Luận tạng Tây Tạng (Tengyur) — Tập 163

་ཞེས་བྱ་བ་ནི། སེམས་ཅན་དང་སེམས་ཅན་མ་ཡིན་པའི་གཟུགས་བསླབ་པའི་ཕྱིར་དང་། རྩོམ་ཞིང་བྲི་བ་ནི་ལོབས་པས་བྲིས་ཟིན་པ་ཉིད་དང་འདྲ་བ་སྟེ། སེམས་ཅན་གྱི་གཟུགས་བསླབ་པའི་ཕྱིར་དང་། འདྲི་བར་རྩོམ་པ་ལ་
ནི་ཉེས་པར་འགྱུར་ལ། སེམས་ཅན་གྱི་གཟུགས་མ་ཡིན་པ་ལ་ནི་ཉེས་པར་མི་འགྱུར་རོ། །ཤི་བའི་སྐབས་དང་གཞག་པའི་སྐབས་ལས་གཞན་པའི་རྗེས་སུ་བསྒྲུབ་པའི་སྐབས་བཤད་ཟིན་ཏོ། །ད་ནི་ཤི་བའི་སྐབས་དང་གཞག་པའི་སྐབས་སུ་གང་བྱ་བ་དེ་བརྗོད་པར་བྱ་སྟེ།
ཚངས་པ་མཚུངས་པར་སྤྱོད་པའི་ཤི་བའི་ལུས་ལ་མཆོད་པར་བྱའོ་ཞེས་བྱ་བ་ནི། སྤོས་ཆུ་དང་ཁྲུས་དང་བྱུག་པ་དང་མེ་ཏོག་དང་གོས་ཀྱིས་དགབ་པ་དང་། གདུགས་དང་རྒྱལ་མཚན་བསྒྲེང་བ་དང་། དུང་དང་རྔ་བོ་ཆེ་དང་རྔ་པ་ཊ་ཧ་ལ་སོགས་པའི་སྒྲ་དབྱུང་བ་དང་། བདུག་སྤོས་

བསྲེགས་པ་དང་། མེ་ཏོག་སིལ་མ་ལ་སོགས་པས་གཏོར་བའི་མཆོད་པ་བྱ་བའོ། །དེ་བསྲེག་པར་བྱའོ་ཞེས་བྱ་བ་ནི་རོ་དེའོ། །འདིར་གཞུང་ནི་ལུས་མཆོད་པ་བྱས་ཏེ་བསྲེག་པར་བྱའོ་ཞེས་གསུངས་པ་ཡིན་ནོ། །ཅི་གདོན་མི་ཟ་བར་བསྲེག་པར་བྱ་བ་
ཁོ་ན་ཡིན་ནམ་ཞེ་ན་དེའི་ཕྱིར། གལ་ཏེ་སྲོག་ཆགས་དང་བཅས་པའི་རྨ་མེད་པ་ཉིད་ཡིན་ནའོ་ཞེས་བྱ་བ་སྨྲས་སོ། །སོ་སོར་བརྟགས་པས་ངེས་པར་བྱའོ་ཞེས་བྱ་བ་ནི་དེ་ལ་སྲོག་ཆགས་ཡོད་དམ་མེད་པའོ། །བརྐོ་བའམ་ཆུ་ཀླུང་དུ་བསྐུར་རོ་ཞེས་བྱ་བ་ནི། ཡང་ན་ས་བརྐོས་
པར་གཞུག་པའམ། ཆུ་ཀླུང་དུ་བསྐྱུར་བར་བྱའོ། །མི་རུང་ན་ཚང་ཚིང་གི་དབུས་སུ་གཞག་གོ་ཞེས་བྱ་བ་ནི། བརྒྱ་ལ་སྲོག་ཆགས་དང་བཅས་ཤིང་བསྲེགས་ན་སྲོག་ཆགས་མང་པོ་དག་འཆི་བ་ལྟ་ནའོ། །སྤྱོད་ལམ་གང་གིས་གཞག་པར་བྱ་ཞེ་ན་དེའི་ཕྱིར་གློ་གཡས་པ་
བསྙལ་ཏེ་མགོ་བྱང་ཕྱོགས་སུ་བསྟན་ཏོ་ཞེས་བྱ་བ་སྨྲས་སོ། །སྔས་སུ་རྩྭའི་ཆུན་པོ་གཞུག་གོ་ཞེས་བྱ་བ་ནི་རོ་དེའི་འོ། །རྩྭ་དག་གམ་ལོ་མ་དག་གིས་གཡོགས་སོ་ཞེས་བྱ་བ་ཡང་རོ་དེའིའོ། །ཆོས་མཉན་པ་དང་ཡོན་བཤད་པ་དག་བྱའོ་ཞེས་བྱ་བ་ནི་དེའི་ཕྱིར་རོ། །རེག་པ་དག་གིས་
གོས་དང་བཅས་ཏེ་ཁྲུས་བྱའོ་ཞེས་བྱ་བ་ནི་རོ་ལ་རེག་པ་དག་གིས་སོ། །གཞན་དག་གིས་ནི་རྐང་ལག་བཀྲུའོ་ཞེས་བྱ་བ་ནི་རོ་ལ་མ་རེག་པ་དག་གིས་སོ། །མཆོད་རྟེན་ལ་ཕྱག་བྱས་ཏེ་འཇུག་པར་བྱའོ་ཞེས་བྱ་བ་ནི་དགེ་སློང་དེ་དག་གིས་མཆོད་རྟེན་ལ་ཕྱག་བྱས་ཏེ་གཙུག་ལག་ཁང་
དུ་འཇུག་པར་བྱའོ། །མཆོད་རྟེན་ནི་རྣམ་པ་གཉིས་ཏེ་གཙང་ཁང་ཅན་ཉིད་དང་ཀ་བ་ལྟ་བུ་ཉིད་དོ་ཞེས་བྱ་བ་ལ་གཙང་ཁང་ཅན་ཉིད་ཅེས་བྱ་བ་ནི། བུམ་པའི་ཕྱོགས་ན་གཙང་ཁང་ཕྱུར་བུ་དང་ལྡན་པ་ཉིད་དོ། །ཀ་བ་ལྟ་བུ་ཉིད་ཅེས་བྱ་བ་ནི། གཙང་ཁང་མེད་པ་ཀ་བའི་རྣམ་པ་ལྟ་བུར་བསྒྲེང་བ་
ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ་ཞེས་བྱ་བ་ནི་མཆོད་རྟེན་དེའོ། །ཅི་ཐམས་ཅད་ལའམ་ཞེ་ན་དེའི་ཕྱིར། གལ་ཏེ་དགེ་བ་ཡིན་ནའོ་ཞེས་བྱ་བ་སྨྲས་ཏེ། རབ་ཏུ་བྱུང་བར་ཞེས་བྱ་བར་སྦྱར་རོ། །སངས་རྒྱས་ཀྱི་ནི་རྣམ་པ་ཐམས་ཅད་དོ་ཞེས་བྱ་བ་ནི་

སངས་རྒྱས་བཅོམ་ལྡན་འདས་རྣམས་ཀྱི་སྐུ་གདུང་གི་མཆོད་རྟེན་ནི་རྣམ་པ་ཐམས་ཅད་རྫོགས་པར་བྱ་བའོ། །རྣམ་པ་ནི་བང་རིམ་བཞི་དང་འདབ་མ་དྲུག་དང་བུམ་པ་དང་པུ་ཤུ་དང་སྲོག་ཤིང་དང་གདུགས་བཅུ་གསུམ་པ་དང་ཆར་ཁབ་དག་གོ་ཞེས་བྱ་བ་ནི་མཆོད་རྟེན་གྱི་རྣམ་པ་
ཐམས་ཅད་རྫོགས་པའོ། །རང་སངས་རྒྱས་རྣམས་ཀྱི་ནི་ཆར་ཁབ་མེད་པའོ་ཞེས་བྱ་བ་ནི། རྣམ་པ་དེ་དག་ལས་ཆར་ཁབ་འབའ་ཞིག་མེད་པ་ཞེས་བྱ་བའི་ཐ་ཚིག་སྟེ། དེ་ཡང་བསེ་རུ་ལྟ་བུའི་ཕྱིར་གསུངས་པ་ཡིན་གྱི། ཚོགས་ན་སྤྱོད་པའི་ནི་དགྲ་བཅོམ་པའི་རྣམ་པ་ལྟ་བུའོ། །
འདིར་གཞུང་ནི་རང་སངས་རྒྱས་ཀྱི་ནི་ཆར་ཁབ་མེད་པའོ་ཞེས་གསུངས་པ་ཡིན་ནོ། །ཉན་ཐོས་རྣམས་ཀྱི་ནི་འབྲས་བུའི་ཚད་དག་གིས་དེའི་གདུགས་གཅིག་ལྷག་པའོ་ཞེས་བྱ་བ་ནི། ཉན་ཐོས་རྣམས་ཀྱི་མཆོད་རྟེན་ནི་རྒྱུན་དུ་ཞུགས་པའི་འབྲས་བུ་ལ་སོགས་པའི་ཚད་དག་
གིས་ཆར་ཁབ་མེད་པའི་མཆོད་རྟེན་དེའི་གདུགས་གཅིག་གིས་ལྷག་པར་བྱ་སྟེ། འབྲས་བུ་ཇི་སྙེད་ཐོབ་པ་དེ་སྙེད་ལས་གདུགས་རེ་རེས་ལྷག་པར་བྱའོ་ཞེས་བྱ་བའི་ཐ་ཚིག་གོ། །འདིར་གཞུང་ནི། དགྲ་བཅོམ་པའི་ནི་གདུགས་ལྔའོ། །ཕྱིར་མི་འོང་བའི་ནི་
གདུགས་བཞིའོ། །ལན་ཅིག་ཕྱིར་འོང་བའི་ནི་གདུགས་གསུམ་མོ། །རྒྱུན་དུ་ཞུགས་པའི་ནི་གདུགས་གཉིས་སོ་ཞེས་གསུངས་པ་ཡིན་ནོ། །ཉན་ཐོས་ཀྱི་མཆོད་རྟེན་ནི་ཕྱོགས་གང་དུ་བྱ་ཞེ་ན། དེའི་ཕྱིར་དེ་བཞིན་གཤེགས་པའི་ཕྱོགས་ཀྱི་ཡུལ་ཉིད་དུ་གང་དེ་དག་གནས་པར་
གྱུར་པའི་ཕྱོགས་དེར་འཁོར་དུ་བྱའོ་ཞེས་བྱ་བ་སྨྲས་ཏེ། དེ་བཞིན་གཤེགས་པའི་མཆོད་རྟེན་གྱི་ཕྱོགས་བཞི་པོ་གང་ཡིན་པ་དེ་དག་ཉིད་ཉན་ཐོས་ཀྱི་མཆོད་རྟེན་དེ་དག་གི་ཡུལ་ཡིན་ཏེ་དེའི་དངོས་པོ་ནི་དེ་ཉིད་དེ་དེར་རོ། །གང་གི་ཚེ་དེ་བཞིན་གཤེགས་པའི་མཆོད་རྟེན་གྱི་ཕྱོགས་
ཀྱི་ཡུལ་ཉིད་དུ་ཉན་ཐོས་ཀྱི་མཆོད་རྟེན་དག་བྱེད་པར་འདོད་པ་དེའི་ཚེ་དེ་བཞིན་གཤེགས་པ་བཞུགས་པའི་དུས་ན་སྔོན་དེ་བཞིན་གཤེགས་པའི་ཕྱོགས་གང་དུ་ཉན་ཐོས་ཆེན་པོ་དེ་དག་གནས་པར་འགྱུར་བའི་ཕྱོགས་དེར་དེ་བཞིན་གཤེགས་པའི་མཆོད་རྟེན་དེའི་འཁོར་དུ་ཉན་

ཐོས་དེ་དག་གི་མཆོད་རྟེན་བརྩིག་པར་བྱ་སྟེ། དཔེར་ན་མཆོག་ཟུང་གཅིག་ནི་བཅོམ་ལྡན་འདས་ཀྱི་མངོན་སུམ་ན་གནས་པར་གྱུར་པས། དེ་ཉིད་ཀྱི་མཆོད་རྟེན་ནི་དེ་བཞིན་གཤེགས་པའི་མཆོད་རྟེན་གྱི་སྤྱན་སྔར་བརྩིག་པར་བྱ་བ་ལ་སོགས་པ་ལྟ་
བུའོ། །འདི་ལ་རྒན་རིམས་སུ་མི་བྱ་བར་མི་བྱའོ་ཞེས་བྱ་བ་ནི་མཆོད་རྟེན་གྱི་ཡུལ་འདི་ལ་ཉན་ཐོས་ཆེན་པོ་རྣམས་ཀྱི་མཆོད་རྟེན་རྒན་རིམས་སུ་བརྩིག་པར་བྱ་སྟེ། དང་པོར་འོད་སྲུངས་ཆེན་པོའིའོ། །དེའི་འོག་ཏུ་གཞན་དག་གིའོ། །སོ་སོའི་སྐྱེ་བོ་རྣམས་ཀྱི་ནི་བྱི་བོའོ་ཞེས་
བྱ་བ་ནི། སོ་སོའི་སྐྱེ་བོ་དགེ་བ་རྣམས་ཀྱི་མཆོད་རྟེན་ནི་སྲོག་ཤིང་མེད་པ་བྱི་བོར་བྱ་བའོ། །དེ་དག་ནི་དགེ་འདུན་གྱི་ཀུན་དགའ་ར་བའི་ཕྱི་རོལ་དུ་བྱའོ་ཞེས་བྱ་བ་ནི་སོ་སོའི་སྐྱེ་བོ་དགེ་བ་རྣམས་ཀྱི་མཆོད་རྟེན་དེ་དག་སྟེ་སོ་སོ་སྐྱེ་བོ་ཡིན་པའི་ཕྱིར་རོ། །འཕགས་པ་ལ་ནི་མཆོད་རྟེན་
གྱི་དུས་སྟོན་རིགས་སོ་ཞེས་བྱ་བ་ནི། འཕགས་པའི་གང་ཟག་ལ་མཆོད་རྟེན་གྱི་དུས་སྟོན་བྱ་བར་རིགས་པའོ། །ཉན་ཐོས་ཀྱི་མཆོད་རྟེན་ལ་ཕུལ་བ་ནི་ཚངས་པ་མཚུངས་པར་སྤྱོད་པ་རྣམས་དབང་བ་ཉིད་ཡིན་ནོ་ཞེས་བྱ་བ་ནི། དེ་ལ་རས་དང་སྣམ་བུ་དང་རྫས་ཀྱི་རྣམ་པ་གཞན་གང་དག་
ཕུལ་བ་དེ་དག་ནི་དགེ་སློང་རྣམས་ཀྱིས་བགོ་བར་བྱའོ། །འདིར་གཞུང་ནི། ཚངས་པ་མཚུངས་པར་སྤྱོད་པའི་རྫས་ལ་ནི་དགེ་སློང་ཚངས་པ་མཚུངས་པར་སྤྱོད་པ་དག་དབང་ངོ་ཞེས་བྱ་བ་གསུངས་པ་ཡིན་ནོ། །མུ་ཏིག་དག་ནི་བསྟན་པ་བཞིན་དུའོ་ཞེས་བྱ་བ་ནི། ཉན་ཐོས་ཀྱི་
མཆོད་རྟེན་ལ་མུ་ཏིག་ཕུལ་བ་དག་ནི་སྔར་མུ་ཏིག་ནི་སངས་རྒྱས་ལ་དབུལ་ཞིང་དྲི་གཙང་ཁང་གི་ཞལ་ཞལ་དུ་བྱའོ་ཞེས་བསྟན་པ་བཞིན་དུ་བྱའོ། །བུད་དུང་དག་ནི་སངས་རྒྱས་ལ་དབུལ་ལོ་ཞེས་བྱ་བ་ལ། འདིར་གཞུང་ནི་བུད་དུང་གང་དག་ཡིན་པ་དེ་དག་ནི་འཛམ་བུའི་གྲིབ་མ་
ལ་སོགས་པ་བྱུང་བའི་སྐུ་གཟུགས་ལ་དབུལ་བར་བྱའོ་ཞེས་གསུངས་པ་ཡིན་ནོ། །དེ་ལས་ཞིག་རལ་བཅོས་པའི་ཕྱིར་གཞག་པར་བྱའོ་ཞེས་བྱ་བ་ནི། མཆོད་རྟེན་ལ་ཕུལ་བའི་རྫས་དེ་ལས་མཆོད་རྟེན་དེ་ཉིད་ཀྱི་ཞིག་རལ་བཅོས་པའི་ཕྱིར་གཞག་པར་ཡང་བྱ་བའོ། །

མཆོད་པ་རུང་བ་ཉིད་ཀྱང་ཞེས་བྱ་བ་ནི། འཕན་གདུགས་ལ་སོགས་པ་མཆོད་པ་རུང་བར་གྱུར་པ་ཉིད་ཀྱང་མཆོད་རྟེན་དེ་ཉིད་ཀྱི་དུས་སྟོན་གྱི་ཚེ་མཆོད་པར་བྱ་བའི་ཕྱིར་གཞག་པར་བྱའོ། །འདིར་གཞུང་ནི་དེ་ལ་དབྱིག་དང་གསེར་གང་ཡིན་པ་དེ་དག་མཆོད་རྟེན་དེ་ཉིད་
ཞིག་རལ་དུ་གྱུར་པ་བཅོས་པའི་ཕྱིར་གཞག་པར་བྱའོ། །མཆོད་པར་རུང་བའི་རྫས་གང་ཡིན་པ་དེ་དག་ནི་དུས་སྟོན་གྱི་མཆོད་པ་བྱ་བའི་ཕྱིར་གཞག་པར་བྱའོ་ཞེས་གསུངས་པ་ཡིན་ནོ། །སངས་རྒྱས་ལ་ལྕགས་ལས་བྱས་པའི་མཆོད་རྟེན་བྱ་བ་ནི་ཆོས་དང་མཐུན་ནོ་ཞེས་
བྱ་བ་ནི་བྱར་རུང་ངོ་ཞེས་བྱ་བའི་ཐ་ཚིག་གོ། །དབུ་སྐྲ་དང་སེན་མོའི་མཆོད་རྟེན་གསེར་དང་དངུལ་དང་བཻ་ཌཱུརྱ་དང་ཤེལ་ལས་བྱས་པ་ཡང་ངོ་ཞེས་བྱ་བ་ཡང་ཆོས་དང་མཐུན་པའོ། །འདིར་གཞུང་ནི་རྣམ་པར་འབྱེད་པ་ལས་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་
ན་བདག་གིས་འཛམ་བུའི་གྲིབ་མ་ལས་བྱུང་བའི་སྐུ་གཟུགས་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་བྱེད་དུ་ཆུག་ཤིག་ཅེས་གསུངས་པ་དང་། སིལ་བུ་དག་ལས་ཀྱང་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་
བ་ན་བདག་གིས་དབུ་སྐྲ་དང་སེན་མོའི་མཆོད་རྟེན་དག་ལ་མཐུན་པའི་འཁོར་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་བྱེད་དུ་ཆུག་ཤིག་ཅེས་བྱ་བ་ལ་སོགས་པ་གསུངས་པ་དང་། གླེང་གཞི་དག་ལས་ཀྱང་གལ་ཏེ་བཅོམ་
ལྡན་འདས་ཀྱིས་རྗེས་སུ་གནང་ན་བདག་གིས་དབུ་སྐྲ་དང་སེན་མོའི་མཆོད་རྟེན་དག་ལ་ཚོན་དང་དཀར་རྩི་སྐུད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་སྐུད་དུ་ཆུག་ཤིག་ཅེས་བྱ་བ་ལ་སོགས་པ་གསུངས་པ་ཡིན་ནོ། །དེ་
ལ་མཐུན་པའི་འཁོར་བྱའོ་ཞེས་བྱ་བ་ནི་སངས་རྒྱས་ཀྱི་མཆོད་རྟེན་དེ་ལ་རི་མོ་དང་བྱུག་པའི་ལས་ལ་སོགས་པས་མཐུན་པའི་འཁོར་བྱ་བའོ། །དགའ་ལྡན་གྱི་གནས་ན་བཞུགས་པ་ལ་སོགས་པ་ནས་ཡོངས་སུ་མྱ་ངན་ལས་འདས་པའི་མཐའི་བར་གྱི་སྤྱོད་པ་ནི་དེ་ཞེས་

བྱའོ་ཞེས་བྱ་བ་ནི། མཐུན་པའི་འཁོར་ཞེས་བྱའོ། །དཀར་རྩིས་དཀར་པོར་བྱའོ་ཞེས་བྱ་བ་ནི་ས་དཀར་པོ་ལ་སོགས་པས་སོ། །མར་མེ་འཛིན་པ་བྱའོ་ཞེས་བྱ་བ་ནི་མར་མེའི་ཕྱིར་ཀོང་བུ་བྱའོ། །ལན་ཀན་གྱིས་བསྐོར་རོ་ཞེས་བྱ་བ་ནི་ཁོ་ར་ཁོར་ཡུག་
ཏུ་བསྐོར་བར་བྱ་བའོ། །རྟ་བབས་བསྒྲེང་བར་བྱའོ་ཞེས་བྱ་བ་ནི་སྒོར་རོ། །རྒྱལ་མཚན་གཟུགས་སོ་ཞེས་བྱ་བ་ནི་མཆོད་རྟེན་གྱི་དྲུང་དུའོ། །དེ་ནི་རྣམ་པ་བཞིའོ་ཞེས་བྱ་བ་ནི་རྒྱལ་མཚན་ནོ། །བཞི་གང་ཞེ་ན་དེའི་ཕྱིར། སེང་གེའི་རྒྱལ་མཚན་དང་ཆུ་སྲིན་གྱི་རྒྱལ་
མཚན་དང་ཀླུའི་རྒྱལ་མཚན་དང་ཁྱུ་མཆོག་གི་རྒྱལ་མཚན་ནོ་ཞེས་བྱ་བ་སྨྲས་སོ། །གཙང་ཁང་གི་མུ་ཁྱུད་བྱའོ་ཞེས་བྱ་བ་ནི་གཙང་ཁང་ཕྱུར་བུའི་ཚར་གྱིས་བསྐོར་བར་བྱའོ། །དེར་རྟ་བབས་བསྒྲེང་བར་བྱའོ་ཞེས་བྱ་བ་ནི། གཙང་ཁང་གི་མུ་ཁྱུད་དེར་རོ། །སྒོ་ཡབ་བྱའོ་
ཞེས་བྱ་བ་ནི། གཙང་ཁང་གི་མུ་ཁྱུད་དེའི་མདུན་དུ་སྒོ་ཡབ་ཀྱི་ཁྱམས་བྱ་བ་སྟེ། སྒོ་དྲུང་དུ་ཁང་པ་བྱའོ་ཞེས་བྱ་བའི་ཐ་ཚིག་གོ། །དེ་ལ་ལན་ཀན་གྱིས་བསྐོར་རོ་ཞེས་བྱ་བ་ནི། སྒོ་གཡབ་དེ་ལའོ། །ཀ་བ་རྣམས་བཙག་གིས་བསྐུའོ་ཞེས་བྱ་བ་ནི་གཙང་
ཁང་ལ་སོགས་པའིའོ། །རྩིག་པ་དག་རྒྱ་སྐྱེགས་ཀྱིས་བྲིའོ་ཞེས་བྱ་བ་ནི་ཁྲ་བོ་ལ་སོགས་པར་བྱུག་པའོ། །དྲིས་དབང་བསྐུར་བ་དབུལ་ལོ་ཞེས་བྱ་བ་ལ་ནི། ཆོས་དང་མཐུན་ན་ཞེས་བྱ་བར་སྦྱར་རོ། །འབྲུ་མར་དང་བ་བླ་དང་ཙནྡན་དང་གུར་གུམ་གྱིས་
ཆག་ཆག་དག་ཀྱང་ངོ་ཞེས་བྱ་བ་ཡང་། དབུལ་བ་ཆོས་དང་མཐུན་ནོ་ཞེས་བྱ་བར་སྦྱར་རོ། །གཟེར་བུ་མི་གདབ་བོ་ཞེས་བྱ་བ་ནི། མཆོད་རྟེན་ལ་གོས་ལ་སོགས་པ་དཔྱང་བའི་ཕྱིར་གཟེར་བུ་གདབ་པར་མི་བྱ་བའོ། །རྩིག་པའི་ཚེ་ཕྲེང་བ་ལ་སོགས་པ་
གདགས་པའི་ཕྱིར་ཟུང་ང་དག་གཞུག་གོ་ཞེས་བྱ་བ་ནི། མཆོད་རྟེན་རྩིག་པའི་ཚེ་ཕྲེང་བ་དང་དར་ལ་སོགས་པ་གདགས་པའི་ཕྱིར་ཟུང་ང་དག་གཞུག་པར་བྱའོ། །མི་དབུག་གོ་ཞེས་བྱ་བ་ནི། མཆོད་རྟེན་ལ་ཟུང་ང་གཞུག་པའི་ཕྱིར་རོ། །སྟེང་དུ་མར་

མེ་མི་གཟུགས་སོ་ཞེས་བྱ་བ་ནི། མཆོད་རྟེན་གྱི་སྟེང་དུ་མར་མེ་གཟུགས་པར་མི་བྱའོ། །མཆོད་པ་བྱ་བའི་ཁྱིམ་པ་དག་འཛེག་ཏུ་གཞུག་གོ་ཞེས་བྱ་བ་ནི་མཆོད་རྟེན་ལའོ། །མེད་ན་དགེ་ཚུལ་དང་དྲི་ཆུས་རྐང་པ་བཀྲུས་ཏེའོ་ཞེས་བྱ་བ་ནི་ཁྱིམ་པ་མེད་ནའོ། །
གལ་ཏེ་དེ་མ་བྱས་ན་དྲི་དག་གིས་དྲིལ་ཕྱི་བྱས་ཏེའམ་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་དུ་བྱས་ནས་དོན་གྱི་བརྣབ་སེམས་ཀྱི་དྲན་པ་དག་གིས་སོ་ཞེས་བྱ་བ་ནི། གལ་ཏེ་དྲི་ཆུས་རྐང་པ་བཀྲུ་བ་དག་མ་བྱས་ན་དེའི་ཕྱིར་དྲི་དག་གིས་རྐང་པ་དྲིལ་ཕྱི་བྱས་
ཏེའམ། ཡང་ན་འབོབ་ལ་སོགས་པའི་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་དུ་བྱས་ནས་དགོས་པའི་དོན་གྱི་བརྣབ་སེམས་ཀྱི་དྲན་པ་དག་གིས་དགེ་ཚུལ་དག་མཆོད་རྟེན་ལ་འཛེག་ཏུ་གཞུག་གོ། །དེ་དག་ཀྱང་མེད་ན་དགེ་སློང་དག་གིས་དེ་བཞིན་དུའོ་ཞེས་
བྱ་བ་ནི། དགེ་ཚུལ་དེ་དག་ཀྱང་མེད་ན་དགེ་སློང་དེ་དག་གིས་དྲི་ཆུས་རྐང་པ་བཀྲུ་བ་ལ་སོགས་པའི་རྣམ་པ་ཇི་སྐད་བཤད་པ་དེ་བཞིན་དུ་བྱས་ཏེ་འཛེག་པར་བྱ་བའོ། །དེའི་ཆེད་དུ་ཐག་པ་གདགས་སོ་ཞེས་བྱ་བ་ནི། འཛེག་པ་དེའི་ཆེད་དུ་ཐག་པ་གདགས་ཤིང་དཔྱང་བར་
བྱའོ། །རིན་པོ་ཆེ་ལས་བྱས་པའི་ཕྲེང་བ་དབུལ་ལོ་ཞེས་བྱ་བ་ནི་མཆོད་རྟེན་ལའོ། །འཇིག་པར་བྱེད་པ་བཟློག་པའི་ཕྱིར་སྦུབས་གཡོགས་ཀྱིས་གཡོགས་སོ་ཞེས་བྱ་བ་ནི། ཆར་པ་ལ་སོགས་པ་མཆོད་རྟེན་འཇིག་པར་བྱེད་པ་བཟློག་པའི་ཕྱིར་ངོས་ནས་སྐྱོར་
བའི་སྦུབས་དང་སྟེང་ནས་གཡོགས་པའི་གཡོགས་མས་གཡོགས་པར་བྱ་བ་སྟེ། སྟེང་དུ་ཁང་པ་དབུབ་པོ་ཞེས་བྱ་བའི་ཐ་ཚིག་གོ། །མུན་པ་མི་ནག་པར་བྱ་བའི་ཕྱིར་དེ་ལ་སྒོ་གདོད་དོ་ཞེས་བྱ་བ་ནི་སྦུབས་གཡོགས་པ་དེ་ལའོ། །སངས་རྒྱས་ཀྱི་སྐུ་གཟུགས་
བྱའོ་ཞེས་བྱ་བ་ནི་ཆོས་དང་མཐུན་པ་ཉིད་ཡིན་པའོ། །དེ་ལ་དུས་སྟོན་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་དེ་ལའོ། །བལྟམས་པ་དང་གཙུག་ཕུད་དང་དབུ་སྐྲ་དང་བྱང་ཆུབ་པའི་དུས་སྟོན་དག་ཀྱང་ངོ་ཞེས་བྱ་བ་ནི་བྱའོ་ཞེས་བྱ་བར་སྦྱར་ཏེ། དུས་

སྟོན་ཞེས་བྱ་བའི་སྒྲ་ནི་བལྟམས་པ་ལ་སོགས་པ་དང་སོ་སོར་སྦྱར་རོ། །དེ་གྲོང་ཁྱེར་དུ་གཤེགས་པར་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་དེའོ། །འདི་ལ་དགེ་སློང་གིས་བསྐུར་དུ་རུང་ངོ་ཞེས་བྱ་བ་ནི། སངས་རྒྱས་ཀྱི་
སྐུ་གཟུགས་གྲོང་ཁྱེར་དུ་གཤེགས་པ་འདི་ལ་ཁྱོགས་ལ་སོགས་པ་དེ་དག་དགེ་སློང་གིས་བཀུར་དུ་རུང་བའོ། །དེ་ནི་གསར་བུ་དག་ལ་དབབ་བོ་ཞེས་བྱ་བ་ནི་བཀུར་བ་དེ་ལའོ། །སྡེ་པ་ལྔ་པོ་དག་གིས་ཞམ་རིང་བྱའོ་ཞེས་བྱ་བ་ནི། དགེ་སློང་ལ་སོགས་པ་དག་གིས་སོ། །
མཆོད་ཡོན་དུ་བྱ་བ་ནི་རྒན་པོ་དག་གིས་གཟུང་ངོ་ཞེས་བྱ་བ་ནི། གོས་དང་རྒྱན་ལ་སོགས་པ་མཆོད་ཡོན་དུ་བྱ་བ་དག་ནི་དགེ་སློང་རྒན་རབས་དག་གིས་གཟུང་བར་བྱའོ། །དེ་ལ་རོལ་མོ་བྱེད་པ་དག་གིས་རོལ་མོ་བྱ་བ་དང་བཀུར་སྟི་ཆེན་པོ་གཞན་ཡང་བཟང་ངོ་ཞེས་བྱ་བ་ནི།
སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤེགས་པར་བྱ་བ་དེ་ལ་རོལ་མོ་མཁན་དག་གིས་གླུ་གླིང་དང་སིལ་སྙན་ལ་སོགས་པ་རོལ་མོ་བྱ་བ་བཟང་ངོ་། །བཀུར་སྟི་ཆེན་པོ་གཞན་ཡང་བཟང་ངོ་ཞེས་བྱ་བ་ནི། དེ་ལ་ལྷའི་གཟུགས་བྱས་པ་དག་གིས་མེ་ཏོག་དག་འཐོར་བ་དང་།
གོས་དག་འཐོར་བ་དང་། རྒྱན་དག་འཐོར་བ་དང་། ལྷའི་བུ་དག་བསིལ་ཡབ་དག་གིས་གཡོབ་པ་དང་། ལྷའི་བུ་མོ་དག་གར་བྱེད་པ་དང་། དྲི་ཟ་དག་སིལ་སྙན་བྱེད་པ་དང་། གྲུལ་བུམ་དག་སྟོད་པར་བྱེད་པ་དང་། མིའམ་ཅི་དག་གླུ་ལེན་པ་དང་།
ཀླུ་དག་ཆག་ཆག་འདེབས་པ་དང་། བར་བར་དུ་མེ་ཏོག་གི་ཁང་པ་དང་། དྲི་གཙང་ཁང་དག་བྱ་བ་ལ་སོགས་པ་དག་བཟང་བའོ། །རོལ་མོ་བྱེད་དུ་གཞུག་པའི་ཕྱིར་ཀྱེ་མི་དག་སྟོན་པ་ལ་མཆོད་པ་དག་གྱིས་ཤིག་ཅེས་བརྗོད་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། རྔ་བོ་ཆེ་
དང་རྔ་པ་ཊ་ཧ་ལ་སོགས་པ་དག་བརྡུང་ཞིང་རོལ་མོ་བྱེད་དུ་གཞུག་པའི་ཕྱིར་རྔ་མཁན་ལ་སོགས་པ་དག་ལ་ཀྱེ་མི་དག་སྟོན་པ་ལ་མཆོད་པ་དག་གྱིས་ཤིག་ཅེས་བརྗོད་པ་ལ་ཁ་ན་མ་ཐོ་བ་མེད་པའོ། །ལམ་པོ་ཆེ་དང་ལམ་སྲང་དང་བཞི་མདོ་དང་སུམ་མདོ་དག་ཏུ་སོང་ངམ་གནང་འབྱུང་

བར་འགྱུར་བ་ཉིད་ན་ཡི་གེར་བྲིས་པ་བསྒྲག་པར་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤེགས་པའི་ཞག་གཅིག་གམ་གཉིས་ཀྱིས་མདུན་རོལ་དུའོ། །ཇི་ལྟར་ཡི་གེར་བྲིས་པ་ཞེ་ན་དེའི་ཕྱིར། དེ་ལྟར་ན་སངས་རྒྱས་གཤེགས་པར་འགྱུར་ཞེས་གྲོ་ག་ལ་སོགས་
པ་ལ་བྲིས་པ་གླང་པོ་ཆེའི་བཤུལ་སྟེང་དུ་གདུགས་དང་རྒྱལ་མཚན་དང་བ་དན་ལ་སོགས་པས་ཡོངས་སུ་བསྐོར་བར་བྱའོ་ཞེས་བྱ་བ་སྨྲས་ཏེ། དེ་ལྟར་ཡི་གེར་བྲིས་པ་བསྒྲག་པར་བྱའོ། །ཇི་དེ་ལྟར་ཞེས་བྱ་བ་ནི། སང་ངམ་གནང་སངས་རྒྱས་གཤེགས་པར་འགྱུར་རོ་ཞེས་
སྨོས་པ་ལ་བསྙེགས་སོ། །བྱང་ཆུབ་སེམས་དཔའི་སྐུ་གཟུགས་བྱ་བ་ཆོས་དང་ལྡན་ནོ་ཞེས་བྱ་བ་ནི་བྱང་ཆུབ་སེམས་དཔའི་སྐུ་གཟུགས་བྱར་རུང་བའོ། །དེ་རྒྱལ་མཚན་དག་གིས་བསྐོར་རོ་ཞེས་བྱ་བ་ནི་བྱང་ཆུབ་སེམས་དཔའི་སྐུ་གཟུགས་དེའོ། །ལན་ཀན་གྱིས་བསྐོར་རོ་ཞེས་
བྱ་བ་ཡང་དེའོ། །ལྕགས་ཀྱི་ཀ་བ་དག་གིས་ཀྱང་ངོ་ཞེས་བྱ་བ་ཡང་བསྐོར་རོ་ཞེས་བྱ་བར་སྦྱར་རོ། །དེ་དག་ལ་བ་དན་གདགས་སོ་ཞེས་བྱ་བ་ནི། ལྕགས་ཀྱི་ཀ་བ་དེ་དག་ལའོ། །རྗེས་སུ་འགྲོ་བ་བྱའོ་ཞེས་བྱ་བ་ལ་འདིར་རྗེས་སུ་འགྲོ་བ་ཞེས་བྱ་བ་ནི། སྔར་མཐུན་པའི་འཁོར་ཞེས་སྨོས་པ་
ཉིད་ནི་ཡིན་པར་རིག་པར་བྱའོ། །རྐང་རྒྱན་དང་རྣ་རྒྱན་མ་གཏོགས་པའི་རྒྱན་གདགས་སོ་ཞེས་བྱ་བ་ནི། དེ་གཉིས་མ་གཏོགས་པའི་རྒྱན་གདུ་བུ་ཅན་དང་དཔུང་རྒྱན་ལ་སོགས་པ་རྒྱན་ལྷག་མ་དག་གདགས་པར་བྱ་བའོ། །སྤོས་ཀྱི་ལུས་སྦྱིན་བྱའོ་ཞེས་བྱ་བ་ནི་དྲི་ལས་བྱས་
པའི་འདབ་མ་དང་། མྱུ་གུ་དང་འཁྲི་ཤིང་དང་མེ་ཏོག་ལ་སོགས་པ་ལུས་ལ་གཞག་པར་བྱ་བ་ནི་སྤོས་ཀྱི་ལུས་སྦྱིན་ཞེས་བྱའོ། །ཁྱོགས་ཀྱིས་བསྐུར་རོ་ཞེས་བྱ་བ་ནི། སྐུ་གཟུགས་དག་གོ། །ཤིང་རྟས་ཀྱང་ངོ་ཞེས་བྱ་བ་ཡང་བསྐུར་རོ་ཞེས་བྱ་བར་སྦྱར་རོ། །དེ་ལ་
གདུགས་དང་རྒྱལ་མཚན་དང་བ་དན་དག་བསྒྲེང་ངོ་ཞེས་བྱ་བ་ནི་ཁྱོགས་དང་ཤིང་རྟ་དེ་ལའོ། །དབུ་ལ་མེ་ཏོག་རྣ་རྒྱན་གདགས་སོ་ཞེས་བྱ་བ་ནི། བྱང་ཆུབ་སེམས་དཔའི་སྐུ་གཟུགས་ཀྱི་དབུ་ལ་མེ་ཏོག་གི་ཐོད་བཅིང་བར་བྱའོ། །མཆོད་ཡོན་དང་ཞབས་

ལ་གསོལ་བ་དག་ཀྱང་ངོ་ཞེས་བྱ་བ་ནི། དེ་ལ་དབུལ་བ་ཆོས་དང་མཐུན་པའོ། །དད་རྫས་ནི་གནས་པ་དང་གཞོན་ནུ་དང་རྒན་པོ་དག་གིས་ཀྱང་བླང་ངོ་ཞེས་བྱ་བ་ལ། འདིར་དད་རྫས་ཞེས་བྱ་བ་ནི་ཡོངས་སུ་ཚིམ་པས་ཕུལ་བའི་རྫས་སོ། །
གནས་བརྟན་རྣམས་ཀྱིས་བསྲུང་ངོ་ཞེས་བྱ་བ་ནི་དད་རྫས་སོ། །ལམ་པོ་ཆེར་ཕྲེང་བའི་ཟ་མ་ཏོག་ཅེས་བྱའོ་ཞེས་བྱ་བ་ནི་མཆོད་ཡོན་དང་། ཞབས་ལ་གསོལ་བ་དང་། མེ་ཏོག་དང་། གོས་ལ་སོགས་པ་གཏོར་བ་དག་ས་ལ་མི་འབབ་པར་བྱ་བའི་ཕྱིར། དེ་
དག་གི་ལམ་སྲོལ་དུ་ཕྲེང་བའི་ཟ་མ་ཏོག་གཞག་པར་བྱའོ། །ཕྲེང་བའི་ཟ་མ་ཏོག་ཏུ་དྲིའི་ཟ་མ་ཏོག་གཞུག་གོ་ཞེས་བྱ་བ་ནི། ཕྲེང་བའི་ཟ་མ་ཏོག་གི་ནང་དུ་དྲིའི་ཟ་མ་ཏོག་གཞག་པར་བྱ་བའོ། །ཕྲེང་བ་གདགས་སོ་ཞེས་བྱ་བ་ནི། བྱང་ཆུབ་སེམས་དཔའི་སྐུ་
གཟུགས་ལའོ། །མཆོད་པ་རྫོགས་ཤིང་རོལ་མོ་བརྟུལ་བ་དག་ན་སྐྱེ་བོའི་ཚོགས་ཕྱིར་དོང་བའི་ཚེ་རྒྱན་བརྟུལ་ལོ་ཞེས་བྱ་བ་ནི། དེའི་ཚེ་སྐུ་གཟུགས་ལ་སོགས་པའི་རྒྱན་བརྟུལ་བར་བྱའོ། །གང་གི་ཚེ་ཞེ་ན། དེའི་ཕྱིར་མཚན་མོའོ་ཞེས་བྱ་བ་སྨྲས་ཏེ། ཉིན་མོ་
ནི་ཕྱིར་དང་དུ་ཟིན་ཀྱང་ཡང་ཕྱིར་འོང་བ་དང་། དང་པོ་ནས་མི་འདོང་བ་ཡང་སྲིད་པས་དེའི་ཕྱིར་ཉིན་མོ་རྒྱན་བརྟུལ་བར་མི་བྱ་བའོ། །བྱང་ཆུབ་སེམས་དཔའ་འབའ་ཞིག་ལ་དེ་ལྟར་བྱ་བར་མ་ཟད་ཀྱི། མཆོད་པ་ཐམས་ཅད་ལ་ཆོ་ག་དེ་ལྟར་བྱ་བར་རིག་པར་བྱའོ། །ཤི་བའི་
སྐབས་མཆོད་རྟེན་བྱ་བ་ལ་སོགས་པ་འདྲ་བ་དང་བཅས་པ་བཤད་ཟིན་ཏོ།། །།ད་ནི་སྐབས་སྔ་མའི་མཐར་བྱ་བ་བརྗོད་པར་བྱ་སྟེ། རབ་ཏུ་བྱུང་བའི་གནས་སུ་དུས་སྟོན་བྱ་བ་ཆོས་དང་མཐུན་ནོ་ཞེས་བྱ་བ་ནི། གང་ཟག་གི་གཙུག་ལག་ཁང་དུ་དུས་སྟོན་བྱར་རུང་
བ་སྟེ། དེ་ནི་ཁང་པའི་དུས་སྟོན་ཞེས་བྱའོ། །འདུལ་བ་རྒྱ་ཆེར་བསྟན་པ་བཤད་ཟིན་ཏོ།། །།ད་ནི་འདུལ་བ་མདོར་བསྡུ་བ་བརྗོད་པར་བྱ་སྟེ། མི་རུང་བ་དང་མཐུན་པ་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ་ཞེས་བྱ་བ་ནི། གང་རུང་བ་མ་ཡིན་པ་བསྟན་ཅིང་

རུང་བ་དང་འགལ་བ་དེ་ན་རུང་བ་མ་ཡིན་པ་སྟེ། དེ་ནི་འདིར་རུང་བ་མ་ཡིན་པར་མདོར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ་ཞེས་བྱ་བ་ལ་ཕྱི་མ་ཞེས་བྱ་བ་ནི་རུང་བ་སྟེ་དེ་དང་མཐུན་པ་ལ། སྔ་མ་ཞེས་བྱ་བ་ནི་མི་རུང་བ་སྟེ་དེ་དང་འགལ་བ་ནི་རུང་བ་སྟེ། དེ་
ནི་འདིར་རུང་བར་མདོར་བསྡུའོ། །དཔེར་ན་ཁྲིའུ་རྐང་པ་བྲིས་པ་བཅང་བར་མི་བྱ་བ་ཉིད་དང་ཉལ་བ་དང་། འགྲོ་བས་བཤང་བ་དང་གཅི་བ་དག་མི་བྱ་བ་ཉིད་དང་། ཉལ་བ་དང་འགྲོ་བས་ཟས་བཟའ་བར་མི་བྱ་བ་ཉིད་ཅེས་བྱ་བ་ལ་སོགས་པ་དག་ནི་དགག་པའི་རྣམ་པ་ཡིན་ལ། ཚྭ་དང་བསྲེས་པའི་རྒུན་ཆུ་བཏུང་བར་
བྱ་བ་ཉིད་དང་། ཁམ་ཕོར་དག་ཏུ་ཟས་བཟའ་བར་བྱ་བ་ཉིད་ཅེས་བྱ་བ་ལ་སོགས་པ་དག་ནི་རྗེས་སུ་གནང་བའི་རྣམ་པ་ཡིན་ཏེ། དེ་དག་ཐམས་ཅད་འདིས་བསྟན་པ་ཉིད་ཡིན་ནོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་མ་བཀག་ལ་མི་རུང་བ་ཡང་བསྟེན་པ་གང་ཡིན་པ་
དེ་ནི་འདིས་བཀག་པར་རིག་པར་བྱའོ། །རྗེས་སུ་མ་གནང་ལ་རུང་བ་ཡང་བསྟེན་པ་གང་ཡིན་པ་དེ་ནི་འདིས་རྗེས་སུ་གནང་བར་རིག་པར་བྱའོ། །གནས་མལ་གྱི་གཞི་ཕྲན་ཚེགས་ལ་སོགས་པའི་སྐབས་སོ་ཞེས་བྱ་བ་དེ་ཕྲན་ཚེགས་ལ་སོགས་པའི་སྐབས་ནས་འབྱུང་བ་
བཤད་ཟིན་ཏོ། །གནས་མལ་གྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ། །འདུལ་བའི་མདོ་རྣམས་རྫོགས་སོ།། །།གང་དག་དུལ་ཞིང་བསླབ་འདོད་པ། །འདུལ་འཛིན་དེ་ལ་གཞོལ་བ་དག །དེ་དག་བདེ་བར་གནས་བྱའི་ཕྱིར། །རུས་ལྤགས་
ལྷག་མ་ལུས་གྱུར་ཅིང་། །མི་བཟད་ནད་ཀྱིས་ཟིན་པའི་ལུས། །སྲོག་ནི་མགྲིན་པར་ཕྱིན་འདྲ་ཞིང་། །སངས་རྒྱས་ཚུལ་ཁྲིམས་མངོན་འདོད་པ། །སློབ་དཔོན་ཆོས་ཀྱི་བཤེས་གཉེན་གྱིས། །འདུལ་མདོ་རྒྱ་ཆེར་འགྲེལ་པ་འདི། །དེ་ལྟར་བདག་གིས་
སྦྱར་བྱས་པས། །ལན་ཅིག་མ་ཡིན་དེ་བཞིན་དུ། །ཚུལ་ཡོན་བཞིན་ལ་བདག་སྤྱོད་ཤོག །དཔལ་ལྡན་ཡུལ་མཆོག་ཏར་མི་ཏ་ཞེས་བྱ། །དམ་པས་བསྔགས་པ་དེ་ན་མཁས་པ་གནས། །པཀྵུ་ཞེས་བྱ་ཆུ་ཀླུང་འགྲམ་དུ་ནི། །འབྱོར་རྒྱས་གྲགས་མཆོག་གྲོང་ཁྱེར་འགྲུབ་པར་

འགྱུར། །དཔལ་ལྡན་གནས་མཆོག་གྲོང་ཁྱེར་དེ་ཉིད་དུ། །ཁ་ན་མ་ཐོ་མེད་པའི་རིགས་མཆོག་སྐྱེས། །དེ་ནི་ལོ་བརྒྱད་བསམ་པ་རྣམ་དག་པས། །ཁྱིམ་གྱི་འབྱོར་པ་དག་ལའང་ཆགས་པ་མེད། །སྐྱེ་བ་གཞན་ནས་གོམས་པས་རྟོག་ལྡན་ཞིང་། དཀོན་མཆོག་གསུམ་
ལ་བརྟེན་པས་སེམས་དབེན་གྱུར། །བསླབ་པའི་རྟེན་ལྡན་ཚུལ་ལ་ཉེར་སྤྱད་ཅིང་། །དམ་པའི་བསྟན་ལ་བརྟེན་པས་འདི་རྣམས་ཕྱེད། །སངས་རྒྱས་བྱམས་པ་ཉི་མ་ནི། །རྡོ་རྗེ་མཆོག་གི་གདན་སྤོ་ལ། །ཇི་སྲིད་རྫོགས་སངས་མ་ཤར་བ། །དེ་སྲིད་ས་སྟེང་འདི་གནས་ཤོག། །།འདུལ་
བའི་མདོ་རྒྱ་ཆེར་འགྲེལ་པ་རྫོགས་སོ། །འདུལ་བའི་མདོ་ཞེས་བྱ་བ་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་པ་འདུལ་བ་རྒྱ་མཚོའི་སྙིང་པོ་མདོར་བསྡུས་པ། ལྷག་པའི་ཚུལ་ཁྲིམས་ཀྱི་བསླབ་པ་མཐའ་དག་གི་མཛོད་དུ་གྱུར་པ། འདུལ་བའི་སྡེ་སྣོད་ཐམས་ཅད་ཀྱི་མ་ལྟ་བུ་
འདི་ནི་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ་བྲམ་ཟེའི་སློབ་དཔོན་བཙུན་པ་ཡོན་ཏན་འོད། བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་དུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་སྙིང་ཁུས་ཤེས་རབ་ཀྱི་དབང་
པོ་རྒྱས་པ། དེ་བཞིན་གཤེགས་པའི་བཀའ་དམ་པ་ནན་ཏན་གྱི་སྙིང་པོར་སྒྲུབ་པས། སྡེ་པ་ཐམས་ཅད་ཀྱི་འདུལ་བའི་སྡེ་སྣོད་མཐའ་དག་གི་གཙོ་བོར་གྱུར་པ། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་ཀུན་ལས་བཏུས་པའི་རྒྱ་ཆེར་འགྲེལ་པ་འདི་ནི་འཕགས་
པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ། །ཐོ་གར་གྱི་བྱེ་བྲག་ཏུ་སྨྲ་བའི་སློབ་དཔོན་དྷརྨ་མི་ཏྲས་མཛད་པ་དབང་ཕྱུག་དམ་པའི་མངའ་བདག་དཔལ་ལྷ་བཙན་པོའི་བཀའ་ལུང་གིས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་
འཛིན་པ་ཆེན་པོ་ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང་། ཞུ་ཆེན་གྱི་ལོ་ཙཱ་བ་བནྡེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། འདི་ལ་ཤློ་ཀ་ནི་ཉི་ཁྲི་ཆིག་སྟོང་ཡོད། བམ་པོ་ནི་བདུན་ཅུར་བྱས་སོ།། །།