Kinh tạng Tây Tạng (Kangyur Đại Học) — 100_གཟུངས་འདུས།_ཨེ

མེ། མ་ཧཱ་ཀ་རུ་ཎ་བི་ཛ་ན་པ་རི་ཤུདྡྷ་ཡ། ཨ་མོ་གྷ་མེ་ཀུ་རུ་ཛཱི་བི་ཏན་རཀྵ་རཀྵ་མཱྃ། བྷ་ག་བ་ཏི་མ་མ་ཧཱ་བོ་དྷི་ཙིཏྟཾ་སཾ་མཱུ་ཧྱེད་མ་སནྟུ་ཤུད་བི་ཏི་མི་ཀ་རུ་ཎི། བུདྡྷ་བོ་དྷི་པྲ་ཏེ། ན་ར་ཀ་པྲེ་ཏ་ཏིརྱ་ག་ཏི་དུཿཁེ་ན་མཱུ་ལ་ནི། དེ་བ་མ་ནུ་ཥྱ་ག་ཏི་སཾ་པ་ཧ་ན་བི་ག་ཏོ་
པ་ཀླེ་ཤེ། སརྦ་བུདྡྷ་དྷརྨཱ་པ་རི་པཱུ་ར་ཎི་སྭཱ་ཧཱ། བཅོམ་ལྡན་འདས་ཀྱི་སྙིང་རྗེ་ཆེན་པོའི་མཆོག་ཅེས་བྱ་བའི་གཟུངས། བཅོམ་ལྡན་འདས་ཀྱི་གཙུག་ཏོར་ནས་བྱུང་བ་འདི་ནི་གཟུངས་གྲངས་མེད་པ་ཕྲག་སྟོང་གི་འཁོར་དང་ལྡན་པའོ། །སྡིག་པ་དང་། ལས་དང་།
ཉོན་མོངས་པ་ཐམས་ཅད་འཇོམས་པའོ། །བཀྲ་མི་ཤིས་པ་དང་། རྨི་ལམ་ངན་པ་དང་། ལྟས་ངན་པ་དང་། དུས་མ་ཡིན་པར་འཆི་བ་ཐམས་ཅད་ཞི་བར་བྱེད་པའོ། །ཚེ་དང་། བསོད་ནམས་དང་། གཟུགས་དང་། སྟོབས་དང་། བདེ་

བ་དང་། སྤོབས་པ་དང་། ནད་མེད་པར་བྱེད་པའོ། །འབྱུང་པོ་དང་། བརྗེད་བྱེད་དང་། གནོད་སྦྱིན་དང་། སྲིན་པོ་དང་། ནམ་མཁའ་ལྡིང་དང་། ལྷ་མ་ཡིན་དང་། མིའམ་ཅིའི་གདོན་ཐམས་ཅད་ངེས་པར་འཇོམས་པའོ། །གཟུངས་འདིའི་
མིང་གཟུང་བ་དང་། ཐོས་པ་དང་། བརྗོད་པ་ཙམ་གྱིས་ཀྱང་ཚེ་རབས་བྱེ་བ་ཕྲག་འབུམ་གྱི་བར་དུ་བསགས་པའི་ལས་ཀྱི་སྒྲིབ་པ་ཡང་འབྱང་བར་འགྱུར་རོ། །ཉོན་མོངས་པ་ཐམས་ཅད་བསྲབས་པར་འགྱུར་རོ། །དེའི་ངན་སོང་གི་འགྲོ་བ་ཐམས་ཅད་ཀྱང་རྒྱུན་ཆད་
པར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ཡོངས་སུ་གཟུང་བར་འགྱུར་རོ། །བྱང་ཆུབ་སེམས་དཔའི་དགེ་བ་དང་ཡང་ལྡན་པར་འགྱུར་རོ། །ཡོངས་སུ་མི་ཉམས་པའི་ཆོས་ཅན་དུ་ཡང་འགྱུར་རོ། །སྙིང་རྗེ་ལས་
ཀྱང་ཉམས་པར་མི་འགྱུར་རོ། །སེམས་ཅན་ཐམས་ཅད་ཀྱིས་ཀྱང་མངོན་པར་དགའ་བར་བྱ་བར་འགྱུར་རོ། །ཉིན་དུས་གསུམ། མཚན་དུས་གསུམ་དུ་ལན་བདུན་བདུན་བརྗོད་ན་སྡིག་པ་ཐམས་ཅད་ལས་རྣམ་པར་ཐར་པར་འགྱུར་ལ། བྱང་ཆུབ་སེམས་
དཔའི་ཡོན་ཏན་སྟོང་ཕྲག་དཔག་ཏུ་མེད། གྲངས་མེད་པ་དག་ཀྱང་ཐོབ་པར་འགྱུར་རོ། །ནམ་ནངས་པའི་དུས་སུ་སྐྱིལ་མོ་ཀྲུང་བཅས་ཏེ་བདེ་བར་འདུག་ལ། ལག་པ་གྲུ་གསུམ་གྱི་ཕྱག་རྒྱ་བྱས་ནས། སངས་རྒྱས་དང་། བྱང་ཆུབ་སེམས་དཔའ་ཐམས་
ཅད་ལ་དམིགས་ཏེ། དེ་བཞིན་གཤེགས་པ་ཡོན་ཏན་བདག་ཉིད་ཆེན་པོ་མངོན་དུ་བསམས་ནས། དེ་བཞིན་གཤེགས་པ་ལ་ཕྱག་འཚལ་ལོ་ཞེས་སྨྲས་ཏེ། ཡིད་ཀྱིས་ཕྱག་འཚལ་ནས་ལན་ཉི་ཤུ་རྩ་གཅིག་བརྗོད་ན། དེ་ལ་ཡིད་ལ་ཇི་ལྟར་འདོད་པའི་བསམ་པ་
ཐམས་ཅད་ཡོངས་སུ་རྫོགས་པར་འགྱུར་ཏེ། དོན་ཇི་ལྟ་བ་བཞིན་དུ་འགྲུབ་པ་ཐོབ་པར་འགྱུར་རོ། །ཚེས་བརྒྱད་དང་། བཅུ་བཞི་དང་། བཅོ་ལྔ་ལ་བཅོམ་ལྡན་འདས་ལ་མཆོད་པ་བྱས་ལ། བསྙེན་གནས་བླངས་ནས་གོས་དཀར་པོ་བགོས་ཏེ། སྦྱིན་པ་བྱས་ལ་བྱང་

ཆུབ་ཀྱི་སེམས་ཆེན་པོ་བླངས་ནས་མི་སྡུག་པ་མེད་པར་ལག་པ་བརྐྱང་བ་དེས་རང་གི་ལག་གིས་དཀྱིལ་འཁོར་བྱུགས་ལ། མེ་ཏོག་ཁ་དོག་སྣ་གསུམ་གྱིས་མཆོད་ནས་ཙནྡན་དཀར་པོས་བདུགས་ལ། འཇིག་རྟེན་གྱི་ཁམས་སྟོང་ཕྲག་
མཐའ་ཡས་པ་དག་ན་མཆོད་པ་དང་། བཀུར་སྟི་ཆེན་པོ་རྣམ་པ་སྣ་ཚོགས་ཡོད་པ། དེ་བཞིན་གཤེགས་པ་རྣམས་ལ་འོས་པ་རྣམས་ཡིད་ལ་བསམས་ཏེ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕུལ་ནས། དེ་བཞིན་གཤེགས་
པའི་སྙིང་པོ་སྟོང་ཆེན་པོ་འབར་བ་འབྱུང་བ་འདི་ནམ་དགའ་བ་ཆེན་པོ་སྐྱེས་ཀྱི་བར་དུ་བརྗོད་ན། བདག་ཉིད་དེ་བཞིན་གཤེགས་པ་རྣམས་ཀྱི་དྲུང་ན་འདུག་པར་ཤེས་ཤིང་། དེ་བཞིན་གཤེགས་པ་རྣམས་ཀྱི་ཟང་ཟིང་མེད་པའི་ཆོས་ཀྱི་ལོངས་སྤྱོད་ཆེན་པོའི་
དགའ་བ་ཐོབ་པར་འགྱུར་ཏེ། དེ་ཕྱིན་ཆད་དེ་བཞིན་གཤེགས་པའི་རིགས་སུ་ཕྱིར་མི་ལྡོག་པར་སྐྱེས་པ་ཡིན་ནོ། །ཚེ་རབས་གཞན་དུ་སོང་ན་ཡང་བྱང་ཆུབ་སེམས་དཔའི་ས་ཆེན་པོ་ཐོབ་པར་འགྱུར་རོ། །རིག་སྔགས་འཆང་ཆེན་པོའི་འཁོར་ལོས་
སྒྱུར་བ་ཡང་ཐོབ་པར་འགྱུར་རོ། །གཟུངས་ཀྱང་ཐོབ་པར་འགྱུར་རོ། །དེ་བཞིན་གཤེགས་པ་རྣམས་ཀྱང་མཉེས་པར་བྱེད་དོ། །མངོན་པར་ཤེས་པ་མི་ཉམས་པ་ཡང་ཐོབ་པར་འགྱུར་རོ། །ཚེ་འདི་ལ་ཡང་སེམས་ཅན་ཐམས་ཅད་དགའ་
བར་འགྱུར་རོ། །ལྷ་ཐམས་ཅད་ཀྱིས་ཀྱང་བསྲུང་བར་འགྱུར་རོ། །ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། གནོད་སྦྱིན་དང་། སྲིན་པོ་ཐམས་ཅད་ཀྱིས་ཀྱང་བསྲུང་བར་འགྱུར་ཏེ། གང་ལ་སྨྲས་པ་དེ་
དེའི་བྱ་བ་སྒྲུབ་པར་འགྱུར་རོ། །དེས་ཅི་བསམས་པ་དང་། བྱེད་དུ་བཅུག་པ་རྣམས་ཀྱང་ལྷ་ལ་སོགས་པ་རྣམས་བྱེད་པར་འགྱུར་རོ། །དེའི་འདོད་པ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །སུས་ཀྱང་ངག་མི་གཅོག་པར་ཡང་

འགྱུར་རོ། །ལྷ་རྣམས་ཀྱིས་ཀྱང་དེའི་སྟོབས་དང་། གཟུགས་དང་། བསོད་ནམས་དང་། ལང་ཚོ་དང་། ནད་མེད་པ་དང་། རྒྱས་པ་འཕེལ་བར་བྱེད་དོ། །བགེགས་ཐམས་ཅད་ཀྱིས་ཀྱང་མི་ཚུགས་པར་འགྱུར་རོ། །མདོར་ན་
དེ་བཞིན་གཤེགས་པའི་གྲོང་ཁྱེར་དུ་འཇུག་པར་འདོད་པ་རྣམས་དང་། དེ་བཞིན་གཤེགས་པའི་སངས་རྒྱས་ཀྱི་སྐུ་ཆེན་པོ་མཐོང་བར་འདོད་པ་རྣམས་དང་། ཡོན་ཏན་ཕུན་སུམ་ཚོགས་པ་ཐམས་ཅད་ཐོབ་པར་འདོད་པ་རྣམས་དང་། གཞན་ཡང་བྱང་ཆུབ་
སེམས་དཔའ་ཆེན་པོའི་བསླབ་པའི་གང་ཟག་བྱེད་པ་ལ་འཇུག་པར་འདོད་པ་རྣམས་དང་། བྱང་ཆུབ་སེམས་དཔའ་ཆེན་པོའི་ཆོས་ཉིད་ཀྱི་དམ་ཚིག་ཐོབ་པར་འདོད་པ་རྣམས་དང་། རྟག་པར་རྒྱུན་མི་འཆད་པ་དང་། བར་ཆད་མེད་པར་རྒྱུད་ཆེན་པོའི་དེ་ཁོ་
ན་རྟོགས་པར་འདོད་པ་རྣམས་དང་། དེ་བཞིན་གཤེགས་པའི་ཡོན་ཏན་གྱི་རྒྱན་གྱི་བདག་ཉིད་བརྒྱན་པར་འདོད་པ་རྣམས་ཀྱིས་ཡོན་ཏན་གྱི་ཚོགས་ཆེན་པོ་བསགས་པའི་ཕྱིར་དེ་བཞིན་གཤེགས་པ་རྣམས་ཀྱིས་བསྟོད་ཅིང་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱིས་ཡང་དག་པར་བསྟེན་པ་འདི་ཐོག་མར་བསྒྲིམ་པ་ཆེན་པོས་དེ་བཞིན་གཤེགས་པ་ཐམས་ཅད་བསམ་པའི་ཆོ་ག་ཇི་སྐད་བསྟན་པ་བཞིན་དུ་བླང་བར་བྱའོ། །སྙིང་རྗེའི་མཆོག་ཅེས་བྱ་བའི་གཟུངས་རྫོགས་སོ།། །།
༄༅༅། །རྒྱ་གར་སྐད་དུ། ཨཱརྱ་ཨ་ནནྟ་མུ་ཁ་སཱ་དྷཱ་ཀ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྒོ་མཐའ་ཡས་པས་སྒྲུབ་པ་ཞེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་
སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཡངས་པ་ཅན་ཚལ་ཆེན་པོའི་ཁང་པ་བརྩེགས་པའི་ཁང་བཟངས་ན། དགེ་སློང་བརྒྱད་སྟོང་གི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་

རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་ཟླ་བ་གསུམ་པོ་འདི་དག་འདས་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །ཞེས་བཅོམ་ལྡན་འདས་ཀྱིས་དྲན་པ་དང་ལྡན་ཞིང་མཁྱེན་བཞིན་དུ་ཚེའི་འདུ་བྱེད་
དག་བཏང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་ཏེ། མཽད་གལ་གྱི་བུ་ཆེན་པོ་ཁྱོད་སོང་ལ་སྟོང་གི་འཇིག་རྟེན་གྱི་ཁམས་ན་དགེ་སློང་ཇི་སྙེད་གནས་པ་དེ་དག་ཐམས་ཅད་ཚལ་ཆེན་པོའི་ཁང་པ་
བརྩེགས་པའི་ཁང་བཟངས་འདིར་སྡུས་ཤིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་མཉན་ནས། སྐད་ཅིག་དེ་ཉིད་ལ་རང་གི་རྫུ་འཕྲུལ་གྱི་སྟོབས་ཀྱིས་རི་རབ་ཀྱི་རྩེ་མོ་
ལ་འདུག་སྟེ། སྟོང་གི་འཇིག་རྟེན་གྱི་ཁམས་སྐད་ཀྱིས་གོ་བར་བྱས་པ། བདེར་གཤེགས་སློབ་མ་སེམས་ཅན་གང་སུ་དག །འཇིག་རྟེན་ཁམས་འདིར་གནས་པ་ཀུན་ཉོན་ཅིག །དེང་འདིར་སྟོན་པ་ཆོས་ཀྱི་ཆར་འབེབས་ཀྱིས། །གང་དག་ཉན་
པར་འདོད་པ་འདིར་ཤེག་ཤིག །དེའི་ཚེ་ཚལ་ཆེན་པོའི་ཁང་པ་བརྩེགས་པའི་ཁང་བཟངས་སུ་དགེ་སློང་བཞི་ཁྲི་འདུས་པར་གྱུར་ཏེ། དེ་དག་ལྷགས་ནས་བཅོམ་ལྡན་འདས་མཐོང་བ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།
བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་ཤཱ་རིའི་བུ་སངས་རྒྱས་ཀྱི་མཐུས་སྐད་ཅིག་དེ་ཉིད་ལ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་མངོན་པར་འདུ་བྱ་བ་གང་མངོན་པར་འདུ་བྱས་
པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། ཐེག་པ་ཆེན་པོ་ཅན་ཡང་རུང་སྟེ། དགེ་སློང་ཇི་སྙེད་གནས་པ་དེ་དག་ཐམས་ཅད་ཚལ་ཆེན་པོའི་ཁང་པ་བརྩེགས་པའི་

ཁང་བཟངས་སུ་འདུ་བར་འགྱུར་བ་དེ་འདྲ་བའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱ་གོར་མ་ཆག་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུས་རྫུ་འཕྲུལ་མངོན་པར་འདུ་བྱ་བ་དེ་ལྟ་བུ་མངོན་པར་འདུ་བྱས་ཏེ། རྫུ་འཕྲུལ་མངོན་པར་འདུ་བྱ་བ་དེ་མངོན་པར་འདུ་བྱས་
པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། ཐེག་པ་ཆེན་པོ་ཅན་ཡང་རུང་སྟེ། དགེ་སློང་ཇི་སྙེད་གནས་པ་དེ་དག་ཐམས་ཅད་ཚལ་ཆེན་པོའི་ཁང་པ་བརྩེགས་པའི་ཁང་
བཟངས་སུ་འདུས་པར་གྱུར་ཏེ། དེ་དག་ལྷགས་ནས་བཅོམ་ལྡན་འདས་མཐོང་བ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་
བཅོམ་ལྡན་འདས་ཀྱིས་སྐད་ཅིག་དེ་ཉིད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བཀའ་སྩལ་པ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་ཅེས་བྱ་བ་དང་། འཇམ་དཔལ་གཞོན་ནུར་གྱུར་པ་
དང་། །བྱང་ཆུབ་སེམས་དཔའ་སེམས་དཔའ་ཆེན་པོ་ངན་སོང་ཐམས་ཅད་སྤོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པ་དག །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་
ཐམས་ཅད་རྣམ་པར་སེལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་འཕགས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་ཡོངས་སུ་མི་སྐྱོབ་དང་། བྱང་ཆུབ་སེམས་དཔའ་སེམས་དཔའ་

ཆེན་པོ་སྤོས་ཀྱི་གླང་པོ་ཆེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་མཛོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་དཔག་མེད་
དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་བློ་གྲོས་རྒྱ་མཚོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་བརྩེགས་པ་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་བྱམས་པ་ལ་བཀའ་སྩལ་པ། རིགས་ཀྱི་བུ་དག་ཁྱེད་དེང་ལ་ཕྱོགས་བཅུ་ཐམས་ཅད་ཀྱི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་ན་བྱང་ཆུབ་སེམས་དཔའ་སྲིད་པ་ཐ་མ་པ་དང་། སྐྱེ་བ་གཅིག་གིས་ཐོགས་པའམ། ཕྱིར་མི་ལྡོག་
པའམ། མི་སྐྱེ་བའི་ཆོས་ལ་བཟོད་པ་ཐོབ་པའམ། དད་པས་མོས་པ་ཇི་སྙེད་གནས་པ་དེ་དག་ཐམས་ཅད་ཚལ་ཆེན་པོའི་ཁང་པ་བརྩེགས་པའི་ཁང་བཟངས་འདིར་སྡུས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་
བཅོམ་ལྡན་འདས་ཀྱི་ལྟར་མཉན་ཏེ། བཅོམ་ལྡན་འདས་ལེགས་སོ་ལེགས་སོ་ཞེས་གསོལ་ནས། སྐད་ཅིག་དེ་ཉིད་ལ་ལྟས་དེ་ལྟ་བུ་བྱས་ཏེ། ལྟས་དེ་བྱས་པས་ཚལ་ཆེན་པོའི་ཁང་པ་བརྩེགས་པའི་ཁང་བཟངས་སུ་བྱང་ཆུབ་སེམས་དཔའ་སྲིད་

པ་ཐ་མ་པ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་བརྗོད་དུ་མེད་པ་བྱེ་བ་ཁྲག་ཁྲིག་ཕྲག་འབུམ་དག་ལྷགས་པར་གྱུར་ཏོ། །བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་བརྒྱ་སྟོང་ཕྲག་དགུ་བཅུ་དང་། བྱང་ཆུབ་སེམས་
དཔའ་ཕྱིར་མི་ལྡོག་པ་བྱེ་བ་ཁྲག་ཁྲིག་བརྒྱ་འབུམ་ཕྲག་སྟོང་ཕྲག་བརྒྱད་ཅུ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མི་སྐྱེ་བའི་ཆོས་ལ་བཟོད་པ་ཐོབ་པ་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་ཕྲག་སུམ་ཅུ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་དད་པས་མོས་པ་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་ཕྲག་བརྒྱད་ལྷགས་པར་གྱུར་ཏོ། །དེ་དག་ཐམས་ཅད་ལྷགས་ཏེ་བཅོམ་ལྡན་འདས་མཐོང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་
འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་འདུས་པ་ཆེན་པོ་དེ་མཐོང་ནས་སྐད་ཅིག་དེ་ཉིད་ལ་འདི་སྙམ་དུ་སེམས་ཏེ། ཞུ་བ་ལུང་བསྟན་པ་ཇི་ལྟ་བུས་བྱང་ཆུབ་སེམས་
དཔའ་སེམས་དཔའ་ཆེན་པོ་འདི་དག་གི་སོམ་ཉི་ཐམས་ཅད་སྤོང་བར་འགྱུར་བ་དང་། སྒྲིབ་པ་མེད་པའི་ཡེ་ཤེས་དང་། སྤོབས་པ་མྱུར་དུ་ཐོབ་པར་འགྱུར་བ་དང་། སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཐམས་ཅད་ལས་ཆོས་བསྟན་པ་ཐོས་པར་འགྱུར་བ་དང་། ཐོས་ནས་ཀྱང་འཛིན་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་བརྗེད་པར་མི་
འགྱུར་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་ཡོངས་སུ་དག་པ་གང་ཡིན་པ་བཞི་པོ་དེ་དག་རྗེས་སུ་ཐོབ་པར་འགྱུར་བ་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་དག་པ་དང་། ཆོས་ཡོངས་སུ་དག་

པ་དང་། སྨོན་ལམ་ཡོངས་སུ་དག་པ་དང་། སངས་རྒྱས་ཀྱི་ཞིང་ཡོངས་སུ་དག་པ་སྟེ། དེ་དག་རྗེས་སུ་འཐོབ་པར་འགྱུར་བ་དང་། གྱ་ནོམ་པ་ཡིད་དུ་འོང་བར་བྱེད་པའི་ཆོས་བཞི་རྗེས་སུ་འཐོབ་པར་འགྱུར་བ་སྟེ། བཞི་གང་ཞེ་ན།
འདི་ལྟ་སྟེ། ལུས་ཡིད་དུ་འོང་བ་དང་། ངག་ཡིད་དུ་འོང་བ་དང་། སེམས་ཡིད་དུ་འོང་བ་དང་། སྐྱེ་བ་ཡིད་དུ་འོང་བ་རྗེས་སུ་འཐོབ་པར་འགྱུར་བ་དང་། གཟུངས་ཀྱི་སྒོར་འཇུག་པ་བཞི་རྗེས་སུ་འཐོབ་པར་འགྱུར་བ་སྟེ། བཞི་གང་ཞེ་ན། འདི་
ལྟ་སྟེ། སྒོ་མི་ཟད་པས་སྒྲུབ་པའི་གཟུངས་ཀྱི་སྒོར་འཇུག་པ་དང་། སེམས་ཅན་རྣམས་ཀྱི་དབང་པོ་ལ་མཁས་པའི་གཟུངས་ཀྱི་སྒོར་འཇུག་པ་དང་། ལས་དང་རྣམ་པར་སྨིན་པ་ལ་མཁས་པ་འདུས་མ་བྱས་ཀྱི་གཟུངས་ཀྱི་སྒོར་འཇུག་པ་དང་། ཆོས་
ཟབ་མོ་ལ་བཟོད་པའི་གཟུངས་ཀྱི་སྒོར་འཇུག་པ་རྗེས་སུ་ཐོབ་པར་འགྱུར་བ་དེ་ལྟ་བུའི་ཞུ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་གིས་ཞུ་གོར་མ་ཆག་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུས་ཞུ་བ་ཇི་སྐད་
སྨོས་པ། ཇི་ལྟར་ཡིད་ལ་བཟུང་བ། ཇི་ལྟར་ཡིད་ལ་བྱས་པ། ཇི་ལྟར་ཀུན་ཆུབ་པར་བྱས་པ་དེ་དག་སངས་རྒྱས་བཅོམ་ལྡན་འདས་ལ་རྒྱ་ཆེར་གསོལ་ཏོ། །འདི་སྐད་ཅེས་ཀྱང་གསོལ་ཏེ། བཅོམ་ལྡན་འདས་ཞུ་བ་ཇི་སྐད་སྨོས་པ།
ཇི་ལྟར་ཡིད་ལ་བཟུང་བ། ཇི་ལྟར་ཡིད་ལ་བགྱིས་པ། ཇི་ལྟར་ཀུན་ཆུབ་པར་བགྱིས་པ་འདི་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་གི་སྤྱོད་པ་ཇི་ལྟར་ཡོངས་སུ་དག་པར་འགྱུར་བ་དེ་ལྟར་བཅོམ་ལྡན་འདས་ཀྱིས་བཤད་དུ་གསོལ། །
དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལེགས་སོ་ལེགས་སོ། །ཤཱ་རིའི་བུ་ཁྱོད་དེ་བཞིན་གཤེགས་པ་ལ་དོན་འདི་ཞུ་བར་སེམས་པ་ཁྱོད་ཡང་ལེགས་སོ། །ཤཱརིའི་བུ་

དེའི་ཕྱིར་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་དེ་ལྟར་འཚལ་ལོ། །དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་
སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཁས་མི་ལེན་ཅིང་འཛིན་པར་མི་བྱེད་པ་དེས་གཟུངས་ཀྱི་གསང་སྔགས་ཀྱི་ཚིག་འདི་དག་གཟུང་བར་བྱའོ། །ཏདྱ་ཐཱ། ཨོྃ་ཨ་ནེ་ཨ་ནེ་ཨ་ནེ། མུ་ཁེ་
མུ་ཁེ་མུ་ཁེ། ས་མནྟ་མུ་ཁེ། ཛྱོ་ཏི་སཽ་མེ་ས་ཏྱེ་ས་ཏྱཱ་རཱ་མེ། སཽ་ཏི་ཡུཀྟེ། ནི་རུ་ཀྟེ། ནི་རུཀྟེ་པྲ་བྷེ། ཧི་ལི་ཧི་ལི། ཀ་ལ་པེ། ཀ་ལ་པེ་སི་སཱ་རེ། སཱ་ར་བ་ཏི། བུདྡྷ་བ་ཏི། ཧི་ལི་ཧི་ལི། ཧི་ལེ་ཧི་ལེ་ཧི་ལེ་ཧི་ལེ། ཧི་ལེ་ཧི་ལི། ཧི་ལི་ལེ། མ་ཧཱ་
ཧི་ལི་ལེ། ཧི་ལེ་ཏུཎྜེ། ཙཎྜེ་ཙཎྜེ། ཙ་རཱ་ཙ་རཱ་ཎེ། ཨ་ཙ་ལེ་མ་ཙ་ལེ། ཨ་ནནྟེ། ཨ་ནནྟ་ག་ཏེ། ཨ་ནནྟ་མུ་ཁེ། ཨ་ར་ཎེ། ནིརྨ་ལེ། ནིརྦྷ་བ་ནེ། ནིརྦརྟྟ་ནེ། ནིརྡཱནྟེ། དྷརྨ་དྷ་རེ། ནི་ཧཱ་ར་ནི་ཧཱ་ར། བི་མ་ལེ་བི་ཤོ་དྷ་ནེ། ཤཱི་ལ་བི་ཤོ་དྷ་
ནེ། པྲ་ཀྲྀ་ཏི། དཱི་བ་ནེ། བྷ་བ་ནེ། བྷ་བ་བི་བྷ་བ་ནེ། ཨ་སྃ་གེ །ཨ་སྃ་ག་བི་ཧ་རེ། ད་མེ། ཤ་མེ། བི་མ་ལེ། བི་མ་ལ་པྲ་བྷེ། ས་མཱ་ཀཪྵ་ཎེ། དྷི་རེ། དྷི་དྷི་རེ། མ་ཧཱ་དྷི་དྷི་རེ། ཡ་ཤོ་ཡ་ཤོ་བ་ཏི། ཙ་ལེ། ཨ་ཙ་ལེ། མ་ཙ་ལེ།
ས་མ་ཙ་ལེ། ཌི་ཌྷ་ས་ན་དྷི་སུ་སྠི་རེ། ཨ་སྃ་གེ། ཨ་སྃ་ག་བི་ཧ་རེ། ཨ་སྃ་ག་ནིརྷ་རེ། ནིརྷ་ར་བི་མ་ལེ། ནིརྷ་ར་བི་ཤོ་དྷ་ནེ། ཌི་ཌྷ་སོ་མེ། སྠི་རེ་སྠཱ་མ་སྠཱ་མ་བ་ཏི། མ་ཧཱ་པྲ་བྷེ། ས་མནྟ་པྲ་བྷེ། བི་པུ་ལ་པྲ་བྷེ། བི་པུ་ལ་རསྨི་སྃ་བྷ་བེ་ས་
མནྟ་མུ་ཁེ། སརྦ་ཏྭཱ་ནུ་ག་ཏེ། ཨ་ནཱ་ཙྪེ་དྱེ་པྲི་ཏི་བྷ་ནེ། དྷཱ་ར་ཎཱི་ནི་དྷཱ་ནེ། དྷརྨ་ནི་དྷཱ་ནི། དྷརྨ་ནི་དྷཱ་ན་གོ་ཏྲེ། ས་མནྟ་བྷ་དྲེ། སརྦ་ཏ་ཐཱ་ག་ཏ་ཧྲྀ་ད་ཡ། ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་

གཟུངས་འདི་དག་འཛིན་པ་ནི་འདུས་བྱས་དང་། འདུས་མ་བྱས་ཀྱི་ཆོས་རྣམས་ལ་རློམ་སེམས་སུ་མི་བྱེད། དམིགས་པར་མི་བྱེད། དམོད་པར་མི་བྱེད། བཏང་སྙོམས་སུ་མི་བྱེད། འཛིན་པར་མི་བྱེད། རྩོམ་པར་མི་བྱེད་དེ། དེ་དག་ཐོབ་པར་བྱ་བ་དང་།
སྤང་བར་བྱ་བ་དང་། བསྒོམ་པར་བྱ་བ་དང་རྣམ་པར་འཕེལ་བར་བྱ་བའི་ཕྱིར་མི་བྱེད། རྣམ་པར་མི་བྱེད། མངོན་པར་འདུ་མི་བྱེད། མཚུངས་པར་ལྡན་པའི་ཆོས་རྣམས་ཀྱང་མི་མཐོང་། ལྡན་པ་མ་ཡིན་པ་རྣམས་ཀྱང་མི་མཐོང་། ཆོས་རྣམས་ཀྱི་སྐྱེ་བ་ཡང་མི་མཐོང་།
འགོག་པ་ཡང་མི་མཐོང་། འདས་པའི་ཆོས་རྣམས་ཀྱང་མི་མཐོང་། མ་འོངས་པའི་ཆོས་རྣམས་ཀྱང་མི་མཐོང་། ད་ལྟར་བྱུང་བའི་ཆོས་རྣམས་ཀྱང་མི་མཐོང་། ཆོས་རྣམས་ཀྱི་འཕེལ་བ་དང་འབྲི་བར་ཡང་མི་མཐོང་། ཆོས་གང་ཡང་སོགས་པར་ཡང་མི་བྱེད།
འགྲིབ་པར་ཡང་མི་བྱེད། འདོགས་པར་ཡང་མི་བྱེད། རྣམ་པར་རིག་པར་ཡང་མི་བྱེད་པར་སངས་རྒྱས་རྗེས་སུ་དྲན་པ་འབའ་ཞིག་སྒོམ་སྟེ། དེ་སྒོམ་པ་ན་གཟུགས་སུ་མ་ཡིན། གཟུགས་མེད་པར་མ་ཡིན། མཚན་དུ་མ་ཡིན། མཚན་མེད་པར་མ་ཡིན། དཔེ་
བྱད་བཟང་པོར་མ་ཡིན། དཔེ་བྱད་བཟང་པོ་མེད་པར་མ་ཡིན། རྣམ་པར་ཤེས་པར་མ་ཡིན། རྣམ་པར་ཤེས་པ་མེད་པར་མ་ཡིན། ཉོན་མོངས་པར་མ་ཡིན། ཉོན་མོངས་པ་མེད་པར་མ་ཡིན། ཚུལ་ཁྲིམས་སུ་མ་ཡིན། ཚུལ་ཁྲིམས་མེད་པར་མ་ཡིན། ཏིང་ངེ་འཛིན་
དུ་མ་ཡིན། ཏིང་ངེ་འཛིན་མེད་པར་མ་ཡིན། ཤེས་རབ་ཏུ་མ་ཡིན། ཤེས་རབ་མེད་པར་མ་ཡིན། རྣམ་པར་གྲོལ་བར་མ་ཡིན། རྣམ་པར་གྲོལ་བ་མེད་པར་མ་ཡིན། རྣམ་པར་གྲོལ་བའི་ཡེ་ཤེས་མཐོང་བར་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་མེད་པར་
མ་ཡིན། སྐྱེ་བར་མ་ཡིན། སྐྱེ་བ་མེད་པར་མ་ཡིན། རིགས་སུ་མ་ཡིན། རིགས་མེད་པར་མ་ཡིན། རུས་སུ་མ་ཡིན། རུས་མེད་པར་མ་ཡིན། འཁོར་དུ་མ་ཡིན། འཁོར་མེད་པར་མ་ཡིན། གནས་པར་མ་ཡིན། གནས་མེད་པར་མ་ཡིན། ཐོབ་པར་མ་ཡིན།

ཐོབ་པ་མེད་པར་མ་ཡིན། མངོན་པར་རྟོགས་པར་མ་ཡིན། མངོན་པར་རྟོགས་པ་མེད་པར་མ་ཡིན། ཉོན་མོངས་པ་ཟད་པར་མ་ཡིན། ཉོན་མོངས་པ་མ་ཟད་པར་མ་ཡིན། ཕུང་པོ་དང་། ཁམས་དང་། སྐྱེ་མཆེད་དུ་མ་ཡིན། ཕུང་པོ་དང་། ཁམས་དང་། སྐྱེ་མཆེད་
མེད་པར་མ་ཡིན། ཤེས་པར་མ་ཡིན། ཤེས་པ་མེད་པར་མ་ཡིན། ཆོས་སྟོན་པར་མ་ཡིན། ཆོས་མི་སྟོན་པར་མ་ཡིན། བདག་རྣམ་པར་དག་པར་བྱ་བར་མ་ཡིན། གཞན་རྣམ་པར་དག་པར་བྱ་བར་མ་ཡིན། སེམས་ཅན་རྣམ་པར་དག་པར་བྱ་བར་མ་ཡིན། སེམས་ཅན་
མེད་པ་རྣམ་པར་དག་པར་བྱ་བར་མ་ཡིན། བདག་གི་དོན་དུ་མ་ཡིན། གཞན་གྱི་དོན་དུ་མ་ཡིན། ཆོས་སུ་མ་ཡིན། འདུལ་བར་མ་ཡིན། ལུས་རྣམ་པར་དག་པར་མ་ཡིན། ངག་རྣམ་པར་དག་པར་མ་ཡིན། ཡིད་རྣམ་པར་དག་པར་མ་ཡིན། སྤྱོད་པ་རྣམ་པར་དག་པར་མ་ཡིན།
སྔོན་གྱི་མཐའི་སྤྱོད་པ་རྣམ་པར་དག་པར་མ་ཡིན། ཕྱི་མའི་མཐའི་སྤྱོད་པ་རྣམ་པར་དག་པར་མ་ཡིན། ད་ལྟར་བྱུང་བའི་སྤྱོད་པ་རྣམ་པར་དག་པར་མ་ཡིན། བདག་གི་རྣམ་པར་མ་ཡིན། གཞན་གྱི་རྣམ་པར་མ་ཡིན་པ་དེ་ནི་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་
པོའི་ཆོས་ཐམས་ཅད་མི་འཛིན་པ་ལ་འཇུག་པ་ཞེས་བྱ་བའི་སངས་རྒྱས་རྗེས་སུ་དྲན་པ་ཞེས་བྱའོ། །དོན་དམ་པ་སྒྲུབ་པས་ཆོས་ཐམས་ཅད་ཡང་དག་པར་འདུ་བ་ལ་མི་འཇིགས་པ་ཐོབ་པར་བྱེད་པ་ཞེས་བྱ་བའི་གཟུངས་སོ། །གཅིག་ཏུ་ངེས་པར་ཐོབ་པས་བསམ་པ་ཐམས་ཅད་
ཡོངས་སུ་རྫོགས་པར་བྱེད་པ་ཞེས་བྱ་བའི་ཏིང་ངེ་འཛིན་ཏོ། །དགེ་བའི་རྩ་བ་ཐམས་ཅད་གཞན་ལ་རག་མ་ལས་པའི་ཡེ་ཤེས་སྒྲུབ་པས་ཆོས་ཀྱི་གཏེར་མཚན་དང་དཔེ་བྱད་བཟང་པོའི་རིགས་ཟིལ་གྱིས་མི་ནོན་པ་ཞེས་བྱ་བའི་གཟུངས་སོ། །དམ་པ་ཡོངས་སུ་ཚོལ་བ་ལ་
མཁས་པས་བདུད་ཀྱི་ལས་ཐམས་ཅད་ལས་ཡང་དག་པར་འདའ་བ་ཞེས་བྱ་བའི་གཟུངས་སོ། །ཤཱ་རིའི་བུ་བྱང་ཆུབ་སེམས་དཔའ་གང་དག་སྒོ་མཐའ་ཡས་པས་སྒྲུབ་པའི་གཟུངས་འདིའི་དོན་ཐོབ་པ་དེ་དག་ནི་ཕྱིར་མི་ལྡོག་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་

པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ཅིའི་སླད་དུ་ཞེ་ན། ཤཱ་རིའི་བུ་འདིར་སངས་རྒྱས་ཐམས་ཅད་ཀྱི་ཆོས་དང་ཡོན་ཏན་ཐམས་ཅད་ཀྱི་གཏེར་ངེས་པའི་ཕྱིར་རོ། །དམིགས་པ་མེད་པའི་སྤྱོད་པ་དང་ལྡན་པའི་གཟུངས་འདི་
ཉིད་ལས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་བྱེ་བྲག་ཆོད་པའི་ཕྱིར་རོ། །རབ་ཏུ་དབྱེ་བར་འགྱུར་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཆོས་རྣམས་སྟོང་པར་དོགས་མེད་ཅིང་། །བྱང་ཆུབ་ཆེད་
དུ་སྤྲོས་མི་བྱེད། །ཆོས་དབྱིངས་འཁྲུགས་པར་མི་བྱེད་ན། །དེ་ཕྱིར་གཟུངས་ནི་ཐོབ་པར་འགྱུར། །མདོ་སྡེ་འདི་ནི་མཉན་པར་བྱ། །འདི་ལ་གཟུངས་ནི་ཟད་པ་མེད། །ཡེ་ཤེས་འབྱོར་འདི་འདི་ལྟ་སྟེ། །དེས་ན་བྱང་ཆུབ་ཐོབ་པར་འགྱུར། །བྱང་ཆུབ་
སེམས་དཔའ་འཇིགས་མེད་པ། །གཟུངས་འདི་རབ་ཏུ་གཟུང་བྱས་ན། །ཕྱོགས་བཅུ་དག་གི་སངས་རྒྱས་ཀྱི། །ཆོས་བསྟན་པ་ནི་ཐོས་པར་འགྱུར། །དོན་དང་ཚིག་འབྲུས་བསྐྱོད་ཀུན་གྱི། །མཆོག་གི་ཆོས་ནི་རྣམ་པར་ཤེས། །ཉི་མའི་འོད་ཟེར་ཇི་སྙེད་པ། །དེ་
སྙེད་ཚིག་རྣམས་ཤེས་པར་འགྱུར། །གང་དག་ཆོས་ཀྱི་མཆོག་འགྱུར་བ། །རླབས་ཆེན་གཟུངས་ཀྱི་སྒོ་རྣམས་ཏེ། །གང་ཞིག་མདོ་འདི་འཛིན་དེ་ལ། །ཐམས་ཅད་རྟག་ཏུ་མངོན་དུ་འགྱུར། །གལ་ཏེ་སེམས་ཅན་ཐམས་ཅད་ཀྱིས། །དེ་ལ་བསྐལ་པར་དོགས་དྲིས་ཏེ། །
ཐེ་ཚོམ་ཐམས་ཅད་ཆད་གྱུར་ཀྱང་། །དེ་ཡི་ཡེ་ཤེས་མི་ཟད་དོ། །མདོ་སྡེ་འདི་ལ་སུ་དགའ་བ། །དེ་ནི་ཆོས་ཀྱི་རྒྱལ་པོའི་སྲས། །བྱང་ཆུབ་མཆོག་ལ་ཉེ་བ་སྟེ། །ཡིད་བརྟན་གྱུར་དང་ཆོས་འཛིན་པའོ། །གཟུངས་འདི་འཛིན་པར་སུ་བྱེད་པ། །དེ་ལ་སེམས་ཅན་
ཐམས་ཅད་དགའ། །སངས་རྒྱས་རྣམས་ཀྱང་དེ་ལ་དགྱེས། །གྲགས་པ་འཇིག་རྟེན་འབྱུང་བར་འགྱུར། །སུ་ཞིག་མདོ་སྡེ་འདི་འཛིན་པ། །དེ་ནི་འཆི་བའི་དུས་བྱེད་ཚེ། །སངས་རྒྱས་བྱེ་བ་བརྒྱད་ཅུ་མཐོང་། །ལག་པ་དེ་ལ་ཉེ་བར་འཇོག །གཟུངས་འདི་

འཛིན་པར་བྱེད་པ་ནི། །བསྐལ་པ་བྱེ་བ་སྟོང་རྣམས་སུ། །སྔོན་ཆད་སྡིག་པ་གང་བྱས་པ། །ཟླ་བ་གཅིག་གིས་བྱང་བར་འགྱུར། །བྱང་ཆུབ་སེམས་དཔའི་བསོད་ནམས་གང་། །བསྐལ་པ་བྱེ་བར་བསྒྲུབས་པ་ཀུན། །གཟུངས་འདི་འཛིན་པར་བྱེད་པ་ཡིས། །ཟླ་
བ་གཅིག་གིས་ཟིལ་གནོན་འགྱུར། །ཁམས་གསུམ་སེམས་ཅན་ཇི་སྙེད་པ། །གལ་ཏེ་ཐམས་ཅད་བདུད་གྱུར་ཀྱང་། །མདོ་སྡེ་འདི་ནི་གང་འཛིན་པ། །དེ་ལ་བར་ཆད་བྱེད་མི་ནུས། །བྱང་ཆུབ་འཚང་རྒྱ་བར་དུ་དེ། །དྲན་དང་བློ་གྲོས་རྟོགས་ལྡན་འགྱུར། །གཟུངས་
ཀྱི་དམ་པ་གང་ཡིན་པ། །དེ་ཡི་ལྕེ་ཡི་རྩེ་མོར་གནས། །ཇི་ལྟར་མདོ་སྡེ་བསྟན་འདི་ལ། །གཟུངས་ནི་སོ་སོར་ངེས་པ་བཞིན། །འདི་ལས་ཐམས་ཅད་མཁྱེན་པ་བསྟན། །འདི་ལས་བྱང་ཆུབ་ཐོབ་པར་འགྱུར། །གཟུངས་འདི་བཤད་མ་ཐག་ཏུ་ཡང་། །མར་མེ་ཞེས་
བྱས་ང་ལུང་བསྟན། །སྐད་ཅིག་དེ་ལ་སངས་རྒྱས་ནི། །གང་གཱའི་ཀླུང་གི་བྱེ་སྙེད་མཐོང་། །གང་ཞིག་སངས་རྒྱས་ཐམས་ཅད་ཀྱིས། །བསྟན་པ་འདིར་ནི་རྟོགས་འདོད་ཅིང་། །མདོ་སྡེ་འདི་ལ་བསྟེན་པ་དེས། །ཐམས་ཅད་མྱུར་དུ་ཐོབ་པར་འགྱུར། །སངས་རྒྱས་ཞིང་ནི་རྣམ་
དག་དང་། །ཉན་ཐོས་ཕུན་སུམ་ཚོགས་པ་དང་། །འོད་དང་མཚན་ཀྱང་རྣམ་དག་པ། །མདོ་སྡེ་འདིས་ནི་བྱེད་པར་འགྱུར། །དེ་བས་བག་ནི་ཡོད་གྱུར་ལ། །ཞག་བདུན་བར་དུ་འདི་སེམས་པ། །སངས་རྒྱས་བྱེ་བ་བརྒྱད་ཅུ་ཡིས། །དེ་ཡི་འོག་ཏུ་གཟུངས་སྦྱིན་འགྱུར། །
བསམ་བྱ་སེམས་པར་མི་བསམ་སྟེ། །བསམ་བྱ་མིན་ཡང་མི་བསམ་མོ། །སོམས་ཤིག་འགལ་བར་མ་སེམས་ཤིག །དེ་ཡི་འོག་ཏུ་གཟུངས་ཐོབ་འགྱུར། །དཔེར་ན་རྒྱ་མཚོར་ཕྱིན་པའི་མི། །ནོར་ལ་སོམ་ཉི་མེད་པ་ལྟར། །དེ་བཞིན་གཟུངས་འདི་ཐོབ་གྱུར་
ནས། །བདེ་བ་ལ་ཡང་སོམ་ཉི་མེད། །འདི་ལས་རྫོགས་པའི་བྱང་ཆུབ་ཉེ། །དེ་བས་འདི་ལ་སྦྱོར་བར་གྱིས། །ཞི་བའི་གནས་ནི་ཐོབ་གྱུར་ནས། །རྫོགས་པའི་བྱང་ཆུབ་ཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་ཡང་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ།

ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་གཟུངས་འདི་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། འདོད་པ་རྣམས་ལ་ལྷག་པར་ཆགས་པ་མེད་པ་ཡིན། སེམས་
ཅན་ཐམས་ཅད་ལ་ཕྲག་དོག་མེད་པ་ཡིན། བདོག་པ་ཐམས་ཅད་ཡོངས་སུ་གཏོང་ཞིང་འགྱོད་པ་མེད་པར་སྦྱིན་པའི་ཚུལ་ཅན་ཡིན། ཉིན་མཚན་དུ་ཆོས་འདོད་ཅིང་ཆོས་ཀྱི་ཀུན་དགའ་ལ་དགའ་བ་ཡིན་ཏེ་ཉིན་མཚན་དུ་ཆོས་ལ་དགའ་ཞིང་ཆོས་འདོད་པ་
ཡིན་ཏེ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་གཟུངས་འདི་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ངན་ཅིང་བདུད་ཀྱི་སྤྱོད་ཡུལ་བ། །འདོད་པ་
དྲི་ང་སྤང་བར་བྱོས། །དེ་དག་སེམས་ཅན་དམྱལ་བའི་རྐྱེན། །ངན་སོང་རྣམས་ཀྱི་རྒྱུ་ཡང་ཡིན། །ཤེས་ཀྱི་ཁེ་དང་རྙེད་དང་གྲགས་པའི་ཕྱིར། །ཕ་རོལ་དག་ལ་ཕྲག་དོག་མི་བྱ་སྟེ། །དགའ་བའི་མིག་གིས་སེམས་ཅན་བལྟས་བྱས་ན། །མཐུ་ཆེ་བ་དང་གཟུགས་
ཀྱང་མཛེས་པར་འགྱུར། །སེམས་ཅན་གང་དག་ཁ་ཅིག་རྩོད་འགྱུར་བ། །དེ་ཡི་གཞི་རྩ་ཡོངས་སུ་འཛིན་པ་སྟེ། །དེ་ལྟས་གང་ལ་སྲེད་པར་འགྱུར་བ་སྤངས། །སྲེད་པ་སྤང་བ་བྱས་ན་གཟུངས་སུ་འགྱུར། །གལ་ཏེ་བྱང་ཆུབ་འདོད་ན་གཞན་མ་སེམས། །ཉིན་
དང་མཚན་དུ་ཆོས་ནི་བཙལ་བར་བྱོས། །ཆོས་ཚིག་འདི་འདྲ་འདི་དག་སྟེན་བྱེད་ན། །དེ་ལ་གཟུངས་ནི་མངོན་དུ་འགྱུར་བར་འོང་། །ཤཱ་རིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་གཟུངས་འདི་ཐོབ་པར་འགྱུར་རོ། །
བཞི་གང་ཞེ་ན། འདི་ལྟ་སྟེ། དགོན་པ་དང་། དབེན་པ་ལ་གནས་པ་དང་། ཆོས་ཟབ་མོ་ལ་བཟོད་པའི་སྟོབས་སྐྱེད་པ་ཉིད་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པ་དག་ལ་ལྷག་པར་ཆགས་པ་མེད་པ་དང་སྡུག་པའི་དངོས་པོ་ཐམས་ཅད་ལ་མི་ལྟ་ཞིང་།

ཐ་ན་ལུས་དང་སྲོག་ཀྱང་ཡོངས་སུ་གཏོང་བ་སྟེ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་གཟུངས་འདི་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །
རྒྱལ་བས་བསྔགས་པའི་དགོན་པར་གནས་པར་གྱིས། །དེ་ལ་གནས་པས་གཞན་ལ་བརྙས་མི་བྱ། །ཟབ་མོའི་བཟོད་ལ་འདུན་པ་བསྐྱེད་ནས་སུ། །བག་ཡོད་མགོ་ལ་འབར་བཞིན་གནས་པར་གྱིས། །འདི་ལྟར་ཚུལ་འཆོས་བྱེད་ཀྱི་གཞིར་གྱུར་པ། །
ཤེས་ཁེ་རྙེད་པ་རྣམས་ལ་གནས་མ་བྱེད། །བྱ་དང་འདྲ་བར་ངན་ངོན་དག་གིས་ཆོག་བྱས་ཏེ། །མིར་གྱུར་པ་ཡི་འབྲས་བུ་ཡོད་པར་བྱོས། །ཀྱེ་མ་སངས་རྒྱས་བསྟན་པ་ལེགས་པར་རྙེད། །སྡུག་བསྔལ་མང་པོའི་རྩ་བ་ཁྱིམ་ཡང་སྤངས། །ལུས་དང་ངག་
དང་ཡིད་ཀྱང་ཡོངས་དག་པས། །སངས་རྒྱས་དང་ནི་ཆོས་ལ་གུས་པར་གྱིས། །རྙེད་འདོད་དྲན་པ་མ་ཡིན་ཤེས་རབ་མིན། །དད་དང་ཚུལ་ཁྲིམས་མ་ཡིན་ཆོས་སེམས་མིན། །དེ་ནི་བྱང་ཆུབ་རིང་སྟེ་གནམ་ས་བཞིན། །དེ་ལྟར་རྙེད་པ་ཡོངས་སུ་སྤང་བར་
བྱ། །ཤཱ་རིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་གཟུངས་འདི་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། ཡི་གེ་འབྲུ་བརྒྱད་ཀྱི་དོན་ཁོང་དུ་ཆུད་པར་བྱའོ། །བརྒྱད་པོ་དེ་དག་གང་ཞེ་ན། འདི་ལྟ་སྟེ། པ་ཞེས་
བྱ་བ་དོན་དམ་པར་ཆོས་ཐམས་ཅད་ལ་བདག་མེད་པ་ལ་འཇུག་པ་ཁོང་དུ་ཆུད་པ་དང་། ལ་ཞེས་བྱ་བ་མཚན་དང་དཔེ་བྱད་བཟང་པོ་དང་མཚན་དང་དཔེ་བྱད་བཟང་པོ་མེད་པར་དེ་བཞིན་གཤེགས་པའི་ཆོས་ཀྱི་སྐུ་ལ་འཇུག་པ་ཁོང་དུ་ཆུད་པ་དང་། བ་ཞེས་བྱ་བ་བྱིས་
པའི་ཆོས་རྣམས་དང་མཁས་པའི་ཆོས་རྣམས་ཇི་ལྟ་བ་བཞིན་དུ་གཉིས་སུ་མེད་པ་ལ་འཇུག་པ་ཁོང་དུ་ཆུད་པ་དང་། ཛ་ཞེས་བྱ་བ་སྐྱེ་བ་དང་རྒ་བ་དང་འཆི་བ་དང་། སྐྱེ་བ་དང་རྒ་བ་དང་འཆི་བ་མེད་པའི་འགྲོ་བ་མི་སྐྱེ་མི་འགག་པ་ལ་འཇུག་པ་ཁོང་དུ་ཆུད་པ་དང་། ཀ་ཞེས་བྱ་བ་

ལས་དང་རྣམ་པར་སྨིན་པ་དང་། ལས་དང་རྣམ་པར་སྨིན་པ་མེད་པ་ལ་འཇུག་པ་ཁོང་དུ་ཆུད་པ་དང་། དྷ་ཞེས་བྱ་བ་གཟུངས་ཀྱི་ཆོས་ཀྱི་རྣམ་གྲངས་ཀྱི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། ཆོས་ཀྱི་དབྱིངས་
ལ་འཇུག་པ་ཁོང་དུ་ཆུད་པ་དང་། ཤ་ཞེས་བྱ་བ་ཞི་གནས་དང་། ལྷག་མཐོང་དང་། ཞི་གནས་དང་ལྷག་མཐོང་མེད་པར་ཆོས་ཐམས་ཅད་ཀྱི་དེ་བཞིན་ཉིད་ལ་འཇུག་པ་ཁོང་དུ་ཆུད་པ་དང་། ཀྵ་ཞེས་བྱ་བ་ཆོས་ཐམས་ཅད་སྐད་ཅིག་པ་སྟེ། གཟོད་མ་ནས་
ཞི་བའི་ཕྱིར་ཟད་པ་མེད་པ་དང་། འཇིགས་པ་མེད་པ་དང་། རྒྱུ་བ་མེད་པ་དང་། ཆོས་ཐམས་ཅད་མྱ་ངན་ལས་འདས་པར་འཇུག་པ་ཁོང་དུ་ཆུད་པ་སྟེ། དེ་ལྟར་ཡི་གེ་འབྲུ་བརྒྱད་པོ་དེ་དག་གི་དོན་ཁོང་དུ་ཆུད་པར་རྟོགས་པར་བྱ་བ་འདི་ནི་དོན་ཁོང་དུ་ཆུད་པ་དང་
པོའོ། །གཟུངས་ཀྱི་ཆོས་ཀྱི་རྣམ་གྲངས་འདི་ལེགས་པར་བྲིས་ཏེ་གཟུང་བར་བྱ་བ་འདི་ནི་དོན་ཁོང་དུ་ཆུད་པ་གཉིས་པའོ། །ཟླ་བ་ཕྱེད་ཕྱེད་ཅིང་གཟུངས་ཀྱི་ཆོས་ཀྱི་རྣམ་གྲངས་འདི་རྟག་ཏུ་ཀློག་པ་དང་། རྗེས་སུ་དྲན་པར་བྱ་བའི་ཕྱིར་བརྩོན་པར་བྱ་བ་འདི་ནི་
དོན་ཁོང་དུ་ཆུད་པ་གསུམ་པའོ། །གཟུངས་ཀྱི་ཆོས་ཀྱི་རྣམ་གྲངས་འདི་ལ་མངོན་པར་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ཡང་དག་པར་དགའ་བར་བྱ་བ་དང་། །ཡང་དག་པར་འཛིན་དུ་གཞུག་པ་དང་།
ཡང་དག་པར་གཟེངས་བསྟོད་པ་ལ་གཟུད་པའི་ཕྱིར་བརྩོན་པར་བྱ་བ་འདི་ནི་དོན་ཁོང་དུ་ཆུད་པ་བཞི་པ་སྟེ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་གཟུངས་འདི་ཐོབ་པར་འགྱུར་རོ། །དེ་ནས་བཅོམ་ལྡན་འདས་
ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཡི་གེ་འབྲུ་བརྒྱད་འདི་དག་བསམ་པར་བྱ། །མདོ་སྡེ་འདི་ནི་བྲིས་ནས་བཅང་བར་བྱ། །ཟླ་བ་ཕྱེད་ཅིང་རྟག་ཏུ་བཀླག་པར་བྱ། །སེམས་ཅན་རྣམས་ཀྱང་འདི་འཛིན་གཞུག་པར་བྱ། །བྱང་ཆུབ་ཉེ་དང་

ཤེས་རབ་རྒྱ་ཡང་ཆེ། །ཕྱོགས་བཅུ་རྣམས་ན་སངས་རྒྱས་གང་སུ་དག །བཞུགས་པ་ཐམས་ཅད་དེས་ནི་མདུན་དུ་མཐོང་། །དེ་ཕྱིར་འདུན་པ་བསྐྱེད་དེ་འདི་ལ་བསླབ། །ཤཱ་རིའི་བུ་བཞི་པོ་འདི་དག་ནི་གཟུངས་འདི་ལ་མངོན་པར་བརྩོན་པའི་བྱང་
ཆུབ་སེམས་དཔའ་སེམས་དཔའ་ཆེན་པོའི་ཕན་ཡོན་ཡིན་ཏེ། བཞི་གང་ཞེ་ན། འདི་ལྟ་སྟེ། ཕྱོགས་བཅུའི་སངས་རྒྱས་བཅོམ་ལྡན་འདས་ཐམས་ཅད་དེ་ལ་དགོངས་པ་དང་། དེ་ལ་བདུད་ཀྱི་ལས་མི་འབྱུང་བ་དང་། དེའི་ལས་ཀྱི་
སྒྲིབ་པ་མྱུར་དུ་འབྱང་བ་དང་། སྤོབས་པ་རྒྱུན་མི་འཆད་པར་མྱུར་དུ་འཐོབ་པ་སྟེ། ཤཱ་རིའི་བུ་བཞི་པོ་དེ་དག་ནི་གཟུངས་འདི་ལ་མངོན་པར་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕན་ཡོན་ཡིན་ནོ། །དེ་ནས་བཅོམ་
ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ཀུན་གྱིས་དེ་ནི་ཡིད་ལ་མཛད། དེ་ལ་བདུད་ཀྱིས་གླགས་ནི་རྙེད་མི་འགྱུར། །དེ་ཡི་ལས་ཀྱི་སྒྲིབ་པ་མྱུར་དུ་འབྱང་། །སྤོབས་པ་མཐའ་ཡས་རྣམས་
ཀྱང་ཐོབ་པར་འགྱུར། །ཤཱ་རིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། ཡངས་པ་རྒྱ་ཆེར་གྱུར་པ། ཚད་མེད་དཔག་ཏུ་མེད་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ།
སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཤཱ་རིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་དེ་ཡོངས་སུ་མྱ་ངན་ལས་འདའ་བའི་དུས་

ཀྱི་ཚེ་འཁོར་ལོས་སྒྱུར་བའི་རྒྱལ་པོ་སྣང་བ་འཛིན་ཅེས་བྱ་བ་མིའི་དབང་པོ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་ངོ་། །དེའི་བུ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་ཞེས་བྱ་བ་ཞིག་ཡོད་དེ། །དེ་སྐྱེས་ནས་ལོ་བཅུ་དྲུག་
ལོན་པ་དང་། དེས་སྒོ་མཐའ་པས་སྒྲུབ་པའི་གཟུངས་ཀྱི་ཆོས་ཀྱི་རྣམ་གྲངས་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་དེ་ལས་ཐོས་ཏེ།
དེས་གཟུངས་འདི་ཐོས་མ་ཐག་ཏུ་ཐོབ་པར་བྱ་བའི་ཕྱིར་བརྩོན་པར་གྱུར་ཏོ། །དེ་ལོ་བདུན་ཁྲིར་རྨུགས་པ་དང་གཉིད་ཀྱིས་མ་བསྟེན་ཏོ། །ནོན་པར་མ་གྱུར་ཏོ། །དེ་ལན་འགའ་ཡང་རྒྱལ་སྲིད་ལ་དགའ་བའམ། ནོར་ལ་དགའ་བའམ། བདག་ལ་དགའ་
བར་མ་གྱུར་ཏོ། །དེ་ལོ་བདུན་ཁྲིར་ལན་འགའ་ཡངས་ལ་གློས་མ་ཕབ་སྟེ། གཅིག་ཏུ་ངེས་པར་ནང་དུ་ཡང་དག་འཇོག་ལ་གནས་སོ། །སངས་རྒྱས་བྱེ་བ་ཕྲག་དགུ་བཅུ་ལས་ཆོས་བསྟན་པ་ཐོས་ཏེ། ཐོས་ནས་ཀྱང་ཉམས་སུ་བླངས་སོ། །ཐམས་
ཅད་བཟུང་ངོ་། །གཟུངས་ཉམས་སུ་བླངས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་ཀྱི་རྒྱལ་པོ་ལྟ་བུ་དེ་ཉིད་ལས་རབ་ཏུ་བྱུང་ངོ་། །དེ་རབ་ཏུ་བྱུང་ནས་
དེ་ལོ་དགུ་ཁྲི་འདས་པ་དང་། དེས་སྒོ་མཐའ་ཡས་པས་སྒྲུབ་པའི་གཟུངས་འདི་བསྒྲུབས་ཏེ། བསྒྲུབས་ནས་ཀྱང་སེམས་ཅན་རྣམས་ལ་རྒྱ་ཆེར་ཡང་དག་པར་བཤད་དོ། །དེས་ཚེ་གཅིག་པོ་དེ་ཉིད་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཙུད་ཅིང་། །ཕྱིར་མི་ལྡོག་པའི་ས་ལ་བཀོད་པར་གྱུར་ཏོ། །ཤཱ་རིའི་བུ་འཁོར་དེ་ན་ཚོང་དཔོན་གྱི་བུ་ཟླ་བའི་ཏོག་ཅེས་བྱ་བ་ཞིག་ཡོད་དོ། །དེས་སྒོ་མཐའ་ཡས་པས་སྒྲུབ་པའི་གཟུངས་ཀྱི་

ཆོས་ཀྱི་རྣམ་གྲངས་འདི་ཆོས་སྨྲ་བའི་དགེ་སློང་དེ་ལས་ཐོས་སོ། །ཐོས་ནས་ཀྱང་རྗེས་སུ་ཡི་རང་བར་གྱུར་ཏེ། དེ་རྗེས་སུ་ཡི་རང་བའི་མོད་ལས་སྐྱེས་པའི་དགེ་བའི་རྩ་བ་དེས་སངས་རྒྱས་བྱེ་བ་ཕྲག་དགུ་བཅུ་ལས་ཆོས་བསྟན་པ་ཐོས་སོ། །ཐོས་ནས་
ཀྱང་ཉམས་སུ་བླངས་སོ། །ཐམས་ཅད་བཟུང་ངོ་། །ཐམས་ཅད་དུ་ཡང་གཟུངས་ཐོབ་པ་རྣམས་ཀྱི་མཆོག་དང་། ཚིག་བཙུན་པ་དང་གཟུངས་སུ་གཟུང་བའི་ཚིག་དང་ལྡན་པ་རྣམས་ཀྱི་མཆོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་
རྒྱུན་མི་ཆོད་པ་རྣམས་ཀྱི་མཆོག་ཏུ་གྱུར་ཏོ། །དེས་བསྐལ་པ་གསུམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཉེས་པར་བྱས་སོ། །མཉེས་པར་བྱས་ནས་བསྐལ་པ་གསུམ་འདས་པ་དང་། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཤཱ་རིའི་བུ་དེའི་ཚེ་དེའི་དུས་ན་ཚོང་དཔོན་གྱི་བུ་ཟླ་བའི་ཏོག་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟ་བར་གྱུར་
ན། ཤཱ་རིའི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དེའི་ཚེ་དེའི་དུས་ན་ཚོང་དཔོན་གྱི་བུ་ཟླ་བའི་ཏོག་ཅེས་བྱ་བར་གྱུར་ཏོ། །
ཤཱ་རིའི་བུ་དེའི་ཚེ་དེའི་དུས་ན་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་ཞེས་བྱ་བ་ཆོས་སྨྲ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉི་དང་། ཡིད་གཉིས་སམ། ཐེ་ཚོམ་ཟ་བར་གྱུར་ན། ཤཱ་རིའི་བུ་ཁྱོད་ཀྱིས་དེ་ལྟར་མི་བལྟའོ། །
དེ་ཅིའི་ཕྱིར་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེའི་ཚེ་དེའི་དུས་ན་དགེ་སློང་ཆོས་སྨྲ་བ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་ཞེས་བྱ་བར་གྱུར་ཏོ། །

ཤཱ་རིའི་བུ་ང་དང་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་དེའི་ཚེ་གཟུངས་ཀྱི་ཆོས་ཀྱི་རྣམ་གྲངས་འདི་ཐོས་སོ། །ཐོས་ནས་ཀྱང་རྗེས་སུ་ཡི་རངས་ཏེ། རྗེས་སུ་ཡི་རང་བའི་མོད་ལས་སྐྱེས་པའི་དགེ་བའི་རྩ་བ་དེས་
ངས་བསྐལ་པ་བྱེ་བ་འབུམ་ཕྲག་བཞི་ཁྲིར་འཁོར་བ་ཕྱིར་བརྙིལ་ཏོ། །སངས་རྒྱས་བྱེ་བ་ཕྲག་དགུ་བཅུ་རྩ་དགུ་ལས་ཆོས་བསྟན་པ་ཡང་ཐོས་ཏེ། ཐམས་ཅད་དུ་ཡང་གཟུངས་ཐོབ་པ་རྣམས་ཀྱི་མཆོག་དང་། ཚིག་བཙུན་པ་གཟུང་བའི་ཚིག་དང་ལྡན་པ་
རྣམས་ཀྱི་མཆོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་རྒྱུན་མི་འཆད་པ་རྣམས་ཀྱི་མཆོག་ཏུ་གྱུར་ཏོ། །ཤཱ་རིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཐ་ན་གཟུངས་ཀྱི་ཆོས་ཀྱི་རྣམ་གྲངས་འདི་ལ་རྗེས་སུ་ཡི་རང་བར་ཡང་བརྩོན་པར་བྱའོ། །དེ་ཅིའི་ཕྱིར་ཞེ་ན། དེ་ཉིད་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཀྱི་ཆེད་དུ་ཕྱིར་མི་ལྡོག་པའི་ས་དང་། ཆོས་སྨྲ་བ་རྣམས་མགུ་བར་བྱེད་པའི་རྒྱུར་འགྱུར་ན། གང་ཡི་གེར་འདྲི་བ་དང་། ལུང་འབོག་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཚུལ་
བཞིན་དུ་ཡིད་ལ་བྱེད་པ་དང་། གཞན་དག་ལ་རྒྱ་ཆེར་ཡང་དག་པར་སྟོན་པ་ལྟ་ཅི་སྨོས་ཏེ། བསོད་ནམས་ཀྱི་ཕུང་པོ་དེའི་ཚད་ནི་དེ་བཞིན་གཤེགས་པ་མ་གཏོགས་པར་སེམས་ཅན་ཐམས་ཅད་ཀྱིས་ཀྱང་ཤེས་པའམ། བསམ་པར་མི་ནུས་
སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུང་དང་བཀླགས་པ་ཡིས། །བསོད་ནམས་ཆུ་པོ་ཇི་ཙམ་བསྐྱེད་པ་ནི། །སེམས་ཅན་

ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལ་ཡང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །བླ་མེད་བྱང་ཆུབ་མ་རེག་བར་དུ་
ཡང་། །དེ་ནི་ཏིང་ངེ་འཛིན་དང་མངོན་ཤེས་དང་། །གཟུངས་རྣམས་དང་ནི་གཟུགས་དང་ལོངས་སྤྱོད་དང་། །སངས་རྒྱས་མཐོང་ལས་ཉམས་པར་ཡོང་མི་འགྱུར། །རྗེས་སུ་དྲན་པ་སྔོན་གྱི་ཚེ་རབས་ན། །ཚོང་དཔོན་བུས་ནི་གཟུངས་འདི་ཐོས་
གྱུར་ནས། །སངས་རྒྱས་གང་གཱའི་བྱེ་སྙེད་མཐོང་གྱུར་ཏེ། །དེས་ནི་འདོད་བཞིན་བྱང་ཆུབ་རྣམས་སངས་རྒྱས། །མར་མེ་མཛད་པ་དེ་ཚེ་ཚོང་དཔོན་བུ། །སྔོན་གྱི་ཚེ་རབས་འོད་ཟེར་མཐའ་ཡས་གྱུར། །དེ་ཚེ་ཆོས་སྨྲ་སངས་རྒྱས་ཚེ་དཔག་མེད། །
ང་ནི་བསྐལ་པ་བཟང་དང་བཅས་ཡི་རང་། །བྱང་ཆུབ་མྱུར་དུ་རེག་པར་སུ་འདོད་དང་། །བདུད་རྣམས་མྱུར་དུ་གཞོམ་པར་སུ་འདོད་དང་། །བསོད་ནམས་བརྒྱ་ཡི་མཚན་བཟང་སུ་འདོད་པ། །འདི་ལ་བརྩོན་ན་རྙེད་པར་དཀའ་མི་འགྱུར། །གང་གཱའི་
ཀླུང་གི་བྱེ་སྙེད་འཇིག་རྟེན་ཁམས། །གང་གིས་རིན་ཆེན་བཀང་སྟེ་སྦྱིན་བྱིན་ཡང་། །བྲིས་དང་བཟུང་བའི་བསོད་ནམས་གང་ཡིན་པ། །དེ་ལ་སྦྱིན་པས་དཔེར་ཡང་མི་འགྱུར་རོ། །དེ་ལྟར་ཐོས་ནས་རྩེ་གཅིག་བག་ཡོད་པར། །བྱང་ཆུབ་
སེམས་དཔའ་མཁས་པས་འདི་བཟུང་ངམ། །གཟུངས་འདི་བྲིས་ཤིང་སེམས་པ་དེ་དག་ནི། །བྱང་ཆུབ་རྙེད་པ་དཀའ་བ་མེད་པར་བཤད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་སྒོ་མཐའ་ཡས་
པས་སྒྲུབ་པའི་གཟུངས་འདི་ལ་མངོན་པར་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ལུས་ལ། གངས་ལ་གནས་པའི་གནོད་སྦྱིན་བརྒྱད་གཟི་བརྗིད་དང་མདངས་འཇུག་ཅིང་ཉིན་མཚན་དུ་སྲུང་བ་དང་། སྐྱོབ་པ་དང་། སྦེད་

པར་བྱེད་དོ། །བརྒྱད་གང་ཞེ་ན། འདི་ལྟ་སྟེ། གནོད་སྦྱིན་དཔའ་བོ་ཞེས་བྱ་བ་དང་། བརྟན་པོ་དང་། བདག་པོ་དང་། སྲེད་མེད་ཀྱི་བུའི་སྟོབས་དང་། སྤྱོད་པའི་བློ་གྲོས་དང་། ཐུབ་དཀའ་དང་། འཇིགས་སུ་རུང་བ་དང་། གནོད་སྦྱིན་ལག་
བཟང་ཞེས་བྱ་བ་སྟེ། གནོད་སྦྱིན་བརྒྱད་པོ་དེ་དག་འོང་བར་བྱ་བའི་ཕྱིར་ཤིན་ཏུ་ཁྲུས་བྱ་བ་དང་། གོས་ཤིན་ཏུ་གཙང་མ་བགོ་བ་དང་། འཆག་སར་འགྲོ་བ་དང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་སུ་བྱ། གཟུངས་ཀྱི་ཆོས་ཀྱི་རྣམ་
གྲངས་འདི་ཡང་ཡིད་ལ་བྱས་ཏེ། དེ་ལྟར་བྱས་ན་དེ་ལ་གནོད་སྦྱིན་བརྒྱད་པོ་དེ་དག་མྱུར་དུ་བཞིན་སྟོན་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདོད་པ་ན་སྤྱོད་པའི་ལྷ་རྣམས་ཀྱི་ནང་དུ་སྐྱེས་པ་བརྒྱད་པོ་འདི་དག་ཀྱང་དེ་ལ་སེམས་
པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་ཅེས་བྱ་བ་དང་། སྣང་བྱེད་དང་། ཤེས་རབ་འོད་དང་། ཉི་མའི་འོད་དང་། ཡང་དག་སྐུལ་བྱེད་དང་། བསམ་པ་ཐམས་ཅད་ཡོངས་སུ་
རྫོགས་བྱེད་དང་། སྐར་མའི་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པའི་བློ་གྲོས་ཞེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་པོ་དེ་དག་དེས་གཟུངས་ཐོབ་པར་བྱ་བའི་ཕྱིར་མངོན་པར་བརྩོན་པར་འགྱུར་
རོ། །གཟུངས་འདི་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་བདེན་པའི་དམ་བཅའ་བར་བྱའོ། །བྱས་པ་གཟོ་བ་དང་། བྱས་པ་ཚོར་བ་ཅན་དང་། ཆོས་འདོད་པ་དང་། ཆོས་ལ་དགའ་བ་དང་། ཟབ་མོའི་ཆོས་ལ་
བཟོད་པ་མངོན་པར་བརྩོན་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ལ་བརྩོན་པས་ཀུན་འགྱེད་བགོ་བཤའ་བྱེད་པའི་ངང་ཚུལ་ཅན་དུ་བྱ་སྟེ། དེས་ཇི་ལྟར་ཆུང་བ་དང་། ཇི་ལྟར་ཉུང་བ་ལས་ཀྱང་སྦྱིན་པ་སྦྱིན་པར་བྱ་ན་མང་པོ་

ལས་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་གཟུངས་ཀྱི་ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སུམ་ཅུས་ནི་སྒོ་མཐའ་ཡས་པས་སྒྲུབ་པའི་གཟུངས་འདི་ཐོབ་སྟེ། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་གྱུར་ཏོ། །ལྷ་དང་། མི་དང་། ལྷ་མ་ཡིན་གྱི་སྐྱེ་དགུ་སྔོན་སེམས་མ་བསྐྱེད་པ་དཀྲིགས་པ་བྱེ་བ་ཁྲག་ཁྲིག་བརྒྱ་སྟོང་འབུམ་ཕྲག་དྲུག་ཅུས་ནི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་
བུ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་སྒོ་མཐའ་ཡས་པས་སྒྲུབ་པའི་གཟུངས་ཞེས་བྱ་བར་ཟུང་ཤིག །བྱང་ཆུབ་སེམས་དཔའ་གཅིག་ཏུ་ངེས་པར་མངོན་པར་འཕགས་པར་བྱེད་པ་ཞེས་བྱ་བར་ཡང་ཟུང་ཤིག །བདུད་ཐམས་ཅད་རྣམ་པར་འཇིགས་པར་བྱེད་པ་
ཞེས་བྱ་བར་ཡང་ཟུང་ཤིག །གཅིག་ཏུ་ངེས་པ་རྣམ་པ་ཐམས་ཅད་མཁྱེན་པ་ཉིད་ཤིན་ཏུ་ཐོབ་པར་བྱེད་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། དགེ་སློང་དེ་དག་དང་།
བྱང་ཆུབ་སེམས་དཔའ་དེ་དག་དང་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྒོ་མཐའ་ཡས་པས་སྒྲུབ་པའི་གཟུངས་ཞེས་བྱ་བའི་མདོ་རྫོགས་
སོ།། །།རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་ཊཱི་ཀ་དང་སྦྱར་ཏེ་སླད་ཀྱིས་ཞུས་ནས་གཏན་ལ་ཕབ་པ།། །།

༄༅། །རྒྱ་གར་སྐད་དུ། ཨཱརྱ་སུ་མུ་ཁཾ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྒོ་བཟང་པོ་ཞེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།
བཅོམ་ལྡན་འདས་བྱང་ཆུབ་ཀྱི་ཤིང་དྲུང་ན་བྱང་ཆུབ་ཀྱི་སྙིང་པོའི་མཆོད་རྟེན་ཆེན་པོ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་འདི་ལྟ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་སོགས་པ་ཉན་ཐོས་ཆེན་
པོ་ཐམས་ཅད་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའི་དགེ་འདུན་ཆེན་པོ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་རྒྱལ་མཚན་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཡང་ཐབས་ཅིག་གོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་བཤད་དུ་གསོལ། གང་གིས་སེམས་
ཅན་རྣམས་ལ་སྣང་བ་བགྱི་བར་འགྱུར་བ་དང་། ཕྱིར་རྒོལ་བ་དང་དགྲ་ཐམས་ཅད་ཀྱིས་གནོད་པ་མི་བགྱི་བར་བསྲུང་བ་དང་། བསྐྱབ་པར་འགྱུར་བ་དང་། འདི་ལྟ་སྟེ། ལྷའི་དབང་པོ་རྣམས་དང་། ཀླུའི་དབང་པོ་རྣམས་དང་། གནོད་སྦྱིན་གྱི་དབང་པོ་རྣམས་
དང་། སྲིན་པོའི་དབང་པོ་རྣམས་དང་། འབྱུང་པོའི་དབང་པོ་རྣམས་ཀྱིས་འཇིགས་པར་མི་འགྱུར་བ་དང་། སྡིག་པ་དང་། མཚོན་དང་། དུག་དང་། བྱད་ཀྱིས་གནོད་པར་མི་འགྱུར་བ་དང་། ཕར་མཆིའམ། སླར་མཆིའམ། ཉལ་ལམ།

གཉིད་ཀྱིས་ལོག་གམ། སྨྱོས་སམ། རབ་ཏུ་སྨྱོས་ཀྱང་རུང་ཐམས་ཅད་དུ་ཡང་སྐྱོབ་པར་འགྱུར་པ་དེ་དག་གི་དོན་དུ་དེ་ལྟ་བུའི་གསང་སྔགས་གཞི་རྣམས་བཤད་དུ་གསོལ། ཇི་ལྟར་བདག་རྟག་ཏུ་དེ་བཞིན་གཤེགས་པའི་རིམ་གྲོ་འཚལ་བ་དང་། རྟག་ཏུ་
སྲུང་བ་དང་། ཡོངས་སུ་སྐྱོབ་པར་འཚལ་བ་དང་། དེ་བཞིན་དུ་སེམས་ཅན་ཐམས་ཅད་ཀྱི་དོན་དང་། བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་འཐབ་པ་དང་། མཚང་འདྲུ་བ་དང་། རྩོད་པ་དང་། ནད་དང་། དུས་
མ་ལགས་པའི་འགུམ་པ་ལས་བསྲུང་བ་དང་། ཡོངས་སུ་བསྐྱང་བར་བགྱི་བའི་སླད་དུ་དེ་བཞིན་གཤེགས་པ་ལ་གསོལ་བ་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་གསོལ་བ་
བཏབ་པར་ཐུགས་སུ་ཆུད་ནས་དེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཁྱོད་སེམས་ཅན་ཐམས་ཅད་ཀྱི་དོན་གྱི་ཕྱིར་དེ་བཞིན་གཤེགས་པ་ལ་གསོལ་བ་འདེབས་པ་ལེགས་སོ་ལེགས་སོ། །དེའི་ཕྱིར་ལག་ན་རྡོ་རྗེ་ཁྱོད་ལེགས་པར་རབ་ཏུ་ཉོན་ལ་
ཡིད་ལ་ཟུང་ཤིག་དང་། སྒོ་བཟང་པོ་ཞེས་བྱ་བའི་ཆོས་ཀྱི་རྣམ་གྲངས་བཤད་པར་བྱའོ། །ཨུ་གུ་མུ་གུ་བ་ལི་ནི། བན་དྷ་ནི། བ་ལ་ཙ་མ་ན། བ་ཧུ་བ་ཧུ་བ་ཧུ་ལི་བརྟཱ་ཡ་སྭཱ་ཧཱ། དེ་བཞིན་གཤེགས་པའི་སྤྱི་བོ་ནས་དབང་བསྐུར་བའི་གཟུངས་སྔགས་གཞི་
རྣམས་བཀའ་སྩལ་ཏོ། །དེ་བཞིན་གཤེགས་པས་ཀྱང་གཟུང་བར་འགྱུར་རོ། །བྱིན་གྱིས་རློབ་པར་འགྱུར་རོ། །ཏདྱ་ཐཱ། བཛྲཱི་བཛྲཱི་བཛྲཱི་བཛྲཱི་དྷ་རི། བཛྲཱ་པཱ་ཎི། བཛྲཱི་དྷ་རི། ཙཀྲ་བཛྲཱི། ཙཀྲ་དྷ་རི། པ་ཊུ་དྷི་དྷི་རི། བྷི་རི། མུ་རི། ཙི་རི། ཨ་
ཧུ་རི། བྷ་ག། བྷི་བྷི་རི། ཤི་རི་ཏྲ། ཤི་རི། རུ་རུ་ཙེ། རུ་རུ་ཙེ། ཙ་རི་ཙ་རི། ད་རི་ཙ་ལེ། ཙུ་རི་མུ་རི་པཎྜ་རེ། སྡིག་པ་ཐམས་ཅད་འཇིག་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། དུས་མ་ཡིན་པར་འཆི་བ་འགོག་པ་ནས་རྨི་ལམ་ངན་

པའི་བར་དུ་འགོག་པར་བྱེད་པ། ཏདྱ་ཐཱ། བནྡྷི་ད། ག་ག་རི་ཎི། མུརྟ་ནི། པྲ་མཱུརྟ་ནི། ནཱ་ཤ་ནི། པྲ་ནཱ་ཤ་ནི། ནད་རབ་ཏུ་ཞི་བར་བྱེད་པ་ནས་རྨི་ལམ་ངན་པའི་བར་དུ་འགོག་པར་བྱེད་པ་འདི་ལྟ་སྟེ། ནཱ་ཤཱ་ནི། ནཱ་ཤ་ནི། བནྡྷ་ནི།
བནྡྷ་ནི། ཙྪིནྡ་ནི། ཙྪིནྡ་ནི། ཙི་རེ་མི་རེ། མ་ཧེ་ཧ་ད་ནི། བ་ནི་བ་རེ། ཁ་རེ་བེ་རེ། བི་རི་བི་རི། བོ་དྷི་བོ་དྷི། སུ་ཥ་ཎི། ཤ་ར་ཎི། བ་རུ་བ་རི་ཎི། བར་ཧཱུྃ་ཡེ། པྲཧྨ་ཙཱ་རི་ཎི། ཨིནྡྲ་བ་ཏི། དྷི་དྷི་རཱི་ཡ་ཎི། ན་མོ་མ་ཧེ་ཤྭ་ར་ཡ་ནི། རྀ་ཤི། བྷཉྫ་
ནི་བཱ་བ་ཛ་ཧ་ནི་ཀཱ་ལ་པ་ཏི་ནི། བྷུ་ཏ་བ་ད་ནི། སཏྱ་ག་ཐེ། སོ་མ་བཱ་དི། སོ་མ་པྲ་བྷེ་སྭཱ་ཧཱ། ཚེ་རིང་བར་འགྱུར། ཏདྱ་ཐཱ། ཧ་ར་ཧ་ར་ཧ་ར་ཧཱ་ནི་སྭཱ་ཧཱ། ཏདྱ་ཐཱ། ཨི་ཌི་ཏ་ག་ཌི་ཏ། བ་དི་ད། ཨ་ཡེ་ན། ཨ་རི། བཉྫ་ནི། ཀ་ཀཱིརྟ་ནི། པུ་ཏྲ་ད་ད་ཧཱ་ནི།
མརྒ་ཨ་བྷི་རོ་ཧ་ནི། ཧུ་ས་བ་ཏི། མུ་པ་བ་དི། ཧི་ལི་ཧི་ལི། ཡ་ཐཱ་བ་ཛུ་ཡ། ཡ་ཐཱ་ཨགྣི། ཡ་ཐཱ་བ་རན་ཙ་ཡ་ཐཱ་ན་ལ་ཡ། ཡ་ཐཱ་བཛྲ་ཎ། ཡ་ཐཱ་ཧྲྀ་ད་ཡ་སྭཱ་ཧཱ། ལག་ན་རྡོ་རྗེ་འདི་ནི་སྒོ་བཟང་པོ་ཞེས་བྱ་བའི་གཟུངས་ཏེ། དེ་བཞིན་གཤེགས་པ་རྣམས་
ཀྱི་ཐུགས་རྗེས་སེམས་ཅན་རྣམས་ཀྱི་དོན་དུ་བཤད་དོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་ཤིང་བྱིན་གྱིས་བརླབས་པ་དང་། བདེན་པའི་ཐུགས་དམ་གྱིས་རྣམ་པར་གཞག་བཞིན་དུ་
ང་ཡང་འཆད་དོ། །དེ་ནས་བཅོམ་ལྡན་འདས་ཀྱིས་སྐྱེས་བུ་ཆེན་པོའི་མཚན་སྨིན་མཚམས་ཀྱི་མཛོད་སྤུ་ནས་འོད་ཟེར་ཕྱུང་སྟེ། སངས་རྒྱས་ཀྱི་ཞིང་ཐམས་ཅད་དུ་འོད་ཟེར་གྱི་སྣང་བ་བྱུང་ངོ་། །འོད་ཟེར་གྱི་སྣང་བ་དེས་བསྐུལ་བས་རང་རང་གི་སངས་རྒྱས་ཀྱི་ཞིང་དག་
ནས་ཆས་ཏེ། འཇིག་རྟེན་གྱི་ཁམས་མི་མཇེད་འདིར་བྱོན་ནས། བཅོམ་ལྡན་འདས་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ཏེ། ཤཱཀྱ་ཐུབ་པ་ཁྱོད་ཀྱིས་སེམས་ཅན་ཐམས་ཅད་ཀྱི་དོན་དུ་སྒོ་བཟང་པོ་ཞེས་བྱ་བའི་ཆོས་ཀྱི་རྣམ་གྲངས་གཟུངས་སྔགས་གཞི་རྣམས་

སྣང་བར་བྱེད་པ། མཆོག་ཏུ་དགའ་བར་བྱེད་པ། དྲན་པར་བྱེད་པ་བཤད་པ་ལེགས་སོ་ལེགས་སོ། །བདག་ཅག་གིས་ཀྱང་བྱིན་གྱིས་བརླབ་བོ། ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་སྔགས་གཞི་འདི་དག་
འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེའི་ཡོན་ཏན་གྱི་ཕན་ཡོན་ཉི་ཤུར་ཤེས་པར་བྱ་སྟེ། ཉི་ཤུ་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་བ་དང་། སངས་རྒྱས་ཐམས་ཅད་
ཀྱིས་དགོངས་པར་འགྱུར་བ་དང་། ངན་སོང་དུ་འགྱུར་བའི་ལས་ཀྱི་སྒྲིབ་པ་ཐམས་ཅད་མེད་པར་འགྱུར་བ་དང་། ཚེ་རིང་བར་འགྱུར་བ་དང་། རིང་དུ་འཚོ་ཞིང་གྲགས་པ་དང་ལྡན་པ་དང་། ལོངས་སྤྱོད་དང་ལྡན་པ་དང་། སྟོབས་དང་ལྡན་པ་དང་། གཟི་བརྗིད་
དང་ལྡན་པ་དང་། རྟག་ཏུ་ནད་མེད་པ་དང་ལྡན་པ་དང་། བརྩོན་འགྲུས་དང་ལྡན་པ་དང་། སངས་རྒྱས་བཅོམ་ལྡན་འདས་ཐམས་ཅད་དགྱེས་ཤིང་ཐུགས་སུ་ཆུད་པར་འགྱུར་བ་དང་། ལྷ་ཐམས་ཅད་ཀྱིས་བསམས་པར་འགྱུར་བ་དང་། དགེ་བར་སྤྱོད་པར་
འགྱུར་བ་དང་། དགེ་བའི་དོན་ལ་རབ་ཏུ་བརྩོན་པ་དང་། སྣང་བར་བྱེད་པར་འགྱུར་བ་དང་། མཆོག་ཏུ་དགའ་བ་དང་། དྲན་པ་དང་ལྡན་པར་འགྱུར་བ་དང་། མཚན་ཕུན་སུམ་ཚོགས་པར་འགྱུར་བ་དང་། མི་འཇིགས་པར་འགྱུར་བ་དང་། དགེ་བའི་རྩ་
བ་ཐམས་ཅད་དང་ལྡན་པར་འགྱུར་རོ། །ལག་ན་རྡོ་རྗེ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསང་བའི་གནས་ཀྱི་གཟུངས་སྔགས་གཞི་འདི་རྣམས་གསུངས་ཤིང་། སངས་རྒྱས་ཐམས་ཅད་ཀྱིས་བྱིན་
གྱིས་བརླབས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་

བསྐྱང་བའི་སླད་དུ་གཟུངས་སྔགས་གཞི་རྣམས་བཤད་པར་བགྱིའོ། །སུ་ཞིག་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པ་དེ་རྣམ་པར་འཚེ་བ་ཐམས་ཅད་
ལས་བསྲུང་བར་བགྱིའོ། །ཏདྱ་ཐཱ། ཤི་ཁི་ཤི་ཁི་ཤི་ཁི་ཤི་ཀ། ཙི་ཙི་ཙི་ཙི། བྷ་བྷ་བྷ་བྷ། རུ་རུ་རུ་རུ། ཛི་ཛི་ཛི་ཛི། གྲ་གྲ་གྲ་གྲ། ཧྲི་ཧྲི་ཧྲི་ཧྲི། ཧ་ཧ་ཧ་ཧ། མ་མ་མ་མ། ཧ་ན་ཧ་ན་མེ། སརྦ་པྲཏྱཪྠི་ཀཱ། ད་ཧ་ད་ཧ་མེ། སརྦ་ཤ་
ཏྲ་བ། པ་ཙ་པ་ཙ་མེ། སརྦ་ཨ་ཧི་ཏེ་ཥི་ན་སྭཱ་ཧཱ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་སེམས་ཅན་ཐམས་ཅད་ཀྱི་དོན་གྱི་ཕྱིར་དངོས་གྲུབ་དམ་པའི་
གཟུངས་སྔགས་གཞི་རྣམས་སྨྲས་པ་ལེགས་སོ་ལེགས་སོ། །བྱང་ཆུབ་སེམས་དཔའ་ལག་ན་རྡོ་རྗེས་གསོལ་པ། བཅོམ་ལྡན་འདས་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་
པ་དེའི་སྤུའི་ཁུང་བུ་རྣམས་སུ་མདངས་ཐམས་ཅད་སྩལ་བར་བགྱི་བར་བཤད་པར་བགྱིའོ། །ཏདྱ་ཐཱ། ཧི་ལི་མི་ལི་ཙི་ལི་སྭཱ་ཧཱ། པྲཧྨ་སྭ་རེ་སྭཱ་ཧཱ། པྲཧྨ་ཨ་བ་སུ་གརྦྷེ། ཨ་ཀ་ལ་བེ། པུ་ཥ་སཾ་སྟ་རེ་སྭཱ་ཧཱ། བཙུན་པ་བཅོམ་ལྡན་འདས་འདི་ནི་གང་ནང་
པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་བསྲུང་བ་དང་། ཡོངས་སུ་བསྐྱང་བའི་སླད་དུ་གཟུངས་སྔགས་གཞི་རྣམས་ལགས་སོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཙུན་
པ་བཅོམ་ལྡན་འདས་བདག་གིས་ཀྱང་གང་གི་ཚེ་སྐྱོང་བའི་རིག་སྔགས་འདི་དག་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་བསྲུང་བ་དང་། ཡོངས་སུ་བསྐྱང་བའི་སླད་དུ་སངས་རྒྱས་ཀྱི་བྱིན་གྱི་བརླབས་ཀྱིས་གཟུངས་

སྔགས་གཞི་རྣམས་བཤད་པར་བགྱིའོ། །ཏདྱ་ཐཱ། བོ་དྷི་ཙིཏྟེ། པ་ར་ཎི། ད་མཱ་རཎྜེ། དིཏྟ་ཏིཏྟིཏྟི་གཽ་རི། གནྡྷ་རི་ས་ར་མ་ཏནྟ། བཛྲ་ཏུ་ལ་ནི། ཛྭཱ་ལ་མཱ་ལ་ལི་ནི། ཙཀྲ་བཱ་ཀ། ཤ་བ་རེ་ཤ་བ་རེ། ཤ་མ་རེ་ཤ་མ་རེ་སྭཱ་ཧཱ། དེ་ནས་རྒྱལ་པོ་ཆེན་
པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་གིས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་ཡོངས་
སུ་བསྐྱང་བའི་སླད་དུ་གཟུངས་ཀྱི་གསང་སྔགས་འདི་བརྗོད་པར་བྱའོ། །ཏདྱ་ཐཱ། པུཥྤེ་སུ་པུཥྤེ། བོ་དྷ་ནི། སཾ་ཤོ་དྷ་ནི། དྷུ་མ་པ་རི་ཧ་རེ། ཨཱརྱ་པྲ་ཤ་སྟེ། ཤཱནྟེ། ནི་ར་མུཀྟེ། མངྒ་ལྱེ། ཧི་ར་ཎྱ་གརྦྷེ། སྟ་རེ་སྟ་པ་ཏི་སྭཱ་ཧཱ། དེ་ནས་འབྱུང་པོའི་
མ་མོ་འཕྲོག་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པ་དང་། ཡིད་ལ་བགྱིད་པའི་
རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་བསྐྱང་བའི་སླད་དུ་གཟུངས་ཀྱི་གསང་སྔགས་གཞི་རྣམས་བརྗོད་པར་བགྱིའོ། །ཏདྱ་ཐཱ། པི་ལི་སི་པ་པི་ལི། སི་ལི། མ་ཧཱ་པི་པི་ལི། སི་མེ་ལི་སི། གུ་རུ་ཎེ། གུ་རུ་གུ་རུ་ཎེ་
མ་ཧཱ་གུ་རུ་ཎེ་ཕུ་སྭཱ་ཧཱ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་

ཞེས་བགྱི་བའི་ཆོས་ཀྱི་རྣམ་གྲངས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བར་བགྱིའོ། །ཏདྱ་ཐཱ། ཨཊྚེ་ཕུ། བཊྚེ་ཕུ། ནཊྚེ་ཕུ། ཀུ་ནཊྚེ་ཕུ། མ་ནཊྚེ་ཕུ། མུཎྜ་
ཏ་ཧ་ཀེ་ཕུ། ཤྲི་ཕུ་བྷཾ་གེ་ཕུ། མྃ་གེ་ཕུ་སྭཱ་ཧཱ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་
གྲངས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བར་བགྱིའོ། །ཡོངས་སུ་བསྐྱང་བ་དང་། ཡོངས་སུ་གཟུང་བ་དང་། ཡོངས་སུ་བསྐྱབ་པ་དང་། ཞི་བ་དང་། བདེ་ལེགས་སུ་འགྱུར་བ་དང་།
ཆད་པ་སྤང་བ་དང་། དུག་གཞིལ་བར་བགྱིའོ། །མཚམས་གཅད་པར་བགྱིའོ། །ཏདྱ་ཐཱ། ཧི་བཛྲེ། ཧེ་བཛྲེ། ཧཱི་ཧཱ། བི་སི་བི་སི། མ་ཧཱ་བི་སི་ཕུ་སྭཱ་ཧཱ། དེ་ནས་བཅོམ་ལྡན་འདས་ལ་ལྷའི་བུ་དབང་ཕྱུག་ཆེན་པོས་འདི་སྐད་ཅེས་གསོལ་ཏོ། །བཙུན་
པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་བསྐྱང་བའི་སླད་དུ་གཟུངས་སྔགས་གཞི་རྣམས་བརྗོད་པར་
བགྱིའོ། །ཏདྱ་ཐཱ། ཧུ་ལུ་ཧུ་ལུ། ཧུ་ལུ་ཧུ་ལུ་ལུ། སརྦ་བྷཱུ་ཏ་པྲ་ཏི་ཥེ་དྷ་ནཾ་ཀ་རོ་མི་སྭཱ་ཧཱ། དེ་ནས་སྡེ་དཔོན་གཞོན་ནུས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་གཙང་མ་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་བསྐྱང་བར་བགྱི་བའི་སླད་དུ་གཟུངས་སྔགས་གཞི་འདི་རྣམས་

བརྗོད་པར་བགྱིའོ། །ཏདྱ་ཐཱ། ཧི་ལི་ཧི་ལི། ཧི་ལི་ཧི་ལི། ཧི་ལི་ཧི་ལི། མི་ལི་མི་ལི། ཏུ་རུ་ཏུ་རུ། ཏུ་རུ་ཏུ་རུ། སརྦ་བྷཱུ་ཏ་པྲ་ཏི་ཥེ་དྷ་ནྃ་ཀ་རོ་མི་སྭཱ་ཧཱ། དེ་ནས་ལྷའི་བུ་ཟླ་འོད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་གཙང་མ་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་ཡོངས་སུ་བསྐྱང་
བར་བགྱིའོ། །ཏདྱ་ཐཱ། ཨྃ་གེ། བྃ་གེ། ཙྃ་གེ། ཧི་ནི། ཌི་ཌི། དི་དི་ཙི་ཙི་ཕུ་སྭཱ་ཧཱ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཙུན་པ་
བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་ཡོངས་སུ་བསྐྱང་བར་བགྱིའོ། །ཏདྱ་ཐཱ། ཧ་
ཏེ། བི་ཧ་ཏེ། ནི་ཧ་ཏེ། སརྦ་པྲ་ཏྱ་རཱི་ཀཱ། པྲ་ཏྱཱ། མི་ཏྲ་ཤུདྡྷེ། མུ་ཀྟེ། བི་མུཀྟི། བི་མ་ལེ། ནི་རྨ་ལེ། པྲ་བྷ་སྭ་རེ། པྲ་བྷ་ཀ་རེ་ཕུ་སྭཱ་ཧཱ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་
གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བར་བགྱིའོ། ཏདྱ་
ཐཱ། ཛྭ་ལེ་ཛྭ་ལེ། མ་ཧཱ་ཛྭ་ལེ་ཛྭ་ལ། ཛྭ་ལེ་ནི་ཨུཀྐེ་མུཀྐེ། ཤ་མེ་པྲ་ཤ་མེ། མ་ཧཱ་པྲ་ཤ་མེ། ཤ་མེ་ས་མཱདྷེ། མ་ཧཱ་ས་མཱ་དྷེ། ས་མཱ་བ་དྷེ། ཛྭ་ལེ་མ་ཧཱ་ཛྭ་ལེ། ཛྭ་ལ་བ་མེ་ཕུ་སྭཱ་ཧཱ། དེ་ནས་གནོད་སྦྱིན་གྱི་སྡེ་དཔོན་ཁ་བ་ཅན་གྱིས་བཅོམ་ལྡན་འདས་

ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་།
ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་བསྐྱང་བར་བགྱིའོ། །ཏདྱ་ཐཱ། ཨུ་དུཾ་བ་རེ། ཨུ་དུཾ་པེ་པྲ་དུཾ་བེ། བྱཱ་བརྡེ། ཨཱ་ན་གྷེ། ས་མཱ་དྷེ། མ་ཧཱ་ས་མཱ་དྷེ། ནཱི་ལེ་ནཱི་ལེ།
ནཱི་ལ་ཀེ་ཤེ་ཀེ་ཤེ་ནི། ཀུ་ལེ་ཀུ་ལེ། མ་ཧཱ་ཀུ་ལེ། ནཱི་ལ་ཀུ་ལེ། སིདྡྷི། སིདྡྷི། མ་ནོ་ཧ་རེ། ཨཊྚེ། བཊྚེ། ནཊྚེ། ཀུ་ནཊྚེ། ས་མ་ཐེ། བ་བ་ལ། ཀུ་ཙེ། དཱནྟེ། ནཱི་ལ་ཀ་ཤེ། ཀུ་ལེ། ནཱི་ལ། དཱནྟེ་ཛཱཾ་གུ་ལེ། ཧུ་ཤེ། མཱུ་ཤེ། བ་ལཾ་
ཀུ་ཤེ། ཧ་ལ་ཀུ་ཤེ། ཕ་ལ་མུ་ཙེ་སྭཱ་ཧཱ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་བདེ་བའི་རི་གནས་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་
གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་བསྲུང་བ་དང་ཡོངས་སུ་བསྐྱང་བར་བགྱིའོ། །ཏདྱ་ཐཱ། ཨ་མ་ལེ། བི་མ་ལེ།
ནི་ར་མ་ལེ། མྃ་ག་ལེ། ཧི་ར་ནྱ་གརྦྷེ། སརྦ་ཨཪྠ་སཱ་དྷ་ནི། ཀ་མཤྩི་ནི་ཡུ་བི་ར་ཛེ། ཀུ་ཊ་ཀུ་ཊ། ཀཾ་བ་ལེ་པྲཧྨ། པྲཧྨ་སྭ་རེ། པྲཧྨ་སིདྡྷེ། སིདྡྷི་མ་ནོར་ཐེ་གུ་སྭཱ་ཧཱ། དེ་ནས་ལྷ་མོ་ཆེན་མོ་རྡོ་རྗེ་ལུ་གུ་རྒྱུད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་
ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་

བུའམ། རིགས་ཀྱི་བུ་མོ་དེ་ལ་བསྲུང་བ་དང་། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བའི་སླད་དུ་གཟུངས་སྔགས་གཞི་རྣམས་བརྗོད་པར་བགྱིའོ། །ཏདྱ་ཐཱ། བཛྲེ་བཛྲེ། མ་ཧཱ་བཛྲེ། བཛྲ་ད་ནི། བུདྡྷ་བཛྲེ།
བུདྡྷ་ཨ་དྷིཥྛི་ཏེ་བཛྲེ། སུ་བུདྡྷེ། ནི་བུདྡྷེ། བ་ཧུ་བུདྡྷེ། བི་ཤི་ཥྚ་བུདྡྷེ། ཤུདྡྷེ། བུདྡྷེ་བུདྡྷེ། ནཱི་ཤྃ་གྲཱ་མ་ཎི། ཛཾ་གེ་ལེ། ཨ་ལ་སེ། ཏི་ལི་མེ། ཏི་ལེ། ཏི་ལི་ལེ། མརྒེ། ཤཱནྟ་ཤཱནྟ་གཱ་མཱི་ནི་ཕུ་སྭཱ་ཧཱ། དེ་ནས་བཅོམ་ལྡན་འདས་ལ་བྱང་ཆུབ་
སེམས་དཔའ་སེམས་དཔའ་ཆེན་པོ་རྡོ་རྗེའི་སྡེས་འདི་སྐད་ཅེས་གསོལ་ཏོ། བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་
བུའམ། རིགས་ཀྱི་བུ་མོ་དེ་ལ་བསྲུང་བར་བགྱིའོ། །ཏདྱ་ཐཱ། ཧི་ལེ་བཛྲེ། ཧེ་ཧི་བཛྲེ། ཧེ་ཧེ་བཛྲ་ཡ་བ་ཀི་རི་ཀི་རི་བཛྲ་སྭཱ་ཧཱ། ཏདྱ་ཐཱ། ཨཎྜ་རེ། པཎྜ་རེ། ཤྭེ་ཏེ། པཎྜ་ར་བ་སི་ནི། ཀིནྣ་རེ། ཀ་རཱ་དེ། ཀེ་ཡཱུ་རེ། ཨེ་ཧ་བུདྡྷེ། ཏ་ཏྭ་བུདྡྷེ།
བྷཱུ་ཛེ་བྷཱུ་ཛེ། བྷཱུ་ཛྃ་ག་མེ། བྷཱུ་ཛ་པཱ་བ་ཏེ། བྷ་ཡེ་བྷ་ཡེ། བྷ་ཡ་ཨ་གྲ་བ་ཏེ། བི་ནཱི་བི་ནཱི། ཤི་ར་པ་ཐེ། ཤི་བ་པ་ཐེ། ཨཱ་དིཏྱ་པ་ཐེ། ཏེ་ཛེ་ཏེ་ཛ་བ་ཏོ། །ཨཱ་ཀཱ་ཤ་པ་ཐེ་ཕུ་སྭཱ་ཧཱ། དེ་ནས་རྡོ་རྗེ་ཕོ་ཉ་མོས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་
བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་གང་སྒོ་བཟང་པོ་ཞེས་བགྱི་བའི་ཆོས་ཀྱི་རྣམ་གྲངས་ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པའི་རིགས་ཀྱི་བུའམ།
རིགས་ཀྱི་བུ་མོ་དེ་ལ་བསྲུང་བ་དང་བསྐྱང་བ་དང་སྦ་བར་བགྱིའོ། །ཏདྱ་ཐཱ། ཀུ་ཊེ་ཀུ་ཊེ། ཀུ་ཊི་ནི། ཀུ་ཊ་ཀུ་ཊ་རེ་སྭཱ་ཧཱ། ནཱི་ལི་ནཱི་ལེ། ནཱི་ལ་ཀེ་ཤེ་སྭཱ་ཧཱ། པཱི་ཏེ་པཱི་ཏེ། པཱི་ཏ་ཀེ་ཤེ་སྭཱ་ཧཱ། ལོ་ཧི་ཏེ། ལོ་ཧི་ཏེ། ལོ་ཧི་ཏ་ཀེ་ཤེ་སྭཱ་ཧཱ། ཨ་བ་དཱ་དེ། ཨ་

བ་དཱ་དེ། ཨ་བ་དཱ་ཏ་ཀེ་ནི་སྭཱ་ཧཱ། མཉྫིཥྛེ། མཉྫིཥྛེ། མཉྫིཥྛེ་ཀེ་ཤེ་སྭཱ་ཧཱ། ཙཀྲེ་ཙཀྲེ། བཛྲ་ཙཀྲེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་ཅན་བརྐྱང་ནས་བརྒྱ་བྱིན་དང་། ཚངས་པ་དང་། འཇིག་རྟེན་
སྐྱོང་བ་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། བཞིན་བཟངས་དག་དེ་བཞིན་གཤེགས་པའི་བྱིན་གྱི་བརླབས་ཀྱིས་ལྷ་དང་འཇིག་རྟེན་སྐྱོང་བ་ཁྱོད་ཀྱིས་སེམས་ཅན་ཐམས་ཅད་ལ་ཕན་གདགས་པ་དང་། བསྲུང་བའི་ཕྱིར་གཟུངས་སྔགས་གཞི་འདི་
དག་ལེགས་པར་བརྗོད་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔའ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་སྒོ་བཟང་པོ་ཞེས་བྱ་བའི་ཆོས་ཀྱི་རྣམ་གྲངས་
ཚེ་སྐྱོང་བའི་རིག་སྔགས་འདི་འཛིན་ཅིང་། ནང་པར་ལངས་ནས་ཀློག་པ་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར། ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་
ལྡིང་གི་དབང་པོ་དང་། མིའམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་ཐམས་ཅད་ཀྱིས་བསམས་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་ལག་ན་རྡོ་རྗེ་དང་། བརྒྱ་བྱིན་དང་། ཚངས་པ་
དང་། འཇིག་རྟེན་སྐྱོང་བ་ཐམས་ཅད་དང་ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །
འཕགས་པ་སྒོ་བཟང་པོ་ཞེས་བྱ་བའི་གཟུངས་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་

ལ་ཕབ་པ།།༄༅། །རྒྱ་གར་སྐད་དུ། ཨཱརྱ་ཥནྨུ་ཁ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྒོ་དྲུག་པ་ཞེས་བྱ་བའི་གཟུངས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་
བདག་གིས་ཐོས་པ་དུས་གཅིག་ན། བཅོམ་ལྡན་འདས་འཁོར་གྱི་ཁྱམས་གནས་གཙང་མའི་སྟེང་ནམ་མཁའི་དཀྱིལ་ན་གནས་པ་རིན་པོ་ཆེ་སྣ་བདུན་གྱིས་རབ་ཏུ་རྣམ་པར་ཕྱེ་བར་སྤྲས་པ་ན། བྱང་ཆུབ་སེམས་དཔའི་ཚོགས་གྲངས་མེད་པ་དང་ཐབས་ཅིག་ཏུ་
བཞུགས་ཏེ། དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ་དག་ཁྱེད་ཀྱིས་འགྲོ་བ་ཐམས་ཅད་ལ་ཕན་པ་དང་བདེ་བའི་ཕྱིར་སྒོ་དྲུག་པ་ཞེས་བྱ་བའི་གཟུངས་ཟུང་ཤིག །དེ་ནི་འདི་ལྟ་སྟེ། འཁོར་བ་
ནས་འཁོར་བའི་སྐྱེ་གནས་གཞན་དག་ཏུ་བདག་གིས་སྡུག་བསྔལ་གང་ཅི་མྱོང་བ་དེ་སེམས་ཅན་ཐམས་ཅད་དང་མཉམ་པ་ཉིད་དུ་མི་ཤེས་པའི་མཚན་ཉིད་དུ་མ་གྱུར་ཅིག །བདག་གིས་འཇིག་རྟེན་པའི་ཕུན་སུམ་ཚོགས་པའི་བདེ་བ་གང་ཅི་མྱོང་བ་དེ་སེམས་ཅན་ཐམས་
ཅད་དང་ཐུན་མོང་དུ་ཡོངས་སུ་སྤྱོད་པར་གྱུར་ཅིག །བདག་གིས་སྡིག་པ་མི་དགེ་བའི་ལས་གང་ཅི་བྱས་པ་དེ་སོ་སོར་བཤགས་པ་བླ་ན་མེད་པས་སོ་སོར་མ་བཤགས་པར་མ་བཤགས་པར་མ་གྱུར་ཅིག །བདག་གིས་བདུད་ཀྱི་ལས་གང་ཅི་བྱས་པ་དེ་ཡོངས་སུ་ཤེས་པ་
བླ་ན་མེད་པས་ཡོངས་སུ་མི་ཤེས་པར་མ་གྱུར་ཅིག །བདག་གི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་འཇིག་རྟེན་པ་དང་འཇིག་རྟེན་པ་དང་འཇིག་རྟེན་ལས་འདས་པ་ཡང་རུང་གང་ཅི་ཡོད་པ་དེ་ཐམས་ཅད་བླ་ན་མེད་པའི་ཡེ་ཤེས་ཀྱི་འབྲས་བུར་གྱུར་ཅིག །བདག་གི་རྣམ་
པར་གྲོལ་བ་གང་ཅི་ཡོད་པ་དེས་སེམས་ཅན་ཐམས་ཅད་རྣམ་པར་ཐར་བར་གྱུར་ཅིག །འཁོར་བ་དང་མྱ་ངན་ལས་འདས་པ་ལ་བདག་གནས་པར་མ་གྱུར་ཅིག །ཏདྱ་ཐཱ། ཨོཾ་ཀྵ་མེ་ཀྵ་མེ། ཀྵཱནྟེ་ཀྵཱ་ནྟེ། ད་མེ་ད་མེ། དཱནྟེ་དཱནྟེ། བྷ་དྲེ་བྷ་དྲེ། སུ་

བྷ་དྲེ་སུ་བྷ་དྲེ། ཙནྡྲེ་ཙནྡྲེ། སུ་ཙནྡྲེ་སུ་ཙནྡྲེ། ཙནྡྲ་ཀི་ར་ཎེ། ཙནྡྲ་བ་ཏི། ཏེ་ཛོ་བ་ཏི། ཡ་ཤོ་བ་ཏི། དྷརྨ་བ་ཏི། བྲཧྨ་བ་ཏི། སརྦ་ཀླེ་ཤ་བི་ཤོ་དྷ་ནི། སརྦ་ཨརྠ་སཱ་དྷ་ནི། སརྦ་ཨརྠ་པྲ་ཤ་མ་ནི། པ་ར་མཱརྠ་སཱ་དྷ་ནི། ཀཱ་
ཡ་བི་ཤོ་དྷ་ནི། བཱ་ག་བི་ཤྭ་དྷ་ནི། མ་ནཿསྃ་ཤྭ་དྷ་ནི་སྭཱ་ཧཱ། རིགས་ཀྱི་བུ་དག་དེ་ལྟར་ན་རིགས་ཀྱི་བུ་དང་། རིགས་ཀྱི་བུ་མོ་གང་ལ་ལ་ཞིག་གིས་སྒོ་དྲུག་པ་ཞེས་བྱ་བའི་གཟུངས་འདི་ཉིན་ལན་གསུམ་མཚན་ལན་གསུམ་བཀླགས་ན་དེའི་ལས་ཀྱི་སྒྲིབ་པ་ཐམས་ཅད་བྱང་
ནས་སྐྱེ་བདུན་གྱི་བར་དུ་དེ་སྐྱེ་བ་དྲན་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ།