Luận tạng Tây Tạng (Tengyur) — Tập 201

ས་བྱ་བ་ལ། རྨི་ལམ་དེ་དག་གི་ནང་ནས། དང་པོའི་རྨི་ལམ་ལྔ་པོ་མཐོང་བ་ལ་སོགས་པ་ལྔ་ནི་འབྲས་བུ་མེད་ཅིང་མི་བདེན་པ་ཡིན་ནོ། །དེ་བཞིན་དུ་
རང་གི་རང་བཞིན་གྱི་ནད་གཞི་ལས་བྱུང་བ་དང་། རྗེས་སུ་མཐུན་པ་དེ་ཡང་འབྲས་བུ་མེད་པ་ཡིན་ཏེ། རླུང་གི་རང་བཞིན་ཅན་ལ་རླུང་གི་རང་བཞིན་དང་མཐུན་པ་རྨིས་པའི་རྨི་ལམ་དང་། མཁྲིས་པའི་རང་བཞིན་ཅན་ལ་མཁྲིས་པ་དང་རྗེས་སུ་མཐུན་པའི་རྨི་ལམ་ནས།
ཆ་འདྲེས་པའི་རང་བཞིན་ཅན་ལ། ཆ་འདྲེས་པའི་རང་བཞིན་ཅན་གྱི་རྨི་ལམ་རྨིས་པ་ཡང་དོན་མེད་པ་ཡིན་ནོ། །དེ་བཞིན་དུ་ཉིན་མོ་རྨིས་པ་ཡང་རྨིས་ནས་བརྗེད་པ་དང་། ཤིན་ཏུ་ཡུན་རིང་བ་དང་། ཤིན་ཏུ་ཡུན་ཐུང་བ་ཡང་འབྲས་བུ་མེད་པ་ཡིན་ནོ། །མཚན་སྟོད་རྨི་ལམ་
འབྲས་བུ་རིང་། །མཐོང་བ་ཆུང་ངུ་བྱེད་པ་ཡིན། །ཞེས་བྱ་བ་ལ། མཚན་སྟོད་ཕྱེད་པ་ཡན་ཆད་རྨི་ལམ་རྨིས་པ་ནི་དེའི་འབྲས་བུ་ཐག་རིང་བ་ཡིན་ལ། མཐོང་བ་དེ་ཡང་ཤས་ཆུང་ཞིང་མཐོང་བ་ཞན་པ་ཡིན་ནོ། །ནང་པར་མཐོང་དང་གཉིད་མ་ལོག །མི་མཐུན་གཏམ་
གྱིས་བར་མ་ཆོད། །དེ་ཡི་ཉིན་པར་འབྲས་ཆེན་འགྱུར། །ཞེས་བྱ་བ་ལ། ནང་པར་བ་ལང་གཟས་ལ་གཏོང་བའི་ཚེ། རྨི་ལམ་མཐོང་བ་དེ་ནི། དེའི་ཉིན་པར་ཉིད་འབྲས་བུ་ཆེན་པོ་མཐོང་བ་ཡིན་ནོ། །ཡང་རྨི་ལམ་དེ་མཐོང་ནས་གཉིད་ཀྱིས་མ་ལོག་ཅིང་རྨི་ལམ་གཞན་གྱིས་
བར་མ་ཆོད་པ་དང་། དེ་བཞིན་དུ་དེ་དང་མི་མཐུན་པའི་ཚིག་གིས་ཆོད་པར་མ་གྱུར་ན། དེ་དེའི་ཉིན་པར་མཐོང་ཞིང་འབྲས་བུ་དང་ཡང་བཅས་པ་ཡིན་ནོ། །སྦྱིན་དང་སྦྱིན་སྲེག་ལ་སོགས་ཀྱིས། །རྨི་ལམ་འབྲས་བུ་ཆུང་བར་འགྱུར། །ཞེས་བྱ་བ་ལ། གལ་ཏེ་རྨི་ལམ་ངན་པ་ཞིག་རྨིས་ན་

དེའི་རྗེས་ལ་དེ་ཞི་བར་བྱ་བའི་ཕྱིར་སྦྱིན་སྲེག་ལ་སོགས་པ་བྱས་ན། རྨི་ལམ་ངན་པ་དེ་འབྲས་བུ་ཆུང་བར་འགྱུར་རོ། །སོགས་པ་སྨོས་པས་ནི་བརྟུལ་ཞུགས་དང་གཙང་སྦྲ་དང་སེམས་ནང་དུ་འདུ་ཞིང་བསམ་གཏན་ལ་མཉམ་པར་འཇོག་པ་དང་། ཏིང་ངེ་འཛིན་དང་།
བཀྲ་ཤིས་ཀྱི་ཆོ་ག་བྱས་པ་ལ་སོགས་པ་བསྡུའོ། །གང་ཞིག་རྨི་ལམ་ངན་མཐོང་ནས། །སླར་ཡང་གནས་སྐབས་དེ་ཉིད་དུ། །རྨི་ལམ་བཟང་པོ་མཐོང་གྱུར་ན། །འབྲས་བུ་བཟང་པོ་ཉིད་ཐོབ་འགྱུར། །ཞེས་བྱ་བ་ལ། གང་ཞིག་གིས་རྨི་ལམ་ངན་ཞིང་མི་དགེ་བ་མཐོང་ཞིང་རྨིས་ནས་ཡང་
གནས་སྐབས་དེ་ཉིད་དུ་རྨི་ལམ་ངན་པའི་རྗེས་ལ་རྨི་ལམ་བཟང་ཞིང་དགེ་བར་གྱུར་པ་མཐོང་ན། སྐྱེས་བུ་དེས་འབྲས་བུ་བཟང་པོ་ཉིད་འཐོབ་པར་འགྱུར་གྱི། རྨི་ལམ་ངན་པའི་དབང་དུ་མི་འགྱུར་རོ། །ལྷ་དང་བྲམ་ཟེ་ཁྱུ་མཆོག་དང་། །བ་ལང་རྒྱལ་པོ་མཛའ་བཤེས་གསོན། །སྐྱེས་བུ་དམ་པ་
གྲགས་ལྡན་དང་། །མེ་འབར་བ་དང་དྭངས་པའི་མཚོ། །བུ་མོ་ཁྱེའུ་སེར་བ་དང་། །གོས་དཀར་གྱོན་ཞིང་མདངས་དང་ལྡན། །སྐྱེས་བུས་བཟའ་དང་ལུས་འབར་དང་། །ཁྲག་གིས་ལུས་ཀུན་བྱུགས་པ་དག །གང་གིས་མཐོང་བར་གྱུར་པ་དང་། །ཞེས་བྱ་བ་ལ། ལྷ་ལ་སོགས་པའི་རྨི་
ལམ་བཟང་པོ་འདི་ལྟ་བུ་གང་གིས་མཐོང་བ་དེ་ཚེ་རིང་བ་ལ་སོགས་པའི་ཡོན་ཏན་ཐོབ་པར་འགྱུར་རོ། །ལྷ་ནི་བརྒྱ་བྱིན་དང་ཆུ་ལྷ་ལ་སོགས་པའོ། །མཛའ་བཤེས་ནི་མཛའ་བོ་སྟེ་དེ་ཡང་གསོན་པོའོ། །སྐྱེས་བུ་དམ་པ་ནི་ཆོས་དང་ལྡན་པའི་ངང་ཚུལ་ཅན་ནོ། །གྲགས་ལྡན་ནི་
སྙན་པས་ཀུན་ཏུ་ཁྱབ་པའི་མིའོ། །མེ་འབར་བ་ནི་ཤིང་མང་པོ་དང་བཅས་ཤིང་འབར་བའོ། །དྭངས་པའི་མཚོ་ནི་རྙོག་པ་མེད་པའི་མཚོའོ། །བུ་མོ་དང་ཁྱེའུ་ནི་ན་ཚོད་དང་པོ་ལ་གནས་པ་སྟེ། དེ་ཡང་ཁ་དོག་སེར་བ་དང་། གོས་དཀར་པོ་གྱོན་ཞིང་མདངས་དང་ལྡན་ཞིང་
གཟུགས་བཟང་བའོ། །སྐྱེས་བུ་ཟ་བ་ནི་མིའི་ཟས་ཟ་བའོ། །ལུས་འབར་བ་ནི་ལུས་མེའི་ཕུང་པོ་ལྟར་འབར་བའོ། །ཁྲག་གིས་ལུས་ཀུན་བསྒོས་པ་ནི་ཁྲག་གིས་བསྒོས་ཤིང་བྱུགས་པ་སྟེ། དེ་ལྟ་བུའི་རྣམ་པ་གང་གིས་རྨི་ལམ་དུ་མཐོང་བ་དེ་ནི་དགེ་བ་ཡིན་ནོ། །གདུགས་

དང་ཤ་རློན་མེ་ལོང་དུག །སྣ་མ་དཀར་པོས་གོས་པ་དང་། །མི་གཙང་གིས་བྱུགས་འབྲས་བུ་རྙེད། །ཅེས་བྱ་བ་ལ། ཡང་སྐྱེས་བུ་གང་ཞིག་རྨི་ལམ་གྱི་ནང་དུ་གདུགས་ལ་སོགས་པ་རྙེད་པ་རྨིས་པ་དེས་ཀྱང་ཚེ་རིང་བ་ལ་སོགས་པ་ཐོབ་པར་འགྱུར་རོ། །དུག་ནི་ཧ་ལ་ཧ་ལ་
འམ་བཙན་དུག་ལ་སོགས་པའོ། །སྣ་མའི་མེ་ཏོག་དཀར་པོ་ནི་བར་བར་ན་ཁ་དོག་རྣམ་པ་བཞི་དང་ལྡན་པའོ། །མི་གཙང་བས་བྱུགས་པ་ནི་བཤང་བས་ལུས་ལ་བྱུགས་པའོ། །འབྲས་བུ་ནི་ཨ་མྲའི་ཤིང་ཐོག་དང་། སྐྱུ་རུ་ར་དང་། སྟ་རྒའི་འབྲས་བུ་ལ་སོགས་པའོ། །
རི་བོ་ཁང་བཟངས་འབྲས་བཅས་ཤིང་། །འཛེག་དང་སེང་གེ་གླང་ཆེན་རྨི། །རྟ་དང་བ་ལང་དག་ལ་ཞོན། །ཞེས་བྱ་བ་ལ། རྨི་ལམ་དུ་རི་བོར་འཛེག་པ་ལ་སོགས་པ་རྨིས་པ་ཡང་བདེ་བ་ཐོབ་པར་འགྱུར་རོ། །རི་བོ་ནི་བྲག་རིའོ། །ཁང་བཟངས་ནི་ཁང་པ་བརྩེགས་པའི་
སྟེང་ངོ་། །འབྲས་བུ་དང་བཅས་པའི་ཤིང་ནི་ཤིང་ཏོག་ཕུན་སུམ་ཚོགས་པ་དང་ལྡན་པ་སྟེ། དེ་དག་ལ་འཛེག་པ་དང་། ཆུ་བོ་མཚོ་བྲན་རྒྱ་མཚོ་བརྒལ། །ཞེས་བྱ་བ་ལ། ཡང་མི་གང་ཞིག་རྨི་ལམ་དུ་ཆུ་བོ་ལ་སོགས་པ་ལས་བརྒལ་ཞིང་ཐར་བར་རྨིས་པ་དེ་ཡང་བདེ་བ་
ཐོབ་པར་འགྱུར་རོ། །ཤར་དང་བྱང་དུ་འགྲོ་བ་དང་། །བགྲོད་མིན་འགྲོ་དང་ཤི་བ་དང་། །ཞེས་བྱ་བ་ལ། ཡང་མི་གང་ཤར་རམ་བྱང་གི་ལམ་དུ་རྨི་ལམ་དུ་འགྲོ་བ་རྨི་བ་དང་། བགྲོད་མིན་འགྲོ་བ་སྟེ། རང་དང་རིས་མི་མཐུན་པའམ། གདོལ་པ་ལ་སོགས་པ་སྤྱོད་པ་རྨིས་པ་
དང་། བདག་ཉིད་ཤི་བར་རྨི་བ་དེ་ཡང་ཚེ་རིང་བ་ལ་སོགས་པ་ཐོབ་པར་འགྱུར་རོ། །ཉམ་ང་ལས་ཐར་ལྷ་རྣམས་དང་། །ཕ་མས་མངོན་པར་བསྟོད་པ་དང་། །ངུ་དང་ལྷུང་ལས་ལྡང་བ་དང་། །དགྲ་བོ་ཕམ་པར་བྱས་པ་ནི། །གང་རྨིས་ཚེ་རིང་ནད་མེད་དང་། །ནོར་མང་པོ་ནི་རྙེད་
པར་འགྱུར། །ཞེས་བྱ་བ་ལ། ཡང་གང་ཞིག་ཉམ་ང་ཞིང་དོགས་པའི་གནས་ལས་ཐར་ཞིང་བྱུང་བ་དང་། དེ་བཞིན་དུ་ལྷ་དང་ཕམ་ལ་སོགས་པས་རྨི་ལམ་གྱི་ནང་དུ་བསྟོད་པ་དང་བཀུར་བ་རྨི་བ་དང་། ཡང་གང་ཞིག་ངུ་ཞིང་མཆི་མ་འབྱིན་པ་དང་། དེ་བཞིན་དུ་ས་ལ་ལྷུང་ཞིང་འགྱེལ་བ་

ལས་ལྡང་བ་དང་། དེ་བཞིན་དུ་སྡང་བར་སེམས་པའི་དགྲ་བོ་ཕམ་པར་བྱས་པའི་རྨི་ལམ་སྐྱེས་བུ་གང་ཞིག་རྨིས་པར་བྱས་པ་དེ་ཚེ་སྟེ་སྲོག་གནས་པ་དང་། ནད་མེད་པ་སྟེ་བདེ་བར་གནས་པ་དང་། ནོར་དང་འབྱོར་པ་མང་པོ་རྙེད་ཅིང་ཐོབ་པར་འགྱུར་རོ། །
དེ་བཞིན་ནད་པའི་གཡོག་འཁོར་ནི། །བཀྲ་ཤིས་ཆོ་ག་ཕུན་སུམ་ཚོགས། །དད་ལྡན་རྗེས་སུ་མཐུན་པ་དང་། །ནོར་མང་བསྡུས་པར་གྱུར་པ་དང་། །སྙིང་སྟོབས་མཚན་ཉིད་དང་ལྡན་ཞིང་། །སྨན་པ་བྲམ་ཟེ་སོགས་ལ་གུས། །གསོ་དཔྱད་རྣམས་ལ་སྐྱོ་བ་མེད། །དེ་ནི་ནད་མེད་
འགྱུར་མཚན་ཉིད། །ཅེས་བྱ་བ་ལ། ཡང་དེ་བཞིན་དུ་ཉེ་དུ་དང་ཆུང་མ་དང་བྲན་ལ་སོགས་པའི་གཡོག་འཁོར་ཡོན་ཏན་དང་ལྡན་པ་དང་། བཀྲ་ཤིས་ཤིང་དམ་པའི་སྤྱོད་པའི་ཆོ་གའི་རྗེས་སུ་མཐུན་པའི་ཡོན་ཏན་ཕུན་སུམ་ཚོགས་པ་དང་ལྡན་པ་དང་། ནད་པ་དད་པ་དང་ལྡན་
པས་སྨན་དཔྱད་བྱས་པས་ངའི་ནད་ལེགས་པར་སོས་སོ་ཞེས་ཡིད་ཆེས་པ་དང་ལྡན་པ་དང་། དེ་བཞིན་དུ་སྨན་པའི་མན་ངག་དང་རྗེས་སུ་མཐུན་པར་བྱེད་ཅིང་གུས་པ་དང་། དེ་བཞིན་དུ་ནོར་མང་དུ་བསྡུས་ཤིང་ཡོ་བྱད་ཕུན་སུམ་ཚོགས་པ་དང་ལྡན་པ་དང་། སྙིང་སྟོབས་
ཀྱི་མཚན་ཉིད་གཙང་སྦྲ་དང་ཡོད་པར་ལྟ་བ་ལ་སོགས་པ་དང་ལྡན་པ་དང་། དེ་བཞིན་དུ་སྨན་པ་དང་བྲམ་ཟེ་ལ་སོགས་པ་ལ་གུས་ཤིང་འདུད་པ་དང་། དེ་བཞིན་དུ་གསོ་དཔྱད་ཀྱི་སྦྱོར་བ་སྨན་བཏུང་བ་ལ་སོགས་པ་ལ་སྐྱོ་ཞིང་སྒྱིད་ལུག་པ་མེད་པ་སྟེ། འཁོར་དང་རང་གི་ཡོན་
ཏན་དེ་ལྟ་བུ་དང་ལྡན་པ་གང་ཡིན་པ་དེ་ནི་ནད་མེད་ཅིང་བདེ་བ་ཉིད་དུ་འགྱུར་བའི་མཚན་ཉིད་དམ་རྟགས་ཡིན་ནོ། །རྟག་ཏུ་ཤིས་པ་སྡུད་པ་དང་། །བཀྲ་མི་ཤིས་པ་རྣམ་པར་སྤང་། །འདི་དག་དེ་ཉིད་མཐོང་བ་ཡི། །དྲང་སྲོང་རྣམས་ཀྱིས་ཤིས་པར་བཤད། །ཅེས་བྱ་བ་ལ། ཡང་དུས་
རྟག་ཏུ་བཀྲ་ཤིས་པར་འགྱུར་བའི་དངོས་པོ་སྡུད་ཅིང་ཉེ་བར་བསགས་པ་དང་། བཀྲ་མི་ཤིས་པའི་དངོས་པོ་ཉེ་བར་སྤྱོད་པའི་མཚན་ཉིད་ཐམས་ཅད་ཉེ་བར་སྤོང་ཞིང་འདོར་བར་འགྱུར་བ་སྟེ། སྡུད་པ་དང་སྤང་བ་འདི་དག་ནི་དེ་ཁོ་ན་ཉིད་མཐོང་ཞིང་མངོན་པར་ཤེས་པ་ལྔ་དང་ལྡན་པའི་དྲང་

སྲོང་རྣམས་ཀྱིས་བཀྲ་ཤིས་ཤིང་དགེ་བར་འགྱུར་བར་བཤད་པ་དེས་ཀྱང་ནད་མེད་པའི་མཚན་ཉིད་དུ་བཤད་དོ། །དེ་ལྟར་འདི་ནི་སྐྱེ་དང་འཆི། །མཚན་ཉིད་གང་ཕྱིར་བཤད་པས་ན། །དེ་ཕྱིར་ལུས་ཀྱི་གནས་ཡིན་པས། །འདི་ནི་ལུས་ཀྱི་གནས་སུ་བཤད། །ཅེས་བྱ་བ་ལ།
དེ་ལྟར་ཞེས་བྱ་བའི་སྒྲ་ནི་རྫོགས་པ་སྟེ། ལུས་ཀྱི་གནས་འདིར་ལུས་དེའི་སྐྱེ་བ་དང་འཆི་བའི་མཚན་ཉིད་གང་ཡིན་པ་གང་གི་ཕྱིར་བཤད་ཅིང་བསྟན་པ་ནས། རྒྱུ་དེའི་ཕྱིར་ལུས་ཀྱི་གནས་ཀྱི་སྐྱེ་བ་དང་འཆི་བ་ཡིན་པས། གནས་འདི་ནི་ལུས་ཀྱི་གནས་ཡིན་ནོ་ཞེས་བཤད་
ཅིང་བསྟན་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ལུས་ཀྱི་གནས་ཀྱི་ལེའུ་དྲུག་པའི་རྣམ་པར་འགྲེལ་པའོ།། །།ལུས་
ཀྱི་གནས་ཏེ་གནས་གཉིས་པའི་འགྲེལ་པ་རྫོགས་སོ།། །།དེ་ནས་ནད་ཐམས་ཅད་ཀྱི་ནད་གཞི་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་དགོས་པ་ནི་འདི་ཡིན་ཏེ། གོང་དུ་ནི་ལུས་ཐམས་ཅད་བཤད་པ་ཡིན་ལ། དེ་ལ་རིམས་ལ་
སོགས་པའི་ནད་ཐམས་ཅད་འབྱུང་བར་འགྱུར་བས། དེ་རྣམ་པར་འཇིག་པས་ནད་གཞིའི་གནས་བཤད་པ་ཡིན་ནོ། །དེ་ནས་ཞེས་བྱ་བ་ནི་སྔར་བཤད་ཟིན་ཏོ། །ནད་ཀྱང་ཡིན་ལ་ཐམས་ཅད་ཀྱང་ཡིན་པས་ནད་ཐམས་ཅད་དོ། །རྒྱུ་གང་གིས་ངེས་པར་འབྱིན་ཞིང་
བསྐྱེད་ལ་འབྱུང་བར་འགྱུར་བ་ནི་ནད་གཞི་སྟེ། དེ་ལྟར་ན་ནད་ཐམས་ཅད་འབྱུང་བར་བྱེད་པའི་རྒྱུ་གང་ཡིན་པ་དེ་བཤད་པར་བྱའོ་ཞེས་པའོ། །དེ་ཡང་རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་བཤད་དོ། །ཞེས་བྱ་བ་ལ་སོགས་པའི་
སྐྲས་ཀྱང་། ནད་དང་སྡིག་པ་རིམས་གནོད་བྱེད། །འགྱུར་བྱེད་སྡུག་བསྔལ་མ་ཞུའི་སྐྱོན། །ཟད་བྱེད་འཚོ་དཀའ་མཁུན་གནོད་སྐྱེད། །མིང་གི་རྣམ་གྲངས་སྒྲས་བཤད་དོ། །ཞེས་བྱ་བ་ལ། ནད་ལ་སོགས་པའི་སྒྲ་ནི་གཅིག་གིས་གཅིག་བཤད་པའི་རྣམ་གྲངས་ཚིག་དོན་

གཅིག་སྟོན་པར་བྱེད་པ་ཡིན་ཏེ། ཅིའི་ཕྱིར་ནད་ཅེས་བྱ་ཞེ་ན། སྡིག་པ་ལ་སོགས་པའི་མིང་གི་རྣམ་པས་སྡུག་བསྔལ་བ་ལ་སོགས་པའི་དོན་གྱིས་ན་ནད་ཅེས་བྱའོ། །ནད་གཞི་སྔར་བྱུང་ཚུལ་དང་ནི། །དེ་བཞིན་ཚུལ་ཕྱེད་གོམས་བྱེད་དང་། །དཀྱིལ་
གྱུར་ཤེས་པར་བྱེད་པ་སྟེ། །ནད་ནི་རྣམ་པ་ལྔར་ཤེས་བྱ། །ཞེས་བྱ་བ་ལ། ནད་རྣམས་ཀྱི་ཚུལ་ནི་ནད་གཞི་ལས་དཀྱེལ་དུ་གྱུར་པའི་བར་དུ་རྣམ་པ་ལྔར་ཤེས་ཤིང་རྟོགས་པར་བྱའོ། །དེ་དག་གི་ཚུལ་ཡང་ཇི་ལྟ་བུ་ཞེ་ན། གཞི་དང་རྒྱུ་དང་སྐྱེ་མཆེད་དང་། །རྐྱེན་དང་སློང་བར་བྱེད་
པའི་རྒྱུ། །རྣམ་གྲངས་ཀྱིས་ནི་ནད་གཞིར་བཤད། །ཅེས་བྱ་བ་ལ་སོགས་པའི་རྣམ་གྲངས་ཀྱི་སྒྲ་འདི་དག་གིས་དང་པོ་ནད་གཞིའི་མཚན་ཉིད་དྲང་སྲོང་ཆེན་པོ་རྣམས་ཀྱིས་བཤད་ཅིང་བསྟན་པ་ཡིན་ནོ། །གང་གིས་སྔར་བྱུང་ཚུལ་ཤེས་པས། །ནད་ནི་འབྱུང་བར་འདོད་འགྱུར་ལ། །
བྱེ་བྲག་ཕྱེད་པར་མ་གྱུར་པ། །ནད་ཀྱི་ཚུལ་ནི་ཇི་བཞིན་པར། །ཆུང་ཕྱིར་མཚན་ཉིད་མི་གསལ་བའོ། །ཞེས་བྱ་བ་ལ། སྔར་བྱུང་བའི་ཚུལ་ལམ། རྟགས་གང་གིས་ནད་ཀྱི་གཞི་སྔར་བྱུང་བའི་ཚུལ་ཤེས་ཤིང་རྟོགས་པར་འགྱུར་བ་ནི་ནད་འབྱུང་ཞིང་ཕྱིས་མི་ལྡང་བར་ནི་འདོད་
པར་འགྱུར་ལ། ནད་རླུང་ལ་སོགས་པའི་ནད་ཀྱི་བྱེ་བྲག་ཕྱེད་ཅིང་གསལ་བར་མ་གྱུར་ལ། རིམས་ལ་སོགས་པའི་ནད་ཀྱི་ཚུལ་ཕྱིས་ཇི་ལྟ་བར་འབྱུང་བའི་མཚན་ཉིད་ཇི་ལྟ་བ་བཞིན་དུ་དེའི་རྟགས་དང་མཚན་ཉིད་མི་གསལ་ཞིང་མངོན་དུ་མི་སྣང་བ་དེ་ནི་སྔར་བྱུང་བའི་ཚུལ་ཞེས་
བྱའོ། །དེ་ཉིད་གསལ་བ་ཉིད་གྱུར་པ། །ཚུལ་ཕྱེད་པ་ཞེས་བྱ་བར་བཤད། །ཅེས་བྱ་བ་ལ། སྔར་བྱུང་བའི་ཚུལ་དེ་ཉིད་གསལ་ཞིང་བྱེ་བྲག་ཕྱེད་པར་གྱུར་པ་ལ་ནི་ནད་ཀྱི་ཚུལ་ཕྱེད་པ་ཞེས་བྱ་བར་བཤད་དོ། །དབྱིབས་དང་གསལ་མངོན་རྟགས་དང་ནི། །མཚན་ཉིད་མཚན་
མ་རྣམས་ཡིན་ནོ། །ཞེས་བྱ་བ་ལ། ནད་ཀྱི་ཚུལ་ཕྱེད་པ་དེའི་མིང་གི་རྣམ་གྲངས་སྒྲའི་ཚུལ་གཞན་གྱིས་བསྟན་པ་ནི། །དབྱིབས་དང་གསལ་བ་ལ་སོགས་པའོ། །རྒྱུ་དང་ནད་དང་མི་མཐུན་ཞིང་། །མི་མཐུན་པ་ཡི་དོན་བྱེད་པའི། །སྨན་དང་ཟས་དང་སྤྱོད་ལམ་རྣམས། །ཉེ་བར་

བསྒྱུར་བས་བདེ་གྱུར་པ། །ཉམས་བརྟས་བྱེད་པར་ཤེས་བྱ་སྟེ། །དེ་ནི་གོམས་པ་ཞེས་བྱར་བཤད། །ཅེས་བྱ་བ་ལ། གོམས་ཤིང་བརྟེན་པར་བྱེད་པས་ན་གོམས་པ་སྟེ། ཉེ་བར་བསྒྱུར་བ་གང་གིས་ལུས་བདེ་བར་འགྱུར་བ་དེ་ལ་དྲང་སྲོང་རྣམས་ཀྱིས་གོམས་པ་ཞེས་བྱ་བར་
བཤད་དོ། །གང་གིས་ཉེ་བར་བསྒྱུར་བ་གོམས་པ་ཞེ་ན། སྨན་ལ་སོགས་པ་སྟེ། སྨན་ནི་ཨ་རུ་ར་དང་། སླེ་ཏྲེས་ལ་སོགས་པའོ། །ཟས་ནི་སཱ་ལུ་རྩ་སྣར་ལ་སོགས་པའོ། །སྤྱོད་ལམ་ནི་ལུས་དང་ངག་དང་ཡིད་ཀྱི་ཉེ་བར་སྤྱོད་པའི་ཁྱད་པར་ཏེ་རྩོལ་བ་དང་། གཉིད་མ་
ལོག་པ་དང་། གླུ་དང་ཁ་ཏོན་འདོན་པ་དང་། བསམ་གཏན་ལ་སོགས་པ་དང་ལྡན་པའོ། །དེ་དག་ཀྱང་ནད་ཀྱི་རྒྱུ་དང་ནད་དང་མི་མཐུན་པའི་དོན་བྱེད་ཅིང་། ནད་གཞིར་འགྱུར་བའི་ཚུལ་ལས་གོ་བཟློག་པ་དང་། དེ་བཞིན་དུ་ནད་ཀྱི་རྒྱུ་དེ་དག་དང་མི་མཐུན་པའི་དོན་བྱེད་
པའོ། །ནད་ཀྱི་རྒྱུ་དང་མི་མཐུན་པར་བསྟེན་པ་ལ། རྒྱུ་དང་མི་མཐུན་པ་ནི་དཔེར་ན་རྟས་པར་བྱེད་པ་ལས་བྱུང་བའི་ནད་ལས་ཉམས་དམད་པ་དང་། ཉམས་དམད་པ་ལས་བྱུང་བ་ལ་རྟས་པར་བྱེད་པ་དང་། རྩུབ་པ་ལས་བྱུང་བ་སྣུམ་པ་དང་། སྣུམ་པ་ལས་བྱུང་བ་ལ་རྩུབ་
པར་བྱ་བ་དང་། སྤྱོད་ལམ་མི་མཐུན་པ་ནི། གཉིད་ལོག་པ་ལས་བྱུང་བ་ལ་གཉིད་མ་ལོག་པར་བྱ་བ་དང་། གཉིད་མ་ལོག་པ་ལས་བྱུང་བ་ལ་གཉིད་ལོག་པར་བྱ་བ་དང་། འདུག་པ་ལས་བྱུང་བ་ལ་བརྩལ་བར་བྱ་བ་དང་། བརྩལ་བ་ལས་བྱུང་བ་ལ་འདུག་པར་བྱ་བ་སྟེ།
དེ་དག་ལ་སོགས་པ་ནི་རྒྱུ་དང་མི་མཐུན་པའོ། །ནད་དང་མི་མཐུན་པ་ནི་དཔེར་ན། རིམས་ནད་ལ་གླ་སྒང་དང་པར་པ་ཏ་ལ་སོགས་པ་སྦྱིན་པ་དང་། གཅིན་ནད་ལ་སྐྱེར་པ་དང་ནས་ཐུག་ལ་སོགས་པ་སྦྱིན་པ་ལྟ་བུ་དང་། སྤྱོད་ལམ་ནི་སྣུམ་གྱི་ཆོ་གའི་སྐབས་སུ་བཤད་པ་དང་འདྲ་
བར་ཐམས་ཅད་གོ་བཟློག་པའོ། །མི་མཐུན་པའི་བྱེད་པ་ནི་དཔེར་ན་ཆང་ལས་བྱུང་བའི་ནད་ལ་ཆང་ཉིད་བྱིན་ན། ཆང་ལས་བྱུང་བའི་ནད་ཉེ་བར་ཞི་བར་འགྱུར་ཞིང་སྨན་དུ་འགྱུར་བ་དང་། ཟས་ནི་དཔེར་ན་ཚད་པ་འཁྲུ་བའི་ནད་ལ། ནས་དང་མ་ཤ་དང་རྒྱ་སྣེའུ་ལ་སོགས་པ་བྱིན་པས་

ཞི་བར་འགྱུར་བ་དང་། སྤྱོད་ལམ་ནི་དཔེར་ན་མེས་ཚིག་པ་ལ་མེས་བསྲོ་བ་ཉིད་ཕན་པ་ལྟ་བུ་དང་། གཞན་ཡང་དཔེར་ན་སྐྱུགས་པའི་ནད་ལ་སྐྱུག་སྨན་བཏང་བ་དང་། ཁ་ཟས་ཀྱང་དེ་འབྱིན་པར་བྱེད་པས་སཱ་ལུ་ལ་སོགས་པ་བྱིན་པ་དང་། སྤྱོད་ལམ་
ནི་སོར་མོ་དང་ཨུཏྤ་ལའི་ཆུ་ལ་སོགས་པས་སློན་དུ་གཞུག་པ་ལྟ་བུ་དེ་ལ་ནི་ཉེ་བར་བསྒྱུར་བས་བདེ་བར་འགྱུར་བའི་གོམས་པ་ཞེས་བྱ་སྟེ། གང་གི་ཕྱིར་དེ་ཉིད་གོམས་པ་ནི་ནད་ཞི་བར་བྱེད་པས་ན་གོམས་པ་ཞེས་བྱའོ། །དེ་ལས་བཟློག་པའི་མ་གོམས་ནད། །མི་འཕྲོད་ནད་
ཅེས་བྱ་བའོ། །ཞེས་བྱ་བ་ལ། གོང་མ་དེ་ལས་བཟློག་པ་མ་གཏོགས་པ་སྟེ། གོམས་པའི་མཚན་ཉིད་ཇི་སྐད་དུ་བསྟན་པའི་ཉེ་བར་བསྒྱུར་བ་དེ་དང་མི་མཐུན་པ་དང་། སྨན་ལ་སོགས་པ་བསྟེན་པས་སྡུག་བསྔལ་ཐོབ་པར་འགྱུར་ཞིང་བདེ་བ་ལས་ཉམས་པར་བྱེད་པ་དེ་ལ་ནི་
མི་འཕྲོད་པ་ཞེས་བྱ་སྟེ། དེ་ཉིད་ནི་མ་གོམས་པའི་ནད་ཅེས་བྱའོ། །གང་གིས་ནད་ནི་དཀྱེལ་གྱུར་པས། །ཇི་བཞིན་རྗེས་སུ་འཕེལ་འགྱུར་ཞིང་། །ནད་རྣམས་རྫོགས་ཤིང་མངོན་གྱུར་པ། །སྐྱེས་ཤིང་འོངས་པ་དཀྱེལ་གྱུར་ཡིན། །ཞེས་བྱ་བ་ལ། རྣམ་པ་གང་གིས་རླུང་ལ་
སོགས་པའི་ནད་དཀྱེལ་དུ་གྱུར་ཅིང་སོགས་པ་དང་། ཇི་ལྟ་བ་བཞིན་དུ་རྗེས་སུ་འཕེལ་ཞིང་ཤས་ཆེར་སྐྱེ་བར་འགྱུར་བས་ནད་ཀྱི་ཚུལ་ལམ་དབྱིབས་ཀྱི་ཁྱད་པར་སོ་སོར་སྐྱེས་ཤིང་ནད་རྣམས་རྫོགས་པར་གྱུར་ནས། མངོན་དུ་གྱུར་པ་དེ་ལ་ནི་དཀྱེལ་སྐྱེས་པ་ཞེས་བྱའོ། །ཡང་
དེ་ཉིད་ནི་སྐྱེས་ཤིང་འོངས་པ་ཞེས་ཀྱང་བྱ་སྟེ། དེ་ཉིད་མཐར་ཕྱིན་པ་ཡིན་པའི་ཕྱིར་རོ། །དེ་ནི་གྲངས་བརྟག་གཙོ་བོ་དང་། །སྟོབས་དང་དུས་ཀྱིས་ཕྱེ་བ་ཡིན། །ཞེས་བྱ་བ་ལ། དཀྱེལ་སྐྱེས་པ་ནི་གྲངས་ལ་སོགས་པའི་དབྱེ་བས་རྣམ་པ་ལྔར་གྱུར་པ་ཡིན་ནོ། །གྲངས་ནི་ཇི་ལྟར་འདི་
ཉིད་ལས། །རིམ་ནི་བརྒྱད་དུ་བཤད་པ་ཡིན། །ཞེས་བྱ་བ་ལ། དབྱེ་བ་དེ་ཡང་ཇི་ལྟར་ན་ནད་གཞི་བསྟན་པ་འདི་ཉིད་ལས་རིམ་རྣམ་པ་བརྒྱད་ཡོད་པར་བཤད་པ་ལྟ་བུ་ནི་རེ་ཞིག་གྲངས་ཀྱི་རྣམ་པ་བཤད་པ་ཡིན་ཏེ། དེ་ཡང་དེ་བཞིན་དུ་ཁྲག་དང་མཁྲིས་པ་ནི་རྣམ་པ་གསུམ་དང་།

ལུད་པ་ནི་རྣམ་པ་ལྔའོ་ཞེས་བྱ་བ་ལ་སོགས་པ་ནི་གྲངས་ཡིན་པར་ཤེས་པར་བྱའོ། །ནད་རྣམས་སྤྱིར་ནི་བསྡུས་བ་ལས། །ཆ་ཤས་དབྱེ་བ་བརྟག་པ་ཡིན། །ཞེས་བྱ་བ་ལ། རླུང་ལ་སོགས་པའི་ནད་ཐ་མི་དད་པ་སྤྱིར་གཅིག་ཏུ་བསྡུས་པ་ལས་ཆ་ཤས་སུ་དབྱེ་ཞིང་ཆ་རེ་རེ་བགོས་པ་
ནི་བརྟག་པ་ཞེས་བྱའོ། །རང་དབང་གཞན་དབང་གཉིས་ལས་ནི། །ནད་རྣམས་གཙོ་བོར་བཤད་པ་ཡིན། །ཞེས་བྱ་བ་ལ། རང་དང་གཞན་གྱི་དབང་དུ་ཞེས་བྱ་བ་རྗེས་སུ་འབྲེལ་པ་ཡོད་པ་དང་། རྗེས་སུ་འབྲེལ་པ་མེད་པའི་ཚུལ་རྣམ་པ་གཉིས་ལས་ནད་རྣམས་ལ་གཙོ་བོར་གྱུར་
པ་ཞེས་བཤད་པ་ཡིན་ནོ། །རྒྱུ་སོགས་མ་ལུས་ཕྱོགས་གཅིག་ལས། །སྟོབས་ནི་ཆེ་ཆུང་ཤེས་པར་བྱ། །ཞེས་བྱ་བ་ལ། ནད་ཀྱི་རྒྱུ་ནི་ནད་གཞི་སྔར་བྱུང་བའི་ཚུལ་དང་། ཚུལ་ཕྱེད་པ་དང་། གོམས་པ་རྣམས་མ་ལུས་པ་འམ། ཕྱོགས་གཅིག་ལས་སྟོབས་ཆེ་ཆུང་
གི་བྱེ་བྲག་ཏུ་འགྱུར་བར་ཤེས་པར་བྱ་སྟེ། ནད་གཞི་ལ་སོགས་པ་བཞི་པོ་དེ་དག་ལས་མ་ལུས་པའི་ཁྱད་པར་ཐ་དད་པར་འགྱུར་རོ། །ནད་རེ་རེ་ཞིང་བསྟན་བཅོས་རྩོམ་པར་བྱེད་པས་ནད་ཀྱི་རྒྱུར་བཤད་པ་གང་ཡིན་པ་དེ་རྣམ་པ་ཐམས་ཅད་ནས་ཐམས་ཅད་དུ་མ་ལུས་པར་
ནད་སྐྱེད་པར་བྱེད་པའི་ཡན་ལག་ཏུ་གྱུར་པ་ཡིན་ནམ། འོན་ཏེ་ཕྱོགས་གཅིག་གིས་ཀྱང་ནད་སྐྱེད་པར་འགྱུར། དེ་བཞིན་དུ་མཚན་ཉིད་ཀྱང་རྣམ་པ་ཐམས་ཅད་དུ་རྫོགས་པ་ཡིན་ནམ། མ་རྫོགས་པ་ཡོད་ཅེས་རྟོགས་ན། དེའི་ཕྱིར་སྨྲས་པ་ནི། ཉིན་མཚན་དུས་དང་ཟས་
ཟོས་ཆས། །ཉེས་པ་ཇི་བཞིན་ནད་ཀྱི་དུས། །ཞེས་བྱ་བ་ལ། ཉིན་མོ་དང་མཚན་མོ་དང་དུས་དང་ཟས་ཟོས་པ་ནི་ཉིན་མཚན་དུས་དང་ཟས་ཟོས་པ་ཞེས་བྱ་སྟེ། དེ་རྣམས་ཀྱི་ཆ་ནི་ཆ་ཤས་ཏེ། དེས་ཉེས་པ་ཇི་ལྟར་འབྱུང་བ་ནི་ནད་ཀྱི་དུས་ཡིན་པར་ཤེས་པར་བྱ་སྟེ། དེ་ལྟར་ན་དུས་ཀྱི་
ཁྱད་པར་གྱིས་ཕྱེ་བ་ཡིན་ནོ། །དེ་ལྟར་ནད་གཞིའི་དོན་བཤད་ནས། །ཞེས་བྱ་བ་ལ། དེ་ལྟར་མདོར་བསྡུས་པའི་རྣམ་པ་འདིས་ནད་གཞི་ཞེས་བྱ་བའི་ཚིག་གི་དོན་བཤད་ཅིང་བསྟན་པ་ཡིན་ནོ། །དེ་ནི་རྒྱས་པར་བཤད་པར་བྱ། །ཞེས་བྱ་བ་ལ། ནད་གཞིའི་དོན་དེ་འོག་ནས་གཞུང་

རྩོམ་པར་བྱེད་པས་རྒྱ་ཆེར་སྟོན་ཅིང་འཆད་པ་ཡིན་ནོ། །ནད་རྣམས་ཀུན་གྱི་ནད་གཞི་ནི། །ནད་ནི་འཁྲུགས་པར་གྱུར་པ་ཡིན། །ཞེས་བྱ་བ་ལ། གནོད་པར་གྱུར་པའི་ནད་མ་ལུས་པ་ཀུན་གྱི་རྒྱུ་འམ་གཞི་ནི་རླུང་དང་མཁྲིས་པ་དང་བད་ཀན་ཏེ། ནད་ཀྱི་སྐྱོན་
གསུམ་པོ་འཁྲུགས་ཤིང་གཡོས་པར་གྱུར་པ་ལས་ལྡང་ཞིང་འབྱུང་བར་འགྱུར་བ་ཡིན་ནོ། །དེ་ནི་གནོད་འགྱུར་སྣ་ཚོགས་པ། །བསྟེན་པས་ལྡང་བར་འགྱུར་བར་བཤད། །ཅེས་བྱ་བ་ལ། དེ་རྣམས་ལྡང་བའི་རྒྱུ་ནི་ཟས་དང་སྤྱོད་ལམ་ལ་སོགས་པ་གནོད་པར་འགྱུར་བ་རྣམ་པ་
སྣ་ཚོགས་པ་བསྟེན་པས་རླུང་ལ་སོགས་པའི་ནད་ལྡང་ཞིང་འབྱུང་བར་འགྱུར་རོ། །གསུམ་པོའི་སྦྱོར་བ་རྣམ་པ་གསུམ། །གནོད་འགྱུར་སྔར་ནི་བཤད་པ་ཡིན། །ཞེས་བྱ་བ་ལ། རླུང་དང་མཁྲིས་པ་དང་བད་ཀན་གསུམ་པོའི་སྦྱོར་བ་རྣམ་པ་གསུམ་པོ་ཆུང་བ་དང་། ལོག་
པ་དང་། དྲག་པའི་མཚན་ཉིད་གནོད་པར་འགྱུར་བ་སྔར་མདོའི་གནས་ཀྱི་སྐབས་སུ་བཤད་པ་ཡིན་ནོ། །ཁ་དང་ཚ་དང་བསྐ་ཅུང་ཟད། །རྩུབ་དང་བཅུད་མེད་སྲ་བ་དང་། །བཀག་དང་ནན་གྱིས་བཙིར་བ་དང་། །མཚན་མོ་མི་ཉལ་སྐད་ཆེར་སྨྲ། །སྦྱངས་པའི་སྦྱོར་དྲགས་མྱ་ངན་
འཇིགས། །སེམས་ལས་དྲག་ཤུལ་བུད་མེད་དྲགས། །སོ་ག་ཉིན་མཚན་ཟས་ཞུའི་རྗེས། །རླུང་གི་ནད་ནི་ལྡང་བར་འགྱུར། །ཞེས་བྱ་བ་ལ། དེ་ལ་རླུང་གི་ནད་ནི་ཁ་བ་དང་ཚ་བ་ལ་སོགས་པས་ལྡང་ཞིང་འཁྲུགས་པར་འགྱུར་རོ། །ཆུང་ངུ་ཟ་བ་ནི་ཅུང་ཟད་ཟའོ། །བཅུད་མེད་
པར་ཟ་བ་ནི་བརྔ་ཞིང་བཏུ་བའི་དུས་ལས་ཡོལ་བའི་འབྲུ་གང་ཡིན་པ་དེ་ནི་བཅུད་མེད་པ་ཞེས་བྱ་སྟེ། དེ་ཡང་ལུང་ལས། འབྲུ་ནི་མ་སྨིན་ཐལ་ཆེས་པ། །བཅུད་མེད་ཟས་ནི་ཡིན་ཞེས་བྱ། །ཞེས་བཤད་པ་ཡིན་ནོ། །བཀག་པ་ནི་བཤང་གཅི་ལ་སོགས་པ་འབྱུང་བའི་ཤུགས་བཀག་
པའོ། །ནན་གྱིས་བཙིར་བ་ནི་དེ་རྣམས་མི་འབྱུང་བཞིན་དུ་བཙིར་བའོ། །མཚན་མོ་མི་ཉལ་བ་ནི་མཚན་མོ་གཉིད་མ་ལོག་པའོ། །སྐད་ཆེར་སྨྲ་བ་ནི་གསང་ཆེ་ཞིང་ང་རོ་ཆེན་པོ་དང་སྨྲ་བའོ། །སྦྱངས་པའི་སྦྱོར་བ་དྲགས་པ་ནི་སློན་སྨན་ལ་སོགས་པའི་སྦྱོར་བ་དྲགས་པའོ། །མྱ་ངན་ནི་

ཡིད་གདུང་བ་སྟེ། དེ་དག་ལ་སོགས་པས་རླུང་ནད་ལྡང་བར་འགྱུར་རོ། །དེ་ཡང་དུས་ནི་སོ་གའི་རྗེས་ཏེ་དབྱར་གྱི་དུས་དང་། དེ་བཞིན་དུ་ཉིན་མོའི་རྗེས་ཏེ་དགོངས་ཀ་དང་། མཚན་མོའི་རྗེས་ཏེ་ཐོ་རངས་དང་། ཟས་ཞུ་བའི་རྗེས་ཏེ་ཁ་ཟས་ཞུ་ཟིན་པའི་རྗེས་ལ་རླུང་གི་ནད་
ལྡང་ཞིང་འཁྲུགས་པར་བྱེད་དོ། །མཁྲིས་པ་ཚ་དང་སྐྱུར་དང་རྣོ། །ལན་ཚྭ་བྲོ་དང་ལུས་ཚ་དང་། །སྟོན་ཀ་ཉིན་ཕྱེད་མཚན་ཕྱེད་དང་། །ཚ་བའི་དུས་སུ་ལྡང་བར་འགྱུར། །ཞེས་བྱ་བ་ལ། མཁྲིས་པ་སྨན་ཚ་བ་དང་སྐྱུར་བ་ལ་སོགས་པས་ལྡང་ཞིང་འཁྲུགས་པར་འགྱུར་རོ། །
ཚ་བའི་དུས་སུ་ནི་ཁ་ཟས་ཚ་ཞིང་སྨིན་ཏེ་སྐྱུར་པོར་གྱུར་པའི་སྐབས་ལ་བྱའོ། །མངར་སྐྱུར་ལན་ཚྭ་སྣུམ་པ་དང་། །ལྕི་དང་བད་ཀན་སྐྱེད་བསིལ་དང་། །འདུག་དང་བདེ་དང་གཉིད་མ་ཞུ། །ཉིན་པར་གཉིད་ལོག་བརྟས་དྲགས་དང་། །སློན་སོགས་སྦྱོར་བ་ཉེས་པ་དང་། །ཟོས་
མ་ཐག་དང་དཔྱིད་ཀྱི་དུས། །སྔ་དྲོ་མཚན་སྟོད་བད་ཀན་ལྡང་། །ཞེས་བྱ་བ་ལ། བད་ཀན་གྱི་ནད་ནི་རོ་མངར་བ་ལ་སོགས་པས་ལྡང་ཞིང་འཁྲུགས་པར་བྱེད་པར་འགྱུར་རོ། །འདུག་བཞིན་པ་ནི་ལས་ཀྱི་བྱ་བ་སྤངས་ཏེ་གནས་པའོ། །སློན་པ་ལ་སོགས་པའི་སྦྱོར་བ་ཉེས་པ་
ནི་ལོག་པར་འགྱུར་རོ། །ཟོས་མ་ཐག་པ་ནི་ཟས་ཟོས་ནས་མངར་པོར་གྱུར་པའི་སྐབས་དང་། དཔྱིད་ལ་སོགས་པའི་དུས་སུ་ཡང་བད་ཀན་ལྡང་ཞིང་འཁྲུགས་པར་འགྱུར་རོ། །འདྲེས་པ་ལ་ནི་ལྡན་པ་ཡིན། །ཞེས་བྱ་བ་ལ། སྔར་བཤད་པའི་རྒྱུ་དེ་དག་ཆ་འདྲེས་པར་གྱུར་
པ་ལས་ལྡན་པ་སྟེ། རླུང་དང་མཁྲིས་པ་བད་ཀན་ལ་སོགས་པ་འདྲེན་མ་ལྡང་བ་ཡིན་ནོ། །ཐམས་ཅད་བསྟེན་ལས་འདུས་པར་འགྱུར། །ཞེས་བྱ་བ་ལ། སྔར་བཤད་པའི་རྒྱུ་ཁབ་དང་ཚ་བ་དང་མངར་བ་ལ་སོགས་པ་ཐམས་ཅད་མ་ལུས་པར་བསྟེན་པ་ལས་རླུང་དང་བད་ཀན་
དང་མཁྲིས་པ་གསུམ་འདུས་པའི་ནད་ལྡང་བར་འགྱུར་རོ། །དེ་བཞིན་གཞན་ཡང་འདྲེས་མར་ཟོས། །མ་ཞུ་མ་སྙོམས་མི་འཕྲོད་དང་། །ལྷག་པར་ཟོས་པ་ལ་སོགས་དང་། །ཆང་དང་བཏུང་བ་ཉེས་པ་དང་། །ཚོད་མ་སྐམ་དང་ལ་ཕུག་རྗེན། །ཏིལ་ཚིགས་ས་ཞག་སོ་བའི་ཆང་། །

ཤ་རུལ་ཤ་སྐམ་ཤ་རིད་རྣམས། །དེ་དང་དེ་ཡིས་ཉེས་གསུམ་སྐྱེད། །དེ་བཞིན་ཁ་ཟས་སྦོས་པ་དང་། །དུས་ཚིགས་ལོག་པ་བདུན་གྱི་རླུང་། །གདོན་ཞུགས་དུག་དང་དབྱིག་དུག་ཟོས། །བེའུ་སྣབས་ནད་འཁྲུགས་རི་རྩར་གནས། །བཙས་སྐར་ལ་ནི་གཟའ་
ཞུགས་དང་། །ལོག་པར་སྦྱོར་བ་ཐམས་ཅད་དང་། །སྡིག་པའི་ལས་ལ་བརྟེན་པ་དང་། །བུད་མེད་བུ་བཙས་ལོག་པར་བྱུང་། །གསོ་བ་ལོག་པར་བྱས་ལས་ལྡང་། །ཞེས་བྱ་བ་ལ། ཡང་དེ་བཞིན་དུ་སྔར་བཤད་པ་དེ་དག་བསྟེན་ཅིང་སྤྱད་པ་ལས་འདུས་པའི་ནད་ལྡང་བར་འགྱུར་
བར་མ་ཟད་ཀྱི། འདྲེན་མར་ཟོས་པ་ལ་སོགས་པ་འདི་དག་གིས་ཀྱང་འདུས་པའི་ནད་ལྡང་བར་འགྱུར་རོ། །ཟོས་པ་ནི་ཚིག་ཀུན་དང་སྦྱར་ཏེ་འདྲེན་མར་ཟ་བ་ནི་འཕྲོད་པ་དང་མི་འཕྲོད་པ་དང་གནོད་པ་ཅན་དྲི་མ་ཅན་ཟོས་པའོ། །མ་ཞུ་བ་ནི་ཁ་ཟས་སྔ་མ་མ་ཞུ་བར་ཟོས་པའོ། །
མི་སྙོམས་པར་ཟ་བ་ནི་ཟས་ཀྱི་དུས་ལ་བབ་པའམ། དུས་ལས་མ་ཡོལ་བའམ། ཚད་ལས་ལྷག་པའམ། ཚད་ལས་ཆུང་ངུ་ཟོས་པའམ། མི་འཕྲོད་པ་ནི་རི་བོང་གི་ཤ་དང་ལ་བུག་རློན་པ་དུས་གཅིག་ཟོས་པའམ། ཉ་དང་འོ་མ་ལྷན་ཅིག་ཟོས་པ་ལ་སོགས་པའོ། །ཟས་ལྷག་
པར་ཟ་བ་ནི་འགྲངས་ཤིང་ཟོས་པའི་རྗེས་ལ་ཟོས་པའོ། །ཉེས་པའི་ཆང་ནི་ཁ་དོག་དང་དྲི་དང་རོ་ལ་སོགས་པའི་ཉེས་པ་སྟེ། ཕལ་ཆེར་རུལ་ཞིང་དྲི་མི་ཞིམ་པ་ལ་སོགས་པའོ། །དེ་བཞིན་དུ་བཏུང་བའི་རྣམ་པ་གཞན་ཡང་རུལ་ཞིང་ཁ་དོག་ལ་སོགས་པའི་ཉེས་པ་དང་ལྡན་པའོ། །
ཚོད་མ་སྐམ་པོ་ནི་རྒྱ་སྣེའུ་ལ་སོགས་པའི་ཚོད་མ་སྐམ་པོའོ། །ཏིལ་ཚིགས་ནི་ཏིལ་གྱི་འབའ་ཚའོ། །ས་ཞག་དང་སོ་བའི་ཆང་ནི་ས་དང་སོ་བ་འདྲེས་པ་ལས་ཆང་དུ་བྱས་པའོ། །ཡང་ཤའི་རྣམ་པ་རུལ་ཞིང་ཞིག་པ་དང་། སྐམ་ཞིང་ཁུ་བཅུད་མེད་པ་དང་། རིད་པ་སྟེ་རུས་པ་
དང་རྩ་རྒྱུས་ཙམ་ལུས་པ་ཟོས་པ་དང་། གཞན་ཡང་འདིར་མ་སྨོས་སུ་ཟིན་ཀྱང་དེ་ལྟ་བུ་ནད་སྐྱེད་པར་བྱེད་པའི་རྣམ་པ་འདི་དག་དང་ཆ་འདྲ་བ་དག་གིས་ཀྱང་ངེས་པར་གསུམ་འདུས་པ་ཞེས་བྱ་བའི་ནད་སྐྱེད་པར་འགྱུར་རོ། །དེ་བཞིན་དུ་ཁ་ཟས་སྤོས་པ་སྟེ་སྔར་གང་ལ་གོམས་

པའི་ཁ་ཟས་སྤངས་ནས་གཞན་ཟོས་པའོ། །དེ་བཞིན་དུ་དུས་ཚིགས་ལོག་པ་ནི་དམན་པ་དང་ལོག་པའི་སྦྱོར་བ་དང་ལྡན་ནོ། །མདུན་གྱི་རླུང་ནི་མདུན་ཕྱོགས་ནས་ལྡང་བའི་རླུང་ངམ་ཤར་ནས་ལྡང་བའི་རླུང་ངོ་། །དེ་བཞིན་དུ་གདོན་ཞུགས་པ་ནི་ལྷ་དང་ལྷ་མ་ཡིན་དང་དྲི་ཟ་ལ་
སོགས་པའི་གདོན་ལུས་ལ་ཞུགས་ཤིང་ཀུན་ཏུ་འཛིན་པའོ། །ཡང་དེ་བཞིན་དུ་དུག་དང་དབྱིག་དུག་སྟེ། མ་སྦྱར་བ་དང་སྦྱར་བའི་དུག་ཟོས་པའོ། །དེ་བཞིན་དུ་མ་ཞུ་བའི་བེའུ་སྣབས་ཀྱི་ནད་འཁྲུགས་ཤིང་ལྡང་བ་དང་། རིའི་རྩར་གནས་ཤིང་འདུག་པ་དང་། བཙས་
པའི་ཚེ་སྐར་མ་གང་བབ་པ་ལ་ཉི་མ་ལ་སོགས་པའི་གཟའ་ཞུགས་ཤིང་གནོད་པར་བྱས་པ་དང་། དེ་བཞིན་དུ་ཁ་ཟས་ལོག་པར་ཟོས་པ་ལ་སོགས་པ་ལོག་པའི་སྦྱོར་བ་སྣ་ཚོགས་བསྟེན་པ་དང་། སྡིག་པའི་ལས་སྲོག་གཅོད་པ་དང་། རྐུབ་ལ་སོགས་པ་ལ་བསྟེན་
ཞིང་སྤྱོད་པ་དང་། བུད་མེད་བུ་བཙས་པའི་དུས་སུ་ལོག་པར་བྱུང་བ་ལ་སོགས་པའི་སྡུག་བསྔལ་གྱིས་ཉེན་པ་དང་། དེ་བཞིན་དུ་གསོ་བ་ལོག་པར་བྱས་ཤིང་ལེགས་པར་མ་བཅོས་པ་དག་ལས་ཀྱང་ནད་དུ་འགྱུར་རོ། །དེ་ལྟར་སོ་སོའི་ནད་ལྡང་བས། །ནད་ཀྱི་
གནས་སུ་འགྲོ་བྱེད་པ། །རྩ་སྦུབས་རྣམས་སུ་ཕྱིན་པ་དང་། །ནད་རྣམས་ལུས་ལ་མྱུར་དུ་སྐྱེད། །ཅེས་བྱ་བ་ལ། དེ་ལྟར་གོང་དུ་བཤད་པའི་རྣམ་པས་ནད་སོ་སོ་ཐ་དད་པར་ལྡང་ཞིང་འཁྲུགས་པས་རླུང་ལ་སོགས་པའི་ནད་རྣམས་ལུས་ལ་མྱུར་དུ་སྐྱེད་ཅིང་འབྱུང་བར་
འགྱུར་རོ། །ཅི་ཞིག་བྱས་པས་ནད་སྐྱེད་ཅེ་ན། ནད་ཀྱི་གནས་གང་ཡང་རུང་བར་འགྲོ་བར་བྱེད་པའི་ནད་དེས་རྩའི་སྦུབས་བཅུད་རྒྱུ་བའི་སར་སོང་ཞིང་ཕྱིན་ནས། གནོད་པ་སྐྱེད་པའི་རྒྱུར་འགྱུར་ཏེ། དངོས་སུ་ན་ནད་ཀྱི་གནས་བཅུད་རྒྱུ་བར་བྱེད་པའི་རྩར་གནོད་པ་དེ་དག་ཞུགས་
པས་ནད་ལྡང་བར་བྱེད་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་རྣམ་པར་སྦྱར་བ་ལས། ནད་གཞིའི་གནས་ཀྱི་ལེའུ་དང་པོའི་རྣམ་པར་འགྲེལ་པའོ།། །།

དེ་ནས་རིམས་ནད་ཀྱི་ནད་གཞི་བཤད་པར་བྱའོ། །ཞེས་བྱ་བ་ལ། ནད་ཐམས་ཅད་ཀྱི་ནད་གཞི་བཤད་པའི་འོག་ཏུ་རིམས་ཀྱི་ནད་གཞི་བཤད་པའི་དགོས་པ་ནི། རིམས་དེ་ནད་ཀྱི་གཙོ་བོ་ཡིན་པའི་ཕྱིར་ཏེ། ནད་རྣམས་ཀྱི་གཙོ་བོ་ནི་རིམས་ཡིན་ནོ་ཞེས་བཤད་
པས་སོ། །རིམས་ནི་ནད་བདག་སྡིག་ཅན་དང་། །འཆི་བདག་མདངས་ཟ་འཆི་བྱེད་ཡིན། །ཁྲོས་པས་མྱུར་བའི་མཆོད་སྦྱིན་བརླག །དྲག་པོ་དཔྲལ་བའི་མིག་ལས་བྱུང་། །སྐྱེ་དང་འཆི་ཚེ་རྨོངས་བྱེད་པ། །མི་འཕྲོད་སྣ་ཚོགས་བསྟེན་ལས་བྱུང་། །མི་བཟད་མིང་ནི་སྣ་ཚོགས་
པས། །སྐྱེ་གནས་དུ་མ་རྣམས་ལ་གནས། །ཞེས་བྱ་བ་ལ། རིམས་དེ་ནི་ནད་ཀྱི་བདག་པོ་སྟེ། ནད་ཐམས་ཅད་ཀྱི་རྒྱལ་པོ་འམ་གཙོ་བོ་ཡིན་ནོ། །སྡིག་ཅན་ནི་སྡིག་པའི་རང་བཞིན་ཅན་ནོ། །འཆི་བདག་ནི་སྲོག་ཆགས་ཐམས་ཅད་འཆི་བ་ལ་སྦྱོར་བའོ། །མདངས་ཟ་བ་ནི་ལུས་
ལ་ཡོད་པའི་མདངས་ཟ་ཞིང་སྤྱོད་པའོ། །འཆི་བར་བྱེད་པ་ནི་སྲོག་ཆགས་རྣམས་ཟད་ཅིང་མཐར་ཕྱིན་པར་བྱེད་པའོ། །ཁྲོས་པ་ནི་ལྷ་ཆེན་པོ་ཁྲོས་པའི་དཔྲལ་བ་ལས་བྱུང་བའོ། །མྱུར་བའི་མཆོད་སྦྱིན་བརླག་པ་ནི་སྐྱེ་དགུའི་བདག་པོ་མྱུར་བ་ཞེས་བྱ་བའི་མཆོད་སྦྱིན་བརླག་ཅིང་
འཇིག་པར་བྱེད་པའོ། །དེ་ཡང་ལྷ་ཆེན་པོ་དྲག་པོའི་མིག་གསུམ་པ་ལས་བྱུང་བས། ཁྲོས་པའི་དཔྲལ་བའི་མིག་ལས་བྱུང་ཞེས་བྱའོ། །སྐྱེ་དང་འཆི་ཞེས་བྱ་བ་ནི་བཅས་པ་ན་འཆི་བའི་དུས་བྱེད་པའི་ཚེ་སྟེ། དེ་དག་གི་སྐབས་སུ་རྨོངས་པར་བྱེད་ཅིང་དང་པོ་སྐྱེས་པ་རྗོད་
པར་བྱེད་པ་ཡིན་ནོ། །དེ་བཞིན་དུ་ཁ་ཟས་དང་སྤྱོད་ལམ་ལ་སོགས་པ་མི་འཕྲོད་པ་སྣ་ཚོགས་བསྟེན་པ་ལས་བྱུང་བ་ཡིན་ལ། ཡང་དེ་ནི་མི་བཟད་ཅིང་བརྣག་པར་དཀའ་བ་ཡིན་ཞིང་ནད་ཀྱི་མིང་སྣ་ཚོགས་པ་ལ་སོགས་པའི་ཚུལ་གྱིས་རྟ་དང་གླང་པོ་ལ་སོགས་པ་སྐྱེ་གནས་དུ་མ་ཐ་
དད་པ་རྣམས་ཀྱི་ལུས་ལ་གནས་ཏེ། གླང་པོ་ཆེའི་ལུས་ལ་ནི་སྨིན་མ་འཛིན་པ་ཞེས་བྱ་ལ། རྟའི་ལུས་ལ་ནི་སོ་སོའི་ཞེས་བྱ་བ་དང་། ལུག་གི་ལུས་ལ་ནི་ཏལ་བ་ཞེས་བྱ་བ་ལ་སོགས་པའི་མིང་གིས་གནས་པ་ཡིན་ནོ། །དེ་ནི་ནད་རྣམས་སོ་སོར་འདྲེས། །འདུས་

དང་གློ་བུར་ལས་བརྒྱད་འགྱུར། །ཞེས་བྱ་བ་ལ། རིམས་དེ་ནི་རྣམ་པ་བརྒྱད་དུ་འགྱུར་ཏེ། དེ་ཡང་རླུང་དང་མཁྲིས་པ་དང་བད་ཀན་སོ་སོ་དང་། དེ་བཞིན་དུ་འདྲེས་པ་སྟེ། གཉིས་གཉིས་འདྲེས་པའི་ལྡན་པ་དང་། ནད་གཞི་གསུམ་ཆར་འདུས་ཤིང་ཚོགས་པ་དང་། དེ་བཞིན་
དུ་གློ་བུར་གྱི་རིམས་ནི་བརྒྱད་པ་ཡིན་ནོ། །དེ་ལྟར་ནད་གཞི་སོ་སོའི་གསུམ་དང་། འདྲེས་པའི་གསུམ་དང་། འདུས་པའི་གཅིག་དང་། གློ་བུར་བའི་གཅིག་སྟེ་བརྒྱད་དུ་འགྱུར་རོ། །དེ་ལ་ནད་རྣམས་རང་རང་ནི། །རྒྱུ་ལས་འཁྲུགས་ཏེ་ལྡང་བ་ཡིས། །མ་ཞུའི་གནས་སུ་ཞུགས་
གྱུར་པ། །ལྷན་ཅིག་གནས་ནས་རྩ་སྒོ་བཀག །ཞུ་བའི་གནས་ནས་མེ་དྲོད་ནི། །ཕྱི་རོལ་དུ་ནི་འབྱིན་པར་བྱེད། །དེ་དང་ལྷན་ཅིག་མངོན་ཁྱབ་ནས། །ལུས་ཀུན་ཚ་བར་བྱེད་པ་ཡིན། །ཡན་ལག་ཤིན་ཏུ་ཚ་བྱེད་པར། །རིམས་ནི་དེ་ཡིས་སྐྱེད་པར་བྱེད། །ཅེས་བྱ་བ་ལ། དེ་ལ་
ནད་གཞི་རྣམས་ནི་ཉེས་པ་འདི་དང་འདི་དག་བྱེད་ཅིང་རིམས་སྐྱེད་ཅིང་འབྱུང་བར་བྱེད་དོ། །དེ་ཡང་རང་རང་གི་རྒྱུ་ཇི་སྐད་བཤད་པ་ལས་རྣམ་པར་འཁྲུགས་ཤིང་གཡོས་པར་གྱུར་པ་ལས་ལྡང་ཞིང་ནད་འབྱུང་བར་འགྱུར་བ་ན། རྒྱུ་དེས་མ་ཞུ་བའི་གནས་སུ་སོང་ནས། མ་ཞུ་
བ་ལུས་ཟུངས་ཀྱི་དང་པོ་དྭངས་མ་ཞེས་བྱ་བ་མས་སྦྱིན་པའི་ནང་དུ་ཞུགས་ནས་དེ་ལྷན་ཅིག་གནས་ཏེ། དྭངས་མ་དང་རྔུལ་རྒྱུ་བར་བྱེད་པའི་རྩ་སྒོ་རྣམས་ཀྱི་ཁ་བཀག་ཅིང་བཅད་ནས། ཞུ་བའི་གནས་ལྟེ་བའི་ཕྱོགས་ནས་ཁོང་པའི་མེ་དྲོད་གང་དག་ཡིན་པ་དེ་ཕྱི་རོལ་དུ་འབྱིན་
པར་བྱེད་ཅིང་ཕྱུང་ནས་མེའི་དྲོད་དེ་དང་ལྷན་ཅིག་ཏུ་མངོན་པར་རྒྱུ་ཞིང་ཁྱབ་པར་བྱས་ནས། ལུས་མ་ལུས་པ་ཀུན་ཚ་བས་ཁྱབ་པར་བྱེད་ཅིང་། ཀུན་ཏུ་གདུང་ལ་ལུས་ཤིན་ཏུ་དྲོ་ཞིང་ཚ་བ་ཉིད་དུ་བྱེད་པར་འགྱུར་རོ། །དེས་ན་ཡན་ལག་རྣམས་ཀྱང་ཤིན་ཏུ་ཚ་བར་བྱེད་ཅིང་ལུས་
དང་ཡན་ལག་ཐམས་ཅད་ནས་ཆེར་ཚ་བ་བསྐྱེད་པའི་རིམས་སུ་ནད་ཀྱི་དྲི་མ་དེས་སྐྱེད་པར་བྱེད་ཅིང་དཀྱེལ་རྫོགས་པར་བྱེད་པ་ཡིན་ནོ། །རྩ་སྒོ་བཀག་པས་དེ་འོག་ཏུ། །རྔུལ་ནི་མང་དུ་མི་འབྱུང་ངོ་། །ཞེས་བྱ་བ་ལ། ནད་དེས་རྩའི་སྒོ་བཀག་ཅིང་གགས་བྱས་པའི་ཕྱིར། དེའི་

འོག་གམ་རྗེས་ལ་ལུས་ཚ། ཡང་། རྔུལ།ཕྱི་རོལ་དུ་མང་དུ་མི་འབྱུང་ངོ་། །དེ་ཡི་སྔོན་ཚུལ་སྒྱིད་ཞན་དང་། །ཉམས་མི་དགའ་ཞིང་ལུས་ལྕི་ལ། །རོ་མི་ཚོར་ཞིང་ཡི་ག་འཆུས། །གླལ་འབྱུང་མིག་འཁྲུགས་མཆི་མར་བཅས། །ཡན་ལག་ན་ཞིང་འཇུ་
སྟོབས་ཆུང་། །ཉམ་ཆུང་གཉིད་ནི་ཆེ་བ་དང་། །སྤུ་ལྡང་བྱ་རྨྱང་བྱེད་འདོད་དང་། །བྱིན་པའི་ཉྭ་ན་ལུས་སྙོམ་དང་། །ཕན་པར་བསྟན་པ་མི་བཟོད་ཁྲོ། །སྐྱུར་དང་ཚ་དང་དྲོད་ལ་སྲེད། །ཁ་ཟས་མངར་བ་ལ་མི་དགའ། །བྱིས་པ་ལ་སྡང་སྐོམ་དད་ཆེ། །སྒྲ་མེ་གྲང་ལྷགས་རླུང་དང་
ཆུ། །གྲིབ་མ་ཉིན་མཚན་རྒྱུ་མེད་པར། །དགའ་དང་མི་དགའ་དག་ཏུ་བྱེད། །དེ་རྗེས་རིམས་ནི་གསལ་བར་འགྱུར། །ཞེས་བྱ་བ་ལ། རིམས་དེའི་སྔོན་དུ་འབྱུང་བའི་ཚུལ་ནི་མི་གསལ་བའི་རྟགས་ཏེ། དེ་དག་ཀྱང་གང་ཞེ་ན། ངལ་ཞིང་སྒྱིད་ངན་པར་འགྱུར་བ་དང་། ཉམས་
མི་དགའ་བ་སྟེ་སྟན་དང་གནས་ལ་སོགས་པ་དང་། གཅིག་ཏུ་སེམས་མངོན་པར་དགའ་བ་མེད་ཅིང་སེམས་སོ་ན་མི་གནས་པ་དང་། ལུས་ཁོང་ལྕི་ཞིང་གདེགས་པར་དཀའ་བ་སྙམ་དུ་སེམས་པ་དང་། ཁས་རོ་མི་ཚོར་ཞིང་བེམ་པོར་གྱུར་པ་དང་། ཁ་ཟས་ཡི་གར་མི་
འོང་ཞིང་སྲེད་པ་མེད་པ་དང་། གླལ་ཞིང་ཁ་གདངས་པ་དང་། མིག་འཁྲུགས་ཤིང་མི་སྡུག་ལ་མཆི་མ་འབྱུང་བ་དང་བཅས་པ་དང་། ཡན་ལག་ན་བ་སྟེ་ཡན་ལག་རྣམས་གཅུས་པ་སྙམ་དུ་སེམས་པ་དང་། བརྡུངས་པའམ་བསྡམས་པ་སྙམ་དུ་སེམས་པ་དང་།
ཁ་ཟས་འཇུ་བའི་སྟོབས་ཆུང་ཞིང་འཇུ་མི་ནུས་པ་དང་། ཉམས་སྟོབས་ཆུང་ཞིང་ནུས་པ་ཞན་པ་དང་། གཉིད་ཆེ་ཞིང་བྱིང་བ་དང་། བ་སྤུ་རྣམས་ལྡང་ཞིང་བཤོར་བ་དང་། དེ་བཞིན་དུ་ཡན་ལག་རྣམས་བསྐྱོད་པ་ལ་སོགས་པའི་བྱ་རྨྱང་བྱེད་འདོད་པ་དང་། བྱིན་པ་
གཉིས་ཀྱི་ཉྭ་བཙིར་བ་ལྟར་ན་བ་དང་། ལུས་སྙོམ་ཞིང་ལྕི་བ་དང་། ཟས་དང་སྤྱོད་ལམ་ལ་སོགས་པ་ཕན་པར་བསྟན་པའི་གདམས་པ་མི་བཟོད་ཅིང་ཁྲོ་བ་དང་། རོ་སྐྱུར་བ་དང་། ཚ་བ་ལ་སོགས་པའི་བྱེ་བྲག་ལ་དགའ་བ་དང་། ཁ་ཟས་མངར་པོ་ལ་སོགས་པ་རྣམས་

ལ་མི་དགའ་ཞིང་འདོད་པ་མེད་པ་དང་། དེ་བཞིན་དུ་བྱིས་པ་ནུ་ཞོ་འཐུངས་པ་སྐྱེ་བོ་མ་ལུས་པའི་ཡིད་དགེ་བར་བྱེད་པ་དག་ལ་ཡང་ཁྲོ་ཞིང་འཁྲུགས་པ་དང་། དེ་བཞིན་དུ་སྐོམ་དད་ཆེ་ཞིང་སྐོམ་དད་ཀྱིས་ཤིན་ཏུ་གདུངས་པ་དང་། དེ་བཞིན་དུ་སྒྲ་ལ་སོགས་པའི་ཡུལ་རྣམས་ལ་
རྒྱུ་མེད་ཅིང་དགོས་པ་མེད་པར་ཆེད་འགའ་ནི་དགའ་བར་འགྱུར་བ་དང་། ཆེད་འགའ་ནི་མི་དགའ་བར་བྱེད་དེ། ལན་འགའ་ཉན་པར་འདོད་ན་ཡང་ཞེ་སྡང་བར་བྱེད་ལ། ལན་འགའ་ནི་འདོད་པ་སྐྱེད་པར་བྱེད་པ་དང་། མེ་ལ་སོགས་པ་ལ་ཡང་རྒྱུ་མེད་པར་ཆེད་འགའ་བསྟེན་
པར་དགའ་ལ། ཆེད་འགའ་ནི་བསྟེན་པར་མི་དགའ་སྟེ། དེ་ལྟ་བུའི་མཚན་ཉིད་བྱུང་ན། དེའི་རྗེས་ལ་རིམས་ཀྱི་མཚན་ཉིད་གསལ་ཞིང་དཀྱེལ་སྐྱེས་པ་ཉིད་དུ་འགྱུར་རོ། །རིམས་ཐེབས་འབྱང་ཉེའི་ཚེ་ནད་ཚབས། །ཆུང་ཞིང་ཚ་བ་མི་སྙོམས་ལ། །ཡན་ལག་དེ་དང་དེར་
འཕོ་ཞིང་། །ན་བ་དེ་དང་དེར་གཡོ་འགྱུར། །རྐང་པ་བེམ་པོ་རེངས་པ་དང་། །བྱིན་སྙིང་ན་ཞིང་ངལ་བ་དང་། །ཚིགས་རྣམས་བྱེ་བ་ལྟ་བུར་སེམས། །བརླ་དང་རྐེད་པ་ན་བ་དང་། །རྒྱབ་ནི་བརྡུངས་པ་ལྟ་བུར་སེམས། །ལྟོ་བ་བཙིར་བ་སྙམ་སེམས་དང་། །རུས་པ་བཅད་པ་སྙམ་
པ་དང་། །རྩིབ་མ་ལྷག་པར་ན་བ་དང་། །སྙིང་ནི་བཙིར་སྙམ་སེམས་ཤིང་ཟུག །བྲང་དུ་བཙུགས་པ་ལྟ་བུར་གཟེར། །ཕྲག་པ་བརྡུངས་སྙམ་དཔུང་པ་ནི། །བཅོམ་སྙམ་སེམས་ཤིང་སྒྲོག་རུས་ན། །འགྲམ་པས་ཁ་ཟས་བལྡད་མི་ནུས། །གླལ་འབྱུང་རྣ་བ་སྒྲ་དང་བཅས། །
མུར་འགྲམ་ཟུག་ཅིང་མགོ་བོ་ན། །ལྕེ་ཡིས་རོ་ནི་མི་ཚོར་རམ། །ཡང་ན་ཁ་བསྐ་བྲོ་བར་འགྱུར། །དྲི་མ་རྣམས་ནི་སྲི་བ་དང་། །ལྤགས་མིག་ཁ་དང་སེན་མོ་དང་། །བཤང་སོགས་རྩུབ་ཅིང་དམར་བ་དང་། །མཆིལ་མང་ཡིག་འཆུས་སྲེད་ཆུང་། །ཟས་མི་འཇུ་ཞིང་རྔུལ་མི་
འབྱུང་། །གཉིད་ཡར་མཆུ་དང་གྲེ་བ་སྐམ། །སྐོམ་དད་ཆེ་ཞིང་ལུད་པ་སྐམ། །ལུད་པ་ལུ་ཞིང་སྐྱུགས་པ་སྐམ། །སེམས་ཞུམ་ལུས་ཀྱི་བ་སྤུ་ལྡང་། །པགས་པ་སོ་དག་བརྩེ་བ་དང་། །རྐང་ལག་འདར་ཞིང་སྦྲིད་པ་ཐོགས། །མགོ་འཁོར་ཚིག་ནི་བླ་བ་དང་། །དྲོད་བག་ལ་དགའ་

བྱ་རྨྱང་བྱེད། །རླུང་གི་རིམས་སུ་ཤེས་པར་བྱ། །ཞེས་བྱ་བ་ལ། རླུང་གི་རིམས་ཀྱིས་བཏབ་པའི་མཚན་མའམ་རྟགས་ནི་འདི་དག་ཡིན་ཏེ། རིམས་ཀྱིས་ཐེབས་པ་ནི་དང་པོ་མགོ་ཟུག་པ་སྟེ། ཚ་བ་ལ་སོགས་པ་འབྱུང་བར་མགོ་རྩོམ་པའོ། །འབྱང་
དུ་ཉེ་བ་ནི་འབྲེལ་ཞིང་འབྱང་བར་བསྐྱོད་པའོ། །ནད་ཚབས་ནི་ནད་ཀྱི་ཚུལ་སྣ་ཚོགས་པའོ། །ཆུང་བ་ནི་ཤུགས་དལ་བའོ། །མི་སྙོམས་པ་ནི་རིམས་ཀྱིས་ཐེབས་པ་ལ་སོགས་པའོ། །དེ་དག་གི་ཚུལ་མི་སྙོམས་ཤིང་རྣམ་པ་ཐ་དད་པར་གནས་པའོ། །ཡང་ན་དེ་དག་
མགོ་ལ་སོགས་པའི་ཡན་ལག་དེ་དང་དེར་རྣམ་པར་ཚོར་བར་འགྱུར་ཞིང་། འོག་ནས་བཤད་པའི་ནད་ཀྱི་ཚོར་བ་དེ་དང་དེ་དག་རྣམ་པར་གཡོ་ཞིང་མལ་གཅིག་ན་མི་གནས་པར་འགྱུར་རོ། །རྐང་པ་བེམ་པོ་ནི་ཚོར་བ་མེད་ཅིང་སེམས་དང་བྲལ་བ་ལྟར་གནས་པའོ། །རེངས་
པ་ནི་ལུས་ཤིང་ལྟར་རེངས་ཤིང་གྱོང་པའོ། །བྱིན་སྙིང་ན་བ་ནི་བཙིར་བ་སྙམ་པའམ། བྲུད་པ་སྙམ་སེམས་པའོ། །ངལ་བ་ནི་དུབ་པའོ། །ཚིགས་རྣམས་བྱེ་བ་ལྟ་བུར་སེམས་པ་ནི། གཉིས་སུ་གཤགས་པ་ལྟར་སེམས་པའོ། །བརླན་བ་ནི་རང་གི་བྱ་བ་མི་ནུས་ཤིང་
ཞུམ་པའོ། །རྐེད་པ་ན་བ་ནི་མནན་པའམ་ཟགས་པ་སྙམ་སེམས་པའོ། །རྒྱབ་བརྡུངས་པ་སྙམ་སེམས་པ་ནི་གྲུགས་པ་སྙམ་སེམས་པའམ། ཕྱིར་བཏགས་པ་སྙམ་དུ་སེམས་པའོ། །ལྟོ་བ་བཙིར་བ་སྙམ་སེམས་པ་ནི་ལག་པས་བཙིར་ཞིང་མནན་པ་ལྟར་སེམས་
པའོ། །རུས་པ་བཅད་པ་ལྟར་སེམས་པ་ནི་མཚོན་གྱིས་བཅད་པ་ལྟར་ཚ་ཞིང་ན་བའོ། །དེ་ལས་ཀྱང་ཁྱད་པར་དུ་རྩིབ་ལོགས་སུ་གཏོགས་པའི་རུས་པ་བཅད་པ་སྙམ་སེམས་ཤིང་ལྷག་པར་ན་བ་དང་། སྙིང་ག་བཙིར་ཞིང་བསྡམས་པ་ལྟ་བུར་སེམས་ཤིང་ནང་དུ་ཞུགས་པའི་
ཚུལ་གྱིས་ན་བ་དང་། བྲང་དུ་ལྕག་ཡུ་བཙུགས་པ་ལྟ་བུར་སེམས་ཞིང་གཟེར་བ་དང་། ཡང་གཟེར་བ་དེ་ཉིད་ཀྱིས་ཕྲག་པའི་ཕྱོགས་ཁྱབ་ཅིང་ན་བ་དང་། དཔུང་པའི་ཕྱོགས་ཐོ་བས་བཅོམ་པ་ལྟ་བུར་སེམས་ཤིང་ན་བ་དང་། སྒྲོག་རུས་ཀྱི་ཕྱོགས་སུ་ཏིལ་བཙིར་བའི་

འཁྲུལ་འཁོར་གྱིས་བཙིར་བ་ལྟར་སེམས་ཤིང་ན་བ་དང་། འགྲམ་པས་ཁ་ཟས་བལྡད་མི་ནུས་ཤིང་ཉམ་ཆུང་བ་དང་། ཁ་གདངས་པ་དང་བཅས་པའི་གླལ་དང་བྱ་རྨྱང་བྱེད་པ་དང་། རྣ་བ་འབོད་པ་ལྟ་བུའི་སྒྲ་དང་བཅས་པ་དང་། མུར་འགྲམ་གཉིས་སུ་ཁབ་ཀྱིས་
གཙགས་པ་ལྟར་ན་བ་དང་། མགོ་བོའི་ཕྱོགས་གཟེར་ཞིང་ན་བ་དང་། ལྕེས་རོ་མི་ཚོར་བ་སྟེ་ལྕེས་རོའི་ཁྱད་པར་མི་ཤེས་པ་དང་། ཡང་དེ་བཞིན་དུ་ཁར་རོ་བསྐ་བའི་བག་ཏུ་ཟ་བ་དང་། བཤང་བ་དང་། གཅི་བ་དང་། རྔུལ་ལ་སོགས་པའི་དྲི་མ་རྣམས་སྲི་བ་དང་།
པགས་པ་ལ་སོགས་པའི་ཁ་དོག་དམར་ཞིང་རྩུབ་པར་འགྱུར་བ་དང་། མཆིལ་མ་མང་ཞིང་བད་ཀན་འཛག་པ་དང་། ཡི་ག་འཆུས་ཤིང་ཟས་ལ་སོགས་པའི་བློ་མི་སྐྱེ་བ་དང་། སྲེད་པ་ཆུང་བ་སྟེ་ཟས་ལ་སོགས་པ་ལ་ལྷག་པར་དགའ་བ་མེད་པ་དང་། ཁ་ཟས་མི་འཇུ་བ་སྟེ།
ཟོས་པའི་ཟས་ཀྱང་མི་འཇུ་བའི་སྟོབས་ཆུང་བ་དང་། རྔུལ་མི་འབྱུང་བའི་ཕྱི་རོལ་དུ་མི་ཐོན་པ་དང་། གཉིད་ཡར་བ་ལ་སོགས་པའི་མཚན་ཉིད་དང་ལྡན་པར་འགྱུར་བ་དང་། ལུད་པ་ནས། སྐྱུགས་པའི་བར་སྐམ་ཞིང་ཁ་ཟས་ལ་སོགས་པ་མི་འབྱུང་བ་དང་། སེམས་
ཞུམ་ཞིང་སྡུག་བསྔལ་བས་ཡིད་ཞུམ་པ་དང་། ལུས་ཀྱི་བ་སྤུ་ལྡང་ཞིང་བཤོར་བ་དང་། པགས་པ་དང་སོ་གཙགས་པ་སྙམ་སེམས་ཤིང་བརྩེ་བ་དང་། རྐང་ལག་འདར་ཞིང་འགུལ་བ་དང་། སྦྲིད་པ་ཐོགས་ཤིང་མི་ཐོན་པ་དང་། མགོ་འཁོར་ཞིང་འཁོར་ལོ་
བསྐོར་བ་ལྟར་སེམས་པ་དང་། ཚིག་བླ་བ་སྟེ་འབྲེལ་པ་མེད་པའི་ཚིག་མང་དུ་སྨྲ་བ་དང་། དྲོད་བག་ལ་དགའ་བ་སྟེ་མེ་དང་ཉི་ཚན་བསྟེན་འདོད་པ་དང་། བྱ་རྨྱང་བྱེད་པ་སྟེ་ཡན་ལག་བརྐྱང་ཞིང་སྡུད་འདོད་པ་རྣམས་འབྱུང་བར་འགྱུར་བ་སྟེ། དེ་དག་ནི་རླུང་ལས་
གྱུར་པའི་རིམས་ནད་ཀྱི་མཚན་མ་ཡིན་པར་ཤེས་པར་བྱའོ། །ལུས་ཀུན་ཅིག་ཅར་ཁྱབ་པ་དང་། །བླ་ཞིང་ཁའི་རོ་ཁ་བ་དང་། །བསིལ་འདོད་ཁ་སྣར་ཐོར་བུ་འབྱུང་། །མགོ་འཁོར་བརྒྱལ་མྱོས་སྙིང་མི་དགའ། །བཤང་སླ་མཁྲིས་པ་སློན་པ་དང་། །མཆིལ་མ་ཁྲག་

བཅས་སྒྲེགས་པ་སྐྱུར། །ཐོར་བུ་དམར་པོ་འབྱུང་བ་དང་། །པགས་པ་ལ་སོགས་སེར་རྩ་སྔོ། །རྔུལ་འབྱུང་དབུགས་ནི་མནམ་པ་དང་། །སྐོམ་དད་རབ་ཆེ་མཁྲིས་པའི་རིམས། །ཞེས་བྱ་བ་ལ། མཁྲིས་པ་ལས་གྱུར་པའི་རིམས་ཀྱི་མཚན་
མ་ནི། ལུས་ཀུན་ཅིག་ཅར་ཁྱབ་པ་དང་། །ཞེས་བྱ་བ་ལ། མགོ་ལ་སོགས་པའི་ཡན་ལག་དང་། ལུས་ཀུན་ཚ་བ་ལ་སོགས་པའི་འུར་འུར་པོས་ཅིག་ཅར་དུས་གཅིག་ཏུ་ཁྱབ་སྟེ་ན་བ་དང་། དེ་བཞིན་དུ་བླ་ཞིང་ཚིག་འཆོལ་བ་དང་། ཁའི་ནང་ཁ་བ་བྲོ་བར་འགྱུར་
བ་དང་། བསིལ་བ་འདོད་ཅིང་གྲང་བ་ལ་དགའ་བ་དང་། ཁ་དང་སྣའི་ནང་ན་ཐོར་བུ་འབྱུང་ཞིང་ཤུ་བ་སྨིན་པ་དང་། བརྒྱལ་ཞིང་འབོགས་པ་དང་། མྱོས་པ་སྟེ་འོག་ནས་ཆང་ནད་ཀྱི་སྐབས་སུ་བཤད་པ་ལྟ་བུའི་མྱོས་པ་དང་ལྡན་པ་དང་། སེམས་མི་དགའ་བ་སྟེ་བློ་
མལ་ན་མི་གནས་ཤིང་འཕྱོ་བ་དང་། བཤང་བ་སླ་ཞིང་འཁྲུ་བ་དང་། མཁྲིས་པ་སློན་ཞིང་སྐྱུགས་པ་དང་། ཁ་ནས་མཆིལ་མ་ཁྲག་དང་བཅས་པ་འབྱུང་བ་དང་། སྒྲེགས་པ་རོ་སྐྱུར་པོར་འབྱུང་བ་དང་། ཐོར་བུ་འམ་འབྲུམ་ཕྲན་དམར་པོ་ཏལ་ཏིལ་འབྱུང་བར་འགྱུར་
བ་དང་། པགས་པ་དང་ལྕེ་དང་གདོང་དང་གཅིན་གྱི་མདོག་སེར་ཞིང་རྩ་སྔོ་བ་དང་། ལུས་རྔུལ་འབྱུང་ཞིང་ཚ་བ་དང་། དབུགས་འབྱུང་བའི་དྲི་མནམ་ཞིང་རུལ་བ་དང་། སྐོམ་དད་ཀྱི་ཤས་ཤིན་ཏུ་ཆེ་བ་འབྱུང་སྟེ། མཚན་ཉིད་འདི་དག་དང་ལྡན་པ་ནི་མཁྲིས་པའི་
རིམས་ཡིན་ནོ། །ལྷག་པར་ཡི་ག་འཆུས་ཤིང་རྨོངས། །བུ་ག་འགགས་ཤིང་རིམས་ཤུགས་དལ། །མཆིལ་མང་ཁ་ནང་མངར་བ་བྲོ། །དང་ག་ལྕི་ཞིང་དབུགས་མི་བདེ། །ཆམ་བཏབ་སྙིང་ན་སྐྱུག་པ་འབྱུང་། །ལུད་པ་ལུས་རེངས་ལྤགས་སོགས་སྐྱ། །ཡན་ལག་
ཐོར་བུ་གྲང་མོ་འབྱུང་། །སྙོམ་ཞིང་ལུས་འདར་བད་ཀན་རིམས། །ཞེས་བྱ་བ་ལ། རིམས་ཐམས་ཅད་ལས་བད་ཀན་གྱི་རིམས་ཀྱི་མཚན་ཉིད་ནི་ལྷག་པར་རམ་ཁྱད་པར་དུ་ཡི་ག་འཆུས་པར་འགྱུར་བ་དང་། སེམས་རྨོངས་བག་ཏུ་འགྱུར་ཞིང་བྱིང་བ་དང་། བུ་གའི་

ཚོགས་འགགས་ཤིང་དྲི་མ་རྣམས་འབྱུང་བ་ཐོགས་པ་དང་། རིམས་ཀྱི་ཤུགས་དལ་ཞིང་ནད་ཚབས་ཆུང་བ་དང་། མཆིལ་མ་མང་ཞིང་ལྗན་ལྗིན་ཆེ་བ་དང་། ཁ་ནང་རོ་མངར་བ་བྲོ་བ་དང་། སྙིང་ག་ལྕི་ཞིང་དང་ག་མེར་མེར་པོར་འདུག་པ་དང་། དབུགས་མི་བདེ་བ་དང་། ཆམ་
པས་བཏབ་ཅིང་སྣ་ཆུ་འཛག་པ་དང་། སྙིང་ན་ཞིང་འཁྱིལ་པ་དང་། སྐྱུག་པ་འབྱུང་ཞིང་བོད་པ་དང་། ལུད་པ་ལུ་བ་དང་། ལུས་ཀྱི་ཡན་ལག་རེངས་པར་འགྱུར་བ་དང་། པགས་པ་ལ་སོགས་པ་སྟེ། པགས་པ་དང་། སེན་མོ་དང་། གདོང་དང་། ལྕེ་དང་། བཤང་
བ་དང་། གཅི་བ་རྣམས་སྐྱ་ཞིང་དཀར་བ་དང་། མགོ་དང་ལག་ངར་ལ་སོགས་པའི་ཡན་ལག་རྣམས་ཐོར་བུའམ་འབྲུམ་བུ་བད་ཀན་གྱི་རང་བཞིན་ཅན་གྲང་མོ་འབྱུང་བ་དང་། སྙོམ་པ་སྟེ་གཉིད་ཀྱིས་ནོན་པ་ལྟར་ཡུལ་རྣམས་ངེས་པར་འཛིན་པར་མི་ནུས་པ་དང་། ལུས་
འདར་བ་སྟེ་གྲང་ལྷགས་ཀྱིས་ལུས་ཀྱི་ཁོང་འདར་བར་གྱུར་པའོ། །དེ་ཡང་། ཆུ་བསིལ་དག་གིས་རེག་པ་དང་། །ཁྱད་པར་དུ་ནི་དགུན་དུས་སུ། །གྲང་བས་ཉེན་ཏེ་སྐྲང་འགྱུར་བ། །བད་ཀན་ལས་བྱུང་ལུས་འདར་ཡིན། །ཞེས་བཤད་པ་ཡིན་ཏེ། མཚན་ཉིད་དེ་དག་
དང་ལྡན་པ་ནི་བད་ཀན་གྱི་རིམས་ཡིན་ནོ། །རང་གི་དུས་སུ་ཐམས་ཅད་ནི། །འབྱུང་ཞིང་འཕེལ་བ་ཉིད་འགྱུར་བ། །ནད་གཞིར་བཤད་པའི་མི་མཐུན་བསྟེན། །བསྒྱུར་བས་བདེ་བར་བྱེད་པ་ཡིན། །ཞེས་བྱ་བ་ལ། རིམས་ནད་རང་རང་གི་དུས་ཉིན་མོ་དང་མཚན་མོ་དང་།
ཟས་ཟོས་པའི་སྐབས་དང་འབྲེལ་པའི་དུས་དེར་རང་རང་གི་མཚན་ཉིད་ཇི་ལྟ་བ་བཞིན་དུ་རིམས་ཐམས་ཅད་འབྱུང་ཞིང་སྐྱེ་བ་དང་། འཕེལ་ཞིང་རྒྱས་པ་ཉིད་དུ་འགྱུར་བ་དང་། ནད་གཞི་ཉིད་དུ་བཤད་པའི་མཁྲིས་པའི་རིམས་ལ་ཚ་བ་ལ་སོགས་པ་མི་མཐུན་པ་བསྟེན་པས་
ནི་སྡུག་བསྔལ་སྐྱེད་པར་བྱེད་པ་ཡིན་ལ། དེ་བསྒྱུར་ཞིང་བདེ་བ་དང་འབྲེལ་པར་བྱས་པས་ནི་བདེ་བར་བྱེད་པ་ཡིན་ནོ། །རང་རང་མཚན་མ་འདྲེས་པ་ནི། །ལྡན་པའི་རིམས་ཡིན། ཞེས་བྱ་བ་ལ། སྔར་སྨོས་པའི་རང་རང་གི་མཚན་མ་འདྲེས་པར་གྱུར་པ་ལས་ནི་དེའི་

མཚན་མ་ལྡན་པའི་རིམས་ཏེ། ནད་གཉིས་གཉིས་ལས་བྱུང་བ་ཡིན་པར་ཤེས་པར་བྱའོ། །དེ་ནས་རླུང་དང་མཁྲིས་པའི་རིམས་ཀྱི་མཚན་མ་འདྲེས་པ་དང་མ་འདྲེས་པ་དང་ལྡན་པ་ནི་རླུང་དང་མཁྲིས་པ་དང་ལྡན་པའི་རིམས་ཡིན་པར་ཤེས་པར་བྱའོ། །
རླུང་དང་བད་ཀན་གྱི་མཚན་མ་གཉིས་ཀ་དང་ལྡན་པ་ནི་རླུང་དང་བད་ཀན་གྱི་ལྡན་པའི་རིམས་ཡིན་ལ། མཁྲིས་པ་དང་བད་ཀན་གཉིས་ཀའི་མཚན་མ་དང་ལྡན་པ་ནི་མཁྲིས་པ་དང་བད་ཀན་དང་ལྡན་པའི་རིམས་ཡིན་པར་ཤེས་པར་བྱའོ། །གཞན་ཡང་ནི། མགོ་ན་བརྒྱལ་
སློན་ལུས་ཚ་རྨོངས་བག་འགྱུར། །གྲེ་བ་ཁ་སྐམ་མི་དགའ་རུས་ཚིགས་ན། །གཉིད་མེད་མགོ་འཁོར་སྤུ་ལྡང་སྐོམ་དད་ཆེ། །ཁ་གླལ་ཚིག་མང་རླུང་མཁྲིས་འདྲེས་པའི་རིམས། །ཞེས་བྱ་བ་ལ། གཞན་ཡང་ཞེས་བྱ་བ་ནི་བསྡུ་བ་སྟེ། རླུང་དང་མཁྲིས་པ་གཉིས་འདྲེས་
པའི་མཚན་ཉིད་ནི་མགོ་ན་བ་ལ་སོགས་པ་ཡང་ཡིན་ནོ། །ཞེས་བྱ་བའི་དོན་ནོ། །མགོ་ན་བ་ནི་མགོ་ལྷང་ལྷང་པོར་ན་ཞིང་ཟུག་པའོ། །བརྒྱལ་བ་ནི་མི་དྲན་པའོ། །སློན་པ་ནི་སྐྱུག་པའོ། །ལུས་ཚ་བ་ནི་ཡན་ལག་ཚ་བ་འུར་འུར་པོར་འདུག་པའོ། །རྨོངས་བག་ནི་སེམས་
རྨོངས་པའོ། །གྲེ་བ་ནང་ཁ་སྐམ་པ་ནི་རླན་མེད་པའོ། །རུས་ཚིགས་ན་བ་ནི་བརྡུངས་པ་སྙམ་དུ་སེམས་པའོ། །ཚིག་མང་བ་ནི་བླ་བའོ། །ཚ་མེད་ཡི་ག་འཆུས་ཤིང་ཀླད་ཚིགས་ན། །ཆམ་པ་ལུད་པ་དབུགས་མི་བདེ་བཤང་སྲི། །ཁོང་བསིལ་རྨོངས་བག་རབ་རིབ་མགོ་
འཁོར་རྨྱ། །བད་ཀན་རླུང་འདྲེས་རིམས་ཀྱི་མཚན་མ་ཡིན། །ཞེས་བྱ་བ་ལ། གཞན་ཡང་བད་ཀན་རླུང་འདྲེས་པ་ལས་བྱུང་བའི་ལྡན་པའི་རིམས་ཀྱི་མཚན་ཉིད་ནི། ཚ་བ་མེ་ལ་སོགས་པ་ཡང་ཡིན་པར་ཤེས་པར་བྱ་སྟེ། ཚ་བ་མེད་པ་ནི་རིམས་ཀྱི་ཚ་བའི་གདུང་བ་ཆུང་
བའོ། །གཞན་དག་ནི་གོ་བར་ཟད་དོ། །ལུས་རྔུལ་རེངས་དང་ཚ་བ་སིལ་སོར་མི་གནས། །སྐོམ་དད་ལུད་པ་བད་ཀན་མཁྲིས་བག་འབྱུང་། །རྨོངས་བག་རྨྱ་དང་ཁ་བྲོ་ཁར་དྲི་ཆགས། །བད་ཀན་མཁྲིས་པ་འདྲེས་པའི་རིམས་ཀྱི་རྟགས། །ཞེས་བྱ་བ་ལ། གཞན་ཡང་བད་

ཀན་དང་མཁྲིས་པ་ལས་བྱུང་བ་ལྡན་པའི་རིམས་ཀྱི་མཚན་མ་ནི། ལུས་རྔུལ་བ་དང་ཁོང་རེངས་པ་ལ་སོགས་པ་ལས་ཤེས་པར་བྱའོ། །རེངས་པ་ནི་ཡན་ལག་རེངས་པའོ། །ཚ་བ་དང་བསིལ་བ་དུས་ལ་མི་གནས་པ་ཡན་ལག་གྲང་ཞིང་ལན་འགའ་ཚ་སྟེ་རྒྱུད་གཅིག་ཏུ་མི་
གནས་པའོ། །ཁར་དྲི་མ་ཆགས་པ་ནི་ལྗན་ལྗིན་གྱིས་གོས་པའོ། །ཀུན་ལས་འབྱུང་བ་རྟགས་ཀུན་ལྡན། །འདིར་ཡང་ཐང་རེ་ཚ་བ་དང་། །དེ་བཞིན་གྲང་དང་ཉིན་མོ་ནི། །གཉིད་ཆེ་མཚན་མོ་གཉིད་མེད་བྱུང་བའམ། །རྟག་པར་གཉིད་འོང་བའམ་ཡང་ན་ཡང་། །
རྔུལ་ཆེར་འབྱུང་བའམ་རྔུལ་མི་འབྱུང་། །གླུ་དང་གར་དང་དགོད་སོགས་པ། །སྤྱོད་པ་ངན་པ་ལ་འཇུག་ཅིང་། །མིག་དམར་མཆི་མ་འཛག་དང་བཅས། །ཞུམ་ཞིང་རྫི་མ་འཁྲུགས་པར་སྣང་། །བྱིན་སྙིང་རྩིབ་ལོགས་ན་བ་དང་། །མགོ་བོ་རུས་ཚིགས་ན་མགོ་འཁོར། །
རྣ་བ་སྒྲ་དང་ནད་བཅས་དང་། །མགུལ་པ་གྲ་མས་གང་སྙམ་སེམས། །ལྕེ་རྩུབ་ཀུན་ནས་བསྲེགས་ལྟར་སྣང་། །ལུས་ལྕི་ཚིགས་ནི་འབྱེ་སྙམ་སེམས། །མཆིལ་མར་ཁྲག་མཁྲིས་བད་ཀན་འབྱུང་། །མགོ་བོ་གཡོ་ཞིང་སྐོམ་དད་ཆེ། །ཐོར་བུ་འབྲུམ་ཕྲན་མཐའ་
འཁོར་བ། །དམར་ཞིང་གནག་པ་འབྱུང་བར་འགྱུར། །སྙིང་ན་བཤང་གཅི་སྲི་བ་འམ། །ཡང་ན་ཉུང་བའམ་རབ་མང་འབྱུང་། །ཁ་ནང་སྣུམ་ཞིང་ཉམས་སྟོབས་ཆུང་། །གཅོམ་ཆུང་འགྱུར་ཞིང་བླ་བ་དང་། །ནད་སྨིན་དཀའ་ཞིང་རྨུགས་པ་དང་། །རྒྱུན་དུ་གྲེ་བ་
འཛེར་བ་ནི། །འདུས་པའི་རིམས་ཏེ་མངོན་རྨུགས་བྱེད། །དེ་ནི་མདངས་འཕྲོག་ཅེས་ཀྱང་བཤད། །ཅེས་བྱ་བ་ལ། ནད་གཞི་ཐམས་ཅད་ལས་བྱུང་བ་ཡིན་པས་ན་ཀུན་ལས་བྱུང་སྟེ། དེ་ནི་རླུང་དང་མཁྲིས་པ་དང་བད་ཀན་གྱི་རིམས་ཀྱི་མཚན་ཉིད་དུ་བཤད་
པ་ཐམས་ཅད་དང་ལྡན་པ་ཡིན་ལ། འདུས་པ་ལས་གྱུར་པའི་རིམས་འདིར་མཚན་ཉིད་གཞན་ཡང་སྐད་ཅིག་གམ། ཐང་ཅིག་རེ་རེ་ཞིང་ཡང་དང་ཡང་དུ་ལུས་ཚ་བར་འགྱུར་བ་དང་། དེ་བཞིན་དུ་ཐང་ཅིག་རེ་རེ་ཞིང་གྲང་བར་འགྱུར་བ་དང་། ཉིན་མོ་ནི་གཉིད་ཆེར་

འོང་ཞིང་ཤས་ཆེར་འཐིབས་པར་འགྱུར་བ་དང་། མཚན་མོ་ནི་གཉིད་མེད་ཅིང་ཡར་བར་འགྱུར་བའམ། ཡང་ན་ཉིན་མཚན་རྟག་པར་རྒྱུན་དུ་གཉིད་འོང་བའམ། ཉིན་མཚན་རྟག་པར་གཉིད་མེད་པར་འགྱུར་བའམ། ཡང་དེ་བཞིན་དུ་རྔུལ་
ཤས་ཆེར་འབྱུང་ཞིང་མང་དུ་འཛག་ལ། ཅུང་ཟད་ཙམ་གྱི་རྔུལ་ཡང་མི་འབྱུང་བར་འགྱུར་བ་དང་། གླུ་ལ་སོགས་པའི་སྤྱོད་པ་ངན་ཅིང་དམན་པ་ལ་འཇུག་པར་དགའ་བ་དང་། མིག་ཁ་དོག་དམར་བ་དང་། མཆི་མའི་རྒྱུན་འཛག་པ་དང་བཅས་ཤིང་མི་སྡུག་པར་
སྣང་བ་དང་། ཞུམ་ཞིང་ཡོ་བ་དང་། རྫི་མ་འཁྲུགས་ཤིང་མིག་གི་སྤུ་གཡོས་པར་སྣང་བ་དང་། བྱིན་སྙིང་ལ་སོགས་པ་ན་བ་དང་། རྣ་བར་སྒྲ་དྲག་པ་དང་བཅས་ནས་ན་ཞིང་གཟེར་བ་དང་། མགུལ་པ་སྟེ་གྲེ་བ་གྲ་མའི་ཚོགས་ཀྱིས་གང་ཞིང་ཁྱབ་པ་སྙམ་དུ་
སེམས་པ་དང་། ལྕེ་ཚེར་མ་ལྟར་རྩུབ་པ་དང་། ཀུན་ནས་བསྲེགས་ཤིང་ཚིག་པ་ལྟར་སྣང་བ་དང་། ལུས་ཀྱི་ཁོང་ལྕི་བ་དང་། ཡན་ལག་གི་ཚོགས་བྱེ་ཞིང་ཞིག་པ་སྙམ་དུ་སེམས་པ་དང་། མཆིལ་མར་ཁྲག་དང་མཁྲིས་པ་དང་བད་ཀན་གྱི་རྣམ་པར་འབྱུང་བ་
དང་། མགོ་བོ་གཡོ་ཞིང་འདར་བ་ཐོར་བུ་དང་འབྲུམ་ཕྲན་མགོ་བོ་འམ་པགས་པ་མཐའ་འཁོར་བ་ཟླུམ་པོ་འབྱུང་ཞིང་། དེ་ཡང་མདོག་ནག་པ་དང་དམར་བར་འབྱུང་བར་འགྱུར་བ་དང་། སྙིང་ན་ཞིང་གཟེར་བ་དང་། བཤང་གཅི་ལ་སོགས་པའི་དྲི་མ་རྣམས་སྲི་ཞིང་
མི་འབྱུང་བའམ། ཡང་ན་ཉུང་ཞིང་ཅུང་ཟད་འབྱུང་བའམ། ཤིན་ཏུ་མང་ཞིང་ཤས་ཆེར་འབྱུང་བར་འགྱུར་བ་དང་། ཁའི་ནང་སྣུམ་ཞིང་འབྱིལ་བ་དང་། ཉམས་སྟོབས་ཆུང་ཞིང་ཟད་པ་དང་། གཅོམ་ཆུང་ཞིང་དམའ་བ་དང་། བླ་ཞིང་ཚིག་འཆོལ་པ་མང་དུ་སྨྲ་
བ་དང་། ནད་སྨིན་པར་དཀའ་ཞིང་ཡུན་རིངས་ནས་འབྱང་བ་དང་། ཤས་ཆེར་རྨུགས་པ་དང་རྒྱུན་མི་ཆད་པར་རྟག་ཏུ་གྲེ་བ་འཛེར་ཞིང་སྒྲ་མི་གསལ་བ་ངར་ངར་པོ་འབྱུང་བ་སྟེ། མཚན་ཉིད་དེ་དག་དང་ལྡན་པ་ནི་འདུས་པའི་རིམས་ཞེས་བཤད་པ་སྟེ། དེ་ཉིད་ལ་ནི་མིང་

གི་རྣམ་གྲངས་སུ་མངོན་པར་རྨུགས་པར་བྱེད་པ་དང་། མདངས་འཕྲོག་པར་བྱེད་པ་ཞེས་བཤད་ཅིང་བཏགས་པ་ཡིན་ནོ། །ནད་ཀྱིས་བཀག་ཅིང་མེ་དྲོད་ཉམས། །མཚན་མ་ཐམས་ཅད་རྫོགས་གྱུར་པ། །གསོར་མི་རུང་སྟེ་དེ་ལས་གཞན། །གསོ་དཀའ་འམ་དབང་
པོ་མ་ཚང་འགྱུར། །ཞེས་བྱ་བ་ལ། རླུང་དང་མཁྲིས་པ་དང་བད་ཀན་དང་བཤང་བ་དང་གཅི་བ་ལ་སོགས་པའི་ནད་ཀྱི་སྐྱོན་གྱིས་འབྱུང་བའི་རྒྱུན་བཀག་ཅིང་མེ་དྲོད་ཉམས་པར་གྱུར་པ་དང་། དེ་བཞིན་དུ་ཇི་སྐད་སྨོས་པའི་མཚན་ཉིད་ཐམས་ཅད་རྫོགས་པར་གྱུར་ན་
གསོར་མི་རུང་སྟེ། གསོ་བར་མི་ནུས་པ་ཡིན་ནོ། །དེ་ལས་གཞན་པ་འདུས་པའི་རིམས་དེ་ནད་ཀྱི་ཚབས་ཆུང་ཞིང་མཚན་ཉིད་མ་རྫོགས་ན། དེ་གསོ་དཀའ་བར་འགྱུར་བའམ། དབང་པོ་མ་ཚང་བ་སྟེ་ལུས་ངག་གི་ལས་ཀྱི་རྟེན་ཉམས་པར་འགྱུར་རོ། །གཞན་ཡང་
འདུས་པ་ལས་བྱུང་བ། །གང་དུ་མཁྲིས་པ་ལོགས་ཤིག་གནས། །པགས་པའམ་ནང་གྲོལ་ཚ་བ་དག །འདེབས་པའམ་ཚ་བ་སྔ་ཕྱིས་འབྱུང་། །ཞེས་བྱ་བ་ལ། འདུས་པ་ལས་གྱུར་པའི་རིམས་སྔ་མ་ལས་མཚན་ཉིད་གཞན་དུ་འབྱུང་བར་གྱུར་པ་སྟེ། འདུས་
པའི་རིམས་གང་ལས་མཁྲིས་པ་ལོགས་ཤིག་ན་གནས་ཤིང་། ལན་འགའ་ནི་པགས་པར་གནས་པ་འམ། ལན་འགའ་ནི་ནང་གྲོལ་ན་གནས་ནས་ཚ་བ་སྐྱེད་པར་བྱེད་པ་སྔར་བྱུང་བའམ། ཕྱིས་འབྱུང་བའི་མཚན་ཉིད་ཅན་ནི་གསོ་དཀའ་བ་ཡིན་ནོ། །དེ་བཞིན་བད་
ཀན་རླུང་གྲང་བ། །ཞེས་བྱ་བ་ལ། ཡང་དེ་བཞིན་དུ་རླུང་དང་བད་ཀན་ལོགས་ཤིག་ཏུ་ཐ་དད་པར་གནས་ཤིང་སྔ་ཕྱིར་གྲང་བར་བྱེད་པ་ནི་གསོ་དཀའ་བ་མ་ཡིན་ནོ། །དེ་གཉིས་ཚ་སྔ་གསོ་དཀའ་ཡིན། །ཞེས་བྱ་བ་ལ། འདུས་པའི་ནད་དེ་གཉིས་ལས་ཚ་བ་སྔ་བའི་ནད་
ནི་གསོ་དཀའ་ཞིང་བཅོས་པར་དཀའ་བ་ཡིན་ནོ། །གྲང་སྔ་དེར་ནི་མཁྲིས་པ་ཡིས། །བད་ཀན་གཤེར་བ་སྐམ་པ་དང་། །གྲང་བ་ཞི་བྱས་ཁ་སྐྱུར་བརྒྱལ། །མྱོས་དང་སྐོམ་དད་སྐྱེ་བར་འགྱུར། །ཞེས་བྱ་བ་ལ། གྲང་བ་སྔར་བྱུང་བའི་འདུས་པའི་རིམས་དེར་ནི་མཁྲིས་

པའི་ཚ་བས་བད་ཀན་གྱི་གཤེར་བག་སྐམ་པར་གྱུར་པ་དང་། སྐྱུར་བ་ལ་སོགས་པའི་འགྱུར་བ་བཞིར་འབྱུང་བར་འགྱུར་ལ། དེ་བཞིན་དུ་གྲང་བ་ཞི་བས་ཀྱང་བཞི་པོ་དེ་དག་ཉིད་སྐྱེ་བར་འགྱུར་རོ། །ཚ་བ་སྔ་མ་དེ་རྗེས་ལ། །རྨུགས་སློན་
མཆིལ་མང་ཁོང་སྙོམ་འགྱུར། །ཞེས་བྱ་བ་ལ། དང་པོ་ཚ་བ་སྐྱེ་བར་འགྱུར་བའི་འདུས་པའི་རིམས་ལ་ཚ་བ་དེའི་རྗེས་ལ་རྨུགས་པ་ལ་སོགས་པ་འབྱུང་བར་འགྱུར་རོ། །གློ་བུར་དྲག་ཤུལ་ལས་བྱུང་དང་། །མངོན་ཟིན་བྱད་བྱས་དམོད་བྱུང་བཞི། །ཞེས་
བྱ་བ་ལ། རིམས་བརྒྱད་པོ་གློ་བུར་བ་ཞེས་བྱ་བ་ལ་ནི་དྲག་ཤུལ་ལས་བྱུང་བ་དང་། མངོན་པར་ཟིན་པ་དང་། བྱད་བྱས་པ་དང་། དམོད་པ་ལས་བྱུང་བའི་དབྱེ་བས་རྣམ་པ་བཞི་ཡོད་དོ། །དེ་ལ་སྨས་བཅད་མེས་ཚིག་སོགས། །ངལ་བ་དྲག་ཤུལ་ལས་བྱུང་ཡིན། །
ཞེས་བྱ་བ་ལ། གློ་བུར་བའི་རིམས་ཀྱིས་དྲག་ཤུལ་ལས་བྱུང་བ་ཞེས་བྱ་བ་འདིར་མཚོ་ན་གྱིས་སྨས་ཤིང་བཅད་པ་ལ་སོགས་པ་ལས་རིམས་འབྱུང་བར་འགྱུར་བ་དང་། དེ་བཞིན་དུ་ངལ་ཞིང་ལམ་གྱིས་དུབ་པ་ལས་བྱུང་བའི་ལུས་ཉོན་མོངས་པ་ལས་དྲག་ཤུལ་ལས་
བྱུང་བའི་ནད་འབྱུང་བར་འགྱུར་རོ། །དེར་ནི་ཕལ་ཆེར་རླུང་ནད་ཀྱིས། །ཁྲག་ནི་གནོད་ཅིང་འཁྲུགས་བྱས་པས། །ན་བཅས་མདོག་ཉམས་སྐྲང་དང་བཅས། །ཟུག་གཟེར་བཅས་པའི་རིམས་སྐྱེད་འགྱུར། །ཞེས་བྱ་བ་ལ། དྲག་ཤུལ་ལས་བྱུང་བའི་རིམས་དེར་ཕལ་
ཆེར་རམ་མང་དུ་རླུང་གི་ནད་ཀྱི་དབང་གིས་ཁྲག་ལ་གནོད་པར་བྱས་ཤིང་རྣམ་པར་འཁྲུགས་པར་འགྱུར་བ་ལས་ན་བ་སོགས་པ་དང་བཅས་པའི་རིམས་སྐྱེ་བར་འགྱུར་རོ། །གདོན་ཞུགས་སྨན་གྱི་དྲི་དང་དུག །ཁྲོས་འཇིགས་མྱ་ངན་གདོན་ལས་བྱུང་། །མངོན་པར་ཟིན་
ལས་བྱུང་རིམས་ཡིན། །ཞེས་བྱ་བ་ལ། གདོན་ཞུགས་པ་ལ་སོགས་པ་ལས་བྱུང་བའི་རིམས་ནི་མངོན་པར་ཟིན་པའམ། གཞན་གྱིས་བྱས་པའི་རྒྱུ་ལས་བྱུང་བའི་རིམས་ཡིན་ནོ། །གདོན་ནི་ལྷ་ལ་སོགས་པའི་འོག་ནས་བཤད་པ་རྣམས་སོ། །འདིར་གདོན་རྒྱུ་མེད་

དགོད་ཅིང་ངུ་། །ཞེས་བྱ་བ་ལ། རིམས་ཀྱི་གནས་སྐབས་འདིར་ལྷ་དང་ལྷ་མ་ཡིན་ལ་སོགས་པའི་གདོན་གྱིས་ནི་རྒྱུ་མེད་པར་གློ་བུར་དུ་ཆེད་འགའ་ནི་དགོད་པ་དང་། ཆེད་འགའ་ནི་ངུ་བར་འགྱུར་རོ། །སྨན་གྱི་དྲི་སྐྱེས་བརྒྱལ་བ་དང་། །སྦྲིད་པ་ཀླད་ནད་སྐྲངས་པར་
འགྱུར། །ཞེས་བྱ་བ་ལ། སྨན་གྱི་དྲི་ལས་སྐྱེས་པའི་གློ་བུར་བའི་རིམས་ནི་བརྒྱལ་བ་ལ་སོགས་པའི་མཚན་ཉིད་ཅན་དུ་འབྱུང་བར་འགྱུར་རོ། །དུག་ལས་བརྒྱལ་དང་ཚད་པར་འཁྲུ། །མདོག་ནག་ལུས་ཚ་སྙིང་ནད་འབྱུང་། །ཞེས་བྱ་བ་ལ། འདིར་དུག་ལས་བྱུང་
བའི་རིམས་ནི་བརྒྱལ་བ་ལ་སོགས་པའི་མཚན་ཉིད་ཅན་འབྱུང་བར་འགྱུར་རོ། །ཁྲོས་པས་ལུས་འདར་ཀླད་ནད་འགྱུར། །ཞེས་བྱ་བ་ལ། ཤིན་ཏུ་ཁྲོས་པ་ལས་ནི་ལུས་འདར་ཞིང་གཡོ་བ་དང་། དེ་བཞིན་དུ་ཀླད་ནད་འབྱུང་བར་འགྱུར་རོ། །མྱ་ངན་འཇིགས་
ལས་བླ་བར་འགྱུར། །ཞེས་བྱ་བ་ལ། མྱ་ངན་འཇིགས་པ་ལས་བྱུང་བའི་རིམས་ནི་བླ་ཞིང་བབ་ཅོལ་མང་དུ་སྨྲ་བར་འགྱུར་རོ། །འདོད་ལས་མགོ་འཁོར་ཡིད་འཆུས་ཚ། །ངོ་ཚ་གཉིད་བློ་བརྟན་ཉམས་འགྱུར། །ཞེས་བྱ་བ་ལ། འདོད་པས་གདུངས་པ་ལས་
སྐྱེས་པའི་རིམས་མགོ་འཁོར་བ་དང་། ཡི་ག་འཆུས་པ་དང་། ལུས་དང་སྙིང་ག་ཚ་བར་འགྱུར་བ་དང་། དེ་བཞིན་དུ་ངོ་ཚ་ཤེས་པ་དང་། གཉིད་དང་། བློ་གྲོས་དང་། བརྟན་ཞིང་མི་འགྱུར་བ་དེ་དག་ཉམས་ཤིང་ཟད་པར་འགྱུར་རོ། །གདོན་ལ་སོགས་པ་
འདུས་པའི་རིམས། །འཇིག་ཚོགས་གསུམ་ནི་རླུང་གི་རིམས། །ཁྲོས་པས་མཁྲིས་པ་ལྡང་བར་འགྱུར། །ཞེས་བྱ་བ་ལ། གདོན་དང་སྨན་དང་དུག་ལས་བྱུང་བའི་རིམས་གསུམ་གྱིས་ནི་ཉེས་པ་གསུམ་འདུས་པའི་རིམས་སུ་འགྱུར་རོ། །འཇིགས་པ་དང་མྱ་
ངན་དང་འདོད་པ་གསུམ་ལས་བྱུང་བའི་རིམས་ཀྱིས་ནི་རླུང་འཁྲུགས་པའི་རིམས་སུ་འགྱུར་རོ། །ཁྲོས་པ་ལས་བྱུང་བའི་རིམས་ཀྱིས་ནི་མཁྲིས་པ་ལྡང་ཞིང་འཁྲུགས་པར་འགྱུར་རོ། །དམོད་པ་བྱད་བྱས་ལས་བྱུང་གང་། །འདུས་པའི་རིམས་ནི་མི་བཟད་པ། །དེ་ནི་ཤིན་

ཏུ་བཟོད་དཀར་བཤད། །ཅེས་བྱ་བ་ལ། དམོད་པ་དང་བྱད་བྱས་པ་ལས་བྱུང་བའི་རིམས་གང་ཡིན་པ་འདུས་པའི་རིམས་མི་བཟོད་ཅིང་རྣོ་བ་དང་། ཤིན་ཏུ་བཟོད་པར་དཀའ་ཞིང་བརྣག་མི་ནུས་པར་འགྱུར་རོ་ཞེས་སྨན་དཔྱད་ཀྱི་གཞུང་རྩོམ་པའི་
དང་སྲོང་རྣམས་ཀྱིས་བཤད་པའམ། བདག་གི་སློབ་དཔོན་ལ་སོགས་ཀྱིས་བཤད་དོ། །ཅེས་པའོ། །དེ་ལ་བྱད་བྱས་སྔགས་ཀྱིས་ནི། །སྦྱིན་སྲེག་བྱས་པ་བཞིན་དུ་བྱས། །ཐོག་མར་སེམས་འབབ་དེ་འོག་ལུས། །དེ་ནས་ཐོར་བུ་མགོ་འཁོར་སྐོམ། །ཚ་བཅས་བརྒྱལ་
བས་ཟིན་གྱུར་པའི། །རིམས་ནི་ཉིན་རེ་བཞིན་དུ་འཕེལ། །ཞེས་བྱ་བ་ལ། འདི་དག་གི་ནང་ནས་བྱད་བྱས་པའི་སྔགས་ནི་སྲིད་སྲུང་གི་རིག་བྱེད་ལ་སོགས་པ་ལས་བཤད་པའི་བྲམ་ཟེའི་ངན་སྔགས་ལ་སོགས་སོ། །སྦྱིན་སྲེག་བྱས་ཤིང་སྲེགས་ཤིག་སྲེགས་ཤིག་ཅེས་
སྨྲ་བཞིན་དུ་མེ་ལ་བསྲེག་རྫས་འཛུད་པ་ན། གང་ལ་བྱས་པ་དེ་ཐོག་མ་ཁོ་ནར་དེའི་སེམས་ལ་འབབ་ཅིང་ཚ་བ་ཉམས་སུ་མྱོང་བར་བྱེད་ལ། དེའི་འོག་ཏུ་ནི་ལུས་ཚ་བར་བྱེད་ཅིང་ཚ་བའི་རིམས་ཀྱིས་འདེབས་ལ། དེ་ནས་ཐོར་བུ་དང་། མགོ་འཁོར་བ་ལ་སོགས་པས་ཟིན་
ཞིང་རིམས་དེ་ནི་ཉིན་གཅིག་བཞིན་དུ་འཕེལ་ཞིང་རྒྱས་པར་འགྱུར་རོ། །དེ་ལྟར་རིམས་ནི་བརྒྱད་དུ་བཤད། །ཅེས་བྱ་བ་ལ། དེ་ལྟར་རྣམ་པ་དེ་དག་གིས་ནད་གཞི་དང་གློ་བུར་བ་ལས་བྱུང་བའི་དབྱེ་བས་རིམས་ནི་གྲངས་བརྒྱད་ཡོད་པར་ཚེའི་རིག་བྱེད་ལ་མཁས་པ་རྣམས་
ཀྱིས་བཤད་ཅིང་བསྟན་པ་ཡིན་ནོ། །དེ་དག་མདོར་ན་རྣམ་གཉིས་ཏེ། །ལུས་དང་སེམས་ཀྱི་རིམས་དང་ནི། །གྲང་དང་ཚ་དང་ཕྱི་ནང་གནས། །རང་བཞིན་དང་ནི་གྱུར་པ་དང་། །གསོར་རུང་གསོར་མི་རུང་བ་དང་། །སྨིན་དང་མ་སྨིན་ཞེས་བྱའོ། །ཞེས་བྱ་བ་ལ། ཡང་
རིམས་འདི་ནི་རྣམ་པ་གཉིས་ཡོད་དེ། ལུས་ཀྱི་རིམས་དང་སེམས་ཀྱི་རིམས་ཞེས་བྱ་བ་གཉིས་དང་། གྲང་བ་དང་ཚ་བ་གཉིས་དང་། ཕྱི་རོལ་ན་གནས་པ་དང་། ནང་ན་གནས་པ་ཞེས་བྱ་བ་གཉིས་དང་། རང་བཞིན་དང་གཞན་དུ་གྱུར་པ་ཞེས་བྱ་བ་གཉིས་དང་། གསོར་རུང་

བ་དང་གསོར་མི་རུང་བ་ཞེས་བྱ་བ་གཉིས་དང་། སྨིན་པ་དང་མ་སྨིན་པ་ཞེས་བྱ་བ་གཉིས་སོ། །ལུས་རིམས་ཐོག་མར་ལུས་ཚ་བྱེད། །སེམས་ཀྱི་དང་པོར་སྙིང་ཚ་འགྱུར། །ཞེས་བྱ་བ་ལ། ལུས་ཀྱི་རིམས་ནི་ཐོག་མར་ཏེ། དང་པོར་ལུས་ཚ་བར་བྱེད་ལ། དེའི་འོག་
ཏུ་ནི་སྙིང་ཚ་བར་འགྱུར་རོ། །སེམས་ཀྱི་རིམས་ཀྱིས་ནི་དང་པོར་སྙིང་ཚ་བར་བྱེད་ལ། དེའི་འོག་ཏུ་ནི་ལུས་ཚ་བར་བྱེད་དོ། །རླུང་དང་བད་ཀན་ཅིག་ཅར་ནི། །འབྱུང་ཚེ་གྲང་བའི་རིམས་སུ་འགྱུར། །མཁྲིས་པ་དང་ལྡན་ཚ་བ་སྟེ། །འདྲེས་པས་འདྲེས་པའོ། །ཞེས་
བྱ་བ་ལ། རླུང་ནི་ཟུང་དུ་འཇུག་པ་ཡིན་པས་བད་ཀན་དང་ལྷན་ཅིག་ཏུ་གནས་ཤིང་ཅིག་ཅར་འབྱུང་བའི་དུས་ན་ནི་གྲང་བའི་རིམས་སུ་འགྱུར་ལ། དེ་བཞིན་དུ་མཁྲིས་པ་དང་རླུང་དུ་འཇུག་ཅིང་མཁྲིས་པ་དང་ལྡན་པའི་ཚེ་ན་ནི་ཚ་བའི་རིམས་སུ་འགྱུར་རོ། །འདྲེས་པ་སྟེ་
བད་ཀན་དང་མཁྲིས་པ་གཉི་ག་དང་རླུང་འདྲེས་པའི་ཚེ་ན་ནི་རླུང་དེ་ཟུང་དུ་འཇུག་པ་ཡིན་ལ་ཆེད་འགའ་ཚ་བར་འགྱུར་རོ། །ཆེད་འགའ་གྲང་བར་འགྱུར་རོ། །ནང་གནས་པ། རིམས་ནད་དཀྱེལ་ནི་བསྐྱེད་འགྱུར་ནས། །ནང་ན་ན་ཞིང་བཤང་གཅི་སྲི། །ཞེས་བྱ་བ་ལ། ནང་
ན་གནས་པའི་རིམས་ནི་ནང་དུ་ཆུད་ཅིང་བརྟེན་པ་ཡིན་པས་ནད་ཀྱི་དཀྱེལ་བསྐྱེད་ཅིང་འཕེལ་བར་འགྱུར་ནས། ནང་དེ་ཉིད་ན་མི་བཟད་པར་ན་བ་དང་། བཤང་བ་ལ་སོགས་པའི་དྲི་མ་སྲི་བར་འགྱུར་རོ། །ཕྱི་རོལ་རིམས་ནི་ཚ་བ་དང་། །ཕྱི་རོལ་གནས་པ་གསོ་བར་སླ། །ཞེས་
བྱ་བ་ལ། ཕྱི་རོལ་གྱི་རིམས་ནི་ཚ་བའི་དངོས་པོ་ཡང་ཕྱི་རོལ་ན་གནས་པ་ཡིན་གྱི། ནང་ན་གནས་པ་མ་ཡིན་ལ། དེ་ཉིད་ནི་གསོ་བར་སླ་ཞིང་བཅོས་པར་སླ་བ་ཡིན་ནོ། །ཚིག་འདིས་ནི་ནང་ན་གནས་པའི་རིམས་ནི་དོན་གྱི་ཤུགས་ཀྱིས་གསོ་དཀའ་བ་ཡིན་ནོ་ཞེས་སྟོན་
ཏོ། །དབྱར་དང་སྟོན་དང་དཔྱིད་དུས་སུ། །རླུང་སོགས་རིམ་འབྱུང་རང་བཞིན་རིམས། །ཞེས་བྱ་བ་ལ། དབྱར་ལ་སོགས་པའི་དུས་གསུམ་དུ་རིམ་པ་ཇི་ལྟ་བ་བཞིན་དུ་རླུང་ལ་སོགས་པ་རིམ་བཞིན་དུ་འབྱུང་བ་ནི་རང་བཞིན་གྱི་རིམས་ཞེས་བྱ་སྟེ། དབྱར་གྱི་དུས་སུ་

ནི་རླུང་གི་རིམས་ཡིན་ནོ། །སྟོན་ནི་མཁྲིས་པའོ། །དཔྱིད་ནི་བད་ཀན་གྱིའོ། །གཞན་དུ་གྱུར་པ་དེ་གསོ་དཀའ། །ཕལ་ཆེར་རླུང་ནི་རང་བཞིན་རིམས། །ཡིན་ཡང་གསོ་བར་དཀའ་བ་ཡིན། །ཞེས་བྱ་བ་ལ། དེ་ལྟར་བཤད་པ་ལས་རྣམ་པ་གཞན་པ་
དེ་ནི་འགྱུར་བའི་རིམས་ཞེས་བྱ་སྟེ། དེ་ཡང་དངོས་སུ་ན་དུས་ཚིགས་རྣམས་སུ་རིམ་བཞིན་དུ་མ་བྱུང་བ་སྟེ། དཔེར་ན་དབྱར་གྱི་ཚེ་མཁྲིས་པ་དང་བད་ཀན་ལས་བྱུང་བ་དང་། སྟོན་གྱི་ཚེ་རླུང་དང་བད་ཀན་ལས་བྱུང་བ་དང་། དཔྱིད་ཀྱི་དུས་སུ་རླུང་དང་མཁྲིས་པ་ལས་འབྱུང་བར་
འགྱུར་བའམ། དེ་བཞིན་དུ་དུས་ཚིགས་ཐམས་ཅད་དུ་ཡང་རླུང་ལས་གྱུར་པའི་ཞེས་བྱ་བ་རང་བཞིན་ལས་གཞན་དུ་གྱུར་པའི་རིམས་དེ་དག་ནི་གསོ་བར་དཀའ་བ་ཡིན་པས། དེ་ལས་ཕལ་ཆེར་རླུང་ལས་གྱུར་པའི་རིམས་ནི་རང་བཞིན་གྱི་རིམས་ཡིན་ཡང་གསོ་དཀའ་བ་ཡིན་
ན། དེ་ལས་གཞན་དུ་གྱུར་པའི་རིམས་ལྟ་སྨོས་ཀྱང་ཅི་དགོས། ཕལ་ཆེར་ཞེས་པ་ནི་མ་ལུས་པར་དེ་ལྟར་མ་ཡིན་པའི་དོན་ཏེ། ལ་ལར་ནི་བསོད་ནམས་ཀྱི་དབང་གིས་རླུང་ལས་གྱུར་པ་ཡིན་ཡང་གསོ་སླ་བ་ནི་ཡོད་དོ་ཞེས་བྱ་བའི་དོན་ཏོ། །དབྱར་དུས་རླུང་ནད་
ལྡང་གྱུར་ན། །མཁྲིས་པ་བད་ཀན་ལྡན་རིམས་འགྱུར། །ཞེས་བྱ་བ་ལ། གང་གི་ཚེ་དབྱར་གྱི་དུས་སུ་རླུང་ནད་ལྡང་ཞིང་འཁྲུགས་པར་གྱུར་ནས་རིམས་སྐྱེད་པར་བྱེད་པ་དེའི་ཚེ། མཁྲིས་པ་དང་བད་ཀན་དང་ལྡན་པའི་རིམས་སུ་འགྱུར་གྱི། དེ་དང་མི་ལྡན་པ་མ་ཡིན་ཏེ།
དེའི་ཚེ་རིམས་དེ་རླུང་ལས་གྱུར་པ་ཡིན་དུ་ཟིན་ཀྱང་མཁྲིས་པ་དང་བད་ཀན་དང་ལྡན་པས་མངོན་པར་ལྡང་བར་འགྱུར་རོ་ཞེས་བྱ་བའི་དོན་ནོ། །སྟོན་ཀ་མཁྲིས་པས་ནད་སློང་སྟེ། །བད་ཀན་དེ་ཡི་གྲོགས་བྱེད་འགྱུར། །དེར་ནི་སྨྱུང་བ་བྱས་གྱུར་ཀྱང་། །གནོད་པར་འགྱུར་བ་
མ་ཡིན་ནོ། །ཞེས་བྱ་བ་ལ། སྟོན་ཀའི་དུས་སུ་མཁྲིས་པ་འཁྲུགས་ནས་རིམས་སྐྱེད་པར་བྱེད་ལ། རིམས་སྐྱེད་པར་རྩོམ་པའི་མཁྲིས་པ་དེའི་སྟོབས་སམ་གྲོགས་སྐྱེད་པ་ནི་བད་ཀན་ཡིན་པས། དེས་གྲོགས་བྱས་ནས་སྐྱེ་བར་འགྱུར་ཏེ། རིམས་ནི་མ་ཞུ་བའི་གནས་ལ་

བརྟེན་ནས་འབྱུང་བའི་ཕྱིར་རོ། །དེས་གནས་སྐབས་དེར་ནི་བད་ཀན་དང་མཁྲིས་པ་གཉིས་ནི་སྨྱུང་བར་བྱས་པས་གསོ་བར་བྱ་ཞིང་བཅོས་དགོས་པ་ཡིན་པས་ན། གནས་སྐབས་འདིར་སྨྱུང་བ་བྱས་པ་ལས་གནོད་ཅིང་ནད་དུ་འགྱུར་བའི་འཇིགས་པ་ཡོད་པ་ཡིན་ནོ། །བད་
ཀན་དཔྱིད་ལྡང་དེ་ཡང་ནི། །དེ་རྗེས་རླུང་དང་མཁྲིས་པ་འབྱུང་། །ཞེས་བྱ་བ་ལ། དཔྱིད་ཀྱི་དུས་སུ་ནི་བད་ཀན་འཁྲུགས་ཤིང་ལྡང་ནས་རིམས་སྐྱེད་པར་བྱེད་པ་ཡིན་ལ། བད་ཀན་ཡང་དེའི་རྗེས་ལ་རླུང་དང་མཁྲིས་པ་གཉིས་གྲོགས་བྱེད་ཅིང་སྟོབས་སྐྱེད་པར་འགྱུར་རོ། །
ཉམས་སྟོབས་ཆེ་ཞིང་ནད་ཚབས་ཆུང་། །བླ་བརྣན་མེད་རིམས་གསོ་བར་སླ། །ཞེས་བྱ་བ་ལ། སྐྱེས་བུ་ལང་ཚོ་ཕུན་སུམ་ཚོགས་པ་ལ་སོགས་པ་ཉམས་སྟོབས་ཆེ་བ་དང་། དེ་བཞིན་དུ་ནད་ཚབས་ཀྱི་དཀྱེལ་ཆུང་བ་དང་། ལུད་པ་དང་དབུགས་མི་བདེ་བའི་བླ་བརྣན་
མེད་པའི་རིམས་ནད་གང་ཡིན་པ་དེ་ནི་མྱུར་དུ་བདེ་བར་བྱ་བར་ནུས་པས་ན་གསོ་སླ་བ་ཡིན་ནོ། །རྣམ་ཀུན་འགྱུར་བ་ཞེས་བྱ་བར། །གསོར་མི་རུང་བར་སྔར་བཤད་དོ། །ཞེས་བྱ་བ་ལ། ཡོང་ཡེ་རྣམ་པ་ཐམས་ཅད་དུ་ལུས་ཀྱི་འགྱུར་བ་ཤེས་པར་བྱ་བའི་ལུས་ཀྱི་གནས་
སུ་གསོར་མི་རུང་བའི་མཚན་ཉིད་ཅན་གྱི་རིམས་སྔར་བཤད་དེ། རིམས་ནི་ཚབས་ཆེ་ཞེས་བྱ་བ་ལ་སོགས་པའི་ཚིག་སྔར་བཤད་པ་ཡིན་ནོ། །རིམས་ཀྱི་ནད་ཚབས་ཆེ་ཞིང་ཚ། །ཁོང་རྨྱ་ཉམ་ཆུང་གཅིན་མང་དང་། །བཤང་སྲི་ཁ་ཟས་མི་འཇུ་ལ། །བཀྲེས་ཆུང་མ་
སྨིན་རིམས་མཚན་ཉིད། །ཅེས་བྱ་བ་ལ། རིམས་མ་སྨིན་པའི་མཚན་ཉིད་འདི་དག་ཡིན་ཏེ། རིམས་ཀྱི་ནད་ཚབས་གནད་དང་ཚིགས་ལ་སོགས་པ་ན་བའི་ཚབས་ཆེ་ཞིང་། དེ་བཞིན་དུ་ཁོང་ཤིན་ཏུ་རྨྱ་ཞིང་ཉམ་ཆུང་བ་ཡིན་ཏེ། སྟོབས་དང་སྲོག་པར་བཅས་པ་གཅིན་མང་
དུ་འབྱུང་བ་དང་། བཤང་གཅི་སྲི་ཞིང་མི་འབྱུང་བ་དང་། ཁ་ཟས་འཇུ་བར་མི་བྱེད་པ་དང་། བཀྲེས་པ་མེད་ཅིང་ཟས་མི་འདོད་པ་སྟེ། འདི་དག་ནི་རིམས་མ་སྨིན་པའི་མཚན་ཉིད་ཡིན་པར་ཤེས་པར་བྱའོ། །རིམས་ཤུགས་སྟོབས་ཆེ་སྐོམ་དད་ཆེ། །བླ་ཞིང་མགོ་འཁོར་

དབུགས་མི་བདེ། །བཤང་གཅི་བདེར་འབྱུང་ནད་བསྐྱོད་པ། །སྨིན་པར་འགྱུར་བའི་མཚན་མ་ཡིན། །ཞེས་བྱ་བ་ལ། རིམས་སྨིན་པའི་ཉེ་བའི་མཚན་མ་ནི་རིམས་ཀྱི་ཤུགས་དྲག་ཅིང་སྟོབས་ཆེ་བ་དང་། དེ་ཉིད་ཀྱིས་ན་སྐོམ་དད་ཆེ་བ་དང་། བླ་
ཞིང་ཚིག་འཁྱལ་པ་དང་། བཤང་གཅི་བདེ་བར་འབྱུང་ཞིང་མི་སྲི་བ་དང་། ནད་བསྐྱོད་ཅིང་བསློངས་པ་ལྟར་སྣང་བ་ཡིན་ནོ། །མ་སྨིན་གོ་བཟློག་མཚན་ཉིད་དང་། །ཞག་བདུན་སྨྱུང་བྱས་ལས་སྨིན་བཤད། །ཅེས་བྱ་བ་ལ། རིམས་སྨིན་ཅིང་ནད་མེད་པའི་མཚན་
ཉིད་ནི་རིམས་ནད་ཚབས་ཆེ་བ་ལ་སོགས་པ་གོ་བཟློག་པ་ལས་ཤེས་པར་བྱ་སྟེ། རིམས་ནད་ཀྱི་ཚབས་ཆུང་བ་བྲི་བ་དང་། ཁོང་རྨྱ་ཞིང་ཉམ་ཆུང་བ་དང་། གཅིན་ཉུང་བ་དང་། བཤང་བ་བདེ་བར་འབྱུང་བ་ལ་སོགས་པ་དེ་ནི་རིམས་མ་ཞུ་བ་མེད་པའི་མཚན་ཉིད་ཡིན་
ལ། དེ་བཞིན་དུ་ཞག་བདུན་གྱི་བར་དུ་སྨྱུང་བ་བྱས་པ་ལས་རིམས་དེ་སྨིན་ཏེ་སྨིན་ཞིང་འཇུ་བ་ཉིད་དུ་འགྱུར་བར་ཤེས་པར་བྱའོ། །དེ་ཡང་དྲང་སྲོང་ཙ་ར་ཀས། ལུས་ཟུངས་ཀུན་གནས་ནད་རྣམས་ནི། །ཞག་བདུན་གྱིས་ནི་སྨིན་པར་འགྱུར། །རིམས་ནད་ཕལ་ཆེར་
ནད་རྣམས་ནི། །སྨྱུང་བྱས་སྨིན་པ་ཡིན་ཞེས་བཤད། །ཅེས་བཤད་པ་ཡིན་ནོ། །རིམས་ནི་ནད་ཀྱི་དུས་དང་ནི། །སྟོབས་ཆུང་ཆེ་ལས་རྣམ་ལྔར་བཤད། །ཕལ་ཆེར་འདུས་པར་གྱུར་པ་ཡི། །རིམས་སུ་མང་དུ་འགྱུར་བར་བཤད། །རྒྱུན་དང་རྟག་པ་ཉིན་གཅིག་པ། །
ཉིན་གསུམ་པ་དང་ཉིན་བཞི་པའོ། །ཞེས་བྱ་བ་ལ། རིམས་ནད་ཀྱི་གྲངས་ནི་འོག་ནས་བཤད་པའི་རྒྱུན་ལ་སོགས་པའི་རྣམ་པ་ལྔ་ཡོད་དོ་ཞེས་དྲང་སྲོང་ཆེན་པོ་རྣམས་ཀྱིས་བཤད་དོ། །དེ་གང་ལས་ཇི་ལྟར་ཞེ་ན། དུས་དང་ཡུལ་དང་སྟོབས་ཆེ་ཆུང་ལས་གྱུར་ཏེ། རླུང་
ལ་སོགས་པའི་རིམས་ནད་སྟོབས་ཆེ་བ་དང་སྟོབས་ཆུང་བའི་དབང་དང་། ཡང་དེ་བཞིན་དུ་རིམས་ནད་འབྱུང་བའི་ནད་གཞི་འཁྲུགས་པའི་དུས་དང་། ཡུལ་སྟོབས་ཆུང་བ་དང་སྟོབས་ཆེ་བའི་དབང་གིས་སམ། ཡང་ན་ནད་རྣམས་ཀྱི་དུས་ཡིན་པས་ན་ནད་ཀྱི་དུས་ཏེ། ཉིན་

མོ་དང་མཚན་མོ་དང་དུས་ཚིགས་དང་ཟས་ཟོས་པའི་ཆ་དེའི་སྟོབས་ཆེ་ཆུང་ལས་ནད་ཟད་པ་དང་། འཕེལ་བའི་རྒྱུར་འགྱུར་བ་ཡིན་ལ། དེ་ཡང་རྣམ་ལྔར་བཤད་དོ། །དེ་ལས་ཀྱང་འདུས་པའི་རིམས་ནི་ཕལ་ཆེར་རམ། མང་དུ་ནད་གཞི་གསུམ་འདུས་པ་ལས་ཕལ་ཆེར་
འདུས་པའི་རིམས་སུ་འགྱུར་བར་བཤད་དོ། །ཕལ་ཆེར་ཞེས་སྨོས་པ་ནི་རྣམ་པར་འགྱུར་བ་ཡོད་པའི་དོན་ཏེ། དེ་ཡང་གཞུང་གཞན་ལས། རླུང་ལས་ཕལ་ཆེར་རྟག་པར་འགྱུར། །མཁྲིས་ལས་ཕལ་ཆེར་ཉིན་གསུམ་པ། །ཕལ་ཆེར་བད་ཀན་ལས་ཉིན་གཅིག །
འདུས་པ་ལས་ནི་བཞི་པ་ཡིན། །ཞེས་བཤད་པ་ཡིན་ནོ། །རྒྱུན་དང་ཞེས་བྱ་བ་ལ་སོགས་པས་ནི་ལྔ་པོའི་མིང་བསྟན་པ་ཡིན་ནོ། །ལུས་ཟུངས་བཤང་གཅི་རྒྱུ་བ་ཡི། །བུ་ག་ནད་ཀྱིས་ཁྱབ་བྱས་པས། །ལུས་ཀུན་ཚ་བར་གྱུར་ནས་ནི། །གནོད་བྱ་སོགས་དང་
མཉམ་པར་འཕེལ། །སྟོབས་ཆེ་ལུས་ལྕི་རྐང་ལག་རེངས། །ཁྱད་པར་དུ་ནི་དྭངས་མར་གནས། །གཉེན་པོས་བཅོས་དཀའ་བཟོད་པར་དཀའ། །རྒྱུན་གྱི་རིམས་སུ་འགྱུར་བ་ཡིན། །ཞེས་བྱ་བ་ལ། རླུང་ལ་སོགས་པའི་ནད་འཁྲུགས་པས་ན་ཤིན་ཏུ་བཟོད་པར་
དཀའ་བའི་རྒྱུན་གྱི་རིམས་སུ་འགྱུར་ཞིང་སྐྱེད་པར་བྱེད་དོ། །དེ་ཡང་ལུས་ཟུངས་ལ་སོགས་པར་རྒྱུ་ཞིང་འགྲོ་བར་བྱེད་པའི་བུ་ག་རྣམས་ནད་ཀྱིས་ཁྱབ་པར་བྱས་ཤིང་ཀུན་ཏུ་ཕྱིན་པར་བྱས་ལ། དེར་ནད་དེ་ལུས་མ་ལུས་པ་ཀུན་དུ་རིམས་ཀྱི་ཚ་བས་ཚ་བར་འགྱུར་ཞིང་ཚ་
བའི་གདུང་བས་གཟིར་བར་བྱས་པ་དང་། དེ་བཞིན་དུ་གནོད་པར་བྱ་བ་དྭངས་མ་དང་། དུས་ཚིགས་དང་། ཡུལ་དང་། རང་བཞིན་དེ་དང་ཆ་མཉམ་པར་འཕེལ་ཞིང་རྒྱས་པར་བྱས་པ་སྟེ། གནོད་བྱ་ནི་ལུས་ཟུངས་བདུན་དང་དྲི་མ་རྣམས་སོ། །དུས་ཚིགས་ནི་
དབྱར་ཀ་ལ་སོགས་པའོ། །ཡུལ་ནི་རླན་ལ་སོགས་པའོ། །རང་བཞིན་ནི་བདུན་ནོ། །དེ་ཡང་སྟོབས་ཆེ་བ་སྟེ་ནུས་པ་དང་ལྡན་པ་དུས་ཡུན་རིང་པོ་ལ་སོགས་པ་དང་། དེ་བཞིན་དུ་ལྕི་ཞིང་བརྣག་དཀའ་ལ། ལུས་ཀྱིས་མི་ཐེགས་པ་སྙམ་དུ་སེམས་པ་དང་། ཡན་ལག་

རྣམས་རེངས་ཤིང་བསྐྱོད་མི་ནུས་པ་དང་། ཁྱད་པར་དུ་ཡང་ལྷག་པར་དྭངས་མ་ཞེས་བྱ་བའི་ལུས་ཟུངས་ལ་གནས་པའི་གཉེན་པོས་བཅོས་པར་དཀའ་ཞིང་གསོ་བའི་ཐབས་ཅིས་ཀྱང་བཟློག་ཏུ་མེད་པ་སྟེ། གནོད་བྱ་ལ་སོགས་པ་དང་ཆ་
མཉམ་པའི་ཕྱིར་རོ། །ཡང་དེ་བཞིན་དུ་བཟོད་པར་རབ་ཏུ་དཀའ་བ་སྟེ། སྡུག་བསྔལ་ཞིང་བརྣག་པར་མི་ནུས་པའི་རིམས་ལ་ནི་རྒྱུན་གྱི་རིམས་ཞེས་བྱ་སྟེ། དེ་ལྟ་བུར་འགྱུར་བ་ཡིན་ནོ། །དེ་ཡི་དྲོད་ཀྱིས་དྲི་མ་དང་། །ལུས་ཟུངས་མྱུར་དུ་ཟད་པར་བྱེད། །དེ་
འོག་རྣམ་ཀུན་ལུས་ཟུངས་སོགས། །དག་པའམ་མ་དག་རིམས་ཀྱིས་ནི། །རླུང་དང་མཁྲིས་པ་བད་ཀན་ཞག །བདུན་ནམ་བཅུའམ་བཅུ་གཉིས་གནས། །ཕལ་ཆེར་མཚམས་ལས་མི་འདའ་བར། །འཚོ་བའམ་འཆི་བ་དག་ཏུ་བྱེད། །ཅེས་བྱ་བ་ལ། རིམས་
དེའི་དྲོད་ཀྱི་ཚ་བས་དྲི་མ་སྟེ་བཤང་བ་ལ་སོགས་པ་དང་། དྭངས་མ་ལ་སོགས་པའི་ལུས་ཟུངས་རྣམས་ཀྱི་ནང་དུ་ཞུགས་པའི་རྒྱུས་རིམས་དེས་དྲི་མ་རྣམས་ཟད་པར་བྱེད་པའམ། ལུས་ཟུངས་རྣམས་ཀྱང་ཟད་པར་བྱས་ནས་དེའི་འོག་ཏུ་རྣམ་པ་ཀུན་དུ་སྟེ། ཐམས་
ཅད་ཀྱི་ཐམས་ཅད་དུ་ལུས་ཟུངས་བཤང་བ་དང་གཅི་བ་དང་བཅས་པ་དག་སྟེ། རིམས་ཀྱི་ཚ་བས་དྲི་མ་མེད་པར་བྱས་པའམ། ཡང་ན་ཡན་ལག་འགའ་ལུས་ཟུངས་ལ་སོགས་པ་མ་དག་ཅིང་ལྗན་ལྗིན་དང་བཅས་པའི་རིམས་ཀྱིས་གྲངས་ཇི་ལྟ་བ་བཞིན་དུ་རླུང་ལ་
སོགས་པའི་ནད་གཞི་ལས་ཞག་བདུན་ནམ་བཅུའམ་བཅུ་གཉིས་ཀྱི་བར་དུ་ཕལ་ཆེར་གནས་པའི་མཚམས་སམ། དུས་ཀྱི་ངེས་པ་ལས་ནི་མི་འདའ་བར་རྗེས་སུ་གནས་ཏེ། ཅིའི་ཕྱིར་ཞེ་ན། དུས་དེ་ཙམ་གྱི་ནང་དུ་འཆི་བའམ། རིམས་ཀྱིས་གཏོང་བར་འགྱུར་བའམ།
འཆི་ཞིང་གསོད་པར་འགྱུར་ཏེ། ཉིན་ཞག་འདི་ཙམ་གྱིས་གཏོང་བའམ་གསོད་པར་འགྱུར་རོ། །དེ་ཡང་གང་རླུང་ཤས་ཆེ་བ་ལས་བྱུང་བ་དེ་ནི་ཕལ་ཆེར་ཞག་བདུན་གྱིས་གཏོང་བའམ་འཆི་བར་འགྱུར་རོ། །དེ་བཞིན་དུ་མཁྲིས་པ་ཤས་ཆེ་བ་ལས་བྱུང་བ་ནི་ཞག་བཅུས་སོ། །

བད་ཀན་ཤས་ཆེ་བ་ལས་བྱུང་བ་ནི་བཅུ་གཉིས་ཀྱིས་བྱེ་བྲག་ཕྱེད་པར་འགྱུར་བ་ནི་རིམས་ཀྱིས་སྦྱར་བའི་དོན་ནོ། །དེ་སྐད་མེ་བཞིན་འཇུག་གིས་བཤད། །ཅེས་བྱ་བ་ལ། དེ་ལྟ་བུ་དེ་ནི་སྨན་དཔྱད་ཀྱི་གཞུང་རྩོམ་པར་བྱེད་པ་དྲང་སྲོང་མེ་བཞིན་འཇུག་ཅེས་བྱ་བས་བཤད་པའི་
གཞུང་ཡིན་