུ་མུན་འཐིབས་ཞེས་བྱེད་པར་
འགྱུར་བ་དང་། མྱུར་དུ་སངས་ཤིང་དྲན་པ་རྙེད་པར་འགྱུར་བ་དང་། སྙིང་ན་ཞིང་འདར་བ་ནས། བཞིན་རས་དང་ལུས་ཀྱི་མདོག་དམར་ནག་ཏུ་སྣང་བར་འགྱུར་རོ། །མཁྲིས་པས་དམར་བའམ་སེར་པོར་ནི། །ནམ་མཁའ་མཐོང་ཞིང་མུན་འཐིབས་བྱེད། །སངས་ནས་
རྔུལ་དང་བཅས་པ་དང་། །ཚ་སྐོམ་གདུངས་པས་ཉེན་པ་དང་། །འཁྲུ་ཞིང་ཁ་དོག་སེར་དང་དམར། །མིག་དམར་སེར་བར་སྣང་བར་འགྱུར། །ཞེས་བྱ་བ་ལ། མཁྲིས་པ་ལས་གྱུར་བའི་བརྒྱལ་བ་ནི་ནམ་མཁའི་མདོག་དམར་པོའམ། སེར་པོ་ཉིད་དུ་མཐོང་པར་འགྱུར་

བ་དང་། མུན་འཐིབས་ཞེས་བྱེད་ཅིང་རྨོངས་ནས་མི་དྲན་པར་འགྱུར་རོ། །དེ་ནས་སངས་ནས་དྲན་པ་རྙེད་པ་དང་། ལུས་རྔུལ་ཞིང་ཚ་བ་ལ་སོགས་པས་གདུངས་ཤིང་ཉེན་པར་འགྱུར་བ་དང་། བཤང་བ་འཁྲུ་ཞིང་སླ་བ་དང་། ཁ་དོག་སེར་ཞིང་དམར་བར་སྣང་བ་དང་།
མིག་དམར་ཞིང་སེར་བར་སྣང་བས་ལྟ་བར་འགྱུར་རོ། །བད་ཀན་གྱིས་ནི་སྤྲིན་ལྟ་བུར། །ནམ་མཁའ་མཐོང་ཞིང་མུན་འཐིབས་བྱེད། །རིངས་ནས་སངས་པར་འགྱུར་བ་དང་། །སྙིང་ན་བཅས་པས་མཆིལ་མ་མང་། །པགས་པ་རློན་པས་གཡོགས་པ་བཞིན། །ཡན་
ལག་ལྕི་ཞིང་ཚོར་བ་ཆུང་། །ཞེས་བྱ་བ་ལ། བད་ཀན་ལས་བྱུང་བའི་བརྒྱལ་བར་གྱུར་པའི་མཚན་མ་ནི་ནམ་མཁའ་གཉིས་པར་གཡོགས་པ་ལྟ་བུར་མཐོང་བ་དང་། མུན་འཐིབས་ཞེས་བྱེད་ཅིང་མི་དྲན་པར་འགྱུར་བ་དང་། བརྒྱལ་ནས་ཡུན་རིང་ཞིག་ནས་སངས་
པར་འགྱུར་བ་དང་། སྙིང་འཕར་ཞིང་ན་བ་དང་བཅས་པའི་མཆིལ་མ་དང་བད་ཀན་གྱི་ལྗན་ལྗིན་མང་པོ་འབྱུང་བ་དང་། པགས་པ་རློན་པས་གཡོགས་ཤིང་དཀྲིས་པ་བཞིན་དུ་ཡན་ལག་དང་བཅས་པའི་ལུས་ལྕི་ཞིང་ཚོར་བ་ཆུང་བར་འབྱུང་བར་འགྱུར་རོ། །ཉེས་པ་
གསུམ་གྱི་མཚན་ཀུན་ལྡན། །བརྗེད་བྱེད་གཉིས་པ་ལྟ་བུ་སྟེ། །མྱུར་དུ་འགྱེལ་ཞིང་བརྒྱལ་འགྱུར་ཏེ། །འཇིགས་རུང་སྤྱོད་པ་མེད་པ་ཡིན། །ཞེས་བྱ་བ་ལ། ནད་གཞིའི་ཉེས་པ་གསུམ་ཆར་གྱིས་བསྐྱེད་པའི་བརྒྱལ་བ་ནི་མཚན་ཉིད་དེ་དག་ཐམས་ཅད་དང་ལྡན་པ་དང་།
བརྗེད་བྱེད་གཉིས་པ་ཡིན་ཞིང་དྲན་པ་ཉམས་པར་འགྱུར་ལ། བརྗེད་བྱེད་ཀྱིས་ཟིན་པ་ལྟར་མྱུར་དུ་འགྱེལ་ཞིང་དྲན་པ་མེད་པར་བརྒྱལ་བར་འགྱུར་ལ། ཁྱད་པར་ནི་བརྗེད་བྱེད་ཀྱི་གདོན་ལྟ་བུ་དང་། འཇིགས་སུ་རུང་བའི་སྤྱོད་པ་མེད་པར་གཞན་ཐམས་ཅད་ཚུལ་མཐུན་
པ་ཡིན་ནོ། །ལུས་ཅན་མྱོས་དང་བརྒྱལ་བ་ཡིས། །ནད་ལ་ཤུགས་ཡོད་གྱུར་ཀྱང་ནི། །རང་ཉིད་ཞི་བར་འགྱུར་བ་ཡིན། །ཀུན་ཞུགས་སྨན་མེད་པར་མི་ཞི། །ཞེས་བྱ་བ་ལ། ལུས་ཅན་ཏེ་མི་རྣམས་ལ་མྱོས་པ་དང་བརྒྱལ་བའི་རླུང་ནད་ལ་སོགས་པའི་ཤུགས་དྲག་པོ་ཡོད་

དུ་ཟིན་ཀྱང་། རང་ཉིད་སྨན་གྱིས་བཅོས་མི་དགོས་པར་རང་ཉིད་ཞི་ཞིང་ལྡོག་པར་འགྱུར་གྱི། ཀུན་དུ་ཞུགས་པ་འམ་ཀུན་དུ་སོང་བ་ཞེས་བྱ་བའི་བརྒྱལ་བའི་ནད་ནི་སྨན་གྱིས་མ་བཅོས་པར་ཞི་ཞིང་ལྡོག་པར་མི་འགྱུར་རོ། །ཀུན་དུ་ཞུགས་པ་ཞེས་
གང་ཞིག་ལ་བྱ་ཞེ་ན། དེའི་ཕྱིར་སྨྲས་པ་ནི། ནད་ནི་ཤིན་ཏུ་སྟོབས་ཆེ་བ། །འདུས་པ་ལས་གྱུར་ཀུན་ཞུགས་པ། །སྲོག་གི་གནས་ལ་བརྟེན་པ་ཡིས། །ལུས་དང་ངག་ཡིད་སྤྱོད་པ་འཕྲོག །དེ་ཡིས་སྐྱེས་བུ་རོ་དང་ནི། །ཤིང་དང་རྩིག་པ་འདྲ་བར་བྱེད། །རིངས་པར་
གསོ་བར་མ་བྱས་ན། །མྱུར་དུ་འཆི་བར་བྱེད་པ་ཡིན། །ཞེས་བྱ་བ་ལ། རླུང་ལ་སོགས་པའི་ནད་ཤིན་ཏུ་སྟོབས་ཆེ་ཞིང་དཀྱེལ་ཆེར་སོགས་པ་རང་གི་རྒྱུའི་ཁྱད་པར་གྱི་ཚོགས་པས་ནུས་པ་ཐམས་ཅད་འདུས་པར་གྱུར་ཅིང་གསུམ་ཆར་བྱ་བའི་རྩོམ་པ་གཅིག་ལ་
ཞུགས་ཤིང་འབྲས་བུ་གཅིག་འབྱེད་པར་བྱེད་པའི་ཀུན་དུ་ཞུགས་པའི་ནད་སྲོག་གི་གནས་སྙིང་གའི་གནད་ལ་བརྟེན་ཅིང་འདུག་པར་གྱུར་པ་ན་ཀུན་དུ་ཞུགས་པ་ཞེས་བྱ་བའི་བརྒྱལ་བའི་ནད་དུ་འགྱུར་ཏེ། ལུས་དང་ངག་དང་ཡིད་ཀྱི་སྤྱོད་པ་འཕྲོག་ཅིང་བསྡུས་ནས་
ཀུན་དུ་ཞུགས་པ་དེས་སྐྱེས་བུ་ཤི་བའི་རོ་དང་འདྲ་བར་འགྱུར་གྱི། ཤིང་དང་རྩིག་པ་ལྟར་སེམས་མེད་པར་བྱེད་པ་ཡིན་ལ། དེས་ན་གལ་ཏེ་ནད་དེ་དག་གསོ་བ་མྱུར་དུ་མ་བྱས་ན་མྱུར་ཞིང་རིངས་པ་ཉིད་དུ་སྲོག་དང་བྲལ་བར་བྱེད་པ་ཡིན་ནོ། །མཚོ་ཟབ་ཆུ་སྲིན་མང་པོ་
ཅན། །ཆུ་འཇིང་འཇུག་ངོགས་མེད་པར་ནི། །ཀུན་ཞུགས་པ་ནི་ནུབ་བྱེད་ལས། །མི་ནི་མྱུར་དུ་གདོན་པར་བྱ། །ཞེས་བྱ་བ་ལ། དེ་བས་ན་སྨན་པས་ཀུན་དུ་ཞུགས་པ་ཞེས་བྱ་བའི་ནད་མི་བཟད་པས་ཟིན་ཅིང་སྡུག་བསྔལ་དེའི་འདམ་དུ་བྱིང་བའི་མི་མྱུར་དུ་གདོན་པར་བྱ་སྟེ། དེ་
ཡང་དཔེར་ན་མཚོ་ཤིན་ཏུ་ཟབ་ཅིང་རྟོགས་པར་དཀའ་ལ། ཆུ་སྲིན་བྱིས་པ་གསོད་ལ་སོགས་པའི་སྲོག་ཆགས་གདུག་པ་མང་པོས་གང་བའི་ཆུ་འཇིང་ཕ་རོལ་དུ་བྱུང་བའི་འཇུག་ངོགས་མེད་པར་ནུབ་པར་གྱུར་པ་དག་ནི། ཉམ་ང་བའི་གནས་ཡིན་པས་མྱུར་དུ་གདོན་དགོས་

པ་དང་འདྲའོ། །རིགས་པས་བརྟེན་དང་བྲལ་བའི་ཆང་འཐུངས་པས། །མྱོས་དྲེགས་ཁྲོ་དང་བྲལ་བའི་རང་བཞིན་ཅན། །རང་གི་དགྲ་བོས་ཡོངས་སུ་འཁྱུད་འགྱུར་ཞིང་། །རིགས་དང་མི་རིགས་མཉམ་པར་བྱེད་པར་འགྱུར། །ཞེས་བྱ་བ་ལ། ཆང་རིགས་ཤིང་འོས་པར་བརྟེན་
པ་དང་བྲལ་བ་སྟེ་འོག་ནས་སྨོས་པའི་སྟོབས་དང་དུས་ལ་སོགས་པ་དང་སྦྱར་བ་མེད་པ་ནི། རིགས་པར་བརྟེན་པ་དང་བྲལ་བ་ཞེས་བྱ་བ་སྟེ། དེ་ལྟ་བུའི་རིགས་པར་བརྟེན་པ་མེད་པ་ཆང་འཐུངས་པས་ནི་མྱོས་པ་ལ་སོགས་པར་ངང་གིས་ཏེ། ལུས་དང་ལྷན་ཅིག་སྐྱེས་པའི་
དགྲ་བོ་འཇིག་རྟེན་འདི་དང་ཕྱི་མའི་ཡོན་ཏན་འཇོམས་ཤིང་འཕྲོག་པར་བྱེད་པས་དགྲ་བོ་ལྟར་གནོད་པར་བྱེད་པའི་དགྲ་བོ་རྣམས་ཡོངས་སུ་འཁྱུད་པར་གྱུར་ཅིང་ཤིན་ཏུ་བརྩེ་བར་གྱུར་ཕ་མ་ཡིན་ཞིང་། དེ་བཞིན་དུ་རིགས་པ་དང་མི་རིགས་པ་ཆ་མཉམ་ཞིང་མཚུངས་པ་ཉིད་དུ་
སེམས་པར་འགྱུར་བ་སྟེ། བྱ་བ་དང་བྱ་བ་མ་ཡིན་པའི་བྱེ་བྲག་ཕྱེད་པར་མི་འགྱུར་རོ་ཞེས་བྱ་བའི་དོན་ནོ། །སྟོབས་དང་དུས་དང་ཡུལ་དང་གོམས་པ་དང་། །རང་བཞིན་གྲོགས་དང་ན་ཚོད་ནད་རྣམས་ནི། །ལེགས་བརྟགས་དེ་དང་རྗེས་མཐུན་གང་ཞིག་འཐུང་། །དེ་ནི་བདུད་རྩི་
འཐུངས་དང་མཚུངས་པ་ཡིན། །ཞེས་བྱ་བ་ལ། ལུས་ཀྱི་ཉམས་སྟོབས་དང་། དུས་ལ་སོགས་པའི་མཚན་ཉིད་དམ་རང་བཞིན་བློས་ལེགས་པར་རྟོགས་ཤིང་སོ་སོར་ཕྱེད་ནས་དེ་དང་མཚུངས་པར་སྐྱེས་བུ་གང་ཞིག་ཆང་རན་ཞིང་དུས་ལ་བབ་པར་འཐུངས་པ་དེ་ནི་བདུད་རྩི་
འཐུངས་པ་དང་མཚུངས་པ་ཡིན་ཏེ། སྐྱེས་བུ་རིགས་པ་དང་ལྡན་པར་འཐུངས་པས་གནོད་པ་མེད་པར་ལུས་བདེ་བར་བྱེད་པའི་རྒྱུ་ཡིན་པའི་ཕྱིར་རོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་
དགའ་བས་ངེས་པར་སྦྱར་བ་ལས། ནད་གཞིའི་གནས་ཀྱི་ལེའུ་དྲུག་པའི་རྣམ་པར་འགྲེལ་པའོ།། །།དེ་ནས་གཞང་འབྲུམ་གྱི་ནད་གཞི་བཤད་པར་བྱའོ། །ཞེས་བྱ་བ་ལ། ཇི་ལྟར་ཀུན་དུ་ཞུགས་པ་ཞེས་བྱ་བའི་ནད་བཤད་མ་ཐག་པ་དེ་ནི་སྲོག་གི་

གནས་སྙིང་ལ་བརྟེན་ཅིང་འབྱུང་བ་དེ་བཞིན་དུ། འདིར་ཡང་སྲོག་གི་གནས་གཞང་ལ་བརྟེན་ཏེ་འབྱུང་བས་ན་སྲོག་གི་གནས་ལ་བརྟེན་པར་ཆོས་མཐུན་པའི་ཕྱིར། དེའི་འོག་ཏུ་འདི་བརྩམས་པ་ཡིན་ནོ། །དགྲ་ལྟར་སྲོག་ཆགས་རྣམས་ཀྱི་ཚེ། །
གཞང་འབྲུམ་བྱུང་བས་གསོད་བྱེད་པས། །དེ་ཕྱིར་བཤང་བའི་ལམ་འགེགས་པས། །གཞང་འབྲུམ་ཞེས་ནི་བཤད་པ་ཡིན། །ཞེས་བྱ་བ་ལ། གཞང་འབྲུམ་ནི་གཞང་ཁར་ཤའི་མཛེར་པ་སྦོམ་པོ་སྐྱེས་པ་ཡིན་ལ། དེ་ནི་དགྲ་བོ་ལྟར་སྲོག་ཆགས་རྣམས་ཀྱི་ཚེ་འཕྲོག་
ཅིང་གཞང་འབྲུམ་དུ་སྐྱེས་པས་གསོད་པར་བྱེད་པའི་ཕྱིར་ངེས་པར་ཚིག་གི་ཚུལ་གྱིས་ན་གཞང་འབྲུམ་ཞེས་བྱའོ། །ནད་ཀྱིས་ལྤགས་ཚིལ་ཤ་རྣམས་ནི། །གནོད་བྱས་དབྱིབས་ནི་སྣ་ཚོགས་པའི། །ཤ་ཡི་མྱུ་གུ་གཞང་སོགས་སུ། །སྐྱེས་དེ་གཞང་འབྲུམ་ཡིན་པར་
བཤད། །ཅེས་བྱ་བ་ལ། ནད་ཅེས་བྱ་བ་ནི་རླུང་ལ་སོགས་པ་སྟེ། དེས་པགས་པ་དང་ཚིལ་དང་ཤ་རྣམས་ལ་གནོད་ཅིང་མ་རུངས་པར་བྱས་ནས། དབྱིབས་དང་ཁ་དོག་སྣ་ཚོགས་ཤིང་ཐ་དད་པའི་ཤའི་མྱུ་གུ་ཤ་མཛེར་སྦོམ་པོ་ལྟ་བུ་གནོད་པ་སྣ་ཚོགས་སྐྱེད་པ་གཞང་
ལ་སོགས་པར་སྐྱེས་ཤིང་བྱུང་བར་གྱུར་པ་དེ་ལ་ནི་གཞང་འབྲུམ་གྱི་ནད་ཅེས་བྱ་བ་ཡིན་པར་དྲང་སྲོང་རྣམས་ཀྱིས་བཤད་དོ། །ལྷན་ཅིག་སྐྱེས་དང་ཕྱིས་འབྱུང་དང་། །སྐམ་དང་ཁྲག་ཏུ་འཛག་པ་ཡི། །དབྱེ་བས་མདོར་ན་རྣམ་གཉིས་ཡིན། །ཞེས་བྱ་བ་ལ། གཞང་འབྲུམ་
གྱི་ནད་དེ་ནི་མདོར་ན་རྣམ་པ་གཉིས་ཡིན་ཏེ། ལ་ལ་ནི་ལྷན་ཅིག་སྐྱེས་ཏེ་འབྱུང་བ་ཡིན་ལ། ལ་ལ་སྐྱེས་ནས་ཕྱིས་འབྱུང་བར་འགྱུར་བ་དང་། ཡང་དེ་བཞིན་དུ་སྐམ་པ་དང་གཤེར་བའི་དབྱེ་བས་ཀྱང་རྣམ་པ་གཉིས་སུ་འགྱུར་ཏེ། ལ་ལ་ནི་སྐམ་པོར་གནས་པ་ཡིན་ལ། ལ་
ལ་ནི་ཁྲག་འཛག་པ་དང་བཅས་པ་ཡིན་ནོ། །གཞང་ནི་རྒྱུ་མ་སྦོམ་པོར་བརྟེན། །སོར་ནི་ཕྱེད་དང་ལྔ་ཡོད་དོ། །ཞེས་བྱ་བ་ལ། གཞང་ནི་རྒྱུ་མའི་ཞབས་རྒྱུ་མ་སྦོམ་པོ་ལ་བརྟེན་ཅིང་གནས་པ་དེའི་ཚད་ནི་སོར་ཕྱེད་དང་ལྔ་ཡོད་པ་ཡིན་ནོ། །གཉེར་གསུམ་སོར་ནི་ཕྱེད་དང་

གཉིས། །ཞེས་བྱ་བ་ལ། གཞང་དེ་ནི་གཉེར་མའི་རིམ་པ་གསུམ་རེ་རེ་ཞིང་སོར་ཕྱེད་དང་གཉིས་གཉིས་ཡོད་དོ། །རིམ་པ་དེ་ཡི་ནང་མ་ནི། །ཕྱིར་འཕུལ་བར་མ་སེལ་བ་ཡིན། །དེ་ཡི་ཕྱི་རོལ་འཛུམས་པ་ཡིན། །ཞེས་བྱ་བ་ལ། རིམ་པ་དེ་རྣམས་ཀྱི་རིམ་པ་ནང་མའམ།
ཕུགས་མ་ནི་དྲི་མ་རྣམས་ཕྱིར་འཕུལ་ཞིང་འབབ་པར་བྱེད་པ་ཡིན་ལ། གཉེར་མའི་རིམ་པ་བར་མ་ནི་དྲི་མ་རྣམས་སེལ་ཞིང་ཕྱིར་འབྱིན་པ་ཡིན་པས་ན་སེལ་བ་ཞེས་བྱ་ལ། ཕྱི་རོལ་གྱི་གཉེར་མ་ནི་དྲི་མ་ལ་སོགས་པ་མི་འབྱུང་བར་སྡོམ་ཞིང་འཛུམས་པར་བྱེད་པས་ན་
འཛུམས་པ་ཞེས་བྱའོ། །དེ་ཡི་ཕྱི་རོལ་སོར་གཅིག་ཁ། །ནས་ནི་ཕྱེད་དང་གཉིས་ཀྱི་ཚད། །དེ་ཕན་ཆད་ནི་སྤུ་སྐྱེ་འགྱུར། །ཞེས་བྱ་བ་ལ། འཛུམས་པ་དེའི་ཕྱི་རོལ་སོར་གཅིག་ནི་གཞང་ཁ་ཞེས་བྱ་ལ། གཞང་ཁ་དེའི་ཚད་ནི་ནས་ཕྱེད་དང་གཉིས་ཀྱི་ཚད་ཡིན་ནོ། །གཞང་
ཁའི་ཚིགས་དེ་ཐམས་ཅད་ནི་རྐུབ་ཏུ་སྤུ་སྐྱེ་བར་འགྱུར་རོ། །དེ་ལ་ལྷན་ཅིག་སྐྱེས་པའི་རྒྱུ། །གཉེར་མའི་ས་བོན་གནོད་འགྱུར་ཉིད། །གཞང་འབྲུམ། ཞེས་བྱ་བ་ལ། དེ་ལ་ལྷན་ཅིག་སྐྱེས་པ་དང་ཕྱིས་འབྱུང་བའི་གཞང་འབྲུམ་གཉིས་ལས། ལྷན་ཅིག་སྐྱེས་པའི་གཞང་
འབྲུམ་འབྱུང་བའི་རྒྱུ་ནི་གཉེར་མ་དེ་འབྱུང་ཞིང་དང་པོར་སྐྱེས་པ་ཉིད་ཀྱི་ཚེ། དེའི་ས་བོན་ཁུ་ཁྲག་ལ་སོགས་པ་ལ་རླུང་ལས་གོས་པར་གནོད་པར་གྱུར་པ་དེ་ཉིད་ལས་གཞང་འབྲུམ་འབྱུང་བའོ། །ས་བོན་གནོད་པ་ཡང་། ཕ་མས་མི་འཕྲོད་ཟོས་པ་དང་། །སྔོན་ལས། ཞེས་
བྱ་བ་ལ། ས་བོན་དེ་ལ་གནོད་པར་བྱེད་པའི་རྒྱུ་ནི་རྣམ་པ་གཉིས་ཏེ། ཕ་དང་མས་ཁ་ཟས་མི་འཕྲོད་པ་གཞང་འབྲུམ་སྐྱེད་པའི་རྒྱུ་ཟོས་པ་དང་། སྔོན་བདག་ཉིད་ཀྱིས་དེ་ལྟ་བུའི་ནད་འབྱུང་བར་འགྱུར་བའི་ལས་བྱས་ཤིང་བསགས་པའོ། །དེ་གཉིས་དང་འདུས་པ། འཁྲུགས་
པ་ལས་གྱུར་དེ་དག་ནི། །གསོར་མི་རུང་བ་ཉིད་དུ་བཤད། །ཅེས་བྱ་བ་ལ། ཕ་དང་མའི་གནོད་པའི་རྒྱུ་དང་། སྔོན་གྱི་ལས་དེ་གཉིས་དང་། ནད་གཞི་འདུས་པར་འཁྲུགས་པ་གང་ཡིན་པ་ལས་གྱུར་པ་དེ་དག་ནི་གང་གི་ཕྱིར་གསོར་མི་རུང་བ་ཉིད་ཡིན་ཏེ་ལྷན་ཅིག་སྐྱེས་པ་ཡིན་པའི་

ཕྱིར་རོ། །རིགས་འབྱུང་ནད་ཀུན་དེ་དང་འདྲ། །ཞེས་བྱ་བ་ལ། ནད་གཞན་གང་ཡང་རུང་བ་ཀུན་ཀྱང་དེ་དང་འདྲ་སྟེ། དང་པོ་ལྷན་ཅིག་སྐྱེས་པ་ནི་གསོར་མི་རུང་ངོ་ཞེས་ཚིག་འདིས་སྟོན་པ་ཡིན་ནོ། །ལྷན་ཅིག་སྐྱེས་པ་ཁྱད་པར་དུ། །རྩུབ་ཅིང་བརྟ་བར་
དཀའ་བ་དང་། །ནང་དུ་ཁ་བལྟས་དཀར་བ་དང་། །བླ་བརྣན་མི་བཟད་ཅན་གསོ་དཀའ། །ཞེས་བྱ་བ་ལ། ལྷན་ཅིག་སྐྱེས་པའི་གཞང་འབྲུམ་དེ་ཡང་ཁྱད་པར་འདི་དག་དང་ལྡན་ན་ལྷག་པར་གསོ་དཀའ་སྟེ། རེག་པ་རྩུབ་པར་གནས་པ་དང་། བརྟ་ཞིང་བརྟགས་པར་
དཀའ་བ་དང་། ཁ་ནང་དུ་བལྟ་ཞིང་ཕྱིར་མི་ཕྱོགས་པ་དང་། ཁ་དོག་དཀར་བ་དང་། བླ་བརྣན་གྱི་ནད་མི་བཟད་པ་ཡོད་པ་ནི་གསོ་དཀའ་ཞིང་བཅོས་སུ་མི་རུང་བ་ཡིན་ནོ། །ཅིག་ཤོས་དྲུག་སྟེ་ནད་ཐ་དད། །འདྲེས་དང་འདུས་པ་ཁྲག་ལས་བྱུང་། །ཞེས་བྱ་བ་ལ། ལྷན་
ཅིག་འབྱུང་བ་ལས་ཅིག་ཤོས་སུ་གྱུར་པའི་ཕྱིར་འབྱུང་བའི་གཞང་འབྲུམ་ནི་རྣམ་པ་དྲུག་ཡོད་དེ། ནད་ཐ་དད་པ་ལས་བྱུང་བ་གསུམ་དང་འདྲེས་པ་ལས་བྱུང་བ་དང་འདུས་པ་ལས་བྱུང་བ་དང་ཁྲག་ལས་བྱུང་བའོ། །རླུང་དང་བད་ཀན་གཉིས་ལས་སྐམ། །ཁྲག་
དང་མཁྲིས་པ་ལས་རླན་ཅན། །ཞེས་བྱ་བ་ལ། དེ་ལ་གཞང་འབྲུམ་སྐམ་པོ་ཁྲག་མི་འཛག་པ་ནི་རླུང་དང་བད་ཀན་གཉིས་འདུས་པས་ཟིན་པ་ལས་འབྱུང་བར་འགྱུར་རོ། །གཞང་འབྲུམ་རླན་ཅན་ཁྲག་འཛག་པ་ནི་ཁྲག་དང་མཁྲིས་པ་འདྲེས་པས་ཟིན་པ་ལས་
འབྱུང་བར་འགྱུར་རོ། །ནད་རྣམས་ལྡང་རྒྱུ་སྔར་བཤད་པ། །ཞེས་བྱ་བ་ལ། ནད་རྣམས་ལྡང་ཞིང་འཁྲུགས་པའི་རྒྱུ་གང་ཡིན་པ་ནི་སྔར་ནད་ཐམས་ཅད་ཀྱི་ནད་གཞི་བཤད་པའི་སྐབས་སུ་བཤད་ཅིང་བསྟན་པ་ཡིན་ནོ། །འཁྲུགས་པ་དེ་ཡིས་ཁོང་པ་ཡི། །མེ་དྲོད་
ཉམས་ཤིང་བཤང་བ་འཕེལ། །གཞན་ཡང་ཉལ་པོ་རབ་དྲགས་དང་། །བཞོན་པས་ཁོང་འཁྲུགས་སྟན་དག་ནི། །མ་སྙོམས་སྲ་དང་ཙོག་པུར་འདུག །འཇམ་རྩི་གཅེའུ་ས་དང་ནི། །རྡོ་དང་གོས་ཀྱིས་བྲུད་པ་དང་། །ཤིན་ཏུ་གྲང་བའི་ཆུས་བཀྲུས་དང་། །རྟག་ཏུ་འཁྲུ་བར་

བྱེད་པ་དང་། །བཤང་དང་གཅི་དང་འཕྱེན་གྱི་ཤུགས། །བཀག་དང་ནན་གྱིས་བཙིར་བ་དང་། །རིམས་དང་སྐྲན་དང་ཚད་པར་འཁྲུ། །འོར་ནད་སྐྱ་རྦབ་བེའུ་སྣབས་ཀྱིས། །སྐེམ་བྱས་གནོད་པར་འགྱུར་བ་ཡི། །སྤྱོད་པ་བསྟེན་ལས་འབྱུང་བར་འགྱུར། །བུད་མེད་ཟླ་གྲངས་མ་ཚང་
འཕྱིལ། །ཟླ་བ་རྫོགས་པས་གཟིར་ལས་འབྱུང་། །དེ་འདྲ་དག་དང་གཞན་ཡང་རླུང་། །ཐུར་སེལ་འཁྲུགས་པས་དྲི་མ་ནི། །གཞང་གི་གཉེར་མར་དེ་གཞག་པས། །དེ་ནི་མི་མངོན་གྱུར་པས་གནས། །གཞང་འབྲུམ་འབྱུང་བར་འགྱུར་བ་ཡིན། །ཞེས་བྱ་བ་ལ། ནད་ལྡང་བའི་རྒྱུ་
དེས་ཁོང་པའི་མེ་དྲོད་ཉམས་ཤིང་བྲི་ལ་བཤང་བ་ཞེས་བྱ་བའི་དྲི་མ་འཕེལ་བར་བྱེད་པ་དང་། རྒྱུ་གཞན་ཡང་བུད་མེད་ལ་འཁྲིག་པ་སྤྱད་པའི་ཉལ་པོ་དྲགས་པར་བྱ་བ་དང་། བཞོན་པ་ལས་ཁོང་འཁྲུགས་པ་སྟེ། རྟ་ལ་སོགས་པའི་བཞོན་པ་མི་སྲུན་པས་གཡེངས་ཤིང་
འཁྲུགས་པར་བྱས་པ་དང་། སྟན་མཐོ་དམན་མ་སྙོམས་པ་ལ་འདུག་པ་དང་། སྟན་སྲབ་པ་ལ་འདུག་པ་དང་། རྟག་ཏུ་ཙོག་པུར་འདུག་པ་དང་། འཇམ་རྩི་གཅེའུ་ལེགས་པར་མ་བཏང་བས་སྣད་པ་དང་། ས་གཞི་དང་རྡོ་ལ་སོགས་པས་བྲུད་དེ་སྣད་པར་བྱས་པ་དང་།
ཤིན་ཏུ་རྒྱུན་མི་འཆད་པར་ཆུ་གྲང་མོས་བཀྲུས་ཤིང་རེག་པར་བྱས་པ་དང་། རྟག་པར་རྒྱུན་ཏུ་འཁྲུ་བར་བྱེད་པ་དང་། བཤང་བ་ལ་སོགས་པའི་ཤུགས་འབྱུང་བ་བཀག་ཅིང་བརྣག་པ་དང་། དེ་དག་ཉིད་མི་འབྱུང་བཞིན་དུ་ནན་གྱིས་བཙིར་བ་དང་། རིམས་ལ་
སོགས་པའི་ནད་ཀྱིས་སྐེམ་ཞིང་རིད་པར་བྱས་པ་དང་། ལུས་ལ་སོགས་པ་ལ་གནོད་ཅིང་གདུང་བར་འགྱུར་བའི་ལས་ཀྱི་སྤྱོད་པ་བསྟེན་པ་དེ་དག་ལས་གཞང་འབྲུམ་འབྱུང་བར་འགྱུར་རོ། །ཡང་བུད་མེད་རྣམས་ལ་ནི་ནད་དེ་དག་གི་སྟེང་དུ་ཟླ་བ་མ་ཚང་ཞིང་། མངལ་
ན་གནས་པའི་སེམས་ཅན་སྐྱེ་བའི་དུས་ལ་མ་བབ་ཅིང་། འཕྱིལ་བ་དང་ཟླ་བ་རྫོགས་ཤིང་ཚང་བར་འདུག་ཀྱང་དེ་གཟིར་བ་སྟེ་གནོད་པ་དང་བཅས་པར་བུ་བཙས་པ་ལས་གཞང་འབྲུམ་འབྱུང་བར་འགྱུར་རོ། །ནད་ཀྱི་རྒྱུ་དེ་འདྲ་བ་དེ་དག་དང་། རྣམ་པ་གཞན་ཡང་ཐུར་དུ་

སེལ་བ་ཞེས་བྱ་བའི་རླུང་འཁྲུགས་ཤིང་གནོད་པར་འགྱུར་བས་དྲི་མ་སོགས་པར་བྱེད་དེ། །གཞང་གི་གཉེར་མའི་གནས་སུ་བཀག་ནས་གནས་པར་བྱེད་ལ། དེས་ན་གཞང་གི་གཉེར་མ་དེ་རྣམས་སུ་ནི་མི་མངོན་པར་གནས་ཤིང་གསེབ་ཏུ་ཞུགས་
པ་དེ་དག་རུལ་བར་འགྱུར་བའི་གནོད་པས་ཉེན་ནས་གཞང་འབྲུམ་སྐྱེ་བར་འགྱུར་བ་ཡིན་ནོ། །དེ་ཡི་སྔོན་ཚུལ་མེ་དྲོད་ཉམས། །བརླ་ནི་རེངས་ཤིང་ན་བ་དང་། །བྱིན་པའི་ཉྭ་ན་མགོ་འཁོར་ཞིང་། །ཡན་ལག་ན་ཞིང་མིག་གཉིས་སྐྲང་། །བཤང་བ་འཁྲུ་བའམ་ཡང་ན་སྲི། །
རླུང་ཆེན་ནང་ནས་འཁྱིལ་བ་དང་། །ཕལ་ཆེར་ལྟེ་བའི་འོག་ནས་རྒྱུ། །ནད་བཅས་བཅད་པ་ལྟ་བུར་སེམས། །དཀའ་བར་འབྱུང་ཞིང་སྒྲ་ཅན་འབྱུང་། །རྒྱུ་མ་ཀྲུལ་ཀྲུལ་ཟེར་ཞིང་སྤོ། །སྐེམ་ཞིང་སྒྲེགས་པ་མང་དུ་འབྱུང་། །གཅིན་མང་བཤང་ཉུང་ཡི་ག་འཆུས། །སྒྲེགས་
པ་དུད་འདྲ་སྐྱུར་བ་འབྱུང་། །མགོ་དང་རྒྱབ་དང་བྲང་དུ་གཟེར། །སྙོམ་ཞིང་ཁ་དོག་ཉམས་པ་དང་། །གློང་བག་དབང་པོ་ཉམ་ཆུང་དང་། །ཁྲོ་ཞིང་བསྙེན་བཀུར་དཀའ་བ་དང་། །མ་ཞུ་སྐེམ་ནད་སྐྱ་རྦབ་དང་། །དམུ་རྫིང་རྣམས་ལ་སོམ་ཉི་སྐྱེས། །ཞེས་བྱ་བ་ལ། གཞང་འབྲུམ་
དེ་རྣམས་ཀྱི་སྔོན་བྱུང་བའི་ཚུལ་ལམ། གཟུགས་ནི་ཕོ་བའི་མེ་དྲོད་ཉམས་ཤིང་བྲི་བ་དང་། བརླ་ཐོག་ཐག་ན་བ་དང་། བྱིན་པ་གཉིས་ཀྱི་ཉ་གཅུས་པ་སྙམ་དུ་སེམས་ཤིང་ན་བ་ལ་སོགས་པ་དང་། བཤང་བ་ཆེད་འགའ་ནི་འཁྲུ་ཞིང་སླ་ལ། ཆེད་འགའ་ནི་སྲི་ཞིང་རྟུག་སྐམ་
དུ་འབྱུང་བ་དང་། རླུང་ཆེ་ཞིང་མང་བ་དང་། རྒྱུ་མའི་ལམ་བཀག་ནས་ནད་ནང་དུ་འཁྱིལ་ཞིང་མི་ཐོན་པ་དང་། དེ་ཉིད་ཀྱིས་ན་ཕལ་ཆེར་ནད་ལྟེ་བའི་ནང་ན་རྒྱུ་ཞིང་ཟུག་པ་དང་། ཕན་ཚུན་གཟེར་བའི་ནད་དང་བཅས་པ་དང་། རྒྱུ་མའི་ནང་ཀུན་དུ་བཅད་པ་སྙམ་དུ་སེམས་པ་དང་།
འབྱུང་བར་དཀའ་ཞིང་ཐོགས་ལ་ཕྱིར་འབྱུང་བ་ཡང་སྒྲ་ཅན་དུ་འབྱུང་བ་དང་། རྒྱུ་མའི་ནང་ཕན་ཚུན་ཀྲུལ་ཀྲུལ་ཟེར་ཞིང་འཁྲོག་པ་དང་སྦོ་བ་དང་། སྐེམ་ཞིང་རིད་པ་ལ་སོགས་པ་དང་། སྒྲེགས་པ་དུད་པ་དང་འདྲ་བར་དཀུ་བར་འོང་ཞིང་སྐྱུར་བར་འབྱུང་བ་དང་། མགོ་ལ་སོགས་

པ་གཟེར་ཞིང་ན་བ་དང་། སྙོམ་ཞིང་ན་བ་དང་། ལས་ལ་མི་བརྩོན་པ་དང་། ཁ་དོག་ཉམས་པ་སྟེ། ཐལ་བའི་རང་བཞིན་གྱི་ཁ་དོག་ལས་གཞན་དུ་གྱུར་བ་མེད་པ་དང་། སྤྲོ་བ་མེད་པ་དང་། དབང་པོ་ཉམ་ཆུང་ཞིང་རང་རང་གི་ལས་ལ་འཇུག་མི་ནུས་པ་དང་། ཁྲོ་ཞིང་སེམས་
འཁྲུགས་པ་དང་། བསྙེན་བཀུར་དཀའ་ཞིང་སྡུག་བསྔལ་བས་བསྙེན་བཀུར་བྱ་དགོས་པ་དང་། མ་ཞུ་བའི་གནས་དམུ་རྫིང་གི་བར་གྱི་གནས་རྣམས་ཡོད་པར་སོམ་ཉི་སྐྱེས་ཤིང་དོགས་པར་འགྱུར་བ་ཡིན་ནོ། །གཞང་འབྲུམ་སྐྱེ་བར་གྱུར་པ་ལ། །འདི་དག་ཉིད་ནི་
འཕེལ་བར་འགྱུར། །ཞེས་བྱ་བ་ལ། གཞང་འབྲུམ་གྱི་ནད་སྐྱེས་ཤིང་བྱུང་བར་གྱུར་པ་ལ། སྔར་བྱུང་བའི་ཚུལ་གྱིས་རྟགས་འདི་དག་ཉིད་འཕེལ་ཞིང་དེའི་ཚུལ་གསལ་བ་ཉིད་དུ་འགྱུར་རོ། །དེ་ཡིས་འོག་གི་ལམ་བཀག་པས། །ཐུར་དུ་སེལ་བའི་རླུང་ལྡོག་སྟེ། །
ལུས་དང་དབང་པོ་ཀུན་གནས་པའི། །རླུང་གཞན་ཐམས་ཅད་འཁྲུགས་པར་བྱེད། །དེ་བཞིན་བཤང་གཅི་མཁྲིས་པ་དང་། །བད་ཀན་ལུས་ཟུངས་རྟེན་བཅས་པ། །འཁྲུགས་ཤིང་མེ་དྲོད་ཉམས་པར་བྱེད། །ཅེས་བྱ་བ་ལ། གཞང་འབྲུམ་དེས་འོག་གི་ལམ་བཤང་
སྒོ་ཞེས་བྱ་བ་བཀག་པས་ཐུར་དུ་སེལ་བའི་རླུང་འབྱུང་བར་ལྡོག་པ་ན་ལམ་བཀག་པའི་ཕྱིར་རླུང་དེ་སླར་ལྡོག་པར་བྱེད་ལ། དེ་ལྟར་ལྡོག་པ་དེས་ལུས་དང་དབང་པོའི་ཚོགས་ཀུན་ལ་གནས་ཤིང་བརྟེན་པའི་རླུང་དང་མེ་དང་མཉམ་དུ་གནས་པ་དང་། ཁྱབ་བྱེད་དང་སྟོད་དུ་རྒྱུ་བ་
དང་། སྲོག་ཅས་བྱ་བ་ཐམས་ཅད་འཁྲུགས་ཤིང་གཡོ་བར་བྱེད་ལ། དེ་བཞིན་དུ་བཤང་གཅི་ལ་སོགས་པ་རྟེན་ནམ་གནས་དང་བཅས་པ་དང་འཁྲུགས་ཤིང་གཡོ་བར་བྱེད་ལ། ཁོང་པའི་མེ་དྲོད་ཀྱང་ཉམས་པར་བྱེད་དོ་ཞེས་བྱ་བར་སྦྱར་རོ། །དེ་ནས་གཞང་འབྲུམ་ནད་
ཅན་ལ། །ཕལ་ཆེར་ཐམས་ཅད་ཉེར་འབྱུང་བ། །སྐེམ་ཞིང་མཆོག་ཏུ་བསྐྱོད་མི་ནུས། །སྟོབས་ཟད་ཁོང་རྨྱ་བཞིན་མདངས་ཉམས། །ལུས་ལྷོད་སྙིང་པོ་མེད་འགྱུར་ཞིང་། །འབུས་ཟོས་པ་ཡི་ཤིང་འདྲ་ལ། །བླ་བརྣན་མ་ལུས་དག་གིས་འདེབས། །ཇི་སྐད་བཤད་པའི་གནད་

གཟིར་ཞིང་། །ལུད་པ་སྐམ་དང་སྐད་འགགས་དང་། །ཁས་རོ་མི་ཚོར་ཆམ་འདེབས་སྤོ། །སྒྱིད་སྐྱུར་རྐང་ལག་ན་ཞིང་སློན། །སྦྲིད་པ་སྐྲང་དང་རིམས་ནད་དང་། །ཁུ་བ་ཟད་ཅིང་རབ་རིབ་སློན། །རྡེའུ་ཆགས་ནད་ཀྱིས་གཟིར་བ་དང་། །སྐད་འགགས་ཞུམ་
ལ་སེམས་ཁོང་ཆུད། །མཆིལ་མ་མང་འདོར་ཡི་ག་འཆུས། །རུས་ཚིགས་ཀུན་དང་སྙིང་ལྟེ་བ། །གཞང་དང་རྣ་རྩར་གཟེར་དང་བཅས། །གཞང་ནས་འབྲུ་ནི་མ་སྨིན་བཙོས། །ཁུ་བ་ལྟ་བུའི་སྦྱིན་བག་འཛག །རྟུག་སྐམ་སྦྱིན་པའང་སླ་བར་འགྱུར། །སྨིན་དང་མ་སྨིན་བར་
བར་འཁྲུ། །སྐྱ་ཞིང་སེར་དང་སྔོན་པོ་ཡི། །ཁྲག་ནི་སྦྱིན་བག་འཁྲུ་བར་འགྱུར། །ཞེས་བྱ་བ་ལ། དེ་ནས་སྔོན་པོའི་ཚུལ་གྱི་འོག་ཏུ་གཞང་འབྲུམ་གྱི་ནད་ཅན་ལ་ཕལ་ཆེར་འབྱུང་བར་འགྱུར་བའི་ཚུལ་ནི་སྐེམ་ཞིང་སྦེག་པ་དང་། མཆོག་ཏུ་སྨྲའམ་ཤིན་ཏུ་བསྐྱོད་
པར་མི་ནུས་ཤིང་རྩོལ་བ་ཆུང་བ་དང་། ཉམས་སྟོབས་ཟད་ཅིང་ནུས་པ་ཆུང་བ་དང་། ཁོང་པ་རྨྱ་ཞིང་སྒྱིད་ཞན་པ་དང་། བཞིན་མདངས་ཉམས་ཤིང་བཞིན་རས་ཀྱི་མདོག་མི་སྡུག་པ་དང་། ལུས་ལྷོད་ཅིང་བྱ་བ་མི་ལྕོགས་པ་དང་། སྙིང་པོ་ལྟར་སྲ་ཞིང་མཁྲང་བའི་བག་
མེད་དེ། དེ་ཡང་དཔེར་ན་འབུས་ཟོས་པའི་ཤིང་ལྟར་ཤིན་ཏུ་སྙི་ཞིང་སྙིང་པོ་མེད་པ་ཡིན་ནོ། །དེ་བཞིན་དུ་བླ་བརྣན་གྱི་ནད་དུ་མ་གཞན་ཇི་སྐད་བཤད་པ་རྣམས་ཀྱིས་ཀྱང་འདེབས་པར་འགྱུར་བ་དང་། དེ་བཞིན་དུ་སྔར་ཇི་སྐད་བཤད་པའི་གནད་རྣམས་གཟིར་ཞིང་གནོད་པར་འགྱུར་
བ་དང་། དེ་བཞིན་དུ་ལུད་པ་ལ་སོགས་པས་གནོད་ཅིང་ཉེན་པར་འགྱུར་བ་དང་། ཡང་དེ་བཞིན་དུ་སྐད་འགགས་པ་དང་། སྐད་གསང་ཞུམ་པར་འགྱུར་བ་དང་། སེམས་ཁོང་དུ་ཆུད་ཅིང་ཡིད་ལ་བྱེད་པས་གནས་པ་དང་། མཆིལ་མ་མང་དུ་འབྱུང་ཞིང་བད་ཀན་ལས་ཀྱིས་
ལྗན་ལྗིན་མང་དུ་འདོར་བ་དང་། ཡི་ག་འཆུས་པ་ལ་སོགས་པའི་ནད་དང་བཅས་པར་འགྱུར་བ་དང་། དེ་བཞིན་དུ་མ་སྨིན་པ་བཙོས་པའི་ཁུ་བ་ལྟ་བུར་སྦྱིན་བག་ཏུ་འདུག་ཅིང་འབྱིལ་བ་གཞང་ཁ་ནས་འཛག་པར་འགྱུར་བ་དང་། དེ་བཞིན་དུ་བར་སྐབས་བར་སྐབས་

སུ་ལན་འགའ་ནི་བཤང་བ་སྲི་ཞིང་འགགས་པས་རྟུག་སྐམ་དུ་འགྱུར་ལ། ལན་འགའ་ནི་འཁྲུ་ཞིང་སླ་བག་ཏུ་འབྱུང་བར་འགྱུར་ལ། དེ་བཞིན་དུ་ལན་འགའ་ནི་སྨིན་པར་འཁྲུ། ལན་འགའ་ནི་མ་སྨིན་པར་འཁྲུ་བ་ནས་སྦྱིན་བག་ཏུ་འཁྲུ་བར་འགྱུར་རོ། །གཞང་འབྲུམ་རླུང་
ཤས་ཆེ་ལས་གྱུར། །སྐེམ་ཞིང་ཙེག་ཙེག་ཚ་བ་དང་། །རྙིད་ཅིང་དམར་ནག་རེངས་པ་དང་། །མི་སྙོམས་རྩུབ་ཅིང་སྲ་བ་དང་། །ཕན་ཚུན་མི་འདྲ་ཡོ་བ་དང་། །རྩེ་མོ་རྣོ་ཞིང་གས་པ་དང་། །བིམ་པ་རྒྱ་ཤུག་ཁརྫུ་ར། །རས་བལ་ས་བོན་དང་འདྲ་ཞིང་། །ལ་ལ་ཀ་དམ་མེ་ཏོག་
འདྲ། །ལ་ལ་ཡུངས་ཀར་ལྟ་བུར་སྐྱེས། །མགོ་དང་ཕྲག་པ་རྩིབ་ལོགས་བརླ། །ཆུ་སོ་དག་ཏུ་ལྷག་པར་ན། །སྦྲིད་པ་སྒྲེགས་པ་བཤང་བ་སྲི། །སྙིང་འཕར་ཡི་ག་འཆུས་པ་སྐྱེད། །ལུད་དབུགས་མི་བདེ་མེ་དྲོད་ཉམས། །རྣ་བ་སྒྲ་བཅས་མགོ་འཁོར་བྱེད། །དེས་ཉེན་
རྟུག་སྐམ་ཉུང་ངུ་ནི། །སྒྲ་བཅས་སྐ་སླ་འདྲེན་མ་དང་། །ན་ཞིང་ལྦུ་བ་འབྱར་བག་ཅན། །རྟུག་སྐམ་ཚུལ་གྱིས་འབྱུང་བར་འགྱུར། །པགས་པ་སེན་མོ་བཤང་གཅི་དང་། །མིག་དང་གདོང་ནི་གནག་པར་འགྱུར། །སྐྲན་དང་མཆེར་པ་དམུ་རྫིང་དང་། །གཏུན་འདྲ་དེ་ཉིད་ལས་
འབྱུང་འགྱུར། །ཞེས་བྱ་བ་ལ། གཞང་འབྲུམ་གྱི་ནད་རླུང་གི་ཤས་ཆེ་ཞིང་རྒྱས་པ་ལས་ནི་གཞང་འབྲུམ་སྐམ་ཞིང་ཁྲག་མི་འཛག་ཅིང་སྐམ་པ་དང་། ཡུངས་ཀར་གྱི་ལྡེ་གུས་བསྐུས་པ་ལྟར་ཚ་བའི་བག་ཙེག་ཙེག་པོར་བྱེད་པ་དང་། རྙིད་ཅིང་རྩེ་མོ་ཡོ་བ་དང་། མདོག་དམར་
ནག་ཏུ་འདུག་པ་དང་། ཕུར་པ་ལྟར་རེངས་ཤིང་འགྲེང་བ་དང་། དབྱིབས་མཐོ་དམན་མི་སྙོམས་པ་དང་། སོག་ལེའི་ཁ་ལྟར་རྩུབ་པ་དང་། རྡོ་ལ་རེག་པ་ལྟར་སྲ་བ་དང་། དབྱིབས་ཕན་ཚུན་གཅིག་ལ་གཅིག་མི་འདྲ་བ་དང་། ཡོ་ཞིང་གཞུ་ལྟར་གུག་པ་དང་། རྩེ་མོ་ལྟར་རྣོ་བ་དང་།
རྩེ་མོ་གས་ཤིང་ཁ་བྱེ་བ་དང་། བིམ་པ་ཞེས་བྱ་བ་འབྲས་བུ་དམར་པོ་ཞིག་ཡོད་པའམ། རྒྱ་ཤུག་ཕྲ་མོའི་འབྲས་བུའམ་ཤིང་ཁ་རྫུ་རའི་འབྲས་བུའམ་རས་བལ་གྱི་ས་བོན་དང་འདྲ་ཞིང་མཚུངས་པར་སྐྱེ་བ་དང་། ཡང་ལ་ལ་ནི་ཀ་དམ་པའི་མེ་ཏོག་དང་འདྲ་བར་སྐྱེ་ལ། གཞང་

འབྲུམ་ལ་ལ་ཡུངས་ཀར་གྱི་ཚད་ཙམ་དུ་ཕྲ་བ་སྐྱེ་བར་འགྱུར་བ་དང་། ཡང་དེ་བཞིན་དུ་མགོ་བོ་ལ་སོགས་པ་ལྷག་པར་ན་ཞིང་ཟུག་པ་དང་། སྦྲིད་པ་ལ་སོགས་པ་མང་བ་དང་། བཤང་བ་སྲི་བ་ལ་སོགས་པ་ནས། རྟུག་སྐམ་གྱི་ཚུལ་གྱིས་བཤང་བ་
འབྱུང་བར་འགྱུར་བ་དང་། པགས་པ་ལ་སོགས་པ་གནག་པར་འགྱུར་བ་དང་། ཡང་རླུང་གི་གཞང་འབྲུམ་དེ་ཉིད་ལས་སྐྲན་ལ་སོགས་པ་ཡང་འབྱུང་བར་འགྱུར་བ་ཡིན་ནོ། །མཁྲིས་ཤས་ཆེ་ལ་རྩེ་མོ་ནི། །སྔོ་ཞིང་དམར་སེར་དཀར་བར་སྣང་། །ཕྲ་ཞིང་དྲི་མནམ་
ཁྲག་སླ་འཛག །སྲབ་ཅིང་འཇམ་ལ་ལྷོད་པ་ཡིན། །མཆེར་པའི་དུམ་བུ་ནེ་ཙོའི་ལྕེ། །སྲིན་པུ་པད་པའི་མཆུ་འདྲར་སྣང་། །ཚ་ཞིང་རྣགས་ལ་རིམས་དང་རྔུལ། །སྐོམ་དད་ཡི་ག་འཆུས་རྨོངས་སྐྱེད། །བཤང་དྲོ་སླ་ཞིང་སྔོ་ལ་ཚ། །སེར་ཞིང་དམར་བར་འཁྲུ་བར་འགྱུར། །
ནས་རུལ་ནང་འདྲ་པགས་པ་དང་། །སེན་སོགས་སྔོ་སེར་ལྗང་བར་འགྱུར། །ཞེས་བྱ་བ་ལ། མཁྲིས་པ་ཤས་ཆེ་བ་ལས་གྱུར་པའི་གཞང་འབྲུམ་ནི་འབྲུམ་བུའི་རྩེ་མོ་སྔོན་པོ་དང་། ཁ་དོག་དམར་སེར་དང་དཀར་པོར་སྣང་བ་དང་། ཕྲ་ཞིང་ཆུང་བ་ལ་སོགས་པ་དང་།
མཚེར་པའི་དུམ་བུ་ལ་སོགས་པ་གང་ཡང་རུང་བའི་རྣམ་པ་འདྲ་བ་ཚ་བ་ལ་སོགས་པའི་བླ་བརྣན་རྐེད་པ་དང་། བཤང་བ་དྲོ་ཞིང་སླ་བ་ལ་སོགས་པ་གང་ཡང་རུང་བའི་རྣམ་པར་འཁྲུ་བ་དང་། ནས་རུལ་བའི་ནང་གི་དབྱིབས་འདྲ་བ་དང་། པགས་པ་དང་སེན་མོ་དང་
མིག་དང་བཞིན་དང་དྲི་མ་རྣམས་སྔོ་ཞིང་སེར་བ་དང་ལྗང་བར་འགྱུར་རོ། །བད་ཀན་ཤས་ཆེ་རྩ་བ་སྦོམ། །མཐུག་ཅིང་ནད་ཀྱི་ཤུགས་དལ་དཀར། །སྐྲངས་ཤིང་རྒྱས་ལ་སྣུམ་པ་དང་། །འགྲེང་ཞིང་ཟླུམ་ལ་ལྕི་ཞིང་བརྟན། །འབྱར་བག་ཚོར་བ་ཆུང་ཞིང་འཇམ། །གཡའ་
ཞིང་རེག་ན་དགའ་བར་བྱེད། །ཀ་རི་ར་པ་ན་ས་ཡི། །རུས་པ་བ་ཡི་ནུ་སོར་འདྲ། །ཆུ་སོར་ཟུག་ཅིང་སྦོ་གཞང་ན། །ལྟེ་བ་ལྒང་པ་བཅད་སྙམ་སེམས། །ལུད་པ་དབུགས་མི་བདེ་སྙིང་ན། །མཆིལ་མང་ཆམ་འདེབས་ཡི་ག་འཆུས། །གཅིན་སྲི་མགོ་བོ་ཚོར་བ་མེད། །གྲང་བའི་

རིམས་ནི་སྐྱེད་པར་བྱེད། །ཁ་ཆུ་འཛག་ཅིང་མེ་དྲོད་ཉམས། །སློན་ཞིང་མ་ཞུའི་ནད་ཀུན་སྐྱེད། །བཤང་བ་ཚིལ་འདྲ་བད་ཀན་མང་། །འཁྲུ་དང་བཅས་པ་འབྱུང་བར་འགྱུར། །འཛག་པར་མི་བྱེད་རྡོལ་མི་བྱེད། །པགས་པ་ལ་སོགས་སྣུམ་ཞིང་དཀར། །ཞེས་བྱ་བ་ལ།
གཞང་འབྲུམ་བད་ཀན་ཤས་ཆེ་ཞིང་བདོ་བ་ལས་གྱུར་པའི་ནད་ནི་རྩ་བ་སྦོམ་ཞིང་ཆེ་བ་དང་། མཐུག་ཅིང་ལྷུན་ཆེ་བ་དང་། ནད་ཀྱི་ཤུགས་དལ་ཞིང་མི་དྲག་པ་དང་། མདོག་དཀར་བ་ལ་སོགས་པའི་རྣམ་པ་ནས་རེག་ན་དགའ་བའི་བར་གྱི་མཚན་ཉིད་དང་ལྡན་པ་དང་། ཤིང་ཀ་རི་
རའི་འབྲས་བུའི་རུས་པའམ། པ་ན་སའི་འབྲས་བུའི་རུས་པ་དང་དབྱིབས་འདྲ་བ་དང་། དེ་བཞིན་དུ་བའི་ནུ་སོར་གྱི་དབྱིབས་འདྲ་བ་ཡིན་ལ། དེ་བཞིན་དུ་ཆུ་སོར་ཟུག་པ་ལ་སོགས་པའི་ནད་སྐྱེད་པ་དང་