Kinh tạng Tây Tạng (Kangyur Đại Học) — 091_རྒྱུད་འབུམ།_བ

ྷ་ཡི་དྲང་སྲོང་མཆོག །རིག་འཛིན་བྱང་ཆུབ་སེམས་ཁྱོད་ལེགས། །རྩེ་གཅིག་སེམས་ཀྱིས་ཉན་ནས་ཀྱང་། །ལེགས་པར་གསུངས་པ་ཡིད་ལ་ཞོག །ཁྱོད་ལ་ཡང་དག་བཤད་བྱ་བ། །བྱིན་བརླབས་དགྱེ་བའི་གཟུགས་བརྙན་ནི། །ཚོན་
གྱིས་རིས་སུ་བྲིས་པའམ། །རིན་ཆེན་རིགས་སམ་ས་རྡོ་འམ། །ཤིང་ལ་བྱས་ན་མཆོག་ཏུ་བསྔགས། །དང་པོའི་ལས་ཅན་སེམས་ཅན་ལ། །དམིགས་པ་གསལ་བར་འགྱུར་བ་དང་། །བྱིན་རླབས་མཆོག་ནི་འཇུག་པར་འགྱུར། །ཙནྡན་དཀར་པོ་གསལ་ཞིང་དྲང་། །གཞོན་

ཞིང་ཆག་གས་མེད་པ་ལ། །བསང་ཞིང་དུད་བས་བདུགས་ནས་ནི། །དད་ལྡན་ངང་ཚུལ་བཟང་པོས་བཞག །འཇིག་རྟེན་དབང་ཕྱུག་མགོན་གྱི་སྐུ། །བཅོ་བརྒྱད་སོར་ཚད་ལྡན་པ་ལ། །གདན་ཁྲི་དག་ནི་སོར་དགུ་སྟེ། །རྒྱབ་ཡོལ་སོར་ཚད་དྲུག་གིས་བསྐྱེད། །བཞེངས་ཏེ་
ལྡེམ་བག་ཉམས་དགའ་བ། །རིན་ཆེན་དུ་མའི་གཟུགས་ཀྱིས་བརྒྱན། །གཡས་ཀྱི་དང་པོ་བགྲང་ཕྲེང་སྟེ། །གཉིས་པ་མི་འཇིགས་སྩོལ་བའི་ཕྱག །གཡོན་པ་དང་པོ་པདྨ་དམར། །གཉིས་པ་རིལ་བ་སྤྱི་བླུགས་ཐོགས། །ཞལ་གྱི་གྲངས་ནི་བཅུ་གཅིག་ལ། །མདུན་
གྱི་ཞལ་གསུམ་མཚན་བཟང་ཅན། །བྱམས་པ་སྙིང་རྗེ་དགའ་བའི་མདངས། །དཀར་པོ་དཀར་སེར་དམར་སྐྱ་བོ། །གཡོན་གྱི་གསུམ་ནི་ཁྲོ་བོའི་ཞལ། །སྒེག་པའི་མདངས་དང་ལྡན་པ་སྟེ། །དམར་དང་དམར་སེར་ལེ་བརྒན་ནོ། །གཡས་སུ་གཏུམ་པོའི་ཁྲོ་ཞལ་
གསུམ། །སྔོ་དང་སེར་དང་ལྗང་གུའོ། །རྒྱབ་ཏུ་ཁྲོ་གཏུམ་མདོག་དམར་བ། །རྟ་སྐད་རབ་ཏུ་འཚེར་བའི་ཞལ། །ཁྲོ་བོའི་ཞལ་རྣམས་མཆེ་བ་གཙིགས། །མིག་གསུམ་དབུ་སྐྲ་སེར་པོ་ནི། །གྱེན་དུ་ཐོར་ཚུགས་བཅིངས་པའོ། །སྟེང་དུ་སངས་རྒྱས་འཛུམ་པའི་ཞལ། །
བྱི་རུ་བཅག་པའི་མཚན་འདྲ་བའི། །དབུ་ཡི་ཅོད་པན་ནང་རྣམས་སུ། །འདི་དག་ཕྱོགས་བཅུའི་ཐུབ་པ་རྣམས། །རེ་རེ་བཞིན་དུ་གཞུག་པར་བྱ། །དབུ་རྒྱན་ཅོད་པན་ལྡན་པ་དང་། །རྣ་རྒྱན་མགུལ་རྒྱན་དཔུང་རྒྱན་དང་། །ལག་རྒྱན་སེ་མོ་དོར་བཅས་པ། །དོ་ཤལ་
རྐང་གདུབ་སྐེ་རགས་ཅན། །རྒྱན་དང་ན་བཟའ་མཛེས་པས་བརྒྱན། །དེ་ནས་ཡང་དག་བཤད་བྱ་བ། །རི་མོ་དག་ལ་དགའ་འགྱུར་ནས། །ཡིད་གཞུངས་དལ་སྤྱོད་ཁྲོ་བ་མེད། །སྲེད་ཆུང་ཤེས་རབ་སྙིང་རྗེ་ཆེ། །ཐབས་ལྡན་རི་མོ་རྒྱུད་ལ་མཁས། །བསམ་པ་བཟང་
ལྡན་ཚུལ་ཁྲིམས་བསྲུང་། །འདྲི་ཆོས་གཟོབ་ལ་གཞུངས་པ་ཡིས། །དབེན་ཞིང་ཉམས་དགའི་གནས་སུ་བྲི། །གཟུགས་བཟང་ཡིད་དལ་གཙང་ལྡན་པའི། །བུ་མོས་བཀལ་བའི་རས་ལ་ནི། །ཚོན་བཟང་ངུར་སྨྲིག་མདོག་བྱའོ། །འཐས་པར་བཅགས་ཏེ་འཇམ་པོར་

བྱ། །ཐིག་པིར་ཕྱོགས་སུ་བཤད་ནས་ཀྱང་། །སེར་སྐྱ་ཚོན་གྱི་གཟུགས་བརྙན་ནི། །ཚད་ལ་མཁས་པ་ཚད་ལྡན་པའི། །ནན་ཏན་དུ་ནི་བྲི་བར་བྱ། །དཀར་པོ་ཝ་ཡི་ཤེལ་ཡིན་ཏེ། །དམར་པོ་སེམས་རྩོ་ལི་ཁྲིའོ། །སྔོན་པོ་རམས་དང་མཐིང་ཤིང་
སྟེ། །སེར་པོ་བ་བླ་དག་པ་ཡིན། །ནག་པོ་སྣག་ཚ་ཉིད་ཡིན་ཏེ། །ལྗང་གུ་རམས་དང་ལྡོང་རོས་སྦྱར། །ཡང་ན་སྤོང་མ་ཉིད་ཀྱིས་བྱ། །སྨུག་རྩི་རམས་དང་སྐགས་སྦྱར་ཏེ། །གཞན་ཡང་ཅི་རིགས་སྦྱར་བར་བྱ། །སྦྱིན་དང་བྲལ་ན་གྲུགས་པར་འགྱུར། །ཤིང་སྤྱིན་
སེར་དང་ཀ་བི་ཏ། །ལོ་མི་ཏ་དང་ཐན་ཛ་ར། །དེ་དག་སོ་སོར་སྦྱར་བ་ཡིས། །གསལ་ཞིང་དཀྲུགས་མེད་དག་པར་བྱེད། །ཨ་ཏ་པས་ནི་སྣུམ་པར་བྱེད། །གན་ཏོ་ཧས་ནི་རྟག་པར་འགྱུར། །རྒྱས་པར་གྲུ་བཞི་སྒོ་བཞི་པ། །ཡང་ན་སྒོ་གཅིག་པ་ཡང་རུང་། །དཀྱིལ་
འཁོར་ཆ་རིམ་གསུམ་པའམ། །ཡང་ན་གཉིས་སམ་གསུམ་ཡང་རུང་། །དབུས་སུ་གདོང་བཅུ་གཅིག་པ་ནི། །མཛེས་པའི་ལྷ་མོ་བཞི་ལྡན་བྲི། །ཤར་དུ་སྤྱན་རས་གཟིགས་དབང་གི། །དཀྱིལ་འཁོར་རྣམ་སྣང་གཙོ་བོ་ཅན། །དེ་ཡང་སྤྱན་སོགས་ལྷ་མོ་བཞི། །ཕྱག་བཞི་
པ་དང་བཅས་པའོ། །ལྷོར་ནི་འཇིག་རྟེན་དབང་ཕྱུག་གི། །དཀྱིལ་འཁོར་ཤཱཀ་ཐུབ་གཙོ་བོ་ཅན། །ལྕགས་ཀྱུ་ཞགས་པ་ལྕགས་སྒྲོག་དང་། །འབེབས་པའི་ཕྱག་རྒྱ་ལྡན་པའོ། །ནུབ་ཏུ་རིགས་མའི་དཀྱིལ་འཁོར་ནི། །སེམས་དཔའ་བཞི་བཞིར་བཅས་པའོ། །དབུས་
སུ་རྡོ་རྗེ་དབང་མོ་ཡང་། མདུན་དུ་རྡོ་རྗེ་རྟག་པ་སྟེ། །གཡས་སུ་རྡོ་རྗེ་དཔལ་འབྱུང་ངོ་། །རྒྱབ་ཏུ་རྡོ་རྗེ་དཔག་མེད་དེ། །གཡོན་དུ་རྡོ་རྗེ་དོན་གྲུབ་པོ། །ཤར་དུ་ལྷ་མོ་སྤྱན་མ་ནི། །མདུན་དུ་རྡོ་རྗེ་སེམས་དཔའོ། །གཡས་སུ་རྡོ་རྗེ་རྒྱལ་བོའོ། །རྒྱབ་ཏུ་རྡོ་རྗེ་ཆགས་པ་སྟེ། །
གཡོན་དུ་རྡོ་རྗེ་ལེགས་པའོ། །ལྷོར་ནི་ལྷ་མོ་མཱ་མ་ཀཱི། །མདུན་དུ་རྡོ་རྗེ་རིན་ཆེན་ནོ། །གཡས་སུ་རྡོ་རྗེ་ཉི་མ་སྟེ། །རྒྱབ་ཏུ་རྡོ་རྗེ་རྒྱལ་མཚན་ནོ། །གཡོན་དུ་རྡོ་རྗེ་བཞད་པ་ཡིན། །ནུབ་ཏུ་ན་བཟའ་དཀར་མོ་ཡང་། །མདུན་དུ་རྡོ་རྗེ་ཆོས་ཡིན་ཏེ། །གཡས་སུ་རྡོ་རྗེ་རྣོན་པོ་ཡིན། །རྒྱབ་ཏུ་

རྡོ་རྗེ་རྒྱུ་ཞེས་པ། །གཡོན་དུ་རྡོ་རྗེ་སྨྲ་བའོ། །བྱང་དུ་ལྷ་མོ་སྒྲོལ་མ་ཡང་། །མདུན་དུ་རྡོ་རྗེ་ལས་ཡིན་ནོ། །གཡས་སུ་རྡོ་རྗེ་སྲུང་བའོ། །རྒྱབ་ཏུ་རྡོ་རྗེ་གནོད་སྦྱིན་ཏེ། །གཡོན་དུ་རྡོ་རྗེ་ཁུ་ཚུར་རོ། །འཁོར་གྱི་བྱང་ཆུབ་སེམས་དཔའ་རྣམས། །ཀུན་ཀྱང་ཞལ་གཅིག་ཕྱག་བཞི་སྟེ། །གཡས་
ཀྱི་དང་པོ་རང་རིགས་རྟགས། །གཉིས་པ་ཐམས་ཅད་སྐྱབས་སྦྱིན་ཏེ། །གཡོན་གྱི་དང་པོ་པདྨ་ཡང་། །ཕྱོགས་ཀྱི་ཁ་དོག་ལྡན་པའོ། །གཉིས་པས་ཕྱོགས་ཀྱི་མདོག་ལྡན་པའི། །སྔགས་ནོར་ཕྲེང་ཡང་འཆང་བའོ། །འཁོར་གྱི་ལྷ་མོ་དེ་དག་ཀུན། །ཞལ་གཅིག་པ་ལ་ཕྱག་བཞི་
པ། །གཡོན་པའི་ཐ་མ་བུམ་པ་འཆང་། །ལྷག་མ་གོང་ལྟར་ཤེས་པར་བྱ། །བྱང་དུ་ཁྲོ་བོའི་དཀྱིལ་འཁོར་ཡང་། །ཁྲོ་མོ་བཞི་བཞིར་བཅས་པའོ། །དབུས་སུ་རྡོ་རྗེ་ཧཱུྃ་བྱེད་དེ། །སྔོན་པོ་ཨུཏྤ་ལ་ཡི་མདོག །མདུན་དུ་སྔོ་བསངས་ཆེན་པོ་སྟེ། །གཡས་སུ་རྡོ་རྗེ་དྲག་མོའོ། །རྒྱབ་
ཏུ་རྡོ་རྗེ་བརྗེད་བྱེད་པའོ། །གཡོན་དུ་རྡོ་རྗེ་མཐུ་ཆེན་མོ། །ཤར་གྱི་འཁོར་ལོའི་ཆ་རྩིབས་ལ། །ཁྲོ་བོ་གཤིན་རྗེ་གཤེད་པོ་གནག །མདུན་དུ་རྡོ་རྗེ་དབང་ཞལ་མ། །གཡས་སུ་རྡོ་རྗེ་ཁྱབ་འཇུག་མོ། །རྒྱབ་ཏུ་རྡོ་རྗེ་གཞོན་ནུ་མ། །གཡོན་དུ་རྡོ་རྗེ་སྐུལ་བྱེད་མ། །འཁོར་ལོ་རྩིབས་ནི་
མཉམ་པ་ལ། །ཁྲོ་བོ་གཞན་གྱིས་མི་ཐུབ་སེར། །མདུན་དུ་རྡོ་རྗེ་གནག་བྱེད་མོ། །གཡས་སུ་རྡོ་རྗེ་མེ་ཆེན་མོ། །རྒྱབ་དུ་རྡོ་རྗེ་ཟླ་བ་མོ། གཡོན་དུ་རྡོ་རྗེ་རྣོན་པོ་མ། །རྩིབས་གསུམ་རྡོ་རྗེ་གཙུག་ཏོར་སེར། །རྡོ་རྗེ་ཁྲོ་མོ་ཁྲག་འཐུང་མོ། །རྡོ་རྗེ་རླུང་འཛིན་ཆེན་མོ་དང་། །རྡོ་རྗེ་སྡང་
བྱེད་མོར་བཅས་པའོ། །ནུབ་ཀྱི་རྩིབས་ལ་རྟ་མགྲིན་དམར། །མདུན་དུ་རྡོ་རྗེ་རྨོངས་བྱེད་མ། །གཡས་སུ་རྡོ་རྗེ་ཞི་བ་མོ། །གཡོན་དུ་རྡོ་རྗེ་ཚོལ་བྱེད་མ། །ལྔ་པའི་རྩིབས་ལ་དེ་བཞིན་དུ། །ཁྲོ་བོ་བགེགས་མཐར་བྱེད་པ་ལྗང་། །མདུན་དུ་རྡོ་རྗེ་གསོར་བྱེད་མ། །གཡས་སུ་རྡོ་རྗེ་གཏུམ་མོ་
སྟེ། །རྒྱབ་ཏུ་རྡོ་རྗེ་རོ་ལངས་མ། །གཡོན་དུ་རྡོ་རྗེ་རེངས་བྱེད་མ། །རྩིབས་དྲུག་འཁོར་ལོར་བྲི་བ་ནི། །རྡོ་རྗེ་གནོད་མཛེས་རྒྱལ་ལྗང་སྔོ། །མདུན་དུ་རྡོ་རྗེ་ཆུ་དབང་མོ། །གཡས་སུ་དངོས་གྲུབ་འབྱུང་བ་མོ། །རྒྱབ་ཏུ་རྡོ་རྗེ་མཚན་མོ་དག །གཡོན་དུ་རྡོ་རྗེ་མཁའ་དབང་ཕྱུག །དེ་

ལྟར་རྡོ་རྗེ་ཁྲོ་བོ་ཁྲོ་མོ་རྣམས། །ཀུན་ཀྱང་ཞལ་གཅིག་ཕྱག་བཞི་པའོ། །ཁྲོ་བོ་ཕྱག་གཉིས་མདའ་གཞུ་བཀང་། །གཡས་ན་བེ་ཅོན་ཁ་ཊྭཱཾ་དང་། །ཐོ་བ་རྡོ་རྗེ་རྒྱ་གྲམ་དང་། །འཁོར་ལོ་གཏུན་ཤིང་རྡོ་རྗེ་རྣམས། །རང་རྟགས་ཕྱག་རྒྱ་འཆང་བའོ། །གཡོན་ན་
སྡིགས་མཛུབ་ཞགས་པའོ། །ཀུན་ཀྱང་སྟག་གི་ཤམ་ཐབས་ཅན། །ཁྲོ་མོ་རྣམས་ཀྱི་ཕྱག་རྒྱ་ནི། །གཡས་ན་གྲི་གུག་ཅང་ཏེའུ་སྟེ། །གཡོན་ན་ཐོད་ཁྲག་ཁ་ཊྭཱཾ་ངོ་། །ཞིང་ལྤགས་དག་གི་ཆོས་གོས་ཏེ། །གཟིག་གི་པགས་པའི་ཤམ་ཐབས་ཅན། །ཁྲོ་བོའི་
གཡོན་ན་སྒེག་པའི་ཚོགས། །དེ་རྒྱབ་ཆ་ཡི་སྣམ་བུ་ལ། །ཕྱོགས་རེར་ལྷ་མོ་བཞི་བཞི་དང་། །དེ་བཞིན་བྱང་ཆུབ་སེམས་དཔའ་བཞི། །ཕྱོགས་རེར་བརྒྱད་བརྒྱད་བཀོད་པ་སྟེ། །སུམ་ཅུ་རྩ་གཉིས་བཞེངས་པའི་ཚུལ། །དེ་བཞིན་བསྐོར་བཞིན་སེམས་མ་མཆོག །
ལྕགས་ཀྱུ་ཞགས་པ་ལྕགས་སྒྲོག་དང་། །འབེབས་མ་རང་རྟགས་ཕྱག་རྒྱ་གཡས། །གཉིས་པ་མི་འཇིགས་ཕྱག་རྒྱ་སྟེ། །གཡོན་པ་ཕྱོགས་མདོག་པདྨ་དང་། །གཉིས་པ་དར་གྱི་ཆོས་གོས་སོ། །ཀུན་ཀྱང་སྒེག་ཉམས་ལྡན་པའོ། །དེ་རྒྱབ་དཀྱིལ་འཁོར་ཆ་ལ་ནི། །
ཤར་དུ་བརྒྱ་བྱིན་གླང་ཆེན་ཞོན། །གཡས་ཀྱི་དང་པོ་རྡོ་རྗེ་སྟེ། །གཉིས་པ་སྐྱབས་སྦྱིན་ཕྱག་རྒྱ་ཅན། །གཡོན་པ་ཕྱོགས་མདོག་པདྨ་སྟེ། །གཉིས་པ་རང་མདོག་ཕྲེང་བ་བྲི། །དེ་ཡི་གཡོན་དུ་ཚངས་པ་སེར། །ངང་པའི་ཁྲི་ལ་བཞུགས་པ་ལ། །གཡས་ཀྱི་དང་པོ་ཉི་མ་
འཆང་། །མེ་ཕྱོགས་སུ་ནི་མེ་ལྷ་སྟེ། །མདོག་དམར་ར་ཞོན་མེ་ཕུང་འཛིན། །ལྷོ་ཡི་ཕྱོགས་སུ་གཤིན་རྗེ་སྔོ། །ཐོད་དབྱུག་བཟུང་བ་མ་ཧེ་ཞོན། །བདེན་བྲལ་དུ་ནི་སྲིན་པོ་གནག །རྩེ་གསུམ་བཟུང་ནས་སྲིན་པོ་ཞོན། །ནུབ་ཏུ་ཆུ་ལྷ་དཀར་པོ་ནི། །ཀླུ་ཡི་ཁྲི་ལ་སྦྲུལ་
ཞགས་བཟུང་། །དེ་ཡི་གཡོན་དུ་ས་བདག་དཀར། །བུམ་པ་བཟུང་སྟེ་རུས་སྦལ་ཞོན། །ལྷ་མིན་ཕྱོགས་སུ་རླུང་ལྷ་ལྗང་། །བ་དན་བཟུང་སྟེ་ཤ་བ་ཞོན། །བྱང་དུ་གནོད་སྦྱིན་མི་ལ་ཞོན། །ལྗང་ནག་ཕྱག་ན་གཏེར་སྒྲོམ་མོ། །བྱང་ཤར་དབང་ལྡན་དཀར་པོ་ནི། །རྩེ་

གསུམ་བཟུང་སྟེ་ཁྱུ་མཆོག་ཞོན། །སྒོ་བཞིར་རྒྱལ་པོ་ཆེན་པོ་བཞི། །ཕྱོགས་ཀྱི་ཁ་དོག་གོ་ཆ་ཅན། །པི་ཝང་རལ་གྲི་ཞགས་པ་ཅན། །རིན་ཆེན་དབྱུག་ཐོ་གཡས་ཀྱིས་འཆང་། །གཉིས་པ་སྐྱབས་ཀྱི་ཕྱག་རྒྱ་སྟེ། །གཡོན་པ་མ་ལ་བགྲང་ཕྲེང་ནི། །ཕྱོགས་ཀྱི་ཁ་
དོག་ལྡན་པའོ། །ཀུན་ཀྱང་སྒེག་ཉམས་ཕྱོགས་ཀྱི་མདོག །རིམ་བཞིན་སྟག་གཟིག་དོམ་སེང་གེའི། །ཁྲི་ལ་བཞུགས་པའི་གཟིགས་པ་ཅན། །རང་རང་ཕྱོགས་ཀྱི་སྒོ་ལ་ནི། །བསྲུང་བརྩོན་ཤིན་ཏུ་འགྲུས་པའོ། །དཀྱིལ་འཁོར་ཆ་བརྒྱད་འཁོར་ཡུག་ཏུ། །བཟའ་
ཤིང་མེ་ཏོག་སྤོས་ཤིང་དང་། །མཛེས་པའི་ཤིང་ཚོགས་ཚལ་གསེབ་ཏུ། །མཛེས་པའི་བྱ་སོགས་དུད་འགྲོ་དང་། །ལྷ་ཡི་བུ་དང་བུ་མོ་སོགས། །དེ་བཞིན་ཀླུ་དང་གནོད་སྦྱིན་དང་། །དྲི་ཟ་གྲུལ་བུམ་བུ་མོའོ། །རོལ་མོ་བྱེད་པ་དུ་མ་བྲི། །འདི་ལྟར་དད་ན་ལ་ལས་ནི། །
འཇིག་རྟེན་སྐྱོང་བའི་ནང་རོལ་དུ། །གཟའ་དང་རྒྱུ་སྐར་སུམ་ཅུ་དྲུག །རིན་ཆེན་པདྨ་ལ་གནས་བྲི། །སྨིན་དྲུག་པདྨ་དམར་པོ་འཆང་། །སྣར་མ་མགོ་ནི་ཨུཏྤ་ལ། །ནབ་སོ་པད་དཀར་ལག་ཏྲི་ཤུལ། །རྒྱལ་ནི་བགྲང་ཕྲེང་སྐག་སྦྲུལ་ནག །མཆུ་ནི་པད་སེར་བྲེ་མཉམ་གཞག །
མེ་བཞི་པད་དཀར་དབོ་དབྱུག་པ། །ནག་པ་པདྨ་ས་རི་རས། །ས་ག་པོ་ཏི་ལྷ་མཚམས་བུམ། །སྣྲོན་ནི་རྡོ་རྗེ་སྣུབས་དབྱུག་སྟེ། །ཆུ་སྟོད་རིལ་བ་ཆུ་སྨད་པད། །བྱི་བཞིན་གསེར་གྱི་འཁོར་ལོ་སྟེ། །གྲོ་བཞིན་ཆུ་སྐྱོགས་མོན་གྲུ་དང་། །མོན་གྲེ་ཤེལ་སྒོང་ཁྲུམས་སྟོད་ཀྱིས། །རལ་
གྲི་ཁྲུམས་སྨད་ཀུ་མུ་ད། །ནམ་གྲུ་བ་དན་ཐ་སྐར་གྱིས། །ཤིང་ལོ་བྲ་ཉེ་དབྱུག་སྲན་ཏོ། །ཟླ་བ་ཀུ་མུད་དཀར་པོ་སྟེ། །ཉི་མ་པདྨ་དམར་པོའོ། །མིག་དམར་མེ་ཡི་ཕུང་པོ་སྟེ། །གཟའ་ལག་ཨུཏྤལ་སྔོན་པོའོ། །ཕུར་བུས་ཆོས་ཀྱི་གླེགས་བམ་མོ། །པ་བ་སངས་ནི་བགྲང་ཕྲེང་བཟུང་། །
སྤེན་པ་ལག་ན་རལ་གྲི་འཆང་། །སྒྲ་གཅན་བདུད་རྩིའི་གཞོང་བུའོ། །ནང་གི་གྲྭ་ཡི་ཆར་གཏོགས་པ། །བཀྲ་ཤིས་ལྷ་མོ་བརྒྱད་ཡིན་ཏེ། །རྟག་དགའ་མ་དང་རྒྱལ་མ་ཤར། །དོན་གྲུབ་མ་དང་མི་ཕམ་ལྷོར། །ནུབ་ཏུ་བདེ་བ་བདེ་དགའ་མ། །མྱུར་གྲུབ་མ་དང་གཏན་མ་བྱད། །རྩེ་ལྔ་

རྩེ་གསུམ་རྡོ་རྗེ་དང་། །སྔོན་པོ་སེར་པོ་རིན་ཆེན་དང་། །དཀར་དང་དམར་དང་ཨུཏྤལ་དང་། །ཨུཏྤལ་སྔོ་དང་ཀུ་མུ་ད། །དང་པོ་ཕྱག་ན་རིམ་བཞིན་འཆང་། །སྐྱབས་སྦྱིན་པདྨ་བགྲང་ཕྲེང་ནི། །ལྷག་མ་རྣམས་ཀྱིས་རིམ་བཞིན་འཆང་། །དེ་དག་ཐམས་
ཅད་ཕྱོགས་མདོག་གོ། །རྒྱས་པའི་སྤྲོས་པས་སྐྱོ་ན་ཡང་། །ལྔ་བཅུ་བརྒྱད་དམ་སུམ་ཅུ་བདུན། །ཉི་ཤུ་དགུ་འམ་ཉི་ཤུ་ལྔ། །བཅོ་ལྔ་དགུ་འམ་ལྔ་འམ་གཅིག །ཡི་གེ་ཕྱག་རྒྱ་གཟུགས་བརྙན་ཚོགས། །སྤྲུལ་པ་སྐུ་ཡི་ཆོ་འཕྲུལ་ཏེ། །རང་གིས་ཇི་ལྟར་འདོད་པ་ཡི། །སེམས་
ཀྱི་བྱིན་བརླབ་ཉིད་དུ་འགྱུར། །བདེ་གཤེགས་སྐུ་དང་པོ་ཏི་དང་། །ཕྱག་རྒྱ་སོགས་པ་རབ་གནས་བྱ། །ཉམས་སམ་དྲི་མས་གོས་པ་ནི། །བཀྲུས་དང་བཤིག་ནས་དག་བྱེད་ལ། །རྟོག་པ་མེད་པའི་སེམས་ཀྱིས་སུ། །དེ་ལ་བསོད་ནམས་དཔག་ཏུ་མེད། །གཟུགས་སོགས་སྔོན་
བས་དམན་གྱུར་ཀྱང་། །དེ་ཡིས་བསོད་ནམས་མཐའ་ཡས་འཐོབ། །ཕྲིན་ལས་དང་ནི་སྐུ་གསང་བ། །དེ་བཞིན་གཤེགས་པའི་མཚན་ཉིད་དེ། །དེ་བཞིན་ཉིད་དེ་སྟོང་པ་ཉིད། །བྱང་ཆུབ་ནམ་མཁའི་མཚན་ཉིད་དང་། །མཚན་དང་དཔེ་བྱད་ཀུན་རྫོབ་སྟེ། །སྒྱུ་མ་རྨི་ལམ་ལྟ་བུའོ། །
སུམ་ཅུ་གཉིས་དང་བརྒྱད་ཅུ་ནི། །ཡི་གེ་བརྡ་དང་སྤྲོས་པའི་སྐུ། །ལོངས་སྐུ་བསོད་ནམས་རྒྱུ་མཐུན་འབྲས། །སྤྲུལ་སྐུ་ལས་ཀྱི་རྣམ་སྨིན་འབྲས། །ཀུན་རྫོབ་དོན་དམ་མཚན་ཉིད་ལྡན། །དག་དང་མ་དག་སྐལ་ལྡན་ལ། །བདེ་གཤེགས་ཕྲིན་ལས་གཟུགས་སྐུ་གཉིས། །ཚོགས་
གཉིས་ལ་ནི་སྐུ་གསུམ་བྱུང་། །རྣམ་བྱང་ཀུན་ཉོན་མོངས་པས་སྟོང་། །ལུས་ངག་ཡིད་ཀྱི་སྤྱོད་ཡུལ་མིན། །དམིགས་མེད་ནམ་མཁའི་ཁམས་རྟོགས་པ། །རྒྱལ་བ་རྣམས་ཀྱི་ཆོས་སྐུའོ། །རྟག་ཆད་མེད་པའི་རྟེན་འབྲེལ་ནི། །སྐྱེ་འགག་མེད་པར་ཐུགས་ཆུད་པ། །ཡིད་
ཀྱི་རྣམ་ཤེས་འཇུག་ལམ་གྱིས། །བསམ་གཏན་གོམས་པས་ཤེས་པར་བྱ། །དད་པའི་ལྕགས་ཀྱུ་ཤེས་རབ་ཅན། །ལྷ་ཀླུ་འབུམ་ཕྲག་དཀར་པོའི་སེམས་དགེ་བ། །ཀུན་སློང་བྱང་ཆུབ་གཏེར་གྱི་རིན་ཆེན་ནོར། །ཐོབ་པར་འདིས་མཛོད་འཁོར་ལོས་སྒྱུར་བ་འབྱུང་། །སེམས་ཀྱི་

དབུས་གཅེས་དེ་ཕྱིར་སྤྱོད་སྤྱད་པས། །དབང་པོར་བྱ་བའི་རྒྱུད་ཀུན་ཁྱད་པར་དུ། །པདྨའི་དྲ་བ་ཕྱག་སྟོང་གིས་བརྒྱན་པར། །མྱུར་དུ་སྒྲུབ་པའི་ཐབས་མང་གསུངས་པ་རྣམས། །བསྡུས་བརྩོན་དང་བྱས་ལྡན་པས་གཅེས་སུ་བྱ། །བླ་མའི་ལུང་ཡོད་སྙིང་རྗེ་གང་ལྡན་པ། །རྒྱལ་དང་
རྒྱལ་སྲས་ཚོགས་རྣམས་ཀུན་དགྱེས་ནས། །འཇིག་རྟེན་སྐྱོང་ཚོགས་དགའ་བ་སྨོས་ཅི་དགོས། །འཕགས་པ་སྤྱན་རས་གཟིགས་དབང་ཕྱུག་གི་རྩ་བའི་རྒྱུད་ཀྱི་རྒྱལ་པོ་པདྨ་དྲ་བ་ཞེས་བྱ་བ་ལས་གཟུགས་བརྙན་འབྱུང་བའི་ལེའུ་སྟེ་ལྔ་པའོ།། །།དེ་ནས་དགའ་ལྡན་གནས་
འཁྲུངས་པ། །བསྐལ་པ་དུ་མར་ཚོགས་བསགས་པ། །རིག་པ་གསུམ་ལྡན་ལྷ་ཡི་བུ། །མཛེས་པའི་ཏོག་ཅེས་མཚན་གསོལ་པ། །སྤྱན་རས་གཟིགས་ལ་ཆེར་དད་ནས། །བཞེངས་ཏེ་ཐལ་མོ་སྦྱར་བྱས་ཤིང་། །འཁོར་ཚོགས་ཆེན་པོ་དང་བཅས་པས། །མགྲིན་གཅིག་
ཏུ་ནི་འདི་སྐད་གསོལ། །ཨོྃ་ཁམས་གསུམ་ཀུན་གྱི་བླ་མ་གཙོ། །འདྲེན་པ་མགོན་པོ་རྫོགས་སངས་རྒྱས། །ས་གསུམ་ཡེ་ཤེས་འོད་པོ་ཆེ། །བདེ་བར་གཤེགས་ལ་ཕྱག་འཚལ་ལོ། །ཡོན་ཏན་ཀུན་གྱི་འབྱུང་གནས་མཆོག །རིག་སྔགས་བདེ་ལྡན་བྱིན་བརླབས་ཅན། །
གཡུང་དྲུང་རྟག་པ་དམ་ཆོས་གཙོ། །ཀུན་རྟོག་སེལ་སྐྱོབ་ཕྱག་འཚལ་ལོ། །རྟག་པར་བརྩེ་ལྡན་སྤྱན་རས་གཟིགས། །བྱང་ཆུབ་སེམས་ཚོགས་འབྱུང་ཚོགས་རྒྱལ། །བྱ་བ་བྱས་ནས་བསྐལ་པར་གནས། །བད་འཆང་ཚོགས་ལ་ཕྱག་འཚལ་ལོ། །བསྐལ་པ་དུ་མར་
བསགས་པ་ཡི། །ཐུགས་རྗེ་ཡེ་ཤེས་ལས་བྱུང་བ། །རིག་སྔགས་ཕྲེང་བ་བྱིན་བརླབས་ཅན། །མགོན་པོ་སྤྱན་རས་གཟིགས་དབང་གིས། །སེམས་ཅན་རྣམས་ལ་ཕན་དོན་ཕྱིར། །ཕྱག་རྒྱ་ཕྲིན་ལས་ལྡན་པར་གསུངས། །ལས་ཀྱི་དྲི་མ་དང་ལྡན་ཞིང་། །ཉོན་མོངས་
བདག་རྒྱལ་ཀྱིས་བཅིངས་ནས། །ལེ་ལོ་སེར་སྣའི་འདབ་རྫབ་ཅན། །ཁུར་དང་ལྡན་པའི་སེམས་ཅན་རྣམས། །མྱུར་དུ་གྲོལ་བར་བྱ་བ་དང་། །ཐུགས་རྗེ་ཉི་མ་བཀྲམ་བྱས་ཏེ། །སྲིད་འདབ་སྟུག་པོ་སྐེམས་པ་དང་། །མྱུར་དུ་སངས་རྒྱས་འགྲུབ་བྱའི་ཕྱིར། །ལྷ་དང་གསང་སྔགས་

བླང་བ་དང་། །ཕྲིན་ལས་སྦྱོར་བ་ལྡན་བ་དང་། །བརྒྱུད་བ་རྒྱུན་གཞན་མེད་པ་ཡི། །སྦྱོར་བའི་ཚུལ་འབྱུང་བཤད་དུ་གསོལ། །རིག་སྔགས་རྗེས་གནང་མེད་པ་ནི། །བསྒྲུབས་ཀྱང་འབྲས་མེད་ངལ་པ་སྟེ། །འདྲེན་པ་མེད་པའི་ཤིང་རྟ་ནི། །འཁོར་
ལོ་བཟང་ཡང་གང་དུ་ཕྱིན། །ཉོན་མོངས་རྩ་བ་གཅད་པའི་ཕྱིར། །རིག་སྔགས་རལ་གྲི་རྣོ་དང་མཚུངས། །བདག་འཛིན་གོ་ཆ་འབིགས་པའི་མདུང་། །སྡུག་བསྔལ་མཚོ་སྐེམས་ཉི་མ་ཆེ། །ཀུན་རྟོག་རྡུལ་ཕུང་བསྲེགས་པའི་མེ། །ཤེས་རབ་མེ་ཏོག་འཁྲུངས་པའི་རླན། །
ནད་ངན་ཀུན་སེལ་སྨན་མཆོག་སྟེ། །བག་ཚོགས་སེལ་བའི་སྲེད་མེད་བུ། །བག་ཆགས་བཀྲུས་པའི་ཆུ་རྒྱུན་ཡིན། །ལོངས་སྤྱོད་འཕེལ་བའི་གཏེར་ཆེན་ཉིད། །འཁོར་བ་ལས་བརྒལ་གྲུ་གཟིངས་ཏེ། །ཉེས་པ་ཀུན་སེལ་རླུང་དང་མཆུངས། །དེ་ནས་བཅོམ་ལྡན་ཐུབ་པ་ཆེ། །
མགོན་པོ་རྫོགས་སངས་རྒྱས་ཆེན་གྱིས། །སྲབ་འཇམ་རིང་བའི་ལྗགས་བཀྲམ་ནས། །ཚངས་པའི་གསུང་སྙན་དབྱངས་ཀྱིས་གསུངས། །འགྲོ་ལ་ཐུགས་རྗེ་ཆེན་པོ་ཡི། །སྔགས་འབྱུང་བརྒྱུད་པའི་རིམ་འབྱུང་བའི། །ཆོ་ག་དམ་པ་ཉན་བརྩོན་པ། །ཤིན་ཏུ་ལེགས་སོ་ལྷ་ཡི་
བུ། །ཉམས་དགའ་དགེ་བའི་ས་ཕྱོགས་སུ། །ས་ཡི་ཆ་མཉམ་དཀྱིལ་འཁོར་ལྟར། །པདྨ་གདན་འདྲའི་དཀྱིལ་འཁོར་ནི། །ཚོན་སྣ་མ་ལུས་རྣམས་ཀྱིས་བྲིས། །མགོན་པོ་སྤྱན་རས་གཟིགས་དབང་སོགས། །སངས་རྒྱས་བྱང་ཆུབ་སེམས་དཔའ་དང་། །རིག་པའི་ལྷ་མོ་
ཁྲོ་མོར་བཅས། །འཇིག་རྟེན་སྐྱོང་སོགས་མ་ལུས་པའི། །སྐུ་འམ་ཕྱག་རྒྱ་བཀོད་པ་དང་། །མཆོད་པའི་ཚོགས་ཀྱང་བཀྲམ་པར་བྱ། །མར་མེ་ཡོན་ཆབ་བྱུག་སྤོས་དྲི། །ཞལ་ཟས་གཏོར་མ་སྣ་ཚོགས་དང་། །གཞན་ཡང་ཟས་སྐོམ་སྣ་ཚོགས་དང་། །རྒྱན་དང་ན་བཟའ་ལྷབ་
ལྷུབ་དང་། །སིལ་སྙན་མེ་ཏོག་ཕྲེང་དུ་མ། །ཡིད་འོང་མཛེས་པའི་ཚིག་གིས་བརྒྱན། །སློབ་མ་གུས་པས་བླ་མ་ལེ། །ཡོན་ཕུལ་བརྩོན་བྱས་འདི་སྐད་གསོལ། །སེམས་ཅན་ཀུན་གྱི་སེམས་ཀྱི་གཉེན། །དམུས་ལོང་ལམ་ལོག་ལས་འདྲེན་པ། །རབ་རིབ་སེལ་བའི་ཐུར་མ་ཅན། །

བདག་ལ་འདྲེན་པའི་སྒྲོལ་མ་སོགས། །ཤེས་རབ་སྙིང་རྗེའི་སྐྱ་བ་ཅན། །ཐོས་བསམ་བསྒོམ་པའི་གྲུ་གཟིངས་ཅན། །ལས་ཅན་སྡུག་བསྔལ་ཆུ་སྒྲོལ་བའི། །ཐབས་བརྩོན་ཉན་པ་ཁྱོད་ཕྱག་འཚལ། །བྱང་ཆུབ་ལམ་མཐོང་དཔག་ཡས་ཐུགས། །འགྲོ་རྣམས་ཐར་ལམ་རྟེན་གཟིགས་
པ། །དགེ་བརྩོན་དགེ་ལ་བསྐུལ་བའོ། །དགེ་བཅུ་མེད་པ་དག་ལ་སྩོལ། །དམ་ཚིག་སྡོམ་གནས་ངང་ཚུལ་བཟང་། །བག་ཡོད་དབྱངས་མཁས་ལྟུང་བ་མེད། །ཆོས་དོན་གཉེར་བའི་དོན་སྐྱབས་པོ། །སྐྱབས་དང་སྡོམ་གནས་བདག་ལ་སྩོལ། །དཔའ་བརྟན་ཞི་དུལ་སྤྱད་པ་
ཡི། །དགའ་སླད་སློབ་དཔོན་འདི་སྐད་བརྗོད། །ཨོྃ་གཏི་མུག་རྣམ་དག་བདེར་གཤེགས་ཐུགས། །རྣམ་པར་སྣང་མཛད་སྐྱབས་སུ་མཆི། །ཞེ་སྡང་རྣམ་དག་རྡོ་རྗེ་ཐུགས། །མི་བསྐྱོད་པ་ལ་སྐྱབས་སུ་མཆི། །སེར་སྣ་རྣམ་དག་ལོངས་སྤྱོད་གཏེར། །རིན་ཆེན་འབྱུང་ལྡན་སྐྱབས་
སུ་མཆི། །འདོད་ཆགས་རྣམ་དག་པདྨའི་གསུང་། །འོད་དཔག་མེད་ལ་སྐྱབས་སུ་མཆི། །ཕྲག་དོག་རྣམ་དག་ཕྲིན་ལས་རྒྱལ། །དོན་ཡོད་རྡོ་རྗེ་སྐྱབས་སུ་མཆི། །ཨཱཿགནས་མེད་མཁའ་དང་མཉམ་སྤྱོད་པ། །ཆོས་དབྱིངས་ཆོས་ལ་སྐྱབས་སུ་མཆི། །སྐྱེ་མེད་སྐྱེ་སྣང་ལྟར་
གྲུབ་ཆོས། །འཕགས་ལམ་བརྒྱད་ལ་སྐྱབས་སུ་མཆི། །དོན་གཅིག་ཚོགས་ལམ་བཅུ་གཉིས་གྲངས། །གསུང་རབ་ཡན་ལག་སྐྱབས་སུ་མཆི། །རྒྱུ་འབྲས་སྣང་བའི་སོ་སོར་རྟོག །ཉན་ཐོས་དགེ་འདུན་སྐྱབས་སུ་མཆི། །གཅིག་གམ་ཚོགས་སྤྱོད་རྫུ་འཕྲུལ་ཆེ། །རང་
རྒྱལ་དགེ་འདུན་སྐྱབས་སུ་མཆི། །སྙིང་རྗེ་ཤེས་རབ་བྱང་ཆུབ་འབྲེལ། །སེམས་ཆེན་ཚོགས་ལ་སྐྱབས་སུ་མཆི། །གསོད་དང་རྐུ་རྫུན་འཁྲིག་སྤྱོད་དང་། །ཚིག་རྩུབ་ཕྲ་མ་ངག་འཁྱལ་དང་། །བརྣབ་སེམས་གནོད་སེམས་ལོག་ལྟ་སྤྱོད། །ཐར་བའི་སྲོག་གཅོད་བཅུ་པོ་སྤོང་། །
ཆང་འཐུང་ཏིལ་མར་ཚིར་ལས་དང་། །མགར་དང་རྒྱ་སྐྱེགས་རྩྭ་ཤིང་གཅོད། །སྲོག་ཆགས་ཚོགས་དང་མགོ་ཟླུམ་ཚོང་། །མཐོ་རིས་ལུས་ཀྱི་གགས་ཆེན་སྤོང་། །རྟགས་དང་ཕྱག་རྒྱ་འདྲ་འབག་དང་། །རྟེན་དང་དགེ་འདུན་རྟགས་ཡི་གེ། །བགྲང་ཕྲེང་འཛིན་པའི་ཡོ་བྱད་སོགས། །

འགོམ་དང་བཤིག་པ་གཏན་དུ་སྤོང་། །མཆོད་པ་རྙིང་དང་སྒོག་པ་དང་། །འབགས་དང་ལྷག་མར་གྱུར་པ་དང་། །ཤ་དང་དམན་པའི་ལག་གི་ཟས། །སྲོག་ཆགས་ཡོད་པའི་ཆུ་རྣམས་སྤོང་། །དེང་ནས་བཟུང་སྟེ་ཇི་སྲིད་པ། །བྱང་ཆུབ་སྙིང་པོ་ཐུག་བར་དུ། །
སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་སོགས། །ནམ་དུ་མི་དོར་བརྟན་པོར་གཟུང་། །ལྷ་དང་སློབ་དཔོན་ཡིད་བྱེད་ཅིང་། །རྡོ་རྗེ་དྲིལ་བུ་ཕྱག་རྒྱ་གཟུང་། །འགྲོ་ལ་ཟང་ཟིང་མི་འཇིགས་སྐྱབས། །ཆོས་ཀྱི་སྦྱིན་
བ་ཅི་འབྱོར་སྩལ། །ཐེག་གསུམ་ཐ་དད་ཆོས་ཚུལ་རྣམས། །མི་འགལ་སྦྱོར་བས་རྒྱུན་དུ་སྤྱོད། །ལུས་ངག་ཡིད་དང་ལོངས་སྤྱོད་བཅས། །སེར་སྣ་མེད་པས་མཆོད་འོས་མཆོད། །ལྷ་དང་ལྷ་མིན་གསང་བ་པའི། །རིག་འབྱུང་སྐུ་གསུང་ཐུགས་ཀྱི་རྒྱ། །དེས་སྤྱོད་དམ་ཚིག་
དམ་པ་རྣམས། །སྡོམ་ཚུལ་བརྟན་པོར་གཟུང་བར་བྱ། །འགྲོ་རྣམས་ཀུན་ལ་སྙིང་བརྩེ་དང་། །ཡི་དགས་རྣམས་ལ་གཏོར་མ་སྦྱིན། །འཛམ་བྷ་ལ་ནི་ཆུ་ཡིས་མཆོད། །ཡི་དགས་དག་ཀྱང་ཆུས་མཉེས་བྱ། །རྡོ་རྗེ་སློབ་མ་རབ་དགའ་ནས། །ཅི་འབྱོར་ལྷ་དང་བླ་མ་མཆོད། །
དགའ་ཆེན་ལས་སྦྱོར་སློབ་དཔོན་དགོངས། །སྙིང་རྗེ་བདག་ལ་གཟིགས་ནས་ཀྱང་། །ལྷ་དང་སྔགས་དང་བྱིན་བརླབས་ཐབས། །དེ་བདག་བརྩེ་ཕྱིར་སྩལ་དུ་གསོལ། །རྒྱལ་བ་སྲས་བཅས་ཚོགས་བཞུགས་པའི། །ཉམས་དགའ་ཐར་པའི་གྲོང་ཁྱེར་ཆེ། །ཡིད་བཞིན་ལོངས་
སྦྱོད་ཆར་དུ་འབབ། །ཁང་ཆེན་དེར་ནི་བདག་འཇུག་འཚལ། །སྐུ་གསུང་ཐུགས་ཀྱི་རྡོ་རྗེ་ཅན། །ཟབ་མོ་སངས་རྒྱས་སྤྱོད་ཡུལ་བ། །སྤྲོས་བྲལ་དམིགས་སུ་མེད་པའི་དོན། །ལམ་ཆེན་བདག་ལ་སྩལ་དུ་གསོལ། །དེ་ནས་སློབ་དཔོན་སྔགས་རིག་པ། །དེ་ཉིད་བཅུ་སྦྱར་
མཁས་པ་བོས། །གཡོན་པས་ཆོས་གོས་རྩེ་བཟུང་སྟེ། །ལག་པ་གཡས་ཆོས་ཕྱག་རྒྱ་ཅན། །གསང་བསྟོད་འཛུམ་པའི་མདངས་འོད་རྒྱས། །དད་དང་ལྡན་པ་འདི་སྐད་བརྗོད། །ཨོྃ་བུ་ཤོག་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་ཕྱིར། །གསང་སྔགས་སྤྱོད་

ཚུལ་ཆོ་ག་རྣམས། །ཁྱོད་ལ་ངེས་པར་བསྟན་པར་བྱ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་སངས་རྒྱས་ཐམས་ཅད་ཀྱི། །རྡོ་རྗེ་གསང་སྔགས་རབ་བསྒོམས་པས། །མཚུངས་པ་མེད་པའི་ཡེ་ཤེས་རྣམས། །ཤཱཀྱ་སེང་གེ་དཔའ་བོས་ཀྱང་། །གསང་
སྔགས་སྦྱོར་བ་མཉམ་མེད་ཀྱིས། །བདུད་སྡེ་ཤིན་ཏུ་མི་བཟད་པའི། །དབུང་ཆེན་དག་ཀྱང་འདིས་བཅོམ་མོ། །འཇིག་རྟེན་རྗེས་འདུལ་རྫོགས་བྱའི་ཕྱིར། །འཁོར་ལོ་བསྐོར་ནས་མྱ་ངན་འདས། །དེ་ཕྱིར་ཀུན་ཐོབ་བྱ་བའི་ཕྱིར། །བུ་ཡིས་བློ་གྲོས་འདི་གྱིས་ཤིག །
སྔགས་དང་རྫས་ཀྱི་བསྲུང་བ་དང་། །ལྷ་ཡི་རྟེན་མིག་དེ་ལ་མཆོད། །ཨུ་དུམ་བཱ་རའི་མེ་ཏོག་ལྟར། །འཇིག་རྟེན་དུ་ནི་ཀུན་མཁྱེན་དག །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །སྔགས་ཀྱི་སྤྱོད་ཚུལ་འབྱུང་བ་ནི། །དེ་བས་ཀྱང་ནི་ཆེས་དཀོན་
ཏེ། །གང་གིས་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་དུ་མར་བསགས་པའི་སྡིག །གང་ལ་སྡིག་ཁུར་ཅི་ཡོད་པ། །ལྷ་ཡི་དཀྱིལ་འཁོར་མཐོང་བ་དང་། །བྱིན་བརླབས་ཙམ་གྱིས་བྱང་གྱུར་ནས། །བློ་གྲོས་དྲི་མ་མེད་པ་ཡིས། །སྤྱོད་
ཚུལ་བརླབས་བཞུགས་ནས་ལྷ། །ངན་འགྲོ་སྡུག་བསྔལ་རྒྱུན་བཅས་ནས། །མཚན་ལྡན་སྐུ་ནི་གཞན་དོན་སྤྱོད། །བདག་ཉིད་ཆེན་པོ་ཁྱེར་རྣམས་ཀྱིས། །རྙེད་པ་མཚུངས་མེད་དེ་རིང་རྙེད། །གང་ཕྱིར་རྒྱལ་བསྲས་བཅས་པས། །བདག་ཉིད་ཆེན་པོ་ཁྱེར་རྣམས་ནི། །གང་
དུ་སྐྱེས་ཀྱང་གཟུང་བའི་ཕྱིར། །དེང་ནས་ཁྱེད་རྣམས་ཐེག་ཆེན་རིགས། །ཤ་སྟག་ཏུ་ནི་སྐྱེ་ངེས་ཏེ། །ཐེག་པ་ཆེན་པོར་ཆེར་འབྱུང་བ། །དཔལ་དང་ལྡན་པའི་ལམ་མཆོག་འདི། །གང་དུ་རྒྱས་པར་ཁྲིད་ནས་ཀྱང་། །བདེ་བར་གཤེགས་པ་ཉིད་དུ་འགྱུར། །དེ་བས་སྤྲོ་ལ་
བརྩོན་པར་གྱིས། །སློབ་མ་ཀུ་ཤ་དགེ་བ་ཡི། །སྟན་ལ་ཉལ་ནས་རྨི་ལམ་དྲི། །བསང་དང་སྦྱང་བ་བྱས་ནས་ཀྱང་། །ཆུས་བཀྲུས་འདི་རྣམས་བཀླག་པ་དང་། །བཀྲ་ཤིས་དུ་མ་བཀླག་བྱས་ཏེ། །གདོང་པ་དར་གྱིས་བཅིངས་ནས་ཀྱང་། །འབྲས་ཀྱི་མེ་ཏོག་ཕྲེང་བ་ནི། །ལྷ་ཡི་

དཀྱིལ་འཁོར་དབུས་སུ་དོར། །སླར་བླངས་མགོ་ལ་བཅིང་བྱ་སྟེ། །པདྨ་ལྡན་རིགས་མཚན་གྱིས་བརྒྱན། །མིག་ཕྱེ་དེ་ལ་ལྷ་རྣམས་དང་། །བྱང་ཆུབ་ཕྱོགས་ཆོས་མཚན་མ་ཡི། །ཡོན་ཏན་ཡེ་ཤེས་སྟོབས་མངའ་བ། །མཆོད་རྟེན་ལྷ་ཚོགས་བཅས་
བ་བསྟན། །ཡིད་ཆེས་དད་བ་མངོན་བྱས་ལ། །ཅི་འབྱོར་པ་ཡིས་མཆོད་པར་བྱ། །དེ་ནས་དག་པའི་སྲས་དེ་ལ། །མར་མེ་ལ་ནི་མར་མེ་ལྟར། །འདོད་པའི་ལྷ་ནི་སྩལ་བར་བྱ། །བརྗོད་པ་དང་བཅས་འབྲེལ་པ་ཡིས། །རྩ་བའི་སྙིང་པོ་ཉེ་སྙིང་ཚོགས། །སྔགས་ཀྱང་གསལ་
བར་སྦྱིན་པར་བྱ། །ཞི་བ་ཤེལ་གྱི་ཕྲེང་བ་སྟེ། །རྒྱས་པ་ལ་ནི་ཨ་རུ་ར། །དཔར་ལ་ལུང་ཐང་དམར་པོ་ཤིས། །དྲག་པོ་རྭ་འམ་རུ་དྲཱཀྵ། །པོ་དེ་ཙེས་ནི་ལས་ཀུན་བྱེད། །སྔགས་བཅས་སྩལ་ནས་མགོ་ལ་བཅིང་། །ཧཱུྃ་དང་བཅས་བའི་རྡོ་རྗེ་ཡང་། །ལག་པ་གཡས་སུ་
གཞག་པར་བྱ། །སྟོད་གཡོགས་ཀྲིཥྞ་ས་རི་སྟེ། །སྨད་གཡོགས་ཁ་དོག་སྔོན་པོའོ། །དབུ་རྒྱན་རིགས་ལྔའི་ཁ་དོག་སྟེ། །ཞལ་ཟས་སྣོད་ནི་པདྨས་བརྒྱན། །སེམས་ཅན་ཀུན་དོན་སྤྱོད་པའི་རྫས། །ཐུབ་པའི་བཀྲ་ཤིས་བཞེས་པའི་རྟགས། །གདུགས་ཉ་བུམ་པ་
དཔལ་བེའུ་དང་། །རྒྱལ་མཚན་འཁོར་ལོ་པདྨ་སྩལ། །ནད་སེལ་བདེ་བྱེད་འཚོ་བའི་ཕྱིར། །འདོད་ཡོན་ཕྱོགས་རིས་གྲུབ་པའི་རྫས། །གིའུ་ཝང་དཱུ་ར་པ་ལི་ཁྲི་ཞོ། །བིལ་བ་སྦྲང་རྩི་ཨ་རུར། །ཀ་ར་བཱི་རའི་འབྲས་བུ་རྣམས། །ཧྲཱིཿཞེས་དག་བས་སྩལ་བར་བྱ། །གུར་ཀུམ་
ག་པུར་གླ་རྩི་དང་། །བ་ཡི་འོ་མས་སྦྱར་བྱས་ནས། །ཚིག་འདིས་ལྕེ་ལ་གཞག་པར་བྱ། །ཨོྃ་ཡན་གར་ངེས་པའི་ཚིག་རིག་དང་། །མིང་གི་རྣམ་གྲངས་ཆོས་རིག་དང་། །དྲི་བ་ལན་ལྡོན་སྤོབས་པ་རིག །ཕྱི་ནང་མཚན་ཉིད་དོན་རིག་ཤོག །བཛྲ་དྷརྨ་པྲ་བེ་ཤ། །ཨོྃ་བཅས་
བརྗོད་ཅིང་ལྕེ་ལ་ནི། །ལན་གསུམ་རྡོ་རྗེ་གཞག་པར་བྱ། །ཧཱིཿཡིག་དམར་པོ་མེ་འབར་བསམ། །གང་ལ་གོམས་པ་དེ་འབྱུང་ཞིང་། །གོམས་པ་གཞན་གྱི་དབང་མེད་ན། །རྟོག་པའི་འབྱུང་བ་ཆད་བའི་ཕྱིར། །ཀུན་རྟོག་ཕྱག་རྒྱ་ལ་དམིགས་བཤད། །དམིགས་པའི་རྟེན་

གྱི་སྔགས་ལ་ཡང་། བྱིན་བརླབ་ཐ་དད་འབྱུང་བར་འགྱུར། །ས་ལ་དབང་བསྐུར་ཐོབ་འདོད་པས། །ཕྱག་ན་འཁོར་ལོ་འཆང་ལ་དམིགས། །ཏིང་འཛིན་བརྟན་ལ་རྡོ་རྗེ་སྟེ། །དཔལ་ཐོབ་འདོད་པས་རིན་ཆེན་དམིགས། །གཟུགས་བཟང་འོད་པས་པདྨ་སྟེ། །སྤོབས་པ་
འདོངས་པས་རལ་གྲིའོ། །གཞན་དོན་འདོད་པས་རྒྱ་གྲམ་སྟེ། །རྡོ་རྗེ་དཀར་པོས་སེམས་གསལ་འགྱུར། །ཤེས་རབ་འདོད་པས་གླེགས་བམ་མོ། །ཁང་བཟང་གིས་ནི་མིའི་རྒྱལ་པོའོ། །ཐུབ་གཟུགས་རྟག་ཏུ་སངས་རྒྱས་འཇམ། །ཐལ་སྦྱར་བ་ནི་འགྲོ་བས་བཀུར། །
འཁར་གསིལ་བྱམས་དང་སྙིང་རྗེ་སྐྱེ། །ལྕགས་ཀྱུ་འཇིག་རྟེན་སྐྱོང་བས་བསྲུང་། །རིན་ཆེན་ཟེའུ་འབྲུ་ལྕེ་བདེར་འགྱུར། །དྲིལ་བུས་སྐད་སྙན་བྱེད་པར་འགྱུར། །བགྲང་ཕྲེང་གིས་ནི་ལུང་བསྟན་འཐོབ། །ཁྲི་རྐང་གིས་ནི་ཉེད་བང་འགྱུར། །ལྷ་སོགས་བདུག་པ་དུང་ཡིན་ཏེ། །མདུང་
རྩེ་གསུམ་པས་གཡུལ་ལས་རྒྱལ། །པདྨ་དམར་པོས་ལྷ་རུ་སྐྱེ། །རིལ་པ་སྤྲི་བླུགས་ཚངས་རིས་སྐྱེ། །སྤྲིན་མདོག་ལྔ་ནི་དྲང་སྲོང་སྐྱེ། །མེ་ལོང་གིས་ནི་ལྷ་ཞལ་མཐོང་། །པདྨ་རཱ་གས་ཡེ་ཤེས་སྐྱེ། །པདྨ་སྔོན་པོས་དག་བའི་ཞིང་། །པདྨ་དཀར་པོས་དགེ་ཚོགས་འཕེལ། །
རི་བོས་བུ་དང་བུ་མོ་འཕེལ། །དགྲ་སྟས་བདུད་ཀྱི་བར་ཆད་སེལ། །འཁོར་དང་སེམས་མཐུན་འབྲིང་གྷ་རས། །ཕུབ་ཀྱིས་དགྲ་དང་གཅན་གཟན་འཇོམས། །རྔ་ཡབ་དཀར་པོས་སྡིག་པ་འཕྱག །མེ་ཏོག་སྙེ་མས་ནད་སེལ་བྱེད། །རིན་ཆེན་མདས་ནི་ཡིད་འོང་གྲོགས། །གཞུས་
ནི་ནོར་དང་གོ་འཕང་རྙེད། །ཆུ་ཤེས་དུག་དང་ཚད་རིམས་སེལ། །མི་འཇིགས་ཕྱག་གིས་འཇིགས་སྐྲག་འཇོམས། །དགྲ་ལ་རྡོ་རྗེ་གཏུན་ཤིང་སྟེ། །རྡོ་རྗེ་ནག་པོ་བདུད་འདུལ་འགྱུར། །རིན་ཆེན་རལ་གྲིས་རིག་སྔགས་བཟློག །ལྟོ་བ་ན་ལས་ལྷུང་བཟེད་དེ། །རིམས་ནད་སེལ་
བྱེད་ཞགས་པའོ། །འབྲུ་འདོད་པས་ནི་འཕྲུའི་སྙེ་མ། །ནོར་དབྱིག་འདོད་པས་རིན་ཆེན་ཕུག །ཡང་ན་ལུང་བསྟན་འདོད་པས་ན། །མགོ་ལ་སངས་རྒྱས་དམིགས་པར་བྱ། །མངོན་པར་ཤེས་པ་ལྔ་འདོད་ན། །སངས་རྒྱས་ལྔ་པོ་དམིགས་པར་བྱ། །དེ་ནས་མགོན་པོ་སྤྱན་རས་

གཟིགས། །འཛུམ་པའི་མདངས་ཀྱིས་པདྨའི་ཞལ། །ས་ཡི་སྙིང་པོ་ལ་གཟིགས་ནས། །ས་ཡི་གོ་རིམས་འདི་གསུངས་སོ། །རིག་པ་འཛིན་པའི་རྟོག་པ་ནི། །གསང་སྔགས་ཐམས་ཅད་ས་བདུན་ཏེ། །གསང་སྔགས་ས་དང་སྔགས་སྦྱར་ས། །རིག་
འཆང་ས་དང་རིག་གསལ་ས། །རིག་མཆོག་ས་དང་རིན་ཆེན་ས། །ཕྱག་རྒྱ་ཆེན་པོའི་ས་རྣམས་སོ། །གཙུག་ཏོར་ཆེན་པོའི་སངས་རྒྱས་ས། །གནས་སྐབས་དྲུག་ཏུ་རྒྱལ་བས་གསུངས། །ཀུན་ཏུ་འོད་དང་པདྨའི་སྤྱན། །ཡི་གེ་འཁོར་ལོ་ཚོགས་ཆེན་ས། །རྡོར་འཆང་
ཡེ་ཤེས་བླ་མའི་ས། །རྫོགས་སངས་བདེ་བ་ཆེན་པོའི་ས། །སའི་སྙིང་པོས་གསོལ་པ། མགོན་པོ་འཕགས་པ་ཐུགས་རྗེའི་སྤྱན་རས་གཟིགས་དབང་ཕྱུག །བྱིན་བརླབས་ལྕགས་ཀྱུ་ལྟ་བུས་འཁོར་བའི་བཙོན་ར་ནས། །ཀླུ་ཕྱུགས་འབུམ་ཕྲག་དྲངས་ལྟར་དགེ་བ་ཀུན་
སློང་གི། །བྱང་ཆུབ་རིན་ཆེན་ས་ལ་འཇོག་མཛད་ངོ་མཚར་ཆེ། །འཕགས་པ་སྤྱན་རས་གཟིགས་དབང་ཕྱུག་གི་རྩ་བའི་རྒྱུད་ཀྱི་རྒྱལ་པོ་པདྨ་དྲ་བ་ཞེས་བྱ་བ་ལས་བྱིན་རླབས་འབྱུང་བའི་ལེའུ་སྟེ་དྲུག་པའོ།། །།དེ་ནས་ཚངས་པའི་འཇིག་རྟེན་དུ། །རབ་དགའི་
ཚུལ་དུ་འཁྲུངས་པའི་ལྷ། །ཏིང་འཛིན་ཡངས་པ་ཞེས་བྱ་བ། །རྟོགས་པ་རྒྱ་ཆེ་ཟབ་པ་ཞིག །འཁོར་དང་བཅས་པ་བཞེངས་བྱས་ཏེ། །མེ་ཏོག་རིན་ཆེན་རིགས་བྱུང་བ། །སྟོན་པའི་ཕྱོགས་སུ་ཆར་བཞིན་ཕབ། །མཁའ་ལ་གདུགས་ཀྱི་བླ་རེ་བཀང་། །འཁོར་དང་
བཅས་པས་མགྲིན་གཅིག་ཏུ། །གསང་བསྟོད་ནས་ནི་ཚིག་འདི་གསོལ། །ལག་ན་རྡོ་རྗེ་རྡོ་རྗེ་འཆང་། །རྡོ་རྗེ་ཐེག་པ་བླ་མེད་པའི། །རྡོ་རྗེ་རིག་འཛིན་མཆོག་གྲུབ་པ། །རྡོ་རྗེ་རྣལ་འབྱོར་ལས་བྱུང་ཕྱིར། །བདག་དང་སེམས་ཅན་ཀུན་ཏུ་ཡང་། །དངོས་གྲུབ་འབྱུང་རིམ་བཤད་
དུ་གསོལ། །ལ་ལ་སེམས་ནི་གཡེངས་པ་ཡིས། །བླ་མའི་རྒྱུད་དོན་བྲལ་མོད་ཀྱང་། །སྔགས་རྒྱུད་སྡིག་པ་འཆང་བྱེད་འབྱུང་། །སྙན་ཚིག་རྨོངས་རྣམས་ངོ་མཚར་སྐྱེ། །གདམས་ངག་མེད་པས་འགྲོ་བ་བསླུ། །དངོས་གྲུབ་མེད་པས་བསྟན་པ་གཞིག །སྲེད་པས་ལན་ཅིག་

སོགས་པར་འགྱུར། །གཉིས་པ་དམྱལ་ཚོགས་ངན་འགྲོར་འགྲོ། །ལ་ལ་ལས་ཀྱི་སྐྱེ་མཆེད་སྒོ། །དབང་པོ་རྟེན་ཁང་དམར་མྱུར་ལ། །གདམས་ངག་རྒྱུད་ཚུལ་ཡོད་མོད་ཀྱི། །ཆོས་ཚུལ་བཞིན་དུ་སྤྱོད་བྱེད་ཅིང་། །གང་ལ་དབང་དུ་བཟུང་བ་ཡི། །བུ་འདྲ་བས་ཀྱང་བརྙས་གྱུར་
ནས། །སྡང་བ་འཕེལ་ནས་རྩོད་པར་འགྱུར། །དེས་ཀྱང་གཉིས་ཀར་དམྱལ་སོགས་འགྲོ། །ལ་ལ་ཐོས་ཆུང་ཤེས་རབ་དམན། །རྨོངས་པ་གཞན་རྐྱེན་ང་རྒྱལ་ཅན། །བསྟན་པ་དང་ནི་འཆང་བྱེད་ལ། །སྐྱོན་སྨོད་སྨྲ་བས་དམྱལ་སོགས་འགྲོ། །ལ་ལ་མི་དགེའི་བཤེས་གཉེན་
གྱིས། །ལོག་ལམ་འཇུག་པའི་ངེས་འཛིན་ཅན། །ཡང་དག་ལམ་སྨོད་བརྩོན་པ་དོར། །ལོག་སྒྲུབ་ཅན་དེ་དམྱལ་བར་འགྲོ། །ལ་ལ་བསམ་མེད་སྔགས་བརྗོད་མེད། །མར་མེ་བདུག་སྤོས་གཏོར་མ་སོགས། །འབྱུང་པོས་བརླམས་ཏེ་བདག་ཉིད་དང་། །འཁོར་བཅས་ཚེ་ཐུང་ལོངས་
སྤྱོད་འགྲིབ། །ལ་ལ་འདོད་སྲེད་གཏུམ་རྡེབ་ཆེ། །མཁས་གཞན་དག་ལ་ཕྲག་དོག་གིས། །སྒྲོ་སྐུར་ཚུལ་འཆོས་ཆོས་ལ་དམོད། །རང་ཉིད་ལྟ་ངན་བསྒྲུབ་ལ་རྩོད། །ཐེར་ཟུག་བློ་ཡི་མུན་པ་ཅན། །འབྱུང་པོ་དྲག་པོའི་རིགས་སུ་སྐྱེ། །ལ་ལ་སེར་སྣ་རབ་འཇུག་པས། །ལྷ་དང་བླ་མ་
ཚིག་གིས་བསྟོད། །ཟས་དང་ལོངས་སྤྱོད་རྒྱན་གོས་དང་། །མེ་ཏོག་བདུག་སྤོས་གཏོར་མ་སོགས། །ཉུང་དུ་མུག་ཚུལ་རྒྱུན་སྩལ་ན། །ཟས་སྐོམ་དག་གིས་གདུངས་པ་ཡི། །ཡི་དགས་དམན་པའི་རིགས་སུ་ནི། །ཡང་ནས་ཡང་དུ་སྐྱེ་བར་ངེས། །དེ་ཕྱིར་དེ་དག་སྤངས་ནས་ནི། །
ཡ་རབས་བསམ་པ་བཟང་ལྡན་པས། །ཚུལ་བཞིན་བླངས་ཏེ་ཐོས་བསམ་གྱིས། །གཏན་ལ་ཕབ་དོན་མ་འཁྲུལ་བར། །བརྗོད་ཅིང་ཡིད་ལ་བྱེད་པ་དང་། །ཐེ་ཚོམ་མེད་པར་བརྩོན་བྱེད་པས། །འགྲོ་ཚོགས་སྒྲོལ་བྱེད་ཐབས་ཐོབ་ན། །རང་དོན་འབའ་ཞིག་སྨོས་ཅི་དགོས། །དེ་ནས་
ལག་ན་རྡོ་རྗེ་གཙོ། །ཡེ་ཤེས་མཐའ་ཡས་མངའ་བའི་སྐུས། །འགྲོ་ལ་སྙིང་བརྩེར་རབ་གཟིགས་ནས། །གསང་བའི་སྐད་ཀྱིས་འདི་སྐད་གསུང་། །ང་ལ་ཉན་པར་བརྩོན་བྱེད་པ། །ཤིན་ཏུ་ལེགས་སོ་ལྷ་ཡི་བུ། །ལྷ་དང་དངོས་གྲུབ་འབྱུང་འབྲེལ་བའི། །ཏིང་འཛིན་ང་ཡིས་བཤད་

པར་བྱ། །ཁྱོད་ཉིད་རྩེ་གཅིག་ཡིད་ཀྱིས་ནི། །ལེགས་པར་ཉོན་ལ་ཡིད་ལ་ཟུང་། །ཤིན་ཏུ་ཟབ་ཅིང་རྒྱ་ཆེ་བའི། །དམ་ཆོས་ཐོབ་པ་ཤིན་ཏུ་དཀའ། །རྒྱུན་ཆད་མེད་པའི་ཐུགས་རྗེ་ཅན། །སྤྱན་རས་གཟིགས་དབང་མགོན་པོ་གཙོ། །རང་གི་སེམས་ལ་བསྐྱེད་
པར་བྱ། །ཤིན་ཏུ་གསལ་ན་དངོས་གྲུབ་འགྱུར། །དང་པོ་སྟོང་པའི་བྱང་ཆུབ་སེམས། །གཉིས་པ་ཡི་གེ་བྱང་ཆུབ་སེམས། །གསུམ་པ་སྒྲོ་བཏགས་མིང་ཚོགས་སེམས། །བཞི་པ་གཟུགས་བརྙན་ཕྱག་རྒྱའི་སེམས། །ལྔ་པ་བྱིན་བརླབ་རྒྱས་འདེབས་སེམས། །སྒྲ་དང་བྲག་
ཆའི་ཚུལ་འབྱུང་བར། །གཙོ་བོའི་འཁོར་གྱིས་ཁྱད་པར་གསོལ། །དབུས་སུ་ཡི་གེ་ཨོྃ་ལ་སྟེ། །ཤར་དུ་ཧཱུྃ་སྟེ་ལྷོར་ནི་སྭཱ། །ནུབ་ཏུ་ཧྲཱིཿཡིག་བྱང་དུ་ཧཱ། །རིགས་ཀྱི་རིགས་ནི་ཡང་ཡང་བསྐྱེད། །ལྷ་ནི་གང་དུ་འཕོ་འགྱུར་བས། །དཀྱིལ་འཁོར་དེ་ཡི་རིགས་འབྱུང་ཡིན། །རིགས་
ཀྱི་ཕྱག་རྒྱ་དེ་ཉིད་ཀྱི། །རིག་པ་རིགས་ཀྱི་རྒྱས་འདེབས་ཤིང་། །རིགས་ཀྱི་ལྷ་ཚོགས་ཕོ་མོ་རྣམས། །ཉམས་དགའ་དབེན་པའི་ཚུལ་གྱིས་སུ། །ཕན་ཚུན་དུ་ནི་བལྟས་ནས་གནས། །ལྡེམ་བག་ན་བཟའ་འཕྱང་འཕྲུལ་དང་། །འཕུར་ལྡིང་སིལ་སྙན་རིན་ཆེན་ཚོགས། །དུ་
མའི་ཚོགས་ཀྱིས་བརྒྱན་བྱ་སྟེ། །ལ་ལ་ལྡེམ་བཞེངས་འགྱིང་དང་བཅས། །ལ་ལ་རྡོ་རྗེ་སྐྱིལ་ཀྲུང་བཅས། །ལ་ལ་པདྨའི་སྐྱིལ་ཀྲུང་སྟེ། །ལ་ལ་སེམས་དཔའི་སྐྱིལ་ཀྲུང་ཅན། །ལ་ལ་ཁྲོ་ཐབས་བརྐྱང་བསྐུམ་ཅན། །ལ་ལ་ཞལ་ཕྱག་ཞབས་ཀྱང་མང་། །ལ་ལ་ཞབས་ནི་གཉིས་
ཡིན་ཏེ། །ལ་ལ་ཞལ་གཅིག་ཕྱག་ཀྱང་གཉིས། །ལ་ལ་པད་སྡོང་པདྨ་ཅན། །ལ་ལ་པདྨ་མི་འཇིགས་ཕྱག །གུན་དྷེ་བུམ་པ་འཁར་གསིལ་དང་། །རྔ་ཡབ་ལེགས་སོ་སྐྱབས་སྦྱིན་ཕྱག །རྡོ་རྗེ་དྲིལ་བུ་མདའ་གཞུ་དང་། །འཁར་རྔ་ཤིང་རྔ་རྫ་རྔ་དུང་། །ཟངས་ལྕགས་རྡོ་དང་རུས་པའི་
རྔ། །རིང་ཟླུམ་རྐེད་ཉག་ལེབ་ཕྱལ་ཆེ། །ཆུང་ཕྲ་སྦོམ་ཡངས་དོག་པ་དང་། །རལ་གྲི་ཆུ་གྲི་གྲི་རིངས་དང་། །གྲི་ལེབ་གྲི་ཟླུམ་གྲི་ཀྱོག་དང་། །སྟ་ཟུར་སྟ་ལེབ་ཕྱལ་སྟ་དང་། །སྟ་ཆུང་གཞོག་སྟ་འབིགས་སྟ་དང་། །ཟླུམ་སྟ་འཕྲེང་སྟ་གཞར་སྟ་དང་། །མདུང་དང་མདུང་རྩེ་གསུམ་འཕེན་

མདུང་། །འཁོར་ལོ་ཁ་ཊྭཱཾ་གཏུན་ཤིང་སྐྱོགས། །སྙེ་མ་ཏིག་བུ་མེ་ཏོག་དང་། །སྡོང་བུ་ལོ་འདབ་ཡལ་ག་དང་། །བ་དན་བད་གདུགས་རྒྱལ་མཚན་སྤུངས། །རྒྱ་གྲམ་པདྨ་རིན་ཆེན་སྒྲོམ། །འཁོར་ལོ་གླེགས་བམ་ཨུཏྤལ་ལོ། །དེ་ལ་སོགས་ཏེ་མཆོག་མཐའ་ཡས། །
ཕྱག་རྒྱ་སྟོང་སྙེད་ཚང་པའམ། །བརྒྱ་རྩ་བརྒྱད་དམ་བཞི་བཅུ་དྲུག །ཉི་ཤུ་གཉིས་སམ་བཅུ་གཉིས་དྲུག །བཞི་འམ་གཉིས་སོགས་མོས་པས་འབྱུང་། །ཕྱག་རྒྱ་བཅིང་ལྡན་ཕྱག་རྒྱ་སྟེ། །དེས་ནི་ལྷ་ལ་རྒྱས་འདེབས་བྱེད། །གོམས་པའི་སྟོབས་ཀྱིས་ཕྱག་རྒྱ་ཆེ། །སེང་
གེའི་སྒྲ་ནི་སེང་གེ་ཞོན། །རྒྱལ་པོ་རོལ་པའི་སྟབས་ཚུལ་ཅན། །རྩེ་གསུམ་སྦྲུལ་དང་མི་འཇིགས་ཕྱག །པདྨ་སྡོང་བཅས་རལ་གྲི་འབར། །དཔའ་བོའི་ལྕགས་ཀྱུ་ཐོད་པ་ནི། །ནང་མ་བདུན་གྱི་ཆ་གནས་པ། །གཏུམ་པོ་དྲག་པོ་འོད་ལྡན་མ། །གཡོན་དུ་ཀླུ་ཡི་དབང་
ཕྱུག་མོ། །པདྨ་དང་ནི་ཟླ་བའི་སྟེང་། །ཕྱོགས་མདོག་སེམས་དཔའི་སྐྱིལ་ཀྲུང་ཅན། །ཡིད་བཞིན་ནོར་བུ་རྟ་ལ་བཅིབས། །ཞལ་གསུམ་ཕྱག་དྲུག་འཁོར་ལོ་དང་། །རྡོ་རྗེ་པདྨ་རིན་ཆེན་ཕྱག །སྐྱབས་གསོལ་མཆོག་སྦྱིན་ཕྱག་རྒྱ་ཅན། །འཁོར་ནི་སེམས་དཔའི་སྐྱིལ་ཀྲུང་སྟེ། །
མདོག་བཟང་སྒེག་པའི་ལྷ་མོ་ནི། །ཡིད་མྱུར་རིན་ཆེན་བཟང་མོ་དང་། །པད་རྒྱལ་མོ་དང་རྟ་རྣ་མོ། །རིན་ཆེན་པདྨ་ཟླ་ཉི་ལ། །འཁོར་ལོ་གྲོགས་ཀྱི་ཚུལ་དུའོ། །པདྨོ་འབྱུང་གནས་རྨ་བྱ་ཞོན། །ཞལ་གཅིག་ཕྱག་བཞི་ལྡེམ་བག་ཅན། །པདྨ་སྐྱབས་སྦྱིན་ལྕགས་ཀྱུ་དང་། །
རིལ་བ་སྤྱི་བླུགས་ཕྱག་ན་འཆང་། །སྒེག་མོ་ཕྲེང་མ་གླུ་གར་མ། །པད་ཟླ་སེམས་དཔའི་སྐྱིལ་ཀྲུང་ངོ་། །མི་བསྐྱོད་པ་ནི་མཁའ་ལྡིང་བཅིབས། །རལ་གྲི་པདྨ་མདའ་གཞུ་དང་། །སྐྱབས་སྦྱིན་གང་བའི་བུམ་པ་ཐོགས། །བཟང་འཛིན་མ་དང་རྣམ་སྦྱངས་མ། །ས་སྲུང་མོ་དང་རབ་
བརྟན་མོ། །དེ་དག་གང་གི་ཆ་བྱད་མཚུངས། །དོན་ཡོད་ཞགས་པ་ཀླུ་སྟེང་བཞུགས། །རིན་པོ་ཆེ་དང་ཞགས་པ་དང་། །སྐྱབས་སྦྱིན་ལྕགས་ཀྱུ་འཆང་བའོ། །སེང་གེ་མོ་དང་གླང་པོ་མ། །སྟག་གདོང་ཁྱུ་མཆོག་གདོང་ལྡན་མ། །པདྨ་ཟླ་བའི་གདན་ལའོ། །ཧ་ལ་ཧ་ལ་རུ་སྦལ་

སྟེང་། །རྡོ་རྗེ་དྲིལ་བུ་སྐྱབས་སྦྱིན་དང་། །ཆོས་ཀྱི་ཟ་མ་ཏོག་འཆང་བའོ། །ཉི་འོད་མ་དང་ཟླ་འོད་མ། །ཆུ་དབང་མོ་དང་ནོར་ཕྲེང་མོ། །དགེ་བའི་མདངས་དང་ལྡན་པའོ། །མགོན་པོ་པདྨ་རྒྱན་ལུང་ཆེ། །ཆུ་སྲིན་སྟེང་དུ་རོལ་པའི་ཚུལ། །ཌ་མ་རུ་དང་བགྲང་
ཕྲེང་དང་། །མི་འཇིགས་ཕྱག་དང་ལྕགས་སྒྲོག་གོ། །ལུ་གུ་རྒྱུད་མ་འཁོར་ལོ་མ། །གསང་བ་མོ་དང་རིང་བསྲེལ་མོ། །གླང་སོར་རྡོ་རྗེ་ཆོས་དབང་ཕྱུག །ཆོས་ཀྱི་འཁོར་ལོ་ཆོས་འཆད་རྒྱ། །སྐྱབས་སྦྱིན་པདྨ་པོ་ཏིར་བཅས། །དགའ་བ་དགའ་སྐྱེས་སྣང་བྱེད་མ། །སིལ་སྙན་
མ་རྣམས་པད་ཟླར་ནི། །ཕྱེད་ཀྲུང་ལྡེམ་བག་ཚུལ་དུའོ། །རྗེ་བཙུན་ཆོས་ཀྱི་གཙུག་ཏོར་ནི། །ཧ་རི་ཧ་རི་ཧ་རི་ཞོན། །ཞལ་གསུམ་ཕྱག་ནི་བརྒྱད་པ་ལ། །འཁོར་ལོ་རྡོ་རྗེ་མདའ་གཞུ་དང་། །པད་དཀར་བགྲང་ཕྲེང་སྐྱབས་སྦྱིན་དང་། །བདུད་རྩིས་གང་བའི་བུམ་པ་འཆང་། །
མཁའ་ལྡིང་གདོང་མ་ཤཱ་རིའི་གདོང་། །ཉི་ཞལ་ཟླ་ཞལ་ལྷ་མོའོ། །མགྲིན་སྔོ་དགའ་བོ་ཉེ་དགའི་སྟེང་། །ཞལ་གསུམ་ཕྱག་དྲུག་པདྨ་དང་། །པོ་ཏི་སྐྱབས་སྦྱིན་བགྲང་ཕྲེང་ཕྱག །སེང་གེ་གདོང་མོ་ཀླུ་ཞལ་མོ། །དགའ་བྱེད་མོ་དང་སྲོག་བྱེད་མོ། །པད་ཟླར་སེམས་དཔའི་སྐྱིལ་
ཀྲུང་ངོ་། །དབུས་སུ་མགོན་པོ་གདོང་བཅུ་གཅིག །གསང་འཛིན་མོ་དང་འཛིན་པ་མོ། །སྔགས་སྲུང་བ་དང་གྲུབ་སྲུང་མ། །གོང་ལྟར་ཆ་བྱད་ཕྱོགས་མདོག་གོ། །ཕྱོགས་བཞི་འཁོར་ལོའི་ཆ་ལ་ནི། །གཙོ་བོ་སེམས་དཔའ་བཞི་དང་བཅས། །ཤར་དུ་རྡོ་རྗེ་དབང་ཕྱུག་ནི། །
ཐོགས་མེད་ཡིད་དང་གྲུབ་དབང་ཕྱུག །རྡོ་རྗེ་ཕྱག་རྒྱ་གཏེར་སྒྲོམ་ཅན། །ཀུན་ཀྱང་པདྨ་ཟླ་བ་ལའོ། །ལྷོར་ནི་རིན་ཆེན་དབང་ཕྱུག་སྟེ། །གྲུབ་ཆེན་དབང་ཕྱུག་དང་ཕག་ཞལ། །གྲུབ་པའི་རྣལ་འབྱོར་དབང་ཕྱུག་དང་། །གྲུ་འཛིན་དབང་ཕྱུག་ཅེས་བྱའོ། །ནུབ་ཏུ་པདྨའི་དབང་
ཕྱུག་ནི། །སྐྱེས་བུ་སེང་གེའི་ཞལ་དང་ནི། །པདྨའི་ཕྱག་དང་སྦྲུལ་ནག་ཕྱག །རྩེ་བྲན་རྒྱས་འཛིན་ཞེས་བྱའོ། །བྱང་དུ་དམ་ཚིག་དབང་ཕྱུག་དང་། །འཁོར་ལོ་འཆང་དང་སྟག་ལྤགས་འཆང་། །ཀུན་གྲུབ་དབང་ཕྱུག་སྒྲ་དུང་འཕེལ། །ཕྱོགས་དང་ཕྱོགས་ཀྱི་མདོག་ཅན་ནོ། །

འཇིག་རྟེན་སྐྱོང་བ་བཅུ་པོ་དང་། །རྒྱལ་པོ་ཆེན་པོ་སྡེ་བཞི་པོ། །ཀུན་ཏུ་གྲགས་པའི་ལྷ་ཆེན་རྣམས། །བསྟན་ལ་དགའ་བ་དགོད་པར་བྱ། །འཇིག་རྟེན་འཇིག་རྟེན་འདས་དོན་དུ། །རིགས་བཟང་སྐྱེ་བ་བཞེས་དགོངས་པ། །བསྐལ་པ་བཟང་པོ་འདི་འབྱུང་བའི། །སངས་
རྒྱས་སྟོང་ཡང་དགོད་པར་བྱ། །དེ་ལྟར་རྒྱས་པར་སྤྲོས་པ་ནི། །ལྷ་རྣམས་གྲངས་ནི་རྒྱ་ཆེ་བར། །ཆིག་སྟོང་ཉིས་བརྒྱ་བཞི་བཅུ་བདུན། །འཇིག་རྟེན་འཇིག་རྟེན་འདས་པའི་ལྷ། །མགོན་པོ་གདོང་བཅུ་གཅིག་པ་ཡི། །ལྷ་གྲངས་དཀྱིལ་འཁོར་བཀོད་པའོ། །སྤྱན་རས་
གཟིགས་ཀྱི་དཀྱིལ་འཁོར་བཅུ། །འཇིག་རྟེན་དབང་གི་དཀྱིལ་འཁོར་ལྔ། །རིག་པའི་ལྷ་མོའི་དཀྱིལ་འཁོར་ལྔ། །རྡོ་རྗེ་ཁྲོ་བོའི་དཀྱིལ་འཁོར་བདུན། །དཀྱིལ་འཁོར་དེ་དག་རེ་རེ་ལ། །སེམས་ཀྱི་དཀྱིལ་འཁོར་ལྷ་མང་སྟེ། །རང་བཞིན་གྱིས་ནི་ཉི་ཤུ་ལྔ། །རྒྱུ་འབྲས་
ཚུལ་དུ་རྣམ་པ་དགུ། །ཡེ་ཤེས་ཆ་ལ་ལྔ་ཡིན་ཏེ། །ཆོས་ཉིད་ངོ་བོས་གཅིག་ཏུ་རྒྱལ། །གང་གང་མོས་པ་དེ་དང་དེའི། །དཀྱིལ་འཁོར་རྣམ་པར་སྤྲོ་བ་འམ། །གཅིག་ཏུ་མོས་པའི་སྦྱོར་བ་ཡིས། །བྱང་ཆུབ་རྡོ་རྗེ་མཆོག་ཐོབ་ནས། །ཁམས་གསུམ་རྒྱལ་པོར་ལོངས་
སྤྱོད་ཆེ། །ཆོས་ཀྱི་འཁོར་ལོ་བསྐོར་བར་འགྱུར། །གཙང་སྦྲ་ཆེ་ཞིང་དད་སེམས་ཅན། །རྩེ་གཅིག་སྒྲུབ་ལ་ནན་ཏན་སྩོལ། །བློ་བཟང་འགྲོ་ལ་འཇུག་ཅིང་སྤྱོད། །ངག་སྙན་ངང་གིས་ཁྲོ་བ་མེད། །གཡོ་སྒྱུ་འདོད་བརྐམ་གཡེང་བ་མེད། །ལུས་ངག་དལ་ཞིང་ཐོས་པ་མང་། །
ང་རྒྱལ་སེར་སྣ་ཆགས་པ་མེད། །གཏོང་ཕོད་སྙིང་རྗེ་དྲག་ལྡན་པས། །སྤྱན་རས་གཟིགས་ལ་གང་དམིགས་ནས། །དེ་ཡི་སྙིང་པོ་རྩ་སྔགས་ལ། །བར་ཆོད་མེད་པས་རབ་བརྗོད་ནས། །གཞན་ལ་ཕན་ཕྱིར་སྨོན་ལམ་བརྗོད། །སྤྱན་རས་གཟིགས་མགོན་ཕྱག་འཚལ་
ལོ། །གང་ལ་འཇིགས་པ་བརྒྱད་སྣང་ཚེ། །ཁྲོ་བོ་ཆེན་པོའི་རྫུ་འཕྲུལ་གྱིས། །དེ་དག་མྱུར་དུ་སེལ་བྱེད་ཤོག །སྤྱན་རས་གཟིགས་མགོན་ཕྱག་འཚལ་ལོ། །གང་ལ་ནད་རིམས་གང་བྱུང་ཚེ། །གསོ་དཔྱད་སྨན་དང་སྨན་པར་ནི། །བདག་ཉིད་གྱུར་ནས་མྱུར་སེལ་

ཤོག །སྤྱན་རས་གཟིགས་མགོན་ཕྱག་འཚལ་ལོ། །མུ་གེའི་ནང་དུ་བྱུང་གྱུར་ཚེ། །ཕྱོགས་གཅིག་ནས་ནི་རྣམ་གཡོས་ནས། །ཟས་སྐོམ་རྒྱུན་ཆད་མེད་པར་ཤོག །སྤྱན་རས་གཟིགས་མགོན་ཕྱག་འཚལ་ལོ། །གང་དུ་འཁྲུག་པ་ཆེ་བྱུང་ཚེ། །
རང་དབང་གིས་ནི་སེམས་གྱུར་ནས། །བདེ་བས་ཕན་ཚུན་སྡུམ་པར་ཤོག །སྤྱན་རས་གཟིགས་མགོན་ཕྱག་འཚལ་ལོ། །བྱོལ་སོང་གཅིག་ལ་གཅིག་ཟ་དང་། །ཟས་སྐོམ་དཀོན་དང་གཞན་འཇིགས་ཚེ། །དེ་དག་སེལ་བའི་སྐྱབས་གྱུར་ཅིག །སྤྱན་རས་
གཟིགས་མགོན་ཕྱག་འཚལ་ལོ། །ཡི་དགས་ཟས་སྐོམ་གདུངས་པ་དང་། །ལོག་པར་ལྟ་བའི་གནས་ཞུགས་ཚེ། །ནད་བྲལ་བདུད་རྩི་ཀུན་སྣང་ཤོག །སྤྱན་རས་གཟིགས་མགོན་ཕྱག་འཚལ་ལོ། །འགྲོ་བའི་སྐྱབས་དང་ཐབས་མཁས་དང་། །ཤེས་རབ་གྲུ་
དང་ལྡན་ནས་ཀྱང་། །ཐབས་ཀྱིས་སྡུག་བསྔལ་ལས་གྲོལ་ཤོག །སྤྱན་རས་གཟིགས་མགོན་ཕྱག་འཚལ་ལོ། །ཚུལ་ཁྲིམས་ཞགས་ལྡན་ལམ་ལ་རྟག །མྱ་ངན་འདས་པའི་རི་བོ་འཛེག །འདུས་མ་བྱས་ཀྱི་ཁྱིམ་འཇུག་ཤོག །སྤྱན་རས་གཟིགས་མགོན་ཕྱག་
འཚལ་ལོ། །ངན་སོང་གནས་རྣམས་མཐོང་ནས་ཀྱང་། །དེར་ཕྱིན་དེ་རྣམས་ཟད་པ་ཡི། །གཉེན་པོ་ས་སར་འབྱུང་བར་ཤོག །སྤྱན་རས་གཟིགས་མགོན་ཕྱག་འཚལ་ལོ། །དམྱལ་རྣམས་ཚ་གྲང་གཅད་གཏུབས་ཚེ། །གོ་ཆ་ཆེ་དང་བསིལ་གྲིབ་དང་། །དྲོད་ཀྱི་
འོད་དུ་གྱུར་པར་ཤོག །རིག་སྔགས་ཡང་ཡང་བརྗོད་པ་ཡིས། །ཡང་དག་ལམ་ཉིད་རྟོགས་པར་ཤོག །ཀུན་འབྱུང་ས་བོན་རུལ་ནས་ནི། །སྡུག་བསྔལ་ཕུང་པོ་སྐམ་པར་ཤོག །མགོན་པོ་མྱ་ངན་འདས་ཐོབ་ནས། །འཇིག་རྟེན་ཕྱོགས་བཅུར་རབ་གྲགས་
འགྱུར། །དེ་ནས་ཡང་དག་བཤད་བྱ་བ། །བསྙེན་པས་བགེགས་ཀྱི་མཐུ་བཅོམ་ནས། །དངོས་གྲུབ་མྱུར་དུ་རྙེད་བྱའི་ཕྱིར། །བསྒྲུབ་པ་ལ་ནི་བརྩོན་པར་བྱ། །ཟླ་བ་དཀར་པོའི་ཚེས་གཅིག་ནས། །ཁྲུས་བྱས་གོས་སར་གྱོན་བྱས་ནས། །སྐུ་གཟུགས་

བཟང་པོའི་མདུན་འདུག་ནས། །སྨྱུང་བར་གནས་ནས་ཉིན་གཅིག་ལ། །དུས་གསུམ་སྔགས་འདི་བརྒྱ་རྩ་བརྒྱད། །བརྗོད་ཅིང་ཅི་འབྱོར་མཆོད་པར་བྱ། །ཆོས་བརྒྱད་ཐོ་རངས་དུས་ནས་ནི། །དབེན་པར་གདན་ཁྲི་བཟང་པོ་ལ། །སྐུ་གཟུགས་ནུབ་ཏུ་གཟིགས་ནས་
གཞག །བཟའ་བཏུང་དང་ར་བས་སྦགས་པས་མཆོད། །ཨ་ཀ་རུ་དང་དུ་རུ་སྐ། །བདུག་པ་རྒྱུན་དུ་བསྲེག་པར་བྱ། །འབྲུ་དཀར་འོ་མའི་ཟས་བཟའ་ཞིང་། །ཞག་གསུམ་བཟླས་པ་ཅི་ནུས་བྱ། །དེ་ནས་ཞག་གསུམ་བར་དུ་བདག །འོ་མ་ཞོ་དང་འབྲས་ཆན་འཚལ། །
ལྷ་ལ་མཆོད་པ་ཆེར་བསྐྱེད་ནས། །བྱང་ཆུབ་ཤིང་དྲུང་སྟོང་རྩ་བརྒྱད། །དུ་རུ་སྐ་ཡི་མར་དུ་སྦང་། །དུམ་བུ་རེ་རེ་སྔགས་རེ་དང་། །བྱང་ཆུབ་སེམས་དཔའི་དྲུང་དུ་བསྲེག །ས་ཡང་གཡོ་ཞིང་སྐུ་ཡང་གཡོ། །སྟེང་ཞལ་ནས་ནི་སྙན་པའི་སྒྲ། །ལེགས་སོ་
ལེགས་སོ་རིགས་ཀྱི་བུ། །ཁྱོད་ནི་ནན་ཏན་བརྩོན་འགྲུས་ཅན། །འདོད་སྨན་དོན་གཉེར་གང་ཡིན་པ། །མཁའ་ལ་འབུར་རམ་རྐང་མགྱོགས་སམ། །དྲང་སྲོང་རིག་འཛིན་རྒྱལ་པོ་ལ། །བདག་དང་སྐལ་བ་མཉམ་འདོད་ན། །དེ་རིང་ཉིད་དུ་སྩལ་བར་བགྱི། །བཅོ་
ལྔའི་ཚེས་ལ་སྐུ་གཟུགས་དེ། །བདེ་གཤེགས་རིང་བསྲེལ་ཡོད་པ་ཡི། །མཆོད་རྟེན་ནང་ངམ་དྲུང་དུ་བཞུགས། །གསོ་སྦྱོང་བླངས་ནས་སྨྱུང་བ་ཡིས། །སྐྱ་སྣར་མེ་ཏོག་བརྒྱ་རྩ་བརྒྱད། །སྔགས་རེ་བརྗོད་པས་སྐུ་ལ་བརྡེག །དེ་ཚེ་མདུན་ཞལ་རྩ་བ་ནས། །འབྲུག་
སྒྲ་ཆེན་པོ་ལྟ་བུ་འབྱུང་། །ས་ཆེན་རབ་ཏུ་གཡོ་བར་འགྱུར། །དེ་ཆོ་བདག་ཉིད་མ་སྐྲག་པར། །སྔགས་བསྒྲུབ་རྗེས་སུ་དྲན་བྱ་སྟེ། །བྱང་ཆུབ་སེམས་དཔའ་སེམས་དཔའ་ཆེ། །མགོན་པོ་སྤྱན་རས་གཟིགས་དབང་ཕྱུག །ཐུགས་རྗེ་ཆེ་དང་ལྡན་པ་ལ། །བདག་ཉིད་
གུས་པར་ཕྱག་འཚལ་ལོ། །བདག་ནི་སེམས་ཅན་ཐམས་ཅད་ཀྱི། །མགོན་སྐྱབས་རེ་གནས་གྱུར་ནས་ཀྱང་། །འགྲོ་བ་ཀུན་གྱི་རེ་འདོད་རྣམས། །ཚུལ་བཞིན་དུ་ནི་སྐོང་བར་ཤོག །དེ་ཚེ་འདོད་པ་སྩོལ་བ་ལ། །ལྷ་ཀླུ་ཚོགས་ཀྱི་བར་ཆད་མེད། །སྔགས་ཀྱི་འདོད་དོན་

ཀུན་གྲུབ་ཡིན། །བསོད་ནམས་རྫོགས་བྱེད་སྨོན་ལམ་མོ། །ཕྱག་འཚལ་རྟེན་ལ་བསྐོར་བ་དང་། །མཆོད་རྟེན་བརྩིག་དང་དཀྱིལ་འཁོར་ནི། །རྣལ་འབྱོར་ཡན་ལག་ལས་ལྡན་པས། །བདག་དང་གཞན་གྱི་དོན་གྱི་ཕྱིར། །རྒྱུན་ཆད་མེད་པར་བརྩོན་པ་ན། །
དགེ་བྱེད་སྨོན་ལམ་རྒྱས་པ་ནི། །དེ་དག་མྱུར་དུ་འབྱུང་བར་འགྱུར། །དེ་ཕྱིར་སྨོན་ལམ་མཆོག་ཏུ་བཤད། །གང་ལ་དགེ་སྤྱོད་གཡེལ་བ་ཡི། །ལེ་ལོ་ཅན་ནི་བདུད་བཟུང་ནས། །གྱ་ཚོམ་སྨྲ་ཞིང་ཆོས་ལ་སྨོད། །བསྟན་པ་འཇིག་པར་བྱེད་པར་འགྱུར། །དེ་ཕྱིར་དམངས་
རིགས་གདོལ་པ་ཅན། །ལོག་སྤྱོད་ཅན་ནི་རིང་དུ་སོང་། །སེར་སྣ་ལེ་ལོ་ང་རྒྱལ་ཅན། །བག་མེད་གཡེང་དང་བཅས་པ་ནི། །བདུད་ཀྱི་འཆིང་ལམ་ལོག་ལམ་པ། །ཞུགས་དང་སྤར་ལ་གཏང་བར་བྱ། །འཕགས་པ་སྤྱན་རས་གཟིགས་དབང་ཕྱུག་གི་རྩ་བའི་རྒྱུད་ཀྱི་
རྒྱལ་པོ་པདྨ་དྲ་བ་ཞེས་བྱ་བ་ལས་དངོས་གྲུབ་འབྱུང་བའི་ལེའུ་སྟེ་བདུན་པའོ།། །།དེ་ནས་ནད་དང་གནོད་པ་སོགས། །སྔགས་བརྗོད་ཙམ་གྱིས་བསལ་བར་བཤད། །ནད་གདོན་གང་དང་གང་ལ་ཡང་། །སྔགས་པས་དྲག་ཏུ་གསལ་བཏབ་ལ། །རང་གིས་རྩེ་
གཅིག་སེམས་ཀྱིས་བཟླ། །དང་པོར་སྙིང་རྗེར་བཅས་པ་ཡི། །སྔགས་ཀྱིས་ནད་དང་གདོན་ལས་གྲོལ། །དེ་ཚེ་མཆོད་ལ་བརྩོན་པར་བྱ། །སྨྱོ་ནད་ཉིན་རེ་ལྡང་བ་དང་། །ཉིན་གཉིས་པ་འམ་ཉིན་གསུམ་པ། །ཉིན་བཞི་ཉིན་བདུན་ལྡང་བའི་རིམས། །འབྱུང་པོ་མཁའ་
འགྲོ་ཤ་ཟ་འམ། །སྨྱོ་བྱེད་བརྗེད་བྱེད་ལུས་སྲུལ་པོ། །འདྲེ་གདོན་དྲག་པོས་བགྱིད་མོད་ཀྱང་། །བརྒྱ་རྩ་བརྒྱད་ཀྱིས་སེལ་བར་འགྱུར། །ཡང་ན་སྲད་བུ་ཁ་དོག་ལྔ། །མདུད་རེ་སྔགས་རེ་བརྒྱ་རྩ་བརྒྱད། །མདུད་ལྡན་མགུལ་ལམ་དཔུང་པར་གདགས། །ཁ་ན་མ་
ཐོ་བསགས་པ་ཡི། །སྒྲིབ་ཀུན་ཞི་ཞིང་བྱང་འགྱུར་ན། །བགེགས་སོགས་ནད་ལྟ་སྨོས་ཅི་དགོས། །བདེ་རླབས་བསམ་གྱིས་མི་ཁྱབ་པོ། །སྐྲངས་དང་འབྲས་ཀྱི་ཕྲེང་བ་དང་། །ཤུ་བ་ཕོལ་མིག་རྨ་མཛེ་དང་། །མེ་དཔལ་ལྷོག་པ་གཡན་ལ་སོགས། །མ་རུངས་

པ་ཡི་ནད་རྣམས་དང་། །རལ་གྲི་མདའ་མདུང་ལ་སོགས་པས། །མྱོས་སམ་དེ་ཡིས་ཉེན་པ་དང་། །སྦྲུལ་དང་སྡིག་པ་རྩངས་པ་དང་། །བུང་བ་མཆུ་རྣོན་ལ་སོགས་པ། །གདུག་པ་རྣམས་ལ་ལན་བདུན་དང་། །བརྒྱ་རྩ་བརྒྱད་དང་སྟོང་དུ་བརྗོད། །ཡང་ན་ས་སེར་
འཇིམ་པས་བྱུགས། །དེ་ཡིས་ནད་ལས་གྲོལ་བར་ངེས། །བགེགས་སམ་རླུང་ལ་སོགས་པ་ཡི། །གཞོགས་གཅིག་ཕྱོགས་སུ་ནད་ལངས་སམ། །རྣ་བ་འོན་ནམ་སྣ་སུབ་ན། །བརྒྱ་རྩ་བརྒྱད་དུ་བཟླས་པའམ། །འབྲུ་མར་ཞོ་དང་རུ་རྟ་དང་། །ལན་བདུན་བརྗོད་ནས་
སྐུ་བྱུག་དང་། །ཟོས་ཤིང་རྣ་བ་སྣར་བྱུགས་ནས། །སོས་པར་འགྱུར་བར་ཐེ་ཚོམ་མེད། །དེ་ནས་བྱང་ཆུབ་སེམས་དཔའ་ཆེ། །ཉི་འོད་ཀྱིས་ཀྱང་རིག་སྔགས་འཆང་། །བསྲུང་དང་ལམ་འགྲོ་བསྐྱབ་པའི་ཕྱིར། །བྱིན་བརླབས་ལྡན་པའི་ཚིག་འདི་གསུངས། །ན་མོ་
བུད་དྷཱ་ཡ་གུ་ར་བེ། ན་མོ་དྷརྨཱ་ཡ་ཏྭ་ཡི་ནི། །ན་མཿསང་གྷཱ་ཡ་མ་ཧཱ་ཏེ། ཏྲི་བྷྱོ་པི་སྭཱ་ཧཱ་ནཱ་མ། ཉིན་མཚན་དུས་སུ་འདི་བརྗོད་པས། །སྡིག་ཀུན་བྱང་ཞིང་ནད་རྣམས་ཞི། །ལམ་དུ་བགེགས་བདུད་མི་ཕྲད་ཅིང་། །རྟག་ཏུ་སེམས་དགའ་དམ་པས་འཐོབ། །བྱང་ཆུབ་སེམས་དཔའ་
ཟླ་འོད་ཀྱང་། །བསྲུང་བའི་དོན་དུ་སྔགས་འདི་གསུངས། །ཤ་མ་ཏ་ཧེ་རུ་ཤ་ཧོ། །ཨཱཛྙཱ་པ་ཏེ། སུ་རུ་ཏེ། ཤཾ་ཀེ་ཊེ། བ་ར་མ་བྱ་ཏེ། སུ་རུ་ཊེ། ཀཱ་ལ་ཊ་ཏེ། ཁི་མ་ཏེ་སྭཱ་ཧཱ། ཚོན་སྣ་ལྔ་ཡི་སྐུད་པ་ལ། །བདུན་བཟླས་མདུད་པ་ཉི་ཤུ་གཅིག །ན་སར་བཏགས་ན་ནད་སེལ་
འགྱུར། །གཞན་ཡང་ཡོན་ཏན་གྲངས་མེད་འཐོབ། །སྦྲུལ་གྱི་རྨ་ནི་སྒོ་ཕྱེ་ལ། །བདུན་བཟླས་རྨ་ཁར་བཏབ་ན་སོས། །སེང་གེ་སྟག་གཟིག་དོམ་དྲེད་ཀྱི། །པགས་ལ་ཉི་ཤུ་རྩ་གཅིག་བསྔགས། །བརྗོད་ནས་གྲ་ཁྲིམས་ཅན་ལ་བསྐོན། །དེ་མ་ཐག་ཏུ་རིམས་སེལ་
འགྱུར། །བློ་བུར་གདོན་གྱིས་ཉེན་པ་ལ། །ལན་བདུན་བརྗོད་པའི་གུ་གུལ་བདུག །ལྡོང་རོས་ཡུངས་ཀར་ལན་ཚྭ་དཀར། །སྦྱར་ནས་ཉི་ཤུ་རྩ་གཅིག་བརྗོད། །ནད་པའི་མལ་བཞག་ནས་བདུགས་ན། །འབྱུང་པོ་འབྲོས་ཏེ་ནད་ལས་གྲོལ། །ཏིལ་མར་ནང་དུ་རུ་རྟ་བཙོས། །

བྱུགས་པས་གཞོགས་ནད་རྣ་ནད་དང་། །ཞ་གྲུམ་མྱུར་དུ་སེལ་བར་བྱེད། །ཡང་ན་རྩི་མར་ཉིད་ལ་བྱ། །ཏིལ་མར་ལྟེ་བར་བསྐུས་པ་ཡིས། །མྱུར་དུ་བུ་ཐོན་འགྱུར་བར་ངེས། །ལྕིམ་རྩས་ཤ་མ་ཐོན་པར་ངེས། །དུ་རུ་ཀ་དང་སྦྱི་མོང་སྦྱར། །སྙིང་ནད་དྲག་པོ་
སེལ་བར་འགྱུར། །བ་རོག་མོ་ཡི་ལྕི་དྲོན་གྱིས། །རྨ་ཁར་བསླན་ན་མེས་ཚིག་སོས། །སྲིན་བུ་རིང་མོ་སྙིང་ལ་ཟ། །རྟ་དཀར་གཅིན་ལ་ཁྱོར་གང་འཐུང་། །དེས་ནི་སྲོག་ཆགས་བུད་པར་འགྱུར། །འབྲས་ལ་རམས་ཀྱི་ལོ་མ་ཡི། །ཁུ་བ་བསྐོལ་བས་བྱུག་པར་
བྱ། །བོང་བུའི་རྟུག་པ་གསར་པ་བཅིར། །ཉལ་ཀར་མིག་ཏུ་བླུགས་ན་སོས། །མཚན་མ་སྐྲངས་ལ་སྐུད་དཀར་རོ། །དེ་ཀུ་ཉི་ཤུ་རྩ་གཅིག་བཟླས། །བརྒྱ་རྩ་བརྒྱད་བརྗོད་ཤུ་དག་དཀར། །དཔུང་པར་བཏགས་པས་གཡུལ་ལས་རྒྱལ། །ཕུག་རོན་རིལ་མ་ཉི་ཤུ་
བརྒྱད། །བཟླས་བཅས་བསྐུས་པས་ལྕགས་སྒྲོག་དང་། །ཤིང་སྒྲོག་ལ་སོགས་གྲོལ་བར་ངེས། །ཐལ་བའམ་ཕྱེ་མ་ལ་ནི་སྔགས། །སྟོང་བཟླས་མེ་ཏོག་སྲིན་བུ་གྲོལ། །གདོན་དང་ཡམས་ནད་བཟློག་པ་ལ། །དྲི་བཟང་ཆུ་ལ་བཟླས་ནས་བཀྲུས། །བུ་མེད་
བུ་འདོད་དོན་དུ་ནི། །སྟོང་བཟླས་བ་མར་བཏུང་བར་བྱ། །བྱི་བ་སྦྲུལ་དང་རུ་སྦལ་ཤ། །ཕྱེ་མ་གཏོར་ན་ཕྱུགས་རྣམས་རེངས། །མར་ག་ནི་དང་ཤུ་དག་དང་། །ལྒ་དང་གོ་སྙོད་སྦྲང་རྩི་སྦྱར། །སྔགས་འདི་ཡིས་ནི་ཤེས་རབ་འཕེལ། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱཱ་
བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཁཱ་ཧི་ཁཱ་ཧི། བ་ལི་ཏེ་སྭཱ་ཧཱ། ན་མོ་རཏྣ་ཏྲ་ཡཱ་ཡ། །ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་པདྨེ་ཕུ། མ་ཧཱ་པདྨེ་ཕུ། པདྨ་ལོ་ཙ་ནེ་ཕུ།
ཨ་མོ་གྷ་བེ་ཏེ། ན་མོ་ཨ་དོ་ཏ་ཀུ་ཏཱ་ཡ། ས་ར་ས་ར། གཙྪ་གཙྪ། ཨི་མཾ་མ་ཀྵི་རོ་གཾ་ནཱ་ཤ་ཡ་སྭཱ་ཧཱ། ཉི་ཤུ་རྩ་གཅིག་བཟླས་ནས་ཀྱང་། །ཐལ་བས་མིག་ནི་ཕྱི་རོལ་བསྐུ། །མིག་ནད་ཐམས་ཅད་འཇོམས་པར་འགྱུར། །སྐུད་པ་དཀར་པོ་མདུད་པ་བདུན། །སྔགས་བདུན་

བཟླས་པས་རྣ་བ་ཡི། །ནད་རྣམས་ཐམས་ཅད་འཇོམས་པར་བྱེད། །གུར་གུམ་ཀ་ར་ཆ་མཉམ་པས། །སྣ་ཡི་ནད་ནི་སེལ་བར་བྱེད། །ཨ་རུ་ར་ཡི་ཕྱེ་མ་དང་། །སྦྲང་རྩི་བསྲེས་པའི་འདག་པས་ནི། །སོ་ཡི་ནད་དང་ལྕེ་ཡི་ནད། །ཐམས་ཅད་འཇོམས་པར་ཤེས་པར་བྱ། །
ཨོྃ་ཧཱུྃ་ཤྲཱི་ཧཱུྃ་ཤུ་ཀྵེ་ཕུ། །ཉི་ཤུ་རྩ་གཅིག་ཆུ་ལ་བཟླ། །འཐུངས་པས་མ་ཞུའི་གནོད་པ་སེལ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་རཏྣ་ཤེ། མ་ཧཱ་ཙཎྜ་ཨ་སུ་ར་མརྟ་ཀ །ཛྭཱ་ལ་ཛྭཱ་ལ། ཙྪིན་ད་
ཙྪིན་ད། ཧུ་རུ་ཧུ་རུ། ཀི་རི་ཀི་རི། ཧ་ན་ཧ་ན། སརྦ་ཛྭ་རེཾ་རུ་དྲ་ཀ །བན་དྷེ་ན། མཱ་ར་ཡ་མཱ་ར་ཡ། སརྦ་གྲ་ཧྃ་སྭཱ་ཧཱ། སྔགས་འདི་མཚལ་གྱིས་བྲིས་ནས་ཀྱང་། །མགུལ་དུ་བཏགས་ན་ནད་རྣམས་སེལ། །གཞན་ཡང་རྩ་བའི་སྔགས་གང་གིས། །ལས་རྣམས་དེ་དང་དེ་ལ་སྦྱར། །
སྦྲང་བུ་སྲིན་བུ་སྦྲུལ་ལྷོག་པ། །གཡེན་པ་ཤུ་བ་སྐེ་ནད་ལ། །སྦྲང་རྩི་པི་པི་ལིང་གིས་བྱུག །གང་ཞིག་བརྩོན་དུ་ཞུགས་པ་ལ། །ཉི་ཤུ་རྩ་གཅིག་བཟླས་པ་ལ། །ཙནྡན་ལྡེ་གུ་སྙིང་གར་བྱུག །གང་གིས་མིག་ནད་སེལ་བ་ལ། །ཤིང་དངར་ཆུ་འམ་སྤོས་ཆུ་འམ། །ལ་ལ་
ཤ་ཡི་ཁུ་ཡིས་བྱ། །རྣ་བ་ལ་ནི་ཏིལ་མར་གྱིས། །གཞན་གྱི་ཡི་གེ་གསལ་བ་དང་། །འཐབ་མོ་ཤགས་འགྱེད་འགྱུར་བའི་ཚེ། །བུམ་པ་ཆུ་ཡིས་གདོང་པ་བཀྲུ། །གང་ཡང་བྱིས་པ་བསྲུང་བ་ནི། །སེང་ལྡེང་ཕུར་བུ་སོར་བཞི་པ། །པདྨ་གར་གྱི་དབང་ཕྱུག་དང་། །དོན་
ཡོད་ཞགས་པའི་སྔགས་རིང་དག །སྟོང་རྩ་བརྒྱད་དུ་བཟླས་བཏགས་ན། །ཚེ་རིང་ཉིད་དུ་བདེ་བར་སྤྱོད། །བ་ལང་རྭ་དང་པོ་སོ་འཆའ། །ཤིང་ཀུན་དུང་སྦྲུལ་པགས་པ་དང་། །རས་བ་ལས་བོན་དྲུང་པོ་དང་། །དེ་བཞིན་དུ་ནི་སེར་པོ་གཉིས། །ནས་ཀྱི་ཕུབ་མ་གཡེངས་པའི་
སྐྲ། །བྱི་ལའི་རྟུག་པ་བྲི་ཧ་ཏི། །ཤུག་པ་བྱ་རོག་སྒོང་དང་། །བ་ལང་རྨིག་པ་ན་ལེ་ཤམ། །ད་ད་ར་དང་ལྷན་ཅིག་སྦྱར། །དེ་རྣམས་བསྲེས་པའི་དུད་པ་ཡིས། །བགེགས་རྣམས་སེལ་ཕྱིར་དུ་དྲ་ཡི། །དུད་པ་བཅུ་དྲུག་ཞེས་བྱ་བའོ། །པུ་ཤེལ་ཙེ་དང་བ་བླ་དང་། །བཙན་

དུག་གི་ནི་སྦྲུལ་ཤུན་གྱིས། །བདུགས་ན་རིམས་ནད་ཐམས་ཅད་སེལ། །ནད་གཞན་དག་ཀྱང་སེལ་བར་བྱེད། །བ་ལང་ལྕི་བའི་ཁུ་བར་ནི། །སོ་མ་ར་ཛའི་ཕྱེ་མ་གདབ། །ཡི་གེ་ཧྲཱིཿཡིས་བྱིན་བརླབས་ནས། །མགྲིན་པ་སྔོན་པོའི་རྩ་བའི་སྔགས། །བརྒྱ་རྩ་
བརྒྱད་བརྗོད་འཐུངས་པས་ནི། །དུག་དང་རིམས་ནད་སེལ་བར་བྱེད། །སྐྱེར་པ་བསྐོལ་བའི་ཁུ་བར་ནི། །སོ་མར་ཛའི་ཕྱེ་མར་སྦྱར། །རིལ་བུ་རྒྱ་སྲན་ཙམ་གྱི་ཚད། །ཡིད་བཞིན་ནོར་བུའི་སྔགས་བརྗོད་ནས། །ཟོས་པ་ཙམ་གྱིས་དུག་རིགས་རྣམས། །ཟོས་ཀྱང་
ལུས་ལ་གནོད་པ་མེད། །འོ་མར་ཡུངས་པ་སྲང་གཅིག་བསྐོལ། །སོ་མ་ར་ཛ་བླུགས་ཏེ་བླུད། །སོ་སོ་འཆང་ལ་ཧ་ལའི་སྔགས། །བརྒྱ་རྩ་བརྒྱད་སྔགས་གྲངས་ཚང་བ། །བརྗོད་དེ་བླུད་ན་སྐྱུགས་ནས་ནི། །དུག་གིས་ཚུགས་པར་མི་འགྱུར་རོ། །ཁྱིམ་གྱི་དུད་པ་རྒྱམ་ཚྭ་དང་། །
སྐྱེ་དུ་དམར་རྩ་ལོ་མར་བཅས། །ཕྱེ་མ་མར་སར་སྦྲང་རྩི་བཅས། །ཧ་རི་ཆེན་པོ་རྩ་བའི་སྔགས། །བརྒྱ་རྩ་བརྒྱད་ཀྱིས་བཏུང་བར་བྱ། །སྦྲུལ་ནད་ཐམས་ཅད་སེལ་བར་བྱེད། །ཤུ་དག་རུ་རྟ་ཨ་ག་རུ། །ཡུང་བ་བོང་དང་དཀར་པོ་རྣམས། །དོན་ཡོད་ཞགས་པའི་སྔགས་ཀྱིས་མཉེ། །
བྱུགས་པས་དུག་རྣམས་ཐམས་ཅད་སེལ། །རྒྱམ་ཚ་སྲང་གང་མར་སྲང་གཉིས། །གཅིན་སྲང་བརྒྱད་དང་ལྷན་ཅིག་བསྐོལ། །རྡོ་རྗེ་ཆོས་ཀྱི་སྔགས་ཀྱིས་འཐུངས། །དུག་ནད་ཐམས་ཅད་སེལ་བར་བྱེད། །རྒྱམ་ཚ་ཚྭ་གསུམ་མར་སྲང་བཞི། །སྦྱར་ཏེ་མི་ཤོལ་སྔགས་
བརྗོད་ནས། །བྱུགས་ན་རེག་པ་ཙམ་གྱིས་ནི། །སྡིག་པ་སྦྲུལ་གྱིས་ཟིན་པ་སེལ། །ཀུ་མ་རི་དང་སེར་པོ་གཉིས། །ལྕིམ་རྩ་མྱང་ཚྭ་སྤར་བཅས་ལ། །གར་དབང་སྔགས་དང་ཆུ་ཡིས་བཏུང་། །དུག་ནད་ཐམས་ཅད་སེལ་བར་བྱེད། །སེར་པོ་གཉིས་དང་ལྡོང་
རོས་དང་། །གོ་ཐལ་གུར་གུམ་ལེ་བརྒན་རྩི། །པདྨ་རྒྱན་ལུང་བསྔགས་ཀྱི་བཏུང་། །དབྱིག་དུག་ཐམས་ཅད་འཇོམས་པར་བྱེད། །གང་ལ་གཟའ་དང་རྒྱ་སྐར་གྱི། །འཚེ་བ་བྱུང་ན་དེ་བསལ་ཕྱིར། །པདྨ་འདབ་བརྒྱད་མཎྜལ་གྱི། །ཕྱོགས་དང་ཕྱོགས་མཚམས་དབུས་

རྣམས་སུ། །མགོན་པོ་འཇམ་པའི་རྡོ་རྗེ་ནི། །མཁའ་ལྡིང་གཟུགས་སུ་འགྱུར་བ་ལ། །སྤྱན་རས་གཟིགས་དབང་བཅུ་གཅིག་གིས། །གུས་པའི་ཚུལ་དུ་མཆོད་བྱེད་བཀོད། །ཉི་མ་ཟླ་བ་ལག་འཛིན་པའི། །ཁྱབ་འཇུག་གིས་ནི་བྱི་བའི་གཟུགས། །མནན་པའི་
མཁའ་ལྡིང་མིག་སྨན་མདོག །ནོར་རྒྱས་བུ་གཉིས་ལྷ་ཡི་གཟུགས། །མིག་གསུམ་ལྡན་པ་བརྗིད་པའི་ལུས། །རིན་ཆེན་ལྔ་ཡི་སྡེར་གཤོག་ཅན། །རྡོ་རྗེ་མཆུ་རྣོ་ཁྲོ་དང་བཅས། །ཉི་མ་བྱེ་བས་བརྒྱན་པའི་འོད། །སྙིང་གར་ཉི་མ་འོད་འབར་ལ། །གཾ་ཡིག་ནག་པོ་
སྔགས་ཀྱིས་བསྐུལ། །སྦུ་རྣམས་ཟིངས་ཀྱིས་གྱུར་ནས་ཀྱང་། །ཕྱོགས་བཅུར་རྡོ་རྗེ་ཁྱབ་པར་འཕྲོ། །གཟའ་དང་རྒྱུ་སྐར་མོག་བྱས་ཏེ། །གདོན་དང་ཀླུ་རྣམས་སྲེག་པར་བྱེད། །ཐུགས་རྗེ་མི་བཤོལ་བ་ཡི་སྔགས། །འབྲུག་སྒྲ་ལྟ་བུར་གསལ་བར་བརྗོད། །གང་ཡང་
གྲངས་མེད་སྟོང་ཕྲག་ནི། །ལས་རྣམས་ཐམས་ཅད་སྔགས་འདིས་འགྲུབ། །མཁའ་ལྡིང་དཀར་པོ་བརྗིད་པའི་ལུས། །ཀླུ་ཡི་གདོན་ལས་སྦྱར་བར་བྱ། །དེ་ལ་མགྲིན་པ་སྔོན་པོ་ཡི། །རྩ་བའི་སྔགས་ཀྱིས་བསྐུལ་བས་ནི། །ས་སྟེང་གཏུམ་པོ་ཀླུ་ཡི་གདོན། །དུ་མ་ངེས་པར་
སེལ་བར་བྱེད། །ཀླུ་དང་ཚངས་པའི་སྲིན་པོ་བསྲེག །འགྲོ་ལ་མཛེ་ནད་གཏོང་བར་བྱེད། །མཁའ་ལྡིང་དམར་པོ་སྦྲུལ་ཟ་མ། །མེ་ཏོག་ཐོད་པ་ཁ་ཊྭཱཾ་ག། །གཡོན་ན་འཆང་སྟེ་གཡས་པ་ན། །རལ་གྲི་མེ་འོད་འབར་བ་འཆང་། །མགོན་པོ་སེང་གེའི་སྒྲས་བསྐུལ་ནས། །དཔའ་
རླབས་བསྐལ་བའི་མེ་དང་མཉམ། །སྦྲུལ་དང་རིན་ཆེན་དབྱུག་ཐོ་ཅན། །མཁའ་ལྡིང་ཤ་ཟའི་གདོན་ལ་ནི། །མགོན་པོ་ཧ་རའི་སྔགས་ཀྱིས་བསྐུལ། །མཁའ་འགྲོའི་གདོན་ལ་མཁའ་ལྡིང་ནི། །ལྗང་གུ་རལ་གྲི་ཕུར་པ་འཆང་། །པདྨ་རལ་གྲི་སྔགས་ཀྱིས་བསྐུལ། །ལས་
རྣམས་གང་དང་གང་ལ་ཡང་། །སྔགས་དང་ཕྱག་རྒྱ་ལྡན་སྦྱོར་བའོ། །ཅི་ལྟར་མོས་ཏེ་ཕྱག་རྒྱར་བཅས། །ལུས་ཀྱི་ཕྱག་རྒྱ་སེམས་ཀྱི་རྒྱ། །ངོ་བོ་ཉིད་ཀྱིས་མཚོན་པ་ཡི། །སྔགས་དང་ཕྱག་རྒྱས་རྒྱས་འདེབས་འགྱུར། །ད་ནི་ཕྱག་རྒྱ་བཤད་པར་བྱ། །སྐུ་ཡི་མདུན་དུ་ལངས་ནས་

ཀྱང་། །རྐང་པ་གཡས་པ་ཡིད་ཙམ་བསྐུལ། །ལག་གཉིས་སོ་སོར་ཐུར་དུ་བརྐྱང་། །གུང་སྲིན་སོ་སོར་མཐིལ་དུ་བཀུག །མཐེབ་མཛུབ་དག་ནི་སོ་སོར་བརྐྱང་། །གྲུ་ཁུག་ལག་མཐིལ་མདུན་དུ་བསྟན། །འགྲོ་འམ་འདུག་ཀྱང་དགྲ་དཔུང་ལས། །རྒྱལ་
ཕྱིར་སྔགས་འདི་བརྗོད་པར་བྱ། །ན་མོ་རཏྣ་ཏྲ་ཡཱ་ཡ། །ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀུ་རུ་ཎི་ཀཱ་ཡ། ཏདྱ་ཐཱ། ཨོྃ་ཨ་བ་ཏེ་པ་ར་ཏེ། ཨེ་ཧྱེ་ཧི་སྭཱ་ཧཱ། ཡང་ན་སྔོན་ལྟར་ལུས་བསྲང་སྟེ། །སྙིང་གར་ཐལ་སྦྱར་སྤྲོ་བ་བསྣོལ། །མཛུབ་མོ་གཉིས་
སྦྲེངས་རྩེ་མོ་སྤྲད། །མཐེབ་གཉིས་མཛུབ་ཚིགས་དང་པོར་བཀུག །ལག་མཐིལ་ཅུང་ཟད་མ་རེག་པ། །གཟུངས་སྔགས་གང་བརྗོད་ཕྱག་བྱའོ། །བགེགས་ཀྱི་འཚེ་བ་འབྱུང་བའི་ཚེ། །སྔགས་དང་ཕྱག་རྒྱ་འདིས་བསལ་བྱ། །ན་མོ་རཏྣ་ཏྲ་ཡཱ་ཡ། །ན་མ་ཨཱརྱཱ་བ་ལོ་ཀི་ཏེ་
ཤྭ་རཱ་ཡ། བོ་དྷི་ས་ཏྭཱ་ཡ མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་སརྦ་དྷརྨཱ་ཎི་མཎྜ་ལཱ་ཡ། ཨེ་ཧྱེ་ཧི་པ་ར་མ་ཤུདྡྷ་སཏྭཱ་ཡ་སྭཱ་ཧཱ། ཡང་ན་སྒོམ་ལ་འཇུག་པས་ནི། །ཐོག་མར་ཕྱག་རྒྱ་འདི་བཅིང་ངོ་། །བུས་བཙུགས་སྤྱི་བོར་ཐལ་མོ་སྦྱར། །མཛུབ་གཉིས་བཀུག་ལ་
རྩེ་སྤྲད་ནས། །དེ་ལ་མཐེབ་གཉིས་སྦྱར་བར་བྱ། །འདི་ནི་བདུད་ལས་རྒྱལ་བར་ངེས། །ཡང་ན་ལག་གཉིས་རྒྱབ་སྤྲད་ནས། །སོར་མོ་རྩེ་རྣམས་རེག་པར་བྱ། །མཐེབ་གཉིས་བརྐྱང་ནས་མཛུབ་ནང་སྦྱར། །སྨིན་མཚམས་སུ་ནི་གཞག་པར་བྱ། །ན་མོ་རཏྣ་ཏྲ་ཡཱ་ཡ། ནམ་
ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་སརྦ་དུཥྚ་ན་མོ་བཛྲཱ་ཡ་མེ་སྭཱ་ཧཱ། ཁྱད་པར་དུ་ནི་ལྷ་མཐོང་འགྱུར། །ཡང་ན་འགྲེང་སྟེ་མཉམ་གཞག་རྒྱ། །སྙིང་གར་བཞག་ལ་སྔགས་འདི་བརྗོད། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་
ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་སརྦ་དེ་བ་ཨ་ན་ལེ་སྭཱ་ཧཱ། གློ་བུར་རྩོད་པ་རྒྱལ་བྱེད་ཡིན། །ཡང་ནི་འགྲེང་སྟེ་རྟིང་པ་སྤྲད། །ལག་གཉིས་འཇིགས་བྱེད་ཚུལ་དུ་བྱ། །རྩ་སྔགས་གང་རུང་བརྗོད་པས་ནི། །ཏིང་འཛིན་ཡན་ལག་བརྟན་པར་

འགྱུར། །ཡང་ན་པདྨ་རྒྱན་ལུང་གི། །རྩ་བའི་སྔགས་ཀྱི་ཕྱག་རྒྱའོ། །ལག་གཉིས་ཐལ་སྦྱར་སྲིན་ལག་གིས། །མཐེ་བོའི་སེན་མོ་མནན་བྱས་ཏེ། །མཐེའུ་ཆུང་རྩེ་མོའི་གུང་མོ་སྤྲང་། །གཤེགས་སུ་གསོལ་བའི་ཕྱག་རྒྱ་སྟེ། །དགུག་ན་མཛུབ་རྩེ་བསྐུལ་ཞིང་དགུག །
ཡང་ན་གཡས་པའི་མཛུབ་མོ་དགུག །གཡོན་པ་སླར་བཏང་བྱ་བའོ། །ན་མོ་རཏྣ་ཏྲ་ཡཱ་ཡ། ནམ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་བྲཧྨ་ཨེ་ཧྱེ་ཧི་སྭཱ་ཧཱ། ཡང་ན་སོར་རྩེ་རྣམས་བསྐྱེད་ན། །མཛུབ་མོ་གཡབ་ལ་ལྷ་ཆེན་
རྣམས། །ཡང་ན་ཕྱག་རྒྱ་འདི་བཅས་ལ། །ཉི་ཟླ་གཟའ་བཟུང་དུས་སུ་ནི། །གཟུངས་སྔགས་བ་མར་ལ་བཟླས་ན། །ཕྱག་རྒྱ་བཏབ་ནས་ཟོས་པས་ནི། །ཤེས་རབ་འཕེལ་དང་ཚེ་འཕེལ་འགྱུར། །ནད་མེད་གཟུགས་བཟང་འཐོབ་པར་ངེས། །འགྲང་སྟེ་རྐང་གཤིབས་ཐལ་
སྦྱར་ནས། །མཐེབ་གཉིས་ལག་པའི་ནང་བཀུག་པ། །སྙིང་གར་གཞག་བྱ་སྤྱན་རས་གཟིགས། །ཡིད་བཞིན་ནོར་བུའི་འཁོར་ལོའི་རྒྱ། །མཆོད་སོགས་ལས་ཀྱི་སྡོན་འགྲོ་བའོ། །དེ་བཞིན་སྡིག་བཤགས་ལ་ཡང་ངོ་། །མཛུབ་བཀུག་མཐེ་བོ་སེན་མོར་བཅས། །ལག་གཉིས་
རྒྱབ་སྤྲད་གར་དབང་རྒྱ། །ཐལ་སྦྱར་མཐེབ་མཛུབ་སོ་སོར་བརྐྱང་། །མགྲིན་པ་སྔོན་པོའི་ཕྱག་རྒྱའོ། །མཛུབ་མོ་གཉིས་བཀུག་ལྷག་མ་བརྐྱང་། །མི་བཤོལ་བ་ཡི་ཕྱག་རྒྱའོ། །ལག་གཉིས་རྒྱབ་སྤྲད་མཐེབ་གཉིས་བརྐྱང་། །བདུག་པ་བཟང་ལ་སྔགས་འདི་བཟླས། །ན་མོ་
རཏྣ་ཏྲ་ཡཱ་ཡ། ནམ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ན་མོ་རཏྣ་ཤ་རི་ཙནྡྲ་ཨ་ལཾ་ཀཱ་ར་མརྒ་ཏེ་ཛ་སུ་པྲ་ཙ་ཀ་བི་ཤ་རཱ་ཛཱ་ཡ། ཏདྱ་ཐཱ། ཨོྃ་རཏྣེ་རཏྣེ། ཏ་ཏ་ཤ་རཏྣ། ཏ་ཏ་ཤ་རཏྣ་པྲི་ཏེ་མ་ཧེ་རཏྣེ་པྲ་བྷ་ཏེ། རཏྣ་གརྦྷེ་སྭཱ་ཧཱ། སྔ་བར་བརྒྱ་རྩ་བརྒྱད་
བརྗོད་དོ། །ནོར་ཡང་ཐོབ་པའི་གཏེར་རྙེད་འགྱུར། །འགྲོ་གཞན་བདག་ལ་བྱམས་འདོད་ན། །སོ་ཤིང་ལ་ནི་ཉི་ཤུ་གཅིག །ལྡོབ་སྐྱེན་འདོད་པ་ཤུ་དག་ལ། །སྟོང་རྩ་བརྒྱད་བཟླས་སྙིང་གར་བསྐུ། །གང་བཤད་ཕྱག་རྒྱ་དང་བཅས་པས། །གདུག་པའི་སྔགས་འདིས་བགེགས་

ཀྱང་འབྲོས། །ན་མཿསརྦ་བུད་དྷ་དྷརྨ་སཾ་གྷཱ་ཡ། ན་མོ་རཏྣ་ཏྲ་ཡཱ་ཡ། ནམ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ན་མོ་བཛྲ་པཱ་ཎི་སྱ། ཏདྱ་ཐཱ། ཨོྃ་ཧུ་པི་ཧུ་པི། ཀ་པ་དུ་པི། པྲ་གཱ་ཡ་ནི་སྭཱ་ཧཱ། རྣམ་གྲངས་བདུག་
པས་སངས་རྒྱས་བདུག །ལྷ་རྣམས་དག་ཀྱང་མཆོད་པར་བྱ། །ཡན་ལག་གཡས་པའི་མཐེ་བོ་ནི། །ལག་མཐིལ་བཞག་ནས་སོར་མོས་དགབ། །རྣ་ལྟག་ཕྱར་ནས་མཛུབ་མོ་ནི། །བརྐྱང་བསྐུམ་བསྐུལ་བས་སྤྲོ་བ་དང་། །གཡོན་པ་མི་འཇིགས་ཕྱག་རྒྱ་སྟེ། །དུས་མ་ཡིན་
པར་འཆི་སོགས་བཟློག །ལག་གཉིས་ཐལ་མོ་སྦྱར་ནས་ཀྱང་། །སོར་མོ་བསྣོལ་ཏེ་བཀོད་པ་ལས། །མཐེ་བོང་མཐེའུ་ཆུང་སོ་སོར་ནི། །སྤྲད་དེ་སྤྲད་པ་ཤེས་རབ་རྒྱ། །ཨོཾ་སརྦ་སཾ་ཤོ་དྷ་ནི་སྭཱ་ཧཱ། དེ་བཞིན་བསྣོལ་ཏེ་བཀན་པ་ཡི། །གུང་གཉིས་ནང་དུ་གཤིབས་བསྒྲེང་བ། །
མར་མེའི་རྒྱ་སྟེ་སྔགས་འདིའོ། ཨོྃ་དཱི་པ་ཏ་ལོ་ཙ་ན་སྭཱ་ཧཱ། དེ་ཉིད་སྦུབས་ནས་གུང་མོ་གཉིས། །རྩེ་སྤྲད་སྦྲེངས་པ་བདུག་སྤོས་སོ། །ཨོཾ་དྷཱུ་པ་དྷ་ཏ་སྭཱ་ཧཱ། རྟིང་སྤྲད་སོ་སོ་རྩེངས་སར་དགུག །བྱུག་པའི་ཚུལ་ནི་བྱུག་པའི་རྒྱ། ཨོྃ་དྷ་ལེ་བེ་ཏྱ་སྭཱ་ཧཱ། རྟིང་སྤྲད་སོར་མོ་གྱེན་དུ་
བགྲོད། །ཞལ་ནས་འཐོར་ཚུལ་བཤོས་ཀྱི་རྒྱ། །ཨོྃ་ནཻ་བི་དྱི་པྲོ་ཀྵ་ཏཾ་སྭཱ་ཧཱ། ལག་གཉིས་བཀུག་ནས་རྩེ་བརྒྱད་སྤྲད། །མཐེ་བོང་གྱེན་དུ་ཡན་པ་ནི། །ན་བཟའ་དམ་པའི་ཕྱག་རྒྱའོ། །ཨོྃ་བྷཱ་ས་ར་ཎི་སྭཱ་ཧཱ། སྙིམ་པ་ཁ་ཕྱེ་བཏེག་པའི་ཚུལ། །རོ་མ་སྩལ་པའི་ཕྱག་རྒྱའོ། །
ཨོྃ་ཨཱྃ་ཀྲཱུྃ་ཧྲཱིཿ ས་ཀ་ལ་གྷ་ན་པ་རི་ཝ་རེ་ནཾ། པ་རི་ཀེ་ར་ཨ་ཨ། ཨ་པ་ཏ་རཾ་ཏེ། ཨ་བ་ཏ་རཾ་ཏེ། ཨ་པ་ཏ་རྃ་ཏུ། ད་ཤ་དི་ཀ་ལོ་ཀ་པཱ་ལ། ས་པ་རི་ཝ་རེ་བྷྱཿཨི་དཾ་བ་ལིཾ་གྲྀཧྞནྟུ་ཁཱ་དཾ་ཏུ། པི་བནྟུ། ཡ་ཐཻ་བྃ་ཡ་ཐེ་ཥྚཾ། ཛཿཧཱུྃ་བཾ་ཧོཿ། སཾ་ཏྲྀ་བྷཱ་སརྦ་སཏྭཱ་ནི། ཤཱནྟིཾ་ཀུ་རུ། པུཥྚིཾ་ཀུ་རུ།
བ་ཤྃ་ཀུ་རུ། ཨཱ་བ་ར་ཎ་ཀུ་རུ་གུཔྟི། ཀ་རོ་ཏ་ཀུརྦཱནྙུ། ཧཱུྃ་ཧཱུྃ་ཕཊ། ཨཱརྱཱ་བ་ལོ་ཀི་ཏེ་ཤྭ་ར་སྱ། ཨཱ་ཛྙཱ་པ་ཡ་ཏི་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱཱ་ནུད་པནྣ་ཏྭཱ་ཏ་ཨོྃ་ཨཱཿཧཱུྃ་ཕཊ་སྭཱ་ཧཱ། ཨོྃ་ཧྲཱི་ཛཾ་བྷ་ལ་ཛ་ལེན་དྲཱ་ཡ་སྭཱ་ཧཱ། ལོངས་སྤྱོད་རྟག་ཕྱིར་གནོད་གནས་ལ། །ཆུ་གཙང་རྟག་ཏུ་

སྦྱིན་པར་བྱ། །ཨོཾ་ཨཱཿཧྲཱིཿལོ་ཀེ་ཤྭ་ར་ཧུ་ནུ་སྨྲྀ་ཏི་ཀ་རཱ་ཡ་སྭཱ་ཧཱ། ཡི་དགས་རྣམས་ལ་སྲ་ར་ཟས། །ཅི་ཕྱིར་ཆུ་དང་བཅས་པ་སྩལ། །རྣལ་འབྱོར་ལྡན་པའི་རྣལ་འབྱོར་གྲོགས། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་ཡི་དགས་ཀུན་བརྩོན་འགྱུར། །སེམས་ཀྱི་ལྕགས་
ཀྱུ་ལྡན་བྱ་སྟེ། །ཉོན་མོངས་སེམས་ལ་རབ་དྲངས་ཏེ། །ལྷ་ཀླུ་འབུམ་ཕྲག་སེམས་དགའ་བའི། །ཀུན་སློང་བྱང་ཆུབ་རིན་ཆེན་གྱི། །ལས་ལ་བསྒྱུར་བའི་ལྷག་བསམ་བསྐྱེད། །མཛད་པ་རྒྱ་ཆེ་ཀུན་གྲུབ་འགྱུར། །འཕགས་པ་སྤྱན་རས་གཟིགས་དབང་ཕྱུག་གི་རྩ་བའི་
རྒྱུད་ཀྱི་རྒྱལ་པོ་པདྨ་དྲ་བ་ཞེས་བྱ་བའི་རྒྱུད་ལས་སྔགས་ཀྱི་སྦྱོར་བའི་ལེའུ་སྟེ་བརྒྱད་པའོ།། །།དེ་ནས་འཁོར་གྱི་དཀྱིལ་འཁོར་ནས། །བྱང་ཆུབ་སེམས་དཔའ་སེམས་དཔའ་ཆེ། །ཉི་མའི་སྙིང་པོ་ཞེས་བྱ་བ། །འཁོར་གྱི་ཚོགས་དང་བཙས་པ་ཞིག །མཆོད་པའི་བཀོད་
པ་ཆེན་པོ་དང་། །བསྟོད་པའི་དབྱངས་དང་བཅས་པ་ཡིས། །བཅོམ་ལྡན་འདས་ལ་མཆོད་པར་བྱས། །བསྐོར་བ་དུ་མ་བྱས་ནས་ཀྱང་། །ཕྱག་འཚལ་གསང་བསྟོད་ཕྱོགས་གཅིག་འཁོད། །པུས་བཙུགས་ཐལ་སྦྱར་འདི་སྐད་གསོལ། །མགོན་པོ་ཡོན་ཏན་ཀུན་
གྱི་རྒྱལ། །ཡེ་ཤེས་རྨད་ཀྱི་འབྱུང་གནས་གཙོ། །ཐར་པའི་ལམ་ཆེན་ཉི་ཤར་རྒྱལ། །འདྲེན་པ་རྒྱ་མཚོ་ཕྱག་འཚལ་ལོ། །མཚན་དཔེ་མཐར་ཐུག་མེད་པའི་སྐུ། །གཟི་བརྗིད་རྒྱ་ཆེ་མཁའ་ཁྱབ་ལ། །བློ་གྲོས་ཡངས་པའི་ནམ་མཁའ་ཅན། །སྐུ་ཡི་གསང་བ་
ཕྱག་འཚལ་ལོ། །ཚངས་དབྱངས་དུ་མ་བསམ་མི་ཁྱབ། །ནམ་མཁའ་ཡངས་པའི་མཐའ་བཀང་ནས། །ཚད་མེད་ཡན་ལག་བཅུ་གཉིས་བྱུང་། །གསུང་གི་གསང་བ་ཕྱག་འཚལ་ལོ། །ཏིང་འཛིན་རྣམ་ཐར་བསམ་གཏན་སྒོ། །བསམ་ཡས་བསམ་དུ་
མེད་བསམ་པས། །བསམ་མི་ཁྱབ་པའི་ཤེས་རབ་དང་། །ཐུགས་རྗེའི་ཐུགས་ལ་ཕྱག་འཚལ་ལོ། །འགྲོ་བའི་ཉོན་མོངས་འཆིང་གཅོད་པའི། །མ་རིག་གཡུལ་ལས་རྒྱལ་བྱེད་པ། །ཀུན་རྟོག་དྲ་བ་སེལ་བ་ཡི། །སྒྲོན་མ་དེ་རིང་བཤད་དུ་གསོལ། །བྱིས་རྣམས་མུན་

པའི་འོབས་སུ་ལྟུང་། །ཉན་ཐོས་འདོད་ཆགས་ཚོགས་ཀྱིས་སྐྲག །རང་རྒྱལ་གསང་བའི་བཟོད་དང་ལྡན། །བྱང་ཆུབ་སེམས་དཔའ་འཆིང་བས་འཇིགས། །ཉོན་མོངས་མངའ་བདག་གསང་སྔགས་ལ། །ཤེས་རབ་སྙིང་རྗེའི་སྦྱོར་བ་ཡིས། །བག་ཆགས་
བཅས་པ་གཏན་སྤོང་བའི། །ཐབས་མཆོག་དུ་མ་བཤད་དུ་གསོལ། །དེ་ནས་བཅོམ་ལྡན་ཐུབ་པ་ཆེ། །འོད་ཟེར་ཕྱོགས་བཅུར་རྒྱས་བྱས་ནས། །ཚངས་པའི་དབྱངས་ཆེན་གསུང་སྙན་པས། །ནམ་མཁའི་ཁམས་ཆེན་རབ་བཀང་ནས། །ཤེས་རབ་
སྙིང་རྗེར་འབྲེལ་བ་ཡི། །སྦྱོར་བའི་ཆོ་ག་དུ་མ་རྣམས། །བསྡུས་པའི་དོན་དུ་བྱས་པ་འདི། །ཉི་མའི་སྙིང་པོ་ཉན་པ་ནི། །ལེགས་སོ་བྱང་ཆུབ་སེམས་དཔའ་ཆེ། །དཔལ་དང་ལྡན་པ་ཁྱོད་ལེགས་སོ། །རྩེ་གཅིག་གུས་དང་བཅས་པ་ཡི། །སེམས་ཀྱིས་
ལེགས་ཉོན་ཡིད་ལ་ཟུང་། །ཉམས་དགའ་བདེ་བའི་ས་ཕྱོགས་སུ། །ཤིན་ཏུ་དགའ་བའི་ས་ལས་ནི། །དཀྱིལ་འཁོར་གྲུ་བཞི་ལྷམ་པ་བྱ། །གྲུ་བཞི་སྒོ་བཞི་རྟ་བབས་བཅས། །ཤར་རམ་ལྷོ་ཡི་སྒོ་གཏོད་བྱ། །དཀར་པོ་སེར་པོ་དམར་པོ་དང་། །ལྗང་གུའི་
ཚོན་གྱིས་བྲི་བར་བྱ། །དབུས་སུ་པདྨ་འདབ་བརྒྱད་པ། །དཀར་པོའི་ལྟེ་བ་འཚམ་བར་དམར། །མུ་ཁྱུད་གཉིས་དང་ལྡན་པའོ། །གསེར་དངུལ་ཟངས་སམ་ས་ཉིད་ལ། །བུམ་པ་ལྟོ་ཡངས་མགྲིན་པ་ཕྲ། །ཁ་གཡེལ་ཞབས་ཚོད་ཞུམ་པ་ལ། །ཤིན་ཏུ་གཙང་
མར་བཀྲུས་ནས་ཀྱང་། །ག་པུར་གུར་གུམ་ཅུ་གང་དང་། །གླ་རྩི་གིའུ་ཝང་ཆུ་ཡིས་བཀང་། །བྱ་གྲི་སེང་གྲི་ཧ་ས་དེར། །ཀ་རི་ཀར་ནི་དེ་བ་ཀོ། །ནས་འབྲས་ཏིལ་གྲོ་མོན་སྲན་དང་། །གསེར་དངུལ་བྱི་རུ་མུ་ཏིག་དང་། །མན་ཤེལ་ཡིན་ཏེ་རིན་ཆེན་ལྔ། །བུམ་པར་
སྩལ་ནས་རས་དཀར་གྱིས། །མགུལ་བ་བཅིངས་ནས་ཁ་རྒྱན་ཡང་། །དྲི་ཞིམ་ཤིང་ལོ་མེ་ཏོག་གཞག །མེ་ཏོག་ཕྲེང་དང་བཅས་པ་དེ། །པདྨའི་དབུས་སུ་བཞག་ནས་ཀྱང་། །རྒྱ་མཚོ་ཆེན་པོར་འཁྲུགས་པ་ནས། །དཔག་བསམ་ཤིང་ཆེན་འབྲས་བུར་བཅས། །འཇིག་

རྟེན་དབང་གིས་གང་བ་ཡི། །སྔགས་ཀྱང་མཐའ་ཡས་ཁྱབ་དམིགས་ནས། །སྔགས་ཀྱི་མཐུ་ཡིས་སངས་རྒྱས་ནས། །དགོངས་པ་རྒྱ་ཆེན་སྐྱེས་གྱུར་ཏེ། །ལེགས་སོ་བཀྲ་ཤིས་འབབ་པར་འགྱུར། །རྒྱལ་སྲས་རྣམས་དང་རིག་པ་ཡི། །ལྷ་མོ་ཚོགས་དང་གླུ་ལེན་
དང་། །བཀྲ་ཤིས་དུ་མ་བརྗོད་པར་འགྱུར། །དེ་ཚེ་མཁའ་ལ་ཡེ་ཤེས་ཀྱི། །འོད་ཟེར་བྱེ་བ་ཕྲག་བརྒྱ་ཡིས། །ཤིང་ཆེན་ཡོངས་སུ་སྨིན་པ་ལས། །བདུད་རྩི་ཆར་ཆེན་འབེབས་པར་འགྱུར། །འཇིག་རྟེན་སྐྱོང་ལ་གཏོར་མ་སྦྱིན། །རྒྱལ་དང་རྒྱལ་སྲས་མཆོད་པར་
བྱ། །སྐར་མ་ལ་སོགས་འབབ་པའམ། །ཚེས་གཅིག་ནས་ནི་ཉ་ཡི་བར། །སྔགས་ཀྱི་ཕྲེང་བ་བརྗོད་པར་བྱ། །ལྷ་ལ་ཡང་ཡང་བསྐོར་བར་བྱ། །ལས་རྣམས་གང་དང་གང་ལ་ཡང་། །ལྷ་ཡི་དབང་གྱུར་སྦྱར་བར་བྱ། །དེ་དང་དེ་ནི་ལས་རྣམས་ལ། །ཅི་བདེ་བར་ཡང་
སྦྱར་བར་བྱ། །ཕྲན་ཚེགས་ལས་ལ་སྤྱན་མའི་སྔགས། །ལྷོག་པ་འབྲུམ་བུ་ལ་སོགས་ལ། །མི་བཤོལ་བ་ཡི་སྔགས་ཀྱིས་སྦྱར། །གདོན་རིགས་བཟློག་ལ་གར་དབང་སྟེ། །བྱད་སྟེམས་རིག་སྔགས་བཟློག་པ་ལ། །དོན་ཡོད་ཞགས་པའི་སྔགས་ཀྱིས་བཀྲུ། །ཤེས་
རབ་འཕེལ་བ་རྡོ་རྗེ་ཆོས། །ཀླུ་ནད་ཧ་ལ་ཧ་ལས་སེལ། །ཚེ་འཕེལ་པདྨ་རྒྱན་ལུང་སྟེ། །མགྲིན་སྔོན་སྔགས་ཀྱིས་དཔལ་འཕེལ་བྱེད། །ཧ་རི་ཆེན་པོ་བདུག་སྤོས་ཏེ། །གདོང་བཅུ་གཅིག་པས་གློ་བུར་སེལ། །སེང་གེ་སྒྲས་ནི་མཛེ་ནད་སེལ། །རྣལ་འབྱོར་ཡོ་བྱད་
འདོད་པས་ནི། །ཡིད་བཞིན་ནོར་བུའི་སྔགས་ཀྱིས་བཀྲུ། །བཀྲ་ཤིས་རོལ་མོ་དུ་མ་དང་། །གཙང་སྦྲ་གོས་གསར་ལྡན་པ་ཡིས། །སྙན་པའི་གདངས་དང་ལྡན་པས་བཀྲུ། །མྱུར་དུ་སྒྲིབ་པ་འབྱང་བ་དང་། །འདོད་ཡོན་ཀུན་གྲུབ་སྔགས་ཕྲེང་ནི། །གང་དང་གང་ཡང་
སྦྱར་བར་འགྱུར། །ཕྲན་ཚེགས་གཞན་ལྟ་སྨོས་ཅི་དགོས། །ཟླ་བ་གཟས་བཟུང་གྱུར་པའི་ཚེ། །མར་སྲང་གཅིག་ནི་དངུལ་སྣོད་གཞུག །སྐུ་གཟུགས་མདུན་བཞག་སྔགས་བརྗོད་ནས། །ཟླ་བ་སོས་ནས་མར་བླངས་ཏེ། །ཟོས་སམ་ལུས་ལ་བྱུགས་པ་ཡིས། །ནད་

རྣམས་ཞི་ཞིང་བདེ་བར་འགྱུར། །ལྡོང་རོས་གིའུ་ཝང་ཆ་མཉམ་པས། །སྐུ་ཡི་མདུན་བཞག་སྔགས་སྟོང་བཟླ། །ཆུས་སྤྲུས་དཔྲལ་བར་ཐིག་ལེ་ནི། །ཁམས་གསུམ་མཐོང་ཞིང་འདོད་གསུམ་འགྲུབ། །ཆུ་དྲོན་སྦྱར་ནས་ལུས་བཀྲུས་ན། །ནད་དང་བགེགས་
རྣམས་དག་པར་འགྱུར། །བསེ་འབྲས་ལ་ནི་བརྒྱ་རྩ་བརྒྱད། །བཟླས་ནས་ཁྲོ་ཞལ་གཡས་ལ་བྱུག