Luận tạng Tây Tạng (Tengyur) — Tập 151

་བྲམ་ཟེ་ལ་མ་སྨྲས་པར་འཇུག་པ་ལ་ཡང་ལྟུང་བ་མེད་དོ། །གྲོང་
ལ་གྲོང་དུ་འདུ་ཤེས་པ་ཡང་རྣམ་པ་དྲུག་ཏུའོ། །ཁ་ཅིག་ནི་གྲོང་མ་ཡིན་པ་དང་། དུས་ལ་དུས་མ་ཡིན་པར་འདུ་ཤེས་ན་ལྟུང་བ་ཉིད་དོ་ཞེས་ཟེར་རོ། །བཅུ་པའོ།། །།བརྒྱད་པའི་ཚོགས་རྫོགས་སོ།། །།མཉན་ཡོད་ན་སྟེ། ཉེ་དགས་ཁྱིམ་པ་གཞན་ཞིག་དད་པར་

བྱས་པ་དང་། དེའི་ངོར་དགེ་སློང་གི་དགེ་འདུན་རྣམས་མགྲོན་དུ་བོས་ནས་ཁོ་བོ་མ་འོངས་པའི་བར་དུ་མ་བྲིམ་ཤིག་ཅེས་བསྒོ་ནས་ཁྱིམ་གཞན་དུ་སོང་སྟེ་འདུག་པ་དང་། དགེ་སློང་གི་དགེ་འདུན་རྣམས་ལས་ཕལ་ཆེར་ཟན་ཆད་པར་གྱུར་ཏེ། ཁྱིམ་དུ་ཉེ་བར་འགྲོ་
བའི་གཞིའི་དབང་དུ་མཛད་ནས་ཕོངས་པ་དང་། མ་དད་པའི་ཉོན་མོངས་པ་དག་གིས་ཟས་དང་བཅས་པ་ལ་སོགས་པའི་ཚོགས་དང་པོར་བཅས་སོ། །ཟས་དང་བཅས་པ་ཞེས་བྱ་བ་ནི་མགྲོན་དུ་བོས་པ་དང་བཅས་པའོ། །ཁྱིམ་ཞེས་བྱ་བ་ནི་བྲམ་ཟེའི་ཁྱིམ་མམ། ཁྱིམ་བདག་གི་
ཁྱིམ་མོ། །ཉེ་བར་མགྲོན་དུ་བོས་པས་ཞེས་བྱ་བ་ནི་ཟས་ལའོ། །ཟས་ཀྱི་སྔ་རོལ་ཞེས་བྱ་བ་ནི་སྔ་དྲོ་སྟེ་ཁྱིམ་དག་ཏུ་གཉིས་དག་ལས་ལྷག་པར་འགྲོ་བའོ། །ཟས་ཟོས་པའི་འོག་རོལ་ཞེས་བྱ་བ་ནི་ཕྱི་དྲོ་སྟེ། ཁྱིམ་རྣམས་སུ་གསུམ་པོ་རྣམས་ལས་ལྷག་པར་རོ། །རྒྱུ་ཞིང་འགྲོ་
ཞེས་བྱ་བ་ནི་འགྲོ་བ་ཞེས་བྱ་བའི་ཐ་ཚིག་གོ། །ཅི་ཙམ་དུ་ཟས་ཀྱི་སྔོན་རོལ་དུ་ཁྱིམ་གཉིས་ལས་ལྷག་པར་རམ། ཟས་ཟོས་པའི་འོག་རོལ་ཏུ་ཁྱིམ་གསུམ་ལས་ལྷག་པར་རྗེས་སུ་འཇུག་ན་ལྟུང་བྱེད་དོ། །གལ་ཏེ་ཁྱིམ་བདག་ལ་བདག་མ་འོངས་ཀྱང་བཤོས་གསོལ་ཅིག་ཅེས་བསྒོ་
སྟེ། འགྲོ་བ་དང་དེའི་ངོར་མགྲོན་དུ་མ་བོས་པ་དང་། བཟའ་བ་ལྔ་ལས་གཞན་ལ་མགྲོན་དུ་བོས་པ་དང་། གོས་སུ་བཅས་པ་ཡོད་པ་དང་། མགྲོན་དུ་བོས་པ་དེ་གཞག་སྟེ་གཞན་དུ་ཚོལ་བ་ལ་ལྟུང་བ་མེད་དོ། །དེ་ལ་ཀུན་དུ་སྤྱད་པ་ནི་མགྲོན་དུ་འབོད་པ་དྲུག་དང་། མགྲོན་དུ་བོས་པ་དགུ་
དང་། ལྷག་མ་ཟ་བ་ལྔའོ། །མགྲོན་དུ་བོས་པ་དྲུག་པོ་རྣམས་གང་ཞེ་ན། དབུལ་པོ་མི་དད་པ་དང་། དད་པ་དང་། ཕྱུག་པོ་མི་དད་པ་དང་། དད་པ་དང་། ཉེ་དུ་མ་ཡིན་པ་དང་། ཉེ་དུ་ཡིན་པའོ། །མགྲོན་དུ་བོས་པ་དྲུག་པོ་རྣམས་གང་ཞེ་ན། དགེ་འདུན་ལ་བརྟེན་ནས་མགྲོན་དུ་
བོས་པ་དང་། གང་ཟག་སོ་སོར་བོས་པ་དང་། གྲོགས་དང་ལྷན་ཅིག་བོས་པ་དང་། ཉིན་ཞག་ཏུ་མགྲོན་དུ་བོས་པ་དང་། ནར་མ་ལ་མགྲོན་དུ་བོས་པ་དང་། ཚད་བཙུགས་ཏེ་མགྲོན་དུ་བོས་པ་དང་། ཅི་ཡོད་པ་དེ་ཙམ་ཟོ་ཤིག་ཅེས་པ་འམ། བྱེ་བྲག་མ་ཕྱེ་བར་མགྲོན་དུ་བོས་པ་

དང་། དུས་སྟོན་ལ་མགྲོན་དུ་བོས་པའོ། །ལྷག་མ་ཟ་བ་ལྔ་པོ་རྣམས་གང་ཞེ་ན། ལོག་པར་ལྟུང་བ་དུད་འགྲོའམ། ཡི་དགས་དང་། ནད་པ་དང་། ནད་པའི་རིམ་གྲོ་དང་། ས་དྭའི་གཡོག་དང་། བདག་གི་དང་། ཡོན་བདག་གི་སྦྱིན་པའམ། རང་ཉམས་སུ་འོངས་པ་དང་།
མུ་གེས་ཉན་ཏེ་ཡ་མཚན་ཅན་འོངས་པ་དང་། དགེ་བསྙེན་ནམ། དགེ་བསྙེན་མ་ལ་མེད་པར་འགྱུར་བའོ། །དེ་ལ་དགེ་སློང་མགྲོན་དུ་བོས་པས་ལོག་པར་ལྟུང་བ་ལ་ཆང་པ་གཅིག་ཙམ་སྦྱིན་པར་བྱའོ། །ལྷག་མ་རྣམས་ལ་སྦྱིན་པར་འདོད་ན་དབུལ་པོ་མི་དད་པའི་ཁྱིམ་དུ་ནི་
ཕྱེད་དང་ཉེ་བ་སྦྱིན་ནོ། །དད་པའི་ཁྱིམ་དུ་ནི་ཕྱེད་དོ། །ཕྱུག་པོ་མ་དད་པའི་ཁྱིམ་དུ་ནི་མཉམ་པར་རོ། །དུས་སྟོན་གྱི་ཚེ་ནི་ཅི་འདོད་པར་སྦྱིན་ནོ། །ལྔ་པོ་ལས་གཞན་ནི་སྦྱིན་བདག་གིས་རྗེས་སུ་གནང་ན་སྦྱིན་ནོ། །ཉེ་དུའི་ཁྱིམ་དུ་ནི་ཅི་འདོད་པ་སྦྱིན་ནོ། །ཚད་བཙུགས་ཏེ་
མགྲོན་དུ་བོས་པར་ནི་ལྷུང་བཟེད་དུ་འོངས་པ་ཙམ་བཟའ་བར་བྱའི། ཇི་སྲིད་འདོད་པའི་བར་དུ་དེ་ལ་སྦྱིན་དུ་ག་ལ་ཡོད། ཀུན་དུ་འབོད་པ་གཉིས་ན་དེ་ཉིད་ཀྱི་ཁར་བོར་བར་བྱའོ། །གལ་ཏེ་རང་དག་མི་འདུམ་ན། ལྕི་བ་དང་། ཡང་བ་དང་། གང་ཆེར་དད་པ་དང་། གང་ཆེར་འདྲིས་
པ་དང་བརྟགས་ལ། གང་ཆེར་བགོ་མི་དགོས་པ་ལ་དེ་ལ་ཁས་བླང་བར་བྱའོ། །དང་པོའོ།། །།མཉན་ཡོད་ན་སྟེ། འཆར་ཀས་བཙུན་མོ་ཕྲེང་ལྡན་མ་ལ་དུས་སྔ་མོ་ཞིག་ཏུ་བསྟན་པ་སྟོན་པར་ནང་དུ་འོངས་ཏེ། དེ་གཉིད་ལོག་པ་ལས་བསླངས་པ་དང་། དེ་ཡང་བཙུན་མོའི་
འཁོར་ལ་འོས་པའི་གོས་གྱོན་པས་ན། ཁྱིམ་དུ་ཉེ་བར་འགྲོ་བའི་གཞིའི་དབང་དུ་མཛད་དེ། མ་དད་པ་དང་། རྐྱེན་མ་གཏོགས་པ་ལ་སོགས་པའི་ཉོན་མོངས་པ་དག་གིས་གཉིས་པའོ། །རྒྱལ་རིགས་ཞེས་བྱ་བ་ནི་རིགས་གཞན་ལས་ཀྱང་རྒྱལ་སྲིད་ཀྱི་དབང་བསྐུར་བས་
དབང་བསྐུར་ན་དེ་ཡང་རྒྱལ་རིགས་ཉིད་ཅེས་བརྗོད་པར་བྱའོ། །སྐྱ་རེངས་མ་ཤར་ཞེས་བྱ་བ་ནི་སྐྱ་རེངས་ལ་གསུམ་མོ། །སྐྱ་རེངས་སྔོན་པོ་སྟེ། གང་སྔོན་པོར་སྣང་བ་དང་། སྐྱ་རེངས་སེར་པོ་སྟེ། གང་སེར་པོར་སྣང་བ་དང་། སྐྱ་རེངས་དམར་པོ་སྟེ། གང་དམར་པོར་སྣང་

བའོ། །མ་བསྡུས་པ་རྣམས་ལ་ཞེས་བྱ་བ་ནི་མ་སྦས་པ་རྣམས་སོ། །སྒོ་གཏན་ཞེས་བྱ་བ་ནི་སྒོའི་གཏན་པ་རྣམ་པ་གསུམ་སྟེ། གྲོང་ཁྱེར་གྱི་སྒོའི་གཏན་པ་དང་། རྒྱལ་པོའི་ཕོ་བྲང་གི་སྒོའི་གཏན་པ་དང་། བཙུན་མོའི་འཁོར་གྱི་སྒོའི་གཏན་པའོ། །
དེ་འདྲ་བའི་རྐྱེན་མ་གཏོགས་ཞེས་བྱ་བ་ནི། ཅི་ལྟར་ཀཽ་ཤཱམྦཱི་ན་རྒྱལ་པོའི་བཀས་གདངས་ཅན་གྱི་ཁྱིམ་དང་། རྒྱལ་པོའི་ཁབ་དང་ཉེ་བ་གཅིག་ཏུ་བྱས་ཏེ་རྗེས་སུ་གནང་བའོ། །ལྔ་པོ་དག་གི་ཚིག་ནི་མི་གཅོག་པ་ཡིན་ཏེ་རྒྱལ་པོ་དང་། དེ་བཞིན་གཤེགས་པ་དང་། དགེ་འདུན་གྱི་
གནས་བརྟན་དང་། སློབ་དཔོན་དང་། མཁན་པོ་དང་དགེ་སྐོས་ཀྱིའོ། །གྲོང་ཁྱེར་གྱི་སྒོ་གཏན་ལས་འདས་པ་དང་། རྒྱལ་པོའི་ཕོ་བྲང་གི་སྒོ་གཏན་ལས་འདས་ན་ཉེས་བྱས་སོ། །བཙུན་མོའི་འཁོར་གྱི་སྒོ་གཏན་ལས་འདས་ན་ལྟུང་བྱེད་དོ། །ནམ་མ་ལངས་པ་ལ་ནམ་
ལངས་པར་འདུ་ཤེས་པ་རྣམ་པ་དྲུག་ཏུའོ། །རྒྱལ་པོ་ཆེན་པོ་བཞི་པོ་རྣམས་དང་། ནམ་མཁའ་ལྡིང་རྣམས་ཀྱི་སྒོ་གཏན་ལས་འདས་ན་ཉེས་བྱས་སོ། །རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུར་འགྱུར་ཏེ། འཛུམ་པ་དང་། མངལ་ན་ཡོད་པ་ལས་མི་ཚངས་པར་
སྤྱོད་པར་དོགས་པ་དང་། མ་བྱིན་པར་བླང་བར་དོགས་པ་དང་། གསང་གྲགས་པར་དོགས་པ་དང་། གཞོན་ནུ་བསད་པ་དང་། དེས་ཀྱང་རྒྱལ་པོ་བསད་པ་དང་། བློན་པོ་བསྟོད་དམ། གནས་དམའ་མོར་འཇོག་པ་དང་། ཡུལ་རྣམས་མ་རུང་བར་བྱེད་པའམ། གཞན་
གྱི་ཡུལ་འཁོར་མ་རུང་བར་བྱེད་པར་དོགས་པའོ། །རྒྱལ་པོ་ལ་སོགས་པའི་བཀས་ནི་ལྟུང་བ་མེད་དོ། །གཉིས་པའོ།། །།མཉན་ཡོད་ན་སྟེ། དྲུག་སྡེ་རྣམས་མ་གུས་པར་སོ་སོར་ཐར་པ་ཉན་ཏེ། འདི་ལྟར་འདི་ཡང་བདེ་བར་གཤེགས་པས་གསུངས་པར་ད་གདོད་ཅིག་
འདི་ཐོས་སོ་ཞེས་སྨྲས་པས་ན་བསླབ་པའི་གཞིའི་དབང་དུ་མཛད་དེ། མ་གུས་པའི་ཉོན་མོངས་པས་གསུམ་པ་བཅས་སོ། །གུས་པར་མི་བྱེད་ཅེས་བྱ་བ་ནི་བསྟན་པའོ། །ལྷག་མ་རྣམས་ནི་བཤད་པའོ། །ཉེས་པ་དྲུག་ནི་གོ་རིམས་ཅི་ལྟ་བ་བཞིན་དུ་སྟོན་ཏེ། མ་དད་པས་ཉེས་པ་དང་། རིམ་གྲོ་

མེད་པས་ཉེས་པ་དང་། མ་མོས་པས་ཉེས་པ་དང་། ཕྱི་རོལ་དུ་གཡེངས་པས་ཉེས་པ་དང་། ནང་དུ་མ་བསྡུས་པས་ཉེས་པ་དང་། སྐྱོ་བས་ཉེས་པ་དང་། དེ་ལ་ལྟུང་བ་ཇི་ལྟར་འགྱུར་ཞེ་ན། གསོ་སྦྱིན་གྱི་ལས་ཀྱི་ཚེ་དགེ་སློང་ལ་དགེ་སློང་གིས་གླེངས་ནས་དེ་ཡང་འདོད་ཆགས་ལ་
སོགས་པས་ཀུན་ནས་དཀྲིས་པར་གྱུར་ཏམ། དྲན་པ་ཉམས་པར་གྱུར་ཏམ། གཉིད་ཀྱིས་ཀུན་ནས་དཀྲིས་པར་གྱུར་ཏམ། གཡེངས་པས་ཀུན་ནས་དཀྲིས་པས་གྱུར་ཀྱང་རུང་། གལ་ཏེ་སྔོན་དུ་གསོ་སྦྱིན་གྱི་ལས་ལན་གཉིས་ལན་གསུམ་གྱི་ཚེ་འདུག་པར་གྱུར་ལ་དེས་ཀྱང་
ཆོས་དེ་ཐོས་སམ། མ་ཐོས་པར་འགྱུར་ཏམ། བརྗེད་དམ་མ་བརྟགས་ཏེ། དགེ་སློང་ཉིད་ཀྱང་བདག་གིས་མ་ཐོས་སོ། །མ་བརྟགས་སོ་སྙམ་དུ་རིག་ལ་དེ་ནས་ཀྱང་དེ་ལ་གཉིད་དམ་གཡེངས་པ་ལ་སོགས་པ་སྦྱོར་བ་ཉམས་སུ་ལེན་ན་གལ་ཏེ་གསོ་སྦྱིན་གྱི་ཚེ་ལྟུང་བ་རྣམས་
བརྗོད་པ་མ་ཐོས་པར་མངོན་དུ་འདའ་བར་བྱེད་ན་འདས་མ་ཐག་ཏུ་ལྷན་ཅིག་བསྟན་པ་ཐམས་ཅད་ལ་ཡང་ལྟུང་བྱེད་གཅིག་གོ། །རྣམ་པ་གཞན་དུ་ན་མ་སྨྲས་ཀྱང་ལྟུང་བ་འདིར་འགྱུར་རོ་ཞེས་འབྱུང་ངོ་། །གལ་ཏེ་དགེ་སློང་མའི་འདུལ་བ་ལ་བསླབ་པ་ཐུན་མོང་མ་ཡིན་པ་ལ་བསམས་
ན་ཉེས་བྱས་སོ། །ཐུན་མོང་བ་ཡིན་ན་ལྟུང་བྱེད་ཉིད་དོ། །ལམ་གོལ་བར་སྐྱེས་ཤིང་རྒས་པ་དང་། མི་ཤེས་པ་བདེན་པ་ལ་ལྟུང་བ་མེད་དོ། །སོ་སོར་ཐར་པའི་མདོ་འདོན་པས་སོ་སོར་ཐར་པ་ལེགས་པར་གདོན་པར་བྱའོ། །གཎྜཱི་བརྡུངས་པ་དང་དགེ་སློང་རྣམས་
ཀྱིས་ལྟུང་བ་དྲན་པར་བྱོས་ལ་ཕྱིར་བཅོས་པར་བྱས་ཏེ་འདུག་པར་བྱའོ། །གསུམ་པའོ།། །།མཉན་ཡོད་ན་སྟེ། བ་སོ་མཁན་གྱིས་རང་གི་བཟོས་དགེ་སློང་གི་དགེ་འདུན་རྣམས་ལ་བསྟབས་པ་དང་། དགེ་སློང་དག་གིས་ཀྱང་དེ་ལ་ཇི་སྲིད་ལོངས་སྤྱོད་ཟད་པར་གྱུར་པའི་
དེའི་བར་དུ་བྱེད་དུ་བཅུག་པས་ན་ཁབ་རལ་གྱི་གཞིའི་དབང་དུ་མཛད་དེ། མ་དད་པ་ལ་སོགས་པའི་ཉོན་མོངས་པས་བཞི་པའོ། །ཁབ་རལ་ཞེས་བྱ་བ་ནི་ཁབ་རལ་གཉིས་རྗེས་སུ་གནང་སྟེ། སྦུབས་ཅན་གི་རྣམ་པ་དང་ཆང་བའོ། །བྱེད་དུ་བཅུག་ཅེས་བྱ་བ་ནི་བདག་

གམ་གཞན་གྱིས་སོ། །བཅག་ནས་ཞེས་བྱ་བ་ནི་གལ་ཏེ་བྱས་ཟིན་པ་བདག་གིར་བྱེད་ན་བཅག་ལ་ལྟུང་བ་བཤགས་པར་བྱའོ། །མ་ཟིན་པར་བཏང་ན་ཉེས་བྱས་སོ། །གཞན་གྱི་ཕྱིར་བྱེད་ན་ཡང་ཉེས་བྱས་སོ། །བྱས་ཟིན་པ་རྙེད་པ་དང་། བྱས་པ་ལ་ལོངས་
སྤྱོད་པ་ནི་ལྟུང་བ་མེད་དོ། །གང་གི་མདུན་དུ་བཤགས་པ་དེས་ཀྱང་བཅག་གམ་ཞེས་དྲི་བར་བྱའོ། །རྣམ་པ་གཞན་དུ་ཉེས་བྱས་ཉིད་དོ། །དེ་བཞིན་དུ་བསྡུས་སམ་བཅད་དམ་ཞེས་བྱ་བ་ཡང་ངོ་། །ཁབ་རྣམ་པ་བཞི་རྗེས་སུ་གནང་སྟེ། ར་གན་དང་། ཟངས་དང་། ཁར་བ་དང་།
ལྕགས་ཀྱིའོ། །གྲིའུ་ཡང་རྣམ་པ་གཉིས་ཏེ། བྱ་རོག་གི་མཆུ་ལྟ་བུ་དང་། བྱ་གག་གི་གཤོག་པ་ལྟ་བུ་སྟེ། ཆེན་པོ་ནི་སོར་དྲུག་གོ། །ཆུང་ངུ་ནི་སོར་བཞིར་རོ། །འབྲིང་ནི་དེ་གཉིས་ཀྱི་བར་རོ། །གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་རང་བཞིན་དང་། ཡུ་བ་ཁྲ་བོ་ཉེ་བར་
བཀྲ་བ་དང་། བསེ་རྩིས་བྱུགས་པ་མ་ཡིན་ནོ། །ཁབ་རལ་ལེགས་པར་སྦ་བར་བྱ་བ་དང་། ངོ་ཚ་མེད་པ་དང་། བསྙེན་པར་མ་རྫོགས་པའི་ལག་ཏུ་མི་སྦྱིན་ནོ། །བདག་གིས་གཞག་པར་བྱ་བའམ། ངོ་ཚ་ཤེས་པའི་ལག་ཏུ་བྱིན་ལ་སྦའོ། །ཁབ་དང་གྲིའུ་བཙས་མི་
ཟོས་པར་བྱ་བའི་ཕྱིར་རས་མ་ལ་སྤྲ་ཚིལ་གྱིས་བསྐུས་ལ་དཀྲི་བ་ཉིད་ཀྱིས་དར་གཞག་པར་བྱའོ། །ཇི་སྐད་ཁབ་རལ་གྱི་གཞི་ལས་ངེས་པར་བསྟན་པ་བཞིན་དུ་ཡོ་བྱད་གཞན་རྣམས་ལ་ཡང་གནས་ཇི་ལྟ་བ་བཞིན་དུ་བརྟག་པར་བྱའོ། །ཇི་སྐད་དུ། གསེར་ལ་སོགས་པའི་རང་བཞིན་ལས་བྱས་
པའི་སོར་གདུབ་རྒྱ་བཅང་བར་མི་བྱའོ། །རྒྱལ་རྣམ་པ་བཞི་སྟེ། ར་གན་དང་། ཟངས་དང་། ཁར་བ་དང་། ཤིང་གིའོ། །དགེ་འདུན་གྱི་རྒྱ་ལ་གཙུག་ལག་ཁང་གི་བདག་པོའི་མིང་དང་། མངོན་མཚན་དུ་ཆོས་ཀྱི་འཁོར་ལོ་བྱའོ། །གང་ཟག་གི་མངོན་མཚན་དུ་ཀེང་རུས་སམ།
མགོའི་ཐོད་པ་བྲིའོ་ཞེས་གསུངས་སོ། །བཞི་པའོ།། །།མཉན་ཡོད་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། ཁྲིའི་དྲུང་དུ་རྐང་པ་དག་བཀྲུ་བར་མི་བྱ་སྟེ། མགོ་ལོགས་སམ་རྐང་པ་ལོགས་སུའོ། །ན་བ་དང་། རྒས་པ་དང་། ཉམ་ཆུང་བ་དང་། ངལ་བས་

ནི་བཀྲུ་བར་བྱའོ། །ཁྲིའི་རྐང་པ་ཤིན་ཏུ་ཐུང་བ་ལ་ཉལ་བར་མི་བྱའོ་ཞེས་དྲུག་སྡེ་རྣམས་ཀྱིས་ཐོས་ཏེ། ཁྲུ་བཅུ་གཉིས་པའི་ལྕུག་མ་རྣམས་ལས་ཁྲི་བྱས་ཏེ། ཡ་གད་བཙུགས་པས་ན་གནས་མལ་གྱི་གཞིའི་དབང་དུ་མཛད་དེ། འགལ་ཚབས་ཅན་དུ་འགྱུར་བ་དང་།
ཕོངས་པའི་ཉོན་མོངས་པ་ཡོངས་སུ་སྤང་བའི་ཕྱིར་ལྔ་པ་བཅས་ཏེ། ལྟུང་བྱེད་ལྷག་མ་རྣམས་ལ་ཡང་བཞི་དང་ཉོན་མོངས་པ་ནི་འདི་ཉིད་དོ། །བྱེད་དུ་བཅུག་ན་ཞེས་བྱ་བ་ནི་བདག་གམ་གཞན་ཡང་རུང་ངོ་། །བདེ་བར་གཤེགས་པའི་སོར་བརྒྱད་ཀྱི་ཚད་ཅེས་བྱ་བ་ནི་མི་ཐ་མལ་
པའི་ཁྲུ་གང་གི་ཚད་དོ། །བུ་གར་ཞུགས་པ་མ་གཏོགས་ཞེས་བྱ་བ་ན་འཆར་ཀའི་དབང་དུ་མཛད་དེ་རྗེས་སུ་གནང་བའོ། །བཅད་ན་ལྟུང་བྱེད་དོ་ཞེས་བྱ་བ་ནི་བཅད་ན་ལྟུང་བྱེད་བཤགས་པར་བྱའོ་ཞེས་བྱ་བའི་ཐ་ཚིག་གོ། །ལྷག་མ་རྣམས་ནི་སྔ་མ་བཞིན་ནོ། །ནོར་བུའམ་
བ་སོའི་རང་བཞིན་ལས་ལྷག་པར་བྱས་ན་ཉེས་བྱས་སོ། །ཁྲིའི་རྩ་བ་བྲེ་ཁ་བཞིན་དུ་ཐད་ཀར་གཅད་པར་བྱའི་གཞོ་བོར་མི་གཅད་དོ། །དེ་ལས་ཀྱང་ས་རྐོན་རྐང་པའི་རྟེན་གཞག་པར་བྱའོ། །ཡང་ན་ཕུབ་མའི་ཕུང་པོར་བྱའོ། །ལྔ་པའོ།། །།མཉན་ཡོད་ན་སྟེ། ཉེ་དགའ་
དགེ་འདུན་གྱི་ཁྲི་དེ་ཡང་གཞན་དབང་ངོ་སྙམ་ནས་དེ་ཤིང་བལ་བདལ་བས་དེ་ལ་དགེ་སློང་དེ་ཤིང་བལ་གྱིས་དཀར་པོར་གྱུར་པས་ན་དྲུག་པའོ། །ཤིང་བལ་ཞེས་བྱ་བ་ནི་རྣམ་པ་ལྔ་སྟེ། ཀ་ཤའི་ཤིང་བལ་དང་། ཨ་རྒའི་ཤིང་བལ་དང་། ཤལ་མ་ལིའི་ཤིང་བལ་དང་། རས་བལ་དང་།
ན་མེ་རུ་ཀའི་ཤིང་བལ་ལོ། །བདལ་ཞེས་བྱ་བ་ནི་ཁྲིའི་སྟེང་དུ་ཤིང་བལ་བདལ་ནས་སྟེང་དུ་གོས་ཀྱིས་གཡོགས་པའོ། །གོས་རུང་བའམ། ཤིང་བལ་རུང་བས་གཡོགས་པར་སྦྱོར་བ་ནི་ཉེས་བྱས་སོ། །གཡོགས་ཟིན་ན་ལྟུང་བྱེད་དོ། །གོས་སམ་ཤིང་བལ་མི་རུང་བས་གཡོགས་
ན་ཉེས་བྱས་སོ། །དྲུག་པའོ།། །།མཉན་ཡོད་ན་སྟེ། དགེ་སློང་མང་པོ་ལ་བརྟེན་ནས་བདུན་པ་བཅས་སོ། །མཐོ་དོ་ཞེས་བྱ་བ་ནི་མི་ཐ་མལ་པའི་ཁྲུ་གསུམ་གྱི་ཚད་དོ། །མཐོ་གང་གིས་སྲིངས་ཤིག་ཅེས་བྱ་བ་ནི་བདེ་བར་གཤེགས་པའི་མཐོ་གང་སྟེ། ཁྲུ་ཕྱེད་དང་དོའོ། །དེ་

ལྟར་སྲིད་ཀྱི་ཚད་ཁྲུ་ཕྱེད་དང་ལྔའོ། །ཞེང་དུ་མཐོ་ཕྱེད་དང་དོ་ཞེས་བྱ་བ་ནི་མི་ཚད་མའི་ཁྲུ་དོ་དང་སོར་དྲུག་གོ། །གདིང་བ་དུམ་བུ་གཅིག་པ་ལ་ནི་བྱིན་གྱིས་བརླབ་པར་མི་བྱའོ། །བདུན་པའོ།། །།མཉན་ཡོད་ན་སྟེ། བཅོམ་ལྡན་འདས་ཀྱིས་གང་
གཡན་པའི་ནད་ཅན་རྣམས་ཀྱིས་གཡན་པ་དགབ་པ་བཅང་བར་བྱའོ། །དེ་ཡང་དུས་དུས་སུ་ཁྲུས་ཤིག །ཁ་བསྒྱུར་བར་བྱ་བ་ཡང་ངོ་། །ཚུར་བཙུག་ལག་ཤེར་བར་བྱས་ཏེ་དབྱུང་བར་བྱའོ་ཞེས་བཀའ་སྩལ་ན། དགེ་སློང་རྣམས་ཚད་ལས་འདས་པར་བྱེད་པས་ན་བརྒྱད་པ་བཅས་སོ། །བྱེད་
ཅེས་བྱ་བ་ནི་བདག་གམ་གཞན་ནོ། །མཐོ་བཞི་ཞེས་བྱ་བ་ནི་མི་ཚད་མའི་ཁྲུ་དྲུག་གོ། །མཐོ་དོ་ཞེས་བྱ་བ་ནི་ཁྲུ་གསུམ་མོ། །ལྷག་པར་བྱས་ན་ལྟུང་བྱེད་དོ། །ཆུང་བ་ལ་ནི་བྱིན་གྱིས་བརླབས་ན་ཉེས་བྱས་སོ། །གཞན་གྱི་ཕྱིར་བྱས་ན་ཉེས་བྱས་སོ། །བརྒྱད་པའོ།། །།མཉན་ཡོད་ན་སྟེ། དགེ་
སློང་རྣམས་སྒྲེན་མོར་ཁྲུས་བྱེད་པས་ན། རི་དགས་འཛིན་གྱི་མ་ས་ག་ལས་བརྩམས་ཏེ། དབྱར་གྱི་གོས་རས་ཆེན་གནང་ངོ་། །དགེ་སློང་རྣམས་ཚད་དེ་ལས་འདས་པར་བྱེད་པས་ན་དགུ་པའོ། །བྱེད་ཅེས་བྱ་བ་ནི་བདག་གམ་གཞན་གྱིས་ཀྱང་ངོ་། །ཚད་ནི་གསུམ་འགྱུར་དུ་སྟེ་གོ་རིམས་བཞིན་དུ་སྦྱར་རོ། །
དེ་ལས་ཆུང་བ་ལ་བྱིན་གྱིས་བརླབས་ན་ཉེས་བྱས་སོ། །དགུ་པའོ།། །།མཉན་ཡོད་ན་སྟེ། ཉེ་དགས་ཆོས་གོས་ཆེན་པོ་དྲུབས་ནས་ཅུང་ཟད་ཅིག་བསྒོས་ཀྱི་གཞན་ལྷག་མ་ཕྲག་པ་ལ་བཀལ་ཏེ། གཙུག་ལག་ཁང་གཞན་དུ་སོང་བས་ན་བཅུ་པ་བཅས་སོ། །བདེ་བར་གཤེགས་པའི་ཆོས་
གོས་ཀྱི་ཚད་ཅེས་བྱ་བ་ནི་ཚད་ལས་ལྷག་པར་ཉེ་བར་མཚོན་པའི་དོན་ཏོ། །དེ་ལས་བརྩམས་ནས་ལྟུང་བ་ཞེས་བྱ་བ་ཡིན་ནོ། །ཆོས་གོས་ཞེས་བྱ་བ་ནི་བྱིན་གྱིས་བརླབས་པའོ། །མཐོ་བཅུ་ཞེས་བྱ་བ་ནི་མི་ཚད་མའི་ཁྲུ་ཚད་ལས་ཁྲུ་བཅོ་ལྔའོ། །ཞེང་དུ་མཐོ་དྲུག་ཅེས་བྱ་བ་ནི་ཁྲུ་དགུའོ། །
དེ་ཚུན་ཆད་ཆུང་ངུ་བྱེད་པ་ནི་ལྟུང་བ་མེད་དོ། །ཁྲུ་ལྔ་ལས་ལྷག་པར་བྱེད་ན་ཉེས་བྱས་སོ། །བཅུ་པའོ། །ལྟུང་བྱེད་དགུ་བཅུ་རྫོགས་སོ།། །།ཉི་ཤུ་པ་འདི་རྣམས་ལས་རྣམ་པ་གཉིས་ཀྱི་གཞི་རིག་པར་བྱ་སྟེ། ལམ་གྱི་གཞི་དང་། འཁོར་ཡོངས་སུ་འཛིན་པར་བྱེད་པའི་གཞི་

དང་། ས་ལེན་པའི་གཞི་དང་མཐོང་བ་དང་ཐོས་པ་དང་། དོགས་པས་ཕན་ཚུན་གླེང་བ་དག་གིས་རྗེས་སུ་ཤེས་པའི་གཞི་དང་། དགེ་བའི་ཕྱོགས་ལ་བསླབ་པའི་གཞི་དང་། འཕེལ་བའི་གཏམ་རྣམ་པར་གཏན་ལ་དབབ་པའི་གཞི་དང་། རྗེས་སུ་མི་མཐུན་པའི་གཞི་དང་། བཏུང་བའི་གཞི་
དང་། མགྲོན་དུ་བོས་པའི་གཞི་དང་། གྲོང་དུ་འཇུག་པའི་གཞི་དང་། ཁྱིམ་དུ་འཇུག་པའི་གཞི་དང་། གསོ་སྦྱིན་གྱི་གཞི་དང་། བྱེད་པ་སྦ་བའི་གཞི་དང་། གནས་མལ་བྱེད་པ་སྦ་བའི་གཞི་དང་། ཆོས་གོས་མངོན་པར་འདུ་བྱས་པ་སྦ་བའི་གཞི་སྟེ་གོ་རིམས་བཞིན་ནོ། །འདུལ་བ་
བསྡུས་པ་བམ་པོ་བཅུ་གསུམ་པ་སྟེ་ཐ་མ། རྒྱལ་པོའི་ཁབ་ན་སྟེ། ཨུཏྤ་ལའི་མདོག་བསོད་སྙོམས་ཀྱི་ཐོག་མ་དགེ་འདུན་ལ་ཕུལ་ནས་བསོད་སྙོམས་གཉིས་པ་ནི་བསོད་སྙོམས་པ་གཅིག་ལ་བྱིན་ཏེ་ཟན་ཆད་པར་གྱུར་ལ། ཉི་མ་གཉིས་པར་ཡང་བསོད་སྙོམས་སྔ་མ་དགེ་འདུན་ལ་ཕུལ་
ལོ། །གཉིས་པ་ཉེ་དགས་བླངས་པས་ན་དེ་བརྒྱལ་ནས་སྲང་དུ་འགྱེལ་བ་དང་། འཇིག་རྟེན་པ་སྨོད་པར་བྱེད་ནས། དགེ་སློང་མའི་གཞིའི་དབང་དུ་མཛད་དེ། མ་དད་པ་ལ་སོགས་པའི་ཉོན་མོངས་པ་སོ་སོར་བཤགས་པར་བྱ་བ་དང་པོ་བཅས་སོ། །ཉེ་དུ་མ་ཡིན་པ་ཞེས་བྱ་བ་ནི་
ཉེ་དུ་ལ་ལྟུང་བ་མེད་པར་བསྟན་པའི་ཐ་ཚིག་གོ། །དགེ་སློང་མ་ཞེས་བྱ་བ་ནི་བསྙེན་པར་རྫོགས་པ་རང་བཞིན་དུ་གནས་པའོ། །ལམ་པོ་ཆེ་ན་འདུག་པ་ཞེས་བྱ་བ་ནི་གལ་ཏེ་དབྱར་ཁང་དུ་འོངས་པ་ལ་བྱིན་ན་ལྟུང་བ་མེད་དོ། །བསོད་སྙོམས་ཀྱི་ཕྱིར་གྲོང་དུ་འགྲོ་བ་ཞེས་བྱ་བ་ནི་དེའམ་དེ་
མ་ཡིན་པའི་ཟས་གལ་ཏེ་ལམ་པོ་ཆེའི་དབུས་སུ་མ་བྱིན་ན་ལྟུང་བ་མེད་དོ། །དེ་ལས་ཞེས་བྱ་བ་ནི་དེ་ཉིད་ལས་སོ། །རང་གི་ལག་གིས་ཞེས་བྱ་བ་ནི་གཞན་ལེན་དུ་མི་འཇུག་པའམ། གཞན་སྦྱིན་དུ་འཇུག་པ་ལ་བྱའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་
བ་ལྔའོ། །བླངས་ཞེས་བྱ་བ་ནི་བླངས་པ་ཙམ་གྱིས་ལྟུང་བར་འགྱུར་རོ། །འཆའ་བའམ་ཟ་ན་ཞེས་བྱ་བ་ནི་དེའི་ཕྱིར་བླངས་པའོ། །དགེ་སློང་དེས་ཞེས་བྱ་བ་ནི་དགེ་སློང་མ་མ་ཡིན་ཏེ། དེས་བྱིན་ཡང་ལྟུང་བ་མེད་དོ་ཞེས་བྱ་བར་བསྒྲགས་པའོ། །ཕྱི་རོལ་ཀུན་དགའ་ར་བ་ཞེས་བྱ་བ་ནི་གྲོང་

གི་ནང་ན་དགེ་སློང་རྣམས་ཡོད་དུ་ཟིན་ཀྱང་དེ་དག་གི་མདུན་དུ་བསྒྲགས་པར་བྱ་བ་ནི་མ་ཡིན་ནོ། །དགེ་སློང་རྣམས་ལ་ཞེས་བྱ་བ་ནི་རང་བཞིན་དུ་གནས་པའི་རྣམས་ལའོ། །སྨད་པ་ཞེས་བྱ་བ་ནི་དེ་བཞིན་གཤེགས་པས་བཀག་པའོ། །མི་རིགས་པ་ཞེས་བྱ་བ་ནི་དགེ་སློང་དང་རྗེས་སུ་
མཐུན་པ་མ་ཡིན་པས་རང་བཞིན་ལྟར་རྗེས་སུ་མི་འཇུག་པའོ། །སོ་སོར་བཤགས་པ་ཞེས་བྱ་བ་ནི་ལྟུང་བའི་མིང་བསྒྲགས་པའོ། །དེ་རྣམས་ལས་གཞན་པ་རྣམས་ལ་ཡང་སོ་སོར་བཤགས་པར་བྱ་བ་ཡིན་ན་ཅིའི་ཕྱིར་དེ་ཉིད་ཁོ་ན་ལ་སོ་སོར་བཤགས་པར་ཞེས་གསུངས་ཤེ་ན། ཅི་ལྟར་
དགེ་སློང་ཐམས་ཅད་པ་རྣམས་འདུས་པའི་མདུན་དུ་ངེས་པ་ཁོ་ནར་ཀུན་དུ་བྱ་བ་སྟེ། ཁྱད་པར་དང་ལྡན་པ་བསལ་བར་བྱེད་པ་ཞེས་བྱ་བའི་ཐ་ཚིག་གོ། །དེ་མ་ཐག་ཏུ་འདི་རིག་ཅིང་བཤགས་པར་བྱའོ། །བཅབ་བར་མི་བྱའོ་ཞེས་བྱ་བ་འདི་ཡང་ཁྱད་པར་གཞན་བརྗོད་པའོ། །ཁ་ཅིག་ནི་མང་
པོ་རྣམས་ལས་ཀྱང་མང་པོ་རྣམས་ཀྱི་མདུན་དུ་བཤགས་པར་བྱའོ་ཞེས་ཟེར་རོ། །གཞན་དག་ནི་ཇི་ལྟར་མདོ་ལས་འབྱུང་བ་བཞིན་དུ་བཤགས་པར་བྱའོ་ཞེས་ཀྱང་ཟེར་རོ། །ཁ་ཅིག་ནི་ལན་གཉིས་སུ་བཤགས་པར་བྱའོ་ཞེས་ཀྱང་ཟེར་རོ། །ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་
སམ། ཡིད་གཉིས་ཟ་ན་ཡང་རུང་སྟེ་བླངས་ན་སོ་སོར་བཤགས་པའོ། །ཉེ་དུ་ལ་ཉེ་དུ་མ་ཡིན་པར་འདུ་ཤེས་སམ། ཡིད་གཉིས་ཟ་ན་ཡང་རུང་སྟེ་བླངས་ན་ཉེས་བྱས་སོ། །ཉེ་དུའམ་ཉེ་དུ་མ་ཡིན་ཡང་རུང་བ་སྟེ། ཉེ་དུར་འདུ་ཤེས་ཏེ་བླངས་ན་ལྟུང་བ་མེད་དོ། །དང་པོའོ།། །།
མཉན་ཡོད་ན་སྟེ། དྲུག་སྡེ་རྣམས་ཀྱིས་སྦོམ་དགའ་མོ་ལ་གང་དུ་དགེ་འདུན་མགྲོན་དུ་བོས་པ་དེར་ཁྱོད་ཀྱིས་ངེད་ལ་མང་བ་དང་གྱ་ནོམ་པ་སྦྱིན་དུ་ཆུག་ཤིག་ཅེས་བསྒོ་སྟེ། དེས་ཀྱང་དེ་བཞིན་དུ་བྱས་པས་ན། ཟན་ཆད་པར་གྱུར་པའི་ཕྱིར། བསོད་སྙོམས་ཡོངས་སུ་ལོངས་སྤྱོད་
པའི་གཞིའི་དབང་དུ་མཛད་དེ། མ་དད་པ་ལ་སོགས་པའི་ཉོན་མོངས་པས་གཉིས་པ་བཅས་སོ། །རབ་ཏུ་མང་པོ་ཞེས་བྱ་བ་ནི་གཉིས་དག་ལས་ལྷག་པའོ། །ཁྱིམ་གཞན་རྣམས་སུ་ཞེས་བྱ་བ་ནི་གང་ན་སྲང་ལ་སོགས་པ་ཡོད་པར་ཤེས་པ་ཡིན་ཏེ། དེས་ནི་གཙུག་ལག་ཁང་དུ་ལྟུང་བ་མེད་

དོ་ཞེས་བསྟན་པར་འགྱུར་རོ། །ཟ་བ་ཞེས་བྱ་བ་ནི་བཅའ་བ་ལྔ་དང་། བཟའ་བ་ལྔའོ། །དགེ་སློང་མ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་རང་བཞིན་དུ་གནས་པའོ། །འདི་ལ་ནི་བཅའ་བ་ཞེས་བྱ་བ་ལ་སོགས་པས་ནི་གྱ་ནོམ་པ་སྦྱིན་དུ་འཇུག་པའོ། །
འདི་ལ་ཡང་ཞེས་བྱ་བ་མང་པོ་སྦྱིན་དུ་འཇུག་པའོ། །སྡོད་ཅིག་ཅེས་བྱ་བ་ནི་ཅང་མ་སྨྲ་བར་འདུག་ཤིག་པའོ། །ཡུད་ཙམ་ཞེས་བྱ་བ་ནི་འདིར་ནི་ཟན་ཟ་བའི་དུས་ལ་བྱའི་ཚད་འཛིན་པའི་ཡུད་ཙམ་ལ་ནི་མ་ཡིན་ཏེ་དེ་ཉིད་ཀྱི་ཕྱིར་གསུངས་པ། དགེ་སློང་འདི་རྣམས་ཟན་ཟའི་བར་དུ་
ཞེས་བྱ་བའོ། །མ་སྤོབས་ཞེས་བྱ་བ་ནི་གཅིག་སྟེ་ཀྱང་སྨྲ་བར་མི་ནུས་པ་ཞེས་བྱ་བའི་ཐ་ཚིག་གོ། །འདི་ནི་དེ་སྐད་སྨྲས་ན་ཕྱིས་བསྒོ་ཡང་ལྟུང་བ་མེད་པར་སྟོན་པའོ། །དགེ་སློང་རྣམས་བར་ཁང་ན་ཟན་ཟ་བ་དང་། དེ་དག་གིས་དགེ་སློང་མ་ལ་བསྒོ་བ་སྟེ་ཟན་བཟའ་བར་བྱའོ། །
མ་བསྒོ་ན་སོ་སོར་བཤགས་པའི་ལྟུང་བའོ། །གཞན་ན་སྒོ་ཁང་ན་ཟན་ཟ་བ་དང་། དེ་དག་གིས་བསྒོ་འམ་མ་བསྒོ་ཞེས་དྲིས་ལ་བཟའ་བར་བྱའོ། །རྣམ་པ་གཞན་དུ་ན་ཉེས་བྱས་སོ། །གཞན་ནི་འགྲོ་ལ་གཞན་ནི་འཇུག་ན་དེས་ཀྱང་དྲི་བར་བྱའོ། །རྣམ་པ་གཞན་དུ་ན་ཉེས་བྱས་སོ། །
ཉེ་དུའི་ཁྱིམ་ནའམ། དེས་གཙོར་བྱས་ཏེ་མགྲོན་དུ་བོས་པ་ལ་ལྟུང་བ་མེད་དོ། །གཉིས་པའོ།། །།ཡངས་པ་ཅན་དུ་སྟེ། དམག་དཔོན་སེང་གེ་ཞེས་བྱ་བས་བདེན་པ་མཐོང་བ་རྒྱུན་དུ་གཏོང་བས་ན་ལོངས་སྤྱོད་ཡོངས་སུ་ཟད་པར་གྱུར་པས་ན། གསོལ་བ་དང་གཉིས་ཀྱི་ལས་ཀྱིས་སློབ་
པའི་སྡོམ་པ་བྱིན་ཏེ། དེ་ཡང་ཀུན་དུ་སྤྱད་པ་བཅས་པ་ནི་བསོད་སྙོམས་ཡོངས་སུ་ལོངས་སྤྱད་པར་མི་བྱ། སྟན་ལ་སོགས་པ་ལ་ཡོངས་སུ་ལོངས་སྤྱད་པར་ནི་བྱའོ། །ཤཱ་རིའི་བུ་དང་མཽད་གལ་གྱི་བུ་གཉིས་ནི་སྔར་མགྲོན་དུ་བོས་པས་ན་ཟན་ཟ་སྟེ། དྲུག་སྡེ་རྣམས་ཀྱང་ཁོ་བོས་ཤེས་ཏེ་ཟས་
ཟོས་པས་ན་ཁྱེའུ་དང་བུ་མོ་རྣམས་བཀྲེས་པས་ངུས་པའི་ཕྱིར་བསོད་སྙོམས་ཡོངས་སུ་ལོངས་སྤྱོད་པའི་གཞིའི་དབང་དུ་མཛད་དེ། མ་དད་པ་ལ་སོགས་པའི་ཉོན་མོངས་པས་ན་གསུམ་པ་བཅས་སོ། །དགེ་འདུན་གྱི་ཞེས་བྱ་བ་ནི་དེ་སྲུང་བར་བྱེད་པའོ། །སློབ་པ་ཞེས་བྱ་བ་ནི་རྒྱུན་དུ་ཞུགས་པ་དང་།

ལན་ཅིག་ཕྱིར་འོང་བ་དང་། ཕྱིར་མི་འོང་བའི་ཁྱིམ་མོ། །མི་སློབ་པ་རྣམས་ནི་ཁྱིམ་ན་མི་གནས་སོ། །སློབ་པའི་སྡོམ་པ་བཅས་པ་ནི་འཁྲུག་པ་མེད་པའི་ལས་ཀྱིས་སོ། །སྔར་མ་བསྟབས་པར་ཞེས་བྱ་བ་ནི་གང་སྡོམ་པ་བྱིན་པའི་སྔོན་ལོགས་སུ་མགྲོན་དུ་
བོས་པ་ཡིན་ཏེ། དེ་ལ་ནི་ལྟུང་བ་མེད་དོ། །རང་གི་ལག་གིས་ཞེས་བྱ་བ་ནི་ལག་ཏུའོ། །བཅའ་བ་དང་བཟའ་བ་ཞེས་བྱ་བ་ནི་ལྡམ་ལྡུམ་དང་སྲན་ཚོད་བླངས་པ་ལ་ལྟུང་བ་མེད་དོ། །འཆའ་འམ་ཟ་ན་བླངས་པ་ཙམ་གྱིས་ལྟུང་བར་འགྱུར་ཏེ། གང་གི་ཕྱིར་བླངས་པ་དེ་སྟོན་ཏེ། སྡོམ་པ་
སླར་བཏང་ན་ལྟུང་བ་མེད་དོ། །དེ་ཡང་ལོངས་སྤྱོད་འཕེལ་ནས་གསོལ་བ་འདེབས་ན་ལྟུང་བ་མེད་དོ། །གསོལ་བ་དང་གཉིས་ཀྱི་ལས་ཀྱིས་སོ། །གསུམ་པའོ།། །།སེར་སྐྱའི་གཞི་ན་སྟེ། གནས་མལ་དགོན་པ་ན་འདུག་སྟེ། དྲུག་སྡེ་རྣམས་ཀྱིས་བུད་མེད་རྣམས་ཟན་ཁྱེར་ཏེ་
འོངས་པ་ལས་ལམ་བར་དུ་བཅོམ་པ་སྒྲེན་མོར་འདྲིམ་དུ་བཅུག་པས་ན་བསོད་སྙོམས་ཀྱི་གཞིའི་དབང་དུ་མཛད་དེ་མ་དད་པ་ལ་སོགས་པའི་ཉོན་མོངས་པས་བཞི་པ་བཅས་སོ། །དགོན་པ་ཞེས་བྱ་བ་ནི་གྲོང་ནས་རྒྱང་གྲགས་གཅིག་ན་གནས་མལ་ཡོད་པའོ། །དེ་ཕན་ཆད་ནི་བས་མཐའོ། །
དེ་ཡང་གང་ན་བདུད་ཀྱི་རིས་ཀྱི་ལྷ་རྣམས་དང་། གནོད་སྦྱིན་མ་རུངས་པ་མེད་པ་དེར་གནས་པར་བྱའོ། །མ་བརྟགས་ཞེས་བྱ་བ་ནི་ཆོས་ལྔ་དང་ལྡན་པ་ནགས་ཉུལ་བ་བསྐོ་བར་བྱའོ། །དེ་ཡང་ནང་པར་སྔར་ལངས་ལ་ནགས་བརྟག་པར་བྱའོ། །གལ་ཏེ་ཆོམ་རྐུན་ཡོད་ན་དུད་བརྡ་གཏུལ་བར་
བྱའོ། །འདབ་མའི་ཆང་བུ་དག་ལམ་ཁར་གཞག་པར་བྱའོ། །གལ་ཏེ་མེད་ན་རྒྱལ་མཚན་བསྒྲེང་བར་བྱའོ། །གང་སྦྱིན་པ་པོ་རྣམས་བག་ཡོད་པར་འོང་ངམ་ཡང་ན་མི་འོང་ངོ་། །དེའི་གྲོགས་ཤིག་ཀྱང་སྦྱིན་པར་བྱའོ། །དེས་ཀྱང་ཁྱེའུ་སུས་ཀྱང་བྱའོ། །དེ་ཉིད་ཀྱིས་བརྟགས་
ནས་ཟན་ཟ་བ་ནི་ལྟུང་བ་མེད་དོ། །ཀུན་དགའ་ར་བའི་ཕྱི་རོལ་གྱི་ཞེས་བྱ་བ་ནི་གཙུག་ལག་ཁང་ལས་ཕྱི་རོལ་ལོ། །འཆའ་འམ་ཟ་ན་ཡང་ཞེས་བྱ་བ་ནི་མགུལ་དུ་མིད་ནའོ། །ནགས་མ་བརྟགས་པ་ལ་མ་བརྟགས་པར་འདུ་ཤེས་སམ་ཡིད་གཉིས་ཟ་ན་ཡང་རུང་། ཟོས་ན་སོ་སོར་བཤགས་

པའོ། །བརྟགས་པ་ལ་མ་བརྟགས་པར་འདུ་ཤེས་སམ། ཡིད་གཉིས་ཟ་ན་ཡང་རུང་སྟེ་ཉེས་བྱས་སོ། །ནགས་སོ་སོར་རྟོགས་པར་བྱེད་པ་ཤི་བར་གྱུར་ཏམ་བྲོས་ན་ལྟུང་བ་མེད་དོ། །ཁ་ཅིག་ནི་མ་བརྟགས་པའི་གནས་ཁང་དུ་གཞན་དག་དོགས་པར་འགྱུར་བ་དེར་ཞུགས་མ་ཐག་ཏུ་
ལྟུང་བའོ་ཞེས་ཟེར་རོ། །དགོན་པ་པས་བྱ་བ་ནི་ས་དང་། རྒྱུ་སྐར་དང་། ཕྱོགས་དང་། ལམ་ལ་མཁས་པར་བྱའོ། །ཕྱེ་དང་། ཆུ་ལ་སོགས་པ་གཞག་པར་བྱའོ། །ཚུར་ཤོག་འོངས་པ་ལེགས་སོ་ཞེས་བྱ་བ་ལ་སོགས་པ་བཞིན་འཛུམ་སྔོན་དུ་འགྲོ་བས་ཁྲོ་གཉེར་མེད་པར་བྱའོ། །
མ་མོ་ལ་སོགས་པ་ཤེས་པར་བྱ་བའོ། །གཞན་ལ་ཡང་ངོ་། །སོ་སོར་བཤགས་པ་བཞིན་པའོ། །འདི་དག་ལ་ནི་ཡོངས་སུ་ལོངས་སྤྱོད་པ་རྣམ་པ་བཞི་ལས་འབྱུང་བ་རིག་པར་བྱ་སྟེ། ལག་པ་ཡོངས་སུ་ལོངས་སྤྱོད་པ་ངན་པ་དང་། བསྒོ་བས་ཡོངས་སུ་ལོངས་སྤྱོད་པ་ངན་པ་
དང་། ཆོ་ག་མ་ཡིན་པ་ཡོངས་སུ་ལོངས་སྤྱོད་པ་དང་། གནས་ངན་པར་ཡོངས་སུ་ལོངས་སྤྱོད་པར་རིག་པར་བྱའོ། །སོ་སོར་བཤགས་པ་རྫོགས་སོ།། །།རབ་ཏུ་མང་པོ་ཞེས་བྱ་བ་ནི་བཞི་ལ་སོགས་པའི་ནང་ནས་འབྱུང་བའི་ཉེས་བྱས་ཀྱི་ལྟུང་བ་ཐམས་ཅད་བསླབ་པ་འདིར་
བསྡུས་པས་ན་གྲངས་དཔག་ཏུ་མེད་པའོ། །འདི་ལྟ་སྟེ་རྔ་བརྡུང་བར་མི་བྱ་སྟེ། སྟོན་པ་ལ་མཆོད་པ་བྱོས་ཤིག་ཅེས་བསྒོ་བ་ནི་མ་གཏོགས་སོ། །བྱུག་རིས་གསུམ་མི་བྱའོ། །མེ་ལོང་དང་ཆུ་ལ་གདོང་པ་བལྟ་བར་མི་བྱ། ཆུ་བརྟག་པའི་ཚེ་རྨའམ་གཉེར་མའམ། སྐྲ་དཀར་
རམ། གདོང་སྔོན་དང་། ད་ལྟར་གྱི་ཁྱད་པར་དུ་ལྟ་བ་ལ་ལྟུང་བ་མེད་དོ། །སོ་མངས་དང་། པུ་ཤེལ་ཙེས་སྐྲ་བཤད་པར་མི་བྱའོ། །དགེ་བའི་ཕྱོགས་ལ་ལེ་ལོ་མི་བྱའོ། །སྐྱེད་མོས་ཚལ་བསྐྱེད་པས་མེ་ཏོག་མ་བྱུང་ངམ། འབྲས་བུ་མ་བྱུང་ངམ། དགེ་སློང་གཞན་ལ་མ་བཅོལ་
གྱི་བར་དུ་ཕྱོགས་གཞན་དུ་འགྲོ་བར་མི་བྱའོ། །སྒོ་གཏན་ལ་ཡུན་རིང་དུ་མི་བརྡུང་ངོ་། །ཤེས་བཞིན་དུ་བར་མའི་སྦྱོར་བས་སྒོ་དབྱེ་ཞིང་གཅད་པར་བྱའོ། །ཤེས་བཞིན་དུ་ཕྱིར་དབྱུང་བར་བྱ་ཞིང་ནང་དུ་འཇུག་པར་བྱའོ། །འཆག་པའི་ཚེ་དྲང་པོར་བྱས་ལ་དབང་པོ་རྣམས་ཕྱིར་མི་འགྲོ་

ཞིང་མི་དྲག་མི་དལ་བར་བཅག་པར་བྱའོ། །རྐང་པ་དག་བཀྲུ་བའི་ཆུ་སྣོད་སྟོང་པར་མཐོང་ན་སླར་བཀང་སྟེ་གཞག་གོ། །མཆོད་རྟེན་ལ་ཕུར་བུ་གདབ་པར་མི་བྱ། འཛེགས་པར་མི་བྱའོ། །བསྙེན་པར་མ་རྫོགས་པ་མེད་ན་རྐང་པ་དག་སྤོས་ཆུས་བཀྲུས་ཏེ་དྲན་པ་ཉེ་
པར་བཞག་ནས་མཆོད་པའི་ཕྱིར་འཛེག་པ་ལ་ལྟུང་བ་མེད་དོ། །བྱང་ཆུབ་སེམས་དཔའི་སྐུ་གཟུགས་ལ་རྐང་རྒྱན་དང་། རྣ་རྒྱན་མ་གཏོགས་པའི་རྒྱན་གཞན་རྣམས་བྱའོ། །སངས་རྒྱས་ཀྱི་དུས་སྟོན་ལ་སོགས་པའི་ཚེ་འཁོར་ལྔ་པོ་རྣམས་ཀྱི་ཞབས་འབྲིང་བྱའོ། །རྒན་པོ་རྣམས་ཀྱིས་མཆོད་
ཡོན་བླངས་ལ་གཞོན་ནུའི་བཀྱེ་བར་བྱའོ། །ཆོས་གོས་སྦེད་པ་ཡང་བསྐོ་བར་བྱའོ། །འགེད་པ་ཡང་ངོ་། །དེ་ལས་གཞན་དག་ཀྱང་ཇི་སྐད་བསྟན་པ་བཞིན་དུ་བྱའོ། །བསླབ་པ་ཞེས་བྱ་བ་ནི་ཆོ་ག་བསྡུས་པའི་ཕྱིར་བསླབ་པ་མང་པོ་འདི་དག་ཅེས་བྱའོ། །གྲོང་ཁྱེར་བཱ་རཱ་ཎ་སཱི་ན་སྟེ་ལྔ་སྡེ་
རྣམས་ལས་བརྩམས་ཏེ་བསླབ་པ་བཅས་སོ། །གང་དུ་ཡང་གླེང་གཞི་དང་གང་ཟག་གི་ཁྱད་པར་དེ་དག་ནི་བརྗོད་པར་བྱའོ། །བཅོམ་ལྡན་འདས་ཀྱིས་སྔོན་དུ་ཡང་དག་པར་རྫོགས་པའི་སངས་རྒྱས་རྣམས་དང་། ཉན་ཐོས་རྣམས་ཤམ་ཐབས་ཅི་ལྟར་བགོས་ཞེས་དགོངས་པ་དང་། ལྷ་
རྣམས་ཀྱིས་གནས་གཙང་མའི་ལྷའི་བཞིན་ནོ་ཞེས་གསོལ་པ་དང་། བཅོམ་ལྡན་འདས་ཀྱི་ཡེ་ཤེས་ཀྱིས་མཁྱེན་ཅིང་གཟིགས་ན་དེ་བཞིན་དུ་གྱུར་ཏོ། །ཟླུམ་པོ་ཞེས་བྱ་བ་ནི་འཆད་པར་འགྱུར་བའི་ཉེས་པ་རྣམས་སྤང་བར་བྱ་བའི་ཕྱིར་རོ། །དྲུག་སྡེ་རྣམས་ལས་བརྩམས་ཏེ། ཧ་ཅང་རྩེངས་པ་
མ་ཡིན་ཞེས་བྱ་བ་ནི་པུས་མོ་ལས་མི་མཐོ་བའོ། །བསླབ་པར་བྱའོ་ཞེས་བྱ་བ་ནི་འདི་ལྟར་བསླབ་པར་བྱའོ་ཞེས་བྱ་བའི་ཐ་ཚིག་གོ། །དེ་ལ་ལྟུང་བ་ཅི་ལྟར་འགྱུར་ཞེ་ན། ཤམ་ཐབས་ཅི་ལྟར་བཅས་པ་དེ་ལྟ་བུར་བདག་བྱེད་དུ་མི་འདོད་ཅིང་ངོ་ཚ་བ་ཡང་སྤངས་ལ། དེ་ལྟ་བུའི་མི་བྱ་བའི་ཕྱིར་འབྱུང་
བར་ཡང་མི་ཚོལ། རྟེན་པར་ཡང་མི་ཚོལ་བའོ། །གོས་ཀྱང་བླངས་ནས་ཕྱེ་སྟེ་བསྙེན་ལ་ཇི་སྲིད་མ་བགོས་ཀྱི་བར་དུ་ནི་བསྡམ་པར་བྱ་བའི་ཉེས་བྱས་སོ། །བགོས་མ་ཐག་ཏུ་བཤགས་པར་བྱའོ། །བར་ཆད་གཅིག་བྱུང་ན་ལྟུང་བ་མེད་དོ། །གལ་ཏེ་འབྱུང་བ་ཚོལ་བར་མི་བྱེད་ན་བསྡམ་པར་བྱ་བའི་

ཉེས་བྱས་སོ། །མི་ཤེས་སམ་དྲན་པ་ཉམས་བཞིན་དུ་སྤྱོད་ན་བསྡམ་པར་བྱའོ། །དེ་བཞིན་དུ་གཞན་རྣམས་ལ་ཡང་རིག་པར་བྱའོ། །ཧ་ཅང་འཇོལ་བ་མ་ཡིན་ཞེས་བྱ་བ་ནི་ཤིན་ཏུ་དམའ་བ་མ་ཡིན་ཏེ། ལོང་བུའི་གནས་ལས་བརྩམས་ཏེ་སོར་བཞི་པར་བྱའོ། །གླང་པོ་ཆེའི་སྣ་ལྟར་མ་ཡིན་
ཞེས་བྱ་བ་ནི་གོས་ཀྱི་མཐའ་མདུན་ནས་འཕྱང་བར་བྱ་བ་མ་ཡིན་པ་སྟེ། དེ་མདུན་ནས་འཕྱང་ན་གླང་པོ་ཆེའི་སྣ་དང་འདྲ་བར་འགྱུར་བའི་ཕྱིར་རོ། །ཏ་ལའི་ལོ་མ་ལྟར་མ་ཡིན་ཞེས་བྱ་བ་ནི་ལོགས་ལ་སྟེང་དུ་ཆ་མང་པོར་བྱས་ཏེ། མེ་ཏོག་ལྟ་བུར་བྱས་ཏེ་གྱོན་པའོ། །སྦྲུལ་མགོའི་ལྡེང་ཀ་ལྟར་མ་
ཡིན་ཞེས་བྱ་བ་ནི་སླར་དགུག་པར་མི་བྱའོ་ཞེས་བྱ་བའི་ཐ་ཚིག་གོ། །འབྲུའི་ཕུར་མ་ལྟར་མ་ཡིན་ཞེས་བྱ་བ་ནི་ཁྱིམ་པ་མོ་བཞིན་དུ་ལྟ་ཟུར་གྱི་སྟེང་དུ་བསྡུས་ནས་གཞག་པར་མི་བྱའོ། །ཆོས་གོས་ཟླུམ་པོར་ཞེས་བྱ་བ་ནི་ཅི་ལྟར་འཆད་པར་འགྱུར་བའི་ཉེས་པ་རྣམས་སྤང་བར་བྱ་བ་ཡིན་ཏེ།
དེ་ལ་སྟེང་དུ་བགོ་བ་ནི་ཆོས་གོས་སོ། །ཧ་ཅང་རྩེངས་པ་མ་ཡིན་ཞེས་བྱ་བ་ནི་པུས་མོ་ལས་མཐོ་བའོ། །གཞན་ནི་ལྟེ་བ་སྣང་བ་ལ་མཐོ་བར་བཟུང་ངོ་ཞེས་ཀྱང་ཟེར་རོ། །ཧ་ཅང་འཇོལ་བ་མ་ཡིན་ཞེས་བྱ་བ་ནི་ཤམ་ཐབས་ལས་དམའ་བའོ། །ཤིན་ཏུ་བསྡམས་པ་ཞེས་བྱ་བ་ནི་ལག་པ་དང་རྐང་པ་
མི་གཡོབ་པའོ། །ལེགས་པར་བགོས་པ་ཞེས་བྱ་བ་ནི་ཤམ་ཐབས་དང་བླ་གོས་ལེགས་པར་བགོས་པ་ལ་བྱ་སྟེ། ཆོས་གོས་བསྡུ་བར་བྱ་བ་མ་ཡིན་ནོ། །སྒྲ་བསྐྱུངས་པ་ཞེས་བྱ་བ་ནི་ཐ་མལ་པའི་ང་རོ་ལ་བྱའི་བུས་པ་ཆུང་ངུ་ཁུར་བ་བཞིན་དུ་ཅ་ཅོ་དབྱུང་བ་མ་ཡིན་ནོ། །གལ་ཏེ་མི་ཐོས་ན་
ཡང་གཞན་ལས་བསྒོ་བར་བྱའོ། །མིག་གཡེང་བར་མི་བྱ་བ་ནི་མིག་གྱེན་དུ་གཡེང་བར་མི་བྱའོ། །གཉའ་ཤིང་གང་ཙམ་དུ་བལྟ་བ་ཞེས་བྱ་བ་ནི་ཁྲུ་བཞིའི་ཚད་ཙམ་གྱི་ཕྱོགས་སུ་བལྟ་བར་བྱའི། རྒྱབ་བམ་ཕན་ཚུན་དུ་བལྟ་བར་མི་བྱ་སྟེ། རྟ་ལ་སོགས་པ་འཁྲུལ་པ་དང་ཉམས་སུ་ཐུག་པར་
འགྱུར་བ་སྤང་བའི་ཕྱིར་རོ། །མགོ་མི་གཡོགས་ཞེས་བྱ་བ་ནི་རིགས་ཀྱི་མནའ་མ་ལ་སོགས་པ་བཞིན་ནོ། །མི་བརྫེ་ཞེས་བྱ་བ་ནི་ཤམ་ཐབས་བརྫེ་བར་མི་བྱའོ། །ཕྲག་པ་གཅིག་ལ་མི་གཟར་བ་ཞེས་བྱ་བ་ནི་ཆོས་གོས་བགོས་པ་ལ་སླར་བཟློག་སྟེ་ཕྲག་པར་གཟར་བར་མི་བྱའོ། །ཁ་ཅིག་ནི་འཛིན་པ་

ལ་ཡང་གཟར་པ་ཞེས་བྱ་བ་སྟེ། འདུག་ཀྱང་ལག་པས་འཛིན་ལ་འགྲོ་ཡང་དེ་བཞིན་ནོ་ཞེས་ཟེར་རོ། །གཉའ་གོང་དུ་མི་བསྣོལ་ཞེས་བྱ་བ་ནི་བླ་གོས་བགོས་ནས་རྩིབ་ལོགས་གཉི་ག་ནས་གོང་དུ་བཟློག་སྟེ་གྱོན་པའོ། །ཕྲག་པ་གཉི་ག་ལ་མི་གཟར་བ་ཞེས་བྱ་བ་ནི་མཐའ་གཉི་ག་
ཕྲག་པའི་སྟེང་དུ་གཟར་བའོ། །བྲང་བས་མ་ཡིན་ཞེས་བྱ་བ་ནི་བྱིས་པ་ཁྱེའུ་དག་དང་སྨྱོན་པ་ལ་སོགས་པ་བཞིན་དུ་རྐང་པ་དག་གི་རྩེ་མོས་འགྲོ་བར་མི་བྱའོ། །མི་མཆོང་བ་ཞེས་བྱ་བ་ནི་རིམ་པ་མ་ཡིན་པར་སྟེང་དུ་མཆོང་བར་མི་བྱའོ་ཞེས་བྱའོ། །མི་མཆོང་བ་ཞེས་བྱ་བ་ནི་ཤིང་ཐགས་ལ་མཆོང་
ཞིང་འགྲོ་བར་མི་བྱ་སྟེ། ལམ་དུ་འགྲོ་བར་བྱའོ། །ཙོག་པུས་མ་ཡིན་པ་ཞེས་བྱ་བ་ནི་རྟ་ལྟར་མཐོན་པོར་བྱེད་པ་མ་ཡིན་པའོ། །དཀུར་མི་བརྟེན་པ་ཞེས་བྱ་བ་ནི་ལག་པས་དཀུར་བརྟེན་པར་མི་བྱའོ། །ལུས་མི་བསྒྱུར་བ་ཞེས་བྱ་བ་ནི་གཟུགས་འཚོང་མ་བཞིན་དུ་མི་བྱའོ། །ལག་པ་མི་
ཀྱོག་པ་ཞེས་བྱ་བ་ནི་བྱིས་པ་ཁྱེའུ་དག་དང་སྨྱོན་པ་ལ་སོགས་པ་བཞིན་དུའོ། །མགོ་མི་བསྒྱུར་ཞེས་བྱ་བ་ནི་གླང་པོ་ཆེའམ་རྩངས་པ་ལྟར་མ་ཡིན་ནོ། །ཕྲག་པ་མི་སྤྲད་ཅེས་བྱ་བ་ནི་སྐྱེས་བུས་དྲིས་བྱུགས་པ་ལས་ཕྲག་པས་བསྣུན་ཏེ་ལྟུང་བར་བྱས་པས་ཉེས་པའི་ཕྱིར་ཏེ། དེ་ནི་
གཞན་ལ་ཕྲག་པ་སྤྲད་དེ་འགྲོ་བར་མི་བྱ་བའི་དོན་ཏོ། །ལག་པ་མི་སྦྲེལ་ཞེས་བྱ་བ་ནི་ཕ་རོལ་པོའི་ལག་པ་དང་། ལག་པ་སྦྲེལ་ཏེ་བཟུང་བར་འགྲོ་བར་མི་བྱའོ། །མ་བསྒོ་བ་ཞེས་བྱ་བ་ནི་མཉན་ཡོད་ན་སྟེ། ཉེ་དགའ་ལས་བརྩམས་ནས་བྲམ་ཟེ་དང་གཙང་སྦྲ་འདོད་པའི་ཁྱིམ་དུ་ཁྲི་ལ་འདུག་པའི་
ཕྱིར་བཅས་སོ། །མ་བརྟགས་པར་ཞེས་བྱ་བ་ནི་མཉན་ཡོད་ན་སྟེ། འཕགས་པ་འཆར་ཀ་ལས་བརྩམས་ནས་ཁྱེའུ་བསད་པའི་ཕྱིར་རོ། །ལུས་ཐམས་ཅད་ཀྱི་ལྗིད་ཀྱིས་མི་དབབ་ཅེས་བྱ་བ་ནི་སེར་སྐྱའི་གནས་ན་སྟེ། འཆར་ཀ་ལས་བྱང་ཆུབ་སེམས་དཔའི་བཙུན་མོའི་འཁོར་དག་གིས་
སྨྲས་པ་དང་། སྟན་ལ་དྲག་ཏུ་འདུག་པས་ལྟུང་བའི་ཕྱིར་བཅས་སོ། །རྐང་པ་མི་བསྣོལ་ཞེས་བྱ་བ་ནི་རྐང་པའི་སྟེང་དུ་རྐང་པ་མི་གཞག་པའོ། །རྐང་པ་མི་དགུག་ཅེས་བྱ་བ་ནི་དགེ་བསྙེན་མ་ཕྱག་འཚལ་བའི་ཚེ་རྐེད་པ་བཅལ་ནས་སྦོམ་པ་ལ་ལྟོས་ཤིག་ཅེས་དེ་སྐད་སྨྲས་པའི་ཕྱིར་བཅས་སོ། །

རྐང་པ་མི་གདངས་ཞེས་བྱ་བ་ནི་རྐང་པ་གཅིག་ལོགས་ཤིག་ཏུ་བརྐྱང་། གཉིས་པ་ཡང་ལོགས་ཤིག་ཏུ་བརྐྱང་བའོ། །མདོམས་མི་སྣང་བར་ཞེས་བྱ་བ་ནི་ཅི་ནས་སྒྲེན་མོར་མི་སྣང་བའོ། །རྒྱལ་བུ་གཞོན་ནུ་རྟོགས་ལྡན་ཞེས་བྱ་བའི་ཁང་བཟངས་སུ་སྲུང་མ་དག་གིས་ལྷུང་བཟེད་བཅག་པས་ན་འབྲས་ཆན་
འདྲིམ་པའི་ཚེ་ལྷུང་བཟེད་ལོགས་ཤིག་ཏུ་ཕྱུང་བས་འབྲས་ཆན་ས་ལ་བོ་བའི་ཕྱིར་འདི་སྐད་དུ་ལེགས་པར་ཞེས་གསུངས་སོ། །མུ་དང་ཁ་ད་ཆད་དུ་མ་ཡིན་ཞེས་བྱ་བ་ནི་ཅི་ནས་སྟེང་ནས་བོ་བར་འགྱུར་བའི་ཕྱིར་མུ་དང་ཁ་ད་ཆད་དུ་མི་བྱའོ། །སྲན་ཚོད་དང་མཉམ་པར་མ་ཡིན་ཞེས་བྱ་བ་ནི་ཚོད་མ་
དང་མཉམ་པ་མ་ཡིན་པ་སྟེ། ཅི་ནས་སྟེང་དུ་འབྲས་ཆན་བླུགས་ནས་འབོ་བའི་ཕྱིར་སྔར་ཚོད་མ་མང་དུ་བླང་བར་མི་བྱའོ། །མཐར་ཆགས་ཞེས་བྱ་བ་ནི་འབྲས་ཆན་དང་ཚོད་མ་ཇི་ལྟར་འོངས་པ་བཞིན་བླང་བར་བྱའི། རིང་དུ་སོང་བ་ལ་འབོད་པར་མི་བྱའོ། །མ་འོངས་པར་ཞེས་བྱ་བ་ནི་ཐང་དུ་མ་
བྱིན་པའོ། །སྟེང་དུ་མ་ཡིན་ཞེས་བྱ་བ་ནི་འཕགས་པ་དག་གཙང་སྦྲ་ནི་སོ་སོར་ཐ་དད་པ་ལགས་ན་ཞེས་འཇིག་རྟེན་པ་སྨོད་པའི་ཕྱིར་བཅས་སོ། །ལེགས་པར་ཟས་བཟའ་བར་བྱའོ་ཞེས་བྱ་བ་ནི་གཟུགས་འཚོང་མ་ལ་སོགས་པ་བཞིན་དུ་རྣམ་པར་འགྱུར་ཞིང་མ་ཡིན་ནོ། །ཧ་ཅང་ཆུང་བ་
མ་ཡིན་ཞེས་བྱ་བ་ནི་རིགས་ཀྱི་མནའ་མ་བཞིན་དུ་ཆུང་ངུ་མ་ཡིན་པའོ། །ཧ་ཅང་ཆེན་པོ་མ་ཡིན་ཞེས་བྱ་བ་རི་གང་མཁུར་བ་གང་བར་གྱུར་ནས་མུ་ཏོ་བ་བཞིན་དུ་མ་ཡིན་ནོ། །མ་གཟས་པར་ཞེས་བྱ་བ་ནི་མ་འོངས་པར་ཁ་གདགས་ཏེ་འདུག་པས་ན་ཁར་བོང་བ་བཅུག་ནས་ཉེས་པའི་ཕྱིར་རོ། །
འབྲས་ཆན་གྱིས་ཚོད་མ་མི་དགབ་ཅེས་བྱ་བ་ནི་གང་ན་འབྲས་ཆན་མང་ཚོད་མ་ཉུང་བའོ། །སྲན་ཚོད་ཀྱིས་འབྲས་ཆན་མི་དགབ་ཅེས་བྱ་བ་ནི་གང་འབྲས་ཆན་ཉུང་ངུ་ཐོབ་ལ་སྲན་ཚོད་མང་བ་ན་ཕྱིས་ཀྱང་འདོད་དེ་ཡང་འཐོབ་ཏུ་རེ་བའོ། །ཙུག་ཙུག་མི་བྱ་ཞེས་བྱ་བ་ནི་མཉན་ཡོད་ན་ཚོད་མ་ཤིན་
ཏུ་མངར་བ་ལ་སྐྱུར་བ་བྲོ་བར་སྟོན་ཅིང་འཕྱ་བས་ཉེས་པའི་ཕྱིར་རོ། །བལྕག་བལྕག་མི་བྱ་ཞེས་བྱ་བ་ནི་ཚོད་མ་ཤིན་ཏུ་སྐྱུར་བ་ལ་མངར་བར་བྲོ་བར་སྟོན་ཅིང་འཕྱ་བས་ཉེས་པའི་ཕྱིར་རོ། །ཧུ་ཧུ་མི་བྱ་ཞེས་བྱ་བ་ནི་འབྲས་ཆན་ཚ་བ་ལ་ཁའི་དབུགས་ཀྱིས་བསྲོ་བར་བྱའོ་སྙམ་ནས་འཕྱ་བའི་ཕྱིར་

རོ། །ཕུ་ཕུ་མི་བྱ་ཞེས་བྱ་བ་ནི་འབྲས་ཆན་ཤིན་ཏུ་གྲང་བ་ལ་ཕུ་ཕུ་ཞེས་བྱས་ལ་གྲང་བར་བྱའོ་སྙམ་ནས་འཕྱ་བའི་ཕྱིར་རོ། །ཁ་ཁམ་དང་བཅས་པས་མ་ཡིན་ཞེས་བྱ་བ་ནི་སྒྲ་མི་སྙན་པར་འབྱུང་བའི་ཉེས་པའི་ཕྱིར་རོ། །འབྲུ་ནས་ཐ་དད་དུ་མི་བྱ་ཞེས་བྱ་བ་ནི་འབྲས་ཆན་འབྲུ་ནས་སོ་
སོར་གཏོར་ཏེ་བྱ་གག་བཞིན་བཟའ་བར་མི་བྱའོ། །འཕྱས་མི་གདགས་ཞེས་བྱ་བ་ནི་ཁ་བའམ་སྐྱུར་བ་ལ་སོགས་པས་ཁ་ཟས་ལ་འཕྱས་གདགས་པར་མི་བྱའོ། །དྲིས་ནས་སྦྱིན་བདག་གིས་ནི་བྱིན་ནོ། །ལེན་པ་པོས་ནི་ཟོས་སོ། །འབྱུང་བ་ཆེན་པོ་རྣམས་ནི་ཚིམས་པར་བྱས་སོ། །ཉིན་ཞག་གཅིག་
གི་ལམ་བརྒྱགས་ཀྱི་ཟན་ནི་བླངས་སོ་ཞེས་སྨྲ་བར་བྱའོ། །མཁུར་བ་མི་སྤོ་ཞེས་བྱ་བ་ནི་ཡི་ག་འཆུས་པ་བཞིན་དུ་མཁུར་བ་ནས་མཁུར་བར་སྤོ་ཞིང་བཟའ་བར་མི་བྱའོ། །ཁམ་འཕྲོར་མི་བཅད་ཅེས་བྱ་བ་ནི་ཇི་ལྟར་ཕྱེད་ཁའི་ནང་དུ་བཅུག་ལ། ཕྱེད་ལྷུང་བཟེད་ཀྱི་ནང་དུ་ལྟུང་བར་མ་ཡིན་ནོ། །ལྕེ་མི་
དབྱུང་ཞེས་བྱ་བ་ནི་ལྕེས་མཆུ་བལྡག་པར་མི་བྱའོ། །མཆོད་རྟེན་འདྲ་བར་མ་ཡིན་ཞེས་བྱ་བ་ནི་ཕྱེ་སྦྲུས་ནས་སྟེང་དུ་ལ་ཕུག་བཞག་སྟེ། དེའི་སྟེང་དུ་ཡང་ཁུར་བ་གཞག་ནས་ངན་འགྲོ་རྫོགས་བྱེད་ཀྱི་མཆོད་རྟེན་ནོ་ཞེས་འཕྱས་བྱེད་པའི་ཕྱིར་རོ། །ལག་པ་མི་བལྡག་ཅེས་བྱ་བ་ནི། མུ་ཏོ་བ་བཞིན་དུ་
མ་ཡིན་ནོ། །ལྷུང་བཟེད་མི་བྱོག་ཅེས་བྱ་བ་ནི་ལྷུང་བཟེད་ལ་ཅི་ཆགས་པ་དེ་ལག་པས་བྱོག་ནས་བལྡག་པའོ། །ལག་པ་མི་སྤྲུག་ཅེས་བྱ་བ་ནི་ཁ་ཟས་ལ་འབགས་པའི་ལག་པ་ཅི་ལྟར་ཕ་རོལ་པོ་ལ་མ་རུང་བར་འགྱུར་བའི་ཕྱིར་མི་སྤྲུག་པའོ། །ལྷུང་བཟེད་མི་བསྐྱམ་ཞེས་བྱ་བ་ནི་ལྷུང་བཟེད་འཁྲུ་བའི་
ཚེ་སྣམ་སྦྱར་བཟང་པོ་མ་རུང་བའི་ཕྱིར་རོ། །ལྷུང་བཟེད་ལ་འདུ་ཤེས་པ་ཞེས་བྱ་བ་ནི་ལྷུང་བཟེད་ལ་བལྟ་བར་བྱ་སྟེ། རྒན་ཞུགས་གཞན་ཞིག་ལ་བརྟེན་ཏེ་དྲུག་སྡེས་དེའི་ལྷུང་བཟེད་ཟན་གྱི་ཆང་པས་བཀང་བའི་ཕྱིར་རོ། །འཕྱས་གདགས་པའི་ཕྱིར་མི་ལྟ་ཞེས་བྱ་བ་ནི་འདི་ནི་ཤིན་ཏུ་མང་དུ་ཟའོ་སྙམ་
ནས་འཕྱས་བཙལ་བར་བསམས་ཏེ་གཞན་གྱི་ལྷུང་བཟེད་ལ་བལྟ་བར་མི་བྱའོ། །ཟས་དང་འབགས་པ་ཞེས་བྱ་བ་ནི་ཟས་ཀྱིས་གོས་པ་ཡིན་ནོ། །ཆུ་སྣོད་ཅེས་བྱ་བ་ནི་ཆུའི་རིལ་བ་སྤྱི་བླུགས་ཏེ། སྦྲང་མ་རྣམས་འདུ་བའི་ཕྱིར་རོ། །ཆུ་ཟས་དང་འབགས་པ་ཞེས་བྱ་བ་ནི་ཡུལ་འཇིགས་རུང་ན་

ཁང་བཟངས་པདྨ་ཅན་ཞེས་བྱ་བ་ཚོན་སྣ་བརྒྱ་རྩ་གཅིག་གིས་རི་མོར་བྲིས་པ་དེར་ཕོ་བས་ནའོ། །ཁྱིམ་པ་འདུག་པ་ལ་མ་དྲིས་པར་ཞེས་བྱ་བ་ནི་ཁྱིམ་བདག་ལ་དྲི་བར་བྱའོ། །ལྷག་མ་ཞེས་བྱ་བ་ནི་ལྷུང་བཟེད་ཀྱི་ཆུ་སློང་བའི་ཚེ་དེར་འབྲས་ཆན་དང་། དེ་ཡང་རུས་པ་བཅུག་པའི་ཆུ་ཉེ་དགས་བྱིན་
པའི་ཕྱིར་མི་བྱ་བར་གསུངས་ཏེ། ལྷུང་བཟེད་ཀྱི་ཆུ་སྦྱིན་པའི་ཀུན་དུ་སྤྱད་པ་ནི་ལྷུང་བཟེད་ལན་གསུམ་བཀྲུས་ལ་གཙུག་ལག་གི་ཚིགས་སུ་བཅད་པའི་སྔགས་ཀྱིས་བཏབ་སྟེ་སྦྱིན་པར་བྱའོ། །འོག་གཞི་མེད་པ་ཞེས་བྱ་བ་ནི་འོག་གཞི་མེད་པར་ཐ་ན་ལྷུང་བཟེད་གཞག་པར་ཡང་མི་བྱའོ། །འགྲེངས་
ཏེ་མ་ཡིན་ཞེས་བྱ་བ་ནི་དགེ་སློང་གཞན་ཞིག་ལ་བརྟེན་ཏེ་ཆག་པ་སྤང་བའི་ཕྱིར་རོ། །གད་ཀ་མ་ཡིན་པ་ཞེས་བྱ་བ་ནི་མང་པོ་ལ་བརྟེན་ཏེ་ས་མི་བདེ་བ་སྤང་བའོ། །གཡང་ས་མ་ཡིན་པ་ཞེས་བྱ་བ་ནི་གཡང་ཟ་བ་དང་ཉེ་བའོ། །དཀན་གཟར་པོ་མ་ཡིན་ཞེས་བྱ་བ་ནི་གང་དུ་གཞག་པ་ལས་འདྲིལ་བའོ། །
འགྲེངས་ཏེ་ཞེས་བྱ་བ་ལ་སོགས་པ་ནི་མ་གུས་པར་བྱེད་པ་སྤང་བའི་ཕྱིར་རོ། །འགྲེངས་ཏེ་བཤང་གཅི་མི་བྱ་ཞེས་བྱ་བ་ནི་ཉེ་དགའ་ལ་བརྟེན་ཏེའོ། །ཉེ་དགས་བཀྲུ་སྨན་འཐུངས་ནས་ལྡུམ་པའི་ལྡུམ་རར་ལྡུམ་རྣམས་ལ་ཕྱགས་མས་བྱུགས་པས་ན་རྩྭ་སྔོན་པོ་ལ་མི་བྱའོ་ཞེས་བྱ་བ་གསུངས་ཏེ།
དེ་ལ་ཀུན་དུ་སྤྱད་པ་ནི་མེ་ཏོག་དང་འབྲས་བུའི་ཤིང་ལྗོན་པའི་དྲུང་དུ་བཤང་གཅི་མི་བྱའོ། །ཤིང་ལྗོན་པ་ཚེར་མ་ཅན་གྱི་དྲུང་དང་། གང་ན་ཤིང་ལྗོན་པ་གཅིག་ཏུ་འབྲེལ་པར་འགྱུར་བའམ། གང་ན་རྩྭ་སྔོན་པོའི་འདབ་ཆགས་པར་འགྱུར་བ་དེར་འདབ་མ་ལྷགས་པའམ། རྩྭ་སྐམ་པོ་གཞིར་བཏིང་
སྟེ་བྱས་པ་ལ་ལྟུང་བ་མེད་དོ། །གལ་ཏེ་ཡང་མ་རྙེད་ན་དེ་ཉིད་དུ་ཡང་བྱའོ། །སྣམ་ཕྱིས་ནི་གཙུག་ལག་ཁང་གི་ནུབ་བྱང་གི་མཚམས་སུ་བྱའོ། །ཤིང་ལྗོན་པ་ཚེར་མ་ཅན་དག་བསྐྱེད་པར་བྱའོ། །འོག་ཏུ་རིབ་མས་བསྐོར་བར་བྱའོ། །རླུང་ཕྱོགས་མ་ཡིན་པར་ཆོས་གོས་གཞག་པར་བྱའོ། །ས་ཕུང་
བདུན་ཐ་དད་པར་བཞག་ལ། གཞན་ཡང་ཕུང་པོ་བདུན་ཐ་དད་པར་རོ། །གཅིག་གཞན་དུ་བཞག་ལ་བོང་རྡོག་གསུམ་ཁྱེར་ཏེ་ནང་དུ་འཇུག་པར་བྱའོ། །གཅིག་གིས་ནི་བཤང་བའི་ལམ་ཕྱི་བར་བྱའོ། །གཉིས་པས་ནི་སྦྱང་བར་བྱའོ། །གསུམ་པས་ནི་ལག་པ་བཀྲུའོ། །དེ་ནས་ཕྱིར་བྱུང་སྟེ། བདུན་

པོས་ལག་པ་ཡ་གཅིག་བཀྲུའོ། །གཞན་བདུན་པོ་དག་གིས་ནི་ལག་པ་གཉིས་བཀྲུའོ། །གཅིག་གིས་ནི་ཆུའི་སྣོད་བཀྲུའོ། །ཐོག་མར་ཞུགས་པ་དང་འཇུག་པའི་ཚེ་ལུད་པའི་དང་སེ་གོལ་གྱི་སྒྲ་གཏོགས་པར་བྱའོ། །དགེ་སྐོས་ཀྱིས་སྣམ་ཕྱི་སའི་ནང་དུ་ཐལ་བ་གཏོར་ཅིང་གཅི་
བའི་སར་ནི་ཆུས་སྦྱང་བར་བྱའོ། །ཚད་པའི་ནད་ཀྱིས་བཏབ་པ་ལ་ནི་ཁྲི་བས་བཏགས་པ་ལ་དབུས་སུ་བུ་གུ་དབྱུང་བར་བྱའོ། །སྲད་བུས་བཏགས་པ་ཡིན་ན་དྲོངས་ལ་གཟུངས་གདགས་པར་བྱའོ། གལ་ཏེ་སྡུག་བསྔལ་བར་གྱུར་ན་རས་མའམ། ལོ་མ་གདིང་བར་བྱའོ། །གྱོ་མོ་གཉིས་
ཉེ་བར་གཞག་པར་བྱ་སྟེ་བཀྲུ་བར་བྱ། བསྐམ་པར་བྱ། འབྲུ་མར་གྱིས་བྱུག་པར་བྱའོ། །སྣམ་སྦྱར་བགོས་ནས་བཤང་བ་དང་གཅི་བ་མི་བྱའོ། །གོས་ལེགས་པར་བསྡུས་ཏེ་ནང་དུ་འཇུག་པར་བྱའོ། །ཤེས་བཞིན་དུ་ཡང་བཤང་བ་དང་གཅི་བ་གཏང་བར་བྱའོ། །འཐོར་འཐུང་མ་
བྱས་པར་ཕྱག་བྱེད་པ་བདག་གིར་མི་བྱའོ། །སྟན་ལ་འདུག་པར་མི་བྱ། སྨན་འཐུངས་སམ་ཆུ་མ་འབྱོར་བ་ལ་ལྟུང་བ་མེད་དོ། །སྨན་འཐུངས་ནས་མ་ལུས་པར་མ་འཁྲུས་ཀྱི་བར་དུ་དེ་སྲིད་དུ་ཁྲུས་མ་བྱེད་པར་བར་བར་དུ་བོང་བའི་དུམ་བུའམ། ཤིང་གི་གཞོག་མས་བཤང་བའི་ལམ་
ཕྱིས་ཤིང་མཇུག་ཏུ་གཙང་སྦྲ་བྱའོ། །ལྷམ་ལ་ཡང་མི་ཉམས་པར་གཙང་སྦྲ་ལ་སོགས་པ་བྱའོ། །ཕྱོགས་མ་ཡིན་པར་གཅི་བར་མི་བྱ་མོད་ཀྱི་འོན་ཀྱང་གནས་གཅིག་ཏུ་ཐམས་ཅད་བྱའོ། །བཤང་བ་དང་གཅི་བ་དང་། ཁྲུས་ཀྱི་སའི་ཉེ་འཁོར་དུ་དེ་ཉིད་ཀྱིས་མ་གཏོགས་པར་གཞན་
བྱ་བ་ཐམས་ཅད་མི་བྱའོ། །སྒྲ་དང་བཅས་པའི་རླུང་གི་ལས་མི་བྱའོ། །བཤང་བ་མ་འོངས་པ་ལ་ཆེད་དུ་མི་བྱའོ། །འོངས་པ་ལ་ནི་དགག་པར་མི་བྱའོ། །བྱ་བ་བྱས་པ་དང་བཤང་གཅིའི་ས་ལ་འདུག་པར་མི་བྱའོ། །སྣབས་དང་མཆིལ་མ་ལ་སོགས་པ་སྒྲ་དང་བཅས་པར་མི་དབྱུང་ངོ་། །
གནས་བརྟན་གྱི་མདུན་དུ་མ་ཡིན། ལས་ཡོངས་སུ་བྱང་བའི་སར་མ་ཡིན། ཟན་ཟ་བ་རྣམས་ཀྱི་མདུན་དུ་མ་ཡིན། མཆིལ་མ་ཡང་དང་ཡང་དུ་དོར་བར་མི་བྱ། གལ་ཏེ་ཕྱི་ཕྱིར་བྱུང་ན་ཕྱོགས་གཅིག་ཏུ་སོང་ལ་དོར་རོ། །ནད་པའི་ཕྱིར་མཆིལ་མའི་སྣོད་ཞོག་ཤིག །དེའི་ཞབས་སུ་ཕྱེ་

མའམ། བྱེ་མ་འམ། ཐལ་བ་ལུགས་ཤིག །ཆུའི་ནང་དུ་མ་ཡིན་ཞེས་བྱ་བ་ནི་ཉེ་དགས་འཁྲུ་སྨན་འཐུངས་ཏེ། བཙོ་བླག་མཁན་གྱི་འཁྲུ་བཤལ་སར་བཤང་བ་བྱས་པའི་ཕྱིར་མངོན་ཏེ། གང་ན་ཆུས་ཁེབས་པ་དེར་ཤིང་ལ་སོགས་པ་བཞོག་སྟེ་དེར་བཤང་གཅི་བྱའོ། །མི་གང་ཙམ་
ལས་མཐོར་མི་བྱའོ་ཞེས་བྱ་བ་ནི་ལྷུང་བཟེད་དུ་ཁྱེར་བ་ལ་དགེ་སྐོས་ཀྱིས་ལྟ་བར་བྱེད་པའི་ཕྱིར་མངོན་པར་འཛེག་པ་ཞེས་བྱའོ། །གནོད་པ་འབྱུང་བ་མ་གཏོགས་ཞེས་བྱ་བ་ནི་མ་འཛེགས་ན་སྟག་གིས་ཟོས་པར་འགྱུར་བའི་ཕྱིར་རྗེས་སུ་གནང་བའོ། །བསླབ་པའི་ཆོས་དེ་རྣམས་ཀྱང་འདི་ལྟར་
དེ་དག་གཞི་རྣམ་པ་བརྒྱད་དུ་རིག་པར་བྱ་སྟེ། ཆོས་གོས་རྣམས་བགོ་བའི་དབང་དུ་བྱས་པ་དང་། གྲོང་དུ་འཇུག་པའི་དབང་དུ་བྱས་པ་དང་། འཇུག་པར་བྱ་བའི་དབང་དུ་བྱས་པ་དང་། བཟའ་བ་ཡོངས་སུ་ལོངས་སྤྱོད་པའི་དབང་དུ་བྱས་པ་དང་། ལྷུང་བཟེད་ཀྱི་ལས་ཀྱི་དབང་དུ་བྱས་པ་
དང་། ཆོས་སྟོན་པའི་དབང་དུ་བྱས་པ་དང་། མི་གཙང་བ་འདོར་བའི་དབང་དུ་བྱས་པ་དང་། མེ་ཏོག་དང་འབྲས་བུ་མ་རུང་བར་བྱེད་པའི་དབང་དུ་བྱས་པའོ། །བསླབ་པའི་ཆོས་རྣམས་རྫོགས་སོ།། །།རྩོད་པ་ཞི་བར་བྱེད་པ་བདུན་ཞེས་བྱ་བ་ནི་རྩོད་པ་བཞི་པོ་དག་འདི་རྣམས་
ཀྱིས་ཞི་བར་བྱེད་པའི་ཕྱིར་རོ། །དེ་ལ་གང་ཆོས་ཀྱི་རྙེད་པ་དེ་ཆོས་སྨྲ་བ་རྣམས་ལའོ་ཞེས་བྱ་བ་ལས་འཐབ་མོ་བྱུང་བའི་ཕྱིར་རྩོད་པའི་གཞིར་བཅས་སོ། །དེ་ལ་འགྱོད་པའི་ཕྱིར་རྩོད་པ་ནི་དགེ་འདུན་ལ་གང་འདི་ལྟར་རམ། འདི་ལྟར་མ་ཡིན་ནོ་ཞེས་བྱ་བ་ནི་མི་མཐུན་པར་སྨྲས་ནས་དེ་དག་
ཀུན་ནས་སློང་བའི་འཐབ་མོའོ། །འགྱེད་པ་ཡང་ཡིན་ལ་རྩོད་པ་ཡང་ཡིན་པས་ན་འགྱེད་པའི་རྩོད་པའོ། །འགྱེད་པ་དེའི་རྩ་བ་དྲུག་དང་། དབྱེན་དུ་གྱུར་པའི་གཞི་བཅུ་བཞིའོ། །འགྱེད་པའི་རྩ་བ་དྲུག་པོ་ནི་ཁྲོ་ཞིང་ཁོན་དུ་འཛིན་པ་དང་། འཆབ་ཅིང་འཚིག་པ་དང་། ཕྲག་དོག་
ཅིང་སེར་སྣ་དང་། གཡོ་བྱེད་ཅིང་སྒྱུ་ཅན་དང་། ངོ་ཚ་མེད་ཅིང་ཁྲེལ་མེད་པ་དང་། སྡིག་པ་ལ་འདོད་ཅིང་ལོག་པར་ལྟ་བ་དང་། རང་གི་ལྟ་བ་ལ་མཆོག་ཏུ་འཛིན་ཅིང་སྙེམས་པའོ། །དབྱེན་དུ་འགྱུར་བའི་གཞི་ནི་ཆོས་སོ་ཞེས་བྱ་བའམ། ཆོས་མ་ཡིན་ལ་ཞེས་བྱ་བའམ། དེ་བཞིན་དུ་

འདུལ་བའོ། །འདུལ་བ་མ་ཡིན་ནོ། །ལྟུང་བའོ། །ལྟུང་བ་མེད་པའོ། །ལྕི་བའོ། །ཡང་བའོ། །ལྷག་མ་ལུས་པའོ། །ལྷག་མ་མ་ལུས་པའོ། །བསྡམ་པར་བྱ་བའོ། །བཤགས་པར་བྱ་བའོ། །འདུལ་བ་དང་འགལ་བའོ། །ཉེས་པ་བཤད་པར་གཏོགས་
པའོ། །དགེ་བ་དང་མི་དགེ་བ་དང་། ལུང་དུ་མ་བསྟན་པའི་དབྱེ་བ་ལས་རྣམ་པ་གསུམ་སྟེ། དགེ་བར་འདོད་པ་དང་། མི་དགེ་བར་འདོད་པ་དང་། དེ་གཉི་གར་མི་འདོད་པ་རྣམས་ལ་ཡང་གོ་རིམས་བཞིན་དུའོ། །གང་འགྱེད་པ་དེ་ཉིད་རྩོད་པ་སྟེ། མུ་བཞིར་སྦྱར་རོ། །མུ་དང་པོ་ནི་མི་
མཐུན་པར་སྨྲ་བ་ཙམ་མོ། །གཉིས་པ་ནི་དེ་ལས་གཞན་ལ་རྩོད་པ་གསུམ་མོ། །གསུམ་པ་ནི་དེ་དག་ལྷན་ཅིག་པའོ། །བཞི་པ་ནི་དེ་རྣམས་མ་གཏོགས་པའོ། །མི་བསྡམས་པའི་ཕྱིར་རྩོད་པ་ནི་གང་གླེང་བར་མི་འོས་པ་ལ་གླེངས་པ་སྟེ། ཉེས་པར་གླེངས་པས་ན་མི་བསྡམས་པ་ཞེས་
བྱ་སྟེ། ཅི་ལྟར་གྱད་བུ་ནོར་ལ་སོགས་པ་གསུམ་སྟེ། དེས་ཀུན་ནས་བསླང་བ་འགྱེད་པའོ། །དེའི་རྩ་བ་ནི་མི་བསྡམས་པའོ། །དེའི་ལྷག་མ་རྣམས་ནི་དང་པོ་བཞིན་ནོ། །ལྟུང་བའི་ཕྱིར་རྩོད་པ་ནི་ལྟུང་བ་སྡེ་ལྔ་པོ་རྣམས་ལས་འཐབ་མོའི་གླེང་གཞིར་གྱུར་པ་སྟེ། དེ་ཀུན་ནས་བསླང་
བའི་འཐབ་མོ་བྱུང་བའོ། །དེའི་རྩ་བ་ནི་ལུས་ལ་སོགས་པའོ། །ལུས་འབའ་ཞིག་པ་ཡང་ཡོད་དེ། ཇི་ལྟར་བསྙེན་པར་མ་རྫོགས་པའི་ཕྱིར་མ་བྱུང་བ་ལས་ཕྱིར་བྱུང་བར་འདུ་ཤེས་ཏེ་ཉལ་བ་དང་། གཉིད་ལོག་པ་ལ་བུད་མེད་ཀྱི་ཡུལ་ཕྱིས་འོངས་ཏེ་ཉལ་ལམ། གཉིད་ཀྱིས་
ལོག་པ་ལས་མལ་ཆེན་པོའི་སྟེང་དུ་གཞག་པའོ། །ངག་འབའ་ཞིག་པ་ཡང་ཡོད་དོ། །ཇི་ལྟར་བུད་མེད་ཀྱི་ཡུལ་ལ་མ་བསམས་པར་ཚིག་དྲུག་གམ་བདུན་དུ་ཐལ་བའོ། །ལུས་དང་སེམས་གཉི་གའི་བར་ཡང་ཡོད་དེ། ཇི་ལྟར་སྲོག་གཅོད་པ་དང་། ཆང་འཐུང་བ་སྟེ།
ཚིག་ཏུ་མི་སྨྲའོ། །ངག་དང་སེམས་གཉིས་ཀྱི་ཡང་ཡོད་དེ། ཇི་ལྟར་བསམས་བཞིན་དུ་ཚིག་དྲུག་གམ་བདུན་དུ་ཐལ་བའོ། །ལུས་དང་ངག་དང་སེམས་ཀྱི་ཡང་ཡོད་དེ། འདི་ལྟ་སྟེ། སྲོག་གཅོད་པ་དེ་ཉིད་ལ་ངག་གིས་ཀྱང་བསྔགས་པའོ། །བྱ་བའི་ཕྱིར་རྩོད་པ་ནི་གསོལ་བ་ལ་

སོགས་པ་བྱ་བ་འཐབ་མོའི་གླེང་གཞིར་འགྱུར་བ་སྟེ། དེས་ཀུན་ནས་བསླང་བ་ལས་འཐབ་མོ་བྱུང་བའོ། །དེའི་རྩ་བ་ནི་གསོལ་བ་ལ་སོགས་པ་བྱ་བ་ཡིན་ཏེ། ལྷག་མ་རྣམས་ནི་སྔ་མ་བཞིན་ཏེ་རྩོད་པ་དག་ནི་སྨྲས་ཟིན་ཏོ། །ཞི་བར་བྱ་བ་བརྗོད་པར་བྱའོ། །འགྱེད་པའི་ཕྱིར་རྩོད་པ་ནི་མངོན་
སུམ་གྱིས་འདུལ་བ་དང་། གང་ཚུལ་ཤིང་མང་པོ་ལེན་པས་སོ། །གང་ཟག་གསུམ་སྟེ། དོན་སྦྱིན་པར་བྱེད་པ་དང་། དོན་སླར་སྦྱིན་པར་བྱེད་པ་དང་། སྐམ་ལ་གནས་པ་རྣམས་སོ། །དེ་ལ་དོན་སྦྱིན་པར་བྱེད་པས་དོན་རྣམ་པ་བཅུ་དྲུག་པོ་རྣམས་སུ་ཤིན་ཏུ་བསམས་ན་གཟུང་བར་
བྱ་སྟེ། བདེན་པ་དང་། དུས་དང་། ཚོད་དང་། དོན་དུ་ལྡན་པ་དང་། མཐོང་བ་དང་། ཐོས་པ་དང་། དོགས་པ་དང་། ལུས་དང་། ངག་དང་། གྲོང་དང་། དགོན་པ་དང་། མཚན་མོ་དང་། ཉིན་པར་བྱས་པ་དང་། ལྷག་མ་མ་ལུས་པ་དང་། བསླང་བར་ནུས་པའོ། །དེའི་ཚིག་གཟུང་
བར་མི་བྱ་བ་རྣམ་པ་ལྔ་སྟེ། དོན་གཏན་ལ་མ་ཕེབས་པ་དང་། གཅིག་ནས་གཅིག་ཏུ་བརྒྱུད་པའི་ཚིག་དང་། བསྙེན་པར་མ་རྫོགས་པའི་ཚིག་དག་ལས་དོན་དུ་འཛིན་པ་དང་། མདོ་སྡེ་དང་གནས་མི་ཤེས་པ་རྣམས་ཀྱིས་སོ། །སླར་བཟློག་པ་ལྔ་པོ་རྣམས་ཀྱིས་ནི་གཟུང་བར་བྱའོ། །
དོན་སླར་སྦྱིན་པར་བྱེད་པས་ཀྱང་རྣམ་པ་བཅུ་དྲུག་པོ་རྣམས་དང་ཉེ་བ་འདི་རྣམས་ཁོ་ན་ཤིན་ཏུ་བསམས་ལ་སྐབས་དབྱེ་བར་བྱའོ། །ཅི་འདི་ཚུལ་ཁྲིམས་དང་ལྡན་པ་ཡིན་ནམ། འགྱོད་པ་ཅན་ནམ། མང་དུ་ཐོས་པའམ། འདུལ་བ་གཏན་ལ་ཕེབས་པ་ཡིན་ནམ། ཅི་
མཐོང་བ་ལས་གླེང་བར་བྱེད་དམ་ཞེས་བྱ་བ་ལ་སོགས་པ་བཅུ་གཉིས་ནི་སྔ་མ་བཞིན་ནོ། །རྣམ་པ་ལྔས་ནི་ཚིག་གཟུང་བར་མི་བྱ་སྟེ། མཚམས་སྦྱོར་བར་ལུང་མི་སྟོན་པ་དང་། གཞན་ནས་གཞན་དུ་འཕོ་བ་དང་། ཕྱོགས་ལ་བརྟེན་ཏེ་ལྟུང་བ་ཁས་ལེན་པ་ལ་ཡང་རུང་བ་མེད་པར་
སྟོན་པ་དང་། དགེ་སློང་རྣམས་ལ་སྐུར་པ་འདེབས་པ་དང་། གུས་པ་མེད་པའོ། །སླར་བཟློག་པ་ནི་གཟུང་བར་བྱའོ། །དོན་སྦྱིན་པར་བྱེད་པ་དང་། དོན་སླར་སྦྱིན་པར་བྱེད་པ་དག་རྩོད་པའི་ཉེས་དམིགས་ཏེ་ཉེ་བར་ཞི་བའི་ཡོན་ཏན་དུ་མཐོང་བ་དག་གིས་སྐམ་ལ་གནས་པ་ཆོས་

བཅུ་དྲུག་དང་ལྡན་པ་བཙལ་པར་བྱའོ། །ཚུལ་ཁྲིམས་དང་བསླབ་པ་འདོད་པ་དང་། ཐོས་པ་དང་། འདུལ་བ་ལ་མཁས་པ་དང་། སྐམ་ལ་གནས་པ་དང་། ཆོས་བཞིན་མ་འདྲེས་པ་དང་། འདུན་པ་ལ་སོགས་པས་མི་འགྲོ་བ་དང་། འདོད་ཆགས་
དང་། ཞེ་སྡང་གིས་མ་ཡིན་པ་དང་། རྒྱལ་བའི་བཀའ་ལས་མི་འདའ་བ་དང་། མ་བཅས་པ་ལས་མི་འཆའ་བ་དང་། བཅས་པ་ལས་ཀུན་དུ་མི་གཅོད་པ་དང་། ཆོས་དེ་ཉིད་ཉེ་བར་ཞི་བར་ནུས་པ་དང་། སློང་བར་ནུས་པའོ། །སྐམ་ལ་གནས་པ་ལ་གསུམ་སྟེ། གང་
ལུས་དང་ངག་གི་མི་བསྡམས་པ་སྟེ། ཕྱོགས་གཉི་གའི་ཐད་དུ་བྱ་བ་བདག་ཉིད་སོང་ནས་དཀྲུགས་པར་བྱེད་པ་དང་། གང་དག་མ་བསྡམས་པ་སྟེ། གང་ཕོ་ཉས་དང་། གཉི་གས་བསྡམས་པ་སྟེ། དེ་ལྟ་བུར་བསྐོ་བར་བྱའི་སྔ་མ་དག་ནི་མ་ཡིན་ནོ། །བྱིས་པ་རྣམས་ནི་ལྔ་སྟེ། ཆོས་མ་ཡིན་པའི་
ཕྱིར་འཇུག་པ་དང་། རྩོད་པར་གྱུར་པ་བཟུང་ནས་སྟོབས་པ་དང་། སྐམ་ལ་གནས་པ་གཞན་གྱི་མདོ་སྡེ་སུན་འབྱིན་པ་དང་། སོ་སོར་ཐར་པས་དགེ་སློང་རྣམས་གནས་ནས་འབྱིན་པ་དང་། མ་གུས་པའོ། །སླར་བཟློག་པ་ལྔ་པོ་རྣམས་ཀྱིས་ནི་གསལ་བའོ། །སྐམ་ལ་གནས་
པས་རྩོད་པ་གཟུང་བ་ཞི་བར་ཁས་བླངས་པ་དང་། བདག་ཉིད་ལ་རྣམ་པ་བརྒྱད་རྣམས་སུ་བརྟག་པར་བྱ་སྟེ། ཅི་བདག་གིས་ཐོག་མ་ཅི་ལས་བྱུང་ཤེས་སམ། བདག་གིས་གྲོགས་པོ་སྐམ་ལ་གནས་པ་ཡོད་དམ། སྔོན་འདྲིས་པར་གྱུར་པ་མ་ཡིན་ནམ། ཅི་བདག་གི་ཚིག་འཛིན་
ནམ། ལྟུང་བ་རྣམ་པར་སྦྱང་བར་ནུས་སམ། ཤེས་པར་ནུས་སམ། ཆོས་བཞིན་དུ་ཉེ་བར་ཞི་བར་ནུས་སམ། ཅི་མི་དགེ་བ་ལས་སློང་བ་ལ་མཁས་པར་ཡང་ངོ་། །གཞན་ལ་ཡང་རྣམ་པ་བརྒྱད་རྣམས་སུ་སྟེ། འདི་ན་འདི་ལྟར་རྒྱལ་བའི་གསུང་བརྟན་པར་བྱེད་པ་མདོ་སྡེ་ལ་
སོགས་པ་འཛིན་པ་ལྟ་ཡོད་དམ། གང་གླགས་ཚོལ་བ་ལ་སླར་བཟློག་པའི་གནས་བརྟན་ལ་སོགས་པ་ལྟ་ཡོད་དམ། རྒྱལ་པོ་ལ་བརྟེན་ཏམ། མཐུ་ཡོད་པ་ལ་བརྟེན་ཏམ། ཁྱིམ་པ་ལ་བརྟེན་ཏམ། གཞན་ལའམ། དགེ་འདུན་ཉིད་ལས་ཉེ་བར་ཞི་བར་བྱེད་དམ་ཚོལ་

བའོ། །སྐམ་ལ་གནས་པ་དེ་དག་གིས་མངོན་སུམ་དུ་འདུལ་བས་རྩོད་པ་ཞི་བར་བྱའོ། །མངོན་སུམ་དུ་བྱ་བ་རྣམ་པ་གཉིས་ཏེ། གང་ཟག་མངོན་སུམ་དུ་བྱ་བ་ལ་གང་དག་ལ་ཉེ་བར་ཞི་བར་བྱ་བ་དང་། གང་དག་གིས་ཉེ་བར་ཞི་བར་བྱེད་པ་དེ་དག་མངོན་སུམ་དུ་གྱུར་པའོ། །ཆོས་མངོན་
སུམ་དུ་བྱ་བ་ནི་ཆོས་ཇི་ལྟ་བ་དང་། འདུལ་བ་ཇི་ལྟ་བ་བཞིན་ནོ། །དེས་དོན་སྦྱིན་པར་བྱེད་པ་རྣམས་ལ་ཡང་རྣམ་པ་བརྒྱད་དུ་བརྟག་པར་བྱ་སྟེ། ཆོ་ག་དང་། སྦྱོང་ཡུལ་དང་། གྲོགས་པོ་དང་། ཟླ་བོ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། ཐོས་པ་སྟེ། འདི་
དག་སྡིག་པ་ཅན་དག་ཏུ་རིག་ན་མ་སྨྲ་ཤིག་ཅེས་བསྒོ་བར་བྱའོ། །དེ་བཞིན་དུ་དོན་སླར་སྦྱིན་པར་བྱེད་པ་ལ་ཡང་རྣམ་པ་བརྒྱད་དེ། ཅི་སྡིག་པ་ཅན་དུ་ཡིན་ན་ཁྱོད་ཀྱིས་ངག་གི་ལས་ཐོག་མ་ཇི་ལྟ་བུ་ཡིན་ཞེ་ན་དྲི་བ་ཡང་ངོ་། །ཇི་སྐད་དུ་སྨྲ་བ་དེ་བཞིན་དུ་བྱའོ། །རྣམ་པ་བཅུ་
དྲུག་དག་ཏུ་རྗེས་སུ་སྦྱོར་བས་རབ་ཏུ་གནས་པར་བྱ་སྟེ། དོན་སྦྱིན་པར་བྱེད་པ་ཉིད་ནི་རིག་པར་བྱ་བ་དང་། བརྟག་པ་དང་། བཟོད་པ་གསོལ་བ་དང་། དྲི་བ་དང་། དམ་འཆར་གཞུག་པ་དང་། སྤྲོ་བར་བྱའོ། །དེ་བཞིན་དུ་དོན་སླར་སྦྱིན་པར་བྱེད་པ་ལ་ཡང་རྣམ་པ་བཅུ་
གཉིས་དང་། དོན་སླར་སྦྱིན་པར་བྱེད་པས་དམ་བཅས་པ་གཟུང་བ་དང་། མདོ་སྡེ་ཁས་ལེན་པ་དང་ཆོས་བཞིན་དང་འདུལ་བ་བཞིན་དུ་རྩོད་པ་ཚོལ་བའོ། །འདིར་རྣམ་པ་ལྔས་ནི་མི་ནུས་པར་འགྱུར་ཏེ། རྗེས་སུ་བསྟན་པའི་ཚིག་ལྔ་མངོན་དུ་མི་ཤེས་པའི་ཕྱིར་ཏེ། དོན་
སྦྱིན་པར་བྱེད་པ་དང་། དོན་སླར་སྦྱིན་པར་བྱེད་པ་དང་། ཆོས་དང་རྗེས་སུ་མཐུན་པར་སྦྱོར་བ་དང་། ཆོས་མ་ཡིན་པ་དང་རྗེས་སུ་མཐུན་པར་སྦྱོར་བ་དང་། དམ་འཆའ་བ་རྗེས་སུ་མི་འཛིན་པའོ། །རྣམ་པ་ལྔས་ཞི་བར་མི་ནུས་ཏེ། རྩོད་པའི་རང་བཞིན་དང་ཀུན་ནས་སློང་བ་དང་།
གཟུང་བ་དང་། ཚར་གཅད་པ་དང་། ཉེ་བར་ཞི་ནས་ཡང་མི་འབྱུང་བར་མི་ཤེས་པའོ། །གཞན་ཡང་རྣམ་པ་ལྔ་སྟེ། འཁྲུལ་བ་དང་། གསང་སྟེ་སྨྲས་པ་དང་། ནོར་བར་སྨྲས་པ་དང་། གློ་བུར་དུ་སྨྲས་པ་འཛིན་པ་དང་། སྨྲས་པ་ཡང་ཇི་སྲིད་ལན་གསུམ་གྱི་བར་དུ་དམ་

འཆར་མི་གཞུག་པའོ། །གནས་བཅུ་དྲུག་ཏུ་ལྟུང་བ་བསྟན་པར་བྱ་བ་སྟེ། ལྕི་བ་དང་། ཡང་བ་དང་། ལྷག་མ་ལུས་པ་དང་། ལྷག་མ་མ་ལུས་པ་དང་། གནས་ངན་ལེན་པ་དང་། ལུས་ཀྱི་དང་། ངག་གི་དང་། དགེ་བ་དང་། མི་དགེ་བ་དང་།
ལུང་དུ་མ་བསྟན་པ་དང་། བཅབས་པ་དང་། མ་བཅབས་པ་དང་། བཤགས་པ་དང་། བསྡམ་པར་བྱ་བ་དང་། ཉེས་པར་བཤད་པར་གཏོགས་པ་དང་། །འདུལ་བ་དང་འགལ་བར་གྱུར་པའི་དབྱེ་བ་རྣམས་ཏེ། དེ་ལ་སྡིག་པ་ལ་སོགས་པའི་ཆད་པའི་ལས་བྱའོ། །ཡང་ཆང་
པའི་ལས་རྣམ་པ་བཅུ་དྲུག་སྟེ། ཚངས་པ་དང་། བསྐྲད་པ་དང་། ལོངས་སྤྱོད་དུ་མི་གཞུག་པ་དང་། བསྙིལ་བར་བྱ་བ་དང་། གང་ངོ་བོ་ཉིད་ཚོལ་དུ་གཞུག་པ་དང་། སྤྱོ་བར་བྱ་བ་དང་། སྨད་པར་བྱ་བ་དང་། གནས་ནས་དབྱུང་བར་བྱ་བ་དང་། ཕྱོགས་མེད་པར་བྱ་བ་དང་། ཞུམ་པ་དང་། སྨ་དབབ་
པར་བྱ་བ་དང་། འགྱོད་པ་དང་། རྣམ་པར་འགྱོད་པ་དང་། རབ་ཏུ་རྣམ་པར་འགྱོད་པར་བྱེད་དུ་གཞུག་པ་དང་། ཉེ་བར་བསྡུ་བར་བྱ་བ་དང་། བརྗོད་པ་དང་བཅས་པ་དང་། ཕུར་པ་དང་བཅས་པ་དང་། རོ་བཞིན་དུ་བྱ་བའོ། །རྣམ་པ་བཅུ་དྲུག་གི་ལས་བྱས་ཏེ། མངོན་སུམ་དུ་
གྱུར་པ་དང་། བྱ་བའི་སྐབས་ཕྱེ་བ་དང་། གླེངས་པ་དང་། དྲན་པར་བྱས་པ་དང་། རང་གིས་ཁས་བླངས་པ་དང་། ཕ་རོལ་པོས་ཁས་བླངས་པ་དང་། རྗེས་སུ་མཐུན་པར་སྦྱོར་བ་བརྟགས་པ་དང་། རྗེས་སུ་མཐུན་པར་སྦྱོར་བ་བརྟག་མི་དགོས་པ་དང་། དྲིས་པ་དང་། དྲི་
མི་དགོས་པ་དང་། ཁས་ལེན་དུ་བཅུག་པ་དང་། ཁས་ལེན་དུ་མ་བཅུག་ཀྱང་རུང་ངོ་། །རྣམ་པ་བཅུ་དྲུག་གི་བར་ན་རྩོད་པ་ཞི་བར་འགྱུར་ཏེ། ཆོས་བཞིན་དང་། དགེ་འདུན་གྱིས་བསྒོ་བ་དང་། རྒྱལ་བའི་གསུང་བཞིན་རྗེས་སུ་མཐུན་པ་དང་། ཕྱོགས་དང་མི་མཐུན་པའི་
ཕྱོགས་ལ་བསྒོ་བ་དང་། དོན་སྦྱིན་པར་བྱེད་པ་འདུལ་བ་ལ་མི་འགལ་བ་དང་། མ་དག་པའི་ལྟུང་བ་མི་འཆབ་པ་དང་། བྱུང་བ་དང་། བཅས་པ་དང་། རྗེས་སུ་བཅས་པ་དང་། རྗེས་སུ་གནང་བ་དང་། རྗེས་སུ་མི་གནང་བ་སྦྱོར་བ་དང་། དོན་སྦྱིན་པར་བྱེད་པ་དང་། དོན་

སླར་སྦྱིན་པར་བྱེད་པ་དག་གིས་དམ་འཆའ་བ་འཛིན་པར་བྱེད་པ་དང་། མདོ་སྡེ་སྟོན་པའམ། འདུལ་བ་དང་མཐུན་པ་དང་། ཆོས་ཀྱི་མིག་རྒྱས་པར་འགྱུར་བ་དང་། ཆོས་དང་འདུལ་བ་བཞིན་ཞི་བར་བྱེད་པའོ། །སླར་བཟློག་པ་ནི་ཞི་བའོ། །མི་ནུས་ནས་དགེ་
འདུན་རྣམས་ལ་སྤོ་བར་བྱ་སྟེ། དེ་ལ་མངོན་སུམ་སྟེ། དགེ་འདུན་ལ་མངོན་སུམ་དུ་སྤོས་པ་དང་། དེས་ཀྱང་མ་ནུས་ན་གསལ་བ་ལ་གཏད་པར་བྱའོ། །དེ་དག་གིས་ཀྱང་མ་ནུས་ན་གསལ་བའི་ཡང་གསལ་བ་ལ་གཏད་པར་བྱའོ། །དེ་དག་གིས་ཀྱང་མ་ནུས་ན་སླར་
ཡང་དགེ་འདུན་ལ་སྤོ་བར་བྱའོ། །དེ་དག་གིས་ཀྱང་གནས་གང་ན་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་ལ་སྤོ་བར་བྱེད་པའི་དགེ་སློང་བསྐོ་བར་བྱའོ། །དེས་ཀྱང་ཇི་ལྟར་གྱུར་པ་བརྗོད་པར་བྱའོ། །དེ་དག་གིས་ཀྱང་མ་ནུས་ན་རྩོད་པ་སྦེད་
པར་བྱེད་པ་དེ་གཉིས་ལ་གཏད་དོ། །དེས་མདོ་སྡེ་ལ་སོགས་པ་འཛིན་པ་ལ་སྤོའོ། །དེ་དག་གིས་ཀྱང་མ་ནུས་ན་དེ་ཉིད་ལའོ། །དེས་ཀྱང་མ་ནུས་ན་གང་ན་གནས་བརྟན་གཙོ་བོའམ། ཤེས་པ་དེ་ལ་མཐའ་ཉེ་བར་བཟུང་ནས་གཏད་པར་བྱའོ། །དེས་དེ་དག་ལ་ཅི་ཡང་
བདག་གིར་མི་བྱའོ། །ཁ་ཏོན་ལ་སོགས་པ་སྦྱིན་པར་མི་བྱའོ། །མདུན་ནམ་རྒྱབ་ཏུ་འདུག་ན་མ་འགྱེད་ཤིག་མ་འཐབ་ཤིག །གཉི་ག་རྒྱལ་བ་མེད་ཀྱི། འོན་ཀྱང་གཅིག་པུ་ལ་བྱའོ་ཞེས་དེ་སྐད་ཉི་ཚེ་སྨྲ་བར་བྱའོ། །དེས་ཞི་བར་གྱུར་ན་ལེགས་པར་ཞི་བ་ཞེས་བྱ་
བ་སྟེ། དེ་ལྟར་ན་མངོན་སུམ་གྱིས་འདུལ་བ་ཡིན་ནོ། །གལ་ཏེ་གནས་བརྟན་གྱིས་ཀྱང་མ་ནུས་ན་དེས་སྤོ་བར་བྱེད་པ་ཉིད་ལ་གཏད་པར་བྱའོ། །དེས་ཀྱང་དགེ་འདུན་ལའོ། །དགེ་འདུན་གྱིས་ཀྱང་ཚུལ་ཤིང་མང་པོ་ལེན་དུ་བཅུག་ནས་ཞི་བར་བྱའོ། །རྣམ་པ་ལྔར་
དོན་སྦྱིན་པར་བྱེད་པ་དང་། དོན་སླར་སྦྱིན་པར་བྱེད་པ་དག་གིས་རྩུབ་བར་གཟུང་བའི་ཕྱིར་དེ་ལྟར་ན་རྩུབ་པ་ཅན་དང་། གདུག་པར་བྱེད་པའི་ཕྱིར་དེ་ལྟར་གདུག་པ་ཅན་དང་། རབ་ཏུ་འཛིན་པའི་ཕྱིར་དེ་ལྟར་ན་དམ་པོ་ཅན་དང་། དབྱེ་བར་བྱེད་པའི་གཞི་བཅུ་བཞི་འཛིན་པའི་ཕྱིར་དབྱེ་བའི་

བསམ་པ་ཅན་དང་གནས་བརྟན་གྱི་མཐར་ཐུག་གི་བར་དུ་ཕྱིན་ཀྱང་སྦྱོར་བ་གཞན་དུ་མི་འགྱུར་རོ། །ཚུལ་ཤིང་བྲིམ་པ་ལ་རྣམ་པ་བཞི་སྟེ། གང་ན་གནས་བརྟན་ཆོས་བཞིན་དུ་མི་སྨྲ་བ་མང་བ་དེར་ནི་དགབ་པར་བྱ་བ་དང་གོ་བཟློག་པ་དེར་ནི་གསལ་བར་བྱ་བ་དང་།
གང་ན་རྣ་དྲུང་དུ་ཁྱོད་ཀྱི་མཁན་པོ་དེས་ནི་ཆོས་ཀྱི་ཚུལ་ཤིང་བླངས་ཀྱི་ཁྱོད་ཀྱིས་ལོངས་ཤིག་ཅེས་བསྒོ་བ་དང་། གང་ན་ནད་པ་མང་ཞིང་དགེ་འདུན་ཐམས་ཅད་ཀྱི་དང་བཞི་པའོ། །ཚུལ་ཤིང་བྲིམ་པ་ཆོས་དང་ལྡན་པ་མ་ཡིན་པར་ལེན་པ་བཅུ་སྟེ། ཆོས་མ་ཡིན་པར་ལེན་པ་དང་། འདུལ་
བ་དང་རྗེས་སུ་མི་མཐུན་པ་དང་། མ་འདུས་པར་ལེན་པ་དང་། ཆུང་ཟད་ཙམ་གྱིས་ལྷུང་བ་ཆུང་ངུས་དབྱེ་བར་དོགས་པ་དང་། གནས་བརྟན་གྱི་མཐར་མ་ཕྱིན་པར་སྦྱོར་བ་གཞན་དུ་བཟློག་པ་དང་། རྟོག་པ་དང་མི་ལྡན་པ་ཁ་ལོ་སྒྱུར་བར་བྱེད་ཅིང་འདུལ་བ་འཛིན་པ་ལ་སོགས་པ་ལ་མི་འདྲི་བ་དང་
དགེ་འདུན་དབྱེ་བར་བྱ་བའི་ཕྱིར་རོ་སྙམ་དུ་འདུ་ཤེས་པ་དང་། དགེ་སློང་ཆེས་རབ་ཏུ་མང་པོ་དག་ཆོས་མ་ཡིན་པར་སྨྲ་བར་འགྱུར་བར་ཤེས་པ་དང་། དགེ་འདུན་དབྱེ་བར་འགྱུར་རོ་སྙམ་དུ་ཤེས་པ་དང་། ཆོས་མ་ཡིན་པར་སྨྲ་བར་གྱུར་ཀྱང་ཅི་མ་རུང་སྙམ་པའོ། །གོ་བཟློག་པ་བཅུ་ནི་ཆོས་ཡིན་ནོ། །
ཚུལ་ཤིང་བྲིམ་པས་ཚུལ་ཤིང་རྣམ་པ་གཉིས་སུ་བྱ་སྟེ། ཆོས་ཀྱི་ཚུལ་ཤིང་ནི་དབྱིབས་དང་ཁ་དོག་དང་གཟུགས་ཕུན་སུམ་ཚོགས་པ་དང་། ཆོས་མ་ཡིན་པའི་ཚུལ་ཤིང་ནི་སླར་བཟློག་པའོ། །ཆོས་ཀྱི་ཚུལ་ཤིང་ལག་པ་གཡས་པར་གཟུང་བར་བྱའོ། །ཆོས་མ་ཡིན་པའི་ཚུལ་ཤིང་ནི་
ལག་པ་གཡོན་པར་རོ། །དེ་ནས་མདུན་དུ་འདུག་ལ་བསྔགས་པ་དང་། མི་བསྔགས་པ་གཉིས་བརྗོད་པར་བྱའོ། །ཆོས་མ་ཡིན་པའི་ཚུལ་ཤིང་གི་ཕྱིར་ལག་པ་བརྐྱང་ན་ཚིག་དང་པོ་དང་གཉིས་ཀྱི་བར་དུ་སྦྱིན་པར་མི་བྱའོ། །གསུམ་པ་ལ་སྦྱིན་ཏེ་འདུལ་བ་དང་འགལ་བའི་ཉེས་བྱས་
བཤགས་པར་བྱའོ། །གལ་ཏེ་ཆོས་ཀྱི་ཚུལ་ཤིང་གཅིག་གིས་ཀྱང་ཉུལ་བར་འགྱུར་ན་ཀུན་ཤེས་ཀཽཎྜི་ནྱའི་ཕྱིར་གཅིག་བླང་བར་བྱའོ། །གལ་ཏེ་ཆོས་ཀྱི་ཚུལ་ཤིང་གཅིག་གིས་ལྷག་པར་གྱུར་ན་ཆོས་ཀྱིས་རྩོད་པ་ཞི་བ་ཡིན་ཏེ། གང་ཆོས་ཀྱིས་སྐྱོ་སྔོགས་བྱེད་ན་ལྟུང་བྱེད་དོ། །གལ་

ཏེ་ཆོས་མ་ཡིན་པའི་ཚུལ་ཤིང་བླངས་པར་འགྱུར་ན་ཡང་ཆོས་མ་ཡིན་པས་ཞི་བ་ཡིན་ཏེ། དེ་ཡང་སྐྱོ་སྔོགས་བྱས་ན་ཉེས་བྱས་སོ། །དེ་ལྟར་ན་གང་ཚུལ་ཤིང་མང་པོ་བྲིམ་པས་ཞི་བར་གྱུར་བ་ཡིན་ནོ། །མི་བསྡམས་པའི་ཕྱིར་རྩོད་པ་ནི་ཞི་བ་རྣམ་པ་གསུམ་གྱིས་ཞི་བར་བྱ་སྟེ། འགྱེད་པའི་
ཕྱིར་རྩོད་པ་བཞིན་དུ་མངོན་སུམ་གྱིས་འདུལ་བ་དང་། དྲན་པས་འདུལ་བ་སྟེ། ཇི་ལྟར་གྱད་བུ་ནོར་ལ་དགེ་སློང་དག་གིས་གཞི་དེས་གླེངས་པས་ན། ངོ་ཚ་བའི་ཕྱིར་གསོལ་བ་དང་གཉིས་ཀྱི་ལས་ཀྱིས་དྲན་པས་འདུལ་བ་སྦྱིན་པ་དང་། དེ་བཞིན་དུ་དེ་ལ་ལྟུང་བ་གཞན་བྱུང་ན་གཞན་
གྱིས་གླེངས་པ་ན་ལྟུང་བ་ཕྱིར་བཅོས་པ་བྱས་པ་ཡང་ངོ་། །མ་སྨྱོས་པས་འདུལ་བ་སྟེ། ཅི་ལྟར་བྱེ་མ་སྐྱེས་ལ། སྨྱོས་པའི་ཚེ་བྱས་པ་གླེངས་པའི་ཕྱིར་གསོལ་བ་དང་། ལས་བརྗོད་པ་གསུམ་གྱིས་མ་སྨྱོས་པས་འདུལ་བ་སྦྱིན་པའོ། །ཆོས་མ་ཡིན་པར་དྲན་པས་འདུལ་བ་
སྦྱིན་པ་ལ་གསུམ་སྟེ། མཐར་འགྱུར་བའི་ལྟུང་བ་བྱུང་བ་དང་། སྨྱོས་པས་ཉེས་པ་བྱུང་བ་དང་། མེ་བཞི་ལྟུང་བ་འབྱུང་བ་ཤེས་བཞིན་དུ་ཁས་ལེན་པ་ལའོ། །དང་པོ་ནི་བསྙིལ་བར་བྱ་བར་འོས་པ་ཉིད་དོ། གཉིས་པ་ལ་ནི་མ་སྨྱོས་པར་འདུལ་བ་སྦྱིན་པར་འོས་སོ། །གསུམ་པ་ལ་ནི་དེའི་
ངོ་བོ་ཉིད་ཚོལ་དུ་གཞུག་པར་འོས་སོ། །ཆོས་མ་ཡིན་པར་མ་སྨྱོས་པས་འདུལ་བ་སྦྱིན་པར་འོས་པ་གཅིག་སྟེ། གང་སྨྱོས་པ་མ་ཡིན་པས་ན་བདག་སྨྱོས་སོ་ཞེས་ཁས་ལེན་པའོ། །ལྟུང་བའི་ཕྱིར་རྩོད་པ་ཞི་བར་འགྱུར་བ་རྣམ་པ་བཞིས་ཞི་བར་བྱས་ཏེ། དེ་ལ་ཁས་བླང་པར་བྱ་བ་ནི་ཅི་
ལྟར་ལྟུང་བ་བྱུང་བ་ལ་གླེངས་སམ་མ་གླེངས་ཀྱང་རུང་། དྲན་པར་བྱས་སམ་དྲན་པར་མ་བྱས་ཀྱང་རུང་སྟེ། དགེ་སློང་གི་མདུན་དུ་ཚུལ་བཞིན་དུ་འཆགས་པ་འདི་ནི་ཁས་བླངས་པའོ། །ཆོས་མ་ཡིན་པར་ཁས་ལེན་དུ་སྦྱིན་པ་བཅུ་སྟེ། ལྟུང་བ་སྡེ་ལྔ་བྱུང་བ་ལས་མ་བྱུང་ངོ་ཞེས་ཁས་ལེན་པ་དང་།
མ་བྱུང་བ་ལ་བྱུང་ངོ་ཞེས་ཁས་ལེན་པ་དང་། སླར་བཟློག་པ་བཅུ་ནི་ཆོས་དང་མཐུན་པ་ཉིད་དོ། །དེ་ལ་མངོན་སུམ་དུ་དུལ་བ་ནི་རི་དགས་འཛིན་གྱི་བུ་ནག་པོ་ལས་བརྩམས་ཏེ་གང་ཟག་ལ་གླེང་བ་དང་། དེ་བཞིན་དུ་ཆོས་བཞིན་འདུལ་བ་བཞིན་མངོན་སུམ་དུ་མིག་གཞིར་དགེ་འདུན་ལ་གླེང་བའི་བར་དུ་དང་།

དེ་བཞིན་དུ་གཉིས་ཀྱིས་དགེ་འདུན་ལ་གླེང་བའི་བར་དུ་དང་། མང་པོས་དགེ་འདུན་ལ་གླེང་བའི་བར་དུ་དང་། དགེ་འདུན་གྱིས་དགེ་འདུན་ལ་གླེང་བའི་བར་དུའོ། །རྣམ་པ་བཅུ་དྲུག་པོ་དེ་དག་ཉིད་ལ་གཞན་ནི་ཆོས་བཞིན་གྱི་གླེང་བ་ཆོས་མ་ཡིན་ན་མངོན་སུམ་དུ་འདུལ་བ་སྦྱིན་པའི་
རྣམ་པ་བཅུ་དྲུག་ཀྱང་ཆོས་བཞིན་མ་ཡིན་པའོ། །གང་ལ་གླེང་པ་ཆོས་བཞིན་མ་ཡིན་པ་གླེང་བར་བྱེད་པ་ཆོས་བཞིན་ཡིན་ན་མངོན་སུམ་དུ་འདུལ་བ་སྦྱིན་པ་རྣམ་པ་བཅུ་དྲུག་ཀྱང་ཆོས་བཞིན་ནོ། །དེ་ལ་དེའི་ངོ་བོ་ཉིད་ཚོལ་དུ་གཞུག་པ་ནི་དགེ་འདུན་གྱི་ནང་དུ་གང་ལྟུང་བ་བསྙོན་ཏེ། བསྙོན་པ་ལ་ཁས་
ལེན་པ་དང་། ཁས་བླངས་པ་ལས་ཡང་བསྙོན་པ་དེ་ལ་ནི་གསོལ་བ་དང་། གཉིས་ཀྱི་ལས་ཀྱིས་སྦྱིན་པར་བྱ་བ་སྟེ། དེ་ནི་ཆོས་བཞིན་པའོ། །ཁས་བླངས་པ་ལས་བསྙོན་པ་ལས་ཡང་ཁས་ལེན་པ་འདི་ནི་ཆོས་བཞིན་མ་ཡིན་པའོ། །དེ་ལ་རྩྭ་བཀྲམ་པ་ལྟ་བུ་ནི་ཕྱོགས་གཉིས་སུ་ཆད་དེ་གནས་པ་
ལས་ཕྱོགས་ཀྱི་གཙོ་བོ་དག་གིས་རང་རང་གི་ཕྱོགས་ལ་བསྒོ་སྟེ། ཕྱོགས་ཕ་རོལ་པོ་ལ་བཟོད་པར་བྱས་ཏེ་ལྟུང་བའང་བཤགས་པར་བྱའོ། །བདག་དང་ཕྱོགས་ཀྱི་དོན་གྱི་ཕྱིར་གང་ཕྱོགས་གཅིག་གིས་ཕྱོགས་གཉིས་པ་ལ་སྤུ་སྙོལ་བར་བྱེད་འབྱུང་བར་བསྐྱོད། ཕྱག་འཚལ་བ་ཉེ་བར་སྟོན་
གཉིས་པ་ཡང་དེ་བཞིན་ཏེ། ཕན་ཚུན་ལྟུང་བ་གླེང་བར་མི་བྱེད་དོ། །དེ་ལྟར་ན་རྩོད་པ་དེ་རྩྭ་བཀྲམ་པ་ལྟ་བུའི་རྩོད་པ་ཞི་བར་བྱས་པས་ཞི་བ་ཡིན་ནོ། །བྱ་བའི་ཕྱིར་རྩོད་པ་ནི་དགེ་འདུན་འདུས་པས་ཞི་བར་བྱའོ། །ཚངས་པ་ཇི་བཞིན་གཅིག་དེ་བཞིན། །བརྒྱ་བྱིན་ཅི་བཞིན་གཉིས་དེ་བཞིན། །
རྒྱལ་པོ་ཇི་བཞིན་གསུམ་དེ་བཞིན། །དེ་ལ་ལྷག་པ་འཁྲུག་པར་འགྱུར། །ཞི་བར་བགྱི་བ་བདུན་མ་མཆིས་ཀྱང་རྩོད་པ་ཞི་བར་འགྱུར་བ་མཆིས་སམ་ཡོད་སྟེ། གལ་ཏེ་གཉིས་སམ་གསུམ་གང་ཡང་རུང་བ་དུས་བྱས་པའམ། ཁྱིམ་པ་ལ་སོགས་པར་ཤེས་པར་བྱེད་དམ། ནད་ཡུན་རིང་པོས་ཐེབས་
སམ། ཡུལ་གཞན་དུ་སོང་བས་སོ། །དེ་ལྟ་བས་ན་གང་གི་ཚིགས་སུ་བཅད་པ་གཅིག་བཀླག་ཀྱང་དེས་ཆོས་དཀོན་མཆོག་གི་རྙེད་པ་ཡོངས་སུ་ལོངས་སྤྱད་པར་བྱའོ། །འདི་ལ་འགྱོད་པར་མི་བྱའོ། །སློབ་དཔོན་གྱིས་ཀྱང་སྨྲས་པ། རྩོད་པ་རྣམ་པ་བདུན་ལ་ཞི་བར་བྱེད་པ་བདུན་དུ་གནས་ཏེ། རྩོད་

པ་བདུན་པོ་ཇི་ལྟ་བུ་ཞེ་ན། ལྟུང་བ་ལས་བརྩམས་ཏེ་མཚན་ཉིད་ཁས་མི་ལེན་པས་ན་རྩོད་པ་དང་། བྱས་པ་ཁས་མི་ལེན་པས་རྩོད་པ་དང་། རང་དབང་མེད་པར་ཁས་མི་ལེན་པས་རྩོད་པ་དང་། བརྟགས་ནས་ཁས་བླངས་པ་ལ་ཁས་མི་ལེན་པས་རྩོད་པ་དང་ཁས་བླངས་ནས་སྨྱོན་པའི་ཕྱིར་རྩོད་པ་
དང་། མཚན་མ་ལས་རྩོད་པ་དང་། ང་རྒྱལ་གྱི་ཕྱོགས་ཀྱིས་རྩོད་པའོ། །དེ་ལ་དང་པོ་ནི་དགེ་སློང་མངོན་སུམ་དུ་ལྷག་པར་སྤྱོད་པ་མཐོང་བས་གླེངས་ན་དེས་བྱས་པ་དེ་ནི་ཁས་ལེན་ལ་ལྟུང་བའི་མཚན་ཉིད་ནི་ཁས་མི་ལེན་ཏེ། དེ་ལ་དགེ་འདུན་གྱིས་ལྟུང་བ་དང་ལྟུང་བ་མེད་པའི་མཚན་ཉིད་
བརྟགས་ཏེ་གླེངས་ནས་ཤོགས་ཤིག་ཅེས་བསྒོ་བར་བྱའོ། །ཡང་ན་གླེང་བ་དགག་པར་བྱ་སྟེ། དེ་ལྟར་ན་རྩོད་པ་མངོན་སུམ་དུ་འདུལ་བས་ཞི་བར་བྱའོ། །གཞན་ཡང་གང་དང་གང་བྱས་པ་མཐོང་བ་དང་། ཐོས་པ་དང་། དོགས་པས་གླེངས་ནས་བྱས་པ་དེ་རྣམས་མི་དྲན་ཞེས་སྨྲ་ན། དེ་དགེ་འདུན་
གྱིས་གླེང་བའི་དགེ་སློང་ཚུལ་ཁྲིམས་དང་ཆོ་ག་དང་འབྲེལ་བ་བརྟགས་ལ། གླེངས་པ་དེའི་དྲན་པ་ལ་དྲན་པས་འདུལ་བས་རྩོད་པ་དེ་ཞི་བར་བྱའོ། །གཞན་ཡང་རང་དབང་མེད་པར་བྱེད་པ་བྱས་པ་ཁས་མི་ལེན། དེ་ལ་དགེ་འདུན་གྱིས་རང་དབང་མེད་པར་བྱས་པ་བརྟགས་ལ། སྨྱོས་པ་ལ་སོགས་
པ་ལ་ལྟུང་བ་མེད་དོ་ཞེས་བྱ་བ་ནི། མ་སྨྱོས་པས་འདུལ་བས་རྩོད་པ་དེ་ཞི་བར་བྱའོ། །ཁ་ཅིག་ནི་ཡང་ལྟུང་བའམ། ལྟུང་བ་མ་ཡིན་ཞེས་རྟོགས་པ་རྣམས་འཁྲུག་པར་འགྱུར་ཏེ། དགེ་སློང་དག་གིས་རྩོད་པ་མདོ་སྡེ་དང་། འདུལ་བ་དང་། མ་མོ་འཛིན་པ་ལ་གཏད་པར་བྱའོ། །དེ་དག་གི་ལྟུང་
བའམ། ལྟུང་བ་མེད་པ་དེའི་ངོ་བོ་ཉིད་རྟོགས་ལ་གང་དེའི་ངོ་བོ་ཉིད་ཚོལ་དུ་གཞུག་པས་གང་རྩོད་པ་ཞི་བར་བྱས་པའོ། །གཞན་ཡང་ལྟུང་བ་ཁས་བླངས་ནས་ཡང་བསྙོན་ལ་བསྙོན་ནས་ཡང་ཁས་ལེན་ན་དེ་ལ་དགེ་འདུན་གྱིས་ཅི་འདི་མང་པོ་དེ་མང་པོ་རྣམས་ཀྱི་ཐད་དུ་ཁས་བླངས་སམ། འོན་
ཏེ་བསྙོན་ཞེས་བརྟག་པར་བྱའོ། །གང་རྣམ་པ་མང་དུ་འདོད་པས་རྩོད་པ་དེ་ཞི་བར་བྱའོ། །གཞན་ཡང་རྩོད་པའི་གནས་སུ་མི་འགྱུར་ཏེ། གང་བདག་ཉིད་ཀྱིས་ལྟུང་བ་མཐོང་ཞིང་བཤགས་ཏེ་རྩོད་པའི་མཚན་མ་ཉིད་ཞི་བར་བྱའོ། །དེ་ལྟར་ཁས་བླངས་པས་རྩོད་པ་དེ་ཞི་བ་ཡིན་ནོ། །གཞན་

ཡང་བདག་ཅག་གི་ཕྱོགས་ལ་གླེངས་སོ་ཞེས་ཏེ། ང་རྒྱལ་མངོན་དུ་བཟུང་ནས་ཕྱོགས་དང་ཕྱི་རོལ་པའི་ཕྱོགས་སུ་གནས་པར་འགྱུར་རོ། །དེ་ལ་ཕྱོགས་ཏེ་གཉི་གའི་གཙོ་བོ་དག་གིས་རང་གི་ཕྱོགས་ལ་བསྒོ་ལ། དེ་ལ་རྗེས་སུ་གནང་ན་ཕྱོགས་གཉིས་པ་ལ་ཡང་བསྒོ་བར་
བྱའོ། །དེ་ལྟར་ན་རྩོད་པ་དེ་རྩྭ་བཀྲམ་པ་ལྟ་བུས་ཞི་བར་བྱའོ། །དགེ་སློང་གི་སྤྱོད་པ་བཅུ་སྟེ། ལྡོག་པ་དང་། མི་བཟོད་པ་དང་། མ་རྟོགས་པ་དང་། དགེ་འདུན་ལ་རག་ལས་པ་དང་། དགེ་བསྙེན་མ་བསྟེན་པ་དང་། ཡོད་བྱད་ཡོངས་སུ་ལོངས་སྤྱོད་པ་དང་། དགེ་སློང་དང་། དགེ་སློང་མ་དང་། ཁྱིམ་པ་ཐ་སྙད་དང་།
བསོད་སྙོམས་ལ་མགྲོན་དུ་བོས་ཤིང་བདག་གིར་བྱེད་པ་དང་། དེར་ཡང་ཆོ་ག་བཞིན་དུ་སྤྱད་པ་དང་། ཕན་ཚུན་གླེང་བར་བྱེད་པ་སྟེ། འདི་དག་ནི་སོ་སོར་ཐར་པའི་ལུས་སོ། །དེ་རྣམ་པ་བཅུ་ལ་སྤྱོད་པའི་ཚེ། རྣམ་པ་གཉིས་ལས་ཉོན་མོངས་པའི་ལྟུང་བ་འབྱུང་ངོ་། །རིང་བ་ལས་ཏེ། གང་དྲན་པ་ཉམས་པར་གྱུར་པ་
ལས་ཁ་ན་མ་ཐོ་བ་དང་བཅས་པའི་ལྟུང་བ་འབྱུང་བར་བྱེད་པ་དང་། ཉེ་བ་ལས་ཏེ། གང་བདག་ཉིད་མངོན་སུམ་དུ་གྱུར་ཅིང་ལྟུང་བ་འབྱུང་བར་བྱེད་པའོ། །དེ་ལ་དགེ་སློང་གིས་གླེང་གཞི་ལས་བྱུང་བའི་མཚན་མོ་ཡོངས་སུ་སྤངས་པ་དེ་ཉེ་བར་ཞི་བར་བྱའོ། །དེས་ཀྱང་ཞི་བར་མི་འགྱུར་ན་གཉེན་པོ་ཡིད་ལ་བྱའོ། །
བདག་ཉིད་ཀྱིས་མི་ནུས་ན་བླ་མའི་གནས་ལྟ་བུ་དང་། མདོ་སྡེ་དང་། འདུལ་བ་དང་། མ་མོ་འཛིན་པ་རྣམས་ལས་གཉེན་པོ་རིག་པར་བྱ་བ་དང་ཡིད་ལ་བྱའོ། །གལ་ཏེ་ཡང་མི་ནུས་ན་ཀློག་པ་དང་། ཁ་ཏོན་བྱ་བ་དང་། དོན་མཉན་པ་དང་། བསམ་པ་དང་། དཀོན་མཆོག་གསུམ་ལ་མཆོད་པ་དང་། བླ་མའི་གནས་
ལྟ་བུ་ལ་ཞལ་ཏའི་ལས་བྱ་བ་དང་། ཡུལ་གཞན་དུ་འགྲོ་བ་དང་། ཟས་བསྐྱུང་བ་ལ་སོགས་པས་དབྲལ་བར་བྱའོ། །གལ་ཏེ་ཡང་མ་ནུས་ན་མ་དག་གཞིན་དུ་དད་པས་སྦྱིན་པ་བདག་གིས་སྤྱད་པར་མི་རིགས་སོ་སྙམ་དུ་ངོ་ཚ་བ་བསྐྱེད་པར་བྱའོ། །སྟོན་པ་གཟིགས་པ་དང་། ལྷ་རྣམས་ཀྱིས་ལྷའི་མིག་གིས་དང་།
ཚངས་པ་མཚུངས་པར་སྤྱོད་པ་རྣམས་ཀྱང་བདག་ལ་ལྟའོ་ཞེས་སོ། །ཅི་སྐད་བསྟན་པ་དེ་བཞིན་དུ་མི་བྱེད་ན་ཐམས་ཅད་ཉེས་བྱས་སོ། །དད་པས་བྱིན་པ་ཡོངས་སུ་ལོངས་སྤྱོད་ན་ཡང་ཉེས་བྱས་སོ། །དེ་བཞིན་དུ་བྱས་པ་ལས་ཀྱང་ཉོན་མོངས་པ་མང་ཞིང་འཁྲུལ་བར་གྱུར་ན་དད་པས་བྱིན་པ་ཡོངས་སུ་ལོངས་སྤྱོད་ཀྱང་ལྟུང་བ་

མེད་དོ། །མཚན་མ་སྤངས་པ་ལ་སོགས་པ་ཐམས་ཅད་བྱས་ཀྱང་བདག་གིས་མི་ནུས་པར་མཐོང་ནས་བསླབ་པ་དབུལ་བར་བྱའོ། །དེའི་ཕྱིར་ཉོན་མོངས་པ་སྤང་བའི་ཕྱིར་སྦྱོར་བར་མི་བྱེད་ན་ལྟུང་བ་མང་དུ་འབྱུང་ངོ་། །དེའི་གླེང་གཞི་འབྱུང་བའི་ཕྱིར་དད་པས་བྱིན་པ་ཡོངས་སུ་ལོངས་སྤྱད་པར་བྱ་བར་མི་རིགས་སོ། །དེ་ལྟ་བས་
ན་དེས་དེ་ཡོངས་སུ་སྤྱོད་ན་ཉོན་མོངས་པ་མང་དུ་འགྱུར་རོ། །རྩོད་པ་ཞི་བར་བྱ་བ་རྫོགས་སོ།། །།བཅོམ་ལྡན་འདས་དེའི་འདི་དག་གོ་ཞེས་བྱ་བ་ནི་རྒྱ་ཆེར་དབྱེ་བའོ། །འདི་ཡང་རྒྱ་ཆེར་བརྗོད་ལ་མདོར་བསྡུས་པ་ཡིན་པ་སྟེ། རྗེས་སུ་གནང་བའང་མ་ལགས་བཀག་པའང་མ་ལགས་པ་དེ་ལ་ཅི་ལྟར་བསྒྲུབ་
པར་བགྱི། ཅི་སྐད་དུ་ཕྲན་ཚེགས་ལས་འབྱུང་བའི་འདུལ་བ་མདོར་བསྡུས་པ་རྗེས་སུ་དྲན་པར་བྱས་ཏེ། དགེ་སློང་རྣམས་ཅི་སྐད་དུ་སྨྲ་བ་ངས་ཐོག་མ་ནས་བཀག་པ་ཡང་མེད་ལ་རྗེས་སུ་གནང་བ་ཡང་མེད་པ་དེ་ནི་གལ་ཏེ་མི་རུང་བ་དང་། རྗེས་སུ་མི་མཐུན་པ་ལ་གལ་ཏེ་རུང་བ་དང་རྗེས་སུ་མཐུན་ན་རུང་བའོ་ཞེས་བྱས་
ལ་སྤྱད་པར་བྱའོ། །རུང་བ་དང་རྗེས་སུ་མི་མཐུན་མི་རུང་བ་དང་རྗེས་སུ་མཐུན་ན་མི་རུང་བའོ་ཞེས་བྱས་ཏེ་སྤྱད་པར་མི་བྱའོ་ཞེས་གསུངས་པ་ལྟ་བུའོ། །མདོར་གཏོགས་པ་ཞེས་བྱ་བ་ནི་ཚིག་ནང་དུ་འདུས་པའོ། །མདོར་བསྡུས་པ་ཞེས་བྱ་བ་ནི་དོན་ནང་དུ་འདུས་པའོ། །གཞན་
ཡང་ཞེས་བྱ་བ་ནི་གཞི་ལ་སོགས་པའི་གཞུང་ལས་འབྱུང་བའོ། །ཆོས་ཀྱི་རྗེས་སུ་མཐུན་པའི་ཆོས་ཞེས་བྱ་བ་ནི་མྱ་ངན་ལས་འདས་པའི་ཆོས་དང་མཐུན་པ་ནན་ཏ