Luận tạng Tây Tạng (Tengyur) — Tập 163

་གིས་སྦྱོར་བར་བྱེད་ན་འདི་ལྟར་དེར་བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་ཀྱི་ཟས་ཉིད་ཀྱིས་ཁྱབ་པར་བྱེད་དུ་ཟིན་ཀྱང་ཉེས་པ་མེད་པའོ། །སྩོགས་པ་ཞེས་བྱ་བའི་སྒྲས་ནི་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་ཟས་ཀྱི་དོན་དུ་
ཁྱབ་པར་བྱེད་པ་གང་ཡིན་པ་དེ་དག་ཀྱང་བསྡུ་བར་རིག་པར་བྱའོ། །འདི་སྐད་བསྟན་ཏེ། ཙོ་ཙ་ལ་སོགས་པའི་བཏུང་བ་དག་ལས་གཞན་པའི་བཏུང་བ་བལ་པོ་སེའུ་དང་མ་དུ་ལུང་ག་ལ་སོགས་པས་སྦྱོར་བར་བྱེད་ན། འདི་ལྟར་དེར་བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་ཀྱི་ཟས་
ཉིད་ཀྱིས་ཁྱབ་པར་བྱེད་དུ་ཟིན་ཀྱང་ཉེས་པ་མེད་དོ། །འདིར་གཞུང་ནི་དགེ་སློང་དག་གིས་བུ་རམ་ཟོས་པ་དང་། དེ་དག་ལ་སྐོམ་པའི་གནོད་པ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། བུ་རམ་ཆུ་བྱས་ཏེ་བཏུང་བར་བྱའོ་ཞེས་གསུངས་པ་ཡིན་ནོ། །དེ་དུས་སུ་རུང་བ་ཉིད་ཡིན་ན་ཐུན་ཚོད་ཀྱི་
མཐའ་མཐའ་ཡིན་ནོ་ཞེས་བྱ་བ་ནི། བཏུང་བའི་རྫས་དེ་རྒུན་ཆུ་ལ་སོགས་པ་དུས་སུ་རུང་བ་ཉིད་ཡིན་ན་མཚན་མོའི་ཐུན་ཚོད་ཀྱི་ཆའི་ཚད་ཀྱི་མཐའ་གང་ཡིན་པ་དེ་བཏུང་བ་དེ་བཏུང་བའི་མཐའ་ཡང་ཡིན་པར་རིག་པར་བྱའོ། །གཞན་ཉིད་ཡིན་ན་དེའི་གང་ཡིན་པའོ་ཞེས་བྱ་བ་ནི། བཏུང་བའི་རྫས་དེ་ལ་དུས་སུ་རུང་
བ་ལས་གཞན་པ་དུས་མ་ཡིན་པར་རུང་བ་ཉིད་ཡིན་ན་རྫས་དེ་བཟའ་བའི་དུས་ཀྱི་མཐའ་ཞག་བདུན་པའམ་འཚོ་བའི་བར་དུ་བཅང་བའི་མཐའ་གང་ཡིན་པ་དེ་ཉིད་བཏུང་བ་དེའི་མཐའ་ཡང་ཡིན་པ་སྟེ། ཐུན་ཚོད་ཀྱི་མཐའ་དང་ལྷན་ཅིག་འགལ་བ་མེད་དོ། །གང་གི་ཕྱིར་ཞག་བདུན་པ་དང་འཚོའི་བར་བཅང་
བའི་རྫས་ཐུན་ཚོད་ཀྱི་མཐའ་ལས་ཐལ་བར་བཟར་རུང་བ་ཉིད་ཡིན་ན་དུས་ཐམས་ཅད་དུ་ཉེས་པ་མེད་པའི་ཕྱིར་ནམ་ཡང་བཟར་མི་རུང་བ་ཉིད་དུ་མི་འགྱུར་བ་དེའི་ཕྱིར་དུས་སུ་རུང་བ་མ་ཡིན་པའི་རྫས་ལས་བྱས་པའི་བཏུང་བ་དེ་བཏུང་བ་ཉིད་ཀྱི་ཕྱིར་ནི་དུས་ཐམས་ཅད་པ་ཉིད་ཡིན་པར་ཤེས་པར་བྱ་ཞིང་བྱིན་
གྱིས་བརླབས་པའི་ཕྱིར་ནི་ཐུན་ཚོད་དུ་རུང་བ་ཉིད་ཡིན་པར་ཤེས་པར་བྱའོ། །ད་ནི་འདིར་ལུགས་གཞན་དགག་པར་བྱ་བར་འདོད་ནས་གཞན་གྱི་ལུགས་བསྟན་པའི་ཕྱིར་ཁ་ཅིག་ན་རེ་མ་གྱུར་ན་དེ་ཡིན་གྱི་གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་རོ་ཞེས་བྱ་བ་སྨྲས་ཏེ། འདིར་འདུལ་བ་འཛིན་པ་

ཁ་ཅིག་ན་རེ་འདི་ལ་གྱུར་པ་ཞེས་བྱ་བ་ནི། བཏུང་བ་བཞིན་སྣང་བ་ཉིད་ཀྱིས་མཚན་ཉིད་ཤིན་ཏུ་སླ་བ་དང་། མྱོས་པར་མི་འགྱུར་བ་ཉིད་ལས་གཞན་དུ་གྱུར་པ་ཞེས་བྱ་སྟེ། མྱོས་པར་འགྱུར་བར་གྱུར་པ་ཞེས་བྱ་བའི་ཐ་ཚིག་གོ། །དེས་ན་སྔར་མདོ་ལས་གཞན་ཉིད་ཡིན་ན་དེའི་གང་ཡིན་
པའོ་ཞེས་སྨོས་པས་བཏུང་བའི་རྫས་ཀྱི་མཐའ་གང་ཡིན་པ་དེ་ཉིད་བཏུང་བ་དེའི་མཐའ་ཡང་ཡིན་ནོ་ཞེས་གང་བསྟན་པ་དེ་གཅིག་ཏུ་ངེས་པར་རྣམ་པར་གནས་པ་མ་ཡིན་པར་ཤེས་པར་བྱ་སྟེ། འདི་ལྟར་ངོ་བོ་ཉིད་མ་གྱུར་ན་དེ་བཏུང་བའི་མཐའ་ཡིན་གྱི། གྱུར་པ་སྐད་ཅིག་གང་ཚུན་ཆད་ཀྱི་འོག་ཏུ་ངོ་བོ་
ཉིད་དེ་གྱུར་པའི་སྐད་ཅིག་དེ་ཉིད་བཏུང་བའི་མཐའ་ཡིན་པར་ཤེས་པར་བྱའོ་ཞེས་ཟེར་རོ། །དེ་ནི་མ་ཡིན་ཏེ་དུས་ལྷག་པ་ལ་བརྟེན་ན་མི་འཆགས་པར་འགྱུར་བའི་ཕྱིར་དང་དེ་འབྱུང་བར་འགྱུར་བ་ཕལ་པ་རྣམས་ཀྱི་བགྲོད་པ་མ་ཡིན་པའི་ཕྱིར་བྱིན་གྱིས་བརླབས་པར་བྱ་བ་ཉིད་མ་ཡིན་པར་འགྱུར་བའི་
ཕྱིར་རོ་ཞེས་བྱ་བ་ནི། གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་བ་དེ་ནི་མ་ཡིན་ཏེ། དུས་ལྷག་པ་ལ་བརྟེན་ན་མི་འཆགས་པར་འགྱུར་བའི་ཕྱིར་ཏེ། གང་ནས་བཏུང་བར་གྱུར་པར་འགྱུར་བ་དེ་ལས་ལྷག་པར་དུས་ལ་བྱིན་གྱིས་བརླབས་པ་བརྟེན་ན་བྱིན་གྱིས་བརླབ་པ་དེ་མི་འཆགས་པར་འགྱུར་
བའི་ཕྱིར་རོ། །འདི་ལྟར་བྱིན་གྱིས་བརླབ་པ་ནི་རེ་ཞིག་བཟའ་བའི་ཕྱིར་ཡིན་པས་བཟར་རུང་བ་ཉིད་ཡིན་ན་ཡིན་ནོ། །དེའི་ཕྱིར་གང་གི་ཚེ་བཟར་རུང་བ་ཉིད་རྣམ་པར་ལོག་པ་དེའི་ཚེ་བྱིན་གྱིས་བརླབས་ཀྱང་རྣམ་པར་ལྡོག་པར་མི་འགྱུར་རམ། དེས་ན་སྐད་ཅིག་གང་ཚུན་ཆད་ཀྱི་འོག་ཏུ་བཏུང་བའི་
ངོ་བོ་ཉིད་དུ་གྱུར་པར་འགྱུར་བའི་སྐད་ཅིག་དེ་ལས་གཞན་པའི་དུས་ལྷག་མ་དེ་ལ་ནི་བྱིན་གྱིས་བརླབ་པར་རྗེས་སུ་མ་གནང་བས། དེས་ན་འདིར་དུས་དེ་ཙམ་ཞིག་ཏུ་འགྱུར་བའི་ཕྱིར་རོ། །གལ་ཏེ་འདི་སྙམ་དུ་དུས་གང་ལ་བཏུང་བའི་ངོ་བོ་ཉིད་དུ་གྱུར་པར་འགྱུར་བའི་དུས་དེ་ཙམ་ཚུན་ཆད་ལ་བྱིན་གྱིས་
བརླབས་པ་རྟེན་པར་བྱེད་པས་དེས་ན་ཉེས་པ་འདིར་མི་འགྱུར་རོ་སྙམ་དུ་སེམས་ན་དེའི་ཕྱིར། དེ་འབྱུང་བར་འགྱུར་བ་ཕལ་པ་རྣམས་ཀྱི་བགྲོད་པ་མ་ཡིན་པའི་ཕྱིར་ཞེས་བྱ་བ་སྨྲས་ཏེ། གང་གི་ཕྱིར་འབྱུང་བར་འགྱུར་བ་མ་འོངས་པའི་དངོས་པོ་དེ། ཕལ་པ་ཚུ་རོལ་མཐོང་བ་རྣམས་ཀྱི་བགྲོད་པ་

མ་ཡིན་ཞིང་ཡུལ་གྱི་དངོས་པོར་མི་འགྱུར་བ་དེའི་ཕྱིར་བྱིན་གྱིས་རློབ་པའི་དུས་ན་འགྱུར་བའི་དུས་ཡོངས་སུ་མི་ཤེས་པས་བྱིན་གྱིས་བརླབ་པའི་ཕྱིར་ཡོངས་སུ་གཟུང་བར་བྱ་བའི་དུས་གང་ཡིན་པ་དེ་མི་ཤེས་སོ། །དེ་མི་ཤེས་པའི་ཕྱིར་གདོན་མི་ཟ་བ་ཁོ་ནར་དུས་ལྷག་པ་ལ་བརྟེན་པར་འགྱུར་
རོ། །དེས་ན་བྱིན་གྱིས་བརླབ་པར་བྱ་བ་ཉིད་མ་ཡིན་པར་འགྱུར་བའི་ཕྱིར་རོ། །འདིར་རོ་དང་ཕྱེ་མ་དང་སྦྱར་བའི་བཏུང་བ་དག་འདུས་པ་ཉིད་ཡིན་ནོ་ཞེས་བྱ་བ་ཡང་། འདིར་ཞེས་བྱ་བ་ནི་ཐུན་ཚོད་དུ་རུང་བ་དག་སྟེ། དེར་བུ་རམ་ཤིང་ལ་སོགས་པའི་རོ་དག་ཀྱང་འདུས་པ་ཉིད་ཡིན་ལ། ཕྱེ་མ་དང་
སྦྱར་བའི་བཏུང་བ་ཞེས་བྱ་བ་ནི། ཕྱེ་མ་ཆང་གི་སྣོད་ཀྱི་ནང་དུ་སྦངས་པ་ལ་ཆང་གི་དྲིས་གོས་པར་གྱུར་པ་དག་ལས་བཏུང་བར་བྱས་པ་དེ་ཡང་དེར་འདུས་པ་ཉིད་ཡིན་ནོ། །མདོ་འདི་དང་མདོ་འོག་མ་གཉིས་ནི་སྔར་ཐུན་ཚོད་དུ་རུང་བ་ནི་བཏུང་བ་དག་གོ་ཞེས་སྨོས་པའི་མདོ་དེའི་སྤྲོས་པ་ཡིན་ནོ། །སྨན་
རྩབས་ཤིན་ཏུ་སླ་བ་ཡང་ངོ་ཞེས་བྱ་བ་ཡང་། ཐུན་ཚོད་དུ་རུང་བའི་བཏུང་བ་དག་ཏུ་འདུས་པ་ཉིད་ཡིན་ནོ་ཞེས་བྱ་བར་སྦྱར་རོ། །སྨན་རྩབས་ཞེས་བྱ་བ་དེ་ཇི་ལྟ་བུ་ཞིག་ཡིན་ཞེ་ན་དེའི་ཕྱིར་དེ་ནི་རྩ་བ་ལ་སོགས་པའི་སྨན་བཀུས་པ་སྐྱུར་པོའོ་ཞེས་བྱ་བ་སྨྲས་ཏེ། སྨན་རྩ་བས་ཞེས་བྱ་བ་དེ་ནི་རྩ་བ་དང་སྡོང་བུ་དང་
འདབ་མ་དང་མེ་ཏོག་དང་འབྲས་བུའི་སྨན་ཆུས་སྦངས་ཤིང་བཀུས་པའི་ཁུ་བ་སྐྱུར་བག་ཅན་གྱུར་པ་ཡིན་པར་ཤེས་པར་བྱའོ། །ཐུན་ཚོད་དུ་རུང་བ་བསྟན་ནས། ད་ནི་ཞག་བདུན་པ་བཤད་པར་བྱ་སྟེ། དེའི་ཕྱིར་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བ་དག་ནི་ཞག་བདུན་པའོ་ཞེས་བྱ་བ་སྨྲས་
ཏེ། བུ་རམ་དང་ཧྭགས་དང་ལི་ཁ་ར་ལ་སོགས་པ་ཐམས་ཅད་ནི་བུ་རམ་གྱི་དབུ་བ་ཉིད་ཀྱིས་འཕངས་སོ་ཞེས་བྱ་བ་ནི། བུ་རམ་གྱི་དབུ་བ་ཞེས་བྱ་བ་ཉིད་དེ་དག་ལས་བྱུང་བ་ཡིན་པའི་ཕྱིར་རོ། །ཁྱིམ་བདག་གླང་བུ་ལྟ་བུས་དགེ་སློང་ཟན་ཆད་པ་རྣམས་ཀྱིས་དུས་མ་ལགས་པར་ཅི་ཞིག་འཚལ་དུ་རུང་བ་ཞེས་ཞུས་
པ་ན། བུ་རམ་དང་ཞུན་མར་དང་ཧྭགས་དང་ལི་ཁ་ར་དང་བཏུང་བ་དག་གོ་ཞེས་གསུངས་པ་གང་ཡིན་པ་དེ་ལས་ནི་འདི་ལྟར་ཤེས་པར་བྱ་སྟེ། དེ་དག་ལས་བཏུང་བ་དག་སྐབས་གཞན་དུ་ཐུན་ཚོད་དུ་རུང་བ་ཉིད་དུ་གསུངས་པས། ལྷག་མ་ཞུན་མར་དང་བུ་རམ་ལ་སོགས་པ་དེ་དག་ནི་ཞག་བདུན་

པ་ཉིད་ཡིན་པར་གནས་སོ། །བདུད་རྩི་ནི་ཞུན་མར་དང་འདྲ་བ་ཉིད་དོ་ཞེས་བྱ་བ་ནི། བཟའ་བར་བྱ་བ་ཉིད་དང་ཞག་བདུན་པ་ཉིད་ཀྱི་ཕྱིར་ཏེ། བདུད་རྩི་ནི་ཞུན་མར་དང་ངོ་བོ་ཉིད་དང་འདྲ་བའི་ཕྱིར་རོ། །ཞག་བསྐོལ་ཞིང་བཙགས་པ་དག་ནི་འབྲུ་མར་དང་འདྲ་བ་ཉིད་དོ་ཞེས་བྱ་བ་ཡང་།
བཟའ་བར་བྱ་བ་ཉིད་དང་ཞག་བདུན་པ་ཉིད་ཀྱི་ཕྱིར་ཏེ། གང་གི་ཚེ་ཞག་དག་བསྐོལ་ཞིང་བཙགས་པ་དེའི་ཚེ་གནས་བག་མེད་པ་ན་འབྲུ་མར་དང་འདྲ་བར་འགྱུར་བའི་ཕྱིར་རོ། །འདིར་གཞུང་ནི་ཞག་རྣམ་པ་ལྔ་པོ་འདི་དག་ནི་དུས་མ་ཡིན་པར་བསྐོལ། དུས་མ་ཡིན་པར་བཙགས། དུས་མ་ཡིན་
པར་བྱིན་ལེན་བྱས། དུས་མ་ཡིན་པར་བྱིན་གྱིས་བརླབས་ན་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་ཞིང་དུས་མ་ཡིན་པར་བཙགས་དུས་མ་ཡིན་པར་བྱིན་ལེན་བྱས་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་
ཤིང་དུས་མ་ཡིན་པར་བྱིན་ལེན་བྱས་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་དུས་སུ་བྱིན་ལེན་བྱས་ཤིང་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་
དུས་སུ་བྱིན་ལེན་བྱས་དུས་སུ་བྱིན་གྱིས་བརླབས་ན་འབྲུ་མར་ཉིད་དུ་ལོངས་སྤྱོད་པས་ཞག་བདུན་པར་ཡོངས་སུ་ལོངས་སྤྱོད་པར་བྱའོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། བསྐོལ་བ་དང་བཙགས་པ་གཉིས་ནི་དུས་སུ་བྱས་ཀྱང་རུང་། མ་བྱས་ཀྱང་རུང་། དུས་མ་ཡིན་པར་བྱས་ཀྱང་རུང་
ལ། བྱིན་ལེན་བྱས་པ་དང་བྱིན་གྱིས་བརླབས་པ་ནི་དུས་ཁོ་ནར་བྱ་དགོས་ཏེ། གང་གི་ཕྱིར་དུས་མ་ཡིན་པར་བྱིན་ལེན་བྱས་པ་དང་དུས་མ་ཡིན་པར་བྱིན་གྱིས་བརླབས་པ་ཡོངས་སུ་ལོངས་སྤྱད་པར་མི་བྱ་ཞིང་། དུས་སུ་བྱིན་ལེན་བྱས་པ་དང་དུས་མ་ཡིན་པར་བྱིན་གྱིས་བརླབས་པ་ཡང་ཡོངས་སུ་
ལོངས་སྤྱོད་པར་མི་བྱ་བ་དེའི་ཕྱིར་བྱིན་ལེན་དང་བྱིན་གྱིས་བརླབས་པ་གཉིས་ནི་དུས་ཁོ་ནར་བྱ་བ་ཡིན་ནོ། །ཆུ་བཙགས་པ་ལ་ནི་དུས་ངེས་པ་མེད་དོ། །ཞག་རྣམ་པ་ལྔ་ཞེས་གསུངས་པ་དེ་དག་ནི་གང་ཡིན། ཅི་དེ་དག་འབྲུ་མར་དང་འདྲ་བ་ཉིད་ཡིན་ནམ་འོན་ཏེ་འདྲ་བ་ཉིད་མ་ཡིན་ཞེ་ན། དེའི་ཕྱིར་

ཉའི་དང་རི་བོང་གི་དང་ཆུ་སྲིན་བྱིས་པ་གསོད་ཀྱི་དང་དོམ་གྱི་དང་ཕག་གིའོ་ཞེས་བྱ་བ་སྨྲས་ཏེ། དེ་ལྔའི་ཞག་ནི་འབྲུ་མར་དང་འདྲ་བ་ཉིད་ཡིན་ནོ། །དེ་དག་ནི་ནད་པ་ལ་ཕལ་ཆེར་སྦྱོར་བར་བྱེད་དོ་ཞེས་བྱ་བ་ནི། ཞག་རྣམ་པ་ལྔ་པོ་སྔར་བསྟན་པ་དེ་དག་ནི་འཇིག་རྟེན་ན་ནད་པ་ལ་ཕལ་ཆེར་ལན་མང་དུ་སྦྱོར་
ཞིང་ལྡུད་པར་བྱེད་པས། དེའི་ཕྱིར་ཞག་རྣམ་པ་ལྔ་ཞེས་གསུངས་ཀྱི་འདི་ལ་ངེས་པ་ནི་མེད་དོ། །སོས་པ་ཉིད་ནི་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་ནི། ནད་པ་གང་གིས་བྱིན་གྱིས་བརླབས་པ་དེ་ཉིད་ནད་སོས་པ་ཉིད་ན་ཞག་རྣམ་པ་ལྔ་པོ་དེ་དག་གཞན་དག་ནད་པའི་ཕྱིར་སློང་ན་སྦྱིན་པར་བྱ་
བའོ། །དེ་མེད་ན་སྨན་ཁང་དུའོ་ཞེས་བྱ་བ་ནི། སློང་བ་དེ་མེད་ན་དགེ་འདུན་གྱི་སྨན་ཁང་དུ་གཞག་པར་བྱ་བའོ། །སྨན་ཁུ་དང་མིག་སྨན་དག་ཀྱང་ངོ་ཞེས་བྱ་བ་ཡང་། སོས་པ་ཉིད་ན་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་དང་། དེ་མེད་ན་སྨན་ཁང་དུ་བཞག་གོ་ཞེས་བྱ་བར་སྦྱར་རོ།། །།
བམ་པོ་ལྔ་བཅུ་དྲུག་པ། ཞག་བདུན་པ་བསྟན་ནས། ད་ནི་འཚོ་བའི་བར་དུ་བཅང་བ་བཤད་པར་བྱ་སྟེ། དེའི་ཕྱིར་འཚོ་བའི་བར་དུ་བཅང་བ་ནི་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པའོ་ཞེས་བྱ་བ་སྨྲས་ཏེ། གང་དག་ཟས་ཀྱི་དོན་དུ་ཁྱབ་པར་བྱེད་
པ་མ་ཡིན་པ་དེ་དག་འཚོ་བའི་བར་དུ་བཅང་བ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་རྩ་བ་དག་གང་ཞེ་ན་འདི་ལྟ་སྟེ། གླ་སྒང་དང་ཤུ་དག་དང་ཡུང་ང་དང་སྒེའུ་གཤེར་དང་བོང་ང་དཀར་པོ་དག་གོ་ཞེས་བྱ་བ་སྨྲས་ཏེ། དེ་དག་ནི་མཚོན་པ་ཙམ་དུ་ཟད་ཀྱི། རྩ་བའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་
པ་གཞན་དག་ཀྱང་བསྡུའོ། །སྡོང་བུ་དག་གང་ཞེ་ན། ཙན་དན་དང་། སྤྱི་མོ་དང་། ཤུག་པ་དང་། སླེ་ཏྲེས་དང་། ཐང་ཤིང་དང་། སྐྱེར་པ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི་སྡོང་བུའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །འདབ་མ་དག་གང་
ཞེ་ན། བ་ཤ་དང་། ཀོ་ཤ་ཏ་ཀའི་དང་། པ་ཏོ་ལའི་དང་། ནིམ་པ་དང་། སབ་ཏ་པརྞའི་འདབ་མ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི་འདབ་མའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །མེ་ཏོག་དག་གང་ཞེ་ན། མེ་ཏོག་ནི་པཱ་ཤ་ཀ་དང་། ནིམ་པ་དང་།

ངྷ་ཏ་ཀི་དང་། ཀླུ་ཤིང་དང་། པད་མའི་ཟེ་བ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི། མེ་ཏོག་གི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །འབྲས་བུ་དག་གང་ཞེ་ན། ཨ་རུ་ར་དང་། སྐྱུ་རུ་ར་དང་། བ་རུ་ར་དང་། ན་ལེ་ཤམ་དང་།
པི་པི་ལིང་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི། འབྲས་བུའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་དག་བསྟན་ནས། འཚོ་བའི་བར་དུ་བཅང་བ་གཞན་བསྟན་པའི་ཕྱིར་ལྕི་བའོ་ཞེས་
བྱ་བ་སྨྲས་སོ། །དེ་ཉིད་བསྟན་པའི་ཕྱིར་འདི་ལྟ་སྟེ། ཤིང་ཀུན་དང་། པྲ་རྩི་དང་། རྒྱ་སྐྱེགས་དང་། སྤྲ་ཚིལ་དང་ཤིང་མ་ཞོའོ་ཞེས་བྱ་བ་སྨྲས་ཏེ། འདི་ལྟ་སྟེ་ཞེས་བྱ་བའི་སྒྲས་ནི་དཔེར་བསྟན་པའི་ཕྱིར་རོ། །ཤིང་མ་ཞོ་ཞེས་བྱ་བ་ནི། རྒྱ་སྐྱེགས་ལས་གཞན་པའི་ཤིང་དག་གི་ཤིང་མ་ཞོ་སྟེ། བསེ་རྩི་དང་ཐང་
ཆུ་ལ་སོགས་པ་དག་གོ། །འགྱུར་བྱེད་དོ་ཞེས་བྱ་བ་ནི། འགྱུར་བྱེད་ཀྱི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར་འདི་ལྟ་སྟེ། ཏིལ་གྱི་དང་རྒྱ་སྐྱེགས་ཀྱི་ཤིང་གི་དང་། ས་ཚུར་གྱི་དང་། ནས་ཀྱི་དང་། ནས་ཀྱི་གྲ་མའི་དང་། བ་ཤ་ཀའི་དང་། ཐལ་བའི་འགྱུར་བྱེད་དོ་ཞེས་བྱ་བ་སྨྲས་སོ། །ལན་ཚྭའི་ཞེས་བྱ་བ་ནི།
ལན་ཚྭའི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར། འདི་ལྟ་སྟེ། རྒྱམ་ཚ་དང་ཁ་རུ་ཚ་དང་ཚ་དམར་དང་རྒྱ་མཚོའི་ཚ་དང་བ་ཚའོ་ཞེས་བྱ་བ་སྨྲས་སོ། །སྨན་ཁུའོ་ཞེས་བྱ་བ་ནི། སྨན་མི་བཏགས་པར་བསྐོལ་བ་དང་བགྲུང་བ་དང་བཀྲུ་བར་བྱ་བའི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར་འདི་ལྟ་སྟེ།
ཤིང་ཨ་མྲ་དང་། ནིམ་བ་དང་། ཀོ་ཤམ་པ་དང་། ཤི་རི་ཤ་དང་། འཛམ་བུ་དག་གོ་ཞེས་བྱ་བ་སྨྲས་སོ། །ཇི་ཙམ་གྱིས་ཆོག་པ་བསྟེན་ཏོ་ཞེས་བྱ་བ་ནི་སྨན་ཁུའོ། །བཀྲུས་ནས་ཡང་ངོ་ཞེས་བྱ་བ་ནི། ཇི་ཙམ་གྱིས་ཆོག་པ་ཁོ་ན་བསྟེན་པའོ། །མི་མཉེ་བ་ལ་ལན་ཅིག་བཀྲུའོ་ཞེས་བྱ་བ་ནི། གང་ལ་རེག་
པས་མཉེ་བར་མི་བྱ་བ་དེ་ནི་མི་མཉེ་བ་ཞེས་བྱ་སྟེ། དེ་ལ་ནི་ལན་ཅིག་བཀྲུས་ཏེ་ཉིན་གཅིག་ལ་ལན་ཅིག་བཀྲུ་བའོ། །ངལ་བ་ལ་སོགས་པ་སྤང་བའི་ཕྱིར་ལན་དུ་མ་བཀྲུ་བ་བཀག་གོ། །སྨན་ཁུ་དེ་ལྟར་བསྟེན་ནོ་ཞེས་བྱ་བ་ནི། རྣམ་པ་དེ་ལྟར་ཞེས་བྱ་བའི་ཐ་ཚིག་སྟེ། འདི་ནི་སྐམ་རྔོ་ལ་སོགས་པ་ལ་

ཡང་དེ་བཞིན་ནོ། །སྨན་སྨོས་པས་དུག་སྨན་མ་བསྡུས་པ་ཉིད་མ་ཡིན་ནོ་ཞེས་བྱ་བ་ནི། འདིར་སྨན་ཞེས་སྨོས་པས་དུག་སྨན་ཡང་བསྡུས་པར་རིག་པར་བྱའོ། །དེ་ནི་འཚོ་བའི་བར་དུ་བཅང་བ་ཉིད་དོ་ཞེས་བྱ་བ་ནི། དུག་སྨན་དེ་ནི་འཚོ་བའི་བར་དུ་བཅང་བ་ཉིད་ཡིན་པའོ། །ཉེ་བ་འཁོར་བུ་རམ་ཤིང་ནི་དུས་
སུ་རུང་བའོ། །ཁུ་བ་ནི་དུས་ཚོད་དུ་རུང་བའོ། །བུ་རམ་ནི་ཞག་བདུན་པའོ། །བུ་རམ་ཤིང་དང་བུ་རམ་གཉིས་བསྲེགས་པའི་ཐལ་བ་ནི་འཚོའི་བར་དུ་བཅང་བའོ་ཞེས་གསུངས་པ་དེར། ཐལ་བ་འཚོའི་བར་དུ་བཅང་བ་ཉིད་དུ་གསུངས་པས། ཐལ་བ་ཡང་དུག་སྨན་གྱི་ཁོངས་སུ་གཏོགས་པ་ཉིད་ཡིན་ལ།
ས་ལ་སོགས་པ་ཟས་ཀྱི་དོན་དུ་ཁྱབ་པར་མི་བྱེད་པ་དག་ཀྱང་འཚོ་བའི་བར་དུ་བཅང་བ་ཉིད་དུ་རྣམ་པར་གནས་སོ་ཞེས་གསུངས་པས་དེའི་ཕྱིར་གཞུང་དེ་ནི་འདིར་ཁུངས་ཉིད་ཡིན་ནོ། །ནུ་ཞོས་འཚོ་བའི་བེའུ་རྣམས་ཀྱི་ལྕི་བ་དང་གཅིན་དག་ནི་དེ་ཞེས་བྱའོ་ཞེས་བྱ་བ་ནི། དུག་སྨན་ཞེས་བྱའོ་ཞེས་བྱ་བར་སྦྱར་
རོ། །འོག་ནས་ཐལ་བ་དང་ས་ཞེས་འབྱུང་བ་དག་ཀྱང་དུག་སྨན་ཞེས་བྱའོ་ཞེས་བྱ་བར་སྦྱར་རོ། །དེ་དག་ནི་དུག་ལ་ཕན་ནོ་ཞེས་བྱ་བ་ནི། ལྕི་བ་དང་གཅིན་ལ་སོགས་པ་དུག་སྨན་ཞེས་བྱ་བ་ཇི་སྐད་བསྟན་པ་དེ་དག་ནི་དུག་ཟོས་པ་ལ་ཕན་ནོ། །ཐལ་བའོ་ཞེས་བྱ་བ་ནི། ཐལ་བའི་སྡེ་ཚན་སྟོན་ཏེ། འདི་ཡང་
དུག་སྨན་ཞེས་བྱའོ། །དེ་ཉིད་བསྟན་པའི་ཕྱིར་ཤིང་ཀན་ཙ་ན་དང་ཀཱ་པཱི་ཏ་ལ་དང་། ཨ་ཤྭད་ཐ་དང་། ཨུ་དུམ་བཱ་ར་དང་། ནྱ་གྲོ་དྷ་རྣམས་ཀྱིའོ་ཞེས་བྱ་བ་སྨྲས་ཏེ། དེ་རྣམས་ཀྱི་ཐལ་བའོ། །དེའོ་ཞེས་བྱ་བ་ནི། ཐལ་བ་དེ་དུག་ལ་ཕན་པའོ། །ས་ནི་སོར་བཞིའི་འོག་གིས་བཟང་ངོ་ཞེས་བྱ་བ་ནི། དུག་ལ་ཕན་
པའི་ས་ནི་སོར་བཞིའི་འོག་གིས་བཟང་སྟེ། རླུང་དང་ཉི་མ་ལ་སོགས་པས་མ་ཉམས་པའི་ཕྱིར་རོ། །འདིར་གཞུང་ནི་དགེ་སློང་དག །དུག་སྨན་ཞེས་བྱ་བ་ནི། ལྕི་བ་དང་གཅིན་དང་ཐལ་བ་དང་ས་སྟེ། དེ་ལ་ལྕི་བ་ནི་བེའུ་འབྲངས་ནས་རིང་པོ་མ་ལོན་པའི་མའི་ནུ་ཞོས་འཚོ་བ་གང་དག་ཡིན་པ་དག་གི་སྟེ།
གཅིན་ཡང་དེ་དག་ཉིད་ཀྱིའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་དགེ་བསྙེན་དད་པ་ཅན་ལས་བླང་ངོ་ཞེས་བྱ་བ་ནི། དུག་སྨན་དེ་དགེ་བསྙེན་དད་པ་ཅན་ལས་བླང་བར་བྱ་བ་སྟེ། དགེ་བསྙེན་ལ་དད་པ་བྲི་ཡང་སྲིད་པས་དེས་ན་འདིར་དད་པ་ཅན་ཞེས་སྨོས་ཏེ། དུག་སྨན་དེ་དག་ནི་རྐྱེན་དུ་འབབ་པ་

མ་ཡིན་པའི་ཕྱིར་གསང་སྟེ་བྱ་བ་ཡིན་པར་རིགས་པས་དེའི་ཕྱིར་དགེ་བསྙེན་དད་པ་ཅན་ལས་བླང་བ་དང་བྱིན་ལེན་ཡང་དེས་བསྟབས་པར་གསུངས་སོ། །འོག་ནས་ཤ་དང་ནས་ཀྱི་སྦྱོར་བ་འབྱུང་བ་དག་ཀྱང་དེ་ཁོ་ན་བཞིན་དུ་བྱ་བར་རིག་པར་བྱའོ། །དེས་བྱིན་ལེན་བསྟབས་པར་བྱའོ་
ཞེས་བྱ་བ་ནི། དགེ་བསྙེན་དད་པ་ཅན་དེས་དུག་སྨན་དེའི་བྱིན་ལེན་བསྟབས་པར་བྱ་བའོ། །ཤའི་བདག་ཉིད་ཀྱི་སྨན་དེ་ཡང་ངོ་ཞེས་བྱ་བ་ཡང་། དགེ་བསྙེན་དད་པ་ཅན་དེས་བྱིན་ལེན་བསྟབས་པར་བྱ་བའོ། །གལ་ཏེ་དགེ་བསྙེན་དད་པ་ཅན་ཡང་མེད་ལ། ནད་པ་ཡང་ནད་ལ་བར་གྱུར་ན་དེའི་ཚེ་
གཞན་ལས་ཀྱང་བླང་བ་དང་བྱིན་ལེན་བྱ་སྟེ། གསོ་བའི་དོན་ནི་མ་གཏོགས་སོ་ཞེས་གསུངས་པའི་ཆོ་ག་ལས་རིག་པར་བྱའོ། །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་དགེ་སློང་ས་རི་ལ་དུག་སྨན་སྦྱིན་པར་བྱའོ་ཞེས་གསུངས་ན། བཙུན་པ་གང་གིས་བསྩལ་བར་བགྱི། ཉེ་བ་འཁོར་དགེ་
བསྙེན་དད་པ་ཅན་གྱིས་སོ། །བཙུན་པ་ཅི་ལགས་དེ་ཡང་བྱིན་ལེན་བགྱིད་དུ་སྩལ་ཏམ། ཉེ་བ་འཁོར་དེ་ཡང་བྱིན་ལེན་བྱེད་དུ་གཞུག་གོ། །བཙུན་པ་སུས་བྱིན་ལེན་བགྱིད་དུ་སྩལ། ཉེ་བ་འཁོར་དགེ་བསྙེན་དད་པ་ཅན་གྱིས་སོ་ཞེས་གསུངས་པ་ཡིན་ནོ། །ཐམས་ཅད་ཤན་པའི་གནས་ནས་བླང་ངོ་ཞེས་བྱ་
བ་ནི། ཤ་རློན་པ་འབའ་ཞིག་ཏུ་མ་ཟད་ཀྱི། ཤའི་སྨན་ཐམས་ཅད་དགེ་བསྙེན་དད་པ་ཅན་གྱིས་ཤན་པའི་གནས་ནས་བླང་བའོ། །དེ་ནི་བྱ་བ་ཉིད་ཡིན་ནོ་ཞེས་བྱ་བ་ནི། དགེ་བསྙེན་དད་པ་ཅན་གྱིས་ཤན་པའི་གནས་ནས་ཤའི་སྨན་བླང་བ་དེ་ནི་བྱ་བ་མ་ཡིན་པ་མ་ཡིན་གྱི། བྱ་བ་ཉིད་ཡིན་ཏེ་དེ་ལ་བྱ་བའི་
ཆ་མ་ཡིན་པར་དོགས་པར་མི་བྱའོ། །གལ་ཏེ་དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་བ་ལང་རྒན་པའི་ལྕི་བའི་ནས་ཀྱིས་ཆོག་པར་བྱའི་གཞན་བཟའ་བར་མི་བྱའོ་ཞེས་བྱ་བ་ནི། གལ་ཏེ་དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན། ནས་ལས་
བྱས་པའི་སྨན་དེའི་དོན་དུ་བ་ལང་རྒན་རྒོན་གྱི་ལྕི་བའི་ནང་ནས་བྱུང་བའི་ནས་ཀྱིས་ཆོག་པར་བྱའི། ནས་གཞན་དག་ནི་དུས་མ་ཡིན་པར་བཟའ་བར་མི་བྱའོ། །དེས་མ་ཆོག་ལ་ནད་པ་ཡང་ནད་ལ་བར་འགྱུར་བ་ལྟ་ན་དེའི་འོག་ཏུ་གཟོད་ན་བ་དུས་སོ་ཞེས་གསུངས་པ་དང་སྦྱར་ཏེ། ནས་གཞན་ལས་

བྱས་པའི་སྨན་ཡང་བཟའ་བར་བྱའོ། །གལ་ཏེ་སྐྱོ་མ་ཚགས་ཀྱིས་བཙགས་ན་སྟེ་གཞན་ནི་མ་ཡིན་ནོ་ཞེས་བྱ་བ་ནི། དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་བ་ལང་རྒན་པའི་ལྕི་བའི་ནས་ཀྱིས་ཆོག་པར་བྱ་བ་དེ་ཡང་ནས་དེ་ལས་བྱས་པའི་སྐྱོ་མ་གལ་ཏེ་ཚགས་
ཀྱིས་བཙགས་ན་དེས་ཆོག་པར་བྱ་བ་ཡིན་གྱི། ཚགས་ཀྱིས་བཙགས་པ་དེ་ལས་གཞན་པ་ཚགས་ཀྱིས་མ་བཙགས་པ་དག་ནི་བཟའ་བར་མི་བྱའོ། །གལ་ཏེ་ཤའི་སྨན་དགོས་པ་ཉིད་ཡིན་ན་མཚའི་རྟུག་པའི་ཤེས་སོ་ཞེས་བྱ་བ་ནི། གལ་ཏེ་དུས་མ་ཡིན་པར་ཤ་ལས་བྱས་པའི་སྨན་དགོས་པ་ཉིད་ཡིན་ན་
དེའི་དོན་དུ་མཚའི་རྟུག་པའི་ནང་ནས་བྱུང་བའི་ཤས་ཆོག་པར་བྱའི། ཤ་གཞན་དུས་མ་ཡིན་པར་བཟའ་བར་མི་བྱའོ། །དེས་མ་ཆོག་ལ་ནད་པ་ཡང་ནད་ལ་བར་འགྱུར་བ་ལྟ་ན་དེའི་འོག་ཏུ་གཟོད་ཤ་གཞན་ལས་བྱས་པའི་སྨན་ཡང་བཟའ་བར་བྱའོ། །གལ་ཏེ་ཁུ་བ་ཚགས་ཀྱིས་བཙགས་ན་སྟེ་
གཞན་ནི་མ་ཡིན་ནོ་ཞེས་བྱ་བ་ནི། དུས་མ་ཡིན་པར་ཤ་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་མཚའི་རྟུག་པའི་ནང་ནས་བྱུང་བའི་ཤས་ཆོག་པར་བྱ་བ་དེ་ཡང་ཤ་དེ་ལས་བྱས་པའི་ཁུ་བ་གལ་ཏེ་ཚགས་ཀྱིས་བཙགས་ན་དེས་ཆོག་པར་བྱ་བ་ཡིན་གྱི། ཚགས་ཀྱིས་བཙགས་པ་དེ་ལས་
གཞན་པ་ཚགས་ཀྱིས་མ་བཙགས་པ་དག་ནི་བཟའ་བར་མི་བྱའོ། །གཞན་དང་བཅས་པ་ལ་དེ་ལྷག་པར་སྤྱད་པ་ཡོད་དོ་ཞེས་བྱ་བ་ལ། གཞན་དང་བཅས་པ་ཞེས་བྱ་བ་ནི། དུས་སུ་རུང་བ་དང་བཅས་པའི་ཐུན་ཚོད་དུ་རུང་བ་དང་། ཐུན་ཚོད་དུ་རུང་བ་དང་བཅས་པའི་ཞག་བདུན་པ་དང་། ཞག་
བདུན་པ་དང་བཅས་པའི་འཚོ་བའི་བར་དུ་བཅང་བའོ། །དེ་ལྷག་པར་སྤྱད་པ་ཡོད་དོ་ཞེས་བྱ་བ་ནི། ཐུན་ཚོད་དུ་རུང་བའི་དེ་ལ་དུས་སུ་རུང་བའི་ཟས་དེ་ལྷག་པར་སྤྱད་པ་ཡོད་པ་དང་། ཞག་བདུན་པ་ལ་ཐུན་ཚོད་དུ་རུང་བའི་ཟས་དེ་ལྷག་པར་སྤྱད་པ་ཡོད་པ་དང་། འཚོ་བའི་བར་དུ་བཅང་བ་ལ་ཞག་
བདུན་པའི་ཟས་དེ་ལྷག་པར་སྤྱད་པ་ཡོད་པ་ཉིད་ཡིན་པའོ། །དེའི་ཕྱིར་དེ་དང་བཅས་པ་ལ་ཆོ་ག་སྔ་མས་འཇུག་པར་བྱའོ་ཞེས་བྱ་བ་ནི། གང་གི་ཕྱིར་གཞན་དང་བཅས་པ་ལ་དེ་ལྷག་པར་སྤྱད་པ་ཡོད་པ་དེའི་ཕྱིར་གཞན་དེ་དང་བཅས་པ་ཕྱི་མ་ལ་གཞན་གྱི་ཆོ་ག་སྔ་མས་འཇུག་པར་བྱའོ་ཞེས་བྱ་

བར་སྦྱར་རོ། །དེ་དང་བཅས་ལ་ཞེས་བྱ་བ་ནི། དུས་སུ་རུང་བ་དེ་དང་བཅས་པའི་ཐུན་ཚོད་དུ་རུང་བ་དང་། ཐུན་ཚོད་དུ་རུང་བ་དེ་དང་བཅས་པའི་ཞག་བདུན་པ་དང་། ཞག་བདུན་པ་དེ་དང་བཅས་པའི་འཚོ་བའི་བར་དུ་བཅང་བ་ལའོ། །ཆོ་ག་སྔ་མས་འཇུག་པར་བྱའོ་ཞེས་བྱ་བ་ནི། ཐུན་ཚད་
དུ་རུང་བ་ལ་ནི་དུས་སུ་རུང་བའི་ཆོ་གས་འཇུག་པར་བྱ་ཞིང་དུས་སུ་བཟའ་བར་བྱའི། ཐུན་ཚོད་དུ་བཟའ་བར་མི་བྱ་བ་དང་། ཞག་བདུན་པ་ལ་ནི་ཐུན་ཚོད་དུ་རུང་བའི་ཆོ་གས་འཇུག་པར་བྱ་ཞིང་། ཐུན་ཚོད་དུ་བཟའ་བར་བྱའི། ཞག་བདུན་པར་བཟའ་བར་མི་བྱ་བ་དང་། འཚོ་བའི་བར་དུ་བཅང་བ་ལ་ནི་ཞག་
བདུན་པའི་ཆོ་གས་འཇུག་པར་བྱ་ཞིང་ཞག་བདུན་པར་བཟའ་བར་བྱའི། འཚོ་བའི་བར་དུ་བཅང་བར་བཟའ་བར་མི་བྱ་བའོ། །འདིར་གཞུང་ནི་ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བ་དུས་སུ་རུང་བ་དང་འདྲེས་པ་དག་ནི་དུས་ཁོ་ནར་ཡོངས་སུ་ལོངས་སྤྱད་པར་བྱའི་
དུས་མ་ཡིན་པར་ཡོངས་སུ་ལོངས་སྤྱད་པར་མི་བྱའོ། །ཞག་བདུན་པ་དང་འཚོ་བའི་བར་དུ་བཅང་བ་ཐུན་ཚོད་དུ་རུང་བ་དང་འདྲེས་པ་དག་ནི་ཐུན་ཚོད་ཁོ་ནར་ཡོངས་སུ་ལོངས་སྤྱད་པར་བྱའི། ཐུན་ཚོད་ཀྱི་མཐའ་ལས་ཡོལ་བར་ཡོངས་སུ་ལོངས་སྤྱད་པར་མི་བྱའོ། །འཚོ་བའི་བར་དུ་བཅང་བ་ཞག་
བདུན་པ་དང་འདྲེས་པ་ནི་ཞག་བདུན་པ་ཁོ་ནར་ཡོངས་སུ་ལོངས་སྤྱད་པར་བྱའི། འཚོ་བའི་བར་དུ་བཅང་བ་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་ནོ་ཞེས་བྱ་བ་ནི། དེ་སྨན་གཞན་དང་ལྷན་ཅིག་
འདྲེས་ཀྱང་རང་གི་ངོ་བོ་ཉིད་ཀྱི་རྣམ་པ་ལས་གཞན་དུ་མ་གྱུར་པ་ནི་སྔོན་གྱི་རང་གི་ངོ་བོ་ཉིད་མ་ཡིན་པ་མ་ཡིན་ཏེ། སྔོན་གྱི་རང་གི་ངོ་བོ་ཉིད་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་གཞན་དང་མ་འདྲེས་པ་ལ་ནི་རང་གི་ཆོ་གས་རུང་བར་བྱ་བ་མི་འགྲུབ་པ་མ་ཡིན་ནོ་ཞེས་བྱ་བ་ནི། གང་གི་ཕྱིར་
རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་པ་དེའི་ཕྱིར་སྨན་དེ་སྨན་གཞན་དང་རེག་ཅིང་ཕྲད་པར་གྱུར་དུ་ཟིན་ཀྱང་གཞན་དང་མ་འདྲེས་ཤིང་རང་བཞིན་ཐ་དད་པར་གནས་པ་ལ་ནི་རང་གི་ཆོ་གས་རུང་བར་བྱ་བ་མི་འགྲུབ་པ་མ་ཡིན་ཏེ། འགྲུབ་པ་ཁོ་ན་ཡིན་ནོ། །འདི་

སྐད་བསྟན་ཏེ། དུས་སུ་རུང་པའི་ནང་ན་འདུག་པའི་ཐུན་ཚོད་དུ་རུང་བ་དུས་སུ་རུང་བ་དང་མ་འདྲེས་པ་ནི་ཐུན་ཚོད་དུ་རུང་བ་ཉིད་དུ་ཡོངས་སུ་ལོངས་སྤྱད་དུ་རུང་ལ། དེ་བཞིན་དུ་ཐུན་ཚོད་དུ་རུང་བའི་ནང་ན་འདུག་པའི་ཞག་བདུན་པ་ཐུན་ཚོད་དུ་རུང་བ་དང་མ་འདྲེས་པ་ནི་ཞག་བདུན་པ་ཉིད་དུ་ཡོངས་སུ་
ལོངས་སྤྱད་པར་རུང་བ་དང་། ཞག་བདུན་པའི་ནང་ན་འདུག་པའི་འཚོ་བའི་བར་དུ་བཅང་བ་ཞག་བདུན་པ་དང་མ་འདྲེས་པ་ནི་འཚོ་བའི་བར་དུ་བཅང་བ་ཉིད་དུ་ཡོངས་སུ་ལོངས་སྤྱད་པར་རུང་སྟེ། རང་རང་གི་ཆོ་གས་འཇུག་པར་བྱར་རུང་ངོ་ཞེས་བྱ་བའི་ཐ་ཚིག་གོ། །བུ་རམ་བསྒོང་བའི་ཕྱིར་འབྲས་
ཕྱེའི་ནང་དུ་གཞག་པ་ནི་བཀྲུ་བས་རང་ཁོ་ནའི་གྲངས་ཉིད་དུ་འགྲུབ་པོ་ཞེས་བྱ་བ་ནི། བུ་རམ་གོང་བུར་བྱ་བའི་ཕྱིར་འབྲས་ཕྱེའི་ནང་དུ་གཞག་སྟེ་གོང་བུར་གྱུར་པ་ན་འབྲས་ཕྱེའི་བག་ཆགས་པ་ནི་ཆུས་བཀྲུས་པས་ཞག་བདུན་པ་ཞེས་བྱ་བ་རང་ཁོ་ནའི་གྲངས་ཉིད་དུ་འགྲུབ་པར་འགྱུར་བའོ། །འགོར་
གྱི་གཟུངས་ནི་བུ་རམ་ཉིད་དུ་ཤེས་པར་བྱའོ་ཞེས་བྱ་བ་ནི། གལ་ཏེ་བུ་རམ་བསྐོལ་བའི་དུས་ན་འགོར་དང་ལིང་ཉིད་དུ་མི་བཏུབ་པ་འགོར་དང་ལིང་ཉིད་དུ་བྱ་བའི་ཕྱིར་འབྲས་ཀྱི་བག་ཕྱེ་ལ་སོགས་པ་ལྡུགས་པ་དེ་ནི་བུ་རམ་ཉིད་ཡིན་པས་ཞག་བདུན་པ་ཉིད་ཡིན་གྱི། དུས་སུ་རུང་བ་ཉིད་ནི་མ་
ཡིན་པར་ཤེས་པར་བྱའོ། །བྱིན་གྱིས་བརླབ་པ་ལ་ནི་སོག་འཇོག་མི་འབྱུང་ངོ་ཞེས་བྱ་བ་ནི། གལ་ཏེ་སྨན་ཞག་བདུན་པ་དང་འཚོའི་བར་དུ་བཅང་བར་བྱིན་གྱིས་བརླབས་པར་གྱུར་ན་དེ་ལ་དུས་དེ་ཙམ་གྱིས་སོག་འཇོག་གི་ཉེས་པ་འབྱུང་བར་མི་འགྱུར་བར། འདིར་གཞུང་ནི་བཙུན་པ་བྲོ་
འཚལ་བས་བྱིན་ལེན་བགྱིས་པ་དང་། བྱིན་གྱིས་བརླབས་པ་ཡོངས་སུ་ལོངས་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །བྲོ་འཚལ་བ་ཞེས་སྨོས་པས་ནི་ན་བ་ལ་རུང་བ་ཉིད་ཡིན་པར་བསྟན་ཏོ། །ནད་པའི་ཆེད་དུ་ཡོངས་སུ་ལོངས་སྤྱོད་པའི་ཕྱིར་རང་གིས་དུས་ཀྱི་མཐའ་
བར་དུ་བྱིན་གྱིས་བརླབ་པར་བྱའོ་ཞེས་བྱ་བ་ནི། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བ་དག་རང་རང་གི་དུས་ཀྱི་མཐའ་ཚུན་ཆད་དུ་བྱིན་གྱིས་བརླབ་པར་བྱ་བའོ། །དུས་སུ་རུང་བ་ནི་བྱིན་གྱིས་བརླབ་མི་དགོས་ཏེ་དེ་བྱིན་གྱིས་བརླབས་པ་དོན་མེད་པའི་ཕྱིར་

རོ། །དེ་དག་གི་སྔགས་ནི། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་སྨན་ཐུན་ཚོད་དུ་རུང་བ་འདི་དག་བདག་དང་ཚངས་པ་མཚུངས་པར་སྤྱོད་པ་རྣམས་ཀྱིར་བགྱི་བར་ཐུན་ཚོད་དུ་རུང་བར་བྱིན་གྱིས་བརླབ་བོ། །ལན་གསུམ་དུ་བཟླས། ཐབས་
ཡིན་ནོ། །ལེགས་སོ་ཞེས་གསུངས་པ་དང་། ཞག་བདུན་པ་དང་། འཚོ་བའི་བར་དུ་བཅང་བ་དག་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །དུས་གང་གི་ཚེ་བྱིན་གྱིས་བརླབ་པར་བྱ་ཞེ་ན། དེའི་ཕྱིར་ཟས་སྔ་མའི་ཚེའོ་ཞེས་བྱ་བ་སྨྲས་ཏེ། གུང་ཚིགས་ཀྱི་མདུན་རོལ་དུ་ཟས་བཟའ་བ་ཐམས་ཅད་ཀྱི་
དུས་གང་ཡིན་པ་དེ་ནི་ཟས་སྔ་མལི་དུས་ཏེ་ཆོ་གའི་གཞི་ཞེས་བྱ་བ་ཡིན་པས་དུས་དེར་བྱིན་གྱིས་བརླབ་པར་བྱའོ། །ཇི་ལྟར་ཞེ་ན། དེའི་ཕྱིར་བྱིན་ལེན་བྱས་ཏེའོ་ཞེས་བྱ་བ་སྨྲས་ཏེ། བྱིན་ལེན་བྱས་ཏེ་བྱིན་གྱིས་བརླབ་པར་བྱའོ། །བྱིན་ལེན་མ་བྱས་པ་དང་སོག་འཇོག་དང་འདྲེས་པ་བསྲུང་བར་
བྱ་བ་ཡིན་ནོ་ཞེས་བྱ་བ་ནི། བྱིན་གྱིས་རློབ་པའི་ཚེ་ན་བྱིན་ལེན་མ་བྱས་པར་བྱིན་གྱིས་བརླབ་ཏུ་ཡང་མི་རུང་ལ། དྲི་མ་ལ་སོགས་པ་དང་འབགས་པས་སོག་འཇོག་དང་འདྲེས་པ་ལ་བྱིན་གྱིས་བརླབ་ཏུ་ཡང་མི་རུང་བས་དེའི་ཕྱིར་དེ་གཉིས་བསྲུང་བར་བྱ་བའོ། །དེའི་ཕྱིར་ལག་པ་གཉིས་བསྙལ་
ནས་སོ་ཞེས་བྱ་བ་ནི། གང་གི་ཕྱིར་བྱིན་ལེན་མ་བྱས་པ་དང་སོག་འཇོག་དང་འདྲེས་པ་བསྲུང་བར་བྱ་བ་ཡིན་པ་དེའི་ཕྱིར་ལག་པ་གཉིས་བསྙལ་ནས་བྱིན་ལེན་བྱས་ཏེ་བྱིན་གྱིས་བརླབ་པར་བྱ་བའོ། །དེས་ན་བྱིན་ལེན་མ་བྱས་པ་དང་སོག་འཇོག་དང་འདྲེས་པ་མེད་པར་འགྱུར་རོ། །ལག་ཉར་
བླངས་པ་དང་སོག་འཇོག་བྱས་པ་དང་བྱིན་ལེན་མ་བྱས་པ་དང་ནང་དུ་ཞག་ལོན་པ་དང་ནང་དུ་བཙོས་པ་དང་དགེ་སློང་གིས་བཙོས་པ་དག་ལ་བྱིན་གྱིས་བརླབ་པ་མི་འཆགས་སོ་ཞེས་བྱ་བ་ལ། འདིར་གཞུང་ནི་ཞུ་བ་ལས། བཙུན་པ་དུས་སུ་རུང་བ་དང་ཐུན་ཚོད་དུ་རུང་བ་དང་ཞག་བདུན་པ་
དང་འཚོའི་བར་དུ་བཅང་བའི་སྨན་གང་དག་སུག་ཉར་བླངས་པ་དང་བྱིན་ལེན་མ་བགྱིས་པ་དང་ནང་དུ་དགུང་ལོན་པ་དང་ནང་དུ་བསྒྲལ་བ་དང་རང་གིས་བསྒྲལ་བ་དང་དགེ་སློང་གིས་བསྒྲལ་བ་དེ་དག་ཡོངས་སུ་ལོངས་སྤྱོད་པར་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །

རོ་དང་སླ་བ་ཉིད་ཡོངས་སུ་གྱུར་ན་སོག་འཇོག་བྱས་པ་ཉིད་ཡིན་ནོ་ཞེས་བྱ་བ་ནི། བྱིན་གྱིས་བརླབས་པའི་བཏུང་བ་རྒུན་ཆུ་ལ་སོགས་པའི་རོ་མྱོས་པར་མི་འགྱུར་བ་ཉིད་ལ་མྱོས་པར་འགྱུར་བ་ཉིད་དུ་ཡོངས་སུ་གྱུར་པ་དང་། སླ་བ་བཞིན་སྣང་བ་ལས་བཞིན་མི་སྣང་བ་ཉིད་དུ་ཡོངས་སུ་གྱུར་ན། དེའི་
ཚེ་སོག་འཇོག་བྱས་པ་ཉིད་ཡིན་ཏེ། དེ་ཡང་བྱིན་ལེན་བྱས་ཤིང་བྱིན་གྱིས་བརླབས་པ་ལ་སོག་འཇོག་བྱས་པར་འགྱུར་གྱི་བྱིན་ལེན་མ་བྱས་པ་ལ་ནི་མི་འགྱུར་ཏེ། བྱིན་ལེན་མ་བྱས་པ་ལ་སོག་འཇོག་མི་སྲིད་པའི་ཕྱིར་རོ། །གལ་ཏེ་རོ་དང་སླ་བ་གཉི་ག་ཡོངས་སུ་གྱུར་ན་ཡང་བཏུང་བར་མི་བྱ་བ་
ཉིད་ཡིན་ནོ། །རོ་འབའ་ཞིག་ཡོངས་སུ་གྱུར་ན་ཡང་བཏུང་བར་མི་བྱ་བ་ཉིད་ཡིན་ནོ། །ཇི་སྟེ་སླ་བ་འབའ་ཞིག་ཡོངས་སུ་གྱུར་པ་ཡང་བཏུང་བར་མི་བྱ་བ་ཉིད་ཡིན་ཏེ། བྱིན་ལེན་མ་བྱས་པའི་ཕྱིར་རོ། །དེ་བས་ན་བཏུང་བ་བྱིན་ལེན་བྱས་ཤིང་བྱིན་གྱིས་བརླབས་པ་རོ་དང་སླ་བ་ཉིད་ཡོངས་སུ་
གྱུར་ན་རང་གི་དུས་ཀྱི་མཐའི་མདུན་རོལ་དུ་ཡང་སོག་འཇོག་བྱས་པ་ཉིད་དུ་འགྱུར་ཏེ། འདིར་དོན་ནི་དེ་ཡིན་ནོ། །འདི་གཉིས་ཀྱིས་ནི་ངོ་བོ་ཉིད་གྱུར་པར་བསྟན་ཏེ། དེས་ན་དེ་གཉིས་ལས་གཅིག་ཏུ་གྱུར་ན་ཡང་སོག་འཇོག་བྱས་པ་ཉིད་ཡིན་ནོ། །འདིར་གཞུང་ནི་སིལ་བུའི་བུ་རམ་གྱི་བཏུང་
བའི་སྐབས་ནས། བཙུན་པ་བཏུང་བ་བཙགས་པ་དགུང་བདུན་པར་བྱིན་གྱིས་བརླབ་ཏུ་རུང་ངམ། ཉེ་བ་འཁོར་རུང་ངོ་། །བཙུན་པ་ཡུན་ཇི་སྲིད་དུ་གཞག་པར་འཚལ་བར་བགྱི། ཉེ་བ་འཁོར་ཤིན་ཏུ་སླ་ཞིང་མི་སྐྱུར་ལ་རང་གི་ངོ་བོ་ཉིད་མི་སྤོང་བ་དེ་སྲིད་དུའོ་ཞེས་གསུངས་པ་ཡིན་ནོ། །
བྱིན་གྱིས་བརླབས་པ་འོག་མ་དང་ལྷན་ཅིག་ཡོངས་སུ་ལོངས་སྤྱད་པར་མི་བྱའོ་ཞེས་བྱ་བ་ནི། ཐུན་ཚོད་དུ་རུང་བ་བྱིན་གྱིས་བརླབས་པ་དུས་སུ་རུང་བ་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་བ་དང་། ཞག་བདུན་པར་བྱིན་གྱིས་བརླབས་པ་དུས་སུ་རུང་བ་དང་ཐུན་ཚོད་དུ་རུང་བ་
དག་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་བ་དང་། འཚོ་བའི་བར་དུ་བཅང་བར་བྱིན་གྱིས་བརླབས་པ་དུས་སུ་རུང་བ་དང་ཐུན་ཚོད་དུ་རུང་བ་དང་ཞག་བདུན་པ་རྣམས་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་སྟེ། འདིར་བྱེ་བྲག་ཏུ་མ་བཅད་པས་བྱིན་གྱིས་བརླབས་པ་དང་

སོག་འཇོག་གི་དུས་ལ་མ་བབ་པ་དང་། ལྷན་ཅིག་ཅེས་བྱ་བར་ཤེས་པར་བྱའོ། །འདིར་གཞུང་ནི་མཽད་གལ་གྱི་བུ། དེ་ལ་ཐུན་ཚོད་དུ་རུང་བ་གང་ཡིན་པ་དང་། ཞག་བདུན་པ་གང་ཡིན་པ་དང་། འཚོའི་བར་དུ་བཅང་བ་གང་ཡིན་པ་དེ་དུས་སུ་རུང་བ་དང་འདྲེས་ན་ཡོངས་སུ་
ལོངས་སྤྱོད་པར་མི་བྱའོ། །ཞག་བདུན་པ་གང་ཡིན་པ་དང་། འཚོའི་བར་དུ་བཅང་བ་གང་ཡིན་པ་དེ་ཐུན་ཚོད་དུ་རུང་བ་དང་འདྲེས་ན་ཡང་ཡོངས་སུ་ལོངས་སྤྱད་པར་མི་བྱའོ། །འཚོའི་བར་དུ་བཅང་བ་གང་ཡིན་པ་དེ་ཞག་བདུན་པ་དང་འདྲེས་ན་ཡང་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་
པ་ཡིན་ནོ། །སྨན་གྱི་གོ་རིམས་ནི་དཔེའོ་ཞེས་གསུངས་པ་ནི། སྔར་དེ་ནི་རྣམ་པ་བཞིའོ་ཞེས་སྨོས་པས་དུས་སུ་རུང་བ་དང་ཐུན་ཚོད་དུ་རུང་བ་དང་། ཞག་བདུན་པ་དང་འཚོའི་བར་དུ་བཅང་བ་ཞེས་སྨན་རྣམ་པ་བཞི་སྨོས་པའི་གོ་རིམས་དེ་ནི་དཔེ་ཙམ་དུ་ཟད་དེ། དེས་ན་འདིས་མིག་སྨན་ལ་སོགས་པ་དག་
ཀྱང་འཕངས་པ་ཉིད་ཡིན་ནོ། །དེའི་ཕྱིར་མིག་སྨན་བསྟེན་པར་བྱའོ་ཞེས་བྱ་བ་སྨྲས་ཏེ། མིག་སྨན་བསྟེན་དུ་རུང་བའོ། །སྨན་མ་ཡིན་པའི་དོན་དུ་མི་བྱའོ་ཞེས་བྱ་བ་ལ། སྒེག་པའི་དོན་ནི་སྨན་མ་ཡིན་པའི་དོན་ཏེ། དེའི་དོན་དུ་མིག་སྨན་བསྟེན་པར་མི་བྱ་བའོ། །དེའི་སྣོད་རིགས་པའོ་ཞེས་བྱ་
བ་ནི། མིག་སྨན་དེའི་སྣོད་རུང་བ་ཉེ་བར་གཞག་པར་བྱ་བའོ། །གང་གིས་སྣོད་ཅི་ཡིན་ཞེ་ན། དེའི་ཕྱིར་མིག་སྨན་སྐྱེར་ཁཎྜའི་ནི་ཟ་མ་ཏོག་གོ་ཞེས་བྱ་བ་སྨྲས་སོ། །མིག་སྨན་རི་ལུའི་ནི་སྒྱེའུའོ་ཞེས་བྱ་བ་ནི། དེའི་སྣོད་སྒྱེའུའོ། །མིག་སྨན་དུ་བ་དང་། སྦྲུས་པ་དང་ཕྱེ་མ་རྣམས་ཀྱི་ནི་དོང་བུའོ་
ཞེས་བྱ་བ་ནི། མིག་སྨན་དུ་བ་དང་མིག་སྨན་སྦྲུས་པ་དང་མིག་སྨན་ཕྱེ་མ་རྣམས་ཀྱི་སྣོད་ནི་སྨྱིག་མ་ལ་སོགས་པའི་དོང་བུའོ། །ཐུར་མ་བཅང་བར་བྱའོ་ཞེས་བྱ་བ་ནི། མིག་བསྐུ་བའི་ཕྱིར་རོ། །ཟངས་མ་དང་ལྕགས་དག་གིས་བཟང་ངོ་ཞེས་བྱ་བ་ནི། ཐུར་མའོ། །ཅི་དེ་གཉིས་ཐམས་ཅད་ཀྱི་བཟང་
ངམ་ཞེ་ན། དེའི་ཕྱིར་རང་འཁྲུངས་དག་གོ་ཞེས་བྱ་བ་སྨྲས་ཏེ། རང་བཞིན་གྱིས་གྲུབ་པ་དག་གམ་བཞུས་ཏེ་བླུགས་པ་དག་གོ། །ནད་པས་སྨན་གཞུག་པའི་ཕྱིར་མཆན་ཁུག་བཅང་བར་བྱའོ་ཞེས་བྱ་བ་ལ། མཆན་ཁུག་ཅེས་བྱ་བ་ནི། ལྕུག་མ་ལ་སོགས་པ་ལས་བྱས་པའི་སྨན་གྱི་སྣོད་

ཀོ་ལྤགས་ཀྱིས་བཅིངས་པ་རིམ་པ་རེ་རེ་ཡང་སྨན་ཐ་དད་པར་གཞུག་པར་བྱ་བའི་ཕྱིར་མིག་མང་པོ་ཡོད་ཅིང་ཁ་བཅད་དུ་རུང་བའོ། །དེར་མ་ཤོང་པ་ཉིད་ཡིན་ན་བྲུངས་སམ་ཐུམ་པོ་བྱས་ཏེ་བཅེར་རོ་ཞེས་བྱ་བ་ནི། མཆན་ཁུག་དེར་སྨན་མངས་ལ་སྣོད་ཆུངས་པས་མི་ཤོང་པ་ཉིད་ཡིན་ན་དེའི་ཚེ་སྨན་གྱི་
ཐུམ་པོ་དག་བྲུངས་སུ་བྱས་ཏེ། གཅིག་གི་སྟེང་དུ་གཅིག་བཅེར་བར་བྱ་བའམ། ཕྱི་ཐུམ་གཅིག་ཏུ་བྱས་ཏེ་གཞག་པར་བྱའོ་ཞེས་བྱ་བའི་ཐ་ཚིག་གོ། །བཅུག་པ་མི་འདྲུལ་བར་བྱ་བ་ཕྱིར་དུས་སུ་བསྐམ་མོ་ཞེས་བྱ་བ་ནི། སྨན་མཆན་ཁུག་ཏུ་བཅུག་པ་རླན་གྱིས་མི་འདྲུལ་བར་བྱ་བའི་ཕྱིར་དུས་དུས་སུ་
བསྐམ་པར་བྱ་བའོ། །གང་དུ་བསྐམ་པར་བྱ་ཞེ་ན་དེའི་ཕྱིར་ཉི་གྲིབ་ལའོ་ཞེས་བྱ་བ་སྨྲས་ཏེ། ཉི་མ་དང་གྲིབ་མ་འདྲེས་མའི་ནང་དུ་བསྐམ་པར་བྱའོ། །བསྐམས་ན་མཐུ་འབྲིའོ་ཞེས་བྱ་བ་ནི། ཉི་མ་ཚ་བ་འབའ་ཞིག་ལ་བསྐམས་ན་སྨན་རྣམས་ཀྱི་མཐུ་འབྲི་བར་འགྱུར་བའོ། །འདིས་ནི་སྨན་ཐམས་ཅད་
བསྐམ་པ་བསྟན་པ་ཡིན་གྱི་མཆན་ཁུག་གི་ཡུལ་འབའ་ཞིག་ཏུ་མ་ཟད་དོ། །མ་རུང་བར་འགྱུར་བའི་རྒྱུ་བྱུང་ན་རང་གིས་དྲུབ་པར་བྱའོ་ཞེས་བྱ་བ་ནི། རླུང་དང་ཆར་པ་ལ་སོགས་པ་སྨན་མ་རུང་བར་འགྱུར་བའི་རྒྱུ་བྱུང་ན་དགེ་སློང་རང་གིས་བསྡུ་ཞིང་དྲུབ་པར་བྱ་བའོ། །ཅི་གནས་སྐབས་ཐམས་
ཅད་དུའམ་ཞེ་ན་དེའི་ཕྱིར། བསྙེན་པར་མ་རྫོགས་པ་མེད་ནའོ་ཞེས་བྱ་བ་སྨྲས་སོ། །སྨན་ཕོར་བཅང་བར་བྱའོ་ཞེས་བྱ་བ་ནི། ནད་པས་ཞེས་བྱ་བར་སྦྱར་རོ། །སྨན་གྱི་ནལ་ཟེ་ཡང་ངོ་ཞེས་བྱ་བ་ཡང་། ནད་པས་བཅང་བར་བྱའོ་ཞེས་བྱ་བར་སྦྱར་རོ། །འགྲོར་མི་བཏུབ་པས་ཕུལ་བའི་བཏུང་ཕོར་རོ་
ཞེས་བྱ་བ་ཡང་། བཅང་ངོ་ཞེས་བྱ་བར་སྦྱར་རོ། །འགྲོར་མི་བཏུབ་པ་ཞེས་བྱ་བ་ལ། འགྲོ་བ་ཞེས་བྱ་བ་ནི་མིད་པའི་ཚེ་དང་དུ་འགྲོ་བའོ། །མི་བཏུང་པ་ཞེས་བྱ་བ་ནི། མིད་པའི་ཚེ་དང་དུ་འགྲོར་མི་བཏུབ་ཅིང་མགུལ་བར་ཐོགས་ཤིང་བརྣག་པ་སྟེ། གང་གིས་དེར་འགྲོར་མི་བཏུབ་པ་མགུལ་བའི་
ནད་ཅེས་བྱ་བའི་ཐ་ཚིག་གོ། །ཕུལ་བའི་བཏུང་ཕོར་ཞེས་བྱ་བ་ནི། གང་གིས་ཟས་ཟོས་པ་མགུལ་བར་ཐོགས་ཤིང་ཕུལ་བའི་ཕྱིར་ཕྱི་ནས་སྐོམ་འཐུང་བར་བྱེད་པའི་སྣོད་ཆུང་ངུ་མ་ལ་བྱའོ། །འདིར་གཞུང་ནི་གནས་བརྟན་ཁྱོད་ཅི་བསྙུང་། ཚེ་དང་ལྡན་པ་འགྲོར་མི་བཏུབ་པའོ། །ཁྱོད་ཀྱིས་སྔོན་

ཅི་བགྱིས། ཕུལ་བའི་བཏུང་ཕོར་མ་བཅངས་སོ། །དེ་ཅིའི་ཕྱིར་མི་བཅང་། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། ཕུལ་བའི་བཏུང་
ཕོར་བཅང་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །འདིར་ནི་གླེང་གཞིའི་དབང་གིས་འགྲོར་མི་བཏུབ་པས་ཞེས་མདོར་བསྡུ་བ་བྱས་སོ། །ནད་པས་ལན་ཚྭ་བཅང་བར་བྱའོ་ཞེས་བྱ་བ་ནི། འགྲོར་མི་བཏུབ་པས་ཞེས་བྱ་བ་ལ་བསྩལ་བའི་ཕྱིར་འདིར་ནད་པས་ཞེས་བྱ་བ་སྨྲས་སོ། །དེའི་སྣོད་
ནི་རྭའི་སྦུབས་བཟང་ངོ་ཞེས་བྱ་བ་ནི། ལན་ཚྭ་དེའིའོ། །རྭ་ཇི་ལྟ་བུ་བཟང་ཞེ་ན་དེའི་ཕྱིར། ལྕི་བས་ཀུན་ནས་བསྐོལ་བའོ་ཞེས་བྱ་བ་སྨྲས་ཏེ། དེ་ནི་སྣུམ་དང་དྲི་མའི་དྲི་ང་བ་སྤང་བའི་ཕྱིར་རོ། །དེ་མེད་པའི་ཉེས་པ་མི་འབྱུང་བར་བྱ་བའི་ཕྱིར་ཁ་དག་པ་གཞུག་གོ་ཞེས་བྱ་བ་ནི། ཁ་གབ་མེད་པའི་ཉེས་
པ་མི་འགྱུར་བར་བྱ་བའི་ཕྱིར་སྟེ། རྡུལ་ཞུགས་པས་རྫས་མ་རུང་བར་འགྱུར་བ་ལ་སོགས་པའི་ཉེས་པ་སྤང་བའི་ཕྱིར་ཞེས་བྱ་བའི་ཐ་ཚིག་གོ། །དེ་ཅི་ལས་བྱས་པ་ཞེ་ན་དེའི་ཕྱིར་དེ་ཉིད་ལས་བྱས་པའོ་ཞེས་བྱ་བ་སྨྲས་ཏེ། རྭ་ལྕི་བས་ཀུན་ནས་བསྐོལ་བ་ལས་བྱས་པའི་ཁ་གབ་གཞུག་པའོ། །དྲིས་
བསྒོས་པའི་སའོ་ཞེས་བྱ་བ་ནི། ནད་པས་བཅང་ངོ་ཞེས་བྱ་བར་སྦྱར་ཏེ། དེ་ནི་ལག་པ་བསྙལ་བ་ལ་སོགས་པའི་ཆེད་དུ་དགོས་པའི་ཕྱིར་རོ། །ཆུ་བསྲོ་བའི་ཕྱིར་ལྕགས་ཀྱི་གར་བུའོ་ཞེས་བྱ་བ་ཡང་། ནད་པས་བཅང་ངོ་ཞེས་བྱ་བར་སྦྱར་རོ། །ཐམས་ཅད་ཀྱིས་སྤྱད་པར་བྱའོ་ཞེས་བྱ་བ་ནི། ནད་པས་བཅང་
བར་བྱ་བ་དེ་དག་ནི་ནད་པ་འབའ་ཞིག་གིས་སྤྱད་པར་མ་ཟད་ཀྱི། ན་བ་དང་མི་ན་བ་ཐམས་ཅད་ཀྱིས་སྤྱད་དུ་རུང་བའོ། །འདིར་གཞུང་ནི་བཅོམ་ལྡན་འདས་ཀྱིས་བསྲོ་གང་བྱའོ་ཞེས་གསུངས་པ་ཡིན་ནོ། །གནས་པར་བྱ་བའི་དགེ་སློང་དག་ཆུ་དྲོན་བསྐོལ་བས་ངལ་བར་གྱུར་ནས། བཅོམ་ལྡན་
འདས་ཀྱིས་བཀའ་སྩལ་པ། ལྕགས་ཀྱི་གར་བུ་བསྲེག་པར་བྱ་ཞིང་ལྕགས་ཐག་གིས་གདགས་པར་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་དགེ་འདུན་གྱིས་ཀྱང་བཅང་དུ་རུང་ངོ་། །བསྲེགས་པ་གདགས་པའི་ཕྱིར་དེ་ལ་ལྕགས་ཐག་གདགས་སོ་ཞེས་བྱ་བ་ནི། ལྕགས་ཀྱི་གར་བུ་དེ་

ལའོ། །ཚ་བའི་དུས་ནས་གཤེར་པས་དེ་མནན་ཏོ་ཞེས་བྱ་བ་ནི། ལྕགས་ཀྱི་གར་བུ་བསྲེག་པའི་ཚེ་ལྕགས་ཐག་ཚ་བར་གྱུར་པའི་དུས་ནས་གཤེར་པས་ལྕགས་ཐག་དེ་མནན་ཏོ། །བསྲེག་པ་ན་ཟས་དང་འབགས་པའི་གནས་མེད་དོ་ཞེས་བྱ་བ་ནི། ལྕགས་ཀྱི་གར་བུ་དེ་བསྲེགས་པ་ན་དེ་ལ་
ཟས་དང་འབགས་པའི་གནས་མེད་པའོ། །དེ་བས་ན་འདིར་ལྕགས་ཀྱི་གར་བུ་དེ་རུང་བར་བྱ་བའི་ཕྱིར་འབད་པ་ནི་དོན་མེད་དོ། །རུང་བ་སྔར་བསྲོའོ་ཞེས་བྱ་བ་ནི། བཏུང་བར་བྱ་བ་ལ་སོགས་པའི་ཆུ་རུང་བ་ཤོས་སྔར་བསྲོ་བའོ། །ལོངས་སྤྱད་པ་ཕྱིས་སོ་ཞེས་བྱ་བ་ནི། ཆབ་ཁུངས་ལ་སོགས་པར་
ཁྲུས་བྱ་བའི་ཆུ་ཕྱིས་བསྲོ་བའོ། །འདི་གཉིས་ནི་གཙང་སྦྲ་བྱ་བའི་ཕྱིར་རོ། །མདོམས་ཀྱི་གསོ་བ་བསྟན་པར་བྱའོ་ཞེས་བྱ་བ་ནི། ནད་པས་ཞེས་བྱ་བར་སྦྱར་རོ། །མདོམས་ཀྱི་གསོ་བ་ཞེས་བྱ་བ་ནི། མས་གཏོང་བ་ལ་སོགས་པའོ། །འདིར་གཞུང་ནི། གལ་ཏེ་སྨན་པ་ན་རེ་གཞན་གྱིས་འཚོ་བར་མི་འགྱུར་རོ་ཞེས་
ཟེར་ན་མས་གཏང་བར་བྱའོ་ཞེས་གསུངས་པ་ཡིན་ནོ། །གཞན་གྱིས་འཚོ་བར་ནུས་པ་ཉིད་ན་དེ་ལ་སྦོམ་པོའོ་ཞེས་བྱ་བ་ནི། སྨན་གཞན་བྱ་བའི་ཐབས་ཀྱིས་ནད་དེ་ལས་འཚོ་བར་ནུས་པ་ཉིད་ཡིན་ན་མདོམས་ཀྱི་གསོ་བ་བསྟེན་པ་དེ་ལ་ཉེས་པ་སྦོམ་པོར་འགྱུར་རོ། །འདིར་གཞུང་ནི་མ་མོ་ལས། དེ་ལས་
གཞན་པའི་སྨན་དག་གིས་འཚོ་ན་དགེ་སློང་གིས་མདོམས་ཀྱི་ལས་བྱེད་དུ་མི་གཞུག་གོ། །གང་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །མི་འཚོ་བ་ཉིད་ཡིན་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །འདི་ལ་ཟངས་མའམ་འཁར་བའི་སྦུ་གུ་བཟང་གི་ལྕགས་ཀྱིས་ནི་མི་རུང་ངོ་ཞེས་བྱ་
བ་ནི། མདོམས་ཀྱི་གསོ་བ་འདི་ལའོ། །མཚོན་གྱིས་གསོ་བ་ཡང་དེ་དང་འདྲའོ་ཞེས་བྱ་བ་ནི། མཚོན་གྱིས་གསོ་བ་བསྟེན་པར་བྱའོ། །གཞན་གྱིས་འཚོ་བར་ནུས་པ་ཉིད་ན་དེ་ལ་སྦོམ་པོའོ་ཞེས་བྱ་བར་སྦྱར་རོ། །འདིར་གཞུང་ནི་མ་མོ་ལས་རྟུལ་བ་གཞན་ཡོད་ན་དགེ་སློང་གིས་མཚོན་གྱི་ལས་བྱེད་
དུ་མི་གཞུག་གོ། །གང་བྱེད་དུ་འཇུག་ན་ཉེས་པ་སྦོམ་པོར་འགྱུར་རོ། །རྟུལ་བ་གཞན་མེད་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །གདོང་དུ་རྩྭའི་རྒྱུན་ལས་གཞན་པར་དེ་མི་བསྟེན་ནོ་ཞེས་བྱ་བ་ནི། གདོང་དུ་རྩྭའི་རྒྱུན་ལས་གཞན་པ་མཚོན་གྱིས་གསོ་བ་དེ་མི་བསྟེན་པའོ། །འདིར་

གཞུང་ནི་ཕྲན་ཚེགས་དག་ལས་དགེ་སློང་གི་གདོང་ནི་མེ་ལོང་ལྟ་བུ་ཡིན་པས་དེའི་ཕྱིར་དགེ་སློང་གིས་སྨན་པ་གདོང་དུ་མཚོན་གྱི་ལས་བྱེད་དུ་མི་གཞུག་གོ་ཞེས་གསུངས་པ་ཡིན་ནོ། །གཞང་འབྲུམ་གཅད་པར་མི་བྱའོ་ཞེས་བྱ་བ་ནི། གང་གི་ཕྱིར་མཚོན་གྱིས་གསོ་བ་མི་བྱའོ་
ཞེས་བྱ་བ་དེའི་ཕྱོགས་གཅིག་ཏུ་གྱུར་པ་ནི། གདོང་དུ་མཚོན་གྱི་ལས་བྱེད་པ་དང་གཞང་འབྲུམ་གཅོད་པ་འདི་གཉིས་ཡིན་པས་དེའི་ཕྱིར་འདི་གཉིས་ལ་ཡང་སྦོམ་པོར་རིག་པར་བྱའོ། །མཚོན་ལས་གཞན་པས་ཀྱང་ངོ་ཞེས་བྱ་བ་ནི། མཚོན་ལས་གཞན་པས་ཀྱང་གཞང་འབྲུམ་གཅད་པར་མི་བྱའོ། །
དེ་ནི་གསང་སྔགས་དང་སྨན་དག་གིས་གསོའོ་ཞེས་བྱ་བ་ནི། གཞང་འབྲུམ་དེའོ། །ཞེ་འགྲས་པས་གསོར་མི་གཞུག་གོ་ཞེས་བྱ་བ་ནི་གཞང་འབྲུམ་མོ། །གསོ་བའི་ཕྱིར་ནུབ་མོ་ཟ་བ་ནི་ཚུལ་དང་མི་མཐུན་པ་མ་ཡིན་ནོ་ཞེས་བྱ་བ་ནི། ནད་གསོ་བའི་ཕྱིར་ནུབ་མོ་ཟས་ཟ་བ་ནི་ཚུལ་དང་མི་མཐུན་
པ་མ་ཡིན་ཏེ། མདོ་འདི་དང་འོག་མ་གཉིས་ནི་གསོ་བའི་དོན་དུ་ནི་མ་གཏོགས་སོ་ཞེས་གསུངས་པའི་སྤྲོས་པ་ཡིན་ནོ། །འདི་ལ་བྱིན་ལེན་མ་བྱས་པ་དང་སོག་འཇོག་བྱས་པ་དག་མི་རུང་བ་ཉིད་དུ་དོགས་པར་མི་བྱའོ་ཞེས་བྱ་བ་ནི། གསོ་བ་འདི་ལ་བྱིན་ལེན་མ་བྱས་པ་དང་སོག་འཇོག་བྱས་པའི་ཟས་དག་མི་
རུང་བ་ཉིད་དུ་དོགས་པར་མི་བྱ་བའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། མཚན་མོ་ཡང་བཏུང་བར་བྱའོ། །བྱིན་ལེན་སྟོབས་པ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་སྟོབས་པ་མེད་ན་བྱིན་ལེན་མ་བྱས་པར་ཡང་བཏུང་བར་བྱའོ་ཞེས་བྱ་བ་ལ་
སོགས་པ་གསུངས་པ་ཡིན་ནོ། །གསོ་བའི་ཕྱིར་རེང་བུའི་དུ་བ་བརྔུབ་པར་བྱའོ་ཞེས་བྱ་བ་ནི། དུ་བ་བྱ་བའི་ཕྱིར་སྨན་ལས་རེང་བུ་བྱེད་པ་གང་ཡིན་པ་དེ་ནི་རེང་བུའི་དུ་བ་ཞེས་བྱ་སྟེ། རེང་བུ་ལས་བྱུང་བའི་དུ་བ་དེ་བརྔུབ་པར་བྱའོ། །འདིར་གཞུང་ནི་དེ་ལྟ་བས་ན་རེང་བུའི་དུ་བ་རྔུབ་པར་རྗེས་སུ་གནང་
ངོ་ཞེས་གསུངས་པ་ཡིན་ནོ། །དེ་ནི་སྨན་གཅེའུས་འགྲུབ་པོ་ཞེས་བྱ་བ་ནི་དུ་བ་རྔུབ་པ་དེའོ། །ལྕགས་ལས་བྱའོ་ཞེས་བྱ་བ་ནི་སྨན་གཅེའུའོ། །སོར་བཅུ་གཉིས་པ་བཟང་ངོ་ཞེས་བྱ་བ་ནི། སྨན་གཅེའུ་དེའི་སྲིད་ཀྱི་ཚད་དུ་སོར་བཅུ་གཉིས་པ་བཟང་ངོ་། །རྣོ་བ་དང་རྩུབ་པར་མི་བྱའོ་ཞེས་བྱ་བ་ནི། སྨན་

གཅེའུའི་སྦུབས་སོ། །ཞུན་མར་རམ་འབྲུ་མར་གྱིས་བསྐུས་ཏེ་ཤུབས་སུ་གཞུག་གོ་ཞེས་བྱ་བ་ནི་སྨན་གཅེའུའོ། །དེ་ནི་ཟུང་ང་འམ་ཆོས་གོས་ཀྱི་གདང་བུ་ལ་གཞག་གོ་ཞེས་བྱ་བ་ནི། སྨན་གཅེའུའི་ཤུབས་དེའོ། །དྲི་མ་མེད་པར་བྱ་བའི་ཕྱིར་མེར་གཞུག་གོ་ཞེས་བྱ་བ་ནི། སྨན་གཅེའུའོ། །སྣར་
བླུགས་པའི་ལས་བྱའོ་ཞེས་བྱ་བ་ནི། སྣར་རྔུབ་པའི་ལས་སོ། །དེ་ནི་སྣར་བླུགས་པའི་སྤྱད་ཀྱིས་འགྲུབ་བོ་ཞེས་བྱ་བ་ནི། སྣར་བླུགས་པའི་ལས་དེའོ། །མཆུ་གཉིས་པ་མི་རྣོ་བ་བཟང་ངོ་ཞེས་བྱ་བ་ནི། སྣར་བླུགས་པའི་སྤྱད་ནི་ཁ་བྲག་མཆུ་གཉིས་པ་མི་རྣོ་བ་བཟང་ངོ་། །དེ་བྱའོ་ཞེས་བྱ་བ་ནི། སྣར་བླུགས་
པའི་སྤྱད་དེའོ། །སྨན་གྱི་གོ་རིམས་ནི་དཔེའོ་ཞེས་སྨོས་པ་དེས་མཚོན་པ་གཞན་བསྟན་པའི་ཕྱིར་སྨན་གྱི་ཕྱིར་ཤ་རློན་པ་བསྟེན་པར་བྱའོ་ཞེས་བྱ་བ་སྨྲས་ཏེ། ཤ་རློན་པ་བཟའ་བར་བྱ་བའོ། །དེ་ཟ་མི་ནུས་ན་ཐབས་བྱའོ་ཞེས་བྱ་བ་ནི། ཤ་རློན་པ་དེ་ཟ་མི་ནུས་པའི་གང་ཟག་ལ་ཟར་གཞུག་པའི་ཐབས་བྱ་
བའོ། །རས་ཀྱིས་མིག་གཉིས་དགབ་བོ་ཞེས་བྱ་བ་ནི། རས་ཀྱིས་མིག་གཉིས་བཀབ་སྟེ་ཤ་རློན་པ་ཡིན་པར་མི་ཤེས་པར་བྱ་ཞིང་ཁར་བསྙོད་པ་ནི་ཐབས་ཡིན་ནོ། །མི་རྒལ་བར་བྱ་བའི་ཕྱིར་དྲི་ཞིམ་པོས་བསྒོའོ་ཞེས་བྱ་བ་ནི། སྐྱུག་མི་བྲོ་བར་བྱ་བའི་ཕྱིར་ཐ་བ་ལ་སོགས་པའི་རྫས་དྲི་ཞིམ་པོས་ཤ་
རློན་པ་ལ་བསྒོ་ཞིང་ཟར་གཞུག་པ་སྟེ། དེ་ཡང་ཐབས་ཡིན་ནོ། །ཤན་མེད་པ་ཉིད་ན་མདུན་དུ་བཟའ་བ་དང་བཅའ་བ་ཡིད་དུ་འོང་བ་གཞག་ཏེ་དགྲོལ་ལོ་ཞེས་བྱ་བ་ནི། ཤ་རློན་པའི་དུམ་གྲུགས་ལ་སོགས་པའི་ཤན་མེད་པ་ཉིད་ན་མདུན་དུ་བཟའ་བ་དང་བཅའ་བ་ཡིད་དུ་འོང་བ་དག་གཞག་སྟེ་
མིག་རས་ཀྱིས་གཡོགས་པ་དགྲོལ་བར་བྱ་བ་སྟེ་དེ་ཡང་ཐབས་ཡིན་ནོ། །གཞན་གྱི་དོན་དེར་ན་སྦོམ་པོའོ་ཞེས་བྱ་བ་ནི། ཤ་རློན་པ་དེ་སྨན་གྱི་དོན་ལས་གཞན་པ་གསང་སྔགས་བསྒྲུབ་པ་ལ་སོགས་པའི་དོན་དེར་ཟ་ན་དགེ་འདུན་གྱི་དབྱེན་གྱི་དགེ་འདུན་ལྷག་མའི་སྐབས་སུ་གཏོགས་པའི་ཉེས་
པ་སྦོམ་པོར་འགྱུར་ཏེ། བདག་ཉིད་འདྲེའི་ནང་དུ་གཏོགས་པར་བྱེད་པའི་ཕྱིར་རོ། །མིའི་ཤ་ནི་ཐམས་ཅད་དུའོ་ཞེས་བྱ་བ་ནི། སྨན་གྱི་དོན་དང་སྨན་མ་ཡིན་པའི་དོན་ཐམས་ཅད་དུ་མི་ཤ་ཟོས་ན་ཉེས་པ་སྦོམ་པོར་འགྱུར་རོ། །འདིར་གཞུང་ནི་ཁྱིམ་བདག་གི་ཆུང་མ་སྡེ་ཆེན་མས་བརླའི་ཤ་

བཅད་དེ་གཡོག་མོ་ལ། བུ་མོ་ཕོ་ཤའི་ཁུ་ཤ་གྱིས་ལ། འཕགས་པ་ཆེ་གེ་མོ་ཞིག་གི་གན་དུ་ཁྱེར་ལ། བྱིན་ཅིག་ཅེས་བྱིན་པ་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤ་འདི་ནི་ཐ་ཆད་ཡིན་ཏེ། འདི་ལྟ་སྟེ་མིའི་ཤའོ། །དེ་ལྟ་བས་ན་དགེ་སློང་
གིས་མི་ཤ་བཟའ་བར་མི་བྱའོ། །ཟ་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །སྨན་གྱི་ཕྱིར་ཟ་བ་ཡང་བཅོམ་ལྡན་འདས་ཀྱིས་སྨད་པས་དེའི་ཕྱིར་འདིར་ཐམས་ཅད་དུའོ་ཞེས་མདོར་བསྡུ་བ་བྱས་སོ། །ཤ་བསྔོས་པར་ཤེས་ན་བཟའ་བར་མི་བྱའོ་ཞེས་བྱ་བ་ནི། ཟ་བ་པོའི་ཕྱིར་སྦྱིན་བདག་
གིས་ཤ་བསྔོས་པར་ཟ་བ་པོས་མཐོང་བ་དང་ཐོས་དང་དོགས་པའི་སྒོ་ནས་ཤེས་ནས་དེས་ཤ་དེ་བཟའ་བར་མི་བྱ་བ་སྟེ། དེ་ལྟ་བས་ན་རབ་ཏུ་བྱུང་བ་རྣམས་ཀྱིས་ནི་ཤན་པའི་གནས་སམ་ཚོང་དུས་ནས་ཤ་རུང་བ་དགེ་བསྙེན་དད་པ་ཅན་གྱིས་བླངས་ཏེ་བཟའ་བར་རྗེས་སུ་གནང་ངོ་། །སྟག་གི་གོང་མ་མི་བཟའོ་
ཞེས་བྱ་བ་ནི། ཤ་ཤེས་ན་བཟའ་བར་མི་བྱ་བའོ། །འདིར་གཞུང་ནི་དགེ་སློང་དག་སྟག་ནི་རུལ་སྦེད་པ་ཡིན་པས་དེའི་ཕྱིར་དགེ་སློང་གིས་སྟག་གི་གོང་མའི་ཤ་བཟའ་བར་མི་བྱའོ་ཞེས་གསུངས་པ་ཡིན་ནོ། །དེ་ནི་ལྟོས་པ་དང་བཅས་པའི་ཕྱིར་བཀག་པས་དེའི་ཕྱིར་ལྟོས་པ་དང་བཅས་པ་གཞན་གྱིས་
སྦས་པར་ཤེས་ན་ཡང་བཟའ་བར་མི་བྱ་བའོ། །གླང་པོ་ཆེ་དང་རྟ་དང་ཀླུ་རྣམས་ཀྱི་མི་བཟའོ་ཞེས་བྱ་བ་ནི། དེ་རྣམས་ཀྱི་ཤ་བཟའ་བར་མི་བྱ་བའོ། །རྨིག་གཅིག་པ་དང་ཝ་དང་སྤྲེའུ་དང་ཤིང་རྟ་མོ་དང་བྱ་རོག་དང་བྱ་རྒོད་དང་ཆུ་སྐྱར་དང་ཁྱི་དང་བྱ་ཁྲ་དང་འུག་པ་དང་། དེ་དག་ལས་གཞན་པའི་བྱ་
མི་རོ་ཟ་བ་དག་དང་བྱ་གར་དང་ཕ་ཝང་དང་སྐྱིན་ཀོར་དང་དྲེའུ་སྲིན་དང་སྲིན་བུ་རྣམས་ཀྱི་ཡང་མི་བཟའོ་ཞེས་བྱ་བ་ནི། དེ་དག་གི་ཤ་ཡང་ཤེས་ན་བཟའ་བར་མི་བྱའོ་ཞེས་བྱ་བར་སྦྱར་རོ། །རྨིག་གཅིག་པ་ཞེས་བྱ་བ་ནི། རྟ་དང་བོང་བུ་དང་དྲེའུ་དང་རྐྱང་ལ་སོགས་པའོ། །ཤིང་རྟ་མོ་ཞེས་བྱ་བ་ནི། བྱ་
ཤིང་རྟ་མོའོ། །བྱ་རོག་ཅེས་བྱ་བ་ནི། ཁྭ་དང་ཕོ་རོག་གོ། །དེ་དག་ལས་གཞན་པའི་བྱ་མི་རོ་ཟ་བ་དག་ཅེས་བྱ་བ་ནི། མི་རོ་ཟ་བའི་བྱ་སྔར་བསྟན་པ་དེ་དག་ལས་གཞན་པའི་བྱ་མི་རོ་ཟ་བ་ཐམས་ཅད་སྤྱིར་བཟུང་ངོ་། །སྐྱིན་ཀོར་ཞེས་བྱ་བ་ནི། ཆུ་ན་གནས་པ་དང་སྐམ་ན་གནས་པའི་སྐྱིན་ཀོར་རོ། །དྲེའུ་

སྲིན་ཞེས་བྱ་བ་ནི། ས་ལས་སྐྱེས་པའི་སྲིན་བུ་རིང་པོའོ། །སྲིན་བུ་རྣམས་ཞེས་བྱ་བས་ནི་སྲིན་བུའི་རིགས་གཞན་དག་བསྟན་ཏོ། །རྣམས་ཞེས་མང་པོའི་ཚིག་ཏུ་བྱས་པས་ནི་ཤིང་སྲིན་དང་སྲིན་གྱི་མེ་དང་སྦྲུལ་དང་སྡིག་སྦྲུལ་དང་སྲེ་མོ་དང་བྱི་བ་ལ་སོགས་པ་གཞན་དག་ཀྱང་བསྡུའོ། །སྲིན་བུ་ཞེས་
སྨོས་པས་ནི། སྲིན་བུ་པད་པ་ལ་སོགས་པ་ཡང་བསྡུའོ། །འདིར་གཞུང་ནི་བཙུན་པ་པད་པའི་ཤ་འཚལ་དུ་རུང་ངམ། ཉེ་བ་འཁོར་མི་རུང་ངོ་། །དེ་བཞིན་དུ་དགེ་སློང་གིས་བྱ་གར་གྱི་ཤ་བཟའ་བར་མི་བྱའོ། །བྱ་རོག་ལ་སོགས་པའི་ཤ་ཡང་བཟའ་བར་མི་བྱའོ་ཞེས་བྱ་བ་ལ་སོགས་པ་དང་། གཞུང་
ཁ་ཅིག་ལས་སྲིན་བུ་རྣམས་ཀྱི་ཚིལ་འཚལ་བར་བགྱིའམ་འཚལ་བར་མི་བགྱི། བཀའ་སྩལ་པ། བཟའ་བར་མི་བྱའོ། །ནད་དང་བྲལ་བའི་ཕྱིར་ལུས་བསྐུ་བར་ནི་བྱའོ་ཞེས་བྱ་བ་གསུངས་པ་ཡིན་ནོ། །ཤའི་བྱིན་ལེན་སྟོབས་པ་ལ་བཅད་པ་ལས་བྱུང་བ་ཉིད་མ་ཡིན་ནམ་ཞེས་དྲི་བར་བྱའོ་ཞེས་བྱ་བ་ནི།
རབ་ཏུ་བྱུང་བ་རྣམས་ལ་སྦྱིན་བདག་གིས་ཤའི་བྱིན་ལེན་བསྟབས་པ་ན་དེ་ལ་ཟ་བ་པོས་འདི་དགེ་སློང་གིས་བཟར་མི་རུང་བའི་ཤ་བཅད་པ་མི་ཤ་དང་སྟག་གི་གོང་་མ་དང་གླང་པོ་ཆེ་དང་རྟ་དང་ཀླུ་དང་རྨིག་གཅིག་པ་ལ་སོགས་པའི་ཤ་མ་ཡིན་ནམ་ཞེས་དྲི་བར་བྱ་ཞིང་། དེ་དག་ལས་བྱུང་བ་མ་ཡིན་ན་
བཟའ་བར་བྱའོ། །ཚིག་དེ་ནི་མཚོན་པ་ཙམ་དུ་ཟད་དེ། འདི་ཅིའི་ཤ་ཞེས་དྲིས་ན་གཞན་མ་སྨོས་ཀྱང་ཉེས་པ་མེད་དོ། །དུ་མ་ཉིད་ན་དང་པོས་སོ་ཞེས་བྱ་བ་ནི། ཟ་བ་པོ་དུ་མ་ཉིད་ཡོད་ན་དང་པོས་དྲི་པར་བྱ་བ་སྟེ། དགེ་སློང་དུ་མ་ཚོགས་ན་དགེ་འདུན་གྱི་གནས་བརྟན་གྱིས་དྲི་བར་བྱའོ་ཞེས་བྱ་བའི་ཐ་
ཚིག་གོ། །ཉམས་ན་འོག་མས་སོ་ཞེས་བྱ་བ་ནི། ཤའི་སྐབས་དྲིའོ་ཞེས་བྱ་བར་སྦྱར་ཏེ། གལ་ཏེ་དང་པོས་དྲི་བ་ཉམས་ཏེ་མ་དྲིས་ན་དེའི་འོག་མའི་དགེ་སློང་གིས་དྲི་བར་བྱ་བའོ། །གླང་པོ་ཆེ་དང་མིའི་འོ་མ་དག་བཏུང་བར་མི་བྱ་བ་ཉིད་དོ་ཞེས་བྱ་བ་ནི། རབ་ཏུ་བྱུང་བས་བལ་གླང་མོ་དང་བུད་
མེད་ཀྱི་འོ་མ་བཏུང་བར་མི་བྱའོ། །པགས་པ་དང་རྨ་བསྐུ་བ་དང་སྣར་བླུགས་པ་དང་མིག་སྐུད་ཅིང་བཟའ་བཏུང་མི་བྱེད་པ་ལ་སྐྱོན་ཆགས་པ་མེད་དོ་ཞེས་བྱ་བ་ནི། ཤ་དང་འོ་མ་རུང་བ་མ་ཡིན་པ་ལ་སོགས་པས་ཞེས་བྱ་བར་སྦྱར་ཏེ། དེ་དག་གིས་པགས་པ་སྐུད་པ་དང་རྨ་སྐུད་པ་དང་སྣར་བླུགས་པ་དང་

མིག་སྐུད་ཅིང་བཟའ་བཏུང་མི་བྱེད་པ་ལ་ནི་སྐྱོན་ཆགས་པ་མེད་དོ་ཞེས་བྱ་བའི་ཐ་ཚིག་གོ། །འདིར་གཞུང་ནི་བཙུན་པ་སྨན་དུ་རུང་བ་མ་ལགས་པ་དག་དང་བསྐོལ་བའི་འབྲུ་མར་འཚལ་དུ་རུང་ངམ། ཉེ་བ་འཁོར་མི་རུང་ངོ་། །ལུས་སྐུད་པ་དང་རྨའི་བསྐུ་མཉེ་བྱ་བ་དང་། སྣར་བླུགས་
པའི་ལས་བྱ་བ་ནི་ལྟུང་བ་མེད་དོ། །བཙུན་པ་བུད་མེད་ཀྱི་འོ་མ་འཚལ་དུ་རུང་ངམ། ཉེ་བ་འཁོར་མི་རུང་ངོ་། །མིག་བསྐུ་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ནད་པས་ནི་ཞུན་མར་དང་འབྲུ་མར་ཆང་དང་འདྲེས་པ་བཏུང་བར་བྱ་བ་ཉིད་དོ་ཞེས་བྱ་བ་ནི། གང་ཟག་ནད་པས་ནི་ཞུན་མར་
དང་འབྲུ་མར་ཆང་དང་འདྲེས་པར་གྱུར་པ་བཏུང་བར་བྱ་བ་ཉིད་ཡིན་ནོ། །འདིར་གཞུང་ནི་བཙུན་པ་རེ་ཞིག་ཞུན་མར་དང་འབྲུ་མར་སྐྱེམས་དང་ལྷན་ཅིག་འདྲེས་པར་གྱུར་ན་འཚལ་དུ་རུང་ངམ། ཉེ་བ་འཁོར་རུང་སྟེ། དེ་ཡང་ནད་པས་ཡིན་གྱི་མི་ན་བས་ནི་མ་ཡིན་ནོ་ཞེས་གསུངས་པ་ཡིན་ནོ། །ཆང་
མ་ཡིན་པ་ཉིད་ན་ཉེས་པ་མེད་པ་ཉིད་དོ་ཞེས་བྱ་བ་ནི། ཆང་དག་ཆང་མ་ཡིན་པ་ཉིད་དུ་གྱུར་ན་ཐམས་ཅད་ལ་ཉེས་པར་མི་འགྱུར་བ་སྟེ། འདིར་ཆང་མ་ཡིན་པ་ཉིད་ཅེས་བྱ་བས་ནི་དེའི་དྲི་དང་རོ་གཉི་ག་མེད་པར་གྱུར་པ་བསྟན་ཏེ། གལ་ཏེ་དྲི་དང་རོའི་མྱང་བ་མྱོས་པར་མི་བྱེད་པ་དག་ཅེས་གསུངས་པ་
ལས་ཤེས་པར་བྱའོ། །དེ་ནི་བསྐོལ་བ་ལས་འགྲུབ་པོ་ཞེས་བྱ་བ་ནི། ཆང་མ་ཡིན་པ་ཉིད་དེ་ནི་བསྐོལ་བ་ལས་ཆང་ཡང་ཆང་མ་ཡིན་པར་འགྱུར་བའོ། །འདིར་གཞུང་ནི་བཙུན་པ་མྱོས་པར་འགྱུར་བའི་ལྟུང་བ་ཞུགས་ཀྱིས་བསྐོལ་ན་འཚལ་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་
ནོ། །དེ་ནི་ནས་བརྔོས་པས་བཏབ་ཅིང་སའི་ནང་དུ་བཅུག་ན་ཚྭ་ཉིད་དུ་འགྱུར་རོ་ཞེས་བྱ་བ་ནི། ཆང་དེའི་ནང་དུ་ཡོས་བླུགས་ཏེ་སྣོད་དང་བཅས་པར་སའི་ནང་དུ་བཅུག་ན་ཚྭར་འགྱུར་བའོ། །རྒུན་གྱི་ཁུ་བ་ནི་བསྐོལ་ན་ཆང་ཉིད་དུ་མི་འགྱུར་རོ་ཞེས་བྱ་བ་ནི། རྒུན་གྱི་ཁུ་བ་བཙིར་མ་ཐག་ཏུ་བསྐོལ་ན་
ཡུན་རིང་དུ་བཞག་ཀྱང་ཕྱིས་ཆང་དུ་མི་འགྱུར་ཏེ། དྲོན་ཞ་ཡིན་ནོ། །འདིར་གཞུང་ནི་བསྐོལ་ཏེ་གཞག་པར་བྱ་ཞིང་དགེ་འདུན་གྱི་དུས་མ་ཡིན་པའི་བཏུང་བར་འགྱུར་རོ་ཞེས་གསུངས་པ་ཡིན་ནོ། །ཐ་དད་པ་མ་ཡིན་པ་ཉིད་ལ་ནི་ཡོད་པ་ཉིད་མ་ཡིན་ནོ་ཞེས་བྱ་བ་ནི། དཔེར་ན་ཏིལ་དག་ལས་ཏིལ་

མར་ཐ་དད་པ་ཉིད་མ་ཡིན་པ་དང་བུ་རམ་ཤིང་དག་ལས་ཁུ་བ་ཐ་དད་པ་ཉིད་མ་ཡིན་པས། ཏིལ་དེ་ལ་ཡང་ཏིལ་མར་ཡོད་པ་ཉིད་མ་ཡིན་ལ། བུ་རམ་ཤིང་དེ་ལ་ཡང་བུ་རམ་ཡོད་པ་ཉིད་མ་ཡིན་པ་ལྟ་བུའོ། །དེ་ལྟ་བས་ན་ཏིལ་བྱིན་ལེན་བྱས་པས་ཏིལ་མར་བྱིན་ལེན་བྱས་པར་མི་འགྱུར་ལ། བུ་རམ་
ཤིང་བྱིན་ལེན་བྱས་པས་ཀྱང་བུ་རམ་བྱིན་ལེན་བྱས་པར་མི་འགྱུར་བར་ཤེས་པར་བྱའོ། །འདི་སྐད་བསྟན་ཏེ། དགེ་སློང་གིས་ཏིལ་བྱིན་ལེན་བྱས་ཏེ་བཙགས་ན་དེའི་ཏིལ་མར་གཟོད་བྱིན་ལེན་བྱ་དགོས་ལ། བུ་རམ་ཤིང་བྱིན་ལེན་བྱས་ཏེ་བཙིར་ན་དེའི་ཁུ་བ་གཟོད་བྱིན་ལེན་བྱ་དགོས་སོ། །དེས་ན་
བྱིན་ལེན་བྱས་པའི་ཏིལ་དང་བུ་རམ་ཤིང་ནི་བཟར་རུང་ལ། དེ་ཉིད་བཙིར་ཅིང་བཙགས་པའི་ཏིལ་མར་དང་ཁུ་བ་ནི་ཡང་བྱིན་ལེན་མ་བྱས་པར་བཟར་མི་རུང་ངོ་། །བག་ཆགས་སུ་གྱུར་པ་ཉིད་ནི་ཡོད་པ་ཉིད་དོ་ཞེས་བྱ་བ་ནི། བག་ཆགས་སུ་གྱུར་པ་ཉིད་ནི་ཡོད་པ་ཉིད་ཡིན་པའོ། །འདིར་གཞུང་ནི་བཙུན་
པ་ཞག་རུང་བ་མ་ལགས་པ་དག་དང་བསྐོལ་བའི་དབོན་ཚ་འཚལ་དུ་རུང་ངམ་མི་རུང་། བཀའ་སྩལ་པ། ནད་པས་ནི་བཟར་རུང་ལ་མི་ན་བས་ནི་མི་རུང་ངོ་། །ཤ་ལ་ཡང་དེ་བཞིན་ནོ་ཞེས་ཞུ་བ་ལས་རྫས་རུང་བ་མ་ཡིན་པ་དང་འབགས་པ་བཟའ་བར་བྱ་བ་ཉིད་མ་ཡིན་ནོ་ཞེས་གསུངས་པ་དེ་འདིར་བསྡུས་
པ་ཡིན་ནོ། །ཆང་གི་སྲེད་པ་དང་བྲལ་བར་བྱ་བའི་ཕྱིར་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་སྐམ་པོའི་ཕྱེ་མ་ཆང་གི་དྲིས་བསྒོས་པའི་ཆུ་དང་སྦྱར་བ་བཏུང་ངོ་ཞེས་བྱ་བ་ནི། ཆང་འདོད་པའི་སྲེད་པ་ཡོད་ན་དེ་དང་དབྲལ་བར་བྱ་བའི་ཕྱིར་ཆང་གི་ཡོ་བྱད་དུ་རུང་བའི་རྩ་བ་དང་སྡོང་
བུ་དང་འདབ་མ་དང་མེ་ཏོག་དང་འབྲས་བུའི་སྨན་སྐམ་པོའི་ཕྱེ་མ་ཆང་གི་རླངས་པས་བསྒོས་པ་དང་སྦྱར་བའི་ཆུ་བཏུང་བར་བྱ་བ་སྟེ། དེ་ནི་ཕྱེ་མ་དང་སྦྱར་བའི་བཏུང་བ་ཞེས་བྱའོ། །འདིར་གཞུང་ནི་དེ་ལྟ་བས་ན་ཆང་དུ་རུང་བའི་རྩ་བ་དང་སྡོང་བུ་ལ་སོགས་པའི་རྫས་སྐམ་པོ་གང་དག་ཡིན་པ་དེ་
དག་ཕྱེ་མར་བྱས་ཏེ། རས་མ་དཀར་པོར་ཕུར་ནས་ཆང་གི་ཤུགས་དག་དང་བྲལ་བའི་སྣོད་མ་གང་བར་བཅང་བར་བྱ་ཞིང་། དེ་ནས་ཕྱུང་སྟེ་བྱི་དོར་བྱས་ནས་ཟས་དང་མ་འབགས་པའི་ཆུ་དང་ལྷན་ཅིག་སྦྱར་ཞིང་བཙགས་ཏེ་བཏུང་བར་རྗེས་སུ་གནང་ངོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །

ཆང་གི་དྲིས་བསྒོ་བར་བྱའོ་ཞེས་གསུངས་ན། ཇི་ལྟར་བསྒོ་བར་བྱ་ཞེ་ན། དེའི་ཕྱིར་ཆང་དང་བཅས་པའི་སྣོད་དུ་དཔྱངས་ཏེ་གཞག་པས་བསྒོ་བར་བྱའོ་ཞེས་བྱ་བ་སྨྲས་ཏེ། སྨན་གྱི་ཕྱེ་མའི་ཕུར་མ་དེ་ཆང་དང་བཅས་པའི་སྣོད་ཀྱི་ནང་དུ་ཆང་ལ་མ་རེག་པར་དཔྱངས་ཏེ་གཞག་པས་
བསྒོ་བར་བྱའོ། །རེག་པ་བསྲུང་ངོ་ཞེས་བྱ་བ་ནི། ཕྱེ་མའི་ཕུར་མ་དེ་ཆང་དང་རེག་པར་མི་འགྱུར་བར་བྱ་བའི་ཕྱིར་བསྲུང་བར་བྱ་བའོ། །དེའི་ཕྱིར་མ་གང་བ་དང་ཤུགས་དང་བྲལ་བ་ཉིད་དུའོ་ཞེས་བྱ་བ་ནི། གང་གི་ཕྱིར་རེག་པ་བསྲུང་དགོས་པ་དེའི་ཕྱིར་ཆང་གིས་མ་གང་བའི་སྣོད་ཆང་གི་
ཤུགས་དང་བྲལ་བ་ཉིད་ཀྱི་ནང་དུ་དཔྱངས་ཏེ་གཞུག་པར་བྱའོ། །གཞན་དུ་ན་གྱེན་དུ་ལྡུད་པས་རེག་པར་འགྱུར་བའི་ཕྱིར་རོ། །དེ་བཞིན་དུ་རོ་མེད་པར་བྱེད་པ་དང་དུས་མ་ཡིན་པར་བཏུང་བ་ལ་ཟས་དང་ཡང་ངོ་ཞེས་བྱ་བ་ནི། ཇི་ལྟར་ཕྱེ་མ་ཆང་དང་རེག་པ་བསྲུང་བར་བྱ་བ་ཡིན་ཏེ་དེ་བཞིན་དུ་རྫས་གང་གིས་
བཏུང་བ་དེ་རོ་མེད་པར་བྱེད་པར་འགྱུར་བའི་རྫས་དེ་དང་རེག་པ་ཡང་བསྲུང་བར་བྱ་བ་དང་། དུས་མ་ཡིན་པར་བཏུང་བ་ལ་ཟས་དང་རེག་པ་ཡང་བསྲུང་བར་བྱ་བའོ། །མཛེས་པ་ཡང་བཟང་ངོ་ཞེས་བྱ་བ་ནི། ཕྱེ་མ་སྐམ་པོ་ཆང་གི་དྲིས་བསྒོས་པ་དང་སྦྱར་བའི་ཆུ་དེ་ཟས་དང་རེག་པ་དེ་ལས་དེ་ལྟར་བསྲུང་བར་
བྱ་བ་ཉིད་མཛེས་པ་ཡིན་ཏེ་དེ་བཟང་བའོ། །དེའི་ཕྱིར་རས་མ་དཀར་པོས་བཙག་པར་བྱའོ་ཞེས་བྱ་བ་ནི། གང་གི་ཕྱིར་མཛེས་པ་བཟང་བ་དེའི་ཕྱིར་རས་མ་དཀར་པོས་བཙག་པར་བྱ་བའོ། །ནད་པས་ཆང་ནི་རྩྭ་མཆོག་གིས་ཀྱང་མི་བཏུང་ངོ་ཞེས་བྱ་བ་འདི་ནི། བཅས་པའི་ཁ་ན་མ་ཐོ་བ་དང་བཅས་པ་ཐམས་
ཅད་ནད་པའི་ཡུལ་ལ་རྗེས་སུ་གནང་བ་དེའི་དམིགས་ཀྱིས་བསལ་བ་བསྟན་པ་ཡིན་ཏེ། ཇི་ལྟར་བཅོམ་ལྡན་འདས་ཀྱིས་ཤཱཀྱ་ན་བར་གྱུར་པ་དག་ལ་དེ་ཉིད་མ་གནང་བར་གསུངས་པ་ཡིན་ནོ། །དེ་ལྟར་ཡང་དགེ་སློང་གང་ང་ལ་སྟོན་པ་ཞེས་ཟེར་བ་ཁྱེད་ཅག་གིས་ཆང་ཐ་ན་རྩྭ་མཆོག་གིས་ཀྱང་མི་བླུད་མི་
བཏུང་ངོ་ཞེས་གསུངས་པ་ཡིན་ནོ། །དགེ་བསྙེན་ཡན་ཆད་ཐམས་ཅད་ཀྱིས་མི་བླུད་དོ་ཞེས་བྱ་བ་ནི། དགེ་བསྙེན་གྱི་མཐའ་ཡན་ཆད་ཆོས་འདི་པ་བསླབ་པ་མ་བླངས་པ་ཐམས་ཅད་ཀྱིས་ཀྱང་ཆང་བླུད་པར་མི་བྱའོ། །འདིར་གཞུང་ནི་དགེ་བསྙེན་གྱིས་མི་བྱ་བའི་ལས་དྲུག་སྟེ། སེམས་ཅན་བཙོང་བ་དང་།

མཚོན་ཆ་བཙོང་བ་དང་། ཆང་བཙོང་བ་དང་། དུག་བཙོང་བ་དང་། རྒྱ་སྐྱེགས་ཀྱི་ལས་དང་། ཏིལ་བཙིར་བའི་ལས་སོ་ཞེས་གསུངས་པ་ཡིན་ནོ། །རང་བཞིན་གྱི་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་སོ་ཞེས་བྱ་བ་ནི་ལྷག་མའོ་ཞེས་བྱ་བ་ནི། བཅས་པའི་
ཁ་ན་མ་ཐོ་བ་དང་བཅས་པ་ཐམས་ཅད་བཀག་པ་ལ་གསོ་བའི་དོན་ཉིད་དུ་ནི་མ་གཏོགས་ཏེ་དེའི་དོན་དུ་ནི་དགག་པ་མེད་དོ་ཞེས་གསུངས་པ་དེའི་ལྷག་མ་ནི་མྱོས་པར་འགྱུར་བའི་བཏུང་བ་བཀག་པ་འདི་ཡིན་ཏེ། འདི་ནི་གསོ་བའི་དོན་དུ་ཡང་བཀག་པར་ཤེས་པར་བྱའོ། །ནད་པ་གསོ་བའི་དོན་དེ་ཉིད་
དུ་བཅས་པའི་ཁ་ན་མ་ཐོ་བ་དང་བཅས་པ་ལྷག་པར་སྤྱོད་པ་ལ་ནི་ལྟུང་བ་མེད་དེ། དཔེར་ན། ཤ་བསྔོས་པར་ཤེས་ན་བཟའ་བར་མི་བྱའོ་ཞེས་བྱ་བ་ལ་སོགས་པ་བཅག་པའི་ཁ་ན་མ་ཐོ་བ་དང་བཅས་པ་ཐམས་ཅད་གསོ་བའི་དོན་ཉིད་དུ་མ་གཏོགས་སོ་ཞེས་བསྟན་པ་དེའི་ལྷག་མ་དམིགས་ཀྱིས་བསལ་
བ་ནི་མྱོས་པར་འགྱུར་བའི་ལྟུང་བ་མ་གཏོགས་སོ་ཞེས་བྱ་བ་འདི་ཡིན་ཏེ། སྡིག་པ་ཐམས་ཅད་ཀྱི་སྒོར་གྱུར་པ་ཡིན་པའི་ཕྱིར་དེ་ལ་དམིགས་ཀྱིས་བསལ་བ་མེད་དོ། །འདིར་གཞུང་ནི་བཙུན་པ་ནད་པའི་གཡོག་ཇི་ལྟར་བགྱི། ཉེ་བ་འཁོར་རང་བཞིན་གྱིས་ཁ་ན་མ་ཐོ་བ་དང་བཅས་པ་མ་གཏོགས་པར་
ཅི་ནས་ཀྱང་ནད་པ་སོས་པར་འགྱུར་བ་ལྟར་རོ། །དེ་ལྟ་བས་ན་དགེ་སློང་གིས་སྒོག་སྐྱ་བཟའ་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྒོག་སྐྱ་དང་ཀུན་དོང་དང་ཀེའུ་བཟའ་བར་མི་བྱའོ་ཞེས་བྱ་བ་ནི། བཙོས་ཀྱང་རུང་མ་བཙོས་ཀྱང་རུང་བའོ། །ནད་པས་ནི་དབེན་པའི་ཕྱོགས་སུའོ་
ཞེས་བྱ་བ་ནི། སྒོག་སྐྱ་ལ་སོགས་པ་བཟའ་བའོ། །ཟོས་ནས་སྒོག་སྐྱ་ནི་ཞག་བདུན། ཀུན་དོང་ཞག་གསུམ་ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བ་ནི། ནད་པས་དབེན་པའི་ཕྱོགས་སུ་སྒོག་སྐྱ་ལ་སོགས་པ་ཟོས་ནས་གཙུག་ལག་ཁང་དུ་འཇུག་
པར་མི་བྱའོ་ཞེས་བྱ་བར་སྦྱར་རོ། །ཟོས་མ་ཐག་ཏུ་འཇུག་པར་མི་བྱ་བར་མ་ཟད་ཀྱི་སྒོག་སྐྱ་ནི་ཟོས་ནས་ཞག་བདུན་མ་ལོན་པར་འཇུག་པར་མི་བྱའོ། །ཀུན་དོང་ནི་ཟོས་ནས་ཞག་གསུམ་མ་ལོན་པར་འཇུག་པར་མི་བྱའོ། །ཀེའུ་ནི་ཟོས་ནས་ཞག་གཅིག་མ་ལོན་པར་འཇུག་པར་མི་བྱའོ། །

གནས་མལ་ལ་མི་བྱའོ་ཞེས་བྱ་བ་ནི། ལོངས་སྤྱད་པར་རོ། །བཤང་བའི་སར་འཇུག་པར་མི་བྱའོ་ཞེས་བྱ་བ་ནི། དགེ་འདུན་གྱིའོ། །གཅི་བའི་སར་མི་བྱའོ་ཞེས་བྱ་བ་ཡང་། དགེ་འདུན་གྱིར་འཇུག་པར་རོ། །དགེ་འདུན་གྱི་ནང་དུ་འགྲོ་བར་མི་བྱའོ་ཞེས་བྱ་བ་ཡང་། ནད་པ་སྒོག་
སྐྱ་ལ་སོགས་པ་ཟོས་པས་སོ། །མཆོད་རྟེན་གྱི་ཉེན་ཀོར་དུ་མི་བྱའོ་ཞེས་བྱ་བ་ནི། མཆོད་རྟེན་གྱི་ཉེན་ཀོར་དུ་འགྲོ་བར་མི་བྱའོ། །དེའི་ཐག་ནི་འདོམ་གང་ངོ་ཞེས་བྱ་བ་ནི། མཆོད་རྟེན་གྱི་ཉེན་ཀོར་དེའི་འོ། །འདིར་གཞུང་ནི་མཆོད་རྟེན་གྱི་ཉེན་ཀོར་འདོམ་གང་སྤང་བར་བྱ་སྟེ། དགེ་སློང་དག་མཆོད་རྟེན་ནི་ལྷ་
མངོན་པར་དད་པ་ཅན་དག་གིས་ཀུན་ནས་གང་བ་ཡིན་ལ། ལྷ་རྣམས་ནི་གཙང་སྦྲ་འདོད་པ་ཡིན་པས། དྲི་དེ་ནི་དེ་དག་དང་མི་མཐུན་པའི་ཕྱིར་རོ་ཞེས་གསུངས་པ་ཡིན་ནོ། །ཁྱིམ་པ་དག་ལ་ཆོས་བསྟན་པར་མི་བྱའོ་ཞེས་བྱ་བ་ཡང་ནད་པ་སྒོག་སྐྱ་ལ་སོགས་པ་ཟོས་པས་སོ། །ཁྱིམ་དག་ཏུ་འགྲོ་བར་མི་བྱའོ་
ཞེས་བྱ་བ་ནི། ཁྱིམ་པའི་ཁྱིམ་དག་ཏུའོ། །སྐྱེ་བོས་གང་བའི་ཕྱོགས་སུ་མི་བྱའོ་ཞེས་བྱ་བ་ནི། སྐྱེ་བོས་གང་བའི་ཕྱོགས་སུ་ཡང་འགྲོ་བར་མི་བྱ་བའོ། །མཇུག་ཏུ་ཁྲུས་བྱའོ་ཞེས་བྱ་བ་ནི། ནད་པས་དེ་ལྟར་སྒོག་སྐྱ་ལ་སོགས་པ་བསྟེན་པའི་དགོས་པ་བསྒྲུབས་ཟིན་ནས་མཇུག་ཏུ་ཁྲུས་བྱ་བའོ། །གོས་
དག་གི་དྲི་ནི་བཀྲུ་བ་དང་དུ་བ་དག་གིས་བསལ་ལོ་ཞེས་བྱ་བ་ནི། ནད་པས་སྒོག་སྐྱ་ལ་སོགས་པ་བསྟེན་པ་དེའི་གོས་དག་ལ་དྲི་ཆགས་པ་ནི་ཐབས་དེ་གཉིས་ཀྱིས་བསལ་བར་བྱ་བའོ།། །།བམ་པོ་ལྔ་བཅུ་བདུན་པ། རུང་བ་ཉིད་དུ་བྱིན་གྱིས་བརླབ་པར་བཙོས་པ་དང་གནས་པ་དག་ནི་
ཕྱི་རོལ་དང་འདྲའོ་ཞེས་བྱ་བ་ནི། དཔེར་ན་དགེ་སློང་གི་གནས་ཉེན་ཀོར་འདོམ་གང་དང་བཅས་པ་ནས་ཕྱི་རོལ་དུ་གྱུར་པའི་ཀུན་དགའ་ར་བ་དང་འབྲོག་དགོན་པ་ལ་སོགས་པའི་གནས་གང་ཡིན་པ་དེར་ཟས་འཚོད་པ་དང་འཆང་བ་དག་ལ་ནང་དུ་བཙོས་པ་དང་ནང་དུ་ཞག་ལོན་པའི་ཉེས་པས་
གོས་པར་མི་འགྱུར་བ་དེ་བཞིན་དུ་གཙུག་ལག་ཁང་གི་ནང་དུ་ཡང་རུང་བ་ཉིད་དུ་བྱིན་གྱིས་བརླབས་པའི་རུང་བའི་ཁང་པ་བྱས་ན་དེར་ཡང་ཉེས་པ་དེ་དག་མི་འབྱུང་བའོ། །རུང་བའི་ཁང་པ་དེ་བྱིན་གྱིས་བརླབ་ཏུ་རུང་བར་བསྟན་པའི་ཕྱིར་བྱིན་གྱིས་བརླབ་པར་བྱའོ་ཞེས་བྱ་བ་སྨྲས་ཏེ། རུང་བའི་

ཁང་པའོ་ཞེས་བྱ་བར་སྦྱར་རོ། །ཤིང་དྲུང་དང་གླང་པོ་ཆེའི་ར་བ་དང་མུ་སྟེག་ཅན་གྱི་འདུག་གནས་དང་རྒྱལ་པོའི་ཕོ་བྲང་ས་དང་དགེ་སློང་མའི་དབྱར་ཁང་དང་གཙུག་ལག་ཁང་གི་བང་རིམ་དང་སྒོ་ཁང་དང་ཁྱམས་དང་བསྲོ་གང་དང་དཔོང་སའི་ར་བ་དག་ཏུ་མི་བྱའོ་ཞེས་བྱ་བ་ནི། རུང་བའི་
ཁང་པ་བྱིན་གྱིས་བརླབ་པར་ཞེས་བྱ་བར་སྦྱར་རོ། །ཤིང་དྲུང་ལ་སོགས་པ་དེ་དག་ཏུ་རུང་བའི་ཁང་པ་བྱིན་གྱིས་བརླབ་པར་མི་བྱའོ་ཞེས་གསུངས་པའི་ཕྱིར་ཏེ། གཏུམ་ཕུགས་ཅན་དང་སྨྱོན་ཐབས་མཁན་དང་ཟིལ་གྱིས་གནོན་པར་བྱེད་པ་དག་ཡོངས་སུ་སྤང་བའི་ཕྱིར་རོ། །ཁ་ཅིག་ལས་བླ་
གབ་མེད་པ་དང་མེ་ཁང་དང་མཆོད་རྟེན་གྱི་གཞི་དང་ཁྱིམ་བདག་གི་གཞིར་ཡང་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་དེ་དག་ཏུ་ཡང་རུང་བའི་ཁང་པ་བྱིན་གྱིས་བརླབ་པར་མི་བྱའོ་ཞེས་འབྱུང་སྟེ། འདི་དག་དང་སྔར་སྨོས་པ་དག་ཏུ་རུང་བའི་ཁང་པ་བྱིན་གྱིས་བརླབ་པར་མི་བྱའོ། །དེར་གཡོས་
དང་བཙོ་བ་ཡང་མི་བྱའོ་ཞེས་བྱ་བ་ནི། ཤིང་དྲུང་ལ་སོགས་པ་དང་བླ་གབ་མེད་པ་དེར་རོ། །འདིར་གཡོས་ཞེས་བྱ་བ་ནི་འབྲས་ཆན་ལ་བྱ་བའོ། །དེ་ལས་གཞན་པ་ནི་བཙོ་བ་ཡིན་པར་ཤེས་པར་བྱའོ། །དགེ་སློང་གིས་དེ་གཉིས་ཕྱོགས་མི་དབེན་པར་གཞན་གྱི་ལག་ཏུ་ཡང་བྱེད་དུ་མི་གཞུག་ན་
རང་གིས་བྱ་བ་ལྟ་ཅི་སྨོས་ཏེ། དང་པོ་ཉིད་ནས་བཀག་པའི་ཕྱིར་རོ། །དེ་ལྟ་བས་ན་དགེ་སློང་གིས་ཤིང་དྲུང་ལ་སོགས་པ་དང་བླ་གབ་མེད་པ་ལ་སོགས་པ་དེར་གཡོས་དང་བཙོ་བ་གཞན་བྱེད་དུ་ཡང་མི་གཞུག་སྟེ། ཚུལ་མ་ཡིན་པས་གཞན་དག་ལས་ཟིལ་གྱིས་གནོན་པ་དང་མི་གུས་པ་འབྱུང་
བའི་ཕྱིར་རོ། །ཚོས་པའི་བྱི་དོར་ཡང་མི་བྱའོ་ཞེས་བྱ་བ་ནི། ཤིང་དྲུང་ལ་སོགས་པ་དང་བླ་གབ་མེད་པ་ལ་སོགས་པ་དེར་ཟས་ཚོས་ཟིན་པའི་བྱི་དོར་ཡང་མི་བྱའོ། །ཚོས་པ་ཞེས་བྱ་བ་ནི་མི་སྙི་བ་རྣམས་ཀྱི་ནི་སུམ་ཆ་བངས་པ་ན་ཚོས་པ་ཡིན་ནོ། །སྙི་བ་རྣམས་ཀྱི་ནི་ཁ་དོག་གྱུར་པ་ནི་ཚོས་པ་ཡིན་ནོ། །
ཁུ་བ་རྣམས་ཀྱི་ནི་ལན་གཉིས་ཁོལ་བར་གྱུར་པ་ན་ཚོས་པ་ཡིན་ཏེ། ཚོས་པ་དེ་དག་དགེ་སློང་རང་གིས་གནས་དེ་དག་ཏུ་བྱི་དོར་བྱ་བ་བཀག་གོ། །འདི་ལ་དུས་བཞི་ཡོད་དོ་ཞེས་བྱ་བ་ནི། རུང་བའི་ཁང་པ་བྱིན་གྱིས་བརླབས་པ་འདི་ལ་དུས་བཞི་ཡོད་པའོ། །དེ་དག་ཀྱང་གང་ཞེ་ན། དང་པོ་སོ་ཕག་

འགྲེམས་པའོ་ཞེས་བྱ་བ་ནི། རུང་བའི་ཁང་པ་བྱིན་གྱིས་བརླབས་པའི་དུས་གཅིག་ནི་རུང་བའི་ཁང་པ་དེ་ཉིད་ཐོག་མའི་རྩིག་པའི་ཚེ་དང་པོ་སོ་ཕག་གི་གཅལ་འགྲེམས་པའི་ཚེའོ། །ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བ་ནི། དང་པོ་སོ་ཕག་བཀྲམ་པའི་འོག་ཏུ་དེ་
ཕྱིན་ཆད་ནས་ཇི་སྲིད་དུ་ལས་སར་པ་ཞེས་བྱ་བ་དེའི་མཁར་ལེན་གྱི་ལས་མ་རྫོགས་ཤིང་ད་དུང་ལས་སར་པའི་མཇུག་ཡོད་པ་ཉིད་ཀྱི་བར་གྱི་དུས་གང་ཡང་རུང་བ་དེ་ཡང་དུས་གཞན་ཅིག་ཡིན་པའོ། །གཞན་གྱི་ཚེ་དགེ་སློང་གནས་པ་ཉིད་དང་མ་བྲལ་བའོ་ཞེས་བྱ་བ་ནི། ལས་སར་པ་མཐར་ཕྱིན་
པའི་འོག་ཏུ་དུས་གཞན་གྱི་ཚེ་གནས་དེར་དང་པོ་དགེ་སློང་ཞུགས་པ་ནས་ཕྱིས་ནམ་གྱི་ཚེ་དེ་ན་དགེ་སློང་འགའ་ཡང་མེད་པར་མ་གྱུར་པའི་བར་གྱི་དུས་གང་ཡང་རུང་བ་དེ་ཡང་དུས་གཞན་ཅིག་ཡིན་པའོ། །དེ་དག་མེད་པ་ནི་གནས་པའི་ཕྱིར་དགེ་སློང་དག་ཕྱིན་པའོ་ཞེས་བྱ་བ་ནི། དེ་ན་དགེ་སློང་སྔར་གནས་
གནས་པ་དེ་དག་མེད་པ་ན་དགེ་སློང་ཕྱི་མ་གཞན་དག་དེར་གནས་པའི་ཕྱིར་གནས་དེར་ཕྱིན་པའི་ཚེ་ཁོ་ནའི་དུས་དེ་ཡང་དུས་གཞན་ཅིག་ཡིན་པ་སྟེ། དུས་བཞི་པོ་དེ་དག་ལས་གང་ཡང་རུང་བར་བྱིན་གྱིས་བརླབས་ཀྱང་རུང་གི །རུང་བའི་ཁང་པ་གཅིག་ལ་ཡང་དུས་དེ་བཞི་ཆར་དུ་བྱིན་གྱིས་བརླབ་པར་
བྱ་བ་ནི་མ་ཡིན་ནོ། །དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པ་ཞེས་སྨོས་པ་དེའི་ཕྱིན་པའི་དུས་ཀྱི་ཚིགས་ཅིས་བཟུང་ཞེ་ན། དེའི་ཕྱིར་བྱ་བ་གཞན་རྩོམ་པ་དང་ངལ་བསོ་བ་མ་བྱས་པ་ཚུན་ཆད་ནི་དེ་ཉིད་དོ་ཞེས་བྱ་བ་སྨྲས་ཏེ། དེ་གཉིས་དངོས་ནི་ད་དུང་མ་བྱས་ལ་དེ་གཉིས་ལ་བྱ་བའི་
མཚམས་ལ་ཐུག་པ་ཚུན་ཆད་ཀྱི་དུས་ནི་དེར་ཕྱིན་པ་ཞེས་བྱ་བ་ཡིན་པར་སྦྱར་རོ། །བྱ་བ་གཞན་བརྩམ་པ་མ་བྱས་པ་ཚུན་ཆད་ཅེས་བྱ་བ་ནི། ཕྱིན་པ་དེ་དག་གིས་ཕྱིན་པ་ལས་གཞན་པའི་བྱ་བ་ཆུ་བཙག་པ་དང་གཙུག་ལག་ཁང་བསྒོ་བ་ལ་སོགས་པ་ཇི་སྲིད་དུ་མ་བརྩམས་པ་ཚུན་ཆད་དོ། །ངལ་བསོ་བ་
མ་བྱས་པ་ཞེས་བྱ་བ་ནི། སྟན་ལ་སོགས་པ་འདུག་པར་བྱ་བ་ཇི་སྲིད་དུ་མ་བཤམས་པ་ཚུན་ཆད་དོ། །དེ་ལྟར་བྱ་བ་གཞན་བརྩམ་པ་དང་ངལ་བསོ་བ་དེ་གཉིས་མ་བྱས་པ་ཚུན་ཆད་ཀྱི་བར་གྱི་དུས་དེ་ནི་དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པ་ཉིད་ཀྱི་དུས་ཡིན་པར་རིག་པར་བྱའོ། །ཐམས་

ཅད་ལ་དགེ་འདུན་གྱི་ལས་ཀྱིས་སོ་ཞེས་བྱ་བ་ནི། དུས་བཞི་པོ་ཇི་སྐད་བསྟན་པ་དེ་དག་ཐམས་ཅད་ལ་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་རུང་བའི་ཁང་པ་བྱིན་གྱིས་བརླབ་པར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ་
བགྱིས་པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བཞེད་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་གནས་ཐམས་ཅད་གྲུབ་པའམ་བགྱིས་
པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱིས་རུང་བའི་ཁང་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ་བགྱིས་པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་
འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བཞེད་དེ། དེའི་སླད་དུ་དགེ་འདུན་གྱི་གནས་ཐམས་ཅད་དུ་གྲུབ་པའམ་བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱི་ན། ཚེ་དང་ལྡན་པ་གང་
དག་གནས་ཐམས་ཅད་གྲུབ་པའམ་བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱི་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་
ཅིང་གནང་ནས། དགེ་འདུན་གྱི་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་
ནོ། །འདིར་གནས་ཐམས་ཅད་གྲུབ་པའམ་བགྱིས་པའམ་ལགས་པ་ཞེས་ཚིག་གསུམ་སྨོས་པ་ནི་གནས་ལ་རྣམ་པ་དེ་ལྟ་བུ་གསུམ་སྲིད་པས་སྤྱིར་བསྟན་པའི་ཕྱིར་ཡིན་གྱི། ལས་བྱེད་པའི་དུས་ན་ནི་གནས་དེ་རྣམ་པ་དེ་གསུམ་གང་ཡིན་པ་གཅིག་སྨོས་པར་བྱ་སྟེ། དཔེར་ན་གནས་ཐམས་ཅད་

གྲུབ་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་ཞེས་བྱ་བ་ལྟ་བུར་སྦྱར་ཏེ་བརྗོད་པར་བྱའོ། །དང་པོ་གཉིས་ལ་ནི་གང་ཟག་གིས་ཀྱང་ངོ་ཞེས་བྱ་བ་ནི། བྱིན་གྱིས་བརླབ་པའི་དུས་དང་པོ་གཉིས་ཏེ། དང་པོ་སོ་ཕག་འགྲེམས་པའོ་ཞེས་བྱ་བ་དང་། ཕྱིས་ལས་
སར་པ་དང་བཅས་པ་ཉིད་དོ་ཞེས་བྱ་བ་དེ་གཉིས་ཀྱི་དུས་སུ་ནི་གང་ཟག་གིས་ཀྱང་བྱིན་གྱིས་བརླབ་ཏུ་རུང་བའོ། །གང་ཟག་ཇི་ལྟ་བུས་ཤེ་ན་དེའི་ཕྱིར་ལག་གི་བླས་སོ་ཞེས་བྱ་བ་སྨོས་ཏེ། དང་པོ་ཤོས་ལ་ནི་འབའ་ཞིག་གིས་ཀྱང་ངོ་ཞེས་བྱ་བ་ནི། དང་པོ་གཉིས་ལས་ཀྱང་དང་པོ་ཤོས་ཏེ་དང་པོ་སོ་
ཕག་འགྲེམས་པའོ་ཞེས་བྱ་བའི་དུས་དེར་ནི་གང་ཟག་གི་ལག་གི་བླ་འབའ་ཞིག་གིས་ཀྱང་བྱིན་གྱིས་བརླབ་ཏུ་རུང་བའོ། །ཀྱང་ངོ་ཞེས་བྱ་བའི་སྒྲས་ནི་དགེ་སློང་གཞན་དང་ལྷན་ཅིག་པས་ཀྱང་རུང་བར་སྟོན་ཏོ། །ཇི་ལྟར་བྱིན་གྱིས་བརླབ་པར་བྱ་ཞེ་ན་དེའི་ཕྱིར་བརྗོད་པས་སོ་ཞེས་བྱ་བ་སྨྲས་ཏེ། སེམས་
བསྐྱེད་པ་སྔར་བཏང་ནས་ཚིག་ཏུ་བརྗོད་པས་བྱིན་གྱིས་བརླབ་པར་བྱའི། ཅང་མི་སྨྲས་པས་ནི་མ་ཡིན་ནོ། །འདིར་གཞུང་ནི་འདི་ལྟར་དགེ་སློང་ལག་གི་བླས་རྡོ་བཏེག་པ་ན་དེའི་དང་པོར་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་སྙམ་དུ་སེམས་བསྐྱེད་པར་བྱ་ཞིང་། ཚིག་ཏུ་ཡང་
བརྗོད་པར་བྱའོ་ཞེས་གསུངས་པ་ཡིན་ནོ། །འདིར་གང་ཟག་གིས་བྱིན་གྱིས་བརླབ་པའི་ཆོ་ག་དང་སྔགས་ཀྱང་གཞུང་དེ་ཉིད་ཡིན་ནོ། །དུས་དང་པོར་བྱིན་གྱིས་བརླབས་པའི་རུང་བའི་ཁང་པ་འདིའི་མིང་ནི་བཏེག་པའི་མཐའ་ལས་བྱུང་བ་ཞེས་བྱའོ། །གཉིས་པ་ལ་ནི་དགེ་སློང་རབ་ཏུ་མང་པོ་དག་
གིས་སེམས་བསྡུ་བས་སོ་ཞེས་བྱ་བ་ནི། བྱིན་གྱིས་བརླབས་པའི་དུས་གཉིས་པ་སྟེ། ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བའི་དུས་དེར་ནི་དགེ་སློང་རབ་ཏུ་མང་པོ་དག་གིར་རུང་བའི་ཁང་པར་སེམས་བསྡུ་བས་བྱིན་གྱིས་བརླབ་པར་བྱ་བ་སྟེ། འདིའི་སྔགས་ནི། ཚེ་དང་ལྡན་པ་དག་གཞི་
འདི་དགེ་འདུན་གྱི་རུང་བའི་ཁང་པར་འགྱུར་བར་སེམས་བསྡུས་ཤིག་ཅེས་གསུངས་པ་ཡིན་ནོ། །དུས་གཉིས་པར་བྱིན་གྱིས་བརླབས་པའི་རུང་བའི་ཁང་པ་འདིའི་མིང་ནི་སེམས་བསྡུས་པའི་མཐའ་ལ