Luận tạng Tây Tạng (Tengyur) — Tập 41

མཆོག་བསྡུས་པ་ལས་བྱུང་བའི་རིག་པའི་རྒྱལ་
མོའོ། །དེ་ལ་རིགས་གཉིས་བསྡུས་པ་ལས་བྱུང་བ་ནི་གོས་དཀར་མོའོ། །པདྨ་ནི་རིག་པའི་པདྨའོ། །དེ་རྒྱས་པ་ནི་རང་གི་རྡོ་རྗེ་བཅུག་པས་ཁ་ཕྱེ་བ་བྱས་ནས་སོ། །སྔགས་འདི་ཞེས་བྱ་བ་ནི་དམ་པ་དང་པོའི་སྙིང་པོ་གཉིས་པའོ། །དེ་ཉིད་གསུངས་པ་ཧཱུཾ་ཞེས་པའོ། །ཅི་འདྲ་ཞེ་ན། འོད་
ཟེར་ལྔ་ནི་རབ་ཏུ་འབར་བ་སྟེ། སངས་རྒྱས་ལྔའི་རྣམ་པའི་འོད་ཟེར་ཅན་ཏེ། སངས་རྒྱས་ལྔའི་རྣམ་པར་འོད་འཕྲོ་བས་འོད་ཟེར་ལྔ་པོ་དེ་དག་ཞུགས་པས་ཡེ་ཤེས་ལྔའི་རང་བཞིན་གྱིས་ཁྱད་པར་དུ་འཕགས་པར་སྣང་བས་ན་རབ་པོ། །ཡང་ཞུ་བར་གྱུར་པས་ན་འབར་བའོ། །རྡོ་རྗེ་ཅན་གྱི་སྦྱོར་བ་
བསྒོམ། །ཞེས་པ་ནི་རྡོ་རྗེ་ཅན་ནི་རང་གི་རྡོ་རྗེའོ། །དེའི་སྦྱོར་བ་ནི་ཞུ་བའི་ཡེ་ཤེས་དེ་ཉིད་ཀྱིས་དེའི་ནང་དུ་དགང་ཞིང་ལྡན་པའོ། །དབབ་ཅེས་བྱ་བ་ནི་ཞུ་བའི་ཡེ་ཤེས་དེ་ཉིད་དགོད་པའོ། །རང་ལུས་ངག་སེམས་རྡོ་རྗེ་ལ། །ཞེས་བྱ་བ་ནི་དཀྱིལ་འཁོར་དང་ལྷན་ཅིག་པའི་ཡེ་ཤེས་ཀྱི་བདག་ཉིད་ཅན་གྱི་སྐུ་ལ་
སོགས་པ་ལ་གོ་རིམས་བཞིན་དུ་དབང་བསྐུར་བ་གསུམ་གྱིས་སོ། །བྱང་ཆུབ་ཐོབ་པར་འགྱུར་ཞེས་པ་ནི་སངས་རྒྱས་ལྔའི་ཡེ་ཤེས་ཀྱི་འཁོར་ལོ་ཡབ་དང་ཡུམ་ཞུ་བའི་དཀྱིལ་འཁོར་གྱི་རྣམ་པར་སངས་རྒྱས་ཐམས་ཅད་ཀྱི་ཆོས་མཉམ་པ་ཉིད་མཐོང་ནས། དེ་ལྷ་མོ་བཞིའི་གླུས་བསྐུལ་བ་དང་།
ཞུ་བ་བསྡུས་པ་ལས་བྱུང་བའི་རང་གི་སྔགས་ཀྱི་མཚན་མར་བྱུང་བ་ལ་སོགས་པའི་རིམ་གྱིས་རྫོགས་ནས་བདག་ཉིད་རྡོ་རྗེ་འཆང་དུ་བསྐྱེད་ཅིང་ཆོ་ག་བཞིན་དུ་སྐུ་ལ་སོགས་པའི་བྱིན་གྱིས་བརླབས་པ་བསམ་པར་བྱའོ་ཞེས་བྱ་བའི་དོན་ཏོ། །འབྲས་བུ་ནི་དེ་ཞེས་བྱ་བ་ལ་སོགས་པ་གསུངས་པ་ལ། དེ་ནི་

ཞེས་བྱ་བ་ནི་སྒྲུབ་པ་པོའོ། །སྟོན་ཀའི་ཟླ་བ་ལྟར་དཀར་བ་ཉིད་ཀྱི་ཕྱིར། རྣམ་པར་སྣང་མཛད་འོད་འདྲ་ཞིང་ངོ་། །ས་བཅུའི་དབང་ཕྱུག་ཉིད་དུ་གྱུར་པའི་ཕྱིར་རྒྱལ་པོ་ཆེའོ། །ཆོས་ཐམས་ཅད་རྣམ་པ་ཐམས་ཅད་དུ་མཁྱེན་པའི་ཕྱིར་སངས་རྒྱས་སོ། །སྐུ་གསུམ་པོ་རྟག་པ་ཉིད་བརྙེས་པའི་ཕྱིར་སྐུ་གསུམ་
རྡོ་རྗེ་འཛིན་ཏོ། འདི་བསྐྱེད་པའི་དོན་གྱི་ཆོ་ག་ཕལ་ཆེར་ཐུན་མོང་ཉིད་དུ་མཇུག་བསྡུ་བའི་ཕྱིར་སེམས་དཔའ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ་དམ་པར་གྱུར་པ་ཉིད་ཀྱིས་ན་སེམས་དཔའ་སྟེ་བཟང་པོ་ཉིད་དོ། །འདི་དག་ནི་སེམས་དཔའ་ཐམས་ཅད་ཡིན་པས་ན། སེམས་དཔའ་ཐམས་ཅད་
ནི་ཀུན་དུ་བཟང་པོ་སྟེ། སངས་རྒྱས་དང་རྡོ་རྗེ་འཛིན་པ་ལ་སོགས་པའི་རིག་པའི་སྐྱེས་བུ་རྣམས་སོ། །དེ་རྣམས་བསྐྱེད་པ་ནི་བསྐྱེད་པའི་དོན་གྱི་ཆོ་ག་སྟེ། འདིས་བསྐྱེད་པ་ཡིན་པའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །དེ་ཉིད་ནི་རྡོ་རྗེ་སྟེ་དབྱེར་མི་ཕྱེད་པ་ཉིད་ཀྱི་ཕྱིར་རོ། །དེ་ལྟར་
དངོས་གྲུབ་ཀྱི་མཆོག་གསུངས་ནས་དངོས་གྲུབ་ཕྲ་མོ་མི་སྣང་བ་རྣམ་པ་མང་པོ་ནི་བཞིན་བཟང་ཞེས་བྱ་བ་ལ་སོགས་པ་གསུངས་ཏེ། ཆོ་ག་བཞིན་ཞེས་བྱ་བ་ནི་རིག་པའི་བརྟུལ་ཞུགས་དང་། མི་སྣང་བའི་དངོས་གྲུབ་ཀྱི་མཚན་མ་ཐོབ་པ་དང་དཀྱིལ་འཁོར་བྲི་བ་ལ་སོགས་པ་ནི་འདིར་ཆོ་ག་ཡིན་ནོ། །
མཆོད་པ་ཞེས་བྱ་བ་ནི་གསང་བའི་མཆོད་པ་སྟེ། ཆོ་ག་བཞིན་ཞེས་བྱ་བ་དང་སྦྱར་རོ། །འཇམ་དཔལ་དང་དེའི་རིག་པའི་གཟུགས་བསྐྱེད་པ་ལ་སོགས་པ་ནི་འདིར་ཆོ་ག་ཡིན་ཏེ། རབ་ཏུ་དབེན་པའི་གནས་ཉིད་དུ་དངོས་གྲུབ་ཐམས་ཅད་བསྒྲུབ་པར་བྱའོ་ཞེས་བྱ་བ་འདི་ཉིད་ཁོང་དུ་ཆུད་པ་ཡིན་པས་
འདིར་གཉིས་ཀ་ལྷ་ཉིད་ཀྱི་གཟུགས་སུ་ཡིན་གྱི་སེམས་ཅན་གསུམ་པ་མི་སྣང་བ་ནི་དབེན་པའི་དོན་ཏོ། །གསང་བ་ཞེས་བྱ་བ་ནི་བྱང་ཆུབ་ཀྱི་སེམས་སོ། །བཟའ་བར་བྱ་ཞེས་བྱ་བ་ནི་ཕན་ཚུན་ཟ་བ་སྟེ་ཆོ་ག་བཞིན་ཞེས་བྱ་བ་དང་སྦྱར་རོ། །འདིར་ཆོ་ག་ནི་མན་ངག་ལས་ཞེས་བྱའོ། །བཟའ་བ་
ཞེས་བྱ་བ་ནི་འབྲས་ཆན་ལ་སོགས་པའོ། །གཞུག་པར་བྱ་ཞེས་བྱ་བ་ནི་པདྨ་ལའོ། །ཆོ་ག་བཞིན་དུ་ཞེས་བྱ་བ་ནི་འབར་བ་དང་། བསྲེག་པ་ལ་སོགས་པའི་མངོན་པར་འདུས་བྱས་པས་སོ། །བསྔགས་ནས་ནི་ཞེས་བྱ་བ་ནི་ཡི་གེ་གསུམ་གྱིས་ལན་བརྒྱ་རྩ་བརྒྱད་ཀྱི་བར་དུའོ། །བསྐུལ་ན་ནི་

ཞེས་བྱ་བ་ནི་མངོན་པར་བསྔགས་ནས་སོ། །མི་མཐོང་ཞེས་བྱ་བ་ནི་དེ་ཉིད་དུ་ཟོས་པས་སོ། །ཁ་སྦྱར་སྦྱོར་བ་ནི་ཁམ་ཕོར་ཁ་སྦྱར་དུ་གཞུག་པའོ། །རི་ལུའི་སྒྲུབ་པ་ནི་ལེའུ་བཅུ་གཉིས་པའི་རྗེས་སུ་འབྲངས་ནས་ཤེས་པར་བྱའོ། །དེ་ལ་ག་བུར་ནི་བྱང་ཆུབ་ཀྱི་སེམས་སོ། །
ཙནྡན་ནི་རྐང་ངོ་། །གི་ཝང་ནི་ཁྲག་དང་བཅས་པའི་ཤའོ། །ཨ་ཀ་རུ་ནི་བཤང་བའོ། །གུར་ཀུམ་ནི་རིག་མའི་མེ་ཏོག་གོ། །དེ་ལྟར་འཇམ་དཔལ་གྱི་སྦྱོར་བས་མི་སྣང་བར་གསུངས་ནས། དེ་ལས་གཞན་པའི་སྦྱོར་བས་ཀྱང་གསུངས་པ་ནི་རྡོ་རྗེ་འཛིན་པ་ཞེས་པ་ལ་སོགས་པ་ལ་རྡོ་རྗེ་འཛིན་
པ་ཞེས་བྱ་བ་ནི་ལྷ་རྣམས་ཀྱིའོ། །བྱིན་བརླབས་ནས་ཞེས་བྱ་བ་ནི་བརྟན་པར་བྱས་ནས་སོ། །དེ་འདྲའི་ཞེས་བྱ་བ་ནི་དེ་དང་འདྲའོ། །རྡོ་རྗེ་འགྲོ་བར་ཞེས་བྱ་བ་ནི་ཐོགས་པ་མེད་པར་འགྲོ་བའོ། །སྟོང་གསུམ་བགྲོད་པའི་ཞེས་བྱ་བ་ནི་ལོགས་སུའོ། །འདོད་ཁམས་གནས་པའོ་ཞེས་བྱ་བ་ནི་ཚངས་པའི་
འཇིག་རྟེན་གྱི་བར་དུའོ། །ལྷའི་ལོངས་སྤྱོད་ཅེས་བྱ་བ་ནི་ལྷའི་བདག་པོས་བསྲུངས་པ་ཡང་ངོ་། །བརྟུལ་ཞུགས་ཞེས་བྱ་བ་ནི་ཁྱིམ་ཐབ་ཀྱི་བརྟུལ་ཞུགས་ཀྱིས་བསྲུངས་པ་ཡང་ངོ་། །གཟུགས་ཁམས་གནས་པ་ལ་ཞེས་བྱ་བ་ནི། མི་གཙང་བ་ལ་སོགས་པའི་ཏིང་ངེ་འཛིན་གྱིས་འདོད་ཆགས་
དང་བྲལ་བ་ཡང་ངོ་། །འདི་ལྟར་སྟོབས་ཆེན་ནི་ཐོགས་པ་མེད་པའི་ནུས་པ་དང་ལྡན་པའོ། །དམ་ཚིག་གིས་མི་སྣང་བས་དེས་ནི་རྡོ་རྗེ་ཆེན་པོ་ནི་ཤིན་ཏུ་བཟློག་པར་དཀའ་བའོ། །དེ་སྟོན་པར་མཛད་པ་ཉིད་ཀྱི་ཕྱིར་དེ་སྐད་ཅེས་བྱའོ། །དེ་ནས་ཞེས་བྱ་བ་ནི་དངོས་གྲུབ་མཆོག་དང་ཕྲ་མོ་བསྟན་ཞིང་ཐོས་པའི་
རྗེས་ཐོགས་ལའོ། །འཕྲུལ་པ་ནི་རབ་ཏུ་དགྱེས་པར་རྣམ་པར་གཡོ་བའོ། །ཡིད་ལ་དབང་བ་རྣམས་ཞེས་བྱ་བ་ནི་དགོངས་པ་དང་བཅས་པ་སྟེ། འགྲོ་བ་འདུལ་བའི་ཕྱིར་འདི་རྣམས་ཀྱིས་མཉེས་པ་དང་ངོ་མཚར་སྟོན་པར་བྱེད་པ་ཡིན་གྱི། དོན་དམ་པར་ནི་མ་ཡིན་ནོ་ཞེས་བྱ་བའི་དོན་ཏོ། །འདི་
ཞེས་བྱ་བ་ནི་མི་སྣང་བའི་ཆེ་བའི་བདག་ཉིད་དོ། །གསང་གནས་མི་འགྱུར་ཞེས་བྱ་བ་ནི་གསང་བ་གསུམ་གྱི་གཞིར་གྱུར་པའི་ཐར་པ་སྟེ། ཀུན་དུ་བཟང་པོའི་སངས་རྒྱས་ཀྱི་མྱ་ངན་ལས་འདས་པ་ཞེས་བྱ་བའི་དོན་ཏོ། །དེ་ལྟར་དངོས་གྲུབ་མཆོག་དང་ཕྲ་མོ་ལ་བསྟོད་ནས་དེ་དག་ཉིད་ཀྱི་ལམ་དག་ལ་

ཚིགས་སུ་བཅད་པའི་ཕྱིར་ཕྱི་མས་བསྟོད་པ་ཡིན་ཏེ་ཆོས་ཀྱི་སྒྲ་ནི་ལམ་གྱི་ཚིག་ཡིན་ཏེ། གཉི་ག་དང་འབྲེལ་བའི་ཕྱིར་རོ། །དེ་ལ་ངོ་བོ་ཉིད་ཀྱིས་དག་པ་ནི་གཉིས་སུ་འཛིན་པའི་གཉེན་པོ་ཉིད་ཡིན་པའི་ཕྱིར་རོ། །ཤིན་ཏུ་དྲི་མེད་ནི་སྒྲིབ་པ་ཐམས་ཅད་ཀྱི་གཉེན་པོ་ཡིན་པའི་ཕྱིར་རོ། །འདིར་རིག་པའི་
སྐྱེས་བུ་བསྒོམ་པ་ནི་ལེའུ་བཅུ་བདུན་པ་ལས། དེ་ནས་སྟོན་པ་རྡོ་རྗེ་འཛིན། །སངས་རྒྱས་ཀུན་གྱིས་ཕྱག་བྱས་པ། །ཞེས་བྱ་བ་ལ་སོགས་པས་མདོར་བརྗོད་ཅིང་། རྒྱས་པར་ནི་ལེའུ་དང་པོ་ལས་འདོད་ཆགས་ཆེན་པོའི་ཚུལ་ཞེས་བྱ་བ་ནས་བརྩམས་ཏེ། ཞལ་གསུམ་པ་ལྟ་བུར་སྣང་བར་གྱུར་ཏོ་ཞེས་
བྱ་བའི་བར་དུ་གསུངས་སོ། །དེ་ལ་དབང་བསྐུར་བ་དང་རིག་པའི་བརྟུལ་ཞུགས་མ་གསུངས་པས་དེ་དག་གི་སྐབས་དབྱེ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་སྟོན་པ་རྡོ་རྗེ་འཛིན་གྱིས་བཀའ་སྩལ་པ་ཞེས་བྱ་བར་སྦྱར་རོ། །སྟོན་པ་ལ་སོགས་པ་ནི་རྣལ་འབྱོར་པའི་གནས་སྐབས་
དྲུག་ཡིན་ནོ། །དེ་སྟོན་པར་མཛད་པ་ཉིད་ཀྱི་ཕྱིར་ཚིག་དེ་དག་གིས་བཅོམ་ལྡན་འདས་བསྟན་པ་ཡིན་ནོ། །དང་པོར་རིག་མ་དང་བཅས་པའི་མཆོག་དང་པོའི་ཚུལ་གྱིས་རྣལ་འབྱོར་པ་སྟོན་པར་འགྱུར་རོ། །དེ་ནས་བསྐྱེད་པ་ཡིན་ཏེ་སྒྲིབ་པ་མེད་པ་ནམ་མཁའི་དབྱིངས་དག་པའི་ཚུལ་དུ་ཐམས་ཅད་ཀྱི་ས་བོན་ཉིད་ཡིན་
པའི་ཕྱིར་རོ། །དེ་ནས་བྱེད་པ་ཡིན་ཏེ་དཀྱིལ་འཁོར་གྱི་བདག་པོའི་ཚུལ་དུ་བྱ་བའི་གཞི་ཉིད་ཡིན་པའི་ཕྱིར་རོ། །དེ་ནས་མི་འགྱུར་ཆེ་ཡིན་ཏེ། སྐུ་ལ་སོགས་པས་བྱིན་གྱིས་བརླབས་པའི་ཕྱིར་རོ། །དེ་ནས་དག་པའི་རྡོ་རྗེ་ཡིན་ཏེ། སངས་རྒྱས་ཀྱི་ཅོད་པན་གྱིས་དབང་བསྐུར་བའི་ཕྱིར་རོ། །དེ་ནས་འདི་
ལ་ཆོས་ཆེན་པོ་ཡོད་པས་ན་ཆོས་ཆེན་པོ་སྟེ། རིག་པའི་བརྟུལ་ཞུགས་རྙེད་པའི་ཕྱིར་རོ། །རྡོ་རྗེའི་གསུང་ནི་འཆད་པར་འགྱུར་བའི་གསང་བ་སྟོན་པའོ། །སེམས་དཔའ་རྡོ་རྗེ་ཞེས་བྱ་བ་ལ་སོགས་པ་ལ་སངས་རྒྱས་ཀྱང་ཡིན་ལ་རྡོ་རྗེ་འཛིན་པ་ཡང་ཡིན་པས་ན་སྟེ། མི་བསྐྱོད་པ་ཞེས་བྱ་བའི་དོན་ཏོ། །
དེ་རྣམས་མཉེས་འགྱུར་ནི་དགྱེས་པར་འགྱུར་བའོ། །སེམས་དཔའ་རྡོ་རྗེ་ནི་མཆོག་དང་པོའོ། །དེའི་སྦྱོར་བ་ནི་སྤྱི་བོར་ཡང་དག་པར་སྦྱོར་བའོ། །དེས་ན་འདི་ནི་ངེས་པར་གཟུང་བ་དང་བཅས་པ་ཡིན་ཏེ། མི་བསྐྱོད་པ་ཉིད་ཀྱི་མཆོག་དང་པོ་ལ་ཡིན་གྱི་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་འཛིན་ནི་

བྱང་ཆུབ་ཀྱི་སེམས་འཛིན་པ་བྱང་ཆུབ་སེམས་དཔའ་རྣམས་ཏེ། དཀྱིལ་འཁོར་གྱི་བདག་པོ་ཞེས་བྱ་བའི་དོན་ཏོ། །དེ་རྣམས་མཉེས་པར་བྱེད་པ་ནི་སངས་རྒྱས་རབ་ཏུ་དབྱེ་བ་དང་། བྱང་ཆུབ་ཀྱི་རབ་ཏུ་དབྱེ་བ་སྟེ་གང་ཞིག་རང་གི་རིགས་ཡིན་པ་དེ་དེས་དབང་བསྐུར་བའི་ཕྱིར་
རོ། །གང་ཞིག་གང་གི་བྱང་ཆུབ་ཀྱི་རིགས་ཀྱི་རིག་པ་ཡིན་པ་དེས་དེ་ལ་བརྟུལ་ཞུགས་སྦྱིན་པའི་ཕྱིར་རོ། །རྡོ་རྗེ་ཞེས་བྱ་བ་ལ་སོགས་པ་ལ་རྡོ་རྗེ་ནི་མི་བསྐྱོད་པ་སྟེ། མཆོག་དང་པོར་ངེས་པ་ཉིད་ཡིན་པའི་ཕྱིར་རོ། །སྤྱན་གྱི་གཟུགས་ནི་སྤྱན་གྱི་སྐུའོ། །སོགས་པའི་སྒྲས་ནི་མཱ་མ་ཀཱི་དང་གོས་
དཀར་མོ་དང་སྒྲོལ་མའི་གཟུགས་བསྡུའོ། །དེ་དག་གིས་ནི་གཙུག་ཏོར་མཉེས་པར་བྱེད་པ་སྟེ། འཁོར་ལོས་སྒྱུར་བ་དྲུག་པོ་མཉེས་པར་བྱེད་པར་རོ། །དེ་ལ་མི་བསྐྱོད་པས་ནི་དེ་ལས་གཞན་པ་ལྔ་པོ་དག་ལ་དབང་བསྐུར་རོ། །རྟག་པ་དང་རྡོ་རྗེ་འཛིན་པ་དག་དང་། ང་རྒྱལ་དང་འདོད་ཆགས་
དང་དོན་ཡོད་པ་ནི་གོ་རིམས་བཞིན་དུ་སྤྱན་ལ་སོགས་པས་རིག་པའི་བརྟུལ་ཞུགས་བྱའོ། །གཙུག་ཏོར་རྣམས་དཀྱིལ་འཁོར་གྱི་བདག་པོ་ཡིན་ཡང་རུང་། དཀྱིལ་འཁོར་པ་ཡིན་ཡང་རུང་། མཉེས་པར་བྱེད་པ་ནི་ཁྱད་པར་གྱི་ཚིག་མེད་པའི་ཕྱིར་རོ། །དཀྱིལ་འཁོར་པ་ལྷག་པ་རྣམས་ཀྱིས་
དབང་དུ་མཛད་ནས། ཁྲོ་བོའི་ནང་ནས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་རྡོ་རྗེ་ནི་མི་བསྐྱོད་པ་སྟེ། དེས་དབང་བསྐུར་བའི་དོན་དུ་བསྒོམས་པའོ། །རིག་པའི་རྒྱལ་པོ་ནི་མིག་ལ་སོགས་པ་ཡིན་ལ། དེ་ཉིད་ནི་ཆོས་རྣམས་ཏེ། དཀྱིལ་འཁོར་གྱི་བདག་པོའི་མཆོག་ལ་
གནས་པ་ཉིད་ཀྱི་ཕྱིར་རོ། །རིག་པའི་རྒྱལ་མོ་ནི་དགའ་མ་བཞིའོ། །དེ་རྣམས་ཀྱི་སྦྱོར་བ་ནི་ཏིང་ངེ་འཛིན་ཏེ། དེ་དག་ལ་དེས་ཞེས་བྱ་བའི་དོན་ཏོ། །ཐམས་ཅད་འདོད་ཅན་ནི་རྡོ་རྗེའི་བདག་པོ་དྲུག་སྟེ། དེ་རྣམས་ཀྱི་ཏིང་ངེ་འཛིན་ནི་ཐམས་ཅད་འདོད་ཅན་སྔགས་རྣམས་ལའོ། །གདོན་མི་ཟ་བའི་ཡེ་
ཤེས་ནི་དོན་ཡོད་པར་གྲུབ་པའོ། །ཕྱོགས་གཞན་ནི་སྔགས་རྣམས་ཞེས་བྱ་བ་ལ་སོགས་པ་གསུངས་ཏེ། དཀྱིལ་འཁོར་པ་དང་། རིགས་མི་ཤེས་པ་ཐམས་ཅད་ཀྱི་སྤྱི་བོར་ནི་མི་བསྐྱོད་པ་ཉིད་བསྒོམ་པར་བྱ་སྟེ། དེས་མཚན་མའི་དྲི་མ་ཐམས་ཅད་འཁྲུད་པར་བྱེད་པའི་བསམ་གཏན་གྱི་

བདག་ཉིད་ཀྱིས་ཐམས་ཅད་དབང་བསྐུར་བ་ཉིད་ཀྱི་ཕྱིར་ཞེས་བྱ་བར་དགོངས་སོ། །དེ་སྐད་དུ་གཙུག་ཏོར་ལ་སོགས་པའི་ཚིག་འདི་དག་ནི་ལེའུ་བཅོ་བརྒྱད་པ་ལས། འཁོར་ལོས་སྒྱུར་རྒྱལ་དྲུག་པོ་དང་། །ཞེས་བྱ་བ་ནས་བརྩམས་ཏེ། བསམ་གཏན་རྡོ་རྗེས་ཐམས་ཅད་ཀྱི། །དབང་བསྐུར་བ་
ནི་རབ་ཏུ་བསྔགས། །ཞེས་བྱ་བའི་བར་གྱིས་འཆད་པར་འགྱུར་རོ། །དེ་ལ་བསམ་གཏན་རྡོ་རྗེ་ནི་མི་བསྐྱོད་པ་ཡིན་ཏེ་དེས་ཐམས་ཅད་ལ་ཡིན་གྱི་མཆོག་དང་པོས་ནི་མ་ཡིན་ནོ་ཞེས་བྱ་བའི་དོན་ཏོ་ཞེས་གསུངས་སོ་ཞེས་བྱ་བ་ནི་དངོས་གྲུབ་མཆོག་གི་དམ་ཚིག་ཉེ་བར་བསྡུ་བ་ཡིན་ནོ། །དེའི་ཞར་
ལ་གནོད་སྦྱིན་མོ་ལ་སོགས་པའི་དངོས་གྲུབ་ཕྲ་མོ་རྣམས་ཀྱི་དམ་ཚིག་ཀྱང་གནོད་སྦྱིན་མོ་ཞེས་བྱ་བ་ལ་སོགས་པ་གསུངས་ཏེ། གནོད་སྦྱིན་མོ་རྣམས་ཀྱི་སྔགས་རྒྱུད་ནི་གནོད་སྦྱིན་མོ་ལ་སོགས་པའི་སྔགས་ཀྱི་རྒྱུན་ཏེ། དེ་རྣམས་ཀྱི་སྤྱི་བོར་བརྟག་པར་བྱ་བ་ནི་བསྒོམ་པའོ། །སྦྱོར་བ་ནི་ཏིང་ངེ་
འཛིན་ནོ། །སྔགས་ནི་ལྷ་རྣམས་སོ། །སྦྱོར་བ་ཡང་ཡིན་ལ་སྔགས་ཀྱང་ཡིན་ནོ། །ཤིས་པ་ནི་བསྔགས་པའོ། །བསྐུལ་བ་ནི་རང་གི་འཁོར་ལོས་སྒྱུར་བ་རྣམས་ཡང་དག་པར་སྦྱོར་བའོ། །དབང་བསྐུར་བ་ནི་ཁྱབ་པར་བྱེད་པ་ཉིད་ཡིན་པའི་ཕྱིར་རོ། །དམ་ཚིག་ཆེན་པོ་ནི་བརྟུལ་ཞུགས་དང་དབང་
བསྐུར་རོ། །དེ་སྟོན་པར་མཛད་པ་ལ་དེ་སྐད་ཅེས་བྱའོ། །བསམ་གཏན་ཞེས་བྱ་བ་ལ་སོགས་པས་ནི་མཇུག་བསྡུ་བའོ། །འདི་ཡིས་ནི་ཞེས་བྱ་བ་ནི། སེམས་དཔའ་རྡོ་རྗེ་སྦྱོར་བ་ཡིས། །ཞེས་བྱ་བ་ལ་སོགས་པ་ལ་ཐམས་ཅད་ཀྱིས་གསུངས་ཞེས་བྱ་བར་སྦྱོར་རོ། །ཅི་གསུངས་ཤེ་ན།
བསམ་གཏན་རྡོ་རྗེ་ཞེས་བྱ་བ་སྟེ། ཏིང་ངེ་འཛིན་བརྟན་པོས་སྔགས་རྣམས་མཉེས་པར་བྱེད་པ་གང་ཡིན་པ་དེའི་དཀྱིལ་འཁོར་དག་སྟེ། སྙིང་པོ་བསྡུས་པའོ། །དམ་ཚིག་ཆེན་པོ་ནི་རྡོ་རྗེ་འཆང་ཆེན་པོའོ། །དེའི་སྒྲུབ་པར་བྱེད་པ་ནི་མཉེས་པར་བྱེད་པ་སྟེ། དེའི་བཀའ་སྒྲུབ་པར་བྱེད་པའི་ཕྱིར་རོ། །
རང་གི་དངོས་གྲུབ་ངེས་པར་བྱ་བ་ལ་སོགས་པའི་དོན་དུ་སྣོད་ལ་དབབ་པར་བྱ་བ་ཡིན་པ་དེའི་ཕྱིར། དེའི་དབང་དུ་མཛད་པ་ནི་དེ་ནས་ཞེས་བྱ་བ་ལ་སོགས་པ་གསུངས་པ་ལ། སྟོན་པ་ཞེས་བྱ་བ་ནི་དེའི་བཀས་ལྷ་ཐམས་ཅད་སྣོད་ལ་འབེབས་པར་མཛད་པའི་ཕྱིར་རོ། །དེ་ཅིའི་ཕྱིར་ཞེ་ན། གང་གི་ཕྱིར་

མཆོག་ཏུ་གཙོ་བོའོ། །དེ་ཡང་ཅིའི་ཕྱིར་ཞེ་ན། གང་གི་ཕྱིར་ཆོས་རྣམས་ཀུན་དབང་ཕྱུག་སྟེ་གྲུབ་པའི་སྔགས་རྣམས་རབ་ཏུ་མཛད་པ་པོའོ། །དེ་ཡང་ཅིའི་ཕྱིར་ཞེ་ན། གང་གི་ཕྱིར་སྐུ་དང་གསུང་དང་ཐུགས་ཡོངས་སུ་དག་པས་ཏེ། རྣམ་པ་ཐམས་ཅད་དུ་སྐྱོན་མི་
མངའ་བའོ། །ཡེ་ཤེས་ནི་འབེབས་པའི་ལས་གྲུབ་པའོ། །དེ་ཉིད་ནི་བརྟན་པ་ཉིད་ཡིན་པའི་ཕྱིར་རྡོ་རྗེའོ། །དེ་འཆད་པར་མཛད་པ་ལ་ཡང་དེ་སྐད་ཅེས་བྱའོ། །བཀའ་སྩལ་པ་ནི་བཀའ་སྩལ་པར་གྱུར་པའོ། །བསམ་གཏན་རྡོ་རྗེ་ཞེས་བྱ་བ་ནི་འབེབས་པའི་ཏིང་ངེ་འཛིན་མི་ཕྱེད་པའོ། །རབ་
བྱ་བ་ཞེས་བྱ་བ་ནི་ཁྱད་པར་དུ་བྱ་བ་སྟེ། བདག་ཉིད་རྡོ་རྗེ་འཆང་དམར་པོ་ལ་སོགས་པའི་རྣམ་པ་དང་། སྣོད་དང་ལྷ་དག་ཀྱང་ཇི་ལྟར་འཆད་པར་འགྱུར་བ་བཞིན་དུ་ཞེས་བྱ་བའི་དོན་ཏོ། །བཟླས་དང་ཞེས་བྱ་བ་ནི་དབབ་པའི་སྔགས་སོ། །སྔགས་ཀྱི་སྦྱོར་བས་སོ་ཞེས་བྱ་བ་ནི་ཡི་གེ་ཧ་ལ་སོགས་
པའི་གནས་ཇི་ལྟ་བ་བཞིན་དུ་ཆུའི་དཀྱིལ་འཁོར་ལ་སོགས་པ་ལ་དགོད་པས་སོ། །དེ་ལས་ཅིར་འགྱུར་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གསུངས་སོ། །འདི་ལ་གསུང་གི་ལས་མངའ་བས་ན་གསུང་གི་ལས་ཏེ། ཇི་སྐད་དུ་གསུངས་པ་དེ་བཞིན་དུ་མཛད་པའོ། །དེ་ཇི་ལྟར་
བཀའ་ཡིན་པ་དེ་བཞིན་དུ་སྟེ། འདི་སླུ་བར་མི་མཛད་ཅེས་བྱ་བའི་དོན་ཏོ། །སྣོད་ལ་བབས་པར་གྱུར་ན་བསྒུལ་བ་དང་རེངས་པ་ལ་སོགས་པ་དང་དཀྱིལ་འཁོར་བྲི་བ་ལ་སོགས་པའི་ལས་རྣམས་སྣ་ཚོགས་ཏེ་རྨད་དུ་བྱུང་བ་བྱེད་པར་འགྱུར་རོ། །རྡོ་རྗེ་ཆོས་ཞེས་བྱ་བ་ལ་སོགས་པ་ལ་རྡོ་རྗེ་ཆོས་ནི་
འོད་དཔག་ཏུ་མེད་པའོ། །དེའི་རང་བཞིན་ཅན་གྱི་སྣོད་ཐམས་ཅད་དམར་པོར་ཡི་གེ་ཨ་ལས་བསམས་ལའོ། །སྐུ་གསུང་ཐུགས་ཀྱི་རྡོ་རྗེ་ལ། །ཞེས་བྱ་བ་ནི་དེ་ཉིད་ཀྱི་མགོ་བོ་དང་ལྐོག་མ་དང་སྙིང་གར་རོ། །གནས་གསུམ་དུ་ནི་རིགས་བརྟག་གོ་ཞེས་བྱ་བ་ནི་ཇི་སྐད་དུ་གསུངས་པའི་ཆུ་དང་རླུང་
དང་དབང་ཆེན་གྱི་དཀྱིལ་འཁོར་ལ་གནས་པའི་ཡི་གེ་ཧཱ་དང་ཨཿདང་ཧཱུཾ་བསྒོམ་པར་བྱའོ་ཞེས་བྱ་བའི་དོན་ཏོ། །དབབ་པའི་ཆོ་ག་ཐམས་ཅད་ནི་བྱས་ན་ཞེས་བྱ་བ་ནི་དེ་ནས་དབབ་པར་བྱ་བའི་ལྷ་གནོད་མཛེས་ཀྱིས་བཀུག་ལ་སྣོད་ཀྱི་ལུས་ལ་བཅུག་སྟེ། སྣོད་ཀྱི་ཡང་རྐང་པའི་འོག་ཏུ་རླུང་དང་མེའི་

དཀྱིལ་འཁོར་ལ་གནས་པའི་ཡི་གེ་ཛྷཻཾ་དམར་པོས་བཏེག་པ་དང་། རིགས་གསུམ་གྱི་འོད་ཟེར་དམར་པོས་ལུས་ཐམས་ཅད་ལ་འགེངས་པར་གྱུར་པར་རྣམ་པར་བསམས་ལ་བདུག་སྤོས་གཏུལ་ཏེ། དྲིལ་བུ་དཀྲོལ་ནས་ཨཱ་བེ་ཤ་ཡ་སྟཾ་བྷ་ཡ། ར་ར་ར། ཙ་ལ་ཡ་ཙ་ལ་ཡ་ཧཱུཾ་ཧཱུཾཿཨཿཛྷཻཾ་ཞེས་
བྱ་བ་ལ་སོགས་པའི་སྔགས་བཟླ་བར་བྱའོ་ཞེས་བྱ་བའི་དོན་ཏོ། །གདོན་མི་ཟ་བར་གྲུབ་ཅེས་བྱ་བ་ནི་ངེས་པར་བབས་པར་འགྱུར་རོ་ཞེས་བྱ་བའི་དོན་ཏོ། །འདི་འགྲུབ་པས་ཅིར་འགྱུར་ཞེ་ན། དེའི་ཕྱིར་བསྒུལ་བ་དང་ཞེས་བྱ་བ་ལ་སོགས་པ་གསུངས་པ་ལ། སྤྱོད་པ་རྣམ་པ་གསུམ་ནི་
བསྒུལ་བའོ། །གཡོ་འགུལ་མེད་པ་ཉིད་ནི་རེངས་པའོ། །ལྐོག་ཏུ་གྱུར་པའི་ཡེ་ཤེས་པ་ནི་ལྷ་ཆེན་པོའོ། །དེ་གསུམ་དང་འཕགས་པའི་ས་བཞི་པ་དག་ཀྱང་སྟེ། འཕགས་པའི་ས་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་ཡུལ་ལོ། །དེའི་ཡུལ་ཅན་གྱི་ཡེ་ཤེས་ནི་
འཕགས་པའི་ས་སྟེ། འདི་ལ་བཞི་པ་དེ་ཡོད་པས་ན་དེ་སྐད་ཅེས་བྱའོ། །ངོ་མཚར་རྣམ་པ་བཞི་པོ་དེ་ནི་རྡོ་རྗེ་གྲུབ་པ་འདི་ཡིས་བྱའོ། །དེ་ཡང་དེ་ལྟར་བྱས་ན་རྟག་པར་གྲུབ་སྟེ་གསུངས་པའི་ཆོ་གས་ངེས་པར་འགྲུབ་པར་འགྱུར་རོ་ཞེས་བྱ་བའི་དོན་ཏོ། །སྣོད་ཀྱི་མཚན་ཉིད་ནི་བུ་མོ་ཞེས་བྱ་
བ་ལ་སོགས་པ་གསུངས་སོ། །སྔོན་དུ་བྱ་བ་བསྟན་པའི་ཕྱིར་ཆོ་ག་ཞེས་བྱ་བ་ལ་སོགས་པ་གསུངས་པ་ལ། ཐམས་ཅད་བྱས་ན་ནི་ཞེས་བྱ་བ་ནི་སེམས་བརྟན་པར་བྱ་བ་དང་ལྷག་པར་གནས་པ་ལ་སོགས་པའོ། །ལས་རྣམས་ནི་དབབ་པའི་ཆོ་གའོ། །དཔྱས་པར་འགྱུར་ཞེས་བྱ་བ་ནི་བཞད་
གད་ཉིད་དུ་འགྱུར་བའོ། །སྙིང་པོའི་སྔགས་ཀྱི་ཡི་གེའི་ཚིག་ནི་ཞེས་བྱ་བ་ལ་ཐུགས་རྡོ་རྗེ་ལ་སོགས་པའི་དེ་ཁོ་ན་ཉིད་སྟོན་པས་ན་སྙིང་པོའོ། །བྱང་ཆུབ་ཀྱི་སེམས་དེའི་རྒྱུ་མཐུན་པ་ཡིན་པའི་ཕྱིར་སྔགས་སོ། །དོན་ཡོད་པ་ཉིད་ཡིན་པའི་ཕྱིར་ཡི་གེའོ། །དེ་རྣམས་འདི་དག་ལ་གནས་པས་ནི་
ཚིག་གོ། །ནམ་མཁའི་ཁམས་ཀྱང་ཞེས་བྱ་བ་ནི་སྣོད་གཞན་ལ་སྨོས་ཀྱང་ཅི་དགོས་ཞེས་པའོ། །རྡོ་རྗེ་སེམས་དཔའ་བདག་ཉིད་ཀྱང་། །ཞེས་བྱ་བ་ནི་ལྷ་གཞན་དག་ལ་སྨོས་ཀྱང་ཅི་དགོས་ཞེས་པའོ། །འདི་ནི་ཞེས་བྱ་བ་ནི་ཡི་གེ་ཧཱུཾ་ལ་སོགས་པ་གསུམ་མོ། །གསང་ཚིག་བརྟན་པའོ་ཞེས་བྱ་བ་

ནི་ཐུགས་རྡོ་རྗེ་ལ་སོགས་པའི་རྟག་ཏུ་གནས་ཡིན་ནོ་ཞེས་བྱ་བའི་དོན་ཏོ། །བསྒུལ་བར་བྱེད་པར་བཤད་ཅེས་བྱ་བ་ལ། དེ་ཡང་གསུམ་སྟེ། འགུལ་བ་དང་། གཡོ་བ་དང་། དྲན་པའོ། །དྲན་པ་ཞེས་བྱ་བ་ནི་བློ་ལ་གནས་པར་སྨྲ་བར་འགྱུར་བ་སྟེ། བསླང་བ་ཞེས་བྱ་བའི་
དོན་ཏོ། །འདི་ནི་ཞེས་བྱ་བ་ནི་ཡི་གེ་ཛྷཻའོ། །བསྒུལ་བ་ཐམས་ཅད་ཀྱི་ཞེས་བྱ་བ་ལ། གསུམ་ཆར་ཡང་སྟོན་པར་བྱེད་ཅེས་བྱ་བ་ནི་ལྷག་མའོ། །འདི་ཞེས་བྱ་བ་ནི་ཡི་གེ་ཛྷཻ་དེ་ཉིད་དོ། །གསང་བ་ཡིན་པར་ཞེས་བྱ་བ་ནི་རྡོ་རྗེ་ལས་ཀྱི་ངོ་བོ་ཉིད་ཅེས་བྱ་བའི་དོན་ཏོ། །ཁྲུ་བརྒྱད་ཙམ་མམ་ལྔ་ཙམ་
དུ་འཕར་ཞེས་བྱ་བར་སྦྱར་རོ། །རྡོ་རྗེ་རྒྱལ་པོ་ནི་གསང་བའོ། །འཇིགས་ཤིང་སྐྲག་པ་ནི་གཡོ་བའོ། །སྔ་མ་བཞིན་དུ་ཞེས་བྱ་བ་ལ་སོགས་པ་ལ། སྣོད་ཇི་ལྟ་བ་བཞིན་དུ་འོད་དཔག་ཏུ་མེད་པར་བྱས་ནས་ཆོ་ག་གསུངས་པ་དེ་བཞིན་དུ་ཡི་གེ་ཧ་ལས་རྣམ་པར་སྣང་མཛད་དམར་པོའམ། ཡི་གེ་ཧཱུཾ་
ལས་མི་བསྐྱོད་པ་དམར་པོར་བྱས་ནས་ཞེས་ཤེས་པར་བྱའོ་ཞེས་བྱ་བའི་དོན་ཏོ། །གསང་བ་ནི་བཅས་པའོ། །གང་གི་ཚེ་སྣོད་ལ་བབས་ནས་རིང་དུ་འབར་བ་དེའི་ཚེ་དེའི་སྟེང་དུ་རྡོ་རྗེ་སེར་པོ་རྡོ་རྗེ་ལ་རི་རབ། དེའི་སྟེང་དུ་དབང་ཆེན་གྱི་དཀྱིལ་འཁོར། དེའི་སྟེང་དུ་རྡོ་རྗེ་རྩེ་ལྔ་པ་སེར་པོ། དེའི་སྟེང་དུ་
དང་པོའི་དབྱངས་ཡིག་སེར་པོ། །དེའི་སྟེང་དུ་རྣམ་པར་སྣང་མཛད་སེར་པོ་བསྒོམས་ན་ངེས་པར་ལྡོག་པར་འགྱུར་རོ། །བབས་པའི་ལྕེ་ལ་ཨཱཿདམར་པོ་འབར་བའི་ཕྲེང་བ་འཁྲིགས་པར་བསམས་ལ། བྲཱུ་ཧི་བཛྲ་ཞེས་བརྗོད་ན་དགེ་བ་དང་མི་དགེ་བ་རྣམས་སྟོན་པར་བྱེད་དོ། །མཐར་ཨོཾ་ཁྱེད་
ཀྱིས་འགྲོ་བའི་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་གཤེགས་པར་མཛད་དུ་གསོལ། །ཞེས་གསོལ་བ་བཏབ་ལ་སྙིམ་པའི་མེ་ཏོག་གཏོར་ཏེ། ཧཱུཾ་ཧཱཿཨཱཿཛྷཻ་མུཿཞེས་བྱ་བས་སླར་གཤེགས་སུ་གསོལ་བ་དང་། སྣོད་
ལ་སོགས་པ་ཡང་བསྲུང་བར་བྱའོ། །མངོན་སྤྱོད་བྱ་བའི་ཕྱིར་བདུད་རྩི་ཐབ་སྦྱོར་གྱི་རྟོག་པ་ནི་དེ་ནས་ཞེས་བྱ་བ་ལ་སོགས་པ་གསུངས་སོ། །གསུང་ནི་ཞེས་བྱ་བ་ནི་གདུག་པའི་ལས་སྟོན་པའོ། །ཅིའི་ཕྱིར་དེ་ལྟར་སྟོན་ཞེ་ན། གང་གི་ཕྱིར་རྒྱལ་པོ་སྟེ། རྒྱལ་པོ་ནི་མ་རུངས་པ་རྣམས་ཚར་གཅོད་པར་

བྱེད་པ་དེ་བས་ནའོ། །ཅི་གནོད་སྦྱིན་རྣམས་ཀྱི་རྒྱལ་པོ་ཡིན་ནམ་ཞེ་ན་མ་ཡིན་ནོ་ཞེས་གསུངས་པ་ནི་དེ་བཞིན་གཤེགས་པ་ཀུན་གྱི་བདག་གོ། །འོ་ན་ཇི་ལྟར་གདུག་པའི་ལས་ཅན་ཡིན་ཞེ་ན། དེ་ལྟར་ནི་མ་ཡིན་ནོ་ཞེས་གསུངས་པ་ནི་སྐུ་གསུམ་ཞེས་བྱ་བ་ལ་སོགས་པ་ལ་སྐུ་ལ་སོགས་པའི་
གནས་ཀྱི་ལས་དེ་དག་གིས་ཡོངས་སུ་དག་པ་ནི་སྐུ་དང་གསུང་དང་ཐུགས་ཀྱི་ཕྲིན་ལས་ཡོངས་སུ་དག་པ་ཅན་ཞེས་བྱ་བའི་དོན་ཏོ། །དེ་ལྟར་ན་དམ་པའི་ཆོས་ཡུན་རིང་གནས་པར་བྱ་བའི་ཕྱིར་དང་། སྐྱེ་བོ་མང་པོ་ལ་ཕན་པར་བྱ་བའི་ཕྱིར་དང་། བསྒྲུབ་པར་བྱ་བ་དེ་ཉིད་དམྱལ་བ་ལ་སོགས་
པ་ལས་བཟློག་པར་བྱ་བའི་ཕྱིར་དང་། སྔགས་དང་ཕྱག་རྒྱ་དང་ཏིང་ངེ་འཛིན་གྱི་སྟོབས་ཀྱིས་ཡོངས་སུ་དག་པའི་སངས་རྒྱས་ཀྱི་ཞིང་དུ་སྐྱེ་བར་འགྱུར་བའི་ས་བོན་གདབ་པའི་དོན་དུ་ཕྲིན་ལས་མཛད་པ་དང་སྟོན་པ་དེའི་ཕྱིར་དེ་བས་ན་འདི་ནི་དྲག་པོ་དང་འདྲ་བར་སྣང་བའི་ཕྱིར་དྲག་པོ་ཡིན་གྱི་
ཐུགས་རྗེ་ཆེན་པོ་ལས་བྱུང་བ་ཉིད་ཀྱི་ཕྱིར་མི་དགེ་བ་ནི་མ་ཡིན་ནོ། །བསྒྲུབ་པར་བྱ་བ་ལ་སོགས་པ་སྐྱེ་བོ་མང་པོ་ལ་ཕན་འདོགས་པ་ཆེན་པོ་ཉིད་ཡིན་པའི་ཕྱིར་ཡང་བསོད་ནམས་ཀྱི་ཕུང་པོ་རྒྱ་ཆེན་པོ་དང་ལྡན་པ་ཡིན་ནོ། །སེམས་ཅན་གདུག་པ་མ་ཡིན་པ་རྣམས་ལ་ནི་ཞེ་སྡང་དང་ཆགས་པ་མེད་
དུ་ཟིན་ཀྱང་མཆོད་སྦྱིན་གྱི་དོན་དུ་ཕྱུགས་གསོད་པ་དང་འདྲ་བར་གཏི་མུག་ལས་བྱུང་བའི་མི་དགེ་བ་ཡིན་ཏེ། གདུག་པ་མ་ཡིན་པ་རྣམས་ལ་ནི་གསོད་པ་ནི་སྙིང་རྗེ་མེད་པར་འགྱུར་བའི་ཕྱིར་དང་། དེ་རྣམས་ཀྱིས་འདི་སངས་རྒྱས་ཀྱི་ཞིང་དུ་བསྐྱེད་པའི་ས་བོན་བསྐྱེད་པ་ཡང་མི་སྲིད་པ་སྟེ།
སངས་རྒྱས་ཀྱི་བཀས་མ་གནང་བ་ཉིད་ཀྱིས་ན་དམ་ཚིག་ལས་འདས་པའི་ཕྱིར་རོ། །རྩེ་གཅིག་མ་གྱུར་པ་ཡིས་ཀྱང་། །ཞེས་བྱ་བ་ལ་སོགས་པ་ལ། རྩེ་གཅིག་པ་སྟེ། དམིགས་པ་གཅིག་ལ་སེམས་དེ་གནས་པ་ཐོབ་པ་སྟེ། འགོག་པའི་བཟླས་པའམ། རྡོ་རྗེ་བཟླས་པས་རྫོགས་པའི་
སྔགས་པ་ཡིན་ནོ། །ཅིག་ཤོས་རྩེ་གཅིག་མ་གྱུར་པ་ནི་གྲངས་ཀྱི་བཟླས་པ་རྫོགས་པའི་སྔགས་པ་ཡིན་ལ། དེས་ཀྱང་གདུག་པ་ཐམས་ཅད་རྣམ་པར་གཞིག་པའི་ལས་འདི་དག་བྱེད་པ་ཡིན་ན། སྔ་མ་དག་གིས་ལྟ་སྨོས་ཀྱང་ཅི་དགོས། ཀྱང་གི་སྒྲས་ནི་གསུམ་ཆར་ལས་ཀྱང་འགྲུབ་པར་

འགྱུར་རོ་ཞེས་བྱ་བར་དགོངས་པའོ། །ཇི་ལྟར་བྱ་ཞེ་ན། བརྟུལ་ཞུགས་བརྟན་པ་སྟེ། ཐོས་པ་དག་དང་དད་པ་དང་སྙིང་རྗེ་དང་། རང་གི་ལྷར་མོས་པ་དང་། གཟུགས་བརྙན་ལ་བསྒྲུབ་བྱར་མོས་པ་དང་། རང་གི་དམ་ཚིག་བསྐྱང་བ་ལ་སོགས་པས་ནི་བརྟུལ་
ཞུགས་ཡིན་ཏེ། དེ་རྣམས་བརྟན་པ་ཞེས་བྱ་བའི་དོན་ཏོ། །སྦྱོར་བ་གཞན་གྱིས་མི་བྱའོ་ཞེས་བྱ་བ་ནི་ལྷ་གང་གི་སྔགས་ཡིན་པ་དེ་ནི་སྦྱོར་བ་ཉིད་ཀྱིས་བྱའོ། །བརྟུལ་ཞུགས་བརྟན་པ་མ་ཡིན་པའམ། སྦྱོར་བ་གཞན་གྱིས་བྱས་ན་འགྲུབ་པར་མི་འགྱུར་རོ་ཞེས་བྱ་བའི་དོན་ཏོ། །ཕུབ་སོགས་
ལས་ཞེས་བྱ་བ་ལ་སོགས་པའི་སྒྲས་ནི་བསྒྲུབ་པར་བྱ་བའི་རྐང་རྗེས་ཀྱི་ས་ལ་སོགས་པ་སྟེ་ལྷག་མ་ནི་དབྱིག་སྔོན་གྱི་སྔགས་དང་འདྲའོ། །རོ་བསྲེགས་ཐལ་བ་ཡིས་ཞེས་བྱ་བ་ནི་རོ་བསྲེགས་པ་དེ་ཉིད་ན་གནས་པའི་ས་དང་ཐལ་བ་དང་བསྒྲུབ་པར་བྱ་བའི་རྐང་རྗེས་ཀྱི་ས་དང་བཅས་པས་སོ། །ལྷག་
མ་ནི་དབྱིག་སྔོན་གྱི་སྔགས་དང་འདྲའོ། །སྐྲ་བཤིག་གཅེར་བུར་ཞེས་བྱ་བ་ནི་གཉི་ག་ལ་སྦྱར་བར་བྱའོ། །དེ་འབའ་ཞིག་ནི་མ་ཡིན་གྱི། སྟོང་རྩ་བརྒྱད་དུ་བཟླས་པས་ཀྱང་ཞེས་བྱ་བ་ནི། སྟོང་རྩ་བརྒྱད་དམ་བརྒྱ་རྩ་བརྒྱད་བཟླས་པས་ཀྱང་ཞེས་པ་སྟེ། མང་པོ་ལྟ་སྨོས་ཀྱང་ཅི་དགོས་ཞེས་བྱ་
བའི་དོན་ཏོ། །དཀྱིལ་འཁོར་ཞེས་བྱ་བ་ལ་སོགས་པས་ནི་སྦྱིན་སྲེག་གི་སྦྱོར་བ་གསུངས་པ་ཡིན་ནོ། །དཀྱིལ་འཁོར་གྲུ་གསུམ་ཞེས་བྱ་བ་ནི་མེའི་དཀྱིལ་འཁོར་ཏེ། དུར་ཁྲོད་དང་རིགས་པའི་སའི་ཆ་ལ་སོགས་པའི་རོ་བསྲེགས་པའི་ས་དང་ཐལ་བས་མེའི་དཀྱིལ་འཁོར་བྲིས་ལ་དེའི་དབུས་སུ་མེ་ཐབ་གྲུ་
གསུམ་ལ་བདུད་རྩི་ཐབ་སྦྱོར་གྱི་ཞལ་དུ་སྦྱིན་སྲེག་བྱའོ་ཞེས་བྱ་བའི་དོན་ཏོ། །ཤ་གསུམ་ཆར་བསྡུས་པའམ་རེ་རེ་དང་གཟུགས་བརྙན་བྱས་ནས་བྲིས་པའི་སྔགས་སྙིང་གར་བཅུག་པའི་སྦྱོར་བ་སྣ་ཚོགས་ཀྱིས་སོ། །བྱས་པ་ལ་ཞེས་བྱ་བ་ལ་སྦྱིན་སྲེག་ཅེས་བྱ་བ་ནི་ལྷག་མའོ། །ཤ་ཆེན་གྱིས་ནི་ཞེས་
བྱ་བ་ལ་སྦྱིན་སྲེག་ཅེས་བྱ་བ་ནི་ལྷག་མའོ། །རྡོ་རྗེ་ལས་བྱུང་ཞེས་བྱ་བ་ལ་རྡོ་རྗེ་ནི་ཞེ་སྡང་ཆེན་པོ་སྟེ། དེ་ལས་བྱུང་བའི་ཁྲོ་བོའི་དབང་པོ་རང་ཉིད་ལྟ་བུ་ཞེས་བྱ་བའི་དོན་ཏོ། །ནི་ནི་གང་གི་ཕྱིར་རོ། །ཤ་ཆེན་གྱི་གཟུགས་བརྙན་གྱི་སྦྱིན་སྲེག་འདི་ནི་དྲག་པོའི་ལས་ཐམས་ཅད་ཀྱི་ནང་ནས་མི་བཟད་པ་ཡིན་ནོ། །

ཆོས་མཆོག་ཅན་ཞེས་བྱ་བ་ནི་ཏིང་ངེ་འཛིན་བརྟན་པ་དང་ལྡན་པའོ། །ཚེར་མའི་ཤིང་ལས་སྦར་བའི་མེ་ནི་ཚེར་མའི་མེའོ། །རྒྱུན་གྱིས་འབབ་པའི་ཆུ་བོའི་འགྲམ་གཉིས་པོ་དེའི་འགྲམ་གཉིས་ས་ཡིས་ཀྱང་ཞེས་བྱ་བའི་ངོགས་གཉིས་ཀྱི་ས་ཡིས་ཀྱང་ངོ་། །དེ་ཡང་མགོ་བྱང་ཕྱོགས་སུ་བསྟན་ཞིང་
གན་རྐྱལ་དུ་བཞག་པ་དེའི་ཡན་ལག་ཀུན་ཏིལ་འབྲུ་ཙམ་གྱིས་ནང་དགང་བར་བྱའོ། །གང་གིས་དགང་བར་བྱ་ཞེ་ན། དུག་ལས་བྱུང་བའི་ཚེར་མ་ཡིན་ཏེ། སྦྲུལ་དང་སྡིག་པ་དང་། སང་ཀོ་ཙ་དང་། ཉ་རྭ་ཅན་ལ་སོགས་པའི་ཚེར་མའམ་དུག་གིས་བྱུགས་པའི་བིལ་བ་ལ་སོགས་པའི་ཚེར་མས་དགང་
བར་བྱའོ། །བསྐུལ་བའི་ཚིག་དང་ཞེས་བྱ་བ་ནི་སརྦ་བིགྷྣཱཾ་ཞེས་བྱ་བ་བཏོན་ལ་ཆེ་གེ་མོ་མཱ་ར་ཡ་ཞེས་བྱ་བའི་བསྐུལ་ཚིག་དང་ལྡན་པའི་སྔགས་བཟླ་བར་བྱའོ་ཞེས་བྱ་བའི་དོན་ཏོ། །དྲག་པོའི་འཁྲུལ་འཁོར་བྲི་བའི་ཆེད་ཀྱི་སྣག་ཚ་ནི་སྐེ་ཚེ་ཞེས་བྱ་བ་ལ་སོགས་པ་གསུངས་པ་ལ་འབྲུ་མར་ཞེས་བྱ་བ་
ནི་ཡུངས་མར་རམ་སྣུམ་ཆེན་པོའོ། །ད་དུ་རའི་ཀའི་ཁྱད་པར་ནི་རིམ་གསུམ་པ་སྔོན་པོ་ཅན་ནོ། །སོལ་བ་ནི་རོ་བསྲེགས་པའི་སོལ་བའམ། རོ་བསྲེགས་པའི་མེ་བསླངས་པས་བསྲེག་པའི་མྱོས་པར་བྱེད་པའི་སོལ་བའོ། །ལྷག་མ་ནི་གཞན་གྱིས་མི་ཐུབ་པའི་སྔགས་ཀྱི་སྐབས་སུ་གསུངས་པ་
ནི་སྲིན་པོ་ལ་སོགས་པ་འཛིན་པ་དང་འདྲའོ། །འདིར་ཡང་ཆེ་གེ་མོ་རཱཀྵ་སཻ་གྲཱ་ཧ་ཡ་ཞེས་བྱ་བ་ནི་བསྐུལ་ཚིག་ཡིན་ནོ། །ལིངྒ་ནི་བསྒྲུབ་པར་བྱ་བའི་གཟུགས་བརྙན་ནོ། །དེ་བྱ་བའི་ཕྱེད་ཀྱི་རྫས་ནི་རུས་ཕྱེ་ཞེས་བྱ་བ་ལ་སོགས་པ་གསུངས་སོ། །ཁྱད་པར་འགྱུར་ཞེས་བྱ་བ་སྲིན་པོ་རྣམས་ཀྱིས་སོ། །
ལིངྒ་ཞེས་བྱ་བ་ནི་བཤད་མ་ཐག་པའི་རྫས་སྐེ་ཚེ་གཙོ་བོར་གྱུར་པའི་བཤང་གཅི་སྦྱར་བ་ཡིན་ཏེ། བྱས་པའི་བསྒྲུབ་པར་བྱ་བའི་གཟུགས་བརྙན་ཞེས་བྱ་བའི་དོན་ཏོ། །ཚ་བ་ཆེན་པོས་བཏབ་པར་འགྱུར། །ཞེས་བྱ་བ་ནི་ཆེ་གེ་མོ་མ་ཧཱ་དཱ་གེ་ན་གྲཱ་ཧ་ཡ་ཞེས་བྱ་བའི་བསྐུལ་ཚིག་དང་ལྡན་པའི་སྔགས་བཟླ་བར་
བྱའོ། །སྔགས་གང་གིས་དྲག་པོའི་སྦྱོར་བ་དེ་དག་དང་འཆད་པར་འགྱུར་བ་དེ་ནི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ནི་ཁྲོ་བོ་ཆེན་པོའོ། །དེ་ཐམས་ཅད་ཀྱི་དམ་ཚིག་ནི་བསྡུས་པ་སྟེ། བདུད་རྩི་ཐབ་སྦྱོར་ལ་བྱའོ། །དེའི་སྙིང་པོ་ནི་གྲུབ་པའི་སྔགས་སོ། །

ན་མཿཞེས་བྱ་བ་ལ་སོགས་པ་ལ། ཧུ་ལུ་ཧུ་ལུ་ཞེས་བྱ་བ་ནི་རྨོ་བས་ན་གཤོལ་ཏེ། སྣ་ཚོགས་སུ་སྣང་བའི་སེམས་བསྐྱེད་ལ། མཚན་མའི་རྣམ་པར་རྟོག་པ་ཐམས་ཅད་ནུབ་པར་བྱ་བའི་ཕྱིར། རྨོས་ཤིག་རྨོས་ཤིག་པའི་དོན་ཏེ། ཁ་ཁ་ཁཱ་ཧི་ཁཱ་ཧི་ཞེས་བྱ་བའི་བར་
དུའོ། །ཏིཥྛ་ཏིཥྛ་ཞེས་བྱ་བ་ལ་སོགས་པ་ནི་སྔ་མ་དང་འདྲའོ། །ཛཱི་བཱི་ཏ་ཨནྟ་ཀ་ར་ཡ་ཞེས་བྱ་བ་ནི་བོད་པའི་དོན་གྱིས་བཞི་པའོ། །སྭཱ་ཧཱའི་གནས་སུ་ཡི་གེ་ཧཱུཾ་ཕཊ་སྦྱར་ཏེ་དོན་ནི་སྔ་མ་བཞིན་ནོ། །སྦྱིན་སྲེག་ཡང་ན་ཞེས་བྱ་བ་ལ་ཡང་ནའི་སྒྲ་ནི་བཟླས་པ་ཡང་སྟེ། གཉི་ག་ཇི་སྐད་དུ་བཤད་
པ་བཞིན་ནོ། །ཡང་ན་བསམ་གཏན་དག་ནི་འཆད་པར་འགྱུར་བའོ། །ཇི་ལྟ་བུ་ཞེ་ན་ལུས་དང་ངག་སེམས་འཇིག་པ་སྟེ། གསུམ་པ་དེ་བྱའོ། །མ་ཡེངས་པར་སེམས་ཀྱིས་ཏེ། དུས་དེ་སྲིད་ཀྱི་བར་དུ་ཡིད་རྩེ་གཅིག་པས་སོ། །རྡོ་རྗེ་སེམས་དཔའ་ཞེས་བྱ་བ་ནི་བདུད་རྩི་ཐབ་སྦྱོར་རོ། །སྟ་
རེ་ཐོ་བ་ཕྱག་ན་བསྣམས། །ཞེས་བྱ་བ་ནི་པདྨ་དང་རལ་གྲིའི་གནས་སུའོ། །བསམ་གཏན་དེ་ཉིད་ནི་དེ་ལ་ཞེས་བྱ་བ་ལ་སོགས་པ་གསུངས་ཏེ། དྲག་པོ་ཆེན་པོའི་ལས་ལ་གནས་པའི་ཁྲོ་བོ་ལ་དེ་སྐད་ཅེས་བྱའོ། །དེའི་དམ་ཚིག་ནི་བསམ་གཏན་ནོ། །བསད་པར་ནི་ཞེས་བྱ་བ་ནི་ནམ་མཁའི་
དབྱིངས་ཀྱི་ཡུལ་ཅན་ལ་ཉེ་བར་བཏགས་པའི་ཕྱིར་རོ། །དེ་ཡིས་ཞེས་བྱ་བ་ནི་བསྒྲུབ་པར་བྱ་བ་ཡིས་ཏེ། ནམ་མཁའ་ཁྱབ་པ་དེ་རྣམས་ལག་ན་དགྲ་སྟ་ཐོགས་པ་དེས་དུམ་བུར་བྱེད་པའི་ཕྱིར་རོ། །བསམས་ན་ཞེས་བྱ་བ་ནི་དེ་ལྟར་བསྒོམས་ནའོ། །རྡོ་རྗེ་འཛིན་པ་ཉིད་ཀྱང་ཞེས་བྱ་བ་ནི་གལ་ཏེ་
བསྒྲུབ་པ་བྱ་བ་དེ་རྡོ་རྗེ་འཛིན་པའི་དངོས་པོ་ཡིན་ན་ཡང་འགྱུར་རོ། །སངས་རྒྱས་གནོད་བྱེད་ཅེས་བྱ་བ་ནི་བཤད་མ་ཐག་པའི་རིམ་པས་སོ། །མདུན་ཞེས་བྱ་བ་ནི་མདུན་ལ་སོགས་སུའོ། །གཏུམ་པ་ནི་གནོད་པ་བྱེད་པ་ཅན་ཉིད་ཡིན་པའི་ཕྱིར་རོ། །མཆུ་རིང་བ་ཞེས་བྱ་བ་ནི་བྱ་ཀང་ཀ་ལ་སོགས་
པའོ། །སྦྲུལ་ནག་ཅེས་བྱ་བ་ནི་ཡི་གེ་ཁཾ་ལས་བྱུང་བའོ། །དུག་གི་མཆོག་ནི་དམ་ཚིག་ཅེས་བྱ་བ་ནི་ཧ་ལ་ཧ་ལ་ལ་སོགས་པའི་ཁམས་གསུམ་དུ་གཏོགས་པའི་དུག་དག་གི་ཚོགས་ནི་དུག་གི་མཆོག་སྟེ། དེའི་དམ་ཚིག་གོ། །འདི་ལ་བསྡུས་པ་ཡོད་པས་ན་དེ་སྐད་ཅེས་བྱའོ། །དེའི་ཁ་ན་གནས་

པའི་ཡི་གེ་ཧྲཱིའི་འོད་ཟེར་རྣམས་ཀྱིས་དེའི་ཁར་རྡོ་རྗེ་ཉིད་དུ་དུག་གི་ཚོགས་སྡུད་པར་བྱེད་པའི་ཕྱིར་རོ། །འཕྲལ་བར་བསམས་ནས་ཞེས་བྱ་བ་ནི་ཆེ་གེ་མོ་ཟོ་ཤིག་ཅེས་ལུང་བསྒོ་བ་ཅན་དེས་དཔྲལ་བར་སོས་འཛིན་པའི་ནང་ན་ཁྱད་པར་འཕགས་པ་ཞེས་བྱ་བ་སྟེ། ཁྱད་པར་ཅན་དུ་གྱུར་པ་ཞེས་བྱ་བའི་དོན་
ཏོ། །ཕྱོགས་བཅུའི་སེམས་ཅན་ཐམས་ཅད་གང་ཡིན་པ་དེ་རྣམས་ལ་ཡམས་སམ། གནོད་པར་བྱེད་པ་རྣམས་འཇིགས་པ་གང་ཡིན་པ་དེ་རྣམས་ངེས་པར་འབེབས་པའི་མཆོག་སྟེ་ཤིན་ཏུའོ། །དགྲའི་ཞེས་བྱ་བ་ནི་དགྲ་ལའོ། །བསྒུལ་བ་ཞེས་བྱ་བ་ནི་གསོད་པའོ། །ཐོ་བ་ཞེས་བྱ་ནི་གཡས་ཀྱི་
གསུམ་པར་གཞག་པའོ། །གཤེག་པ་ཅི་འདྲ་བ་ཞེ་ན། གཏུབ་པའོ། །སྟ་རེ་སོགས་ཞེས་བྱ་བ་ལ། དང་པོ་ཉིད་དུ་ལེན་ཅིང་འཛིན་པ་ནི་དང་པོའི་སོགས་ཏེ། གང་ལ་གཡོན་པའི་ཕྱག་གསུམ་པས་དང་པོ་སྟ་རེ་འཛིན་པ་གང་ལ་མངའ་བ་དེ་ལ་དེ་སྐད་ཅེས་བྱའོ། །རྡོ་རྗེ་ཅན་ནི་བདུད་རྩི་ཐབ་སྦྱོར་
གྱིས་སོ། །མངོན་སྤྱོད་ལ་ཁ་སྦྱར་དབྱེ་བ་ལ་སོགས་པ་སྔོན་དུ་བྱ་བའི་བླ་མའི་མན་ངག་ལས་ཤེས་པ་གང་ཡིན་པ་དེ་ཚིགས་སུ་བཅད་པ་གཉིས་ཀྱིས་བསྟན་པར་བྱ་བའི་ཕྱིར་བསྲུང་བ་ཞེས་བྱ་བ་ལ་སོགས་པ་གསུངས་ཏེ། བསྲུང་བའི་དོན་དུ་དང་པོར་ཡོངས་སུ་གཟུང་བ་ནི་ཁ་སྦྱར་ལ་སོགས་པའོ། །
སྔགས་རྣམས་ནི་བསྲུང་བའི་སྔགས་སོ། །ལྷ་རྣམས་ནི་སྲུང་བར་བྱེད་པའི་ལྷ་རྣམས་སོ། །དེ་རྣམས་རང་གི་སྙིང་ག་ལས་བྱུང་བའི་རྡོ་རྗེ་ལྕགས་ཀྱུ་ཕྱག་ན་བསྣམས་པའི་ལྷ་རྣམས་ཀྱིས་བཀུག་པ་རྣམས་གཡོན་ལོགས་སུ་གཞག་སྟེ། བདུད་རྩི་ཐབ་སྦྱོར་གྱི་ཕུར་བུས་ཀཱ་ཡ་བཱག་ཙིཏྟ་བཛྲ་ཞེས་བྱ་བ་
བཏོན་ལ། ཆེ་གེ་མོའི་རཀྵ་སཾ་པུ་ཏ་དིཾ་རཀྵ་མནྟྲ་དེ་བ་ཏ་ཤུ་ཞེས་བྱ་བ་བཅུག་ལ། ཨོཾ་གྷ་གྷ་ཞེས་བྱ་བ་ལ་སོགས་པའི་སྔགས་བརྗོད་ཅིང་བསྣུན་པར་བྱའོ། །དམ་ཚིག་ནི་ཏིང་ངེ་འཛིན་ཏོ། །རྡོ་རྗེ་ཕུང་པོས་ཞེས་བྱ་བ་ནི་བསྒྲུབ་པར་བྱ་བའི་ལུས་ལའོ། །དཀྱིལ་འཁོར་ཞེས་བྱ་བ་ནི་འདུས་པའི་དཀྱིལ་
འཁོར་གྱི་རྣམ་པས་སོ། །བསད་བདག་ཉིད་གཏོགས་ཞེས་བྱ་བ་ནི་བསྒྲུབ་པར་བྱ་བའི་ཉེས་པ་བསྒྲགས་པ་དང་། དེ་ལ་ཁྲོས་ནས་ཁྲོ་བོའི་གཟུགས་སུ་བྱས་ཏེ། དེ་བསད་ནས་བསད་པའི་འོག་ཏུ་བདག་ཉིད་གཏོགས་ཏེ། རང་གི་དཀྱིལ་འཁོར་དུ་བྱོན་ནས་ཞུགས་པར་བསམ་པར་བྱའོ། །སྟོན་པ་

སངས་རྒྱས་ཞེས་བྱ་བ་ལ་སོགས་པ་ལ། གལ་ཏེ་བསྒྲུབ་པར་བྱ་བ་སངས་རྒྱས་ལ་སོགས་པར་གྱུར་པ་དེ་ལྟ་ན་ཡང་ཆོ་ག་འདིས་འཆི་བར་འགྱུར་རོ་ཞེས་ལ་དོར་བ་གསུངས་པ་ཡིན་ནོ། །རྡོ་རྗེ་ཆེན་པོའི་དམ་ཚིག་ནི་ཇི་སྐད་དུ་གསུངས་པའི་བསམ་གཏན་ནོ། །དེས་གདུག་
པའི་ལས་ཅན་གྱི་ཁྲོ་བོ་ལ་དེ་སྐད་ཅེས་བྱའོ། །དེ་སྟོན་པར་མཛད་པ་ཉིད་ཀྱི་ཕྱིར་བཅོམ་ལྡན་འདས་ལ་ཡང་དེ་སྐད་ཅེས་བྱའོ། །ཆོ་ག་འདི་དག་ཐམས་ཅད་ནི་སྔགས་གཞན་དག་དང་ཡང་གདུག་པའི་ལས་རྣམས་ལ་སྦྱར་བར་བྱའོ། །བདུད་རྩི་ཐབ་སྦྱོར་གྱི་རྟོག་པའོ། །ཡིད་བཞིན་གྱི་ནོར་བུའི་རང་
བཞིན་ཅན་གྱི་སངས་རྒྱས་ཐམས་ཅད་གཅིག་ཏུ་གྱུར་པའི་ཕྱིར་ཐུབ་པ་ཆེན་པོའོ། །དོན་ཡོད་པའི་རང་བཞིན་ཉིད་ཀྱིས་ཐམས་ཅད་དུ་རྟོག་པ་སྤྲོས་པའི་ཕྱིར་རྫོགས་སངས་རྒྱས་སོ། །ལྷག་མ་ནི་སྔ་མ་བཞིན་ནོ། །ལས་ཕྲན་ཚེགས་ཀྱི་དངོས་གྲུབ་ནི་ཡེ་ཤེས་རྡོ་རྗེའོ། །དེ་སྟོན་པར་མཛད་
པ་ལ་ཡང་དེ་སྐད་ཅེས་བྱའོ། །དེ་ལ་བཀའ་སྩལ་པ་ཡང་རྫོགས་པར་སངས་རྒྱས་པ་ཉིད་ཀྱི་ཕྱིར་རོ། །རྡོ་རྒྱུས་ཀྱི་སྦྲུལ་ལ་སོགས་པ་ལས། སྦྲུལ་ལ་སོགས་པའི་བྱ་བ་འབྱུང་བའི་ཐེ་ཚོམ་བསལ་བའི་ཕྱིར། ཨེ་མའོ་ཞེས་བྱ་བ་ལ་སོགས་པ་གསུངས་ཏེ། ངོ་བོ་ཉིད་ཀྱིས་དག་པ་ནི་རང་
བཞིན་གྱིས་ཀུན་ནས་དག་པའོ། །རྡོ་རྗེའི་ཐེག་པ་ཞེས་བྱ་བ་ནི་ཐེག་པ་ཆེན་པོ་མ་ལུས་པ་བསྡུས་པ་ནི་ཕ་རོལ་ཏུ་ཕྱིན་པ་དྲུག་ཡིན་ལ་དེ་རྣམས་བསྡུས་པ་ནི་ཐབས་དང་ཤེས་རབ་ཡིན་ཞིང་དེ་དག་ཀྱང་བསྡུས་པ་རོ་གཅིག་པ་དེ་ནི་བྱང་ཆུབ་ཀྱི་སེམས་ཡིན་ཏེ། དེ་ཡང་རྡོ་རྗེ་སེམས་དཔའི་ཏིང་ངེ་འཛིན་ཡིན་
ལ་དེ་ཉིད་ནི་རྡོ་རྗེ་ཡིན་ནོ། །རྡོ་རྗེ་ཡང་དེ་ཡིན་ལ་ཐེག་པ་ཡང་ཡིན་པས་ན་རྡོ་རྗེ་ཐེག་པ་སྟེ། སྔགས་ཀྱི་ཐེག་པ་ཞེས་བྱ་བའི་དོན་ཏོ། །བླ་ན་མེད་ཅེས་བྱ་བ་ནི་ཐེག་པ་ཐམས་ཅད་ཀྱི་མཆོག་ཉིད་དུ་གྱུར་པའི་ཕྱིར་རོ། །དེ་ཅིའི་ཕྱིར་ཞེ་ན། མ་སྐྱེས་པའི་ཞེས་བྱ་བ་ལ་སོགས་པ་གསུངས་ཏེ། གཞན་དུ་ན་
རྡོ་རྒྱུས་ཀྱི་སྦྲུལ་ལ་སོགས་པ་ལས་གདུག་པའི་སྦྲུལ་ལ་སོགས་པའི་ལས་རྣམས་མ་སྐྱེས་པ་རྣམས་དེ་ལས་གང་གི་ཕྱིར་རྒྱལ་བ་བདེན་པ་གསུང་བ་རྣམས་ཀྱིས་སྐྱེ་བ་བསྟན་པའི་ཕྱིར་ཏེ། རྡོ་རྗེ་ཐེག་པ་ཆེན་པོ་འདིའི་འདི་ཆེ་བའི་བདག་ཉིད་ཡིན་པས་ན། འདི་ནི་ཐེ་ཚོམ་གྱི་གནས་མ་ཡིན་ནོ་ཞེས་བྱ་བར་

དགོངས་སོ། །རྡོ་རྒྱུས་དག་ཅེས་བྱ་བ་ལ་སོགས་པ་ལ་ཁྲོ་བོའི་ལྷ་ཉིད་ཀྱི་སྦྱོར་བ་དང་ལྡན་པས་རྡོ་རྒྱུས་དང་དུར་ཁྲོད་ཀྱི་སོལ་བ་དག་ལ་ཡི་གེ་ཁཾ་བརྒྱ་རྩ་བརྒྱད་ཀྱིས་མངོན་པར་བསྔགས་པ་བྱས་ནས་དེ་དག་གིས་ཇི་སྐད་གསུངས་པའི་སྦྲུལ་ནག་པོ་བྲི་བར་བྱའོ། །དུག་བསམ་ཞེས་བྱ་བ་ནི་ཡི་གེ་ཁཾ་གིས་
སོ། །ཅི་འདྲ་བ་ཞིག་ཅེ་ན། མི་བཟད་པར་ནི་གྱུར་པ་ཡི། །སྲེག་པའི་མེ་ཡི་ཁ་དོག་བཞིན། །བསྒོམས་ན་ཞེས་བྱ་བ་ནི་དེ་ལྟར་བསྒོམས་ནའོ། །འགུལ་པར་གདོན་མི་ཟ་ཞེས་བྱ་བ་ནི་ཡི་གེ་ཁཾ་ཉིད་ཀྱིས་བསྒྲུབ་པར་བྱ་བ་ལ་འཛིན་པའི་ཕྱིར་བསྐུལ་ན་གནས་ལས་འགྲོ་བར་འགྱུར་རོ་ཞེས་བྱ་བའི་དོན་
ཏོ། །དེ་ཡིས་ཞེས་བྱ་བ་ནི་སྦྲུལ་གྱི་ཁར་བསྒོམས་པའི་ཡི་གེ་ཧྲཱིའི་འོད་ཟེར་གྱི་ལྕགས་ཀྱུས་སྦྲུལ་གྱི་ཁར་འབབ་པར་འགྱུར་བའོ། །རེག་མ་ཐག་ཏུ་ཞེས་བྱ་བ་ནི་གལ་ཏེ་རེག་ནའོ། །དེ་ལྟ་མ་ཡིན་ན་ནི་ཆེ་གེ་མོ་བྷཀྵ་ཡ་ཁཾ་ཞེས་བྱ་བའི་བསྐུལ་བའི་ཚིག་དེས་བསྒྲུབ་པར་བྱ་བའི་དཔྲལ་བར་སོས་འཛིན་པར་
བསམ་པར་བྱའོ། །དེ་ཡིས་འདི་འཛིན་པ་དང་འཆི་བ་ནི་སྔ་མ་བཞིན་ནོ། །སྡིག་པ་ཞེས་བྱ་བ་ལ་སོགས་པ་ལ་རབ་ཏུ་ཞེས་བྱ་བ་ནི་བསྐྱེད་པར་བྱ་བའོ། །ཇི་ལྟར་བྱ་ཞེ་ན། ཆོ་ག་བཞིན་དུ་སྟེ་ཡི་གེ་ཁཾ་གིས་མངོན་པར་བསྔགས་པའི་ཚོན་གྱིས་བྲིས་པ་བཞིན་ནོ། །དེ་བཞིན་དུ་སྦྱོར་བ་འབྱུང་བའི་མཚན་
ཉིད་གང་ཡིན་པ་སྟེ། དེ་དག་གིས་དུག་བསྐྱེད་པ་དང་དུག་གཏོང་བ་དང་། དུག་དགུག་པ་ལ་སོགས་པ་ནི་སྔ་མ་བཞིན་ནོ། །ལྟ་བ་ཞེས་བྱ་བ་ལ་སོགས་པ་རྡོ་རྗེ་ནི་མཆེ་བའོ། །སོགས་པའི་སྒྲས་ནི་གནས་པའི་དུག་རྣམས་སོ། །གཞན་ཡང་དུག་ཅེས་བྱ་བ་ནི་སྦྱོར་བ་རྣམས་སོ། །ཡེ་ཤེས་རྡོ་རྗེ་ཞེས་
བྱ་བ་ནི་རྣམ་པར་སྣང་མཛད་དཀར་པོའི་རྣལ་འབྱོར་བྱས་ལ། ལག་པ་གཡས་པར་ཨོཾ་ལས་བྱུང་བའི་འཁོར་ལོའི་ལྟེ་བར་ཨོཾ་གནས་པ་འོད་ཟེར་དཀར་པོའི་ཕྲེང་བ་ཅན་བསམ་པར་བྱ་བ་དེ་ནི་འདིར་ཡེ་ཤེས་རྡོ་རྗེ་སྟེ། དེ་བྱབས་པ་ལས་དུག་དྲངས་ནས་ནམ་མཁའ་ལ་སྤྲོ་བར་བྱའོ། །དེ་བཞིན་དུ་བུ་རམ་གྱི་
ཁམ་ཕོར་ལ་སོགས་པར་བྱའོ། །དུག་གི་དམ་ཚིག་རྡོ་རྗེ་ནི་དུག་སྤྲོ་བ་བསྟན་པའོ། །དེ་སྟོན་པར་མཛད་པ་ཉིད་ཀྱི་ཕྱིར་དེ་སྐད་ཅེས་བྱའོ། །གསོ་བའི་རྡོ་རྗེ་ནི་གསོ་བར་བསྟན་པའོ། །དེའི་དོན་གྱི་སྙིང་པོ་ནི་ཡི་གེ་ཧཱུཾ་དཀར་པོའོ། །སྙིང་པོ་འདི་ཞེས་བྱ་བ་ནི་མི་བསྐྱོད་པ་དཀར་པོའི་རྣལ་འབྱོར་རམ། རྡོ་རྗེ་སེམས་

དཔའི་རྣལ་འབྱོར་བྱས་ནས་སྙིང་གའི་ཟླ་བར་ས་བོན་དེ་ཉིད་ཀྱི་ལས་རྡོ་རྗེ་རྩེ་ལྔ་པ་དཀར་པོ་དེའི་ལྟེ་བར་རྣམ་པར་བསམ་པར་བྱའོ། །དེ་ནས་དེའི་འོད་ཟེར་དཀར་པོ་བསིལ་བའི་ཚོགས་ཀྱིས་བསྒྲུབ་པར་བྱ་བའི་ལུས་ལ་ཁྱབ་པར་བྱས་ལ། དུག་ཁ་དོག་ནག་པོ་དེ་དེའི་སྙིང་ག་དང་ལྐོག་
མ་དང་། དཔྲལ་བ་དང་མགོ་བོར་བསྡུས་ལ་ལངས་པར་ཞེས་བྱ་བ་ལན་གཉིས་ལན་གསུམ་བསམ་པར་བྱའོ། །དེ་ནས་ཐམས་ཅད་སྙིང་གར་བསྡུས་པ་ཐམས་ཅད་སྐྱུག་པ་ཉིད་དུ་བསྒྲུབ་པར་བྱ་བ་ལ་བསམ་པར་བྱའོ། །གང་གཞན་ནད་དུ་ཞེས་བྱ་བ་ནི་ཤུ་བ་དང་། འབྲུམ་བུ་ལ་སོགས་པའོ། །པདྨ་
ཆེན་པོ་ཞེས་བྱ་བ་ནི་འོད་དཔག་ཏུ་མེད་པ་དཀར་པོའི་སྦྱོར་བ་དང་ལྡན་པས་ཨཱཿདཀར་པོ་ལས་བྱུང་བའི་པདྨ་དཀར་པོའོ། །དེའི་ཞེས་བྱ་བ་ནི་ལག་པ་གཡས་པའི་མཐིལ་གྱིའོ། །སྡུད་པ་ན་ནི་ཞེས་བྱ་བ་ནི་བྱབས་པའི་སྐད་ཅིག་ལ་ནད་པ་ལ་ཞུགས་པའི་འོད་ཟེར་རྣམས་རྒྱས་པར་བྱས་ནས་བསྡུས་
པ་ན་ནིའོ། །དམ་ཚིག་གནག་ཅེས་བྱ་བ་ལ་དམ་ཚིག་ནི་འོད་ཟེར་གྱི་ཚོགས་སོ། །དེའི་ནག་པོ་ནི་དུག་བསྡུས་པའི་ཕྱིར་ཏེ་བསམ་པ་ཞེས་བྱ་བར་སྦྱར་རོ། །བསྐུལ་བ་ན་ནི་ཞེས་བྱ་བ་ནི་ཁུ་ཚུར་ཕྱི་རོལ་དུ་བཀྲོལ་བས་དུག་ཐག་རིང་བར་དྲང་བ་ནའོ། །དཀར་པོ་དང་འདྲ་ཞེས་བྱ་བ་ནི་དུག་ལས་ངེས་པར་ཐར་
པ་ཉིད་ཀྱི་ཕྱིར་རོ། །གཞན་དག་ན་རེ་དེའི་ཞེས་བྱ་བ་ནི་ནད་གནས་སུ་བསྡུ་བའི་སྔགས་ཀྱིའོ། །བསྐུལ་བ་ན་ནི་ཕྱོགས་སུ་འོད་ཟེར་སྤྲོ་བའི་ཕྱིར་ཞེས་འཆད་དོ། །གསང་བ་ནི་པདྨའི་དོན་གྱིས་སོ། །གསང་ཆེན་ནི་ཡི་གེ་ཨཱཿདེ་ཉིད་ཀྱིས་སོ། །ཡེ་ཤེས་དྲི་མེད་ནི་འོད་ཟེར་གྱི་ལས་ཀྱིས་སོ། །ཕྱིའི་
ནད་ནི་རིམས་ལ་སོགས་པའོ། །ནང་གི་ནད་ནི་སྡིག་པ་ལ་སོགས་པའོ། །ནད་རྣམས་གསོ་བ་རྡོ་རྗེའི་དོན་དང་སྙིང་པོ་ལ་སོགས་པའི་དོན་ནི་སྔར་དང་འདྲའོ། །འདོད་པ་ནི་སྡུག་པ་སྟེ་ཕུལ་དུ་བྱུང་བའི་ཡུལ་ཡིན་པའི་ཕྱིར་རོ། །དད་པ་ནི་གུས་པའོ། །དེའི་ཡོན་ཏན་ནི་ཁྱད་པར་ཅན་ནོ། །དེ་ཐོབ་པར་
འགྱུར་བ་ནི་དེའི་ཡུལ་ཅན་ཡིན་པའི་ཕྱིར་རོ། །ཡི་གེའི་ཚིག་ཅེས་བྱ་བ་ལ། སྔགས་དེ་རྣམས་ཀྱི་འབྲས་བུ་རྣམ་པར་སྣང་མཛད་ལ་སོགས་པའི་གཟུགས་སོ། །དེ་འདྲ་བའི་གཟུགས་ནི་ཞེས་བྱ་བ་ལ་བདག་ཉིད་ཀྱི་གཟུགས་ནི་དེ་རྣམས་ཀྱི་གཟུགས་ཁྲོ་བོ་ཐམས་ཅད་གནག་པའི་འབར་བའི་ཕྲེང་བ་

འཁྲིགས་པའོ། །ནད་ཀྱི་རྒྱུའི་སྡིག་པ་ནི་ནད་དེ་དེ་བསྐུལ་བ་ནི་བསྒྲུབ་པར་བྱ་བའི་ལྟེ་བ་ལ་བསམས་པའི་ཛི་ན་ཛི་ཀ་ལ་སོགས་པའི་སྔགས་ཀྱི་འོད་ཟེར་འབར་བ་རྣམས་ཀྱིས་བསྒྲུབ་པར་བྱ་བའི་ལུས་དང་། ངག་དང་ཡིད་ཁྱབ་པ་རྣམས་ཀྱིས་བཀང་བ་སྟེ། དེ་རྒྱུར་གྱུར་པ་རྣམས་ཀྱིས་སོ། །གང་དུ་
བསྐུལ་བས་ཤེ་ན། རང་གི་ལུས་ངག་སེམས་གནས་ལས་ཏེ། བསྒྲུབ་པར་བྱ་བའི་ལུས་ལ་སོགས་པ་ཉིད་ནི་སྡིག་པའི་གནས་ཡིན་ལ་དེ་ལས་དེ་རྣམས་ཀྱིས་སོ། །དེའི་ལུས་ལ་སོགས་པར་གཏོགས་པའི་སྡིག་པ་ནག་པོ་ཡི་གེ་ཀཾ་གིས་དེའི་སྙིང་གར་བསྡུས་པ་ནི་དམ་ཚིག་ཀྱང་ཡིན་ལ་དེ་
བྱུང་བ་ཡང་དེ་ཉིད་ཡིན་ནོ། །དེ་ནས་ལྟེ་བ་ཡན་ཆད་དུ་འོད་ཟེར་འབར་བའི་སྔགས་ཀྱིས་རིམ་གྱིས་བཏེག་ཅིང་ཡི་གེ་ཁཾ་ཡང་སྙིང་ག་ལས་གོང་བུར་བྱུང་སྟེ། རང་གི་ལྷའི་རྣམ་པ་ཐམས་ཅད་དཀར་པོར་ཡོངས་སུ་གྱུར་པའི་རང་གི་སྔགས་སྙིང་གར་ཕྱིན་ནས་གནས་པ་ལ་ཡི་གེ་ཁཾ་ཡང་སྣ་རྩེ་ལས་བྱུང་བ་ཉིད་ན་
གནག་ཅིང་མི་སྡུག་པའི་སྤྲེའུ་ལ་སོགས་པའི་རྣམ་པར་ཡོངས་སུ་གྱུར་ནས་བྱུང་བར་བསམ་པར་བྱའོ། །སྤྲེའུ་དང་འདྲ་བར་ཡོངས་སུ་གྱུར་པའི་དམ་ཚིག་ལ་དེ་སྐད་ཅེས་བྱ་ཞིང་། ཁྱི་དང་འདྲ་བར་གྱུར་པའི་བྱུང་བ་དེ་ལའང་དེ་སྐད་ཅེས་བྱའོ། །དེ་བྱུང་བ་དག་ཏུ་རྣམ་པར་བསམ་པ་ནི་རྣམ་པར་བརྟག་
པར་བྱའོ། །ཡང་ན་ཞེས་བྱ་བ་གསུངས་པའི་ཕྱིར་གནག་ཅིང་མི་སྡུག་པ་གཅེར་བུ་ཡི་དགས་ཀྱི་གཟུགས་སུ་ཡོངས་སུ་གྱུར་པའང་རུང་། འཁོར་ལོའམ་ཞེས་བྱ་བ་ནི་རྣམ་པར་སྣང་མཛད་ཀྱི་ཕྱག་ཏུའོ། །རྡོ་རྗེའང་རུང་ཞེས་བྱ་བ་ནི་མི་བསྐྱོད་པ་དང་འོད་དཔག་ཏུ་མེད་པ་དག་ལའོ། །བསྒོམས་ནས་
ཞེས་བྱ་བ་ནི་འབར་བ་རྣམ་པར་བསམས་ནས་སོ། །རྡོ་རྗེ་གོ་འཕང་ནི་སྐུ་རྡོ་རྗེ་ལ་སོགས་པའི་ང་རྒྱལ་ཏེ་དེའི་གནས་སོ། །ལུས་ལ་སོགས་པའི་ཚོགས་ནི་ལུས་དང་ངག་སེམས་དམ་ཚིག་རྣམས་སོ། །དེས་ནི་ཞེས་བྱ་བ་ནི་འཁོར་ལོ་ལ་སོགས་པས་ནིའོ། །རབ་ཏུ་རྩོལ་ཞེས་བྱ་བ་ནི་བསྒྲུབ་པར་བྱ་
བའི་ནད་ཉེ་བར་ཞི་བར་བྱ་བའི་ཕྱིར་རོ། །སངས་རྒྱས་སྤྲིན་དག་ཅེས་བྱ་བ་ནི་ཕྱོགས་རྣམས་ནས་ལྷགས་ཏེ། སྐུ་ལ་སོགས་པར་ཞུགས་ནས་གནས་པ་དག་གོ། །རྡོ་རྗེ་རྣམས་ཀྱི་རྒྱལ་པོ་ནི་རྡོ་རྗེ་སེམས་དཔའ་སྟེ་དེའི་སྤྲིན་བསམ་པར་བྱའོ། །བསྒོམ་པར་བྱ་ཞེས་བྱ་བ་ནི་དེ་ལྟར་བསྒོམས་པས་སོ། །སངས་

རྒྱས་ཞེས་བྱ་བ་ནི་སངས་རྒྱས་རྣམས་སོ། །ཁྲོས་པར་ཞེས་བྱ་བ་ལ་ནིའི་སྒྲས་ནི་བསྣུན་པར་ནིའོ། །དེ་ལ་ཞེས་བྱ་བ་ནི་སྤྲེའུ་ལ་སོགས་པ་དང་འདྲ་བར་བྱུང་བའི་ནད་ལའོ། །ནད་ཀྱི་རིགས་ལས་སྐྱེས་པར་གང་གྲགས་པ་དེ་ཡང་འཇིག་པར་འགྱུར་རོ། །བརྒྱ་རྩ་བརྒྱད་པ་ནི་བརྒྱ་
དང་བརྒྱད་བཟླས་པ་སྟེ་དེའི་སྦྱོར་བས་ཡིན་གྱི་བསམ་གཏན་ཡན་གར་བས་ཀྱང་མ་ཡིན་ནོ། །ཡང་ན་ཞེས་བྱ་བ་ནི་ཕྱོགས་གཞན་ནོ། །བདག་གི་སྔགས་རྒྱལ་གྱིས་ཞེས་བྱ་བ་ནི་རང་གི་འདོད་པའི་ལྷ་དང་ཏིང་ངེ་འཛིན་དང་སྔགས་ཀྱིས་སོ། །རྡོ་རྗེའི་བསམ་གཏན་ནི་བཤད་མ་ཐག་པའི་བསམ་གཏན་
ནོ། །དམ་ཚིག་ནི་ཏིང་ངེ་འཛིན་ཏོ། །ལས་ཀྱི་དངོས་གྲུབ་ཕྲ་མོའོ། །དེ་དེ་ལྟར་ན་དངོས་གྲུབ་མཆོག་དང་དམན་པ་གསུངས་ནས་དངོས་གྲུབ་ཕྲ་མོ་རྣམས་ཀྱང་གསུངས་པ་ཡིན་ཏེ། དངོས་གྲུབ་ཏུ་མཚུངས་པའི་ཕྱིར་རོ། །ད་ནི་ཚོགས་ཀྱི་ལམ་ལ་གནས་པའི་རྣལ་འབྱོར་པས་བཟླས་པ་དང་བསྒོམ་པ་
ལ་བརྩོན་པ་རྣམས་ཀྱིས་ནི་དངོས་གྲུབ་ཀྱི་མཚན་མའི་རྨི་ལམ་དག་མཐོང་བར་འགྱུར་ལ། མཐོང་ནས་ཀྱང་སྔོན་དུ་བསྙེན་པ་ལ་འཇུག་པར་འགྱུར་བ་གང་ཡིན་པ་དེ་བསྟན་པའི་སྐབས་དབྱེ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། འདོད་དང་ཐར་པ་ནི་ཐབས་གསུམ་པའི་འབྲས་བུའོ། །
རྡོ་རྗེ་ཆེ་ནི་རྣམ་པར་སྣང་མཛད་ལ་སོགས་པ་དང་འདྲ་བའི་སྐུ་ལ་སོགས་པ་སྟེ། དངོས་གྲུབ་དམན་པ་རྣམས་ཞེས་བྱ་བའི་དོན་ཏོ། །དེ་དག་རྒྱས་པར་བཤད་མ་ཐག་པའི་ཚུལ་དུ་སྟོན་པར་མཛད་པའི་བཅོམ་ལྡན་འདས་ལ། འདོད་དང་ཐར་པ་རྡོ་རྗེ་ཆོས། །ཞེས་བྱའོ། །དངོས་གྲུབ་རྣམ་པ་གཉིས་པོ་
དེ་ཉིད་ནི་ཡེ་ཤེས་ཡིན་ལ། དེ་འདྲེན་པར་མཛད་པས་ན་ཡེ་ཤེས་ཀྱི་ཀྱོ་བ་ཡང་དེ་ཡིན་ལ། དངོས་གྲུབ་ཀྱི་མཚན་ཉིད་ཡིན་པའི་ཕྱིར་རྨི་ལམ་ཆེན་པོར་སྣང་བའི་འོད་པོ་ཆེ་ཡང་ཡིན་པས་ན་དེ་སྐད་ཅེས་བྱའོ། །དེ་དེ་མ་ཐག་ཏུ་སྟོན་པར་མཛད་པ་ཉིད་ཀྱི་ཕྱིར་བཅོམ་ལྡན་འདས་ལ་ཡང་དེ་སྐད་ཅེས་བྱའོ། །
དེ་ལ་རང་བཞིན་གྱིས་སླུ་བའི་རྨི་ལམ་ལ་ཡོངས་སུ་སྟོན་ཞེ་ན། འགའ་ཞིག་ཐེ་ཚོམ་དུ་གྱུར་པ་དེ་བསལ་བའི་ཕྱིར་ཆོས་རྣམས་ཞེས་བྱ་བ་ལ་སོགས་པ་གསུངས་ཏེ། གཉིས་མེད་ཀྱང་གཉིས་སུ་སྣང་བས་བསླད་པའི་རྣམ་པར་རིག་པ་ཙམ་གྱིས་ལུས་ཅན་གཞན་གྱི་དབང་གི་མཚན་ཉིད་ཅན་གྱི་

ཆོས་རྣམས་ཐམས་ཅད་ནི་རྨི་ལམ་ལྟ་བུའོ། །ཀུན་དུ་བརྟགས་པ་ཉིད་ཡིན་པའི་ཕྱིར་སྐྱེ་བ་དང་བྲལ་བའི་རང་བཞིན་གྱིས་གཟུང་བ་དང་འཛིན་པའི་མཚན་ཉིད་ཅན་གང་ཡིན་པ་དེ་དང་ལྡན་པའི་ཕྱིར་ངོ་བོ་ཉིད་ཀྱིས་མ་སྐྱེས་ཤིང་ངོ་། །གཉིས་ཀྱི་རང་བཞིན་དེ་དག་ཉིད་ཀྱིས་དག་པ་སྟེ། སྟོང་པ་
དེ་ཉིད་འདི་དག་ལ་ཡོད་པས་ན་དེ་སྐད་ཅེས་བྱ་སྟེ། དེ་དག་ནི་གཉིས་ཀྱིས་སྟོང་པའི་ཡོངས་སུ་གྲུབ་པའི་རང་བཞིན་ནོ་ཞེས་བྱ་བའི་དོན་ཏོ། །ཨེ་མའོ་དེ་ལྟ་བུའི་རྣམ་པ་ཅན་གྱིས་ནི་ཆོས་ཐམས་ཅད་ནི་ཇི་ལྟར་རྨི་ལམ་གྱི་ལ་ཡིད་བརྟན་དུ་མེད་པ་དེ་བཞིན་དུ་གཞན་དག་ཏུ་ཡང་འཁྲུལ་པ་ཙམ་ཡིན་
ནོ། །འོན་ཀྱང་འཁྲུལ་པའི་རྡོ་རྗེ་རབ་ཏུ་གསུངས་ཏེ། བག་ཆགས་བརྟན་པོས་ཤིན་ཏུ་བརྟན་པར་གྱུར་པ་ནི་འཁྲུལ་པའི་རྡོ་རྗེ་ཡིན་ལ། དེ་ཉིད་དོན་བྱེད་པ་ལ་མི་སླུ་བའི་ཕྱིར་འཇིག་རྟེན་གྱི་ཐ་སྙད་ཀྱི་ཚུལ་དུ་གསུངས་པ་ནི་ཚད་མར་བརྗོད་དེ། ཇི་ལྟར་ཡུལ་དང་དུས་དང་རྣམ་པ་ཐ་དད་པ་ཡིན་ན་ཡང་།
ཆུ་ཟླ་དང་ནི་རྨི་ལམ་བདེན་པ་དང་ནགས་ཚལ་སྟུག་པོ་ལ་སོགས་པའི་འཁྲུལ་པ་ནི་འཁྲུལ་པའི་རྡོ་རྗེ་ཡིན་པ་དེ་བཞིན་དུ་དངོས་གྲུབ་ཀྱི་མཚན་མའི་རྨི་ལམ་དེ་དག་ཀྱང་ཡིན་པའི་ཕྱིར། འདི་ལ་སོམ་ཉི་བྱ་བར་རིགས་པ་མ་ཡིན་ནོ་ཞེས་བྱ་བར་དགོངས་སོ། །བསམ་གཏན་ཞེས་བྱ་བ་ལ་སོགས་པ་ལ་
ཚིགས་སུ་བཅད་པ་འདིས་ནི་བསྟན་པའོ། །བསམ་གཏན་བཟླས་པའི་དོན་ནི་དམིགས་པའོ། །དེ་ལ་བརྩོན་པ་ནི་སེམས་བརྟན་པར་གྱུར་པ་ཅན་ནོ། །ཡང་ན་བསམ་གཏན་བཟླས་པའི་དོན་ནི་འབྲས་བུ་ཡིན་ཏེ། །དངོས་གྲུབ་རྣམ་པ་གཉིས་སོ། །དེ་ནི་མཐོང་བ་དེ་ལས་གཞན་པ་གང་ཡིན་
པ་དེ་ལ་དེ་སྐད་ཅེས་བྱའོ། །དེ་ཡང་དབྱེ་བ་མཐོང་ཞེས་བྱ་བ་སྟེ་དངོས་གྲུབ་ཀྱི་དབྱེ་བའོ། །རྣམ་པ་གཉིས་ནི་བདག་ཉིད་ལ་སངས་རྒྱས་ལ་སོགས་པའི་གཟུགས་སུ་མཐོང་བ་ནི་དངོས་གྲུབ་མཆོག་ཡིན་ལ་གཞན་མཐོང་བ་ནི་དངོས་གྲུབ་དམན་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ཞེས་བྱ་བ་ནི།
དེ་དག་གི་ནང་ནས་སོ། །རྨི་ལམ་གྱི་དམ་ཚིག་གི་གནས་ཉིད་ནི་རྟོགས་པའི་མཚན་མ་ཡིན་ལ། དེ་དང་དེའི་དངོས་གྲུབ་མཆོག་གི་ཡུལ་ཉིད་ཡིན་པའི་ཕྱིར་ཆེན་པོ་ཡང་ཡིན་པས་ན། རྨི་ལམ་ཆེན་པོའི་དམ་ཚིག་གི་གནས་སོ། །བྱང་ཆུབ་ཉིད་ཡེ་ཤེས་ཀྱི་མཆོག་ཡིན་ལ་དེ་ཐོབ་པས་བདག་

ཉིད་ཅེས་བྱ་བར་སྦྱར་རོ། །སངས་རྒྱས་འོད་ནི་བཟང་པོར་ཞེས་བྱ་བ་ནི་རབ་ཏུ་གྲགས་པའི་སངས་རྒྱས་ཀྱི་སྐུ་མདོག་དང་མཚན་དང་དཔེ་བྱད་རྣམས་ཀྱིས་རྣམ་པར་མཛེས་པའོ། །སངས་རྒྱས་རྫོགས་ལོངས་སྤྱོད་པའི་སྐུ་ཡང་ཞེས་བྱ་བ་ནི་ཡོངས་སུ་དག་པའི་སངས་རྒྱས་
ཀྱི་ཞིང་དུ་གཙོ་བོ་འབའ་ཞིག་ཏུའོ། །མཆོད་པར་བྱེད་པ་ཞེས་བྱ་བ་ནི་བདག་ཉིད་ལའོ། །གཟུགས་དང་། སངས་རྒྱས་བྱང་ཆུབ་སེམས་དཔའ་ཡིས། །མཆོད་པ་བྱས་པར་ཞེས་བྱ་བ་ནི་རང་གི་གཟུགས་ལའོ། །ཡེ་ཤེས་ཆེན་པོ་ནི་སྐུ་རྡོ་རྗེ་ལའོ། །རྡོ་རྗེ་སེམས་དཔའ་ནི་ཐུགས་རྡོ་རྗེ་ལའོ། །རྡོ་རྗེ་
ཆོས་ནི་གསུང་རྡོ་རྗེ་ལའོ། །སྐུ་རྡོ་རྗེ་ལ་སོགས་པའི་དངོས་གྲུབ་ལ་ངེས་པ་ཉིད་ཀྱི་ཕྱིར་ན་གསང་བའོ། །རྡོ་རྗེ་ཡང་དེ་ཡིན་ལ་བསོད་ནམས་མཛད་པ་ཉིད་ཀྱི་ཕྱིར་གྲགས་པ་ཆེན་པོ་ཡང་ཡིན་པས་ནའོ། །རྡོ་རྗེ་ཅན་ཞེས་བྱ་བ་ནི་རྡོ་རྗེ་འཆང་བའོ། །གཟུགས་ཞེས་བྱ་བ་ནི་རང་གི་ལུས་སོ། །འདི་འདྲ་བ་
ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཕྱག་བྱས་པར་གྱུར་པའོ། །སྐུ་གསུང་ཐུགས་ཀྱི་དངོས་གྲུབ་ནི་རྣམ་པར་དག་པའི་མཐར་ཐུག་པའོ། །དེ་ནི་རྡོ་རྗེ་འཛིན་པའི་མཚན་ཉིད་དེ་ལས་སྐྱེ་བ་སྟེ། རིག་པ་ཆེན་པོའི་སྐྱེས་བུའི་གཟུགས་སུ་གྱུར་ཏོ་ཞེས་བྱ་བའི་དོན་ཏོ། །
ལྷ་རྣམས་ཀྱི་བུ་མོ་དང་ཁྱེའུ་དང་བུ་མོ་དག་ཡིད་དུ་འོང་བ་དེ་རྣམས་ཀྱང་མངོན་དུ་ཕྱོགས་པར་གྱུར་པའམ། ཉེ་བར་གནས་པའམ་གང་ན་གནས་པར་མཐོང་ནའོ། །ཆོས་ཀྱི་འཁོར་ལོས་སྒྱུར་བའི་ཞེས་བྱ་བ་ནི་ཆོས་སྟོན་པའི་ཕྱིར་རོ། །བསམ་གཏན་རྡོ་རྗེ་ནི་ཏིང་ངེ་འཛིན་གྱི་རྡོ་རྗེའོ། །དེ་ལ་གནས་པ་ནི་སེམས་
བརྟན་པར་གྱུར་པའོ། །དེ་ཉིད་ཀྱིས་ན་དེ་ལས་བྱུང་བའི་ཕྱིར་དམ་ཚིག་སྦྱོར་བ་ཡང་དེ་ལྟར་མཐོང་བར་འགྱུར་རོ། །དབང་བསྐུར་བ་ཞེས་བྱ་བ་འདིར་བདག་ཉིད་ཅེས་བྱ་བ་ནི་ལྷག་མ་སྟེ་བསམ་གཏན་དམ་ཚིག་ཅན་དག་གིས་ཞེས་བྱ་བར་སྦྱར་རོ། །དེ་བཞིན་དུ་མཆོད་པ་བྱས་པ་ཡང་ཞེས་བྱ་བ་འདིར་ཡང་ངོ་
ཞེའོ་ཞེས་བྱ་བ་ནི་དངོས་གྲུབ་ཀྱི་མཆོག་གི་མཚན་མ་ཡོངས་སུ་རྫོགས་ཞེས་བྱ་བའི་དོན་ཏོ། །ཡང་གསུངས་པ་ཞེས་བྱ་བ་ནི་དངོས་གྲུབ་དམན་པའི་མཚན་མའི་ཚིགས་སུ་བཅད་པ་འོག་མ་གཉིས་སོ། །རྡོ་རྗེ་ལས་བྱུང་ཞེས་བྱ་བ་ལ། རྡོ་རྗེ་ནི་བྱང་ཆུབ་ཀྱི་སེམས་སོ། །འདིར་ནི་དེ་ཐོབ་པ་ཅན་གྱི་བྱང་ཆུབ་

སེམས་དཔའ་ཉིད་ལ་རྡོ་རྗེ་ཞེས་བཤད་དོ། །དེ་ཡང་དག་པར་འབྱུང་བ་ནི་ཡང་དག་པར་སྐྱེས་པའོ། །སྣ་ཚོགས་པའི་ཞེས་བྱ་བ་ནི་བདག་ཉིད་བྱང་ཆུབ་སེམས་དཔར་གྱུར་པའམ། བྱང་ཆུབ་སེམས་དཔའི་མཛད་པ་ཆེན་པོ་ལ་འཇུག་པར་གྱུར་པའམ། གཞན་སངས་རྒྱས་དང་བྱང་ཆུབ་
སེམས་དཔའ་མངོན་སུམ་དུ་གྱུར་པའམ། བུ་མོ་དང་ཁྱེའུ་ཡིད་དུ་འོང་བའམ། དེ་ལྟ་བུའི་རིགས་གཞན་འགའ་ཞིག་མཐོང་ནས་ཞེས་བྱ་བའི་དོན་ཏོ། །དྲི་མ་མེད་ཅེས་བྱ་བ་ནི་བསྔགས་པའོ། །བླ་ན་མེད་པར་ཞེས་བྱ་བ་ནི་གོང་ན་མེད་པ་ཉིད་དེ་དགག་པ་དང་འདྲ་བ་དང་ལྡན་པའི་རིགས་པས་
འཇིག་རྟེན་ལས་འདས་པའི་སངས་རྒྱས་དང་བྱང་ཆུབ་སེམས་དཔའ་དང་འདྲ་བ་ཞེས་བྱ་བའི་དོན་ཡིན་གྱི་རྣམ་པ་ཐམས་ཅད་དུ་ནི་མ་ཡིན་ནོ། །འོ་ན་ཅི་ཡིན་ཞེ་ན། སྐུ་གསུང་ཐུགས་ཀྱི་རྡོ་རྗེ་ལས་སྐྱེས་པ་སྟེ། སྐུའི་རྡོ་རྗེའམ། གསུང་གི་རྡོ་རྗེའམ། ཐུགས་ཀྱི་རྡོ་རྗེའི་སྐུ་དང་གསུང་དང་
ཐུགས་རྡོ་རྗེ་ལས་སྐྱེས་པའོ། །གདོལ་པ་ཞེས་བྱ་བ་ལ་སོགས་པ་ལ་གང་གི་ཚེ་གདོལ་པ་མོའམ་ཁྱི་མོའམ་རྒོད་མ་ལ་སོགས་པ་རྣམས་དང་། བདག་ཉིད་སྦྱོར་བས་རྡོ་རྗེ་སློབ་དཔོན་ཏེ། བརྟག་པའི་བློས་མཐོང་བར་གྱུར་པ་དེའི་ཚེ་ཐུགས་ཀྱི་གསང་བ་འགྲུབ་པར་འགྱུར་རོ། །མི་བསྐྱོད་པ་
ནི་བློ་ལྡན་མི་བསྐྱོད་པའི་ཞེས་བྱ་བ་གང་ཡིན་པ་ནི་ཚིགས་སུ་བཅད་པའི་དོན་ཡིན་ནོ། །དངོས་གྲུབ་ཀྱི་མཚན་མ་རྣམས་སོ། །ཇི་ལྟར་དངོས་གྲུབ་ཀྱི་མཚན་མའི་རྨི་ལམ་རྣམས་བསྒོམས་པའི་སྟོབས་ལས་མ་བསམས་པར་འབྱུང་བ་དེ་བཞིན་དུ་དངོས་གྲུབ་རྣམས་ཀྱང་ཡིན་ནོ་ཞེས་ངེས་པར་བྱ་
བའི་ཕྱིར་དངོས་གྲུབ་ཉེ་བའི་ཆེད་དུ་རྨི་ལམ་གྱི་མཚན་མ་མཐོང་བ་རྣམས་ཀྱིས་རྨི་ལམ་བརྟག་པར་བྱ་བ་ཡིན་པ་དེའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་པ་ལ་དེ་ལ་ཞེས་བྱ་བ་ནི་རྨི་ལམ་གྱི་མཚན་མ་དེ་མཐོང་བ་ཡོད་ནའོ། །རྨི་ལམ་གྱི་རྣམ་པར་དཔྱད་པ་ནི་ཆོས་ཐམས་ཅད་མཉམ་
པ་ཉིད་ཀྱི་ཡེ་ཤེས་ཀྱིས་རྨི་ལམ་རྣམ་པར་དཔྱད་པར་བྱ་སྟེ། སེམས་ལ་དམིགས་སོ། །དེའི་སྙིང་པོ་ནི་སྙིང་པོ་བསྡུས་པ་སྟེ་ནམ་མཁའ་རྡོ་རྗེའོ། །འདི་ནི་ཞེས་པ་འཆད་པར་འགྱུར་བའི་ཚིགས་སུ་བཅད་པའི་དོན་གྱི་ཚུལ་ལོ། །དེ་ཉིད་ནི་རང་སེམས་ཞེས་བྱ་བ་ལ་སོགས་པ་གསུངས་ཏེ། དོན་ནི་འདི་ན་

བྱང་ཆུབ་སེམས་དཔའ་རྨི་ལམ་མཐོང་ན་རྨི་ལམ་དེ་ཉིད་ལ་མཉམ་པར་གཞག་པའི་སེམས་རབ་ཏུ་འཇོག་སྟེ་རྣམ་པར་དཔྱོད་པར་བྱེད་དོ། །རྨི་ལམ་འདི་ལ་ནི་གཟུང་བར་བྱ་བའི་དོན་ཅི་ཡང་མེད་ལ་གཟུང་བར་བྱ་བ་མེད་པས་འཛིན་པ་ཡང་མེད་དོ། །འོན་ཀྱང་གཉིས་མེད་པ་ལ་
གཉིས་སུ་སྣང་བའི་སེམས་ཙམ་འདི་ནི་འཁྲུལ་པ་ཙམ་ཡིན་ཏེ། རྨི་ལམ་འདི་ཇི་ལྟ་བ་བཞིན་དུ་ཡང་དག་པ་མ་ཡིན་པའི་ཀུན་དུ་རྟོག་པ་སེམས་ཙམ་གྱི་ལུས་ཅན་གྱི་ཆོས་ཐམས་ཅད་གཉིས་སུ་མེད་པ་ལ་གཉིས་སུ་སྣང་བ་ཡིན་ནོ་ཞེས་བྱ་བ་འདི་ཡིན་ནོ། །དེ་ལྟར་ན་རྨི་ལམ་ལྟ་བུ་ཉིད་ཡིན་པའི་ཕྱིར་ཆོས་
ཐམས་ཅད་ནི་སེམས་ཙམ་ཉིད་ཡིན་པ་དེ་ལྟར་དེ་རྣམས་སེམས་སུ་དམིགས་པ་སྟེ། ཡང་དག་པ་ལ་སོ་སོར་རྟོག་པ་གང་ཡིན་པ་འདི་ནི་སེམས་ལ་དམིགས་པ་ཞེས་བྱ་བར་བརྗོད་དོ། །འདི་ལ་ཆོས་རྣམས་ཐམས་ཅད་རབ་ཏུ་གནས་པ་སྟེ་རང་གི་སེམས་སྣང་བ་ཡིན་ནོ་ཞེས་བྱ་བ་ནི་ལྷག་མ་སྟེ། གཟུགས་
དང་ཚོར་བ་ལ་སོགས་པའི་ཆོས་སྣང་བ་གང་ཡིན་པ་དེ་ཐམས་ཅད་གཟུགས་དང་ཚོར་བ་ལ་སོགས་པའི་རྣམ་པ་ཅན་གྱི་རང་གི་སེམས་ཉིད་ཡིན་གྱི་སེམས་ལས་ཕྱི་རོལ་དུ་གྱུར་པའི་སེམས་ཀྱིས་གཟུང་བར་བྱ་བའི་དོན་མ་ཡིན་པ་དེ་ལྟར་ནི་དེ་རྣམས་སེམས་སུ་དམིགས་པ་ལ་ཡང་དག་པ་ཇི་ལྟ་བ་བཞིན་དུ་
སྣང་ངོ་ཞེས་བྱ་བའི་དོན་ཏོ། །དེའི་འོག་ཏུ་གཟུང་བ་མེད་པས་འཛིན་པ་ཡང་ཡོད་པ་མ་ཡིན་པ་དེ་ལྟར་ན་གཉིས་སུ་མེད་པའི་ཕྱིར་གཉིས་སུ་མེད་པར་སྣང་བ་ཙམ་གྱི་མཚན་ཉིད་ཅན་གཉིས་ཀྱིས་སྟོང་པ་ཉིད་ཀྱི་ཆོས་ཐམས་ཅད་རོ་གཅིག་པ་གཉིས་སུ་སྣང་བའི་འཁྲུལ་པའི་རྒྱུ་མཚན་ཡོངས་སུ་
སྤངས་ནས་ཡང་དག་པའི་ཡིད་ལ་བྱེད་པས་ཡིད་ལ་བྱེད་པ་དེ་ཉིད་ཀྱིས་རྗེས་སུ་འགྲོ་བའི་ཕྱིར་ལྷུན་གྱིས་གྲུབ་པ་མངོན་པར་འདུ་མི་བྱེད་པ་སྤྲོས་པའི་མཚན་མར་སྣང་བ་ཐམས་ཅད་དང་བྲལ་བས་གཉིས་ཀྱིས་སྟོང་པའི་སྤྲོས་པ་མེད་པ་དེ་ལ་སེམས་མཉམ་པར་འཇོག་གོ། །དེ་ནི་སྤྲོས་པ་མེད་པ་
རྣམ་པར་མི་རྟོག་པ་འཇིག་རྟེན་ལས་འདས་པའི་ཡེ་ཤེས་དོན་དམ་པའི་བྱང་ཆུབ་ཀྱི་སེམས་ཡིན་པར་བཤད་དོ། །དེ་ཉིད་ནི་ནམ་མཁའ་རྡོ་རྗེ་སྟེ། ཆོས་ཐམས་ཅད་ནམ་མཁའ་དང་འདྲ་བར་མཐོང་བའི་ཕྱིར་ནམ་མཁའ་ཡང་དེ་ཡིན་ལ། བྱང་ཆུབ་ཀྱི་སེམས་ཉིད་ཡིན་པའི་ཕྱིར། རྡོ་རྗེ་ཡང་ཡིན་པ་དེ་

ལྟར་ན་ནམ་མཁའ་རྡོ་རྗེའོ། །ནམ་མཁའ་རྡོ་རྗེའི་གནས་ཞེས་བྱ་བ་ལ་ནིའི་སྒྲ་ནི་ཡང་གི་དོན་ཏེ། ནམ་མཁའི་རྡོ་རྗེ་ལ་ཡང་ཆོས་རྣམས་ཐམས་ཅད་རབ་ཏུ་གནས་པའོ། །ཆོས་མེད་ཆོས་ཉིད་མེད་པ་སྟེ། རེ་ཞིག་ཆོས་ཀྱི་ཚུལ་དུ་སྣང་བ་མ་ཡིན་ཏེ། ཆོས་ཐམས་ཅད་ཀྱི་རྒྱུ་མཚན་ནུབ་པ་ན་དེ་
ལ་སྟོང་པ་ཉིད་ཙམ་དུ་སྣང་བའི་ཕྱིར་རོ། །ཆོས་ཉིད་ཀྱི་ཚུལ་དུ་ཡང་མ་ཡིན་ཏེ། ལྟུང་བའི་ཆོས་ཅན་རྒྱ་ཤུག་གི་འབྲས་བུ་ཁར་གཞོང་གིས་རྟེན་པར་བྱེད་པ་ན་དེ་རྣམས་ཀྱི་རྟེན་དུ་གྱུར་པ་ཡིན་ལ། སྟོང་པ་ཉིད་ནི་རྟག་པ་ཉིད་ཡིན་པའི་ཕྱིར་རྣམ་པ་ཇི་ལྟར་ཡང་བྱ་བ་མ་ཡིན་པ་དེ་བས་ན་འདིའི་
ནི་འགའ་ཞིག་གི་ཡང་བརྟེན་པ་མ་ཡིན་པ་དེ་ལྟར་ན་འདི་ནི་འགའ་ཞིག་གི་ཡང་ཆོས་ཉིད་མ་ཡིན་ནོ། །ཆོས་རྣམས་ཀྱི་ནི་སྟོང་པ་ཉིད་ཆོས་ཉིད་ཡིན་ནོ་ཞེས་གསུངས་པ་གང་ཡིན་པ་དེ་ལ་དོན་ནི་འདིའི་རང་བཞིན་ཞེས་བྱ་བ་ཡིན་གྱི། བརྟེན་པའི་ཡོན་ཏན་ནི་མ་ཡིན་ནོ་ཞེས་བྱ་བའི་དོན་ཏོ། །
དེ་ནས་ཞེས་བྱ་བ་ལ་སོགས་པ་ལ་ངོ་མཚར་དུ་གྱུར་པ་ནི་ཆོས་རྣམས་རང་བཞིན་མེད་པ་ལའོ། །རྨད་དུ་གྱུར་པ་ནི་ནམ་མཁའི་རྡོ་རྗེས་ནམ་མཁའ་རྡོ་རྗེ་མཐོང་བ་ལའོ། །སྐུ་དང་གསུང་དང་ཐུགས་ནི་ཆོས་ཐམས་ཅད་དོ། །དེ་རྣམས་ཀྱི་དམ་ཚིག་ནི་ཡང་དག་པའི་དེ་ཁོ་ན་ཉིད་དང་ཡང་དག་
པར་རྟོགས་པ་ཞེས་བྱ་བའི་དོན་ཏོ། །དེ་དག་གི་ཐེ་ཚོམ་ནི་དེ་བཞིན་གཤེགས་པ་ཐམས་ཅད་ཀྱི་སྟེ་དེ་གཅོད་པའོ། །ངོ་མཚར་དང་རྨད་དུ་གྱུར་པ་ནི་ཐེ་ཚོམ་ལས་གྱུར་པ་ཡིན་པ་དེའི་ཕྱིར་ཞུས་པ་ནི་བཅོམ་ལྡན་འདས་ཞེས་བྱ་བ་ལ་སོགས་པ་ཡིན་ཏེ། དོན་ནི་ཆོས་རྣམས་ངོ་བོ་མེད་པ་ལ།
ཆོས་ཀྱི་དེ་ཉིད་ཀུན་བཤད་པ་གང་ཡིན་པ་དེ་དང་དེ་ནི་ངོ་མཚར་ཡིན་ཏེ། རང་བཞིན་མེད་པར་མ་གྲུབ་པའི་ཕྱིར་རོ་ཞེས་བྱ་བར་དགོངས་སོ། །ངོ་མཚར་ལས་བྱུང་བ་ནམ་མཁའ་ལ་ནི་ནམ་མཁའ་བསྒོམ་ཞེས་བྱ་བ་ནི་ནམ་མཁའ་རྡོ་རྗེས་ནམ་མཁའ་བསྒོམ་པ་ནི་ཤིན་ཏུ་ངོ་མཚར་དང་ལྡན་པའོ། །
གང་གི་ཚེ་རང་གི་སེམས་ཉིད་ཆོས་ཐམས་ཅད་ཡིན་པ་དེའི་ཚེ་སྣ་ཚོགས་པ་ཉིད་ཡིན་ན་ཅིའི་ཕྱིར་ནམ་མཁའི་རྡོ་རྗེ་ཡིན། འོན་ཏེ་རང་གི་སེམས་ཉིད་ནམ་མཁའི་རྡོ་རྗེ་ཉིད་ཡིན་པ་དེའི་ཚེ་སྣ་ཚོགས་པ་ཉིད་མེད་པ་ཡིན་པས་ན་ཇི་ལྟར་ན་དེ་ཉིད་ཆོས་ཐམས་ཅད་ཡིན། འོན་ཏེ་ནམ་མཁའི་རྡོ་རྗེ་ཉིད་ཆོས་

ཐམས་ཅད་དུ་འགྱུར་བ་དེ་ལྟ་ན་ཡང་ནམ་མཁའི་རྡོ་རྗེས་ནམ་མཁའི་རྡོ་རྗེ་ཉིད་རིག་པར་བྱ་བ་ཡིན་ནོ་ཞེས་བྱ་བ་ནི་རིགས་པ་མ་ཡིན་ཏེ། རང་ཉིད་ལ་བྱེད་པ་འགལ་བའི་ཕྱིར་རལ་གྲིའི་སོ་རྣོན་པོས་ཀྱང་རལ་གྲིའི་སོ་རྣོན་པོ་དེ་ཉིད་གཅོད་པར་མི་བྱེད་པ་ལྟ་བུའོ། །དེ་བཞིན་དུ་
ནམ་མཁའ་རྡོ་རྗེ་རྣམ་པ་མེད་པ་ཡིན་ན་ཡང་དེ་ཇི་ལྟར་དེ་བཞིན་ཉིད་ལ་དམིགས་པ་ཅན་ཡིན། དེ་ལ་དམིགས་པ་ཅན་ཡིན་ན་ཡང་ང་ནི་ཐམས་ཅད་དུ་གཏོགས་པ་དང་། ཐམས་ཅད་ཀྱི་རྗེས་སུ་ལྟ་བ་ཡིན་ནོ་ཞེས་རྣམ་པར་རྟོག་པར་ཐལ་བར་འགྱུར་རོ་ཞེ་ན། དེ་ལ་རེ་ཞིག་དང་པོར་ཤིན་ཏུ་ངོ་
མཚར་དུ་གྱུར་པ་ཉིད་གསལ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་པ་ལ། སྐུ་དང་གསུང་དང་ཐུགས་ནི་སྐུ་ལ་སོགས་པ་རོ་གཅིག་པའི་བྱང་ཆུབ་ཀྱི་སེམས་སོ། །དེ་ཉིད་ནི་རྡོ་རྗེ་སྟེ། དེ་གང་གི་ཕྱག་ན་བསྣམས་པ་དེ་ལ་དེ་སྐད་ཅེས་བྱའོ། །ཆོས་ཞེས་བྱ་བ་ནི་གཟུགས་ཅན་ནོ། །མི་ལྡན་ཏེ་
ཞེས་བྱ་བ་ནི་ལྡན་པ་ཉིད་དུ་རྟག་ཏུ་མི་སྣང་བ་སྟེ། ནམ་མཁའ་མཐའ་ཡས་སྐྱེ་མཆེད་ཐོབ་པ་རྣམས་ནི་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་འདས་ནས་ནམ་མཁའ་མཐའ་ཡས་ཙམ་དུ་སྣང་བའི་ཕྱིར་ལྡན་པ་ཡང་མ་ཡིན་ནོ། །མི་ལྡན་པ་ཡང་མ་ཡིན་ཏེ་ཞེས་བྱ་བ་ནི་མི་ལྡན་པ་ཉིད་རྟག་
ཏུ་སྣང་བ་མ་ཡིན་ཏེ། གཟུགས་མཐོང་བ་རྣམས་ཀྱིས་ནམ་མཁའ་ཉིད་ལ་གཟུགས་ཐམས་ཅད་མཐོང་བའི་ཕྱིར་རོ། །ནམ་མཁའ་ནི་འདི་སྙམ་དུ་ཡང་མི་སེམས་སོ་ཞེས་བྱ་བ་ནི་ནམ་མཁའ་ལ་རྣམ་པར་རྟོག་པ་མེད་པའི་ཕྱིར་རོ་ཞེས་བྱ་བར་དགོངས་སོ། །འགྲོ་ཞིང་རྒྱུན་མི་འཆད་པར་མཐོང་བ་ནི་
རྗེས་སུ་ལྟ་བའོ། །དེ་དང་ལྡན་པས་ན་རྗེས་སུ་ལྟ་བ་ཅན་ཏེ། ང་ནི་མཐའ་ཡས་པ་དང་འབའ་ཞིག་ཏུ་མཐོང་བར་བྱ་བ་ཡིན་ནོ་ཞེས་བྱ་བའི་དོན་ཏོ། །དེ་བཞིན་དུ་ཞེས་བྱ་བ་ནི་གཟུགས་ཅན་གྱི་རྫས་དང་ནམ་མཁའི་ཚུལ་དུའོ། །རྨི་ལམ་ཞེས་བྱ་བ་ནི་རྨི་ལམ་ལྟ་བུར་སྣང་བའི་ཕྱིར་ཏེ་སེམས་དེ་ལ་དམིགས་
པ་ནི་སེམས་ཙམ་ཡིན་པའི་ཕྱིར་རོ། །རྨི་ལམ་དང་མཚུངས་པ་དེ་རྣམས་ཀྱི་དམ་ཚིག་ནི་རོ་གཅིག་པའི་ཡེ་ཤེས་ཏེ། ནམ་མཁའ་རྡོ་རྗེའོ། །དེ་ལས་བྱུང་བ་ནི་དེར་རོ་གཅིག་པར་གྱུར་པས་སྣང་བར་ཤེས་པར་བྱའོ། །དེ་འདི་སྐད་དུ་སེམས་ལ་དམིགས་པ་ལས་ཆོས་ཐམས་ཅད་སེམས་ཙམ་དུ་ཤེས་པར་གྱུར་

པ་ཡིན་ན་ཡང་བློ་འཁྲུལ་པའི་ཕྱིར་རང་གི་སེམས་མཚན་ཉིད་ཀྱི་རྒྱུ་མཚན་ཡང་དག་པ་མ་ཡིན་པ་དང་ལྡན་པ་སྣང་ངོ་། །ནམ་མཁའ་རྡོ་རྗེ་ནི་དེ་རྣམས་དང་བྲལ་བ་ཡིན་ཏེ། ཡིད་ལ་མི་བྱེད་པས་ཡོངས་སུ་སྤོང་ཞིང་དེ་རྣམས་ནུབ་པས་ཡང་དག་པ་ལ་སོ་སོར་རྟོག་པའི་སྟོབས་བསྐྱེད་པའི་ཕྱིར་ལྷུན་གྱིས་གྲུབ་
པའི་ནམ་མཁའི་རྡོ་རྗེ་ཤིན་ཏུ་འཁྲུལ་པ་མེད་པར་སྐྱེད་པའི་ཕྱིར་རོ་ཞེས་བསྟན་པར་འགྱུར་རོ། །དེ་བས་ན་སེམས་ལ་དམིགས་པ་ལ་སྣ་ཚོགས་པར་སྣང་ཞིང་ནམ་མཁའ་རྡོ་རྗེ་ལ་ནི་རོ་གཅིག་པ་ཡིན་པ་དེ་ལྟར་ན་འདི་འགལ་བ་ཅི་ཞིག་ཡོད། སེམས་ཇི་ལྟ་བུར་གྱུར་པ་སྐྱེ་བ་དེ་ལྟ་བུར་གྱུར་པ་
ཉིད་དུ་སྣང་བ་སྟེ། གསལ་བའི་མཚན་ཉིད་ཅན་ཉིད་ཡིན་པའི་ཕྱིར་རོ། །དེ་ལྟར་གསལ་བར་གྱུར་པ་ཉིད་ཀྱིས་འདི་དེ་ལྟར་གྱུར་པའི་བདག་ཉིད་དུ་རིག་པ་དེའི་ཕྱིར་ཇི་ལྟར་འདི་ནི་དེ་ལྟར་གྱུར་པ་འབྱུང་བ་འགལ་བ་མེད་པ་དེ་བཞིན་དུ་དེ་ལྟ་བུར་གྱུར་པའི་བདག་ཉིད་རིག་པ་ཡང་ཡིན་པའི་ཕྱིར་རང་རིག་
པ་ལ་ཡང་འགལ་བ་ཡོད་པ་མ་ཡིན་ནོ། །དགོངས་པ་ངེས་པར་འགྲེལ་པ་ལས་ཀྱང་བྱམས་པས་གསོལ་པ། བཅོམ་ལྡན་འདས་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བརྙན་གལ་ཏེ་སེམས་དེ་ལས་ཐ་དད་པ་མ་ལགས་ན། སེམས་དེ་ཉིད་ཀྱིས་སེམས་དེ་ཉིད་ལ་ཇི་ལྟར་རྟོགས་པར་བགྱིད་
ལགས། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་དེ་ལ་ཆོས་གང་ཡང་ཆོས་གང་ལ་ཡང་རྟོག་པར་མི་བྱེད་མོད་ཀྱི། འོན་ཀྱང་དེ་ལྟར་སྐྱེས་པའི་སེམས་གང་ཡིན་པ་དེ་དེ་ལྟར་སྣང་ངོ་ཞེས་གསུངས་པ་དང་། གཉིས་སུ་གྱུར་པ་ལ་རག་ལས་པའི་གཅོད་པར་བྱེད་པས་གཅད་པར་
བྱ་བ་རྣམ་པ་གཉིས་སུ་བྱེད་པ་དེའི་ཕྱིར་བདག་ཉིད་གཅོད་པ་འགལ་བ་ཡིན་པ་དེ་ལྟར་ན་དཔེ་དང་འདྲ་བ་མ་ཡིན་ནོ། །འདི་ལྟར་ཆོས་ཐམས་ཅད་ལ་གཉིས་ཀྱིས་སྟོང་པ་ཉིད་དུ་ཡང་དག་པར་རིག་པ་ཉིད་དམིགས་པ་ཡིན་གྱི་གཟུང་བ་ཉིད་ནི་མ་ཡིན་ནོ། །མཚན་མ་ཉིད་ཀྱིས་དབེན་པ་ཉིད་ནི་ནམ་མཁའ་
རྡོ་རྗེའི་རྣམ་པ་ཡིན་ཏེ། དེ་ཉིད་ཀྱིས་དེ་ཡང་དག་པར་རིག་པ་འགྲུབ་པའི་ཕྱིར་དང་། རྣམ་པ་གཞན་གྱིས་གྲུབ་པ་མ་ཡིན་པའི་ཕྱིར་ཏེ། དཔེར་ན་བུམ་པར་སྣང་བས་དབེན་པ་མཐོང་བས་ས་ཕྱོགས་སུ་བུམ་པས་སྟོང་པ་ཉིད་དུ་འགྲུབ་ཀྱིས་གཞན་གྱིས་ནི་མ་ཡིན་པ་ལྟ་བུའོ། །ཐེག་པ་ཆེན་པོ་བསྡུས་

པ་ལས་ཀྱང་། བྱང་ཆུབ་སེམས་དཔའ་རྣམས་ཀྱིས་ཤེས། །རྣམ་རྟོག་མེད་པའི་དམིགས་པ་ནི། །ཆོས་རྣམས་བརྗོད་དུ་མེད་པ་ཉིད། །བདག་མེད་དེ་བཞིན་ཉིད་ཀྱང་དེ། །བྱང་ཆུབ་སེམས་དཔའ་རྣམས་ཀྱིས་ཤེས། །བྱང་ཆུབ་སེམས་དཔའི་རྣམ་པའིའོ། །ཤེས་བྱ་
དམིགས་པ་དེ་ཉིད་ལ། །མཚན་མ་མེད་པ་གང་ཡིན་པའོ། །ཞེས་བཤད་དོ། །འོ་ན་ཇི་ལྟར་རྣམ་པར་མི་རྟོག་པའི་ཡེ་ཤེས་འདི་རྣམ་པ་མེད་པ་ཞེས་བྱ་ཞེ་ན། གཉིས་ཀྱི་རྣམ་པས་སྟོང་པ་ཉིད་ཀྱི་ཕྱིར་རོ། །ཇི་ལྟར་ན་དམིགས་པ་མེད་པ་ཞེས་བྱ་ཞེ་ན། གཟུང་བའི་དོན་གཞན་ལ་མི་རྟོག་པའི་
ཕྱིར་རོ། །དེ་ལྟར་ན་རྣམ་པར་མི་རྟོག་པ་དེ་ཉིད་ནམ་མཁའ་རྡོ་རྗེ་ཆོས་ཐམས་ཅད་དུ་གཏོགས་པ་དེ་ནི་དེ་བཞིན་ཉིད་རིག་ཅིང་ཉམས་སུ་མྱོང་བ་ན་ཡང་འདི་ལྟར་ང་ནི་ཐམས་ཅད་དུ་གཏོགས་པ་ལ་ཐམས་ཅད་ཀྱི་རྗེས་སུ་བལྟའོ་སྙམ་དུ་ཡང་རྣམ་པར་རྟོག་པར་མི་བྱེད་དོ། །དེ་དེ་ལྟར་ན་ཤིན་ཏུ་ངོ་མཚར་དུ་གྱུར་པ་
མདོར་བསྡུས་པས་གསལ་ནས་རྒྱས་པར་ངོ་མཚར་དུ་གྱུར་པ་གསལ་བའི་ཕྱིར་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། འདིར་ནི་གཟུང་བ་མེད་པར་སྟོན་པར་བྱེད་དོ། །གཟུགས་ཀྱི་ཕུང་པོ་ལས་གཞན་གཟུང་བར་བྱ་བའི་རྫས་ཉིད་དུ་ཡོད་པ་མ་ཡིན་ནོ་ཞེས་བྱ་བ་དེ་ནི་རབ་ཏུ་གྲགས་པ་
ཡིན་ལ། གཟུགས་ཀྱི་ཕུང་པོ་ནི་ཡོད་པ་མ་ཡིན་ནོ་ཞེས་མ་གྲགས་པ་དེ་འདིས་དངོས་སུ་བརྗོད་པར་བྱའོ། །འདི་ལྟ་སྟེ་ཞེས་བྱ་བ་ནི་ཚིག་རྩོམ་པའོ། །དཔེར་ན་ཞེས་བྱ་བ་ནི་ཇི་ལྟར་རབ་ཏུ་གྲགས་པའོ། །དེ་གང་ཞེ་ན། ནམ་མཁའི་གཟུགས་ཅན་མ་ཡིན་པ་བལྟར་མི་སྣང་བ་སྟེ། གཟུགས་ཀྱི་ཕུང་པོའི་
རང་བཞིན་མེད་པའི་ཕྱིར་གཟུགས་ཅན་མ་ཡིན་པའོ། །དེ་ཉིད་ཀྱི་ཕྱིར་མིག་གི་རྣམ་པར་ཤེས་པ་འདིས་བལྟར་སྣང་བ་མེད་པའི་ཕྱིར་བལྟར་མི་སྣང་བ་སྟེ། ནམ་མཁའ་ལ་ནི་གཟུགས་ཅན་གྱི་རྫས་མེད་པའི་མཚན་ཉིད་ཡིན་པའི་ཕྱིར་རོ། །དེ་བཞིན་དུ་ཞེས་བྱ་བ་ནི་ནམ་མཁའ་དང་འདྲ་བ་ཉིད་དུ་ཆོས་ཐམས་ཅད་
གཟུགས་ཅན་མ་ཡིན་ཞིང་བལྟར་མི་སྣང་བར་ཤེས་པར་བྱ་སྟེ། གཅིག་དང་དུ་མའི་རང་བཞིན་དང་བྲལ་བའི་གཟུགས་ཀྱི་ཕུང་པོ་དང་སྐྱེ་མཆེད་བཅུ་དང་ཁམས་བཅུ་པོ་དོན་དམ་པར་ཡོད་པ་ཉིད་མ་ཡིན་པའི་ཕྱིར་རོ་ཞེས་བྱ་བར་དགོངས་སོ། །གལ་ཏེ་གཞན་གྱི་སེམས་ལ་སོགས་པ་གཟུང་བ་ཡོད་པ་ཉིད་ཀྱི་ཕྱིར་རོ་ཞེ་ན།

ཇི་ལྟར་སྣང་བ་ནི་མེད་པ་ཉིད་ཡིན་པའི་ཕྱིར་དང་། ཇི་ལྟར་ཡོད་པ་ཉིད་ནི་མི་སྣང་བའི་ཕྱིར་ཏེ། དེ་དག་ཀྱང་གཟུང་བ་མ་ཡིན་པ་དེ་ལྟར་ནི་སྐྱོན་ཡོད་པ་མ་ཡིན་ནོ། །འཛིན་པ་མེད་པར་སྟོན་པའི་ཕྱིར། བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། སྟོང་པ་ཉིད་དུ་གསུངས་པ་གང་ཡིན་པ་དེ་འདི་ལྟ་སྟེ། དཔེར་
ན་མདོ་སྡེ་གཞན་དག་ཏུ་རབ་ཏུ་གྲགས་པའི་ཆོས་ཐམས་ཅད་རྒྱས་པ་དེ་མདོར་བསྡུས་ནས་ལུས་དང་ངག་དང་སེམས་ཀྱི་དམ་ཚིག་གི་དེ་ཁོ་ན་ཉིད་དེ་བཞིན་དུ་རིག་པར་བྱའོ། །ཅི་འདྲ་བ་ཞིག་ཅེ་ན། ཐམས་ཅད་ཀྱི་རྗེས་སུ་སོང་བ་སྟེ། ཆོས་ཐམས་ཅད་ལ་ཡོད་པའི་ཕྱིར་རོ། །ངོ་བོ་ཉིད་གཅིག་པ་ནི་ཞེས་བྱ་བ་ནི་ཇི་ལྟར་
གཟུང་བ་དེ་དང་དེའི་རང་བཞིན་གྱིས་སྟོང་པ་དེ་བཞིན་དུ་འཛིན་པའི་རང་བཞིན་གྱིས་ཀྱང་སྟོང་སྟེ། གཟུང་བ་མེད་ན་འཛིན་པ་ཡང་མི་རུང་བའི་ཕྱིར་རོ། །འཛིན་པའི་རང་བཞིན་གང་གིས་ཤེ་ན་གང་ལྷག་མར་གྱུར་པའི་ཕུང་པོ་བཞི་དང་ཁམས་བརྒྱད་དང་སྐྱེ་མཆེད་བཅུ་གཉིས་སོ། །དེ་ལྟར་ནི་རྣམ་པར་ཤེས་
པར་བྱེད་པས་ན་རྣམ་པར་ཤེས་པ་སྟེ། དེ་ཡང་དོན་གྱི་རང་གི་ངོ་བོ་ཙམ་འཛིན་པ་ཡིན་ལ། དོན་དེ་ཉིད་ཀྱི་ཁྱད་པར་འཛིན་པའི་སེམས་ལས་བྱུང་བའི་ཚོར་བ་དང་འདུ་ཤེས་དང་འདུ་བྱེད་དག་ཡིན་ནོ། །དེ་ལྟར་ན་གཟུང་བ་དང་འཛིན་པའི་རང་བཞིན་མེད་པའི་ཕྱིར་རང་བཞིན་གཞན་གང་ཞིག་ལུས་ན་གང་གིས་དེ་
ངོ་བོ་ཉིད་གཅིག་པ་ཡིན་སྙམ་པ་ལ་དེའི་ཕྱིར་འདི་ལྟ་སྟེ་སེམས་ཀྱི་ངོ་བོ་ཉིད་དོ་ཞེས་གསུངས་ཏེ། གསལ་བའི་མཚན་ཉིད་ཅན་གྱི་སེམས་འདི་ཉིད་ནི་ཐོག་མ་མེད་པ་ནས་གཉིས་སུ་རྟོག་པའི་བག་ཆགས་ཀྱིས་བསླད་པའི་ཕྱིར་གཉིས་མེད་ཀྱང་གཉིས་ཀྱི་རྣམ་པར་བྱུང་བ་ཡིན་ཏེ། རྨི་ལམ་ལ་སོགས་པ་
ལྟ་བུའོ་ཞེས་བྱ་བའི་དོན་ཏོ། །གཞུང་འདི་ཙམ་གྱིས་ནི་སེམས་ལ་དམིགས་པ་ལ་ཆོས་ཐམས་ཅད་ཀྱི་དེ་ཁོ་ན་ཉིད་སེམས་ཙམ་ཉིད་ཅེས་སྣང་བ་ཅི་འདྲ་བ་ཡིན་པ་དེ་རབ་ཏུ་བསྒྲུབས་པ་ཡིན་ནོ། །ནམ་མཁའི་རྡོ་རྗེར་སྣང་བ་ཅི་འདྲ་བ་ཡིན་པ་དེ་རབ་ཏུ་བསྒྲུབ་པའི་ཕྱིར་ལུས་དང་ཞེས་བྱ་བ་ལ་སོགས་པ་གསུངས་
ཏེ། ལུས་དང་ངག་དང་སེམས་ཀྱི་ཁམས་ནི་ཆོས་ཐམས་ཅད་སྣང་བའི་ལུས་ཅན་རྣམས་ཀྱི་རང་བཞིན་ཡིན་ཏེ། ཡོངས་སུ་གྲུབ་པའི་ངོ་བོ་ཉིད་འདི་ནི་གཉིས་ཀྱིས་སྟོང་པ་ཉིད་ཡིན་ནོ། །ནམ་མཁའི་ཁམས་ནི་རང་བཞིན་ཏེ། དག་པའི་ནམ་མཁའོ། །དེ་དག་གཉི་ག་ཡང་གཉིས་སུ་མེད་ཅིང་

གཉིས་སུ་དབྱེར་མེད་པ་སྟེ། ཁྱད་པར་མེད་དོ་ཞེས་བྱ་བའི་དོན་ཏོ། །ཆོས་ཀྱི་རང་གི་མཚན་ཉིད་རྣམས་ནི་གཉིས་པོ་བརྫུན་པའི་མཚན་མའོ། །ཁྱད་པར་ཉིད་ཀྱིས་ཡོངས་སུ་གྲུབ་པ་མ་ཡིན་པ་ཉིད་དོ་ཞེས་བྱ་བར་དགོངས་སོ། །འདི་ཙམ་གྱིས་ནི་ཆོས་ཐམས་ཅད་རང་གི་
མཚན་ཉིད་དུ་ཡོད་པ་མ་ཡིན་ནོ་ཞེས་བྱ་བ་རབ་ཏུ་འགྲུབ་པ་ཡིན་ནོ། །ཆོས་ཉིད་ཀྱང་མཚན་ཉིད་ཇི་ལྟ་བ་བཞིན་དུ་ཡོད་པ་མ་ཡིན་ནོ་ཞེས་རབ་ཏུ་བསྒྲུབ་པའི་ཕྱིར་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ་ལ་འདི་ལྟ་སྟེ་ཞེས་བྱ་བ་ནི་དེའི་ཕྱིར་རོ། །ནམ་མཁའི་ཁམས་ལ་གནས་ཏེ་ཞེས་བྱ་བ་
ནི་ནམ་མཁའ་ལྟ་བུའི་ཆོས་ཀྱི་དབྱིངས་ལ་གནས་པའོ། །ཇི་ལྟར་ན་ནམ་མཁའ་ལྟ་བུ་ཡིན་ཞེ་ན། དཔེར་ན་ཞེས་བྱ་བ་གསུངས་ཏེ། འདས་མ་ཐག་པ་ཉིད་དུ་ཇི་ལྟར་རབ་ཏུ་བསྒྲུབས་པའོ། །ཇི་ལྟར་དེ་རྣམས་དེ་ལ་གནས་ཤེ་ན། ནམ་མཁའ་དང་འདྲ་བའི་ཚད་མེད་པ་དང་རྟག་པ་དེའི་ནང་དུ་ཚད་ཡོད་པ་
དང་། མི་རྟག་པ་དེ་རྣམས་འདུས་པ་ཉིད་ཀྱི་ཕྱིར་རོ། །དེ་ཡང་ཞེས་བྱ་བ་ནི་ཆོས་ཀྱི་དབྱིངས་སོ། །འདོད་པའི་ཁམས་ལ་སོགས་པ་ལ་གནས་པ་མ་ཡིན་པ་ནི་ནང་དུ་འདུས་པ་མ་ཡིན་ཏེ། ཚད་མེད་པའི་ཕྱིར་དང་། རྟག་པ་ཉིད་ཀྱི་ཕྱིར་རོ། །དེ་ལས་ཅིར་འགྱུར་ཞེ་ན། ཆོས་གང་ཞེས་བྱ་བ་ལ་སོགས་
པ་གསུངས་སོ། །རྟག་པར་མི་ནུས་སོ་ཞེས་བྱ་བ་ནི་བརྟན་པར་ནུས་པ་མ་ཡིན་ལ། བརྟན་པར་ནུས་པ་ནང་དུ་འགྱུར་བའི་མཚན་ཉིད་ཅན་ཡིན་པའི་ཕྱིར་ཏེ། དཔེར་ན་ཁར་གཞོང་གིས་རྒྱ་ཤུག་གི་འབྲས་བུ་ལྟ་བུའོ་ཞེས་བྱ་བར་དགོངས་སོ། །གང་གི་ཕྱིར་འགའ་ཞིག་ལྟར་ཡང་བརྟན་
པར་བྱ་བ་མ་ཡིན་པ་དེའི་ཕྱིར་འགའ་ཞིག་གི་ཡང་ཆོས་ཉིད་མ་ཡིན་ནོ་ཞེས་བསྟན་པར་འགྱུར་རོ། །དེ་བས་ན་ཞེས་བྱ་བ་ལ་སོགས་པས་ནི་མཇུག་བསྡུ་བ་ཡིན་ཏེ། གང་གི་ཕྱིར་མཚན་ཉིད་ཅན་ཇི་ལྟ་བ་བཞིན་དུ་ཆོས་མ་ཡིན་པ་དེ་བས་ན་རང་དང་སྤྱིའི་མཚན་ཉིད་དག་གིས་ཆོས་ཐམས་ཅད་ནི་ངོ་བོ་ཉིད་མེད་པ་ཡིན་ཏེ།
ངོ་བོ་ཉིད་མེད་པ་གང་གིས་སྤྲོས་པའི་རྒྱུ་མཚན་ཐམས་ཅད་ནུབ་པའི་དྲི་མ་མེད་པ་ནམ་མཁའི་རྡོ་རྗེ་ལ་སྣང་ངོ་ཞེས་བྱ་བར་དགོངས་སོ། །ནམ་མཁའ་རྡོ་རྗེ་ནི་བྱང་ཆུབ་ཀྱང་མ་ཡིན་བྱང་ཆུབ་ཀྱི་སེམས་ཀྱང་མ་ཡིན་པ་དེ་བས་ན་འདི་བསྒོམས་པས་ཅིར་འགྱུར་ཞེ་ན། བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ།

འདི་ལྟ་སྟེ་ཞེས་བྱ་བ་ནི་ནམ་མཁའི་རྡོ་རྗེ་ཉིད་དེ་བྱང་ཆུབ་ཀྱི་སེམས་སོ། །དཔེར་ན་ཞེས་བྱ་བ་ནི་ཇི་ལྟར་རབ་ཏུ་གྲགས་པའི་ཐེག་པ་ཆེན་པོ་ལའོ། །ཅིའི་ཕྱིར་དེ་བྱང་ཆུབ་ཀྱི་སེམས་ཡིན་ཞེ་ན། གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཏེ། སངས་རྒྱས་ཀྱི་ཆོས་ཐམས་ཅད་དོ། །དེ་རྣམས་
འབྱུང་བ་ནི་བསྐྱེད་པའོ། །རྡོ་རྗེའི་གནས་ནི་རྡོ་རྗེ་འཆང་ཆེན་པོའི་གོ་འཕང་སྟེ། བླ་ན་མེད་པའི་བྱང་ཆུབ་པོ། །དེ་བྱེད་པ་ནི་ཐོབ་པར་བྱེད་པ་སྟེ། རྒྱུ་ཞེས་བྱ་བའི་དོན་ཏོ། །སངས་རྒྱས་རྣམས་ཀྱི་སྐུ་དང་གསུང་དང་ཐུགས་གང་ཡིན་པ་དེ་ལ་དམིགས་པ་ཅན་གྱི་སེམས་མ་ཡིན་ནམ། དེ་ཅིའི་ཕྱིར་ནམ་
མཁའི་རྡོ་རྗེ་ཡིན་ཞེ་ན། དེའི་ཕྱིར་བྱང་ཆུབ་ཀྱི་སེམས་ཞེས་བྱ་བ་ལ་སོགས་པ་གསུངས་ཏེ། དོན་དམ་པར་བྱང་ཆུབ་ཀྱི་སེམས་ནི་ལུས་ལ་སོགས་པ་ལ་དམིགས་པ་ཅན་མ་ཡིན་ཏེ། འཁྲུལ་པ་མེད་པ་ཉིད་ཡིན་པའི་ཕྱིར་རོ་ཞེས་བྱ་བའི་དོན་ཏོ། །སངས་རྒྱས་རྣམས་ཀྱི་སྐུ་དང་གསུང་ཡང་ཡོད་
པ་མ་ཡིན་ཏེ། གཟུང་བ་མེད་པའི་ཕྱིར་རོ། །ཐུགས་ཀྱང་ཡོད་པ་མ་ཡིན་ཏེ། འཛིན་པ་མེད་པའི་ཕྱིར་རོ། །སྐུ་ལ་སོགས་པའི་རྣམ་པར་རིག་པའི་མཚན་ཉིད་ཅན་གྱི་སྐུ་དང་གསུང་དང་ཐུགས་སངས་རྒྱས་རྣམས་ཀྱི་ལོངས་སྤྱོད་རྫོགས་པ་དང་སྤྲུལ་པ་ཅན་གང་ཡིན་པ་དེ་ཡང་དག་པའི་འཇིག་
རྟེན་པ་རྣམ་པར་རྟོག་པའི་རང་བཞིན་ཉིད་ཡིན་པའི་ཕྱིར་གཙོ་བོའི་བྱང་ཆུབ་མ་ཡིན་ནོ། །དམིགས་པ་དང་བཅས་པའི་བྱང་ཆུབ་ཀྱི་སེམས་ཀྱང་གཙོ་བོ་མ་ཡིན་ནོ་ཞེས་བྱ་བ་ཐུགས་ལ་བཞག་ནས། ཆོས་གང་ཞེས་བྱ་བ་ལ་སོགས་པ་གསུངས་པ་ལ། ཆོས་གང་ཞེས་བྱ་བ་ནི་སེམས་ཀྱི་རྒྱུན་རྣམ་
པར་བྱང་བར་གནས་གྱུར་པའོ། །ཁམས་གསུམ་ན་མི་གནས་པ་ཞེས་བྱ་བ་ནི་ཀུན་ནས་ཉོན་མོངས་པའི་ཆོས་ཡང་དག་པ་མ་ཡིན་པ་ཀུན་དུ་རྟོག་པའི་རང་བཞིན་ཅན་ཐམས་ཅད་ནི་ཁམས་གསུམ་པ་ཡིན་ལ། དེ་ལ་མི་གནས་པ་ནི་དེའི་རྒྱུ་མཚན་དུ་མི་གནས་པ་སྟེ། ཀུན་ནས་ཉོན་མོངས་པ་
ཅན་གྱི་ཆོས་ཐམས་ཅད་ཀྱི་ས་བོན་ནི་དེར་འཕགས་པའི་ལམ་གྱིས་ཡོངས་སུ་ཟད་པའི་ཕྱིར་རོ། །དེ་ལ་སྐྱེ་བ་མེད་དེ་ཞེས་བྱ་བ་ནི་དེ་ལ་ཀུན་ནས་ཉོན་མོངས་པའི་ཆོས་འབྱུང་བ་ནི་ཡོད་པ་མ་ཡིན་ཏེ། ས་བོན་མེད་པ་ཉིད་ཀྱི་ཕྱིར་རོ་ཞེས་བྱ་བའི་དོན་ཏོ། །འདི་ནི་ཞེས་བྱ་བ་ལ་སོགས་པ་ལ་གང་གནས་

ཡོངས་སུ་གྱུར་པའི་མཚན་ཉིད་ཅན་གྱི་ཆོས་གང་ཡིན་པ་འདི་ནི་ཀུན་ནས་ཉོན་མོངས་པ་ཅན་གྱི་ས་བོན་ཐམས་ཅད་ཟད་པ་ཡིན་པས་ན་རྣམ་