Kinh tạng Tây Tạng (Kangyur Đại Học) — 085_རྒྱུད་འབུམ།_ཏ

༄༅། །རྒྱུད་འབུམ་ཏ་བ་བཞུགས་སོ། །

༄༅༅། །རྒྱ་གར་སྐད་དུ། སརྦ་ར་ཧ་སྱོ་ནཱ་མ་ཏནྟྲ་རཱ་ཛཱ། བོད་སྐད་དུ། ཐམས་ཅད་གསང་བ་ཞེས་བྱ་བ་རྒྱུད་ཀྱི་རྒྱལ་པོ། བཅོམ་ལྡན་འདས་ཡེ་ཤེས་སེམས་དཔའ་ལ་
ཕྱག་འཚལ་ལོ། །འབྱུང་ལྔ་ཉིད་ཀྱིས་ལྔ་ཡི་བདག་ཉིད་ཅན། །མི་རྣམས་ལུས་ལ་ངེས་པར་མཐོང་བ་དག །རང་སེམས་རབ་ཏུ་བསྒོམས་པར་གྱུར་ན་ནི། །དངོས་དེར་བསྒོམས་
པས་ངེས་པར་སངས་རྒྱས་འགྱུར། །རང་ཤེས་གསང་བ་དམ་པ་ནི། །སངས་རྒྱས་ཡེ་ཤེས་བླ་མེད་དེ། །གཉིས་མེད་གཉིས་ཀྱི་ཚུལ་ཅན་ཏེ། །སངས་རྒྱས་རྟག་པར་རབ་ཏུ་འདུད། །
གང་ཡང་བདག་མེད་ལས་བྱུང་ཞིང་། །གཉིས་མེད་ཡེ་ཤེས་ལས་བྱུང་བ། །སྡུག་དང་མི་སྡུག་རྣམ་སྤངས་པ། །ཅི་ལའང་ཕྱག་ནི་མི་འཚལ་ཏོ། །མ་སྐྱེས་པ་ནི་ཡང་དག་བསྐྱེད། །
སྐྱེས་པའི་འོག་ཏུ་རྟག་པར་ནི། །སངས་རྒྱས་སྐུར་ནི་བསྒོམ་པ་དེ། །རང་གི་ཡེ་ཤེས་མཆོག་ཕྱག་འཚལ། །རྣལ་འབྱོར་པ་དང་སེམས་ཅན་ཀུན། །མ་སྐྱེས་པ་ནི་ཡང་དག་བསྐྱེད། །

སྐྱེས་པའི་འོག་ཏུ་རྟག་པར་ནི། །ཉོན་མོངས་བག་ཆགས་ཀྱིས་སུན་འབྱིན། །ལུས་ཅན་རྣམས་ནི་འཁོར་གྱུར་པ། །སྡུག་དང་མི་སྡུག་རྣམ་འབྱེད་ཡིན། །སེམས་གང་དེ་ཉིད་སྡུག་བསྔལ་ཏེ། །སེམས་ཅན་རྣམས་ཀྱི་ལུས་འབྱུང་ངོ་། །
སེམས་དེ་ཡི་ནི་རྒྱུན་ཉིད་ཀྱིས། །འགྲོ་བ་སྡུག་བསྔལ་གནོན་པར་འགྱུར། །རྣམ་པར་སྣང་མཛད་རྒྱལ་བ་མགོན། །སངས་རྒྱས་ཐམས་ཅད་བསྡུས་གཅིག་པུ། །སངས་རྒྱས་ཐམས་ཅད་རྟོགས་གྱུར་པ། །སངས་རྒྱས་འཁོར་བ་སྒྲོལ་བ་པོ། །
སེམས་ཅན་ཀུན་ལ་ཀུན་ལ་ཕན་པའི་ཕྱིར། །ཐུགས་རྗེའི་ཉམས་དང་ཡང་དག་ལྡན། །རྒྱུ་ཡི་དེ་ཉིད་མཉམ་སྦྱོར་བས། །འབྲས་བུའི་དེ་ཉིད་རྣམས་ཀྱང་སྟོན། །འབྲས་བུའི་དེ་ཉིད་ཡང་དག་ཞུགས། །རྒྱུ་ཡི་དེ་ཉིད་མི་འདོད་དོ། །གང་དུ་འདོད་པ་སྐྱེས་གྱུར་པ། །
དེ་ཉིད་འཁོར་བའི་བག་ཆགས་ཡིན། །མཁས་པ་ཡི་ནི་ཆོ་ག་ཡིས། །བསྒོམ་པ་རུ་ནི་ཡོངས་སུ་བརྟགས། །གང་ཞིག་སླར་ཡང་གཅིག་གྱུར་པ། །རྣལ་འབྱོར་པ་ཡི་རྣལ་འབྱོར་བྱུང་། །སངས་རྒྱས་རྗེས་དྲན་ལ་དམིགས་ཤིང་། །ཆོས་ནི་རྗེས་སུ་
དམིགས་པ་ཡི། །ཚོགས་གཉིས་ཀྱི་ནི་སྦྱོར་བ་ཡིས། །རྐང་གཉིས་དམ་པ་ཉིད་དུ་འགྱུར། །བྷ་གར་ལིང་ག་རབ་བཞག་སྟེ། །སངས་རྒྱས་སྐུར་ནི་རྣམ་པར་བསྒོམ། །སངས་རྒྱས་རྗེས་དྲན་རྣལ་འབྱོར་པ། །སངས་རྒྱས་སྤྲིན་ནི་བསྒོམ་པར་བྱ། །
བྷ་གར་ལིང་ག་རབ་བཞག་སྟེ། །རྡོ་རྗེ་ཆོས་ནི་རྣམ་པར་བསྒོམ། །ཆོས་ནི་རྗེས་དྲན་རྣལ་འབྱོར་པ། །ཆོས་ཀྱི་སྤྲིན་ལས་ཆར་རབ་འབེབས། །མཚན་མ་ལིང་ག་ཞེས་བཤད་དེ། །ཕྱག་རྒྱའི་མཚན་མ་རྣམ་པ་བཞི། །འཇོམས་པས་བྷ་ག་ཞེས་བཤད་

དེ། །ཉོན་མོངས་འཇོམས་པའི་དམ་པ་ཡིན། །སེམས་ཅན་ཀུན་གྱི་དངོས་ཀུན་གྱི། །རང་སེམས་ཆོས་ནི་བསྡུས་པ་ཡིན། །ཆོས་བདག་མེད་པའི་སྦྱོར་བ་ཡིས། །བསད་ན་རང་ཉིད་འཆི་བར་འགྱུར། །རང་གི་སེམས་ཉིད་རྫོགས་སངས་རྒྱས། །རྟོགས་པར་བྱ་བ་
སེམས་ཉིད་ཡིན། །རང་གི་སེམས་ཉིད་གསད་བྱ་བ། །སེམས་ཉིད་ཁོ་ན་གསད་པར་བྱ། །སྦྱོར་བ་ཉིད་དང་ཡང་དག་འབྲེལ། །གང་ཡང་སྲིད་པ་འབྱུང་མ་ཡིན། །གང་ཚེ་སངས་རྒྱས་དེ་ཚེ་ནི། །སྦྱོར་ལྔ་སངས་རྒྱས་བདག་ཅེས་བསྒོམ། །ཏིང་འཛིན་ཡེ་ཤེས་ལས་
བྱུང་བ། །སངས་རྒྱས་ཉིད་ཕྱིར་མདོར་བསྡུས་པས། །སངས་རྒྱས་རྣལ་འབྱོར་མེད་པར་ནི། །རྣལ་འབྱོར་པ་ནི་འཚང་མི་རྒྱ། །ཕྲ་མོའི་དངོས་པོ་ཅི་བཞིན་མཐོང་། །སྡུག་པའི་དངོས་པོར་དེ་བཞིན་ཏེ། །དངོས་དང་དངོས་མེད་ཁྱད་པར་ནི། །བསྒོམ་པ་ཀུན་ཏུ་
བརྟགས་པ་ཡིན། །དངོས་པོ་བསྒོམ་པའི་དངོས་མ་ཡིན། །བསྒོམ་པར་བྱ་བ་བསྒོམ་པ་མིན། །དངོས་པོ་བསྒོམས་པར་གྱུར་པ་ཡིས། །རང་གི་སེམས་ནི་ཡོངས་སུ་སྦྱངས། །སངས་རྒྱས་སངས་རྒྱས་ཡུལ་མ་ཡིན། །སེམས་ཅན་ཡུལ་དུའང་མི་འགྱུར་གྱི། །
རང་སེམས་རྟོགས་པས་སངས་རྒྱས་ཏེ། །སངས་རྒྱས་སངས་རྒྱས་རྟོགས་པས་མིན། །གཉིས་མེད་སྦྱོར་བ་འདི་ལ་ཡང་། །ཏིང་ངེ་འཛིན་གྱིས་ཡེ་ཤེས་བརྟགས། །རྒྱུ་ཡི་དེ་ཉིད་ཇི་ལྟར་མཐོང་། །འབྲས་བུའི་དེ་ཉིད་དེ་ཉིད་ཡིན། །རྒྱུ་ཡི་དེ་ཉིད་ཅུང་ཟད་མེད། །འབྲས་བུའི་
དེ་ཉིད་དེ་བཞིན་ནོ། །དེ་ཉིད་དེ་ནི་དེ་བཞིན་ཤེས། །དེ་ཉིད་རྣལ་འབྱོར་པ་ཀུན་སྤྱོད། །རྒྱུ་ཡིས་རྒྱུ་ནི་དངོས་པོར་མིན། །འབྲས་བུའི་དངོས་པོར་འབྲས་བུས་མིན། །རྒྱུ་དེ་འབྲས་བུའི་དངོས་པོར་རུང་། །རང་གི་སེམས་ནི་སོ་སོར་སྣང་། །ཡེ་ཤེས་དེ་ནི་རྒྱུ་དངོས་ཏེ། །གསང་
དེ་འབྲས་བུའི་དངོས་པོ་ཡིན། །གསང་བ་གཉིས་མེད་སྤྱོད་པ་ཡིས། །དེ་ཡི་དངོས་པོས་མཆོག་ཡིན་ནོ། །དེ་ཉིད་དེ་ཉིད་རྟོགས་གྱུར་པ། །གསང་དེ་གསང་བའི་རྣལ་འབྱོར་པ། །གསང་བ་དེ་རིག་ཤེས་པ་སྟེ། །མཆོག་ནི་མཆོག་གི་རྣལ་འབྱོར་པ། །སྡུག་པའི་ངོ་བོར་གང་

བཤད་པ། །མི་སྡུག་པ་ཡང་དེ་ཡི་དངོས། །སྡུག་དང་མི་སྡུག་གཟུགས་གང་ཡིན། །མི་མཐོང་དེ་ནི་དེ་བཞིན་གཤེགས། །རྣམ་ཤེས་ཙམ་ནི་མེད་པ་རུ། །རྣལ་འབྱོར་རྣལ་འབྱོར་འབྱུང་མི་འགྱུར། །ཅི་ལྟར་ཡེ་ཤེས་མཆོག་དག་པ། །དེ་ལྟར་དག་
པ་དེ་བཞིན་གཤེགས། །རྣམ་པར་ཤེས་པ་རྣམ་པ་བཞི། །ཕྱག་རྒྱ་བཞི་ཡི་ཆོ་ག་ཡིས། །གསང་བ་གཉིས་མེད་སྦྱོར་བ་ཡིས། །སྐུ་གསུང་ཐུགས་ནི་ཡང་དག་བྱུང་། །ཐུགས་ནི་ཕྱག་རྒྱ་ཆེན་པོ་སྟེ། །དམ་ཚིག་ཕྱག་རྒྱ་ཀུན་ཏུ་འགྲོ། །ཆོས་ཀྱི་ཕྱག་རྒྱ་གསུང་གི་སྟེ། །
ལས་ཀྱི་ཕྱག་རྒྱ་སྐུ་ཡི་ཡིན། །རྒྱ་ཡིས་རྒྱས་བཏབ་དངོས་པོ་ནི། །གསང་བདག་གསང་བའི་རྣལ་འབྱོར་པའོ། །རང་རིག་པ་ཡི་ངོ་བོ་ཡིས། །ཏིང་འཛིན་ཡེ་ཤེས་བརྟགས་པ་ཡིན། །ལུས་ངག་སེམས་སུ་རྣམ་བརྟགས་པའི། །བྱ་བ་རྒྱུད་དུ་རྣམ་བརྟགས་པ། །གསང་
བ་རྣམ་པ་གསུམ་དུ་བཤད། །རྡོ་རྗེ་ལས་ཅན་སྣ་ཚོགས་བཞིན། །སངས་རྒྱས་ལྔ་ཡི་བདག་ཉིད་ནི། །གསང་བའི་ཡེ་ཤེས་བླ་མེད་ཡིན། །ཕྱག་རྒྱ་བཞི་པོ་གསང་བ་དེ། །རྣལ་འབྱོར་པ་ཡིས་ལས་གྲུབ་བྱེད། །འབྱུང་བ་ཆེན་པོ་བཞི་པོ་ཡང་། །ཕྱག་རྒྱ་བཞི་ཞེས་བཤད་
པ་ཡིན། །ཕྱག་རྒྱ་བཞི་ཡི་མཉམ་སྦྱོར་བ། །ལྷ་མོ་བཞི་དང་ཡང་དག་སྦྱོར། །ས་ནི་སྤྱན་ཞེས་བཤད་པ་ཡིན། །ཆུ་ནི་མཱ་མ་ཀཱི་ཞེས་བཤད། །མེ་དང་རླུང་ཞེས་གྲགས་པ་ནི། །གོས་དཀར་མོ་དང་སྒྲོལ་མ་ཡིན། །དབང་ཆེན་ས་ཡི་ཁམས་ཡིན་ཏེ། །ཆུ་ཡི་ཁམས་
ནི་ཆུ་དཀྱིལ་འཁོར། །མེ་ནི་མེ་ཡི་ཁམས་ཡིན་ཏེ། །རླུང་ནི་རླུང་གི་དཀྱིལ་འཁོར་རོ། །དབང་ཆེན་ཁ་དོག་སེར་པོ་སྟེ། །གྲུ་བཞི་པ་སྟེ་རྒྱས་པ་ཡིན། །ཆུ་ཡི་དཀྱིལ་འཁོར་ཟླུམ་པོ་སྟེ། །དཀར་པོའི་མདོག་ཅན་ཞི་བའི་ཡིན། །མེ་ཡི་དཀྱིལ་འཁོར་ཁ་དོག་དམར། །
གྲུ་གསུམ་དབང་གི་ལས་རྣམས་ལའོ། །རླུང་གི་དཀྱིལ་འཁོར་གཞུ་ཡི་དབྱིབས། །ནག་པོའི་གདུག་པའི་ལས་རྣམས་ལ། །འབྱུང་བ་ཆེ་བདག་ལས་གྲུབ་པ། །ལས་ཀྱི་དངོས་གྲུབ་ཡོན་ཏན་བཞི། །ལས་ཀྱི་དངོས་གྲུབ་དངོས་གྲུབ་མཆོག །འཁོར་ལོས་སྒྱུར་བ་

རྣམ་པ་བཞི། །ཞི་བ་ལ་ནི་སྤྱན་གྱི་ཚུལ། །རྒྱས་པ་པདྨའི་རྡོ་རྗེ་ཅན། །དབང་ལ་རྣམ་པར་སྣང་མཛད་གནས། །རྡོ་རྗེ་ཁྲོ་བོ་མངོན་སྤྱོད་ལའོ། །ཞི་བ་དགོངས་ཀ་བྱ་བ་ཡིན། །དེ་བཞིན་རྒྱས་པ་སྔ་དྲོ་ལ། །གདུག་པའི་ལས་རྣམས་ཉི་མའི་གུང་། །དབང་
གི་ལས་ནི་མཚན་ཕྱེད་བྱ། །ཞི་ལ་དཀར་པོ་སྦྱར་བར་བྱ། །སེར་པོར་སྣང་བ་རྒྱས་པ་ལ། །དབང་གི་ལས་ལ་དམར་པོ་སྟེ། །གདུག་པ་ནག་པོ་རབ་ཏུ་སྦྱར། །ཏིང་འཛིན་ཡེ་ཤེས་ལས་བྱུང་བ། །ལས་ཀྱི་བསྒྲུབ་པ་དམ་པ་ཡིན། །བཅོམ་ལྡན་དག་པ་བསྒོམ་
བྱ་སྟེ། །སངས་རྒྱས་ཀུན་ལས་མི་གཡོ་གྱུར། །བྷ་གའི་དབུས་སུ་གསང་བའི་བདག །རྡོ་རྗེའི་དབྱིངས་ནི་དེ་བཞིན་གཤེགས། །ལྔ་ཡི་བདག་གྱུར་བདག་ཉིད་ནི། །བསྒོམས་ན་གཡོ་བ་མེད་པར་འགྱུར། །སྙིང་ལ་གནས་པའི་ལྷ་མོ་ཆེ། །རྣལ་འབྱོར་པ་ཡི་
རྣལ་འབྱོར་བསྐྱེད། །སངས་རྒྱས་ཐམས་ཅད་སྐྱེད་མཛད་ཡུམ། །རྡོ་རྗེ་དབྱིངས་ཀྱི་དབང་མོར་བཤད། །འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་ཡིན། །སངས་རྒྱས་བཅོམ་ལྡན་དུག་མི་མངའ། །རྡོ་རྗེ་དབྱིངས་ནི་དེ་བཞིན་གཤེགས། །
ཆགས་དང་སྡང་དང་རྨོངས་པ་རྣམས། །བསྒོམས་ནས་ཁམས་གསུམ་པ་ཡི་བདག །སངས་རྒྱས་བཅོམ་ལྡན་འདས་གྱུར་ཏེ། །སངས་རྒྱས་བདེན་པས་དུག་བཅོམ་མོ། །རང་སེམས་སོ་སོར་རྟོགས་པ་ཡིས། །གཏི་མུག་སེམས་ནི་དེ་བཞིན་གཤེགས། །
རྨོངས་པ་ཉིད་ནི་འཇིག་རྟེན་གྱུར། །སེམས་ཅན་ཀུན་ལ་བལྟ་བར་བྱ། །ཞེ་སྡང་སེམས་ནི་དེ་བཞིན་གཤེགས། །ཕྲ་མོའི་ཡེ་ཤེས་ཡང་དག་བསྐྱེད། །སྡང་གྱུར་རྡོ་རྗེ་ཉིད་དུ་གྱུར། །སེམས་ཅན་ཐམས་ཅད་གཞིག་པར་བྱ། །འདོད་ཆགས་སེམས་ནི་དེ་བཞིན་
གཤེགས། །བྱང་ཆུབ་སེམས་ནི་ཡང་དག་བསྐྱེད། །ཆགས་གྱུར་བཟང་པོ་ཉིད་གྱུར་པ། །སངས་རྒྱས་ཐམས་ཅད་ཆགས་པར་བྱ། །བྱམས་པའི་སེམས་ནི་དེ་བཞིན་གཤེགས། །ང་རྒྱལ་ཡང་དག་བསྐྱེད་ནས་ནི། །མཛའ་བོར་གྱུར་ཅིང་ཀུན་ཉིད་གྱུར། །

སངས་རྒྱས་ཀུན་ལ་འཁྱུད་པར་བྱ། །ཆགས་པའི་ལྟ་བས་བྱམས་པ་སྟེ། །ཐུགས་རྗེའི་ཆོས་ནི་སྨྲ་བ་དང་། །ཀུན་ལ་མི་འཇིགས་སྦྱིན་པ་དང་། །སངས་རྒྱས་ཐམས་ཅད་མཉེས་བྱ་བའོ། །རྣལ་འབྱོར་སྦྱིན་ལས་རབ་དགའ་སྟེ། །ཚུལ་ཁྲིམས་ལྡན་
ལས་དྲི་མེད་འགྱུར། །བཟོད་པ་ལས་ནི་འོད་བྱེད་པ། །བརྩོན་ལས་འོད་འཕྲོ་ཅན་དང་ལྡན། །བསམ་གཏན་ལས་ནི་སྦྱང་དཀའ་བ། །ཤེས་རབ་ཀྱིས་ནི་མངོན་གྱུར་མཐོང་། །ཐབས་ཆེན་ལས་ནི་རིང་དུ་སོང་། །སྟོབས་དང་ལྡན་ལས་མི་གཡོ་འགྱུར། །སྨོན་ལམ་
གྱིས་ནི་ལེགས་བློ་ལྡན། །ཡེ་ཤེས་ལྡན་ལས་ཆོས་ཀྱི་སྤྲིན། །རྒྱལ་བ་དེ་བཞིན་གཤེགས་པ་ནི། །རང་རིག་བདག་ཉིད་བཅུ་གཅིག་འགྱུར། །ཕ་རོལ་ཕྱིན་པ་བཅུ་རྣམས་དང་། །སྟོབས་དང་དབང་ནི་རྫོགས་གྱུར་ཅིང་། །ས་བཅུ་ལས་ནི་འདས་གྱུར་པ། །མཚན་མ་
བརྟན་གྱུར་དེ་ལས་ནི། །རྡོ་རྗེའི་ཆུ་ནི་རྫོགས་སངས་རྒྱས། །ཆོས་ཀྱི་བདུད་རྩི་བཅུད་ལེན་ཡིན། །སངས་རྒྱས་ཀུན་གྱི་མཐའ་ཡས་པ། །གཟུང་དང་འཛིན་པ་སྤོངས་པ་ཡིན། །ཆོས་ཀྱི་བདུད་རྩི་བཅུད་ཀྱིས་ལེན། །རྡོ་རྗེའི་ཆུ་ནི་དག་འཐུངས་པས། །རྡོ་རྗེ་སློབ་དཔོན་
རྣལ་འབྱོར་པ། །གདོད་ནས་དག་པར་དེ་ཚེ་འགྱུར། །གདོད་ནས་དག་པར་གནས་གྱུར་པ། །དེ་ནས་བྱང་ཆུབ་སེམས་སུ་འགྱུར། །བྱང་ཆུབ་སེམས་ཀྱི་བདག་ཅན་འགྱུར། །བྱང་ཆུབ་སེམས་དཔའ་དེ་བཞིན་གཤེགས། །རྣམ་པར་གྲོལ་བའི་རས་ཀྱིས་གཡོགས། །
བྱང་ཆུབ་སེམས་ནི་བླ་ན་མེད། །ཡང་དག་བསྐྱེད་གྱུར་རྣལ་འབྱོར་པ། །རྡོ་རྗེ་སེམས་དཔའ་སྙིང་ལ་འདུག །སེམས་ཅན་ཁམས་ནི་མཐའ་ཡས་པའི། །མ་གྱུར་དམ་ཚིག་འཛིན་བྱེད་པ། །རྡོ་རྗེ་དམ་ཚིག་གིས་སྤྱོད་ན། །རྟག་ཏུ་དམ་ཚིག་གནས་པར་འགྱུར། །
ཁམས་གསུམ་ལམ་ནི་ཉམས་དགའ་བར། །བུད་མེད་ཅེས་བཤད་ཇི་སྙེད་པ། །ཆོ་ག་བཞིན་དུ་ཀུན་སྤྱོད་ཅིང་། །ཐུགས་ཀྱི་རྡོ་རྗེ་སྨད་མི་བྱ། །རྡོ་རྗེ་གསུམ་གྱི་སྐུ་ལ་གནས། །དམ་ཚིག་ཕྱག་རྒྱ་ཇི་སྙེད་པ། །རྡོ་རྗེ་དམ་ཚིག་གསུམ་གྱིས་བྱ། །གསུང་གི་རྡོ་རྗེ་སྨད་

མི་བྱ། །རྡོ་རྗེ་སེམས་དཔའ་ལས་བྱུང་བའི། །ཕྱག་རྒྱ་ཀུན་ནི་བུད་མེད་བཟང་། །དེ་རྣམས་སྟེན་པའི་རྣལ་འབྱོར་པ། །ཕྱག་རྒྱ་ཐམས་ཅད་དབང་དུ་འགྱུར། །འཇིག་རྟེན་ཁམས་ནི་ཐམས་ཅད་ན། །བུད་མེད་ཅེས་བྱ་ཇི་སྙེད་པ། །ཕྱག་རྒྱ་ཆེན་པོའི་སྦྱོར་བ་
ཡིན། །དེ་དག་ཀུན་ལ་ཉེ་བར་སྦྱོར། །གསང་བ་མཆོག་གི་རྣལ་འབྱོར་པ། །ཏིང་འཛིན་ཡེ་ཤེས་དམ་པ་ཡིན། །གལ་ཏེ་དངོས་གྲུབ་མཆོག་འདོད་ན། །ང་རྒྱལ་མ་ཡིན་ཧཱུྃ་མ་ཡིན། །རིག་པ་མ་ཡིན་སྔགས་རིག་མིན། །ལག་པའི་ཕྱག་རྒྱའང་མི་བཅའོ། །
མཆོད་རྟེན་གྱི་ནི་ལས་མི་བྱ། །གླེགས་བམ་དག་ཀྱང་བཀླག་མི་བྱ། །དཀྱིལ་འཁོར་དག་ནི་མི་བྱ་ཞིང་། །རྡོ་རྗེ་མཆོག་གསུམ་ཕྱག་མི་བཙལ། །སློབ་དཔོན་སྨད་པར་མི་བྱ་སྟེ། །བླ་མ་སངས་རྒྱས་ཀུན་དང་མཉམ། །ཁྱོད་ཀྱིས་སྲོག་ཆགས་གསད་པར་བྱ། །
བརྫུན་གྱི་ཚིག་ཀྱང་སྨྲ་བར་བྱ། །ཁྱོད་ཀྱིས་མ་བྱིན་བླང་བྱ་ཞིང་། །གཞན་གྱི་བུད་མེད་བསྟེན་པར་བྱ། །སྦྱིན་སྲེག་ཡང་ན་བསམ་གཏན་མིན། །ལུས་ངག་ཡིད་ནི་མི་ཕྱེད་པ། །གཞན་མིན་སེམས་ཀྱིས་བྱ་བ་སྟེ། །འདི་ནི་གསང་བའི་མཆོག་ཡིན་ནོ། །སྔགས་
རྣམས་ཐམས་ཅད་རབ་ཏུ་འགྲུབ། །རྣལ་འབྱོར་ཀུན་ཀྱང་རྣམ་ཀུན་ཏུ། །དེ་བས་འབད་པ་ཐམས་ཅད་ཀྱིས། །སངས་རྒྱས་ཆོས་ནི་བསྒོམ་པར་བྱ། །མ་འདྲེས་ཆོས་ནི་བཅྭ་བརྒྱད་པོ། །སངས་རྒྱས་ཆོས་ཞེས་བཤད་པ་ཡིན། །དེ་རྣམས་རྟག་ཏུ་བསྒོམ་པ་ནི། །
སངས་རྒྱས་ཆོས་ནི་སྒྲུབ་བྱད་ཡིན། །བསམ་གཏན་བཞི་དང་གཟུགས་མེད་བཞི། །རྟག་ཏུ་ཐོབ་པར་བྱས་པ་དང་། །འགོག་པའི་སྙོམས་འཇུག་དེ་ཡིས་ནི། །སངས་རྒྱས་བྱང་ཆུབ་རབ་ཏུ་བསྒྲུབ། །བྱང་ཆུབ་ཕྱོགས་ནི་སུམ་ཅུ་བདུན། །ཆོས་སུ་ཡང་དག་
བཤད་པ་གང་། །དེ་རྣམས་བསྒོམས་པས་དག་པ་དང་། །བྱང་ཆུབ་སེམས་དཔའ་འགྲོ་ཕན་ཡིན། །འགྲོ་བ་རྣམས་ལ་སྤྲོ་བའི་སེམས། །བརྟན་ཞིང་སྙིང་པོ་རབ་བསྒོམས་པ། །སྟོང་པའི་དེ་ཉིད་ལས་བྱུང་བ། །རྡོ་རྗེ་ཡེ་ཤེས་ཞེས་བྱ་བ་བཤད། །ཆོས་བདག་

མེད་ལས་ཡང་དག་བྱུང་། །གཉིས་མེད་ཡེ་ཤེས་དམ་པ་སྟེ། །ཆོས་ཉིད་མཆོག་གི་ཡེ་ཤེས་ནི། །ཆོས་ཀྱི་དབྱིངས་ཞེས་ཡང་དག་བཤད། །འདི་ནི་ཆོས་དབྱིངས་ཡེ་ཤེས་ཏེ། །རྡོ་རྗེ་ལྟ་བུའི་ཏིང་འཛིན་སྐྱེས། །རྡོ་རྗེ་ཡེ་ཤེས་རང་བཞིན་
སེམས། །རྡོ་རྗེ་དབྱིངས་ཞེས་བྱ་བར་བཤད། །སེམས་ཀྱི་སྤྲོ་བའི་སྦྱོར་བ་ཡིས། །ཕྲ་མོའི་ཡེ་ཤེས་སོགས་སྦྱོར་བ། །དེ་བཞིན་གཤེགས་ཀུན་ཡེ་ཤེས་ནི། །རྣམ་པར་སྣང་མཛད་ཅེས་བྱར་བཤད། །བྱམས་པ་སྤྲོ་བའི་སྦྱོར་བ་ཡིས། །སྦྱོར་བ་སྤྱོད་པར་
བྱེད་པའི་མཆོག །ཟག་མེད་བརྟན་པར་གྱུར་པ་ཡི། །ཐུགས་ནི་མི་བསྐྱོད་པ་ཞེས་བཤད། །ཐུགས་རྗེ་སྤྲོ་བའི་ཚུལ་གྱིས་ནི། །སེམས་ཅན་ཕན་འདོགས་མཛད་པ་པོ། །ཐུགས་ནི་འགྲོ་དོན་ཡང་དག་ལྡན། །རིན་ཆེན་འབྱུང་ལྡན་ཞེས་བཤད་དོ། །
དགའ་བས་སྤྲོ་བའི་སྦྱོར་བ་ཡིས། །ཐེག་ཆེན་མཆོག་ནི་དྲི་མ་མེད། །ཐུགས་ནི་འོད་གསལ་དག་པ་ནི། །འོད་དཔག་མེད་ཅེས་དེ་བཤད་དོ། །བཏང་སྙོམས་སྤྲོ་བར་མཛད་པའི་ཤུགས། །སེམས་ཅན་ཐམས་ཅད་རྟོགས་མཛད་པ། །དོན་ཡོད་བླ་མེད་བྱ་བ་ནི། །
དོན་ཡོད་གྲུབ་པར་དེ་བཤད་དོ། །བྱང་ཆུབ་རང་བཞིན་ཡེ་ཤེས་མཆོག །དེ་འདིར་རྡོ་རྗེ་ཞེས་བཤད་དེ། །རྡོ་རྗེ་ཡེ་ཤེས་ལས་བྱུང་བ། །རྡོ་རྗེ་སེམས་དཔའ་དེ་བཤད་དོ། །སངས་རྒྱས་ཐམས་ཅད་སྤྱན་འདྲེན་པ། །རྡོ་རྗེ་ལྕགས་ཀྱུ་ཞེས་བཤད་དེ། །རྡོ་རྗེའི་རིགས་རྣམས་
ཀུན་གྱི་རྒྱལ། །རྡོ་རྗེ་རྒྱལ་པོར་དེ་བཤད་དོ། །སངས་རྒྱས་ཐམས་ཅད་ཆགས་བྱེད་པས། །མཉེས་པར་བྱེད་པ་ཞེས་བཤད་དེ། །བདུད་ཀྱི་སྦྱོར་བ་ཆགས་པ་ཆེ། །རྡོ་རྗེ་ཆགས་པར་དེ་བཤད་དོ། །སངས་རྒྱས་ཐམས་ཅད་མཉེས་བྱེད་ཅིང་། །ལེགས་སོ་ཞེས་པ་རབ་
སོགས་པ། །བྱང་ཆུབ་སེམས་དཔའ་དགའ་བྱེད་པས། །རྡོ་རྗེ་ལེགས་པར་དེ་བཤད་དོ། །བྱང་ཆུབ་སེམས་དཔའི་སྦྱིན་པ་གང་། །མཁའ་མཉམ་རྡོ་རྗེ་ལས་བྱུང་བ། །དོན་ཡོད་རིན་ཆེན་ཆེན་པོ་སྟེ། །རྡོ་རྗེ་རིན་ཆེན་དེ་བཤད་དོ། །མ་རིག་བྲལ་བའི་ཡེ་ཤེས་ནི། །ཚོགས་

དག་ལས་ནི་ངེས་པར་བྱུང་། །ཐར་པའི་སྣང་བ་གཟི་བརྗིད་ཆེ། །རྡོ་རྗེ་ཉི་མར་དེ་བཤད་དོ། །རྣམ་པ་ཀུན་གྱི་དངོས་ཡེ་ཤེས། །ཐར་པའི་ལམ་འཇུག་ཐོབ་མཛད་གང་། །ཆོས་ཀྱི་རྒྱལ་མཚན་ཏོག་ཆེན་པོ། །རྡོ་རྗེ་དབལ་དུ་དེ་བཤད་དོ། །རྡོ་རྗེ་བཞད་པ་རྣལ་འབྱོར་ཆེ། །སངས་
རྒྱས་ཀུན་འབྱུང་རྨད་བྱུང་བ། །འདི་ནི་བྱང་ཆུབ་སེམས་དཔའ་ཆེ། །རྡོ་རྗེ་བཞད་པར་དེ་བཤད་དོ། །སངས་རྒྱས་ཀུན་གྱི་རྣལ་འབྱོར་ཆེ། །སངས་རྒྱས་ཆོས་ནི་རྟོགས་མཛད་པ། །དེ་བཞིན་གཤེགས་པའི་ཆོས་དག་པ། །རྡོ་རྗེ་ཆོས་སུ་དེ་བཤད་དོ། །ཤེས་རབ་རྣོན་པོ་ཐེག་པ་ཆེ། །
ཉོན་མོངས་ཐམས་ཅད་ངེས་གཅོད་མཛད། །ཤེས་བྱའི་སྒྲིབ་པ་གཅོད་པ་པོ། །རྡོ་རྗེ་རྣོན་པོར་དེ་བཤད་དོ། །སངས་རྒྱས་རོལ་མོའི་འཁོར་ལོ་ནི། །ཆོས་ཀྱི་འཁོར་ལོ་རབ་བསྐོར་བས། །སེམས་དཔའ་ཆེན་པོ་ཐེག་པ་ཆེ། །རྡོ་རྗེ་རྒྱུ་ཞེས་དེ་བཤད་དོ། །ཤེས་རབ་ཡེ་
ཤེས་རང་བཞིན་དག །གསུང་གི་སྒྲ་ནི་རྣམ་པར་སྤངས། །འཇམ་པའི་གསུང་གི་བདག་ཉིད་གྱུར། །རྡོ་རྗེ་སྨྲ་བར་དེ་བཤད་དོ། །ཕ་རོལ་ཕྱིན་པ་ཀུན་གྱི་ཞབས། །ཆོས་རྣམས་ཐམས་ཅད་རྟོགས་མཛད་པ། །སེམས་ཅན་ཀུན་དོན་སྤྲུལ་པ་པོ། །རྡོ་རྗེ་ལས་ཞེས་བྱ་བར་
བཤད། །སངས་རྒྱས་རྗེས་དྲན་ཡང་དག་གྲུབ། །ཐེག་པ་དམན་པ་རྣམ་སྤངས་ཤིང་། །བྱང་ཆུབ་སེམས་ལ་རབ་ཞུགས་པ། །རྡོ་རྗེ་བསྲུང་བར་དེ་བཤད་དོ། །སྡིག་པ་ཐམས་ཅད་ཟད་བྱེད་ཅིང་། །དེ་བཞིན་ཉོན་མོངས་རྣམ་སྲེག་ལ། །ཉོན་མོངས་ཟད་པ་ཉེར་ལེན་པས། །
རྡོ་རྗེ་གནོད་སྦྱིན་དེ་བཤད་དོ། །སྐུ་གསུང་ཐུགས་ཀྱི་རྡོ་རྗེ་རྣམས། །བཅིང་བ་རུ་ནི་ཡང་དག་གྱུར། །དེ་ཉིད་དེ་ཉིད་ཡེ་ཤེས་ཏེ། །རྡོ་རྗེ་ཁུ་ཚུར་ཞེས་བཤད་དོ། །དམ་ཚིག་ཕྱག་རྒྱ་ཐམས་ཅད་ནི། །རྡོ་རྗེ་བསྡམས་ལས་ཡང་དག་བྱུང་། །རྡོ་རྗེ་ཁུ་ཚུར་གཉིས་གྱུར་པ། །
ལས་ཀྱི་ཕྱག་རྒྱ་ཞེས་བཤད་དོ། །ང་རྒྱལ་མེད་ཅིང་སྣང་བ་མེད། །མཚན་མ་མེད་ཅིང་ཞེན་པ་མེད། །བདག་མེད་མཉམ་ཉིད་ཡེ་ཤེས་ནི། །རྡོ་རྗེ་སེམས་དཔའ་ཞེས་བྱར་བཤད། །གསང་བའི་མཉམ་པར་འབྱོར་པ་འདིར། །ཡེ་ཤེས་ཕ་རོལ་ཕྱིན་དགེ་བ། །རྣམ་པ་

བཅུ་གཉིས་ཡང་དག་བྱུང་། །རྡོ་རྗེ་ཕ་རོལ་ཕྱིན་པའི་འོད། །བྱང་ཆུབ་སེམས་ནི་རབ་བསྒོམས་པས། །ཕ་རོལ་སངས་རྒྱས་ཉིད་སོན་པའི། །ཕ་རོལ་ཕྱིན་ཐོབ་ཡེ་ཤེས་ནི། །རྡོ་རྗེ་སེམས་མར་བཤད་པ་ཡིན། །བསྡུ་བའི་དངོས་པོ་བཞི་རྣམས་ནི། །
ཤེས་རབ་ཕ་རོལ་ཕྱིན་རྡོ་རྗེ། །ཆོས་བཞི་གཅིག་ཏུ་གྱུར་པ་ནི། །རྡོ་རྗེ་རིན་ཆེན་མར་བཤད་དོ། །གསང་བའི་ཡེ་ཤེས་ཡེ་ཤེས་ཆེ། །དེ་ཉིད་ཕ་རོལ་ཕྱིན་དགེ་བ། །ཕ་རོལ་ཕྱིན་པ་ཆེ་ལས་བྱུང་། །རྡོ་རྗེ་ཆོས་མར་ཤེས་པར་བྱ། །ཕ་རོལ་ཕྱིན་པའི་དགེ་བ་ནི། །སྦྱོར་
བའི་ཐབས་སུ་རབ་བསྟན་པ། །རྡོ་རྗེ་ལས་མར་ཤེས་པར་བྱ། །གང་ཕྱིར་དེ་ནི་རོལ་བ་དགེ། །སྒེག་མོ་སྦྱིན་པའི་ཕ་རོལ་ཕྱིན། །ཚུལ་ཁྲིམས་ཕ་རོལ་ཕྱིན་དགེ་བས། །བརྒྱན་པའི་ཡན་ལག་ཡིད་འོང་ཡིན། །གླུ་མ་བཟོད་པའི་ཕ་རོལ་ཕྱིན། །ཆེད་དུ་བརྗོད་པའི་ཆོས་
བརྗོད་པའོ། །གར་མ་བརྩོན་འགྲུས་ཕ་རོལ་ཕྱིན། །མྱུར་དུ་སངས་རྒྱས་ཉིད་སྟེར་བའོ། །བདུག་པ་ཤེས་རབ་ཕ་རོལ་ཕྱིན། །ཀུན་ཏུ་ཁྱབ་པར་སྤྲོས་ཕྱིར་རོ། །མེ་ཏོག་བསམ་གཏན་ཕ་རོལ་ཕྱིན། །འདོད་པའི་འདམ་གྱིས་མ་གོས་པའོ། །མར་མེ་སྨོན་ལམ་ཕ་རོལ་ཕྱིན། །
ཕྱོགས་ཀུན་སྣང་བར་བྱེད་པ་ཡིན། །དྲི་ནི་ཐབས་ཀྱི་ཕ་རོལ་ཕྱིན། །དྲི་ངན་ཐུར་སེལ་དགེ་བ་ཡིན། །སངས་རྒྱས་ཀུན་གྱི་ཐབས་ཆེན་པོ། །དབྱེ་བ་རྣམ་པ་བཞི་ཡིས་གནས། །ཐམས་ཅད་འདོད་པའི་ཐབས་ཆེན་པོ། །རྡོ་རྗེ་ལྕགས་ཀྱུ་ཞེས་བཤད་དོ། །བྱང་ཆུབ་སྤྱད་པ་
སྤྱོད་བྱེད་པ། །རྡོ་རྗེ་ཞགས་པ་ཞེས་བཤད་དོ། །ཐེག་པ་འདི་ལ་བརྟན་འགྱུར་གང་། །རྡོ་རྗེ་ལྕགས་སྒྲོག་ཅེས་བཤད་དོ། །ཆོས་རྣམས་ཐམས་ཅད་མ་སྐྱེས་ཤིང་། །གདོད་ནས་ཞི་བ་མཁའ་དང་མཉམ། །དེ་ལྟའི་ཚིག་ནི་རབ་འཇུག་པས། །རྡོ་རྗེ་དྲིལ་བུ་ཞེས་བཤད་དོ། །
ཚོགས་གཉིས་ཀྱིས་ནི་སྦྱོར་བ་ཡིས། །སེམས་ཅན་ཀུན་གྱི་དོན་སྟོན་པའི། །སེམས་ནི་རང་བཞིན་གྱིས་འོད་གསལ། །ཟླ་བའི་དཀྱིལ་འཁོར་ཡིན་པར་བཤད། །ཡང་དག་རྡོ་རྗེ་རྟོགས་པ་སྟེ། །འཛིན་པའི་སྦྱོར་ཉིད་ལྕགས་ཀྱུ་ཡིན། །ཕྲ་བར་འབིགས་པ་མདའ་ཞེས་བྱ། །

དགྱེས་པས་ལེགས་སོ་ཞེས་བྱ་བ། །སྤྲས་པས་རིན་པོ་ཆེ་རུ་བཤད། །གཟི་བརྗིད་ཅེས་བྱ་ཉི་མ་ཡིན། །བསྒྲེང་བས་ཏོག་ཏུ་བཤད་པ་སྟེ། །རྣམ་པར་འབྱེད་པས་བཞད་པར་བཤད། །འདོད་ཆགས་དག་པ་པདྨ་ཡིན། །ཉོན་མོངས་དགྲ་བཅོམ་རལ་གྲི་སྟེ། །དཀྱིལ་
འཁོར་སྦྱོར་བས་འཁོར་ལོ་ཡིན། །གང་གི་བརྗོད་པས་སྨྲ་བར་བཤད། །ཀུན་ཉིད་སྣ་ཚོགས་རྡོ་རྗེ་ཡིན། །གཞིག་དཀའི་སྦྱོར་བ་གོ་ཆ་ཡིན། །འཇིགས་པའི་སྤྱོད་པའི་མཆེ་བ་སྟེ། །ཕྱག་རྒྱའི་སྦྱོར་ཉིད་བཅིང་བ་ཡིན། །དཀྱིལ་འཁོར་དུ་ནི་གང་བཤད་པ། །ཡིད་ཀྱི་དཀྱིལ་
འཁོར་དམ་པ་ཡིན། །གཞལ་ཡས་ཁང་ནི་ཡེ་ཤེས་ཏེ། །སེམས་ཀྱི་བརྩེགས་པ་བསྒྲེང་བ་ཡིན། །ཕྱི་ཡི་གྲུ་བཞི་བ་གང་ཡིན། །ཚད་ཀྱིས་མཉམ་པ་ཉིད་གྱུར་པ། །བྱམས་པ་ལ་སོགས་སེམས་གང་ཡིན། །ཐིག་བཞི་ཞེས་ནི་བཤད་པ་ཡིན། །ཆོས་ཀྱི་སྦྱོར་བ་རྗེས་དྲན་ཉིད། །
གང་དེ་རྡོ་རྗེ་ཐིག་ཏུ་བཤད། །ལྟ་བ་ཀུན་ལས་རྣམ་གྲོལ་བ། །ཡེ་ཤེས་ཐིག་ཏུ་བཤད་པ་ཡིན། །ཚུལ་ཁྲིམས་ཚོགས་ཀྱི་དམ་པ་ནི། །གང་ཞིག་རྒྱན་དུ་བཤད་པ་ཡིན། །དད་དབང་ལ་སོགས་སེམས་གང་ཡིན། །ར་བ་ལྔར་ནི་ཡང་དག་བྱུང་། །རྣམ་པར་ཐར་པ་བཞི་པོ་ནི། །སྒོ་
རྣམས་སུ་ནི་ཡང་དག་བཤད། །ཡང་དག་སྤོང་བ་བཞི་པོ་ནི། །རྟ་བབས་རྣམས་དག་ཀ་བར་བྱུང་། །དྲན་པ་ཉེར་གཞག་བཞི་པོ་ནི། །ཁྱམས་རྣམས་བཞི་པོར་ཤེས་པར་བྱ། །རྫུ་འཕྲུལ་རྐང་པ་བཞི་པོ་ནི། །དེ་ནི་སྒོ་ཁྱུད་རྣམ་བཞི་ཡིན། །བྱང་ཆུབ་ཡན་ལག་བདུན་པོ་ནི། །
ཕྲེང་བ་མེ་ཏོག་ཆུན་བརྒྱན་པ། །འཕགས་ལམ་ཡན་ལག་བརྒྱད་པོ་ནི། །ཀ་བ་བརྒྱད་ཅེས་བྱ་བར་བཤད། །སྒྲིབ་པ་གཉིས་ལས་རྣམ་གྲོལ་ཞིང་། །ཏིང་འཛིན་ཡེ་ཤེས་ཀྱིས་བརྟགས་པ། །ལམ་གྱི་ཡེ་ཤེས་ཁྱད་པར་རྣམས། །རྔ་ཡབ་ཅེས་ནི་ཡང་དག་བཤད། །ཉོན་
མོངས་ཐམས་ཅད་དེས་གཅོད་ཅིང་། །ཉོན་མོངས་འཕྲོག་པས་དྲ་བ་སྟེ། །ཡང་དག་གཅོད་ཅིང་སྤོང་བ་ཉིད། །སེལ་བའི་སྤོང་བ་ལ་གནས་པ། །ཚོགས་གཉིས་ཀྱི་ནི་སྦྱོར་བ་ཉིད། །ཉོན་མོངས་པ་ཡི་ཕྱེད་འཕྲོག་པ། །དྲ་བ་ཕྱེད་ཅེས་བྱ་བར་བཤད། །རང་བཞིན་འོད་གསལ་གང་

ཡིན་དེ། །བྱང་ཆུབ་སེམས་ནི་བླ་མེད་ཡིན། །སེམས་ནི་དོན་ཀུན་སྐྱེད་བྱེད་པ། །ཟླ་བའི་དཀྱིལ་འཁོར་ཡིན་པར་བཤད། །ཤེས་རབ་ཡེ་ཤེས་རང་བཞིན་དག །རྡོ་རྗེ་ལྟ་བུའི་ཏིང་འཛིན་སྐྱེས། །ཐར་པའི་སྣང་བ་གཟི་བརྗིད་ཆེ། །ཉི་མའི་དཀྱིལ་འཁོར་
ཡིན་པར་བཤད། །ཚོན་རྩི་ལྔར་ནི་ཡང་དག་བཤད། །ལྟ་བ་ལྔ་ཡི་མེ་ཏོག་ཡིན། །ཡེ་ཤེས་ལྔ་ཡི་དེས་སྦྱོར་ཉིད། །སངས་རྒྱས་ལྔ་ཞེས་ཡང་དག་བཤད། །ནམ་མཁའ་བཞིན་དུ་བདག་མེད་པའི། །རྣམ་ཤེས་ཡེ་ཤེས་དམ་པ་ཡིན། །ཡེ་ཤེས་དེ་ཡི་རྒྱན་
བཤད་པ། །ཆགས་པའི་སེམས་ཞེས་བྱ་བར་བཤད། །ཆགས་བྲལ་ལས་ནི་བྱང་ཆུབ་འབྱུང་། །ཆགས་པའི་སེམས་ལས་གཞན་ཡིན་ནོ། །དེ་བས་ཆགས་དང་ཆགས་བྲལ་བ། །བྱང་ཆུབ་སེམས་ཞེས་ཡང་དག་བཤད། །འཇིག་རྟེན་ཆགས་དང་བྲལ་བས་འདུལ། །
ཕྱག་རྒྱའི་དངོས་གྲུབ་ཆགས་ལས་བྱུང་། །དེར་ནི་ཐབས་ཀྱི་སྒོམ་པ་དག །དངོས་གྲུབ་ཐམས་ཅད་སྟེར་བ་ཡིན། །ཇི་ལྟར་འཇིག་རྟེན་འདུལ་འགྱུར་བ། །དེ་ལྟར་རྣལ་འབྱོར་པ་ཡིས་སྤྱད། །ཇི་ལྟར་གདུལ་བྱ་དག་གྱུར་པ། །ཞེན་པ་ཀུན་ཏུ་མཆོད་པར་འགྱུར། །མཚན་
ཉིད་གང་ཞིག་ཡང་དག་བཤད། །མཚན་ཉིད་དེས་ནི་མཚོན་པར་འགྱུར། །སྐུ་གསུང་ཐུགས་ཀྱི་ཕྱག་རྒྱ་ཡིས། །རྒྱས་བཏབ་ཡེ་ཤེས་ཡིན་པ་བཤད། །ཕྱག་རྒྱ་བསྒོམས་པས་རྣལ་འབྱོར་པ། །རྟག་ཏུ་ཕྱག་རྒྱའི་བདག་ཅན་འགྱུར། །རྒྱས་བཏབ་དངོས་པོ་ཤེས་ནས་ནི། །
བསྒོམས་ན་ཕྱག་རྒྱས་བཏབ་པར་འགྱུར། །མཚན་དང་མཚན་ཉིད་འབྲེལ་བ་ནི། །ཤེས་ནས་རྣལ་འབྱོར་ཡང་དག་སྤྱོད། །ཇི་ལྟར་མཚན་ཉིད་ཡང་དག་གྲུབ། །དེ་བཞིན་དག་པ་མྱུར་དུ་འགྲུབ། །གཡས་པའི་ཆ་ཡི་མཚན་མས་ནི། །ཤེས་རབ་ཅན་ནི་རབ་ཏུ་བསྟན། །
གཡོན་གྱི་མཚན་མ་ཇི་ལྟར་མཐོང་། །དེ་ཡིས་ཐུགས་རྗེ་མཚོན་པ་ཡིན། །ཕྱག་ནི་གཉིས་ཀའི་མཉམ་སྦྱོར་ལས། །ཏིང་འཛིན་གཉིས་སུ་བཤད་པ་ཡིན། །ཞབས་གཉིས་ཀྱི་ནི་མཚན་མ་ཡིས། །ཚོགས་གཉིས་དག་ནི་བསྟན་པ་ཡིན། །སོར་མོ་ལྔ་ཡི་མཉམ་སྦྱོར་ལས། །དཀྱིལ་

འཁོར་ལྔ་ཡིས་བརྒྱན་པ་ཡིན། །སངས་རྒྱས་ལྔ་ཡི་མངོན་བྱང་ཆུབ། །རིམ་པ་བཞིན་དུ་བསྟན་བྱ་སྟེ། །གང་ཞིག་གུང་མོ་སྟོན་པ་ནི། །ནམ་མཁའ་ལས་ནི་བྱུང་བ་མཚོན། །གང་ཞིག་མཛུབ་མོ་སྟོན་པ་ནི། །དེས་ནི་དབང་ཆེན་དཀྱིལ་འཁོར་ཡིན། །གང་ཞིག་
སྲིན་ལག་སྟོན་པ་ནི། །ཆུ་ཡི་དཀྱིལ་འཁོར་ཞེས་བཤད་དོ། །གང་ཞིག་མཐེ་བོ་སྟོན་པ་ནི། །དེ་ཡིས་མེ་ནི་མཚོན་པ་ཡིན། །གང་ཞིག་མཐེའུ་སྟོན་པ་ནི། །རླུང་གི་དཀྱིལ་འཁོར་ཉིད་དུ་འགྱུར། །གང་ཞིག་ལྟེ་བ་སྟོན་པ་ནི། །རྡོ་རྗེ་དབྱིངས་ཀྱི་དབང་ཕྱུག་བཤད། །
གང་ཞིག་སྙིང་ག་སྟོན་པ་ནི། །རྡོ་རྗེ་སེམས་མར་རྗེས་སུ་དཔག །གང་ཞིག་སྨིན་མཚམས་སྟོན་པ་ནི། །རྡོ་རྗེ་རིན་ཆེན་མ་ཞེས་བྱ། །གང་ཞིག་ལྐོག་མ་སྟོན་པ་ནི། །རྡོ་རྗེ་ཆོས་མར་ཤེས་པར་བྱ། །གང་ཞིག་སྤྱི་བོ་སྟོན་པ་ནི། །རྡོ་རྗེ་ལས་མར་ཤེས་པར་བྱ། །བྱང་ཆུབ་
ལྔར་མངོན་བྱང་ཆུབ་པའམ། །ཡང་ན་ཡེ་ཤེས་ལྔ་རྣམས་སམ། །སངས་རྒྱས་ལྔ་དང་ཡང་དག་ལྡན། །དཀྱིལ་འཁོར་བྱང་ཆུབ་ཡིན་པར་བསྟན། །སྔོན་གྱི་སྒྲར་ནི་ཇི་སྐད་བཤད། །མདུན་དུ་དེ་ནི་རབ་ཏུ་བསྟན། །རྒྱབ་ཀྱི་སྒྲར་ནི་ཇི་ལྟར་བཤད། །ཕྱི་མར་དེ་ནི་ཡང་དག་བསྟན། །
གང་དུ་ཐོག་མའི་སྒྲར་གྱུར་པ། །དེ་ནི་རྒྱུ་ཡི་སྒྲ་རུ་བསྟན། །གང་ཞིག་ཐ་མའི་སྒྲར་གྱུར་པ། །འདིར་ནི་འབྲས་བུར་ཡང་དག་བསྟན། །སངས་རྒྱས་བཅོམ་ལྡན་གཉིས་མི་མངའ། །རྒྱུ་དང་འབྲས་བུར་ལྡན་འགྱུར་མིན། །གང་ཕྱིར་ཐོག་མ་ཐ་མ་མེད། །དེ་ཕྱིར་རྟག་པ་ཞེས་བཤད་དོ། །
རང་སེམས་རྟོགས་པས་སངས་རྒྱས་ཏེ། །རྟོགས་པར་བྱ་བའང་སེམས་ཉིད་ཡིན། །སངས་རྒྱས་ཞིང་ཞེས་བཤད་པ་དང་། །བྱང་ཆུབ་སེམས་སུ་ཤེས་པར་བྱ། །རང་བཞིན་དག་པའི་སེམས་ཅན་ནི། །ཀུན་ཏུ་རིག་པར་ཡང་དག་བཤད། །སེམས་ཅན་རང་བཞིན་དག་པ་ནི། །
བྱང་ཆུབ་སེམས་སུ་ཤེས་པར་བྱ། །དང་པོར་གྱུར་པ་སྙིང་གར་རྡེབས། །བརྟན་པ་ཉིད་དུའང་རང་ཉིད་འགྱུར། །སྐྲ་འཛིན་པ་ནི་རལ་པའི་དབུས། །འོད་དཔག་མེད་དུ་མཉམ་གཞག་ཡིན། །ཙུམ་པ་ན་ནི་རྗེས་བཤད་པ། །དེ་བཞིན་གཤེགས་པ་རྡོ་རྗེ་གསུང་། །དབང་པོ་གཉིས་

ནི་མཉམ་སྦྱོར་བ། །རྣམ་པར་སྣང་མཛད་ཅེས་བཤད་དོ། །བུ་མོ་ལོ་གྲངས་བཅུ་གཉིས་པར། །སྐྱེས་མཆོག་ཐུབ་པས་གང་གསུངས་པ། །ཕ་རོལ་ཕྱིན་པ་བཅུ་གཉིས་སུ། །གསུངས་ཀྱི་གཞན་དུ་མི་བརྟག་གོ། །བུ་མོ་ལོ་གྲངས་བཅུ་དྲུག་པར། །དེ་
བཞིན་གཤེགས་པས་གང་གསུངས་པ། །རྡོ་རྗེ་སེམས་སོགས་སེམས་དཔའ་ཡི། །བསྒོམ་པའི་དོན་གྱི་སྒྲ་ཡིན་ནོ། །ལྷ་མོ་ལོ་གྲངས་ཉི་ཤུ་པར། །འཁོར་ལོས་སྒྱུར་བས་ཇི་སྐད་གསུངས། །མཆོད་པ་ཉི་ཤུའི་བདག་ཉིད་ཅན། །ཉི་ཤུ་པོ་དང་རིམ་བཞིན་ནོ། །རང་
གི་ཆུང་མ་རང་རིག་ལས། །བྱུང་བའི་རང་རིགས་ཡིན་པར་བཤད། །གཞན་གྱི་ཆུང་མར་གང་བསྟན་པ། །གཞན་སྡུག་གཞན་གྱི་རིག་པ་ཡིན། །གཅི་དང་རྡོ་རྗེ་ཞེས་བཤད་པ། །རྡོ་རྗེ་ཡེ་ཤེས་བླ་མེད་ཡིན། །བཤང་དང་པདྨ་ཞེས་བཤད་པ། །ཆོས་ཀྱི་ཡེ་ཤེས་
རྙོག་མེད་ཡིན། །ཡོངས་སུ་གསལ་བར་རྣམ་ཤེས་པ། །དཀྱིལ་འཁོར་ཐུགས་ཀྱི་དམ་པ་ཡིན། །སྐུ་གསུང་ཐུགས་ཀྱི་སྤྱོད་པ་ཡིས། །འབད་པ་ཡིས་ནི་མཆོད་བྱེད་པ། །རང་གི་རྡོ་རྗེ་པདྨར་ལྡན། །དབང་པོ་གཉིས་ལས་བྱུང་བ་ཡི། །རང་གི་ཁུ་བ་ཐིག་ལེ་ཡིས། །
རྡོ་རྗེ་སེམས་དཔའ་མཆོད་པར་བྱ། །ཚོགས་གཉིས་ཀྱི་ནི་སྦྱོར་བ་ཡིས། །སངས་རྒྱས་ཐམས་ཅད་གཅིག་བསྡུས་པ། །གཉིས་མེད་གཉིས་ཉིད་ལ་བརྟེན་པ། །ཐུགས་རྗེ་ཉམས་དང་ཡང་དག་ལྡན། །དབང་པོ་གཉིས་ཀྱི་མཉམ་སྦྱོར་བས། །རང་གི་ཁུ་བ་མཁས་པ་ཡིས། །
རྣལ་འབྱོར་ཆེན་པོ་བྱུང་ནས་ནི། །དཀྱིལ་འཁོར་ཡང་དག་བྱིན་གྱིས་བརླབ། །དགོད་དམ་རབ་ཏུ་སྨྲ་བ་འམ། །སངས་རྒྱས་རོལ་མོའི་གར་བྱེད་པ། །ལྷ་མོ་བཞི་ཡི་མཉམ་སྦྱོར་བས། །རྒྱུ་དང་མི་རྒྱུ་རྣམས་ཀྱིས་རོལ། །གསང་ཞིང་ལེགས་པར་བསྒྲིལ་པ་དང་། །ཚད་དང་ལྡན་ཞིང་
མཛེས་པ་ཡིས། །ཤེས་རབ་ཅན་གྱིས་ཐིག་གདབ་པ། །སྐུ་གསུང་ཐུགས་ནི་བསྒོམས་པས་སོ། །ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་བྱས་ལ། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། །གྲྭ་ཡི་མཚམས་ནི་ཐམས་ཅད་དང་། །སྒོ་ཁྱུད་

ཀྱི་ནི་ནང་རྣམས་སུ། །རྡོ་རྗེ་རིན་ཆེན་སྤྲས་པས་ནི། །ཕྱི་ཡི་དཀྱིལ་འཁོར་ཐིག་གདབ་བོ། །རྡོ་རྗེའི་ཐིག་གིས་ཡོངས་བསྐོར་ཞིང་། །ཀ་བ་བརྒྱད་ཀྱིས་ཉེ་བར་མཛེས། །ཀ་བ་བརྒྱད་ཀྱི་ནང་གནས་པའི། །དཀྱིལ་འཁོར་བརྒྱད་པར་བསྟན་པ་དང་། །གྲྭ་ཡི་དཀྱིལ་འཁོར་དོར་བར་ནི། །རྡོ་རྗེ་ལྷ་མོའི་ཚོགས་ཀྱིས་
མཆོད། །འཁོར་ལོ་ལྔ་དང་ཡང་དག་ལྡན། །དཀྱིལ་འཁོར་ལྔ་ཡིས་རྣམ་པར་བརྒྱན། །དྲ་བ་དྲ་ཕྱེད་ཀྱིས་བརྒྱན་ཅིང་། །རྔ་ཡབ་ཀྱིས་ནི་ཉེར་སྤྲས་པ། །ཁྲུ་ནི་བཅུ་གཉིས་བྱ་བ་འམ། །ཁྲུ་བཅུ་དྲུག་ཏུ་རབ་ཏུ་བརྟག །ཡང་ནི་ཁྲུ་ནི་ཉི་ཤུ་ཙམ། །ཉི་ཤུ་ལྔ་དང་ལྡན་པ་ཡིས། །ཁྲུ་ནི་ཉི་ཤུ་
ལྔ་པ་ཡིས། །དཀྱིལ་འཁོར་ཡང་དག་བྱིན་གྱིས་བརླབ། །སྒོ་རྣམས་ཀྱི་ནི་དབུས་མའི་ཆ། །ཆ་དགུ་རུ་ནི་རྣམ་དབྱེ་བ། །དཀྱིལ་འཁོར་སྒོ་རུ་བསམས་ནས་ནི། །སྒོ་ཁྱུད་དེར་ནི་བྱ་བ་ཡིན། །སྒོ་ཁྱུད་དཀྱིལ་འཁོར་རྣམ་པ་ནི། །སྙིང་པོའི་དཀྱིལ་འཁོར་དང་མཉམ་པར། །དགུ་
ཆ་རུ་ནི་རྣམ་བགོས་ཏེ། །གྲྭ་ཡི་དཀྱིལ་འཁོར་དོར་བར་བྱ། །ཐ་མར་ཁྱམས་དང་ལྡན་པ་ཡི། །དཀྱིལ་འཁོར་ལྔས་ནི་བརྒྱན་པ་དང་། །ཁ་དོག་ལྔ་དང་ཡང་དག་ལྡན། །གྲུ་བཞི་པར་ནི་བརྟག་པར་བྱ། །ལྟ་བ་ལྔ་པོ་བགྲོད་དཀའ་ཆེ། །ཁ་དོག་ལྔ་ཡི་དེ་བཞིན་གཤེགས། །
སངས་རྒྱས་ལྔ་དང་མཉམ་སྦྱོར་བས། །ས་ནི་ཚོན་གྱིས་རབ་ཏུ་བསྒྱུར། །དཀྱིལ་འཁོར་ལྔ་ཡི་དབུས་སུ་ནི། །སངས་རྒྱས་ལྔ་ནི་དགོད་པར་བྱ། །ཁ་དོག་ལྔ་དང་ཏིང་འཛིན་གྱིས། །འདོད་པའི་ཡོན་ཏན་ལྔ་ཡིས་ཁྱབ། །ཤེལ་དང་ཟླ་བའི་འོད་འདྲ་ཞིང་། །སངས་རྒྱས་ཐམས་
ཅད་གཅིག་བསྡུས་པ། །དེ་བཞིན་གཤེགས་པ་རྣམ་སྣང་མཛད། །དཔའ་བོའི་ལྟ་བ་དེ་བཞིན་གཤེགས། །ཨིནྡྲ་ནཱི་ལའི་འོད་འདྲ་ཞིང་། །རྡོ་རྗེ་ཐམས་ཅད་གཅིག་བསྡུས་པ། །མི་བསྐྱོད་ཡེ་ཤེས་ལས་བྱུང་བ། །རྡོ་རྗེའི་ལྟ་བ་དེ་བཞིན་གཤེགས། །འཛམ་བུའི་གསེར་གྱི་
འོད་འདྲ་ཞིང་། །སངས་རྒྱས་ཐམས་ཅད་གཅིག་བསྡུས་པ། །སེམས་ཅན་ཀུན་གྱི་དོན་དུ་བྱུང་། །འབར་བའི་ལྟ་བ་དེ་བཞིན་གཤེགས། །དཔའ་བོ་ཆེན་པོ་པདྨ་འདྲ། །པདྨ་རཱ་གའི་ནོར་བུའི་འོད། །ཆོས་ཀྱི་ཡེ་ཤེས་ལས་བྱུང་བ། །ཆགས་པའི་ལྟ་བ་དེ་བཞིན་གཤེགས། །

མ་རྒད་ཀྱི་ནི་འོད་འདྲ་ཞིང་། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གཅིག་ལས་བྱུང་བ། །བྱམས་པའི་ལྟ་བ་དེ་བཞིན་གཤེགས། །དབུས་མའི་ས་ཡི་གཞི་དག་པ། །ནོར་བུ་ཆུ་ཤེལ་མདོག་འདྲ་བ། །ཤར་ཕྱོགས་ཉིད་
དུ་སྔོན་པོ་ཆེ། །ལྷོ་རུ་སེར་པོ་ཡང་དག་ལྡན། །ནུབ་ཕྱོགས་དེར་ནི་དམར་པོ་སྟེ། །བྱང་དུ་ལྗང་དང་ཡང་དག་ལྡན། །ཀུན་ཏུ་ཁྱམས་དང་ལྡན་པ་ལ། །སྒོར་ནི་ཁྱམས་དང་བྲལ་བའོ། །གང་ཞིག་དབུས་མར་ཡང་དག་བཤད། །སངས་རྒྱས་ཡེ་ཤེས་བླ་མེད་ཡིན། །
གཞན་དག་དོན་ཀུན་ཡང་དག་ལྡན། །ཏིང་འཛིན་ཡེ་ཤེས་དམ་པ་ཡིན། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམ་བསྒོམས་ལ། །སྤྱན་ནི་དབུས་སུ་བསམ་པར་བྱ། །བཞིན་བཟངས་སྤྱན་ནི་ཡངས་པ་དང་། །
ནོར་བུ་ཆུ་ཤེལ་མདོག་འདྲ་ལ། །མཚན་རྣམས་ཐམས་ཅད་ཡོངས་སུ་རྫོགས། །བུད་མེད་སྒྱུ་མའི་མཆོག་འཛིན་པ། །ཕྱག་ཏུ་འཁོར་ལོ་བསྒོམ་བྱ་སྟེ། །ཁམས་གསུམ་པ་ནི་དབང་བྱེད་པ། །དངོས་ཀུན་གྲུབ་བྱེད་ཡེ་ཤེས་ནི། །འཁོར་ལོ་ཡིད་བཞིན་ནོར་བུའི་མདོག །ནམ་
མཁའི་རྡོ་རྗེ་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམ་བསྒོམས་ལ། །ནམ་མཁའི་རྡོ་རྗེ་མཆོག་བསྒོམ་མོ། །ཞལ་མཛེས་སྤྱན་ནི་ཡངས་པ་དང་། །ཨུཏྤལ་སྔོན་པོའི་འདབ་མའི་མདོག །མཚན་རྣམས་ཐམས་ཅད་ཡང་དག་རྫོགས། །
ནམ་མཁའི་སྒྱུ་མའི་མཆོག་བསམ་མོ། །ཕྱག་ཏུ་ཨུཏྤལ་སྔོན་དམར་ཏེ། །ཁམས་གསུམ་པ་ནི་ཕྱག་བྱས་པ། །སངས་རྒྱས་བྱང་ཆུབ་བྱེད་པའི་མཆོག །གསང་བའི་དངོས་གྲུབ་རྡོ་རྗེ་ཅན། །ནམ་མཁའ་རྡོ་རྗེའི་དབུས་ཆུད་པ། །ཟླ་བའི་དཀྱིལ་འཁོར་དམ་པ་བསམ། །
སངས་རྒྱས་སྐུ་ནི་རྣམ་བསྒོམས་ལ། །རྡོ་རྗེ་ཆོས་མར་རྣམ་པར་བསམ། །མཛེས་པའི་ཞལ་ལ་སྤྱན་ཡངས་པ། །པདྨ་རཱ་ག་ལྟ་བུའི་མདོག །སྐུ་མདོག་དམར་པོ་ཡང་དག་བྱུང་། །ཆགས་པའི་པདྨ་འཛིན་སྡུག་པ། །མཚན་རྣམས་ཐམས་ཅད་ཡང་དག་རྫོགས། །རྒྱན་

རྣམས་ཀུན་གྱིས་རྣམ་པར་བརྒྱན། །ཕྱག་ཏུ་ཨུཏྤལ་དམར་པོ་ནི། །སངས་རྒྱས་ཐམས་ཅད་རབ་བསྒོམས་པའོ། །ཆོས་ཀྱི་ཡེ་ཤེས་བྱེད་པ་མཆོག །གསང་བ་དམ་ཚིག་རྡོ་རྗེ་ཅན། །མཁའ་དབྱིངས་རྡོ་རྗེའི་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་
རྒྱས་གཟུགས་ནི་རྣམ་བསྒོམས་ལ། །སྒྲོལ་མ་མཆོག་ནི་བསམ་པར་བྱ། །ཞལ་མཛེས་སྤྱན་ནི་ཡངས་པ་དང་། །སྣ་ཚོགས་རྒྱན་གྱིས་རབ་ཏུ་བརྒྱན། །ཁ་དོག་སེར་པོ་ཉིད་བསམ་ཞིང་། །བུད་མེད་སྒྱུ་མའི་དྲེགས་བོར་བ། །ཕྱག་ཏུ་ཨུཏྤལ་དམ་པ་ནི། །སེར་པོ་སྣང་བ་བསྒོམ་
པར་བྱ། །རྡོ་རྗེ་ཉིད་འཛིན་ལས་བྱུང་བ། །སེམས་ཅན་ཀུན་གྱིས་ཕྱག་བྱས་པའོ། །ཨོྃ་རུ་རུ་སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ནེ། སརྦ་ཨརྠ་སཱ་དྷ་ནི་སྭཱ་ཧཱ། ཨོྃ་ཤཾ་ཀ་རེ་ཤཱནྟི་ཀ་རེ་གྷྲུཊྚ་གྷྲུཊྚི་ནི། གྷཱ་ཏ་ཡ་གྟཱ་ཏ་ཡ་གྷུ་ཊྚི་ནི་སྭཱ་ཧཱ། ཨོྃ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊྃ་ཀ་ཊེ་སྭཱ་ཧཱ། ཨོྃ་ཏཱ་རེ་ཏུ་ཏྟཱ་རེ་
ཏུ་རེ་སྭཱ་ཧཱ། རིག་པའི་ལྷ་མོ་བཞིའོ། །སྐུ་ནི་ལུས་ཀྱི་ངོ་བོ་ཡིས། །ཐུགས་ནི་སེམས་ཀྱི་རྣམ་པ་ཉིད། །གསུང་ནི་ངག་གི་རྣམ་པ་ཡིན། །མཆོད་ན་མཆོད་པའི་བདག་ཉིད་འགྱུར། །སྐུ་གསུང་ཐུགས་ཀྱི་གསང་བ་ནི། །མཁས་པ་ཡིས་ནི་བསྲུང་བྱ་སྟེ། །བསྲུངས་ན་མཆོག་
ཏུ་གསང་བ་ནི། །རྟག་པར་ཀུན་ཏུ་འབྱུང་བར་འགྱུར། །དངོས་པོ་ཡོངས་སུ་དག་པ་ནི། །མེད་པས་ཀུན་ཏུ་བརྟག་མི་འབྱུང་། །རྣལ་འབྱོར་པ་ཡིས་རྣལ་འབྱོར་ཐོབ། །ཚོགས་མེད་ཡང་དག་མི་མཐོང་ངོ་། །དེ་བས་གསང་བའི་ཡེ་ཤེས་འབྱུང་། །རྣལ་འབྱོར་ཀུན་ཏུ་
འབྱུང་བར་འགྱུར། །ཤེས་རབ་ཕ་རོལ་ཕྱིན་པའི་ཐབས། །ཏིང་འཛིན་ཡེ་ཤེས་བརྟགས་པ་ཡིན། །ཆོས་རྣམས་ཐམས་ཅད་རྣམ་དག་པ། །དག་པ་ཉིད་དུ་གྱུར་པ་ནི། །ཇི་ལྟར་ལྷ་ཡི་ནོར་བུ་ནི། །རང་གི་འོད་ཀྱིས་རྟག་ཏུ་སྣང་། །སྲིད་པ་ཡོངས་སུ་དག་པ་ཡང་། །
རྣལ་འབྱོར་རྣལ་འབྱོར་ཐོབ་བྱེད་ཡིན། །རྡོ་རྗེ་དབྱིངས་ནི་གསང་ཆེན་དུ། །གང་ཞིག་དབང་བསྐུར་མཁས་པ་ལ། །ཐུགས་ཀྱི་གསང་བའི་རྣལ་འབྱོར་མཆོག །མཁས་པས་དེ་ལ་བཤད་པར་བྱ། །ཐམས་ཅད་གསང་བ་ཞེས་བྱ་བའི་རྒྱུད་ཀྱི་རྒྱལ་པོ་རྫོགས་སོ།། །།

རྒྱ་གར་གྱི་མཁན་པོ་པདྨཱ་ཀ་ར་བ་རྨ་དང་། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅། །རྒྱ་གར་སྐད་དུ། ཏྲཻ་ལོ་ཀྱ་བི་ཛ་
ཡ་མ་ཧཱ་ཀལྤ་རཱ་ཛཱ། བོད་སྐད་དུ། འཇིག་རྟེན་གསུམ་ལས་རྣམ་པར་རྒྱལ་བ་རྟོག་པའི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་རབ་རིའི་རྩེ་མོ་ན་རྡོ་རྗེ་དང་ནོར་བུ་རིན་པོ་ཆེ་རྩེ་མོའི་
ཁང་པ་བརྩེགས་པ་ན། བྱང་ཆུབ་སེམས་དཔའ་བྱེ་བ་ཕྲག་དུ་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། འབྱུང་པོ་དང་། ཤ་ཟ་དང་། བརྗེད་བྱེད་དང་། མ་མོ་རྣམས་དང་། བལྟར་རུང་བ་དང་། བལྟར་མི་རུང་བ་དུ་མ་སངས་
རྒྱས་ཀྱི་བསྟན་པ་ལ་མངོན་པར་དད་པ་རྣམས་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ་ནམ་མཁའི་དཀྱིལ་ནས་བབས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་ལ་
ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་བདག་གིས་ལྷ་ཆེན་པོ་ལ་སོགས་པ་སེམས་ཅན་མ་རུངས་པ་དེ་དག་ལ་དམ་ཚིག་འཛིན་དུ་སྩལ་བར་འཚལ་ན། བཅོམ་ལྡན་འདས་དེའི་སླད་དུ་བདག་ལ་བཀའ་སྩལ་དུ་གསོལ། དེ་ནས་ཕྱག་ན་རྡོ་རྗེ་བྱང་
ཆུབ་སེམས་དཔའ་ཆེན་པོའི་ཚིག །བཅོམ་ལྡན་འདས་ཆོས་ཀྱི་རྒྱལ་པོ་ཆེན་པོ་དེ་བཞིན་གཤེགས་པས་གསན་ནས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ། །གནོད་སྦྱིན་ཁྱོད་ཤིན་ཏུ་ཁེངས་པ་ཤིན་ཏུ་ཁྲོ་བ་ཤིན་ཏུ་འཐུར་བ་དེ། ཅི་ལྟར་ཁྱོད་ཀྱིས་སེམས་ཅན་རྣམས་ཀྱི་དོན་གྱི་ཕྱིར་
འདི་ལྟ་བུའི་སྔགས་ཀྱི་ཚིག་སྨྲ། དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྐད་ཅེས་གསོལ་ཏོ། །དེའི་ཕྱིར་ན་བཅོམ་ལྡན་འདས་བདག་སེམས་ཅན་མ་རུངས་པ་འདུལ་བར་བགྱིད་དོ། །གང་གི་ཕྱིར་ཞེ་ན། བདག་གིས་འདོད་པའི་

བདེ་བ་ཅན་རྣམས་དབང་དུ་བགྱི་བ་ལ་སོགས་པས་བཏུལ་ནས། བླ་ན་མེད་པའི་བདེ་བ་ལ་དགོད་པར་འཚལ་ལོ། །སེམས་ཅན་མ་རུངས་པ་རྣམས་བསད་པ་ལ་སོགས་པས་སྦྱངས་ཏེ་ཞི་བ་ལ་དགོད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་
དཔའ་ལ་ལེགས་སོ་ཞེས་བྱ་བ་བྱིན་ཏེ། ཕྱག་ན་རྡོ་རྗེ་ལེགས་སོ་ལེགས་སོ། །འཇིག་རྟེན་ཐམས་ཅད་ཀྱི་དོན་གྱི་ཕྱིར་དང་། ཕན་པའི་ཕྱིར་དང་། བདེ་བའི་ཕྱིར་སྙིང་པོ་འདི་སྨྲོས་ཤིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔས་ལྷ་ཐམས་ཅད་ནས་མི་རྣམས་ཐམས་ཅད་
ཀྱི་བར་དུ་སངས་རྒྱས་ཀྱི་བསྟན་པ་ལ་མངོན་པར་དད་པ་དེ་རྣམས་ལ་བཀའ་སྩལ་པ། གྲོགས་པོ་དག་སངས་རྒྱས་ལ་སྐྱབས་སུ་དོང་ཤིག །ངའི་བཀའ་ཡང་རྗེས་སུ་སྐྱོངས་ཤིག །དེ་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་ན་རྡོ་རྗེས་ཕྱག་འཚལ་ནས། འཇིག་རྟེན་
གསུམ་ལས་རྣམ་པར་རྒྱལ་བའི་སྙིང་པོ་འདི་གསུངས་སོ། །ཨོྃ་སུམ་བྷ་ནི་སུམ་བྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀ་ཧྞཱ་པ་ཡ་གྲྀཧྞཱ་བ་ཡ་ཧཱུྃ། ཨཱ་ན་ཡ་ཧོ་བྷ་ག་བཱ་ན་བཛྲ་ཧཱུྃ་ཕཊ། དེ་ནས་འདི་གསུངས་པ་ཙམ་གྱིས་འཇིག་རྟེན་གསུམ་ཐམས་ཅད་གཡོས་རབ་ཏུ་གཡོས་ཀུན་ཏུ་རབ་ཏུ་
གཡོས་སོ། །འགུལ་རབ་ཏུ་འགུལ་ཀུན་ཏུ་རབ་ཏུ་འགུལ་ཏོ། །འཕར་རབ་ཏུ་འཕར་ཀུན་ཏུ་རབ་ཏུ་འཕར་རོ། །དེ་ནས་ལྷ་ཐམས་ཅད་ལ་སོགས་པ་སེམས་ཅན་ཐམས་ཅད་འདར་ཡེད་ཡེད་ནས། བཅོམ་ལྡན་འདས་ག་ལ་བ་དེར་ལྷགས་ནས། ཁོ་ར་ཁོར་ཡུག་དང་ཁོ་ར་
ཁོར་ཡུག་ཆེན་པོའི་རི་ལ་སོགས་པ་ཚུན་ཆད་ཀྱི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ཀྱིས་གང་ངོ་། །དེ་ནས་བཅོམ་ལྡན་འདས་ཕྱག་ན་རྡོ་རྗེས་གླིང་བཞི་བའི་འཇིག་རྟེན་གྱི་ཁམས་སུ་ཚོགས་པའི་དཀྱིལ་འཁོར་ཐམས་ཅད་ལ་གཟིགས་ནས་
འདི་སྐད་གསུངས་སོ། །གྲོགས་པོ་རྣམས་སངས་རྒྱས་ལ་སོགས་པ་ལ་སྐྱབས་སུ་འགྲོ་བར་ཁས་ལོང་ཤིག །ངའི་བཀའ་ཡང་རྗེས་སུ་སྐྱོངས་ཤིག །དེ་ནས་འདུས་པའི་འཁོར་ཆེན་པོ་ཐམས་ཅད་བཅོམ་ལྡན་འདས་ཕྱག་ན་རྡོ་རྗེས་སྐྲག་སྟེ། འདར་ཡེད་ཡེད་ནས་བཅོམ་ལྡན་

འདས་དེ་བཞིན་གཤེགས་པ་ལ་སྐྱབས་སུ་དོང་ངོ་། །དེ་ནས་བཅོམ་ལྡན་འདས་ལ་ལྷ་ཆེན་པོའི་ལྷ་དང་མཐུ་བོ་ཆེ་དང་ཚངས་པ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་སེམས་ཅན་འདི་ལྟར་རྫུ་འཕྲུལ་ཆེ་བ། འདི་ལྟར་བྱིན་ཆེ་ཞིང་བདག་ཅག་ལ་
འཆོས་པ་འདི་སུ་ལགས། དེ་ནས་བཅོམ་ལྡན་འདས་ཀྱིས་དོན་འདི་བསྟན་པའི་ཕྱིར་ཚིགས་སུ་བཅད་པ་འདི་གླེངས་ཏེ་གསུངས་སོ། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་ཀུན་གྱིས་བྱིན་གྱིས་བརླབས། །ཀུན་ཏུ་བཟང་པོ་ཀུན་གྱི་བདག །སངས་རྒྱས་ཐམས་
ཅད་ཉིད་སྐྱེས་འདི། །ཕྱག་ན་རྡོ་རྗེ་གནོད་སྦྱིན་ཆེ། །མ་རུངས་འཆོས་ལ་དབང་བ་སྟེ། །གང་གི་མིང་བརྗོད་པ་ཡིས་ནི། །སངས་རྒྱས་པ་ཡང་ཐོབ་པར་འགྱུར། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་ཡང་གསུངས་པ། ཀྱེ་ཀྱེ་ལྷ་དག་སངས་རྒྱས་ལ་
སྐྱབས་སུ་དོང་ལ་ངའི་བཀའ་བཞིན་དུ་ཡང་གྱིས་ཤིག །རྡོ་རྗེ་འབར་བ་གཅིག་ཏུ་འབར་བར་གྱུར་པ་འདིས་ཁྱེད་ཐམས་ཅད་གཏན་སྲེག་པར་འགྱུར་ཏ་རེ། དེ་ནས་ལྷ་ཆེན་པོ་ལ་སོགས་པ་ཐམས་ཅད་ཀྱིས་འདི་སྐད་སྨྲས་སོ། །ཁྱོད་ནི་གནོད་སྦྱིན་ངེད་ནི་ལྷ་བས་ན་ངེད་ཀྱིས་གནོད་
སྦྱིན་གྱི་བཀའ་རྗེས་སུ་སྐྱོང་བར་མི་ནུས་སོ། །དེ་ནས་ཕྱག་ན་རྡོ་རྗེས་དེ་ཐོས་ནས་ཁྲོས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་བདག་མ་རུངས་པ་ཐམས་ཅད་འདུལ་བར་དབང་བསྐུར་ཏེ་བསྐོས་སོ། །དེ་བས་ན་གལ་ཏེ་བཅོམ་
ལྡན་འདས་ཀྱིས་བདག་ལ་བཀའ་སྩལ་ན། ལྷ་ཆེན་པོ་འདི་འདུལ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་ལྷ་ཆེན་པོ་ལ་འདི་སྐད་ཅེས་གསུངས་སོ། །སེམས་ཅན་ཆེན་པོ་ཁས་ལོང་ཤིག །འདིས་ཁྱོད་བསད་ཏ་རེ། དེ་ནས་བཅོམ་ལྡན་འདས་ལ་ལྷ་ཆེན་པོ་ལ་སོགས་
པ། འཇིག་རྟེན་གསུམ་ཐམས་ཅད་ཀྱི་དབང་པོ་ལྷ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གནོད་སྦྱིན་མ་རུངས་པ་འདིའི་བཀའ་བཞིན་དུ་བྱེད་པ་བདག་ཅག་མ་ལགས་སོ། །དེ་ནས་ལྷ་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། བཅོམ་

ལྡན་འདས་ཕྱག་ན་རྡོ་རྗེ་ལ་འདི་སྐད་ཅེས་སྨྲས་སོ། །ཀྱེ་གནོད་སྦྱིན་ང་ནི་ཐམས་ཅད་ཀྱི་དབང་པོ་ཆེན་པོ་བྱེད་པ་པོ་འཇོམས་པ་པོ་སྐྱེ་དགུའི་བདག་པོ་ཚངས་པའོ། །གཏོགས་འདོད་དོ། །དབང་ཕྱུག་ཆེན་པོའོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ་ཁྲོས་ནས་
འདི་སྐད་གསུངས་སོ། །ཁྱོད་ནི་ལུས་སྲུལ་པོ་མི་ཤ་ཟ་བ་མ་རུངས་པ་དྲག་ཤུལ་གྱི་ལས་བྱེད་པས་ན་གཏུམ་པ་སྟེ། ཤ་ཟའི་ལུས་སྲེལ་བ་ན་ཇི་ལྟར་ཚངས་པ་དང་གཏོགས་འདོད་དང་དབང་ཕྱུག་ཆེན་པོ་ཡིན་ཚངས་པ་ཞེས་བྱ་བ་ནི་མི་འགྱུར་བའོ། །གཏོགས་འདོད་ཅེས་བྱུ་བ་ནི་
ཐར་པའོ། །དབང་ཕྱུག་ཆེན་པོ་ཞེས་བྱ་བ་ནི་འདོད་པའི་ཁམས་ཀྱི་དབང་པོ་སྟེ། སེམས་ཅན་ཐམས་ཅད་ཀྱི་དབང་པོ་དེ་ནི་ང་ཡིན་པས་འདུལ་ནུས་སོ། །དེ་ནས་དབང་ཕྱུག་ཆེན་པོ་ལྷ་ཆེན་པོ་ཁྲོས་ནས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། འཇིགས་སུ་
རུང་བ་ཆེན་པོའི་གཟུགས་ཁྲོས་པ་ཆེན་པོའི་གད་མོས་བགད་ནས་འཇིགས་པ་ཆེན་པོར་བྱེད་པ་འབར་བ་ཆེན་པོ་སྟོང་པ་འཇིག་རྟེན་གྱི་ཁམས་ཐམས་ཅད་མཐའ་མེད་པར་གཟུགས་སྣ་ཚོགས་སུ་བྱས། འབར་བ་ཆེན་པོའི་གྲུབ་པ། མི་མཚུངས་པ་རྡོ་རྗེ་དང་། མདུང་རྩེ་གསུམ་པ་དང་།
འཁོར་ལོ་དང་། ཤཀ་ཏི་དང་། བེ་ཅོན་དང་། མི་མཚུངས་པའི་མཚོན་ཆ་འདེབས་ཤིང་གཏོང་བ་མ་མོ་རྣམས་ཀྱི་ཚོགས་དང་འབྱུང་པོའི་ཚོགས་རྣམས་དང་བཅས་པར་ཀུན་བསྟན་ཏོ། །བདུད་དང་བགེགས་བྱེད་པ་དང་མཐའ་དང་མུ་མེད་པའི་གཟུགས་སྣ་ཚོགས་སུ་སྤྲུལ།
ཁྲོ་བོ་རབ་ཏུ་མི་བཟད་པ་མ་རུངས་པའི་ཚོགས་ཆེན་པོ་དང་ལྷན་ཅིག་ཏུ་རབ་ཏུ་འཐབ་ཅིང་ཤིན་ཏུ་འགྱེད་པ། གླིང་བཞི་པའི་འཇིག་རྟེན་གྱི་ཁམས་མཚན་མོའི་མུན་གནག་ཏུ་བྱས། འབར་བ་ཆེན་པོའི་ཕུང་པོས་ཀློངས་ཏེ་རབ་ཏུ་སྣང་བར་བྱས་སོ། །དེ་ནས་བཅོམ་ལྡན་འདས་
རྡོ་རྗེ་འཆང་བ་ཆེན་པོ་ཅུང་ཟད་དུ་མཆེ་བའི་ཐོག་མ་གཙིགས་པ། སྨིན་མཚམས་ཀྱི་ཁྲོ་གཉེར་གྱི་རླབས་བསྐྱོད་པ། མིག་གཡོན་པ་ཆེར་བགྲད་དེ། རྡོ་རྗེའི་ལྟ་བ་ཁྲོ་བ་དང་བཅས་པས་ཟབ་མོའི་ཚིག་གིས་སྙིང་པོ་མཆོག་འཇིག་རྟེན་གསུམ་ལས་རྣམ་པར་རྒྱལ་བའི་དཔལ་

ཞེས་བྱ་བ་འདི་གསུངས་སོ། །ཧཱུྃ། དེ་ནས་ཧཱུྃ་ཞེས་བྱ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་སྒྲ་དེས་གང་ནས། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས་གཡོས་སོ། །འཁྲོལ་རབ་ཏུ་འཁྲོལ་ཀུན་ཏུ་རབ་ཏུ་འཁྲོལ་ལོ། །དེ་
ནས་དབང་ཕྱུག་ཆེན་པོ་ལ་སོགས་པ་ལྷའི་ཚོགས་ཐམས་ཅད་བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ་ཞེས་ནས་བཅོམ་ལྡན་འདས་ལ་སྐྱབས་སུ་དོང་ངོ་། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་གསུངས་སོ། །གང་འདི་ལྟ་
བུའི་སྔགས་ཀྱི་ཚིག་སྨྲ་བ་ནི་ཁྱོད་རབ་ཏུ་མི་བགྲུངས་སོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས། ཡང་འཇིག་རྟེན་གསུམ་ལས་རྣམ་པར་རྒྱལ་བ་འདི་གསུངས་སོ། །ཨོྃ་སུམ་བྷ་ནི་སུམ་བྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཏྞཱ་པ་ཡ་གྲྀཧྞཱ་པ་ཡ་
ཧཱུྃ། ཨཱ་ན་ཡ་ཧོ་བྷ་ག་བཱན་བཛྲ་ཧཱུྃ་ཕཊ། དེ་ནས་འདི་གསུངས་པ་ཙམ་གྱིས་ལྷ་ཆེན་པོ་ལ་སོགས་པ་ལྷའི་བདག་པོ་ཐམས་ཅད་འཁོར་དང་བཅས་པར། བཅོམ་ལྡན་འདས་ཕྱག་ན་རྡོ་རྗེ་གང་ན་བ་དེར་མགོ་རྐང་བཟློག་སྟེ། རི་རབ་རིའི་རྩེ་མོའི་དཀྱིལ་འཁོར་ཆེན་པོར་བཙུད་
ནས་བརླམས་པར་བྱས་ཏེ། བཅོམ་ལྡན་འདས་ཕྱག་ན་རྡོ་རྗེའི་ཞབས་གཡོན་པས་མནན་ཏོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལེགས་སོ་ཞེས་བྱ་བ་བྱིན་ཏེ་ཕྱག་ན་རྡོ་རྗེ་ཁྱོད་ཀྱིས་འདི་འདྲ་བར་སེམས་ཅན་འདུལ་བར་
བྱེད་པ་ལེགས་སོ་ལེགས་སོ། །དེ་བས་ན་ཐུལ་ལ་དབུགས་ཕྱུང་ཤིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་དག་གི་དོན་གྱི་ཕྱིར་རྡོ་རྗེས་བཅིངས་པ་འདི་གསུངས་སོ། །ཧཱུྃ་བཛྲ་ཌྀ་དྷོ་མེ་བྷ་བ་རཀྵ་སརྦཱ་ན་སྭཱ་ཧཱ། དེ་ནས་ཕྱག་ན་རྡོ་རྗེས་འདི་
གསུངས་པ་ཙམ་གྱིས་ལྷ་ཆེན་པོ་ལ་སོགས་པ་ལྷ་དེ་དག་ཐམས་ཅད་དྲན་པ་རྙེད་དོ། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་གསུངས་སོ། །གྲོགས་པོ་དག་སེམས་ཅན་ཆེན་པོ་འདིའི་བཀའ་བཞིན་དུ་བྱེད་པར་ཁས་ལོང་ཤིག །དེ་ནས་བཅོམ་ལྡན་འདས་ལ་དེ་དག་ཐམས་

ཅད་མགྲིན་གཅིག་ཏུ་བདག་ཅག་མཆིད་ཀྱིས་འཚལ་ལོ་ཞེས་གསོལ་ཏོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་རང་གི་སྙིང་པོ་འདི་གསུངས་སོ། །ཧཱུྃ་ཊཀྐི་ཧོ། དེ་ནས་འདི་བརྗོད་པ་ཙམ་གྱིས་ལྷ་ལ་སོགས་པ་ཐམས་ཅད་དབང་དུ་བྱས་ཏེ། བཅོམ་
ལྡན་འདས་ཕྱག་ན་རྡོ་རྗེ་ལ་ཕྱག་བྱས་ནས་མཆི་མ་བླགས་ཏེ། ང་རོ་བཏོན་ནས་སྐྱབས་སུ་དོང་སྟེ། བཅོམ་ལྡན་འདས་བསྐྱབ་ཏུ་གསོལ། ད་བདག་ཅག་ཁྱོད་ཀྱི་བཀའ་ཉན་ན་ཅི་ལྟར་བགྱི་བ་བཀའ་སྩལ་དུ་གསོལ་ཞེས་སོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་དེ་
རྣམས་ལ་གསུངས་པ། གྲོགས་པོ་དག་བྱང་ཆུབ་ཀྱི་སེམས་དང་སྡོམ་པ་གཟུང་བར་ཁས་ལོང་ཤིག །དེ་དག་གིས་གསོལ་བ། བཅོམ་ལྡན་འདས་བདག་ཅག་གིས་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བགྱིད་ཅིང་བྱང་ཆུབ་ཏུའང་སེམས་བསྐྱེད་པར་འཚལ་ལོ། །
དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་ཡང་དེ་རྣམས་ཇི་ལྟ་བ་བཞིན་དུ་དཀྱིལ་འཁོར་དུ་བཙུད་ནས་སྡོམ་པ་འཛིན་དུ་བཅུག་སྟེ། བྱང་ཆུབ་སེམས་ནི་བརྟན་བྱས་པ། །སེམས་ཅན་ཐམས་ཅད་བདེ་བ་སྩལ། །ཕྱག་ན་རྡོ་རྗེ་བདག་ཆེན་དང་། །འདོད་པ་སྨད་པར་
མི་བྱའོ། །འདི་ནི་གསང་བ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་དེ་དག་སྡོམ་པ་འཛིན་དུ་བཅུག་ནས། དམ་ཚིག་བྱིན་པ་ནི། །ཨོྃ་བཛྲ་ས་མ་ཡ་ཨ་བྷི་ཥིཉྩ་མཱ་བི་རཱ་ག་ཡ་སརྦ་ཀཱ་མཱན་ཧཱུྃ་ཕཊ། དེ་ནས་དེ་དག་གིས་སྨྲས་པ། འདི་ནི་བདུད་ཀྱིས་སྨྲས་པས་ན་བདག་ཅག་
མི་ཉན་ཏོ། དེ་ནས་བཅོམ་ལྡན་འདས་དེ་བཞིན་གཤེགས་པས་དེ་དག་ལ་ཁྱེད་ཅག་གིས་འདི་ལ་མ་བརྙས་ཤིག་ཅེས་གསུངས་པ་དང་། དེ་དག་གིས་གསོལ་པ། ཇི་ལྟར་འདོད་ཆགས་དང་བྲལ་བ་ནི་སངས་རྒྱས་ཀྱི་བྱང་ཆུབ་བོ་ཞེས་བཅོམ་ལྡན་འདས་ཉིད་ཀྱིས་བཀའ་སྩལ་
ཏོ། །བཅོམ་ལྡན་འདས་ཀྱིས་གསུངས་པ། ཀྱེ་གྲོགས་པོ་དག་ང་ནི་ཇི་ལྟར་འདུལ་བཞིན་དུ་བྱེད་པ་སྟེ། འདི་ཉིད་ཀྱིས་འཇིག་རྟེན་གྱི་ཁམས་འདི་སུན་འབྱིན་ཏེ། ཇི་ལྟར་བདེ་བ་ལ་མི་ཆགས་པ་དང་། སྡུག་བསྔལ་ལ་འདོད་ཆགས་པ་ཅན་ཇི་ལྟ་བུས་འཇིག་རྟེན་འདུལ་བར་

འགྱུར་བའི་ཆོས་སངས་རྒྱས་བཅོམ་ལྡན་འདས་རྣམས་འཆད་པར་མཛད་དེ། དེ་དག་སྦྱང་བའི་ཕྱིར་འདི་ནི་དེ་བཞིན་གཤེགས་པ་ཐམས་ཅད་ཀུན་ཏུ་བཟང་པོ་བྱང་ཆུབ་སེམས་དཔས་ཅི་ནས་ཀྱང་འདོད་ཆགས་དང་བྲལ་བར་མ་བྱེད་ཅིག་ཅེས་བཀའ་སྩལ་ཏོ། །དེ་ནས་
ཕྱག་ན་རྡོ་རྗེས་ཡང་གསུངས་པ། །ཨོྃ་བཛྲ་ས་མ་ཡ་ཨ་བྷི་ཥིཉྩཱ་མི་བི་རཱ་ག་ཡ་སརྦ་ཀཱ་མཱྃ་ཧཱུྃ་ཕཊ། དེ་ནས་དེ་དག་གིས་ཇི་ལྟར་བཅོམ་ལྡན་འདས་ཀྱིས་བཀའ་སྩལ་པ་བཞིན་ནོ་ཞེས་གསོལ་ཏོ། །དེ་ནས་ཡང་ཕྱག་ན་རྡོ་རྗེས་ལག་ཏུ་རྡོ་རྗེ་བྱིན་ཏེ། རྡོ་རྗེའི་དབང་བསྐུར་བ་འདི་བྱིན་ནོ། །
ཨོྃ་བཛྲ་ཨ་བྷི་ཥིཉྩ་སརྦ་ཏ་ཐཱ་ག་ཏ་བཛྲ་དྷ་རོ་ཏྟྭེ་བཛྲ་པཱ་ཎི་ཧཱི། ཧ་ཧ་ཧ་ཧ། དེ་ནས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། དབང་ཕྱུག་ཆེན་པོ་ནི་རྡོ་རྗེ་རིག་སྔགས་མཆོག་གོ། །མཐུ་བོ་ཆེ་ནི་རྡོ་རྗེ་སྒྱུ་མའོ། །ཚངས་པ་ནི་རྡོ་རྗེ་མི་སྨྲ་བའོ། །སྒྲ་གཞོན་ནུ་ནི་རྡོ་རྗེ་
དྲིལ་བུའོ། །དབང་པོ་ནི་རྡོ་རྗེ་འཐབ་ཆ་སྟེ། དེ་དག་ལ་སོགས་པ་འཇིག་རྟེན་གསུམ་གྱི་དབང་པོ་ཐམས་ཅད་རིག་པའི་བློན་པོ་ཆེན་པོར་དབང་བསྐུར་རོ། །དེ་ནས་བར་སྣང་ལ་རྒྱུ་བ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། བདུད་རྩི་འཁྱིལ་པ་ནི་རྡོ་རྗེ་འཁྱིལ་
པའོ། །ཟླ་བ་ནི་རྡོ་རྗེ་འོད་དོ། །བེ་ཅོན་རྩེ་མོ་ནི་རྡོ་རྗེ་བེ་ཅོན་ནོ། །སྐྱ་སླེང་ནི་རྡོ་རྗེ་སྐྱ་སླེང་སྟེ། དེ་རྣམས་ནི་རྡོ་རྗེ་ཁྲོ་བོར་དབང་བསྐུར་རོ། །དེ་ནས་ནམ་མཁའ་ལ་རྒྱུ་བའི་ལྷ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི། འདི་ལྟ་སྟེ་ཆང་གིས་མྱོས་པ་ནི་རྡོ་རྗེས་ཟིན་པའོ། །
ཆང་བྱེད་ནི་རྡོ་རྗེ་ཕྲེང་བའོ། །རྒྱལ་བ་ནི་རྡོ་རྗེ་དབང་ངོ་། །རྒྱལ་བ་སྐྱེས་པ་ནི་རྡོ་རྗེ་རྣམ་པར་རྒྱལ་བ་སྟེ། དེ་དག་ལ་སོགས་པ་ནི་ཚོགས་ཀྱི་བདག་པོར་དབང་བསྐུར་རོ། །དེ་ནས་ས་པ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། མཛོད་སྐྱོང་ནི་རྡོ་རྗེ་གྲུ་ཤིང་ངོ་། །རླུང་ནི་རྡོ་རྗེ་
རླུང་ངོ་། །མེ་ནི་རྡོ་རྗེ་མེའོ། །ཀུ་བེ་ར་ནི་རྡོ་རྗེ་འཇིགས་པ་སྟེ། དེ་དག་ལ་སོགས་པ་ནི་རྡོ་རྗེ་ཕོ་ཉར་དབང་བསྐུར་རོ། །དེ་ནས་སའི་འོག་ན་གནས་པའི་ལྷའི་དབང་པོ་ཐམས་ཅད་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། ཕག་ནི་རྡོ་རྗེ་ཀྱོ་བའོ། །གཤིན་རྗེ་ནི་རྡོ་རྗེ་ནག་པོའོ། །

སའི་སྤྱི་བོ་ནི་རྡོ་རྗེ་རྣམ་འདྲེན་ནོ། །བཱ་རུ་ཎ་ནི་རྡོ་རྗེ་ཀླུ་སྟེ། དེ་དག་ལ་སོགས་པ་ནི་རྡོ་རྗེ་བྲན་དུ་དབང་བསྐུར་རོ། །དེ་ནས་འཇིག་རྟེན་གསུམ་གྱི་བདག་པོ་རྣམས་ཀྱིས་ལྷ་མོ་ཐམས་ཅད་ཀྱི་ལག་ཏུ་རྡོ་རྗེ་བྱིན་ཏེ། རྡོ་རྗེའི་དབང་བསྐུར་ནས་རྡོ་རྗེ་མིང་གི་དབང་བསྐུར་བ་བྱིན་པ་ནི་འདི་ལྟ་སྟེ། ཉོན་
མོངས་པ་ནི་རྡོ་རྗེ་ཁྲོ་བ་མའོ། །ནོར་ཅན་ནི་རྡོ་རྗེ་གསེར་མའོ། །ཚངས་མ་ནི་རྡོ་རྗེ་ཞི་མའོ། །དུག་མོ་ནི་རྡོ་རྗེ་གཞོན་ནུ་མའོ། །དབང་མོ་ནི་རྡོ་རྗེ་ཁུ་ཚུར་ཏེ། དེ་དག་ལ་སོགས་པ་ནི་རིག་སྔགས་ཀྱི་བློན་མོ་ཆེན་མོར་དབང་བསྐུར་རོ། །དེ་ནས་བར་སྣང་ལ་རྒྱུ་བའི་མ་རྣམས་དབང་བསྐུར་བ་བྱིན་
པ་ནི་འདི་ལྟ་སྟེ། བདུད་རྩི་མ་ནི་རྡོ་རྗེ་བདུད་རྩི་མའོ། །འཁྲུང་མ་ནི་རྡོ་རྗེ་སྡུག་གུ་མའོ། །བེ་ཅོན་འཆང་མ་ནི་རྡོ་རྗེ་བེ་ཅོན་རྩེ་མོའོ། །སྐྱེ་འཕྲོག་མ་ནི་རྡོ་རྗེ་རྐེད་ཆིངས་ཏེ། དེ་དག་ལ་སོགས་པ་ནི་རྡོ་རྗེ་ཁྲོ་མོར་དབང་བསྐུར་རོ། །དེ་ནས་ནམ་མཁའ་ལ་རྒྱུ་བའི་མ་རྣམས་དབང་བསྐུར་བ་བྱིན་
པ་ནི་འདི་ལྟ་སྟེ། གསོད་མ་ནི་རྡོ་རྗེ་གསོད་མའོ། །ཟ་བ་མོ་ནི་རྡོ་རྗེ་ཟ་བ་མོའོ། །གོས་ནི་རྡོ་རྗེ་བགོ་བ་མོའོ། །དགའ་མོ་ནི་རྡོ་རྗེ་དབང་མོ་སྟེ། དེ་དག་ལ་སོགས་པ་ནི་རྡོ་རྗེ་ཚོགས་མ་མོར་དབང་བསྐུར་རོ། །དེ་ནས་ས་ལ་རྒྱུ་བའི་མ་རྣམས་དབང་བསྐུར་བ་བྱིན་པ་ནི་འདི་ལྟ་སྟེ། ཞི་བ་མོ་
ནི་རྡོ་རྗེ་ཕོ་ཉ་མོའོ། །རླུང་མ་ནི་རྡོ་རྗེ་མགྱོགས་མའོ། །མེ་ནི་རྡོ་རྗེ་འབར་མའོ། །ཀུ་བེ་ར་ནི་རྡོ་རྗེ་ཐག་ཐུག་མ་སྟེ། དེ་དག་ལ་སོགས་པ་ནི་རྡོ་རྗེ་ཕོ་ཉ་མོར་དབང་བསྐུར་རོ། །དེ་ནས་ས་འོག་ན་གནས་པའི་མ་ཐམས་ཅད་དབང་བསྐུར་བ་བྱིན་པ་ནི་འདི་ལྟ་སྟེ། ཕག་མོ་ནི་རྡོ་རྗེ་གདོང་ངོ་། །མགོ་
ལྤགས་མ་ནི་རྡོ་རྗེ་ནག་མོའོ། །སྣ་ཆད་མ་ནི་རྡོ་རྗེ་མྱགས་མའོ། །ཀླུ་མོ་ནི་རྡོ་རྗེ་ཆུ་སྲིན་མ་སྟེ། དེ་དག་ལ་སོགས་པ་ནི་རྡོ་རྗེ་བྲན་མོར་དབང་བསྐུར་རོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་བཙུད་པ་དེ་དག་ཐམས་ཅད་ཀྱིས་སངས་རྒྱས་ཀྱི་ཡེ་ཤེས་བསྐྱེད་ནས་རྡོ་རྗེའི་
དམ་ཚིག་བྱིན་པའོ། །ཨོྃ་བ་ལི་ཏོད་བ་ལི་ཏོད་བཛྲ་ཨཱ་ཀརྵ་ཡ་ཧཱུྃ་ཛ། ལྷ་རྣམས་དགུག་པའོ། །ཨོྃ་བཛྲ་ཨ་གྲི་པི་ཊཱ་ཡ་ས་མ་ཡ་ཧཱུྃ། བར་སྣང་ལ་རྒྱུ་བ་རྣམས་ཀྱིའོ། །ཨོྃ་བཛྲ་མཱ་ལཱ་གྲ་ལྃ། ཕྲེང་བ་འཆང་བ་རྣམས་ཀྱིའོ། །ཨོྃ་བཛྲ་བནྡྷ་ཧྃ། ས་ལ་རྒྱུ་བ་རྣམས་ཀྱིའོ། །

ཨོྃ་བཛྲ་པཱ་ཏཱ་ལ་བྷཉྫ་ཧཱུྃ་ཕཊ། འོག་ན་གནས་པ་རྣམས་ཀྱིའོ། །ཨོྃ་ཧེ་རུ་ཀ་བཛྲ་ས་མ་ཡ་སརྦ་དུཥྚཾ་ས་མ་ཡ་མུ་པྲ་བྷནྡྷ་ཙཀྲ་ཧཱུྃ་ཕཊ། མ་མོ་རྣམས་ཐམས་ཅད་ཀྱིའོ། །དེ་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་ན་རྡོ་རྗེས་ཕྱག་འཚལ་ནས་འདི་སྐད་གསོལ་
ཏོ། །བཅོམ་ལྡན་འདས་བདག་ནི་སེམས་ཅན་ཐམས་ཅད་འདུལ་བ་ལགས་ན། བཅོམ་ལྡན་འདས་མ་རུངས་པའི་སེམས་ཅན་གྱི་དཀྱིལ་འཁོར་དེ་དག་ལ་ཇི་ལྟར་བགྱི་བ་བཀའ་སྩོལ་ཅིག །བཅོམ་ལྡན་འདས་ཀྱིས་གསུངས་པ། གང་གིས་སེམས་ཅན་དེ་རྣམས་སེམས་ཅན་
ཐམས་ཅད་ལ་ཕན་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་དམ་ཚིག་འདི་ཉིད་ལ་ཚུད་ཅིག །དེ་ནས་ཡང་ཕྱག་ན་རྡོ་རྗེས་གསོལ་པ། བཅོམ་ལྡན་འདས་མཁའ་འགྲོ་མ་ལ་སོགས་པའི་གདོན་འདི་དག་ལ་
ཇི་ལྟར་ནན་ཏན་བགྱི། རིམས་ལ་སོགས་པ་ཇི་ལྟར་བགྱི། དམྱལ་བ་ལ་སོགས་པ་ངན་སོང་གི་རྣམས་ཇི་ལྟར་བགྱི། བཅོམ་ལྡན་འདས་ཀྱིས་གསུངས་པ། དམ་ཚིག་དེ་ཉིད་ལ་ནན་ཏན་བྱེད་དུ་ཚུད་ཅིག །དེ་ནས་ཕྱག་ན་རྡོ་རྗེས་ཡང་གསོལ་པ། བཅོམ་ལྡན་འདས་མི་འདི་
རྣམས་ཇི་ལྟར་ནན་ཏན་བགྱི། བཅོམ་ལྡན་འདས་ཀྱིས་གསུངས་པ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོར་བཙུད་ནས། རྡོ་རྗེའི་དཀྱིལ་འཁོར་དུ་ཚུད་ཅིག །རྡོ་རྗེའི་དཀྱིལ་འཁོར་དུ་བཙུད་ནས། དམ་ཚིག་གི་དཀྱིལ་འཁོར་དུ་ཚུད་ཅིག །དམ་
ཚིག་གི་དཀྱིལ་འཁོར་དུ་བཙུད་ནས་ལས་ཀྱི་དཀྱིལ་འཁོར་དུ་ཚུད་ཅིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ། བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ། ཚིགས་སུ་བཅད་པ་འདི་སྨྲས་སོ། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་
ཀུན་གྱིས་བྱིན་བརླབས་ཏེ། །གྲུབ་པ་ཐམས་ཅད་བྱེད་པའི་མཆོག །དཀྱིལ་འཁོར་ཆེན་པོ་བཤད་པར་བྱའོ། །དེ་ནས་ཡང་དག་རབ་བཤད་པ། །དཀྱིལ་འཁོར་ཆེན་པོ་དམ་པ་སྟེ། །ཆོས་ཀྱི་འཁོར་ལོ་ཚུལ་འདྲ་བར། །དཀྱིལ་འཁོར་ཐམས་ཅད་ཐིག་གདབ་བོ། །དེ་ལ་སྲད་བུ་

བྲེ་བའི་ཆོ་ག་ནི་འདི་ལྟ་སྟེ། །གསར་ཞིང་ལེགས་པར་བྱས་པ་དང་། །ཚད་མ་བཟང་པོ་སྲད་བུ་ཡིས། །ཤེས་རབ་ཅན་གྱིས་སྲད་བྲེ་བ། །འཇིག་རྟེན་གསུམ་རྒྱལ་དྲན་ཞིང་ངོ་། །དེ་ཡི་དབུང་དུ་གདབ་པ་ནི། །སེང་ལྡེང་ཕུར་པ་བརྟེན་པར་རོ། །དེ་ལས་སྲད་བུ་བྲེ་གསུངས་པའི། །སྲད་
བུ་ཉིས་ལྡབ་ཀྱིས་བྱས་ཏེ། །བཅུ་དྲུག་ཆ་རུ་བགོ་བར་བྱ། །ཐམས་ཅད་དུ་ནི་རིམ་གསུམ་མཆོག །ཁོ་ར་ཁོར་ཡུག་རིགས་དག་ཀྱང་། །ཕུར་བུ་ཡིས་ནི་དེ་བཞིན་ནོ། །དེ་ཡི་ནང་དུ་བྱ་བ་ནི། །སྲད་བུ་རིམ་བདུན་ལྡན་བར་ཏེ། །ཚོན་སེར་དྲི་ཞིམ་ལྡན་པ་ཡིས། །ཐིག་རྣམས་
ཀྱང་ནི་གདབ་པར་བྱ། །དེ་ཡི་དབུས་སུ་གཞག་པ་ནི། །ཤིན་ཏུ་བཀྲབས་པའི་ནས་ཕུལ་བཞིའོ། །དེ་ཡི་སྟེང་དུ་མགོན་པོ་སྟེ། །སངས་རྒྱས་གཟུགས་བརྙན་གཞག་པར་བྱ། །སངས་རྒྱས་ཐད་འཁོར་ཐམས་ཅད་དུ། །བྱང་ཆུབ་བརྒྱད་ནི་རིམ་བཞིན་པར། །བྲིའམ་ཡང་
ན་གཞག་པར་བྱ། །ཚོན་སྣ་ལྔ་མཆོག་རྣམས་ཀྱིས་སོ། །སངས་རྒྱས་སྤྱན་སྔ་དེ་རུ་ནི། །ཕྱག་ན་རྡོ་རྗེ་དེ་བཞིན་ནོ། །བྲིའམ་གཞག་པར་བྱ་བ་ནི། །རྡོ་རྗེ་ཧཱུྃ་ཞེས་པར་འདུས་སོ། །དེ་ཡི་ཞབས་ནི་གཡོན་པ་ཡིས། །དབང་ཕྱུག་ཆེན་པོ་མནན་པར་བྱའོ། །གཡས་པའི་
ཞབས་ཀྱིས་བཙིར་བ་ནི། །ཉོན་མོངས་མ་ཡིན་ལྷ་མོའོ། །འདོད་དྲུག་སྤྱོད་པའི་ལྷ་རྣམས་དག །སྲད་བུ་རིམ་བདུན་བར་དག་ཏུ། །བྲི་འམ་ཡང་ན་གཞག་པར་བྱ། །རྡོ་རྗེ་ཤུགས་ཀྱིས་འགོངས་ནས་སུ། །ཕྱི་རོལ་བྱུང་ནས་དེ་རུ་ཡང་། །གླིང་རྣམས་བཞི་ཡང་བྲི་བར་བྱ། །
དབྱིབས་དང་ཆོ་ག་ཇི་བཞིན་དུ། །གྲྭ་ཡི་རི་མོ་ལེགས་པར་དགོད། །གླིང་རྣམས་དབུས་ནི་ཐམས་ཅད་དུ། །འཇིག་རྟེན་ཇི་བཞིན་བ་སོགས་པར་བྱའོ། །ཚངས་པ་ལ་སོགས་བཞི་ཡི་རྣམས། །དེ་རུ་འཇིག་རྟེན་དབང་པོ་བྲི། །ཁོ་ར་ཁོར་ཡུག་རི་དང་ནི། །གླིང་རྣམས་ཀྱི་ཡང་
བར་དག་ཏུ། །ཕྱི་ཡི་རྡོ་རྗེའི་རིགས་རྣམས་ཀྱི། །དཀྱིལ་འཁོར་ཡང་དག་བྲི་བར་བྱ། །སྒོ་སྲུང་བྲི་བར་བྱ་བ་ཡང་། །རྡོ་རྗེ་སྒོ་བཞི་དེ་དག་ཏུ། །རྡོ་རྗེ་ཀྱོ་བ་ཞགས་པ་དང་། །སྒྲོག་དང་དྲིལ་བུ་དེ་བཞིན་ནོ། །ཁོ་ར་ཁོར་ཡུག་རི་ཡི་ནི། །ཕྱི་རོལ་དམྱལ་བ་བརྒྱད་རྣམས་སོ། །

གནམ་དལ་དང་ནི་ནད་དག་དང་། །མཁའ་འགྲོ་མ་དང་གདོན་དྲག་རྣམས། །བཞག་གམ་ཡང་ན་བྲི་བར་བྱ། །ཆོས་མིན་ཅན་ནི་གཞིག་ཕྱིར་རོ། །དེ་ཡི་ཕྱི་རོལ་དུ་དགོད་པ། །གཏོར་མ་སྣ་ཚོགས་མཆོག་རྣམས་སོ། །དེ་ནས་དཀྱིལ་འཁོར་ཆེན་པོའི་ཆོ་
ག་འབྱུང་སྟེ། དེ་ལ་ཐོག་མ་ཉིད་དུ་སློབ་དཔོན་གྱིས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ་འཇུག་པ་ནི། གཙང་མས་གོས་གཙང་མ་བགོས་ལ། སེ་རལ་ཐག་གུ་དམར་པོ་ཐོགས་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་དེའི་སྟེང་དུ་དྲི་ཞིམ་པོའི་མེ་ཏོག་བཞག་
ནས། སྙིང་པོ་འདི་བརྗོད་ལ་ཞུགས་ཤིག །ཨོྃ་བཛྲ་པྲ་ཏཱིཙྪ་མྃ་ཧ་ཧ་ཧ་ཧ་ཧི། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ནས་དུ་རུ་སྐའི་བདུག་པ་འམ་ཅི་བདོག་པས་གསོལ་ཏོ། །རྡོ་རྗེ་འཛིན་མ་མཛུབ་མོ་གཉིས་ཀྱོ་བ་ཏང་དུ་བྱས་ལ་སྙིང་པོ་ནི་འདི་བརྗོད་དོ། །ཨོྃ་ཨུ་རུ་
གྲ་གྲ་བི་རི་ཎི་བི་རི་ཎི། བཛྲ་མ་ཡ་ཧི། བྷི་ད་ཡེ་སྭཱ་ཧཱ། ཉི་ཤུ་རྩ་གཅིག་བཟླས་ན། དེ་ལས་མཚན་མ་འབྱུང་བ་ནི་བ་སྤུ་གཡོ་བ་ལ་སོགས་པ་དང་ས་གཡོ་བའམ་དྲི་ཞིམ་པོའམ་འོད་ཟེར་མཐོང་བའོ། །དེ་ནས་ཕྱག་ན་རྡོ་རྗེའི་སྤྱི་བོར་མེ་ཏོག་གཏོར་ཅིག །དེ་ནས་སློབ་མ་
གཞུག་སྟེ། དེ་ལ་ཐོག་མ་ཉིད་དུ་བཀྲུས་ནས་སློབ་མ་གོས་གཙང་མ་བསྐོན་ཏེ་གསུམ་ལ་སྐྱབས་སུ་བཏང་བ་དང་། བསླབ་པའི་སྡོམ་པ་འཛིན་པ་ལ་སོ་སོར་གནས་པར་བྱས་ནས་བྱང་ཆུབ་ཀྱི་སེམས་སྐྱེད་ཅིག །དེ་ནས་གདོང་རས་ཀྱིས་གཡོགས་ནས་མགོ་གཙུག་ཏོར་དུ་བྱས་
ཏེ། རྡོ་རྗེ་འཛིན་མའི་ཕྱག་རྒྱ་བཅིངས་ལ་ཆུག་ཅིག །བཅུག་ནས་མེ་ཏོག་གཏོར་ཏེ། དེ་ནས་གང་ལ་བབ་པ་ནི་དེའི་ལྷའོ། །དེ་ནས་གདོང་བཅིངས་པ་བཀྲོལ་ནས་རང་གི་རིག་པའི་ལྷ་སྟོན་ལ། དེ་ལ་མཆོད་ཅིང་སློབ་དཔོན་ལ་ཡང་ཅི་འདོད་པའི་ཡོན་ཕུལ་ནས། དེ་རང་གི་
རིག་པའམ་སྔགས་བཟླས་ཏེ་ཕྱག་རྒྱ་ཡང་བཅིང་ངོ་། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས། འཇིག་རྟེན་གསུམ་གྱི་འཁོར་ལོ་ཞེས་བྱ་བའི་དཀྱིལ་འཁོར་ཆེན་པོའོ།། །།དེ་ནས་རྡོ་རྗེའི་དཀྱིལ་འཁོར་འབྱུང་སྟེ། རྡོ་རྗེའི་ཕྲེང་བ་མཉམ་

ལྡན་པས། །རྡོ་རྗེའི་དཀྱིལ་འཁོར་བརྟག་པར་བྱའོ། །འཇུག་པར་བྱ་བ་དེ་བཞིན་ཏེ། །ལས་ཀྱང་དེ་དང་འདྲ་བར་བྱའོ། །དཀྱིལ་འཁོར་དེ་རུ་ཞུགས་ནས་སུ། །དེ་བཞིན་རྡོ་རྗེ་གསོར་བར་བྱ། །འཇིག་རྟེན་གསུམ་རྒྱལ་རབ་བསླབས་ནས། །རྡོ་རྗེ་མཆོག་ནི་བསྒྲུབ་པར་བྱ། །
དེ་ལ་རྡོ་རྗེ་བསྒྲུབ་པའི་ཆོ་ག་ནི། ལག་པ་གཉིས་ཀྱིས་རྡོ་རྗེའི་ཕྱག་རྒྱ་འཛིན་པས་རྡོ་རྗེ་བཟུང་ལ། ཇི་སྲིད་དུ་འགུལ་བ་དེ་སྲིད་དུ་བཟླས་སོ། །དེ་ཕྱིན་ཅད་རྡོ་རྗེ་དེས་ལས་ཐམས་ཅད་བྱེད་དོ། །རྡོ་རྗེའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ། དཀྱིལ་འཁོར་
ཆེན་པོ་ཀུན་བྲིས་ནས། །མཚན་མ་ཐམས་ཅད་བསྟན་པར་བྱ། །འཇུག་པ་རྡོ་རྗེ་དྲིལ་བུ་དང་། །རྡོ་རྗེ་འཛིན་མཆོག་ཕྱག་རྒྱས་སོ། །དེ་ལ་རྡོ་རྗེ་དྲིལ་བུའི་ཕྱག་རྒྱ་ནི་འདི་ཡིན་ནོ། །རྡོ་རྗེ་འཛིན་མ་ཀུན་བྱས་ནས། །རྡོ་རྗེར་ཀུན་ཏུ་བརྟག་པར་བྱ། །གཡས་པར་བཞག་ནས་གཡོན་
པ་ཡིས། །དྲིལ་བུ་གསིལ་ཞིང་འཇུག་པར་བྱ། །བཅུག་ནས་སུ་ནི་དྲིལ་བུ་དེ། །མཉམ་པར་བཞག་པས་གསིལ་བར་བྱ། །སློབ་དཔོན་གྱུར་ཅིག་དམ་ཚིག་ཀྱང་། །རྟག་ཏུ་བསྲུངས་ཞེས་བརྗོད་པར་བྱ། །ཇི་ལྟར་དྲིལ་བུའི་སྒྲ་འདི་ནི། །དེ་ཡི་མི་རྟག་པ་རུ་གསུངས། །
དེ་ལྟར་ཁྱོད་ལ་བྱིན་པ་ནི། །རྡོ་རྗེ་ཆེན་པོ་ཞེས་བྱ་འདིས། །ངེས་པར་བསྲེག་པར་གྱུར་པ་ནི། །དེ་སྟེ་རྡོ་རྗེ་འཛིན་དད་དང་། །སྐྱབས་གསུམ་བརྟུལ་ཞུགས་དེ་བཞིན་ཏེ། །དེ་ལྟར་བྱང་ཆུབ་སེམས་འདོད་རྣམས། །ཁྱོད་ཀྱིས་འདི་ཚེ་སྤངས་གྱུར་ནའོ། །དེ་ལ་འདི་ཉིད་དམ་ཚིག་གི་
སྔགས་སོ། །ཨོྃ་ཧ་ན་ས་མ་ཡ་ཧཱུྃ་ཕཊ། དེ་ནས་དེ་བཞིན་དུ་འདུག་ལ་རྡོ་རྗེའི་ཆུ་འདི་བླུད་དོ། །དེ་ནས་གདོང་བཅིངས་པ་བཀྲོལ་ནས་ཆོ་ག་དེ་བཞིན་དུ་བྱའོ། །དམ་ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ། དེ་བཞིན་དཀྱིལ་འཁོར་བྲིས་
ནས་སུ། །ཆ་ལུགས་མང་པོ་གཞག་པར་བྱ། །བཙུད་ནས་ལས་རྣམས་ཐམས་ཅད་ཀྱང་། །སློབ་དཔོན་གྱིས་ནི་དེ་བཞིན་བསླབ། །དེ་ནས་ལས་ཀྱི་རབ་ཏུ་སྦྱོར་བ་འདིའོ། །བཅོམ་ལྡན་འདས་ཀྱི་སྤྱན་སྔར་ཐབ་གྲུ་བཞིར་བྱས་ལ། མངར་པོའི་ཡམ་ཤིང་ལ་མེ་བུས་ལ།

མངར་པོའི་མེ་ཏོག་དང་འབྲས་བུ་རྣམས་སྦྲང་རྩི་དང་ལྡན་པའི་མར་ལས་སྦགས་ཏེ། བླ་གོས་གཡས་སུ་གཟར་ལ་ཀུ་ཤའི་བམ་པོ་ལ་འདུག་སྟེ། རྡོ་རྗེའི་ཚིག་ཏུ་བཟླས་ཤིང་ཞི་བ་དང་། རྒྱས་པ་དང་། དབང་དུ་བྱ་བ་ལ་སོགས་པའི་ཞི་བའི་ལས་རྣམས་ལ་ལག་པ་
གཡོན་པས་བདག་གིས་ཕྱག་རྒྱ་བཅིངས་ཏེ། གཡས་པས་བསྲེགས་ན་དེ་དག་འགྲུབ་པར་འགྱུར་རོ། །བཅོམ་ལྡན་འདས་ཀྱི་རྒྱབ་ཏུ་ཐབ་ཟུར་གསུམ་དུ་ཁྲོ་བོའི་ཚེར་མ་རྣོན་པོའི་ཡམ་ཤིང་དང་། འདབ་མ་དང་། མེ་ཏོག་དང་། ཡལ་གའི་རྩེ་མོ་དང་། སྡོང་བུ་དང་།
འབྲས་བུ་ཡང་དེ་དང་འདྲ་བར་རང་གི་ཁྲག་གིས་བསྐུས་ནས་སྟན་མཁྲང་པོ་ལ་འདུག་སྟེ། བླ་གོས་གཡོན་དུ་གཟར་ལ་ཁྲོས་པའི་ཚིག་གིས་བཟླས་ཤིང་གཡོན་པས་བསྲེགས་ན། དགུག་པ་དང་། གཞུག་པ་དང་། བཅིང་བ་དང་། རྒྱས་གདབ་པ་དང་། གཞོམ་
པ་དང་། བཙིར་བ་དང་། བསྙལ་བ་དང་། མྱོས་པར་བྱ་བ་དང་། གཏན་འཕོ་བ་ལ་སོགས་པའི་ལས་དྲག་པོ་རྣམས་རབ་ཏུ་འགྲུབ་པར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དགུག་པ་དང་། གཞུག་པ་དང་། དམ་ཚིག་གིས་
བཅིང་བ་དང་། དབང་དུ་བྱ་བ་ལ་སོགས་པ་གྲུབ་པ་ཐམས་ཅད་ཀྱི་ལས་ནི་བཅོམ་ལྡན་འདས་ཀྱི་གཡས་སུ་རྩྭ་འཇམ་པོ་བཏིང་བ་ལ་འདུག་ནས། སྟོད་གཡོགས་སྦྱར་མ་ལྟར་བགོས་ཏེ། ཏིང་ངེ་འཛིན་གྱིས་བཟླས་ཤིང་འཁོར་ལོ་ལྟ་བུའི་ཐབ་ཏུ་དུ་བ་མེད་པའི་མདག་མ་ལ།
ཏིལ་དང་འབྲས་ལ་སོགས་པ་ནས་འབྲས་གཡས་གཡོན་གྱིས་བསྲེག་གོ། །བཅོམ་ལྡན་འདས་ཀྱི་གཡོན་དུ་རྡོ་རྗེ་ལྟ་བུའི་ཐབ་བྱས་ལ་སྟོད་གཡོགས་ཀྱིས་ཡན་ལག་ཀུན་བཅིངས་ཏེ། རློད་སྟན་འཇམ་པོ་ལ་འདུག་ནས། ཡམ་ཤིང་ཐམས་ཅད་འབར་བའི་ཕྲེང་བ་ལ་
འཛིངས་པའི་མེ་ལ་ལག་པ་གཡས་པ་རྡོ་རྗེ་དང་བཅས་པ་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་ནས། ལག་པ་གཡོན་པ་རྡོ་རྗེ་ཁུ་ཚུར་འཛིན་པས་གཟར་བུ་བཟུང་ནས་འཛུམ་ཞིང་དགའ་བར་བྱས་ཏེ། རྡོ་རྗེའི་ཚིག་གིས་ཟློས་ཤིང་རོ་ཐམས་ཅད་བསྲེགས་ན། རྡོ་རྗེ་འཛིན་པ་དགུག་

པ་དང་། གཞུག་པ་དང་། བཅིང་བ་དང་། དབང་དུ་བྱ་བ་ལ་སོགས་པ་དམ་པ་འགྲུབ་པའི་སྦྱིན་སྲེག་གི་ཆོ་ག་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་དཀྱིལ་འཁོར་ཐམས་ཅད་ཀྱི་ཆོ་གའོ།། །།དེ་ནས་ཡོ་བྱད་བཤད་པར་བྱའོ་ཞེས་ནས་
བཅོམ་ལྡན་འདས་རྡོ་རྗེ་འཛིན་གྱིས་གསུངས་པ། དཀྱིལ་འཁོར་གྱི་ཆོ་ག་ཐམས་ཅད་མཐོང་བར་འགྱུར་ནས་བསྒྲུབ་བོ། །དེ་ཅིའི་ཕྱིར་ཞེ་ན། དཀྱིལ་འཁོར་དུ་ནི་མ་ཞུགས་སམ། །དམ་ཚིག་སྤངས་པར་གྱུར་པ་ནི། །ཕྱག་ན་རྡོ་རྗེ་མི་འགྲུབ་པ། །གསང་བ་ཡང་དག་མི་ཤེས་བས། །
བཅོམ་ལྡན་འདས་སེམས་འདོད་པའོ། །ཆགས་དང་རྡོ་རྗེ་དེ་ཉིད་དེ། །དེ་ལ་ཆགས་པར་མ་གྱུར་ན། །ཕྱག་ན་རྡོ་རྗེ་མི་འགྲུབ་བོ། །དེ་བས་ཡང་དག་མ་མཐོང་བས། །དཀྱིལ་འཁོར་དུ་ནི་གྲུབ་མ་གསུངས། །ཡང་དག་མ་མཐོང་གྲུབ་པ་ནི། །ཐེ་ཚོམ་ཅན་གྱིས་མི་
འཐོབ་བོ། །རབ་ཏུ་འཇིགས་པ་རྙེད་ནས་སུ། །ནད་ཀྱིས་ཀྱང་ནི་འཇིག་པར་བྱེད། །གདོན་ཡང་དེ་ལ་བརྩོན་པར་འགྱུར། །ཤི་ནས་ངུ་འབོད་དུ་ལྟུང་ངོ་། །དེ་ལྟར་དཀྱིལ་འཁོར་ཐམས་ཅད་དུ་ཆུག་ལ། ནད་དང་གདོན་ལ་སོགས་པ་སྟོན་ཅིག །བཅོམ་ལྡན་འདས་
དེ་བཞིན་གཤེགས་པ་གསེར་གྱི་ཁ་དོག་རས་ལ་བྲི་བར་བྱ་སྟེ། དེའི་ཐད་འཁོར་ཀུན་ཏུ་བྱང་ཆུབ་སེམས་དཔའ་བརྒྱད་བྲི་བ་ནི་འདི་ལྟ་སྟེ། གཡས་ཕྱོགས་སུ་ནི་འཕགས་པ་སྤྱན་རས་གཟིགས་ཀྱི་དབང་པོ་དང་། འཇམ་དཔལ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་
བསྐོར་བའོ། །གཡོན་ཕྱོགས་སུ་ནི་རྡོ་རྗེ་ཁུ་ཚུར་དང་། བྱམས་པ་དང་ནམ་མཁའི་མཛོད་དོ། །སྟེང་དུ་ནི་ནམ་མཁའི་སྙིང་པོའོ། །བཅོམ་ལྡན་འདས་ཀྱི་འོག་ཏུ་ནི་ཕྱག་ན་རྡོ་རྗེ་སྟེ། རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་རྡོ་རྗེ་དང་བཅས་པ་ལག་པ་གཉིས་ཀྱིས་བཅིང་ངོ་། །ལག་པ་
གཉིས་པོ་གཞན་ལ་གཡས་པས་ནི་རྡོ་རྗེ་གསོར་གཡོན་པས་ནི་མེ་ཏོག་གི་གཞུ་དང་མདའ་ལྔ་བསྣམས་པ། སྐུ་མདོག་ནི་ཨུཏྤལ་སྔོན་པོ་ལྟ་བུ། ཡིད་ཙམ་འཛུམ་ལ་མཆེ་བ་ཅུང་ཟད་གཙིགས་པ། ཁྲོ་བ་དང་བཅས་པས་བཞད་པའི་ཞལ། ཕྱིར་བརྐྱང་བསྐུམ་དུ་གནས་

པ། རྒྱན་ཐམས་ཅད་ཀྱིས་བརྒྱན་པ། ཞབས་གཡོན་པས་ལྷ་ཆེན་པོའི་འདན་པ་གཡོན་པར་མནན། ཞབས་གཡས་པ་བསྐུམས་པས་ཨུ་མའི་ནུ་མར་བཙིར་ཏེ། སྟོད་གཡོགས་ཁྲ་བོས་ཡན་ལག་གཡོགས་པ། ཀོ་རློན་གྱི་སྨད་གཡོགས་ཅན།
དེ་བཞིན་གཤེགས་པ་ཐམས་ཅད་དབུ་རྒྱན་དུ་ཐོགས་པའོ། །དེ་ནས་ཚེས་ཞག་གཅིག་ནས་མགོ་བརྩམས་ཏེ། ཚེས་བཅོ་ལྔའམ། ཟླ་བའམ། ལོའི་བར་དུ་ཉིན་རེ་ཞིང་བརྒྱད་སྟོང་བཟླས་ཏེ། གོས་དཀར་པོ་གཙང་མ་བགོས་ཏེ་བདག་གི་ཁྱིམ་དུ་གནས་ཤིང་།
ཟས་གཙང་མ་ཡིད་བཞིན་དུ་ཟོས་ཏེ་བཟླས་ན། དེ་ནས་ཟླ་བ་གཅིག་ལོན་པ་དང་། ཟླ་བ་དང་པོས་ནི་ཧཱུྃ་ཞེས་བྱ་བས་ཕྱི་རོལ་གྱི་ལས་རྣམས་འགྲུབ་པར་འགྱུར་རོ། །གཉིས་ཀྱིས་ནི་ལས་ཐམས་ཅད་འགྲུབ་པར་འགྱུར་རོ། །གསུམ་གྱིས་ནི་བཅོམ་ལྡན་འདས་རྨི་ལམ་
དུ་སྟོན་ཅིང་འདས་པ་དང་མ་འོངས་པ་ཐམས་ཅད་སྟོན་ཏོ། །བཞིས་ནི་སེམས་ཅན་ཐམས་ཅད་དགུག་པ་དང་། དབང་དུ་བྱ་བར་ནུས་སོ། །ཟླ་བ་ལྔས་ནི་ཡིད་བཞིན་དུ་སྣང་བ་དང་མི་སྣང་བར་འགྱུར་རོ། །ཟླ་བ་དྲུག་གིས་ནི་ཅི་འདོད་པ་ཐམས་ཅད་ཀྱི་གཟུགས་སུ་འགྱུར་
རོ། །ཟླ་བ་བདུན་གྱིས་ནི་བདག་གི་ལུས་སངས་རྒྱས་དང་བྱང་ཆུབ་སེམས་དཔའ་དང་ཕྱག་ན་རྡོ་རྗེར་སྟོན་ཅིང་། ཆོ་འཕྲུལ་ཐམས་ཅད་ཀྱང་སྟོན་ཏོ། །ཟླ་བ་བརྒྱད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་ལ་སོགས་པ། དགུག་པ་དང་།
གཞུག་པ་དང་། བཅིང་བ་དང་དབང་དུ་བྱེད་ཅིང་ལས་སུ་བསྐོའོ། །ཟླ་བ་དགུས་ནི་བྱང་ཆུབ་སེམས་དཔའ་རྣམས་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱེད་དོ། །ཟླ་བ་བཅུས་ནི་ས་བཅུ་ཐོབ་པར་འགྱུར་རོ། །ཟླ་བ་བཅུ་
གཅིག་གིས་ནི་ས་བཅུ་གཅིག་པ་སངས་རྒྱས་ཀྱི་ས་ཐོབ་པོ། །ཟླ་བ་བཅུ་གཉིས་པས་ནི་རྡོ་རྗེ་འཛིན་པར་འགྱུར་རོ། །དེ་ནས་སྒྲུབ་པ་བསྟན་ཏེ། རས་ལ་བཅོམ་ལྡན་འདས་རྡོ་རྗེ་ཧཱུྃ་ཞེས་བྱ་བ་དེ་བཞིན་དུ་བྲིས་ལ། དེའི་ཐད་འཁོར་ཐམས་ཅད་དུ་མཐུ་ཆེན་པོ་ལ་སོགས་པ་

ནས། ཀླུ་བཱ་རུ་ཎའི་མཐའི་བར་དུ་བཅོམ་ལྡན་འདས་ལ་སྒོང་ཞིང་པུས་མོ་བཙུགས་པ་བྲིས་ལ། དེ་ནས་དེ་བཞིན་དུ་བཟླས་པ་ནི་རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་གྲངས་མེད་པར་བཟླས་ཏེ། ཟླ་བའི་མཐའི་བར་དུ་ཚེས་ཉི་ཤུ་དགུའི་མཚན་ཐལ་བྱུང་དུ་བཟླས་ན་ནང་པར་ཐམས་ཅད་
འོང་ངོ་། །འོངས་ནས་ཀྱང་དབང་དུ་འགྱུར་ཏེ་ཐམས་ཅད་བསྒོ་བ་བཞིན་དུ་བྱེད་དོ། །དེ་ནས་སྒྲུབ་པ་གཞན་འབྱུང་སྟེ། བཅོམ་ལྡན་འདས་དེ་བཞིན་དུ་བྲིས་ནས། གསེར་གྱི་མདངས་ཀྱི་ལྷ་མོ་ལ་སོགས་པ་ཐམས་ཅད་རང་རང་གི་ཕྱག་རྒྱ་བསྒྲེང་ནས་གར་བྱེད་ཅིང་མི་སྡུག་པ་
འཇིགས་པའི་གཟུགས་སུ་བྲིའོ། །དེ་ནས་དེ་བཞིན་དུ་ཟླ་བ་གཅིག་གི་མཐའི་མཚན་ཐལ་བྱུང་དུ་ཟློས་ཤིག །དེ་ནས་ནང་པར་ཀུན་ལྷགས་ཏེ། དེ་བཞིན་དུ་གར་དག་གིས་སྒྲུབ་པ་པོ་ལ་མཆོད་དོ། །འདི་ནི་རྟོག་པ་འདིར་བྲིས་པ་དེ་བཞིན་ནོ་སྙམ་དུ་བསམས་ནས་དེས་མི་འཇིགས་
པར་བྱའོ། །དེ་ནས་དབང་དུ་འགྱུར་ཏེ་རྟག་ཏུ་ལས་ཐམས་ཅད་བྱེད་པའི་གཡོག་མོར་འགྱུར་རོ། །དེ་ནས་ཆོ་ག་གཞན་ཏེ་རས་ལ་བཅོམ་ལྡན་འདས་དེ་བཞིན་དུ་བྲིས་ལ། དེ་ནས་དེ་བཞིན་དུ་བརྒྱད་སྟོང་དུ་བཟླས་ན། ནུབ་ཐ་མ་ལ་རྡོ་རྗེ་འཛིན་པ་འཐོབ་སྟེ། ཅི་འདོད་པ་གྲུབ་པའི་
མཆོག་ཀྱང་འཐོབ་བོ། །གཞན་ཡང་སྒྲུབ་པ་ཕྱག་ན་རྡོ་རྗེའི་སྤྱན་སྔར་འབུམ་ཟློས་ཤིག །དེ་ནས་དགོས་པ་ཀུན་བཅོམ་ལྡན་འདས་ཀྱིས་མཛད་དོ། །ཕྱག་ན་རྡོ་རྗེའི་སྤྱན་སྔར་ཅི་འདོད་པར་ཡམ་ཤིང་ཐམས་ཅད་ཀྱིས་སྦྱིན་སྲེག་གིས་ལོ་གཅིག་གི་བར་དུ་བསྲེགས་ན་ཐམས་ཅད་
འགྲུབ་པར་འགྱུར་རོ། །དེ་ནས་རྡོ་རྗེ་ཧཱུྃ་ཞེས་པ་བྲིས་ལ་དེའི་སྤྱན་སྔར་ལོ་གཅིག་གི་མཐའི་བར་དུ་གྲངས་མེད་པར་ཟློས་ཤིག །དེ་ནས་ཐ་མར་བཅོམ་ལྡན་འདས་རང་གི་ཅི་འདོད་པའི་མཆོག་སྩོལ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པའི་སྤྱན་སྔར་རྡོ་རྗེ་ཧཱུྃ་ཞེས་
པའི་ཕྱག་རྒྱ་བཅིངས་ལ། དེ་བཞིན་གཤེགས་པ་འགུལ་གྱི་བར་དུ་ཟློས་ཤིག །དེ་ནས་ཕྱག་རྒྱ་འགྲུབ་པར་འགྱུར་རོ། །གྲུབ་པ་དེས་ན་དགུག་པ་དང་དབང་དུ་བྱ་བ་དང་། གཞུག་པ་དང་། དྲང་བ་དང་། ལྟུང་བ་དང་། དབབ་པ་དང་། གཏན་འཕོ་བ་ལ་སོགས་པ་

ལས་ཕྲན་ཚེགས་རྣམས་ཀྱི་ཟེར་བཅིངས་པས་ཧཱུྃ་ཞེས་པས་མཛད་དོ། །དེ་ནས་ཆོ་ག་གཞན་ཏེ། རིག་པས་དབང་བསྐུར་བར་བྱ་བར་འདོད་ན། བྲིའམ་འཇིམ་པ་ལས་ཕྱག་ན་རྡོ་རྗེའི་ཆ་ལུགས་བྱས་ལ་ཕྱག་གཉིས་བརྐྱང་སྟེ་རྡོ་རྗེ་འཛིན་ཏོ། །དེ་ཟླ་བ་ཡར་གྱི་ཚེས་
གཅིག་ནས་བརྩམས་ཏེ། ཚེས་བཅོ་ལྔའི་བར་དུ་མར་བཞི་བྲེ་བརྒྱད་སྟོང་གིས་ཁྲུས་ཤིག །དེ་ནས་ཐ་མར་མཚན་ཐལ་བྱུང་བཟླས་སོ། །དེ་ནས་ནང་པར་གཟུགས་དེ་བཞད་དེ། དེ་ནས་རིག་པ་ཐམས་ཅད་ཀྱི་བདག་པོར་འགྱུར་རོ། །དེ་ནས་སྒྲུབ་པ་གཞན་འབྱུང་སྟེ།
སངས་རྒྱས་བཅོམ་ལྡན་འདས་ཀྱི་ཆ་ལུགས་བྲི་འམ། །འཇིམ་པ་ལ་དེ་བཞིན་དུ་ཕྱག་བརྐྱང་བ་རྡོ་རྗེ་འཛིན་པར་བྱས་ལ་དེ་ཞིགས་ཀྱི་བར་དུ་སྤོས་ཆུས་བཀྲུས་ན་དེ་ཕྱིན་ཅད་ཡིད་བཞིན་དུ་མི་སྣང་བར་འགྱུར་རོ། །དེ་ནས་སྒྲུབ་པ་གཞན་འབྱུང་སྟེ། རས་ལ་བཅོམ་ལྡན་འདས་ཕྱག་
ན་རྡོ་རྗེ་ཕྱག་བཞི་པ་བྱས་ནས། དེའི་ཕྱག་གཡས་པར་པདྨོ། གཡོན་པར་རྡོ་རྗེ་གཡས་པར་རྡོ་རྗེ་ཧཱུྃ་ཞེས་པ། གཡོན་པར་མདའ་དང་གཞུའོ། །དེ་ནས་དེའི་སྤྱན་སྔར་སྟོང་ཕྲག་བརྒྱ་བཟླས་པའི་མཇུག་ཏུ་ཞག་གསུམ་སྨྱུང་བ་བྱས་ཏེ་མཚན་ཐལ་བྱུང་བཟླས་ན། དེའི་
ནང་པར་དེ་དང་འདྲ་བའི་གཟུགས་སུ་འགྱུར་ཏེ། བསྐལ་པར་གནས་ཤིང་མི་དགའ་བ་དང་། སེམས་ཅན་ཐམས་ཅད་དབང་དུ་བྱ་བ་དང་། ཐམས་ཅད་དུ་འགྲོ་བར་འགྱུར་རོ། །དེ་ནས་དཀྱིལ་འཁོར་བསྒྲུབ་པ་འབྱུང་སྟེ། དཀྱིལ་འཁོར་མཐོང་བས་ལྕི་བ་གསུམ་གྱིས་ཁྲུས་
བྱས། དུས་གསུམ་དུ་གོས་བརྗེས་ལ་རྡོ་རྗེ་འཛིན་མའི་ཕྱག་རྒྱ་བཅིངས་ནས། བརྒྱད་སྟོང་དུས་གསུམ་དུ་ཉིན་བདུན་བཟླས་ན། དེ་ནས་ཕྱག་ན་རྡོ་རྗེ་སློབ་དཔོན་གྱི་གཟུགས་སུ་བྱས་ནས་རྨི་ལམ་དུ་ཐམས་ཅད་སྨྲའོ། །དེ་ནས་དཀྱིལ་འཁོར་སྒྲུབ་པའི་ཆོ་ག་གཞན་
འབྱུང་སྟེ། དཀྱིལ་འཁོར་ཆེན་པོ་མཐོང་བས་ཟླ་