Luận tạng Tây Tạng (Tengyur) — Tập 163

་བྱས་པའི་མཚན་མ་དང་སྒྱུ་མས་བྱས་པའི་མཚན་མ་དག་ཀྱང་ཐ་སྙད་དུ་བྱ་བར་གྱུར་པའི་མཚན་མ་ཉིད་མ་ཡིན་ནོ། །ཟླ་བ་དང་ཉི་མ་དང་སྐར་མའི་
འོད་དང་དབའ་ཀློང་གི་རླབས་དག་ཀྱང་མི་བརྟན་པ་ཉིད་ཡིན་ནོ་ཞེས་བྱ་བ་ནི། ཟླ་བ་དང་། ཉི་མ་དང་། སྐར་མ་དག་གི་འོད་གང་ཡིན་པ་དེ་དག་ཀྱང་མཚན་མ་ཉིད་མ་ཡིན་ཏེ་མི་བརྟན་པའི་ཕྱིར་རོ། །དེ་བཞིན་དུ་དབའ་ཀློང་གི་རླབས་འགྲམ་དུ་བྱུང་བ་དག་ཀྱང་མཚན་མ་ཉིད་མ་ཡིན་ཏེ། མི་བརྟན་པ་
ཉིད་ཀྱི་ཕྱིར་རོ། །མཚམས་སུ་ཆུ་ནི་མཚམས་གཞན་དང་འདྲའོ་ཞེས་བྱ་བ་ནི། མཚམས་ཀྱི་ནང་དུ་ཆུས་ཆོད་ན་མཚམས་གཞན་དང་འདྲ་བར་མཚམས་ཐ་དད་པ་ཉིད་ཡིན་ཏེ། ཆུ་ནི་གནས་མ་ཡིན་པའི་ཕྱིར་རོ། །མཚམས་བཅད་པའི་ནང་དུ་ཇི་སྲིད་དུ་ཆུས་ཆོད་པ་དེ་སྲིད་དུ་མཚམས་ཀྱི་ཡུལ་མ་
ཡིན་ལ། ཆུ་ཆད་ན་ནི་སྔར་མཚམས་བཅད་པ་ཉིད་སྔ་མ་ཁོ་ན་བཞིན་དུ་མཚམས་ཉིད་དུ་རུང་བར་འགྱུར་རོ། །བར་དུ་ཆོད་ན་གཅིག་པ་ཉིད་མ་ཡིན་ནོ་ཞེས་བྱ་བ་ནི། མཚམས་གཅིག་པ་ཉིད་ཀྱི་ནང་དུ་ཆུ་ལ་སོགས་པས་བར་དུ་ཆོད་ན་གལ་ཏེ་ཕྱོགས་འགའ་ཡང་འབྲེལ་པ་མེད་ན་མཚམས་གཅིག་པ་ཉིད་མ་
ཡིན་ཏེ། དེས་ན་མི་མཐུན་པར་འགྱུར་བ་མེད་དོ། །ཕྱོགས་གཅིག་གིས་ཕྱོགས་མ་འབྲེལ་བའི་མཚམས་དུས་གཅིག་ཏུ་གཅད་དུ་མི་རུང་ངོ་། །གལ་ཏེ་ཟམ་པ་བརྟན་པ་ཡིན་ན་ཡུལ་ཉིད་ཡིན་ནོ་ཞེས་བྱ་བ་ནི། གལ་ཏེ་ཟམ་པ་ཆུས་མི་ཁྱེར་བ་བརྟན་པ་ཡོད་ན་དེས་འབྲེལ་པའི་ཕ་རོལ་གྱི་ཕྱོགས་གང་ཡིན་པ་དེ་

ཡང་མཚམས་བཅད་པའི་ནང་དུ་གཏོགས་ན་མཚམས་གཅིག་པའི་ཡུལ་ཉིད་ཡིན་པའོ། །འདིར་གཞུང་ནི་བཙུན་པ་ཆབ་ཀྱི་མཚམས་ལས་འདའ་བར་རུང་ངམ་ཉེ་བ་འཁོར་མི་རུང་ངོ་། །གལ་ཏེ་ཟམ་པ་བརྟན་པོ་ཡོད་ན་ནི་རུང་ངོ་ཞེས་གསུངས་པ་ཡིན་ནོ། །དེ་ཞིག་པ་ཡང་
ཕྱིར་བྱས་ན་ནི་རྗེས་སུ་འཇུག་གོ་ཞེས་བྱ་བ་ནི། ཟམ་པ་དེ་ཞིག་པ་ཡང་ཕྱིར་བྱས་ན་ནི། མཚམས་ཀྱི་རྗེས་སུ་འཇུག་པ་སྟེ། ཆུས་ཆོད་པའི་ཕྱོགས་གཉི་ག་མཚམས་གཅིག་གི་ཁོངས་སུ་གཏོགས་པར་འགྱུར་རོ་ཞེས་བྱ་བའི་ཐ་ཚིག་གོ། །ཇི་ལྟ་བུ་ཞིག་ཡང་ཕྱིར་བྱས་ན་ཞེ་ན་དེའི་ཕྱིར་སྦྱོར་བ་མ་བཏང་
བ་ཉིད་དོ་ཞེས་བྱ་བ་སྨྲས་ཏེ། ཡང་ཕྱིར་བྱ་བ་གང་ལ་སྦྱོར་བ་བཏང་བ་མེད་པ་གང་ཡིན་པ་དེ་ནི་སྦྱོར་བ་མ་བཏང་བ་ཉིད་ཡིན་ཏེ། ཟམ་པ་ཞིག་ནས་ཡང་ཕྱིར་བྱ་བའི་སྦྱོར་བ་མ་བཏང་བ་ཉིད་གང་ཡིན་པ་དེ་ཡང་ཕྱིས་བྱས་ན། དེའི་ཚེ་མཚམས་ཉིད་རྗེས་སུ་འཇུག་གོ། །དུས་ཇི་སྲིད་དུ་སྦྱོར་བ་མ་བཏང་བ་ཉིད་
ཡང་ཕྱིར་བྱས་ན་རྗེས་སུ་འཇུག་ཅེ་ན། དེའི་ཕྱིར་ཞག་བདུན་ཕན་ཆད་ནི་མི་འཇུག་གོ་ཞེས་བྱ་བ་སྨྲས་ཏེ། ཞག་བདུན་ཚུན་ཆད་ཀྱི་བར་དུ་ཡང་ཕྱིར་བྱ་བའི་སྦྱོར་བ་མ་བཏང་བ་ཉིད་ལས་ཕྱིར་བྱས་ན་ནི་རྗེས་སུ་འཇུག་གི །ཞག་བདུན་དུ་སྦྱོར་བ་བཏང་ནས་ཕྱིས་ཡང་ཕྱིར་བྱས་ན་ཡང་རྗེས་སུ་འཇུག་པ་མེད་དེ།
འདི་ལྟར་ཡུན་རིང་དུ་བཏང་བ་ཉིད་ཀྱི་ཕྱིར་རོ། །སྦྱོར་བ་གཏོང་བ་མ་བྱས་ན་ནི་ཞག་བདུན་ཕན་ཆད་དུ་ཕྱིར་བྱས་ན་ཡང་རྗེས་སུ་འཇུག་པར་འགྱུར་རོ། །ནམ་མཁའ་ནི་བར་དུ་ཆོད་པར་གྱུར་པ་ཡིན་པས་དེ་ལ་ཡོད་པ་ཉིད་ཀྱི་ཐ་སྙད་ཀྱང་མེད་ན་འབྲེལ་པ་ལྟ་ག་ལ་ཡོད་ཅེས་བྱ་བ་ལ། འདིར་ནམ་མཁའ་
ཞེས་བྱ་བའི་སྒྲས་ནི་ནམ་མཁའི་ཁམས་བརྗོད་དེ། ནམ་མཁའ་ནི་བར་དུ་ཆད་པར་གྱུར་པ་ཐ་དད་པ་ཡིན་པས། ཆུ་བཞིན་དུ་མཚམས་གཞན་ཡིན་ཏེ། འདི་ལྟར་ནམ་མཁའ་དེ་ལ་ཡོད་པ་ཉིད་ཀྱི་ཐ་སྙད་ཀྱང་མེད་ན། ས་ལ་སོགས་པ་དང་ལྷན་ཅིག་འབྲེལ་པ་ལྟ་ག་ལ་ཡོད། དེ་བས་ན་གནས་ཁང་གི་ནང་ན་
འདུག་པའི་ནམ་མཁའ་ཡང་གནས་ཁང་དང་ལྷན་ཅིག་འབྲེལ་པ་མེད་དེ། མཚམས་གཅིག་པ་ཉིད་ཀྱང་མ་ཡིན་ནོ། །འདིར་གཞུང་ནི་བཙུན་པ་ནམ་མཁའ་ལ་མཆིས་པ་དག་དང་། དོགས་ལ་མཆིས་པ་དག་ལྷན་ཅིག་ལས་བགྱིར་རུང་ངམ། ཉེ་བ་འཁོར་མི་རུང་ངོ་། །བཙུན་པ་ནམ་མཁའ་ལ་མཆིས་

པ་དག་དང་། ཤིང་ལྗོན་པ་ལ་མཆིས་པ་དག་ལྷན་ཅིག་ལས་བགྱིར་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །དབུས་ནས་དཔག་ཚད་ཕྱེད་དང་གསུམ་གྱི་མཐའ་ལས་ལྷག་པར་མཚམས་བཅད་པ་མི་འཆགས་སོ་ཞེས་བྱ་བ་ནི། དབུས་ནས་བརྩམས་ཏེ་དཔག་ཚད་ཕྱེད་དང་གསུམ་གྱི་མཐའ་
ཚུན་ཆད་དུ་མཚམས་བཅད་པ་འཆགས་ཀྱི། དེ་ཕན་ཆད་དེ་ལས་ལྷག་པར་མཚམས་གཅད་པ་མི་འཆགས་སོ། །འདིར་གཞུང་ནི་བཙུན་པ་མཚམས་ཆེན་པོའི་ཚད་ཇི་ཙམ་ལགས། ཉེ་བ་འཁོར་དཔག་ཚད་ཕྱེད་དང་གསུམ་མོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་མཚམས་སུ་རུང་ངམ། ཉེ་བ་
འཁོར་མི་རུང་ངོ་ཞེས་གསུངས་པ་ཡིན་ནོ། །འོག་དང་སྟེང་དུ་སྲ་བ་དང་འབྲེལ་པ་ལ་དེ་ཚུན་ཆད་གཞི་དང་འདྲ་བ་ཉིད་དོ་ཞེས་བྱ་བ་ནི། མཚམས་ཀྱི་འོག་དང་སྟེང་གི་ཕྱོགས་སུ་ས་དང་རྡོ་དང་རྩིག་པ་དང་། ཤིང་ལྗོན་པ་དང་ཤིང་ལ་སོགས་པའི་རྫས་སྲ་བ་དང་འབྲེལ་པ་ལ་ནི་དཔག་ཚད་ཕྱེད་དང་གསུམ་གྱི་མཐའ་
ཡན་ཆད་དང་མན་ཆད་ས་གཞི་དང་འདྲ་བ་ཉིད་དུ་མཚམས་ཀྱི་ཁོངས་སུ་གཏོགས་པ་ཉིད་ཡིན་ནོ། །འདི་སྐད་བསྟན་ཏེ་མཚམས་ཀྱི་མཐའ་དཔག་ཚད་ཕྱེད་དང་གསུམ་དུ་བསྟན་པ་དེ་ལ་ཕྱོགས་བཞིར་ཐད་ཀར་ས་གཞི་དང་འབྲེལ་པའི་རྫས་ཆུ་མ་གཏོགས་པ་རྩྭ་དང་ཤིང་ལྗོན་པ་དང་རྩིག་པ་དང་ཤིང་ལ་སོགས་པ་སྲ་བ་
དཔག་ཚད་ཕྱེད་དང་གསུམ་ཚུན་ཆད་མཚམས་ཀྱི་ཁོངས་སུ་གཏོགས་པར་མ་ཟད་ཀྱི། སྟེང་དང་འོག་གི་ཕྱོགས་སུ་ཡང་དེ་དང་འདྲ་སྟེ། དེའི་ཕྱིར་འོག་གི་ཕྱོགས་སུ་ཡང་སྲ་བ་དང་འབྲེལ་བའི་ཕྱོགས་དང་། སྟེང་གི་ཕྱོགས་སུ་ཡང་རིའི་རྩེ་མོ་ལ་སོགས་པ་སྲ་བ་དང་འབྲེལ་པ་ཆུ་དང་ནམ་མཁས་བར་དུ་མཆོད་པ་
དཔག་ཚད་ཕྱེད་དང་གསུམ་ཡན་ཆད་དང་མན་ཆད་མཚམས་ཀྱི་ཁོངས་སུ་གཏོགས་པ་ཡིན་པས། དེའི་ནང་དུ་དགེ་སློང་གཞན་འདུག་པར་ཤེས་བཞིན་དུ་འདུན་པ་ལ་སོགས་པ་མ་བླངས་པར་ལས་བྱེད་ན་མི་མཐུན་པ་ཉིད་དུ་འགྱུར་རོ། །བསྙེན་པར་མ་རྫོགས་པ་འདུག་ན་ནི་ལས་བརྗོད་པ་དེ་དག་གིས་མི་
ཐོས་པར་བྱ་བར་ཟད་ཀྱི། དེ་དག་ལས་མི་མཐུན་པའི་ཉེས་པར་འགྱུར་བ་ནི་མེད་དོ། །བླ་འོག་གི་ཚད་ཇི་སྐད་བསྟན་པ་དེ་ནི་མཚམས་ཆེན་པོའི་དབང་དུ་བྱས་ཏེ་རྣམ་པར་གཞག་པ་ཡིན་གྱི་མཚམས་ཆུང་ངུ་གཞན་ལ་ནི་དབུས་ནས་ཕྱོགས་བཞིར་ཐ་གྲུའི་རྒྱ་ཇི་ཙམ་ཡོད་པ་བླ་འོག་ཏུ་ཡང་དེ་ཙམ་མན་ཆད་དང་

ཡན་ཆད་ས་གཞི་དང་འདྲ་བ་མཚམས་ཀྱི་ཁོངས་སུ་གཏོགས་པ་ཉིད་ཡིན་ནོ། །དེ་ལྟར་གྱུར་ན་དཀྱིལ་འཁོར་པ་ལ་ནི་དབུས་ནས་ཕྱོགས་བཞིར་ས་གཞི་དང་འབྲེལ་པའི་ཚད་ཇི་ཙམ་ཡོད་པ་དེ་ཙམ་ཡན་ཆད་དང་མན་ཆད་དང་རྫས་སྲ་བ་དང་འབྲེལ་བ་མཚམས་དེའི་ཁོངས་སུ་གཏོགས་པ་ཡིན་གྱི། དེ་ལས་ལྷག་
པ་ནི་རྫས་སྲ་བ་དང་འབྲེལ་པ་ཡོད་དུ་ཟིན་ཀྱང་མཚམས་དེའི་ཁོངས་སུ་མ་གཏོགས་སོ། །ས་གཞི་མཚམས་མ་བཅད་པ་དེ་ཉིད་དུ་ནི་མི་འབྲལ་བའི་གནང་བ་མི་འཆགས་སོ་ཞེས་བྱ་བ་ནི། ས་གཞི་གང་དུ་མཚམས་མ་བཅད་པ་ཉིད་ཀྱིས་ས་གཞི་དེ་ནི་ཆོས་གོས་དང་མི་འབྲལ་བའི་གནང་བ་མི་འཆགས་སོ། །
མི་འབྲལ་བའི་གནང་བའི་ཡུལ་ནི་ལས་གདགས་པས་རྣམ་པར་གཞག་པའི་གནས་ཡིན་གྱི། ངོ་བོ་ཉིད་ལས་བྱུང་བ་ནི་མ་ཡིན་ནོ། །འདིར་གཞུང་ནི་བཙུན་པ་རེ་ཞིག་གྲོང་དང་ལྷན་ཅིག་གཙུག་ལག་ཁང་དང་འབྲེལ་བའི་མཚམས་མཆིས་ན་གང་ཚུན་ཆད་དུ་ཆོས་གོས་དག་དང་མི་འབྲལ་བར་འཚལ་བར་
བགྱི། གྲོང་གི་ཉེན་ཀོར་མ་གཏོགས་པ་ཚུན་ཆད་དུའོ་ཞེས་གསུངས་པ་ཡིན་ནོ། །གྲོང་གི་ཉེན་ཀོར་མ་གཏོགས་པ་ཞེས་གསུངས་པའི་ཚིག་དེ་ཉིད་ཀྱིས་གང་ན་མཚམས་གཅད་པ་མེད་པར་དེར་མི་འབྲལ་བའི་གནང་བ་མེད་པ་དེ་བསྟན་པ་ཡིན་ཏེ། མཚམས་མ་བཅད་པའི་ཕྱོགས་ནི་མཚམས་ཀྱི་ཕྱི་རོལ་ཡིན་
པས། མཚམས་ཀྱི་ཕྱི་རོལ་དུ་ནི་འབྲལ་བར་འགྱུར་བའི་ཕྱིར་རོ། །བཅད་པ་ཞིག་ན་ཞིག་གོ་ཞེས་བྱ་བ་ནི། མཚམས་བཅད་པ་ལས་ཀྱིས་བཀྲོལ་བས་སམ། དེ་མི་གནས་པ་ཉིད་ཀྱིས་ཞིག་ན་ཆོས་གོས་དང་མི་འབྲལ་བའི་གནང་བ་ཐོབ་པ་ཡང་ཞིག་གོ་ཞེས་བྱ་བའི་ཐ་ཚིག་གོ། །དེས་ནི་དེ་མི་ཞིག་
གོ་ཞེས་བྱ་བ་ནི། མི་འབྲལ་བའི་གནང་བ་ཞིག་པ་དེས་ནི་མཚམས་བཅད་པ་དེ་མི་ཞིག་པ་སྟེ། མཚམས་གཅད་པ་ནི་གནས་ཡིན་ལ་མི་འབྲལ་བའི་གནང་བ་ཐོབ་པ་ནི་གནས་པ་ཡིན་པས། གནས་ཞིག་ན་ནི་གནས་པ་ཡང་འཇིག་པར་རིགས་ཀྱི་གནས་པ་ཞིག་པས་ནི་གནས་འཇིག་པར་མི་རིགས་
པའི་ཕྱིར་རོ། །མཆོད་རྟེན་དང་གཙང་ཁང་ཕྱུར་བུ་དང་འཁོར་ས་དང་གསོ་སྦྱོང་གི་གནས་དག་ཏུ་ཕྱག་དར་བྱ་བ་ཉིད་དོ་ཞེས་བྱ་བ་ལ། འདིར་གཞུང་ནི་མ་མོ་ལས་དེར་གསོ་སྦྱོང་བཅོ་ལྔ་པ་དེ་ཉིད་ཀྱི་ཚེ་ནང་པར་སྔར་ལངས་ཏེ་མཆོད་རྟེན་དང་གཙང་ཁང་ཕྱུར་བུར་ཕྱག་དར་བྱའོ། །འཁོར་ས་དང་གསོ་སྦྱོང་གི་

གནས་སུ་ཕྱག་དར་བྱའོ་ཞེས་གསུངས་པ་ཡིན་ནོ། །འདིར་ཕྱག་དར་བྱ་བ་ནི་གནས་ཁང་ངམ་ཁྱམས་སམ་རྫིང་བུའི་ཚད་ཙམ་ཞིག་ཕྱགས་ན་ཕྱག་དར་བྱས་པ་ཉིད་ཡིན་ནོ། །དགེ་འདུན་ལ་འདུན་པ་ལ་སོགས་པ་ཕུལ་བ་ཉིད་ནི་ཕུལ་བ་ཉིད་ཡིན་ནོ་ཞེས་བྱ་བ་ནི། དགེ་སློང་ན་བ་ལ་སོགས་པས་དགེ་འདུན་ལ་
འདུན་པ་ལ་སོགས་པ་ཕུལ་བ་ཉིད་ནི་ཕུལ་བའི་གྲངས་སུ་ཆུད་པ་ཉིད་ཡིན་པའོ། །འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་འདུན་ཐམས་ཅད་འདུས་ཤིང་ཚོགས་པ་ལ་འདུན་པ་དང་ཡོངས་སུ་དག་པ་འབུལ་ན། འདུན་པ་དང་ཡོངས་སུ་དག་པ་ཕུལ་ཞེས་བགྱིའམ་ཉེ་བ་འཁོར་ཕུལ་བ་ཞེས་
གསུངས་པ་ཡིན་ནོ། །དེ་ལས་གང་ཡང་རུང་བས་དེ་བརྗོད་པར་བྱ་བ་ཉིད་ཡིན་ནོ་ཞེས་བྱ་བ་ནི། འདུན་པ་ལ་སོགས་པ་འབུལ་བར་བྱེད་པ་དེ་ཉིད་ཀྱིས་དགེ་འདུན་ལ་འདུན་པ་ལ་སོགས་པ་མངོན་སུམ་དུ་ཕུལ་ཟིན་མོད་ཀྱི། འོན་ཀྱང་དགེ་འདུན་དེ་ལས་གང་ཟག་གང་ཡང་རུང་བས་དེའི་འདུན་པ་ལ་སོགས་པ་དེ་དགེ་འདུན་ལ་
བརྗོད་པར་བྱ་བ་ཉིད་ཡིན་ཏེ། བསྟན་པ་རྣམ་པར་གཞག་པ་རྗེས་སུ་བསྲུང་བའི་ཕྱིར་རོ། །ལས་ཐམས་ཅད་ལ་ཡང་མ་ལྷགས་པ་རྣམས་ཀྱིས་འདུན་པ་ལ་སོགས་པ་བརྗོད་པར་བྱ་སྟེ། ཟིན་ན་ཡང་བྱའོ།། །།བམ་པོ་བཞི་བཅུ་བརྒྱད་པ། མཚམས་ཀྱི་ཕྱི་རོལ་ན་གནས་པས་དེ་འབུལ་བ་དང་དབུལ་ཏུ་
གཞུག་པར་མི་བྱའོ་ཞེས་བྱ་བ་ནི། མཚམས་ཀྱི་ཕྱི་རོལ་ན་འདུག་པའི་གང་ཟག་གིས་འདུན་པ་ལ་སོགས་པ་དེ་དགེ་འདུན་ལ་དབུལ་བར་མི་བྱ་ཞིང་ལེན་པར་བྱེད་པས་ཀྱང་དེ་དབུལ་དུ་གཞུག་པར་མི་བྱ་བའོ། །འདི་ནི་མི་འཆགས་པ་མི་བྱའོ་ཞེས་གསུངས་པའི་སྤྲོས་པ་ཡིན་ཏེ། འདི་ལྟར་མཚམས་གཞན་
ན་གནས་པ་ནི་གང་ལ་ཡང་ཡན་ལག་ཉིད་མ་ཡིན་ནོ་ཞེས་གསུངས་པ་དེས་འདིར་མི་འཆགས་པར་བྱས་པ་ཉིད་ཡིན་ནོ། །བརྒྱུད་པས་མི་བྱའོ་ཞེས་བྱ་བ་ནི། དབུལ་བ་དང་དབུལ་དུ་གཞུག་པར་ཞེས་བྱ་བར་སྦྱར་རོ། །ལེན་པར་བྱེད་པས་གཞན་ལ་ཕུལ་ལ་དེས་ཀྱང་གཞན་ཞིག་ལ་ཕུལ་བ་ནི་བརྒྱུད་པ་ཡིན་ཏེ།
དེ་ཡང་སྤྲིང་ཡིག་ལ་སོགས་པ་དག་གི་དཔེ་ཡིན་ནོ། །ན་བ་དང་དབང་མེད་པ་དང་སྲོག་དང་ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་གཞན་པས་འབུལ་བ་ནི་ཉེས་བྱས་སོ་ཞེས་བྱ་བ་ནི། ན་བ་ལས་གཞན་པ་དང་། དབང་མེད་པ་ལས་གཞན་པ་དང་། སྲོག་གི་བར་ཆད་ཀྱིས་འཇིགས་པ་ལས་གཞན་

པ་དང་། ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་གཞན་པའི་གང་ཟག་གིས་བདག་ཉིད་དགེ་འདུན་ཚོགས་པའི་ནང་དུ་མི་འདུ་བར་འདུན་པ་ལ་སོགས་པ་འབུལ་བ་ལ་ནི་ཉེས་བྱས་སུ་འགྱུར་ཏེ། དབུལ་བ་མི་འཆགས་པ་ནི་མ་ཡིན་ནོ། །འདིར་དབང་མེད་པས་
ཞེས་སྨོས་པས་ནི་ཐ་ན་མཛའ་བཤེས་ཀྱི་དབང་གིས་བཟུང་བ་ཡན་ཆད་བསྡུའོ། །བར་ཆད་བྱེད་ཅེས་སྨོས་པས་ནི་རྒྱལ་པོ་དང་ཆོམ་རྐུན་པས་གནོད་པ་ལ་སོགས་པ་དག་བསྡུའོ། །འདིར་ཚངས་པར་སྤྱོད་པའི་བར་ཆད་ཅེས་བྱ་བ་ནི། དགེ་སློང་གི་དངོས་པོ་ལས་ཉམས་པར་འགྱུར་བ་འབའ་ཞིག་ཏུ་མ་ཟད་ཀྱི།
འདི་ལྟར་ལས་ཉམས་སུ་མྱོང་བ་ཙམ་གྱི་དབང་གིས་དགེ་བའི་ཕྱོགས་ཀྱི་བར་ཆད་གང་འབྱུང་བར་འགྱུར་བ་དེ་ཡང་འདིར་ཚངས་པར་སྤྱོད་པའི་བར་ཆད་ཡིན་པར་རིག་པར་བྱ་སྟེ། དེ་ཙམ་གྱི་ཚངས་པར་སྤྱོད་པའི་ཚོགས་ལ་གནོད་པར་འགྱུར་བའི་ཕྱིར་རོ། །དེ་ལྟ་བས་ན་དགེ་བའི་ཕྱོགས་ཀྱི་བར་ཆད་ཙམ་གྱི་
དབང་གིས་ཀྱང་འདིར་འདུན་པ་ལ་སོགས་པ་དབུལ་བ་ཉིད་དུ་བསྟན་པ་ཡིན་ནོ། །མ་བརྗོད་ན་ནི་མ་གུས་པ་ལས་སོ་ཞེས་བྱ་བ་ནི། ལེན་པར་བྱེད་པས་འདུན་པ་ལ་སོགས་པ་བླངས་པ་དགེ་འདུན་ལ་མ་བརྗོད་ན་ནི་མ་གུས་པའི་ལྟུང་བྱེད་ཀྱི་རྗེས་སུ་མཐུན་པ་ལས་ཉེས་བྱས་སུ་འགྱུར་བའོ། །དེས་འཇིགས་པས་
མཚམས་ཀྱི་ཕྱི་རོལ་ནས་ཁྱེར་ཏེ་འོངས་པ་ལ་ནི་ཉེས་པ་མེད་དོ་ཞེས་བྱ་བ་ནི། འདུན་པ་ལ་སོགས་པ་ལེན་པར་བྱེད་པ་དེས་མཚམས་ཀྱི་ནང་ནས་འདུན་པ་ལ་སོགས་པ་བླངས་ནས། ཚངས་པར་སྤྱོད་པའི་བར་ཆད་ཀྱིས་འཇིགས་པ་དེས་མཚམས་ཀྱི་ཕྱི་རོལ་ནས་ཀྱོགས་ཏེ་འདུན་པ་ལ་སོགས་ཏེ་དེ་དག་དགེ་འདུན་
གྱི་ནང་དུ་ཁྱེར་ཏེ་འོངས་པ་ལ་ནི་ཉེས་པ་མེད་དོ། །དགེ་སྐོས་ཀྱིས་གསོ་སྦྱོང་གི་ཚེ་ཚུལ་ཤིང་བྲིམ་པས་དགེ་སློང་རྣམས་བགྲང་བར་བྱའོ་ཞེས་བྱ་བ་ནི། དགེ་སྐོས་ཀྱིས་གསོ་སྦྱོང་གི་ཉིན་མོ་ཚུལ་ཤིང་བྲིམ་པས་དགེ་སློང་རྣམས་བགྲང་བར་བྱ་སྟེ། འོངས་པ་དང་མ་འོངས་པ་ཡོངས་སུ་ཤེས་པར་བྱ་བའི་ཕྱིར་རོ། །ལེགས་
པར་ཐོན་པས་གདོན་ཏེ་ཚིག་ཕྱེད་ཀྱང་མ་འཁྲུལ་བ་ཉིད་ནའོ་ཞེས་བྱ་བ་ནི། སོ་སོར་ཐར་པའི་མདོ་ཁ་ཏོན་དུ་ལེགས་པར་ཐོན་པས་གསོ་སྦྱོང་གདོན་པར་བྱ་སྟེ། ཇི་ལྟར་ན་ལེགས་པར་ཐོན་པ་ཉིད་ཡིན་ཞེ་ན། ཚིག་ཕྱེད་ཀྱང་མ་འཁྲུལ་བ་ཉིད་ན་སྟེ། གང་ཚིག་ཕྱེད་ཀྱང་མི་འཁྲུལ་བ་དེ་ནི་ལེགས་པར་ཐོན་པ་ཉིད་ཡིན་

ཏེ་དེས་གདོན་པར་བྱའོ་ཞེས་བྱ་བའི་ཐ་ཚིག་གོ། །འདིར་གསོ་སྦྱོང་ཞེས་བྱ་བའི་སྒྲ་ནི་སོ་སོར་ཐར་པའི་མདོ་ལ་བྱ་སྟེ། ཇི་ལྟར་སོ་སོར་ཐར་པའི་མདོ་འདོན་པས་གསོ་སྦྱོང་འགྲུབ་པར་འགྱུར་གྱིས་གསོ་སྦྱོང་ནི་གདོན་པར་བྱ་བ་མ་ཡིན་པས་དེའི་ཕྱིར་སོ་སོར་ཐར་པའི་མདོ་བཏོན་ན་གསོ་སྦྱོང་བཏོན་པ་ཉིད་དུ་འགྱུར་རོ། །དེ་ལྟར་
ན་ཚིག་ཕྱེད་ཀྱང་མི་འཁྲུལ་བ་ཉིད་ཡིན་ན་ལེགས་པར་ཐོན་པ་ཉིད་ཡིན་པས་དེས་སོ་སོར་ཐར་པའི་མདོ་གདོན་པར་བྱའི། གཞན་དུ་ན་མ་ཡིན་ཏེ། གཞན་དུ་ནི་ཉེས་བྱས་སུ་འགྱུར་རོ། །གདོན་པ་དེ་སུའི་ལས་ཡིན་ཞེ་ན། དེའི་ཕྱིར་དགེ་འདུན་གྱི་གནས་བརྟན་གྱིའོ་ཞེས་བྱ་བ་སྨྲས་ཏེ། སོ་སོར་ཐར་པའི་མདོ་གདོན་
པ་ནི་དགེ་འདུན་གྱི་གནས་བརྟན་གྱི་ལས་ཡིན་ནོ། །མི་ནུས་པ་ཉིད་ཡིན་ན་གཉིས་པའིའོ་ཞེས་བྱ་བ་ནི། གལ་ཏེ་དགེ་འདུན་གྱི་གནས་བརྟན་གྱིས་འདོན་པའི་ལས་མི་ནུས་པ་ཉིད་ཡིན་ན། དེའི་ཚེ་གདོན་པ་དེ་གནས་བརྟན་གཉིས་པའི་ལས་ཡིན་པའོ། དེས་ཀྱང་ན་གསུམ་པའི་འོ་ཞེས་བྱ་བ་ནི། གཉིས་པ་དེས་ཀྱང་
མི་ནུས་པ་ཉིད་ཡིན་ན། གདོན་པ་དེ་གནས་བརྟན་གསུམ་པའི་ལས་ཡིན་པའོ། །དེས་ཀྱང་ན་རེས་ཀྱིས་སོ་ཞེས་བྱ་བ་ནི། གནས་བརྟན་གསུམ་པ་དེས་ཀྱང་མི་ནུས་པ་ཉིད་ཡིན་ན་དགེ་འདུན་ཐམས་ཅད་ཀྱིས་རེས་ཀྱིས་གདོན་པར་བྱ་བའོ། །མི་ནུས་ན་གཞན་ལ་བཅོལ་བར་བྱའོ་ཞེས་བྱ་བ་ནི། རེས་བབ་
པའི་ཚེ་འདོན་མི་ནུས་ན་གདོན་གཞན་ལ་བཅོལ་བར་བྱ་བའོ། །མ་བཏུབ་ན་དགེ་འདུན་གྱིས་སོ་ཞེས་བྱ་བ་ནི་གང་ཟག་གིས་བཅོལ་ཏེ་མ་བཏུབ་ན་དེ་ལ་དགེ་འདུན་གྱིས་བཅོལ་བར་བྱ་བའོ། །རྟག་ཏུ་ཡང་ངོ་ཞེས་བྱ་བ་ནི། དེས་རྟག་ཏུ་གདོན་པར་ཡང་དགེ་འདུན་གྱིས་བཅོལ་བར་བྱ་བའོ། །རྡུགས་ན་ལྷག་མ་
གཞན་གྱིས་སོ་ཞེས་བྱ་བ་ནི། བར་དུ་བརྗེད་པ་ལ་སོགས་པས་གདོན་པ་རྡུགས་ཤིང་རྒྱུན་ཆད་མ་ལྷག་པ་དགེ་སློང་གཞན་གྱིས་གདོན་པར་བྱ་བའོ། །དུམ་བུ་འཛིན་པ་ཉིད་ཡིན་ན་ཇི་སྙེད་ཀྱིས་འགྲུབ་པ་བདག་གིས་སོ་ཞེས་བྱ་བ་ནི། གལ་ཏེ་དགེ་སློང་རྣམས་ཀྱིས་སོ་སོར་ཐར་པའི་མདོ་འདོན་པ་རྣམས་པ་ལྔ་པོ་
དག་ལས་དུམ་བུ་རེ་རེ་འཛིན་ཅིང་ཐོན་པ་ཡིན་ན། འདོན་པར་བྱེད་པ་ཇི་སྙེད་ཀྱིས་གདོན་པ་གྲུབ་པར་འགྱུར་བའི་དགེ་སློང་དེ་སྙེད་ཀྱིས་རྗེས་སུ་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ། །འཇིགས་པ་དང་བཅས་པ་ཉིད་ཡིན་ན་གནས་ན་མཛེས་པ་འདོད་པས་གྲོང་དང་མི་ཉེ་བར་གསོ་སྦྱོང་བྱར་མི་

རུང་ངོ་ཞེས་བྱ་བ་ནི། ཆོམ་རྐུན་པ་ལ་སོགས་པའི་འཚེ་བས་ས་ཕྱོགས་འཇིགས་པ་དང་བཅས་པ་ཉིད་ཡིན་ན། ལམ་ཀ་ན་ནེའུ་གསིང་ལ་སོགས་པ་གནས་མཛེས་པ་ཡོད་པ་ལ་སྲེད་ཅིང་འདོད་པས་གྲོང་དང་ཐག་རིང་པོའི་གནས་དེར་གསོ་སྦྱོང་བྱར་མི་རུང་མི་རིགས་ཚུལ་མ་ཡིན་ནོ། །འདིར་
གསོ་སྦྱོང་ཞེས་སྨོས་པ་ནི་དཔེ་ཙམ་དུ་ཟད་དེ། ལས་ཀྱི་སྦྱོར་བ་གཞན་དག་ལ་ཡང་དེ་བཞིན་ནོ། །འདྲོན་པ་མི་སྡོད་ན་འགྲོ་བཞིན་དུ་བྱའོ་ཞེས་བྱ་བ་ནི། ལམ་དུ་ལམ་གྲོགས་འདྲོན་པ་དག་སྡོད་དུ་མི་བཏུབ་ན་དགེ་སློང་རྣམས་ཀྱིས་འགྲོ་བཞིན་དུ་གསོ་སྦྱོང་བྱ་སྟེ། རྣམ་པ་གཞན་མ་གྲུབ་ན་འགྲོ་བཞིན་དུ་གསོ་སྦྱོང་བྱ་
བ་ལ་མི་རིགས་པར་དོགས་པར་མི་བྱའོ། །འདིར་གཞུང་ནི་དགེ་སློང་དག་འདྲོན་པ་དང་ལྷན་ཅིག་ལྗོངས་རྒྱུར་འཕགས་པ་ན་དེ་དག་གིས་ས་ཕྱོགས་ནེའུ་གསིང་ཅན་མཐོང་ནས་དེ་དག་དེར་གསོ་སྦྱོང་བྱེད་པར་བརྩམས་པ་ན་འདྲོན་པོ་དག་ཐལ་ནས་དེ་དག་ཕྱི་བཞིན་འདོང་བ་ན་ཆོམ་རྐུན་པ་དག་གིས་བཅོམ་པ་ནས།
བཅོམ་ལྡན་འདས་ཀྱིས་བཀའ་སྩལ་པ། ནེའུ་གསིང་འདོད་པས་གསོ་སྦྱོང་མི་བྱ་བར་གྲོང་དང་ཉེ་བར་གསོ་སྦྱོང་བྱའོ་ཞེས་བྱ་བའི་བར་དུ་གསུངས་པ་དང་། དགེ་སློང་དག་ཚོང་པ་འདྲོན་པ་དང་ལྷན་ཅིག་ལམ་དུ་འཕགས་ཏེ་ཞུགས་པ་ན། དགེ་སློང་རྣམས་ཀྱིས་ཚོང་པ་དག་ལ་སྨྲས་པ། བཞིན་བཟང་
དག་ཁོ་བོ་ཅག་གསོ་སྦྱོང་བྱེད་ཀྱི་བར་དུ་ཡུད་ཙམ་ཞིག་སྡོད་ཅིག །དེ་དག་གིས་སྨྲས་པ། འཕགས་པ་དག་ཕྱོགས་འདི་ན་ཆོམ་རྐུན་པའི་འཇིགས་པ་མཆིས་ཀྱི་ཚུར་སྤྱོན་ཅིག་དང་ཕྱོགས་གཞན་དུ་བསྡད་པར་བགྱིའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བཞིན་དུ་གསོ་
སྦྱོང་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྒྲ་མི་འདོད་ན་མདོར་བསྡུ་བས་སོ་ཞེས་བྱ་བ་ནི། འདྲོན་པ་གང་དག་ལམ་དུ་ཞུགས་པ་དེ་དག་འཇིགས་ཡུལ་དུ་སྒྲ་མི་འདོད་ན་དགེ་སློང་རྣམས་ཀྱིས་འགྲོ་བཞིན་དུ་མདོར་བསྡུ་བས་གསོ་སྦྱོང་བྱ་བའོ། །དེ་ཙམ་ཡང་ན་བྱིན་གྱིས་བརླབ་པོ་ཞེས་བྱ་བ་ནི།
མདོར་བསྡུ་བས་གསོ་སྦྱོང་བྱ་བ་ལ་སྒྲ་ཇི་ཙམ་འབྱུང་བར་འགྱུར་བའི་སྒྲ་དེ་ཙམ་ཡང་འདྲོན་པ་དག་མི་འདོད་ན། དེའི་ཚེ་དགེ་སློང་རྣམས་ཀྱིས་སོ་སོ་ནས་གསོ་སྦྱོང་བྱིན་གྱིས་བརླབ་པར་བྱ་སྟེ། འདི་ལྟར་དགེ་སློང་གཞན་དང་ལྷན་ཅིག་ཉིད་དུ་གསོ་སྦྱོང་བྱེད་པ་ལ་སྒྲ་ལས་གྲོལ་བ་མེད་པས་དེའི་ཕྱིར་

སོ་སོ་ནས་ཡིད་ཀྱིས་བྱིན་གྱིས་བརླབ་པར་བྱ་བའོ། །དད་པ་ཅན་དང་གཙོ་བོ་དག་དགའ་བར་འགྱུར་བ་ལྟ་ན་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། དགེ་སློང་གིས་དགེ་སློང་གི་བྱ་བ་ཆོ་ག་དག་གཞན་ལ་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་པའོ། །སུ་ལ་ཞེ་ན་དད་པ་ཅན་དང་
གཙོ་བོ་དག་ལ་སྟེ་ཁྱིམ་བདག་དང་རྒྱལ་པོ་ལ་སོགས་པ་དག་ལའོ། །གང་གི་ཚེ་ཞེ་ན་དགའ་བར་འགྱུར་ན་སྟེ་དེའི་ཚེ་ཆོ་ག་ཞེས་བྱ་བ་ནི། དགེ་སློང་གི་བྱ་བ་དང་། བྱ་བ་མ་ཡིན་པ་དག་དེ་དག་ལ་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་དོ། །དྲུང་དུ་གསོ་སྦྱོང་བྱེད་པ་ལ་ཡང་ངོ་ཞེས་བྱ་བ་ནི། དད་པ་ཅན་དང་
གཙོ་བོ་དག་དགའ་བར་འགྱུར་བ་ལྟ་ན་དེ་དག་གི་དྲུང་དུ་གསོ་སྦྱོང་བྱེད་པ་ལ་ཡང་ཁ་ན་མ་ཐོ་བ་མེད་པའོ། །ཕོངས་པའི་ཚེ་ཁྱིམ་པའི་དྲུང་དུ་བཤགས་པར་བྱའོ་ཞེས་བྱ་བ་ནི། ཕོངས་པའི་དུས་ཀྱི་ཚེ་ན་ཁྱིམ་པའི་དྲུང་དུ་ཡང་ལྟུང་བ་བཤགས་ཤིང་ཕྱིར་བཅོས་པར་བྱར་རུང་བའོ། །གླེང་གཞི་ནི་ཆོམ་རྐུན་བ་དག་ལ་
དེ་སྐད་གསུངས་པ་ཡིན་མོད་ཀྱི། ཁྱིམ་པ་གཞན་དག་ལ་ཡང་རུང་བ་ཉིད་ཡིན་པའི་ཕྱིར་འདིར་སྤྱིར་བསྡུས་སོ། །དེ་ལྟ་བས་ན་ཀྱལ་ཀ་ཅན་ལ་སོགས་པ་དང་རྩེ་དགོད་ལ་སོགས་པ་དང་རབ་ཏུ་བྱུང་ཞིང་བསྙེན་པར་མ་རྫོགས་པ་དག་གི་དྲུང་དུ་ཡང་ཉེས་པ་མེད་དོ། །དེ་ལ་ཆོ་ག་རྗེས་སུ་བསྒྲགས་པ་ལ་ཡང་ངོ་ཞེས་བྱ་
བ་ནི། ཁྱིམ་པ་དེ་ལ་ཕོངས་པའི་ཚེ་རབ་ཏུ་བྱུང་བའི་བསླབ་པའི་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་པའོ། །རྒྱལ་པོ་ལ་གོ་བར་བྱ་བ་ལ་ཡང་ངོ་ཞེས་བྱ་བ་ནི། རྒྱལ་པོ་ལ་བདག་ཅག་གི་སྟོན་པས་འདི་སྐད་གསུངས་སོ། །འདི་ལྟར་བཀག་གོ་ཞེས་བྱ་བ་ལ་སོགས་པ་རབ་ཏུ་བྱུང་བའི་བྱ་བ་དང་།
བྱ་བ་མ་ཡིན་པའི་ཆོ་ག་དེ་དག་གོ་བར་བྱེད་པ་ལ་ཡང་ཁ་ན་མ་ཐོ་བ་མེད་དེ། །གང་ལ་གོ་བར་བྱས་ན་ཆོས་དང་ལྡན་པའི་བྱ་བ་འགྲུབ་པར་འགྱུར་བ་དེ་ལ་གོ་བར་བྱས་པ་ལ་ཉེས་པ་མེད་པའོ། །གཞན་མ་རྫོགས་པ་ལ་མི་འཆགས་པ་མེད་དོ་ཞེས་བྱ་བ་ལ། གཞན་ཞེས་བྱ་བ་ནི། སོ་སོར་ཐར་པའི་མདོ་གདོན་པ་
རྣམ་པ་ལྔ་པོ་དག་ལས་གླེང་གཞི་ནི་རྫོགས་པར་མི་གདོན་དུ་མི་རུང་བས། དེ་ལ་ལྟོས་ནས་ཕམ་པར་འགྱུར་བ་ལ་སོགས་པས་གདོན་པ་ལྷག་མ་བཞི་པོ་དག་ལ་གཞན་ཞེས་བྱ་སྟེ། དེ་དག་གདོན་པར་བརྩམས་ནས་མ་རྫོགས་པ་ལ་ནི་གདོན་པ་མི་འཆགས་པ་མེད་དེ། འོན་ཀྱང་བརྩམས་ན་རྫོགས་པར་བྱ་

དགོས་སོ། །རྫོགས་པར་མ་བྱས་ན་ཉེས་བྱས་སུ་འགྱུར་རོ། །ཆོས་མ་ཡིན་པས་མི་བྱའོ་ཞེས་གང་གསུངས་པ་དེ་ལ་གསོ་སྦྱོང་འདི་ལ་ཆོས་མ་ཡིན་པ་བསྟན་པའི་ཕྱིར། གདོན་པར་བྱ་བ་དང་དེའི་ཚད་དང་དུས་དང་འདོན་པར་བྱེད་པ་རྣམས་དེ་ཁོ་ན་བཞིན་ཉེ་བར་མ་བཟུང་བ་ནི་འདིར་ཆོས་མ་ཡིན་
ནོ་ཞེས་བྱ་བ་སྨྲས་ཏེ། གདོན་པར་བྱ་བ་དང་། དེའི་ཚད་དང་། དེའི་དུས་དང་། དེའི་འདོན་པར་བྱེད་པ་དག་དེ་ཁོ་ན་བཞིན་དུ་ཉེ་བར་མ་བཟུང་བ་ནི་གསོ་སྦྱོང་གི་སྐབས་འདིར་ཆོས་མ་ཡིན་པ་ཡིན་ནོ། །དེ་ལ་གདོན་པར་བྱ་བ་དེ་ཁོ་ན་བཞིན་དུ་ཉེ་བར་མ་བཟུང་བ་ནི། སོ་སོར་ཐར་པའི་མདོ་ལས་གཞན་པ་ཕྲན་
ཚེགས་ལ་སོགས་པ་འདོན་པའོ། །དེའི་ཚད་དེ་ཁོ་ན་བཞིན་ཉེ་བར་མ་བཟུང་བ་ནི་གླེང་གཞི་མི་འདོན་ཅིང་ལྷག་མ་རྣམས་ཀྱང་ཐོས་པ་བསྒྲགས་པས་སྒྲུབ་པར་མི་བྱེད་པའོ། །གསོལ་བ་མ་གཏོགས་པ་ནི་མི་མཐུན་པ་ཉིད་ཡིན་པར་རིག་པར་བྱ་སྟེ། གསོལ་བ་མ་བྱས་པར་བྱེད་པ་གང་ཡིན་པ་དེ་ནི་མ་བསྐོས་
པར་བྱེད་པ་ཡིན་པའི་ཕྱིར་རོ། །དེའི་དུས་དེ་ཁོ་ན་བཞིན་ཉེ་བར་མ་བཟུང་བ་ནི་གསོ་སྦྱོང་གི་དུས་ལས་གཞན་པའི་དུས་སུ་བྱེད་པའོ། །འདོན་པར་བྱེད་པ་དེ་ཁོ་ན་བཞིན་ཉེ་བར་མ་བཟུང་བ་ནི་གང་ཟག་གང་དག་གི་དབང་དུ་གསོ་སྦྱོང་བྱེད་པ་བསྙེན་པར་རྫོགས་པ་དང་བཅས་པ་ལྟ་བ་དང་། ཚུལ་ཁྲིམས་
དག་གིས་རིགས་མཐུན་པ་དེ་དག་ལས་གཞན་པས་བྱེད་པའོ། །ཡང་ན་གང་གདོན་པར་བྱ་བ་དང་ཇི་སྙེད་གདོན་པར་བྱ་བ་དང་། གང་གི་ཚེ་འདོན་པར་བྱེད་པ་དང་། གང་དག་གིས་གདོན་པར་བྱ་བ་དེ་དག་ཡོངས་སུ་སྤངས་ཏེ། གདོན་པར་བྱ་བ་དང་ཚད་དང་དུས་དང་འདོན་པར་བྱེད་པ་གཞན་ཉིད་ཉེ་བར་
འཛིན་པར་བྱེད་པ་དེ་ནི་འདིར་མི་འཆགས་པར་བྱེད་པ་ཆོས་མ་ཡིན་པར་ཤེས་པར་བྱའོ། །གནས་དེ་ནས་འགའ་ཡང་མ་སོང་བ་ཉིད་ཡིན་ན་ངེས་པ་ཡིན་ནོ་ཞེས་སྔར་གང་བསྟན་པ་དེ་ལ་སོང་བ་ཉིད་ཅེས་བྱ་བ་དེའི་ཚད་བསྟན་པའི་ཕྱིར། ཐོས་པའི་ཉེན་ཀོར་ལས་འདས་པ་ཉིད་ནི་སོང་བ་ཉིད་ཡིན་ནོ་ཞེས་
བྱ་བ་སྨྲས་ཏེ། ཐོས་པའི་ཉེན་ཀོར་ཞེས་བྱ་བ་ཐོས་པའི་སྤྱོད་ཡུལ་གང་ཡིན་པ་དེ་ལས་འདས་ཏེ་སོང་བ་ནི་སོང་བ་ཉིད་ཡིན་ནོ། །གསོ་སྦྱོང་གི་གཞི་དང་འབྲེལ་པ་རྣམ་པར་འབྱེད་པ་ལ་སོགས་པའི་སྐབས་སོ་ཞེས་བྱ་བ། གསོ་སྦྱོང་གི་གཞི་དང་འབྲེལ་པ་རྣམ་པར་འབྱེད་པ་དང་། ཕྲན་ཚེགས་དང་

འདུལ་བྱེད་དང་། ཞུ་བའི་སྐབས་ནས་འབྱུང་བ་དག་བཤད་ཟིན་ཏོ། །གསོ་སྦྱོང་གི་བཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་དབྱར་གྱི་གཞི་བསྡུ་བའི་ཕྱིར། དབྱར་གནས་པར་ཁས་བླང་བར་བྱའོ་ཞེས་བྱ་བ་སྨྲས་ཏེ། དབྱར་གནས་པར་བྱ་བ་ཉིད་ཀྱིས་ཁས་བླང་བར་བྱའོ། །དུས་ཇི་སྲིད་དུ་ཞེ་ན་
དེའི་ཕྱིར། ཟླ་བ་གསུམ་དུའོ་ཞེས་བྱ་བ་སྨྲས་སོ། །ཉི་མ་གང་ལ་ཞེ་ན་དེའི་ཕྱིར་ཚེས་བཅུ་དྲུག་ལའོ་ཞེས་བྱ་བ་སྨྲས་སོ། །ཟླ་བ་གང་གི་ཞེ་ན། དེའི་ཕྱིར་དབྱར་ཟླ་འབྲིང་པོ་ཉའི་ཕྱི་དེ་ཉིན་པར་གྱིའོ་ཞེས་བྱ་བ་སྨྲས་ཏེ། དབྱར་ཟླ་འབྲིང་པོ་ཉའི་ཕྱི་དེ་ཉིན་པར་ཞེས་བྱ་བ་ནི་དབྱར་ཟླ་འབྲིང་པོའི་ཚེས་བཅུ་དྲུག་སྟེ་དེ་ལའོ། །
སྔགས་ལས་དབྱར་ཉེ་བར་བསྒྲུབ་པ་དབྱར་ཟླ་འབྲིང་པོ་ཚེས་བཅོ་ལྔ་ཞེས་གསུངས་པ་གང་ཡིན་པ་དེ་ལ་དབྱར་ཟླ་འབྲིང་པོ་ཚེས་བཅོ་ལྔ་ནི་དབྱར་ཉེ་བར་སྒྲུབ་པར་བྱེད་པ་ཡིན་པར་གསུངས་པས། ཚེས་བཅུ་དྲུག་ཕྱིན་ཆད་ནི་དབྱར་གྱི་དུས་ཉིད་ཡིན་པར་ཤེས་པར་བྱའོ། །གནས་པར་ཁས་བླངས་པ་སྔ་མའི་
དུས་བསྟན་ནས། ཕྱི་མའི་དུས་བསྟན་པའི་ཕྱིར་དབྱར་ཟླ་ཐ་ཆུངས་ཉའི་འོ་ཞེས་བྱ་བ་སྨྲས་ཏེ། ཕྱི་དེ་ཉིན་པར་བགྱིའོ་ཞེས་བྱ་བར་སྦྱར་རོ། །དབྱར་ཟླ་ཐ་ཆུངས་ཉའི་ཕྱི་དེ་ཉིན་པར་ཞེས་བྱ་བ་ནི། དབྱར་ཟླ་ཐ་ཆུངས་ཚེས་བཅུ་དྲུག་སྟེ་དེ་ལའོ། །ཞག་བཅུའམ་ཟླ་བ་ཕྱེད་ཀྱིས་འབྱུང་བར་འགྱུར་བ་ཉིད་ན་གཙུག་
ལག་ཁང་བྱི་དོར་བྱའོ་ཞེས་བྱ་བ་ནི། གནས་པར་ཁས་བླངས་པ་འབྱུང་བར་འགྱུར་བ་ཉིད་ཀྱི་མདུན་རོལ་དེ་ཙམ་ནས་སོ། །ཁ་ཅིག་ལས་ནི་བདུན་ནམ་བརྒྱད་ན་ཞེའོ་ཞེས་བྱ་བ་ནི། ལུགས་ཁ་ཅིག་ལས་དེ་ཙམ་ན་གནས་པར་ཁས་བླངས་པ་འབྱུང་བར་འགྱུར་བ་ཉིད་ཀྱི་མདུན་རོལ་དེ་ཙམ་ནས་གཙུག་ལག་
ཁང་བྱི་དོར་བྱའོ་ཞེས་ཀྱང་འབྱུང་ངོ་། །ཉི་མ་སྔ་མ་ལ་གནས་མལ་བསྡོག་གོ་ཞེས་བྱ་བ་ནི། ཚེས་བཅུ་དྲུག་ལ་གནས་པར་ཁས་བླངས་པ་དེའི་ཉི་མ་སྔ་མ་སྟེ། ཚེས་བཅོ་ལྔའི་ཉིན་པར་གནས་མལ་བསྡོག་པར་བྱ་བ་སྟེ། བསྡོག་པ་ཞེས་བྱ་བ་ནི་བགོ་བའི་ཕྱིར་སྟ་གོན་བྱ་བའོ། །འདིར་གནས་མལ་
ཞེས་བྱ་བའི་སྒྲས་ནི། གནས་དང་སྟན་ལ་སོགས་པ་གནས་མལ་ཐམས་ཅད་སྤྱིར་བཟུང་སྟེ། དེ་ལ་གནས་ཞེས་བྱ་བ་ནི། ཤིང་དྲུང་དང་། ཁང་པ་དང་ལྔ་ཁང་དང་ཁང་པ་བརྩེགས་པ་དང་། བསིལ་ཁང་དང་སབ་མོས་བསྐོར་བ་དང་། བ་གམ་དང་། ཁང་བཟངས་དང་། སྒོ་ཁང་གི་སྟེང་གི་བསིལ་

ཁང་དང་། ཁང་སྟེང་གི་ཡོལ་ཁང་དང་། སྤང་ལེབ་ཁང་དང་། ས་ཕུག་དང་། བྲག་ཕུག་དང་། རི་ཕུག་དང་། རྩྭའི་སྤྱིལ་བུ་དང་། ལོ་མའི་སྤྱིལ་བུ་དང་། འཆག་སར་བྱས་པ་དང་། འཆག་སར་མ་བྱས་པ་དང་། བྱ་སྐྱིབས་སུ་བྱས་པ་དང་། བྱ་སྐྱིབས་སུ་མ་བྱས་པ་དང་། དེ་ལྟ་བུ་ལ་
སོགས་པ་དགེ་འདུན་ལས་བྱུང་བ་དང་། གང་ཟག་ལས་བྱུང་བའི་གནས་ཀྱི་རྣམ་པ་ཐམས་ཅད་སྤྱིར་བསྡུའོ། །སྟན་ཞེས་བྱ་བ་ནི། ཁྲི་དང་སྟན་དང་། སྟན་ནང་ཚངས་ཅན་དང་། ཕྱག་དར་ཁྲོད་དང་། དར་དང་། སྣམ་བུ་དང་། རེའུ་རས་དང་། དར་ལ་དང་། མོན་དར་དང་། བེའུ་རས་ཡུག་ཆེན་དང་། བེའུ་
རས་དམར་པོ་དང་། བེའུ་ཕྲུག་དང་། ལ་དམར་དང་། ཡུལ་ཀ་ཤི་ཀའི་རས་ཕྲན་དང་། ཁ་དོག་རན་པ་དང་། ཁ་དོག་ངན་པ་དང་། བལ་གོས་དང་། ཤ་ནའི་རས་དང་། ཟར་མའི་རས་དང་། རས་གོས་དང་། དུ་གུ་ལའི་རས་དང་། ཀོ་ཏམ་པའི་རས་དང་། ཉི་འོག་གི་གོས་དང་། དེ་ལྟ་བུ་ལ་སོགས་པ་
དགེ་འདུན་ལས་བྱུང་བ་དང་། གང་ཟག་ལས་བྱུང་བའི་གོས་དང་། མལ་ཆ་དང་། སྟན་དང་། དགེ་སྦྱོང་གི་འཚོ་བའི་ཡོ་བྱད་ཐ་ན་ཁྲིའུ་དང་། ཆོལ་ཟངས་ཀྱི་བར་ཡན་ཆད་སྤྱིར་བསྡུས་ཏེ། གནས་དང་གོས་ཀྱི་རྣམ་པ་དེ་དག་ཐམས་ཅད་ལ་གནས་མལ་ཞེས་བྱའོ། །ཁྲིའུ་དང་ཆོལ་ཟངས་ཡན་ཆད་དོ་ཞེས་བྱ་
བ་ནི། ཐ་ན་ཁྲིའུ་དང་ཆོལ་ཟངས་ཀྱི་བར་ཡན་ཆད་སྦྱར་ཏེ། དེའི་ཉིན་མོ་བསྡོག་པར་བྱའོ་ཞེས་བྱ་བའི་ཐ་ཚིག་གོ། །དེ་སྟོབས་པ་བསྐོ་བར་བྱའོ་ཞེས་བྱ་བ་ནི། གནས་མལ་དེ་སྟོབས་པའི་དགེ་སློང་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ་ཞེས་བྱ་བའི་ཐ་ཚིག་གོ། །དེའི་སྔགས་ནི་
མིང་འདི་ཞེས་བྱ་བ་ཁྱོད་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་འམ་སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་
མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་གནས་མལ་སྟོབས་པར་བསྐོ་སྟེ། གནས་མལ་སྟོབས་པ་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབས་སོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་

ལ་དབྱར་གྱི་གནས་མལ་སྟོབས་པར་སྤྲོ་ཏེ། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་གནས་མལ་སྟོབས་པར་བསྐོ་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་གནས་མལ་སྟོབས་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་
གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་མལ་སྟོབས་པར་བསྐོས་ལགས་ཏེ། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །མི་ནུས་ན་དུ་མའོ་ཞེས་བྱ་བ་ནི། གང་ཟག་གཅིག་གིས་དགེ་འདུན་ལ་གནས་མལ་སྟོབས་པར་མི་ནུས་ན་དགེ་སློང་
དུ་མ་བསྐོ་བར་བྱ་བའོ། །བསྐོས་པའི་འོག་ཏུ་དེས་ཅི་ཞིག་བྱ་ཞེ་ན་དེའི་ཕྱིར། དེས་དྲི་དག་གིས་བསྐུས་པའི་ཚུལ་ཤིང་གཟེབ་ཀྱི་སྤྲོག་མར་རས་དཀར་པོ་བཏིང་པས་དཀྲིས་པ་དག་རྒན་རིམས་སུ་བཞག་ནས། ཚེ་དང་ལྡན་པ་དག་གནས་འདི་ན་ཁྲིམས་སུ་བྱ་བ་འདི་དང་འདི་ཡོད་དེ། ཁྱེད་ཅག་ལས་གང་
ཁྲིམས་སུ་བྱ་བ་འདི་དང་འདིས་གནས་འདིར་གནས་པར་སྤྲོ་བ་དེས་ནི་ཚུལ་ཤིང་ལོངས་ཤིག་ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལས་ཆུང་ཟད་ཤེས་པ་དེས་དེ་སྨྲོས་ཤིག །ཁྱེད་ཅག་ལས་གང་དབྱར་གྱི་ནང་དུ་དགེ་
འདུན་ལ་འཁྲུག་ལོང་བསྐྱེད་པར་འགྱུར་བ་དེ་ལ་དགེ་འདུན་གྱིས་ཕྱིས་ཉེ་བར་བརྟགས་པར་དགོངས་སོ་ཞེས་དགེ་སློང་རྣམས་ལ་བསྒོ་བར་བྱའོ་ཞེས་བྱ་བ་སྨྲས་ཏེ། གནས་མལ་སྟོབས་པའི་དགེ་སློང་དེས་དེ་ལྟར་བྱའོ་ཞེས་བྱ་བའི་ཐ་ཚིག་གོ། །དེའི་འོག་ཏུ་དགེ་སློང་གཞན་གྱིས་བླངས་པ་དང་ཁས་
བླངས་པའི་ཕྱིར་དགེ་འདུན་ལ་གསོལ་བར་བྱའོ་ཞེས་བྱ་བ་ནི། གནས་མལ་སྟོབས་པའི་དགེ་སློང་དེ་ལས་གཞན་པའི་དགེ་སློང་གཞན་ཅིག་གིས་དགེ་འདུན་གི་ཚུལ་ཤིང་བླངས་པ་དང་། དབྱར་གནས་པར་ཁས་བླངས་པའི་ཕྱིར་དགེ་འདུན་ལ་གསོལ་བ་འབའ་ཞིག་གི་ལས་གཅིག་བྱ་
སྟེ། དོན་དེ་གཉི་ག་གསོལ་བ་འབའ་ཞིག་གི་ལས་ཅིག་གིས་ཅིག་ཅར་གོ་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དེང་ནི་དགེ་འདུན་གྱིས་དབྱར་ཉེ་བར་བསྒྲུབ་པ་དབྱར་ཟླ་འབྲིང་པོ་ཚེས་བཅོ་ལྔ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་

བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ཚུལ་ཤིང་བཞེས་ཏེ་སང་ནམ་ནངས་པར་གནས་པར་ཁས་བླང་ངོ་། །འདི་ནི་གསོལ་བའོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི། དབྱར་ཉེ་བར་བསྒྲུབ་པ་དབྱར་ཟླ་ཐ་ཆུངས་ཚེས་བཅོ་ལྔ་
ལགས་ན་ཞེས་སྔགས་ཀྱིས་བྱེ་བྲག་ཏུ་བྱའོ། །གསོལ་བ་དེ་བྱས་མ་ཐག་ཁོ་ནར་ཚུལ་ཤིང་བྲིམ་མོ་ཞེས་བྱ་བ་ནི། དེ་ལྟར་གསོལ་བའི་ལས་བྱས་མ་ཐག་ཏུ་ཚུལ་ཤིང་བྲིམ་པར་བྱ་བའོ། །དང་པོར་སྟོན་པའི་བླང་ངོ་ཞེས་བྱ་བ་ནི། ཚུལ་ཤིང་བྲིམ་པའི་ཚེ་དང་པོ་ཁོ་ནར་ཚུལ་ཤིང་འདྲིམ་པར་བྱེད་བས་
སྟོན་པ་སངས་རྒྱས་བཅོམ་ལྡན་འདས་ཀྱི་ཚུལ་ཤིང་དེ་བླང་བར་བྱ་བའོ། །གཞན་དག་གིས་ནི་སྟན་ལས་ཕྱེད་འཕགས་པས་སོ་ཞེས་བྱ་བ་ནི། སྟོན་པའི་ཚུལ་ཤིང་ལེན་པ་ལས་གཞན་པའི་དགེ་སློང་དག་གིས་ནི་རང་རང་གི་སྟན་ལས་ཕྱེད་འཕགས་པའི་སྤྱོད་ལམ་གྱིས་རང་རང་གི་ཚུལ་ཤིང་
བླང་བར་བྱ་བའོ། །དགེ་ཚུལ་རྣམས་ཀྱི་ནི་སློབ་དཔོན་དང་མཁན་པོ་དག་གིས་སོ་ཞེས་བྱ་བ་ནི། སྟོན་པ་མན་ཆད་ནས་རྒན་རིམས་ཀྱི་དགེ་སློང་ཐམས་ཅད་ལ་ཚུལ་ཤིང་བྲིམ་པ་མཇུག་ཏུ་ཕྱིན་ནས་ཚུལ་ཤིང་འདྲིམ་པར་བྱེད་པ་དེས་ཡང་མགོ་ནས་བླངས་ཏེ། དགེ་སློང་གང་དག་ལ་སློབ་མ་དང་ཉེ་
གནས་དགེ་ཚུལ་ཡོད་པ་དེ་དག་ལ་དགེ་ཚུལ་གྱི་ཚུལ་ཤིང་ལེན་དུ་གཞུག་ཅིང་སློབ་དཔོན་དང་མཁན་པོ་གང་དག་ལ་སློབ་མའམ་ཉེ་གནས་དགེ་ཚུལ་ཡོད་པ་དེའི་ཚུལ་ཤིང་མཁན་པོ་དང་སློབ་དཔོན་དག་གིས་བླང་བར་བྱ་བའོ། །མཇུག་ཏུ་གཉུག་མར་གནས་པ་རྣམས་ཀྱི་དེ་ཡང་ངོ་ཞེས་བྱ་བ་ནི། དེ་
ལྟར་དགེ་ཚུལ་རྣམས་ཀྱི་ཚུལ་ཤིང་བྲིམ་པ་ཟིན་པའི་མཇུག་ཏུ་གཙུག་ལག་ཁང་གི་སྲུང་མ་གཉུག་མར་གནས་པ་ལྷ་མོ་ཆེན་མོ་འཕྲོག་མ་ལ་སོགས་པ་དག་གི་ཚུལ་ཤིང་བྲིམ་པ་དེ་ཡང་བྱའོ། །དལ་བུས་གཞག་པར་བྱའོ་ཞེས་བྱ་བ་ནི། ཚུལ་ཤིང་སྡུད་པ་ན་ཐམས་ཅད་ཀྱིས་དལ་བུས་གཞག་
པར་བྱ་བའོ། །བགྲངས་ནས་གནས་འདིར་དགེ་སློང་འདི་སྙེད་ཀྱིས་ཚུལ་ཤིང་བླངས་སོ་ཞེས་གོ་བར་བྱའོ་ཞེས་བྱ་བ་ནི། ཚུལ་ཤིང་བསྡུས་པའི་འོག་ཏུ་བགྲངས་ནས་དུ་བྱུང་བའི་སྡོམ་དགེ་འདུན་ལ་སྒྲ་དེ་སྐད་ཅེས་བརྗོད་ཅིང་གོ་བར་བྱའོ་ཞེས་བྱ་བའི་ཐ་ཚིག་གོ། །གནས་ཀྱི་གཞི་བསྟབས་

པར་བྱའོ་ཞེས་བྱ་བ་ནི། གནས་པར་བྱ་བའི་གཞི་ནི་གནས་ཀྱི་གཞི་སྟེ་གནས་ཁང་ལ་སོགས་པའོ། །གནས་མལ་སྟོབས་པས་དེ་དགེ་འདུན་ལ་བསྟབས་པར་བྱའོ། །དེ་དག་གི་སྒོ་ལྕགས་དང་ལྡེ་མིག་བླངས་པས་མདུན་དུ་འདུག་སྟེ་གནས་བརྟན་གཙུག་ལག་ཁང་ཆེ་གེ་མོ་ནི་རྙེད་པ་དང་བཅས་པ་
གོས་ཀྱི་རིན་དང་བཅས་པ་ལགས་ཀྱིས་བཞེས་ཤིག་ཅེས་ཡོན་ཏན་ཇི་ལྟ་བ་བཞིན་དུ་མོས་པ་བསྐྱེད་ཅིང་ལེན་དུ་གཞུག་གོ་ཞེས་བྱ་བ་ནི། གནས་མལ་སྟོབས་པའི་དགེ་སློང་གང་གིས་དབྱར་གྱི་གནས་དེ་ན་ཡོད་པའི་གནས་ཀྱི་གཞི་བསྟབས་པར་བྱ་བ་ཉིད་དུ་འདོད་པ་གང་དག་ཡིན་པ་དེ་དག་གི་སྒོ་ལྕགས་
དང་ལྡེ་མིག་ཐམས་ཅད་དེའི་ཚེ་བསྡུས་ཤིང་སྲེལ་བའི་དགེ་སློང་དེས་དང་པོར་དགེ་འདུན་གྱི་གནས་བརྟན་གྱི་མདུན་དུ་འདུག་སྟེ། གནས་ཀྱི་གཞི་དེ་དག་གི་ཡོན་ཏན་ཇི་ལྟ་བ་བཞིན་དུ་བརྗོད་ཅིང་མོས་པ་བསྐྱེད་པ་བརྩམས་པས་ལེན་དུ་གཞུག་པ་སྟེ། གནས་བརྟན་གཙུག་ལག་ཁང་ཆེ་གེ་མོ་ནི་
རྙེད་པ་དང་བཅས་པ་གོས་ཀྱི་རིན་དང་བཅས་པ་ལགས་ཀྱིས་གལ་ཏེ་བཞེད་ན་བཞེས་ཤིག་ཅེས་ལེན་དུ་གཞུག་གོ། །དེ་བཞིན་དུ་རྒན་རིམས་ཀྱིས་ཐམས་ཅད་ལ་གནས་ཀྱི་གཞི་ལྷག་མ་རྣམས་ཀྱང་ཡོན་ཏན་ཇི་ལྟ་བ་བཞིན་དུ་བརྗོད་དེ་མོས་པ་བསྐྱེད་ཅིང་ལེན་དུ་གཞུག་གོ། །དགེ་སློང་
གང་གིས་གནས་ཀྱི་གཞི་གང་བླངས་པ་དེ་ལ་དེའི་སྒོ་ལྕགས་དང་ལྡེ་མིག་ཀྱང་གཏད་པར་བྱའོ། །བླངས་པ་ལ་སོགས་པ་ནི་ལྷུང་བཟེད་དང་འདྲ་བའོ་ཞེས་བྱ་བ་ནི། ཇི་སྐད་དུ་ལྷུང་བཟེད་འབྲེལ་པ་མེད་པ་བྲིམ་པའི་སྐབས་སུ་འདོད་ན་ལོངས་ཤིག་ཅེས་བྱ་བ་དང་། བར་དུ་ཆོད་
པས་བླངས་པ་མི་བསླང་ངོ་ཞེས་བྱ་བ་དང་། ཚིག་གཉིས་པ་ལ་མི་སྦྱིན་ཞིང་གསུམ་པ་ལ་སྦྱིན་ནོ་ཞེས་བསྟན་པ་དེ་བཞིན་དུ་འདིར་གནས་ཀྱི་གཞི་སྟོབས་པ་ལ་ཡང་དེ་དག་ཐམས་ཅད་སྔ་མ་བཞིན་དུ་སྦྱར་བར་བྱའོ། །མཆོད་རྟེན་དང་དགེ་འདུན་གྱི་དོན་མ་ཡིན་པར་སོང་བར་ཤེས་པ་ལ་ནི་འཐེབ་ཉིད་ལས་བསྐོ་བར་
བྱའོ་ཞེས་བྱ་བ་ནི། དགེ་སློང་མཆོད་རྟེན་གྱི་དོན་མ་ཡིན་པ་དང་། དགེ་འདུན་གྱི་དོན་མ་ཡིན་པར་སྒོ་དོན་ལ་རང་དགར་གཞན་དུ་སོང་བ་ལ་ནི་གནས་ཀྱི་གཞིའི་སྐལ་བ་འཐེབ་ཡོད་ན་དེ་ལས་བསྐོ་བར་བྱ་བ་ཉིད་ཡིན་ནོ། །འདིར་འཐེབ་ཅེས་བྱ་བ་ནི། དགེ་སློང་གཉུག་མར་གནས་པ་རྣམས་ལ་

བསྐོས་ཟིན་པའི་འོག་ཏུ་ཡང་བསྐོ་བར་བྱ་བའི་ལྷག་མ་ཡོད་པ་ལ་བྱ་སྟེ། དེ་ལྟར་ལྷག་པའི་འཐེབ་ཡོད་ན་བསྐོ་བར་བྱའོ། །མཆོད་རྟེན་གྱི་དོན་དང་དགེ་འདུན་གྱི་དོན་དུ་སོང་བ་ལ་ནི་རྒན་རིམས་བཞིན་དུ་སྐལ་བ་བསྐོ་བར་བྱའོ། །འདིར་གཞུང་ནི། བཅོམ་ལྡན་འདས་ཀྱིས་གནས་
བརྟན་ཉེ་དགའི་སྐབས་ལས་འདི་སྐད་ཅེས་གང་དགེ་འདུན་གྱིའམ་མཆོད་རྟེན་གྱི་བྱ་བ་ལ་སོང་བ་དེ་ལ་ནི་རྒན་རིམས་བཞིན་དུ་གནས་མལ་བསྐོ་བར་བྱའོ། །གཞན་ལ་ནི་འཐེབ་ཇི་ལྟ་བ་བཞིན་དུའོ་ཞེས་གསུངས་པ་ཡིན་ནོ། །ཤིང་ལྗོན་པའི་དྲུང་དང་ནེའུ་གསིང་གི་གཞི་དག་ལ་ཡང་རྒན་རིམས་
བཞིན་དུ་བསྐོ་བར་བྱའོ་ཞེས་བྱ་བ་ནི། ཤིང་དྲུང་ལ་སོགས་པའི་གནས་མལ་གཞན་དག་ལ་ཡང་རྒན་རིམས་བཞིན་དུ་བསྐོ་བར་བྱ་བའོ། །གནས་ཁང་གིས་མི་ཆོག་ན་གཉིས་ལ་སོགས་པ་དག་ལ་ཐ་ན་དེའི་ས་གཞི་གདིང་བའི་ཚད་ཙམ་ཡང་ངོ་ཞེས་བྱ་བ་ནི། གལ་ཏེ་དགེ་སློང་རེ་རེ་ལ་གནས་ཁང་
རེ་རེ་བསྐོར་མི་ཆོག་ན་དེའི་ཚེ་དགེ་སློང་གཉིས་ལ་སོགས་པ་དག་ལ་གཅིག་ཐུན་མོང་དུ་བསྐོ་སྟེ། གཉིས་ལའམ་གསུམ་ལ་འམ་བཞི་ལའམ། དེ་དག་ལ་སོགས་པ་དག་ལ་གནས་ཁང་གཅིག་ཏུ་ཐུན་མོང་དུ་བསྐོ་བར་བྱའོ། །འོན་ཀྱང་མི་ཆོག་ན་དེའི་ཚེ་མཐའ་བསྟན་པའི་ཕྱིར། ཐ་ན་དེའི་ས་
གཞི་གདིང་བའི་ཚད་ཙམ་མོ་ཞེས་བྱ་བ་སྨོས་ཏེ། གནས་ཁང་གི་ས་གཞིར་སྟན་གདིང་བའི་ཚད་དུ་ཙམ་ཤོང་བ་དེ་སྙེད་ཀྱི་དགེ་སློང་དག་ལ་གནས་ཁང་གཅིག་བསྐོ་བར་བྱའོ། །ལྷུང་བཟེད་དང་བྱ་མ་བུམ་དང་འདག་རྫས་དང་སོ་ཤིང་དང་སྨན་གྱི་གནས་ལ་ལྟོས་པར་བྱའོ་ཞེས་བྱ་བ་ནི། གནས་ཁང་
གཅིག་ཏུ་མལ་སྟན་གྱི་ཚད་དུ་ཤོང་པའི་དགེ་སློང་དེ་སྙེད་ལ་གནས་ཁང་གཅིག་ཐུན་མོང་དུ་བསྐོ་བར་བྱའོ་ཞེས་བསྟན་པ་དེ་ལ་གནས་ཁང་དེར་དགེ་སློང་དག་གི་ལྷུང་བཟེད་ལ་སོགས་པ་གཞག་པའི་གནས་ལ་ལྟོས་ཏེ་དེའི་ཕྱི་ན་མལ་སྟན་དུ་ཤོང་བ་དེ་སྙེད་ཀྱི་དགེ་སློང་དག་ལ་གནས་དེ་ཐུན་མོང་དུ་བསྐོ་
བར་བྱའོ། །སྒོ་ཁང་དང་ཐེམ་སྐས་ཀྱི་ལྐོག་དང་ཁྱམས་དང་དཔོངས་དང་བཀད་ས་དང་བསྲོ་ཁང་གི་ར་བ་དག་ནི་བསྐོ་བར་མི་བྱའོ་ཞེས་བྱ་བ་ནི། མི་ཤོང་དུ་ཟིན་ཀྱང་འདི་དག་ནི་གང་ཟག་གི་གནས་ཁང་དུ་བསྐོ་བར་མི་བྱའོ། །ར་བ་ཞེས་བྱ་བའི་སྒྲས་ནི་དཔོངས་མན་ཆད་དང་སོ་སོར་སྦྱར་བར་བྱའོ། །

འདིར་གཞུང་ནི་རྣམ་པར་འབྱེད་པ་ལས་དགེ་སློང་དག་གནས་དྲུག་པོ་འདི་དག་ནི་བསྐོ་བར་མི་བྱ་བ་དག་སྟེ། སྒོ་གང་ཐམས་ཅད་དང་ཐེམ་སྐས་ཀྱི་ལྐོག་དང་། ཁྱམས་དང་དཔོང་སའི་ར་བ་དང་། བཀད་སའི་ར་བ་དང་། བསྲོ་ཁང་གི་ར་བ་དག་སྟེ། སྐོ་བར་བྱེད་ན་ཉེས་བྱས་སུ་འགྱུར་རོ་ཞེས་གསུངས་
པ་ཡིན་ནོ། །མཚན་མོ་གནས་མལ་མི་བསྐོའོ་ཞེས་བྱ་བ་ནི། གནས་ཁང་ཉི་ཚེར་མ་ཟད་ཀྱི། ཁྲི་ལ་སོགས་པ་གཞན་ཐམས་ཅད་ལ་ཡང་དེ་བཞིན་ནོ། །ནད་པ་འདུག་པའི་གནས་ཁང་གཞན་ལ་མི་སྦྱིན་ནོ་ཞེས་བྱ་བ་ནི། ནད་པ་འདུག་པའི་གནས་ཁང་གཞན་ལ་མི་སྦྱིན་པ་སྟེ། གནས་ཁང་ཞེས་
སྨོས་པས་ནི་ཁྲི་ལ་སོགས་པ་གཅད་པར་བསྟན་ཏོ། །དེ་ཉིད་ཐོབ་པ་མེད་པ་ན་མི་སྦྱིན་པར་མི་བྱའོ་ཞེས་བྱ་བ་ནི། གནས་པ་དེ་ཉིད་ཀྱིས་ཐོབ་པ་གང་ཡིན་པ་དེ་ནི་དེ་ཉིད་ཐོབ་པ་སྟེ་གནས་པ་ཉིད་ཐོབ་པའོ། །དེ་མེད་པ་ནི་ནད་པ་གང་གིས་རྒན་རིམས་སུ་གནས་ཁང་ན་སྔ་ནས་གནས་པ་ཐོབ་པ་མེད་པ་སྟེ། དེ་ལྟར་
ན་ནད་པས་སྔ་ནས་གནས་ཁང་ན་གནས་པ་ཐོབ་པ་མེད་དུ་ཟིན་ཀྱང་། གསར་དུ་གནས་ཁང་མི་སྦྱིན་པར་མི་བྱ་སྟེ་སྦྱིན་པ་ཁོ་ནར་བྱ་བའོ། །འདིར་གཞུང་ནི། དགེ་སློང་དག་གིས་དགེ་སློང་ནད་པའི་གནས་ཁང་གཞན་ལ་བསྐོ་བར་མི་བྱའོ། །བསྐོ་ན་འགལ་ཚབས་ཅན་དུ་འགྱུར་རོ། །འདི་ལྟར་དགེ་སློང་
ནད་པ་ལ་གནས་ཁང་བསྟབས་པ་དང་། གཡོག་བསྟབས་པ་དང་། ལས་སུ་མི་བསྐོ་བར་བསྟབས་པར་བྱའོ་ཞེས་གསུངས་པ་ཡིན་ནོ། །འདིར་ནད་པ་ཞེས་བྱ་བ་ནི་སྦྱོར་བ་མི་བཟོད་པ་ཡིན་པར་རིགས་པར་བྱའོ། །དེ་དང་དེའི་གཡོག་ལས་བྱེད་དུ་མི་གཞུག་གོ་ཞེས་བྱ་བ་ནི། ནད་པ་དེའི་ནད་གཡོག་ལས་
བྱེད་དུ་མི་གཞུག་པའོ། །མཛེ་ཅན་གྱིས་དགེ་འདུན་གྱི་གནས་མལ་སྤྱད་པར་མི་བྱའོ་ཞེས་བྱ་བ་ནི། དེས་དགེ་འདུན་གྱི་གནས་དང་མལ་ཆ་ལ་སོགས་པ་སྤྱད་པར་མི་བྱའོ། །དེ་ལ་གནས་དབེན་པ་སྦྱིན་ནོ་ཞེས་བྱ་བ་ནི། མཛེ་ཅན་དེ་ལ་མཐའ་ཁོབ་དབེན་པར་གནས་སྦྱིན་པར་བྱ་བའོ། །དགེ་འདུན་
གྱིས་བསྟེན་པར་བྱ་བ་དང་བཅས་པར་ཐ་ན་ཁྱམས་དང་ཁྱམས་གྲུ་བཞི་དང་སྒོ་ཁང་དང་བང་རིམ་དང་འཆག་ས་དང་ཤིང་དྲུང་གི་གནས་དེར་ཡང་འདུག་པར་མི་བྱའོ་ཞེས་བྱ་བ་ནི། མཛེ་ཅན་གྱིས་དགེ་འདུན་གྱི་གནས་དེ་ལྟ་བུར་འདུག་པར་མི་བྱའོ། །བཤང་བ་དང་གཅི་བའི་སྐྱབས་གཉིས་སུ་འཇུག་

པར་མི་བྱའོ་ཞེས་བྱ་བ་ནི། མཛེ་ཅན་གྱིས་དགེ་འདུན་གྱི་དེ་གཉིས་སུ་འཇུག་པར་མི་བྱ་བའོ། །དེ་ལ་གཡོག་བསྐོ་བས་སྙིང་བརྩེ་བར་བྱའོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་དག་གིས་མཛེ་ཅན་དེ་ལ་གཡོག་བསྐོ་བས་རྗེས་སུ་སྙིང་བརྩེ་བར་བྱ་བ་སྟེ། མཛེ་ཅན་དེ་ནི་
ནད་ཡུན་རིང་ཞིང་ཆེ་བ་ཡིན་པའི་ཕྱིར་དང་། བསྟན་པ་ནི་སྙིང་རྗེས་རབ་ཏུ་ཕྱེ་བ་ཉིད་ཡིན་པའི་ཕྱིར་རོ། །འདིར་གཞུང་ནི། དགེ་སློང་མཛེ་ཅན་གྱིས་དགེ་འདུན་གྱི་གནས་མལ་ལ་སྤྱད་པར་མི་བྱ། ཁྱམས་ལ་སོགས་པའི་གནས་སུ་གནས་པར་མི་བྱ། དགེ་འདུན་གྱི་བཤང་བའི་གནས་དང་།
གཅི་བའི་གནས་སུ་འཇུག་པར་མི་བྱའོ། །དགེ་འདུན་གྱིས་དབེན་པའི་གནས་སུ་དེའི་གནས་སྦྱིན་པར་བྱ། གཡོག་ཀྱང་བྱའོ་ཞེས་གསུངས་པ་ཡིན་ནོ། །དུས་ཐམས་ཅད་དུ་དགོན་པ་པ་དག་ལ་ལྷུང་བཟེད་དང་ཆོས་གོས་གཞན་ཡོད་པའི་ཕྱིར་གནས་ཁང་བསྐོ་བར་བྱའོ་ཞེས་བྱ་བ་ནི། དབྱར་
དག་ཉི་ཚེར་མ་ཟད་ཀྱི་དུས་གཞན་ཐམས་ཅད་དུ་ཡང་དགེ་སློང་དགོན་པ་བ་དག་ལ་ལྷུང་བཟེད་ལ་སོགས་པ་གཞག་པའི་ཕྱིར། གཙུག་ལག་ཁང་དུ་གནས་ཁང་བསྐོ་བར་བྱ་བའོ། །འདིར་གཞུང་ནི་དགེ་སློང་དགོན་པ་པ་དག་གཙུག་ལག་ཁང་དུ་ལྷགས་ཏེ། གནས་ཁང་དག་རྙེད་པ་ན་དགེ་སློང་
དག་ལས་མ་ཐོབ་ནས། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་དུ་དགེ་སློང་དགོན་པ་པ་རྣམས་ཀྱི་ལྷུང་བཟེད་དང་ཆོས་གོས་གང་དུ་འཇོག་པའི་གནས་ཁང་བསྐོ་བར་བྱའོ་ཞེས་གསུངས་པ་ཡིན་ནོ། །དབྱར་གནས་པར་ཁས་བླངས་པ་ན་ཁ་ཅིག་གློ་བུར་དུ་འོང་སྲིད་པས་གནས་
དང་གནས་མལ་གཞག་པར་བྱའོ་ཞེས་བྱ་བ་ལ། དབྱར་གནས་པར་ཁས་བླངས་པ་ཞེས་སྨོས་པས་དུས་ཐམས་ཅད་ནི་མ་ཡིན་པར་བསྟན་ཏེ། དབྱར་གནས་པར་ཁས་བླངས་པར་སྔ་མ་ཡང་རུང་ཕྱི་མ་ཡང་རུང་བར་དགེ་སློང་གློ་བུར་བ་དག་འོང་བར་ཤེས་ན་གནས་ཀྱི་གཞི་དང་ཁྲི་ལ་སོགས་པའི་གནས་
མལ་དག་གཞག་པར་བྱའོ། །མང་པོ་དག་ལྷགས་ན་གནས་བདག་གིས་གཟོད་བསྐོ་བར་བྱའོ་ཞེས་བྱ་བ་ནི། དགེ་སློང་གློ་བུར་བ་མང་པ་དག་ལྷགས་ན་སྔར་གནས་པར་ཁས་བླངས་པ་དག་གིས་གནས་མལ་གཟོད་བསྐོ་བར་བྱ་བའོ། །གནས་པར་ཁས་བླངས་པ་ཕྱི་མ་ཕྱིན་ཆད་མི་བྱའོ་ཞེས་བྱ་བ་ནི།

དབྱར་གནས་པར་ཁས་བླངས་པར་ཕྱི་མ་ཤོས་ཕྱིན་ཆད་ནི་གཟོད་བསྐོ་བར་མི་བྱ་སྟེ། གནས་པར་ཁས་བླངས་པ་གསུམ་པ་མེད་པའི་ཕྱིར་རོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་དག་ངས་དགེ་སློང་མ་འོངས་པ་རྣམས་ལ་བརྟེན་ནས་དབྱར་གནས་པར་ཁས་བླངས་པ་གཉིས་པ་བཅས་ཀྱི་གསུམ་
པ་ནི་མ་ཡིན་ནོ་ཞེས་གསུངས་པ་ཡིན་ནོ། །མང་བ་ཉིད་ཡིན་ན་གཅིག་ལ་ཡང་གཉིས་ལ་སོགས་པ་ཁྱབ་པའི་བར་དག་གོ་ཞེས་བྱ་བ་ནི། གནས་ཀྱི་གཞི་མང་བ་དག་ཡིན་ན་དགེ་སློང་རེ་རེ་ལ་ཡང་གནས་ཀྱི་གཞི་གཉིས་ལ་སོགས་པ་ནས་དུ་ཙམ་བསྐོས་པ་གནས་ཐམས་ཅད་ལ་ཁྱབ་པར་འགྱུར་བ་དེ་སྙེད་ཀྱི་བར་
དག་བསྐོ་བར་བྱའོ་ཞེས་བྱ་བའི་ཐ་ཚིག་གོ། །ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་བྱ་བ་ནི། ཞག་གཅིག་ལས་མི་གནས་ན་ཞག་གཅིག་གི་དོན་དུ་གནས་མལ་བགོ་བཤའ་མི་བྱའོ། །གནས་མལ་ཞེས་སྨོས་པ་ནི་དཔེ་ཙམ་དུ་ཟད་དེ་གཙུག་ལག་ཁང་ལ་སོགས་པ་ལ་ཡང་དེ་བཞིན་ནོ། །
འདིར་གཞུང་ནི་ཕྲན་ཚེགས་དག་ལས་དགེ་སློང་དག་གིས་ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་གསུངས་པ་ཡིན་ནོ། །རྙེད་པ་འདོད་པས་གཙུག་ལག་ཁང་མི་མནོད་དོ་ཞེས་བྱ་བ་ནི། རྙེད་པ་འདོད་པས་གཙུག་ལག་ཁང་ལ་སོགས་པ་གནས་དང་། སྟན་ལ་སོགས་པ་
མལ་ཆ་མནོད་པར་མི་བྱའོ། །འདིར་གཞུང་ནི། དེ་ནས་དུས་གཞན་ཞིག་ན་དགེ་སློང་རྣམས་ལ་རྒན་རིམས་བཞིན་དུ་གནས་མལ་སྟོབས་པར་བྱེད་པ་ན། བྲམ་ཟེ་ཞིག་གཙུག་ལག་ཁང་དུ་འོངས་ནས་དེས་དེ་མཐོང་བ་དང་། གང་གི་ཕྱིར་འདི་བཞིན་བགོ་བཤའ་བྱེད་པའི་ངང་ཚུལ་ཅན་ཤཱཀྱའི་
སྲས་ཀྱི་དགེ་སྦྱོང་འདི་དག་ལ་སུ་ཞིག་མངོན་པར་དད་པར་མི་འགྱུར་སྙམ་དུ་དད་པ་སྐྱེས་པར་གྱུར་ནས། དེས་གཙུག་ལག་ཁང་བྱེད་དུ་བཅུག་སྟེ་དགེ་སློང་གིས་དགེ་འདུན་ལ་ཕུལ་བ་དང་། དགེ་སློང་དག་གིས་སྨྲས་པ། ཧ་ཅང་ཡང་གཤེར་ཆེས་སོ་ཞེས་མི་ལེན་པ་དང་། དེས་ཕྲུ་ས་འདེབས་སུ་
བཅུག་སྟེ་ཕུལ་ལོ། །དགེ་སློང་དག་གིས་སྨྲས་པ། ཧ་ཅང་དགོན་དུང་ཆེས་སོ་ཞེས་མི་ལེན་པ་དང་། བྲམ་ཟེ་དེས་དེ་དག་རྙེད་པ་འདོད་པས་མི་ལེན་པར་རིག་ནས། བྲམ་ཟེ་དེ་ཤཱཀྱའི་སྲས་ཀྱི་དགེ་སྦྱོང་དག་ནི་རྙེད་པ་འདོད་པས་གཙུག་ལག་ཁང་ལེན་ཏོ་ཞེས་འཕྱ་བར་རྩོམ་པ་ནས། བཅོམ་

ལྡན་འདས་ཀྱིས་བཀའ་སྩལ་པ། དགེ་སློང་དག་གིས་རྙེད་པ་འདོད་པས་གཙུག་ལག་ཁང་དག་བླང་བར་མི་བྱ་བར། འདི་ལྟར་སྦྱིན་བདག་རྣམས་ལ་རྗེས་སུ་སྙིང་བརྩེ་བས་གཙུག་ལག་ཁང་དག་བླང་བར་བྱའོ་ཞེས་གསུངས་པ་ཡིན་ནོ། །ཕོངས་པ་མེད་པའི་སེམས་ཀྱིས་
ཀྱང་བླང་བར་བྱའོ། །ཐམས་ཅད་ཡོངས་སུ་སྤྱད་པར་བྱའོ་ཞེས་བྱ་བ་ནི། གང་ཟག་གཅིག་གིས་གནས་ཁང་དུ་མ་མནོས་ནའོ། །གཅིག་གིས་ཐམས་ཅད་ཇི་ལྟར་སྤྱད་པར་བྱ་ཞེ་ན། དེའི་ཕྱིར་ལ་ལར་ཀླག་པ་དང་། ཁ་ཏོན་དང་། འདུག་པ་དང་། བཅག་པ་དག་ལས་གང་ཡང་རུང་བ་བྱ། ལ་ལར་
ལྷུང་བཟེད་དང་ཆོས་གོས་གཞག་པར་བྱ། ལ་ལར་མཚན་མོ་ཉལ་བར་བྱ། ལ་ལར་སྔ་དྲོ་དང་དུས་ཚིགས་དང་ཕྱི་དྲོ་འདུག་པས་དེ་ལ་སྦྱར་བར་བྱའོ་ཞེས་བྱ་བ་སྨྲས་ཏེ། ཐམས་ཅད་ཡོངས་སུ་སྤྱད་པར་བྱ་བ་དེ་ལ་ཐབས་དེ་ལྟར་སྦྱར་བར་བྱའོ། །དེ་ལ་གཞུང་ཁ་ཅིག་ལས་ནི། ལ་ལར་བཀླག་པར་བྱ།
ལ་ལར་ཁ་ཏོན་བྱ། ལ་ལར་ལྷུང་བཟེད་དང་ཆོས་གོས་གཞག་པར་བྱ། ལ་ལར་ཉལ་བར་བྱའོ་ཞེས་གསུངས་སོ། །གཞུང་ཁ་ཅིག་ལས་ནི་ལ་ལར་སྔ་དྲོ་འདུག་པར་བྱ། ལ་ལར་གུང་ཚིགས་ལ་འདུག་པར་བྱ། ལ་ལར་ཕྱི་དྲོ་འདུག་པར་བྱ། ལ་ལར་མཚན་མོ་འདུག་པར་བྱའོ་ཞེས་གསུངས་
པས་དེའི་ཕྱིར་དེ་གཉི་ག་བསྡུ་བའི་ཕྱིར་མདོ་འདི་བྱས་སོ། །གནས་པར་ཁས་བླངས་པས་གནས་ཀྱི་གཞི་རལ་བ་དང་འདྲུམས་པ་བཅོས་པར་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་པས་གནས་ཀྱི་གཞི་རལ་བ་དང་འདྲུམས་པ་ཕྱིར་བཅོས་པར་བྱའོ། །རལ་བ་ཞེས་བྱ་བ་ནི་
ཕྱོགས་གཅིག་ཆད་པའོ། །འདྲུམས་པ་ཞེས་བྱ་བ་ནི་གས་པའོ། །དགེ་སློང་མ་དག་དབྱར་གནས་པ་རྣམས་ཀྱིས་དབྱར་ཁང་བཅོས་པར་བྱའོ་ཞེས་བྱ་བ་ནི། རལ་པ་དང་འདྲུམས་པ་སྟེ་དེ་ཡང་དབྱར་ཁང་གཅིག་ལ་ཡང་དགེ་སློང་མ་ཐམས་ཅད་སྤྱིས་ལོག་སྟེ་བཅོས་པར་བྱ་བ་ཡིན་གྱི། གནས་
ཁང་གང་ན་གང་གནས་གནས་པ་དེས་དེ་ཉི་ཙེས་བཅོས་པ་མ་ཡིན་ནོ། །འཐབ་ཀྲོལ་ཅན་གྱིས་གནས་མི་ཐོབ་པར་བྱ་བའི་ཕྱིར་དགུན་མནོད་པ་དང་དཔྱིད་མནོད་པའི་གནས་མལ་ཡང་བསྟབས་པར་བྱའོ་ཞེས་བྱ་བ་ནི། གང་ཟག་འཐབ་ཀྲོལ་ཅན་དག་གཞན་ནས་འོངས་པས་མཚམས་ཀྱི་ནང་དུ་

གནས་མི་ཐོབ་པར་བྱ་བའི་ཕྱིར་དགུན་དང་དཔྱིད་མནོད་པར་གནས་མལ་གཉིས་ཀྱང་བསྟབས་པར་བྱའོ། །རིལ་གྱིས་བསྐོ་བར་བྱའོ་ཞེས་བྱ་བ་ནི། འཐབ་ཀྲོལ་ཅན་གྱི་གནས་མི་ཐོབ་པར་བྱ་བའི་ཕྱིར་གནས་མལ་རིལ་གྱིས་བསྐོ་བར་བྱའོ། །དེ་ཉིད་བསྟན་པའི་ཕྱིར། འདི་ལྟ་སྟེ་གཙུག་ལག་
ཁང་དང་ཁང་ཁྱིམ་དག་གི་ཉེན་ཀོར་ཡང་ངོ་ཞེས་བྱ་བ་སྨྲས་ཏེ། གཙུག་ལག་ཁང་དང་ཁང་ཁྱིམ་དག་གི་ཉེན་ཀོར་ཡང་མ་ལུས་པར་རིལ་གྱིས་བསྐོ་བར་བྱ་བའོ། །ཁྱམས་ཀྱི་དེ་ཡང་ངོ་ཞེས་བྱ་བ་ནི་ཁྱམས་ཀྱི་ཉེན་ཀོར་དེ་ཡང་རིལ་གྱིས་བསྐོ་བར་བྱ་བའོ། །དེ་དག་དོང་བ་ཉིད་ཀྱི་འོག་ཏུ་དེ་དག་མི་གཏད་པར་
མི་བྱའོ་ཞེས་བྱ་བ་ནི། འཐབ་ཀྲོལ་ཅན་དེ་དག་དོང་བའི་འོག་ཏུ་གཙུག་ལག་ཁང་དང་ཁང་ཁྱིམ་དང་ཁྱམས་དེ་དག་གི་ཉེན་ཀོར་དེ་དག་སྔ་མ་ཁོ་ན་བཞིན་དུ་མི་གཏང་བར་མི་བྱ་བ་སྟེ། ལྷུག་པར་གཏང་བར་བྱའོ། །རང་བཞིན་དུ་གནས་པའི་ཕྱིར་སྒྱུ་ཐབས་ཀྱིས་མི་བྱའོ་ཞེས་བྱ་བ་ནི། དགེ་སློང་རང་བཞིན་
དུ་གནས་པ་ཚུལ་ཁྲིམས་དང་ལྡན་པ་འཐབ་ཀྲོལ་ཅན་མ་ཡིན་པའི་ཕྱིར། སྒྱུ་ཐབས་ཞེས་བྱ་བ་བགེགས་མི་བྱ་བ་སྟེ། འདི་ནི་བསྐོ་བའི་དུས་འབའ་ཞིག་ཏུ་མ་ཟད་ཀྱི། དུས་ཐམས་ཅད་དུ་ཡང་དེ་བཞིན་ནོ། །འབྱུང་བའི་དོན་དུ་ནི་མི་བསྐོའོ་ཞེས་བྱ་བ་ནི། དགེ་སློང་ད་ལྟར་མི་གནས་པ་ཕྱིས་འབྱུང་བར་
འགྱུར་བའི་དོན་དུ་ནི་གནས་མལ་སྔ་ནས་བསྐོ་བར་མི་བྱའོ། །དེ་ཉིད་བསྟན་པའི་ཕྱིར། འདི་ནི་དུས་ཚིགས་དང་ཉིན་མཚན་དང་དེའི་ཡན་ལག་ཆེ་གེ་མོ་ཞིག་ནི་འབྱུང་བའི་འོ། །འདི་ནི་མཁན་པོ་དང་སློབ་དཔོན་ཆེ་གེ་མོ་ཞིག་འབྱུང་བའི་འོ། །འདི་ནི་ལྷན་ཅིག་གནས་པ་ཉེ་གནས་ཆེ་གེ་མོ་ཞིག་འབྱུང་
བའིའོ། །འདི་ནི་གཏམ་འདྲེས་པ་དང་ཕེབས་པར་སྨྲ་བ་དང་འགྲོགས་བཤེས་དང་སྨོས་འགྲིན་ལ་སོགས་པ་ཆེ་གེ་མོ་ཞིག་འབྱུང་བའི་འོ་ཞེས་གཙུག་ལག་ཁང་དག་བསྐོ་བར་མི་བྱའོ་ཞེས་བྱ་བ་སྨྲས་ཏེ། གནས་ཁང་བསྐོ་བས་འདི་སྐད་ཅེས་གཙུག་ལག་ཁང་འདི་ནི་དགུན་དང་། དགུན་སྨད་དང་།
དཔྱིད་དང་། སོས་ཀ་དང་། དབྱར་དང་སྟོན་གྱི་དུས་ཚིགས་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་འདི་ནི་སང་དང་གནངས་དང་གཞེས་དང་ཚེས་གཅིག་དང་གཉིས་དང་། གསུམ་ལ་སོགས་པའི་ཉིན་མཚན་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་

འདི་ནི་སྔ་དྲོ་དང་གུང་ཚིགས་དང་ཕྱི་དྲོ་དང་ཐུན་དང་པོ་དང་གཉིས་པ་དང་གསུམ་པ་དང་བཞི་པ་ཞེས་བྱ་བ་ཉིན་མཚན་དེའི་ཡན་ལག་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་འདི་ནི་མཁན་པོའམ་སློབ་དཔོན་ཆེ་གེ་མོ་ཞིག་འབྱུང་བའི་གནས་སུ་བསྐོའོ་ཞེས་
བྱ་བ་ལ་སོགས་པ་ལྟ་བུ་ཕྱིས་འབྱུང་བའི་དོན་དུ་གཙུག་ལག་ཁང་དག་བསྐོ་བར་མི་བྱའོ། །མནོད་པར་མི་བྱའོ་ཞེས་བྱ་བ་ནི། གཞན་གྱིས་བསྐོས་ཀྱང་མནོད་པར་མི་བྱའོ། །འདིར་གཞུང་ནི་འབྱུང་བའི་དོན་དུ་གཙུག་ལག་ཁང་བསྐོ་བར་མི་བྱ། བསྐོར་གཞུག་པར་མི་བྱའོ་ཞེས་གསུངས་པ་ཡིན་ཏེ། དེ་
ལ་མདོ་སྔ་མས་ནི་བསྐོ་བར་མི་བྱའོ་ཞེས་གསུངས་པས་བསྡུས་སོ། །མདོ་འདིས་ནི་བསྐོར་གཞུག་པར་མི་བྱའོ་ཞེས་གསུངས་པས་བསྡུས་སོ། །ཚད་གཞིག་པའི་ཕྱིར་དབྱུག་གུ་ཐོགས་པ་བསྐོ་བར་བྱའོ་ཞེས་བྱ་བ་ནི། བྱེའུ་ལ་སོགས་པའི་ཚང་གཙུག་ལག་ཁང་དུ་འཆའ་བ་གཞིག་པའི་ཕྱིར་དགེ་
སློང་དབྱུག་གུ་ཐོགས་པ་བསྐོ་བར་བྱའོ། །དེས་ཇི་ལྟར་གཞིག་པར་བྱ་ཞེ་ན་དེའི་ཕྱིར། སྒོ་ང་མེད་པ་རྣམས་ནི་གདོན་པར་བྱའོ་ཞེས་བྱ་བ་སྨྲས་ཏེ། ཚང་སྒོ་ང་མེད་པ་རྣམས་ནི་དབྱུག་གུ་ཐོགས་པས་གདོན་ཅིང་དབྱུང་བར་བྱའོ། །ཕྲ་མོ་རྣམས་ཀྱི་ནི་མི་སྤེལ་བར་བྱ་བའི་ཕྱིར་སྐུད་པས་དཀྲིའོ་ཞེས་བྱ་བ་
ནི། སྦྲང་བུ་ཏྲྱ་མ་བུ་ཀ་དང་། ཏྲཻ་ལ་ཏ་ཀ་ལ་སོགས་པ་དག་གི་ཚང་གང་ཡིན་པ་དེ་དག་ནི་མི་འཕེལ་བར་བྱ་བའི་ཕྱིར་སྐུད་པས་དཀྲི་བར་བྱའོ། །འདིར་གཞུང་ནི་མི་འཕེལ་བར་བྱ་བའི་ཕྱིར་སྐུད་པས་དཀྲིའོ་ཞེས་གསུངས་པ་ཡིན་ཏེ། དེ་ལ་ཚང་སྐུད་པས་དཀྲིས་ན་དེ་དག་གིས་ཡང་ཕྱིར་སྐྱེད་པར་མི་
ནུས་པའི་ཕྱིར་རོ། །གནས་མལ་ལ་སོགས་པ་སྦྱིན་ནོ་ཞེས་བྱ་བ་ལ། གོས་ལ་སོགས་པ་ཡང་བསྡུ་བའི་ཕྱིར་སོགས་པ་ཞེས་བྱ་བའི་སྒྲ་སྨོས་སོ། །ཡོད་པ་ཉིད་ན་དུ་མ་ཡང་ངོ་ཞེས་བྱ་བ་ནི། ཁྲི་ལ་སོགས་པ་ཡོད་པ་ཉིད་ཡིན་ན། གང་ཟག་གཅིག་ལ་ཡང་དུ་མ་སྦྱིན་པར་བྱ་བ་སྟེ། གལ་ཏེ་རྒན་རིམས་
ཀྱིས་ཁྲི་ལ་སོགས་པ་ལན་གཉིས་བསྟབས་སུ་ཡོད་དམ་ལན་གསུམ་ལ་སོགས་པ་བསྟབས་སུ་ཡོད་ན་ཡང་དེ་བཞིན་དུ་བསྟབས་ཤིང་སྦྱིན་པར་བྱའོ། །གལ་ཏེ་ལན་གྲངས་གཞན་ལ་ཁྱེད་པར་བྲིམ་དུ་མེད་ན་ཡང་རྒན་རིམས་ནས་བརྩམས་ཏེ་ཇི་ཙམ་ཁྱེད་པ་ཡན་ཆད་ལ་བྲིམ་པར་དོན་གྱིས་ཤེས་

པར་བྱ་སྟེ། འདི་ལྟར་རྒན་རིམས་ནས་བརྩམས་ཏེ། རྙེད་པར་བྲིམ་མོ་ཞེས་གསུངས་པའི་ཕྱིར་རོ། །ཁྲི་ཆེན་པོ་དག་ཀྱང་བསྐོ་བར་བྱ་བ་ཉིད་ཡིན་ནོ་ཞེས་བྱ་བ་ནི། ཁྲིའི་ཚད་ཆེན་པོ་ནི་ཁྲི་ཆེན་པོ་སྟེ། གང་དག་ལ་མལ་ཡང་བཅར་རུང་བའོ། །དེ་བས་ན་ཁྲི་ཆེན་པོ་དེ་ལྟ་བུ་དག་ཀྱང་རྒན་རིམས་སུ་བསྐོ་བར་
བྱའོ། །སྟན་དག་ཀྱང་ངོ་ཞེས་བྱ་བ་ཡང་བསྐོ་བར་བྱ་བ་ཉིད་ཡིན་ནོ། །འདིར་གཞུང་ནི་དེ་ལྟ་བས་ན་ཁྲི་ཆེན་པོ་དག་ཀྱང་རྒན་རིམས་བཞིན་དུ་བསྐོ་བར་བྱ་ཞིང་ཐ་ན་སྟན་དག་ཀྱང་ངོ་ཞེས་གསུངས་པ་ཡིན་ནོ། །དགེ་འདུན་གྱིས་གནས་མལ་གཡོགས་པ་དགེ་ཚུལ་མི་གཙང་བས་ཉམས་པར་བྱེད་པའི་ཆོས་
ཅན་ལ་སུས་ཀྱང་མི་སྦྱིན་ནོ་ཞེས་བྱ་བ་ནི། དགེ་འདུན་གྱི་གནས་མལ་ཁྲི་ལ་སོགས་པ་གོས་ལ་སོགས་པས་གཡོགས་པ་དག་དགེ་ཚུལ་འོག་རྫིང་ཅན་ནམ་ཟ་གུ་མི་གཙང་བས་གནས་མལ་ཉམས་པར་བྱེད་པའི་ཆོས་ཅན་ལ་མི་སྦྱིན་པའོ། །སུས་ཀྱང་ཞེས་སྨོས་པའི་སྒྲས་ནི། གནས་མལ་སྟོབས་
པ་འབའ་ཞིག་ཏུ་མ་ཟད་ཀྱི། གཞན་དག་གིས་ཀྱང་སྦྱིན་པར་མི་བྱའོ་ཞེས་བྱ་བར་སྟོན་ཏོ། །དགེ་སློང་མ་ལ་ཡང་མི་སྦྱིན་ནོ་ཞེས་བྱ་བ་ནི། དགེ་འདུན་གྱིས་གནས་མལ་གཡོགས་པ་དག་དགེ་སློང་མ་མི་གཙང་བས་ཉམས་པར་བྱེད་པའི་ཆོས་ཅན་ལ་ཡང་སུས་ཀྱང་མི་སྦྱིན་པའོ། །འདིར་གནས་
འབྱོར་ན་དེ་ལ་འདབ་ཏུ་གཙུག་ལག་ཁང་སྦྱིན་ནོ་ཞེས་བྱ་བ་ནི། དགེ་སློང་གི་གཙུག་ལག་ཁང་འདིར་གནས་ལྷག་པ་འབྱོར་པ་ཡོད་ན་དགེ་སློང་མ་རང་གི་ཚོགས་ཀྱི། དབྱར་ཁང་མེད་པ་ཆོམ་རྐུན་ལ་སོགས་པ་རྐྱེན་གྱི་དབང་གིས་ལོགས་ཤིག་ན་གནས་པ་གྲ་མི་ཐུབ་པ་དེ་ལ་དགེ་སློང་གི་གཙུག་ལག་
ཁང་གི་འདབ་ཀྱི་ཕྱོགས་སུ་གནས་ཁང་སྦྱིན་པར་བྱ་བའོ། །གནས་མལ་ལྷག་པ་བཟང་པོ་མ་ཡིན་པ་ཡང་ངོ་ཞེས་བྱ་བ་ནི། དགེ་སློང་མ་དེ་ལ་སྦྱིན་ནོ་ཞེས་བྱ་བར་སྦྱར་ཏེ། དགེ་འདུན་གྱི་གནས་མལ་མལ་ཆ་དང་སྟན་ལ་སོགས་པ་ཐ་ན་ཁྲིའུ་དང་ཆོལ་ཟངས་ཀྱི་བར་ཡན་ཆད་ཀྱང་དགེ་སློང་ཐམས་ཅད་ལ་ཁྱེད་
པར་བྲིམས་ཏེ། གལ་ཏེ་ལྷག་མ་འཐེབ་ཡོད་ན་དེའི་ནང་ནས་བཟང་པོ་མ་ཡིན་པ་དགེ་སློང་མ་དེ་ལ་སྦྱིན་པར་བྱའོ། །དེ་ལྟར་གནས་མལ་སྟོབས་པའི་དགེ་འདུན་ལ་རྒན་རིམས་ཀྱིས་གནས་མལ་བསྟབས་ཟིན་ནས་ཐམས་ཅད་ལ་འདི་སྐད་ཅེས་ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་

གདིང་བ་མེད་པར་ལོངས་སྤྱད་པར་མི་བྱ་གདིང་བ་རུང་བ་མ་ཡིན་པས་ལོངས་སྤྱད་པར་མི་བྱ་གདིང་བ་དྲི་མ་ཅན་གྱིས་ལོངས་སྤྱད་པར་མི་བྱའོ་ཞེས་གོ་བར་བྱའོ་ཞེས་བྱ་བ་ནི། དགེ་སློང་རྣམས་ལ་གདིང་བ་མེད་པ་དང་གདིང་བ་རུང་བ་མ་ཡིན་པ་དང་གདིང་བ་དྲི་མ་ཅན་གྱིས་དགེ་འདུན་གྱི་མལ་ཆ་དང་སྟན་
ལ་སོགས་པ་སྤྱད་པར་མི་བྱ་བའི་བསླབ་པའི་གཞི་ཡོད་པའི་ཕྱིར་དེ་དག་ལ་བསྐུལ་ཞིང་ནན་ཏུར་བྱ་བའི་ཆེད་དུ་དེ་སྐད་གོ་བར་བྱའོ། །ཟླ་བ་ཕྱེད་ཕྱེད་ཅིང་སོ་སོར་བརྟག་པར་བྱའོ་ཞེས་བྱ་བ་ནི། དགེ་སློང་རྣམས་ཀྱིས་གནས་མལ་མནོས་པ་གནས་མལ་སྟོབས་པས་ཟླ་བ་ཕྱེད་ཕྱེད་ཅིང་བྱུལ་ཞིང་བརྟག་པར་བྱའོ། །དམ་
ཚིག་ལས་འདས་ཤིང་སྤྱད་ན་གནས་པའི་གནས་ལ་གཞན་ནི་དགེ་འདུན་ལ་བརྗོད་དེ་དབྲོག་པར་བྱའོ་ཞེས་བྱ་བ་ནི། ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱད་པར་མི་བྱ་ཞེས་བྱ་བ་ལ་སོགས་པའི་དམ་ཚིག་སྔར་བསྒོ་བ་དེ་ལས་འདས་ཤིང་སྤྱོད་པ་དག་བྱུང་ན་དེ་གལ་
ཏེ་སློབ་མ་དང་ཉེ་གནས་སུ་གནས་པ་ཞིག་ཡིན་ན་ནི་དེའི་གནས་མཁན་པོ་དང་སློབ་དཔོན་གང་ཡིན་པ་ལ་བརྗོད་དེ་དགེ་འདུན་གྱིས་གནས་མལ་དེ་ཕྱིར་དབྲོག་པར་བྱའོ། །གལ་ཏེ་དེ་གནས་པ་མ་ཡིན་པ་གཞན་ཞིག་ཡིན་ན་ནི་དགེ་འདུན་ལ་བརྗོད་དེ་དགེ་འདུན་གྱིས་གནས་མལ་དེ་ཕྱིར་དབྲོག་པར་བྱའོ། །གནས་
མལ་སྟོབས་པ་དེས་ཚེས་བཅོ་ལྔའི་ཉིན་མོ་དགེ་འདུན་ལ་གནས་མལ་བསྟབས་ཟིན་ནས་འདི་སྐད་ཅེས་བརྗོད་པར་བྱ་སྟེ། དགེ་འདུན་སང་སྦྱིན་བདག་ཆེ་གེ་མོ་དང་ཞལ་ཏ་པ་ཆེ་གེ་མོ་དང་། སྤྱོད་ཡུལ་གྱི་གྲོང་ཆེ་གེ་མོ་དང་། ནད་གཡོག་ཆེ་གེ་མོས་གནས་པར་ཞལ་གྱིས་བཞེས་པར་འགྱུར་རོ་ཞེས་བརྗོད་
པར་བྱའོ་ཞེས་བྱ་བ་ནི། དབྱར་ཟླ་འབྲིང་པོ་ཉའམ་དབྱར་ཟླ་ཐ་ཆུངས་ཉའི་དུས་དེར་དེ་སྐད་བརྗོད་པར་བྱའོ། །དགེ་འདུན་དུ་གྱུར་པའི་དགེ་སློང་རྣམས་ཀྱིས་ཀྱང་དེའི་ཚེ་ཇི་ལྟར་སོ་སོར་བརྟགས་ཏེ་གནས་པར་ཁས་བླང་བར་བྱ་ཞེ་ན། དེའི་ཕྱིར་འགྱོད་པ་དང་གཞན་སྡུག་བསྔལ་བ་དང་ཡིད་མི་བདེ་བ་མི་སྐྱེད་
པ་ཉིད་དང་སེལ་བ་ཉིད་དག་དང་། བདེ་བ་དང་ཡིད་བདེ་བ་སྐྱེད་པ་ཉིད་དང་རྗེས་སུ་སྲུང་བ་ཉིད་དག་དང་ནད་གཡོག་ཉིད་ཚངས་པ་མཚུངས་པར་སྤྱོད་པ་དག་ལས་འབྱུང་བ་སོ་སོར་བརྟགས་པས་གནས་དང་སྤྱོད་ཡུལ་དང་བསོད་སྙོམས་དང་། སྨན་སྦྱིན་པར་བྱེད་པ་ལ་རྣམ་པར་བལྟས་ཏེ་གནས་པར་ཁས་བླང་

བར་བྱའོ་ཞེས་བྱ་བ་སྨྲས་ཏེ། འགྱོད་པ་དང་འགྱོད་པ་ལས་གཞན་པའི་སྡུག་བསྔལ་དང་། ཡིད་མི་བདེ་བ་མ་སྐྱེས་པ་མི་སྐྱེད་པ་ཉིད་དང་། སྐྱེས་པ་སེལ་བར་བྱེད་པ་ཉིད་དག་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་བ་སོ་སོར་བརྟགས་པས་གནས་ལ་རྣམ་པར་བལྟ་སྟེ། དེ་ལྟ་བུ་
འབྱུང་བར་འགྱུར་ན་གནས་པར་ཁས་བླང་བར་བྱའོ། །དེ་བཞིན་དུ་བདེ་བ་དང་ཡིད་བདེ་བ་མ་སྐྱེས་པ་སྐྱེད་པ་ཉིད་དང་། སྐྱེས་པ་རྗེས་སུ་སྲུང་བར་བྱེད་པ་ཉིད་དག་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་བ་སོ་སོར་བརྟགས་པས་གནས་ལ་རྣམ་པར་བལྟས་ཏེ། དེ་ལྟ་བུ་འབྱུང་
བར་འགྱུར་ན་གནས་པར་ཁས་བླང་ངོ་། །དེ་བཞིན་དུ་ན་བར་གྱུར་ན་ནད་གཡོག་ཉིད་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་བ་སོ་སོར་བརྟགས་པས་གནས་ལ་རྣམ་པར་བལྟས་ཏེ། དེ་ལྟ་བུ་འབྱུང་བར་འགྱུར་ན་གནས་པར་ཁས་བླང་ངོ་། །དེ་བཞིན་དུ་སྤྱོད་ཡུལ་གྱི་གྲོང་གང་
ནས་བསོད་སྙོམས་ལ་སོགས་པ་ཐོབ་པར་འགྱུར་བ་སོ་སོར་བརྟགས་པས་སྤྱོད་ཡུལ་ལ་རྣམ་པར་བལྟས་ཏེ། དེ་ལྟ་བུ་ཡོད་པར་གྱུར་ན་གནས་པར་ཁས་བླང་ངོ་། །དེ་བཞིན་དུ་སྦྱིན་བདག་གང་གིས་བསོད་སྙོམས་དང་ན་བའི་རྐྱེན་དང་སྨན་གྱི་ཡོ་བྱད་སྦྱོར་བ་ལ་སོ་སོར་བརྟགས་པས་བསོད་སྙོམས་དང་སྨན་སྦྱིན་པར་
བྱེད་པ་ལ་རྣམ་པར་བལྟས་ཏེ། དེ་ལྟ་བུ་ཡོད་པར་གྱུར་ན་གནས་པར་ཁས་བླང་ངོ་ཞེས་བྱ་བར་སྦྱར་རོ། །དེ་དག་ཐམས་ཅད་མེད་ན་དེར་གནས་པར་ཁས་བླང་བར་མི་བྱའོ། །དེ་ལ་སྡུག་བསྔལ་ཞེས་བྱ་བ་ནི་ལུས་ཀྱིའོ། །ཡིད་མི་བདེ་བ་ཞེས་བྱ་བ་ནི་ཡིད་ཀྱིའོ། །མི་བསྐྱེད་པ་ཞེས་བྱ་བ་ནི་མ་སྐྱེས་པ་མི་སྐྱེད་
པའོ། །སེལ་བ་ཉིད་ཅེས་བྱ་བ་ནི། སྐྱེས་པའི་ཕྱིར་འཆོས་པར་བྱེད་པའོ། །བདེ་བ་ཞེས་བྱ་བ་ནི་ལུས་ཀྱིའོ། །ཡིད་བདེ་བ་ཞེས་བྱ་བ་ནི་ཡིད་ཀྱིའོ། །སྐྱེས་པ་ཉིད་ཅེས་བྱ་བ་ནི་མ་སྐྱེས་པ་སྐྱེད་པའོ། །རྗེས་སུ་བསྲུང་བ་ཉིད་ཅེས་བྱ་བ་ནི། ཚོགས་པ་སྐྱེས་པ་རྣམས་ཅི་ནས་ཀྱང་ཉམས་པར་མི་འགྱུར་བ་དེ་ལྟར་
ཀུན་ཏུ་སྤྱོད་པའོ། །སོ་སོར་བརྟགས་པས་ཞེས་བྱ་བ་ནི། སོ་སོར་ཤེས་པར་བྱ་བས་སོ། །འདིར་གཞུང་ནི་དགེ་སློང་དེས་འདི་ལྟར་བརྟག་པར་བྱ་སྟེ། གནས་འདི་ན་བདག་གི་ཚངས་པ་མཚུངས་པར་སྤྱོད་པ་གང་དག་བདག་གིས་འགྱོད་པ་དང་སྡུག་བསྔལ་བ་དང་ཡིད་མི་བདེ་བ་མ་སྐྱེས་པ་མི་སྐྱེད་པ་ཉིད་དང་།

སྐྱེས་པ་སེལ་བ་ཉིད་དང་བདེ་བ་དང་ཡིད་བདེ་བ་མ་སྐྱེས་པ་སྐྱེད་པ་ཉིད་དང་། སྐྱེས་པ་རྗེས་སུ་བསྲུང་བ་ཉིད་དག་དང་བདག་ན་ན་ནད་གཡོག་བྱེད་པ་པོ་དེ་ལྟ་བུ་དག་ཡོད་དམ་ཞེས་སོ་སོར་བརྟགས་པས་གནས་ལ་རྣམ་པར་བལྟ་བར་བྱ་ཞིང་སྤྱོད་ཡུལ་འདི་ན་བདག་གིས་བསོད་སྙོམས་དང་
སྨན་སྦྱིན་པར་བྱེད་པ་ཡོད་དམ་ཞེས་སོ་སོར་བརྟགས་པས་སྤྱོད་ཡུལ་དང་སྦྱིན་བདག་ལ་རྣམ་པར་བལྟས་ཏེ། དེའི་འོག་ཏུ་གནས་པར་ཁས་བླང་བར་བྱའི། གཞན་དུ་ན་གནས་པར་ཁས་བླང་བར་མི་བྱའོ་ཞེས་གསུངས་པ་ཡིན་ནོ། །གང་དུ་གནས་པར་ཁས་བླང་བར་བྱ་ཞེ་ན། དེའི་ཕྱིར་གཡོགས་པར་
དགེ་སློང་གི་མདུན་རོལ་དུའོ་ཞེས་བྱ་བ་སྨྲས་ཏེ། གནས་སྟེང་གཡོགས་པའི་ནང་གི་ཕྱོགས་དེར་དགེ་སློང་གི་མདུན་དུ་ཚེས་བཅུ་དྲུག་གི་ནང་པར་གནས་པར་ཁས་བླང་བར་བྱའོ། །དེའི་སྔགས་ནི་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་
གནས་འདིར་འདི་ལྟ་སྟེ། གནས་རལ་བ་དང་འདྲུམས་པ་བཅོས་པའི་སླད་དུ་སྦྱིན་བདག་མིང་འདི་ཞེས་བགྱི་བ་དང་། ཞལ་ཏ་བ་མིང་འདི་ཞེས་བགྱི་བ་དང་། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང་བྲོ་གཡོག་ཆེ་གེ་མོ་ཞེས་བགྱི་བས་དབྱར་སྔ་མ་ཟླ་བ་གསུམ་གནས་པར་ཁས་བླང་ངོ་། །བདག་དབྱར་
འདི་ན་མཆིས་ཤིང་བདག་གི་དབྱར་གནས་ནི་འདི་ལགས་སོ་ཞེས་ལན་གསུམ་བརྗོད་པར་བྱའོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་གནས་པར་ཁས་བླང་ངོ་ཞེས་སྔགས་ཀྱི་བྱེ་བྲག་ཏུ་བྱའོ། །གཙུག་ལག་ཁང་དུ་མར་མི་བྱའོ་ཞེས་བྱ་བ་ནི། གཙུག་ལག་ཁང་དུ་མར་མཚམས་
དུ་མར་རྫས་གཅིག་གིས་མནན་ཏེ། དགེ་སློང་གིས་གནས་པར་ཁས་བླང་བར་མི་བྱའོ། །འདིར་གཞུང་ནི་དགེ་སློང་གིས་གཙུག་ལག་ཁང་གཉིས་སུ་དབྱར་གནས་པར་ཁས་བླང་བར་མི་བྱ་བའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་ན་དགེ་སློང་མེད་པ་ཉིད་དང་སྒོ་གླེགས་
མེད་པ་ཉིད་དང་བཅས་པར་ཡང་མི་བྱའོ་ཞེས་བྱ་བ་ནི། གཙུག་ལག་ཁང་གང་ན་འདི་གཉི་ག་མེད་པའི་གཙུག་ལག་ཁང་དེར་ཡང་གནས་པར་ཁས་བླང་བར་མི་བྱ་བའོ། །སྦྱིན་བདག་དང་ཞལ་ཏ་བ་དང་སྤྱོད་ཡུལ་གྱི་གྲོང་དང་ནད་གཡོག་དག་ཡོད་པ་ཉིད་ཡིན་ན་བརྗོད་པར་བྱའོ་ཞེས་བྱ་བ་ནི། གལ་ཏེ་གནས་དེ་

ན་དེ་དག་ཡོད་པ་ཉིད་ཡིན་ན་སྔར་ཚེས་བཅོ་ལྔའི་ཉིན་པར་གནས་མལ་སྟོབས་པས་ཀྱང་དགེ་འདུན་ལ་སང་སྦྱིན་བདག་ཆེ་གེ་མོ་དང་ཞལ་ཏ་བ་ཆེ་གེ་མོ་དང་སྤྱོད་ཡུལ་གྱི་གྲོང་ཆེ་གེ་མོ་དང་ནད་གཡོག་ཆེ་གེ་མོས་གནས་པར་ཞལ་གྱིས་བཞེས་པར་འགྱུར་རོ་ཞེས་བརྗོད་པར་བྱ་ཞིང་། ཚེས་བཅུ་དྲུག་གི་ནང་པར་དགེ་འདུན་
གནས་པར་ཁས་ལེན་པའི་སྔགས་བརྗོད་པའི་ཚེ་ཡང་དེ་སྐད་བརྗོད་པར་བྱའོ།། །།བམ་པོ་བཞི་བཅུ་དགུ་པ། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་པས་ཞག་བདུན་ལ་སོགས་པར་བྱིན་གྱིས་མ་བརླབས་
པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ། །སྐྱ་རེངས་མ་ཤར་ཚུན་ཆད་ཀྱི་དུས་སུ་མཚམས་ཀྱི་ཕྱི་རོལ་དུ་འདའ་བར་བྱེད་པ་ལ་ནི་ཉེས་པ་མེད་དེ། དེ་ལྟར་ཡང་གལ་ཏེ་འགྲོ་ན་དེར་ཡང་གནས་པར་མི་བྱའོ་ཞེས་གསུངས་པའི་ཕྱིར་རོ། །ཆོས་དང་ལྡན་པའི་དོན་ཏུ་ཞག་བདུན་བྱིན་གྱིས་བརླབ་
པར་བྱའོ་ཞེས་བྱ་བ་ནི། ཆོས་དང་མི་འབྲལ་བ་ནི་ཆོས་དང་ལྡན་པ་སྟེ། དེའི་དོན་གྱི་ཆེད་དུ་མཚམས་ཀྱི་ཕྱི་རོལ་དུ་འགྲོ་ན་ཞག་གཅིག་གམ་གཉིས་སམ་བདུན་མན་ཆད་ཇི་ཙམ་གྱིས་དོན་དེ་འགྲུབ་པ་དེ་ཙམ་གྱི་དུས་མཚམས་ཀྱི་ནང་དུ་དགེ་སློང་གཅིག་གི་མདུན་དུ་བྱིན་གྱིས་བརླབས་ཏེ་འགྲོ་བར་བྱའོ། །
འདིའི་སྔགས་ནི་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་མིང་འདི་ཞེས་བགྱི་བ། བགྱི་བ་ཞིག་གི་སླད་དུ་དགུང་བདུན་མཚམས་ཀྱི་སླད་རོལ་དུ་མཆི་བ་དང་། དེ་ཚུན་
ཆད་ཀྱིས་སླར་མཆིས་པར་བྱིན་གྱིས་བརླབ་པོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ་ཞེས་ལན་གསུམ་བཟླས་སོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་གནས་པར་ཁས་བླང་པ་ལས་ཞེས་སྔགས་ཀྱི་བྱེ་བྲག་ཏུ་བྱའོ། །འདིར་ཞག་
བདུན་ཞེས་སྨོས་པ་ནི་མཚོན་པ་ཙམ་དུ་ཟད་དོ། །ཞག་གཅིག་གམ་གཉིས་སམ་བདུན་མན་ཆད་ཇི་ཙམ་གྱིས་དོན་དེ་འགྲུབ་པ་དེ་ཙམ་གྱི་ཞག་གྲངས་སྨོས་པར་བྱའོ། །ཆོས་དང་ལྡན་པའི་དོན་བསྟན་པའི་ཕྱིར། འདི་ལྟ་སྟེ། དགེ་སློང་གི་ཀུན་དགའ་ར་བ་འབུལ་བ་དང་གཙུག་ལག་ཁང་ཞལ་བསྲོ་བ་དང་གནས་

མལ་འབུལ་བ་དང་བསླབ་པ་བརྟན་པོ་བཅའ་བ་དང་མཆོད་རྟེན་ཞལ་བསྲོ་བ་དང་མཆོད་སྡོང་གཟུགས་པ་དང་རྒྱལ་མཚན་བསྒྲེང་བ་དང་མཆོད་པ་བྱ་བ་དང་། ཚོན་དང་ཙན་དན་དང་གུར་གུམ་གྱི་བྱུག་པས་སྐུད་པ་དང་ཀླག་པ་དང་འགྱོད་པ་བསལ་བ་དང་ལྟ་བའི་རྣམ་པ་སྤང་བ་དང་ཕྱོགས་དང་མཐུན་
པ་བསྒྲུབ་པ་དང་བཟོད་པ་གསོལ་བ་དང་སྤོ་བ་ལ་སོགས་པ་བཞི་བྱ་བ་དང་དབྱུང་བ་དང་ནད་པ་དབུགས་དབྱུང་བ་དག་ལའོ་ཞེས་བྱ་བ་སྨྲས་ཏེ། དགེ་སློང་མཚམས་ཀྱི་ཕྱི་རོལ་ན་གནས་པ་གཞན་གྱི་ཆོས་དང་ལྡན་པའི་དོན་འདི་ལྟ་བུ་དག་བྱུང་ན་དེ་སྒྲུབ་པའི་དོན་དུ་དགེ་སློང་དབྱར་གནས་པར་ཁས་བླང་པ་མཚམས་ཀྱི་ནང་
ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་པོ་ཞེས་བྱ་བར་སྦྱར་རོ། །དགེ་སློང་གི་ཞེས་བྱ་བ་ནི། དགེ་སློང་མཚམས་ཀྱི་ཕྱི་རོལ་ན་གནས་པ་གཞན་གྱིའོ། །ཀུན་དགའ་ར་བ་འབུལ་ཞེས་བྱ་བ་ནི། མཚམས་ཀྱི་ནང་ན་བཞུགས་པའི་དགེ་
འདུན་ལའོ། །གཙུག་ལག་ཁང་ཞལ་བསྲོ་བ་ཞེས་བྱ་བ་ནི། འཇུག་པ་དག་དང་གནས་པ་ལ་སོགས་པའི་ཆོ་ག་བྱ་བའོ། །གནས་མལ་འབུལ་བ་ཞེས་བྱ་བ་ནི། གནས་ཀྱི་གཞི་དང་མལ་ཆ་ལ་སོགས་པ་དགེ་འདུན་ལ་འབུལ་བའོ། །བསླབ་པ་བརྟན་པོ་བཅའ་བ་ཞེས་བྱ་བ་ནི། བསྟན་པ་ལ་ཕན་པའི་གཙིགས་
བརྟན་པོ་བཅའ་བའོ། །མཆོད་རྟེན་ཞལ་བསྲོ་བ་ཞེས་བྱ་བ་ནི། བརྩིགས་ནས་ཞལ་བསོ་བའི་ཆོ་ག་བྱ་བའོ། །མཆོད་སྡོང་གཟུགས་པ་ཞེས་བྱ་བ་ནི། མཆོད་རྟེན་གྱི་སྲོག་ཤིང་གཟུགས་པའོ། །རྒྱལ་མཚན་བསྒྲེང་བ་ཞེས་བྱ་བ་ནི། རྒྱལ་མཚན་བསྒྲེང་བ་དང་གདུགས་གདགས་པ་ལ་སོགས་པའོ། །
མཆོད་པ་བྱ་བ་ཞེས་བྱ་བ་ནི། དཀོན་མཆོག་གསུམ་ལའོ། །ཚོན་གྱི་བྱུག་བས་སྐུད་པ་ཞེས་བྱ་བ་ནི། མཆོད་རྟེན་ལ་སོགས་པ་ལ་ཡུང་བ་དང་བ་བླ་ལ་སོགས་པའི་བྱུག་པས་སྐུད་པའོ། །ཙན་དན་དང་གུར་གུམ་གྱི་བྱུགས་པས་སྐུད་པ་ཞེས་བྱ་བ་ཡང་དེ་བཞིན་ནོ། །ཀླག་པ་ཞེས་བྱ་བ་ནི། མདོ་སྡེའི་སྡེ་ཚན་
བཀླགས་པ་དང་བཏོན་པ་ན་རྙེད་པ་གྲུབ་པ་ཡོད་པས་དཀོན་མཆོག་གསུམ་ལ་མཆོད་པ་བྱ་བའམ་ཀླག་པའི་ལུང་མནོད་པའོ། །འགྱོད་པ་བསལ་བ་ཞེས་བྱ་བ་ནི། ངན་པ་བྱས་པའི་དངོས་པོས་འགྱོད་པར་གྱུར་པ་བསལ་བའོ། །འདིར་ལྟ་བའི་རྣམ་པ་སྤང་བ་ཞེས་བྱ་བ་ནི། སྡིག་པ་ཅན་གྱི་ལྟ་བའི་རྣམ་པ་

སྐྱེད་པ་བསལ་བའོ། །ཕྱོགས་དང་མཐུན་པ་བསྒྲུབ་པ་ཞེས་བྱ་བ་ནི། ནན་ཏུར་གྱི་ལས་སམ་རྩོད་པ་འགའ་ཞིག་བྱུང་བ་ན་དེའི་ཚེ་ཆོས་ཀྱིས་ཕྱོགས་བཙལ་བར་རིགས་པའོ། །བཟོད་པ་གསོལ་བ་ཞེས་བྱ་བ་ནི། སྔར་དགེ་འདུན་གྱིས་སྤངས་པ་ལ་སོགས་པ་ཕྱིར་དགེ་འདུན་ལ་བཟོད་པ་གསོལ་བའོ། །སྤོ་བ་ལ་སོགས་པ་
བཞི་ཞེས་བྱ་བ་ནི། སྤོ་བ་དང་གཞི་ནས་སྤོ་བ་དང་། མགུ་བར་བྱ་བ་དང་། གཞི་ནས་མགུ་བར་བྱ་བ་སྟེ། ཡང་གཞི་ནས་བསླང་སྟེ་སྤོ་བ་དང་། ཡང་གཞི་ནས་བསླང་སྟེ་མགུ་བར་བྱ་བ་ནི། གཞི་ནས་སྤོ་བ་དང་། གཞི་ནས་མགུ་བར་བྱ་བ་ལས་ཐ་མི་དད་དོ། །དབྱུང་བ་ཞེས་བྱ་བ་ནི། དགེ་འདུན་ལྷག་མའི་ལྟུང་བ་
ལས་དབྱུང་བའོ། །ནད་པ་དབུགས་དབྱུང་བ་ཞེས་བྱ་བ་ནི་ནད་པའི་ནད་དྲི་བའོ། །དགེ་སློང་མའི་ལྕི་བའི་ཆོས་ཀྱི་མགུ་བར་བྱ་བ་འབུལ་བ་ལ་ཡང་ངོ་ཞེས་བྱ་བ་ནི། དགེ་སློང་མ་མཚམས་ཀྱི་ཕྱི་རོལ་ན་གནས་པ་གཞན་གྱི་ཆོས་དང་ལྡན་པའི་དོན་ནི་སྔར་དགེ་སློང་གི་སྐབས་སུ་བསྟན་པ་དེ་དག་ཉིད་ཀྱང་ཡིན་ལ།
དེའི་སྟེང་དུ་འདིས་ཀྱང་བསྣན་པར་བྱ་བའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དགེ་སློང་མ་རྣམས་ཀྱི་ལྕི་བའི་ཆོས་ལས་འདས་པ་གཉི་གའི་དགེ་འདུན་ལ་མགུ་བ་སྤྱད་པར་བྱ་དགོས་པས་འདི་དང་སྔ་མ་དག་ལྟ་བུའི་ཆོས་དང་ལྡན་པའི་དོན་དག་བྱུང་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་
བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །དགེ་སློབ་མའི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དང་བསྙེན་པར་རྫོགས་པར་བྱ་བ་ལ་ཡང་ངོ་ཞེས་བྱ་བ་ནི། དགེ་སློབ་
མ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མནོད་པ་དང་། བསྙེན་པར་རྫོགས་པར་བྱ་བ་ཆོས་དང་ལྡན་པའི་དོན་དེ་གཉིས་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་
ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །དགེ་ཚུལ་གྱི་དེ་ལའོ་ཞེས་བྱ་བ་ནི། དགེ་ཚུལ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་བསྙེན་པར་རྫོགས་པར་བྱ་བ་ཆོས་དང་ལྡན་པའི་དོན་དེ་བྱུང་བ་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་

གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །དེ་ལ་ཞེས་བྱ་བ་ནི་བསྙེན་པར་རྫོགས་པར་བྱ་བ་ལའོ། །དགེ་ཚུལ་མའི་བསླབ་པའི་སྡོམ་པ་
བྱིན་པ་ལའོ་ཞེས་བྱ་བ་ནི། དགེ་ཚུལ་མ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་བསླབ་པའི་སྡོམ་པ་སྦྱིན་པར་བྱ་བ་ཆོས་དང་ལྡན་པའི་དོན་དེ་བྱུང་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་
ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །ཁྱིམ་པ་དང་ཁྱིམ་པ་མོའི་མགོ་དཀྲི་བ་དང་བང་བསང་བ་དང་སྐྲ་བསྐྱེད་པ་དང་སྐྲ་བྲེག་པ་དང་གདུབ་ཀོར་སྐྱེད་པ་དག་ལའོ་ཞེས་བྱ་བ་ནི། ཁྱིམ་པ་དང་ཁྱིམ་པ་མོ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཆོས་དང་ལྡན་པའི་དོན་འདི་
ལྟ་བུ་དག་བྱུང་ན་དེ་བསྒྲུབ་པའི་དོན་དུ་ཡང་། དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །མགོ་དཀྲི་བ་ཞེས་བྱ་བ་ནི། ཕྱིས་ཁྱེའུ་རྣམས་ཀྱིས་
འཕྲུལ་བ་བསལ་བར་བྱ་བའི་ཕྱིར་མགོ་དཀྲི་བར་བྱེད་པ་གང་ཡིན་པའོ། །བང་བསང་བ་ཞེས་བྱ་བ་ནི། བུད་མེད་བུ་བཙས་རྣམས་ཀྱི་མངལ་གྱི་དྲི་མ་བསལ་བའི་ཕྱིར་ཁྲུས་བྱེད་པའོ། །སྐྲ་བསྐྱེད་པ་ཞེས་བྱ་བ་ནི། ཁྱེའུ་རྣམས་ཀྱི་སྐྲ་དེ་ཕན་ཆད་མི་བྲག་པར་གཞག་པར་བྱ་བའོ། །སྐྲ་བྲེག་པ་ཞེས་བྱ་བ་ནི།
དེ་དག་ཉིད་ཀྱི་དང་པོའི་སྐྲ་དག་བྲེག་པར་བྱ་བའོ། །གདུབ་ཀོར་སྐྱེད་པ་ཞེས་བྱ་བ་ནི། རྣ་ཆ་གདུབ་ཀོར་གཞུག་པའི་ཕྱིར་རྣ་བའི་བུ་ག་སྐྱེད་པའོ། །བསྙེན་པར་མ་རྫོགས་པ་རྣམས་ཀྱིས་དགེ་འདུན་ལྷག་མའི་སྐབས་མ་གཏོགས་པ་སྔ་མ་དག་ལ་ཡང་ངོ་ཞེས་བྱ་བ་ནི། སྔར་དགེ་སློང་དང་དགེ་སློང་མའི་ཆོས་དང་
ལྡན་པ་དོན་ཇི་སྐད་བསྟན་པ་དེ་དག་ལས་དགེ་འདུན་ལྷག་མའི་སྐབས་དང་སྤོ་བ་ལ་སོགས་པ་བཞི་དང་དབྱུང་བ་མ་གཏོགས་པ་ཀུན་དགའ་ར་བ་འབུལ་བ་ཞེས་བྱ་བ་ལ་སོགས་པ་ཐམས་ཅད་ནི་བསྙེན་པར་མ་རྫོགས་པ་དགེ་སློབ་མ་དང་དགེ་ཚུལ་དང་དགེ་ཚུལ་མ་དང་ཁྱིམ་པ་དང་། ཁྱིམ་པ་མོ་རྣམས་ཆོས་དང་

ལྡན་པའི་དོན་ཡང་ཡིན་པས་བསྙེན་པར་མ་རྫོགས་པ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཆོས་དང་ལྡན་པའི་དོན་དེ་ལྟ་བུ་དག་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་
འཁོར་བར་བྱིན་གྱིས་བརླབ་བོ་ཞེས་བྱ་བ་སྦྱར་རོ། །དེ་ལྟ་ན་བཟོད་པ་གསོལ་བ་ཡང་དེ་དག་ལ་ཐལ་བར་འགྱུར་རོ་ཞེ་ན་དེའི་ཕྱིར། ཁྱིམ་པ་དང་ཁྱིམ་པ་མོའི་བཟོད་པ་གསོལ་བ་ནི་ཁ་བསྲང་བའོ་ཞེས་བྱ་བ་སྨྲས་ཏེ། ཁྱིམ་པ་དང་ཁྱིམ་པ་མོའི་བཟོད་པ་གསོལ་བ