Luận tạng Tây Tạng (Tengyur) — Tập 163

་བ་ནི། འཁོར་བའི་འཁོར་ལོའི་ཕྱི་རོལ་གྱི་མཐའ་ཁོ་ར་ཁོར་ཡུག་ཏུ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་བྲི་བར་བྱ་ཞིང་དེ་དག་ཐམས་ཅད་ཀྱང་མི་རྟག་པ་ཉིད་ཀྱི་སྲིན་པོས་པང་དུ་བླངས་ཏེ་ཡན་ལག་ལྔ་ཆར་གྱིས་གཟུང་བར་བྲི་
བར་བྱ་བའོ། །སྟེང་དུ་སངས་རྒྱས་མྱ་ངན་ལས་འདས་པའི་དཀྱིལ་འཁོར་དཀར་པོ་ཉེ་བར་སྟོན་པའོ་ཞེས་བྱ་བ་ནི། འཁོར་བའི་འཁོར་ལོ་མི་རྟག་པ་ཉིད་ཀྱི་སྲིན་པོས་གཟུང་བར་དེའི་སྟེང་དུ་སངས་རྒྱས་བཅོམ་ལྡན་འདས་ཀྱི་སྐུ་གཟུགས་བྲི་ཞིང་། དེའི་དྲུང་དུ་མྱ་ངན་ལས་འདས་པའི་

གཟུགས་བརྙན་དཀྱིལ་འཁོར་དཀར་པོ་བྲི་བར་བྱ་སྟེ། སངས་རྒྱས་ཀྱི་སྐུ་གཟུགས་དེ་དཀྱིལ་འཁོར་དེ་བཞིན་ལ་ཉེ་བར་སྟོན་པར་མཛད་པ་འདྲ་བར་འདྲི་བར་བྱ་བའོ། །འོག་ཏུ་བརྩམ་པར་བྱ་ཞིང་ཞེས་བྱ་བའི་ཚིགས་སུ་བཅད་པ་གཉིས་སོ་ཞེས་བྱ་བ་ནི།
འཁོར་བའི་འཁོར་ལོ་མི་རྟག་པ་ཉིད་ཀྱི་སྲིན་པོས་གཟུང་བ་དེའི་འོག་ཏུ་བརྩམ་པར་བྱ་ཞིང་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཡི་གེར་བྲི་བར་བྱ་བའོ། །ཚིགས་སུ་བཅད་པ་གཉིས་གང་ཞེ་ན། །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་
པར་བྱ། །འདམ་བུའི་ཁྱིམ་ན་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་གསུངས་པ་ཡིན་ནོ། དེ་
སྟོན་པར་བྱེད་པ་གཞག་པར་བྱའོ་ཞེས་བྱ་བ་ནི། སྐྱེ་བོ་ལྷགས་པ་རྣམས་འཁོར་བའི་འཁོར་ལོ་དེ་སྟོན་ནུས་པའི་དགེ་སློང་གཙུག་ལག་ཁང་དེར་གཞག་པར་བྱ་བའོ། །དེའི་ཁོ་ར་ཁོར་ཡུག་ཏུ་ཆོ་འཕྲུལ་ཆེན་པོ་དང་བདུད་བཅོམ་པ་དག་གོ་ཞེས་བྱ་བ་ནི། སྒོ་ཁང་དེའི་ཁོ་ར་ཁོར་ཡུག་
ཏུ་བཅོམ་ལྡན་འདས་རྡོ་རྗེའི་གདན་ལ་གཞུགས་ཏེ་བདུད་འདུལ་བ་དང་། མངོན་པར་རྫོགས་པར་སངས་རྒྱས་ཏེ་ཆོ་འཕྲུལ་ཆེན་པོ་བསྟན་པའི་རྒྱུད་རི་མོ་བྲི་བར་བྱ་བའོ། །ཁྱམས་སུ་སྐྱེས་པའི་རབས་དག་གོ་ཞེས་བྱ་བ་ནི། གཙུག་ལག་ཁང་གི་ཁྱམས་སུ་སྐྱེས་པའི་རབས་ཀྱི་
སྡེ་དག་རི་མོར་བྲི་བར་བྱ་བའོ། །དྲི་གཙང་ཁང་གི་སྒོར་གནོད་སྦྱིན་ཕྲེང་ཐོགས་དག་གོ་ཞེས་བྱ་བ་ནི། དྲི་གཙང་ཁང་གི་སྒོར་གནོད་སྦྱིན་ལག་ན་ཕྲེང་ཐོགས་དག་རི་མོར་བྲི་བར་བྱ་བའོ། །དཔོང་སའི་ཁང་པར་གནས་བརྟན་གྱི་གྲལ་དག་གོ་ཞེས་བྱ་བ་ནི། དཔོང་སའི་རྩིག་ངོས་
སུ་གནས་བརྟན་ཆེན་པོ་འཕགས་པ་ཀུན་ཤེས་ཀཽཎྜི་ནྱ་ལ་སོགས་པ་དགྲ་བཅོམ་པའི་དགེ་འདུན་རྣམས་ཀྱི་གཟུགས་རི་མོར་བྲི་བར་བྱའོ། །མཛོད་ཀྱི་སྒོར་གནོད་སྦྱིན་ལག་ན་མྱུ་གུ་ཐོགས་པ་དག་གོ་ཞེས་བྱ་བ་ནི། མཛོད་ཀྱི་སྒོར་གནོད་སྦྱིན་ལག་ན་རིན་པོ་ཆེའི་མྱུ་གུ་དང་སྙེ་མ་དང་

དོག་པ་དང་། འབྲུ་ཐོགས་པ་དག་རི་མོར་བྲི་བར་བྱའོ། །ཟས་ཀྱི་ཁང་པར་ལག་ན་བཟའ་བ་དང་བཅའ་བ་ཐོགས་པ་དག་གོ་ཞེས་བྱ་བ་ནི། བཀད་སར་གནོད་སྦྱིན་ལག་ན་བཅའ་བ་དང་བཟའ་བ་ཐོགས་པ་དག་རི་མོར་བྲི་བར་བྱ་བའོ། །བསྲོ་གང་གི་ཁང་པར་ལག་ན་མྱུ་གུ་དང་བུམ་
པ་ཐོགས་པ་དག་གོ་ཞེས་བྱ་བ་ནི། བསྲོ་གང་གི་ཁང་པར་གནོད་སྦྱིན་ལག་ན་བུམ་པ་དང་མྱུ་གུ་ཐོགས་པ་དག་རི་མོར་བྲི་བར་བྱ་བ་སྟེ། བུམ་པ་ནི་ཁྲུས་ཀྱི་དོན་ཉིད་དུ་དགོས་ལ་མྱུ་གུ་ནི་གདིང་བའི་དོན་ཉིད་དུ་དགོས་པའི་ཕྱིར་རོ། །མེ་ཁང་དུ་གྲུལ་བུམ་མེ་སྦར་བར་བྱེད་པ་དག་ཀྱང་
གྲུལ་བུམ་གྱི་བུ་བྱི་དོར་ལ་སོགས་པ་བྱེད་པ་དང་མེ་སྦར་བར་བྱེད་པ་དག་དང་སྦྱིན་བདག་མར་མེ་ཐོགས་པ་དང་ལྷའི་ཕོ་ཉ་དག་གོ་ཞེས་བྱ་བ་ནི། མེ་བུད་པའི་ཁང་པར་གྲུལ་བུམ་མེ་སྦར་བར་བྱེད་པ་དག་རི་མོར་བྲི་བར་བྱ་སྟེ། དེ་དག་ནི་མེ་ལ་དབང་བར་གྲགས་པའི་ཕྱིར་རོ། །དེར་གྲུལ་
བུམ་གྱི་བུ་བྱི་དོར་ལ་སོགས་པ་བྱེད་པ་དང་མེ་སྦར་བར་བྱེད་པ་དག་ཀྱང་རི་མོར་བྲི་བར་བྱའོ། །དེར་སྦྱིན་བདག་གང་ཡིན་པ་འཁོར་དང་བཅས་པ་མར་མེ་ཐོགས་པ་ཡང་རི་མོར་བྲི་བར་བྱ་སྟེ། མེ་བུད་པའི་ཁང་པ་དེ་ནི་མུན་གནག་པའི་ཕྱིར་མར་མེ་གཟུགས་པར་གསུངས་པའི་ཕྱིར་རོ། །དེར་ལྷའི་
ཕོ་ཉ་དག་ཀྱང་རི་མོར་བྲི་བར་བྱ་སྟེ། ལྷའི་ཕོ་ཉ་ཞེས་བྱ་བ་ནི། སེམས་ཅན་སྐྱེ་བ་དང་རྒ་བ་དང་ན་བ་དང་འཆི་བ་ལ་སོགས་པ་དེ་དག་སྟེ། དེ་དག་ན་སྐྱོ་བ་བསྐྱེད་པར་བྱ་བའི་ཕྱིར་དང་། དགེ་བའི་ཕྱོགས་ལ་མངོན་པར་བྱ་བའི་ཕྱིར་རོ། །ཆུའི་ཁང་པར་ཀླུ་ལག་ན་བུམ་པ་ཐོགས་པ་རྒྱན་
སྣ་ཚོགས་ཀྱིས་བརྒྱན་པ་དག་དང་ཀླུའི་བུ་མོ་ཆུ་འདྲིམ་པར་བྱེད་པ་དག་གོ་ཞེས་བྱ་བ་ནི། ཆུའི་ཁང་པར་དེ་དག་རི་མོ་བྲི་བར་བྱ་བ་སྟེ་ཀླུ་རྣམས་ནི་ཆུ་ལ་དབང་བའི་ཕྱིར་རོ། །ནད་པའི་རུང་བའི་ཁང་པར་དེ་བཞིན་གཤེགས་པ་ནད་པའི་རིམ་གྲོ་མཛད་པའོ་ཞེས་བྱ་བ་ནི། སྨན་ཁང་
དུ་ནི་དེ་བཞིན་གཤེགས་པ་ནད་པའི་རིམ་གྲོ་མཛད་པ་རི་མོར་བྲི་བར་བྱ་བའོ། །བཤང་བ་དང་གཅི་བའི་སྐྱབས་སུ་དུར་ཁྲོད་དག་གམ་མགོའི་ཐོད་པ་དག་གོ་ཞེས་བྱ་བ་ནི། ཆབ་ཁུང་ས་རྣམ་པ་གཉིས་སུ་ནི་དུར་ཁྲོད་རྒྱས་པའམ་མགོའི་ཐོད་པ་ལ་སོགས་པ་རུས་པའི་ཀེང་རུས་དམ་དུམ་

དག་རི་མོར་བྲི་པར་བྱའོ། །གཙུག་ལག་ཁང་བླ་གབ་མེད་པ་མ་ཡིན་པར་མེ་དུ་བ་དང་བཅས་པ་བུད་པར་ཡང་མི་བྱ་བཅང་བར་ཡང་མི་བྱའོ་ཞེས་བྱ་བ་ནི། རི་མོ་མ་རུང་བར་འགྱུར་བ་སྤང་བའི་ཕྱིར་རོ། །བླ་གབ་མེད་པར་ནི་ཉེས་པ་མེད་དོ། །སྤྱིལ་
བར་ནི་ཐམས་ཅད་མི་བྱའོ་ཞེས་བྱ་བ་ནི། ས་གཞི་སྤྱིལ་བའམ་བརྡུངས་པས་འཇམ་པོར་ནི་མེ་དུ་བ་ཅན་དང་དུ་བ་མེད་པར་ཐམས་ཅད་བུད་པར་ཡང་མི་བྱ་བཅང་བར་ཡང་མི་བྱ་བའོ། །དེའི་དོན་དུ་ཞུགས་ལིང་བཅང་བར་བྱའོ་ཞེས་བྱ་བ་ནི་མེ་བུད་པ་དང་དེའི་དོན་དུ་ཞུགས་ལིང་བཅང་བར་
བྱ་བའོ། །མེ་ལ་དགོས་པ་གྱོ་མོ་ལ་སོགས་པའི་སྣོད་ནི་ཞུགས་ལིང་ཞེས་བྱའོ། །འདིར་གཞུང་ནི་དགེ་སློང་དག་དགུན་སྨད་ཀྱི་དུས་སུ་ལྷགས་པས་ཉེན་ནས་སྤྱིལ་བར་མེ་འབུད་པར་བྱེད་པ་ནི་སྤྱིལ་བ་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྤྱིལ་བར་མེ་
འབུད་པར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མཉམ་པར་བཅེར་བའི་ཕྱིར་ལྕགས་ཀྱི་ཕྲ་སྐོམ་མོ་ཞེས་བྱ་བ་ནི། བཅང་བར་བྱའོ་ཞེས་བྱ་བར་སྦྱར་ཏེ། མེའི་ཕྱོགས་ཕན་ཚུན་ནས་བསྐུལ་བ་ནི་མཉམ་པར་བཅེར་བ་ཞེས་བྱའོ། །ལྕགས་ཀྱི་ཕྲ་སྐམ་ཞེས་བྱ་བ་ནི་
ལྕགས་ཀྱི་ཐལ་ཕྱགས་སོ། །ཤིང་གི་གཡོག་པས་ཀྱང་ལས་དེ་འགྲུབ་བོ་ཞེས་བྱ་བ་ནི། ཤིང་གི་གཡོག་པ་ཞེས་བྱ་བ་ནི་ཤིང་གི་ཐལ་ཕྱགས་ཀྱིས་ཀྱང་ཕྲ་སྐམ་གྱི་ལས་དེ་འགྲུབ་པོ། །ཁང་སྐྱོང་གིས་གཙུག་ལག་ཁང་ཉི་མ་རེ་རེ་ཞིང་ཕྱག་དར་བྱའོ་ཞེས་བྱ་བ་ནི་གཙུག་
ལག་ཁང་གི་ཁང་སྐྱོང་གིས་ཉི་མ་རེ་རེ་ཞིང་གཙུག་ལག་ཁང་ཕྱག་དར་བྱའོ། །ཅི་མཐའི་ཕྱོགས་ཐམས་ཅད་དམ་ཞེ་ན་དེའི་ཕྱིར། མི་ནུས་ན་མཁོ་བའི་ཕྱོགས་སོ་ཞེས་བྱ་བ་སྨྲས་ཏེ། གཙུག་ལག་ཁང་མཐའ་དག་ཕྱག་དར་བྱེད་མི་ནུས་ན་གཙུག་ལག་ཁང་གི་ཕྱོགས་གང་མཁོ་བ་དེ་དག་
ཕྱག་དར་བྱའོ། །ལྷག་མ་ནི་ཚེས་བརྒྱད་དམ་ཚེས་བཅུ་བཞི་ལ་གཎྜཱི་བརྡུངས་ཏེ་དགེ་འདུན་ཐམས་ཅད་ཀྱིས་ཆོས་དང་ལྡན་པའི་གཏམ་གྱིས་སམ་འཕགས་པ་མི་སྨྲ་བ་ཉིད་ཀྱིས་སོ་ཞེས་བྱ་བ་ནི། མཁོ་བའི་ཕྱོགས་ཀྱི་ལྷག་མ་ཕྱག་དར་མ་བྱས་པ་གང་ཡིན་པ་དེ་དག་ནི་ཚེས་བརྒྱད་

དམ་བཅུ་བཞིའི་དུས་སུ་དགེ་འདུན་ཐམས་ཅད་ཀྱིས་ཇི་སྐད་སྨོས་པའི་རིམ་པ་དེས་ཕྱག་དར་བྱའོ། །ཆོས་ཀྱི་འདུན་སར་ཆག་ཆག་དང་ལྕི་བ་འཇམ་པོའི་བྱུག་པས་བྱུག་གོ་ཞེས་བྱ་བ་ནི། གསོ་སྦྱོང་དང་དགག་དབྱེ་ལ་སོགས་པ་ཆོས་ཀྱི་འདུན་མའི་གནས་དེར་ཆག་ཆག་
གདབ་པར་བྱ། ལྕི་བ་འཇམ་པོའི་བྱུག་པས་བསྐུ་བར་བྱའོ། །མཇུག་ཏུ་ཁྲུས་བྱའོ་ཞེས་བྱ་བ་ནི། ཕྱག་དར་ལ་སོགས་པ་ཟིན་པའི་མཇུག་ཏུ་དེའི་ཚེ་ཁྲུས་བྱ་བའོ། །ཡང་ན་རྐང་ལག་བཀྲུའོ་ཞེས་བྱ་བ་ནི་མཇུག་ཏུའོ། །ཆུས་བརླན་པས་ལུས་ཀྱང་བྱུག་གོ་ཞེས་བྱ་བ་ནི།
ལག་པ་ཆུས་བརླན་པས་ལུས་ཀྱི་རྡུལ་ཕྱི་བའི་ཕྱིར་ལུས་ལ་བྱུག་པར་བྱའོ། །སྣུམ་བག་གིས་ཉེད་པ་བྱའོ་ཞེས་བྱ་བ་ནི། ཚེས་བརྒྱད་དང་བཅུ་བཞི་དང་བཅོ་ལྔ་ལའོ། །དཀོན་མཆོག་གི་དོན་དུ་ཕྱག་དར་བྱས་པ་དང་། ཞལ་ཞལ་བྱས་པ་དང་། དྲི་གཙང་ཁང་དང་སྐུ་གཟུགས་
དང་མཆོད་རྟེན་དང་སྲོག་ཤིང་གི་གྲིབ་མ་ལ་གཙུག་ལག་ཁང་གི་ཚིགས་སུ་བཅད་པ་གདོན་ཅིང་བགོམ་མོ་ཞེས་བྱ་བ་ནི། དེ་དག་ལ་མི་བགོམ་དུ་མི་རུང་ན་དྲང་སྲོང་གིས་གསུངས་པའི་ཚིགས་སུ་བཅད་པ་གདོན་ཅིང་བགོམ་པར་བྱའོ། །ཉི་མ་དེ་ཉིད་ལ་གནས་མལ་ལ་སོ་སོར་
བརྟག་པ་དང་བཅོས་པར་བྱའོ་ཞེས་བྱ་བ་ནི་ཚེས་བརྒྱད་དང་བཅུ་བཞིའི་ཉི་མ་དེ་ཉིད་ལ་མལ་ཆ་དང་སྟན་དང་། གདིང་བ་ལ་སོགས་པ་སོ་སོར་བརྟག་པ་དང་བཅོས་པར་བྱ་བའོ། །སུས་དེ་ལ་སོ་སོར་བརྟག་པར་བྱ་ཞེ་ན་དེའི་ཕྱིར། རྡོལ་བ་ལ་སོགས་པ་དང་ལྡན་པ་དག་གིས་སོ་ཞེས་བྱ་
བ་སྨྲས་ཏེ་མལ་ཆ་ལ་སོགས་པའོ། །སུས་བཅོས་པར་བྱ་ཞེ་ན་དེའི་ཕྱིར། གནས་པ་དག་གིས་སོ་ཞེས་བྱ་བ་སྨྲས་ཏེ། དེ་དག་ཉིད་ཀྱིས་འདིར་མཁན་པོ་དང་སློབ་དཔོན་དག་གི་མལ་སྟན་ལ་སོགས་པ་བཅོས་པར་བྱའོ། །གནས་མལ་གྱི་གཞི་ཆག་ཆག་དང་ཕྱག་དར་དང་ལྕི་བ་
འཇམ་པོའི་བྱུག་པས་བསྐུ་བར་བྱའོ་ཞེས་བྱ་བ་ནི། གནས་ཁང་ལ་སོགས་པ་གནས་མལ་གྱི་གཞི་དག་དེ་ན་གནས་པའི་དགེ་སློང་དག་གིས་ཆག་ཆག་ལ་སོགས་པ་བྱ་བའོ། །མལ་ཆ་དྲི་མས་གོས་པ་སྤྲུག་པར་བྱའོ་ཞེས་བྱ་བ་ནི། གལ་ཏེ་སྤྲུགས་པས་དྲི་མ་དང་བྲལ་བར་འགྱུར་ནའོ། །

གལ་ཏེ་ཧ་ཅང་ན་བཀྲུའོ་ཞེས་བྱ་བ་ནི། གལ་ཏེ་ཧ་ཅང་དྲི་མ་ཅན་དུ་གྱུར་ན་འགྱུར་བྱེད་ཀྱི་ཆུ་ལ་སོགས་པས་བཀྲུ་བར་བྱ་བའོ། །ཆག་ཆག་བཏབ་པའི་འོག་ཏུ་ཕྱག་གོ་ཞེས་བྱ་བ་ནི། ཆག་ཆག་བཏབ་པའི་འོག་ཏུ་ཕྱག་དར་བྱ་བའོ། །དེའི་འོག་ཏུ་བཤམ་མོ་
ཞེས་བྱ་བ་ནི། ཕྱག་དར་བྱས་པའི་འོག་ཏུ་མལ་སྟན་བཤམ་པར་བྱ་བའོ། །གཞི་རྡུལ་དང་བཅས་པ་མ་སྤྲུགས་པ་ལ་མི་བྱའོ་ཞེས་བྱ་བ་ནི། མལ་ཆ་དང་སྟན་གྱི་གཞིའི་ཁྲི་ལ་སོགས་པ་རྡུལ་དང་བཅས་པ་ཉིད་ཡིན་ན་དེ་མ་སྤྲུགས་པའི་སྟེང་དུ་མལ་དང་སྟན་བཤམ་པར་མི་བྱའོ། །
བཤམ་པར་བྱ་བ་དག་ལས་གོས་གཅིག་སྤྲུགས་པར་སྤྱད་དོ་ཞེས་བྱ་བ་ནི་མལ་སྟན་བཤམ་པར་བྱ་བ་དེ་དག་གི་ནང་ནས་གཅིག་ཅིག་ཁྲི་ལ་སོགས་པ་སྤྲུག་ཅིང་ཕྱི་བའི་རྡུལ་ཕྱགས་སུ་སྤྱད་པར་བྱ་བའོ། གོས་ཇི་ལྟ་བུ་ཞིག་ཅེ་ན་དེའི་ཕྱིར་ངན་པའོ་ཞེས་བྱ་བ་སྨྲས་ཏེ་ཐམས་ཅད་ཀྱི་ཐ་མའོ། །
དེ་བཅོས་སོ་ཞེས་བྱ་བ་ནི། སྤྲུག་པའི་དོན་དུ་སྤྱད་པའི་གོས་ངན་པ་དེའོ། །མི་ནུས་པ་ཉིད་ན་རས་མར་བྱས་ཏེ་ཤིང་བུའི་རྩེ་མོ་ལ་བཏགས་ནས་སྤྲུག་གོ་ཞེས་བྱ་བ་ནི། དེས་ཁྲི་ལ་སོགས་པ་དག་སྤྲུག་གོ་ཞེས་བྱ་བར་སྦྱར་ཏེ། གོས་ངན་པ་དེ་ཧ་ཅང་ཞིགས་ཆེས་པར་གྱུར་ན་
གང་གི་ཚེ་དེས་ཁྲི་ལ་སོགས་པ་དག་སྤྲུག་པར་མི་ནུས་ཤིང་ཕྱིར་བཅོས་སུ་མི་རུང་བ་དེའི་ཚེ་གོས་ཞིགས་པ་དེ་རས་མར་བྱས་ཏེ་དམ་དུམ་དུ་གཤེགས་ནས་ཤིང་བུའི་རྩེ་མོ་ལ་བཏགས་ཏེ་སྦྲང་ཡབ་བཞིན་དུ་དེས་ཁྲི་ལ་སོགས་པ་དག་སྤྲུག་པར་བྱའོ། །དེ་ལྟར་ཡང་མི་རུང་བ་ཉིད་
ཡིན་ན་སྦྱིན་པ་པོའི་བསོད་ནམས་མངོན་པར་སྤེལ་བ་དང་ཡུན་རིང་བ་ཉིད་དུ་བྱ་བའི་བྱིར་ལྕི་བ་དང་ས་དག་བསྲེས་ཏེ་ཀ་བ་དང་རྩིག་པའི་སེར་ཀ་གླན་པར་བྱའོ་ཞེས་བྱ་བ་ནི། །དེ་ལྟར་རས་མར་བྱས་ཀྱང་ཁྲི་ལ་སོགས་པ་སྤྲུག་པར་མི་ནུས་པ་ཉིད་ཡིན་ན་ཇི་སྐད་སྨོས་པ་དེ་བཞིན་བྱ་བའོ། །སྒོ་
གང་དང་ཁྱམས་སུ་མལ་བཅའ་བ་དང་བཅས་ན་ཡང་གཟུང་བར་མི་བྱའོ་ཞེས་བྱ་བ་ནི། དེ་དག་ཏུ་མལ་བཅའ་བར་ཡང་མི་བྱ་ལ་གཞན་གྱིས་བཅས་ན་ཡང་རང་གིས་གཟུང་བར་མི་བྱའོ། །སྦྱིན་པ་པོ་མྱ་ངན་བསང་བའི་ཕྱིར་ཕུལ་བ་དེས་མཐོང་བར་གཞག་པར་མི་བྱའོ་ཞེས་བྱ་བ་ནི།

རྒྱལ་པོ་གསལ་རྒྱལ་གྱིས་རང་གི་མ་ཤི་བའི་མྱ་ངན་བསང་བའི་ཕྱིར་མའི་མལ་ཁྲི་དགེ་འདུན་ལ་ཕུལ་བ་དགེ་སློང་དག་གིས་སྒོ་གང་དང་ཁྱམས་སུ་བཤམས་པ་རྒྱལ་པོས་མཐོང་ནས་ཡང་མྱ་ངན་ལངས་པ་བྱུང་བའི་མཐའ་ལས་བཅས་པ་ཡིན་ཏེ། དེ་ལྟ་བུའི་རྫས་སྦྱིན་བདག་
གིས་མཐོང་བར་མི་བྱའོ། །སྒྲ་མི་སྙན་པའི་གཉེན་པོའི་ཕྱིར་ཚེས་བརྒྱད་དང་བཅུ་བཞི་དག་ལ་ཁྱམས་སུ་བཤམ་པར་བྱའོ་ཞེས་བྱ་བ་ནི། སྦྱིན་བདག་གིས་མཐོང་བར་མི་བྱ་བའི་ཕྱིར་རྫས་དེ་སྦས་པ་ན། གལ་ཏེ་གཞན་དག་འདི་སྐད་ཅེས་དགེ་སློང་དེ་དག་གིས་མལ་ཁྲི་དེ་བརྐུས་སོ་
ཞེས་བྱ་བ་ལ་སོགས་པའི་སྒྲ་མི་སྙན་པ་སྐུར་པ་དང་ཕྱར་ཀ་དང་དྲི་ངས་སུ་འགྱུར་བ་དེ་བསལ་བའི་ཕྱིར་གཉེན་པོའི་ཕྱིར་ཚེས་བརྒྱད་དང་བཅུ་བཞི་ལ་སོགས་པ་དུས་དུས་སུ་སྦྱིན་བདག་དེ་མེད་པའི་སྐབས་སུ་མལ་ཁྲི་ལ་སོགས་པ་དེ་དག་ཁྱམས་ལ་སོགས་པ་དག་ཏུ་བཤམས་ཤིང་
གཞན་གྱིས་མཐོང་བར་བྱའོ། །ཁྲི་དང་ཁྲིའུ་བཅང་བར་བྱ་བའོ་ཞེས་བྱ་བ་ནི། གང་ཟག་གིས་ཀྱང་ངོ་། །སྤྱིལ་བ་མི་ཉམས་པར་བྱ་བའི་ཕྱིར་ཁྲི་རྐང་གི་མཐིལ་མཉམ་པར་བཅས་པར་བྱའོ་ཞེས་བྱ་བ་ནི། ས་གཞི་སྤྱིལ་བ་འཇམ་པོ་མི་ཉམས་པར་བྱ་བའི་ཕྱིར་རོ། །ཡང་ན་དེའི་
འོག་ཏུ་ཕུབ་མའི་ཕུང་པོ་བཞག་པའམ་དེ་རས་མས་དཀྲི་བར་བྱའོ་ཞེས་བྱ་བ་ནི། སྤྱིལ་བ་མི་ཉམས་པར་བྱ་བའི་ཕྱིར་ཡང་ན་ཁྲི་རྐང་དེའི་འོག་ཏུ་ཕུབ་མའི་ཕུང་བུ་བླུགས་པའམ་ཁྲི་རྐང་དེ་རས་མས་དཀྲི་བར་བྱའོ། །དགེ་འདུན་མ་ཡིན་པས་རྐང་པ་བྲིས་པའི་ཁྲིའུ་བདག་གིར་བྱ་བ་
བསྟན་པར་མི་བྱའོ་ཞེས་བྱ་བ་ནི། དགེ་འདུན་མ་ཡིན་པ་གང་ཟག་གིས་རྐང་པ་རི་མོ་བྲིས་པའི་ཁྲིའུ་བཅང་བར་མི་བྱའོ། །འདིར་གཞུང་ནི། དགེ་སློང་གཞན་དག་ཁྲིའུ་རྐང་པ་ཁྲ་བོ་རང་གིས་བྱེད་དུ་མི་འཇུད་ལ། གཞན་དག་ལས་ཐོབ་པ་ནི་འཆང་བར་བྱེད་པ་དང་། བཅོམ་
ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་འདུན་ལ་ནི་ཁྲིའུ་རྐང་པ་ཁྲ་བོ་ཐོབ་པ་དང་བྱེད་དུ་བཅུག་པ་རྗེས་སུ་གནང་ངོ་། །གང་ཟག་ལ་ནི་རྣམ་པ་ཐམས་ཅད་རྗེས་སུ་མི་གནང་ངོ་ཞེས་གསུངས་པ་ཡིན་ནོ། །སྟན་བཟང་པོ་དང་རྒྱབ་རྟེན་དང་བཅས་པའི་རྟེན་ཡང་མི་

བྱའོ། །ཞེས་བྱ་བ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །སྟན་བཟང་པོ་ཞེས་བྱ་བ་ནི་སྟན་ཚད་ཆེན་པོའོ། །རྒྱབ་རྟེན་དང་བཅས་པའི་སྟན་ཞེས་བྱ་བ་ནི། ལུས་ཀྱི་རྒྱབ་རྟེན་དང་བཅས་པའི་སྟན་ནོ། །མར་མེའི་སྡོང་
བུ་ཡང་མི་བྱའོ་ཞེས་བྱ་བ་ནི་ཤིང་ལྗོན་པའི་རྣམ་པ་འདྲ་བའི་མར་མེའི་སྡོང་བུ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །འདིར་གཞུང་ནི་དགེ་འདུན་ལ་ནི་ཡལ་ག་གཅིག་པའི་མར་མེའི་སྡོང་བུ་རྙེད་ན་ཡང་རྗེས་སུ་གནང་ངོ་། །གང་ཟག་ལ་ནི་རྗེས་སུ་མི་
གནང་ངོ་། །ཡལ་ག་གཉིས་པ་དང་མང་པོ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཁ་ཅིག་ལས་ནི་ཡལ་ག་དུ་མ་པ་ཞེས་སོ་ཞེས་བྱ་བ་ནི། ལུགས་ཁ་ཅིག་ལས་ནི་ཡལ་ག་དུ་མ་དང་ལྡན་པའི་མར་མེའི་སྡོང་བུ་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །
ཡལ་ག་ཁ་ཅིག་དང་ལྡན་པ་བདག་གིར་བྱས་པ་ལ་ནི་ཉེས་པ་མེད་དོ་ཞེས་འབྱུང་ངོ་། །སྟན་ནང་ཚངས་ཅན་གྲུ་བཞི་དང་སྔས་ནང་ཚངས་ཅན་བཅང་བར་བྱའོ་ཞེས་བྱ་བ་ནི། དགེ་འདུན་དང་གང་ཟག་གིས་ཀྱང་ངོ་། །སྟན་ནང་ཚངས་ཅན་ཞེས་བྱ་བ་ནི་ཤིང་བལ་ཅན་ནོ། །སྔས་ནང་
ནང་ཚངས་ཅན་གྱི་རྣམ་པ་བསྟན་པའི་ཕྱིར་ཁྲུ་བཞི་དང་དོ་པ་ཉིས་བལྟབ་ཏུ་བྱས་ཏེ། བཙེམ་མོ་ཞེས་བྱ་བ་སྨྲས་ཏེ། སྲིད་དུ་ནི་ཁྲུ་བཞི་པ་ཉིས་བལྟབ་ཞེང་དུ་ནི་ཁྲུ་དོ་པ་ཉིད་བལྟབ་ཏུ་བྱས་ཏེ་བཙེམ་མོ། །ཤིང་བལ་གྱིས་བརྫང་ངོ་ཞེས་བྱ་བ་ནི། སྟན་ནང་ཚངས་ཅན་དང་སྔས་ནང་
ཚངས་ཅན་དག་གོ། །སོ་སོར་བརྟག་པར་མ་བྱས་པར་ཉལ་བར་མི་བྱའོ་ཞེས་བྱ་བ་ནི། མལ་དང་སྟན་ལ་སོ་སོར་བརྟག་པར་མ་བྱས་པར་དེར་ཉལ་བར་མི་བྱའོ། །འདིར་གཞུང་ནི། ཉལ་བར་བྱེད་ན་སོ་སོར་བརྟགས་ཏེ་ཉལ་བར་བྱའོ་ཞེས་གསུངས་པ་ཡིན་ནོ། །དྲན་པ་ཉེ་བར་
མ་བཞག་པར་མི་བྱའོ་ཞེས་བྱ་བ་ནི་ཉལ་བར་མི་བྱ་བ་སྟེ། འདིར་དྲན་པ་ཞེས་བྱ་བ་ནི། དགེ་བ་བརྩམས་པ་དང་། འབྲེལ་བ་དང་། དགེ་བའི་ཕྱོགས་གཞན་དང་འབྲེལ་བ་དག་དུས་ཇི་ལྟ་བ་བཞིན་དུ་ལྡང་བ་དང་། འབྲེལ་པ་དང་། ལུས་དང་གོས་མི་འཕྱར་བ་དང་འབྲེལ་བའི་དྲན་པ་

ཡིན་པར་རིག་པར་བྱའོ། །གཞན་དང་ལྷན་གཅིག་ཁྲིའམ་སྟན་ནམ་གཞན་ལ་ཅིག་ཅར་མི་བྱའོ་ཞེས་བྱ་བ་ནི་ཉལ་བར་མི་བྱ་བ་སྟེ། གཞན་ཞེས་སྨོས་པ་ནི་སྟེགས་བུ་ལ་སོགས་པ་དག་བསྡུའོ། །ངོ་ཚ་ཤེས་པས་མེད་ན་སྟན་སོ་སོར་བཏིང་སྟེ་གཏུར་བུའམ་ལྷུང་བཟེད་
ཀྱི་སྣོད་ལ་སོགས་པས་བར་དུ་བཅད་ནས་དྲན་པ་ཉེ་བར་གཞག་སྟེ་ཉལ་བར་བྱའོ་ཞེས་བྱ་བ་ནི། དགེ་སློང་ངོ་ཚ་ཤེས་ཤིང་ཁྲེལ་ཡོད་པས་ནི་ཁྲི་ལ་སོགས་པ་མལ་ཐ་དད་པ་མེད་པ་ན། གདིང་བའི་སྟན་སོ་སོར་བཏིང་སྟེ་ཆོས་གོས་ཀྱི་གཏུར་བུའམ་ལྷུང་བཟེད་ཀྱི་སྣོད་ལ་སོགས་
པས་བར་དུ་བཅད་ནས་དྲན་པ་ཉེ་བར་གཞག་སྟེ་ཁྲིའམ་སྟན་ནམ་གཞན་དེའི་སྟེང་དུ་གཞན་དང་ལྷན་ཅིག་ཉལ་བར་བྱའོ། །འདི་ནི་ཕན་ཚུལ་ལུས་རེག་པ་སྤང་བའི་ཕྱིར་རོ། །གསུམ་ལས་ལྷག་པ་མང་བ་དང་ལྷན་ཅིག་ཁྲི་ལས་འཛེག་པ་ཉིད་བསྟེན་པར་མི་བྱའོ་ཞེས་བྱ་བ་ནི། གང་ཟག་
གསུམ་ལས་ལྷག་པ་མང་པོ་དང་ལྷན་ཅིག་ཏུ་ཁྲི་གཅིག་གི་སྟེང་དུ་འཛེགས་པ་དང་འདུག་པ་དང་ཉལ་བར་མི་བྱའོ། །འདི་སྐད་བསྟན་ཏེ། ཁྲི་གཅིག་གི་སྟེང་དུ་གང་ཟག་གཉིས་སམ་གསུམ་ནི་འཛེག་པ་དང་འདུག་པ་དང་ཉལ་བར་བྱའི། བཞི་ཡན་ཆད་ནི་མི་བྱའོ། །ཁྲི་རིང་
པོ་ལ་ནི་གཉིས་ལས་མི་བྱའོ་ཞེས་བྱ་བ་ནི། ལྷག་པར་མང་པོ་དང་ལྷན་ཅིག་འཛེག་པ་ཉིད་བསྟེན་པར་མི་བྱ་བའོ། །ཁྲིའུ་ལ་གཅིག་མ་ཡིན་པས་མི་བྱའོ་ཞེས་བྱ་བ་ནི་གཅིག་པོ་ཁོ་ན་དེ་ལ་འདུག་པར་བྱའོ། །དེ་ནི་ཁྲི་ཐུང་ངུའི་དཔེ་ཡིན་པར་བལྟ་བར་བྱའོ། །ཤིང་གི་སྤང་ལེབ་ལ་ནི་སྟོབས་
ཅི་ཡོད་པ་དང་གོ་ཅི་ཡོད་པ་ལས་ཤེས་པར་བྱའོ། །ལོ་གསུམ་ལས་ལྷག་པས་བར་དུ་ཆོད་པ་དང་ལྷན་ཅིག་སྟན་ལ་འདུག་པར་མི་བྱའོ་ཞེས་བྱ་བ་ནི། དགེ་སློང་རྫོགས་པར་བསྙེན་པའི་དུས་ལོ་གསུམ་ལས་ལྷག་པས་བར་དུ་ཆོད་ཅིང་ཁྱད་ཞུགས་པ་རྒན་པ་དང་ལྷན་ཅིག་སྟན་གཅིག་ལ་
འདུག་པར་མི་བྱ་སྟེ། འདི་ལྟར་གཞོན་པ་ཆེས་རྒན་པ་དང་ལྷན་ཅིག་ཏུ་འདུག་པར་མི་རིགས་པའི་ཕྱིར་རོ། །འདིར་ལོ་གསུམ་ལས་ལྷག་པས་བར་དུ་ཆོད་པ་ཞེས་སྨོས་པ་ནི། བསྙེན་པར་རྫོགས་པའི་ལོ་གྲངས་ཡིན་གྱི་ན་ཚོད་ནི་མ་ཡིན་ཏེ། དེས་ན་ལོ་གསུམ་ལས་ལྷག་ན་མི་རུང་གི །

ལོ་གསུམ་ཡན་ཆད་ནི་རུང་བར་ཤེས་པར་བྱའོ། །ཁྱིམ་གཞན་དུ་སྟན་གཞན་མེད་ན་མཁན་པོ་དང་ཡང་དྲན་པ་ཉེ་བར་གཞག་སྟེ་སྟན་གཅིག་ལ་འདུག་པར་བྱའོ་ཞེས་བྱ་བ་ནི། ཁྱིམ་པའི་ཁྱིམ་གཞན་དུ་གལ་ཏེ་སྟན་གཞན་མེད་ན་མཁན་པོ་དང་ཡང་སྟན་གཅིག་ལ་
འདུག་པ་བསྟེན་པར་བྱ་སྟེ། འདི་ནི་མཁན་པོ་ཡིན་ཏེ་གུས་པ་དང་བཅས་པས་འདུག་པར་བྱའོ་སྙམ་དུ་དྲན་པ་ཉེ་བར་གཞག་སྟེ་འདུག་པར་བྱའོ། །ཁྱིམ་པ་དང་གང་དུའང་མི་བྱའོ་ཞེས་བྱ་བ་ནི། ཁྱིམ་པ་དང་ནི་ཁྱིམ་གཞན་ཡང་རུང་གཙུག་ལག་ཁང་ཡང་རུང་སྟེ། །གང་དུ་ཡང་སྟན་
གཅིག་ལ་འདུག་པར་མི་བྱའོ། །བསྙེན་པར་མ་རྫོགས་པ་དང་ཡང་མི་བྱའོ་ཞེས་བྱ་བ་ནི། བསྙེན་པར་མ་རྫོགས་པ་དང་གང་དུ་ཡང་སྟན་གཅིག་ལ་འདུག་པར་མི་བྱའོ། །ཟ་མ་དང་མ་ནིང་དང་མ་བསད་པ་ལ་སོགས་པ་དང་མུ་སྟེགས་ཅན་དང་མུ་སྟེགས་ཅན་དུ་ཞུགས་པ་དང་རྐུ་ཐབས་སུ་
གནས་པ་དང་ཐ་དད་པར་གནས་པ་དང་གནས་པར་མི་བྱ་བ་དག་དང་མི་བྱའོ་ཞེས་བྱ་བ་ནི། དེ་དག་དང་གང་དུ་ཡང་སྟན་གཅིག་ལ་འདུག་པ་བསྟེན་པར་མི་བྱའོ། །བསླབ་པ་བྱིན་པ་དང་མི་བྱའོ་ཞེས་བྱ་བ་ཡང་གང་དུ་ཡང་སྟན་གཅིག་ལ་འདུག་པ་བསྟེན་པར་མི་བྱའོ། །ཨར་མོ་ནི་ག་ནི་
བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པའི་སྟན་ཉིད་ཡིན་ནོ་ཞེས་བྱ་བ་ནི། ཨར་མོ་ནི་ག་ནི་བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པའི་གནས་སུ་སྟན་ཉིད་ཡིན་པའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་དགེ་འདུན་འདུས་
པ་ལས་གཞན་པར་ཡང་ཨར་མོ་ནིག་དེ་ལ་ལོ་གསུམ་ལས་ལྷག་པས་བར་དུ་ཆོད་པ་དང་ལྷན་ཅིག་འདུག་པ་བསྟེན་པར་མི་བྱའོ། །འདིར་བསྙེན་པར་རྫོགས་པ་དང་བཅས་པ་ཞེས་སྨོས་པ་ནི། བསྙེན་པར་མ་རྫོགས་པ་དང་ལྷན་ཅིག་དགེ་འདུན་ཚོགས་ན་ཡང་འདུག་པར་མི་བྱའོ་ཞེས་
བསྟན་པའི་ཕྱིར་སྨོས་སོ། །སྟེགས་བུ་ནི་མ་ཡིན་ནོ་ཞེས་བྱ་བ་ནི། སྟེགས་བུ་ནི་སར་གྱུར་པ་ཉིད་ཡིན་པས་སྟན་ཉིད་མ་ཡིན་ནོ། །དོག་པའི་གནོད་པར་གྱུར་ན་ལྟུང་བ་མེད་དོ་ཞེས་བྱ་བ་ནི། འདུས་པའི་སྐབས་ཀྱི་བསླབ་པའི་གཞི་དེ་དག་ཐམས་ཅད་ལ་འདི་དམིགས་ཀྱིས་བསལ་བ་ཡིན་

ནོ། །འདིར་གཞུང་ནི་བཙུན་པ་དགེ་སློང་ཁྱིམ་པ་དང་ལྷན་ཅིག་སྟན་ནང་ཚངས་ཅན་གཅིག་ལས་མཆིས་སུ་རུང་ངམ། ཉེ་བ་འཁོར་མི་རུང་སྟེ་རྐྱེན་དེ་ལྟ་བུ་དག་ཡོད་ན་ནི་རུང་ངོ་ཞེས་གསུངས་པ་ཡིན་ནོ། །གནས་མལ་སྦེད་པ་ནི་གལ་ཏེ་གཉིས་ཡོད་ན་གཅིག་གིས་ཁྲིའམ་ཁྲིའུ་
བསྐུར་ཞིང་ཅིག་ཤོས་ཀྱིས་སྟན་ནང་ཚངས་ཅན་ལ་སོགས་པའོ་ཞེས་བྱ་བ་ནི། གལ་ཏེ་གང་ཟག་གཉིས་ཡོད་ན་དེ་ལྟར་བསྐུར་བར་བྱ་བའོ། །འདིར་བྱེ་བྲག་ཏུ་མ་སྨོས་པས་དགེ་འདུན་གྱི་འབའ་ཞིག་ཏུ་མ་ཟད་ཀྱི་གང་ཟག་གི་ཡང་རུང་ངོ་། །དགེ་འདུན་གྱི་དེ་སྙིང་མི་བརྩེ་བར་མདུན་ནས་
དྲང་བ་དང་གཡས་གཡོན་ནས་དྲང་བར་མི་བྱའོ་ཞེས་བྱ་བ་ནི། དགེ་འདུན་གྱི་མལ་ཆ་དང་སྟན་ལ་སོགས་པའི་གནས་མལ་དེ་སྙིང་མི་བརྩེ་ཞིང་ལྟོས་པ་མེད་པར་མདུན་ནས་ཚུར་དྲང་ཞིང་བཤལ་བ་དང་ཀློ་གཡས་གཡོན་ནས་དྲང་ཞིང་བཤལ་བར་མི་བྱའོ། །ཅི་ནས་ཀྱང་དེ་དུ་བ་དང་དྲི་མ་
དང་རྡུལ་དག་གིས་གོས་པར་འགྱུར་བ་དེ་ལྟར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་དེའོ། །དེ་མི་གཙང་བའི་སྐྱབས་དང་ཉེ་བར་བསྟེན་པར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་དེ་བཤང་བ་དང་གཅི་བའི་སྐྱབས་དག་དང་ཉེ་བར་བཅང་བ་དང་བཞག་པ་བསྟེན་པར་
མི་བྱ་བའོ། །ཉམས་པ་དོར་བར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་སྟན་ལ་སོགས་པ་དེ་དག་རླན་པ་དང་། གཤེར་བ་དང་རྡུལ་ཆགས་པ་དང་རྡོལ་པ་ལ་སོགས་པས་ཉམས་པ་ཕྱི་རོལ་དུ་དོར་བར་མི་བྱ་བའོ། །འོ་ན་ཇི་ལྟར་ཞེ་ན་དེའི་ཕྱིར་བསྲད་པ་དང་
བསྐམ་པ་དང་སྤྲུག་པ་དང་བུ་གུ་གླན་པར་བྱའོ་ཞེས་བྱ་བ་སྨྲས་ཏེ། གནས་མལ་དེའོ། །རལ་བ་ལ་ལྷན་རིང་ངོ་ཞེས་བྱ་བ་ནི་གནས་མལ་རལ་བ་དང་གས་པ་དག་ལ་ལྷན་རིང་གིས་གླན་པར་བྱ་བའོ། །དབུས་ཟེགས་ན་མཐའ་གཉིས་དབུས་ཉིད་དུའོ་ཞེས་བྱ་བ་ནི། གལ་ཏེ་གནས་
མལ་གྱི་དབུས་ཟེགས་ཤིང་མཐའ་གཉིས་སྲན་དེའི་ཚེ་མཐའ་གཉིས་དབུས་ཉིད་དུ་བྱ་བའོ། །དེར་འོས་པ་ཁ་བསྒྱུར་རོ་ཞེས་བྱ་བ་ནི། ཁ་བསྒྱུར་བར་འོས་པའི་གནས་མལ་ཁ་བསྒྱུར་བར་བྱ་བའོ། །ཕྱིར་བཅོས་མི་ནུས་པ་ཉིད་ཡིན་ན་དཀོན་མཆོག་ལ་ཕུལ་བའི་མར་མེ་གང་ཟག་སྦྱིན་

བདག་ཡིན་པ་ཡང་རུང་བ་དག་གིས་སྙིང་པོ་ཉིད་དུ་སྤྱད་དོ་ཞེས་བྱ་བ་ནི། གལ་ཏེ་གནས་མལ་མི་རུང་བ་ཉིད་དུ་གྱུར་པས་ཕྱིར་བཅོས་མི་ནུས་པ་ཉིད་ཡིན་ན་དེའི་ཚེ་དཀོན་མཆོག་གསུམ་ལ་ཕུལ་བའི་མར་མེ་གང་ཟག་སྦྱིན་བདག་ཡིན་པ་རུང་བ་དག་གིས་སྙིང་པོ་ཉིད་
དུ་སྤྱད་པར་ཡང་རུང་བ་བྱ་སྟེ། དགེ་འདུན་སྦྱིན་བདག་ཡིན་པའི་མར་མེ་དག་འབའ་ཞིག་གི་སྙིང་པོར་སྤྱད་པར་བྱ་བར་མ་ཟད་དོ། །དེར་མི་མཁོ་བ་ཉིད་ཡིན་ན་འཇིམ་པ་དང་བསྲེས་ཏེ་དཀོན་མཆོག་དག་གི་རྩིག་པ་དང་ཀ་བ་དང་སྒོ་གླེགས་ཀྱི་སེར་ཀ་དག་བྱུག་པའི་ཕྱིར་དེ་ལ་ནན་ཏན་བྱའོ་ཞེས་
བྱ་བ་ནི་གནས་མལ་དེ་སྔར་བསྟན་པའི་མར་མེའི་སྙིང་པོ་དེར་མི་མཁོ་བ་ཉིད་ཡིན་ན་དེའི་ཚེ་འཇིམ་པ་དང་ལྷན་ཅིག་བསྲེས་ཏེ། དཀོན་མཆོག་དག་གི་རྩིག་པ་དང་ཀ་བ་དང་སྒོ་གླེགས་ཀྱི་སེར་ཀ་དག་བྱུག་པར་བྱ་བའི་ཕྱིར་བསྲད་པ་དང་བསྐམ་པ་དང་སྤྲུག་པ་དེ་ལ་ནན་ཏན་བྱ་བའོ། །
གནས་མལ་ཇི་ལྟ་བུར་གྱུར་པ་སུས་བསྲད་པ་ལ་སོགས་པའི་ནན་ཏན་བྱ་ཞེ་ན་དེའི་ཕྱིར། བསྐོས་པ་ནི་མནོས་པས་སོ་ཞེས་བྱ་བ་སྨྲས་ཏེ། གནས་མལ་བསྐོས་པ་ནི་གང་ཟག་གང་གིས་མནོས་པ་དེས་བསྲད་པ་ལ་སོགས་པ་ནན་ཏན་བྱའོ། །ལྷག་མ་ནི་དགེ་འདུན་གཎྜཱི་བརྡུངས་
པས་བསྡུས་ཏེའོ་ཞེས་བྱ་བ་ནི། གནས་མལ་བསྐོས་པའི་ལྷག་མ་མ་བསྐོས་པ་ནི་དགེ་འདུན་གཎྜཱི་བརྡུངས་པས་བསྡུས་ཏེ་དགེ་འདུན་དུ་གྱུར་པའི་དགེ་སློང་ཐམས་ཅད་ཀྱིས་བསྲད་པ་ལ་སོགས་པ་ལ་ནན་ཏན་བྱ་བའོ། །དགེ་འདུན་གྱིས་རྐུ་འཕྲོག་བྱེད་པ་མཐོང་ལ་ནུས་ན་མི་ཟློགས་པར་
མི་བྱའོ་ཞེས་བྱ་བ་ནི། དགེ་འདུན་གྱིས་དངོས་པོ་ལ་ཆོམ་རྐུན་ལས་རྐུ་འཕྲོག་བྱེད་པ་མཐོང་ལ་གལ་ཏེ་ཕྱིར་བཟློག་ནུས་ན་མི་ཟློགས་པར་མི་བྱ་སྟེ་བཟློག་པ་ཁོ་ནར་བྱ་བའོ། །རྐུ་འཕྲོག་ནི་དཔེ་ཙམ་དུ་ཟད་དེ་ཆུད་ཟ་བར་འགྱུར་བ་དག་ལ་ཡང་ཆོ་ག་དེ་བཞིན་དུ་བསྒྲུབ་པར་བྱ་བའོ། །སྐྲག་པ་ན་དགེ་
འདུན་གྱིས་ཡལ་བར་མི་དོར་རོ་ཞེས་བྱ་བ་ནི་ཆོམ་རྐུན་ལ་སོགས་པས་སྐྲག་པ་ན་དགེ་འདུན་གྱིས་དངོས་པོ་ཡལ་བར་མི་འདོར་བའོ། །གནས་སུ་མ་སོན་གྱི་བར་དུ་ཁྱེར་བར་བྱེད་པས་ལོངས་སྤྱད་པར་བྱ་བ་ཉིད་ཡིན་ནོ་ཞེས་བྱ་བ་ནི། སྐྲག་པ་ན་དགེ་འདུན་གྱིས་དངོས་པོ་ཡལ་བར་བོར་

ཏེ་བླངས་པ་གང་ཡིན་པ་དེ་ནི་དགེ་སློང་གི་གནས་སུ་མ་སོན་གྱི་བར་དུ་གང་གིས་ཁྱེར་བར་བྱེད་པའི་གང་ཟག་དེ་ཉིད་ཀྱིས་ལོངས་སྤྱད་པར་བྱ་བ་ཉིད་ཡིན་པའོ། །དེ་རང་གི་གནས་སུ་བསྐུར་བར་མི་འགྲུབ་ན་གནས་གཞན་དུ་ལོངས་སྤྱད་པས་ཡོངས་སུ་སྤྱད་པར་བྱའོ་ཞེས་བྱ་བ་ནི། གལ་ཏེ་
རྫས་དེ་རང་གི་གནས་སུ་བསྐུར་བར་མི་འགྲུབ་ན་གནས་གཞན་དུ་ཡོངས་སུ་ལོངས་སྤྱད་པས་ཡོངས་སུ་སྤྱད་པའོ། །གནས་གཞན་གྱི་ཟས་དང་ཡོ་བྱད་ཀྱི་རྙེད་པ་གནས་གཞན་དུ་ཡོངས་སུ་སྤྱད་པར་མི་བྱའོ་ཞེས་བྱ་བ་ནི། གནས་གཞན་གྱི་ཟས་ཀྱི་རྙེད་པ་བཟའ་བ་དང་བཅའ་བ་ལ་སོགས་པ་
དང་ཡོ་བྱད་ཀྱི་རྙེད་པ་མར་མེ་དང་འབྲུ་མར་དང་། རྐང་པ་བསྐུ་བ་དང་མཆིལ་ལྷམ་དང་གོས་དང་གདུགས་དང་ཤིང་དང་རྩ་བ་དང་སྡོང་བུ་དང་འདབ་མ་དང་མེ་ཏོག་དང་། འབྲས་བུ་དང་སྨན་ལ་སོགས་པ་དག་གནས་དེར་གནས་པ་མི་བསྟན་པས་གནས་གཞན་དུ་དྲང་ཞིང་ཡོངས་སུ་སྤྱད་པར་
མི་བྱའོ། །དེ་དེ་ལ་སྦྱིན་པར་མི་བྱའོ་ཞེས་བྱ་བ་ནི། གནས་གཞན་གྱི་ཟས་དང་ཡོ་བྱད་ཀྱི་རྙེད་པ་དེ་གནས་གཞན་དུ་ཟ་བར་བྱེད་པ་དེ་ལ་དགེ་འདུན་གྱིས་སྦྱིན་པར་མི་བྱ་བའོ། །ནོད་པ་འབུལ་དུ་གཞུག་པར་བྱ་བ་ཉིད་དོ་ཞེས་བྱ་བ་ནི་གནས་གཞན་དུ་ཟ་བར་བྱེད་པ་དེས་གནས་གཞན་གྱི་
ཟས་དང་ཡོ་བྱད་ཀྱི་རྙེད་པ་མནོས་པ་གང་ཡིན་པ་དེ་དགེ་འདུན་གྱིས་ནོད་པར་བྱེད་པའི་གང་ཟག་དེ་ཉིད་ཕྱིར་འབུལ་དུ་གཞུག་པར་བྱའོ། །མི་ཁུགས་ན་འབོག་པའོ་ཞེས་བྱ་བ་ནི། གལ་ཏེ་ནོད་པ་དེ་མ་རྙེད་དམ་མཐུ་དང་ལྡན་པ་ལ་བརྟེན་པའི་ཕྱིར་དེ་ལས་ཟས་དང་ཡོ་བྱད་ཀྱི་རྙེད་པ་དེ་ཕྱིར་མ་
ཁུགས་ན་གང་ཟག་གང་གིས་ནོད་པ་དེ་ལ་ཕོག་པའི་གང་ཟག་འབོག་འབོག་པ་དེ་ཉིད་དགེ་འདུན་གྱི་ཕྱིར་དབུལ་དུ་གཞུག་པར་བྱའོ། །འདིར་གཞུང་ནི་དགེ་སློང་གཞན་དུ་གནས་པས་གཞན་དུ་ཁྱེར་ཏེ་ཅུང་ཟད་ཅི་ཙམ་ཟོས་པ་ཐམས་ཅད་རིན་ཚང་བར་བྱས་ཏེ་འབུལ་དུ་གཞུག་པར་བྱའོ་
ཞེས་གསུངས་པ་ཡིན་ནོ།། །།བམ་པོ་བདུན་ཅུ་པ་སྟེ་ཐ་མའོ། །ཆ་དབང་བ་དག་གིས་དགེ་འདུན་གྱི་རྩྭ་དང་ཤིང་མི་མཁོ་བ་རང་གི་དང་འདྲ་བར་སྤྱད་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། གང་དག་དེ་ཐོབ་ཅིང་དེའི་ཆ་དབང་བ་དག་གིས་དགེ་འདུན་གྱི་རྩྭ་

དང་། ཤིང་དགེ་འདུན་གྱི་འཁོར་ན་སྐྱེ་ཞིང་ཡོངས་སུ་མ་བཟུང་བ་གང་ཡིན་པ་མི་མཁོ་བ་དེ་དག་རང་གི་དང་འདྲ་བ་སྤྱད་པ་ཁ་ན་མ་ཐོ་བ་མེད་པའོ། །མ་བསྐོས་པར་འཁོར་ཞིང་སྤྱད་པ་ལ་ཇི་ལྟར་འོངས་པས་ཡིན་གྱི་རྒན་རིམས་ཀྱིས་མ་ཡིན་ནོ་ཞེས་བྱ་བ་ནི།
དགེ་འདུན་གྱི་ཡོ་བྱད་གང་ཟག་སྒོ་གཅིག་ཏུ་མ་བསྐོས་པས་རེས་ཀྱིས་འཁོར་ཞིང་སྤྱད་པ་ཟངས་ལ་སོགས་པ་མར་མེ་བཞིན་དུ་ཅིག་ཅར་སྤྱད་པར་བྱ་བ་མ་ཡིན་པ་ལ་ནི་ཇི་ལྟར་འོངས་པ་སྤྱད་པར་བྱའི། རྒན་རིམས་ཀྱིས་སྤྱད་པར་བྱ་བ་ནི་མ་ཡིན་ཏེ། དེ་མ་བསྒོས་ན་དང་པོ་སུ་འོངས་པ་
དེ་ལ་གཡར་པོར་སྦྱིན་པར་བྱའོ། །བསྒོས་ན་ནི་བསྐོས་པའི་ཚེ་ན་གང་གིས་མནོས་པ་དེ་བདག་པོ་ཉིད་ཡིན་ནོ། །ཅིག་ཅར་བརྙས་ན་ནི་དེའོ་ཞེས་བྱ་བ་ནི། གལ་ཏེ་ཅིག་ཅར་བརྙས་པར་གྱུར་ན་ནི་ཅིག་ཅར་བརྙས་པ་དེ་རྒན་རིམས་ཀྱིས་སྤྱད་པར་བྱ་བའོ། །མ་ཟིན་ན་དེ་ལས་
འབྲལ་བར་མི་བྱའོ་ཞེས་བྱ་བ་ནི། གང་ཟག་གང་གིས་བརྙས་པ་དེའི་གོས་ཁ་བསྒྱུར་བ་ལ་སོགས་པའི་ལས་བརྩམས་པ་མ་ཟིན་ན་མ་བསྐོས་པའི་འཁོར་ཞིང་སྤྱད་པ་ཟངས་ལ་སོགས་པ་དེ་ལས་དབྲལ་བར་མི་བྱ་སྟེ། གཞན་གྱི་མཐུས་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ། །
དེས་བཀྲུ་བར་ཆུས་བཀང་ལ་འབགས་པ་ཉིད་ན་དེ་ཡིན་ནོ་ཞེས་བྱ་བ་ནི། དེ་བཀྲུ་བར་ཞེས་བྱ་བ་རྐང་པ་དེ་བཀྲུ་བའི་རྐང་ཁྲུས་སར་གལ་ཏེ་ཆུས་རྐང་པ་འབའ་ཞིག་གོས་པ་ཉིད་ཡིན་ན་བརྩམས་པ་མ་ཟིན་པ་ཉིད་ཡིན་པ་སྟེ། མ་ཟིན་ན་དེ་དང་དབྲལ་བར་མི་བྱའོ་ཞེས་བྱ་བར་སྦྱར་ཏེ། དེས་རྐང་པ་
བཀྲུས་མ་ཟིན་གྱི་བར་དུ་གཞན་གྱི་རྐང་ཁྲུས་སའི་གོ་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ། །ཆབ་ཁུང་ས་དེར་ཞུགས་པ་ཉིད་ནའོ་ཞེས་བྱ་བ་ནི། བཤང་བ་དང་གཅི་བའི་ཆབ་ཁུང་ས་དེར་ཞུགས་པ་ཉིད་ན་མ་ཟིན་པ་ཉིད་ཡིན་པས། མ་ཟིན་ན་དེ་དང་དབྲལ་བར་མི་བྱའོ་ཞེས་བྱ་བར་སྦྱར་
ཏེ་དེས་བཤང་བ་དང་གཅི་བ་མ་ཟིན་གྱི་བར་དུ་གཞན་གྱི་ཆབ་ཁུང་སའི་གོ་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ། །བསྒོམ་པའི་ཕྱིར་འདུག་པ་ལ་བསླང་བར་མི་བྱའོ་ཞེས་བྱ་བ་ནི། བསམ་གཏན་ལ་སོགས་པ་བསྒོམ་པའི་ཕྱིར་འདུག་པ་གཞན་གྱི་མཐུས་བསླང་བར་མི་བྱའོ། །དེ་ལ་

རྒན་རིམས་སུ་མི་བྱའོ་ཞེས་བྱ་བ་ནི་སྒོམ་པ་དེ་ལ་རྒན་རིམས་སུ་མི་བྱའི་ཇི་ལྟར་འོས་པས་བྱ་བ་སྟེ། སྒོམ་པའི་ཡོ་བྱད་སྟན་ལ་སོགས་པ་དག་ལ་ཇི་ལྟར་འཐོབ་པས་ལོངས་སྤྱད་པར་བྱའི་རྒན་རིམས་སུ་ལོངས་སྤྱད་པར་བྱ་བ་མ་ཡིན་ནོ་ཞེས་བྱ་བའི་ཐ་ཚིག་གོ། །འདིར་གཞུང་ནི་དགེ་སློང་
དག་སྤོང་བའི་ཁང་པ་ན་འཁོད་ཅིང་དགེ་བའི་ཕྱོགས་དག་བྱེད་པ་ན། དྲུག་སྡེ་དག་ལྷགས་ཏེ་ངེད་ཅག་རྒན་ནོ་ཞེས་སློང་བར་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདི་ལ་རྒན་རིམས་སུ་མི་བྱའོ་ཞེས་གསུངས་པ་ཡིན་ནོ། །དགེ་སློང་ལས་དང་ཟས་ཀྱིས་འབགས་
པ་མི་བྱའོ་ཞེས་བྱ་བ་ནི། དགེ་སློང་ལས་དང་ཟས་བརྩམས་པས་འབགས་པ་བསླང་བར་མི་བྱའོ། །བྱུག་རིས་མ་ཡིན་པར་འདུག་པར་མི་བྱའོ་ཞེས་བྱ་བ་ནི། རང་གི་གོ་མ་ཡིན་པ་ནི་བྱུག་རིས་མ་ཡིན་པ་སྟེ། དེར་འདུག་པར་མི་བྱའོ། །བྱ་བ་བྱས་ན་འཁོར་ཞིང་སྤྱད་པར་འདོད་པ་ཡོད་ན་བཅང་
བར་མི་བྱའོ་ཞེས་བྱ་བ་ནི། དགེ་སློང་གིས་རང་གི་གོས་ཁ་བསྒྱུར་བ་ལ་སོགས་པ་དང་རྐང་པ་བཀྲུ་བ་ལ་སོགས་པ་དང་། བཤང་གཅི་བྱ་བ་ལ་སོགས་པ་བྱ་བ་བྱས་ཟིན་ནས་དགེ་འདུན་གྱི་འཁོར་ཞིང་སྤྱད་པ་ཟངས་ལ་སོགས་པ་དང་། རྐང་ཁྲུས་ས་ལ་སོགས་པ་དང་ཆབ་ཁུང་ས་ལ་སོགས་
པ་གཞན་འདོད་པ་ཡོད་ན་མི་བཅང་མི་བརྣོག་པར་གཏང་བར་བྱ་བའོ། །བར་དུ་དོན་གྱི་ཆེད་ཉིད་དུ་ཁྲིའུ་ལས་ལངས་པ་ནི་བྱ་བ་བྱས་པ་ཉིད་མ་ཡིན་ནོ་ཞེས་བྱ་བ་ནི། གོས་ཁ་བསྒྱུར་བ་དང་གདང་ལ་གཟར་བ་དང་དབོག་པ་མི་སླེབས་པ་བསྙགས་པའི་ཆེད་དུ་རྐང་རྟེན་ཁྲིའུ་བཙུགས་པ་
ལས་བར་དུ་དོན་གྱི་དབང་ཉིད་དུ་ཁྲིའུ་ལས་བབ་པ་ནི། ད་དུང་ལས་སྔ་མ་བརྩམས་པ་མ་ཟིན་པས་བྱ་བ་བྱས་པ་ཉིད་མ་ཡིན་ཏེ། དེའི་སྐབས་སུ་གཞན་ཁྲིའུ་འདོད་པ་ཡོད་ན་བསྐུར་བར་མི་བྱའོ། །གཞན་ལ་ཡང་དེ་བཞིན་དུ་ཅི་རིགས་པར་སྦྱར་རོ། །དེའི་དུས་ན་དེ་ལ་ཆོས་གོས་སམ་
པུས་འཁྱུད་གཞག་པར་བྱའོ་ཞེས་བྱ་བ་ནི། བར་དུ་དོན་གྱི་ཆེད་ཉིད་དུ་ཁྲིའུ་ལས་ལྡང་བ་དེའི་དུས་ན་ཁྲིའུ་དེ་ལ་རང་གི་ཆོས་གོས་སམ་པུས་འཁྱུད་གཞག་པར་བྱའོ། །དེ་ནི་ཁྲིའུ་བྱ་བ་མ་བྱས་པར་ཁ་བརྔམ་དུ་འཕྲོག་པའི་སྐབས་མེད་པར་བྱ་བའི་ཕྱིར་རོ། །འདོད་པ་ཡོད་ལ་གནས་ཡོད་ན་

དགེ་འདུན་གྱིས་སྤགས་པ་ཉིད་བསྟེན་པར་མི་བྱའོ་ཞེས་བྱ་བ་ནི། དགེ་སློང་གི་དགེ་འདུན་གྱི་འཁོར་ཞིང་སྤྱད་པར་ཟངས་ལ་སོགས་པ་བླངས་ཏེ། ཚོན་ལ་སོགས་པས་སྤགས་ཤིང་རང་གི་བྱ་བ་བྱས་པ་མ་ཟིན་པའི་ཚེ་འདོད་པ་གཞན་ཡོད་ལ། བདག་ལ་
སྣོད་ལ་སོགས་པ་གནས་གཞན་ཡོད་ན་དགེ་འདུན་གྱི་སྣོད་སྤགས་པ་དེ་རང་གི་བྱ་བ་བྱས་མ་ཟིན་ཀྱང་མི་བསྟེན་པར་བྱ་སྟེ་བསྐུར་བར་བྱ་བའོ། །འདི་སྐད་བསྟན་ཏེ་དགེ་སློང་གང་གིས་དགེ་འདུན་གྱི་ཡོ་བྱད་དེ་བླངས་ཤིང་སྤགས་པ་དེ་མ་ཟིན་པའི་ཚེ་དེ་འདོད་པའི་གང་ཟག་གཞན་ཡོད་ལ་
བདག་ལ་ཡང་ཡོ་བྱད་གཞན་ཡོད་ན་དེའི་ཚེ་དགེ་འདུན་གྱི་ཡོ་བྱད་དེ་བྱོ་སྟེ་བསྐུར་བར་བྱའོ། །དོན་ཡོད་ན་རྣམ་པ་དེ་ལྟ་བུ་ལས་བྲལ་བར་བྱས་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། གང་ཟག་དེ་དགེ་འདུན་གྱི་ཡོ་བྱད་འདོད་པ་ཕྱི་མ་ཤོས་དེ་ལ་དོན་ཡོད་པ་ཉིད་ཡིན་ན། གང་ཟག་སྔ་མ་ཤོས་
ལ་རང་གི་སྣོད་གཞན་ཡོད་བཞིན་དུ་དགེ་འདུན་གྱི་ཡོ་བྱད་གང་ཟག་ཕྱི་མ་ལ་མི་སྟེར་ན་གང་ཟག་རྣམ་པ་དེ་ལྟ་བུ་དེ་ལས་གང་ཟག་ཕྱི་མ་ཤོས་ཀྱིས་དགེ་འདུན་གྱི་སྣོད་དེ་ན་དེའི་སྤགས་པ་འདུག་པ་དེ་དེ་རང་གི་སྣོད་གཞན་དེར་བྱ་སྟེ། དགེ་འདུན་གྱི་འཁོར་ཞིང་སྤྱད་པའི་ཡོ་བྱད་དེ་དེ་ལས་བྲལ་
བར་བྱས་ཏེ་ཁྱེར་བ་ལ་ཁ་ན་མ་ཐོ་བ་མེད་པའོ། །དོན་མེད་ན་ནི་བྲལ་བར་མི་བྱའོ། །དགེ་འདུན་གྱིས་མཆིག་དང་མཆི་གུ་བཅང་བར་བྱའོ་ཞེས་བྱ་བ་ནི། མཆིག་ཅེས་བྱ་བ་ནི་ལན་ཚྭ་ལ་སོགས་པ་བཏགས་པའི་ཕྱིར་རོ། །འོག་གཞིར་བཞག་པའི་རྡོ་ལེབ་བོ། །དེའི་མཆི་གུ་ཞེས་བྱ་བ་ནི།
མཆིག་དེའི་སྟེང་ནས་ལན་ཚྭ་ལ་སོགས་པ་འཐག་པར་བྱེད་པའི་རྡོ་ལེབ་ཆུང་ངུ་འཕྲེད་ཀར་གཞག་པའོ། །འདྲེག་མཁན་གྱི་ལག་ཆ་ཡང་ངོ་ཞེས་བྱ་བ་ཡང་། བཅང་བར་བྱའོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དགེ་སློང་དག་གིས་དགེ་འདུན་གྱི་ཕྱིར་
བཅང་བར་བྱ་བའོ། །སྣོད་དུ་བཅུག་སྟེ་རྩིག་པ་ལ་གཞག་གོ་ཞེས་བྱ་བ་ནི། འདྲེག་མཁན་གྱི་ལག་ཆའོ། །འདིར་གཞུང་ནི་དགེ་སློང་གི་དགེ་འདུན་གྱི་ཕྱིར་འདྲེག་མཁན་གྱི་ལག་ཆ་བཅང་བར་བྱ་ཞིང་སྣོད་དུ་བཅུག་སྟེ་རྩིག་པ་ལ་གཞག་པར་བྱའོ་ཞེས་གསུངས་པ་ཡིན་ནོ། །སྣོད་

ཅེས་བྱ་བ་ནི་འདྲེག་མཁན་གྱི་ལག་ཆའི་སྣོད་ཡིན་པར་ཤེས་པར་བྱའོ། །སྟེའུ་དང་སྟ་རེ་དང་གཟོང་ལ་སོགས་པ་དང་དེ་དག་གི་སྣོད་དང་བཅས་པ་ཡང་ངོ་ཞེས་བྱ་བ་ལ་ཡང་། དགེ་འདུན་གྱིས་བཅང་བར་བྱའོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ།
དགེ་འདུན་གྱིས་སྟེའུ་དང་སྟ་རེ་དང་གཟོང་ལ་སོགས་པ་དང་དེ་དག་གི་སྣོད་དང་བཅས་པ་བཅང་བར་བྱ་བའོ། །སོགས་པ་ཞེས་སྨོས་པའི་སྒྲས་ནི། སྤྱང་ཕྲ་མོ་ལ་སོགས་པ་དག་བསྡུའོ། །དེ་དག་གི་སྣོད་ཅེས་སྨོས་པས་ནི་ཤིང་མཁན་གྱི་ལག་ཆའི་སྣོད་དག་བསྡུའོ། །འདིར་གཞུང་ནི་
ཤིང་དག་གཤེགས་པར་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་སྟ་རེ་དང་གཟོང་དག་བཅང་བར་བྱའོ། །དགེ་སློང་ཞིག་གི་ཁྲི་ཆག་ནས་དགེ་སློང་དེས་སྨྲས་པ་ཁོ་བོ་ལ་བཟོ་ཡོད་དེ་ཞེས་བྱ་བས་ན། བཅོམ་ལྡན་འདས་ཀྱིས་བཀའ་སྩལ་པ།
དབེན་པའི་ཕྱོགས་སུ་བྱའོ། །དགེ་འདུན་གྱིས་སྟེའུ་དང་སྣོད་དག་ཀྱང་བཅང་བར་བྱའོ། །གང་ཟག་གི་འཆང་ན་འགལ་ཚབས་ཅན་དུ་འགྱུར་རོ་ཞེས་བྱ་བ་གསུངས་པ་ཡིན་ནོ། །དེས་དགེ་སློང་ལ་གཡར་པོ་ཉིད་དུ་ས་ལས་བྱས་པ་ཡན་ཆད་སྦྱིན་ནོ་ཞེས་བྱ་བ་ནི། དགེ་འདུན་དེས་དགེ་སློང་
ཤིང་བཟོ་བྱེད་པ་དེ་ལ་ལག་ཆའི་སྣོད་ཐ་ན་ས་ལས་བྱས་པ་ཡན་ཆད་ཀྱང་གཡར་པོ་ཉིད་དུ་སྦྱིན་པར་བྱའོ། །དགེ་སློང་མས་འཆིང་བུའི་སྣོད་བཅང་བར་མི་བྱའོ་ཞེས་བྱ་བ་ནི་རྣམ་པ་ཐམས་ཅད་དུའོ། །ཐམས་ཅད་ཀྱིས་འབྲུ་མར་སྣོད་བཅང་བར་བྱའོ་ཞེས་བྱ་བ་ནི་དགེ་སློང་དང་དགེ་སློང་མ་
ཐམས་ཅད་ཀྱིས་སོ། །ཕུལ་གང་མན་ཆད་ནས་ཕུལ་བྱེད་ཡན་ཆད་ཤོང་བའོ་ཞེས་བྱ་བ་ནི། འབྲུ་མར་སྣོད་ཀྱི་ཚད་དེ་ཕུལ་གང་ལ་ནི་དབུས་ཀྱི་སྲང་བརྒྱད་ཀྱི་ཚད་དོ། །ཕུལ་ཕྱེད་ལ་ནི་དབུས་ཀྱི་སྲང་བཞིའི་ཚད་དོ། །ལྕགས་ཀྱི་དོག་ལེ་ཡང་ངོ་ཞེས་བྱ་བ་ནི་དགེ་སློང་དང་དགེ་སློང་མ་
ཐམས་ཅད་ཀྱིས་བཅང་བར་བྱའོ། །དེའི་ལྕགས་སྒྱེད་ཀྱང་ངོ་ཞེས་བྱ་བ་ནི། ལྕགས་ཀྱི་དོག་ལེའི་ལྕགས་སྒྱེད་རྐང་གསུམ་པའམ་རྐང་བཞི་པ་ཡང་བཅང་བར་བྱ་བའོ། །ས་ལས་བྱས་པའི་ཐབ་ཀྱང་ངོ་ཞེས་བྱ་བ་ནི། རྒྱ་ཐབ་དང་སྒྱེད་པོ་ཡང་བཅང་བར་བྱའོ། །གནང་བ་ཐོབ་པས་འཁར་

བའོ་ཞེས་བྱ་བ་ནི། འཁར་བའི་གནང་བ་ཐོབ་པ་ཐམས་ཅད་ཀྱིས་འཁར་བ་བཅང་བར་བྱ་བའོ། །དྲ་བ་ཁ་དོག་གཅིག་པ་ཡང་ངོ་ཞེས་བྱ་བ་ཡང་གནང་བ་ཐོབ་པ་ཐམས་ཅད་ཀྱིས་བཅང་བར་བྱ་བའོ། །འདིར་དྲ་བ་ཞེས་བྱ་བ་ནི་བྱ་རྒྱའི་རྣམ་པ་ལྟ་བུ་ཡིན་པར་
ཤེས་པར་བྱ་སྟེ་དེ་ཁ་དོག་གཅིག་པ་བཅང་བར་བྱའོ། །འདིར་གཞུང་ནི་བཅོམ་ལྡན་འདས་ཀྱིས་དྲ་བ་ཉེ་བར་གཞག་པར་བྱའོ་ཞེས་བཀའ་སྩལ་པ་དང་། དྲུག་སྡེ་དག་གིས་ཚོན་སྣ་ལྔ་པའི་དྲ་བ་དག་ཉེ་བར་གཞག་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཚོན་སྣ་ལྔ་པའི་
དྲ་བ་དག་ཉེ་བར་གཞག་པར་མི་བྱའོ་ཞེས་གསུངས་པ་ཡིན་ཏེ། དེའི་ཕྱིར་དྲ་བ་ཁ་དོག་གཅིག་པ་ཡང་ངོ་ཞེས་སྨོས་སོ། །དེ་སྦྱིན་པར་བྱའོ་ཞེས་བྱ་བ་ནི་འཁར་བ་དང་དྲ་བའི་གནང་བ་དེ་སྦྱིན་པར་བྱ་བའོ། །ཅི་ཐམས་ཅད་ལའམ་ཞེ་ན་དེའི་ཕྱིར་རྒས་པ་དང་ན་བ་དག་ལའོ་ཞེས་བྱ་བ་
སྨྲས་ཏེ། རྒས་པ་དང་ན་བ་དག་གིས་དགེ་འདུན་ལ་གསོལ་ནས། དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གནང་བ་སྦྱིན་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་
ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་དེ་དགེ་འདུན་ལས་འཁར་བ་གནང་བ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་བ་ལ་བྲོ་འཚལ་ཞིང་སྟོར་མི་བཟོད་པ་ལ། འཁར་
བ་གནང་བ་སྩལ་དུ་གསོལ། ལན་གསུམ་དུ་བཟླས། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་པ་འདི་དག་དགེ་འདུན་ལས་འཁར་བ་གནང་བ་གསོལ་ན། གལ་ཏེ་དགེ་འདུན་གྱི་
དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་པ་ལ་འཁར་བ་གནང་བ་གསོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་

ཡིན་ནོ། །དྲ་བ་གནང་བ་གསོལ་བ་དང་སྦྱིན་པའི་སྔགས་ནི་འཁར་བ་གནང་བ་ཞེས་འབྱུང་བ་མིང་བརྗེས་ལ། སྐབས་དེར་དྲ་བ་གནང་བ་ཞེས་བྱ་བ་སྨོས་ཏེ་དྲ་བ་གནང་བ་ཉིད་བརྗོད་པར་བྱའོ། །དེ་གཉིས་ཚིག་གཅིག་གིས་སྦྱིན་པ་ཡང་སྲིད་དོ་ཞེས་བྱ་བ་ནི། འཁར་བ་དང་དྲ་བ་གནང་
བ་དེ་ཉིད་སྔགས་ཀྱི་ཚིག་གཅིག་གིས་ཅིག་ཅར་དུ་གསོལ་བ་དང་སྦྱིན་དུ་ཡང་རུང་ངོ་། །སྡིག་སྦྲུལ་ལ་སོགས་པའི་གཉེན་པོའི་ཕྱིར་འཁར་བ་སྒྲ་དང་བཅས་པ་བཅང་ངོ་ཞེས་བྱ་བ་ནི། སྡིག་སྦྲུལ་མང་བའི་ཡུལ་དུ་དེས་འཚེ་བའི་གཉེན་པོར་དགེ་སློང་གིས་འཁར་བའི་མེ་ཏོག་གསོང་
གདངས་སྙིང་པོ་ཅན་སྒྲ་དང་བཅས་པ་བཅང་བར་བྱའོ། །སྔར་རྒན་པོ་དང་ནད་པ་དག་ལ་གནང་བ་སྦྱིན་པའི་འཁར་བ་ནི་གནས་བརྟན་པའི་ཕྱིར་བེ་ཅོན་སྦོམ་པོ་རྗེས་སུ་གནང་བ་ཡིན་ནོ། །འཁར་གསིལ་ནི་དགོས་པ་གཞན་གྱི་དབང་གིས་གསུངས་སོ། །འདི་ནི་སྡིག་སྦྲུལ་ལ་སོགས་པའི་
གཉེན་པོའི་ཕྱིར་རྗེས་སུ་གནང་བ་ཡིན་པས་དེའི་ཕྱིར་དེ་གསུམ་ཐ་དད་པར་ཤེས་པར་བྱའོ། །ཡུ་བའི་རྩ་བ་ནས་གས་ན་སྦུ་གུ་བསྐོན་ནོ་ཞེས་བྱ་བ་ལ་ཡུ་བ་ཞེས་བྱ་བའི་སྒྲས་ནི་འཁར་བ་གནང་བ་ཐོབ་པའི་འཁར་བའི་ཡུ་བ་དང་འཁར་གསིལ་གྱི་ཡུ་བ་དང་གོས་ཀྱི་སྲོག་ཤིང་གི་ཡུ་བ་
དག་གཟུང་ངོ་། །དེ་དག་གི་རྩ་བ་མ་ཐོག་ན། ལྕགས་ཀྱི་བུ་གུ་ངོས་གཅིག་ཞབས་བཅུག་པ་བསྐོན་པར་བྱ་བའོ། །ཡ་ཐོག་ནི་དཀྲི་བས་སོ་ཞེས་བྱ་བ་ནི། ཡུ་བ་དེ་དག་གི་ཡ་ཐོག་གས་ན་དཀྲི་བ་བསྐོན་པར་བྱ་སྟེ། ལྕགས་ཀྱི་གླེགས་བུས་ཀུན་ནས་འཁོར་བར་དཀྲི་བར་བྱའོ། །
འདིར་གཞུང་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་བསིལ་བའི་ཚལ་གྱི་དུར་ཁྲོད་ན་སྡིག་སྦྲུལ་དག་མང་པས། དེ་ན་དགེ་སློང་དུར་ཁྲོད་དུ་འགྲོ་བ་དག་སྡིག་སྦྲུལ་དག་གིས་ཟིན་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྡིག་སྦྲུལ་བཟློག་པའི་ཕྱིར་འཁར་བ་སྒྲ་
ཅན་རྗེས་སུ་གནང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །གོས་ཀྱི་སྲོག་ཤིང་ཞེས་བྱ་བ་ནི་གོས་ཀྱི་གདང་ཡིན་ནོ། །སྨྱིག་མ་མཁན་གྱིས་བྱས་པའམ་ལོ་མ་ལས་བྱས་པའི་གདུགས་བཅང་བར་བྱའོ་ཞེས་བྱ་བ་ནི། སྨྱིག་མས་འཚོ་བ་ནི་སྨྱིག་མ་མཁན་ཏེ། དེས་བྱས་པའི་གདུགས་

ནི་སྨྱིག་མ་མཁན་གྱིས་བྱས་པའི་གདུགས་སོ། །དེ་ནི་སྐྱེ་བོ་ཐམས་ཅད་ཀྱི་དོན་དུ་གདུགས་ཁྲ་བོ་བཀྲ་བ་དག་བྱེད་པས་དེ་འདིར་ཉེས་པ་མེད་པར་བསྟན་པའི་ཕྱིར་སྨྱིག་མ་མཁན་གྱིས་བྱས་པའི་ཞེས་སྨོས་སོ། །ལོ་མ་ལས་བྱས་པའི་གདུགས་ནི་འཕྲལ་གྱི་རང་བཟོར་
བྱས་པ་ཡིན་ཏེ། དེ་གཉིས་གང་འབྱོར་བ་བཅང་བར་བྱའོ། །ཡུ་བ་ནི་ལུས་ཀྱི་ཚད་དོ་ཞེས་བྱ་བ་ནི་གདུགས་ཀྱི་ཡུ་བའི་སྲིད་ཀྱི་ཚད་ནི་ལུས་ཀྱི་སྲིད་ཀྱི་ཚད་དང་མཉམ་པར་བྱའོ། །དེས་གྲོང་དབུས་སུ་འགྲོ་བར་མི་བྱའོ་ཞེས་བྱ་བ་ནི། གདུགས་དེས་གྲོང་གི་དབུས་སུ་འགྲོ་བར་མི་བྱའོ། །གལ་
ཏེ་ལམ་གྱི་དབང་གིས་ནི་གློར་བསྙལ་ཏེའོ་ཞེས་བྱ་བ་ནི་གལ་ཏེ་ལམ་གྱི་དབང་གིས་གྲོང་དབུས་སུ་མི་འགྲོར་མི་རུང་ན། གདུགས་དེ་གློར་བསྙལ་ཏེ་འགྲོ་བར་བྱའོ། །ཆར་འབབ་པ་ཉིད་ནི་བསོད་སྙོམས་ལ་རྒྱུ་བར་བྱའོ་ཞེས་བྱ་བ་ནི། གདུགས་ཀྱིས་གྲོང་དབུས་སོ། །ཡུ་བ་ལ་གཞར་དུ་
མི་རུང་བ་ཉིད་མ་ཡིན་ནོ་ཞེས་བྱ་བ་ནི། གོས་བསྐྱབ་པའི་ཕྱིར་ཡུ་བ་ལ་གཞར་ཞིང་ཡིབ་ཏུ་མི་རུང་བ་མ་ཡིན་ཏེ་རུང་བ་ཁོ་ནའོ། །ཡུ་བ་ནི་བྱི་དོར་བྱའོ། །ཆད་ན་ཁྱིམ་དག་ཏུ་གཞག་གོ་ཞེས་བྱ་བ་ནི། ཆར་པ་ཆད་ན་དེའི་ཚེ་དྲུང་ན་འདུག་པའི་ཁྱིམ་གང་ཡིན་པ་དེར་གདུགས་དེ་བརྟགས་ཏེ་གཞག་
པའོ། །འབྱུང་ཀར་བླང་ངོ་ཞེས་བྱ་བ་ནི། གང་དུ་བཞག་པའི་གྲོང་དེ་ནས་ཕྱིར་འབྱུང་ཀར་གདུགས་དེ་བླང་བའོ། །གཙུག་ལག་ཁང་ན་གནས་པའི་སྐབས་བཤད་ཟིན་ཏོ།། །།ད་ནི་གནས་གཞན་ན་གནས་པའི་སྐབས་བརྗོད་པར་བྱ་སྟེ། རོལ་མོ་མཁན་གྱི་གནས་དང་།
སྨད་འཚོང་མའི་གནས་དང་། ཆང་འཚོང་མའི་གནས་དང་། རྒྱལ་པོའི་ཕོ་བྲང་དང་། གདོལ་པའི་ཁྱིམ་གྱི་གནས་དག་བསྟེན་པར་མི་བྱའོ་ཞེས་བྱ་བ་ནི། སྤྱོད་ཡུལ་མ་ཡིན་པའི་གནས་ལྔ་པོ་དེ་དག་ཏུ་འཇུག་པར་མི་བྱའོ། །མི་གཙང་བའི་སྐྱབས་དང་ཉེ་བར་འདུག་པར་
མི་བྱའོ་ཞེས་བྱ་བ་ནི། འཇུག་པའི་ཕྱིར་སོང་ན་ཡང་དེའི་ཉེན་ཀོར་དུ་བསྡད་པར་མི་བྱའོ། །འདིར་གཞུང་ནི། གླེང་གཞི་དག་ལས་དེ་ལྟ་བས་ན་དགེ་སློང་གིས་ཆབ་ཁུང་སར་སོང་ན་འདུ་འཛིས་གནས་པར་མི་བྱའོ། །དེའི་ཉེན་ཀོར་དུ་ལུང་དབོག་པར་མི་བྱ། བཀླག་པར་མི་བྱ། ཁ་

ཐོན་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གོས་རིན་པོ་ཆེར་གྱུར་པས་དགོན་པར་གནས་པར་མི་བྱའོ་ཞེས་བྱ་བ་ནི་ལ་བ་རིན་པོ་ཆེ་ལ་སོགས་པ་རིན་ཆེ་བས་སོ། །ལྡུམ་བུ་ནི་མེ་རུ་ཀའི་ཕྱེ་མས་ལ་བ་ལ་སྲོག་ཆགས་དག་མི་འབྱུང་ངོ་ཞེས་བྱ་བ་ནི། ལྡུམ་བུ་དེའི་
ཕྱེ་མས་བཏབ་ན་ལ་བ་ལ་སྲིལ་ལ་སོགས་པ་སྲོག་ཆགས་དག་མི་འབྱུང་ཞིང་དེ་དག་གིས་ཟོས་པར་མི་འགྱུར་བའོ། །ཤིང་ཀུན་གྱིས་ཀྱང་ངོ་ཞེས་བྱ་བ་ནི། ཤིང་ཀུན་གྱི་ཕྱེ་མས་ཀྱང་ལ་བ་ལ་སྲོག་ཆགས་དག་མི་འབྱུང་བའོ། །ཤིང་ནིམ་པ་དང་བ་ཤ་ཀའི་ལོ་མ་དག་གིས་ཀྱང་ངོ་ཞེས་
བྱ་བ་ནི། ཤིང་དེ་གཉིས་ཀྱི་ལོ་མ་དག་གི་ཕྱེ་མས་ཀྱང་ལ་བ་ལ་སྲོག་ཆགས་དག་མི་འབྱུང་བའོ། །རིམ་པ་དེར་སོང་ན་དེ་ལ་ཤིན་ཏུ་ཕན་པ་ཉིད་དོ་ཞེས་བྱ་བ་ནི། གོས་ཀྱི་རིམ་པ་གཅིག་ཏུ་ཕྱེ་མ་སོང་ཞིང་བཏབ་ན་རིམ་པ་གཞན་ལ་ཤིན་ཏུ་ཕན་པ་ཉིད་ཡིན་ཏེ། དེའི་མཐུས་
རིམ་པ་གཞན་ལ་ཡང་ཤིན་ཏུ་ཕན་པ་ཉིད་ཡིན་པའོ། །སྐམ་པ་ཡང་དེའི་དོན་ཉིད་ཡིན་ནོ་ཞེས་བྱ་བ་ནི། གོས་སྐམ་པ་ཡང་སྲོག་ཆགས་མི་སྐྱེ་བ་ཉིད་དེའི་དོན་ཉིད་ཡིན་པའོ། །འདིར་གཞུང་ནི་དུས་དུས་སུ་བསྐམ་པར་བྱའོ་གསུངས་པ་ཡིན་ནོ། །དགོན་པ་པས་ཕྱོགས་དང་
ལམ་དང་ཚེས་གྲངས་དང་ཉི་མ་དང་རྒྱུ་སྐར་དག་ལ་མཁས་པར་བྱའོ་ཞེས་བྱ་བ་ནི། དགོན་པ་པས་དེ་དག་ཤེས་པར་བྱ་བའོ། །རྟག་ཏུ་མེ་དང་ཆུ་ཡོད་པར་རོ་ཞེས་བྱ་བ་ནི། དགོན་པ་པས་དེ་གཉིས་རྟག་ཏུ་ཡོད་པར་བྱའོ། །ཕྱེ་དང་རས་མ་དག་དང་། སྦྲང་རྩི་དང་ཞུན་མར་
དག་ཅི་འབྱོར་པ་ཉེ་བར་གཞག་གོ་ཞེས་བྱ་བ་ནི། དགོན་པ་པས་དེ་དག་ཅི་འབྱོར་པ་བཅང་བར་བྱ་བ་སྟེ། དེ་ནི་ཆོམ་རྐུན་པའི་གནོད་པ་ཟློག་པའི་ཕྱིར་རོ། །འདིར་གཞུང་ནི་ཕྱེ་དང་སྦྲང་རྩི་དང་ཞུན་མར་ཅི་འབྱོར་པ་ཉེ་བར་གཞག་པར་བྱའོ་ཞེས་གསུངས་པ་ཡིན་ནོ། །གལ་ཏེ་ཟས་ལས་
ལྷག་བྱུང་ན་ཡང་ངོ་ཞེས་བྱ་བ་ནི། གལ་ཏེ་ཟས་ལས་ལྷག་རོལ་ལུས་པར་གྱུར་ན་ཡང་ཉེ་བར་གཞག་པར་བྱའོ། །དགེ་སློང་མས་དགོན་པར་གནས་པར་མི་བྱའོ་ཞེས་བྱ་བ་ནི་རྣམ་པ་ཐམས་ཅད་དུའོ། །གྲོང་ཁྱེར་གྱི་ནང་དུ་དབྱར་ཁང་བྱའོ་ཞེས་བྱ་བ་ནི་དགེ་སློང་མས་སོ། །དེས་དེའི་

ཕྱིར་སྒོར་འདུག་པར་མི་བྱའོ་ཞེས་བྱ་བ་ནི། དགེ་སློང་མ་དེས་དབྱར་ཁང་དེའི་ཕྱིར་སྒོར་འདུག་པར་མི་བྱའོ། །སྣང་ཡལ་ཅན་དུ་མི་བྱའོ་ཞེས་བྱ་བ་ནི་འདུག་པར་ཏེ། འདིར་སྣང་ཡལ་ཅན་ཞེས་བྱ་བ་ནི། སྐར་ཁུང་འབའ་ཞིག་ཏུ་མ་ཟད་ཀྱི། གང་དུ་ཕྱི་རོལ་
སྣང་བ་ཐམས་ཅད་ཡིན་པར་རིག་པར་བྱའོ། །ལམ་གྱི་གཞི་མདོར་མི་བྱའོ་ཞེས་བྱ་བ་ཡང་འདུག་པར་རོ། །གོས་མེད་པ་ཅན་གྱིས་མི་བྱའོ་ཞེས་བྱ་བ་ནི། དགེ་སློང་མ་གོས་མེད་པ་ཅན་གྱིས་ཐམས་ཅད་དུ་འདུག་པར་མི་བྱའོ། །དེ་ལ་རྔུལ་གཟན་ནི་གོས་ཉིད་ཡིན་ནོ་ཞེས་བྱ་བ་ནི།
བསྟན་མ་ཐག་པའི་མོད་དེ་ལའོ། །དཔུང་པ་གཉིས་མ་གཡོགས་པར་ཁྱིམ་པའི་དྲུང་དུ་མི་བྱའོ་ཞེས་བྱ་བ་ནི། དགེ་སློང་མས་རྔུལ་གཟན་གྱི་གོས་ཉིད་གྱོན་དུ་ཟིན་ཀྱང་དཔུང་པ་གཉིས་མ་གཡོགས་པར་ཁྱིམ་པའི་དྲུང་དུ་འདུག་པར་མི་བྱའོ། །དེའི་སྐྱིལ་མོ་ཀྲུང་གི་གནས་སུ་སྐྱིལ་མོ་
ཀྲུང་ཕྱེད་དོ་ཞེས་བྱ་བ་ནི། དགེ་སློང་མས་དེའི་སྐྱིལ་མོ་ཀྲུང་གིས་འདུག་པའི་གནས་སུ་ནི་སྐྱིལ་མོ་ཀྲུང་ཕྱེད་ཀྱིས་འདུག་པར་རིག་པར་བྱ་སྟེ། དེས་སྐྱིལ་མོ་ཀྲུང་ཕྱེད་ཀྱིས་ཏིང་ངེ་འཛིན་ལ་འདུག་པར་བྱའོ་ཞེས་བྱ་བའི་ཐ་ཚིག་གོ། །ཟག་བྱེད་ཀྱི་སྒོར་སྲོག་ཆགས་མི་འཇུག་པར་བྱ་
བའི་ཕྱིར་གོས་ལ་སོགས་པས་གཡོགས་སོ་ཞེས་བྱ་བ་ནི་དགེ་སློང་མས་མོ་མཚན་གྱི་སྒོར་འབུ་སྦྲང་ལ་སོགས་པ་སྲོག་ཆགས་ཕྲ་མོ་མི་འཇུག་པར་བྱ་བའི་ཕྱིར་གོས་ལ་སོགས་པས་གཡོགས་པར་བྱ་བའོ། །དགེ་སློང་དག་གིས་དགེ་སློང་མ་གཙུག་ལག་ཁང་དུ་འཇུག་པ་དག་བཟློག་པར་
མི་བྱའོ་ཞེས་བྱ་བ་ནི། དགེ་སློང་དག་གིས་དགེ་སློང་མ་དགེ་འདུན་གྱི་གཙུག་ལག་ཁང་དུ་འཇུག་པ་དག་ཕྱིར་བཟློག་པར་མི་བྱའོ། །དེ་དག་གཏམ་མི་འདྲི་བ་དང་མི་གདམས་པ་དང་། གསོ་སྦྱོང་དང་དགག་དབྱེ་གཞག་པ་དག་གིས་ཡོངས་སུ་གདུལ་བར་བྱའོ་ཞེས་བྱ་བ་ནི། དགེ་
སློང་དག་གིས་དགེ་སློང་མ་དེ་དག་ཚུལ་བཞིན་མ་ཡིན་པར་བྱེད་ན་གཏམ་འདྲེ་བར་མི་བྱ་བ་ལ་སོགས་པ་དག་གིས་ཡོངས་སུ་གདུལ་བར་བྱ་ཞིང་དུལ་བ་ཐོབ་པར་བྱའོ། །དེས་དགེ་སློང་རྗེས་སུ་གནང་བ་བྱེད་དུ་མ་བཅུག་པར་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བ་ནི། དགེ་སློང་

མ་དེས་དགེ་སློང་རྗེས་སུ་གནང་བར་བྱེད་དུ་མ་བཅུག་ཅིང་གོ་བར་མ་བྱས་པར་དགེ་སློང་གི་གཙུག་ལག་ཁང་དུ་ཐུག་ཐུབ་ཏུ་འཇུག་པར་མི་བྱའོ། །དགེ་སློང་གིས་དེ་ལ་ཇི་ལྟར་རྗེས་སུ་གནང་བར་བྱ་ཞེ་ན། དེའི་ཕྱིར་ཁྱོད་ནད་དང་བཅས་པ་མ་ཡིན་ན་རྗེས་སུ་གནང་ངོ་ཞེས་བྱ་བ་སྨྲས་
ཏེ། གལ་ཏེ་ཁྱོད་དགེ་སློང་རྣམས་དང་ཞེ་འགྲས་པ་མ་ཡིན་ན་རྗེས་སུ་གནང་ངོ་ཞེས་རྗེས་སུ་གནང་བར་བྱའོ། །ཅི་དེ་བཞིན་རྗེས་སུ་གནང་བར་བྱའམ་ཞེ་ན་དེའི་ཕྱིར། དྲི་བས་ཞེ་འགྲས་པ་མེད་པ་ཉིད་ངེས་པར་ཤེས་པར་བྱས་ཏེའོ་ཞེས་བྱ་བ་སྨྲས་ཏེ། དྲི་བ་གང་གི་དགེ་སློང་མ་དེ་ལ་ཞེ་
འགྲས་པ་མེད་ཅིང་རྙོག་པ་མེད་པ་ཉིད་དུ་སྟོན་པའི་དྲི་བ་དེས་ཞེས་བྱ་བའི་ཐ་ཚིག་གོ། །གནས་ཀྱི་ཡང་དག་པར་སྦྱར་བའི་སྐབས་རྫོགས་སོ།། །།ད་ནི་སྦ་བའི་རྣམ་པར་གཞག་པ་དང་ཡོངས་སུ་བསྐྱང་བའི་སྐབས་བརྗོད་པར་བྱ་སྟེ། ཕྲེད་གཏན་དང་གནམ་གཟེར་དང་འཁོར་གཏན་དང་སྒོ་
ལྕགས་དང་ལྡེ་མིག་ཀྱོག་པོ་དག་གཙུག་ལག་ཁང་བསྡམ་པའི་ཕྱིར་ཡང་དག་པར་སྦྱར་རོ་ཞེས་བྱ་བ་ནི། གཙུག་ལག་ཁང་གི་སྒོ་ལ་སོགས་པ་བསྡམ་པའི་ཕྱིར་སྟ་གོན་བྱའོ། །སྒོ་ལྕགས་ཞེས་སྨོས་པས་ནི་སྒོ་གཏན་ཡང་བརྗོད་པ་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་ལྔ་པོ་འདི་དག་ནི་སྡོམ་པར་བྱེད་པ་དག་ཡིན་ཏེ། ལྔ་གང་ཞེ་ན། ཕྲེད་གཏན་དང་གནམ་གཟེར་དང་། འཁོར་གཏན་དང་སྒོ་ལྕགས་དང་སྡེ་མིག་ཀྱོག་པོ་སྟེ། དེ་དག་གཙུག་ལག་ཁང་ན་བདོག་ན་ཐམས་ཅད་དགེ་སྐོས་ཀྱིས་བཅང་བར་བྱའོ་ཞེས་
གསུངས་པ་དང་། རྣམ་པར་འབྱེད་པ་ལས་ཀྱང་དགེ་འདུན་གྱི་གནས་བརྟན་དགེ་སློང་གིས་དགེ་སྐོས་ལ་ཚེ་དང་ལྡན་པ་ཁྱོད་ཀྱིས་སྒོ་བཅད་དམ། གཙུག་ལག་ཁང་སོ་སོར་བརྟགས་སམ་ཞེས་དྲི་བར་བྱའོ་ཞེས་གསུངས་པ་དང་། མ་མོ་ལས་ཀྱང་བཅོམ་ལྡན་འདས་ཀྱིས་དགེ་
སློང་རྣམས་ལ་གནས་མལ་བསྲུང་བའི་ཕྱིར་ལྡེ་མིག་ཀྱོག་པོ་རྗེས་སུ་གནང་ངོ་ཞེས་གསུངས་པ་ཡིན་ནོ། །དགེ་སྐོས་ཀྱིས་དགོངས་ཀར་གཙུག་ལག་ཁང་བསྡམས་ནས་སོ་སོར་བརྟག་པར་བྱའོ་ཞེས་བྱ་བ་ནི། དགེ་སྐོས་ཀྱིས་མཚན་མོའི་ཐུན་དང་པོའི་ཆར་གཙུག་ལག་ཁང་གི་སྒོ་ལ་

སོགས་པ་བསྡམས་ནས་གཙུག་ལག་ཁང་སོ་སོར་བརྟག་པར་བྱའོ། །འཇིགས་པ་དང་བཅས་པ་ཉིད་ཡིན་ན་ཐུན་པ་ཉིད་ཀྱིས་མེལ་ཚེ་བྱའོ་ཞེས་བྱ་བ་ནི། གལ་ཏེ་གཙུག་ལག་ཁང་འཇིགས་པ་དང་བཅས་པ་ཉིད་ཡིན་ན། དེའི་ཚེ་དགེ་སློང་རྣམས་ཀྱིས་
ཐུན་ཏུ་ཀླག་པའི་ཐུན་པ་ཉིད་ཀྱིས་མེལ་ཚེ་བྱ་བའོ། །དེར་གྱུར་པས་ཉལ་བ་དང་སྙོམས་པར་འཇུག་པ་དག་སྤང་ངོ་ཞེས་བྱ་བ་ནི། མེལ་ཚེའི་ཐུན་པར་གྱུར་པ་དེས་ཉལ་བ་དང་སྙོམས་པར་འཇུག་པ་དག་ངེས་པར་སྤང་བར་བྱ་སྟེ། གཞན་དུ་ན་ཡིད་རྟོན་པ་ལ་འཁུས་པར་འགྱུར་རོ། །དེར་
དགེ་འདུན་གྱི་གནས་བརྟན་གྱིས་དགེ་སྐོས་ལ་དམ་གཞག་བྱས་པ་ཉིད་དྲི་བར་བྱའོ་ཞེས་བྱ་བ་ནི། གཙུག་ལག་ཁང་དེར་དགེ་འདུན་གྱི་གནས་བརྟན་གྱིས་དགེ་སྐོས་ལ་སྒོ་བཅད་པ་ལ་སོགས་པ་དམ་གཞག་བྱས་པ་ཉིད་སྨྲ་བར་བྱའོ། །གལ་ཏེ་ཡང་དག་པར་སྦྱར་བ་དག་གིས་མ་
བསྡམས་པ་ཉིད་ན་གཙུག་ལག་ཁང་བརླག་ན་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ནོ་ཞེས་བྱ་བ་ནི། གལ་ཏེ་ཕྲེད་གཏན་ལ་སོགས་པ་སྡོམ་པར་བྱེད་པ་ལྔ་པོ་ཡང་དག་པར་སྦྱར་བ་དག་གིས་གཙུག་ལག་ཁང་གི་སྒོ་ལ་སོགས་པ་ལ་མ་བསྡམས་པ་ཉིད་ན་ཆོམ་རྐུན་པ་དག་གིས་
གཙུག་ལག་ཁང་བོར་རླག་བྱུང་ན། རྫས་ཅི་རླག་པ་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ཏེ། དགེ་སྐོས་ལ་སྐྱིན་པ་དབབ་པོ་ཞེས་བྱ་བའི་ཐ་ཚིག་གོ། །དེ་དག་ཇི་ཙམ་ཉམས་པར་བྱས་པ་དེ་ཙམ་གྱི་ཆ་དག་གོ་ཞེས་བྱ་བ་ནི། བསྡམས་པའི་ཕྱིར་ཡང་དག་པར་སྦྱར་བ་འཕྲེད་
གཏན་ལ་སོགས་པ་དག་ལས་གཅིག་གམ་དུ་མའམ། མང་པོས་བསྡམ་པ་མ་བསྒྲུབས་ཤིང་ཉམས་པར་བྱས་ན་ཡང་དག་པར་སྦྱར་བ་དེ་དག་ཇི་ཙམ་མ་བསྒྲུབས་ཤིང་ཉམས་པར་བྱས་པ་དེ་ཙམ་གྱི་ཆ་དག་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ཏེ། གལ་ཏེ་གཅིག་གིས་མ་
བསྡམས་ན་གཅིག་གི་ཆ་འཇལ་དུ་གཞུག་གོ། །ཇི་སྟེ་གཉིས་ཀྱིས་མ་བསྡམས་ན་གཉིས་ཀྱི་ཆ་འཇལ་དུ་གཞུག་གོ། །དེ་བཞིན་དུ་གསུམ་གྱིས་མ་བསྡམས་ན་གསུམ་གྱི་ཆ་བཞིས་མ་བསྡམས་ན་བཞིའི་ཆ་འཇལ་དུ་གཞུག་གོ། །གལ་ཏེ་ལྔ་ཆར་གྱིས་མ་བསྡམས་ན་སྐྱིན་

པ་རིལ་གྱིས་འཇལ་དུ་གཞུག་གོ། །ལྡེ་མིག་ཀྱོག་པོ་དང་སྒོ་ལྕགས་བཅང་བར་བྱའོ་ཞེས་བྱ་བ་ནི། དགེ་སློང་དང་དགེ་སློང་མ་ཐམས་ཅད་ཀྱིས་སོ། །སྡོམ་པ་ཇི་སྙེད་ཡོད་པ་དེ་དག་གིས་སྒོ་མ་བསྡམས་པར་འགྲོ་བར་མི་བྱའོ་ཞེས་བྱ་བ་ནི། །ཕྲེད་གཏན་ལ་སོགས་པ་
སྡོམ་པར་བྱེད་པ་ཇི་སྙེད་ཡོད་པ་དེ་དག་ཐམས་ཅད་ཀྱིས་སྒོ་མ་བསྡམས་པར་གཞན་དུ་འགྲོ་བར་མི་བྱའོ། །གལ་ཏེ་གནས་སྟོང་པར་ཞུགས་པར་གྱུར་པ་ན་དེར་ཆག་ཆག་ལ་སོགས་པ་བྱའོ་ཞེས་བྱ་བ་ནི་གནས་གང་དུ་ཞུགས་པར་གྱུར་པ་དེ་གལ་ཏེ་སྟོང་པ་ཡིན་ན། །དེར་ཆག་ཆག་
ལ་སོགས་པ་བྱ་བའོ། །སྣོད་སྤྱད་བརྩམ་པ་མཁོས་སུ་དབབ་པར་བྱའོ་ཞེས་བྱ་བ་ནི། གནས་གང་དུ་ཞུགས་པར་གྱུར་པ་དེ་ན་གལ་ཏེ་སྣོད་སྤྱད་དག་བསྡུ་བསོག་མ་བྱས་པར་བརྩམ་པར་འཇུག་ན་དེ་དག་གནས་ཇི་ལྟ་བ་བཞིན་དུ་བསྡུ་བསོག་བྱ་ཞིང་མཁོས་སུ་དབབ་
པར་བྱའོ། །གལ་ཏེ་བཟོད་ན་བྱི་དོར་བྱའོ་ཞེས་བྱ་བ་ནི། སྣོད་སྤྱད་དེ་དག་གལ་ཏེ་བཀྲུ་བཤལ་ལ་སོགས་པ་བྱི་དོར་བྱ་བ་དེ་བཟོད་ཅིང་འོས་པ་ཡིན་ན་དེ་དག་བཀྲུ་བཤལ་ལ་སོགས་པ་བྱི་དོར་བྱ་སྟེ་མཁོས་སུ་དབབ་པར་བྱའོ། །གལ་ཏེ་རུང་བར་བྱེད་པ་ཡོད་ན་སྔོ་སྲབ་པ་བྱེད་དུ་གཞུག་གོ་ཞེས་བྱ་བ་
ནི་གལ་ཏེ་རྩེ་རྒོད་ལ་སོགས་པ་བསྙེན་པར་མ་རྫོགས་པ་རུང་བར་བྱེད་པ་ཡོད་ན། གཙུག་ལག་ཁང་དུ་རྩྭ་སྔོན་པོ་ལ་སོགས་པ་ལྷབ་ལྷུབ་འཐོག་ཏུ་གཞུག་པའོ། །གལ་ཏེ་དེར་ཁྱིམ་དག་ལྷག་ན་དེ་དག་ལ་ཆོས་དང་ལྡན་པའི་གཏམ་དང་ནུས་པའི་ཆོས་གཞན་ཡང་བྱ་བའོ་ཞེས་བྱ་བ་ནི།
གལ་ཏེ་གཙུག་ལག་ཁང་དེར་ཁྱིམ་པ་དག་ལྷགས་ན་ཁྱིམ་པ་དེ་དག་ལ་ཆོས་དང་ལྡན་པའི་གཏམ་བྱ་བ་དང་ཟས་སྐོམ་དང་དབྱར་གཟིགས་ལ་སོགས་པ་ནུས་པའི་ཆོས་གཞན་ཡང་བྱ་བའོ། །གནས་ཀྱི་གཞིའི་ནང་གི་སྐབས་བཤད་ཟིན་ཏོ།། །།ད་ནི་ཕྱི་རོལ་གྱི་སྐབས་བརྗོད་
པར་བྱ་སྟེ། ཤིང་ལྗོན་པ་བསྐྱེད་པ་མི་རུང་བ་ནི་མ་ཡིན་ནོ་ཞེས་བྱ་བ་ནི། དགེ་སློང་གིས་ཤིང་ལྗོན་པ་བསྐྱེད་དུ་རུང་བ་སྟེ། འདིར་ཤིང་ལྗོན་པ་ཞེས་བྱ་བ་ནི་ནགས་མ་དང་གེལ་པ་དང་ཁྲི་ཤིང་དང་ཏ་ལ་ལ་སོགས་པ་དག་བསྟན་པར་རིག་པར་བྱའོ། །དེ་བསྐྱེད་ནས་མི་བསྐྱང་བར་མི་

བྱའོ་ཞེས་བྱ་བ་ནི། ཤིང་ལྗོན་པ་ལ་སོགས་པ་དེ་བསྐྱེད་ནས་མི་བསྐྱང་བར་མི་བྱ་སྟེ་བསྐྱང་བ་ཁོ་ནར་བྱ་བའོ། །ཤིང་ལྗོན་པ་དུས་ཇི་སྲིད་དུ་བསྐྱང་བར་བྱ་ཞེ་ན་དེའི་ཕྱིར། དེའི་ཤིང་ལྗོན་པ་ནི་མེ་ཏོག་ཆགས་ཀྱི་བར་དུའོ་ཞེས་བྱ་བ་སྨྲས་ཏེ། མེ་ཏོག་གི་ཤིང་ལྗོན་པ་ནི་མེ་ཏོག་
ཆགས་ཀྱི་བར་དུ་བསྐྱང་བར་བྱའོ། །གཞན་ནི་འབྲས་བུའི་བར་དུའོ་ཞེས་བྱ་བ་ནི་འབྲས་བུའི་ཤིང་ལྗོན་པ་ནི་འབྲས་བུ་ཆགས་ཀྱི་བར་དུ་བསྐྱང་བར་བྱའོ། །གང་ལ་མེ་ཏོག་དང་འབྲས་བུ་གཉིས་ཀ་ཡང་འགྲུབ་པའི་ཤིང་ལྗོན་པ་དེ་ལ་ནི་གང་གི་དོན་དང་ལྡན་པ་ཉིད་དུ་ཆེས་གྲགས་པ་དེས་རྣམ་པར་གཞག་གོ། །
ཡུན་རིང་བ་ཉིད་ན་ལོ་ལྔར་རོ་ཞེས་བྱ་བ་ནི། མེ་ཏོག་དང་འབྲས་བུ་ཆགས་པ་དེ་ཉིད་ནི་ཡུན་རིང་བ་ཉིད་ནི་ལོ་ལྔར་བསྐྱང་བར་བྱ་བའོ། །འདི་ལ་དགེ་སློང་བསྐོས་པ་ནི་རང་ཉིད་དང་འདྲའོ་ཞེས་བྱ་བ་ནི། ཤིང་ལྗོན་པ་བསྐྱེད་པ་བསྐྱང་བ་འདི་ལ་དགེ་སློང་གཞན་ལ་བཅོལ་ཞིང་བསྐོས་པ་ནི་
རང་ཉིད་དང་འདྲ་སྟེ། དགེ་སློང་བསྐོས་པས་བསྐྱང་བ་བྱས་ན་རང་ཉིད་ཀྱིས་བསྐྱང་བ་བྱས་པ་དང་འདྲ་བ་ཉིད་ཡིན་ནོ། །འདིར་གཞུང་ནི་དགེ་སློང་ཀུན་དགའ་ར་བ་བསྐྱེད་པས་ལོ་ལྔར་གར་ཡང་འགྲོ་བར་མི་བྱའོ། །གལ་ཏེ་འགྲོ་ན་དགེ་སློང་ལ་རྗེས་སུ་གཏད་དེ་འགྲོ་བར་བྱའོ་ཞེས་གསུངས་པ་ཡིན་
ནོ། །བཅུ་པའི་བདག་ཉིད་ཀྱིས་བསྐྱང་པ་ཇི་ལྟར་བྱ་ཞེ་ན་དེའི་ཕྱིར་ལག་པ་དག་དང་རྐང་པ་དག་བཀྲུ་བ་དང་སོ་ཤིང་དོར་བ་དང་། ལྷུང་བཟེད་བཀྲུ་བ་དང་། ཁྲུས་བྱས་པ་ནི་བཅུ་པ་ཡིན་ནོ་ཞེས་བྱ་བ་སྨྲས་ཏེ། ཕྱོགས་དེར་རྐང་ལག་བཀྲུ་བ་ལ་སོགས་པ་ཁྲུས་ཀྱི་མཐར་ཐུག་པའི་བར་དག་བྱ་བ་ནི།
བཅུ་པ་བྱ་བ་ཡིན་པར་རིག་པར་བྱའོ། །གྲང་བ་བསྐྱབ་པའི་ཕྱིར་ཁང་བུའི་སྦུབས་བྱའོ་ཞེས་བྱ་བ་ནི། ལྷགས་པ་བསྐྱབ་པའི་ཕྱིར་དེའི་སྟེང་དུ་ཁུང་བུའི་སྦུབས་དབུབ་པར་བྱ་བའོ། །དབུགས་དབྱུང་བའི་ཕྱིར་དེ་ལ་སྐར་ཁུང་གདོད་དོ་ཞེས་བྱ་བ་ནི། རླངས་པ་ཕྱིར་དབྱུང་པའི་ཕྱིར་
ཁང་བའི་སྦུབས་དེ་ལ་སྐར་ཁུང་གདོད་པར་བྱ་བའོ། །གཡོགས་མས་དགབ་བོ་ཞེས་བྱ་བ་ནི། གྲང་བ་བསྐྱབ་པའི་ཕྱིར་ཁོ་ནར་ཁང་བུའི་སྦུབས་དེའི་སྟེང་དུ་གཡོགས་པར་བྱ་བའོ། །སོ་ག་མི་ཚ་བར་བྱ་བའི་ཕྱིར་དེ་བསལ་ལོ་ཞེས་བྱ་བ་ནི། སོ་ག་ཤིང་ལྗོན་པ་མི་ཚ་བར་བྱ་བའི་ཕྱིར་

གཡོག་མ་དེ་བསལ་བར་བྱ་བའོ། །དབྱར་དག་ནི་མི་འདྲུལ་བར་བྱ་བའི་ཕྱིར་སྔ་མ་ཡང་ངོ་ཞེས་བྱ་བ་ནི། དབྱར་དག་ནི་ཤིང་ལྗོན་པ་མི་འདྲུལ་བར་བྱ་བའི་ཕྱིར་སྔ་མ་དག་ཅེས་བྱ་བ་ཁང་བུའི་སྦུབས་དེ་ཡང་བསལ་བར་བྱའོ། །ཆུའི་ཡུར་བ་གདོད་དོ་ཞེས་བྱ་བ་ནི། ཁང་བུའི་སྦུབས་
དེ་ལས་ཆུའི་ཡུར་བ་གདོད་པར་བྱ་བའོ། །རྩ་བའི་འོངས་ཡལ་བར་མི་འདོར་རོ་ཞེས་བྱ་བ་ལ། རྩ་བ་ཞེས་བྱ་བ་ནི་ཤིང་ལྗོན་པའོ། །དེའི་འོངས་ཞེས་བྱ་བ་ནི། མེ་ཏོག་དང་འབྲས་བུ་ལ་སོགས་པ་ཐོག་སྟེ་དེ་ཡལ་བར་མི་དོར་བའོ། །འདིར་གཞུང་ནི་དེས་རྩ་བའི་ཐོག་ཡལ་དོར་
བར་མི་བྱ་ཞིང་བྱི་དོར་བྱའོ་ཞེས་གསུངས་པ་ཡིན་ནོ། །འཁོར་རྣམ་པར་དབྱེ་བའི་བྱེ་བྲག་གིས་བྱི་དོར་བྱའོ་ཞེས་བྱ་བ་ནི། དགེ་སློང་དག་གིས་འཁོར་མང་ཉུང་རྣམ་པར་དབྱེ་བའི་མི་བླས་ཀྱི་བྱེ་བྲག་དེས་བྱི་དོར་གྱི་ལས་བྱ་བའོ། །ཅི་དེ་ལ་འཇུག་པས་སམ་ཞེ་ན་དེའི་ཕྱིར། ཁ་ཅིག་
ཏུ་སོ་ཤིང་བཟའ་བ་དང་ཁ་གཅིག་ཏུ་ཁ་བཀྲུ་བ་དང་ཁ་གཅིག་ཏུ་རྐང་པ་དག་བཀྲུ་བ་དེ་ལྟ་བུ་དེ་ལ་འཇུག་པ་ཉིད་མ་ཡིན་པས་སོ་ཞེས་བྱ་བ་སྨྲས་ཏེ། གཅིག་པུ་དེ་ལ་བྱ་བ་དེ་དག་འཇུག་པ་ཉིད་དུ་མི་བྱ་བར་ལྷག་མ་རྣམས་ལ་ཡང་དེ་ལྟར་ཁ་བཀྲམ་སྟེ་བཅུ་བར་བྱའོ། །བྱི་དོར་གྱི་ལས་
ལྷག་མ་སྨེད་ལ་སོགས་པ་གདབ་པ་དང་། ཁང་བུའི་སྦུབས་བྱ་བ་ལ་སོགས་པ་རང་གིས་བསྐྱེད་པ་ལ་བྱ་བ་བསྟན་པ་གང་ཡིན་པ་དེ་དག་ལ་ཡང་ཅི་རིགས་པར་ཁ་བཀྲམ་སྟེ་བྱ་བར་རིག་པར་བྱའོ། །མེ་ཏོག་དང་འབྲས་བུ་དག་བསྲུང་བའི་ཕྱིར་དགེ་སློང་དག་བསྐོ་བར་བྱའོ་ཞེས་བྱ་བ་ནི།
མེ་ཏོག་དང་འབྲས་བུ་ལ་སོགས་བསྲུང་བའི་ཕྱིར་དགེ་སློང་དག་བསྐོ་བར་བྱའོ། །ཟས་ཀྱི་དུས་ཀྱི་ཆེད་དུ་གཞན་དག་གོ་ཞེས་བྱ་བ་ནི། དགེ་སློང་སྔ་མ་དག་ཟན་ཟ་བའི་དུས་ཀྱི་ཆེད་དུ་དགེ་སློང་གཞན་དག་བསྐོ་བར་བྱའོ། །དེ་དག་གིས་ཆེས་དང་པོར་ཟན་ཟོས་ཏེ་འགྲོ་བར་བྱའོ་ཞེས་བྱ་བ་
ནི། ཟན་གྱི་དུས་ཀྱི་ཆེད་དུ་བསྐོས་པའི་དགེ་སློང་དེ་དག་གིས་ཟན་སྔར་ཟོས་ཏེ་དེར་འགྲོ་བར་བྱའོ། །གནས་ཀྱི་ཚུལ་བཤད་ཟིན་ཏོ།། །།ད་ནི་བྱ་བའི་སྐབས་བརྗོད་པར་བྱ་སྟེ། ཀློག་ཏུ་འཇུག་པས་བསྙེན་བཀུར་ཆེས་མང་པོ་བྱེད་པ་དང་མི་ནུས་པ་ལ་ལོགས་ཤིག་ཏུ་བྱས་པས་

ཀྱང་རྗེས་སུ་བརྩེ་བར་བྱའོ་ཞེས་བྱ་བ་ལ། ཀློག་ཏུ་འཇུག་པ་ཞེས་བྱ་བ་ནི་ཀློག་པའི་སློབ་དཔོན་གྱིས་བསྙེན་བཀུར་ཆེས་མང་དུ་བྱེད་པ་ཞེས་བྱ་བར་རང་གི་དྲུང་ན་འདུག་པའི་སློབ་མ་དང་ཉེ་གནས་སློབ་དཔོན་རང་གི་བསྙེན་བཀུར་དང་འཕྲལ་གྱི་བྱ་བའི་ལས་ཆེས་མང་
པོ་བྱེད་པ་དང་། ལུང་ཕོག་པ་སྤྱིར་ཅིག་ཅར་དུ་འཛིན་ཅིང་ཀློག་པ་དང་། ཁ་ཏོན་བྱ་བ་ལ་སོགས་པར་མི་ནུས་པའི་གང་ཟག་ལ་ལོགས་ཤིག་ཏུ་ལུང་འབོགས་པ་དང་རྣམ་པར་བཤད་པ་ལ་སོགས་པ་བྱ་བས་ཀྱང་རྗེས་སུ་སྙིང་བརྩེ་བར་བྱ་བའོ། །དེའི་འདུལ་བ་བཟུང་སྟེ་དེའི་ལུང་འབོགས་
པ་དང་ཁ་ཏོན་བྱ་བ་དང་། དམིགས་ཀྱིས་འདྲི་བ་སྦྱིན་པ་དག་གིས་དགེ་སློང་མ་ལ་རྗེས་སུ་བརྩེ་བར་བྱའོ་ཞེས་བྱ་བ་ནི། དགེ་སློང་གིས་དགེ་སློང་མའི་དེའི་འདུལ་བ་བཟུང་སྟེ། དགེ་སློང་མའི་འདུལ་བ་དེའི་ལུང་འབོགས་པ་དང་ཁ་ཏོན་བྱ་བ་དང་དམིགས་ཀྱིས་འདྲི་བ་སྦྱིན་པ་
དག་གིས་དགེ་སློང་མ་ལ་རྗེས་སུ་བརྩེ་བར་བྱའོ། །ཡི་གེ་བྲི་བར་བྱའོ་ཞེས་བྱ་བ་ནི། དགེ་སློང་གིས་སྤྲིང་ཡིག་ལ་སོགས་པ་ཡི་གེ་བྲི་བ་ལ་ཚུལ་དང་མི་མཐུན་པར་མེད་པར་ཤེས་པར་བྱའོ། །འདིར་གཞུང་ནི། རྣམ་པར་འབྱེད་པ་ལས། བཅོམ་ལྡན་འདས་ཀྱིས་རང་ཉིད་ཀྱིས་
ཡབ་ལ་སྤྲིང་ཡིག་བསྐུར་བ་དང་། སྐྱེ་དགུའི་བདག་མོ་ཆེན་མོས་ཨུཏྤ་ལའི་མདོག་གི་ཕྱིར་རང་ཉིད་ཀྱིས་ཡི་གེ་སྤྲིང་ངོ་ཞེས་གསུངས་པས་དེའི་ཕྱིར་མདོ་འདིས་བྱས་སོ། །དྲན་པ་དང་འཛིན་པར་མི་ནུས་པས་འདུལ་བའོ་ཞེས་བྱ་བ་ནི། གང་ཟག་གང་གིས་འདུལ་བའི་ཚིག་དང་དོན་
དྲན་པ་དང་འཛིན་པར་མི་ནུས་པ་དེས་འདུལ་བ་ཡི་གེར་བྲི་བར་བྱའོ། །དེ་མི་བྲི་བར་བྱ་བ་ཉིད་ཡིན་ནོ་ཞེས་བྱ་བ་ནི་འདུལ་བ་དེ་དྲན་པར་བྱའོ། །དོན་ལས་གཞན་དུ་ཡི་གེར་མི་བྲི་བ་ཉིད་ཡིན་པའོ། །འདིར་གཞུང་ནི། བཙུན་པ་བཅོམ་ལྡན་འདས་ཀྱིས་མ་འོངས་པའི་དུས་ན་བརྗེད་
ངེས་པ་རྒྱུད་ཉམ་ཆུང་བ་དག་འབྱུང་བར་འགྱུར་ཏེ། དེ་དག་གིས་གླེང་གཞི་ཡང་ཐོན་པར་མི་འགྱུར་རོ་ཞེས་གསུངས་ལ། བཅོམ་ལྡན་འདས་ཀྱིས་ལྔ་པོ་དག་ནི་ཡི་གེར་མི་བྲི་སྟེ། ལྔ་གང་ཞེ་ན། སོ་སོར་ཐར་པ་ཐམས་ཅད་དང་། སོ་སོར་ཐར་པ་དང་ལྡན་པ་ཐམས་ཅད་དང་། འདུལ་

བ་ཐམས་ཅད་དང་། འདུལ་བ་དང་ལྡན་པ་ཐམས་ཅད་དང་། གང་ཟག་སོ་སོའིའོ་ཞེས་ཀྱང་བཀའ་སྩལ་ན། དེ་དག་གིས་ཇི་ལྟར་བསྒྲུབ་པར་བགྱི། ཉེ་བ་འཁོར་དེ་དག་གིས་གླེགས་བུ་ལ་ཡི་གེར་བྲིས་ཏེ་བཅང་བར་བྱའོ་ཞེས་གསུངས་པ་ཡིན་ནོ། །འདི་ལ་སོ་སོར་ཐར་པ་ནི་དེ་
དང་འདྲའོ་ཞེས་བྱ་བ་ནི། ཡི་གེར་བྲི་བ་དང་ཡི་གེར་མི་བྲི་བ་ཉིད་འདི་ལ་སོ་སོར་ཐར་པ་ནི་འདུལ་བ་དང་འདྲ་བ་སྟེ། དྲན་པ་དང་འཛིན་པར་མི་ནུས་པས་ནི་སོ་སོར་ཐར་པའི་ཡི་གེར་བྲི་བར་བྱའོ། །དེ་དང་ལྡན་པ་ཡང་ངོ་ཞེས་བྱ་བ་ནི། འདུལ་བ་དེ་དང་ལྡན་པ་དང་སོ་སོར་ཐར་པ་དེ་དང་ལྡན་པ་ཡང་ཡི་
གེར་བྲི་བ་དང་ཡི་གེར་མི་བྲི་བ་ཉིད་འདི་ལ་འདུལ་བ་དང་འདྲ་བར་ཤེས་པར་བྱའོ། །འདིར་གཞི་དག་ནི་འདུལ་བ་ཉིད་ཀྱིས་བསྟན་ཏོ། །མདོ་ཙམ་ནི་སོ་སོར་ཐར་པ་ཉིད་ཀྱིས་བསྟན་ཏོ། །སོ་སོར་ཐར་པ་རྣམ་པར་འབྱེད་པ་དང་དེར་གཏོགས་པའི་ཕྲན་ཚེགས་དང་གླེང་གཞི་དང་སིལ་བུ་དང་ཞུ་བ་ལ་སོགས་པ་ནི་སོ་
སོར་ཐར་པ་དང་ལྡན་པ་ཉིད་ཀྱིས་བསྟན་ཏོ། །གཞིར་གཏོགས་པའི་ཕྲན་ཚེགས་དང་གླེང་བཞི་དང་སིལ་བུ་དང་ཞུ་བ་ལ་སོགས་པ་ནི་འདུལ་བ་དང་ལྡན་པ་ཉིད་ཀྱིས་བསྟན་ཏོ། །གང་ཟག་གིས་ཡང་ངོ་ཞེས་བྱ་བ་ཡང་མི་བྲི་བར་བྱ་བ་ཉིད་ཡིན་ནོ་ཞེས་བྱ་བའི་རྗེས་སུ་བསྙག་པའི་ཕྱིར་ཡང་ངོ་
ཞེས་བྱ་བའི་སྒྲ་སྨོས་ཏེ། གང་ཟག་གིས་དངོས་པོ་གང་ཡིན་པ་དེ་ཡང་ཡི་གེར་བྲི་བར་མི་བྱ་བ་སྟེ། དེ་ལ་བདག་པོའི་མིང་ཡི་གེར་བྲི་བར་མི་བྱ་བའོ། །མཚན་མར་བྱ་བ་ལ་ནི་ཉེས་པ་མེད་དོ་ཞེས་བྱ་བ་ནི། འདིར་མཚན་མ་ཞེས་བྱ་བ་ནི་ཡོངས་སུ་ཤེས་པར་བྱ་བའི་ཕྱིར་ལྷུང་བཟེད་
ལ་སོགས་པ་ལ་མངོན་མཚན་བྱེད་པ་གང་ཡིན་པ་དེ་ཡིན་པར་རིག་པར་བྱའོ། །འདིར་གཞུང་ནི་མཚན་མ་བྱེད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །དགེ་འདུན་གྱི་གནས་མལ་ལ་མིང་ཡི་གེར་བྲིའོ་ཞེས་བྱ་བ་ནི། དགེ་འདུན་གྱི་གནས་མལ་མིང་ཡི་གེར་བྲི་བར་བྱ་བའོ། །ཇི་ལྟར་
ཞེ་ན་དེའི་ཕྱིར། འདི་ནི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བའི་སྦྱིན་པར་བྱ་བའི་ཆོས་སོ་ཞེས་བྱ་བ་སྨྲས་ཏེ། སྦྱིན་པར་བྱ་བའི་ཆོས་འདི་ནི་སྦྱིན་བདག་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བ་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱའོ། །སྦྱིན་པར་བྱ་བའི་ཆོས་

ཞེས་བྱ་བ་ནི། སྦྱིན་པར་བྱ་བའི་དེའི་ངོ་བོ་ཉིད་ཀྱི་ཆོས་སོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། མལ་ཆ་འདི་ནི་རྒྱལ་པོ་གཟུགས་ཅན་སྙིང་པོའི་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱའོ་ཞེས་གསུངས་པ་ཡིན་ནོ། །གོས་དག་
ལ་ཡང་ངོ་ཞེས་བྱ་བ་ནི། དགེ་འདུན་གྱིས་གོས་དག་ལ་ཡང་འདི་ནི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བའི་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱ་བའོ། །རྣམ་པ་དེ་ལྟར་གཞན་དག་ལ་ཡང་ངོ་ཞེས་བྱ་བ་ནི། གནས་མལ་གྱི་རྣམ་པ་དེ་ལྟར་སྣོད་སྤྱད་ལ་སོགས་
པའི་དོན་གཞན་ལ་ཡང་བྱ་བའོ། །ཀློག་ཏུ་འཇུད་པའི་སྐབས་ཞར་ལ་བྱུང་བ་དང་བཅས་པ་བཤད་ཟིན་ཏོ།། །།ད་ནི་ཀློག་པར་བྱེད་པའི་སྐབས་བརྗོད་པར་བྱ་སྟེ། སངས་རྒྱས་ཀྱི་བཀའ་སྡེབ་སྦྱོར་དང་ཚིག་དང་རིམ་པ་དེ་ལ་གཞོལ་བ་ཉིད་ཀྱིས་སྐྱར་ཏེ་བཀླག་པར་མི་བྱའོ་
ཞེས་བྱ་བ་ནི། སངས་རྒྱས་ཀྱི་བཀའ་ཞལ་ནས་གསུངས་པའི་ལུང་དག་སྡེབ་སྦྱོར་དང་ཚིག་དང་རིམ་པ་དེ་དག་ལ་གཞོལ་བ་ཉིད་ཀྱིས་དེ་དག་དང་སྦྱར་ཏེ་བཀླག་པར་མི་བྱའོ། །སྡེབ་སྦྱོར་ཞེས་བྱ་བ་ནི་ཀླག་པའི་རྣམ་པ་སྟེ་རིང་པོར་དྲང་བ་ལ་སོགས་པའི་རྣམ་པ་དང་ང་རོར་འགྱུར་བ་ལ་སོགས་
པའི་མིང་ངོ་། །ཚིག་ཅེས་བྱ་བའི་ཚིག་རེ་རེར་རྣམ་པར་ཕྱེ་སྟེ་ཀློག་པའོ། །རིམ་པ་ཞེས་བྱ་བ་ནི་ཐམས་ཅད་གཅིག་ཏུ་བྱས་ཏེ་ཀློག་པའོ། །དེ་ལ་གཞོལ་བ་ཉིད་ཀྱིས་ཞེས་བྱ་བ་ནི། དེ་དག་ལ་ཁོ་ན་ལྟ་བུར་བྱས་པར་གྱུར་ཅིག་སྙམ་པ་སྟེ། སྡེབ་སྦྱོར་ལ་སོགས་པའི་རྣམ་པ་ལ་སོགས་པ་
བཏོན་པ་དེ་ལྟ་བུར་གྱུར་ཅིག་སྙམ་པ་ཉིད་ཀྱིས་སོ། །གལ་ཏེ་རང་གི་ངང་ཉིད་ཀྱིས་རྣམ་པ་དེ་ལྟ་བུར་ཀློག་པ་ཡིན་ན་དེའི་ཚེ་ནི་ཉེས་པ་མེད་དོ། །གཞན་ལ་ལེགས་པར་གོ་བར་བྱེད་ནུས་ཤིང་སངས་རྒྱས་ཀྱི་བཀའ་ལ་བརྩོན་པ་ཉིད་མི་གཏོང་ན་ཕྱི་རོལ་པའི་བསྟན་བཅོས་དག་
གཟུང་བར་བྱའོ་ཞེས་བྱ་བ་ནི། དགེ་སློང་གིས་ཕྱི་རོལ་གྱི་བསྟན་བཅོས་དག་གཟུང་བར་བྱ་བ་སྟེ། འདིར་བྱེ་བྲག་ཏུ་མ་སྨོས་པས་ཚིག་དང་དོན་གཉི་གར་ཤེས་པར་བྱའོ། །འདིར་གཞུང་ནི་དེ་ལྟ་བས་ན་དགེ་སློང་གིས་འཇིག་རྟེན་རྒྱང་འཕེན་པ་གཟུང་བར་རྗེས་སུ་གནང་ངོ་ཞེས་

གསུངས་པ་ཡིན་ནོ། །ཅི་ཐམས་ཅད་ཀྱིས་བྱེ་བྲག་མེད་པར་རམ་ཞེ་ན་དེའི་ཕྱིར། གཞན་ལ་ལེགས་པར་གོ་བར་བྱེད་ནུས་ཤིང་ངོ་ཞེས་བྱ་བ་སྨྲས་ཏེ། གཞན་མགུ་བར་བྱེད་ནུས་པ་གང་ཡིན་པ་དེས་སོ། །ཅི་དེ་ལ་གཞོལ་བ་ཁོ་ནས་དེ་གཟུང་བར་བྱའམ་ཞེ་ན་དེའི་ཕྱིར་སངས་
རྒྱས་ཀྱི་བཀའ་ལ་བརྩོན་པ་ཉིད་མི་གཏོང་ན་ཞེས་བྱ་བ་སྨྲས་ཏེ། རྣམ་པ་ཐམས་ཅད་དུ་སངས་རྒྱས་ཀྱི་བཀའ་ལ་བརྩོན་པ་གཏང་བར་མི་བྱའོ། །དེའི་དུས་ནི་ཉི་མའི་སུམ་ཆ་བདེ་བ་མ་ཡིན་པ་ལའོ་ཞེས་བྱ་བ་ནི། ཕྱི་རོལ་པའི་བསྟན་བཅོས་བཟུང་བ་དེའི་དུས་ནི་ཉི་མའི་སུམ་ཆ་སྟེ།
དེ་ཡང་བདེ་བ་མ་ཡིན་པ་ཞེས་བྱ་བ་གང་གི་ཚེ་ལུས་དང་སེམས་ལས་སུ་རུང་བ་མ་ཡིན་པར་རིག་པར་བྱའོ། །མཚན་མོ་ཡང་ངོ་ཞེས་བྱ་བ་ནི། དེའི་དུས་སུམ་ཆ་བདེ་བ་མ་ཡིན་པའོ་ཞེས་བྱ་བར་སྦྱར་རོ། །གསང་སྔགས་ཕན་འདོགས་པར་བྱེད་པ་དག་གཟུང་བར་བྱའོ་ཞེས་བྱ་བ་ནི།
དུག་གི་གནོད་པ་ལ་སོགས་པ་སེལ་བར་བྱེད་པ་དག་གོ། །སྦྱར་བར་བྱའོ་ཞེས་བྱ་བ་ནི་གསང་སྔགས་ཕན་འདོགས་པར་བྱེད་པ་བདག་གིས་གཟུང་བ་དག་གཞན་ཡང་གདབ་པ་ལ་སོགས་པས་ཐམས་ཅད་དུ་སྦྱར་བར་བྱའོ། །གནོད་པ་བྱེད་པ་ནི་མི་བྱའོ་ཞེས་བྱ་བ་ནི། གསང་
སྔགས་གནོད་པ་བྱེད་པ་ནི་གཟུང་བར་ཡང་མི་བྱའོ། །སྦྱར་བར་ཡང་མི་བྱ་བའོ། །དེ་དག་གི་ཕྱག་གི་གནས་སུ་དཀོན་མཆོག་གསུམ་བརྗོད་པར་བྱའོ་ཞེས་བྱ་བ་ནི། གསང་སྔགས་དེ་དག་ལ་ཕྱག་འཚལ་བ་འབྱུང་བ་གང་ཡིན་པ་དེའི་གནས་སུ་དཀོན་མཆོག་གསུམ་ལ་ཕྱག་
འཚལ་ལོ་ཞེས་བརྗོད་པར་བྱའོ། །ལྷ་གཞན་ལ་ཕྱག་མི་བྱའོ་ཞེས་བྱ་བ་ནི། ཁྱབ་འཇུག་ལ་སོགས་པ་ལའོ། །འདིར་གཞུང་ནི་གསང་སྔགས་ནི་རྣམ་པ་གཉིས་ཏེ། ཕན་འདོགས་པ་དང་། གནོད་པ་བྱེད་པའོ། །དེ་ལ་གནོད་པར་བྱེད་པ་གང་ཡིན་པ་དེ་དག་ནི་དེ་དགེ་
སློང་རྣམས་ཀྱིས་བཀླག་པར་མི་བྱ་སྦྱར་བར་མི་བྱའོ། །ཕན་འདོགས་པ་གང་ཡིན་པ་དེ་དག་ནི་དགེ་སློང་རྣམས་ཀྱིས་བཀླག་པར་བྱ་སྦྱར་བར་བྱའོ་ཞེས་གསུངས་པ་དང་། གསང་སྔགས་དེ་དག་ལ་ལྷ་གཞན་ལ་ཕྱག་འཚལ་བ་སྔོན་དུ་བཏང་བ་དག་བྱུང་ནས་བཅོམ་ལྡན་འདས་ཀྱིས་

བཀའ་སྩལ་པ། དགེ་སློང་གིས་འདི་ལས་ཕྱི་རོལ་པའི་ལྷ་ལ་ཕྱག་མི་བྱའོ་ཞེས་གསུངས་པ་ཡིན་ནོ། །མཆོད་པ་མི་བྱའོ་བཀུར་སྟི་མི་བྱའོ་ཞེས་བྱ་བ་ནི་འདི་ལས་ཕྱི་རོལ་པའི་ལྷ་ལའོ། །གནས་སུ་ཕྱིན་ན་མངོན་སུམ་དུ་འགྲེང་སྟེ་སེ་གོལ་གྱི་སྒྲས་གོ་བར་བྱས་
ནས་གཙུག་ལག་གི་ཚིགས་སུ་བཅད་པ་གདོན་པས་དེ་ལ་ཕན་གདགས་པར་བྱའོ་ཞེས་བྱ་བ་ནི། དགེ་སློང་གིས་འདི་ལས་ཕྱི་རོལ་པའི་ལྷའི་གནས་སུ་ཕྱིན་ན་དེའི་མངོན་སུམ་དུ་འགྲེང་སྟེ། སེ་གོལ་གྱི་སྒྲས་གོ་བར་བྱས་ནས་དྲང་སྲོང་གིས་གསུངས་པའི་ཚིགས་སུ་
བཅད་པ་གདོན་པས་དེ་ལ་ཕན་གདགས་པར་བྱའོ། །བཟོ་རྗེས་སུ་བསྒྲུབ་པ་དང་བསླབ་པ་དང་དེའི་སྣོད་ཉེ་བར་གཞག་པར་མི་བྱ་སྟེ་མཚོན་གྱི་ཤུབས་དང་ཁབ་རལ་དང་རམ་ཕྱིས་ནི་མ་གཏོགས་སོ་ཞེས་བྱ་བ་ནི། དགེ་སློང་གིས་རང་གིས་བཟོ་མི་བྱ་བ་དང་། གཞན་ལ་བཟོ་བསླབ་
པར་མི་བྱ་བ་དང་། བཟོ་སྤྱད་ཀྱི་སྣོད་ཉེ་བར་གཞག་པར་མི་བྱའོ། །གྲི་ཤུབས་ལ་སོགས་པ་དང་ཁབ་རལ་དང་རམ་ཕྱིས་ནི་མ་གཏོགས་སོ། །འདིར་གཞུང་ནི། དགེ་སློང་གིས་དེ་ལྟ་བུའི་སྣོད་ཉེ་བར་གཞག་པར་མི་བྱའོ། །སྔོན་སྨན་པ་ཡིན་ན་མཚོན་
གྱི་སྣོད་དོ། །སྔོན་ཡི་གེ་པ་ཡིན་ན་རམ་ཕྱིས་དང་། སྔོན་བཟོས་མཁན་ལས་རབ་ཏུ་བྱུང་བ་ཡིན་ན་ཁབ་རལ་ནི་མ་གཏོགས་སོ་ཞེས་གསུངས་པ་ཡིན་ནོ། །མུ་གཅིག་པ་ལ་བསོད་ནམས་ཀྱི་བསམ་པས་དགེ་བའི་གསོ་བ་ཉེ་བར་བསྒྲུབ་པར་བྱ་སྟེ་གླ་རྔན་གྱིས་ནི་མ་
ཡིན་ནོ་ཞེས་བྱ་བ་ནི། ཚངས་པ་མཚུངས་པར་སྤྱོད་པ་མུ་གཅིག་པ་དག་ལའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ་ཞེས་བྱ་བ་ནི། །གཞན་ལ་བཀྲུ་སྨན་བཏང་ནས་དེ་ཉིད་དུ་བསྡད་པར་བྱའོ་ཞེས་བྱ་བའི་ཐ་ཚིག་གོ། །རྐྱེན་དེ་ལྟ་བུ་དག་བྱུང་ན་ཧ་ཅང་འཁྲུ་བ་
ལ་སོགས་པ་གནོད་པའི་གཉེན་པོའི་ཆོ་ག་བསྟེན་ཏེའོ་ཞེས་བྱ་བ་ནི། གདོན་མི་ཟ་བར་འགྲོ་དགོས་པ་དེ་ལྟ་བུའི་རྐྱེན་དག་བྱུང་ན། ཧ་ཅང་འཁྲུ་བ་དང་ཡེ་མི་འཁྲུ་བ་ལ་སོགས་པའི་གནོད་པའི་གཉེན་པོའི་ཆོ་ག་སྨན་དཔྱད་ཀྱི་ཐབས་གཞན་དག་ནད་པ་དང་ནད་གཡོག་ལ་

བསྟན་ཏེ་འགྲོ་བར་བྱའོ། །འདིར་གཞུང་ནི་དེ་ལྟ་བས་ན་དགེ་སློང་གིས་གླ་རྔན་གྱིས་བཀྲུ་སྨན་གཏང་བར་མི་བྱའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ། །རྐྱེན་དེ་ལྟ་བུ་དག་བྱུང་ན་བསྒོས་ཏེ་འགྲོ་བར་བྱའོ་ཞེས་གསུངས་པ་ཡིན་ནོ། །ཚངས་པ་མཚུངས་
པར་སྤྱོད་པ་མཚན་མཐུན་པ་དབེན་པའི་ཕྱོགས་སུ་འདྲེག་མཁན་གྱི་བྱ་བ་བྱའོ་ཞེས་བྱ་བ་ནི། རབ་ཏུ་བྱུང་བས་ཚངས་པ་མཚུངས་པར་སྤྱོད་པ་མཚན་མཐུན་པ་ཞེས་བྱ་བ་དགེ་སློང་གིས་དགེ་སློང་ལ་དང་། དགེ་སློང་མས་དགེ་སློང་མ་ལ་དབེན་པའི་ཕྱོགས་སུ་འདྲེག་མཁན་གྱི་
བྱ་བ་སྐྲ་དང་སེན་མོ་བྲེག་པ་ལ་སོགས་པ་དག་བྱའོ། །ཁྲིའི་ཡན་ལག་ཆག་པ་བཅོས་པ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱ་བའོ། །འདིར་ཁྲི་ཞེས་སྨོས་པ་ནི་ཁྲིའུ་ལ་སོགས་པ་གཞན་དག་གི་དཔེ་ཡིན་ནོ། །ཕྲེང་བའི་རིམ་པ་དག་བརྒྱུ་བ་ཡང་ངོ་ཞེས་བྱ་བ་ཡང་
དབེན་པའི་ཕྱོགས་སུ་བྱ་བའོ། །དཀོན་མཆོག་མཆོད་པར་གྱུར་པ་སེམས་ཅན་གྱི་གཟུགས་མ་ཡིན་པའི་རི་མོ་བྲི་བ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱ་བའོ། །སེམས་ཅན་གྱི་གཟུགས་མ་ཡིན་པ་ཞེས་སྨོས་པས་ནི་འདབ་མའི་མྱུ་གུ་ལ་སོགས་པ་དག་གཟུང་
ངོ་། །དེའི་ཕྱིར་འདྲི་བ་ནི་དེ་ཉིད་ཡིན་ནོ