Kinh tạng Tây Tạng (Kangyur Đại Học) — 100_གཟུངས་འདུས།_ཨེ

གང་དུ་སྐྱེས་པ་དེར་ཐམས་ཅད་དུ་དེ་བཞིན་གཤེགས་པ་དང་ཕྲད་པ་དང་། བྱང་ཆུབ་སེམས་དཔའ་དང་ཕྲད་པར་འགྱུར་ཞིང་བྱང་ཆུབ་ཀྱི་སྙིང་པོའི་བར་དུ་མཐར་ཕྱིན་པར་བྱེད་པར་འགྱུར་རོ། །སྐུ་གཟུགས་རྒྱས་པ་ཆེན་པོའི་ལེའུ་སྟེ་ཆོ་ག་ལྔ་
པའོ།། །།དོན་ཀུན་སྒྲུབ་པར་བྱེད་པ་ཡི། །སྦྱིན་སྲེག་ཆོ་ག་བཤད་པར་བྱ། །སེམས་ཅན་ཀུན་གྱི་བདེ་ཐོབ་པ། །ཞི་བ་ཡི་ནི་ལས་བརྩམ་མོ། །རིག་པ་འཛིན་པས་གསང་བྱ་སྟེ། །ངེས་པར་ཚངས་པར་སྤྱོད་པ་ཡིས། །སེམས་ཅན་ཐམས་ཅད་ཡིད་དགའ་བའི། །དེ་
ནས་སྦྱིན་སྲེག་དག་བྱའོ། །ཨོྃ་སྭཱ་ཧཱ་པ་ཏི་བྷཱུར་བྷུ་བཱ་ཧཱུྃ་ཧཱུྃ་ཕཊ་སྭཱ་ཧཱ། སྔགས་འདིས་ཏིལ་དང་། ཡུངས་ཀར་དང་། མར་ལས་སྦྱིན་སྲེག་བྱས་ན་རིག་སྔགས་འཆང་ཐམས་ཅད་གྲུབ་པར་འགྱུར་རོ། །བགེགས་དང་། ལོག་འདྲེན་ཐམས་ཅད་ཚར་བཅད་པར་འགྱུར་རོ། །སྡིག་པ་ཐམས་ཅད་
དང་། གནོད་པ་ཐམས་ཅད་དང་། ཕྱིར་རྒོལ་བ་དང་། མི་མཛའ་བ་ཐམས་ཅད་རྨུགས་པར་བྱས་པར་འགྱུར། རེངས་པར་བྱས་པར་འགྱུར། རྨོངས་པར་བྱས་བར་འགྱུར་རོ། །རྨི་ལམ་ངན་པ་དང་། ལྟས་ངན་པ་ཐམས་ཅད་མེད་པར་འགྱུར་རོ། །གུ་གུལ་དང་། ཡུངས་ཀར་དང་།

མར་ལས་སྦྱིན་སྲེག་སྟོང་རྩ་བརྒྱད་བྱས་ན་གདོན་ཐམས་ཅད་ཀྱི་ཀླད་པ་འགས་པར་འགྱུར། འབྱུང་བོ་ཐམས་ཅད་ཀྱིས་གནོད་པ་བྱས་པ་ལས་ཡོངས་སུ་ཐར་བར་འགྱུར། རིམས་ནད་ལ་སོགས་པ་ཐམས་ཅད་ཞི་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །མར་དང་།
ཡུངས་ཀར་ལས་སྦྱིན་སྲེག་སྟོང་རྩ་བརྒྱད་བྱས་ན་ཡུལ་ཐོབ་པར་འགྱུར་རོ། །ས་བོན་བདུག་པ་དང་། མར་ལས་སྦྱིན་སྲེག་སྟོང་རྩ་བརྒྱད་བྱས་ན་བདུད་ལ་སོགས་པའི་གདུག་པས་འཇིགས་སྐྲག་པ་དང་། ཕ་རོལ་གྱི་དམག་ཚོགས་ལ་སོགས་པ་འཇིག་པར་འགྱུར་རོ། །སྒྲོན་ཤིང་དང་མར་
ལས་སྦྱིན་སྲེག་སྟོང་རྩ་བརྒྱད་བྱས་ན་རྒྱལ་པོ་བཙུན་མོའི་འཁོར་དང་བཅས་པ་དགའ་བར་འགྱུར་རོ། །ཅི་འདོད་པ་དེ་བྱེད་དོ། །གང་དང་གང་སླངས་པ་དེ་དང་དེ་འཐོབ་པོ། །རི་ཁར་སྲ་ཙི་བོག་དང་། ཡུངས་ཀར་དང་། མར་ལས་སྦྱིན་སྲེག་བྱས་ན་ལྷ་མ་ཡིན་གྱི་སྒོ་ཐམས་ཅད་འབྱེད་པར་
འགྱུར། རིག་འཛིན་གྱི་རྒྱལ་པོར་འགྱུར་རོ། །ཡུངས་ཀར་དང་། ཏིལ་མར་དང་། ནཱ་ག་གེ་སར་ལས་སྦྱིན་སྲེག་སྟོང་རྩ་བརྒྱད་བྱས་ན་ཀླུ་ཐམས་ཅད་དབང་དུ་འགྱུར་རོ། །ཅི་བསྒོ་བ་བྱེད་དོ། །དུས་སུ་ཆར་གྱི་རྒྱུན་འབེབས་པར་བྱེད་དོ། །ཕྱིན་ཆད་སེར་བའི་འཇིགས་པ་མི་འབྱུང་ངོ་། །
ཁ་ཟས་ལས་སྦྱིན་སྲེག་སྟོང་རྩ་བརྒྱད་བྱས་ན་འབྲུ་སྟོང་དུ་འཕེལ་ཞིང་མང་པོར་འགྱུར་རོ། །ལན་ཚྭ་ལ་སྦྱིན་སྲེག་སྟོང་རྩ་བརྒྱད་བྱས་ན་གནོད་སྦྱིན་མོ་ཐམས་ཅད་ལྷགས་ནས། རྗེ་བཙུན་སྲོག་དང་མ་ད་བྲལ་ཅིག་དང་། བཀའ་ཅི་སྩལ་བ་དེ་བགྱིའོ་ཞེས་རྐང་པ་ལ་གཏུགས་པར་འགྱུར་རོ། །འབྲས་
དང་མར་ལས་སྦྱིན་སྲེག་སྟོང་རྩ་བརྒྱད་བྱས་ན་དཔལ་ཆེན་པོ་ཐོབ་པར་འགྱུར་རོ། །ཉི་མ་ལ་ཁ་བལྟས་ཏེ་ན་ལེ་ཤམ་ལས་སྦྱིན་སྲེག་སྟོང་རྩ་བརྒྱད་བྱས་ན་དེ་ལ་ལྷ་ཐམས་ཅད་རྟག་ཏུ་རྒྱུན་མི་འཆད་པར་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །དཔལ་ཐམས་ཅད་ཐོབ་
པར་འགྱུར་རོ། །དཔལ་ལྷ་མོའི་མདུན་དུ་ཏིལ་དང་། ཡུངས་ཀར་ལས་སྦྱིན་སྲེག་བྱས་ན་ནོར་མང་པོ་འཕེལ་བར་འགྱུར་རོ། །ཤིང་ཨར་ཀའི་ཡམ་སྲེག་ཤིང་དང་མར་ལས་སྦྱིན་སྲེག་བརྒྱ་རྩ་བརྒྱད་བྱས་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྐུལ་བར་འགྱུར་རོ། །སྡིག་པ་

ཐམས་ཅད་དང་བྲལ་བར་འགྱུར། འཇིག་རྟེན་དང་། འཇིག་རྟེན་ལས་འདས་པའི་གསང་སྔགས་ཐམས་ཅད་མངོན་དུ་འགྱུར། ནད་ཐམས་ཅད་དང་བྲལ་བར་འགྱུར། དགྲ་ཐམས་ཅད་ལས་རྒྱལ་བར་འགྱུར། འཇིག་རྟེན་གྱི་སྡུག་བསྔལ་ཐམས་ཅད་འབྱུང་བར་
མི་འགྱུར་རོ། །རིག་སྔགས་འདིའི་མཐུས་བདེ་བ་ཐམས་ཅད་འགྲུབ་པར་འགྱུར། རྨི་ལམ་ངན་པ་དང་། ལྟས་ངན་པ་ཐམས་ཅད་མེད་པར་འགྱུར། བྱད་ཐམས་ཅད་དང་། བཅིངས་པ་ཐམས་ཅད་དང་། གནོད་པ་ཐམས་ཅད་ནམ་ཡང་འབྱུང་བར་མི་འགྱུར་རོ། །དེ་ལ་སོགས་ཏེ་སྦྱིན་
སྲེག་གི་ལས་རྣམས་ཀྱིས་མཆོག་ཏུ་ཞི་བར་བྱེད་དོ། །བདེ་བ་རབ་ཏུ་སྦྱིན་པར་བྱེད། ནོར་ཐོབ་པར་བྱེད། དོན་གྲུབ་པར་བྱེད་ཅིང་ལྟ་བ་ངན་པར་ལྟུང་བའི་སེམས་ཅན་ཐམས་ཅད་ཉམས་པར་བྱེད་དོ། །སྦྱིན་སྲེག་གྲུབ་པ་རྒྱས་པའི་ལེའུ་སྟེ་ཆོ་ག་དྲུག་པའོ།། །།དེ་ནས་
བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་ཆོ་ག་ཞིབ་མོའི་རྒྱལ་པོ་ཡིན། འདི་ནི་ཡོན་ཏན་ཁྱད་པར་ཆེན་པོ་ཅན་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་སངས་རྒྱས་ཐམས་ཅད་སྐྱེད་པའི་ཡུམ་ཡིན། འདི་ནི་དེ་
བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་གཤེགས་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་རྒྱལ་མཚན་འཛུགས་པ་ཡིན། འདི་ནི་དེ་བཞིན་གཤེགས་པ་ཐམས་ཅད་
ཀྱི་ཆོས་ཀྱི་དུང་རབ་ཏུ་འབུད་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གང་ན་ཡིན། འདི་ནི་དེ་བཞིན་གཤེགས་པ་ཐམས་ཅད་ཕམ་པར་བྱེད་ཅིང་འཇོམས་པར་བྱེད་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བ་དམ་པ་ཡིན།
འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་ཆེན་ཡིན། ལག་ན་རྡོ་རྗེ་འདི་ནི་འཛམ་བུའི་གླིང་གི་སེམས་ཅན་ཐམས་ཅད་ཀྱི་ཉོན་མོངས་པ་འདུལ་བ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་སྡིག་པ་འཇིག་པ་ཡིན། འདི་ནི་འཛམ་བུའི་གླིང་གི་སེམས་ཅན་ཐམས་ཅད་

ཀྱི་དམྱལ་བ་ཐམས་ཅད་སྐེམས་པ་ཡིན། ཡི་དགས་ཀྱི་འཇིག་རྟེན་ཟློག་པ་ཡིན། དུད་འགྲོའི་སྐྱེ་གནས་ལས་ཐར་བར་བྱེད་པ་ཡིན་ནོ། །འདི་ནི་འཛམ་བུའི་གླིང་གི་སེམས་ཅན་ཐམས་ཅད་ཀྱི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་
སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་སྐེམས་པར་བྱེད་པ་ཡིན་ནོ། །ལག་ན་རྡོ་རྗེ་འོན་ཀྱང་བསོད་ནམས་ཀྱི་ཕུང་པོ་འབྱུང་བ་ལྷའི་མིག་གིས་བལྟ་བའམ། དེ་བཞིན་གཤེགས་པའི་ཐུགས་ཀྱིས་ཀྱང་བརྗོད་ཀྱིས་མི་ལང་སྟེ།
ཡོན་ཏན་གྱི་ཁྱད་པར་དེ་ལྟར་རྒྱ་ཆེ་ཞིང་དེ་ལྟར་ཟབ་པ། རབ་མཆོག་གྱ་ནོམ་པ་ལ་སོགས་པ་དེ་ལྟར་གོང་ནས་གོང་དུ་རྣམ་པར་འཕྲུལ་པ་ཆེན་པོའི་ཁྱད་པར་དུ་འཕགས་པ་ཡིན་ནོ། །ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བའི་གཟུངས་ཀྱི་ཆོ་ག་ཞིབ་
མོའི་རྒྱལ་པོ་འདི་ནི་སེམས་ཅན་སྐལ་བ་ཆུང་བ་རྣམས་ཀྱི་ལག་ཏུ་འོང་བར་མི་འགྱུར་ཏེ། ཐོས་པར་མི་འགྱུར། བསྙེན་བཀུར་བྱེད་པར་མི་འགྱུར། འཆང་བར་མི་འགྱུར་རོ། །གང་གིས་གང་གཱའི་ཀླུང་གི་བྱེ་མ་དང་མཉམ་པའི་དེ་བཞིན་གཤེགས་པ་རྣམས་མ་མཐོང་བ་དེའི་ལག་
ཏུ་མཆོག་ཏུ་གསང་བ་འདི་འོང་བའམ། ཉན་པའམ། བསྙེན་བཀུར་བྱེད་པའམ། འཛིན་པར་ལྟ་ག་ལ་འགྱུར། ལག་ན་རྡོ་རྗེ་དེ་བཞིན་གཤེགས་པའི་གསང་བ་འདི་ནི་ཤིན་ཏུ་གཏིང་དཔག་དཀའ་སྟེ། ལག་ན་རྡོ་རྗེ་གང་གིས་སངས་རྒྱས་བཅོམ་ལྡན་འདས་ཆུ་བོ་གང་
གཱའི་ཀླུང་བྱེ་བ་ཁྲག་ཁྲིག་བརྒྱ་སྟོང་གི་བྱེ་མ་དང་མཉམ་པ་རྣམས་ལ་བསྐལ་པ་བརྒྱ་སྟོང་དུ་བདེ་བའི་ཡོ་བྱད་ན་བཟའ་དང་། བསོད་སྙོམས་དང་། གཟིམས་མལ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་དང་། བཟའ་བ་དང་། བཅའ་བ་དང་། ཞལ་ཟས་དང་། བཏུང་བ་དང་།
བཅིབས་པ་དང་། ཕོ་བྲང་རྣམས་དེ་བཞིན་གཤེགས་པ་རྣམས་ལ་ཉི་མ་རེ་རེ་འབུལ་ཞིང་། དེ་བཞིན་དུ་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་གྱིས་དེ་ལྟར་དེ་བཞིན་གཤེགས་པ་ཐམས་ཅད་ལ་མཆོད་པ་

བྱེད་པ་དང་། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་བྱུར་བུར་བཀང་སྟེ། ཉི་མ་རེ་རེར་སངས་རྒྱས་ཐམས་ཅད་ལ་དབུལ་བ་ནི་བསོད་ནམས་ཀྱི་ཕུང་པོ་ཆེན་པོ་བསྐྱེད་པ་མ་ཡིན་གྱི། ལག་ན་རྡོ་རྗེ་གང་གིས་དེ་བཞིན་
གཤེགས་པའི་གསང་བ་འདི་ལན་ཅིག་བཟླས་བརྗོད་བྱས་ན་བསོད་ནམས་ཀྱི་ཕུང་པོ་ཆེས་མང་པོ་དང་ལྡན་པར་འགྱུར་ཏེ། དེ་བཞིན་གཤེགས་པ་ཐམས་ཅད་ཀྱིས་ཀྱང་བརྗོད་ཀྱིས་མི་ལང་ངོ་། །གང་གིས་དེ་བཞིན་གཤེགས་པའི་གསང་བའི་གཟུངས་ཀྱི་རྒྱལ་པོ་འདི་ལན་ཅིག་དྲན་པར་
གྱུར་ན། དེ་གོང་དུ་བཤད་པའི་ཡོན་ཏན་གྱི་ཁྱད་པར་ཡོངས་སུ་བསྒྲགས་པས་དེ་བཞིན་གཤེགས་པ་ཐམས་ཅད་མཆོད་པར་འགྱུར། མཁོ་བའི་ཡོ་བྱད་ཁྱད་པར་དུ་འཕགས་པ་ཇི་ལྟ་བ་ཐམས་ཅད་ཀྱིས་དེ་བཞིན་གཤེགས་པའི་གསང་བ་རྣམས་ལ་དེ་ལྟར་ཉིན་གཅིག་བཞིན་མཆོད་པར་འགྱུར་
རོ། །དེ་ནས་འཁོར་འདུས་པ་དེ་དག་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་ཀྱིས། ཨ་ལ་ལ་ཞེས་ཅ་ཅོ་དང་། ག་ཞའི་སྒྲ་ཆེར་
བཏོན་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མའོ་སངས་རྒྱས་འབྱུང་བ་དང་མཚུངས་པར་མཆོག་ཏུ་རྙེད་པར་དཀའ་བ་གསང་བ་དམ་པའི་སྙིང་པོ་འཛམ་བུའི་གླིང་དུ་བཞག་ལགས་སོ། །དེ་ནས་ཕྱོགས་བཅུའི་དེ་བཞིན་
གཤེགས་པ་ཐམས་ཅད་ཀྱིས་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ནས། རང་རང་གི་སངས་རྒྱས་ཀྱི་ཞིང་རྣམས་སུ་གཤེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡང་རྫུ་འཕྲུལ་གྱི་ཆོ་འཕྲུལ་ཆེན་པོས་མི་མཇེད་ཀྱི་འཇིག་རྟེན་གྱི་ཁམས་སུ་གཤེགས་སོ། །འཕགས་
པ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་སྟེ་བདུན་པ་རྫོགས་སོ།། །།རྒྱ་གར་གྱི་མཁན་པོ་བིདྱཱ་གརྦྷ་པྲ་བྷ་དང་། ལོཙྪ་བ་བནྡེ་དཔལ་གྱི་ལྷུན་པོས་བསྒྱུར། རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ཞུ་ཆེན་

གྱི་ལོ་ཙྪ་བ་བནྡེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། ཨཱརྱ་པུཥྤ་ཀཱུ་ཊ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་མེ་ཏོག་བརྩེགས་པ་ཞེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཚོ་ཆེན་པོ་མ་དྲོས་པ་ན། ཀླུའི་རྒྱལ་པོ་མ་དྲོས་པའི་ཁང་པ་ན། དགེ་སློང་ལྔ་བརྒྱའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའི་
ཚོགས་ཆེན་པོ་འཇིག་རྟེན་གྱི་ཁམས་གཞན་དང་གཞན་དག་ནས་འདུས་པ། བྱང་ཆུབ་སེམས་དཔའ་སྟོང་དུ་ཚང་བ། ཐམས་ཅད་ཀྱང་གཟུངས་ཐོབ་པ། ཏིང་ངེ་འཛིན་ཐོབ་པ། སྐྱེ་བ་གཅིག་གིས་ཐོགས་པ། ས་བཅུ་ལ་རབ་ཏུ་གནས་པ། དེ་མ་ཐག་ཏུ་རྒྱལ་ཚབ་ཏུ་དབང་བསྐུར་བས་
དབང་བསྐུར་བ། གོ་ཆ་ཆེན་པོ་བགོས་པ། སངས་རྒྱས་ཀྱི་ཡོན་ཏན་ཐམས་ཅད་ལ་ཐེ་ཚོམ་མེད་པ་ཤ་སྟག་དང་ཡང་ཐབས་ཅིག་གོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་རྣམ་པར་རྩེ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་སེང་གེ་རྣམ་པར་རྩེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་གིས་དེ་བཞིན་གཤེགས་པ་ལ་མཆོད་པ་བགྱིས་ན་དེའི་བསོད་ནམས་ཇི་སྙེད་ཅིག་བསྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་
རྣམ་པར་རྩེ་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་གིས་དེ་བཞིན་གཤེགས་པ་ལ་མཆོད་པ་བགྱིས་ན་དེའི་བསོད་ནམས་ཇི་སྙེད་ཅིག་བསྐྱེད་པར་འགྱུར་ཞེས་སེང་གེ་རྣམ་པར་རྩེ་ཁྱོད་དེ་སྐད་མ་ཟེར་ཅིག །དེ་ཅིའི་ཕྱིར་

ཞེ་ན། དེ་བཞིན་གཤེགས་པ་ནི་ཚུལ་ཁྲིམས་དཔག་ཏུ་མེད་པ། ཏིང་ངེ་འཛིན་དཔག་ཏུ་མེད་པ། ཤེས་རབ་དཔག་ཏུ་མེད་པ། རྣམ་པར་གྲོལ་དཔག་ཏུ་མེད་པ། རྣམ་པར་གྲོལ་བའི་ཡེ་ཤེས་མཐོང་བ་དཔག་ཏུ་མེད་པ་སྟེ། སེང་གེ་རྣམ་པར་རྩེ་གང་གི་ཕྱིར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་ཚོགས་དཔག་ཏུ་མེད་པ་དང་ལྡན་པ་དེའི་ཕྱིར་དེ་ལ་མཆོད་པའི་རྣམ་པར་སྨིན་པ་དེ་ཡང་དཔག་ཏུ་མེད་པར་ཤེས་པར་བྱའོ། །སེང་གེ་རྣམ་པར་རྩེ་གང་ལ་ལ་དག་དེ་བཞིན་གཤེགས་པ་བཞུགས་ཀྱང་རུང་། ཡོངས་སུ་
མྱ་ངན་ལས་འདས་ཀྱང་རུང་སྟེ། མཆོད་པ་བྱེད་པ་དེ་དག་ཐམས་ཅད་ནི་འདི་ལྟ་སྟེ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོའམ། ཐེག་པ་གསུམ་ལས་ཐེག་པ་གཅིག་གིས་ཡོངས་སུ་མྱ་ངན་ལས་འདའ་བར་འགྱུར་རོ། །སེང་གེ་རྣམ་པར་
རྩེ་ཡང་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་ནས་སེམས་དད་པར་གྱུར་ལ། དད་པའི་སེམས་ཀྱིས་རྙེད་པ་དང་། ན་བཟའ་དང་། ཞལ་ཟས་དང་། གཟིམས་ཆ་དང་། སྙུན་གྱི་གསོས་སྨན་དང་། ཡོ་བྱད་དང་། བདེ་བར་
སྦྱར་བ་ཐམས་ཅད་ཀྱིས་བསྟི་སྟང་དུ་བྱས་ཤིང་། རི་མོར་བྱས་ཏེ་མཆོད་ཅིང་རྗེད་ལ། རིམ་གྲོར་བྱས་པ་དང་། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་གྱི་མཆོད་རྟེན་ལ་མཆོད་པ་བྱས་པའི་རྣམ་པར་སྨིན་པ་མཉམ་པར་ཤེས་པར་བྱ་སྟེ།
བྱེ་བྲག་གམ་ཐ་དད་དུ་བྱ་བ་མེད་དོ། །སེང་གེ་རྣམ་པར་རྩེ་བྱང་ཆུབ་སེམས་དཔའ་ཁྱིམ་པ་གང་ཞིག་གིས་ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་རིན་པོ་ཆེའི་ཕུང་པོ་རི་རབ་ཙམ་དབུལ་བར་ཕུལ་བ་
བས་བྱང་ཆུབ་སེམས་དཔའ་གང་རབ་ཏུ་བྱུང་ནས་ཀཱརྵཱ་པ་ཎ་གཅིག་ཙམ་དབུལ་བར་ཕུལ་ལ། ཕུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ན། དགེ་བའི་རྩ་བ་སྔ་མ་དེས་དགེ་བའི་རྩ་བ་ཕྱི་མའི་བརྒྱའི་ཆར་ཡང་ཉེ་བར་མི་འགྲོ། །སྟོང་གི་ཆ་དང་། འབུམ་

གྱི་ཆ་དང་། གྲངས་དང་། ཆ་དང་། བགྲང་བ་དང་། བསྐྲུན་པ་དང་། རྒྱུར་ཡང་ཉེ་བར་མི་འགྲོ་བ་ནས་དཔེའི་བར་དུ་ཡང་མི་བཟོད་དོ། །སེང་གེ་རྣམ་པར་རྩེ་གང་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ལོ་གཅིག་གམ། ལོ་བརྒྱའམ།
ལོ་སྟོང་ཡང་རུང་སྟེ། བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང་། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་ལ་བྱང་ཆུབ་ཀྱི་སེམས་ཀྱིས་ཡང་དག་པར་ཟིན་པས་དེ་བཞིན་གཤེགས་པ་མཆོད་པའི་ཕྱིར་མེ་ཏོག་འགའ་
འབུལ་ལམ། ཆུ་སྙིམ་པ་གང་ཙམ་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་ཉལ་ཉིལ་འཕྱག་གམ། བྱུག་པ་འབུལ་ལམ། སྦོས་འབུལ་ལམ། མེ་ཏོག་འབུལ་ལམ། བདུག་སྤོས་འབུལ་ལམ། ཕྲེང་བ་འབུལ་ལམ། རོལ་མོའི་སིལ་སྙན་འབུལ་
ལམ། གདུགས་འབུལ་ལམ། དྲིལ་བུ་འབུལ་ལམ། དབྱངས་པ་འབུལ་ལམ། རྒྱལ་མཚན་འབུལ་ལམ། བ་དན་འབུལ་ལམ། དར་འབུལ་ལམ། མར་མེ་འབུལ་ཞིང་། ཕུལ་ནས་དགའ་བའི་སེམས་ཀྱིས་གོམ་པའི་གར་སྟབས་འགའ་བོར་ཏེ། སངས་རྒྱས་བཅོམ་
ལྡན་འདས་དེ་ལ་ཕྱག་འཚལ་ལོ་ཞེས་སྨྲ་བ་དེ་དག་ནི། སེང་གེ་རྣམ་པར་རྩེ་བསྐལ་པར་རམ། བསྐལ་པ་བརྒྱའམ། བསྐལ་པ་སྟོང་དུའམ། བསྐལ་པ་འབུམ་དུ་ཡང་ངན་འགྲོ་ལོག་པར་ལྟུང་བར་འགྲོ་བར་འགྱུར་བ་དེའི་གནས་མེད་དེ། འདི་ལ་དོགས་པའམ། ཡིད་གཉིས་
སམ། ཐེ་ཙོམ་ཟ་བར་མི་བྱའོ། །སེང་གེ་རྣམ་པར་རྩེ་མེ་ཏོག་བརྩེགས་པ་ཞེས་བྱ་བའི་གཟུངས་ཡོད་ཀྱིས་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མིའི་སྐྱེ་བོ་ཕལ་པོ་ཆེའི་དོན་དང་། ཕན་པ་དང་། བདེ་བའི་ཕྱིར་དེ་
བཤད་པར་བྱའོ། །སེང་གེ་རྣམ་པར་རྩེ་གང་ལ་ལ་ཞིག་མེ་ཏོག་བརྩེགས་པའི་གཟུངས་འདི་འཛིན་ཏམ། འཆང་དམ། ཀློག་གམ། ཡིད་ལ་བྱེད་དམ། ཀུན་ཆུབ་པར་བྱེད་དམ། གཞན་དག་ལ་ཡང་རྒྱ་ཆེར་ཡང་དག་པར་འཆད་པ་དེ་རྟག་ཏུ་ཚེ་རབས་དྲན་པར་འགྱུར། དེ་

ངན་འགྲོ་ལོག་པར་ལྟུང་བར་མི་འགྱུར། དལ་བ་རྙེད་པར་འགྱུར། ནམ་དུ་ཡང་དཀོན་མཆོག་གསུམ་དང་མི་འབྲལ་བར་འགྱུར། ནམ་དུ་ཡང་དེ་བཞིན་གཤེགས་པ་དང་མི་འབྲལ་བར་འགྱུར། ནམ་དུ་ཡང་སངས་རྒྱས་རྗེས་སུ་དྲན་པ་དང་མི་འབྲལ་བར་འགྱུར།
ནམ་དུ་ཡང་བྱང་ཆུབ་སེམས་དཔའ་དང་མི་འབྲལ་བར་འགྱུར། ནམ་དུ་ཡང་བྱང་ཆུབ་ཀྱི་སེམས་དང་མི་འབྲལ་བར་འགྱུར། ནམ་དུ་ཡང་དབང་པོ་མ་ཚང་བར་མི་འགྱུར། ནམ་དུ་ཡང་རིགས་དམའ་བར་སྐྱེ་བར་མི་འགྱུར། སྤོབས་པ་སྣ་ཚོགས་ཟབ་མོ་ཕུན་སུམ་ཚོགས་པར་འགྱུར།
ཕྱོགས་བཅུའི་འཇིག་རྟེན་གྱི་ཁམས་གྲངས་མེད་པ་དག་གི་སངས་རྒྱས་བཅོམ་ལྡན་འདས་རྣམས་མཐོང་བར་འགྱུར་རོ། །ཏདྱ་ཐཱ། དྷཱ་ར་ཎཱི། དྷཱ་ར་ཎཱི། མུ་ནི་པྲ་བྷ་སྭ་རེ། སིདྡྷེ་ཙཎྜེ་ནཱ་མཙི་ནིརྷིརི། ཨ་རོ་ག་བ་ཏི། བུདྡྷ་མ་ཏི་དྷཻརྱེ། ཨོྃ་ཀ་ར་ཏེ། ག་ག་ར་ཏེ། རཱ་ཛཱ་བ་ཏི། ཏེ་ཛོ་
བ་ཏི། བི་པུ་ལ་བུདྡྷེ། དྷརྨ་ཨ་བ་བྷཱ་སེ། ཨཀྵ་ཡ་ཀལྦེ། ཀལྤ་བ་ཏི། ཨ་མྲྀ་ཏ་ཀལྦེ་ཧཱུ་ཏཱ་ཤ་ནེ། ཏེ་ཛོ་བ་ཏི། ནིརྱ་སི་ཧི་ཏེ། ཏེ་ཛོ་གྲ་བྷཱ། ཏིཥྠི་ན་དྲ་ཡ་ཏིཥྛཱི་ན་དྲ་ཡེ་བུདྡྷི་སྭཱ་ཧཱ། སེང་གེ་རྣམ་པར་རྩེ་གང་ལ་ལ་ཞིག་གིས་མེ་ཏོག་བརྩེགས་པའི་གཟུངས་འདིའི་མིང་དང་། ཡི་གེ་
དང་། ཚིག་མཐའ་དག་ཤེས་ཏེ། ཀུན་ཆུབ་པར་བྱེད་པ་དེས་དཔྱིད་ཟླ་ཐ་ཆུངས་དང་། དབྱར་ཟླ་ར་བ་དང་། སྟོན་ཟླ་ཐ་ཆུངས་ཀྱི་ཡར་ངོའི་ཚེས་བརྒྱད་ནས་བཟུང་ལ་བཅྭ་ལྔའི་བར་དུ་སངས་རྒྱས་རྗེས་སུ་དྲན་པ་བསྒོམ་པར་བྱ་སྟེ། ཉིན་ལན་གསུམ་མཚན་ལན་གསུམ་བསམ་ཞིང་། དེ་
བཞིན་གཤེགས་པ་རྩེ་གཅིག་ཏུ་ཡིད་ལ་བྱས་ལ། བཅོམ་ལྡན་འདས་ལ་སྤོས་དང་། མེ་ཏོག་དང་། མར་མེ་དང་། བདུག་སྤོས་ཀྱིས་མཆོད་ན་སངས་རྒྱས་བཅོམ་ལྡན་འདས་པདྨའི་སྙིང་པོའི་སེང་གེའི་ཁྲི་ལ་བཞུགས་ཤིང་ཆོས་ཀྱང་སྟོན་པ་བཅོ་ལྔ་མཐོང་བར་འགྱུར་རོ། །གཟུངས་
རབ་ཏུ་ཐོབ་པར་འགྱུར། དྲན་པ་དང་ལྡན་པར་འགྱུར། བློ་གྲོས་དང་ལྡན་པར་འགྱུར། རྟོགས་པ་དང་ལྡན་པར་འགྱུར། བློ་དང་ལྡན་པར་འགྱུར། ཡོངས་སུ་མྱ་ངན་ལས་འདའ་བའི་བར་དུ་ཚེ་རབས་དྲན་པར་འགྱུར་རོ། །ཐོས་པ་ཐམས་ཅད་དང་། བསྟན་བཅོས་ཐམས་ཅད་དང་།

བཟོ་ཐམས་ཅད་དང་། ལས་ཐམས་ཅད་རབ་ཏུ་ཤེས་པར་འགྱུར། ཏིང་ངེ་འཛིན་ཐམས་ཅད་ཀྱང་དེའི་སེམས་ལས་རྣམ་པར་དག་པར་འགྱུར་ཏེ་འཕགས་པའི་བདེན་པ་བཞི་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཆོས་དེ་དག་ནི་ཟག་པ་མེད་པར་གཏོགས་པའི་ཕྱིར་རོ། །བཅོམ་ལྡན་
འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་རྣམ་པར་རྩེ་དང་། བྱང་ཆུབ་སེམས་དཔའ་དེ་དག་དང་། དགེ་སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་
འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་མེ་ཏོག་བརྩེགས་པ་ཞེས་བྱ་བའི་གཟུངས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་མ་ཧཱ་མ་ཧཱི་ནྡྲ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སའི་དབང་པོ་ཆེན་པོ་ཞེས་བྱ་བའི་
གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་འོད་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུའི་གནས་ལྷ་དང་
ལྡན་པ་ན་བཞུགས་ཏེ། དེ་ནས་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་འོད་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་འོད་ཀྱི་ཞབས་ལ་མགོ་བོས་
ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འདུག་ནས་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་འོད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ལགས་ན། གང་གིས་བདག་སྐྱེ་བ་དྲན་པར་འགྱུར། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་བརྗེད་པར་མི་འགྱུར་བའི་ཐབས་དེ་བཅོམ་ལྡན་འདས་ཀྱིས་བདག་ལ་ལེགས་པར་བཤད་དུ་གསོལ། དེ་སྐད་ཅེས་

གསོལ་པ་དང་། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་འོད་ཀྱིས་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་བུ་ཁྱོད་གལ་ཏེ་དེ་ལྟར་སྨོན་ན་དེའི་ཕྱིར་ཀུན་དུ་འོད་ཀྱི་རིག་སྔགས་ཀྱི་
སྙིང་པོ་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཀུན་དུ་འོད་ཀྱི་རིག་སྔགས་ཀྱི་སྙིང་པོ་གང་ཞེ་ན། ཏདྱ་ཐཱ། ཨ་མོ་ད་ནི། པྲ་མོ་ད་ནི། བི་མོ་ད་ནི། སཾ་མོ་ད་ནི། པྲི་ཡཾ་ཀ་ར་ཎི། ཤྲཱི་ཀ་ར་ཎི། ཤྲཱ་ཀ་ར་ཎི། བོ་དྷི་ཀ་ར་ཎི། ཨ་ནུཏྟ་རསྱཾ་སམྱཀྶཾ་བུདྡྷ་ཀ་
ར་ཎི། ཨ་ནུཏྟ་ར་ཨཱརྱ་ཀ་ར་ཎི། ཨ་ནུཏྟ་ར་པྲཛྙཱ་ཀ་ར་ཎི། ཨ་ནུཏྟ་ར་བ་ཤཱི་ཀ་ར་ཎི། ཨ་ནུནྟ་ར་སརྦ་ཀླེ་ཤོ་པ་ཀླེ་ཤ་བི་དྷཱ་ར་ཎི། ཨ་པ་དྱཱ་ན་དྷ་ཀ་ར་བིདྷ་མ་ནི། ཨ་ནུཏྟ་ར་བིདྱཱ་ཨ་ལོ་ཀོཏྤཱ་ད་ནི། ཨ་ནུཏྟ་ཤཻ་ཀྵ་ཤཱི་ལ་བིདྱཱ་ཙ་ར་ཎ། བི་མུཀྟི་གུ་ཎ་ག་ཎ། སཾ་བྷ་དྷ་ནི། ཨུ་ནུཏྟ་ར་
སརྦ་ཀུ་ཤ་ལ། མཱུ་ལོ་དྦྷོ་ད་ནི། ཨ་ནུ་ཏྟ་རི་བྷོ་ན་མཱུ་ལ་ནི། ཨ་ནུཏྟ་དཱ་ར་ག་དོ་ཥ། མོ་ཧ་ན་མཱུ་ལ་ནི། ཨ་ནུཏྟ་ར་ཤཻཀྵ་མ་ན། ཨ་བིདྱཱ། ཨནྟ་ཀ་རཱ་བིདྷ་མ་ནི། ཨ་ནུཏྟ་རཱ་སཱི་ཨ་པྲ་ཏི་ཧ་ཏ་བ་ལ་ཙཀྲ། ཨ་ནུཏྟ་རཱ་སརྦ་ལཱ་ར་བ་བི་དྲཱ་མ་ནི། ཏྭཾ་ཧི་བྷ་དྲེ། ཨ་ནུཏྟ་
རཱ་བ་ལ་བྷ་དྲ། སུ་བྷ་དྲ། ཤྲཱི་བྷ་དྲ། ཨ་ནུཏྟ་ར་བྷ་དྲ། ས་མནྟ་བྷ་དྲ། ཨ་ས་མ་ས་མ་བྷ་དྲ། ཨ་ནུཏྟ་ར་མ་ཧཱ་པུ་རུ་ཥ་བྷ་དྲ། ཨ་ནུཏྟ་ར་མ་ཧཱ་པུ་རུ་ཥ་སེ་པི་ཏཱ། ཨ་ནུཏྟ་ར་མ་ཧཱ་པུ་རུ་ཥ་ཨ་ནུ་བརྟ་ནཱི། ཨ་ནུཏྟ་ར་མ་ཧཱ་པུ་རུ་ཥ་དྷརྨ་དེ་ཤི་ཀཱ །ཨ་ནུཏྟ་ར་མ་ཧཱ་པུ་རུ་ཥ། དྷརྨ་ཀོ་ཥ།
སྃ་བཱརྡྷི་ཀཱ། ཨ་ནུཏྟ་ར་མ་ཧཱ་བུ་རུ་ཥ་ནིརྦཱ་ཎ། ཨ་ནུཏྟ་པྲ་ཏརྵི་ཀྵ། ཏྭཾ་ཧི་བྷ་དྲེ། གང་གཱ་སི་ཏ་པཀྵུ། སམྱཀྶཾ་བུདྡྷེ་ཨཱ་སེ་བི་ཏཱ། བྷཱ་བི་ཏཱ་བ་ཧུ་ལཱི་ཀྲོ་དྷ། སྟུ་ཏ། སྟཽ་བི་ཏ་བརྞི་ཏཱ་པྲ་ཤ་སྟ། བུ་འདི་ནི་ཀུན་དུ་འོད་ཀྱི་རིག་སྔགས་ཀྱི་སྙིང་པོ་ཡིན་ཏེ། དེ་བས་ན་བུ་ཁྱེད་ཀྱིས་ཀུན་དུ་
འོད་ཀྱི་རིག་སྔགས་ཀྱི་སྙིང་པོ་འདི་འགྲོ་བ་དང་། འགྲེང་བ་དང་། འདུག་པ་དང་། ཉལ་བ་ན་ཡང་ཡིད་ལ་གྱིས་ཤིག །བུ་གང་ལ་ལ་ཞིག་ཀུན་དུ་འོད་ཀྱི་རིག་སྔགས་ཀྱི་སྙིང་པོ་འདི་མིང་དང་། རིགས་དང་། རིགས་ཀྱི་བྱེ་བྲག་གང་ཡིད་ལ་བྱེད་དམ། སྐྱེས་པའམ། བུད་མེད་

དམ། ཁྱེའུ་འམ། བུ་མོའམ། ལྷའམ། ལྷ་མོའམ། ཀླུའམ། ཀླུ་མོའམ། དྲི་ཟའམ། དྲི་ཟ་མོའམ། ལྷ་མ་ཡིན་ནམ། ལྷ་མ་ཡིན་མོའམ། མིའམ་ཅིའམ། མིའམ་ཅི་མོའམ། ལྟོ་འཕྱེ་ཆེན་པོའམ། ལྟོ་འཕྱེ་ཆེན་མོའམ། ཡི་དགས་སམ།
ཡི་དགས་མོའམ། ཤ་ཟའམ། ཤ་ཟ་མོའམ། གྲུལ་བུམ་མམ། གྲུལ་བུམ་མོའམ། ལུས་སྲུལ་པོའམ། ལུས་སྲུལ་མོའམ། ཀུན་དུ་འོད་ཀྱི་རིག་སྔགས་ཀྱི་སྙིང་པོ་འདི་འཆང་ངམ། ཀློག་གམ། ལུང་འབོག་གམ། སྟོན་ཏམ། འཆད་ན་དེ་ཚེ་རབས་བདུན་གྱི་
བར་དུ་ཚེ་རབས་དྲན་པར་འགྱུར་རོ། །དེ་ཇི་སྲིད་འཁོར་གྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་མི་བརྗེད་པར་འགྱུར་རོ། །ལྷར་གྱུར་ཀྱང་རུང་མིར་གྱུར་ཀྱང་རུང་སྟེ། དེ་མཚོན་ཆའམ། དུག་གམ། ཆུའམ། མེས་བར་མ་དོར་འཆི་བའི་དུས་བྱེད་པར་
མི་འགྱུར་རོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་དུ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་མཐའ་ཡས་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་
ལྡན་འདས་ཡང་དག་པར་རྫོགས་པའི་སངས་རྒྱས་འཆི་མེད་འོད་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་ཆེན་པོ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་
པར་རྫོགས་པའི་སངས་རྒྱས་འོད་མཉམ་པ་མེད་པ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་མི་མཉམ་པ་དང་མཉམ་པ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་
དག་པར་རྫོགས་པའི་སངས་རྒྱས་དྲང་སྲོང་ཆེན་པོ་འོད་སྲུང་གི་རིགས་དང་བཅས་པ་བདུན་པོ་དེ་དག་ལ་ཕྱག་འཚལ་ལོ། །ཞི་བའི་དབྱིངས་སུ་ཞུགས་པ་འཁོར་དང་བཅས་པ་རྣམས་ལ་ཕྱག་འཚལ་ལོ། །ཕྱག་འཚལ་ལོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྲམ་ཟེ་སའི་

དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སའི་དབང་པོ་ཆེན་པོ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་
ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། ༄༅༅། །རྒྱ་གར་སྐད་དུ། ཨཱརྱ་མ་ཧཱ་དྷཱ་ར་ཎཱི། བོད་སྐད་དུ། འཕགས་པ་གཟུངས་ཆེན་པོ། སངས་རྒྱས་དང་། བྱང་ཆུབ་སེམས་
དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་
ཏེ། དེའི་ཚེ་ན་ཚེ་དང་ལྡན་པ་ཀུན་དགའ་བོ་གྲོང་ཁྱེར་གནས་བཅས་སུ་དབྱར་གནས་དབྱར་ཟླ་བ་གསུམ་འདས་པ་དང་ཆོས་གོས་བྱས་ཏེ། ཆོས་གོས་ཟིན་ནས་ལྷུང་བཟེད་དང་ཆས་གོས་ཐོགས་ཏེ། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་
ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་སེམས་ཅན་ཐམས་ཅད་ཀྱི་དོན་དང་། ཕན་པ་དང་། བདེ་བ་དང་། སྟོབས་
དང་། གཟི་བརྗིད་ཀྱི་ཕྱིར་གཟུངས་ཆེན་པོའི་གསང་སྔགས་གཞི་འདི་དག་ཟུང་ཤིག །ཆོངས་ཤིག །ལོང་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཡིད་ལ་ཟུང་ཤིག །དེ་ཅིའི་ཕྱིར་ཞེ་ན། ཀུན་དགའ་བོ་གཟུངས་ཆེན་པོའི་གསང་སྔགས་གཞི་
རྣམས་ནི་རྙེད་པར་དཀའ་ཞིང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་ཡང་རྙེད་པར་དཀའ་བའི་ཕྱིར་ཏེ། དཔེར་ན་ཨུ་དུམ་བཱ་རའི་མེ་ཏོག་ལྟ་བུ་ཡིན་གྱིས། ཟུང་ཤིག །ཆོངས་ཤིག །ལོང་ཤིག །

ལྷོགས་ཤིག །ཡིད་ལ་ཟུངས་ཤིག །ཀུན་ཆུབ་པར་གྱིས་ཤིག །ཀུན་དགའ་བོ་དད་པའི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཆེན་པོའི་གསང་སྔགས་ཀྱི་གཞི་འདི་དག་འཆང་ངམ། འཛིན་ཏམ། ཀློག་གམ། ཡིད་ལ་འཛིན་ཏམ། ཀུན་
ཆུབ་བར་བྱེད་ན་དེ་མཚོན་གྱིས་འཆི་བའི་དུས་བྱེད་པར་མི་འགྱུར། དུག་གིས་མ་ཡིན། མེས་མ་ཡིན། ཆུས་མ་ཡིན། རྒྱལ་པོས་ཆད་པས་མ་ཡིན་ཏེ། དུས་མ་ཡིན་པར་འཆི་བའི་དུས་བྱེད་པར་མི་འགྱུར་རོ། །དེ་ལྷ་དང་། ལྷ་མ་ཡིན་དང་། ཀླུ་དང་། རླུང་ལྷ་
དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། སྲུལ་པོ་དང་། ལུས་སྲུལ་པོ་དང་། འབྱུང་པོ་དང་། བརྗེད་བྱེད་དང་། སྨྱོ་བྱེད་དང་། གནོན་པོ་
དང་། གྲིབ་གནོན་དང་། གཤེད་བྱེད་དང་། གནོད་བྱེད་དང་། བྱད་ཀྱིས་མི་ཚུགས། དེ་ལ་མི་དང་། མི་མ་ཡིན་པ་རྣམས་ཀྱིས་མི་ཚུགས། དེ་ལ་རིག་པའི་ལས་དང་། ངག་གི་ལས་དང་། ཡིད་ཀྱི་ལས་ཀྱིས་མི་ཚུགས། དེ་ལ་རིམས་ཉིན་གཅིག་པ་དང་། ཉིན་གཉིས་
པ་དང་། ཉིན་གསུམ་པ་དང་། ཉིན་བཞི་པ་དང་། རྟག་པའི་རིམས་དང་། འབྱུང་པོའི་རིམས་དང་། ཡུད་ཙམ་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་བ་དང་། འདུས་པ་ལས་གྱུར་པས་མི་ཚུགས་པར་འགྱུར་རོ། །དེ་ལ་
གཟུངས་ཆེན་པོའི་གསང་སྔགས་གཞི་ནི་འདི་རྣམས་ཡིན་ནོ། །ཏདྱ་ཐཱ། ཛྭ་ལེ། མ་ཧཱ་ཛྭ་ལེ། ཛྭ་ལ་ནེ། མ་ཧཱ་ཛྭ་ལ་ནེ། ཏཱ་པ་ནེ། མ་ཧཱ་ཏཱ་པ་ནེ། ཛྭ་ལི་ཏེ། ཨུ་ཀ་ཀེ །བུ་ག་གེ །སཾ་བྷ་དེ། མ་ཧཱ་སཾ་བྷ་དེ། ཙཀྲེ། མ་ཧཱ་ཙཀྲེ། བདག་དང་སེམས་ཅན་ཐམས་ཅད་
འཇིགས་པ་ཐམས་ཅད་དང་། གནོད་པ་དང་། ནད་འགོ་བ་ཐམས་ཅད་ལས་སྲུངས་ཤིག་སྲུངས་ཤིག་སྭཱ་ཧཱ། ཀུན་དགའ་བོ་གཟུངས་ཆེན་པོ་གསང་སྔགས་ཀྱི་གཞི་འདི་དག་ནི་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་ཅུ་རྩ་བདུན་གྱིས་གསུངས་ཏེ། ང་ཡང་ད་ལྟར་

འཆད་ཅིང་རྗེས་སུ་ཡི་རང་ངོ་། །ཀུན་དགའ་བོ་དད་པའི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཆེན་པོའི་གསང་སྔགས་ཀྱི་གཞི་འདི་དག་འཛིན་ཏམ། འཆང་ངམ། ཀློག་གམ། ཡིད་ལ་བྱེད་དམ། ཀུན་ཆུབ་པར་བྱེད་
ན། དེ་ཚེ་རབས་བདུན་གྱི་བར་དུ་ཚེ་རབས་དྲན་པར་འགྱུར་རོ། །དེ་བྱང་ཆུབ་ཀྱི་སེམས་ལས་མི་ལྡོག་པར་འགྱུར་རོ། །དེ་ལ་གཟུངས་ཆེན་པོའི་གསང་སྔགས་ཀྱི་གཞི་ནི་འདི་རྣམས་ཡིན་ནོ། །ཏདྱ་ཐཱ། ཨནྟེ། བནྡྷེ། ཀྵ་མེ། ཀྵ་མ་མེ། དྷཱ་ན་སེ། བ་ད་ནེ། ཨ་ད་ནེ།
ཧུ་ལེ། མ་ཧཱ་ཧུ་ལེ། ཏ་ཀ་རེ་གཾ་བྷཱི་རེ། དུཥྤུ་སྟེ། བདག་དང་སེམས་ཅན་ཐམས་ཅད་འཇིགས་པ་ཐམས་ཅད་དང་། གནོད་པ་དང་། ནད་འགོ་བ་ཐམས་ཅད་ལས་སྲུངས་ཤིག་སྲུངས་ཤིག་སྭཱ་ཧཱ། ཀུན་དགའ་བོ་གཟུངས་ཆེན་པོའི་གསང་སྔགས་ཀྱི་གཞི་འདི་དག་ནི་ཡང་
དག་པར་རྫོགས་པའི་སངས་རྒྱས་བྱེ་བ་ཕྲག་བརྒྱད་ཅུ་རྩ་བརྒྱད་ཀྱིས་གསུངས་ཏེ། ང་ཡང་ད་ལྟ་ན་འཆད་ཅིང་རྗེས་སུ་ཡི་རང་ངོ་། །ཀུན་དགའ་བོ་དད་པའི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཆེན་པོའི་གསང་སྔགས་ཀྱི་གཞི་འདི་དག་འཆང་ངམ། འཛིན་ཏམ།
ཀློག་གམ། ཡིད་ལ་བྱེད་དམ། ཀུན་ཆུབ་པར་བྱེད་ན། དེ་ཚེ་རབས་བཅུ་བཞིའི་བར་དུ་ཚེ་རབས་དྲན་པར་འགྱུར་རོ། །དེ་བྱང་ཆུབ་ཀྱི་སེམས་ལས་མི་ལྡོག་པར་འགྱུར་རོ། །དེ་ལ་གཟུངས་ཆེན་པོའི་གསང་སྔགས་ཀྱི་གཞི་ནི་འདི་རྣམས་ཡིན་ནོ། །ཏདྱ་ཐཱ། ཨཊྚེ། བཊྚེ།
ཨགྒེ། བགྒེ། ཋགྒེ། ཋགྒེ། དྷཀྐེ། དྷཱ་ར་དྷཀྐེ། ཊ་ཀེ་ཊ་ར་ཀེ། ཨ་ཀ་སི། ས་ཀ་སི། མ་ཀ་སི། ཨི་ལི་མི་ལི། ཏི་ལི་མི་ལི། རཽ་ར་བེ། མ་ཧཱ་རཽ་ར་བེ། བྷཱུ་ཏཾ་ག་མེ་བྷཱུ་ཏ་པ་རཱ་ཡ་ཎེ། ཏི་མི་གི་སེ། མ་ཧཱ་ཏི་མི་གེ་སེ། སཾ་བྷཱ་བེ། མ་ཧཱ་སཾ་བྷཱ་བེ། བདག་དང་སེམས་ཅན་ཐམས་ཅད་འཇིགས་
པ་ཐམས་ཅད་དང་། གནོད་པ་ཐམས་ཅད་དང་། ནད་འགོ་བ་ཐམས་ཅད་ལས་སྲུངས་ཤིག་སྲུངས་ཤིག་སྭཱ་ཧཱ། ཀུན་དགའ་བོ་གཟུངས་ཆེན་པོའི་གསང་སྔགས་ཀྱི་གཞི་འདི་དག་ནི་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་ཏེ། ང་ཡང་ད་ལྟ་ན་འཆད་ཅིང་

རྗེས་སུ་ཡི་རང་ངོ་། །ཀུན་དགའ་བོ་དད་པའི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཆེན་པོའི་གསང་སྔགས་ཀྱི་གཞི་འདི་དག་འཆད་པ་དང་། འཛིན་པ་དང་། ཀློག་པ་དང་། ཡིད་ལ་བྱེད་པ་དང་། ཀུན་ཆུབ་པར་བྱེད་པ་དེ་ཚེ་རབས་ཉི་ཤུ་རྩ་གཅིག་གི་
བར་དུ་ཚེ་རབས་དྲན་པར་འགྱུར་རོ། །དེ་བྱང་ཆུབ་ཀྱི་སེམས་ལས་ཕྱིར་ལྡོག་པར་མི་འགྱུར་རོ། །དེ་ལ་གཟུངས་ཆེན་པོའི་གསང་སྔགས་ཀྱི་གཞི་ནི་འདི་རྣམས་ཡིན་ནོ། །ཏདྱ་ཐཱ། རུ་ལེ། མ་ཧཱ་རུ་ལེ། ཧེ་ཧེ་རི། མཏྟ་རི། ཛཾ་བྷ་ནི། སྟཾ་བྷ་ནི། ཀུན་དགའ་བོ་དད་
པའི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཆེན་པོའི་གསང་སྔགས་ཀྱི་གཞི་འདི་དག་གིས་ཤིང་སྐམ་པོ་ལ་བསྲུང་བའམ། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་། བདེ་ལེགས་སུ་འགྱུར་བ་
དང་། ཆད་པ་སྤང་བ་དང་། མཚོན་ཆ་སྤང་བ་དང་། དུག་གཞིལ་བ་དང་། དུག་གསད་པ་དང་། མཚམས་གཅད་པ་དང་། ནམ་མཁའ་བཅིང་བ་དང་། ས་བཅིང་བ་བྱས་ཏེ། དེ་ལ་སྲད་བུས་བཅིངས་ན་དེའི་རྩ་བ་ཡང་སྐྱེ་བར་འགྱུར། ཡལ་ག་དང་། ལོ་
མ་དང་། ལྕུག་མ་དང་། མེ་ཏོག་དང་། འབྲས་བུ་ཡང་སྐྱེ་བར་འགྱུར་ན་རྣམ་པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས་ཏེ། ཀུན་དགའ་བོ་སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །ཀུན་དགའ་བོ་ཉི་ཟླ་འདི་ལྟར་རྫུ་འཕྲུལ་ཆེ་བ། འདི་ལྟར་
མཐུ་ཆེ་བ། འདི་ལྟར་དབང་ཆེ་བར་གྲགས་པ་འདི་གཉིས་ནི་ས་ལ་ལྟུང་ཡང་སྲིད་དོ། །ཀུན་དགའ་བོ་རིའི་རྒྱལ་པོ་རི་རབ་གནས་ནས་གཡོ་ཡང་སྲིད་དོ། །ཀུན་དགའ་བོ་རྒྱ་མཚོ་ཆེན་པོ་འདི་ལྟར་ཟབ་པ། འདི་ལྟར་རྒྱ་ཆེ་ལ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་བཞི་པོ་འདི་དག་ནི་
སྐམས་ཤིང་ཡོངས་སུ་ཟད་དེ་མཐར་ཐུག་པར་འགྱུར་ཡང་སྲིད་དོ། །ཀུན་དགའ་བོ་ས་ཆེན་པོ་འདི་ནི་རྣམ་པ་སྟོང་དུ་འགྱེས་ཀྱང་སྲིད། ཆུ་ནི་གཤེར་བ་ཉིད་འདོར་ཡང་སྲིད། མེ་ནི་ཚ་བ་འདོར་བ་ཡང་སྲིད། རླུང་ནི་གྲང་བ་འདོར་ཡང་སྲིད་ཀྱི། གཟུངས་ཆེན་པོའི་གསང་

སྔགས་ཀྱི་གཞི་འདི་དག་ནི་སླུ་མི་སྲིད་དོ། །ཀུན་དགའ་བོ་ལྷའམ། ཀླུའམ། ལྷ་མ་ཡིན་ནམ། ནམ་མཁའ་ལྡིང་ངམ། རླུང་ལྷའམ། དྲི་ཟའམ། མིའམ་ཅིའམ། ལྟོ་འཕྱེ་ཆེན་པོའམ། གནོད་སྦྱིན་ནམ། སྲིན་པོའམ། ཡི་དགས་
སམ། ཤ་ཟའམ། གྲུལ་བུམ་མམ། སྲུལ་པོའམ། ལུས་སྲུལ་པོའམ། འབྱུང་པོའམ། བྲམ་ཟེའམ། སྲིན་པོའམ། གྲིབ་གནོན་ནམ། མི་དང་། མི་མ་ཡིན་པ་གང་ལ་ལ་ཞིག་གམ། གཞན་སུ་ཡང་རུང་བ་ཞིག་གིས་གཟུངས་ཆེན་པོའི་གསང་སྔགས་
ཀྱི་གཞི་འདི་དག་ལས་འགལ་བར་བྱེད་ན། ཏདྱ་ཐཱ། ཨགྒི་ལེ། ཙགྒི་ལེ། བལླེ། མལླེ། ཨོ་ཧཱ་ནི། མོ་ཧཱ་ནི། ཛཾ་བྷ་ནི། སྟཾ་བྷ་ནི། བདག་དང་སེམས་ཅན་ཐམས་ཅད་ལ་སྲུངས་ཤིག་སྲུངས་ཤིག་སྭཱ་ཧཱ། རྒྱལ་པོ་ཆེན་པོ་ཡུལ་འཁོར་སྲུང་ཡང་ལྕགས་ཀྱི་
འཁོར་ལོ་འབར་བ། རབ་ཏུ་འབར་བ། ཀུན་དུ་རབ་ཏུ་མཆེད་ཅིང་འབར་བ། མེ་ལྕེ་གཅིག་ཏུ་གྱུར་པས་དེའི་མགོ་ཚལ་བ་བདུན་དུ་འགེམས་སོ། །རྒྱལ་པོ་ཆེན་པོ་འཕགས་སྐྱེས་པོ་དང་། མིག་མི་བཟང་དང་། རྣམ་ཐོས་ཀྱི་བུ་ཡང་ལྕགས་ཀྱི་འཁོར་ལོ་འབར་བ། རབ་
ཏུ་འབར་བ་ཀུན་དུ་རབ་ཏུ་མཆེད་ཅིང་འབར་བ་མེ་ལྕེ་གཅིག་ཏུ་གྱུར་པས་དེའི་མགོ་ཚལ་བ་བདུན་དུ་འགེམས་སོ། །ལྷའི་དབང་པོ་བརྒྱ་བྱིན་ཡང་རྡོ་རྗེ་འཕེན་ཏོ། །གསང་བ་པའི་བདག་པོ་ལག་ན་རྡོ་རྗེ་ཡང་རྡོ་རྗེ་འབར་བ། རབ་ཏུ་འབར་བ། ཀུན་དུ་རབ་ཏུ་མཆེད་ཅིང་འབར་
བ། མེ་ལྕེ་གཅིག་ཏུ་གྱུར་པས་དེའི་མགོ་ཚལ་པ་བདུན་དུ་འགེམས་སོ། །དེ་རྒྱལ་པོའི་ཕོ་བྲང་ལྕང་ལོ་ཅན་དུ་གནས་སུ་མི་དབང་སྟེ། དེའི་མགོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།
ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་གཟུངས་ཆེན་པོ་རྫོགས་སོ།། །།རྒྱ་གར་གྱི་མཁན་

པོ་ཛི་ནི་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། ༄༅༅། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་
ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕྱག་འཚལ་ལོ། །དེ་རྣམས་ལ་ཕྱག་འཚལ་ནས་རིག་པ་འདི་འཛིན་གྱིས་རིག་པ་འདི་བདག་ལ་གྲུབ་པར་གྱུར་ཅིག །ཏདྱ་ཐཱ། ཧ་ན་ཧ་ན་སྭཱ་ནི། ན་བ་སཱ་ནི།
ཛྭ་ལ་ཛྭ་ལ་ནེ། ཙ་ལ་ཙ་ལ་ནེ། པུརྦོ། ཡོ་ག་མ་ནུ་སྨ་ར་ཕཊ། མ་ཧཱ་ཧ་ཏ་ཡ་སྭཱ་ཧཱ། གང་གིས་རིག་པ་འདི་བཀླགས་པ་དེ་ཚེ་རབས་བརྒྱ་སྟོང་དུ་སྐྱེ་བ་དྲན་པར་འགྱུར་རོ། །འདི་ནས་ཤི་འཕོས་ནས་ཀྱང་བདེ་ལྡན་གྱི་འཇིག་རྟེན་དུ་སྐྱེ་བར་འགྱུར་རོ། །བདེ་ལྡན་གྱི་སྙིང་པོ་རྫོགས་
སོ།། ༄༅༅། །རྒྱ་གར་སྐད་དུ། ཨཱརྱ་མཻ་ཏྲི་པྲ་ཏི་ཛྙཱ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་བྱམས་པས་དམ་བཅས་པ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །རྒྱལ་བ་བྱམས་པ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ།
ཨོཾ་ན་མོ་བྷ་ག་བ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུད་དྷཱ་ཡ། ཏདྱ་ཐཱ། ཨོཾ་ཨ་ཛི་ཏེ། ཨ་ཛི་ཏེ། ཨ་པ་རཱ་ཛི་ཏེ། ཨ་ཛི་ཏན་ཛ་ཡ། ཧ་ར་ཧ་ར། མཻ་ཏྲི་ཨ་བ་ལོ་ཀི་ཏེ། ཀ་ར་ཀ་ར། མ་ཧཱ་ས་མ་ཡ་སིདྡྷེ། བྷ་ར་བྷ་ར། མ་ཧཱ་བོ་དྷི་མཎྜ་བཱི་ཛེ། སྨ་ར་སྨ་ར།
ཨཱ་སྨ་ཀཾ་ས་མ་ཡ། བོ་དྷི་བོ་དྷི། མ་ཧཱ་བོ་དྷི་སྭཱ་ཧཱ། རྩ་བའི་གསང་སྔགས་སོ། །ཨོྃ་མོ་ཧི་མོ་ཧི། མ་ཧཱ་མོ་ཧི་སྭཱ་ཧཱ། སྙིང་པོའོ། ཨོྃ་མུ་ནི་མུ་ནི་སྨ་ར་སྭཱ་ཧཱ། ཉེ་བའི་སྙིང་པོའོ། །གཟུངས་འདི་ཉན་པ་ཙམ་དང་། ཀློག་པ་དང་། ཁ་ཏོན་བྱེད་པ་དང་། ཚུལ་བཞིན་ཡིད་ལ་
སེམས་པ་དང་། སྒོམ་པ་ཙམ་གྱིས་གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་གྱུར་པ་ན། བདག་གིས་སེམས་ཅན་དེ་ངེས་པར་བཙལ་བར་བགྱི་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་

བགྱིའོ། །ཐ་ན་དུད་འགྲོའི་སྐྱེ་གནས་སུ་གྱུར་པའི་རི་དགས་དང་། བྱ་རྣམས་ཀྱི་རྣ་ཁུང་དུ་སྒྲོག་པར་བྱེད་ན། དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་འཐོབ་བོ། །འདི་ཐོས་པ་ཙམ་གྱིས་ནམ་དུ་ཡང་ངན་སོང་དུ་འགྲོ་བར་
མི་འགྱུར་རོ། །ངན་སོང་གི་དྲི་མས་མི་གོས་སོ། །མའི་མངལ་དུ་ཡང་མི་སྐྱེའོ། །ལྷའི་བསྐལ་པ་སྟོང་དུ་འཁོར་ལོས་སྒྱུར་བའི་རྒྱལ་པོར་འགྱུར་རོ། །དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་རོ། །ཇི་ལྟར་བསམས་ཤིང་དོན་དུ་གཉེར་བའི་ལོངས་སྤྱོད་འགྲུབ་
པར་འགྱུར་རོ། །བཅོམ་ལྡན་འདས་བདག་གིས་ཀྱང་སེམས་ཅན་དེ་བསྐྱུད་པར་མི་བགྱི་ལགས་སོ། །ངེས་པར་བདག་བྱང་ཆུབ་ཀྱི་སྙིང་པོ་ལ་མཆིས་ནས། དེ་ཇི་ལྟར་གྱུར་ཀྱང་རུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བགྱིའོ། །འཕགས་
པ་བྱམས་པས་དམ་བཅས་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་བཛྲ་པཱ་ཎི་དང་། བོད་ཀྱི་ལོཙྪ་བ། དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
༄༅༅། །རྒྱ་གར་སྐད་དུ། ཨཱརྱ་ཨཱ་པ་ར་ཎ་བི་སྐཾ་བྷི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྒྲིབ་པ་རྣམ་པར་སེལ་བ་ཞེས་བྱ་བའི་གཟུངས། སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །དེ་རྣམས་ལ་
ཕྱག་འཚལ་ནས་འཕགས་པ་སྒྲིབ་པ་རྣམ་པར་སེལ་བའི་གཟུངས་འདི་བརྗོད་པར་བྱའོ། །འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲིབ་པ་རྣམ་པར་སེལ་བའི་སྙིང་པོ་འདི་ལན་བདུན་བརྗོད་ན། ལུས་བརྒྱུད་པའི་
སྡིག་པ་ཐམས་ཅད་འབྱང་ཞིང་འཆི་བའི་དུས་སུ་བདེ་བ་ཉིད་དུ་དུས་བྱེད་པར་འགྱུར་རོ། །ཨོཾ་ཤྭེ་ཏ་ཝ་ར་བི་ཛ་ལི་ནེ་སྭཱ་ཧཱ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་པར་སེལ་བའི་སྙིང་པོ་འདི་ཉིན་ལན་བདུན་མཚན་ལན་བདུན་བརྗོད་ན་ལས་བརྒྱུད་མར་བསགས་པའི་

སྡིག་པ་ཐམས་ཅད་འབྱང་ཞིང་འཆི་བའི་དུས་སུ་གནད་གཅོད་པའི་སྡུག་བསྔལ་དྲག་པོ་མི་འབྱུང་ངོ་། །བདེ་བ་ཉིད་དུ་དུས་བྱེད་པར་འགྱུར་རོ། །ཨོཾ་སརྦ་ཨཱ་བ་ར་ཎ་བི་སྐཾ་བྷི་ནེ་སྭཱ་ཧཱ། སངས་རྒྱས་སྲས་དང་བཅས་པ་དེ་དག་རྣམས་ལ་བཤོས་གཙང་ལ་སོགས་པའི་མཆོད་པས་
ཡང་དག་པར་མཆོད་ན་ཡང་གང་ཟག་དེ་འཆི་བའི་དུས་སུ་ནད་དང་ཟུག་རྔུ་དང་བྲལ་ཏེ། བདེ་བ་ཉིད་དུ་དུས་བྱེད་ཅིང་། ཚེ་འཕོས་ནས་ཀྱང་སུམ་ཅུ་རྩ་གསུམ་མམ། འཐབ་བྲལ་ལམ། དགའ་ལྡན་གྱི་ལྷའི་ནང་དུ་སྐྱེ་ཞིང་། བདེ་བ་ཉིད་དུ་འཚོ་བར་འགྱུར་རོ། །དགེ་སློང་
ཕ་དང་དགེ་སློང་མ། །དགེ་བསྙེན་ཕ་དང་དགེ་བསྙེན་མས། །དུས་ཚིགས་གཟའ་སྐར་མ་བརྩིས་ཤིང་། །ཁྲུས་དང་གཙང་སྦྲ་མ་བྱས་ཀྱང་། །རིག་པ་ལ་ནི་གནས་པས་འགྲུབ། །གང་དག་མོས་པ་མེད་འགྱུར་བས། །འགྲུབ་ཉིད་དུ་ནི་ཡོང་མི་འགྱུར། །དེ་བས་ཤིན་ཏུ་
མོས་གུས་བྱའོ། །འཕགས་པ་སྒྲིབ་པ་རྣམ་པར་སེལ་བའི་གཟུངས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་སྭཱ་ཁྱཱ་ཏོ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་འཇམ་དཔལ་གྱི་ཞལ་ནས་གསུངས་པ་ཞེས་བྱ་བའི་གཟུངས། དཀོན་མཆོག་
གསུམ་ལ་ཕྱག་འཚལ་ལོ། །འཕགས་པ་འཇམ་དཔལ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ་དྷརྨ་དྷཱ་ཏུ་ནི་གརྫི་ཏ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་དྷཱ་ཡ། ན་མོ་མཉྫུ་ཤྲི་ཡེ། ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ཨོྃ་ཛྙཱ་ནཱ་ལོ་ཀེ། ཏྲི་རཏྣ་པཾ་ཤ་
སཾ་དྷཱ་ར་ཎི། བྷ་ག་བ་ཏི། ཨ་བཱ་ཡཾ་དཱ་དི་ཨ་བཱ་ཡཾ་དཏྟེ་མེ་བོ་དྷི་ཙིཏྟ་བཛྲ་པ་རི་པཱ་ལ་ཡ། ས་མནྟ་ཨ་བ་བྷཱ་སེ་ན། ཧ་ན་ཧ་ན། སརྦ་སཏྭ་སཾ་ཏ་ན་པ་ཏི་ཏཾ། ཀླེ་ཤཱ་ནུཙྪེ་ད་ཡ། བ་ར་ལཀྵ་ཎ། ཨ་ལཾ་ཀྲྀ་ཏ་ཤ་རཱི་རི། བོ་དྷི་ས་ཏྭ་ཤི་ཤཱུ་པ་ཏི་པཱ་ལ་ཡ། བུད་དྷཱ་ན་དེ་ཤཱ་ཡ། དེ་བ།
ནཱ་ག། ཡཀྵ། ག་ན་དྷརྦ། ཨ་སུ་ར། ག་རུ་ཌ། ཀིནྣ་ར། མ་ཧོ་ར་ག །བ་ཤེསྠ་པཱ་ཡ། ཨ་པ་ཡཾ་དད་ཏི་སྭཱ་ཧཱ། གཟུངས་འདིའི་ཕན་ཡོན་ནི་ལན་ཅིག་བརྗོད་པས་ཀྱང་བསྐལ་པ་སྟོང་དུ་ལས་ཀྱི་སྒྲིབ་པ་བསགས་པ་འབྱང་བར་འགྱུར་རོ། །འཆི་ཀར་ཡང་འཕགས་

པ་འཇམ་དཔལ་མཐོང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ཐོར་ཚུགས་ཀྱིས་དབུ་བརྒྱན་པའི་སྐུ་ཡང་མཐོང་བར་འགྱུར་རོ། །མདོར་ན་གཟུངས་འདིའི་ཕན་ཡོན་ནི་མཐའ་ཡས་སོ། །འཕགས་པ་འཇམ་དཔལ་གྱི་
ཞལ་ནས་གསུངས་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་གརྦྷ་དང་། ལོཙྪ་བ་བནྡེ་ཀླུའི་དབང་པོས་བསྒྱུར། རྒྱ་གར་གྱི་མཁན་པོ་བི་ཤུདྡྷ་སིདྷ་དང་། ཞུ་ཆེན་གྱི་ལོཙྪ་བ་བནྡེ་དེ་བ་ཙནྡྲས་གཏན་ལ་ཕབ་པ།། །།
༄༅༅། །དཀོན་མཆོག་གསུམ་ལ་ཕྱག་འཚལ་ལོ། །འཇམ་པའི་མགོན་ལ་ཕྱག་འཚལ་ལོ། །དེ་ནས་ཡང་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་
ག་ལ་བ་དེར་ཐལ་མོ་སྦྱར་བ་བཏུད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རིག་པ་མཐོང་བར་བགྱི་སྟེ། རིག་པ་དམ་པ་འདི་སྨྲས་ན་ནི་ངོ་མཚར་དུ་འགྱུར་རོ། །ཐམས་
ཅད་དང་ལྡན་པའི་འཁོར་དེས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་རིག་པ་སྨྲོས་ཤིག །བདག་གིས་བཅོམ་ལྡན་འདས་ཀྱི་གསུང་གིས་སྨྲ་བར་བགྱིའོ། །
བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གྱིས་སངས་རྒྱས་ཐམས་ཅད་ཀྱི་སྙིང་པོ་ཆོས་ཐམས་ཅད་ལ་ཕྱག་འཚལ་ཏེ་མཆོད་པ་བྱས་ནས་རིག་པ་སྨྲས་སོ། །ན་མཿསརྦ་ཏ་ཐཱ་ག་ཏེ་བྷྱཿ། ན་མོ་མཉྫུ་ཤྲི་ཡེ། བོ་དྷི་སཏྭཱ་ཡ། ཨོྃ་མཉྫུ་པ་ར། མཉྫུ་གྷོ་ཥ། ཧ་ན་ཧ་ན།
པ་ཙ་པ་ཙ། མ་ཏ་མ་ཏ། མ་ཐ་མ་ཐ། བིདྷྭནྶ་ཡ། བི་དྷྭནྶ་ཡ། ཀ་ར་ཀ་ར། ཏྲུ་ཊ་ཏྲུ་ཊ། བཉྫ་བཉྫ། ཨ་བྷི་ས་ཨ་བྷི་ས། ཏུ་ཊ་ཏུ་ཊ། ཏྲུ་ཊ་ཏྲུ་ཊ། སྥུ་ཊ་སྥུ་ཊ། ཧྲྀ་ད་ཡ་བཾ་དྷ་ནི། ན་མཿསཾ་བོ་དྷ་ནི། པྲ་བྷེ་ས་པྲ་བྷེ་ས། ལོ་ཏ་ལོ་ཏ། ཀྲྀ་ད་ཀྲྀ་ད། ཀྲྀ་ཊ་ཀྲྀ་ཊ། ཧ་

ས་ཧ་ས། པྲ་བནྡྷ། པྲ་བནྡྷ། ཨཱ་བི་ཤ་ཨཱ་བི་ཤ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་སྭཱ་ཧཱ། གང་ཞིག་གིས་ནམ་ཕྱེད་ན་ལན་གསུམ་བརྗོད། ཉི་མ་ལ་ཡང་ལན་བདུན་བརྗོད་པ་བྱས་ན་རིག་པ་ཆེན་མོ་ཐོབ་པར་འགྱུར་རོ། །མི་རྣམས་ཀྱི་ཤློ་ཀ་སུམ་བརྒྱ་འཛིན་པར་འགྱུར་རོ། །འདིའི་ཆོ་ག་
ནི་ཙནྡན་གྱིས་དཀྱིལ་འཁོར་བྱས་ཏེ། ཞུན་མར་གྱི་མར་མེས་ཀྱང་མཆོད་ནས་སྟོང་ཕྲག་བརྒྱད་བཟླས་ན་འགྲུབ་པར་འགྱུར། མ་གྲུབ་ཀྱང་ཤློ་ཀ་བརྒྱ་ཉི་མ་རེ་རེ་ལ་འཛིན་པར་འགྱུར་རོ། །བཅོམ་ལྡན་འདས་བདག་གིས་བསྟན་པ་འདིས་མ་གྲུབ་ན་གང་ཞིག་མཚམས་མེད་པ་ལྔ་
བྱས་ན་བདག་ཀྱང་དེ་དང་འདྲ་བར་མཚམས་མེད་པ་ལྔ་བྱས་པར་འགྱུར་རོ། །འཕགས་པ་འཇམ་དཔལ་གྱིས་དམོད་བཙུགས་པ་ཞེས་བྱ་བའི་གཟུངས་རྫོགས་སོ།། ༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །ཨོཾ་བཱ་ཀྱེ་ཏེ་ཛཱ་ཡ། ཨོྃ་བཱ་ཀྱེ་ཥ་ཥེ་སྭ།
ཨོྃ་བཱ་ཀྱེ་ཁ་ན་ཛ་ཡེ། ཨོྃ་བཱ་ཀྱེ་ནིཥྛ་ཨ། ཨོྃ་བཱ་ཀྱེ་ཡ་ནམཿ། ཨོྃ་བཱ་ཀྱེ་དྃ་ནམཿ། འཕགས་པ་འཇམ་དཔལ་གྱི་མཚན་འདི་ཉིད་ལན་ཉི་ཤུ་རྩ་གཅིག་བཟླས་པས་མཚམས་མེད་པ་ལྔའི་ལས་ཀྱི་སྒྲིབ་པ་ཐམས་ཅད་འབྱང་ངོ་། །འཕགས་པ་འཇམ་དཔལ་གྱི་མཚན་རྫོགས་སོ།། །།
༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་བྷཊྚཱ་ར་ཀ་སྱ་པྲཛྙཱ་བུདྡྷི་བརྡྷ་ན་ནཱ་མ་དྷཱ་ར་ཎཱི། བོད་སྐད་དུ། རྗེ་བཙུན་འཕགས་པ་འཇམ་དཔལ་གྱི་ཤེས་རབ་དང་བློ་འཕེལ་བ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་མཉྫུ་ཤྲི་ཡེ་ཀུ་མཱ་ར་བྷཱུ་ཏཱ་ཡ། ཏདྱ་
ཐཱ། ཨོྃ་ཨ་ར་ཛེ། བི་ར་ཛེ། ཤུདྡྷེ་བི་ཤུདྡྷེ། ཤོ་དྷ་ནི་བི་ཤོདྷ་ནི། ཤོ་དྷ་ཡ་བི་ཤོ་དྷ་ཡ། ཨ་མ་ལེ། བི་མ་ལེ་ཛ་ཡ་བ་ཏི་རུ་རུ་ཙ་ལ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་སྭཱ་ཧཱ། གང་ཞིག་འདི་འཛིན་པ་དེ་ཟླ་བ་གཅིག་གིས་བློ་དང་ལྡན་པར་འགྱུར་རོ། །དབྱངས་སྙན་པར་འགྱུར་རོ། །གཟུགས་
བཟང་བར་འགྱུར་རོ། །ལན་ཅིག་བཀླགས་ན་བསྐལ་པ་སྟོང་གི་བར་དུ་འཁོར་བ་ལ་རྒྱབ་ཀྱིས་ཕྱོགས་པར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །འབུམ་ཕྲག་གཅིག་བཟླས་ན་མཁས་པར་འགྱུར་རོ། །འབུམ་ཕྲག་གཉིས་བཟླས་ན་རིག་པ་འཛིན་

པར་འགྱུར་རོ། །འབུམ་ཕྲག་གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །གལ་ཏེ་མཚམས་མེད་པ་ལྔ་བྱས་པས་གྲུབ་པར་མ་གྱུར་ན་དེའི་ཚེ་ང་ཉིད་མཚམས་མེད་པ་ལྔ་བྱེད་པ་ཡིན་ཞིང་། ང་ཉིད་ཀྱིས་སངས་རྒྱས་བཅོམ་
ལྡན་འདས་རྣམས་བསླུས་པར་གྱུར་ཅིག །རྗེ་བཙུན་འཕགས་པ་འཇམ་དཔལ་གྱི་ཤེས་རབ་དང་བློ་འཕེལ་བ་ཞེས་བྱ་བའི་གཟུངས་རྫོགས་སོ།། ༄༅༅། །འཕགས་པ་འཇམ་དཔལ་གྱི་སྔགས་ཡི་གེ་འབྲུ་གཅིག་པའི་ཆོ་ག །ཏདྱ་ཐཱ། ཨོཾཀྵྞཱི།
གསང་སྔགས་ཡི་གེ་འབྲུ་གཅིག་པ་འདི་རབ་ཏུ་གསང་བ་སྟེ། དོན་ཐམས་ཅད་སྒྲུབ་པར་བྱེད་པ། ལས་ཐམས་ཅད་བྱེད་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ། རེ་བ་ཐམས་ཅད་ཡོངས་སུ་སྐོང་བར་མཛད་པ་སྟེ། སོ་ཤིང་ལ་བསྔགས་ནས་བཅངས་ན་
སོ་ན་བ་འབྱང་ངོ་། །མིག་ན་བ་ལ་རྒྱམ་ཚ་བཏགས་པ་ལ་ལན་བདུན་བསྔགས་ཏེ་མིག་བཀང་ན་མིག་ནད་སེལ་ཏོ། །མིའི་ཁོང་དུ་མཚོན་གྱི་དུམ་བུ་ལུས་བ་ལ་ཞུན་མར་རྙིང་པ་ལ་ལན་བདུན་ནམ། བརྒྱ་རྩ་བརྒྱད་བསྔགས་ཏེ་བླུད་པའམ། རྨ་ཁར་བསྐུས་ན་མཚོན་གྱི་དུམ་
བུ་འབྱུང་བར་འགྱུར་རོ། །ཟས་མ་ཞུ་བ་དང་། ལྦོས་ཏེ་གསུད་པ་དང་། ཚད་པས་འཁྲུ་བ་ལ་མུ་རང་ཚྭའམ། རྒྱམ་ཚའམ། ཡང་ན་ལན་ཚྭ་གཞན་གང་ཡང་རུང་བ་ལ་ལན་བདུན་བསྔགས་ཏེ་ཟོས་ན་ནད་དེ་ལས་གྲོལ་ཏེ་དེ་ཉིད་ཀྱི་ཉིན་པར་སོས་པར་འགྱུར་རོ། །ཀླད་པ་ན་
བ་ལ་བྱ་རོག་གི་སྒྲོ་ལ་ལན་བདུན་བསྔགས་ཏེ་བྱ་བས་ན་ནད་དེ་སོས་པར་འགྱུར་རོ། །འཇམ་དཔལ་གྱི་ཡི་གེ་འབྲུ་གཅིག་པའི་གཟུངས་རྫོགས་སོ།། ༄༅༅། །འཕགས་པ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་
པ་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་

ཤཱཀྱ་ཐུབ་པ་རི་པོ་ཊ་ལའི་སྟེང་། འཕགས་པ་སྤྱན་རས་གཟིགས་དབང་ཕྱུག་གི་གཞལ་མེད་ཁང་རིན་པོ་ཆེ་བཀོད་པའི་དཀྱིལ་འཁོར་ན་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པའི་རིན་པོ་ཆེའི་སེང་གེའི་གདན་རིན་པོ་ཆེའི་རྒྱལ་མཚན་དང་བ་དན་དག་གིས་འཁོར་བར་
བཀོད་ཅིང་དཔྱངས་པ་ལ་བཞུགས་ཏེ། དེའི་ཚེ་དེ་བཞིན་གཤེགས་པ་གདན་དེ་ལ་བཞུགས་ནས་ཀུན་འཛིན་ཅེས་བྱ་བའི་གཟུངས་སྔགས་བཤད་པར་བཞེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ།
བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་དང་། བྱང་ཆུབ་སེམས་དཔའ་རིན་པོ་ཆེའི་རྒྱལ་པོ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་མངོན་པར་འཕགས་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་
དང་། བྱང་ཆུབ་སེམས་དཔའ་མཐུ་ཆེན་ཐོབ་པ་དང་། བྱང་ཆུབ་སེམས་དཔའ་པདྨའི་བཀོད་པ་དང་། བྱང་ཆུབ་སེམས་དཔའ་བཀོད་པ་ཆེན་པོ་དང་། བྱང་ཆུབ་སེམས་དཔའ་རིན་ཆེན་སྙིང་པོ་དང་། བྱང་ཆུབ་སེམས་དཔའ་དཔལ་གྱི་སྙིང་པོ་དང་། བྱང་ཆུབ་སེམས་
དཔའ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་ཀུན་དུ་བཟང་པོ་དང་། བྱང་ཆུབ་སེམས་དཔའ་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
ཀྱི་རྒྱལ་པོ་ཆེན་པོར་དབང་བསྐུར་བ་ཐོབ་པ་ཤ་སྟག་དང་ཐབས་ཅིག་གོ། །གཞན་ཡང་ཉན་ཐོས་ཀྱི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པའི་ས་བཅུ་སྤྱད་པ་ཚད་མེད་གྲངས་མེད་པ་དག་དང་ཐབས་ཅིག་སྟེ། ཚེ་དང་ལྡན་པ་འོད་སྲུང་ཆེན་པོ་ནི་གཙོ་བོར་གྱུར་ཏོ། །གཞན་ཡང་
ཚངས་རིས་ཀྱི་ལྷ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀྵཎྜ་མ་ར་ནི་གཙོ་བོར་གྱུར་ཏོ། །གཞན་ཡང་ལྷ་དང་ལྷའི་བུ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀུཾ་བྷ་ཀ་ནི་གཙོ་བོར་གྱུར་ཏོ། །གཞན་ཡང་འཇིག་རྟེན་སྐྱོང་བ་དང་། རྒྱལ་ཆེན་རིས་བཞིའི་ལྷའི་རྒྱལ་པོ་

ཚད་མེད་པ་སྙེད་དང་ཐབས་ཅིག་སྟེ། ལྷའི་རྒྱལ་པོ་ཡུལ་འཁོར་སྲུང་ནི་གཙོ་བོར་གྱུར་ཏོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་།
མི་དང་མི་མ་ཡིན་པ་ལ་སོགས་པ་ཚད་མེད་པ་སྙེད་དང་ཐབས་ཅིག་སྟེ། ཀླུའི་རྒྱལ་པོ་ཆེན་པོ་རིའི་དཔལ་ནི་གཙོ་བོར་གྱུར་ཏོ། །གཞན་ཡང་འདོད་པའི་ཁམས་ཀྱི་ལྷའི་བུ་མོ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་མོ་གཞོན་ནུའི་མིག་ཅེས་བྱ་བ་ནི་གཙོ་མོར་
གྱུར་ཏོ། །གཞན་ཡང་ནམ་མཁའི་ལྷ་དང་། ཆུ་བོ་དང་། རྒྱ་མཚོའི་ལྷ་དང་། ཆུ་མིག་གི་ལྷ་དང་། ཆུ་ཀླུང་གི་ལྷ་དང་། སྨན་གྱི་ལྷ་དང་། ལྗོན་ཤིང་གི་ལྷ་དང་། ནགས་ཚལ་གྱི་ལྷ་དང་། ཁང་ཁྱིམ་གྱི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་དང་།
སའི་ལྷ་དང་། རིའི་ལྷ་དང་། གཞལ་མེད་ཁང་ལ་སོགས་པའི་ལྷ་ཚད་མེད་པ་སྙེད་ཀྱང་སོ་སོ་ནས་འདུས་ཤིང་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འཁོར་མང་པོའི་ནང་དུ་གསང་སྟེ། རྫུ་འཕྲུལ་གྱིས་འོད་ཟེར་བཀྱེ་བས་
ཕྱོགས་བཅུའི་འཇིག་རྟེན་གྱི་ཁམས་རྣམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་གསེར་གྱི་ཁ་དོག་ཅན་དུ་གྱུར་ཏོ། །ལྷའི་གཞལ་མེད་ཁང་རྣམས་དང་། ཀླུའི་ཁང་ཁྱིམ་རྣམས་དང་། ལྷའི་གཙོ་བོ་རྣམས་ཀྱི་གཞལ་མེད་ཁང་རྣམས་ཀྱང་རབ་ཏུ་
གཡོས་པར་གྱུར། ཆུ་བོ་དང་། མཚོ་དང་། རྒྱ་མཚོ་ཆེན་པོ་དང་། རི་ཁོར་ཡུག་དང་། རི་རབ་ལྷུན་པོ་དང་། སའི་རི་དང་། རི་ནག་པོ་རྣམས་ཀྱང་རབ་ཏུ་གཡོས་པར་གྱུར་ཏོ། །ཉི་མ་དང་། ཟླ་བ་དང་། ནོར་བུ་དང་། མེ་དང་། རྒྱུ་སྐར་དང་། གཟའི་འོད་རྣམས་ཀྱང་
ཟིལ་གྱིས་མནན་ཏེ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོས་ངོ་མཚར་རྨད་དུ་བྱུང་བའི་མཚན་མ་དེ་དག་མཐོང་བ་དང་། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་ངོ་མཚར་དུ་གྱུར་ནས། སྟན་ལས་ལངས་ཏེ་ཐལ་མོ་སྦྱར་ནས་འདི་སྐད་ཅེས། བཅོམ་

ལྡན་འདས་རྫུ་འཕྲུལ་གྱི་མཚན་མ་འདི་ལྟ་བུ་འདི་དག་སུས་བཀྱེ་ལགས་ཞེས་གསོལ་ནས། ཚིགས་སུ་བཅད་དེ་ཞུ་བ་ཞུས་པ། དེང་ནི་སུ་ཞིག་མངོན་པར་སངས་རྒྱས་ན། །འདི་ལྟར་འོད་ཟེར་ཆེན་པོ་རབ་བཀྱེ་བས། །ཕྱོགས་བཅུའི་འཇིག་རྟེན་གསེར་གྱི་མདོག་ཏུ་གྱུར། །སྟོང་
ཆེན་འཇིག་རྟེན་ཁམས་ཀྱང་དེ་བཞིན་ལགས། །དེང་ནི་སུ་ཞིག་རང་དབང་ཐོབ་གྱུར་ན། །ཡ་མཚན་རྫུ་འཕྲུལ་ཆེན་པོ་མཐུ་བཀྱེ་ནས། །མཐའ་མེད་སངས་རྒྱས་ཞིང་རྣམས་རབ་གཡོས་ཤིང་། །ལྷ་ཀླུ་གཞལ་མེད་ཁང་རྣམས་མི་བདེར་གྱུར། །སུ་ཡི་མཐུ་ལགས་རྒྱུ་རྐྱེན་མ་
རྟོགས་པས། །འཁོར་མང་འདི་དག་ཐེ་ཚོམ་འཚལ་གྱུར་ན། །བཅོམ་ལྡན་འདས་ཀྱི་ཐུགས་རྗེ་ཆེན་པོ་ཡིས། །རྫུ་འཕྲུལ་འདི་ཡི་རྒྱུ་རྐྱེན་བཀས་བཤད་གསོལ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་ལ་བཀའ་སྩལ་པ། རིགས་ཀྱི་བུ་
ཁྱེད་ཀྱིས་འདི་རིག་པར་བྱ་སྟེ། དེང་འཁོར་གྱི་དཀྱིལ་འཁོར་འདུས་པ་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་པ་དེ་སྔོན་བསྐལ་བ་ཚད་མེད་པ་ནས་བྱམས་པ་ཆེན་པོ་དང་། སྙིང་རྗེ་ཆེན་པོ་ཕུན་སུམ་ཚོགས་པར་
གྱུར་པ། གཟུངས་ཀྱི་སྒོ་ཚད་མེད་པ་སྙེད་ཤིན་ཏུ་བསྒོམས་ཤིང་མངོན་པར་བསྒྲུབས་པར་གྱུར་པས། སེམས་ཅན་རྣམས་ལ་ཕན་པ་དང་། བདེ་བར་འདོད་པའི་ཕྱིར་གསང་སྟེ་འདི་ལྟ་བུའི་རྫུ་འཕྲུལ་གྱི་མཐུ་ཆེན་པོ་བསྟན་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་
བཀའ་སྩལ་པ་དང་། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ་གོས་ཚགས་བཅོས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་རྗེ་
ཆེན་པོའི་སེམས་ཞེས་བགྱི་བའི་གཟུངས་སྔགས་མཆིས་ཏེ། སེམས་ཅན་མང་པོ་རྣམས་ལ་སྨན་པ་དང་བདེ་བ་འཐོབ་པར་བགྱི་བ་དང་། བྲོ་ནད་ཐམས་ཅད་བསལ་བར་བགྱི་བ་དང་། ཚེ་རིང་བར་འགྱུར་བ་དང་། ཕྱུག་ཅིང་འབྱོར་པ་དང་ལྡན་པར་བགྱི་བ་དང་། སྡིག་པ་མི་དགེ་

བའི་ལས་དང་ཁ་ན་མ་ཐོ་བ་ལྕི་བ་རྣམས་ཡོངས་སུ་སྦྱང་ཞིང་བསལ་བ་དང་། སྒྲིབ་པའི་བགེགས་རྣམས་དང་འབྲལ་བ་དང་། ཆོས་དཀར་པོའི་ཡོན་ཏན་ཐམས་ཅད་འཕེལ་བར་བགྱི་བ་དང་། །དགེ་བའི་ས་བོན་ཐམས་ཅད་ཕུན་སུམ་ཚོགས་པར་བགྱི་བ་
དང་། འཇིགས་ཤིང་སྐྲག་པ་ཐམས་ཅད་ཡོངས་སུ་སྤང་བར་བགྱི་བ་དང་། རེ་བ་ཐམས་ཅད་མྱུར་དུ་ཡོངས་སུ་རྫོགས་པར་བགྱི་བའི་སླད་དུ་དེང་བཤད་པར་འཚལ་ན། བཅོམ་ལྡན་འདས་ཐུགས་བརྩེ་བར་དགོངས་ཏེ་གནང་བར་མཛད་དུ་གསོལ། བཅོམ་ལྡན་འདས་ཀྱིས་
བཀའ་སྩལ་པ། རིགས་ཀྱི་བུ་ཁྱོད་སྙིང་རྗེ་ཆེན་པོས་སེམས་ཅན་རྣམས་ལ་ཕན་པ་དང་། བདེ་བ་འདོད་པའི་ཕྱིར་རིག་སྔགས་བཤད་པར་འདོད་པས་དེང་དུས་ལ་བབ་ཀྱིས་མྱུར་དུ་སྨྲོས་ཤིག་དང་། དེ་བཞིན་གཤེགས་པ་ང་དང་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ་
ཐུགས་དགྱེས་པར་མཛད་དོ། །བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་མངོན་པར་དྲན་ལགས་ཏེ། སྔོན་བྱུང་བའི་བསྐལ་པ་འབུམ་ཕྲག་ཚད་མ་མཆིས་པ་སྙེད་འདས་པ་དེའི་ཚེ་
དེའི་དུས་ན། བཅོམ་ལྡན་འདས་དེ་བཞིན་གཤེགས་པ་འོད་སྟོང་གི་རྒྱལ་པོ་ཞི་བར་གནས་པ་ཞེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་དེས་བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཐོགས་པ་མ་མཆིས་པའི་ཐུགས་རྗེ་ཆེན་པོ་རྒྱ་ཆེར་ཡོངས་
སུ་རྫོགས་པ་ཞེས་བགྱི་བའི་གཟུངས་འདི་བཀའ་སྩལ་ནས། ཕྱག་གསེར་གྱི་ཁ་དོག་ཅན་གྱིས་བདག་གི་སྤྱི་བོ་ལ་བྱུགས་ཏེ་འདི་སྐད་ཅེས། རིགས་ཀྱི་བུ་ཁྱོད་ཐུགས་རྗེ་ཆེན་པོའི་རིག་སྔགས་འདི་ཟུང་ཤིག་དང་། མ་འོངས་པའི་དུས་ངན་པའི་སེམས་ཅན་ཐམས་ཅད་ལ་
ཕན་པ་དང་བདེ་བ་ཆེན་པོ་བྱེད་པར་འགྱུར་རོ་ཞེས་བཀའ་སྩལ་ཏོ། །བདག་དེའི་ཚེ་གདོད་ས་དང་པོ་ལ་གནས་པ་ལས་རིག་སྔགས་འདི་ལན་ཅིག་ཐོས་པ་ཙམ་གྱིས་ས་བརྒྱད་པ་ལས་ཡང་དག་པར་འདས་པར་གྱུར་ལགས་སོ། །བདག་དེའི་ཚེ་དེའི་དུས་ན་སེམས་རབ་ཏུ་དགའ་ཞིང་མགུ་བར་གྱུར་

པའི་སླད་དུ་སྨོན་ལམ་འདི་སྐད་དུ་བཏབ་ལགས་ཏེ། གལ་ཏེ་བདག་མ་འོངས་པའི་དུས་ན་སེམས་ཅན་ཐམས་ཅད་ལ་སྨན་ཅིང་བདེ་བར་བགྱིད་པའི་འོས་སུ་འགྱུར་ཡང་དག་པ་ཞིག་ལགས་ན་དེང་བདག་གི་ལུས་འདི་ཉིད་ལས་ལག་པ་སྟོང་དང་། མིག་སྟོང་ཚང་བར་འབྱུང་
བར་གྱུར་ཅིག་ཅེས་སྨོན་ལམ་བཏབ་མ་ཐག་ཏུ་ལུས་ལས་སུག་པ་སྟོང་དང་མིག་སྟོང་ཚང་བར་བྱུང་བར་གྱུར་ཏེ། ཕྱོགས་བཅུའི་ས་ཆེན་པོ་རྣམས་ཀྱང་རྣམ་པ་དྲུག་ཏུ་རབ་ཏུ་གཡོས་པར་གྱུར། ཕྱོགས་བཅུའི་སངས་རྒྱས་རྣམས་ཀྱིས་ཀྱང་འོད་ཟེར་བཀྱེ་བས་བདག་གི་ལུས་ལ་
རེག་ཅིང་ཕྱོགས་བཅུའི་འཇིག་རྟེན་གྱི་ཁམས་མཐའ་མ་མཆིས་པ་རྣམས་ཀྱང་གསལ་བར་བགྱིས་པར་གྱུར་ལགས་སོ། །དེང་སླན་ཅད་སངས་རྒྱས་ཚད་མ་མཆིས་པའི་འཁོར་གྱི་དཀྱིལ་འཁོར་ཚད་མ་མཆིས་པ་དག་ཏུ་གཟུངས་འདི་ཡང་དང་ཡང་དུ་ཐོས་ཤིང་མངོན་སུམ་དུ་ཡང་
དག་པར་བླངས་པ་དང་། གཞན་ཡང་དགའ་བ་དང་། མགུ་བ་དང་། རངས་པ་ཚད་མ་མཆིས་པ་བསྐྱེད་པས་བསྐལ་པ་འབུམ་ཕྲག་ཚད་མ་མཆིས་པ་སྙེད་ཀྱི་འཁོར་བ་ཕྲ་མོ་ལས་ཡང་དག་པར་འདས་པར་གྱུར་ལགས་སོ། །དེང་སླན་ཅད་གཟུངས་འདི་རྟག་པར་འདོན་
ཅིང་ཡོངས་སུ་བཟུང་ནས་ནམ་དུ་ཡང་མི་བསྐྱུད་པར་བགྱིས་པའི་སླད་དུ་སྐྱེ་བ་ཐམས་ཅད་དུ་རྟག་པར་སངས་རྒྱས་རྣམས་ཀྱི་སྤྱན་སྔར་པདྨ་ལས་རྫུས་ཏེ་སྐྱེས་པས་མངལ་དུ་སྐྱེ་བའི་ལུས་བླངས་པར་མ་གྱུར་ལགས་སོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་
བསྙེན་མའམ། ཁྱེའུ་འམ། བུ་མོ་གང་ལ་ལ་ཞིག་འདི་འདོན་ཅིང་ཡོངས་སུ་འཛིན་པར་འཚལ་བ་དེས་སེམས་ཅན་རྣམས་ལ་སྙིང་བརྩེ་བའི་སེམས་བསྐྱེད་ནས། དང་པོ་ཁོ་ནར་བདག་ལ་སྨོན་ལམ་འདི་སྐད་གདབ་པར་བགྱི་ལགས་སོ། །སྤྱན་རས་གཟིགས་དབང་ཐུགས་རྗེ་ཆེ་ལ་
ཕྱག་འཚལ་ལོ། །བདག་གིས་ཆོས་རྣམས་ཐམས་ཅད་མྱུར་དུ་རྟོགས་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཡེ་ཤེས་མིག་ནི་མྱུར་དུ་ཐོབ་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་སེམས་

ཅན་ཐམས་ཅད་མྱུར་དུ་སྒྲོལ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཐབས་མཁས་པ་དག་མྱུར་དུ་ཐོབ་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཤེས་
རབ་གྲུ་ཡིས་སྒྲོལ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་སྡུག་བསྔལ་མཚོ་ལས་འདའ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་ཚུལ་ཁྲིམས་རྐང་གི་ལམ་ཐོབ་ཤོག །
སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་མྱ་ངན་འདའ་བའི་རི་འཛེག་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་འདུས་མ་བྱས་ཀྱི་ཁྱིམ་ཕྱིན་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་
ཕྱག་འཚལ་ལོ། །བདག་ནི་མྱུར་དུ་ཆོས་ཉིད་སྐུ་དང་མཚུངས་པར་ཤོག །བདག་ནི་རལ་གྲི་རི་ལ་འཛེག །རལ་གྲི་རི་ནི་རང་རྙིལ་ཤོག །བདག་ནི་ཆུ་ཚན་ཕྲད་གྱུར་ན། །ཆུ་ཚན་མེ་མུར་རང་ཞི་ཤོག །སེམས་ཅན་དམྱལ་བར་བདག་སོང་ན། །སེམས་ཅན་དམྱལ་བ་རང་སྐམས་
ཤོག །བདག་ནི་ཡི་དགས་གནས་སོང་ན། །བཀྲེས་སྐོམ་དག་ནི་འགྲངས་པར་ཤོག །བདག་ནི་ལྷ་མིན་གནས་སོང་ན། །ངན་སེམས་རང་ནི་དུལ་བར་ཤོག །བདག་ནི་དུད་འགྲོའི་གནས་ཕྱིན་ན། །རང་ཉིད་ཤེས་རབ་ཆེ་ཐོབ་ཤོག །དེ་སྐད་དུ་སྨོན་ལམ་བཏབ་ནས་སེམས་
རྩེ་གཅིག་ཏུ་བདག་གི་མིང་ནས་འདོན་ཅིང་རྗེས་སུ་དྲན་པར་བགྱིའོ། །གཞན་ཡང་བདག་གི་སྟོན་པ་དེ་བཞིན་གཤེགས་པ་འོད་དཔག་མེད་རྗེས་སུ་དྲན་པར་བགྱིས་ན། དེའི་རྗེས་ལ་གཟུངས་སྔགས་འདི་མཚན་གཅིག་ལ་ལན་བདུན་ཚང་བར་འདོན་པར་བགྱིད་ན་བསྐལ་པ་
འབུམ་ཕྲག་བརྒྱད་སྟོང་སྙེད་དུ་འཁོར་བར་འགྱུར་བའི་ཁ་ན་མ་ཐོ་བ་ལྕི་བ་རྣམས་ཡོངས་སུ་བསལ་ཅིང་འབྱང་བར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའམ་མི་གང་ལ་ལ་ཞིག་ཐུགས་རྗེ་ཆེན་པོའི་ཚིག་འདི་འདོན་ཅིང་

འཛིན་པར་བགྱིད་ན་འཆི་བའི་དུས་ཀྱི་ཚེ་ཕྱོགས་བཅུའི་དེ་བཞིན་གཤེགས་པ་རྣམས་དེར་གཤེགས་ནས་ཕྱག་རྐྱོང་བར་འགྱུར་བས། སངས་རྒྱས་ཀྱི་ཞིང་གང་དང་གང་དུ་སྐྱེ་བར་འཚལ་བ་ཅི་ལྟར་སྨོན་པ་བཞིན་དུ་དེ་དག་ཏུ་སྐྱེ་བར་འགྱུར་ལགས་སོ། །བཅོམ་ལྡན་
འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གང་ལ་ལ་ཞིག་ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་པ་དག་གལ་ཏེ་ངན་འགྲོ་གསུམ་པོ་དག་ཏུ་ལྟུང་བར་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །
ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་སངས་རྒྱས་ཀྱི་ཞིང་ཁམས་རྣམས་སུ་སྐྱེ་བར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་ཏིང་ངེ་འཛིན་
དང་སྤོབས་པ་ཚད་མ་མཆིས་པ་སྙེད་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་ཚེ་འདི་ཉིད་ལ་སྨོན་པ་ཐམས་ཅད་ཇི་ལྟར་སྨོན་པ་བཞིན་དུ་གྲུབ་པར་མ་གྱུར་ན་སྙིང་རྗེ་ཆེན་
པོའི་སེམས་ཀྱི་གཟུངས་ཞེས་མི་བགྱི་ལགས་ཏེ། མི་དགེ་བ་རྣམས་དང་སེམས་རྩེ་གཅིག་ཏུ་མ་བགྱིས་པ་ནི་མ་གཏོགས་ལགས་སོ། །བུད་མེད་གང་ལ་ལ་ཞིག་བུད་མེད་ཀྱི་ལུས་ཀྱིས་ཡོངས་སུ་སྐྱོ་ནས་སྐྱེས་པའི་ལུས་ཐོབ་པར་འཚལ་བ་གང་ལགས་པ་དེས་ཐུགས་རྗེ་ཆེན་པོའི་
སེམས་ཀྱི་གཟུངས་ཀྱི་ཚིག་འདི་འདོན་ཅིང་ཡོངས་སུ་བཟུང་བས་གལ་ཏེ་བུད་མེད་ཀྱི་དངོས་པོ་ལས་ཡོངས་སུ་གྱུར་ཏེ། སྐྱེས་པའི་ལུས་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐེ་ཚོམ་གྱི་བསམ་པ་ཅུང་ཟད་ཅིག་བསྐྱེད་པར་གྱུར་ན་
གདོན་མི་འཚལ་བར་གང་སྨོན་པའི་འབྲས་བུ་དེ་མངོན་པར་འགྲུབ་པར་མི་འགྱུར་ལགས་སོ། །སེམས་ཅན་གང་ལ་ལ་ཞིག་དགེ་འདུན་གྱི་ཞལ་ཟས་དང་དཀོར་འཕྲོག་ཅིང་ཆུད་གསོན་པ་གང་ལགས་པ་དེ་དག་ནི་སངས་རྒྱས་སྟོང་འཇིག་རྟེན་དུ་བྱུང་བ་དག་ལ་འགྱོད་པས་

མཐོལ་ཞིང་བཤགས་ན་ཡང་འབྱང་ཞིང་ཚངས་པར་མི་འགྱུར་མོད་ཀྱི། འོན་ཀྱང་ཐུགས་རྗེ་ཆེན་པོའི་རིག་སྔགས་འདི་བཏོན་པ་ཙམ་གྱིས་དེ་དག་ཡོངས་སུ་འབྱང་བར་འགྱུར་བ་ལགས་ཏེ། དཀོན་མཆོག་གསུམ་གྱི་ཞལ་ཟས་དང་།
དཀོན་མཆོག་གསུམ་གྱི་དཀོར་ནོར་འཕྲོག་ཅིང་ཆུད་གསོན་པ་དེ་དག་ནི་ཕྱོགས་བཅུའི་སྟོན་པ་རྣམས་མངོན་སུམ་དུ་གྱུར་པའི་སྤྱན་སྔར་བཤགས་ན་གདོད་ཡོངས་སུ་འབྱང་བར་འགྱུར་ལགས་ལ། ཐུགས་རྗེ་ཆེན་པོའི་གཟུངས་འདི་འདོན་པའི་ཚེ་ཕྱོགས་བཅུའི་སྟོན་པ་
རྣམས་དེར་གཤེགས་ནས་དབང་མཛད་པར་འགྱུར་བས་ཁ་ན་མ་ཐོ་བའི་སྒྲིབ་པ་དེ་དག་ཐམས་ཅད་ཀྱང་ཡོངས་སུ་འབྱང་བར་འགྱུར། མི་དགེ་བ་བཅུ་དང་། མཚམས་མ་མཆིས་པ་ལྔ་དང་། གང་ཟག་ལ་སྐུར་པ་བཏབ་པ་དང་། ཆོས་ལ་སྐུར་པ་བཏབ་པ་དང་། གསོ་
སྦྱོང་བཤིག་པ་དང་། ཚུལ་ཁྲིམས་བཤིག་པ་དང་། མཆོད་རྟེན་བཤིག་པ་དང་། གཙུག་ལག་ཁང་བཤིག་པ་ཐམས་ཅད་དང་། དགེ་འདུན་གྱི་དཀོར་བརྐུས་པ་དང་། ཡོངས་སུ་དག་པའི་ཚངས་པར་སྤྱོད་པ་སུན་པར་བགྱིས་པ་འདི་ལྟ་བུ་ལ་སོགས་པ་སྡིག་པའི་
ལས་ལྕི་བ་ཐམས་ཅད་ཡོངས་སུ་འབྱང་བར་འགྱུར་ལགས་སོ། །རིག་སྔགས་འདི་ལ་ཐེ་ཚོམ་འཚལ་བའི་དངོས་པོ་གཅིག་ནི་མ་གཏོགས་ཏེ། ཐེ་ཚོམ་འཚལ་བར་གྱུར་ན་ཐ་ན་ཁ་ན་མ་ཐོ་བ་ཆུང་ངུའི་ལས་ཡང་བ་ཙམ་ཡང་ཡོངས་སུ་འབྱང་བར་མི་འགྱུར་ན་ཁ་ན་མ་ཐོ་བ་
ལྕི་བ་ལྟ་སྨོས་ཀྱང་ཅི་འཚལ་ལགས། ཁ་ན་མ་ཐོ་བ་ལྕི་བ་དག་ཡོངས་སུ་འབྱང་བར་མི་འགྱུར་མོད་ཀྱི། འོན་ཀྱང་བྱང་ཆུབ་ཀྱི་རིང་བའི་རྒྱུ་ནི་བགྱིད་པར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་མི་གང་ལ་
ལ་ཞིག་ཐུགས་རྗེ་ཆེན་པོའི་སེམས་ཀྱི་རིག་སྔགས་འདི་འདོན་ཅིང་འཛིན་པ་དེ་དག་ནི་དགེ་བའི་སྐྱེ་བ་རྣམ་པ་བཅྭ་ལྔ་འཐོབ་པར་འགྱུར་ཞིང་གཤིས་ངན་དུ་འཆི་བ་རྣམ་པ་བཅྭ་ལྔར་ལེན་པར་མི་འགྱུར་ལགས་སོ། །གཤིས་ངན་དུ་འཆི་བར་མི་འགྱུར་བ་དེ་ཡང་འདི་ལྟ་སྟེ། གང་ཟག་

དེ་བཀྲེས་པས་ཉོན་མོངས་ཏེ་འཆི་བར་མི་འགྱུར་བ་དང་། མཚོན་ཆ་དང་ལྕག་དབྱུག་གིས་འཆི་བར་མི་འགྱུར་བ་དང་། ཁོ་ན་མཆིས་པའི་དགྲའི་སུག་པར་འཆི་བར་མི་འགྱུར་བ་དང་། གཡུལ་ངོར་འཆི་བར་མི་འགྱུར་བ་དང་། སྟག་དང་སྤྱང་ཀི་དང་གཅན་གཟན་མ་རུངས་པའི་ཁར་
འཆི་བར་མི་འགྱུར་བ་དང་། སྦྲུལ་གདུག་པ་དང་རྩངས་པ་དང་སྡིག་པའི་ཁར་འཆི་བར་མི་འགྱུར་བ་དང་། ཆབ་དང་ཞུགས་ཀྱི་ནང་དུ་འབྱིང་ཞིང་ཚིག་སྟེ་འཆི་བར་མི་འགྱུར་བ་དང་། དུག་གིས་འཆི་བར་མི་འགྱུར་བ་དང་། བྱད་སྟེམས་ཀྱིས་འཆི་བའི་དུས་བགྱིད་པར་མི་འགྱུར་བ་དང་། སྨྱོས་
ནས་དྲན་པ་ཉམས་ཏེ་འཆི་བར་མི་འགྱུར་བ་དང་། རི་དང་། ལྗོན་ཤིང་དང་ངམ་གྲོག་དང་གཡངས་ནས་ལྷུང་སྟེ་འཆི་བར་མི་འགྱུར་བ་དང་། མི་མ་རུངས་པའི་བྱད་ཀྱིས་འཆི་བར་མི་འགྱུར་བ་དང་། ལོག་པའི་འདྲེ་གདོན་མ་རུངས་པས་གླགས་རྙེད་དེ་འཆི་བའི་དུས་བགྱིད་
པར་མི་འགྱུར་བ་དང་། ནད་ངན་པས་ལུས་ལ་དཀྲིས་ཏེ་འཆི་བའི་དུས་བགྱིད་པར་མི་འགྱུར་བ་དང་། ཆ་མ་ལགས་པས་བདག་ཉིད་ལ་གནོད་པ་བགྱིས་ཏེ་འཆི་བའི་དུས་བགྱིད་པར་མི་འགྱུར་བ་དག་ལགས་ཏེ། ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་
པར་བགྱིད་པ་དེ་དག་ནི་གཤིས་ངན་དུ་འཆི་བ་རྣམ་པ་བཅྭ་ལྔ་པོ་འདི་དག་གིས་འཆི་བའི་དུས་བགྱིད་པར་མི་འགྱུར་ལགས་སོ། །དགེ་བའི་སྐྱེ་བ་རྣམ་པ་བཅྭ་ལྔ་པོ་ཐོབ་པར་འགྱུར་བ་འདི་ལྟ་སྟེ། སྐྱེ་བ་ཐམས་ཅད་དུ་རྒྱལ་པོ་དགེ་བ་དང་མཇལ་བར་འགྱུར་བ་དང་། རྟག་པར་
ཡུལ་དགེ་བར་སྐྱེ་བར་འགྱུར་བ་དང་། རྟག་པར་དུས་བཟང་པོ་དང་མཇལ་བར་འགྱུར་བ་དང་། རྟག་པར་དགེ་བའི་བཤེས་གཉེན་དང་མཇལ་བར་འགྱུར་བ་དང་། རྟག་པར་ལུས་ཀྱི་དབང་པོ་ཚང་བར་འགྱུར་བ་དང་། ལམ་གྱི་སེམས་ལ་གོམས་པར་འགྱུར་བ་
དང་། སྡོམ་པའི་ཚུལ་ཁྲིམས་ཉམས་པར་མི་བགྱིད་པ་དང་། འཁོར་རྣམས་དྲིན་གྱིས་འདྲིས་ཤིང་འདུམ་པར་འགྱུར་བ་དང་། འཚོ་བའི་ཡོ་བྱད་རྣམས་རྟག་པར་འབྱོར་ཅིང་ལྡན་པར་འགྱུར་བ་དང་། རྟག་པར་གཞན་གྱིས་བཀུར་ཞིང་རིམ་གྲོ་བགྱིད་པར་འགྱུར་བ་

དང་། ཡོ་བྱད་བདོག་པ་རྣམས་གཞན་གྱིས་འཕྲོག་པར་མི་འགྱུར་བ་དང་། ཡིད་ལ་སྨོན་པ་རྣམས་བསམ་པ་བཞིན་དུ་འགྲུབ་པར་འགྱུར་བ་དང་། ལྷ་དང་། ཀླུ་དགེ་བ་རྣམས་ཀྱིས་རྟག་ཏུ་སྲུང་ཞིང་ཡོངས་སུ་སྐྱོབ་པར་འགྱུར་བ་དང་། སྐྱེ་བ་ཐམས་
ཅད་དུ་སངས་རྒྱས་མཐོང་ཞིང་ཆོས་ཐོས་པར་འགྱུར་བ་དང་། ཡང་དག་པའི་ཆོས་ཐོས་ནས་དོན་ཟབ་མོ་རྟོགས་པར་འགྱུར་བ་དག་ལགས་ཏེ། ལྷའམ་མི་གང་ལ་ལ་ཞིག་ཐུགས་རྗེ་ཆེན་པོའི་སེམས་ཀྱིས་གཟུངས་འདི་འདོན་ཅིང་ཡོངས་སུ་འཛིན་པར་བགྱིད་པ་གང་ལགས་
པ་དེ་དག་ནི་དགེ་བའི་སྐྱེ་བ་རྣམ་པ་བཅྭ་ལྔ་པོ་འདི་དག་ཐོབ་པར་འགྱུར་བས། ལྷ་དང་། མི་ཐམས་ཅད་ཀྱིས་རྟག་པར་བཏོན་ནས་ཡོངས་སུ་གཟུང་བར་བགྱི་སྟེ་ལེ་ལོ་བསྐྱེད་པར་མི་བགྱིའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་དེ་སྐད་ཅེས་སྨྲས་
ནས། འཁོར་འདུས་པའི་མདུན་དུ་ཐལ་མོ་སྦྱར་ཏེ་དྲང་པོར་འདུག་ནས་སེམས་ཅན་རྣམས་ལ་སྙིང་རྗེ་ཆེན་པོའི་སེམས་བསྐྱེད་དེ། འཛུམ་པའི་མདངས་ཀྱིས་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་ཀྱི་ཚིག་གྱ་
ནོམ་པ་འདི་དག་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་པ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོྃ་སརྦ་བནྡྷ་ན་ཙྪེ་ད་ན་ཀ་རཱ་ཡ། སརྦ་པཱ་ཡ་ས་མུ་དྲོ་ཙྪོ་ཥ་ཎ་ཀ་རཱ་ཡ། སརྦ་བྱཱ་དྷི་པྲ་ཤ་མ་ན་ཀ་རཱ་ཡ། སརྦ་
ཨི་ཏྱུ་པ་དྲ་བ་བི་ནཱ་ཤ་ན་ཀ་རཱ་ཡ། སརྦ་བྷ་ཡེ་ཥུ་ཏཱ་ར་ཎ་ཀ་རཱ་ཡ། ཏསྱ། ན་མ་སྐྲྀ་ཏྭཱ་ཨི་དཾ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། ཏ་བ་ནཱི་ལ་ཀཎྛ་ནཱ་མ་པ་ར་མ་ཧྲྀ་ད་ཡ། མཱ་བརྟ་ཡིཥྱཱ་མི། སརྦཱ་རྠ་སཱ་དྷཱནཱཾ། ཤུ་བྷ་ཙེ་ཏ་ནཱཾ། སརྦ་བྷཱ་ཏཱ་ནཱཾ། པཱ་པ་མཱ་རྒ་བི་ཤོ་དྷ་ཀཾ། །ཏདྱ་ཐཱ།
ཨཱ་ལོ་ཀེ །ཨ་དྷི་པ་ཏི། ལོ་ཀ་ཨ་ཏི་ཀྲཱནྟེ། ཨེ་ཧྱེ་ཧི་མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲི་ཡ་བོ་དྷི་སཏྭ། ཧེ་མ་ཧཱ་ཀཱ་རུ་ཎི་ཀ་མ་ཧཱ་སྨ་ར་ཧྲྀད་ཡན། ཨེ་ཧྱེ་ཧི་ཨཱརྱཱ་བ་ལོ་ཀི་ཏེ་ཤྭ་རཱ་ཡ། པ་ར་མ་མཻ་ཏྲི་ཙིཏྟ་ཀཱ་ར་ཎི་ཀ་ཀུ་རུ་ཀུ་རུ། ཀརྨ་སཱ་དྷཱ་ཡ་སཱ་དྷ་

ཡ། བི་དྱཱ་ན་དེ་ཧི་དེ་ཧི། མེ་ཨ་རཾ་ག་མཾ་ག་མ་བི་ཧཾ་ག་མ། སིདྡྷ་ཡོ་གཱི་ཤྭ་ར་དུ་ཧུ་དུ་ཧུ་བཱིརྱ་ནྟེ་མ་ཧཱ་བཱི་རྱནྟེ། དྷ་ར་དྷ་ར། དྷ་རེ་ནྡེ་ཤྭ་ར། ཙ་ལ་ཙ་ལ། བི་མ་ལ། མཱུརྟེ་ཨཱརྱཱ་བ་ལོ་ཀི་ཏེ་ཤྭ་ར། ཛི་ན་ཀྲྀཥྞ་ཛ་ཊཱ་མུ་ཀུ་ཊ། ཨ་ལཾ་ཀྲྀ་ཏ་ཤ་རཱི་ར། ལཾ་བ་པྲ་ལྃ་
བ་བི་ལཾ་བ། མ་ཧཱ་སིདྡྷ་བིདྱཱ་དྷ་ར། བ་ལ་བ་ལ་མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཙ་ལ་ཙ་ལ་མ་ཧཱ་ཙ་ལ། ཀྲྀཥྞ་བརྞ། ཀྲིཥྞ་བཀྵ། ཀྲྀཥྞ་པཱ་ཤ་ནིརྒཱ་ཏ་ན་ཧེ་པདྨ་ཧ་སྟ། ཙ་ར་ཙ་ར་ནིཤྩ་རེ་ཤྭ་རེ་ཀྲྀཥྞ་སརྦ་ཀྲྀ་ཏ་ཡ་ཛྙོ་པ་བཱི་ཏ། ཨེ་ཧྱེ་ཧི་མ་ཧཱ་བཱ་རཱ་ཧ་མུ་ཁ་ཏྲི་པུ་ར་
ད་ཧ་ནེ་ཤྭ་ར། ནཱ་རཱ་ཡ་ཎ་བ་ལ་རཱུ་པ་བེ་ཥ་དྷ་ར། ཧེ་ནཱི་ལ་ཀཎྛ། ཨེ་ཧྱེ་ཧི། མ་ཧཱ་ཧ་ལ་ཧ་ལ། བི་ཥ་ནིརྫྫ་ཏ། ལོ་ཀ་སྱ། རཱ་ག་བི་ཥ་བི་ནཱ་ཤ་ནཾ། དྭེ་ཥ་བི་ཥ་བི་ནཱ་ཤ་ནཾ། མོ་ཧ་གི་ཥ་བི་ནཱ་ཤ་ནཾ། ནི་རྨོཀྵ་ཎ་ཧུ་ལུ་ཧུ་ལུ། མུཉྩ་མུཉྩ། མུ་ཧུ་མུ་ཧུ། རཱ་ཧུ་ལ་རཱ་ཧུ་ལ།
ཧ་ལ་ཧ་ལཱ་ཧཱ་རེ་མ་ཧཱ་པདྨ་ནཱ་བྷི། ས་ར་ས་ར། སི་རི་སི་རི། སུ་རུ་སུ་རུ། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། བོ་དྷ་ཡཱ་མི་ཏ་བ་ནཱི་ལ་ཀཎྛ། ཨེ་ཧྱེ་ཧི་ནཱི་ལ་ཀཎྛ། ཨེ་ཧྱེ་ཧི་བཱ་མ་སྠི་ཏ་མ་ཧཱ་སིཾ་ཧ་མུ་ཁ། ཧ་ས་ཧ་ས། མུཉྩ་མུཉྩ། མ་ཧཱཊྚཱཊྚ་ཧཱ་སྱ། ཨེ་ཧྱེ་ཧི་བྷོ་བྷོ་མ་ཧཱ་
སིདྡྷ་ཡོ་གཱི་ཤྭ་ར་བྷ་ཎ་བྷ་ཎ་བཱ་ཙ་སཱ་དྷ་ཡ་སཱ་དྷ་ཡ། བི་དྱཱཾ་སྨ་ར་སྨ་ར་ཏྭཾ། ཧེ་བྷ་ག་བནྟཱ་ལོ་ཀ་བི་ལོ་ཀ་ཏྭཾ། ཏ་ཐཱ་ག་ཏཱ་ནཱཾ། ད་དཱ་ཧི་མེ་དཪྴ་ན་ཀཱ་མ་སྱ་དརྴ་ནཱཾ། པྲ་སཱ་དྷ་ཡ་མེ་སྭཱ་ཧཱ། སིད་དྷཱ་ཡ་སྭཱ་ཧཱ། མ་ཧཱ་སིད་དྷཱ་ཡ་སྭཱ་ཧཱ། སིདྡྷ་ཡོ་གཱི་ཤྭ་རཱ་ཡ་སྭཱ་ཧཱ། ནཱི་ལ་ཀཎྵཱ་ཡ་
སྭཱ་ཧཱ། བཱ་རཱ་ཧ་མུ་ཁཱ་ཡ་སྭཱ་ཧཱ། མ་ཧཱ་བཱ་རཱ་ཧ་མུ་ཁཱ་ཡ་སྭཱ་ཧཱ།