Luận tạng Tây Tạng (Tengyur) — Tập 70

ས་ལ་བརྩེ་བའི་ཕྱིར། །བདེ་གཤེགས་བསམ་པས་བྱ་བར་བསྟན། །སེམས་ཅན་སྡིག་པ་ཆེ་བ་རྣམས་ལ་སྙིང་རྗེ་སྐྱེད་པ་ནི་བདག་ཉིད་ངན་སོང་སོང་ཡང་བླའི། སེམས་ཅན་
སྡིག་པོ་ཆེ་དེ་མི་བཏང་ངོ་ཞེས་སྙིང་རྗེ་ཆེན་པོ་བསྐྱེད་ཅིང་བྱང་ཆུབ་ཀྱི་སེམས་དང་ལྡན་པར་བྱས་ནས་སེམས་ཅན་མ་རུངས་པ་དེ་ལྟ་བུ་དག་གི་ཕྱིར་དྲག་ཤུལ་སྤྱོད་པའི་ལས་བྱ་བར་བསྟན་ཏོ། །དེ་བཞིན་གཤེགས་པས་ཅི་གསུངས་པའི། །ཞེས་པ་དེ་བཞིན་གཤེགས་པས་ཇི་སྐད་
གསུངས་པའི་དངོས་གྲུབ་རྣམས་ཞེས་པའོ། །དེ་བཞིན་དངོས་གྲུབ་མེད་པ་ཡི། །ཞེས་པ་ཡོན་ཏན་ལ་བྱ་ཞེས་པའོ། །དངོས་གྲུབ་འདོད་པ་ཐོབ་འདོད་ན། །ཞེས་པ་སྒྲུབ་པ་པོས་དངོས་གྲུབ་དེ་དག་ཐོབ་པར་འདོད་ན་དེ་ལྟར་དྲག་ཤུལ་སྤྱོད་པའི་ལས་མི་བྱའོ་ཞེས་སོ། །
བདེ་གཤེགས་བསམ་པ་གང་མེད་པ། །ཞེས་བྱང་ཆུབ་ཀྱི་སེམས་དང་མི་ལྡན་ན། དངོས་གྲུབ་ཐོབ་པར་མི་འགྱུར་རོ། །ཐོབ་ན་ཡང་ཉམས་པར་འགྱུར་རོ། །དེ་ནི་དངོས་གྲུབ་ཉམས་པར་འགྱུར། །ཞེས་པའོ། །མདོར་ན་བྱང་ཆུབ་སེམས་མེད་པར། །ཞེས་པ་ལ་སོགས་པར་
བྱང་ཆུབ་སེམས་དང་མི་ལྡན་ན། བརྟུལ་ཞུགས་དང་བཅས་པའི་དངོས་གྲུབ་མཆོག་ཇི་སྐད་གསུངས་པ་རྣམས་འགྲུབ་པར་མི་འགྱུར་རོ་ཞེས་པའོ། །གང་ཞིག་བདེ་གཤེགས་སེམས་ལྡན་པ། །ཞེས་པ་སྒྲུབ་པ་པོ་གང་ཞིག་བྱང་ཆུབ་སེམས་དང་ལྡན་ན་ཞེས་པའོ། །
བརྟུལ་ཞུགས་བཟང་པོ་མེད་པ་དང་། །ཞེས་པ་ལྷའི་བརྟུལ་ཞུགས་དང་ཞེས་པའོ། །དེ་བཞིན་དུ་གཟུགས་ལ་སོགས་པ་མེད་ཀྱང་། དངོས་གྲུབ་མཆོག་རྣམས་འདིས་ཐོབ་ཅིང་ཞེས་པ་རི་མོ་དང་ལུགས་མ་དག་མེད་ཀྱང་ཁྲུས་ལ་སོགས་ཕྱི་རོལ་གྱི་ཡོ་བྱད་རྣམས་མ་བྱས་ཤིང་

མ་སྤྱད་ཀྱང་དངོས་གྲུབ་མཆོག་རྣམས་སྒྲུབ་པ་པོ་དེ་ལྟ་བུ་དང་ལྡན་པས་ཐོབ་པར་འགྱུར་རོ་ཞེས་པའོ། །ཉོན་མོངས་མེད་པར་ཅི་འདོད་པར། །ཞེས་པ་དཀའ་བ་དག་མ་སྤྱད་པར་ཞེས་པའོ། །འདོད་པ་ཐམས་ཅད་རྙེད་པར་འགྱུར། །ཞེས་པ་སྔགས་པ་དེ་ལྟ་བུ་དེས་རྙེད་པར་
འགྱུར་ཞེས་པའོ། །སྔགས་པ་གང་ཞིག་བདེ་གཤེགས་བསམ་ལྡན་ཞིང་། །ཞེས་པ་བྱང་ཆུབ་ཀྱི་སེམས་དང་ལྡན་ཞིང་ཞེས་པའོ། །བློ་ནི་མ་རྨོངས་བརྟན་པ་ཡིས། །ཞེས་པ་སེམས་མི་འགྱུར་ཞིང་བརྟན་པའི་སྔགས་པ་དེ་ལྟ་བུ་འདི་འདྲ་བའི་ཡོན་ཏན་དང་ལྡན་པའི་བླ་ན་
མེད་པའི་དེ་བཞིན་གཤེགས་པ་ཐམས་ཅད་ལ་ཕྱག་བྱ་ཞིང་བྱང་ཆུབ་ཀྱི་སེམས་དང་ལྡན་པའི་སྒྲུབ་པ་པོས་དངོས་གྲུབ་མཆོག་རྣམས་བསྒྲུབས་ན་ཐོབ་པར་འགྱུར་རོ་ཞེས་པའོ། །དེ་ལྟར་ཤེས་ནས་དེ་ཡི་ཚེ། །ཞེས་པ་ཚུལ་དེ་ལྟར་ཤེས་ནས་དེའི་ཚེ་ཞེས་པའོ། །བདེ་གཤེགས་
ལམ་མཆོག་བསྟན་པར་བྱ། །ཞེས་པ་བྱང་ཆུབ་ཀྱི་སེམས་དེ་བསྟན་པར་བྱ་ཞེས་པའོ། །ཉོན་མོངས་སྡུག་བསྔལ་འཇིག་འགྱུར་བ། །ཞེས་པ་འཇིག་རྟེན་པའི་དངོས་གྲུབ་དང་མཚན་མ་ལ་ཞེན་པ་དག་ཅེས་པའོ། །དེ་ལྟར་སེམས་ཅན་གདུལ་བ་ཡི། །ལས་རྣམས་ཇི་
སྐད་གསུངས་པ་ཡིས། །ཞེས་པ་ལ་སོགས་པ་དེ་ལྟར་སེམས་ཅན་མ་རུངས་པ་རྣམས་གདུལ་བའི་རེ་ཞིག་འདུལ་བར་གསུངས་པའི་ལས་བྱ་བའི་ཆོ་ག་རྣམས་ཀྱང་ཉེས་པ་ཕྲན་ཚེགས་ཀྱི་ཕྱིར་སྦྱར་བར་མི་བྱའོ། །དཀོན་མཆོག་བསྲུང་བའི་དོན་དུ་ལས་དེ་དག་ལ་སྦྱར་བར་
བྱའོ། །དེ་བས་ན་ཉེས་པ་ཕྲན་ཚེགས་དང་ཞེས་འཁོན་བྱུང་བ་དང་ལ་སོགས་པ་ཙམ་གྱི་ཕྱིར་དྲག་ཤུལ་སྤྱད་པའི་ལས་དེ་དག་སྦྱར་བར་ཡང་ཡང་མི་བྱའོ། །འདི་དག་གང་ཡང་རུང་བར་ནི། །ཞེས་པ་ལས་འདི་དག་གནས་གང་ཡང་རུང་བར་དགར་ཞེས་པའོ། །དེ་བཞིན་འདོད་པ་
བྱེད་པ་ལ། །ཞེས་པ་ཆོ་ག་བཞིན་སྔགས་པས་ཇི་སྐད་གསུངས་པ་བཞིན་དུ་བཤད་པར་བྱའོ་ཞེས་པའོ། །དེར་ནི་དུར་ཁྲོད་ཐལ་བ་ཡིས། །མཁས་པས་དགྲ་ཡི་གཟུགས་བརྙན་བྲིས། །ཞེས་པ་སྔར་གོང་དུ་བཤད་པ་བཞིན་དུ་ཐལ་ཕྱེས་དགྲ་དགར་བ་གང་ཡིན་པ་དེའི་གཟུགས་

བརྙན་དེ་ཁྲོ་བོའི་སྤྱན་སྔར་བྲིའོ། །དེ་སྟེང་རྐང་གཉིས་འདུག་ནས་སུ། །ཞེས་པ་གཟུགས་བརྙན་བྲིས་པ་དེའི་སྟེང་དུ་རྐང་པ་གཉིས་ཀྱིས་མནན་ཏེ་ཙོག་པུར་འདུག་པ་ལ་བྱའོ། །སྐུ་གཟུགས་ཀྱི་སྤྱན་སྔར་གང་དགར་བར་བྱ་བའི་དགྲ་དེའི་མིང་བཅུག་སྟེ་ཨུ་ཙ་ཏ་ཡ་ཞེས་བྱ་བའི་རྩ་
བའི་སྔགས་ཀྱི་མཇུག་ཏུ་ཧཱུྃ་ཕཊ་ཅེས་བྱའོ། །གདོན་མི་ཟ་བར་བསྐྲད་པར་འགྱུར། །ཞེས་པ་ཐེ་ཚོམ་མེད་པར་བསྐྲད་པར་འགྱུར་རོ། །ཡང་ཐལ་བ་དེ་ཉིད་ཀྱིས་ཞེས་པ་དུར་ཁྲོད་ཀྱི་ཐལ་བ་དེ་ཉིད་ཀྱིས་སོ། །དགྲ་ཡི་གཟུགས་བརྙན་བྲིས་ནས་སུ། །སྔར་བཤད་པ་བཞིན་དུ་ཞེས་
པའོ། །དེ་ཡི་སྙིང་གར་རྐང་གཡོན་གྱིས། །ཞེས་པ་གཟུགས་བརྙན་དེའི་སྒྲུབ་པ་པོ་ཡིས་ཞེས་པའོ། །གདོན་མི་ཟ་བར་བརྫིས་ནས་སུ། །ཞེས་པ་ཐེ་ཚོམ་མེད་པར་ཞེས་པའོ། །ཉི་མ་ལ་ནི་ཁ་བལྟས་ལ། །ཞེས་པ་ཉི་མ་འཆར་ཀར་ཉི་མ་ལ་ཁ་བལྟས་ནས་རྩ་བའི་སྔགས་ཀྱི་
མཇུག་ཏུ་བྷཉྫ་ཧཱུྃ་ཞེས་བྱ་བའི་འོག་ཏུ་ཆེ་གེ་མོ་ཞིག་ལ་ཏ་པྲ་ཛྭ་རེ་གྲྀ་ཧ་ན་ཧཱུྃ་ཞེས་བཟླས་སོ་ཞེས་པའོ། །ཆོ་ག་སྔ་མ་བཞིན་བྱའོ། །ཞི་བར་མ་བྱས་ན། དེ་ལྟར་མ་བྱས་ཞག་བདུན་གྱིས། །གདོན་མི་ཟ་བར་འཆི་བར་འགྱུར། །ཞེས་པའོ། །དེ་ལ་སོགས་པའི་ལས་རྣམས་ནི། །
ཞེས་པ་དེ་ལ་སོགས་པ་དྲག་ཤུལ་གྱི་ལས་རྣམས་ཞེས་པའོ། །བདེ་གཤེགས་སེམས་དཔའ་སྤང་མི་བྱ། །ཞེས་པ་བྱང་ཆུབ་ཀྱི་སེམས་དང་ལྡན་པས་སོ། །འོ་ན་ཅི་ཞེ་ན། སེམས་ཅན་རྣམས་ནི་ཐམས་ཅད་ལ། །ཞི་བ་དང་ནི་རྒྱས་པ་བྱ། །ཞེས་པའི་དོན་ཏོ། །ཅིའི་ཕྱིར་ཞེ་ན།
བྱང་ཆུབ་སེམས་ཀྱི་བདག་ཉིད་ཅན། །རིང་པོར་མི་ཐོགས་འགྲུབ་པར་འགྱུར། །ཞེས་པ་བྱང་ཆུབ་སེམས་ཀྱི་བདག་ཉིད་ཅན་གྱི་སྔགས་པས་ལས་བྱས་ན་ཞི་བ་དང་རྒྱས་པ་དག་མྱུར་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་མན་ཆད་དེ་བཞིན་གཤེགས་པའི་
དམ་ཚིག་སྔར་བཤད་ནས་ཞི་བ་ལ་སོགས་པའི་ལས་བྱ་བ་བཤད་པའི་ཕྱིར། དེ་ནས་སེམས་ཅན་ཐམས་ཅད་ནི། །ཞེས་པ་ལ་སོགས་པ་སྨོས་ཏེ། །བདེ་ཕྱིར་ཞི་བའི་ལས་རྣམས་ནི། །ཞེས་པ་བདེ་བ་ལ་དགོད་པའི་དོན་དུ་ཞི་བ་བྱ་ཞེས་པའོ། །ཇི་སྐད་གསུངས་པ་བཤད་པར་བྱ། །

ཞེས་ཁྲོ་བོས་ཇི་སྐད་གསུངས་པ་དེ་དག་འདིར་བཤད་པར་བྱའོ་ཞེས་བྱ་བའི་དོན་ཏོ། །མཆོད་རྟེན་འགྲམ་གྱི་དཀྱིལ་འཁོར་དུ། །ཞེས་པ། ཡི་དགས་ཕལ་པོ་ཆེའི་དཀྱིལ་འཁོར་དུ་མཆོད་པ་གཙང་མ་ཚུལ་བཞིན་དུ་མཆོད་པར་བྱའོ། །ཡང་དང་ཡང་དུ་ཕྱག་བྱས་
ནས། །ཞེས་པ་དུས་གསུམ་དག་ཏུ་དགེ་བ་ལའོ། །ཉིན་པར་དང་ནི་མཚན་མོ་ཡང་། །ཞེས་པ་སྲོད་དང་ཐོ་རངས་ཀྱི་དགེ་བ་ལ་ཡང་བྱ་ཞེས་པའི་དོན་ཏོ། །དཀོན་མཆོག་གསུམ་ལ་དེ་བརྟེན་ནས། །ཞེས་པ་ལྷག་པར་མོས་ཤིང་དེར་ཕྱོགས་པས་བརྟེན་ཞེས་པའོ། །བདེ་བར་
གཤེགས་པའི་བསམ་པ་བྱ། །ཞེས་པ་བྱང་ཆུབ་ཀྱི་སེམས་དང་ལྡན་པར་བྱ་ཞེས་པའོ། །འདི་ཡིས་སེམས་ཅན་ཐམས་ཅད་ནི། །ཤིན་ཏུ་སྡུག་བསྔལ་བདེར་གྱུར་ཅིག །ཅེས་པ་ཕྱག་བྱ་བ་དེ་དང་། ཉིན་མཚན་གྱི་དགེ་བ་སྤྱད་པ་ལ་སོགས་པས་འདི་སེམས་ཅན་ཐམས་ཅད་
སྡུག་བསྔལ་དང་བྲལ་བར་བདེ་བར་གྱུར་ཅིག་ཅེས་ཡོངས་སུ་བསྔོ་བར་བྱའོ། །འདི་དག་ནི་སྔོན་དུ་སྤྱད་པའི་དགེ་བའི་ཚེ་བྱའོ་ཞེས་པའོ། །དེ་ཡི་དངོས་གྲུབ་ཅུང་ཟད་གང་། །ཞེས་པ་དེ་ལྟར་དགེ་བ་སྤྱོད་པ་དེ་ཡིས་ཕྲ་མོ་དག་ཀྱང་ཐོབ་པར་འགྱུར་ཞེས་པའོ། །མཁས་པ་དག་
གིས་ཕན་པར་བྱ། །ཞེས་པ་དེ་ལྟར་ཡི་དམ་དུ་བཅའ་བར་བྱའོ་ཞེས་པའོ། །མཁས་པས་མཆོད་རྟེན་ལས་བྱས་ཤིང་། །ཞེས་པ་འཛབ་ལས་འབྱུང་ཀར་དགེ་བ་འདི་དག་བྱའོ་ཞེས་པའོ། །དགེ་བ་ཆུང་ངུ་ཟིན་ཀྱང་སྐབས་འདི་དག་ཏུ། དངོས་གྲུབ་མཆོག་ནི་ཐོབ་འདོད་པའི། །སྒྲུབ་
པ་པོ་དེས་དགེ་བ་དེ་དག་གིས་ཀྱང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཕུན་སུམ་ཚོགས་པར་བསྔོ་བ་ནི། རྟག་ཏུ་སེམས་ཅན་རྣམས་ལ་བསྔོའོ་ཞེས་པའི་དོན་ཏོ། །འདི་ལྟར་དེ་ནི་བྱང་ཆུབ་སེམས། །ཆོས་ཀྱི་དོན་དུ་ཡུལ་དུ་གྱུར། །ཞེས་པ་
ཚུལ་དེ་ལྟར་སྤྱོད་པ་དེ་ནི་བྱང་ཆུབ་ཀྱི་སེམས་དང་ལྡན་པར་བྱས་ཏེ། སྒྲུབ་པ་པོ་དེས་ཆོས་ཉིད་ཁོང་དུ་ཆུད་ཅིང་རྟོགས་ཞེས་པའི་དོན་ཏོ། །བྱང་ཆུབ་སེམས་རྣམས་ཉེར་བསྟན་པའི། །མཚན་ཉིད་རབ་ཏུ་བསྟན་པ་ཡིན། །ཞེས་པ་སྔོན་བྱང་ཆུབ་སེམས་དཔའ་རྣམས་ཀྱིས་ཀྱང་སྤྱད་

ཅིང་ཉེ་བར་བསྟན་པའི་བྱང་ཆུབ་སེམས་ཀྱི་མཚན་ཉིད་དེ་ལྟར་བསྟན་ཏེ། དེ་ལྟར་བློ་གྲོས་བསྟན་བྱས་ནས། །ཞེས་པ་སྒྲུབ་པ་པོས་ཞེས་པའོ། །དགེ་བ་དག་ནི་སྤེལ་བར་བྱ། །ཞེས་པ་གོང་དུ་བཤད་པའི་ཚུལ་དེ་ལྟར་དགེ་བ་རྒྱ་ཆེར་སྤེལ་ལོ་ཞེས་པའོ། །སེམས་ཅན་རྣམས་ལ་
ཡོངས་སུ་བསྔོ། །ཞེས་པ་བདག་གི་དགེ་བ་ཅུང་ཟད་ཅི་སྤྱད་པ་ཐམས་ཅད་ཀྱང་སེམས་ཅན་གྱི་དོན་གྱི་ཕྱིར་བསྔོ་ཞེས་པའོ། །སྔགས་པས་བདེ་གཤེགས་སེམས་ལྡན་གང་། །ཞེས་པ་བྱང་ཆུབ་སེམས་དང་ལྡན་པའི་སྔགས་པ་གང་གིས་གོང་དུ་བཤད་པའི་ཚུལ་དེ་ལྟ་བུར་དུས་
ཐམས་ཅད་དུ་སེམས་ཅན་རྣམས་ཀྱི་དོན་གྱི་ཕྱིར་ཞེས་པའོ། །ཞི་བ་དང་ནི་རྒྱས་པ་འཕེལ། །ཞེས་པ་ཞི་བ་དང་ནི་རྒྱས་པ་འཕེལ་བར་འགྱུར་རོ་ཞེས་པའོ། །ཐོག་མར་དཀོན་མཆོག་གསུམ་པོ་ལ། །གདོད་ནས་བཤད་དོ་ཞེས་པའོ། །དཀར་པོ་མཆོག་གིས་མཆོད་པར་
བྱ། །ཞེས་པ་ཡོན་ཏན་དང་ལྡན་པའི་མེ་ཏོག་དཀར་པོས་མཆོད་ཅེས་པའོ། །མཆོད་པ་བྱས་ནས་འདི་དག་ཏུ། །ཞེས་པ་སྐབས་འདིར་ལས་བྱ་བའི་བཟླས་བརྗོད་ཆོ་ག་བཞིན་དུ་བྱའོ། །བདེ་ཞིང་སྟན་ལ་བདེ་བར་འདུག །ཅེས་པ་སེམས་ཉམས་པར་མི་འགྱུར་བ་དང་ཉམས་
པར་མི་འགྱུར་བ་ལ་བྱ་ཞེས་པའོ། །རབ་ཏུ་དང་ཞིང་བདེ་གཤེགས་སེམས། །ཞེས་པ་སེམས་རབ་ཏུ་དང་ཞིང་བྱང་ཆུབ་སེམས་དང་ལྡན་པར་ཞེས་པའོ། །དེ་མིང་སྨོས་ཤིང་ཞིར་འགྱུར་ཞེས། །ཞེས་པ་གང་ཞི་བར་བྱ་བ་དེའི་མིང་སྨོས་ཤིང་ཤཱིནྟིཾ་ཀུ་རུ་སྭཱ་ཧཱ། ཞེས་པའོ། །
ཁྲོ་བོའི་ཚིག་གིས་མཐའ་སྦྱར་ཏེ། །ཞེས་པ་རྩ་བའི་སྔགས་ལ་བྷཉྫ་ཧཱུཾ་ཞེས་བྱ་བའི་འོག་ཏུ་སྦྱར་ཏེ། ཐ་མར་བཽ་ཥཊ་བཅུག་སྟེ་བཟླས་སོ་ཞེས་པའོ། །གང་ཡང་རུང་བ་ཅིག་ལ་ནི། །ཞེས་པ་གང་རུང་བ་ཅིག་ཞི་བར་བྱ་བ་ལ་ཞེས་པའོ། །དེ་ལྟར་ཚུལ་དེ་ལྟར་བཟླས་ཞེས་པའོ། །
ཡུལ་ཞེས་པ་ལྗོངས་གཅིག་ལ་བྱའོ། །ཡུལ་གྱི་ཕྱོགས་དག་ཅེས་པ་ཡུལ་ཕྱོགས་གཅིག་པ་ཞེས་པའོ། །རྒྱལ་པོ་དག་ལ་ཉིས་འགྱུར་བྱ། །ཞེས་པ་དེ་དག་ཉིས་སྟོང་དུ་བྱ་ཞེས་པའོ། །འདི་དག་ཞི་བར་བྱ་བའི་ཕྱིར། །བ་ལང་དག་ལ་སྟོང་དུ་བཟླས། །ཞེས་པའོ། །ར་ལུག་

དང་ནི་མ་ཧེ་ལ། །འདི་དག་ཞི་བར་བྱ་བའི་ཕྱིར། །རྟག་པར་སྟོང་དུ་བཟླས་པར་གསུངས། །ཞེས་པའོ། །ཡང་ན་ལུས་ཅན་ཐམས་ཅད་ལ། །ཞེས་སེམས་ཅན་ཐམས་ཅད་ལ་ཞེས་པའོ། །བྱང་ཆུབ་སེམས་དང་ལྡན་པ་ལ། །ཞི་བའི་མཆོག་ཏུ་ངེས་པར་འགྱུར། །
ཞེས་བྱང་ཆུབ་ཀྱི་སེམས་དང་ལྡན་པའི་སྔགས་པས་ཞི་བའི་ལས་དེ་དག་བྱས་ན། ཞི་བའི་མཆོག་ཏུ་འགྱུར་བར་ཐེ་ཚོམ་མེད་དོ་ཞེས་བྱ་བའི་ཐ་ཚིག་གོ། །ད་ནི་རྒྱས་པའི་ལས་བཤད་པའི་ཕྱིར། །དེ་བཞིན་དུ་ནི་རྒྱས་འགྱུར་བ། །ཞེས་པ་ལ་སོགས་པ་སྨོས་ཏེ། དེ་བཞིན་དུ་ནི་
རྒྱས་འགྱུར་བ། །ཞེས་པ་ལ་སོགས་པ་ཆོ་ག་འདི་བྱ་བའི་རིམ་པ་ནི་མདུན་གྱི་སྣོད་ཀྱི་ནང་ན་འོ་མ་ཡོད་པ་ལ་འོ་མའི་རྒྱ་མཚོ་ཆེན་པོར་བྱིན་གྱིས་བརླབ་པོ། །ཆུ་ལྷ་སྤྱན་དྲངས་པའི་ཀུན་སྦྱིན་ནི། བ་རུ་ཎ་འཁོར་དང་བཅས་པ་ཉིད་ཀྱི་ཕྱག་རྒྱ་དང་སྔགས་ཀྱིས་སྤྱན་དྲངས་ནས། མཆོད་
པ་ལ་སོགས་པ་དང་། བསང་གཏོར་བྱ་བ་དག་ཚུལ་བཞིན་དུ་བྱས་ནས་དང་པོར་མངར་གསུམ་གྱིས་དགང་བླུགས་ཚུལ་བཞིན་དུ་གསུམ་མམ་བདུན་དུ་དབུལ་ལོ། །དེའི་འོག་ཏུ་མེ་ཏོག་ལས་ཀྱང་གྲངས་དེ་དག་དང་འདྲ་བ་དབུལ་ལོ། །དེ་ནས་བསང་གཏོར་བྱས་ཏེ་ཆུ་ལྷ་ནུབ་
ཕྱོགས་སུ་བཞུགས་སུ་གསོལ་ལོ། །ཆུའི་ཀུན་སྦྱིན་དང་མེ་ཏོག་དག་སྦྱིན་པའི་ཚེ། ཆུ་ལྷ་བ་རུ་ཎ་སྤྱན་དྲངས་ཏེ་འདི་ལྟར་བྱ་བ་པདྨ་བྱཱུ་ཧ་ཞེས་བྱ་བའི་རྒྱུད་ལས་འབྱུང་ངོ་། །དེའི་འོག་ཏུ་འོ་མའི་རྒྱ་མཚོ་ཆེན་པོ་དེའི་དབུས་སུ་པདྨ་ཆེན་པོ་བསམས་ཏེ། དེའི་དབུས་སུ་ཁྲོ་བོ་
བསམས་ཏེ། སྤྱན་དྲངས་ཏེ་ཁྲོ་བོ་དེ་ལ་དང་པོར་མངར་གསུམ་གྱི་དགང་བླུགས་ཕུལ་ཏེ། དེའི་འོག་ཏུ་མེ་ཏོག་རྣམས་ཚུལ་བཞིན་དུ་དབུལ་ལོ་ཞེས་བཤད་དོ། །ཁ་དོག་ནི་ལས་རྣམ་བཞི་སྦྱར་རོ། །སྤྱན་སྔར་ཞེས་པ་མདུན་དུ་རི་མོ་བྲི་སྣོད་དུ་དབུལ་ཞེས་པ་མེ་ཏོག་གོ། །
རྒྱས་པ་ལ་ཡང་མེ་ཏོག་དཀར་པོ་ཡོན་ཏན་ལྡན་པ་བཟང་པོ་ཙནྡན་དཀར་པོའི་འདེ་གུས་བསྒོས་པའི་མེ་ཏོག་སྟོང་ཁྲོ་བོའི་སྤྱན་སྔར་གསེར་དང་དངུལ་དང་ཟངས་ཀྱི་སྣོད་གང་འབྱོར་བར་འོ་མ་བླུགས་པའི་སྟེང་དུ་མེ་ཏོག་རེ་རེ་ལ་སྔགས་ལན་རེ་རེ་སྦྱར་ཏེ། སྔགས་བརྗོད་ཅིང་འོ་མས་

བཀང་བའི་སྣོད་དུ་བླུགས་སོ། །སྟོང་གིས་རབ་ཏུ་རྒྱས་པར་འགྱུར། །སྙིང་ལ་རབ་ཏུ་དགའ་འགྱུར་བའི། །ཞེས་པའི་ཚུལ་དེ་ལྟར་མེ་ཏོག་སྟོང་ཕུལ་ན་གང་རྒྱས་པར་བྱ་བ་དེ་རྒྱས་པར་འགྱུར་རོ། །སྙིང་ལ་རབ་ཏུ་དགའ་བའི་ཚུལ་གྱིས་རྒྱས་པར་འགྱུར་བའི་རྒྱས་པའི་ལས་
བྱེད་འདོད་ན་ཞེས་པའོ། །གང་ཡང་རུང་བ་དེ་ཡི་མིང་། །ཞེས་པ་གང་རྒྱས་པར་བྱ་བ་དེའི་མིང་སྨོས་པ་ནི། ཆོ་ག་བཞིན་དུ་མཐའ་མར་སྦྱར། །ཞེས་པ་དེ་པུཥྚིཾ་ཀུ་རུ་བཽ་ཥཊ་ཅེས་སྦྱར། རྩ་བའི་སྔགས་ཀྱི་ཧཱུྃ་ཞེས་པའི་འོག་ཏུ་སྦྱར་བ་བསྐུལ་ཚིག་གཞུག་པའི་ཐབས་ནི་ཚུལ་དེ་བཞིན་
དུ་ལས་གཉིས་ཀ་ལ་འདྲ་བར་སྦྱོར་རོ་ཞེས་པའི་དོན་ཏོ། །མེ་ཏོག་ཡིད་དུ་འོང་བ་རྣམས། །འོ་མར་བླུགས་པར་བྱས་པ་གང་། །ཞེས་པ་གསུམ་པ་ནི་ཞེས་བྱ་སྟེ་མེ་ཏོག་གི་མིང་ཡིད་དུ་འོང་བའི་མེ་ཏོག་ལ་སྟོང་སྔ་མ་བཞིན་དུ་འོ་མས་བཀང་བའི་སྣོད་ཀྱི་ནང་དུ་དབུལ་ལོ། །ཚུལ་དེ་
ལྟར་བྱས་ན་རྒྱས་པར་འགྱུར་རོ། །ཡང་སྤྱིར་མེ་ཏོག་དཀར་པོའམ། །སེར་པོ་ཡིད་དུ་འོང་བ་བཟང་པོ་ཡོན་ཏན་དང་ལྡན་པ་དབུལ་བར་བྱ་སྟེ། མེ་ཏོག་ཙམ་གྱིས་ཁྱད་པར་གྱི་སྒོ་ནས་རྒྱས་པའི་ལས་གཉིས་སུ་ཡང་བཤད་པ་ཡང་རུང་བ་དེ་གཉིས་སུ་གཅིག་ཏུ་ཡང་རུང་ངོ་ཞེས་བྱ་བའི་དོན་
ཏོ། །ད་ནི་དཔལ་ལ་སོགས་པ་སྒྲུབ་པ་བཤད་པའི་ཕྱིར། དེ་ནས་གཞན་ཡང་དཔལ་འདོད་ན། །ཞེས་པ་ལ་སོགས་པ་སྨོས་སོ། །དེ་ནས་གཞན་ཡང་དཔལ་འདོད་ན། །ཞེས་པ་ལ་སོགས་པ་ལ་རྒྱལ་པོ་དང་ལོངས་སྤྱོད་སྒྲུབ་འདོད་ན་སྔར་བཤད་པ་བཞིན་དུ་སྐུ་གཟུགས་བཀྲམ་
ལ་མེ་ཏོག་ཡིད་དུ་འོང་བ་ཞེས་བྱ་བའི་མེ་ཏོག་ཙནྡན་དཀར་པོས་གཏོར་ཏེ་བསྒོས་པའི་མེ་ཏོག་གིས་མཆོད་དོ། །སྤྱིར་མེ་ཏོག་ཡིད་དུ་འོང་བ་བཟང་པོ་ལ་ཡང་བྱ་ཞེས་པའོ། །བདུག་པ་དག་གི་སྔགས་ཀྱིས་དབུལ། །ཞེས་པ་བདུག་པའི་སྔགས་ཀྱིས་ཞེས་པའོ། །ཉིན་རེ་དེ་ལྟར་
བྱས་ནས་སུ། །ཞེས་པ་དུས་གསུམ་དུ་ཚུལ་དེ་ལྟར་མཆོད་པ་བྱས་ནས་མཆོད་པ་དེ་ལྟ་བུའི་བཟླས་པ་བྱའོ་ཞེས་སོ། །མཐའ་མ་དག་ཏུ་སྦྱར་ནས་སུ། །དེ་ནས་ནཱ་མ་སྭཱ་ཧཱར་ལྡན། །ཞེས་པ་རྩ་བའི་སྔགས་བྷཉྫ་ཧཱུྃ་ཞེས་བྱ་བའི་འོག་ཏུ་ཤྲཱི་རི་ཕྲ་མ་མེ་སཾ་པྲ་པ་ཡཙྪ་ནཱ་མ་སྭཱ་ཧཱ། ཞེས་བྱ་བའི་

ཚུལ་དུ་བསྐུལ་ཚིག་བཅུག་སྟེ་སྔོན་དུ་བསྙེན་པ་ཁྲི་བྱའོ་ཞེས་པའོ། །དེ་ནས་རྒྱ་མཚོར་འབབ་པའི་ཆུ་ཀླུང་གི་ནང་དུ་སོང་ནས་ནི། ལྟེ་བ་ནུབ་པར་ཆུར་འདུག་ནས། །ཞེས་པ་དེ་ནས་བསྒྲུབས་ཏེ་རྒྱ་མཚོར་འབབ་པའི་ཆུ་ཀླུང་དུ་སོང་ནས་བདག་ཉིད་ཁྲུས་བྱས་ཏེ་སྦྱོར་བ་
བྱས་ཏེ་སྦྱོར་བ་བྱས་ནས་ལྟེ་བ་ནུབ་ཙམ་དུ་ཆུར་ཞུགས་ཏེ་འགྲེང་བ་ལ་བྱ་ཞེས་པའོ། །མེ་ཏོག་པུཎྜ་རཱི་ཀ་དང་། །ཞེས་པ་པདྨ་དཀར་པོ་ཞེས་པའོ། །ཙནྡན་དཀར་པོས་བསྐུས་ནས་སུ། །ཞེས་པ་གཏོར་ཏེ་བསྒོས་ཏེ་ཞེས་པའོ། །བཟླས་ཤིང་བཟླས་ཤིང་ཆུར་དབུལ་བ། །བློ་དང་ལྡན་
པས་འབུམ་བྱས་ནས། །ཞེས་པ་མདུན་དུ་ལྷ་སྤྱན་དྲངས་ཏེ་དེ་ལ་མེ་ཏོག་དབུལ་ལོ། །ལན་ཅིག་གིས་མ་རྫོགས་ན་དུས་གསུམ་དུ་ཡང་དབུལ་ལོ། །མེ་ཏོག་པདྨ་དཀར་པོ་ཡང་སྔགས་བརྗོད་ཅིང་དབུལ་ལོ། །དེ་ཡི་མཇུག་ཏུ་དཔལ་ཆེན་ཐོབ། །ཅེས་པ་རྒྱལ་རིགས་ཅན་
ལ་རྒྱལ་པོ་ཐོབ་པར་མོས་པ་ཞིག་གིས་དེ་ལྟར་བྱས་ན་རྒྱལ་པོ་ཐོབ་པོ། །ལོངས་སྤྱོད་ཐོབ་པར་འདོད་ན། །མཆོད་པ་བྱས་ནས་བསྙེན་པ་ཁྲི་བྱས་པ་ལ་སོགས་པ་སྔར་བཤད་པ་བཞིན་དུ་བྱས་ནས་ཆུ་ཀླུང་གི་ནང་དུ་ཞུགས་ཏེ། པདྨོ་དབུལ་བ་ཆུ་ཀླུང་གི་ནང་དུ་པདྨོ་དམར་པོ་འབུམ་དབུལ་
ལོ། །དེ་ལྟ་བུ་ཟིན་པའི་འོག་ཏུ་ཆོ་ག་དེ་ལྟར་བྱས་ན་ཐེ་ཚོམ་མེད་པར་ཐོབ་པར་འགྱུར་རོ། །རྩ་བའི་སྔགས་བྷཉྫ་ཧཱུྃ་ཞེས་བྱ་བའི་འོག་ཏུ་ཧི་མ་མེ་པྲ་ཡཙྪ་ནཱ་མ་སྭཱ་ཧཱ་ཞེས་བཟླས་སོ་ཞེས་བྱ་བའི་དོན་ཏོ། །ཆོ་ག་འདི་དག་འདི་ཉིད་ཀྱིས། །ཞེས་པ་སྔར་བཤད་པ་བཞིན་དུ་བྱ་ཞེས་པའོ། །
བཟླས་ཤིང་བཟླས་ཤིང་སྔ་མ་བཞིན། །ཞེས་པ་སྔ་མ་བཞིན་དུ་ཆུ་ཀླུང་དུ་དབུལ་ལོ་ཞེས་པའོ། །ཆོ་ག་གསུངས་པ་བཞིན་གནས་པའི། །སྔགས་པ་ངེས་པར་དེ་ཡི་མཐར། །ཞེས་པ་ཇི་སྐད་གསུངས་པའི་ཚུལ་བཞིན་གནས་པའི་སྔགས་པས་ཆོ་ག་དེ་ཟིན་པའི་འོག་ཏུ་དེ་ནས་ཐེ་
ཚོམ་མེད་པར་བྱེད་ན། རང་འབུམ་ཐོབ་པར་འགྱུར་རོ། །རྩ་བའི་སྔགས་ཧཱུྃ་ཞེས་བྱ་བའི་འོག་ཏུ་ད་ནི་རྨཱ་མེ་པྲ་ཡཙྪ་ན་སྭཱ་ཧཱ་ཞེས་བཟླས་སོ་ཞེས་སོ། །འདི་ལ་རྣམ་པར་དཔྱད་མི་བྱ། །ཞེས་པ་འགྲུབ་པའམ་མི་འགྲུབ་ཅེས་ཐེ་ཚོམ་མི་བྱའོ་ཞེས་པའོ། །དེ་སྟེང་དེ་ཡི་སྔ་མ་བཞིན། །

ཞེས་པ་ཆོ་ག་སྔ་མ་བཞིན་དུ་ཨ་ཏི་མུག་ཏ་ཀའི་མེ་ཏོག་ཅེས་སོ། །འབུམ་ནི་དབུལ་བར་བྱས་ནས་སུ། །ཞེས་པ་ཆུ་ཀླུང་དུ་དབུལ་བར་བྱ་ཞེས་པའོ། །གདོན་མི་ཟ་བར་གནོད་སྦྱིན་མ། །ཞེས་པ་ཐེ་ཚོམ་མེད་པར་དེའི་དབང་དུ་འགྱུར་ཞེས་པའོ། །ཆོ་ག་གང་འདིས་སྒྲུབ་པ་པོས། །ནོར་ཆེན་དག་
ཀྱང་འཐོབ་པར་འགྱུར། །ཞེས་པ་ཆོ་ག་འདི་བྱས་པས་གནོད་སྦྱིན་མོ་དབང་དུ་འགྱུར་བར་མ་ཟད་ཀྱི་ནོར་ཆེན་དག་ཀྱང་ཐོབ་པོ། །སྔ་མ་བཞིན་དུ་ཡཀྴ་ནི་མ་མེ་པཱ་ཤཾ་ཀུ་རུ་ནཱ་མ་སྭཱ་ཧཱ་ཞེས་བཟླས་སོ། །དེ་སྟེ་སྔ་མ་བཤད་པ་བཞིན། །ཞེས་པ། ཆོ་ག་སྔ་མ་བཞིན་དུ་བྱ། །ཞེས་པའོ། །མེ་ཏོག་
ཛཱ་ཏི་བཟང་པོ་ནི། །ཞེས་པ་སྲི་ཤིང་སྣ་མའི་མེ་ཏོག་ཅེས་པའོ། །ཙནྡན་ཞེས་པ་དཀར་པོ་ཙནྡན་གྱིས་བསྐུས་པ་རྣམས་ཞེས་པའོ། །ཆུ་ཡི་ནང་དུ་ཕུལ་ན་ནི། །ཞེས་པ་སྔ་མ་བཞིན་དུ་དབུལ་ཞེས་པའོ། །ས་ཡི་སྟེང་ན་འདོད་པ་ཐོབ། །ཅེས་པ་སའི་སྟེང་ན་གང་འདོད་པའི་
ཚུལ་དེ་ལྟར་སྒྲུབ་པ་ན་ཐོབ་པར་འགྱུར་ཞེས་བྱ་བའི་དོན་ཏོ། །ཡང་ན་པདྨ་དཀར་པོ་ནི། །ཞེས་པ་སྔར་བཤད་པ་བཞིན་དུ་སྔོན་དུ་བསྙེན་པ་ཁྲི་བྱས། དེའི་འོག་ཏུ་ཆོ་ག་འདི་བརྩམས་ཏེ། སྔ་མ་བཞིན་དུ་རྒྱས་པའི་ཞུགས་ཐབ་བརྐོས་ཏེ་བྱས་ལ་དེར་མེ་ལྷ་གཉེར་ཏེ་ཀུན་སྦྱིན་དབུལ་
བ་དང་། པདྨ་ཉིད་ཡང་གསུམ་མམ་བདུན་དབུལ་ལོ། །དེ་ནས་མེ་ལྷ་བསངས་ནས་ཤར་ལྷོའི་མཚམས་སུ་བཞག་ལ་ལྷ་སྤྱན་དྲངས་ཏེ་ཀུན་སྦྱིན་སྲེག་ལ་སོགས་པ་དབུལ་བ་བྱས་ནས། དེའི་འོག་ཏུ་གཟོད་པདྨ་དཀར་པོ་མངར་གསུམ་ལ་སྦགས་པ་འབུམ་དབུལ་ལོ། །ཆོ་ག་
འདི་ལྟར་སྦྱར་བར་བྱ་བ་འོག་ནས་འབྱུང་བ་ཀུན་ལ་ཡང་སྦྱར་རོ་ཞེས་པའི་ཐ་ཚིག་གོ། །མངར་གསུམ་ཞེས་པ་འོ་མ་སྦྲང་རྩི་མར་ཞེས་སོ། །མེ་འབར་ནང་དུ་ལེགས་པར་བསྲེག །ཞེས་པ་ཚུལ་བཞིན་དུ་སྦྱིན་སྲེག་བྱ་བ་ལ་སོགས་པ་ཆོ་ག་དེས་ན་ལྷ་མོ་བཟང་མོ་ཞིག་མཐོང་
བར་འགྱུར་རོ་ཞེས་པའོ། །དེ་ཡིས་དེ་ལ་འདོད་མཆོག་དང་། །ནོར་དག་ཀྱང་ནི་སྟེར་བར་འགྱུར། །ཞེས་པ་ལྷ་མོ་དེ་ཡིས་སྒྲུབ་པ་པོ་དེ་ལ་འདོད་པའི་མཆོག་སྩོལ་བ་དང་ནོར་དག་ཀྱང་སོགས་པར་མཛད་དོ་ཞེས་པའོ། །བློ་དང་ལྡན་པའི་ཟས་ཀྱི་མཆོག །ཅེས་པ་འོ་མ་དང་

འབྲས་སཱ་ལུ་སྦྱར་བའི་ཟས་ཀྱི་ནང་དུ་མར་དང་སྦྲང་རྩི་བླུགས་ལ་བྱའོ་ཞེས་པའོ། །ཞག་བདུན་དུ་ནི་གཟར་བུ་ཡིས། །ཞེས་པ་ཟས་དེ་ལས་ཞག་བདུན་དུ་གཟར་བུ་ཆུང་ངུས་སྦྱིན་སྲེག་འབུམ་བྱའོ། །ཡང་ན་འབྲུ་རྣམས་ཐམས་ཅད་ཀྱིས། །ཞེས་པ་ཡང་ན་འབྲུ་
སྣ་ལྔ་ལ་སོགས་པ་འབྲུ་ཐམས་ཅད་ལ་བྱའོ། །སྦྱིན་སྲེག་དོན་རྣམས་ཐམས་ཅད་སྒྲུབ། །ཅེས་པ་འབྲུའི་སྦྱིན་སྲེག་བྱས་པས་གང་འདོད་པའི་ནོར་ཐམས་ཅད་འགྲུབ་པར་འགྱུར་རོ་ཞེས་པའོ། །སྦྱིན་སྲེག་ཚིག་འབུམ་བྱས་པ་ཡིས། །ཞེས་པ། འབྲུ་རྣམས་ལས་གང་ཡང་
རུང་བ་སྣ་གཅིག་གིས་ཞེས་པའོ། །དེ་དག་ཉིད་ཀྱིས་མི་ཟད་འགྱུར། །ཞེས་པ་འབྲུ་གང་སྦྱིན་སྲེག་བྱས་པ་དེ་ཉིད་མི་ཟད་པར་འགྱུར་བ་ལ་བྱ། དོན་དེ་ནོར་འགྲུབ་པ་ལ་ཡང་བྱ་ཞེས་པའོ། །བིལ་བ་མར་ལ་ཞེས་པ། བིལ་བའི་འབྲས་བུ་མེར་བསྲེགས་པ་འབར་བ་ལ་
ཞེས་པ། གཟར་བུ་ཆུང་ངུས། བསྲེགས་ནས་ས་ཡི་བདག་པོ་ལས། ནོར་ཆེན་དག་ནི་ཐོབ་པར་འགྱུར། །ཞེས་པའོ། །དཱུར་བ་འཇག་མ་མ་གྲུགས་པས། །ཞེས་པ་ལ་སོགས་པ་བོད་ཡུལ་ན་ཡོད་པར་གྲགས་པ་ལ་བྱ་བ་སྐད་དུ་བཤད་དེ། རྩྭ་དཱུར་བའི་འཇག་མ་སྐམ་པོ་མ་ཡིན་པ།
རློན་པ་ལས་མ་ཆག་པ་མ་གྲུགས་པ་མ་གོད་པ་བཟང་པོ་ལས་རིང་ཐུང་ཇི་ཙམ་ཡང་རུང་བ་ལས། འོ་མ་ལས་སྦྲགས་ཤིང་སྦྱིན་སྲེག་འབུམ་བྱས་ན་ཚེ་རིང་པོར་འགྱུར་རོ། །སྔ་མ་བཞིན་དུ་རྩ་བའི་སྔགས་ཀྱི་མཇུག་ལ་ཨཱ་ཡུ་བརྟ་ཡ་ནཱ་མ་སྭཱ་ཧཱ་ཞེས་བཟླས་ན་ཚེ་རིང་བར་འགྱུར་རོ་ཞེས་
པའོ། །རྒྱ་སྐྱེགས་ཤིང་གི་མེ་དག་ལ། །དེ་བཞིན་ལན་རེ་མར་གྱི་ཧོམ། །ཞེས་པ་དུས་གསུམ་དུ་འབུམ་བྱས་ན་ཚེ་རིང་བ་དང་ཡིད་གཞུངས་པ་དང་གྲགས་པ་ཆེན་པོ་ལ་སོགས་པ་ཐོབ་པར་འགྱུར་ཞེས་བྱ་བའི་དོན་ཏོ། །དེ་བཞིན་ཟས་རྣམས་ཀུན་བསྲེགས་ནས། །ཞེས་པ།
འབྲས་སྣ་མང་པོ་ཡོད་པ་དེ་དག་ལ་ཟས་རྣམས་ཀུན་ཞེས་བྱའོ། །གཟར་བུ་ཆུང་ངུས་སྦྱིན་སྲེག་བྱའོ་ཞེས་པའོ། །དགུ་པའི་བཤད་པ་རྫོགས་སོ།། །།ཕྱི་མའི་ཡང་ཕྱི་མ་རྟོག་པ་འདི་ལ་རྣམ་པ་ལྔ་བཤད་དོ། །གླེང་བསླང་བ་དང་། སྔོན་དུ་བསྙེན་པའི་ཆོ་ག་དང་། རི་མོའི་སྐུ་གཟུགས་

ཀྱི་ཆོ་ག་དང་། སྒྲུབ་པ་ལ་འཇུག་པ་དང་། བསྒྲུབས་ནས་སྦྱིན་སྲེག་བྱ་བའོ། །དེ་ལ་དང་པོ་གླེང་བསླང་བ་བཤད་དེ། དེ་ནས་རྟོག་པ་ཐམས་ཅད་ཀྱི། །ཕྱི་མའི་ཕྱི་མ་ཞེས་བྱ་བ། །ཞེས་པ་གོང་དུ་བཤད་པ་རྣམས་ཀྱིས་ཆོ་ག་གོང་དུ་མ་བཤད་པ་རྣམས་ལེའུ་འདི་ལས་བཤད་པས་ཕྱི་མ་
ཞེས་བྱའོ། །སྦྱོར་བར་བཅས་པས་རྒྱས་པ་ཡི། །རྟོག་པ་འདི་ནི་བཤད་པར་བྱ། །ཞེས་པ་དེ་ཡང་སྦྱོར་བ་ཐབས་དང་བཅས་པར་རྒྱ་ཆེར་འགྲེལ་ཅིང་བཤད་པའི་རྟོག་པ་དེ་དང་དེ་འདིར་བཤད་ཅེས་པའོ། །འདི་དག་ནི་སྔར་གོང་དུ་བཤད་པའི་འཕྲོ་སྦྱོར་བའི་ཚིག་གོ། །དེ་བཞིན་བསྙེན་པ་
སྔོན་དུ་རྫོགས། །ཞེས་པ་ཕྱིའི་ཡོ་བྱད་རྣམས་ཞེས་པའོ། །རྟོག་པ་དག་ནི་འདི་ལྟར་ཟིན། །ཞེས་པ་ཆོ་ག་དེ་དག་གི་རྟོག་པ་དག་ནི་སྔར་བཤད་ཟིན་ཏོ། །སྔགས་མཆོག་དག་ནི་གང་གསུངས་པ། །ཞེས་པ་རྒྱུད་ཆེན་པོ་ལས་གསུངས་ཞེས་པའོ། །ད་ནི་སྔོན་དུ་བསྙེན་པ་ཞེས་བྱ་བའི་
ཆོ་ག་བཤད་དེ་དེའི་ཕྱིར། དེ་ཡི་ལས་ནི་ཆོ་ག་བཤད། །ཅེས་པ་གསུངས་ཏེ། ཐོག་མར་ཨོཾ་བཞག་ཆོ་ག་བཞིན། །ཞེས་པ་ཨོཾ་ཐོག་མར་བཞག་པ་ནི་ཡོངས་ཀྱིས་སྲིད་དེ་བཀྲ་ཤིས་པ་དང་གཟི་བྱིན་དང་ལྡན་པའམ་ཕྱག་འཚལ་བའི་དོན་ཏོ། །རི་མོའི་སྤྱན་སྔར་འདུག་ནས་སུ། །ཞེས་
པ་མདུན་དུ་རི་མོའི་སྐུ་གཟུགས་བཀྲམ་པའི་སྤྱན་སྔར་འདུག་ནས་འབུམ་ཕྲག་བཅུར་བཟླས་པ་བྱ་ཞེས་པའོ། །ད་ནི་རི་མོའི་སྐུ་གཟུགས་ཀྱི་ཆོ་ག་བཤད་དེ། དེའི་ཕྱིར། དེ་ནས་དེ་ཡི་རི་མོ་མཆོག །ཅེས་པ་སྨོས་སོ། །གང་གིས་དངོས་གྲུབ་རབ་ཐོབ་པ། །ཞེས་པ་རི་མོའི་སྐུ་གཟུགས་
གང་གིས་དངོས་གྲུབ་རབ་ཏུ་ཐོབ་པ་ཞེས་པ་དེ། ཚུལ་བཞིན་དུ་ནི་རབ་ཏུ་བཤད། །ཅེས་པའོ། །རས་ནི་སར་པ་ཁྲུ་གང་ཙམ། །ཞེས་པ་ཆེད་དུ་བཏགས་པའི་རས་ཞེས་པའོ། །ཞལ་གཅིག་པོ་ལ་མདངས་གསལ་བ། །ཞེས་པ་མོག་མོག་མ་ཡིན་པ་གསལ་བར་བྱ་ཞེས་པའོ། །མ་ཧེ་
ལ་ནི་བཅིབས་པར་བྱ། །ཞེས་པ་གཡོན་བརྐྱང་བའི་ཚུལ་དུ་བཞུགས་པར་ཞེས་པའོ། །སྟག་ལྤགས་ཞེས་པ་སྨད་གཡོགས་བྱས། །ཞེས་པའོ། །འཁྲུག་ཅིང་འཇིགས་པ་ཞེས་པ་བདུད་དང་བགེགས་ཀྱི་སྡེ་འཇིགས་པ་བྲི་ཞེས་པའོ། །གང་དུ་ཡང་ཞེས་པ་གསུང་འབྱིན་འབྱིན་ལྟ་

བུའི་ཚུལ་དུ་བྱའོ་ཞེས་པའོ། །ཡན་ལག་ཐམས་ཅད་ཡོངས་རྫོགས་པ། །ཞེས་པ་སྐུ་གཟུགས་དེ་ཞེས་པའོ། །དེ་ནས་དེ་ལ་མཁས་པ་ཡིས། །མཆོད་པའི་ཡན་ལག་མཆོག་གིས་མཆོད། །ཅེས་པ་དེ་ལྟར་གཟུགས་བྲིས་ཟིན་ནས་སྔགས་པས་སྔར་བཤད་པའི་ཡོ་བྱད་
རྣམས་མཆོད་པར་བྱའོ། །རི་མོའི་སྐུ་གཟུགས་ཀྱི་སྤྱན་སྔར་གཟུགས་པའི་བསྙེན་པ་འབུམ་ཕྲག་བཅུ་བྱའོ་ཞེས་པའི་ཐ་ཚིག་གོ། །ད་ནི་བསྒྲུབ་པ་ལ་འཇུག་པ་ཞེས་བྱ་བ་བཤད་པ་ཡང་། སྔགས་པ་བརྟུལ་ཞུགས་བརྟན་པ་ཡིས། །ཞེས་སྨོས་ཏེ། སྔགས་པ་བརྟུལ་ཞུགས་བརྟན་
པ་ཡིས། །དེ་ཡི་འོག་ཏུ་བྲག་ཕུག་ཞུགས། །ཞེས་པ་ཇི་སྐད་གསུངས་པའི་ཚུལ་བཞིན་དུ་མི་འགྱུར་བར་བརྟན་པར་གནས་པར་བྱའོ། །སྔར་བསྙེན་པ་འབུམ་ཕྲག་བཅུ་བྱས་པའི་འོག་ཏུ་སྔགས་པ་དེ་བྲག་ཕུག་ཏུ་གནས་པར་བྱའོ་ཞེས་པའོ། །ཁ་ཟས་ཞེས་པ་སྨྱུང་བ་བྱ། །རི་རབ་
རི་ནི་ཇི་ཙམ་པར། །ཞེས་པ་བདག་གནས་པའི་རི་གཡོ་བར་འགྱུར་གྱི་བར་དུ་བཟླས་ཞེས་པའོ། །ཡང་ན་རི་མོ་བཞད་ཀྱི་བར་དུ་བཟླས་ཞེས་པའོ། །ཡང་ན་རི་མོ་འབར་གྱི་བར་དུ་བཟླས་ཞེས་པའོ། །བཟླས་ན་དེའི་ཚེ་དངོས་གྲུབ་ཐོབ། །ཅེས་པ་དེ་ལྟར་མཚན་མ་བྱུང་བྱུང་དུ་བཟླས་ན་དངོས་
གྲུབ་འཐོབ་པོ་ཞེས་བྱ་བའི་དོན་ཏོ། །དེ་ལྟར་ལྷ་འདི་བཟླས་པ་ཡི། །ཞེས་པ་ལ་སོགས་པའི་རི་མོའི་ལྷའི་སྐུ་གཟུགས་འདི་ལ་དངོས་གྲུབ་ཀྱི་མཚན་མ་བྱུང་བ་དང་བསྟན་པ་དེ་དག་ཡིན་ནོ། །མཚན་མ་དེ་དག་བྱུང་ནས་རིག་འཛིན་དུ་འགྱུར་རོ། །དེ་ལྟར་རིག་འཛིན་གྲུབ་ནས་འབྲས་བུའི་དོན་
ཐམས་ཅད་སྒྲུབ་ནུས་པར་འགྱུར་རོ། །དེ་ཡང་ཡིད་ལ་གང་འདོད་པ་བསམས་པ་ཙམ་གྱིས་དེ་དག་ཐམས་ཅད་རིང་པོར་མི་ཐོགས་པར་འགྲུབ་པར་འགྱུར་རོ་ཞེས་པའོ། །ཁྲོས་ནས་ས་ཡང་འགས་པར་འགྱུར། །ཞེས་པ་ལ་སོགས་པའི་ལས་འདི་དག་ཀྱང་དེ་བཞིན་དུ་བྱེད་ནུས་པར་འགྱུར་རོ་
ཞེས་བྱ་བའི་ཐ་ཚིག་གོ། །ཆུ་དག་ཅེས་པ་ཆུ་ཀླུང་དག་སྐེམས་ཞེས་པའོ། །དེ་ལ་སོགས་པའི་ལས་རྣམས་ནི། །ཞེས་པ། དེ་ལ་སོགས་པའི་ཡ་མཚན་ལས། །ངོ་མཚར་ཆེན་པོ་གཞན་དག་ཀྱང་བྱེད་དེ། ཡ་མཚན་ཆེན་པོ་ཐམས་ཅད་དང་། །ཞེས་པའོ། །སེམས་ཅན་རྣམས་ནི་ཐམས་ཅད་

ལ། །ཞེས་པ་ལ་སོགས་པ་ཡི་དགས་ཕལ་པོ་ཆེའི་དཀྱིལ་འཁོར་དང་རྩ་བའི་རྟོག་པ་ལ་སོགས་པའི་ཆོ་ག་སྔར་གསུངས་པ་དེ་དག་གི་དངོས་གྲུབ་དང་ལས་རྣམས་འབྱུང་བ་ཡང་ཇི་སྐད་གསུངས་པའི་ཆོ་ག་བཞིན་དུ་བསྒྲུབས་ན་ཡང་འགྲུབ་པར་འགྱུར་རོ་ཞེས་བྱ་བའི་དོན་ཏོ། །ད་ནི་བསྒྲུབས་
ནས་སྦྱིན་པ་ཞེས་བྱ་བ་བཤད་དེ། དེའི་ཕྱིར་བསྒྲུབས་ནས་སེམས་ཅན་ཐམས་ཅད་ལ་ཞེས་གསུངས་ཏེ། འབྲས་བུ་མཆོག་རྣམས་བསྒྲུབ་པར་བྱ། །ཞེས་པ་གོང་དུ་བཤད་པའི་དངོས་གྲུབ་གྲུབ་པའི་འབྲས་བུ་སེམས་ཅན་ཐམས་ཅད་ལ་སྦྱིན་པར་བྱའོ་ཞེས་པའི་དོན་ཏོ། །གྲུབ་པའི་
མཐུ་ནི་གང་ཡོད་པ། །ཞེས་པ་དངོས་གྲུབ་གྲུབ་པའི་མཐུ་གང་ཡོད་པ་དེ་དག་ཐམས་ཅད་ཅེས་པའོ། །བདེ་གཤེགས་བསམ་པས་དེ་དག་ཀུན། །ཞེས་པ་ལ་སོགས་པ་བྱང་ཆུབ་ཀྱི་སེམས་དང་ལྡན་པས་མཐུ་གྲུབ་པ་དེ་དག་ཀུན་ཀྱང་སེར་སྣ་མེད་པའི་སེམས་ཀྱིས་སྐྱེ་བོ་ཕོངས་པ་རྣམས་
ལ་སྦྱིན་ཞིང་སོ་སོའི་ལས་རེ་བ་ཡོངས་སུ་བསྐང་བར་བྱའོ་ཞེས་པའི་ཐ་ཚིག་གོ། །སྙིང་རྗེ་ཅན་གྱིས་བདག་གི་ལུས། །ཞེས་པ་བདག་གི་ལུས་ཀྱང་སྦྱིན་པར་བྱའོ་ཞེས་པའོ། །དྲི་མ་མེད་པར་བསྒྲུབས་ནས་སུ། །དགེ་བ་འདི་ཡིས་སེམས་ཅན་ཀུན། །བདེ་གཤེགས་སེམས་ལྡན་
བདེ་བར་འགྱུར། །ཞེས་པ་སྐྱོན་མེད་པའི་སྦྱིན་པ་སྔོན་དུ་བཤད་པ་བཞིན་སྤྱད་པའི་དགེ་བ་འདི་ཡིས་དེ་ལྟར་དགེ་བ་སྤྱད་པ་སེམས་ཅན་ཐམས་ཅད་ལ་བསྔོའོ། །བྱང་ཆུབ་སེམས་དང་ལྡན་ཞིང་བདེ་བར་གྱུར་ཅིག་ཅེས་པའི་དོན་ཏོ། །རེ་བ་ཐམས་ཅད་ཡོངས་རྫོགས་ཤིང་། །ཞེས་པ་
འཇིག་རྟེན་དང་འཇིག་རྟེན་ལས་འདས་པའི་དགེ་བ་འདོད་པ་ཕུན་སུམ་ཚོགས་པའི་ལོངས་སྤྱོད་དང་ལྡན་པར་གྱུར་ཅིག་ཅེས་པའི་དོན་ཏོ། །དགེ་བ་ཀུན་གྱི་སྣོད་གྱུར་ཅེས། །ཞེས་པ་དེ་དག་དང་ཡང་ལྡན་ཞིང་དགེ་བ་སྤྱོད་པའི་སྐབས་དང་ལྡན་པའོ། །ཡིད་ཀྱིས་ཡོངས་སུ་བསྔོ་བར་
བྱ། །ཞེས་པ་སྤྱོད་པའི་སྐལ་བ་ཅན་དུ་གྱུར་ཅིག་ཅེས་པའོ། །གང་ཞིག་དེ་ལྟར་སྔགས་གྲུབ་ཀྱང་། །ཞེས་པ་ཕལ་ཆེར་སྔགས་གྲུབ་ན་སྦྱིན་པའི་དགེ་བ་དེ་ལྟར་མི་སྤྱོད་པ་སྟེ། འགའ་ཞིག་སྔགས་གྲུབ་ནས་ཀྱང་སྦྱིན་པའི་དགེ་བ་དག་དེ་ལྟར་སྤྱད་པ་དེས་སྐྱོན་མེད་པའི་སྦྱིན་པ་ནི། དྲི་མ་མེད་པའི་

བྱང་ཆུབ་སེམས་ཞེས་པའི་དོན་ཏོ། །དགེ་བ་རྟག་ཏུ་སྤྱོད་པའི་དེ། །ཞེས་པ་སྦྱིན་པའི་དགེ་བ་དག་སྤྱོད་པ་ཞེས་པའོ། །དངོས་གྲུབ་རྟོག་ལས་གང་གསུངས་པ། །ཞེས་པ་རྟོག་པ་དག་ལས་དངོས་གྲུབ་གང་གསུངས་པ་དེ་བཞིན་གཤེགས་པའི་ཞལ་ནས་བྱུང་བ་དེ་ཞེས་བྱ་བའི་དོན་
ཏོ། །ཐམས་ཅད་དེ་ལ་ཉེ་བར་གནས། །ཞེས་པ་དངོས་གྲུབ་ཐམས་ཅད་ཀྱང་སྔགས་པ་གྲུབ་པ་དེ་ལྟ་བུ་ལ་འགྲུབ་པར་འགྱུར་བས་ནི་ཉེ་བར་གནས་ཞེས་བྱའོ། །སྔགས་པ་སྒྲུབ་པ་པོ་ཡི་རྫུ་འཕྲུལ་གྱི། །ཡོན་ཏན་ཀུན་དང་ལྡན་པར་འགྱུར། །ཞེས་བྱ་བའི་དོན་ཏོ། །རྒྱ་ཆེར་བསྟན་ཞེས་པ་དེ་ལྟར་
རྒྱ་ཆེར་བསྟན་ཏོ་ཞེས་པའོ། །རྟོག་པ་ཐམས་ཅད་འདུས་པའོ། །ཞེས་པ་དེ་དག་ནི་རྟོག་པ་ཐམས་ཅད་འདུས་པ་ཡིན་ནོ་ཞེས་པའི་དོན་ཏོ། །འཇམ་དཔལ་གཤིན་རྗེ་གཤེད་ཀྱི་རྟོག་པར་གཏོགས་པ་བཅུ་པའི་འགྲེལ་པ་ཞེས་པ་རྫོགས་སོ།། །།དུར་ཁྲོད་གནས་ཀྱི་དཀྱིལ་འཁོར་དུ་
གཏོགས་པའི་ལེའུ་འདི་ལ་དོན་རྣམ་པ་བདུན་གྱིས་བཤད་དོ། །དེ་ལ་སྙིང་པོ་ཁྱད་པ་ཅན་བསྟན་པ་དང་། དཀྱིལ་འཁོར་གྱི་ཆོ་ག་དང་། མཆོད་པ་སྔར་བྱས་ནས་སློབ་མ་བཟུང་བ་ལ་སོགས་པའི་ལས་བྱ་བ་དང་། ལྷ་སླར་གཤེགས་སུ་གསོལ་བ་ལ་སོགས་པའི་ལས་བྱ་བ་དང་།
ཕྱག་རྒྱའི་མཚན་ཉིད་དང་། དཀྱིལ་འཁོར་དུ་དགོད་པའི་སྔགས་ཀྱི་ལེའུ་དང་། མཆོད་པའི་ཆོ་ག་རྣམས་ཀྱིས་བསྟན་ཏོ། །དེ་ལ་སྙིང་པོའི་ཁྱད་པར་བསྟན་པའི་ཕྱིར། འཇམ་པའི་དབྱངས་ཀྱི་ཁྲོ་བོ་ཡི། །ཞེས་གསུངས་ཏེ། འཇམ་པའི་དབྱངས་ཀྱི་ཁྲོ་བོ་ཡི། །ཞེས་པ་ཧཱུྃ་རིང་
པོ་འབྲུ་གཅིག་པོ་སྔར་བཤད་ཟིན་ཏེ་ཞེས་འཕྲོ་སྦྱོར་བའི་ཚིག་ཏུ་ཟད་དོ་ཞེས་པའོ། །དེ་ནས་གཞན་ཡང་དེ་ཡི་ནི། །ཞེས་པ་འཇམ་པའི་དབྱངས་དེའི་གཞན་ཡང་རྟོག་པ་བསྡུས་ཞེས་བྱ་བའི་དོན་ཏོ། །རྟོག་པ་བསྡུས་པ་རྒྱ་ཆེར་བཤད། །གཤིན་རྗེ་རབ་ཏུ་འཇོམས་པ་འདི། །ཞེས་
པ་རྩ་བའི་རྟོག་པ་ལས་གསུངས་པའི་དངོས་གྲུབ་དང་། ལས་རྣམས་ལེའུ་འདིར་མདོར་བསྡུས་ནས་ཡི་གེ་འབྲུ་གཅིག་པའི་སྒོ་ནས་རྒྱས་པར་བཤད་པའོ། །ཞལ་ནི་ཧཱུཾ་ཞེས་བྱ་བར་བཤད། །ཅེས་པ་ཞལ་དྲུག་པ་ལས་ཧཱུྃ་བྱུང་བས་ན་ཞལ་ཉིད་ཧཱུྃ་ཡིན་ཏེ་ཧཱུྃ་ཉིད་ཁྲོ་བོ་ཡིན་པར་བཤད་དོ། །

ཧཱུྃ་ཞེས་བྱ་བ་མཆོག་རིག་བྱ། །ཞེས་པ་ཧཱུྃ་དེ་ཉིད་ཁྲོ་བོ་ཡིན་པར་བཤད་པར་བྱའོ། །དེ་ཡི་དཀྱིལ་འཁོར་གཞན་ཡིན་ཏེ། །ཞེས་པ་འཇམ་དབྱངས་ཀྱི་ཁྲོ་བོ་དཀྱིལ་འཁོར་སྔར་གོང་དུ་བཤད་པ་ལས་གཞན་པའི་དཀྱིལ་འཁོར་འོག་ནས་འབྱུང་བ་ལ་བྱའོ། །འོག་ནས་འབྱུང་བའི་དཀྱིལ་འཁོར་
དེ་བྲིས་ནས་བསྒྲུབས་ན་དཀྱིལ་འཁོར་དེ་ལས་དངོས་གྲུབ་ཀུན་འགྲུབ་པར་ཤེས་པར་བྱའོ་ཞེས་པའི་དོན་ཏོ། །དུར་ཁྲོད་གནས་ཞེས་བྱ་བ་སྟེ་ཞེས་པ་དཀྱིལ་འཁོར་དེའི་ནང་དུ་དུར་ཁྲོད་གནས་པས་ན་ཡང་དུར་ཁྲོད་གནས་ཞེས་བྱ་སྟེ། དེ་ལྟར་དཀྱིལ་འཁོར་དེ་ལ་མིང་དེ་སྐད་ཅེས་བྱ་སྟེ།
མི་རོ་དེ་ཉིད་ལ་དུར་ཁྲོད་ཅེས་བྱ་བའི་ཕྱིར་ཞེས་བྱ་བའི་དོན་ཏོ། །དུར་ཁྲོད་གནས་པའི་གང་ཡིན་པའོ། །ཞེས་པ་དེ་ལ་དུར་ཁྲོད་གནས་ཞེས་ཅིའི་ཕྱིར་ཞེ་ན། མཎྜལ་གྱི་གནས་སུ་དུར་ཁྲོད་དུ་བྲིས་ན་ཡང་དུར་ཁྲོད་གནས་ཞེས་བྱ་བའི་དོན་ཏོ། །ཁྲུ་བརྒྱད་པ་ལ་སྒོ་བཞི་པ། །ཞེས་པ་ངོས་
བཞི་ངོས་གཅིག་གི་ཚད་ཅེས་པའོ། །ཡང་ན་གྲུ་བཞི་པ་ཡང་རུང་། །ཞེས་པ་ཕྱོགས་བཞིར་ཡང་ངོས་བཞི་པའི་ངོས་གཅིག་གི་ཚད་ཅེས་བྱའོ། །དུར་ཁྲོད་གནས་པ་བཟང་པོ་སྟེ། །ཞེས་པ་དཀྱིལ་འཁོར་ཉིད་ཀྱི་ཡོན་ཏན་ལ་བྱ་བའི་དོན་ཏོ། །དུར་ཁྲོད་ཐལ་བས་བྲི་བར་བྱ། །ཞེས་པ་
དཀྱིལ་འཁོར་དེ་ཡང་དུར་ཁྲོད་ཀྱི་ཐལ་བས་བྲི་བར་བྱའོ་ཞེས་པའོ། །དེ་ཡི་དབུས་སུ་ཡི་དགས་བྲི། །ཡི་དགས་ཕྲེང་བ་དག་གིས་བརྒྱན། །ཞེས་པ་དཀྱིལ་འཁོར་དེའི་དབུས་སུ་པདྨ་འདབ་མ་བརྒྱད་པ་གཅིག་ཐལ་བས་བྲིས་པ་དེའི་སྟེང་དུ་མི་རོ་གཅིག་བྲིའོ། །དཀྱིལ་འཁོར་དེའི་ནང་
རོལ་གྱི་ངོས་བཞིར་མི་རོ་གཉིས་གཉིས་ཙམ་བྲིའོ། །ཡི་དགས་འདི་དག་ཐམས་ཅད་ཀྱང་ཕྱག་རྒྱ་ཡིན་པས་ན་ཀུན་ཀྱང་པདྨའི་སྟེང་དུ་བཞག་གོ་ཞེས་པའི་དོན་ཏོ། །སྒོར་ནི་ཡི་དགས་རོ་སྨད་བཞག །ཅེས་སྒོ་བཞིར་མི་རོ་རེ་རེ་བྲི་བ་ནི་མགོ་མེད་པའི་རོ་ལ་བྱའོ། །མཐའ་མ་དག་ཏུ་
མགོ་བོ་བཞག །ཅེས་པ་དཀྱིལ་འཁོར་དེའི་ནང་རོལ་གྱི་ངོས་བཞིར་མི་རོ་གཉིས་གཉིས་ཙམ་བྲིས་པའི་བར་དུ་མིའི་མགོ་བོ་བྲི་བར་བྱའོ། །ཚུལ་དེ་ལྟར་འདྲི་ནུས་ན་ནི་སྔགས་པས་དེ་དག་ཐམས་ཅད་དུར་ཁྲོད་ཐལ་བས་བྲིའོ་ཞེས་པའི་དོན་ཏོ། །གྲྭ་བཞིར་ཤཱུ་ལ་བཞི་རྣམས་དང་། ཐོད་པ་

དག་ཀྱང་བྲི་བར་བྱ། །ཞེས་པ་འདིར་ཤཱུ་ལ་ཞེས་པ་ནི་ཏྲི་ཤཱུ་ལ་བྱའོ། །གྲྭ་བཞིར་ཤཱུ་ལ་རྩེ་གསུམ་པ་རེ་རེ་བཞི་ཡིས་ནང་རོལ་ནས་ཁ་ཕྱིར་བལྟས་པ་བྲི་སྟེ། ཤཱུ་ལ་རེ་རེའི་གློ་ཕ་རོལ་ཚུ་རོལ་དུ་ཐོད་པ་རེ་རེ་སྟེ་གཉིས་གཉིས་བྲིའོ། །དེ་ལྟར་ཤཱུ་ལ་བྲིས་པའི་ཚེ་རྩ་བ་
དག་ཏུ་ཐོད་པ་རེ་རེ་བཞི་བྲི་ཞེས་པ་ཁ་ཅིག་འཆད་དོ། །གལ་ཏེ་འདྲི་བར་མི་ནུས་ན། །མཁས་པས་དེ་དག་ཐལ་བས་བྲི། །ཞེས་པ་ལ་སོགས་པ་ཚུལ་དེ་ལྟར་རི་མོ་འདྲི་བར་མི་ནུས་ན་ས་གཞི་སྐྱང་ནུལ་གྱིས་བྱུགས་ཏེ། ས་བསྟར་བ་བཟང་པོ་ལ་ཙནྡན་དམར་པོའི་འདེ་གུས་བསྐུས་
ནས་ཐིག་ཙམ་བཏབ་ཀྱང་རུང་ངོ་། །དཀྱིལ་འཁོར་ཚད་ཀྱང་གོང་དུ་གསུངས་པ་དང་སྦྱར་ཞེས་པའོ། །དུར་ཁྲོད་གནས་སུ་དང་པོར་ནི། །ཞེས་པ་དཀྱིལ་འཁོར་དང་པོར་ཡི་དགས་ལ་སོགས་པའི་སྔགས་རྣམས་གནས་སུ་དགོད་པའོ། །སྔགས་པས་ཡི་གེ་དགོད་པར་བྱ། །
ཞེས་པ་ཡི་གེ་རྣམས་སོ་སོར་བཀོད་ཟིན་ནས་དཀྱིལ་འཁོར་དེར་ཁྲོ་བོའི་རྒྱལ་པོ་སྤྱན་དྲངས་ཏེ་མཆོད་པ་བྱའོ་ཞེས་པའི་ཐ་ཚིག་གོ། །འདི་མན་ཆད་མཆོད་པ་སྔར་བྱས་ནས་སློབ་མ་བཟུང་བ་ལ་སོགས་པའི་ལས་ཞེས་བྱ་བ་བཤད་དེ། འཇིགས་པའི་ཞལ་ནི་འབར་བ་དྲུག །ཅེས་
གསུངས་ཏེ། དེ་ཡང་ཁྲོ་བོའི་རྒྱལ་པོ་དེ་ནི་ཅི་འདྲ་བ་ཞིག་ཅེ་ན། དེ་བཞིན་ཞབས་ཀྱང་དྲུག་དང་ལྡན། །ཞེས་པ་ལ་སོགས་པ་བཞིན་ཞེས་པར་བྱའོ། །གཟིག་ལྤགས་ནི་སྨད་གཡོགས་ཞེས་སོ། །མཚོན་ཆ་བཟང་པོ་དུ་མ་བསྣམས། །ཞེས་པ་རི་མོ་འདྲི་བའི་སྐབས་འོག་ནས་
ཀྱང་འབྱུང་ངོ་ཞེས་པའོ། །ཡི་དགས་སྟེང་དུ་མཆོད་པ་བྱ། །ཞེས་པ་དེ་ལྟ་བུའི་ལྷ་དེ་དཀྱིལ་འཁོར་གྱི་དབུས་སུ་མི་རོ་བྲིས་པའི་སྟེང་དུ་སྤྱན་དྲངས་ཏེ་མཆོད་པ་བྱའོ་ཞེས་པའི་དོན་ཏོ། །འོ་མའི་འབྲས་ཐུག་གཏོར་མར་དབུལ། །ཞེས་པ་ལྷ་བཤོས་དབུལ་བའི་དོན་ཏོ། །མར་མེ་དག་
ནི་མར་ལས་བྱ། །ཞེས་པ་མར་མེ་བརྒྱད་དང་བཅུ་དྲུག་ཏུ་སྦྱར་ཞེས་པའོ། །ས་བོན་ཡི་གེ་གཅིག་པ་འདི། །ཞེས་པ། ཨོཾ་ཨཱཿཧཱུྃ་སྭཱ་ཧཱ། ཞེས་བཟླས་པར་རིགས་སོ་ཞེས་ཁ་ཅིག་འཆད་དོ། །དེ་ནས་སྟོང་དུ་བཟླས་པ་བྱ། །དེ་ཡི་འོག་ཏུ་མཁས་པ་ཡིས། །ཞེས་པ་དེ་ལྟར་སྔར་

མཆོད་པ་དང་། བཟླས་བརྗོད་བྱས་ནས་དེའི་འོག་ཏུ་སྔགས་པས་དཀྱིལ་འཁོར་དུ་སློབ་མ་གཟུང་བར་བྱའོ་ཞེས་པའོ། །དུར་ཁྲོད་གནས་སུ་ཞེས་པ་དཀྱིལ་འཁོར་གྱི་མིང་ཞེས་པའོ། །ཧཱུྃ་གི་ཞལ་ནི་ཟློས་ཤིང་གཟུང་། །ཅེས་པ་དཀྱིལ་འཁོར་དུ་མེ་ཏོག་གཏོར་བའི་སྔགས་ཀྱང་འདི་ཉིད་
དོ། །སློབ་དཔོན་གྱིས་ཧཱུྃ་ཞེས་བྱ་བ་བཟླས་ཤིང་སློབ་མ་གཟུང་བར་བྱ་ཞེས་པའི་དོན་ཏོ། །བཙུད་ནས་དེ་ཡི་སྙིང་གར་ནི། །ཞེས་པ་སློབ་མ་དཀྱིལ་འཁོར་དུ་བཙུད་ནས་དེའི་འོག་ཏུ་སློབ་མའི་སྙིང་གར་སྙིང་པོ་ཧཱུྃ་ཞེས་པ་བསམས་ལ་ལྷའི་སྐུར་བསྒྱུར་ཏེ། ཧཱུྃ་ཞེས་པ་གཞག་པར་བྱ་
ཞེས་པའི་དོན་ཏོ། །དེ་ནས་ཤཱུ་ལའམ་ཕྱག་རྒྱ་ནི། །རས་ཀྱིས་གཡོགས་ཏེ་བཅིང་བར་བྱ། །ཞེས་པ་ཤཱུ་ལའི་ཕྱག་རྒྱ་ནི་བདག་གིས་ཀྱང་བཅིང་། སློབ་མས་ཀྱང་འཆིང་དུ་གཞུག་གོ། །མེ་ཏོག་དཀྱིལ་འཁོར་དུ་དོར་དུ་གཞུག་གོ། །འདི་ནི་དཀྱིལ་འཁོར་དུ་གཞུག་པའི་ཕྱག་རྒྱའོ། །ཕྱག་
རྒྱ་འདི་བཅིང་བའི་ཚེ་གཞན་གྱིས་མ་མཐོང་བར་རས་ཀྱིས་གཡོགས་ལ་ཕྱག་རྒྱ་བཅིང་བར་བྱའོ་ཞེས་པའི་ཐ་ཚིག་གོ། །སློབ་མ་དག་ལ་ལེགས་བསྟན་ན། །དེ་ཡང་མཆོད་པ་བྱེད་དུ་གཞུག །ཅེས་པ་དེ་ནས་གདོང་གི་རས་ཕྱེ་ལ་དཀྱིལ་འཁོར་བསྟན་ནས་སློབ་མ་དེ་དཀྱིལ་འཁོར་ལ་
མཆོད་པ་བྱེད་དུ་གཞུག་གོ་ཞེས་བྱ་བའི་དོན་ཏོ། །དེ་ནས་གཤིན་རྗེ་རབ་འཇོམས་པའི། །ཞེས་པ་ལ་སོགས་པ་དེ་ནས་དེའི་འོག་ཏུ་སློབ་མ་དེ་ལ་དབང་རྣམ་པ་བཞི་ལས་རིག་པའི་དབང་བསྐུར་བར་བྱའོ། །དབང་བསྐུར་བའི་བུམ་པ་ལ་ཡང་སྙིང་པོ་འབྲུ་གཅིག་པ་བཟླས་སོ། །དེ་ཡི་གེ་
འབྲུ་གསུམ་སྦྱིན་པ་བཟླས་སོ་ཞེས་པ། ཨོཾ་ཨཱཿཧཱུྃ་ཞེས་བྱ་བའི་ཡི་གེ་འབྲུ་གཅིག་པོ་སློབ་མ་ལ་ཚུལ་བཞིན་དུ་སྦྱིན་པར་བྱ་བའི་རིག་པའི་དབང་བསྐུར་བར་བྱའོ་ཞེས་པའི་ཐ་ཚིག་གོ། །འདི་མན་ཆད་ནི་ལྷ་སླར་གཤེགས་སུ་གསོལ་བ་ལ་སོགས་པའི་ལས་བཤད་དེ། དེ་ནས་
མཆོད་པ་ཡང་བྱས་ནས་ཞེས་པ་ནས་བསྟན་ཏེ། དེ་ནས་མཆོད་པ་ཡང་བྱས་ནས། །ཞེས་པ་ལ་སོགས་པ་དེ་ནས་ཡང་དཀྱིལ་འཁོར་དུ་མཆོད་པ་བྱས་ནས་ཁྲོ་བོ་སླར་གཤེགས་སུ་གསོལ་ལོ། །ཤཱུ་ལའི་ཕྱག་རྒྱ་བཅིངས་ནས་སུ། །དེ་བཞིན་རྟག་པར་གཤེགས་སུ་གསོལ། །ཞེས་

པ་དེ་ལྟར་གཤེགས་སུ་གསོལ་བ་དང་ཐབས་གང་གིས་གཤེགས་སུ་གསོལ་ཞེ་ན། ཤཱུ་ལའི་ཕྱག་རྒྱ་བཅིངས་ནས་མཐེ་བོང་ཕྱིར་བསྐྱེད་པས་སླར་གཤེགས་སུ་གསོལ། །ཁྲོ་བོ་སྤྱན་དྲངས་པ་ཡང་ཤཱུ་ལའི་ཕྱག་རྒྱ་བཅིངས་ཏེ། མཐེ་བོང་གཉིས་ནང་དུ་གཡབ་
ཅིང་སྔགས་དང་ལྡན་པས་སྤྱན་དྲང་བར་བྱའོ་ཞེས་པའི་དོན་ཏོ། །ཁྲོ་བོ་སྤྱན་དྲངས་པ་དག་ཀྱང་། ཤཱུ་ལའི་ཕྱག་རྒྱ་ལྡན་པར་བྱ། །ཞེས་པ་ཁྲོ་བོ་སྤྱན་དྲངས་པ་དང་སླར་གཤེགས་སུ་གསོལ་བའི་མཛུབ་མོ་གཉིས་ནང་དུ་གཡབ་པར་འོས་ཏེ་དེ་ལྟར་བྱ་བ་ཡང་ཤཱུ་ལའི་ཕྱག་རྒྱ་བཅིངས་ཏེ་བྱའོ་ཞེས་ཁ་ཅིག་
འཆད་དོ། །འདི་མན་ཆད་ཕྱག་རྒྱའི་མཚན་ཉིད་བཤད་དོ། །དཀོན་མཆོག་གསུམ་ལ་ཕྱག་བཙལ་ནས། །ཞེས་པ་ཐོག་མར་ལག་པ་གཉིས་ཐལ་མོ་སྦྱར་ཏེ་དཔྲལ་བར་བཞག་ལ། ཨོཾ་ན་མོ་བུདྡྷ་དྷརྨ་སཾ་གྷེ་བྷྱཿཞེས་པ་བརྗོད་ནས་དེའི་འོག་ཏུ་ཤཱུ་ལའི་ཕྱག་རྒྱ་བཅིང་བར་བྱའོ། །དེ་ནི་
དམ་ཚིག་སྔར་བྱས་ནས་གདོང་ཕྱག་རྒྱ་བཅིང་ཞེས་བྱ་བའི་དོན་ཏོ། །འདི་མན་ཆད་ནི་ཕྱག་རྒྱའི་མཚན་ཉིད་ཅེས་བྱ་བ་བཤད་དོ། །ཤཱུ་ལ་རབ་ཏུ་བསྟན་པར་བྱ། །ཞེས་པ་ནས་བསྟན་ཏེ། མཁས་པས་ཞེས་པ་སྔགས་པས་ཞེས་པའོ། །སོར་མོ་ཕན་ཚུན་བསྣོལ་ནས་སུ། །ཞེས་
པ་ལག་པའི་རྒྱབ་ཏུ་བསྣོལ་ཞེས་པའོ། །གུང་མོར་སོར་མོ་མཆོག་གཉིས་ནི། །ཞེས་པ་རྩེ་སྤྲད་དེ་བསྒྲེང་བ་དབུས་ནས་གྱེན་དུ་བསྒྲེང་སྟེ་བཞག་ཅེས་པའི་དོན་ཏོ། །སྲིན་ལག་གཉིས་ནི་ནང་དུ་བཞག །མཛུབ་མོ་གཉིས་ཀྱི་དྲུང་དུ་བཞག །ཅེས་པ་སྲིན་ལག་གཉིས་ནང་དུ་བཞག་
པ་ཡང་མཛུབ་མོ་དང་གུང་མོ་གཉིས་ཀྱི་བར་བར་དུ་བཞག་པའི་སྐད་དུ་ཁ་ཅིག་གིས་གསུངས་སོ། །བསྣོལ་མར་ནང་དུ་བཅུག་སྟེ་ཕ་རོལ་ཚུ་རོལ་རྩ་བ་ལ་གཏང་ལ་བཞག་གོ། །དེ་ལྟར་དེ་གཉིས་བསྒྲེང་ནས་སུ། །ཞེས་པ་མཛུབ་མོ་གཉིས་ཀྱང་གུང་མོ་བསྒྲེང་བའི་སོ་སོའི་ངོས་ལ་སྦྱར་བ་ལ་
ཡང་བསྒྲེང་ངོ་ཞེས་པའོ། །ལྷག་མ་རྣམས་ནི་ངེས་པར་སྦ། །ཞེས་པ་མཐེ་བོ་མཐེའུ་ཆུང་གཉིས་ཀྱང་བསྣོལ་མར་ནང་དུ་གཞུག་གོ། །འདི་ཡི་ལས་རྣམས་ཐམས་ཅད་ནི། །ཞེས་པ་ཕྱག་རྒྱ་འདིས་བདག་བསྲུང་བ་དང་། གཞན་བསྲུང་བ་ལ་སོགས་པའི་ལས་ཐམས་ཅད་བྱ་བའི་ཐ་ཚིག་གོ། །འདི་

མན་ཆད་ནི་དཀྱིལ་འཁོར་དུ་དགོད་པའི་སྔགས་ཀྱི་ལེའུ་བཤད་དེ། །དེ་ནས་གཞན་ཡང་བཤད་པ་བཞིན། །ཞེས་པ་ནས་བསྟན་ཏེ། ཨོཾ་ཧཱུྃ་ལཾ་ལཾ་ཧ་ཞེས་པ་དཀྱིལ་འཁོར་གྱི་ནང་གི་ཕྱོགས་བཞིར་ཡི་དགས་དགོད་པའི་སྔགས་སོ། །ཨོཾ་ཧཱུྃ་དྲིང་ཛ་ཞེས་པ་སྒོ་བཞི་ན་ཡི་དགས་
ཀྱི་རོ་སྨད་ཡོད་པའི་སྔགས་སོ། །ཨོཾ་ཧཱུྃ་ཧ་ཞེས་པ་དཀྱིལ་འཁོར་གྱི་ནང་གི་ཕྱོགས་བཞིར་ཡི་དགས་ཕྲེང་བ་བཀོད་པའི་བར་བར་དུ་མགོ་བཞག་པའི་སྔགས་སོ། །ཨོཾ་ཧཱུྃ་ཧྲཱིཿཥྚྲིར་ཁ་ཤཱུ་ལ་བཞི་ཆར་གྱིའོ་ཞེས་པ་དཀྱིལ་འཁོར་མཐའ་བཞིར་ཏྲི་ཤཱུ་ལ་བཞི་བཞག་པའི་སྔགས་སོ། །
ཨོཾ་ཧཱུྃ་ཏྲི་ཧ་ཞེས་ཏྲི་ཤཱུ་ལའི་རྩ་བའི་གྲྭ་བཞིར་ཐོད་པ་བཞི་བྲི་བའི་སྔགས་སོ། །ཏྲི་ཤཱུ་ལའི་གཡས་གཡོན་དུ་ཐོད་པ་རེ་རེ་གཉིས་གཉིས་བཞག་པ་རྣམས་ཀྱི་སྔགས་སོ། །ལྷོ་ཕྱོགས་ཀྱི་ནི་སྒོ་ཕྱེ་ནས། །ལྷག་མ་གཞན་ནི་གཅད་པར་བྱ། །ཞེས་པ་ལྷོ་ཕྱོགས་སྒོ་ནི་ཕྱེ་སྟེ། །སྒོ་ལྷག་
མ་གསུམ་ནི་བཅད་དོ། །དུར་ཁྲོད་ཅེས་པ་དཀྱིལ་འཁོར་ལ་ཡང་བྱའོ། །རྟག་ཏུ་བྲི་བའི་སྔགས་ཞེས་པའོ། །སྔགས་འདི་རྣམས་ཀྱིས་རབ་སྦྱར་ན། །ཞེས་པ་སྔགས་དེ་རྣམས་ཀྱིས་དཀྱིལ་འཁོར་དེར་སྦྱར་ནས། དུར་ཁྲོད་ཀྱི་ནི་གནས་སུ་འགྱུར། །ཞེས་པ་སྔར་བཤད་པ་བཞིན་
དུ་དུར་ཁྲོད་ཀྱི་གནས་ཀྱི་དཀྱིལ་འཁོར་དུ་འགྱུར་རོ་ཞེས་པའི་དོན་ཏོ། །ཙནྡན་དམར་པོས་བསྐུས་པ་ཡི། །ཞེས་པ་ཡང་ན་ཙནྡན་དམར་པོས་བསྐུས་པའི་ས་གཞི་ཁྲུ་གང་ཙམ་གྱི་ཚད་དུ་དཀྱིལ་འཁོར་བྲིས་ཀྱང་རུང་ཞེས་པའི་དོན་ཏོ། །ས་གཞི་ཁྲུ་གང་ཙམ་ལ་ནི། །ཞེས་པ་ངོས་གཅིག་
ཚད་དུ་བྱ་ཞེས་པའོ། །དཀྱིལ་འཁོར་གྱི་ཚད་དང་གནས་ནི་ཇི་ལྟ་བུར་ཡང་གང་ཡང་རུང་ཞེས་པའི་དོན་ཏོ། །དཀྱིལ་འཁོར་དག་ནི་བྲིས་ནས་སུ། །དེ་ནས་ཆོ་ག་ཞེས་པ་ཡིས། །ཞེས་པ་དེ་ལྟར་དཀྱིལ་འཁོར་བྲིས་པ་ནས་དེའི་འོག་ཏུ་ལྷ་སྤྱན་དྲངས་པ་ལ་སོགས་པ་བྱའོ་ཞེས་པའི་ཐ་
ཚིག་གོ། །འདི་མན་ཆད་ནི་མཆོད་པའི་ཆོ་ག་ཞེས་བྱ་བ་བཤད་དེ། སྔགས་ཀྱི་མཆོད་པ་རིམ་བཞིན་བཤད། །ཅེས་པ་འོག་ནས་འབྱུང་བ་བཞིན་བྱ་ཞེས་པའོ། །སྤྱན་དྲངས་པའོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་ལྷ་སྤྱན་དྲངས་པའོ། །ཨོཾ་ཧཱུྃ་སྭཱ་ཧཱ་ཞེས་པ། ཨོཾ་ཧཱུཾ་སྭཱ་ཧཱ་ཞེས་

བཟླས་སོ། །སྭཱ་ཧཱ་ནི་ཞི་བ་དང་། རྒྱས་པ་ལ་སྦྱར་བར་ཟད་ཅེས་ཁ་ཅིག་ཀྱང་འཆད་དེ། སྔགས་འདིས་ཁྲོ་བོ་བཞུགས་སུ་གསོལ་ལོ། །ཁྲོ་བོ་ཉིད་ཀྱི་སྙིང་པོ་འབྲུ་གཅིག་པའི་སྔགས་ཡིན་ཏེ། བཟླས་པའི་ཚེ་འདི་བཞིན་དུ་བཟླས་སོ། །གོང་མའི་ལེའུ་ལས་ཡང་ཚུལ་
འདི་བཞིན་དུ་བཟླས་སོ། །ཁྱད་པར་དུ་ནི་ཧཱུྃ་རིང་ཐུང་ཙམ་ཞིག་ཡོད་དོ་ཞེས་པའི་དོན་ཏོ། །ཁྲོ་བོ་རྣམ་པར་རྒྱལ་བའི་འཇམ་དཔལ་གྱི་རྩ་བའི་རྟོག་པ་ཕྱི་མའི་ཕྱི་མ་ལས་ཞེས་པ་དུར་ཁྲོད་གནས་ཀྱི་དཀྱིལ་འཁོར་འདིར་སྔགས་ཀྱི་ལེའུ་སྔགས་བཤད་པ་རྣམས་ཡི་དགས་ཕལ་པོ་ཆེའི་དཀྱིལ་
འཁོར་དུ་སྔགས་མ་གསུངས་པ་རྣམས་སམ་དེར་མ་ཚང་བ་རྣམས་ཀྱང་སྔགས་འདི་རྣམས་ཀྱིས་སྦྱར་བར་བྱའོ། །བསྒོམ་པའི་ཡན་ལག་གང་དུ་ཡང་སྔགས་དགོས་པ་རྣམས་ཀྱང་ལེའུ་ལྟག་འོག་ཏུ་དེ་བཞིན་དུ་སྦྱར་རོ་ཞེས་པའི་དོན་ཏོ། །རྟོག་པ་སྟེ་དང་པོའོ་ཞེས་པ་དུར་ཁྲོད་གནས་
ཀྱི་དཀྱིལ་འཁོར་གནས་སུ་གཏོགས་པའི་ནང་ནས་ལེའུ་འདི་དང་པོའོ་ཞེས་བྱ་བའི་དོན་ཏོ།། །།སྐུ་གཟུགས་དེའི་སྤྱན་སྔར་ཇི་སྐད་གསུངས་པའི་བཟླས་པའི་ཆོ་གའི་ལས་རྣམས་ཀྱི་བཟླས་བརྗོད་བྱའོ་ཞེས་བྱ་བའི་ཐ་ཚིག་གོ། །དུར་ཁྲོད་གནས་ཀྱི་དཀྱིལ་འཁོར་དུ་གཏོགས་པའི་རི་མོའི་
སྐུ་གཟུགས་ཀྱི་མཚན་ཉིད་བཤད་པའི་ལེའུ་འདི་ལ་དོན་རྣམ་པ་གསུམ་གྱིས་བསྟན་ཏེ། རི་མོའི་སྐུ་གཟུགས་ཀྱི་མཚན་ཉིད་དང་། བཟླས་བརྗོད་བྱ་བའི་མཚན་ཉིད་དང་སྔགས་རྣམས་བསྟན་པའོ། །དེ་ལ་དང་པོར་རི་མོའི་སྐུ་གཟུགས་ཀྱི་མཚན་ཉིད་བཤད་པའི་ཕྱིར། དེ་ནས་འདི་ནི་རི་
མོའི་མཆོག །ཅེས་བྱ་བ་ལ་སོགས་པ་སྨོས་སོ། །བཟླས་པའི་ལས་ནི་རབ་ཏུ་བྱ། །ཞེས་བྱ་བ་ལ་དེ་ལྟར་སྐུ་གཟུགས་བྲིས་ནས་དེ་ནས་ཞེས་པ། ཁྲོ་བོ་འདི་ཡི་མཆོག་ཏུ་འགྱུར། །ཞེས་པའོ། །རས་ཕྲན་ཁྲུ་གང་ཙམ་དུ་ནི། །ཞེས་པ་ཆེད་དུ་བཏགས་པའོ། །བཟང་པོ་སར་པ་
བཀྲུས་པ་ལ། །ཞེས་པ་ཐག་ཐུག་ཅན་མ་ཡིན་པར་ཕྲ་མོར་བྱས་པའི་དོན་ཏོ། །ན་བཟར་གསོལ་ཞེས་པ་སྨད་གཡོགས་བྱས་པའོ། །ཚུལ་བཞིན་ཡི་དགས་སྟེང་དུ་བཞུགས། །ཞེས་པ་གཡོན་བརྐྱང་པའི་ཚུལ་དུ་བཞུགས་པའོ། །ཤཱུ་ལ་རལ་གྲི་འཁོར་ལོ་དང་། །དགྲ་སྟྭ་མཆོག་

སྦྱིན་པ་ཡི་ཕྱག །ཅེས་པ་འདིའི་སྐབས་སུ་ཤཱུ་ལ་ཞེས་བྱ་བ་ནི་ཏྲི་ཤཱུ་ལ་ལ་བྱ་སྟེ་རྩེ་གསུམ་ལ་དྲང་པོར་འདུག་པའོ། །ཁ་ཅིག་གིས་རྩེ་གསུམ་ལ་ཁ་གདེངས་པོར་འདུག་པ་ཡིན་ཞེས་བཤད་དོ། །ལྕགས་མདའ་བེ་ཅོན་རྡོ་རྗེ་དང་། །ཞེས་པ་ནང་ཡང་ཞེས་བྱ་སྟེ་ལྕགས་དང་ཤིང་ལས་ཕྱེད་
ཕྱེད་བའི་མདའ་བྱས་ཏེ། འདི་ནི་མི་ལས་བྱའོ། །མདའ་དང་མདེའུ་ལྕགས་དང་སྒྲོ་ཡན་ཆད་ཀུན་ལྕགས་ལས་བྱས་པའོ། །འགའ་འང་ཞགས་པ་ཞེས་པ་དབྱུག་ཏོའམ་ཐོ་བ་ལ་ཡང་བྱའོ་ཞེས་པའོ། །ཤཀྟི་ཞེས་པ་མདུང་ཐུང་ཞེས་པའོ། །བ་ཏི་ས་དང་དེ་བཞིན་སྡིགས། །ཞེས་པ་ལ་
གཅིག་ནི་རྩེ་གདེངས་པོར་ཡིན་པར་བཤད་དོ། །ཁ་ཅིག་ནི་བྲེ་བའི་སོ་འདྲ་བ་རྩེ་གསུམ་དྲང་པོར་འདུག་པ་ཡིན་ནོ་ཞེས་འཆད་དོ། །བུང་བ་ཞེས་པ་སྔོན་པོ་བྲིས་ནས་དེ་ཡང་སྦ་ཞེས་པ་གནས་དབེན་པར་བཞག་པའི་དོན་ཏོ། །འདི་མན་ཆད་བཟླས་བརྗོད་བྱ་བའི་ཆོ་ག་བཤད་དེ། ཡིད་དུ་འོང་བའི་
གནས་དག་ཏུ། །ཞེས་པ་ལ་སོགས་པ་སྨོས་སོ། །བཞག་ནས་བཟླས་པ་དག་ཀྱང་བྱ། །ཞེས་པ་རི་མོའི་སྐུ་གཟུགས་དེ་ཡང་། གནས་ཡིད་དུ་འོང་བའི་གནས་དབེན་པར་བཞག་ནས་བཟླས་བརྗོད་བྱའོ་ཞེས་པའོ། །བཟླས་པའི་ཆོ་ག་འདིར་བཤད་དོ། །ཞེས་པ་ཁྲུས་ལ་སོགས་པ་
ཡང་བཟླས་པའི་ཡན་ལག་ཏུ་གཏོགས་པའི་ཕྱིར་ཞེས་པའི་དོན་ཏོ། །རིག་པ་འཛིན་པའི་སྔགས་པས་རྟག་པ་རུ་ཁྲུས་བྱའོ། །འབར་བའི་སྔགས་ཀྱིས་ཁྲུས་བྱའོ། །ཞེས་པ་མཐུ་ཆེ་བ་གཟི་བརྗིད་ཅན་གྱིས་ཁྲུས་བྱས་ཏེ། སྔགས་ཉིད་འོག་ནས་འབྱུང་ངོ་ཞེས་པའོ། །བདུད་རྩི་འབྱུང་བའི་
སྔགས་ཀྱིས་ནི། །ཞེས་འོག་ནས་འབྱུང་བ་ཞེས་པའོ། །ཐོག་མར་ཁ་ནི་བཀྲུས་ནས་སུ། །ཞེས་པ་ཁྲུས་བྱས་པའི་འོག་ཏུ་ཉེ་རེག་གི་ཕྱག་རྒྱ་དང་ལྡན་པའི་ཚུལ་བཞིན་དུ་ཁ་བཀྲུའོ། །དེའི་འོག་ཏུ་ཤཱུ་ལའི་ཕྱག་རྒྱ་དང་ལྡན་པའི་ཚུལ་བཞིན་དུ་བསྲུང་ཞེས་པའོ། །དེ་ནས་བསྲུང་བ་ལེགས་
པར་བྱ། །ཞེས་པ་དེའི་འོག་ཏུ་ཤཱུ་ལའི་ཕྱག་རྒྱ་དང་ལྡན་པས་བསྲུང་བར་བྱ་བའི་སྔགས་ཀྱང་འོག་ནས་འབྱུང་ངོ་། །དེ་ཡི་འོག་ཏུ་ཆོ་ག་བཞིན། །ཞེས་པ་དེའི་འོག་ཏུ་འཛབ་སར་འགྲོ་བར་བྱས་ཏེ། དེའི་སྔགས་ཀྱང་འོག་ནས་འབྱུང་ངོ་། །མཁས་པས་ཁྲོ་བོའི་ཁང་པར་འཇུག །

ཅེས་པའི་དོན་ཏོ། །ཞུགས་ནས་ཀུ་ཤའི་ལས་བྱའོ། །ཞེས་པ་འཛབ་སའི་ཁང་པའི་ནང་དུ་ཞུགས་ནས། སྟན་བཟང་དེ་ལ་སྔགས་པ་འདུག་ནས་སུ། །ཞེས་པའི་དོན་ཏོ། །དེ་ནས་ཆོ་ག་སྔོན་གསུངས་པ། །ཞེས་པ་གོང་དུ་བཤད་པའི་མཆོད་པའི་ཡོ་བྱད་རྣམས་ཀྱིས་མཆོད་
པར་བྱའོ། །སྔགས་པའི་ལག་པ་གཉིས་ནི་ཙནྡན་དྲིས་བསྐུས་པས་ཞེས་པའི་དོན་ཏོ། །སྔགས་ཀྱི་ནོར་བུ་བླངས་ནས་སུ། །ཉེས་པའི་སྐྱོན་རྣམས་སྦྱང་བའི་ཕྱིར། །ཞེས་པ་སྔགས་ཀྱི་ནོར་བུ་བླངས་པའི་སྔགས་འོག་ནས་འབྱུང་བ་བརྗོད་ཅིང་སྔགས་ཀྱི་ནོར་བུ་བླང་ངོ་། །ནོར་བུའི་སྐྱོན་སྦྱང་ཞེས་པའི་དོན་
ཏོ། །ཁྲོ་བོ་བདུད་རྩི་ལན་གསུམ་བཟླས། །ཞེས་པ་ཁྱོར་བའི་ནང་དུ་བཅུག་སྟེ་བཟླས་པའི་སྔགས་འོག་ནས་འབྱུང་ངོ་ཞེས་པའི་དོན་ཏོ། །མངོན་པར་ཕྱོགས་འདུག་བཟླས་པར་བྱ། །ཞེས་པ་སྔགས་པས་བཟླས་ཞེས་པའོ། །སེམས་རབ་དང་ཞིང་རྩེ་གཅིག་ཡིད། །སེམས་མི་གཡེང་བར་བྱ་བའི་
དོན་ཏོ། །ཡིད་ནི་མི་སྐྱོ་བར་དུ་བྱ། །ཞེས་པ་དུས་གསུམ་དུ་བཟླས་པ་དེ་ཡིད་ལ་སྐྱོ་བའི་མཚམས་ཀྱིས་བཟུང་སྟེ་བཟླས་པར་བྱའོ་ཞེས་པའི་དོན་ཏོ། །བཟླས་པའི་མཐར་ཞེས་པ་བཟླས་བརྗོད་ཟིན་པའི་མཐར་ཁྲོ་བོ་སླར་གཤེགས་སུ་གསོལ་ལོ། །ཤཱུ་ལའི་རྒྱ་བཅིངས་གཤེགས་སུ་
གསོལ། །ཞེས་པ་ཤཱུ་ལའི་ཕྱག་རྒྱ་དང་སླར་གཤེགས་སུ་གསོལ་བའི་སྔགས་རྣམས་སྦྱར་ཏེ་སླར་གཤེགས་སུ་གསོལ་ལོ། །དེ་ལྟར་ལེགས་པར་ཉིན་རེ་ཞིང་། །ཡི་གེ་གཉིས་པའི་སྔགས་འདི་ནི། །རྣམ་པ་ཀུན་དུ་ཆོ་ག་བཞིན། །ཞེས་པ་གོང་དུ་བཤད་པ་དེ་ལྟར་ལེགས་པར་ཉིན་རེ་
བཞིན་དུས་གསུམ་དུ་ཡི་གེ་གཅིག་པའི་སྔགས་འདི་བཟླས་པའི་དུས་ཐམས་ཅད་དུ་ཆོ་ག་བཞིན་དུ་བཟླས་པར་བྱའོ། །གང་ཞིག་བྱེ་བ་གཅིག་ཟློས་པ། །ཞེས་པ་འབུམ་ཕྲག་བརྒྱར་བཟླས་པ་བྱའོ། །དེ་ཡི་དངོས་གྲུབ་དམ་པ་ཐོབ། །ཅེས་པ་དེ་ལྟར་སྔགས་བཟླས་པ་བྱས་ནས་དེའི་འོག་ཏུ་
བསྒྲུབས་ན་དངོས་གྲུབ་མཆོག་འཐོབ་བོ་ཞེས་པའི་ཐ་ཚིག་གོ། །འདི་མན་ཆད་ནི་སྔགས་རྣམས་བསྟན་ཏེ། དེ་ནས་གཞན་ཡང་ཅི་བསྟན་པ། །ཞེས་པ་ལ་སོགས་པ་ཁྲོ་བོ་ཆེན་པོ་ཉིད་ཀྱིས་གསུངས་པའི་རྒྱུད་ཆེན་པོ་ལས་ཇི་སྐད་བསྟེན་པའི་སྔགས་རྣམས་བསྒྲུབ་ལ་ཕན་པའི་ཕྱིར་བཤད་དོ། །

ཨོཾ་ཧཱུྃ་དི་བ་ཏ་ཏེ་ཙ་སྭཱ་ཧཱ་ཞེས་པ་ཁྲུས་བྱེད་པའི་ཚེ་ཆུ་ལ་གདབ་པ་དང་། ས་ལ་གདབ་པ་དང་། སྔགས་ཀྱི་ཆུས་ལུས་ལ་གཏོར་བར་བྱ་བའི་སྔགས་སོ། །ཨོཾ་ཧཱུྃ་ཨ་མྲྀ་ཏ་སྲ་བ་བཱ་མ་བ་ཞེས་ཉེ་རེག་གི་ཕྱག་རྒྱ་སྦྱར་ཏེ། ཁར་ལན་གསུམ་དུ་སྦྱར་ཏེ། ཁར་ལན་གསུམ་དུ་ཆུ་བཏུང་བ་དང་།
ཁ་ལན་གསུམ་དུ་ཕྱི་བའི་སྔགས་སོ། །ཨོཾ་ཧཱུྃ་སརྦ་ཏོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་བདག་ཉིད་བསྲུང་ངོ་། །ཨོཾ་ནཱ་མ་སརྦ་ཏ་ཐཱ་ག་ཏོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་ཁྲུས་བྱ་བའི་ཚེ་དང་། བསྲུང་བའི་ཚེ་མཚམས་བཅད་པའི་སྔགས་སོ། །ར་བའི་སྔགས་སོ། །ཞེས་པ་རྡོ་རྗེ་
འབར་བ་བསམ་ཞེས་པའི་དོན་ཏོ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་གནས་ལྔར་གཏུག་ཅིང་བདག་བསྲུང་དང་ཕ་རོལ་ཡང་བསྲུང་བའི་སྔགས་སོ། །ཨོཾ་ཧཱུྃ་སི་ཏི་ཀཱ་ལ་མ་ཐ་ན་ཕཊ། ཅེས་པ་འཛབ་སར་ནང་དུ་འགྲོ་བའི་ཚེ་སྔགས་འདི་ཟློས་ཤིང་འགྲོ་བར་བྱའོ། །
སྔགས་འདི་ཆུ་ལ་ཟློས་ཤིང་ཆུར་གཏོར་ཞིང་འགྲོ་བར་བྱའོ་ཞེས་པའི་དོན་ཏོ། །ཨོཾ་ཧཱུྃ་རཀྵ་རཀྵ་མན་སྭཱ་ཧཱ་ཞེས་པ་བདག་ཉིད་ཀྱི་སྟན་ལ་གདབ་པའི་སྔགས་སོ། །ཨོཾ་ཧཱུྃ་སིདྡྷི་དྷ་ཧཱུྃ་ཛ་ཛ་ཞེས་པ་སྔགས་འདི་བཟླས་ཤིང་སྔགས་ཀྱི་ནོར་བུ་བླང་ངོ་ཞེས་སོ། །ཨོཾ་ཧཱུྃ་ཀྲོ་ཏ་ཨ་མྲི་ཏ་ཞེས་
པ་སྙིམ་པ་བསྣོལ་བའི་ནང་དུ་ནོར་བུ་བཅུག་སྟེ། སྔགས་འདི་བཟླས་སོ། །བཟླས་པའི་ཆོ་གར་གཏོགས་པ་སྟེ། །ཞེས་པ་དུར་ཁྲོད་གནས་ཀྱི་དཀྱིལ་འཁོར་ལེའུར་གཏོགས་པ་ལས་གཉིས་པའོ།། །།བརྟུལ་ཞུགས་སུ་གཏོགས་པའི་ལེའུར་འདི་ལ་དོན་རྣམ་པ་
བཞིས་བསྟན་ཏེ། དེ་ལ་སྔོན་དུ་བསྙེན་པ་བྱས་ནས་བརྟུལ་ཞུགས་སྤྱོད་པ་དང་། བརྟུལ་ཞུགས་མ་ནུས་ན་སྔོན་དུ་བསྙེན་པ་ལྷག་པར་བྱས་ཏེ་བསྒྲུབ་པ་དང་། སྤྱིར་བསྟན་པ་དང་། དངོས་གྲུབ་མཆོག་དང་འབྲིང་མི་འདོད་ན་དངོས་གྲུབ་ཕལ་བསྒྲུབ་པ་བསྟན་པའོ། །དེ་ལ་དང་པོར་སྔོན་དུ་
བསྙེན་པ་བྱས་ནས་བརྟུལ་ཞུགས་སྤྱད་པ་ཞེས་བྱ་བ་བཤད་པའོ། །འདི་ཡི་སྔོན་དུ་བསྙེན་པ་ནི། །བྱེ་བ་གཅིག་ཏུ་ངེས་པར་བཤད། །ཅེས་ཁྲོ་བོའི་རྒྱལ་པོ་འདིའི་སྔོན་དུ་བསྙེན་པ་བྱ་བ་ནི་སྔར་བཤད་པ་བཞིན་དུ་འབུམ་ཕྲག་བརྒྱ་བྱའོ། །ཁྲོ་བོ་བརྟུལ་ཞུགས་ཕྱིས་སྤྱོད་པ་ན་ཞེས་

པ་དེ་ལྟར་བསྙེན་པ་བྱས་པའི་འོག་ཏུ་ཁྲོ་བོའི་བརྟུལ་ཞུགས་སྤྱད་ན་དངོས་གྲུབ་མཆོག་ཐོབ་པོ་ཞེས་པའི་དོན་ཏོ། །ཤིང་ལས་བྱས་པའི་ཐོད་པ་ནི། །ཞེས་པ་ཐང་ཤིང་ལས་བྱས་པའི་ཐོད་པ་ཞེས་པའོ། །ཉི་ཤུ་རྩ་དྲུག་སོར་ཚད་བྱས། །ཞེས་པ་ཐོད་པའི་ཁ་ཤིང་
གི་ཚད་བྱ་ཞེས་པའོ། །མཁས་པས་ཏྲི་ཤཱུལ་རྣོན་པོ་ནི། །སྔགས་པས་ཏྲི་ཤཱུལ་རྣོན་པོ་ལེགས་པ་ཞེས་པའོ། །ལག་པ་གཡས་པས་ཏྲི་ཤཱུ་ལ་བཟུང་། །གཡོན་དུ་ཐོད་པ་བཟུང་ཞེས་པའོ། །གཟིག་ལྤགས་ཞེས་པ་སྨད་གཡོགས་ཞེས་པའོ། །ལུས་ནི་ཐལ་བ་དག་གིས་
བསྐུ། །ཞེས་པ་ཐལ་བས་བྱུག་པར་བྱ་བའི་དོན་ཏོ། །རུས་པ་དག་གི་ཕྲེང་བ་ཡིས། །ཞེས་པ་མི་རུས་དག་གིས་ལྷའི་རྒྱན་བཞིན་དུ་གདགས་སོ། །རྒྱན་དུ་བྱས་ནས་བརྟུལ་ཞུགས་སྤྱད། །ཅེས་པ་ཚུལ་དེ་ལྟར་དེ་བརྟུལ་ཞུགས་སྤྱད་དོ་ཞེས་པའི་དོན་ཏོ། །སྔགས་པ་དེ་གད་མོ་སྒྲ་ཆེན་དག་
ཀྱང་འབྱིན་ཞེས་པའོ། །དུར་ཁྲོད་དམ་ནི་ཤིང་གཅིག་གམ། །རིའམ་ཡང་ན་ཚལ་ཡང་རུང་། །ཞེས་པ་སྔགས་པ་དེ་ལྟ་བུ་དེ་གྲོང་དུ་འགྲོ་ཞིང་དེར་གནས་པར་མི་བྱ་སྟེ། མིང་གིས་སྨོས་པའི་གནས་འདི་དག་ཏུ་གནས་པར་བྱའོ། །མཁས་པས་ཞེས་པ་སྔགས་པས་ཞེས་པའོ། །ལྕི་
བ་ཟ་ཞེས་པ་ཟས་སུ་ལྕི་བ་ཟ་བའོ། །བློ་ལྡན་གྲོང་དུ་ཡོང་མི་འཇུག །ཅེས་པ་སྔགས་པ་དེ་གྲོང་དུ་འགྲོ་ཞིང་དེར་ཡང་གནས་པར་མི་བྱའོ། །མཉམ་པར་གཞག་ཅེས་པ་སེམས་རྩེ་གཅིག་ཏུ་གནས་ཞེས་པའོ། །ཚིག་མི་སྨྲ་ཞེས་པ་གཞན་གང་ཡང་མི་སྨྲའོ། །གཙང་ཞིང་ཚངས་པར་
སྤྱོད་ལ་དུལ། །ཞེས་ཕྱི་ནང་གི་ཁྱིམ་པ་ཞིག་ཡིན་ན་མི་ཚངས་པར་མི་སྤྱད་ཅེས་པའི་དོན་ཏོ། །རྟག་ཏུ་བདེ་གཤེགས་སེམས་དང་ལྡན། །ཞེས་པ་བྱང་ཆུབ་སེམས་དང་ལྡན་ཞེས་པའོ། །བྱང་ཆུབ་སེམས་དང་ཀུན་ལྡན་ཞིང་། །ཞེས་པ་གོང་མ་ཉིད་ཀྱི་འགྲེལ་པ་གཤིན་རྗེས་རབ་ཏུ་
འཇོམས་པ་འདི་ཞེས་པ་དེ་ལྟར་སྤྱད་ན་དངོས་གྲུབ་མཆོག་འགྲུབ་པར་འགྱུར་གྱི་མི་འགྲུབ་པར་མི་འགྱུར་རོ་ཞེས་པའི་དོན་ཏོ། །དུས་ཐམས་ཅད་དུ་བྱང་ཆུབ་ཀྱི་སེམས་ལྡན་པར་བྱ་ཞིང་ཁྲོ་བོའི་བརྟུལ་ཞུགས་གང་གསུངས་པ་ཡང་སྤྱོད་ཅིང་རྟག་ཏུ་དུས་གསུམ་དུ་ཟློས་པ་བྱེད་པ་ནི་དངོས་

གྲུབ་མཆོག་ཐོབ་པར་འགྱུར་རོ་ཞེས་པའི་དོན་ཏོ། །འདི་མན་ཆད་ནི་བརྟུལ་ཞུགས་མ་གྲུབ་ན་བསྙེན་པ་ལྷག་པར་བྱ་སྟེ། སྒྲུབ་པ་ཞེས་བྱ་བ་བཤད་དོ། །གང་ཚེ་འདི་ཡི་བརྟུལ་ཞུགས་ནི། །བསྙེན་པ་བྱ་བར་མི་ནུས་ན། །ཞེས་བྱ་བ་གོང་དུ་བཤད་པ་བཞིན་དུ་བརྟུལ་ཞུགས་སྤྱོད་མི་ནུས་ན། གནས་
གང་ཡང་རུང་བར་གནས་ཤིང་ཟས་སུ་ལྕི་བ་ཟ་ཞིང་འབུམ་ཕྲག་བརྒྱད་བཟླས་པའི་བསྙེན་པ་བྱའོ་ཞེས་པའི་དོན་ཏོ། །དེ་ནས་བཟླས་པའི་ཐ་མར་ཡང་། །མཁས་པས་མཆོད་པ་རྒྱ་ཆེར་བྱ། །ཞེས་པ་དེ་ལྟར་སྔོན་དུ་བསྙེན་པ་བྱས་པའི་བཟླས་པ་ཟིན་ནས། ཐ་མར་ཡང་སྔགས་པས་སྐུ་
གཟུགས་དེ་ལ་མཆོད་པ་རྒྱ་ཆེན་པོ་བྱའོ། །དེ་ནས་མེ་ཏོག་ཛཱ་ཏི་སྟོང་། །རི་མོ་དག་ལ་ཕོག་པར་དབུལ། །ཞེས་པ་སྲི་ཤིང་སྣ་མའི་མེ་ཏོག་ལ་བྱ་སྟེ། སྔགས་བཟླས་ཤིང་སྐུ་གཟུགས་ལ་ཕོག་པར་དབུལ་ལོ། །རིག་པ་འཛིན་ཞེས་པ་སྔགས་པས་ཞེས་པའོ། །དེ་ཡིས་ཕོག་པར་
ཕུལ་ན་ནི། །ཞེས་པ་སྲི་ཤིང་སྣ་མའི་མེ་ཏོག་ཕུལ་ཞེས་པའོ། །གང་ཚེ་རབ་ཏུ་འབར་འགྱུར་བ། །ཞེས་པ་རི་མོའི་སྐུ་གཟུགས་འབར་བར་གྱུར་ན་ཞེས་པའི་དོན་ཏོ། །དེའི་ཚེ་རི་མོ་དེ་ཡིས་ནི། །ཞེས་པ་རི་མོའི་སྐུ་གཟུགས་འབར་བར་གྱུར་པ་དེའི་མཐུས་ནི་སྔགས་པ་ཉིད་ནམ་མཁའ་ལ་
འཕར་བར་གདོན་མི་ཟ་བར་ཞེས་པའི་དོན་ཏོ། །མཆོག་ཏུ་གྱུར་ཏེ་ཐོག་མར་འགྲོ། །ཞེས་པ་རིག་འཛིན་གྱི་རྒྱལ་པོར་འགྱུར་ཞེས་པའི་དོན་ཏོ། །འོན་ཏེ་ཕོག་པར་ཕུལ་བ་ན། །ཞེས་པ་མེ་ཏོག་སྔ་མ་དེ་ཉིད་ཀྱིས་སྐུ་གཟུགས་ལ་ཕུལ་ཞེས་པའི་དོན་ཏོ། །གཟུགས་དེ་རབ་ཏུ་གཡོ་བར་
གྱུར་ན་ནི། །ཞེས་པའོ། །རྟོག་ལ་ཇི་སྐད་གསུངས་པ་ཡི། །ཞེས་པ་ཇི་སྐད་གསུངས་པའི་དངོས་གྲུབ་འབྲིང་། ལུས་མི་སྣང་བ་འཐོབ་པར་འགྱུར་རོ་ཞེས་པའི་དོན་ཏོ། །དེ་ལ་དངོས་གྲུབ་འབྲིང་དུ་སྒྲུབ་པ་པོ་དེ་ལ་འགྱུར་ཞེས་པའི་དོན་ཏོ། །དེ་སྟེ་རབ་ཏུ་མི་གཡོ་བར་རི་མོ་རང་བཞིན་
དུ་འདུག་པ། དངོས་གྲུབ་ཐ་མ་ཐོབ་པར་འགྱུར། །ཞེས་པ་དེ་ལྟར་བྱས་པ་ལས་ཀྱང་སྐུ་གཟུགས་མི་འགུལ་ཞིང་མི་གཡོ་བར་གྱུར་ཏེ། སྐུ་གཟུགས་ཐ་མལ་པར་འདུག་ན་ཆོ་ག་དེ་ལྟར་བྱས་པའི་དངོས་གྲུབ་ཐ་མ་རྐང་མགྱོགས་ཙམ་དུ་འགྱུར་རོ། །དེ་ལྟ་བུའི་འབྲས་བུ་རྣམ་པ་གསུམ་

གསུམ་བཤད་ཅེས་པ་དེ་ལྟར་དངོས་གྲུབ་རབ་འབྲིང་ཐ་མ་གསུམ་དུ་བཤད་དོ་ཞེས་བྱ་བའི་ཐ་ཚིག་གོ། །འདི་མན་ཆད་ནི་སྤྱིར་བསྙེན་པ་ཞེས་བྱ་བ་བཤད་དོ། །ལུས་ནི་ཉོན་མོངས་སྤྱད་པ་ལས། །དངོས་གྲུབ་རྣམ་གསུམ་ཐོབ་པར་འགྱུར། །ཞེས་པ་གོང་དུ་བཤད་
པའི་བརྟུལ་ཞུགས་དག་མ་ཡིན་པར་སྤྱིར་ཡང་ལུས་ཉོན་མོངས་པའི་དཀའ་ཐུབ་སྤྱད་པ་ལས་དངོས་གྲུབ་རྣམ་གསུམ་ཐོབ་པར་འགྱུར་རོ་ཞེས་པའི་དོན་ཏོ། །བརྟུལ་ཞུགས་སྨྱུང་བར་འདུག་ལ་འབད། །ཅེས་པ་ལུས་ལ་ཉོན་མོངས་པར་བྱ་བའི་དཀའ་ཐུབ་དེ་དག་ཀྱང་གང་ཞེ་ན། འདི་དག་
གོ་ཡང་ན་ཆུའམ། །རླུང་དག་བཟའ་ཞེས་པ་ཆུ་འབའ་ཞིག་བཏུང་བའམ་རླུང་ཆེན་རྔུབ་ཅིང་བཟའ་བར་བྱའོ། །ཅི་ལའང་མ་ཆགས་ཕྱུགས་གཅིན་བཏུང་། །ཞེས་པ་འདོད་པའི་ལོངས་སྤྱོད་ལ་སོགས་ཏེ། གང་ལ་ཡང་ཆགས་པར་མི་བྱའོ། །ཕྱུགས་གཅིན་ཞེས་པ་
ཕྱུགས་གཅིན་འབའ་ཞིག་བཏུང་ཞེས་པའོ། །བྱང་ཆུབ་སེམས་དང་ཀུན་ལྡན་ན། །ཞེས་པ་དེ་ལྟར་དཀའ་ཐུབ་སྤྱོད་པ་དང་ལྡན་ཞིང་བྱང་ཆུབ་ཀྱི་སེམས་དང་ཡང་ལྡན་ན། དེའི་ཚེ་དངོས་གྲུབ་དམ་པ་འཐོབ་ཅེས་པའི་དོན་ཏོ། །རིག་པ་མཆོག་ཀུན་བསྒྲུབ་པ་ལ། །ཞེས་པ་ཁྲོ་བོའི་
རྒྱལ་པོ་ལ་བྱ་སྟེ། དེའི་སྔགས་སྒྲུབ་པ་ལ་བྱ་ཞེས་པའི་དོན་ཏོ། །འདི་དག་སྤྱིར་ན་བསྟན་པ་ཡིས། །ཞེས་པ་ཆོ་ག་དེ་ལྟར་སྤྱད་ན་དངོས་གྲུབ་རྣམ་གསུམ་ཐོབ་པར་འགྱུར་རོ་ཞེས་སྤྱིར་བསྟན་པ་ཡིན་ནོ་ཞེས་བྱ་བའི་དོན་ཏོ། །འདི་མན་ཆད་དངོས་གྲུབ་མཆོག་འབྲིང་མི་འདོད་ན། དངོས་གྲུབ་ཕལ་
པ་སྒྲུབ་པ་བསྟན་ཏེ། གང་ཚེ་དངོས་གྲུབ་མཆོག་རྣམས་དང་། །འབྲིང་ཡང་གལ་ཏེ་མི་འདོད་ན། །ལོངས་སྤྱོད་རྟག་ཏུ་འདོད་ན་ནི། །ཞེས་པ་ལ་འོག་ནས་འབྱུང་བའི་ལོངས་སྤྱོད་དག་ནི་དངོས་གྲུབ་ཕལ་པ་འདོད་ན་ཞེས་པའི་དོན་ཏོ། །དེ་ཚེ་རྟག་ཏུ་བཟླས་པར་བྱ། །ཞེས་པ་དུས་གསུམ་དུ་
བཟླས་པ་རྒྱུན་དུ་བྱའོ། ཞེས་པའོ། །འདི་ཡི་ཆོ་ག་གཞན་དག་ཀྱང་། །དེ་ནས་མདོར་ནི་བཤད་པར་བྱ། །ཞེས་པ་དངོས་གྲུབ་ཕལ་པ་སྒྲུབ་པའི་ཆོ་ག་གཞན་དག་ཀྱང་མདོར་བཤད་པར་བྱའོ་ཞེས་པའོ། །ས་གཞི་རབ་ཏུ་མདངས་དགའ་བ། །ཞེས་པ་ཉམས་དགའ་བའི་ས་གཞི་

བཟང་པོ་ལ་བྱའོ་ཞེས་པའོ། །དེར་ནི་ཙནྡན་དམར་པོ་ཡིས། །ཞེས་པ་དེའི་སྟེང་དུ་ཙནྡན་དམར་པོའི་འདེ་གུས་བསྐུ་བར་བྱའོ་ཞེས་པའི་དོན་ཏོ། །མཁས་པས་བྱ་ཞེས་སྔགས་པས་བྱའོ། །དེ་ཡང་བཟང་པོ་ཁྲུ་གང་ཙམ། །ཞེས་པ་དེ་ལྟར་ཡིད་ཀྱི་དཀྱིལ་འཁོར་བྱ་བ་དེ་ཡང་ཆེ་ཆུང་གི་
ཚད་ཁྲུ་གང་ཙམ་དུ་བྱའོ། །རབ་ཏུ་མཉམ་ཞིང་ཡིད་དུ་འོང་། །ཞེས་པ་དཀྱིལ་འཁོར་གྱི་ཡོན་ཏན་ལ་བྱའོ། །གཤིན་རྗེས་རབ་ཏུ་འཇོམས་པ་གང་། །ཞེས་པ་ལ་སོགས་པ་གཤིན་རྗེ་རབ་ཏུ་འཇོམས་ཞེས་བྱ་བའི་དཀྱིལ་འཁོར་དུར་ཁྲོད་གནས་ཞེས་བྱ་བ་གང་གསུངས་པ་དེ་དག་
གི་སྔགས་རྣམས་ཀྱིས་མེ་ཏོག་ལ་བསྔགས་ཏེ། སོ་སོའི་གནས་གནས་སུ་བཀོད་པས་དཀྱིལ་འཁོར་དེ་བྱས་ནས་ཞེས་བྱ་བའི་དོན་ཏོ། །དེ་ཡི་འོག་ན་སྔགས་རིག་པས། །ཞེས་པ་དེ་ལྟར་ཡིད་ཀྱིས་དཀྱིལ་འཁོར་ལེགས་པར་བཀོད་ནས་དེའི་འོག་ཏུ་སྔགས་པས་ཇི་སྐད་
གསུངས་པའི་ལས་དག་གིས་ཞེས་པ་མཆོད་པ་བྱ་བའི་ལས་དག་གིས་ཅི་འབྱོར་པ་དང་། །ཅི་ནུས་པར་ཁྲོ་བོའི་རྒྱལ་པོའི་གཙོ་བོ་ལ་མཆོད་པར་བྱ་ཞེས་པའི་དོན་ཏོ། །ཉི་མ་རེ་རེ་ཆོ་ག་བཞིན། །བཟླས་པ་དག་ཀྱང་སྟོང་དུ་བྱ། །ཞེས་པ་ཉི་མ་རེ་རེ་ཞིང་དུས་གསུམ་དུ་ཟློས་པ་
ཡང་དུས་གཅིག་གི་ཚེས་གྲངས་སྟོང་སྟོང་དུ་བཟླས་བརྗོད་བྱས་པའི་དུས་གསུམ་ཆར་ཡང་མཆོད་པའི་ཆོ་ག་དང་དཀྱིལ་འཁོར་ཚུལ་དེ་ལྟར་བཀོད་ནས་བཟླས་པ་བྱའོ། །དེ་ལྟར་རྟག་ཏུ་བྱས་པ་ཡིས། །ཞེས་པ་ཚུལ་དེ་ལྟར་རྟག་ཏུ་བྱས་པས་བདག་ཉིད་གང་འདོད་པའི་འབྲས་བུ་
ཐོབ་པར་འགྱུར་རོ་ཞེས་པའི་དོན་ཏོ། །གདོན་མི་ཟ་ཞེས་པ་ཐེ་ཚོམ་མེད་པར་དགའ་བར་འགྱུར། དེའི་ཞེས་པ་སྔགས་པ་དེའི་དགྲ་ཡང་མེད་པར་འགྱུར་བའི་དོན་ཏོ། །ནད་མེད་རང་གིས་ཞེས་པའོ། །སའི་དབང་པོ་དང་ཞེས་པ་རྒྱལ་པོ་དང་ཞེས་པའོ། །གཡོ་དང་མི་གཡོ་འཇིག་རྟེན་
རྣམས། །ཞེས་ལྷ་ཀླུ་ལ་སོགས་པ་རི་དང་མཚོ་ལ་སོགས་པ་མི་གཡོ་བ་ལ་གནས་པའི་ལྷ་ཀླུ་རྣམས་ཞེས་པའི་དོན་ཏོ། །བྱང་ཆུབ་སེམས་ལྡན་པ་དེ་ནི། །ཞེས་པ་སྔགས་པ་བྱང་ཆུབ་ཀྱི་སེམས་དང་ལྡན་པ་དེའི་དབང་དུ་གྱུར་པ་གདོན་མི་ཟ་ཞེས་པའི་དོན་ཏོ། །རིག་པའི་བརྟུལ་ཞུགས་

སུ་གཏོགས་པ་སྟེ། གསུམ་པའི་བཤད་པ་རྫོགས་སོ།། །།རྩ་བའི་རྟོག་པར་སྡུད་པར་གཏོགས་པའི་ལེའུ་འདི་ལ་དོན་རྣམ་པ་གཉིས་ཀྱིས་སྟོན་ཏོ། །དེ་ལ་སྐབས་དབྱེ་བ་དང་། དངོས་གྲུབ་དང་ལས་ཐམས་ཅད་སྦྱར་བར་བྱའོ། །དེ་ལ་རྩ་བའི་རྟོག་པ་
སྡུད་པར་གཏོགས་པ་ཞེས་བྱ་བ་ཅིའི་ཕྱིར་བྱ་ཞེ་ན། སྔར་བཤད་པའི་རྩ་བའི་རྟོག་པ་ཐམས་ཅད་ཀྱི་དངོས་གྲུབ་དང་ལས་རྣམས་ལེའུ་འདིར་སྡུད་པར་གྱུར་པས་ན་ཡང་ལེའུ་འདི་ལ་རྩ་བའི་རྟོག་པ་སྡུད་པར་གཏོགས་པའི་ལེའུ་ཞེས་བྱའོ། །དེ་ལ་དང་པོ་སྐབས་དབྱེ་བ་ཞེས་བྱ་བ་བཤད་
དེ། དེ་ནས་གཞན་ཡང་བརྟུལ་ཞུགས་ཀྱིས། །བསྒྲུབ་པའི་ལས་རྣམས་བཤད་པར་བྱ། །ཞེས་པ་ཁྲོ་བོའི་བརྟུལ་ཞུགས་སྤྱད་པས་འགྲུབ་པར་འགྱུར་བའི་ལས་རྣམས་བཤད་དོ། །དངོས་གྲུབ་མཆོག་རྣམས་ཐམས་ཅད་ཀྱི། །ཞེས་པ་དངོས་གྲུབ་མཆོག་རྣམས་ཐམས་ཅད་ཁྲོ་
བོའི་བརྟུལ་ཞུགས་སྤྱད་པས་བསྒྲུབ་པར་བྱའོ། །བརྟུལ་ཞུགས་མེད་པས་མི་འགྲུབ་སྟེ། །ཞེས་པ་ཁྲོ་བོའི་བརྟུལ་ཞུགས་མེད་པར་ཕལ་ཆེར་དངོས་གྲུབ་མཆོག་རྣམས་མི་འགྲུབ་སྟེ། བརྟུལ་ཞུགས་སྤྱད་པ་བྱས་ནས་སུ། །དངོས་གྲུབ་མཆོག་རྣམས་ལེགས་པར་འགྲུབ། །
ཅེས་པ་ཁྲོ་བོའི་བརྟུལ་ཞུགས་སྔར་སྤྱད་ནས་དེའི་འོག་ཏུ་དངོས་གྲུབ་མཆོག་རྣམས་འགྲུབ་པོ་ཞེས་པའི་དོན་ཏོ། །མཁས་པས་གཞན་ཡང་མ་ཡིན་ནོ། །ཞེས་པ་བརྟུལ་ཞུགས་མ་སྤྱད་པར་དངོས་གྲུབ་མཆོག་རྣམས་བསྒྲུབ་ཀྱང་འགྲུབ་པར་མི་འགྱུར་རོ་ཞེས་པའི་དོན་ཏོ། །འདི་མན་
ཆད་ནི་དངོས་གྲུབ་དང་ལས་ཐམས་ཅད་ལ་སྦྱར་བ་ཞེས་བྱ་བ་བསྟན་ཏོ། །ཇི་སྐད་བསྟན་པའི་མཚོན་ཆ་རྣམས། །རྩ་བའི་རྟོག་པའི་ཆོ་ག་བཞིན། །ཞེས་པ་སྔར་རྩ་བའི་རྟོག་པ་རྣམས་ལས་རལ་གྲི་དང་། བེ་ཅོན་དང་། དགྲ་སྟ་དང་། ཤཱུ་ལ་ལ་སོགས་པའི་ལྷའི་མཚོན་ཆ་རྣམས་
སྒྲུབ་པའི་སྦྱོར་བ་སྔར་གསུངས་པ་རྣམས་བཞིན་དུ་འདིས་བསྒྲུབས་ན། དེ་བཞིན་དུ་འགྲུབ་པར་འགྱུར་རོ་ཞེས་སོ། །དེ་ལ་འདི་ནི་རྟག་པ་རུ། །དུར་ཁྲོད་གནས་པའི་དཀྱིལ་འཁོར་ནི། །ཞེས་པ་དེ་ལ་རྩ་བའི་རྟོག་པ་ལས་ཁྱད་པར་དུ་འདིར་རལ་གྲི་ལ་སོགས་པ་བསྒྲུབ་པའི་ཚེ། དུར་

ཁྲོད་ཀྱི་གནས་སུ་དཀྱིལ་འཁོར་བྲིས་ལ་སྒྲུབ་པོ་ཞེས་པའི་དོན་ཏོ། །དངོས་གྲུབ་མཆོག་རྣམས་རབ་སྦྱིན་པའི། །ཞེས་པ་དཀྱིལ་འཁོར་གྱི་ཡོན་ཏན་ལ་བྱའོ། །བྱེ་བྲག་ཏུ་ནི་ལོགས་ཤིག་གསུངས། །ཞེས་པ་རལ་གྲི་ལ་སོགས་པའི་དངོས་གྲུབ་བསྒྲུབ་པའི་ཚེ། རྩ་བའི་རྟོག་
པ་ལས་བྱེ་བྲག་ཏུ་འདིར་དུར་ཁྲོད་ཀྱི་དཀྱིལ་འཁོར་བྲིས་ཏེ་བསྒྲུབ་པར་གསུངས་སོ། །རལ་གྲི་ས་འོག་རོ་ལངས་དང་། །ཞེས་པ་རྩ་བའི་རྟོག་པ་ལས་གསུངས་པའི་དངོས་གྲུབ་འདི་དག་གིས་ཞེས་པའོ། །གཞན་ཡང་ལས་དག་ཅི་འདོད་དང་། །ཞེས་པ་མི་རོའི་རས་བསྒྲུབ་
པ་དག་ཅེས་པའོ། །བུད་མེད་དམ་པ་སྤྱད་བསྒྲུབ་པ། །ཞེས་པ་འདོད་པའི་ཕྱིར་བསྒྲུབ་ཅེས་པའོ། །རྩ་བའི་རྟོག་པ་ཆོ་ག་ཡིས། །ཞེས་པ་སྔར་རྩ་བའི་རྟོག་པའི་ལེའུ་ལས་དངོས་གྲུབ་སྒྲུབ་པའི་མཚན་ཉིད་བཤད་པའི་རྣམ་གྲངས་འདི་རྣམས་རྩ་བའི་རྟོག་པ་ལས་གསང་བའི་ཆོ་ག་
བཞིན་དུ་འདི་ཡང་སྐབས་སུ་ཡང་བསྒྲུབ་པར་བྱའོ། །དེ་ལས་རྩ་བའི་རྟོག་པ་ལས་ཁྱད་པར་དུ་ན་འདིའི་སྐབས་སུ་དངོས་གྲུབ་དེ་དག་བསྒྲུབ་པའི་ཚེ། ཁྲོ་བོའི་རྒྱལ་པོའི་ཡི་གེ་བཅུ་གཅིག་པའི་སྙིང་པོ་སྒྲུབ་པར་གསུངས་སོ། །དེ་ནས་ཇི་སྐད་བསྟན་པ་ཀུན། །མ་སྨོས་པ་ཡང་བསྒྲུབ་པ་
བྱ། །ཞེས་པ་དེ་བས་ན་རྩ་བའི་རྟོག་པ་ལས་དངོས་གྲུབ་བཤད་པ་རྣམས་ལས། མིང་གིས་སྨོས་པ་འདི་རྣམས་མ་གཏོགས་པར་དངོས་གྲུབ་འབྱུང་བ་རྣམས་ཀྱང་ཚུལ་བཞིན་དུ་བསྒྲུབ་པར་བྱའོ། །འཇམ་དཔལ་ཁྲོ་བོའི་སྙིང་པོ་འདི། །ཧཱུྃ་ཞེས་བྱ་བ་རྒྱས་པ་སྟེ། །ཞེས་པ་ཧཱུྃ་
ཞེས་བྱ་བའི་སྙིང་པོ་འབྲུ་གཅིག་པའི་ཆོ་ག་རྒྱས་པའི་ཡི་གེ་སྟེ། ཧཱུྃ་འདི་ནི་རྩ་བའི་རྟོག་པ་སྡུད་པར་ཡོངས་སུ་གྲགས། །ཡི་གེ་ཧཱུྃ་རྩ་བའི་རྟོག་པ་གསུངས་པ། དངོས་གྲུབ་ཐམས་ཅད་བསྒྲུབ་པའི་ཕྱིར། །ཞེས་བྱ་བའི་དོན་ཏོ། །འདི་ནི་རྩ་བའི་རྟོག་པ་ཡི། །བསྡུས་པའི་
ཡོངས་སུ་བསྒྲགས་པའོ། །ཞེས་པ་སྔར་རྩ་བའི་རྟོག་པར་གཏོགས་པའི་དངོས་གྲུབ་རྣམས་ལས་ལེའུ་འདིར་མདོར་བསྡུས་ནས་ཡི་གེ་འབྲུ་གཅིག་པའི་སྒོ་ནས་དེ་རྒྱས་པར་བཤད་པར་བྱའོ། །རྩ་བའི་རྟོག་པ་ལས་གསུངས་པའི་དངོས་གྲུབ་ལས་རྣམས་ལེའུ་འདིར་མདོར་

བསྡུས་ནས་བཤད་པ་དང་། དངོས་གྲུབ་དེ་དག་ཀྱང་ཡི་གེ་འབྲུ་གཅིག་པོས་དངོས་གྲུབ་སྒྲུབ་ཅིང་ལས་སྦྱར་རུང་བར་རྒྱས་པར་བཤད་པའོ། །རྩ་བའི་རྟོག་པར་གཏོགས་པ་སྟེ་བཞི་པའོ། །བཞི་པའི་བཤད་པ་རྫོགས་སོ།། །།ཕྱི་མའི་ཕྱི་མ་རྟོག་པ་ལྔ་པ་འདི་
ལ་དོན་རྣམ་པ་ལྔས་སྟོན་ཏེ། དེ་ལ་མཚམས་སྦྱོར་བ་དང་། སྔགས་བསྟན་པ་དང་། སྔགས་ཀྱི་མཐུ་བསྟན་པ་དང་། སྔོན་དུ་བསྙེན་པ་བྱས་ནས་སྒྲུབ་པ་དང་། སྦྱོར་བ་བསྟན་པའོ། །དེ་ལ་དང་པོ་འདི་ལ་མཚམས་སྦྱོར་བ་ཞེས་བྱ་བ་བཤད་དོ། །རྟོག་པ་མདོ་རུ་བསྡུས་པ་དང་། རྒྱས་
པ་དག་ཏུ་བཤད་པ་དང་། །ཞེས་པ་རྩ་བའི་རྟོག་པར་གསུངས་པའི་དངོས་གྲུབ་རྣམས་དང་། ལས་དང་ལེའུ་འདིར་བསྡུས་ནས་ཡི་གེ་འབྲུ་གཅིག་པའི་སྒོ་ནས་དེ་དག་རྒྱས་པར་བཤད་པར་བྱའོ། །རྩ་བའི་རྟོག་པ་ལས་གསུངས་པའི་དངོས་གྲུབ་དང་ལས་རྣམས་ལེའུ་
འདིར་མདོར་བསྡུས་ཏེ་བཤད་པ་དང་། །དངོས་གྲུབ་དེ་དག་ཀྱང་ཡི་གེ་འབྲུ་གཅིག་པོས་དངོས་གྲུབ་ཅི་ལས་བྱར་རུང་བས་རྒྱས་པར་བཤད་པའོ། །བརྟུལ་ཞུགས་དང་ནི་ངེས་པ་ཡིས། །ཞེས་པ་བསྡམ་པར་བྱས་ཏེ་སྨྱུང་བ་བྱས་པ་ལ་བྱའོ། །སྒྲུབ་པ་ཅི་བསྟན་བཤད་པ་
ཡིན། །ཞེས་པ་ཚུལ་དེ་དག་གིས་སྒྲུབ་པ་ལ་དེ་ཡན་ཆད་ཀྱིས་བཤད་ཟིན་ཏོ། །དེ་ནས་ཁྲོ་བོ་གཟི་ཆེན་གྱིས། །ཞལ་དྲུག་ཧཱུྃ་ཞེས་བྱ་བའི་སྔགས། །ཞེས་བྱ་བ་ལ་སོགས་པ་ཁྲོ་བོ་ཆེན་པོ་གཟི་བྱིན་ཆེན་པོའི་ཞལ་དྲུག་ནས་ཧཱུྃ་དྲུག་འབྱུང་བའི་ཧཱུྃ་ཞེས་བྱ་བའི་སྔགས་དངོས་གྲུབ་
ཇི་ལྟར་བསྒྲུབ་པ་རྣམས་བཤད་པ་ཡིན་ནོ་ཞེས་གོང་མ་དང་ཚིག་གི་འཕྲོ་སྦྱར་རོ། །ཧཱུྃ་གི་སྔགས་དེ་སྔོན་དུ་བསྙེན་པ་བྱས་ནས་དེའི་འོག་ཏུ་བཟླས་པ་ཙམ་གྱིས་ལས་དེ་དག་འགྲུབ་པར་འགྱུར་རོ། །གསང་བ་དེ་མདོར་བཤད་པར་བྱའོ་ཞེས་པའོ། །བརྟུལ་ཞུགས་སྤྱད་དང་
བརྟུལ་ཞུགས་དཀའ། །དེ་དག་འདི་ལ་ཡོད་མེད་དེ། །ཞེས་བརྟུལ་ཞུགས་སྤྱད་པ་དང་། ཁྱད་པར་གྱི་བརྟུལ་ཞུགས་དགའ་བ་དེ་དག་ཧཱུྃ་ཞེས་བྱ་བའི་སྔགས་ཀྱིས་ལས་སྒྲུབ་པ་འདི་དག་ལ་དཀའ་ཐུབ་དང་བརྟུལ་ཞུགས་སྤྱད་མི་དགོས་སོ་ཞེས་པའི་དོན་ཏོ། །ལན་ཅིག་

ཀླགས་པ་ཙམ་གྱིས་ཀྱང་། །ལས་རྣམས་ཐམས་ཅད་བྱེད་པར་འགྱུར། །ཞེས་པ་གོང་དུ་བསྙེན་པ་བྱས་ནས་དེའི་འོག་ཏུ་ལས་བྱས་པ་འགྲུབ་པར་འགྱུར་བ་ལ་བྱའོ་ཞེས་པའོ། །འདི་མན་ཆད་སྔགས་བསྟན་པ་ཞེས་བྱ་བ་བཤད་དེ། ཨོཾ་ན་མ་ཞེས་བྱ་བ་རྣམས་བསྟན་ཏེ། ཨོཾ་ན་མཿ
ཞེས་པ་ནས་སྭཱ་ཧཱ། ཞེས་པའི་བར་གྱི་སྔགས་ནི་ཞལ་རེ་རེ་ནས་ཧཱུྃ་དྲུག་དྲུག་འབྱུང་བ་དང་སྦྱར་རོ། །འོག་ནས་སྦྱོར་བ་བསྟན་པའི་སྐབས་ནས་ལས་རྣམས་འབྱུང་བའི་བསྐུལ་ཚིག་རེ་རེའི་ཧཱུྃ་དྲུག་གི་སྐབས་སྐབས་སུ་བཅུག་སྟེ། ཆེ་གེ་མོ་ཞིག་གིས་རི་རྣམས་ཁོས་ཤིག་གཡོས་པར་གྱུར་
ཅིག་ཅེས་པའི་སོ་སོའི་ཚིག་ཀྱང་བཅུག་སྟེ་སྔགས་རིམ་གྱིས་བཟླས་སོ། །ཡི་གེ་བཞི་བཅུ་རྩ་གསུམ་འདི། །ཁྲོ་བོས་ཀླགས་པ་ཙམ་གྱིས་འགྲུབ། །ཅེས་པའི་ཡི་གེ་བཞི་བཅུ་རྩ་གསུམ་འབྱུང་སྟེ་བགྲང་བར་བྱ་བའི་ལུགས་ལགས་སོ། །ཧཱུྃ་གི་སྔགས་ཉིད་ཁྲོ་བོའི་རང་བཞིན་ཏེ་
འགྲུབ་པར་འགྱུར་བ་ན་སྔར་བཤད་ཟིན་ཏོ། །སངས་རྒྱས་ཀུན་གྱིས་མངོན་པར་བསྟོད། །ཅེས་པ་ཧཱུྃ་གི་སྔགས་ཀྱི་ཡོན་ཏན་ལ་བྱའོ་ཞེས་པའི་དོན་ཏོ། །དེ་ནི་རྟག་པར་བཟླས་པ་ནི། །ཞེས་པ་ཧཱུྃ་གི་སྔགས་ཏེ་རྟག་པར་བཟླས་པར་བྱས་ན་དངོས་གྲུབ་སྩོལ་བར་མཛད་དོ། །འདི་མན་
ཆད་ནི་སྔགས་ཀྱི་མཐུ་བསྟན་པ་ཞེས་བྱ་བ་བཤད་དོ། །དངོས་གྲུབ་ཐམས་ཅད་སྟེར་བར་བཤད། །ཅེས་པ་ནས་བསྟན་ཏེ། དུར་ཁྲོད་གནས་སུ་རྟག་པར་ནི། །རྟག་ཏུ་ཟློས་པའི་ཆོ་ག་ཡིས། །ཞེས་པ་དེ་ལྟར་རྟག་ཏུ་བཟླས་པ་བྱ་བ་ཡང་སྔར་བཤད་པའི་དུར་ཁྲོད་ཀྱི་དཀྱིལ་འཁོར་སྔ་
མའི་ཚུལ་བཞིན་དུ་དཀྱིལ་འཁོར་བྲིས་སམ་བསམས་ཏེ། དཀྱིལ་འཁོར་འདིར་རྟག་ཏུ་བཟླས་པ་བྱ་ཞེས་པའི་དོན་ཏོ། །ལྷ་དང་ལྷ་མིན་དྲི་ཟ་དང་། །ཞེས་པ་དེ་ལྟར་བཟླས་པ་བྱས་པ་དེའི་མཐུས། །དེ་ཡི་གཟིས་ནི་འབྱེར་བར་འགྱུར། །ཞེས་པ་སྔགས་དེའི་གཟི་བྱིན་དང་མཐུས་
ཞེས་པའོ། །འགྲོ་དང་མི་འགྲོ་འཇིག་རྟེན་ན། །དེ་ལ་དཀའ་བ་ཅུང་ཟད་མེད། །ཅེས་པ་སྣོད་ཀྱི་འཇིག་རྟེན་དང་། གཡོ་བའི་འཇིག་རྟེན་ཏེ་བཅུད་ཀྱི་འཇིག་རྟེན་ལ་བྱའོ། །ཧཱུྃ་གི་སྔགས་དེ་ལས་བྱ་བ་ལ་ཞེས་པའོ། །ཞལ་དྲུག་ཧཱུྃ་ཞེས་བྱ་བའི་སྔགས། །ཞེས་བྱ་བ་ལ་

སོགས་པ་སྔོན་དུ་བསྙེན་པ་བྱས་པའི་འོག་ནས་ཧཱུྃ་གི་སྔགས་དེ་དག་དང་། ཤཱུ་ལའི་ཕྱག་རྒྱ་དང་ལྡན་པར་སྦྱར་ན་རྒྱུད་འདིའི་ཆོ་གའི་ལས་རྣམས་འགྲུབ་པར་འགྱུར་རོ་ཞེས་པའི་དོན་ཏོ། །འདི་མན་ཆད་ནི་སྔོན་དུ་བསྙེན་པ་བྱས་ནས་སྒྲུབ་པ་ཞེས་བྱ་བ་བཤད་དེ།
དུར་ཁྲོད་གནས་སུ་ཆོ་ག་བཞིན། །ཞེས་པ་སྔོན་དུ་བསྙེན་པ་བྱ་བ་ཡང་དུར་ཁྲོད་ཀྱི་དཀྱིལ་འཁོར་གྱི་ཆོ་ག་བཞིན་དུ་བྲིས་སམ་བསམས་ཏེ། དཀྱིལ་འཁོར་དེས་སྔོན་དུ་བསྙེན་པ་བྱའོ། །ཐོག་མ་ཉིད་དུ་ཆིག་འབུམ་བྱ། །ཞེས་པ་ཧཱུྃ་གི་སྔགས་དེ་ཐོག་མར་བསྙེན་པ་འབུམ་བཟླས་
པར་བྱ་ཞེས་པའི་དོན་ཏོ། །དེ་ནས་རྟག་པའི་ཆོ་ག་བཤད། །ཅེས་པ་དེ་ལྟར་སྔོན་དུ་བསྙེན་པ་བྱས་ནས་དེ་ཕན་ཆད་ཀྱང་ཡལ་བར་མི་འདོར་བར་དུས་གསུམ་དུ་བཟླས་པར་བྱའོ། །རྟག་པར་སྤྱོད་པའི་ཆོ་ག་ཡིས། །དེ་ནས་ཆིག་འབུམ་བཟླས་ནས་ཀྱང་། །ཞེས་པ་དེ་ལྟར་རྟག་པར་
བཟླས་པ་སྤྱོད་པའི་ཆོ་གས་སྔོན་དུ་བསྙེན་པ་འབུམ་བྱས་པའི་འོག་ཏུ་ཡང་འབུམ་བཟླས་ཏེ་སྦྱོར་བ་ཉིད་འབུམ་སྔོན་དུ་བསྙེན་པ་བྱའོ། །ཁ་ཅིག་གིས་བཤད་པ་ནི་འདི་ནི་སྔར་བསྙེན་པ་བྱ་བ་ཟློས་བུར་བཤད་པར་ཟད་དེ་བསྙེན་པའི་ཆིག་འབུམ་བྱ་བར་ངེས་སོ་ཞེས་བཤད་དོ། །ཇི་སྐད་
གསུངས་པའི་ལས་རྣམས་ཀྱིས། །དེ་ཡི་འོག་ཏུ་སྒྲུབ་ལ་འཇུག །ཅེས་པ་དེ་ལྟར་བསྙེན་པ་བྱས་པའི་འོག་ཏུ་སྔར་རྩ་བའི་རྟོག་པ་ལས་གསུངས་པའི་ལས་དང་། འོག་ནས་འབྱུང་བའི་ལས་རྣམས་སྒྲུབ་པ་ལ་འཇུག་པའོ་ཞེས་བྱ་བའི་དོན་ཏོ། །རྩ་བའི་རྟོག་པའི་ཆོ་ག་ཡིས། །དེ་
ནས་ཐམས་ཅད་བསྒྲུབ་པར་བྱ། །ཞེས་པ་རྩ་བའི་རྟོག་པ་ལས་གསུངས་པའི་ལས་ཐམས་ཅད་ཀྱང་རྩ་བའི་རྟོག་པའི་ཆོ་ག་བཞིན་དུ་ལས་ཐམས་ཅད་བསྒྲུབ་པར་བྱའོ། །འདི་ལ་དཀའ་བ་ཅི་ཡང་མེད། །ཅེས་པ་ཧཱུྃ་གི་སྔགས་དེ་ལས་བྱ་བ་འདི་ལ་དཀའ་བ་མེད་དོ། །ཆོ་ག་བཟང་པོ་ཅི་
གསུངས་པའི། །ཞེས་པའོ། །རྟོག་པ་དེ་བཞིན་བདག་གིས་བཤད། །ཅེས་པ་འོག་ནས་འབྱུང་བ་ལ་བྱའོ། །ཞལ་དྲུག་ཧཱུྃ་ཞེས་བྱ་བ་འདི། །ཞེས་པ་ཞལ་དྲུག་ནས་ཧཱུྃ་ཞེས་བྱ་བ་རེ་རེ་འབྱུང་བས་ཞལ་དྲུག་ཏུ་བཤད་དོ་ཞེས་པའོ། །འདི་མན་ཆད་ནི་སྦྱོར་བ་བསྟན་པ་ཞེས་བྱ་བ་

བཤད་དོ། །ཁྲོ་བོའི་ཞལ་ནས་མདོ་རུ་ནི། །ཆོ་ག་བཟང་པོ་ཞེས་བྱ་བ་ལ་སོགས་པ་སྨོས་སོ། །ཧཱུྃ་གི་མཐར་ནི་བསྐུལ་བར་བྱ། །ཞེས་པ་ལ་སོགས་པ་ཧཱུྃ་དྲུག་གི་འོག་ཡ་མ་པྲ་མ་ཞེས་བྱ་བའི་གོང་གི་བར་དེར་ཏྲ་ཞེས་བྱ་བའི་བསྐུལ་ཚིག་བཅུག་སྟེ། །ཡི་གེ་བཞི་བཅུ་རྩ་གསུམ་རིལ་གྱིས་
བཟླས་ཏེ། ཤཱུ་ལའི་ཕྱག་རྒྱ་དང་ལྡན་པར་སྔགས་བརྗོད་པས་ལས་བྱ་སྟེ་ཚུལ་འདི་བཞིན་དུ་སྦྱར་ཏེ། ལས་བྱ་བ་ལས་གང་དང་གང་བྱས་པས་དེ་དང་དེ་བཞིན་