Luận tạng Tây Tạng (Tengyur) — Tập 112

་བ་ལ་དགའ་བ་དང་། གཉིད་ལ་དགའ་བ་དང་། གདུ་བ་ལ་དགའ་བ་དང་། འདུ་འཛི་ལ་དགའ་བ་དང་། སྤྲོས་པ་ལ་དགའ་བ་དང་། རིགས་པ་མེད་པའི་གཏམ་དང་། མ་དག་པའི་གཏམ་དང་། བདག་ཏུ་འཛིན་པ་དང་། སེམས་ཅན་དུ་
འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། མར་མི་འཛིན་པ་དང་། ཕར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། སྨན་པའི་ཐ་སྙད་དང་ཁྱིམ་སུན་འབྱིན་པ་ལ་དགའ་བ་དང་། ཕོ་ཉར་འགྲོ་བ་དང་། ཁྱིམ་པའི་ལས་ཀྱི་མཐའ་བྱེད་དུ་འཇུག་པ་དང་།
ཁྱིམ་པའི་འདུ་འཛི་བྱེད་པ་དང་། ཁྱིམ་པའི་གོ་རེ་ལོང་བྱེད་པ་དང་། ལོ་མ་དང་མེ་ཏོག་དང་འབྲས་བུ་འབྱིན་པས་ཁྱིམ་འཇིག་པ་དང་། གཅེར་བུ་པའི་སྡོམ་པ་བདག་གིར་བྱེད་པ་དང་། གཅེར་བུ་པ་སྲེལ་པ་དང་། འཇིག་རྟེན་ལས་འདས་པའི་ཡེ་ཤེས་སྤོང་བ་དང་། ལོ་ཉི་ཤུ་མ་ཚང་བར་བསྙེན་པར་རྫོགས་པ་
དང་། ཡན་ལག་མ་ཚང་བར་བསྙེན་པར་རྫོགས་པ་དང་། འབྲུ་མ་བཙོས་པ་བྱིན་ལེན་བྱེད་པ་དང་། ཤ་མ་བཙོས་པ་བྱིན་ལེན་བྱེད་པ་དང་། གསེར་དང་དངུལ་ལེན་པ་དང་། བདག་ཏུ་སྨྲ་བ་ལ་མི་སྨོད་པ་དང་། བདག་ཤེས་པ་མ་ཡིན་པ་དང་། གང་ཟག་གཞན་དང་གཞན་ཤེས་པར་བྱེད་པ་དང་།
བརྫུན་དུ་སྨྲ་བ་དང་། སྡོམ་པ་ལྷོད་པ་དང་། གྱ་གྱུ་བྱེད་པ་དང་། དད་པ་མེད་པ་དང་། སྲན་ཆུང་བ་དང་། བྱས་པ་མི་ཤེས་པ་དང་། མ་རིག་པ་དང་། ལེ་ལོ་དང་། གཉིད་དང་རྒོད་པ་དང་། འགྱོད་པ་དང་། ཁྲོ་བ་དང་ཁོན་དུ་འཛིན་པ་དང་། འཆབ་པ་དང་། ཆགས་པ་དང་། སྒྱུ་དང་གཡོ་དང་
ཕྲག་དོག་དང་། སེར་སྣ་དང་། ཁྲེལ་མེད་པ་དང་། ངོ་ཚ་མེད་པ་དང་། རྒྱགས་པ་དང་། བག་མེད་པ་དང་། ཁེངས་པ་དང་། ཀུན་ནས་རྩོམ་པ་དང་། དགའ་བ་མེད་པ་དང་། སྒྱིད་ལུག་པ་དང་། གླལ་བ་དང་། ཟས་ཀྱིས་དྲེགས་པ་དང་། སེམས་ཞུམ་པ་དང་། ང་རྒྱལ་དང་མངོན་

པའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། ཆུང་ཟད་སྙམ་པའི་ང་རྒྱལ་དང་། ཚུལ་འཆོས་དང་ཁ་གསག་དང་གཞོགས་སློང་དང་། ཐོབ་ཀྱིས་འཇལ་བ་དང་། ཆོས་དང་མི་མཐུན་པ་དང་། རྙེད་པས་རྙེད་པ་སྒྲུབ་པ་དང་། ཚུལ་ཁྲིམས་ཀྱི་ཕུང་པོ་ཉམས་པ་དང་། ཏིང་ངེ་
འཛིན་གྱི་ཕུང་པོ་ཉམས་པ་དང་། ཤེས་རབ་ཀྱི་ཕུང་པོ་ཉམས་པ་དང་། རྣམ་པར་གྲོལ་བའི་ཕུང་པོ་ཉམས་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཉམས་པ་དང་། སངས་རྒྱས་ལ་མ་དད་པ་དང་། ཆོས་ལ་མ་དད་པ་དང་། དགེ་འདུན་ལ་མ་དད་པ་དང་། ལས་ཀྱི་རྣམ་པར་སྨིན་པ་ལ་ཡིད་
མི་ཆེས་པ་དང་། ཚེ་འདི་ལ་གཙོ་བོར་བྱེད་པ་དང་། ཚེ་ཕྱི་མའི་ཆོས་ལ་གཅེས་པར་མི་བྱེད་པ་དང་། སོམ་ཉི་དང་། ཡིད་གཉིས་དང་། ཐེ་ཚོམ་དང་། ཕོ་ཐེག་ཆེ་བ་དང་། འཇིགས་སུ་རུང་བའི་རང་བཞིན་ཅན་ཡིན་ཏེ། ཤཱ་རིའི་བུ་གང་ཟག་འདི་དག་ནི་ཆོས་འདུལ་བ་འདི་ལ་ངན་སྐྱུགས་དང་འདྲ་བར་རིག་པར་བྱའོ། །
མི་གཙང་བའི་ལུས་ཀྱི་ལས་དང་ལྡན་པ་དང་། མི་གཙང་བའི་ངག་གི་ལས་དང་ལྡན་པ་དང་། མི་གཙང་བའི་ཡིད་ཀྱི་ལས་དང་ལྡན་པ་དང་། འཚོ་བ་མ་དག་པ་གང་ཡིན་པ་དེ་དག་ནི་ལུས་ཞིག་ནས་ཤི་བའི་འོག་ཏུ་སེམས་ཅན་དམྱལ་བར་ལྟུང་བར་འགྱུར་རོ། །དེ་དག་ནི་སངས་རྒྱས་རྣམས་དང་། སངས་རྒྱས་ཀྱི་
ཉན་ཐོས་རྣམས་དང་། དེ་བཞིན་དུ་གཞན་ཡང་དགེ་བ་དོན་དུ་གཉེར་བ་རྣམས་དང་། ཡོངས་སུ་མྱ་ངན་ལས་འདའ་བར་འདོད་པ་རྣམས་ཀྱིས་ཡོངས་སུ་སྤོང་བའི་འོས་ཡིན་ནོ། །ཤཱ་རིའི་བུ་དཔེར་ན་ཙནྡན་དམར་པོ་དེ་ངན་སྐྱུགས་བླུགས་པའི་སྣོད་དེར་བཅུག་ན། དེ་ཡང་མི་གཙང་བར་འགྱུར་ཞིང་སྨད་པར་
འགྱུར་རོ་ཞེས་གསུངས་པ་དང་། ཡང་མདོ་སྡེ་དེ་ཉིད་ལས། ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་གིས་དེ་བཞིན་གཤེགས་པས་གསུངས་པའི་ཡང་དག་པའི་མདོ་སྡེ་འདི་ལྟ་བུ་འདི་དག་ཤེས་ནས། དགའ་བའམ་མགུ་བ་མི་འཐོབ་ཅིང་། བདག་ཉིད་ལ་ལྷག་པར་ཡང་གནོད་པར་
བྱེད་དེ། རང་གི་སྤྱོད་ལམ་ངན་པ་ལ་ཀུན་དུ་བལྟས་ནས། རང་ཉིད་ཡིད་གཉིས་ཟ་བར་འགྱུར་ཞིང་། མདོ་སྡེ་འདི་ལྟ་བུ་འདི་དག་ནི་བདག་ཁོ་ནའི་ཆེད་དུ་གསུངས་ཀྱི། གཞན་ལ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་བདག་ཁོ་ནའི་ཀུན་དུ་སྣང་ངོ་སྙམ་མོ། །ཤཱ་རིའི་བུ་འདི་ནི་དགེ་སློང་ཚུལ་ཁྲིམས་

རལ་པ་རྣམས་ཀྱི་མ་འདྲེས་པའི་ཆོས་ཡིན་ཏེ། དེས་དེ་ཐོས་ནས་ཐོག་མ་ཁོ་ནར་ཁྲོ་བ་བསྐྱེད་པར་འགྱུར་རོ། །དེ་ཁྲོ་བའི་ཟིལ་གྱིས་ནོན་ནས་དགེ་སློང་ཆོས་སྨྲ་བ་ལ་མ་དད་པ་སྐྱེད་པར་བྱེད་དེ། དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ལ་འདི་ནི་སངས་རྒྱས་
ཀྱིས་གསུངས་པ་མ་ཡིན་ནོ་ཞེས་སྨོད་ཅིང་། སྐྱེ་བོ་ལ་འདུ་ཤེས་སུ་བྱེད་དོ་ཞེས་གསུངས་པ་དང་། ཡང་མདོ་དེ་ཉིད་ལས། ཤཱ་རིའི་བུ་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །གང་ཡང་མི་དགེ་བ་བཅུའི་ལས་ཀྱི་ལམ་དེ་ལྟ་བུ་དང་ལྡན་པའི་མི་དེ་དག་རྟག་པར་རྒྱུན་དུ་བར་ཆད་མེད་པ་ལོ་བརྒྱའི་བར་
དུ་བསོད་ནམས་མ་ཡིན་པའི་ཕུང་པོ་བསགས་པ་བས། དགེ་སློང་ཚུལ་ཁྲིམས་རལ་པ་གང་ཞིག་བསྟན་པ་འདི་ལ་དྲང་སྲོང་གི་རྒྱལ་མཚན་གྱིས་གཡོགས་ནས། དད་པས་བྱིན་པ་ལ་ཞག་གཅིག་ལོངས་སྤྱོད་པར་བྱེད་ན། དེ་བས་ནི་ཆེས་མང་དུ་འདི་མི་དགེ་བའི་རྩ་བ་མངོན་པར་འདུ་བྱེད་པར་འགྱུར་
རོ། །གང་ཚུལ་ཁྲིམས་རལ་པའི་དགེ་སློང་འདི་ནི་ཉིན་ཞག་གཅིག་དད་པས་བྱིན་པ་ལ་ལོངས་སྤྱོད་ན། དེ་ཉིད་དེ་དག་ལས་མི་དགེ་བའི་རྩ་བ་ཆེས་མང་དུ་མངོན་པར་འདུ་བྱེད་པ་ཡིན་ནོ་ཞེས་གསུངས་པ་དང་། ཡང་མདོ་དེ་ཉིད་ལས། ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་བྲེ་
མོའི་གཏམ་ལ་དགའ་བ་དང་། བྲེ་མོའི་གཏམ་ལ་མངོན་པར་དགའ་བ་ཕྲག་དོག་ཅན་ཡིན་ནོ། །ཚུལ་ཁྲིམས་འཆལ་པའི་འཁོར་ཅན་ཡིན་ནོ། །ཚུལ་ཁྲིམས་འཆལ་པ་བསྟེན་པ་དང་། ཚུལ་ཁྲིམས་ཀྱི་གཏམ་ལ་མི་དགའ་བ་ཡིན་ནོ། །མདོ་སྡེ་ཟབ་མོ་འདི་ལྟ་བུ་དག་དང་མི་མཐུན་པར་བྱེད་པ་
ཡིན་ནོ། །མདོ་སྡེ་འདི་ལྟ་བུ་འདི་དག་སྨྲ་བ་ལ་མི་མཐུན་པར་བྱེད་ཅིང་རྩོད་པ་དང་། བསྟན་པ་ལ་མངོན་པར་མི་དགའ་བ་དང་། ཕྱོགས་དང་ཕྱོགས་མཚམས་སུ་ལྟ་བར་བྱེད་པ་དང་། ལག་པས་གདོང་འགེབས་པ་དང་། བར་སྣང་ལ་ལྟ་བར་བྱེད་པ་དང་། སྟན་ལས་ལངས་ཏེ་འགྲོ་བ་དང་། དེ་
བཞིན་གཤེགས་པའི་གསུང་ལ་སྨོད་པ་དང་། ཆོས་སྨྲ་བ་ལ་ཁྲོ་བར་བྱེད་པ་ཡིན་ནོ། །དེ་མི་དགེ་བ་དང་ལྡན་ཞིང་ལུས་དང་ངག་དང་ཡིད་ཀྱི་ཉེས་པར་སྤྱོད་པས་ངན་སོང་དུ་འགྲོ་བར་འགྱུར་རོ། །ཤཱ་རིའི་བུ་འདི་ཡང་དགེ་སློང་ཚུལ་ཁྲིམས་འཆལ་པའི་འཆལ་པའི་ཚུལ་ཁྲིམས་ཀྱི་སྐྱོན་བརྒྱད་པ་ཡིན་ཏེ། ངན་སོང་

རབ་ཏུ་རྫོགས་པར་བྱ་བའི་ཕྱིར་ཀུན་དུ་ཞུགས་པ་ཡིན་ནོ། །ཤཱ་རིའི་བུ་གཞན་ཡང་དགེ་སློང་ཚུལ་ཁྲིམས་འཆལ་པ་ནི་ཡོན་ཏན་སྒྲོགས་པས་སློབ་དཔོན་གཙོ་བོར་བྱེད་པ་ཡིན། གྲགས་པ་དང་སྒྲ་དང་ཚིགས་སུ་བཅད་པ་མངོན་པར་བསྟོད་པས་མཁན་པོ་གཙོ་བོར་བྱེད་པ་ཡིན་ནོ། །ཚུལ་ཁྲིམས་དང་
ལྡན་པའི་མིང་ཡོངས་སུ་བསྒྲགས་པས་འཚོ་བ་ཡོངས་སུ་སྒྲུབ་པ་དང་གྲིམས་པ་དང་གཏོགས་འདོད་ཆེ་བ་ཡིན་ནོ། །དཔེར་ན་བྱ་རོག་བཞིན་དུ་དགེ་འདུན་གྱི་མིང་གིས་བདག་ཉིད་ཀྱི་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་དང་། ཡོ་བྱད་རྣམས་ཡོངས་སུ་སྒྲུབ་པར་བྱེད་
པ་ཡིན་ནོ། །མཐུ་དང་ལྡན་པ་དང་ལུས་ཀྱི་འཇོ་སྒེག་ལ་བརྩོན་པ་ཡིན་ནོ། །ངོ་ཚ་མེད་པ་དང་འཛེམ་པ་མེད་པ་ཡིན་ནོ། །ཚིག་ཐུན་ཚགས་སུ་སྨྲ་བ་དང་། ལག་པ་དང་། རྐང་པ་རྒོད་པ་ཡིན་ནོ། །རིགས་ཉམས་པ་ཡིན་ནོ། །བུད་མེད་ལ་བརྟེན་པ་ཡིན་ནོ། །སྐྱེས་པ་ལ་མི་བརྟེན་པ་ཡིན་ནོ། །
ཤིན་ཏུ་ཡོངས་སུ་འདྲིས་པར་བྱེད་པས་གུས་པ་མེད་པ་ཡིན་ནོ། །དེའི་བསྔགས་པ་ལྷ་དང་ཀླུ་དང་གནོད་སྦྱིན་ཡང་མི་སྨྲའོ། །དེའི་བསྔགས་པ་སངས་རྒྱས་བཅོམ་ལྡན་འདས་རྣམས་ཀྱང་གསུང་བར་མི་འགྱུར་རོ། །འཚེ་བ་ལ་དཔའ་བ་དང་དགེ་འདུན་གྱི་ཐ་སྙད་དང་ལྡན་པ་ཀུན་བྱེད་པ་ཡིན་ནོ། །ཤཱ་རིའི་
བུ་གང་ཟག་དེ་ལྟ་བུ་ནི་དགེ་འདུན་གྱི་དབང་ཕྱུག་འདོད་པ་ཡིན་ནོ། །གང་ཅི་ལ་བསྔགས་ཀྱང་མ་དྲིས་པར་སྨྲ་བ་ཡིན་ནོ། །ཆོས་གོས་ཚོལ་བ་ཡིན་ནོ། །གཞན་ཚུལ་ཁྲིམས་དང་ལྡན་པ་རྣམས་ལ་གླགས་ལྟ་བ་ལ་བརྩོན་པ་ཡིན་ནོ། །མཚུངས་པར་བྱེད་པ་ཡིན་ནོ། །དམ་པ་མ་ཡིན་པའི་ཆོས་
འཛིན་པ་དང་། དམ་པ་མ་ཡིན་པའི་ཆོས་ལེན་པ་ཡིན་ནོ། །ཚོགས་ལ་དགའ་བ་ཡིན་ནོ། །རྩོད་པ་འབར་བར་བྱེད་པ་ཡིན་ནོ། །ཤཱ་རིའི་བུ་འདི་ཡང་དགེ་སློང་ཚུལ་ཁྲིམས་འཆལ་པའི་འཆལ་པའི་ཚུལ་ཁྲིམས་ཀྱི་སྐྱོན་དགུ་པ་ཡིན་ཏེ། ངན་སོང་རབ་ཏུ་རྫོགས་པར་བྱ་བར་ཀུན་དུ་ཞུགས་པ་ཡིན་ནོ། །
ཤཱ་རིའི་བུ་གཞན་ཡང་དགེ་སློང་ཚུལ་ཁྲིམས་འཆལ་པ་ནི་རྩོད་པ་ལེན་པ་ཡིན་ནོ། །འཐབ་མོས་དགའ་བ་འཐོབ་པ་དང་། ཆོས་གོས་ལ་ཞེན་པ་ཡིན་ནོ། །འགྲོ་བ་ངན་པར་འགྲོ་བ་དང་ཉལ་བའི་བདེ་བ་ལ་གཞོལ་བ་ཡིན་ནོ། །བསྔགས་པ་རྙེད་ན་དགའ་བ་དང་བཤེས་པའི་ཁྱིམ་དང་སློང་མོ་སྟེར་

བའི་ཁྱིམ་ལ་འཆུམས་པ་ཡིན་ནོ། །ཁྱིམ་ལ་ཕྲག་དོག་བྱེད་པ་དང་གནས་ལ་ཕྲག་དོག་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཀྱེ་མ་བདག་གི་འདི་དགེ་སློང་དེ་དག་གིས་མ་ཤེས་ཀྱང་ཅི་མ་རུང་སྙམ་པ་སེམས་པའི་ཕྱིར་རོ། །ཚུལ་ཁྲིམས་ལ་སྡང་བ་ཡིན་ནོ། །འཆལ་པའི་ཚུལ་
ཁྲིམས་ལ་ཀུན་དུ་དགའ་བ་དང་། སྦྱིན་པའི་བསྔགས་པ་འབའ་ཞིག་ལྷག་པར་སྨྲ་བ་ཡིན་ཏེ། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཉེ་བར་ཞི་བ་རྣམས་ཀྱི་མ་ཡིན་ནོ། །དགོན་པའི་གནས་དབེན་པ་ཆུང་ཟད་དོན་གྱི་སྒོ་ནས་སམ་ཆུང་ཟད་
ཡི་གེའི་སྒོ་ནས་ནི་མ་ཡིན་ཏེ། དགེ་སློང་ངོ་ཚ་ཤེས་པ་རྣམས་ལ་བསྔགས་པ་མ་ཡིན་པ་སྤྱོད་པས་མངོན་པར་བརྩོན་པར་བྱེད་པ་ཡིན་ནོ། །དེ་དགེ་སློང་སྦྱངས་པའི་ཡོན་ཏན་དང་ལྡན་པ་རྣམས་ལ་ཆུང་ཟད་དོན་གྱི་སྒོ་ནས་སམ། ཆུང་ཟད་ཡི་གེའི་སྒོ་ནས་ཀྱང་བསྔགས་པ་མ་ཡིན་པ་སྨྲ་ཞིང་།
ཅི་ནས་ཀྱང་སྐྱོན་འདོགས་པ་ཡིན་ནོ། །རིགས་རྒྱུད་སྨྲ་བ་ལ་ཞུགས་པ་ཡིན་ནོ། །སྔོན་གྱི་ཉེ་དུ་ལ་སྨོས་པ་དང་། ཅིའི་རྒྱུས་ཆོས་སྟོན་ཀྱང་འདི་ལྟར་བཀྲེན་པའི་ཕྱིར་ཡིན་པ་དང་། བག་ཚ་བའི་ལྕེ་གཉིས་སུ་སྨྲ་བ་དང་། རང་གི་སྐྱེ་བོ་མི་སྤོང་བ་དང་། སྐྱེ་བོ་མང་པོས་མྱུར་དུ་ཟིལ་གྱིས་མནན་པ་འཐོབ་
པ་དང་ཡིད་དུ་མི་འཐད་པ་ཡིན་ནོ། །ཚུལ་ཁྲིམས་དང་ལྡན་པ་རྣམས་ལ་ཁ་ཟེར་བ་དང་། གདམས་ངག་སྨྲ་བའི་སྐྱེས་པ་དང་། བུད་མེད་རྣམས་ལ་མི་བསྟེན་པ་དང་། དེ་མདོ་སྡེ་འདི་ལྟ་བུ་འདི་དང་། མདོ་སྡེ་འདི་ལྟ་བུ་འཆང་བ་དང་། སྟོན་པ་གང་ཡིན་པ་དེ་དག་ཡིད་ལ་མི་འཐད་པ་དང་། མདོ་
སྡེ་འདི་ལྟ་བུ་འདི་སྟོན་པ་རྣམས་ལ་དགའ་བ་དང་མགུ་བར་བྱེད་པ་གང་ཡིན་པ་དེ་དག་ལ་ཡང་སྡང་ཞིང་ཡིད་དུ་མི་འོང་བས། ཚུལ་ཁྲིམས་ཀྱི་བསྔགས་པ་མི་བརྗོད་པ་ཡིན་ནོ། །འདི་ལྟ་བུའི་མདོ་སྡེ་སྟོན་པ་རྣམས་ཀྱི་དྲུང་དུ་ཉེ་བར་མི་འགྲོའོ། །ཉེ་བར་སོང་ན་ཡང་སླར་མྱུར་དུ་ལྡོག་པ་དང་། ལྟོས་
པ་མེད་པར་སྟོན་པ་ཡིན་ནོ། །བྱུང་རྒྱལ་དུ་སྨྲ་བ་དང་ཁྱིམ་པ་ཉེ་དུ་མ་ཡིན་པ་ལ་ཉེ་དུར་སྨོས་པ་ཡིན་ནོ། །དབང་ཕྱུག་གི་ཕྱིར་དབྱེ་བར་བྱེད་པ་དང་། ཚུལ་ཁྲིམས་དང་ལྡན་པའི་ཕྱོགས་ལ་སྨོད་པར་བྱེད་པ་ཡིན་ནོ། །ཤཱ་རིའི་བུ་འདི་ཡང་དགེ་སློང་ཚུལ་ཁྲིམས་འཆལ་པའི་འཆལ་པའི་ཚུལ་

ཁྲིམས་ཀྱི་སྐྱོན་བཅུ་པ་ཡིན་ཏེ། ངན་སོང་ཡོངས་སུ་རྫོགས་པར་བྱ་བའི་ཕྱིར་ཀུན་དུ་ཞུགས་པ་ཡིན་ནོ་ཞེས་གསུངས་པ་དང་། ཡང་མདོ་དེ་ཉིད་ལས། ཤཱ་རིའི་བུ་དེ་ལྟ་བས་ན། དེ་བཞིན་གཤེགས་པ་སྐྱེས་བུ་བླུན་པོ་དེ་དག་གི་དོན་དུ་འདི་ལྟ་བུའི་མདོ་སྡེ་འདི་རབ་ཏུ་སྟོན་པར་མི་མཛད་དོ། །དེ་ཅིའི་
ཕྱིར་ཞེ་ན། ཤཱ་རིའི་བུ་ཚུལ་ཁྲིམས་རལ་པའི་དགེ་སློང་འབྱུང་བ་གང་ཡིན་པ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཐོས་ནས་ཉམས་པར་བྱ་བའི་ཕྱིར་འཇུག་པར་འགྱུར་བའི་ཕྱིར་རོ། །ཤཱ་རིའི་བུ་དེ་ལ་དད་པས་བྱིན་པ་རྣམས་ལ་ལོངས་སྤྱོད་པར་བྱེད་པ་དག་ནི་ཆོམ་རྐུན་ཆེན་པོ་
ཡིན་ནོ། །ཤཱ་རིའི་བུ་ཆོས་འདུལ་བ་འདི་ཐོས་ནས། དགའ་ལ་རངས་པར་མི་འགྱུར་བ་གང་ཡིན་པ་དེ་ནི་ལྷག་པར་དགེ་སློང་སྡིག་ཅན་ཡིན་པར་ཤེས་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དགེ་སློང་ཚུལ་ཁྲིམས་དང་ལྡན་པ་དག་ལ་ནི། ཡང་ན་ཚུལ་ཁྲིམས་ཀྱི་གཏམ་མམ། ཡང་ན་ཏིང་
ངེ་འཛིན་གྱི་གཏམ་མམ། ཡང་ན་ཤེས་རབ་ཀྱི་གཏམ་མམ། ཡང་ན་ཀུན་དུ་སྐྱོ་བར་འགྱུར་བའི་ཆོས་ཀྱི་གཏམ་དེ་ལྟ་བུ་གང་ཡང་ཡིད་དུ་མི་འོང་བར་མི་འགྱུར་བའི་ཕྱིར་རོ། །ཤཱ་རིའི་བུ་འདི་ལྟ་བུའི་མདོ་སྡེ་འདི་ཐོས་ན་གསུམ་ཡིད་མི་བདེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཚུལ་ཁྲིམས་
རལ་པའི་དགེ་སློང་གང་ཡིན་པ་དང་། མངོན་པའི་ང་རྒྱལ་ཅན་གྱི་དགེ་སློང་གང་ཡིན་པ་དང་། ཆོས་མ་ཡིན་པའི་གཏམ་ཆོས་ཀྱི་གཏམ་ལྟར་བཅོས་པས་ཡོངས་སུ་མ་དག་པ་སྟོན་པའི་དགེ་སློང་གང་ཡིན་པའོ། །གཞན་ཡང་གསུམ་ཡིད་མི་བདེ་བར་འགྱུར་ཏེ། གསུམ་པོ་དེ་དག་གང་ཞེ་ན།
བདག་ཏུ་ལྟ་བ་དང་སྲོག་ཏུ་ལྟ་བ་དང་གང་ཟག་ཏུ་ལྟ་བའོ། །གཞན་ཡང་གསུམ་ཡིད་མི་བདེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕུང་པོར་ལྟ་བ་དང་། ཁམས་སུ་ལྟ་བ་དང་། སྐྱེ་མཆེད་དུ་ལྟ་བའོ་ཞེས་གསུངས་པ་དང་། མདོ་དེ་ཉིད་ལས། ཤཱ་རིའི་བུ་འདི་ལྟར་མདོ་སྡེ་དེ་ནི།
དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ན། དགེ་སློང་ཚུལ་ཁྲིམས་དང་ལྡན་པ་རྣམས་དགའ་བ་དང་མགུ་བར་བྱེད་པར་འགྱུར་རོ། །ཤཱ་རིའི་བུ་མདོ་སྡེ་འདི་ནི་ཚུལ་ཁྲིམས་དང་ལྡན་པ་རྣམས་ཀྱིས་ཀུན་དུ་བཟུང་ཞིང་ཚུལ་ཁྲིམས་འཆལ་པས་ཡོངས་སུ་སྤང་བར་འགྱུར་རོ། །

དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་ཡང་དག་པ་ཇི་ལྟ་བ་བཞིན་དུ་བསྟན་ན། བྱིས་པ་རྣམས་སྡུག་བསྔལ་བར་འགྱུར་ཏེ། ཤཱ་རིའི་བུ་གང་དག་གི་ཡན་ལག་དང་། གང་དག་གི་རྣམ་པ་དང་། གང་དག་གི་རྟགས་དང་། གང་དག་གི་མཚན་མས་ཚུལ་ཁྲིམས་འཆལ་པ་
དང་ལྡན་པར་འགྱུར་བའི་རྣམ་པ་དང་། རྟགས་དང་མཚན་མ་དེ་དག་དེ་བཞིན་གཤེགས་པས་མདོ་སྡེ་འདི་ལས་གསུངས་ཏེ། ཚུལ་ཁྲིམས་འཆལ་པ་ནི་ཚུལ་ཁྲིམས་ཀྱི་གཏམ་ལ་དགའ་བར་མི་འགྱུར། མཉམ་པར་མ་བཞག་པ་ནི་མཉམ་པར་གཞག་པའི་གཏམ་ལ་དགའ་བར་མི་འགྱུར། སེར་
སྣ་ཅན་ནི་གཏོང་བའི་གཏམ་ལ་དགའ་བར་མི་འགྱུར། མངོན་པའི་ང་རྒྱལ་ཅན་གྱི་ལྷག་པར་ང་རྒྱལ་མེད་པ་སངས་རྒྱས་ཀྱི་གསུང་ཐོས་ནས། གཡང་ས་ཆེན་པོར་ལྟུང་བར་འགྱུར་ཞིང་སྐྲག་པ་ཆེན་པོ་སྐྱེ་བར་འགྱུར་རོ། །འཇིག་རྟེན་གྱི་ཟང་ཟིང་དང་ཁ་ཟས་ལྷུར་ལེན་པ་ནི་ཡོ་བྱད་བསྙུངས་པའི་
བསྔགས་པ་སྨྲས་ན་ཡིད་མི་བདེ་བ་ཆེན་པོ་སྐྱེ་བར་འགྱུར་རོ་ཞེས་གསུངས་སོ། །ཆོས་ཀྱི་ཕུང་པོའི་མདོ་ལས་ཀྱང་། ཤཱ་རིའི་བུ་བཅུ་པོ་འདི་དག་ནི་ཚུལ་ཁྲིམས་འཆལ་པའི་འཆལ་པའི་ཚུལ་ཁྲིམས་ཀྱི་སྐྱོན་རྣམས་ཏེ། བཅུ་གང་ཞེ་ན། ཚུལ་ཁྲིམས་འཆལ་པ་འཆི་བའི་ཚེ་གདུང་བར་འགྱུར།
མནར་མེད་པར་འགྱུར་རོ་སྙམ་དུ་ཚུལ་ཁྲིམས་འཆལ་པའི་དགེ་སློང་ཕྱིར་འགྱོད་པར་འགྱུར། འཁོར་གྱི་ནང་དུ་སྐྲག་པར་འགྱུར། ཚུལ་ཁྲིམས་དང་ལྡན་པ་ལ་བདག་ཉིད་སྨྲ་བར་འགྱུར། བདག་སངས་རྒྱས་རྣམས་ཀྱིས་སྤངས་སོ། །བདག་ཉན་ཐོས་རྣམས་ཀྱིས་སྤངས་སོ། །བདག་
ལྷ་རྣམས་ཀྱིས་སྤངས་སོ་ཞེས་སྨྲ་བར་འགྱུར། དེ་འཇིགས་པ་དང་བཅས་པས་འཆི་བའི་དུས་བྱེད་པ་དང་། ངན་སོང་དུ་འགྲོ་བ་དང་། མིའི་འཐོབ་པ་རྙེད་པ་དཀའ་བར་འགྱུར་ཏེ། ཤཱ་རིའི་བུ་བཅུ་པོ་འདི་དག་ནི་ཚུལ་ཁྲིམས་འཆལ་པའི་དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་དག་གོ་ཞེས་
གསུངས་སོ།། །།ཚུལ་ཁྲིམས་དང་ལྡན་པ་བརྙས་པ་ལ་དགོངས་པ་བསྟན་པ། ཡུལ་འཁོར་སྐྱོང་གི་མདོ་ལས་ཀྱང་། ཕྱི་མའི་དུས་ན་ང་ཡི་བུ་དེ་དག །ཀུན་དུ་སྨད་པར་གྱུར་པ་མཐོང་ནས་ནི། །དེ་དག་ང་ཡི་ཚིག་ནི་དྲན་འགྱུར་ཏེ། །བས་མཐའ་དག་དང་ནགས་སུ་དེ་ཚེ་གནས། །ཀྱི་

ཧུད་རྙེད་པས་ཟིལ་ནོན་ཡོན་ཏན་སྡང་། །དགེ་སློང་མང་པོ་གང་དུ་བྱུང་གྱུར་པ། །རྒྱལ་བ་དམ་པ་ཡི་ནི་བསྟན་པ་དག །རིང་པོར་མི་ཐོགས་པར་ཡང་འཇིག་པར་འགྱུར། །ཕྱི་དུས་ཚུལ་ཁྲིམས་ཡོན་ཏན་ལྡན་པ་དག །རྟག་པར་ཡོངས་སུ་བརྙས་པར་འགྱུར་བ་སྟེ། །དེ་དག་གྲོང་དང་ཡུལ་འཁོར་
གྲོང་ཁྱེར་རྣམས། །སྤངས་ནས་དགོན་པ་ནགས་སུ་གནས་པར་འགྱུར། །འབྱེད་དང་ཟུག་གཟེར་འཐབ་མོ་དགའ་བ་དང་། །ཡོན་ཏན་ཉམས་ལ་རྟག་ཏུ་བསྟི་སྟང་བྱེད། །དེ་དག་སྐྱེ་བོའི་སྟོན་པར་གྲགས་འགྱུར་ཏེ། །དེ་དག་ང་རྒྱལ་རྒྱགས་པས་ཚིག་པར་འགྱུར། །འདིར་ནི་ང་ཡི་བསྟན་པ་
ཡོན་ཏན་གཏེར། །ཡོན་ཏན་ཀུན་གྱི་འབྱུང་གནས་མཆོག་དགའ་བ། །འདི་ནི་ཚུལ་ཁྲིམས་ཉམས་དང་ཕྲག་དོག་དང་། །རྒྱགས་པའི་སྐྱོན་རྣམས་ཀྱིས་ནི་འཇིག་པར་འགྱུར། །ཇི་ལྟར་རིན་ཆེན་འབྱུང་གནས་བྲུས་པ་དང་། །པདྨའི་རྫིང་བུ་ཡོངས་སུ་བསྐམས་པ་དང་། །རིན་ཆེན་མཆོད་སྡོང་ཆག་
པར་གནས་པ་ལྟར། །ཕྱི་མའི་དུས་ན་བསྟན་པ་འཇིག་པར་འགྱུར། །ཕྱི་མའི་དུས་ཀྱི་ཚེ་ན་དམ་པའི་ཆོས། །རྣམ་པར་འཇིག་འགྱུར་ཤིན་ཏུ་མི་བཟད་ཚེ། །དགེ་སློང་དུལ་བ་མ་ཡིན་དེ་འདྲ་བ། །དེ་དག་ང་ཡི་བསྟན་འདི་འཇིག་པ་ཡིན། །སྤྱོད་པ་འདི་ལ་བརྟེན་པར་དགའ་བ་རྣམས། །དེ་དག་
བཟང་འགྲོ་ག་ལ་ཡོད་དེ་རིང་། །འདི་ནས་ཤི་འཕོས་ཡི་དགས་འགྲོ་བ་དང་། །དུད་འགྲོའི་འགྲོ་དང་སེམས་ཅན་དམྱལ་བར་གནས། །ལོ་བརྒྱ་དུ་མར་སྡུག་བསྔལ་མཐའ་ཡས་པ། །མི་བཟང་དྲག་པོ་ཉམས་སུ་མྱོང་བར་འགྱུར། །ཅི་སྟེ་དེ་ཡིས་མི་ཡི་ལུས་རྙེད་ཀྱང་། །རྟག་ཏུ་སྡུག་
བསྔལ་མྱ་ངན་ལྡན་པར་འགྱུར། །སྡིག་པའི་སྤྱོད་པ་འདི་ལ་རྟག་བརྟེན་པ། །ལོང་བའམ་འོན་པའམ་ཞར་བར་སྐྱེ་བར་འགྱུར། །ལུས་ལ་རྟག་ཏུ་ཤ་བཀྲ་འབྱུང་བར་འགྱུར། །འཇིགས་པའི་གཟུགས་ཅན་མཐོང་ན་འཇིགས་པར་འགྱུར། །གང་ཞིག་ཡ་ངའི་སྤྱོད་པ་བསྟེན་པ་ནི། །དེ་ལ་སུ་ཡང་ཡིད་
རྟོན་མི་འགྱུར་ཏེ། །དེ་ཡི་ཚིག་ལ་ཡིད་ཆེས་མི་འགྱུར་ཞིང་། །དེ་ནི་རྟག་ཏུ་སྨ་འབབ་པར་ཡང་འགྱུར། །དེ་དག་ནད་དང་སྡུག་བསྔལ་བརྒྱ་ཡིས་གདུངས། །མཚོན་དང་ཤིང་དང་བོང་བ་རྣམས་ཀྱིས་བསྣུན། །བཀྲེས་དང་སྐོམ་པའི་འཇིགས་པས་ཡོངས་སུ་གདུངས། ཡང་ན་དེ་ནི་རྟག་པར་རབ་ཏུ་

བརྙས། སྡུག་བསྔལ་མཐའ་ཡས་པ་དག་ཐོས་ནས་ནི། །ངེས་པ་རྣམས་ཀྱིས་སྡིག་པའི་སྤྱོད་བོར་ལ། །ལེགས་པའི་སྤྱོད་ལ་རྟག་ཏུ་བརྟེན་པར་གྱིས། །འདི་ནས་ཕྱིན་ཆད་འགྱོད་པར་གྱུར་ཏ་རེ། །གང་ཞིག་སངས་རྒྱས་དང་ནི་འཕགས་ཚོགས་དང་། །བསླབ་དང་སྦྱངས་
པའི་ཆོས་ལ་དགའ་གྱུར་པ། །གཉེན་དང་རྙེད་དང་གྲགས་བརྗོད་སྤང་བྱོས་ལ། །དེ་དག་རྟག་ཏུ་མངོན་པར་བརྩོན་པར་གྱིས། །འདུས་བྱས་འདི་ནི་སྒྱུ་མ་ལྟ་བུ་དང་། །འཇིག་པར་གྱུར་དང་རྨི་ལམ་ལྟ་བུ་དང་། །སྡུག་པ་ཀུན་དང་མི་རིང་འབྲལ་གྱུར་ཞིང་། །འདི་ལ་རྟག་པར་གང་ཡང་མེད་
རྟོགས་ལ། །ཕ་རོལ་ཕྱིན་དང་ས་དང་སྟོབས་རྣམས་ལ། །རྟག་ཏུ་རབ་ཏུ་སྦྱོར་ཞིང་འབད་པར་གྱིས། །ཇི་སྲིད་བྱང་ཆུབ་མཆོག་སངས་མ་རྒྱས་པ། །དེ་སྲིད་བརྩོན་འགྲུས་ནམ་ཡང་ཉམས་མ་བྱས། །ཞེས་གསུངས་སོ། །འོད་སྲུངས་ཀྱིས་ཞུས་པའི་མདོ་ལས་ཀྱང་། ངས་འཁོར་ལོས་སྒྱུར་བའི་
རྒྱལ་སྲིད་སྤངས་ནས་རབ་ཏུ་བྱུང་སྟེ། ཀ་ཤི་བ་ཕྲ་མོ་དང་། དུ་གུ་ལའི་རས་དང་། ཀོ་ཏམ་པའི་རས་དང་། ངང་རིས་ཅན་གྱི་གོས་རྣམས་སྤངས་ནས། འཕགས་པའི་རིགས་ལ་དགའ་བའི་ཕྱིར་ཤ་ནའི་རས་ཀྱི་གོས་རྣམས་ལུས་ལ་བགོས་སོ། །འོད་སྲུངས་ངས་ཁྱོད་ལས་དར་གོས་ངན་པ་བླངས་
ཏེ། ངས་ཁྱོད་ལ་ཤ་ནའི་རས་བྱིན་པ་གང་ཡིན་པ་དེ་ཐམས་ཅད་ཀྱང་ཁྱོད་ཉིད་ལ་སྙིང་བརྩེ་བའི་ཕྱིར་ཡིན་གྱི་ཆགས་པའི་ཕྱིར་མ་ཡིན་ལ་ལུས་བརྒྱན་པའི་ཕྱིར་མ་ཡིན་ནོ། །འོད་སྲུངས་འདི་ལ་མི་གཏི་མུག་པ་ཁ་ཅིག་ཁྱོད་དང་ངའི་རྗེས་སུ་མི་སློབ་ཅིང་བརྐམ་པ་ཆགས་པའི་ཟིལ་གྱིས་ནོན་པ་ཆོས་གོས་
སོགས་པར་བྱེད་པ། ལྷུང་བཟེད་སོགས་པར་བྱེད་པ། འཇིག་རྟེན་པའི་ཟང་ཟིང་སོགས་པར་བྱེད་པ། འགྲོན་བུ་དང་། གསེར་དང་། ནོར་བུ་དང་། འབྲུ་སོགས་པར་བྱེད་པ། བ་ལང་དང་། ལུག་དང་། བྱ་གག་དང་། ཕག་དང་། བོང་བུ་དང་། རྟ་དང་། ཐོང་གཤོལ་དང་། ཤིང་རྟ་འདྲེན་པ་དག་
ཉེ་བར་འཇོག་པར་བྱེད་པ། ཁྱིམ་པའི་ལས་ཀྱི་མཐའ་སྤྱོད་པ་དག་པས་ནི། འོད་སྲུངས་ཁྱིམ་པ་དག་ལ་ཁྱད་པར་དུ་འགྱུར་བ་ཡོད་ཀྱི། མི་བླུན་པོ་རབ་ཏུ་བྱུང་བའི་མཚམས་ལས་འདས་པ་དེ་དག་ལ་ནི་ཁྱད་པར་དུ་འགྱུར་བ་གང་ཡང་མེད་དོ། །འོད་སྲུངས་ཁྱིམ་པ་རྣམས་ཁྱད་པར་དུ་འགྱུར་བ་

ནི་དགེ་སྦྱོང་མ་ཡིན་པ་ལ་དེ་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པ་ལ་ཚངས་པར་སྤྱོད་པར་ཁས་འཆེ་བ། གོས་ངུར་སྨྲིག་བགོས་ཤིང་བྱ་བ་མང་བ། སྦགས་པ་སྣ་ཚོགས་ཀྱིས་སྦགས་པ། ཟས་དང་གོས་ལྷུར་ལེན་པ་དེ་དག་ཁྱིམ་པ་དག་གིས་གོས་ངུར་སྨྲིག་གྱོན་པར་རིག་ནས།
ཞེ་ས་དང་གུས་པ་བསྐྱེད་པ་དང་ཆོས་གོས་དང་བསོད་སྙོམས་ཀྱིས་སྡུད་པར་བྱེད་པ་དང་། གུས་པར་སྨྲ་ཞིང་། ཕྱག་འཚལ་བ་དང་ལྡང་བར་བྱེད་པ་སྟེ། འོད་སྲུངས་འདི་ནི་ཁྱིམ་བདག་གི་ཁྱད་པར་དུ་གྱུར་པའི་ཆོས་ཡིན་གྱི། དེ་དག་རབ་ཏུ་བྱུང་བ་དེ་དག་ནི་མེད་པའོ། །དེ་ཅིའི་ཕྱིར་ཞེ་ན། འདི་ལྟར་
དེ་དག་ནི་ཡོངས་སུ་ལེན་པ་ལ་བརྩོན་པ་མ་ཡིན་ཞིང་། ཅི་ཡང་མི་སོགས་པའི་ཕྱིར་རོ། །འོད་སྲུངས་དེའི་ཚེ་དེའི་དུས་ན། དགེ་སློང་ཕལ་ཆེར་ལྷུང་བཟེད་དང་། ཆོས་གོས་མང་ཞིང་སྣོད་སྤྱད་མང་བ་དང་། རྙེད་པ་མང་བར་འགྱུར་ཏེ། དེ་དག་ལ་བསྟི་སྟང་བྱེད་པར་འགྱུར། བཙུན་པར་བྱེད་པར་འགྱུར།
རི་མོ་བྱེད་ཅིང་མཆོད་པ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་སྦྱིན་པ་དང་། ཕྱིར་སྦྱིན་པ་དུས་དུས་སུ་བྱེད་ཅིང་། བྱ་བ་ཇི་ལྟ་བ་བཞིན་དུ་ཡོངས་སུ་འཛིན་པའི་ཕྱིར་རོ། །དགེ་སློང་གང་དག་ཚུལ་ཁྲིམས་དང་ལྡན་པ། དགེ་བའི་ཆོས་ཅན་ཟག་པ་རྣམས་ཟད་པར་བྱེད་པ་ལ་མངོན་པར་བརྩོན་
པ། ཡིད་བྱུང་བ་མགོ་དང་གོས་ལ་མེ་འབར་བ་བཞིན་དུ་བརྩོན་པ། དོན་ཉུང་བ་བྱེད་པ་ཉུང་བ། རང་གི་དོན་ལ་བརྩོན་པ། འདྲིས་པར་བྱེད་པ་ཡོངས་སུ་སྤངས་པ་དག་འབྱུང་བ་དེ་དག་གི་གན་དུ་ནི། དེའི་ཚེ་དེའི་དུས་ན་སུ་ཡང་མི་འགྲོ་མི་བསྟེན་ཅིང་བསྙེན་བཀུར་མི་བྱེད་པར་འགྱུར་རོ། །དེ་ཅིའི་
ཕྱིར་ཞེ་ན། འདི་ལྟར་ཁྱིམ་པ་དག་ནི་ཆགས་པའི་རང་བཞིན་ཅན་ཚེ་འདི་ལྷུར་ལེན་གྱི་ཚེ་རབས་ཕྱི་མ་ལྷུར་ལེན་པ་མ་ཡིན་པས་དེ་དག་འདི་སྙམ་དུ། དགེ་སློང་དེ་དག་ལ་ནི་བདག་ཅག་གི་འཚེ་བ་མེད་ན། བདག་གིས་ཅིའི་ཕྱིར་བསྟེན། ཅིའི་ཕྱིར་ཕྱག་བྱ་ཅིའི་ཕྱིར་མཆོང་། ཅིའི་ཕྱིར་བསྙེན་
བཀུར་བྱ་སྙམ་དུ་སེམས་པའི་ཕྱིར་རོ། །གཞན་དུ་ན་གང་དག་དགེ་བའི་རྩ་བ་བསྐྱེད་པ། སྔོན་གྱི་སྦྱོར་བ་ཕུན་སུམ་ཚོགས་པ་དག་འབྱུང་ཞིང་ཚུལ་ཁྲིམས་དང་ལྡན་པ། དགེ་བའི་ཆོས་ཅན་དེ་ལྟ་བུ་དེ་དག་ལ་བསྟེན་པར་བྱེད། བསྙེན་པར་བྱེད་ཅིང་བསྙེན་བཀུར་བྱེད་པ་ནི་མ་གཏོགས་ཏེ་ཉུང་ངོ་། །འོད་

སྲུངས་ཆོས་འདི་ལྟ་བུའི་ཚུལ་དང་མཐུན་པ་འདི་ལྟ་བུ་འདི་དག་ནི། གང་ཟག་གཉིས་ཀྱི་ཡིད་དུ་འོང་བར་འགྱུར་ཏེ། གཉིས་གང་ཞེ་ན། བདེན་པ་མཐོང་ཞིང་འཁོར་བ་ལ་འཇིགས་པར་ལྟ་བ་དང་། རྣལ་འབྱོར་སྤྱོད་པ་ལ་བརྩོན་ཞིང་འབྲས་བུ་ཐོབ་པར་འདོད་པ། ལས་ཀྱི་རྣམ་
པར་སྨིན་པ་ལ་རྟོན་པ་ཆོས་དོན་དུ་གཉེར་ཞིང་ཆོས་འདོད་པའོ། །འོད་སྲུངས་མངོན་པར་མི་བརྩོན་པ་ཆོས་མ་ཡིན་པ་ལ་ལྟ་བ། ལས་ཀྱི་རྣམ་པར་སྨིན་པ་དང་འགལ་བ། འཇིག་རྟེན་ཕ་རོལ་དུ་ཁ་ན་མ་ཐོ་བས་འཇིགས་པར་མི་ལྟ་བ། ཚེ་འདི་ལྷུར་ལེན་པ། ཚེ་རབས་ཕྱི་མ་ལྷུར་མི་ལེན་པ་ཐམས་
ཅད་ཀྱི་སྒོ་ངས་བཤད་པར་བྱའོ། །འོད་སྲུངས་གང་དག་ཐ་ན་ཐར་པ་དང་ལྡན་པའི་སེམས་གཅིག་ཙམ་ཡང་མི་བསྐྱེད་པའི་གཏི་མུག་པ་དེ་དག་ལ་ནི། ངས་འདི་ལྟ་བུའི་ཆོས་འདིར་སྐབས་མི་འབྱེད་ཀྱི། སྟེང་དུ་འདི་ལྟ་བུའི་ཆོས་འདི་དག་ཐོས་ནས། བདག་སྒྲུབ་པ་ལས་ཉམས་པར་རིག་ནས། སྨད་
པར་བྱ་བར་སེམས་ཏེ། འདི་དག་ནི་སངས་རྒྱས་ཀྱིས་གསུངས་པ་མ་ཡིན་གྱི། འདི་དག་ནི་རང་བཟོར་སྦྱར་བའམ། བདུད་ཀྱིས་མཐོ་བཙམས་ནས་བྱས་པའོ་ཞེས་སྨྲ་ཞིང་། དེ་དག་འདི་ལྟར་སྐྱེ་བོ་མང་པོ་དག་ལོག་པར་འཛིན་དུ་འཇུག་པར་འགྱུར་རོ། །དེ་དག་ནི་བདག་ཀྱང་ཕུང་ལ། གཞན་དག་
ཀྱང་ཕུང་བར་བྱེད་པར་འགྱུར། བདག་ཀྱང་ཉོན་མོངས་པ་ཅན་དུ་འགྱུར་ལ། གཞན་ཡང་ཉོན་མོངས་པ་ཅན་དུ་བྱེད་པར་འགྱུར་ཏེ། དེ་ལྟར་མི་གཏི་མུག་པ་དེ་དག་ནི་བདག་ལ་ཕན་པ་དང་། གཞན་ལ་ཕན་པའི་ཕྱིར་ཞུགས་པ་མ་ཡིན་ནོ་ཞེས་གསུངས་སོ། །རབ་ཏུ་རྣམ་པར་འབྱེད་པའི་མདོ་ལས་ཀྱང་།
ཤཱ་རིའི་བུ་དེ་ལ་དགེ་སློང་སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་རྒྱས་པ་གང་དག་འབྱུང་བ་དེ་དག་ནི། ཕུང་པོར་འདུ་ཤེས་པ། ཁམས་སུ་འདུ་ཤེས་པ། སྐྱེ་མཆེད་དུ་འདུ་ཤེས་པ། གང་ཟག་ཏུ་ལྟ་བ། རྒན་པས་གནས་བརྟན་དུ་གྱུར་པ། གཏི་མུག་གིས་རྙོགས་པ། ལམ་གོལ་བ་
ནས་དོང་བ། ལྷག་པར་ང་རྒྱལ་བ། ལོག་པར་ལྟ་བ་དེ་དག་གིས་སྨྲས་པ། དེ་ལ་མངོན་པར་མི་དགའ་ཞིང་རྗེས་སུ་ཡི་མི་རང་ནས་སྟན་ལས་ལངས་ཏེ་འདོང་བར་འགྱུར་རོ། །ཤཱ་རིའི་བུ་དེའི་ཚེ་ལྷའི་ཚོགས་ཆེན་པོ་ཡིད་རབ་ཏུ་དགའ་བ་རྣམས། ད་དུང་ཡང་ཤཱཀྱ་ཐུབ་པའི་ཉན་ཐོས་རྣམས་གནས་

སོ་ཞེས་ཕྱོགས་བཞིར་སྒྲ་ཤིན་ཏུ་སྒྲོགས་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་དག་འདི་ནི། གང་ཟག་ཏུ་ལྟ་བའོ་ཞེས་ཡོངས་སུ་མ་དག་པའི་བཟོད་པ་འདི་དག་མི་འདོད་པ་དེ་དག་ནི་དགེ་བའི་རྩ་བ་ཉང་ཉུང་དང་ལྡན་པ་མ་ལགས་སོ། །དེ་དག་གི་བསམ་པ་རིག་ནས་ལྷའི་ཚོགས་ཆེན་པོ་
དགའ་བ་དང་ཡིད་བདེ་བ་སྐྱེས་པ། ཡིད་ཆེར་རངས་པ་དེ་དག་ཆེད་དུ་བརྗོད་པ་ཆེར་ཆེད་དུ་བརྗོད་པར་འགྱུར་རོ། །ཤཱ་རིའི་བུ་ཡང་དགེ་སློང་དེ་དག་སངས་རྒྱས་ཀྱི་སྲས་ཡོངས་སུ་འདྲི་བའི་རང་བཞིན་ཅན། མི་དམིགས་པའི་བཟོད་པ་ཅན་རྣམས་ལ་མི་དགའ་བར་འགྱུར། དེ་དག་དེར་ཚུལ་གཅིག་ཏུ་
སྒྲོགས་པར་འགྱུར་རོ། །ཤཱ་རིའི་བུ་འདི་ལྟར་དེའི་ཚེ་ཚོགས་ནས་བསྡུས་ཏེ་ཚོགས་ཀྱི་སློབ་དཔོན་དུ་འགྱུར་རོ། །དེ་ཅིའི་ཕྱིར་ཞེ་ན། ཤིན་ཏུ་ཟིལ་གྱིས་མནན་པ་ཉིད་ཀྱིས་སོ། །ཤཱ་རིའི་བུ་དེ་ལྟར་དེའི་ཚེ་ངའི་སྲས་ངའི་ཉན་ཐོས་རྣམས་ཀྱིས་ཡབ་ཀྱི་གནས་དང་ཡབ་ཀྱི་སྤྱོད་ཡུལ་ལ་སྙན་པར་སྨྲ་བ་
ཡང་རྙེད་པར་མི་འགྱུར་ན། གཙུག་ལག་ཁང་དུ་གནས་པ་དང་བཀུར་སྟི་ལྟ་ཅི་སྨོས་ཏེ། དེ་ནི་གནས་མེད་དོ། །ཤཱ་རིའི་བུ་དེའི་ཚེ་འདི་ལྟར་དེ་བཞིན་གཤེགས་པ་ཟིལ་གྱིས་གནོན་པར་འགྱུར་བ་ལ་ལྟོས། གང་ང་ཡོངས་སུ་མྱ་ངན་ལས་འདས་པ་ན། དེ་བཞིན་གཤེགས་པའི་སྲས་གང་དག །ལེགས་
པར་ཐུབ་པ་ལེགས་པར་ཞི་བ། ལེགས་པར་དུལ་ཞིང་མི་དམིགས་པའི་བཟོད་པ་ཅན་དག་དེའི་ཤིན་ཏུ་ཟིལ་གྱིས་གནོན་ཅིང་ཡོངས་སུ་སྤངས་པར་འགྱུར་རོ། །ངའི་སྲས་དག་ཡབ་ཀྱི་སྤྱོད་ཡུལ་གང་ལ་བདེ་བ་ལ་རེག་པར་གནས་པར་འགྱུར་སྙམ་དུ་གང་ངས་དེ་དག་གི་དོན་གྱི་ཕྱིར་བསྐལ་པ་གྲངས་མེད་
པར་ཉེ་བར་བླངས་ནས། གཡུལ་ཆེན་པོ་ཕམ་པར་བྱས་པ་དང་། རྒྱལ་སྲིད་བསྐྱངས་སོ། །ཤཱ་རིའི་བུ་དེ་ལ་ཆོས་འདུལ་བ་དེ་ལྟར་དང་ཞིང་དེ་ལྟར་རྒྱ་ཆེ་བ་འདི་ལ་ཆོམ་རྐུན་པའི་ཚོགས་ཆེན་པོ་དང་དམུ་རྒོད་ཀྱི་ཚོགས་ཆེན་པོས་བསྣུབ་པར་འགྱུར་རོ། །ཤཱ་རིའི་བུ་དེ་ལ་ཇི་ལྟར་ངས་ཆོས་ཀྱིས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དང་། བླ་ན་མེད་པའི་ཆོས་ཀྱི་འཁོར་ལོ་དགེ་སྦྱོང་ངམ་བྲམ་ཟེའམ་ལྷའམ་བདུད་དམ་ཚངས་པའམ་སུས་ཀྱང་འཇིག་རྟེན་དུ་ཆོས་དང་མཐུན་པར་མ་བསྐོར་བ་རབ་ཏུ་བསྐོར་བ། ཆོས་མ་ཡིན་པས་མ་ཡིན་པ་ངའི་གནས་

འདི་ལ། ལྷ་དང་བཅས་པའི་འཇིག་རྟེན་མངོན་སུམ་དུ་དབང་དུ་འགྱུར་རོ། །ཤཱ་རིའི་བུ་གང་ན་དེ་ལྟར་མངོན་སུམ་དུ་གྱུར་པའི་རྒྱུ་ཡོད་བཞིན་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་རྒྱས་པར་བྱེད་
པ་རྣམས་ཀྱིས་ཆོས་དང་མཐུན་པར་དབང་པོའང་དྲིས་པ་ན་ལན་གདབ་པའི་ཕྱིར་མི་སྨྲའོ། །དེའི་ཚེ་ངའི་སྲས་དེ་དག་ལ་ཡང་མི་འཇིགས་པ་ཡང་མི་སྟེར་རོ། །ཤཱ་རིའི་བུ་འདི་ལྟ་སྟེ་དཔེར་ན་སྐྱེས་བུ་འགའ་ཞིག་ལམ་གྱི་བཞི་མདོ་ཆེན་པོར་སྦྲང་རྩིའི་བུམ་པ་ཉེ་བར་བཞག་ནས། འདི་སྐད་དུ་སྦྲང་རྩིའི་བུམ་
པ་རྣམ་པ་བརྒྱར་ཆག་པ་འདི་ལས་ཐ་ན་སྐྲའི་རྩེ་མོ་ཙམ་ཞིག་ཀྱང་ཡོངས་སུ་ཟོས་ན། དེ་རྒ་བ་དང་འཆི་བར་མི་འགྱུར་རོ་ཞེས་སྨྲ་བར་འགྱུར་ཞིང་། སྦྲང་རྩིའི་བུམ་པ་དེ་ལ་ལག་ན་མཚོན་ཆ་ཐོགས་པ་མང་པོ་རལ་གྲི་དག་གིས་བསྲུང་བར་འགྱུར་ལ། ཤཱ་རིའི་བུ་དེའི་ཚེ་སྲུང་མ་རྣམས་རྟག་ཏུ་རྒྱུན་མི་འཆད་
པར་འདི་སྙམ་དུ། གང་སྦྲང་རྩིའི་བུམ་པ་རྣམ་པ་བརྒྱར་ཆག་པ་འདི་ལས་ཐ་ན་སྐྲའི་རྩེ་མོ་ཙམ་ཞིག་ཀྱང་ཟ་ན། དེའི་སྲོག་ཀྱང་མེད་དོ་ཞེས་སེམས་པར་འགྱུར་རོ། །ཤཱ་རིའི་བུ་དེ་ལ་འགའ་ཞིག་འདི་སྙམ་དུ་གང་ཞིག་སྦྲང་རྩིའི་བུམ་པ་རྣམ་པ་བརྒྱར་ཆག་པ་འདི་ལས་ཐ་ན་སྐྲའི་རྩེ་མོ་ཙམ་ཞིག་ཀྱང་ཟོས་ན་
བདག་ལ་རྒ་བ་དང་འཆི་བར་མི་འགྱུར། གང་བདག་གི་སྲོག་ཀྱང་ཡོངས་སུ་བཏང་ནས་སྦྲང་རྩིའི་བུམ་པ་འདི་ལས་བཟའ་བར་བྱའོ། །གལ་ཏེ་མཚོན་རྣམས་བབ་པར་མ་གྱུར་པ་ན་སྦྲང་རྩིའི་བུམ་པ་འདི་ལས་བཟའ་བར་ནུས་ན། ཕྱི་ནས་མཚོན་གྱིས་ཀྱང་འཇིགས་པར་མི་འགྱུར། རྒ་བ་དང་འཆི་
བ་མེད་པའི་གནས་འཐོབ་པར་འགྱུར་རོ་ཞེས་སེམས་པར་འགྱུར་རོ། །དེ་སྲོག་ཡོངས་སུ་བཏང་ནས་སྲོག་ལ་ལྟོས་པ་མེད་པར་འགྱུར་ཏེ་སྦྲང་རྩིའི་བུམ་པ་དེ་ལས་ལེན་པར་བྱེད་པ་དེ་ལ་ལག་ན་མཚོན་ཆ་ཐོགས་པའི་སྲོག་ཆགས་བརྒྱ་སྟོང་ཕྲག་མང་པོ་ལྷགས་པར་འགྱུར་རོ། །གལ་ཏེ་མཚོན་ཆ་མ་ལྷུང་
བ་ན་སྦྲང་རྩིའི་བུམ་པ་དེ་ལས་བཟའ་བར་ནུས་ན། དེ་དེ་ནས་སྡུག་བསྔལ་ཆེན་པོ་ལས་གྲོལ་བར་འགྱུར། རྒ་བ་དང་འཆི་བ་ལས་ཡོངས་སུ་ཐར་བར་འགྱུར་རོ། །ཤཱ་རིའི་བུ་དེ་ལྟར་དཀར་པོའི་ཆོས་མང་པོ་རྣམས་བསྣུབ་པའི་ཕྱིར་དུ་བདུད་སྡིག་ཅན་དང་བདུད་ཀྱི་རིས་ཀྱི་ལྷ་རྣམས་དང་། གང་བདུད་

ཀྱིས་མངགས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་འཇུག་པར་འགྱུར་རོ་ཞེས་གསུངས་སོ། །སྙིང་རྗེ་ཆེན་པོ་ལ་འཇུག་པའི་མདོ་ལས་ཀྱང་། གང་ཞིག་ཚུལ་ཁྲིམས་ལྡན་ཞིང་ཡོན་ཏན་ལྡན། །བྱམས་ལ་གནས་ཤིང་རྟག་ཏུ་བཟོད་ལ་མཁས། །ལེགས་
བསྡམས་འཇམ་ཞིང་དེས་པ་འབྱུང་འགྱུར་བ། །དེ་ནི་དེ་ཡི་དུས་ན་ཟིལ་ནོན་འགྱུར། །གང་ཞིག་སླར་ཡང་གདུག་པའི་སེམས་ལྡན་ཞིང་། །ཤིན་ཏུ་མ་རུངས་དྲག་ཅིང་ལས་ཉམས་ལ། །ཆོས་མ་ཡིན་སྤྱོད་རྩོད་ལ་དགའ་འབྱུང་བ། །དེ་ནི་དེ་ཡི་དུས་ན་མཆོད་པར་འགྱུར། །ཞེས་གསུངས་སོ། །
ཟླ་བའི་སྙིང་པོའི་མདོ་ལས་ཀྱང་། གཞན་ཡང་ཆགས་པ་དེ་དག་ནི། །སྡིག་པའི་དགེ་སློང་སྟེན་པར་བྱེད། །དགེ་སློང་དེ་དག་མཆོད་རྟེན་དང་། །དགེ་འདུན་ཟས་སྐོམ་འབྲས་བུའི་རོ། །ཁྱིམ་པ་རྣམས་ལ་སྦྱིན་བྱེད་ཅིང་། །སླར་ཡང་མཆོད་པ་ཉིད་དུ་འགྱུར། །དེ་དག་ལ་ནི་ཡོངས་འཛིན་པ། །བྲན་
དང་བྲན་མོ་ཁྱིམ་སྟེར་འགྱུར། །དགེ་སློང་ལས་གསུམ་དང་བྲལ་བ། །ཐོས་པས་རློམ་ཞིང་ལྷུང་དང་བཅས། །བསམ་གཏན་ཚུལ་ཁྲིམས་མི་མཐུན་པ། །ཚོགས་ཀྱི་ནང་དུ་གཙོ་བོར་འགྱུར། །ཚུལ་ཁྲིམས་ལྡན་རྣམས་དོང་བ་ན། །ནོར་གྱི་རྒྱུ་ཡིས་འཐབ་པར་འགྱུར། །ཞེས་གསུངས་པ་དང་། །ཡང་
མདོ་དེ་ཉིད་ལས། དགེ་སློང་འདི་ནི་ཚུལ་འཆོས་ཅན། །རྐུན་པོ་མཆོག་ཏུ་མ་རུངས་པ། །གང་ཞིག་དེ་ལ་མཆོད་བྱེད་པ། །གྲགས་པ་མ་ཡིན་མང་དུ་འཐོབ། །དེ་ལ་བསོད་ནམས་འཐོབ་མི་འགྱུར། །དེ་ཡིས་བཤད་པ་མ་ཉན་ཞེས། །ཁྱིམ་པ་རྣམས་ལ་སྨྲ་བར་བྱེད། །ཅེས་གསུངས་སོ། །
གསེར་འོད་དམ་པའི་མདོ་ལས་ཀྱང་། ཡུལ་འཁོར་དུ་ནི་གདོན་འཇུག་ཅིང་། །མི་བཟད་པ་ཡི་ནད་ཀྱང་འབྱུང་། །དེ་ཡི་འོག་ཏུ་སྦྱིན་གནས་ཀྱང་། །ཆོས་དང་ལྡན་པ་མ་ཡིན་འགྱུར། །དེ་ཡི་འཁོར་དང་བློན་པོ་ཡང་། །ཆོས་དང་ལྡན་པ་མ་ཡིན་འགྱུར། །ཆོས་དང་མི་ལྡན་སྐྱེ་བོ་ལ། །དེ་ཡི་འོག་ཏུ་
མཆོད་བྱེད་འགྱུར། །ཆོས་དང་ལྡན་པའི་སེམས་ཅན་ལ། །རྟག་ཏུ་ཆད་པས་གཅོད་པར་འགྱུར། །ཆོས་དང་མི་ལྡན་སྐྱེ་བོ་བཀུར། །ཆོས་ལྡན་ཆད་པས་བཅད་པས་ན། །དེར་ནི་ཆུ་དང་རྒྱུ་སྐར་རླུང་། །རྣམ་གསུམ་རྣམ་པར་འཁྲུག་པར་འགྱུར། །ཆོས་མིན་སྐྱེ་བོ་བཟུང་བས་ན། །དམ་ཆོས་རོ་ཡི་

སྙིང་པོ་མདངས། །སེམས་ཅན་མདངས་དང་ས་ཡི་བཅུད། །དངོས་པོ་རྣམ་གསུམ་རྣམ་པར་འཇིག །སྐྱེ་བོ་ངན་པ་རབ་བཀུར་ཞིང་། །སྐྱེ་བོ་དམ་པ་སྨད་པས་ན། །འཆི་དང་ལྕེ་འབབ་མུ་གེ་དང་། །རྣམ་པ་གསུམ་ནི་དེར་འབྱུང་འགྱུར། །ཞེས་གསུངས་སོ། །སའི་སྙིང་
པོའི་མདོ་ལས་ཀྱང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཕྱི་མ་མ་འོངས་པའི་དུས་ན། སངས་རྒྱས་ཀྱི་ཞིང་འདིར་སེམས་ཅན་དག་ཉོན་མོངས་པས་ཡོངས་སུ་གདུངས་ནས་སྡིག་པ་སྤྱོད་ཅིང་། བྱིས་པ་གཏི་
མུག་ཅན་གདུལ་དཀའ་བར་གྱུར་པ་གང་། རྒྱལ་རིགས་གདོལ་པ་ཅན་དང་། བློན་པོ་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། ཚོང་དཔོན་གདོལ་པ་ཅན་དང་། དགེ་སྦྱོང་གདོལ་པ་ཅན་དང་། བྲམ་ཟེ་གདོལ་པ་ཅན་ལ་སོགས་པ་དགེ་བའི་རྩ་བ་ཆུང་བ་དང་། དད་པའི་སེམས་མེད་པ། གཡོ་
དང་སྒྱུས་འཚོ་བ། གཏི་མུག་དང་། ཤེས་པ་སྙེམས་པ་ཅན། དགེ་བའི་བཤེས་གཉེན་སྤོང་བ། སྨྲ་བའི་ཚིག་བདེན་པ་མེད་པ། དགེ་བའི་བཤེས་གཉེན་གྱིས་བསྟན་པ་ལ་མི་འཇུག་པ་དང་། བརྙས་ཤིང་དབང་ཟ་བ། ཚིག་ངན་པས་རྣམ་པར་འཐིང་བ། དམ་པའི་ཆོས་ལ་ཐེ་ཚོམ་ཟ་ཞིང་ལོག་པར་ལྟ་
བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུས་མི་འཇིགས་པ། རྟག་ཏུ་ངང་ཚུལ་ངན་པ་ཅན་དག་དང་བསྟེན་པར་དགའ་བ། སྲོག་གཅོད་པ་ནས་ལེགས་པར་ལྟ་བའི་བར་དུ་སྤྱོད་པ་ལ་དགའ་ཞིང་གཡོ་དང་སྒྱུས་འཇིག་རྟེན་པ་སླུ་བ་དང་། བདག་དང་གཞན་ལ་གནོད་པ་བྱེད་པའི་རྒྱལ་རིགས་གདོལ་པ་
ཅན་ནས་བྲམ་ཟེ་གདོལ་པ་ཅན་གྱི་བར་དུ། ངའི་ཆོས་འཇིག་པར་བྱེད་པ། ངའི་བསྟན་པ་ལ་རབ་ཏུ་བྱུང་ན་ཡང་ཚུལ་ཁྲིམས་ཉམས་ཤིང་འཇིག་རྟེན་གྱི་འདུ་འཛིའི་ལས་བྱེད་པར་སྤྲོ་བ་ལ། རྒྱལ་རིགས་དང་བྲམ་ཟེ་ལ་སོགས་པས་བསྟི་སྟང་དང་བཅས་པས་མཆོད་པ་དང་། ཁེ་ལ་བརྐམ་པས་ནོར་
གྱི་ཕྱིར་ཚིག་ཙམ་དུ་སྨྲ་ཞིང་སྤྱོད་པ་དང་མི་ལྡན་པ། ཕན་ཚུན་དུ་འཕྲིན་གྱི་ཡི་གེ་སྐྱེལ་བ་ལ་དགའ་བ་དང་། ཚོང་དང་ཁེ་སྤོགས་བྱེད་ཅིང་། འཇིག་རྟེན་རྒྱང་འཕེན་པའི་གཙུག་ལག་སློབ་པ་དང་། ཞིང་རྨོ་བའི་ལས་ལ་དགའ་བ་དང་། ནོར་རིན་པོ་ཆེ་སོགས་ཤིང་སྦེད་པ་དང་། ཁང་ཁྱིམ་དང་ཆུང་

མ་དང་། བུ་སྨད་སྲུང་བ་དང་། འཇིག་རྟེན་གྱི་སྔགས་དང་། ཕྱག་རྒྱས་འབྱུང་པོ་འཁོལ་བ་དང་། ལྟས་བཟང་ངན་ལྟ་བ་དང་། སྨན་སྦྱར་ཅིང་ནད་གསོ་བའི་ནོར་གྱིས་འཚོ་བ་དང་། བཟའ་བ་དང་། བཏུང་བ་དང་། བགོ་བ་དང་། རིན་པོ་ཆེའི་རྒྱན་ལ་ཆགས་ཤིང་། ཁྱིམ་པའི་ལས་བྱེད་པ་ལ་དགའ་བ་དང་།
ཚུལ་ཁྲིམས་འདྲལ་ཞིང་སྡིག་པ་སྤྱོད་པ་དང་། དུང་གི་སྒྲ་ལ་ཁྱིའི་སྤྱོད་པ་དང་ལྡན་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ་ཡོད་དེ། རྒྱལ་རིགས་གདོལ་པ་ཅན་ནས། བྲམ་ཟེ་གདོལ་པ་ཅན་གྱི་བར་དུ། དེ་དག་ལ་བསྙེན་བཀུར་བྱེད་
ཅིང་། བསྟི་སྟང་དང་བཅས་པས་མཆོད་པ་བྱེད་དེ། དེ་དག་གི་ངག་ཀྱང་ཉན་ཏོ། །ཚུལ་ཁྲིམས་ཉམས་པ་དེ་དག་ཀྱང་། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ། དེ་དག་ལ་བརྟེན་པར་དགའ་ཞིང་། བཀུར་སྟི་དང་། རིམ་གྲོ་བྱེད་དེ་དེའི་ངག་ཉན་ཏོ། །གལ་ཏེ་གང་ཟག་འགའ་
ཞིག་ངའི་བསྟན་པ་ལ་རབ་ཏུ་བྱུང་ནས་ཚུལ་ཁྲིམས་དང་ཡོན་ཏན་དང་ལྡན་པ་དང་། སློབ་པ་དང་མི་སློབ་པ་ནན་ཏན་བྱེད་པ་ནས། འབྲས་བུའི་མཐར་ཕྱིན་གྱི་བར་དུ་གྱུར་པ་ལ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ། དེ་དག་གིས་དེ་ལ་ཕྲག་དོག་བྱེད་དེ། བསྙེན་བཀུར་དང་།
བསྟི་སྟང་དང་། རིམ་གྲོ་དང་། མཆོད་པ་མི་བྱེད་ཅིང་། སླར་ངག་ཉན་པར་ཡང་མི་བྱེད་དོ། །རིགས་ཀྱི་བུ་འདི་ལྟ་སྟེ་མི་ལ་ལ་ཞིག་རིན་པོ་ཆེའི་གླིང་དུ་ཕྱིན་པ་ལས། རིན་པོ་ཆེ་ཨིནྡྲ་ནཱི་ལ་དང་། མ་ཧཱ་ནཱི་ལ་དང་། གསེར་དང་། དངུལ་དང་། མུ་ཏིག་དང་། པདྨ་རཱ་ག་དང་། བཻ་ཌཱུརྱ་དང་། རིན་ཐང་
མེད་པའི་རིན་པོ་ཆེ་རྣམ་པ་སྣ་ཚོགས་བོར་ནས། ནོར་བུ་མཆིང་བུ་ལེན་པ་ལྟར། དེ་བཞིན་དུ་མ་འོངས་པའི་དུས་ན། སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ཡང་དེ་དང་འདྲ་སྟེ། ངས་བསྟན་པའི་དམ་པའི་ཆོས་ཀྱི་རིན་པོ་ཆེའི་གླིང་དུ་ཕྱིན་ནས། ཚུལ་ཁྲིམས་
དང་། ཡོན་ཏན་གྱིས་ཕྱུག་པ། དོན་དམ་པའི་བདེན་པ་ལ་དགའ་བ་དང་། འཛེམ་པ་དང་། ངོ་ཚ་བར་ལྡན་པ། སློབ་པ་དང་། མི་སློབ་པའི་གང་ཟག་དང་། ཕ་རོལ་ཏུ་ཕྱིན་པ་དྲུག་ནན་ཏན་བྱེད་པ་ལ་བརྩོན་པའི་སོ་སོའི་སྐྱེ་བོ་དགེ་བའི་ཡོན་ཏན་དང་ལྡན་པ། འཕགས་པའི་འཁོར་སྤངས་ནས། ཚུལ་

ཁྲིམས་ཉམས་པ། སྡིག་པ་མང་པོ་སྤྱོད་པ། ངོ་ཚ་བ་མེད་པ། འཛེམ་པ་མེད་པ། ཚིག་བརླང་ཞིང་རྩུབ་པ། ལུས་དང་སེམས་ང་རྒྱལ་གྱིས་དྲེགས་པ། རྣམ་པར་དཀར་བའི་ཆོས་དང་བྲལ་བ། བྱམས་པའི་སེམས་མེད་པ། སྙིང་རྗེ་མེད་པ། སྡིག་པའི་དགེ་སློང་དག་
ལ་བསོད་ནམས་ཀྱི་ཞིང་དུ་འཛིན་ཅིང་། བཀུར་སྟི་དང་། རིམ་གྲོ་དང་། མཆོད་པ་བྱེད་དེ་དེའི་ངག་ཉན་ཏོ། །དེ་ལྟར་སྡིག་པ་ཅན་དེ་དག་ནི་སློབ་དཔོན་དང་། སློབ་མར་བཅས་ཏེ་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ་ཞེས་གསུངས་སོ།། །།རབ་ཏུ་བྱུང་
བའི་བསྔགས་པ་ལ་དགོངས་པ་བསྟན་པ། བློ་གྲོས་རྒྱ་མཚོའི་མདོ་ལས་ཀྱང་། བློ་གྲོས་རྒྱ་མཚོ་དེ་ནས། བཅོམ་ལྡན་འདས་དེ་བཞིན་གཤེགས་པ་འོད་ཟེར་སྣང་བ་མཐའ་ཡས་དེས། རྒྱལ་པོ་ཡུལ་ཤིན་ཏུ་རྣམ་པར་དག་པ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁྱོད་ཀྱིས་ཡོངས་
སུ་སྤྱད་པའི་ཕྱིར། རྒྱལ་སྲིད་ཐམས་ཅད་དེ་བཞིན་གཤེགས་པ་ལ་ཕུལ་ཟིན་ན། རྒྱལ་པོ་ཆེན་པོ་ཁྱོད་དད་པས་ལེགས་པར་གསུངས་པའི་ཆོས་འདུལ་བ་ལ། ཁྱིམ་ནས་ཁྱིམ་མེད་པར་རབ་ཏུ་བྱུང་ཤིག །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་ནི།
དོན་ཆེ་བ། ཕན་ཡོན་ཆེ་བ། རྒྱ་ཆེ་བའོ། །རྒྱལ་པོ་ཆེན་པོ་རབ་ཏུ་བྱུང་བར་གཏོགས་པའི་བྱང་ཆུབ་སེམས་དཔའི་འཐོབ་པ་ཆེན་པོ་ནི་ཉི་ཤུ་པོ་འདི་དག་སྟེ། ཐམས་ཅད་མཁྱེན་པ་བླ་ན་མེད་པའི་འཐོབ་པ་ཡོངས་སུ་རྫོགས་པར་འགྱུར་བ་དག་གོ། །ཉི་ཤུ་པོ་གང་ཞེ་ན། འདི་ལྟ་སྟེ། རྒྱལ་སྲིད་དང་། ལོངས་
སྤྱོད་དང་། གཡོག་འཁོར་དང་། དབང་ཕྱུག་དག་འདོར་བས་ང་ཡི་བ་མེད་ཅིང་ཡོངས་སུ་འཛིན་པ་མེད་པ་འཐོབ་པ་དང་། ཁྱིམ་ནས་འབྱུང་བ་ལ་གཞོལ་བས་ཉོན་མོངས་པ་ལས་འབྱུང་བ་འཐོབ་པ་དང་། ངུར་སྨྲིག་འཛིན་པས་རྙོག་པ་མེད་པའི་སེམས་འཐོབ་པ་དང་། འཕགས་པའི་རིགས་ཀྱི་
ཆོག་ཤེས་པས་དགོང་སླ་བ་དང་། གསོ་སླ་བ་འཐོབ་པ་དང་། སྦྱངས་པའི་ཡོན་ཏན་ཡོ་བྱད་བསྙུངས་པ་ཡང་དག་པར་ལེན་པས། འདོད་པ་ཆེ་བ་དང་། སྡིག་པ་འདོད་པ་སྤོང་བ་འཐོབ་པ་དང་། ཚུལ་ཁྲིམས་ཀྱི་ཕུང་པོ་ཡོངས་སུ་དག་པས། ལྷ་དང་མིར་སྐྱེ་བ་འཐོབ་པ་དང་། བྱང་ཆུབ་ཀྱི་སེམས་མི་

འདོར་བས། ཕ་རོལ་ཏུ་ཕྱིན་པ་དྲུག་འཐོབ་པ་དང་། དགོན་པ་དབེན་པ་ན་གནས་པས། འདུ་འཛི་དང་མི་འདྲེ་བ་འཐོབ་པ་དང་། གནོད་པ་མེད་པས་ཆོས་སེམས་པའི་བདེ་བ་འཐོབ་པ་དང་། བསམ་གཏན་གྱི་ཡན་ལག་ཡང་དག་པར་བསྒྲུབས་པས་སེམས་ལས་སུ་རུང་བ་འཐོབ་པ་དང་། ཐོས་པ་
ཡོངས་སུ་ཚོལ་བས་ཤེས་རབ་ཆེན་པོ་འཐོབ་པ་དང་། ང་རྒྱལ་མེད་པས་ཡེ་ཤེས་ཆེན་པོ་འཐོབ་པ་དང་། དོན་ཉུང་ཞིང་བྱེད་པ་ཉུང་བས་ཆོས་རབ་ཏུ་རྣམ་པར་འབྱེད་པ་འཐོབ་པ་དང་། སེམས་ཅན་ཐམས་ཅད་ལ་སེམས་མཉམ་པ་ཉིད་པས་བྱམས་པ་ཆེན་པོ་འཐོབ་པ་དང་། སེམས་ཅན་
ཐམས་ཅད་རབ་ཏུ་ཐར་པར་བྱ་བའི་སེམས་ཀྱིས་སྙིང་རྗེ་ཆེན་པོ་འཐོབ་པ་དང་། ལུས་དང་སྲོག་ལ་མི་ལྟ་བས་དམ་པའི་ཆོས་ཡོངས་སུ་འཛིན་པ་འཐོབ་པ་དང་། སེམས་རབ་ཏུ་སྦྱངས་པས་མངོན་པར་ཤེས་པ་ཆེན་པོ་འཐོབ་པ་དང་། སངས་རྒྱས་རྗེས་སུ་དྲན་པས་སངས་རྒྱས་མཐོང་བ་འཐོབ་པ་དང་།
ཚུལ་བཞིན་གྱི་ཆོས་ལ་སོ་སོར་རྟོག་པས་མི་སྐྱེ་བའི་ཆོས་ལ་བཟོད་པ་ཐོབ་པ་འཐོབ་པ་དང་། ཡོན་ཏན་ཐམས་ཅད་ཡང་དག་པར་འཛིན་པའི་སྤྱོད་པས་མྱུར་དུ་ཐམས་ཅད་མཁྱེན་པ་འཐོབ་པ་སྟེ། རྒྱལ་པོ་ཆེན་པོ་རབ་ཏུ་བྱུང་བར་གཏོགས་པའི་བྱང་ཆུབ་སེམས་དཔའ་ལ་འཐོབ་པ་ཆེན་པོ་ཉི་ཤུ་པོ་འདི་དག་
རྙེད་པར་དཀའ་བར་མི་འགྱུར་རོ། །རྒྱལ་པོ་ཆེན་པོ་དེ་ལྟ་བས་ན་ཁྱོད་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཤིག་ཅེས་གསུངས་སོ། །རབ་ཏུ་བྱུང་བ་ལ་བར་ཆད་བྱེད་པའི་མདོ་ལས་ཀྱང་། བདུད་ཀྱི་འཆིང་བ་བཅོམ་བྱས་ནས། །བྱང་ཆུབ་སྙིང་པོའི་ལམ་དག་དང་། །ཀུན་མཁྱེན་ཡེ་
ཤེས་ཚོལ་བ་ཡིས། །རབ་ཏུ་བྱུང་ཕྱིར་མྱུར་དུ་དོང་། །སོ་སོར་ཐར་པའི་སྡོམ་པ་དང་། །ཚུལ་ཁྲིམས་མ་ཉམས་བསྲུང་བར་གྱིས། །སེམས་ཅན་རྣམས་ནི་ཐམས་ཅད་ལ། །བྱམས་སེམས་རྣམ་པར་བསྒོམ་པར་གྱིས། །ཚངས་པར་སྤྱོད་པ་སྤྱད་ནས་ནི། །མཐོ་རིས་དག་ཏུ་འགྲོ་བར་འགྱུར། །
མི་ཁོམ་པ་དག་སྤོང་འགྱུར་ཞིང་། །དེ་དག་དལ་བ་རྙེད་དཀའ་མིན། །ཚངས་པར་སྤྱོད་པ་སྤྱད་ནས་ནི། །སངས་རྒྱས་མྱུར་དུ་མཐོང་བ་དང་། །སངས་རྒྱས་རྣམས་ཀྱི་བཤེས་འགྱུར་ཏེ། །དེ་ཕྱིར་འདོད་པ་བསྟེན་མི་བྱ། །འདི་ཡང་ང་ཡི་ལམ་མིན་ཞིང་། །འདི་ནི་སངས་རྒྱས་ཀྱིས་གསུངས་ལམ། །

དྲང་པོ་དེས་ནི་སྡུག་བསྔལ་དག །ཀུན་ལས་སྒྲོལ་ཞིང་མྱ་ངན་འདའ། །གང་དག་ཤེས་རབ་འཆལ་རང་བཞིན། །ཁྱིམ་དུ་འདོད་པ་ངེས་བསྟེན་པ། །བདེ་བར་གཤེགས་པའི་ལམ་སྤངས་ནས། །དེ་ནི་ངན་སོང་འགྲོ་བར་འགྱུར། །དེ་ཕྱིར་འདོད་པ་རྣམ་སྤངས་ནས། །
མྱུར་དུ་རབ་ཏུ་འབྱུང་བར་དོང་། །ལམ་འདི་དྲང་པོ་རྣམས་ཀྱི་ཕྱིར། །སངས་རྒྱས་ཀུན་གྱིས་མངོན་པར་གསུངས། །གང་ཞིག་འདི་འདྲའི་མདོ་སྡེ་ནི། །ཐོས་ནས་ལོག་པར་རྟོགས་འགྱུར་བ། །སངས་རྒྱས་བསྟན་པ་སྤངས་ནས་སུ། །མྱུར་དུ་ངན་འགྲོར་འགྲོ་བར་འགྱུར། །དེ་ནི་ཕ་དང་མ་ཡིས་
ཀྱང་། །སྡུག་བསྔལ་བ་ལས་སྒྲོལ་མི་ནུས། །དེ་ཕྱིར་ཚུལ་བཞིན་བསམས་ནས་ནི། །མྱུར་དུ་རབ་ཏུ་བྱུང་བར་དོང་། །དྲི་མེད་ཚུལ་ཁྲིམས་བསྲུང་བྱས་ན། །ནོར་འཛིན་འདི་དག་གཡོ་འགྱུར་ཞིང་། །དཔུང་བཅས་བདུད་ནི་བརྫི་བར་འགྱུར། །དེ་ཕྱིར་རབ་ཏུ་བྱུང་བར་དོང་། །དེ་ལ་ལྷ་དབང་བརྒྱ་
བྱིན་དང་། །གང་དག་ལྷ་གཞན་ཆེན་པོ་རྣམས། །དེ་ཀུན་དེ་ལ་ཕྱག་བྱེད་ཅིང་། །དགེ་སློང་རྫུ་འཕྲུལ་ཆེན་པོར་འགྱུར། །གང་ལ་སོ་སོའི་སྐྱེ་ཆགས་པ། །ཟོལ་གྱི་ལས་རྣམས་བཏང་བྱས་ནས། །བྱང་ཆུབ་དམ་པ་འདོད་པ་ན། །མྱུར་དུ་རབ་ཏུ་བྱུང་བར་དོང་། །དམྱལ་བར་འབར་བའི་ལུས་ཀྱི་ནི། །
སྡུག་བསྔལ་ཚོར་བ་དེ་ཤེས་ནས། །ཐར་པའི་སྒོ་དག་ཚོལ་བ་ན། །མྱུར་དུ་རབ་ཏུ་བྱུང་བར་དོང་། །མི་གཙང་ཁྲོན་པའི་ཚོགས་ནང་དུ། །ཤིན་ཏུ་གནོད་པར་བྱེད་སྒོ་ཅན། །འཇིག་རྟེན་གསུམ་པོ་འཕྱན་མཐོང་ནས། །མྱུར་དུ་རབ་ཏུ་བྱུང་བར་དོང་། །འཇིག་རྟེན་ཟང་ཟིང་ཚོལ་བ་དང་། །བུ་ནི་ངན་སོང་
འཁྲིད་པར་འགྱུར། །དྲི་ངའི་ཆུང་མ་བསྟེན་པ་ཡི། །རྐང་པ་ལག་པ་གཅོད་པར་འགྱུར། །བུད་མེད་དག་ནི་རྣམ་སྤང་ཕྱིར། །མྱུར་དུ་རབ་ཏུ་བྱུང་བར་དོང་། །ཟག་དང་བཅས་པའི་ལས་བྱས་ནས། །རྒན་པོ་རྣམས་ལ་ཟས་བྱིན་བྱེད། །དེ་དག་བདག་ལ་སྨོད་བྱེད་ཅིང་། །བུ་ནི་ངན་སོང་འགྲོ་བར་
འགྱུར། །འདི་ནི་ངན་འགྲོར་འགྲོ་འགྱུར་ཞིང་། །བདག་གིས་དོན་མིན་བྱས་པར་འགྱུར། །རྫས་ངན་དག་ལ་གང་བརྟེན་པ། །དེ་དག་སྡིག་པའི་གྲོགས་ཞེས་བརྗོད། །ཆོས་ལས་ལོག་པར་བྱེད་གྱུར་པ། །དེ་ནི་ཕ་དང་མ་མིན་ནོ། །གང་དག་ཆོས་མཆོད་རྗོད་བྱེད་ཅིང་། །སངས་རྒྱས་ཆོས་ལ་

དགའ་བྱེད་པ། །མྱུར་དུ་རབ་ཏུ་བྱུང་སྨྲ་བ། །ཕ་མ་དེ་དག་བདེ་བ་ཅན། །དལ་བ་ཐོབ་ནས་ཀུན་མཁྱེན་གྱི། །ཆོས་ནི་འདི་འདྲ་ཐོབ་འགྱུར་ཏེ། །ལས་རྣམས་ཐམས་ཅད་བཏང་བྱས་ཏེ། །མྱུར་དུ་རབ་ཏུ་བྱུང་བར་དོང་། །ཇི་ལྟར་སྟོན་པ་ཐམས་ཅད་མཁྱེན། །འདི་འདྲའི་ཞིང་གཞན་ཡོད་མིན་ཅིང་། །འདི་
འདྲའི་བདེ་བ་གཞན་ཡོད་མིན། །མྱུར་དུ་རབ་ཏུ་བྱུང་བར་དོང་། །གླིང་བཞི་པོ་དག་སྤང་བྱས་ནས། །ཚོགས་ནི་རྙེད་པར་དཀའ་མ་ཡིན། །ང་ནི་མྱུར་དུ་རབ་བྱུང་ན། །ཇི་ལྟར་གཞན་ལྟ་རབ་མི་འབྱུང་། །སེམས་ཅན་བསོད་ནམས་བྱས་གང་ལ། །འདི་རྙེད་སྨྲ་བར་ནུས་པར་འགྱུར། །དེ་ལྟར་དེ་ཕྱིར་ཚུལ་
བཞིན་དུ། །བརྟགས་ནས་མྱུར་དུ་རབ་བྱུང་དོང་། །བསྐལ་པ་བྱེ་བ་མང་པོར་ནི། །འདི་འདྲའི་ཆོས་ནི་མི་ཐོས་སོ། །དེ་ཕྱིར་སྐྱོ་བ་དྲག་པོ་ནི། །སྐྱེད་པས་རབ་ཏུ་བྱུང་བར་དོང་། །ཞེས་གསུངས་སོ། །དྲག་ཤུལ་ཅན་གྱིས་ཞུས་པའི་མདོ་ལས་ཀྱང་། བྱང་ཆུབ་སེམས་དཔའ་ཁྱིམ་ན་གནས་ཏེ།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནི། གང་ཡང་མེད་དེ། དེ་དག་ཐམས་ཅད་ཀྱང་ཁྱིམ་གྱི་གནས་ནས་མངོན་པར་བྱུང་ནས་དགོན་པ་ལ་སེམས། དགོན་པ་ལ་གཞོལ། དགོན་པར་སོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་སོ། །ཚོགས་དེ་ཡང་དག་པར་བསྒྲུབས་སོ། །ཁྱིམ་ན་གནས་པ་ནི་ཀུན་དུ་གནོད་པ་སྟེ། རྡུལ་འབབ་པའོ། །རབ་ཏུ་བྱུང་བ་ནི་སངས་རྒྱས་དང་དེའི་ཉན་ཐོས་རྣམས་ཀྱིས་བསྔགས་པའོ། །ཁྱིམ་ན་གནས་པ་ནི་ཉེས་པའི་སྐྱོན་ཆགས་པ་མང་བའོ། །རབ་ཏུ་བྱུང་བ་ནི་ཡོན་ཏན་
ཕུན་སུམ་ཚོགས་པ་མང་བའོ། །ཁྱིམ་ན་གནས་པ་ནི་ཉམ་ང་བའོ། །རབ་ཏུ་བྱུང་བ་ནི་བག་ཡངས་པའོ། །ཁྱིམ་ན་གནས་པ་ནི་ཡོངས་སུ་འཛིན་པའི་དྲི་མ་ཅན་ནོ། །རབ་ཏུ་བྱུང་བ་ནི་ཡོངས་སུ་འཛིན་པ་ལས་རྣམ་པར་གྲོལ་བའོ། །ཁྱིམ་ན་གནས་པ་ནི་ཉེས་པར་སྤྱོད་པའི་གཞིའོ། །རབ་ཏུ་
བྱུང་བ་ནི་ལེགས་པར་སྤྱོད་པའི་གཞིའོ། །ཁྱིམ་ན་གནས་པ་ནི་རྡུལ་གྱི་ནང་ན་གནས་པའོ། །རབ་ཏུ་བྱུང་བ་ནི་རྡུལ་གྱི་ནང་ན་མི་གནས་པའོ། །ཁྱིམ་ན་གནས་པ་ནི་འདོད་པའི་འདམ་དུ་བྱིང་བའོ། །རབ་ཏུ་བྱུང་བ་ནི་འདོད་པའི་འདམ་ནས་འབྱིན་པའོ། །ཁྱིམ་ན་གནས་པ་ནི་བྱིས་པའི་སྐྱེ་བོའི་ཞུགས་

པའོ། །རབ་ཏུ་བྱུང་བ་ནི་སྐྱེ་བོ་མཁས་པའི་ཞུགས་པའོ། །ཁྱིམ་ན་གནས་པ་ནི་འཚོ་བ་སྦྱང་བར་དཀའ་བའོ། །རབ་ཏུ་བྱུང་བ་ནི་འཚོ་བ་སྦྱང་བར་སླ་བའོ། །ཁྱིམ་ན་གནས་པ་ནི་འགྲན་ཟླ་མང་བའོ། །རབ་ཏུ་བྱུང་བ་ནི་འགྲན་ཟླ་མེད་པའོ། །ཁྱིམ་ན་གནས་པ་ནི་ཕོངས་པ་མང་བའོ། །རབ་ཏུ་
བྱུང་བ་ནི་ཕོངས་པ་མེད་པའོ། །ཁྱིམ་ན་གནས་པ་ནི་མྱ་ངན་གྱི་གནས་སོ། །རབ་ཏུ་བྱུང་བ་ནི་མྱ་ངན་དང་བྲལ་བའོ། །ཁྱིམ་ན་གནས་པ་ནི་ངན་སོང་གི་ཐེམ་སྐས་སོ། །རབ་ཏུ་བྱུང་བ་ནི་མངོན་པར་མཐོ་བའི་ཐེམ་སྐས་སོ། །ཁྱིམ་ན་གནས་པ་ནི་བཅིངས་པའོ། །རབ་ཏུ་བྱུང་བ་ནི་ཐར་པའོ། །ཁྱིམ་ན་གནས་པ་ནི་
འཇིགས་པ་དང་བཅས་པའོ། །རབ་ཏུ་བྱུང་བ་ནི་འཇིགས་པ་མེད་པའོ། །ཁྱིམ་ན་གནས་པ་ནི་ཆད་པ་དང་བཅས་པར་སྤྱོད་པའོ། །རབ་ཏུ་བྱུང་བ་ནི་ཆད་པ་མེད་པར་སྤྱོད་པའོ། །ཁྱིམ་ན་གནས་པ་ནི་མཚོན་ཆའི་སྤྱོད་པ་དང་བཅས་པའོ། །རབ་ཏུ་བྱུང་བ་ནི་མཚོན་ཆ་མི་སྤྱོད་པའོ། །ཁྱིམ་ན་གནས་པ་ནི་
ཡོངས་སུ་གདུང་བ་དང་བཅས་པའོ། །རབ་ཏུ་བྱུང་བ་ནི་ཡོངས་སུ་གདུང་བ་མེད་པའོ། །ཁྱིམ་ན་གནས་པ་ནི་ཀུན་དུ་ཚོར་བས་སྡུག་བསྔལ་བའོ། །རབ་ཏུ་བྱུང་བ་ནི་ཀུན་དུ་ཚོར་བ་མེད་པས་བདེ་བའོ། །ཁྱིམ་ན་གནས་པ་ནི་རྒོད་པའོ། །རབ་ཏུ་བྱུང་བ་ནི་ཉེ་བར་ཞི་བའོ། །ཁྱིམ་ན་གནས་པ་ནི་འཇུངས་
པའོ། །རབ་ཏུ་བྱུང་བ་ནི་མ་འཇུངས་པའོ། །ཁྱིམ་ན་གནས་པ་ནི་ཞན་པའོ། །རབ་ཏུ་བྱུང་བ་ནི་མི་ཞན་པའོ། །ཁྱིམ་ན་གནས་པ་ནི་མ་རབས་སོ། །རབ་ཏུ་བྱུང་བ་ནི་ཡ་རབས་སོ། །ཁྱིམ་ན་གནས་པ་ནི་ཀུན་དུ་འབར་བའོ། །རབ་ཏུ་བྱུང་བ་ནི་འབར་བ་ཞི་བའོ། །ཁྱིམ་ན་གནས་པ་ནི་རང་གི་དོན་
ཏོ། །རབ་ཏུ་བྱུང་བ་ནི་གཉིས་ཀའི་དོན་ཏོ། །ཁྱིམ་ན་གནས་པ་ནི་དོན་ཆུང་བའོ། །རབ་ཏུ་བྱུང་བ་ནི་དོན་ཆེ་བའོ། །ཁྱིམ་ན་གནས་པ་ནི་གཟི་ཆུང་བའོ། །རབ་ཏུ་བྱུང་བ་ནི་གཟི་ཆེ་བའོ། །ཁྱིམ་ན་གནས་པ་ནི་ཀུན་ནས་ཉོན་མོངས་པས་སྡུག་བསྔལ་བའོ། །རབ་ཏུ་བྱུང་བ་ནི་མངོན་པར་བྱུང་བས་བདེ་
བའོ། །ཁྱིམ་ན་གནས་པ་ནི་ཚེར་མ་བསྐྱེད་པའོ། །རབ་ཏུ་བྱུང་བ་ནི་ཚེར་མ་བསལ་བའོ། །ཁྱིམ་ན་གནས་པ་ནི་ཆོས་ཆུང་ངུ་དང་ལྡན་པའོ། །རབ་ཏུ་བྱུང་བ་ནི་ཆོས་ཆེན་པོ་དང་ལྡན་པའོ། །ཁྱིམ་ན་གནས་པ་ནི་འདུལ་བ་མ་ཡིན་པ་བྱེད་པའོ། །རབ་ཏུ་བྱུང་བ་ནི་འདུལ་བ་བྱེད་པའོ། །ཁྱིམ་ན་གནས་

པ་ནི་འགྱོད་པའོ། །རབ་ཏུ་བྱུང་བ་ནི་མི་འགྱོད་པའོ། །ཁྱིམ་ན་གནས་པ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་འཕེལ་བའོ། །རབ་ཏུ་བྱུང་བ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་སྐེམ་པའོ། །ཁྱིམ་ན་གནས་པ་ནི་སངས་རྒྱས་དང་རང་སངས་རྒྱས་དང་ཉན་ཐོས་ཀྱིས་སྨད་པའོ། །རབ་ཏུ་བྱུང་བ་ནི་སངས་
རྒྱས་དང་རང་སངས་རྒྱས་དང་ཉན་ཐོས་ཀྱིས་བསྔགས་པའོ། །ཁྱིམ་ན་གནས་པ་ནི་ཆོག་མི་ཤེས་པའོ། །རབ་ཏུ་བྱུང་བ་ནི་ཆོག་ཤེས་པའོ། །ཁྱིམ་ན་གནས་པ་ནི་བདུད་དགའ་བའོ། །རབ་ཏུ་བྱུང་བ་ནི་བདུད་མྱ་ངན་བྱེད་པའོ། །ཁྱིམ་ན་གནས་པ་ནི་རྙོག་པ་ཆེན་པོའི་མཐར་ཐུག་པར་འགྱུར་བའོ། །
རབ་ཏུ་བྱུང་བ་ནི་རྙོག་པ་ཐམས་ཅད་ཉེ་བར་ཞི་བའི་མཐར་ཐུག་པའོ། །ཁྱིམ་ན་གནས་པ་ནི་བརྫི་བར་བྱ་བའོ། །རབ་ཏུ་བྱུང་བ་ནི་བརྫི་བར་མི་བྱའོ། །ཁྱིམ་ན་གནས་པ་ནི་བྲན་གྱི་ལས་བྱེད་པའོ། །རབ་ཏུ་བྱུང་བ་ནི་རྗེ་བོ་བྱེད་པའོ། །ཁྱིམ་ན་གནས་པ་ནི་འཁོར་བའི་མཐར་འགྱུར་བའོ། །རབ་ཏུ་བྱུང་བ་ནི་
མྱ་ངན་ལས་འདས་པའི་མཐར་འགྱུར་བའོ། །ཁྱིམ་ན་གནས་པ་ནི་གཡང་སའོ། །རབ་ཏུ་བྱུང་བ་ནི་གཡང་ས་ལས་འདས་པའོ། །ཁྱིམ་ན་གནས་པ་ནི་མུན་ནག་གོ། །རབ་ཏུ་བྱུང་བ་ནི་སྣང་བའོ། །ཁྱིམ་ན་གནས་པ་ནི་དབང་པོ་ལ་དབང་མི་བྱེད་པའོ། །རབ་ཏུ་བྱུང་བ་ནི་དབང་པོ་ལ་དབང་བྱེད་པའོ། །
ཁྱིམ་ན་གནས་པ་ནི་དྲེགས་པ་བསྐྱེད་པའོ། །རབ་ཏུ་བྱུང་བ་ནི་དྲེགས་པ་འདུལ་བའོ། །ཁྱིམ་ན་གནས་པ་ནི་དམ་པ་མ་ཡིན་པ་བསྐྱེད་པའོ། །རབ་ཏུ་བྱུང་བ་ནི་བདེ་འགྲོ་བསྐྱེད་པའོ། །ཁྱིམ་ན་གནས་པ་ནི་བལྟ་བར་མི་འོས་པའོ། །རབ་ཏུ་བྱུང་བ་ནི་བལྟ་བར་འོས་པའོ། །ཁྱིམ་ན་གནས་པ་ནི་བརྩོན་པ་ཆུང་
པའོ། །རབ་ཏུ་བྱུང་བ་ནི་བརྩོན་པ་ཆེ་བའོ། །ཁྱིམ་ན་གནས་པ་ནི་འབྲས་བུ་ཆུང་བའོ། །རབ་ཏུ་བྱུང་བ་ནི་འབྲས་བུ་ཆེ་བའོ། །ཁྱིམ་ན་གནས་པ་ནི་གྱ་གྱུ་ཅན་ནོ། །རབ་ཏུ་བྱུང་བ་ནི་དྲང་བའོ། །ཁྱིམ་ན་གནས་པ་ནི་ཡིད་མི་བདེ་བ་མང་བའོ། །རབ་ཏུ་བྱུང་བ་ནི་ཡིད་བདེ་བ་མང་བའོ། །ཁྱིམ་ན་གནས་
པ་ནི་ཟུག་རྔུ་དང་བཅས་པའོ། །རབ་ཏུ་བྱུང་བ་ནི་ཟུག་རྔུ་ཕྱུང་བའོ། །ཁྱིམ་ན་གནས་པ་ནི་ན་བའོ། །རབ་ཏུ་བྱུང་བ་ནི་ནད་མེད་པའོ། །ཁྱིམ་ན་གནས་པ་ནི་ཆོས་རྒས་པར་བྱེད་པའོ། །རབ་ཏུ་བྱུང་བ་ནི་ཆོས་དར་བར་བྱེད་པའོ། །ཁྱིམ་ན་གནས་པ་ནི་བག་མེད་པར་བྱེད་པའོ། །རབ་ཏུ་བྱུང་བ་ནི་བག་ཡོད་པར་

བྱེད་པའོ། །ཁྱིམ་ན་གནས་པ་ནི་འཆལ་པའི་ཤེས་རབ་ཀྱི་འབྱུང་གནས་པའོ། །རབ་ཏུ་བྱུང་བ་ནི་ཤེས་རབ་འཕེལ་བའོ། །ཁྱིམ་ན་གནས་པ་ནི་ཤེས་རབ་ཀྱི་བར་ཆད་བྱེད་པའོ། །རབ་ཏུ་བྱུང་བ་ནི་ཤེས་རབ་ཀྱི་སྲོག་བྱེད་པའོ། །ཁྱིམ་ན་གནས་པ་ནི་སླུ་བར་སོ་སོར་ཉེ་བར་གནས་
པའོ། །རབ་ཏུ་བྱུང་བ་ནི་མི་སླུ་བར་སོ་སོར་ཉེ་བར་གནས་པའོ། །ཁྱིམ་ན་གནས་པ་ནི་བྱེད་པ་མང་བའོ། །རབ་ཏུ་བྱུང་བ་ནི་བྱེད་པ་ཉུང་བའོ། །ཁྱིམ་ན་གནས་པ་ནི་དུག་དང་བཅས་པའི་བཏུང་བ་ལྟ་བུའོ། །རབ་ཏུ་བྱུང་བ་ནི་བདུད་རྩི་དང་བཅས་པའི་བཏུང་བ་ལྟ་བུའོ། །ཁྱིམ་ན་གནས་པ་ནི་གནོད་པ་ཅན་ནོ། །
རབ་ཏུ་བྱུང་བ་ནི་གནོད་པ་མེད་པའོ། །ཁྱིམ་ན་གནས་པ་ནི་འདྲེས་པའོ། །རབ་ཏུ་བྱུང་བ་ནི་མ་འདྲེས་པའོ། །ཁྱིམ་ན་གནས་པ་ནི་ཀིམ་པ་ཀའི་འབྲས་བུ་ལྟ་བུའོ། །རབ་ཏུ་བྱུང་བ་ནི་བདུད་རྩིའི་འབྲས་བུ་ལྟ་བུའོ། །ཁྱིམ་ན་གནས་པ་ནི་མི་སྡུག་པ་དང་ཕྲད་པར་བྱེད་པའོ། །རབ་ཏུ་བྱུང་བ་ནི་མི་
སྡུག་པ་དང་བྲལ་བར་བྱེད་པའོ། །ཁྱིམ་ན་གནས་པ་ནི་སྡུག་པ་དང་ཕྲད་པར་བྱེད་པའོ། །རབ་ཏུ་བྱུང་བ་ནི་སྡུག་པ་དང་བྲལ་བར་བྱེད་པའོ། །ཁྱིམ་ན་གནས་པ་ནི་གཏི་མུག་གིས་ལྕི་བའོ། །རབ་ཏུ་བྱུང་བ་ནི་ཡེ་ཤེས་ཀྱིས་ཡང་བའོ། །ཁྱིམ་ན་གནས་པ་ནི་སྦྱོར་བ་རྣམ་པར་འཇིག་པའོ། །རབ་
ཏུ་བྱུང་བ་ནི་སྦྱོར་བ་རྣམ་པར་སྦྱོང་བའོ། །ཁྱིམ་ན་གནས་པ་ནི་བསམ་པ་རྣམ་པར་འཇིག་པའོ། །རབ་ཏུ་བྱུང་བ་ནི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་ནི་ལྷག་པའི་བསམ་པ་རྣམ་པར་འཇོག་པའོ། །རབ་ཏུ་བྱུང་བ་ནི་ལྷག་པའི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་ནི་
དཔུང་གཉེན་མེད་པར་བྱེད་པའོ། །རབ་ཏུ་བྱུང་བ་ནི་དཔུང་གཉེན་བྱེད་པའོ། །ཁྱིམ་ན་གནས་པ་ནི་མགོན་མེད་པར་བྱེད་པའོ། །རབ་ཏུ་བྱུང་བ་ནི་མགོན་བྱེད་པའོ། །ཁྱིམ་ན་གནས་པ་ནི་གནས་མེད་པར་བྱེད་པའོ། །རབ་ཏུ་བྱུང་བ་ནི་གནས་བྱེད་པའོ། །ཁྱིམ་ན་གནས་པ་ནི་སྐྱབས་མེད་པར་བྱེད་པའོ། །
རབ་ཏུ་བྱུང་བ་ནི་སྐྱབས་བྱེད་པའོ། །ཁྱིམ་ན་གནས་པ་ནི་གནོད་སེམས་མང་བའོ། །རབ་ཏུ་བྱུང་བ་ནི་བྱམས་པ་མང་བའོ། །ཁྱིམ་ན་གནས་པ་ནི་ཁུར་ཁྱེར་བའོ། །རབ་ཏུ་བྱུང་བ་ནི་ཁུར་བོར་བའོ། །ཁྱིམ་ན་གནས་པ་ནི་ཐུག་པ་མེད་པར་སྤྱོད་པའོ། །རབ་ཏུ་བྱུང་བ་ནི་སྤྱོད་པ་ཐམས་ཅད་མཐར་འབྱིན་

པའོ། །ཁྱིམ་ན་གནས་པ་ནི་ཁ་ན་མ་ཐོ་བ་དང་བཅས་པའོ། །རབ་ཏུ་བྱུང་བ་ནི་ཁ་ན་མ་ཐོ་བ་མེད་པའོ། །ཁྱིམ་ན་གནས་པ་ནི་གདུང་བར་འགྱུར་བའོ། །རབ་ཏུ་བྱུང་བ་ནི་གདུང་བར་མི་འགྱུར་བའོ། །ཁྱིམ་ན་གནས་པ་ནི་ཉོན་མོངས་པ་དང་བཅས་པའོ། །རབ་ཏུ་བྱུང་བ་ནི་ཉོན་མོངས་པ་མེད་པའོ། །
ཁྱིམ་ན་གནས་པ་ནི་ཟང་ཟིང་དང་བཅས་པའོ། །རབ་ཏུ་བྱུང་བ་ནི་ཟང་ཟིང་མེད་པའོ། །ཁྱིམ་ན་གནས་པ་ནི་མངོན་པའི་ང་རྒྱལ་དང་བཅས་པའོ། །རབ་ཏུ་བྱུང་བ་ནི་མངོན་པའི་ང་རྒྱལ་མེད་པའོ། །ཁྱིམ་ན་གནས་པ་ནི་ནོར་སྙིང་པོར་བྱེད་པའོ། །རབ་ཏུ་བྱུང་བ་ནི་ཡོན་ཏན་སྙིང་པོར་བྱེད་པའོ། །ཁྱིམ་
ན་གནས་པ་ནི་ཡམས་ཀྱི་ནད་དོ། །རབ་ཏུ་བྱུང་བ་ནི་ཡམས་ཀྱི་ནད་ཞི་བར་བྱེད་པའོ། །ཁྱིམ་ན་གནས་པ་ནི་འབྲི་བའོ། །རབ་ཏུ་བྱུང་བ་ནི་འཕེལ་བའོ། །ཁྱིམ་ན་གནས་པ་ནི་རྙེད་པར་སླ་བའོ། །རབ་ཏུ་བྱུང་བ་ནི་བསྐལ་པ་བརྒྱ་སྟོང་དུ་ཡང་རྙེད་པར་དཀའ་བའོ། །ཁྱིམ་ན་གནས་པ་ནི་བྱ་སླ་བའོ། །རབ་
ཏུ་བྱུང་བ་ནི་བྱ་དཀའ་བའོ། །ཁྱིམ་ན་གནས་པ་ནི་རྒྱུན་ཕྱོགས་སུ་འགྲོ་བའོ། །རབ་ཏུ་བྱུང་བ་ནི་རྒྱུན་ལས་བཟློག་སྟེ་འགྲོ་བའོ། །ཁྱིམ་ན་གནས་པ་ནི་ཆུ་བོའོ། །རབ་ཏུ་བྱུང་བ་ནི་གཟིངས་སོ། །ཁྱིམ་ན་གནས་པ་ནི་ཉོན་མོངས་པའི་ཆུ་བོའོ། །རབ་ཏུ་བྱུང་བ་ནི་ཟམ་པའོ། །ཁྱིམ་ན་གནས་པ་ནི་ཚུ་རོལ་
གྱི་ངོགས་སོ། །རབ་ཏུ་བྱུང་བ་ནི་ཕ་རོལ་གྱི་ངོགས་སོ། །ཁྱིམ་ན་གནས་པ་ནི་གླགས་པའོ། །རབ་ཏུ་བྱུང་བ་ནི་མ་གླགས་པའོ། །ཁྱིམ་ན་གནས་པ་ནི་ཁོན་དུ་འཛིན་པའོ། །རབ་ཏུ་བྱུང་བ་ནི་ཁོན་དུ་འཛིན་པ་ཞི་བའོ། །ཁྱིམ་ན་གནས་པ་ནི་རྒྱལ་པོའི་ནན་ཏུར་བཞིན་བྱེད་པའོ། །རབ་ཏུ་བྱུང་བ་ནི་སངས་
རྒྱས་ཀྱི་བསྟན་པ་བཞིན་བྱེད་པའོ། །ཁྱིམ་ན་གནས་པ་ནི་ཉམ་ཐག་པའོ། །རབ་ཏུ་བྱུང་བ་ནི་ཉམ་ཐག་པ་མེད་པའོ། །ཁྱིམ་ན་གནས་པ་ནི་སྡུག་བསྔལ་འབྱུང་བའོ། །རབ་ཏུ་བྱུང་བ་ནི་བདེ་བ་འབྱུང་བའོ། །ཁྱིམ་ན་གནས་པ་ནི་སྒང་བུའོ། །རབ་ཏུ་བྱུང་བ་ནི་ཟབ་པའོ། །ཁྱིམ་ན་གནས་པ་ནི་གྲོགས་
མང་བའོ། །རབ་ཏུ་བྱུང་བ་ནི་གྲོགས་དཀོན་པའོ། །ཁྱིམ་ན་གནས་པ་ནི་ཆུང་མ་དང་འགྲོགས་པའོ། །རབ་ཏུ་བྱུང་བ་ནི་མོས་པ་དང་འགྲོགས་པའོ། །ཁྱིམ་ན་གནས་པ་ནི་རྒྱ་དང་འདྲ་བའོ། །རབ་ཏུ་བྱུང་བ་ནི་རྒྱ་བྲལ་བའོ། །ཁྱིམ་ན་གནས་པ་ནི་གཞན་ལ་གནོད་པ་བྱེད་པ་གཅེས་སུ་རྩི་བའོ། །རབ་ཏུ་

བྱུང་བ་ནི་གཞན་ལ་ཕན་འདོགས་པ་གཅེས་སུ་རྩི་བའོ། །ཁྱིམ་ན་གནས་པ་ནི་ཟང་ཟིང་གི་སྦྱིན་པ་ཆེད་ཆེར་འཛིན་པའོ། །རབ་ཏུ་བྱུང་བ་ནི་ཆོས་ཀྱི་སྦྱིན་པ་ཆེད་ཆེར་འཛིན་པའོ། །ཁྱིམ་ན་གནས་པ་ནི་བདུད་ཀྱི་རྒྱལ་མཚན་འཛིན་པའོ། །རབ་ཏུ་བྱུང་བ་ནི་སངས་རྒྱས་ཀྱི་རྒྱལ་མཚན་འཛིན་
པའོ། །ཁྱིམ་ན་གནས་པ་ནི་སྡུག་བསྔལ་གྱི་གཞིའོ། །རབ་ཏུ་བྱུང་བ་ནི་སྡུག་བསྔལ་གྱི་གཞི་ཡང་དག་པར་འཇོམས་པའོ། །ཁྱིམ་ན་གནས་པ་ནི་ཕུང་པོ་འཕེལ་བའོ། །རབ་ཏུ་བྱུང་བ་ནི་ཕུང་པོ་ཐམས་ཅད་ངེས་པར་འདོར་བའོ། །ཁྱིམ་ན་གནས་པ་ནི་ཐིབས་པོའོ། །རབ་ཏུ་བྱུང་བ་ནི་ཐིབས་པོ་ལས་ཐར་
བ་ཡིན་ཏེ། ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པས་རབ་ཏུ་བྱུང་བ་ལ་གཞོལ་བར་བྱའོ་ཞེས་གསུངས་སོ། །རིན་པོ་ཆེའི་ཏོག་ལས་ཀྱང་། འཇིག་རྟེན་རྒ་བས་གཟིར་གྱུར་ཅིང་། །འཆི་བདག་གིས་ནི་ཡོངས་བསྐོར་བ། །དེ་ཕྱིར་གཉི་ག་སྤང་བའི་ཕྱིར། །རབ་ཏུ་བྱུང་བ་ལེགས་པར་གཟུང་། །
ཞེས་གསུངས་སོ། །དྲི་མ་མེད་པར་གྲགས་པས་ཞུས་པའི་མདོ་ལས་ཀྱང་། ཐམས་ཅད་ནས་ཁ་ན་མ་ཐོ་བ་མེད་པ་འདི་ནི་རབ་ཏུ་བྱུང་བ་ཞེས་བྱའོ་ཞེས་གསུངས་སོ། །སྦྱངས་པའི་ཡོན་ཏན་གྱི་ཡོ་བྱད་བསྙུངས་པ་ལ་དགོངས་པ་བསྟན་པ། ཆོས་ཡང་དག་པར་སྡུད་པའི་མདོ་ལས་ཀྱང་། ཁ་ན་མ་ཐོ་བ་
མེད་པར་བྱ་བའི་ཕྱིར་བསོད་སྙོམས་སྤྱོད་པ་ལ་འཇུག་གོ་ཞེས་གསུངས་སོ། །བཞི་པ་བརྗོད་པའི་མདོ་ལས་ཀྱང་། ལྷའི་བུ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཚུལ་ཡིན་ནོ། །བཞི་གང་ཞེ་ན། གང་འདི་ལྟ་སྟེ། ཁྱིམ་པའི་ལོངས་སྤྱོད་དོར་ནས་རང་གི་ལོངས་སྤྱོད་ཀྱིས་ཆོག་ཤེས་
པ་དང་། གཞན་གྱི་ནོར་མངོན་པར་མི་འདོད་པ་ཉིད་དང་། རབ་ཏུ་བྱུང་ནས་འཕགས་པའི་རིགས་ལ་དགའ་བ་དང་། སྦྱངས་པའི་ཡོན་ཏན་གྱི་ཡོ་བྱད་བསྙུངས་པ་ཉིད་དེ། བཞི་པོ་འདི་དག་གོ་ཞེས་གསུངས་སོ། །སའི་སྙིང་པོའི་མདོ་ལས་ཀྱང་། གདུལ་བར་དཀའ་བའི་སེམས་སྲེག་ཅིང་། །དགེ་སློང་
རྣམས་ལ་རྩོལ་མི་བྱེད། །འཕགས་པའི་རིགས་ལ་དག་འགྱུར་ན། །རྐང་གཉིས་རྣམས་ཀྱི་མཆོག་ཏུ་འགྱུར། །སྡིག་པའི་དགེ་སློང་སྤོང་བྱེད་ཅིང་། །འཕགས་ལ་གུས་པས་སྟེན་པར་བྱེད། །དགེ་འདུན་རྫས་དག་མི་ཟ་ན། །མྱུར་དུ་བྱང་ཆུབ་རེག་པར་འགྱུར། །ཞེས་གསུངས་སོ། །བྱང་ཆུབ་

སེམས་དཔའི་ལམ་གྱི་མདོ་ལས་ཀྱང་། བྱང་ཆུབ་སེམས་དཔས་བྲན་མ་ཡིན་པ་དང་། འཚོ་བ་གཞན་ལ་རག་མ་ལས་པས་འཚོ་བར་བྱའོ་ཞེས་གསུངས་སོ། །རྣལ་འབྱོར་སྤྱོད་པ་ཉན་ཐོས་ཀྱི་ས་ལས་ཀྱང་། ཇི་ལྟར་ན་སྦྱངས་པའི་ཡོན་ཏན་དང་ལྡན་པ་ཡིན་ཞེ་ན། རྙེད་པས་ཆོག་པའི་བསོད་སྙོམས་
པ་དང་། མཐར་གྱིས་སློང་བའི་བསོད་སྙོམས་པ་དང་། སྟན་གཅིག་པ་དང་། ཟས་ཕྱིས་མི་ལེན་པ་དང་། ཆོས་གོས་གསུམ་པ་དང་། ཕྱིང་པ་པ་དང་། ཕྱག་དར་ཁྲོད་པ་དང་། དགོན་པ་པ་དང་། ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་དང་། ཅོག་པུ་པ་དང་། གཞི་ཇི་བཞིན་པ་སྟེ། དེ་
དག་ཀྱང་བསོད་སྙོམས་པ་དང་། ཆོས་གོས་དང་། གནས་མལ་ལས་བརྩམས་ནས། སྦྱངས་པའི་ཡོན་ཏན་བཅུ་གཉིས་སམ་བཅུ་གསུམ་དུ་འགྱུར་རོ། །དེ་ལ་བསོད་སྙོམས་པ་ཉིད་ལས་དབྱེ་ན་རྣམ་པ་གཉིས་ཏེ། རྙེད་པས་ཆོག་པའི་བསོད་སྙོམས་པ་དང་། མཐར་གྱིས་སློང་བའི་བསོད་སྙོམས་
པའོ། །དེ་ལ་རྙེད་པས་ཆོག་པའི་བསོད་སྙོམས་པ་གང་ཞེ་ན། འདི་ལྟ་སྟེ། འདྲིས་པའི་ཁྱིམ་དག་ནས་ཅི་ཐོབ་པ་དང་། ཅི་སྙེད་པ་ཙམ་ཟ་བར་བྱེད་པའོ། །མཐར་གྱིས་སློང་བའི་བསོད་སྙོམས་པ་གང་ཞེ་ན། ཁྱིམ་རྣམས་སུ་ཁང་ཁྱིམ་ནས་ཁང་ཁྱིམ་དུ་བསླངས་ཤིང་བརྒྱུས་ཏེ། བསོད་སྙོམས་
ཅི་ཐོབ་པ་དང་། ཅི་སྙེད་པ་ཟ་བར་བྱེད་ཀྱི། བདག་གིས་འདི་ནས་བཟའ་བ་དང་། བཅའ་བ་བཟང་པོ་ཅི་ཙམ་འདོད་པ་ཐོབ་པར་འགྱུར་རོ་སྙམ་ནས་མགོ་འཕང་བསྟོད་དེ། ཁྱིམ་རྣམས་སུ་མི་འགྲོ་བ་གང་ཡིན་པའོ། །དེ་ལ་བསོད་སྙོམས་པ་ཉིད་བྱེ་བྲག་ཏུ་མ་ཕྱེ་བ་ལས་བརྩམས་ནས་ནི་སྦྱངས་
པའི་ཡོན་ཏན་བཅུ་གཉིས་སུ་འགྱུར་ལ། བྱེ་བྲག་ཏུ་ཕྱེ་བ་ལས་བརྩམས་ན་ནི་བཅུ་གསུམ་མོ། །དེ་ལ་སྟན་གཅིག་པ་ཉིད་གང་ཞེ་ན། སྟན་གཅིག་ལ་འདུག་ནས་ཇི་ཙམ་ཟ་བར་བྱེད་པ་དེ་ཙམ་ཟ་བར་བྱེད་ཀྱི། སྟན་དེ་ལས་ལངས་ནས་ཟ་བར་མི་བྱེད་པ་སྟེ། དེ་ནི་སྟན་གཅིག་པ་ཉིད་ཅེས་བྱའོ། །
ཟས་ཕྱིས་མི་ལེན་པ་ཉིད་གང་ཞེ་ན། ཟས་ཀྱི་ཕྱིར་འདུག་ནས་ཇི་སྲིད་དུ་ཇི་ཙམ་གྱིས་བདག་འཚོ་བར་ཤེས་པའི་ཟས་ཐམས་ཅད་མ་མནོས་པ་དེ་སྲིད་ཟ་བར་མི་བྱེད་ཅིང་། གང་ལས་བདག་གི་ཟས་ཀྱི་བྱ་བ་དེ་ལས་ལྷག་པ་མེད་དོ་སྙམ་དུ་ཤེས་པར་གྱུར་པ། དེའི་འོག་ཏུ་ཐམས་ཅད་བླངས་ནས་ཟ་བར་

རྩོམ་པ་སྟེ། དེ་ལྟར་ན་ཟས་ཕྱིས་མི་ལེན་པ་ཡིན་ནོ། །ཇི་ལྟར་ན་ཆོས་གོས་གསུམ་པ་ཡིན་ཞེ་ན། ཆོས་གོས་གསུམ་པོ་སྣམ་སྦྱར་དང་། བླ་གོས་དང་མཐང་གོས་ཀྱིས་འཚོ་བར་བྱེད་ཅིང་ཆོས་གོས་གསུམ་ལས་ལྷག་པའི་གོས་གཞན་མི་འཆང་བ་ཡིན་ཏེ། དེ་ལྟར་
ན་ཆོས་གོས་གསུམ་པ་ཡིན་ནོ། །ཇི་ལྟར་ན་ཕྱིང་པ་པ་ཡིན་ཞེ་ན། ཆོས་གོས་གསུམ་པའམ། གོས་ལྷག་པ་གང་ཅུང་ཟད་ཅིག་འཆང་བ་དེ་དག་ཐམས་ཅད་བལ་ལས་བྱས་པ་ཤ་སྟག་འཆང་གི་གཞན་མ་ཡིན་པ་སྟེ། དེ་ལྟར་ན་ཕྱིང་པ་པ་ཡིན་ནོ། །ཇི་ལྟར་ན་ཕྱག་དར་ཁྲོད་པ་ཡིན་ཞེ་
ན། གཞན་དག་གིས་ལམ་པོ་ཆེའམ། ལམ་སྲང་ངམ། བཞི་མདོའམ། སུམ་མདོའམ། ལམ་ཀའམ། ལམ་གོལ་བར་བོར་བ་དང་། སྤངས་པ་དང་། བཏང་བའི་གོས་བཤང་བས་རེག་པའམ། གཅི་བས་རེག་པའམ། བཤང་གཅི་དང་། རྣག་དང་། ཁྲག་དང་། མཆིལ་མས་
རེག་པ་གང་ཡིན་པ་དེ་ལས་མི་གཙང་བ་གང་ཡིན་པ་དེ་བོར་ལ། ཐ་གི་བ་བླངས་ཏེ་བཀྲུས་ལ། དྲུབས་ཏེ་ཁ་དོག་བསྒྱུར་ཅིང་འཆང་བ་ཡིན་ཏེ། དེ་ལྟར་ན་ཕྱག་དར་ཁྲོད་པ་ཡིན་ནོ། །ཇི་ལྟར་ན་དགོན་པ་པ་ཡིན་ཞེ་ན། གྲོང་དང་གྲོང་རྡལ་ལས་དབེན་པའི་གནས་མལ་དགོན་པ་དང་། ནགས་
འདབ་དང་། བས་མཐའ་གང་དག་ཡིན་པ་དག་ཏུ་གནས་པར་བྱེད་པ་ཡིན་ཏེ། དེ་ལྟར་ན་དགོན་པ་པ་ཡིན་ནོ། །ཇི་ལྟར་ན་ཤིང་དྲུང་པ་ཡིན་ཞེ་ན། ཤིང་དྲུང་དུ་གནས་འཆའ་ཞིང་། ཤིང་དྲུང་ལ་བརྟེན་པ་ཡིན་ཏེ། དེ་ལྟར་ན་ཤིང་དྲུང་པ་ཡིན་ནོ། །ཇི་ལྟར་ན་བླ་གབ་མེད་པ་ཡིན་ཞེ་ན། མ་བཀབ་
པ་དང་མ་གཡོགས་པའི་ཕྱོགས་བླ་གབ་མེད་པར་གནས་འཆའ་བར་བྱེད་པ་ཡིན་ཏེ། དེ་ལྟར་ན་བླ་གབ་མེད་པ་ཡིན་ནོ། །ཇི་ལྟར་ན་དུར་ཁྲོད་པ་ཡིན་ཞེ་ན། གང་དུ་སྐྱེ་བོའི་ཚོགས་ཤི་འོ་ཅོག་འདོར་བའི་དུར་ཁྲོད་དུ་གནས་འཆའ་བར་བྱེད་པ་ཡིན་ཏེ། དེ་ལྟར་ན་དུར་ཁྲོད་པ་ཡིན་ནོ། །ཇི་ལྟར་ན་ཅོག་
པུ་པ་ཡིན་ཞེ་ན། ཁྲིའམ། ཁྲིའུ་འམ། རྩྭ་བཏིང་བའི་སྟེང་དུ་ཙོག་པུར་འདུག་སྟེ། དུས་ཡོལ་བར་བྱེད་ཅིང་། ཁྲི་འམ། ཁྲིའུ་འམ། རྩིག་པ་འམ། ཤིང་ངམ། རྩྭ་བཏིང་བ་ལ་རྒྱབ་བམ། གློས་མི་བརྟེན་པ་ཡིན་ཏེ། དེ་ལྟར་ན་ཅོག་པུ་པ་ཡིན་ནོ། །ཇི་ལྟར་ན་གཞི་ཇི་བཞིན་པ་ཡིན་ཞེ་ན།

གང་དུ་རྩྭ་བཏིང་བའམ། ལོ་མ་བཏིང་བའི་སྟེང་དུ། མལ་འཆའ་བར་བྱེད་ཅིང་། རྩྭ་བཏིང་བའམ། ལོ་མ་བཏིང་བ་དེ་ཡང་ལན་ཅིག་ཇི་ལྟར་བཏིང་བ་དེ་ཁོ་ནའི་སྟེང་དུ་མལ་འཆའ་བར་བྱེད་ཀྱི། ཡང་དང་ཡང་དུ་མི་རྗེ་མི་འཆོས་པ་ཡིན་ཏེ། དེ་ལྟར་ན་གཞི་ཇི་བཞིན་པ་ཡིན་ནོ། །དེ་ཅིའི་ཕྱིར་དེ་དག་ལ་སྦྱངས་
པའི་ཡོན་ཏན་ཞེས་བྱ་ཞེ་ན། འདི་ལྟ་སྟེ་དཔེར་ན་བལ་ལམ། ཤིང་བལ་ནི་གང་གི་ཚེ་མ་བསྩལ་མ་བཤིག་མ་རྨེལ་བ་དེའི་ཚེ་ན། འཛིངས་ཤིང་མི་འཇམ། མི་ཡང་ལ་འདི་ལྟ་སྟེ། སྐུད་པར་བཀལ་བའམ། འདའ་བར་བྱ་བའི་ལས་སུ་མི་རུང་ངོ་། །དེ་བཞིན་དུ་འདི་ན་ལ་ལ་བསོད་སྙོམས་ལ་ཆགས་
པས་བསོད་སྙོམས་ལ་སེམས་ཞེན་ཅིང་ཀུན་དུ་ཞེན་པ་དང་། ཆོས་གོས་ལ་ཆགས་པས་ཆོས་གོས་ལ་སེམས་ཞེན་ཅིང་། ཀུན་དུ་ཞེན་པ་དང་། མལ་སྟན་ལ་ཆགས་པས་མལ་སྟན་ལ་སེམས་ཞེན་ཅིང་ཀུན་དུ་ཞེན་པ་དེ་སྦྱངས་པའི་ཡོན་ཏན་དེ་དག་གིས་འདི་ལྟ་སྟེ། ཚངས་པར་སྤྱོད་པ་ལ་གནས་པར་
བྱ་བའི་ཕྱིར། སེམས་རྣམ་པར་སྦྱོང་བར་བྱེད། དྲང་པོར་བྱེད། མཉེན་པར་བྱེད། ལས་སུ་རུང་བར་བྱེད། རྣལ་བར་བྱེད། བཏུབ་པར་བྱེད། རུང་བར་བྱེད་པས་ན། དེའི་ཕྱིར་སྦྱངས་པའི་ཡོན་ཏན་ཞེས་བྱའོ། །དེ་ལ་བསོད་སྙོམས་ལ་ཆགས་པ་ནི་བར་ཆད་རྣམ་པ་གཉིས་ཡིན་ཏེ། ཟས་བཟང་པོ་ལ་
ཆགས་པ་དང་། ཟས་མང་པོ་ལ་ཆགས་པའོ། །དེའི་ཕྱིར་ཟས་བཟང་པོ་ལ་ཆགས་པ་སྤང་བའི་ཕྱིར་བསོད་སྙོམས་པ་ཡིན་ནོ། །ཟས་མང་པོ་ལ་ཆགས་པ་སྤང་བའི་ཕྱིར་སྟན་གཅིག་པ་དང་། ཟས་ཕྱིས་མི་ལེན་པ་ཡིན་ནོ། །དེ་ལ་ཆོས་གོས་ལ་ཆགས་པ་ནི་བར་ཆད་རྣམ་པ་གསུམ་ཡིན་ཏེ། ཆོས་
གོས་མང་པོ་ལ་ཆགས་པ་དང་། འཇམ་ཞིང་རེག་ན་བདེ་བ་ལ་ཆགས་པ་དང་། བཟང་པོ་ལ་ཆགས་པའོ། །དེ་ལ་ཆོས་གོས་མང་པོ་ལ་ཆགས་པ་སྤང་བའི་ཕྱིར་ཆོས་གོས་གསུམ་པ་ཡིན་ནོ། །ཆོས་གོས་འཇམ་ཞིང་རེག་ན་བདེ་བ་ལ་ཆགས་པ་སྤང་བའི་ཕྱིར་ཕྱིང་པ་པ་ཡིན་ནོ། །ཆོས་གོས་བཟང་པོ་ལ་
ཆགས་པ་སྤང་བའི་ཕྱིར། ཕྱག་དར་ཁྲོད་པ་ཡིན་ནོ། །མལ་སྟན་ལ་ཆགས་པ་ནི་བར་ཆད་རྣམ་པ་བཞི་ཡིན་ཏེ། འདི་ལྟ་སྟེ། འདུ་འཛི་ལ་ཆགས་པ་དང་། གནས་ལ་ཆགས་པ་དང་། གློས་འབེབས་པའི་བདེ་བ་དང་། ཉལ་བའི་བདེ་བ་ལ་ཆགས་པ་དང་། སྟན་དང་། གདིང་བ་དང་། དགབ་པ་ལ་ཆགས་

པའོ། དེ་ལ་འདུ་འཛི་ལ་ཆགས་པ་སྤང་བའི་ཕྱིར་དགོན་པ་པ་ཡིན་ནོ། །གནས་ལ་ཆགས་པ་སྤང་བའི་ཕྱིར། ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་ཡིན་ནོ། །དུར་ཁྲོད་པ་ནི་འཁྲིག་པ་ལ་ཆགས་པ་སྤང་བའི་ཕྱིར་ཡང་ཡིན་ནོ། །གློས་འབེབས་པའི་བདེ་
བ་དང་། གཉིད་ཀྱི་བདེ་བ་ལ་ཆགས་པ་སྤང་བའི་ཕྱིར་ཅོག་པུ་པ་ཡིན་ནོ། །སྟན་དང་། གདིང་བ་དང་། དགབ་པ་ལ་ཆགས་པ་སྤང་བའི་ཕྱིར་གཞི་ཇི་བཞིན་པ་ཡིན་ཏེ། དེ་ལྟར་ན་སྦྱངས་པའི་ཡོན་ཏན་དང་ལྡན་པ་ཡིན་ནོ་ཞེས་གསུངས་སོ། །རབ་ཏུ་རྣམ་པར་འབྱེད་པའི་མདོ་ལས་ཀྱང་། ཤ་
ར་དྭ་ཏིའི་བུ་ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །དགོས་པ་དོན་དུ་གཉེར་བའི་རིགས་ཀྱི་བུ་རྣམས་ཀྱིས་ཚོགས་གནས་པ་དེའི་ནང་དུ་འཇུག་པར་མི་བྱ་སྟེ། དགྲ་བཅོམ་པ་ཉོན་མོངས་པ་མེད་པའམ། ནད་པའམ། མཁན་པོའམ། སློབ་དཔོན་གྱི་རྗེས་སུ་འཇུག་པ་ནི་མ་གཏོགས་སོ་
ཞེས་གསུངས་སོ། །རབ་ཏུ་ཞི་བ་རྣམ་པར་ངེས་པ་ཆོ་འཕྲུལ་གྱི་ཏིང་ངེ་འཛིན་ལས་ཀྱང་། བཟང་སྐྱོང་འདི་ལྟ་སྟེ། སྐྱེས་པའམ། བུད་མེད་དམ། སྲོག་ཆགས་ཀྱི་རིགས་གཞན་གང་ཡང་རུང་བ་འགའ་ཞིག་མེས་ཚིག་པར་གྱུར་ཅིང་། འཆི་བའི་དུས་བྱས་པར་མ་གྱུར་ལ། ཚིག་བཞིན་པའམ་ཚིག་པར་གྱུར་
པ་ཞིག་བསིལ་བ་ཉིད་ཚོལ་བར་འགྱུར་རོ། །ཚོལ་བ་ན་སོ་སོར་བསྟེན་པ་མ་གཏོགས་པར་སྒྲས་བསིལ་བར་མི་འགྱུར་རོ། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་འཇིག་རྟེན་ལ་སྡུག་བསྔལ་གྱིས་སྐྱོ་བ་ཡང་དབེན་པ་ཉིད་ཡོངས་སུ་ཚོལ་ལ། དེ་དེར་གནས་པ་དེས་བདེ་བ་ཉིད་དུ་འགྱུར་རོ། །དེ་
བཞིན་དུ་དགོན་པར་གནས་པ་ལ་དགའ་བར་འགྱུར་རོ། །དེ་ལྟར་འདོད་པ་མེད་པ་ན་ཆོས་གོས་འཚོལ་བའི་རྒྱུས། གྲོང་ངམ་གྲོང་ཁྱེར་རམ། ལྗོངས་སམ་གང་ཡང་རུང་བར་ཞུགས་ནས་སྐྱེས་པའམ། བུད་མེད་ལ་ཆོས་གོས་ཅིའི་དོན་དུ་གསོལ་བ་འདེབས་པར་འགྱུར་ཏེ། དེ་ནི་གནས་མེད་དེ།
དེ་ཆོས་དང་པོ་འདི་དང་ལྡན་ཞིང་ཚུལ་ཁྲིམས་སྲུང་བར་བྱེད་དོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་བསོད་སྙོམས་སྤྱོད་པར་འགྱུར། ཆོས་གོས་གསུམ་འཆང་བ་སྦྱངས་པའི་ཡོན་ཏན་ཐམས་ཅད་དང་ལྡན་ཞིང་། སྦྱངས་པའི་ཡོན་ཏན་བཅུ་གཉིས་ཡང་དག་པར་སྤྱོད་པར་

འགྱུར་རོ། །དེ་ཆོས་འདི་གཉིས་དང་ལྡན་ཞིང་ཚུལ་ཁྲིམས་ཡོངས་སུ་སྦྱོང་བར་བྱེད་དོ་ཞེས་གསུངས་སོ། །དྲག་ཤུལ་ཅན་གྱིས་ཞུས་པའི་མདོ་ལས་ཀྱང་། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བས། འདི་ལྟར་བདག་སུའི་ཆེད་ལ། ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་སྙམ་
དུ་གཞལ་བར་བྱ་སྟེ། དེས་མགོ་དང་གོས་ལ་མེ་འབར་བ་བཞིན་དུ། ཡེ་ཤེས་ཡོངས་སུ་བཙལ་བ་ལ་བརྩོན་འགྲུས་བརྩམ་པར་བྱའོ། །དེ་ལྟ་དེ་ལྟར་ཡོངས་སུ་འཇལ་བས། ཐོག་མ་ཉིད་དུ་འཕགས་པའི་རིགས་བཞི་པོ་དག་ལ་རབ་ཏུ་གནས་ཤིང་། སྦྱངས་པའི་ཡོན་ཏན་དང་། ཡོ་བྱད་བསྙུངས་
པ་ལ་མངོན་པར་དགའ་བར་བྱའོ། །ཁྱིམ་བདག་ཇི་ལྟར་ན། བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་རབ་ཏུ་གནས་པ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ནི། ཆོས་གོས་ངན་ངོན་གྱིས་ཆོག་པར་འཛིན་པ་ཡིན་ཆོས་གོས་ངན་ངོན་གྱིས་
ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་ཆོས་གོས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །ཆོས་གོས་མ་རྙེད་ན་ཡང་། ཡི་མི་འཆད་ཅིང་ཡོངས་སུ་གདུང་བ་མེད་དོ། །ཆོས་གོས་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་། ཞེན་
པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས། ཆགས་པ་མེད་པར་སྤྱོད་དེ། ཆོས་གོས་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོང་ཅིང་གཞན་ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་བསོད་སྙོམས་ངན་ངོན་གྱིས་ཆོག་པར་
འཛིན་པ་ཡིན། བསོད་སྙོམས་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་བསོད་སྙོམས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །བསོད་སྙོམས་མ་རྙེད་ན་ཡང་ཡི་མི་འཆད་ཅིང་། ཡོངས་སུ་གདུང་བ་མེད་དོ། །བསོད་སྙོམས་རྙེད་ན་ཡང་ཆགས་པ་མེད།
རྨོངས་པ་མེད། དགའ་བ་མེད། ཞེན་པ་མེད་ཅིང་། ཞེན་པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས། ཆགས་པ་མེད་པར་སྤྱོད་དེ། བསོད་སྙོམས་ངན་ངོན་གྱིས་ཆོག་པར་འཛིན་པ་དེ། བདག་ལ་མི་སྟོད་ཅིང་གཞན་ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་

དཔའ་རབ་ཏུ་བྱུང་བ་ནི་མལ་ཆ་ངན་ངོན་གྱིས་ཆོག་པར་འཛིན་པ་ཡིན། མལ་ཆ་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་མལ་ཆའི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །མལ་ཆ་མ་རྙེད་ན་ཡང་ཡི་མི་འཆད་ཅིང་། ཡོངས་སུ་གདུང་བ་
མེད་དོ། །མལ་ཆ་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་མཐོང་ལ། འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། མལ་ཆ་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་
དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པ་ཡིན། ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་ན་བའི་གསོས་སྨན་དང་། ཡོ་བྱད་ཀྱི་ཕྱིར་
ཚུལ་དང་མི་འདྲ་བས་ཚོལ་བར་མི་བྱེད་དོ། །ན་བའི་གསོས་སྨན་དང་། ཡོ་བྱད་མ་རྙེད་ན་ཡང་ཡི་མི་འཆད་ཅིང་ཡོངས་སུ་གདུང་བ་མེད་དོ། །ན་བའི་གསོས་སྨན་དང་། ཡོ་བྱད་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་
མཐོང་ལ། འབྱུང་བ་རབ་ཏུ་ཤ