Kinh tạng Tây Tạng (Kangyur Đại Học) — 098_རྙིང་རྒྱུད།_ཁ

་ན། །ཡ་མཱནྟ་ཀྲྀ་ཏ་གཤིན་རྗེ་གཤེད། །གང་ཕྱིར་འཁོར་བའི་རྒྱ་མཚོ་ལས། །ཐབས་དང་བཅས་པའི་རྫུ་འཕྲུལ་ལས། །འཇོམས་དང་སྒྲོལ་བར་མཛད་པས་ན། །རྟ་མགྲིན་
རྒྱལ་པོར་དེ་བཤད་དོ། །འཁོར་བའི་བདུད་ཀྱི་དུག་ལྔ་ལ། །ཡེ་ཤེས་ལྔ་རུ་གསལ་གོམས་པས། །གཉིས་མེད་རྩི་རུ་གང་འཁྱིལ་བ། །སྒྲིབ་ཟད་བདུད་རྩི་འཁྱིལ་པར་བཤད། །གང་དུ་ལུས་དང་བཅས་པ་ཡི། །དབང་པོ་ཡུལ་དང་རྣམ་ཤེས་རེག །རང་རྒྱུད་བཅད་པའི་
ཡེ་ཤེས་ཉིད། །སྒོ་བ་རྣམ་པ་བཞི་རུ་གསུངས། །རང་རྒྱུད་རྟག་ཆད་བཟློག་པ་དང་། །གཟུངས་དང་ལྷ་དང་བདེ་བ་དང་། །ཐིག་ལེ་རིག་པར་བཅས་པ་ཉིད། །གང་ཕྱིར་གནས་ནས་དགུག་པ་དང་། །གང་དུའང་འགྲོ་བར་མི་ནུས་དང་། །དེ་ལས་འདའ་བར་དཀའ་བ་དང་། །
བསྟིམས་ནས་བདེ་བས་དྲིལ་བུ་མ། །གཟུང་དང་འཁྱུད་དང་བསྡམ་པ་དང་། །གཉིས་སུ་མེད་པས་བདེ་ཆེན་པོ། །རང་ལུས་སྣང་སྲིད་བརྟན་གཡོ་ལ། །རྟོགས་དང་གོམས་པའི་ཚུལ་གྱིས་སྦྱར། །དེ་དག་མ་ལུས་དྲན་བྱེད་པ། །རིག་པའི་རྒྱལ་པོ་ཀུན་དབྱེར་མེད། །ཀུན་གཞི་
རྡོ་རྗེ་མི་ཕྱེད་པ། །ཀུན་དུ་བཟང་པོར་དེ་བཤད་དོ། །མ་ལུས་འདུས་བྱས་མ་བྱས་ཆོས། །མ་ལུས་ཟག་མེད་ཁྱབ་པའི་དབྱིངས། །རྟོགས་དང་ཤེས་དང་གང་གྱུར་པ། །ཀུན་དུ་བཟང་མོར་དེ་བཤད་དོ། །མི་ཤིགས་ཐིག་ལེ་བདེ་ཆེན་པོ། །ཡེ་ཤེས་ལྔ་ལྡན་དངས་མའི་བཅུད། །
རང་འབྱུང་ལུས་ཅན་ཀུན་གནས་པ། །སྟོན་པ་རིག་པའི་གསུང་ཅན་ཉིད། །དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་ཚུལ་དུ་ནི། །ལུས་སྦས་པ་ཡི་ཚུལ་དག་གིས། །ལུས་ཅན་ཀུན་ལ་ཁྱབ་པར་གནས། །རང་འབྱུང་ཐུགས་ཀྱི་བདེ་བ་ཉིད། །རྒྱུ་བ་བྲལ་བའི་སྙིང་པོ་

སྟེ། །བར་མ་ཨརྠ་བྱང་ཆུབ་སེམས། །ནམ་མཁའི་ཡེ་ཤེས་ཐུགས་ཀྱི་ཀློང་། །མ་ན་མ་ཏ་དྲན་རྟོག་ཡིད། །རྣམ་ཤེས་རྒྱུ་བའི་དྲན་རྟོག་རྣམས། །ཡེ་ཤེས་ནམ་མཁའི་གསལ་འདོད་པ། །དྲན་རྟོག་རིག་པ་འཁོར་དུ་གནས། །ཟག་མེད་རྣམ་ཤེས་བསམ་མི་
ཁྱབ། །མ་ལུས་ནམ་མཁའི་ཡེ་ཤེས་སུ། །བདེ་ཆེན་རིག་པའི་མི་རྟོག་པར། །བསྡུས་ཏེ་ཉམས་ལ་གནས་པར་མཛད། །བདེ་བ་ཆེན་པོ་མ་སྐྱེས་པ། །ནམ་མཁའ་ལྟ་བུར་མི་ཕྱེད་པ། །ནམ་མཁའི་ཡེ་ཤེས་དབྱེར་མེད་སྐུ། །དུས་གསུམ་ཀུན་གྱི་ངོ་བོར་གནས། །འདི་ཞེས་
ཉེ་བར་བསྟན་པ་ནི། །ཨེ་སོགས་བཞི་ཡི་ཚུལ་གནས་ཏེ། །ཕྱི་ནང་བར་ཁྱམས་གདོང་བར་བཅས། །གསང་བའི་འོག་མིན་རྒྱན་རྫོགས་པའོ། །ཐིག་ལེ་བྃ་དབྱིབས་སྤྲོས་པ་མེད། །བརྗོད་མེད་བསྟན་པ་བསྲུང་མཛད་ཅིང་། །བྱིན་བརླབས་བདེ་ཆེན་མི་རྟོག་པ། །འཁོར་
ལ་སྣང་བར་མཛད་པའོ། །མ་ནི་མ་ནུ་མ་ཏ་སྟེ། །སྡོམ་བྱེད་དྲན་རྟོག་ཡིད་ཀྱི་དངོས། །ལས་ཅན་རྣམ་ཤེས་དེ་དག་གིས། །གསལ་བར་གོ་བར་འཁོར་དུ་བརྗོད། །ཆོས་རྣམས་ཀུན་གྱི་ངོ་བོ་ཉིད། །ཐིག་ལེ་བཅུ་དྲུག་སེམས་ལྔའི་དངོས། །མི་རྟོག་ལྷན་ཅིག་སྐྱེས་པའི་དོན། །
བྱིན་བརླབས་མངོན་སུམ་ཚུལ་གྱིས་གསལ། །ཐབས་དང་ཤེས་རབ་གཉིས་མེད་པའི། །ཐིག་ལེ་ཟག་མེད་སྐྱེས་པའི་དུས། །བསམ་མེད་ལྷན་ཅིག་སྐྱེས་པའི་ཚེ། །བདེ་བ་ཆེན་པོའི་དུས་སུ་འདོད། །ཤེས་པ་རྟེན་དང་བརྟེན་པར་བཅས། །ཐབས་ཀྱི་རིམ་པ་ལ་བརྟེན་
ནས། །རླུང་གིས་བསྡུས་པའི་དོན་གྱིས་ནི། །རང་རིག་ཐབས་ཀྱི་རྒྱལ་པོར་གསལ། །གང་དང་གང་ལ་གང་དུ་ནི། །གང་གིས་གང་ཚེ་གང་གསུངས་པ། །བརྗོད་འབྱུང་རྩ་བར་དེ་གྱུར་པས། །གླེང་གཞི་ཞེས་ནི་བསྟན་པ་ཡིན། །དེ་བཞིན་གཤེགས་པ་ཐམས་ཅད་ཀྱི། །
དབྱེར་མེད་ཡེ་ཤེས་གཅིག་གི་ངང་། །རྡོ་རྗེ་འཆང་ཆེན་ཀུན་བཟང་ལས། །སྣ་ཚོགས་སྐུ་ནི་རྣམ་པར་འཕྲུལ། །དེ་ཚེ་རྒྱལ་བ་ཐམས་ཅད་ཀྱང་། །ལྷ་ལ་རྡོ་རྗེ་འཛིན་པ་ཉིད། །ལྷ་མིན་སྟོན་པ་ཕྲག་དོག་རྗེ། །མི་ལ་ཐུབ་པའི་དབང་པོ་སྟེ། །བྱོལ་སོང་སྒྲ་ཡིས་

འདུལ་མཛད་པ། །ཡི་དགས་དྲག་པོས་གདུང་བ་སེལ། །དམྱལ་བ་སྡུག་བསྔལ་ཆོས་ཀྱི་རྒྱལ། །གདུལ་བའི་སྤྲུལ་སྐུ་ངོ་བོར་ཤར། །ལ་ལ་ལྷ་ལས་འཕོ་བ་དང་། །ལ་ལར་ལྷུམས་ཞུགས་བལྟམ་པ་དང་། །དཀའ་ཐུབ་བདུད་བཏུལ་སངས་རྒྱས་ནས། །འཁོར་ལོ་བསྐོར་
ཏེ་མྱ་ངན་འདས། །གནས་ལ་ངེས་པ་ཡོད་མིན་ཏེ། །དམྱལ་བ་ཡི་དགས་བྱོལ་སོང་དང་། །མི་དང་ལྷ་དང་ལྷ་མིན་ཏེ། །སོ་སོའི་གནས་ཏེ་གང་ཡིན་པ། །འགྲོ་བ་འདུལ་བ་སྟོན་པའི་གནས། །ལྷ་རྣམས་དང་ནི་མི་རྣམས་དང་། །ལྷ་མིན་ཡི་དགས་དུད་འགྲོ་དང་། །དམྱལ་བ་སོ་
སོའི་འགྲོ་རིས་དག །རང་རང་མོས་དང་ལས་དབང་གིས། །འདུལ་ཚུལ་ཐ་དད་དབང་གིས་འཁོད། །རང་རང་མོས་པས་ཕྲད་པའི་ཚེ། །རང་རང་བརྡ་སྐད་ཐ་དད་པས། །རྟོགས་དང་གྲོལ་བར་གང་གྱུར་པ། །རང་རང་ཇི་བཞིན་སྟོན་པའི་དུས། །བསྟན་པའི་ཐེག་པ་སྣ་ཚོགས་
ཏེ། །རང་རང་ཞེན་པ་མཐའ་ཡས་ཕྱིར། །ཚུལ་དང་མོས་པའི་དབང་གིས་ན། །ཐེག་པ་སྣ་ཚོགས་ཚུལ་དུ་སྣང་། །ཐེག་གཅིག་མཉམ་པ་ཉིད་ཀྱི་ཚུལ། །གཉིས་དང་གསུམ་དང་བཞི་དང་ལྔ། །དགུ་དང་བརྒྱད་ཁྲི་ལ་སོགས་པ། །འགྲོ་བ་འདུལ་བའི་ཚུལ་གྱིས་སྣང་། །སྐུ་དང་
གསུང་ཐུགས་ལས་དག་གིས། །འདུལ་དབང་ཐབས་ནི་སྣ་ཚོགས་ཀྱིས། །ཆོས་ཀྱི་འཁོར་ལོ་རབ་ཏུ་བསྐོར། །དེ་ཚེ་འགྲོ་བ་སོ་སོ་ཡང་། །རང་གི་གཞི་རྩ་དོན་རིག་ནས། །རིམ་པ་ལྔ་འམ་ཐབས་གཅིག་གིས། །རིག་འཛིན་སངས་རྒྱས་ས་ལ་གནས། །རང་རང་ཆ་འཛིན་སྤྲུལ་པའི་
ལུས། །སར་གནས་འཁོར་གྱི་དང་པོ་ཡིས། །དེ་དག་ཞུས་པའི་རིམ་གསུངས་པ། །བློ་དང་ཚིག་དང་ཡི་གེར་བསྡུས། །རྒྱུད་ཅེས་བྱ་བ་རྒྱུན་དུ་གྲགས། །སྐུ་དང་གསུང་དང་ཐུགས་ཀྱི་རྒྱུད། །ལྟ་སྤྱོད་དཀྱིལ་འཁོར་དབང་དམ་དང་། །སྒྲུབ་པ་ཕྲིན་ལས་ལམ་རིམ་ནི། །ཕྱི་དང་ནང་དང་
སྦས་པ་སྟེ། །རང་བཞིན་གནས་དང་མངོན་བྱེད་པ། །ཐབས་ཀྱི་རྒྱུད་ནི་གསུམ་དུ་གསུངས། །ཕྱོགས་བཅུ་དུས་བཞི་མངོན་རྫོགས་པའི། །མདོ་སྡེ་འདུལ་བ་མངོན་པ་དང་། །སྐུ་དང་གསུང་དང་ཐུགས་ཀྱི་རྒྱུད། །བསྐྱེད་རྫོགས་ཐབས་རིམ་གང་བསྟན་པ། །སྒྱུ་འཕྲུལ་དྲ་བར་

འདུས་པ་སྟེ། །དེ་ལྟར་གྲགས་པའི་ཆོས་རྣམས་ཀུན། །རྟོག་པའི་ཆོ་ག་ཀུན་བཤད་པའི། །རྒྱུད་ཆེན་སྒྱུ་འཕྲུལ་དྲ་བ་སྟེ། །སངས་རྒྱས་ཀུན་གྱི་གསུང་གི་མཆོག །ཐོག་མ་བར་དང་མཐར་དགེ་བ། །དུས་གསུམ་རྒྱལ་བ་ཀུན་གྱིས་གསུངས། །རྡོ་རྗེ་སེམས་དཔའ་
སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ཆེན་པོ་ལས་གླེང་གཞི་རྣམ་པར་བཤད་པའི་ལེའུ་སྟེ་གཉིས་པའོ།། །།དེ་ནས་གཞན་ཡང་བཤད་བྱ་བ། །གང་ཟག་ཐབས་ནི་ཐུན་མོང་དུ། །བློ་ཡི་ཡུལ་དུ་གང་གྱུར་པ། །དེ་ནི་ཐུན་མོང་ཡུལ་ཉིད་དེ། །གང་ཟག་ཐབས་དང་སྟོན་པ་
ཉིད། །དེ་ཡི་སྤྱོད་ཡུལ་མ་གྱུར་ཅིང་། །ཐབས་ཆེན་གསང་བ་དང་ལྡན་པ། །དེ་ནི་ཐུན་མོང་མ་ཡིན་པའོ། །དེ་ཉིད་སྐྱེ་བོ་འཁོར་གཉིས་དོན། །རྣམ་གཉིས་ཚུལ་དུ་སྣང་བར་མཛད། །ཕུང་པོ་ཁམས་དང་སྐྱེ་མཆེད་ཉིད། །རྒྱལ་བ་ཡབ་ཡུམ་སེམས་དཔའ་དང་། །སེམས་མ་ཉིད་དུ་ལྷུན་
གྱིས་གྲུབ། །གསང་ཡུལ་དབང་པོ་རྣམ་ཤེས་རེག །མ་ལུས་འཇོམས་ཕྱིར་ཁྲོ་བོ་སྟེ། །རྟགས་སོགས་མཚན་མ་ལས་སྐྱེས་ཕྱིར། །ཡུམ་སྟེ་ལས་ཀྱིས་མི་གནས་བཤད། །ཡིད་ཆོས་བཟང་པོ་བཟང་མོ་ཉིད། །ཆགས་སོགས་ཉོན་མོངས་དྲུག་པོ་ཉིད། །ཐུབ་པ་སྤྲུལ་པ་དྲུག་ཏུ་བཤད། །
དེ་ཉིད་ཕྱོགས་བཅུ་དུས་བཞི་ཡི། །ཕུང་པོ་འབྱུང་བ་རྣམ་ཤེས་ཡུལ། །དབང་པོ་དུས་དང་ལུས་ཆོས་བཞི། །མཚན་མ་ཉོན་མོངས་ཡུམ་ཉིད་དེ། །དེ་ཉིད་སེམས་ཕྱིར་མ་སྐྱེས་པས། །ལྷག་པའི་བདེན་གཉིས་འབྲེལ་བ་ལས། །བྱང་ཆུབ་སེམས་ལྔ་རྣམ་པར་འཕྲུལ། །དངོས་པོ་
སྣང་གྲགས་ཆོས་ཐམས་ཅད། །སྐྱེ་བ་མེད་དང་འགག་མེད་དང་། །གནས་པ་མེད་དང་དམིགས་མེད་དང་། །འགྲོ་འོང་མེད་པ་ཉིད་དུ་སྣང་། །བདག་ཕྱིར་ཡེ་ཤེས་གསལ་སྣང་ཡང་། །གཞན་ཕྱིར་དེ་དག་མ་རྟོགས་པས། །རང་བཞིན་ངོ་བོ་ཡེ་ནས་གསང་། །ཤིན་ཏུ་གབ་སྦས་
གསང་བའི་དོན། །དེ་ཉིད་ལེགས་པར་བཤད་པའི་ཚེ། །ཡེ་ནས་མཉམ་ཉིད་གསང་བ་ལ། །མ་རིག་ལོག་རྟོག་རྐྱེན་དབང་གིས། །འཁོར་བའི་སྡུག་བསྔལ་དེ་བོར་སྣང་། །དེ་ཉིད་བདེ་གཤེགས་སྙིང་པོ་སྟེ། །དངོས་མེད་དངོས་པོའི་སྙིང་པོ་ཅན། །འགྲོ་བ་རྣམས་ནི་

སྨིན་བྱའི་ཕྱིར། །སྐུ་གསུང་ཐུགས་ཀྱི་རང་བཞིན་ལས། །སྤྲུལ་པ་རྣམས་ནི་རྣམ་པར་འཕྲུལ། །སྐུ་དང་གསུང་ཐུགས་སྣ་ཚོགས་ཀྱིས། །ཆོས་ཀྱི་འཁོར་ལོ་རྣམ་པར་བསྐོར། །རྒྱལ་བའི་དཀྱིལ་འཁོར་དེ་དག་ཀྱང་། །སྟོན་པ་འཁོར་གྱིས་གཅིག་ལ་གཅིག །ཡབ་
དང་ཡུམ་དང་གཉིས་མེད་དང་། །གང་ལ་གང་གིས་གླེང་བསླང་བ། །བརྡ་དང་དགོངས་པའི་ཚིག་གིས་ཏེ། །བསྟན་པའི་ཚོགས་ནི་སྣང་བར་འགྱུར། །འཕེན་པ་རླུང་གི་སྦྱོར་བ་ཡིས། །ཐབས་དེས་ཡུམ་ལ་གང་བསྐུལ་བས། །གཉིས་མེད་འབྲེལ་པའི་ཆགས་པའི་འོད། །ས་
ཡ་བཅུ་གསུམ་སྐུ་གསུང་ཐུགས། །བདེ་ཆེན་ལྷ་རུ་གསལ་བྱས་ཤིང་། །ནམ་མཁའི་ཡེ་ཤེས་མངོན་ཕྱུང་ནས། །བདེ་བའི་ཡེ་ཤེས་གསལ་བའི་རོ། །སྐྱེ་དང་དགའ་དང་གནས་པ་དང་། །འགྲོ་འོང་ཉིད་ལས་ཤེས་པར་འགྱུར། །གང་གིས་གང་ལ་གང་བསླང་བས། །
གང་རྐྱེན་དབང་གིས་དེ་དག་ལས། །ཡེ་ཤེས་གསལ་བར་གང་སྣང་བས། །སྣང་སྲིད་ལུས་དང་དངོས་པོར་བཅས། །ནམ་མཁའི་ཡེ་ཤེས་ཅིར་ཡང་སྣང་། །ནང་གི་གླེང་བསླང་ཐབས་ཆེན་ཡིན། །གང་ཕྱིར་ཐབས་ཀྱིས་ཤེས་རབ་ལ། །ཆགས་པའི་གླུ་དང་སྦྱོར་བས་བསྐུལ། །
ཤེས་རབ་ཐབས་ལ་ལན་བསྐུལ་བའང་། །ཤ་ད་པ་ཡི་གླུ་གར་དང་། །སྔགས་སྦྱོར་བ་ཡི་རིམ་པ་ཡིས། །ཕྱག་རྒྱ་བཞི་ཡིས་མངོན་སྦྱར་བས། །ཐབས་དང་ཤེས་རབ་གཉིས་མེད་པའི། །རྒྱུ་བ་རླུང་གི་སྦྱོར་བ་ཡིས། །དགུག་དང་བཀུག་པའི་ཐབས་ཉིད་དེ། །
དབབ་དང་གཟུང་དང་བསྐྱིལ་བ་དང་། །ཟློག་དང་གཟུང་དང་སྦྱར་བ་ཡིས། །བསྐྱེད་དང་རྫོགས་དང་རྫོགས་ཆེན་པོ། །ཐུན་མོང་ཐུན་མོང་མ་ཡིན་པའི། །མཐར་ཐུག་རིམ་པ་ལས་བྱུང་བའི། །ཀུན་ཀྱང་སེམས་ལྔར་སྣང་བ་སྟེ། །ཐབས་ལས་བྱུང་བའི་ཐིག་ལེ་དང་། །ཤེས་རབ་
གསང་བའི་ཐིག་ལེ་དང་། །གཉིས་མེད་བདེ་བ་ལས་བྱུང་བ། །སེམས་ལྔ་རིམ་པར་སྣང་བར་འགྱུར། །ཐབས་དང་ཤེས་རབ་མཉམ་སྦྱོར་ཞིང་། །སྐུ་དང་གསུང་ཐུགས་ལས་བྱུང་བ། །བྱེ་བྲག་བརྒྱད་ཅུ་ཀུན་འདུས་པ། །དཀྱིལ་འཁོར་བཞི་བཅུ་རྩ་གཉིས་ཏེ། །སྐུ་གསུང་ཐུགས་

དང་ཡེ་ཤེས་ལྔས། །ཐབས་དང་རང་བཞིན་འབྲེལ་པ་ཡིས། །འགྲོ་བ་ཀུན་ལ་རྒྱས་བཏབ་པའོ། །སྣོད་བཅུད་བདེ་བའི་རང་བཞིན་གྱིས། །མ་ལུས་ལྷན་ཅིག་སྐྱེས་པར་གནས། །གཡོ་ལྡང་སྨོན་འཇུག་གནས་མཐར་ཕྱིན། །སྐྱེ་བའི་གཞི་དང་ཐབས་དག་དང་། །
སྐྱེས་ནས་མཐར་ཕྱིན་ཡེ་ཤེས་ལྔ། །སངས་རྒྱས་ཀུན་གྱི་རང་བཞིན་ཉིད། །ཇི་ལྟ་བ་བཞིན་རྣམ་པར་གནས། །འགྲོ་བ་མོས་པའི་ཁྱད་པར་གྱིས། །གཟུགས་དང་ཁ་དོག་སྔགས་དང་འོད། །དཀྱིལ་འཁོར་ལ་སོགས་སོ་སོར་གནས། །གང་ཟག་བློ་དང་འཚམ་པར་བསྟན། །རྟེན་དང་
བརྟེན་ཅན་ལས་བྱུང་བའི། །རང་འབྱུང་བདེ་ཆེན་མི་རྟོག་པ། །ལུས་མེད་ལུས་ལ་གནས་པ་ཡི། །ཁྱབ་པ་གཉིས་མེད་གང་བའི་ཚུལ། །གང་ཕྱིར་ཟག་མེད་བདེ་བ་ཡི། །ཏིང་འཛིན་བདེ་བ་ཁྱད་པར་ཅན། །རང་བཞིན་བརྟགས་དང་སྣང་བ་དང་། །བྱིན་རློབ་ནུས་པའི་ལྷ་ཡིས་ནི། །ཕྱི་
ནང་སྣོད་བཅུད་སྐུ་གསུང་ཐུགས། །མ་ལུས་སྦྱོར་བ་གསུམ་ལས་བྱུང་། །རྩ་དང་རླུང་དང་ཐིག་ལེ་དག །རིམ་པར་བསྟེན་དང་སྦྱོར་བ་དང་། །འཕེན་དང་སྡུད་པ་རླུང་གིས་ཏེ། །དངས་མར་ཡེ་ཤེས་རླུང་གིས་འཇུག །སྟེང་དང་འོག་ལས་བྱུང་བ་ཡི། །བདེ་བའི་ཐིག་ལེ་རིམ་པ་དག །
དངས་སྙིགས་རླུང་གི་ཁྱད་པར་གྱིས། །ཇི་ལྟར་འདོད་པའི་འབྲས་བུ་ཉིད། །རྐྱེན་གྱིས་ནུས་པ་ཕྲད་པ་ལྟར། །རྒྱུ་གཅིག་ནུས་པ་སོ་སོར་སྣང་། །འཇིག་རྟེན་འདས་དང་འཇིག་རྟེན་པའི། །ལམ་ནི་རྩ་དང་ཐིག་ལེ་དང་། །རླུང་ནི་ཕྱི་ནང་དངས་སྙིགས་དང་། །ལམ་དང་རྒྱུ་བའི་ཚུལ་ལས་བྱུང་། །
གང་ཕྱིར་མེད་དང་ནུས་པ་མེད། །སྟོངས་དང་ལོག་པའི་ནུས་མཐུ་ཡིས། །རང་ལུས་འཇིག་དང་སྡུག་བསྔལ་ཞིང་། །དབང་པོ་མ་ཚང་དམན་པར་གྱུར། །གང་ཕྱིར་ཐུན་མོང་ཐུན་མོང་མིན། །སེམས་ལྔ་ཡེ་ཤེས་ལྔ་བསྟན་པ། །རང་བཞིན་ཏིང་འཛིན་གཟུགས་བརྙན་དུ། །གཟུངས་མ་
རིགས་ལ་རྟེན་བཅས་པའི། །སེམས་ལྔ་ཡུན་རིང་ཐུང་བཅས་པས། །བདག་གཞན་ཆོས་རྣམས་མ་ལུས་པ། །ལྷན་ཅིག་སྐྱེས་པའི་ཡེ་ཤེས་ཏེ། །དངོས་པོ་མ་ཡིན་དངོས་མེད་མིན། །བདག་གཞན་གཉིས་ཀ་གཉིས་མེད་མིན། །རང་འབྱུང་བདེ་ཆེན་སྒྱུ་མ་ཉིད། །རྡོ་རྗེ་བརྟན་པོ་རང་སྣང་

བ། །ཡེ་ཤེས་སྒྱུ་མ་ལྷུན་གྱིས་གྲུབ། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ཆེན་པོ་ལས་གླེང་བསླང་བ་བཤད་པའི་ལེའུ་སྟེ་གསུམ་པའོ།། །།དེ་ནས་གཞན་ཡང་བཤད་བྱ་བ། །ཀུན་གྱི་ཤེས་བྱ་ཡུལ་བཤད་པ། །ཆོས་རྣམས་མ་ལུས་ཐམས་ཅད་
ཀུན། །གཅིག་དང་ཐ་དད་ཀུན་བྲལ་བའི། །མཐའ་དང་དབུས་མེད་དེ་བཞིན་ཉིད། །སྒྲོ་སྐུར་ཀུན་བྲལ་མཉམ་པ་ལས། །རྟོགས་དང་མ་རྟོགས་ཁྱད་པར་ལས། །སྣ་ཚོགས་ཆོས་ནི་རྣམ་པར་འཕྲུལ། །གཞི་དང་རྩ་བ་ལས་འདས་པའི། །རང་བཞིན་དབྱེར་མེད་དེ་བཞིན་ཉིད། །
དངོས་མེད་དངོས་པོ་ཡུལ་འདས་ལ། །འཁོར་དང་མྱ་ངན་འདས་པ་ཡི། །ངོ་བོ་སྣ་ཚོགས་རང་སྣང་བ། །གཉིས་མེད་ཐབས་ཆེན་རྡོ་རྗེ་ཉིད། །ཨེ་མའོ་གཉིས་མེད་བདེ་ཆེན་ལས། །སྣ་ཚོགས་གནས་དང་ལོངས་སྤྱོད་དང་། །རིགས་དང་ཁ་དོག་ཚེ་ཚད་དང་། །བདེ་སྡུག་དབང་པོ་བྱེ་
བྲག་དག །རང་བཞིན་སྣ་ཚོགས་རྣམ་པར་འཕྲུལ། །སྒྱུ་མ་ཆུ་ཟླ་འཇའ་ཚོན་ལྟར། །བྱང་ཆུབ་སེམས་ཀྱི་ངོ་བོར་གནས། །ལས་དང་རྐྱེན་གྱིས་གང་སྣང་བ། །རང་རང་ཞེན་པའི་ཐ་དད་ཀྱིས། །དབང་པོ་ཁྱད་པར་སྣ་ཚོགས་པའི། །རྟོག་པའི་ནུས་པ་སྣ་ཚོགས་མཐོང་། །རང་བཞིན་
གཞི་རྩ་མེད་པའི་དབྱིངས། །ལྷན་ཅིག་སྐྱེས་དང་ཀུན་བརྟགས་པའི། །མ་མཐོང་ལོག་ཞེན་རྟས་པ་ཡིས། །འཁྲུལ་འཁོར་ལོག་པའི་སྟོབས་སུ་སྣང་། །འཁོར་བ་མ་བསལ་དག་པ་ཡི། །ཞིང་དང་སྤྱོད་ཡུལ་ལོངས་སྤྱོད་དང་། །ཏིང་འཛིན་དབང་སྟོབས་རྫུ་འཕྲུལ་དང་། །མངོན་
ཤེས་ཡེ་ཤེས་དཔག་མེད་པའི། །སྣ་ཚོགས་སྐུ་དང་གསུང་ཐུགས་དང་། །ཡོན་ཏན་ཕྲིན་ལས་རང་སྣང་བ། །བདག་གཞན་ལྷུན་གྱིས་གྲུབ་པའི་དོན། །སྣ་ཚོགས་ཡིད་བཞིན་ནོར་བུ་ལྟར། །མ་བསགས་ལྷུན་གྱིས་གྲུབ་པའི་སྐུ། །སྣ་ཚོགས་ཀུན་དང་དབྱེར་མེད་པའི། །ཀུན་ལ་
ཡིད་བཞིན་མཐུན་པར་སྣང་། །ཀུན་ཀྱང་རང་འབྱུང་བྱང་ཆུབ་སེམས། །བདེན་པ་དབྱེར་མེད་དོན་དུ་སྣང་། །གང་ཕྱིར་ནམ་མཁའི་རང་བཞིན་ལྟར། །གང་ལ་དེ་ལྟར་སྣང་བ་ལས། །ཡང་དག་གཅིག་ཏུ་གཟུང་དུ་མེད། །མ་བཅོས་རང་འབྱུང་ཞི་བ་ཉིད། །རྣམ་པར་དག་

པའི་སྙིང་པོ་སྟེ། །འཁོར་བ་ཉིད་ན་མྱ་ངན་འདས། །རྣམ་པར་དག་པའི་དབྱིངས་སུ་མཁྱེན། །སྒྲོ་དང་སྐུར་པ་ཀུན་བྲལ་བའི། །ཐམས་ཅད་རང་སྣང་སྙིང་པོ་ལས། །སྣ་ཚོགས་མ་ལུས་རྣམ་པར་འཕྲུལ། །དངོས་དང་དངོས་པོ་མེད་མིན་ཞིང་། །གང་ལ་དེ་ཉིད་
ཡུལ་འདས་པ། །ནམ་མཁའ་ལྟ་བུར་དཔག་མེད་པ། །ཕྱོགས་རིས་མཐའ་དབུས་རྒྱ་དཔག་མེད། །གང་གིས་གང་ལ་ཁྱབ་པ་ལྟར། །མཁའ་སོགས་རྡུལ་བྲལ་འབྱུང་བའི་བཅུད། །ཟག་པ་མེད་པའི་སྙིང་པོ་ཉིད། །ལུས་ཅན་ཀུན་གྱི་དབང་པོ་དང་། །དངས་མར་འབྲེལ་
བར་གང་སྣང་ཡང་། །མཐོང་པ་ལོག་པའི་སྟོབས་ཀྱིས་སྒྱུར། །བདག་གཞན་མེད་པའི་རང་སྣང་ཡིན། །མ་ལུས་ཐམས་ཅད་དབྱེར་མེད་པའི། །ཐབས་དང་ཤེས་རབ་བཅུད་ལྔའི་རྒྱུན། །ལོངས་སྤྱོད་ཐབས་སུ་བཅས་པ་ཉིད། །འགྲོ་བ་ཀུན་ལ་ཁྱབ་པར་གནས། །གང་ཡང་
ཐབས་དང་ཤེས་རབ་ཀྱི། །སྒྱུ་འཕྲུལ་དྲ་བའི་རང་བཞིན་ཉིད། །རང་བཞིན་དབྱེར་མེད་བྱང་ཆུབ་སེམས། །བདེ་བ་ཆེན་པོའི་ངོ་བོ་ཉིད། །འདས་དང་ད་ལྟར་མ་བྱོན་གྱི། །རྒྱལ་བ་རིག་འཛིན་མཐའ་ཡས་དང་། །མ་ལུས་ཀུན་གྱིས་རྟོགས་བྱ་བ། །ཕྱོགས་མེད་ཁྱབ་པའི་ངོ་བོར་གནས། །
གང་སྣང་མ་ལུས་དེ་བཞིན་ཉིད། །མ་བཅོས་མ་བྱས་ཞི་བ་སྟེ། །གཅིག་དང་དུ་མ་ལས་འདས་པ། །སངས་རྒྱས་ཀུན་གྱི་རང་བཞིན་ཉིད། །མཐའ་བྲལ་ནམ་མཁའི་རང་བཞིན་ལྟར། །མ་ལུས་གནས་པ་དེ་དག་ཀྱང་། །རྟོགས་པའི་ཁྱད་པར་དབང་པོ་ཡི། །མཐོང་ཚུལ་དག་
དང་མ་དག་གིས། །རང་བཞིན་ཡུལ་དུ་མ་གྱུར་པས། །ཕྱི་ནང་གསང་བ་ལ་སོགས་པའི། །དབང་དང་མན་ངག་འབྲེལ་བ་ཡིས། །དེ་ཉིད་མཐོང་རྟོགས་དོན་ཕྱིར་བཤད། །གང་ཕྱིར་རྡོ་རྗེ་སློབ་དཔོན་ཉིད། །ཡོན་ཏན་ཡོངས་རྫོགས་ནུས་པ་ཅན། །དད་དང་བརྩོན་འགྲུས་
བརྟུལ་ཞུགས་ཅན། །ཤེས་རབ་ཁྱད་པར་གང་ལྡན་ལ། །དབང་དང་དམ་ཚིག་མན་ངག་དང་། །རྒྱུ་རྐྱེན་འབྲེལ་པའི་ནུས་པ་ཡི། །བདེ་བ་གསལ་བ་མི་རྟོག་པ། །ཐབས་ཀྱིས་ཕུན་སུམ་ཚོགས་པར་འགྱུར། །གསང་བའི་གསང་ཆེན་སྙིང་པོ་ཉིད། །སྐུ་གསུང་ཐུགས་ཀྱི་དངོས་

གྲུབ་སྟེ། །ཕྱི་ནང་བདག་གཞན་མ་ལུས་པ། །ཐམས་ཅད་དབྱེར་མེད་དེ་བཞིན་ཉིད། །ཐབས་བྲལ་ཀུན་ལ་རྒྱས་བཏབ་པས། །མུན་པའི་ཚོགས་སུ་གྱུར་པ་ཡིན། །མུན་སྣང་དུག་དང་གསེར་འགྱུར་རྩི། །ཐབས་མཁས་རང་བཞིན་ངེས་འགྱུར་ལྟར། །གང་དེའི་ལྟ་སྤྱོད་ཏིང་འཛིན་གྱིས། །
དེ་མ་ཐག་ཏུ་དེ་བཞིན་འགྱུར། །དབྱེར་མེད་ནམ་མཁའི་རང་བཞིན་དུ། །ཁ་དོག་དབྱིབས་དང་རྫས་ལ་སོགས། །མ་ལུས་ཐ་དད་མེད་པ་ལྟར། །ཐབས་མཁས་མ་ལུས་དེ་བཞིན་འགྱུར། །ཐ་མལ་པ་དང་ལོག་པ་དང་། །དཀའ་ཐུབ་ཅན་དང་རྐྱེན་རྟོགས་དང་། །ཕྱི་ནང་ཅན་དང་ཐ་དད་
ཅན། །གཙང་སྨེ་ཅན་དང་ཕྱོགས་རྟོགས་ཉིད། །མཉམ་ཉིད་ལྟ་ལས་གང་འདས་པ། །ངོ་བོ་ཉིད་དང་ཐབས་དག་དང་། །དབང་པོ་ལ་སོགས་ལོག་པ་ཡིས། །དེ་ཉིད་གནོད་པའི་སྟོབས་སུ་འགྱུར། །གང་ལ་གང་གིས་ཟིན་པའི་ནད། །ཐབས་དང་བརྩོན་འགྲུས་ལེགས་པ་ཡིས། །དེ་ལྟར་
བརྩོན་པའི་ཁྱད་པར་གྱིས། །དེ་ཉིད་མ་སྤངས་རྣམ་པར་དག །གང་ཕྱིར་དེ་ཉིད་ངེས་པ་ལ། །རྟོགས་དང་མ་རྟོགས་ཁྱད་པར་གྱིས། །ཐ་དད་ཆོས་སུ་གང་སྣང་བ། །དངོས་ལ་དེ་ལྟར་གནས་པ་མིན། །རྡོ་རྗེ་སྐྱེ་མེད་ཤེས་རབ་སྟེ། །མེ་ལོང་ཐབས་ཉིད་སྣ་ཚོགས་སྣང་། །གཉིས་མེད་འབྲེལ་
པའི་མཉམ་པ་ཉིད། །མ་ལུས་དབྱེར་མེད་དམ་པར་བཤད། །དེ་ནས་རྟོགས་སྒོ་བཤད་བྱ་བ། །གང་ལ་གང་གི་དོན་མེད་པས། །ལྟ་དང་སྤྱོད་དང་ལམ་འབྲས་དག །འདི་ཉིད་དོན་གཉེར་གཞན་མེད་པའོ། །གང་གིས་དེ་དག་དེ་དོན་དུ། །ཚིག་དང་སྔགས་རྫས་དཀའ་ཐུབ་ཀྱིས། །
གང་བསྟན་དེ་ཡི་བྱིན་བརླབས་ཀྱིས། །བདག་གཞན་ཕན་པར་གང་འདོད་པའོ། །གང་ལས་གྱུར་པ་དེ་ཞིག་པས། །ལུས་སེམས་འབྱུང་བའི་བག་ལ་གནས། །ཕྱིན་ཅད་ཕན་གནོད་ཆོས་མེད་པས། །དཀའ་ཐུབ་འབད་རྩོལ་མི་དགོས་སོ། །གང་ཕྱིར་བྱེད་པའི་རྒྱུ་བཞི་དག །མཉེས་
དང་དག་པས་བདེ་བྱའི་ཕྱིར། །ལས་དང་དཀའ་ཐུབ་དྲག་ཤུལ་གྱིས། །གྲོལ་ཞིང་ཐར་བར་འདོད་པར་སྣང་། །བདེན་བཞི་བཅུ་དྲུག་ཐ་དད་ལམ། །ཁམས་གསུམ་མཐོང་བསྒོམ་སྤོང་ཚུལ་གྱིས། །རང་དོན་ཟག་པ་ཀུན་བྲལ་ནས། །རང་དོན་ཐར་པ་མྱ་ངན་འདས། །རྐྱེན་རྟོགས་

བག་ཆགས་སད་པ་ཡིས། །འབྱུང་མེད་བཅུ་གཉིས་རང་བརྟགས་ནས། །མ་རིག་འཁྲུལ་འཁོར་རྒྱུ་འབྲས་ཟད། །ཡིད་བཞིན་བདེ་བ་མཆོག་གི་ས། །ཐ་དད་མེད་པའི་རིག་པའི་སེམས། །བདེན་བརྫུན་ཁྱད་པར་ཅིར་བལྟས་པ། །གསལ་ལ་མི་རྟོག་སྙིང་
པོ་ཉིད། །བདག་གཞན་ནུས་པའི་སྟོབས་སུ་སྣང་། །ཆོས་རྣམས་སྒྱུ་མ་མིག་ཡོར་དང་། །བྲག་ཅ་ཆུ་ཟླ་འདྲ་བ་ཡི། །དེ་ཉིད་མཐའ་དབུས་བྲལ་བ་ནི། །བདེན་གཉིས་འབྲེལ་པ་དབུ་མའི་ཚུལ། །རྡོ་རྗེ་དམ་པ་གསུམ་བཀོད་དེ། །དངོས་པོ་སྒྱུ་མ་ལས་གྲོལ་ནས། །དག་པའི་རྟེན་
འབྲེལ་ལ་བརྟེན་ནས། །ཡེ་ཤེས་སྒྱུ་མ་མངོན་སུམ་ཤར། །གང་ཕྱིར་ལས་དང་བྱ་བ་དང་། །ཁྲུས་དང་གཙང་སྦྲ་ལ་བརྟེན་ནས། །སྔགས་དང་ཕྱག་རྒྱའི་མཐུ་སྟོབས་ཀྱིས། །སྒོ་གསུམ་རྡོ་རྗེ་འཛིན་པའི་ས། །དེ་དག་ལས་མཐུན་ཁྱད་པར་ཉིད། །དེ་ཁོ་ན་ཉིད་བཞི་རྟོགས་
ནས། །ལས་དང་ཏིང་འཛིན་འབྲེལ་གོམས་པས། །རྡོ་རྗེ་འཆང་བའི་ས་ལ་གནས། །ཏིང་འཛིན་རིག་པ་གཙོར་བྱས་ནས། །སྔགས་དང་ཕྱག་རྒྱ་བསམ་པ་ཡིས། །ཆ་ལུགས་ཇི་བཞིན་མངོན་སྒྱུར་ཏེ། །གོམས་པས་བདག་གཞན་དོན་གྲུབ་པའོ། །ཐབས་དང་གྲོལ་བའི་ཁྱད་
པར་གྱིས། །དབང་པོ་ཡུལ་དང་རྣམ་ཤེས་དང་། །སྣང་སྲིད་ཕྱི་ནང་སྣོད་བཅུད་ཀྱི། །སྤྱོད་ཡུལ་ཇི་ལྟར་འགྱུར་བ་ཀུན། །ཐབས་དང་ཤེས་རབ་དབྱེར་མེད་པའི། །གསང་བའི་ཐབས་ཀྱིས་རྒྱས་བཏབ་པས། །མ་ལུས་རྡོ་རྗེ་ཉིད་དུ་འགྱུར། །སྣང་སྲིད་དཔའ་བོ་ཐབས་ཆེན་དེ། །
རང་བཞིན་དབྱེར་མེད་དག་པ་ཡི། །སྣ་ཚོགས་འཕྲུལ་པ་རང་སྣང་བས། །མ་ལུས་གཉིས་མེད་ཡེ་ཤེས་ཡིན། །ཐབས་དང་ཤེས་རབ་གཉིས་མེད་པའི། །ཐབས་དང་རིག་པ་གང་ཟིན་པ། །གཞན་གྱིས་དོར་བའི་འཁོར་བའི་ཆོས། །ཡེ་ཤེས་བདུད་རྩིའི་ངོ་བོར་འགྱུར། །མ་ལུས་
གཅིག་དང་ཐ་བྲལ་བའི། །ཇི་ལྟར་མཐུན་པའི་སྙིང་པོ་ལ། །སོ་སོའི་དོན་ལྟར་མི་གནས་པས། །བསྐྱེད་པ་ལྷ་དང་གཞལ་ཡས་དང་། །རྫོགས་པ་ནམ་མཁའི་ཡེ་ཤེས་དང་། །དངོས་པོ་ལྷན་ཅིག་སྐྱེས་པ་རུ། །སྣང་བ་རྐྱེན་གྱིས་སྒྱུར་བ་ལྟར། །མ་ལུས་དེ་ཡི་ངོ་བོར་འགྱུར། །

དེ་དག་བལྟས་པའི་ཁྱད་པར་གྱིས། །རང་རེའི་མོས་དང་བསམ་པ་དང་། །ནུས་པའི་རིམ་པ་ཅིར་སྣང་ཡང་། །ནམ་མཁའ་དང་བའི་རང་བཞིན་ལས། །ཉི་ཟླ་གཟའ་སྐར་སྤྲིན་ཁུ་རླངས། །རང་འབྱུང་རང་དངས་འགྱུར་མེད་ལྟར། །ཇི་ལྟར་སྣང་བའི་ཆོས་རྣམས་ཀུན། །དངོས་
དབང་དོན་ལས་མ་གཡོས་པས། །དེ་དག་དེ་ལྟར་ཉིད་སྣང་བས། །དེ་ཉིད་ནམ་མཁའི་ཁོངས་སུ་འདུ། །དེ་ནས་གཏན་ཚིགས་བཤད་པར་བྱ། །མ་ལུས་འགྲོ་བ་ཐམས་ཅད་ལ། །བྱང་ཆུབ་སྙིང་པོས་ཀུན་ཁྱབ་པས། །ཀུན་གྱིས་མཐོང་གོམས་བྱ་དགོས་པས། །སོ་སོ་ཐུན་མོང་
གཏན་ཚིགས་དང་། །ཐུན་མོང་མ་ཡིན་ལ་སོགས་པ། །རྒྱ་མཚོ་ཀློང་དང་ཆུ་བོ་ལྟར། །མ་ལུས་འདུལ་ཤིང་འབྱུང་བ་ཡིན། །ཐུན་མོང་བཞི་སོགས་གང་ཡིན་པ། །ལོག་ལྟ་ཕྱོགས་འཛིན་དགག་པ་དང་། །དངོས་དབང་ཐབས་དང་འབྲེལ་མཚོན་ཕྱིར། །ཐུན་མོང་གཏན་ཚིགས་བརྗོད་
པ་ཡིན། །གང་ཕྱིར་གཏན་ཚིགས་ཐམས་ཅད་ཀྱིས། །རང་ལས་འཕྲུལ་ཕྱིར་མེ་ལོང་ཉིད། །མ་ལུས་གཅིག་དང་ཐ་དད་མིན། །གང་གི་མཐའ་ལས་ཡོངས་གྲོལ་ཏེ། །དབུས་སུ་གཟུང་མེད་གཏན་ལ་ཕེབས། །གཅིག་དང་དུ་མ་བྲལ་བའོ། །རྒྱུ་དང་རྐྱེན་དང་འབྲས་བུ་སྟེ། །ཐབས་
དེ་གདོད་ནས་དག་པ་གསུམ། །མ་ལུས་རང་སྣང་རྟོགས་པ་ཉིད། །མཚན་ཉིད་དེ་ཡི་མཚན་ཉིད་དོ། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །མ་ལུས་རྟོགས་པ་བཞིར་ཤར་ཏེ། །དེ་ཉིད་རྟོགས་པ་བཞིར་སྣང་ངོ་། །མ་སྐྱེས་ངང་ལས་གང་སྣང་
བ། །ཆུ་དང་རླབས་བཞིན་གཅིག་པས་ན། །དེ་དང་དེར་གཅིག་དབྱེར་མེད་པས། །དངོས་པོ་ལོ་རྒྱུས་ཉིད་ཀྱིས་ཤེས། །འཁོར་དང་མྱ་ངན་འདས་པ་ཡི། །རྩ་བ་ཆགས་སྡང་ལྔ་ཉིད་དེ། །གཞི་རྩ་མ་བཅོས་སྐད་ཅིག་མ། །དེ་ཉིད་རང་སྤྱིར་གང་སྣང་བ། །རྟོགས་པས་སྤྱི་དང་རང་
མཚན་ཤེས། །སྣོད་བཅུད་རྒྱུད་རྣམས་མཐའ་ཡས་དང་། །མཉམ་གཉིས་ལྷག་པའི་མཉམ་གཉིས་ཀྱིས། །དངོས་པོ་སྣང་གྲགས་ཆོས་རྣམས་ཀུན། །མ་བཅོས་དེ་བཞིན་ཉིད་དུ་གནས། །མ་ལུས་སྙིང་པོ་ཐིག་ལེ་དང་། །ལྔ་བདག་བརྒྱད་ཅུ་རྩ་གཉིས་རྒྱུ། །ས་ཡ་བཅུ་

གསུམ་རྩ་ཡན་ལག །རོ་དང་གནས་སྐབས་ཀུན་ལས་གྲོལ། །དང་པོ་གནས་དང་གཉིས་པ་གཉིས། །གསུམ་པ་མ་ལུས་ཁྱབ་བྱེད་པ། །ཉམས་སུ་མྱོང་བྱེད་གཏན་ཚིགས་སོ། །ཐིག་ལེ་གནས་དང་ཡིག་འབྲུ་དང་། །དེ་ཡི་བྱིན་བརླབས་འདྲེས་པ་ཡིས། །བདེ་
བ་ཆེན་པོ་མངོན་དུ་སྣང་། །ཆུ་ལས་ཆུ་བོ་ཐ་དད་དེ། །རྒྱ་མཚོ་ལས་ནི་ཆུ་ཐིགས་དང་། །ལམ་དང་ཞིང་སའི་འབྲས་བུ་ལྟར། །ཐབས་ཀྱི་ཁྱད་པར་སྣང་བ་ཡིན། །དངས་མ་ལྔ་ལས་གང་བྱུང་བ། །ཇི་སྙེད་ལུས་སེམས་རྩ་ཐིག་ལེ། །ཁམས་ལྔའི་རོ་དང་བཅུད་སྣང་བ། །ཡེ་
ཤེས་ཆེན་པོར་གཏོགས་པ་ཡིན། །གསུམ་དངོས་བརྒྱད་སོགས་ཁ་དོག་གྲངས། །གནས་པ་གང་ཡིན་དེ་སྣོད་དེ། །སོ་སོའི་བཅུད་ཀྱི་ཁྱད་པར་ལས། །བྱང་ཆུབ་སེམས་ཉིད་གསལ་བར་སྣང་། །དོན་དམ་ཀུན་རྫོབ་དབྱེར་མེད་པའི། །བདེན་བཞི་དབྱེར་མེད་དངས་མ་ཉིད། །མ་
ལུས་ཁྱབ་པའི་ཚུལ་གྱིས་སྣང་། །ཐབས་དང་ཤེས་རབ་གཉིས་མེད་པའི། །ཐིག་ལེ་གཅིག་དང་དུ་མ་ཉིད། །བྲལ་བའི་ཡེ་ཤེས་ཆེན་པོ་ཉིད། །གཅིག་དང་དུ་མ་ལས་གྲོལ་བའོ། །བཅུད་འདུས་ཐིག་ལེ་གཉིས་རོ་རྒྱུ། །རླུང་དང་གདམས་ངག་རྐྱེན་ལྡན་པས། །འབྲས་བུ་ལྷན་
ཅིག་སྐྱེས་པར་སྣང་། །རང་ལ་གནས་པ་ཐབས་ཀྱིས་གསལ། །ཐབས་དང་ཤེས་རབ་འབྲེལ་བའི་རོ། །རྩ་ཡིག་བཅས་པ་བཅུད་འདུས་པས། །ཐབས་དང་རླུང་གི་གདམས་པ་ཡིས། །མ་ལུས་ལྷན་སྐྱེས་མངོན་སུམ་གསལ། །བདེ་དང་སྟོང་ཉིད་མི་ཕྱེད་པ། །རང་རིག་
བདེ་ཆེན་མ་སྐྱེས་གཟུགས། །མ་ལུས་འོད་དང་རྣམ་པ་ལྟར། །དབྱེར་མེད་ཚུལ་དང་རང་སྣང་བའོ། །བདེ་བས་བསྐྱེད་པའི་རྟོག་པ་ལྔ། །རྩ་བ་ཡན་ལག་བཅས་པ་ཉིད། །མ་ལུས་ཡེ་ཤེས་ཆེན་པོ་ཉིད། །ཡེ་ཤེས་ལྔ་ཡི་རྒྱས་བཏབ་པའོ། །དབང་པོ་སྣོད་བཅུད་བཅས་
པ་ཡིས། །ཡབ་ཡུམ་འབྲེལ་པར་བཅས་པའི་བཅུད། །སེམས་ལྔའི་རྒྱུད་དུ་རང་སྣང་བ། །མཉམ་པ་བཞི་ཡི་ཚུལ་དུ་གསལ། །དེ་ལ་སོགས་པ་མཐའ་ཡས་པའི། །ཕྱི་ནང་གསང་བ་མཐར་ཐུག་པའི། །གཏན་ཚིགས་མཐའ་ཡས་བཤད་པ་སྟེ། །རྡོ་རྗེ་མེ་ལོང་

བཤད་པའི་རྒྱུད། །གང་གིས་རྟོགས་པ་དེ་ཉིད་ནི། །མ་ལུས་རང་སྣང་སྐུ་གསུང་ཐུགས། །ཡོན་ཏན་ཕྲིན་ལས་རང་སྣང་བ། །ཟག་མེད་རང་འབྱུང་ངང་ལས་འཆར། །ཆོས་རྣམས་འབྲས་བུར་ལྷུན་རྫོགས་པའི། །བདག་དང་གཞན་དོན་ལྷུན་རྫོགས་པ། །མ་བཅོས་ཇི་བཞིན་ངང་
བཞག་ལས། །ལྷུན་གྱིས་གྲུབ་པའི་དཀྱིལ་འཁོར་འབྱུང་། །གང་དག་གང་ལ་གང་བརྟེན་པས། །ལྷུན་གྱིས་གྲུབ་པས་འབྲས་བུ་ཉིད། །མ་བཅོས་སྒྱུ་མ་ལྷུན་གྲུབ་ཉིད། །དུས་བཞི་ཕྱོགས་བཅུ་མ་ལུས་པར། །ལྷུན་གྲུབ་འབྲས་བུར་རང་སྣང་བའོ། །རྡོ་རྗེ་སེམས་དཔའི་སྒྱུ་འཕྲུལ་
དྲ་བ་གསང་བ་མེ་ལོང་གི་རྒྱུད་ཆེན་པོ་ལས་ལྟ་བ་མ་ལུས་པ་བཤད་པའི་ལེའུ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །སྒྱུ་འཕྲུལ་དྲ་བ་མངོན་རྫོགས་པའི། །སྤྱོད་པའི་ཁྱད་པར་མ་ལུས་པ། །འདི་དག་བཤད་པར་བྱ་བ་སྟེ། །རང་བཞིན་ཐབས་དང་མངོན་གྱུར་པས། །
སྤྱོད་པ་མ་ལུས་བསྟན་པ་ཡིན། །ཨེ་མའོ་རང་རིག་སྙིང་པོ་ལས། །བདེ་སྡུག་གནས་དང་ལོངས་སྤྱོད་དང་། །ཚེ་དང་ཁ་དོག་ལ་སོགས་པ། །ལ་ལར་མངོན་པར་ཆགས་པ་སྟེ། །ལ་ལར་དྲག་ཤུལ་ཞེ་སྡང་སྤྱོད། །ལ་ལར་རི་བོས་ནོན་པ་ཉིད། །ལ་ལར་ལྡོངས་པའི་མུན་པ་ཉིད། །
ལ་ལར་ཕྲག་དོག་སྣང་བ་ཡིན། །ལ་ལར་སེར་སྣ་འཐབ་རྩོད་དེ། །ལ་ལར་འཆལ་དང་བྱ་བ་བཏང་། །རྩོལ་དང་མི་རྩོལ་ལ་སོགས་པ། །དེ་ལ་སོགས་པ་མཐའ་ཡས་རྙེད། །ཆོས་དབྱིངས་མཐའ་ཡས་མུ་མེད་པའི། །ནམ་མཁའ་དབྱིངས་ནི་མཐའ་ཡས་པར། །སྤྱོད་པའི་ཁྱད་པར་
དེ་ཉིད་དོ། །རང་འབྱུང་ཐབས་ཀྱི་སྤྱོད་པ་ཉིད། །ཇི་ལྟར་བསམ་ཞིང་བརྟགས་པ་ལྟར། །རང་བཞིན་དབྱེ་བ་མེད་པའི་ཕྱིར། །སྒོ་གསུམ་བྱེད་སྤྱོད་བསམ་མི་ཁྱབ། །ཐབས་དང་ཤེས་རབ་རང་བཞིན་གྱིས། །མ་ལུས་སངས་རྒྱས་གནས་གྱུར་ཀྱང་། །མ་རྟོགས་ཐབས་དང་བྲལ་བའི་ཕྱིར། །
བདེ་སྡུག་སྣ་ཚོགས་བསམ་མི་ཁྱབ། །ཐབས་ཆེན་དག་དང་ལྡན་པ་ལ། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ཆེན་པོ་དག །བྱང་ཆུབ་ལམ་དུ་བདེ་བར་བཤད། །ཐབས་དང་མི་ལྡན་སྐྱེ་བོ་ཡིས། །ཐབས་དང་བྱ་བ་སྣ་ཚོགས་ཀྱིས། །མཛད་སྤྱོད་དཀའ་བ་སྣ་ཚོགས་པ། །མི་དང་ལྷ་ལས་ཐར་བ་མེད། །

དཔེར་ན་དུག་དང་ལྡན་པ་ལ། །ཐབས་ཀྱི་ཁྱད་པར་ཇི་བཞིན་དུ། །རྟོགས་པའི་ཁྱད་པར་ཇི་བཞིན་དུ། །བདེ་དང་སྡུག་བསྔལ་སྣ་ཚོགས་རྒྱུན། །རང་བཞིན་གཉིས་མེད་དག་པ་ལས། །བརྟགས་པའི་བྱེ་བྲག་ཁྱད་པར་གྱིས། །མི་མཐུན་བདེ་སྡུག་སྣ་ཚོགས་མྱོང་། །
མ་བཅོས་དབྱིངས་ལས་གཡོས་པ་མེད། །གང་དག་ཐུན་མོང་ངོ་དག་ལས། །ལས་དང་བྱ་བ་སྒོ་ནས་ནི། །སྤྱད་དང་སྤྱོད་དང་སྤྱོད་འགྱུར་ཕྱིར། །འདི་སྐད་སྤྱོད་པས་སྤྱོད་པར་གསུངས། །རང་བཞིན་རྒྱལ་བའི་སྤྱོད་པ་ཡིས། །ཆུ་དང་རླབས་ལྟར་ཁྱབ་གྱུར་ཀྱང་། །སྤོང་ལེན་བྱ་བ་སྣ་
ཚོགས་ལས། །སྤྱོད་པ་ཐབས་ཀྱིས་ཟིན་པ་མེད། །གང་ཕྱིར་ཐབས་དང་ཤེས་རབ་དང་། །སྒྲ་དང་རྟོགས་པ་སྣ་ཚོགས་ཀྱིས། །ཐུན་མོང་ཡུལ་དུ་མ་གྱུར་པ། །ཐུན་མོང་མ་ཡིན་ཐབས་སྤྱོད་དེ། །ལ་ལར་ཐུན་མོང་ཉིད་དུ་སྟེ། །ཐར་པ་དང་ནི་མ་ཐར་པ། །ཀུན་དུ་རྒྱུ་དང་མུ་སྟེགས་
དང་། །བུད་མེད་དང་ནི་མ་རབས་དང་། །རྒྱལ་པོ་དཔའ་བོ་དཀའ་ཐུབ་ཅན། །བྱིས་པ་ལ་སོགས་ཐ་དད་དེ། །ལ་ལར་དགོད་དང་དྲག་པོ་དང་། །གཤེ་དང་འཇིགས་དང་ཞི་བ་དང་། །ལ་ལར་དེ་བཞིན་ཆགས་ཆེན་པོ། །གཡོ་སྒྱུ་སྤྱོད་དང་གཡེམ་པར་སྟོན། །ཞི་དང་རྐུ་དང་
ཕྲག་དོག་སྤྱོད། །འདོད་དང་ལོངས་སྤྱོད་གཟིར་བ་དང་། །གླུ་བྲོ་གར་དང་འཇོ་སྒེག་དང་། །དེ་བཞིན་འཇིགས་དང་སྡིགས་པ་དང་། །མ་རུངས་པ་དང་རྣམ་པར་འཚེ། །ཞིང་ཁམས་རྫུ་འཕྲུལ་སྤྱོད་པ་དང་། །ངོ་མཚར་ཆོ་འཕྲུལ་དུ་མ་དག །གང་དང་གང་གིས་མཛད་པ་
དག། །སྐྱེ་བོ་མ་ལུས་འདུལ་བའི་ཕྱིར། །མཛད་པ་མཐའ་ཡས་རྣམ་པར་སྟོན། །ཞི་ལ་ཚངས་དང་ཁྲོ་ལ་ཁྲོ། །ཐར་པ་ན་ཆུང་མཛེས་དང་རོལ། །གདུང་དང་རྨོངས་དང་སྡུག་བསྔལ་བ། །རང་རང་དེད་དཔོན་མཐའ་ཡས་པའི། །སྐུ་ཡི་རོལ་པ་མཐའ་ཡས་སྟོན། །བྱིན་
གྱིས་བརླབས་དང་རང་སྣང་དང་། །བརྡ་དང་རིག་པ་ཏིང་འཛིན་དང་། །ཚིག་ཏུ་ཆགས་སྡང་རྨོངས་པ་དང་། །ཤིན་ཏུ་རྒྱལ་དང་ཕྲག་དོག་དང་། །འཇམ་དང་དལ་དང་སྙན་མི་སྙན། །རྩུབ་དང་དྲག་དང་སྦོམ་ཕྲ་དང་། །རིང་ཐུང་རོལ་མོ་ལྷ་ཀླུ་དང་། །མི་དང་མི་མིན་

འབྱུང་པོའི་སྒྲ། །ཁྱིམ་བདག་དབང་ཆེན་ལེགས་དཔོན་དང་། །ཆགས་ཅན་གཏུམ་པོ་ལ་སོགས་པའི། །སྣ་ཚོགས་རོལ་པ་མཐའ་ཡས་པ། །དག་དང་མ་དག་ཚུལ་གྱིས་ནི། །གསུང་གི་རོལ་པ་མཐའ་ཡས་སྣང་། །ལ་ལར་བྱམས་དང་སྡང་བ་དང་། །གཡེང་དང་མི་གཡེང་རྨོངས་
དང་རི། །སྡུད་དང་མི་སྡུད་ཡལ་བ་དང་། །གྲོལ་དང་མ་གྲོལ་རྣོ་རྟུལ་དང་། །མ་རིག་ཡེ་ཤེས་ལ་སོགས་པ། །ཐུགས་ཀྱི་རོལ་པ་མཐའ་ཡས་པ། །ཐམས་ཅད་མཁྱེན་པའི་ཚུལ་གྱིས་སྣང་། །མཐའ་ཡས་དབྱེར་མེད་དམ་པ་ཉིད། །ལུང་དང་རིགས་པ་མན་ངག་གི། །ཚད་མ་དག་
གིས་གང་བཅལ་བ། །ཤེས་བྱ་ཁོང་དུ་ཆུད་པར་འགྱུར། །དེ་ནས་ཆོས་རྣམས་མ་ལུས་པ། །བདག་གཞན་ཕྱི་ནང་དབྱེར་མེད་པའི། །ཐམས་ཅད་མཁྱེན་པའི་ཚུལ་གྱིས་སྣང་། །མཐའ་ཡས་དབྱེར་མེད་དམ་པ་ཉིད། །དྲན་དང་ཤེས་བཞིན་བརྟན་པོ་ཡིས། །དུས་གསུམ་རྒྱ་མཚོ་གཏིང་
ལྟ་བུར། །མི་གཡོ་གསལ་བའི་ངང་གྱུར་ནས། །སྒོ་གསུམ་མཉམ་པར་སྦྱོར་བ་ཡིས། །དང་པོ་རྟོགས་པའི་སྤྱོད་པ་སྟེ། །དེ་བཞིན་ཉིད་ལ་གསལ་བརྟན་ཏེ། །སྟོང་པ་ཤེས་རབ་སྤྱོད་པར་བཤད། །དེ་ནས་ཕྱོགས་བཅུ་མ་ལུས་པ། །རང་འབྱུང་བྱང་ཆུབ་སེམས་ཉིད་ཕྱིར། །གང་
སྣང་རང་རྒྱུད་དངོས་མེད་དེ། །སྒྱུ་མ་མིག་ཡོར་བྲག་ཅ་དང་། །སྨིག་རྒྱུ་ཆུ་བུར་ལ་སོགས་པ། །གོང་མའི་སྟོབས་དང་འདི་ཉིད་སྟོབས། །མཉམ་པར་སྦྱོར་བས་བསྒོམ་པར་བྱ། །གང་ལ་མ་བལྟས་མངོན་བྱས་དང་། །ཏིང་འཛིན་རིམ་པ་གཉིས་མེད་པས། །ཀུན་ལ་སྙིང་རྗེའི་སྤྱོད་པ་དག །
དམ་པ་འདི་ནི་སྤྱད་པར་བྱ། །རང་བཞིན་ཆེད་དུ་དམིགས་པ་དང་། །ཁྱབ་དང་ཤུགས་ལས་གང་བྱུང་བའི། །སྙིང་རྗེའི་སྤྱོད་པར་རྣམ་པར་སྤྱད། །དེ་ནས་སྒྱུ་མ་ལྟ་བུ་ཉིད། །རང་ཉིད་ཕྱོགས་མེད་སྣང་བ་ཡིས། །ཅིར་ཡང་བསྒྱུར་དུ་རུང་བའི་ཕྱིར། །རིག་པ་དབུ་མར་གང་གསལ་བ། །ཉི་
ཟླ་བརྩེགས་པའི་གདན་དུ་འབར། །ས་བོན་གང་ལས་ཐབས་ཆོ་གས། །འཕྲོ་འདུ་ཞུ་ནས་མངོན་གྱུར་པ། །རྡོ་རྗེ་གསུམ་གྱི་ངོ་བོར་སྣང་། །དེ་ཉིད་གཅིག་དང་ལྔ་གསུམ་གྱིས། །བརྟན་འབར་མཛེས་པར་གསལ་གྱུར་ཏེ། །མདུན་དང་གཞན་དུ་སྐབས་དག་སྦྱོར། །གཅིག་དང་

ངེས་མེད་རིམ་པ་དང་། །འཁོར་ལོ་ཞེས་བྱ་བཞི་རུ་གྱུར། །གང་གིས་གང་དེ་མ་བརྟེན་པར། །འཕྲོ་འདུ་བསྒོམས་པ་དོན་མེད་དེ། །སྐྱོན་བྲལ་གསལ་བརྟན་འདྲིས་པ་ཡིས། །གང་བསྒོམས་གསལ་བར་མངོན་དུ་འགྱུར། །ཐ་མལ་ཞེན་རྟོག་ཟློག་པ་དང་། །ལམ་གྱི་
འབྲེལ་པར་བྱ་བ་དང་། །དངོས་གྲུབ་འབྲས་ལ་མྱུར་འཇུག་པས། །རྟགས་ཀྱི་ལྷ་ནི་བསྒོམ་པར་བྱ། །དེ་ལྟར་བརྟན་འགྱུར་གསལ་བ་ལ། །བདག་གཞན་ཕྱི་ནང་མ་ལུས་པའི། །སྒོ་གསུམ་སྐུ་གསུང་ཐུགས་གསལ་བས། །ཐུན་མོང་སྤྱོད་པ་རྣམ་བཅད་ལ། །སྒོ་གསུམ་མཉམ་
བཞག་རྗེས་ཐོབ་མེད། །གང་གིས་དེ་ལྟར་གསལ་བྱའི་ཕྱིར། །ཕྱོགས་གཅིག་སྤྱོད་པ་བརྩམ་པར་བྱ། །དེ་ནས་རྩ་བ་གོམས་པ་དང་། །བསླབ་བྱ་ཁྱད་པར་མཐར་ཕྱིན་ལྟར། །གང་དེ་རིམ་པར་བསྟན་འཕེལ་ཕྱིར། །ཡན་ལག་སྤྲོས་པ་རྣམ་པར་བསྒོམ། །ལྷག་པ་བཅུ་གཅིག་
དགུར་ལྡན་པའི། །གཅིག་ལས་རྒྱས་བསྡུས་ཕྱེ་བ་ཡིས། །འཁོར་ལོའི་རྩ་བ་ལྷ་དག་ཀྱང་། །ཡབ་ཡུམ་གནས་དགོད་གསལ་བར་བསྒོམ། །དེ་དག་ལྷག་པའི་ལྷ་དགུ་དག །ཡན་ལག་ཚུལ་དུ་སྤྲོས་ཏེ་བསྒོམ། །འདུལ་བ་གཉིས་ཀྱི་རང་བཞིན་གྱིས། །མཛེས་པའི་ཚུལ་དང་གདུག་
པ་འདུལ། །ལྷ་དང་ཞལ་ཕྱག་དབུ་གྲངས་ཀྱང་། །རྩ་བ་ཡན་ལག་སྤྲོས་ཚུལ་གྱིས། །དཀྱིལ་འཁོར་གྲངས་དང་གང་སྦྱར་བའི། །རིམ་པར་སྤྲོས་ཤིང་བསྒོམ་པར་བྱ། །གྲངས་དང་གྲངས་མེད་ཚུལ་དག་གིས། །དཔག་ཚད་རྒྱང་གྲགས་མཁའ་དབྱིངས་སུ། །ཞི་དང་ཁྲོ་
ལ་སོགས་པ་ཡི། །སངས་རྒྱས་སྤྲིན་ཚོགས་སྣ་ཚོགས་བསྒོམ། །དང་པོའི་བར་དང་ཐ་མའི་བར། །རིག་པའི་ཏིང་འཛིན་གསལ་བརྟན་ནས། །སྐུ་གསུང་ཐུགས་དང་ལྡན་པ་ཡི། །ཚོམ་བུ་རིམ་པར་བསྒོམ་པར་བྱ། །དགོན་པའི་རིམ་པའམ་ནགས་ཚལ་དང་། །ཆུ་འགྲམ་
རི་རྩེ་དུར་ཁྲོད་དང་། །སྐྱོན་བྲལ་ཡོན་ཏན་རྫོགས་པ་སྟེ། །དགྲ་དང་ཕྱོགས་མཚམས་སྐྱོན་མེད་པའི། །བརྟག་པའི་རིམ་པ་ལྡན་པ་ཡིས། །ཤིས་དང་འཐད་པའི་ས་ཕྱོགས་སུ། །གཞལ་ཡས་རིམ་བརྩེགས་མཛེས་ལྡན་པ། །རྒྱན་དང་བཅས་པ་ལྡན་བྱས་ལ། །ཏིང་

འཛིན་མཉམ་པའི་ཤེས་རབ་ཐབས། །མི་ལྡན་གོང་མའི་འོད་ཀྱིས་སྤྱད། །བདག་དང་གཞན་གྱི་ནུས་པ་ཡིས། །མཉམ་ནས་ཚོགས་ལ་འཇུག་པར་བྱ། །ཡོ་བྱད་ལྔ་ལྡན་ཐོགས་མེད་པར། །ཆོ་གའི་རིམ་པ་ཇི་བཞིན་བརྩམ། །བྲོ་གླུ་གར་དང་ཏིང་འཛིན་བཅས། །བར་
ཆད་མེད་པར་བསྒྲུབ་པར་བྱ། །གལ་ཏེ་འདོད་པ་མ་རྫོགས་པར། །སྒྱུ་མའི་ལུས་དེ་མ་བརྟན་ན། །ཡིད་ཀྱིས་རྡོ་རྗེ་གསུམ་གསལ་བས། །རྣམ་པར་སྨིན་པའི་རིག་འཛིན་དེ། །ཕྱིན་ཅད་འཇིགས་བྲལ་ཁྱུང་བཞིན་ནོ། །དེ་བས་འབྲེལ་པའི་སྤྱོད་ལྡན་ན། །དབང་སྒྱུར་ཟག་མེད་
ས་ཐོབ་སྟེ། །བརྒྱ་དང་སྟོང་སོགས་འཇིག་བྲལ་ཞིང་། །གླིང་དང་འཇིག་རྟེན་བརྒྱ་སྟོང་དུ། །འདུལ་བའི་ཆོ་འཕྲུལ་མཐའ་ཡས་སྣང་། །འཇིགས་པ་མེད་ཅིང་མི་ལྡོག་ས། །དཔའ་བོ་རྫོགས་པའི་རྣལ་འབྱོར་པས། །གཞན་དོན་སྤྱོད་པའི་ཁྱད་པར་དག །འདུལ་བའི་དབང་
ནི་སྣ་ཚོགས་ཀྱིས། །རྣམ་པར་བརྩེ་བ་སྣ་ཚོགས་སྤྲོ། །འདི་ནི་རྒྱལ་བ་ཐམས་ཅད་ཀྱི། །ཤེས་རབ་ཕྱི་ཡི་སྤྱོད་པ་སྟེ། །ཆོ་ག་རྒྱས་པར་བསྟན་པ་ཡིན། །དེ་ནས་གཞན་ཡང་བཤད་བྱ་བ། །ནང་དུ་འཇུག་པའི་རིམ་པ་ཡི། །སྤྱོད་པའི་ཁྱད་པར་ཆོ་ག་དག །དེ་ནས་རིམ་པ་འདི་དག་
བཤད། །ལུས་ཅན་འགྲོ་བ་ཐམས་ཅད་ལ། །ཙཀྲ་བཞི་དང་སྐུ་གསུང་ཐུགས། །སྤོར་དང་འབར་མ་འཁྱིལ་པ་དང་། །འབྲེལ་དང་མ་འབྲེལ་ཁུག་པ་དང་། །འཛིན་དང་འཛག་དང་གནས་པ་དང་། །དེ་བཞིན་ཁྱབ་དང་འཁྲུལ་བའི་རྩ། །གང་དུ་རྒྱུ་དང་གནས་འཛིན་པས། །རྩ་ཞེས་དེ་ལ་
མངོན་བཤད་དེ། །དེ་དག་རྒྱུ་དང་ལམ་འབྲས་དང་། །ཐབས་དང་ཤེས་རབ་གཉིས་མེད་པས། །བདེ་བ་ཆེན་པོ་སྐྱེད་པར་བྱེད། །གོང་དང་འོག་གི་རང་བཞིན་ལས། །སྤྱི་དང་ཁྱད་པར་ཁ་སྦྱོར་འབྱུང་། །ས་བོན་ཁྱབ་བྱེད་འཁོར་ལོ་ཡིས། །ཐམས་ཅད་ཁྱབ་ཅིང་འཛག་པའི་རྩ། །དངས་
སྙིགས་རླུང་དང་འབྲེལ་བ་ཡིས། །གང་དེ་ཕོ་མོའི་བཅུད་རྐྱེན་གྱིས། །ཟག་དང་ཟག་མེད་བདེ་བ་སྐྱེད། །ལུས་ཀུན་ཁྱབ་པར་གནས་པ་ཉིད། །དངས་མ་ཐུར་གྱི་རླུང་དང་འགྲོགས། །གང་ན་སྒྲ་སྦྱོར་འཁོར་ལོ་ཅན། །དེས་ཀྱང་ཀུན་ཁྱབ་རྒྱུ་བ་ཅན། །འཁྲུལ་ཞིང་འཁོར་བས་

འཁོར་ལོ་སྟེ། །གསུང་གི་འཁོར་ལོ་ངག་གི་རྟེན། །རྫོགས་དང་མ་རྫོགས་གང་མི་གསལ། །སྒྲ་སྦྱོར་དག་དང་མ་དག་གྱུར། །བདེ་དང་སྙན་དང་མི་སྙན་དང་། །བྱ་དང་དྲི་ཟ་བུང་བ་དང་། །ཆགས་པའི་སྒྲ་ནི་སྣ་ཚོགས་བྱེད། །མདོག་དམར་ལུས་ཁྱབ་ཀླུ་ལ་སོགས། །ཨུ་
ཐའི་རླུང་དང་འགྲོགས་ཏེ་གནས། །དྷརྨ་ཙཀྲ་སྲོག་གི་རྟེན། །མ་ལུས་གཞི་རྩ་ཀུན་གྱི་སྲོག །རྩ་བཞི་ཡན་ལག་བརྒྱད་དང་ལྡན། །དངས་མ་ལྔ་འདུས་ཀུན་གྱི་གཙོ། །ཕྱི་རིམ་རིན་ཆེན་སུལ་མང་འདྲ། །མི་ཤིགས་ཐིག་ལེ་བདེ་ཆེན་པོ། །རིན་ཆེན་ཕུང་པོ་ཟ་མ་ཏོག །སྣ་ཚོགས་ཡེ་ཤེས་ལྔ་ཡི་
བདག །ཐུང་ངུ་ཨ་ཡི་རང་བཞིན་ཅན། །སྲོག་གི་རླུང་དང་འགྲོགས་ཏེ་གནས། །ཕྱི་རིམ་པདྨ་འདབ་བརྒྱད་དེ། །ཆོས་ཉིད་ཡེ་ཤེས་ཡོན་ཏན་དང་། །རང་རྒྱུད་བཞི་ལ་ཡན་ལག་བརྒྱད། །ཐུན་མོང་ཕྱི་ཡི་རིམ་པ་ཡིན། །འདི་ལ་རྩ་གསུམ་རིམ་པ་སྟེ། །ཟག་པའི་རྩ་དང་མངོན་ཤེས་རྩ། །ཆོས་
ཉིད་རིམ་པ་གསུམ་དུ་གནས། །རླུང་ཡང་གཅིག་གམ་གཉིས་ཡིན་ཏེ། །དེ་ལས་བྱེ་བྲག་དཔག་མེད་པའོ། །གནས་པ་དང་ནི་རྒྱུ་བའི་རླུང་། །གནས་པ་སྲོག་དང་ཡེ་ཤེས་ཏེ། །རྒྱུ་བ་བཞི་ནི་མངོན་པར་བརྗོད། །ཕྱི་ནང་ཅན་དང་གྱེན་ཐུར་ཅན། །དེ་རེའང་དངས་སྙིགས་ཁྱད་པར་གྱིས། །
རིམ་པ་བརྒྱད་དུ་མངོན་སྣང་ཡིན། །གཉིད་དང་འགྲོ་བའི་ས་བོན་གྱིས། །ཆགས་སྡང་དྲན་རྟོག་ཀུན་གྱི་གཞི། །གང་དུ་གནས་དང་གནས་མ་ཡིན། །རྒྱུ་ཞིང་འཕོ་བ་རླུང་གིས་ཏེ། །བདེ་དང་སྡུག་བསྔལ་ཇི་སྙེད་པ། །མྱོང་ཞིང་སྐྱེད་པར་བྱེད་པ་ཡིན། །འདི་ནི་གནས་དང་མི་གནས་ཀྱིས། །སྲོག་
དབང་དྲན་པ་དབང་སྒྱུར་བས། །གནས་དང་འཕོ་བ་ཕ་རོལ་དག །གནས་པ་སྲོག་གི་རླུང་ཅན་ནོ། །གང་དུ་འཁྲུལ་པ་འཛེད་པ་ནི། །མ་ལུས་འགྱེད་ཅིང་སྤྲོ་བ་ཡི། །གྱེན་ཐུར་འཛེག་ཅིང་འགེངས་འབྱུང་བའི། །སྒོ་གཉིས་ལུས་ཀུན་ཁྱབ་པའི་རྩ། །དྲུག་ཅུ་རྩ་བཞི་སྙིང་པོ་ཅན། །ཕྱི་
རིམ་བཞི་ཡི་རྒྱུན་དུ་འཁྱིལ། །དབུས་ནས་འཁྱིལ་པ་ཐིག་ལེའི་རྩ། །འཕེན་པ་བདེ་བའི་རླུང་དང་འགྲོགས། །གང་དུའང་འཁྲུལ་ཅིང་སྤྲུལ་པའི་ཕྱིར། །སྤྲུལ་པའི་འཁོར་ལོ་ཤེས་རབ་ཉིད། །དེ་འོག་གྲུ་གསུམ་འབར་བའི་རྩ། །གྱེན་དུ་འབར་དང་ཐུར་དུ་འཕྲོ། །འོད་ཀྱིས་འབར་

བའི་ས་བོན་ཅན། །རྩེ་མོའི་འོག་མས་རེག་པའི་ཁམས། །གཏུམ་མོ་ལྟེ་འོག་འབར་བའི་རྩ། །སྐྱེས་བུ་ཆགས་པ་སློང་བ་ལྟར། །འདི་དག་བདེ་བ་བསྐྱེད་པ་སྟེ། །གནས་ས་ཚད་དང་བཅས་པར་གནས། །དེ་འོག་གཡོ་བ་རླུང་གི་རྟེན། །འབྱེད་དང་འཛུམས་པའི་ལས་ཅན་ཉིད། །
དེ་དང་དེ་གཉིས་གང་ལྡན་པས། །ལུས་ཀྱི་དངས་སྙིགས་འདིས་འབྱེད་པ། །བྱེ་བྲག་བརྒྱད་ཅུ་རྩ་གཉིས་རྩ། །འདུས་པས་སྐུ་གསུང་ཐུགས་ཡིན་ཏེ། །ལྟེ་བ་ཐུར་དུ་འཛག་པའི་རྩ། །རྩ་གསུམ་འདོམ་པའི་བདེ་བའི་གནད། །རྒྱུ་བ་རླུང་ནི་ཐིག་ལེར་རྟེན། །འགྱེད་ཅིང་
འདུད་པ་གཡས་གཡོན་ཏེ། །བཅུ་དྲུག་འདུས་པའི་སྲོག་རྩེ་གོང་། །རྩ་གསུམ་མགྲིན་པར་འདུས་པ་ནི། །སྒྲ་སྦྱོར་འཁོར་ལོ་ངག་གི་གནད། །དེ་ནས་དངས་མའི་ཐིག་ལེ་ལ། །མ་ལུས་འདུས་པའི་ཚུལ་དུ་གནས། །རིག་པའི་རྩ་ལ་བཅུད་འདུས་པས། །ཐོགས་མེད་
གསལ་བའི་མངོན་ཤེས་འབྱུང་། །ཕྱི་རོལ་ཟག་པའི་རྩ་ཉིད་ལ། །བདེ་བ་ཆེན་པོའི་བཅུད་འདུས་པས། །བདེ་ཆེན་ཉམས་ཉིད་སྐྱེ་བར་འགྱུར། །ཆོས་ཉིད་ཐིག་ལེ་མི་གཡོ་བ། །དངས་མ་འདུས་པའི་བཅུད་ཐིམ་པས། །ཡེ་ཤེས་ལྔ་དང་ལྡན་པ་ཡི། །ཟག་མེད་ཡེ་
ཤེས་བདེ་བ་ཆེ། །ནམ་མཁའི་དབྱིངས་ནི་རྒྱ་ཆེ་བ། །ཐོག་མཐའ་མེད་པར་ཁྱབ་པར་འགྱུར། །འདི་ཉིད་རྟོགས་དང་མ་རྟོགས་ལས། །འཁོར་དང་མྱ་ངན་འདས་པ་ཡི། །སྤྱོད་པ་སྣ་ཚོགས་འབྱུང་བར་འགྱུར། །ཐབས་ཀྱི་ཁྱད་པར་ཕྱག་རྒྱ་ལྔ། །བསྐྱོད་པ་རླུང་དང་འབར་
བ་མེ། །ཐིག་ལེ་ཆུ་དང་འཛིན་པས། །བདེ་ཆེན་ནམ་མཁའི་ཕྱག་རྒྱར་གསལ། །བདེ་བས་བདེ་བའི་དོན་མཐོང་བས། །རྩ་དང་ཐིག་ལེ་རླུང་དག་དང་། །བདེ་བ་རང་རིག་མ་སྐྱེས་པ། །དེ་ཉིད་བདེ་ཆེན་མི་རྟོག་པ། །རང་རྒྱུད་བྲལ་བས་ཟག་པ་མེད། །རང་རྒྱུད་མེད་པའི་བདེ་
བ་ཉིད། །དངས་མའི་ཐིག་ལེས་ཀུན་ཁྱབ་པས། །ཕྱི་ནང་དབང་པོར་བཅས་པ་ཡིས། །བདེ་བ་སྒྱུ་མའི་རང་བཞིན་འཆར། །མ་ལུས་བདེ་བ་ཆེན་པོ་ཉིད། །དེ་ལ་དེ་ཡིས་རྒྱས་བཏབ་པས། །བདེ་བ་མི་རྟོག་ལྷན་ཅིག་སྐྱེས། །ཕྱག་རྒྱ་གཅིག་ཏུ་གསལ་བར་གནས། །གང་དུ་འཁོར་

ལོ་རྩ་བཅུད་ལྡན། །ས་བོན་ཡི་གེ་བདེ་བ་དང་། །ཁམས་ལྔ་ཡེ་ཤེས་རོ་ལྡན་ཞིང་། །སྟོང་དང་བདེ་བའི་ཐིག་ལེ་འདྲེས། །རྟག་ཏུ་དྲན་པར་གནས་པ་ཉིད། །རེ་རེའང་དེ་ལྟར་གནས་པའི་ཕྱིར། །འཁོར་ལོ་རྩ་བཅུད་ཐིག་ལེར་བཅས། །ལྷ་དང་ཡེ་ཤེས་སྐུ་གསུང་
ཐུགས། །རང་ལུས་སྣང་བ་སྣོད་བཅུད་ཀུན། །སྤྲོས་བཅས་ཕྱག་རྒྱའི་གྲངས་སུ་གསལ། །བཅུད་ལྔ་ཡེ་ཤེས་ཁོ་ནའི་ཕྱིར། །དངས་སྙིགས་དབྱེར་མེད་ཐིག་ལེའི་དོན། །སོ་སོའི་ཁ་དོག་དབྱིབས་ཚུལ་དང་། །སྦས་པའི་སྐུ་གསུང་ཐུགས་དག་ལ། །དབྱེར་མེད་གསལ་བའི་རིག་པ་ཡིས། །
མ་ལུས་བདེ་ཆེན་མངོན་དུ་གསལ། །དེ་ནས་བདེ་བ་ཆེན་པོ་ཉིད། །གར་ཐབས་རླུང་གིས་དབང་བསྒྱུར་ནས། །མ་ལུས་བདེ་བའི་རིག་པ་འཆར། །གཙང་དང་འཛེམ་པ་བྲལ་གྱུར་ནས། །བཤུང་བ་ལྔ་དང་འདོད་པ་ལྔ། །ཐིག་ལེ་བཅུད་དང་དངས་མར་བཅས། །ཐིག་ལེ་ཆེན་པོར་འདྲེས་པས་
ན། །མི་འགྱུར་འཆི་མེད་ཚེ་ལ་གནས། །རང་རིག་བདེ་བ་ཆེན་པོ་ཉིད། །ཐོག་མ་ཐ་མ་མེད་པར་གནས། །ཐིག་ལེ་རྒྱུ་བ་རླུང་དང་བཅས། །ཟག་མེད་དང་མའི་སྙིང་པོར་ཐིམ། །མངོན་ཤེས་ལྔ་ལྡན་ཟག་པ་མེད། །དངས་མའི་སྙིང་པོར་ལམ་མཐར་ཕྱིན། །དེ་ནས་གསང་བ་བཤད་བྱ་བ། །
འཁོར་དང་མྱ་ངན་འདས་པ་དག །ཐབས་དང་ཤེས་རབ་ཁ་སྦྱོར་བའི། །བདེན་གཉིས་ཉི་ཟླའི་ཁྱད་པར་ལས། །མ་ལུས་ཐམས་ཅད་གསལ་བར་སྣང་། །གང་དུ་ཐབས་དང་བྲལ་བ་ཡི། །གནས་དང་བདེ་སྡུག་བཏང་སྙོམས་དང་། །ལོངས་སྤྱོད་ཚེ་དང་ཁ་དོག་དང་། །བདག་དང་བདག་
གིར་ཞེན་བཅས་པའི། །གཟུགས་དང་སྒྲ་དང་དྲི་དང་རོ། །རེག་དང་དྲན་པ་སྣ་ཚོགས་ཀྱིས། །ཞེན་དང་འཆིང་བའི་རང་བཞིན་གྱིས། །རང་བཞིན་བཞི་ནི་གསལ་བར་འགྱུར། །དེ་ལས་ཐ་མལ་འཁོར་བའི་ལམ། །ཐོག་མ་མེད་ནས་ལུས་གནས་པའི། །བདེ་ཆེན་ནམ་མཁའི་སྙིང་
པོ་ཉིད། །ལུས་གཉིས་རྩ་བཅུད་མ་ལུས་པ། །ཐབས་དང་ཤེས་རབ་སྐུ་གསུང་ཐུགས། །སྲིན་བུ་འཁྱུགས་པའི་ཡི་གེ་ལྟར། །དབང་པོ་གཉིས་དང་འབྲེལ་ཏེ་གནས། །ཐབས་དང་མན་ངག་ལྡན་པ་ཡིས། །རྒྱལ་རིགས་རྗེའུ་དང་བྲམ་ཟེ་དང་། །དམངས་རིགས་ཚོས་མ་གར་མཁན་

མ། །རྡོལ་མ་ཉོ་ཚོང་མ་ཉིད་དང་། །མ་དང་སྒྱུག་མོ་སྲིང་མོ་དང་། །མཐར་སྒེག་ལུས་འཚོང་མ་ལ་སོགས། །དངོས་གྲུབ་སྐྱེ་བའི་ཞིང་དུ་བཤད། །བཅུ་གཉིས་བཅུ་བཞི་བཅུ་དྲུག་དང་། །བཅྭ་བརྒྱད་བཅུད་ལྡན་རབ་ཡིན་ཏེ། །ཉི་ཤུ་ལ་སོགས་འབྲིང་དུ་བཤད། །རྩ་ལྔ་ཐ་མའི་
ཚད་ཡིན་ཏེ། །གཞན་ལ་དངོས་གྲུབ་མེད་པར་གསུངས། །ལས་དང་བྱ་བ་མ་ལུས་པ། །ཆོ་གའི་སྦྱོར་བ་རབ་ཏུ་བརྩམ། །གནས་པ་འབྱུང་བའི་བཅུད་བཞི་ལ། །འབྱུང་བཞི་གསལ་རྐྱེན་གང་ཕྲད་པས། །ཉི་ཟླ་འདྲེས་པའི་གར་ཐབས་ལས། །ལྷན་ཅིག་སྐྱེས་པ་གསུམ་གཅིག་
ལས། །ཉམས་སུ་ཡེ་ཤེས་ལྔ་ཤར་བ། །མ་ལུས་བདེ་བ་ཆེན་པོར་འགྱུར། །གནས་བཞི་རྩ་བཅུད་ཐིག་ལེ་ལེ་ལས། །ཐབས་དང་ཤེས་རབ་གཉིས་མེད་པའི། །ཕྱག་རྒྱ་བཞིར་ལྡན་མཉམ་སྦྱོར་བས། །དངས་སྙིགས་རླུང་གིས་ངོས་བཟུང་ནས། །དངོས་པོ་ལྷན་ཅིག་སྐྱེས་པ་དག །
བདག་པོ་གདུང་ཅན་སྦྱར་བ་ཡི། །འཕྲོ་འདུ་བཏང་དང་བཟུང་བ་དང་། །བཟློག་པས་ཉི་ཟླ་དབྱེར་མེད་མྱོང་། །དང་པོ་འཇིག་པ་ལ་སོགས་ནས། །རྡོ་རྗེ་འཆང་ཆེན་གསང་བདག་པར། །ལམ་ལྔ་སེམས་ལྔ་མཐར་ཕྱིན་པས། །སྟོབས་ཀྱི་ཁྱད་པར་གསལ་བར་འགྱུར། །ཐབས་དང་ཤེས་
རབ་གཉིས་མེད་པའི། །འོག་མིན་ནམ་མཁའི་ཤར་སྒོ་ནས། །ཉི་ཟླ་དུས་གཅིག་ཤར་བ་ལ། །དུས་ཚོད་གཟའ་ཡིས་གང་བཟུང་བ། །ཉིན་མཚན་མེད་པའི་ཡེ་ཤེས་ཉིད། །འཕེན་པ་རླུང་གི་སྦྱོར་བས་འབྱུང་། །རྣལ་འབྱོར་རིག་པར་སྣང་བ་ཡི། །ཁྱབ་པ་ནམ་མཁའི་འཇིག་རྟེན་ན། །
བདེ་ཆེན་མཛེས་པའི་མེ་ཏོག་ལ། །བཅུད་ཀྱི་ཁྱད་པར་གང་གནས་པ། །ཐབས་དང་ཤེས་རབ་འབྲེལ་བ་ཡི། །ཤེལ་དང་བྱུ་རུའི་བུང་བསྡུས་ནས། །རྣལ་འབྱོར་བཅུད་ཀྱིས་རྒྱས་འགྱུར་ནས། །བཅུ་གསུམ་ས་ལ་ལྷུན་གྱིས་གྲུབ། །འཁྱུད་པའི་གར་ཐབས་ལས་བྱུང་བའི། །
བདེ་བ་ཆེན་པོ་མི་རྟོག་པ། །སྐད་ཅིག་ཆ་ལས་བྱུང་བ་ཡི། །ཟག་མེད་ཡེ་ཤེས་སྙིང་པོ་སྟེ། །མ་ལུས་དངས་མའི་བློ་སྣང་བ། །ཞེན་བྲལ་སྟོང་རྟོག་མི་གནས་པ། །དངོས་པོ་ལྷན་ཅིག་སྐྱེས་པ་སྟེ། །མ་ལུས་ཁྱབ་པར་གནས་པ་ཡིན། །འདུ་ཤེས་ཟད་པའི་རང་བཞིན་ཏེ། །

སྐྱེ་དང་འགྲིབ་པའི་ཐིག་ལེ་ཉིད། །བཅོ་ལྔ་རྫོགས་པའི་ཐ་མ་ཉིད། །སྦྱོར་བ་ཀུན་ཟད་སྟོང་པའི་ངང་། །དེ་ཉིད་བྱིན་བརླབས་ལས་གྱུར་པ། །ཕྱོགས་དུས་སྣོད་བཅུད་ངོ་བོ་ཉིད། །ཐིག་ལེ་རྡུལ་བྲལ་ཞེན་པ་མེད། །སྒྱུ་མ་གཟུགས་བརྙན་བྲག་ཅ་སོགས། །
མ་ལུས་བདེ་ཆེན་རང་བཞིན་དུ། །ཐུན་མོང་དྲན་རྟོག་རང་འགགས་ནས། །བདེ་ཆེན་སྒྱུ་མ་མངོན་སུམ་སྣང་། །བདེ་བ་ཆེན་པོའི་སྐུ་གསུང་ཐུགས། །བཅུད་ལྔ་ཞུ་བའི་ཡེ་ཤེས་རོ། །ཐམས་ཅད་རྩེ་གཅིག་དྲན་པ་ཉིད། །དབྱེར་མེད་ཐབས་དང་ཤེས་རབ་སྟེ། །དྲན་པ་གཅིག་
ཏུ་མྱོང་བ་ཉིད། །ཐབས་དང་ཤེས་རབ་འབྲེལ་བ་ཡིས། །ས་ཡ་བཅུ་གསུམ་གྲངས་མེད་པའི། །ཐིག་ལེ་བདེ་བ་ཉིད་སྣང་བ། །རང་རང་མ་འདྲེས་ཐིག་ལེ་ལ། །སྐུ་གསུང་ཐུགས་དང་དྲན་པ་དང་། །ཡེ་ཤེས་ལྔ་ཡི་རྒྱས་བཏབ་སྟེ། །མ་ལུས་ཐིག་ལེའི་ཚོགས་སུ་སྣང་། །རང་འབྱུང་
བདེ་ཆེན་རིག་པའི་ལྷ། །གཅིག་དང་གྲངས་ལས་འདས་པ་ཡང་། །ཉི་ཟླ་གཉིས་ཀྱི་གདན་ལ་བཞུགས། །ཁྱབ་པ་ཐིག་ལེའི་གུར་ནང་ནས། །བཞུགས་ནས་བདག་པོ་རྟེན་བདག་ཅན། །རྩ་བཅུད་འབྲེལ་བའི་རྒྱན་དང་བཅས། །ཀ་བ་གསུམ་དང་ཕོ་བྲང་བཞི། །ལྡེ་མིག་
གཉིས་ལ་འབྱེད་པ་བཞི། །སྒོ་བཞི་ཕྱེ་བས་གཞལ་ཡས་ཁང་། །ལྷ་དང་བཅས་པ་མངོན་དུ་འགྱུར། །དགོན་པ་དུར་ཁྲོད་ལྡན་པ་ཡི། །གསང་བའི་འོག་མིན་འབར་བ་ཉིད། །རིམ་པ་ཕྱི་ནང་བར་ལྡན་པར། །ཉི་ཟླ་པདྨའི་གདན་སྟེངས་ནས། །དུས་གསུམ་ཐིག་ལེར་རོ་གཅིག་
པའོ། །བདེ་ཆེན་གཉིས་སུ་མེད་པར་བཞུགས། །ཐབས་དང་ཤེས་རབ་དབྱེར་མེད་པའི། །ཚོམ་བུའི་ཚོགས་ཀྱང་དེ་བཞིན་ཏེ། །ཐུན་མོང་དམ་ཚིག་ཏིང་འཛིན་དང་། །བྱང་ཆུབ་ཤེས་རབ་སྙིང་རྗེ་ལྔ། །གཞན་དུ་ཐབས་དང་ཤེས་རབ་དང་། །སྤྱད་དང་གླུ་གར་རྒྱན་དང་བཅས། །
མ་སྤངས་རོལ་བར་ལོངས་སྤྱོད་པས། །ཡེ་ཤེས་ཉི་ཟླ་རྒྱུན་འཆར་བ། །རླུང་སེམས་ཡེ་ཤེས་བཅས་པ་ཉིད། །རྒྱུ་བ་མེད་པས་ཟག་པ་བྲལ། །ནམ་མཁའི་མཐར་ཐུག་བར་ཉིད་དུ། །ཟག་མེད་བདེ་བ་རྒྱུན་མི་འཆད། །དེ་ཉིད་ཚད་མེད་དཀྱིལ་འཁོར་ཏེ། །བདེ་ཆེན་མངོན་དུ་གང་

བར་སྣང་། །དེ་དག་ལམ་ལ་ཞུགས་པ་ཡི། །ཕྱི་ནང་གསང་བ་མ་ལུས་པའི། །སྤྱོད་པའི་ཁྱད་པར་ཐམས་ཅད་ཀུན། །འདིར་ནི་རྒྱས་པར་བསྟན་པ་ཡིན། །ཐབས་དང་ཤེས་རབ་ལྡན་གྱུར་པས། །ཕྱི་ནང་གསང་བ་ལ་སོགས་པ། །སྐབས་ལ་བབ་པའི་རྣལ་འབྱོར་པ། །གང་ཡང་རུང་
བས་སྤྱོད་པར་བྱ། །དང་པོ་རྟོགས་ནས་མཐར་ཐུག་པའི། །ཕྱི་ནང་གསང་བའི་ལམ་སྤྱོད་ལ། །སྤྱད་བྱ་ཡུལ་ཞེས་གང་འདོད་དེ། །ཐམས་ཅད་བླང་དོར་མེད་པར་སྤྱོད། །ཐབས་ཀྱི་ལྟ་སྤྱོད་ཏིང་འཛིན་གྱིས། །པདྨ་ལ་ནི་འདམ་བཞིན་ནམ། །མུན་སྣང་གསེར་འགྱུར་ཐབས་བཞིན་
དུ། །ཐབས་ལ་མཁས་པས་སྤྱད་པར་བྱ། །སྐྱེས་མཆོད་ཐབས་དང་ལྡན་པ་ཡིས། །ཞིང་དང་སྤྱོད་ཡུལ་དག་པ་ལ། །ཆགས་བྲལ་བདེ་བར་གང་སྤྱད་པས། །ནམ་མཁའ་དབྱིངས་ཀྱི་ལོངས་སྤྱོད་ལ། །བདེ་བ་ཆེན་པོར་ལོངས་སྤྱོད་ཅིང་། །ལྷུན་གྱིས་གྲུབ་པའི་བདག་པོར་འགྱུར། །གང་
དག་ཐབས་དང་མི་ལྡན་ཞིང་། །དོན་མེད་ལམ་ལ་མ་འབྲེལ་བར། །སྒྲ་དང་ཚིག་ལ་བརྟེན་པ་ཡིས། །གསང་བའི་སྤྱོད་པ་གང་བརྩམས་པ། །གང་བསྒྲུབས་སྣང་བར་མི་འགྱུར་གྱི། །ནུས་མེད་གཡུལ་དུ་ཞུགས་པ་ལྟར། །བདག་གཞན་གཉིས་ཀ་བརླག་པ་དང་། །མཐོང་བའི་
ཆོས་ལ་སྡུག་བསྔལ་ཞིང་། །ངན་འགྲོ་ལོག་པའི་གནས་སུ་འགྱུར། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ཆེན་པོ་ལས་སྤྱོད་པ་རྒྱས་པར་བཤད་པའི་ལེའུ་སྟེ་ལྔ་པའོ།། །།དེ་ནས་གཞན་ཡང་བཤད་བྱ་བ། །རང་བཞིན་ཏིང་འཛིན་གཟུགས་བརྙན་
དང་། །ལྷག་གཉིས་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ཚོགས་ཉིད་ཀྱི། །དཀྱིལ་འཁོར་དོན་ནི་བཤད་པར་བྱ། །གང་ཕྱིར་དབང་ཡུལ་རྣམ་ཤེས་ཀུན། །གཞན་སྣང་ཐ་དད་མ་ཡིན་པའི། །མ་ལུས་རང་རིག་བྱང་ཆུབ་སེམས། །མ་བཅོས་རང་བཞིན་འོད་གསལ་
བ། །མ་ལུས་ཀུན་གྱི་སྙིང་པོ་སྟེ། །ཕྱོགས་བཅུ་འདས་དང་མ་བྱོན་པའི། །རྒྱལ་བ་རྣམས་ཀྱི་རང་བཞིན་ཡིན། །འཁོར་དང་མྱ་ངན་འདས་པ་ཡི། །ཆོས་རྣམས་མ་ལུས་ཐམས་ཅད་ཀུན། །སྣ་ཚོགས་རང་བཞིན་དབྱེར་མེད་པ། །དེ་ཉིད་རང་བཞིན་ཆོས་སྐུ་ཡིན། །དེ་ཉིད་འཇིག་རྟེན་

བརྟན་གཡོ་སྟེ། །ཇི་ལྟར་སྣང་གྲགས་ཐམས་ཅད་ཀུན། །ངེས་པའི་རང་བཞིན་བཞི་བཅུ་གཉིས། །རང་བཞིན་ལོངས་སྤྱོད་རྫོགས་སྐུར་བཤད། །དེ་ཉིད་ཕྱག་རྒྱ་སྣ་ཚོགས་ཏེ། །ཀུན་དུ་སྐུ་དང་གསུང་དང་ཐུགས། །ཡོན་ཏན་ཕྲིན་ལས་བསམ་ཡས་
མཆོག །རང་བཞིན་སྤྲུལ་སྐུ་བསམ་མི་ཁྱབ། །ཇི་སྙེད་འགྲོ་བ་མ་ལུས་ཀྱི། །ལུས་ཅན་སྙིང་ལ་གང་གནས་པའི། །རང་འབྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །
དེ་ཉིད་རྩ་བའི་རང་བཞིན་ལས། །མ་ལུས་སྣོད་བཅུད་རང་བཞིན་ཅན། །རྟོག་པ་མ་ལུས་དཀྱིལ་འཁོར་ཏེ། །ལོངས་སྤྱོད་རྫོགས་པའི་རང་བཞིན་ཉིད། །དེ་ཉིད་ཐིག་ལེ་ཕྲ་རགས་པར། །སྣང་བའི་མཛད་པ་བསམ་མི་ཁྱབ། །དེ་ཡིས་དེ་འདུལ་སྣང་བའི་རྒྱུ། །སྤྲུལ་པ་
རང་བཞིན་ཞེས་བཤད་དོ། །གང་འདིར་ཕུང་པོ་འབྱུང་བ་དང་། །རྣམ་ཤེས་དབང་པོ་ཡུལ་དུས་དང་། །ཉོན་མོངས་རྟག་ཆད་ཡིད་ཆོས་བཅས། །གང་ལ་མངོན་པར་མི་སྣང་ཡང་། །རང་བཞིན་མ་བཅོས་དཀྱིལ་འཁོར་ཏེ། །ཀུན་ལ་ཁྱབ་པར་སྣང་བ་ཡིན། །རང་སྙིང་དངས་
མ་ལྔར་ལྡན་པ། །དངས་མའི་ཕུང་པོ་འབྱུང་བ་དང་། །དབང་པོའི་ཡུལ་དུ་བཅས་པ་ཡི། །རྩ་བཅུད་ཐིག་ལེར་བཅས་པ་ཉིད། །སྐུ་གསུང་ཐུགས་སུ་རང་སྣང་བ། །མ་ལུས་ཀུན་ལ་རྒྱས་བཏབ་པོ། །བཅུད་འདུས་ཐིག་ལེ་ཆེན་པོ་ཉིད། །ཉི་ཟླ་འདྲེས་པའི་རང་བཞིན་
ཉིད། །བདེ་བའི་ཐིག་ལེ་རང་སྣང་བ། །མ་ལུས་འདུས་པའི་ཚུལ་དག་གིས། །ཐབས་ཀྱིས་མངོན་དུ་གྱུར་ན་ཡང་། །གཉིས་མེད་ཐིག་ལེ་བདེ་བའི་རོ། །འགྲོ་བ་ཀུན་ལ་རང་བཞིན་སྣང་། །དེ་དག་ཡབ་ཡུམ་སྐུ་གསུང་ཐུགས། །རྩ་བཅུད་ཐིག་ལེར་བཅས་པ་ཉིད། །
འདུ་འབྲལ་མེད་པར་ཡེ་གནས་པའི། །གང་ཕྱིར་རྒྱལ་བ་ཐམས་ཅད་ཀྱི། །ཟག་མེད་ཡེ་ཤེས་རང་སྣང་བ། །དཔག་མེད་ཡོན་ཏན་རྒྱ་མཚོ་ཉིད། །ཡེ་ཤེས་འོག་མིན་ཕོ་བྲང་སྟེ། །ཟག་མེད་ཡོན་ཏན་རྒྱན་ལྡན་པའི། །འཁོར་ལོ་འབར་བའི་ཕོ་བྲང་དབུས། །མི་འཇིགས་

ཕུང་པོའི་གདན་སྟེངས་ན། །བདག་པོ་ཀུན་བཟང་འཁོར་ལོ་བསྐོར། །བཀའ་སྡོད་སྐྱེས་བུ་མདུན་ན་གནས། །གཞན་ཡང་རྒྱལ་བ་རྒྱ་མཚོའི་ཚོགས། །སྐུ་གསུང་ཐུགས་དང་ཡོན་ཏན་ལས། །རང་རང་རིགས་ལྔ་གང་གྱུར་པའི། །རྣམ་ཐར་དབུ་དང་ཡེ་ཤེས་ཕྱག །སོ་སོའི་བཞུགས་
ཚུལ་ལྡན་པ་ཡིས། །མདུན་རྒྱབ་ཕྱོགས་བཅུར་འཁོད་པ་ཉིད། །ཡབ་ཡུམ་འབྲེལ་པའི་ཚུལ་གྱིས་གནས། །རང་འབྱུང་མ་བསྒྲིབས་ཡེ་ཤེས་ཕྱིར། །ཟག་མེད་ཚོགས་གཉིས་ལས་བྱུང་བའི། །ནམ་མཁའི་ཁམས་དང་རྒྱ་མཉམ་པའི། །འཇིག་རྟེན་གྲངས་མེད་རྡུལ་དང་བཅས། །
བཀོད་པ་ཕུན་སུམ་ཚོགས་པར་གནས། །གང་དེ་ཟག་མེད་ཡེ་ཤེས་ཀྱི། །ཕྱག་དང་ཞལ་དང་ཐབས་ལྡན་པས། །ཞལ་མཐོང་རིགས་ལ་དབང་སྒྱུར་བས། །རྡོ་རྗེ་འཛིན་པ་ཆེན་པོར་གྱུར། །རྒྱལ་བ་དེ་དག་མ་ལུས་པའི། །གསུང་མཆོག་བརྗོད་དུ་མེད་པ་ཉིད། །ནམ་མཁའི་དབྱིངས་
ཀྱི་མཐར་ཐུག་པ། །བརྡ་དང་དོན་དང་བྱིན་བརླབས་དང་། །གསང་བ་ལ་སོགས་ཅི་རིགས་པར། །དམ་པའི་ཆོས་སྒྲ་རྒྱ་མཚོ་སྒྲོགས། །ཟག་མེད་ཡེ་ཤེས་རྒྱ་མཚོ་ཡི། །བྱིན་བརླབས་ཆོ་འཕྲུལ་མངོན་ཤར་བ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། རྀ་རཱྀ། ལྀ་ལཱྀ། ཨྃ་ཨཿ།
ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཏ་ཐ་ད་དྷ་ན། ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། འདི་དག་རབ་ཏུ་ཕྱུང་བ་ཡིས། །ཕྱོགས་བཅུ་འཇིག་རྟེན་ཁམས་བཅས་པའི། །ནམ་མཁའི་དབྱིངས་དང་རྒྱ་མཚོ་དང་། །ཁོ་ར་ཡུག་དང་ལྷུན་པོ་དང་། །འབབ་ཆུ་
ལྟེང་ཀ་མཚེའུ་བཅས། །དེ་ན་གནས་པའི་འགྲོ་བ་རྣམས། །རང་རང་ལོངས་སྤྱོད་བདེ་སྡུག་བཅས། །ཕྱི་ནང་སྣོད་བཅུད་བཅས་པ་རྣམས། །མ་ལུས་གཡོ་ཞིང་ལྡེག་པར་བྱེད། །སྒྲ་བོ་ཆེ་ཡང་སྒྲོགས་པར་བྱེད། །དེ་དག་སྦྱངས་ནས་མི་གནས་པར། །གསུང་གི་ངོ་བོར་བྱིན་བརླབས་
ཏེ། །དེ་དག་སྟོང་ཉིད་ལ་ཐིམ་པས། །མ་ལུས་སྟོང་པ་ཉིད་དུ་འགྱུར། །ཨ་ནི་སྟོང་དང་མི་སྟོང་གི། །དབུ་མ་དམིགས་སུའང་ཡོད་མ་ཡིན། །ཇི་སྙེད་སྣང་གྲགས་ཆོས་རྣམས་ཀུན། །ཡི་གེ་ཕྲེང་བ་ཉིད་ལ་གནས། །གང་ཕྱིར་དེ་ཡི་རང་བཞིན་ཡང་། །རང་བཞིན་ཆོ་འཕྲུལ་

ཏིང་འཛིན་དང་། །གསང་བ་བྲིས་པར་གང་སྣང་བ། །རིག་པའི་ཁྱད་པར་སྣང་བ་ཡིན། །རྩ་བ་དང་ནི་རྒྱན་ཞེས་དང་། །ལྷ་ཡི་ཡི་གེ་མངོན་སྣང་བས། །རང་བཞིན་སྐུ་གསུང་ཐུགས་ཉིད་དེ། །ཁྱབ་པའི་ཚུལ་གྱིས་མ་ལུས་སྣང་། །གང་དུ་ཐུགས་རྗེ་བྱིན་
བརླབས་དང་། །ཏིང་འཛིན་རིག་པའི་ཆོ་འཕྲུལ་ཏེ། །རང་རང་ཁྱད་པར་མངོན་སྣང་ཡིན། །འདི་དག་རང་བཞིན་སྣ་ཚོགས་པ། །གང་དུ་ཇི་ལྟར་གནས་པ་ཀུན། །ཡི་གེར་མ་གྱུར་མེད་པར་གནས། །རྒྱལ་བ་སངས་རྒྱས་ཐམས་ཅད་ཀྱི། །ཡེ་ཤེས་རྒྱ་མཚོའི་གསང་བའི་ཐུགས། །
མཐར་ཐུག་མེད་པའི་ནམ་མཁའ་བཞིན། །ཟག་མེད་རྒྱས་པས་ཀུན་ཁྱབ་ཅན། །ཤེས་བྱའི་དཀྱིལ་འཁོར་མཐའ་ཡས་པ། །གཅིག་དང་དུ་མ་མེད་ཚུལ་གྱིས། །ཡེ་ཤེས་མ་བསྒྲིབས་གསལ་བ་ཡིས། །ནམ་མཁའ་དབྱིངས་ལྟར་གསལ་མཁྱེན་པ། །དུས་གསུམ་ཆོས་དང་
འགྲོ་བ་དང་། །ཞིང་ཁམས་རྒྱལ་བ་དཔག་མེད་དང་། །རི་དང་རྒྱ་མཚོ་རྡུལ་བཅས་པ། །སྔ་ཕྱི་མ་བསྒྲིབས་ད་ལྟ་ཉིད། །མེ་ལོང་ལྟ་བུར་མངོན་དུ་སྣང་། །དཔལ་ལྡན་ནམ་མཁའི་དཀྱིལ་འཁོར་དུ། །ཡེ་ཤེས་ལྔ་ཡིས་ཀུན་ཁྱད་ཅན། །ཀུན་མཁྱེན་སྟོབས་བཅུ་མཐའ་ཐུག་
མེད། །ནམ་མཁའི་དབང་ཕྱུག་བདེ་ཆེན་པོ། །མངོན་ཤེས་རྒྱ་མཚོ་ཕ་རོལ་བྱོན། །ཤེས་བྱའི་དཀྱིལ་འཁོར་ཐམས་ཅད་ཀུན། །སད་དང་སངས་པའི་བདག་ཉིད་ཅན། །ཐོག་མ་ཐ་མ་མེད་པའི་བདག །བདེ་བ་ཆེན་པོ་སྒྱུ་མ་ཉིད། །རང་འབྱུང་ཐུགས་ལས་གཞན་པ་མིན། །འདི་ནི་
རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་ཏེ། །གདུལ་བྱ་གང་གི་ངོ་དག་ཏུ། །སྣ་ཚོགས་མངོན་པར་འཕྲུལ་པ་ཡིན། །གང་དུ་ཁྲོ་གཏུམ་གདུག་ལྡན་པའི། །སྲིད་གསུམ་དྲེགས་པའི་བདག་པོ་དག །ཐུགས་རྗེ་ཁྲོས་པས་གདུལ་བའི་ཕྱིར། །ཁྲོ་བོའི་དེ་བཞིན་
གཤེགས་པར་མཛད། །སྐུ་ནི་རི་རབ་ལྟ་བུ་ཉིད། །ཞབས་དང་ཕྱག་ནི་རྡུལ་སྙེད་དེ། །གང་དེ་གདུལ་བའི་ཁྱད་པར་གྱིས། །ཞལ་གསུམ་ཕྱག་དྲུག་ཞབས་བཞི་དང་། །དབུ་དགུ་བཅྭ་བརྒྱད་ཕྱག་ལ་སོགས། །ཉི་ཤུ་རྩ་གཅིག་དབུ་ལ་སོགས། །དེ་བཞིན་གཡོ་རྡུལ་མི་གཡོ་བའི། །

ཕྱག་ཞབས་ཞལ་ཡང་དེ་བསྐྱེད་དེ། །མཚོན་ཆ་སྣ་ཚོགས་འཛིན་པ་དེས། །ཇི་སྙེད་ཕྱོགས་བཅུ་འཇིག་རྟེན་དུ། །ཆོ་འཕྲུལ་བཞི་ལ་སོགས་པ་ཡི། །མཛད་པའི་གར་ཐབས་སྣ་ཚོགས་ཀྱིས། །དྲེགས་པ་ཆེ་དང་དབང་ཕྱུག་དང་། །ཚངས་པ་ཁྱབ་འཇུག་བརྒྱ་བྱིན་དང་། །དྲི་
ཟ་གཤིན་རྗེ་གནོད་སྦྱིན་བཅས། །གདུག་པའི་ང་རྒྱལ་རྒྱུ་འབྲས་ཅན། །རྒྱུ་འབྲས་རྩད་ནས་བཅད་པའི་ཕྱིར། །མ་ལུས་བ་དག་མ་བཏང་བར། །ང་རྒྱལ་ཁྲོ་གཏུམ་ཞུམ་པ་ཡིས། །ཇི་སྐད་སྨྲས་ཀྱང་རང་རང་གི། །ཉོན་མོངས་རྒྱ་མཚོ་མ་སྐམས་པར། །ཐུགས་རྗེ་ཞེ་ལ་མནན་
ཚུལ་གྱིས། །དེ་དག་མངོན་དུ་བཏུལ་བར་མཛད། །ལ་ལར་དཔལ་ཆེན་ཁྲག་འཐུང་སྟེ། །ལ་ལར་རྡོ་རྗེ་ཁྲག་འཐུང་ཉིད། །ལ་ལར་རིན་ཆེན་ཁྲག་འཐུང་སྟེ། །ལ་ལར་པདྨ་དེ་བཞིན་གཤེགས། །ལ་ལར་སྣ་ཚོགས་ལས་སུ་བཅས། །རང་རང་བཙུན་མོ་ཚོགས་དང་འཁྲིལ། །
རིགས་ཀྱི་མཚོན་ཆ་སྣ་ཚོགས་འཛིན། །མདོག་དང་ཆ་ལུགས་དེ་བཞིན་ཏེ། །དེ་བཞིན་སྲས་དང་བཀའ་ཉན་དང་། །ཕོ་ཉ་ཡང་སྤྲུལ་ལ་སོགས་པ། །རྡོ་རྗེ་བ་སྤུ་བུ་ག་ནས། །ཕོ་ཉ་བྱེ་བ་དྲུག་ཅུ་དག །ཕྱོགས་བཅུ་ཀུན་དུ་རྒྱས་བཀྱེ་སྟེ། །ནམ་མཁའི་ཁམས་དང་མཉམ་པ་
ཡི། །གདུག་པའི་ཚོགས་ནི་དེ་དག་ཀུན། །མ་ལུས་དུས་གཅིག་བཏུལ་ནས་ནི། །ཕྱིར་མི་ལྡོག་པའི་ས་ལ་བཀོད། །དེ་དག་གསུང་ཡང་སྣ་ཚོགས་ཏེ། །སྤྲུལ་པ་འགྱེད་པས་གསུང་གཅིག་ཏུ། །ཁམས་གསུམ་སྒྲ་ཡིས་གང་བར་མཛད། །ཧཱུྃ་ཧཱུྃ་ཧཱུྃ་བི་ཤྭ་ཀྲོ་དྷ་ཛྭ་ལ་མཎྜལ་
ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ་ཕཊ། ཕཊ་ཕཊ་ཕཊ། ཏྲཏ་ཏྲ་ཏ་ཏྲ་ཏ། ཀྲོ་ཊ་ཀྲོ་ཊ་ཀྲོ་ཊ། ཧ་ལ་ཧ་ལ་ཧ་ལ། ཧུ་ལུ་ཧུ་ལུ་ཧུ་ལུ། ཏིཥྛ་ཏིཥྛ་ཏིཥྛ། བནྡྷ་བནྡྷ་བནྡྷ། ད་ཧ་ད་ཧ་ད་ཧ། གྲྀཧྞ་གྲྀཧྞ་གྲྀཧྞ། པ་ཙ་པ་ཙ་པ་ཙ། ཙྪིནྡ་ཙྪིནྡ་ཙྪིནྡ། གརྫ་གརྫ་གརྫ། ཧཱུྃ་ཧཱུྃ་ཧཱུྃ། བྷྱོ་བྷྱོ་བྷྱོ།
ཕྲཊ་ཛྭ་ལ་རྃ། ཞེས་པའི་སྒྲ་ཡིས་ཐམས་ཅད་གང་། །ཇི་སྲིད་ནམ་མཁའི་མཐའ་ཐུག་པར། །རི་དང་གླིང་དང་རྒྱ་མཚོར་བཅས། །འཁོར་ཡུག་སྟོང་གསུམ་འཇིག་རྟེན་བཅས། །མ་ལུས་གཡོ་ཞིང་སྒྲས་བཀང་སྟེ། །གདུག་པའི་ཚོགས་དེ་འཁོར་བཅས་པ། །གང་གི་

དབང་དུ་མ་བཏང་བར། །གདུག་པ་དུས་གཅིག་བཏུལ་བར་མཛད། །དེ་ཚེ་དེ་ཡི་འཁོར་གཡོག་ཀྱང་། །ཞུམ་པས་སྨྲས་ཤིང་གསོལ་བཏབ་ནས། །རང་སྙིང་ཕུལ་ནས་དམ་མནོས་ཏེ། །དམོད་བཙུགས་རང་གི་ལམ་ལ་བཞག །འབར་བའི་དཀྱིལ་འཁོར་
དེ་དག་ཀྱང་། །ལ་ལར་གཏི་མུག་རྨུགས་པར་མཛད། །ལ་ལར་ཆགས་ལ་ཆགས་ཆེན་པོ། །ལ་ལར་གཡེམ་ལ་གཡེམ་པར་སྟོན། །སྡང་ལ་དྲག་ཤུལ་སྤྱོད་པ་སྟེ། །ང་རྒྱལ་ཅན་ལ་རི་བོས་གནོན། །ཞི་ལས་སློང་དང་ཞི་བ་ཉིད། །གསལ་དང་ཞེ་ལ་གནོན་པ་དང་། །ཆགས་
ཁྲོ་དང་ནི་སྡང་ཁྲ་དང་། །རྨོངས་ཁྲོ་གནོན་ཁྲོ་ལ་སོགས་པས། །བསྐལ་པ་ཞིང་གི་རྡུལ་སྙེད་དུ། །རང་གི་མཁྱེན་པའི་ཡེ་ཤེས་ཀྱིས། །གདུལ་བའི་ཐབས་ནི་སྣ་ཚོགས་སུ། །སྒྱུ་འཕྲུལ་དྲ་བ་མངོན་རྫོགས་པའི། །ཐུགས་ཀྱི་སྤྲུལ་པ་སྣང་བར་མཛད། །གང་ཕྱིར་སྤྲོས་མེད་གོམས་པ་
ཉིད། །དེ་ཉིད་ཏིང་འཛིན་དཀྱིལ་འཁོར་ཏེ། །ཕྱི་ནང་སྣོད་བཅུད་མ་ལུས་པ། །ཇི་སྙེད་ཕྱོགས་བཅུར་གནས་པ་ཀུན། །རང་རིག་རྒྱལ་པོར་གནས་པ་ཉིད། །འདི་ཉིད་ཕོ་མོ་མ་ནིང་དང་། །མཚན་མེད་ལ་སོགས་གང་ཡང་མིན། །དངོས་དང་དངོས་མེད་ལས་འདས་པའི། །དེ་བཞིན་
ཉིད་དབྱིངས་ཡེ་ཤེས་ཏེ། །རིག་པ་སྐྱེ་བ་མེད་པའི་ངང་། །འདི་ཉིད་གསལ་བར་བསྒོམ་པར་བྱ། །ཨོྃ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧྃ། སྐྱེས་དང་མ་སྐྱེས་ལ་སོགས་པའི། །ཐ་སྙད་མིང་ལ་མི་གནས་ཤིང་། །བློ་ཡི་སྦྱོར་བ་ལས་འདས་པས། །འདི་ནི་དེ་བཞིན་ཉིད་ཅེས་
བཤད། །འདི་ལ་རིམ་པ་མེད་པ་སྟེ། །སྐྱེས་བུ་མཆོག་གི་ཡུལ་དུ་གསུངས། །མ་ལུས་རང་རིག་རྡོ་རྗེ་ཉིད། །ཁྱབ་པའི་ཚུལ་གྱིས་ནམ་མཁའ་སྟེ། །རྣམ་དག་རང་བཞིན་འོད་གསལ་བ། །དམ་པའི་ཏིང་འཛིན་ཆེན་པོ་ཉིད། །གང་གིས་མ་ལུས་མངོན་གསལ་ནས། །ཕྱི་ནང་
ཆོས་རྣམས་ཐམས་ཅད་ཀུན། །གོམས་ནས་སྤྲོས་མེད་དེ་བཞིན་ཉིད། །དེ་དག་ཏིང་འཛིན་ཐུན་མོང་ཉིད། །མི་ཤིགས་ཐིག་ལེ་དངས་མའི་བདག །བཞི་འདུས་ལྔ་བདག་གཉིས་སུ་མེད། །རྩ་བཅུད་ཐིག་ལེར་བཅས་པ་ཉིད། །ཐབས་དང་བཅས་པའི་ཏིང་

འཛིན་གྱིས། །ཡེ་ཤེས་ལྔ་ཡི་རོ་དང་བཅས། །བདེ་ཆེན་སྐྱེ་བ་མེད་པའི་དོན། །ཟག་མེད་ཁྱབ་པ་མངོན་དུ་སྨིན། །ཡེ་ཤེས་ནམ་མཁའི་གཟུགས་ཅན་ཉིད། །ཕྱི་ནང་མེད་པའི་རང་འབྱུང་སྟེ། །གསལ་དང་བདེ་བའི་རང་བཞིན་ཅན། །ཐབས་དང་ཐིག་ལེས་དབང་བསྒྱུར་ནས། །ལུས་
ཅན་ཀུན་ལ་གསལ་བར་སྐྱེ། །གནས་བཞི་འབྱུང་བའི་དངས་མ་ཉིད། །རྟེན་ཅན་བརྟེན་པར་བཅས་པ་ཉིད། །རང་འབྱུང་ཐིག་ལེ་བདེ་བ་ཉིད། །ཕྱོགས་ཆ་མེད་པར་གསལ་ཁྱབ་པས། །བདེ་བ་ཆེན་པོའི་ལུས་སུ་འགྱུར། །རང་འབྱུང་སྙིང་པོ་དངས་མའི་ལུས། །འབྱུང་བ་ཟག་མེད་སྙིང་
པོར་ཐིམ། །ཐིག་ལེ་སྤྲོས་པ་མེད་པ་སྟེ། །ཐམས་ཅད་མ་ལུས་ཁྱབ་པར་སྣང་། །རང་ལུས་རྩ་བཅུད་ཕྱི་ནང་ཀུན། །སྙིགས་མ་དངས་མར་སྨིན་བྱས་ཏེ། །དངས་མ་ཡེ་ཤེས་སྙིང་པོར་གསལ། །དེ་ཉིད་རྒྱུ་བ་མེད་པ་ཡི། །རང་འབྱུང་ཐིག་ལེ་སྤྲོས་པ་མེད། །དངས་མ་ཟག་མེད་སྟོབས་
ལས་སྣང་། །གང་ཕྱིར་སྐྱེས་དང་སྤྲུལ་པ་དང་། །བརྟགས་པའི་གཟུངས་མ་ལས་བྱུང་བ། །དབང་པོ་གཉིས་ནི་བསྲུབས་པ་ལས། །སྐད་ཅིག་བཅུ་དྲུག་མཐའ་ཡི་ཚེ། །ཉི་ཟླ་འདྲེས་པའི་གར་ཐབས་ལས། །དངོས་པོ་ལྷན་ཅིག་སྐྱེས་པ་གསལ། །སེམས་ལྔ་རྫོགས་པའི་སྙིང་པོ་
ཉིད། །བརྗོད་མེད་རང་སྣང་བསྟན་པ་ཉིད། །མ་ལུས་སྐུ་གསུང་ཐུགས་གནས་པ། །འཁྱུད་པའི་གར་གསུམ་བསྡམ་པ་ཡིས། །གནས་དང་འབྱུང་བ་མ་ལུས་པ། །རང་རིག་ཡེ་ཤེས་གཟུགས་སུ་སྣང་། །ཐབས་དང་ཤེས་རབ་དབྱེར་མེད་པའི། །བྱང་ཆུབ་སེམས་ཀྱི་ཐིག་ལེ་སྟེ། །
རྟེན་དང་བརྟེན་པར་བཅས་པ་ཉིད། །རང་ཉིད་གསལ་བར་བྱིན་བརླབས་ནས། །ཇི་ལྟར་སྣང་སྲིད་ཆོས་ཐམས་ཅད། །ལྷན་ཅིག་སྐྱེས་པའི་ངོ་བོར་གསལ། །མ་ལུས་བདེ་བ་ཆེན་པོའི་རིགས། །དམ་པའི་སྦྱོར་བ་སྣང་བར་འགྱུར། །འདི་ནི་ཕྱི་ནང་གསང་བ་ཡི། །ཏིང་འཛིན་དཀྱིལ་
འཁོར་ཉིད་དུ་བཤད། །གང་ཕྱིར་མཚན་མའི་རྣལ་འབྱོར་པས། །དངོས་དང་དངོས་མེད་རྣམ་སྤངས་པའི། །རང་རིག་སྐྱེ་མེད་དེ་བཞིན་ཉིད། །མ་བཅོས་རང་རིག་འོད་གསལ་བ། །དེ་བཞིན་ཉིད་དེ་དང་པོར་བསྒོམ། །དེ་ནས་སྙིང་རྗེ་ནམ་མཁའ་ལྟར། །གསལ་ལ་སྟོང་པའི་རྣལ་

འབྱོར་བསྒོམ། །ཡང་ན་སྒྱུ་མ་བྲག་ཅ་དང་། །ཆུ་ཟླའི་ཚུལ་དུ་བསྒོམ་པར་བྱ། །དེ་ནས་རང་ཉིད་ཡི་གེ་ཉིད། །གསལ་ལ་བརྟན་ཞིང་གོམས་པ་ཡིས། །མ་དག་པ་ནི་སྦྱང་བྱས་ཏེ། །དག་པའི་མཁའ་ལྔ་བསམ་པར་བྱ། །ཨེ་ཡྃ་བྃ་སུ་ལྃ། ས་ཆུ་མེ་རླུང་ནམ་མཁའ་དག །
རིག་པ་རང་སྣང་ཚུལ་དུ་བསྒོམ། །དེ་དབུས་རིན་ཆེན་ཁང་པ་དག །མཛེས་པའི་ཚུལ་དང་ལྡན་པ་སྟེ། །རྩིབས་བཞི་འཁོར་ལོ་ལྟེ་བར་བཅས། །མུ་ཁྱུད་ཟླུམ་པོ་ཐོག་མཐའ་མེད། །གྲུ་ཆད་གློ་འབུར་བར་ཁྱམས་དང་། །སྒོ་བཞི་རྟ་བབས་ཐེམ་སྐས་དང་། །ལྔ་བརྩེགས་ཕ་གུ་དྲ་ཕྱེད་དང་། །
འདོད་ཡོན་ཀ་བ་ཟ་ར་ཚགས། །མི་སྒྲིབ་གསལ་བའི་རྒྱན་དང་ལྡན། །མི་འཇིགས་ལ་སོགས་ལྔ་དབུས་གདན། །ཉི་ཟླ་པདྨ་ལ་སོགས་པ། །ལྔ་དང་གསུམ་དང་བཞི་གཅིག་གོ། །རིམ་པ་འཚམ་པའི་གདན་སྟེངས་སུ། །ས་བོན་ཆོ་ག་ལས་བྱུང་བ། །གཙོ་གཟུངས་མཐིང་ག་རྡོ་རྗེ་
འཛིན། །འཁྲིལ་སྦྱོར་འཛུམ་པའི་བྱིན་བརླབས་ཏེ། །དབང་བསྐུར་ཆོ་ག་ལྔ་ལྡན་པས། །སྦྱོར་བསྐུལ་སྲས་བསྐྱེད་སོ་སོར་དགོད། །ཆོས་དབྱིངས་དཀར་པོ་འཁོར་ལོ་འཛིན། །མཉམ་ཉིད་རིན་ཆེན་སེར་པོ་ལྷོ། །སོར་རྟོག་པདྨ་དམར་པོ་ནུབ། །བྱ་གྲུབ་རལ་གྲི་ལྗང་གུ་བྱང་། །
བཙུན་མོ་རིགས་མཐུན་དྲིལ་འཛིན་འཁྲིལ། །འཁོར་ལོའི་རྩིབས་མཆན་ཤར་ལྷོ་ནས། །ས་སྙིང་དཀར་པོ་མྱུ་གུ་འཛིན། །སྒེག་མོ་དུང་མདོག་མེ་ལོང་འཁྲིལ། །ནམ་སྙིང་སྔོན་པོ་རལ་གྲི་འཛིན། །ཕྲེང་འཛིན་མཱ་ལེ་ནམ་མཁའ་མདོག །སྤྱན་རས་ལེ་བརྒན་པདྨ་དཀར། །གཱི་ཏི་པི་ཝང་
དམར་མོ་མདོག །རྡོར་འཛིན་ལྗང་གུ་ལས་ཀྱི་རིགས། །ཕྱག་གཉིས་བརྐྱང་ནས་གར་མཛད་ལྗང་། །གྲུ་ཆད་བཞི་ལ་རིམ་པ་བཞིན། །བྱམས་པ་དཀར་སེར་ཀླུ་ཤིང་འཛིན། །སྒྲིབ་སེལ་དམར་སེར་གླེགས་བམ་བསྣམས། །ཀུན་བཟང་དམར་ལྗང་རིན་ཆེན་སྙེ། །འཇམ་དཔལ་དཀར་ལྗང་
ཨུཏྤལ་བསྣམས། །བཙུན་མོ་རིགས་དང་མཐུན་པ་སྟེ། །སྤོས་དང་མར་མེ་མེ་ཏོག་དྲི། །འཁྲིལ་ཞིང་འདུད་པ་ཚུལ་བཞིན་བཞུགས། །སྒོ་བཞིར་རིམ་པ་ཇི་བཞིན་དུ། །སྟོབས་ཆེན་གཤིན་རྗེ་གཤེད་པོ་དང་། །རྟ་མགྲིན་བདུད་རྩི་འཁྱིལ་པ་བཞི། །ལྕགས་ཀྱུ་ཞགས་པ་ལྕགས་

སྒྲོག་དྲིལ། །མཐིང་ནག་སེར་ནག་དམར་ནག་དང་། །ལྗང་ནག་རྡོ་རྗེ་ཐོད་དབྱུག་དང་། །ཐོད་སྦྲུལ་རྡོ་རྗེ་རྒྱ་གྲམ་དང་། །ཡུམ་ཡང་སོ་སོའི་ཕྱག་མཚན་བཅས། །སྒོ་བཞིར་རྔམ་ཚུལ་འཁྲིལ་སྦྱོར་བཞུགས། །ཁྱམས་ཀྱི་མདུན་དང་རྒྱབ་ཏུ་ནི། །ཀུན་བཟང་ཡབ་ཡུམ་ནམ་མཁའི་མདོག །
ཕྱག་རྒྱ་མ་ངེས་སྣ་ཚོགས་ཏེ། །མཉམ་བཞག་ཡེ་ཤེས་འཕྲོ་བའི་སྟེང་། །རྡོ་རྗེ་དྲིལ་བུའི་མཚན་པའོ། །ཐུབ་དྲུག་དཀར་སེར་མཐིང་ག་དང་། །དམར་ནག་སེར་ནག་དུད་ཀ་སྟེ། །ཕྱོགས་བཞི་སྟེང་འོག་ཤར་ནུབ་ཚུལ། །པི་ཝང་གོ་ཆ་གསེག་པར་སྒྲོམ། །པོ་ཏི་མེ་ཆུར་ཤེས་པར་བྱ། །མི་
བསྐྱོད་བྱེད་པོ་ལ་སོགས་པ། །རྡོ་རྗེ་འཆང་བས་རྣམ་པར་བརྒྱན། །གཞན་དག་རང་རང་གིས་ཡིན་ཏེ། །ཡ་མཱནྟ་ཀྲྀཏ་རྟག་པའོ། །ཐུབ་དྲུག་ཀུན་བཟང་བརྒྱན་པ་ཉིད། །སྐུ་གསུང་ཐུགས་འབར་བྱིན་བརླབས་ལྡན། །རྡོ་རྗེ་འཕྲོ་འདུ་སྙིང་པོར་ལྡན། །ཆོ་གའི་རིམ་པ་ཤེས་པར་
བྱ། །དངས་མ་བཅུད་ལྡན་ཡེ་ཤེས་ཉིད། །མ་བཅོས་དེ་བཞིན་ཉིད་ཡིན་ཏེ། །ཡེ་ཤེས་ནམ་མཁའི་ངང་དང་འབྲེལ། །ཀུན་ལ་ཁྱབ་པའི་སྙིང་རྗེ་ཡིས། །ཁྱབ་བྱེད་བདེ་བའི་སྙིང་པོ་ཉིད། །ཐ་མལ་རྟོག་པ་གང་དག་ནས། །བདེ་བ་ཆེན་པོར་བྱིན་གྱིས་རློབ། །འབྱུང་ལྔ་
དངས་མའི་སྙིང་པོ་ཉིད། །ཐམས་ཅད་འབྱུང་བའི་རྒྱུ་ཡིན་ཏེ། །དྷརྨ་ཙཀྲ་ཆོས་ཀྱི་དབྱིངས། །མི་ཤིགས་ཐིག་ལེ་ཀུན་གྱི་གནས། །ནུས་པའི་ཁྱད་པར་ཕྲ་རགས་བཞི། །ཐིག་ལེའི་གཟུགས་དང་ཚོར་བ་དང་། །འདུ་ཤེས་འདུ་བྱེད་རྣམ་ཤེས་ཉིད། །ཡེ་ཤེས་ལྔ་ཡི་རང་
བཞིན་ཉིད། །རྒྱལ་པོ་ལྔ་རུ་བཤད་པ་ཡིན། །འབྱུང་ལྔ་དངས་མར་བཅས་པ་ནི། །དགྱེས་པ་བསྐྱེད་ཕྱིར་བཙུན་མོ་སྟེ། །མིག་སོགས་བདེ་བའི་རྣམ་ཤེས་དང་། །དེ་ཡི་ངོ་བོ་ཡུལ་བཅས་ནི། །གནས་པ་རྩ་བཅུད་ཐིག་ལེར་བཅས། །ནང་གི་སེམས་དཔའ་ཡབ་
ཡུམ་ཉིད། །སོ་སོའི་རྩ་བཅུད་གནས་པའི་རྟེན། །དབང་པོ་དུས་བཞི་རེ་བཅས་པ་ཉིད། །ཕྱི་ཡི་སེམས་དཔར་བཤད་པ་ནི། །གནས་དང་དུས་ཀྱིས་ཕྱེ་ཕྱིར་རོ། །གང་དེ་དངས་མས་བསྐྱེད་པ་ཡིས། །ལུས་ཀྱི་ཆོས་བཞི་རྟག་ཆད་བཅས། །སྒོ་བཞི་ཡབ་ཡུམ་ཤེས་

པར་བྱ། །བདེ་ཆེན་ཡིད་ཆོས་རང་རིག་ཉིད། །ཀུན་བཟང་རོ་ཡི་བདེ་བ་ཉིད། །ཉོན་མོངས་དྲུག་གི་ཡུལ་རྣམས་སུ། །སྤྲུལ་བའི་ཐིག་ལེར་རང་ཤར་བའོ། །འདུལ་བ་བཞི་ཡིས་དོན་མཛད་པ། །སྤྲུལ་བའི་མཛད་པ་བསམ་མི་ཁྱབ། །ཀུན་ཀྱང་དངས་མའི་རང་བཞིན་
ལས། །ཡེ་ཤེས་ལྔ་ཡི་རོ་ལྡན་པ། །གནས་དང་ངོ་བོ་ལྔས་བརྒྱན་པ། །ཡེ་ཤེས་ལྔ་ཡིས་རྒྱས་བཏབ་པའོ། །ས་བོན་སྐུ་སྟེ་ཡི་གེ་གསུང་། །བདེ་ཐུགས་སྐུ་གསུང་དཀྱིལ་འཁོར་ལྡན། །འཕྲོ་འདུ་རྩ་བའི་ཐིག་ལེར་བཅས། །མ་ལུས་ཀུན་ལ་འདི་གནས་པས། །ཡན་ལག་ཉིད་
དུ་འདི་ཤེས་བྱ། །སྟོང་ཉིད་རྡོ་རྗེ་ལ་སོགས་པ། །སྔོན་བྱས་རང་རྒྱུད་མེད་པ་ཡི། །རིགས་བརྟགས་གཟུངས་མ་བླང་བར་བྱ། །རང་རྒྱུད་སྒོ་གསུམ་དག་བྱས་ལ། །ལྷ་ཡི་རྣལ་འབྱོར་ལུས་སུ་བྱ། །རྡོ་རྗེ་སྙིང་པོ་གེ་སར་ཉིད། །ཕྲད་པ་ས་དང་གཤེར་བ་ཆུ། །དྲོད་མེད་བསྐྱོད་པ་རླུང་ཉིད་
དེ། །བདེ་བའི་དངས་མ་ནམ་མཁའ་ཉིད། །བྷྲུྃ་དབྱིབས་བྷ་ག་བདེ་བའི་གནས། །སྣ་ཚོགས་འདུས་པའི་གཞལ་ཡས་ཁང་། །ཉི་ཟླ་པདྨ་ནུས་པའི་གདན། །ཆེ་བའི་ཡོན་ཏན་རྫོགས་པར་ལྡན། །ཐབས་དང་ཤེས་རབ་འབྲེལ་བའི་རོ། །ལྔ་ཕུང་འབྱུང་ལྔ་དག་པ་ཡི། །རང་བཞིན་
དེ་དང་མཉམ་སྦྱར་བས། །ཡེ་ཤེས་ཕྲ་རགས་གཉིས་སུ་མེད། །ཐབས་དང་ཤེས་རབ་འབྲེལ་པ་ཡི། །དབང་པོ་ཡུལ་དུས་རྣམ་ཤེས་བཅས། །རང་རང་བདེ་བར་སྐྱེས་པའི་ལྷ། །ལྷན་ཅིག་སྐྱེས་པའི་ཡེ་ཤེས་ཉིད། །ཐབས་དང་ཤེས་རབ་གཉིས་མེད་ཅིང་། །རྒྱུ་བའི་རླུང་ལ་དབང་
ཐོབ་ནས། །ཐབས་ལམ་བདེ་བའི་གཉེར་དག་གིས། །བརྟགས་པ་རང་གི་རྟོག་པ་ཟློག །དངོས་པོ་རྣམས་ཀྱི་ངོ་བོ་ལ། །བཟློག་བྱ་ངས་ཀྱང་མི་དམིགས་སོ། །བདེ་བའི་ཐིག་ལེ་ས་བོན་ལ། །ཐབས་བཞི་རླུང་གི་གར་ཐབས་ཀྱིས། །དགའ་བའི་ཚད་ལྡན་ནུས་པ་བཅས། །
དངོས་འདི་ལྷན་ཅིག་སྐྱེས་པར་བརྟན། །བདེ་བའི་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་མ་ལུས་པ། །བདེ་བ་ཆེན་པོར་རོ་གཅིག་ཕྱིར། །མ་ལུས་ལྷན་ཅིག་སྐྱེས་པར་གནས། །བཅུད་འདུས་བདེ་བའི་ཐིག་ལེ་ནི། །ཡོན་ཏན་ཀུན་གྱི་ངོ་བོ་བས། །ཆེ་བའི་ཡོན་ཏན་ཀུན་རྫོགས་

པས། །སངས་རྒྱས་ཀུན་གྱི་ངོ་བོར་གནས། །དེ་ནས་རྒྱལ་བ་ཀུན་གྱི་རྒྱལ་པོ་ཡིས། །མ་ལུས་ལྷག་པའི་ལྷར་བརླབ་ཕྱིར། །གསུང་གི་སྙིང་པོ་བརྗོད་པར་མཛད། །བྷྲུྃ་བི་ཤྭ་བི་ཤུདྡྷེ། ཧཱུྃ་བཛྲ་དྷྲྀཀ། ཨོཾ་ཛྲི་ན་ཛིཀ། སྭཱྃ་རཏྣ་དྷྲྀཀ། ཨཱྃཿ ཨཱ་རོ་ལིག། ཧཱྃ་
པྲཛྙཱ་དྷྲྀཀ། མུྃ་དྷཱ་ཏྭཱི་ཤྭ་རཱི། ལཱྃ་དྭེ་ཥ་ར་ཏི་མཱྃ་མོ་ཧ་ར་ཏི། བྱཱྃ་རཱ་ག་ར་ཏི། ཏཱྃ་བཛྲ་ར་ཏི། ཀྵཱིཾ་ཧ་རཱ་ཛ་ཡ། ཏྲཱྃ་ཨཱ་གརྦྷ་ཡ། ཧྲཱི་ཧ་ཧཱུྃ་པདྨ་བ་ད་ཡ། ཛཱིཾ་ཀུ་རུ་པ་ཎཱི་ཧྲཱིཿ། ཧཱུྃ་ལཱ་སྱེ་ས་མ་ཡ་སྟྭྃ། ཏྲཱྃ་མཱ་ལྱེ་ས་མ་ཡ་ཧོཿ། ཧྲཱི་གཱི་ཏཱི་རཱ་གོ྅ཧྃ། ཨ་ནྲྀ་ཏྱེ་རཱ་ག་ཡཱ་མྱེ། མཻ་དྷ་ར་ཎེ་སྭཱ་ཧཱ། ཐྐྷིྃ་ནིསྶ་རྃ་བྷ་
ཡ་སྭཱ་ཧཱ། ཧཱུྃ་ས་རཱ་ཛཱ་ཡ་སྭཱ་ཧཱ། མུྃ་ཤྲཱི་ཨ་རྃ་གཱ་ཡ་སྭཱ་ཧཱུྃ། ཛཿངྷཱུ་པ་པྲ་བེ་ཤ། ཧཱུྃ་པུཥྤ་ཨ་བེ་ཤ། པྃ་དཱི་བ་སུ་ཁི་ནི། ཧོ་གནྡྷེ་ཙིཏྟ། ཧཱུྃ་ཡ་མཱཏྣ་ཀྲྀཏ་ཛཿཕཊ། ཧཱུྃ་བིགྷྣཱནྟ་ཀྲྀཏ་ཧཱུྃ་ཕཊ། ཧཱུྃ་པདྨཱནྟ་ཀྲྀཏ་བྃ་ཕཊ། ཧཱུྃ་པྲཛྙཱནྟ་ཀྲྀཏ་ཧོཿཕཊ། ཨོྃ་མ་ཧཱ་བཛྲ་དྷཱ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཕཊ། ཨོྃ་
མ་ཧཱ་རཏྣ་དྷཱ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཕཊ། ཨོྃ་མ་ཧཱ་པདྨ་དྷཱ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཕཊ། ཨོྃ་མ་ཧཱ་ཀརྨ་དྷཱ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཕཊ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུྃ། ཨ་ཨ་ཨ་བཛྲ་བྷ་དྲ་ས་མནྟ་ཨོྃ། ཨོྃ་མུ་ནེ་ཀྲིྃ་སྭཱ་ཧཱ། ཨོྃ་མུ་ནེ་ཧཱུྃ་དྲུྃ་སྭཱ་ཧཱ། ཨོྃ་མུ་ནེ་སྲུྃ་སྭཱ་ཧཱ། ཨོྃ་མུ་ནེ་པྲྃ་སྭཱ་ཧཱ།
ཨོྃ་མུ་ནེ་ཤྃ་སྭཱ་ཧཱ། ཨོྃ་མུ་ན་ཡེ་སྭཱ་ཧཱ། ཨོྃ་ཨེ་ཧྱེ་ཧི་བྷ་ག་བཱན། མ་ཧཱ་ཀ་རུ་ཎཱི་ཀ་ཏྲྀ་ཤྱ་ཧོ། ས་མ་ཡ་སྟྭྃ། ཛཿཧཱུྃ་བྃ་ཧོཿ། ཨོྃ་ཨཱཿཧཱུྃ་སྭཱ་ཧཱ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། ཨོྃ་ཨཱཿཧཱུྃ་སྭཱ་ཧཱ། ཨོྃ་སྒྱུ་འཕྲུལ་དྲ་བ་གཉིས་མེད་པའི། །
གསང་བ་ཟབ་མོ་སྐུ་གསུངས་ཐུགས། །གདོད་ནས་བདག་དང་དབྱེར་མེད་པའི། །ད་ལྟ་ཉིད་དུ་དབྱེར་མེད་ཤོག །ཨོྃ་བཛྲ་ས་མ་ཡ་ཧཱུྃ། ཨོྃ་བཛྲ་ས་མ་ཡ་སྟྭྃ། ཨོྃ་བཛྲ་ས་མ་ཡ་ཧོཿ ཛཿཧཱུྃ་བྃ་ཧོཿ ཞེས་བརྗོད་པས། སྣ་ཚོགས་དཀྱིལ་འཁོར་མཛེས་པ་དག །གཉིས་མེད་རོ་གཅིག་
འདྲེས་ནས་ཀྱང་། །སྟོང་གསུམ་དཀྱིལ་འཁོར་གསལ་བར་འགྱུར། །ཨོྃ་ཨཱཿཧཱུྃ་སྭཱ་ཧཱ། མུྃ་མཱྃ་ལཱྃ་པཱྃ་ཏཱྃ། ཧཱུྃ་ཧཱུྃ་ཧཱུྃ་ཧཱུྃ། ཏྲཱྃ་ཏྲཱྃ་ཏྲཱྃ་ཏྲཱྃ། དྷྲི་དྷྲི་དྷྲི་དྷྲི། ཨཱཿཨཱཿཨཱཿཨཱཿ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཛཿཧཱུྃ་བྃ་ཧོཿརབ་ལྡན་པས། །གཙོ་བོ་ལྔ་དང་གཙོ་མོ་

ལྔ། །འབྲེལ་པ་སུམ་ཅུ་རྩ་གཉིས་དང་། །རྡོ་རྗེ་ཁྲོ་བོ་ཁྲོ་མོ་དང་། །སྒོ་བཞི་རབ་འབྱམ་ལ་སོགས་པ། །དཀྱིལ་འཁོར་རྒྱས་པར་སྣང་བར་མཛད། །འཁོར་ལོ་ཉིས་བརྩེགས་རྩིབས་སུ་བཅས། །ཁྱམས་དང་སྒོར་བཅས་ལྷ་ཡི་རིམ། །རང་རང་ཕྱག་མཚན་
གདན་དང་བཅས། །བཞུགས་ཐབས་ཚུལ་བཞིན་གནས་པའོ། །དེ་ནས་རྒྱལ་བ་དེ་དག་གིས། །དཀྱིལ་འཁོར་ཆེན་པོ་དེ་དག་ལ། །དབང་བསྐུར་བྱིན་བརླབས་བྱ་བའི་ཕྱིར། །གསང་བའི་སྔགས་ནི་གསུང་བར་མཛད། །ཨོྃ་མ་ཧཱ་ཤཱུ་ནྱཏཱ་ཛྙཱ་ན་བཛྲ་སྭ་བྷ་བ་ཨཱཏྨ་ཀོ྅ཧྃ།
ཨོྃ་མ་ཧཱ་ཨཱ་དརྴ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧཱ་པྲ་ཏྱཱ་བེཀྵ་ཎཱ་ཛྙཱ་ན་བཛྲ་སྭ་བྷཱ་བ་ཨཱཏྨ་