Luận tạng Tây Tạng (Tengyur) — Tập 112

ེས་ནས་ཆགས་པ་མེད་པར་སྤྱོད་དེ། ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། །སྤོང་བ་ལ་དགའ་བ་ཡིན་ཏེ། སྤོང་བ་ལ་མོས་ཤིང་། སྤོང་བ་ལ་དགའ་བའི་སྦྱོར་བ་ལ་བརྩོན་ནོ། །དེ་སྡིག་པ་མི་དགེ་
བའི་ཆོས་རྣམས་སྤངས་པས། དགའ་བར་འགྱུར་ཏེ། མ་སྤངས་པས་ནི་མ་ཡིན་ནོ། །དེ་སྒོམ་པ་ལ་དགའ་བ་ཡིན་ཏེ། སྒོམ་པ་ལ་དགའ་བའི་སྦྱོར་བ་ལ་བརྩོན་ནོ། །དགེ་བའི་ཆོས་བསྒོམས་པས་དགའ་བར་འགྱུར་ཏེ། མ་བསྒོམས་པས་ནི་མ་ཡིན་ནོ། །སྤོང་བ་ལ་དགའ་བ། སྤོང་བ་ལ་མོས་པ།
སྤོང་བ་ལ་དགའ་བའི་སྦྱོར་བ་ལ་བརྩོན་པ། སྒོམ་པ་ལ་དགའ་བ། སྒོམ་པ་ལ་མོས་པ། སྒོམ་པ་ལ་དགའ་བའི་སྦྱོར་བ་ལ་བརྩོན་པ་དེ། བདག་ལ་མི་སྟོད་ཅིང་གཞན་ལ་མི་སྨོད་དོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་གནས་པ་ཡིན་ནོ་

ཞེས་གསུངས་སོ། །སྙིང་རྗེ་ཆེན་པོ་ལ་འཇུག་པའི་མདོ་ལས་ཀྱང་། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་སྙོམས་སྤྱོད་པ་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། དེ་ཤེས་ཀྱི་ཁེ་འདོད་པ་མ་ཡིན་པ་དང་།
དེ་སྙན་པ་འདོད་པ་མ་ཡིན་པ་དང་། དེ་རྙེད་པ་དང་བཀུར་སྟི་འདོད་པ་མ་ཡིན་པ་དང་། དེ་འཕགས་པའི་རིགས་བཞི་ལ་གནས་པ་དང་། དེ་ཚུལ་འཆོས་པ་དང་། ཁ་གསག་མེད་པར་འགྱུར་བ་དང་། བདག་ལ་མི་སྟོད་གཞན་ལ་མི་སྨོད་པ་དང་། དེ་རྗེས་སུ་ཆགས་པ་དང་། དེ་ཁོང་ཁྲོ་བ་སྤངས་པས་གཞན་
གྱི་ཁྱིམ་དུ་སྤྱད་པ་དང་། ཟང་ཟིང་མེད་པར་ཆོས་ཀྱི་སྦྱིན་པ་སྦྱིན་པར་བྱེད་པ་དང་། དེ་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་ཤིང་ཆོས་བསྟན་པ་གཟུང་བར་འགྱུར་བ་ཡིན་ཏེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་སྙོམས་སྤྱོད་པ་སྦྱངས་པའི་ཡོན་ཏན་
ཡོ་བྱད་བསྙུངས་པ་ལ་གནས་པའི་ཕན་ཡོན་ནོ་ཞེས་གསུངས་སོ། །ཡང་མདོ་དེ་ཉིད་ལས། བྱམས་པ་ལ་ཡང་གནས་པ་བདེ་བ་ཡིན། །སྙན་པའི་ཕྲེང་བ་ཕྱོགས་བཞིར་རབ་ཏུ་མཆོད། །རྟག་ཏུ་ཆོག་ཤེས་འདོད་པ་ཉུང་བར་འགྱུར། །དགོན་པར་གནས་ཤིང་སྦྱངས་པའི་ཡོན་ཏན་བརྩོན། །
བསོད་སྙོམས་ལེན་པ་དག་ཀྱང་མི་གཏོང་སྟེ། སྦྱངས་པ་ལ་ཡང་ཡི་དམ་བརྟན་པར་འགྱུར། །རྟག་ཏུ་དང་བར་བཅས་ཤིང་དད་པར་འགྱུར། །ཁོར་མོར་སངས་རྒྱས་བསྟན་ལ་དད་པ་མང་། །དད་པ་མང་བའི་ཕན་ཡོན་འདི་ལགས་ཏེ། །བྱད་བཞིན་བཟང་ཞིང་དབང་པོ་མ་ཉམས་འགྱུར། །ཡང་
དག་འཆད་པ་དེ་ལ་བདག་གནས་ཏེ། །བདག་ནི་རྟག་ཏུ་ནན་ཏན་སྙིང་པོར་བགྱིད། །ནན་ཏན་སྙིང་པོར་བགྱིད་པ་ལྷ་ཀླུ་ཡང་། །རབ་ཏུ་དང་བའི་སེམས་ཀྱིས་རི་མོ་བགྱིད། །ཅེས་གསུངས་སོ། །གཅིག་ལས་འཕྲོས་པའི་མདོ་ལས་ཀྱང་། བསོད་སྙོམས་པ་ལྔ་སྟེ། ལྔ་གང་ཞེ་ན། བསོད་སྙོམས་
པ་སྨྱོན་པ་དང་། བསོད་སྙོམས་པ་གཡེངས་པ་དང་། བསོད་སྙོམས་པ་འདོད་ཆེན་པོ་དང་། བསོད་སྙོམས་པ་མངོན་པའི་ང་རྒྱལ་ཅན་དང་། ཡང་དག་པའི་བསོད་སྙོམས་པ་སྟེ། འདི་དག་ནི་བསོད་སྙོམས་པ་ལྔའོ། །གཞན་ཡང་བསོད་སྙོམས་པ་བདུན་དག་སྟེ། མཐར་ཕྱིན་པའི་བསོད་

སྙོམས་པ་དང་། མཐར་ཕྱིན་པའི་རྗེས་སུ་འགྲོ་བའི་བསོད་སྙོམས་པ་དང་། ངེས་པའི་བསོད་སྙོམས་པ་དང་། མ་ངེས་པའི་བསོད་སྙོམས་པ་དང་། དུས་མ་ཡིན་པར་སྤྱོད་པའི་བསོད་སྙོམས་པ་དང་། མགོ་མཉམ་པའི་བསོད་སྙོམས་པ་དང་། ཡ་བ་ནར་བཏགས་པའི་
བསོད་སྙོམས་པའོ་ཞེས་གསུངས་སོ། །འདུལ་བ་ལས་ཀྱང་། ཅི་ཞིག་བཀག་པ་ལས་སྦྱངས་པའི་ཡོན་ཏན་དགོན་པ་པ་ཉིད་ཡང་དག་པར་ལེན་པར་འགྱུར་ཞེ་ན། བཤད་པ། གྲོང་གི་མཐའ་དགག་པའི་ཕྱིར་དགོན་པ་པ་ཉིད་ཡང་དག་པར་ལེན་པ་ཡིན་ནོ། །དེ་ལ་དགོན་པ་པ་ཉིད་ནི་རྣམ་པ་
གསུམ་སྟེ། ཆེན་པོ་དང་འབྲིང་དང་ཆུང་ངུའོ། །དགོན་པ་པ་ཆེན་པོ་ཉིད་གང་ཞེ་ན། རྡུལ་ཕྲ་རབ་བདུན་ལ་རྡུལ་ལོ། །རྡུལ་བདུན་ལ་སྲོ་མའོ། །སྲོ་མ་བདུན་ལ་ཤིག་གོ། །ཤིག་བདུན་ལ་ནས་སོ། །ནས་བདུན་ལ་སོར་ཚིགས་སོ། །སོར་ཚིགས་བཅུ་གཉིས་ལ་མཐོའོ། །མཐོ་གཉིས་ལ་
ཁྲུའོ། །ཁྲུ་བཞི་ལ་གཞུ་འདོམ་མོ། །གཞུ་འདོམ་ལྔ་ལ་སྲོག་ཤིང་ངོ་། །སྲོག་ཤིང་ཉི་ཤུ་ལ་ངལ་སོའོ། །ངལ་སོ་བརྒྱད་ཅུ་ལ་རྒྱང་གྲགས་སོ། །གཞུ་འདོམ་སྟོང་ཕྲག་བརྒྱད་པོ་དེ་ན་གནས་པ་ནི་དགོན་པ་པ་ཆེན་པོའོ། །དགོན་པ་པ་འབྲིང་ནི་གང་ཞེ་ན། བཤད་པ། གཞུ་འདོམ་སྟོང་ཕྲག་སྟེ་ཁྲུ་
བཞི་སྟོང་ན་གནས་པའོ། །དགོན་པ་པ་ཆུང་ངུ་གང་ཞེ་ན། གཞུ་འདོམ་ལྔ་བརྒྱར་བགྲངས་པ་སྟེ། ཁྲུ་སྟོང་ཕྲག་གཉིས་སུ་འགྱུར་བ་ན་གནས་པའོ། །རྒྱུ་ཅིས་དགོན་པ་པ་ཡིན་ན་ལམ་གྱི་ཚད་ཀྱིས་སམ་རྣམ་པས་ཡིན་ཞེ་ན། བཤད་པ། ལམ་གྱི་ཚད་ཀྱིས་དགོན་པ་པར་རབ་ཏུ་ཤེས་ཀྱི། རྣམ་པས་
ནི་མ་ཡིན་ནོ། །གྲོང་མཐའ་པ་ཡིན་ལ་དགོན་པ་པ་མ་ཡིན་པ་ཡང་ཡོད། དགོན་པ་པ་ཡིན་ལ་གྲོང་མཐའ་པ་མ་ཡིན་པ་ཡང་ཡོད། དགོན་པ་པ་ཡིན་ལ་གྲོང་མཐའ་པ་ཡིན་པ་ཡང་ཡོད། དགོན་པ་པ་མ་ཡིན་ལ་གྲོང་མཐའ་པ་མ་ཡིན་པ་ཡང་ཡོད་དོ། །དེ་ལ་གྲོང་མཐའ་པ་མ་ཡིན་ལ་དགོན་
པ་པ་མ་ཡིན་པ་གང་ཞེ་ན། དགོན་པ་ན་ཡང་གནས་ལ་གྲོང་ལ་རྟོག་པ་རྣམ་པར་རྟོག་པར་བྱེད་ཅིང་། ངེས་པར་འབྱུང་བ་ལ་རྟོག་པར་མི་བྱེད་པ་སྟེ། འདི་ནི་གྲོང་མཐའ་བ་ཡིན་ལ་དགོན་པ་པ་མ་ཡིན་པ་ཞེས་བྱའོ། །དགོན་པ་པ་ཡིན་ལ་གྲོང་མཐའ་པ་མ་ཡིན་པ་གང་ཞེ་ན། གྲོང་མཐར་ཡང་གནས་ལ།

སེམས་ཀྱིས་དབེན་པ་ལ་གཞོལ། དབེན་པ་ལ་འབབ། དབེན་པ་ལ་བབ་པ། བསྲིངས་པ། ངེས་པར་འབྱུང་བ་ལ་དགའ་བ་སྟེ། འདི་ནི་དགོན་པ་ཡིན་ལ་གྲོང་མཐའ་པ་མ་ཡིན་པ་ཞེས་བྱའོ། །དགོན་པ་པ་ཡང་ཡིན་ལ་གྲོང་མཐའ་ཡང་ཡིན་པ་གང་ཞེ་ན། ཉོན་མོངས་པ་རྣམས་དང་མ་འདྲེས་པ་སྟེ།
འདི་ནི་དགོན་པ་པ་ཡང་ཡིན་ལ་གྲོང་མཐའ་པ་ཡང་ཡིན་པ་ཞེས་བྱའོ། །དགོན་པ་པ་ཡང་མ་ཡིན་ལ་གྲོང་མཐའ་པ་ཡང་མ་ཡིན་པ་གང་ཞེ་ན། བཟློག་པ་སྟེ། འདི་ནི་དགོན་པ་པ་ཡང་མ་ཡིན་ལ་གྲོང་མཐའ་པ་ཡང་མ་ཡིན་པ་ཞེས་བྱའོ། །དགོན་པ་ན་གནས་ཤིང་། གཞན་ཡང་དགེ་འདུན་གྱི་བྱ་བ་
དག་དང་། ནད་པའི་བྱ་བ་དག་གི་ཆེད་དམ། ཆོས་ཉན་པའི་དབང་དུ་བྱས་ནས་གྲོང་མཐར་འཇུག་པར་འགྱུར་བ་ན། འདི་ལྟར་གདོན་མི་ཟ་བར་དགོན་པར་འགྲོ་བར་བྱའོ་སྙམ་དུ་སེམས་སྐྱེད་པར་བྱེད་ཅིང་། དེར་གནས་པ་ལ་སྐྱ་རེངས་ཤར་བ་ན་ཡང་སྦྱངས་པའི་ཡན་ལག་འཁྲུག་པར་མི་འགྱུར་རོ། །ཅི་སྟེ་
ཡང་དགོན་པར་འགྲོ་བར་མི་བྱའོ་སྙམ་དུ་སེམས་སྐྱེད་པར་བྱེད་ན། སྐྱ་རེངས་ཤར་བ་དང་ལྷན་ཅིག་སྦྱངས་པའི་ཡན་ལག་འཁྲུག་པར་འགྱུར་རོ། །ཅི་ཞིག་བཀག་པ་ལས་སྦྱངས་པའི་ཡན་ལག་བསོད་སྙོམས་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ་དགེ་འདུན་གྱི་རྙེད་པ་དགག་པའི་ཕྱིར་སྦྱངས་
པའི་ཡོན་ཏན་བསོད་སྙོམས་པ་ཉིད་ཡང་དག་པར་ལེན་པ་ཡིན་ནོ་དེ་ལ་བསོད་སྙོམས་པ་ཉིད་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །བསོད་སྙོམས་བ་ཆུང་ངུ་གང་ཞེ་ན། ཟས་ལྔ་པོ་རྣམས་ལས། གང་ཡང་རུང་བ་མགྲོན་དུ་གཉེར་བའི་ཟས་མི་ལེན་པ་སྟེ། འདི་ནི་བསོད་སྙོམས་པ་ཆུང་
ངུའོ། །བསོད་སྙོམས་པ་འབྲིང་ཉིད་གང་ཞེ་ན། ཟས་ལྔ་པོ་དག་ལས་མགྲོན་དུ་གཉེར་བ་མི་ལེན་ཅིང་། སློང་མོས་མགྲོན་དུ་གཉེར་བ་ཡང་མི་ལེན་ལ། ས་ཕྱོགས་ག་གེ་མོ་ཞེས་བྱ་བ་དང་གྲོང་ག་གེ་མོ་ཞེས་བྱ་བར་ཤོག་ཤིག་ཅེས་བརྡ་བྱེད་པ་སྟེ། འདི་ནི་བསོད་སྙོམས་པ་འབྲིང་ཉིད་དོ། །བསོད་སྙོམས་
པ་ཆེན་པོ་གང་ཞེ་ན། ཟས་ལྔ་པོ་དག་ལས་གང་ཡང་རུང་བ་ལ་མགྲོན་དུ་གཉེར་བའི་ཟས་མི་ལེན། སློང་མོས་མགྲོན་དུ་གཉེར་བ་ཡང་མི་ལེན། བརྡ་བྱས་པར་ཡང་མི་འགྲོ་ཞིང་། ཁྱིམ་གྱི་སྒོར་གནས་པ་ཉིད་ཀྱིས་བསོད་སྙོམས་ལེན་པ་སྟེ། འདི་ནི་བསོད་སྙོམས་པ་ཆེན་པོའོ། །ཅི་ཞིག་བཀག་

པ་ལས་སྦྱངས་པའི་ཡན་ལག་ཕྱག་དར་ཁྲོད་པ་ཉིད་ཡང་དག་པར་ལེན་པ་ཡིན་ཞེ་ན། ཁྱིམ་བདག་གི་གོས་དགག་པའི་ཕྱིར་སྦྱངས་པའི་ཡན་ལག་ཕྱག་དར་ཁྲོད་པ་ཉིད་ཡང་དག་པར་ལེན་པ་ཡིན་ནོ། །དེ་ལ་ཕྱག་དར་ཁྲོད་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་
པོའོ། །ཕྱག་དར་ཁྲོད་པ་ཆུང་ངུ་གང་ཞེ་ན། བྱི་བས་ཟོས་པ་དང་གྲོག་མས་ཟོས་པ་དང་རྣམ་པར་ཚིག་པ་དང་། དུམ་བུར་བཅད་ནས་ཧྲལ་ཏེ་ཆེད་དུ་བྱས་ནས་བོར་བ་དེ་ལེན་པ་སྟེ་འདི་ནི་ཕྱག་དར་ཁྲོད་པ་ཆུང་ངུའོ། །ཕྱག་དར་ཁྲོད་པ་འབྲིང་ཉིད་གང་ཞེ་ན། ཆེད་དུ་བྱས་ནས་བོར་བ་མི་ལེན་ཅིང་། གང་སྔར་
བྱས་པ་མ་ངེས་པར་བོར་བ་དེ་ལེན་པ་སྟེ། འདི་ནི་ཕྱག་དར་ཁྲོད་པ་འབྲིང་ཉིད་དོ། །ཕྱག་དར་ཁྲོད་པ་ཆེན་པོ་གང་ཞེ་ན། བྱི་བས་ཟོས་པ་ལ་ཧྲལ་ཏེ་ཆེད་དུ་བྱས་ནས་བོར་བའི་བར་དུ་ལེན་ཅིང་། དུར་ཁྲོད་དང་ཕྱག་དར་ཁྲོད་དང་ལམ་དུ་ལྷུང་བ་རྙེད་ནས་ལེན་པ་སྟེ། འདི་ནི་ཕྱག་དར་ཁྲོད་པ་ཆེན་པོའོ། །
ཅི་ཞིག་བཀག་པ་ལས་སྦྱངས་པའི་ཡན་ལག་ཟས་ཕྱིས་མི་ལེན་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། ཟས་ལྷག་པ་དགག་པའི་ཕྱིར་སྦྱངས་པའི་ཡན་ལག་ཟས་ཕྱིས་མི་ལེན་པ་ཉིད་ཡང་དག་པར་ལེན་པ་ཡིན་ནོ། །དེ་ལ་ཟས་ཕྱིས་མི་ལེན་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་
དང་ཆེན་པོའོ། །ཟས་ཕྱིས་མི་ལེན་པ་ཆུང་ངུ་གང་ཞེ་ན། སྟན་མ་བོར་བ་བཞིན་དུ་ཟོས་ནས་ཀྱང་མ་བཀྲུས་པར་ཟ་བ་སྟེ། འདི་ནི་ཟས་ཕྱིས་མི་ལེན་པ་ཆུང་ངུའོ། །ཟས་ཕྱིས་མི་ལེན་པ་འབྲིང་ཉིད་གང་ཞེ་ན། གང་ཞིག་ཟ་བཞིན་དུ་བསྟབས་པ་ལྷག་མ་མེད་པར་ཟ་བ་དེ་ནི་ཟས་ཕྱིས་མི་ལེན་པ་འབྲིང་པོ་
ཉིད་དོ། །ཟས་ཕྱིས་མི་ལེན་པ་ཆེན་པོ་གང་ཞེ་ན། ཟ་བཞིན་དུ་མི་ལེན་ཅིང་། ཟོས་ནས་ཀྱང་མི་ལེན་པ་སྟེ། འདི་ནི་ཟས་ཕྱིས་མི་ལེན་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་སྟན་གཅིག་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། སྟན་ཐ་དད་ལ་ཟ་བ་
དགག་པའི་ཕྱིར། སྦྱངས་པའི་ཡན་ལག་སྟན་གཅིག་པ་ཉིད་ཡང་དག་པར་ལེན་པ་ཡིན་ནོ། །དེ་ལ་སྟན་གཅིག་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །སྟན་གཅིག་པ་ཆུང་ངུ་གང་ཞེ་ན། སྟན་མ་སྤངས་པར་དུས་ཇི་སྲིད་ཀྱི་བར་དུ་ཟ་བ་སྟེ། འདི་ནི་སྟན་གཅིག་པ་ཆུང་ངུའོ།

སྟན་གཅིག་པ་འབྲིང་ཉིད་གང་ཞེ་ན། ཟོས་ནས་ཀྱང་ཟས་བསོད་པ་རྙེད་པ་ལེན་པ་སྟེ། འདི་ནི་སྟན་གཅིག་པ་འབྲིང་ཉིད་དོ། །སྟན་གཅིག་པ་ཆེན་པོ་གང་ཞེ་ན། གང་ཞིག་ཟ་བཞིན་པ་དང་ཟོས་ནས་ཟས་རྙེད་ཀྱང་མི་ཟ་བར་སྔར་བསླངས་བ་ཟོས་ནས་འགྲོ་བ་སྟེ། འདི་ནི་སྟན་གཅིག་པ་ཆེན་པོའོ། །
ཅི་ཞིག་བཀག་པ་ལས་སྦྱངས་པའི་ཡན་ལག་ལྷུང་བཟེད་ཀྱི་བསོད་སྙོམས་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། སྣོད་གཞན་དགག་པའི་ཕྱིར་སྦྱངས་པའི་ཡན་ལག་ལྷུང་བཟེད་ཀྱི་བསོད་སྙོམས་པ་ཉིད་ཡང་དག་པར་ལེན་པ་ཡིན་ནོ། །དེ་ལ་ལྷུང་བཟེད་ཀྱི་བསོད་སྙོམས་པ་ཉིད་ནི་རྣམ་
པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །ལྷུང་བཟེད་ཀྱི་བསོད་སྙོམས་པ་ཆུང་ངུ་གང་ཞེ་ན། གང་ཞིག་ལག་པ་གཉིས་ཀྱིས་བཅད་ནས་བཟའ་བར་ནུས་པ་སྟེ། འདི་ནི་ལྷུང་བཟེད་ཀྱི་བསོད་སྙོམས་པ་ཆུང་ངུའོ། །ལྷུང་བཟེད་ཀྱི་བསོད་སྙོམས་པ་འབྲིང་ཉིད་གང་ཞེ་ན། གང་ཞིག་ལག་པ་
གཅིག་གིས་བཅད་ནས་ཟ་བར་ནུས་པ་སྟེ། འདི་ནི་ལྷུང་བཟེད་ཀྱི་བསོད་སྙོམས་པ་འབྲིང་དུ་འདོད་དོ། །ལྷུང་བཟེད་ཀྱི་བསོད་སྙོམས་པ་ཆེན་པོ་གང་ཞེ་ན། ལག་པ་གཅིག་གིས་བཅད་ནས་མ་ཡིན། ཁས་བཅད་ནས་མ་ཡིན། འཇིག་པར་མི་བྱེད་འཇིག་ཏུ་འཇུག་པར་མི་བྱེད་ཅིང་། གང་
བཤིག་ནས་རྙེད་པ་ཟ་བ་སྟེ། འདི་ནི་ལྷུང་བཟེད་ཀྱི་བསོད་སྙོམས་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་མཐར་གྱིས་སློང་བའི་བསོད་སྙོམས་པ་ཡང་དག་པར་ལེན་པ་ཡིན་ཞེ་ན། བཤད་པ། མཐོན་པོའི་ཁྱིམ་དགག་པའི་ཕྱིར་སྦྱངས་པའི་ཡན་ལག་མཐར་གྱིས་སློང་བའི་
བསོད་སྙོམས་པ་ཡང་དག་པར་ལེན་པ་ཡིན་ནོ། །དེ་ལ་མཐར་གྱིས་སློང་བའི་བསོད་སྙོམས་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །མཐར་གྱིས་སློང་བའི་བསོད་སྙོམས་པ་ཆུང་ངུ་གང་ཞེ་ན། གང་ཞིག་གྲོང་དུ་བསོད་སྙོམས་ལ་ཕྱིན་པ་ན་ཀུན་དགའ་ར་བར་གནས་པས་རྙེད་པ་སྟེ། འདི་
ནི་མཐར་གྱིས་སློང་བའི་བསོད་སྙོམས་པ་ཆུང་ངུའོ། །མཐར་གྱིས་སློང་བའི་བསོད་སྙོམས་པ་འབྲིང་ཉིད་གང་ཞེ་ན། བསོད་སྙོམས་ལ་འགྲོ་བ་ན་ཀུན་དགའ་ར་བ་ན་གནས་པས་མི་ལེན་ཅིང་བར་གྱི་ལམ་དུ་རྙེད་པ་ལེན་པ་སྟེ། འདི་ནི་མཐར་གྱིས་སློང་བའི་བསོད་སྙོམས་པ་འབྲིང་ཉིད་དོ། །མཐར་གྱིས་

སློང་བའི་བསོད་སྙོམས་པ་ཆེན་པོ་གང་ཞེ་ན། ཀུན་དགའ་ར་བར་གནས་ནས་ཀྱང་མི་ལེན་ཅིང་བར་གྱི་ལམ་དུ་ཡང་མི་ལེན་ལ། གྲོང་ངམ་གྲོང་གི་ཉེ་འཁོར་དུ་རྙེད་པ་ལེན་པ་སྟེ། འདི་ནི་མཐར་གྱིས་སློང་བའི་བསོད་སྙོམས་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་
དུར་ཁྲོད་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། དགེ་འདུན་གྱི་ཀུན་དགའ་ར་བ་དགག་པའི་ཕྱིར། སྦྱངས་པའི་ཡན་ལག་དུར་ཁྲོད་པ་ཉིད་ཡང་དག་པར་ལེན་པ་ཡིན་ནོ། །དེ་ལ་དུར་ཁྲོད་པ་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །དུར་ཁྲོད་པ་ཆུང་ངུ་གང་ཞེ་ན། གང་སྔོན་དུར་
ཁྲོད་དུ་གྱུར་ནས་ཕྱིས་དུར་ཁྲོད་མ་ཡིན་པར་གྱུར་པ་དེར་གནས་པ་སྟེ། འདི་ནི་དུར་ཁྲོད་པ་ཆུང་ངུའོ། །དུར་ཁྲོད་པ་འབྲིང་ཉིད་གང་ཞེ་ན། གང་དུ་རོ་ཉུང་བ་བསྐྱལ་བར་གྱུར་པ་དེར་གནས་པ་སྟེ། དེ་ནི་དུར་ཁྲོད་པ་འབྲིང་ཉིད་དོ། །དུར་ཁྲོད་པ་ཆེན་པོ་གང་ཞེ་ན། གང་དུར་ཁྲོད་ཆེན་པོར་གནས་པ་འདི་ནི་དུར་ཁྲོད་
པ་ཆེན་པོ་སྟེ། དཔེར་ན་བཙུན་པ་གཞོན་ནུའི་རྟོགས་པ་བརྗོད་པ་བཞིན་ནོ། །སིང་གྷ་ལའི་གླིང་དུ་ལོ་དྲུག་ཅུ་དུར་ཁྲོད་ན་གནས་པ་ན། བཙུན་པ་འདི་ནི་དུར་ཁྲོད་པ་ཞིག་གོ་ཞེས་སུས་ཀྱང་མ་ཤེས་སོ། །ལོ་དྲུག་ཅུ་འདས་པ་ན་དུར་ཁྲོད་ཆེན་པོ་དེར་གནོད་སྦྱིན་ཆེན་པོ་མདངས་འཕྲོག་པ་རྣམས་འདུས་པར་གྱུར་ལ།
བཙུན་པ་དེ་ཡང་དུར་ཁྲོད་དུ་དོང་པར་གྱུར་ཏོ། །གང་དུར་ཁྲོད་དེ་ན་དུར་ཁྲོད་ན་རྒྱུན་དུ་གནས་པའི་གནོད་སྦྱིན་དེ་མིའི་ཆ་བྱད་ཀྱིས་ལམ་གྱི་དབུས་ན་བཙུན་པའི་མདུན་དུ་འདུག་སྟེ་འདི་སྐད་ཅེས་སྨྲས་སོ། །བཙུན་པ་གང་དུ་འགྲོ། །དེས་སྨྲས་པ། གཅིག་པུ་དུར་ཁྲོད་དུ་འགྲོའོ། །དེས་འདི་སྐད་དུ་སྨྲས་པ། བཙུན་
པ་མ་འགྲོ་ཤིག །དེས་སྨྲས་པ། གདོན་མི་ཟ་བར་འགྲོའོ། །དེས་སྨྲས་པ། བཙུན་པ་མ་འགྲོ་ཤིག །དུར་ཁྲོད་དེར་འབྱུང་བོ་ཆེན་པོ་རྣམས་འདུས་པར་གྱུར་ལ། བཙུན་པ་ལ་རྣམ་པར་འཚེ་བ་སྐྱེད་པར་འགྱུར་རོ། །དེས་སྨྲས་པ། ཅི་ནས་ཀྱང་འགྲོ་བར་བྱའོ། །དེས་སྨྲས་པ། ང་སུ་ཡིན་པ་མ་ཤེས་སམ།
སྨྲས་པ་མ་ཤེས་སོ། །སྨྲས་པ། ང་ནི་དུར་ཁྲོད་ན་རྒྱུན་དུ་གནས་པའི་གནོད་སྦྱིན་ནོ། །གལ་ཏེ་སླར་ལོག་པར་མི་བྱེད་ན་ནི་གྲོང་ཁྱེར་འདིའི་མི་རྣམས་ལ་གཞོན་ནུ་ལོ་དྲུག་ཅུ་དུར་ཁྲོད་དུ་གནས་པ་ན་ཁྱེད་འགས་ཀྱང་མ་ཤེས་ཞེས་བྱ་བར་སྨྲའོ། །དེས་སྨྲས་པ། གནོད་སྦྱིན་སྡིག་པ་ཁྱོད་མི་རྣམས་ལ་མ་སྨྲ་

ཤིག །ང་ཕྱིར་མི་ལྡོག་པར་བྱའོ་ཞེས་གནས་བརྟན་གཞོན་ནུ་ལོ་དྲུག་ཅུ་ལོན་པ་ན་སྦྱངས་པའི་ཡན་ལག་འཁྲུག་པར་མི་བྱེད་ཅིང་འདོད་པ་ཆུང་བར་གྱུར་ཏོ། །ཅི་ཞིག་བཀག་པ་ལས་སྦྱངས་པའི་ཡན་ལག་བླ་གབ་མེད་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། གཡོགས་པ་སྤངས་པའི་ཕྱིར་
སྦྱངས་པའི་ཡན་ལག་བླ་གབ་མེད་པ་ཉིད་ཡང་དག་པར་ལེན་པ་ཡིན་ནོ། །དེ་ལ་བླ་གབ་མེད་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །བླ་གབ་མེད་པ་ཆུང་ངུ་གང་ཞེ་ན། ངོས་གསུམ་གཡོགས་ལ་ངོས་གཅིག་མ་གཡོགས་པ་སྟེ། འདི་ནི་བླ་གབ་མེད་པ་ཆུང་ངུའོ། །བླ་གབ་མེད་
པ་འབྲིང་ཉིད་གང་ཞེ་ན། ངོས་གཅིག་གཡོགས་ལ་ངོས་གསུམ་མ་གཡོགས་པ་སྟེ། འདི་ནི་བླ་གབ་མེད་པ་འབྲིང་ཉིད་དོ། །བླ་གབ་མེད་པ་ཆེན་པོ་གང་ཞེ་ན། ངོས་བཞི་པོ་ཐམས་ཅད་མ་གཡོགས་པ་སྟེ། འདི་ནི་བླ་གབ་མེད་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་
ཤིང་དྲུང་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། གཙུག་ལག་ཁང་སྤང་བའི་ཕྱིར་སྦྱངས་པའི་ཡན་ལག་ཤིང་དྲུང་པ་ཉིད་ཡང་དག་པར་ལེན་པ་ཡིན་ནོ། །དེ་ལ་ཤིང་དྲུང་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །ཤིང་དྲུང་པ་ཆུང་ངུ་གང་ཞེ་ན། གང་ངོས་བཞི་
པོ་ཐམས་ཅད་ནས་བསྒྲིབས་པ་སྟེ། འདི་ནི་ཤིང་དྲུང་པ་ཆུང་ངུའོ། །ཤིང་དྲུང་པ་འབྲིང་ཉིད་གང་ཞེ་ན། ཅུང་ཟད་ཀྱང་མི་སྒྲིབ་པར་སྦྱོང་བ་དང་། འཆག་པ་དང་། རབ་ཏུ་འདུས་བྱས་པ་སྟེ་འདི་ནི་ཤིང་དྲུང་པ་འབྲིང་ཉིད་དོ། །ཤིང་དྲུང་པ་ཆེན་པོ་གང་ཞེ་ན། མི་སྒྲིབ་ལ་རབ་ཏུ་འདུས་
མི་བྱེད་ཅིང་མངོན་པར་མ་ཞེན་པས་གནས་པ་སྟེ། འདི་ནི་ཤིང་དྲུང་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་ཅོག་པུ་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། མལ་ཆ་དང་སྟན་ལ་འདུག་པ་སྤང་བའི་ཕྱིར། སྦྱངས་པའི་ཡན་ལག་ཅོག་པུ་པ་ཉིད་ཡང་དག་
པར་ལེན་པ་ཡིན་ནོ། །དེ་ལ་ཅོག་པུ་པ་ཉིད་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །ཅོག་པུ་པ་ཆུང་ངུ་ནི་ངོས་གཉིས་སུ་སྙེས་པར་བྱེད་པ་སྟེ། འདི་ནི་ཅོག་པུ་པ་ཆུང་ངུའོ། །ཅོག་པུ་པ་འབྲིང་ཉིད་གང་ཞེ་ན། ངོས་གཅིག་ཏུ་སྙེས་པར་བྱེད་པ་སྟེ། འདི་ནི་ཅོག་པུ་པ་འབྲིང་

ཉིད་དོ། །ཅོག་པུ་པ་ཆེན་པོ་གང་ཞེ་ན། ངོས་ཐམས་ཅད་དུ་མི་སྙེས་པ་སྟེ། འདི་ནི་ཅོག་པུ་པ་ཆེན་པོའོ། །ཅི་ཞིག་བཀག་པ་ལས་སྦྱངས་པའི་ཡན་ལག་གཞི་ཇི་བཞིན་པ་ཉིད་ཡང་དག་པར་ལེན་པ་ཡིན་ཞེ་ན། བཤད་པ། གནས་མལ་ལ་བརྐམ་པ་སྤང་བའི་ཕྱིར་སྦྱངས་
པའི་ཡན་ལག་གཞི་ཇི་བཞིན་པ་ཉིད་ཡང་དག་པར་ལེན་པ་ཡིན་ནོ། །དེ་ལ་གཞི་ཇི་བཞིན་པ་ནི་རྣམ་པ་གསུམ་སྟེ། ཆུང་ངུ་དང་འབྲིང་དང་ཆེན་པོའོ། །གཞི་ཇི་བཞིན་པ་ཆུང་ངུ་གང་ཞེ་ན། གང་ཞིག་མལ་ཆ་ལན་གསུམ་གྱི་བར་དུ་ཡང་ལེན་ཅིང་། ལན་བཞིར་མི་ལེན་པ་སྟེ། འདི་ནི་གཞི་ཇི་བཞིན་པ་ཆུང་
ངུའོ། །གཞི་ཇི་བཞིན་པ་འབྲིང་ཉིད་གང་ཞེ་ན། ལན་གཅིག་ལ་མི་ལེན་པ། ལན་གཉིས་ལ་མི་ལེན་པ་སྟེ། འདི་ནི་གཞི་ཇི་བཞིན་པ་འབྲིང་ཉིད་དོ། །གཞི་ཇི་བཞིན་པ་ཆེན་པོ་གང་ཞེ་ན། གང་ཞིག་ཇི་ལྟར་བསྟན་པ་བཞིན་ལེན་པར་བྱེད་ཅིང་མི་ཁྱེར་བ་སྟེ། འདི་ནི་གཞི་ཇི་བཞིན་པ་ཆེན་པོའོ། །ཅི་
ཞིག་བཀག་པ་ལས་སྦྱངས་པའི་ཡན་ལག་ཆོས་གོས་གསུམ་པ་ཉིད་ཡང་དག་པར་ལེན་པ་ཡིན་ཞེ་ན། །བཤད་པ། ཆོས་གོས་ལྷག་པ་སྤང་བའི་ཕྱིར་སྦྱངས་པའི་ཡན་ལག་ཆོས་གོས་གསུམ་པ་ཡང་དག་པར་ལེན་པ་ཡིན་ནོ། །དེ་ལ་ཆོས་གོས་གསུམ་པ་ནི་རྣམ་པ་གསུམ་
སྟེ། ཆུང་ངུ་དང་འབྲིང་དང་ཆེན་པོའོ། །ཆོས་གོས་གསུམ་པ་ཆུང་ངུ་གང་ཞེ་ན། ཆོས་གོས་གསུམ་ལས་ལྷག་པ། དབྱར་གྱི་གོས་རས་ཆེན་དང་གཡན་པ་དགབ་པ་དང་མཆིས་སྟན་དང་གདིང་བ་འཆང་བ་སྟེ། འདི་ནི་ཆོས་གོས་གསུམ་པ་ཆུང་ངུའོ། །ཆོས་གོས་གསུམ་པ་འབྲིང་ཉིད་
གང་ཞེ་ན། ཆོས་གོས་གསུམ་འཆང་བར་བྱེད་ཅིང་དབྱར་གྱི་གོས་རས་ཆེན་ནས་གདིང་བའི་བར་བདག་ཉིད་ཀྱིས་འཆང་བར་མི་བྱེད་ལ་གཞན་གྱིས་ལོངས་སྤྱོད་པ་འཆང་བ་སྟེ། འདི་ནི་ཆོས་གོས་གསུམ་པ་འབྲིང་ཉིད་དོ། །ཆོས་གོས་གསུམ་པ་ཆེན་པོ་གང་ཞེ་ན། ཆོས་གོས་གསུམ་པ་ལས་
ཕྱི་རོལ་དུ་གྱུར་པ་མི་འཆང་བ་སྟེ། འདི་ནི་ཆོས་གོས་གསུམ་པ་ཆེན་པོའོ། །སྦྱངས་པའི་ཡན་ལག་བཅུ་གསུམ་བསྟན་པ་རྫོགས་སོ།། །།ཕྱག་དར་ཁྲོད་དང་ཅོག་པུ་པ། །ཕྱིས་མི་ལེན་དང་ཕྱིང་པ་པ། །ཆོས་གོས་གསུམ་པ་ཤིང་དྲུང་པ། །སྟན་གཅིག་པ་དང་ཇི་བཞིན་པ། །དུར་ཁྲོད་

པ་དང་བླ་གབ་མེད། །དགོན་པ་པ་དང་བསོད་སྙོམས་ཏེ། །ཐུབ་པ་ཞི་བའི་ཐུགས་མངའ་བས། །སྦྱངས་པ་བཅུ་གཉིས་འདི་དག་གསུངས། །དེ་ལ་ཕྱག་དར་ཁྲོད་པ་ཉིད་ནི་ཡང་དག་པར་བླངས་པ་སྔོན་དུ་འགྲོ་བས། རས་མ་བོར་བ་འཆང་བའོ། །ཅོག་པུ་པ་ཉིད་གང་ཞེ་ན། ཡང་དག་པར་བླངས་པ་སྔོན་
དུ་འགྲོ་བས། གློས་མི་འབེབས་པར་ཅོག་པུས་མཚན་མོ་འདའ་བར་བྱེད་པའོ། །ཟས་ཕྱིས་མི་ལེན་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། ཟོས་པ་བསྟབས་ཀྱང་མི་ཟ་ཞིང་། དུས་མ་ཡིན་པའི་བཏུང་བ་མི་འཐུང་བའོ། །ཕྱིང་པ་པ་ཉིད་ནི་ཡང་དག་པར་བླངས་པ་སྔོན་དུ་འགྲོ་བས་ཕྱིང་
པའི་གོས་འཆང་བའོ། །ཆོས་གོས་གསུམ་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། ཆོས་གོས་གསུམ་ཙམ་འཆང་གི་ལྷག་པ་མི་འཆང་བའོ། །ཤིང་དྲུང་པ་ཉིད་ནི། ཤིང་དྲུང་ལ་དགའ་བས་ཡང་དག་པར་བླངས་པ་སྔོན་དུ་འགྲོ་བས་ཤིང་དྲུང་དུ་གནས་ཀྱི། བསྐྱོར་བར་མི་འཇུག་པའོ། །
སྟན་གཅིག་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། སྟན་གཉིས་པ་ལ་མི་ཟ་བའོ། །གཞི་ཇི་བཞིན་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། ཇི་ལྟར་ཐོབ་པའི་གནས་མལ་ལ་སོགས་པ་ལོངས་སྤྱོད་པའོ། །དུར་ཁྲོད་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས།
དུར་ཁྲོད་ཉིད་དུ་གནས་པའོ། །བླ་གབ་མེད་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། གཡོགས་པའམ་ཤིང་དྲུང་དུ་མི་འཇུག་པའོ། །དགོན་པ་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། མི་མི་རྒྱུ་བའི་ཡུལ་དུ་རི་དགས་དང་བྱ་བཞིན་གནས་པ་སྟེ། གང་ཡང་རུང་བར་ཉལ་བའོ། །
བསོད་སྙོམས་པ་ཉིད་ནི། ཡང་དག་པར་བླངས་པ་སྔོན་དུ་འགྲོ་བས། བསོད་སྙོམས་མང་བའམ་ཉུང་བ་ལེན་པ་དང་། མཉམ་པའི་སེམས་ཉིད་ཀྱིས་དགེ་འདུན་གྱི་ཟས་ལ་མི་ལྟོས་པའོ། །ཕྱག་དར་ཁྲོད་པ་ཉིད་ལ་ཡོན་ཏན་བཅུ་སྟེ། ཆོས་གོས་ཀྱི་དོན་དུ་ཁྱིམ་པ་རྣམས་དང་མི་འདྲིས་པ་དང་། མི་
སློང་བ་དང་། གོས་ཀྱི་རྒྱུས་ཡོངས་སུ་མི་གཏམ་པ་དང་། ཀུན་ནས་ཡོངས་སུ་མི་ཚོལ་བ་དང་། མ་རྙེད་པས་མི་ཁྲོ་བ་དང་། རྙེད་པས་དགའ་བ་མེད་པ་དང་། ཉུང་བ་དང་རྙེད་སླ་བ་དང་། ཁ་ན་མ་ཐོ་བ་མེད་པ་ཁས་ལེན་པ་དང་། གནས་ན་རྗེས་སུ་མཐུན་པར་འཇུག་པར་འགྱུར་བ་དང་། ཆོས་གོས་

རྩུབ་པར་བགོ་བ་དང་། གཞན་གྱིས་གླགས་མི་ཚོལ་བའོ། །སྟན་གཅིག་པ་ཉིད་ལ་ཡོན་ཏན་བཅུ་སྟེ། ཟས་གཉིས་པ་ཚོལ་བས་མི་གནོད་པ་དང་། བྱིན་ལེན་གྱིས་མི་གནོད་པ་དང་། ཡོངས་སུ་ལོངས་སྤྱོད་པས་མི་གནོད་པ་དང་། སྔ་དྲོའི་དུས་ཤེས་པ་དང་། ཟས་བསྙུངས་
པ་དང་། ཟོས་པ་འཇུ་བ་དང་། གནོད་པ་ཆུང་བ་དང་། ཟོ་མདོག་བདེ་བ་དང་། ལྡང་བ་ཡང་བ་དང་། བདེ་བར་གནས་པའོ། །ཅོག་བུ་པ་ཉིད་ལ་ཡོན་ཏན་བཅུ་སྟེ། ལུས་ཀྱི་བདེ་བ་ལ་ཆགས་པ་མེད་པ་དང་། གཉིད་ཀྱི་བདེ་བ་ལ་ཆགས་པ་མེད་པ་དང་། ངོས་སུ་མི་ལྟུང་བ་དང་། ལུས་ལ་སེར་
སྣ་མེད་པ་དང་། བདེ་བར་སེམས་པ་དང་། རྨི་ལམ་ཉུང་བ་ཉིད་དང་། ལྡང་བ་ཡང་བ་ཉིད་དང་། མལ་སྟན་འཆོས་པ་དང་། གྱོན་པ་དང་། མལ་སྟན་ཚོལ་བ་ཉུང་བའོ། །ཟས་ཕྱིས་མི་ལེན་པ་ཉིད་ལ་ཡོན་ཏན་བཅུ་སྟེ། ཟས་རན་པ་དང་། ཟས་ལྷག་པ་མ་ཡིན་པ་དང་། མི་བརྐམ་པ་དང་།
ཚོལ་བ་ཉུང་བ་དང་། དགང་སླ་བ་དང་། གསོ་སླ་བ་དང་། ཆོག་ཤེས་པ་དང་། བསམ་གཏན་དང་། ཀློག་པ་ལ་མི་གནོད་པའོ། །ཆོས་གོས་གསུམ་པ་ཉིད་ལ་ཡོན་ཏན་བཅུ་སྟེ། ཆོས་གོས་གསུམ་ལས་ལྷག་པ་ཚོལ་བ་དང་། འཛིན་པ་དང་། འབད་པ་ལ་མི་སྤྲོ་བ་དང་། ཡོངས་སུ་བསྲུང་བ་ལ་
སྤྲོ་བ་མེད་པ་དང་། ཡོ་བྱད་ཉུང་བ་ཉིད་དང་། ལུས་དགབ་པ་ཙམ་གྱི་གོས་ཀྱིས་ཆོག་ཤེས་པ་དང་། ཡོ་བྱད་བསྙུངས་པས་འཚོ་བ་དང་། ལྡང་བ་ཡང་བ་ཉིད་དང་། ལུས་ཡང་བ་ཉིད་དང་། དགོན་པར་གནས་པ་ལ་རྗེས་སུ་མཐུན་པར་འགྱུར་བ་དང་། གང་ཡང་རུང་བར་གནས་པ་དང་། ལྟོས་པ་མེད་པས་
རྣལ་འབྱོར་གྱི་རྗེས་སུ་མཐུན་པར་འཇུག་པའོ། །ཕྱིང་བ་པ་ཉིད་ལ་ཡོན་ཏན་བཅུ་སྟེ། ཆོས་གོས་རྩུབ་པར་བགོ་བ་དང་། ཚོལ་བ་ཉུང་བ་དང་། གང་ཡང་རུང་བར་གནས་པ་དང་། འཁྲུ་བ་ན་གནོད་པ་ཉུང་བ་དང་། ཁ་བསྒྱུར་བ་ན་གནོད་པ་ཉུང་བ་དང་། སྲོག་ཆགས་ཉུང་བ་དང་། ཡུན་རིང་པོ་ན་འཛད་པ་དང་།
ཆོས་གོས་གཞན་མི་འཛིན་པ་དང་། རྣལ་འབྱོར་བརྩོན་པ་ལ་གེགས་མེད་པའོ། །གཞི་ཇི་བཞིན་པ་ཉིད་ལ་ཡོན་ཏན་བཅུ་སྟེ། གཙུག་ལག་ཁང་གི་ལོངས་སྤྱོད་མཆོག་ལ་མངོན་པར་མི་བརྩོན་པ་དང་། མལ་སྟན་མཆོག་འཛིན་པ་དང་ལོངས་སྤྱོད་པ་ལ་མི་བརྩོན་པ་དང་། རྒན་པོ་རྣམས་ལ་གནོད་པ་མེད་

པ་དང་། གཞོན་ནུ་རྣམས་ལ་ཁྲོ་བར་བྱེད་པ་མེད་པ་དང་། དོན་ཉུང་བ་དང་། བྱ་བ་ཉུང་བ་དང་། ཇི་ལྟར་ཐོབ་པ་བཞིན་ཡོངས་སུ་ལོངས་སྤྱོད་པ་ཉིད་དང་། དགོས་པ་ཉུང་བ་ལ་ཆགས་པ་ཆུང་བ་དང་། རྩོད་པའི་གཞི་མི་ལྡང་བ་ཉིད་དང་། གཞན་གྱི་ལོངས་སྤྱོད་ལ་འདོད་པ་མེད་པའོ། །ཤིང་དྲུང་པ་ཉིད་ལ་ཡོན་
ཏན་བཅུ་སྟེ། གནས་གཙུག་ལག་ཁང་ཡོངས་སུ་ཚོལ་བ་མེད་པ་དང་། མལ་སྟན་ཡོངས་སུ་ཚོལ་བ་མེད་པ་དང་། རབ་ཏུ་འཛིན་པ་ལ་མི་འབད་པ་དང་། ལོངས་སྤྱོད་ལ་མི་འབད་པ་དང་། དེའི་ཆེད་ཀྱི་རྒྱུ་མཚན་མི་བྱེད་པ་དང་། རྩོད་པའི་གཞི་མི་བྱེད་པ་དང་། གནས་རྗེས་སུ་མཐུན་པར་འགྱུར་བ་དང་།
ཉུང་བ་དང་རྙེད་སླ་བ་དང་། ཁ་ན་མ་ཐོ་བ་མེད་པས་དགའ་བ་དང་། སྦྱོར་བའི་རྗེས་སུ་མཐུན་པར་གནས་པ་དང་། མ་འདྲེས་པར་གནས་པ་ཉིད་དོ། །དུར་ཁྲོད་པ་ཉིད་ལ་ཡོན་ཏན་བཅུ་སྟེ། མི་རྟག་པའི་འདུ་ཤེས་ཉེ་བར་འཇོག་པ་དང་། འཆི་བའི་འདུ་ཤེས་ཉེ་བར་འཇོག་པ་དང་། མི་གཙང་བའི་འདུ་ཤེས་
ཉེ་བར་འཇོག་པ་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་ཉེ་བར་འཇོག་པ་དང་། མཛའ་བོ་ཐམས་ཅད་མེད་པར་འབྱུང་བ་དང་འབྲལ་བའི་འདུ་ཤེས་ཉེ་བར་འཇོག་པ་དང་། སྙིང་རྗེའི་འདུ་ཤེས་ཉེ་བར་འཇོག་པ་དང་། རྒོད་པ་སྤོང་བ་དང་། སྐྱོ་བ་དང་། འཇིགས་པ་སྤོང་
བའོ། །བླ་གབ་མེད་པ་ཉིད་ལ་ཡོན་ཏན་བཅུ་སྟེ། ཤིང་དྲུང་ཚོལ་བ་མེད་པ་དང་། རྩོད་པའི་གཞི་མེད་པ་དང་། འགྲོ་བ་ན་ལྟོས་པ་མེད་པ་དང་། ཁེངས་པ་ཆུང་བ་དང་། གྲང་བ་དང་། དྲོ་བ་དང་། ཤ་སྦྲང་དང་། སྦྲང་བུ་དང་། རླུང་དང་། ཉི་མ་དང་། སྡིག་སྦྲུལ་དག་ལ་བཟོད་པ་དང་། དགྲའི་
ཚེར་མ་མེད་པ་དང་། གཞན་ལ་གནོད་པ་མི་བྱེད་པ་དང་། རང་ལ་གནོད་པ་མི་འཐོབ་པ་དང་། འདྲེས་པ་མེད་པ་ཉིད་དོ། །དགོན་པ་པ་ཉིད་ལ་ཡོན་ཏན་བཅུ་སྟེ། འདྲིས་པ་མེད་པའི་ཕྱིར་རེས་འགའ་རྒྱུ་བ་རྣམས་འདུལ་བ་ལ་མཁས་པ་དང་། དབང་པོ་དུལ་བ་ཉིད་དང་། ཐོས་པ་མང་བ་
ཉིད་དང་། སྟོབས་ཆེ་བ་ཉིད་དང་། བདག་ཏུ་འཛིན་པ་དང་། འཇིགས་པ་དང་བྲལ་བ་ཉིད་དང་། རི་དགས་དང་འདྲ་བ་ཉིད་དང་། ལུས་རིང་དུ་གནས་པ་ཉིད་དང་། དབེན་པ་ལ་དགའ་བ་དང་འདྲེས་པ་མེད་པའོ། །བསོད་སྙོམས་པ་ཉིད་ལ་ཡོན་ཏན་བཅུ་སྟེ། སེམས་ཅན་རྗེས་སུ་འཛིན་པར་བྱེད་

པ་དང་། གཞན་ལ་གནོད་པ་མེད་པ་ཉིད་དང་། ཆོག་ཤེས་པ་དང་། ཡང་དག་པར་བགོ་བཤའ་བྱེད་པ་དང་། ལྷག་པར་མ་ཆགས་པ་དང་། ཚོད་ཤེས་པ་ཉིད་དང་། དགེ་བའི་ཕྱོགས་ལ་མངོན་པར་ཆགས་པ་དང་། དགེ་བ་སྡུད་པ་ཉིད་དང་། ཟས་ལ་མི་བརྐམ་པ་དང་།
འགྱོད་པ་མེད་པར་འགྱུར་བའོ། །སྔོན་གྱི་སངས་རྒྱས་རྣམས་ནི་བསོད་སྙོམས་པ་དག་སྟེ་བསྡུས་པའི་ཕྱིར་རོ། །ཆོས་འདི་དག་ལ་གནས་པས། བདག་ལ་སྟོད་པར་མི་འགྱུར་བར་བྱ། གཞན་ལ་སྨོད་པར་མི་འགྱུར་བར་བྱ། ཚུལ་ཁྲིམས་ལ་བརྩོན་པར་བྱེད་པ་དང་། ཡང་དག་པར་བླངས་པ་ལ་
བརྟན་པ་དང་། ཇི་ལྟར་ཐོས་པའི་ཆོས་བསྒྲུབ་པར་འགྱུར་བར་བྱ། བདག་གི་བ་མེད་པ་དང་། ང་རྒྱལ་བ་མེད་པ་དང་། མ་ཆགས་པ་དང་། མི་བརྐམ་པ་དང་། དྲན་པ་ཉེ་བར་གཞག་པ་ཉིད་དང་། ཉོན་མོངས་པ་ཐམས་ཅད་དུག་དང་སྦྲུལ་བཞིན་དུ་སྤང་བ་དང་། མ་འདྲེས་པ་ཉིད་དང་། སྐྱེས་པ་
དང་བུད་མེད་དང་ཁྱེའུ་དང་བུ་མོ་དང་། དགེ་སློང་དང་། དགེ་སློང་མ་དང་། མུ་སྟེགས་པ་སྤངས་པར་འགྱུར་བར་བྱ། དེ་ལ་ཡོན་ཏན་དུ་བལྟ་བར་འགྱུར་བར་བྱ། སྤྱོད་ཚུལ་བཅོ་བརྒྱད་ཀྱི་ཚོགས་ལ་སུན་འབྱིན་པ་ཅན་དུ་མི་འགྱུར་བར་བྱ། ཐེག་པ་ཆེན་པོ་དང་སྦྱངས་པའི་ཡན་ལག་ལ་ཤིན་ཏུ་བསྔགས་
པ་བརྗོད་པར་འགྱུར་བར་བྱའོ། །དགེ་སློང་གིས་གང་ལ་འཇུག་པར་མི་བྱ་བ་དང་འདྲིས་པར་མི་བྱ་བ་སྤྱོད་ཡུལ་མ་ཡིན་པ་ལ་དགོངས་པ་བསྟན་པ། རྣལ་འབྱོར་སྤྱོད་པ་ཉན་ཐོས་ཀྱི་ས་ལས་ཀྱང་། དགེ་སློང་གི་སྤྱོད་ཡུལ་མ་ཡིན་པ་ནི་ལྔའོ། །ལྔ་པོ་གང་ཞེ་ན། འདི་ལྟ་སྟེ། ཤན་པ་དང་། སྨད་
འཚོང་མ་དང་། ཆང་འཚོང་མའི་ཁྱིམ་དང་། རྒྱལ་པོའི་ཁྱིམ་དང་། ལྔ་པ་གདོལ་པའི་ཁྱིམ་མོ་ཞེས་གསུངས་སོ། །འདུལ་བ་ཕྲན་ཚེགས་ལས་ཀྱང་། སྤྱོད་ཡུལ་མ་ཡིན་པ་ལྔ་སྟེ། སྨད་འཚོང་མ་དང་། ཡུགས་ས་མོ་དང་། གོ་རྒས་མ་དང་། ཟ་མ་དང་། སྡིག་པའི་དགེ་སློང་མའོ་ཞེས་
གསུངས་པ་དང་། ཡང་འདུལ་བ་དེ་ཉིད་ལས་ཆེས་རྒན་ཡང་ཆོས་མ་ཡིན་པར་སྨྲ་བ་ལ་ཕྱག་མི་བྱའོ་ཞེས་གསུངས་སོ། །དཀོན་མཆོག་སྤྲིན་གྱི་མདོ་ལས་ཀྱང་། གཞན་དུ་ན་གནས་གང་ན་ཁྱི་ཟ་བའམ། བ་དྲུས་མའམ། བྱོལ་སོང་གི་སྐྱེ་གནས་སུ་གཏོགས་པ་རང་བཞིན་གྱིས་ངང་ཚུལ་

ངན་པའི་སྲོག་ཆགས་སམ། བུད་མེད་དང་སྐྱེས་པ་དང་ཁྱེའུ་དང་བུ་མོ་ཀྱལ་ཀ་བྱ་བའི་བསམ་པ་ཅན་དག་ཡོད་པ་འམ། སྨད་པའི་གནས་ཐམས་ཅད་དུ་ཐམས་ཅད་ཡོངས་སུ་སྤོང་སྟེ་ཞེས་གསུངས་སོ། །བྱང་ཆུབ་ཀུན་དུ་རྒྱུའི་མདོ་ལས་ཀྱང་། རྒྱལ་པོ་ཆེན་པོ་རབ་ཏུ་བྱུང་བས་ཁྱིམ་ཡན་ལག་
དགུ་དང་ལྡན་པར་འགྲོ་བར་མི་བྱའོ། །ཡན་ལག་དགུ་པོ་གང་དང་ལྡན་པ་ཡིན་ཞེ་ན། མཐོང་ནས་ངོ་འབྱོལ་བ་དང་། སྟན་འདོར་དུ་འཇུག་པ་དང་། དེའི་སྨྲ་བ་ལ་མི་དད་པ་དང་། དེ་ལ་མ་གུས་པ་ཉེ་བར་འཇོག་པ་དང་། གང་ན་ཁྱིམ་ནས་འབྱུང་བ་ན་ཁྱི་གཏུམ་པོ་རྒྱབ་ནས་རྨུགས་པ་ཡོད་
པ་དང་། གང་ན་སྒོ་སྲུང་སྡིག་པ་ཅན་ཡོད་པ་དང་། ཁྱིམ་གྱི་ཁྱིམ་བདག་དག་ཀྱང་དེ་ལ་དད་པ་དང་བྲལ་བར་གྱུར་པ་དང་། གང་ན་བུད་མེད་དང་ཚུལ་ངན་པ་དང་སྡིག་པའི་ཆོས་ཅན་དང་འཇུངས་པ་དང་། བརྒྱད་པར་བྱེད་པ་ཡོད་པ་དང་། ཁྱིམ་གང་ན་གཡོག་རང་དབང་ཅན་ཡོད་པ་སྟེ། རྒྱལ་
པོ་ཆེན་པོ་ད་ལྟར་ཁྱིམ་ཡན་ལག་དགུ་དང་ལྡན་པར་རབ་ཏུ་བྱུང་བས་འགྲོ་བར་མི་བྱའོ་ཞེས་གསུངས་སོ། །དཀོན་མཆོག་སྤྲིན་གྱི་མདོ་ལས་ཀྱང་། ཇི་ལྟར་ན་བྱང་ཆུབ་སེམས་དཔའ་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་ལ་
དྲན་པ་ཤིན་ཏུ་ཉེ་བར་གཞག་ཅིང་གནས་ཤེ་ན། འདི་ལ་བྱང་ཆུབ་སེམས་དཔའ་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ན་བྱང་ཆུབ་སེམས་དཔའི་སྤྱད་པ་སྤྱོད་པ་ན། གནས་གང་ན་ཚུལ་དང་མི་འདྲ་ཞིང་ཡོངས་སུ་སྤང་བར་བྱ་བ་རབ་ཏུ་
བྱུང་བའི་ཚུལ་དང་མི་མཐུན་པ་དེ་དག་ཡོངས་སུ་སྤོང་ངོ་། །དེ་དག་ཀྱང་གང་ཞེ་ན། འདི་ལྟ་སྟེ། ཆང་འཚོང་གི་ཁྱིམ་མམ། སྨད་འཚོང་མའི་ཁྱིམ་མམ། རྒྱལ་པོའི་ཕོ་བྲང་ངམ། རྒྱལ་པོའི་གནས་སམ། ར་རོའི་འཁོར་གྱི་ཚོགས་སམ། གར་མཁན་ནམ། གླུ་གར་གྱི་གནས་དང་དེ་མ་ཡིན་
པའི་གནས་གཞན་ཡང་རུང་སྟེ། རབ་ཏུ་བྱུང་བའི་ཚུལ་དང་མི་འདྲ་བ་དེ་དག་ཡོངས་སུ་སྤོང་ཞིང་དེ་དག་ལ་དྲན་པ་ཤིན་ཏུ་ཉེ་བར་གཞག་ཅིང་གནས་ཏེ། དེ་ལྟར་ན་བྱང་ཆུབ་སེམས་དཔའ་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་དག་ལ་དྲན་པ་

ཤིན་ཏུ་ཉེ་བར་གཞག་ཅིང་གནས་སོ་ཞེས་གསུངས་སོ། །དམ་པའི་ཆོས་པདྨ་དཀར་པོའི་མདོ་ལས་ཀྱང་། ཕྱི་དུས་ཤིན་ཏུ་འཇིགས་པ་ལ། །ཞུམ་པ་མེད་ཅིང་མི་འཇིགས་པར། །མདོ་སྡེ་འདི་ནི་བསྟན་པ་ཡང་། །བྱང་ཆུབ་སེམས་དཔའ་གང་འདོད་པ། །ཆོ་ག་སྤྱོད་
ཡུལ་བསྲུང་བྱ་ཞིང་། །འདུ་འཛི་མེད་ལ་གཙང་བར་བྱ། །རྒྱལ་པོ་དང་ནི་རྒྱལ་བུ་དང་། །འདྲེས་བྱེད་རྟག་ཏུ་སྤང་བར་བྱ། །རྒྱལ་པོའི་ཞམ་འབྲིང་གང་ཡིན་དང་། །གདོལ་པ་དང་ནི་ཟོལ་པ་དང་། །མུ་སྟེགས་ཅན་ནི་དེ་དག་དང་། །རྣམ་པ་ཀུན་དུ་འདྲིས་མི་བྱ། །དགེ་སློང་འདུལ་དང་ལུང་
གནས་པ། །དགྲ་བཅོམ་སྙམ་དུ་སེམས་བྱེད་ཅིང་། །ང་རྒྱལ་ཅན་རྣམས་བསྙེན་མི་བྱ། །ཚུལ་ཁྲིམས་འཆལ་རྣམས་རྣམ་པར་སྤང་། །རྒོད་ཅིང་སྨྲ་བའི་སྤྱོད་ཡུལ་ཅན། །དགེ་སློང་མ་རྣམས་རྟག་ཏུ་སྤང་། །མི་བརྟན་པར་ནི་མངོན་པ་ཡི། །དགེ་བསྙེན་རྣམས་ཀྱང་སྤང་བར་བྱ། །དགེ་བསྙེན་
མ་གང་ཚེ་འདི་ལ། །བདེ་བ་ཡང་དག་ཚོལ་བྱེད་པ། །དེ་དག་དང་ནི་འདྲིས་བྱེད་སྤང་། །འདི་ནི་ཆོ་ག་ཡིན་ཞེས་བྱ། །གང་ཞིག་དེ་ཡི་ཐད་འོངས་ནས། །བྱང་ཆུབ་མཆོག་ཕྱིར་ཆོས་འདི་ན། །གནས་པ་མེད་ཅིང་མི་ཞན་པར། །དཔའ་བོ་རྟག་ཏུ་དེ་ལ་ཤོད། །བུད་མེད་མ་ནིང་སེམས་
ཅན་གང་། །དེ་དང་འདྲིས་བྱེད་རྣམ་པར་སྤང་། །ཁྱིམ་རྣམས་སུ་ནི་མནའ་མ་དང་། །གཞོན་ནུ་མ་རྣམས་རྣམ་པར་སྤང་། །བདེ་ལ་རེག་པར་འདྲི་བ་ཡིས། །དེ་ལ་ནམ་དུའང་དགའ་མི་བྱེད། །ཕག་འཚོང་བ་དང་ཤན་པ་དང་། །འདྲིས་པར་བྱེད་པ་རྣམ་པར་སྤང་། །གང་དག་སྲོག་ཆགས་
རྣམ་མང་དག །ལོངས་སྤྱོད་ཕྱིར་ནི་གསོད་པ་དང་། །བཤའ་སར་ཤ་རྣམས་ཚོང་བྱེད་པ། །དེ་དང་འདྲིས་བྱེད་རྣམ་པར་སྤང་། །གང་དག་བུད་མེད་གསོ་བྱེད་དང་། །གར་མཁན་གྱད་དང་སིལ་ཁྲོལ་བ། །གང་གཞན་དེ་དང་འདྲ་བ་ཡང་། །དེ་དག་རྣམས་དང་འདྲིས་བྱེད་སྤང་། །སྨད་འཚོང་གཙོ་
མོ་བསྟེན་མི་བྱ། །ཇི་སྙེད་ལོངས་སྤྱོད་འཚོ་བ་གཞན། །ཤིན་ཏུ་དགའ་བ་དེ་དག་ཀྱང་། །རྣམ་པ་ཀུན་དུ་ཡོངས་སུ་སྤང་། །མཁས་པས་བུད་མེད་རྣམས་ལ་ཡང་། །གང་གི་དུས་ན་ཆོས་འཆད་པ། །དེར་ནི་གཅིག་པུ་མི་འགྲོ་སྟེ། །དགོད་ཅིང་འདུག་པར་མི་བྱའོ། །གང་ཚེ་ཟས་ཕྱིར་

ཡང་ནས་ཡང་། །གྲོང་དུ་འཇུག་པར་བྱེད་པ་ན། །དགེ་སློང་གཉིས་པ་བཙལ་བར་བྱ། །ཡང་ན་སངས་རྒྱས་དྲན་པར་བྱ། །གང་གིས་ཤེས་རབ་ལྡན་པ་དག །མདོ་སྡེ་འདི་འདྲ་འཛིན་པ་ཡི། །ཆོ་ག་དང་ནི་སྤྱོད་ཡུལ་དག །ཐོག་མར་ངས་བཤད་འདི་ཡིན་ནོ། །གང་གིས་འདུས་བྱས་འདུས་མ་
བྱས། །ཡང་དག་ཡང་དག་མ་ཡིན་དང་། །རབ་འབྲིང་ཐ་མའི་ཆོས་རྣམས་ལ། །རྣམ་པ་ཀུན་དུ་སྤྱོད་པ་མེད། །བརྟན་པ་བུད་མེད་ཅེས་མི་སྤྱོད། །སྐྱེས་པ་ཞེས་ཀྱང་མི་རྟོག་སྟེ། །ཆོས་སོ་ཅོག་ནི་མ་སྐྱེས་ཤིང་། །བཙལ་བར་བྱས་ཀྱང་མི་མཐོང་བ། །འདི་ནི་བྱང་ཆུབ་སེམས་དཔའ་ཡི། །ཆོ་
གར་རྣམ་པ་ཀུན་དུ་བསྟན། །ཞེས་གསུངས་སོ། །དམ་པའི་ཆོས་དྲན་པ་ཉེ་བར་གཞག་པ་ལས་ཀྱང་། འདི་ལྟ་སྟེ། བརྟན་པ་དང་། བརྩོན་པ་དང་། རབ་ཏུ་ཞི་བ་དང་། བླ་མ་ལ་བསྙེན་བཀུར་བ་དང་། སྡིག་པའི་གྲོགས་པོ་སྤངས་པ་དང་། སངས་རྒྱས་ཀྱི་གསུང་ལ་གོམས་པ་དང་། ཚུལ་བཞིན་
ཡིད་ལ་བྱེད་པ་ལ་གོམས་པ་དང་། ཁེངས་པ་སྤངས་པ་དང་། ལས་རྒྱུ་འབྲས་ལ་དད་པ་བསྐྱེད་པ་དང་། སྔོན་གྱི་འདོད་པ་མི་དྲན་པ་དང་། བུད་མེད་ལ་བལྟ་བ་སྤང་བ་དང་། གཉེན་བཤེས་ལ་བལྟ་བའི་དོན་དུ་ཤིན་ཏུ་མི་རྒྱུ་བ་དང་། ཡུལ་ཐམས་ཅད་ལ་རྒྱུག་པ་དང་། འཆི་བ་དང་འཆི་འཕོ་བ་དང་
སྐྱེ་བ་ལ་འཇིགས་པས་དེ་ལྟར་གྲོང་དུ་འཇུག་པར་བྱའོ་ཞེས་གསུངས་སོ། །བློ་གྲོས་རྒྱ་མཚོའི་མདོ་ལས་ཀྱང་། བློ་གྲོས་རྒྱ་མཚོ་གཞན་ཡང་ཐེག་པ་ཆེན་པོའི་བར་ཆད་དུ་འགྱུར་བའི་ཆོས་བཞི་སྟེ། བཞི་གང་ཞེ་ན། ཐོས་པ་ཉུང་ངུས་གྲོང་དང་གྲོང་ཁྱེར་དང་གྲོང་རྡལ་དུ་འཇུག་པ་དང་། ཚུལ་ཁྲིམས་ཀྱི་
ཕུང་པོ་ལ་མི་གནས་པར་རྙེད་པ་དང་བཀུར་སྟི་དང་ཚིགས་སུ་བཅད་པ་འདོད་པ་དང་། དབང་པོ་རྣམས་ཀྱི་སྒོ་མ་བསྲུངས་པར་བུད་མེད་ལ་བལྟ་བ་དང་། མཉམ་པར་མ་བཞག་པའི་སེམས་ཀྱིས་སེམས་ཅན་གྱི་དབང་པོ་ལ་འཇུག་པའོ་ཞེས་གསུངས་སོ། །དམ་པའི་ཆོས་དྲན་པ་ཉེ་བར་གཞག་པའི་
མདོ་ལས་ཀྱང་། ལེ་ལོ་ཅན་དང་ལྷན་ཅིག་གནས་པར་མི་བྱའོ། །ཚུལ་འཆོས་ཅན་རྣམས་དང་འགྲོགས་པར་མི་བྱའོ། །ཞིམ་ལྟོ་ཅན་དང་ལྷན་ཅིག་གནས་པར་མི་བྱའོ། །ཚོང་པ་དང་ལྷན་ཅིག་འདྲི་རྨེད་ཀྱང་མི་བྱའོ། །ཟོལ་གྱིས་འཚོ་བ་རྣམས་དང་མ་ཡིན། རང་བཞིན་གྱིས་དྲི་མ་ཅན་དང་མ་

ཡིན། ལྟ་བ་ལོག་པ་ཅན་དང་མ་ཡིན། འགྱུར་བག་ཅན་དང་མ་ཡིན། ང་རྒྱལ་ཅན་དང་མ་ཡིན། ཁེངས་པ་དང་མ་ཡིན། ལྟུང་བར་གྱུར་ནས་ལངས་པ་དང་མ་ཡིན། རྒྱན་པོས་འཚོ་བ་དང་མ་ཡིན། ཆང་ཁང་པ་དང་མ་ཡིན། ཆང་འཚོང་མ་དང་མ་ཡིན། འཐབ་
ཀྲོལ་ཅན་དང་མ་ཡིན། བུད་མེད་ལ་དད་ཆེ་བ་དང་མ་ཡིན། ཟོང་ཚོང་གིས་ཉེ་བར་འཚོ་བ་དང་མ་ཡིན། སྡང་མིག་ཅན་དང་མ་ཡིན། སྐྱེས་བུ་བྱ་མ་རྟ་དང་མ་ཡིན། བྱ་བ་དང་མ་ཡིན། སྤྲོས་པ་ཅན་རྣམས་དང་མ་ཡིན། མུ་སྟེགས་ཅན་ཞུགས་པ་དང་མ་ཡིན། སྐྱེ་བོ་ཐམས་ཅད་དང་
ཞེ་འགྲས་པ་རྣམས་དང་མ་ཡིན་ཏེ། ལྷན་ཅིག་ཏུ་འགྲོགས་པ་དང་ངག་བརྗོད་པའམ་ལམ་དུ་འགྲོགས་པ་ཡང་དགེ་སློང་གིས་མི་བྱའོ་ཞེས་གསུངས་སོ། །སྡིག་པའི་གྲོགས་པོ་སྤང་བ་ལ་དགོངས་པ་བསྟན་པ། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས་ཀྱང་། རབ་འབྱོར་གཞན་ཡང་གང་ཞིག་
དེ་ལ་བདུད་ཀྱི་ལས་ཉེ་བར་མི་སྟོན་པ་དང་། བདུད་ཀྱི་སྐྱོན་ཉེ་བར་མི་སྟོན་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་སྡིག་པའི་གྲོགས་པོའོ། །བདུད་སྡིག་ཏོ་ཅན་སངས་རྒྱས་ཀྱི་ཆ་བྱད་ཀྱིས་འོངས་ནས་འདི་སྐད་དུ། ཁྱོད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་ཅི་ཞིག་བྱ།
བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་བསྒོམས་པས་ཅི་ཞིག་བྱ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལས་
རྣམ་པར་འབྱེད་པ་སྟེ། རབ་འབྱོར་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྡིག་པའི་གྲོགས་པོར་རིག་པར་བྱའོ་ཞེས་གསུངས་སོ། །དཀོན་མཆོག་སྤྲིན་གྱི་མདོ་ལས་ཀྱང་། རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་སྡིག་པའི་གྲོགས་པོ་ཡོངས་སུ་སྤངས་པ་རྣམས་
ཡིན་ནོ། །བཅུ་གང་ཞེ་ན། འདི་ལྟ་སྟེ། ཚུལ་ཁྲིམས་ཉམས་པའི་གང་ཟག་རྣམ་པར་སྤངས་པས་སྡིག་པའི་གྲོགས་པོ་ཡོངས་སུ་སྤངས་པར་རིག་པར་བྱའོ། །ལྟ་བ་ཉམས་པའི་གང་ཟག་རྣམ་པར་སྤངས་པ་དང་། ཆོ་ག་ཉམས་པའི་གང་ཟག་རྣམ་པར་སྤངས་པ་དང་། འཚོ་བ་ཉམས་པའི་

གང་ཟག་རྣམ་པར་སྤངས་པ་དང་། འདུ་འཛི་ལ་དགའ་བའི་གང་ཟག་རྣམ་པར་སྤངས་པ་དང་། ལེ་ལོ་ཅན་གྱི་གང་ཟག་རྣམ་པར་སྤངས་པ་དང་། འཁོར་བ་ལ་དགའ་བའི་གང་ཟག་རྣམ་པར་སྤངས་པ་དང་། བྱང་ཆུབ་ལ་རྒྱབ་ཀྱིས་ཕྱོགས་པའི་གང་ཟག་རྣམ་པར་སྤངས་པ་དང་། ཁྱིམ་པ་དང་བསྟེན་
པ་རྣམ་པར་སྤངས་པ་དང་། ཉོན་མོངས་པ་ཐམས་ཅད་རྣམ་པར་སྤངས་པས་ན། སྡིག་པའི་གྲོགས་པོ་རྣམ་པར་སྤངས་པར་རིག་པར་བྱ་སྟེ། རིགས་ཀྱི་བུ་བྱང་ཆུབ་སེམས་དཔའ་ངས་གནས་འདི་དག་རྣམ་པར་སྤོང་བའི་ཚེ། གང་ཟག་དེ་དག་ལ་ཞེ་སྡང་བའི་སེམས་བསྐྱེད་པར་མི་བྱའོ། །ཁོང་ཁྲོ་
བའི་སེམས་དང་བརྙས་པའི་སེམས་བསྐྱེད་པར་མི་བྱའོ། །དེས་འདི་ལྟར་བཅོམ་ལྡན་འདས་ཀྱིས་ཀྱང་སེམས་ཅན་རྣམས་ཀྱི་ཁམས་སོ་སོར་བསྟེན་ཏེ། བསྟེན་པར་མ་གྱུར་ན། ཆུད་ཟ་བར་འགྱུར་རོ་ཞེས་བཀའ་སྩལ་གྱིས། དེ་བས་ན་བདག་གིས་བསྟེན་པ་ཡོངས་སུ་སྤངས་པར་སེམས་ཉེ་བར་གཞག་
པར་བྱའོ། །རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའ་སྡིག་པའི་གྲོགས་པོ་ཡོངས་སུ་སྤངས་པ་རྣམས་ཡིན་ནོ་ཞེས་གསུངས་སོ། །ཚུལ་ཁྲིམས་འཆལ་པ་ཚར་བཅད་པའི་མདོ་ལས་ཀྱང་། ཤཱ་རིའི་བུ་དཔེར་ན་ས་ལས་བྱས་པའི་སྣོད་སར་པ་ཞིག་ཡོད་ལ་དེ་
སྐྱེས་པ་གང་ཞིག་གིས་ངན་སྐྱུགས་བླུགས་ནས། དེ་ཕོ་སྟེ་ཙནྡན་དམར་པོས་སླར་བཀང་ནས། ཙནྡན་དམར་པོ་དེ་ཡང་ཕོ་ན། ཤཱ་རིའི་བུ་འདི་ཇི་སྙམ་དུ་སེམས། ས་ལས་བྱས་པའི་སྣོད་སར་པ་དེ་ལ་འདི་ལྟར་ཙནྡན་གྱི་དྲིའམ། འོན་ཏེ་ངན་སྐྱུགས་ཀྱི་དྲི་འམ། དྲིའི་རང་བཞིན་གང་གི་
མཐུ་ཡོད་པར་འགྱུར། བཅོམ་ལྡན་འདས་དོག་པའི་སྣོད་དེ། ངན་སྐྱུགས་ཀྱི་དྲི་གང་ལགས་པ་དེ་ཁོ་ནས། ཐོག་མར་བསྒོས་པས་དྲི་དེའི་རང་བཞིན་ཁོ་ནར་འགྱུར་ལགས་ཏེ། འདི་ལྟ་སྟེ་ངན་སྐྱུགས་ཀྱི་དྲི་ལགས་སོ། །ཙནྡན་གྱི་དྲི་ནི་མ་ལགས་ཏེ། དེས་ནི་ཙནྡན་དམར་པོ་བགྱི་བ་
དང་སྒྲུབ་པ་རྔོ་མི་ཐོགས་ལགས་སོ། །ཤཱ་རིའི་བུ་དེ་བཞིན་དུ་འདི་ན་སེམས་ཅན་ཁ་ཅིག་དབང་པོ་ཡོངས་སུ་རྫོགས་ཤིང་ཡོངས་སུ་དག་སྟེ། དགེ་བའི་ཆོས་རྣམས་དང་ལྡན་ཞིང་། དེ་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་སྟེ། དེ་དག་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་

སྡིག་པའི་གྲོགས་པོའི་ལག་ཏུ་འདོང་བ་དང་། དབང་དུ་འདོང་བ་དང་། ཉེ་བར་འདོང་བར་འགྱུར་རོ། །ཤཱ་རིའི་བུ་སྡིག་པའི་གྲོགས་པོ་ཞེས་བྱ་བ་དེ་དག་གང་ཞེ་ན། ཤཱ་རིའི་བུ་སྡིག་པའི་གྲོགས་པོ་ནི་འདི་ལྟ་སྟེ། རྒོད་པ་དང་། ཕོ་ཐེག་ཆེ་བ་དང་། མི་བརྟན་པ་དང་། མུ་ཅོར་
སྨྲ་བ་དང་། ཐུག་ཐུབ་ཅན་དང་། ཚིག་ཟློས་བུ་ཅན་དང་། ལེ་ལོ་ཅན་དང་། བརྩོན་འགྲུས་ཞན་པ་དང་། བརྗེད་ངས་པ་དང་། སེམས་མཉམ་པར་མ་བཞག་པ་དང་། སེམས་འཁྲུགས་པ་དང་། མཛེས་པ་མ་ཡིན་པ་དང་། ཤེས་བཞིན་མ་ཡིན་པ་དང་། ཤེས་རབ་འཆལ་པ་དང་། ལུག་
ལྟར་ལྐུགས་པ་དང་། ཕལ་པའི་དབང་པོ་ཅན་གྱི་དགེ་སློང་རྣམས་ཡིན་ནོ། །དེ་དག་དགེ་སློང་དེ་ལྟ་བུ་དག་ལ་ཉེ་བར་བརྟེན་ཅིང་བཀུར་སྟི་དང་། བསྙེན་བཀུར་བྱེད་ན། རྒྱུན་དུ་ཞུགས་པའི་འབྲས་བུ་ལས་ཡོངས་སུ་ཉམས་པར་འགྱུར་རོ། །ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་
འབྲས་བུ་དང་། དགྲ་བཅོམ་པ་ཉིད་ལས་ཡོངས་སུ་ཉམས་པར་འགྱུར་རོ། །ཐ་ན་མཐོ་རིས་སུ་སྐྱེ་བ་ལས་ཀྱང་ཡོངས་སུ་ཉམས་པར་འགྱུར་རོ། །ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བྱེད་པར་འགྱུར་རོ། །ཆོས་ཀྱིས་ཕོངས་པར་འགྱུར་བ་དང་ལྡན་པ་དག་དང་ལྷན་ཅིག་གནས་པ་དང་།
ཀུན་དུ་གཞོལ་བར་འགྱུར་རོ། །ཡོངས་སུ་མ་དག་པའི་ལུས་ཀྱི་ལས་དང་ལྡན་པར་འགྱུར་རོ། །ཡོངས་སུ་མ་དག་པའི་ངག་གི་ལས་དང་། ཡིད་ཀྱི་ལས་དང་ལྡན་པར་འགྱུར་རོ། །དགེ་སློང་འཚོ་བ་ཡོངས་སུ་མ་དག་པ་དེ་ལྟ་བུ་དག་ལ་བརྟེན་ཅིང་། བཀུར་སྟི་དང་བསྙེན་བཀུར་བྱས་ནས་ལུས་ཞིག་པ་
ལས་ཤི་བའི་འོག་ཏུ་ངན་འགྲོར་འགྲོ་བར་འགྱུར་རོ། །ངན་འགྲོ་ཞེས་བྱ་བ་གང་ཞེ་ན། ཤཱ་རིའི་བུ་ངན་འགྲོ་ཞེས་བྱ་བ་ནི་འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་རིས་སོ། །ཤ་ར་དྭ་ཏིའི་བུ་སྲོག་ཆགས་ཀྱི་རིགས་རྙེད་
དགུ་ཟ་ཞེས་པ་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་མཆུས་རྐོ་ཞེས་བྱ་བ་ཞིག་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་ཁབ་ཀྱི་ཁ་ཞེས་བྱ་བ་ཞིག་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་ས་བསྩོག་ཅེས་བྱ་བ་ཞིག་ཡོད་པ་དང་། དེར་སྡིག་པའི་གྲོགས་པོ་སྐྱེས་བུ་

བླུན་པོ་དེ་དག་སྐྱེ་བར་འགྱུར་རོ། །ཤཱ་རིའི་བུ་སྡིག་པའི་གྲོགས་པོ་དེ་དག་གི་ལག་ཏུ་སོང་བ་དང་། དབང་དུ་སོང་བ་དང་། ཉེ་བར་སོང་བ་གང་ཡིན་པ་དེ་དག་ཀྱང་ལུས་ཞིག་ནས་ཤི་བའི་འོག་ཏུ་ངན་འགྲོར་འགྲོ་བར་འགྱུར་རོ། །ཤཱ་རིའི་བུ་ངན་འགྲོ་ཞེས་བྱ་བ་གང་ཞེ་ན། ཤཱ་རིའི་བུ་ངན་འགྲོ་
ཞེས་བྱ་བ་ནི། འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་རིས་སོ། །གལ་ཏེ་སེམས་ཅན་དམྱལ་བ་ནས་ཤི་འཕོས་ཏེ། མི་རྣམས་སུ་སླར་སྐྱེ་བར་འགྱུར། དེ་དག་མི་རྣམས་སུ་སླར་སྐྱེས་ན་མ་དང་ཡང་འབྲལ་
བར་འགྱུར་ཞིང་ཕ་དང་ཡང་འབྲལ་བ་དང་། སྤུན་དང་ཡང་འབྲལ་བ་དང་། སྲིང་མོ་དང་ཡང་འབྲལ་བ་དང་། བུ་དང་ཡང་འབྲལ་བ་དང་། བུ་མོ་དང་ཡང་འབྲལ་བ་དང་། བྲན་གཡོག་དང་ཡང་འབྲལ་བ་དང་། གྲོགས་པོ་དང་ཡང་འབྲལ་བ་དང་། ཉེ་དུ་དང་ཡང་འབྲལ་བ་དང་།
ནད་ཀྱིས་ཀྱང་ཉམ་ཐག་པ་དང་། ལོངས་སྤྱོད་དང་ཡང་འབྲལ་བ་དང་། ཡུལ་དང་ཡང་འབྲལ་བ་དང་། ཡུལ་ཕྱོགས་དང་ཡང་འབྲལ་བར་འགྱུར་རོ། །མི་ཁོམ་པ་བརྒྱད་དང་ཡང་ལྡན་པར་འགྱུར་རོ། །དལ་བ་ཕུན་སུམ་ཚོགས་པ་དང་ཡང་འབྲལ་བར་འགྱུར་རོ། །འདོད་ཆགས་བདོ་
བ་དང་། ཞེ་སྡང་བདོ་བ་དང་། གཏི་མུག་བདོ་བར་ཡང་འགྱུར་རོ། །རྒོད་པ་དང་། ཕོ་ཐེག་ཆེ་བ་དང་། མི་བརྟན་པ་དང་། མུ་ཅོར་སྨྲ་བ་དང་། ཐུག་ཐུབ་ཅན་དང་། ཚིག་ཟློས་བུ་ཅན་དང་། ལེ་ལོ་ཅན་དང་། བརྩོན་འགྲུས་ཞན་པ་དང་། མ་བསྡམས་པ་དང་། ཤེས་བཞིན་མ་ཡིན་པ་དང་།
མཉམ་པར་མ་བཞག་པ་དང་། བརྗེད་ངས་པ་དང་། ཤེས་རབ་འཆལ་པ་དང་། ལུག་ལྟར་ལྐུགས་པ་དང་། སེམས་འཁྲུགས་པ་དང་ཕལ་པའི་དབང་པོ་ཅན་རྣམས་སུ་འགྱུར་རོ། །འདོད་ཆགས་ཀྱིས་ཀྱང་བཅོམ་པར་འགྱུར་ཏེ། ཞེ་སྡང་གིས་བཅོམ་པ་དང་། གཏི་མུག་གིས་བཅོམ་པ་
དང་། ང་རྒྱལ་གྱིས་བཅོམ་པར་ཡང་འགྱུར་རོ། །ལོང་བ་དང་། ཞར་བ་དང་། སྒུར་པོ་དང་། འགྲམ་པ་ཞོམ་པ་དང་། འོན་པ་དང་། རྣ་བ་ཡ་གཅིག་འོན་པ་དང་། ལྷག་པར་འོན་པ་དང་། རྐྱེན་གྱིས་འོན་པ་དང་། གླེན་པ་དང་། དིག་པ་དང་། ལུག་ལྟར་ལྐུགས་པ་རྣམས་སུ་འགྱུར་རོ་

ཞེས་གསུངས་སོ། །གཟི་བརྗིད་ཅན་གྱི་མདོ་ལས་ཀྱང་། དགེ་འདུན་གྱི་དབྱེན་བརྗོད་པར་བྱ་སྟེ། གང་ཞིག་བསླབ་པའི་གནས་མངོན་པར་བཅོམ་ནས། སངས་རྒྱས་ཀྱིས་བཅས་པའི་བསླབ་པའི་གནས་ལ་སྨོད་པ་དེ་ནི་དགེ་འདུན་གྱི་དབྱེན་ཞེས་བྱའོ། །དགེ་འདུན་ནི་ཡང་
དག་པར་སྒྲོགས་པ་ལས་བརྗོད་དེ། གང་གིས་ཚུལ་ཁྲིམས་དང་ལྡན་པ་དེ་དག་སྨིན་པར་འགྱུར་བ་དེ། དེ་དག་གིས་ཡང་དག་པར་སྒྲོགས་པར་འགྱུར་རོ། །ཡང་དག་པར་མི་སྒྲོགས་པ་སུ་ཞིག་ཡིན་ཞེ་ན། གང་དག་ལྟུང་བ་དང་ལྟུང་བ་མ་ཡིན་པ་མི་ཤེས་པའོ། །ང་ནི་དགེ་སྦྱོང་དུ་གནས་སོ་
སྙམ་དུ་བདག་ཉིད་ལ་སེམས་པ་དེ་དག་མགོ་བཅད་པར་འགྱུར་ཞིང་། ཡང་དག་པར་རྗེས་སུ་ལྟ་བར་མི་འགྱུར་རོ། །དེ་ནས་གང་གི་ཚེ་མང་དུ་ཐོས་པ་མཉེས་པར་བྱེད་པ་དེའི་ཚེ། འདུལ་བ་ལ་མཁས་པ་ཡོངས་སུ་དྲིས་པ་དག་གིས་བདག་ཉིད་མགོ་བཅད་དེ་གནས་པར་ཡང་དག་པར་ཤེས་པར་
འགྱུར་རོ། །དེ་དག་དབེན་པའི་གནས་སུ་སོང་ནས། ཀྱེ་མའོ་འདི་ནི་ངོ་མཚར་ཏོ། །ཀྱེ་མའོ་སློབ་དཔོན་ངན་པ་དང་མཁན་པོ་ངན་པ་དག་གིས་བསླུས་པ་འདི་ནི་ངོ་མཚར་ཏོ། །ཀྱེ་མའོ་ཆོས་ཀྱི་རྒྱལ་པོའི་བསྟན་པ་འདི་ནི་ངོ་མཚར་ཏོ། །གང་དུ་འདོམས་པར་འགྱུར། སུ་ཞིག་སྨྲ་བར་
འགྱུར། སུ་ཞིག་མཉེས་པར་བྱ། བདག་ནི་དེང་འཆི་བར་འགྱུར་རོ། །རྣམ་པར་འཇིགས་པ་དང་། བདག་ནི་དེང་དཔུང་གཉེན་མེད་པར་འགྱུར། གང་དུ་སོང་ཞིང་གནས་ནས་མྱ་ངན་གྱི་ཟུག་རྔུ་འབྱིན་པར་འགྱུར་བ། ཕྱོགས་གང་ཞིག་ཏུ་རྒྱུག་པར་བྱ་ཞེས་བདག་ཉིད་ལ་བཤུང་བར་བྱེད་
དོ། །ཀྱེ་མའོ་ཤིན་ཏུ་གསལ་བར་གསུངས་པའི་སངས་རྒྱས་འདི་ནི་ངོ་མཚར་ཏོ། །ཀྱེ་མའོ་འདོད་ཆགས་དང་བྲལ་བའི་ཆོས་འདི་ནི་ངོ་མཚར་ཏོ། །ཀྱེ་མའོ་དགེ་འདུན་གྱིས་ལེགས་པར་རབ་ཏུ་བརྗོད་པ་འདི་ནི་ངོ་མཚར་ཏོ། །དེང་བདག་ནི་ཚུལ་ཁྲིམས་ལས་རབ་ཏུ་ཉམས་སོ། །ཏིང་ངེ་
འཛིན་དང་། ཤེས་རབ་དང་། རྣམ་པར་གྲོལ་བ་དང་། དེང་བདག་ནི་རྣམ་པར་གྲོལ་བའི་ཡེ་ཤེས་མཐོང་བ་ལས་རབ་ཏུ་ཉམས་སོ། །ངན་སོང་དུ་འགྲོ་བ་ལ་ཕྱོགས་པར་འགྱུར་རོ། །བདེ་འགྲོའི་འགྲོ་བ་བཀག་བཞིན་དུ་འཆི་བར་འགྱུར་རོ། །བདག་གིས་ཆུ་བོ་ལས་བརྒལ་བར་མི་

འགྱུར་རོ། །མི་སྙན་པའི་སྒྲ་ཐོས་པར་འགྱུར་རོ། །སེམས་ཅན་དམྱལ་བར་རབ་ཏུ་ལྟུང་བར་འགྱུར་རོ། །ལུས་ཀུན་ནས་འབར་བར་འགྱུར་རོ། །དམྱལ་བའི་སྲུང་མས་གཟིར་བར་འགྱུར་བཞིན་དུ་ཕྱོགས་གང་དུ་རྒྱུག་པར་འགྱུར་རོ། །སུ་ཞིག་གིས་མི་འཇིགས་པ་སྟེར་བར་འགྱུར།
གང་དག་གིས་དད་པས་བྱིན་པ་ཡོངས་སུ་ལོངས་སྤྱད་པར་གྱུར་པ། དེ་དག་ལག་ན་དབྱུག་པ་ཐོགས་ཏེ་མདུན་ན་ཉེ་བར་གནས་པར་འགྱུར་རོ། །སུ་ཞིག་སྦྲན་པར་བྱ། འོན་ཏེ་དམྱལ་བའི་སྲུང་མ་དག་ལའམ། འོན་ཏེ་ཁྱི་དག་ལའམ། འོན་ཏེ་ལྕགས་ཀྱི་མཆུ་ཅན་གྱི་བྱ་རོག་དག་
ལའམ། ཡང་ན་སློང་མོ་བ་དག་ལའང་རུང་སྟེ་སུ་ཞིག་ལ་བསྐྱབ་པར་བྱ། འོན་ཏེ་བྲོས་པར་བྱ། བདག་ནི་མི་བདེ་བའི་ཕྱོགས་སུ་འགྲོ་བར་འགྱུར་རོ་ཞེས་དེ་སྐད་དུ་ཚིག་སྨྲ་བར་འགྱུར་རོ། །དགེ་སློང་དགོན་པ་པ་དག་མཐོང་ནས་འདི་སྐད་དུ། ཀྱེ་མའོ་འཕགས་པ་འདི་ནི་བདེ་བ་སྟེ། གང་
གི་ཕྱིར་དགེ་སློང་དགོན་པ་དང་ཤིན་ཏུ་དགོན་པ་དག་ཏུ་ལྟོས་པ་མེད་པར་གནས་པ། སེམས་ཀྱི་ནད་མེད་པ། ལུས་ཀྱི་སྡུག་བསྔལ་དང་སེམས་ཀྱི་སྡུག་བསྔལ་མེད་པའོ། །བདག་ཅག་ནི་དེང་ཕུན་སུམ་ཚོགས་པ་མེད་པ་བདག་ཅག་ནི་དེང་བསོད་ནམས་མེད་པ་གང་བདག་ཅག་ནི་སངས་
རྒྱས་ཀྱི་ཆེད་དུ་རབ་ཏུ་བྱུང་ནས་ཁྱིམ་པ་རྣམས་དང་ལྷན་ཅིག་མཉམ་པའི་ལོངས་སྤྱོད་ཙམ་གྱིས་འཚོ་བའོ། །ཚུལ་ཁྲིམས་འཆལ་པའི་གང་ཟག་བསྟེན་པ་དག་གིས་དགེ་སྦྱོང་གི་ཆོས་ལ་ངོ་ཚ་བར་འགྱུར་དུ་འོང་ངོ་ཞེས་སྨྲ་བར་འགྱུར་རོ། །གལ་ཏེ་ཡང་བདག་ཅག་ཚུལ་ཁྲིམས་དང་
ལྡན་པ་ལ་བརྟེན་པ་ན། དེའི་ཚེ་སྨད་པར་འགྱུར་དུ་འོང་། ངོ་ཚ་བར་འགྱུར་དུ་འོང་། དགེ་སློང་དེས་པ་དག་གིས་ལྟ་བར་འགྱུར་དུ་འོང་། དེའི་ཚེ་མཐོང་བ་ཙམ་དང་ལྷན་ཅིག་འདི་ནི་སུའི་ཡིན། གང་ནས་ཡིན། སུ་ཞིག་ཡིན། འོན་ཏེ་ཚུལ་ཁྲིམས་དང་ལྡན་པ་ཞིག་གམ། འོན་ཏེ་
ཚུལ་ཁྲིམས་འཆལ་པ་ཡིན་ཞེས། བདག་ཅག་ལ་ངེས་པར་རྟོག་པར་འགྱུར་དུ་འོང་། ཞུམ་པ་དང་། ཡོངས་སུ་ཞུམ་པ་དང་། རྣམ་པར་ཞུམ་པ་དང་། སྡུག་བསྔལ་བར་འགྱུར། མདུན་ན་མི་དགའ་བར་འགྱུར། ཁ་ཕྱིར་ཕྱོགས་ཏེ་ལྡོག་པར་འགྱུར་དུ་འོང་ངོ་། །དཔེར་ན་

འུག་པ་ནི་ཉི་མ་མ་ཤར་བའི་ཚེ་ཚང་ནས་ཁ་གདངས་ཏེ། མཚན་མོ་དེར་བྱ་རོག་དག་མཐོང་ནས་བདག་ཅག་མཐོང་ངམ་མི་མཐོང་སྙམ་དུ་ཕྱོགས་བཞིར་རྗེས་སུ་ལྟ་བར་བྱེད། གཞན་ན་རི་ཆེན་པོ་གང་དག་ཡོད་པ་དེ་དག་མཐོང་ནས་དེར་འགྲོ་བར་འགྱུར་ཏེ། འདི་ལྟར་དེ་
ལས་མཚན་མོ་འགྲོ་བ་དང་འོང་བ་དང་རྟོག་པར་འགྱུར་རོ་སྙམ་མོ། །བློ་གྲོས་མེད་པ་དེས་ཚང་རྙེད་པར་མི་འགྱུར་རོ། །བྱ་རོག་དང་འཁོར་ལོས་བརྒྱན་པ་དག་ཀྱང་དེའི་རྗེས་སུ་འཕུར་བར་བྱེད་ཅིང་རྗེས་སུ་འགྲོ་བར་འགྱུར་རོ། །དེ་འཇིགས་པས་དེ་མ་ཐག་ཏུ་མུན་པ་ཚོལ་ཞིང་། ཀུན་དུ་
ལྟ་བར་འགྱུར། དེ་འཇིགས་ཏེ་བྱ་རོག་གི་ཚོགས་ལ་ལྟ་བར་བྱེད་དོ། །དེ་བཞིན་དུ་ཚུལ་ཁྲིམས་འཆལ་པའི་དགེ་སློང་དག་ཀྱང་འུག་པ་འདྲ་བར་བརྗོད་དོ། །གང་གི་ཚེ་གང་དུ་དགེ་སློང་འདུས་པ་དང་གསོ་སྦྱོང་གི་ལས་དང་ཆོས་ཉན་པའི་ལས་དང་སྒྲོགས་པའི་ལས་བྱེད་པ་དེའི་ཚེ། ཁ་
ཅིག་བདག་ལ་རྟོག་པར་འགྱུར་ཁ་ཅིག་བདག་ལ་སྨྲ་བར་འགྱུར་རོ་སྙམ་དུ་ཚུལ་ཁྲིམས་འཆལ་པ་འཇིགས་པར་འགྱུར། སྐྲག་པར་འགྱུར། དགེ་སློང་གི་དབུས་སུ་སོང་བ་བསྒྲིབས་པར་སོང་བ་དེ་དགེ་སློང་གི་དགེ་འདུན་གྱིས་རིག་ནས། གཞན་གྱིས་ཀྱང་ལོ་མི་འདྲི་ཞིང་བདག་ཉིད་
ཀྱང་མི་སྨྲའོ། །ངོ་མི་ལྟ་ཞིང་སེམས་ས་ཕྱོགས་ལ་གཏད་དེ་འདུག་པར་འགྱུར། འདི་དག་སྨྲ་བ་ན་བདག་གིས་ཅི་ཞིག་སྨྲ་བར་བྱ། ཇི་ལྟར་བྱ་སྙམ་དུ་སེམས་པར་འགྱུར། དགེ་སློང་གི་དགེ་འདུན་ལངས་པའི་ཚེ་བདག་འགྲོ་བ་ན་ཁ་ཅིག་འགའ་ཞིག་སྨྲ་བར་འགྱུར་སྙམ་ནས་ཕྱི་ནས་འགྲོ་བར་
འགྱུར་རོ། །འདི་ལྟར་ཡང་ཚུལ་ཁྲིམས་འཆལ་པའི་དགེ་སློང་དེའི་ཚེ་ཁྱིམ་ནས་འཐོན་ཏེ་འུག་པ་ཚང་ནས་འབྱུང་བ་བཞིན་དུ་ཕྱོགས་བཞིར་ལྟ་བར་བྱེད་དོ། །གལ་ཏེ་དགེ་སློང་དེས་པ་དག་གིས་མཐོང་བ་ལས་འདི་སྐད་དུ། དགེ་སློང་འདི་ནི་འདི་སྐད་དུ་སྨྲ་བ་ལས་ན། ཚེ་དང་ལྡན་པ་དག་
དེ་ལ་ཡིད་བརྟན་པར་མ་བྱེད་ཅིག་ཅེས་སྨྲ་བར་འགྱུར་རོ། །དགེ་སློང་གི་དགེ་འདུན་མཐུན་པར་ཤེས་པ་དེ་དག །གང་ལ་འདི་ན་འདུག་པ་འདི་ལྟ་བུ་སུ་ཞིག་དེ་ལ་རྗེས་སུ་ལྟ་བར་འགྱུར། གལ་ཏེ་དགེ་སློང་རྣམས་ཀྱིས་གཙེས་པ་ན་དེ་མ་ཐག་ཏུ། གང་ན་རྩོད་པ་སྨྲ་བ་མེད་པའི་ལམ་

གོལ་བ་ཉིད་བསྟེན་པར་འགྱུར་ཏེ། ཀུན་དགའ་བོ་ཚུལ་ཁྲིམས་འཆལ་པའི་དགེ་སློང་རྣམ་པ་དེ་ལྟ་བུ་ནི་འུག་པ་དང་འདྲ་བར་བརྗོད་དོ། །གསད་པའི་ཕྱིར་གཏད་པ་ལྟ་བུ་སྟེ། དེ་ཅིའི་ཕྱིར་ཞེ་ན། དཔེར་ན་གསོད་པར་གཏད་པ་དང་ངེས་པར་གཏད་པ་ནི། ཟས་ཀྱི་ཐ་མ་ཟ་བ་ཡིན། བཏུང་
བའི་ཐ་མ་འཐུང་བ་ཡིན། ཕྲེང་བའི་ཐ་མ་འཆིང་བ་ཡིན། ཚིག་གི་ཐ་མ་སྨྲ་བར་བྱེད་པ་ཡིན་ནོ། །དེ་བཞིན་དུ་ཚུལ་ཁྲིམས་འཆལ་པའི་དགེ་སློང་ཇི་ལྟ་ཇི་ལྟར་དད་པས་བྱིན་པ་ཟ་བ། དེ་ལྟ་དེ་ལྟར་མིའི་ཟས་ཐ་མ་ཟ་བ་ཡིན། སངས་རྒྱས་མཐོང་བ་ཐ་མ་ཡིན། ཆོས་ཐོས་པ་ཐ་མ་
ཡིན། འཕགས་པའི་དགེ་འདུན་མཐོང་བ་ཐ་མ་ཡིན། མིར་སྐྱེ་བའི་གནས་ཐ་མ་ཡིན་ནོ། །དེ་ནས་ལུས་ཞིག་པ་ན་མནར་མེད་པར་ལྟུང་བར་འགྱུར་རོ། །ཀུན་དགའ་བོ་དེའི་ཕྱིར་ན། ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །བྱ་བ་འདི་དང་ལྡན་པའི་དགེ་སློང་གྲོལ་བར་
མི་འགྱུར་རོ། །ཀུན་དགའ་བོ་ཟས་ནི་རབ་ཏུ་བྱུང་བར་འགྱུར་བའི་དམྱལ་བ་འཐོབ་པར་བྱེད་པར་འགྱུར་རོ་ཞེས་གསུངས་སོ། །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཀྱང་། ལྟོས་ཤིག་སྡིག་པའི་གྲོགས་ཀྱི་ཚིག་གིས་ནི། །དེ་ཚེ་མ་རུངས་
རྒྱལ་པོ་འཆི་དུས་བྱས། །ཆོས་སྨྲ་དག་ལ་ཁྲོ་བ་བྱས་པས་ན། །དེར་ནི་ཚེ་རབས་དྲུག་ཅུར་མནར་མེད་སོང་། །རྒྱལ་རིགས་རྒྱལ་པོ་གང་ཞིག་རྦད་པ་ཡི། །དགེ་སློང་དམིགས་ལྟ་མང་པོ་དེ་དག་ཀྱང་། །ཚེ་རབས་བྱེ་བ་བརྒྱ་ཕྲག་བསམ་ཡས་སུ། །སེམས་ཅན་དམྱལ་བའི་སྡུག་
བསྔལ་མྱོང་བར་གྱུར། །ཞེས་གསུངས་སོ། །གཟི་བརྗིད་ཅན་གྱི་མདོ་ལས་ཀྱང་། དེ་ལ་ཀློང་འཁོར་དང་། སྲིན་པོ་ལྔ་གང་ཞེ་ན། མ་རིག་པའི་ཀློང་འཁོར་དང་། གཉིད་དང་རྨུགས་པའི་ཀློང་འཁོར་དང་། འཁོར་བའི་ཀློང་འཁོར་དང་། མི་ཤེས་པའི་ཀློང་འཁོར་དང་། སྲིད་
པའི་ཀློང་འཁོར་ཏེ། འདི་དག་ནི་ཀློང་འཁོར་ལྔའོ། །དེ་ལ་གཅིག་ནི་ཀློང་འཁོར་ཆེན་པོ་སྟེ། གང་གིས་ཁམས་གསུམ་དུ་ཡོངས་སུ་སྐོར་བར་བྱེད་པ་དང་། ཁམས་གསུམ་ལས་ལྡོག་པར་མི་འགྱུར་བའོ། །དེ་ལ་ཀློང་འཁོར་ལྔ་པོ་དེ་དག་ནི་སྲིན་པོ་ལྔ་གང་ཞེ་ན། སྡིག་པའི་

གྲོགས་པོའི་སྲིན་པོ་དང་། མི་ཁོམ་པར་སྐྱེ་བའི་སྲིན་པོ་དང་། བུད་མེད་བསྟེན་པའི་སྲིན་པོ་དང་། ཚུལ་བཞིན་མ་ཡིན་པ་ཡིད་ལ་བྱེད་པའི་སྲིན་པོ་དང་། བདག་ཏུ་འདུ་ཤེས་པའི་སྲིན་པོ་སྟེ། འདི་དག་ནི་སྲིན་པོ་ལྔའོ། །དེ་ལ་སྲིན་པོ་ལྔ་པོ་དེ་དག་ལས་གང་ཞིག་
བུད་མེད་བསྟེན་པ་འདི་ནི་གཙོ་བོ་ཀློང་འཁོར་གྱི་སྲིན་པོ་ཡིན་ཏེ། འདི་དག་ནི་ཀློང་འཁོར་དང་སྲིན་པོ་ལྔའོ་ཞེས་གསུངས་སོ། །དམ་པའི་ཆོས་དྲན་པ་ཉེ་བར་གཞག་པའི་མདོ་ལས་ཀྱང་། སྡིག་པའི་གྲོགས་པོ་ཐང་ཅིག་ཀྱང་བསྟེན་པར་མི་འགྱུར། ཚིག་གིས་མདངས་གསོལ་བར་མི་
བྱེད། དེ་དང་ལྷན་ཅིག་ལམ་དུའང་འགྲོ་བར་མི་བྱེད་དེ། གང་གི་ཕྱིར་གང་འདི་ལྟ་སྟེ་སྡིག་པའི་གྲོགས་པོ་དང་འགྲོགས་པའམ། དེ་བསྐྱང་བའམ། དེ་དང་ལྷན་ཅིག་འགྲོ་བ་དང་འོང་བར་བྱེད་པའམ། དེའི་གྲིབ་མ་ལ་རེག་པ་འདི་ནི་དགེ་བའི་ཆོས་ཐམས་ཅད་ཀྱི་བར་དུ་གཅོད་པའི་གཙོ་བོ་ཡིན་
པའི་ཕྱིར་རོ། །དེ་ཅིའི་ཕྱིར་ཞེ་ན། སྡིག་པའི་གྲོགས་པོ་ལམ་ཀའི་ཤིང་ལྟར། འདོད་ཆགས་དང་ཞེ་སྡང་དང་གཏི་མུག་གི་གནས་སུ་གྱུར་པའོ་ཞེས་གསུངས་སོ།། །།དགེ་བའི་བཤེས་གཉེན་ལ་དགོངས་པ་བསྟན་པ། བུ་མོ་ཡོན་ཏན་གྱིས་བརྒྱན་པ་མངོན་པར་ཤེས་པ་རྒྱས་
པའི་ལེའུའི་མདོ་ལས་ཀྱང་། འདི་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བུ་མོ་ཡོན་ཏན་གྱིས་བརྒྱན་པ་མངོན་པར་ཤེས་པ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའི་དགེ་བའི་བཤེས་གཉེན་གང་ལགས། བཅོམ་ལྡན་འདས་ཀྱིས་
བཀའ་སྩལ་པ། བུ་མོ་གང་བྱང་ཆུབ་སེམས་དཔའི་དགེ་བའི་བཤེས་གཉེན་ནི་ལྷ་དང་བཅས་པའི་འཇིག་རྟེན་དང་། བདུད་དང་བཅས་པའི་འཇིག་རྟེན་དང་། ཚངས་པ་དང་བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེ་དང་བཅས་པའི་སྐྱེ་དགུ་ལ་ངས་མ་མཐོང་སྟེ། མང་དུ་ཐོས་
པའི་བྱང་ཆུབ་སེམས་དཔའ་ནི་མ་གཏོགས་སོ་ཞེས་གསུངས་སོ། །རྣལ་འབྱོར་སྤྱོད་པ་བྱང་ཆུབ་སེམས་དཔའི་ས་ལས་ཀྱང་། དེ་ལ་རྣམ་པ་དུ་དང་ལྡན་ན་བྱང་ཆུབ་སེམས་དཔའི་དགེ་བའི་བཤེས་གཉེན་དུ་རིག་པར་བྱ། རྣམ་པ་དུ་ཞིག་གིས་ནི་དགེ་བའི་བཤེས་གཉེན་ཉིད་དོན་ཡོད་པ་

ཡིན། རྣམ་པ་དུ་ཞིག་དང་ལྡན་ན་དགེ་བའི་བཤེས་གཉེན་དད་པའི་གཞིའི་གནས་ལ་གནས་པ་ཡིན། བྱང་ཆུབ་སེམས་དཔའི་དགེ་བའི་བཤེས་གཉེན་དུ་གྱུར་པའི་འདུལ་བ་རྣམས་ལ་དགེ་བའི་བཤེས་གཉེན་གྱི་བྱ་བ་ནི་དུ་ཞིག་ཡོད། བྱང་ཆུབ་སེམས་དཔའ་དགེ་བའི་བཤེས་གཉེན་ལ་
བརྟེན་པ་ནི་རྣམ་པ་དུ་ཞིག་ཡོད། འདུ་ཤེས་རྣམ་པ་དུས་ནི་བྱང་ཆུབ་སེམས་དཔའ་དགེ་བའི་བཤེས་གཉེན་ལས་ཆོས་མཉན་པར་བྱ། བྱང་ཆུབ་སེམས་དཔའ་དགེ་བའི་བཤེས་གཉེན་ལ་ཆོས་ཉན་པ་ན། གང་ཟག་ཆོས་སྨྲ་བ་དེ་ལ་གནས་དུ་ཞིག་ལ་ནི་ཡིད་ལ་མི་བྱེད་པ་བྱ་ཞེ་ན། དེ་ལ་
རྣམ་པ་བརྒྱད་དང་ལྡན་ན། བྱང་ཆུབ་སེམས་དཔའི་དགེ་བའི་བཤེས་གཉེན་རྣམ་པ་ཐམས་ཅད་རྫོགས་པ་ཡིན་པར་རིག་པར་བྱ་སྟེ། བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་རྣམས་ལ་གནས་ཤིང་མ་ཉམས་པ་དང་། སྐྱོན་མེད་པར་བྱེད་པས་ཚུལ་ཁྲིམས་ལ་གནས་པ་ཡིན།
བློ་མ་བྱང་བ་མ་ཡིན་པས་མང་དུ་ཐོས་པ་ཡིན། བསྒོམས་པ་ལས་བྱུང་བའི་དགེ་བ་གང་ཡང་རུང་བ་ཐོབ་ཅིང་ཞི་གནས་དང་ལྷག་མཐོང་ཐོབ་པས་རྟོགས་པ་དང་ལྡན་པ་ཡིན། སྙིང་རྗེ་དང་ལྡན་པས་སྙིང་བརྩེ་བ་ཅན་ཡིན་ཏེ། དེ་ཚེ་འདི་ལ་རང་གི་བདེ་བར་གནས་པ་ཡལ་བར་བོར་ནས།
གཞན་དག་གི་དོན་ལ་སྦྱོར་བ་ཡིན། དེ་གཞན་དག་ལ་ཆོས་སྟོན་པ་ན་བག་ཚ་བའི་འཇིགས་པས་དྲན་པ་དང་སྤོབས་པ་ཉམས་པ་མེད་པས་འཇིགས་པ་མེད་པ་ཡིན། གཞན་དག་གིས་བརྙས་པ་རྣམས་དང་། འཕྱ་བ་དང་། བསྟིང་བ་དང་ངན་དུ་བརྗོད་པ་དང་། ངན་དུ་སྨྲ་བ་ལ་
སོགས་པ་མི་སྙན་པའི་ཚིག་གི་ལམ་རྣམས་དང་། སེམས་ཅན་གྱི་ལོག་པར་ཞུགས་པ་རྣམ་པ་སྣ་ཚོགས་རྣམས་བཟོད་པ་ཡིན། འཁོར་བཞི་པོ་དག་ལ་ཆོས་བསྟན་པ་ན། སྟོབས་དང་ལྡན་ཞིང་། དལ་བ་མེད་པས་ཡིད་ཡོངས་སུ་མི་སྐྱོ་བ་ཡིན། ཚིག་ཆོས་ཉིད་ལས་མི་ཉམས་
ཤིང་གསལ་ལ་ཚིག་གི་བྱ་བ་དང་ལྡན་པས་དགེ་བའི་ཚིག་དང་ལྡན་པ་ཡིན་ནོ། །དེ་ལ་བྱང་ཆུབ་སེམས་དཔའི་དགེ་བའི་བཤེས་གཉེན་དེ་ལྟ་བུའི་ཡོན་ཏན་གྱི་རྣམ་པ་ཐམས་ཅད་དང་ལྡན་པ་ནི། རྣམ་པ་ལྔས་དགེ་བའི་བཤེས་གཉེན་གྱི་བྱ་བ་དོན་ཡོད་པ་ཡིན་ཏེ། དེ་ནི་སྔ་ནས་ཀྱང་གཞན་

དག་ལ་ཕན་པ་དང་བདེ་བར་འདོད་པ་ཡིན། ཕན་པ་དང་བདེ་བ་དེ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ཡིན། དེ་ལ་བློ་ཕྱིན་ཅི་ལོག་ཏུ་མི་འགྱུར་བ་ཡིན། ཐབས་གང་དང་ཆོས་བསྟན་པའི་ཚུལ་གང་གིས་སེམས་ཅན་གང་འདུལ་ནུས་པ་དེ་ལ་ནུས་ཤིང་
མཐུ་ཡོད་པ་དང་། ཡིད་ཡོངས་སུ་མི་སྐྱོ་བ་ཡིན། སེམས་ཅན་ཐ་མ་དང་། འབྲིང་དང་། ཁྱད་པར་དུ་འཕགས་པ་ཐམས་ཅད་ལ་ཕྱོགས་འཛིན་པ་མེད་དེ། སྙིང་རྗེ་སྙོམས་པ་ཡིན་ནོ། །དེ་ལ་དགེ་བའི་བཤེས་གཉེན་དེ་ནི་རྣམ་པ་ལྔས་དད་པའི་གཞི་ལ་གནས་པ་ཡིན་ཏེ། གང་གི་ཕྱིར་
གཏམ་ཐོས་པས་ཀྱང་དེ་ལ་གཞན་དག་ཤིན་ཏུ་དང་བར་བྱེད་ན། མངོན་སུམ་དུ་མཐོང་བས་ལྟ་སྨོས་ཀྱང་ཅི་དགོས་ཏེ། སྤྱོད་ལམ་རབ་ཏུ་ཞི་བ་དང་། སྤྱོད་ལམ་དང་ལྡན་པ་དང་། ཡན་ལག་དང་ཉིང་ལག་ཐམས་ཅད་མི་འགྱུར་བས་སྤྱོད་ལམ་ཕུན་སུམ་ཚོགས་པ་ཡིན། ལུས་དང་ངག་དང་
ཡིད་ཀྱི་ལས་ཀྱི་མཐའ་རྒྱུ་བ་ལ་རྒོད་པ་མེད་ཅིང་འགྱུར་བ་མེད་པས་བརྟན་པ་ཡིན། གཞན་དག་ལ་ཚུལ་འཆོས་པ་མེད་པའི་ཕྱིར་སོ་སོར་བརྟགས་ནས་སྤྱོད་ལམ་དང་བརྟན་པ་ལྟར་མི་འཆོས་པས་ཚུལ་འཆོས་པ་མེད་པ་ཡིན། གཞན་དག་གི་ཆོས་ཀྱི་གཏམ་མམ། རྙེད་པ་དང་བཀུར་སྟི་ལས་
བརྩམས་ཏེ། ཕྲག་དོག་སྐྱེད་པར་མི་བྱེད་ཀྱི་གཞན་དག་གིས་ཆོས་ཀྱི་གཏམ་བྱ་བར་བདག་ལ་གསོལ་བ་བཏབ་པ་དང་། རྙེད་པ་དང་བཀུར་སྟི་རྒྱ་ཆེན་པོ་རྙེད་ན་ཡང་གཡོ་བ་མེད་ཅིང་དགའ་བའི་སེམས་ཀྱིས་གཞན་ལ་གསོལ་བ་འདེབས་སུ་འཇུག་ལ། ཆོས་ཀྱི་གཏམ་དེ་དང་རྙེད་པ་དང་
བཀུར་སྟི་དེ་ཡང་གཞན་དག་ལ་སྟོབས་པར་བྱེད་དེ། ཇི་ལྟར་བདག་གི་རྙེད་པ་དང་བཀུར་སྟིས་མགུ་བར་འགྱུར་བ་དེ་བཞིན་དུ་གཞན་གྱི་རྙེད་པ་དང་། གཞན་གྱི་བཀུར་སྟིས་ཆེས་ཤིན་ཏུ་མགུ་བར་འགྱུར་བས་ཕྲག་དོག་མེད་པ་ཡིན། སྣོད་སྤྱད་བསྙུངས་ཤིང་ཡོ་བྱད་བསྙུངས་ལ། འཚོག་
ཆས་རྙེད་དོ་ཅོག་ཐམས་ཅད་ཡོངས་སུ་གཏོང་བས་ཡོ་བྱད་བསྙུངས་པ་ཡིན་ནོ། །དེ་ལ་བྱང་ཆུབ་སེམས་དཔའ་དགེ་བའི་བཤེས་གཉེན་དུ་གྱུར་པ་དེ་ནི་རྣམ་པ་ལྔས་འདུལ་བ་གཞན་དག་ལ་དགེ་བའི་བཤེས་གཉེན་གྱི་བྱ་བ་བྱེད་དེ། གླང་བར་བྱེད་པ་ཡིན། དྲན་པར་བྱེད་པ་ཡིན། འདོམ་

པར་བྱེད་པ་ཡིན། རྗེས་སུ་སྟོན་པར་བྱེད་པ་ཡིན། ཆོས་སྟོན་པར་བྱེད་པ་ཡིན་ཏེ། ཚིག་དེ་དག་གིས་རྒྱས་པར་དབྱེ་བ་ནི་འདི་ལྟ་སྟེ། ཉན་ཐོས་ཀྱི་ས་ལས་རིག་པར་བྱའོ། །གདམས་ངག་དང་རྗེས་སུ་བསྟན་པ་ནི་དེ་བས་ཀྱང་ལྷག་པར་འདི་ལྟ་སྟེ། སྟོབས་ཀྱི་རིགས་ཀྱི་ལེའུ་ལས་རིག་པར་
བྱའོ། །དེ་ལ་བྱང་ཆུབ་སེམས་དཔའ་དགེ་བའི་བཤེས་གཉེན་ལ་བརྟེན་པ་ནི་རྣམ་པ་བཞིས་ཡོངས་སུ་རྫོགས་པར་རིག་པར་བྱ་སྟེ། དུས་དུས་སུ་ནད་གཡོག་དང་། ཐ་མལ་པའི་གཡོག་བྱེད་ཅིང་། བྱམས་པ་དང་གུས་པ་དང་། དགའ་བ་དང་ལྡན་པ་དང་། དུས་དུས་སུ་གུས་པར་
སྨྲ་བ་དང་། ཕྱག་བྱ་བ་དང་། མངོན་དུ་ལྡང་བ་དང་། ཐལ་མོ་སྦྱར་བ་དང་། གདུད་པར་བྱ་བ་དང་། མཆོད་པར་བྱ་བ་དང་། ཆོས་དང་མཐུན་པའི་གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་སྦྱིན་པས་མཆོད་པ་དང་། གནས་བཅས་
ནས་ཡང་དག་པར་གཟུད་པ་དང་། རྣམ་པར་གཟུད་པས་ཆོས་དང་མཐུན་པའི་དོན་རྣམས་ལ་དབང་བྱེད་ལ། རྣམ་པར་མི་གཡོ་ཞིང་། ཡང་དག་པ་ཇི་ལྟ་བ་བཞིན་དུ་འཆགས་པ་དང་། དུས་དུས་སུ་ཤེས་པར་བྱ་བའི་བསམ་པའི་དྲུང་དུ་འགྲོ་བ་དང་། བསྙེན་བཀུར་བྱེད་པ་དང་འདྲི་བ་དང་
ཉན་པའོ། །དེ་ལ་བྱང་ཆུབ་སེམས་དཔའ་དགེ་བའི་བཤེས་གཉེན་ལས་ཆོས་ཉན་པར་འདོད་པས་ནི། འདུ་ཤེས་རྣམ་པ་ལྔས་ཆོས་ཉན་པར་བྱ་སྟེ། དཀོན་པའི་དོན་གྱིས་རིན་པོ་ཆེའི་འདུ་ཤེས་དང་། ལྷན་ཅིག་སྐྱེས་པའི་ཤེས་རབ་རྒྱ་ཆེན་པོ་འཐོབ་པའི་རྒྱུའི་རང་བཞིན་གྱི་དོན་གྱིས་
མིག་གི་འདུ་ཤེས་དང་། ལྷན་ཅིག་སྐྱེས་པའི་ཡེ་ཤེས་ཀྱི་མིག་ཐོབ་ནས་ཀྱང་ཤེས་བྱ་ཡང་དག་པ་ཇི་ལྟ་བ་བཞིན་དུ་རྣམ་པ་ཐམས་ཅད་ཡང་དག་པར་སྟོན་པའི་དོན་གྱིས་སྣང་བའི་འདུ་ཤེས་དང་། མྱ་ངན་ལས་འདས་པ་དང་རྫོགས་པའི་བྱང་ཆུབ་བླ་ན་མེད་པའི་གོ་འཕང་འཐོབ་པའི་རྒྱུའི་དངོས་
པོའི་དོན་གྱིས་འབྲས་བུ་དང་ཕན་ཡོན་ཆེ་བའི་འདུ་ཤེས་དང་། ཚེ་འདི་ལ་མྱ་ངན་ལས་འདས་པ་དང་རྫོགས་པའི་བྱང་ཆུབ་ཀྱི་ཆོས་མ་ཐོབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་རྣམ་པར་འབྱེད་པའི་ཞི་གནས་དང་། ལྷག་མཐོང་གི་དགའ་བ་ཆེན་པོ་ཁ་ན་མ་ཐོ་བ་མེད་པའི་རྒྱུའི་དངོས་པའི་དོན་གྱིས་

དགའ་བ་ཁ་ན་མ་ཐོ་བ་མེད་པའི་འདུ་ཤེས་སོ། །དེ་ལ་བྱང་ཆུབ་སེམས་དཔའ་དགེ་བའི་བཤེས་གཉེན་ལས་ཆོས་ཉན་པ་དང་། གང་ཟག་ཆོས་སྨྲ་བ་དེ་ལ་གནས་ལྔར་ཡིད་ལ་བྱེད་པ་མི་བྱ་བར་རྣ་བླགས་ཏེ། དང་བའི་ཡིད་ཀྱིས་ཆོས་མཉན་པར་བྱའོ། །ཚུལ་ཁྲིམས་
ཉམས་པ་ཡིད་ལ་བྱེད་པར་མི་བྱ་སྟེ། འདི་ལྟར་འདི་ནི་ཚུལ་ཁྲིམས་ཉམས་ཤིང་སྡོམ་པ་ལ་གནས་པ་མ་ཡིན་གྱི། བདག་གིས་འདི་ལས་མཉན་པར་མི་བྱའོ་སྙམ་དུ་སེམས་མངོན་པར་འདུ་མི་བྱའོ། །རིགས་དམའ་བ་ལ་ཡང་ཡིད་ལ་བྱེད་པར་མི་བྱ་སྟེ། འདི་ལྟར་འདི་ནི་རིགས་དམའ་
བ་ཡིན་གྱི། བདག་གིས་འདི་ལས་མཉན་པར་མི་བྱའོ་སྙམ་དུ་སེམས་མངོན་པར་འདུ་མི་བྱའོ། །བྱད་ངན་པ་ལ་ཡང་ཡིད་ལ་བྱེད་པར་མི་བྱ་སྟེ། འདི་ལྟར་འདི་ནི་བྱད་ངན་ཡིན་གྱི། བདག་གིས་འདི་ལས་མཉན་པར་མི་བྱའོ་སྙམ་དུ་སེམས་མངོན་པར་འདུ་མི་བྱའོ། །ཚིག་འབྲུ་
ངན་པ་ལ་ཡང་ཡིད་ལ་བྱེད་པར་མི་བྱ་སྟེ། འདི་ལྟར་འདི་ནི་ཚིག་ལེགས་པར་སྦྱར་བ་མ་ཡིན་གྱི། བདག་གིས་འདི་ལས་མཉན་པར་མི་བྱའོ་སྙམ་དུ་སེམས་མངོན་པར་འདུ་མི་བྱ་སྟེ། དོན་ལ་རྟོན་པར་བྱའི་ཚིག་འབྲུ་ལ་རྟོན་པར་མི་བྱའོ། །སྙན་པ་མེད་པ་ཡང་ཡིད་ལ་བྱེད་པར་མི་
བྱ་སྟེ། འདི་ལྟར་དེ་ནི་ཚིག་རྩུབ་ཅིང་ཁྲོ་ལ་སྙན་པར་ཆོས་སྨྲ་བ་ཡང་མ་ཡིན་གྱི། བདག་གིས་འདི་ལས་མཉན་པར་མི་བྱའོ་སྙམ་དུ་སེམས་མངོན་པར་འདུ་མི་བྱའོ། །གནས་ལྔ་པོ་འདི་དག་ལ་ཡིད་ལ་བྱེད་པར་མི་བྱ་བར་བྱང་ཆུབ་སེམས་དཔས་གུས་པ་དང་བཅས་པས་དམ་པའི་ཆོས་
ཡོངས་སུ་གཟུང་བར་བྱ་སྟེ། ཆོས་ནི་ནམས་ཀྱང་གང་ཟག་གི་སྐྱོན་གྱིས་སྐྱོན་ཅན་དུ་མི་འགྱུར་བའི་ཕྱིར་རོ། །དེ་ལ་བྱང་ཆུབ་སེམས་དཔའ་ཤེས་རབ་རྟུལ་པོ་གང་ཟག་གི་སྐྱོན་རྣམས་ལ་སེམས་སྡང་ཞིང་ཆོས་ཉན་པར་མི་འདོད་པ་དེ་ནི་བདག་ཉིད་ཁོ་ན་ལ་གནོད་ཅིང་ཤེས་རབ་ཡོངས་སུ་ཉམས་
པར་འགྱུར་བར་ཞུགས་པ་ཡིན་པར་རིག་པར་བྱའོ་ཞེས་གསུངས་སོ། །སྡོང་པོ་བཀོད་པའི་མདོ་ལས་ཀྱང་། རིགས་ཀྱི་བུ་དགེ་བའི་བཤེས་གཉེན་ནི་སྒྲིབ་པར་འགྱུར་བའི་ཆོས་ཐམས་ཅད་ལ་རྣམ་པར་སྦྱོང་བའོ། །དགེ་བའི་བཤེས་གཉེན་ནི་སྡིག་ཏོ་ལས་རྣམ་པར་ཟློག་པའོ། །དགེ་བའི་

བཤེས་གཉེན་ནི་མི་བྱ་བ་རྣམས་ཁོང་དུ་ཆུད་པར་བྱེད་པའོ། །བག་མེད་པའི་གནས་ལས་ཡང་དག་པར་ཟློག་པའོ། །མ་རིག་པའི་མུན་པ་རྣམ་པར་སེལ་བའོ། །ལྟ་བའི་འཆིང་བ་གཏུབ་པའོ། །འཁོར་བའི་གྲོང་ཁྱེར་ནས་འདོན་པའོ། །འཇིག་རྟེན་གྱི་གནས་འདོར་བར་
བྱེད་པའོ། །བདུད་ཀྱི་ཞགས་པ་ལས་ཐར་བར་བྱེད་པའོ། །སྡུག་བསྔལ་གྱི་ཟུག་རྔུ་འབྱིན་པའོ། །མི་ཤེས་པའི་ཐིབས་པོ་ལས་ཐར་བར་བྱེད་པའོ། །ལྟ་བའི་མྱ་ངན་ལས་ཡོངས་སུ་ཟློག་པའོ། །སྲིད་པའི་ཆུ་བོ་ལས་སྒྲོལ་བའོ། །འདོད་པའི་འདམ་ནས་འབྱིན་པའོ། །ལམ་མི་བདེ་
བ་ནས་རྣམ་པར་ཟློག་པའོ། །བྱང་ཆུབ་སེམས་དཔའི་ལམ་ཡང་དག་པར་སྟོན་པའོ། །བྱང་ཆུབ་སེམས་དཔའི་ཡི་དམ་ལ་གཞོག་པའོ། །ནན་ཏན་ལ་རབ་ཏུ་དགོད་པའོ། །ཐམས་ཅད་མཁྱེན་པ་ཉིད་དུ་འགྲོ་བའི་ཕྱོགས་རབ་ཏུ་སྟོན་པའོ། །ཤེས་རབ་ཀྱི་མིག་རྣམ་པར་སྦྱོང་བའོ། །
བྱང་ཆུབ་ཀྱི་སེམས་རྣམ་པར་འཕེལ་བར་བྱེད་པའོ། །སྙིང་རྗེ་ཆེན་པོ་ཡང་དག་པར་བསྐྱེད་པའོ། །སྤྱོད་པ་ཡོངས་སུ་སྟོན་པའོ། །ཕ་རོལ་ཏུ་ཕྱིན་པའི་གདམས་ངག་རབ་ཏུ་སྟོན་པའོ། །ས་ལ་རབ་ཏུ་འགོད་པའོ། །བཟོད་པ་རྣམ་པར་འབྱེད་པའོ། །དགེ་བའི་རྩ་བ་ཐམས་ཅད་ཡོངས་
སུ་འགྲུབ་པར་བྱེད་པའོ། །ཚོགས་ཐམས་ཅད་སྐྱེད་པར་བྱེད་པའོ། །བྱང་ཆུབ་སེམས་དཔའི་ཡོན་ཏན་ཐམས་ཅད་སྟོབས་པའོ། །སངས་རྒྱས་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་བྱེད་པའོ། །ཡོན་ཏན་ཐམས་ཅད་ཡོངས་སུ་སྟོན་པའོ། །དོན་ཐམས་ཅད་ཡང་དག་པར་ལེན་དུ་
འཇུག་པའོ། །ནན་ཏན་ལ་གཟེངས་བསྟོད་པའོ། །འབྱུང་བའི་སྒོ་སྟོན་པའོ། །ལམ་གོལ་བ་ལས་ཡོངས་སུ་བསྲུང་བའོ། །ཆོས་སྣང་བའི་སྒོ་སྣང་བར་བྱེད་པའོ། །ཆོས་ཀྱི་སྒོ་མངོན་པར་རླན་པར་བྱེད་པའོ། །ཆོས་ཐོས་པར་བྱ་བའི་སྤྲིན་གྱི་ཆར་འབེབས་པའོ། །ཉོན་མོངས་པ་
ཐམས་ཅད་ཞི་བར་བྱེད་པའོ། །ལྟ་བའི་རྣམ་པ་ཐམས་ཅད་ལས་རྣམ་པར་ཟློག་པའོ། །སངས་རྒྱས་ཀྱི་ཆོས་ཐམས་ཅད་ལ་གནས་པར་བྱེད་པའོ། །འདི་ལྟར་ཡང་རིགས་ཀྱི་བུ་དགེ་བའི་བཤེས་གཉེན་ནི་སངས་རྒྱས་ཀྱི་རིགས་བསྐྱེད་པས་མ་ལྟ་བུའོ། །དགེ་བའི་བཤེས་

གཉེན་ནི་ཕན་ཡོན་རྒྱ་ཆེན་པོ་སྒྲུབ་པས་ཕ་ལྟ་བུའོ། །དགེ་བའི་བཤེས་གཉེན་ནི་སྡིག་པ་ཐམས་ཅད་ལས་བསྲུང་བས་མ་མ་ལྟ་བུའོ། །དགེ་བའི་བཤེས་གཉེན་ནི་བྱང་ཆུབ་སེམས་དཔའི་བསླབ་པ་ཁོང་དུ་ཆུད་པར་བྱེད་པས་སློབ་དཔོན་ལྟ་བུའོ། །དགེ་བའི་
བཤེས་གཉེན་ནི་ཕ་རོལ་ཏུ་ཕྱིན་པའི་ལམ་དུ་འཛུད་པས་ལམ་མཁན་ལྟ་བུའོ། །དགེ་བའི་བཤེས་གཉེན་ནི་ཉོན་མོངས་པའི་ནད་ལས་ཐར་བར་བྱེད་པས་སྨན་པ་ལྟ་བུའོ། །དགེ་བའི་བཤེས་གཉེན་ནི་ཡེ་ཤེས་ཀྱི་སྨན་རྣམ་པར་འཕེལ་བར་བྱེད་པས་གངས་ཀྱི་རི་ལྟ་བུའོ། །
དགེ་བའི་བཤེས་གཉེན་ནི་འཇིགས་པ་ཐམས་ཅད་ལས་བསྲུང་བས་དཔའ་བོ་ལྟ་བུའོ། །དགེ་བའི་བཤེས་གཉེན་ནི་འཁོར་བའི་ཆུ་བོ་ཆེན་པོ་ལས་སྒྲོལ་བས་གཉེན་པ་ལྟ་བུའོ། །དགེ་བའི་བཤེས་གཉེན་ནི་ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་གླིང་དུ་ཕྱིན་པར་བྱེད་
པས་སྐྱ་བ་འཛིན་པ་ལྟ་བུའོ། །རིགས་ཀྱི་བུ་དེ་ལྟ་བས་ན་དེ་ལྟར་ཡིད་ལ་བྱེད་པ་རྒྱུན་མ་ཆད་པས་ཁྱོད་ཀྱིས་དགེ་བའི་བཤེས་གཉེན་བསྙེན་པར་གྱིས་ཤིག །ཁུར་ཐམས་ཅད་བསྐུར་བས་ཡོངས་སུ་མི་སྐྱོ་བའི་ཕྱིར་ས་ལྟ་བུའི་སེམས་དང་མི་ཕྱེད་པའི་ཕྱིར་རྡོ་རྗེ་ལྟ་བུའི་སེམས་
དང་། སྡུག་བསྔལ་ཐམས་ཅད་ཀྱིས་མི་བསྒུལ་བའི་ཕྱིར་ཁོར་ཡུག་ལྟ་བུའི་སེམས་དང་། ཅི་དགའ་བར་བཀའ་ཉན་པས་བྲན་ལྟ་བུའི་སེམས་དང་། ངག་ཐམས་ཅད་མི་གཅོག་པས་སློབ་མ་ལྟ་བུའི་སེམས་དང་། ལས་ཐམས་ཅད་ཉམས་སུ་བླང་བ་ལ་མི་སྨད་པས་འཇིག་རྟེན་
གྱི་བྲན་ལྟ་བུའི་སེམས་དང་། ཉོན་མོངས་ཐམས་ཅད་ཀྱིས་མི་སྐྱོ་བའི་ཕྱིར་མ་མ་ལྟ་བུའི་སེམས་དང་། བྱའོ་ཅོག་ལ་མཐུན་པར་བཟུང་བས་གཡོག་ལྟ་བུའི་སེམས་དང་། ང་རྒྱལ་དང་མཐོ་བའི་ང་རྒྱལ་སྤང་བས་ཕྱག་དར་བ་ལྟ་བུའི་སེམས་དང་། དུས་དང་དུས་མ་ཡིན་པར་མཐོ་
དམན་དུ་འགྱུར་བས་ཟླ་བ་ཉ་བ་ལྟ་བུའི་སེམས་དང་། མི་སྲུན་པ་ཐམས་ཅད་རྣམ་པར་སྤང་བས་རྟ་ཅང་ཤེས་ལྟ་བུའི་སེམས་དང་། ཁུར་ལྕི་བ་བསྐུར་བས་ཐེག་པ་ལྟ་བུའི་སེམས་དང་། དུལ་བ་དང་ཅང་ཤེས་ཀྱི་བསམ་པས་གླང་པོ་ལྟ་བུའི་སེམས་དང་། མི་འགུལ་མི་བསྐྱོད་

པས་རི་ལྟ་བུའི་སེམས་དང་། མི་ཁྲོ་བས་ཁྱི་ལྟ་བུའི་སེམས་དང་། རློམ་པ་དང་ང་རྒྱལ་མེད་པས་གདོལ་པ་ལྟ་བུའི་སེམས་དང་། དྲེགས་པ་ཐམས་ཅད་མེད་པས་རྭ་བཅད་པའི་ཁྱུ་མཆོག་ལྟ་བུའི་སེམས་དང་། རློམ་སེམས་མེད་པས་མཆན་བུ་ལྟ་བུའི་སེམས་དང་། འགྲོ་ཞིང་
འོང་བས་མི་སྐྱོ་བས་གྲུ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངག་གི་མཐར་ཕྱིན་པར་བྱེད་པས་ཟམ་པ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངོར་ལྟ་བས་བུ་མཛངས་པ་ལྟ་བུའི་སེམས་དང་། ཆོས་ཀྱི་རྒྱལ་པོའི་བཀའ་ལས་མི་འདའ་བར་བྱ་བས། རྒྱལ་པོ་
གཞོན་ནུ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་བཀུར་བར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ནད་པར་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སྨན་པའི་འདུ་ཤེས་དང་། གདམས་ངག་ལ་ནི་སྨན་གྱི་འདུ་ཤེས་དང་། ནན་ཏན་ཉམས་
སུ་བླང་བ་ལ་ནི་ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་འགྲོན་པོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ལམ་མཚོན་པའི་འདུ་ཤེས་དང་། གདམས་ངག་ལ་ནི་ལམ་གྱི་འདུ་ཤེས་དང་། ནན་ཏན་ལ་ནི་ཕྱོགས་
བདེ་བར་འགྲོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཕ་རོལ་ཏུ་འགྲོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་གཉེན་པའི་འདུ་ཤེས་དང་། རྗེས་སུ་བསྟན་པ་ལ་ནི་མུ་སྟེགས་ཀྱི་འདུ་ཤེས་དང་། ནན་ཏན་ལ་ནི་གྲུའི་འདུ་
ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཞིང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཀླུའི་དབང་པོའི་འདུ་ཤེས་དང་། གདམས་ངག་ལ་ནི་ཆར་པའི་འདུ་ཤེས་དང་། ནན་ཏན་ལ་ནི་ལོ་ཏོག་འགྲུབ་པའི་འདུ་ཤེས་བསྐྱེད་
པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་དབུལ་པོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ངལ་བསོ་བའི་འདུ་ཤེས་དང་། གདམས་ངག་ལ་ནི་ནོར་དང་དོན་གྱི་འདུ་ཤེས་དང་། ནན་ཏན་ལ་ནི་དབུལ་བ་སེལ་བའི་འདུ་ཤེས་བསྐྱེད་པར་

བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་སློབ་མའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སློབ་དཔོན་གྱི་འདུ་ཤེས་དང་། གདམས་ངག་ལ་ནི་བཟོའི་འདུ་ཤེས་དང་། ནན་ཏན་ལ་ནི