Luận tạng Tây Tạng (Tengyur) — Tập 163

༄༅༅། །བམ་པོ་སུམ་ཅུ་དྲུག་པ། ལྟུང་བྱེད་གཞན་བྱེད་པའི་ཚུལ་གཞན་བརྗོད་པར་བྱ་སྟེ། རྒྱལ་པོའི་ཕོ་བྲང་གི་གནས་ལ་ཡང་ངོ་ཞེས་བྱ་བ་ནི། འབྲེལ་པ་ཉིད་ལ་ཞེས་བྱ་བར་སྦྱར་ཏེ།
གལ་ཏེ་དགེ་སློང་ནུབ་མོ་རྒྱལ་པོའི་ཕོ་བྲང་གི་གནས་སུ་ལུས་ཀྱིས་འབྲེལ་པར་གྱུར་ཅིང་དེར་འདུ་ཤེས་པར་ཡང་མ་གྱུར་ན་དེའི་ཚེ་ཁ་ན་མ་ཐོ་བ་འདིར་འགྱུར་རོ། །འདིར་གཞུང་ནི་དགེ་སློང་ནམ་མ་ལངས་པ་ལ་
ནམ་མ་ལངས་པར་འདུ་ཤེས་བཞིན་དུ་རྒྱལ་པོའི་ཕོ་བྲང་གི་སྒོའི་གཏན་པ་ལས་འདའ་བར་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །གྲོང་ཁྱེར་དང་ནི་ཉེས་བྱས་སོ་ཞེས་བྱ་བ་ནི། གྲོང་ཁྱེར་གྱི་གནས་དང་
འབྲེལ་པ་ཉིད་ལ་ནི་སྦྱོར་བ་ལས་བྱུང་བའི་ཉེས་བྱས་སུ་འགྱུར་བའོ། །ཅི་གྲོང་ཁྱེར་དང་འབྲེལ་པ་ཉིད་ལ་བྱེ་བྲག་མེད་པར་ཉེས་བྱས་འདིར་འགྱུར་རམ་ཞེ་ན་དེའི་ཕྱིར། གལ་ཏེ་དེའི་དོན་ཉིད་ཡིན་ནའོ་ཞེས་
བྱ་བ་སྨྲས་ཏེ། འབྲེལ་པ་གཉིས་པོ་བཙུན་མོའི་འཁོར་དང་རྒྱལ་པོའི་ཕོ་བྲང་དུ་འཇུག་པ་ཞེས་བྱ་བ་གང་ཡིན་པ་དེ་གཉིས་ལས་གལ་ཏེ་གཅིག་དང་འབྲེལ་པར་བྱ་བའི་དོན་གྱི་ཕྱིར་གྲོང་ཁྱེར་དེ་དག་དང་འབྲེལ་པར་

གྱུར་ན་དེའི་ཚེ་ཉེས་བྱས་སུ་འགྱུར་རོ། །འདི་སྐད་བསྟན་ཏེ། གལ་ཏེ་བཙུན་མོའི་འཁོར་གྱི་ནང་དུ་འཇུག་པའི་ཕྱིར་རམ། རྒྱལ་པོའི་ཕོ་བྲང་དུ་འཇུག་པའི་ཕྱིར་གྲོང་ཁྱེར་གྱི་སྒོར་འཇུག་ན་དེའི་ཚེ་ཉེས་བྱས་སོ། །
ཅི་སྟེ་དགོས་པ་གཞན་གྱི་ཕྱིར་འཇུག་ན་དེའི་ཚེ་ལྟུང་བ་མེད་དོ། །དེ་བཞིན་དུ་རྒྱལ་པོའི་ཕོ་བྲང་ལས་གཞན་པའི་ཁྱིམ་དུ་སྐྱ་རེངས་མ་ཤར་བར་འཇུག་ན་ཡང་ཉེས་བྱས་སོ། །འདིར་གཞུང་ནི་བཙུན་པ་རེ་ཞིག་དགེ་སློང་རྒྱལ་པོའི་ཕོ་བྲང་
མ་གཏོགས་པ་དེ་ལས་གཞན་པའི་ཁྱིམ་དག་ཏུ་དགུང་མ་སངས་སྐྱ་རེངས་མ་ཤར་བར་དབེན་པའི་མཐའི་སྒོ་གཏན་ཚུན་ཆད་ལས་འདའ་བར་བགྱིད་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །དབེན་པ་ཞེས་བྱ་བ་ནི་རྒྱུན་
ལུགས་མེད་ཅིང་གཞན་དང་ཐུན་མོང་མ་ཡིན་པའོ། །མཐའ་ཞེས་བྱ་བ་ནི་རྒྱལ་པོའི་ཕོ་བྲང་དང་ཉེ་བ་སྟེ། དབེན་པའི་མཐའ་ནི་བཙུན་མོའི་འཁོར་གྱི་སྒོ་གཏན་ལ་བྱའོ། །འདི་ལ་དུས་མ་ཡིན་པར་འགྲོ་བའི་ལྟུང་བྱེད་ཀྱང་སྲིད་པར་བསྟན་
པའི་ཕྱིར། འདི་ལ་ཅིག་ཤོས་ཀྱི་ཁ་ན་མ་ཐོ་བ་དེ་ཡང་ངོ་ཞེས་བྱ་བ་སྨྲས་ཏེ། རྒྱལ་པོའི་ཕོ་བྲང་ལ་སོགས་པར་སྐྱ་རེངས་དང་པོ་འཆར་བའི་མདུན་རོལ་དུ་དགེ་སློང་ལ་སོགས་པ་ལ་མ་སྨྲས་པར་འཇུག་པ་འདི་ཅིག་ཤོས་ཀྱི་ཁ་ན་མ་ཐོ་བ་དེ་

ཡང་ཡོད་དེ་དུས་མ་ཡིན་པར་འགྲོ་བའི་ལྟུང་བྱེད་ཀྱང་ཡོད་དོ་ཞེས་བྱ་བའི་ཐ་ཚིག་གོ། །ཅི་བཙུན་མོའི་འཁོར་དང་རྒྱལ་པོའི་ཕོ་བྲང་ཞེས་བྱ་བ་སྔ་མ་དེ་གཉིས་དང་གྲོང་ཁྱེར་དང་འབྲེལ་པར་དེའི་དོན་ཉིད་དུ་འགྲོ་བ་གང་ཡང་རུང་བ་ལ་ཅིག་ཤོས་ཀྱི་ཁ་ན་མ་ཐོ་བ་དེ་ཡང་ཡོད་དམ་ཞེ་ན་དེའི་ཕྱིར། གལ་ཏེ་
རྒྱལ་པོ་དང་བཙུན་མོ་དང་གཞོན་ནུ་དང་ཞང་བློན་དང་བར་ཆད་དང་གདུལ་བའི་དབང་གིས་མ་ཡིན་པ་ལའོ་ཞེས་བྱ་བ་སྨྲས་ཏེ། འདིར་ལུང་ནི་རྒྱལ་པོས་བོས་པ་དང་བཙུན་མོ་དང་གཞོན་ནུ་དང་ཞང་བློན་དང་བར་ཆད་བརྒྱད་པོ་དག་ལས་གང་ཡང་རུང་བ་ཉེ་བར་གནས་པར་གྱུར་ན་ཉེས་པ་མེད་དོ་ཞེས་
གསུངས་པ་དང་། འདུལ་བའི་དབང་གིས་འགྲོ་བའི་ལུང་ནི་འདིར་ཡང་འཕགས་པ་ཤཱ་རིའི་བུ་བྱུང་བའི་མཐའ་ལས་རྗེས་སུ་གནང་བ་ཡིན་ནོ། །མ་ཟླུགས་པར་རྒྱལ་པོའི་ཕོ་བྲང་དུ་འཇུག་པར་མི་བྱའོ་ཞེས་བྱ་བ་ནི། རྒྱལ་པོའི་ཕོ་བྲང་གི་ནང་དུ་མ་ཟླུགས་པར་གྱ་ཚོམ་དུ་འཇུག་པར་མི་བྱའོ། །
འདིར་གཞུང་ནི་ཁྱོད་ཀྱིས་གྱ་ཚོམ་དུ་རྒྱལ་པོའི་ཕོ་བྲང་དུ་འཇུག་པར་མི་བྱ་བར་སྒོར་བསྡད་ནས། ཤཱཀྱའི་དགེ་སློང་འོངས་སོ་ཞེས་བརྗོད་པར་བྱ་ཞིང་། གལ་ཏེ་སྤྱོན་ཅིག་ཅེས་ཟེར་ན་འཇུག་པར་བྱའོ་ཞེས་གསུངས་པ་ཡིན་ནོ། །རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དོ་ཞེས་བྱ་བ་
དེ་བཤད་ཟིན་ཏོ།། །།གང་ལ་བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སོ་སོར་ཐར་པའི་མདོ་གདོན་པ་འདོན་པའི་ཚེ་དེ་ལ་ལན་གཉིས་ཉམས་སུ་མྱོང་ཞིང་ཡིད་རྨོངས་པ་མ་ཡིན་པས་འདི་ལ་ཆོས་འདི་ཡོད་པར་བདག་གིས་ད་གདོད་ཤེས་སོ་
ཞེས་ཟེར་བ་དེ་ལའོ་ཞེས་བྱ་བ་སྨྲས་ཏེ། བསླབ་པའི་གཞི་འདིའི་དངོས་པོ་ལ་ཁྱད་དུ་གསོད་པ་ཞེས་བྱ་བ་ནི་བསླབ་པའི་གཞིའི་དངོས་པོ་ཡོད་པ་ཁོ་ན་ལ་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ལོག་པར་བསྒྲུབ་པ་ཡིན་
ནོ། །དེ་ལ་ཞེ་སྡང་གིས་ལོག་པར་བསྒྲུབས་ན་ནི་མ་གུས་པའི་ཚུལ་གྱིས་ལྟུང་བྱེད་ཀྱི་སྐབས་སུ་སྔར་ལྟུང་བ་བཅས་པ་ཉིད་དུ་འགྱུར་རོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བ་བཅས་པ་ནི་ད་འདིར་རྣམ་པར་དབྱེ་བར་བྱའོ། །སོ་སོར་ཐར་པའི་མདོ་གདོན་པ་འདོན་པའི་

ཚེ་ཞེས་བྱ་བ་ནི་གསོ་སྦྱོང་གི་ལས་ཀྱི་ཚེ་སོ་སོར་ཐར་པའི་མདོ་གདོན་པ་འདོན་པ་ན་བསླབ་པའི་གཞིའི་དངོས་པོ་ལ་ཁྱད་དུ་གསོད་ན་ལྟུང་བྱེད་དུ་འགྱུར་གྱི་དུས་གཞན་གྱི་ཚེ་བརྗོད་ན་ནི་ཉེས་བྱས་སུ་འགྱུར་བའོ། །འདིར་སོ་སོར་ཐར་པའི་མདོ་གདོན་པ་འདོན་པ་ལ་ལོག་པར་བསྒྲུབ་པ་
ནི་རྣམ་པ་གསུམ་སྣང་སྟེ། ཁྱད་དུ་གསོད་པ་དང་སྤོང་བ་དང་བསླབ་པའི་གཞིའི་དངོས་པོ་ལ་ཁྱད་དུ་གསོད་པའོ། །དེ་ལ་ཁྱད་དུ་གསོད་པ་ནི་སྔར་ཁྱད་དུ་གསོད་པའི་ལྟུང་བྱེད་བསྟན་པའི་སྐབས་སུ་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་བསླབ་པ་ཁྱད་དུ་བསད་ནས་ཚེ་དང་ལྡན་པ་དག་གང་
དགེ་སློང་རྣམས་འགྱོད་པ་དང་། ཞུམ་པ་དང་བག་འཁུམས་པ་དང་གནོད་པ་དང་ཡིད་ལ་གཅགས་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ན་འདོན་ཅི་དགོས་ཞེས་དེ་སྐད་ཟེར་ན་ལྟུང་བྱེད་དོ་ཞེས་བསྟན་པ་ཡིན་ནོ། །སྤོང་བ་ནི་སྔར་
བསླབ་པ་ལ་ཉེ་བར་འཇོག་པ་སྤོང་བའི་ལྟུང་བྱེད་བསྟན་པའི་སྐབས་སུ་དགེ་སློང་རྣམས་ཀྱིས་ཚེ་དང་ལྡན་པ་བསླབ་པ་འདི་ལ་སློབས་ཤིག་ཅེས་བསྒོ་ན་དེ་ལ་འདི་སྐད་ཅེས་བདག་ནི་དགེ་སློང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ལ་འདྲིའི་བར་དུ་བྱིས་པ་གླེན་པ་མི་གསལ་བ་མི་མཁས་པ་
ཁྱེད་ཅག་གི་ཚིག་གིས་བསླབ་པ་འདི་ལ་མི་སློབ་བོ་ཞེས་དེ་སྐད་ཟེར་ན་ལྟུང་བྱེད་དོ་ཞེས་བསྟན་པ་ཡིན་ནོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པ་ནི་སྐབས་འདིས་སྟོན་ཏོ། །དེ་ལན་གཉིས་ཉམས་སུ་མྱོང་ཞིང་ཞེས་བྱ་བ་ནི། གང་གིས་སོ་སོར་ཐར་པའི་མདོ་གདོན་པ་འདོན་པ་ལན་གཉིས་
ཉམས་སུ་མྱོང་བ་དེ་ནི་དེ་ལན་གཉིས་ཉམས་སུ་མྱོང་བ་སྟེ། དེ་ལན་གཉིས་ཉམས་སུ་མྱོང་བའི་དགེ་སློང་དེ་སྐད་ཟེར་བ་དེ་ལ་ཁ་ན་མ་ཐོ་བ་འདིར་འགྱུར་རོ། །ལན་གཉིས་ཉམས་སུ་མ་མྱོང་བ་ལ་ནི་ཉེས་བྱས་ཁོ་ནར་འགྱུར་ཏེ། འདིར་གཞུང་ནི་གལ་ཏེ་དགེ་སློང་རྣམས་ཀྱིས་ཀྱང་ཚེ་དང་ལྡན་པ་འདི་སྔོན་གསོ་
སྦྱོང་གི་ལས་གཉིས་སམ་གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས་ཞེས་གསུངས་པ་ཡིན་ནོ། །ཡིད་རྨོངས་པ་མ་ཡིན་པས་ཞེས་བྱ་བ་ནི། ཡིད་རྨོངས་པས་དེ་སྐད་སྨྲས་པ་ལ་ནི་ལྟུང་བ་མེད་དོ། །འདིར་གཞུང་ནི་ལམ་གོལ་བར་རྒས་པ་མི་ཤེས་པ་ཡང་དག་པ་ཉིད་ལ་ནི་ལྟུང་བ་མེད་དོ་

ཞེས་གསུངས་པ་ཡིན་ནོ། །དེའི་ཕྱིར་ཡིད་རྨོངས་པ་མ་ཡིན་པས་བཞད་གད་ཙམ་གྱི་བསམ་པས་ཀྱང་འདི་ལ་ཆོས་འདི་ཡོད་པར་བདག་གིས་གཟོད་ཤེས་སོ་ཞེས་ཟེར་ཞིང་སོ་སོར་ཐར་པའི་མདོ་གདོན་པ་འདི་ལ་ཆོས་འདི་ཡང་ཡོད་ཅིང་བསླབ་པའི་གཞི་འདི་ཡང་ཡོད་པར་བདག་གིས་ད་གཟོད་ཤེས་སོ་ཞེས་ཟེར་
བ་དེ་ནི་བསླབ་པའི་གཞིའི་དངོས་པོ་ལ་ཁྱད་དུ་གསོད་པ་ཡིན་ནོ། །དེ་སྐད་ཟེར་བའི་དགེ་སློང་དེ་ལ་ལྟུང་བྱེད་དུ་འགྱུར་ལ། གཞན་གྱི་ཚེ་བརྗོད་ན་ནི་ཉེས་བྱས་སོ། །བསླབ་པའི་གཞི་འདྲལ་བ་ཐམས་ཅད་ལ་མ་གུས་པའི་སེམས་བསྐྱེད་པ་དེ་ལ་ཡང་ཉེས་བྱས་སོ། །གལ་ཏེ་སངས་རྒྱས་བཅོམ་
ལྡན་འདས་ལ་ཡང་མ་གུས་པའི་སེམས་བསྐྱེད་ན་དེའི་ཚེ་ལྟུང་བྱེད་དུ་ཡང་འགྱུར་རོ། །བརྫུན་དུ་སྨྲས་པ་ཉིད་ཡིན་ན་ནི་བརྫུན་དུ་སྨྲ་བའི་ལྟུང་བྱེད་གཞན་དུ་ཡང་འགྱུར་རོ། །མཚན་གཞན་གྱི་འདོན་པའི་ཚེ་ཐུན་མོང་བ་ལ་ནི་ཉེས་བྱས་སོ་ཞེས་བྱ་བ་ལ། མཚན་གཞན་གྱི་འདོན་
པའི་ཚེ་ཞེས་བྱ་བ་ནི། དགེ་སློང་མ་རྣམས་ཀྱི་གསོ་སྦྱོང་འདོན་པའི་ཚེའོ། །ཐུན་མོང་བ་ལ་ནི་ཉེས་བྱས་སོ་ཞེས་བྱ་བ་ནི་དགེ་སློང་མའི་བསླབ་པའི་གཞི་དགེ་སློང་དང་ཐུན་མོང་གང་ཡིན་པ་ལ་འདི་སྐད་ཅེས་བདག་གིས་ད་གཟོད་ཤེས་སོ་ཞེས་བྱ་བ་ལ་སོགས་པ་ཟེར་ན་ཉེས་
བྱས་སོ། །འདིར་གཞུང་ནི་བཙུན་པ་དགེ་སློང་མ་རྣམས་ཀྱིས་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་མཆི་ན་ལྟུང་བ་ཅིར་འགྱུར། གང་ཚེ་བསླབ་པ་
ཐུན་མོང་བ་ལས་བསམ་ཏེ་སྨྲ་ན་ཉེས་བྱས་སོ་ཞེས་གསུངས་པ་ཡིན་ནོ། །མདོ་སྡེ་དང་ལྡན་པ་སྨྲ་བ་ན་ཡང་ངོ་ཞེས་བྱ་བ་ནི་མདོ་སྡེ་དང་ལྡན་པའི་བསླབ་པའི་གཞི་སྨྲ་བ་ན་དེ་སྐད་ཟེར་བ་ལ་ཡང་ཉེས་བྱས་སོ། །འདིར་གཞུང་ནི་འདུལ་བ་དང་ལྡན་པའི་མདོ་མ་གཏོགས་
པ་ལ་འདི་སྐད་ཅེས་འདི་ལྟར་ཆོས་འདི་ཡང་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ན་ཉེས་བྱས་སོ་ཞེས་གསུངས་པ་ཡིན་ནོ། །ཐུན་མོང་མ་ཡིན་པ་ལ་ནི་ལྟུང་བ་མེད་དོ་ཞེས་བྱ་བ་ནི། མཚན་གཞན་གྱི་བསླབ་པའི་གཞི་ཐུན་མོང་མ་

ཡིན་པ་འདོན་པའི་ཚེ་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་བ་ལ་ལྟུང་བ་མེད་པའོ། །སོ་སོར་ཐར་པའི་མདོ་འདོན་པའི་ཚེ་མ་གུས་པར་ཉན་པ་ཉེ་བར་བསྒྲུབ་པ་འགྱོད་དུ་གཞུག་གོ་ཞེས་བྱ་བ་ནི། སོ་སོར་
ཐར་པའི་མདོ་གདོན་པ་འདོན་པ་ན་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་བྱ་བ་ལ་སོགས་པའི་ཚིག་གིས་མ་གུས་པར་ཉན་པ་ཉེ་བར་སྒྲུབ་པར་བྱེད་པའི་དགེ་སློང་གང་ཡིན་པ་དེ། དེ་ན་གནས་པའི་དགེ་སློང་རྣམས་ཀྱིས་འགྱོད་
དུ་གཞུག་པ་སྟེ། ཚིག་དངོས་སུ་སྨྲ་བསམ་གུས་པར་ཉན་པ་ཉེ་བར་བསྒྲུབ་པ་འབའ་ཞིག་ཏུ་ཡང་མ་ཟད་ཀྱི་ཚིག་བརྒྱུད་པས་མ་གུས་པར་ཉན་པ་ཉེ་བར་བསྒྲུབ་པ་ཡང་འགྱོད་དུ་གཞུག་གོ། །ཚིག་བརྒྱུད་པའི་གཞུང་ནི་ཁོ་བོ་ལ་ལས་འདིས་ཅི་བྱ་ཁོ་བོ་འདོད་པའི་རྣམ་པར་རྟོག་པ་ལ་ཡང་རྣམ་པར་རྟོག་
དགོས་སོ། །གནོད་སེམས་ཀྱི་རྣམ་པར་རྟོག་པ་དང་རྣམ་པར་འཚེ་བའི་རྣམ་པར་རྟོག་པ་ལ་ཡང་རྣམ་པར་རྟོག་དགོས་སོ་ཞེས་བྱ་བ་ལ་སོགས་པ་སྟེ་དེ་ཡང་འགྱོད་དུ་གཞུག་གོ། །འདིར་འགྱོད་དུ་གཞུག་པ་ནི་ཚེ་དང་ལྡན་པ་ཁྱོད་མ་རྙེད་པའོ། །རྙེད་པ་མ་ཡིན་པའོ། །ཉེས་པ་རྙེད་པའོ། །ལེགས་
པ་མ་རྙེད་པའོ་ཞེས་འགྱོད་དུ་གཞུག་གོ་ཞེས་བྱ་བ་གསུངས་པ་ཡིན་ནོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཁབ་རལ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བ་སོ་དང་རུས་པ་དང་རྭའི་ཁབ་རལ་བྱེད་དམ་བྱེད་དུ་
གཅུག་པ་ལའོ་ཞེས་བྱ་བ་སྨྲས་ཏེ། བ་སོའམ་རུས་པའམ་རྭའི་ཁབ་རལ་བྱེད་དམ་བྱེད་དུ་བཅུག་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ། །འདི་ལྟར་བསླབ་པའི་གཞི་འདི་མན་ཆད་ལས་ཤིང་བལ་གྱིས་གོས་པར་བྱས་པ་མ་གཏོགས་པའི་ལྟུང་བྱེད་རྣམས་ལ་བྱེད་དུ་གཞུག་པ་
འབའ་ཞིག་གསུང་མོད་ཀྱི། རང་བྱེད་པ་ལ་ཁ་ན་མ་ཐོ་བ་ཆེས་ལྕི་བས་དེས་ན་འདིར་བྱེད་པ་ཞེས་བྱ་བའི་སྒྲ་ཡང་བསྡུས་སོ། །བ་སོ་ལ་སོགས་པ་ནི་རིན་ཆེ་བའི་ཕྱིར་བཀག་གོ། །ལྕགས་ལ་སོགས་པ་ནི་ཆེས་རིན་ཆེ་བའི་ཕྱིར། དེ་ཡང་འདིར་བཀག་པར་རིག་པར་བྱའོ། །རིན་པོ་ཆེ་ལས་

བྱས་པ་ནི་རུང་བ་མ་ཡིན་པའི་ཕྱིར་ཉེས་བྱས་བྱེད་པ་ཉིད་ཡིན་ནོ། །དེ་ལྟར་ཡང་འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་རིན་པོ་ཆེ་ལས་བགྱིས་པའི་ཁབ་རལ་བགྱིད་དུ་སྩོལ་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །བྱས་ཟིན་པ་རྙེད་པ་དང་བྱས་ཟིན་པ་ལ་
སྤྱོད་པ་དག་ལ་ནི་ལྟུང་བ་མེད་དོ་ཞེས་བྱ་བ་ནི། བྱས་ཟིན་པ་རྙེད་པ་དང་བྱས་ཟིན་པ་ལ་སྤྱོད་པ་ལ་ནི་ལྟུང་བ་མེད་པའོ། །འདིར་གཞུང་ནི་ཞུ་བ་ལས་བྱས་པ་རྙེད་པ་དང་བྱས་པ་ལ་སྤྱོད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །བཅབ་པ་ཉིད་མ་དྲིས་པར་འཆགས་པ་བླང་བར་མི་བྱའོ་ཞེས་
བྱ་བ་ནི། གང་གི་མདུན་དུ་ལྟུང་བ་འཆགས་པ་དེས་ཁབ་རལ་དེ་ཁྱོད་ཀྱིས་བཅག་གམ་ཞེས་དྲི་བར་བྱ་སྟེ། དེ་སྐད་མ་དྲིས་པར་ལྟུང་བ་འཆགས་པ་བླང་བར་མི་བྱའོ། །གལ་ཏེ་མ་བཅག་ན་མ་བཤགས་པ་ཉིད་ཡིན་ནོ་ཞེས་བྱ་བ་ནི། གལ་ཏེ་ཁབ་རལ་མ་བཅག་པར་ལྟུང་བ་འཆག་
པར་བྱེད་ན་དེའི་ལྟུང་བ་དེ་མ་བཤགས་པ་ཉིད་ཡིན་པའོ། །འོག་མ་ལྔ་པོ་དག་ལ་ཡང་དེ་དག་དང་བཅད་པ་དང་ལྡན་པ་ཡིན་ནོ་ཞེས་བྱ་བ་ནི། བསླབ་པའི་གཞི་འདིའི་འོག་མ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་གོང་མ་ལྔ་པོ་ཁྲིའི་རྐང་པ་འཆོས་པ་དང་། ཤིང་བལ་གྱིས་
གོས་པར་བྱས་པ་དང་། གདིང་བ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་དང་། གཡན་པ་དགབ་པ་ལས་གྱུར་པ་དག་ལ་ཡང་དེ་དག་དང་ཞེས་བྱ་བ་བཅད་པ་ཉིད་མ་དྲིས་པར་འཆགས་པ་བླང་བར་མི་བྱའོ་ཞེས་བྱ་བ་དང་། གལ་ཏེ་མ་བཅད་ན་བཤགས་པ་ཉིད་མ་ཡིན་ནོ་ཞེས་
བྱ་བའི་མདོ་དེ་གཉིས་དང་བཅས་པ་ཉིད་ཅེས་བྱ་བའི་དོན་དང་ལྡན་པ་ཡིན་ཏེ་བཅད་པ་ཞེས་བྱ་བའི་སྒྲ་དང་སྦྱར་བ་ཡིན་གྱི། བཅག་པ་ཞེས་བྱ་བའི་སྒྲ་དང་སྦྱར་བ་མ་ཡིན་པའོ། །འདི་སྐད་བསྟན་ཏ། བཅད་པ་ཉིད་མ་དྲིས་པར་འཆགས་པ་བླང་བར་མི་བྱའོ། །གལ་ཏེ་མ་བཅད་ན་མ་
བཤགས་པ་ཉིད་ཡིན་ནོ། །འདིར་གཞུང་ནི་རྣམ་པར་འབྱེད་པ་ལས་གང་གིས་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་ན་ལྟུང་བ་དེ་ཡང་བཤགས་པ་མ་ཡིན་ལ་དགེ་སློང་དེ་ལ་ཡང་ཉེས་བྱས་སུ་འགྱུར་རོ་ཞེས་གསུངས་

པ་ཡིན་ནོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ལ་ནི་སོ་སོར་ཐར་པའི་མདོ་ལས་འདི་སྐད་ཅེས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དམ་བདེ་བར་གཤེགས་པའི་ཆོས་གོས་ལས་ལྷག་པར་བྱེད་ན་ལྟུང་བྱེད་དོ་ཞེས་
གསུངས་ཀྱི་བཅད་ནས་ལྟུང་བྱེད་དོ་ཞེས་བྱ་བ་ནི་མ་གསུངས་སོ། །དེ་བཞིན་དུ་རྣམ་པར་འབྱེད་པ་ལས་ཀྱང་བཅད་ནས་ཞེས་ཀྱང་མ་གསུངས་པས་དེའི་ཕྱིར་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པ་ལས་གཞན་པ་དག་ལ་བཅད་པ་དང་ལྡན་པ་ཡིན་ནོ། །སྤྱིར་བཏང་བར་བྱས་ནས་
དམིགས་ཀྱིས་བསལ་བ་བསྟན་པའི་ཕྱིར། གཉིས་པ་ལ་ནི་བསྡུས་པ་དང་པོ་ཞེས་བྱ་བ་སྨྲས་ཏེ། བསླབ་པའི་གཞི་འདིའི་འོག་མའི་གཉིས་པ་ཤིང་བལ་གྱིས་གོས་པར་བྱས་པ་ཞེས་བྱ་བའི་བསླབ་པའི་གཞི་ལ་ནི་བསྡུས་པ་དང་ལྡན་པར་ཤེས་པར་བྱ་སྟེ་བསྡུས་པ་ཉིད་མ་དྲིས་པར་འཆགས་པ་
བླང་བར་མི་བྱའོ། །གལ་ཏེ་མ་བསྡུས་ན་མ་བཤགས་པ་ཉིད་ཡིན་ནོ་ཞེས་བྱ་བར་སྦྱར་རོ། །བསྡུས་པ་ཞེས་བྱ་བ་ནི། གོས་པ་མེད་པར་བརྟུལ་བ་སྟེ་བསྡུས་ཞེས་བྱ་བའི་ཐ་ཚིག་གོ། །ཁབ་རལ་འཆོས་པའི་ལྟུང་བྱེད་དོ་ཞེས་བྱ་བ་སྟེ་བཤད་ཟིན་ཏོ།། །།ཁྲིའི་རྐང་པ་འཆོས་པའི་ལྟུང་
བྱེད་སྨྲ་བར་འདོད་ནས། ཇེ་འདི་བརྗོད་པར་བྱ་སྟེ། རྐང་པ་དམའ་བ་དང་ལྡན་པའི་ཁྲི་ལ་ཉལ་བར་མི་བྱའོ་ཞེས་བྱ་བ་ནི། ཁྲི་གང་ལ་རྐང་པ་ཐུང་ངུས་དང་ཉེ་བ་ཡོད་པ་དེ་ནི་རྐང་པ་དམའ་བ་དང་ལྡན་པ་སྟེ། དེ་ལ་ཉལ་བར་མི་བྱ་བའོ། །ཁྲི་གང་ལ་འདུག་པའི་དགེ་སློང་འཆག་པའི་མགོ་ས་
ལ་ཐུག་པར་འགྱུར་བའི་ཁྲི་དེ་ལྟ་བུ་ལ་ཉལ་བར་མི་བྱ་བ་སྟེ། དེ་ནི་གླེང་གཞི་ལས་ཤེས་པར་བྱའོ། །མལ་དང་འབྲེལ་བའི་ཁྲིའི་ཉེན་ཀོར་གྱི་ཕྱོགས་སུ་རྐང་པ་བཀྲུ་བར་མི་བྱའོ་ཞེས་བྱ་བ་ནི། ཉལ་བའི་གནས་དང་འབྲེལ་པའི་ཁྲིའི་ཉེན་ཀོར་འབྲེལ་པའི་ཕྱོགས་སུ་རྐང་པ་བཀྲུ་བར་མི་བྱའོ། །
ཁྱིམ་པའི་གནས་མལ་གྱི་གནས་གཞན་གྱི་ཉེན་ཀོར་གྱི་ཕྱོགས་སུ་ཡང་ཉེས་བྱས་སོ། །ཅི་དགེ་སློང་ཐམས་ཅད་ཀྱིས་བཀྲུ་བར་མི་བྱའམ་ཞེ་ན་དེའི་ཕྱིར། ལྷམ་ཡོད་པས་སོ་ཞེས་བྱ་བ་སྨྲས་ཏེ། དགེ་སློང་གང་ལ་ལྷམ་ཡུ་ཆད་ལ་སོགས་པ་ཉེན་ཀོར་ན་ཡོད་པ་དེ་ནི་ལྷམ་ཡོད་པ་སྟེ། དེས་ཕྱོགས་

དེར་རྐང་པ་བཀྲུ་བར་མི་བྱའོ། །གཞན་གྱིས་ནི་མགོ་ལོགས་དང་རྐང་པ་ལོགས་མ་གཏོགས་པར་རོ་ཞེས་བྱ་བ་ནི། ལྷམ་ཡོད་པ་ལས་གཞན་པ་ལྷམ་མེད་པས་ནི་མགོ་ལོགས་མ་གཏོགས་པ་དང་། རྐང་པ་ལོགས་མ་གཏོགས་པ་གཡས་གཡོན་གྱི་ཕྱོགས་སུ་རྐང་པ་བཀྲུ་བར་མི་བྱ་བའོ། །
འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། གང་དག་ལ་ལྷམ་མི་བདོག་པ་དེ་དག་གིས་མགོ་ལོགས་སམ་རྐང་པ་ལོགས་སུ་བཀྲུ་བར་བྱའོ་ཞེས་གསུངས་པ་ཡིན་ནོ། །མལ་སྟན་མཐོན་པོ་དང་མལ་སྟན་ཆེན་པོ་ལ་འདུག་པའམ་ཉལ་བར་མི་བྱའོ་ཞེས་བྱ་བ་ལ། མལ་སྟན་
མཐོན་པོ་ཞེས་བྱ་བ་ནི་རྩ་བ་བུ་གར་གཞུག་པ་མ་གཏོགས་པར་ཁྲུ་གང་ལས་ལྷག་པའོ། །མལ་སྟན་ཆེན་པོ་ཞེས་བྱ་བ་ནི། གསེར་དང་དངུལ་དང་རིན་པོ་ཆེ་ལ་སོགས་པ་ལས་བྱས་པ་སྟེ་དེ་ལ་འདུག་པའམ་ཉལ་བར་མི་བྱའོ། །མལ་སྟན་ཞེས་སྨོས་པས་འདིར་སྟན་ཡང་འཕངས་
པར་རིག་པར་བྱའོ། །ཁྱིམ་གཞན་དུ་གཞན་མེད་ན་སྔ་མ་ཤོས་བྱའོ་ཞེས་བྱ་བ་ནི། ཁྱིམ་པའི་ཁྱིམ་གཞན་དུ་མལ་སྟན་མི་མཐོ་བ་དང་མལ་སྟན་མི་ཆེ་བ་གཞན་མེད་ན་མལ་སྟན་མཐོན་པོ་དང་མལ་སྟན་ཆེན་པོ་ལ་སྔ་མ་ཤོས་བྱ་སྟེ། འདུག་པའམ་ཉལ་བར་མི་བྱའོ་ཞེས་ཚིག་གཉིས་
སྨོས་པའི་སྔ་མ་ཤོས་འདུག་པ་ཞེས་བྱའི། ཕྱི་མ་ཤོས་ཉལ་བ་ཞེས་བྱ་བ་མི་བྱའོ། །འདིར་ལུང་ནི་ཀུན་དགའ་བོ་དེ་དག་ཐམས་ཅད་དུ་འབྱོར་པར་མི་འགྱུར་རོ་ཞེས་གསུངས་པ་ཡིན་ནོ། །རྐང་རྟེན་དང་བཅས་པ་ལ་མལ་བཅའ་བར་བྱའོ་ཞེས་བྱ་བ་ནི། རྐང་རྟེན་དང་བཅས་པའི་
མལ་ཁྲི་ལ་མལ་བཅའ་བར་བྱའོ་ཞེས་བྱ་བའི་ཐ་ཚིག་གོ། །ཕྱོགས་གཅིག་མཐོ་བ་ཉིད་ཀྱིས་ནི་མལ་སྟན་མཐོན་པོ་མ་ཡིན་པར་རིག་པར་བྱའོ། །འདིར་གཞུང་ནི་འདི་ལྟར་སྨན་པ་དེས་འཕགས་པ་ཁྱོད་ཀྱིས་མགོ་སྨད་དེ་ཉལ་བས་དེས་ཁྱོད་ཀྱི་ཁམས་མ་སྙོམས་པ་ཉིད་དུ་གྱུར་ཅིང་དྲོད་ཆུང་
བར་ཡང་གྱུར་བས་རྐང་རྟེན་ཆུག་སྟེ་ཉོལ་ཅིག་ཅེས་སྨྲས་པ་དང་། དགེ་སློང་དག་གིས་སྨྲས་པ་བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྐང་རྟེན་བཅུག་སྟེ་མལ་བཅའ་བར་རྗེས་སུ་གནང་ངོ་ཞེས་བྱ་བའི་

བར་དུ་གསུངས་པ་ཡིན་ནོ། །ཁྲི་བརྩེག་མའི་སྟེང་དུ་འདུག་པར་མི་བྱའོ་ཞེས་བྱ་བ་ལ་ཁྲི་བརྩེག་མ་ཞེས་བྱ་བ་ནི་ཁྲིའི་སྟེང་དུ་ཁྲི་བཞག་པ་སྟེ་དེ་ལ་འདུག་པར་མི་བྱའོ། །འདིར་གཞུང་ནི་དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དགེ་སློང་དག་ཁྲིའི་སྟེང་དུ་ཁྲི་
བཞག་པ་ལ་འཁོད་ན་ཉེས་དམིགས་འགའ་ཡོད་དོ་སྙམ་ནས་དེ་ལྟ་བས་ན་དགེ་སློང་གིས་ཁྲིའི་སྟེང་དུ་ཁྲི་བཞག་པ་ལ་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་ལ་ཁྲིའི་རྐང་པ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཚད་ལས་
ལྷག་པར་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། འོག་ནས་འབྱུང་བའི་ཚད་ལས་ལྷག་པར་རང་གིས་བྱེད་དམ་གཞན་བྱེད་དུ་འཇུག་པ་ལའོ། །གཉིས་པའི་འོག་མ་གསུམ་པོ་དག་ལ་ཡང་ངོ་ཞེས་བྱ་བ་ལ། གཉིས་པ་ཞེས་བྱ་བ་ནི་བསླབ་པའི་གཞི་འདིའི་འོག་མ་གཉིས་པ་ཤིང་
བལ་གྱིས་གོས་པར་བྱས་པ་དགག་པ་ཞེས་བྱ་བའི་བསླབ་པའི་གཞིའོ། །དེའི་འོག་མ་གསུམ་པོ་དག་ཅེས་བྱ་བ་ནི་གདིང་བ་ལས་གྱུར་པ་དང་། གཡན་པ་དགབ་པ་ལས་གྱུར་པ་དང་། དབྱར་གྱི་རས་ཆེན་ལས་གྱུར་པ་ཞེས་བྱ་བ་དག་སྟེ། བསླབ་པའི་གཞི་དེ་གསུམ་ལ་ཡང་ཚད་
ལས་ལྷག་པར་བྱེད་དམ་བྱེད་དུ་འཇུག་པ་ལ་ལྟུང་བྱེད་དུ་འགྱུར་བའོ། །གང་གི་ཚད་ལས་ལྷག་པར་བྱེད་དམ་བྱེད་དུ་འཇུག་པ་ལ་ཞེ་ན། རྐང་པ་དག་གིའོ་ཞེས་འོག་ནས་འབྱུང་ངོ་། །གང་གི་རྐང་པ་དག་ཅེ་ན་དེའི་ཕྱིར་ཁྲིའམ་ཁྲིའུ་དག་གིའོ་ཞེས་བྱ་བ་སྨྲས་སོ། །ཅི་ཐམས་ཅད་ཀྱི་འམ་ཞེ་
ན་དེའི་ཕྱིར་དགེ་འདུན་གྱིའོ་ཞེས་བྱ་བ་སྨྲས་སོ། །འོག་མ་ལ་ཡང་ངོ་ཞེས་བྱ་བ་ནི་བསླབ་པའི་གཞི་འདིའི་འོག་མ་ཤིང་བལ་གྱིས་གོས་པར་བྱས་པ་ཞེས་བྱ་བའི་བསླབ་པའི་གཞི་ལ་ཡང་ཁྲིའམ་ཁྲིའུ་དག་ལའོ། །དགེ་འདུན་གྱིའོ་ཞེས་བྱ་བར་རིག་པར་བྱའོ། །གང་གི་ཚད་ལས་ལྷག་པར་
བྱེད་དམ་བྱེད་དུ་འཇུག་པ་ལ་ཁྲིའི་རྐང་པ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར་རྐང་པ་དག་གིའོ་ཞེས་བྱ་བ་སྨྲས་ཏེ། ཁྲིའམ་ཁྲིའུ་དེའི་གནས་སྐབས་ལ་རྐང་པ་ཅི་ཙམ་གྱིས་འགྲུབ་པ་སྟེ། རྐང་པ་བཞིས་འགྲུབ་པ་ནི་དཔེར་ན་རྐང་པ་བཞི་པ་ལྟ་བུའོ། །གཉིས་སམ་གསུམ་གྱིས་འགྲུབ་

པ་ནི་དཔེར་ན་ཤིང་གི་ཁྲིའུ་ཁ་ཅིག་ལྟ་བུ་སྟེ་དེ་རྙེད་ཅེས་བྱ་བ་ནི་ཤུགས་ཀྱིས་ཁོང་དུ་ཆུད་པར་བྱའོ། །གཞན་གྱིས་བརྩམས་ལ་གཞན་གྱིས་ཟིན་པར་བྱེད་པ་ནི་ཉེས་བྱས་སོ། །རབ་ཏུ་བྱུང་བ་གཞན་ལ་ཡང་ཞེས་བྱ་བ་ཐམས་ཅད་ནི་ཁང་པ་དང་གཙུག་ལག་ཁང་དང་གདིང་བ་དག་ལས་ཁོང་དུ་ཆུད་པར་བྱའོ། །
རྐང་པ་དེ་དག་གི་ཚད་གང་ཡིན་ཞེ་ན་དེའི་ཕྱིར། དེ་དག་གི་ཚད་ནི་བུ་གར་གཞུག་པའི་ཕྱོགས་མ་གཏོགས་པར་ཁྲུ་གང་ངོ་ཞེས་བྱ་བ་སྨྲས་ཏེ། རྐང་པ་དེ་དག་གི་ཚད་ནི་བུ་གར་གཞུག་པ་ཞེས་བྱ་བའི་ཕྱོགས་དག་མ་གཏོགས་པར་རྐང་པ་ཉིད་ཀྱི་ཕྱོགས་ཀྱི་སྲིད་ཁྲུ་གང་ངོ་། །གལ་ཏེ་དེ་ལ་བུ་གར་
གཞུག་པ་ཡོད་ན་ནི་བུ་གར་བཅུག་པའི་མཚམས་ནས་བརྩམས་ཏེ་ཁྲུ་གང་ངོ་། །གལ་ཏེ་བུ་གར་གཞུག་པ་མེད་ན་ནི་བུ་གར་གཞུག་པའི་ཕྱོགས་ཀྱི་གོང་ཡན་ཆད་ཀྱི་ཆ་ལ་བུ་གར་གཞུག་པ་ཞེས་བྱ་སྟེ། དེ་མ་གཏོགས་སོ། །ཁྲུ་ཅི་ལྟ་བུས་ཞེ་ན། དེའི་ཕྱིར་བདེ་བར་གཤེགས་པའི་སུམ་ཆས་སོ་ཞེས་
བྱ་བ་སྨྲས་ཏེ། བདེ་བར་གཤེགས་པའི་ཁྲུའི་སུམ་ཆར་གྱུར་པ་སྟེ། བདེ་བར་གཤེགས་པའི་སོར་བརྒྱད་ཀྱིས་ཞེས་བྱ་བའི་ཐ་ཚིག་གོ། །འོག་མ་དག་ལ་ཡང་ངོ་ཞེས་བྱ་བ་ནི། བསླབ་པའི་གཞི་འོག་མ་ཤིང་བལ་གྱིས་གོས་པར་བྱས་པ་དང་། བདེ་བར་གཤེགས་པའི་ཆོས་གོས་ཀྱི་ཚད་ལས་
གྱུར་པ་ཞེས་བྱ་བའི་བསླབ་པའི་གཞི་གཉིས་མ་གཏོགས་པ་གདིང་བ་ལས་གྱུར་པ་དང་། གཡན་པ་དགབ་པ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་ཞེས་བྱ་བའི་བསླབ་པའི་གཞི་གསུམ་པོ་དག་ལ་ཡང་ཁྲུ་ཚད་ནི་བདེ་བར་གཤེགས་པའི་ཁྲུའི་སུམ་ཆར་གྱུར་པས་རྣམ་པར་གཞག་
པར་རིག་པར་བྱའོ། །ལ་ལ་ལ་ནི་རང་གི་ལུས་ཀྱི་ཚད་དང་མཐུན་པའི་གཞལ་བས་ཆོས་གོས་བཞིན་དུ་རྣམ་པར་གཞག་ཏུ་ཡང་རུང་སྟེ། བདེ་བར་གཤེག་པའི་ཁྲུའི་སུམ་ཆས་གཞལ་བས་ནི་མི་འབྲིང་གི་ཁྲུ་ཚད་རྣམ་པར་འཇོག་པར་བྱེད་དོ། །ཁྲི་རྐང་འཆོས་པའི་ལྟུང་བྱེད་དོ་ཞེས་བྱ་བ་
དེ་བཤད་ཟིན་ཏོ།། །།གང་ལ་ཤིང་བལ་གྱིས་གོས་པར་བྱས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཤིང་བལ་གྱིས་གོས་པར་བྱས་པ་ལའོ་ཞེས་བྱ་བ་སྨྲས་ཏེ། དགེ་འདུན་གྱི་ཁྲིའམ་ཁྲིའུ་དག་ལ་ཤིང་བལ་བརྡལ་བ་ལའོ། །ཅི་རང་ཉིད་ཀྱིས་གོས་པར་བྱས་པའམ་ཞེ་ན། དེའི་ཕྱིར་

རང་ངམ་བསྐོས་པས་སོ་ཞེས་བྱ་བ་སྨྲས་སོ། །འདིར་ཤིང་བལ་ཇི་ལྟ་བུ་ཞིག་ཡིན་པར་རིག་པར་བྱ་ཞེ་ན་དེའི་ཕྱིར་ཤིང་བལ་ནི་ལྔ་སྟེ། ཤལ་མ་ལའི་དང་། ཨརྐའི་དང་། ཀ་ཤའི་དང་། སོའུ་ཀའི་དང་། ཨར་ཀའིའོ་ཞེས་བྱ་བ་སྨྲས་ཏེ། ཚིག་དེ་དག་ནི་གོས་དང་ལུས་མ་
རུངས་པར་འགྱུར་བ་དགག་པའི་ཕྱིར་རོ། །ཤིང་བལ་གྱིས་གོས་པར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གདིང་བ་ལས་གྱུར་པའི་ལྟུ་བྱེད་སྨྲ་བར་འདོད་ནས་གདིང་བའོ་ཞེས་བྱ་བ་སྨྲས་ཏེ། ཚད་ལས་ལྷག་པར་བྱེད་དམ་བྱེད་དུ་འཇུག་ན་ཞེས་བྱ་བ་དེ་དང་སྦྱར་རོ། །དེའི་ཚད་གང་ཞེ་ན་
དེའི་ཕྱིར་འདིའི་ཚད་ནི་སྲིད་དུ་ཁྲུ་གསུམ་མོ་ཞེས་བྱ་བ་སྨྲས་ཏེ། གདིང་བ་འདིའི་ཚད་ནི་སྲིད་དུ་ཁྲུ་གསུམ་དུ་རིག་པར་བྱའོ། །མི་ཆོག་ན་ཁྲུ་ཕྱེད་དང་དོ་མན་ཆད་བསྐྱེད་དོ་ཞེས་བྱ་བ་ནི། གང་ལ་ཁྲུ་གསུམ་གྱིས་མི་ཆོག་པ་དེས་ཅི་ཙམ་བསྐྱེད་པས་དོན་གྲུབ་པ་དེ་ཙམ་བསྐྱེད་པར་བྱ་སྟེ། ཁྲུ་ཕྱེད་དང་དོ་མན་
ཆད་བསྐྱེད་པར་བྱའོ། །སྲིད་དུ་ཁྲུ་ཕྱེད་དང་དོ་བསྐྱེད་པར་བྱ་སྟེ། དེས་ན་གདིང་བའི་སྲིད་ཀྱི་ཚད་ནི་ཁྲུ་ཕྱེད་དང་ལྔའོ། །འདིའི་ཞེང་དུ་ནི་ཁྲུ་དོ་དང་སོར་དྲུག་གོ་ཞེས་བྱ་བ་ནི། གདིང་བའི་ཞིང་གི་ཚད་ཅེས་བྱ་བར་སྦྱར་རོ། །དེ་ཆུང་ངུ་ལ་བྱིན་གྱིས་རློབ་ན་ཉེས་བྱས་སོ་ཞེས་བྱ་བ་ནི་གདིང་བ་དེའི་
ཆུ་ཞེང་གི་ཚད་ཇི་སྐད་བསྟན་པ་དེ་ལས་ཆུང་བ་ལ་བྱིན་གྱིས་རློབ་ན་ཉེས་བྱས་སུ་འགྱུར་བའོ། །འོག་མ་གཉིས་ལ་ཡང་ངོ་ཞེས་བྱ་བ་ནི། བསླབ་པའི་གཞི་འདིའི་འོག་མ་གཡན་པ་དགབ་པ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་ཞེས་བྱ་བ་གཉིས་ལས་ཡང་ཚད་པས་ཆུང་བ་ལ་
བྱིན་གྱིས་རློབ་པ་ལ་ཉེས་བྱས་སུ་འགྱུར་བའོ། །འདིར་གཞུང་ནི་དབྱར་གྱི་རས་ཆེན་ཆུང་ངུ་ལ་བྱིན་གྱིས་རློབ་ན་ཉེས་བྱས་སོ། །གཡན་པ་དགབ་པ་ལ་ཡང་དེ་དང་འདྲའོ་ཞེས་གསུངས་པ་ཡིན་ཏེ། དེའི་རྗེས་སུ་འབྲང་བས་གདིང་བ་ལ་ཡང་དེ་སྐད་ཅེས་སྨྲས་སོ། །གདིང་བ་ལས་གྱུར་པའི་ལྟུང་
བྱེད་དོ་ཞེས་བྱ་བ་དེ་བཤད་ཟིན་ཏོ།། །།གཡན་པ་དགབ་པ་ལས་གྱུར་པའི་ལྟུང་བྱེད་སྨྲ་བར་འདོད་ནས། གཡན་པ་དགབ་པའིའོ་ཞེས་བྱ་བ་སྨྲས་ཏེ། གཡན་པ་དགབ་པའི་ཚད་ལས་ལྷག་པར་བྱེད་དམ་བྱེད་དུ་འཇུག་ན་ལྟུང་བྱེད་དོ། །དེའི་ཚད་ཅི་ཙམ་ཞེ་ན་དེའི་ཕྱིར། ཁྲུ་དྲུག་

དང་གསུམ་མོ་ཞེས་བྱ་བ་སྨྲས་ཏེ། སྲིད་དུ་ནི་ཁྲུ་དྲུག་གོ། །ཞེང་དུ་ནི་ཁྲུ་གསུམ་མོ། །གཡན་པ་དགབ་པ་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དབྱར་གྱི་རས་ཆེན་ལས་གྱུར་པའི་ལྟུང་བྱེད་སྨྲ་བར་འདོད་ནས། དབྱར་གྱི་རས་ཆེན་གྱིའོ་ཞེས་བྱ་བ་སྨྲས་ཏེ། ཚད་
ལས་ལྷག་པར་བྱེད་དམ་བྱེད་དུ་འཇུག་ན་ལྟུང་བྱེད་དོ། །དེའི་ཚད་ཇི་ཙམ་ཞེ་ན་དེའི་ཕྱིར། དགུ་དང་གསུམ་དང་སོར་བཅོ་བརྒྱད་དོ་ཞེས་བྱ་བ་སྨྲས་ཏེ། ཁྲུ་ཞེས་བྱ་བར་སྦྱར་རོ། །དབྱར་གྱི་རས་ཆེན་གྱི་སྲིད་དུ་ནི་ཁྲུ་དགུའོ། །ཞེང་དུ་ནི་ཁྲུ་གསུམ་དང་སོར་བཅོ་བརྒྱད་དོ། །དབྱར་གྱི་རས་ཆེན་
ལས་གྱུར་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་སྨྲ་བར་འདོད་ནས། སྟོན་པ་རང་གི་ཁྲུ་ལྔ་དང་གསུམ་པའི་ཆོས་གོས་སོ་ཞེས་བྱ་བ་སྨྲས་ཏེ། བདེ་བར་གཤེགས་པའི་ཆོས་གོས་ཀྱི་ཚད་ནི་སྲིད་དུ་སྟོན་པ་
སངས་རྒྱས་བཅོམ་ལྡན་འདས་རང་གི་ཁྲུ་ལྔའོ། །ཞེང་དུ་ནི་ཁྲུ་གསུམ་མོ། གང་ལ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེའི་ལུས་ཙམ་མེད་པར་དེའི་ཚད་དམ་ལྷག་པའི་ཆོས་གོས་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། དེའི་
ཚད་དམ་ཞེས་བྱ་བ་ནི། བདེ་བར་གཤེགས་པའི་ཆོས་གོས་ཀྱི་ཚད་དང་མཉམ་པའོ། །ལྷག་པ་ཞེས་བྱ་བ་ནི་བདེ་བར་གཤེགས་པའི་ཆོས་གོས་ཀྱི་ཚད་ལས་ལྷག་པ་སྟེ། དེ་ལྟ་བུའི་ཆོས་གོས་བྱེད་དམ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །ཅི་དགེ་སློང་ཐམས་ཅད་ལ་
འམ་ཞེ་ན་དེའི་ཕྱིར་དེའི་ལུས་ཙམ་མེད་པར་ཞེས་བྱ་བ་སྨྲས་ཏེ། དེའི་ལུས་ཞེས་བྱ་བ་ནི། བདེ་བར་གཤེགས་པའི་སྐུ་སྟེ་དགེ་སློང་གང་ལ་དེའི་སྐུ་ཙམ་གྱི་ལུས་ཡོད་པ་དེ་ནི་དེའི་ལུས་ཙམ་ཡོད་པའོ། །གང་ལ་དེའི་སྐུ་ཙམ་གྱི་ལུས་མེད་པ་དེ་ནི་དེའི་ལུས་ཙམ་མེད་པ་སྟེ། དེ་ལ་ཁ་ན་མ་ཐོ་བ་
འདིར་འགྱུར་རོ་ཞེས་བྱ་བའི་ཐ་ཚིག་གོ། །བདེ་བར་གཤེགས་པའི་སྐུའི་ཚད་ཙམ་གྱི་ལུས་ཡོད་པ་ལ་ནི་བདེ་བར་གཤེགས་པའི་ཆོས་གོས་ཀྱི་ཚད་ཙམ་གྱི་ཆོས་གོས་བྱེད་དམ་བྱེད་དུ་འཇུག་པ་ལ་ལྟུང་བ་མེད་དོ། ལྷག་པ་ལ་ནི་ཅི་རིགས་པ་ཁ་ན་མ་ཐོ་བར་འགྱུར་ཏེ། གང་ལ་བདེ་བར་

གཤེགས་པའི་སྐུའི་ཚད་ཙམ་གྱི་ལུས་མེད་པ་དེས་བདེ་བར་གཤེགས་པའི་སྐུའི་ཚད་ཀྱི་ཆོས་གོས་སམ་དེ་ལས་ལྷག་པའི་ཆོས་གོས་བྱེད་དམ་བྱེད་དུ་འཇུག་པ་ལ་ནི་ལྟུང་བྱེད་དོ། །བདེ་བར་གཤེགས་པའི་ཆོས་གོས་པས་ནི་ཆུང་ལ་རང་གི་ལུས་ལས་ནི་ཆེ་བའི་ཆོས་
གོས་བྱེད་དམ་བྱེད་དུ་འཇུག་པ་ལ་ནི་ཉེས་བྱས་སོ། །གང་ལ་བདེ་བར་གཤེགས་པའི་སྐུའི་ཚད་ཙམ་མམ་དེ་ལས་ལྷག་པའི་ལུས་ཡོད་པ་དེས་རང་གི་ཁྲུ་ལྔ་དང་གསུམ་ལས་ལྷག་པའི་ཆོས་གོས་སུམ་འགྱུར་དང་བཞི་འགྱུར་ལ་སོགས་པ་བྱེད་དམ་བྱེད་དུ་འཇུག་ན་ལྟུང་བྱེད་དོ། །སུམ་འགྱུར་
དུ་མ་ཆོག་པ་མན་ཆད་ཉིས་འགྱུར་ཡན་ཆད་བྱེད་པ་ལ་ནི་ཉེས་བྱས་སུ་འགྱུར་བར་འདིར་དོན་ཅི་རིགས་པར་སྦྱར་རོ། །འདིར་གཞུང་ནི་གཏམ་གྱི་གཞི་ལས་ཚད་དང་ལྡན་པར་བགྱིད་པ་ལ་ལྟུང་བར་འགྱུར་བ་དང་ཚད་དང་ལྡན་པར་བགྱིད་པ་ལ་ལྟུང་བར་མི་འགྱུར་བ་འགའ་མཆིས་སམ།
བཅོམ་ལྡན་འདས་ཀྱིས་བཀའ་སྩལ་པ། ཡོད་དེ་བདེ་བར་གཤེགས་པའི་ཆོས་གོས་ཀྱི་ཚད་དུ་བྱེད་ན་ལྟུང་བྱེད་དོ། །དཀྱིལ་འཁོར་གྱི་ཚད་དུ་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་དུ་བྱེད་ན་ཞེས་བྱ་བ་ནི། རང་གི་ཁྲུ་ཚད་
ལས་སུམ་འགྱུར་དུ་བྱེད་པ་ལ་ལྟུང་བྱེད་དུ་འགྱུར་བའོ། །དཀྱིལ་འཁོར་གྱི་ཚད་དུ་བྱེད་ན་ཞེས་བྱ་བ་ནི། རང་གི་ཁྲུ་ལྔ་དང་གསུམ་མན་ཆད་ཆུང་ངུ་དང་ལྡན་པར་བྱེད་པ་ལ་ལྟུང་བ་མེད་པ་སྟེ། འདིར་དོན་དེ་ཡིན་པར་རིག་པར་བྱའོ། །དེ་བཅང་བར་མི་བྱའོ་ཞེས་བྱ་བ་ལ། དེ་ཞེས་
བྱ་བ་ནི། བདེ་བར་གཤེགས་པའི་ཆོས་གོས་སམ་བདེ་བར་གཤེགས་པའི་ཆོས་གོས་ལས་ལྷག་པ་དེའོ། །བཅང་བར་མི་བྱའོ་ཞེས་བྱ་བ་ནི་ལུས་དང་འབྲེལ་པས་སམ་གཞན་ཡང་རུང་སྟེ། བྱིན་གྱིས་བརླབས་ནས་སམ་རྣམ་པར་བརྟགས་ནས་སམ་རྣམ་པར་མ་བརྟགས་པར་ཡང་བཅང་
བར་མི་བྱའོ། །འདིར་གཞུང་ནི་གོས་ཀྱི་གཞི་ལས་བཙུན་པ་བདེ་བར་གཤེགས་པའི་ཆོས་གོས་ལྷག་ཉིད་དུ་འཆང་དུ་དབང་ངམ། ཉེ་བ་འཁོར་མི་དབང་ངོ་ཞེས་གསུངས་པ་ཡིན་ནོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ། །

ལྟུང་བྱེད་འབའ་ཞིག་ཏུ་འགྱུར་བ་རྣམས་རྫོགས་སོ་ཞེས་བྱ་བ་དངོས་པོ་སྤང་དུ་མེད་ཅིང་ལྟུང་བྱེད་འབའ་ཞིག་བཤགས་པར་བྱ་བ་ལྟུང་བྱེད་དགུ་བཅུ་པོ་དག་བཤད་ཟིན་ཏོ།། །།ལྟུང་བྱེད་རྣམས་སྨྲས་ནས། ད་ནི། གྲོང་དང་ཁྱིམ་གཞན་ཉིད་དང་ནི། །སློབ་པ་རྣམས་དང་དགོན་པ་ནི། །
སངས་རྒྱས་ཕན་པ་གསུངས་པ་ཡིས། །སོ་སོར་བཤགས་པར་བྱ་བར་གསུངས། །ཞེས་བྱ་བའི་རིམ་གྱིས་དེའི་འོག་ཏུ་བསྟན་པ་སོ་སོར་བཤགས་པར་བྱ་བའི་ཆོས་བཞི་པོ་དག་བརྗོད་པར་བྱའོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་ལ་བྱེད་པ་པོ་ཉིད་གང་ཡིན་ཞེ་
ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་དགེ་སློང་མ་ཉེ་དུ་མ་ཡིན་པ་ཉིད་ལའོ་ཞེས་བྱ་བ་སྨྲས་
ཏེ། གལ་ཏེ་དགེ་སློང་མ་ཡང་དགེ་སློང་དེའི་ཉེ་དུ་མ་ཡིན་པ་ཉིད་ཡིན་ལ། དགེ་སློང་གིས་ཀྱང་འདི་བདག་གི་ཉེ་དུ་མ་ཡིན་པ་ཉིད་དོ་སྙམ་དུ་ཤེས་ན་ཉེ་དུ་མ་ཡིན་པ་ཉིད་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་རྗེས་སུ་སྒྲུབ་ན་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། རང་གིས་མི་
འགྲིམ་པར་བསྒྲུབས་པའི་བཅའ་བ་དང་བཟའ་བ་བདག་ཉིད་གྲོང་ན་འདུག་པས་བླངས་ཏེ་ཟོས་ནའོ་ཞེས་བྱ་བ་སྨྲས་ཏེ། ཉེ་དུ་མ་ཡིན་པའི་དགེ་སློང་མ་གྲོང་ངམ་གཞན་གང་ཡང་རུང་བ་ན་འདུག་པས་རང་གི་ལག་གིས་མི་འགྲིམ་པའི་རྣམ་པས་བསྒྲུབས་ཤིང་ཕུལ་བའི་བཅའ་བ་དང་བཟའ་
བ་ལྟུང་བ་འབྱིན་པར་བྱེད་པའི་དགེ་སློང་བདག་ཉིད་གྲོང་ན་འདུག་པས་རང་གི་ལག་གིས་བླངས་ཏེ་བཅའ་བ་དང་བཟའ་བ་དང་དེ་དག་གནས་གང་ཡང་རུང་བར་འདུག་སྟེ་ཟོས་ན་དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བར་འགྱུར་རོ་ཞེས་བྱ་བའི་ཐ་ཚིག་གོ། །དེ་ལྟ་
བས་ན་གལ་ཏེ་དགེ་སློང་ལམ་པོ་ཆེ་ན་འདུག་པས་དགེ་སློང་མ་གང་ཡང་རུང་བ་ན་འདུག་པ་དེ་ལས་བཅའ་བ་དང་བཟའ་བ་ལེན་ཅིང་ཟ་བར་བྱེད་ན་དངོས་གཞིར་འགྱུར་རོ། །དེ་བཞིན་དུ་དགེ་སློང་ལམ་པོ་ཆེ་ན་འདུག་པ་མ་ཡིན་པས་དགེ་སློང་མ་ལམ་པོ་ཆེ་ན་འདུག་པ་དེ་ལས་བཅའ་བ་དང་

བཟའ་བ་ལེན་ཅིང་ཟ་བར་བྱེད་ན་ནི་ཉེས་བྱས་སུ་འགྱུར་རོ། །དགེ་སློང་གཙུག་ལག་ཁང་ན་འདུག་པས་དགེ་སློང་མ་གྲོང་ན་འདུག་པ་དེ་ལས་བཅའ་བ་དང་བཟའ་བ་ལེན་ཅིང་ཟ་བར་བྱེད་པ་དེ་ལ་ནི་ལྟུང་བ་མེད་དོ། །དེ་ལྟར་ཡང་འདིར་གཞུང་ནི་ཞུ་བ་ལས་བཙུན་
པ་རེ་ཞིག་དགེ་སློང་མའི་དབྱར་ཁང་ན་མཆིས་པ་ལ་དགེ་སློང་མ་གྲོང་ན་མཆིས་པས་བཅའ་བ་དང་བཟའ་བ་རྩོལ་ལ་དེས་དེ་ན་མཆིས་པ་ལས་ལེན་ཅིང་བླངས་ནས་འཚལ་བར་བགྱིད་ན་ལྟུང་བ་ཅིར་འགྱུར། ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ལས་བཟློག་པ་ལ་ནི་ཉེས་བྱས་
སོ། །ཁ་ཅིག་ནི་འདི་སྐད་ཅེས་སྦྱིན་པ་མོ་དང་ལེན་པར་བྱེད་པ་གཉི་ག་ལམ་པོ་ཆེ་ན་འདུག་པ་དག་ལ་ནི་ཁ་ན་མ་ཐོ་བ་རྫོགས་པར་འགྱུར་རོ། །ཡན་ལག་གཅིག་མ་ཚང་བ་ལ་ནི་ཉེས་བྱས་སོ། །ཡན་ལག་གཉི་ག་མ་ཚང་བ་ལ་ནི་ལྟུང་བ་མེད་དོ་ཞེས་ཟེར་རོ། །དབྱར་ཁང་ནི་གྲོང་ཉིད་མ་ཡིན་
ནོ་ཞེས་བྱ་བའི་གཞུང་ནི་ཞུ་བ་ལས་ལྟུང་བ་མེད་དོ་ཞེས་སྔར་བསྟན་མ་ཐག་པ་ཉིད་ཡིན་ནོ། །དགེ་སློང་གི་གནས་ཀྱང་མ་ཡིན་ནོ་ཞེས་བྱ་བ་ཡང་གྲོང་ཉིད་མ་ཡིན་པའོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་ཁྱིམ་གཞན་དུ་ཞུགས་པ་ལས་བཅའ་
བ་དང་བཟའ་བ་བླངས་ཏེ་འཆོས་ཤིང་འཚལ་ན་ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་དགེ་སློང་གནས་ན་འདུག་པས་དགེ་སློང་མ་ཁྱིམ་གཞན་ན་འདུག་པ་ལས་ལེན་ནའོ་ཞེས་གསུངས་པ་ཡིན་ནོ། །ནམ་མཁའ་ནི་ཕྱེད་ཉིད་དོ་ཞེས་བྱ་བ་ནི། གྲོང་གི་སྟེང་གི་ནམ་མཁའ་
ལ་འདུག་པས་བླངས་ཏེ་ཟ་ན་ཉེས་བྱས་སུ་འགྱུར་བའོ། །འཇོག་པར་བྱེད་པ་ཉེ་བར་མི་གནས་ན་གཞག་པ་ལེན་པ་ནི་དེ་ལས་མ་ཡིན་ནོ་ཞེས་བྱ་བ་ནི། འཇོག་པར་བྱེད་པའི་དགེ་སློང་མས་ཟས་གང་གྲོང་དུ་འཇོག་པར་བྱེད་པའི་དགེ་སློང་མ་དེས་ཟས་དེ་གྲོང་དུ་བཞག་ནས་གུད་དུ་སོང་སྟེ་
དེ་ནས་ཉེ་བར་མི་གནས་ན་དགེ་སློང་དེས་ཟས་དེ་གྲོང་དེ་ནས་ལེན་པར་བྱེད་ཀྱང་དེས་ཟས་དེ་འཇོག་པར་བྱེད་པ་དེ་ལས་བླངས་པ་མ་ཡིན་ནོ། །འདིར་གཞུང་ནི་དགེ་སློང་མས་གྲོང་དུ་བཞག་པར་གྱུར་པ་དེས་དགེ་སློང་གིས་ཡིད་གཅུགས་པས་བླངས་ཏེ་ཟ་བར་བྱེད་ན་ལྟུང་བ་མེད་དོ་ཞེས་

གསུངས་པ་ཡིན་ནོ། །གལ་ཏེ་ཡིད་གཅུགས་པ་མེད་པས་ལེན་ན་ནི་མ་བྱིན་པར་ལེན་པར་གཏོགས་པའི་ཁ་ན་མ་ཐོ་བར་ཡང་འགྱུར་རོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོའོ་ཞེས་བྱ་བ་དེ་བཤད་ཟིན་ཏོ། །གྲལ་རིམ་དུ་མ་ཕེབས་པར་འདྲིམ་
དུ་འཇུག་པ་མ་བཟློག་པར་ཟའི་སོ་སོར་བཤགས་པར་བྱ་བ་ལ་བྱེད་པ་པོ་གང་ཡིན་ཞེ་ན། དེའི་ཕྱིར་དེའམ་དགེ་སློང་གཞན་ལ་འདི་ལ་བཅའ་བའམ་བཏུང་བའམ་སྲན་ཚོད་དམ་བཟའ་བ་འམ་ཡང་བྱིན་ཅིག་ཅེས་བྱ་བ་ལ་སོགས་པས་སྐོ་ཤམ་བྱེད་པ་ལ་ཞུགས་པའི་དགེ་སློང་མ་འདུག་
པ་ནི་བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། དེའམ་ཞེས་བྱ་བ་ནི་ལྟུང་བ་འབྱིན་པར་བྱེད་པ་ཉིད་དུ་བརྗོད་པར་འདོད་པའི་དགེ་སློང་དེ་ལའོ། །དགེ་སློང་གཞན་ལ་ཞེས་བྱ་བ་ནི། དགེ་སློང་མང་པོ་གཞན་གང་ཡང་རུང་བ་ལའོ། །འདི་ལ་བཅའ་བ་བྱིན་ཅིག་ཅེས་བྱ་བ་ནས་བཟའ་བ་
བྱིན་ཅིག་ཅེས་བྱ་བའི་བར་དང་ཡང་ལྷག་པར་བྱིན་ཅིག་ཅེས་བྱ་བ་ལ་སོགས་པས་ནི་སྐོ་ཤམ་བྱེད་པ་བསྟན་ཏོ། །སྩོགས་པ་ཞེས་བྱ་བའི་སྒྲས་ནི། ཟས་ལྷག་མ་དག་སྟོབས་པ་ཡང་བསྡུས་པའི་ཕྱིར་རོ། །སྐོ་ཤམ་བྱེད་པ་དེ་ལྟ་བུ་དེ་ལ་ཞུགས་པའི་དགེ་སློང་མ་གང་ཡིན་པ་དེ་འདུག་པ་
གང་ཡིན་པ་དེ་ནི་ལྟུང་བ་འདིའི་བྱེད་པ་པོ་ཡིན་པར་ཤེས་པར་བྱའོ། །ཅི་དགེ་སློང་མ་དེ་ལྟར་གྱུར་པ་ཐམས་ཅད་ཀྱི་འདུག་པ་དེ་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར་གལ་ཏེ་དེའི་ཚིག་གིས་སམ་དེའི་ཉེ་དུས་མགྲོན་དུ་བོས་པ་མ་ཡིན་ནའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་མ་རྣམས་
མགྲོན་དུ་བོས་པ་དགེ་སློང་མ་དེའི་ཚིག་གིས་མ་ཡིན་པ་དང་། ཡོན་བདག་གང་གིས་དགེ་སློང་རྣམས་མགྲོན་དུ་བོས་པ་དེ་སྐོ་ཤམ་བྱེད་པ་ལ་ཞུགས་པའི་དགེ་སློང་མ་དེའི་ཉེ་དུ་མ་ཡིན་ན་དེའི་བྱེད་པ་པོའི་ཉིད་ཡིན་པའོ། །འདིར་གཞུང་ནི་དེའི་ཚིག་གིས་མགྲོན་དུ་བོས་པར་གྱུར་ན་
ལྟུང་བ་མེད་དོ་ཞེས་གསུངས་པ་དང་། ཞུ་བའི་གཞུང་ལས་ཉེ་དུའི་གནས་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །སྤྱིར་བཏང་བ་བསྟན་ནས་དམིགས་ཀྱིས་བསལ་བ་བསྟན་པའི་ཕྱིར། བྱུག་རིས་སྟོན་པ་དང་མ་བྱིན་པ་ལ་སྦྱིན་དུ་འཇུག་པ་མ་གཏོགས་སོ་ཞེས་བྱ་བ་སྨྲས་སོ། །སྐོ་ཤམ་

ལ་ཞུགས་པ་སྔར་བསྟན་པ་ལས་འདི་གཉིས་འབྲི་བར་བྱའོ། །བྱུག་རིས་སྟོན་པ་ཞེས་བྱ་བ་ནི་ད་འདིར་བྲིམས་ཤིག །དེའི་འོག་ཏུ་འདིར་བྲིམས་ཤིག་ཅེས་བྱ་བ་ལ་སོགས་པས་གྲལ་རིམ་བཞིན་དུ་མདུན་གྱི་བྱུག་རིས་སྟོན་པར་བྱེད་པའོ། །མ་བྱིན་པ་ལ་སྦྱིན་
དུ་འཇུག་པ་ཞེས་བྱ་བ་ནི། གང་གི་ཚེ་བྱུག་རིས་སྔ་མ་ལས་ཐོད་རྒལ་དུ་འདས་ཏེ་བྱུག་རིས་འོག་མར་བྱིན་པར་གྱུར་པ་དེའི་ཚེ་ན་བྱུག་རིས་གོང་མ་བཀོལ་བ་ཤོས་དེར་སྦྱིན་དུ་འཇུག་པའོ། །ཅི་ཞིག་བྱས་ན་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། དེ་ལ་དགེ་སློང་གང་ཡང་རུང་བ་ལྷན་
ཅིག་མི་ཟ་བས་ཀྱང་རུང་བས་སྲིང་མོ་ཁྱོད་དགེ་སློང་རྣམས་ཟས་ཟོས་ཀྱི་བར་དུ་རེ་ཞིག་སྡོད་ཅིག་ཅེས་མ་བསྒོ་བར་དགེ་སློང་གསུམ་ལ་སོགས་པར་མགྲོན་དུ་བོས་པས་ཟོས་ནའོ་ཞེས་བྱ་བ་སྨྲས་ཏེ། དགེ་སློང་མ་དེ་ལ་མ་བསྒོ་བར་ཟོས་ན་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །དེ་ལ་ཞེས་བྱ་
བ་ནི་དགེ་སློང་མ་དེ་ལ་སྟེ་དེ་ལ་མ་བསྒོ་བར་ཟོས་ན་ཁ་ན་མ་ཐོ་པ་འདིར་འགྱུར་རོ། །སུས་མ་བསྒོ་བར་ཞེ་ན། དེའི་ཕྱིར་དགེ་སློང་གིས་ཞེས་བྱ་བ་སྨྲས་སོ། །ཅི་ལྟུང་བ་འབྱིན་པར་བྱེད་པ་ཁོ་ནས་སམ་ཞེ་ན་མ་ཡིན་ཏེ་དེའི་ཕྱིར་གང་ཡང་རུང་བས་ཞེས་བྱ་བ་སྨྲས་སོ། །དགེ་སློང་སྟོན་མོ་དེའི་ནང་
དུ་ཟན་ཟོས་ཟིན་ནས་སྔར་ལངས་པ་དེས་བསྒོ་བ་བྱས་ནས་ཡང་བསྒོ་བ་ཉིད་ཡིན་པས་དེའི་ཕྱིར་ལྷན་ཅིག་མི་ཟ་བས་ཀྱང་རུང་བས་ཞེས་བྱ་བ་སྨྲས་ཏེ། འདིར་གཞུང་ནི་དགེ་སློང་གཞན་དག་ཟོས་ཏེ་འབྱུང་ཞིང་གཞན་དག་འཇུག་པས་ཞེས་གསུངས་པ་ཡིན་ནོ། །གང་གི་ཚེ་དགེ་སློང་དེ་དག་
ཐམས་ཅད་ལངས་པར་གྱུར་ཟིན་ཅིང་དགེ་སློང་གཞན་དག་ཅིག་འཁོད་པར་གྱུར་ན་དེ་ལ་ནི་ལྷན་ཅིག་མི་ཟ་བར་ཞེས་བྱ་བར་མི་བཟུང་སྟེ། ཟན་ཐ་དད་པའི་ཕྱིར་རོ། །འདིར་ཟན་གཅིག་པ་ཉིད་ཡན་ལག་ཏུ་བཞེད་པས་དེའི་ཕྱིར་ཟ་བར་བྱེད་པ་ཐམས་ཅད་མ་ལངས་པ་ཉིད་ན་འགའ་ཞིག་
ལངས་པ་ནི་ལྷན་ཅིག་མི་ཟ་བ་ཉིད་ཡིན་པར་ཤེས་པར་བྱའོ། །དགེ་སློང་དེ་དག་གིས་ཇི་སྐད་བསྒོ་བར་བྱ་ཞེ་ན། དེའི་ཕྱིར་སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་བྱ་བ་སྨྲས་ཏེ། དེ་ཡང་བཟློག་པར་བྱ་བའི་ཚིག་གི་དཔེ་ཙམ་དུ་ཟད་དོ། །མ་བསྒོ་

བར་ཞེས་བྱ་བ་ནི། དགེ་སློང་མ་དེ་ལ་ཇི་སྐད་སྨོས་པའི་རྣམ་པ་དེ་དག་གིས་གལ་ཏེ་མ་བསྒོ་ཞིང་བརྡ་མ་སྤྲད་པར་རོ། །དགེ་སློང་གསུམ་ལ་སོགས་པ་མགྲོན་དུ་བོས་པས་ཟོས་ནའོ་ཞེས་བྱ་བ་ནི། གཉིས་མན་ཆད་ལ་ནི་ན་སྨད་པ་ཡིན་པས་གསུམ་ཡན་ཆད་མགྲོན་དུ་བོས་པ་ཇི་སྙེད་
ཀྱིས་ཟོས་པ་དེ་དག་ཐམས་ཅད་ལ་ཁ་ན་མ་ཐོ་བ་འདིར་འགྱུར་བའོ། །ཅི་མགྲོན་དུ་བོས་པ་གང་ཡང་རུང་བས་གང་ཡང་རུང་བ་ཟོས་པ་ལའམ་ཞེ་ན་དེའི་ཕྱིར་རིགས་ཀྱིའོ་ཞེས་བྱ་བ་སྨྲས་ཏེ། གལ་ཏེ་བྲམ་ཟེ་དང་ཁྱིམ་བདག་གི་རིགས་ཀྱིས་མགྲོན་དུ་བོས་པ་དེས་སོ། །རིགས་ཀྱི་དྲུང་
ཉིད་དུ་ཟོས་ན་སྟེ། གཞན་དུ་མ་ཡིན་ནོ། །དགོན་པ་དང་གཙུག་ལག་ཁང་ལ་སོགས་པར་སྦྱིན་བདག་རིགས་ཀྱི་མི་ཐམས་ཅད་འདུས་པའམ་དེས་བསྐོས་པ་ལ་སོགས་པས་ཟན་སྦྱར་བ་དེ་ཡང་རིགས་ཀྱི་ཟན་སྦྱར་བ་ཉིད་ཡིན་པར་རིག་པར་བྱ་སྟེ། དེའི་ཕྱིར་ཁྱིམ་དུ་ཞེས་མ་སྨོས་སོ། །
རིགས་ཀྱི་ཟན་ལས་གཞན་པ་གཙུག་ལག་ཁང་ལ་སོགས་པའི་ཟན་དང་། དགེ་སློང་གཅིག་གམ་གཉིས་མགྲོན་དུ་བོས་པ་ལ་ནི་འདིའི་རྗེས་སུ་འབྲངས་པས་ཉེས་བྱས་སུ་ཤེས་པར་བྱའོ། །འདིར་དགེ་སློང་མ་ཐག་ཇི་སྲིད་ན་འདུག་པར་གྱུར་པ་ཁ་ན་མ་ཐོ་བ་ཇི་ལྟ་བུའི་བྱེད་པ་པོ་ཡིན་ཞེ་ན།
དེའི་ཕྱིར་གལ་ཏེ་ཚིག་དེ་ཉེ་བར་གདགས་སུ་རུང་ན་དངོས་གཞིའོ་ཞེས་བྱ་བ་སྨྲས་ཏེ། གལ་ཏེ་སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་བྱ་བའི་ཚིག་དེ་དགེ་སློང་མ་དེ་ལ་ཉེ་བར་གདགས་ཤིང་བསྒོར་རུང་བའི་ཐག་དེ་ཙམ་ན་འདུག་པ་ལ་ཉེ་བར་མ་བརྟགས་ཤིང་མ་
བསྒོ་ན་དངོས་གཞིའི་ལྟུང་བའི་བྱེད་པ་པོ་ཡིན་ནོ། །གལ་ཏེ་མི་རུང་ན་ཉེས་བྱས་ཀྱིའོ་ཞེས་བྱ་བ་ནི། གལ་ཏེ་དེ་སྐད་ཉེ་བར་གདགས་ཤིང་བསྒོར་མི་རུང་བའི་ཐག་དེ་ཙམ་ན་འདུག་པ་ལ་ཉེ་བར་མ་བརྟགས་ཤིང་མ་བསྒོ་ན་ཉེས་བྱས་ཀྱི་བྱེད་པ་པོ་ཡིན་ནོ། །འདིར་ཉེས་བྱས་ཀྱི་གཞུང་ནི་གང་དག་སྒོ་
ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱ་སྟེ། མ་དྲིས་པར་ཟ་ན་ཉེས་བྱས་སུ་འགྱུར་རོ། །གང་དག་སྒོ་ཁང་ན་ཟ་བར་དེ་དག་གིས་དགེ་སློང་མ་དེ་ལ་བསྒོའམ་ཞེས་དྲི་བར་བྱ་སྟེ་མ་དྲིས་པར་ཟ་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདིར་དངོས་

གཞིའི་གཞུང་ནི་དགེ་སློང་དག་ཁ་ཅིག་ནི་ཁང་ཐོག་ན་ཟ་བར་བྱེད། ཁ་ཅིག་ནི་བར་ཁང་ན་ཟ་བར་བྱེད་ལ་དེ་ན་གལ་ཏེ་དགེ་སློང་མ་སྐོ་ཤམ་བྱེད་ཅིང་འདུག་པར་གྱུར་ན་དགེ་སློང་མ་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་
བཤགས་པར་བྱ་བར་འགྱུར་རོ། །དགེ་སློང་དག་ཁ་ཅིག་ནི་འོག་ཁང་ན་ཟ་བར་བྱེད་ཁ་ཅིག་ནི་སྒོ་ཁང་ན་ཟ་བར་བྱེད་ལ་དེ་ན་གལ་ཏེ་དགེ་སློང་མ་སྐོ་ཤམ་བྱེད་ཅིང་འདུག་པར་གྱུར་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་
འགྱུར་རོ་ཞེས་གསུངས་པ་དེ་གཉིས་ཡིན་ནོ། །འདི་ལ་བསྒོ་བ་ཉིད་དུ་རྣམ་པར་གནས་པ་ནི་ཤེས་གཙོས་སོ་ཞེས་བྱ་བ་ལ། འདི་ལ་ཞེས་བྱ་བ་ནི། བསླབ་པའི་གཞི་འདི་ལའོ། །བསྒོ་བ་ཉིད་དུ་གནས་པ་ནི་ཤེས་གཙོས་ཏེ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་པས་འདུ་ཤེས་ཀྱི་དབང་
གིས་གནས་པ་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་དྲི་བ་ལ་བརྩོན་པར་བྱའོ་ཞེས་བྱ་བ་ནི། གང་གི་ཕྱིར་འདུ་ཤེས་གཙོ་ཆེར་བྱེད་པ་པོ་ཉིད་ཡིན་པ་དེའི་ཕྱིར་དགེ་སློང་མ་དེ་ལ་བསྒོའམ་ཞེས་འདྲི་བ་ལ་བརྩོན་པར་བྱའོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་མ་དེ་ལ་
བསྒོ་འམ་ཞེས་འདྲི་བར་བྱའོ་ཞེས་གསུངས་པ་ཡིན་ནོ། །འདི་ལ་རྒན་པ་མི་འཇུག་ན་གསར་བུས་འཇུག་པར་བྱའོ་ཞེས་བྱ་བ་ནི། དྲི་བ་འདི་ལ་རྒན་པས་འཇུག་པར་བྱའོ། །དེ་མི་འཇུག་ན་གསར་བུས་འཇུག་པར་བྱའོ། །གྲལ་རིམ་དུ་མ་ཕེབས་པར་འདྲིམ་དུ་འཇུག་པ་མ་བཟློག་པར་
ཟ་བའི་སོ་སོར་བཤགས་པར་བྱ་བ་སྟེ་གཉིས་པའོ་ཞེས་བྱ་བ་དེ་བཤད་ཟིན་ཏོ།། །།བམ་པོ་སུམ་ཅུ་བདུན་པ། བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྨྲ་བར་འདོད་ནས། དད་པ་ཅན་ལ་གལ་ཏེ་བྱིན་ན་དེ་ཕོངས་པར་འགྱུར་བ་ལྟ་ན་ཁྱིམ་གྱི་བསླབ་
པའི་སྡོམ་པ་སྦྱིན་པར་བྱའོ་ཞེས་བྱ་བ་སྨྲས་ཏེ། དད་པ་ཅན་ཞེས་བྱ་བ་ནི། ཁྱིམ་བདག་སྟེ་དེ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱའོ་ཞེས་བྱ་བར་སྦྱར་རོ། །གལ་ཏེ་བྱིན་ན་དེ་ཕོངས་པར་འགྱུར་བ་ལྟ་ན་ཞེས་བྱ་བ་ནི་གལ་ཏེ་སྦྱིན་པ་བྱིན་ན་དད་པ་ཅན་དེ་ཡོ་བྱད་ཀྱིས་ཕོངས་པར་

འགྱུར་བ་ལྟ་ནའོ། །དེ་ལྟ་ན་དེ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱ་སྟེ། ཁྱིམ་ལ་བརྟེན་པའི་བསླབ་པ་དེ་ཉིད་སྡོམ་པར་གྱུར་ཅིང་ངེས་པ་ཡིན་པས་སྡོམ་པ་སྟེ་དགེ་སློང་སྡོམ་པ་དེ་ལ་གནས་པ་སྦྱིན་པར་བྱའོ། །གང་གིས་ཤེ་ན་དེའི་ཕྱིར་གསོལ་བས་སོ་ཞེས་བྱ་བ་
སྨྲས་ཏེ། གསོལ་བ་འབའ་ཞིག་གི་ལས་ཀྱིས་སོ་ཞེས་བྱ་བའི་ཐ་ཚིག་གོ། །བག་ཡངས་སུ་བྱ་བ་ལ་ཡང་ངོ་ཞེས་བྱ་བ་ནི། སྡོམ་པ་དེ་བག་ཡངས་སུ་བྱ་ཞིང་གཞིག་པ་ཡང་གསོལ་བ་འབའ་ཞིག་གི་ལས་ཀྱིས་བྱ་བའོ། །བྱིན་པ་དེའི་སེམས་རྟོགས་ནས་ཁྱིམ་དུ་འགྲོ་བ་དང་སྟན་ལ་
འདུག་པ་དང་ཆོས་བསྟན་པ་དག་བྱའོ་ཞེས་བྱ་བ་ལ། བྱིན་པ་དེ་ཞེས་བྱ་བ་ནི། གང་ལ་ཁྱིམ་གྱི་བསླབ་པའི་སྡོམ་པ་དེ་བྱིན་པ་དེ་ནི་བྱིན་པ་དེ་ཞེས་བྱའོ། །བྱིན་པ་དེའི་སེམས་རྟོགས་པས་དེའི་ཁྱིམ་དུ་འགྲོ་བ་དང་། དེའི་སྟན་ལ་ལོངས་སྤྱོད་པ་དང་། དེ་ལ་ཆོས་བསྟན་པ་དག་ཀྱང་
བྱའོ། །ལྷུང་བཟེད་སྟོང་པས་འཇུག་པར་མི་བྱའོ་ཞེས་བྱ་བ་ནི། དགེ་སློང་གང་གི་ལྷུང་བཟེད་སྟོང་པ་དེ་ནི་ལྷུང་བཟེད་སྟོང་པ་སྟེ་ལྷུང་བཟེད་སྟོང་པ་དང་ལྡན་པའི་དགེ་སློང་དེས་བསླབ་པའི་སྡོམ་པ་བྱིན་པའི་ཁྱིམ་དུ་འཇུག་པར་མི་བྱའོ། །དེའི་བྱིས་པ་སློང་བ་དག་ལ་བསོད་སྙོམས་ལས་
སྣུམ་ཁུར་བྱིན་པར་བྱ་ཞིང་རིལ་གྱིས་ནི་མི་སྦྱིན་ནོ་ཞེས་བྱ་བ་ནི། དགེ་སློང་བསོད་སྙོམས་བླངས་ཏེ་བསླབ་པའི་སྡོམ་པ་བྱིན་པའི་ཁྱིམ་དུ་སོན་པ་ན་བསླབ་པའི་སྡོམ་པ་བྱིན་པ་དེའི་བྱིས་པ་ཁ་ཟས་སློང་བ་དག་ལ་དགེ་སློང་དེས་རང་གི་བསོད་སྙོམས་དེ་ལས་སྣུམ་ཁུར་སྦྱིན་པར་དེ་ཡང་མཚོན་པ་
ཙམ་དུ་ཟད་དེ་བཅའ་བར་བྱ་བ་གཞན་དག་ཀྱང་སྦྱིན་པར་བྱའོ། །བསོད་སྙོམས་རིལ་གྱིས་ནི་སྦྱིན་པར་མི་བྱ་སྟེ། གཞན་མུ་སྟེགས་ཅན་མ་དད་པ་དག་འཕྱ་བའི་ཉེས་པ་སྤང་བའི་ཕྱིར་རོ། །འདོད་ན་བག་ཡངས་སུ་བྱའོ་ཞེས་བྱ་བ་ནི། གལ་ཏེ་དད་པ་ཅན་དེ་བག་ཡངས་སུ་བྱ་བ་དེ་འདོད་པར་
གྱུར་ན་དེའི་ཚེ་དེ་ལ་ཁྱིམ་གྱི་བསླབ་པའི་སྡོམ་པ་དེ་བག་ཡངས་སུ་བྱ་ཞིང་གཞིག་པར་བྱའོ། །གང་ལ་བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་འབྱུང་བར་འགྱུར་ཞེ་ན་དེའི་ཕྱིར། དེ་བྱིན་པའི་མདུན་རོལ་དུ་མགྲོན་དུ་མ་བོས་པས་བསླབ་པའི་སྡོམ་པ་བྱིན་པའི་

ཁྱིམ་ནས་བཅའ་བ་དང་བཟའ་བ་དག་བླངས་ཤིང་ཟོས་པ་ལ་སྟེ་ག་གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་གཏོགས་སོ་ཞེས་བྱ་བ་སྨྲས་ཏེ། བསླབ་པའི་སྡོམ་པ་བྱིན་པའི་ཁྱིམ་ནས་བཅའ་བ་དང་བཟའ་བ་དག་བླངས་ཤིང་ཟོས་པ་ལ་ཁ་ན་མ་ཐོ་བ་འདིར་འགྱུར་
རོ་ཞེས་བྱ་བར་སྦྱར་རོ། །ཅི་དགེ་སློང་ཐམས་ཅད་ལ་ཁ་ན་མ་ཐོ་བ་འདིར་འགྱུར་རམ་ཞེ་ན་དེའི་ཕྱིར་དེ་བྱིན་པའི་མདུན་རོལ་དུ་མགྲོན་དུ་མ་བོས་པས་ཞེས་བྱ་བ་སྨྲས་ཏེ། བསླབ་པའི་སྡོམ་པ་དེ་བྱིན་པའི་མདུན་རོལ་དུ་མགྲོན་དུ་མ་བོས་པའི་དགེ་སློང་གིས་ཟོས་ན་ཁ་ན་མ་ཐོ་བ་འདིར་
འགྱུར་གྱི་བསླབ་པའི་སྡོམ་པ་དེ་བྱིན་པའི་མདུན་རོལ་དུ་མགྲོན་དུ་མ་བོས་ན་ནི་བསླབ་པའི་སྡོམ་པ་བྱིན་པ་ན་ཟོས་ཀྱང་ལྟུང་བ་མེད་དོ། །བསླབ་པའི་སྡོམ་པ་བྱིན་པའི་ཁྱིམ་ནས་ཞེས་བྱ་བ་ལ། ཅི་ཙམ་དུ་གཡོས་མལ་གཅིག་པ་ཉིད་དང་ནོར་མ་བགོས་པ་ཉིད་ཡིན་པ་དེ་ཚུན་ཆད་ནི་འདིར་ཁྱིམ་
གཅིག་ཉིད་ཡིན་པས་བསླབ་པའི་སྡོམ་པ་བྱིན་པའི་ཁྱིམ་དེ་ནས་སོ། །ཁྱིམ་དེ་ནས་དགེ་སློང་རང་གི་ལག་གིས་བཅའ་བ་དང་བཟའ་བ་དག་བླངས་ཤིང་ཟོས་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ཅི་བཅའ་བ་དང་བཟའ་བ་གང་ཡང་རུང་བ་ཐམས་ཅད་ཟོས་པ་ལའམ་ཞེ་ན་དེའི་ཕྱིར་ག་
གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་གཏོགས་སོ་ཞེས་བྱ་བ་སྨྲས་ཏེ་གང་གིས་ག་གོན་ལ་སོགས་པ་འདི་དག་དང་དེ་དག་གི་ཚོད་ཅི་རན་དུ་ལེན་པས་དེ་ལ་གནོད་པ་འགར་ཡང་མི་འགྱུར་བ་ནི་མ་གཏོགས་ཏེ་འདི་ལྟར་དེ་དག་ནི་ཡོད་པ་ཉིད་ཡིན་པའི་ཕྱིར་དེ་ལ་ལྟུང་བ་མེད་དོ། །བསླབ་
པ་དྲལ་ཏེ་ཁྱིམ་དུ་འཇུག་པ་གང་ཡིན་པ་དེ་ནི་ཤིན་ཏུ་ལྟོ་འདུན་ཅན་ཉིད་ཡིན་པས་དེའི་ཕྱིར་ལྟུང་བ་འདི་རྣམ་པར་གཞག་པ་མཛད་དོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པའོ་ཞེས་བྱ་བ་དེ་བཤད་ཟིན་ཏོ།། །།ནགས་བརྟགས་པ་ལས་གྱུར་པའི་
སོ་སོར་བཤགས་པར་བྱ་བ་སྨྲ་བར་འདོད་ནས། ནགས་ཉུལ་བའི་དགེ་སློང་བསྐོ་བར་བྱའོ་ཞེས་བྱ་བ་སྨྲས་ཏེ། ནགས་ཉུལ་བར་བྱེད་པས་ན་ནགས་ཉུལ་བ་སྟེ་ཅི་འདི་ན་ཆོམ་རྐུན་པ་དག་ཡོད་དམ་འོན་ཏེ་མེད་ཅེས་ནགས་རྟོག་པར་བྱེད་པ་ནི་ནགས་ཉུལ་བའི་དགེ་སློང་སྟེ་དེ་གསོལ་བ་

དང་གཉིས་ཀྱི་ལས་ཀྱིས་བསྐོ་བར་བྱའོ། །དགེ་ཚུལ་ལ་སོགས་པ་གཞན་ནི་ཡིད་བརྟན་དུ་རུང་བ་མ་ཡིན་པའི་ཕྱིར་འདིར་དགེ་སློང་ཁོ་ན་ལ་བརྟེན་པ་མཛད་དོ། །དེ་གང་གི་ཕྱིར་བསྐོ་བ་དེའི་ལས་བསྟན་པའི་ཕྱིར་དེས་དཔག་ཚད་ཕྱེད་ཁོ་ར་ཁོར་ཡུག་ཏུ་བརྟག་པར་བྱའོ། །འཇིགས་
པ་དང་བཅས་པ་ཉིད་ཡིན་ན་དུད་བརྡ་བརྟུལ་བར་བྱའོ། །བ་དན་སྔོན་པོ་བསྒྲེང་བར་བྱའོ། །འདག་མའི་ཆང་བུ་དག་ལམ་ཀར་གཞག་པར་བྱའོ་ཞེས་བྱ་བ་སྨྲས་ཏེ་དགེ་སློང་དེས་དཔག་ཚད་ཕྱེད་ཁོ་ར་ཁོར་ཡུག་ཏུ་བརྟག་པར་བྱའོ། །གལ་ཏེ་ནགས་འཇིགས་པ་དང་བཅས་པ་ཉིད་ཡིན་ན་དུད་
བརྡ་ལ་སོགས་པ་མདོ་ལས་ཇི་སྐད་སྨོས་པ་དག་བྱའོ། །གཞན་དུ་ན་དཀར་པོ་དག་གོ་ཞེས་བྱ་བ་ནི། གལ་ཏེ་ནགས་འཇིགས་པ་མེད་པར་གྱུར་ན་བ་དན་དཀར་པོ་དག་བསྒྲེང་བར་བྱའོ། །འདོད་པ་ཉིད་ཡིན་ན་དེ་ལ་ཁེའུ་སུས་དང་གྲོགས་དག་ཀྱང་སྦྱིན་པར་བྱའོ་ཞེས་བྱ་བ་ནི། ནགས་ཉུལ་
བའི་དགེ་སློང་དེ་གལ་ཏེ་འདོད་པ་ཉིད་ཡིན་ན་དེ་ལ་ཁེའུ་སུས་ཀྱང་སྦྱིན་པར་བྱ། གྲོགས་དག་ཀྱང་བསྐོ་བར་བྱའོ། །ནགས་བརྟགས་པ་ལས་གྱུར་པའི་སོ་སོར་བཤགས་པར་བྱ་བ་འདི་ལ་བྱེད་པ་པོ་གང་ཡིན་ཞེ་ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་
ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་ནགས་མ་བྱུལ་བ་ཉིད་ལའོ་ཞེས་བྱ་བ་སྨྲས་ཏེ། ནགས་འཇིགས་པ་མེད་པ་ཉིད་དུ་ངེས་པར་མི་ཤེས་པ་ཉིད་ལའོ། །
རེ་ཞིག་བདག་གི་དོན་ནི་གྲུབ་ཟིན་གྱི། དགེ་འདུན་དང་སྦྱིན་པ་པོའི་གནོད་པ་བསྲུངས་པ་འདིས་ཁོ་བོ་ལ་ཅི་བྱ་ཞེས་བདག་ཉིད་བཀང་བ་ཙམ་གྱིས་ཆོག་པར་འཛིན་ཅིང་འཇིགས་པ་དང་བཅས་པའི་གནས་སུ་ཟས་བླངས་ཏེ་ཟ་བ་ལ་ཁ་ན་མ་ཐོ་བ་འདིར་འགྱུར་རོ། །དེ་ལྟར་ཡང་འདིར་གཞུང་ནི་
དགེ་འདུན་གྱི་དགོན་པའི་གནས་དོགས་པ་དང་བཅས་པར་གྲགས་པ་འཇིགས་པ་དང་བཅས་པར་གྲགས་པ་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ཏུ་ཞེས་གསུངས་པ་ཡིན་ནོ། །འདིར་ནགས་ཞེས་བྱ་བ་ནི། དགོན་པར་གྱུར་པ་ཙམ་ཉིད་ལས་དགོངས་ཏེ་

གསུངས་པ་ཡིན་གྱི་ཤིང་ལྗོན་པའི་ཚོགས་ཐིབས་པོ་འབའ་ཞིག་ལ་ནི་མི་བྱའོ། །ཅི་ཞིག་བྱས་ན་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། ཀུན་དགའ་ར་བའི་ཕྱི་རོལ་གྱི་དགོན་པར་བཅའ་བ་དང་བཟའ་བ་བླངས་ཏེ་ཟོས་ནའོ་ཞེས་བྱ་བ་སྨྲས་ཏེ། གྲོང་
གི་ཕྱི་རོལ་ནས་རྒྱང་གྲགས་གཅིག་གི་མཐའ་གང་ཡིན་པ་དེ་ནི་དགོན་པའི་དང་པོ་ཡིན་པས་དེའི་དགེ་སློང་ཀུན་དགའ་ར་བ་ན་གནས་པས་དེའི་ཕྱི་རོལ་དེར་བཅའ་བ་དང་བཟའ་བ་བླངས་ནས་གང་ཡང་རུང་བ་དེ་དག་ཟོས་ན་ཁ་ན་མ་ཐོ་བ་འདིར་འགྱུར་རོ། །བསྲུང་བ་བསྒྲུབས་ན་ཕྱེད་ཉིད་དོ་
ཞེས་བྱ་བ་ནི། གང་གི་ཚེ་ནགས་དེ་འཇིགས་པ་མེད་པ་ཉིད་དུ་བྱུལ་བས་སྦྱིན་པ་པོ་དག་གི་བསྲུང་བ་བསྒྲུབས་པར་གྱུར་པ་དེའི་ཚེ་ཀུན་དགའ་ར་བའི་ཕྱི་རོལ་གྱི་དགོན་པ་དེར་བཅའ་བ་དང་བཟའ་བ་དག་ཟོས་ན་ཕྱེད་ཉིད་དེ་ཉེས་བྱས་བྱེད་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །འཇིགས་པ་
དང་བཅས་པའི་གནས་ལས་གཞན་དུ་འཇུག་པ་ཉིད་དུ་ཡང་ངོ་ཞེས་བྱ་བ་ནི། དགོན་པ་དེའི་ཀུན་དགའ་ར་བའི་ཕྱི་རོལ་འཇིགས་པ་དང་བཅས་པའི་གནས་སུ་གྲགས་པ་དེ་ལས་གཞན་དུ་འདུག་སྟེ་ཟ་བ་ལ་ཡང་ཕྱེད་ཉིད་དོ་ཞེས་བྱ་བའི་རྗེས་བསྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨྲས་སོ། །
འདིར་མདོ་སྔ་མ་དང་འདི་གཉིས་ཀྱི་གཞུང་ནི་བཙུན་པ་རེ་ཞིག་དགེ་སློང་གིས་ཀུན་དགའ་ར་བའི་སླད་རོལ་དུ་རང་གི་སུག་པས་བཅའ་བ་དང་བཟའ་བ་བླངས་ཏེ་འཚལ་བར་བགྱིད་ཅིང་ཆོམ་རྐུན་པ་དག་ཀྱང་སླར་བཟློག་པར་བགྱིད། སྦྱིན་པ་པོ་སྦྱིན་བདག་ཀྱང་བདེ་བར་ཀུན་དགའ་ར་བར་འཛུད་
པར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ནི་མདོ་སྔ་མའི་གཞུང་ཡིན་ནོ། །ཤུལ་གྱི་ཕྱེད་དུ་མཆིས་ཏེ་འཚལ་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ནི་མདོ་འདིའི་གཞུང་ཡིན་ནོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་
དང་པོ་ལ་ནི་རང་གིས་ཞེས་སྨོས་པས་གཞན་ནི་ན་སྨད་པ་ཉིད་ཡིན་ནོ། །གཉིས་པ་ལ་སོགས་པ་སོ་སོར་བཤགས་པར་བྱ་བ་གསུམ་པོ་དག་ལ་ནི་རང་གིས་ཞེས་མ་སྨོས་པས་སྤྲིང་ཡིག་ལ་སོགས་པ་དང་མངགས་པས་བླངས་པ་ལ་ཡང་ཁ་ན་མ་ཐོ་བ་འདྲའོ། །ནགས་བརྟགས་པ་ལས་གྱུར་པའི་

སོ་སོར་བཤགས་པར་བྱ་བ་སྟེ་བཞི་པའོ་ཞེས་བྱ་བ་དེ་བཤད་ཟིན་ཏོ།། །།སོ་སོར་བཤགས་པར་བྱ་བ་རྣམས་རྫོགས་སོ་ཞེས་བྱ་བ་སོ་སོར་བཤགས་པར་བྱ་བའི་ཆོས་བཞི་པོ་དག་བཤད་ཟིན་ཏོ།། །།སོ་སོར་བཤགས་པར་བྱ་བའི་ཆོས་རྣམས་སྨྲས་ནས། ད་ནི། ཤམ་ཐབས་ལ་ནི་རྣམ་
བདུན་དང་། །སྟོད་གཡོགས་ལ་ཡང་རྣམ་གསུམ་དང་། །ཤིན་ཏུ་བསྡམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །ཞེས་བྱ་བ་ལ་སོགས་པའི་རིམ་གྱིས་སོ་སོར་བཤགས་པར་བྱ་བའི་ཆོས་རྣམས་ཀྱི་འོག་ཏུ་བསྟན་པ་བསླབ་པའི་ཆོས་མང་པོ་དག་བསྡུ་བའི་ཕྱིར་
ཤམ་ཐབས་ཅི་ནས་ཀྱང་ཟླུམ་པོར་འདུག་པར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་སྨྲས་ཏེ། ཟླུམ་པོ་ཞེས་བྱ་བ་ནི་མཐའི་ཁ་མཉམ་པར་འདུག་པའོ། །ཧ་ཅང་རྩེངས་པ་མ་ཡིན་པར་ཡང་ངོ་ཞེས་བྱ་བ་ལ་འདིར་ཧ་ཅང་རྩེངས་པ་ཞེས་བྱ་བ་ནི་པུས་མོ་གཉིས་ལས་གང་དུ་ཐལ་བ་
ཉིད་དོ། །དེ་ལྟར་ཧ་ཅང་རྩེངས་པ་མ་ཡིན་པར་ཟླུམ་པོར་བགོ་བར་བྱའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། ཧ་ཅང་རྩེངས་པ་མ་ཡིན་པ་ཞེས་བྱ་བ་ལ་སོགས་པ་མདོ་ལྷག་མ་དྲུག་ནི་ཟླུམ་པོ་ཞེས་བྱ་བའི་མདོ་སྔ་མ་དེའི་སྤྲོས་པ་ཡིན་གྱི་དེའི་རྣམ་པ་གཞན་བསྟན་པ་ནི་
མ་ཡིན་ནོ། །ཧ་ཅང་འཇོལ་བ་མ་ཡིན་པར་རོ་ཞེས་བྱ་བ་ལ། ཧ་ཅང་འཇོལ་བ་ཞེས་བྱ་བ་ནི་ལོང་བུའི་ཚིགས་ལ་རེག་པ་ཉིད་དེ། དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གྲྭ་གླང་པོ་ཆེའི་སྣ་ལྟར་ནར་བ་མ་ཡིན་པར་རོ་ཞེས་བྱ་བ་ལ། གྲྭ་ཞེས་བྱ་བ་ནི་ཕྱོགས་
གཅིག་སྟེ་འདིར་ཁ་ཚར་དང་ཕུན་ཚར་གྱི་མཐའ་མ་བཅད་པའི་གྲྭ་དག་ནི་གླང་པོ་ཆེའི་སྣ་ལྟར་ནར་བ་དག་ཡོད་པས་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གོང་དུ་མ་ལྟེབས་པར་རོ་ཞེས་བྱ་བ་ནི། ལྟེ་བའི་གོང་རོལ་དུ་ཏ་ལའི་ལོ་མ་ལྟར་ལྟེབས་ཤིང་
འདུག་པ་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །ཕུར་མ་ལྟར་འདུག་པར་མ་ཡིན་པར་རོ་ཞེས་བྱ་བ་ནི། གློ་ནས་ཕྱི་རོལ་གྱི་རིམ་པའི་གྲྭ་ཕུར་མ་ལྟར་འདུག་པ་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །སྦྲུལ་མགོའི་

གདེངས་ཀ་ལྟར་ཕྱིར་བྱུང་བ་མ་ཡིན་པར་རོ་ཞེས་བྱ་བ་ནི། མདུན་གྱི་ལྟེ་བའི་འོག་ཏུ་ཤམ་ཐབས་ཀྱི་ནང་དང་འབྲེལ་བའི་རིམ་པ་སྦྲུལ་མགོའི་གདེངས་ཀ་ལྟར་ཕྱིར་བྱུང་བ་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གོང་དུ་མ་ལྟེབས་པར་
རོ་ཞེས་བྱ་བ་དང་འདི་གཉིས་ནི་སྟེང་གི་ཁང་ལོགས་ན་གནས་པའི་རྣམ་པ་ཡིན་ནོ། །ཆོས་གོས་ཅི་ནས་ཀྱང་དང་པོ་གསུམ་ལྟར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་ལ། ཆོས་གོས་ཞེས་བྱ་བ་ནི་བླ་གོས་དང་སྣམ་སྦྱར་རོ། །ཤམ་ཐབས་བྱིན་གྱིས་མ་བརླབས་པ་ལ་སོགས་པ་དག་
ལ་ཡང་རྣམ་པ་འདི་དག་རིག་པར་བྱའོ། །དང་པོ་གསུམ་ཞེས་བྱ་བ་ནི་ཟླུམ་པོར་འདུག་པ་དང་ཧ་ཅང་རྩེངས་པ་མ་ཡིན་པ་དང་ཧ་ཅང་འཇོལ་བ་མ་ཡིན་པ་ཞེས་བྱ་བ་དེ་དག་གོ། །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ་ཞེས་བྱ་བ་ནི། རྣམ་པ་རབ་ཏུ་བརྟག་པ་ལ་སྦྱར་སྟེ། ལག་
པ་དང་རྐང་པ་རྐྱོང་བ་ལ་སོགས་པ་མི་བྱ་བར་མཉམ་པར་གཞག་པའི་རྣམ་པས་ཁྱིམ་གཞན་དུ་འགྲོ་བར་བྱའོ་ཞེས་བྱ་བའི་ཐ་ཚིག་གོ། །ལེགས་པར་བགོས་ཤིང་ངོ་། །སྒྲ་བསྐྱུང་ཞིང་ངོ་། །མིག་གཡེང་བར་མི་བྱ་ཞིང་ངོ་། །གཉའ་ཤིང་གང་ཙམ་དུ་བལྟ་ཞིང་ངོ་ཞེས་བྱ་བ་ལ། ལེགས་པར་
བགོས་པ་ཞེས་བྱ་བ་ནི། ཤམ་ཐབས་དང་སྟོད་གཡོགས་དག་གིས་གཡོགས་པར་བྱ་བའི་ལུས་མཉམ་པར་གཡོགས་ཤིང་ཞེས་བྱ་བའི་ཐ་ཚིག་གོ། །སྒྲ་བསྐྱུང་བ་ཞེས་བྱ་བ་ནི་ཅ་ཅོ་བསྐྱུང་ཞིང་ངོ་། །མིག་གཡེང་བར་མི་བྱ་བ་ཞེས་བྱ་བ་ནི་མིག་འཁྲུལ་པ་མེད་པར་རོ། །གཉའ་ཤིང་གང་ཙམ་
དུ་ལྟ་བ་ཞེས་བྱ་བ་ནི། གང་ལ་གཉའ་ཤིང་གང་ཙམ་དུ་ལྟ་བའི་ངང་ཚུལ་ཡོད་པ་དེ་ནི་གཉའ་ཤིང་གང་ཙམ་དུ་ལྟ་བ་སྟེ་དེ་ལྟར་རོ། །མགོ་མི་གཡོགས་པའི་རྣམ་པས་སོ་ཞེས་བྱ་བ་ནི། རས་ལ་སོགས་པས་མགོ་གཡོགས་པའི་རྣམ་པ་དེ་ལྟ་བུས་ཁྱིམ་གཞན་དུ་འགྲོ་བར་མི་བྱའོ། །མི་བརྫེ་བར་རོ་
ཞེས་བྱ་བ་ནི། ཅི་ཙམ་གྱི་མདོམས་ཀྱི་ཕྱོགས་སྣང་བར་འགྱུར་བ་དེ་ཙམ་དུ་ཤམ་ཐབས་མི་བརྫེ་བར་རོ། །དེ་ལྟ་བས་ན་ཐ་མལ་པར་གནས་པ་ཆར་པ་ལ་སོགས་པའི་གནོད་པ་བྱུང་ན་ཡང་ཤམ་ཐབས་དང་ཆོས་གོས་བརྫེས་ཏེ་བགོ་བར་མི་བྱའོ། །ཚུལ་ཁྲིམས་ལ་སོགས་པའི་བར་ཆད་ཀྱི་དབང་

གིས་ནི་འགྲོ་བར་བྱའོ། །དེ་ལྟར་དྲུག་སྡེ་དག་ཤམ་ཐབས་བརྫེས་ཏེ་ཁྱིམ་གཞན་དུ་འགྲོ་བ་ན་བྲམ་ཟེ་ཁྱིམ་བདག་དད་པ་ཅན་དག་འདི་སྐད་ཅེས་འཕགས་པ་དག་ནི་མི་བཤང་བ་དང་གཅི་བ་བྱས་ནས་འགྲོ་བ་དང་འདྲའོ་ཞེས་འཕྱ་བར་བྱེད་དོ་ཞེས་གསུངས་པ་ཡིན་ནོ། །མི་གཟར་བར་རོ་ཞེས་བྱ་བ་
ནི་ཆོས་གོས་ཕྲག་པའི་ཕྱོགས་སུ་གཟར་ཏེ་གཞག་པ་ཉིད་ནི་གཟར་བ་ཞེས་བྱ་སྟེ། དགེ་སློང་དག་ལ་ནི་ཕྲག་པ་གཡོན་པར་གཟར་བར་གྲགས་པ་ཉིད་ཡིན་ལ་ཡུལ་ཛ་རྟ་དག་ན་ནི་ངོས་གཉི་གར་རོ། །གཉའ་གོང་དུ་མི་བསྣོལ་བར་རོ་ཞེས་བྱ་བ་ནི། ལག་པ་གཡས་པ་མདུན་དུ་བཏང་སྟེ་
དཔུང་པའམ་ཕྲག་པ་འམ་གཉའ་བའི་ཕྱོགས་སུ་བཞག་ལ་གཡོན་པ་ཡང་གཡས་པ་བཞིན་དུ་བྱས་པ་དེ་ནི་གཉའ་གོང་དུ་བསྣོལ་བ་སྟེ་དེ་དེ་ལྟར་མི་བསྣོལ་བར་རོ། །ལྟག་པར་མི་བསྣོལ་བར་རོ་ཞེས་བྱ་བ་ནི། ལག་པ་ཅུང་ཟད་དམ། ཏེ་པོར་བརྐྱང་སྟེ་ལྟག་པའམ་དཔུང་མགོར་ལག་པ་
གཉིས་ཕན་ཚུན་སྤྲད་ཅིང་བསྣོལ་བ་ནི་ལྟག་པར་བསྣོལ་བ་ཞེས་བྱའོ། །འདི་སྐད་བསྟན་ཏེ་ལྟག་པའི་ཕྱོགས་སུ་ལག་པ་ཕན་ཚུན་ནས་སྤྲད་ཏེ་སོར་མོ་བསྣོལ་བ་ཞེས་བྱ་སྟེ་དེ་ལྟར་མི་བསྣོལ་བར་རོ། །ད་ནི། མཆོང་ལ་སོགས་པ་རྣམ་པ་ལྔ། །ལུས་ལ་སོགས་པ་རྣམ་པ་ལྔ། །འདུག་པར་བྱ་བ་དགུ་
དག་དང་། །བྱིན་ལེན་བྱ་བ་བརྒྱད་རྣམས་སོ། །ཞེས་བྱ་བའི་རིམ་པ་བཤད་པར་བྱ་སྟེ། མི་མཆོང་བར་རོ་ཞེས་བྱ་བ་ནི། མཆོང་ཞིང་མཆོང་ཞིང་འགྲོ་བར་མི་བྱའོ། །མི་བརྐྱང་བར་རོ་ཞེས་བྱ་བ་ནི། སྒྱིད་པ་བརྐྱང་བསྐུམ་བྱེད་ཅིང་འགྲོ་བར་མི་བྱའོ། །ཙོག་བུས་མ་ཡིན་པའོ་ཞེས་བྱ་བ་ནི།
ཙོག་བུས་འགྲོ་བར་མི་བྱའོ། །བྲང་བས་མ་ཡིན་པར་རོ་ཞེས་བྱ་བ་ནི། རྐང་པའི་རྟིང་པ་བཏེག་སྟེ་སོར་མོའི་བྲང་བས་ས་ལ་ཕབ་སྟེ་འགྲོ་བར་མི་བྱའོ། །དཀུར་མི་བརྟེན་པར་རོ་ཞེས་བྱ་བ་ནི། ལག་པ་གཉིས་རྐེད་པའི་ཕྱོགས་སུ་བརྟེན་ཏེ་གྲུ་མོའི་ཕྱོགས་སྨྱང་སྨྱང་པོར་བྱས་ཏེ་འགྲོ་བར་མི་བྱའོ། །
ལུས་མི་བསྒྱུར་བར་རོ་ཞེས་བྱ་བ་ནི། གང་དུ་འགྲོ་བ་དེ་ལུས་བསྒྱུར་ཞིང་འགྲོ་བ་ནི་ལུས་བསྒྱུར་ཞིང་འགྲོ་བ་ཞེས་བྱ་བ་སྟེ། དེ་ནི་བྱ་བའི་བྱེ་བྲག་ཡིན་པས་དེའི་ཕྱིར་ལུས་བསྒྱུར་བ་ཞེས་བྱ་བའི་བྱ་བ་དེ་བྱེད་ཅིང་ཁྱིམ་གཞན་དུ་འགྲོ་བར་མི་བྱའོ། །ལག་པ་མི་ཀྱོག་པར་རོ་ཞེས་བྱ་བ་ཡང་། བྱ་བའི་བྱེ་

བྲག་ཡིན་ཏེ་ལག་པ་ཀྱོག་ཅིང་ཁྱིམ་གཞན་དུ་འགྲོ་བར་མི་བྱའོ། །མགོ་མི་བསྒྱུར་བར་རོ་ཞེས་བྱ་བ་ཡང་བྱ་བའི་བྱེ་བྲག་ཡིན་ཏེ། མགོ་བསྒྱུར་ཞིང་ཁྱིམ་གཞན་དུ་འགྲོ་བར་མི་བྱའོ། །ཕྲག་པ་མི་སྤྲད་པར་རོ་ཞེས་བྱ་བ་ནི། །གཞན་དག་དང་ཕྲག་པ་གཉིས་སྤྲད་ཅིང་ཁྱིམ་གཞན་དུ་འགྲོ་
བར་མི་བྱའོ། །ལག་པ་མི་སྦྲེལ་བར་རོ་ཞེས་བྱ་བ་ནི་གཞན་དག་དང་ལག་པ་སྦྲེལ་ཏེ་ཁྱིམ་གཞན་དུ་འགྲོ་བར་མི་བྱའོ། །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ་ཞེས་མན་ཆད་འདི་ཡན་ཆད་ཐམས་ཅད་ཁྱིམ་གཞན་དུ་འགྲོ་བར་བྱའོ་ཞེས་བྱ་བར་སྦྱར་རོ། །དེར་མ་བསྒོ་བར་སྟན་ལ་
འདུག་པར་མི་བྱའོ་ཞེས་བྱ་བ་ནི། ཁྱིམ་གཞན་དེར་ཁྱིམ་བདག་གིས་མ་བསྒོ་བར་དགེ་སློང་སྟན་ལ་འདུག་པར་མི་བྱ་བ་སྟེ། ཅི་སྲིད་དུ་མ་བསྒོ་བ་དེ་སྲིད་དུ་སྟན་ལ་འདུག་པར་མི་བྱའོ་ཞེས་བྱ་བའི་ཐ་ཚིག་གོ། །སྟན་ལ་མ་བརྟགས་པར་མི་བྱའོ་ཞེས་བྱ་བ་ནི། ཁྱིམ་གཞན་དེར་སྟན་ལ་མ་
བརྟགས་པར་འདུག་པར་མི་བྱ་བའོ། །ལུས་ཐམས་ཅད་ཀྱི་ལྗིད་ཀྱིས་མི་དབབ་པར་རོ་ཞེས་བྱ་བ་ནི། ཁྱིམ་གཞན་དེར་སྟན་ལ་ཟོན་ཡོད་པར་དལ་བུས་ལུས་ཕབ་སྟེ་འདུག་པར་བྱའི། གྱ་ཙོམ་དུ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ། ཐིག་ཅེས་འདུག་པར་མི་བྱ་བའོ། །རྐང་པ་
མི་བསྣོལ་བར་རོ་ཞེས་བྱ་བ་ནི། རྐང་པའི་སྟེང་དུ་རྐང་པ་བཞག་སྟེ་འདུག་པར་མི་བྱ་བའོ། །བརླ་མི་བསྣོལ་བར་རོ་ཞེས་བྱ་བ་ཡང་། བརླའི་སྟེང་དུ་བརླ་བཞག་སྟེ་འདུག་པར་མི་བྱའོ། །ལོང་བུའི་སྟེང་དུ་ལོང་བུ་མི་གཞག་པར་རོ་ཞེས་བྱ་བ་ཡང་། ལོང་བུའི་སྟེང་དུ་ལོང་བུ་བཞག་སྟེ་འདུག་
པར་མི་བྱའོ། །རྐང་པ་མི་འགུག་པར་རོ། །རྐང་པ་མི་གདངས་པར་རོ། །མདོམས་མི་སྣང་བར་རོ་ཞེས་བྱ་བ་འདིས་ནི་བརླ་གཉིས་སམ་བྱིན་པ་གཉིས་སམ་རྐང་པ་གཉིས་སམ་ཡང་ན་ཐམས་ཅད་ཀྱང་རུང་སྟེ། ཐད་ཀར་གདངས་ཏེ་འདུག་པར་མི་བྱ་བ་བསྟན་ཏོ། །ལག་པ་ལ་འགྲམ་པ་བརྟེན་
ཏེ་མི་བྱའོ་ཞེས་བྱ་བ་ནི་རྐོམ་ཚུགས་བཅས་ཏེ་སྟན་ལ་འདུག་པར་མི་བྱའོ། །སྟན་ཐབས་བསྐུར་བར་མི་བྱའོ་ཞེས་བྱ་བ་ནི། སྟན་གང་ལ་འདུག་འདུག་པ་དེ་རྒྱབ་ཀྱིས་ཁྱེར་ཞིང་འགྲོ་བར་མི་བྱའོ་ཞེས་བྱ་བའི་ཐ་ཚིག་གོ། །ཐམས་ཅད་དུ་ལེགས་པར་ཁ་ཟས་བླང་བར་བྱའོ་ཞེས་བྱ་བ་ནི། གྲོང་འབའ་

ཞིག་ཏུ་མ་ཟད་ཀྱི་གཞན་དུ་ཡང་ངོ་། །མུ་དང་ཁ་ད་ཆད་དུ་མ་ཡིན་པར་རོ་ཞེས་བྱ་བ་ལ། མུ་ཞེས་བྱ་བའི་སྒྲ་ནི་ཁ་ལོགས་ཀྱི་མུ་ལ་བྱ་སྟེ། ཅི་ནས་ཀྱང་མུ་དང་ཁ་ད་ཆད་དུ་གང་བར་འགྱུར་བ་དེ་ལྟར་བླང་བར་མི་བྱའོ། །ཅུང་ཞིག་མ་གང་བ་དེ་ཙམ་དུ་བྱས་ཏེ་བླང་བར་བྱ་བ་ཡིན་གྱི། ཁའི་
མུ་ནས་མཐེ་བོའི་ལྟོ་གང་གིས་མ་གང་བར་བྱས་ཤིང་བླང་བ་ནི་མ་ཡིན་ཏེ། དེ་ནི་ལྷུང་བཟེད་ཀྱི་ཚད་བཤད་པར་ཟད་ཀྱི་ཟས་བླང་བའི་ཚད་ནི་མ་ཡིན་ནོ། །ཚོད་མ་དང་མཉམ་པ་མ་ཡིན་པར་རོ་ཞེས་བྱ་བ་ནི། བཟའ་བ་གང་ལ་ཚོད་མ་དང་མཉམ་པ་དེ་ནི་ཚོད་མ་དང་མཉམ་པ་སྟེ་དེ་ལྟར་
བླང་བར་མི་བྱའོ། །འདིར་ཚོད་མ་ཞེས་བྱ་བ་ནི་བྱ་ན་ཐམས་ཅད་ཀྱི་དཔེ་ཡིན་ནོ། །ཚོད་མ་ཇི་ཙམ་གྱིས་མུ་དང་ཁ་ད་ཆད་དུ་འགྱུར་བ་དེ་འདིར་དགག་པ་ནི་མ་ཡིན་ཏེ། སྔར་མུ་དང་ཁ་ད་ཆད་ཉིད་བཀག་ཟིན་པའི་ཕྱིར་རོ། །གང་གི་ཕྱིར་བཟའ་བར་བྱ་བའི་ཟས་གཡོས་སུ་བྱས་ཟིན་པ་
ཐམས་ཅད་བསོད་སྙོམས་ཉིད་དུ་བསྟན་པ་ཡིན་པ་དེའི་ཕྱིར་རང་ལ་དགོས་པའི་ཚད་ལས་ལྷག་པའི་ཚོད་མ་ལེན་པ་དེ་བཀག་པ་ཡིན་ནོ། །དེ་ལྟར་ཡང་འདིར་གཞུང་ནི་མ་མོ་ལས་ཇི་ཙམ་གྱིས་དེ་འཚོ་བར་འགྱུར་བ་དེ་ལས་ལྷག་པར་ལེན་ཏམ་ཟ་ན་ཐ་ན་ཁམ་གཅིག་ཙམ་ཡིན་དུ་ཟིན་ཀྱང་
དད་པས་སྦྱིན་པར་བྱ་བ་ཆུད་གཟན་པར་བརྗོད་པར་བྱའོ་ཞེས་གསུངས་པ་ཡིན་ནོ། །གང་གི་ཚེ་ཚད་འཛིན་པར་མི་ནུས་སམ་ཕྱིར་བཟློག་པར་མི་ནུས་པས་ཡོན་བདག་གིས་ནན་གྱིས་བླུག་པ་དང་རྗེས་སུ་སྙིང་བརྩེ་བས་ལེན་ན་དེའི་ཚེ་འབྲས་ཆན་ལ་སོགས་པ་ལྷག་པར་ལེན་ཅིང་གཞན་ནམ་སུ་ཡང་
རུང་བ་ལ་སྦྱིན་ནོ་སྙམ་པ་དེ་ལ་ནི་ལྟུང་བ་མེད་པར་རིག་པར་བྱའོ། །མཐར་ཆགས་སུའོ་ཞེས་བྱ་བ་ནི། སྟན་ལ་འདུག་པའི་གྲལ་གྱི་རིམ་བཞིན་དུ་ཟན་བླང་བར་བྱའོ། །འདིར་རྒན་རིམས་སུ་བྱ་བ་ནི་མ་ཡིན་གྱི་སྟན་ལ་འདུག་པའི་གྲལ་གྱི་རིམ་དུ་བྱ་བ་ཡིན་ཏེ། རྒན་རིམས་མ་ཡིན་
པར་འདུག་པར་གྱུར་ན་ཡང་ཇི་ལྟར་འདུག་པ་བཞིན་རྒན་རིམས་མ་ཡིན་པར་བྲིམས་པར་བྱ་བའི་རྒན་རིམས་ལྟག་འོག་ན་འདུག་པ་ལ་ཐོད་རྒལ་དུ་བྲིམས་པར་མི་བྱ་སྟེ། དེ་ནི་སྔོན་དྲུག་སྡེ་དག་ཟན་ཟ་བ་ན་ཚོད་མ་འཕྲལ་དུ་བྲིམས་པ་མི་ནོད་པར་འོག་ཏུ་ཐག་རིང་དུ་ཐལ་བ་དང་ཕྱིར་འབོད་

པས་བྲིམས་པ་འཁྲུགས་ཤིང་ལང་ལོང་དུ་གྱུར་པའི་ཉེས་དམིགས་དེ་ལྟ་བུ་བསལ་བའི་ཕྱིར་རོ། །ལྷུང་བཟེད་ལ་ལྟ་ཞིང་ངོ་ཞེས་བྱ་བ་ནི། སྣོད་ཤེས་པར་བྱ་ཞིང་བླང་བ་དེ་གང་ལ་ལྷུང་བཟེད་ལ་ལྟ་བའི་འདུ་ཤེས་ཡོད་པའི་དགེ་སློང་དེ་ནི་ལྷུང་བཟེད་ལ་བལྟ་བའོ། །
འདིར་ལྷུང་བཟེད་ལ་ལྟ་བ་ཞེས་བྱ་བ་ནི་ཡིད་ཀྱིས་བལྟ་བ་ལ་བྱའི་མིག་གི་དབང་པོས་བལྟ་བ་ལ་ནི་མ་ཡིན་ནོ། །དེ་ལྟ་བས་ན་ལྷུང་བཟེད་དང་འབྲེལ་པའི་ཡིད་ཀྱིས་ཟས་ལེགས་པར་བླང་བར་བྱ་བ་ཡིན་གྱི། ཐ་སྙད་ལས་བྱུང་བ་ན། གཉའ་ཤིང་གང་ཙམ་དུ་ལྟ་བའི་སྐབས་སུ་བཀག་ཟིན་ཏོ། །
བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་རོ་ཞེས་བྱ་བ་ནི། ཇི་སྲིད་དུ་བཅའ་བ་དང་བཟའ་བ་མངོན་སུམ་དུ་མ་འོངས་པ་དེ་སྲིད་དུ་ལྷུང་བཟེད་མི་བཟེད་པར་བསླབ་པར་བྱ་བའོ། །ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ་ཚོད་མས་འབྲས་ཆན་མི་
དགབ་པར་རོ་ཞེས་བྱ་བ་ནི། ཡང་ཐོབ་པར་བྱའོ་སྙམ་པའི་བསམ་པས་འབྲས་ཆན་གྱིས་ཚོད་མ་མི་དགབ་ཚོད་མས་འབྲས་ཆན་མི་དགབ་པར་བསླབ་པར་བྱའོ། །སྟེང་དུ་གཟུང་བར་མི་བྱའོ་ཞེས་བྱ་བ་ནི། བཅའ་བ་དང་བཟའ་བ་དེའི་སྟེང་དུ་ལྷུང་བཟེད་གཟུང་བར་མི་བྱ་
བའོ། །ད་ནི། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། འབྲུ་ནས་ཐ་དད་བྱེད་པ་ལྔ། ལག་པ་བལྡག་ལ་སོགས་པ་ལྔ། །ཞེས་བྱ་བའི་གོ་རིམས་བཤད་པར་བྱ་སྟེ། ལེགས་པར་ཟས་བཟའ་བར་བྱའོ་ཞེས་བྱ་བ་ནི། མདོ་འོག་མ་ལྔའི་ལུས་ལྟ་བུ་
ཡིན་ནོ། །ཁམ་ཧ་ཅང་ཆུང་བ་མ་ཡིན་པར་རོ་ཞེས་བྱ་བ་ལ། ཁམ་ཞེས་བྱ་བ་ནི་ཁར་ཁམ་ཚད་དུ་གཞུག་ཅིང་མེད་པར་བྱ་བའི་ཕྱིར་ཁམ་ཞེས་བྱ་བ་སྟེ། དེ་ཧ་ཅང་ཆུང་ངུ་མ་ཡིན་པར་བསླབ་པར་བྱ་བའོ། །ཁམ་ཧ་ཅང་ཆེན་པོ་མ་ཡིན་པར་རོ་ཞེས་བྱ་བ་ནི། ཁམ་ཧ་ཅང་ཆེན་
པོ་ཡང་མ་ཡིན་པར་ཟས་བཟའ་བར་བསླབ་པར་བྱ་བའོ། །ཁམ་རན་པར་རོ་ཞེས་བྱ་བ་ནི། རང་དང་མཐུན་པ་དང་འཇིག་རྟེན་དང་མཐུན་པའི་ཁམ་རན་པར་བཟའ་བར་བྱའོ། །ཁམ་མ་བཟས་པར་ཁ་མི་གདངས་སོ་ཞེས་བྱ་བ་སྟེ། ཇི་སྲིད་དུ་ཁམ་ཁའི་སྒོར་ཉེ་བར་མ་

འོངས་པ་དེ་སྲིད་དུ་ཁའི་སྒོ་གདངས་པར་མི་བྱ་བའོ། །ཁ་ཁམ་གྱིས་བཀང་སྟེ་མི་སྨྲ་བར་བྱའོ་ཞེས་བྱ་བ་ནི། ཁ་ཁམ་གྱིས་གང་བ་ནི་ཁམ་གྱིས་བཀང་བ་སྟེ། ཁ་དེས་ཚིག་སྨྲ་བར་མི་བྱ་བའོ། །ཙུག་ཙུག་མི་བྱའོ་ཞེས་བྱ་བ་ནི། ཙུག་ཙུག་ཟེར་ཞིང་བཟའ་བར་མི་བྱ་བའོ། ཅག་
ཅག་མི་བྱའོ། །ཧུ་ཧུ་མི་བྱའོ། །ཕུ་ཕུ་མི་བྱའོ་ཞེས་བྱ་བ་དག་ནི། དེ་དག་སྐད་མི་བྱ་བར་ཟན་བཟའ་བར་བྱ་བ་སྟེ། དེ་དག་ནི་ཁའི་རྣམ་པར་འགྱུར་བའི་སྒྲའི་བྱེ་བྲག་ཡིན་ནོ། །ལྕེ་ཕྱུང་སྟེ་ཟས་མི་བཟའོ་ཞེས་བྱ་བ་ནི་ཟན་ཟ་བ་ན་ལྕེ་ཕྱིར་ཕྱུང་སྟེ་བཟའ་བར་མི་བྱ་བའོ། །འབྲུ་ནས་ཐ་
དད་དུ་མི་བྱའོ་ཞེས་བྱ་བ་ལ་འབྲུ་ཞེས་བྱ་བ་ནི། འབྲས་ཆན་ལ་སོགས་པའི་འབྲུ་སྟེ་ཟན་གང་ལ་འབྲུ་སྟེ་དེ་ལྟ་བུ་ཡོད་པ་དེར་ག་རེ་རེ་ནས་བཏུ་ཞིང་བཟའ་བར་མི་བྱའོ། །འདིར་ནི་རྣམ་པར་འགྱུར་བ་བྱེད་པའི་ཕྱིར་དགག་པ་ཡིན་གྱི་རྟག་པའི་ཕྱིར་དགག་པ་ནི་མ་ཡིན་ནོ། །འཕྱས་མི་གདགས་སོ་
ཞེས་བྱ་བ་ནི། ཟས་ལ་འཕྱ་སྨོད་མི་བྱ་བའོ། །མཁུར་བ་མི་སྤོའོ་ཞེས་བྱ་བ་ནི་མཁུར་བ་གཉིས་དགལ་བཞིན་དུ་བཀང་སྟེ་གཡས་གཡོན་སྤོ་བར་མི་བྱའོ་ཞེས་བྱ་བའི་ཐ་ཚིག་གོ། །རྐན་མི་གཏོག་གོ་ཞེས་བྱ་བ་ནི། ལྕེས་རྐན་གཏོག་ཅིང་ཟན་བཟའ་བར་མི་བྱའོ། །ཁམ་འཕྲོར་བཅད་ཅིང་
བཟའ་བར་མི་བྱའོ་ཞེས་བྱ་བ་ནི་ཁམ་འཕྲོར་བཅད་ཅིང་ཟན་བཟའ་བར་མི་བྱ་བའོ། །ལག་པ་མི་བལྡག་གོ། །ལྷུང་བཟེད་མི་བྱོག་གོ། །ལག་པ་མི་སྤྲུག་གོ། །ལྷུང་བཟེད་མི་བསྐྱམ་མོ་ཞེས་བྱ་བ་ལ། ལག་པ་མི་བལྡག་གོ་ཞེས་བྱ་བ་ནི། ཟས་གང་ལ་ལག་པ་བལྡག་པ་ཡོད་པ་དེ་
མི་བལྡག་པའོ། །ལྷུང་བཟེད་མི་བྱོག་གོ་ཞེས་བྱ་བ་ནི། སོར་མོས་མི་བྱོག་པའོ། །ལག་པ་མི་སྤྲུག་གོ་ཞེས་བྱ་བ་ནི། ལག་པ་ལ་ཟས་ཆགས་པ་སྤྲུག་པར་མི་བྱ་བའོ། །ཡང་ན་ལག་པ་ལ་ཟས་ཆགས་པ་ལྕེའི་སྟེང་དུ་སྤྲུགས་པར་མི་བྱ་བའོ། །ལྷུང་བཟེད་མི་བསྐྱམ་མོ་ཞེས་བྱ་བ་ནི།
ལྷུང་བཟེད་ཀྱི་ནང་དུ་ཟས་ལ་སོགས་པ་བླུགས་ཏེ་བསྐྱམ་པར་མི་བྱ་བའོ། །ཡང་ན་ལྷུང་བཟེད་ཀྱི་ནང་དུ་ཟས་བླུགས་ཏེ་ལྕི་ཡང་ཅི་ཡོད་པ་ལག་སྲང་ལ་མི་གདབ་པའོ། །མཆོད་རྟེན་འདྲ་བར་བྱས་ཏེ་མི་གཞོམ་མོ་ཞེས་བྱ་བ་ནི། ཟན་ལ་མཆོད་རྟེན་གྱི་དབྱིབས་འདྲ་བར་བྱས་ཏེ་གཞོམ་ཞིང་བཟའ་བར་མི་བྱའོ། །

ད་ནི། འཕྱ་ལ་སོགས་པ་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །འགྲེང་བར་བྱེད་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །ཞེས་བྱ་བའི་རིམ་པ་བཤད་པར་བྱ་སྟེ། དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟའོ་ཞེས་
བྱ་བ་ནི། གང་ལ་འཕྱས་གདགས་པའི་ཕྱིར་བལྟ་བའི་ངང་ཚུལ་ཡོད་པ་དེ་ནི་འཕྱས་གདགས་པའི་ཕྱིར་ལྟ་བ་སྟེ། དེས་དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བའོ། །དྲུང་ན་འདུག་པ་ཞེས་བྱ་བ་ནི་མཚོན་པ་ཙམ་དུ་ཟད་དོ། །ལག་པ་ཟས་དང་འབགས་པས་ཆུ་
སྣོད་ལ་མི་བཟུང་ངོ་ཞེས་བྱ་བ་ནི། ལག་པ་ཟས་དང་འབགས་པས་བྱ་མ་བུམ་ལ་སོགས་པའི་ཆུ་སྣོད་ལ་མི་བཟུང་ངོ་ཞེས་བྱ་བའི་ཐ་ཚིག་གོ། །དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་རོ་ཞེས་བྱ་བ་ལ་འདིར་ཡང་དྲུང་ན་འདུག་པ་ཞེས་བྱ་བ་ནི་མཚོན་པ་ཙམ་དུ་ཟད་དོ། །
ཁྱིམ་ན་འདུག་པ་ལ་མ་དྲིས་པར་དེའི་ཁྱིམ་དུ་མི་དབོའོ་ཞེས་བྱ་བ་ནི། ཁྱིམ་བདག་ལ་མ་དྲིས་པར་ཟས་དང་འབགས་པའི་ཆུ་དེ་ཁྱིམ་པའི་ཁྱིམ་དུ་མི་དབོ་བར་བསླབ་པར་བྱ་བའོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་རོ་ཞེས་བྱ་བ་ནི། ཤིང་ཏོག་ལ་སོགས་པ་ཕྱད་ཕྱེད་
ཟོས་པ་དང་ངན་མར་གྱུར་པ་ལྷུང་བཟེད་ཀྱིས་མི་འདོར་བར་བསླབ་པར་བྱ་བའོ། །ལྷུང་བཟེད་ལན་གསུམ་བཀྲུས་ཏེ་གཙུག་ལག་གི་ཚིགས་སུ་བཅད་པ་དག་གིས་བཟླས་བརྗོད་བྱས་པའི་ལྷུང་བཟེད་ཀྱི་ཆུ་སྦྱིན་པར་བྱའོ་ཞེས་བྱ་བ་ནི། ལྷུང་བཟེད་ལན་གསུམ་དག་པར་བཀྲུས་ཏེ། དྲང་སྲོང་
གིས་གསུངས་པའི་གཙུག་ལག་གི་ཚིགས་སུ་བཅད་པ་དག་གིས་བཟླས་བརྗོད་བྱས་པ་བྲམ་ཟེ་ལ་སོགས་པ་སློང་བ་དག་ལ་སྦྱིན་པར་བྱའོ། །འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་པར་རོ་ཞེས་བྱ་བ་ནི། ལོ་མ་ལ་སོགས་པ་དག་གིས་མ་གཡོགས་པ་འོག་གཞི་མེད་པའི