Kinh tạng Tây Tạng (Kangyur Đại Học) — 087_རྒྱུད་འབུམ།_ད

༄༅། །རྒྱུད་འབུམ་ད་པ་བཞུགས་སོ། །

༄༅༅། །རྒྱ་གར་སྐད་དུ། ཨཱརྱ་བཛྲ་པཱ་ཎི་ཨ་བྷི་ཥེ་ཀ་མ་ཧཱ་ཏནྟྲ། བོད་སྐད་དུ། འཕགས་པ་ལག་ན་རྡོ་རྗེ་དབང་བསྐུར་བའི་རྒྱུད་ཆེན་པོ། བམ་པོ་དང་པོ། སངས་རྒྱས་དང་
བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷའི་རྒྱལ་པོ་དབང་སྒྱུར་གྱི་ཁང་པ་ཆེན་པོ་རྣམ་པར་སྨིན་པ་བསམ་གྱིས་
མི་ཁྱབ་པ་ལས་མངོན་པར་གྲུབ་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་པའི་རྒྱུ་མཐུན་པའི་རིན་པོ་ཆེའི་རྒྱལ་པོ་ཆེན་པོས་ཤིན་ཏུ་རྣམ་པར་སྤྲས་པའི་ཁང་བཟང་ཆེན་པོ་རིན་པོ་ཆེའི་རྒྱལ་པོ།
བྱང་ཆུབ་སེམས་དཔའ་སེམས་དཔའ་ཆེན་པོའི་ཁང་པ་ན། པདྨའི་སྙིང་པོའི་སེང་གེའི་ཁྲི་ཆེན་པོ། ནོར་བུ་ཆེན་པོ་དབང་གི་རྒྱལ་པོས་ངོས་གཉིས་རྣམ་པར་སྤྲས་པ་ལ་བཞུགས་ནས།
ལྷམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན་ཉི་མའི་དཀྱིལ་འཁོར་ནི་ནམ་ཐང་བའི་ནམ་མཁའ་ལ་ལྷམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་པདྨའི་སྙིང་པོའི་སེང་གེའི་ཁྲི་

ཆེན་པོ་དེ་ལ་ལྷམ་མེ་ལྷན་ནེ་ལྷང་ངེར་བཞུགས་ནས། བྱང་ཆུབ་སེམས་དཔའི་ཚོགས་ཆེན་པོས་ཀུན་ནས་བསྐོར་ཏེ་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པ་ནི་བརྙེས། སྐུ་དང་གསུང་དང་ཐུགས་ནི་མཉམ་པར་བྱིན་གྱིས་བརླབས།
གཡོ་བ་དང་རློམ་སེམས་ཐམས་ཅད་དང་ནི་བྲལ་ཞིང་ལྷུན་གྱིས་གྲུབ་པར་སངས་རྒྱས་ཀྱི་མཛད་པ་ལ་འཇུག་ཅིང་། འདི་ལྟ་སྟེ། ལུས་མཉམ་པ་ཉིད་ཀྱི་གནས་ཞེས་བྱ་བའི་ཆོས་ཀྱི་རྣམ་གྲངས་དང་། ངག་མཉམ་པ་ཉིད་ཀྱི་གནས་ཞེས་བྱ་བའི་ཆོས་ཀྱི་རྣམ་གྲངས་
དང་། དེ་བཞིན་དུ་ཡིད་མཉམ་པ་ཉིད་ཀྱི་གནས་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་དེ་དག་གིས་ཆོས་ཀྱི་རྣམ་གྲངས་འདི་ཐོས་ནས། ལུས་དང་ངག་དང་ཡིད་མཉམ་པ་ཉིད་ཀྱི་བཀོད་པའི་སྙིང་པོ་ཞེས་བྱ་བའི་ཏིང་ངེ་འཛིན་ཐོབ་
སྟེ། ཏིང་ངེ་འཛིན་དེ་ཐོབ་པ་དང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་དེ་ཉིད་ཀྱིས་བྱིན་གྱིས་བརླབས་ཀྱིས་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ། བྱང་
ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ནས། འདི་ལྟ་སྟེ། ལུས་དང་ངག་དང་ཡིད་མཉམ་པ་ཉིད་ཀྱི་གནས་བཀོད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་སྟོན་པ་དག་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་
ལ་ལ་དག །མེ་ཏོག་གི་གཞིའི་སྙིང་པོའི་རྒྱན་བཀོད་པ་དང་ལྡན་པ། འཇིག་རྟེན་གྱི་ཁམས་རབ་འབྱམ་དུ་མ་ངེས་པར་སྟོན་པ་འདི་ནི། བྱང་ཆུབ་ཏུ་སེམས་བསྐྱེད་པ་དང་སྤྱོད་པ་ལ་ནན་ཏན་བྱེད་པ་དང་། ས་བསྒྲུབ་པ་དང་། བྱང་ཆུབ་མངོན་པར་རྫོགས་པར་

སངས་རྒྱས་པ་དང་། ཆོས་ཀྱི་འཁོར་ལོ་རབ་ཏུ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་སྟོན་པ་དེ་ཐམས་ཅད་ནི་བཅོམ་ལྡན་འདས་རྣམ་པར་སྣང་མཛད་ཀྱིས་བྱིན་གྱིས་བརླབས་ཀྱིས་སོ། །མདོར་ན་སེམས་ཅན་གང་ལ་ལ་དག་དགེ་བ་མངོན་པར་འདུ་བྱ་བ་བྱེད་པ་དེ་དག་
ཐམས་ཅད་ཀྱང་བཅོམ་ལྡན་འདས་རྣམ་པར་སྣང་མཛད་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བསྡུ་བའི་དངོས་པོ་བཞི་པོ་འདི་ལྟ་སྟེ། སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པས་བསྡུས་པ་ཤ་སྟག་སྟེ། དེ་དག་ནི་རྒྱུ་དེ་ཉིད་དང་དམིགས་པ་དེ་
དག་ཉིད་ཀྱིས་དགེ་བ་མངོན་པར་འདུ་བྱེད་དོ། །དེ་ལྟར་ན་བྱང་ཆུབ་སེམས་དཔའ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་ཡེ་ཤེས་ཆེན་པོ་ཤིན་ཏུ་རྒྱས་པ་དེ་ཐམས་ཅད་མཐོང་ཞིང་འཇུག་སྟེ། རྣམ་པར་བལྟ་ཞིང་ཉེ་བར་སེམས་ཏེ། དགེ་བ་ཅི་ཙམ་མངོན་པར་འདུ་བྱེད་པ་ཡང་རྒྱུ་
དེ་ཉིད་དང་དམིགས་པ་དེ་ཉིད་ཀྱིས་སོ། །དེ་ལྟར་བྱང་ཆུབ་སེམས་དཔའ་དེ་དག་ངོ་མཚར་རྨད་དུ་བྱུང་ཞིང་། ཡ་མཚན་གྱིས་འདུན་པའི་སྙིང་དུ་གྱུར་ནས། དེ་བཞིན་གཤེགས་པ་ནི་བསམ་གྱིས་མི་ཁྱབ་བོ་སྙམ་སྟེ་ཅང་མི་སྨྲ་བར་གྱུར་ནས། བཅོམ་ལྡན་འདས་ཉིད་ལ་རྣམ་པར་བལྟ་
ཞིང་ཉེ་བར་སེམས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཡ་མཚན་གྱི་ས་སྙིང་འདུན་པ་མཁྱེན་ནས། བྱང་ཆུབ་སེམས་དཔའ་ཐམས་ཅད་ཡང་དག་པར་བསྐུལ་བ་ཞེས་བྱ་བའི་འོད་ཟེར་འཁོར་འོད་ཟེར་སྟོང་ཕྲག་དུ་མ་མགུར་ནས་ཕྱུང་
ངོ་། །དེ་བྱུང་ནས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཐམས་ཅད་སྣང་བར་བྱས་ཏེ། ནམ་མཁའི་ཁམས་རབ་འབྱམ་དག་དང་འཇིག་རྟེན་གྱི་ཁམས་རྒྱ་མཚོ་དག་ན་བྱང་ཆུབ་སེམས་དཔའ་གང་དག་དབང་དང་ལྡན་པར་གྱུར་པ་འཁོད་པ་དེ་དག་ལ། ཐམས་ཅད་མཁྱེན་པ་
རྫོགས་སངས་རྒྱས། །བཅོམ་ལྡན་རིམས་ནད་བྲལ་བ་དེ། །དབང་སྒྱུར་རྒྱལ་པོའི་ཁང་པ་ནི། །སྐྱོན་ཀུན་རྣམ་པར་སྤངས་པ་ན། །སྙིང་འཐད་ཆེན་པོ་སེང་གེའི་ཁྲི། །དཔག་ཚད་སུམ་བརྒྱ་ཡོད་པ་ལ། །པདྨའི་སྙིང་པོ་དེར་བཞུགས་ནས། །བྱང་ཆུབ་སེམས་དཔའ་རྣམས་

ཀྱིས་བསྐོར། །གནས་དེར་ཐུབ་པ་ཆེན་པོ་ཡིས། །བཀོད་པ་ཆེན་པོར་གང་སྤྲུལ་པ། །དེ་དག་གི་ནི་གྲངས་ཚད་དང་། །དབྱིབས་དང་ཁ་དོག་གང་ཡིན་པ། །དེ་ནི་བསྐལ་པ་གྲངས་མེད་དུ། །བསྟན་པར་ནུས་པ་མ་ཡིན་ནོ། །དེ་རུ་དེད་ལ་དཔའ་བོ་ཆེ། །རྫོགས་
པའི་སངས་རྒྱས་རྐང་གཉིས་མཆོག །ཡིད་གཉིས་སོམ་ཉི་སྤངས་པ་པོ། །དོགས་པ་གཅོད་པ་བལྟ་བར་གྱིས། །ཞེས་བསྐུལ་ཏོ། །དེ་ནས་འོད་ཟེར་དེ་དག་གིས་བྱང་ཆུབ་སེམས་དཔའ་ཐམས་ཅད་ལ་བསྐུལ་ནས་སླར་ལོག་སྟེ། བཅོམ་ལྡན་འདས་རྣམ་པར་སྣང་མཛད་ཀྱི་མགུར་
དུ་རང་གི་གནས་སུ་བཞུགས་སོ། །དེ་ནས་བཅོམ་ལྡན་འདས་ཀྱིས་ཡང་མཛོད་སྤུ་ནས་ཡིད་བཞིན་གྱི་ནོར་བུ་བཀོད་པའི་མཛོད་ཀྱི་སྙིང་པོ་ཞེས་བྱ་བའི་འོད་ཟེར་སངས་རྒྱས་ཐམས་ཅད་ཡང་དག་པར་བསྐུལ་བ་འཁོར་འོད་ཟེར་བརྒྱ་སྟོང་དང་ལྡན་པ་ཕྱུང་སྟེ། དེ་ཡང་སངས་རྒྱས་ཀྱི་ཞིང་ཐམས་ཅད་དུ་
སངས་རྒྱས་བཅོམ་ལྡན་འདས་དེ་དག་ལ། འདྲེན་པ་བཅོམ་ལྡན་རྣམ་པར་སྣང་མཛད་ལ། །བལྟ་བ་དང་ནི་མཆོད་པ་བགྱི་བ་དང་། །སེམས་ཅན་ཕན་པར་བཞེད་པས་ཆོས་བརྗོད་ཕྱིར། །ཁྱེད་ཅག་ཐམས་ཅད་མ་ཤོལ་འདིར་གཤེགས་ཤིག །ཅེས་ཡང་དག་པར་སྟོན་ཏོ། །དེ་
ནས་འོད་ཟེར་དེ་དག་ཡང་སླར་ལོག་ནས་བཅོམ་ལྡན་འདས་ཀྱི་མཛོད་སྤུ་ཉིད་དུ་ཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འོད་ཟེར་དེས་བསྐུལ་མ་ཐག་ཏུ། རང་རང་གི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ།
བཅོམ་ལྡན་འདས་དག་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་བལྟ་བ་དང་། ཕྱག་བགྱི་བའི་སླད་དུ། རྒྱལ་པོ་དབང་སྒྱུར་གྱི་ཁང་པ་ཆེན་པོར་མཆི་ན། རྒྱལ་པོ་དབང་སྒྱུར་གྱི་ཁང་པ་ཆེན་
པོ་དེ་ནི་འཇིག་རྟེན་གྱི་ཁམས་གང་ཞིག་ན་མཆིས། གང་དུ་བཅོམ་ལྡན་འདས་རྣམ་པར་སྣང་མཛད་དེ། མངོན་པར་རྫོགས་པར་སངས་རྒྱས་པའི་འཇིག་རྟེན་གྱི་ཁམས་དེའི་མིང་ནི་ཅི་ཞེས་བགྱི། དེའི་བྱང་ཆུབ་ཀྱི་སྙིང་པོ་ནི་ཅི་འདྲ་བ་ཞིག་ལགས་ཞེས་ཞུས་སོ། །དེ་སྐད་ཅེས་

གསོལ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། རང་རང་གི་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་འཇིག་རྟེན་གྱི་ཁམས་ཀྱི་རྒྱུད་མེ་ཏོག་གི་གཞིའི་སྙིང་པོའི་རྒྱན་བཀོད་པ་དང་ལྡན་པ་
ཞེས་བྱ་བ་འཇིག་རྟེན་གྱི་ཁམས་རབ་འབྱམ་དུ་མ་ངེས་པར་སྟོན་པ་དག་ཡོད་དེ། འཇིག་རྟེན་གྱི་ཁམས་རབ་འབྱམ་རེ་རེ་ངེས་པར་སྟོན་པ་རེ་རེ་ལ་ཡང་། འཇིག་རྟེན་གྱི་ཁམས་ཀྱི་མཚམས་སྦྱོར་བ་ངེས་པར་སྟོན་པའི་བཀོད་པ་རབ་འབྱམ་དུ་མ་ཡོད་པར་ཁོང་དུ་ཆུད་པར་བྱའོ། །རིགས་
ཀྱི་བུ་དག་དེ་ལ་མཚམས་སྦྱོར་བ་བཀོད་པ་རྣམས་ཀྱི་ཚད་ནི། གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་རྒྱ་མཚོ་ཆེན་པོ་བྱེ་བ་ཕྲག་བརྒྱ་དང་། ཟླ་བ་དང་ཉི་མ་བྱེ་བ་ཕྲག་བརྒྱ་དག་གང་གི་ཁོངས་སུ་འདུས་ཤིང་རྗེས་སུ་ཞུགས་པ་དེ་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་གང་གི་ཁོངས་སུ་འདུས་ཤིང་རྗེས་སུ་ཞུགས་པ་དེ། མེ་ཏོག་གི་གཞིའི་སྙིང་པོའི་རྒྱན་བཀོད་པ་དང་ལྡན་པ་རབ་འབྱམ་གྱི་མཚམས་སྦྱོར་བ་རྣམས་ཀྱི་ཁོངས་སུ་
འདུས་ཤིང་རྗེས་སུ་ཞུགས་པར་གཅིག་གོ། །མེ་ཏོག་གི་གཞིའི་སྙིང་པོའི་རྒྱན་བཀོད་པ་དང་ལྡན་པ་རབ་འབྱམ་གྱི་མཚམས་སྦྱོར་བ་བྱེ་བ་ཕྲག་བརྒྱ་གང་གི་ཁོངས་སུ་འདུས་ཤིང་རྗེས་སུ་ཞུགས་པ་དེ། མེ་ཏོག་གི་གཞིའི་སྙིང་པོའི་རྒྱན་བཀོད་པ་རབ་འབྱམ་གྱི་འཇིག་རྟེན་གྱི་ཁམས་ཀྱི་རྒྱུད་
གཅིག་གོ། །མེ་ཏོག་གི་གཞིའི་སྙིང་པོའི་རྒྱན་བཀོད་པའི་རྒྱུད་བྱེ་བ་ཕྲག་བརྒྱ་རྣམས་གང་གི་ཁོངས་སུ་འདུས་ཤིང་རྗེས་སུ་ཞུགས་པ་དེ། མེ་ཏོག་གི་གཞིའི་སྙིང་པོའི་རྒྱན་བཀོད་པའི་འཇིག་རྟེན་གྱི་ཁམས་ཀྱི་རྒྱུད་བར་མ་གཅིག་གོ། །འཇིག་རྟེན་གྱི་ཁམས་རབ་འབྱམ་བར་མ་བཀོད་པའི་རྒྱུད་
བྱེ་བ་ཕྲག་བརྒྱ་གང་གི་ཁོངས་སུ་འདུས་ཤིང་རྗེས་སུ་ཞུགས་པ་དེ། མེ་ཏོག་གི་གཞིའི་སྙིང་པོའི་རྒྱན་བཀོད་པའི་འཇིག་རྟེན་གྱི་ཁམས་བཀོད་པ་གཅིག་སྟེ། དེ་ནི་བཅོམ་ལྡན་འདས་རྣམ་པར་སྣང་མཛད་དེས། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡོངས་སུ་སྦྱོངས་སོ། །རིགས་ཀྱི་

བུ་དག་འཇིག་རྟེན་གྱི་ཁམས་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་པོ་དེ་ཉིད། བཅོམ་ལྡན་འདས་རྣམ་པར་སྣང་མཛད་དེ་ཉིད་ཡིན་ཏེ། སྔོན་གྱི་སྨོན་ལམ་གྱི་དབང་གིས་བྱང་ཆུབ་སེམས་དཔའི་ཚོགས་ཀྱིས་ནི་ཡོངས་
སུ་བསྐོར། ལུས་དང་ངག་དང་ཡིད་ཀྱིས་ལས་ནི་ཤིན་ཏུ་འདས་ཤིང་ནམ་མཁའ་ཉིད་བྱང་ཆུབ་ཀྱི་སྙིང་པོར་བྱིན་གྱིས་བརླབས་ནས། འཇིག་རྟེན་གྱི་ཁམས་བར་མ་དེ་ན་རྒྱལ་པོ་དབང་སྒྱུར་གྱི་ཁང་པ་ཆེན་པོ་ན་བཞུགས་སོ། །རིགས་ཀྱི་བུ་དག་བཅོམ་ལྡན་འདས་རྣམ་པར་སྣང་མཛད་
དེ་ནི་དེ་འདྲ་སྟེ། དེའི་ཡོན་ཏན་ནམ། སྤྱོད་པའམ། སྨོན་ལམ་མམ། ཡེ་ཤེས་ཀྱི་མཐའ་ནི་ངེད་ཀྱིས་བསྐལ་པ་གྲངས་མེད་པར་ཡང་རྟོགས་པར་མི་ནུས་སོ། །རིགས་ཀྱི་བུ་དག་ངེད་ཀྱང་བཅོམ་ལྡན་འདས་དེ་སྔོན་བྱང་ཆུབ་སེམས་དཔར་གྱུར་པ་ན། བླ་ན་མེད་པ་ཡང་དག་
ར་རྫོགས་པའི་བྱང་ཆུབ་ལ་བཙུད་དེ། ངེད་ནི་བཅོམ་ལྡན་འདས་དེ་ལ་བྱས་པ་གཟོ་བ་བྱས་པ་ཤེས་པ་ཤ་སྟག་གོ། །རིགས་ཀྱི་བུ་དག་བཅོམ་ལྡན་འདས་རྣམ་པར་སྣང་མཛད་དེ་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སྔོན་གྱི་སྤྱོད་པ་དང་སྨོན་ལམ་དང་ངག་གི་འཁོར་ལོའི་
དཀྱིལ་འཁོར་རྒྱུན་མི་གཅོད་པ་ནས་བརྩམས་ཏེ། བསྟན་པ་གནས་པར་མཛད་པ་དང་ཐེག་པ་ཆེན་པོ་བླ་ན་མེད་པའི་སྤྱོད་པ་རྒྱུན་མི་འཆད་པར་འགྱུར་བ་དང་། ཅི་ལྟ་བ་བཞིན་དུ་རྣམ་པར་རིག་པར་བྱ་བ་དང་། ཅི་ཙམ་དུ་བྱང་ཆུབ་སེམས་དཔའ་ཀུན་ཏུ་བཟང་པོས་བྱིན་
གྱིས་བརླབས་ནས། རྡོ་རྗེའི་ཡེ་ཤེས་ཀྱི་དཀྱིལ་འཁོར་ཆེན་པོ་ལས་བརྩམས་ཏེ། ངག་སྣ་ཚོགས་ཀྱི་འཁོར་ལོའི་དཀྱིལ་འཁོར་རྒྱ་ཆེན་པོས་འཇིག་རྟེན་གྱི་ཁམས་མཐའ་ཡས་པ་རབ་འབྱམ་གོ་བར་མཛད་པར་བཞེད་ནས། འོད་ཟེར་གྱི་དྲ་བ་ཆེན་པོ་འདི་ཕྱུང་ངོ་། །དེ་
ནས་ཤར་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཏོག་གིས་བྱང་ཆུབ་སེམས་དཔའ་རིན་ཆེན་བློ་གྲོས་ལ། རིན་པོ་ཆེ་རྡོ་རྗེ་ཆེན་པོའི་སྙིང་པོ་འདི་བྱིན་ནོ། །ན་མཿས་མནྟ་མུ་ཁེ་བྷྱཿསརྦ་ཏ་ཐཱ་ག་ཏེ་བྷྱཿསརྦ་ཐཱ་ཛ་ན། རིགས་

ཀྱི་བུ་ཁྱོད་རིན་པོ་ཆེ་རྡོ་རྗེ་ཆེན་པོའི་སྙིང་པོ་འདིས་འཇིག་རྟེན་གྱི་ཁམས་དེར་གནས་པར་གྱིས་ཤིག །དེ་ནས་བྱང་ཆུབ་སེམས་དཔའ་རིན་ཆེན་བློ་གྲོས་ཀྱིས་སྙིང་པོ་འདི་བླངས་ཏེ། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་
དུ་མས་ཡོངས་སུ་བསྐོར་ཏེ། བཅོམ་ལྡན་འདས་རྣམ་པར་སྣང་མཛད་ལ་མཆོད་པའི་ཕྱིར། བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང་། རིན་པོ་ཆེ་རྡོ་རྗེ་ཆེན་པོ་ལ་སྙིང་པོ་འདིས་མཆོད་པའི་སྤྲིན་ཆེན་པོ་སྔོན་མ་མཐོང་བ་མངོན་པར་སྤྲུལ་ནས། འཇིག་རྟེན་གྱི་ཁམས་མེ་ཏོག་
གི་གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ག་ལ་བ་དེར་སོང་སྟེ་ཕྱིན་ནས། ཐམས་ཅད་དང་ལྡན་པའི་འཇིག་རྟེན་གྱི་ཁམས་དང་རྒྱལ་པོ་དབང་སྒྱུར་གྱི་ཁང་པ་ཆེན་པོ་ཡང་རིན་པོ་ཆེ་དང་རྡོ་རྗེ་མེ་ཏོག་གི་སྤྲིན་ཆེན་པོས་མངོན་པར་བཀབ་བོ། །དེ་བཞིན་དུ་བདུག་
པ་དང་། སྤོས་དང་། ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། ཕྱེ་མ་དང་། ན་བཟའ་དང་། རྒྱན་དང་། རིན་པོ་ཆེ་དང་། རྡོ་རྗེའི་སྤྲིན་ཆེན་པོ་དག་གིས་བཀབ་བོ། །བཅོམ་ལྡན་འདས་རྣམ་པར་སྣང་མཛད་ག་ལ་བ་དེར་ཡང་སོང་ནས། བྱང་
ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ནས། ཇི་ལྟར་འོངས་པ་བཞིན་དུ་ཤར་ཕྱོགས་ཉིད་དུ་གནས་ཏེ། རིན་པོ་ཆེ་དང་རྡོ་རྗེའི་ཁང་པ་བརྩེགས་པ་ཆེན་པོ་དང་རིན་པོ་ཆེའི་རྒྱལ་པོ་ཆེན་པོ་དང་རྡོ་རྗེའི་དབྱུག་གུ་
དང་པདྨའི་སྙིང་པོའི་སེང་གེའི་ཁྲི་ཆེན་པོ་དག་མངོན་པར་སྤྲུལ་ནས་རིན་པོ་ཆེ་རྡོ་རྗེ་ཆེན་པོའི་སྙིང་པོས་བྱིན་གྱིས་བརླབས་ཏེ། རིན་པོ་ཆེ་རྡོ་རྗེ་ཆེན་པོའི་ཡི་གེའི་སྙིང་པོའི་ཡི་གེའི་སྙིང་པོས་ཕྱོགས་བཅུ་རྒྱས་པར་འགེངས་ཤིང་བཞུགས་སོ། །ལྷོ་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མེ་ཏོག་ཀུན་ཏུ་རྒྱས་པའི་རྒྱལ་པོའི་དབང་པོས། འཇམ་དཔལ་གཞོན་ནུར་གྱུར་པ་ལ། རྡོ་རྗེ་ཆེན་པོའི་སྙིང་པོའི་སྙིང་པོས་བྱིན་གྱིས་བརླབས་ནས་བཀའ་སྩལ་པ། རིགས་ཀྱི་བུ་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་དེར།

བཅོམ་ལྡན་འདས་རྣམ་པར་སྣང་མཛད་དེ་ལ་ཕྱག་བྱ་བ་དང་བལྟ་བ་དང་མཆོད་པའི་ཕྱིར་སོང་ཤིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་ཏུ་རྒྱས་པའི་རྒྱལ་པོའི་དབང་པོས། རྡོ་རྗེ་ཆེན་པོའི་
སྙིང་པོ་འདི་གསུངས་སོ། །ན་མཿས་མནྟ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿ སརྦ་མ་ཧཱ་བཛྲཱ་གྲ་བ་རྃ་ཧཱུྃ། དེ་ནས་འཇམ་དཔལ་གཞོན་ནུར་གྱུར་པས་རྡོ་རྗེ་མཆོག་གི་སྙིང་པོ་འདི་ཐོབ་ཅིང་། བཅོམ་ལྡན་འདས་དེས་གནང་བས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་
དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ། འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་ག་ལ་བ་དེ་དང་། རྒྱལ་པོ་དབང་
སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་ནས་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་འདི་ཐམས་ཅད་རིན་པོ་ཆེ་རྡོ་རྗེ་མཆོག་གི་སྣང་བ་ཆེན་པོས་སྣང་བར་བྱས་སོ། །རྡོ་རྗེ་ཆེན་པོའི་མཆོག་གི་མེ་ཏོག་དང་། བདུག་པ་དང་།
སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་རྣམས་དང་། རྡོ་རྗེ་ཆེན་པོའི་མཆོག་དང་། རིན་པོ་ཆེ་མཆོག་གི་འོད་ཟེར་གྱི་སྣང་བས་རྒྱལ་པོ་དབང་སྒྱུར་གྱི་ཁང་པ་ཆེན་པོ་སྣང་བར་བྱས་སོ། །མཆོག་
སྦྱིན་པ་ཆེན་པོའི་རྡོ་རྗེ་མཆོག་གི་སྒྲས་ཕྱོགས་བཅུར་གོ་བར་བྱས་སོ། །གོ་བར་བྱས་ནས་ཀྱང་ཇི་ལྟར་འོངས་པ་བཞིན་དུ་ལྷོ་ཕྱོགས་ཉིད་དུ་གནས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་རྡོ་རྗེ་ཆེན་པོའི་མཆོག་ལས་བྱུང་བའི་པདྨའི་རྒྱལ་པོ་ཆེན་པོ་
རྣམས་ལ་འདུག་གོ། །ནུབ་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ། དེ་བཞིན་གཤེགས་པ་ཐམས་ཅད་

ཀྱི་ཐུགས་རྗེ་ཆེན་པོའི་དཀྱིལ་འཁོར་གྱི་མཆོག །རྡོ་རྗེ་ཆེན་པོའི་པདྨའི་མཆོག་གི་སྙིང་པོ་འདི་སྦྱིན་པར་མཛད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱིས། རྡོ་རྗེ་ཆེན་པོའི་པདྨ་མཆོག་
གི་དཀྱིལ་འཁོར་ཐུགས་རྗེའི་སྟོབས་ཀྱི་སྙིང་པོ་འདི་གསུངས་སོ། །ན་མཿས་མནྟ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿ སརྦ་ཐཱ་ཀ་རུ་ཎ་བ་ལ་བཛྲ་པདྨཱ་གྲ་ས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱིས་སྙིང་པོ་དའི་གསུངས་
ནས། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་ཕྱུག་ལ་རིགས་ཀྱི་བུ་དེའི་དུས་ལ་བབ་པར་ཤེས་ནས། འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་དེར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམ་པར་སྣང་མཛད་དེ་ལ་བལྟ་བ་དང་། ཕྱག་བྱ་བའི་ཕྱིར་སོང་ཤིག་ཅེས་བཏང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་ཕྱུག་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་
དུ་བདར་ཏེ། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་འཇིག་རྟེན་གྱི་ཁམས་འདིར་ཕྱིན་ནས། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་
སོང་སྟེ་ཕྱིན་ནས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ཏེ། ཇི་ལྟར་འོངས་པ་བཞིན་དུ་ནུབ་ཕྱོགས་ཉིད་དུ་གནས་ནས་པདྨ་ཆེན་པོ་རྡོ་རྗེའི་རྒྱལ་པོ་ལ་འདུག་སྟེ། རྒྱལ་པོ་དབང་སྒྱུར་གྱི་ཁང་པ་ཆེན་པོ་འདི་ཐམས་ཅད་དང་། འཇིག་རྟེན་གྱི་ཁམས་མེ་
ཏོག་གི་གཞིའི་སྙིང་པོའི་རྒྱན་བཀོད་པ་ཐམས་ཅད་དུ་ཐུགས་རྗེ་ཆེན་པོའི་རྡོ་རྗེ་མཆོག་གི་སྟོབས་ཀྱིས་རང་གི་ལུས་ཀྱི་རྣམ་པར་རིག་བྱེད་ཀྱི་སྤྲིན་རྣམས་ཀྱིས་ཀུན་ཏུ་བཀང་ནས་སྣང་བར་བྱས་སོ། །བྱང་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་

པར་རྫོགས་པའི་སངས་རྒྱས་མི་འཁྲུགས་པས་བྱང་ཆུབ་སེམས་དཔའ་སའི་སྙིང་པོ་ལ། རྡོ་རྗེ་ཆེན་པོས་རྣམ་པར་གནོན་པ་རྡོ་རྗེ་ཆེན་པོས་རྣམ་པར་རོལ་པ། བྱང་ཆུབ་ཀྱི་སྙིང་པོའི་མཆོག་འཛིན་པའི་སྙིང་པོ་འདི་སྦྱིན་པར་མཛད་དོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས། བྱང་ཆུབ་ཀྱི་སྙིང་པོ་ཆེན་པོ་མཆོག་འཛིན་པའི་སྙིང་པོ་འདི་གསུངས་སོ། །ན་མཿས་མནྟ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿ སརྦ་ཐཱ་བར་ད་མན་ར་ཨ་གྲི་གྲི། འདི་གསུངས་ནས་
བྱང་ཆུབ་སེམས་དཔའ་སའི་སྙིང་པོ་ལ་རིགས་ཀྱི་བུ་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་དེ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དེར། བཅོམ་ལྡན་འདས་རྣམ་པར་སྣང་མཛད་དེ་ལ་བལྟ་བ་དང་ཕྱག་བྱ་བའི་ཕྱིར་སོང་ཤིག་ཅེས་བཏང་ངོ་། །
དེ་ནས་བྱང་ཆུབ་སེམས་དཔའ་སའི་སྙིང་པོ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་འཇིག་
རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ཏེ། ཇི་ལྟར་འོངས་པ་བཞིན་དུ་བྱང་
ཕྱོགས་ཉིད་དུ་གནས་ནས་བྱང་ཆུབ་ཀྱི་སྙིང་པོ་ཆེན་པོའི་རྒྱན་བཀོད་པར་བྱིན་གྱིས་བརླབས་ཏེ། བྱང་ཆུབ་ཀྱི་སྙིང་པོའི་མཆོག་གི་ལུས་ཀྱི་སྤྲིན་རྣམས་ཀྱིས་ཕྱོགས་བཅུ་རྒྱས་པར་འགེངས་སོ། །བྱང་ཤར་གྱི་ཕྱོགས་མཚམས་ནས། བཅོམ་ལྡན་འདས་དེ་བཞིན་གཤེགས་པ་དགྲ་
ཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མཆོག་འཛིན་གྱིས་བྱང་ཆུབ་སེམས་དཔའ་རིན་པོ་ཆེ་ཅོད་པན་ལ། དཀོན་མཆོག་གསུམ་པའི་རྡོ་རྗེ་འབྱུང་གནས་རྡོ་རྗེ་ཆེན་པོའི་སྙིང་པོ་འདི་སྦྱིན་པར་མཛད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མཆོག་འཛིན་གྱིས། དཀོན་མཆོག་གསུམ་པའི་རྡོ་རྗེ་འབྱུང་གནས་ཀྱི་སྙིང་པོ་འདི་གསུངས་སོ། །ན་མཿས་མནྟ་མུ་ཁེ་བྷྱཿ ས་རྦ་ཏ་ཐཱ་ག་ཏེ་བྷྱཿ སརྦ་ཐཱ་ཨོཾ་ཨོཾ་ཛྃ་སྃ། འདི་བྱིན་ནས་རིགས་ཀྱི་བུ་འཇིག་རྟེན་གྱི་ཁམས་མེ་ཏོག་གི་
གཞིའི་སྙིང་པོའི་རྒྱན་བཀོད་པ་དེ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་དེར། བཅོམ་ལྡན་འདས་རྣམ་པར་སྣང་མཛད་དེ་ལ་བལྟ་བ་དང་ཕྱག་བྱ་བའི་ཕྱིར་སོང་ཤིག་ཅེས་བཏང་ངོ་། །དེ་ནས་བྱང་ཆུབ་སེམས་དཔའ་རིན་པོ་ཆེའི་ཅོད་པན། བཅོམ་ལྡན་འདས་དེས་
ནང་བས་འཇིགས་རྟེན་གྱི་ཁམས་དེ་ནས་མི་སྣང་བར་གྱུར་ཏེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་འཇིག་རྟེན་གྱི་ཁམས་མེ་ཏོག་གི་
ཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་རྣམ་པར་སྣང་མཛད་ག་ལ་བ་དེར་སོང་ནས་ཇི་ལྟར་འོངས་པ་བཞིན་དུ་བྱང་ཤར་གྱི་ཕྱོགས་མཚམས་ཉིད་དུ་གནས་ནས་དཀོན་མཆོག་གསུམ་གྱིར་རྡོ་རྗེས་
རྒྱན་པའི་པདྨའི་རྒྱལ་པོ་ལ་འདུག་སྟེ། དཀོན་མཆོག་གསུམ་གྱི་སྐུའི་སྤྲིན་རྣམས་ཀྱིས་སངས་རྒྱས་ཀྱི་ཞིང་ཁམས་ཐམས་ཅད་རྒྱས་པར་འགེངས་སོ། །ཤར་ལྷོའི་ཕྱོགས་མཚམས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྤྲིན་གྱི་དཔལ་ཞེས་བྱ་བས། བྱང་ཆུབ་སེམས་དཔའ་སྤྲིན་གྱི་སྙིང་པོ་ལ་སྤྲིན་ཆེན་པོ་རྡོ་རྗེའི་མཆོག་བཀོད་པའི་སྙིང་པོ་ཞེས་བྱ་བའི་སྙིང་པོ་སྦྱིན་པར་མཛད་དེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
སྤྲིན་གྱི་དཔལ་གྱིས་སྤྲིན་ཆེན་པོ་རྡོ་རྗེའི་མཆོག་བཀོད་པའི་སྙིང་པོ་འདི་གསུངས་སོ། །ན་མཿསརྦ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿསརྦ་ཐཱ་མ་ཧཱ་བཛྲ་མེ་གྷ་བི་ཀྲཱྀ་ཌི་ཏེ་བི་ཤྭ་སམ་བྷ་བ་ཧ། འདི་བྱིན་ནས་རིགས་ཀྱི་བུ་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་

དེ་དང་རྒྱལ་པོ་དབང་སྒྱུར་གྱི་ཁང་པ་ཆེན་པོ་དེར་བཅོམ་ལྡན་འདས་རྣམ་པར་སྣང་མཛད་དེ་ལ་བལྟ་བ་དང་ཕྱག་བྱ་བའི་ཕྱིར་སོང་ཤིག་ཅེས་བཏང་ངོ་། །དེ་ནས་བྱང་ཆུབ་སེམས་དཔའ་སྤྲིན་གྱི་སྙིང་པོ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་
དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ཏེ། ཇི་ལྟར་འོངས་པ་
བཞིན་དུ། ཤར་ལྷོའི་ཕྱོགས་མཚམས་ཉིད་དུ་གནས་ནས་སྤྲིན་ཆེན་པོ་རྡོ་རྗེ་མཆོག་གི་ལུས་ཀྱི་རྣམ་པར་རིག་པའི་སྤྲིན་རྣམས་ཀྱིས་པདྨ་ཆེན་པོའི་རྒྱལ་པོའི་སྤྲིན་བྱིན་གྱིས་བརླབས་ནས། མཆོད་པ་ཆེན་པོའི་མཆོག་གི་སྤྲིན་རྣམས་ཀྱིས་འཇིག་རྟེན་གྱི་ཁམས་ཐམས་ཅད་རྒྱས་པར་
འགེངས་ཤིང་འདུག་གོ། །ལྷོ་ནུབ་ཀྱི་ཕྱོགས་མཚམས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡག་དག་པར་རྫོགས་པའི་སངས་རྒྱས་རྡོ་རྗེ་ཆེན་པོའི་ཏོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་དཔའ་བོ་ལ་རྡོ་རྗེ་ལས་བྱུང་བའི་སྙིང་པོ་སྦྱིན་པར་
མཛད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་ཏོག་གིས། རྡོ་རྗེ་ཆེན་པོ་ལས་བྱུང་བའི་སྙིང་པོ་འདི་གསུངས་སོ། །ན་མཿསརྦ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿ སརྦ་ཐཱ་བཛྲོདྡྷུ་བེ་སྭཱ་ཧཱ། འདི་བྱིན་ནས་
བཏང་ངོ་། །དེ་ནས་བྱང་ཆུབ་སེམས་དཔའ་རྡོ་རྗེ་དཔའ་བོ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་
དག་དང་ལྷན་ཅིག་ཏུ་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ག་ལ་བ་དང་། བཅོམ་ལྡན་འདས་རྣམ་པར་སྣང་མཛད་ག་ལ་བ་དེར་སོང་ནས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་

བྱས་ཏེ། ཇི་ལྟར་འོངས་བ་བཞིན་དུ་ལྷོ་ནུབ་ཀྱི་ཕྱོགས་མཚམས་ཉིད་དུ་གནས་ནས། རྡོ་རྗེ་ཆེན་པོ་ལས་བྱུང་བའི་རྡོ་རྗེ་ཆེན་པོའི་རྒྱན་རྣམས་ཀྱིས་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་ཤིང་། རྡོ་རྗེའི་གཟུགས་ཀྱིས་བརྒྱན་པའི་རྡོ་རྗེ་ཆེན་པོའི་པདྨ་ལ་འདུག་གོ། །ནུབ་
བྱང་གི་ཕྱོགས་མཚམས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲ་དབྱངས་སྙན་པས་བྱང་ཆུབ་སེམས་དཔའ་འབྲུག་སྒྲའི་རྒྱལ་པོ་ལ་རྡོ་རྗེའི་སྒྲ་དབྱངས་བསྒྲགས་པའི་སྙིང་པོ་སྦྱིན་པར་མཛད་དོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲ་དབྱངས་ཤིན་ཏུ་སྙན་པས། རྡོ་རྗེའི་ཡི་གེའི་སྙིང་པོ་འདི་གསུངས་སོ། །ན་མཿསརྦ་མུ་ཁེ་བྷྱཿ སརྦ་ཏ་ཐཱ་ག་ཏེ་བྷྱཿ སརྦ་ཐཱ་བཛྲ་རཀྵ་ནི་ཪྒྷོ་ཥ་བི་ཀྲཱནྟ་སྭཱ་ཧཱ། འདི་བྱིན་ནས་བཏང་ངོ་། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་འབྲུག་སྒྲའི་རྒྱལ་པོ་ཆེན་པོ་བཅོམ་ལྡན་འདས་དེས་གནང་བས། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ཏེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་རྣམ་པར་སྣང་མཛད་ག་ལ་བ་དེར་སོང་ནས། ཇི་
ལྟར་འོངས་པ་བཞིན་དུ་ནུབ་བྱང་གི་ཕྱོགས་མཚམས་ཉིད་དུ་གནས་ཏེ། དབྱངས་ཀྱི་རིག་བྱེད་མཐའ་ཡས་པས་སངས་རྒྱས་ཀྱི་ཞིང་འདི་ཐམས་ཅད་གོ་བར་བྱེད་ཅིང་། རང་གི་སྨོན་ལམ་ལས་ངེས་པར་བྱུང་བའི་རིན་པོ་ཆེ་ཆེན་པོའི་པདྨ་ལ་འདུག་གོ །འོག་གི་ཕྱོགས་
ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་པདྨ་རྣམ་པར་དག་པའི་སྙིང་པོས། བྱང་ཆུབ་སེམས་དཔའ་པདྨའི་ཡན་ལག་ལ་སྤྱོད་པ་ཆེན་པོའི་རྒྱལ་པོའི་རྡོ་རྗེའི་སྙིང་པོ་འདི་གསུངས་སོ། །ན་མཿ

སརྦ་མུ་ཁེ་བྷྱཿསརྦ་ཏ་ཐཱ་ག་ཏེ་བྷྱཿསརྦ་ཐཱ་ཧྃ་ཧེ་སྭཱ་ཧཱ། འདི་བྱིན་ནས་བཏང་ངོ་། །དེ་ནས་བྱང་ཆུབ་སེམས་དཔའ་པདྨའི་ཡན་ལག་བཅོམ་ལྡན་འདས་དེས་གནང་ནས། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། བྱང་ཆུབ་སེམས་དཔའ་བྱེ་བ་
ཕྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ། འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་
ལ་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ག་ལ་བ་དེར་སོང་ནས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ཏེ། ཇི་ལྟར་འོངས་པ་བཞིན་དུ་འོག་གི་ཕྱོགས་ཉིད་དུ་
གནས་ནས། པདྨའི་རྒྱལ་པོ་ཆེན་པོའི་ཁང་པ་བརྩེགས་པ་སྣ་ཚོགས་པ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་རྒྱས་པར་འགེངས་ཤིང་། པདྨའི་རྒྱལ་པོ་ཆེན་པོ་རྡུལ་དང་བྲལ་བའི་དཀྱིལ་འཁོར་གྱི་སྙིང་པོ་ལ་འདུག་གོ །སྟེང་གི་ཕྱོགས་ནས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་པའི་འབྱུང་གནས་ཀྱིས། བྱང་ཆུབ་སེམས་དཔའ་གཡུལ་ལས་ཤིན་ཏུ་རྣམ་པར་རྒྱལ་བ་ལ་བྱང་ཆུབ་ཀྱི་སྟོབས་ཀྱི་སྙིང་པོ་སྦྱིན་པ་མཛད་དོ། །དེ་ནས་དེ་བཞིན་གཤེགས་
རྒྱལ་བའི་འབྱུང་གནས་ཀྱིས་བྱང་ཆུབ་ཀྱི་སྟོབས་ཀྱི་སྙིང་པོ་འདི་གསུངས་སོ། །ན་མཿསརྦ་མུ་ཁེ་བྷྱཿསརྦ་ཏ་ཐཱ་ག་ཏེ་བྷྱཿསརྦ་ཐཱ་བོ་དྷྱཾ་ཀ་ར་དྷརྨྨ་སྭཱ་ཧཱ། འདི་བྱིན་ནས་བཏང་ངོ་། །དེ་ནས་བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་བཅོམ་ལྡན་འདས་
དེས་གནང་བས་འཇིག་རྟེན་གྱི་ཁམས་དེ་ནས་མི་སྣང་པར་གྱུར་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ། འཇིག་རྟེན་གྱི་ཁམས་མེ་ཏོག་གི་

གཞིའི་སྙིང་པོའི་རྒྱན་བཀོད་པ་ག་ལ་བ་དང་། རྒྱལ་པོ་དབང་སྒྱུར་གྱི་ཁང་པ་ཆེན་པོ་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ག་ལ་བ་དེར་སོང་ནས། བཅོམ་ལྡན་འདས་ལ་ལན་
བརྒྱ་སྟོང་ཕྲག་དུ་མར་བསྐོར་བ་བྱས་ཏེ་ཇི་ལྟར་འོངས་པ་བཞིན་དུ་སྟེང་གི་ཕྱོགས་ཉིད་དུ་གནས་ནས། ཆོས་ཀྱི་དབྱིངས་རྒྱས་པར་འགེངས་པ་མཐའ་ཡས་པ་གོ་བར་བྱེད་པའི་སྒོ་ནས་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་ཤིང་། ཆོས་ཉིད་ལས་བྱུང་བའི་པདྨ་ཆེན་
པོ་ལ་འདུག་གོ། །དེ་ནས་བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་ཤིང་། འཁོད་པ་དེ་དག་གིས་བཅོམ་ལྡན་འདས་རྣམ་པར་སྣང་མཛད་ཀྱི་ཞིང་འདི་དག་ཏུ། སངས་རྒྱས་ཀྱི་ཞིང་གི་ཡོན་ཏན་བཀོད་པ་སྔོན་མ་མཐོང་བ་མཐོང་ངོ་། །
ཅོམ་ལྡན་འདས་རྣམ་པར་སྣང་མཛད་ཤིན་ཏུ་ལྷམ་མེ། ལྷན་ནེ། ལྷང་ངེ་བ་དང་། རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་ཞིང་། ནམ་མཁའ་ལྟར་གདོད་མ་ནས་ཞི་བ་དང་ཡིད་བཞིན་གྱི་ནོར་བུ་རིན་པོ་ཆེའི་རྒྱལ་པོ་ཆེན་པོ་ལྟར་བསམ་པ་ཐམས་ཅད་
ཡོངས་སུ་རྫོགས་པར་མཛད་པ་ཡང་མཐོང་ནས་ངོ་མཚར་དུ་གྱུར་ཏེ། སྒྲ་སྐད་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །རྟོག་པ་ཐམས་ཅད་སྤངས་པའོ། །གཟོད་ནས་ཞི་ཞིང་མ་སྐྱེས་པ། །མགོན་པོ་རྨད་བྱུང་དམ་པ་འདི། །ཅི་ལྟར་ས་ལ་སྣང་ཞིག་
གུ། །སྐུ་ཡིས་འཕྲིན་ལས་མི་མཛད་ལ། །གསུང་དང་ཐུགས་ཀྱིས་མི་མཛད་ཅིང་། །སུམ་ཅུ་རྩ་གཉིས་མཚན་དང་ལྡན། །ཤིན་ཏུ་དག་པའི་ཤེལ་དང་འདྲ། །སྐུ་ཡིས་སེམས་ཅན་ཐམས་ཅད་ལ། །སངས་རྒྱས་མཛད་པ་རྣམས་མཛད་ཀྱང་། །སྐུ་ལ་
འགྱུར་བ་མི་མངའ་སྟེ། །ཐུབ་པ་དེ་ནི་འགྱུར་མི་མངའ། །གསུང་ནི་བྲག་ཆ་འདྲ་བ་སྟེ། །བསྟན་དུ་མེད་ཅིང་གཟུགས་མེད་ཀྱང་། །ལྷ་ཡི་རྔ་ཆེན་ཅི་བཞིན་དུ། །འགྲོ་བ་ཐམས་ཅད་ཚིམ་པར་མཛད། །ཐུགས་ནི་རློམ་སེམས་བྲལ་བ་སྟེ། །དེ་ལ་ཡུལ་

ནི་མངའ་མ་ལགས། །ཡུལ་རྣམས་དང་ནི་དེ་བྲལ་ཡང་། །སེམས་ཅན་རྣམས་ཀྱི་ཡུལ་དུ་གྱུར། །གསུང་ནི་དེ་བཞིན་སེམས་ཅན་དེ། །དེ་བཞིན་སྐུ་དང་དེ་བཞིན་ཐུགས། །མཚན་ཉིད་གཅིག་དང་རབ་ལྡན་ཞིང་། །སྨྲ་བའི་ནང་ན་མཆོག་ཏུ་སྣང་། །
སྐྱེ་བ་མེད་ལས་གྲོལ་བ་ཡི། །དེ་བཞིན་གཤེགས་པ་ཡོད་མིན་པས། །གང་དག་སྐྱེ་བ་མེད་ཤེས་པ། །དེ་དག་འདྲེན་པ་རྣམ་པར་ཤེས། །མགོན་པོ་རྟག་ཏུ་མཉམ་གཞག་ཅིང་། །ལུས་དང་ངག་དང་ཡིད་བྲལ་ཡང་། །རྟག་པར་ལུས་ངག་སྤྱོད་ཡུལ་དུ། །ཐུབ་པ་
རྒྱུན་དུ་རབ་ཏུ་སྣང་། །བྱང་ཆུབ་སེམས་དཔའ་ཆེ་བ་ཉིད། །ཤིན་ཏུ་དཀའ་བ་བྱེད་པ་དག །སངས་རྒྱས་ཡེ་ཤེས་ཆེ་འབར་བ། །འདི་འདྲ་ཡོངས་སུ་ཚོལ་བར་བྱེད། །དེ་ལ་མིག་ནི་མི་སྣང་ཞིང་། །རྣ་བ་དང་ནི་སྣ་ཡང་མིན། །ལྕེ་དང་ལུས་དང་ཡིད་ཀྱང་ནི། །དེ་ཕྱིར་
དེ་ཡི་ཡུལ་མ་ཡིན། །གཟུགས་མིན་སྒྲ་ཡང་མ་ཡིན་ཏེ། །དྲི་དང་རོ་དང་རེག་མ་ཡིན། །དབང་པོ་མ་ཡིན་རྣམ་ཤེས་མིན། །ཐམས་ཅད་དུ་ནི་རྟག་ཏུ་ཞི། །ཡུལ་ཅན་དང་ནི་ཡུལ་དེ་དག །རྣམ་པར་བརྟགས་པས་ཡོད་མ་ཡིན། །ཡུལ་ཅན་ཡོད་པ་མ་ཡིན་པས། །
ཡུལ་རྣམས་སྲིད་པ་མ་ཡིན་ནོ། །བྱིས་པས་ཇི་ལྟར་བརྟགས་པ་བཞིན། །དེ་ལྟར་གང་ཚེ་ཡོད་མིན་པ། །དེ་ཚེ་མགོན་པོ་ཡོད་འགྱུར་ཏེ། །རྣམ་པར་མ་བརྟགས་ཚུལ་དུའོ། །དེ་ནི་ཀུན་ཏུ་ཐམས་ཅད་ལ། །བསམ་པ་ཇི་བཞིན་རྫོགས་མཛད་པ། །སྟོན་པ་ཡིད་
བཞིན་ནོར་བུ་ལྟར། །ཀུན་གྱི་མདུན་ན་བཞུགས་པ་ཡིན། །གཟུགས་བརྙན་འབྱུང་བའི་ཚུལ་གྱིས་སུ། །ཏིང་འཛིན་དབང་སྒྱུར་རྣམས་ལ་ནི། །ལྟ་སྨྲ་འབེལ་གཏམ་ཐམས་ཅད་ཀྱིས། །ཀུན་གྱི་ལོངས་སྤྱོད་འོས་སུ་འགྱུར། །རྣམ་པར་སྣང་མཛད་མགོན་མཐོང་ནས། །
དེ་ཚེ་ཀུན་གྱིས་ཏིང་འཛིན་དང་། །གཟུངས་དང་རིག་དང་རྣམ་པར་ཐར། །བསམ་གྱིས་མི་ཁྱབ་ཐམས་ཅད་ཐོབ། །གཟུངས་ལ་དབང་ནི་ཐོབ་གྱུར་ཅིང་། །སངས་རྒྱས་ཡེ་ཤེས་ཚོལ་བྱེད་པ། །བདག་ཅག་རྣམས་ནི་ཐམས་ཅད་ཀྱང་། །ཕྱོགས་བཅུ་དག་ནས་ལགས་པ་ཡིན།

ཡང་དག་རྫོགས་པའི་སངས་རྒྱས་གཟུངས། །དེ་ནི་གཟུངས་ཀྱི་མཆོག་ཡིན་ཏེ། །ཡང་དག་རྫོགས་སངས་ཡང་དག་པར། །དེ་ནི་བདག་ཅག་ཐོབ་པར་ཤོག །དེ་ནས་བྱང་ཆུབ་སེམས་དཔའ་དེ་དག་གིས་ཚིགས་སུ་བཅད་པ་དེ་དག་སྨྲས་ནས། འདི་ལྟ་སྟེ། ལུས་ཀྱི་སྔོན་གྱི་
མཐའ་དང་ཕྱི་མའི་མཐའ་མེད་པ་དང་། དེ་བཞིན་དུ་ངག་དང་ཡིད་ཀྱི་སྔོན་གྱི་མཐའ་དང་ཕྱི་མའི་མཐའ་མེད་པས། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དང་གསུང་དང་ཐུགས་ཀྱིས་གང་ཡིན་པ་ལ་འཇུག་གོ །དེ་ཅིའི་ཕྱིར་ཞེ་ན། ངོ་བོ་ཉིད་ཡོངས་སུ་ཤེས་
པས་ལུས་ཀྱི་སྔོན་གྱི་མཐའ་དང་ཕྱི་མའི་མཐའ་མི་དམིགས་སོ། །དེ་བཞིན་དུ་ངོ་བོ་ཉིད་ཡོངས་སུ་ཤེས་པས་ངག་དང་ཡིད་ཀྱི་སྔོན་གྱི་མཐའ་མི་དམིགས་སོ། །ལག་ན་རྡོ་རྗེ་དབང་བསྐུར་བའི་དཀྱིལ་འཁོར་ལས། གླེང་གཞིའི་ལེའུ་སྟེ་དང་པོའོ།། །།
དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱིས། བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་དེ་དག་ཀྱང་མཁྱེན། རྒྱལ་པོ་དབང་སྒྱུར་གྱི་ཁང་པ་ཆེན་པོ་
གནས་པའི་བྱང་ཆུབ་སེམས་དཔའ་འཁོད་པ་དག་ཀྱང་མཁྱེན་ནས། ཏིང་ངེ་འཛིན་གང་གི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གྱི་ཁམས་ཐམས་ཅད་ན། སངས་རྒྱས་ཀྱི་འཁོར་གྱི་དཀྱིལ་འཁོར་ཐམས་ཅད་དུ།
སྐད་ཅིག་ཐང་ཅིག་ཡུད་ཙམ་ཅིག་ལ་སེམས་དང་པོ་བསྐྱེད་པ་ནས་བཟུང་སྟེ། ཡོངས་སུ་མྱ་ངན་ལས་འདས་པ་ཆེན་པོའི་མཐའི་བར་དུ། སངས་རྒྱས་ཀྱི་མཛད་པ་བྱིན་གྱིས་རློབ་པའི་ཏིང་ངེ་འཛིན། རྣམ་པར་སྣང་བ་བཀོད་པའི་རྒྱན་གྱི་སྙིང་པོ་ཞེས་བྱ་བ་ལ་སྙོམས་པར་
ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་འཇིག་རྟེན་གྱི་ཁམས་འདི་དང་། འཇིག་རྟེན་གྱི་ཁམས་རབ་འབྱམ་ཐམས་ཅད་དང་འཇིག་རྟེན་གྱི་ཁམས་མཚམས་སྦྱོར་བའི་བཀོད་པ་

ཐམས་ཅད་དང་། འཇིག་རྟེན་གྱི་ཁམས་གཞན་ཐམས་ཅད་དང་། འཇིག་རྟེན་གྱི་ཁམས་ཀྱི་གླིང་བཞི་པ་ཐམས་ཅད་དང་། སྟོང་ཐམས་ཅད་དང་། སྟོང་གཉིས་པ་ཐམས་ཅད་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཆོས་ཐམས་
ཅད་དང་། འཇིག་རྟེན་གྱི་ཁམས་རྒྱ་མཚོ་ཐམས་ཅད་དང་། འཇིག་རྟེན་གྱི་ཁམས་གཏན་ལ་ཕབ་པ་ཐམས་ཅད་དང་། མེ་ཏོག་གི་གཞིའི་སྙིང་པོའི་རྒྱན་བཀོད་པའི་འཇིག་རྟེན་གྱི་ཁམས་འདི་ན། བཅོམ་ལྡན་འདས་རྣམ་པར་སྣང་མཛད་བསམ་པ་སྣ་ཚོགས་དང་། རེ་
བ་སྣ་ཚོགས་དང་། འདོད་པ་སྣ་ཚོགས་དང་། ཐེག་པ་སྣ་ཚོགས་ཀྱི་ཚུལ་རྣམ་པར་གནས་པ་དང་། འགྲོ་བ་སྣ་ཚོགས་དང་། སྐྱེ་གནས་སྣ་ཚོགས་དང་། ལྗོངས་སྣ་ཚོགས་དང་། ཁ་དོག་སྣ་ཚོགས་དང་། དབྱིབས་སྣ་ཚོགས་དང་། སེམས་ཅན་སྣ་ཚོགས་དག་
སྒྲ་དང་ཚིག་བརྗོད་པ་རྣམ་པར་གཞག་པ་སྣ་ཚོགས་རྣམས་ཀྱིས་སེམས་དང་པོ་བསྐྱེད་པ་ནས་བཟུང་སྟེ། ཡོངས་སུ་མྱ་ངན་ལས་འདས་པ་ཆེན་པོའི་མཐའི་བར་དུ། སངས་རྒྱས་ཀྱི་མཛད་པ་ཡང་དག་པར་སྟོན་ཅིང་། རང་གི་གསུང་གི་འཁོར་ལོའི་དཀྱིལ་འཁོར་ལས་
བྱུང་བ། སངས་རྒྱས་ཀྱི་དབྱངས་བཀོད་པའི་རྒྱན་གྱིས་བྱིན་གྱིས་བརླབས་པའི་སངས་རྒྱས་ཀྱི་གཟུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ཡང་དག་པར་བྱིན་གྱིས་བརླབས་ནས། རྡོ་རྗེ་དཀྱིལ་འཁོར་ཆེན་པོ་དོན་ཡོད་པ་དང་། བསྟན་པ་
ནས་པར་བྱ་བ་དང་། སངས་རྒྱས་ཀྱི་མཛད་པ་གཅིག་ནས་གཅིག་ཏུ་བརྒྱུད་པ་རྒྱུན་མི་འཆད་པའི་ཕྱིར་དུས་ཀྱི་དབང་གིས་སྐྱེ་བ་རིམ་གྱིས་ཡོངས་སུ་གཟུང་བར་བྱིན་གྱིས་བརླབས་ཏེ། རྡོ་རྗེ་ཡེ་ཤེས་ཀྱི་དབང་བསྐུར་བ་ཆེན་པོ་དང་། རྡོ་རྗེ་ཆེན་པོའི་སྙིང་པོ་དང་། རྡོ་རྗེ་ཆེན་
པོའི་འོད་འཕྲོ་བ་རྒྱས་པར་འགེངས་པའི་སྣང་བ་དང་། ཐེག་པ་ཆེན་པོའི་སྤྱོད་པ་དང་། གསང་སྔགས་རྣམ་པར་དག་པའི་སྒོས་རྡོ་རྗེའི་ཁོར་ཡུག་ཆེན་པོའི་དཀྱིལ་འཁོར་དུ་ལག་ན་རྡོ་རྗེ་དབང་ཆེན་པོ་བསྐུར་བ་མཛད་པ་མཐོང་ངོ་། །དེ་ལྟར་བཅོམ་ལྡན་འདས་རྣམ་པར་

སྣང་མཛད་སྤྲོས་པ་ཐམས་ཅད་དང་བྲལ་བའི་ཕྱིར་ཐམས་ཅད་དུ་སྤྲོས་པ་མེད་པའོ། །རྟོག་པ་ཐམས་ཅད་དང་བྲལ་བའི་ཕྱིར་རྣམ་པར་མི་རྟོག་པའོ། ངོ་བོ་ཉིད་དང་བྲལ་བའི་ཕྱིར་སྟོང་པའོ། །གདོད་མ་ནས་དག་པའི་ཕྱིར་རྣམ་པར་དག་པའོ། །སྐྱེ་བ་དང་བྲལ་བའི་ཕྱིར་མ་སྐྱེས་
པའོ། །བསམ་པའི་ས་ལས་ཤིན་ཏུ་འདས་པའི་ཕྱིར་བསམ་གྱིས་མི་ཁྱབ་པའོ། །ཡུལ་དང་བྲལ་བའི་ཕྱིར་ཡུལ་མེད་པའོ། །ཚིག་གི་ལམ་ལས་ཤིན་ཏུ་འདས་པའི་ཕྱིར་བརྗོད་པར་བྱ་བ་མ་ཡིན་པ་སྟེ། རྣམ་པ་ཐམས་ཅད་དུ་སེམས་ཅན་ཐམས་ཅད་ཡང་དག་པར་འདུ་བའི་ས་
ལ་བྱང་ཆུབ་སེམས་དཔའ་ཆེན་པོ་རྣམས་ཀྱི་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར་བསམ་པ་ཐམས་ཅད་ཡོངས་སུ་རྫོགས་པར་མཛད་པ་ཐམས་ཅད་རྗེས་སུ་མཐུན་པ། འཇིག་རྟེན་གྱི་ཁམས་ཐམས་ཅད་ན་གཟུགས་བརྙན་གྱི་རྣམ་པར་སེམས་ཅན་ཐམས་ཅད་ཀྱི་
མདུན་ན་འདུག་པ། ནོར་བུ་རིན་པོ་ཆེ་ཆེན་པོ་རིན་ཐང་ཆེན་པོ་གོས་དྲི་མ་ཅན་གྱིས་དཀྲིས་པ་ལྟ་བུ་འདི་སུའི་ཡིན། འདི་ཅི་ཞིག་ཅེས་སེམས་ཅན་རྣམས་ཀྱིས་མི་ཤེས་ཏེ་ཡ་མཚན་ཅི་ཞིག་ཏུ་གྱུར་ཏོ། །གང་དག་བློ་གྲོས་རྣམ་པར་དག་པ་ཡིད་གཉིས་དང་ཐེ་ཙོམ་དང་བྲལ་བ། སྔོན་
གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། ཐེག་པ་ཆེན་པོའི་གསང་སྔགས་དང་སྤྱོད་པའི་ཚུལ་ལ་བྱང་ཆུབ་ཀྱི་སེམས་བསྐྱེད་པ་དང་པོ། །རྡོ་རྗེ་འཆང་ཐམས་ཅད་ཀྱིས་བྱིན་གྱིས་བརླབས་པ། བཅོམ་ལྡན་འདས་རྣམ་པར་སྣང་མཛད་ཀྱིས་རྣམ་པར་སྣང་མཛད་
ཆེན་པོའི་རྒྱན་གྱི་སྙིང་པོའི་འོད་ཟེར་ཆེན་པོས་སྣང་བར་བྱས་པ་དེ་དག་ནི། དེ་བཞིན་གཤེགས་པའི་སྙིང་པོ་ལ་ཞུགས་པ་དག་སྟེ། དེ་དག་ནི་གསང་སྔགས་ཀྱི་སྤྱོད་པའི་ཚུལ་འདི་མཉན་པ་དང་བསླབ་པ་དང་། རྡོ་རྗེའི་དཀྱིལ་འཁོར་ཆེན་པོ་བྲི་བ་དང་། དངོས་གྲུབ་
ཆེན་པོ་བསྒྲུབ་པར་བྱ་བའི་སྐལ་བ་ཡོད་དོ། །དེ་ནས་འཇིག་རྟེན་གྱི་ཁམས་མི་མཇེད་འདིར། བཅོམ་ལྡན་འདས་ཤཱཀྱ་ཐུབ་པའི་མཚན་གྱིས་གླིང་བཞི་པ་བར་མའི་འཇིག་རྟེན་གྱི་ཁམས་ཀྱི་འཛམ་བུའི་གླིང་དུ་བདུད་ཕམ་པར་མཛད་ནས། བྱང་ཆུབ་མངོན་པར་རྫོགས་

པར་སངས་རྒྱས་ཏེ། དགའ་ལྡན་གྱི་གནས་ན་གནས་པ་ནས་བཟུང་སྟེ། མཐར་གྱིས་སྤྱད་པ་སྤྱོད་ཅིང་ཡོངས་སུ་མྱ་ངན་ལས་འདས་པ་ཆེན་པོའི་མཐའི་བར་དུ་བྱིན་གྱིས་བརླབས་ནས་ཆོས་བསྟན་ཏོ། །བཅོམ་ལྡན་འདས་ཤཱཀྱ་ཐུབ་པ་དེ་ཡང་བསྟན་པ་རྒྱུན་མི་འཆད་པའི་
ཕྱིར། བྱང་ཆུབ་སེམས་དཔའ་ཀུན་ཏུ་བཟང་པོ་དང་། བྱམས་པ་དང་། འཇམ་དཔལ་དང་། སྤྱན་རས་གཟིགས་ཀྱི་དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ནམ་མཁའི་སྙིང་པོ་དང་། སའི་སྙིང་པོ་དང་། བྱང་ཆུབ་སེམས་དཔའ་ངན་སོང་ཐམས་
ཅད་སྤོང་བ་ལ་སོགས་པ་བྱང་ཆུབ་སེམས་དཔའ་རྣམས་བསྡུས་ནས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱི་མདུན་དུ། རྡོ་རྗེའི་དཀྱིལ་འཁོར་ཆེན་པོ་
བྲིས་ནས། ལག་ན་རྡོ་རྗེ་དབང་ཆེན་པོ་བསྐུར་བས་བྱང་ཆུབ་སེམས་དཔའ་ཀུན་ཏུ་བཟང་པོ་དབང་བསྐུར་ནས་དེ་ཉིད་ལ་བསྟན་པ་གཏད་དོ། །ལག་ན་རྡོ་རྗེ་དབང་བསྐུར་བའི་དཀྱིལ་འཁོར་ཆེན་པོ་ལས། སྔོན་གྱི་སྤྱོད་པ་ཡང་དག་པར་བསྒྲུབ་པའི་གཏམ་གྱི་ཚུལ་འབྱུང་བ་
ཞེས་བྱ་བའི་ལེའུ་སྟེ་གཉིས་པའོ།། །།འཕགས་པ་ལག་ན་རྡོ་རྗེ་དབང་བསྐུར་བའི་རྒྱུད་ཆེན་པོ། བམ་པོ་གཉིས་པ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་གྲོང་ཁྱེར་ཆེན་པོ་དཔལ་ཡོན་ཏན་གྱི་འབྱུང་གནས་ན། ཤིང་སཱ་
ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྤྱོད་པས་རྣམ་པར་རོལ་པའི་རྒྱུ་མཐུན་པས་བྱིན་གྱིས་བརླབས་པའི་ནགས་ཚལ་ཆེན་པོ་མཆོག་ན། དགེ་སློང་ཁྲི་ཉིས་སྟོང་ལྔ་བརྒྱའི་དགེ་སློང་གི་དགེ་འདུན་ཆེན་
པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་ཟག་པ་ཟད་པ། ཉོན་མོངས་པ་མེད་པ་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་

དབང་ཆེན་དང་། ཚེ་དང་ལྡན་པ་ཉིན་གུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཉེ་དགའ་བོ་དང་། ཚེ་དང་ལྡན་པ་བཟང་པོ་དང་། ཚེ་དང་ལྡན་པ་སྒྲ་གཅན་འཛིན་དང་། ཚེ་དང་ལྡན་
པ་མ་འགགས་པ་དང་། ཚེ་དང་ལྡན་པ་ཀ་པི་ན་ཆེན་པོ་དང་། ཚེ་དང་ལྡན་པ་ཡུལ་འཁོར་སྐྱོང་དང་། ཚེ་དང་ལྡན་པ་ག་ཡཱ་འོད་སྲུང་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། ཚེ་དང་ལྡན་པ་ཚེམས་ཆེན་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་
མཛེས་དགའ་དང་། ཚེ་དང་ལྡན་པ་གྱད་བུ་ནོར་དང་། ཚེ་དང་ལྡན་པ་སེང་ལྡེང་ནགས་པ་དང་། ཚེ་དང་ལྡན་པ་བསོད་སྙོམས་ལེན་པ་བར་དྭ་ཛ་དང་། ཚེ་དང་ལྡན་པ་འོད་སྲུང་སྤྱོད་དབང་པོའི་བུ་དང་། ཚེ་དང་ལྡན་པ་ཉེ་སྦྱོར་དང་། ཚེ་དང་ལྡན་པ་གཞོན་ནུ་འོད་སྲུང་དང་།
ཚེ་དང་ལྡན་པ་ལམ་ཕྲན་བསྟན་དང་། ཚེ་དང་ལྡན་པ་ཤཱ་རིའི་བུ་དང་། དེ་དག་ལ་སོགས་པ་དགེ་སློང་ཁྲི་ཉིས་སྟོང་ལྔ་བརྒྱ་དང་ཐབས་ཅིག་གོ། །བྱང་ཆུབ་སེམས་དཔའི་ཚོགས་ཆེན་པོ་ཤ་སྟག་ལ་འདི་ལྟ་སྟེ། འཇམ་དཔལ་གཞོན་ནུར་གྱུར་པ་དང་། དྲ་བ་ཅན་གྱི་འོད་གཞོན་
ནུར་གྱུར་པ་དང་། བྱང་ཆུབ་སེམས་དཔའ་དཀོན་མཆོག་འབྱུང་གནས་དང་། བྱང་ཆུབ་སེམས་དཔའ་རིན་པོ་ཆེའི་བློ་གྲོས་དང་། བྱང་ཆུབ་སེམས་དཔའ་ལག་ན་རིན་པོ་ཆེ་དང་། བྱང་ཆུབ་སེམས་དཔའ་ལག་ན་ཕྱག་རྒྱ་རིན་པོ་ཆེ་དང་། བྱང་ཆུབ་སེམས་དཔའ་
རྟག་ཏུ་བརྩོན་པར་ཆོས་ལ་གནས་པ་དང་། བྱང་ཆུབ་སེམས་དཔའ་ཆོས་ཐམས་ཅད་ཀྱི་ཚིག་རབ་ཏུ་འབྱེད་པ་དང་། བྱང་ཆུབ་སེམས་དཔའ་གདུང་བ་ཐམས་ཅད་རབ་ཏུ་ཞི་ལྡན་དང་། བྱང་ཆུབ་སེམས་དཔའ་བློ་གྲོས་རབ་ཏུ་བརྟན་པ་དང་། བྱང་ཆུབ་སེམས་དཔའ་ལྷག་
པའི་བསམ་པས་ཕན་བྱེད་དང་། བྱང་ཆུབ་སེམས་དཔའ་སྙིང་རྗེ་ཅན་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་དང་། བྱང་ཆུབ་སེམས་དཔའ་ནམ་མཁའ་

མཛོད་དང་། བྱང་ཆུབ་སེམས་དཔའ་སའི་སྙིང་པོ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་འབྲུག་སྒྲའི་རྒྱལ་པོ་དང་། བྱང་ཆུབ་སེམས་དཔའ་སང་སང་པོའི་དབྱངས་དང་། བྱང་ཆུབ་སེམས་དཔའ་བློ་གྲོས་དྲི་མ་མེད་
པ་དང་། བྱང་ཆུབ་སེམས་དཔའ་སྤྱོད་པའི་བློ་གྲོས་མི་ཟད་པ་དང་། བྱང་ཆུབ་སེམས་དཔའ་སྤྱོད་པའི་བློ་གྲོས་དང་། བྱང་ཆུབ་སེམས་དཔའ་བླ་མའི་བློ་གྲོས་དང་། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དང་། བྱང་ཆུབ་སེམས་དཔའ་བྱམས་པ་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། ཐབས་ཅིག་སྟེ་དེ་དག་
ཐམས་ཅད་ཀྱང་ས་དང་ཕ་རོལ་ཏུ་ཕྱིན་པ་དང་། གཟུངས་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་དང་། དབང་ཐོབ་པ་དང་། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། བསམ་པ་ཅི་ལྟ་བ་བཞིན་དུ་སེམས་ཅན་
ཐམས་ཅད་ཚིམ་པར་བྱེད་པ། སྔོན་གྱི་སྨོན་ལམ་ཅི་ལྟ་བ་བཞིན་དུ་ངེས་པར་བྱུང་བ། དེ་བཞིན་གཤེགས་པ་ཐམས་ཅད་ལ་མཆོད་པ་དང་རིམ་གྲོ་བྱ་བ་ལ་མཁས་པ། རྟག་ཏུ་རྒྱུན་མི་འཆད་པར་དམ་པའི་ཆོས་ཡོངས་སུ་ཚོལ་བ་ལ་མཁས་པ་ཤ་སྟག་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་ལྟ་བུ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ན། བཅོམ་ལྡན་འདས་པདྨའི་སྙིང་པོ་སེང་གེའི་ཁྲི་ཆེན་པོ་ལ་བཞུགས་ཏེ། ལྷ་དང་བཅས་པའི་འཇིག་རྟེན་ཟིལ་གྱིས་མནན་ནས། ཤིན་ཏུ་ལྷམ་མེ། ལྷན་ནེ། ལྷང་ངེའོ། །གནས་
གཙང་མའི་ལྷའི་བུ་རྣམས་ཀྱང་དེ་ཉིད་དུ་འདུས་ཏེ་འཁོད་དོ། །མི་མཇེད་ཀྱི་བདག་པོ་ཚངས་པ་ཡང་ཚངས་རིས་ཀྱི་ལྷའི་བུས་ཀུན་ནས་བསྐོར་ཅིང་དེ་ཉིད་དུ་འདུས་ཏེ་འདུག་པར་གྱུར་ཏོ། །ལྷའི་དབང་པོ་བརྒྱ་བྱིན་ཡང་ལྷའི་བུ་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་

ཏེ་འཁོར་དེ་ཉིད་དུ་འདུས་ནས་འདུག་པར་གྱུར་ཏོ། །ལྷ་མ་ཡིན་གྱི་དབང་པོ་རབ་སིམ་དང་། ཐགས་བཟངས་རིས་དང་། ཞིང་མཆོག་དང་། བ་ཊི་དང་། རྔ་ཆེན་དང་། དུས་ཀྱི་འཁོར་ལོ་ཅན་དང་། དྲི་མ་མེད་པ་དང་། ཏོག་དང་། ཟླ་གདོང་དང་། རྣམ་པར་འཇོམས་དང་།
ཟབ་མོ་དང་། སྟོབས་ཅན་དང་། སྒྲ་གཅན་དང་། ཏོག་དྲེགས་དང་། རྣམ་པར་སྣང་བ་དང་། ལྷ་མ་ཡིན་གྱི་དབང་པོ་སྣ་ཚོགས་ཕྲེང་བ་ཅན་དང་། དེ་དག་ལ་སོགས་པ་དང་། ལྷ་མ་ཡིན་གྱི་དབང་པོ་གཞན་སྟོང་དང་ལྷ་མ་ཡིན་གྱི་དབང་པོ་དེ་དག་ཐམས་ཅད་རང་རང་གི་གནས་
ནས་བྱུང་སྟེ། ལྷ་མ་ཡིན་གྱི་མཐུ་ཆེན་པོ་དང་། ལྷ་མ་ཡིན་གྱི་རྫུ་འཕྲུལ་ཆེན་པོས་མེ་ཏོག་དང་། སྤོས་དང་། ཕྲེང་བ་དང་། བདུག་པ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། རྒྱན་དང་། སིལ་སྙན་དང་།
ཕེག་རྡོབ་རྣམས་མངོན་པར་སྤྲུལ་ནས་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་དོང་སྟེ་ལྷགས་ནས། ཅི་ལྟར་སྤྲུལ་
པའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། རྒྱན་དང་། སིལ་སྙན་དང་། ཕེག་རྡོབ་རྣམས་བཅོམ་ལྡན་འདས་ག་ལ་བ་དེར་གཏོར་ཏོ། །གཏོར་ནས་
ཀྱང་བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་འོད་ཟེར་བརྒྱ་པ་དང་། ཀླུའི་རྒྱལ་པོ་གློག་ལྕེ་དང་། ཀླུའི་རྒྱལ་པོ་རིན་པོ་ཆེའི་ཅོད་པན་ཅན་དང་། ཀླུའི་རྒྱལ་པོ་འཇོག་པོ་
དང་། ཀླུའི་རྒྱལ་པོ་སོག་མ་མེད་དང་། ཀླུའི་རྒྱལ་པོ་ནོར་རྒྱས་དང་། ཀླུའི་རྒྱལ་པོ་སྟོབས་ཀྱིས་རྒྱུ་དང་། ཀླུའི་རྒྱལ་པོ་རྣ་རྡུམ་དང་། ཀླུའི་རྒྱལ་པོ་པདྨ་ཅན་དང་། ཀླུའི་རྒྱལ་པོ་དུང་སྐྱོང་དང་། ཀླུའི་རྒྱལ་པོ་པདྨ་ཆེན་པོ་དང་། ཀླུའི་རྒྱལ་པོ་དུས་ཅན་དང་།

ཀླུའི་རྒྱལ་པོ་རིགས་ཅན་དང་། ཀླུའི་རྒྱལ་པོ་མགོ་གཅིག་པ་དང་། ཀླུའི་རྒྱལ་པོ་བརྫུན་པོ་དང་། ཀླུའི་རྒྱལ་པོ་དབང་པོའི་སྒྲ་དང་། ཀླུའི་རྒྱལ་པོ་སྟོབས་ལྡན་དང་། དེ་དག་ལ་སོགས་པ་ཀླུའི་རྒྱལ་པོ་ཁྲི་རང་རང་གི་གནས་ནས་བྱུང་སྟེ། ཀླུའི་མཐུ་ཆེན་པོ་དང་།
ཀླུའི་རྫུ་འཕྲུལ་ཆེན་པོས་ཙནྡན་གོར་ཤི་ཤའི་ཆུའི་སྤྲིན་མངོན་པར་སྤྲུལ་ནས། ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ། ལྷགས་ནས་ཅི་ལྟར་སྤྲུལ་པའི་སྤོས་ཆུའི་སྤྲིན་རྣམས་ཀྱིས་ཤིང་སཱ་ལ་སྣ་
ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོར་ཆར་དུ་མངོན་པར་ཕབ་བོ། །ཕབ་ནས་ཀྱང་བཅོམ་ལྡན་འདས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །གནོད་སྦྱིན་གྱི་སྡེ་དཔོན་ཆེན་པོ་རྣམ་ཐོས་ཀྱི་བུ་དང་། གནོད་སྦྱིན་གྱི་སྡེ་དཔོན་ཆེན་པོ་འབྲོག་གནས་དང་།
གནོད་སྦྱིན་གྱི་སྡེ་དཔོན་ཆེན་པོ་ཡུལ་འཁོར་སྲུང་དང་། གནོད་སྦྱིན་གྱི་སྡེ་དཔོན་ཆེན་པོ་འཕགས་སྐྱེས་པོ་དང་། གནོད་སྦྱིན་གྱི་སྡེ་དཔོན་ཆེན་པོ་མིག་མི་བཟང་དང་། གནོད་སྦྱིན་གྱི་སྡེ་དཔོན་ཆེན་པོ་གང་བ་བཟང་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་པོ་
དང་། གནོད་སྦྱིན་གྱི་སྡེ་དཔོན་ཆེན་པོ་རྨོངས་བྱེད་འཛིན་ཆུའི་དབང་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་པ་བརྒྱ་པ་དང་། གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་དང་། དེ་དག་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་ཁྲི་རང་རང་གི་གནས་ནས་བྱུང་སྟེ། མེ་
ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། སིལ་སྙན་རྣམས་ཐོགས་ནས། ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་
དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། ཅི་ལྟར་ཐོགས་པའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་རྣམས་བཅོམ་ལྡན་འདས་

ལ་གཏོར་ཏོ། །གཏོར་ནས་ཀྱང་བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །མི་འམ་ཅིའི་རྒྱལ་པོ་ལྗོན་པ་འཁོར་མི་འམ་ཅི་དུ་མ་དང་ལྡན་པ་ཡང་མི་འམ་ཅིའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་།
ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། སིལ་སྙན་དང་། ཕེག་རྡོབ་པ་རྣམ་པ་དུ་མ་ཐོགས་པ་བརྒྱ་སྟོང་དུ་མ་རང་རང་གི་གནས་ནས་བྱུང་སྟེ། ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་
འདས་ག་ལ་བ་དེར་སོང་སྟེ་ཕྱིན་ནས་ཅི་ལྟར་ཐོགས་པའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། སིལ་སྙན་དང་། ཕེག་རྡོབ་རྣམས་བཅོམ་ལྡན་འདས་ལ་
གཏོར་ཏོ། །གཏོར་ནས་ཀྱང་བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ནམ་མཁའ་ལྡིང་གི་དབང་པོ་རྣམ་པར་འདུད་བྱེད་ཀྱི་བུ་དང་། ནམ་མཁའ་ལྡིང་གི་དབང་པོ་འཇིགས་འགྲོ་དང་། ནམ་མཁའ་ལྡིང་
གི་དབང་པོ་འདབ་བརྒྱ་དང་། ནམ་མཁའ་ལྡིང་གི་དབང་པོ་གཙུག་ཕུད་ཅན་འཁོར་ནམ་མཁའ་ལྡིང་བརྒྱ་སྟོང་དུ་མ་དང་ལྡན་པ་ཡང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །སྲིན་མོའི་བདག་པོ་
ཁྲོས་བཞིན་དང་། སྲིན་མོའི་བདག་པོ་མཆེ་བ་བཟང་དང་། སྲིན་མོའི་བདག་པོ་དྲག་པོ་དང་། རབ་ཏུ་གཏུམ་པ་དང་། འཇིགས་འཇིགས་ལྟ་དང་། སྐྲག་བྱེད་དང་། འཇིགས་བྱེད་ཆེན་པོ་དང་། གདོང་བཅུ་དང་། གཤིན་རྗེ་དང་། གཤིན་རྗེའི་དྲིལ་བུ་དང་། རྣམ་པར་འཇིགས་འཇིགས་ལྟ་དང་། ཟླ་
བའི་སྡེ་འཁོར་སྲིན་པོ་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དྲང་

སྲོང་ཆེན་པོ་མེ་འཁོར་དྲང་སྲོང་དུ་མ་དང་ལྡན་པ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་
འཁོད་དོ། །རླུང་སྤྲིན་གྱི་ཕྲེང་བ་ཅན་དང་། །རླུང་འཇིག་བྱེད་དང་། རླུང་འཆགས་བྱེད་དང་། རླུང་ཀུན་ཏུ་འཇོག་བྱེད་དང་། རླུང་རྣམ་པར་འཐོར་དང་། རླུང་དུས་ལྡན་དང་། རླུང་རྣམ་པར་འཐོར་རླུང་དང་། རླུང་རླུང་དམར་དང་། རླུང་འཇིག་རྟེན་འཛིན་དག་ཀྱང་། བཅོམ་
ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །སྐར་མའི་རྒྱལ་པོ་ཟླ་བ་འཁོར་སྐར་མ་བརྒྱ་སྟོང་དུ་མ་དང་ལྡན་པ་ཡང་ཤིང་སཱ་ལ་ཆེན་པོ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་
ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཉི་མ་འོད་ཟེར་གྱི་ཕྲེང་བ་ཅན་དང་། ཚ་བར་བྱེད་པ་དང་། སྐེམས་བྱེད་དང་། དུ་བ་འབྱིན་དང་། རབ་འབར་དང་། ཉི་མ་སྲེད་བྱེད་འཁོར་ལྷའི་
བུ་གཟི་བརྗིད་འཕགས་པ་བརྒྱ་སྟོང་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་
འཁོད་དོ། །ཀླུའི་རྒྱལ་པོ་ཆུ་ལྷ་འཁོར་ཀླུའི་རྒྱལ་པོ་དུ་མ་དང་ལྡན་པ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་
ཕྱོགས་གཅིག་ཏུ་འདུག་གོ། །ཁྱབ་འཇུག་འཁོར་དང་བཅས་པ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་

གཅིག་ཏུ་འདུག་གོ། །དྲག་པོ་ཡི་དགས་ཀྱི་འཁོར་དང་ལྡན་པ་ཡང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །འབྱུང་པོའི་བདག་པོ་དབང་ལྡན་འཁོར་འབྱུང་པོ་བརྒྱ་སྟོང་དུ་མ་དང་ལྡན་པ་ཡང་
ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །གཟའི་རྒྱལ་པོ་ཆེན་པོ་སྨིན་དྲུག་གི་བུ་འཁོར་གཟའ་
བརྒྱ་སྟོང་དུ་མ་དང་ལྡན་པ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །སྤྲིན་ལྷའི་བུ་སྐྱ་བོ་
ཞེས་བྱ་བ་དང་། སྤྲིན་ལྷའི་བུ་གློག་ཕྲེང་ཞེས་བྱ་བ་དང་། སྤྲིན་ལྷའི་བུ་སྤྲིན་གྱི་དྲ་བ་སྟུག་པོ་འཇོམས་བྱེད་ཅེས་བྱ་བ་དང་། སྤྲིན་ལྷའི་བུ་ཆར་འབེབས་ཞེས་བྱ་བ་འཁོར་ལྷའི་བུ་བརྒྱ་སྟོང་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་
ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གློག་སྟུག་བྱེད་ཅེས་བྱ་བ་དང་། གློག་གཟི་བརྗིད་ཅན་ཞེས་བྱ་བ་དང་། གློག་སྟུག་འོད་ཅེས་བྱ་བ་དང་། གློག་
འོད་ཅེས་བྱ་བ་དང་། གློག་མཛེས་ཕྲེང་ཅན་ཞེས་བྱ་བ་འཁོར་གློག་བརྒྱ་སྟོང་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་
བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །རིའི་རྒྱལ་པོ་རི་རབ་དང་། རིའི་རྒྱལ་པོ་སྤོས་ཀྱི་ངད་ལྡང་དང་། རིའི་རྒྱལ་པོ་གངས་རི་དང་། རིའི་རྒྱལ་པོ་འབིགས་བྱེད་དང་། རིའི་རྒྱལ་པོ་མ་ལ་ཡ་དང་། རིའི་རྒྱལ་པོ་དབང་ཆེན་དང་། རིའི་རྒྱལ་པོ་མི་མཇེད་ཅན་

དང་། །རིའི་རྒྱལ་པོ་རྩེ་མོ་བརྒྱ་པ་དང་། རིའི་རྒྱལ་པོ་སྣ་ཚོགས་བརྩེགས་དང་། རིའི་རྒྱལ་པོ་རིག་སྔགས་འཆང་དང་། རིའི་རྒྱལ་པོ་གཞན་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་
ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །གཤིན་རྗེ་དང་། མཚན་མོ་ནག་མོ་དང་། བེ་ཅོན་ནག་མོ་ཅན་དང་། སྐྱེས་བུ་ནག་པོ་དང་། འཆི་བདག་དང་། དཔལ་བྱིན་མ་དང་། རྣ་ནག་
མ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དཀའ་ཐུབ་ཟློག་མ་དང་། ཙ་
མུ་ཎ་ཌ་དང་། དྲག་པོའི་ཆུང་མ་དང་། ཚངས་པའི་ཆུང་མ་དང་། ཁྱབ་འཇུག་གི་ཆུང་མ་དང་། གཞོན་ནུའི་ཆུང་མ་དང་། ལུས་ངན་གྱི་ཆུང་མ་དང་། ཕག་གི་ཆུང་མ་དང་། འཇིགས་བྱེད་ཆེན་པོའི་ཆུང་མ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་
པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཆུ་ཀླུང་ཆེན་པོ་གང་གཱ་དང་། ཆུ་ཀླུང་ཆེན་པོ་སི་ཏཱ་དང་། ཆུ་ཀླུང་ཆེན་པོ་དབྱངས་ཅན་དང་། ཆུ་ཀླུང་ཆེན་
པོ་བི་ད་སྟ་དང་། ཆུ་ཀླུང་ཆེན་པོ་ཟླ་བའི་ཆ་ཅན་དང་། ཆུ་ཀླུང་ཆེན་པོ་ཡ་མུན་ན་དང་། ཆུ་ཀླུང་ཆེན་པོ་ཀུན་གྱི་བཤེས་གཉེན་དང་། ཆུ་ཀླུང་ཆེན་པོ་མགྱོགས་ལྡན་དང་། ཆུ་ཀླུང་ཆེན་པོ་མཚོ་སྟེན་དང་། ཆུ་ཀླུང་ཆེན་པོ་བ་ལང་སྦྱིན་མཆོག་ལྡན་དང་། ཆུ་ཀླུང་
ཆེན་པོ་བརྩེ་བ་སྦྱིན་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དྲི་ཟའི་རྒྱལ་པོ་

སྣ་ཚོགས་ཕྲེང་བ་ཅན་དང་། དྲི་ཟའི་རྒྱལ་པོ་འཕྲོག་པོ་དང་། དྲི་ཟའི་རྒྱལ་པོ་ཤུགས་ཆེན་དང་། དྲི་ཟའི་རྒྱལ་པོ་རྣམ་པར་གནོན་པ་དང་། དྲི་ཟའི་རྒྱལ་པོ་ཆུ་སྐྱེས་དང་། དྲི་ཟའི་རྒྱལ་པོ་ཨུཏྤ་ལ་ལྟ་བུའི་མིག་དང་། དྲི་ཟའི་རྒྱལ་པོ་ཙནྡན་བརྩེགས་ཀྱང་ཤིང་སཱ་ལ་སྣ་ཚོགས་ཀྱི་
རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །རིག་སྔགས་འཆང་གི་རྒྱལ་པོ་ཏོག་དང་། རིག་སྔགས་འཆང་གི་རྒྱལ་པོ་
ཉེ་བའི་ཏོག་དང་། རིག་སྔགས་འཆང་གི་རྒྱལ་པོ་རབ་གཏུམ་དང་། རིག་སྔགས་འཆང་གི་རྒྱལ་པོ་བསྙེམས་ལྡན་དང་། རིག་སྔགས་འཆང་གི་རྒྱལ་པོ་ཤུགས་འཆང་དང་། རིག་སྔགས་འཆང་གི་རྒྱལ་པོ་སྣ་ཚོགས་སྡེ་དང་། རིག་སྔགས་འཆང་གི་རྒྱལ་པོ་དེ་དག་དང་། གཞན་
ང་འཁོར་རིག་སྔགས་འཆང་གི་རྒྱལ་པོ་བརྒྱ་སྟོང་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་
གཅིག་ཏུ་འཁོད་དོ། །སྲིན་མོ་སོ་ཅན་ཞེས་བྱ་བ་དང་། སྲིན་མོ་གཡེངས་བྱེད་ཅེས་བྱ་བ་དང་། སྲིན་མོ་མཚན་མོ་རྒྱུ་ཞེས་བྱ་བ་དང་། སྲིན་མོ་སོ་འཆའ་མ་ཞེས་བྱ་བ་དང་། སྲིན་མོ་རྨོངས་བྱེད་མ་ཞེས་བྱ་བ་དང་། སྲིན་མོ་རྒོད་མ་ཞེས་བྱ་བ་དང་། སྲིན་མོ་རྡོ་རྗེ་ལྟ་བུའི་ལྟོ་ཞེས་
བྱ་བ་དང་། སྲིན་མོ་བུམ་ལྟོ་མ་ཞེས་བྱ་བ་དང་། སྲིན་མོ་ཟངས་འདབ་ཅན་ཞེས་བྱ་བ་དང་། སྲིན་མོ་གློག་ལྕེ་མ་ཞེས་བྱ་བ་དང་། སྲིན་མོ་པུན་ཙ་ལེ་ཞེས་བྱ་བ་དང་། སྲིན་མོ་བོང་མོ་ཞེས་བྱ་བ་དང་། སྲིན་མོ་འཇིགས་སུ་རུང་མ་ཞེས་བྱ་བ་དང་། སྲིན་མོ་རྡོ་རྗེ་ལྟ་བུའི་སེན་མོ་
ཅན་ཞེས་བྱ་བ་དང་། སྲིན་མོ་ཆེན་མོ་དེ་དག་དང་། གཞན་ཡང་སྲིན་མོ་འཁོར་དུ་མ་དང་ལྡན་པ་དག་ཀྱང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་

ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །འབྱུང་པོའི་རྒྱལ་པོ་མདུང་ཅན་དང་། འབྱུང་པོའི་རྒྱལ་པོ་གཤོལ་ཅན་དང་། འབྱུང་པོའི་རྒྱལ་པོ་གཏུན་ཤིང་ཅན་དང་། འབྱུང་པོའི་རྒྱལ་པོ་གཤོལ་འཛིན་དང་། འབྱུང་པོའི་རྒྱལ་པོ་
ཡང་དག་འགུགས་བྱེད་དང་། འབྱུང་པོའི་རྒྱལ་པོ་གཉའ་དྲག་འཁོར་འབྱུང་པོ་བརྒྱ་སྟོང་དུ་མ་དང་ལྡན་པ་ཡང་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་
སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཤ་ཟ་ཐམས་ཅད་དང་། མདངས་འཕྲོག་པ་ཐམས་ཅད་དང་། གནོན་པོ་ཐམས་ཅད་དང་། གྲིབ་གནོན་ཐམས་ཅད་དང་། ཡི་དགས་ཐམས་ཅད་དང་། བདུད་
ཐམས་ཅད་དང་། བདུད་ཀྱི་རིས་ཀྱི་ལྷ་ཐམས་ཅད་དང་། སྟོབས་པོ་ཆེའི་ཚོགས་ཀྱི་བདག་པོ་དང་། དེ་དག་ཐམས་ཅད་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་
ལ་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །སྲིན་མོ་བཞི་གང་ཡིན་པ་དེ་དག་ཀྱང་ཕྱོགས་བཞི་ནས་ལྷགས་ཏེ་གཅིག་ཏུ་འདུས་ནས་བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་
འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ཤིན་ཏུ་ཡངས་ཤིང་ཐ་གྲུ་ཆེ་ལ་ཀ་ཙ་ལིན་དི་ཀ་ལྟར་རེག་ན་བདེ་བར་གྱུར་ཅིང་། ས་གཞི་རྡོ་རྗེ་དང་བཻཌཱུརྱ་དང་སྤུག་གི་ཁ་ཁྱེར་གྱིས་རྣམ་པར་ཕྱེ་བ། ངོས་
གཉིས་ཀའི་སྒོ་ཁང་དང་རྟ་བབས་དང་སྐར་ཁུང་གིས་བརྒྱན་ཏེ་མཛེས་པར་བྱས་པ་སྟེང་དུ་རིན་པོ་ཆེ་ཆེན་པོའི་དྲིལ་བུ་གཡེར་ཀའི་དྲ་བ་བྲེས་པ། མུ་ཏིག་གི་དོ་ཤལ་མང་པོ་དཔྱངས་པ། དར་གྱི་ལྡ་ལྡི་མང་པོ་བྲེས་པ་སིལ་སྙན་དང་ཕེག་རྡོབ་པ་སྙན་ཅིང་ཡིད་དུ་འོང་བའི་སྒྲ་འབྱིན་

པ། ལྷའི་མེ་ཏོག་ཨུཏྤ་ལ་དང་། ཀུ་མུ་ད་དང་། པདྨ་དཀར་པོ་དང་། དྲི་མཆོག་གིས་ས་ཕྱོགས་དེ་བཀྲམ་པར་གྱུར་ཏེ། འདི་ལྟར་སངས་རྒྱས་ཀྱིས་བྱིན་གྱིས་བརླབས་དང་། སངས་རྒྱས་ཀྱི་རྫུ་འཕྲུལ་གྱིས་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་
པོ་ཐམས་ཅད་རྡོ་རྗེ་ཆེན་པོའི་འཁོར་ཡུག་གི་རིས་བསྐོར་བ་རྡོ་རྗེའི་དཀྱིལ་འཁོར་གྱི་ཁྱམས་སུ་གྱུར་པ་ཆུ་ཞེང་དཔག་ཚད་འབུམ་ཕྲག་བཅུ་པ་དུས་ཐམས་ཅད་པའི་མེ་ཏོག་གིས་ལེགས་པར་བརྒྱན་པ། ལྷའི་ཆུ་ཡན་ལག་བརྒྱད་དང་ལྡན་པས་ཕྱོགས་ཆ་ཡོངས་སུ་གང་བ་བྱང་ཆུབ་
སེམས་དཔའི་ལས་ཀྱིས་བྱུང་བ་སྟེ་དཔེར་ན་གཞན་འཕྲུལ་དབང་བྱེད་ཀྱི་རྒྱལ་པོའི་གནས་དག་པའི་ལས་ཀྱིས་བྱུང་བ་ལྷམ་མེ་ལྷང་ངེ་གནས་པ་དེ་བཞིན་དུ་ཤིང་སཱ་ལ་སྣ་ཚོགས་ཀྱི་རྒྱལ་མཚན་བཀོད་པའི་ནགས་ཚལ་སྟུག་པོ་ཡང་། བཅོམ་ལྡན་འདས་ཀྱི་མཐུས་ལྷན་ནེར་རྣམ་པར་
མཛེས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྡོ་རྗེའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཀྱིས་མཉམ་པར་གཞག་མ་ཐག་ཏུ་དེ་བཞིན་གཤེགས་པ་
ཐམས་ཅད་ཀྱིས་ལེགས་སོ་ཞེས་བྱ་བའི་གསུང་ཕྱུང་སྟེ། རྡོ་རྗེ་འབྱུང་གནས་ཞེས་བྱ་བའི་སྙིང་པོ་འདི་གསུངས་སོ། །དཔའ་བོ་ཆེན་པོ་ལེགས་སོ་ལེགས། །རྡོ་རྗེ་འབྱུང་གནས་སྟོབས་པོ་ཆེ། །ཤཱཀྱ་སེང་གེ་སྐྱོབ་པ་ཡི། །འཁོར་གྱི་དཀྱིལ་འཁོར་འདི་ལ་ནི། །
རྡོ་རྗེ་སྟོབས་ཆེན་བསྲུང་བར་གྱིས། །ན་མཿསརྦ་ཏ་ཐཱ་ག་ཏེ་བྷྱཿསརྦ་མུ་ཁེ་བྷྱཿསྭ་ཧཱ། རྡོ་རྗེ་འབྱུང་གནས་ཀྱི་སྙིང་པོའི་མཆོག་འདི་གསུངས་མ་ཐག་ཏུ་འཁོར་གྱི་དཀྱིལ་འཁོར་ཐམས་ཅད་དང་། འཇིག་རྟེན་གྱི་ཁམས་རབ་འབྱམ་ཐམས་ཅད་དུ་རྡོ་རྗེའི་འབྱུང་གནས་ཀྱི་སྙིང་པོ་
སྒྲ་གཅིག་ནས་གཅིག་ཏུ་འུར་ཞེས་གྲགས་པར་གྱུར་ཏེ། རྡོ་རྗེ་འབྱུང་གནས་དཔའ་བོ་ཆེ། །སེམས་ཅན་ཀུན་ལ་ཕན་མཛད་པ། །འཁོར་གྱི་དཀྱིལ་འཁོར་འདི་ལ་ནི། །ཐུབ་པ་ཆེན་པོས་བྱིན་གྱིས་རློབས། །རྟག་ཏུ་སྲོག་ཆགས་ཐམས་ཅད་ཀྱང་། །སྙིང་པོ་འདི་ནི་

འཛིན་གྱུར་ཅིག །དེས་ན་འདིར་ནི་དེ་དག་ཀུན། །ཚུལ་ཆེན་དངོས་གྲུབ་ཐོབ་པར་ཤོག །ཅེས་གྲགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་ལ་གཟིགས་ནས། ཀུན་ཏུ་བཟང་པོ་དང་བྱམས་པ་དང་། འཇམ་དཔལ་
ལ་སོགས་པ་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ་དག་བཅོམ་ལྡན་འདས་རྣམ་པར་སྣང་མཛད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་གང་རྣམ་པར་དག་པའི་སྒོ་ལ་འཇུག་པའི་མཛོད་ཀྱི་སྙིང་པོ་ཞེས་བྱ་བའི་གསང་སྔགས་ལ་འཇུག་པ་གསང་སྔགས་ཀྱི་
སྒོ་བྱང་ཆུབ་སེམས་དཔའི་སྤྱོད་པའི་རྗེས་སུ་འབྲང་བ། བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་གནས་རྡོ་རྗེ་ཡེ་ཤེས་ཀྱི་དབང་བསྐུར་སྙིང་པོ་ཞེས་བྱ་བའི་གསང་བའི་དཀྱིལ་འཁོར་ཐམས་ཅད་མཁྱེན་པའི་ཡེ་ཤེས་ཡང་དག་པར་སྟོན་པ་ཡིད་བཞིན་གྱི་ནོར་བུའི་རྒྱལ་པོ་ལྟ་
བུ་འཕྲལ་དུ་འབྲས་བུ་མང་བ་བྱང་ཆུབ་སེམས་དཔའི་གསང་ཆེན་བྱང་ཆུབ་སེམས་དཔས་ལེགས་པར་བརྗོད་པ། བྱང་ཆུབ་སེམས་དཔའི་མིག་འཕྲུལ་བྱང་ཆུབ་སེམས་དཔའི་སྒྱུ་མས་རྣམ་པར་རོལ་པ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཉན་ཐོས་དང་རང་སངས་རྒྱས་
ཐམས་ཅད་ཀྱིས་ཀྱང་ཡོངས་སུ་མི་ཤེས་ན། སེམས་ཅན་གཞན་དག་གིས་ཤེས་པར་འགྱུར་བ་ལྟ་ཅི་སྨོས་ཏེ། གཞན་དུ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱི་དྲིང་མི་འཇོག་པ་དང་། དེ་བཞིན་གཤེགས་པའི་རིགས་སུ་འབྱུང་བ་དང་། དེ་བཞིན་གཤེགས་
པ་ཐམས་ཅད་ཀྱིས་བྱིན་གྱིས་བརླབས་པ་དག་ནི་མ་གཏོགས་ཏེ། རྡོ་རྗེ་ཆེན་པོའི་ཡེ་ཤེས་དབང་བསྐུར་བའི་དཀྱིལ་འཁོར་ལག་ན་རྡོ་རྗེ་དབང་ཆེན་པོ་བསྐུར་བ་ཞེས་བྱ་བ་གསང་བའི་མཆོག་ཡོད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དང་ཐམས་ཅད་
དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདི་ནི་དུས་ལགས་སོ། །བདེ་བར་གཤེགས་པ་འདི་ནི་ཚོད་ལགས་སོ། །དེ་ནས་བཅོམ་ལྡན་འདས་སྔོན་གྱི་སྤྱོད་པ་ཡང་དག་པར་སྟོན་པ་བསྒྲུབ་པའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་

ཞུགས་ནས་སྔོན་གྱི་སྤྱོད་པ་རྣམ་པར་དག་པའི་སྒོ་རྡོ་རྗེ་ཆེན་པོའི་འབྱུང་གནས་གསང་སྔགས་ཀྱི་རྒྱལ་པོ་འདི་གསུངས་སོ། །ན་མཿསརྦ་མུ་ཁེ་བྷྱཿསརྦ་ཏ་ཐཱ་ག་ཏེ་བྷྱཿསརྦ་ཐཱ་ཁཾ། གསང་སྔགས་ཀྱི་རྒྱལ་པོ་གསུངས་མ་ཐག་ཏུ་དེ་ནས་ཐམས་ཅད་དང་ལྡན་པའི་འཁོར་དེ་ངོ་
མཚར་དུ་གྱུར་པའི་སྙིང་གིས་མགྲིན་གཅིག་ཏུ་ཚིག་སྨྲས་པ། ཀྱེ་མ་ཡེ་ཤེས་སྐྱིད་པ་ཆེ། །བསམ་གཏན་བདེ་བ་མཆོག་ཐོབ་པ། །ཀུན་ཀྱང་དེ་ཡི་དབང་དུ་བྱས། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེ་ངོ་མཚར་རྩེ་གཅིག་ཏུ་གྱུར་པར་མཁྱེན་
ནས། དཔལ་བེའུ་ལས་བྱང་ཆུབ་སེམས་དཔའ་ཐམས་ཅད་བསྐུལ་བ་ཞེས་བྱ་བའི་འོད་ཟེར་ཕྱུང་ངོ་། །དེ་བྱུང་ནས་བྱང་ཆུབ་སེམས་དཔའི་གནས་ཐམས་ཅད་སྣང་བར་བྱས་ཏེ། ཡང་བཅོམ་ལྡན་འདས་ཀྱི་དཔལ་བེའུ་ཉིད་དུ་ཞུགས་སོ། །དེའི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་ཀུན་དུ་བཟང་པོ་ཞེས་བྱ་བའི་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པ་འདི་ཐམས་ཅད་དུ་བཅོམ་ལྡན་འདས་རྣམ་པར་སྣང་མཛད་ཀྱི་སྔོན་གྱི་སྤྱོད་པ་སྟོན་པར་སྨོན་ལམ་བཏབ་ནས་གནོད་སྦྱིན་འདུལ་བའི་དབང་ཉེ་བར་བཟུང་སྟེ་དབུས་ཀྱི་
འཛམ་བུའི་གླིང་མི་མཇེད་འདིར་ལྕང་ལོ་ཅན་དུ་གནོད་སྦྱིན་གྱི་སྡེ་དཔོན་ཆེན་པོ་འབྲོག་གནས་ཀྱི་གནས་ན་གནས་པ་དེའི་འོད་ཟེར་གྱི་སྣང་བ་དེས་སྣང་བར་གྱུར་ནས། མིག་དང་བཞིན་རྒྱས་པར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དེ། དེ་བཞིན་གཤེགས་པའི་བསམ་གྱིས་
མི་ཁྱབ་པ་ཉིད་ཡིད་ལ་བྱེད་ཅིང་ཅང་མི་ཟེར་བར་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོ་འོད་བར་འགྱུར་བའི་བརྡ་མཛད་དེ་ཚིགས་སུ་བཅད་པ་ཡང་འདི་གསུངས་སོ། །སེམས་ཅན་དག་པ་ཟླ་བཞིན་ཚུར་གཤེགས་ཤིག །
དེ་བཞིན་གཤེགས་པས་བྱིན་བརླབས་བྱང་ཆུབ་གཞོལ། །བསམ་ཡས་མཉམ་ཉིད་ལེགས་རྟོགས་ཁོང་ཆུད་ཁྱོད། །རྟག་ཏུ་སངས་རྒྱས་བྱས་གཟོ་ཚུར་ཤོག་ཅིག །དུས་གསུམ་མཉམ་པ་ཉིད་ལ་རྟག་གནས་པ། །རྡོ་རྗེ་སེམས་དཔའ་རྡོ་རྗེ་མཆོག་ཚུར་ཤོག །ཕྱོགས་

བཅུ་དག་ན་སངས་རྒྱས་ཅི་སྙེད་ཅིག །སེམས་ཅན་དོན་མཛད་བསམ་ཡས་གཟུགས་མངའ་བ། །དེ་དག་མ་ལུས་དོན་གྱི་མདུན་འགྲོ་ཁྱོད། །གསང་བའི་བདག་པོ་སེམས་ཅན་མཆོག་ཚུར་ཤོག །གསང་བའི་དམ་པ་སེམས་ཅན་སྙིང་པོ་ཚུར། །གདུལ་
དཀའ་རྟག་འདུལ་དབང་ཐོབ་ཚུར་ཤོག་ཅིག །བརྟན་ཏེ་བྱུང་ལས་སྐྱེས་པའོ། །དུས་དང་ཚོད་ཤེས་ཚུར་ཤོག་ཅིག །དམ་པ་ཐོབ་པ་ཚུར་ཤོག་ཅིག །དམ་པ་སྦྱིན་བྱེད་ཚུར་ཤོག་ཅིག །དཔལ་བྱེད་དཔལ་སྡུད་དཔལ་ལྡན་པ། །བདེ་བར་གཤེགས་པའི་སྲས་ཚུར་ཤོག །
སེམས་ཅན་བཟང་པོ་སྟོབས་པོ་ཆེ། །རྡོ་རྗེ་ལྟ་བུར་ཚུར་ཤོག་ཅིག །སངས་རྒྱས་སྲས་པོ་འཇིགས་མེད་པ། །སྟོབས་ཅན་རྣམས་ཀྱི་མཆོག་ཚུར་ཤོག །རྟག་ཏུ་སྲིད་པ་གསུམ་དེ་ཡི། །སྙིང་དགའ་བྱེད་པ་ཚུར་ཤོག་ཅིག །ཡང་དག་ལམ་ནི་སྟོན་བྱེད་པ། །སྟོབས་
བཅུར་གནས་པ་ཚུར་ཤོག་ཅིག །སེམས་ཅན་དག་པ་རྫུ་འཕྲུལ་ཆེ། །ཀུན་དུ་བཟང་པོ་ཚུར་ཤོག་ཅིག །ཀུན་དུ་མཛེས་པ་ཚུར་ཤོག་ཅིག །སྲིད་གསུམ་དབང་ཕྱུག་ཚུར་ཤོག་ཅིག །ཁྱོད་ནི་གཟུགས་བཟང་ཤིན་ཏུ་བརྒྱན། །གླང་པོ་རྣ་བ་ཁྱོད་ཚུར་ཤོག །སྣ་ཚོགས་
གཟུགས་ཅན་འཁྲུལ་མེད་ཁྱོད། །མཐོང་ན་དགའ་བ་ཚུར་ཤོག་ཅིག །འགྲོ་ལྡིང་བ་ཡི་