Kinh tạng Tây Tạng (Kangyur Đại Học) — 100_གཟུངས་འདུས།_ཨེ

མ་དབང་། །རྡོ་རྗེ་བཟང་པོ་རྡོ་འོད་རྡོ་རྗེ་འབར། །རྡོ་རྗེ་སེམས་དཔའ་

རྡོ་རྗེ་འབར་བས་བརྒྱན། །རྡོ་རྗེ་འོད་ཅན་རྡོ་འཛིན་རྡོ་རྗེ་དྲག །རྡོ་རྗེ་རྒྱ་ཆེན་རྡོ་རྗེ་རབ་མཆོག་དབང་། །ན་བཟའ་སྔོ་ཞིང་སྐུ་ཡི་ཆ་ལུགས་སྔོ། །སྐུ་མདོག་སྔོ་ཞིང་སྔོ་བའི་འོད་ཀྱིས་བརྒྱན། །རལ་གྲི་རྣོ་འཇེབས་སྔོ་ཞིང་བརྟན་པ་བསྣམས། །མཁའ་
སྔོ་གཞལ་མེད་ཁང་འབར་ནང་ན་བཞུགས། །ལྷ་ཞལ་དྲི་མེད་ཤིན་ཏུ་མི་བཟད་འབར། །རབ་ཏུ་དྲག་ལ་འོད་ཟེར་འཕྲོ་ཞིང་འགྱུ། །སྡིག་སེལ་རྡུལ་ལྟར་འཁྲུག་བྱེད་ཕྲེང་མཆོག་ཅན། །གློག་གི་སྟོབས་ཀྱིས་སྣང་བས་སྒེག་ལ་བརྟན། །རལ་གྲི་མཚོན་ཐོགས་དབང་
ལྡན་མཐུ་སྟོབས་མཚོན། །རྡོ་རྗེའི་མཚོན་ཐོགས་མདའ་དང་མདུང་ཐུང་འཇིགས། །འཁོར་ལོའི་མཚོན་ཐོགས་བཅིབས་པ་རི་དང་འཁྲུལ། །གསལ་ཤིང་མཚོན་ཐོགས་བགེགས་ཀྱི་སྟོབས་འཇོམས་པ། །བདེ་འབྱུང་འཇིག་རྟེན་གསུམ་བདག་རྡོ་རྗེའི་དབྱུག །སྐུ་རྣམས་
ཐམས་ཅད་ཉི་མའི་འོད་ཀྱིས་བརྒྱན། །གྲགས་པའི་རིགས་སུ་བྱུང་བས་རྒྱལ་པོ་མཛད། །མུ་ཏིག་ཕྲེང་བས་སྒེག་ཅིང་མཛེས་པར་བགྱིས། །སྐུ་མཛེས་བརྙེས་ཤིང་ཕུན་སུམ་ཚོགས་པ་བརྙེས། །རབ་འབྱམ་མཆོག་བརྙེས་ས་ལ་འཇུག་པ་བརྙེས། །མཐུ་སྟོབས་ལྷག་པ་
བརྙེས་ཤིང་གྲུབ་བརྙེས་ལ། །རིག་པ་གསུམ་གྱི་སྟོབས་བརྙེས་མཐུ་བརྙེས་པ། །བདེ་འདྲེན་ཞི་བ་འདྲེན་ཅིང་འོད་འདྲེན་པ། །ཆ་ལུགས་གསལ་མཆོག་དར་བ་ཆེན་པོ་འདྲེན། །བྱམས་འདྲེན་ཉི་མ་འདྲེན་ཅིང་སྐྱེ་དགུ་འདྲེན། །ལེགས་འདྲེན་ཞིང་གི་སྟོབས་འདྲེན་སྙིང་རྗེ་ཅན། །
དྲི་མེད་ཆ་ལུགས་གསལ་བ་ཆ་ལུགས་འབར། །རྣམ་གྲགས་སྒེག་པས་གྲགས་པའི་བ་དན་ཅན། །འགྲོ་བའི་སྐབས་འབྱེད་འཇུག་དང་ལྡོག་པ་མཁྱེན། །ལོངས་སྤྱོད་གསལ་བར་སྟོན་པའི་སེམས་ཀྱིས་འཇུག །སྐུ་དམར་སྐུ་མཐོན་སྐུ་མཛེས་སྐུ་བཟང་བ། །སྐུ་སེར་སྐུ་
དཀར་དར་བ་ཆེན་པོའི་སྐུ། །སྐུ་རོལ་རྡོ་རྗེའི་སྐུ་མངའ་སྤྱན་ལེགས་སྐུ། །རིགས་སྐུ་རིག་སྔགས་འཆང་བ་རིན་ཆེན་བསྣམས། །གཙུག་གི་ནོར་བུ་གཙུག་ཅན་ཅོད་པན་མཆོག །ཅོད་པན་ཅན་ཏེ་ཆོས་འཛིན་རྡོ་རྗེ་མཆོག །དཔལ་འཛིན་རིན་ཆེན་དམ་པ་འཆང་བའི་མཆོག །

སྔགས་གཞི་ཕྱག་རྒྱ་འཆང་བ་ཕུན་སུམ་ཚོགས། །རབ་མཛེས་མཁའ་ལ་གཤེགས་ཤིང་རབ་ཏུ་རྒྱུ། །སྲིད་གསུམ་ཉི་མ་གཅིག་པུ་འོད་སྟོང་མངའ། །རི་རྩེར་འཆར་བ་བདལ་ལེགས་བཀྲ་ཤིས་པ། །ཡོན་ཏན་མཐུ་སྟོབས་ཁྱད་པར་རྣམ་པར་གྲགས། །ནོར་བུ་ཆེན་པོ་
ནོར་སྡུག་ནོར་བུའི་འོད། །ཉི་མའི་ནོར་བུ་ཚུལ་སྤྱོད་ནོར་བུ་འབར། །ཡིད་བཞིན་ནོར་བུ་འགྲོ་ཀུན་མགོན་གཅིག་པུ། །ནམ་མཁའི་དཀྱིལ་ན་ནོར་བུ་གཅིག་སྣང་བ། །སེམས་ཅན་རྣམ་དག་ཡངས་ཤིང་རྣམ་པར་གྲགས། །སྲིད་གསུམ་སྲུང་མ་གཅིག་པུ་རྒྱལ་སྲས་
མཆོག །ཞི་བ་རབ་ཏུ་ཞི་བ་སྐྱབས་འོས་རྟག །སྐྱེ་དགུའི་བདག་པོ་པད་བྱུང་པདྨ་སྐྱེས། །ཀུན་ནས་འོད་བཟང་ལེགས་བཤད་ཆོས་མངའ་བ། །དར་བ་ལེགས་བཤད་རབ་དུལ་ལེགས་བཤད་ཕྱག །བློ་བཟང་འོད་བཟང་བདེ་ལྡན་སྐྱེ་གནས་བཟང་། །མཁས་རབ་
ཞི་རབ་མཆོག་གི་ཆོས་དང་ལྡན། །ཞི་མཛད་རྒྱལ་འབྱུང་བདེ་བ་འབྱུང་བའི་གནས། །འོད་ཀྱི་འབྱུང་གནས་བདེ་མཛད་དབང་དུ་མཛད། །ལེགས་འབྱུང་ཤེས་རབ་འབྱུང་གནས་སྟོབས་སྐྱེད་པ། །སྙིང་རྗེའི་འབྱུང་གནས་བློ་བཟང་རྣམ་གྲགས་མཛད། །རྣམ་གྲོལ་ངས་གྲོལ་
ཤིན་ཏུ་གྲོལ་བའི་བློ། །བློ་ཡངས་རྣམ་པར་བཀྲམ་ཞིང་རྣམ་པར་གྲགས། །ཀུན་དུ་ལོངས་སྤྱོད་སྒོ་སྟེ་བློ་ཡི་མཆོག །བློ་གྲོས་བརྟན་པ་དཀོན་མཆོག་གསུམ་ལས་བསྒྲུབས། །སངས་རྒྱས་པདྨ་འདབ་རྒྱས་འདྲ་བའི་ཞལ། །དག་ཅིང་སྤྱན་ཡངས་ཆ་ལུགས་ཡིད་དུ་འཐད། །
སྙིང་པོ་གསལ་བའི་སྙིང་པོ་བརྟན་ཞིང་དུལ། །ངོ་བོ་ཉིད་ཀྱིས་རྒྱུན་བརྙེས་རབ་གསལ་བ། །སྤྱན་ཟུར་མདའ་ནི་རབ་ཏུ་གཏད་ལེགས་པ། །འཇིགས་མེད་ཞལ་རས་སྟོན་གྱི་ཟླ་བ་འདྲ། །མདུང་ཐུང་བརྒྱ་ཡི་མཚོན་མཆོག་མཚོན་ཆ་རྫོགས། །དྲག་པོ་འཇིགས་པ་སྡིག་སེལ་
གསུམ་ལས་སྐྱེས། །རབ་དུལ་མཁས་པ་འགྲོགས་དགའ་འདྲིས་པར་སླ། །རབ་ཏུ་དྲག་པ་གཉེན་རབ་གསེར་མདོག་ཅན། །ལྷ་ཆེན་བདེ་བྱེད་གསལ་ཤིང་ཕྱག་ན་བསྣམས། །སྤྱན་གསུམ་རིག་པ་གསུམ་ལྡན་མེ་གསུམ་སེལ། །འདོད་བཟང་མེ་ཏོག་མཚོན་ཐོགས་མེ་ཏོག་

མདའ། །ན་བཟའ་བཟང་མནབས་གཡས་འཕེན་ཚབས་ཆེར་འཕེན། །ལེགས་བྲིས་སྣ་ཚོགས་མཚོན་ཆ་སྣ་ཚོགས་མདའ། །ན་བཟའ་སྣ་ཚོགས་སྣ་ཚོགས་རྒྱན་གྱི་དཔལ། །ཞལ་རས་ཟླ་བ་འོད་ཟེར་རྒྱས་པ་འདྲ། །ཞལ་མདངས་བསྟན་པས་འཇིག་རྟེན་
ཀུན་འབྱོར་མཛད། །བཞད་པ་ཉི་མའི་འོད་ཟེར་རབ་འཇེབས་མངའ། །ཞལ་མདངས་རྒྱ་མཚོ་གསལ་མཛད་ལམ་མེ་བ། །དབང་ཆེན་རྡོ་རྗེའི་ཐོག་ལགས་འཇིགས་པའི་སྒྲ། །རྡོ་རྗེ་དྲག་པོ་ནོར་བུ་གཡོ་བ་འཛིན། །སྒྲ་སྙན་སྣང་བར་མཛད་པའི་མཐུ་དང་ལྡན། །བློ་གྲོས་ཆེན་
པོ་བློ་གྲོས་རྣོ་བའི་མཆོག །རྒྱན་འཛིན་དཔལ་འཛིན་རིན་ཆེན་ཞལ་དང་ལྡན། །རྒྱུ་དང་མི་རྒྱུ་འགྲོ་བ་ཀུན་གྱི་གནས། །དེ་བཞིན་གཤེགས་པ་མགོན་སྲས་ཕྲེང་བ་བཟང་། །སྟོབས་ཆེན་འཇིག་རྟེན་བློ་གྲོས་ངོ་བོ་ཉིད། །སྐྱེ་དགུའི་བདག་པོ་བཀའ་ལུང་མཉམ་ཞིང་བརྟགས། །
མི་ཡི་མངའ་བདག་མཐོ་རིས་སྐྱེད་པའི་རྒྱུ། །སྒྱུ་འདྲ་འདོད་པའི་མངའ་དང་རྡོ་རྗེ་ཅན། །མཐུ་སྟོབས་མངའ་ཞིང་སྤྱན་བཟང་སྡུག་པར་ལྡན། །སྟོན་པ་བཟང་པོ་སྟོང་ཉིད་ལམ་གྱི་སྟེགས། །གཅེས་གསུམ་འཕེལ་བའི་རྒྱུ་ལ་འཇུག་པ་མཛད། །བརྟན་པོ་རྒྱུ་ལ་རབ་ཏུ་ངེས་གྱུར་པ། །
དཀྱིལ་འཁོར་དམ་པ་ཀུན་གྱི་སློབ་དཔོན་ལགས། །གཅིག་པུ་སྐྱེ་དགུའི་དཀྱིལ་འཁོར་ཆོ་ག་མཁྱེན། །རྣམ་པར་སྣང་མཛད་ཞིང་གི་གནས་ནས་སྐྱེས། །དབང་བསྐུར་བརྙེས་ཤིང་ས་བཅུར་ལེགས་པར་གནས། །གནས་ཆེན་སོན་པ་མཆོག་གནས་གཅིག་པུ་ལགས། །སྐྱེ་
དགུ་རྣམས་ཀྱི་ཉོན་མོངས་སེལ་བ་དང་། །སྡིག་འཇོམས་མཚན་བརྒྱ་རྩ་བརྒྱད་འདི་ཐོས་ནས། །བདེ་གཤེགས་སྲས་མཆོག་སུ་ཞིག་འདོན་བྱེད་པ། །འཇིག་རྟེན་ཟླ་བ་གཅིག་ཤར་བཞིན་དུ་སྣང་། །ནམ་མཁའི་སྙིང་པོ་སེམས་ཅན་གཅིག་པུ་ཡི། །མདུན་འདུག་ནང་པར་
བསྟོད་པ་འདི་བརྗོད་གང་། །དེ་ནི་སྲིད་གསུམ་སེམས་ཅན་མཆོག་འགྱུར་ཞིང་། །དྲི་མའི་གནས་ཀུན་ལས་ཀྱང་ཐར་བར་འགྱུར། །གཡུལ་དང་འཐབ་རྩོད་ཤིན་ཏུ་མི་བཟད་དང་། །མུ་གེའི་གནོད་པ་མི་ནད་བྱུང་བ་ན། །མཁས་པ་སུ་ཞིག་སྔར་ལངས་དད་བསྐྱེད་ནས། །

ནམ་མཁའི་སྙིང་པོ་ལ་ནི་སྟོད་བྱེད་པ། །དེ་ནི་འཇིགས་པའི་འབྱུང་གནས་ཐམས་ཅད་དང་། །སྡུག་བསྔལ་འབྱུང་འདྲེན་སྡིག་པ་རྣམས་ལས་གྲོལ། །དེས་ནི་ཞི་མཆོག་མཆོག་བདེ་ཀུན་གནས་དང་། །བདེ་བ་རྒྱ་ཆེན་ངེས་པར་ཐོབ་པར་འགྱུར། །བདེ་འཐོབ་ལོངས་སྤྱོད་འཕེལ་
བར་བྱ་བའམ། །རྒྱལ་སྲིད་འཐོབ་དང་བྱད་གཟུགས་ནོར་འཐོབ་དང་། །རིགས་འཐོབ་ཡོན་ཏན་ཀུན་གྱི་གཞི་བསྒྲུབ་ཕྱིར། །བཏོན་ན་འགྲུབ་འགྱུར་འདི་ལ་ཐེ་ཚོམ་མེད། །དེ་ཕྱིར་ཇི་སྟེ་རྟག་ཏུ་འདོད་བདེ་ཀུན། །འདོད་ན་འགྲོ་བ་ཀུན་ལ་གཅིག་དཔའ་བ། །ནམ་མཁའི་སྙིང་པོ་
སྲིད་གསུམ་མགོན་པོ་ལ། །རྟག་ཏུ་བསྟེན་ཅིང་སྔགས་ཀྱང་བསྟེན་པར་བགྱི། །འཕགས་པ་ནམ་མཁའི་སྙིང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སྷོ།། ༄༅། །འཕགས་པ་ཀུན་དུ་
བཟང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ཀུན་དུ་བཟང་པོ་ནམ་མཁའི་དཀྱིལ་ཀུན་དུ་རབ་འབྱམ་མ་ལུས་པ་དང་མཉམ་པའི་ངོ་བོ་ཉིད་ཀྱི་ཆོས་ཀྱི་སྣང་བ་གསལ་བ་བརྙེས་པ། སའི་དཀྱིལ་
འཁོར་ཀུན་དུ་འཕྲོས་པའི་སྐུ་ཐ་དད་པ་མེད་ཅིང་དུས་གསུམ་གྱི་སྐུ་མཉམ་པ་ཉིད་བརྙེས་པ། གཟུགས་སྣ་ཚོགས་ཅན། བྱང་ཆུབ་སེམས་དཔའ་སེམས་དཔའ་ཆེན་པོའི་མཆོག་དང་། རབ་མཆོག་དམ་པ་སྦྱིན་པ། ཡོན་ཏན་ཆེན་པོའི་སྐུ་ས་ཀུན་དུ་མངའ་མཛད་པ་ལ་ཕྱག་འཚལ་
ལོ། །དེ་ནས་དེའི་ཚེ་བྱང་ཆུབ་སེམས་དཔའ་ཆེན་པོའི་མཆོག་ཀུན་དུ་བཟང་པོ་གཟུགས་སྣ་ཚོགས་ཅན། བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་རབ་འབྱམ་སའི་དབང་ཕྱུག་ཆེན་པོ་ཞེས་བྱ་བ་ལ་སྙོམས་པར་ཞུགས་སོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་དུ་བཟང་པོ་སྙོམས་པར་ཞུགས་མ་ཐག་པ་དེའི་ཚེ་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སྐུ་རབ་འབྱམ་ཀུན་དུ་ཡོངས་སུ་རྒྱས་པར་གྱུར་ཏེ། ནམ་མཁའི་ཁམས་ཀྱི་ཁོངས་སུ་གཏོགས་པའི་སྐུ་རྣམས་སའི་དཀྱིལ་འཁོར་དུ་མ་དག་ཏུ་ཀུན་

ནས་འཁོད་པར་གྱུར་ཏོ། །དེ་ནས་སངས་རྒྱས་ཀྱི་ཞིང་རབ་འབྱམ་ཐམས་ཅད་ཀྱི་ཁོངས་སུ་གཏོགས་པའི་དེ་བཞིན་གཤེགས་པ་རྣམས་ཀྱིས་ཕྱག་གཡས་པ་བརྐྱང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོའི་མགོ་བོ་ལ་བྱུགས་ནས་བཀའ་སྩལ་
པ། རིགས་ཀྱི་བུ་ལེགས་སོ་ལེགས་སོ། །སངས་རྒྱས་འབྱུང་བ་ཐམས་ཅད་ཀྱི་སྙིང་པོ་གཟུངས་ཆེན་མོ་ཤོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོའི་མཆོག །ལུས་འོད་ཟེར་འབུམ་གྱིས་སྣང་བར་བྱས་པས་དེའི་ཚེ་སངས་རྒྱས་ཀྱི་ཞིང་ཐམས་ཅད་གཡོ་བར་
བྱས་ནས། གཟུངས་འདི་བཤད་དོ། །ཏདྱ་ཐཱ། ཨོྃ་ན་མོ་ན་མ་སྟྲི། བྷུ་བ་ནེ་ཤྭ་རེ། མ་ཧཱ་བྷོ་གཱ་ཡ། ཨ་ས་མ་ས་མ། ཨ་མི་ཏ་ས་མ། ཨ་ནནྟ་ས་མ། ག་ག་ན་ས་མ། ཏྲི་བྷུ་བ་ན་ས་མ། ཨ་ཤེ་ཥ་ས་མ། བེ་ཥ་ས་མ། པ་ར་མ་ཨརྠ་ས་མ། སྭ་བྷཱ་བ་ས་མ།
ཏ་ཐཱ་ཏཱ་ས་མ། ཨ་ར་ཛཿས་མ། ཤུདྡྷི་ས་མ། བུདྡྷི་ས་མ། དྷརྨ་ཏ་ཐཱ་ཏཱ་ས་མ། ཨ་བྷི་ཥ་མ་ས་མ། ས་མ་ས་མ། ཨེ་ཀཱ་ནཱ་ཡ། སཱ་ག་ར། བི་ཤུདྡྷེ། ཨཱ་ལོ་ཀ། ཧཱི་ཧཱི། ལབྡྷ་ལབྡྷ། བི་ཛ་ཡ་བི་ཛ་ཡ། ཨོྃ་པྲ་ས་ག་ཏ། ན་ཡ་ན་ཡ། ཧི་ནི་ར་ཨ་དྷིཥྛཱ་ན། སཾ་བྷོ་ག།
ཨཾ་ཨ་ན་ལ་ཡ་ལ་ཡ། དྷརྨ་ཨ་གྲ། དྷ་ར་དྷ་ར། ཛ་ཡ་ཛ་ཡ། ཧཱུྃ་ཧཱུྃ། དྷ་མ་དྷ་མ་སྭཱ་ཧཱ། དེ་ནས་རྒྱལ་བའི་སྲས་ཀྱི་ཐུ་བོ་འཇིག་རྟེན་ཐམས་ཅད་ཀྱི་མགོན་པོ་གཅིག་པུ། སེམས་ཅན་ཐམས་ཅད་ལ་ཕན་པར་འདོད་པ་བྱང་ཆུབ་སེམས་དཔའ་ཀུན་དུ་བཟང་པོས་བཅོམ་ལྡན་
འདས་ཀྱི་ཞལ་དུ་བལྟས་ཏེ། སའི་དཀྱིལ་འཁོར་གཡོ་བར་བྱས་ནས་དེ་སྐད་ཅེས་སྨྲས་ཏེ། འཇིག་རྟེན་གསུམ་པོ་ཀུན་དུ་གང་བར་བྱས་སོ། །དེ་ནས་ལྷ་དང་ལྷ་མ་ཡིན་དུ་བཅས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་གང་བའི་དཀྱིལ་འཁོར་ནས་གསེར་གྱི་འོད་ཟེར་འབར་ཞིང་
སྣང་ལ་རབ་ཏུ་གཡོ་བས་བརྒྱན་པའི་ལུས་ཅན་ས་སྟེང་ཀུན་གྱི་རྡོ་རྗེ་མེ་ཏོག་ཐོད་སྟན་ཆེན་པོ་ལས་བསྐྱོད་དེ། དཀྱིལ་འཁོར་ནས་ལངས་ནས་ཧ་ཧ་ཞེས་བྱ་བའི་སྒྲ་ཕྱུང་སྟེ་སྨྲས་པ། ཀྱེ་མ་སྙིང་རྗེ་ཆེན་པོ་དང་ཡོན་ཏན་གྲངས་མེད་པའི་རྒྱ་མཚོ་རབ་ཏུ་འབྱམ་པའི་གཟུངས་ཆེན་མོ། ཀྱེ་མ་སངས་

རྒྱས་འབྱུང་བ་ཆེན་མོ། མཐའ་དང་དབུས་མེད་པའི་ས་གསུམ་དང་མཉམ་ཞིང་སེམས་ཅན་གྱི་ཁམས་གྲངས་མེད་པ་ཡོངས་སུ་སྨིན་པར་བྱ་བའི་ཕྱིར་གནས་པ། ཆོས་ཀྱི་དཀྱིལ་འཁོར་གནས་པ་མེད་པའི་གཟུངས་ཆེན་མོ། ཀྱེ་མ་བསྐལ་པ་མཐའ་ཡས་པ་ནས་འཕངས་པའི་སྡིག་པའི་
བག་ཆགས་སེལ་ཅིང་ཉོན་མོངས་པའི་རྒྱ་མཚོ་སྐེམས་ལ་ལྟ་བའི་རི་བོ་འཐོར་བར་བྱེད་པའི་གཟུངས་ཆེན་མོ། བསྐལ་པ་མཐའ་ཡས་པར་དགེ་བའི་རྩ་བའི་ཚོགས་འབྱུང་བ་ཡང་དག་པར་མ་བསགས་ཤིང་། བདེ་བར་གཤེགས་པ་འབུམ་ཕྲག་དུ་མ་མངོན་སུམ་དུ་མཐོང་བས་བྱང་
ཆུབ་ཀྱི་ས་བོན་མ་བསྒྲུབས་ལ། ཐམས་ཅད་མཁྱེན་པའི་སའི་ཁྱད་པར་གྱི་ཡོན་ཏན་རྒྱ་མཚོ་ཡོངས་སུ་རྫོགས་པ་རྗེས་སུ་ཐོབ་པ་མ་ཡིན་པ་གཞན་ནི་སུས་ཀྱང་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གཟུངས་ཆེན་མོ་འདི་མཉན་པར་ཡང་མི་ནུས་ན། གཟུང་བའམ། བཀླག་
པའམ། ཀུན་ཆུབ་པར་བྱ་བ་ལྟ་ཅི་སྨོས། གཟུངས་ཆེན་མོ་འདིའི་མིང་ཙམ་ཡང་བསྐལ་པ་བྱེ་བ་ཕྲག་སྟོང་གི་བར་དུ་ཐོས་པར་དཀའོ། །ཀྱེ་མ་གཟུངས་ཆེན་མོ་འདི་ནི་སེམས་ཅན་གང་དག་གི་ལག་ན་འདུག་པ་དེ་དག་ནི་རྙེད་པ་ལེགས་པར་རྙེད་པའོ། །འཚོ་བ་བཟང་པོས་འཚོ་
བའོ། །མངོན་པར་ཤེས་པ་རྣམས་ཀྱི་གཞི་བཟང་པོའོ། །དགེ་བའི་རྩ་བ་ཡང་དག་པར་རྫོགས་པའོ། །དེ་བཞིན་གཤེགས་པའི་སྤྱོད་ཡུལ་ལ་གནས་པའོ། །ཡོན་ཏན་ཐམས་ཅད་ཡང་དག་པར་རྫོགས་པའོ། །འདི་ལན་ཅིག་བརྗོད་པ་ཙམ་གྱིས་ངན་སོང་གི་སྡུག་བསྔལ་
ཐམས་ཅད་ལས་ཐར་བར་འགྱུར་རོ། །ལན་གཉིས་བརྗོད་པ་ཙམ་གྱིས་སྡིག་པ་ཐམས་ཅད་ལས་གྲོལ་བར་འགྱུར་རོ། །ལན་གསུམ་བརྗོད་པ་ཙམ་གྱིས་ཉོན་མོངས་པ་ཐམས་ཅད་ལས་གྲོལ་བར་འགྱུར་རོ། །དེ་ལྟར་ན་བརྗོད་པ་ཙམ་གྱིས་གོང་ནས་གོང་དུ་ཡོན་ཏན་རྣམས་འཐོབ་པར་
འགྱུར་ཏེ། དེ་བཞིན་གཤེགས་པ་ཡང་མཐོང་བར་འགྱུར་རོ། །འཆག་བཞིན་དུ་བཟླས་བརྗོད་བྱས་ན་སྡུག་བསྔལ་ཐམས་ཅད་ལས་ཐར་བར་འགྱུར་རོ། །ཤིང་གཅིག་འགྲེང་གི་དྲུང་དུ་བཟླས་བརྗོད་བྱས་ན་གྲུབ་པ་ཐམས་ཅད་འཐོབ་པར་འགྱུར་རོ། །འགྲོ་བཞིན་དུ་བཟླས་བརྗོད་

བྱས་ན་སེམས་ཅན་ཐམས་ཅད་དབང་དུ་འགྱུར་རོ། །ནགས་ཚལ་ཆེན་པོའི་ནང་དུ་སྐྱིལ་མོ་ཀྲུང་བཅས་ཏེ་འདུག་ལ་ལན་བདུན་བརྗོད་ན་བསམ་གཏན་ཆེན་པོ་འཐོབ་པར་འགྱུར་ལ། ཉོན་མོངས་པ་དང་ཡང་བྲལ་བར་འགྱུར་རོ། །འཕགས་པ་ཀུན་དུ་བཟང་
པོའི་སྐུ་གཟུགས་ཀྱི་དྲུང་དུ་སྐྱིལ་མོ་ཀྲུང་བཅས་ཏེ་འདུག་ལ་མེ་ཏོག་ལ་སོགས་པ་ཇི་སྙེད་པས་མཆོད་ནས། ལུས་ངལ་བར་གྱུར་གྱི་བར་དུ་གཟུངས་ཆེན་མོ་འདི་བརྗོད་ལ། དལ་བར་གྱུར་ནས་དེ་ཉིད་དུ་ཉལ་ན་རྨི་ལམ་དུ་བྱང་ཆུབ་སེམས་དཔའ་ཀུན་དུ་བཟང་པོ་མཐོང་བར་འགྱུར་ཏེ།
ཕྱག་གཡས་པས་དེ་ལ་བྱུགས་ནས་ཡང་དག་པར་དབུགས་འབྱིན་པར་མཛད་དེ། ཆོས་ཀྱི་སྣང་བ་ཆེན་པོ་ཡང་གསོལ་བར་མཛད་དོ། །འདི་སྐད་དུ་རྒྱལ་བའི་སྲས་ལེགས་སོ་ལེགས་སོ། །ཁྱོད་ནི་དེ་བཞིན་གཤེགས་པའི་དཀྱིལ་འཁོར་ཆེན་པོར་ཞུགས་པ་ཡིན་ཏེ། ཁྱོད་ཚེ་
བརྗེས་ནས་ས་ཆེན་པོ་འཐོབ་པར་འགྱུར་རོ་ཞེས་ཀྱང་གསུངས་སོ། །དེ་ནས་ལུས་བདེ་བ་དང་། སེམས་བདེ་བ་དང་། དགའ་བ་ཆེན་པོ་དང་། དང་བ་དང་། མཆོག་ཏུ་དགའ་བ་ཆེན་པོ་དང་ལྡན་བཞིན་དུ་སད་པར་འགྱུར་རོ། །མཐུ་ཆེ་བ་དང་། དབང་ཆེ་བར་གྲགས་པར་ཡང་
འགྱུར་རོ། །ལྷ་རྣམས་ཀྱང་དེ་ལ་བལྟ་བའི་ཕྱིར་འོང་ངོ་། །ནང་པར་ལངས་ནས་བྱང་ཆུབ་སེམས་དཔའ་རྣམས་ཀྱིས་ཡང་དག་པར་བསྡུས་པའི་མདོ་སྡེ་རྣམས་བཀླག་པར་བྱའོ། །སེམས་ཅན་ཐམས་ཅད་ལ་ཡང་ཕན་པ་དང་། བདེ་བའི་སེམས་བསྐྱེད་པར་བྱའོ། །དེ་ནས་ཕ་
རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་ཤིང་སྡིག་པ་ཐམས་ཅད་དང་བྲལ་ཏེ། ཉོན་མོངས་པའི་ཕྱོགས་རྣམས་བཅོམ་ལ། དེ་བཞིན་གཤེགས་པ་རྣམས་ཀྱིས་ཀྱང་བསྔགས་པར་འགྱུར་རོ། །ལྷ་ལ་སོགས་པ་ཡང་དེ་ལ་བསྲུང་བ་དང་། བསྐྱབ་པ་དང་། སྦ་བའི་ཕྱིར་
བརྩོན་པར་འགྱུར་རོ། །དེ་ལྟར་ཇི་སྐད་བསྟན་པ་བཞིན་དུ་བྱེད་པའི་རྒྱལ་བའི་སྲས་དེ་ནི་རིང་པོ་མི་ཐོགས་པར་ཀུན་དུ་བཟང་པོའི་ས་ཆེན་པོ་ལ་འཇུག་པར་འགྱུར་རོ། །དེ་ནས་རྡོ་རྗེ་གཙུག་ཕུད་ལ་སོགས་པ་སྟོང་གསུམ་གྱི་བདག་པོ་རིག་སྔགས་འཆང་ཆེན་མོ་རྣམས་དང་། སྤྱན་ཆེན་མོ་

ལ་སོགས་པ་རིག་སྔགས་འཆང་ཆེན་མོ་རྣམས་དང་། རྡོ་རྗེ་སྙིང་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། རྡོ་རྗེ་ཞགས་པ་ལ་སོགས་པ་རིག་སྔགས་ཀྱི་ལྷ་ཆེན་པོ་རྣམས་དང་། རིན་ཆེན་དྲ་བ་ཅན་ལ་སོགས་པ་རིག་སྔགས་ཀྱི་ལྷ་མོ་ཆེན་མོ་རྣམས་དང་།
ལྷ་མོ་སྒྲོལ་མ་ལ་སོགས་པ་བྱང་ཆུབ་སེམས་དཔའ་ཆེན་པོའི་དཀྱིལ་འཁོར་གྱི་ལྷ་རྣམས་དང་། དར་ཆེན་དང་། གཟུགས་བཟང་དང་། ཤིན་ཏུ་བལྟ་ན་སྡུག་པ་ལ་སོགས་པ་གཞོན་ནུ་རྣམས་དང་། གཞོན་ནུ་མ་རྣམས་དང་། བྲན་རྣམས་དང་། བྲམ་མོ་རྣམས་དང་། མི་
འཁྲུགས་པ་ལ་སོགས་པ་ལོག་འདྲེན་ཆེན་པོ་རྣམས་དང་། ལུས་མཆོག་ལ་སོགས་པ་སྲིན་པོའི་དབང་པོ་རྣམས་དང་། མ་མོ་ལ་སོགས་པ་སྲིན་མོ་རྣམས་དང་། དབང་ཕྱུག་ཆེན་པོ་ལ་སོགས་པ་ལྷའི་དབང་ཕྱུག་རྣམས་དང་། རྡོ་རྗེ་མེ་ཏོག་ཐོད་ལ་སོགས་པ་དཀྱིལ་འཁོར་
ཆེན་པོར་འདུས་པའི་བྱང་ཆུབ་སེམས་དཔའ་ལ་སོགས་པ་ཐམས་ཅད་ལངས་ནས། བྱང་ཆུབ་སེམས་དཔའ་ཆེན་པོའི་མཆོག་འཕགས་པ་ཀུན་ཏུ་བཟང་པོ་ལ་མཚན་བརྒྱ་རྩ་བརྒྱད་བླ་ན་མེད་པའི་ཡོན་ཏན་གྱི་སྣང་བ་ཞེས་བྱ་བས་བསྟོད་པ། ཀུན་དུ་བཟང་པོ་ཀུན་གྱི་མཆོག །སྣ་ཚོགས་
ཀུན་གྱི་འབྱོར་པ་ཆེ། །དཀྱིལ་འཁོར་ཆེན་པོ་རྡོ་རྗེ་མཆོག །སྣ་ཚོགས་གཟུགས་ཅན་ཕྱོགས་ཀྱི་བདག །རྡོ་རྗེ་ཆེན་པོ་དགྱེས་པ་ཆེ། །གཟི་བརྗིད་ཆེན་པོ་སྟོབས་པོ་ཆེ། །གནོན་དང་རབ་གནོན་དཔལ་གྱི་རབ། །ཁྱབ་བདག་རྒྱལ་བའི་བློ་གྲོས་རྒྱལ། །རྡོ་རྗེ་
ཆེན་པོ་རབ་ཏུ་བཞད། །བསྒྲུབ་དཀའ་ཆེན་པོ་སྒྲུབ་མཛད་པ། །རོལ་མོ་ཆེན་པོས་རྣམ་པར་རོལ། །རབ་དགའ་ཆེན་པོ་འདུལ་བ་པོ། །ལྷ་ཆེན་དབང་ཕྱུག་ཆེན་པོ་སྟེ། །བཙན་པོ་ཁྱབ་འཇུག་སྐྱེ་དགུའི་བདག །ས་སྟེང་ས་འོག་ས་ལ་དགྱེས། །དེ་བཞིན་ས་འཛིན་
ས་གསུམ་པ། །དུལ་དང་སྦྱིན་པའི་གོ་རིམས་ཐབས། །རབ་མཁྱེན་སྟོང་གི་མངའ་བདག་ལགས། །ཤེས་ཉེན་ཅན་ཏེ་བཟོད་ལ་དགྱེས། །བརྩོན་འགྲུས་འབྱུང་བ་འབྱོར་པ་ཆེ། །བརྩོན་འགྲུས་བཅུ་དང་ཐབས་བཅུ་པ། །སྟོབས་བཅུའི་སྲས་ཆེན་ཐུ་བོ་སྟེ། །མཐུ་

སྟོབས་སྟོང་གིས་སྤྲོ་བ་དང་། །ཡོངས་སུ་ལྡན་ཞིང་བཅུ་སེལ་བ། །རྡུལ་སེལ་རྒྱལ་པོ་ཆེན་པོ་སྟེ། །རྒྱལ་པོ་དཀྱིལ་འཁོར་རྒྱ་མཚོ་བ། །རྡུལ་རྣམས་རབ་ཏུ་ཞི་བའི་ཐབས། །ཆོ་ག་མཁྱེན་པ་བློ་མངའ་བ། །མཁས་པ་མཛེས་པ་སྐལ་བ་བཟང་། །
ཤིན་ཏུ་སྡུག་པ་དགའ་སྐྱེད་པ། །སྙིང་པོ་ཆེན་པོ་ལས་བྱུང་དཔལ། །ཉོན་མོངས་བྲལ་བ་ཐུབ་པར་དཀའ། །ས་དང་མཉམ་པ་མཁའ་དང་མཉམ། །རླུང་དང་མཚུངས་པའི་སྤྱོད་ཡུལ་ཅན། །གཟི་བརྗིད་ཉིད་དེ་གཟི་བརྗིད་མཚུངས། །རྒྱ་མཚོ་བཞི་ཡི་ཆུ་དང་འདྲ། །
རྨུགས་དང་སྨྱོ་བ་ཞི་བར་མཛད། །ཐུབ་པར་དཀའ་བའི་ཉོན་མོངས་འཇིལ། །གཡུལ་སེལ་གཡུལ་ལ་དགྱེས་པ་སྟེ། །གཡུལ་གྱི་ཉེས་པ་རབ་འཇོམས་པ། །གསུང་བཟང་ངང་པའི་གདངས་སུ་བཞད། །དབང་པོ་ཉེ་དབང་དབང་ཆེན་སྲས། །དབང་པོ་ལས་ལྷག་ཐུབ་
དང་མཉམ། །ཆོས་འཛིན་འབྱོར་དང་ལྡན་པར་བསྟན། །རབ་དགའི་བུན་ལོང་ཞི་མཛད་པ། །ཉོན་མོངས་འདམ་རྫ་བསྐེམས་པར་མཛད། །དཔའ་བོ་རྒྱགས་པའི་རིམས་ནད་སེལ། །ཁྲོ་བོའི་དྲེགས་པ་རྣམ་པར་འཇོམས། །གསུང་སྙན་འཇམ་པ་ཉིད་དང་ལྡན། །མཉམ་
པ་མི་མཉམ་མཉམ་པ་དང་། །མཉམ་མེད་ཡུལ་ལས་རྣམ་པར་འདས། །སངས་རྒྱས་ཀུན་དང་སྤྱོད་ཡུལ་གཅིག །བྱང་ཆུབ་སྙིང་པོར་རྒྱ་ཆེར་རོལ། །རིམ་པ་རབ་སྟོན་དགེ་བ་སྟེ། །སྤྱན་བཟང་ཕུན་སུམ་ཚོགས་པ་དགེ། །གཙང་མ་ལམ་བཟང་སྦྱིན་མཛད་པ། །དག་
མཛད་སྲེག་སྦྱིན་མཆོག་སྦྱིན་པོ། །འཇོམས་བྱེད་བགེགས་རྣམས་རྣམ་པར་འཇོམས། །འཐོབ་མཛད་དཔེ་མེད་གསུང་བ་པོ། །རྡོ་རྗེའི་འཇིག་རྟེན་གཅིག་སྣང་བ། །སྐྱེས་པ་བུད་མེད་ཚོགས་ཀྱི་བདག །ངེས་པར་ཡོན་ཏན་འབྱོར་མཛད་པ། །སེམས་ཅན་འཁོར་བ་
ཞི་མཛད་པ། །བརྟན་པོ་སྡིག་པ་རྣམས་དང་བྲལ། །ཀུན་དུ་རྣམ་རྒྱལ་སྣང་བ་པོ། །ཀུན་དུ་རྒྱལ་བའི་དཀྱིལ་འཁོར་ཅན། །ཀུན་དུ་རྒྱ་མཚོའི་སྣང་བ་མཛད། །ཀུན་དུ་ཉེས་པ་སེལ་བ་ལགས། །མི་བཟད་ས་འོག་རྣམ་པར་དཀྲུགས། །དེ་བཞིན་ཟད་མཛད་ཐུག་

པར་མཛད། །ཉོན་མོངས་རྒྱ་མཚོ་རྣམ་པར་དཀྲུགས། །ཉོན་མོངས་ཕྱོགས་རྣམས་ཟད་པར་མཛད། །འབར་བའི་དཀའ་བ་འཕྲོ་མཛད་པ། །རྒྱགས་ཤིང་བདོ་བ་ཞི་བར་མཛད། །རྡོ་རྗེ་ཆེན་པོ་སྟོབས་སྐྱེད་པ། །སྡང་བ་ཐམས་ཅད་ངེས་པར་འཇོམས། །ཕ་རོལ་
བཞུགས་པ་སྡིག་སེལ་བ། །དག་པ་ནམ་མཁའི་སྤྱོད་ཡུལ་ཅན། །དག་པ་སྦྱིན་ཞིང་ཡོན་ཏན་སྦྱིན། །འབྲས་བུ་སྦྱིན་ཞིང་ཀུན་སྦྱིན་པ། །ཡེ་ཤེས་སྦྱིན་ཞིང་བསོད་ནམས་སྦྱིན། །ལོངས་སྤྱོད་སྦྱིན་ཞིང་རྒྱལ་སྦྱིན་པ། །དབང་ཕྱུག་སྦྱིན་ཞིང་ཚིག་སྦྱིན་ལ། །ནོར་སྦྱིན་
ཚོགས་ལྡན་རྡོ་རྗེ་ཅན། །གཟུགས་སྦྱིན་དཔའ་བོ་རྣམ་པར་རྒྱལ། །དག་ཅིང་དགེ་བའི་ཚུལ་སྦྱིན་པ། །བདེ་འབྱུང་གཙུག་ན་ནོར་བུ་ཐོགས། །ས་འཛིན་གཟུང་བར་དཀའ་བ་པོ། །དཀྱིལ་འཁོར་མགུ་བར་སྒྲུབ་མཛད་པ། །འབབ་ཅིང་དེ་བཞིན་འབེབས་པར་མཛད། །
རིན་ཆེན་དྲ་བ་རིན་ཆེན་མཉམ། །སྒྲོན་མ་མུན་སེལ་རྒྱལ་བ་ཅན། །ཡོན་ཏན་ཡེ་ཤེས་ཐེག་ཆེན་ལྡན། །བརྟན་མཆོག་ཆེ་བའི་ཆོས་ཉིད་ཅན། །གསུང་བ་ཆེན་པོ་ཤེས་རབ་ཆེ། །སངས་རྒྱས་ཚུལ་ནི་རབ་སྟོན་པ། །མཆོད་པ་ཆེན་པོ་ཐེག་ཆེན་གྱི། །ཐེག་པ་བླ་
ན་མེད་པར་ལྡན། །མཆོད་པ་ཆེན་པོའི་ཆོས་ཤེས་པ། །འབྲས་བུ་ཆེན་པོ་ཆོས་ཀྱི་མཆོག །སྟོན་མཛད་འདུལ་མཛད་སྟོན་པ་པོ། །ཞི་བ་དེ་བཞིན་ཞི་མཛད་པ། །བཟང་པོ་བཟང་དང་མཚུངས་པ་ཉིད། །ཀུན་དུ་རབ་འབྱམ་སེལ་མཛད་པ། །སྙིང་རྗེ་ཡེ་ཤེས་སྙིང་
པོ་མཁྱེན། །སྙིང་རྗེའི་འོད་ཀྱི་དཀྱིལ་འཁོར་ཅན། །སྙིང་རྗེ་ཆེན་པོ་ཡོངས་སུ་རྫོགས། །དུས་ཆེན་རྣམ་པར་དག་པར་མཛད། །མཚོ་མཆོག་དང་བ་རབ་མཐོ་བ། །རྩོད་ཆེན་འདས་པའི་སྤྱོད་ཡུལ་ཅན། །སྐྱེ་དགུ་སྲུང་ཞིང་སྤྱན་ཡངས་པ། །རྙེད་པར་དཀའ་བའི་
འབྱོར་བ་ཅན། །ཀུན་དུ་སྤྱོད་པ་ཁོང་དགེ་བ། །དགའ་བའི་དམ་པ་སྦྱིན་པ་པོ། །ཀུན་དུ་ཡུལ་ཀུན་མངའ་བ་སྟེ། །ཞེས་བཟང་པོ་རྟག་ཏུ་མངའ། །དུལ་བ་སངས་རྒྱས་ཀུན་དང་མཉམ། །དཀྱིལ་འཁོར་ཆེན་པོའི་པདྨ་ལགས། །ཟླ་བ་ལྟ་བུར་སིམ་མཛད་ཐབས། །

མཁས་པ་རྒྱགས་སྤངས་ཆོ་ག་མཁྱེན། །སྤྱོད་ཡུལ་གཅིག་ལ་གནས་པ་སྟེ། །དེ་བཞིན་གཤེགས་པའི་ཡེ་ཤེས་མངའ། །དམ་ཚིག་ཆེན་པོ་དེ་ཉིད་མཁྱེན། །སློབ་དཔོན་ཆེན་པོ་གྲགས་པ་ཆེ། །དམ་པ་ཉིད་དེ་བླ་ན་མེད། །གསང་སྔགས་
རླབས་ནི་རྒྱས་པར་མཛད། །དེ་ལྟར་ཁྱབ་བདག་ཆེན་པོ་ནི། །ཡོན་ཏན་བརྒྱ་ཡི་སྤོས་ཀྱིས་རྒྱས། །དག་ཅིང་བྱང་ལ་མཁས་ལ་སོགས། །ཡོན་ཏན་འབྱུང་ལ་རིག་སྔགས་རྒྱལ། །གཙུག་ན་ནོར་བུ་ཐོགས་ལ་སོགས། །མཆོག་རྣམས་ཀྱིས་ནི་བསྟོད་ནས་ཀྱང་། །
སྡུག་བསྔལ་ཆུ་བོ་བཅོམ་པ་ཡི། །བཅོམ་ལྡན་འདས་ཀྱིས་ཚིག་འདི་གསུངས། །ཀྱེ་མ་བསྟོད་པ་ཆེན་པོ་བརྒྱ། །མིང་བརྒྱ་རྩ་བརྒྱད་དམ་པ་ཡིན། །མི་རྣམས་ལ་ལ་གང་ཞིག་གིས། །སྡིག་བསལ་ཀུན་དུ་བཟང་པོ་ལ། །སྙིང་ནས་འདི་ཡིས་བསྟོད་བྱས་ན། །དེས་ནི་
སངས་རྒྱས་ཉིད་ཀྱང་འཐོབ། །གང་ཞིག་མིང་བརྒྱ་རྩ་བརྒྱད་འདོན། །མི་དེ་ཡོན་ཏན་ཡོངས་རྫོགས་ཤིང་། །དེ་བཞིན་གཤེགས་ཚུལ་ཆེ་བ་ཡི། །ཡེ་ཤེས་མ་ལུས་སྨྲ་བར་ནུས། །དེ་ལྟར་ཐུབ་མཆོག་སྲས་པོ་ཡོན་ཏན་བརྒྱ་ཡི་སྤོ་ལས་ངེས་པར་བྱུང་གྱུར་ཅིང་། །ཡོན་
ཏན་སྣ་ཚོགས་འབྱུང་དང་འཇིག་རྟེན་ཡན་ཆད་དག་གིས་ཡོན་ཏན་རྒྱས་རྣམས་ལ། །བསྟོད་པ་ཆེན་པོས་སྣང་བྱས་རྒྱལ་བའི་སྲས་ལ་བསྟོད་པས་ཉིན་རེ་བསྟོད་བྱས་ན། །སྟོབས་བཅུ་མངའ་བའི་སྐུར་འགྱུར་སྣང་བ་ཐོབ་ཅིང་རྣམ་དག་ཡོན་ཏན་འབྱུང་གནས་འགྱུར། །འཕགས་
པ་ཀུན་དུ་བཟང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ།། ༄༅། །འཕགས་པ་ལག་ན་རྡོ་རྗེའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། བྱང་ཆུབ་
སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་རང་གི་སྙིང་པོ་སྨྲས་པ། ཨོྃ་བཛྲ་པཎྜ་སརྦ་དུཥྚཱཾ་ཏ་ཀ །ཧ་ན་ད་ཧ་པ་ཙ་ཧཱུྃ་ཕཊ། དེ་ནས་གཟུངས་སྔགས་འདི་བཤད་མ་ཐག་ཏུ་ས་ཆེན་པོ་གཡོས་པར་གྱུར་ཏེ།

བགེགས་དང་ལོག་འདྲེན་ཐམས་ཅད་ཀྱང་སྐྲག་ནས་ཉམ་ཐག་པའི་སྐད་ཕྱུང་ངོ་། །དཀྱིལ་འཁོར་ཆེན་པོར་འདུས་པ་ཐམས་ཅད་ཀྱང་ཧ་ཧ་ཞེས་འཛེར་ཏོ། །ལྷ་ལ་སོགས་པ་རིག་སྔགས་འཆང་ཆེན་པོ་རྣམས་ཀྱིས་ཀྱང་རྒྱན་གྱི་ཆར་ཆེན་པོ་ཕབ་བོ། །བཅོམ་ལྡན་འདས་ཀྱིས་ཀྱང་ཞལ་འཛུམ་
བཞིན་དུ་རྡོ་རྗེ་འཆང་ལ་གཟིགས་ནས་བཀའ་སྩལ་བ། སྡང་བ་སེལ་བ་འཁོར་འདི་དག་ཧ་ཅང་སྐྲག་པར་མ་བྱེད་ཅིག །རྡོ་རྗེ་འཆང་གིས་གསོལ་བ། བཅོམ་ལྡན་འདས་བདག་གི་གཟུངས་འདི་ནི་མཆོག་ཏུ་གསང་བ་ལགས་སོ། །རིག་སྔགས་ཐམས་ཅད་ཀྱི་མཆོག་དང་། བགེགས་
ཐམས་ཅད་ཟློག་པ་དང་། སྡང་བ་ཐམས་ཅད་སེལ་བ་དང་། དམ་པ་སྩོལ་བ་དང་། འབྱོར་པ་སྩོལ་བ་དང་། སྡང་བ་རྣམས་དགའ་བར་བགྱིད་པ་དང་། ཐོས་ན་དོན་མཆིས་པ་དང་། བརྗོད་ན་དོན་ན་མཆིས་པ་དང་། བསྙེན་བཀུར་བགྱིས་ན་དོན་མཆིས་པ་དང་། སྟོབས་
བསྐྱེད་པ་དང་། གཟུགས་བཟང་བར་བགྱིད་པ་དང་། སྤོབས་པ་སྐྱེད་པ་དང་། དབང་ཕྱུག་ཐོབ་པར་བགྱིད་པ་དང་། ནོར་དང་ལྡན་པར་བགྱིད་པ་དང་། དབང་བགྱིད་པ་དང་། སྡང་བ་འཇོམས་པ་དང་། སྡང་བ་འཇིག་པར་བགྱིད་པ་དང་། དུག་སེལ་བ་དང་། རྒྱལ་བར་བགྱིད་པ་དང་།
དགའ་བར་བགྱིད་པ་དང་། མཆོག་ཏུ་དགའ་བར་བགྱིད་པ་དང་། དང་བར་བགྱིད་པ་དང་། ང་རྒྱལ་འཇོམས་པ་དང་། ཕ་རོལ་ཕམ་པར་བགྱིད་པ་དང་། སྡིག་པ་ཞི་བར་བགྱིད་པ་དང་། ནོངས་པ་བགྱིས་པ་སྦྱོང་བ་དང་། འདོད་ཆགས་ལ་སོགས་པའི་ཉོན་མོངས་པ་ཞི་བར་བགྱིད་པ་
དང་། མཚམས་མ་མཆིས་པ་ཟློག་པ་དང་། རྨི་ལམ་ངན་པ་ཞི་བར་བགྱིད་པ་དང་། བཀྲ་མི་ཤིས་པ་ཞི་བར་བགྱིད་པ་དང་། དཔལ་སྐྱེད་པ་དང་། སྐལ་བ་བཟང་པོར་བགྱིད་པ་དང་། སེམས་ཅན་ཐམས་ཅད་དགའ་བར་བགྱིས་དང་། གཞན་ལ་དབང་བགྱིད་པ་དང་། ཅི་
འཚལ་བ་སྩོལ་བ་དང་། ཡོན་ཏན་ཐམས་ཅད་ཕུན་སུམ་ཚོགས་པར་བགྱིད་པ་དང་། ཆར་ཆེས་པ་དང་། ཆར་མི་འབབ་པ་དང་། དུས་ཀྱི་གནོད་པ་རབ་ཏུ་ཞི་བར་བགྱིད་པ་ལགས་ཏེ། གཡུལ་ཆེན་པོ་དང་། མི་ནད་ཆེན་པོ་དང་། རྩོད་པ་ཆེན་པོ་དང་། མི་མ་ལགས་པ་ལ་

སོགས་པ་འཇིག་པ་དང་། སྡང་བ་དང་། བྱད་སྟེམས་དང་། རོ་ལངས་ཀྱི་སྦྱོར་བ་ཆེན་པོ་དང་། སྐྲོད་པ་དང་། སྲོག་འཇིག་པའི་ཚེ་དང་། འཇིགས་པ་ཆེན་པོ་བྱུང་བ་ན། ནང་པར་ལངས་ནས་ལུས་ཁྲུས་བགྱིས་ལ། གོས་
དཀར་པོ་འཚལ་ཏེ། ཁ་ཤར་ཤར་ཕྱོགས་སུ་བལྟས་ལ། བཅོམ་ལྡན་འདས་རྡོ་རྗེ་འཆང་གི་གདོང་དུ་ལྟ་ཞིང་ལན་བདུན་བརྗོད་ན། བརྗོད་པ་ཙམ་གྱིས་འཇིགས་པ་ཐམས་ཅད་ལས་ཐར་བར་འགྱུར་ཞིང་། གྲུབ་པ་ཆེན་པོ་ཡང་ཐོབ་པར་འགྱུར་ལ། ཐམས་
ཅད་དུ་ཡང་རྒྱལ་བར་འགྱུར་ཏེ། སེམས་ཅན་རྣམས་ལ་སྲུང་བ་དང་། སྐྱོབ་པ་དང་། སྦེད་པ་ནི་གཟུངས་ཆེན་མོ་འདི་ལས་ལྷག་པ་མ་མཆིས་སོ། །དེ་ནས་འཁོར་ཐམས་ཅད་ངོ་མཚར་དུ་གྱུར་ནས། རྡོ་རྗེ་འཆང་ལ་མཚན་བརྒྱ་རྩ་བརྒྱད་ཀྱིས་མངོན་པར་
བསྟོད་པ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་རྒྱལ་པོ་བདེ་བ་ཆེ། །རྡོ་རྗེ་འཇིགས་པ་དགྱེས་པ་ཆེ། །རྡོ་རྗེ་སྙིང་པོ་སྟོབས་པོ་ཆེ། །རྡོ་རྗེ་འཁྲུགས་པ་ཞགས་པ་ཆེ། །རྡོ་རྗེ་འཇིགས་བྱེད་འཇིགས་པར་མཛད། །རྡོ་རྗེ་ཧཱུྃ་གི་ཧཱུྃ་ལགས་ཏེ། །རྡོ་
རྗེ་ས་འོག་འཇིགས་པ་པོ། །ཆགས་པའི་རྡོ་རྗེ་ཆགས་པ་ཆེ། །ཆགས་པའི་ཞགས་པ་མགྱོགས་པ་ཆེ། །ཕྱག་དམར་ཕྱག་ནི་རིང་བ་སྟེ། །སྤྱན་དམར་སྤྱན་དང་ལྡན་པ་ལགས། །རྡོ་རྗེ་མཐོན་ཀ་མཐོན་ཀ་ཆེ། །མཐོན་མཐིང་དབུ་སྐྲས་བརྒྱན་པ་ལགས། །
རལ་གྲི་སྔོན་པོ་རལ་གྲི་ཆེ། །དཀྱིལ་འཁོར་སྔོན་པོའི་དཀྱིལ་འཁོར་ཅན། །མཐོན་ཀའི་སྤྱན་ཏེ་དབུ་སྔོ་བ། །འོད་ཆེན་མཐོན་ཀའི་འོད་དང་ལྡན། །རྡོ་རྗེ་སྔོན་པོ་སྟོབས་མི་མཚུངས། །རྡོ་རྗེ་སྤྲོ་བའི་སྟོབས་པོ་ཆེ། །ཁྲོ་བོའི་རྡོ་རྗེ་ཁྲོ་བོ་ཆེ། །སེལ་མཛད་
ཁྲོ་བོའི་རྒྱགས་པ་སེལ། །ཁྲོས་པའི་སྤྱན་ནི་རབ་ཏུ་བསྟོད། །ཁྲོ་བོ་བགེགས་རིགས་སེལ་བར་མཛད། །གཞུ་བསྣམས་ཞགས་པ་བསྣམས་པ་སྟེ། །རྡོ་རྗེའི་མདས་ནི་ངེས་པར་འགུམས། །དབྱིག་ཐོགས་རྡོ་རྗེའི་རལ་གྲི་བསྣམས། །རྡོ་རྗེའི་ཞགས་པས་

རབ་ཏུ་འཇོམས། །རྡོ་རྗེའི་འཁོར་ལོ་འཁོར་ལོ་ཆེ། །འཇིགས་པའི་སྒྲ་སྒྲོགས་རབ་ཏུ་ཁྲོ། །སྣ་ཚོགས་སྐུ་སྟེ་ཐིག་ལེས་བྲིས། །གཟི་བརྗིད་སྐྱེད་པ་གྲགས་མཛད་པ། །བཟོད་པར་དཀའ་བ་རེག་མི་བཟོད། །སྡིག་དང་བགེགས་རྣམས་གཅོད་མཛད་པ། །
དྲག་པོ་ཆེན་པོ་རྡོ་རྗེ་ཁྲོ། །སྒྱེལ་བྱེད་དྲག་པོ་སྒྱེལ་བར་མཛད། །གཏིང་དཔག་དཀའ་བ་རིང་དུ་གཤེགས། །རིན་ཆེན་རྒྱ་མཚོ་རབ་ཏུ་དགའ། །རྒྱ་མཚོ་ལྷུན་པོའི་དཔུང་དང་ལྡན། །དམ་པའི་ཏི་སེ་ལྷུན་པོའི་རྩེ། །གད་རྒྱངས་ཆེན་པོས་བཞད་པ་པོ། །སྤྱོད་
ཡུལ་བསྐལ་པ་གྲངས་མེད་གསུམ། །རིག་སྔགས་འཆང་མཆོག་རྡོ་རྗེ་ཅན། །རིག་སྔགས་འཆང་ཆེན་མངའ་བདག་ལགས། །ན་བཟའ་ལྕང་ལོ་རྩ་དམར་གསོལ། །མཐོན་ཀ་ན་བཟའ་མཐོན་ལ་དགྱེས། །སྲིན་པོ་སྲུང་བ་དྲག་པོ་སྟེ། །མེ་ཏོག་ཕྲེང་
བའི་རྒྱན་ལ་དགྱེས། །ཉི་མ་ཆེན་པོ་ཉི་མའི་འོད། །འོད་ཟེར་བརྒྱ་ཕྲག་རབ་ཏུ་འགྱེད། །གྲོལ་མཛད་མགོན་པོ་སྟོན་པ་པོ། །རབ་མཆོག་རབ་མཆོག་རྣམས་ཀྱིས་མཆོད། །མགྲིན་ཆེན་མགྲིན་པའི་མདོག་སྔོ་བ། །མགུར་བཟང་ཞལ་བཟང་དམ་པ་ལགས། །
ཅོད་པན་ཆེན་པོ་རྡོ་རྗེའི་འོད། །ཕུན་སུམ་ཚོགས་ལྡན་སེམས་དག་པ། །ཡེ་ཤེས་ཆེ་ལྡན་སྲུང་བ་ཆེ། །རླུང་དམར་ལགས་ཏེ་སྤྱོད་ཡུལ་རིང་། །གཙོ་བོ་སྒྲོལ་མཛད་ཕ་རོལ་གཤེགས། །འཇིགས་ལས་གྲོལ་བ་རབ་འཇིགས་པ། །རྒྱལ་ཆེན་
གཙུག་ན་ནོར་བུ་ཐོགས། །མཚོན་ཆ་ཆེན་པོ་སྣ་ཚོགས་མཚོན། །འཇིག་རྟེན་གསུམ་གྱི་ཚུལ་ཆེན་གཅིག །གསུམ་གཟིགས་རྩེ་གསུམ་གཙུག་པུད་གསུམ། །འདོད་པའི་ལྷ་སྟེ་སྣང་ཆེན་མཚན། །ཟ་བ་པོ་སྟེ་འཇིགས་པར་མཛད། །མཐོ་བ་
སྐུ་མཆོག་ཞལ་གསུམ་པ། །ཚམ་ཚོམ་མེད་དེ་སྲིད་ལས་བྱུང་། །རྟག་པ་སྐར་དགྱེས་དུས་འབྱོར་པ། །རྒྱུ་སྐར་རྒྱལ་རིགས་འཕེལ་བར་མཛད། །རྒྱལ་པོ་སྔགས་འཆང་ཆེན་པོ་སྟེ། །བགེགས་ཀུན་དབང་ཕྱུག་མཁས་པ་ལགས། །བཻཌཱུརྱ་ལྟར་

དྲི་མེད་སྐུ། །མཛེས་ཤིང་སྟོབས་སྐྱེད་སྣ་ཚོགས་སྟོབས། །དགའ་བསྐྱེད་པ་དགའ་བར་མཛད། །དཀོན་མཆོག་གསུམ་པོ་འཛིན་པའི་མཆོག །ལྷ་ཆེན་དཔའ་བོ་ཆེན་པོ་སྟེ། །བརྟན་པོ་དཔའ་བོ་ལྷམ་མེ་བ། །བདེ་བ་ཆེན་
པོ་འཆིང་བ་གཅོད། །དམ་དུ་འཆིང་བའི་རྩལ་མངའ་བ། །མཚོན་ཆ་ཆེ་ཚོགས་ཅོད་པན་ཅན། །རིག་སྔགས་འཆང་བའི་ཚོགས་དགའ་བ། །པདྨ་ཆེན་པོའི་ཕྱག་རིང་བ། །པདྨ་ལས་བྱུང་པདྨའི་མཆོག །ནག་པོ་ཆེན་པོ་འབྱུང་པོ་ཆེ། །གཏུམ་ཆེན་
ཐོག་ཐོག་ཆེན་པོ་སྟེ། །རླུང་ཆེན་བཞད་མོ་འབྱུང་བ་དང་། །རྡོ་རྗེའི་མཚོན་ཆ་བརྒྱ་རྫོགས་པ། །རྟུལ་ཕོད་ཐུབ་དཀའ་བརྩོན་པ་སྟེ། །འབྱུང་པོ་ཆེན་པོའི་ཚོགས་ཀྱི་རྗེ། །ཞི་བ་དབང་པོ་རྡོ་རྗེའི་མཚོན། །བྲག་གི་རྩེ་མོ་རྣམ་པར་འགེམས། །རྒྱལ་
བའི་སྲས་པོ་གཟུགས་ཆེ་བ། །རྡོ་རྗེ་ཡིས་ནི་དཀྱིལ་འཁོར་བརྒྱན། །རྡོ་རྗེའི་ལྕགས་མདས་སྲེག་མཛད་པ། །རྡོ་རྗེའི་མདས་ནི་རྣམ་པར་སྦྱངས། །རྡོ་རྗེ་དོན་ཡོད་རྡོ་རྗེའི་དབང་། །རྡོ་རྗེ་བཟང་པོ་རྡོ་རྗེའི་རྩལ། །ཡེ་ཤེས་དག་པ་ཐེག་པ་ཆེ། །ཐབས་
བརྙེས་སྙིང་རྗེ་ཆེན་པོ་ལགས། །རྡོ་རྗེ་ཆེན་པོ་རྩེད་མོ་ཅན། །སྤྱན་བཟང་རྣམ་པར་གཟིགས་པ་པོ། །རྡོ་རྗེ་དྲིལ་བུ་རྣམ་དག་སྤྱན། །མཛའ་བོ་སྡུག་པ་དམ་ཚིག་མཁྱེན། །རྡོ་རྗེ་ཆེན་པོ་མགོན་པོ་པ། །རྡོ་རྗེ་ས་འོག་འཇིགས་པར་མཛད། །རྡོ་རྗེ་ཆེན་པོ་
གད་རྒྱངས་སྒྲོགས། །མེ་ཏོག་ཆུན་པོ་འོད་གསལ་བ། །དག་པ་ཟས་གཙང་སྲས་ཀྱི་སྲས། །དེས་པ་སྐལ་བཟང་གཙང་བ་ལགས། །སྣ་ཚོགས་ཅན་ཏེ་ལྷ་ཀུན་མཆོག །རྡོ་རྗེའི་དཔུང་གི་དཀྱིལ་འཁོར་ལྡན། །རྡོ་རྗེའི་གཙུག་སྡུག་ཤེས་རབ་ཅན། །
རྡོ་རྗེའི་བཀོད་པ་རབ་ཏུ་མཛེས། །མཛེས་པ་ཤིན་ཏུ་རྣམ་པར་དག །བསྐལ་པའི་རླུང་ཆེན་ལྟ་བུ་ལགས། །དཔའ་བོ་གསང་བ་ཆེན་པོ་འཆང་། །རིག་སྔགས་འཆང་གི་མཆོག་གིས་རྗེད། །གསང་བ་པོ་སྟེ་གསང་བ་གསུང་། །སྐྱེས་པ་བུད་མེད་ཚོགས་དགའ་

བ། །རྡོ་རྗེ་ཐོག་ཐོག་སྒྲ་ཆེན་སྒྲོགས། །རྡོ་རྗེའི་སྒྲོག་སྟེ་རྣམ་པར་འཇོམས། །རྡོ་རྗེའི་ལྕགས་ཀྱུ་དགྱེས་པ་ཆེ། །རྡོ་རྗེ་འབར་བ་ཆེར་འབར་བ། །ནོར་བུས་སྤྲས་པའི་ན་བཟའ་གསོལ། །སྤོས་དང་མེ་ཏོག་ཕྲེང་གིས་བརྒྱན། །དབུ་ཡི་སྙན་ཆ་གདུབ་ཀོར་
བཏགས། །སངས་རྒྱས་བསྟན་པ་སྟོན་པ་པོ། །རྒྱལ་པོ་སངས་རྒྱས་ཀུན་དང་མཉམ། །དབང་ཕྱུག་ཆེན་པོ་གྲགས་པ་ཆེ། །དཀྱིལ་འཁོར་སློབ་དཔོན་དཀྱིལ་འཁོར་ཅན། །སངས་རྒྱས་དཀྱིལ་འཁོར་སྟོན་པ་པོ། །དབུ་རྒྱན་ཅོད་པན་ཀུན་ནས་བཅིངས། །
སྣ་ཚོགས་རྒྱན་གྱིས་བརྒྱན་པ་ལགས། །དེ་ལྟར་རྡོ་རྗེ་དབང་ཕྱུག་མགོན། །མཚན་བརྒྱ་རྩ་བརྒྱད་དག་གིས་བསྟོད། །དེ་ནས་རྡོ་རྗེ་དོན་ཡོད་པས་གསུངས་པ། རྡོ་རྗེ་གསང་བས་བརྒྱན་པ་ཡི། །རྡོ་རྗེ་མཚན་རྩ་བརྒྱད་པ་འདི། །མིང་ནི་རྡོ་རྗེ་དོན་ཡོད་འབྱུང་། །
སྡང་བ་ཐམས་ཅད་ཟློག་བྱེད་པ། །མིང་ནི་བརྒྱ་རྩ་བརྒྱད་པ་འདི། །དད་པ་གང་ཞིག་འཆང་བྱེད་པ། །གྲུབ་པ་ཐམས་ཅད་ཐོབ་འགྱུར་ཞིང་། །ངེས་པ་ཀུན་ལས་རྣམ་པར་གྲོལ། །ལག་ན་རྡོ་རྗེ་སྟོབས་པོ་ཆེ། །རྟག་ཏུ་ཕྱི་བཞིན་འབྲང་བར་འགྱུར། །ལག་
ན་རྡོ་རྗེའི་ཡོན་ཏན་ཆེ། །གང་ཞིག་ནང་པར་ལངས་ནས་བརྗོད། །དེ་ནི་སྡིག་པ་ཀུན་ལས་གྲོལ། །ངན་འགྲོ་ཀུན་ལས་ཐར་བར་འགྱུར། །གསང་སྔགས་ཐོག་མར་སྨོས་པ་འདི། །སུ་ཞིག་ནང་བར་ལངས་ནས་འདོན། །རྒྱལ་པོ་བློན་པོ་གྲོང་ཁྱེར་བ། །
གཉེན་རྣམས་ཀྱང་ནི་དགའ་བར་འགྱུར། །བསྟོད་པའི་མཆོག་འདི་སུ་འདོན་པ། །འཇིག་རྟེན་ཐམས་ཅད་དེ་དབང་འགྱུར། །སྡིག་པ་ཐམས་ཅད་ཟད་པ་དང་། །ཚེ་དང་བསོད་ནམས་འཕེལ་བར་འགྱུར། །ཇི་ལྟར་འདོད་པ་དམ་པ་ཡི། །བདེ་བ་དེ་ཡིས་
འཐོབ་པར་འགྱུར། །གང་ཞིག་ནང་བར་ལངས་ནས་ནི། །ལག་ན་རྡོ་རྗེའི་དྲུང་དུ་བརྗོད། །དེ་ནི་ཇི་ལྟར་འདོད་པ་དང་། །ལྡན་འགྱུར་འདི་ལ་ཐེ་ཚོམ་མེད། །མིང་བརྒྱ་རྩ་བརྒྱད་འདོན་པ་ལ། །བགེགས་དང་ལོགས་འདྲེན་ཐམས་ཅད་དང་། །འཇིགས་བྱེད་

རྒྱལ་པོ་རྣམས་ཀྱིས་ཀྱང་། །ཟིལ་གྱིས་གནོན་པར་མི་ནུས་སོ། །ཤེས་རབ་ཅན་ནི་གང་ཞིག་གིས། །མིང་བརྒྱ་རྩ་བརྒྱད་མཆོག་བཏོན་ན། །གཟུགས་བཟང་སྟོབས་ནི་སྐྱེ་བ་དང་། །བདེ་བ་འཕེལ་བ་དེ་ཡིས་འཐོབ། །གང་ཞིག་མིང་
བརྒྱ་རྩ་བརྒྱད་འདི། །ངེས་པར་གནས་ཤིང་གཙང་མར་འདོན། །མདོར་ན་ཡོན་ཏན་རྒྱས་པ་ཡི། །བདེ་བ་དེ་ཡིས་འཐོབ་པར་འགྱུར། །འཕགས་པ་ལག་ན་རྡོ་རྗེའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ།། །།
༄༅། །འཕགས་པ་འཇམ་དཔལ་གཞོན་ནུར་གྱུར་པའི་མཚན་བརྒྱ་ར་བརྒྱད་པ་གཟུངས་སྔགས་དང་བཅས་པ། ཕྱོགས་བཅུའི་ཡང་དག་པར་རྫོགས་པའི་སངས་རྒྱས་ཤེས་བྱ་མཐའ་དག་མ་ལུས་པར་ཁྱབ་ཅིང་། མཆོག་ཏུ་རྨད་དུ་བྱུང་བ་རྣམ་པར་དག་
པའི་བློ་མངའ་བ་རྣམས་ལ་ཕྱག་འཚལ་ལོ། །འཇམ་དཔལ་གཞོན་ནུར་གྱུར་པ་ཐུགས་དྲི་མ་དང་སྐྱོན་ཐམས་ཅད་དང་བྲལ་བ། ཡོན་ཏན་དྲི་མ་མེད་པའི་ཚོགས་ཀྱི་འོད་ཟེར་གྱིས་བརྒྱན་པའི་སྐུ་ཞབས་རྟེན་གྱི་པདྨ་ལ་ལྷ་དང་། མི་དང་། ལྷ་མ་ཡིན་དང་།
ཀླུ་དང་། རིག་སྔགས་འཆང་རྣམས་ཀྱི་ཐོར་ཚུགས་དང་ཅོད་པན་གྱི་རྩེ་མོས་གཏུགས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་པའི་དབྱངས་ངན་སོང་གི་འགྲོ་བ་སྣ་ཚོགས་རྣམ་པར་འཇོམས་པ་ལ་ཕྱག་འཚལ་ལོ། །ཏདྱ་ཐཱ། ཨོཾ་
བྷོ་མ་ཧཱ་མ་ཎི་རུ་ཙི་ར་ཀ་ལཱ་པ་བི་ཙི་ཏྲ། མུགྟ་དཱ་མ། ཨ་ལཾ་ཀྲྀ་ཏ་ཤ་རཱི་ར། པ་ར་སཏྭ་མོ་ཙ་ཀ །ཏ་ཐཱ་ག་ཏ་མ་ཧཱ་དྷརྨ་ཀོ་ཥ་དྷ་ར། པྲ་བ་ར་དྷརྨ། ལབྡྷ། བི་ཛ་ཡ། སུ་ར་ཏ། སམྦྷོ་ག་ཨུ་པ་དེ་ཤ་ཀ། ཀླེ་ཤ་ག་ར་པྲ་ཤ་མ་ཀ། ཤཱུ་ནྱ་ཏཱ་སྭ་བྷཱ་བ། ཨ་
ནུ་སྭ་རི། མ་ཧཱ་བོ་དྷི་ས་ཏྭ་པ་ར། བ་ར་ཏ། བ་ར་ཎ་ད་ད། ཨོྃ་མ་ཧཱ་ཕཱ་ཤ་པྲ་ས་ར། ཨ་ས་མ་ས་མ། ཨ་ནནྟ་ས་མ་ས་མནྟ་བྷ་དྲ། ས་མནྟ་སཾ་དྷ་ར། ས་མནྟ་ཨཱ་ཀ་ར། ས་མནྟ་པྲ་ས་ར། ས་ར་ས་ར། ཧེ་ཧེ་མཉྫུ་ར་བ། མ་ཧཱ་བཛྲ་མ་ཧཱ་ཁཌྒ།

ཚིནྡ་ཚིནྡ། བྷིནྡ་བྷིནྡ། བི་ར་ཛ་བི་ར་ཛ། ཀརྨ་ཨ་བ་ག་མ་ཀ། ཀུ་རུ་ཀུ་རུ། དྷུ་རུ་དྷུ་རུ། སུ་རུ་སུ་རུ། མུ་རུ་མུ་རུ། དྷ་དྷ་དྷ་དྷ། དྷུ་དྷུ་དྷུ་དྷུ། མ་ཧཱ་མ་ཧཱ། མ་ཧཱ་མ་ཧཱ། མོ་ཧ་ཡ་མོ་ཧ་ཡ། བྷོ་བྷོ། བྷཱི་མ་བྷཱི་མ། ན་ད་ན་ད། ས་ར་
ས་ར། མ་ཧཱ་བོ་དྷི་སཏྭ། མོ་ཙ་ཡ། མ་མ་ནཱ་ཐ་མ་ནུ་སྲྀ་ཏ། ཨ་བ་ཡ་དུཿཁ་ན། སུ་ཁཾ་ད། མ་ཧཱ་ཀཱ་རུ་ཎི་ཀཱ། ཨ་ནཱ་ཐོ་ཧཾ། དུཿཁི་ཏོ་ཧཾ། ས་ར་ཛོ་ཧཾ། ཨུ་པ་དྲུ་ཏོ་ཧཾ། ཨ་བི་བིཀྟོ་ཧཾ། ཀུ་སི་དྷོ་ཧཾ། མཱ་ར་ཎ་དྷརྨོ་ཧཾ། ཏྭཾ་བྷ་ག་བཱ་ན། དུཿ
ཁི་ཏཱ་ནཱཾ། སུ་ཁཾ་ད་ད། ཨ་ནཱ་ཐཱཾ་ནཱཾ། ས་ནཱ་ཐ་ཀ་ར། ས་ར་ཛ་སཱཾ། བི་ར་ཛ་སྐ་ར། ཨུ་པ་དྲུ་ཏཱ་ནཱཾ། སྭ་ར་ཨུ་པ་དྲ་བ་པྲ་ཤ་མ་ཀ། ཨ་བི་བི་ག་ཏཱ་ནཱ། ཀུ་ཤ་ལ་སཾ་བྷ་ར། པ་རི་པཱུ་ར་ཡི་ཏཱ། ཀུ་སིདྷཱ་ནཱཾ། མ་ཧཱ་བཱིརྱ་དྷ་ཏཱ། མཱ་ར་ཎ་
དྷརྨི་ཎ། མ་མི་ཏ་པ་དཱ་དཱ་ཏཱ། མ་མ་བི་བྷ་ག་བཱ་ན། ནཱ་ཐོ་བྷ་བ། ཤ་ར་ཎཾ། པ་རཱ་ཡ་ཎཾ། ཏྲ་ཏཱ། སརྦ་དུཿཁཱ་ནི་མེ་པྲ་ཤ་མ་ཡ། སརྦ་ཀླེ་ཤ་ར་ཛཱཾ་སི་མི། ཨ་བ་ན་ཡ། སརྦ་སཾ་སཱ་ར་ཨུ་པ་དྲ་བ། དུཿཁཱ་ནི་མི། ནཱ་ཤ་ཡ། སརྦ་ཀུ་ཤ་ལ་
དྷརྨ་པ་རི་པཱུ་ར་མེ་ཀུ་རུ། སརྦ་ཀརྨ་ཨཱ་བ་ར་ཎ། ཀླེ་ཤ་པ་ར་བ་ཏ་མེ་བི་ཀ་རི། མ་ཧཱ་བོ་དྷི་སཏྭ་སི་བི་དྷི། བཱིརྱ་པཱ་ར་མི་ཏཱ། ཡོ་གཾ་མེ་སཾ་ནི་ཡོ་ཛ་ཡ། ཨ་ར་ཎ་དྷརྨ། བི་རཱ་ག་བི་ར་ཛ། སཉྫ་ཧ། པྲ་ཛ་ཧ། དྷ་རི་ཎི། ས་མ་ཁ་ས་མ། ཛ་ལ་ནི་དྷི་ས་མ།
མེ་རུ་ས་མ། མ་ཧཱ་བོ་དྷི་སཏྭ་བ་ར་ད་སྭཱ་ཧཱ། རིག་སྔགས་དོན་ཀུན་སྒྲུབ་པ་འདི། །འཇམ་པའི་དབྱངས་ཀྱིས་བཤད་པ་ན། །དེ་མ་ཐག་ཏུ་སེམས་ཅན་རྣམས། །སྐྱེ་དང་རྒ་བ་ཟད་པར་འགྱུར། །ངན་འགྲོ་ཐམས་ཅད་ཞི་གྱུར་ནས། །བདུད་ཀྱི་སྡེ་རྣམས་
རབ་ཏུ་འདར། །ལྷ་རྣམས་ཐམས་ཅད་རབ་ཏུ་དགའ། །ལོག་འདྲེན་རྣམས་ནི་སྐྲག་པར་གྱུར། །སྡིག་པ་ཞི་བར་བྱེད་པ་ཡི། །གཟུངས་འདི་བཤད་པའི་མོད་ལ་ཡང་། །གྲངས་མེད་ཕྲག་ནི་དུང་ཕྱུར་སྙེད། །འཁོར་བའི་བཙོན་ར་དག་ནས་ཐར། །འཇམ་

དཔལ་གཞོན་ནུར་གྱུར་པ་ཡིས། །འཇམ་པའི་དབྱངས་ནི་རབ་བསྒྲགས་ཤིང་། །གང་ཚེ་རིག་སྔགས་བཤད་པ་ན། །བྲག་དང་ནགས་དང་ཚལ་དུ་བཅས། །རྒྱུ་བ་དང་ནི་མི་རྒྱུ་པའི། །ས་གཞི་དེ་ཡི་ཚེ་ན་གཡོས། །སངས་རྒྱས་
འོད་ཀྱི་སྣང་བ་ཡིས། །ས་ཡི་སྟེང་ཡང་ཁྱབ་པར་གྱུར། །བགེགས་དང་ལོག་འདྲེན་ཐམས་ཅད་དང་། །སྲིན་པོ་མི་བཟང་གཟུགས་ཅན་རྣམས། །སྟོབས་བཅུ་ལྡན་ལ་ཕྱག་འཚལ་ཞེས། །སྐད་ཕྱུང་ཚིག་ནི་མཐུན་པར་སྨྲས། །ལྷ་རྣམས་ཞི་བའི་ཆ་
ལུགས་ཅན། །ཐམས་ཅད་ཡིད་ནི་དགའ་གྱུར་ནས། །གང་ན་རྡོ་རྗེ་རལ་གྲི་ཆེ། །དེ་ཡི་དྲུང་ལྷགས་སྨྲས་པ་ནི། །ཕྱག་འཚལ་མཆོག་སྦྱིན་རྡོ་རྗེའི་མཆོག །འཇམ་པའི་དབྱངས་ནི་སྟོབས་ཆེན་ལ། །ཤུགས་སྟོང་ལྡན་པ་རྒྱལ་བ་ཅན། །བགེགས་
ཀྱི་ཡུལ་འཁོར་རབ་འཇོམས་པ། །སྔགས་འཆང་གསང་སྔགས་ཆེན་པོ་འཆང་། །སྣ་ཚོགས་གཟུགས་ཅན་མི་ཡི་བདག །ཤིན་ཏུ་སྟོབས་ལྡན་གཟུགས་མཛེས་འཇིགས། །དྲག་པོ་དྲག་པོ་རབ་འཇོམས་པ། །གཟི་བརྗིད་གཟི་བརྗིད་མངའ་བའི་དཔལ། །
དཔལ་ལྡན་མཉམ་པ་མེད་པའི་དཔེ། །རྡོ་རྗེ་ཅན་ཏེ་སྙིང་སྦྱོང་བ། །མི་ཤེས་པ་ཡི་རབ་རིབ་སེལ། །སྒེག་པའི་ཆ་ལུགས་མཆོག་མངའ་བ། །སྐྱེ་དགུའི་བདག་པོ་སྒེག་པར་དགྱེས། །གཞུ་སྟོབས་ཅན་ལ་ཕྱག་རིང་བ། །ཉོན་མོངས་དགྲ་རྣམས་སེལ་
བར་མཛད། །མཛེས་པ་ན་བཟའ་སྣ་ཚོགས་གསོལ། །མེ་ཏོག་ཕྲེང་རྒྱན་སྣ་ཚོགས་ཅན། །སྤྱན་བཟང་དབུ་ནི་མཛེས་པ་སྟེ། །དགྱེས་ཤིང་ན་བཟའ་མཛེས་པར་གསོལ། །འཇམ་པའི་དབྱངས་དེ་རབ་ཏུ་བཞད། །དཀར་ནག་འབྱེས་པའི་སྤྱན་མངའ་
བ། །ཧ་ཧའི་སྒྲ་ནི་གྲགས་པར་བསྒྲགས། །རབ་ཏུ་དང་བས་བསྟན་པ་དགའ། །རྒྱ་ཆེན་གསེར་གྱི་མདོག་དང་ལྡན། །རྒྱ་མཚོའི་སྙིང་པོའི་སྤྱོད་ཡུལ་ཅན། །ཚུལ་མཁྱེན་ཚུལ་ལྡན་འཇིགས་པ་སྟེ། །སྡང་བའི་སྙིང་ནི་འཇིགས་པར་མཛད། །ཆ་ལུགས་

སྔོ་ལ་ས་སྐྱོང་བ། །ལྷ་ཡི་བདག་པོ་དགའ་བར་མཛད། །འདོད་པའི་ལྷ་སྟེ་འདོད་སེལ་བསྟན། །རྒྱལ་པོའི་འཇིག་རྟེན་ས་འཛིན་པ། །བརྟན་པོ་རྣམས་ལ་བརྟན་པར་གྲགས། །ཡོན་ཏན་དག་གིས་ཕྱོགས་སུ་བཞད། །བཏུད་པ་ཡིས་བཏུད་ཕྱག་བགྱིས་
པ། །རྟག་ཏུ་མཆོད་ཅིང་རྗེད་པ་ལགས། །སྟོབས་པོ་ཆེ་ལ་ཤུགས་ཆེ་བ། །ཕྱག་རིང་གཡུལ་ཆེན་མངའ་བ་པོ། །སྒེག་ཆེན་རྡོ་རྗེ་དམ་པ་སྟེ། །འཛེམ་ཤེས་རབ་སྲུང་ངོ་ཚ་ཤེས། །དཀྱིལ་འཁོར་ཆེན་པོའི་སྙིང་པོའི་མཆོག །དཀྱིལ་འཁོར་ཆེན་པོ་སྟོན་
པ་པོ། །དཀྱིལ་འཁོར་ཆེན་པོར་གྲགས་པ་སྟེ། །དཀྱིལ་འཁོར་ཆེན་པོ་མཛད་པ་ལགས། །དཀྱིལ་འཁོར་སློབ་དཔོན་དཀྱིལ་འཁོར་ཅན། །ཞབས་ལ་རྗེད་པའི་ཚོགས་དང་ལྡན། །ཧ་ཧ་སྭཱ་ཧཱའི་བདག་ཆེ་བ། །མཆོད་པ་ཆེན་པོ་ས་དང་མཉམ། །ཧཱུྃ་གིས་
འཇིགས་མཛད་འཇིགས་པ་སྟེ། །འཇིགས་པའི་འོད་ཀྱིས་གསལ་བ་པོ། །ལྷ་དང་ལྷ་མིན་རྣམས་ཀྱིས་བཏུད། །དེ་བཞིན་མཆོད་ཅིང་རི་མོར་བགྱིད། །ཞམ་རིང་གད་རྒྱངས་ཆེན་པོ་ཅན། །རླུང་དྲག་མུན་པ་སེལ་མཛད་པ། །འཇིག་རྟེན་གསུམ་དུ་སྙན་པར་
གྲགས། །གནོད་སྦྱིན་སྲིན་པོས་བསྙེན་བཀུར་བ། །དྲག་པོ་དཀར་མཛད་བདེ་འབྱུང་བ། །མངའ་བདག་གཙུག་གི་ནོར་བུ་ཅན། །འཛུམ་ཞིང་སྒེག་པར་ཀུན་དུ་སྟོན། །སྤྱོད་པས་ལྟར་བརྟན་པ་ལགས། །ནོར་བུའི་དཀྱིལ་འཁོར་འོད་མཛེས་པ། །ཉི་
མ་གསལ་བ་ལམ་མེ་པ། །ཉི་མའི་འོད་འདྲ་འཇའ་ཁུགས་བཞིན། །ཐ་ལེར་ཞུགས་ཤིང་རྒྱ་ཆེར་བཞད། །མཐོང་ན་དགའ་ཞིང་དགའ་བར་མཛད། །ནོར་སྦྱིན་དེ་བཞིན་གསང་སྔགས་སྦྱིན། །དབང་ཕྱུག་སྦྱིན་ཞིང་རྒྱལ་སྲིད་སྦྱིན། །གཟུགས་སྦྱིན་དེ་
བཞིན་སྟོབས་སྦྱིན་པ། །དཔལ་ལྡན་དཔལ་མཛད་བགེགས་གནོན་རི། །ཀུན་དུ་རྨོངས་པ་སེལ་བར་མཛད། །འདུས་པའི་ནང་དུ་གདན་གཤེགས་པ། །ཞབས་ལ་མཆོད་པའི་ཚོགས་བསགས་པ། །དཔུང་རྒྱན་སྙན་ཆེ་གདུབ་ཀོར་ཅན། །ནོར་བུའི་རྒྱན་

གྱིས་བརྒྱན་པ་སྟེ། །རྒྱུ་དང་མི་རྒྱུ་འགྲོ་བའི་སྒྲོན། །རབ་རིབ་སེལ་བར་མཛད་པ་པོ། །སྟོན་པ་སྟོན་མཛད་སྐྱོང་མཛད་པ། །དབང་པོ་མངའ་བདག་དམག་གི་མཆོག །འཇིགས་པ་སེལ་བར་མཛད་པ་སྟེ། །འཇིགས་པ་མེད་པའི་
གནས་སྦྱིན་པ། །དཀར་བ་སྔོ་བ་འོད་བཟང་བ། །མགྲིན་སྔོན་གྱི་ནི་སྟོན་པ་ལགས། །ཇི་ལྟར་འདུལ་བ་འདུལ་འགྱུར་བ། །དེ་བཞིན་ཆ་ལུགས་རབ་ཏུ་སྟོན། །ཤེས་རབ་རལ་གྲིས་འདེབས་པར་མཛད། །སྟོང་ཉིད་ཆོས་ནི་ལྷུར་འཛིན་པ། །བྱམས་པ་མཆོག་
དང་ཐ་མ་མཁྱེན། །རྣམ་པར་གྲགས་པ་གསན་པ་དེས། །རིག་སྔགས་འཆང་བ་རྣམས་ཀྱིས་བསྟོད། །རིག་སྔགས་འཆང་བ་སྟོབས་པོ་ཆེ། །ཤིན་ཏུ་རྣམ་རྒྱལ་འཁོར་ལོས་སྒྱུར། །འཇིགས་མེད་བློ་གྲོས་ཤེས་རབ་ཅན། །དེ་བཞིན་གཤེགས་པ་ཆོས་འཛིན་
པ། །མགུར་བཟང་འདུལ་མཛད་ཞི་བ་སྟེ། །ཞི་བའི་ལམ་ནི་སྟོན་མཛད་པ། །ལྷ་དང་ལྷ་མིན་བཅས་པས་བཀུར། །སེམས་ཅན་ཐམས་ཅད་འཇིགས་མེད་མཛད། །སེམས་ཅན་ཀུན་ལ་རབ་སྟོན་པ། །བརྟན་པོ་སེམས་ཅན་ཀུན་གྱི་མཆོག །སེམས་ཅན་
རྣམས་ཀྱི་བློ་ལ་མཁས། །སྲེད་མེད་བུ་སྟེ་དྲག་ཤུལ་སྟོབས། །མེ་ཡི་འོད་དང་འདྲ་བ་སྟེ། །བྱིས་པ་སྐུ་མཆོག་མཆོག་སྦྱིན་པ། །རྩེད་མོ་རོལ་མོ་སྟོན་པར་མཛད། །ཕྱག་རྒྱ་མཛད་ཅིང་གསང་སྔགས་མཛད། །བདག་གིར་མི་འཛིན་རྡུལ་མེད་བརྟན། །མཁའ་
འདྲ་དཔེ་མེད་སྨྲ་མཁས་པ། །བདུད་དཔུང་ངེས་པར་འཇོམས་པ་པོ། །མི་མཆོག་བརྩོན་པ་བསྐྱོད་དུ་མེད། །དེ་བཞིན་ཐུབ་མེད་རྣམ་པར་རྒྱལ། །བརྟན་པོ་སངས་རྒྱས་དེ་བཞིན་གཤེགས། །མྱ་ངན་མེད་ཅིང་གནས་པ་མེད། །འཇོམས་མེད་ཚིག་བཟང་
ཆུ་ལུགས་བཟང་། །དཔའ་བོ་དགྲ་རྣམས་རབ་འཇོམས་པ། །ཚན་ཆེན་ངེས་འཇོམས་རྣལ་འབྱོར་པ། །འདོད་པ་གནོད་པ་ཁྱབ་པར་གཤེགས། །མགོན་པོ་རྒྱལ་བའི་སྲས་ཀྱི་མཆོག །གཤིན་རྗེ་ཕམ་མཛད་སྐྱེ་དགུ་སྲུང་། །ལས་དང་ཉོན་མོངས་རབ་

སྲེག་པ། །སྟོན་མཛད་ཉོན་མོངས་སེལ་བ་ལགས། །ལེགས་པ་ཁྱོད་ཀྱི་མཆོག་གི་མཚན། །བརྒྱ་རྩ་བརྒྱད་པ་རབ་གསལ་ཞིང་། །དད་པ་སྐྱེད་པར་བྱེད་པ་འདི། །ལྷ་མཆོག་རྣམས་ཀྱིས་རབ་ཏུ་བཤད། །བགེགས་ཆེན་དང་ནི་ལོག་འདྲེན་དང་། །
གནོད་སྦྱིན་ལྷ་མིན་སྲིན་པོ་དང་། །མདངས་འཕྲོག་གཏུམ་པོ་རྒོད་རྣམས་ཀྱིས། །དེ་རིང་ལེགས་པར་བསྟོད་པར་གྱུར། །འཇམ་དཔལ་རྡོ་རྗེ་མཆོག་གིས་རབ། །བསྒྱིངས་པས་བལྟས་པའང་བདེ་བར་གྱུར། །དེ་དག་ཀུན་ལ་བལྟས་ནས་ཀྱང་། །འདི་
སྐད་དུ་ནི་ཚིག་སྨྲས་པ། །ཁྱེད་ཀུན་རྟག་ཏུ་བགེགས་མེད་ཅིང་། །ངེས་ལེགས་ཐར་པ་ཐོབ་གྱུར་ལ། །འཇིགས་མེད་བཀྲ་ཡང་ཤིས་པར་ཤོག །ང་ལ་འཇིགས་པར་མ་སེམས་ཤིག །དེ་ནས་རབ་ཏུ་ཆེར་བཞད་ཅིང་། །འབྲུག་ཆེན་སྒྲ་ནི་སྒྲོགས་པ་ཡི། །
དེ་བཞིན་གཤེགས་པ་ཞལ་གསལ་བས། །ཤར་ཕྱོགས་གཟིགས་ནས་བཀའ་སྩལ་པ། །ཀྱེ་མ་གསང་སྔགས་མཆོག་གི་ཡུལ། །སེམས་ཅན་གཏི་མུག་བསལ་བའི་ཕྱིར། །སེམས་ཅན་རྣམས་ཀྱི་བསོད་ནམས་ཚོགས། །ཤིན་ཏུ་རྒྱས་པ་བྱུང་བར་
གྱུར། །ཀྱེ་མ་བསོད་ནམས་ཆེར་བྱས་པའི། །སེམས་ཅན་རྣམས་ནི་རབ་སྦྱང་ཕྱིར། །དམ་པ་སྦྱིན་པའི་གྲུབ་པའི་གཟུངས། །འཇམ་པའི་ཀློག་གིས་རབ་ཏུ་བཤད། །ལ་ལ་གང་ཞིག་མཉམ་བཞག་ནས། །སྡུག་བསྔལ་ཐམས་ཅད་སེལ་བ་ཡི། །
གྲུབ་པའི་གཟུངས་འདི་འདོན་པའམ། །ཡང་ན་ཉན་ཏམ་སེམས་ཀྱང་རུང་། །དེ་ཡི་དོན་ཀུན་འགྲུབ་འགྱུར་ཞིང་། །སྡུག་བསྔལ་ཀུན་ལས་ཐར་བར་འགྱུར། །སྡིག་པ་ཐམས་ཅད་རྣམ་དག་པ། །དེ་ཡིས་ངེས་པར་ཐོབ་པར་འགྱུར། །དེ་བཞིན་གཤེགས་
པའི་ས་ཆེན་ཡང་། །རིང་བོར་མི་ཐོགས་དེ་ཡིས་འཐོབ། །བྱང་ཆུབ་སེམས་དཔའ་རྣམས་ཀྱིས། །རབ་དགའ་ཤིན་ཏུ་དྲི་མ་མེད། །འོད་བྱེད་པ་དང་འོད་འཕྲོ་ཅན། །སྦྱང་དཀའ་དེ་བཞིན་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་

པའི་བློ་གྲོས་ཆོས་ཀྱི་སྤྲིན། །ས་ཆེན་དམ་པ་དེ་དག་ཀྱང་། །གང་ཞིག་ངེས་གནས་འདོད་པ་ཡི། །སེམས་ཅན་ཆེན་པོས་མི་ཐོགས་པར། །ཚེ་ཟད་ནས་ནི་ཐོབ་པར་འགྱུར། །སྡིག་པ་ཐམས་ཅད་རྣམ་དག་དང་། །སེམས་ཅན་
ཀུན་ལ་སྡུག་པ་དང་། །སྤྲོས་པ་ཐམས་ཅད་ཞི་བ་ཡི། །བྱང་ཆུབ་བླ་མེད་ཐོབ་པར་འགྱུར། །རིག་སྔགས་འཆང་ཀུན་བསྐྱེད་པ་དང་། །སྡིག་པ་ཐམས་ཅད་ཞི་བྱེད་པ། །བཀྲ་ཤིས་མཆོག་ཏུ་དགེ་བ་ཡི། །མིང་བརྒྱ་རྩ་བརྒྱད་ཡིད་འོང་འདི། །
སོར་མོ་བཅུ་ཡི་ཐལ་སྦྱར་ནས། །འཇམ་པའི་དབྱངས་ཀྱི་མདུན་འདུག་ལ། །ཤིན་ཏུ་དང་བའི་སེམས་ཀྱིས་སུ། །ནང་པར་ལངས་ནས་སུ་བརྗོད་པ། །དེ་ལ་རིག་སྔགས་འཆང་ཀུན་དང་། །དེ་བཞིན་ལྷ་ཡི་བདག་པོ་རྣམས། །གནོད་སྦྱིན་སྲིན་པོ་
མང་པོ་དག །རྟག་ཏུ་ཡང་ནི་སྲུང་བར་བྱེད། །དེ་བཞིན་གཤེགས་པའི་སྲས་ཀུན་དང་། །དེ་བཞིན་གཤེགས་པ་ཉིད་རྣམས་དང་། །དེ་བཞིན་རྡོ་རྗེའི་མཚོན་འཆང་རྣམས། །དེ་ལ་ངེས་པར་སྲུང་བར་བྱེད། །དེ་ནི་སངས་རྒྱས་སྐུར་བཞུགས་ཤིང་། །
མཉམ་པར་གཞག་པར་སྣང་བར་འགྱུར། །གནོད་སྦྱིན་ལྷ་ཡི་བདག་པོ་རྣམས། །བགེགས་དང་ལོག་འདྲེན་ཆེན་པོ་དག །དགའ་ཞིང་བསམ་པ་དམ་པ་ཡིས། །རྒྱང་མ་དག་ནས་ཕྱག་ཀྱང་འཚལ། །དེ་ཕྱིར་བགེགས་རྣམས་དགའ་གྱུར་པས། །
འཚེ་བར་བྱེད་ཀྱང་མི་ནུས་སོ། །ལན་ཅིག་བཀླགས་ན་ཚངས་ཆེན་དང་། །བསོད་ནམས་མཉམ་པ་ཐོབ་པར་འགྱུར། །ཤེས་རབ་ཆེན་པོ་གང་ཞིག་གིས། །ཉིན་རེ་མཚན་མཆོག་བརྗོད་བྱས་ན། །དྲི་མ་མེད་ཅིང་རབ་དག་ལ། །རབ་ཏུ་འོད་གསལ་སྒྲ་
སྙན་དང་། །སེམས་ཅན་ཐམས་ཅད་དགའ་བ་ཡི། །ཡིད་དུ་འོང་བའི་གནས་ཀྱང་འཐོབ། །མཚུངས་པ་མེད་ཅིང་སྟོབས་བསྐྱེད་ལམ་མཆོག་འགྲོ་བ་དང་། །འོད་གསལ་དམ་ཚིག་ཅན་གྱི་ལྷ་རྣམས་ཀྱིས་བསྟོད་ཅིང་། །ཡིད་འཕྲོག་ལྷ་དང་ལྷ་མིན་ཚོགས་

ཏེ་འདུན་པ་ཡི། །གཟུངས་འདི་རྒྱལ་བ་རྣམས་ཀྱིས་ལེགས་པར་གསུངས་པ་ཡིན། །འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ།། །།
༄༅། །འཕགས་པ་སྒྲིབ་པ་ཐམས་ཅད་རྣམ་པར་སེལ་བའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །ཨོྃ་ཨ་མྲྀ་ཏ་བིནྡུ་ཛ་བ་མ་ཧཱ་སུ་
ཁ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་ཕྱག་གཡས་པ་བརྐྱང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ཚིམ་པར་མཛད་ནས་བཀའ་སྩལ་པ། ཡོན་ཏན་རིན་པོ་ཆེའི་
ཚོགས་ཅན་ཁྱེད་ཀྱི་གཟུངས་སྔགས་འདི་ཕྱུང་བས། སེམས་ཅན་རྣམས་ཀྱི་བདེ་བ་ཆེན་པོ་བསྐྱེད་པ་ལེགས་སོ་ལེགས་སོ། །ཀྱེ་རྒྱལ་བའི་སྲས། གང་ལ་ལ་གཟུངས་སྔགས་འདི་ཐོས་པ་དེ་ནི་དེ་བཞིན་གཤེགས་པ་གངྒཱའི་ཀླུང་བཅུའི་བྱེ་མ་སྙེད་ཀྱི་སྤྱན་སྔར་དགེ་
བའི་རྩ་བ་བསྐྱེད་པ་དང་ལྡན་པར་འགྱུར་རོ། །གང་ལ་ལའི་རྣ་ལམ་དུ་གྲགས་པར་གྱུར་པ་དེ་ཡང་སྒྲིབ་པ་དང་བྲལ་བར་འགྱུར་རོ། །སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ཟླ་བ་ཡར་གྱི་ངོ་། ཚེས་བརྒྱད་དམ། ཚེས་བཅྭ་ལྔ་ལ་སྨྱུང་བར་འདུག་ཅིང་གསོ་
སྦྱོང་དང་ལྡན་པར་བྱས་ཏེ། སྤོས་དང་། བདུག་པ་དང་། མར་མེ་དང་། མེ་ཏོག་དང་དང་། མེ་ཏོག་ཕྲེང་དང་། བྱུག་པ་ལ་སོགས་པས་མཆོད་ལ། བསྐོར་བ་བྱས་ནས་བཟླས་བརྗོད་བྱས་ན། དམ་པ་ཅི་འདོད་པ་ཐོབ་པར་འགྱུར་ཏེ། སྡིག་
པ་ཐམས་ཅད་དང་། སྡུག་བསྔལ་བ་དང་། འཇིགས་པ་ཐམས་ཅད་ལས་ཐར་བར་འགྱུར་རོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་སྤོས་ལ་སོགས་པས་མཆོད་དེ། བཟླས་བརྗོད་བྱས་ན་རྨི་ལམ་དུ་སྟོན་པར་འགྱུར་ཏེ། བསམ་

པ་ཐམས་ཅད་ཡོངས་སུ་རྫོགས་པར་བྱེད་ཅིང་། ཉོན་མོངས་པ་དང་སྡུག་བསྔལ་ཐམས་ཅད་སེལ་བར་བྱེད་དོ། །དེ་ནས་རྡོ་རྗེ་མེ་ཏོག་ཐོད་ཆེན་པོ་ས་གསུམ་གྱི་དབང་ཕྱུག་དང་ཐབས་ཅིག་ཏུ་འཁོར་གྱི་དཀྱིལ་འཁོར་ཆེན་པོ་དེའི་ནང་ནས་སྟན་ལས་ལངས་
ཏེ། བྱང་ཆུབ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་བཏུད་ནས། མཚན་བརྒྱ་རྩ་བརྒྱད་ཀྱིས་མངོན་པར་བསྟོད་པ། སེམས་ཅན་ཀུན་གྱི་གཙོ་བོ་ཆེ། །བྱང་ཆུབ་སེམས་དཔའི་ཚུལ་ཆེ་བ། །ཉོན་མོངས་དྲི་མ་ཀུན་ལས་འདས། །
ཆོས་དབྱིངས་ཁྱོད་ལ་ཕྱག་འཚལ་ལོ། །སྒྲིབ་པ་ཀུན་ལས་ངེས་པར་གྲོལ། །ཉོན་མོངས་དྲི་མ་ཀུན་སེལ་ཅིང་། །ཉེས་པ་ཀུན་ལས་རྣམ་པར་གྲོལ། །སྐྱོན་བྲལ་ཁྱོད་ལ་ཕྱག་འཚལ་ལོ། །ལམ་སྲང་གཅིག་པུའི་ཚུལ་སྟོན་ཅིང་། །ཐེག་པ་གཅིག་
པུའི་ཚུལ་གཅིག་པ། །ཐེག་པ་ཆེན་པོའི་ཚུལ་བརྙེས་ཏེ། །ཐེག་པ་དག་པ་ཁྱོད་ཕྱག་འཚལ། །སྣང་བ་ཆེན་པོ་སྣང་བ་བརྙེས། །ཡོན་ཏན་དཀྱིལ་འཁོར་འཇིག་རྟེན་བདག །ཟླ་བ་བཞིན་དུ་འོད་དཀར་བ། །འཇིག་རྟེན་འདས་པ་ཁྱོད་ཕྱག་འཚལ། །ཐེག་
པ་ཆེན་པོ་དག་པ་ཆེ། །སངས་རྒྱས་ཐེག་པ་རྟོགས་གྱུར་ཅིང་། །རྡོ་རྗེའི་དཀྱིལ་འཁོར་རྣམ་གྲགས་པ། །རྡོ་རྗེ་ཆེན་པོ་ཁྱོད་ཕྱག་འཚལ། །དཔའ་བོ་ཆེན་པོ་བདུད་ལས་རྒྱལ། །དར་བ་ཆེན་པོ་ཉོན་མོངས་ཆོམས། །བགེགས་ཐུབ་གཤིན་རྗེ་ཐུབ་པ་སྟེ། །
རིན་ཆེན་དྲ་བ་ཁྱོད་ཕྱག་འཚལ། །ཟླ་བ་ཆེན་པོ་ཉི་མ་ཆེ། །ལྷུན་པོ་ཆེན་པོ་དབང་ཕྱུག་ཆེ། །ལྷ་ཆེན་མགོན་པོ་ཆེན་པོ་སྟེ། །འབྱོར་པ་ཆེན་པོ་ཁྱོད་ཕྱག་འཚལ། །སྒྲིབ་པ་ཐམས་ཅད་གཅོད་མཛད་ཅིང་། །སྒྲིབ་པ་ཐམས་ཅད་སེལ་མཛད་པ། །ཀུན་
མཁྱེན་ཡོན་ཏན་བདག་ཉིད་ཆེ། །རྣམ་སེལ་ཁྱོད་ལ་ཕྱག་འཚལ་ལོ། །སངས་རྒྱས་སྤྱོད་ཡུལ་ཞུགས་པ་སྟེ། །ཆོས་ཀྱི་སྤྱོད་ཡུལ་གཤེགས་པ་ལགས། །ཡེ་ཤེས་དབང་ཕྱུག་ཡེ་ཤེས་ཆེ། །སྲེད་བྲལ་ཁྱོད་ལ་ཕྱག་འཚལ་ལོ། །སྐུ་མཛེས་ཡོན་

ཏན་སྙིང་པོ་མཁྱེན། །རྡོ་རྗེ་ཡི་ནི་དཀྱིལ་འཁོར་བརྒྱན། །སངས་རྒྱས་ལམ་སྟེ་དོན་ཡོད་ཆེ། །ཡེ་ཤེས་དག་པ་ཁྱོད་ཕྱག་འཚལ། །བསྟན་པ་གནས་པ་དབང་བདག་པོ། །བདེ་མཛད་ཐུགས་ཀྱང་ཞི་བ་སྟེ། །ཡངས་པ་དྲི་མེད་ཤེས་རབ་ཅན། །སྣང་
བ་དག་པ་ཁྱོད་ཕྱག་འཚལ། །ཟབ་ཅིང་བརྟན་ལ་རྣམ་པར་གནོན། །ཞི་ལ་འཇིག་རྟེན་དག་པར་མཛད། །སྟོན་པ་སྐྱབས་འོས་སྲིད་གསུམ་ན། །དཔའ་བཙན་ཁྱོད་ལ་ཕྱག་འཚལ་ལོ། །སྐལ་བ་ཆེན་པོ་ཉོན་མོངས་བཅོམ། །འཁོར་བའི་དཀྱིལ་འཁོར་
འཇོམས་པ་སྟེ། །ཞི་བ་ཞི་མཛད་བདེ་འབྱུང་བ། །ཆུ་བོ་ཞི་མཛད་ཁྱོད་ཕྱག་འཚལ། །ཐར་བའི་རྒྱུ་སྟེ་ཆོས་ལུགས་ཆེ། །བདེ་འགྲོར་གནས་པ་དྲི་མ་མེད། །རྣམ་དག་ཐུགས་མངའ་ཞི་བ་མཁྱེན། །ཉེས་སེལ་ཁྱོད་ལ་ཕྱག་འཚལ་ལོ། །རྩེ་མོ་ཡངས་
པར་རྣམ་པར་གྲགས། །སྔགས་ཆེན་མང་པོས་འདུལ་མཛད་པ། །སྙིང་པོ་ཆེན་པོ་དཀྱིལ་འཁོར་མཆོག །དཀྱིལ་འཁོར་མཁྱེན་པ་ཁྱོད་ཕྱག་འཚལ། །སྡུག་བསྔལ་གསུམ་སེལ་གསུམ་གྱི་མཆོག །དཀོན་མཆོག་གསུམ་དང་སྤྱོད་ཡུལ་འདྲ། །རྣམ་
གསུམ་མཁྱེན་པ་རྙེད་པའི་བདག །རྣམ་ཐར་གསུམ་ཁྱོད་ཕྱག་འཚལ་ལོ། །བྱང་ཆུབ་སེམས་དཔའི་ཡོན་ཏན་གྱི། །འབྱོར་བ་བརྙེས་ཤིང་མཉམ་ཉིད་བརྙེས། །བསྐལ་བ་དག་ནི་གྲངས་མེད་པར། །ཚོགས་ཆེན་བསགས་པ་ཁྱོད་ཕྱག་འཚལ། །ས་
ལ་གནས་པ་ས་ཆེན་བརྙེས། །ས་ཡི་འབྲས་བུ་ཕུན་སུམ་ཚོགས། །ཡང་དག་ས་འཛིན་ལས་བྱུང་བ། །ཡེ་ཤེས་ས་ཁྱོད་ཕྱག་འཚལ་ལོ། །ཏིང་ངེ་འཛིན་ལ་མངའ་བརྙེས་པ། །ཉེས་གསུམ་སྤོང་ཞིང་སྡིག་པ་སེལ། །ཏིང་འཛིན་མཁྱེན་ཅིང་རྒྱ་ཆེ་
བ། །མཉམ་པ་ཉིད་མཉམ་ཁྱོད་ཕྱག་འཚལ། །མགོན་པོ་ཆེན་པོ་སྣང་བ་ཆེ། །སྡུག་བསྔལ་ཆེན་པོའི་དྲི་མ་སེལ། །ཞི་གྱུར་མ་ལུས་ཞི་མཛད་པ། །ཡོན་ཏན་ཕ་མཐའ་ཁྱོད་ཕྱག་འཚལ། །སངས་རྒྱས་ཀུན་མཚུངས་གསུང་ལྡན་པ། །ཆོས་

ཀུན་ཞི་བ་ཕུན་སུམ་ཚོགས། །དཀོན་མཆོག་གསུམ་རིགས་དཔེ་མེད་པ། །རིན་ཆེན་མཐའ་ཡས་ཁྱོད་ཕྱག་འཚལ། །རྡོ་རྗེ་ཆེན་པོ་དྲི་མེད་མཆོག །རྡོ་རྗེའི་མཚོན་པ་སྣམས་སྡིག་མི་མངའ། །ནམ་མཁའ་མ་ལུས་ཡུལ་དང་ལྡན། །
ཡེ་ཤེས་སྤྱོད་ཡུལ་རྒྱ་མཚོ་མངའ། །དེ་བཞིན་གཤེགས་དང་ཡུལ་གཅིག་པ། །སེལ་བ་པོ་སྟེ་དྲི་མ་སྦྱོང་། །ཤེས་རབ་ཆེན་པོ་རྒྱལ་བའི་སྲས། །སྲེད་གཅོད་ཁྱོད་ལ་ཕྱག་འཚལ་ལོ། །རྡོ་རྗེའི་དཀྱིལ་འཁོར་རྡོ་རྗེའི་མཆོག །རྡོ་རྗེས་འདུལ་
བ་རྡོ་རྗེ་འཆང་། །རྡོ་རྗེ་རྩལ་ཅན་རྣམས་ཀྱི་རྩལ། །རྡོ་རྗེ་སྣང་བ་ཁྱོད་ཕྱག་འཚལ། །རིན་ཆེན་ཆེན་པོ་རིན་ཆེན་བློ། །རིན་ཆེན་རྡོ་རྗེ་འོད་ཆེ་བ། །རིན་ཆེན་འོད་མཛེས་རིན་ཆེན་འབྱུང་། །རིན་ཆེན་བསྟན་པ་སྲུང་མཛད་པ། །སྟོང་པ་ཉིད་ཀྱི་
ཡུལ་བརྙེས་པ། །ཡེ་ཤེས་སྟོང་པ་ཉིད་ཀྱིས་སྟོན། །སྟོང་ཉིད་ལོངས་སྤྱོད་ཡུལ་དང་ལྡན། །སྟོང་ཉིད་མཆོག་ཁྱོད་ཕྱག་འཚལ་ལོ། །ཤེས་རབ་མཚུངས་མེད་ཤེས་རབ་ཅན། །དགེ་བ་རྣམ་དག་ས་དང་བྲལ། །ཆོས་གཅིག་ལས་བྱུང་སྣང་
བ་པོ། །འཇིག་རྟེན་འདས་པའི་ཚུལ་ཆེན་ལགས། །འཇིག་རྟེན་སྣང་མཛད་སྨྲ་མཁས་པ། །འཇིག་རྟེན་ཆོས་ལས་རྣམ་པར་འདས། །འཇིག་རྟེན་མཁྱེན་པའི་ཡོན་ཏན་བརྙེས། །བརྒྱན་པར་མཛད་པ་དཀྱིལ་འཁོར་དག །ཉེས་པ་མ་ལུས་
སེལ་བ་སྟེ། །ཕལ་ཆེན་སྐྱེ་བོ་ཀུན་ལ་ཕན། །ས་འཛིན་རྣམ་པར་གྲགས་པ་པོ། །ཀུན་མཁྱེན་ཁྱོད་ལ་ཕྱག་འཚལ་ལོ། །དགའ་མཁྱེན་དགའ་ལ་ལོངས་སྤྱོད་པ། །དགའ་བའི་རིགས་མཆོག་རྣམས་ཀྱི་མཆོག །དགའ་བར་མཛད་པའི་རྟོག་པ་
ཅན། །དགའ་ལ་སྣང་བ་ཁྱོད་ཕྱག་འཚལ། །སྒེག་ཆེན་འཇམ་ཞིང་དགོངས་པར་ལྡན། །རྣམ་པར་སྒེག་ལ་སྤྱོད་པ་བརྟན། །རྡོ་རྗེ་རིག་པ་སྒེག་པའི་མཆོག །སྒེག་ཆེན་ཁྱོད་ལ་ཕྱག་འཚལ་ལོ། །སངས་རྒྱས་བྱང་ཆུབ་སེམས་དཔའི་མཆོག །

རྡོ་རྗེ་མཆོག་གི་དཀྱིལ་འཁོར་ཆེ། །ཐེག་པ་ཆེན་པོའི་ཚུལ་ལ་གནས། །བླ་མེད་མཆོག་ཁྱོད་ཕྱག་འཚལ་ལོ། །དཔའ་བོ་བྱང་ཆུབ་སེམས་དཔའི་མཆོག །སྒྲིབ་པ་ཐམས་ཅད་སེལ་མཛད་ལ། །རྡོ་རྗེའི་དཀྱིལ་འཁོར་འཁོར་རྣམས་ཀྱིས། །མིང་བརྒྱ་
རྩ་བརྒྱད་ཀྱིས་བསྟོད་ནས། །རྡོ་རྗེའི་བསྟན་པ་རྣམ་གྲགས་པ། །བཅོམ་ལྡན་རྡོ་རྗེ་ཅན་གྱིས་གསུངས། །ཀྱེ་མ་འབྱོར་ཆེན་སྣང་བ་ཡི། །དཀྱིལ་འཁོར་རྒྱལ་བའི་དཀྱིལ་འཁོར་པ། །གང་ཞིག་མིང་བརྒྱ་རྩ་བརྒྱད་པ། །འདི་དག་སོ་སོར་རྗོད་བྱེད་ན། །
ང་ནི་ཉེས་པ་ཀུན་ཟློག་ཅིང་། །རྟག་ཏུ་དེ་ཡི་ཕྱི་བཞིན་འབྲང་། །ནང་པར་ལངས་ནས་གཙང་མ་ཡིས། །སྒྲིབ་པ་ཐམས་ཅད་སེལ་བ་ལ། །བློ་ལྡན་གང་ཞིག་སྟོད་བྱེད་པ། །དེ་ཡི་སྡིག་པ་མེད་པར་འགྱུར། །གང་ཞིག་མིང་བརྒྱ་རྩ་བརྒྱད་མཆོག །ནང་
པར་ལངས་ནས་རྗོད་བྱེད་པ། །སྡང་བ་ཐམས་ཅད་དེ་དབང་འགྱུར། །བགེགས་རྣམས་ཀྱིས་ཀྱང་ཡོངས་སུ་གཏང་། །སྡིག་པ་དག་པ་འཐོབ་པ་དང་། །དེ་བཞིན་བསོད་ནམས་འཕེལ་བ་དང་། །ཡེ་ཤེས་རྒྱ་མཚོ་ལོངས་སྤྱོད་ཅིང་། །ས་མཆོག་ཆེན་
པོ་ཐོབ་པར་འགྱུར། །གང་ཞིག་ངེས་པར་གནས་བྱས་ལ། །མིང་བརྒྱ་རྩ་བརྒྱད་མཆོག་འདོན་པ། །དེས་ནི་འབྱོར་ཆེན་སངས་རྒྱས་ས། །རིང་པོར་མི་ཐོགས་ཐོབ་པར་འགྱུར། །རྒྱུད་ཆེན་ལྡན་ཞིང་བློ་ཆེ་བ། །གང་ཞིག་མིང་མཆོག་འདོན་པ་ནི། །རྡོ་
རྗེའི་དཀྱིལ་འཁོར་བསྟན་པ་ལ། །རིང་པོར་མི་ཐོགས་འཇུག་པར་འགྱུར། །བྱང་ཆུབ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ།། །།
༄༅། །འཕགས་པ་སའི་སྙིང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། དཀྱིལ་འཁོར་གྱི་རྒྱལ་པོ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་ཕྱག་འཚལ་ལོ། །ཨོྃ་སུམྦྷ་ནི་སུམྦྷ། ཧ་ར་ཙ་ར། མ་

ཧཱ་བཱ་ཤ། མ་རུ་ཏཱ། ཨ་མོ་གྷ་བཛྲ་སཏྭ་སྭཱ་ཧཱ། དེ་ནས་ཡོན་ཏན་སྦྱིན་པ་ཡི། །གཟུངས་འདི་བཤད་མ་ཐག་ཏུ་ཡང་། །རྡོ་རྗེའི་དཀྱིལ་འཁོར་དམ་པ་ནི། །ཏི་སེའི་གངས་བཅས་གཡོས་པར་གྱུར། །ས་ཡི་སྙིང་པོ་ཚོགས་
དབང་ལ། །བཅོམ་ལྡན་རྡོ་རྗེ་ཅན་གྱིས་སྨྲས། །སྐལ་ལྡན་ཆེན་པོ་ལེགས་སོ་ལེགས། །ས་སྟེང་ཁྱོད་ཀྱིས་ཡངས་པར་བྱས། །ཁྱོད་ཀྱི་གཟུངས་ནི་རྣམ་གྲགས་ཤིང་། །ཡོན་ཏན་དཔག་མེད་མཆོག་བསྐྱེད་པ། །སེམས་ཅན་ཀུན་གྱི་སྡུག་
བསྔལ་དང་། །ཉེས་པ་ཟློག་བྱེད་ཐོས་པ་ནི། །འཁོར་བར་རབ་ཏུ་རྒྱུ་བ་ན། །ཉེས་པ་ཀུན་གྱིས་མི་གོས་ཏེ། །ཇི་ལྟར་འདམ་གྱི་པདྨ་དག །འདམ་གྱི་ཉེས་པས་མི་གོས་བཞིན། །ལུས་ཅན་དག་ལས་སུ་ཡང་རུང་། །ཁྱོད་ཀྱི་གསང་སྔགས་
འཆང་བྱེད་པ། །དེ་དག་ལས་ནི་གཅིག་ཙམ་ཡང་། །བྱང་ཆུབ་ལས་ནི་ལྡོག་མི་འགྱུར། །མཁས་པ་གང་ཞིག་གཟུངས་སྔགས་མཆོག །ཐོས་ནས་མོས་པར་བྱེད་པ་ནི། །ངེས་པར་ཡོན་ཏན་ཐམས་ཅད་ཀྱང་། །ཐོབ་པར་འགྱུར་ཏེ་ཐེ་ཚོམ་མེད། །
དེ་ནས་ཐམས་ཅད་ལྡན་པའི་འཁོར། །ལངས་ཏེ་ས་ཡི་དབང་ཕྱུག་པོ། །ས་ཡི་སྙིང་པོ་ས་མཆོག་ལ། །མིང་བརྒྱ་རྩ་བརྒྱད་སྨྲས་པ་ནི། །ས་ཡི་སྙིང་པོ་གཙོ་བོ་ཆེ། །གློག་འགྱུ་ལྟ་བུའི་སྤྱན་མངའ་བ། །ཅོད་པན་ཅན་ཏེ་ས་བརྙེས་པ། །ཕུན་
སུམ་ཚོགས་ལྡན་འབྱོར་པ་མཆོག །རིག་ལྡན་རིག་མཛད་མཆོད་པའི་གནས། །གཙོ་བོ་དགེ་སྦྱོང་སྟོན་པ་པོ། །གཞི་བཅས་ལྡན་པའི་རླུང་གི་ཚུལ། །སྭཱ་ཧཱའི་བློ་ལྡན་སྙིང་རྗེའི་རབ། །ཐམས་ཅད་མཁྱེན་པའི་ཉི་མའི་མཆོག །སྙིང་པོ་སྙིང་པོ་
མཁྱེན་པར་གྲགས། །གསང་སྔགས་རོལ་ཅིང་རྒྱ་ཆེར་རོལ། །ས་ཡི་དབང་ཕྱུག་གར་ཐབས་ཅན། །སྒེག་པོ་ཞལ་བཟང་གར་མཁན་ལྡན། །འབྲས་བུ་མངོན་སུམ་སྟོན་པ་པོ། །རབ་འབྱོར་བློ་གྲོས་སྙིང་པོ་མཁྱེན། །སྙིང་པོ་བརྙེས་པ་འཇིགས་པ་མེད། །

མགོན་པོ་སངས་རྒྱས་གཟུགས་མངའ་བ། །ཤེས་རབ་ཀྱིས་ནི་མ་ལུས་གཟིགས། །འདོད་ཆགས་ལ་སོགས་སྐྱོན་བསལ་ཅིང་། །གར་ཐབས་ཆེན་པོ་སྟོན་པ་པོ། །སྟོན་པ་དཔག་བསམ་ཤིང་དང་འདྲ། །ནམ་མཁའི་དབང་ཕྱུག་གསུང་སྙན་པ། །ཉི་
མ་ཆེན་པོ་ཉིད་ཡིན་ཏེ། །དབང་ཕྱུག་ཆེན་པོ་འབར་བས་བསྐོར། །ཡོན་ཏན་མཐའ་ཡས་ལོངས་སྤྱོད་པ། །ས་ཡི་དབང་ཕྱུག་སྤྱོད་ཡུལ་ཅན། །ཆོས་ཀྱི་ལོངས་སྤྱོད་ལོངས་སྤྱོད་ཆེ། །ཡོན་ཏན་རྒྱ་མཚོའི་གང་ཆེན་མཚོ། །ཡོན་ཏན་སྣ་ཚོགས་ལོངས་སྤྱོད་
པ། །དེ་བཞིན་གཤེགས་པའི་རིགས་ཀྱི་མཆོག །ཐབས་ཚུལ་ཟབ་ལ་མཁས་པ་སྟེ། །ཐེག་པ་ཆེན་པོ་འཇིགས་པ་མེད། །མཆོད་པ་ཆེན་པོ་སྒྲ་ཆེ་བ། །ཟླ་ལྟར་གྲགས་པའི་དཀྱིལ་འཁོར་ཅན། །རྡོ་རྗེ་འཆང་ཆེན་མཚན་བརྒྱ་པ། །རྡོ་རྗེ་དཀྱིལ་
འཁོར་མེ་ཏོག་ཐོད། །བློ་གྲོས་ཆེན་པོ་ཕྱག་རིང་བ། །པདྨ་ཆེན་པོ་སྟོབས་པོ་ཆེ། །གསང་སྔགས་ཆེན་པོ་ཚོགས་ཆེན་པོ། །ས་གཞི་ཆེན་པོ་ལྷུན་པོ་ལགས། །ལག་ན་རྡོ་རྗེ་ཡོན་ཏན་དེས། །ནོར་བུའི་མེ་ཏོག་ཐོད་ཀྱིས་བརྒྱན། །མཉམ་ཉིད་འབྱམ་
ལོངས་སྤྱོད་པ་ཡི། །རྒྱ་ཆེན་ཞིང་གི་རྒྱ་མཚོ་ཅན། །རྡོ་རྗེའི་འོད་མངའ་རྡོ་རྗེ་ལྡན། །ས་ཡི་བདག་པོ་ལྷུན་པོ་བཞིན། །ས་ལ་ལོངས་སྤྱོད་ལོངས་སྤྱོད་བཟང་། །མཚོན་ཆ་གཡོ་བ་ཕུན་སུམ་ཚོགས། །རབ་འབྱམ་སྣོད་ནི་རྣམ་པར་གྲགས། །སྨྲ་མཁས་
རྡོ་རྗེ་རབ་འཇོམས་པ། །སྤྱན་རྩ་ཡིད་ཙམ་དམར་བ་སྟེ། །མེ་ཏོག་སྔོན་པོའི་ཐོད་ཀྱིས་བཅིངས། །སྤྲོ་བ་ཆེན་པོ་ཕྱག་རིང་བ། །བརྟན་པོ་བརྟན་ལ་བདེ་སྦྱིན་པ། །དེད་དཔོན་དཔལ་བཟང་ཆེན་པོ་སྟེ། །གངས་ཅན་ལྷུན་པོ་ལྟ་བུ་ལགས། །དབང་པོ་
གཤིན་རྗེའི་རྒྱལ་ཆེན་དང་། །བཙན་པོ་ཁྱབ་འཇུག་སྟོབས་དབང་ཕྱུག །འཇིག་རྟེན་མཆོག་རིགས་སངས་རྒྱས་ཚངས། །དེ་བཞིན་ཉིད་ཚུལ་སྤྱོད་ཡུལ་ཅན། །རིན་ཆེན་ཏོག་སྟེ་ཆེར་བཞད་པ། །དགྱེས་པ་ན་བཟའ་སྣ་ཚོགས་གསོལ། །གཟིགས་པ་

རིང་བ་སྤྱན་ཡངས་པ། །ནམ་མཁའ་བཞིན་དུ་ཐོགས་པ་མེད། །ཐོགས་པ་མི་དཔོགས་རིན་ཆེན་གཙུག །སྲིད་གསུམ་འདོད་པ་མེད་པའི་རྒྱུ། །དུལ་བ་ཉོན་མོངས་དྲི་མ་བསལ། །དག་པ་གཙང་བ་གསོ་སྦྱོང་ཅན། །རྣམ་པར་
གནོན་པའི་གཡུལ་ལས་འདས། །ལྗང་མདོག་སྐྱབས་མཛད་སྙིང་རྗེ་ཆེ། །སྟོབས་ཀྱིས་གྲགས་པ་རྒྱ་ཆེ་བ། །བསམས་ན་ཤེས་པའི་སྤྱོད་ཡུལ་ཅན། །དཔའ་བོ་སེང་གེ་འཇིགས་པར་བྱེད། །སྡང་བ་རྣམས་ཀྱི་སྙིང་འཇོམས་པ། །མངའ་བདག་གྲགས་
པ་ཡུལ་དང་ལྡན། །དགའ་བ་རྒྱ་ཆེན་རབ་འབྱུང་བ། །རིགས་མཁྱེན་རིགས་ཀྱི་སྙིང་པོ་མཁྱེན། །རིགས་ཀུན་དུ་ནི་མཆོད་པ་ལགས། །རྒྱལ་པོ་རིགས་མཆོག་སྐྱེད་པའི་རྟེན། །རྡོ་རྗེ་ཡི་ནི་དཀྱིལ་འཁོར་བརྒྱན། །རྡོ་རྗེ་ས་འོག་རབ་གྲགས་པ། །རིག་
སྔགས་འཆང་བ་སྟོབས་པོ་ཆེ། །མངོན་པར་འཕགས་པ་ཁྱབ་པ་མཆོག །མགྲིན་བཟངས་ནད་དང་བྲལ་བ་ལགས། །སྐྱོང་མཛད་སྟོན་པ་དག་པ་སྟེ། །སངས་རྒྱས་ལམ་ནི་རབ་སྟོན་པ། །གྲོལ་བ་སྨིན་མཛད་འདུད་པར་མཛད། །དཀྱིལ་འཁོར་མ་ལུས་
རྣམས་ཀྱིས་བརྒྱན། །རབ་ཞུགས་དཀྱིལ་འཁོར་རྣམས་ལ་མཁས། །རྡོ་རྗེའི་སློབ་དཔོན་ཡོན་ཏན་རྟེན། །གྲུབ་པ་སྦྱིན་པ་རྣམ་དག་མཆོག །ཚུལ་དང་ཚུལ་མིན་རྟོགས་པ་པོ། །དཀྱིལ་འཁོར་རྩ་སེར་མངའ་བ་སྟེ། །འོད་ཟེར་ལྗང་གུའི་འོད་དང་ལྡན། །
སེར་ལ་ན་བཟའ་སེར་པོ་མནབས། །དཀྱིལ་འཁོར་མ་ལུས་ཀུན་གྱིས་བརྒྱན། །སྤྱན་རྩ་དམར་བ་ཟླ་བའི་དཔལ། །ནོར་བུ་སྣ་ཚོགས་འོད་འབྱུང་བ། །རྡོ་རྗེ་བརྒྱ་ཡི་སྟོབས་ཀྱིས་སྤྲོ། །མཉམ་ཉིད་མཉམ་པ་དྲི་མ་མེད། །སྐུ་ཡང་དག་ཅིང་ན་བཟའ་དག །
དག་པ་མཁྱེན་ཅིང་དག་པར་ལྡན། །དག་པའི་ཆོས་མངའ་སྣང་བ་སྟེ། །འབྱུང་ལྡན་སྲེད་པ་སེལ་མཛད་པ། །འཁོར་བ་ཟད་མཛད་ཤེས་རབ་ཅན། །ཚུལ་ཤེས་ཚུལ་སྤྱོད་ཡུལ་བ། །རྡོ་རྗེ་རྒྱ་མཚོའི་སྙིང་པོ་ལགས། །རྡོ་རྗེ་སེམས་དཔའ་དགེ་

བ་ཆེ། །འབྱུང་ལྡན་རབ་འབྱམ་ཤེས་རབ་ཅན། །མ་ལུས་གྲགས་པའི་འོད་བཟང་བ། །ས་ཡི་སྙིང་པོ་སྙིང་པོ་ཆེ། །རྡོ་རྗེའི་སྙིང་པོ་རྣམ་པར་འདྲེན། །དཔག་ཏུ་མེད་པ་དཔག་མེད་རྫོགས། །ཁྱད་པར་འཕགས་པའི་ཡུལ་ལ་གནས། །ཟབ་ཅིང་
གསལ་བའི་གཙོ་བོ་སྟེ། །ཟླ་བའི་དཀྱིལ་འཁོར་འོད་ཟེར་བསིལ། །དགའ་དད་དང་བསྐྱེད་པ་སྟེ། །ཡེ་ཤེས་རྒྱ་ཆེན་སྤྱོད་ཡུལ་བ། །རླུང་གི་དྲག་ཤུལ་ལྟ་བུར་དྲག །དྲག་པོ་ལགས་ཏེ་དྲག་སེལ་གཙང་། །རྒྱལ་བར་བྱེད་ཅིང་རྒྱལ་བ་ཞི། །རྒྱལ་
བའི་དཔལ་མཛད་དགའ་བར་མཛད། །ལྷུན་པོ་ཏི་སེ་མ་ལ་ཡས། །སྤྱོད་ཡུལ་ཟབ་མོ་ནོན་པ་སྟེ། །རིན་ཆེན་རྡོ་རྗེ་སྙིང་པོ་ཆེ། །ས་གཞིའི་སྤྱོད་ཡུལ་མངའ་བ་ལགས། །རིན་ཆེན་བྲག་ལས་བྱུང་བའི་འོད། །རྡོ་རྗེའི་དཀྱིལ་འཁོར་དག་གིས་བརྒྱན། །
དེ་བཞིན་གཤེགས་ལ་ལྷུར་དགྱེས་པ། །ཤུགས་དྲག་དཔལ་གྱི་གཞི་རྟེན་ལགས། །རབ་གསལ་དཔལ་མཛད་གཙང་མ་སྟེ། །ཕྱོགས་བཅུའི་དབང་ཕྱུག་དབང་ཕྱུག་ཆེ། །དེ་ལྟར་རྡོ་རྗེ་འཆང་ཆེན་ལ། །མིང་བརྒྱ་རྩ་བརྒྱད་མཆོག་རྣམས་ཀྱིས། །རྡོ་རྗེ་
སེམས་དཔས་བསྟོད་ནས་ནི། །རྡོ་རྗེ་ས་གསུམ་དབང་མཆོག་སྨྲས། །ཡོན་ཏན་སྙིང་པོ་ཤེས་རྣམས་ཀྱིས། །མིང་བརྒྱ་རྩ་བརྒྱད་མཆོག་བརྗོད་ཅིང་། །ཉེས་པ་ཟློག་པ་འདི་ལས་གཞན། །ས་ཡི་སྟེང་ན་ངས་མ་མཐོང་། །མིང་བརྒྱ་རྩ་བརྒྱད་དམ་པ་འདི། །
ཐམས་ཅད་འགྲུབ་བྱེད་དགའ་བ་སྟེ། །སྡིག་པ་ཐམས་ཅད་སེལ་བ་དང་། །དྲི་མ་ཀུན་བྲལ་ཡོན་ཏན་ངེས། །དེ་ཕྱིར་སྒྲིམ་པ་ཐམས་ཅད་ཀྱིས། །ཕུན་སུམ་ཚོགས་པ་འདོད་པའི་མིས། །མིང་བརྒྱ་རྩ་བརྒྱད་དགེ་བ་འདི། །རྟག་ཏུ་ཡང་ནི་བརྗོད་པར་གྱིས། །
མི་བརྒྱ་རྩ་བརྒྱད་དམ་པ་འདི། །བསམ་པ་ཀུན་དང་འབྱོར་པ་ཡི། །གནས་མཆོག་བླ་ན་མེད་པ་སྟེ། །དཔལ་ཡོན་རྒྱ་ཆེན་སྦྱིན་པ་ཡིན། །ཡིད་ནི་ཤིན་ཏུ་དང་བ་ཡིས། །ས་ཡི་སྙིང་པོའི་མཚན་གསལ་བ། །འདོད་པ་ཐམས་ཅད་རབ་སྒྲུབ་པའི། །ཡོན་

ཏན་མཆོག་ནི་གང་བརྗོད་དང་། །དཔལ་ཡོན་རྒྱ་ཆེན་འཛིན་པ་ཡི། །མིང་བརྒྱ་རྩ་བརྒྱད་དམ་པ་འདི། །མི་ནི་གང་ཞིག་རྗོད་བྱེད་པ། །སྡུག་བསྔལ་ཀུན་ལས་མྱུར་དུ་འགྲོལ། །འཕགས་པ་སའི་སྙིང་པོའི་མཚན་བརྒྱ་རྩ་བརྒྱད་
པ་གཟུངས་སྔགས་དང་བཅས་པ་རྫོགས་སོ།། ༄༅། །རྒྱ་གར་སྐད་དུ། ཨཱརྱ་ཨཥྚ་མཎྜལ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དཀྱིལ་འཁོར་བརྒྱད་པ་ཞེས་
བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་གྲུ་འཛིན་ན་འཕགས་པ་སྤྱན་རས་གཟིགས་དབང་ཕྱུག་གི་གནས་ན་བྱང་ཆུབ་སེམས་དཔའ་བྱེ་
བ་ཁྲག་ཁྲིག་འབུམ་ཕྲག་དུ་མ་དང་ཐབས་ཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་སྙིང་པོ་ཟླ་བ་སྣང་བ་ཞེས་བྱ་བ་བྱང་ཆུབ་སེམས་དཔའི་འཁོར་དེ་ཉིད་དུ་འདུས་པར་གྱུར་ནས་འདུག་པ་དེ་སྟན་ལས་ལངས་ནས་ཆོས་གོས་ཕྲག་པ་གཅིག་ཏུ་
གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་
སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་
སྙིང་པོ་ཟླ་བ་སྣང་བ་ལ་འདི་སྐད་ཅེས་བཀའ་སྩལ་ཏོ། །རིན་ཆེན་སྙིང་པོ་ཟླ་བ་སྣང་བ་ཁྱོད་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་

སེམས་དཔའ་ཆེན་པོ་རིན་ཆེན་སྙིང་པོ་ཟླ་བ་སྣང་བས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་དཀྱིལ་འཁོར་བརྒྱད་པ་བགྱིད་པར་འཚལ་ན་དེས་ཇི་ལྟར་བགྱི། བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་ཁྱོད་སྐྱེ་བོ་མང་པོ་ལ་ཤིན་ཏུ་ཕན་པ་དང་། སྐྱེ་བོ་མང་པོ་ལ་བདེ་བ་དང་། དུས་གསུམ་དུ་སྐྱེས་པའི་སེམས་ཅན་རྣམས་ཀྱི་མཚུངས་པ་མེད་པའི་ཡེ་ཤེས་བསྒྲུབ་པའི་ཕྱིར་རིགས་ཀྱི་བུ་ཁྱོད་སྤོབས་པ་སྐྱེས་པ་ནི་བཟང་སྟེ་ལེགས་སོ་
ལེགས་སོ། །རིགས་ཀྱི་བུ་དེའི་ཕྱིར་སྙིང་པོ་གང་བརྗོད་པ་ཙམ་གྱིས་མཚམས་མེད་པ་ལྔ་འབྱང་ཞིང་། དངོས་གྲུབ་ཐམས་ཅད་ཀྱང་ཐོབ་པར་འགྱུར་བ་བྱང་ཆུབ་སེམས་དཔའ་བརྒྱད་ཀྱི་སྙིང་པོ་ཉོན་ཅིག །ཨོྃ་མ་ཧཱ་ཧཱུྃ་མ་ཧཱ་བཱི་ར་སྭཱ་ཧཱ། སྙིང་པོ་འདིས་ནི་དབུས་ཀྱི་བཅོམ་
ལྡན་འདས་མཆོད་དོ། །ཨོྃ་ཧྲཱི་ཧཱུྃ་པདྨ་པྲི་ཡ་སྭཱ་ཧཱ། འཕགས་པ་སྤྱན་རས་གཟིགས་དབང་ཕྱུག་གི་སྙིང་པོའོ། །ཨོྃ་མཻ་ཧཱ་རཱ་ཎ་སྭཱ་ཧཱ། བྱམས་པའི་སྙིང་པོའོ། །ཨོྃ་ཨཱ་ཀཱ་ཤ་གརྦྷཱ་ཡ་སྭཱ་ཧཱ། ནམ་མཁའི་སྙིང་པོའི་སྙིང་པོའོ། །ཨོྃ་སྭཱ་ཧྲི་རཱ་ཛ་ཡ་སྭཱ་ཧཱ།
ཀུན་དུ་བཟང་པོའི་སྙིང་པོའོ། །ཨོྃ་ཀུ་རུ་བྷ་ན་ར་ཧ་སྭཱ་ཧཱ། ལག་ན་རྡོ་རྗེའི་སྙིང་པོའོ། །ཨོྃ་ཤྲཱི་ཨཾ་རྃ་ག་སྭཱ་ཧཱ། འཇམ་དཔལ་གཞོན་ནུར་གྱུར་པའི་སྙིང་པོའོ། །ཨོྃ་ནི་སྭཱ་རྃ་བྷ་སྭཱ་ཧཱ། སྒྲིབ་པ་ཐམས་ཅད་རྣམ་པར་སེལ་བའི་སྙིང་པོའོ། །ཨོྃ་ཀྵི་ཏི་ཧ་
རཱ་ཛ་སྭཱ་ཧཱ། སའི་སྙིང་པོའི་སྙིང་པོའོ། །བྱང་ཆུབ་སེམས་དཔའ་བརྒྱད་ཀྱི་སྙིང་པོ་དེ་བཞིན་གཤེགས་པ་དང་ལྡན་པ་འདི་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་དཀྱིལ་འཁོར་གྱི་མདུན་དུ་ལན་ཅིག་བརྗོད་ན་དེའི་དོན་ཐམས་ཅད་འགྲུབ་པར་འགྱུར་
ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཡི་རངས་ཏེ། བཅོམ་ལྡན་འདས་

ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀྱིལ་འཁོར་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་
ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་སརྦ་ཏ་ཐཱ་ག་ཏ་ཨ་དྷིཥྛཱ་ན་ཧྲྀ་ད་ཡ་གུ་ཧྱ་དྷཱ་ཏུ་ཀ་རཎྜ་ནཱ་མ་དྷཱ་ར་ཎཱི་མ་ཧཱ་ཡཱ་ན་སཱུ་ཏྲ།
བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྙིང་པོ་གསང་བ་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་དྲི་མ་མེད་པའི་ཀུན་དགའ་ར་བ་ན་རིན་པོ་ཆེ་སྣ་བདུན་གྱི་རྫིང་ན། བྱང་ཆུབ་སེམས་དཔའི་དགེ་འདུན་ཆེན་པོ་དང་། ཉན་ཐོས་ཀྱི་དགེ་འདུན་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་།
དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་བྱེ་བ་མང་པོ་རྣམས་དང་། ཡུལ་གྱི་མི་འབུམ་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བྱས་ནས་ཐབས་ཅིག་ཏུ་བཞུགས་སོ། །
དེ་ནས་འཁོར་གྱི་ནང་དེ་ན་བྲམ་ཟེ་ཆེན་པོ་ཤིང་སཱ་ལ་ཆེན་པོ་ལྟ་བུ་མཁས་པ། མཛངས་པ། གསལ་བ། ཡིད་གཞུངས་པ། མཐོང་ན་དགའ་བ། དགེ་བ་བཅུའི་ལས་ཀྱི་ལམ་ཡོངས་སུ་བཟུང་བ་དྲི་མེད་ལེགས་སྣང་ཞེས་བྱ་བ་ཞིག་ཡོད་དེ། དེ་ཡང་གཅིག་ཏུ་
དཀོན་མཆོག་གསུམ་ལ་དད་ཅིང་གུས་ལ་ཕྱག་བྱེད་པའི་དགེ་བའི་བསམ་པ་དང་ལྡན་པ། ཞིབ་མོ་བརྟགས་པ། སེམས་ཅན་ཐམས་ཅད་དང་དགེ་བའི་དོན་ལ་བརྩོན་པ། ནོར་ཆེ་བ། ལོངས་སྤྱོད་ཆེ་བ། ཕྱུག་པ། རྫས་མང་བ། ཡོ་བྱད་ཕུན་སུམ་ཚོགས་

པ་ཡིན་ནོ། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ལ་མེ་ཏོག་དང་། བདུག་པས་མངོན་པར་མཆོད་དོ། །ན་བཟའ་རིན་འབུམ་རི་
བ་ཡང་གསོལ། བཅོམ་ལྡན་འདས་ལ་མུ་ཏིག་གི་དོ་ཤལ་འབུམ་རི་བ་ཡང་གསོལ་ནས། ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
སྲས་ཚོགས་ཀྱི་འཁོར་དང་བཅས་པ་བདག་གི་སྡུམ་པར་གདུགས་ཚོད་ལ་སྤྱན་འདྲེན་ན། དེའི་སླད་དུ་བཅོམ་ལྡན་འདས་ཀྱིས་གནང་བར་མཛད་པར་ཅི་གནང་། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དྲི་མེད་ལེགས་སྣང་གིས་སྤྱན་དྲངས་པར་ཐུགས་སུ་ཆུད་ནས་
ཅང་མི་གསུང་བར་གྱུར་པས་གནང་ངོ་། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་བཅོམ་ལྡན་འདས་ཀྱི་སྤྱན་སྔ་ནས་ཅང་མི་གསུང་བས་གནང་བར་རིག་ནས། དེ་རིངས་པ་རིངས་པར་རང་གི་ཁྱིམ་དུ་སོང་སྟེ། དེ་ཉིད་ཀྱི་མཚན་མོ་འདས་པ་དང་། ཞལ་ཟས་དང་། ཡོ་བྱད་
དང་། ཞལ་ཟས་རོ་བརྒྱ་པ་མང་པོ་བཤམས་ནས་བཀོད་པ་ཆེན་པོས་བཀྲ་ཤིས་ཀྱི་གཞལ་མེད་ཁང་དང་། གཞལ་མེད་ཁང་ཆེན་པོ་སྣ་ཚོགས་དང་། མེ་ཏོག་དང་། བདུག་པ་ཁྱེར་ཏེ་འཁོར་མང་པོ་དང་། སིལ་སྙན་དང་། ཕེག་རྡོབ་པས་བཅོམ་ལྡན་འདས་
ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་དུས་ལ་བབ་པར་གསོལ་ཏོ། །དེ་ན