Luận tạng Tây Tạng (Tengyur) — Tập 201

ག་པའི་རྩ་བར་གནས་ཏེ། དེ་ན་གནས་པའི་རྩ་འཁུམས་ཤིང་འདུས་པར་བྱས་ནས། དཔུང་པ་བསྐྱོད་
བསྒུལ་མི་ནུས་པར་བྱེད་པའི་རླུང་ནད་སྐྱེད་པར་བྱེད་དོ། གང་ཞིག་ལག་མཐིལ་སོར་མོར་འབྲེལ། །ཆུ་བ་རྒྱབ་ཏུ་འཁུམས་བྱེད་ཅིང་། །ལག་ངར་བྱ་བ་ཉམས་བྱེད་པ། །རླུང་དེ་བི་ཤ་ཙེ་རུ་བཤད། །ཅེས་བྱ་བ་ལ། ནད་གང་ཞིག་ལག་པའི་མཐིལ་དུ་ཕྱོགས་ཤིང་དེ་དང་འབྲེལ་པ་ཆུ་བ་འདུས་པ་ཞེས་
བྱ་བའི་ཆུ་བ་རྒྱབ་ཏུ་འཁུམས་པར་བྱེད་ཅིང་། ལག་ངར་གྱི་རྒྱབ་ཏུ་རླུང་གིས་འཁུམས་པར་བྱེད་ནས་ལག་ངར་གྱི་བྱ་བའི་ལས་གང་དག་ཡིན་པ་ཐམས་ཅད་ཉམས་པར་བྱེད་དེ། གཡོ་འགུལ་གྱི་བྱ་བ་ཐམས་ཅད་མི་ནུས་པར་བྱེད་པའི་རླུང་ནད་དེ་ནི་མིང་བི་ཤ་ཙེ་ཞེས་བྱ་བ་ཡིན་ནོ་ཞེས་དྲང་སྲོང་
རྣམས་ཀྱིས་བཤད་དོ། །གང་ཚེ་རླུང་ནི་རྐེད་པར་གནས། །བརླ་ཡི་ཆུ་བའི་ནང་དུ་ཞུགས། །དེ་ཚེ་མི་དེ་འཐེང་པོར་འགྱུར། །ཞེས་བྱ་བ་ལ། གང་གི་ཚེ་རླུང་གི་ནད་རྐེད་པའི་ཕྱོགས་སུ་གནས་ཤིང་བརྟེན་པར་གྱུར་ནས་བརླའི་ཆུ་བའི་ནང་དུ་ཞུགས་ཤིང་ཞེན་པར་གྱུར་པ་དེའི་ཚེ་མི་དེ་འཐེང་པོར་གྱུར་ཏེ་རྐང་

ཟུག་ཅིང་འཆལ་བའི་འཐེང་པོར་འགྱུར་རོ། །བརླ་གཉིས་ལ་ཞུགས་འཕྱེ་བོར་འགྱུར། །ཞེས་བྱ་བ་ལ། གང་གི་ཚེ་རྐེད་པར་གནས་པའི་རླུང་དེ་བརླ་གཉིས་ཀ་ལ་ཞུགས་པར་གྱུར་པ་དེའི་ཚེ་བརླ་གཉིས་ཀའི་སྤྱོད་པ་ཉམས་པས་འཕྱེ་བོར་འགྱུར་རོ། །གང་ཞིག་འགྲོ་བར་རྩོམ་པ་ན། །
ལུས་འདར་འཐེང་པོ་ལྟར་འགྲོ་བ། །ཚིགས་ཀྱི་སྤྲེལ་མཚམས་ལྷོད་གྱུར་པ། །དེ་ནི་སྲན་མའི་འཐེང་པོར་བཤད། །ཅེས་བྱ་བ་ལ། སྐྱེས་བུ་གང་འགྲོ་བར་རྩོམ་ཞིང་འགྲོ་བའི་བྱ་བ་འདོར་ཞིང་གཡོ་ལ་འཐེང་པོ་ལྟ་བུར་འགྲོ་བའི་སྐྱེས་བུ་དེ་ནི་ཚིགས་ཀྱི་བོག་རེའི་སྦྲེལ་མཚམས་ལྷོད་ཅིང་ཉམས་
པར་གྱུར་པ་ཡིན་ཏེ། དེ་ནི་མིང་སྲན་མ་ལྟར་འཐེང་པ་ཞེས་བྱའོ། །ཁ་ཟས་དྲོ་གྲང་སྐམ་རློན་འདྲེས། །ལྕི་དང་སྣུམ་ཆེས་བསྟེན་པ་དང་། །ཞུ་དང་མ་ཞུ་མི་བདེས་བསྐྱོད། །ཉིན་ཉལ་མཚན་གཉིད་མ་ལོག་པས། །མ་ཞུ་ཤིན་ཏུ་སོགས་གྱུར་ཏེ། །གལ་ཏེ་བརླ་ནང་ཞུགས་གྱུར་ན། །བད་ཀན་
ཚིལ་དང་རླུང་བཅས་པ། །ནད་གཞན་ཟིལ་གྱིས་མནན་ནས་ནི། །བརླ་རུས་ནང་དུ་གང་བྱས་ཏེ། །བད་ཀན་གྱིས་ཏེ་རེངས་གྱུར་ལ། །དེ་ཚེ་དེ་ཡིས་བརླ་རེངས་བྱེད། །འདེགས་མི་ནུས་གྲང་ཚོར་བ་མེད། །གཞན་གྱི་ཡིན་སྙམ་སེམས་ཤིང་ལྕི། །མི་བཟད་པར་ནི་འགྲོ་བ་ཉམས། །སེམས་
ཁོང་ཆུད་ཅིང་ཡན་ལག་ན། །སྙོམ་སློན་རིམས་འདེབས་ཡི་ག་འཆུས། །རྐང་པ་སྒྱིད་ཞན་འདེགས་པར་དཀའ། །བེམ་བེམ་པོར་འདུག་ལྡན་པ་ཡིན། །དེ་ནི་བརླ་རེངས་ནད་ཅེས་བཤད། །གཞན་དག་ཕྱུག་པོའི་རླུང་ཞེས་ཟེར། །ཞེས་བྱ་བ་ལ། ཁ་ཟས་ཀྱི་བག་དྲོ་གྲང་ལ་སོགས་པར་འདྲེན་
མར་བསྟེན་པ་དང་། ཞུ་བ་དང་བཅས་པའི་མ་ཞུ་བ་ནི་ཞུ་བ་དང་མ་ཞུ་བ་སྟེ། ལ་ལ་ནི་ཞུ་ཞིང་སྨིན་པ་ཡིན་ལ། ལ་ལ་ནི་མ་ཞུ་ཞིང་མ་སྨིན་པ་ཡིན་ཏེ། ལེགས་པར་ཚོས་པ་དང་། མ་ཚོས་པ་དག་གིས་མི་བདེ་བར་གྱུར་པ་དང་། དེ་བཞིན་དུ་མི་བདེ་ཞིང་སྡུག་བསྔལ་བའི་རྣམ་པ་ལ་བརྟེན་པས་
བསྐྱོད་ཅིང་འཁྲུགས་པར་བྱས་པས་མ་ཞུ་བ་ཤིན་ཏུ་ཤས་ཆེར་སོགས་པར་འགྱུར་ལ། དེ་བཞིན་དུ་ཉིན་པར་གཉིད་ལོག་ཅིང་ཉལ་བ་དང་། གཉིད་མ་ལོག་པ་དག་ཡུན་རིང་དུ་བསྟེན་ཀྱང་མ་ཞུ་བ་ཤིན་ཏུ་ཤས་ཆེར་སོགས་པར་འགྱུར་ཏེ། མ་ཞུ་བ་དེ་གལ་ཏེ་བརླ་དང་

བྱིན་པའི་ནང་དུ་ཞུགས་པར་གྱུར་ན། མ་ཞུ་བ་དེ་བད་ཀན་དང་ཚིལ་དང་རླུང་དང་བཅས་པར་འགྱུར་བ་ཡིན་གྱི། མ་ཞུ་བ་དེ་ནི་རླུང་དང་བད་ཀན་གྱི་ནད་གཞན་ལ་ལྟོས་པ་ཟིལ་གྱིས་མནན་ཅིང་མཐུ་ཆུང་བར་བྱེད་ལ། དེའི་ཕྱིར་མ་ཞུ་བ་དེས་བད་ཀན་གྱི་གཡོ་
བ་མེད་པར་བྱས་ཤིང་བརླའི་རུས་པའི་ནང་དུ་གང་བར་བྱེད་པ་ན་དེའི་ཚེ་བརླ་རེངས་ཤིང་བསྐྱོད་མི་ཤེས་པར་འགྱུར་ཏེ། དེ་བས་དེའི་ནད་དེས་བརླ་རེངས་པར་བྱེད་ཅིང་འགྱུར་མི་ཤེས་པར་འདེགས་ཤིང་བསྐྱོད་མི་ཤེས་མི་ནུས་པ་དང་། གྲང་ཞིང་ཚོར་བ་མེད་པ་དང་། གཞན་གྱི་ཡིན་པར་
སྙམ་དུ་སེམས་ཤིང་རང་གི་ལུས་ལས་བྱུང་བ་སྙམ་དུ་མི་སེམས་པ་དང་། དེ་བཞིན་དུ་མི་བཟད་པར་ན་ཞིང་བརྣག་པར་དཀའ་བ་ལ་སོགས་པར་འགྱུར་བ་དང་། སེམས་ཁོང་དུ་ཆུད་པ་ལ་སོགས་པ་དང་ལྡན་པར་འགྱུར་ཏེ། ནད་དེ་ནི་བརླ་རེངས་ཀྱི་ནད་ཅེས་བྱའོ་ཞེས་ཚེའི་རིག་བྱེད་ཤེས་པའི་
སློབ་དཔོན་དག་གིས་བཤད་དོ། །དྲང་སྲོང་གཞན་དག་གིས་ཕྱུག་པོའི་རླུང་ནད་ཅེས་བྱའོ་ཞེས་ཟེར་རོ། །རླུང་དང་ཁྲག་ལས་སྐྱེས་པའི་སྐྲང་། །པུས་མོའི་སྟེང་བྱུང་ནད་ཚབས་ཆེ། །ཅེ་སྤྱང་མགོ་ལྟར་སྦོམ་གྱུར་པ། །ཅེ་སྤྱང་མགོ་འདྲ་ཡིན་ཞེས་བྱ། །ཞེས་བྱ་བ་ལ། རླུང་དང་ཁྲག་
ལས་སྐྱེས་པའི་སྐྲང་པ་པུས་མོའི་སྟེང་དུ་བྱུང་བ་དེ་ནི་ནད་ཚབས་ཤིན་ཏུ་ཆེ་བ་ཡིན་ཏེ། དེ་ནི་ཅེ་སྤྱང་གི་མགོ་འདྲ་བར་སྦོམ་ཞིང་ཆེ་བར་སྐྲང་པ་ཡིན་པས་ཅེ་སྤྱང་གི་མགོ་འདྲ་བའི་རླུང་ནད་ཅེས་བྱའོ། །རྐང་པ་ན་ཞིང་མི་མཉམ་འདོར། །ངལ་བ་ལས་ནི་གང་ཚེ་རླུང་། །ལོང་མོར་གནས་ཏེ་
ནད་སྐྱེད་པ། །དེ་ནི་རླུང་ནད་ཚེར་མར་བཤད། །ཅེས་བྱ་བ་ལ། རྐང་པ་ས་ལ་མི་མཉམ་ཞིང་མི་མཉམ་པར་འདོར་བའམ། ཡང་ན་ངལ་ཞིང་དུབ་པ་ལས་དུས་གང་གི་ཚེ་རླུང་བྱིན་པ་དང་། རྐང་པ་ལ་བརྟེན་ནས་ལོང་མོར་གནས་པའི་ནད་སྐྱེད་པར་གྱུར་པའི་རླུང་ནད་དེ་ནི་ཚེར་མ་ལྟ་བུ་ཞེས་བཤད་
དོ། །རྟིང་པ་སོར་མོར་འབྲེལ་པ་ཡི། །ཆུ་བར་རླུང་གིས་གནོད་གྱུར་གང་། །བརླ་ནས་འཇུག་པར་བྱེད་པ་དེ། །གཟུགས་འཁུམས་ཞེས་ནི་བྱ་བར་བཤད། །ཅེས་བྱ་བ་ལ། རྟིང་པར་གནས་ནས་སོར་མོ་དང་འབྲེལ་བར་འགྱུར་བའི་ཆུ་བའི་ཚོགས་གང་ཡིན་པར་རླུང་དེས་གནོད་

པ་སྐྱེད་པར་གྱུར་ནས། བརླའི་བར་དུ་གྱེན་དུ་འཇུག་པར་བྱེད་ཅིང་བསྡུས་ཤིང་འཁུམས་པར་བྱེད་པ་གང་ཡིན་པ་དེ་ནི་དྲང་སྲོང་དག་གིས་གཟུགས་འཁུམས་པའི་རླུང་ནད་ཅེས་བྱ་བར་བཤད་དོ། །བི་ཤ་ཙི་དང་གཟུགས་འཁུམས་བཤད། །མི་བཟད་ན་བ་ཁ་ལི་ར་བཤད། །
ཅེས་བྱ་བ་ལ། སྔར་ལག་ངར་དུ་ཞུགས་པའི་རླུང་ནད་ཀྱི་བི་ཤ་ཙི་དང་། འདས་མ་ཐག་པའི་གཟུགས་འཁུམས་པའི་རླུང་ནད་གཉིས་པོ་མི་བཟད་པ་དང་ལྡན་པར་སྣང་བ་ནི་རླུང་ནད་ཁ་ལི་ཞེས་བྱ་བར་བཤད་དོ། །གང་གི་རྐང་པ་བརྩེ་གྱུར་ཞིང་། །བེམ་བེམ་པོར་ནི་གྱུར་པ་དག །བད་
ཀན་རླུང་འཁྲུགས་ལས་གྱུར་པ། །རྐང་པ་བརྩེ་བར་དེ་བཤད་དོ། །ཞེས་བྱ་བ་ལ། མི་གང་གི་རྐང་པ་གཉིས་བརྩེ་ཞིང་ཚ་བ་ཙག་ཙག་པོར་བྱེད་པའི་སྒོ་ནས་ཚོར་བ་མེད་ཅིང་བེམ་བེམ་པོར་གྱུར་པ་དག་ནི་བད་ཀན་དང་འདྲེས་པ་ལས་གྱུར་པ་ཡིན་ལ། ནད་དེ་ནི་རྐང་པ་བརྩེ་བ་ཞེས་བྱའོ་
ཞེས་བཤད་དོ། །མཁྲིས་པ་ཁྲག་དང་བཅས་པའི་རླུང་། །རྐང་པ་གཉིས་སུ་ཚ་བྱེད་ཅིང་། །ཁྱད་པར་དུ་ནི་འགྲོ་ཚེ་ཚ། །དེ་ནི་རྐང་ཚ་ཞེས་བྱར་བཤད། །ཅེས་བྱ་བ་ལ། རླུང་གི་ནད་མཁྲིས་པ་དང་ཁྲག་དང་བཅས་པར་གྱུར་པ་ལས་རྐང་པ་གཉིས་སུ་ཚ་བ་འུར་འུར་པོར་གྱུར་པ་གང་ཡིན་པ་
དང་། ཁྱད་པར་དུ་ཡང་འགྲོ་ཞིང་འཆག་པའི་ཚེ་ལྷག་པར་ཚ་བར་གྱུར་པའི་ནད་དེ་ནི་རྐང་པ་ཚ་བ་ཞེས་བྱའོ་ཞེས་བཤད་དོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ནད་གཞིའི་གནས་ཀྱི་
ལེའུ་བཅོ་ལྔ་པའི་རྣམ་པར་འགྲེལ་པའོ།། །།དེ་ནས་དྲེག་ནད་ཀྱི་ནད་གཞི་བཤད་པར་བྱའོ། །ཞེས་བྱ་བ་ལ། རླུང་ལས་གྱུར་པ་ཡིན་པར་ཆོས་མཐུན་པ་ཡིན་པས་ན། རླུང་ནད་ཀྱི་འོག་ཏུ་ལེའུ་འདི་བརྩམས་པ་ཡིན་ནོ། །དེ་ཡང་རླུང་དང་ཁྲག་ལས་སྐྱེས་པའི་སྐྲང་ཞེས་སྨོས་པ་ཡིན་ནོ། །ཁྲག་
ནི་འཁྲུགས་པར་བྱེད་པའི་ཟས། །ཚ་བ་དང་ནི་མི་འཕྲོད་པ། །བསྟེན་དང་སྦྱོར་བ་ལོག་པ་དང་། །ཉིན་ཉལ་མཚན་གཉིད་མ་ལོག་དང་། །ཉལ་པོ་དྲགས་དང་སྐྱིད་པར་གནས། །འཆག་པའི་སྤྱོད་པ་མ་བསྟེན་དང་། །སྣད་དང་སྦྱང་བ་མ་བྱས་པས། །མི་ཡི་ཁྲག་ནི་འཁྲུགས་གྱུར་ཅིང་། །རླུང་སྐྱེད་ཟོས་པས་རླུང་ནད་ནི། །

འཕེལ་བས་འཁྲུགས་ཏེ་ལམ་གཞན་ཞུགས། །དེ་བཞིན་ཁྲག་ཀྱང་ལམ་འགགས་ལ། །དང་པོར་གནོད་པར་འགྱུར་བ་ཡིན། །ཞེས་བྱ་བ་ལ། ཁྲག་འཁྲུགས་ཤིང་སྐྱེད་པར་བྱེད་པའི་ཟས་འབྲུ་དང་སྲོག་ཆགས་ཆུ་ན་སྤྱོད་པའི་ཤ་དང་། རྒྱ་སྲན་ཀུ་ལངྠ་དང་། མོན་སྲན་
གྲེའུ་དང་། ནིམ་པ་བ་དང་། སྐྱུར་བ་དང་། ཆང་དང་དར་བ་དང་། ཞོ་སྐྱུར་པོ་ལ་སོགས་བསྟེན་པ་དང་། མི་འཕྲོད་པའི་ཟས་གཤེར་བའི་ཤ་དང་། མོན་སྲན་གྲེའུ་ལྷན་ཅིག་བཟའ་བ་དང་སྦྲང་རྩི་དང་མར་ཆ་མཉམ་པར་ཟ་བ་ལ་སོགས་པ་ཇི་སྐད་བཤད་པ་དང་། འདིར་མ་སྨོས་སུ་ཟིན་ཀྱང་ཁྲག་སྐྱེད་
པར་བྱེད་པའི་སྤྱོད་ལམ་དང་། ཁ་ཟས་ལ་སོགས་པ་དེ་དག་བསྟེན་ཅིང་གོམས་པར་བྱེད་པ་དང་། དེ་བཞིན་དུ་སྦྱོར་བ་ལོག་པ་སྟེ་སྨན་དཔྱད་ཀྱི་གཙུག་ལག་ལས་བྱུང་བ་བཞིན་དུ་བསྟེན་པར་མ་བྱས་པའི་སྦྱོར་བ་ལོག་པ་དང་། དེ་བཞིན་དུ་ཉིན་པར་ཤས་ཆེར་གཉིད་ལོག་པ་དང་། མཚན་མོའི་དུས་སུ་གཉིད་མ་
ལོག་པ་དང་། ཉལ་པོ་དྲགས་ཤིང་བུད་མེད་བསྟེན་པ་དྲགས་པ་དང་། ཕལ་ཆེར་སྐྱིད་དེ་བར་གནས་ཤིང་རྟག་ཏུ་བདེ་བ་དང་ལྡན་ལ་ལུས་འཇམ་ཤ་ཅན་དུ་གྱུར་པས་འཆག་ཅིང་འགྲོ་བའི་སྤྱོད་ལམ་མ་བསྟེན་གྱི། རྟག་ཏུ་དལ་བར་འདུག་ལ་བསྐྱོད་ཅིང་རྩོལ་བ་མི་བྱེད་པ་དང་། སྣད་པ་སྟེ་མཚོན་
ཆའི་ཚོགས་ཀྱི་ཁྱད་པར་གང་ཡང་རུང་བས་སྣད་ཅིང་རྨ་བྱུང་བ་དང་། སྦྱང་བ་མ་བྱས་ཏེ་དྲི་མའི་ཚོགས་མ་བསལ་ཅིང་མ་བཏོན་པས་མིའི་ཁྲག་འཁྲུགས་ཤིང་ལྡང་བར་འགྱུར་ཞིང་རླུང་སྐྱེད་ཅིང་འཁྲུགས་པའི་ཟས་ཁ་བ་དང་། ཁུང་བུ་དང་། བསྐ་བ་ལ་སོགས་པ་ཟོས་པ་ལ་གོམས་
ཤིང་མང་དུ་བསྟེན་པས་རླུང་ནད་འཕེལ་ཞིང་དང་པོ་སོགས་པར་གྱུར་ལ། དེའི་འོག་ཏུ་འཁྲུགས་ཤིང་ལྡང་བར་གྱུར་ནས། ལམ་ལོག་པ་གཞན་དུ་ཞུགས་པ་དང་། ཁྲག་ཀྱང་དེ་དང་འདྲ་བར་སོགས་ཤིང་འཕེལ་བ་དང་། འཁྲུགས་ཤིང་ལྡང་བར་གྱུར་ནས་ལམ་འགག་
པར་བྱ་བ་དེ་ཉིད་ཀྱིས་དང་པོར་གནོད་ཅིང་སྐྱེད་པར་འགྱུར་བ་ཡིན་ནོ། །དེ་ནི་ཕྱུག་པོའི་རླུང་ནད་དང་། །འཐེང་ནད་སྟོབས་འཇིག་རླུང་ཁྲག་འདྲེས། །མིང་དུ་དེ་ནི་རྣམ་པར་བཤད། །ཅེས་བྱ་བ་ལ། དྲེག་ནད་དེ་ནི་ཕྱུག་པོའི་རླུང་ནད་དང་འཐེང་པོའི་ནད་དང་སྟོབས་འཇིག་པ་དང་།

རླུང་ཁྲག་འདྲེས་པའི་ནད་ཅེས་བྱ་བར་མིང་གི་རྣམ་གྲངས་སུ་སློབ་དཔོན་གྱིས་བཤད་པ་ཡིན་ནོ། །དེ་ཡང་དང་པོར་རྐང་པར་རྒྱུ། །མཆོག་ཏུ་བཞོན་སོགས་འཕྱང་ལས་བྱུང་། །ཞེས་བྱ་བ་ལ། དྲེག་ནད་དེ་ཡང་དང་པོར་རྐང་པ་གཉིས་སུ་རྒྱུག་ཅིང་འབྱུང་བར་འགྱུར་རོ། །མཆོག་
ཏུའམ་ཁྱད་པར་དུ་ནི་རྟ་ལ་སོགས་པའི་བཞོན་པ་ལ་ཞོན་ཏེ། རྐང་པ་འཕྱང་བར་བྱས་པ་ལས་དེ་འབྱུང་བར་འགྱུར་རོ། །དེ་ཡི་འབྱུང་འགྱུར་མཚན་ཉིད་ནི། །མཛེ་ནི་འབྱུང་འགྱུར་མཚན་མར་མཚུངས། །དེ་བཞིན་ལུས་ཉམས་ཡན་ལག་ལྷོད། །པུས་མོ་བྱིན་པ་བརླ་རྐེད་པ། །ལག་པ་རྐང་
པའི་ཚིགས་རྣམས་སུ། །གཡའ་ཞིང་འགུལ་དང་ན་བ་དང་། །ཆག་སྙམ་སེམས་ཤིང་ཚོར་མེད་ལྕི། །ཡང་དང་ཡང་དུ་ལྡང་བ་དང་། །སླར་ཡང་ཞི་བར་འགྱུར་བ་ཡིན། །ཞེས་བྱ་བ་ལ། དྲེག་ནད་དེ་ཕྱིས་འབྱུང་བར་འགྱུར་བའི་མཚན་ཉིད་སྔར་བྱུང་བའི་ཚུལ་ནི་མཛེ་འབྱུང་བར་འགྱུར་བའི་མཚན་
མ་དང་མཚུངས་པ་ཡིན་ཏེ། ཤིན་ཏུ་འདར་བའམ་རེག་ན་རྩུབ། །ཚུལ་འབྱུང་མི་འབྱུང་མདོག་མི་སྡུག །ཅེས་བྱ་བ་ལ་སོགས་པའི་གཞུང་གིས་བསྟན་པ་ཡིན་ནོ། །དེ་བཞིན་དུ་མཚན་མ་གཞན་ཡང་ལུས་ཉམས་ཤིང་ཤིག་ཤིག་པོར་འགྱུར་བ་དང་། ཡན་ལག་རྣམས་ལྷོད་པ་དང་། པུས་མོ་
ལ་སོགས་པར་གཡའ་བ་ལ་སོགས་པའི་ནད་ཡང་དང་ཡང་དུ་ལྡང་ཞིང་ཡང་ཡང་དུ་སླར་ཞི་བར་འགྱུར་བ་དང་། དེ་ནས་སླར་ལྡང་དུ་བ་བྱེད་པ་ཡིན་ནོ། །རྐང་པ་གཉིས་ཀྱི་རྩ་བར་གནས། །ལན་འགའ་ལག་པ་དག་དུ་གནས། །བྱི་བའི་དུག་ནི་ལྡང་བ་ལྟར། །ལུས་ཀུན་ལ་ནི་ཁྱབ་པར་འགྱུར། །
ཞེས་བྱ་བ་ལ། དྲེག་ནད་དེ་རྐང་པ་གཉིས་ཀྱི་རྩ་བར་གནས་ཤིང་རྟེན་བྱས་ནས། ལན་འགའ་ནི་ལག་པ་གཉིས་ཀྱི་རྩ་བར་ཡང་གནས་པར་བྱེད་དེ། བྱི་བའི་དུག་ལྡང་བར་བྱེད་པ་དང་། དང་པོར་ལུས་ཀྱི་ཕྱོགས་གཅིག་ཏུ་གནས་ནས། དེའི་འོག་ཏུ་ལུས་མ་ལུས་པར་ཁྱབ་ཅིང་མཆེད་པར་བྱེད་དོ། །ཐོགས་
མར་པགས་པ་ཁྲག་ལ་གནས། །བྱུང་བ་རྟོགས་པར་སླ་ཞེས་བྱ། །ཞེས་བྱ་བ་ལ། དྲེག་ནད་དེ་ཐོག་མར་ཏེ་དང་པོར་པགས་པ་དང་ཁྲག་ལ་གནས་ཤིང་བརྟེན་ནས་བྱུང་བ་དེ་ནི་དྲེག་ནད་རྟོགས་པར་སླ་བ་ཞེས་བྱའོ། །དེ་ནས་རིམ་གྱིས་ལུས་ཟུངས་ཀུན། །ཁྱབ་སྟེ་རྟོགས་པར་དཀའ་ཞེས་བྱ། །

ཞེས་བྱ་བ་ལ། དེ་ནས་དེའི་འོག་ཏུ་སྔར་བཤད་པ་ལས་གཞན་པའི་ལུས་ཟུངས་ཚིལ་ལ་སོགས་པ་ཀུན་ཁྱབ་ཅིང་ཞུ་བར་གྱུར་ནས་འབྱུང་བ་དེ་ནི་གཏིང་ན་གནས་ཏེ་རྟོགས་པར་དཀའ་བ་ཞེས་བྱའོ། །རྟོགས་སླ་པགས་གཡའ་ལ་སོགས་ལྡན། །ཟངས་ལྟར་དམར་དང་སྔོ་བ་དང་། བྱ་རྨྱང་
བཅས་ཤིང་རབ་དྲོ་ཚ། །ཞེས་བྱ་བ་ལ། དྲེག་ནད་རྟོགས་པར་སླ་བ་ནི་པགས་པ་གཡའ་བ་དང་། འགུལ་བ་དང་། གཟུགས་ལ་སོགས་པ་དང་ལྡན་པ་དང་། དེ་བཞིན་དུ་ཟངས་ལྟར་དམར་བ་དང་། སྔོ་བའི་མདོག་ཏུ་སྣང་བ་དང་། བྱ་རྨྱང་བྱེད་འདོད་པ་དང་བཅས་པ་དང་། མི་བཟད་པར་རབ་ཏུ་ཚ་བ་
ཡིན་ནོ། །རྟོགས་དཀའ་སྔར་བས་ལྷག་པར་ན། །སྐྲང་ཞིང་མཁྲང་ལ་ཚོས་པར་བྱེད། །གཞང་དང་ཚིགས་དང་རུས་པ་རྐང་། །བཅད་སྙམ་སེམས་ཤིང་ནང་དུ་རྒྱུ། །ཤུགས་དང་ལྡན་ཚེ་སྒུར་པོ་དང་། །ཞ་བོ་འཐེང་པོར་བྱེད་འགྱུར་ལ། །ལུས་ནི་ཀུན་ཏུ་རྒྱུ་བ་ཡིན། །ཞེས་བྱ་བ་ལ། དྲེག་
ནད་རྟོགས་པར་དཀའ་བ་ཞེས་བྱ་བ་ནི། དྲེག་ནད་སྔ་མ་རྟོགས་པར་བླ་བ་བས་ལྷག་པར་ན་ཞིང་གཏིང་ཟབ་པར་སྐྲང་བ་དང་། མཁྲང་ཞིང་སྲ་བ་དང་། ཚོས་ཤིང་སྨིན་པར་བྱེད་པ་དང་། གཞང་ལ་སོགས་པ་བཅད་པ་སྙམ་དུ་སེམས་ཤིང་ནད་ནང་དུ་རྒྱུ་བ་དང་དེ་ཤུགས་དང་ལྡན་ཞིང་ཤས་
ཆེར་བདེ་བའི་ཚེ་ན་སྒུར་པོའམ་འཇས་པའམ་འཐེང་པོར་བྱེད་པར་འགྱུར་བ་དང་། རླུང་དེ་མགོ་ནས་རྐང་པའི་བར་དུ་ལུས་ཐམས་ཅད་དུ་རྒྱུ་ཞིང་འབྱམ་པ་ཡིན་ནོ། །དེ་ལ་རླུང་ཤས་ཆེ་གྱུར་ན། །གཟེར་འགུལ་ཟུག་པའི་ཤས་ཆེ་ཞིང་། །སྐྲང་པ་རྩུབ་ཅིང་གནག་པ་དང་། །སྔོ་ཞིང་འཕེལ་ལ་འབྲི་
བར་འགྱུར། །རྩ་ཆེན་སོར་མོའི་ཚིགས་རྣམས་ནི། །འཁུམས་ཤིང་ལུས་བཅུམ་ཤིན་ཏུ་ན། །གྲང་ལ་མི་དགའ་རེག་ན་བདེ། །རེངས་ཤིང་འདར་ལ་ཚོར་བ་མེད། །ཅེས་བྱ་བ་ལ། དེ་ལ་དྲེག་ནད་རླུང་གི་ཤས་ཆེ་བ་ནི་གཟེར་བ་ལ་སོགས་པར་འགྱུར་ཏེ། གཟེར་བ་ནི་རྒྱུན་མི་འཆད་པར་ན་བའོ། །
ཟུག་པ་ནི་བར་བར་དུ་ཆད་ཅིང་སྡོད་དེ་ན་བའོ། །ལུས་བཅུམ་པ་ནི་ཡན་ལག་དམ་དུ་བཅངས་པ་སྙམ་སེམས་པའོ། །གྲང་བ་ལ་མི་དགའ་བ་ནི་གྲང་བ་ལ་སྡང་ཞིང་མི་དགའ་བའོ། །རེག་ན་བདེ་བ་ནི་གྲང་བདེ་ཉིད་ཀྱིས་རེག་ན་བདེ་བར་འགྱུར་བའོ། །ཁྲག་ཤས་ཆེ་སྐྲང་རབ་ཏུ་ཟུག །དམར་

ཞིང་ཚ་བ་ཙེག་ཙེག་བྱེད། །སྣུམ་དང་རྩུབ་པས་ཞི་མི་འགྱུར། །གཡའ་དང་འདྲུལ་བར་ལྡན་པ་ཡིན། །ཞེས་བྱ་བ་ལ། ཁྲག་གི་ཤས་ཆེ་ཞིང་རྒྱས་པ་ལས་བྱུང་བའི་དྲེག་ནད་ཀྱི་མདོག་དམར་བ་དང་། ཡུངས་ཀར་བཏགས་པའི་ལྡེ་གུས་བསྐུས་པ་ལྟར་ཚ་བ་ཙེག་ཙེག་བྱེད་པ་དང་།
ཟས་དང་སྤྱོད་ལམ་སྣུམ་པ་དང་རྩུབ་པས་ཞི་ཞིང་བདེ་བར་མི་འགྱུར་བ་ཡིན་ནོ། །གཞན་ཡང་གཡའ་བ་ལ་སོགས་པ་དང་ལྡན་ནོ། །མཁྲིས་གྱུར་ཚ་ཞིང་རྨོངས་བག་དང་། །རྔུལ་ཞིང་བརྒྱལ་མྱོས་སྐོམ་དད་ཆེ། །རེག་མི་བཟོད་ཅིང་ན་ལ་དམར། །སྐྲང་ཞིང་སྨིན་ལ་ཤིན་ཏུ་དྲོ། །ཞེས་
བྱ་བ་ལ། མཁྲིས་པ་ཤས་ཆེ་ཞིང་བདོ་བ་ལས་གྱུར་པའི་དྲེག་ནད་ནི་ཚ་ཞིང་གདུང་པ་སྣ་ཚོགས་དང་ལྡན་པ་དང་། རྨོངས་བག་ལ་སོགས་པ་དང་ལྡན་པར་འགྱུར་རོ། །བད་ཀན་གྱིས་འགུལ་མི་ཤེས་ལྕི། །ཚོར་མེད་སྣུམ་ཞིང་གྲང་བ་དང་། །གཡའ་ཞིང་ཅུང་ཟད་ན་བ་ཡིན། །ཞེས་བྱ་བ་ལ།
བད་ཀན་ཤས་ཆེ་བར་གྱུར་པའི་དྲེག་ནད་ནི་འགུལ་མི་ཤེས་པ་ལ་སོགས་པ་དང་ལྡན་པ་ཡིན་ནོ། །འདྲེས་པའི་མཚན་ཉིད་འདྲེན་མ་ཡིན། །ཞེས་བྱ་བ་ལ། ནད་གཞི་གཉིས་འདྲེས་པའི་ལྡན་པ་ལས་བྱུང་བ་ནི། དྲེག་ནད་ཀྱི་མཚན་ཉིད་འདྲེན་མ་དང་ལྡན་པར་འགྱུར་རོ། །ནད་གཅིག་ལས་
གྱུར་གསར་གསོ་སླ། །ཞེས་བྱ་བ་ལ། དྲེག་ནད་དེ་ནད་གཞི་གཅིག་ལས་བྱུང་བར་གྱུར་པ་དང་། གསར་དུ་བྱུང་ཞིང་རིང་པོར་མ་ལོན་པ་ནི་གསོ་སླ་བ་ཡིན་ནོ། །ནད་གཉིས་ལས་བྱུང་འཚོ་བཙམ། །ཞེས་བྱ་བ་ལ། དྲེག་ནད་ནད་གཞི་གཉིས་ལས་བྱུང་བ་ནི་མི་ལ་བ་ཙམ་དུ་འཚོ་བར་ནུས་པ་ཙམ་
ཡིན་ནོ། །འདུས་པ་ལས་གྱུར་ཆུ་སེར་འཛག །རེངས་དང་ཐོར་བུ་འཕྱང་བ་སྤང་། །ཞེས་བྱ་བ་ལ། དྲེག་ནད་དེ་ནད་གཞི་གསུམ་ཆར་འདུས་པ་ལས་བྱུང་བ་དང་། ཆུ་སེར་འཛག་པར་བྱེད་པ་དང་། རེངས་ཤིང་འགྱུར་མི་ཤེས་པ་དང་། ཐོར་བུ་འཕྱང་བར་བྱེད་པ་དེ་ནི་སྤང་ཞིང་དོར་བར་བྱའོ། །རླུང་
ནི་ཡན་ལག་ཚིགས་གནས་པ། །ཁྲག་གི་ལམ་ལ་མྱུར་གནོད་བྱེད། །དེ་གཉིས་ཕན་ཚུན་འདྲེས་གྱུར་པའི། །ནད་ཀྱིས་སྲོག་ནི་འཕྲོག་པར་བྱེད། །ཅེས་བྱ་བ་ལ། རླུང་ནི་ཡན་ལག་གི་ཚིགས་རྣམས་ཀྱི་ནང་དུ་ཞུགས་ཏེ་གནས་ནས་ཁྲག་རྒྱུ་བའི་ལམ་ལ་མྱུར་དུ་གནོད་ཅིང་འཇོམས་པར་

བྱེད་དེ། རླུང་ཁྲག་དེ་གཉིས་འདྲེས་ཤིང་འཁྲུགས་པར་གྱུར་ན་རླུང་གི་ནད་ཀྱིས་མིའི་སྲོག་འཕྲོག་ཅིང་འཇོམས་པར་བྱེད་དོ། །ལྔ་ཡི་བདག་ཉིད་ཅན་རླུང་ལས། །སྲོག་རྩུབ་དྲག་ཤུལ་སྨྱུང་བ་དང་། །འགྲངས་དྲགས་སྣད་དང་ལམ་གྱིས་དུ་བ། །ཤུགས་བཀག་ནན་གྱིས་
བཙིར་བ་ཡིས། །འཁྲུགས་ནས་མིག་ལ་སོགས་པ་ལ། །ཉེ་བར་གནོད་པ་སྐྱེད་བྱེད་ཅིང་། །ཆམ་པ་ཉམ་ཐག་སྐམ་ལུད་པ། །དབུགས་མི་བདེ་སོགས་ནད་མང་སྐྱེད། །ཅེས་བྱ་བ་ལ། སྲོག་ཅེས་བྱ་བ་ལ་སོགས་པའི་དབྱེ་བས་རྣམ་པ་ལྔ་ཞེས་བྱ་བའི་རླུང་ལྔ་ཡོད་པ་ལས་ཀྱང་། སྲོག་ཅེས་བྱ་བའི་
རླུང་ནི་རྩུབ་པ་ལ་སོགས་པས་འཁྲུགས་པར་གྱུར་ནས། མིག་ལ་སོགས་པའི་དབང་པོ་ལ་གནོད་པར་བྱེད་དེ། ཆམ་པ་ལ་སོགས་པའི་ནད་སྐྱེད་པར་བྱེད་དོ། །སྟོད་རྒྱུ་སྦྲིད་པ་སྒྲེགས་པ་དང་། །སྐྱུག་པ་གཉིད་ནི་བཀག་པ་དང་། །ཁུར་ལྕི་འདེགས་དང་དྲག་ཏུ་ངུ་། །དགོད་དྲགས་
སོགས་ཀྱིས་ནད་འཁྲུགས་ཏེ། མགུལ་པ་འགགས་ཤིང་སེམས་ཉམས་ལ། །ཆམ་འདེབས་སློན་ཞིང་ཡི་ག་འཆུས། །མགུལ་པར་ལྦ་བ་སོགས་སྐྱེད་ཅིང་། །ནམ་ཚོང་ཡན་ཆད་རྟེན་ནས་སྐྱེད། །ཅེས་བྱ་བ་ལ། སྟོད་དུ་རྒྱུ་བ་ཞེས་བྱ་བའི་རླུང་ནི་སྲིད་པ་བཀག་པ་ལ་སོགས་པས་
འཁྲུགས་ཤིང་ལྡང་བར་བྱེད་དེ། མགུལ་པ་འགགས་པ་ལ་སོགས་པའི་ནད་རྣམས་དང་། ནམ་ཚོང་ཡན་ཆད་ཀྱི་ནད་འདིར་མ་སྨོས་པ་གཞན་དག་ཀྱང་སྐྱེད་པར་བྱེད་དོ། །ཁྱབ་བྱེད་འགྲོ་དང་འདུག་དྲགས་དང་། །རྩེད་མོ་དྲགས་དང་མི་བཟོད་སྤྱོད། །ཁ་ཟས་མི་མཐུན་རྩུབ་འཇིགས་
དགའ། །ཡི་མུག་སོགས་ཀྱིས་འཁྲུགས་པར་གྱུར། །ཁུ་བ་སྟོབས་དང་སྤྲོ་བ་ཉམས། །སྐྲང་དང་སེམས་གཡེངས་རིམས་ཀྱིས་འདེབས། །ཡན་ལག་ཀུན་ལ་ཟུག་པ་དང་། །སྤུ་བརྩེ་ཡན་ལག་ཚོར་བ་མེད། །མཛེ་དང་མེ་དབལ་གཞན་ཡང་ནི། །ལུས་ཀུན་ཁྱབ་པའི་ནད་སྐྱེད་
འགྱུར། །ཞེས་བྱ་བ་ལ། ཁྱབ་བྱེད་ཅེས་བྱ་བའི་རླུང་ནི་འགྲོ་དྲགས་པ་དང་འདུག་དྲགས་པ་ལ་སོགས་པས་འཁྲུགས་ཤིང་ལྡང་བར་གྱུར་ནས་ཁུ་བ་ཟད་ཅིང་ཉལ་པོ་མི་ནུས་པ་ལ་སོགས་པའི་ནད་རྣམས་དང་། ལུས་ཀྱི་ཡན་ལག་མ་ལུས་པ་ལ་ཁྱབ་པའི་ནད་ཐམས་ཅད་སྐྱེད་པར་འགྱུར་

རོ། །མཉམ་གནས་འདུ་བ་མ་སྙོམས་དང་། །གྲང་དང་འདྲེན་མའི་ཟས་ཟོས་དང་། །དུས་མིན་གཉིད་ལོག་མཚན་མོ་ནི། །གཉིད་མ་ལོག་ལ་སོགས་ཀྱིས་འཁྲུགས། །གཟེར་དང་སྐྲན་དང་ཕོ་ནད་སོགས། །ཞུ་དང་མ་ཞུར་གནས་ནད་སྐྱེད། །ཅེས་བྱ་བ་ལ། མེ་དང་མཉམ་དུ་
གནས་པ་ཞེས་བྱ་བའི་རླུང་ནི་གནས་མ་སྙོམས་པ་དང་། འདུ་བ་མ་སྙོམས་པ་ལ་སོགས་པས་འཁྲུགས་པར་གྱུར་ནས། གཟེར་ལ་སོགས་པའི་ནད་ཞུ་བ་དང་མ་ཞུ་བའི་གནས་ལ་བརྟེན་ཅིང་གནས་པ་རྣམས་སྐྱེད་ཅིང་འབྱུང་བར་བྱེད་དོ། །ཐུར་སེལ་ཟས་ནི་རྩུབ་ལ་ལྕི། །ཤུགས་བཀག་
པ་དང་མི་སྲུན་བཞོན། །ཁྱོགས་དང་བཞོན་དང་སྟན་ལ་གནས། །འགྲོ་བ་བསྟེན་ནི་དྲགས་པ་ཡིས། །འཁྲུགས་ནས་གསོ་བར་དཀའ་བའི་ནད། ཞུ་བའི་གནས་ལ་བརྟེན་པ་སྐྱེད། །གཅིན་དང་ཁུ་ཆུའི་ནད་གཞང་འབྲུམ། །གཞང་འབྱུང་ལ་སོགས་མང་པོ་སྐྱེད། །ཅེས་བྱ་བ་ལ།
ཐུར་དུ་སེལ་བ་ཞེས་བྱ་བའི་རླུང་ནི་ཟས་རྩུབ་པ་ལ་སོགས་པ་དང་བཞོན་པ་དང་། ཁྱོགས་ལ་སོགས་པ་བསྟེན་པར་དྲགས་ཤིང་ཡང་དང་ཡང་དུ་སྐྱོད་པར་བྱེད་པ་དག་གིས་འཁྲུགས་པར་གྱུར་ནས། གསོ་ཞིང་བཅོས་པར་དཀའ་བའི་ནད་ཞུ་བའི་གནས་ལ་བརྟེན་པ་དང་གཅིན་ནད་ལ་སོགས་པ་རྣམས་
དང་། གཞན་ཡང་ནད་མང་པོ་སྐྱེད་པར་འགྱུར་རོ། །རླུང་ཀུན་མ་ཞུར་ལྡན་པ་ནི། །སྙོམ་དང་འགུལ་མི་ཤེས་ཁོང་ལྕི། །སྣུམ་དང་སྒྱིད་ཞན་ཡི་ག་འཆུས། །གྲང་སྐྲན་མེ་དྲོད་ཉམས་བྱེད་ཅིང་། །ཚ་དང་རྩུབ་པ་མངོན་འདོད་ཅིང་། །དེ་ཟོས་བདེ་འགྱུར་ལས་ཤེས་བྱ། །ཞེས་བྱ་བ་ལ། སྲོག་ཅེས་བྱ་བ་
ལ་སོགས་པས་ཞུགས་པའི་རླུང་གི་ནད་ཀུན་མ་ཞུ་བ་དང་ལྡན་པ་ཡིན་པར་ནི་སྙོམ་ལས་ཤེས་པར་བྱའོ། །འགུལ་མི་ཤེས་པ་ནི་ལ་ལ་དག་ན་རེ་མུན་པར་ཞུགས་པ་སྙམ་བྱེད་པའི་ནད་ལ་བྱའོ་ཞེས་ཟེར་རོ། །ཚ་བ་ལ་སོགས་པ་མངོན་པར་འདོད་པ་ནི་དེ་ལ་དགའ་བ་དང་། དེ་དག་ཉིད་ཟོས་པས་བདེ་བ་དང་། རྗེས་སུ་
འབྲེལ་པ་ཡིན་པ་ལས་ཤེས་པར་བྱའོ། །མ་ཞུ་བ་དང་མི་ལྡན་པ། །སྙོམ་སོགས་གོ་ནི་བཟློག་པ་ཡིན། །ཞེས་བྱ་བ་ལ། རླུང་ཐམས་ཅད་མ་ཞུ་བ་མི་ལྡན་ཞིང་། །བྲལ་བའི་མཚན་ཉིད་ནི་བཤད་མ་ཐག་པའི་སྙོམ་པ་ལ་སོགས་པའི་མཚན་ཉིད་དང་ལྡན་པར་ཤེས་པར་བྱའོ། །དེ་ནས་རླུང་གིས་འདྲེས་པ་ཡི། །དབྱེ་བ་

མང་པོར་ཤེས་པར་བྱ། །ཞེས་བྱ་བ་ལ། དེ་ནས་དེའི་འོག་ཏུ་རླུང་མཁྲིས་ལ་སོགས་པའི་མང་པོ་དང་འདྲེས་ཤིང་ལྡན་པར་གྱུར་པ་ལས་འཁྲུགས་པའི་མཚན་ཉིད་ཀྱི་དབྱེ་བ་མང་པོ་གང་དག་ཡིན་པ་དེ་ཤེས་པར་བྱའོ། །མཁྲིས་པས་འདྲེས་རྟགས་ཚ་བ་དང་། །སྐོམ་གཟེར་མགོ་འཁོར་མུན་འཐིབས་བྱེད། །
ཚ་དྲོ་སྐྱུར་དང་ལན་ཚྭ་བྲོ། །ཚྭ་ཞིང་གྲང་བ་འདོད་པ་ཡིན། །ཞེས་བྱ་བ་ལ། རླུང་མཁྲིས་པ་དང་འདྲེས་ཤིང་དེ་དང་ལྡན་པའི་རྟགས་ནི་ལུས་ཚ་བ་དང་། སྐོམ་པ་ལ་སོགས་པའི་ཚུལ་ལས་ཤེས་པར་བྱའོ། །བསིལ་ཞིང་ཁོང་ལྕི་གཟེར་བ་དང་། །ཚ་བ་སོགས་ཟོས་སྨྱུང་བ་དང་། །རྩོལ་དང་རྩུབ་པས་ལྷག་པར་བདེ། །དྲོད་འདོད་བད་
ཀན་ལྡན་པ་ཡིན། །ཞེས་བྱ་བ་ལ། བད་ཀན་དང་འདྲེས་པའི་རླུང་གི་མཚན་ཉིད་ནི་བསིལ་བ་ལ་སོགས་པ་དང་ལྡན་ཞིང་། རྟགས་ནི་ཚ་བ་དང་བསྐ་བ་དང་ཁ་བ་ཟོས་པ་དང་། སྨྱུང་བ་ལ་སོགས་པས་ལྷག་པར་འགྱུར་བ་ཡིན་ནོ། །ཁྲག་བཅས་ཚ་ཞིང་ན་དང་བཅས། །པགས་པའི་ཤ་ནང་ཤིན་ཏུ་ཟུག །སྐྲང་པ་མདོག་
དམར་འགྱུར་བ་དང་། །ཐིག་ལེ་དམར་པོ་འབྱུང་བ་ཡིན། །ཞེས་བྱ་བ་ལ། རླུང་ཁྲག་དང་འདྲེས་ཏེ་འཁྲུགས་པ་ནི་ཚབ་ལ་སོགས་པ་དང་བཅས་པ་དང་། སྐྲང་པའི་མདོག་དམར་བར་འགྱུར་བ་དང་། ཐིག་ལེ་དམར་པོ་ཏལ་ཏིལ་འབྱུང་བར་འགྱུར་བ་ཡིན་ནོ། །ཤ་དང་འདྲེས་པ་མཁྲང་བ་དང་། །མདོག་འགྱུར་
འབྲུམ་བུ་ཕྲ་མོ་འབྱུང་། །སྤུ་བརྩེ་ལུས་ལ་གྲོག་མ་ནི། །རྒྱུ་བ་སྙམ་དུ་སེམས་པར་འགྱུར། །ཞེས་བྱ་བ་ལ། ཤ་དང་འདྲེས་ནས་འཁྲུགས་པའི་རླུང་ནི་སྐྲང་པ་སྲ་ཞིང་མཁྲང་བ་དང་། མདོག་མི་སྡུག་པར་འགྱུར་བ་དང་། དེ་བཞིན་དུ་འབྲུམ་བུ་ཕྲ་མོ་ཡང་སྲ་ཞིང་མདོག་མི་སྡུག་པར་འགྱུར་བ་དང་། སྤུ་བརྩེ་བ་ལ་
སོགས་པ་དང་ལྡན་པར་འགྱུར་བ་ཡིན་ནོ། །ཚིལ་དང་འདྲེས་པ་གསོ་དཀའ་དང་། །གཡོ་ཞིང་སྣུམ་ལ་འཇམ་གྲང་བར། །ལུས་ལ་གྲང་ཞིང་ཡི་ག་འཆུས། །དེ་ནི་ཕྱུག་པོའི་རླུང་ནད་ཡིན། །ཞེས་བྱ་བ་ལ། ཚིལ་དང་འདྲེས་བའི་རླུང་ནད་ནི་ཕྱུག་པོའི་རླུང་ཡིན་ནོ། །ཞེས་ཚིག་འདིས་ཤེས་པར་བྱ་སྟེ། ཡན་ལག་དེར་
སྐྲང་པ་དང་གཡོ་ཞིང་འཕོ་བ་དང་། སྣུམ་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །རུས་པ་དང་ལྡན་རེག་ན་ཚ། །བཙིར་ན་མངོན་པར་དགའ་བ་དང་། །ཁབ་ཀྱིས་རབ་ཏུ་གཙགས་སྙམ་བྱེད། །ཡན་ལག་ན་ཞིང་ཟུག་པ་ཡིན། ཞེས་བྱ་བ་ལ། རུས་པ་དང་འདྲེས་པའི་རླུང་ནད་ནི་རེག་ན་

ཚ་བ་འུར་འུར་པོར་འདུག་པ་དང་། ལག་པ་གཉིས་ཀྱིས་བཙིར་ཞིང་མན་ནན་མངོན་པར་དགའ་བ་ལ་སོགས་པ་དང་ལྡན་པ་ཡིན་ནོ། །རྐང་དང་ལྡན་ལ་ལུས་སྒུ་ཞིང་། །གླལ་མང་དཀྲིས་པ་སྙམ་དུ་སེམས། །རབ་ཏུ་ན་ལ་ལག་གཉིས་ཀྱིས། །བཙིར་ན་བདེ་བར་འགྱུར་བ་ཡིན། །ཞེས་བྱ་བ་ལ། རྐང་དང་
འདྲེས་ཤིང་ལྡན་པ་ལས་འཁྲུགས་པའི་རླུང་ནི་ལུས་གུད་ཅིང་སྒུར་བ་དང་། གླལ་མང་དུ་འབྱུང་བ་དང་། རས་ལ་སོགས་པས་དམ་དུ་དཀྲིས་པ་སྙམ་དུ་སེམས་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །ཁུ་བ་དང་འདྲེས་དྲག་ཏུ་འབྱུང་། །ཡང་ན་མི་འབྱུང་འབྲས་བུ་མེད། །ཅེས་བྱ་བ་ལ། ཁུ་བ་དང་
འདྲེས་པའི་རླུང་ནི་ཁུ་བའི་ཤུགས་དྲག་ཏུ་འབྱུང་བར་བྱེད་པའམ། ཡང་ན་མི་འབྱུང་བར་འགྱུར་ཞིང་། ཁུ་བའི་འབྲས་བུ་མངལ་དུ་ཆགས་བདེ་མེད་པར་འགྱུར་རོ། །ཟས་འདྲེས་ཁོང་པར་མ་ཞུ་ན། །ཞུ་ནས་ནད་དེ་བདེ་བར་འགྱུར། །ཞེས་བྱ་བ་ལ། རླུང་ཟས་དང་འདྲེས་བར་གྱུར་ན་ཟོས་མ་ཐག་ཁོང་པར་ན་ཞིང་
གཟེར་བར་འགྱུར་ལ། ཟས་དེ་ཞུ་ནས་ནི་མེད་དེ་བདེ་བར་འགྱུར་རོ། །གཅིན་དང་རླུང་འདྲེས་ལྒང་པ་སྦོ། །གཅིན་ནི་འགགས་པར་བྱེད་པར་འགྱུར། །ཞེས་བྱ་བ་ལ། གཅིན་དང་རླུང་འདྲེས་ཏེ་འཁྲུགས་ན་ནི་ལྒང་པ་སྦོ་ཞིང་རླུང་གིས་གང་བ་དང་། གཅིན་འགགས་ཤིང་སྲི་བར་འགྱུར་རོ། །
བཤང་འདྲེས་ཐུར་དུ་འབྱུང་བ་འགགས། །རང་གི་གནས་སུ་ཡོངས་སུ་གཅོད། །སྣུམ་ཟོས་མྱུར་དུ་འཇུ་བར་འགྱུར། །ཟས་ཟོས་ལྟོ་ནི་སྤོས་པ་དང་། །ཟས་ཀྱིས་བཤང་བ་ཕུལ་ནས་ནི། །ན་ཞིང་སྐམ་པོ་རྙོག་ཅན་འབྱུང་། །ཞེས་བྱ་བ་ལ། བཤང་བ་དང་འདྲེས་པར་གྱུར་བའི་རླུང་ནི་ཐུར་དུ་
འབྱུང་བའི་རྒྱུ་བ་འགགས་ཤིང་སྲི་བར་བྱེད་པ་དང་། རང་གི་གནས་སུ་ཞུ་བའི་གནས་ཡོངས་སུ་གཅོད་ཅིང་གྲིས་གཅད་པ་སྙམ་དུ་བྱེད་པ་དང་། དེ་ལ་སྣུམ་ཟོས་ན་མྱུར་དུ་ཇུ་ཞིང་སྨིན་པར་འགྱུར་བ་དང་། ཟས་ཟོས་ན་ལྟོ་སྦོ་ཞིང་རྒྱས་པར་འགྱུར་བ་དང་། དེ་ལ་ཟས་ཀྱིས་བཤང་བ་ཕུལ་ཞིང་བཙིར་ནས་དེའི་
འོག་ཏུ་ན་བར་བྱེད་ཅིང་སྐམ་པ་དྲི་མ་ཅན་འབྱུང་བར་འགྱུར་རོ། །རླུང་ནི་ལུས་ཟུངས་ཀུན་དང་འདྲེས། །བརཱ་དང་ཆུ་སོ་རྒྱབ་ཏུ་ན། །རླུང་ནི་ལོག་སོང་མི་བདེ་ཞིང་། །སྙིང་ནི་རབ་ཏུ་ན་བར་བྱེད། །ཅེས་བྱ་བ་ལ། རླུང་དྭངས་མ་ལ་སོགས་པའི་ལུས་ཟུངས་ཀུན་དང་འདྲེས་པར་གྱུར་ན། བརླ་ལ་

སོགས་པ་ན་བར་འགྱུར་རོ། །དེ་བཞིན་དུ་རླུང་ནི་ལམ་ལོག་པར་སོང་ཞིང་མི་མཐུན་པར་རྒྱུ་བ་དང་། ཤིན་ཏུ་མི་བདེ་བར་བྱེད་པ་ལ་སོགས་པ་རླུང་གིས་བྱེད་པར་འགྱུར་རོ། །སྲོག་དང་མཁྲིས་པ་འདྲེས་གྱུར་འཁྲུགས། །མགོ་འཁོར་བརྒྱལ་དང་ལུས་ཚ་འགྱུར། །ལེགས་པར་མ་ཞུ་སློན་པར་བྱེད། །
ཅེས་བྱ་བ་ལ། སྲོག་ཅེས་བྱ་བའི་རླུང་མཁྲིས་པ་དང་གཅིག་ཏུ་འདྲེས་ཏེ་འཁྲུགས་ཤིང་ལྡང་བར་གྱུར་ན་མགོ་འཁོར་བ་ལ་སོགས་པ་སྐྱེད་པ་དང་། ཟས་ལེགས་པར་མ་ཞུ་བ་སྟེ། ཕྱེད་ཙམ་དུ་ཞུ་བའམ། མ་ཞུ་བ་ཉིད་ཀྱི་གནས་སྐབས་ན་སློན་པར་འགྱུར་རོ། །སྟོད་རྒྱུ་མགོ་འཁོར་སྩོགས་པ་དང་། །ནང་དུ་ཚ་ཞིང་སྟོབས་
ཟད་འགྱུར། །ཞེས་བྱ་བ་ལ། རླུང་སྟོད་དུ་རྒྱུ་བ་དེ་མཁྲིས་པར་གྱུར་ན། མགོ་འཁོར་བ་ལ་སོགས་པ་སྔར་བཤད་པ་དང་། དེ་བཞིན་དུ་ཁོང་པའི་ནང་ཚ་ཞིང་སྟོབས་ཟད་པར་འགྱུར་རོ། །ཁྱབ་བྱེད་རྨོངས་བག་ལུས་ཀུན་ནི། །ཚ་ཞིང་ངལ་ལ་ལུས་སྤྱོད་འགག །ལུས་ཚ་ནད་དང་བཅས་པ་ཡིན། །ཞེས་བྱ་
བ་ལ། ཁྱབ་བྱེད་ཅེས་བྱ་བའི་རླུང་མཁྲིས་པ་དང་འདྲེས་པར་གྱུར་ན། རྨོངས་བག་ལ་སོགས་པ་འབྱུང་བ་དང་། ལུས་ཀྱི་སྤྱོད་པའི་གཡོ་འགུལ་འགགས་ཤིང་མི་འབྱུང་བ་དང་། ལུས་ཚ་བ་དང་བཅས་པ་དང་། ན་བ་དང་བཅས་པ་ཡིན་ནོ། །མཉམ་གནས་དྲོད་ཀྱིས་གནོད་རྔུལ་ཆེ། །མི་དགའ་སྐོམ་དད་
ཚ་བཅས་འགྱུར། །ཞེས་བྱ་བ་ལ། མེ་དང་མཉམ་དུ་གནས་པ་ཞེས་བྱ་བའི་རླུང་མཁྲིས་པ་དང་འདྲེས་པར་གྱུར་ན། དྲོད་ཀྱིས་ལུས་ལ་གནོད་པར་འགྱུར་བ་དང་། རྡུལ་ཤས་ཆེར་འབྱུང་བ་དང་། ཡིད་མི་དགའ་བ་ལ་སོགས་པ་དང་བཅས་པར་འགྱུར་རོ། །ཐུར་དུ་སེལ་བས་དྲི་མ་ནི། །ཁ་དོག་སེར་པོ་འབྱུང་
བ་དང་། །ཟླ་མཚན་ཆེར་འཕེལ་མོ་མཚན་དང་། །ཕོ་མཚན་རྐུབ་ཏུ་ཚ་བར་འགྱུར། །ཞེས་བྱ་བ་ལ། ཐུར་དུ་སེལ་བ་ཞེས་བྱ་བའི་རླུང་མཁྲིས་པ་དང་འདྲེས་པར་གྱུར་ན། དྲི་མ་ཞེས་བྱ་བ་བཤང་བ་དང་གཅི་བ་ཁ་དོག་སེར་ཞིང་ལྗང་བར་འབྱུང་བ་དང་། བུད་མེད་ཀྱི་ཟླ་མཚན་འཕེལ་ཞིང་མོ་མཚན་དང་རྐུབ་
ཚ་བ་དང་། སྐྱེས་པའི་ཕོ་མཚན་དང་། རྐུབ་ཚ་བར་འགྱུར་རོ། །སྲོག་ནི་བད་ཀན་འདྲེས་གྱུར་པ། །ལུས་ལྷོད་སྐོམ་དད་ཡི་ག་འཆུས། །མཆིལ་མང་སྒྲེགས་པ་སྦྲིད་མང་སློན། །དབུགས་འབྱུང་དབུགས་རྔུབ་ཐོགས་པ་ཡིན། །ཞེས་བྱ་བ་ལ། སྲོག་ཅེས་བྱ་བའི་རླུང་བད་ཀན་དང་འདྲེས་པར་གྱུར་ན།

ལུས་ལྷོད་པ་ལ་སོགས་པ་འབྱུང་བར་འགྱུར་རོ། །སྟོད་རྒྱུ་ལུས་ནི་ལྕི་བ་དང་། །ཚིག་ཐོགས་སྐད་འགགས་ཡི་ག་འཆུས། །སྟོབས་དང་ཁ་དོག་ཉམས་པར་བྱེད། །ཅེས་བྱ་བ་ལ། སྟོད་དུ་རྒྱུ་བ་ཞེས་བྱ་བའི་རླུང་བད་ཀན་དང་འདྲེས་པར་གྱུར་ན། ལུས་ལྕི་བ་ནས་ཁ་དོག་ཉམས་པའི་བར་དུ་བྱེད་པར་འགྱུར་རོ། །
ཁྱབ་བྱེད་རུས་ཚིགས་རེངས་པ་དང་། །ཡན་ལག་ཐམས་ཅད་ལྕི་བ་དང་། །འགྲོས་ནི་ཤིན་ཏུ་འཁྱོར་བ་ཡིན། །ཞེས་བྱ་བ་ལ། ཁྱབ་བྱེད་ཅེས་བྱ་བའི་རླུང་བད་ཀན་དང་འདྲེས་པར་གྱུར་ན། རུས་པ་དང་ཚིགས་རེངས་པ་ལ་སོགས་པ་དང་། འགྲོས་ཤིན་ཏུ་འཁྱོར་ཞིང་འཁྲུལ་བར་འགྱུར་རོ། །མཉམ་གནས་
ཡན་ལག་གྲང་བྱེད་ཅིང་། །རྡུལ་མི་འབྱུང་ཞིང་དྲོད་ཆུང་འགྱུར། །ཞེས་བྱ་བ་ལ། མཉམ་དུ་གནས་པ་ཞེས་བྱ་བའི་རླུང་བད་ཀན་དང་འདྲེས་པར་གྱུར་ན། ལུས་ཀྱི་ཡན་ལག་ཤིན་ཏུ་གྲང་བ་ལ་སོགས་པར་འགྱུར་རོ། །ཐུར་སེལ་བཤང་དང་གཅི་བ་ནི། །བད་ཀན་བཅས་པར་འབྱུང་བར་འགྱུར། །ཞེས་བྱ་བ་ལ། ཐུར་
དུ་སེལ་བཞེས་བྱ་བའི་རླུང་ནད་བད་ཀན་དང་འདྲེས་པར་གྱུར་ན། བཤང་བ་དང་གཅི་བ་བད་ཀན་དང་བཅས་པར་ཕྱིར་འབྱུང་བར་འགྱུར་རོ། །དེ་ལྟར་རླུང་ནི་གཞན་འབྲེལ་པ། །ཉི་ཤུ་རྩ་གཉིས་ཡིན་ཞེས་བྱ། །ཞེས་བྱ་བ་ལ། དེ་ལྟར་ན་རྣམ་པ་དེ་དག་གི་ཚུལ་ཇི་ལྟར་བརྟགས་པ་འདིས་རླུང་གི་ནད་གཞན་དང་
འབྲེལ་ཞིང་འདྲེས་པ་ལས་བྱུང་བ་ཉི་ཤུ་རྩ་གཉིས་ཡིན་པར་ཤེས་པར་བྱ་སྟེ། དེ་ཡང་མཁྲིས་པ་དང་བད་ཀན་གཉིས་དང་ཁྲག་ལ་སོགས་པ་ལུས་ཟུངས་དྲུག་དང་ཟས་དང་གཅི་བ་དང་བཤང་བ་དང་ལུས་ཟུངས་ཀུན་དང་འདྲེས་པ་དང་། སྲོག་ལ་སོགས་པ་ལྔ་མཁྲིས་པ་དང་འདྲེས་པ་ལྔ་དང་། བད་
ཀན་དང་འདྲེས་པ་ལྔ་སྟེ། དེ་ལྟར་ཉི་ཤུ་རྩ་གཉིས་ཡིན་ནོ། །དེ་བཞིན་སྲོག་ལ་སོགས་པའི་རླུང་། །ཕན་ཚུན་རིམ་བཞིན་འདྲེས་གྱུར་པ། །ཀུན་ཀྱང་འཁྲུགས་པར་གྱུར་པ་དེ། །ཉི་ཤུར་འགྱུར་བ་ཡིན་ཞེས་བྱ། །ཞེས་བྱ་བ་ལ། སྲོག་ལ་སོགས་པའི་རླུང་ལྔ་པོ་ཕན་ཚུན་གཅིག་ཅིང་
འདྲེས་པར་གྱུར་པ་ནི་རིམ་བཞིན་དུ་རྣམ་པ་ཉི་ཤུ་ཡིན་པར་ཤེས་པར་བྱ་སྟེ། དེ་ལ་སྲོག་ལ་སོགས་པ་བཞི་པོ་དང་། རིམ་བཞིན་དུ་འདྲེས་པར་གྱུར་པ་ལས་རླུང་ལྔ་པོ་དེ་དག་རེ་རེ་ཞིང་བཞི་བཞིར་འགྱུར་ཏེ། དེ་ལྟར་ན་ཉི་ཤུར་འགྱུར་རོ། །དེ་ཡང་སྲོག་ཅེས་བྱ་བའི་རླུང་ནི་

སྟོད་དུ་རྒྱུ་བ་ལ་སོགས་པའི་རླུང་དང་སོ་སོར་འདྲེས་པར་གྱུར་ལ། སྟོད་དུ་རྒྱུ་བ་ནི་སྲོག་ལ་སོགས་པ་བཞི་དང་འདྲེས་པར་འགྱུར་རོ། །དེ་བཞིན་དུ་ཐམས་ཅད་ལ་སྦྱར་རོ། །སྲོག་དང་སྟོད་རྒྱུ་ལྷན་ཅིག་འཁྲུགས། །དབུགས་འབྱུང་དབུགས་རྔུབ་དཀའ་བ་
དང་། །ཆམ་འདེབས་མགོ་འཁོར་ན་བར་བྱེད། །སྙིང་ན་ཁ་ནི་སྐོམ་པར་འགྱུར། །ཞེས་བྱ་བ་ལ། སྲོག་ཅེས་བྱ་བའི་རླུང་སྟོད་དུ་རྒྱུ་བའི་རླུང་དང་ལྷན་ཅིག་འཁྲུགས་པར་གྱུར་ན་དབུགས་དབྱུང་བ་དང་། རྔུབ་པ་དཀའ་ཞིང་འགགས་པར་འགྱུར་བ་དང་། དེ་བཞིན་དུ་
ཆམ་པས་འདེབས་པ་ལ་སོགས་པ་འབྱུང་བར་འགྱུར་རོ། །སྟོད་རྒྱུའི་རླུང་ནི་སྲོག་དང་འདྲེས། །མདོག་དང་གཟི་མདངས་སྟོབས་ཟད་བྱེད། །ཅེས་བྱ་བ་ལ། སྟོད་དུ་རྒྱུ་བའི་རླུང་ནི་སྲོག་ཅེས་བྱ་བའི་རླུང་འཁྲུགས་པར་བྱས་ཤིང་འདྲེས་པར་གྱུར་ན་མདོག་ལ་སོགས་པ་ཟད་པར་བྱེད་དོ། །
ཕྱོགས་འདིས་འགྲེས་པ་ལྷག་མ་རྣམས། །སྨན་པས་ཉེ་བར་སྦྱར་བར་བྱ། །རླུང་གི་གནས་དང་འཕེལ་དང་འབྲི། །ལས་རྣམས་ལེགས་པར་བརྟག་པར་བྱའོ། །ཞེས་བྱ་བ་ལ། ཕྱོགས་ཙམ་བསྟན་པའི་ཚུལ་འདིས་རླུང་ལྔ་པོ་ཐམས་ཅད་ཀྱི་འགྲེས་པའི་ཚུལ་བཤད་པ་ཡིན་ནོ། །དེའི་ཆ་
སྨན་པས་ཉེ་བར་སྦྱར་བར་བྱ་ཞིང་ཤེས་པར་བྱ་སྟེ། སྲོག་ལ་སོགས་པ་རླུང་ལྔ་པོའི་གནས། ནད་ཀྱི་བྱེ་བྲག་ཤེས་པ་ལས་བཤད་པའི་ཚུལ་གྱིས་བརྟགས་ཤིང་ཉེ་བར་དཔྱད་པ་དང་། དེ་བཞིན་དུ་དེའི་ལས་མཆིལ་སྣབས་འདོར་བ་ལ་སོགས་པ་ལས་འཕེལ་བ་དང་འབྲི་བ་བརྟག་པར་བྱའོ། །
དེས་ན་འདི་སྐད་སྟོན་ཏེ། རླུང་འདི་ནི་གནས་འདི་ན་གནས་པ་ལ། དེ་ལ་གནས་ནས་ལས་འདི་དག་བྱེད་པར་བཤད་ལ། དེ་ནི་ད་ལྟར་ཚུལ་འདིས་འཕེལ་བའམ་འབྲི་བར་སྣང་བས་ན། དེའི་ཕྱིར་དེ་ནི་འདིས་བསྒྲིབས་ཤིང་འདི་དང་འདྲེས་པ་ཡིན་ནོ། །ཞེས་རྗེས་སུ་དཔག་པར་བྱའོ། །
སྲོག་ལ་སོགས་པ་ལྔ་པོ་ནི། །འཁྲུགས་པས་ཕན་ཚུན་འདྲེས་པ་ཡིན། །ཞེས་བྱ་བ་ལ། སྲོག་ལ་སོགས་པ་རླུང་ལྔ་པོ་དག་ནི་ཕན་ཚུན་འཁྲུགས་ཤིང་སྒྲིབ་པར་བྱེད་པ་དང་། འཁྲུགས་པར་བྱས་པའི་ཚུལ་གྱིས་ནད་སྐྱེད་པས་ཕན་ཚུན་གཅིག་ལ་གཅིག་

འདྲེས་ཤིང་བསྒྲིབས་ལ་འཁྲུགས་པར་བྱེད་པ་ཡིན་ནོ། །མཁྲིས་པ་ལ་སོགས་བཅུ་གཉིས་དང་། །འདྲེས་པར་གྱུར་ཏེ་འདྲེན་མ་ཡིན། །ཞེས་བྱ་བ་ལ། སྲོག་ཅེས་བྱ་བ་ལ་སོགས་པ་རླུང་ལྔ་པོ་དེ་དག་ནད་བཅུ་གཉིས་ལུས་ཟུངས་དྲུག་དང་། ཁྲག་དང་ཟས་
དང་བཤང་བ་དང་། གཅི་བ་དང་འདྲེས་པ་སྟེ། རྣམ་པ་བཅུ་གཉིས་ཡིན་ནོ། །འདྲེས་པ་དེ་ནི་འདྲེན་མ་ཡིན་ཏེ། སྲོག་ཅེས་བྱ་བའི་རླུང་དེ་ལ་སོགས་པ་དེ་དག་གིས་འདྲེས་པར་གྱུར་ན་འདྲེན་མ་ཡིན་ཏེ། ཕན་ཚུན་འདྲེ་བར་བྱེད་པ་དང་། འདྲེ་བར་བྱ་བའི་ངོ་བོར་གནས་
པ་ཡིན་ནོ། །མཁྲིས་པ་སོགས་ལས་འདྲེས། ཞེས་བྱ་བ་ལ། མཁྲིས་པ་ལ་སོགས་པ་གཉིས་ལ་སོགས་པར་ཕྲད་པའི་འདྲེས་པར་གྱུར་པའོ། །དེ་བཞིན། །འདྲེན་མ་རྣམ་པ་དུ་མ་ཡིན། །རབ་དང་རབ་མཆོག་བརྟགས་པ་ཡིས། །འདྲེས་པ་གྲངས་མེད་འགྱུར་བ་ཡིན། །ཞེས་
བྱ་བ་ལ། དེ་དང་མཚུངས་པས་ན་དེ་བཞིན་ཏེ། སྲོག་ཅེས་བྱ་བའི་རླུང་ལ་སོགས་པ་དང་། མཁྲིས་པ་ལ་སོགས་པ་དེ་དང་འདྲེས་པར་གྱུར་པ་རྣམ་པ་མང་པོས་ནད་ཀྱི་འདྲེན་མ་ནི་རྣམ་པ་དུ་མ་ཡིན་ཏེ། གྲངས་མེད་པར་འགྱུར་བ་དང་། རབ་དང་རབ་མཆོག་གི་དབྱེ་བའི་བརྟགས་པས་གྲངས་མེད་པར་འགྱུར་ཏེ།
སྲོག་ལ་སོགས་པ་དང་མཁྲིས་པ་ལ་སོགས་པ་ཅུང་ཟད་རབ་ཏུ་ལྷག་པ་དང་། རབ་མཆོག་ཏུ་ལྷག་པ་སྟེ། དེ་ལྟར་བརྟགས་པ་རྣམ་པ་དུ་མར་ཕྱེ་བས་འདྲེས་པའི་ཚུལ་ནི་གྲངས་མེད་པར་འགྱུར་ཏེ། རྩིས་ལས་འདས་པ་ཞེས་བྱ་བའི་དོན་ཏོ། །དེ་ནི་རང་གི་མཚན་ཉིད་དང་། །རིམ་གྱིས་བདེ་བར་འགྱུར་བ་ལས། །
རྟོགས་དཀའ་ཡིན་ཏེ་ཡང་ཡང་བརྟག །མ་ཡེངས་པས་ནི་ཤེས་པར་བྱ། །ཞེས་བྱ་བ་ལ། འདྲེས་པའི་ནད་དེ་སྲོག་ཅེས་བྱ་བ་ལ་སོགས་པའི་མཚན་ཉིད་དཔག་ཏུ་མེད་པའི་དབྱེ་བས་ཕྱེ་བ་ནི་ཤིན་ཏུ་རྟོགས་པར་དཀའ་ཞིང་ཤེས་པར་མི་ནུས་པ་ཡིན་དུ་ཟིན་ཀྱང་། རང་གི་མཚན་ཉིད་འབྱུང་བའི་ཚུལ་རང་རང་གི་ནད་ཀྱི་
རྟགས་ཇི་ལྟར་བྱུང་བ་དང་། རིམ་གྱིས་བདེ་བར་འགྱུར་བ་སྟེ། ཟས་དང་སྤྱོད་ལམ་ལ་སོགས་པ་སྣ་ཚོགས་ཀྱི་ཉེ་བར་སྦྱོར་བ་དང་། རང་ཉིད་ཀྱིས་གོམས་པར་གྱུར་པ་ལས་རྟོགས་པར་དཀའ་བ་ཡིན་དུ་ཟིན་ཀྱང་ཡང་དང་ཡང་དུ་བརྟག་པར་བྱ་ཞིང་སྨན་པས་མ་ཡེངས་ཤིང་དེ་ཤེས་པ་ལ་

བརྩོན་པར་སེམས་གཞན་དུ་མ་འཕྱོས་པར་ཤེས་ཤིང་རྟོགས་པར་བྱའོ། །ཁྱད་པར་སྲོག་ནི་འཚོ་བ་ཡིན། །སྟོད་དུ་རྒྱུ་བ་སྟོབས་ཞེས་བརྗོད། །དེ་གཉིས་གནོད་པར་གྱུར་པ་ལས། །ཚེ་དང་སྟོབས་ནི་ཟད་པར་འགྱུར། །ཞེས་བྱ་བ་ལ། ཁྱད་པར་རམ་མཆོག་ཏུ་རླུང་ཐམས་ཅད་ལས་
སྲོག་ཅེས་བྱ་བའི་རླུང་ནི་འཚོ་བ་ཞེས་བྱ་བ་ཡིན་ལ། སྟོད་དུ་རྒྱུ་བའི་རླུང་ནི་སྟོབས་ཞེས་བྱ་བ་ཡིན་པར་བརྗོད་དོ། །གང་གི་ཕྱིར་དེ་ལྟར་ཡིན་པ་དེས་ནི་སྲོག་ཅེས་བྱ་བ་དང་། སྟོད་དུ་རྒྱུ་བ་དེ་གཉིས་ལས་གནོད་པར་གྱུར་ཅིང་འདྲེས་པར་གྱུར་ན་རང་གི་ལས་ཉམས་ཤིང་དེ་བཞིན་དུ་ཚེ་དང་སྟོབས་
ཟད་པར་འགྱུར་རོ། །རླུང་ནི་འདྲེས་པ་མ་ཤེས་པའམ། །ཤེས་ཀྱང་ལོ་གཅིག་ལོན་པ་ནི། །འབད་ཀྱང་གསོ་དཀའ་ཡིན་པའམ། །གསོ་བའི་ཐབས་ནི་མེད་པ་ཡིན། །ཞེས་བྱ་བ་ལ། སྲོག་ཅེས་བྱ་བ་ལ་སོགས་པའི་རླུང་ཕན་ཚུན་འདྲེས་པར་གྱུར་པའམ། རེ་རེ་མཁྲིས་
པ་ལ་སོགས་པ་དང་འདྲེས་པ་ལས་འདྲེན་མ་དུ་མར་གྱུར་པ་ལས་དེ་མ་ཤེས་ཤིང་མ་རྟོགས་པའམ། ཕྱིན་ཅི་མ་ལོག་པར་ཤེས་སུ་ཟིན་ཀྱང་འཁྲུགས་ནས་ལོ་གཅིག་ལོན་ཅིང་འདས་པར་གྱུར་པ་ནི་རབ་ཏུ་འབད་པས་གསོས་ཀྱང་གསོ་བར་དཀའ་བ་ཡིན་ཞིང་ཚེགས་ཆེན་པོས་བཅོས་པར་
མི་ནུས་པ་ཡིན་པའམ། ཡང་ན་རྣམ་པ་ཐམས་ཅད་དུ་གསོ་བའི་ཐབས་མེད་པ་ཡིན་ནོ། །དེ་བས་ན་འདྲེན་མ་དེ་ནི་ངེས་པས་བརྟག་ཅིང་ཤེས་པར་བྱ་དགོས་སོ། །འདྲེས་ནད་ཡལ་བར་བོར་ན་ནི། །ཁོང་འབྲས་མཆེར་པ་སྙིང་ནད་དང་། །སྐྲན་དང་མེ་དྲོད་ཉམས་
ལ་སོགས། །བླ་བརྣན་དེ་ལས་འབྱུང་བར་འགྱུར། །ཞེས་བྱ་བ་ལ། རླུང་གི་འདྲེན་མེད་དག་ཡལ་བར་བོར་ཞིང་གསོ་བར་མ་བྱས་ན། ཁོང་འབྲས་ལ་སོགས་པའི་བླ་བརྣན་འབྱུང་བར་འགྱུར་ཏེ། དེ་བས་ན་ཤིན་ཏུ་འབད་པས་དེ་བསྲུང་ཞིང་གསོ་བ་དང་བཅོས་པ་ཁོ་ནར་
བྱའོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ནད་གཞིའི་གནས་ཀྱི་ལེའུ་བཅུ་དྲུག་པའི་རྣམ་པར་འགྲེལ་པ་སྟེ་གནས་གསུམ་པའི་འགྲེལ་པ་རྫོགས་སོ།། །།

དེ་ནས་རིམས་ནད་གསོ་བ་བཤད་པར་བྱའོ། །ཞེས་བྱ་བ་ལ། ནད་གཞིའི་གནས་ཀྱི་འོག་ཏུ་གསོ་བའི་གནས་བརྩམས་པའི་དགོས་པ་ནི་འདི་ཡིན་ཏེ། གང་གི་ཕྱིར་ནད་ཡོངས་སུ་བརྟགས་ནས་དེའི་རྗེས་ལ་གསོ་བ་བྱ་དགོས་པའི་ཕྱིར་རོ། །དེ་ཡང་དྲང་སྲོང་ཙ་ར་ཀས། དང་པོ་ནད་ནི་ཡོངས་བརྟགས་
ལ། །དེ་རྗེས་སྨན་ནི་བརྟག་བྱ་ཞིང་། །དེ་ནས་ལས་བྱ་སྨན་པ་ཡིས། །ཤེས་པ་སྔོན་འགྲོས་ཡང་དག་སྤྱད། །ཅེས་བཤད་པ་ཡིན་ནོ། །རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་བཤད་དོ། །ཞེས་བྱ་བ་ནི། གཞུང་རྩམ་པར་བྱེད་པ་བདག་ཉིད་སྨན་དཔྱད་ཀྱི་ལུང་གི་
རྗེས་སུ་འཇུག་པ་ཡིན་པར་སྟོན་པ་ཡིན་ནོ། །གང་ཕྱིར་མ་ཞུ་གནས་མ་ཞུ། །རྒྱུན་སྲང་བཀག་སྟེ་མེ་དྲོད་ཉམས། །རིམས་ཀྱིས་ཉེས་པ་སྐྱེད་བྱེད་པས། །སྔོན་ཚུལ་བྱུང་དང་རིམས་སོགས་ལའང་། །དེ་ཕྱིར་སྨྱུང་བ་བྱ་དགོས་ལ། །སྟོབས་ནི་འབད་པས་བསྲུང་བར་བྱ། །ཞེས་བྱ་བ་ལ། གང་གི་
ཕྱིར་མ་ཞུ་བའི་གནས་ལ་གནས་པའི་ནད་རླུང་ལ་སོགས་པ་གང་ཡིན་པ་དེ་མ་ཞུ་བ་དང་བཅས་པར་གནས་པ་ན་མ་ཞུ་བ་སྟེ། དེས་རྒྱུན་སྲང་གི་བུ་ག་བཀག་ཅིང་རྒྱུར་མི་རུང་བར་བྱས་ནས་ཁོང་པའི་མེ་དྲོད་ཉམས་ཤིང་འབྲི་བར་བྱེད་ནས་རིམས་སྐྱེད་ཅིང་འབྱུང་བར་བྱེད་པས་ན། དེའི་ཕྱིར་རིམས་ལ་
ནི་དང་པོ་སྨྱུང་བ་བྱ་དགོས་སོ། །རིམས་ཕྱིས་འབྱུང་བར་འགྱུར་བའི་སྔོན་གྱི་ཚུལ་གསལ་བར་འབྱུང་ཞིང་སྣང་བར་གྱུར་པའམ། རིམས་ལ་སོགས་པ་གསལ་བ་ཉིད་དུ་སྣང་ན་ཡང་སྨྱུང་བ་བྱ་ཞིང་། ནད་པའི་ཉམས་སྟོབས་འབད་པས་བསྲུང་ཞིང་བསྐྱང་བར་བྱའོ། །སྟོབས་ནི་ནད་མེད་པ་
ཡི་གནས། །བྱ་བའི་རིམས་ནི་ནད་མེད་དོན། །ཞེས་བྱ་བ་ལ། ནད་མེད་པ་ནི་བདེ་བར་གནས་པ་སྟེ། དེ་ནི་ལུས་ཀྱི་ཉམས་སྟོབས་ལ་གནས་ཤིང་བརྟེན་པ་ལས་འབྱུང་བར་འགྱུར་བ་ཡིན་ནོ། །གང་འདི་ནད་བསལ་བར་བྱ་བའི་ཕྱིར་གསོ་བའི་དཔྱད་དུ་བྱེད་པའི་མཚན་ཉིད་ཅན་དེ་ཡང་ནད་
མེད་པའི་དོན་ཡིན་པ་དེའི་ཕྱིར་བྱེད་པ་ཡིན་ནོ། །སྨྱུང་བྱས་ནད་ནི་ཉམས་སྨད་ཅིང་། །མེ་དྲོད་སྐྱེད་དང་ཁོང་ཡང་འགྱུར། །བདེ་ཞིང་བཀྲེས་སྐོམ་ཡི་ག་འབྱེད། །ཟས་འཇུ་སྟོབས་དང་མདངས་སྐྱེད་འགྱུར། །ཞེས་བྱ་བ་ལ། དང་པོར་སྨྱུང་བ་བྱས་པས་ནད་ཉམས་སྨད་པར་བྱས་

པ་དང་། དེ་བཞིན་དུ་ཕོ་བའི་མེ་དྲོད་སྐྱེད་ཅིང་འབྱུང་བ་དང་ནད་ཉམས་སྨད་པས་ཡང་ཞིང་རིམས་བྲི་བར་གྱུར་ན་བདེ་ཞིང་ཐ་མལ་པ་ཉིད་དུ་གནས་པ་དང་། བཀྲེས་ཤིང་ཟས་འདོད་པ་དང་། སྐོམ་སྟེ་བཏུང་བ་འདོད་པ་དང་ཡི་ག་བྱེ་སྟེ་ཟས་འདོད་པ་སྐྱེ་བ་དང་།
ཟས་འཇུ་ཞིང་སྨིན་པར་འགྱུར་བ་དང་། སྟོབས་དེ་ནུས་པ་སྐྱེ་བར་འགྱུར་བ་དང་། མདངས་ཞེས་བྱ་བ་ལུས་ཟུངས་ཐམས་ཅད་བརྟས་པར་བྱེད་པ་སྐྱེ་བར་འགྱུར་རོ། །དེ་ལ་ཕལ་ཆེར་བད་ཀན་ནད། །གློངས་དང་གཡོས་པར་གྱུར་པ་དང་། །དང་གར་འཁྱིལ་བཅས་མཆིལ་མ་མང་།
ཟས་ལ་མི་དགའ་ལུད་པ་གསུད། །ཟོས་མ་ཐག་ཏུ་རིམས་འདེབས་པ། །ཁྱད་པར་དུ་ནི་མ་ཞུར་འབྱུང་། །སྐྱུག་སྨན་བཏང་འོས་སྐྱུག་སྨན་བསྔགས། །ཞེས་བྱ་བ་ལ། རིམས་དེ་ལ་དྲི་མ་སྟེ་ཕལ་ཆེར་བད་ཀན་ལ་སོགས་པ་ནད་གཞན་ལ་ལྟོས་ན་ཤས་ཆེ་ཞིང་སྟོབས་དྲག་པ་དང་།
གློངས་ཤིང་བསྐྱོད་པ་དང་། གཡོས་པ་སྟེ་ཕལ་ཆེར་ཕྱིར་འབྱུང་དུ་ཉེ་བར་གྱུར་པ་དང་། དེ་བཞིན་དུ་ནད་གང་དང་གར་འཁྱིལ་ཞིང་མེར་མེར་པོར་གྱུར་པ་ལ་སོགས་པའི་མཚན་ཉིད་དང་ལྡན་པའི་བད་ཀན་དེ་ལ་སྐྱུག་སྨན་བཏང་བ་བསྔགས་པ་ཡིན་ལ། དེ་ཡང་གང་ཞིག་ལ་གཏང་ཞེ་ན། སྐྱུག་སྨན་
བཏང་བར་འོས་པ་སྟེ། སྔར་སྐྱུག་སྨན་བཏང་བའི་ཆོ་གའི་སྐབས་སུ་བཤད་པའི་སྐྱུག་སྨན་བཏང་བར་འོས་པ་ལ་གཏང་བར་བྱའོ། །དེ་ལས་གཞན་དུ་བྱས་ན་ནི། །དབུགས་མི་བདེ་དང་ཚད་འཁྲུ་སློན། །སྙིང་ནད་མི་བཟད་རིམས་ཀྱིས་འདེབས། །ཞེས་བྱ་བ་ལ། སྐྱུག་སྨན་བཏང་བ་
དང་། དེ་ལས་གཞན་པ་སྟེ་ནད་མ་གློངས་པ་ལ་སོགས་པའི་ཚུལ་བཏང་བར་གྱུར་ན་དབུགས་མི་བདེ་བ་ལ་སོགས་པའི་ནད་ཀྱིས་འདེབས་པར་འགྱུར་རོ། །པོ་སོན་པི་པི་ལིང་བཅས་པ། །དུག་མོ་ཡུངས་སམ་ཤིང་མངར་ནི། །ཆུ་དྲོན་སྦྲང་རྩིར་བཅས་པའམ། །ཡང་ན་རྒྱ་མཚར་ལྡན་པ་
བླུད། །ཀར་ཀ་ཏ་འམ་པ་ཏོ་ལ། །ནིམ་པ་སྤ་ཡི་ལོ་མའི་ཆུའམ། །འབྲས་ཡོས་ཀྱི་ནི་སྐྱོ་མའམ། །བུ་རམ་ཤིང་ཁུའང་ཆང་སྦྱར་བཏུང་། །ཞེས་བྱ་བ་ལ། དེ་ལ་པོ་སོན་ཆ་ནི་མ་དན་ཕ་ལ་སྟེ། དེ་པི་པི་ལིང་ལ་སོགས་པ་དང་བཅས་ཤིང་སྦྱར་བ་དང་། ཡང་ན་དུག་མོ་ཉུང་ཏེ། ཨིནྡྲ་

ཡ་བ་དང་བཅས་པ་དང་། ཡང་ན་ཤིང་མངར་ཞེས་པ་མ་དུ་ཡཥྚི་དང་བཅས་པ་དང་། ཆུ་དྲོན་ཞེས་པ་ཆུ་དྲོ་འཇམ་ཙམ་དང་སྦྲང་རྩི་དང་སྦྱར་བ་བླུད་པའམ། ཡང་ན་རྒྱམ་ཚ་དང་བཅས་པའི་ཆུ་དྲོན་པོ་དག་བླུད་པར་བྱའོ། །ཡང་ན་ཀར་ཀ་ཏ་ལ་སོགས་པ་གང་ཡང་རུང་བའི་ལོ་མ་བསྐོལ་
བའི་ཆུ་དང་སྦྱར་བ་བཏུང་བར་བྱའོ། །ཡང་ན་འབྲས་ཡོས་ལས་བྱས་པའི་སྐྱོ་མའམ། བུ་རམ་ཤིང་གི་ཁུ་བའམ། ཆང་སྣ་ཚོགས་པ་ཇི་ལྟར་འོས་པ་དང་པོ་སོན་ཆ་བླུད་པར་བྱའོ། །ཉམས་སྟོབས་དུས་ཀྱི་དབྱེ་ཤེས་པས། །ཆོ་གའི་གནས་ལས་བཤད་པ་ཡི། །སྐྱུག་
སྨན་དག་ནི་རབ་ཏུ་གཏང་། །ཞེས་བྱ་བ་ལ། ཉམས་སྟོབས་དང་དུས་ཀྱི་དབྱེ་བ་ཤེས་པའི་སྨན་པ་གང་ཡིན་པ་དེས་ཆོ་གའི་གནས་ལས་བཤད་པ་སྟེ་སྐྱུག་སྨན་དག་གཏང་ཞིང་སྦྱིན་པར་བྱའོ། །སྐྱུག་སྨན་གྱི་ནི་སྦྱོར་བ་དག །བྱས་པར་གྱུར་ཏམ་མ་བྱས་ཀྱང་། །རིམས་ནད་ཅན་ལ་རྣམ་
སྦྱང་བྱ། །ནད་ནི་བསྐྱོད་པར་གྱུར་པ་དག །སྨིན་དང་ཞི་བར་བྱ་ཕྱིར་བྱ། །ཞེས་བྱ་བ་ལ། བཤད་མ་ཐག་པའི་ཆོ་གས་སྐྱུག་སྨན་གྱི་སྦྱོར་བ་བྱས་ཀྱང་རུང་མ་བྱས་ཀྱང་རུང་རིམས་ནད་ཅན་གྱི་སྐྱེས་བུ་ལ་སྨྱུང་བ་ལ་སོགས་པའི་རྣམ་པར་སྦྱང་བའི་ཆོ་ག་བྱ་སྟེ། ཅིའི་ཕྱིར་ཞེ་ན། རིམས་སྐྱེད་པར་བྱེད་པའི་
ནད་གློངས་ཤིང་བསྐྱོད་པར་བྱ་བ་དག་སྨིན་ཅིང་མ་ཞུ་བ་མེད་པར་བྱ་བའི་ཕྱིར་དང་ཞི་ཞིང་བསལ་བར་བྱ་བའི་ཕྱིར་རྣམ་པར་སྦྱང་བའི་ཆོ་ག་བྱའོ། །ཐལ་བས་གཡོགས་པའི་མེ་བཞིན་དུ། །མ་ཞུས་ཁེབས་ཟས་འཇུ་མི་འགྱུར། །དེ་བས་ཉེས་པ་སྨིན་བྱའི་ཕྱིར། །རིམས་དང་ལྡན་ལ་
སྨྱུང་བ་བྱ། །ཞེས་བྱ་བ་ལ། ཕོ་བའི་མེ་དྲོད་རླུང་ལ་སོགས་པའི་ནད་ཀྱི་སྐྱོན་གཞན་གྱིས་གཡོགས་ཤིང་ཁེབས་པར་གྱུར་ན་ཟས་འཇུ་བར་བྱེད་མི་ནུས་པ་སྟེ། དཔེར་ན་ཕྱི་རོལ་གྱི་མེ་ཐལ་བས་གཡོགས་པར་གྱུར་ན་དངོས་པོ་འཚེད་ཅིང་སྨིན་པར་བྱེད་མི་ནུས་སོ། །དེ་བཞིན་དུ་ནང་གི་མེ་ཡང་མ་
ཞུ་བས་ཁེབས་ཤིང་གཡོགས་ན་ཟས་འཇུ་བར་མི་ནུས་སོ། །དེ་བས་ན་རིམས་དང་ལྡན་པའི་མི་ལ་ནི་དང་པོ་ཁོ་ནར་སྨྱུང་བ་བྱ་བ་གཅེས་ཏེ། དེ་ཡང་ནད་ཀྱི་ཉེས་པ་སྨིན་པར་གྱུར་གྱི་བར་དུ་བྱ་ཞིང་ནད་མ་ཞུ་བ་མེད་པར་གྱུར་གྱི་བར་དུ་དེ་ལ་སྨྱུང་བ་བྱའོ། །རླུང་དང་བད་ཀན་རིམས་སྐོམ་དང་། །

ཆུ་ཚན་ཉུང་ཤས་ཉུང་ཤས་བཏུང་། །དེས་ནི་བད་ཀན་ཞུ་གྱུར་ནས། །སྐོམ་དང་མྱུར་དུ་སེལ་བར་བྱེད། །མེ་དྲོད་སྐྱེད་ཅིང་བུ་གའི་རྒྱུན། །འཇམ་པར་བྱས་ནས་སྦྱོང་བར་བྱེད། །ཞེན་པའི་རླུང་མཁྲིས་རྔུལ་དང་ནི། །བཤང་གཅི་བདེ་བར་འབྱིན་པར་བྱེད། །གཉིད་རྨོངས་
ཡི་ག་འཆུས་པ་སེལ། །སྲོག་ནི་འཛིན་པར་བྱེད་པ་ཡིན། །ཞེས་བྱ་བ་ལ། རླུང་དང་བད་ཀན་གྱི་རིམས་ལ་ནད་པ་སྐོམ་དད་སྐྱེས་པར་གྱུར་ན་ཆུ་བསྐོལ་བཏུང་བར་བྱ་སྟེ། དེ་ཡང་ཆུ་ཚན་ཉུང་ཤས་ཅུང་ཞིག་བཏུང་བར་བྱའོ། །དེས་ཅི་ཞིག་བྱེད་ཅེ་ན། ཆུ་ཚན་དེས་རྩ་སྦུབས་ཀྱི་རྒྱུན་
སྲང་འགག་པར་བྱེད་པའི་བད་ཀན་འཐས་པའི་ཚུལ་དུ་གནས་པ་དེས་ཞུ་ཞིང་སླ་བའི་ཚུལ་དུ་བྱས་ནས་སྐོམ་དད་གང་ཡིན་པ་དེ་མྱུར་དུ་སེལ་ཞིང་ལྡོག་པར་བྱེད་དོ། །དེ་བཞིན་དུ་ཕོ་བའི་མེ་དྲོད་ཀྱང་བསྐྱེད་ཅིང་སྦར་ནས་ནང་གི་བུ་གའི་རྒྱུན་གང་དག་ཡིན་པ་དེ་འཇམ་ཞིང་མཉེན་པར་
བྱས་ནས་བུ་ག་དེ་དག་ཉིད་སྦྱོང་ཞིང་དག་པར་བྱེད་པ་དང་། དེ་བཞིན་དུ་ཞེན་ཅིང་བུ་གའི་སྒོ་རྣམས་སུ་ཆགས་པའི་རླུང་ལ་སོགས་པ་བདེ་བར་འབྱིན་པར་བྱེད་ཅིང་ལུགས་དང་མཐུན་པར་འབྱུང་བར་བྱེད་པ་དང་། དེ་བཞིན་དུ་གཉིད་དང་རྨོངས་བག་ལ་སོགས་པ་སེལ་བར་བྱེད་པ་དང་།
སྲོག་འཛིན་ཅིང་གནས་པ་ཡིན་ལ་དེ་ཚིམ་པར་བྱེད་པའི་རང་བཞིན་ཅན་ཡིན་པའི་ཕྱིར་རོ། །ཆུ་གྲང་དེ་ལས་བཟློག་པ་སྟེ། །ནད་ཀྱི་ཚོགས་ནི་འཕེལ་བྱེད་ཡིན། །ཞེས་བྱ་བ་ལ། ཆུ་གྲང་ནི་ཆུ་ཚན་གྱི་ཡོན་ཏན་དེ་ལས་གོ་བཟློག་པའི་མཚན་ཉིད་ཅན་ཡིན་ཞིང་། ནད་ཀྱི་ཚོགས་གང་དག་
ཡོད་པ་དེ་འཕེལ་ཞིང་རྒྱས་པར་བྱེད་པ་ཡིན་ནོ། །ཆུ་ཚན་ཡོན་ཏན་དེ་འདྲ་ཡང་། །གཅིག་ཏུ་མཁྲིས་པས་ལྡན་རིམས་དང་། །མཁྲིས་ཤས་ཆེ་དང་ཕྱོགས་གཅིག་ཚ། །ཀུན་ཚ་རྨོངས་བག་ཚད་པར་འཁྲུ། །ཆང་དུབ་ལས་བྱུང་སོ་ག་དང་། །གཅོང་སྐེམ་ཁྲག་མཁྲིས་ཅན་མི་བླུད། །ཅེས་
བྱ་བ་ལ། ཆུ་ཚན་བཤད་མ་ཐག་པའི་ཡོན་ཏན་བད་ཀན་ཞུ་བར་གྱུར་པ་དང་། མེ་དྲོད་སྐྱེད་པ་ལ་སོགས་པའི་ཡོན་ཏན་དེ་ལྟ་བུ་དང་ལྡན་པ་ཡིན་དུ་ཟིན་ཀྱང་གཅིག་ཏུ་མཁྲིས་པ་ལས་གྱུར་པའི་རིམས་དང་ལྡན་པའི་མི་དང་ནད་གཞན་དག་མཁྲིས་པ་ཤས་ཆེ་ཞིང་རྒྱས་པ་དང་ལྡན་པ་དང་།

ཕྱོགས་གཅིག་ཚ་བ་ལ་སོགས་པའི་ནད་དེ། དེ་ལ་ཕྱོགས་གཅིག་ཚ་བ་ནི་མིག་ལ་སོགས་པའི་དབང་པོ་ཚ་བ་དང་། ཀུན་ཚབ་སྟེ་ལུས་ཐམས་ཅད་ཚ་བ་དང་། དེ་བཞིན་དུ་ཆང་དང་དུག་གཉིས་ལས་བྱུང་བའི་རིམས་ལ་ཆུ་ཚན་དེ་བླུད་པར་མི་བྱའོ། །དེ་བཞིན་དུ་སོ་གའི་དུས་སུའང་རང་བཞིན་
གྱི་ཆུ་ཚན་བཏུང་དུ་མི་རུང་ངོ་། །དེ་བཞིན་དུ་གཅོང་ཆེན་པོས་ཐེབས་ཏེ་སྐེམས་པར་གྱུར་པའི་སྐྱེས་བུ་དང་། ཁྲག་མཁྲིས་ལས་གྱུར་པའི་ནད་ཡོད་པ་སྟེ། དེ་དག་ལ་སྐོམ་དད་ཡོད་དུ་ཟིན་ཀྱང་ཆུ་ཚན་བླུད་དུ་མི་རུང་ངོ་། །དེ་དག་ལ་ཅི་ཞིག་སྦྱིན་ཞེ་ན། དེའི་ཕྱིར་སྨྲས་པ་ནི། དེ་ལ་གླ་སྒང་
ཙནྡན་དང་། །བཅའ་སྒ་པར་པ་ཏ་དང་ནི། །པུ་ཤེལ་ཙེ་དང་བ་ལེ་ཀ། །བསྐོལ་ཆུ་བསྒྲངས་བླུད་རིམས་སྐོམ་སེལ། །ཞེས་བྱ་བ་ལ། གཅིག་ཏུ་མཁྲིས་པའི་ནད་ཡོད་པ་ལ་སོགས་པ་དེ་དག་ལ་ནི་གླ་སྒང་ལ་སོགས་པ་དང་། བསྐོལ་བའི་ཆུ་བསྒྲངས་པ་ཕན་ཏེ། དེ་ནི་རིམས་དང་སྐོམ་
དད་སེལ་བ་ཡིན་ནོ། །འདིར་ཆུ་དང་སྨན་དག་གི་ཚད་ནི་གཞུང་གཞན་དག་ལས་བསྟན་ཏེ། གང་ཞིག་ཆུར་བསྐོལ་བསྒྲངས་གྱུར་པ། །གླ་སྒང་ལ་སོགས་པ་ཏོ་ལ། །ཡན་ལག་དྲུག་པ་ལ་སོགས་སྦྱར། །དེ་ལས་ཞོ་རེ་བཅུ་གནས་ནི། །ཆུ་ནི་བྲེ་གང་ནང་དུ་བསྐོལ། །དེ་ནས་བཞི་ཆ་
ལུས་བྱས་ཏེ། །སྐོམ་དད་ལ་སོགས་ཞི་ཕྱིར་བཏུང་། ཞེས་བཤད་པ་དང་། དེ་བཞིན་དུ་གཞན་དག་ལས་ཀྱང་། སྨན་མང་བསྐོལ་བ་སྐ་བ་ཡིན། །སྨན་ཉུང་ཆུ་བསྐོལ་དྭངས་མ་ཡིན། །ཞེས་སྨོས་པ་ཡིན་ནོ། །མཁྲིས་པ་མེད་པར་ཚ་མི་འབྱུང་། །ཚ་བ་མེད་པར་རིམས་ཡོད་མིན། །
དེ་བས་མཁྲིས་པ་ལ་གནོད་སྤང་། །མཁྲིས་ཤས་ཆེ་བས་ལྷག་པར་སྤང་། །ཞེས་བྱ་བ་ལ། རིམས་ནད་ཐམས་ཅད་ལ་ནི་མཁྲིས་པ་མེད་ཅིང་དེ་མ་གཏོགས་པར་ཚ་བ་མི་འབྱུང་སྟེ། ཚ་བ་ནི་མཁྲིས་པའི་རང་བཞིན་ལས་བྱུང་བ་ཡིན་པའི་ཕྱིར་རིམས་ལ་ཚ་བ་གང་དག་ཡོད་པ་དེ་
ནི་མཁྲིས་པ་ལས་སྐྱེས་པ་ཡིན་ནོ། །ཚ་བ་དེ་མེད་པར་ཡང་རིམས་ཡོད་པ་མ་ཡིན་ཏེ། གང་གི་ཕྱིར་རིམས་ཀྱི་ངོ་བོ་ཉིད་ཀྱི་མཚན་ཉིད་ནི་དང་པོ་ཚ་བ་འབྱུང་བ་ཡིན་པའི་ཕྱིར་རོ། །དེ་བས་ན་མཁྲིས་པ་ལ་གནོད་པའི་ཁ་ཟས་དང་སྤྱོད་ལམ་དང་སྨན་མཁྲིས་པ་སྐྱེད་པར་བྱེད་པའི་རིམས་

ཐམས་ཅད་ལ་ཡང་ཕལ་ཆེར་སྤང་བར་བྱ་བ་ཉིད་ཡིན་ནོ། །དེ་ལས་ཀྱང་མཁྲིས་པ་ཤས་ཆེ་ཞིང་མཁྲིས་པ་རྒྱས་པ་ལས་གྱུར་པའི་རིམས་ལ་ནི་མཁྲིས་པ་སྐྱེད་པར་བྱེད་པ་དེ་ལྷག་པར་ཡང་སྤང་བར་བྱའོ། །དེ་ནས་ལྷག་པར་ཞེས་སྨོས་པའི་སྒྲ་འདིས་ནི་རླུང་དང་མཁྲིས་པ་
ལས་གྱུར་པའི་རིམས་ལ་མཁྲིས་པ་སྐྱེད་པར་བྱེད་པའི་སྨན་ལ་སོགས་པ་ཅུང་ཟད་ཅིག་སྤང་བར་མི་བྱ་བ་ཡང་ཡོད་དོ། །ཞེས་སྟོན་པ་ཡིན་ནོ། །ཁྲུས་དང་བསྐུ་དང་བྱུག་པ་དང་། །སྨྱུང་བ་ལྷག་མ་སྤང་བར་བྱ། །ཞེས་བྱ་བ་ལ། རིམས་ཐམས་ཅད་ལ་ཁྲུས་བྱ་བ་ལ་སོགས་པ་སྤང་
བར་བྱའོ། །དེ་བཞིན་དུ་སྨྱུང་བ་ལྷག་མ་རྣམས་ཀྱང་སྤང་བར་བྱ་སྟེ། གནས་སྐབས་ཀྱི་ཁྱད་པར་གྱི་དབང་དུ་བཤད་པའི་སྨྱུང་བ་མ་གཏོགས་པར་སྨྱུང་བ་གཞན་དག་སྤང་བར་བྱའོ། །དེ་ཡང་གནས་སྐབས་སུ་དགོས་པ་ནི། སྨྱུང་བ་ནི་རིམས་ལ་སྐྱུག་སྨན་གཏང་བ་དང་། ཟས་བྲི་ཞིང་གཅད་
པའི་སྨྱུང་བ་ཡིན་ཏེ། དེ་མ་གཏོགས་བཀྲུ་སྨན་གཏང་པ་ལ་སོགས་པ་གང་ཡིན་པ་དེ་དག་རིམས་སར་པ་ལ་སྤང་བར་བྱའོ། །མ་ཞུ་གཟེར་འཇོམས་སྨན་ལྟ་བུ། །མ་ཞུ་རིམས་ནི་མི་བཟད་ལ། །སྨན་བཏུང་མི་བྱ་དེ་ཡིས་ནི། །ལྷག་པར་མ་ཞུ་འཕེལ་བར་འགྱུར། །ལྟོ་བ་མ་ཞུས་
ཁྱབ་པ་ལ། །འོ་མ་སྦྲུལ་ལ་བླུད་དང་མཚུངས། །ཞེས་བྱ་བ་ལ། མ་ཞུ་བ་དང་བཅས་པའི་རིམས་མི་བཟད་ཅིང་བརྣག་པར་དཀའ་བའི་ནད་དང་ལྡན་པ་ལ་སྨན་བསྐོལ་བ་དང་། བསྒྲངས་པ་དང་། སྐྱོ་མ་ལ་སོགས་པ་བཏུང་བར་མི་བྱ་སྟེ། དཔེར་ན་མ་ཞུ་ཞིང་ཟས་ཀྱི་ལྷག་མ་ལུས་པ།
མི་བཟད་པར་ན་བ་ལ་གསུད་པ་ལ་སོགས་པའི་ནད་ལ་གཟེར་འཇོམས་པའི་སྨན་རྩི་བོ་ཆེ་གསུམ་པ་ལ་སོགས་པ་བླུད་པར་མི་བྱ་སྟེ། སྨན་འཇུ་མི་ནུས་པས་སླར་ལ་གནོད་པར་འགྱུར་བའི་སྐྱོན་ཡོད་པའི་ཕྱིར་རོ། །དེ་ཡང་མདོ་གནས་ལས། །མ་ཞུ་མི་བཟད་པས་ཉེན་ཀྱང་། །གཟེར་
འཇོམས་སྨན་ནི་བཏུང་མི་བྱ། །བེའུ་སྣབས་མ་ཞུ་མེ་དྲོད་ཉམས། །ནད་ཀྱི་སྨན་ནི་བཏུང་མི་ནུས། །འདི་ཡིས་ནད་པ་འཕྲལ་དུ་ནི། །ཐུ་ཞིང་འཆི་བ་དག་ཏུ་འགྱུར། །ཞེས་སྨོས་པ་དེ་དྲན་པའི་ཕྱིར་འདི་སྐད་སྨོས་པ་ཡིན་ནོ། །དེ་བས་ན་གླ་སྒང་དང་པར་པ་ཏ་ལ་སོགས་པའི་སྨན་

བསྐོལ་བ་ལ་སོགས་པའི་སྦྱོར་བ་བྱས་པ་འཐུངས་པ་དེས་ན་ལྷག་པར་ཡང་མ་ཞུ་བ་མང་དུ་འཕེལ་ཞིང་སྐྱེད་པར་བྱེད་པ་ཡིན་ནོ། །གང་གིས་སྐྱེད་ཅེ་ན། མི་གང་ལྟོ་བར་མ་ཞུ་བས་ཁྱབ་ཅིང་ཟིལ་གྱིས་མནན་པར་གྱུར་པའི་རིམས་ནད་ཅན་དེ་ལ་བླུད་ན་འཕེལ་བར་འགྱུར་རོ། །དེ་བཞིན་དུ་
མ་ཞུ་བས་ཁྱབ་པའི་ལྟོ་བར་སྨན་བླུད་པ་དེ་ནི་མ་ཞུ་བ་དེ་ཉིད་སླར་འཕེལ་བར་འགྱུར་རོ། །རླུང་དང་བད་ཀན་བདག་ཉིད་དེར། །ལྐོག་ནད་ཆམ་པ་དབུགས་མི་བདེ། །བྱིན་པ་ཚིགས་རུས་གཟེར་གྱུར་ལ། །རྔུལ་འབྱུང་བ་ནི་རབ་བསྔགས་ཏེ། །རྔུལ་དང་བཤང་གཅི་ཕྱེན་བདེར་འབྱུང་། །
མེ་དྲོད་སྐྱེད་ཅིང་ཟས་འཇུ་བྱེད། །ཅེས་བྱ་བ་ལ། རླུང་དང་བད་ཀན་གྱི་བདག་ཉིད་ཅན་གྱི་རིམས་བྱུང་བར་གྱུར་པ་ལ། ལྐོག་མའི་ནད་ལ་སོགས་པ་ཇི་སྐད་སྨོས་པའི་ནད་བྱུང་བར་གྱུར་ན། རྔུལ་འབྱུང་བ་ཞེས་བྱ་བའི་གསོ་བར་བྱ་བ་རབ་ཏུ་བསྔགས་པ་ཡིན་ཏེ། རྔུལ་འབྱུང་བའི་ཆོ་ག་དེ་བྱས་
ན་ཁོང་དུ་ཞེན་པའི་རྔུལ་ལ་སོགས་པ་བདེ་བར་འབྱུང་བར་འགྱུར་རོ། །དེ་བཞིན་དུ་མེ་དྲོད་སྐྱེད་ཅིང་ཕོ་བས་ཟས་བདེ་བླག་ཏུ་འཇུ་བར་བྱེད་པའི་ནུས་པ་སྐྱེད་པར་བྱེད་དོ། །སྣུམ་འཐུངས་ཆོ་གར་བཤད་པ་ནི། །རྣམ་པ་ཀུན་ཏུ་སྤྱད་པར་བྱ། །ཞེས་བྱ་བ་ལ། སྣུམ་འཐུངས་པའི་ཆོ་ག་སྣུམ་
འཐུངས་པའི་ལེའུའི་སྐབས་སུ་བཤད་པ་དག །ཆུ་དྲོན་དག་གིས་ཉེར་སྤྱོད་བྱ། །ཞེས་བྱ་བ་ལ་སོགས་པ་དེ་ཐམས་ཅད་བསྟེན་ཅིང་སྤྱད་པར་བྱའོ། །སྨྱུང་དང་དུགས་བྱ་དུས་དང་ནི། །ནས་ཐུག་ཏིག་ཏའི་ཁུ་བ་རྣམས། །དྲི་མ་རྣམས་ནི་སྨིན་བྱེད་པ། །རིམ་མམ་གནས་སྐབས་ཇི་བཞིན་སྦྱིན། །ཞེས་
བྱ་བ་ལ། རླུང་ལ་སོགས་པའི་དྲི་མ་མ་སྨིན་པ་རྣམས་ནི་སྨྱུང་བ་ལ་སོགས་པ་བསྟེན་པས་སྨིན་པར་འགྱུར་ཏེ། དེ་ཡང་ཇི་སྐད་དུ་བཤད་པའི་རིམ་གྱིས་སམ་གནས་སྐབས་གང་ལ་བབ་པ་དེ་ལས་མི་འགྱུར་ཚུལ་གྱིས་སྦྱིན་པར་བྱ་སྟེ། དེ་ཡང་རིམ་པའི་ཚུལ་ནི་དང་པོར་སྨྱུང་བ་བྱ་ཞིང་ཟས་
བཅད་པར་བྱའོ། །དེའི་འོག་ཏུ་དུགས་བྱ། དེ་ནས་དུགས་དེ་ཞག་དྲུག་གི་བར་དུ་བྱ་བ་དང་། དེ་ནས་ནས་ཐུག་སྦྱིན་ནོ། །དེའི་འོག་ཏུ་ཏིག་ཏའི་ཁུ་བ་བླུད་པར་བྱ་སྟེ། སྨིན་པ་གསར་དུ་བྱུང་བ་ལ་བྱའོ། །རླུང་ནད་ཉི་ཚེ་ཟད་བྱེད་དང་། །གློ་བུར་བ་དང་རིམས་རྙིང་ལ། །སྨྱུང་བ་མི་བྱ་དེ་ལ་

ནི། །ཉམས་མི་སྨོད་པའི་ཞི་བྱ་ཕན། །ཞེས་བྱ་བ་ལ། རླུང་ནད་ཉི་ཚེ་ལས་གྱུར་པའི་རིམས་ན་བ་དང་། དེ་བཞིན་དུ་ཟད་བྱེད་ལས་གྱུར་པའི་རིམས་དང་། རིམས་ནད་གློ་བུར་བས་ཐེབས་པ་དང་། རིམས་རྙིང་པ་དག་ལ་ནི་སྨྱུང་བའི་ཆོ་ག་མི་བྱ་སྟེ། རླུང་ནད་ཉི་
ཚེ་ལ་སོགས་པའི་རིམས་ན་བ་དེ་དེ་དག་ལ་ཞི་བར་བྱ་བའི་སྦྱོར་བ་ཕན་ལ། ཞི་བ་དེ་ཡང་ཉམས་སྨོད་ཅིང་སྐེམས་པར་མི་འགྱུར་བ་དེ་ལྟ་བུའི་ཞི་བར་བྱ་བའི་ཐབས་བསྟེན་ན་ཕན་ཞིང་བསྔགས་པ་ཡིན་ནོ། །དེ་ལ་མ་ཞུའི་རིམས་ཚུལ་ལྡན། །ཉམས་སྨད་མི་བྱར་ཤེས་པར་བྱ། །ཞེས་
བྱ་བ་ལ། རིམས་དེ་ལ་མ་ཞུ་བའི་རིམས་ཀྱི་མཚན་ཉིད་དང་ལྡན་ཞིང་། དེའི་རང་བཞིན་སྔར་སྨོས་པ་རིམས་ཀྱི་བླ་བརྣན་མི་བཟད་པ་ལ་སོགས་པ་ལྡན་པ་ལ་ཡང་། ཉམས་སྨད་པར་མི་བྱ་བར་ཤེས་པར་བྱའོ། །གསོ་བའི་ཐབས་གཉིས་ཤེས་པ་ལས། །བརྟགས་ཏེ་སྨྱུང་བར་བྱ་
བ་ཡིན། །ཞེས་བྱ་བ་ལ། གསོ་བའི་ཐབས་གཉིས་སྟོན་པར་བཤད་པའི་སྨྱུང་བའི་མཚན་ཉིད་ཀྱིས་ཡང་དག་པར་རྟོགས་པར་བྱ་སྟེ། དེ་ཡང་། དབང་པོ་དང་ཞིང་དྲི་མ་དག །བདེ་བར་འབྱུང་བ་ཞེས་བྱ་བ་ལ་སོགས་པ་སྨྱུང་བ་ལེགས་པར་བྱས་པ་རྟོགས་པར་བྱས་ལ། ཤིན་ཏུ་
སྐེམས་པ་ལ་སོགས་པ་ནི་སྨྱུང་དྲགས་པས་ཤེས་པར་བྱའོ། །སྨྱུང་བྱས་མཚན་མར་ལྡན་པ་ནི། །དེ་ལ་ཐུག་སླ་ལ་སོགས་བླུད། །རང་གི་སྨན་དང་ཇི་བཞིན་བསྐོལ། །དང་པོར་ཐུག་སླ་ལ་སོགས་སྦྱིན། །ཞེས་བྱ་བ་ལ། རིམས་ནད་ཅན་སྨྱུང་བ་བྱས་ཟིན་པའི་མཚན་མ་དང་ལྡན་
པ་དེ་ལ་ནི་ཐུག་པ་སླ་བ་སྟེ་འབྲས་ཐུག་རྐྱང་རྐྱང་པོ་དང་པོར་བླུད་པར་བྱའི། སྐ་བར་ནི་མ་ཡིན་ཏེ། དེ་ཡང་དང་པོར་ནི་ཐུག་པ་སླ་བ་འབྲས་ཐུག་རྐྱང་རྐྱང་པོ་བླུད་པར་བྱའོ། །དེ་ནས་ཐུག་པ་ཡིད་ཙམ་སྐ་བ་དང་ཐུག་པ་གར་མོ་བླུད་པར་བྱའོ། །དེ་ཡང་དྲང་སྲོང་ཙ་ར་ཀས། །བུད་ཤིང་གིས་ནི་མེ་
བཞིན་དུ། །དེ་ཡི་མེ་དྲོད་དེས་སྐྱེད་དེ། །དེ་ཡང་སྨན་གྱི་སྦྱོར་བ་ལས། །ཡང་དང་མེ་དྲོད་འབར་བར་བྱེད། །གཤེར་ཞིང་དྲོ་བས་རྔུལ་བར་བྱེད། །སླ་བས་སྐོམ་དད་རབ་ཞི་བྱེད། །ཁ་ཟས་ཡིན་ཕྱིར་སྲོག་བརྟེན་ལ། །ཁུ་བ་ཡིན་པས་ཡང་བ་ཉིད། །རིམས་དང་འཕྲོད་པས་རིམས་

འཇོམས་བྱེད། །དེ་བས་དང་པོར་ཐུག་པ་སོགས། །རིམས་ལ་བློ་དང་ལྡན་པས་སྦྱིན། །ཞེས་བཤད་པ་ཡིན་ནོ། །དུས་ཇི་སྲིད་ཀྱི་བར་དུ་བྱ་ཞེ་ན། ཞག་དྲུག་བར་དུའམ་གང་ཚེ་རིམས། །རྩེ་ཞིལ་གྱུར་པའི་བར་དུ་སྦྱིན། །དེ་ཡིས་ཤིང་གི་མེ་བཞིན་དུ། །དེ་ཡི་མེ་དྲོད་འཕེལ་བར་
བྱེད། །ཅེས་བྱ་བ་ཡིན་ཏེ། རིམས་ཀྱིས་དང་པོར་བཏབ་པ་ནས་བརྩམས་ཏེ་ཞག་དྲུག་གི་བར་དུ་སྦྱིན་པར་བྱ་བ་འམ། ཡང་ན་གང་གི་ཚེ་རིམས་རྩེ་ཞིལ་ཞིང་ཚ་བའི་གདུང་བ་ལ་སོགས་པ་ཅུང་ཟད་ཞི་བར་གྱུར་པ་དང་། ཤུགས་དལ་བར་གྱུར་པ་དེ་སྲིད་ཀྱི་བར་དུ་རིམས་ནད་ན་བའི་ནད་པ་
དེ་ལ་ཐུག་པ་དེ་དག་བླུད་ཅིང་སྦྱིན་པར་བྱའོ། །དེས་ན་ཞག་དྲུག་གི་གོང་ཡན་ཆད་དུ་སྨྱུང་བ་བྱས་ཟིན་པའི་མཚན་ཉིད་མེད་པར་གྱུར་ཅིང་གང་ལ་ཐུག་པ་བླུད་པ་དེས་རིམས་རྩེ་ཞིལ་བར་གྱུར་བ་དེ་སྲིད་ཀྱི་བར་དུ་དེ་སྦྱིན་པར་བྱའོ། །དང་པོར་འབྲས་ཡོས་ཐུག་འཇུ་སླ། །བཅའ་སྒ་པི་པི་ལིང་
དང་བཅས། །འུ་སུ་རྒྱམ་ཚར་བཅས་པ་སྦྱིན། །སྐྱུར་འདོད་སེའུ་འབྲུ་བཅས་པ་བཏུང་། །ཞེས་བྱ་བ་ལ། དེ་ཡང་དང་པོར་ཏེ་ཐོག་མར་འབྲས་ཡོས་ཀྱི་ཐུག་པ་བླུད་པར་བྱའོ། །དེ་ནས་ལེགས་པར་འཇུ་སླ་བའི་འབྲས་ཐུག་བཅའ་སྒ་ལ་སོགས་པས་བཏབ་པ་རྒྱམ་ཚ་དང་བཅས་པ་བླུད་
པར་བྱས་ལ། དེ་བཞིན་དུ་རོ་སྐྱུར་བ་འདོད་པའི་སྐྱེས་བུ་ལ་ནི་སེའུ་འབྲུ་དང་བཅས་ཤིང་བཏབ་པའི་ཐུག་པ་བླུད་པར་བྱའོ། །འཁྲུ་བའམ་མཁྲིས་པ་མང་བ་ལ། །སྦྲང་རྩི་བཅའ་སྒ་བཏབ་བསྒྲངས་བླུད། །ཅེས་བྱ་བ་ལ། འཁྲུ་བས་བཏབ་པའམ་མཁྲིས་པ་མང་བ་དག་ལ་ནི་ཐུག་
པ་དེ་སྦྲང་རྩི་དང་བཅའ་སྒ་བཏབ་སྟེ་བསྒྲངས་པ་བླུད་པར་བྱ་ལ། དེ་ཡང་ཐུག་པ་སླ་བ་ནས་བརྩམས་ཏེ་བཏུང་བར་བྱའོ། །ཆུ་སོ་རྩིབ་ལོགས་ཀླད་པ་གཟེར། །གཟེ་མ་བྱ་ཀྲི་བསྐོལ་བ་བླུད། །ཅེས་བྱ་བ་ལ། ནད་པ་གང་ཆུ་སོ་ལ་སོགས་པར་གཟེར་བའི་ནད་ཡོད་པར་ནི་གཟེ་མ་དང་
བྱ་ཀྲི་སྟེ། ཀཎྜ་ཀ་རི་དང་བསྐོལ་བའི་ཐུག་པ་བླུད་པར་བྱའོ། །རིམས་འཁྲུར་ཀྲྀཥྞ་པརྞི་དང་། །བ་ལ་བིལ་བ་བཅའ་སྒ་དང་། །ཨུཏྤལ་འུ་སུ་བསྐོལ་རིམས་འཁྲུར། །ཐུག་སྐྱུར་སྨིན་དང་དྲོད་སྐྱེད་ཡིན། །ཞེས་བྱ་བ་ལ། རིམས་དང་ཚད་པར་འཁྲུ་བའི་ནད་གཉིས་ཡོད་པ་ལ་ནི་

ཀྲྀཥྞ་པརྞི་ལ་སོགས་པ་དང་བསྐོལ་བའི་ཐུག་པ་སེའུ་འབྲུའི་ཁུ་བས་སྐྱུར་པོར་བྱས་པ་སྦྱིན་པར་བྱ་སྟེ། དེས་ནི་མ་ཞུ་བ་རྣམས་སྨིན་པ་དང་ཕོ་བའི་མེ་དྲོད་སྐྱེད་པར་བྱེད་པ་ཡིན་ནོ། །སྐྱིགས་བུ་ལུད་པ་དབུགས་མི་བདེ། །གཟེར་ཅན་རྩ་བ་ཆུང་ངུ་ལྔ། །ཞེས་བྱ་བ་
ལ། སྐྱིགས་བུ་ལ་སོགས་པ་སྐྱིགས་བུ་ནས་གཟེར་གྱི་བར་དང་ལྡན་པའི་ནད་པ་ལ་ནི་རྩ་བ་ཆུང་ངུ་ལྔ་དང་བསྐོལ་བའི་ཐུག་པ་སྦྱིན་པར་བྱ་སྟེ། བྲི་ཧ་ཏི་དང་ཀཎྜཀཱ་རི་དང་ཨ་ཤུ་མི་ཏི་གཉིས་དང་གཟེ་མ་སྟེ་ལྔ་དང་བསྐོལ་བའི་ཐུག་པ་སྦྱིན་པར་བྱའོ། །བད་ཀན་གྱིས་ཉེན་ནས་ཐུག་ནི། །རྩ་བ་
ཆེན་པོ་ལྔ་པ་སྦྱིན། །ཞེས་བྱ་བ་ལ། བད་ཀན་གྱི་ནད་ཀྱིས་ཉེན་པའི་ནད་པ་ལ་ནི་བིལ་བའི་རྩ་བ་ལ་སོགས་པ་རྩ་བ་ཆེན་པོ་ལྔ་དང་། ནས་ཐུག་བཙོས་པའི་ཐུག་པ་བླུད་པར་བྱའོ། །རྟུག་པ་འགགས་ལ་ནད་བཅས་པ། །པི་པི་ལིང་དང་སྐྱུ་རུ་ར། །བཏབ་པའི་ནས་ཐུག་མར་དང་བརྔོས། །
དྲི་མ་ནད་ནི་བདེ་འབྱུང་བྱེད། །ཅེས་བྱ་བ་ལ། ནད་པ་གང་ཞིག་རྟུག་འགགས་ཀྱི་ནད་ཀྱིས་བཏབ་པ་ལ་ནི་ནས་ཐུག་བླུད་དེ། དེ་ཡང་པི་པི་ལིང་དང་སྐྱུ་རུ་ར་བཏབ་པ་ལ་ནས་དེ་མར་དང་བརྔོས་པ་ལས་བྱས་པའི་ཐུག་པ་སྦྱིན་པར་བྱ་སྟེ། དེས་ནི་དྲི་མ་དང་ནད་གང་དག་ཡོད་པ་དེ་བདེ་བར་འབྱུང་
བར་བྱེད་དོ། །ལྟོ་བར་རྟུག་འགགས་ནད་བཅས་ལ། །དབྱི་མོ་པི་པི་ལིང་རྩ་བ། །རྒུན་འབྲུམ་དོང་གྲ་སྐྱུ་རུ་ར། །ཞེས་བྱ་བ་ལ། ལྟོ་བར་རྟུག་པ་འགགས་པར་གྱུར་ཅིང་དེ་ཡང་ན་ཞིང་ཐུག་པ་དང་བཅས་པ་ལ་ནི་དབྱི་མོ་ལ་སོགས་པ་དང་བསྐོལ་བའི་ཐུག་པ་བླུད་པར་བྱའོ། །ཁོང་པ་
བཅད་པ་སྙམ་བྱེད་ལ། །རྒྱ་ཤུག་ད་ཏྲིག་ས་ལ་པར། །ཀྲྀཥྞ་པརྞི་བིལ་བ་བླུད། །ཅེས་བྱ་བ་ལ། ཁོང་པའི་ནང་གྲིས་བཅད་པ་སྙམ་དུ་སེམས་པའི་ནད་ལ་རྒྱ་ཤུག་ལ་སོགས་པ་དང་སྦྱར་བའི་ཐུག་པ་བླུད་པར་བྱའོ། །ད་ཏྲིག་ནི་བྲྀཀྵ་ཨཾ་པ་ལའོ། །རྔུལ་མེད་གཉིད་མེད་སྐོམ་པས་
ཉེན། །ཁ་ར་དོང་གྲ་སྐྱུ་རུ་རའོ། །རྒྱ་ཤུག་ཁ་ར་རྒུན་འབྲུམ་དང་། །ཐལ་ཏྲེས་གླ་སྒང་ཙནྡན་ནི། །སྐོམ་དང་སློན་དང་བཅས་པ་བླུད། །སྦྲང་རྩིར་བཅས་པ་རིམས་འཇོམས་ཡིན། །དེ་དག་ཐུག་པའི་སྨན་ཡིན་ཏེ། །ཤ་ཁུ་ཡུ་ཤ་སོགས་པའང་སྦྱར། །ཞེས་བྱ་བ་ལ།

རྔུལ་མེད་པ་དང་གཉིད་མེད་ཅིང་ཡང་བ་དང་སྐོམ་པས་ཉེན་ཅིང་གདུངས་པ་ལ་ཁ་ར་དཀར་པོ་ལ་སོགས་པ་དང་སྦྱར་བའི་ཐུག་པ་བླུད་པར་བྱའོ། །ཐུག་པ་དང་སྦྱར་བ་བསྟེན་པའི་སྨན་འདི་དག་ནི་ཤ་ཁུ་ལ་སོགས་པ་དང་ཡང་སྦྱར་ཏེ་བླུད་པར་བྱའོ། །དེ་ཡང་བསྡུས་པ་ལས། ཐུག་པ་དང་
སྦྱར་སྨན་གཉིས་ཀྱིས། །ཤ་ཁུ་ཡུ་ཤ་ལ་སོགས་པའང་སྦྱར། །ཞེས་སྨོས་པ་ཡིན་ཏེ། ཤ་བཙོས་པའི་ཁུ་བ་དང་། ཡུ་ཤ་ཞེས་བྱ་བ་མོན་སྲན་སྡེའུ་མུངྒ་ལ་སོགས་པ་བསྐོལ་བའི་ཁུ་བ་ལས་བྱས་པའི་བཏུང་བ་ཡིན་ནོ། །སོགས་པ་སྨོས་པས་ནི་བཏུང་བ་གཞན་དང་ཞོག་ཆུ་དང་
དར་བ་དང་། རྒུན་འབྲུམ་ལ་སོགས་པ་བསྐོལ་བའི་བཏུང་བ་ན་ཀ་དང་། ཚོད་མ་ལ་སོགས་པ་དང་ཡང་སྦྱར་བར་བྱའོ། །དེ་ཡང་། ཐུག་པ་ཤ་ཁུ་ཡུ་ཤ་སོགས། །རོ་བཟང་བཏུང་བ་ལ་སོགས་ལས། །སྨན་གྱི་ཚད་ནི་སྦྱར་བར་བྱ། །འཇིག་རྟེན་གྲགས་དང་ཅི་རིགས་སྦྱར། །
ཡང་ན་ཇི་སྲིད་སྨན་གྱིས་ནི། །དེ་དང་འཚམ་པ་ཉིད་བྱ་ཞིང་། །ནད་དང་ལྟོ་ཚོད་ན་ཚོད་སྟོབས། །རྣམ་པར་བརྟགས་ནས་སྦྱར་བྱ་ཡི། །ཚད་ཀྱི་ངེས་པ་ཡོད་མ་ཡིན། །ཞེས་བཤད་མོད་ཀྱི། འོན་ཀྱང་སྨན་པ་མཁས་པ་རྒན་པོ་རྣམས་གཅིག་ནས་གཅིག་ཏུ་བརྒྱུད་དེ་བྱེད་པ་གང་དག་
མཐོང་བ་དེ་འདིར་བསྟན་པར་བྱ་སྟེ། འབྲས་ཡོས་ཀྱི་ཚད་ནི་སྲང་གཅིག་ལ་བྱའོ། །ལ་ལར་ནི་འབྲས་སྲང་གཅིག་ཙམ་ལས་བྱེད་པ་སྣང་ངོ་། །བསྐོལ་བའི་སྨན་ནི་སྲང་ཕྱེད་ལས་བྱའོ། །སྦྱར་བའི་སྨན་ནི་སྤྱིར་ཞོ་གཉིས་སོ། །ཆུ་ནི་སྲང་སུམ་ཅུ་རྩ་གཉིས་བསྐོལ་ལ་ལྷག་མ་སྲང་སུམ་ཅུ་
ལུས་པ་དང་། དེའི་འོག་ཏུ་འབྲས་ཡོས་ལ་སོགས་པ་དང་ཐུག་པར་བསྐོལ་བར་བྱའོ། །ཆང་ལས་བྱུང་དང་ཆང་རྒྱུན་བསྟེན། །བད་ཀན་མཁྲིས་པའི་གནས་ཞུགས་ནས། །དེ་གཉིས་ཤས་ཆེ་འམ་སོ་ག་འམ། །སྐོམ་དང་སློན་དང་ཚད་པས་ཉེན། །ཁྲག་ནི་སྟོད་དུ་འབྱུང་བ་སྟེ། །དེ་ལ་
ཐུག་པ་མི་བླུད་ཀྱི། །འབྲས་ཕྱེའི་སྐྱོ་མ་རིམས་འཇོམས་པའི། །འབྲས་བུའི་ཁུ་བ་སྦྲང་རྩི་དང་། །ཁ་ར་དཀར་བཅས་བླུད་པར་བྱ། །ཞེས་བྱ་བ་ལ། ཆང་འཐུངས་པ་ལས་རིམས་སུ་གྱུར་པ་ལ་སོགས་པ་ལ་ནི་ཐུག་པ་བླུད་པ་སློབ་དཔོན་གྱིས་མ་བསྔགས་ཏེ། འདོད་པར་བྱ་བ་མ་

ཡིན་ནོ། །དེ་ཡང་ཆང་ལས་བྱུང་བ་ནི་ཆང་འཐུངས་དྲགས་པ་ལས་རིམས་ནད་ཀྱིས་བཏབ་པའོ། །ཡང་ཡང་དེ་བཞིན་དུ་ཆང་རྒྱུན་དུ་བསྟེན་པའི་མི་དང་། བད་ཀན་དང་མཁྲིས་པའི་ནད་ལྟ་བར་ཞུགས་པ་དང་དེ་གཉིས་ཏེ་འདས་མ་ཐག་པའི་བད་ཀན་དང་མཁྲིས་པ་
ཤས་ཆེ་བ་དང་། སོ་གའི་དུས་དང་སྐོམ་དད་ལ་སོགས་པས་ཉེན་པ་དང་། ཁྲག་དང་མཁྲིས་པ་སྟོད་དུ་འབྱུང་ཞིང་གྱེན་དུ་ལུད་པ་དེ་དེ་ལྟ་བུའི་རིམས་ནད་ཅན་དེ་ལ་ཐུག་པ་བླུད་པའི་སྐབས་ཡིན་ཡང་། ནས་ཐུག་ལ་སོགས་པའི་ཐུག་པ་མི་སྦྱིན་གྱི། དེ་ལ་ནི་སྐྱོ་མ་འབྲས་ཡོས་ཀྱི་ཕྱེ་
ལས་བྱས་པ་བླུད་པར་བྱ་སྟེ། དེ་ཡང་རིམས་འཇོམས་པར་བྱེད་པའི་འབྲས་བུའི་ཁུ་བ་རྒུན་འབྲུ་སྐྱུ་རུ་ར་ལ་སོགས་པའི་ཁུ་བ་བསྐོལ་ཏེ་བསྒྲངས་པའམ། དེ་མ་རྙེད་ན་སྐམ་པོར་ཆུ་དང་བསྐོལ་བའི་ཁུ་བ་བསྒྲངས་པ་སྦྲང་རྩི་དང་ཁ་ར་དཀར་པོ་དང་བཅས་ཤིང་སྦྱར་བ་དེ་ལ་བླུད་པར་བྱའོ། །
དེ་ནས་སྐྱོ་མ་ཞུ་ནས་ནི། །བཀྲེས་ན་ནས་ཐུག་འབྲས་བརྔོས་པའི། །འབྲས་ཆན་དག་ནི་བཟའ་བྱ་ཞིང་། །ཤ་ཁུ་སླ་བའི་ཁུ་བའམ། །མུངྒ་འུར་བའི་ཁུ་བཅས་བཟའ། །ཞེས་བྱ་བ་ལ། དེ་ནས་དེ་ལྟར་སྐྱོ་མ་འཐུངས་པ་དེ་ཞུ་བའི་རྗེས་ལ་ཉིན་ཞག་དེ་ཉིད་ལ་བཀྲེས་ཤིང་ཟས་
འདོད་པར་གྱུར་པའི་ཟས་ཀྱི་དུས་གཉིས་པར་འབྲས་བརྔོས་པ་ལས་གཡོས་པའི་འབྲས་ཆན་བཟའ་བར་བྱ་བའམ་ནས་ཐུག་བཏུང་བར་བྱའོ། །དེ་ཡང་གང་དང་ལྷན་ཅིག་བཟའ་ཞེ་ན། ཤ་ཉུང་ངུ་དག་གི་ཤ་ཁུ་ཤིན་ཏུ་སླ་ཞིང་ཡང་ལ་བཅུད་ཆུང་བའམ། ཡང་ན་སྲན་མུངྒ་སྟེ།
མོན་སྲན་སྡེའུ་དང་བྱ་འུར་པ་ཞེས་བྱ་བའི་ཤ་ཁུ་བ་དང་བཅས་པ་བཟའ་བར་བྱའོ། །དེ་ཡང་། ཤ་ཆུང་སོགས་ཀྱི་ཁུ་བ་སླ། །ཤ་ཉུང་སླ་བ་ཡིན་པར་བཤད། །ཅེས་བྱ་བ་ལ། ལ་ལ་དག་གིས། ཤ་ཁུ་ཚད་ཆེན་མ་ཡིན་སླ། །ཤ་ཁུ་སླ་བ་ཡིན་པར་བཤད། །ཅེས་བཤད་
པ་ཡིན་ནོ། །དེ་ལྟར་ཞག་དྲུག་འདི་བཟླས་ཏེ། །ཉམས་སྟོབས་ནད་ནི་བསྲུང་བར་བྱ། །ཞེས་བྱ་བ་ལ། ཐུག་པ་ལ་སོགས་པའི་རིམ་པའི་ཚུལ་འདི་ལྟ་བུས་རིམས་ཀྱིས་བཏབ་པའི་གནས་སྐབས་དང་པོ་འདི་འདས་ཤིང་བཟླ་བར་བྱ་སྟེ། ནད་པས་ལུས་ཀྱི་ཉམས་སྟོབས་

དང་། ནད་ཀྱི་འཕེལ་འབྲིའི་ཚུལ་ལས་བསྲུང་བར་བྱ་སྟེ། ནད་ནི་འདིར་རླུང་ལ་སོགས་པའི་ནད་གང་ཡང་རུང་བ་རེ་རེ་འམ་གཉིས་འདྲེས་པ་འམ་འདུས་པ་དག་ལ་བྱའོ། །དེ་ནས་སྨྱུང་བ་ལ་སོགས་པས། །སྨིན་པའི་ནད་ནི་ལྷག་མ་རྣམས། །སྨིན་པའམ་ཡང་ན་ཞི་བྱའི་ཕྱིར། །སྨན་
ཁུའི་སྦྱོར་བའི་བྱ་བ་བསྔགས། །ཞེས་བྱ་བ་ལ། དེ་ནས་ཐུག་པ་ལ་སོགས་པ་རིམ་པར་སྤྱད་པའི་རྗེས་ལ་སྨྱུང་བ་ལ་སོགས་པ་སྟེ་སྨྱུང་བ་དང་དུགས་བྱ་བ་དང་དུགས་དང་ནས་ཐུག་དང་སྨན་བསྐོལ་བའི་ཁུ་བ་ཁ་བས་རིམས་རྩོམ་པའི་ནད་སྨིན་པར་གྱུར་པ་དང་། ནད་ལྷག་མ་རྣམས་སྨིན་པ་
འམ་ཞི་བར་བྱ་བའི་ཕྱིར་སྨན་ཁུའི་སྦྱོར་བའི་རྣམ་པ་ལྔ་པོར་རང་གི་ཁུ་བའམ། ལྡེ་གུ་འམ། བསྐོལ་ཏེ་བསྒྲངས་པ་དང་། སྐྱོ་མར་བྱ་བའི་རྣམ་པར་ཕྱེ་བ་དག་བྱ་བ་ནི་ནད་ཕལ་པོ་ཆེ་ལ་བསྔགས་པ་ཡིན་ནོ། །མཁྲིས་ལ་མཆོག་ཏུ་ཁ་བ་སྟེ། །བད་ཀན་ལ་ནི་ཚ་བ་བླུད། །ཅེས་བྱ་བ་ལ།
སྨན་བསྐོལ་བའི་ཁུ་བ་དེ་ཡང་མཁྲིས་པ་ལས་གྱུར་པའི་རིམས་ལ་ནི་ཁྱད་པར་རམ་མཆོག་ཏུ་རོ་ཁ་བའི་སྨན་གྱི་ཁུ་བ་བླུད་པར་བྱ་སྟེ། མཆོག་ཏུ་ཞེས་སྨོས་པས་ནི་སྨན་ཁ་བ་དེ་ནི་བད་ཀན་ལ་ཡང་བླུད་པར་བྱའོ། །ཞེས་སྟོན་པ་ཡིན་ནོ། །ཚ་བའི་སྨན་བསྐོལ་བ་ནི་བད་ཀན་གྱི་རིམས་
ཁོ་ན་ལ་སྦྱིན་པར་བྱའི་མཁྲིས་པ་ལ་ནི་མ་ཡིན་ནོ། །བད་ཀན་མཁྲིས་པ་སེལ་བྱེད་ཀྱང་། །བསྐ་བ་བསྔགས་པ་མ་ཡིན་ཏེ། །རིམས་སར་དྲི་མ་འགགས་བྱེད་པས། །བསྐ་བས་མི་བཟད་རིམས་སྐྱེད་ཅིང་། །དང་ག་འཁྱིལ་དང་ཡི་ག་འཆུས། །སྐྱིགས་བུ་དབུགས་མི་བདེ་ཡང་སྐྱེད། །
ཅེས་བྱ་བ་ལ། །རོ་བསྐ་བ་ནི་བད་ཀན་དང་མཁྲིས་པ་སེལ་བ་ཡིན་དུ་ཟིན་ཀྱང་རིམས་སར་པ་ལ་ནི་བཏང་བ་བསྔགས་པ་མ་ཡིན་ཏེ། ཅིའི་ཕྱིར་ཞེ་ན། དྲི་མ་འགགས་པར་བྱེད་པའི་རྒྱུས་རོ་བསྐ་བ་བླུད་པས་ནི་མི་བཟད་པའི་རིམས་སྐྱེད་པར་བྱེད་པ་དང་དེ་བཞིན་དུ་སྙིང་ནད་དང་ག་འཁྱིལ་པ་
ལ་སོགས་པ་སྐྱེད་པར་འགྱུར་རོ། །དེ་ཡང་རིམས་སར་པ་ལ་ནི་རོ་བསྐ་བས་ནད་འཐས་ཤིང་སྲ་བར་བྱེད་ནས། ཕྱི་རོལ་དུ་ཡང་འབྱིན་པར་མི་བྱེད་ལ། ནང་དུ་ཡང་སྨིན་ཅིང་འཇུ་བར་བྱེད་དེ། སླར་ཞིང་ཡན་མན་གྱི་རྒྱུན་སྲང་ངམ། ལམ་ལོག་པར་བྱས་ནས་རིམས་འཕེལ་བར་བྱེད་དོ། །

དེ་ཡང་དྲང་སྲོང་ཙ་ར་ཀས། །བསྐ་བའི་རོས་ནི་ནད་བཀག་སྟེ། །རིམས་སར་འཐས་པར་བྱེད་འགྱུར་ཞིང་། །སྲ་བར་བྱེད་ཀྱི་སྨིན་མི་བྱེད། །མི་བཟད་རིམས་ནི་སྐྱེད་པར་བྱེད། །ཅེས་བཤད་པ་དང་། སྦྱོར་བའི་དབང་དུ་བྱས་ནས་ནི། །བསྐ་བས་བཀག་པ་མ་ཡིན་
གྱི། །གང་ཞིག་བསྐ་བས་བསྐ་འགྱུར་བ། །དེ་ནི་རིམས་སར་དག་ལ་སྤང་། །ཞེས་བཤད་པ་ཡིན་ནོ། །ལ་ལ་ཞག་བདུན་ནས་སྨན་གཏོང་། །གཞན་དག་ཞག་ནི་བཅུ་ལོན་ནས། །ཁ་ཅིག་ཟས་ཡང་ཟོས་ནས་གཏོང་། །མ་ཞུ་ཤས་ཆེ་ལ་མི་གཏང་། །ཞེས་བྱ་བ་ལ། སློབ་དཔོན་ལ་
ལས་ནི་ཞག་བདུན་པའི་རྗེས་ལ། ཞག་བརྒྱད་པའི་ཞག་གི་ཚེ་སྨན་གླ་སྒང་དང་པར་པ་ཏ་ལྡུམ་བུ་སྐྲ་བཟངས་ཞེས་བྱ་བ་ལ་སོགས་པ་རིམས་འཇོམས་པའི་སྨན་གཏང་བར་བྱའོ། །ཞེས་ཟེར་རོ། །སློབ་དཔོན་གཞན་དག་ནི་ཞག་བཅུ་ལོན་པའི་རྗེས་ལ་སྨན་གཏང་བར་བྱའོ། །ཞེས་ཟེར་
རོ། །ཡང་སྲོག་འཚོ་བའི་སློབ་དཔོན། ཅིག་ན་རེ་གང་གིས་ཁ་ཟས་ཡང་བར་ཟོས་པར་གྱུར་པ་དང་། དེའི་འོག་ཏུ་སྨན་སྦྱིན་ཏེ། ཞག་དྲུག་ལོན་ནས་སྨན་གཏང་བར་བྱའོ། །ཞེས་ཟེར་བ་ནས། དེ་ཡན་ཆད་བཀག་པ་ཉིད་ཡིན་ནོ། །ཚད་འདི་དག་ཐམས་ཅད་ནི་ནད་ཀྱི་གནས་སྐབས་ཀྱི་
དབང་གི་སྦྱོར་བ་དང་འཚམ་པ་ཉིད་ཡིན་པའི་ཕྱིར་རོ། །མ་ཞུ་བ་ཤས་ཆེ་ཞིང་རྒྱས་པར་གྱུར་པ་ལ་ནི་སྨན་དེ་ཞག་བཅུ་འདས་ཟིན་ཀྱང་སྦྱིན་པར་བྱ་སྟེ། འདི་ནི་སྔར་སྨོས་པའི་ཕྱོགས་གསུམ་ཆར་ལ་བཀག་པ་ཡིན་ནོ། །མ་ཞུ་བ་ཤས་ཆེ་བ་ལ་སྨན་མི་བཏང་བའི་དགོས་པ་གང་ཡིན་པ་འདིར་
སྨྲས་པ་ནི། གང་ཕྱིར་མི་བཟད་རིམས་ཉེན་ལ། །ནད་ཀྱི་ཤུགས་ནི་འབྱུང་འགྱུར་བ། །མ་སྨིན་པ་ལ་སྨན་གྱིས་ནི། །རིམས་ནི་སླར་འཕེལ་བྱེད་པ་འམ། །ནད་ནི་ཤིན་ཏུ་སོགས་པ་ཡིས། །སྙོམ་དང་རྨོངས་བག་སྐྱེད་པར་བྱེད། །ཅེས་བྱ་བ་ཡིན་ཏེ། རྒྱུ་གང་གི་ཕྱིར་མི་བཟད་པའི་རིམས་
ཀྱིས་ཉེན་པའི་སྐྱེས་བུ་ལ་ནི་ནད་ཀྱི་ཤུགས་འབྱུང་བར་འགྱུར་བས་ན་སྨན་བླུད་པར་གྱུར་ན་མ་སྨིན་ཅིང་མ་ཞུ་བ་ཉིད་ཀྱིས་རིམས་དེ་སླར་འཕེལ་ཞིང་རྒྱས་པ་དང་འབར་བར་བྱེད་དོ། །ཡང་ན་རིམས་སར་པ་ཤིན་ཏུ་སོགས་ཤིང་འཕེལ་བར་འགྱུར་བའི་ནད་ལ་སྨན་བཏང་ན་སྙོམ་པ་དང་རྨོངས་

བག་གི་ནད་སྐྱེ་བར་བྱེད་ཅིང་སླར་རིམས་དེ་འཕེལ་བར་འགྱུར་རོ། །འོ་ན་གང་གི་ཚེ་སྦྱིན་པར་བྱ་ཞེ་ན། དེའི་ཕྱིར་སྨྲས་པ་ནི། གང་ཚེ་རིམས་རྩེ་ཞིལ་ལུས་ཡང་། །དྲི་མ་ལ་སོགས་གཡོས་གྱུར་པ། །རིམས་བཏབ་ཡུན་རིང་མ་ལོན་ཡང་། །དེ་ཚེ་སྨན་ནི་སྦྱིན་པར་བྱ། །ཞེས་བྱ་བ་
ཡིན་ཏེ། དུས་གང་གི་ཚེ་རིམས་རྩེ་ཞིལ་ཞིང་ཤུགས་དལ་བ་དང་།དེ་བཞིན་དུ་ལུས་ཡང་ཞིང་མ་སྨིན་པའི་ནད་ཀྱིས་གནོན་པ་དང་། དྲི་མ་བད་ཀན་དང་མཁྲིས་པ་བཤང་བ་ལ་སོགས་པ་གཡོས་པར་གྱུར་ཞིང་གནས་ལས་འཕགས་ཏེ་འགགས་པར་མ་གྱུར་པ་དེའི་ཚེ་རིམས་
ཀྱིས་བཏབ་པ་དེ་ཡུན་རིང་པོ་མ་ལོན་ཞིང་ཞག་དྲུག་མ་འདས་སུ་ཟིན་ཀྱང་སྨན་སྦྱིན་པར་བྱ་བ་ཉིད་ཡིན་ནོ། །གླ་སྒང་པར་པ་ཏར་བཅས་པའམ། །བཅའ་སྒ་འམ་ཡང་ན་བྱི་ཚེར་བ། །བསྐོལ་བ་བསྒྲངས་པའི་ཁུ་བ་བླུད། །པ་ཐ་པུ་ཤེལ་པ་ལ་ཀ །བླུད་པའམ་དེ་བཞིན་དུ་ནི་མ་
པ། །སླེ་ཏྲེས་གླ་སྒང་དོང་གྲ་རྣམས། །འདི་ནི་ཅི་རིགས་པར་བླུད་བྱ། །ནད་སྨིན་བྱེད་པའི་སྨན་ཁུ་བ། །རིམས་དང་སྐོམ་དད་ཡི་ག་འཆུས། །ཁས་རོ་མི་ཚོར་མ་ཞུ་འཇོམས། །ཞེས་བྱ་བ་ལ། ནད་ལ་སོགས་པའི་དབྱེ་བས་པར་པ་ཏ་ཞེས་བྱ་བ་སྐྲ་བཟངས་ལན་འགའ་ནི་གླ་
སྒང་དང་སྦྱར་བར་བྱའོ། །ལན་འགའ་ནི་བཅའ་སྒ་དང་སྦྱར་ཏེ་བཏང་ངོ་། །ཡང་ན་བྱི་ཚེར་བ་ཞེས་བྱ་བ་དུར་ལ་བ་དང་སྦྱར་ཏེ་བསྐོལ་བའི་ཁུ་བའམ། ཡང་ན་བསྐོལ་ཏེ་བསྒྲངས་པ་བླུད་པར་བྱའོ། །ཡང་ན་པར་པ་ཏ་དང་པུ་ཤེལ་ཙེ་དང་བ་ལ་ཀ་དང་བཅས་པ་གསུམ་པོ་དེ་དག་བསྐོལ་
བའི་ཁུ་བ་དྲོ་བའམ། གྲང་བ་བླུད་པར་བྱའོ། །ཡང་དེ་བཞིན་དུ་ནིམ་པ་ཞེས་བྱ་བ་རྩ་མཁྲིས་དང་སླེ་ཏྲེས་ལ་སོགས་པ་སྨན་བཞི་པོ་བསྐོལ་བ་དྲོ་བའམ། གྲང་བ་བླུད་པར་བྱའོ། །འདིར་སྨན་བསྐོལ་བའི་ཚད་ནི། སྨན་སྲང་གཅིག་ཆུ་སྲང་བཅུ་དྲུག་དང་བསྐོལ་ཏེ། སྨན་གྱི་ཁུ་བ་
སྲང་བཞི་ལུས་པ་བཏུང་བར་བྱ་ལ། བསྒྲངས་པ་ནི་སྨན་སྲང་གཅིག་ལ་ཆུ་སྲང་དྲུག་ལུས་པ