Kinh tạng Tây Tạng (Kangyur Đại Học) — 082_རྒྱུད་འབུམ།_ཆ

ས་པ་དག་གོ། །དེ་ནས་གཞན་ཡང་ཐམས་ཅད་མཁྱེན་པའི་འཁོར་ཕུན་སུམ་ཚོགས་པ་བཤད་པར་བྱའོ། །འདི་
ལྟ་སྟེ་འཕགས་པ་འཇམ་དཔལ་ཡེ་ཤེས་སེམས་དཔའ་ནི་རྒྱལ་པོ་ཟས་གཙང་མར་གྱུར་ཏོ། །འཇིག་རྟེན་གྱི་དབང་ཕྱུག་དབྱངས་ནི་ལྷ་མོ་ཆེན་མོ་སྒྱུ་འཕྲུལ་ཞེས་བྱ་བར་གྱུར་ཏོ། །ལྷ་མོ་དཔལ་གྱི་ལུ་གུ་རྒྱུད་མ་ནི་གྲགས་འཛིན་མར་གྱུར་ཏོ། །རྡོ་རྗེ་སེམས་དཔའ་ནི་སྒྲ་གཅན་འཛིན་ཏོ། །བྱང་ཆུབ་
སེམས་དཔའ་སྒྲིབ་པ་ཀུན་ཏུ་གཅོད་པ་ནི་ཤཱ་རིའི་བུར་གྱུར་པའོ། །ཀུན་དུ་བཟང་པོ་ནི་གནས་བརྟན་ཀུན་དགའ་བོར་གྱུར་ཏོ། །ཀུན་དུ་བཟང་པོ་རྣམ་པར་རོལ་པའི་སྐུ་ཅན་ནི་མོད་གལ་གྱི་བུར་གྱུར་བའོ། །ལྷའི་དབང་པོ་བརྒྱ་བྱིན་ནི་གནས་བརྟན་ལྷ་སྦྱིན་ནོ། །ཚངས་པ་ཆེན་པོ་ནི་བྱང་ཆུབ་སེམས་
དཔའི་སྣང་བའི་འོད་དུ་གྱུར་པའོ། །དཔལ་རྣམ་པར་སྣང་མཛད་ཆེན་པོ་ནི་ཡང་དག་པར་རྫོགས་པའི་སངས་རྒྱས་རྒྱལ་བ་ཤཱཀྱ་ཐུབ་པ་ཉིད་དུ་གྱུར་ཏོ། །དེ་ལྟར་མདོ་དང་ཐུན་མོང་དུ་སྤྱོད་པའི་དོན་དུ་གསུངས་སོ། །འདིར་ནི་གསང་བ་ཐུན་མོང་མ་ཡིན་པའི་དོན་དུ་སོ་སོར་ཕྱེ་ནས་གསལ་བར་བཤད་པར་བྱའོ། །
འདི་ལྟ་སྟེ་ད་ལྟར་ཕྱོགས་བཅུའི་དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་དཀྱིལ་འཁོར་གསང་བ་སྤྱིའི་དོན་དུ་བསྟན་ཏེ། །གསང་བའི་བདག་པོ་ཕྱག་ན་རྡོ་རྗེ་ནི་ཕྱག་ན་རྡོ་རྗེ་རྩེ་ལྔ་པ་འཛིན་པ་ཅན་གྱི་ཀུན་དགའ་བོར་གྱུར་ཏོ། །ཀུན་དུ་བཟང་པོ་ནི་མཽད་གལ་གྱི་བུའོ། །སྒྲིབ་པ་ཐམས་ཅད་རྣམ་

པར་སེལ་བ་ནི་ཀུན་ཤེས་ཀཽཎྜི་ནྱ་ར་གྱུར་ཏོ། །བློ་གྲོས་མི་ཟད་པ་ནི་ཤཱ་རིའི་བུའོ། །སྤྱན་རས་གཟིགས་དབང་ཕྱུག་ནི་འོད་སྲུང་ངོ་། །སའི་སྙིང་པོ་ནི་མ་འགགས་པའོ། །བྱམས་པ་ནི་ཉེ་བའི་འཁོར་རོ། །ནམ་མཁའི་སྙིང་པོ་ནི་གནས་བརྟན་ཆེན་པོ་རབ་འབྱོར་དུ་གྱུར་ཏོ། །གཟུགས་རྡོ་རྗེ་
མ་ནི་སྐྱེ་དགུའི་བདག་མོའོ། །སྒྲ་རྡོ་རྗེ་མ་ནི་དབྱངས་ལྡན་མའོ། །དྲི་རྡོ་རྗེ་མ་ནི་རིགས་ལྡན་མའོ། །རོ་རྡོ་རྗེ་ནི་དགའ་མོ་དང་དགའ་སྟོབས་མའོ། །རེག་བྱ་རྡོ་རྗེ་ནི་ས་འཚོ་མར་གྱུར་ཏོ། །སངས་རྒྱས་སྤྱན་མ་ནི་སའི་ལྷ་མོར་གྱུར་ཏོ། །མཱ་མ་ཀཱི་ནི་འོད་མཆོག་མར་གྱུར་ཏོ། །གོས་དཀར་མོ་
ནི་པདྨ་གྲགས་མཆོག་མའོ། །སྒྲོལ་མ་ནི་སྣ་ཚོགས་འོད་འཆང་མར་གྱུར་ཏོ། །དེ་བཞིན་གཤེགས་པ་མི་བསྐྱོད་པ་ནི་སངས་རྒྱས་མི་འཁྲུགས་པ་སྨན་གྱི་བླ་དྲི་མ་མེད་པ་བཻ་ཌཱུརྱའི་འོད་དུ་གྱུར་ཏོ། །རྣམ་པར་སྣང་བྱེད་དེ་བཞིན་གཤེགས་པ་ནི་སངས་རྒྱས་སྟོབས་མཆོག་སེང་གེ་ཐུགས་རྗེས་
འོད་ཀྱི་སྣང་བ་མི་ཟད་པར་གྱུར་ཏོ། །འོད་དཔག་ཏུ་མེད་པ་ནི་དེ་བཞིན་གཤེགས་པ་པདྨའི་འོད་འཕྲོ་མི་ཟད་པར་གྱུར་ཏོ། །གདོན་མི་ཟ་བ་གྲུབ་པ་ནི་དེ་བཞིན་གཤེགས་པ་རྔ་སྒྲའི་རྒྱལ་པོ་ཞེས་བྱ་བར་གྱུར་ཏོ། །རིན་ཆེན་འབྱུང་ལྡན་ནི་དེ་བཞིན་གཤེགས་པ་དཀོན་མཆོག་དཔལ་རིན་ཆེན་འོད་འཕྲོ་
བ་ཞེས་བྱ་བར་གྱུར་ཏོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ནི་དེ་བཞིན་གཤེགས་པ་དཔལ་ཡེ་ཤེས་ཀུན་དུ་བཟང་པོ་ཞེས་བྱ་བར་གྱུར་ཏེ། དེ་ནི་གཞན་ཡིན་པར་མི་བལྟ་སྟེ་ད་ལྟ་རང་ཉིད་ཡིན་ནོ། །གཞན་ཡང་རབ་ཏུ་བཤད་པར་བྱ་སྟེ། ཁྲོ་བོའི་རྒྱལ་པོ་བཅུ་རྣམས་ལ་འདི་ལྟ་སྟེ། དཔལ་
གཤིན་རྗེ་མཐར་བྱེད་ནི་དེ་བཞིན་གཤེགས་པ་རིན་ཆེན་འབྱུང་གནས་སུ་གྱུར། བགེགས་མཐར་བྱེད་ནི་དེ་བཞིན་གཤེགས་པ་རྒྱལ་བའི་དབང་པོ་ཞེས་བྱ་བར་གྱུར། དཔལ་རྟ་མགྲིན་ནི་རིན་ཆེན་འོད་འཕྲོ་ཞེས་བྱ་བར་གྱུར། ཤེས་རབ་མཐར་བྱེད་ནི་སངས་རྒྱས་མྱ་ངན་མེད་པའི་དཔལ་ཞེས་བྱ་བར་
གྱུར། ཁྲོ་བོ་མི་གཡོ་བ་ནི་པདྨོ་དམ་པའི་དཔལ་ཞེས་བྱ་བར་གྱུར། ཁྲོ་བོ་འདོད་པའི་རྒྱལ་པོ་ན་སངས་རྒྱས་ཉི་མའི་དཀྱིལ་འཁོར་སྣང་བའི་དཔལ་ཞེས་བྱ་བར་གྱུར། དབྱུག་སྔོན་ཅན་ནི་དེ་བཞིན་གཤེགས་པ་གདུགས་དམ་པར་གྱུར། ཁྲོ་བོ་སྟོབས་པོ་ཆེ་ནི་དེ་བཞིན་གཤེགས་པ་ཏིང་ངེ་འཛིན་

གྱི་རྒྱལ་པོ་གླང་པོ་དམ་པའི་དཔལ་ཞེས་བྱ་བར་གྱུར། ཁྲོ་བོ་གནོད་མཛེས་རྒྱལ་པོ་ནི་སངས་རྒྱས་པདྨོ་དམ་པའི་དཔལ་ཞེས་བྱ་བར་གྱུར། ཁྲོ་བོ་གཙུག་ཏོར་འཁོར་ལོས་སྒྱུར་བ་ནི་དེ་བཞིན་གཤེགས་པ་དགའ་བ་དམ་པའི་དཔལ་ཞེས་བྱ་བར་གྱུར་ཏོ། །བསྐལ་པ་བཟང་པོའི་སངས་
རྒྱས་སྟོང་འཇིག་རྟེན་དུ་མངོན་པར་འབྱུང་བ་ལ་འདི་ལྟ་སྟེ། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་ཕྱག་རྒྱ་དང་གསང་བ་འཛིན་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་སྣང་བའི་འོད་དང་གསུམ་གྱི་སྐུ་གསུང་ཐུགས་ཀྱི་ཡེ་ཤེས་ཀྱི་གསང་བ་འཛིན་པའི་གནས་ཀྱི་སྤྱོད་ཡུལ་གྱིས་སྤྱད་པ་སྤྱོད་པ་ཉིད་དོ། །དེ་བཞིན་གཤེགས་པ་བརྒྱད་བྱང་ཆུབ་ཀྱི་ཤིང་བརྒྱད་དང་བཅས་པ་ལས་མངོན་པར་བྱང་ཆུབ་པ་འདི་ལྟ་སྟེ། དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྡོ་རྗེ་འཛིན་པའི་ངོ་བོ་ཉིད་དུ་གནས་ཏེ། དེ་བཞིན་གཤེགས་པ་སྣ་ཚོགས་བདག་ཉིད་དུ་གཅིག་པའི་སྐུའོ། །དེ་བཞིན་གཤེགས་པ་རྣམ་པར་གཟིགས་པ་ཏ་ལའི་ཤིང་གི་དྲུང་དུའོ། །དེ་བཞིན་གཤེགས་པ་རིན་ཆེན་གཙུག་ཏོར་ཅན་ནི་མྱ་ངན་མེད་པའི་
ཤིང་གི་དྲུང་དུའོ། །དེ་བཞིན་གཤེགས་པ་མར་མེ་ཅན་ནི་ཙཱུ་ཏའི་ཤིང་གི་དྲུང་དུའོ། །དེ་བཞིན་གཤེགས་པ་ལོག་པར་དད་སེལ་ནི་བྷ་ཏ་བའི་ཤིང་གི་དྲུང་དུའོ། །དེ་བཞིན་གཤེགས་པ་གསེར་ཐུབ་ནི་ཀ་ར་ཙ་པའི་ཤིང་གི་དྲུང་དུའོ། །དེ་བཞིན་གཤེགས་པ་འོད་སྲུང་ནི་པར་ཀ་ཏི་བའི་ཤིང་གི་དྲུང་དུའོ། །དེ་བཞིན་
གཤེགས་པ་ཤཱཀྱ་ཐུབ་པ་ནི་པར་ཏི་པའི་ཤིང་གི་དྲུང་དུའོ། །དེ་བཞིན་གཤེགས་པ་བྱམས་པ་ནི་ནཱ་ག་ཀེ་ས་རའི་ཤིང་གི་དྲུང་དུའོ། །དེ་ལྟར་དེ་བཞིན་གཤེགས་པ་རྣམས་ཀྱིས་དུས་གསུམ་དུ་འབྱུང་བའི་སངས་རྒྱས་ཐམས་ཅད་ཀྱི་དཀྱིལ་འཁོར་དུ་ཕྱོགས་བརྒྱད་ཀྱི་ཞིང་ཁམས་ན་བཞུགས་ཤིང་ཡོངས་སུ་
སྐྱོང་བར་མཛད་དེ། གང་དུ་རྡོ་རྗེ་ཐེག་པ་ལ་གནས་པའི་རྣལ་འབྱོར་པ་རྣམས་ལ་དེ་བཞིན་གཤེགས་པ་དེ་དག་གིས་ཡོངས་སུ་གཟིགས་ཤིང་བྱིན་གྱིས་རློབ་པར་སྟོན་པ་ཡིན་ནོ་ཞེས་གསུངས་སོ། །དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོས་དེ་བཞིན་གཤེགས་པ་

ཐམས་ཅད་དང་བྱང་ཆུབ་སེམས་དཔའ་རྣམས་ལ་བཀའ་སྩལ་པ། འདིར་དེ་བཞིན་གཤེགས་པ་ཀུན་དུ་འབྱུང་བའི་གནས་རྡོ་རྗེའི་ཏིང་ངེ་འཛིན་ཁོང་དུ་ཆུད་པར་གྱིས་ཤིག །དེ་ཡང་གང་ཞེ་ན། གང་དུ་དེ་བཞིན་གཤེགས་པ་རྣམས་ཏིང་ངེ་འཛིན་གང་དུ་བྱོན་པའམ་འཇུག་པར་མཛད་པ་དུ་གང་
ནས་གཤེགས་པ་དང་། གང་དུ་གནས་པའི་དོན་གྱིས་རྣམ་པར་འཕྲུལ་པའི་མཛད་པ་ཤེས་པར་གྱིས་ཤིག །གང་དུ་འདི་ནི་མངོན་བསྟན་པས། །སངས་རྒྱས་འཇིག་རྟེན་འབྱུང་བ་དག །མངོན་པར་བྱང་ཆུབ་གནས་ཉིད་ལས། །འབྱུང་དང་འཇུག་པར་གནས་པ་དང་། །ཕྲིན་ལས་མཛད་པ་དུ་
མར་སྟོན། །དགའ་ལྡན་གནས་ནས་འཕོ་ཚུལ་དང་། །ལྷུམས་སུ་འཇུག་དང་སྐུ་བལྟམས་དང་། །གཞོན་ནུ་རོལ་དང་ཁབ་གནས་དང་། །སྐྱེད་མོས་ཚལ་བྱོན་གནས་གཟིགས་ཏེ། །མངོན་པར་འབྱུང་དང་གཤེགས་མཛད་ཅིང་། །དཀའ་སྤྱད་མཛད་དང་བཞེངས་པ་དང་། །བྱང་ཆུབ་སྙིང་པོར་
གཤེགས་པ་དང་། །བདུད་བཅོམ་མངོན་པར་བྱང་ཆུབ་པ། །ཆོས་ཀྱི་འཁོར་ལོ་སྐོར་མཛད་དེ། །འདི་ནི་དུས་རྣམས་ཀུན་དུ་ཡང་། །ཐོག་མར་ཐུན་མོང་ལམ་བསྟན་ཅིང་། །རབ་ཏུ་དགེ་བ་མཚན་མ་མེད། །ཐ་མར་ཐེ་ཚོམ་སེལ་བ་ཡི། །བྱང་ཆུབ་སེམས་ཀྱི་སྤྱོད་ཡུལ་དང་། །རྣམ་པར་
ངེས་པ་ཕྲ་བར་བསྟན། །སངས་རྒྱས་མ་ལུས་འདི་དག་ཉིད། །ཞི་བར་འཇུག་པ་སྟོན་པ་དག །བླ་ན་མེད་པའི་སྤྱོད་ཡུལ་ལོ། །སྐུ་གསུང་ཐུགས་ཉིད་རྡོ་རྗེ་ཡིས། །སེམས་ཀྱི་རོལ་མོ་ལས་བྱུང་བ། །སྒྱུ་འཕྲུལ་ཆེན་པོ་སྟོན་པ་ཡིས། །མཛད་པ་ཕྱི་ནང་གསང་བ་སྟེ། །དགའ་ལྡན་ཕོ་བྲང་རང་ལུས་
ཀྱི། །བདེ་ཆེན་སྤྱི་བོར་གནས་པ་ཉིད། །དམ་པ་འབིགས་བྱེད་གཞོན་ནུའི་གནས། །རྡོ་རྗེ་སྔགས་ཀྱི་དེ་ཉིད་ལས། །ཏིང་འཛིན་མཉམ་པར་གྱུར་པ་ནི། །ཇི་ལྟར་སྐར་མདའ་འཕོ་བ་ལྟར། །བྱང་ཆུབ་སེམས་ཀྱི་གླང་པོ་ནི། །མཆེ་བ་དྲུག་ལྡན་དུ་གྱུར་པ། །སྙིང་རྗེས་ཆགས་པའི་སེམས་ཀྱིས་ནི། །རྩ་
ཡི་ཕོ་བྲང་ཁ་སྦྱར་དུ། །བྱང་ཆུབ་སེམས་ནི་ཞུགས་པར་གྱུར། །དེར་གནས་ལྷུམས་སུ་འཇུག་པ་ཉིད། །རྡོ་རྗེ་འཛིན་པ་བདག་ཉིད་འཇུག །ཐབས་དང་ཤེས་རབ་ནུས་ཐོབ་པས། །གཡས་རྩ་ནས་ནི་འབྱུང་གྱུར་པ། །བལྟམ་པའི་མཛད་པ་ཞེས་བརྗོད་དོ། །བདེ་བའི་ནུས་པ་འཕེལ་བ་ལས། །རྒལ་

ཚིགས་ཉི་ཤུ་རྩ་བརྒྱད་ཀྱི། །པདྨ་ཡི་གེས་བགྲོད་པ་དག །གོམ་པ་བོར་བའི་དུས་ཡིན་ནོ། །རླུང་སེམས་འགྲོ་ལྡོག་གང་གྱུར་པ། །འཁོར་དང་མྱང་འདས་བསྐྱེད་པ་ནི། །བྲམ་ཟེ་མཚན་མཁན་དྲང་སྲོང་གིས། །ལུང་བསྟན་བརྗོད་པ་དེ་ཡིན་ནོ། །དེ་ལྟར་མཉམ་པར་
བཞག་པ་ལས། །རྗེས་ཐོབ་ཡུལ་ལ་སྤྱོད་གྱུར་པ། །སྤྲོས་བཅས་སྤྲོས་མེད་རྣམ་དབྱེ་བས། །འདོད་པའི་ཡོན་ཏན་རྣམ་ལྔ་ལ། །གཞོན་ནུ་རོལ་པའི་སྤྱོད་པ་ཡིས། །ལུས་ཀྱི་གནས་སོགས་ཀུན་དུ་རོལ། །དབྱངས་དང་གསལ་བྱེད་གྱུར་པ་ཡི། །རྩ་ཡི་འཁོར་ལོའི་ཡི་གེ་རྣམས། །
ཕོ་མོ་མ་ནིང་དབྱེ་བ་ཡིས། །ཡི་གེའི་གནས་ལ་མཁས་པ་ཡིན། །རྩ་དང་རླུང་དང་ཐིག་ལེ་དག །འཕོ་ཚུལ་གྲངས་དང་དབྱེ་བསྡུ་ཡི། །རྒྱུ་ཚུལ་སྤྲོ་བསྡུ་གང་གྱུར་པ། །རྩིས་ཀྱི་གནས་ལ་མཁས་པའོ། །ས་ཆུ་མེ་རླུང་ནུས་པ་ཡི། །གླང་པོ་བརྐྱལ་དང་འགེགས་པ་དང་། །པགས་
པ་རིམ་པ་བདུན་གྱུར་ལ། །ཤིང་སོགས་རིམ་པར་གནས་གྱུར་པ། །རླུང་གི་གཞུ་ལ་མེ་མདའ་ཡིས། །འཕང་བ་ཆུ་རྒྱུན་འབབ་པ་ཡིན། །དང་པོར་ཤེས་རབ་ལས་ཐོབ་པ། །བྱང་སེམས་དམར་པོ་གསང་གནས་སུ། །དབང་བྱས་བཙུན་མོ་ཁབ་གནས་ཤིང་། །འབྱུང་བཞིའི་རླུང་
རྣམས་བཙུན་མོའོ། །སྨིན་མཚམས་ཀྱི་ནི་མདུད་པ་དེར། །ཐིག་ལེ་ཕྲ་བ་བརྟན་པ་ནི། །སྟེང་དུ་ཉི་ཟླ་གཟས་ཟིན་པ། །སྒྲ་གཅན་འཛིན་དུ་བརྗོད་པ་ཡིན། །ལྟེ་བ་སྤྲུལ་པའི་འཁོར་ལོ་ཡི། །ཕྱོགས་བཞིར་སྐྱེད་ཚལ་གཟིགས་པ་ནི། །ཟག་བཅས་རྩ་རླུང་ཐིག་ལེ་ཡིས། །སྲིད་པ་
བསྐྱེད་པ་གང་ཡིན་པའོ། །ཟག་མེད་བདེ་བ་ཐོབ་འདོད་པས། །དེ་ཡི་ཚུལ་ལ་འཇུག་པ་ནི། །རླུང་གི་རྟ་དང་བཅས་པ་ཡིས། །དབུ་མའི་མཐོངས་ལས་བྱུང་ནས་ནི། །བྱང་ཆུབ་སེམས་ཀྱི་མཆོད་རྟེན་དག །འཁོར་བའི་དྲ་བ་བཅད་ནས་ནི། །ཆུ་བོ་འདུས་པའི་འགྲམ་ཉིད་དུ། །ཡེ་ཤེས་མངོན་
དུ་བྱེད་འདོད་པས། །བཙན་ཐབས་སུ་ནི་འགོག་པ་དང་། །ལུས་ངག་གཅུང་ལ་བོར་བ་ཡིས། །ཟུག་དང་དཀའ་ཐུབ་སྤྱད་པ་ནི། །མཉམ་རྗེས་གཉིས་སུ་མེད་པ་ཡིས། །རྩེ་གཅིག་ཏིང་འཛིན་གནས་པའོ། །ཨཿཐུང་གསོས་ཤིང་རྒྱུན་ཕབ་པས། །འོ་མའི་བདུད་རྩི་གསོལ་བ་

ཡིན། །གང་བ་བྱང་ཆུབ་ཤིང་དྲུང་དུ། །རྡོ་རྗེ་སྐྱིལ་ཀྲུང་གྱུར་པ་ཡིས། །རྟགས་དང་ཡོན་ཏན་འཐོབ་བྱེད་ཅིང་། །སྣང་བ་གསུམ་ནི་ཐིམ་པའི་ཚེ། །ཟླ་བ་ཉི་མ་མུན་པ་ཡི། །རྟོག་པའི་དྲ་བ་གང་ཡིན་པ། །བདུད་བཏུལ་བ་ནི་སྲོད་ཀྱི་དུས། །རྣམ་རྟོག་ཡེ་ཤེས་ཐིམ་གྱུར་པ། །ཉེ་བར་ཐོབ་
པའི་སྐད་ཅིག་ལ། །སྐད་ཅིག་ཁྱད་པར་ལྔ་པ་ལ། །ཐོ་རངས་སྐྱ་རེངས་ཤར་བའི་དུས། །ནམ་མཁའི་སྤྲིན་མེད་ལྟ་བུ་ཡི། །ཉམས་ཀྱི་ཤེས་པ་འོད་གསལ་བ། །ཁྱད་པར་མངོན་པར་བྱང་ཆུབ་པའི། །ཡང་དག་སངས་རྒྱས་ཐོབ་པ་ཡིན། །འཁོར་ལོ་བཞིར་ནི་བདུད་བཅོམ་པས། །བཅོམ་
ལྡན་འདས་ཞེས་བརྗོད་པ་ཡིན། །མགྲིན་པར་ཟག་བཅས་རླུང་འགགས་པས། །ཀླུ་ཡི་གནས་སུ་ཞུགས་པ་སྟེ། །ཚངས་པའི་སྤྱི་བོ་ནས་འཕོ་ཞིང་། །ས་རླུང་ཐིག་ལེ་དང་བཅས་པས། །གསེར་གྱི་འཁོར་ལོ་ལྡན་པ་ཡིན། །ཐམས་ཅད་དབང་དུ་གྱུར་པ་ནི། །ཁམས་གསུམ་པོ་ནི་མ་ལུས་
དང་། །འགྲོ་དྲུག་སེམས་ཅན་ཐམས་ཅད་ཀྱིས། །ཚངས་པ་ལྷ་དང་བཅས་པ་དང་། །ལྷ་སྲིན་སྡེ་བརྒྱད་མ་ལུས་པས། །ཆོས་ཀྱི་འཁོར་ལོ་བསྐུལ་བ་ཡིན། །སྒྲོལ་རྒྱུའི་ཚལ་ནི་མཛོད་སྤུ་སྟེ། །ཚོང་དཔོན་གཉིས་ནི་རྩ་གཉིས་ཏེ། །ལམ་གྱུར་སྟོབས་དང་ལྡན་པའོ། །ལྔ་སྡེ་བཟང་པོ་ཞེས་བྱ་
བ། །དུག་ལྔ་བསྐྱེད་པའི་རྩ་དང་རླུང་། །བདེན་བཞི་ཆོས་ཀྱི་འཁོར་ལོ་ནི། །སྤྲུལ་པའི་གནས་སུ་གསུངས་པ་སྟེ། །བཱ་རཱ་ཎ་སཱི་ཞེས་བ་ཡི། །ཐོག་མར་ཆགས་པའི་གནས་ཡིན་ནོ། །ཆོ་འཕྲུལ་བསྟན་པ་ཞེས་བྱ་བ། །མུ་སྟེགས་གདུལ་བའི་དོན་དུ་སྟེ། །སྤ་བཀོང་ཀུན་བརྗོད་རྫུ་འཕྲུལ་
དང་། །བྱིན་གྱིས་རློབ་བའི་ཆོ་འཕྲུལ་གྱིས། །ལོག་པར་ལྟ་བ་འཇོམས་པར་མཛད། །མཚན་མ་མེད་པའི་ཆོས་གསུངས་པ། །སྙིང་གའི་གནས་སུ་བསྟན་པ་སྟེ། །རྒྱལ་པོའི་ཁབ་དང་བྱ་རྒོད་སྤུངས། །གནས་ཀྱི་ཁྱད་པར་ཐེག་པ་ཆེ། །ཁྱད་པར་འཁོར་རྣམས་བསྟན་པ་ལ། །ཟབ་
ཅིང་རྒྱ་ཆེ་བསྟན་པ་ཡིན། །སྤྱི་བོ་མགྲིན་པ་སྨིན་མཚམས་དང་། །གསང་བ་ལ་སོགས་ཐམས་ཅད་དུ། །དོན་དམ་ངོ་བོ་ཉིད་ཀྱི་ཆོས། །ཐམས་ཅད་དེ་བཞིན་ཉིད་དོན་གསུངས། །གནས་གཞན་རྣམས་སུ་ཐུབ་པ་ཡིས། །ཆོས་རྣམས་ཐམས་ཅད་གསུངས་པ་ཡིན། །འཇིག་རྟེན་འཇིག་རྟེན་

འདས་པ་ཡིས། །མཛད་པ་སྣ་ཚོགས་གང་བསྟན་ནས། །སྲོག་རྩོལ་དེ་བཞིན་ཉིད་ཐིམ་ཞིང་། །ཐམས་ཅད་མངོན་དུ་གྱུར་པ་ཡི། །སྐུ་བཞི་ངོ་བོ་ཉིད་སྐུར་ཐིམ། །བདེ་ཆེན་རང་བྱུང་དྲི་མེད་པའི། །དག་པའི་ཞིང་ཁམས་རབ་མི་གནས། །རྟོག་མེད་ཡེ་ཤེས་ནམ་མཁའ་
བཞིན། །གང་དུ་མི་མཇེད་འཇིག་རྟེན་གྱི། །འདོད་ཁམས་དབང་ཕྱུག་གནས་འདིར་ནི། །དེ་བཞིན་གཤེགས་པ་སྔོན་བྱུང་བ། །དཔག་མེད་བསྐལ་པ་འདས་པའི་དུས། །ཐུབ་པ་ཆེན་པོ་མར་མེ་མཛད། །ང་ནི་བྲམ་ཟེར་གྱུར་པ་ཡིས། །སེམས་བསྐྱེད་ཞུས་ཚེ་བསྟེན་པ་ན། །མངོན་པར་
ལུང་བསྟན་ཐོབ་པར་གྱུར། །དེ་ཉིད་འཇིག་རྟེན་བཞུགས་པའི་ཚེའང་། །གསང་བའི་གནས་འདི་མ་གསུངས་ཤིང་། །དེ་ཡི་གོང་རོལ་སྔར་འདས་ཚེ། །སངས་རྒྱས་ཐུབ་ཆེན་མཆོག་ཉིད་དང་། །རིན་ཆེན་གཙུག་ཏོར་ཅན་དང་ནི། །རྣམ་པར་གཟིགས་ལ་སོགས་པས་ཀྱང་། །གསང་ཆེན་འདི་ནི་
མ་གསུངས་ཤིང་། །ལོག་པར་དད་སེལ་གསེར་ཐུབ་དང་། །རྒྱལ་བ་འོད་སྲུང་དག་གིས་ཀྱང་། །གསང་བ་འདི་དག་མ་གསུངས་ཏེ། །དེ་ཉིད་སྟོན་པའི་དོན་དུ་ནི། །གསང་ཆེན་གནས་ཀྱི་དོན་འདི་དག །དེ་དུས་སེམས་ཅན་ཐམས་ཅད་ལ། །གང་དུ་མངོན་པར་སྤྱོད་པ་དང་། །ཐུན་མོང་བསླབ་
པའི་ཚུལ་བསྟན་ཅིང་། །འདི་ཉིད་གསུངས་པར་མ་གྱུར་ཏོ། །གང་དུ་མ་འོངས་དུས་ན་ཡང་། །བྱམས་པ་ལ་སོགས་རྒྱལ་བ་ཡི། །བསྐལ་བཟང་སངས་རྒྱས་དུ་མས་ཀྱང་། །འདི་དག་ལྷ་མིའི་མངོན་སུམ་དུ། །གསང་བ་སྟོན་པར་མི་འགྱུར་རོ། །ད་ལྟར་ཕྱོགས་བཅུའི་འཇིག་རྟེན་གྱི། །འགྲོ་
དྲུག་སེམས་ཅན་སྣ་ཚོགས་ལ། །སྙིགས་མར་གྱུར་པའི་དུས་ཀྱི་ཚེ། །དབང་པོ་རྣོ་ཞིང་དོན་སྤྱོད་པས། །དུས་ལ་བབ་པར་ཤེས་པར་བྱ། །འདི་ཉིད་ཉེ་བར་འབྱུང་བ་ཡང་། །གླིང་འདི་ཉིད་ལས་གཞན་དུ་མིན། །གང་ཡང་འོག་མིན་ཞིང་ཁམས་ནི། །ཡེ་ཤེས་སྣང་བ་རྒྱས་པའི་ཕྱིར། །རྡོ་རྗེ་འཆང་
ཆེན་བཅོམ་ལྡན་གྱིས། །རྒྱུན་མི་འཆད་ཅིང་ཁྱབ་པ་དང་། །རྟག་ཅིང་འགྱུར་མེད་མཆོག་གིས་ནི། །གསང་ཆེན་འདི་ནི་ཀུན་དུ་སྟོན། །གང་ཡང་འདས་དང་མ་བྱོན་དང་། །ད་ལྟར་འབྱུང་བ་མ་ལུས་པ། །གསང་ཆེན་མཆོག་འདིས་མ་བགྲོད་པར། །བྱང་ཆུབ་ཐོབ་པར་མི་འགྱུར་ཏེ། །འདི་ནི་མཐར་

ཐུག་གནས་ཡིན་པས། །དེ་ལས་གཞན་པའི་སྤྱོད་ཡུལ་མིན། །འདི་ཉིད་གནས་པའི་ཏིང་འཛིན་ལས། །སྐད་ཅིག་གིས་ནི་སངས་རྒྱས་འཐོབ། །འདི་ཉིད་དཀྱིལ་འཁོར་འཁོར་ལོའི་རིམ། །ཕྱོགས་མཚམས་བརྒྱད་དུ་སྣང་བ་ཡི། །དུར་ཁྲོད་གནས་བརྒྱད་སྤྲུལ་པ་ལ། །ཕྱི་ནང་གནས་ཀྱི་
དབྱེ་བ་ཡིས། །ཕྱོགས་སྐྱོང་བ་དང་ཞིང་སྐྱོང་ལ། །མཛད་པ་རྟགས་ཀྱི་ཕྱག་རྒྱ་དང་། །གྲུབ་པ་རྟགས་ཀྱི་ཕྱག་རྒྱ་སྟེ། །སྙིང་པོ་ཡེ་ཤེས་ཕྱག་རྒྱ་དང་། །ཕྲིན་ལས་རོལ་པའི་ཕྱག་རྒྱའོ། །འཇིག་རྟེན་པ་རྣམས་གདུལ་བའི་ཕྱིར། །དཔལ་རྡོ་རྗེ་འཛིན་པ་ཆེན་པོས་ཡེ་ཤེས་ཀུན་དུ་རྒྱས་པས་
ཕྱག་རྒྱས་རྟགས་མཚོན་པས་བསྟན་པ་ཞེས་བྱ་བའི་ཏིང་ངེ་འཛིན་ཏོ། །མཛད་པའི་ཕྱག་རྒྱས་རྒྱས་གདབ་ཕྱིར། །ཞི་བའི་དོན་དུ་ཕྱོགས་སྐྱོང་གྱུར། །དེ་ཡི་རྟགས་ནི་འཁོར་དང་བཅས། །ཡུམ་དང་རིན་ཆེན་རྒྱན་གྱིས་སྤྲས། །གྲུབ་པའི་རྟགས་ཀྱི་རྒྱས་གདབ་ཕྱིར། །ཞིང་སྐྱོང་བརྒྱད་དུ་ཁྲོ་
བོའི་ཚུལ། །ལྗོན་པའི་ཤིང་ལ་བརྟེན་ནས་གནས། །ཞི་བའི་ཚུལ་གྱིས་རྒྱས་གདབ་ཕྱིར། །དེ་ཡི་ཞོན་པའི་གདོང་བརྙན་བྱུང་། །ཕྲིན་ལས་ཕྱག་རྒྱ་རྒྱས་གདབ་ཕྱིར། །ཚར་གཅད་རྗེས་འཛིན་ལས་རྣམས་མཛད། །རྡོ་རྗེ་དབྱུག་ཏོ་ཞགས་པ་དང་། །བེ་ཅོན་བགྲང་ཕྲེང་རལ་གྲི་དང་། །བ་
དན་ཏྲི་ཤཱུལ་འཛིན་པར་མཛད། །སྙིང་པོ་ཡེ་ཤེས་ཕྱག་རྒྱ་ཡིས། །རྒྱས་གདབ་ཕྱིར་ནི་གཞལ་ཡས་ཀྱི། །ཕྱོགས་མཚམས་བརྒྱད་དུ་བཀོད་པ་ཡིན། །རོལ་པའི་ཕྱག་རྒྱ་སྤྱོད་པའི་ཕྱིར། །དུར་ཁྲོད་བརྒྱད་དུ་གནས་པ་སྟེ། །ལྷ་དབང་བཅས་དང་མ་མོ་དང་། །ཀླུ་དང་གནོད་སྦྱིན་ཚོགས་རྣམས་
དང་། །འབྱུང་པོའི་ཚོགས་དང་དྲང་སྲོང་དང་། །ཤ་ཟ་རྣམས་དང་རིག་འཛིན་ཚོགས། །སྡེ་ཚན་བརྒྱད་ཀྱིས་བསྐོར་བ་ཡིན། །ཞིང་སྐྱོང་དྲག་པོའི་ལས་བྱེད་ཕྱིར། །ཕྱག་ན་གྲི་གུག་ཐོད་པ་བསྣམས། །ཤིན་ཏུ་འཇིགས་པ་གཏུམ་པའི་གཟུགས། །ཤིང་བརྒྱད་ནང་ནས་ལུས་ཕྱེད་ཐོན། །ལུས་
ཀྱི་ཕྱག་རྒྱ་སྦས་པ་ཡིན། །དེ་ཡང་སོ་སོའི་ཡུམ་དག་ནི། །ཤིང་གི་རྩ་བར་གནས་པ་སྟེ། །ཞལ་ཟས་སྟོབས་པའི་ཚུལ་དུ་གནས། །གླང་པོ་མ་ཧེ་ཆུ་སྲིན་དང་། །རྟ་མཆོག་ཕྱོགས་གཅིག་གནས་པ་ཡིན། །རོ་དང་རོ་ལངས་རི་དགས་དང་། །ཁྱུ་མཆོག་བཞི་ནི་མཚམས་སུ་གནས། །སྟེང་ཕྱོགས་

ཚངས་པ་ངང་བ་ཞོན། །འོག་ཕྱོགས་ས་བདག་རུས་སྦལ་ཞོན། །ལྷ་དང་ལྷ་མོར་མཚུངས་པ་སྟེ། །འདི་དག་རང་བཞིན་གྱིས་གནས་ཡིན། །ཆགས་པ་དང་ཁྲོ་བོའི་སྐུས་འཇིག་རྟེན་པ་དང་འཇིག་རྟེན་ལས་འདས་པའི་རྣམ་པར་འཕྲུལ་པ་བསྟན་པ་རྡོ་རྗེ་ཞེས་བྱ་བའི་ཏིང་ངེ་འཛིན་
ཏོ། །དེ་ནས་རྒྱལ་པོ་རྡོ་རྗེ་འཛིན། །དེ་ཉིད་ཀུན་ཏུ་སྤྲུལ་མཛད་པས། །རྡོ་རྗེ་སེམས་དཔའི་གཟུགས་སྦས་ནས། །ཞི་བའི་སྐུས་ནི་མི་འདུལ་བའི། །སེམས་ཅན་གདུག་པ་གདུལ་བའི་ཕྱིར། །རང་རིག་ཡེ་ཤེས་བྱང་ཆུབ་སེམས། །དྲག་པོ་ཁྲོ་བོའི་སྐུར་བསྟན་པས། །ཁྲོ་བོ་ཞེས་ནི་རྣམ་
པར་བརྗོད། །གང་དུ་རྗེས་སུ་འཛིན་པ་ནི། །རྣམ་པར་བསྒྱུར་ཏེ་ཞི་བས་ན། །སླར་ཡང་ཞི་བ་དེ་བཞིན་གཤེགས། ཆོས་ཉིད་མཉམ་པར་འབྱུང་བའོ། །འདི་དག་གསང་བ་རྡོ་རྗེ་འཛིན། །སེམས་ཅན་དོན་དུ་ཐབས་སྟོན་མཛད། །ཤཱཀྱ་ཐུབ་པ་བཅོམ་ལྡན་འདས། །བདག་ཉིད་ཆེན་པོའི་
བྱིན་བརླབས་ལས། །རྔ་བོ་ཆེ་དང་གཎྜཱི་དང་། །ཆོས་ཀྱི་དུང་ལས་གྲགས་པ་དང་། །སྣ་ཚོགས་རོལ་མོའི་སྒྲ་ལས་ནི། །གང་ཞིག་དམ་ཆོས་སྒྲ་བྱུང་བ། །འཕགས་པ་ཉན་ཐོས་རྣམས་དང་ནི། །བྱང་ཆུབ་སེམས་དཔའི་ཚོགས་ཀྱིས་ཀྱང་། །ཆོས་ཀྱི་འགྲོ་བ་གང་ཡིན་དང་། །དུས་དེར་བརྒྱུད་
པའི་ཆོས་བསྟན་པ། །དེ་སྙེད་བདེ་གཤེགས་རྒྱལ་བ་ཡི། །དངོས་ཀྱི་བྱིན་བརླབ་རིག་པར་བྱ། །སྟོན་པའི་ཞལ་གྱི་དཀྱིལ་འཁོར་ནི། །མི་གནས་མ་འོངས་དུས་ཀྱི་ཚེ། །དོན་བྱེད་སྟོན་པ་འབྱུང་བ་ནི། །བླ་མེད་བཀའ་ཡི་དགོངས་པ་དག །ཡང་དག་ངེས་པར་བཀྲོལ་ནས་ཀྱང་། །གང་དུ་
དམ་པའི་ཆོས་སྒྲ་ཡིས། །འགྲོ་བ་སྨིན་པར་བྱེད་པ་ནི། །དེ་དུས་ང་ཉིད་དེར་བསྟན་པས། །བསྟན་བཅོས་ཤིན་ཏུ་རྒྱས་པར་འགྱུར། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་
མཉམ་པ་ཉིད་རྣམ་པར་རྒྱལ་བ་ལས་དེ་བཞིན་གཤེགས་པའི་གནས་གསང་བ་ཆེན་པོ་ཐུན་མོང་མ་ཡིན་པ་ཞེས་བྱ་བའི་ལེའུ་སྟེ་བཞི་བཅུ་བཞི་པའོ།། །།གསང་བ་ཐུན་མོང་མ་ཡིན་པ་རྣལ་འབྱོར་ཆེན་པོའི་རྒྱུད་ཀྱི་བརྟག་པ་བཞི་པ་ལས་རྡོ་རྗེ་དཔལ་མཆོག་ཆེན་པོ་གསང་

བའི་དོན་གྱི་རྒྱལ་པོའོ། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་སྐྱེ་བོ་འོད་ཆེན་པོ། །འདོད་དང་ཐར་པ་རྡོ་རྗེ་འཛིན། །ཡེ་ཤེས་གསང་བ་བཀའ་སྩལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུས་པར་གྱུར་ནས་བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་གིས་གསོལ་བ་བཏབ་པ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་པོ་ཆེའི་ཡེ་ཤེས་ཀྱི་ནོར་བུ་ཆེན་པོ་དུ་མའི་ཚོགས་ཀྱིས་ཡང་དག་པར་མཆོད་པར་
བྱས་སོ། །མཆོད་པར་བྱས་ནས་ཀྱང་སངས་རྒྱས་ཐམས་ཅད་ཀྱི་མདུན་དུ་བདར་ཞིང་འདུག་སྟེ་གསང་ཆེན་གྱི་དོན་ལ་ཕྱོགས་གཅིག་ཏུ་ཞུགས་ཏེ་ཡོངས་སུ་སྤྱོད་པར་གྱུར་ཏོ། །དེ་ལ་འདི་ནི་གསང་ཆེན་གྱི། །སྐུ་གསུམ་བླ་མེད་ཕྱག་རྒྱ་ཆེ། །དུས་གསུམ་རྒྱལ་བ་མ་ལུས་པའི། །ཆོས་རྣམས་འདུས་པའི་
མཆོག་ཡིན་ཏེ། །འདི་ནི་ཁྱད་པར་དུས་འབྱུང་བའི། །དམ་ཚིག་མཆོག་ཏུ་བརྟག་པ་ཡིན། །དེ་ནས་བཅོམ་ལྡན་འདས་དེ་བཞིན་གཤེགས་པ་གཟུགས་བཟང་པོ་སངས་རྒྱས་ཐམས་ཅད་ཀྱི་ཡེ་ཤེས་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
དཔལ་ལྡན་སངས་རྒྱས་སྐུས་ཁྱབ་པ། །སྐུ་ཡི་རྫུ་འཕྲུལ་མཐའ་ཡས་པ། །ཇི་སྙེད་སྐུ་ཡི་རྣམ་པ་མངའ། །གསང་བ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་པོ་དོན་གྲུབ་སངས་རྒྱས་ཐམས་ཅད་ཀྱི་མོས་པ་སྣ་ཚོགས་མཁྱེན་པའི་སྟོབས་ཀྱི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་པའི་གསུང་གི་གནས། །གསུང་གཅིག་གནས་ལས་གྱུར་མེད་ཀྱི། །མོས་པ་དུ་མས་སོ་སོར་ཐོས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་
སེང་གེའི་སྡེ་སངས་རྒྱས་ཐམས་ཅད་ཀྱི་བསམ་གཏན་དང་ཏིང་ངེ་འཛིན་མཁྱེན་པའི་སྟོབས་རྡོ་རྗེ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་པའི་ཐུགས་དག་ལ། །ཡེ་ཤེས་སྣ་ཚོགས་ཏིང་འཛིན་ལས། །མི་འགྱུར་ནམ་མཁའི་

ངང་བཞུགས་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་བུའི་ལྷ་སངས་རྒྱས་ཐམས་ཅད་ཀྱི་བསམ་གྱིས་མི་ཁྱབ་པའི་སྙོམས་པར་འཇུག་པ་མཁྱེན་པའི་སྟོབས་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསྐལ་པ་གང་གཱའི་བྱེ་སྙེད་དུ། །སེམས་ཀྱི་རྒྱུན་ནི་མི་འགག་ཕྱིར། །ཏིང་འཛིན་བསམ་གྱིས་མི་ཁྱབ་པའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པ་སངས་རྒྱས་ཐམས་
ཅད་ཀྱི་ཀུན་ནས་ཉོན་མོངས་པ་དང་རྣམ་པར་བྱང་བ་མཁྱེན་པའི་སྟོབས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱེ་བ་ཕྲག་ནི་བརྒྱ་ཡི་བར། །ཐུབ་པའི་ཞིང་ཁམས་བདག་པོ་ནི། །ཀུན་དུ་བཟང་པོའི་སྤྱོད་ལས་བྱུང་། །བྱང་ཆུབ་ཚུལ་
འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་བ་སངས་རྒྱས་ཐམས་ཅད་ཀྱི་ལས་དང་ལས་ཀྱི་རྣམ་པར་སྨིན་པ་མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྒྱུ་དང་འབྲས་བུ་ཡི། །སྣང་བ་མི་འགག་
སྟོང་པ་ཉིད། །དེ་ཉིད་རང་བཞིན་གྱིས་དག་བརྗོད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱ་ཆེན་སྙིང་པོ་སངས་རྒྱས་ཐམས་ཅད་ཀྱི་ཐམས་ཅད་དུ་སོན་པའི་ལམ་མཁྱེན་པའི་སྟོབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །དཔེར་ན་ནམ་མཁའི་ཁམས་འདི་ནི། །ཐམས་ཅད་རྗེས་སུ་སོག་གྱུར་ཀྱང་། །སེམས་པ་མི་ལྡན་དེ་བཞིན་ཏེ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་འོད་ཟེར་སངས་རྒྱས་ཐམས་ཅད་ཀྱི་སྔོན་གྱི་
གནས་མ་ལུས་པར་མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་སེམས་ཅན་ཁམས་མཐའ་ཡས། །དེ་ཡི་ཆོས་ཉིད་རྗེས་འགྲོ་བ། །རྟོག་པ་མི་མངའ་དེ་ཉིད་དོ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །

དེ་ནས་དེ་བཞིན་གཤེགས་པ་བཟང་པོ་ཡོན་ཏན་སངས་རྒྱས་ཐམས་ཅད་ཀྱི་འཆི་འཕོ་བ་དང་སྐྱེ་བ་མཁྱེན་པའི་སྟོབས་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་རྒྱལ་བའི་སྐུ་ཉིད་ཀྱང་། །སྤྲོས་མེད་དེ་བཞིན་ཉིད་དག་
པའི། །རྗེས་འགྲོ་རྟོག་པ་མེད་པ་ཉིད། །སྤྲོས་པ་མེད་པའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྨྲ་འདོན་དཔལ་སངས་རྒྱས་ཐམས་ཅད་ཀྱི་ཟག་པ་ཟད་པ་མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཡོངས་སུ་དག་པའི་སྣང་བ་གང་། །མཉམ་པ་ཉིད་ཀྱི་ངང་ལས་ནི། །སྤང་བླང་དབྲི་བསྣན་མེད་པར་གྲོལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲོན་མེའི་རྒྱལ་པོ་སངས་རྒྱས་ཐམས་ཅད་ཀྱི་སྟོབས་བཅུ་ཡོངས་སུ་དག་པ་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་སྐུ་ཡེ་ཤེས་རྒྱ་མཚོ་ལས། །ཆུ་རླུང་ནམ་མཁར་དག་པ་གང་། །གཟུགས་སྐུའི་རྟོགས་པ་མཁའ་ལ་གནས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་
གཤེགས་པ་ཡེ་ཤེས་བརྩེགས་སངས་རྒྱས་ཐམས་ཅད་ཀྱི་ཤའི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོགས་པ་མེད་པ་རྡོ་རྗེ་ཡི། །ཕ་ལམ་ལྟར་ནི་ཕྲིན་ལས་དག །སྟོབས་བཟངས་ཀྱིས་ནི་ཡུལ་དུ་གྱུར། །སྣང་མེད་རྣལ་འབྱོར་པ་
ཡི་གནས། །ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་མཆོག་སངས་རྒྱས་ཐམས་ཅད་ཀྱི་ལྷའི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདོད་པ་དང་ནི་གཟུགས་དག་ནི། །ལྷ་ཡི་སྤྱོད་ཡུལ་གཙང་མའི་གནས། །འཇིག་རྟེན་
ཁམས་ཀུན་སྣང་བར་བྱེད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སའི་བདག་པོ་སངས་རྒྱས་ཐམས་ཅད་ཀྱི་ཆོས་ཀྱི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐམས་ཅད་མཁྱེན་པའི་

ཡེ་ཤེས་ལས། །དབྱེར་མེད་བདེན་པ་གཉིས་དག་པ། །རྣམ་པར་འབྱེད་པའི་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བརྙེས་སངས་རྒྱས་ཐམས་ཅད་ཀྱི་བྱང་ཆུབ་པའི་སྤྱན་རྡོ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་རྟོག་པ་མི་མངའ་བ། །ཆོས་ཀྱི་གཏེར་དང་ལྡན་པ་ལས། །རྗེས་སུ་དྲན་པའི་སྤྱན་གྱིས་ནི། །དུས་གསུམ་ཤེས་བྱ་མི་གཟིགས་མེད། །ཅེས་གསུངས་སོ། །དེ་ནས་དེ་བཞིན་གཤེགས་པ་གཙུག་གི་གསེར་སངས་རྒྱས་ཐམས་
ཅད་ཀྱི་ཡེ་ཤེས་ཀྱི་སྤྱན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུས་གསུམ་མཉམ་ཉིད་རྣམ་དག་པས། །དུས་ཀྱི་འདུ་ཤེས་འཇུག་མེད་པ། །སྐད་ཅིག་ཡེ་ཤེས་སྤྱོད་ཡུལ་ནི། །སྣང་བ་མེད་པའི་ཚུལ་བསྟན་པའོ། །ཞེས་གསུངས་སོ། །
དེ་ནས་དེ་བཞིན་གཤེགས་པ་སྒྲ་གཅན་སངས་རྒྱས་ཐམས་ཅད་ཀྱི་སྤྱན་ལྔ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གཟིགས་པའི་ཡུལ་མེད་པས། །བློ་སྣང་བཏགས་པའི་ཚུལ་མ་གྲུབ། །དེ་སྣང་གདུལ་བྱའི་དོན་
སྤྱོད་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་དཀའ་སངས་རྒྱས་ཐམས་ཅད་ཀྱི་ཕྱིར་མི་ལྡོག་པའི་ལམ་བསྟན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་གཞལ་དུ་
མེད་པ་ཉིད། །མི་གནས་རྣམ་པར་མི་གནས་པས། །ནམ་མཁའ་ལྟ་བུར་མི་རྟོག་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་གསལ་སངས་རྒྱས་ཐམས་ཅད་ཀྱི་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །འདུ་ཤེས་དང་ནི་སེམས་པ་དང་། །ལྟ་བ་ཕྱིན་ཅི་ལོག་སྤངས་ནས། །ཡེ་ཤེས་མངོན་པར་བྱང་ཆུབ་པ། །གསང་བ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བའི་འོད་ཟེར་སངས་རྒྱས་ཐམས་ཅད་ཀྱི་མི་གནས་

པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ། །བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་ཟག་པ་མེད་པའི་དབྱིངས། །རང་བྱུང་བསམ་གྱིས་མི་ཁྱབ་པ། །ནམ་མཁའི་ཁམས་ལྟར་རྟེན་མེད་པས། །དམིགས་མེད་ཡེ་ཤེས་ཚུལ་བསྟན་པའོ། །ཞེས་གསུངས་སོ། །
དེ་ནས་གསང་བ་འཛིན་པ་ལ། །མཆོད་པ་གནས་ཀྱི་དོན་འདི་གསུངས། །མེ་ཏོག་རིགས་ནི་ལྷ་མོའི་ཆ། །དེ་ཉིད་ཡེ་ཤེས་དབྱིངས་བསྟན་པའོ། །མཁས་པས་ཨུཏྤལ་དག་ནི། །འབྱུང་བ་ལྔ་ཡི་རྣམ་པ་སྟེ། །པདྨ་རྣམ་པ་ལྔ་ཉིད་ནི། །འདོད་ཡོན་ལྔ་ཡི་བྱེ་བྲག་སྟེ། །ཛཱ་ཏི་རྣམ་
གསུམ་ཞེས་བྱ་བ། །སྐུ་གསུང་ཐུགས་ཀྱི་ལྷ་མོ་སྟེ། །ཀར་ནི་ཀ་ར་ཆུ་ཡི་ལྷ། །མ་ལི་ཀ་ནི་མེ་ཡི་ལྷ། །ཡུ་ཏི་ཀ་ནི་ས་ཡི་ལྷ། །ཀ་ར་བཱི་ར་རླུང་གི་ལྷ། །ལྷ་མོ་འདོད་པའི་དབང་ཕྱུག་སྟེ། །གཟུགས་དང་སྒྲ་དང་དྲི་རྡོ་རྗེ། །རོ་དང་རེག་བྱ་རྡོ་རྗེ་མ། །སྤྱན་དང་མཱ་མ་ཀཱི་དང་ནི། །གོས་
དཀར་མོ་དང་སྒྲོལ་མ་སྟེ། །ལྷ་མོ་དགུ་ཡི་རོལ་པ་གང་། །གསང་བ་ལྷ་མོ་ཡེ་ཤེས་མཆོད། །མེ་ཏོག་ཉི་ཤུ་རྩ་ལྔ་ཡི། །རྣམ་པ་གསལ་བ་བསྟན་པའོ། །སྣ་མའི་མེ་ཏོག་པདྨ་དང་། །ཏ་མ་ལ་དང་ཙམ་པ་ཀ། །ཀུ་མུད་དང་ནཱ་ག་གེ་སར། །ན་བ་མ་ལི་དམ་ན། པུནད་རི་ཀ་ད་
མ་ན། །མནྡཱ་ར་བ་པྲི་ཡང་ཀུ། །སེ་ཕ་ལི་ཀ་སུ་ན་ཀ །བིལ་བའི་མེ་ཏོག་ཀ་ཐ་ར། །ས་ལི་ཀི་ལ་ཀུ་ཛ་ཏ། །ཨ་སན་ཀེ་ཏ་ཤ་འབྲས་བུ། །ཁརྫུ་རི་ཀ་བཀྐུ་ལ། །རག་ཀུ་ཏ་དང་ཨ་ཤོ་ཀ །ཀར་ཀུ་ཊོ་ཌ་པུན་དྷ་སྟེ། །མེ་ཏོག་ཇི་བཞིན་བདུག་སྤོས་དང་། །ཞལ་ཟས་བྱེ་བྲག་ཤེས་པར་བྱ། །
དཔལ་དེ་བཞིན་གཤེགས་པ་ཐམས་ཅད་ཀྱི་གསང་བ་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་བའི་ལྷ་མོའི་མཆོད་པ་བསྟན་པའི་ལེའུ་སྟེ་བཞི་བཅུ་ལྔ་པའོ།། །།དེ་ནས་དེ་བཞིན་
གཤེགས་པ་གསེར་གྱི་འོད་སངས་རྒྱས་ཐམས་ཅད་ཀྱི་ཆོས་ཐམས་ཅད་ལ་འཇུག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་སྐུ་ངོ་བོ་ཉིད་ཀྱིས་ནི། །སྤྲོས་པ་མེད་ཅིང་མཚན་ཉིད་མེད། །རྟོག་བྲལ་བྱང་ཆུབ་སེམས་ཀྱི་ངང་། །དེ་ཉིད་ཚུལ་འདི་

བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་བྱིན་དཔལ་སངས་རྒྱས་ཐམས་ཅད་ཀྱི་ཡི་གེ་རྣམ་པར་དག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་མཚན་ཉིད་རྣམ་བྲལ་བས། །
དེ་ཕྱིར་ཉོན་མོངས་མེད་ཅེས་བཤད། །རྟོག་པ་སྣ་ཚོགས་དག་པས་ན། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་ཡོན་ཏན་དབང་པོ་སངས་རྒྱས་ཐམས་ཅད་ཀྱི་འོད་ཟེར་གྱི་སྙིང་པོ་ཀུན་དུ་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་དབྱིངས་ཚད་མེད་སྟོང་ཉིད་པས། །སངས་རྒྱས་སྐུ་ཡང་དེ་རྗེས་འགྲོ། །ཡེ་ཤེས་ལུས་སུ་ཡང་དག་བཞུགས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་གདུགས་ཚད་
མེད་པ་སངས་རྒྱས་ཐམས་ཅད་ཀྱི་ཆོས་རྡོ་རྗེའི་རྟོགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བའི་གསུང་ནི་ཆོས་དབྱིངས་ཀྱི། །ནམ་མཁའི་གནས་དང་མཚུངས་པར་ཡང་། །རྡོ་རྗེའི་གསུང་དུ་སྟོན་པ་པོས། །བྱང་ཆུབ་
ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་ལག་སངས་རྒྱས་ཐམས་ཅད་ཀྱི་ཡེ་ཤེས་རོལ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བཞིན་གྱིས་ནི་དག་པའི་བདག །བདེ་གཤེགས་
ཐུགས་ནི་རྗེས་འགྲོ་བྲལ། །རྡོ་རྗེ་ཐུགས་ཏེ་མི་བཟད་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆགས་པ་མེད་པ་སངས་རྒྱས་ཐམས་ཅད་ཀྱི་རྟ་བདུན་དཔལ་རྡོ་རྗེའི་ཟེར་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཕྱི་དང་ནང་དུ་རྟོག་མེད་པའི། །དབུས་ན་ཡེ་ཤེས་མི་ཤིགས་པ། །གསང་བ་རོལ་པར་ཡང་དག་འབྱུང་། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་གྱ་ནོམ་པསངས་རྒྱས་ཐམས་ཅད་ཀྱི་ཟླ་བའི་སྙིང་

པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉེར་འགྲོ་ཉེར་སྤྱོད་མི་གནས་པ། །ཁམས་གསུམ་བསྐྱེད་དང་སྡུད་བྲལ་བའི། །བྱང་ཆུབ་མཆོག་ཏུ་སྟོན་པ་པོ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་
དེ་བཞིན་གཤེགས་པ་བློ་གྲོས་ཕྲ་བ་སངས་རྒྱས་ཐམས་ཅད་ཀྱི་རྟེན་པའི་གླིང་རྡོ་རྗེ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁྲུལ་པ་དག་ཅིང་དྲི་མ་སྤངས། །སྣ་ཚོགས་སྤྱོད་པ་ལས་གྲོལ་ཞིང་། །ཕྱི་རོལ་རྣམ་རྟོག་སྤངས་པ་ཡི། །
བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་མི་ཟད་པ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་འབྲུག་སྒྲའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སོ་སོར་སྣང་བ་དུ་མ་དང་། །གོང་དུ་གཅིག་
པའི་དངོས་གང་ཡིན། །དེ་ཉིད་ཡོངས་སུ་བསྡུས་པས་ན། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བརྩི་སྨན་རྒྱལ་པོ་སངས་རྒྱས་ཐམས་ཅད་ཀྱི་པདྨའི་རྩ་བའི་སྣལ་མ་ལྟ་བུར་ཕྲ་བ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །ཚོགས་དྲུག་སྣང་བ་མ་འགགས་པ། །སེམས་དང་ཡིད་དང་རྣམ་ཤེས་ལས། །སྙིང་གི་ཆུ་སྐྱེས་སད་བྱེད་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བའི་ཏོག་སངས་རྒྱས་ཐམས་ཅད་ཀྱི་མི་གཡོ་
བའི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་མི་ཆད་པའི་སྦྱོར་བ་ཡིས། །དལ་ཞིང་དལ་བའི་གནས་ལས་སྐྱེས། །ཞི་བ་གཡོ་མེད་ཉིད་དུ་འཇུག །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཀྱི་
མཛོད་སངས་རྒྱས་ཐམས་ཅད་ཀྱི་ལྷའི་མིག་གི་མངོན་པར་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་ཕྱེད་ཕྱེ་བའི་དངོས་པོ་ཉིད། །གཡེང་བ་བྲལ་བའི་བསམ་གཏན་ལ། །མཆོག་ཏུ་གྲུབ་པ་མཐོང་བྱེད་པ། །བྱང་ཆུབ་ཚུལ་འདི་བསྟན་

པའོ། ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རྒྱལ་པོ་སངས་རྒྱས་ཐམས་ཅད་ཀྱི་ལྷའི་རྣ་བའི་མངོན་པར་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་བརྩེ་བ་ཆེན་པོ་ཡིས། །གཅིག་
དང་དུ་མར་མི་གནས་པར། །སྒྲ་བརྙན་ལྟ་བུར་སྟོན་པར་མཛད། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འཇིགས་མཛད་སངས་རྒྱས་ཐམས་ཅད་ཀྱི་གཞན་གྱི་སེམས་ཤེས་པའི་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་ཁམས་ཀྱི་སེམས་ཅད་རྣམས། །བསྐལ་པ་གང་གཱའི་བྱེ་མ་གནས། །དེ་ཡི་རྒྱུ་དང་གནས་ཤེས་པའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆུ་བོ་སྤོང་སངས་རྒྱས་
ཐམས་ཅད་ཀྱི་འཆི་འཕོ་བ་དང་སྐྱེ་བ་ཤེས་པའི་མངོན་པར་ཤེས་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཡུལ་དང་ཡུལ་རྣམས་ཀྱི། །དབྱེ་བ་ཤེས་པའི་ཡེ་ཤེས་མཐའ། །སྣ་ཚོགས་རིགས་ཀྱི་རྒྱུ་
ངེས་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐོགས་མེད་གྲགས་སངས་རྒྱས་ཐམས་ཅད་ཀྱི་མཁྱེན་པ་སྔོན་གྱི་གནས་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་
ཀྱི་གཏན་ཚིགས་རགས་ཕྲ་དང་། །ཕྲ་བ་མ་ལུས་པ་ཡི་གཞི། །ཞག་གསུམ་ལོན་པ་བཞིན་ཤེས་ཕྱིར། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བདེན་པའི་ཕུང་བོ་སངས་རྒྱས་ཐམས་ཅད་ཀྱི་ཟག་པ་ཟད་པའི་མངོན་པར་ཤེས་པ་རྡོ་རྗེ་
སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་པའི་རྒྱུན་ནི་རྣམ་བཅད་ཅིང་། །སྤོང་བ་དག་པའི་ཚུལ་གནས་པ། །སྤང་དུ་མེད་པའི་ངང་དུ་གྲོལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་

གཤེགས་པ་དབྱངས་སྙན་པ་སངས་རྒྱས་ཐམས་ཅད་ཀྱི་མངོན་པར་ཤེས་པ་དྲུག་དག་པའི་རྡོ་རྗེའི་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་མཐུན་གོམས་པའི་དབང་གིས་ནི། །དེ་ཡི་འབྲས་བུ་འགྲུབ་པར་བྱེད། །དེ་
ཡི་རྩ་བ་མ་སྐྱེས་ཕྱིར། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རི་དབང་མཚུངས་པ་སངས་རྒྱས་ཐམས་ཅད་ཀྱི་རྙོག་པ་སེལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པ་ཀུན་
དང་ཁམས་དང་ནི། །སྐྱེ་བ་ལས་ནི་ཡོངས་གྲོལ་བས། །བྲལ་བའི་འབྲས་བུ་དག་པ་ཉིད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་བརྩེགས་སངས་རྒྱས་ཐམས་ཅད་ཀྱི་རྣམ་པར་དག་པ་དང་རྟགས་རྣམ་པར་དག་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབང་དུ་གྱུར་པས་དངོས་པོ་ལས། །ལྡོག་པ་མེད་པའི་འབྲས་བུ་གང་། །ཐོབ་པ་རྣམ་པར་དག་པའི་གནས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པའི་ཚོགས། །
ནམ་མཁའི་ཁམས་ཀྱི་དབུས་གནས་པར། །རྟེན་དང་བརྟེན་པར་བཅས་པ་ཡི། །དཀྱིལ་འཁོར་ཕོ་བྲང་ལས་རྫོགས་པ། །གང་དུ་དབུས་སུ་ལེགས་གནས་པ། །སྙིང་པོར་གྱུར་པ་གཙོ་བོ་སྟེ། །གཞན་རྣམས་ལེན་ཅིང་འཛིན་པར་བརྗོད། །རྫུས་ཏེ་སྐྱེས་དང་མངལ་ལས་སྐྱེས། །
སྒོ་ང་ལས་བྱུང་དྲོད་གཤེར་སྐྱེས། །འདི་དག་དག་པའི་ལྷར་གྱུར་པས། །དཀྱིལ་འཁོར་གྲོང་ཁྱེར་དེ་དང་མཚུངས། །གནས་མེད་ཡེ་ཤེས་ཚུལ་བསྟན་པ། །རྡོ་རྗེ་རྣམ་པ་བཞི་དག་དང་། །ཆོ་ག་གསུམ་དང་མངོན་པར་ནི། །བྱང་ཆུབ་རྣམ་པ་ལྔར་གསུངས་པ། །གལ་ཏེ་སྐད་ཅིག་
དྲན་རྫོགས་གྱུར། །ཐམས་ཅད་རིགས་ཀྱི་དབྱེ་བ་ཡིས། །རྒྱས་པའི་དཀྱིལ་འཁོར་ཆེན་པོར་བསྟན། །རིགས་ནི་དབྱེ་དང་བསྡུ་བ་ཡིས། །བྱེ་བྲག་མཁས་པས་ཤེས་པར་བྱ། །འབྱུང་བ་ལྔ་ཉིད་སངས་རྒྱས་ལྔར། །མི་ཡི་ལུས་ནི་བརྟག་བྱ་སྟེ། །དངོས་དེ་ངེས་པར་བསྒོམས་

པ་ཡིས། །རང་སེམས་མཐུ་ཡིས་སངས་རྒྱས་འགྱུར། །ཕྱི་རོལ་འགྲོ་བ་མི་མཛེས་པ། །སློབ་པའི་འགྲོ་བའི་སླར་ལྡོག་ཡིན། །མི་སློབ་པ་ཡང་མ་ལུས་ཡིན། །བདེ་གཤེགས་གསུམ་དུ་རྣམ་པར་གཤེགས། །གཞན་དུ་རྣམ་པར་འཁྲུལ་འགྱུར་བས། །བླ་
མའི་བཀའ་ལས་ལེགས་པར་བླང་། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་སངས་རྒྱས་ཐམས་ཅད་ཀྱི་ཡེ་ཤེས་དྲི་མ་མེད་པ་གནས་པའི་ལེའུ་སྟེ་
བཞི་བཅུ་དྲུག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐར་པ་སྦྱིན་སངས་རྒྱས་ཐམས་ཅད་ཀྱི་ཐུགས་རྗེའི་ཁྱུ་མཆོག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ས་བོན་ལས་ནི་མྱུ་གུ་བཞིན། །བསྐྱེད་པའི་
ཚུལ་བྱུང་རྣམ་དག་པ། །ཡེ་ཤེས་དེ་ཉིད་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་མཛད་སངས་རྒྱས་ཐམས་ཅད་ཀྱི་དགའ་བ་དག་པ་ཚད་ཚད་མེད་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །ཐོབ་མེད་ཐོབ་པ་སྟོང་ཉིད་སྐུ། །བྱང་ཆུབ་དང་སེམས་གཅིག་ཏུ་བཤད། །དག་པས་རྟོག་པ་དག་པར་གྱུར། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བའི་སྐུ་སངས་རྒྱས་ཐམས་ཅད་ཀྱི་བཏང་སྙོམས་
ཆེན་པོའི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁྱབ་པའི་སྐུ་ཡི་ཕྲིན་ལས་དང་། །འཇམ་དབྱངས་གསུང་གི་དབྱངས་གང་དང་། །སྐྱེ་མེད་རོ་གཅིག་ཡེ་ཤེས་ཐུགས། །དག་པ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་
པ་ཡིད་དུ་འོང་པའི་གསུང་དབྱངས་ཐམས་ཅད་ཀྱི་གནས་རྡོ་རྗེ་རྒྱལ་པོ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་གསུམ་ཞིང་ཁམས་སྣོད་བཅུད་ཀུན། །མ་ལུས་སངས་རྒྱས་ཉིད་ཀྱི་དང་། །སྙིང་པོ་ཆོས་ཀྱི་མངོན་བྱུང་བ། །བྱང་ཆུབ་ཚུལ་འདི་བསྟན་

པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བློ་དབྱངས་དཔལ་བྱང་ཆུབ་དོན་སྟོན་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བས་མཐའ་དབེན་པ་ནགས་ཚལ་དུ། །གཅིག་པུ་རི་དགས་ཀུན་གནས་པས། །བསམ་གཏན་
རྣམ་ཐར་སྒོ་གསུམ་གྱི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆུ་ཟླ་སངས་རྒྱས་ཐམས་ཅད་ཀྱི་རྒྱུན་གྱི་གནས་པ་རྡོ་རྗེ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བོ་ཀུན་གྱི་
མཆོད་པའི་གནས། །དྲང་སྲོང་དྲི་མེད་སྦྱང་མངའ་བ། །བག་ཡོད་པ་ནི་རྟེན་གནས་ཡིན། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འགྲོ་བས་མཆོད་པ་སངས་རྒྱས་ཐམས་ཅད་ཀྱི་བསྟན་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །བཀུར་སྟི་རིམ་གྲོའི་གནས་གྱུར་པ། །དྲན་པ་མི་བརྗེད་གནས་བསྟན་པ། །ཐུབ་པ་བློ་གྲོས་བཟང་པོ་སྟེ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་ལོགས་སངས་རྒྱས་ཐམས་ཅད་ཀྱི་དྲི་མ་མེད་
པའི་རྣམ་པར་གྲོལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཆོས་ཉིད་དག་པ་ལས། །བསྒྲིབས་པ་མེད་ཅིང་འབད་མེད་པ། །རེ་དོགས་རྣམ་པར་བྲལ་བ་ཡི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་
གཤེགས་པ་ཆོས་ཀྱི་མཐུ་རྩལ་སངས་རྒྱས་ཐམས་ཅད་ཀྱི་འབྱུང་པའི་གདོན་ཐམས་ཅད་དག་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མཁའ་ལ་རྒྱུ་བའི་གདོན་གྱི་རིགས། །ཐམས་ཅད་ཚད་མེད་ཐུགས་རྗེའི་ཆུ་རྒྱུན་
གྱིས། ཚིམ་པར་བྱེད་པ་བྱང་ཆུབ་སེམས་དཔའ་ཆེ། །དེ་ཉིད་བླ་མེད་བྱང་ཆུབ་སེམས་སུ་བརྗོད། །ཅེས་གསུངས་སོ། །དེ་ནས་དེ་བཞིན་གཤེགས་པ་སྐལ་བ་བཟང་པོ་སངས་རྒྱས་ཐམས་ཅད་ཀྱི་བྱིན་གྱིས་བརླབས་པའི་ཆོ་འཕྲུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་

སེམས་འདི་གསུངས་སོ། །སྐུ་དང་གསུང་དང་ཐུགས་ཀྱིས་ནི། །བྱིན་བརླབས་ཡེ་ཤེས་རྒྱ་མཚོ་ཡི། མཚུངས་མེད་བདེ་བར་སྐྱུར་བ་སྟེ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མི་འཁྲུགས་པའི་མདོག་སངས་རྒྱས་ཐམས་
ཅད་ཀྱི་དབང་བསྐུར་བའི་ཆོ་འཕྲུལ་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔལ་ལྡན་ཕྱོགས་བཅུའི་རྒྱལ་བ་ཡིས། །སྲས་པོ་གཅིག་པར་དབང་བསྐུར་བ། །ཚིམ་བྱེད་ཡེ་ཤེས་མཆོག་དབང་པོ། །བྱང་ཆུབ་ཚུལ་འདི་བསྟན་པའོ། །
ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་རྒྱལ་པོ་སངས་རྒྱས་ཐམས་ཅད་ཀྱི་ཀུན་དུ་བརྗོད་པའི་ཆོ་འཕྲུལ་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་ཆོས་ཀྱི་སྒྲ་འབྱུང་བའི། །སིལ་སྙན་བྲག་ཅའི་སྒྲ་མཚུངས་
པའི། །རྒྱུན་ཆད་མེད་པར་རབ་སྟོན་པ། །དེ་ཉིད་དོན་དམ་ཆོས་རྒྱུན་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྟོགས་མཛད་སངས་རྒྱས་ཐམས་ཅད་ཀྱི་རྫུ་འཕྲུལ་གྱི་ཆོ་འཕྲུལ་བསྟན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སྐུ་ཡི་རོལ་པ་མི་ཟད་པ། །ཕྱོགས་བཅུ་ནམ་མཁའི་ཁམས་ཁྱབ་པར། །རྡོ་རྗེ་རྫུ་འཕྲུལ་མཆོག་གིས་འགེངས། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱན་ལེགས་སངས་རྒྱས་ཐམས་ཅད་ཀྱིས་བདུད་སྤ་བཀོང་
བའི་ཆོ་འཕྲུལ་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་དང་ནག་པོའི་ཕྱོགས་གྱུར་ལ། །སྐྲག་པར་བྱེད་པས་ཚར་གཅོད་པའི། །ཆོ་འཕྲུལ་བཅུ་དྲུག་བསྟན་པ་གང་། །དེ་ཉིད་བྱང་ཆུབ་ཚུལ་བསྟན་པའོ། །ཞེས་གསུངས་སོ། །དེ་ནས་
དེ་བཞིན་གཤེགས་པ་དོན་ལ་གནས་པའི་བློ་མངའ་བ་སངས་རྒྱས་ཐམས་ཅད་ཀྱི་ཆོས་སོ་སོ་ཡང་དག་པར་རིག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མདོ་ཡི་སྡེ་ལ་སོགས། །བཅུ་གཉིས་ཚུལ་དང་ལྡན་པ་བཞི། །བསླབ་པ་གསུམ་གྱི་

དབྱེ་བ་ཡིས། །ཆོས་ཀྱི་དེ་ཉིད་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་བའི་འོད་ཟེར་སངས་རྒྱས་ཐམས་ཅད་ཀྱི་དོན་སོ་སོར་ཡང་དག་པར་རིག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡུལ་སྣང་སེམས་ཀྱི་
ལྡོག་པ་དང་། །ཆོས་རྣམས་ངོ་བོ་ཉིད་ཤེས་ན། །དག་པའི་ས་ལ་གནས་པར་འགྱུར། །དེ་ཉིད་བྱང་ཆུབ་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་ཀྱི་གཟི་བརྗིད་སངས་རྒྱས་ཐམས་ཅད་ཀྱི་ངེས་པའི་ཚིག་སོ་སོར་ཡང་དག་པར་རིག་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡི་གེའི་གནས་དང་རྐྱེན་དག་དང་། །འབྱུང་བའི་ཚུལ་དང་སྡེ་ཚན་གྱི། །རྣམ་དབྱེ་མཁས་པས་དཔྱད་པར་བྱ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་ཏུ་
དགའ་བར་མཛད་བ་སངས་རྒྱས་ཐམས་ཅད་ཀྱི་སྤོབས་པ་སོ་སོ་ཡང་དག་པར་རིག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་ཐོགས་པ་མེད་པ་ཡི། །སེང་གེའི་ང་རོ་སྒྲོགས་བྱེད་ཅིང་། །དཔལ་གྱི་གནས་ལས་ཀུན་དུ་
རྒྱལ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དོན་ཡོད་པར་གཤེགས་པ་སངས་རྒྱས་ཐམས་ཅད་ཀྱི་སོ་སོ་ཡང་དག་པར་རིག་པ་བཞི་རྣམ་པར་དག་པའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱིས་སེམས་འདི་གསུངས་སོ། །
དེ་དག་མི་དམིགས་མཉམ་པ་ཉིད། །སྟོང་ཉིད་ཡེ་ཤེས་མཚུངས་པ་མེད། །རང་བཞིན་དག་པས་སྣང་བ་གང་། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཁྲོ་བ་བཅོམ་པ་སངས་རྒྱས་ཐམས་ཅད་ཀྱི་ཕྲིན་ལས་རྡོ་རྗེ་དག་པའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་དང་ནི་མཚན་མ་ཡི། །རྣམ་པར་རྟོག་པ་དག་པའི་ཕྱིར། །དངོས་པོར་མི་གནས་གཞན་སྣང་ལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དག་པ་འདི་ནི་གསུངས་ཙམ་གྱིས། །ཡེ་ཤེས་ཅན་

རྣམས་རྒྱལ་བར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་པའི་རྒྱུད་ལས་ལྷག་པའི་ཡེ་ཤེས་འབྱུང་བར་བསྟན་པའི་ལེའུ་སྟེ་བཞི་བཅུ་བདུན་
པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་གཟུགས་མཆོག་སངས་རྒྱས་ཐམས་ཅད་ཀྱི་བར་དུ་གཅོད་པའི་ཕྱོགས་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདག་འཛིན་ཉོན་མོངས་མེད། །
ངར་འཛིན་ཞི་བའི་ཆོས་ཅན་ལ། །བདུད་ཀྱིས་གླགས་རྙེད་མི་འགྱུར་བའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་གཤེགས་སངས་རྒྱས་ཐམས་ཅད་ཀྱིས་ལྷའི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །གང་དུ་དམིགས་མེད་ཐུགས་རྗེ་ཡིས། །བྱམས་པའི་ཡེ་ཤེས་ལ་འཇུག་པ། །བླ་ན་མེད་པའི་དོན་བསྟན་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་སྦྱིན་པར་གྲགས་པ་སངས་རྒྱས་ཐམས་ཅད་ཀྱི་ཀླུའི་
གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དམིགས་པ་ཀུན་དང་བྲལ་བའི་སེམས། །ནམ་མཁའི་ངང་ལས་འཇའ་ཚོན་ལྟར། །དེ་ཉིད་ཐོགས་མེད་ཡེ་ཤེས་ཀྱིས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །
དེ་ནས་དེ་བཞིན་གཤེགས་པ་འོད་གཙང་སངས་རྒྱས་ཐམས་ཅད་ཀྱི་དྲི་ཟའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་རོལ་མོའི་ཆ་དང་ནི། །སིལ་སྙན་རྣམས་ལས་སྒྲ་བྱུང་བ། །སྟོན་པའི་ཆོས་ཀྱི་ཚིག་གྲགས་པ། །དེ་ཉིད་ཚུལ་
འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་ཉི་མ་སངས་རྒྱས་ཐམས་ཅད་ཀྱི་ལྷ་མ་ཡིན་གྱི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ནི་རྣམ་པར་གཙང་བ་ཡི། །དྲི་མ་རྣམ་སྤངས་བདེ་

བའི་ལམ། །ཡེ་ཤེས་ཕྱག་རྒྱས་བརྒྱན་པ་ཡི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་སྦྱིན་སངས་རྒྱས་ཐམས་ཅད་ཀྱི་ནམ་མཁའ་ལྡིང་གི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །ནམ་མཁའི་གནས་ཀྱི་སྤྱོད་ཡུལ་བ། །འདི་ནི་རྣམ་དག་བྱང་ཆུབ་ལམ། །རྣམ་གྲོལ་རང་རིག་བདེ་བ་ཆེ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཉམ་པར་བཞག་པའི་བདག་ཉིད་སངས་རྒྱས་ཐམས་ཅད་ཀྱི་མིའམ་ཅིའི་
གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་ནས་དེ་བཞིན་གཤེགས་པ་ཆེ། །གསང་བ་འཛིན་པ་མཚུངས་མེད་པ། །རྒྱལ་བ་རིགས་ཀྱི་བདག་པོའི་དཔལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ།།
དེ་ནས་དེ་བཞིན་གཤེགས་པ་གཟི་མདངས་སངས་རྒྱས་ཐམས་ཅད་ཀྱི་ལྟོ་འཕྱེ་ཆེན་པོའི་གདོན་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ས་ལ་གནས་པའི་འགྲོ་བ་ཀུན། །དག་པ་ཆོས་ཀྱི་དབྱིངས་གནས་པའི། །ཤིང་རྟ་ཆེན་པོའི་འཁོར་ལོ་བཞིན། །
བཞི་དྲུག་ལྡན་པས་བགྲོད་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་རིགས་ཆེན་པོ་སངས་རྒྱས་ཐམས་ཅད་ཀྱི་གནོད་སྦྱིན་གྱི་གདོན་རྣམ་པར་དག་པ་སངས་རྒྱས་ཐམས་ཅད་ཀྱི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚུངས་པ་
མེད་པ་ཆོས་ཀྱི་དོན། །སྤྲོས་པ་མེད་པ་དེ་བཞིན་གཤེགས། །འབྲས་བུར་ལྡན་པའི་གནས་འདི་ལས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བསྐལ་ལྡན་ཤིང་རྟ་ལྟོ་འཕྱེ་ཆེན་པོའི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་པ་མེད་པ་དྲི་གསུམ་སྤངས། །ཐུབ་པ་རྒྱལ་བ་སྤྱན་རྡོ་རྗེ། །བློ་གྲོས་མི་ཟད་ཡེ་ཤེས་ཏེ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་མཆོག་གི་ཀ་ན་ཀ་སངས་རྒྱས་ཐམས་ཅད་ཀྱི་ཡི་

དགས་ཀྱི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བ་མེད་ཅིང་འབྱུང་བའང་མེད། །གྲུབ་པ་མེད་པའི་ཆོས་ཉིད་ལས། །ཀུན་དུ་སྣང་བ་མི་སླུ་བ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་
སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བའི་གཙུག་སངས་རྒྱས་ཐམས་ཅད་ཀྱི་སྲུལ་པོའི་གདོན་དག་པ་རྡོ་རྗེའི་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་འཇིགས་པ་ཡི་དངོས་པོ་ལས། །ཟག་མེད་དངོས་གྲུབ་འབྱུང་
བ་ཡི། །དབེན་པ་རྣམ་པར་མི་རྟོག་པ། །ཡེ་ཤེས་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ལྡན་དཔལ་སངས་རྒྱས་ཐམས་ཅད་ཀྱི་ལུས་སྲུལ་པོ་གདོན་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
དེ་ནས་དེ་བཞིན་གཤེགས་པའི་རྒྱལ། །ཐུབ་པ་བྱང་ཆུབ་ཤིང་དྲུང་དུ། །བདུད་དཔུང་སྡེ་རྣམས་རབ་འཇོམས་པའི། །ཡེ་ཤེས་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་གནས་སངས་རྒྱས་ཐམས་ཅད་ཀྱི་སྐེམ་བྱེད་ཀྱི་གདོན་དག་པ་རྡོ་རྗེ་སངས་རྒྱས་ཐམས་
ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྨྲ་བའི་སེང་གེ་བླ་ན་མེད། །གླང་པོ་ཆེན་པོ་ཐོགས་པ་མེད། །ཕ་རོལ་འཇོམས་པ་གྱད་བཞིན་ཏེ། །དེ་ཡི་ནོར་བུའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དྲེགས་པ་སྤངས་
སངས་རྒྱས་ཐམས་ཅད་ཀྱི་སྨྱོ་བྱེད་ཀྱི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྣ་ཚོགས་ཆོ་འཕྲུལ་ཚོགས། །སེམས་ཅན་མོས་པའི་སྣང་བ་ལ། །དུ་མ་ཉིད་དུ་བསྟན་གྱུར་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་
སོ། །དེ་ནས་དེ་བཞིན་གཤེགས་པ་ཡེ་ཤེས་ཀྱི་མཛོད་སངས་རྒྱས་ཐམས་ཅད་ཀྱི་བརྗེད་བྱེད་ཀྱི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཐུན་སྣང་གང་ཟག་མོས་ཡུལ་ཏེ། །དེ་བས་ཡང་དག་སངས་རྒྱས་ལ། །ཀུན་རྟོག་མི་མངལ་ལྷམ་མེ་

བཞུགས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པར་གཤེགས་པ་སངས་རྒྱས་ཀྱི་གྲིབ་གནོན་གྱི་གདོན་དག་པ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་
དག་རྫོགས་པའི་སངས་རྒྱས་ལ། །འབད་དང་རྩོལ་བའི་རྟོག་མི་མངའ། །མཐའ་ཡས་བྱང་ཆུབ་སེམས་ཀྱི་དང་། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་བ་ཙནྡན་སངས་རྒྱས་ཐམས་ཅད་ཀྱི་ཤ་ཟའི་གདོན་རྣམ་པར་དག་པ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐ་དད་རྟོག་པ་ཡོངས་མི་མངའ། །རང་རིག་ཡེ་ཤེས་འགྲོ་འོང་མེད། །ཐམས་ཅད་གྲུབ་མཐའི་འདོད་པས་བརྟགས། །དེ་ཉིད་ཡེ་ཤེས་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་
མྱ་ངན་མེད་བདུད་ཀྱི་དཔུང་ལས་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་ཆགས་ཐོགས་མེད་རྡོ་རྗེ་ཡི། །ཆར་སྤྲིན་མདོག་འདྲའི་རྟོག་སྤངས་ཅན། །ཚད་མེད་བྱམས་པ་ཆེན་པོ་ཡིས། །བྱང་ཆུབ་ཚུལ་འདི་བསྟན་པའོ། །ཞེས་
གསུངས་སོ། །དེ་ནས་དེ་བཞིན་གཤེགས་པ་སེང་གེའི་འོད་ཟེར་སངས་རྒྱས་ཐམས་ཅད་ཀྱི་དམིགས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་བྱང་ཆུབ་ཐབས་ལྡན་པ། །གང་ཚེ་སྒྱུ་མ་ལྟ་བུའི་དངོས། །དེ་ཉིད་རང་བཞིན་
སྟོང་ཉིད་གྲུབ། །མཐའ་མེད་ཡེ་ཤེས་ཚུལ་བསྟན་པའོ། །ཞེས་གསུངས་སོ། །འདིར་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་གསང་བའི་སྤྱོད་པས་གནས་ཤིང་གསང་བ་བླ་མེད་ཀྱི་ཏིང་ངེ་འཛིན་ལ་ཉེ་བར་གནས་པས་ནི་ཉན་ཐོས་དང་། །རང་རྒྱལ་དང་། །བྱང་ཆུབ་སེམས་དཔའ་
དང་། །བྱང་ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་སྤྱོད་པ་ཐམས་ཅད་ཀྱང་ཡོངས་སུ་རྫོགས་པར་སྤྱོད་པར་བྱེད་དོ། །གསང་བ་འཛིན་པར་བྱེད་པའི་བྱང་ཆུབ་སེམས་དཔའ་དེས་སངས་རྒྱས་ཀྱི་ཡོན་ཏན་དང་། །ཏིང་ངེ་འཛིན་དང་། །གཟུངས་ཀྱི་སྒོ་དང་། །རྣམ་པར་ཐར་པ་

མ་ལུས་པ་ཡང་ཚེ་འདི་ཉིད་དང་ཡོངས་སུ་རྫོགས་ཤིང་ཀུན་དུ་སྤྱད་པས་སྤྱོད་པར་བྱེད་ན་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་དང་ཡེ་ཤེས་གཞན་དག་ལྟ་སྨོས་ཀྱང་ཅི་དགོས། །དེ་ལ་འཇིག་རྟེན་པའི་ལྷ་ཐམས་ཅད་ཀྱིས་སྲུང་བར་བྱེད། །འཇིག་རྟེན་
ལས་འདས་པའི་ལྷ་ཐམས་ཅད་ཀྱིས་ཀྱང་སྲུང་ཞིང་སྐྱོབ་བ་དང་སྦ་བ་དང་ཡོངས་སུ་སྲུང་བར་བྱེད་དོ། །གསང་བའི་རྒྱུད་འདི་གང་གིས་འཛིན་པ་དང་། འཆང་བ་དང་། ཀློག་པ་དང་། ཉན་པ་དང་། ཕན་ཚུན་འདྲེ་བར་བྱེད་པ་དང་། སེམས་པ་ན་ལྷ་དང་། ཀླུ་དང་། གཟའ་
དང་། རྒྱུ་སྐར་ཐམས་ཅད་ཀྱི་གདོན་གྱིས་ཀྱང་བར་ཆད་མི་བྱེད་དོ། བསྲུང་ཞིང་ཡོངས་སུ་མཆོད་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་པའི་
རྒྱུད་ལས་སྲུང་བ་ཡོངས་སུ་དག་པ་དང་བར་ཆད་མེད་པའི་དོན་བསྟན་པའི་ལེའུ་སྟེ་བཞི་བཅུ་བརྒྱད་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཡུལ་འཁོར་ཏོག་སངས་རྒྱས་ཐམས་ཅད་ཀྱི་རྒྱལ་པོ་ཆེན་པོ་བཞིའི་རིས་ཀྱི་གདོན་རྣམ་པར་དག་པ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཕགས་པ་རྣམས་ཀྱི་ཡེ་ཤེས་གང་། །ཕྱིན་ཅི་ལོག་དང་རྣམ་བྲལ་བ། །དེ་ཉིད་སྐྱེ་འགག་བྲལ་བ་ལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་པདྨའི་
སྙིང་པོ་སངས་རྒྱས་ཐམས་ཅད་ཀྱི་ཀླུ་ཆེན་པོ་བརྒྱད་དག་པ་རྡོ་རྗེའི་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་འདས་པའི་ཡེ་ཤེས་ནི། །གསང་བ་མཆོག་གི་དོན་གནས་པ། །དམིགས་པ་ལས་འདས་བྱང་ཆུབ་
སེམས། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་དག་པ་ལྷ་ཆེན་པོ་བརྒྱད་དག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཟུང་འཛིན་བཏགས་པའི་དབང་གིས་ནི། །མཐར་

གྱུར་ཏེ་ཉིད་ལམ་གྱུར་པ། །བཏགས་པའི་དྲི་མ་དག་པར་བྱ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་འོད་ཟེར་སངས་རྒྱས་ཐམས་ཅད་ཀྱི་གཟའ་ཆེན་པོ་བརྒྱད་ཀྱི་གདོན་རྣམ་པར་དག་པར་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྐྱེན་ལས་བསྐྱེད་པ་ཡི། །རྣམ་པ་ཕན་ཚུན་ལྟོས་ལས་བྱུང་། །གཞན་དབང་དག་པའི་ཡེ་ཤེས་ནི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་ཏོག་སངས་
རྒྱས་ཐམས་ཅད་ཀྱི་རྒྱུ་སྐར་གྱི་གདོན་མ་ལུས་པ་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཕྱིན་ཅི་མ་ལོག་པའི། །གནས་ཚུལ་ཡོངས་སུ་རྫོགས་གྲུབ་པ། །དེ་བཞིན་ཉིད་དང་ཡེ་ཤེས་དོན། །མི་འགྱུར་དེ་
བཞིན་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་པདྨའི་གེ་སར་སངས་རྒྱས་ཐམས་ཅད་ཀྱི་ལྷ་མ་སྲིན་སྡེ་བརྒྱད་ཀྱི་རིས་ཀྱི་གདོན་ཐམས་ཅད་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ཆོས་རྣམས་དག་པའི་མཚན་ཉིད་ཅན། །རང་བཞིན་སྒྱུ་མར་སྣང་བ་གང་། །ངོ་བོ་ལྷུན་གྲུབ་དབྱེར་མེད་ལས། །བྱང་ཆུབ་ཚུལ་འདི་བསྟན་བའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་དཔག་མེད་སངས་རྒྱས་ཐམས་ཅད་ཀྱི་ཕྱོགས་སྐྱོང་བ་བཅུའི་གནོད་
པའི་གདོན་ཡོངས་སུ་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཀུན་གྱི་ངོ་བོ་ཉིད། །མ་ནོར་མངོན་པར་ཐུགས་ཆུད་པས། །སྐྱོབ་པ་ཐུགས་རྗེའི་ངོ་བོ་ལས། །བྱང་ཆུབ་ཚུལ་འདི་བསྟན་པའོ། །ཞེས་
གསུངས་སོ། །དེ་ནས་དེ་བཞིན་གཤེགས་པ་ལྷའི་འོད་ཟེར་སངས་རྒྱས་ཐམས་ཅད་ཀྱི་རཱ་ཧུ་ལ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བག་ཆགས་དག་པའི་རྒྱུད་ལས་ནི། །མ་རིག་པ་དང་བྲལ་

གྱུར་པས། །བདག་སྐྱེས་དག་པར་གནས་པར་བྱ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་མེ་ཏོག་སངས་རྒྱས་ཐམས་ཅད་ཀྱི་བྷི་སྣུ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །ཁམས་རྒྱུད་རྣམ་པར་བྱང་བ་ལས། །ཕྱིར་མི་ལྡོག་པར་གྱུར་པ་ན། །རང་རིག་བདུད་ལས་གྲོལ་བར་འགྱུར། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཁས་པའི་དཔལ་སངས་རྒྱས་ཐམས་
ཅད་ཀྱི་དྲང་སྲོང་ཐམས་ཅད་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གདོན་རྣམས་འབྱུང་བའི་ཚེ། །རགས་པ་འོག་ལ་བརྟེན་ནས་ཏེ། །ཕྲ་བའི་སྒོ་ནི་སྟེང་ནས་འཇུག །དག་པ་ཡེ་ཤེས་ཚུལ་གནས་བྱ། །ཞེས་གསུངས་
སོ། །དེ་ནས་དེ་བཞིན་གཤེགས་པ་ཡེ་ཤེས་འབྱོར་ལྡན་སངས་རྒྱས་ཐམས་ཅད་ཀྱི་ཁྱབ་འཇུག་གི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱེད་པ་འཇིགས་པའི་ཚུལ་སྦངས་ཏེ། །ཞེ་སྡང་དག་པའི་བྱང་ཆུབ་ལས། །སྟོབས་
ཆེན་ཕ་རོལ་གནོན་བྱེད་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་སངས་རྒྱས་ཐམས་ཅད་ཀྱི་དབང་ཕྱུག་ཆེན་པོའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །གང་དུ་དྲག་པོ་འཇིགས་པར་སྟོན། །དུས་མཚན་བཅས་པ་འདོད་ཆགས་བདག །འདི་ཉིད་ཉོན་མོངས་ཚུལ་དག་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཕྱག་ན་རིན་ཆེན་སངས་རྒྱས་ཐམས་ཅད་ཀྱི་ཚངས་པ་དག་པའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་སྲིད་པ་གནས་པ་ཡི། །དག་པ་བཞི་ལས་སྤྲུལ་འདོད་པ། །ཐོག་མ་ཐ་མ་མེད་པའི་བདག །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དབང་ལྡན་སངས་

རྒྱས་ཐམས་ཅད་ཀྱི་འཇིག་རྟེན་གསུམ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆགས་དང་འཇིག་པ་དང་། །གནས་དང་སྟོང་པའི་རིམ་པར་འདིའི། །དམ་པ་གཙང་མའི་ཞིང་དུ་སྨོན། །ཚུལ་འདི་སངས་རྒྱས་བསྟན་
པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྫོགས་པར་གསུངས་པ་སངས་རྒྱས་ཐམས་ཅད་ཀྱི་ས་འོག་དང་ས་སྟེངས་དང་ས་བླ་བ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མུན་པ་དང་ནི་སྣང་བ་ཡི། །བསྟན་པ་
གཉིས་ལ་རང་རྒྱལ་དང་། །སངས་རྒྱས་འབྱུང་བའི་ཚུལ་མཆོག་གི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཆོག་གསུང་དཔལ་སངས་རྒྱས་ཐམས་ཅད་ཀྱི་ཁམས་གསུམ་པ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོག་མ་དང་ནི་ཐ་མ་ཡི། །འཕེལ་དང་འགྲིབ་པའི་ཆ་ལས་ནི། །འཁོར་ལོས་སྒྱུར་བའི་རྒྱལ་པོ་ནི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་འོས་སངས་རྒྱས་ཐམས་ཅད་ཀྱི་སྲིད་པ་
གསུམ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྙིགས་མ་ལྔ་འབྱུང་དུས་ཀྱི་ཚེ། །དུས་ལ་བབ་པའི་བསྐལ་པ་ལ། །རྒྱལ་པ་འཇིག་རྟེན་འབྱུང་བ་སྟེ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་
གཤེགས་པ་སྐར་རྒྱལ་སངས་རྒྱས་ཐམས་ཅད་ཀྱི་དུས་གསུམ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བགྲང་བ་ལས་འདས་པའི། །རྡུལ་སྙེད་འཇིག་རྟེན་ཐམས་ཅད་དུ། །དུས་གསུམ་དག་པའི་ཡེ་ཤེས་ཀྱི། །བྱང་
ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ཉི་མ་སངས་རྒྱས་ཐམས་ཅད་ཀྱི་ཕྱོགས་བཅུ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བལྟས་པས་མཐོང་མེད་ཡུལ་མེད་པ། །

ཕྱོགས་ལས་རྣམ་པར་རྒྱལ་བ་ཡི། །ཕ་རོལ་ཕྱིན་པ་མཚུངས་མེད་པའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འཁོར་བའི་འདམ་རྫབ་ལས་རྒལ་བ་རྡོ་རྗེ་རྣམ་པ་ཐམས་ཅད་ལས་འདས་པ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྤྲོས་པ་ཀུན་ལས་འདས་ནས་ནི། །བླ་མེད་ཐེག་པ་རབ་འབྱུང་བ། །ཚུལ་འདི་ཉེ་བར་སྤྱད་པ་ན། །བྱང་ཆུབ་སེམས་འདི་བསྟན་པ་ཡིན། །ཞེས་གསུངས་སོ། །དེ་ནས་འདོད་པ་ན་སྤྱོད་པ་དང་། །གཟུགས་ན་སྤྱོད་
བའི་ལྷའི་བུ་རྣམས་ཀྱིས་གསང་བ་ཉེ་བར་བསྟན་པ་ལ་མཆོད་པར་བྱེད་དེ། ལྷའི་གོས་དག་འཐོར་ཞིང་ལྷའི་སིལ་སྙན་དུ་མ་ཡང་རབ་ཏུ་དཀྲོལ་ཏེ། ལྷའི་མེ་ཏོག་པདྨ་དང་། པདྨ་ཆེན་པོ་དང་། ཨུཏྤལ་དང་། ཨུཏྤ་ལ་ཆེན་པོའི་ཚོགས་ཐམས་ཅད་ཀྱིས་ཀྱང་གཏོར་ཏོ། །མངོན་པར་གཏོར་
ཏོ། །མངོན་པར་རབ་ཏུ་གཏོར་ཏོ། །ཞིང་ཁམས་དེ་དག་ཏུ་ཁྱབ་པའི་ལྷ་རྫས་ཀྱི་ཙནྡན་ཕྱེ་མས་གཏོར་ཞིང་དྲི་ཞིམ་པོས་ཡོངས་སུ་ཁྱབ་པར་གྱུར་ཏོ། །དེ་དག་ཀྱང་འདི་ལྟ་སྟེ། །ས་བླའི་ལྷ་དང་། །རྒྱལ་ཆེན་རིགས་བཞིའི་ལྷ་དང་། །སུམ་ཅུ་རྩ་གསུམ་གྱི་ལྷ་དང་། །འཐབ་བྲལ་གྱི་ལྷ་དང་།
དགའ་ལྡན་ཀྱི་ལྷ་དང་། །འཕྲུལ་དགའི་ལྷ་དང་། །གཞན་འཕྲུལ་དབང་བྱེད་ཀྱི་ལྷའི་བར་དང་། །ཚངས་རིས་ཀྱི་ལྷ་དང་། །ཚངས་པ་མདུན་ན་འདོན་གྱི་ལྷ་དང་། །ཚགས་པ་ཆེན་པོའི་ལྷ་དང་། །འོད་ཆུང་གི་ལྷ་དང་། །ཚད་མེད་འོད་ཀྱི་ལྷ་དང་། །འོད་གསལ་གྱི་ལྷ་དང་། །དགེ་བའི་ལྷ་དང་། །དགེ་ཆུང་
གི་ལྷ་དང་། །ཆད་མེད་དགེ་བའི་ལྷ་དང་། །དགེ་རྒྱས་ཀྱི་ལྷ་དང་། །སྤྲིན་མེད་འོད་ཀྱི་ལྷ་དང་། །བསོད་ནམས་སྐྱེས་ཀྱི་ལྷ་རྣམས་དང་། །འབྲས་བུ་ཆེ་བའི་ལྷ་རྣམས་དང་། །མི་ཆེ་འབི་ལྷ་རྣམས་དང་། །མི་གདུང་བའི་ལྷ་རྣམས་དང་། །གྱ་ནོམ་སྣང་བའི་ལྷ་རྣམས་དང་། །ཤིན་ཏུ་མཐོང་བའི་
ལྷ་རྣམས་ཀྱི་བར་ཏེ། །འོག་མིན་གྱི་ལྷའི་ཚོགས་དུ་མ་ངང་བཅས་པ་རྣམས་ཀྱིས་གསང་བ་ཆེན་པོ་བླ་ན་མེད་པའི་དོན་རབ་ཏུ་བསྟན་པ་ལ་མཆོད་དོ། །རབ་ཏུ་མཆོད་དོ། །ཀུན་དུ་མཆོད་དོ། །ཡང་དག་པར་མཆོད་ཅིང་མེ་ཏོག་གི་ཆར་ཕབ་པར་གྱུར་ཏོ། །རོལ་མོའི་སྒྲ་སྣ་ཚོགས་རབ་ཏུ་སྒྲོགས་

པར་གྱུར་ཏོ། །རིན་པོ་ཆེ་སྣ་ཚོགས་ཀྱི་ཆར་ཕབ་པ་ལ་འདི་ལྟ་སྟེ། རིན་པོ་ཆེ་ཨན་ད་རྙིལ་དང་། མརྒད་དང་། ཀེ་ཀེ་རུ་དང་། ཀེ་ཀ་རུ་ཆེན་པོ་དང་། སྤུག་དང་། རྡོའི་སྙིང་པོ་དང་། མན་ཤེལ་དང་། བཻ་ཌཱུ་ཪྻ་དང་། མུ་ཏིག་དང་། མུ་མེན་དང་། མུས་ལ་ག་ལྦ་དང་། རིན་པོ་ཆེའི་
རྒྱལ་བ་བསམ་འཕེལ་གྱི་བར་དུ་གཏོར་ཞིང་ཡོངས་སུ་བྱུར་བུར་རབ་ཏུ་གང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་གདོན་ལ་ཡོངས་སུ་དག་ཅིང་
ཀུན་དུ་མཆོད་པའི་ལེའུ་སྟེ་བཞི་བཅུ་དགུ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་ཡེ་ཤེས་བརྙེས་པ་སངས་རྒྱས་ཐམས་ཅད་ཀྱི་ལྷའི་བུའི་བདུད་འཇོམས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱིས་སེམས་འདི་གསུངས་སོ། །མཚན་ཉིད་མེད་པའི་ཆོས་རྣམས་ལ། །ཕྱི་རོལ་དངོས་པོ་དག་པ་ལ། །ཡང་དག་ཡེ་ཤེས་སྒྱུར་བ་པོ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་གྲུབ་པའི་རྒྱལ་པོ་སངས་རྒྱས་ཐམས་
ཅད་ཀྱི་ཉོན་མོངས་པའི་བདུད་བཅོམ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉོན་མོངས་རྣམ་རྟོག་གློ་བུར་བ། །དེ་ཉིད་མ་རིག་བག་ཆགས་དག །རྩ་བ་བྲལ་བས་དེས་བཅོམ་པའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་
སོ། །དེ་ནས་དེ་བཞིན་གཤེགས་པ་རྨ་བྱའི་སྟོབས་སངས་རྒྱས་ཐམས་ཅད་ཀྱི་ཕུང་པོའི་བདུད་བཅོམ་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མ་ལྟ་བུའི་རྣམ་པ་ལས། །རྨི་ལམ་ཚུལ་ལྟར་མ་ལགས་པ། །གང་དུ་དག་པ་བདག་
མེད་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་སྦྱིན་སངས་རྒྱས་ཐམས་ཅད་ཀྱི་འཆི་བདག་གི་བདུད་བཅོམ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་དག་པ་ཡེ་ཤེས་སྐུ། །