Luận tạng Tây Tạng (Tengyur) — Tập 158

༄༅༅། །རྒྱ་གར་སྐད་དུ། ཨཱ་ག་མ་ཀྵཱུ་དྲ་ཀ་བྱཱ་ཁྱཱ་ན། བོད་སྐད་དུ། ལུང་ཕྲན་ཚེགས་ཀྱི་རྣམ་པར་བཤད་པ། བམ་པོ་དང་པོ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་
ཕྱག་འཚལ་ལོ། །དཔལ་ལྡན་གང་གི་ཡོན་ཏན་དག་གིས་ཉོན་མོངས་དགྲ་ཡི་ཚོགས་རྣམས་མ་ལུས་འདུལ་མཛད་ཅིང་། །དོན་རྣམས་མ་ལུས་རིག་པའི་དྲི་མེད་མཁྱེན་ལྡན་བདག་ཉིད་ཐུགས་
རྗེས་འདུལ་གསུང་བའི། །སངས་རྒྱས་ཞབས་ཀྱི་པདྨ་ལྷ་ཡི་རིན་ཆེན་ཅོད་པན་ཟེར་གྱིས་རེག་པར་གྱུར་དེ་ལ། །ཕྱག་བྱས་ནས་ནི་ཕྲ་མོའི་རྟོགས་དཀའི་དེ་ཉིད་ཚིག་གི་རྣམ་བཤད་འདི་བརྩམ་བྱ། །
ཕྲན་ཚེགས་ཀྱི་གཞིའི་སྡོམ་ཞེས་བྱ་བ་ལ། ཕལ་ཆེར་བསླབ་པའི་གཞི་ཕྲ་ཞིང་ཁ་ན་མ་ཐོ་བ་ཆུང་བ་སྟོན་པར་བྱེད་པའི་ལུང་གང་ཡིན་པ་དེ་ནི་ཕྲན་ཚེགས་ཞེས་བྱའོ། །གཞི་ཞེས་བྱ་བ་ནི་འདི་ལ་
བསླབ་པའི་གཞི་བརྗོད་པར་བྱ་བའི་དངོས་པོའི་སྒོ་ནས་གནས་པར་བྱེད་པའི་ཕྱིར་གཞི་ཡིན་ཏེ། དོན་དང་ལྡན་པའི་སྒྲ་བཀོད་པ་ཞེས་བྱ་བའི་དོན་ཏོ། །སྡོམ་ཞེས་བྱ་བ་ནི་སྒྲོ་འདོགས་པ་བསལ་

བ་དང་། རྣམ་པར་བརྗེད་པ་སྤང་བའི་དོན་ཏོ། །གནོད་པ་ཅན་གྱི་ཡུལ་སྨོས་པ་ལས་བཏུས་ནས་ངག་གང་ལ་བསླབ་པའི་གཞི་བརྗོད་ཅིང་དཔྱོད་པ་ནི་སྡོམ་ཡིན་ཏེ། མདོར་བསྡུ་བ་བྱས་པའི་དོན་སྨོས་
པ་ཞེས་བྱ་བའི་བར་དུའོ། །བསྡུས་པའི་སྡོམ་ཞེས་བྱ་བ་ནི་བསྡུས་པར་གྱུར་པའི་སྡོམ་གྱི་ཚིགས་སུ་བཅད་པ་ལས་བཏུས་ཤིང་ངག་གང་ལ་ཁས་བླངས་པའམ། དུམ་བུར་བྱེད་པ་དེ་ནི་བསྡུས་པའི་སྡོམ་ཞེས་བྱའོ། །ཐམས་
ཅད་དུ་བསྟན་བཅོས་རྩོམ་པ་ལ་བརྗོད་པར་བྱ་བ་དང་། དགོས་པ་དང་འབྲེལ་པ་དང་། དགོས་པའི་དགོས་པ་དག་གདོན་མི་ཟ་བར་བརྗོད་པར་བྱ་བ་ཡིན་ཏེ། གང་གི་ཕྱིར་བརྗོད་པར་བྱ་བ་ལ་སོགས་པ་བཞི་པོ་དག་དང་བྲལ་བའི་སྒྲ་
ལ་ཡང་རྟོག་པ་དང་ལྡན་པ་ཡིད་དགའ་བ་སྐྱེད་པས་སྐྱེད་པར་མི་བྱེད་ན་བསྟན་བཅོས་དག་ལ་ཡང་སྨོས་ཀྱང་ཅི་དགོས། དེ་ཕྲན་ཚེགས་ཀྱི་མིང་ཅན་གྱི་ལུང་འདི་ལ་དགེ་སློང་དག་གི་བྱ་བ་ནི་བརྗོད་པར་བྱ་བ་ཡིན་ལ། དེ་ཡང་
རྣམ་པ་གཉིས་ཏེ། ཅུང་ཞིག་ནི་དོར་བར་བྱ་བ་ཡིན་ཏེ། དཔེར་ན་སོ་ཕག་གིས་ལུས་ལ་བདར་བར་མི་བྱའོ་ཞེས་བྱ་བ་ལྟ་བུའོ། །བསམ་གཏན་དང་འདོན་པ་ལ་སོགས་པ་ཅུང་ཞིག་ནི་བླང་བར་བྱ་བ་ཡིན་ཏེ། དཔེར་ན་དགེ་

སློང་དག་རྒྱགས་པ་མེད་པར་བསམ་གཏན་གྱིས་ཤིག་ཅེས་བྱ་བ་ལྟ་བུའོ། །བརྗོད་པར་བྱ་བ་གཉིས་པོ་དེ་བསྟན་ཅིང་ཁོང་དུ་ཆུད་པ་ནི་བཅོམ་ལྡན་འདས་དང་སྡུད་པ་པོ་དག་གི་དགོས་པ་ཡིན་ནོ། །བསྟན་པ་དེ་ཡང་ཕྲན་ཚེགས་ཀྱི་མིང་ཅན་གྱི་སྒྲའི་བཀོད་པ་འདིས་བསྒྲུབ་པར་ནུས་པ་དེའི་ཕྱིར་སྒྲའི་
ཚོགས་འདི་བརྗོད་པར་བྱ་བ་ཁོང་དུ་ཆུད་པའི་ཐབས་སུ་གྱུར་པ་ཡིན་ཏེ། འདི་གཉིས་ནི་ཐབས་ལས་བྱུང་བའི་མཚན་ཉིད་ཀྱིས་འབྲེལ་པ་ཡིན་ནོ། །རབ་ཏུ་ཡང་དག་པར་འཇུག་པའི་སྡུག་བསྔལ་ལ་ཆོས་ཤེས་པའི་བཟོད་པ་ནས་ཕུང་པོ་ལྷག་མ་མེད་པའི་མྱ་ངན་འདས་པ་ཐོབ་པ་ཞེས་བྱ་བའི་ནི་
དགོས་པའི་དགོས་པ་ཡིན་ནོ། །སངས་རྒྱས་བཅོམ་ལྡན་འདས་ཞེས་བྱ་བ་ལ། ཆོས་ཐམས་ཅད་ཐུགས་སུ་ཆུད་པའི་ཕྱིར་སངས་རྒྱས་ཡིན་ལ། དབང་ཕྱུག་ལ་སོགས་པ་ཡོན་ཏན་དྲུག་དང་ལྡན་པའི་ཕྱིར་བཅོམ་ལྡན་འདས་སམ། འདོད་ཆགས་དང་། ཞེ་སྡང་དང་། གཏི་མུག་བཅོམ་པ་ཉིད་ཀྱི་
ཕྱིར་བཅོམ་ལྡན་འདས་ཏེ། འདོད་ཆགས་བཅོམ་ཞིང་ཞེ་སྡང་བཅོམ། །གཏི་མུག་བཅོམ་ཞིང་ཟག་པ་མེད། །སྡིག་པའི་ཆོས་རྣམས་རྣམ་བཅོམ་པ། །དེ་ཕྱིར་དེ་ནི་བཅོམ་ལྡན་འདས། །ཞེས་གསུངས་པའི་ཕྱིར་རོ། །སངས་རྒྱས་ཀྱི་སྒྲའི་ཉེ་བའི་ཚིག་བཅོམ་ལྡན་འདས་ཞེས་བྱ་བ་ཡིན་ན་ནི་
བཅོམ་ལྡན་འདས་ཉིད་བརྗོད་པར་བྱ་བ་མ་ཡིན་ནམ། འདི་ལྟར་མདོ་སྡེ་ལས་དུས་གཅིག་ན་བཅོམ་ལྡན་འདས་ཞེས་འབྱུང་བའི་ཕྱིར་རོ་ཞེ་ན། དེ་སྐད་དུ་བརྗོད་པར་ནི་མི་ནུས་ཀྱི་གཞན་དག་ལ་ཡང་བཅོམ་ལྡན་འདས་ཞེས་བརྗོད་དེ། འདི་ལྟར་བཅོམ་ལྡན་འདས་ནོར་ལྷ་ཞེས་བྱ་བ་ལ་སོགས་པའི་
ཁྱད་པར་རྣམ་པར་གཅད་པར་བྱ་བའི་ཕྱིར་སངས་རྒྱས་སྨོས་པ་ཡིན་ནོ། །དེ་ལྟ་ན་ནི་མདོ་སྡེ་དག་ལ་ཡང་སངས་རྒྱས་སྨོས་དགོས་སོ་ཞེ་ན། མི་བྱ་སྟེ། ཉན་ཐོས་ཀྱིས་བཤད་པའི་མདོ་སྡེ་ཡང་སྲིད་པའི་ཕྱིར་ཏེ། དེ་ལྟར་བསླབ་པའི་གཞི་བཅའ་བ་དག་ནི་ཉན་ཐོས་འཕགས་པ་ཤཱ་རིའི་བུ་ལ་ཡང་
དབང་ཡོད་པ་མ་ཡིན་པ་དེའི་ཕྱིར་འདུལ་བ་ལ་བསླབ་པའི་གཞི་བཅས་པ་མཛད་པ་ལ་སྟོན་པ་གཅིག་པུ་གཙོ་བོར་གྱུར་པ་ཡིན་གྱི། གཞན་འགའ་ཞིག་ཀྱང་མ་ཡིན་ནོ་ཞེས་བྱ་བ་ཉིད་ཀྱི་ཕྱིར་སངས་རྒྱས་སྨོས་སོ། །ཡངས་པ་ཅན་ཞེས་བྱ་བ་ནི་ཁྱིམ་དང་འབྱོར་པ་ཡངས་ཤིང་རྒྱ་ཆེ་བར་གྱུར་པའི་གྲོང་

ཁྱེར་ནི་ཡངས་པ་ཅན་ནམ། མི་རྣམས་བསོད་ནམས་རྒྱ་ཆེ་ཞིང་ལྷའི་ཕུན་སུམ་ཚོགས་པ་དང་ལྡན་པའི་གྲོང་ཁྱེར་འདི་ལ་ཡངས་པ་ཅན་ཞེས་བྱའོ། །ཡངས་པ་ཅན་དེ་ན་ཞེས་བྱ་བ་ནི་ཉེ་བར་གྱུར་པ་དབང་དུ་བྱེད་པའོ། །བཞུགས་ཏེ་ཞེས་བྱ་བ་ལ་དེའི་སྒྲ་ནི་འདས་པའི་དུས་སྟོན་
པར་བྱེད་པའོ། །འདི་ལྟར་བཞུགས་པ་ཡང་བཞེངས་པ་དང་། བཞུགས་པ་དང་། གཟིམས་པ་དང་། འཆག་པ་ཐ་དད་པའི་སྒོ་ནས་རྣམ་པ་བཞི་སྲིད་པ་དེ་ལྟ་ན་ཡང་འདིར་བཞུགས་པ་ཙམ་ཞིག་ཉེ་བར་སྦྱར་བ་ཡིན་ནོ། །སྤྲེའུ་རྫིང་གི་འགྲམ་ཞེས་བྱ་བ་ནི་སྤྲེའུས་བརྐོས་པའི་ཆུའི་རྫིང་གི་འགྲམ་
ནའོ། །ཁང་པ་བརྩེགས་པའི་གནས་ཞེས་བྱ་བ་ནི་གཙུག་ལག་ཁང་གི་མིང་ངོ་། །དྲུག་སྡེ་ཉིད་ཀྱིས་བྱ་བ་ནི་དྲུག་པོ་ཕན་ཚུན་སྡེ་ཚན་དུ་རྗེས་སུ་མཐུན་པ་དག་ནི་དྲུག་སྡེ་ཡིན་ལ། དྲུག་སྡེའི་དངོས་པོ་ནི་དྲུག་སྡེ་ཉིད་དམ། གང་རྣམ་པ་དྲུག་པོ་ལ་ཕན་པས་ན་དྲུག་སྡེ་ཉིད་དེ། དེ་དག་རེ་རེ་ལ་ཡང་དྲུག་
སྡེ་ཁོ་ན་ཉིད་ཅེས་བྱ་སྟེ། དཔེར་ན་བྱ་ལྔ་པ་དང་དགེ་སློང་ལྔ་པ་ཞེས་བྱ་བ་ལྟ་བུའོ། །དྲུག་སྡེ་ཉིད་ནི་ཚོགས་ལ་བྱའོ། །སྔ་དྲོ་ནི་ཉི་མའི་ཐུན་དང་པོ་ཡིན་ལ་དེར་བགོས་ནས་ཞེས་བྱ་བ་ནི་ཤམ་ཐབས་བགོས་སུ་ཟིན་ཀྱང་སྤྱོད་ལམ་སྦ་བའི་ཕྱིར་དང་། ཡང་མཛེས་པར་བྱ་བ་ནི་ཉིད་ཀྱི་ཕྱིར་ཞེས་
བྱ་བའི་དོན་ཏོ། །བསོད་སྙོམས་ཀྱི་ཕྱིར་ཞེས་བྱ་བ་ནི་བསོད་སྙོམས་བླང་བའི་དོན་དུའོ། །བར་ནི་དབུས་སོ། །ཡངས་པ་ཅན་ཞེས་བྱ་བ་ལ་ཡངས་པ་ཅན་གྱི་གྲོང་ཁྱེར་ན་གནས་པ་གང་ཡིན་པ་དེ་དག་ནི་ཡངས་པ་ཅན་གྱིའོ། །ལིཙྪ་བཱི་ཞེས་བྱ་བ་ནི་ལིཙྪ་བཱིའི་མིང་ཅན་གྱི་རྒྱལ་རིགས་དག་གིའོ། །
སྐྱེད་མོས་ཚལ་ནི་རྩེད་འཇོའི་གནས་ལ་བྱའོ། །བྱ་སྣ་ཚོགས་སྐད་འབྱིན་པ་ཞེས་བྱ་བ་ནི་འདབ་ཆགས་རྣམ་པ་སྣ་ཚོགས་སྒྲ་སྒྲོགས་པའོ། །དགའ་བའི་ཚལ་ཞེས་བྱ་བ་ནི་སུམ་ཅུ་རྩ་གསུམ་པ་དག་སྐྱེད་མོས་ཚལ་གང་ལ་རབ་ཏུ་འཇུག་ན་ལྷ་དག་གི་འབྱོར་པའི་ཚོགས་ཉམས་སུ་མྱོང་བར་གྱུར་
པའོ། །དེ་དང་འདྲ་བ་ནི་དེ་དང་ཆ་འདྲ་བ་དག་ཡིན་ནོ། །རྩོལ་བ་ནི་ལུས་ཀྱི་སྒོ་ནས་དུབ་པར་བྱེད་པ་ཡིན་ལ། རྩོལ་བ་གང་གིས་སྒྲུབ་པར་བྱེད་པ་དེ་ནི་བརྩལ་བའི་ཆ་སྤྱད་ཡིན་ཏེ། རྔ་བོ་ཆེ་ལ་སོགས་པའོ། །གར་དང་གླུ་དང་སིལ་སྙན་གྱི་ཆ་སྤྱད་ནི་པི་ཝང་ལ་སོགས་པ་དག་གོ། །ཁྲུས་ཀྱི་ཡོ་བྱད་ནི་སོ་ཕག་ལ་

སོགས་པ་དག་གོ། །སུམ་ཅུ་རྩ་གསུམ་གྱི་ལྷ་ཞེས་བྱ་བ་ནི་རྩེ་བའི་ཕྱིར་ལྷ་སྟེ་རྩེ་འཇོ་བྱེད་པའི་ཕྱིར་ཞེས་བྱ་བའི་དོན་ཏོ། །དབང་པོ་གཅིག་དང་ཉེ་བའི་དབང་པོ་སུམ་ཅུ་རྩ་གཉིས་ཏེ། སུམ་ཅུ་རྩ་གསུམ་པོ་དེ་དག་ནི་སུམ་ཅུ་རྩ་གསུམ་ཞེས་བྱའོ། །དཔེར་མཛད་ན་ཞེས་བྱ་བ་ནི་དཔེར་གྱུར་པས་ན་དཔེར་
མཛད་པ་སྟེ། ཇི་སྐད་དུ་དགེ་སློང་དག་ཁྱེད་ཅག་ལས་སུམ་ཅུ་རྩ་གསུམ་གྱི་ལྷ་མཐོང་བར་མ་གྱུར་པ་གང་ཡིན་པ་དེས་ཡངས་པ་ཅན་གྱི་ལིཙྪ་བཱིའི་སྐྱེད་མོས་ཚལ་གྱི་གནས་སུ་སོང་ལ་ལྟོས་ཤིག་ཅེས་བྱ་བ་ལ་སོགས་པ་གསུངས་པ་ཡིན་ནོ། །གཏམ་དུ་བྱས་པ་ཞེས་བྱ་བ་ལ། གཏམ་ནི་
ཚིག་གི་སྒོ་ནས་མངོན་པར་འདོད་པའི་འབྲས་བུ་དཔྱོད་པར་བྱེད་པ་ཡིན་ཏེ། གང་གིས་གཏམ་དུ་བྱས་པ་དེ་དག་ནི་གཏམ་དུ་བྱས་པ་སྟེ། མངོན་པར་འདོད་པའི་འབྲས་བུ་འབྱོར་པ་བསྒྲུབས་ནས་ཞེས་བྱ་བའི་བར་དུའོ། །མདའ་བོ་ཆེ་ནི་ལོགས་གཉིས་ནས་ལྕགས་ཀྱི་མདེའུ་ཚད་ཆེན་པོ་
ཅན་དབུས་ལག་པས་གཟུང་དུ་རུང་བ་མཚོན་ཆའི་ཁྱད་པར་དག་ཡིན་ཏེ། དེ་ཡང་དང་ཡང་དུ་འཕངས་པ་ལས་བརྩལ་བ་འགྲུབ་པར་འགྱུར་རོ། །རྡོ་སྲད་བུ་ལ་སོགས་པས་བཅིངས་པ་དག་ནི་དྲང་བའི་དོན་གྱི་རྡོ་སྟེ། དེ་འདྲེན་པ་ལས་ཀྱང་བརྩལ་བ་འགྲུབ་པར་འགྱུར་རོ། །བསྣུན་པའི་
དོན་གྱི་རྡོ་ནི་སྐྱེས་བུ་སྟོབས་དང་ལྡན་པས་བཏེག་པའི་རྡོ་ཡིན་ཏེ། དེ་བཏེག་ནས་དོར་བ་ལས་ཀྱང་བརྩལ་བ་འགྲུབ་པར་འགྱུར་བའམ། གང་གིས་དཔུང་མགོའི་ཕྱོགས་ལ་བསྣུན་པར་གྱུར་ན་མཁྲང་པོར་འགྱུར་བའི་ཕྱིར་བསྣུན་པའི་དོན་གྱི་རྡོ་ཞེས་བྱའོ། །པི་ཝང་ནི་སིལ་སྙན་གྱི་ཁྱད་པར་ལ་
བྱ་སྟེ། ད་ལྟར་ནི་མི་སྣང་ངོ་། །ཁ་ཅིག་ནི་པི་ཝང་དུ་རབ་ཏུ་གྲགས་པ་ལ་ཡང་པི་ཝང་ཞེས་ཟེར་རོ། །གླིང་བུ་ནི་འདི་མ་ཡིན་ལ། རྔ་ནི་རྫ་རྔ་ལ་བྱའོ། །འཁར་རྔ་ནི་འཁར་རྔའི་སིལ་སྙན་ཡིན་ལ། སྒྲ་སྙན་པའི་མཆོག་ནི་སིལ་སྙན་ཡིན་ཏེ་ནུབ་པར་གྱུར་ཏོ་ཞེས་བརྗོད་དོ། །བཟོའི་གནས་དང་། ལས་ཀྱི་གནས་ཞེས་
བྱ་བ་ལ། བསླབ་པའི་གནས་ནི་བསླབ་པའི་དངོས་པོ་ཁོང་དུ་ཆུད་པ་སྟེ། ཁོལ་མ་བྱུང་བ་ལ་སོགས་པའོ། །ལས་ཀྱི་གནས་ནི་བསླབ་པའི་རྩོལ་བས་བསྒྲུབ་པ་དག་ཡིན་ཏེ། གླང་པོ་ཆེའི་གཉའ་བ་དང་། རྟའི་རྒྱབ་དག་ལ་ཞོན་པ་ལ་སོགས་པའོ། །ཡན་ལག་ལྔ་དང་ལྡན་པ་ཞེས་བྱ་བ་ནི་བརྡུང་བར་བྱ་བ་སིལ་

སྙན་གྱི་ཚོགས་ལ་བྱ་ལ། བརྡུང་བར་བྱ་བ་ཡན་ལག་ལྔ་དག་གང་ལ་ཡོད་པ་དེ་ནི་ཡན་ལག་ལྔ་དང་ལྡན་པ་སྟེ། དཔེར་ན་དཔུང་གི་ཚོགས་ཡན་ལག་བཞི་པ་ལྟ་བུའོ། །བརྡུང་བར་བྱ་བའི་ཡན་ལག་དག་ཀྱང་སིལ་སྙན་ལྔའི་ཁྱད་པར་ཡིན་ཏེ། རྒྱུད་དང་། རྣམ་པར་རྒྱས་པ་དང་།
མགོ་བཟངས་དང་། མཐུག་པ་དང་། འདྲེན་མའི་དབྱེ་བའི་ཕྱིར་རོ། །དེ་ལ་རྒྱུད་ནི་རྒྱུད་ཉིད་ཀྱིས་སྒྲོག་པ་སྟེ་པི་ཝང་ལ་སོགས་པའོ། །རྣམ་པར་རྒྱས་པ་ནི་པགས་པས་གཡོགས་པ་སྟེ། རྔ་བོ་ཆེ་དང་རྫ་རྔ་ལ་སོགས་པའོ། །མགོ་བཟངས་ནི་འོད་མའི་སིལ་སྙན་ནོ། །མཐུག་པ་ནི་གླུ་སྙན་པ་
ལ་སོགས་པ་དབྱངས་ཀྱི་ཁྱད་པར་རོ། །འདྲེས་མ་ནི་ཕན་ཚུན་རྗེས་སུ་མཐུན་པ་སྒྲ་འཇམ་པོ་ཡིད་དུ་འོང་བའི་སིལ་སྙན་དག་གི་ཚོགས་ཡིན་ནོ། །སྐྱེས་བུ་མཁས་པས་ཞེས་བྱ་བ་ལ་སོགས་པ་ལ། སྒྲ་སྣ་ཚོགས་ཀྱི་ཁྱད་པར་སྒྲོགས་པར་བྱེད་པ་ལ་མཁས་པ་ཞེས་བྱའོ། །ལེགས་པར་རབ་ཏུ་
དཀྲོལ་བ་ཞེས་བྱ་བ་ནི་རབ་ཏུ་སྦྱོར་བ་པོ་དེས་ཡང་དག་པ་ཕྱིན་ཅི་མ་ལོག་པའི་རྣམ་པས་སོ། །ཁ་ཅིག་ནི་སྒྲ་ཡིད་དུ་འོང་བ་ཅན་རྒྱུད་ལྔ་པ་བརྡུང་བར་བྱ་བའི་ཁྱད་པར་ནི་ཡན་ལག་ལྔ་དང་ལྡན་པ་ཞེས་བྱ་བ་དང་། གཞན་དག་ཀྱང་ཕན་ཚུན་རྗེས་སུ་མཐུན་པ་སྒྲ་ཡིད་དུ་འོང་བ་ཅན་བརྡུང་བར་བྱ་བའི་
ཁྱད་པར་ལྔ་ལ་ཡན་ལག་ལྔ་དང་ལྡན་པ་ཞེས་ཟེར་རོ། །ཡང་ན་སིལ་སྙན་གྱི་རྫས་རྒྱུད་དང་ལྡན་པར་བྱ་བའི་པི་ཝང་ལ་སོགས་པ་དག་སོར་མོ་དག་གིས་བརྡུང་བར་བྱ་བ་གང་ཡིན་པ་དེ་དག་ཡན་ལག་གཅིག་ཡིན་ལ། རྒྱུད་ཀྱི་ཁྱད་པར་གྱི་སྒོ་ནས་གྲུབ་པ་ལག་པ་དང་འབྲེལ་པའི་ཤིང་བུ་དྲུད་པ་དང་།
ཡོངས་སུ་དྲུད་པས་བརྡུང་བར་བྱ་བ་གང་ཡིན་པ་དེ་ནི་གཉིས་པའོ། །གླིང་བུ་ལ་སོགས་པ་ཁའི་དབུགས་ཀྱིས་བུད་པར་བྱ་བ་གང་ཡིན་པ་དེ་ནི་གསུམ་པའོ། །རྫ་རྔ་ལ་སོགས་པ་ལག་པས་བསྣུན་པའི་སྒོ་ནས་བརྡུང་བར་བྱ་བ་གང་ཡིན་པ་དེ་ནི་བཞི་པའོ། །ཆ་ལང་ལ་སོགས་པ་ཕན་ཚུན་
བརྡབ་པའི་སྦྱོར་བས་དཀྲོལ་བར་བྱ་བ་གང་ཡིན་པ་དེ་ནི་ལྔ་པའོ། །རྣ་བ་བྱོལ་ཏེ་ཞེས་བྱ་བ་ནི་སྒྲ་དེ་མཉན་པ་ལ་རྣ་བ་དང་སེམས་དག་རྣམ་པར་གཏོད་པའོ། །གར་བྱེད་པས་ན་གར་མཁན་ནོ། །བརྟག་པས་མོས་པ་ནི་མངོན་པར་འདོད་པ་ཡིན་ལ། བརྟག་པའི་ཕྱིར་གཞོལ་ཞིང་འབབ་པའི་ཡིད་

གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། སྒྲ་དེ་མཉན་པའི་ཕྱིར་གནས་དེར་འགྲོ་བར་མངོན་པར་འདོད་པ་དང་བཅས་པས་ཞེས་བྱ་བའི་ཐ་ཚིག་གོ། །མྱུར་ཞིང་ཞེས་བྱ་བ་ལ་སོགས་པ་ལ། རིངས་དྲག་ཏུ་དོང་ནས་སོ། །བཀྲེན་པ་ནི་དམན་པའམ་ཡོན་ཏན་གྱིས་དབུལ་བར་གྱུར་པ་ཡིན་ཏེ། དམན་པ་ཉིད་
དང་ཡོན་ཏན་གྱིས་དབུལ་བར་གྱུར་པས་འགའ་ཞིག་ལ་ཡོན་ཏན་ཡོད་པ་དག་ཏུ་སྐྱེད་པར་མི་བྱེད་དོ། །དེ་ཉིད་ཀྱི་ཕྱིར་ཁྱེད་ལ་བྱེ་བྲག་ཅི་ཡོད་ཅེས་སྨོས་པ་ཡིན་ཏེ། ཁྱད་པར་ཡོངས་སུ་ཤེས་པའི་ནུས་པ་མེད་པ་ཡིན་ནོ་ཞེས་བྱ་བར་དགོངས་སོ། །དགེ་སྦྱོང་རྣམས་ཀྱང་འདོད་པའི་ཡོན་ཏན་གྱིས་
ཞེས་བྱ་བ་ལ་མཁས་པ་དཀའ་ཐུབ་ཅན་གྱི་འགྲོ་བ་དག་ནི་དགེ་སྦྱོང་ཡིན་ཏེ། དེ་དག་འདི་ཀུན་སྤྱོད་པར་བྱེད་པའི་ཕྱིར་དགེ་སྦྱོང་རྣམས་རྟོག་པའི་གཡོས་འདོད་པ་ལ་ཡོངས་སུ་ལོངས་སྤྱོད་པ་ཡིན་ཏེ། དཔེར་ན་སོ་ཕག་བདར་བའི་གཡོས་སྒྲ་ཡིད་དུ་འོང་བ་ལོངས་སྤྱོད་པ་དང་། རྒྱ་རྗེས་སུ་
གནང་བས་གསེར་ལས་བྱས་པ་ལ་སོགས་པའི་སོར་གདུབ་ཡོངས་སུ་ལོངས་སྤྱོད་པར་བྱེད་དོ་ཞེས་བྱ་བ་ལ་སོགས་པ་ལྟ་བུའོ། །སྒྲའི་དོན་དཔྱད་པར་བྱ་སྟེ། འདོད་པར་བྱ་བ་ཡིན་པའི་ཕྱིར་འདོད་པ་སྟེ། མངོན་པར་འདོད་པར་བྱ་བ་ཡིན་པའི་ཕྱིར་ཞེས་བྱ་བའི་དོན་ཏོ། །གོམས་པར་བྱ་བ་ཡིན་
པའི་ཕྱིར་ཡོན་ཏན་ཏེ། འདུན་པའི་འདོད་ཆགས་ཀྱི་སྒོ་ནས་གོམས་པར་བྱེད་ཅེས་བྱ་བའི་བར་དུའོ། །རྗེས་སུ་སྟོན་པར་མཛད་པས་ན་སྟོན་པའོ། །སྤ་གོང་བ་ནི་ལན་སྦྱིན་པའི་ནུས་པ་མེད་པར་གྱུར་པ་ཡིན་ནོ། །སྲང་དང་ཞེས་བྱ་བ་ལ་སོགས་པ་ལ། ཤིང་རྟ་བཀྲི་བར་ནུས་པའི་ཁྲི་
ལམ་གང་ཡིན་པ་དེ་ནི་སྲང་ཡིན་ནོ། །ཁྲི་ལམ་ནི་ཤིང་རྟ་བསྐྱོད་དུ་རུང་བའི་ཚོང་དུས་ཀྱི་ཁྲི་ལམ་མོ། །བཞི་མདོ་ནི་སྲང་གི་སྣའི་ལམ་གྱི་བཞི་མདོ་དག་གོ། །སུམ་མདོ་ནི་སྲང་གི་སྣའི་ལམ་གྱི་སུམ་མདོའོ། །འདས་པ་དང་བཅས་པར་འགྱུར་རོ་ཞེས་བྱ་བ་ནི་ཤིན་ཏུ་འདས་པར་བྱེད་པ་ནི་འདས་
པ་སྟེ། བསླབ་པའི་མཚམས་ལས་ཤིན་ཏུ་རྒལ་བར་བྱེད་པའོ། །འདས་པ་དང་ལྷན་ཅིག་འཇུག་པས་ན་འདས་པ་དང་བཅས་ཤིང་རྒལ་བ་དང་བཅས་པ་སྟེ། ཉེས་བྱས་ཀྱི་ཁ་ན་མ་ཐོ་བ་དང་བཅས་པར་གྱུར་ཞེས་བྱ་བའི་ཐ་ཚིག་གོ། །དྲི་མའི་འདམ་ནི་དྲི་མས་ཉེ་བར་གོས་པའམ་དྲི་

མའི་ཚོགས་ལ་བྱའོ། །དག་པ་ནི་ཉོན་མོངས་པའི་དྲི་མ་དང་བྲལ་བར་གྱུར་པའོ། །སྐབས་ནི་གནས་སྐབས་ལ་བྱའོ། །གང་སོ་ཕག་གིས་ལུས་སྦྱང་བར་མི་བྱའོ་ཞེས་གསུངས་པ་ནི་བཅས་པ་ཡིན་ལ། གང་རྐང་པ་སོ་ཕག་གིས་སྦྱང་བར་བྱའོ་ཞེས་གསུངས་པ་དེའི་
ཕྱིར་རྗེས་སུ་གནང་བ་ཡིན་པར་ཤེས་པར་བྱའོ། །མཛུབ་རིས་གསུམ་ཞེས་བྱ་བ་ནི་ས་ཞག་དཀར་པོས་འཕྲལ་བའི་ཕྱོགས་སུ་རི་མོ་གསུམ་བྱས་པ་ནི་མཛུབ་རིས་གསུམ་མོ། །འཕྱ་བར་བྱེད་པ་ནི་ཕྱར་ཁ་གཏོང་བར་བྱེད་པའོ། །གསོང་པོར་སྨྲ་བས་གསོང་པོར་སྨྲའོ་ཞེས་བྱ་བ་ནི་གུས་པའི་ཚིག་ཟློས་
པ་ཡིན་ཏེ། གསོང་པོར་སྨྲ་བ་ནི་ལུས་ཀྱིས་ཕྱག་འཚལ་མེད་པའི་སྒོ་ནས་མཆོད་པའི་ཚིག་བརྗོད་པ་ཡིན་ནོ། །མཉན་ཡོད་ཅེས་བྱ་བ་ལ་སོགས་པ་ལ། དྲང་སྲོང་མཉན་ཡོད་ཀྱིས་བསྒྲུབས་པའི་གྲོང་ཁྱེར་ལ་མཉན་ཡོད་ཅེས་བྱའོ། །བསླབ་པའི་ཚིག་འབྱུང་བས་ན་གཞི་ཞེས་བྱའོ། །གི་ཝང་གི་ཐིག་
ལེར་བྱས་ཏེ་ཞེས་བྱ་བ་ནི་གི་ཝང་གིས་འཕྲལ་བའི་ཕྱོགས་སུ་ཐིག་ལེར་བྱས་ནས་སོ། །ཆོས་སྟོན་བསྔགས་པར་བྱེད་ཅེས་བྱ་བ་ནི་དེང་བདག་གིས་བཟའ་བ་རྣམ་པ་སྣ་ཚོགས་ཞིམ་ཞིང་བསོད་པ་མང་པོ་རྙེད་པར་གྱུར་ཞེས་པའོ། །བྲམ་ཟེ་དང་ཁྱིམ་བདག་ནི་ཁྱིམ་གྱི་སྐྱེ་བོ་དམ་པ་དག་ཡིན་
ཏེ། དམ་པ་བཟུང་བས་དམ་པ་མ་ཡིན་པ་ཡང་སྨོས་པ་ཡིན་ནོ། །གསོང་པོར་སྨྲ་བ་ནི་གསོང་པོར་སྨྲ་བར་འོས་པ་ཡིན་པའི་ཕྱིར་གསོང་པོར་སྨྲ་བར་བྱ་བ་དག་ཡིན་ལ། ཕྱག་བྱ་བར་འོས་པ་ཡིན་པའི་ཕྱིར་ཕྱག་བྱ་བ་དག་ཅེས་བྱའོ། །རྒན་པོ་ནི་ན་ཚོད་ལས་ཤིན་ཏུ་འདས་པ་ཡིན་ཏེ།
བྲམ་ཟེ་ནི་གང་ཡིད་ཕྱིར་ཕྱོགས་པ་ཁྱིམ་དག་ཏུ་གནས་པ་བསམ་པ་མེད་པར་གྱུར་པའོ། །བརྒྱན་པ་ནི་སྤྲས་པར་གྱུར་པའོ། །བཞིན་བཟངས་ཞེས་བྱ་བ་ནི་སྙན་པའི་ཚིག་གིས་འབོད་པའོ། །རང་བཞིན་དུ་གནས་པའི་དངོས་པོ་ནི་རང་བཞིན་དུ་གནས་པར་གྱུར་པ་ཉིད་དེ། ནད་མེད་
པར་འགྱུར་རོ་ཞེས་བྱ་བའི་བར་དུའོ། །ཐུགས་རྗེའི་སྤྱོད་པ་མངའ་བའི་ཕྱིར་ཐུགས་རྗེ་ཅན་ནོ། །དྲིས་བྱུགས་ཏེ་ཞེས་བྱ་བ་ནི་ཡང་དག་པར་བསྐུས་ཏེའོ། །གནས་བརྟན་ཞེས་བྱ་བ་ནི་དེ་དག་མཆོད་པའི་ཚིག་གོ། །དེ་དག་འཕྱ་བར་བྱེད་ཅེས་བྱ་བ་ལ་སོགས་པ་ལ་འཕྱ་བ་ནི་མིང་སྨོས་པའི་སྒོ་ནས་ཚུལ་

མ་ཡིན་པ་རྗོད་པར་བྱེད་པའོ། །སྨོད་པ་ནི་མིང་སྨོས་པ་མེད་པར་སྤྱིར་འགའ་ཞིག་འདི་ལྟར་བྱེད་དོ་ཞེས་ཉེས་པ་རྗོད་པར་བྱེད་པའོ། །ངན་དུ་ཟེར་བ་ནི་དེའི་སྐྱོན་བརྗོད་པའི་ཕྱིར་འདྲི་བ་ལ་སྦྱོར་བ་ཡིན་ནོ། །འདོད་པ་ལ་ལོངས་སྤྱོད་པ་ཞེས་བྱ་བ་ནི་འདོད་པ་ལ་ལོངས་སྤྱོད་པའི་ངང་ཚུལ་ཅན་ནོ། །འོངས་ཤིང་ལྷགས་
པར་གྱུར་པ་རྣམས་ལ་ཞེས་བྱ་བ་ལ། ཅུང་ཞིག་སྔར་འོངས་པར་གྱུར་པའི་ཕྱིས་ལྷགས་པར་གྱུར་པ་གང་ཡིན་པ་དེ་དག་ནི་འོངས་ཤིང་ལྷགས་པར་གྱུར་པ་དེ་དག་ལའོ། །ཆོས་ནི་སངས་རྒྱས་ཀྱི་བཀའ་ཡིན་ལ། འཆད་པ་ནི་སྟོན་པར་བྱེད་པའོ། །ཀུན་ཏུ་སྤྱོད་པའི་ཆོས་རྣམས་ཞེས་བྱ་བ་ལ་ཁྱད་
པར་དུ་བྱ་བ་དང་རྗེས་སུ་མཐུན་པའི་གདོན་མི་ཟ་བར་བྱ་བ་དག་ནི་བཅོམ་ལྡན་འདས་ཀྱིས་དངོས་སམ་བརྒྱུད་པས་སྐབས་ཀྱི་བྱེ་བྲག་ལ་རག་ལུས་པ་བྱ་བར་རྗེས་སུ་གནང་བ་ཡིན་པའི་ཕྱིར་ཀུན་དུ་སྤྱོད་པའི་ཆོས་ཏེ། ཀུན་ནས་རྟག་ཏུ་ཁྱད་པར་དུ་བྱ་བའི་དོན་ཡིན་ནོ། །ཀུན་ཏུ་སྤྱད་པ་ནི་ཀུན་ཏུ་སྤྱོད་པ་སྟེ།
དེ་དང་དེ་དག་འདིར་ཀུན་ཏུ་སྤྱད་པ་ཞེས་བྱ་བ་ཡིན་ཏེ། དཔེར་ན་དགོན་པ་བས་ཁྱི་གསོ་བར་བྱེད་པ་ཁྱད་པར་དུ་བྱ་བ་ཡིན་ལ། དེ་དང་རྗེས་སུ་མཐུན་པ་ཡིན་པའི་ཕྱིར་བཅོམ་ལྡན་འདས་ཀྱིས་བྱ་བ་དག་ཏུ་རྗེས་སུ་གནང་བ་ཡིན་ནོ། །ལག་མཐིལ་དྲི་དང་ལྡན་པས་བྱུགས་ཤིག་ཅེས་བྱ་
བ་ནི་ལག་པ་དྲིས་ཉེ་བར་བསྒོས་པས་བཅོམ་ལྡན་འདས་ཀྱི་མཆོད་རྟེན་ལའོ། །ལག་པའི་སོར་མོ་རྣམ་པར་ཕྱེ་བ་གཟུགས་བརྙན་འབྱུང་བ་ཅན་ནི་ལག་པའི་མཐིལ་དྲི་དང་ལྡན་པའོ། །བཅོམ་ལྡན་འདས་ཀྱི་དབུ་སྐྲ་དང་སེན་མོ་དག་སྙིང་པོར་བྱས་པའི་མཆོད་རྟེན་ནི་དབུ་སྐྲ་དང་སེན་མོའི་མཆོད་
རྟེན་ནོ། །དུས་དུས་སུ་ཞེས་བྱ་བ་ནི་དུས་སྔ་མ་དང་ཀུན་དུ་འབྲེལ་པའི་དུས་ཅིག་ཤོས་ལ་དུས་དུས་ཞེས་བྱའོ། །མིག་ལ་ཕན་འདོགས་པར་བྱེད་པ་ནི་མིག་ལ་ཕན་པའོ། །འདི་ལ་འགྱོད་པ་ཉིད་དུ་མི་བྱ་བའོ་ཞེས་བྱ་བ་ནི་ངན་པར་བྱས་པས་ན་འགྱོད་པ་ཡིན་ལ། འགྱོད་པའི་དངོས་པོ་ནི་འགྱོད་པ་ཉིད་དོ། །
འདིར་ནི་དེ་ལ་དམིགས་པའི་སེམས་ལས་བྱུང་བའི་འགྱོད་པ་ཞེས་བྱ་བའི་ཆོས་ལ་འགྱོད་པ་ཉིད་དུ་བཤད་ལ་དེ་མི་བྱ་བ་ནི་བསྐྱེད་པར་མི་བྱའོ། །སྲོག་ཆགས་བྱིས་པ་གསོད་ཀྱི་རྣམ་པས་ཉེ་བར་མཚོན་པའི་རི་ནི་བྱིས་པ་གསོད་ཀྱི་རིའོ། །སྲིན་པོ་འཇིགས་པར་བྱེད་པ་རྣམ་པར་གནས་པའི་ནགས་ནི་

འཇིགས་པར་བྱེད་པའི་ནགས་སོ། །རི་དགས་མང་པོ་རྒྱུ་བའི་ཕྱིར་རི་དགས་རྒྱུ་བ་སྟེ། ཤིང་མང་པོ་ཅན་ཚད་ཤིན་ཏུ་མི་ཆེ་བའི་ཤིང་གཞན་དང་གཞན་དག་གིས་ཁྱབ་པའི་ས་ཕྱོགས་ནི་རྒྱུ་བ་ཅན་ནོ། །ཡང་དག་པ་འབྲས་བུ་གདམས་པ་སྒྲོགས་པར་བྱེད་པའི་ཕྱིར་ཉན་ཐོས་ཏེ།
དེ་དག་གི་དགེ་འདུན་ནི་ཚོགས་ཡིན་པས་ཉན་ཐོས་ཀྱི་དགེ་འདུན་ནོ། །ཚོན་རྩི་བརྒྱ་ནི་ཁམས་བརྒྱ་ལ་བྱའོ། །ཆགས་པ་ནི་ཞེན་པར་གྱུར་པའོ། །དུས་ལས་ཞེས་བྱ་བ་ལ། དུས་ནི་ཐ་མའི་དུས་ཏེ། དེ་ལས་འདས་པ་ནི་ཉམས་སུ་མྱོང་བར་གྱུར་པའོ། །གང་ལ་སྐེ་བ་ལ་ལྦ་བ་ཡོད་པ་དེ་ནི་ལྦ་བ་
ཅན་ཏེ་ཡི་དགས་ཀྱི་རིགས་ཅན་དག་ཏུའོ། །ཚངས་པའི་སྐུད་པ་ནི་མཆོད་སྦྱིན་གྱི་དག་བྱེད་དོ། །བཅའ་བ་དང་བཟའ་བ་ཞེས་བྱ་བ་ལ། །བཅའ་བ་ནི་ལྔ་སྟེ། འདི་ལྟར་རྩ་བའི་བཅའ་བ་དང་། སྡོང་བུའི་བཅའ་བ་དང་། ལོ་མའི་བཅའ་བ་དང་། མེ་ཏོག་གི་བཅའ་བ་དང་། འབྲས་
བུའི་བཅའ་བ་ཞེས་བྱ་བའོ། །བཟའ་བ་ནི་ལྔ་སྟེ། འདི་ལྟར་འབྲས་ཆན་དང་། ནས་ཆན་དང་། སྣུམ་ཁུར་དང་། ཉ་དང་། ཤ་ཞེས་བྱ་བའོ། །སྐུད་པ་གང་ལ་སྔོན་པོ་ལ་སོགས་པ་ཚོན་སྣ་ལྔ་ཡོད་པ་དེ་ནི་ཚོན་སྣ་ལྔ་པའི་སྐུད་པའོ། །འདུས་པར་ཟན་ཟོས་ནས་ཞེས་བྱ་བ་ནི་གང་གི་ཚེ་ཁྱིམ་
པའི་བྱིས་པ་བཙས་པའམ། མེ་སྐོར་བྱེད་པ་དེའི་ཚེ་སྐྱེ་བའི་རྩ་ལག་འདུས་པར་གྱུར་པ་གང་ཡིན་པ་དེ་ལ་འདུས་པ་ཞེས་བྱ་བའམ། འདུས་པའི་རྒྱུ་མཚན་ལས་བྱུང་བའི་ཟས་བསོད་པ་ལ་ཡང་འདུས་པ་ཁོ་ན་ཞེས་བྱ་སྟེ། དེ་ལ་བརྟེན་ནས་འབྱུང་བ་ཉིད་ཀྱི་ཕྱིར་རོ། །གཞུང་གཞན་ལས་ནི་
གནོད་སྦྱིན་གྱི་གཏོར་མ་ཟོས་ནས་ཞེས་འབྱུང་སྟེ། འདིར་དེའི་དོན་ནི་ཁྱིམ་དུ་གནོད་སྦྱིན་གྱི་ཆེད་ཀྱི་གཏོར་མ་བྱས་པ་གང་ཡིན་པ་དེ་ཟོས་ཤིང་དབང་པོ་ཚིམ་པར་བྱས་པ་ཡིན་ནོ། །སྐ་རགས་ནི་ལུས་བཅིང་བའོ། །སྤྲོག་མ་ནི་ལྕུག་མ་ལས་བྱས་པ་སྟེ། མེ་ཏོག་ལ་སོགས་པ་རྫས་གཙང་མའི་
གཞིར་གྱུར་པའི་དངོས་པོའོ། །ཤཱཀྱའི་བུ་ནི་དཀའ་ཐུབ་ལ་གནས་པའི་ཕྱིར་ཤཱཀྱའི་བུའོ། །དགེ་སྦྱོང་ནི་ཐར་པའི་ཕྱིར་འཇུག་པའོ། །རབ་ཏུ་ཚིག་པ་ནི་རྣམ་པར་ཉམས་པར་གྱུར་པའོ། །དགེ་སྦྱོང་ཞེས་བྱ་བ་ནི་ཐར་པའི་དོན་དུ་ཡོངས་སུ་སྦྱོང་བའོ། །བྲམ་ཟེ་ནི་ལུས་དང་ཡིད་ཀྱི་ཉེས་པར་

སྤྱོད་པ་ལས་ལྡོག་པ་ཡིན་གྱི། དེ་དག་ཐར་པའི་དོན་དུ་ལྡོག་ཅིང་ཡོངས་སུ་སྦྱོང་བ་ནི་མ་ཡིན་ཏེ། གང་ཉེས་པར་སྤྱོད་པ་ལས་ལྡོག་པ་མ་ཡིན་པ་རྒྱའི་ཐ་སྙད་ཀྱི་སྒོ་ནས་རྒྱན་ཡོངས་སུ་ལོངས་སྤྱོད་པ་ཡིན་ནོ། །འདྲེག་མཁན་ཞེས་བྱ་བ་ལ། འདྲེག་མཁན་ནི་སྐྲ་འདྲེག་པར་
བྱེད་པ་ཡིན་པའི་ཕྱིར་འདྲེག་མཁན་ཏེ་རུང་བར་བྱེད་པ་ལ་བྱའོ། །ཀུན་ཏུ་སྤྱོད་པ་ཞེས་བྱ་བ་ནི་གདོན་མི་ཟ་བར་བྱ་བ་ཡིན་པས་ན་ངེས་པར་ཡང་དང་ཡང་དུ་ནན་ཏན་དུ་བྱེད་པ་གང་ཡིན་པ་དེ་ནི་ཀུན་ཏུ་སྤྱོད་པ་སྟེ། དཔེར་ན་དྲུག་སྡེ་དག་གིས་རྒྱལ་བྱེད་ཀྱི་ཚལ་གྱི་སྒོར་སྡོད་པ་ལྟ་བུའམ།
གཞན་དག་ཀྱང་རྟག་ཏུ་གོམས་པར་བྱ་བའི་བྱ་བ་སྒྲུབ་པར་བྱེད་པ་ལྟ་བུའོ། །ཟླ་བ་ལྟར་ཡུན་རིང་པོ་ཞིག་ལོན་ནས་ཞེས་བྱ་བ་ནི་ཇི་ལྟར་ཡར་ངོའི་ཚེས་གཅིག་གམ་ཚེས་གཉིས་ལ་ཟླ་བ་མཐོང་བར་བྱེད་དོ། །སྐྱེ་བོ་ཐམས་ཅད་ཀྱིས་མངོན་པར་འདོད་པར་བྱ་བ་ཡིན་པ་དེ་བཞིན་དུ་ཁྱེད་ཀྱང་
ཡིན་ནོ། །འབྲུའི་སྣ་ཞེས་བྱ་བ་ནི་ལོགས་གཉིས་ནས་རིམ་པ་བཞིན་དུ་བཅད་ཅིང་ལྷག་མ་སེན་མོའི་དབུས་འབྲུའི་སྣ་ལྟར་བྱས་པའོ། །དང་རའི་བང་རིམ་ཞེས་བྱ་བ་ནི་དང་རའི་བང་རིམ་བཞིན་དུ་མཐོ་དམན་དུ་གྱུར་པ་ཞེས་བྱ་བའི་ཐ་ཚིག་གོ། །སྤུ་གྲིའི་སོ་དང་ཞེས་བྱ་བ་ནི་སེན་མོ་ཐམས་ཅད་རིམ་
པ་བཞིན་དུ་བཅད་པ་ནི་སྤུ་གྲིའི་སོ་ལྟ་བུའོ། །མཉམ་པོར་བཅད་པ་ནི་སྟེའུའི་སོ་ལྟ་བུ་ཡིན་ཏེ། ལོགས་གཉིས་ནས་མ་བཅད་པའི་ཕྱིར་རོ། །ནན་ཁུགས་ཅན་གྱི་དགེ་སྦྱོང་ཞེས་བྱ་བ་ལ། ང་རྒྱལ་གྱིས་ཚུལ་མ་ཡིན་པའི་བྱ་བ་དག་ཀུན་ཏུ་སྤྱོད་པར་བྱེད་པ་གང་ཡིན་པ་དེ་ནི་ནན་ཁུགས་ཅན་
གྱི་དགེ་སྦྱོང་ཞེས་བྱའོ། །འཕྱ་བ་ལ་ཞུགས་པ་ནི་ཅོ་འདྲི་བའི་བསམ་པས་ཞུགས་པའོ། །ཉེ་བར་ཞི་བ་མེད་དོ་ཞེས་བྱ་བ་ནི་རྒོད་པ་མངོན་དུ་སོང་བ་ཅན་གྱི་ལུས་དང་ངག་གི་འཇུག་པ་རྣམ་པར་ལྡོག་པ་མེད་དོ་ཞེས་བྱ་བའི་དོན་ཏོ། །བཅོམ་ལྡན་འདས་ཀྱིས་དགོངས་པ་ཞེས་བྱ་བ་ནི་འབྲེལ་པ་རྣམ་
པར་བསྟན་པའི་ཕྱིར་འདི་དྲུག་པ་ཡིན་ཏེ། འདི་ལྟར་བཅོམ་ལྡན་འདས་ཀྱིས་ཞེས་བཅོམ་ལྡན་འདས་ཀྱིས་གསན་པ་དང་འབྲེལ་བའི་གཏམ་དགོངས་པ་མཛད་པ་ཡིན་ནོ་ཞེས་བྱ་བར་དགོངས་སོ། །གཅོད་པ་སྤངས་ཤིང་གཞན་སེན་མོ་མཛེས་པར་བྱེད་པའི་རྣམ་པ་ནི་སེན་མོ་སྤྱིལ་བ་ཡིན་ཏེ། སེན་མོའི་

དྲི་མ་དག་པར་བྱེད་པ་ཉིད་ནི་བྲིས་ཤིང་ཚོན་ལ་སོགས་པས་དྲི་མ་བསལ་བའོ། །རྒྱལ་པོའི་ཁབ་ཅེས་བྱ་བ་ནི་ཁང་པ་བྱས་ཤིང་མི་མ་ཡིན་པ་དག་གིས་བཤིག་པར་གྱུར་པས་ཕྱིས་གང་དང་གང་གིས་ཁང་པ་བྱས་པ་དེ་ཐམས་ཅད་ཀྱིས་དེ་དག་ལ་རྒྱལ་པོའི་ཁབ་ཅེས་རྒྱལ་པོའི་
མིང་དུ་བྱས་པས་སྲིན་པོ་མི་སྲུན་པས་བཤིག་པར་མ་གྱུར་པའི་གྲོང་ཁྱེར་ལ་རྒྱལ་པོའི་ཁབ་ཅེས་བྱ་བའི་མིང་དུ་གྱུར་ཏོ། །གཟུགས་ཅན་ཞེས་བྱ་བ་ནི་གཟུགས་ཀྱི་དཔེ་འདི་ལ་ཡོད་པའི་ཕྱིར་གཟུགས་ཅན་ནོ། །སྙིང་པོ་ནི་རྒྱལ་སྲིད་ལ་བརྟེན་པ་བརྟེན་པར་གྱུར་པ་ཉིད་ཀྱི་ཕྱིར་རོ། །གཟུགས་ཅན་ཡང་དེ་ཡིན་
ལ་སྙིང་པོ་ཡང་ཡིན་པའི་ཕྱིར་གཟུགས་ཅན་སྙིང་པོ་ཞེས་བྱའོ། །དུས་ཀྱི་གསར་ཐོག་ཅེས་བྱ་བ་ནི་འབྲས་བུ་གང་དག་དུས་དང་དུས་སུ་ངེས་པར་གྱུར་པ་དག་ནི་ངེས་པར་གྱུར་པ་དག་སྟེ། ཐོག་མར་སྨིན་པར་གྱུར་པའི་འབྲས་བུ་གང་ཡིན་པ་དེ་ནི་དུས་ཀྱི་གསར་ཐོག་གོ། །འབྲུ་སར་པ་དག་ནི་འབྲས་སཱ་ལུ་ལ་
སོགས་པ་གང་ཡིན་པ་དེ་དག་ལས་བསྒྲུབས་པའི་བཟའ་བ་དག་གོ། །འབྲས་བུ་སར་པ་ཞེས་བྱ་བ་ནི་གསར་དུ་རྙེད་པའམ། སྔར་སྨིན་པའི་འབྲས་བུ་སྟེ་ཨ་མྲ་ལ་སོགས་པ་དག་གོ། །བློན་པོ་ནི་བློའི་གྲོགས་སུ་གྱུར་པའོ། །ཅུང་ཟད་དགོད་པ་ནི་རྣམ་པར་འཛུམ་པའོ། །ཨ་མྲའི་ཤིང་སྟོང་
གིས་ཉེ་བར་མཚན་པའི་སྐྱེད་མོས་ཚལ་སྟོང་གི་སྐྱེད་མོས་ཚལ་ཞེས་ཤེས་པར་བྱའོ། །དུས་སྟོན་ཞེས་བྱ་བ་ནི་མངོན་པར་འདོད་པའི་ལྷ་ལ་མཆོད་པས་ཉེ་བར་མཚོན་པའི་དགའ་སྟོན་ནོ། །མཚམས་སོ་སོ་ན་གནས་པར་གྱུར་པས་ན་མཚམས་ཀྱི་རྒྱལ་པོའོ། །འདི་ལ་འབྲས་བུ་ཀུན་ནས་
ཆགས་པར་གྱུར་པ་དེས་ན་འདི་ནི་འབྲས་བུ་ཆགས་པའོ། །ཅི་འོ་ན་ཞེས་བྱ་བ་ལ་འོ་ནའི་སྒྲ་ནི་ངེས་པའམ་སྲིད་པའི་དོན་ཏོ། །ལྷགས་པར་གྱུར་པ་ཞེས་བྱ་བ་ལ་ལྷགས་པ་ནི་འདིར་འབྲས་བུ་ཡོངས་སུ་ཉམས་པར་གྱུར་པའོ། །ཚི་གུ་ནི་རུས་པ་ལ་བྱའོ། །མཚན་མ་རྣམ་པར་ཕྱེད་པ་ནི་
ཨ་མྲ་སྨིན་པར་གྱུར་པའོ། །འོད་མའི་ཚལ་ནི་འོད་མ་རབ་ཏུ་མང་པོ་ཡོད་པའི་ས་ཕྱོགས་དེ་ཉིད་འོད་མའི་ཚལ་ལོ། །བྱ་ཀ་ལན་ད་ཀ་རྩེ་ཞིང་འབབ་པའི་གནས་ནི་ཀ་ལན་ད་ཀའི་གནས་སོ། །རྟག་ཏུ་སྟེར་བ་དེས་ན་ཁྱིམ་བདག་ཅེས་བྱའི་སྤྱིར་ནི་མ་ཡིན་ནོ། །ཕྱུག་པ་ཞེས་བྱ་བ་ལ་ཕྱུག་པ་ནི་

གསེར་ལ་སོགས་པ་ནང་གི་གཏེར་གྱིས་སོ། །ནོར་ཆེ་བ་ནི་མ་ཧེ་ལ་སོགས་པས་སོ། །ལོངས་སྤྱོད་ཆེ་བ་ནི་གྲོ་ལ་སོགས་པའོ། །ཆུང་མ་ཞེས་བྱ་བ་ནི་བུད་མེད་དོ། །རྩེ་བ་ནི་རྡོ་འཕེན་པ་དང་། འཁྱུད་པ་དང་འོ་བྱེད་པ་ལ་སོགས་པས་སོ། །དགའ་བ་ནི་ཆུང་མའི་ཡུལ་ལ་མགུ་བའི་སེམས་ཀྱིས་
སོ། །དགའ་མགུར་སྤྱོད་པ་ནི་འཁྲིག་པ་ལྷག་པར་སྤྱོད་པའི་སྒོ་ནས་སོ། །སེམས་ཅན་དང་ལྡན་པར་གྱུར་པ་ནི་མངལ་དང་ལྡན་པར་གྱུར་པའོ། །བཅོམ་ལྡན་འདས་ག་ལ་བ་ཞེས་བྱ་བ་ནི་བཅོམ་ལྡན་འདས་གཤེགས་པའི་ག་ལ་བ་དེར་སོང་བའམ། བཅོམ་ལྡན་འདས་གང་ན་བཞུགས་པ་དེར་སོང་
བའོ། །རིགས་སྒྲོགས་པར་འགྱུར་ལ་ཞེས་བྱ་བ་ནི་ཕུན་སུམ་ཚོགས་པ་ལ་སྒྲོགས་པར་བྱེད་པའོ། །དགྲ་བཅོམ་པ་ཉིད་ནི་ཟད་ལ་མི་སྐྱེ་བའི་ཡེ་ཤེས་ཡིན་ལ་དེ་མངོན་དུ་བྱེད་པ་ནི་སྐྱེད་པར་བྱེད་ཅིང་མངོན་སུམ་དུ་བྱེད་པའོ། །གཅེར་བུ་ནི་ནམ་མཁའི་གོས་ཅན་ནོ། །བསླངས་ན་སྟེར་
བའི་ཁྱིམ་ཞེས་བྱ་བ་ནི་སློང་མོ་རྙེད་པའི་གཞིར་གྱུར་པའོ། །དགེ་སློང་གི་ངང་ཚུལ་དང་ལྡན་པའི་ཕྱིར་དགེ་སློང་ངོ་། །གཽ་ཏ་མ་ཞེས་བྱ་བ་ནི་དྲང་སྲོང་གཽ་ཏ་མའི་རིགས་སུ་འཁྲུངས་པ་ཉིད་ཀྱི་ཕྱིར་གཽ་ཏ་མའོ། །རྩིས་ནི་སྐར་མ་ཤེས་པ་ཡིན་ལ། མཁས་པ་ནི་བླངས་པའམ། ཁོང་དུ་
ཆུད་པ་དེ་བསྲུང་བའམ། །སྦེད་པའམ་དྲན་པའི་ངང་ཚུལ་འདི་ལ་ཡོད་པའི་ཕྱིར་མཁས་པ་དང་ལྡན་པ་སྟེ་ཤེས་པར་གྱུར་པའོ། །རྗེས་སུ་བསྔགས་པ་ནི་བཅོམ་ལྡན་འདས་ཀྱིས་ལུང་བསྟན་པ་དང་རྗེས་སུ་མཐུན་པར་རྗོད་པར་བྱེད་པའོ། །གུས་པ་མེད་པའི་སྒོ་ནས་བཞིན་སྒྱུར་བར་བྱེད་པ་
ནི་སྨོད་པར་བྱེད་པའོ། །སྐལ་བ་ཆུང་བ་ནི་བསོད་ནམས་ཆུང་བའོ། །མི་དགའ་བ་ནི་ནང་ན་འགྱོད་པའོ། །བསླབ་པ་ཡང་དག་པར་བླངས་པ་ནི་བསླབ་པའི་གཞི་ཡང་དག་པར་བཟུང་བའོ། །ཐ་མ་སྟེ་ཕྱི་མ་འབྱུང་བར་འགྱུར་བའི་སྲིད་པ་རབ་ཏུ་མི་འབྱུང་བ་འདི་ལ་ཡོད་པའི་ཕྱིར་སྲིད་པ་ཐ་མ་པའོ། །
བར་མ་དོ་ནི་དབུས་སུའོ། །འཆི་བ་ནི་སྐད་ཅིག་མས་འཇིག་པ་ཐོབ་པར་འགྱུར་བ་སྐད་ཅིག་མ་གཞན་ལ་དུས་བྱེད་པར་འགྱུར་བའོ། །ཁྱིམ་མཚེས་ནི་ཉེ་བའི་ཁྱིམ་ལ་དབང་བྱེད་ཅིང་གནས་པའི་གཉེན་བཤེས་དག་གོ། །གྲོང་ལས་རྒྱང་གྲགས་སུ་གྱུར་པ་ནི་དགོན་པ་སྟེ། སྐྱེ་བོ་རབ་ཏུ་རྒྱུ་

བ་དང་བྲལ་བ་ཉིད་ཀྱི་ཕྱིར་དེར་གསང་བའི་ལས་བསྒྲུབ་ནུས་པར་འགྱུར་བའོ། །གྲོགས་པོ་ནི་མཛའ་བོ་དང་ནེའུ་ལྡངས་དག་གོ། །ཀུན་ཏུ་སྤྱོད་པ་དང་མེ་སྐོར་བྱར་རུང་བ་ཉིད་ཀྱི་ཕྱིར་གཉེན་ནོ། །བདུན་བརྒྱུད་ཀྱི་ནང་དུ་ཆུད་པར་གྱུར་པ་ནི་ཕོ་ནུའོ། །དགའ་བ་ཞེས་བྱ་བ་ལ་སོགས་
པ་ལ་བཞིན་དང་བར་འགྱུར་བའི་ཕྱིར་དགའ་བའོ། །ཡིད་དང་བར་འགྱུར་བ་ནི་མགུ་བའོ། །ངག་དང་བར་བྱེད་པའི་ཕྱིར་རངས་པའོ། །རྒྱལ་མཚན་ནི་སེང་གེའི་རྒྱལ་མཚན་ལ་སོགས་པའམ། གོས་ཀྱིས་དཀྲིས་པའམ། །ལྕུག་མ་རིང་པོ་ལ་བཏགས་པའི་འབྱུང་པོའི་གདོང་
ཅན་ལ་རྒྱལ་མཚན་ཞེས་བྱའོ། །གོས་ཁ་དོག་སྣ་ཚོགས་པ་ཅན་ལྕུག་མ་རིང་པོ་ལ་བཏགས་པ་ནི་བ་དན་ནོ། །ལོ་མ་ནི་ཤིང་སྐམ་གྱི་ཤུན་པའམ་ལོ་མ་སྔོན་པོའོ། །མི་མཁྱེན་པ་ནི་ཡེ་ཤེས་ཀྱིས་སོ། །མི་གཟིགས་པ་ནི་སྤྱན་གྱིས་སོ། །མི་རིག་པ་ནི་སྙན་གྱིས་སོ། །རྣམ་པར་མི་
མཁྱེན་པ་ནི་ཡིད་ཀྱི་རྣམ་པར་ཤེས་པས་སོ། །ཆོས་ཉིད་ཅེས་བྱ་བ་ནི་སངས་རྒྱས་བཅོམ་ལྡན་འདས་དེ་དག་གིས་གང་བརྗོད་པར་འགྱུར་བ་གདོན་མི་ཟ་བ་མངའ་བར་གྱུར་པའོ། །ཐུགས་རྗེ་ཆེན་པོ་དང་ལྡན་པ་ནི་ཐུགས་རྗེ་ཆེན་པོའི་དབང་གིས་གཞན་གྱི་དབང་དུ་གྱུར་པའོ། །འཇིག་རྟེན་ལ་ཕན་
འདོགས་པར་ཞུགས་པ་ཞེས་པ་ནི་འཇིག་རྟེན་ལ་ཕན་པ་མཛད་པ་ལ་གཞོལ་བར་གྱུར་པའོ། །བསྲུང་བ་གཅིག་པ་ནི་ཉོན་མོངས་པའི་དགྲ་ལས་ཡོངས་སུ་སྐྱོབ་པར་མཛད་པའོ། །དཔའ་བོ་གཅིག་པུ་ནི་ཉོན་མོངས་པ་ལས་རྣམ་པར་རྒྱལ་བའི་ཕྱིར་ཐེག་པ་ཆེན་པོ་ལ་ལྟོས་པ་མེད་པར་དཔའ་
བར་གྱུར་པའོ། །ཞི་གནས་དང་ཞེས་བྱ་བ་ལ་ཞི་གནས་ནི་ཏིང་ངེ་འཛིན་ནོ། །ལྷག་མཐོང་ལ་ཞེས་བྱ་བ་ལ་ལྷག་མཐོང་ནི་ཤེས་རབ་ཡིན་ཏེ། དེ་དག་ལ་རྟག་ཏུ་སྤྱོད་པའོ། །བསླབ་པ་གསུམ་ནི་ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་དང་། ལྷག་པའི་ཤེས་རབ་ཀྱི་བསླབ་པ་སྟེ། དེ་དག་
ལ་ལེགས་པར་བསླབས་པར་གྱུར་པའོ། །དུལ་བའི་དངོས་པོ་གསུམ་ནི་གཅིག་ཏུ་འཇམ་པ་དང་། གཅིག་ཏུ་རྩུབ་པ་དང་། འཇམ་པ་དང་རྩུབ་པའོ། །དེ་ལ་མཁས་པ་ནི་མཁྱེན་པར་གྱུར་པའོ། །ཆུ་བོ་བཞི་ནི་འདོད་པའི་ཆུ་བོ་དང་། སྲིད་པའི་ཆུ་བོ་དང་། ལྟ་བའི་ཆུ་བོ་དང་། མ་རིག་

པའི་ཆུ་བོ་དང་། དེ་དག་ལ་རྒལ་བ་ནི་ཕ་རོལ་དུ་བྱོན་པར་གྱུར་པའོ། །རྫུ་འཕྲུལ་གྱི་རྐང་པ་བཞི་ནི་འདུན་པ་གཙོ་བོར་གྱུར་པའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང་། སེམས་དང་། བརྩོན་འགྲུས་དང་། དཔྱོད་པ་གཙོ་བོར་གྱུར་པའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་
སྟེ་རྫུ་འཕྲུལ་གྱི་རྐང་པ་བཞི་པོ་ཁོ་ནའི་ཞབས་ཀྱི་མཐིལ་དེ་ལེགས་པར་རབ་ཏུ་གནས་པར་གྱུར་པའོ། །བསྡུ་བའི་དངོས་པོ་བཞི་ནི་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པ་སྟེ། དེ་དག་ལ་ཡུན་རིང་པོ་ནས་གོམས་པར་མཛད་པའོ། །མི་འཇིགས་
པ་བཞི་ནི་ཀྱེ་མའོ་བདག་ཡང་དག་པར་རྫོགས་པར་སངས་རྒྱས་པ་ན་ཞེས་བྱ་བ་ནས་འཁོར་རྣམས་ལ་ཡང་དག་པར་སེང་གེའི་སྒྲ་སྒྲོགས་པར་བགྱི་བའམ། ཀྱེ་མའོ་བདག་ཟག་པ་ཟད་པར་གྱུར་པ་ན་དང་། གང་བདག་གིས་ངེས་པར་འབྱུང་བའི་ལམ་བསྟན་པར་བགྱི་བའམ།
གང་བདག་གིས་བར་དུ་གཅོད་པའི་ཆོས་དག་བསྟན་པ་ཞེས་བྱ་བའི་བར་དང་། དེར་བདག་ལ་འགའ་ཞིག་རྩོད་པར་བྱེད་པའི་རྒྱུ་མཚན་ཡང་དག་པར་མ་མཐོང་ཞིང་རྙོག་པ་མེད་པར་གྱུར་པ་དང་། འཇིགས་པ་མེད་པར་གྱུར་པས་གནས་པ་ནས། འཁོར་རྣམས་ལ་སེང་གེའི་སྒྲ་
བསྒྲགས་པར་བགྱིའོ། །ཞེས་བྱ་བའི་བར་དུའོ། །ཡན་ལག་ལྔ་ནི་འདོད་པ་ལ་འདུན་པ་དང་། གནོད་སེམས་དང་། གཉིད་དང་རྨུགས་པ་དང་། རྒོད་པ་དང་། འགྱོད་པ་དང་། ཐེ་ཚོམ་དག་སྟེ། སྲིད་པའི་རྒྱུ་ཡན་ལག་ལྔ་པོ་དེ་དག་རྣམ་པར་སྤངས་པ་ནི་རྣམ་
པར་དོར་བའོ། །རྒྱུད་ལྔ་ནི་དམྱལ་བ་དང་། དུད་འགྲོ་དང་། ཡི་དགས་དང་། ལྷ་དང་། མི་ཞེས་བྱ་བ་སྟེ། དེ་དག་ཏུ་ཕྱིར་ཡང་དག་པར་འཇུག་པ་མེད་པ་ནི་ཤིན་ཏུ་འདས་པའོ། །ཡན་ལག་དྲུག་དང་ལྡན་པ་ནི་རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་
གྲངས་དང་། སྔོན་གྱི་སྐྱེ་གནས་དང་། འཆི་འཕོ་བ་དང་། སྐྱེ་བ་དང་། ཟག་པ་ཟད་པར་གྲགས་པ་དག་ཡིན་ནོ་ཞེས་གསུངས་པ་ཡིན་ནོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་

དང་། ཤེས་རབ་ཀྱི་ཕ་རོལ་ཏུ་ཕྱིན་པ་དག་ཡོངས་སུ་རྫོགས་པར་བརྙེས་པར་གྱུར་ཞེས་བྱ་བའི་ཐ་ཚིག་གོ། །དྲུག་ལ་རྟག་ཏུ་སྤྱོད་པ་ཞེས་བྱ་བ་ནི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཞེས་བྱ་བའི་ཡུལ་དག་ལ་རྟག་ཏུ་
དྲན་པ་དང་། ཤེས་བཞིན་དང་ལྡན་པ་ནི་དྲུག་པོ་ལ་རྟག་ཏུ་སྤྱོད་པ་སྟེ། མདོ་སྡེ་ལས་མིག་གིས་གཟུགས་མཐོང་བ་ན་ནི་ཡིད་བདེ་བར་ཡང་མི་བྱེད། ཡིད་མི་བདེ་བར་ཡང་མི་བྱེད། ཡིད་མི་བདེ་བར་ཡང་མི་བྱེད་པར་དྲན་པ་དང་ཤེས་བཞིན་གྱིས་རྟག་ཏུ་བཏང་སྙོམས་སུ་སྤྱོད་
པར་བྱེད་དོ་ཞེས་བྱ་བ་དེ་ལྟ་བུ་ལ་སོགས་པ་དེས་རྟག་ཏུ་སྤྱོད་པར་བྱེད་དོ་ཞེས་འབྱུང་ངོ་། །བྱང་ཆུབ་ཀྱི་ཡན་ལག་བདུན་གྱི་ནི་དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་
དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ། དེ་དག་ཁོ་ནའི་མེ་ཏོག་དེས་རྒྱས་པ་ནི་འབྱོར་པར་གྱུར་པའོ། །ཟག་པ་མེད་པ་འཕགས་པའི་ལམ་ཡན་ལག་བརྒྱད་པ་ནི་ཡང་དག་པའི་ལྟ་བ་ལ་སོགས་པ་ལམ་གང་ལ་ཡོད་པ་དེ་ནི་འཕགས་པའི་ལམ་ཡན་ལག་བརྒྱད་
པ་སྟེ། དེ་སྟོན་པར་མཛད་པའོ། །མཐར་གྱིས་གནས་པའི་སྙོམས་པར་འཇུག་པ་དགུ་ནི་བསམ་གཏན་བཞི་དང་། གཟུགས་མེད་པ་བཞི་དང་། འགོག་པའི་སྙོམས་པར་འཇུག་པ་ལ་གནས་པར་མཛད་པའི་ཕྱིར་དེ་དག་ལ་མཁས་པ་ཞེས་བྱའོ། །སྟོབས་བཅུ་པོའི་སྟོབས་
དང་ལྡན་པ་ནི་གནས་དང་གནས་མ་ཡིན་པ་མཁྱེན་པ་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་མཁྱེན་པ་དང་། ལས་ཀྱི་རྣམ་པར་སྨིན་པ་མཁྱེན་པ་དང་དབང་པོ་མཆོག་དང་མཆོག་མ་ཡིན་པ་མཁྱེན་པ་དང་། མོས་པ་སྣ་ཚོགས་མཁྱེན་
པ་དང་། ཁམས་སྣ་ཚོགས་མཁྱེན་པ་དང་། ཀུན་ཏུ་འགྲོ་བའི་ལམ་མཁྱེན་པ་དང་། སྔོན་གྱི་གནས་རྗེས་སུ་དྲན་པ་མཁྱེན་པ་དང་། འཆི་འཕོ་དང་སྐྱེ་བ་མཁྱེན་པ་དང་། ཟག་པ་ཟད་པ་མཁྱེན་པ་དང་། སྟོབས་བཅུ་པོ་དག་ཡིན་ཏེ་མངའ་བའོ། །གྲགས་པས་ཕྱོགས་

བཅུ་ལ་སྙོམས་པར་གྲགས་པ་གང་ལ་ཡོད་པ་དེ་དག་ལ་དེ་སྐད་ཅེས་བྱའོ། །བརྒྱ་ཕྲག་བཅུ་ནི་འཛམ་བུའི་གླིང་སྟོང་དག་སྟེ། སྤྱི་ཕུད་ཀྱི་འཇིག་རྟེན་གྱི་ཁམས་སོ། །དེ་ལ་དབང་སྒྱུར་བ་སྟེ། རང་དབང་དུ་མཛད་པའི་ངང་ཚུལ་གང་ལ་ཡོད་པ་དེ་ནི་བརྒྱ་ཕྲག་བཅུ་ལ་དབང་སྒྱུར་བ་ཅན་ནོ། །
འཁོར་གྱི་བདག་པོ་ཚངས་པ་ཆེན་པོ་དེ་ལས་ཀྱང་ཁྱད་པར་དུ་འཕགས་པར་གྱུར་པའོ། །ཡང་ན་བརྒྱ་ཕྲག་བཅུ་ལ་དབང་སྒྱུར་བ་གང་ཡིན་པ་དེ་ནི་བརྒྱ་ཕྲག་བཅུ་སྟེ། སྟོང་གི་གྲངས་ལ་དབང་སྒྱུར་བར་མཛད་པའོ། །སྟོང་སྨོས་པ་ཡང་མཐར་ཐུག་པ་མེད་པ་ཉེ་བར་མཚོན་པར་བྱེད་
པ་ཡིན་ཏེ། མཐར་ཐུག་པ་མེད་པའི་ཚངས་པ་ཆེན་པོ་དག་ལས་སངས་རྒྱས་བཅོམ་ལྡན་འདས་ཤིན་ཏུ་ཁྱད་པར་དུ་འཕགས་པ་ཡིན་ནོ་ཞེས་བྱ་བའི་ཐ་ཚིག་གོ། །ཉིན་ལན་གསུམ་མཚན་ལན་གསུམ་ཞེས་བྱ་བ་ནི་མཚན་མོའི་ཐུན་དང་པོ་དང་། ཐུན་བར་མ་དང་། ཐ་མ་དག་
ལ་མཚན་ལན་གསུམ་དུ་གཟིགས་པར་མཛད་པ་ཡིན་ལ། ཉིན་པར་ཡང་སྔ་དྲོ་དང་། ཉི་མ་གུང་དང་། ཕྱི་དྲོ་དག་ལ་ཉིན་ལན་གསུམ་དུ་གཟིགས་པ་མཛད་དོ། །སངས་རྒྱས་ཀྱི་སྤྱན་ནི་ཐམས་ཅད་མཁྱེན་པའི་ཡེ་ཤེས་སོ། །འཇིག་རྟེན་གསུམ་ལ་གཟིགས་པ་ནི་རྣམ་པར་
དཔྱོད་པའོ། །ཡེ་ཤེས་ནི་ཤེས་པར་བྱ་བ་ཡོད་པ་ཡིན་ལ། གཟིགས་པ་ནི་བལྟ་བར་བྱ་བའི་དངོས་པོ་ཡོད་པ་སྟེ། དེའི་ཕྱིར་ཡང་མཚུངས་པ་མེད་པ་ཡོད་པ་ཞེས་བྱའོ། །ཡོད་པ་ལ་ཡང་ཡོད་དོ་ཞེས་སངས་རྒྱས་བཅོམ་ལྡན་འདས་ཀྱིས་གཟིགས་པར་འགྱུར་རོ་ཞེས་
བྱ་བའི་དོན་འདིར་བསྟན་པར་འགྱུར་རོ། །བྲི་བ་ནི་དགེ་བའི་ཆོས་རྣམས་ལས་སོ། །འཕེལ་བ་ནི་དགེ་བའི་ཆོས་ཀྱིས་སོ། །དཀའ་བ་རྙེད་པ་ནི་ལུས་ཀྱི་སྡུག་བསྔལ་ལོ། །ཉམ་ང་བ་ནི་གཉེན་པོས་གསོ་མི་ནུས་པའི་རྒུད་པའི་འགྱུར་བའོ། །གནོད་པར་གྱུར་པ་ནི་གཉེན་པོས་
གསོ་ནུས་པའི་ནད་དོ། །དཀའ་བ་དང་། ཉམ་ང་བ་དང་། གནོད་པར་གྱུར་པ་ནི་སྔར་སྨོས་པ་ཁོ་ནར་ནི་བཤད་པ་དག་བལྟ་བར་བྱའོ། །གཞོལ་བ་ནི་ངན་སོང་གི་ལས་ལ་སྦྱོར་བའི་དུས་སོ། །འབབ་པ་ནི་དངོས་གཞིའི་ལམ་གྱི་ལམ་ཡོངས་སུ་རྫོགས་པའོ། །རབ་ཏུ་འབབ་

པ་ནི་མཇུག་ཡོངས་སུ་རྫོགས་པའོ། །མཐོ་རིས་དང་ཐར་པ་ཞེས་པ་ནི་མཐོ་རིས་ལ་འགོད་པར་བྱེད་པ་ནི་ཐར་པ་ཁོ་ནའི་དོན་དུ་ཁོང་དུ་ཆུད་པར་བྱ་སྟེ། གང་གི་ཚེ་སྔོན་སེར་སྐྱ་ཉར་གྱུར་པ་ངན་སོང་ནས་བཏོན་ནས་མཐོ་རིས་ལ་བཀོད་པ་ཐར་པ་ཁོ་ནའི་ཕྱིར་ཡིན་པ་ལྟ་བུའོ། །
འབྲས་བུ་ནི་དགེ་སྦྱོང་གི་འབྲས་བུའོ། །དགེ་བའི་རྩ་བ་མ་བསྐྲུན་པ་ནི་ཐར་པའི་ཆ་དང་མཐུན་པ་བསྐྲུན་པར་མ་གྱུར་པའོ། །ཡོངས་སུ་སྨིན་པར་བྱ་བ་ནི་སྤེལ་བར་བྱ་བའོ། །རྣམ་པར་གྲོལ་བར་བྱ་བ་ནི་འབྲས་བུ་ལ་སྦྱོར་བར་བྱེད་པའོ། །ཆུ་སྲིན་གནས་ཀྱི་ཞེས་བྱ་བ་ལ་སོགས་པ་ལ་སངས་རྒྱས་
ཐམས་ཅད་ཀྱིས་གདུལ་བྱ་ལ་སོ་སོར་རྟོག་པ་གདོན་མི་ཟ་བར་བྱ་བ་ཡིན་པས་ན་འདའ་བར་མི་འགྱུར་བ་ཞེས་བསྟན་པ་ཡིན་ནོ། །རྟོག་ཅིང་ཞེས་བྱ་བ་ནི་རྟག་ཏུ་གཉེན་པས་སྲོག་འཇིག་པའི་རྐྱེན་དག་ལས་ཀྱང་སྲོག་སྲུང་བར་བྱེད་པ་དེ་བཞིན་དུ། བཅོམ་ལྡན་འདས་ཀྱང་བུ་གཅིག་པ་སྡུག་པ་བཞིན་དུ་རྟག་
ཏུ་གཉེན་པར་མཛད་པས་སེམས་ཅན་ཐམས་ཅད་ཀྱི་རྒྱུད་འཕགས་པའི་ལམ་དང་འགལ་བའི་རྐྱེན་ལས་བསྲུང་བ་མཛད་པར་འགྱུར་རོ། །འདིས་ནི་སྐལ་པ་དང་ལྡན་པའི་སེམས་ཀྱི་རྒྱུད་བསྲུང་བ་དང་། འབྲས་བུ་ལ་སྦྱོར་བ་རྟོག་པའི་ཕན་འདོགས་པ་ནི་མངོན་སུམ་གྱི་འབྲས་བུ་བསྟན་པ་ཡིན་ནོ། །
སོ་སོར་རྟོག་པས་ཕན་པ་སྒྲུབ་པར་བྱེད་པ་འདི་གཉིས་ནི་སྙིང་རྗེ་ཆེན་པོའི་རྒྱུ་ཅན་ཡིན་གྱི། གཞན་དག་ནི་མ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར་ཚིགས་སུ་བཅད་པ་གསུམ་གསུངས་པ་ཡིན་ཏེ། དངོས་པོ་ཐམས་ཅད་རྣམ་པ་ཐམས་ཅད་དུ་མཁྱེན་པའི་ཕྱིར་ཐམས་ཅད་མཁྱེན་པའོ། །
ཐམས་ཅད་མཁྱེན་པའི་རྒྱུད་ལ་གནས་པའི་སྙིང་རྗེའི་བ་དྲུས་མ་གང་ཡིན་པ་དེ་གདུལ་བྱའི་བེའུ་ཚོལ་བ་ལ་སྐྱོ་བར་མི་འགྱུར་བ་སྟེ། བ་བེའུ་གསར་བུ་བཙས་པ་ལ་འབད་པ་ཆེན་པོས་ཚོལ་བར་བྱེད་པ་དེ་བཞིན་དུ་གདུལ་བྱ་དག་ལ་སྙིང་རྗེ་ཆེན་པོ་ཡང་ཡིན་པ་དེ་བས་ན་སྙིང་རྗེ་ཆེན་པོའི་བ་དྲུས་མ་
ཞེས་བྱ་བ་དང་། གདུལ་བྱའི་སྐྱེ་བོའི་བེའུ་ཞེས་བརྡར་བཏགས་པ་ཡིན་ནོ། །འཛུམ་པ་ནི་ཅུང་ཞིག་བཤད་པའོ། །སེམས་ཅན་དམྱལ་བའི་རྒྱུད་གང་ལ་སེམས་ཅན་ཁྱོད་ནི་ཡང་འཚོ་བར་འགྱུར་རོ་ཞེས་བྱ་བའི་སྒྲ་སྒྲོགས་པར་འགྱུར་བ་དེ་བས་ན་ཡང་སོས་སོ། །ཐིག་ནག་པོས་འདེབས་

ཤིང་འགོག་པར་བྱེད་པས་ན་ཐིག་ནག་གོ། །གང་དུ་རི་བོ་དག་གིས་བསྡུས་ཤིང་འཇོམས་པར་བྱེད་པ་དེ་བས་ན་བསྡུས་འཇོམས་སོ། །གང་དུ་བྱ་བ་བྱས་ན་སེམས་ཅན་འཇིགས་པས་ངུ་བར་བྱེད་པ་དེ་བས་ན་ངུ་འབོད་དོ། །ཀུན་ནས་ལྷགས་པར་གྱུར་པའི་ཕྱིར་ངུ་འབོད་ཆེན་པོའོ། །གང་དུ་
ལས་ཀྱི་མེས་གདུང་བར་བྱེད་པ་དེས་ན་ཚ་བའོ། །གང་གི་སྡུག་བསྔལ་གྱི་མཚམས་བར་སྐབས་མེད་པར་གྱུར་པ་དེས་ན་མནར་མེད་པའོ། །གྲང་བས་ན་ཆུ་བུར་རྡོལ་བ་དང་འདྲ་བར་ཡན་ལག་རྡོལ་བས་ན་ཆུ་བུར་ཅན་ནོ། །ཆུ་བུར་རྡོལ་བའི་ནགས་དང་འདྲ་བར་བར་མེད་པར་ཆུ་བུར་རྡོལ་བས་ཆུ་བུར་རྡོལ་
བའོ། །གྲང་བས་གནོད་པར་གྱུར་པ་ལ་ཇི་ལྟ་བུའི་སྒྲ་རྒྱུན་མི་འཆད་པར་སྒྲོགས་པར་བྱེད་པའི་སྒྲ་དེས་ཉེ་བར་མཚོན་པར་བྱ་བ་དག་ནི་སོ་ཐམས་ཐམས་དང་། ཀྱི་ཧུད་ཟེར་བ་དང་། ཨ་ཆུ་ཟེར་བ་དག་གོ། །གྲང་བས་ཨུཏྤལ་དང་། པདྨ་ཆུང་ངུ་དང་། པདྨ་ཆེན་པོ་དང་འདྲ་བར་ཡན་ལག་གས་པར་
གྱུར་པ་གང་ཡིན་པ་དེ་དག་གི་མིང་ནི་དེ་དག་ཡིན་ནོ། །བསིལ་བར་གྱུར་པ་དང་དྲོ་བར་གྱུར་པ་ཞེས་བྱ་བ་ལ་ཚ་བའི་དམྱལ་བ་དག་གི་མེས་གདུངས་པར་གྱུར་པ་བཟློག་པའི་ཕྱིར་འོད་ཟེར་བསིལ་བར་གྱུར་པ་འབབ་པར་འགྱུར་ཞིང་གྲང་བའི་དམྱལ་བ་དག་གི་ནི་གོ་བཟློག་པ་ཡིན་ནོ། །བྱེད་པའི་ཁྱད་པར་ནི་སྡུག་
བསྔལ་ཡིན་ལ། སོ་སོར་ཐར་པར་གྱུར་ཏོ་ཞེས་བྱ་བ་ནི་འཇུག་པ་མེད་པར་གྱུར་པའོ། །གལ་ཏེ་སངས་རྒྱས་ཀྱི་སྤྲུལ་པ་མཐོང་བ་ལས་དེ་དག་བྱེད་པའི་ཁྱད་པར་ལས་སོ་སོར་ཐར་པ་ཡིན་ན། ཅིའི་ཕྱིར་བཅོམ་ལྡན་འདས་རྟག་ཏུ་སྤྲུལ་པ་དེ་འགྱེད་པར་མི་མཛད། བཅོམ་ལྡན་འདས་ནི་ཐུགས་རྗེ་ཆེན་པོ་དང་
ལྡན་པར་གྱུར་པ་ཉིད་ཀྱི་ཕྱིར་དང་། གཞན་གྱིས་བྱས་པའི་ལས་ཀྱིས་ཀྱང་གཞན་གྱིས་འབྲས་བུ་ཉེ་བར་ལོངས་སྤྱོད་པ་ཐོབ་པར་འགྱུར་བ་ཡིན་ནོ་ཞེ་ན། འདིར་སྨྲས་པ། དམྱལ་བར་སྐྱེས་པ་དག་ལ་ཚོགས་པ་ཕྲད་ན་རྣམ་པར་སྨིན་པ་འབྱིན་ནུས་པ་དང་ལྡན་པ་ལན་གྲངས་གཞན་དུ་ཉམས་སུ་མྱོང་བར་
འགྱུར་བའི་ལས་དེ་ནི་ཡོད་ལ། གང་གི་ཚེ་དེ་དག་གིས་སངས་རྒྱས་ཀྱི་སྤྲུལ་པ་མཐོང་བར་གྱུར་པ་ན་སེམས་མངོན་པར་དད་པར་ཡང་བྱེད་པ་དེའི་ཚེ་དེ་དག་ལ་ལས་དེ་དང་ལྷན་ཅིག་བྱེད་པའི་རྐྱེན་རྙེད་པ་ལས་རྣམ་པར་སྨིན་པ་འབྱིན་པར་བྱེད་དེ། དེའི་ཚེ་དེ་དག་གི་རྒྱུ་མཐུན་པ་ཅན་ལུས་ཀྱི་བདེ་བ་སྐྱེ་བར་འགྱུར་བ་དེ་

བས་ན་འདི་ལ་ཉེས་པ་མེད་དོ། །དམྱལ་བ་དེ་མྱོང་བར་ལས་དེ་ཟད་ནས་ཞེས་བྱ་བ་ནི་དམྱལ་བའི་འབྲས་བུའི་ལས་བྱས་ཤིང་ངེས་པར་བསགས་པ་གང་ཡིན་པ་དེ་ནི་རྣམ་པར་སྨིན་པ་ཉམས་སུ་མྱོང་བས་ཟད་པར་འགྱུར་གྱི། སེམས་མངོན་པར་དད་པས་བྱས་ཤིང་བསགས་པའི་ལས་
ཉམས་པར་གྱུར་པ་ནི་མ་ཡིན་ལ། ལྷ་དང་མིར་སྐྱེས་པ་ནི་སངས་རྒྱས་ཀྱི་སྤྲུལ་པའི་ཡུལ་ལ་མངོན་པར་དད་པ་ལས་འབྱོར་པར་འགྱུར་རོ། །རྒྱལ་པོ་ཆེན་པོ་བཞི་པོ་དག་གི་ཡིན་པས་ན་རྒྱལ་ཆེན་རིགས་བཞིའོ། །དབང་པོ་གཅིག་དང་ཉེ་བའི་དབང་པོ་སུམ་ཅུ་རྩ་གཉིས་ཏེ། སུམ་ཅུ་རྩ་
གསུམ་དེ་དག་ནི་སུམ་ཅུ་རྩ་གསུམ་མོ། །ལེགས་པར་འཐབ་བྲལ་གྱི་ལྷའི་བུ་གཙོ་བོར་གྱུར་པས་ན་འཐབ་བྲལ་ལོ། །ཡོངས་སུ་དགའ་ལྡན་གྱི་ལྷའི་བུ་གཙོ་བོར་གྱུར་པས་ན་དགའ་ལྡན་ནོ། །སྤྲུལ་པས་དགའ་བ་གང་ལ་ཡོད་པ་དེ་དག་ནི་འཕྲུལ་དགའོ། །གཞན་གྱིས་སྤྲུལ་པའི་
འདོད་པ་དག་ལ་དབང་སྒྱུར་བར་བྱེད་པའི་ཕྱིར་གཞན་འཕྲུལ་དབང་བྱེད་དོ། །ཚངས་པའི་ཚོགས་ཀྱིས་གནས་པ་གང་ལ་ཡོད་པ་དེ་དག་ནི་ཚངས་འཁོར་རོ། །ཚངས་པའི་མདུན་ན་འཇོག་ཅིང་འཛིན་པའི་ཕྱིར། ཚངས་པའི་མདུན་ན་འདོན་ནོ། །ཚངས་པ་ཆེན་པོའི་ཚེའི་ཁྱད་པར་ལ་སོགས་པ་ཡོད་
པའི་ཕྱིར་ཚངས་ཆེན་ནོ། །ས་གོང་མ་ལ་ལྟོས་ནས་ལུས་ཀྱི་འོད་ཆུང་བའི་ཕྱིར་འོད་ཆུང་ངོ་། །འོད་ཤིན་ཏུ་ཆེ་བའི་ཕྱིར་ཚད་མེད་འོད་དོ། །གསལ་བར་བྱེད་པའི་ངང་ཚུལ་ཡིན་པས་ན་འོད་གསལ་ལོ། །རང་གི་ས་ལ་ལྟོས་ནས་དགེ་བ་ཆུང་བ་གང་ལ་ཡོད་པ་དེ་ནི་དགེ་ཆུང་ངོ་། །དགེ་བ་ཚད་མེད་པ་དེ་དག་
ནི་ཚད་མེད་དགེའོ། །དགེ་བ་རྒྱས་ཤིང་ཁྱབ་པས་ན་དགེ་རྒྱས་སོ། །སྤྲིན་དང་འདྲ་བར་གོང་ནས་གོང་དུ་རྣམ་པར་འཕྲུལ་པས་གནས་པ་མེད་པ་གང་ཡིན་པ་དེ་དག་ནི་སྤྲིན་མེད་དོ། །བསོད་ནམས་རབ་ཏུ་འཕེལ་བ་གང་ལ་ཡོད་པ་དེ་ནི་བསོད་ནམས་འཕེལ་ལོ། །འབྲས་བུ་ཆེ་ནི་གཟུགས་ཁམས་
ཀྱི་སོ་སོའི་གནས་གཞན་ལས་ཁྱད་པར་དུ་འཕགས་པའི་འབྲས་བུ་གང་ལ་ཡོད་པ་དེ་ནི་འབྲས་བུ་ཆེའོ། །ཆེན་པོ་མ་ཡིན་པའི་ཕྱིར་མི་ཆེ་བ་ཡིན་ཏེ། གཙང་མའི་རིས་ལ་ལྟོས་ན་འབད་རྩོལ་ཞན་པ་ཉིད་ཀྱི་ཕྱིར་རོ། །གདུང་བ་མེད་ཅིང་གཞན་གྱིས་ཟིལ་གྱིས་གནོན་པར་མི་འགྱུར་བས་ན་

མི་གདུང་བའོ། །ཤེས་པར་བྱ་བ་བདེ་བར་མཐོང་བ་གང་ཡིན་པ་དེ་ནི་གྱ་ནོམ་སྣང་བའོ། །རྣམ་པར་མི་གཡེང་བར་སྒོམ་པའི་རྒྱུ་མཚན་དགེ་བ་གང་ལ་ཡོད་པ་དེ་དག་ནི་ཤིན་ཏུ་མཐོང་ངོ་། །གང་ལས་འདིར་འོག་མར་འགྱུར་བ་དེ་དག་ལས་གཟུགས་ཅན་གྱི་གནས་ཆེན་པོར་གྱུར་པ་གཞན་ཡོད་པ་མ་ཡིན་
པའི་ཕྱིར་འོག་མིན་ནོ།། །།བམ་པོ་གཉིས་པ། མི་རྟག་པ་ནི་སྐད་ཅིག་མས་འཇིག་པའོ། །སྡུག་བསྔལ་བ་ནི་མི་མཐུན་པར་གྱུར་པའོ། །སྟོང་པ་ནི་བདག་གིས་བྱིན་གྱིས་བརླབས་པའོ། །བདག་མེད་པ་ནི་བདག་གིས་རང་བཞིན་མེད་པ་ཞེས་འགྲོ་བ་མ་ལུས་པ་ལ་
འོད་ཟེར་སྒྲོགས་པར་བྱེད་པའོ། །བརྩམ་པར་བྱ་ཞིང་ཞེས་བྱ་བ་ནི་ཡིད་ཀྱི་བྱ་བ་སྤྲོ་བའི་འདུ་ཤེས་ཅན་གྱིས་འབྱུང་བའི་ཕྱིར་བརྩམ་པར་བྱའོ། །འབྱུང་བར་བྱ་ཞེས་བྱ་བ་ནི་སྲིད་པའི་བཟོས་སྦྱར་བ་སྡུག་བསྔལ་གྱི་གཟེབ་ལས་འབྱུང་བར་བྱ་བའོ། །འབྱུང་བས་ཅི་ཞིག་བྱ་ཞེ་ན་སྨྲས་པ།
སངས་རྒྱས་བཅོམ་ལྡན་འདས་ཀྱིས་བསྟན་པ་འཕགས་པའི་ལམ་ཡན་ལག་བརྒྱད་ཀྱི་མཚན་ཉིད་ཅན་ལ་འཇུག་པར་བྱ་སྟེ། མངོན་པར་སྦྱོར་བར་བྱ་བའོ། །གཞོམ་པར་བྱ་བ་ནི་ཚར་གཅད་པར་བྱ་བའོ། །བདག་ནི་བདག་ཉིད་ཀྱིའོ། །འཆི་བདག་ནི་དགྲ་བོའོ། །དེ་ནི་ཉོན་མོངས་པའི་
མིང་ཅན་ཡིན་ཏེ། གང་གི་ཕྱིར་ཉོན་མོངས་པའི་སྡེ་ཅན་གྱི་དབང་གིས་ཡང་དང་ཡང་དུ་འཆི་བར་འགྱུར་ཞིང་ཕམ་པར་འགྱུར་བའི་ཕྱིར་རོ། །དེ་བས་ན་འཆི་བདག་གི་སྡེ་ཕམ་པར་བྱ་བའི་ཕྱིར་སངས་རྒྱས་ཀྱི་བསྟན་པ་ལ་འཇུག་པར་བྱའོ་ཞེས་གསུངས་པ་ཡིན་ནོ། །ཅིའི་ཕྱིར་འཆི་བདག་གི་སྡེ་ཕམ་པར་བྱ་
བའི་ཕྱིར་སངས་རྒྱས་ཀྱི་བསྟན་པ་ལ་འཇུག་པར་བྱ་ཞེ་ན་སྨྲས་པ། གང་གི་ཕྱིར་གང་ཞིག་རབ་ཏུ་བག་ཡོད་པ་སྟེ། བག་མེད་པ་སྤངས་ནས། ཆོས་འདུལ་བ་འདི་ལ་སྤྱོད་པར་འགྱུར་རོ། །ཆོས་ནི་ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་རྩོལ་བ་དང་། ཡང་དག་
པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །འདུལ་བ་ནི་ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བའོ། །སྐྱེ་བའི་འཁོར་བ་སྟེ་རྒྱུན་སྤངས་ཤིང་ཉེ་བར་ལེན་པའི་ཕུང་པོ་ལྔའི་མཚན་ཉིད་ཅན་གྱི་སྡུག་བསྔལ་ཐ་མར་གྱུར་པར་འགྱུར་བ་

དེའི་ཕྱིར་སངས་རྒྱས་ཀྱི་བསྟན་པ་ལ་འཇུག་པར་བྱ་བ་ཡིན་ནོ། །སྟོང་གསུམ་གྱི་ཞེས་བྱ་བ་ལ་སོགས་པ་ལ། རེ་རེ་དག་གི་སྟོང་དང་། སྟོང་དག་གི་སྟོང་དང་། སྟོང་སྟོང་དག་གི་སྟོང་ཞེས་བྱ་བ་གསུམ་པོ་དེ་དག་ནི་གླིང་བཞི་པོའི་འདོད་པའི་སྤྱོད་པའི་ལྷའི་འཁོར་ཅན་
ཚངས་པའི་འཇིག་རྟེན་སྟོང་དག་གི་ཚད་གང་ལ་ཡོད་པ་དེ་ནི་སྟོང་གསུམ་ཡིན་ལ། སྟོང་གི་ཚད་འདི་ལ་ཡོད་པའི་ཕྱིར་སྟོང་གསུམ་པའོ། །ཆེན་པོ་ཡང་དེ་ཡིན་ལ་སྟོང་ཡང་དེ་ཡིན་པའི་ཕྱིར་སྟོང་ཆེན་པོ་ཡིན་ལ། སྟོང་གསུམ་ཡང་དེ་ཡིན་ལ་སྟོང་ཆེན་པོ་པ་ཡང་ཡིན་པའི་ཕྱིར་སྟོང་གསུམ་
གྱི་སྟོང་ཆེན་པོ་ཡིན་ཏེ། གླིང་བཞི་པ་བྱེ་བ་ཕྲག་བརྒྱའི་ཚད་ཅེས་བྱ་བའི་ཐ་ཚིག་གོ། །འཇིག་རྟེན་གྱི་ཁམས་ནི་གནས་པའི་གནས་སོ། །འདས་པ་ལུང་སྟོན་པར་བཞེད་ན་ཞེས་བྱ་བ་ནི་གང་དུ་འདས་པར་གྱུར་པའི་འབྲས་བུ་ཐམས་ཅད་ཁོ་ནའོ། །མ་འོངས་པ་ལུང་སྟོན་པར་བཞེད་
ན་ཞེས་བྱ་བ་ནི་གང་དུ་མ་འོངས་པའི་འབྲས་བུ་ཁོ་ནའོ། །ལག་མཐིལ་ཁ་སྦྱར་དུ་བྱས་པས་ནི་ཐལ་མོ་སྦྱར་བའོ། །ཞལ་གྱི་ནང་ནས་ཞེས་བྱ་བ་ནི་ཞལ་གྱི་སྒོ་ནས་སོ། །ཚོགས་ནི་འོད་ཟེར་གྱི་ཚོགས་སོ། །རྒོད་པ་དང་བྲལ་ཞིང་ཞེས་བྱ་བ་ནི་རྒོད་པ་སྤངས་པར་གྱུར་པའོ། །སེམས་
ཡུལ་ཡུལ་བོར་གྱུར་པ་ནི་ཞུམ་པ་ཡིན་ལ། རང་དང་གཞན་གྱི་ཡོན་ཏན་ལ་ལྟོས་པ་ནི་རྒྱགས་པ་ཡིན་ཏེ། དེ་དག་དང་བྲལ་བ་ནི་ཞུམ་པ་དང་རྒྱགས་པ་སྤངས་པར་གྱུར་པའོ། །མཆོག་གི་རྒྱུར་གྱུར་པ་ཞེས་བྱ་བ་ནི་མྱ་ངན་ལས་འདས་པ་མཆོག་གི་རྒྱུར་གྱུར་པའོ། །དུང་དང་པདྨའི་རྩ་ལྟར་
དཀར་གྱུར་པ། །ཞེས་བྱ་བ་ནི། དུང་དང་པདྨའི་རྩ་སྟེ་པདྨའི་སྐུད་པ་ལྟར་ཤིན་ཏུ་དྲི་མ་མེད་པར་གྱུར་པའོ། །དགྲ་ཐུལ་བ་ནི་བདུད་བཞིའི་དགྲ་ཐུལ་བའོ། །རྒྱལ་བ་ནི་དགྲ་ལས་སོ། །རྒྱུ་མེད་པ་ནི་རྒྱུ་མཚན་མེད་པར་ཏེ། འདིའི་རྒྱུ་གང་ཡིན་ཞེས་བྱ་བའི་ཐ་ཚིག་གོ། །འཛུམ་པ་ནི་བཞད་པའོ། །དེ་ནི་
ཞེས་བྱ་བ་ནི་དེའི་ཕྱིར་ཞེས་བྱ་བའི་ཐ་ཚིག་གོ། །ཉིད་ཀྱི་ཐུགས་སུ་ཆུད་ནས་ཏེ། དུས་མཁྱེན་ནས་ཐོས་པར་འཚལ་བའི་འདོད་པ་དང་ལྡན་པའི་ཉན་ཐོས་ཐེ་ཚོམ་སྐྱེད་པ་དག་གི་ཐེ་ཚོམ་བསལ་བར་མཛད་དུ་གསོལ་བའོ། །དཀའ་ཅི་འདྲ་བས་ཤེ་ན་བསྟན་པ་ཞེས་བྱ་བ་སྨོས་ཏེ། བསྟན་པ་

མཆོག་དང་དགེ་བ་དག་གིས་ཏེ། །གཡོ་བ་མེད་པའི་ཕྱིར་བརྟན་པ་ཡིན་ལ། ཟབ་པ་ལ་སོགས་པ་དམ་པའི་དོན་ཉིད་ཡིན་པའི་ཕྱིར་མཆོག་ཡིན་ཞིང་མཛེས་པར་གྱུར་པ་ཉིད་ཀྱི་ཕྱིར་དང་། ཁ་ན་མ་ཐོ་བ་མེད་པའི་ཕྱིར་དགེ་བའོ། །བསྟན་པའི་ཞེས་བྱ་བ་ནི་འབོད་པ་སྟེ། བསྟན་པ་མཆོག་
དང་ལྡན་པའི་ཕྱིར་རོ། །དགེ་སྦྱོང་རྒྱལ་དབང་ཞེས་བྱ་བ་ནི་འབོད་པ་ཉིད་ཡིན་ལ་དེ་ལ་ཞུགས་པ་བཞི་དང་། འབྲས་བུ་ལ་གནས་པ་བཞི་ཞེས་བྱ་བ་བརྒྱད་པོ་དག་ནི་དགེ་སྦྱོང་རྒྱལ་བ་དག་ཡིན་ཏེ། དེ་དག་གི་དབང་པོ་ནི་གཙོ་བོར་གྱུར་པ་ཡིན་པས་ན་དགེ་སྦྱོང་རྒྱལ་དབང་པོའོ། །ཐུབ་པའི་ཁྱུ་
མཆོག་ཅེས་བྱ་བ་ནི་འབོད་པ་ཉིད་ཡིན་ཏེ། དེ་ལ་ཐུབ་པ་ནི་སློབ་པ་དང་མི་སློབ་པ་ཡིན་ལ། དེ་དག་གི་ཁྱུ་མཆོག་ནི་གཙོ་བོ་ཡིན་པས་ན་ཐུབ་པའི་ཁྱུ་མཆོག་གོ། །ཅིའི་ཕྱིར་ཐོས་པར་འཚལ་བར་འགྱུར་ཞེ་ན། རྒྱུ་མེད་ཅེས་བྱ་བ་ལ་སོགས་པ་སྨོས་ཏེ། རྒྱུ་མེད་པ་ནི་རྒྱུ་མེད་པ་ཉིད་དུའོ། །
ལན་ཚྭའི་ཆུ་ནི་རྒྱ་མཚོའོ། །རི་རྒྱལ་ནི་རིའི་རྒྱལ་པོ་རི་རབ་སྟེ། དེ་དག་དང་འདྲ་བར་བརྟན་པ་གང་ལ་ཡོད་པ་དེ་ནི་ལན་ཚྭའི་ཆུ་དང་རི་རྒྱལ་བཞིན་དུ་བརྟན་པའོ། །དེ་དེ་བཞིན་ཏེ་ཞེས་བྱ་བ་ནི་རྗེས་སུ་བརྗོད་པ་སྟེ་གུས་པའི་དོན་གྱི་ཟློས་པའི་ཚིག་གོ། །རྒྱུ་མེད་པ་ནི་རྒྱུ་མེད་པ་ཉིད་དུའོ། །
རྐྱེན་མེད་པ་ནི་རྐྱེན་དང་བྲལ་བའོ། །དུལ་བ་ནི་ཡིད་ཀྱི་སྒོ་ནས་སོ། །རྩེ་གཅིག་པ་ནི་ཉོན་མོངས་པའི་ཀུན་ཏུ་སྤྱོད་པ་ཉེ་བར་ཞི་བའོ། །ཞི་བ་ནི་ལུས་དང་ངག་གི་སྒོ་ནས་སོ། །གྲོལ་བ་ནི་སྲིད་པ་གཞན་སྤངས་པར་གྱུར་པའོ། །དབུགས་འབྱིན་པ་ནི་སྡུག་བསྔལ་མེད་པར་གྱུར་པ་ཉིད་ཀྱི་
ཕྱིར་ཤིན་ཏུ་སྦྱངས་པའོ། །ཐུལ་བ་ནི་ཚུལ་མ་ཡིན་པའི་སྤྱོད་པ་མེད་པའི་ཕྱིར་རོ། །འདོད་ཆགས་དང་བྲལ་བ་ནི་འདོད་པའི་འདོད་ཆགས་མེད་པར་འགྱུར་བའི་ཕྱིར་རོ། །མཛེས་པ་ནི་རྣམ་པར་སྨིན་པའི་གཟུགས་ཀྱིས་མཛེས་པར་གྱུར་པའོ། །ཁྱིམ་ན་གནས་པ་རྣམས་ཀྱི་ཁྱུ་མཆོག་དང་།
དགོན་པ་ན་གནས་པ་དག་གི་གླང་པོ་དང་ནགས་ན་གནས་པ་རྣམས་ཀྱི་སེང་གེ་དང་། ཆུ་བོའི་ངོགས་ན་གནས་པ་རྣམས་ཀྱི་ངང་པ་དང་། རྒྱ་མཚོའི་ངོགས་ན་གནས་པ་རྣམས་ཀྱི་ནམ་མཁའི་ལྡིང་དང་། འདོན་པར་བྱེད་པ་དག་གི་བྲམ་ཟེ་དང་། ནད་པ་རྣམས་ཀྱི་སྨན་པ་མཁས་པ་དང་།

སྡར་མ་རྣམས་ཀྱི་དཔའ་བོ་དང་། ལམ་དུ་ཞུགས་པ་རྣམས་ཀྱི་ས་མཁན་དང་། དོན་མཐུན་རྣམས་ཀྱི་དེད་དཔོན་དང་། ཚོང་པ་རྣམས་ཀྱི་ཚོང་དཔོན་དང་། མཐའ་འཁོབ་ན་གནས་པ་རྣམས་ཀྱི་མཁར་གྱི་རྒྱལ་པོ་དང་། འཛམ་བུ་གླིང་པའི་འཁོར་ལོས་སྒྱུར་བ་དང་། བླ་གབ་མེད་པ་དག་གི་ཟླ་བ་དང་།
ཉི་མ་ལ་དད་པ་རྣམས་ཀྱི་ཉི་མ་དང་། རི་རབ་ཀྱི་བང་རིམ་ལ་གནས་པ་དག་གི་རྒྱལ་པོ་ཆེན་པོ་བཞི་དང་། རི་གཉའ་ཤིང་འཛིན་ལ་གནས་པ་དག་གི་ཐགས་ཟངས་རིས་དང་། རི་རབ་ཀྱི་སྟེང་ན་གནས་པའི་བརྒྱ་བྱིན་དང་། ཚངས་པའི་འཇིག་རྟེན་ན་གནས་པ་དག་གི་ཚངས་པ་ལྟ་བུ་སྟེ། གཙོ་
བོར་གྱུར་པའི་ཕྱིར་དང་། འཁོར་རྣམས་གུས་པར་ཉན་པ་ཉིད་ཀྱི་ཕྱིར་དང་། དེ་དག་དང་འདིར་མཚུངས་པར་ཤེས་པར་བྱའོ། །མིག་ལ་སོགས་པའི་དབང་པོ་རྒྱུར་གྱུར་པས་ཤིན་ཏུ་དུལ་བ་ནི་ལེགས་པར་དབང་དུ་གྱུར་པའོ། །སྤྱོད་ལམ་དང་སྤྱོད་པ་མ་འཁྲུལ་བ་ནི་འཁྲུལ་པ་
མེད་པར་གཤེགས་པ་ལ་སོགས་པའོ། །ཇི་ལྟ་བུར་ཞེ་ན། ཆུ་གཏེར་ལྟར་ཞེས་བྱ་བ་ལ་སོགས་པ་སྨོས་ཏེ། ཏིང་ངེ་བ་ནི་བརྟན་ཞིང་མི་འགྱུར་བ་སྟེ། ཆུ་བོ་རྣམས་ཀྱི་ཆུ་གཏེར་དང་། ཞིང་པ་རྣམས་ཀྱི་སྤྲིན་དང་། དགོན་པ་པ་རྣམས་ཀྱི་གླང་པོ་ཆེའི་གཙོ་བོ་ལྟ་བུའོ། །མ་འདྲེས་
པ་ནི་ཐུན་མོང་མ་ཡིན་པའི་དྲན་པ་ཉེ་བར་གཞག་པ་སྟེ། ཡེ་ཤེས་ཀྱིས་གུས་པར་ཉན་པ་དང་། གུས་པར་མི་ཉན་པ་དང་། གཉི་ག་མ་ཡིན་པ་དག་ལ་ཀུན་ཏུ་སྤྱོད་པ་རྣམ་པ་གསུམ་མོ། །སྙིང་རྗེ་ཆེན་པོ་ནི་ཁམས་གསུམ་གྱི་སེམས་ཅན་ལ་དམིགས་ཤིང་སྡུག་བསྔལ་གྱི་རྣམ་པ་ལ་སྙོམས་
པར་འཇུག་པའི་དེ་བཞིན་གཤེགས་པའི་ཐུགས་ཀྱི་རྒྱུད་ལ་གནས་པ་ཐབས་ཀྱིས་འཇུག་པའི་འཕགས་པའི་ལམ་བསྐྱེད་པ་མྱ་ངན་ལས་འདས་པ་ཐོབ་པར་བྱེད་པ་སྟེ། ཟག་པ་དང་བཅས་པའི་བློ་དང་ལྡན་ཞིང་འབྱོར་པའོ། །ཉན་ཐོས་ཆེན་པོ་ནི་མངོན་པར་ཤེས་པ་ལ་སོགས་པའི་ཡོན་
ཏན་གྱིས་སློབ་མིའི་གཙོ་བོར་གྱུར་པའོ། །གང་གི་འོད་འདོམ་གང་བ་ཉི་མ་སྟོང་བས་ལྷག་པར་འཕྲོ་བ་དེ་ནི་ཉི་མ་སྟོང་བས་ལྷག་པའི་འོད་མངའ་བ་སྟེ། བཅོམ་ལྡན་འདས་བཞེད་པར་གྱུར་པ་ན་འོད་རབ་ཏུ་འབར་བ་དང་བྲི་བར་འགྱུར་བའོ། །འགྲོ་བ་ཞེས་བྱ་བ་ནི་འགྲོ་ཞིང་རྒྱུ་བའི་

ནུས་པ་དང་ལྡན་པའོ། །བཅོམ་ལྡན་འདས་མ་འདྲེས་པའི་དྲན་པ་ཉེ་བར་གཞག་པ་དག་གིས་འཁོར་རྣམས་ལ་ཆོས་སྟོན་པ་ན། གུས་པར་ཉན་པ་ཐམས་ཅད་དང་། གུས་པར་མི་ཉན་པ་ཐམས་ཅད་ལ་གཅིག་ཏུ་གུས་པར་ཉན་པ་དང་། གཅིག་ཏུ་གུས་པར་མི་ཉན་པ་དེས་བཅོམ་ལྡན་འདས་ཀྱི་
ཐུགས་རྣམ་པ་གཞན་དུ་མི་འགྱུར་བའོ། །ཕ་རོལ་གྱི་དཔུང་གི་ཚོགས་འོང་བ་རིག་པར་བྱ་བའི་ཕྱིར་དང་། ལམ་ཉམ་ང་བ་ཡོངས་སུ་བསྲུང་བའི་ཕྱིར་བཞག་པའི་སྐྱེས་བུ་ནི་ལག་གཅན་ནོ། །ཆུ་བོ་ཆེན་པོའི་ཕ་རོལ་དུ་འགྲོ་བར་བྱ་བའི་ཕྱིར་རྔན་པ་སྟེར་བ་ནི་གྲུ་བཙས་སོ། །བཀའ་ལུང་བསྟན་པ་ནི་དགྲ་
བཅོམ་པའི་འབྲས་བུ་ལུང་བསྟན་པའོ། །ལོངས་སྤྱོད་ནི་ཡོངས་སུ་བསྒོ་བར་བྱ་བའོ། །ན་ཚོད་མཉམ་པོར་གྱུར་པས་ནེའུ་ལྡངས་སམ་གྲོགས་པོའོ། །ཤི་ཞིང་ཞེས་བྱ་བ་ལ་ཇི་ལྟར་ཤི་བ་ཡིན་ཞེ་ན། དུས་ལས་འདས་པ་ཞེས་སྨོས་ཏེ། སྐལ་བ་མཉམ་པའི་མཐའི་སྐད་ཅིག་མའི་དུས་
ཞེས་བྱ་བའི་བར་དུ་བྱས་ནས་ཐ་མའི་དུས་ཐོབ་པར་གྱུར་ཅེས་བྱ་བའི་ཐ་ཚིག་གོ། །ནམ་མཁའ་ནི་མཁའ་དང་བར་སྣང་ངོ་། །རྒྱ་མཚོ་ཆེན་པོ་ནི་ཆུ་འཛིན་ཆེན་པོའོ། །དྲང་སྲོང་ཆེན་པོ་ནི་སངས་རྒྱས་བཅོམ་ལྡན་འདས་ཏེ། དེ་དག་ནི་བརྫུན་གསུང་བའི་ངང་ཚུལ་ཅན་དུ་མི་འགྱུར་བའོ། །བཅོམ་ལྡན་
འདས་མཆོག་ཏུ་ཞི་བ་དང་ལྡན་པ་ཉིད་ཀྱི་ཕྱིར་རྒོད་པ་མི་མངའ་བ་དང་ལྟད་མོ་སྤངས་པའོ། །སྐྱེ་བོ་མང་པོ་ནི་སྐྱེ་བོ་མང་པོ་སྟེ་སྐྱེ་བོའི་ཚོགས་ཀྱིས་བསྐོར་བའོ། །ཚོགས་འདི་ལ་ཡོད་པས་ན་ཚོགས་ཅན་ནོ། །ཕ་རོལ་ཡང་དེ་ཡིན་ལ་ཚོགས་ཅན་ཡང་དེ་ཡིན་པས་ན་ཕ་རོལ་ཚོགས་ཅན་ཏེ། དེའི་རྒོལ་བ་
ནི་ཕས་ཀྱི་རྒོལ་བའི་ཚོགས་ཅན་ནོ། །དེ་འཇོམས་པར་མཛད་པའི་ཕྱིར་ཕས་ཀྱི་རྒོལ་བའི་ཚོགས་ཅན་འཇོམས་པར་རོ། །རི་དགས་ཀྱི་རྒྱལ་པོ་ནི་སེང་གེའོ། །མངོན་སུམ་དུ་ཕྱོགས་པ་ནི་དེར་གཞོལ་བའམ་བརྩོན་པ་དང་བཅས་པའོ། །འདམ་ནི་ཉེ་བར་གོས་པའམ་ཚོགས་ལ་བྱའོ། །མཐོ་
རིས་ཀྱི་གནས་གང་དག་ལ་ཡོད་པ་དེ་དག་ནི་ལྷ་རྣམས་སོ། །ངེས་པ་ནི་གསལ་པོར་རོ། །རྣམ་པར་འཕྲུལ་པ་ནི་རྫུ་འཕྲུལ་གྱི་རྣམ་པར་འཕྲུལ་པའོ། །གཞོན་ནུ་ནི་གཞོན་ནུ་རྒྱལ་ཚབ་ཏུ་དབང་བསྐུར་བའོ། །བློན་པོ་ནི་རྟག་ཏུ་ཐག་ཉེ་བར་གནས་པ་ཅན་བློའི་གྲོགས་སུ་གྱུར་པའོ། །

གྲོང་ཁྱེར་ན་གནས་པས་ན་གྲོང་ཁྱེར་གྱི་མིའོ། །ལྗོངས་ན་གནས་པས་ན་ལྗོངས་ཀྱི་མི་སྟེ། ལྗོངས་ན་གནས་པའི་ཚུལ་གྱིས་རྒྱལ་པོའི་ཕོ་བྲང་ན་གནས་པ་གང་ལ་ཡོད་པ་དེ་ནི་ལྗོངས་ཀྱི་མིའོ། །འབྱུང་བར་བརྩམས་པ་ནི་འབྱུང་བ་དང་ལྡན་པར་རོ། །ཞལ་འཛུམ་པ་ནི་
ཞལ་གྱི་མདོག་དྲི་མ་མེད་པའམ། ཞལ་རབ་ཏུ་བཞད་པར་གྱུར་པའོ། །གཟུགས་མཛེས་པ་ནི་ཁ་དོག་གི་སྒོ་ནས་སོ། །བལྟ་ན་སྡུག་པ་ནི་དབྱིབས་ཀྱི་སྒོ་ནས་སོ། །སྐྱེ་མཆེད་དང་བར་གྱུར་པ་ནི་བཟང་པོའོ། །གནས་མེད་པ་ནི་མི་སྲིད་པའོ། །སྐབས་མེད་པ་ནི་ངེས་པར་སྦྱོར་དུ་མེད་པའོ། །
ཉོན་མོངས་པར་མ་གྱུར་པ་ནི་པགས་པ་ཚིག་པའི་སྒོ་ནས་སོ། །གནོད་པར་མ་གྱུར་པ་ནི་ཤ་ཚིག་པའི་སྒོ་ནས་སོ། །སྐལ་བ་ནི་ཁྱིམ་གྱི་བགོ་སྐལ་ཡིན་ལ། དེ་ལ་སྤྱོད་པའི་ཕྱིར་བགོ་སྐལ་ལ་སྤྱོད་པ་ཡིན་ཏེ། བགོ་སྐལ་ལས་ཉམས་པའམ། བགོ་སྐལ་དང་བྲལ་བར་གྱུར་པ་ནི་སྐལ་བ་ཆུང་
བའོ། །བསམ་པ་ཞེས་བྱ་བ་ལ་སོགས་པ་ལ། བསམ་པ་ནི་རྒྱ་ཆེ་བའི་ཆོས་བཤད་པའི་རྒྱ་ཆེན་པོ་ཉིད་ལ་མོས་ཤིང་མངོན་པར་འདོད་པར་རོ། །བག་ལ་ཉལ་ནི་ཉོན་མོངས་པ་དག་ཅིང་དྲག་པའི་ཀུན་ཏུ་སྤྱོད་པ་སྟེ། ཉོན་མོངས་པ་གང་དང་གང་གིས་གནོད་པར་གྱུར་པ་དེ་དང་དེ་ལ་རྗེས་སུ་མཐུན་པའི་ཆོས་
སྟོན་པའོ། །ཁམས་ནི་རིགས་ཡིན་ཏེ། ཁ་ཅིག་ནི་རྩུབ་པ་མ་ཡིན་པའི་ཆོས་དང་། ཁ་ཅིག་ནི་རྩུབ་པའི་ཆོས་བསྟན་པས་འདུལ་བའོ། །དམྱལ་བའི་གཏམ་རྒྱུད་ནི་རྩུབ་པ་ཡིན་ལ། མཐོ་རིས་ཀྱི་གཏམ་རྒྱུད་ནི་འཇམ་པའོ། །རང་བཞིན་ནི་དད་པའི་དབང་པོ་ལ་སོགས་པའི་རང་བཞིན་ཏེ། དབང་
པོ་རྣོན་པོ་དང་རྟུལ་པོ་དབྱེ་བའི་ཕྱིར་རོ། །ལམ་ལ་རྗེས་སུ་ཤེས་པ་ནི་རྒྱུན་དུ་ཞུགས་པའི་འབྲས་བུའོ། །བསྒོམ་པས་སྤང་བར་བྱ་བའི་ཀུན་ནས་ཉོན་མོངས་པའི་རྣམ་པ་དྲུག་པ་སྤངས་པ་ནི་ལན་ཅིག་ཕྱིར་འོང་བའི་འབྲས་བུའོ། །ཐ་མའི་ཆ་དང་མཐུན་པའི་ཀུན་ཏུ་སྦྱོར་བ་ལྔ་ཟག་པ་མེད་པའི་ལམ་
གྱིས་སྤངས་པ་ནི་ཕྱིར་མི་འོང་བའི་འབྲས་བུའོ། །སྲིད་པའི་རྩེ་མོ་པའི་ཉོན་མོངས་པ་མ་ལུས་པར་སྤངས་པ་ནི་དགྲ་བཅོམ་པ་ཉིད་དོ། །དྲོད་དུ་གཏོགས་པའི་དགེ་བའི་རྩ་བ་ཞེས་བྱ་བ་ནི་འཕགས་པའི་ལམ་གྱི་མེའི་སྔ་ལྟས་ཡིན་ཏེ། དེས་བསྐྱེད་པ་ནི་ཡོངས་སུ་མྱ་ངན་ལས་འདས་པའི་ཆོས་

སུ་འགྱུར་བའོ། །རྩེ་མོ་དང་བཟོད་པ་བསྐྱེད་པ་ཡང་དེ་དང་འདྲའོ། །ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་དོ་ཞེས་བྱ་བ་ནི་ཉན་ཐོས་ཀྱི་རིགས་ཅན་ལས་ཐར་པའི་ཆ་དང་མཐུན་པའི་དགེ་བ་བསྐྱེད་པའོ། །དེ་བཞིན་དུ་རང་སངས་རྒྱས་དང་། ཡང་དག་པར་རྫོགས་པའི་སངས་རྒྱས་ཀྱི་
རིགས་ལས་ཞེས་བྱ་བར་སྦྱར་རོ། །སངས་རྒྱས་ལ་གཞོལ་བ་ཞེས་བྱ་བ་ལ་སོགས་པ་ལ་འཁོར་དེའི་ནང་དུ་ཆུད་པར་གྱུར་པ་དག་དེ་ལྟ་བུར་གྱུར་པ་ཡིན་ཏེ། བདག་གིས་ཡོན་ཏན་གྱི་ཚོགས་འདི་ཁོང་དུ་ཆུད་པར་གྱུར་པ་གང་ཡིན་པ་དེ་ཐམས་ཅད་ནི་བཅོམ་ལྡན་འདས་ཀྱི་མཐུ་ཡིན་པ་དེ་
བས་ན། བཅོམ་ལྡན་འདས་འདི་ནི་ཡོན་ཏན་གྱི་ཚོགས་དཔག་ཏུ་མེད་པར་གྱུར་པའི་གཞི་དང་འདི་ཉིད་འཁོར་བའི་སྡུག་བསྔལ་མ་ལུས་པ་ལས་ཡོངས་སུ་སྐྱོབ་པར་མཛད་པར་སྤྱོད་པ་ཡིན་ལ། དེས་ན་བཅོམ་ལྡན་འདས་ལ་ལྡོག་པ་མེད་པའི་དད་པ་བསྐྱེད་ནས་ཀྱང་བཅོམ་ལྡན་འདས་དེ་ཉིད་ལ་སྐྱབས་ཉིད་
དུ་འཛིན་པ་དེའི་ཕྱིར། སངས་རྒྱས་ལ་གཞོལ་བ་ཞེས་བྱའོ། །དོན་དམ་པའི་ཆོས་མྱ་ངན་ལས་འདས་པ་ཐོབ་པ་ཡང་སྐྱེས་བུའི་དོན་བླ་ན་མེད་པ་ཡིན་ཏེ། གང་གི་ཕྱིར་མྱ་ངན་ལས་འདས་པ་དེ་ཡང་གཙོར་དེ་དག་གིས་ཐོབ་པ་ཡིན་ཏེ། རྒྱུན་དུ་ཞུགས་པའི་འབྲས་བུ་ལ་སོགས་པ་ཐོབ་པར་བྱེད་པ་
ཡིན་པའི་ཕྱིར་ཆོས་ཤེས་ཤིང་དད་པ་རྙེད་པ་དེ་བས་ན་ཆོས་ལ་བརྟེན་པ་ཞེས་བྱའོ། །རྒྱུན་དུ་ཞུགས་པ་ལ་སོགས་པ་ཡང་དོན་དམ་པའི་དགེ་འདུན་གྱི་རང་བཞིན་ཡིན་པའི་ཕྱིར་དང་། ཐར་པའི་ཆ་དང་མཐུན་པ་ལ་སོགས་པ་སྐྱེ་བ་ཡང་ཚོགས་དེ་ལ་བརྟེན་པ་ཉིད་ཀྱི་ཕྱིར་དགེ་འདུན་ལ་ཤེས་ཤིང་དད་པ་རྙེད་པ་དེ་
བས་ན་དགེ་འདུན་ལ་རབ་ཏུ་འབབ་པ་ཞེས་བྱའོ། །དེས་པ་དག་ལས་གཞན་དེས་པ་ནི་དེས་ཤིང་དེས་པ་སྟེ། འཕྲལ་དུ་སྐྱེད་པར་བྱེད་ཅེས་བྱ་བའི་ཐ་ཚིག་གོ། །མའི་མིང་པོ་ནི་ཞང་པོའོ། །ཐ་སྙད་དུ་བྱ་བའི་དངོས་པོ་ནི་ཟོང་ངོ་། །རྫུ་འཕྲུལ་ཆེ་བ་ཞེས་བྱ་བ་ལ་སོགས་པ་ལ། རྫུ་འཕྲུལ་ཆེ་བ་ནི་
རང་བཞིན་ཉིད་ཀྱི་ཡོན་ཏན་བསྒྲུབས་པའི་སྒོ་ནས་སོ། །མཐུ་ཆེ་བ་ནི་གཞན་ལ་ཕན་པ་བྱེད་པས་སོ། །ཚུལ་ཤིང་བྲིམ་མོ་ཞེས་བྱ་བ་ནི་མིང་བྱང་ཕྱིས་པར་གྱུར་པ་སྟེ། གཉེན་གྱི་ཚོགས་ལ་ཕྱི་རོལ་དུ་བྱེད་ཅེས་བྱ་བའི་བར་དུའོ། །ཁྲག་དྲོན་པོ་ནི་སྙིང་གི་ཕྱོགས་ན་གནས་པ་སྲོག་འཛིན་པར་བྱེད་པ་ཡིན་ལ།

གང་གི་ཕྱིར་འཇིག་རྟེན་པ་ནི་སྟོབས་ཞེས་བརྗོད་དོ། །དགའ་བའི་རྒྱུར་གྱུར་པ་ཉིད་ཀྱི་ཕྱིར་སྡུག་པའོ། །སྐད་ཅིག་མ་གཅིག་ཀྱང་ཡིད་ཡོངས་སུ་མི་གཏོང་བའི་ཕྱིར་ཡིད་དུ་འོང་བའོ། །སངས་རྒྱས་ལ་སྐྱབས་སུ་སོང་བ་ཞེས་བྱ་བ་ནི་མི་སློབ་པ་སངས་རྒྱས་སུ་བྱེད་པའི་ཆོས་
ལའོ། །ཆོས་ལ་ཞེས་བྱ་བ་ནི་མྱ་ངན་ལས་འདས་པ་ལའོ། །དགེ་འདུན་ལ་ཞེས་བྱ་བ་ནི་སློབ་པ་དང་མི་སློབ་པ་དགེ་འདུན་དུ་བྱེད་པ་ལའོ། །གནས་བརྟན་རྣམས་ཀྱིས་ཞེས་བྱ་བ་ནི་སྡུད་པ་པོ་རྣམས་ཀྱིས་སོ། །སྐྱེས་བུའི་བྱེད་པ་ལ་བརྟེན་ནས་འཚོ་བར་བྱེད་པའི་སྐྱེས་པ་གང་ཡིན་པ་དེ་ནི་
སྐྱེས་བུར་བཀུར་བའོ། །ཤིང་རིང་པོའི་རྩེ་མོར་བཞག་ནས་ཞེས་བྱ་བ་ལ་སོགས་པ་ལ། སྐས་ནི་ཤིང་དག་གི་གོང་ནས་གོང་དུ་ཡང་དགེ་བར་སྦྱར་བའོ། །ཐག་སྐས་ནི་ཤིང་རིང་པོ་ལ་རྐང་པ་བཞག་པའི་གནས་བྱས་ཤིང་ཐེ་གུས་བཅིངས་པའོ། །མཆིལ་པ་ནི་ལྕགས་ཀྱུ་སྟེ་སྲད་བུས་འཕང་
བར་བྱ་བའོ། །འབབ་སྟེགས་སུ་ཉེ་རེག་བྱེད་པས་ཞེས་བྱ་བ་ནི་མངོན་པར་འདོད་པའི་འབབ་སྟེགས་རྟེན་པར་བྱེད་པས་སོ། །སྤངས་ཤིང་ཞེས་བྱ་བ་ནི་འདས་པར་ཉོན་མོངས་པའི་དགྲ་སྤངས་པའོ། །དོར་ལ་ཞེས་བྱ་བ་ནི། ད་ལྟར་གྱིའོ། །སྒུགས་ལ་ཞེས་བྱ་བ་ནི་མ་འོངས་པའོ། །མངོན་དུ་
རྒྱུ་བ་སྤངས་པ་ནི་སོ་སོར་དོར་བ་ནའོ། །ཡང་ན་དེ་དག་ཐམས་ཅད་སྤངས་པའི་རྣམ་གྲངས་ཁོ་ན་ཡིན་ནོ། །གསོལ་བ་ནི་གཞན་གཡོའི་སྒོ་ནས་གསོལ་བ་འདེབས་པར་བྱེད་པའོ། །གང་གི་ཚེ་ཟངས་མ་ལ་སོགས་པའི་རྒྱུ་ལས་བྱས་པའི་ལྷུང་བཟེད་དག་རྙེད་པར་གྱུར་པ་དེའི་ཚེ། དེ་དག་སྨན་ཕོར་གྱི་ཚུལ་
དུ་ཡོངས་སུ་ལོངས་སྤྱོད་པར་བྱའི། དེ་ལ་ཆགས་པ་བསྐྱེད་པར་ནི་མི་བྱ་སྟེ། བཅོམ་ལྡན་འདས་ཀྱིས་སྨན་ཕོར་དུ་བཅང་བར་བྱའོ་ཞེས་རྗེས་སུ་གནང་བ་ཡིན་ནོ། །གཏུམ་པོ་ནི་དྲག་པོའོ། །གནོད་སྦྱིན་གྱི་གནས་ནི་ལྷ་རྟེན་ནོ། །ཉིན་ཞག་ནི་ཚེས་གཅིག་ལ་སོགས་པའོ། །ཚེས་གྲངས་ནི་གཟའ་
ལྷག་ལ་སོགས་པའོ། །ཉི་ཚོད་དུ་སྦྱར་བ་ནི་དགེ་བའི་སྦྱོར་བའོ། །བཙོང་བར་བྱ་བའི་དངོས་པོ་ཐམས་ཅད་ཀྱིས་ཇི་ལྟར་རྗེས་སུ་མཐུན་པའི་རིན་རྙེད་པའི་གནས་ནི་ཚོང་དུས་སོ། །རས་ཟུང་གི་རྗེས་སུ་མཐུན་པའི་རིན་མི་ཁུགས་པའི་ཕྱིར་ཚོང་དུས་མ་ཡིན་པར་བསྒྲག་ཏུ་རུང་བར་འགྱུར་བའོ། །

འདྲོན་པོ་ནི་གསར་དུ་འོངས་པའི་ཕྱིར་བསྙེན་བཀུར་བར་བྱ་བའོ། །ལྷན་ཅིག་ནི་རྟག་ཏུ་ལྷན་ཅིག་འདུག་པ་ཉིད་དོ། །དབང་པོ་རྣམས་བསྡུས་པ་ཞེས་བྱ་བ་ནི་ཡུལ་ལས་ཏེ། དབང་པོ་རྣམས་བསྡུས་པའམ། །བཙུམས་པའམ་ཟློག་པར་བྱེད་པའོ། །མནའ་མ་རྣམས་ཞེས་བྱ་བ་ནི་མེ་ལས་སྐྱེས་ཀྱི་
ཡུལ་ལ་རྒྱལ་པོའི་སྲས་ཀྱི་མིང་དུ་བྱས་དབང་དུ་བྱས་ནས་མནའ་མ་ཞེས་བྱའོ། །ངོ་མཚར་བ་ནི་ཡ་མཚན་དུ་གྱུར་པའོ། །ཆེས་གྱུར་པ་ནི་ལྷག་པར་གྱུར་པའོ། །བསོད་ནམས་ཀྱི་སྟོབས་ལས་བྱུང་བའི་རིན་པོ་ཆེའི་རང་བཞིན་གྱི་ས་གཞི་དེ་ལ་འཁྲུལ་འཁོར་གྱི་སྦྱོར་བས་ཉ་ལ་སོགས་པ་ཆུའི་
སྲོག་ཆགས་སྟེང་ན་རྒྱུ་བ་ལྟར་མཐོང་བའི་ཕྱིར་རོ། །བྱེད་པ་ནི་གཙོ་བོར་བྱ་བ་ཡིན་ལ། བྱ་བ་ནི་གཙོ་བོར་མ་ཡིན་པའམ། ཉེ་བ་ན་གནས་པ་ནི་བྱེད་པ་ཡིན་ལ་ཕྱིས་བྱ་བ་ནི་བྱ་བ་ཡིན་ནོ། །སྐྱེངས་པ་ནི་རྣམ་པར་ཞུམ་པ་ཡིན་ཏེ། བྱ་བ་ལ་རྨོངས་པར་གྱུར་ཞེས་བྱ་བའི་ཐ་ཚིག་གོ། །སེམས་
པ་ནི་ཚུལ་མ་ཡིན་པའི་བྱ་བ་བྱེད་པའི་སེམས་སྐྱེས་པར་གྱུར་པའོ། །བདག་ཉིད་ཆོས་སྤྱོད་པའི་ཕྱིར་ཆོས་དང་ལྡན་པའོ། །ཆོས་ཀྱི་རྒྱལ་སྲིད་ཡོངས་སུ་སྐྱོང་བར་བྱེད་པའི་ཕྱིར་ཆོས་སྐྱོང་བའི་རྒྱལ་པོའོ། །གཡོན་ཅན་ནི་ངོ་སྦེད་པའི་རྐུན་མའོ། །བསམས་ནས་ཞེས་བྱ་བ་ནི་དོན་དུ་
གཉེར་བའི་སེམས་ཀྱིས་སོ། །མཚན་མོ་ནི་ནུབ་མོའོ། །རྒྱལ་པོ་སྡིག་ཅན་ཞེས་བྱ་བ་ནི་སྡིག་པའམ་ཚུལ་མ་ཡིན་པ་བྱེད་པ་ཅན་ནོ། །དམན་པ་ནི་སྟོབས་ཀྱིས་དམན་པར་གྱུར་པའོ། །མགོན་མེད་པ་ནི་སྐྱབས་མེད་པའོ། །ཕོངས་པ་ནི་དབུལ་བའོ། །རྒུད་པ་ནི་ནད་ཀྱིས་
གཟིར་བར་གྱུར་པའོ། །མཛེས་པར་བཤད་པ་ནི་ལེགས་པར་གསུངས་པ་སྟེ། འབྲེལ་པ་ནི་བརྗོད་པའོ། །ཆོས་འདུལ་བ་གང་ལ་ཡང་དག་པར་སྒྲུབ་པའམ། འབྲས་བུ་ངེས་པར་མི་འཁྲུལ་བ་ཡོད་པ་དེ་ནི་ལེགས་པར་གསུངས་པའོ། །རབ་ཏུ་བྱུང་ཞིང་བསྙེན་པར་རྫོགས་པའི་
མཚན་ཉིད་ནི་དགེ་སློང་གི་དངོས་པོའོ། །ཐོབ་ནས་ཞེས་བྱ་བ་ནི་ཐོབ་པའི་ཕྱིར་རོ། །ཚངས་པ་ནི་མྱ་ངན་ལས་འདས་པ་ཡིན་ལ། དེའི་རྒྱུ་མཚན་ཚུལ་ཁྲིམས་ཡོངས་སུ་སྲུང་བ་ལ་སོགས་པའི་བྱ་བ་ནི་སྤྱད་པའོ། །དེ་སྤྱོད་པ་ནི་བསྒྲུབ་པའོ། །ལྷུང་བཟེད་དང་བུམ་པ་ཐོགས་པའི་ལག་པ་གང་

ལ་ཡོད་པ་དེ་ནི་ལག་ན་ལྷུང་བཟེད་དང་བུམ་པ་ཐོགས་པ་ཅན་ནོ། །སྐྲ་དང་ཁ་སྤུ་བྲེགས་ནས་ཞག་བདུན་ལོན་པ་ནི་སྐྲ་དང་ཁ་སྤུ་བྲེགས་ནས་ཞག་བདུན་ལོན་པ་གང་ཡིན་པ་དེ་ལ་དེ་སྐད་ཅེས་བྱའོ། །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གང་ཡིན་པ་དེའི་སྤྱོད་ལམ་ནི་རབ་ཏུ་
ཞི་བར་འགྲོ་བ་ལ་སོགས་པའོ། །གནས་པ་ནི་ལྡན་པའོ། །ཚུར་ཤོག་ཅེས་བྱ་བ་ནི་འདིར་ཤོག་ཤིག་པའོ། །ལུས་ལ་སྦྱར་མས་གཡོགས་པ་ནི་སྦྱར་མ་བགོས་པའི་ལུས་ཅན་ནོ། །དབང་པོ་རབ་ཏུ་ཞི་བ་ཞེས་བྱ་བ་ནི་རྒོད་པའི་ཡུལ་ལས་དབང་པོ་ལྡོག་པའོ། །ཆ་ལུགས་ནི་ཆ་བྱད་དོ། །སངས་
རྒྱས་དགོངས་བཞིན་ཞེས་བྱ་བ་ནི། སངས་རྒྱས་བཅོམ་ལྡན་འདས་བཞེད་པ་བཞིན་དུ་སྟེ། སྦྱར་མ་གོན་པའི་ལུས་ཞེས་བྱ་བ་ལ་སོགས་པ་སྐབས་གསུམ་པོ་ཐམས་ཅད་ལ་སངས་རྒྱས་དགོངས་བཞིན་དུ་ཞེས་བྱ་བ་སྦྱར་བར་བྱའོ། །གདམས་ངག་ནི་ལམ་བསྒོམ་པའི་མན་ངག་གོ། །བརྩོན་
པ་ནི་སྤྲོ་བར་བྱེད་པའོ། །འབད་པ་ནི་ལས་སུ་བྱ་བ་བྱེད་པའོ། །རྩོལ་བ་ནི་བྱ་བ་དེ་ལ་ནན་ཏན་དུ་བྱེད་པའོ། །གཡོ་བ་དང་མི་གཡོ་བར་རིག་ནས་ཞེས་བྱ་བ་ལ་གཡོ་བ་ནི་སྐད་ཅིག་མའི་རྒྱུན་མི་རྟག་པ་ཉིད་ཀྱི་ཕྱིར་རོ། །མི་གཡོ་བ་ནི་འཕགས་པའི་ལམ་མེད་པར་འཁོར་བ་ལ་ལྡོག་པ་མེད་པའི་ཕྱིར་རོ། །
འདུས་བྱས་སུ་གཏོགས་པ་ཐམས་ཅད་ནི་དུས་ཀྱི་རྣམ་པ་སྟེ། འདུས་བྱས་སུ་གཏོགས་པ་དེ་དག་ཟིལ་གྱིས་མནན་པ་ནི་ཚར་བཅད་པའོ། །ཇི་ལྟར་ཟིལ་གྱིས་མནན་ནས་ཤེ་ན། ཉམས་པ་ཞེས་སྨོས་ཏེ། ཉམས་པ་ནི་གཞན་གྱི་སྟོབས་ཀྱིས་ཉམས་པའོ། །ལྟུང་བ་ནི་རང་གི་སྟོབས་ཀྱིས་སོ། །
རྣམ་པར་འཐོར་བ་ནི་འགྱུར་བ་དང་བཅས་པར་འཇིག་པར་གྱུར་པའོ། །རྣམ་པར་འཇིག་པ་ནི་འགྱུར་བ་མེད་པར་འཇིག་པའོ། །ཉམས་པ་ནི་མི་དང་ལྷ་ཁ་ཅིག་གི་དཔེ་ཡིན་ནོ། །ལྟུང་བ་ནི་གཟུགས་དང་གཟུགས་མེད་པ་ན་སྤྱོད་པའི་ལྷ་དག་གི་དཔེ་ཡིན་ནོ། །རྣམ་པར་འཐོར་བ་ནི་ཤིང་ལ་
སོགས་པའི་དཔེ་ཡིན་ཏེ། ཞིག་ནས་ཐམས་ཅད་ཐལ་བར་འགྱུར་བ་དེའི་ཕྱིར་འགྱུར་བ་དང་བཅས་པས་འཇིག་པ་ཡིན་ནོ། །རྣམ་པར་འཇིག་པ་ནི་སེམས་དང་སེམས་ལས་བྱུང་བ་དང་། མེ་མར་གྱི་མེ་ལྕེ་ལ་སོགས་པ་འགྱུར་བ་མེད་པར་འཇིག་པའི་དཔེ་ཡིན་ནོ། །འདུས་བྱས་སུ་གཏོགས་པའི་

ཆོས་གང་ཡིན་པ་དེ་དག་ནི་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པ་དག་གི་ཆོས་སུ་གདོན་མི་ཟ་བར་འགྱུར་བས་ཡིན་ནོ། །དགྲ་བཅོམ་པ་ནི་མཆོད་པར་བྱ་བ་ཉིད་ཡིན་ཏེ། དེ་རྒྱུ་མཚན་གཞན་ལས་ནི་མ་ཡིན་གྱི། ཉོན་མོངས་པ་ཐམས་ཅད་སྤངས་པའི་ཕྱིར་
རོ། །ཁམས་གསུམ་པའི་ཁམས་གསུམ་གྱི་སྲེད་པ་དང་བྲལ་བར་གྱུར་པ་ནི་འདོད་ཆགས་དང་བྲལ་བའོ། །བོང་བ་དང་གསེར་དུ་མཉམ་པ་ནི་དེ་ལ་ས་དང་གསེར་དུ་མཚུངས་པ་སྟེ། ཅི་ལྟར་ནམ་མཁའ་ལ་ལག་ཐོགས་པ་མེད་པ་བཞིན་དུ་དེ་དང་མཚུངས་པ་ནི་དེའི་སེམས་སོ། །སྟེའུ་
ནི་ལག་ན་སྟེའུ་ཐོགས་པའི་སྐྱེས་བུ་ཡིན་ལ་ཙན་དན་ནི་ལག་ན་ཙན་དན་ཐོགས་པའི་སྐྱེས་བུ་སྟེ། འདི་ལ་སྟེའུ་ཐོགས་པའི་སྐྱེས་བུ་དང་། ཙན་དན་ཐོགས་པའི་སྐྱེས་བུ་མཚུངས་པ་ནི་ཕན་འདོགས་པ་དང་གནོད་པ་བྱེད་པ་ལ་རྗེས་སུ་ཆགས་པ་དང་ཁོང་ཁྲོ་བ་མེད་པའི་ཕྱིར་རོ། །རིག་པ་སྟེ་
ཡང་དག་པའི་ལྟ་བས་སོ། །བྲལ་བར་གྱུར་པ་ནི་ཕྱེ་བ་སྟེ། གང་གི་ཕྱིར་མ་རིག་པའི་བདག་ཉིད་ཀྱི་སྒོ་ངའི་སྦུབས་དྲལ་བར་གྱུར་པ་དེ་ལ་དེ་སྐད་ཅེས་བྱའོ། །རིག་པ་ནི་གསུམ་སྟེ། སྔོན་གྱི་གནས་དང་། འཆི་འཕོ་དང་སྐྱེ་བ་དང་། ཟག་པ་ཟད་པ་ཤེས་པ་མངོན་སུམ་དུ་བྱེད་པའི་
མིང་ཅན་ནོ། །མངོན་པར་ཤེས་པ་ནི་རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་ཀྱི་རང་བཞིན་ཅན་ནོ། །སོ་སོ་ཡང་དག་པར་རིག་པ་ནི་བཞི་སྟེ། ཆོས་དང་དོན་དང་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་ཐོབ་པའོ། །སོ་སོ་ཡང་
དག་པར་རིག་པ་ནི་ཆོས་དང་དོན་དང་ངེས་པའི་ཚིག་དང་སྤོབས་པ་ཡོངས་སུ་ཤེས་པ་ལ་གཟུང་བར་བྱའོ། །འདོད་པ་ནི་ཆགས་པའོ། །རྙེད་པ་ནི་ནོར་རྙེད་པའོ། །བཀུར་སྟི་ནི་བསྙེན་བཀུར་རོ། །རྒྱབ་ཀྱིས་ཕྱོགས་པ་ནི་ཡིད་ཕྱིར་ཕྱོགས་པའོ། །དབང་པོ་དང་ཉེ་དབང་དུ་བཅས་
པས་འཇུག་པའི་ལྷ་རྣམས་ཀྱིས་མཆོད་པ་ནི་འདུད་པ་དང་སྙེན་པའི་ཚིག་ལ་སོགས་པ་དག་གིས་གུས་པར་བྱེད་པའོ། །རྗེད་པ་ནི་གོས་དང་བསོད་སྙོམས་ལ་སོགས་པ་དག་གིས་བསྙེན་བཀུར་བྱེད་པའོ། །སྔོན་དུ་སྨྲ་བར་གྱུར་པ་ནི་ཕྱག་བྱ་བར་གྱུར་པའོ། །ཐེ་ཚོམ་སྐྱེས་པ་ནི་སོམ་ཉི་སྐྱེས་

པར་གྱུར་པའོ། །ཐམས་ཅད་མཁྱེན་པ་ཉིད་ཡིན་པའི་ཕྱིར་ཐེ་ཚོམ་ཐམས་ཅད་གཅོད་པར་མཛད་པ་སྟེ་བཅོམ་ལྡན་འདས་ལའོ། །བྱས་ཤིང་བསགས་པ་ནི་བསམས་བཞིན་དུ་བྱས་པ་དང་། རྫོགས་པ་དང་། འགྱོད་པ་མེད་པར་བྱ་བ་དང་། གཉེན་པོ་མ་བསྟན་པ་
དང་སྦྱོར་བ་དང་མཇུག་དང་ལྡན་པ་དེ་འདྲ་བ་ལས་ཀྱི་རྣམ་པར་སྨིན་པ་སོ་སོར་ངེས་པ་གང་ཡིན་པ་དེ་ནི་བསགས་པ་ཞེས་བྱའོ། །ཚོགས་པ་རྙེད་པ་ནི་གཞན་རྙེད་པའོ། །རྐྱེན་ཡོངས་སུ་བསྒྱུར་བ་ནི་རྐྱེན་དག་གིས་ནུས་པ་རྙེད་པར་གྱུར་པའོ། །ཆུ་བོ་ལྟར་ཞེས་བྱ་བ་ནི་ལྡོག་པ་མེད་པའོ། །ཉེ་བར་
གནས་པ་ནི་ཐག་ཉེ་བ་ན་གནས་པར་གྱུར་པའོ། །དེ་ལྟར་གྱུར་པ་གདོན་མི་ཟ་བར་འབྲས་བུ་འབྱིན་པར་བྱེད་པ་ནི་འགའ་ཞིག་ཏུ་ཡང་ལྡོག་པར་མི་འགྱུར་བའོ། །གཞན་སུ་ཞིག་གིས་སོ་སོར་མྱོང་བར་འགྱུར་ཞེས་བྱ་བ་ནི་གཞན་གྱིས་བྱས་པའི་ལས་ཀྱི་རྣམ་པར་སྨིན་པ་གཞན་གྱིས་མྱོང་བར་
འགྱུར་བ་མ་ཡིན་ཏེ། འདིས་ནི་ཕན་ཚུན་རྒྱུ་ཉིད་མ་ཡིན་པར་བསྟན་ཏོ། །ལས་ཀྱི་རྣམ་པར་སྨིན་པ་ཡང་ཕྱི་རོལ་ལ་མ་ཡིན་གྱི་ནང་གི་བདག་ཉིད་ཁོ་ན་ཡིན་ནོ་ཞེས་བསྟན་པར་བྱ་བའི་ཕྱིར། དགེ་སློང་དག་ལས་བྱས་ཤིང་བསགས་པ་ཞེས་བྱ་བ་ལ་སོགས་པ་སྨོས་པ་ཡིན་ནོ། །ཆུད་མི་
ཟ་བ་ཞེས་བྱ་བ་ནི་ལས་བྱས་ཤིང་བསགས་པ་གང་ཡིན་པ་དེ་ཆུད་ཟ་བར་མི་འགྱུར་བའོ། །གང་བྱས་ནས་འགྱོད་པ་དང་། གཉེན་པོ་བསྟེན་པས་ཉམས་པ་གང་ཡིན་པ་དེ་ནི་ཚང་བར་བསགས་པ་མ་ཡིན་པ་དེ་ནི་ཕྱིར་མ་བསགས་པའི་ལས་ཁོ་ན་ཟད་པ་ཞེས་བྱའི་བསགས་པ་ངེས་
པར་མྱོང་བར་འགྱུར་བ་ཡོངས་སུ་ཟད་པ་ནི་མ་ཡིན་ལ། རྒྱལ་པོ་མ་སྐྱེས་དགྲས་སྐྱེ་བ་གང་ཁོ་ན་ལ་བྱས་པའི་ལས་ལ་འགྱོད་པ་དང་