Kinh tạng Tây Tạng (Kangyur Đại Học) — 091_རྒྱུད་འབུམ།_བ

་ཕྲག་འབུམ་
གྱི་བྱེ་མ་སྙེད་དག་ཚིམ་པར་བྱས་པར་འགྱུར་ཏེ། ཡི་དགས་དང་། བྲམ་ཟེའི་དྲང་སྲོང་རེ་རེ་ལ་ཟས་དང་སྐོམ་ཡུལ་མ་ག་དྷཱའི་བྲེ་བོ་བདུན་བདུན་བྱིན་པར་འགྱུར་རོ། །དེ་ནི་ང་སྔོན་བྲམ་ཟེར་གྱུར་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་དབང་
ཕྱུག་དང་། དེ་བཞིན་གཤེགས་པ་འཇིག་རྟེན་དབང་ཕྱུག་འོད་ལས་ངས་བཟུང་སྟེ། དེས་ཡི་དགས་དང་བྲམ་ཟེའི་དྲང་སྲོང་གྲངས་སུ་བགྲང་བ་མང་བ་དང་། ཆེས་མང་བ་དག་ངས་ཟས་དང་སྐོམ་གྱིས་ཚིམ་པར་བྱས་ཏེ། དེ་དག་ཐམས་ཅད་ཡི་དགས་ཀྱི་འཇིག་རྟེན་ནས་

ཤི་འཕོས་ནས་ལྷའི་འཇིག་རྟེན་དུ་སྐྱེས་སོ། །ཀུན་དགའ་བོ་ཁྱོད་ཀྱིས་ཟུང་ལ་ངོ་ལོན་གྱིས་ཤིག །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཀུན་དགའ་བོ་འདིས་ཡི་དགས་ཀྱི་གཏོར་མ་ལ་ལན་བདུན་བཟླས་བརྗོད་བྱས་ནས་ལག་པ་བརྐྱངས་ཏེ་སྒོ་དྲུང་དུ་
སྦྱིན་པར་བྱའོ། །སེ་གོལ་ཡང་བརྡབ་པར་བྱའོ། །དེ་ལྟར་བྱས་ནས་བྱིན་མ་ཐག་ཏུ་ཕྱོགས་བཞིའི་ཡི་དགས་གང་གཱའི་ཀླུང་བྱེ་བ་ཁྲག་ཁྲིག་འབུམ་ཕྲག་གི་བྱེ་མ་སྙེད་དག་ཚིམ་པར་བྱས་པར་འགྱུར་ཏེ། ཡི་དགས་རེ་རེ་ལ་ཡང་ཡུལ་མ་གདྷཱའི་བྲེ་བོ་བདུན་བདུན་བྱིན་པར་
འགྱུར་རོ། །དེ་དག་ཟོས་པ་ཙམ་གྱིས་ཡི་དགས་ཀྱི་འཇིག་རྟེན་ནས་ཤི་འཕོས་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཀུན་དགའ་བོ་ཁྱོད་ཀྱིས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ལ་རྟག་ཏུ་རྒྱུན་མི་འཆད་པར་བོར་ཟུག་
ཏུ་བསྙད་པར་བྱའོ། །དེ་ལྟར་བྱས་ན་བསོད་ནམས་ཀྱི་ཕུང་པོ་དང་ལྡན་པར་འགྱུར་ཏེ། ཚེ་ཡང་རིང་བར་འགྱུར་རོ། །དེ་བཞིན་གཤེགས་པ་བྱེ་བ་ཕྲག་འབུམ་གྱི་བསོད་ནམས་ཀྱི་ཕུང་པོ་དང་ལྡན་པར་འགྱུར་རོ། །རྟག་ཏུ་མི་མ་ཡིན་པ་རྒྱུ་བ་འབྱུང་པོ་དང་། ཤ་ཟ་དང་།
གྲུལ་བུམ་ལ་སོགས་པ་དང་། གནོད་སྦྱིན་དང་། སྲིན་པོ་དང་། གདོན་དང་། ཡི་དགས་རྣམས་ཀྱིས་མི་མཐོང་བར་འགྱུར་རོ། །སྟོབས་དང་། བརྩོན་འགྲུས་དང་ཡང་ལྡན་པར་འགྱུར་རོ། །གཟུགས་དང་ལྡན་པ་དང་། གཟི་བརྗིད་དང་ལྡན་པ་དང་། དྲན་པ་དང་
ལྡན་པར་ཡང་འགྱུར་རོ། །བྲམ་ཟེའི་དྲང་སྲོང་ཚིམ་པར་བྱེད་འདོད་པ་དེས་ནི་མཆོད་ཡོན་དང་། དབུལ་བར་བྱ་བ་དང་། སྣོད་བཀང་བ་ལ་ལན་བདུན་བཟླས་བརྗོད་བྱས་ལ་འབབ་ཆུ་ག་ལ་ཡོད་པའི་གནས་དེར་སྦྱིན་པར་བྱའོ། །དེ་ལྟར་བྱས་ནས་བྲམ་ཟེའི་དྲང་སྲོང་གང་གཱའི་
ཀླུང་བྱེ་བ་ཁྲག་ཁྲིག་འབུམ་ཕྲག་དུ་མའི་བྱེ་མ་སྙེད་དག་ལྷའི་བཟའ་བ་དང་། བཏུང་བ་རྣམས་ཀྱིས་ཚིམ་པར་བྱས་པར་འགྱུར་རོ། །བྲམ་ཟེའི་དྲང་སྲོང་དེ་དག་ཀྱང་དབང་པོ་ཚིམ་པར་འགྱུར་ཏེ། དེ་དག་ཐམས་ཅད་ཀྱིས་ཨོཾ་བདེ་ལེགས་སུ་གྱུར་ཅིག་ཅེས་བྱ་བའི་སྒྲ་འབྱིན་

པར་བྱེད་ལ། སེམས་ཅན་དེ་དག་ཀྱང་བསམ་པ་ཡོངས་སུ་དག་པར་འགྱུར་ཏེ། བྲམ་ཟེའི་གཟི་བརྗིད་དང་ལྡན་པར་འགྱུར་རོ། །རྟག་ཏུ་ཚངས་པར་སྤྱོད་པར་ཡང་འགྱུར་རོ། །དེ་བཞིན་གཤེགས་པ་གང་གཱའི་ཀླུང་བྱེ་བ་ཁྲག་ཁྲིག་ཕྲག་འབུམ་གྱི་བྱེ་མ་སྙེད་དག་གི་
དགེ་བའི་རྩ་བ་དང་ལྡན་པར་ཡང་འགྱུར་རོ། །རྟག་ཏུ་དགྲ་ཐམས་ཅད་ཤིག་པར་འགྱུར་རོ། །མེ་ཏོག་གམ། བདུག་པའམ། སྤོས་སམ། ཟས་དང་། སྐོམ་གྱི་ཡོ་བྱད་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ། སངས་རྒྱས་དང་ཆོས་དང་དགེ་འདུན་ལ་དབུལ་བར་བྱའོ། །
དེ་ལྟར་བྱས་ན་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་མ་དེས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་གི་སངས་རྒྱས་དང་ཆོས་དང་དགེ་འདུན་ལ་ལྷའི་མཆོད་པ་དང་དེ་བཞིན་གཤེགས་
པའི་མཆོད་པའི་མཆོག་གིས་མཆོད་པ་བྱས་པར་འགྱུར་རོ། །བླ་མར་བྱས། རི་མོར་བྱས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་དགོངས་ཤིང་ལུང་བསྟན་པ་དང་། ལྷ་ཐམས་ཅད་ཀྱིས་ཀུན་དུ་བསྲུང་བར་ཡང་འགྱུར་རོ། །ཀུན་དགའ་བོ་སོང་ལ་ངོ་ལོན་
ཡང་གྱིས་ཤིག །སེམས་ཅན་ཐམས་ཅད་ལ་ཡང་ཡང་དག་པར་སྟོན་ཅིག །དགེ་བའི་རྩ་བའི་ཚོགས་ཐམས་ཅད་ཀྱང་གྱིས་ཤིག་ཅེས་ང་སྨྲའོ། །ཡི་དགས་མོ་ཁ་འབར་མ་དབུགས་དབྱུང་བའི་གཏོར་མའི་ཆོ་ག་རྫོགས་སོ།། །།
༄༅། །བོད་སྐད་དུ། འཇུར་འགེགས་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སེར་སྣ་ལས་ཆེར་ལྷག་པ། གཞན་གྱི་ལ་འཇུར་འགེགས་བྱས་པའི་ཉེས་པའི་འབྲས་བུ་འདི་ལྟ་སྟེ། འཕགས་པ་ཤྭ་རིའི་བུ་དང་།
འཕགས་པ་མཽད་གལ་གྱི་བུ་གཉིས་བས་མཐའ་ཅིག་ན། སོ་སོར་རྟོག་པའི་ཤེས་རབ་ཡིད་ལ་བྱེད་ཅིང་ཡོད་པ་ལས། ཉི་མའི་གུང་ལ་གཉིས་པོས་ཁམས་སེང་དུ་མཆིས་པའི་ས་ན་ཡི་དགས་མོ་ལུས་སྔོ་ལ་སྐམ་པ། ཁོག་ཁོག་ཟེར་བ། སྐྲ་འཛིངས་པ། མིག་དམར་

ལ་གཡོན་དུ་ཡོ་བ། མ་མཆུ་རིང་ལ་གཡས་སུ་ཡོ་བ། སྐེ་དང་རྐང་ལག་ཤིན་ཏུ་ཕྲ་ལ་རིད་བ། ལག་པ་ཁུ་ཚུར་བསྡམས་པའི་སེན་མོས་ཐད་ཀར་ཕུག་ནས་སེན་མོ་སྔོ་ཟང་ངེ་ཡོད་པ། ཁ་ནས་སྒྲ་རྣམ་པ་ལྔ་སྒྲོགས་པ་ནི་འདི་ལྟ་སྟེ། དགོས་ན་ཞེས་བྱ་བ་དང་། མེད་ན་
ཞེས་བྱ་བ་དང་། མ་སྦྱིན་ཅིག་ཞེས་བྱ་བ་དང་། སྟེར་ན་ཡང་མཆེ་ཆེས་པར་འོང་ངོ་ཞེས་བྱ་བ་དང་། དེ་ཙམ་ཆེས་ཀྱིས་ཕྲིལ་བྱིན་ཞེས་བྱ་བ་དང་ལྔ་བརྗོད་པ། སྐྱི་ཟིང་བྱེད་པ་ཅིག་དང་ཕྲད་པ་ལས། དེར་གང་ཟག་གཉིས་པོ་དེས་བསམས་པ། དགོན་པ་བས་གྲོང་ཡུལ་
ཐག་ཉེ་ལ་ཟས་མོད་པས་གྲོང་ཁྱེར་དུ་ཕྱིན་ཏེ་བསླངས་པས་དཀར་གསུམ་དང་། མངར་གསུམ་དང་། འབྲས་དང་ནས་ཀྱི་ཟན་ལ་སོགས་པ་བཟའ་བ་དང་། བཏུང་བ་མང་དུ་རྙེད་ནས་ཡི་དགས་ཀྱི་དྲུང་དུ་ཁྱེར་ཏེ་ཕྱིན་ནས་བསྟབས་པས་མི་ལེན་པར་གོང་གི་སྒྲ་རྣམ་པ་ལྔ་
སྒྲོགས་ཤིང་བྲོས་སོ། །དེར་གང་ཟག་གཉིས་པོ་དེས་ཤིན་ཏུ་མ་དགའ་ནས། ཡི་དགས་མོ་དེའི་སེམས་སུ་སོང་ནས་གཞན་ཡིད་ལ་མ་དྲན་ཏེ། བཅོམ་ལྡན་འདས་འོད་མའི་ཚལ་ན་བཞུགས་པ་ཅན་དུ་དེ་མ་ཐག་ཕྱིན་ཏེ། ཞབས་ལ་ཕྱག་འཚལ་བས་འཁངས་ནས་ཐང་
ཆད་དེ་དྲི་བ་མ་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱེད་ཅི་ཉེས། དྲི་བ་ཡོད་ན་དབུགས་ཕྱུང་ལ་དྲིས་ཤིག །ཅེས་གསུངས་སོ། བཅོམ་ལྡན་འདས་ལགས་བདག་ཅག་ནི་ཤིན་ཏུ་མ་དགའ་སྟེ། ཉིད་ལ་ཁོང་ཡུས་ཆེ་ནས་འཁམས་པ་
ལགས་སོ། །བཀའ་སྩལ་པ། ཅི་ལས་གྱུར། སྨྲས་པ། བདག་ཅག་གཉིས་ནི་བས་མཐའ་ཞིག་ན། བཅོམ་ལྡན་འདས་ཀྱི་ཞལ་ནས་གསུངས་པ་སོ་སོར་རྟོག་པ་ཡིད་ལ་བྱེད་པ་ལས་རྒྱང་རིང་པོར་འཆག་ཏུ་ཕྱིན་པ་ལས་ཡི་དགས་མོ་ལུས་པོ་སྔོ་ལ་སྐམ་པ། ཁོག་ཁོག་ཟེར་བ།
སྐྲ་འཛིངས་པ། མིག་དམར་ལ་གཡོན་དུ་ཡོ་བ། མ་མཆུ་རིང་ལ་གཡས་སུ་ཡོ་བ། སྐེ་དང་རྐང་ལག་ཤིན་ཏུ་ཕྲ་ལ་རིད་པ། ལག་པས་ཁུ་ཚུར་བསྡམས་པའི་སེན་མོས་ཐད་ཀར་ཕུག་ནས་སྔོ་ཟང་ངེ་བ། ཁ་ནས་སྒྲ་རྣམ་པ་ལྔ་སྒྲོགས་པ་འདི་ལྟ་སྟེ། དགོས་ན་ཞེས་བྱ་

བ་དང་། མེད་ན་ཞེས་བྱ་བ་དང་། མ་བྱིན་ཅིག་ཅེས་བྱ་བ་དང་། སྟེར་ན་ཡང་མཆེ་ཆེས་པར་འོང་ངོ་ཞེས་བྱ་བ་དང་། དེ་ཙམ་ཆེས་ཀྱིས་ཕྲིལ་བྱིན་ཞེས་བྱ་བ་དང་ལྔ་བརྗོད་པ། སྐྱི་ཟིང་བྱེད་པ་ཅིག་དང་ཕྲད་ནས། བདག་ཅག་གཉིས་ཀྱིས་བསམས་པས་དགོན་པ་བས་
གྲོང་ཡུལ་ཐག་ཉེ་ལ་ཟས་མོད་པས་གྲོང་ཁྱེར་དུ་ཕྱིན་ཏེ་བསླངས་པས་དཀར་གསུམ་དང་། མངར་གསུམ་དང་། འབྲས་དང་། ནས་ཀྱི་ཟན་ལ་སོགས་པ་བཟའ་བ་དང་བཏུང་བ་མང་དུ་རྙེད་ནས་ཡི་དགས་མོ་དེའི་དྲུང་དུ་ཁྱེར་ནས་བསྟབས་པས། ཁ་ནས་གོང་གི་སྒྲ་རྣམ་པ་ལྔ་བརྗོད་ཅིང་
གང་བྱིན་པ་མི་ལེན་པར་བྲོས་ཏེ་ཐལ་ན་འདི་ཅི་ལས་གྱུར་པ་དང་། འདི་ལ་སྨན་པའི་ཐབས་ཅི་མཆིས་ཞུ་རུ་མཆིས་པ་ལགས་སོ། །བཀའ་སྩལ་པ། རིགས་ཀྱི་བུ་དག་དེ་ནི་ཤིན་ཏུ་ལེགས་སོ། །ངས་བཤད་ཀྱིས་ལེགས་པར་ཉོན་ལ་ཡིད་ལ་ཟུང་ཤིག །དེ་ཅི་ལས་གྱུར་ན་ལུས་
སྔོ་ལ་སྐམས་པ་ནི་རང་གིས་ཟ་མ་ཕོད་པ་ལས་གྱུར་པའོ། །སྐེ་ཕྲ་བ་ནི་གཞན་ཟ་ཞིང་སྤྱོད་པ་ལ་བདག་གིས་སེར་སྣ་བྱས་པ་ལས་གྱུར་ཏོ། །ཡན་ལག་ཕྲ་ལ་སོར་མོས་ཐད་ཀར་ཕུག་པ་ནི་གཞན་ལ་སྦྱིན་པ་དག་ལ་ཆེས་ཀྱིས་ཕྲི་ལ་བྱིན་ཅེས་བྱས་པ་དང་། རང་གིས་ཀྱང་སྤྱོད་མི་
ཕོད་པ་ལས་གྱུར་ཏོ། །སྐྲ་འཛིངས་པ་ནི་ཀུན་གྱི་ཡིད་དུ་མི་འོང་བ་བྱས་པ་ལས་གྱུར་ཏོ། །མིག་དམར་བ་ནི་འདོད་ཆགས་ཀྱིས་ཡོངས་སུ་རྒྱས་པ་ལས་གྱུར་ཏོ། །གཡོན་དུ་ཡོ་བ་ནི་མིག་མི་ལེགས་པར་གཞན་ལ་བལྟས་པ་ལས་གྱུར་ཏོ། །མ་མཆུ་རིང་ལ་གཡས་སུ་ཡོ་བ་
ནི་སྟེར་ན་ཡང་ཆེས་པར་འོང་ངོ་ཞེས་བྱས་པ་ལས་གྱུར་ཏོ། །ཁ་ནས་སྒྲ་རྣམ་པ་ལྔ་སྒྲོགས་པ་ནི་བྱེད་པ་རྒྱུ་མཐུན་པའི་འབྲས་བུ་སྟེ། སྔོན་བརྗོད་པའི་བག་ཆགས་བརྟས་པ་ལས་གྱུར་ཏོ། །དེ་ལྟ་བུའི་ལས་ཀྱི་དབང་གིས་གཞན་ཅི་བྱིན་ཡང་ཕན་པར་མི་འགྱུར་ཏེ། ཆུ་གཅིག་པུ་
ལས་རང་གིས་སྦྱིན་ནུས་པ་མ་ཡིན་ཏེ། གཞན་གྱི་ཆུ་ལ་འཇུར་འགེགས་མ་བྱས་པས་ད་ལྟ་ཡང་ཆུ་གཙང་མ་རྩམ་པས་མ་རེག་པ་ལ་སྔགས་ལན་ཅིག་བཏབ་སྟེ། སེ་གོལ་ལན་ཅིག་གཏོགས་ཏེ་བྱིན་ན་དེའི་རྒྱུད་གྲོལ་ཞིང་འདོད་པ་ཚིམ་པར་འགྱུར་རོ། །དེ་འདི་ལྟ་སྟེ། ཨོཾ་ཛྭ་ལ་མི་དཾ་སརྦ་

པྲེ་ཏ་བྷྱཿསྭཱ་ཧཱ། གསོལ་པ། དེའི་འབྲུ་དོན་བཤད་དུ་གསོལ། བཀའ་སྩལ་པ། ཨོཾ་ནི་ཡེ་ཤེས་ལྔའི་རང་བཞིན་ཏེ་དོན་དམ་པའོ། །ཛྭ་ལ་འདོད་པ་མེ་ལྟར་འབར་བའོ། །མི་དཾ་ནི་མིའི་རྒྱུད་ཀྱིས་སེར་སྣ་དང་འཇུར་འགེགས་བྱས་པའོ། །སརྦ་ནི་དེ་ལྟ་བུའི་ལས་ལས་གྱུར་པ་ཐམས་
ཅད་དོ། །པྲེ་ཏ་ནི་ཡི་དགས་ཀྱི་སྙིང་པོ་སྟེ། ལས་ཀྱི་རྒྱུད་སྨིན་པའི་དོན་ཏོ། །བྷྱཿནི་ལས་དང་སྡུག་བསྔལ་བྱང་བར་བྱ་བའི་དོན་ཏོ། །སྭཱ་ཧཱ་ནི་ལས་དང་སྡུག་བསྔལ་བཀྲེས་སྐོམ་བྱང་བར་གྱུར་ཅིག་པའོ། །ད་མྱུར་དུ་སོང་ལ་དེ་ལྟར་གསོས་ཅིག་ཅེས་གསུངས་པས། དེ་ནས་
དེ་གཉིས་ཀྱིས་མྱུར་དུ་ཕྱིན་ནས་དེ་བཞིན་དུ་བགྱིས་པས་གཟོད་དགའ་ནས་ལོངས་སྤྱོད་ཅིང་ལུས་བག་རླན་ནོ། །དེ་ནས་ཆོས་སྟོན་ལ་བབ་ནས་གཉིས་པོ་རེ་མོས་བྱས་ཏེ། ཤཱ་རིའི་བུས་བཤོས་གསོལ་ནས། གཅིག་གསོལ་དུ་སྩལ་ཏེ། ཆབ་བྱིན་པས་ཡང་གོང་བཞིན་བརྗོད་དེ་བྲོས་སོ། །
ཡང་གཉིས་ཀྱིས་ཡིད་མ་ཆེས་ནས་བཅོམ་ལྡན་འདས་ལ་ཞུར་མཆིས་སོ། །བཅོམ་ལྡན་འདས་ལགས། བདག་ཅག་གིས་གསུངས་པ་བཞིན་བགྱིས་ལགས་པས། གསོ་རུ་གཏུབ་པར་གདའ་བ་ལ་ཆོས་སྟོན་ཡོལ་དུ་དོགས་ནས་འཚལ་ནས་ཡང་སྔར་བཞིན་བརྗོད་ཅིང་བྲོས་ནས་ཡང་ཞུ་རུ་མཆིས་
སོ། །བཀའ་སྩལ་པ། དེ་ནི་ཁྱོད་ཀྱི་སན་བར་དུ་རྩམ་པ་ལས་པས་ལན་པ་ཡིན་གྱིས། ལག་པ་ཁྲུས་ལ་གཟོད་བྱིན་ཅིག །དེའི་དྲུང་དུ་འགྲོ་མི་དགོས་ཏེ་འདི་ཉིད་ཀྱིས་བཏུབ་པོ་ཞེས་གསུངས་སོ། །དེ་གཉིས་ཀྱིས་ཁྲུས་བགྱིས་ཏེ། ཆུ་སྦྱིན་སྩལ་བས་ཡི་དགས་མོ་དེ་ཉིད་དུ་འོངས་
ནས་ཅུང་ཟད་ན་མདངས་དང་ལྡན་པར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་བུའི་ཆུ་སྦྱིན་འདི་ནི་འདིར་མ་ཟད་དེ་དུས་ཐམས་ཅད་དུ་ཡང་ཡི་དམ་དུ་གྱིས་ལ་ཐོང་ཤིག །གཞན་ལ་ཡང་རྒྱ་ཆེར་སྤེལ་ཅིག །དེ་ཅིའི་ཕྱིར་ཞེ་ན། འདིའི་ཕན་ཡོན་ནི་དཔག་ཏུ་མེད་དེ་
ཚད་ལས་འདས་སོ། །མདོ་ཙམ་བརྗོད་ན་འདི་ལྟ་སྟེ། འཇིག་རྟེན་གྱི་ཁམས་ཀྱི་མི་ཕྱུག་པོ་རྣམས་ལ་སྦྱིན་པ་བྱས་པ་བས་དབུལ་པོ་འགའ་ཞིག་ལ་སྦྱིན་པ་བྱས་ན་དེའི་བསོད་ནམས་བརྒྱའི་ཆར་ཡང་མི་ཉེ་སྟེ། དེ་ཅི་སྟེ་ཞེ་ན། ཕྱུག་པོ་རྣམས་ནི་ང་རྒྱལ་ཏེ་དྲེགས་པ་དང་རྒྱགས་པས་གནས་ངན་

ལེན་སྤྲོ་བར་བྱེད་དོ། །འཇིག་རྟེན་གྱི་ཁམས་ཀྱི་དབུལ་པོ་རྣམས་ལ་སྦྱིན་པ་བྱས་པ་བས་ཡི་དགས་འགའ་ཞིག་ལ་སྦྱིན་པ་བྱས་ན་དེའི་བསོད་ནམས་བརྒྱའི་ཆར་ཡང་མི་ཉེའོ། །དེ་ཅི་སྟེ་ཞེ་ན། དབུལ་པོ་རྣམས་ལ་ནི་འབད་དུ་ཡོད། བཙལ་དུ་ཡོད། བསླང་དུ་ཡོད་དོ། །ཡི་
དགས་ལས་ཀྱིས་དེ་ལྟ་བུ་དག་མ་ཡིན་གྱི། མ་བསྔོས་ན་ཁ་རུ་ཆུད་ཀྱང་དུག་ཆེན་པོར་འགྱུར་རོ། །འཇིག་རྟེན་གྱི་ཁམས་ཀྱི་ཡི་དགས་ལ་སྦྱིན་པ་བྱིན་པ་བས་འཇུར་འགེགས་ཀྱི་ཡི་དགས་གཅིག་ལ་ཆུ་བྱིན་ན་དེའི་བསོད་ནམས་བརྒྱའི་ཆར་ཡང་མི་ཉེའོ། །དེ་ཅི་སྟེ་ཞེ་ན། ཡི་དགས་དེ་དག་
ལ་ནི་དམིགས་པས་ཚིམ་པ་དང་། བཤམས་པས་ཚིམ་པ་དང་། བསྔོས་པས་ཚིམ་པ་དང་། རེག་པས་ཚིམ་པ་དང་། རྗེས་ཀྱིས་ཚིམ་པ་དང་། བཤལ་བས་ཚིམ་པ་ཡང་ཡོད་དེ། ལས་ཀྱི་རིམ་པ་བཞིན་ནོ། །འཇུར་འགེགས་ནི་གཞན་བཀག་པའི་ལས་ཀྱིས་སྔགས་དང་།
ཕྱག་རྒྱ་དང་། དམིགས་པ་གཞན་གྱིས་མི་ཐོབ། རྫས་ཐམས་ཅད་ལ་འཐམས་ཏེ་བཀག་པས་རྫས་གཞན་མི་མྱོང་། གཞན་གྱི་ཆུ་གཅིག་པུ་མ་བཀག་པས། ཆུ་གཙང་རྩམ་པས་མ་རེག་པ་ལས་དབང་མེད། རང་གི་རྒྱུད་ཞི་བར་བྱེད་པའི་སྔགས་དང་། ཕྱག་རྒྱ་སེ་གོལ་གཅིག་མིན་
པ་གཞན་གང་གིས་ཀྱང་ཐུབ་པར་མི་ནུས་སོ། །སེ་གོལ་གཅིག་ཏུ་བཞག་པ་ཅི་ཞེ་ན། གཉིས་སུ་གྱུར་ན་གཞན་གྱི་སྒྲར་གྱུར་ནས་མི་ཐོབ་དེས་ན་རང་གི་གོ་བ་བསྐྱེད་པ་སྒྲ་གཅིག་ཏུ་ངེས་པའོ། །འདིས་ནི་བར་ཆད་ཀྱིས་མི་ཚུགས་པ་དང་། ནད་ཉུང་བ་དང་། ཚེ་རིང་བ་དང་། ལོངས་སྤྱོད་དང་
ལྡན་པ་དང་། ཡི་ག་འཆུས་པ་རྣམས་འབྱེད་པར་བྱེད་པ་དང་། མདངས་ཉམས་པ་རྣམས་གསལ་བར་བྱེད་པ་དང་། འདི་གཞན་ལ་སྤེལ་ན་རྒྱུད་གྲོལ་ནས་ཡི་དགས་ཀྱི་རྒྱུད་ཆད་དེ་མཐར་མངོན་པར་རྫོགས་པར་འཚང་རྒྱའོ། །དེ་སྐད་ཅེས་བཀའ་སྩལ་ནས། རིགས་ཀྱི་བུ་དེ་དག་གིས་
བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཇུར་འགེགས་ཞེས་བྱ་བའི་གཟུངས་རྫོགས་སོ།། །།ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཏེ་གཏན་ལ་ཕབ་པ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། །

ཨོཾ་ཛྙཱ་ནཱ་བ་ལོ་ཀི་ཏེ་ས་མནྟ་སྥ་ར་ཎ་རསྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛ་ལ་ནི་ཧཱུཾ། འབབ་ཆུའམ། མཚོའི་འགྲམ་དུ་འདུག་སྟེ། ལག་པ་གཡས་པའི་ཁྱོར་བར་ཆུ་བླུགས་ལ། ཡེ་ཤེས་སྐར་མདའི་སྙིང་པོ་འདི་ལན་བདུན་བཟླས་ཏེ། ཆུ་ཁྱོར་བ་བདུན་འབབ་ཆུའམ།
ཆུར་གཏོར་ན་སངས་རྒྱས་ཀྱི་སྤྱན་གྱིས་གཟིགས་པའི་ཡི་དགས་ཇི་སྙེད་ཡོད་པ་དེ་དག་ཐམས་ཅད་ལྷའི་ཁ་ཟས་ཀྱི་རོ་དང་། བཏུང་བའི་རོ་མཆོག་དང་ལྡན་པ་འཐོབ་ཅིང་ཡི་དགས་རེ་རེ་ལ་ཡང་ཁ་ཟས་དང་། བཏུང་བ་ཡུལ་མ་ག་དྷཱའི་བྲེ་བདུན་བདུན་གྱིས་ཚིམ་པར་བྱས་པར་འགྱུར་ཞིང་།
ཆུ་དེ་འཐུངས་པ་ཙམ་གྱིས་དེ་དག་ཐམས་ཅད་ཡི་དགས་ཀྱི་སྐྱེ་གནས་ལས་ཐར་ཅིང་། བདེ་འགྲོ་མཐོ་རིས་ཀྱི་སྐྱེ་གནས་སུ་སྐྱེ་བར་འགྱུར་རོ། །སྐྱེས་པའམ། བུད་མེད་དམ། ཁྱེའུའམ། བུ་མོའམ། གཞན་ཡང་བྱོལ་སོང་གི་སྐྱེ་གནས་སུ་གཏོགས་པའི་རི་དགས་སམ། བྱའམ།
ཆུ་ན་གནས་པ་ལ་སོགས་པ་གང་གིས་ཆུ་དེ་འཐུངས་པ་དེ་དག་ཐམས་ཅད་སྡིག་པ་དང་། སྒྲིབ་པ་ཐམས་ཅད་བྱང་ཞིང་བདེ་འགྲོའི་ལམ་དུ་འགྲོ་བར་འགྱུར་རོ། །ཡེ་ཤེས་སྐར་མདའི་སྙིང་པོ་རྫོགས་སོ།། །།༄༅། །རྒྱ་གར་སྐད་དུ། པྲཛྙཱ་བརྡྷ་ནཱི་ནཱ་མ་དྷཱ་ར་ཎཱི།
བོད་སྐད་དུ། ཤེས་རབ་སྐྱེད་པ་ཞེས་བྱ་བའི་གཟུངས། ན་མོ་རཏྣ་ཏྲ་ཡཱ་ལ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་བི་བ་བི་བ། པྲཛྙཱ་བརྡྷ་ནི། ཛ་ར་ཛ་ར། མེ་དྷཱ་བརྡྷ་ནི། དྷི་རི་དྷི་རི། བུདྡྷི་བརྡྷ་ནི་སྭཱ་ཧཱ། རིག་
སྔགས་འདིའི་ཆོ་ག་ནི་འདི་ཡིན་ཏེ། ནང་རེ་ཞིང་རྩབ་མོ་ཁྱོར་གང་ལ་ལན་ཉི་ཤུ་རྩ་གཅིག་བཟླས་ཏེ། ཟླ་བ་གཅིག་གི་བར་དུ་འཐུངས་ན་ཐོས་པ་འཛིན་པར་འགྱུར་རོ། །ཤེས་རབ་སྐྱེད་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་གརྦྷ་དང་། ལོ་ཙྪ་བ་བནྡེ་
ཀླུའི་དབང་པོས་བསྒྱུར། རྒྱ་གར་གྱི་མཁན་པོ་བིདྱཱ་ཀ་ར་སིང་ཧ་དང་། ཞུ་ཆེན་གྱི་ལོ་ཙྪ་བ་བནྡེ་དེ་བ་ཙནྡྲས་ཞུས་ཏེ་གཏན་ལ་ཕབ་པ།། ༄༅། །དཀོན་མཆོག་གསུམ་ལ་ཕྱག་འཚལ་ལོ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་

སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏ་དྱ་ཐཱ། སྨྲྀ་ཏི་མ་ཏི་མ་ཏི། ཏེ་ཛ་བིདྱཱ། ཧུ་རུ་མེ་ཧུ་རུ་ཧུ་རུ་མེ་ཀྲྀཥྞ་ཧ་རུ་མེ་སྭཱ་ཧཱ། ཤུ་དག་ནག་པོ་ལ་སྔགས་འདི་ལན་བརྒྱ་རྩ་བརྒྱད་བཟླས་བརྗོད་བྱས་ཏེ་ཟོས་ན་གདོན་མི་ཟ་བར་ཐོས་པ་འཛིན་པར་འགྱུར་རོ། །ཐོས་
པ་འཛིན་པའི་གཟུངས་རྫོགས་སོ།། ༄༅། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བའི་བླ་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་རྒྱལ་བའི་བླ་མའི་གཟུངས་སྔགས་ཀྱི་གཞི་འདི་གང་གིས་བཟུང་བས་ཆོས་ཐམས་ཅད་བཟུང་བ་དང་བཅས་པར་འགྱུར་རོ། །མི་ཁོམ་པ་བརྒྱད་ལས་འདས་པར་འགྱུར་རོ། །ཚེ་རབས་ཐམས་ཅད་དུ་ཡང་གནོད་སྦྱིན་དེ་ལ་བསྲུང་བ་དང་། བསྐྱབ་པ་དང་། སྦ་བར་
བྱེད་ལ་དེ་ལ་ནད་ཐམས་ཅད་ཀྱིས་འཇིགས་པ་མེད་དོ། །སྱཱདྱ་ཐེ་དཾ། བུདྡྷེ་བུདྡྷེ། ཛ་ཡོཏྟ་ར། བོ་དྷ་ནི་བོ་དྷ་ནི། སཾ་བོ་དྷ་ནི། མ་ཧཱ་སཾ་བོ་དྷ་ནི། ཨ་དྷི་སམྦོ་དྷ་ནི། ཧ་ལ་ཧ་ལ་ཧ་ལ། ཧི་ལི་ཧི་ལི་ཧི་ལི། ཧུ་ལུ་ཧུ་ལུ་ཧུ་ལུ། སརྦ་བུདྡྷ། དྷརྨཱ་བ་བོ་དྷི་ནི། སྥུ་ཊ་སྥུ་ཊ་སྥུ་ཊ། སརྦ་པཱ་པ་ནི།
བུདྡྷ། ཨདྷིཥྛཱ་ནི་ན་སྭཱ་ཧཱ། འཕགས་པ་རྒྱལ་བའི་བླ་མའི་གཟུངས་རྫོགས་སོ།། ༄༅། །རྒྱ་གར་སྐད་དུ། མ་ཧཱ་ས་མཱ་ཛ་སཱུ་ཏྲ་ན་ནཱ་མ་ཧཱ་སཱུ་ཏྲ། བོད་སྐད་དུ། མདོ་ཆེན་པོ་འདུས་པ་ཆེན་པོའི་མདོ་ཞེས་བྱ་བ། དཀོན་མཆོག་
གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱ་རྣམས་ཀྱི་སེར་སྐྱའི་གནས་ཀྱི་ནགས་ཚལ་ན། དགེ་སློང་ལྔ་བརྒྱ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་
རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་ལ་མྱ་ངན་ལས་འདས་པ་དང་ལྡན་པའི་ཆོས་ཀྱི་གཏམ་སྟོན་པར་

མཛད་དེ། དེའི་ཚེ་ན་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དག་ནས། དབང་ཆེ་བར་གྲགས་པ་དབང་ཆེ་བར་གྲགས་པའི་ལྷ་དག་ལྷགས་ནས། བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་བྱེད་དོ། །དེ་ནས་ཚངས་རིས་ཀྱི་ལྷ་ཚངས་པའི་འཇིག་རྟེན་གནས་པ་བཞི་
ཞིག་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་དེ་ནི་ཤཱཀྱ་རྣམས་ཀྱི་སེར་སྐྱའི་གནས་ཀྱི་ནགས་ཚལ་ན། དགེ་སློང་ལྔ་བརྒྱ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་
པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་ལ་མྱ་ངན་ལས་འདས་པ་དང་ལྡན་པའི་ཆོས་ཀྱི་གཏམ་སྟོན་པར་མཛད་དེ། དེའི་ཚེ་ན་
ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དག་ནས་དབང་ཆེ་བར་གྲགས་པ་དབང་ཆེ་བར་གྲགས་པའི་ལྷ་དག་ལྷགས་ནས་བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་བྱེད་ཀྱིས་བདག་ཅག་ཀྱང་སོང་ལ། བཅོམ་ལྡན་འདས་ལ་རེ་རེ་ནས་ཚིགས་སུ་བཅད་པས་མངོན་པར་
བསྟོད་པར་བྱ་བ་གོར་མ་ཆག་སྙམ་མོ། །དེ་ནས་ཚངས་རིས་ཀྱི་ལྷ་བཞི་པོ་དག་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་གྱིས་ཚངས་པའི་འཇིག་རྟེན་ནས་མི་སྣང་བར་གྱུར་ཅིང་། བཅོམ་
ལྡན་འདས་ཀྱི་སྤྱན་སྔར་ལྷགས་ཏེ་ཕྱོགས་གཅིག་ཏུ་འཁོད་ནས། ཚངས་རིས་ཀྱི་ལྷ་གཅིག་གིས་ཚིགས་སུ་བཅད་དེ་གསོལ་པ། འདུས་པ་ཆེ་ལ་གཞོལ་བ་ཡི། །ལྷ་ཚོགས་ཀུན་ནས་ལྷགས་གྱུར་པས། །གཞན་གྱིས་མི་ཐུབ་དགེ་འདུན་ལ། །བལྟ་བའི་སླད་དུ་བདག་
ཅག་མཆིས། །ཚངས་རིས་ཀྱི་ལྷ་གཉིས་པས་ཚིགས་སུ་བཅད་དེ་གསོལ་པ། དྲང་པོར་གྱུར་པའི་སེམས་ཀྱིས་ནི། །འདི་ན་དགེ་སྦྱོང་རབ་བརྩོན་པ། །ཁ་ལོ་པ་ལྟར་མིག་བླངས་ཤིང་། །དབང་པོ་རྣམས་ནི་ལེགས་སྡོམ་བགྱིད། །ཚངས་རིས་ཀྱི་ལྷ་གསུམ་པས་ཚིགས་

སུ་བཅད་དེ་གསོལ་པ། དབང་ཕུར་འོད་པ་འོབས་འདྲ་བའི། །ཕུར་བུ་རབ་བཅོམ་བཀྲིར་མི་ཚུགས། །དེ་དག་སྲེད་བྲལ་དག་སྤྱོད་ཅིང་། །འདྲེན་པས་གླང་པོ་གཞོན་ལྟར་བཏུལ། །ཚངས་རིས་ཀྱི་ལྷ་བཞི་པས་ཚིགས་སུ་བཅད་དེ་གསོལ་པ། གང་དག་སངས་
རྒྱས་སྐྱབས་མཆི་བ། །དེ་དག་ངན་འགྲོར་མི་མཆི་ཞིང་། །མི་ལུས་སྤངས་པར་གྱུར་ནས་ཀྱང་། །ལྷ་ཡི་ལུས་ནི་ཐོབ་པར་འགྱུར། །ཚངས་རིས་ཀྱི་ལྷ་བཞི་པོ་དག་གིས་དེ་སྐད་ཅེས་གསོལ་ནས་དེ་ཉིད་ན་བག་བཅུམ་སྟེ་འཁོད་དོ། །དེ་ནས་བཅོམ་ལྡན་འདས་ཀྱིས་ལྷའི་
འཁོར་ཐམས་ཅད་ལ་རྣམ་པར་གཟིགས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་ཀྱེ་མ་ལྷ་རྣམས་ཀྱི་འདུས་པ་འདི་ནི་ཆེ་བ་ཡིན་ནོ། །དགེ་སློང་དག་ཀྱེ་མ་ལྷ་རྣམས་ཀྱི་འདུས་པ་འདི་ནི་ཤིན་ཏུ་ཆེ་བ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་གང་དག་འདས་པའི་དུས་ན་བྱུང་བར་གྱུར་བའི་སངས་རྒྱས་བཅོམ་ལྡན་འདས་དེ་དག་ལ་ཡང་འདི་ལྟ་སྟེ། དཔེར་ན་ད་ལྟར་ངའི་ལྷ་རྣམས་ཀྱི་འདུས་པ་ཆེན་པོ་འདི་ཁོ་ན་ལྟ་བུ་དག་འདུས་པར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་གང་དག་མ་འོངས་པའི་དུས་ན་འབྱུང་བར་འགྱུར་བའི་སངས་རྒྱས་བཅོམ་ལྡན་འདས་དེ་དག་ལ་ཡང་འདི་ལྟ་སྟེ། དཔེར་ན་ད་ལྟར་ངའི་ལྷ་རྣམས་ཀྱི་འདུས་པ་ཆེན་པོ་འདི་ཁོ་ན་ལྟ་བུ་དག་འདུ་བ་གྱུར་རོ། །དགེ་སློང་དག་ལྷ་རྣམས་ཀྱི་མིང་དག་བརྗོད་
པར་བྱས། ལྷ་རྣམས་ཀྱི་མིང་དག་ཟུང་ཤིག །གང་དག་ས་ལ་གནས་པ་དང་། །གང་དག་རི་ཁྲོད་གནས་པ་རྣམས། །སེང་གེ་བཞིན་དུ་ཐ་དད་ལ། །སེམས་བསྡུས་མཉམ་པར་བཞག་བྱས་ཤིང་། །ཀུན་ནས་འདུས་པར་གྱུར་པ་ནི། །སྤུ་དག་ཟིང་ཞེས་བྱེད་པ་ཡིན། །
གང་དག་ས་ལ་གནས་བ་དང་། །གང་དག་རི་ཁྲོད་གནས་པ་རྣམས། །སེང་གེ་བཞིན་དུ་ཐ་དད་པ། །སེམས་བསྡུས་མཉམ་པར་བཞག་བྱས་ཤིང་། །ཀུན་ནས་འདུས་གྱུར་སྤུ་ཟིང་ཞེས། །བྱེད་པ་བདག་གིས་བརྗོད་པར་བྱ། །ཡིད་བྱད་དག་ཅིང་རབ་དང་ལ། །རྙོག་མེད་

འཆི་བདག་སྤངས་པ་རྣམས། །ཚངས་པའི་འཇིག་རྟེན་མཐར་ཐུག་པའི། །ལྷ་དང་མི་ཡི་བར་ན་འཁོད། །སློབ་མ་ལྔ་བརྒྱ་ཕྲག་གཉིས་དང་། །གཞན་ཡང་བརྒྱ་དང་བཅུ་དག་དང་། །སྟོང་ཕྲག་དུ་མ་རྣམས་དག་གི། །ལྷ་རྣམས་འདུས་པར་གྱུར་པ་དག །མཐའ་ནས་
མཐའ་མ་མི་མཐོང་ཞིང་། །ཕྱོགས་རྣམས་ཐམས་ཅད་ཁྱབ་གྱུར་པ། །སངས་རྒྱས་ཀྱིས་ནི་དེ་མཁྱེན་ནས། །དེ་བཞིན་གཤེགས་པས་རྣམ་གཟིགས་ཏེ། །དེ་ནས་སྟོན་པས་བསྟན་དགའ་བའི། །ཉན་ཐོས་རྣམས་ལ་དགེ་སློང་དག །ལྷ་ཚོགས་མངོན་པར་ལྷགས་གྱུར་
ཀྱིས། །ངེས་པར་རྟོགས་ཞེས་བཀའ་སྩལ་པ། །ཚིགས་སུ་བཅད་པས་མཐར་ཆགས་ཀྱིས། །དེ་དག་རྣམས་ཀྱི་མིང་བརྗོད་ཀྱི། །རྩེ་གཅིག་གྱུར་པའི་ཡིད་ཀྱིས་ནི། །ང་ཡིས་བཤད་པ་མཉན་པར་གྱིས། །སེར་སྐྱའི་གནས་ཀྱི་ནགས་ཚལ་གྱི། །གནོད་སྦྱིན་སྟོང་
ཕྲག་བདུན་པོ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་
ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །གསེར་ཅན་སྟོང་ཕྲག་དྲུག་པོ་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་
ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ཤར་ཕྱོགས་རྣམ་རྒྱལ་ཚལ་གྱི་ནི། །རི་མཉམ་སྟོང་ཕྲག་གསུམ་པོ་དག །སེར་སྐྱའི་གནས་
ཀྱི་ནགས་ཚལ་ནི། །སྣང་བར་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་

དུ་མངོན་པར་ཞུགས། །དེ་ལྟར་སྟོང་ཕྲག་བཅུ་དྲུག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་
ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །གནོད་སྦྱིན་ཆུ་སྲིན་རྒྱལ་པོའི་ཁབ། །ཡངས་པ་ལ་ནི་རྟག་གནས་ཤིང་། །བརྒྱ་སྟོང་ཕྲག་ནི་མང་པོ་ཡི། །གནོད་
སྦྱིན་བསྙེན་བཀུར་བྱེད་པ་དང་། །གང་དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །
ཀུན་གྱི་བཤེས་གཉེན་ལྡ་བརྒྱ་དང་། །རྫུ་འཕྲུལ་ཆེན་པོ་ཀུན་གྱི་ལྷ། །གང་དག་དེ་ཡི་འཁོར་རྣམས་དང་། །དེ་གཉིས་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་
ཚལ་དུ་མངོན་པར་ཞུགས། །ཤར་ཕྱོགས་མངོན་པར་སྐྱོང་བྱེད་པ། །རྒྱལ་ཆེན་གྲགས་དང་ལྡན་པ་ནི། །དྲི་ཟའི་བདག་པོ་རྒྱལ་པོ་སྟེ། །མིང་ནི་ཡུལ་འཁོར་སྲུང་ཞེས་བྱ། །དེ་ནི་ཉེ་དུ་ལྷན་ཅིག་ཏུ། །གླུ་དང་གར་གྱིས་རྟག་ཏུ་རྩེ། །གང་དག་དེ་ཡི་འཁོར་རྣམས་དང་། །དེ་ཡང་འདུས་
པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །དེ་ལ་བུ་ནི་མང་ཡོད་དེ། །བརྒྱད་ཅུ་དང་ནི་བཅུ་དང་གཅིག །དེ་དག་མིང་མཐུན་གྲགས་པ་ནི། །
དབང་པོ་ཞེས་བྱ་སྟོབས་པོ་ཆེ། །ལྷ་དང་ལྷ་མིན་གཡུལ་འགྱེད་པར། །ཀུན་ཏུ་གཞན་གྱིས་མི་ཐུབ་པར། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་

ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ལྷོ་ཕྱོགས་མངོན་པར་སྐྱོང་བྱེད་པ། །རྒྱལ་ཆེན་གྲགས་དང་ལྡན་པ་ནི། །གྲུབ་བུམ་བདག་པོ་རྒྱལ་པོ་སྟེ། །མིང་ནི་འཕགས་སྐྱེས་པོ་ཞེས་བགྱི། །དེ་ནི་ཉེ་དུ་ལྷན་ཅིག་ཏུ། །གླུ་དང་གར་གྱིས་རྟག་ཏུ་རྩེ། །གང་
དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །དེ་ལ་བུ་ནི་མང་ཡོད་དེ། །བརྒྱད་ཅུ་དང་ནི་
བཅུ་དང་གཅིག །དེ་དག་མིང་མཐུན་གྲགས་པ་ནི། །དབང་པོ་ཞེས་བགྱི་སྟོབས་པོ་ཆེ། །ལྷ་དང་ལྷ་མིན་གཡུལ་འགྱེད་པར། །ཀུན་ཏུ་གཞན་གྱིས་མི་ཐུབ་པ། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་
དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ནུབ་ཕྱོགས་མངོན་པར་སྐྱོང་བྱེད་པ། །རྒྱལ་ཆེན་གྲགས་དང་ལྡན་པ་ནི། །ཀླུ་ཡི་བདག་པོ་རྒྱལ་པོ་སྟེ། །མིང་ནི་མིག་མི་བཟང་
ཞེས་བགྱི། །དེ་ནི་ཉེ་དུ་ལྷན་ཅིག་ཏུ། །གླུ་དང་གར་གྱིས་རྟག་ཏུ་རྩེ། །གང་དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་
པའི་ཚལ་དུ་མངོན་པར་ཞུགས། །དེ་ལ་བུ་ནི་མང་ཡོད་དེ། །བརྒྱད་ཅུ་དང་ནི་བཅུ་དང་གཅིག །དེ་དག་མིང་མཐུན་གྲགས་པ་ནི། །དབང་པོ་ཞེས་བགྱི་སྟོབས་པོ་ཆེ། །ལྷ་དང་ལྷ་མིན་གཡུལ་འགྱེད་པར། །ཀུན་ཏུ་གཞན་གྱིས་མི་ཐུབ་པ། །གང་དག་དེ་ཡི་འཁོར་རྣམས་
དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །བྱང་ཕྱོགས་མངོན་པར་སྐྱོང་བྱེད་པ། །རྒྱལ་ཆེན་གྲགས་

དང་ལྡན་པ་ནི། །གནོད་སྦྱིན་བདག་པོ་རྒྱལ་པོ་སྟེ། །མིང་ནི་ལུས་ངན་པོ་ཞེས་བྱ། །དེ་ནི་ཉེ་དུ་ལྷན་ཅིག་ཏུ། །གླུ་དང་གར་གྱིས་རྟག་ཏུ་རྩེ། །གང་དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །
ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །དེ་ལ་བུ་ནི་མང་ཡོད་དེ། །བརྒྱད་ཅུ་དང་ནི་བཅུ་དང་གཅིག །དེ་དག་མིང་མཐུན་གྲགས་པ་ནི། །དབང་པོ་ཞེས་བྱ་སྟོབས་པོ་ཆེ། །ལྷ་དང་ལྷ་མིན་
གཡུལ་འགྱེད་པར། །ཀུན་ཏུ་གཞན་གྱིས་མི་ཐུབ་པ། །གང་དག་དེ་ཡི་འཁོར་རྣམས་དང་། །དགེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་
ཚལ་དུ་མངོན་པར་ཞུགས། །ཤར་ཕྱོགས་ན་ནི་ཡུལ་འཁོར་སྲུང་། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང་། །བྱང་ཕྱོགས་ན་ནི་ལུས་ངན་པོ། །རྒྱལ་པོ་ཆེན་པོ་དེ་བཞི་དག །འཇིག་རྟེན་སྐྱོང་བ་གྲགས་དང་ལྡན། །རྫུ་འཕྲུལ་ཆེན་པོ་སྟོབས་
པོ་ཆེ། །ཕྱོགས་བཞི་དག་ནི་སྐྱོང་བར་བྱེད། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་
ཞུགས། །དེ་དག་གི་ནི་ཁོལ་པོ་རྣམས། །མཆོད་རྟེན་མང་ལ་གནས་བཅས་པ། །སླུ་བྱེད་གཡོན་ཅན་སྒྱུ་མ་ཅན། །སྒྱུ་མ་ཤེས་དང་རྣམ་ཤེས་དང་། །ངན་སྤོང་ཁྲོ་གཉེར་ལྷན་ཅིག་ཏུ། །དེ་ཚེ་རྫུ་འཕྲུལ་སྟོན་ཅིང་ལྷགས། །གང་དག་དེ་ཡི་འཁོར་རྣམས་དང་། །དེ་དག་
ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །གནོད་སྦྱིན་དང་། གནོད་སྦྱིན་ཆེན་པོ་དང་། །གནོད་སྦྱིན་གྱི་སྡེ་དཔོན་དང་། དམག་

དཔོན་འདི་དག་ཀྱང་དེར་ཀུན་ནས་ལྷགས་ཏེ། །འདི་ལྟ་སྟེ། དབང་པོ་ཟླ་བ་ཆུ་ལྷ་དང་། །བྷ་ར་དྭ་ཛ་སྐྱེ་དགུའི་བདག །དབང་ལྡན་ཙནྡ་ན་འདོད་གཙོ་དང་། །མགྲིན་ངན་དང་ནི་མགུལ་ངེས་དང་། །སྟོབས་ལྡན་ནོར་བུ་ནོར་སྤྱོད་དང་། །སྒྲ་རབ་དང་ནི་ཉེ་རྔ་དང་། །རི་མཉམ་གསེར་ཅན་
གང་པོ་དང་། །སེང་ལྡེང་པ་དང་གཡོན་ཅན་དང་། །གནོད་སྦྱིན་བ་སྐྱོང་འབྲོག་གནས་དང་། །རྒྱལ་བའི་ཁྱུ་མཆོག་མི་རྒྱལ་པོ། །དྲི་ཟ་སྣ་ཚོགས་སྡེ་དང་ནི། །ལྕགས་མདུང་རིང་དང་མ་ལྡན་དང་། །ཚིགས་ལྔ་སེར་པོ་ཡིད་དགའ་དང་། །གནོད་སྦྱིན་རིང་པོ་འཁོར་དང་བཅས། །
འབྲས་བུ་གསུམ་དང་མགུལ་གསུམ་པ། །འགྲོ་གནས་ཇི་སྙེད་ཡོད་པ་ཡིན། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་
ཞིང་། །འདུས་པའི་ཚལ་དུ་མགོན་པར་ཞུགས། །ལྷན་ཅིག་འབྱུང་བའི་ཀླུ་དང་ནི། །འཇོག་པོ་དང་ནི་ཡངས་པའང་འོངས། །ལ་བ་དང་ནི་མགྱོགས་མཆོག་དག །སྲུང་བྱེད་འགྲོ་དང་ལྷན་ཅིག་ལྷགས། །ཀླུ་བདག་བྲན་བཟང་བུ་དང་ནི། །ཡུལ་འཁོར་སྲུང་དང་གླང་པོ་ཆེ། །
འཇིགས་བྱེད་ཆེ་དང་ས་སྲུང་བུ། །རྫུ་འཕྲུལ་ལྡན་པའི་ཀླུ་ཡང་འོངས། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་
བའི་ཚལ་དུ་མངོན་པར་ཞུགས། །གང་ཞིག་ཀླུ་རྒྱལ་ཟིམ་མནན་ལེན། །སྟོབས་ལྡན་མིག་རྣོན་འདབ་ཆགས་བྱ། །དེ་མིང་འདབ་བཟང་ཁྲ་བོ་ཡང་། །མཁའ་ལས་ཚལ་དུ་མངོན་པར་འོངས། །དེ་ཚེ་ཀླུ་རྒྱལ་མི་འཇིགས་བྱིན། །སྟོན་པས་འདས་བཟང་བདེ་མཛད་ཅིང་། །
གསུང་འཇམ་བརྗོད་པ་དེ་ཉིད་ལ། །སངས་རྒྱས་སྐྱབས་སུ་ཉེ་བར་སོང་། །གང་དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་

པའི་ཚལ་དུ་མངོན་པར་ཞུགས། །ལག་ན་རྡོ་རྗེས་ཕམ་བྱས་ཤིང་། །རྒྱ་མཚོར་རྟེན་པའི་ལྷ་མིན་རྣམས། །ཐམས་ཅད་ནོར་ལྷས་སྦག་གྱུར་ཅིང་། །མཚོ་ལ་སྐྱབས་སུ་འདུ་ཤེས་པ། །ཐགས་བཟངས་རིས་དང་རབ་བཀྲ་དང་། །རབ་སིམ་བྱེད་དང་བཏང་བཟུང་
དང་། །སྟོབས་ལྡན་བུ་ནི་བརྒྱད་པོ་ཀུན། །རྣམ་སྣང་བྱེད་པའི་བུ་རྣམས་དང་། །སྟོབས་ལྡན་སྡེ་དང་སྒྲ་གཅན་བཟང་། །དཔའ་ཆེན་ཁྱོད་ཀྱི་དུས་ལགས་ཤེས། །དགེ་སློང་འདུས་པའི་ནགས་ཚལ་དུ། །གོ་ཆ་བགོས་ཏེ་ལྷགས་པ་དང་། །གང་དག་དེ་ཡི་འཁོར་རྣམས་དང་། །
དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ཆུ་ལྷ་མོ་དང་བུ་མོ་དང་། །ཟླ་བ་མོ་ཡང་ཕྱི་བཞིན་འོངས། །མཛའ་བཤེས་
མ་དང་ཆུ་ལྷ་ཅན། །ལྷ་མོ་གྲགས་ལྡན་ཉིད་ཀྱང་འོངས། །ས་དང་ཆུ་དང་རླུང་གི་དང་། །མེ་ཡི་ལྷ་མོའང་འོངས་གྱུར་ཏེ། །བཅུ་ཚན་ཚོགས་བཅུ་དེ་དག་ཀུན། །ཁ་དོག་སྣ་ཚོགས་ལྡན་བདག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །
གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ཁྱབ་འཇུག་ལྷ་དང་གཤོལ་ཅན་ལྷ། །
མཚེམ་གཉིས་ཀྱང་ལྷགས་པར་གྱུར། །ཟླ་ལ་གནས་པའི་ལྷ་རྣམས་ཀྱིས། །ཟླ་བ་ཉིད་ནི་མདུན་དུ་བདར། །ཉི་ལ་གནས་པའི་ལྷ་རྣམས་ཀྱིས། །ཉི་མ་ཉིད་ཀྱང་མདུན་བདར་ཅིང་། །ཆར་པ་འབེབས་པར་བྱེད་པ་དག །རྒྱུ་སྐར་རྣམས་ཀྱིས་མདུན་བདར་ལགས། །ཐམས་
ཅད་བཟང་པོ་རྡོ་རྗེ་ཅན། །བརྒྱ་བྱིན་ཁྱེར་འཇིག་འོངས་གྱུར་ཏེ། །བཅུ་ཚན་ཚོགས་བཅུ་དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་

པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ལྷ་མོ་ཚོགས་ཅན་མ་དང་ནི། །མེ་ལྕེའི་རྩེ་འདྲ་འཆི་ལྟས་ཅན། །ཞི་བ་མོ་དང་དཀའ་ཟློག་
མ། །མེ་ཏོག་གོས་ཅན་འོངས་གྱུར་ཅིང་། །རྒྱུ་བ་མོ་དང་མཚན་མཆིངས་བཟང་། །འཆི་མེད་རྣམ་པ་དུ་མ་དང་། །གང་ཞིག་ཕྱོགས་སུ་ཆར་འབེབས་པ། །འདོད་ལྷའི་དབྱངས་ཅན་མ་ཡང་འོངས། །བཅུ་ཚན་ཚོགས་བཅུ་དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་
སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དག། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་དྲག་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་
ཚལ་དུ་མངོན་པར་ཞུགས། །སྔོ་བསངས་སྔོ་བསངས་ཆེན་མོ་དང་། །མི་འདྲ་མི་འདྲ་དམ་པ་དང་། །རྩེད་མོས་མྱོས་དང་དེ་བཞིན་དུ། །ཡིད་རབ་འཁྲུག་མའང་འོངས་གྱུར་ཅིང་། །ཕག་མོ་ཕག་མོ་ཆེན་མོ་དང་། །སློང་མ་ངེས་མ་ལྷན་ཅིག་ལྷགས། །བཅུ་ཚན་ཚོགས་བཅུ་
དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །
དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །དཀར་མོ་རྒྱགས་བྱེད་སྙིང་རྗེ་དང་། །གོས་སྔོན་མོ་ཡང་འོངས་གྱུར་ཅིང་། །སྐྲ་དཀར་མོ་ལ་སོགས་པ་དང་། །གོས་སེར་མོ་ཡང་འོངས་པར་གྱུར། །འཕྲོག་མ་རྟག་ཏུ་མྱོས་པ་དང་། །སྤེལ་
མ་རྣམ་པ་དུ་མདར། །དག་པ་དང་ནི་འོད་ཅན་མ། །ལྷ་མོ་གྲགས་ལྡན་རྣམས་ཀྱང་ལྷགས། །བཅུ་ཚན་ཚོགས་བཅུ་དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་

རྣམས་དང་། །དེ་དག་ཀྱང་ནི་འདུས་པར་ལྷགས།།རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །བདེ་བྱེད་དགའ་ལྡན་འཐབ་བྲལ་དང་། །ནག་
པོ་བཏབ་པ་དུ་མ་དང་། །ལུམ་བི་ནི་དང་ལུམ་བི་མཆོག །སྐར་མ་ཞེས་བྱ་ལེགས་སྨོན་དང་། །འཕྲུལ་དགའ་རྣམས་དང་དེ་བཞིན་དུ། །དབང་སྒྱུར་རྣམས་ཀྱང་ལྷགས་པར་གྱུར། །བཅུ་ཚན་ཚོགས་བཅུ་དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་
ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་
ཞུགས། །ལྷ་ཚོགས་དྲུག་ཅུ་དེ་དག་ཀུན། །ཁ་དོག་སྣ་ཚོགས་ལྡན་པ་དག །སེར་སྐྱའི་གནས་ཀྱི་ནགས་ཚལ་ནི། །སྣང་བར་བྱས་ཏེ་འཁོད་པ་དང་། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་
ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །ཚངས་པའི་འཇིག་རྟེན་སྟོང་དག་གི། །ཚངས་པ་ཆེན་པོ་ཞེས་བྱ་བ། །ཀུན་འགེད་གཞོན་ནུ་སྐར་རྒྱལ་དེ། །སོ་སོར་དབང་སྒྱུར་དབང་ཕྱུག་བཅུ། །རྫུ་འཕྲུལ་ལྡན་
པ་དེ་དག་དང་། །ལྷན་ཅིག་འགྲོགས་ཏེ་དེར་ལྷགས་པ། །གང་དག་དེ་ཡི་འཁོར་རྣམས་དང་། །དེ་དག་ཀྱང་ནི་འདུས་པར་ལྷགས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་
དུ་མངོན་པར་ཞུགས། །དབང་སྒྱུར་བྱེད་པའི་འཕྲོག་མ་མོ། །ཁ་དོག་གཟུགས་མཆོག་ལྡན་པ་ཡང་། །བུ་རྣམས་ཀྱིས་ནི་ཡོངས་བསྐོར་ཅིང་། །དེ་དག་རྣམས་ཀྱི་ཕྱི་བཞིན་འོངས། །གང་དག་དེ་ཡི་འཁོར་རྣམས་དང་། །དེ་ཡང་འདུས་པའི་ནང་དུ་འོངས། །རྫུ་འཕྲུལ་ལྡན་ཞིང་

འོད་དང་ལྡན། །ཁ་དོག་ལྡན་ཞིང་གྲགས་ལྡན་རྣམས། །དགེ་སློང་རྣམས་ལ་ཕྱག་འཚལ་ཞིང་། །འདུས་པའི་ཚལ་དུ་མངོན་པར་ཞུགས། །དབང་པོར་བཅས་དང་དབང་ལྡན་བཅས། །སྐྱེ་དགུའི་བདག་དང་བཅས་པ་ཡི། །ལྷ་རྣམས་དེ་དག་དེར་ལྷགས་ཤིང་། །དགེ་སློང་
རྣམས་ཀྱང་དེར་ལྷགས་སོ། །ནག་པོས་སྨྲས་པའི་ཚིག་ལ་ལྟོས། །འདོད་ཆགས་ཀྱིས་ནི་འདི་བཟུང་ལ། །བཅིང་བགྱིས་དང་ཁྱོད་ལ་ལེགས། །འདི་དག་ཀུན་ནས་ཡོངས་བསྡུས་ལ། །འདི་དག་གསོན་པོར་མ་བཏང་ཞེས། །དེ་ན་ནག་པོ་སྡེ་བོ་ཆེ། །སྡེ་རྣམས་ལ་ནི་སྐུལ་བྱེད་
ཅིང་། །ཁྲོས་ཤིང་རང་དབང་ཆེད་གྱུར་ནས། །རང་ཡང་མངོན་པར་ཞུགས་གྱུར་ཏེ། །ལག་པས་ལ་བརྡབས་ནས་ནི། །ཤིན་ཏུ་འཇིགས་པའི་སྒྲ་ཕྱུང་སྟེ། །དེ་ནས་ལྷ་ཡིས་སྤྲིན་ཕྲེང་དང་། །གློག་དང་བཅས་པའི་ཆར་ཡང་ཕབ། །སངས་རྒྱས་ཀྱིས་ནི་དེ་མཁྱེན་ནས། །དེ་བཞིན་
གཤེགས་པས་རྣམ་གཟིགས་ཏེ། །དེ་ནས་སྟོན་པས་བསྟན་དགའ་བའི། །ཉན་ཐོས་རྣམས་ལ་དགེ་སློང་དག །བདུད་སྡེ་མངོན་པར་ལྷགས་གྱུར་གྱིས། །མངོན་པར་རྟོགས་ཞེས་བཀའ་སྩལ་པ། །བརྩོན་པར་བྱེད་པ་དེ་དག་གིས། །སངས་རྒྱས་གསུངས་པ་ཐོས་ནས་ནི། །དེ་དག་
སྤུ་ཡང་མི་གཡོ་བས། །དེ་དག་ཆགས་བྲལ་ཡིན་པར་རྟོགས། །རྒྱལ་སྲས་ཉན་ཐོས་དེ་དག་ནི། །སློབ་མ་རྣམས་དང་ལྷན་ཅིག་དགའ། །དེ་དག་གཡུལ་ལས་རྣམ་རྒྱལ་ཞིང་། །འཇིགས་བྲལ་གྲགས་དང་ལྡན་པ་ཡིན། །བར་གྱི་སྡོམ་ནི། བདུན་སྟོང་གསེར་ཅན་རི་མཉམ་
དང་། །དེ་བཞིན་གནོད་སྦྱིན་ཆུ་སྲིན་དང་། །ཀུན་གྱི་བཤེས་དང་རྒྱལ་པོ་རྣམས། །དེ་བཞིན་ཁོལ་པོ་གནོད་སྦྱིན་དང་། །ཀླུ་དང་འདབ་བཟང་ལྷ་མིན་དང་། །ཆུ་ལྷ་མོ་དང་ཁྱབ་འཇུག་དང་། །ཚོགས་ཅན་མ་དང་སྔོ་བསངས་དང་། །དཀར་མོ་བདེ་བྱེད་དབང་ཕྱུག་དང་། །ཀུན་འགེད་
གཞོན་དང་འཕྲོག་མ་དང་། །དབང་བཅས་བདུད་དང་དགེ་སློང་ངོ་། །དེ་ནས་གནས་གཙང་མའི་ལྷ་ཤིན་ཏུ་དབང་ཆེ་བར་གྲགས་པ་རྣམས་མདོ་སྡེ་བསྟན་པས་ཡི་རངས་པར་གྱུར་ནས་དེའི་ཚེ་ཚིག་འདི་དག་གིས་འདུས་པ་ཆེན་པོའི་མདོ་བཤད་དོ། །བཅོམ་ལྡན་འདས་བདག་ཅག་གིས་ཀྱང་

ཚིག་འདི་དག་གིས་མདོ་སྡེ་འདི་ཡང་དག་པར་བསྙད་པར་བགྱི་ཞིང་ཡང་དག་པར་བརྗོད་པར་བགྱི་ལགས་སོ། །དེ་ལ་གསང་སྔགས་ཀྱི་ཚིག་ནི་འདི་དག་ལགས་སོ། །ཏདྱ་ཐཱ། ཏེ་ཛེ་ཏེ་ཛ་བ་ཏི། ཙི་ཏྲེ་ཙི་ཏྲ་བ་ཏི། ལ་ཏེ་ལ་ཏ་བ་ཏི། ཁ་མེ་ཁ་མ་བ་ཏི། ཀྵེ་མེ་ཀྵ་མ་པ་ཏི།
བྷ་དྲེ་བྷ་དྲ་བ་ཏི། ཡ་ཤེ་ཡ་ཤ་བ་ཏི། དཱུ་ཏེ་དཱུ་ཏ་བ་ཏི། ཙ་པ་ལེ་ཙ་པ་ལ་བ་ཏི། ཁ་ཙེ་ཁ་ཙ་བ་ཏི། བཅོམ་ལྡན་འདས་འདི་དག་ནི་གནས་གཙང་མ་པ་རྣམས་ཀྱི་གསང་སྔགས་ཀྱི་ཚིག་རྣམས་ལགས་ཏེ། བཅོམ་ལྡན་འདས་གང་ཞིག་མདོ་སྡེ་འདི་དང་། གསང་སྔགས་ཀྱི་ཚིག་འདི་
དག་རྨོངས་པ་མ་མཆིས་པར་འཛིན་པར་བགྱིད་ན། དེ་ནི་ཇི་སྲིད་འཚོའི་བར་དུ་འབྱུང་པོ་ཐམས་ཅད་ལས་བསྲུང་བ་བགྱིས་པར་འགྱུར་ལགས་སོ། །འབྱུང་པོ་ཐམས་ཅད་ཀྱང་དགའ་བར་འགྱུར་ལགས་སོ། །དེ་ལ་བྲོ་ནད་ཐམས་ཅད་ཀྱིས་མི་ཚུགས་པར་འགྱུར་ལགས་སོ། །གང་དུ་
ཀློག་པ་དེར་དགེ་བར་འགྱུར་ཞིང་དེ་དག་ལ་དགུང་ལོ་བདུན་དུ་བསྲུང་བ་བགྱིས་པར་ཡང་འགྱུར་ལགས་སོ། །ཇི་ཙམ་འཚལ་བར་འགྱུར་བ་དེ་ཙམ་གྱིས་དགུང་ཆར་འབབ་པར་ཡང་འགྱུར། འཆད་པར་ཡང་འགྱུར། དགུང་སེར་འབེབ་པར་ཡང་འགྱུར། འཆད་པར་ཡང་འགྱུར་
ལགས་སོ། །བྲོ་ནད་ཐམས་ཅད་ལ་བྱབ་པར་བགྱིས་སམ། ཆབ་ལ་བཟླས་བརྗོད་བགྱིས་ཏེ་སྩལ་ན། དེས་དེའི་བྲོ་ནད་ཐམས་ཅད་རབ་ཏུ་ཞི་བར་འགྱུར་ལགས་སོ། །དེ་ནས་བཅོམ་ལྡན་འདས་ལ་ཚངས་པས་གསོལ་པ། བཅོམ་ལྡན་འདས་གནས་གཙང་མ་པ་དག་མ་གཏོགས་པ་
གཟུགས་ན་སྤྱོད་པའི་ལྷའི་རིས་གོང་མ་རྣམས་ཀྱི་རིག་སྔགས་ཀྱང་འདི་དག་ལགས་ལ། གསང་སྔགས་ཀྱི་ཚིག་ཞིབ་མོ་ཡང་འདི་དག་ལགས་སོ། །འདི་ནི་འདིར་མདོ་སྡེ་ཡོངས་སུ་འཛིན་པར་བགྱིད་པ་ལགས་སོ། །ཏདྱ་ཐཱ། བྷ་ལེ་བྷ་ལ་མ་ལེ། དུར་དུ་ལེ། ཧི་མེ། ཕུབ་པི་སེ།
ཀཱ་ཙཱཀྵི་ཀུ་ཙེ་སི། མ་མཱི་ཎི་ཥེ་རེ་ཐོ་ར་ཎཱི། བམ་པི་བམ་པོ་ཊི་སྟེ་ཀེ། ཏ་ར་ཀེ། གུ་རུ་ག་རོ་ཊེ། གུག་གུ་མི་ཏི། ཏཱ་རེ་རཀྵ། སཱུ་ཏྲ་མ་ནུ་པཱ་ལ་ཡ་ཐཱ། འདི་ནི་བདག་ཅག་གི་རིག་སྔགས་ཀྱི་ཆོ་ག་ཞིབ་མོ་ལགས་ཏེ། གང་ལ་ལ་ཞིག་མདོ་སྡེ་འདི་དང་གསང་སྔགས་ཀྱི་ཚིག་འདི་དག་དུམ་བུར་

མ་གྱུར་པར་འཛིན་ཏམ། ཀློག་པར་བགྱིད་ན་དེ་ལ་མི་དང་། མི་མ་ལགས་པ་དག་མཆི་བར་མི་འགྱུར་ཞིང་གདུག་པ་ཡང་མི་མཆི། སྦྲུལ་ཡང་མི་མཆི། དུག་ཀྱང་མི་མཆི་ལ། དེའི་ལུས་ལ་གནོད་པ་དག་གིས་མི་ཚུགས་པར་འགྱུར་ལགས་སོ། །འབྱུང་པོ་ཐམས་ཅད་ཀྱང་
དགའ་བར་འགྱུར་ལགས་སོ། །ཇི་སྲིད་འཚོའི་བར་དུ་འབྱུང་པོ་ཐམས་ཅད་ལས་བསྲུང་བ་བགྱིས་པར་ཡང་འགྱུར་ལགས་སོ། །གང་ཀློག་པར་བགྱིད་པ་དང་། གང་ཉན་པར་བགྱིད་པ་དེ་ལ་དགུང་ལོ་བདུན་དུ་བསྲུང་བ་བགྱིས་པར་འགྱུར་ལགས་སོ། །ཆབ་ལ་བཟླས་
བརྗོད་བགྱིས་ཏེ་གཏོར་ཏམ། འཚལ་དུ་སྩལ་ན་དེའི་བྲོ་ནད་ཐམས་ཅད་ཉེ་བར་ཞི་བར་འགྱུར་ལགས་སོ། །དེ་ནས་བཅོམ་ལྡན་འདས་ལ་འདོད་པའི་བདག་པོ་ཐམས་ཅད་ཀྱིས་གསོལ་པ། བཅོམ་ལྡན་འདས་འདི་ནི་བདག་ཅག་གི་ཡུལ་ཡང་ལགས་ཏེ། མདོ་སྡེ་འདི་ཡོངས་སུ་
གཟུང་བའི་རིག་སྔགས་ནི་འདི་ལགས་སོ། །ཏདྱ་ཐཱ། ལིནྟེ་ལི་པེ། ལོ་པེ། བ་པེ། པད་ཀེ། ཀ་མེ། ཀཱ་ཙེ་ཀཱ་ཙེ་ཀྵི། ཀཱ་ཙ་པི་ག་ལེ། དུ་མེ་དུ་མེ། ཏ་ཊེ་ཏྲ་ཊེ། ཏ་ད་ཏྲ། ཊེ་ཏྲ་ཊཱ་ཀྵི། གོ་ལཱ། ཀོ་ལི། ཀི་ཀ་ཀོ་ལི་ཀེ་སཱ་དྷཱ། སཱུ་ཏྲ་མ་ནུ་པཱ་ལ་ཡ་ཐཱ། ཨུད་གྲྀཧྞ་ཡ་ཙེ་ཏི། བཅོམ་ལྡན་
འདས་གང་ཞིག་གསང་སྔགས་ཀྱི་ཚིག་འདི་དག་དང་། མདོ་སྡེ་ལེགས་པར་གསུངས་པ་འདི་དུམ་བུར་མ་གྱུར་བ་དང་། མཉམས་པར་བཟུང་སྟེ་སྲུང་བར་བགྱིད་ན་དེ་ནི་ཐམས་ཅད་ལས་བསྲུང་བ་བགྱིས་པར་འགྱུར་ལགས་སོ། །འབྱུང་པོ་ཐམས་ཅད་ཀྱང་དགའ་བར་འགྱུར་
ལགས་སོ། །ཇི་ཙམ་འཚལ་བར་དེ་ཙམ་གྱི་དགུང་ཆར་འབེབ་པར་ཡང་འགྱུར། འཆད་པར་ཡང་འགྱུར། དགུང་སེར་འབབ་པར་ཡང་འགྱུར། འཆད་པར་ཡང་འགྱུར་ལགས་སོ། །འབྱུང་པོ་དང་གདོན་རྣམས་ལས་ཡོངས་སུ་ཐར་བར་ཡང་འགྱུར་ལགས་སོ། །དུག་
འབྱིན་པར་ཡང་འགྱུར་ལགས་སོ། །ཆབ་ལ་ལན་བདུན་བཟླས་བརྗོད་བགྱིས་ཏེ། གཏོར་ཏམ་འཚལ་དུ་སྩལ་ན་དེས་བྲོ་ནད་ཐམས་ཅད་ཉེ་བར་ཞི་བར་འགྱུར་ལགས་སོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་གསོལ་པ། བཅོམ་ལྡན་འདས་བདག་ཅག་

གི་རིག་སྔགས་འདི་ཡང་དེ་བཞིན་དུ་མདོ་སྡེ་འདི་ཡོངས་སུ་འཛིན་པར་བགྱིད་ཅིང་། འདོད་པ་ན་སྤྱོད་པའི་ལྷ་གོང་མ་རྣམས་ཀྱིས་ནི་རྗེས་སུ་ཡི་རང་བར་བགྱིས་ལ། འོག་མ་རྣམས་ཀྱིས་ཀྱང་ལེགས་པར་རྗེས་སུ་ཡི་རང་བར་བགྱིས་པ་ལགས་སོ། །ཏདྱ་ཐཱ། བཱི་རེ་བཱི་རེ་བ་
ཏི། ཏོ་ཊེ་ཏོ་ཊ་བ་ཏི། བྷ་དྲེ་བྷ་དྲ་བ་ཏི། གོ་ནེ་གོ་ན་བ་ཏི། མེ་གྷེ་མེ་གྷ་བ་ཏི། ཛྭ་ལ་ནེ་ཛྭ་ལ་ན་བ་ཏི། བྷུ་ཏི་བྷུ་ཏ་བ་ཏི། ཁོ་ར་ཏེ་ཁོ་ར་ཏ་པ་ཏི། ཨི་དན་སཱུ་ཏྲ་མ་ནུ་གྲྀཧྞ་ཋ། ཨ་ནུ་པཱ་ལ་ཡ་ཐ་ཙེ་ཏི། བཅོམ་ལྡན་འདས་གང་ཞིག་མདོ་སྡེ་འདི་དང་གསང་སྔགས་ཀྱི་ཚིག་འདི་དག་དུམ་བུར་མ་
གྱུར་པར་འཛིན་པར་བགྱིད་ན་དེ་ཇི་སྲིད་འཚོའི་བར་དུ་འབྱུང་པོ་ཐམས་ཅད་ལས་སྲུང་བར་བགྱིད་པར་འགྱུར་ལགས་སོ། །དེ་ལ་མི་དང་མི་མ་ལགས་པ་འགའ་ཡང་འཚེ་བར་མི་འགྱུར་ལགས་སོ། །གང་དུ་ཀློག་པ་དེར་ཇི་སྲིད་འཚོའི་བར་དུ་སྲུང་བ་བགྱིད་པར་འགྱུར་ལགས་སོ། །སེམས་
ཅན་ཐམས་ཅད་ཀྱང་དགའ་བར་འགྱུར་ལགས་སོ། །དེ་ལ་ཟིལ་གྱིས་གནོན་པ་འགའ་ཡང་འབྱུང་བར་མི་འགྱུར་ལགས་སོ། །དེ་ཡི་ལུས་ལ་བྲོ་ནད་རྣམས་ཀྱིས་མི་ཚུགས་པར་འགྱུར་ལགས་སོ། །སེམས་ཅན་ཐམས་ཅད་ལ་ཕན་འདོགས་པར་ཡང་འགྱུར་ལགས་སོ། །གང་དུ་ཀློག་
པར་འགྱུར་བ་དེར་དགུང་ལོ་བདུན་དུ་བསྲུང་བ་བགྱིས་པར་འགྱུར་རོ། །འབྱུང་པོ་དང་གདོན་རྣམས་ལས་ཐར་བར་ཡང་འགྱུར་ལགས་སོ། །དུག་འཇོམས་པར་ཡང་འགྱུར་ལགས་སོ། །བྲོ་ནད་ཐམས་ཅད་སེལ་བར་ཡང་འགྱུར་ལགས་སོ། །སྐུད་པའམ་ཆབ་ལ་བཟླས་བརྗོད་
བགྱིས་ཏེ་བཅིངས་སམ་གཏོར་ན་བྲོ་ནད་ཐམས་ཅད་དང་བྲལ་བར་ཡང་འགྱུར་ལགས་སོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞིས་གསོལ་པ། བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིའི་རིག་སྔགས་འདི་ཡང་མདོ་སྡེ་འདི་ཡོངས་སུ་འཛིན་ཅིང་གྲུབ་པར་
བགྱིད་པ་ལགས་སོ། །རྣམ་ཐོས་ཀྱི་བུས་གསོལ་པ། ཏདྱ་ཐཱ། ཀུ་རེ་ཀུ་ར་ཎཱི། མོ་རེ་མོ་ར་ཎཱི། ཀཱ་ཙེ་ཀཱ་ཙ་ནཱི། ཀྲི་མི་ཀྲི་མི་ཎཱི། ཡུལ་འཁོར་སྲུང་གིས་གསོལ་པ། པུ་རེ་པོ་རེ། པུ་ར་ཏཱི། ཧོ་རེ་ཧོ་ར་ཎཱི། པྲ་ཧོ་རེ་པྲ་ཧོ་ར་ཎཱི། འཕགས་སྐྱེས་པོས་གསོལ་པ། ཀེ་ཤེ་ཀེ་ཤེ་

པ་ཏི། ཀེ་ཤ་ན། མི་ཀེ་ཤ། ཋེ་ཏི་ཋེ་ནི་མ་རི་ཏི། མིག་མི་བཟང་གིས་གསོལ་པ། ཙཀྲེ་ཙཀྲི་ཎཱི། ཙཀྲ་བ་གི་ཎི། བྷི་ཏི་རི་རྨི་ནི། ཤི་མི་ཤི་མི། ཤཱ་མ་ནེ་ཏི། བཅོམ་ལྡན་འདས་གང་ཞིག་རྒྱལ་པོ་ཆེན་པོ་བཞིས་བརྗོད་པའི་རིག་སྔགས་ཀྱི་ཆོ་ག་ཞིབ་མོ་འདི་བཞི་དང་། མདོ་སྡེ་
འདི་དུམ་བུར་མ་གྱུར་པ་དང་། མ་བཀོལ་བར་ལེགས་པར་བཟུང་སྟེ་སྲུང་བར་བགྱིད་ན། དེ་ཇི་སྲིད་འཚོའི་བར་དུ་བསྲུང་བ་བགྱིས་པར་འགྱུར་ལགས་སོ། །དེ་ལ་འབྱུང་པོ་ཐམས་ཅད་དང་། བྲོ་ནད་ཐམས་ཅད་ཀྱང་སླར་མི་ལྡོག་པར་འགྱུར་ལགས་སོ། །གདུག་པས་ཟིན་པ་
དང་། དུག་ཐམས་ཅད་ལས་ཀྱང་ཐར་བར་འགྱུར་ལགས་སོ། །སྐུད་པའམ། ཆབ་ལ་བཟླས་བརྗོད་བགྱིས་ཏེ། བཅིངས་སམ། གཏོར་ཅིང་འཚལ་དུ་སྩལ་ན། ཆོ་ག་དེས་དེ་ལ་འགྲུབ་པར་འགྱུར་ལགས་སོ། །དེ་ནས་བཅོམ་ལྡན་འདས་ལ་ལྷ་མ་ཡིན་དང་། རླུང་ལྷས་
གསོལ་པ། བཅོམ་ལྡན་འདས་བདག་ཅག་གི་རིག་སྔགས་འདི་ཡང་ཡོངས་སུ་འཛིན་པར་བགྱིད་པ་ལགས་སོ། །ཏདྱ་ཐཱ། ག་ལེ། ག་ག་ག་ལེ། ག་ལེ་ག་ནི། ཁི་ནི་ཁི་ནི། གྷུ་ཥེ་གྷུ་ཥེ་གྷུ་གྷུ་ཥྱ། ཁ་ན་ཁ་ཁ་ནེ། ཁ་ན་ཁ་ནི། ལུ་པེ་ལུ་པི། ལུ་པ་ལུ་པི་ཏི། བཅོམ་ལྡན་འདས་གསང་སྔགས་
འདི་དག་དང་། མདོ་སྡེ་འདི་དུམ་བུར་མ་གྱུར་ཅིང་། མ་བཀོལ་བར་བཟུང་ན་ཇི་སྲིད་འཚོའི་བར་དུ་བསྲུང་བར་འགྱུར་ལགས་སོ། །དེའི་བྲོ་ནད་ཐམས་ཅད་ཀྱང་རབ་ཏུ་ཞི་བར་འགྱུར་ལགས་སོ། །ལུས་ལ་དུག་གིས་མི་ཚུགས་པར་ཡང་འགྱུར་ལགས་སོ། །དེ་ནས་བཅོམ་ལྡན་འདས་ལ་
གནས་གཙང་མའི་རིས་ཀྱི་ལྷ་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མདོ་སྡེ་འདིའི་དགོངས་པ་ཡོངས་སུ་གཟུང་བའི་སླད་དུ་ཕྱོགས་བཅུའི་འཇིག་རྟེན་གྱི་ཁམས་ནས་ལྷགས་པ་རྣམས་ཀྱིས་རིག་སྔགས་དག་སྨྲས་པ་ལགས་ན། བཅོམ་ལྡན་འདས་ཉན་ཐོས་ཀྱི་
ཚོགས་དང་བཅས་པས་ཀྱང་ཡང་དག་པར་རྗེས་སུ་ཡི་རང་བར་མཛད་ཅིང་། ཀུན་ཏུ་གཟུང་བ་དང་། བསྲུང་བ་དང་། བསྒྲུབ་པ་དག་ལེགས་པར་བཤད་དུ་གསོལ། དེ་ལྟར་ན་རིགས་ཀྱི་བུ་དེ་དག་གི་སྦྱིན་པར་བགྱི་བའི་ཆོས་ཀྱི་མདོ་སྡེ་འདི་འབྲས་བུ་དང་བཅས་པར་འགྱུར་ལགས་སོ། །དེ་ནས་

བཅོམ་ལྡན་འདས་ཀྱིས་བཀའ་སྩལ་པ། ཁྱེད་ཀྱིས་གསང་སྔགས་ཀུན་ཏུ་བཟུང་བ་འདི་ནི་གྲུབ་པ་ཡིན་ཏེ། ང་ཉན་ཐོས་ཀྱི་ཚོགས་དང་བཅས་པས་ཀྱང་མདོ་སྡེ་འདིའི་གྲུབ་པ་དང་། བསྲུང་བ་དང་། བསྒྲུབ་པ་དག་བཤད་པར་བྱ་སྟེ། དེ་ཉོན་ཅིག་དང་བཤད་པར་བྱའོ། །གནས་
གཙང་མའི་རིས་ཀྱི་ལྷ་རྣམས་ཀྱིས་བཅོམ་ལྡན་འདས་དེ་བཞིན་ལགས་ཏེ། བཅོམ་ལྡན་འདས་ཉན་ཐོས་ཀྱི་ཚོགས་དང་བཅས་པས་མདོ་སྡེ་ཆེན་པོ་འདི་གྲུབ་པར་བགྱི་བའི་སླད་དུ་བསྲུང་བ་དང་། བསྒྲུབ་པ་དག་བཤད་དུ་གསོལ། དེ་ནས་བཅོམ་ལྡན་འདས་ཀྱིས་མདོ་སྡེ་འདི་གྲུབ་པར་བྱ་བའི་ཕྱིར་
བསྲུང་བ་དང་། བསྒྲུབ་པ་དག་བཀའ་སྩལ་པ། དེ་ལ་རྒྱུན་དུ་ཞུགས་པ་རྣམས་ཀྱི་གྲུབ་པ་ནི་འདི་ཡིན་ནོ། །ཏ་ལ་ཏ་ལ། ཏན་ཏ་ལ། ཏ་ཏོ་ཏ་ལེ་མེ་ཏེ། ལན་ཅིག་ཕྱིར་འོང་བ་རྣམས་ཀྱི་གྲུབ་པ་ནི་འདི་ཡིན་ནོ། །ས་ལེ་ས་ས་ལི་ཏི། ཕྱིར་མི་འོང་བ་རྣམས་ཀྱི་གྲུབ་པ་ནི་འདི་ཡིན་ནོ། །ལ་ཏེ་
ལ་ཏེ་ལོ་ལ་ཏེ། དགྲ་བཅོམ་པ་རྣམས་ཀྱི་གྲུབ་པ་ནི་འདི་ཡིན་ནོ། །དྷུ་པུ་དྷུ་པུ། དྷུ་རུ་དྷུ་རུ། ཀ་ཙི་བི་ཀ་ཙི། ཀ་ཙ་བི་ཀ་ཙེ་ཏི། དེ་ནས་བཅོམ་ལྡན་འདས་ཀྱི་གྲུབ་པ་ནི་འདི་ཡིན་ནོ། །དྷ་མེ་དྷ་མེ། དྷ་མེ་དྷ་མེ། དྷ་སེ་དྷ་སེ། དྷ་རེ་དྷ་རེ། དྷ་རོ་དྷི་དྷི་ཏི། དེ་ལ་སྲུང་བ་ནི་འདི་ཡིན་ནོ། །ཏི་ན་ཏི་རི་
ཙ་རི་ཥ། པིངྒ་ལ་ཀྵི་རཀྵ། མཚམས་བཅད་པ་ནི་འདི་ཡིན་ནོ། །བདྡྷ་བདྡྷོ་ཏི། བདྡྷ་སི་རི་མི་ཏི། བདྡྷ་ཀུ་ཥེ་བདྡྷ། གྷུ་གྷུ་ཥེ་བདྡྷ་གྷུ་ཥེ་གྷུ་ཥེ་ཡ་མ་བ་དྷ་བྷི། སྒྲུབ་པ་ནི་འདི་ཡིན་ནོ། །པེ་ཥེ་སཱ་དྷ་ཡ། ཏུ་ཏུ་ལི་སཱ་དྷ་ཡེ་ཏི། ཞག་གསུམ་སྨྱུང་བ་བྱས་པས་ཚེས་བཅོ་ལྔའི་ཉིན་པར་གསང་སྔགས་ཀྱི་ཚིག་
འདི་དག་དང་། མདོ་སྡེ་འདིས་བཅོམ་ལྡན་འདས་ལ་མཆོད་པར་བྱས་ཏེ། ཁ་ཤར་ཕྱོགས་སུ་བལྟས་ལ་སྲུང་བ་ལན་བརྒྱ་བརྗོད་པར་བྱ་ཞིང་། བཟླས་བརྗོད་ལན་བརྒྱ་བྱས་ལ། མདུད་པ་རེ་རེ་ལ་བརྒྱ་རྩ་བརྒྱད་བྱས་ན་བསྲུང་བ་བྱས་པ་ཡིན་ཞིང་། ལན་གསུམ་སྤུ་ཟིང་ཞེས་བྱེད་པར་ཡང་
འགྱུར་ཏེ། སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །ཟླ་བ་ཡར་གྱི་ངོའི་ཚེས་བཅུ་གཉིས་ལ་བཅོམ་ལྡན་འདས་ལ་མཆོད་པ་བྱས་ལ་སྐུད་པ་དེ་ལག་ཏུ་བླངས་ཏེ་བཟླས་ཤིང་མཚམས་གཅད་པར་བྱས་ཏེ། ལན་བརྒྱ་རྩ་བརྒྱད་བརྗོད་ཅིང་མདུད་པ་བརྒྱ་རྩ་བརྒྱད་བྱས་ཏེ།

མཚམས་གཅོད་པར་བྱེད་ན་ལན་བདུན་སྤུ་ཟིང་ཞེས་བྱེད་པར་ཡང་འགྱུར་རོ། །ལྷོ་ཕྱོགས་ནས་ཅེ་སྤྱང་མོས་ལན་བསུམ་སྒྲ་ཕྱུང་སྟེ་འདུག་པར་གྱུར་ན། །དེ་ནས་མཚམས་བཅད་པར་ཤེས་པར་བྱའོ། །དེས་དེ་བཞིན་དུ་སྨྱུར་བ་བྱས་ཏེ། ཚེས་བཅོ་ལྔའི་ཉིན་པར་ཁྲུས་བྱས་ལ། བཅོམ་ལྡན་
འདས་ལ་མཆོད་པ་བྱས་ཏེ། སྐུད་པ་བླངས་ལ། ཉན་ཐོས་ཀྱི་ཚིག་རྣམས་དང་། བཅོམ་ལྡན་འདས་ཀྱི་ཆོ་གཞི་མོས་ལན་བདུན་བཟླས་ཏེ། བཟླས་བརྗོད་ལན་རྩ་བརྒྱད་བརྗོད་ཅིང་མདུད་པ་བརྒྱ་རྩ་བརྒྱད་བྱས་ལ། སྐུད་པ་ལག་ཏུ་བླངས་ཏེ། རིག་སྔགས་ཐམས་ཅད་ལན་ཅིག་
བཟླས་བརྗོད་བྱས་ཤིང་སྒྲུབ་པ་བྱས་ན་ཆར་པ་ཆེན་པོ་དང་། རླུང་ཆེན་པོ་ཡང་འབྱུང་སྟེ། མཚམས་ཀྱི་ཕྱི་རོལ་དུ་ལྡང་ཞིང་འབབ་པར་འགྱུར་ལ། སྐད་ཅིག་གིས་འཆད་པར་ཡང་འགྱུར་ཏེ། ལན་བདུན་གྱི་བར་དུ་ཡང་བརྗོད་པར་བྱའོ། །དེ་ནས་ལྷའི་བུ་སྤྲིན་ཆེན་ཞེས་བྱ་བ་དང་། སྤྲིན་བཟང་
ཞེས་བྱ་བ་གཉིས་འོངས་ཏེ། དེའི་རྐང་པ་ལ་མགོ་བོས་ཕྱག་འཚལ་ཞིང་གྲུབ་པ་སྦྱིན་པ་དང་། རྗེས་སུ་ཡི་རང་བར་ཡང་འགྱུར་རོ། །དེ་ལ་གྲུབ་པ་ནི་འདི་དག་ཡིན་ཏེ། སྤྲིན་ནི་ཀུ་ཙུ་ཀུ་ཙ་ཞེས་བྱའོ། །སྤྲིན་བཟང་ཀྱི་ནི་འདི་ཡིན་ཏེ། ཀ་ར་ཀ་ར་ཀཱ་ར་ར་ཞེས་བྱའོ། ཚིག་འདི་དག་དང་
སྐུད་པ་ལག་ཏུ་བླངས་པས་མདོ་སྡེ་དང་། གསང་སྔགས་རྣམས་བསམས་ན་གང་བྱ་བར་འདོད་པ་དེ་དག་ཐམས་ཅད་བྱེད་པར་འགྱུར་རོ། །བཅོམ་ལྡན་འདས་ཀྱི་མདོ་སྡེ་དང་། རིག་སྔགས་འདི་དག་ཐམས་ཅད་ཀྱིས་ཆུའམ་སྐུད་པ་ལ་བཟླས་ན་གང་བྱེད་པར་མི་འགྱུར་བ་དེ་མེད་དེ་ལས་ཐམས་
ཅད་འགྲུབ་པར་འགྱུར་རོ། །ཇི་སྲིད་འཚོའི་བར་དུ་བདག་དང་། གཞན་དག་བསྲུང་བའི་ཕྱིར་མདོ་སྡེ་འདི་གཟུང་བར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འབྱུང་པོ་གང་
དག་འདིར་ནི་ལྷགས་གྱུར་ཅིང་། །ས་དང་བར་སྣང་དག་ལ་འཁོད་པ་རྣམས། །སྐྱེ་དགུ་རྣམས་ལ་རྟག་ཏུ་བྱམས་བྱས་ཅིང་། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །མདོ་ཆེན་པོ་འདུས་པ་ཆེན་པོའི་མདོ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་།

པྲཛྙཱ་བརྨ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་དྷརྨ་སཱ་ག་ར་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ཆོས་ཀྱི་རྒྱ་མཚོ་
ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་དགེ་སློང་ལྔ་བརྒྱ་ཐམ་པའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་
བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ་དང་། དགེ་སློང་དེ་དག་གིས་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་ངས་ནི་ཆོས་ཟབ་མོ་མཐོང་བར་དཀའ་བ། རྟོགས་པར་དཀའ་བ། ཆ་
ཕྲ་བ། བརྟགས་པ། མཁས་ཤིང་ཤེས་པས་རིག་པར་བྱ་བ་རྟོགས་སོ། །ངས་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེའི་དོན་དང་། ལྷ་དང་། མི་རྣམས་ལ་ཕན་པ་དང་བདེ་བའི་ཕྱིར་ཆོས་ཀྱི་འཁོར་ལོ་བསྐོར་རོ། །
ངས་ཐོགས་པ་མེད་པའི་ཆོས་ཀྱི་འཁོར་ལོ་བསྐོར་བའི་ཕྱིར་ངེས་པ་ཁོ་ནར་བསྒྲུབ་པར་བྱའོ། །དགེ་སློང་དག་ཆོས་ཀྱི་རྒྱ་མཚོའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པའི་བློ་དང་ལྡན་པ། བློ་གྲོས་ཀྱི་བློ་དང་ལྡན་
པ། རྟོགས་པའི་བློ་དང་ལྡན་པ། བརྟན་པའི་བློ་དང་ལྡན་པ། ཤེས་རབ་ཀྱི་བློ་དང་ལྡན་པ། གསུང་གི་མཆོག་དང་ལྡན་པ། སྤོབས་པ་མཆོག་དང་ལྡན་པ། མཁྱེན་ཅིང་གཟིགས་པ་དག་གིས་བསྟན་ཅིང་བཤད་པ་ཡོད་དེ། གང་དག་དེ་ཤེས་པ་དང་། གང་དག་དེ་འཛིན་པ་དེ་དག་གིས་ནི་
མྱུར་བ་ཁོ་ནར་ཆོས་ལྔ་ཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། ཐོས་པ་འཛིན་པའི་དྲན་པ་དང་ལྡན་བར་འགྱུར་བ་དང་། བརྗེད་ངས་པ་མེད་པའི་དྲན་པ་དང་ལྡན་ཞིང་ཆོས་བཟུང་བ་རྣམས་ཆུད་ཟ་བར་མི་འགྱུར་བའི་བློ་གྲོས་དང་ལྡན་པར་འགྱུར་བ་དང་། རྣོན་པོ་ཐོབ་པའི་རྟོགས་པ་

དང་ལྡན་པར་འགྱུར་བ་དང་། ཡི་གེ་དང་དོན་དང་ཚིག་ལ་འཇུག་པའི་སྤོབས་པ་ཐོགས་པ་མེད་པ་དང་ལྡན་པར་འགྱུར་བ་དང་། སེམས་ཅན་རྣམས་ཀྱི་རྒྱུའི་ལམ་མངོན་པར་ཤེས་ནས་སྔོན་གྱི་གནས་རྗེས་སུ་དྲན་པ་ལ་མཁས་པར་འགྱུར་བ་སྟེ། ཆོས་ལྔ་པོ་འདི་དག་ནི་སྔོན་གྱི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བཞག་གོ། །ད་ལྟར་ང་ཡང་འཇོག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཐམས་ཅད་ཀྱི་སྡོམས་ཀྱི་གཞི་བསྡུ་བ་ཁྱོད་ལ་བསྟན་པར་བྱ་སྟེ། དེས་ན་ཁྱོད་ཀྱིས་མ་
ཐོས་པའི་ཆོས་རྣམས་ཐོས་པར་འགྱུར་རོ། །ཐོས་པའི་ཆོས་རྣམས་འཛིན་པར་འགྱུར་རོ། །གཟུང་བའི་ཆོས་རྣམས་ནི་ཉམས་སུ་ལེན་པར་འགྱུར་རོ། །ཉམས་སུ་བླངས་པའི་ཆོས་རྣམས་ནི་གཞན་དག་ལ་ཁོང་དུ་ཆུད་པར་བྱེད་དོ། །ཚིག་གི་རབ་ཏུ་དབྱེ་བ་ལྔ་ནི་འདི་ལྟ་སྟེ། འདུ་བྱེད་ཀྱི་ཚིག་གི་
རབ་ཏུ་དབྱེ་བ་དང་། དེ་བཞིན་དུ་མ་ཐོས་པའི་ཆོས་ཀྱི་ཚིག་གི་རབ་ཏུ་དབྱེ་བ་དང་། བླ་ན་མེད་པའི་ཚིག་གི་རབ་ཏུ་དབྱེ་བ་དང་། ས་ནས་ས་བརྟགས་པའི་ཡི་གེའི་ཚིག་གི་རབ་ཏུ་དབྱེ་བ་དང་། ངེས་པའི་ཚིག་དང་བརྡ་སྣ་ཚོགས་ཀྱི་ཚིག་གི་རབ་ཏུ་དབྱེ་བའོ། །དེ་ལ་འདི་དག་ནི་གཟི་བྱིན་
རྟེན་པར་བྱེད་པའི་ཚིག་རིག་སྔགས་དང་ལྡན་པ་སྟེ། གླིང་བཞི་པའི་འཇིག་རྟེན་གྱི་ཁམས་ཀྱི་གནོད་སྦྱིན་དང་། སྲིན་པོ་དང་། གྲུལ་བུམ་དང་། ཡི་དགས་དང་། ཤ་ཟ་འཛམ་བུའི་གླིང་དུ་ལྷགས་པ་ཐམས་ཅད་ཀྱིས་གང་ཟག་དེ་ལ་ཟས་ཀྱི་སྣ་གྲངས་རྣམས་དང་། སྨན་རྣམས་སྦྱིན་པར་
འགྱུར་རོ། །དེ་ལ་གསང་སྔགས་ཀྱི་ཚིག་ཆོས་ལས་བྱུང་བ་གཞན་དག་ལ་མི་གནོད་པ། དེ་བཞིན་གཤེགས་པས་གསུངས་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་མནོས་པ། བསྟན་པ་ཡོངས་སུ་འཛིན་པ་ནི་འདི་དག་ཡིན་ཏེ། ཀུན་དགའ་བོ་གསང་
སྔགས་ཀྱི་ཚིག་འདི་དག་ཉོན་ཅིག །ཁྱོད་ཕྱིས་འགྱོད་ཏ་རེ། སྱཱད་ཡ་ཐེ་ད་ན། ཀརྨ་ཀེ་ཏ་མ་ནུཙྪེ། ར་ཏེ་རུ་ཏ་གྲན་དྲ་མ། ཐུ་མ་ན། ནཻ་ལ་ཏ། ཨ་སཾ་ཀུ་ལ་སྠཱ། བུ་མི་ཨ་ནུ་སྨ་རི། ཨི་ཤཾ་ག་མ་ཨི་ཤ་སྠཱ། ཀླེ་ན་ཨ་ནུ་ག་ཏེ། ཡཱ་མུ་ལ་གུམ་བྷེ། པ་བྷེ་མ་གུར་བ་ཡ་བ།

ཨ་སྱ་བཱཀྱ་སྱ་བི་ལཾ་ག། བེ་ལ་མ་ཐ། ཤྲཱི་བ་བ་རཱི་པཉྩ་ཀ། པྲ་ས་ཏེ། ཨ་བ་བེ་ལ། ཨ་གྲ་བེ་ལ། ནི་ཤི་ཁུ་ཨུ་ཙེ་ཛུ་མེ། ཨུ་ཛེ་ཛུ་མེ། ཀུན་དགའ་བོ་འདི་དག་ནི་གནོད་སྦྱིན་གྱི་དབབ་པ་གྲུབ་པ་དང་། གནོད་སྦྱིན་གང་དག་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་འོད་སྲུང་མཐོང་བ་ལ་བསྙེན་བཀུར་ཡང་བྱེད་བྱེད། རིམ་གྲོ་ཡང་བྱེད་བྱེད་པ་རྣམས་འཆིང་བ་སྟེ། ཀུན་དགའ་བོ་ཁྱོད་ཀྱིས་གནོད་སྦྱིན་དབབ་པ་གྲུབ་པ། དེ་བཞིན་གཤེགས་པས་གསུངས་པ་རྣམས་ཟུང་ཤིག །ཀུན་དགའ་བོ་གང་ལ་ལ་
གསང་སྔགས་ཀྱི་ཚིག་སྐྱོན་མེད་པའི་ཚིག་འདི་དག་འཛིན་པ་དང་། འཆང་བ་དང་། ཀུན་ཆུབ་པར་བྱེད་པ་དེ་ལ་ནི་རྒྱལ་པོ་ཆེན་པོ་བཞི་སེམས་བཞིན་དུ་གནས་སོ། །ཀུན་དགའ་བོ་གསང་སྔགས་ཀྱི་ཚིག་འདི་དག་བཟུང་བས་ནི་དྲན་པ་དང་ལྡན་པར་འགྱུར་རོ། །སངས་རྒྱས་རྣམས་དང་
བྲལ་བར་མི་འགྱུར་རོ། །ཀུན་དགའ་བོ་ཤར་གྱི་ལུས་འཕགས་ཀྱི་གླིང་ན་ནི་གནོད་སྦྱིན་སྲིད་པ་སྣང་བྱེད་ཅེས་བྱ་བ་གནས་སོ། །ཀུན་དགའ་བོ་ནུབ་ཀྱི་བ་ལང་སྤྱོད་ཀྱི་གླིང་ན་ནི་གནོད་སྦྱིན་ཆེར་སྤྱོད་ཅེས་བྱ་བ་གནས་སོ། །ཀུན་དགའ་བོ་བྱང་གི་སྒྲ་མི་སྙན་གྱི་གླིང་ན་ནི་གནོད་སྦྱིན་རྣམ་
གྲགས་ཞེས་བྱ་བ་གནས་སོ། །ཀུན་དགའ་བོ་འཛམ་བུའི་གླིང་ན་ནི་གནོད་སྦྱིན་གྲགས་ཐོབ་ཅེས་བྱ་བ་གནས་ཏེ། །ཀུན་དགའ་བོ་གནོད་སྦྱིན་དེ་དག་གིས་ཀྱང་རྗེས་སུ་དྲན་པར་འགྱུར་རོ། །ཀུན་དགའ་བོ་གནོད་སྦྱིན་གཞན་གཟི་བརྗིད་ཟ་བ་གང་ཡིན་པ་དེ་དག་ཀྱང་དད་པ་ཐོབ་པར་འགྱུར་རོ། །
དད་པ་ཐོབ་པར་གྱུར་ནས་ཀྱང་དད་པ་མི་ཕྱེད་པར་ཐོབ་པར་བྱ་བའི་ཕྱིར་འགྲོ་བར་བྱེད་དོ། །ཀུན་དགའ་བོ་དེ་ལ་འདི་དག་ནི་ཤེས་བཞིན་གྱི་ཚིག་དྲང་སྲོང་གིས་བསྟན་པ་དག་ཡིན་ཏེ། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་དྲང་སྲོང་གི་མཆོག་གི་ཚིག་གི་མཆོག་སྲོག་ཆགས་འབྱུང་
པོ་ཐམས་ཅད་ལ་རྣམ་པར་མི་འཚེ་བའི་ཚིག་རྣམས་ཟུང་ཤིག་དང་ངས་བཤད་དོ། །ཀུན་དགའ་བོ་དེ་ལ་ངའི་ཕྱིར་ན་འབྲང་བའི་གནོད་སྦྱིན་གང་ཡིན་པ་དེ་དག་གིས་ཀྱང་བར་ཆད་བྱེད་མི་ནུས་སོ། །སྱད་ཡ་ཐེ་དན། དན་དྷ་ར་མ་ཧཱ་ཧ་ར་ཧ་ར་མ་བ་ར་ན། རུད་དྲ་ཏྲ། ཀུ་མ་ཏི་དྲི་ཏྲ། ཨིནྡྲ་

མན་ཏུ་ཀེ། ཨ་བ་ཏེ། ས་ཧ་རཱ། ས་དྷུ་མ་ཏི། ཨི་ལ་ལ་བ་མ་ཏི། ཨ་བ་ཏི། ཏ་ར་པ་ར། ཡི་བིཥྚ། ས་ད་བིཥྚ། ཨ་བ་ཏིཥྛ། པ་རི་བརྟ། ཨི་ཤ་བརྡ། ས་ད་བརྟ། ཀྲ་མ་ཀྲ་མ་ཏི་རན། ཨ་སི་བ་ཙ་མ་ལ་བི་ན་ཧ་ཐི། ཋ་ཤ་སུ་རེ། དྷུ་ར་དྷུ་ར། ཨུཀྒྲ་མུཀྒྲ། ཨུཀྒྲ་པ་ཏི། བི་ས་ར་གྲ་མ་ཏི།
ཐམས་ཅད་དང་ལྡན་པའི་གླིང་བཞི་པ་ཆེན་པོའི་འཇིག་རྟེན་གྱི་ཁམས་ཀྱི་གནོད་སྦྱིན་དང་། འབྱུང་པོ་དང་། གྲུལ་བུམ་དང་། ཡི་དགས་དང་། སྲུལ་པོ་དང་། ཀླུ་དང་། དྲི་ཟ་དང་། ཤ་ཟ་གནས་པ་གང་ཡང་རུང་བ་དེ་དག་གིས་ཁྱིམ་གྱི་ནང་ན་གནས་པ་དང་། ལམ་དུ་ཞུགས་པ་རྣམས་
ཀྱིས་དེ་བཞིན་གཤེགས་པས་གསུངས་པའི་ཚིག་འདི་དག་ཐོས་ནས་དགའ་བར་འགྱུར་རོ། །ཀུན་དགའ་བོ་ཁྱོད་ཀྱིས་གཟུངས་སྔགས་ཀྱི་ཚིག་འདི་དག་ཟུང་ཤིག །ཕྱིས་འགྱོད་ཏ་རེ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གནོད་སྦྱིན་
གྲུབ་པ་འདི་དག་ནི། །གླིང་བཞི་དག་ན་གཙོ་ཞེས་བྱ། །གསང་སྔགས་འདི་དག་སུ་འཆང་བ། །དེ་ཡི་དྲན་པ་འཕེལ་བར་འགྱུར། །སངས་རྒྱས་རྣམས་ཀྱིས་གསུངས་པ་ཡི། །གནོད་སྦྱིན་དེ་དག་ལྷགས་ནས་ནི། །ཆོས་རྒྱལ་རྣམས་ཀྱིས་བསྟན་པ་དག །ཉམས་པར་
གྱུར་པ་དེ་ལ་སྟོན། །དཔག་ཚད་བརྒྱ་ཕྲག་མང་པོ་ཡང་། །མཐར་གྱིས་སུ་ནི་སོང་ནས་ཀྱང་། །ཟབ་ཅིང་དོན་དང་ལྡན་པ་ཡི། །ཚིག་འདི་དག་ནི་མཉན་པར་བྱ། །འདི་དག་ཆོས་ཀུན་རྩ་བ་སྟེ། །དེ་དག་མཁས་རྣམས་ཉན་པར་གྱིས། །དྲག་པོ་དག་གིས་ཐོས་ན་
ཡང་། །ཕྱི་ནས་མཆོག་ཏུ་དགའ་བ་སྟེ། །གང་ལ་བདེ་དང་སྡུག་བསྔལ་མེད། །དེ་ལ་དེ་ནི་དགའ་བར་འགྱུར། །ས་འདི་ཆགས་པ་མེད་པ་སྟེ། །སངས་རྒྱས་ས་ནི་བསམ་མི་ཁྱབ། །ཆགས་པ་མེད་པར་བསྟན་པ་ཡི། །བསམ་ཡས་ས་དེ་ཐོབ་གྱུར་ནས། །ཉི་མ་སྤྲིན་
ལས་བྱུང་བ་ལྟར། །དེ་ནས་ས་སྟེང་དེ་བཞིན་སྣང་། །འདི་ལ་སྐྱེ་མཆེད་ཕུང་པོ་རྣམས། །དབེན་དང་བྱང་ཆུབ་ཡན་ལག་དབང་། །དགེ་བའི་ཆོས་ནི་ཟབ་མོ་རྣམས། །སངས་རྒྱས་གསུངས་པ་ཅི་ཡང་ཡོད། །དེ་ཡི་ཐོས་པའི་ཚོགས་རྣམས་གང་། །ནམས་ཀྱང་ཆུད་

ཟར་མི་འགྱུར་ཏེ། །མ་ཐོས་ཆོས་རྣམས་དེ་དག་ཐོས། །ཉེས་དང་ཉེས་མིན་རྣམས་ལ་མཁས། །རྟོགས་པར་ཁོང་དུ་ཆུད་པའི་མཆོག །མིག་བཟད་རྣམས་ཀྱང་དག་པར་འགྱུར། །འཆང་བ་དང་ནི་སྟོན་བྱེད་པ། །དེ་ནི་རྟག་ཏུ་སངས་རྒྱས་བསྔགས། །
སངས་རྒྱས་ཀྱི་ནི་ཆོས་རྣམས་ལ། །ཐེ་ཚོམ་མི་མངའ་བདེན་པ་གང་། །བདེན་དེས་བདག་ལ་ལུང་མནོས་པ། །ཅི་ཡོད་ཐམས་ཅད་གནས་གྱུར་ཅིག །སངས་རྒྱས་རྣམས་ནི་འབྱུང་རྣམས་ལ། །བྱམས་པས་གནས་པའི་བདེན་པ་དེས། །རང་གི་སེམས་དང་གཞན་སེམས་ལ། །
སྟོན་པ་རབ་ཏུ་གནས་གྱུར་ཅིག །གླིང་བཞིའི་གནས་ཀྱི་གནོད་སྦྱིན་དག །མ་དད་པ་དང་དད་པ་བསྟན། །གང་ལ་རྟོག་པ་མི་སྣང་བ། །དེ་ལ་དེ་ཀུན་དོན་སྟོན་འགྱུར། །གནོད་སྦྱིན་སྐར་གདོང་གང་ཡིན་དང་། །གླང་ཆེན་སྣ་དང་ཁྱད་པར་སྟོབས། །དྲག་པོ་དགའ་བྱེད་གསོད་བྱེད་
དང་། །ཟླ་བ་མགོ་མེད་ལུག་གསོད་པ། །དཔའ་སྡེ་དང་ནི་ལག་དཔའ་དང་། །སྲིན་པོ་དང་ནི་ས་འཛིན་པ། །ལྗང་གུ་ཁ་དང་རྣ་བཟང་དང་། །རལ་གྲིའི་སྡུ་ཅན་བོང་བུ་རྣམས། །ཐམས་ཅད་གྲུབ་པར་བྱེད་པར་ཤོག །གསང་སྔགས་འདི་དག་སུ་འཛིན་ལ། །གནོད་སྦྱིན་
སྲིན་པོ་དེ་དག་ནི། །སྤྲོ་བར་གྱུར་ནས་འཛུད་པར་བྱེད། །རྟག་ཏུ་དེ་ནི་སྤོབས་པ་དང་། །ཚིག་རྣམས་དང་ནི་ལུང་བསྟན་དང་། །ངེས་པའི་ཚིག་དང་ཆོས་ཀུན་དང་། །ཡི་གེ་རྣམས་ལ་མཁས་པར་འགྱུར། །ལུང་མནོས་པ་ཡང་ཆུད་མི་ཟ། །རྟོགས་པ་མཐའ་ཡས་འཕེལ་བར་
འགྱུར། །རྟག་ཏུ་དོན་དང་ཡི་གེ་ལ། །དེ་ཡི་ཤེས་པ་འཕེལ་བར་འགྱུར། །སུམ་ཅུ་རྩ་གསུམ་ལྷ་རྣམས་དང་། །མི་མཇེད་བདག་པོ་ཚངས་པ་ཡང་། །དེ་ཡི་ལེགས་བཤད་ཉན་པ་རྣམས། །དེ་ཡི་མོད་ལ་དྲན་པར་བྱེད། །སྱཱད་ཡ་ཐེ་དན། ཧུ་ཀུ་ན། མུ་ཀུ་ན། ཧ་ར་ཎ།
བི་ཧ་ར་ཎ། ཨི་ཤ་སཾ་ཀྲ་མ་ཎ། ཨོཾ་སུ་མུ་ཁ། ཏ་ཀ་ཎ། ཨ་ག་ཎ་ཨ་པྲི་ཡ། ཨུ་སྠཱ་མེ། ཀོ་བ་ཧ་རེ། ཨུ་རུ་པ། པྲ་བ་ཎ་ཏན། སཾ་པྲ་མེ་བ་ཧ་ཛ་ག་རེ། པྲ་ཤི་ག་རེ། གུ་ཌྷ་བ་ནེ། ཨུཏྟ་ན། བི་གུ་ཎ། ཨི་ཤ་ཀུ་ན། ཨ་ཏུ་ལ་ཏུ་ལ། ཨཾ་ཊི་བ་ཊི། བ་རི་ཙ་མོ་ཤ། ཧ་ར་ཛ་ག་ཏ། ཨེ་བ་

སཾ་པྲ་མུ་ཁེ། ཨ་ག་བ་རེ། ཋ་ཧུ་ས་ཧུ། ཨི་ཏི་ཡ། ཐཱ་ཧུ། ཙ་ཏུར་དྭཱི་པི་ཀ་ཡན། ཋ་ཧུ་མ་ཧུ། ཨུཀྒྲ་ཧུ། དྷཱ་ར་ས་ཧུ། སཾ་གྲ་ཧ། ཨ་བི་ན་གྲ་ཧ། ཨ་བི་ན་གྲ་ཧ། པྲཛྙཱ་བྲྀད་དྷ་ཡེ། ཋ་ཧུ་ས་ཧུ། ཀ་ར་ཀུ་རུ། དྷ་ས་ཧུ། དེ་ལ་འདི་སྐད་ཅེས་བྱ་སྟེ། །གསང་སྔགས་ཀྱི་ནི་ཚིག་འདི་དག །གང་གིས་
ལག་དང་ལུས་ལ་ཡོད། །དེ་ནི་ཐོས་ལ་རྨོངས་པ་མེད། །དེ་ནི་ཤེས་རབ་མེད་མི་འགྱུར། །སྐར་མདའ་ཇི་བཞིན་ཉི་མ་བཞིན། །ཟླ་བ་ཇི་ལྟར་སྣང་བ་བཞིན། །དེ་ལྟར་ཐོས་དང་དོན་གྱིས་ཀྱང་། །མྱ་ངན་འདས་པའི་བར་ལ་རེག །དེ་ནས་བཅོམ་ལྡན་འདས་ཀྱིས་དེའི་ཚེ་གསང་སྔགས་
འདི་དག་བཀའ་སྩལ་ཏོ། །སྱཱད་ཡ་ཐེ་དན། ཙ་ར་དྷེ་བི་ཙ་ར་དྷེ། ཨ་མཾ་ཀུ་ཏེ། ཨ་ཏི་མི་ཏི། པ་ར་ཧ་རེ། གྷ་ཎ་བྷེ། ཧི་བར་མེ། མ་ཧཱ་པྲ་ཏི་བཱ་ཧཱ་ནེ། ཛ་ཡ་ཛ་ཡ། ཨ་ནུ་ཀེ། པ་ལ་པ་ལེ། ཨུཀྒྲ་བ་ཏི། སྭ་ར་སྭ་ར། ཨ་བི་ས་རེ། གུ་གུན་དེ། པྲ་བི་བརྡྷེ། ས་མེ། ཨ་ཛི་ཏེ་ཛ་ཡེ། ནུ་པ་ལེ་སུ།
ཁོམ་སུ་སན་དྷི་ནི་ཀུ་མ་ནོ། །སཀྵེ། ཙཱ་པི་ཙཱ་པེ། ཙུ་པེ། ཙུ་ལུ་ཙུ་ལུ། པུ་ལུ་པུ་ལུ། བྱ་བ་པྲ་ས་རེ། ཀ་ར་ཀ་བྷིན་དྷེ། བི་ཛཱ་བི་ཛེ། ཨ་པྲ་ཏི་སན་དྷི། ནཱ་ནཱ་ནུ་མ་ཏི། པྲ་ན་ནུ་མ་ཏི། ཨ་རི་ད་སི། ཛེཥྛ་ནུ་པ་ནི་དེ། ཨ་སཾ་གྲ་ཨ་བ་ཏི། རིག་སྔགས་བསྡུས་པའི་གསང་སྔགས་ཀྱི་ཚིག་འདི་དག་ལུས་
ལ་ཐོགས་ཏེ་འཆང་ན། གླིང་བཞི་པ་ཆེན་པོའི་འཇིག་རྟེན་གྱི་ཁམས་ན་གནོད་སྦྱིན་དང་། སྲིན་པོ་དང་། གྲུལ་བུམ་དང་། ཡི་དགས་དང་། ཤ་ཟ་གནས་པ་དེ་དག་ཐམས་ཅད་དབང་དུ་འགྱུར་ཞིང་། དབང་དུ་མ་གྱུར་པ་རྣམས་ཀྱང་དབང་དུ་འགྱུར་རོ། །དོན་ཐམས་ཅད་ཀྱང་དེ་བཞིན་གཤེགས་
པས་གནང་བ་བཞིན་དུ་འཚོ་བའི་མཐར་ཐུག་གི་བར་དུ་འཆི་བར་མི་འགྱུར། མེད་པར་མི་འགྱུར་རོ། །དེ་ལ་ཆོ་ག་ནི་འདི་ཡིན་ཏེ། དགོན་པར་འདུག་ལ་གཟུངས་སྔགས་འདི་དག་ཐམས་ཅད་ཞག་བདུན་གྱི་བར་དུ་བརྗོད་དེ། ཉིན་ལན་གསུམ་མཚན་ལན་གསུམ་དུ་དྲན་པར་བྱའོ། །དེ་ནས་ཞག་
བདུན་ལོན་པའི་འོག་ཏུ་བསམ་པ་ཐམས་ཅད་འགྲུབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཆོས་ཀྱི་རྒྱ་མཚོ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། པྲཛྙཱ་བརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་
ཞུས་ཏེ་གཏན་ལ་ཕབ་པ།། །།༄༅། །རྒྱ་གར་སྐད་དུ། ཨཱརྱ་བིགྷྣ་བི་ནཱ་ཡ་ཀཱ་ར་ཏཱ་དྷཱ་ར་ཎཱི། བོད་སྐད་དུ། འཕགས་པ་བགེགས་སེལ་བའི་གཟུངས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་
པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་བཀའ་སྩལ་པ། དགའ་བོ་ཚོགས་ཀྱི་བདག་པོ་སུ་གང་ཚོགས་ཀྱི་བདག་པོའི་སྙིང་པོ་འཛིན་པ་དེས་ཆོ་ག་ཐམས་ཅད་དང་དགོངས་པ་ཐམས་ཅད་འགྲུབ་པར་འགྱུར་
རོ། །གསང་སྔགས་ཐམས་ཅད་འགྲུབ་པར་འགྱུར་རོ། །ཏདྱ་ཐཱ། ན་མོ་སྟུ་ཏེ། ཀ་ཊ་ཀ་ཊ། མ་ཊ་མ་ཊ། ད་ར་ད་ར། ཌ་ཧ་ཌ་ཧ། གྲིཧྞ། བྷཉྫ་བྷཉྫ། ན་མོ་སྟུ་ཏེ། རུ་རུ་ཙ་ཙ་ཡེ་སྭཱ་ཧཱ། ཨ་བྷུ་ཏྲཱ། བི་ན་དུཿཁན་མན་ཙེདྡྷ་པ་ར་ས་མ་གཙྪ་ཏི། ཧ་ཧ་ཡ། མ་ཧཱ་ཧ་སྟིཀྵ་ཏ་ན་ན། པྲ་གོ་བ་
ཡེ་མོ། །ཀུ་རུ་ཀུ་རུ། ཙུ་རུ་ཙུ་རུ། མུ་རུ་མུ་རུ། ན་མོ་ན་མཿསྭཱ་ཧཱ། ནང་པར་ལངས་ཏེ་སྔགས་ལན་བདུན་བཟླས་ལ། ཆུ་ཁྱོར་བ་གང་སྟེང་དང་། འོག་གི་ཕྱོགས་སུ་གཏོར་ཅིག་དང་བགེགས་ཐམས་ཅད་བཅིངས་པར་འགྱུར་རོ། །གསང་སྔགས་སྒྲུབ་འདོད་པས་སྐུད་པ་དཀར་པོ་ལ་
མདུད་པ་ཉི་ཤུ་རྩ་གཅིག་པོར་ཏེ། ལག་པ་ལ་བཅིངས་ན་རིག་སྔགས་འགྲུབ་པར་འགྱུར་རོ། །བགེགས་ཐམས་ཅད་བཅིངས་པར་འགྱུར་རོ། །གང་ན་ཚོགས་ཀྱི་བདག་པོ་སྣང་བ་དེར་སྔགས་འདི་ལན་ཅིག་བཀླགས་ན་ཡང་བགེགས་རྣམས་པར་ཆད་མི་བྱེད་དོ། །བཅོམ་ལྡན་འདས་ཀྱིས་དེ་སྐད་
ཅེས་བཀའ་སྩལ་ནས། འཁོར་དེ་དག་ཐམས་ཅད་དགའ་སྟེ། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་གྱིས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བགེགས་སེལ་བ་ཞེས་བྱ་བའི་གཟུངས་རྫོགས་སོ།། །།

གུ་གུལ་སེར་པོ་དང་། ཕ་བང་གི་རྟུག་པ་ཀུན་ལ་རྐུ་བའི་རྟག་པ་སྦྱར་བའི་དུ་བས་གདུགས་ན། འགོ་བའི་ནད་པའི་གན་དུ་ཕྱིན་ཡང་མི་ཚུགས། གོས་པ་ལ་ཐུག་ན་མྱུར་དུ་སེལ། ཁྱིམ་དུ་འབྱུང་པོ་གནོད་པ་དག་ལ་རབ་ཏུ་བསྔགས་སོ།། །།
༄༅། །རྒྱ་གར་སྐད་དུ། ཨཱ་ཊཱ་ནཱ་ཊཱི་ཡ་མ་སཱུ་ཏྲཾ་ནཱ་མ་མ་ཧཱ་སཱུ་ཏྲ། བོད་སྐད་དུ། མདོ་ཆེན་པོ་ཀུན་ཏུ་རྒྱུ་བ་དང་། ཀུན་ཏུ་རྒྱུ་བ་མ་ཡིན་པ་དང་མཐུན་པའི་མདོ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་
ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་ཁ་དོག་འཕགས་པ། གཡོག་འཁོར་གནོད་སྦྱིན་དུ་མ་དང་། གཡོག་འཁོར་གནོད་སྦྱིན་བརྒྱ་ཕྲག་དུ་མ་དང་། གཡོག་འཁོར་གནོད་སྦྱིན་སྟོང་ཕྲག་ཏུ་
མ་དང་། གཡོག་འཁོར་གནོད་སྦྱིན་འབུམ་ཕྲག་དུ་མ་དང་ལྡན་པ་ནམ་སྲོས་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེའི་ཚེ་རྒྱལ་པོ་ཆེན་པོ་རྣམ་ཐོས་ཀྱི་བུའི་ཁ་དོག་གི་མཐུས་
རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བ་ཆེན་པོས་གསལ་བར་གྱུར་ཏོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ཕྱོགས་གཅིག་ཏུ་འདུག་ནས་དེའི་ཚེ་ཚིགས་སུ་བཅད་པ