Kinh tạng Tây Tạng (Kangyur Đại Học) — 080_རྒྱུད་འབུམ།_ང

ར་བྱ། །སྦྱོར་བའི་གདན་གྱི་རྣལ་འབྱོར་དང་། །ཧཱུཾ་ཧཱུཾ་ས་ཡམ་ཤིང་སྦྱང་བའོ། །ཧཱུྃ་འབྲུ་སྦྱང་བའོ། །ཨོཾ་འོ་མ་སྦྱང་བའོ། །ཧྲི་ཏི་ཡིའོ། །ཨོཾ་ཤུ་སུ་པི་ཏ་བུཥྤེ་བྷྱོ་སྭཱ་ཧཱ།
ཨོཾ་དྷུ་བ་མཱ་ལ་ཀུ་ལེ་སྭཱ་ཧཱ། ཨོཾ་ཏཱི་ཀྵ་ཎཱ་དཱི་པེ་སྭཱ་ཧཱ། ཨོཾ་ཀུ་རུ་ཀུ་རུ་བི་ཛ་ཡ་སྭཱ་ཧཱ། ལྷན་ཅིག་ལྷ་དང་དབུས་སུ་ནི། །བཟླས་པ་གཅིག་གིས་བསྡུ་བར་བྱ། །དཔའ་བོ་འབར་བའི་བདག་ཉིད་ཆེ། །ཕྱག་གཉིས་སྦྱོར་བའི་གདན་ལ་ནི། །དེ་ཡི་ཞལ་དུ་སྲེག་
བླུགས་ནི། །ཀུན་ནས་ལྷ་ཉིད་ཚིམ་པར་བྱ། །དངོས་པོ་བརྒྱད་ཀྱི་མཆོད་པ་ནི། །ཧཱུཾ་གི་གླུ་ཡི་རྣམ་པ་ཡིས། །སངས་རྒྱས་ཀུན་ནས་མཉེས་པར་བྱ། །རྡོ་རྗེ་ཁུ་ཚུར་གཉིས་བྱས་ནས། །དཀུ་ཡི་ཕྱོགས་སུ་གཟུང་བར་བྱ། །མེ་ཏོག་ཚུལ་གྱིས་གཏོར་

བ་དང་། །གླིང་བུའི་ཚུལ་གྱིས་འབུད་པ་དང་། །སིལ་སྙན་ཚུལ་གྱིས་དཀྲོལ་བ་དང་། །གར་གྱི་ཚུལ་གྱིས་ཡན་ལག་བསྐྱོད། །འབུད་པའི་ཚུལ་གྱིས་འབུད་པ་དང་། །རྒྱལ་མཚན་ཚུལ་གྱིས་བསྒྲེང་བ་དང་། །བླ་རེའི་ཚུལ་གྱིས་བྲེ་
བ་དང་། །བ་དན་ཚུལ་གྱིས་འཕྱར་བ་དང་། །རླུང་གཡབ་ཚུལ་གྱིས་གཡབ་པ་དང་། །ལྷ་ཉིད་ལ་མཆོད་ཕྱིར་ནི་མཆོག་ཏུ་འདུད། །ཞི་ཕྱིར་ཕྱག་འཚལ་འདུད་པས་ཞི་བར་བྱེད། །སྤྲོ་ཕྱིར་ཕྱག་འཚལ་འདུད་ལ་ཕྱག་འཚལ་འདུད། །བདག་མེད་རྣལ་འབྱོར་
གྲུབ་ཕྱིར་ཧཱུཾ་འབྱིན་ས་བོན་འཛིན་པར་མཛད། །བདག་མེད་པར་སྦྱོར་རྣམ་པར་སྣང་མཛད་དངོས་ལ་ཕྱག་འཚལ་འདུད། །ཁྱད་པར་གླུ་དང་མཆོད་པས་མེ་ལ་མཆོད་བར་བྱ་སྟེ་སྒྲས་འཇུག་པར་བྱའོ། །དེ་བཞིན་དུ་ཕྱིས་སྲེག་བླུགས་ཕྱེད་དང་བཞིས་མེ་ལྷ་མཆོད་
པར་བྱའོ། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སླར་ཡང་མེ་ཡི་བརྟག་པ་ནི། །མཐོ་བར་འབར་བས་ཞི་བའོ། །དམའ་བར་འབར་བས་རྒྱས་པ་ཉིད། །འཁོར་བར་འབར་བས་དབང་དང་ལྡན། །ངུ་བར་འབར་
བས་བདག་ཉིད་འཇོམས། །དེ་བཞིན་མེ་ཡི་དེ་ཉིད་ནི། །བློ་ལྡན་རྣལ་འབྱོར་པས་ཤེས་བྱ། །དབང་ལྡན་དུ་ནི་ཞི་བ་ཉིད། །ཤར་དུ་དཔལ་དང་མངོན་པར་འགྲོགས། །མེ་ཡི་ཕྱོགས་སུ་རྒྱས་པ་ཉིད། ལྷོ་ཕྱོགས་སུ་ནི་ནོར་བརླག་གོ། །བདེན་བྲལ་འཆི་
བའི་ཕོ་ཉ་ཉིད། །ནུབ་ཏུ་དབང་ནི་བརྩམ་པར་བྱ། །རླུང་དུ་ནོར་ནི་ཉམས་པ་དང་། །བྱང་དུ་རིགས་ནི་རྣམ་པར་འཕེལ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡམ་ཤིང་གི་ནི་བརྟག་པ་ནི། །ཡམ་ཤིང་གི་ནི་
བྱེ་བྲག་ཉིད། །ཞི་བ་ལ་ནི་སོར་མོ་བཅུ། །རྒྱས་པ་ལ་ནི་སྐྱེས་བུ་ཉིད། །མངོན་སྤྱོད་ལ་ནི་བརྒྱད་པ་པོ། །དབང་ལ་བཅུ་གཉིས་པ་ཉིད་དང་། །དབྱེ་བ་དེ་བཞིན་འོ་མའི་ཤིང་། །དེ་བཞིན་པདྨ་པྲི་ཡང་ཀུ། །ཁྱད་པར་དུ་ནི་ཞི་བ་ལ། །ཡམ་ཤིང་འདི་ནི་ཆོ་གའི་

མཆོག །ཐང་ཤིང་དེ་བཞིན་ཤིང་དང་ནི། །འོ་མ་འཛག་པའི་ཤིང་ཇི་བཞིན། །ཡམ་ཤིང་གི་ནི་ཆོ་ག་མཆོག །རྒྱས་པ་ལ་ནི་སྦྱར་བར་བྱ། །བྷ་ལ་ཏ་ཀ་སྒུར་པོའི་ཤིང་། །བྱ་རོག་ཚང་གི་ཤིང་ཇི་བཞིན། །ཡམ་ཤིང་གི་ནི་ཆོ་ག་མཆོག །ཤིང་གི་
ནག་པོའི་ལས་ལ་སྦྱར། །འོ་མར་ལྡན་པའི་བཏུང་བ་དང་། །དེ་བཞིན་འབྲས་དང་འབྲུ་མཉམ་པས། །ཞི་བ་ལ་ནི་སྦྱར་བར་བཤད། །སྦྱིན་སྲེག་གི་ནི་ཆོ་ག་མཆོག །གིའུ་ཝང་དང་ནི་གུར་གུམ་ཉིད། །ཐམས་ཅད་འབྲུ་དང་མཉམ་ལྡན་པ། །དེ་བཞིན་རྒྱས་
པའི་སྦྱིན་སྲེག་གོ། །ཡང་ན་གསེར་གྱི་ལྷ་དང་ནི། །པུཎྜ་རཱི་ཀ་གུར་གུམ་དང་། །ཨ་རུ་ར་ཡི་མེ་ཏོག་བརྒྱ། །དབང་ལ་སྦྱར་བར་ཡང་དག་མཚུངས། །བྷ་ལ་ཏ་ཀ་ལུ་བཏང་དང་། །དུག་དང་དེ་བཞིན་ཁྲག་ཉིད་དང་། །ཚ་བའི་མར་ཁུ་དེ་བཞིན་སྐྲ། །ནག་
པོའི་ཕྱོགས་ལ་སྦྱར་བ་ཉིད། །ལེའུ་གསུམ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །འབྱུང་པོ་གནོད་སྦྱིན་དེ་བཞིན་ཀླུ། །ལྷ་དང་ནམ་མཁའ་ལྡིང་དང་ནི། །སྨྱོ་དང་འཁོར་བྱེད་གནོད་སྦྱིན་དང་། །ལྷ་མོ་མ་མོའི་བདག་ཉིད་ནི། །དཀྱིལ་
འཁོར་དགུ་ནི་མངོན་བྱས་ནས། །རེའུ་མིག་དགུ་དང་ཆ་དགུ་དང་། །དབུས་སུ་བདག་གི་ལྷ་ཉིད་དང་། །དབང་ལྡན་དུ་ནི་ལྷ་ཡི་རིས། །ཤར་དུ་ཀླུ་ཡི་ཆ་དང་ནི། །མེ་ཡི་ཕྱོགས་སུ་གནོད་སྦྱིན་ཉིད། །ལྷོ་ཕྱོགས་སུ་ནི་འབྱུང་པོའོ། །དེ་བཞིན་སྨྱོ་བྱེད་
བདེན་བྲལ་དུའོ། །ནུབ་ཏུ་ནམ་མཁའ་ལྡིང་ཉིད་དང་། །རླུང་གི་ཕྱོགས་སུ་གཏོར་མ་མཚུངས། །བྱང་དུ་འཁོར་བྱེད་གནོད་སྦྱིན་ནོ། །བདག་ཉིད་ཆ་ཡིས་མཆོད་པར་བྱ། །ལེའུ་བཞི་པ་ཞེས་བྱ་བའོ།། །།དཀར་པོའི་འོད་མཆོག་མི་བཟད་མངོན་པར་
རོལ་པ་གསང་བ་ལ་མཁས་ལྕེའོ། །སྟེང་གི་མཆེ་བ་གཉིས་ལ་ཆུ་འབྱིན་རོ་ནི་འོ་མའི་ཆུ་ཞེས་པ། །འཕྱར་བའི་ཆུ་ཡི་ཁ་དོག་དང་མཚུངས་མཆེ་བ་གཉིས་ནི་རྩ་བཞིན་ནོ། །ལྕེ་ཡི་གདུང་བ་སེལ་བའི་ཆུ་ནི་བདུད་རྩི་དཀར་པོའི་བདུད་རྩི་ལྔ། །རྒྱས་པ་ལྔ་ལ་བདུད་

རྩིའི་རོ་བཞིན་སྦྱོར་བ་མཁས་པས་མི་ཤེས་སོ། །ལྕེ་ལ་དེ་བཞིན་དཀར་པོའི་ས་བོན་དེ་ནི་དུད་པའི་ལྕགས་ཀྱུ་དྲངས། །སྣ་ལ་རོ་ཡི་དགོད་པའི་བདུད་རྩི་རླུང་གི་ལྕགས་ཀྱུ་ཡིས་ནི་འདྲེན། །རིག་པས་རིག་པ་མཐོང་བ་དེ་ལྟར་དེ་ཡི་
བདུད་རྩི་རྣམ་པར་ཐིམ། །ཇི་སྲིད་རིང་དུ་འཚོ་ཞིང་ཆོས་སྤྱོད་པ། །དེ་སྲིད་དགེ་བའི་རྒྱུན་ནི་རབ་ཏུ་འཕེལ། །རླུང་གིས་འབྱིན་ཅིང་ཡིད་ནི་མངོན་ང་རྒྱལ། །རླུང་གི་ས་བོན་གྱིས་ནི་རྟག་སྦྱོར་བྱེད། །ཀ་བ་གཅིག་དང་ཚིག་དགུ་དང་། །སྒོ་ལྔ་བུག་པ་གསུམ་
པ་ཉིད། །རྩ་ཡི་འཁོར་ལོ་ཕྲ་བ་འདི། །གཡོ་དང་མི་གཡོ་གསང་བར་བཅས། །གཟུགས་གཅིག་ལ་ནི་སྡུད་པ་ཉིད། །རྩ་ཡི་རང་བཞིན་གྱིས་མི་རྟག །དང་པོའི་གདན་ལ་བཤད་པ་ཡིས། །སྔོན་དུ་བདག་ཉིད་བཤད་པར་བྱ། །ཆུ་ཤིང་མེ་ཏོག་ལྟ་བུ་
ནི། །ལྟེ་བའི་དབུས་སུ་རྣམ་པར་གནས། །དེ་དབུས་དེ་བཞིན་གསུངས་པ་ནི། །ཡེ་ཤེས་རྣམ་ཤེས་སེམས་པའོ། །བདུད་རྩི་སྦྱོར་བའི་ལེའུ་ཞེས་བྱ་བ་སྟེ་ལྔ་པའོ།། །།དེ་ནས་གཞན་ཡང་རབ་འཆད་བྱེད། །གང་ལ་ལྕེ་བའི་སྐྱེ་བ་ཐོབ། །འཁོར་བ་
དེ་ལ་འཁོར་ལོ་ཆེ། །འཁོར་ལོའི་འཁོར་ལོ་ལྡན་གྱུར་པ། །དམངས་རིགས་ཕྱུགས་བཞིན་འགྲོ་བ་ཡི། །སྟོང་ཕྲག་བདུན་ཅུ་རྩ་གཉིས་ནི། །ལུས་པོ་ཡི་ནི་རྩ་ཉིད་དོ། །བཞི་བརྒྱ་དང་ནི་ལྔ་བཅུ་ཡང་། །ཁྲག་དང་རུས་པ་མ་ལུས་པའོ། །ཆུ་ནི་བྲེ་ཕྱེད་དང་
བཅས་པ། །དེ་བཞིན་སྲིན་བུ་ཁྲི་ཉིད་དང་། །ཁྲི་ཕྲག་གསུམ་དང་སྟོང་ཕྲག་གཅིག །སྐྱེས་པ་ཡི་ནི་བ་སྤུ་ཉིད། །ཤ་ཁྲག་དྲུག་ཅུ་ཐམ་པ་ནི། །སྐྱེས་བུ་བར་མར་འགྱུར་བའོ། །སུམ་བརྒྱ་དེ་བཞིན་དྲུག་ཅུ་ཡི། །ཆུ་ཚོད་དབུགས་དང་རྩ་གཞན་ནོ། །མཉམ་པོ་ཆ་
རུ་འཕེལ་བ་ཡི། །མཉམ་པའི་གཟུགས་དང་མཉམ་པའི་འོད། །རྩ་ནི་འཁོར་ལོ་བཞིན་དུ་བསྒྱུར། །འཁོར་ལོ་བརྒྱད་པ་བརྒྱད་པ་བཞིན། །སྲོག་དང་རྩོལ་བ་ལྔ་ཟད་དང་། །བདག་ཉིད་ཡང་དག་མཉན་པར་མཛད། །དབུས་སུ་མེ་ཡི་བུང་པོ་ཉིད། །འབྱིན་པའི་ས་བོན་དེ་

དབུས་སུ། །དྲི་མེད་རྟག་ཏུ་མཉམ་ཞིང་དམའ། །ཕྱི་རོལ་དུ་ནི་བཅུ་གཉིས་འགྱུར། །འཁོར་ཞིང་ས་བོན་མཉམ་པ་དང་། །དབུགས་ནི་མཉམ་པར་འཁོར་བའོ། །མེ་དང་རླུང་གི་བདུན་དོན་ལ། །དུ་བའི་ས་བོན་བསྒོམ་པར་བྱའོ། །སྒྲ་དང་ཐིག་ལེར་ཡང་དང་
ལྡན། །ཆར་གྱི་རྒྱུན་ཞེས་བཤད་པ་ཡིན། །འཁོར་ལོའི་ལེའུ་ཞེས་བྱ་བ་སྟེ་དྲུག་པའོ།། །།དེ་ནས་གཞན་ཡང་བཤད་བྱ་བ། །ཨོཾ་ནི་རེ་བའི་ཐིག་ལེ་རྫོགས། །བླ་མའི་ཡི་གེར་ཀུན་ཏུ་བརྟག །ཉིན་མོ་དབུགས་ནི་མཉམ་པར་ཆད། །དེ་བཞིན་ལྷ་
ཡི་ཡི་གེའོ། །མཚན་མོ་ཆེན་པོ་ལྔ་ཆད་ན། །ཆུ་ཤིང་དུས་ནི་མཉམ་པ་བཞིན། །ཟླ་བ་དྲུག་ནི་མཚན་མོ་ཉིད། །ཟླ་དྲུག་ཉིན་མོར་རྣམ་པར་བརྟག །ཆུ་ཚོད་དང་ནི་ཟླ་ཕྱེད་དང་། །ཉིན་ཞག་བཅུ་གཉིས་བདག་ཉིད་ནི། །དྲུག་ཅུ་རྩ་བཞིའི་ཆ་ཉིད་ལ། །དཀར་པོའི་
བླ་ན་མེད་དང་ནི། །དེ་ནི་དཀར་པོའི་ས་རང་བཞིན། །མགོ་དང་རྐང་གི་སྟེང་དང་ནི། །དེ་བཞིན་མིག་དང་སྣ་དང་ནི། །ལྕེ་དང་རྣ་བ་བཅས་པ་དང་། །དཔྲལ་བ་ཚངས་པའི་བུ་ག་དང་། །ཐིག་ལེ་དཀར་པོའི་ས་ཅན་པའོ། །དགུན་གྱི་ཕྱོགས་ནི་སྔ་མ་དང་། །
མཀྒ་ཡི་ནི་རང་དོན་དང་། །ཁྱུ་མཆོག་པུ་མ་པ་ཀརྐ་ཊ། །མི་དང་ཆུ་སྲིན་སྤང་གིས་ཁྱབ། །དེ་ནི་དུད་པ་ས་ཡི་དངོས། །དགུན་གྱི་དབུས་སུ་སྔ་མ་བཞིན། །ལག་མཐིལ་སེན་མོའི་ཚོགས་དང་ནི། །ངེས་པར་དེ་བཞིན་མཆན་ཁུང་དང་། །མགྲིན་པ་མཆུ་དང་
བྲང་གི་ཚོགས། །ཕུར་བུར་མཉམ་པར་འཕྲོ་བའོ། །འཇིག་རྟེན་སྤྲུལ་དང་དགའ་བའི་རིག །དེ་བཞིན་འཇིག་རྟེན་ཕྱེད་བཅས་སྦྱིན། །ལྷོ་ཕྱོགས་ཀྱི་ནི་འཁོར་ལོ་བསྐོར། །དེ་ནི་དུས་ཀྱི་ས་གཞིའོ། །སོ་ག་དང་པོའི་དབུས་ཉིད་དང་། །ལག་མཐིལ་སེན་
མོའི་ཚོགས་དང་ནི། །དེ་བཞིན་མཆན་ཁུང་ས་དང་ནི། །འགྲིན་པ་ཆུ་དང་བྲང་གི་མཚམས། །དེ་བཞིན་བློ་ལྡན་འགྲོ་བའོ། །ལེའུ་བདུན་པ་ཞེས་བྱས་པའོ།། །།དེ་ནས་གཞན་ཡང་བཤད་བྱ་བ། །ཚིགས་ཀྱི་དབུས་དང་ནུ་མའི་སྟེང་། །སྙིང་

དང་སྙིང་ནི་ཤིན་ཏུ་མཆོག །དེ་ནི་པདྨའི་གནས་རང་བཞིན། །རྣམ་པར་ཤེས་པའི་ཆ་བརྒྱད་ཉིད། །སོ་ག་དང་པོའི་དབུས་ཉིད་དང་། །དགུན་གྱི་ཟླ་བ་བརྒྱད་པ་བཞིན། །གི་ཝང་ཕྲ་ཞིང་ཡང་བ་ཉིད། །ཆུ་ཡི་མདོག་དང་སྦྱངས་དེ་
བཞིན། །བྷྲྀ་དྷི་པ་ལ་མཉམ་པའི་ས། །གཟའ་ནི་བུམ་པས་བསྒྱུར་པ་དང་། །གཞུང་ཚིགས་ངོས་དང་ནུ་མའི་སྟེང་། །སྙིང་དང་སྙིང་ནི་ཤིན་ཏུ་མཆོག །དེ་ནི་གི་ཝང་གནས་རང་བཞིན། །རིམ་བཞིན་ཟླ་བ་ཕྱེད་དང་ནི། །རུས་སྦལ་རུས་སྦལ་མཉམ་རུས་
སྦལ། །མཚམས་དང་མཚམས་ནི་མཉམ་པར་དང་། །པདྨ་པདྨ་པདྨར་མཉམ། །དྲི་མེད་གསུམ་གྱི་སར་གནས་པའོ། །སྲིན་བུ་སྐྱེ་བ་མཉམ་པར་བཟའ། །དཀུ་དང་རུས་པའི་མཚམས་སུ་ནི། །རྐེད་པར་པདྨ་པདྨ་ཡང་། །མཉམ་པའི་ཆ་ཡིས་གནས་
པ་ཉིད། །ད་ནི་དྲི་མེད་གསུམ་གྱི་ས། །རྣམ་ཤེས་ལྷན་ཅིག་གནས་པའོ། །ལེའུ་བརྒྱད་པ་ཞེས་བྱ་བའོ།། །།རེ་ཕ་ཟླུམ་པོ་རེ་ཕར་མཉམ། །མངལ་གྱི་སྟེང་དང་འོག་ཏུ་ཡང་། །ལྷ་དང་ལྷ་མོའི་ཡེ་ཤེས་བཞིན། །བརླ་དང་པུས་མོ་མཉམ་
པའི་བརླ། །སྟེང་དང་འོག་ཏུ་རིགས་ཉིད་ནི། །སོར་མོའི་མཚམས་དང་ལོགས་སུ་ཡང་། །འབྱེད་པའི་རྩ་ནི་རྣམ་པར་གནས། །དེ་ནི་དབྱེ་བའི་གནས་རང་བཞིན། །བློ་དང་ལྡན་པས་ཤེས་པར་བྱ། །རེ་ཕ་རེ་ཕ་ཟླུམ་པོར་མཉམ། །བཅུ་ཡི་སྟེང་དང་འོག་ཏུ་
ཡང་། །བརླ་དང་པུས་མོའི་སྟེང་དུ་མཉམ། །སྟེང་དང་འོག་ཏུ་རིགས་ཉིད་དུ། །སོར་མོའི་ཚིགས་དང་ལོགས་སུ་ཡང་། །ས་གདུགས་རྩ་ནི་གནས་པ་བཞིན། །དེ་རྣམས་ས་གདུགས་གནས་རང་བཞིན། །གནས་པར་བློ་དང་ལྡན་པས་ཤེས། །ལེའུ་
དགུ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྟེང་དུ་ཆུ་ཚོད་དབུགས་དང་ནི། །ཡེ་ཤེས་གལ་ཏེ་འབྱུང་གྱུར་ན། །སུམ་བརྒྱ་དེ་བཞིན་སུམ་ཅུ་དང་། །ཇི་སྲིད་བདུན་དུ་འདྲེས་གྱུར་ན། །གཉིས་གཅིག་བཅུ་ཕྱེད་བཅས་པ་ཡི། །

ཆུ་ཚོད་དབུགས་ནི་ཆད་པ་བཞིན། །ཡེ་ཤེས་འགྱུར་བ་རྣམ་ཤེས་བྱ། །བློ་ལྡན་སྤྱི་ཡི་བསྟན་བཅོས་བཞིན། །སྦྱོར་བའི་དུས་ལ་ཕན་པའི་ཕྱིར། །བསྟན་བཅོས་ལས་ནི་བཤད་པའོ། །དྲུག་ཅུ་རྩ་བཞི་དབུགས་མཉམ་པས། །རྟག་ཏུ་ས་ནི་བསྲུང་བར་བྱ། །
ལེའུ་བཅུ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡིད་ནི་སྔོན་དུ་འགྲོ་བའི་ཆོས། །ཡིད་དག་ཅིང་ནི་ཡིད་འགྲོ་བས། །དེ་ཕྱིར་ཡིད་མངོན་ཐམས་ཅད་དུ། །བློ་དང་ལྡན་པས་ཡིད་བསྒྲིམ་བྱ། །ས་བོན་གྱི་ནི་ཁྱད་པར་ཉིད། །
སྔགས་ཀྱིས་ཕ་རོལ་གནོན་བྱ་མེད། །ཕྱག་རྒྱ་མངོན་པར་ལྡན་པ་ནི། །དགོད་ཅིང་མངོན་པར་རྩེ་བ་མེད། །དེ་ལ་ཁྲུས་ཀྱི་ཆོ་ག་མིན། །སྨྱུང་བ་མཆོག་ཏུ་བཟོད་པ་མེད། །མཆོད་རྟེན་ལས་ནི་མི་བྱ་ཞིང་། །གླེགས་བམ་གྱི་ནི་ཚིག་མེད་པའོ། །ལག་པའི་ཕྱག་
རྒྱ་མི་བཅིང་ཞིང་། །སྔགས་ཀྱི་ཡི་གེ་མི་བཟླའོ། །སྐད་ཅིག་རྣལ་འབྱོར་བལྟ་བྱ་ཞིང་། །རྣལ་འབྱོར་སྦྱོར་བས་འགྲོ་བ་བརྩམ། །ཤེལ་བཞིན་དུ་ནི་དག་པ་ཡི། །དག་པ་ཡི་ནི་སྦྱོར་བ་མཆོག །ཡེ་ཤེས་རྣམ་ཤེས་ལྡན་པའོ། །ཡེ་ཤེས་ཀྱིས་ནི་གནས་
བརྩམ་མོ། །ལེའུ་བཅུ་གཅིག་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཤེལ་བཞིན་དུ་ནི་དག་པ་ཡི། །དྲི་མེད་ཟླ་བའི་དཀྱིལ་འཁོར་ནི། །གངས་དང་ཁ་བའི་ཆུ་ལྟ་བུར། །རྣམ་པར་ཤེས་པའི་ཁ་དོག་བཞིན། །པདྨ་
དཀར་པོའི་གདན་ལ་ནི། །ཟླ་བའི་དཀྱིལ་འཁོར་གྱིས་མནན་པའོ། །མཆོད་པ་རྣམ་པ་བརྒྱད་དང་ནི། །སྔགས་བརྒྱད་ཀྱི་ནི་ས་བོན་བཞིན། །བདུད་རྩི་དཀར་པོའི་ཟས་དང་ནི། །དག་པའི་ཆུ་ནི་བརྩམ་པར་བྱ། །པདྨའི་གདན་དང་གདན་ལ་ནི། །ཟླ་བའི་
དཀྱིལ་འཁོར་གྱིས་མནན་པའོ། །གི་ཝང་བླ་མར་བཤད་པ་ནི། །རྣམ་པར་སྣང་མཛད་ཡེ་ཤེས་ལྷ། །དཀར་པོ་ཉིད་ནི་མི་བསྐྱོད་པའོ། །དོན་ཡོད་གྲུབ་པ་དུ་བར་བཤད། །སྣང་བ་མཐའ་ཡས་དུང་ཉིད་དང་། །པདྨ་ཉིད་ནི་རིན་ཆེན་ནོ། །གི་ཝང་ལྷ་མོ་

མཱ་མ་ཀཱི། །དྲི་མེད་གསུམ་ནི་སྒྲོལ་མའོ། །གོས་དཀར་མོ་ནི་འབྱེད་པར་འགྱུར། །ས་ཡི་གདུགས་ནི་སངས་རྒྱས་སྤྱན། །ལེའུ་བཅུ་གཉིས་བ་ཞེས་བྱ་བའོ།། །།ཐམས་ཅད་མཁྱེན་པ་ལ་ཕྱག་འཚལ་ལོ། །ཁམས་བཞི་
རྣམ་པར་མཉམ་པ་ཉིད། །ཁམས་བཞི་རུ་ནི་རྣམ་པར་འགྲོ། །མེ་དང་ཆུ་ནི་འདི་བཤད་པ། །ནམ་མཁའ་ཡང་ནི་སྟོང་པ་ཉིད། །སྲ་བ་ཉིད་ནི་ས་ཡིན་ནོ། །དྲོ་བའི་དངོས་པོ་མེ་དང་ནི། །ཨོཾ་ནི་རྣམ་པར་སྣང་མཛད་དངོས། །སྤྱི་བོར་དཀར་པོ་ཡི་ས་བོན། །
ཤར་དུ་མི་བསྐྱོད་པ་ཉིད་ནི། །ཨ་ཡི་རྣམ་པ་དེ་ཉིད་ལྷ། །ཧཱུྃ་གིས་དོན་ཡོད་རྣམ་པར་གྱུར། །ལྷོ་ཡི་ཕྱོགས་སུ་བརྩམ་པར་བྱ། །ཏྲཾ་གི་རྣམ་པ་མངའ་བདག་ལྷ། །དེ་ཉིད་སྣང་བ་མཐའ་ཡས་ལྷ། །ཅོད་པན་ནུབ་ཀྱི་ཕྱོགས་སུའོ། །དེ་ཉིད་མཆོད་པ་
མཉམ་པ་དང་། །ཏྲཾ་གི་རྣམ་པས་མངའ་བདག་ལྷ། །བྱང་དུ་རིན་ཆེན་འབྱུང་བའོ། །སྤྱི་གཙུག་ལ་སོགས་ལྷ་ལྔ་ནི། །བློ་དང་ཤེས་པས་རྣམ་པར་དགོད། །ཏྲཾ་གི་རྣམ་པས་མངའ་བདག་ལྷ། །དཔྲལ་བ་ཁྲོ་བོའི་ཕྱག་ཅན་ནོ། །ཀ་ཡི་རྣམ་པ་ཡེ་ཤེས་ལྷ། །
མི་གཡོ་ས་ཡི་མགོན་པོ་བཞིན། །ཧྲཱིཿཡི་རྣམ་པས་མངའ་བདག་ལྷ། །དེ་བཞིན་ཟླ་བ་མིག་གཉིས་སུའོ། །ལེའུ་དང་པོ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཛཾ་གྱི་རྣམ་པས་བདག་པོའི་ལྷ། །རྣ་བར་བྱམས་པ་ཉིད་ཡིན་
ནི། །ཀྵཾ་གི་རྣམ་པས་བདག་པོའི་ལྷ། །མཁུར་ཚོས་ཡི་དགས་སྐྱོང་བ་པོ། །ས་ཡི་རྣམ་པས་བདག་པོའི་ལྷ། །ལྕེ་ལ་ཡང་ནི་མཱ་མ་ཀཱི། །ཧཱུཾ་གི་རྣམ་པས་མངའ་བདག་ལྷ། །མགྲིན་པར་རྟ་མགྲིན་ཁྲོ་བོ་བཞིན། །ཤྲིཾ་ཡི་རྣམ་པས་མངའ་བདག་ལྷ། །
ཡེ་ཤེས་ལྷ་ནི་མཆོག་ཏུ་གཙོ། །སྙིང་པོ་ཡི་ནི་ཡེ་ཤེས་མཆོག །སོར་མོ་ལྔ་དང་མཉམ་པའི་ལྷ། །ལྔ་ནི་སངས་རྒྱས་ཉིད་ཡིན་ནོ། །ཨ་ཡིས་བདུད་རྩི་ལྷ་མོ་ནི། །ལག་མཐིལ་རྡོ་རྗེ་སྒེག་མོ་བཞིན། །ཤྲིཾ་གི་རྣམས་ས་མངའ་བདག་ལྷ། །ལྟེ་

བར་རྣམ་པར་སེལ་བ་ཉིད། །ཙུཾ་གི་རྣམ་པས་མངའ་བདག་ལྷ། །དེ་བཞིན་བདག་ཉིད་ཧེ་རུ་ཀ། །།ལཾ་གྱི་རྣམ་པས་མངའ་བདག་ལྷ། །དེ་བཞིན་བརླ་གཉིས་ས་སྙིང་ངོ་། །ཡུཾ་གྱི་རྣམ་པས་མངའ་བདག་ལྷ། །པུས་མོ་ཡི་དགས་ལྷ་མོའོ། །ཏྲཾ་བི་
རྣམ་པས་ཡི་དགས་ལྷ། །འོག་ཏུ་འབྱུང་པོའི་གཙོ་བོའོ། །ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །ཨོཾ་ཧྲཱི་ཧེ་ཧ་ཧ་ཧ་ཧཱུྃ་ཕཊ། འདི་ནི་ཉེ་བའི་ཆོ་གའི་སྔགས་སོ། །སྐུ་མདོག་སྔོན་པོ་ཁྲོ་གཉེར་ལྡན་པའི་ཞལ་དང་
ནི། །སྤྱན་གསུམ་ཞལ་དང་རྐེད་པ་སྤྱི་བོ་ཅོད་པན་ཅན། །སྦྱོར་བའི་གདན་བདུན་མངོན་པའི་ཕྱག་རྒྱ་དབང་དང་ནི། །དར་གྱིས་མངོན་པར་གང་བའི་གདེངས་ཀའི་རྣ་ཆ་དང་། །སྦྲུལ་གྱི་མཆོད་ཕྱིར་ཐོགས་ནི་ལྷག་པར་ལྡན། །དམར་པོའི་གོས་དང་སྦྲུལ་
གྱི་པགས་པ་བསྣམས། །གཡོན་གྱི་ཕྱག་ན་སྣོད་ནི་རབ་གང་མཛེས། །གཉིས་པར་དབྱུག་པ་གསུམ་པར་དགྲ་སྟ་དང་། །གྱེན་དུ་བ་དན་དང་ནི་དྲིལ་བུ་གཡས་པའོ། །རྡོ་རྗེ་གསོར་དང་ལྕགས་ཀྱུ་དྲིལ་བུའི་ཕྱག །པད་གདན་ཉི་མའི་ཕྱག་ཅན་མེ་དཀྱིལ་
ཧེ་རུ་ཀ་དཔལ་མགོན་པོ་ཤིན་ཏུ་འཇིགས། །ཤར་གྱི་ཆར་ནི་མཱ་མ་ཀཱི། །ཐོད་པ་ཕྱག་ན་བསྣམས་པའོ། །ལྷོ་ཡི་ཆར་ནི་སངས་རྒྱས་སྤྱན། །ཕྱག་གི་འཁྱུད་པའི་ཚུལ་བཞིན་ནོ། །ནུབ་ཏུ་སྒྲོལ་མ་དྲིར་བཤད་པ། །དེ་བཞིན་ཕྱག་ན་མེ་ཏོག་ཕྲེང་། །གོས་
དཀར་གཏོར་མ་ཡང་དག་ལྡན། །བྱང་གི་ཕྱོགས་སུ་དགོད་པར་བྱ། །དབང་ལྡན་རྡོ་རྗེ་སྒེག་མོ་དང་། །མེ་རུ་བིལ་བ་ལག་པ་མ། །བདེན་བྲལ་དུ་ནི་གླུ་མ་དང་། །རླུང་དུ་གར་མ་བསྐྱོད་པ་བཞིན་པའོ། །ལེའུ་གསུམ་པ་ཞེས་བྱ་བའོ།། །།དེ་ནས་
གཞན་ཡང་རབ་བཤད་པ། །ས་ཤྲཱི་སྭཱ་ཧཱ། ཤར་གྱིའོ། །ས་ཧཱུྃ་ཧཱུྃ་ཧཱུྃ་སྭཱ་ཧཱ། ལྷོ་ཡིའོ། །ས་ཀྵུྃ་ས་ཧ། ནུབ་ཀྱིའོ། །ས་ཀྵུཾ་ཀྵུཾ་ཀྵུཾ་སྭཱ་ཧཱ། བྱང་གིའོ། །ཧཱུྃ་དབང་ལྡན་གྱིའོ། །ཧེ་མེ་ཡིའོ། །ཧེ་བདེན་བྲལ་གྱིའོ། །ཧྲི་རླུང་གིའོ། །ཨོཾ་

བཛྲ་ཨཾ་ཀུ་ཤ་ཛཿ། ཨོྃ་བཛྲ་པཱ་ཤ་ཧཱུྃ། ཨོྃ་བཛྲ་སྥོ་ཊ་བཾ། ཨོྃ་བཛྲ་གྟཎྜེ་ཏོཿ། ཨོྃ་པདྨ་ཨུད་བྷཱ་བ་ཡ་སྭཱ་ཧཱ། གདན་གྱིའོ། །ཨོྃ་པུཥྤཾ་བྷྱོ་ས། ཨོཾ་དྷུ་པེ་བྷྱོ་ཤ། །ཨོྃ་དཱི་པཾ་བྷྱོ་ཧྲི། གྷ་ཙྪནྟེ་སྭཱ་ཧཱ། བྷཱ་བེ་ན་སུ་ར་ཨ་ག་མ་ནཱ་ཡ་སྭཱ་ཧཱ།
ལེའུ་བཞི་པ་ཞེས་བྱ་བའོ།། །།པདྨའི་དབང་ཕྱུག་སྐུ་ནི་གསེར་གྱི་མདོག །དྲི་ཆུའི་དངོས་པོ་ཤིན་ཏུ་སྣང་མཛད་དང་། །རོ་ནི་བདུད་རྩི་ཆུ་ཡི་ངོ་བོ་ཉིད། །མཐེ་བ་མཛུབ་ཀྱིས་ནི་ས་ཡི་སྟེང་དུ་དོར། །དབུས་མའི་རི་རབ་ཀྱིས་ནི་བདུད་རྩི་བསྲུབ། །
ཇི་བཞིན་གནས་བརྒྱད་འཐོར་འཐུང་དབུལ་བར་བྱ། །ཧ་ཡི་རྣམ་པས་ཁ་དོག་འཕྲོག །ཧོ་ཞེས་བྱ་བས་དྲི་མེད་བྱེད། །དཔའ་བོ་ཧྲིཿཡི་རྣམ་པས་འཇོམས། །རིམ་པ་འདི་ལྟར་ཤེས་པར་བྱའོ། །ལྷ་རྣམས་ཀུན་ནས་ལྕགས་ཀྱུ་ཡིས། །བདུད་རྩིའི་ཡི་
གེས་ཚིམ་པར་བྱ། །ལྕགས་ཀྱུ་ཀུན་ནས་སྐྱོད་བྱེད་ཅིང་། །རྣལ་འབྱོར་བདག་ཉིད་མཚན་ཉིད་ཡིན། །དཔལ་ལྡན་རྡོ་རྗེ་འཛིན་དེ་ཉིད། །དུད་པའི་ས་བོན་གྱིས་ནི་སྦྱང་། །གཏོར་མ་སྦྱང་བ་བྱས་པ་ཡིན། །དེ་ཡི་ས་བོན་གྱིས་དེ་སྦྱང་། །ལོགས་སུ་ཁ་
ཁྱེར་གསུམ་བྱས་ལ། །ཕོ་ཉ་རྣལ་འབྱོར་མས་སྤྱན་དྲང་། །ཀ་ཌ་ཀ་ཌ་བནྡྷ་བནྡྷ་ན་ཧྲྀ་ཁ་ཁ་ཁ་ཤ་ཏྲུཾ་ཛ་ཛ་ཤ་ཏྲུྃ་མཱར་ན་བ་ལི་བ་ཏ་ལི་དྷེ་བ་ཏི་ཤེ་སྭ། ལེའུ་ལྔ་པ་ཞེས་བྱ་བའོ།། །།དེ་ནས་གཞན་ཡང་རབ་བཤད་པ། །འཇིམ་པ་ལས་ནི་གཟུགས་
བརྙན་བྱ། །ཞལ་གསུམ་སྤྱན་གསུམ་རྐང་པ་གསུམ། །ཕྱག་གསུམ་རབ་ཏུ་བཞད་པ་དང་། །གླང་པོའི་མིག་ཅན་རོ་ལངས་མ། །རྟག་ཏུ་རལ་གྲི་ཞགས་པ་དང་། །གོས་དམར་པགས་པ་དམར་པོ་མནབས། །ཞབས་གཉིས་སྐད་ཅིག་ས་ལ་མནན་པ་
དང་། །རོ་ལངས་ཕྱག་རྒྱ་སྙིང་གར་མངོན་པར་བསྡིགས། །ཧཱུྃ་གི་སྒྲ་ཡི་ས་བོན་བཟླས་པ་ཡིས། །བསྟན་པ་སྲུང་ཞིང་སྐེམས་པ་ཡིས། །མངོན་དུ་ཕོ་ཉ་ཆེན་པོ་འོད། །ཀཱརྱ་ཀཱརྱ་བནྡྷ་བནྡྷེ། ནཱ་ད་ནཱ་ད་ཧཱུྃ་ཧཱུྃ་ཕཊ་ཕཊ། འདི་ནི་ཕོ་ཉ་མཆོག་གི་སྔགས། །

དབང་དང་མངག་ལ་དེ་བཞིན་མིང་། །དུག་དང་ལྷན་ཅིག་སྦྱར་བྱས་པའི། །ཁྲག་གིས་མངོན་པར་བྲི་བར་བྱ། །རྐང་པས་མངོན་དུ་མནན་བྱས་ལ། །བློ་དང་ལྡན་པས་རིམ་བཞིན་བཟླས། །ལན་ཅིག་བཟླས་ཤིང་ལན་ཅིག་མིན། །ལན་ཅིག་ཕྱག་
རྒྱ་བསྣུན་པར་བྱ། །མིང་ནི་བརྒྱ་ཕྲག་བརྒྱ་ཕྲག་གསུམ། །ནག་མོ་སེར་སྐྱ་ཙནྡན་དང་། །དམར་པོའི་མེ་ཏོག་ས་བོན་གྱིས། །དཀྱིལ་འཁོར་གསུམ་ནི་བྲི་བར་བྱ། །གུ་གུལ་ནག་པོའི་བདུག་པ་དྲི། །དེ་ཡི་གཏོར་མ་ལྡན་དབུལ་བཞིན། །སེར་སྐྱའི་ཕོ་
ཉ་མོ་ཞེས་བྱ། །ལེའུ་དྲུག་པ་ཞེས་བྱ་བའོ།། །།དེ་ནས་ཡང་དག་བཤད་བྱ་བ། །མི་ཤེས་མུན་པ་ཉིད་དང་འབུ་དང་སྲིན་བུའི་འཁོར་ལོས་ཁྱབ། །མི་རྣམས་སྡིག་པའི་ཁྱད་པར་ཉིན་རེ་བཞིན་དུ་སྤྱོད་པ་ནི། །དགེ་བའི་ལམ་ཆེན་དག་ནས་མི་ནི་
དབུ་མའི་སྐྱེ་བར་སྐྱེ། །ཐོས་ལ་མངོན་པར་དགའ་ཞིང་སྤྲོ་ཞིང་རྣམ་པར་ལྟ་བ་ཡིས། །མི་ཡི་ཡེ་ཤེས་མཆོག་དང་མཆོག་ཏུ་འགྱུར་བ་ཉིད། །རྒྱལ་བའི་ཐར་པ་དོན་དམ་མཆོག་ཏུ་རྣམ་པར་ཤེས། །ཕྲ་ཞིང་ཤིན་ཏུ་ཕྲ་བ་དེ་ཉིད་རབ་ཏུ་ཕྲ། །དངོས་པོ་མེད་ཅིང་
དངོས་པོ་དང་བྲལ་བ། །སྦྱོར་བའི་དངོས་པོ་བདེ་བར་རྟོགས། །ཤེས་པས་བསྒོམས་པ་དག་པ་ཡིས། །མཉམ་པར་དག་པ་དབུ་མའོ། །རྟག་ཏུ་བདག་མེད་རྣམ་པར་དག །འདོད་པས་རྣམ་པར་མི་གོས་པའོ། །ལེའུ་བདུན་པ་ཞེས་བྱ་བའོ།། །།
སངས་རྒྱས་ལྔ་ཡི་དངོས་པོ་ཡིས། །རྟག་ཏུ་སྤྱི་བོར་བརྒྱན་པའོ། །གཉིས་མེད་ཕྱག་རྒྱའི་གནས་སུ་ནི། །དེ་ལ་རྒྱ་མཚོ་ཆུ་ཉིད་བསྒོམ། །སྤྱི་གཙུག་རྣམ་ཤེས་ཚིམ་པར་བྱ། །གཡོན་གྱི་ཕྱོགས་སུ་མི་བསྐྱོད་པའོ། །དོན་ཡོད་གྲུབ་པ་གཡས་སུ་བཞུགས། །
རིན་ཆེན་གྱིས་ཀྱང་གཡོན་པར་བརྒྱན། །རྒྱབ་ཏུ་སྣང་བ་མཐའ་ཡས་དགོད། །སངས་རྒྱས་ལྔ་ནི་གཟུང་བར་བྱ། །གཞན་དུ་ནམ་ཡང་མ་བཤད་པ། །སངས་རྒྱས་བསྟན་བཅོས་ཉིད་དུ་གསུངས། །སྔ་དྲོ་ཕྱི་དྲོ་ཉིན་ཕྱེད་དུས། །དུས་གསུམ་དུ་ནི་རྟག་ཏུ་

བཟུང་། །ས་བོན་འདི་ཡིས་བཀྲུས་པ་ཡིས། །འཐོར་འཐུང་རྣམ་པར་སྦྱངས་པའོ། །ལྔ་པ་ཡང་དག་སྦྱར་བས་དབུལ། །ཆི་ལིང་ག་ཡི་ཐིག་ལེ་སྦྱང་། །གོང་བུ་བསྒོམས་པ་ཙམ་གྱིས་ནི། །རྣམ་ཤེས་ལྷན་ཅིག་དཀར་བའོ། །ལེའུ་
བརྒྱད་པ་ཞེས་བྱ་བའོ།། །།ཨེ་མའོ་ལས་ནི་མཆོག་ཏུ་གཙོ། །ཨེ་མའོ་རྣལ་འབྱོར་རྨད་དུ་བྱུང་། །ཨེ་མའོ་ཆོས་ནི་མཆོག་ཐོ་པས། །དྲང་སྲོང་ལྷན་ཅིག་ངོ་མཚར་སྐྱེས། །ཡེ་ཤེས་མཆོག་གི་ཆོས་འདི་ནི། །བྱང་ཆུབ་སེམས་དཔའ་འདུས་
ནས་གསུངས། །ཡེ་ཤེས་ཡིད་ཀྱི་ཆོས་ཅན་ནི། །ཚིག་གིས་ཁྱོད་ལ་བཤད་པ་ཡིན། །ཡེ་ཤེས་ཕྱག་རྒྱ་མཆོག་ཉིད་ནི། །ཡེ་ཤེས་རྩ་བ་ཡང་དག་འབྱུང་། །ཤེལ་བཞིན་དུ་ནི་དག་པ་ཡི། །དག་པ་གཉིས་སུ་མེད་པའི་རྟགས། །ལྷ་ཡི་ཡན་ལག་
མཆོད་པ་པོས། །གཉིས་མེད་དགོད་པར་ཡང་དག་ལྡན། །གཉིས་མེད་རྣམ་ཤེས་ངོ་བོ་ཡིས། །བློ་ལྡན་བདུད་རྩི་ཤེས་པར་བྱ། །བདུད་རྩི་ཆུ་ནི་དབུལ་བ་ཡིས། །ཕྱི་རོལ་རྣལ་འབྱོར་མ་མཆོད་དོ། །གཉིས་མེད་ཕྱག་རྒྱའི་རྡོ་རྗེ་འདི། །རྩ་གསུམ་གཉིས་
མེད་ཕྱག་རྒྱས་བཞིན། །རྐང་པས་པདྨར་མཉམ་ཞོན་པས། །འཁྲིག་པ་བདུད་རྩིའི་སྦྱོར་བའོ། །རྡོ་རྗེ་པདྨ་མཉམ་པའི་དངོས། །སྐྱེས་བུས་ཧཱུྃ་གི་སྒྲ་བྱས་ནས། །རང་བཞིན་གྱིས་ནི་སྒྲ་འབྱིན་ཅིང་། །གཉི་གའི་ཡེ་ཤེས་དཀར་པོ་བཞིན། །དེ་ཡི་རང་
བཞིན་གྱིས་ནི་རྡུལ། །དུ་བའི་ས་བོན་གྱིས་སྦྱར་བྱ། །དབང་པོ་རུ་རྟ་བི་ལ་བར་མཉམ། །ཁ་ར་སྦྲང་རྩི་བ་ལ་ཤ། །བདུད་རྩི་ཆུ་དང་ཡང་དག་ལྡན། །རྒྱུ་སྐར་ཟླ་བ་ལྷ་ཉིད་ལ། །བྱིན་ནས་དོན་ཆེན་དབང་དུ་བྱེད། །ལེའུ་དང་པོ་ཞེས་བྱ་བའོ།། །།
དེ་ནས་གཞན་ཡང་བཤད་བྱ་བ། །སྟོང་ཉིད་ངོ་བོའི་ཚུལ་གྱིས་ནི། །ཕྱི་དང་ནང་དུ་བཅས་པར་རོ། །ཡེ་ཤེས་ཆོས་ཀྱི་སྦྱོར་བ་ལས། །ཡེ་ཤེས་ཀྱི་ནི་སྦྱོར་བ་མཆོག །ཐམས་ཅད་ལུས་ལ་གནས་པ་ནི། །རྨོངས་པས་ཀུན་ཏུ་མི་ཤེས་པས། །དེ་ཕྱིར་རྨོངས་

པ་ཡོངས་སྤངས་ལ། །ཡེ་ཤེས་ཀྱི་ནི་གནས་པ་རྩམ་བྱ། །འདུ་འཛི་ལས་ནི་རྨོངས་པའི་ཚུལ། །དེ་ཕྱིར་འདུ་འཛི་ཡོངས་སུ་སྤང་། །གཅིག་པུའི་སྦྱོར་བས་གྲུབ་པ་ཡི། །གཅིག་པུས་འགྲོ་བ་བརྩམ་པར་བྱ། །བྱིས་པའི་སྐྱེ་བོས་མཐོང་བ་ཡི། །དེ་ཕྱིར་དེ་
ཉིད་གཅིག་པུ་ནི། །གནས་མེད་གནས་ནི་ཤེས་བྱས་ལ། །དངོས་པོ་མེད་པའི་ངོ་བོ་ལ། །གཉིས་སུ་མེད་པའི་བདག་ཉིད་ཀྱི། །གཉིས་ཀྱི་ཤེས་པ་རྣམ་པར་སྤངས། །དེ་ཉིད་རིག་པ་མཆོག་ཏུ་ཕྲ། །སྦྱོར་བའང་མཆོག་ཏུ་ཕྲ་བ་ཉིད། །མགྲིན་པ་རྐན་གྱི་སྟེང་
དུ་བཟླ། །སྨིན་མའི་དབུས་དང་མིག་གི་རྩར། །སྒོར་ནི་ཐིག་ལེ་ཕྲར་གྱུར་པ། །འཁོར་ལོ་ཕྲ་རབ་རྡུལ་ལྟ་བུར། །དང་པོ་མཆོག་དང་ཡང་དག་ལྡན། །བླ་མས་བསྟན་ལས་ཤེས་པར་བྱ། །རྡུལ་ཕྲན་ཡེ་ཤེས་དེ་ཁོ་ན། །དེ་ཕྱིར་བློ་ལྡན་གྱིས་ཤེས་བྱ། །
ལེའུ་གཉིས་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྐྱོན་དང་ཡོན་ཏན་དངོས་པོ་སྤང་། །ཁ་གའི་སྒོ་ནི་ཇི་བཞིན་བསྡམ། །བུག་པ་དགུ་དང་ཁ་ག་ཉིད། །བུ་ག་དགུ་ལས་དུད་པ་འབྱུང་། །སྐྱེས་བུ་གོང་གི་སྒོ་ལ་ནི། །
དེར་ནི་པདྨ་དཀར་པོ་བཞིན། །ལུས་ཀུན་ལ་ནི་དགོད་བྱ་ཉིད། །ལྷ་ཉིད་སོ་སོར་བསྒོམ་པར་བྱ། །ལྷ་ཡི་ས་བོན་དེ་ཉིད་ཀྱིས། །རྡོ་རྗེའི་ཕྱག་རྒྱ་དགོད་པ་བཞིན། །རླུང་གི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་འདྲ་བའོ། །ཡེ་ཤེས་
རྣམ་ཤེས་མཆོག་ཏུ་དྲང་། །དངོས་དང་དངོས་པོ་ཕྲ་བའི་དེ་ཁོ་ན། །དངོས་དང་ཤིན་ཏུ་འབྲེལ་བར་མཚུངས་པའོ། །སྙིང་གར་གནས་པའི་སྙིང་པོ་མཆོག་མིང་བརྗོད། །སེམས་ཀྱི་རྩ་ནས་དེ་བཞིན་དུ་ཧི་ཀ། །སྟེང་དང་འོག་དང་དེ་བཞིན་སྟེང་། །ཡི་གེ་
བྱེད་དང་གཉིས་ཀྱིས་སྦྱང་། །བཟློག་པར་བྱ་བའི་ས་བོན་གྱིས། །ལྷན་ཅིག་བློ་དང་ལྡན་པར་སྦྱང་། །ལེའུ་གསུམ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཐམས་ཅད་ལུས་ལ་གནས་པ་ཡི། །ཡེ་ཤེས་ཀྱི་ནི་ཡེ་ཤེས་མཆོག །

ས་དང་རི་དང་དེ་བཞིན་ཤིང་། །བོང་པ་ཆུ་དང་དེ་བཞིན་སྲིན། །འབུ་སྲིན་རྣམ་པར་སྤངས་ནས་ནི། །ཡེ་ཤེས་ལུས་ལ་སེམས་མེད་པའོ། །འབུ་དང་སྲིན་བུ་ཡེ་ཤེས་བླུན། །ཁྱད་པར་ཉིད་དུ་སྤང་བའོ། །རྣམ་གསུམ་ལྷ་དང་གནོད་སྦྱིན་དང་། །
ལྷ་མིན་ཡི་དགས་མཁའ་འགྲོ་མ། །གཟུགས་དང་ཡེ་ཤེས་དེ་བཞིན་ཁྲོ། །ཞི་ཞིང་ཞི་བའི་ཡེ་ཤེས་བཞིན། །ལུས་ལ་ཐམས་ཅད་གནས་པ་ནི། །བློ་དང་ལྡན་པས་ཁྱད་པར་ཤེས། །ལེའུ་བཞི་པ་ཞེས་བྱ་བའོ།། །།དེ་ནས་གཞན་
ཡང་བཤད་པར་བྱ། །དྲང་སྲོང་ངོ་མཚར་སྐྱེ་བ་ནི། །ཀ་བ་གཅིག་དང་སྒོ་དགུ་དང་། །བུ་ག་གསུམ་དང་ཡེ་ཤེས་ལྷ། །རྣམ་ཤེས་ཡེ་ཤེས་ལུས་ལ་ནི། །ཆོས་ཀྱི་དབྱིངས་ནི་ཇི་ལྟར་གྲགས། །ཐར་པ་ཐོབ་པའི་དུས་སུ་ནི། །མི་ཤེས་ཡེ་ཤེས་ལུས་ཇི་བཞིན། །
ཇི་ལྟར་ཆོས་ཀྱི་དབྱིངས་ཉིད་དང་། །ཡེ་ཤེས་དང་ནི་གཟུགས་ཀྱི་ཆ། །ཡེ་ཤེས་ཇི་ལྟར་མཐོང་བ་དང་། །ཇི་ལྟར་ན་ནི་ཡེ་ཤེས་གཟུགས། །དེ་ཉིད་གཟུགས་ལ་སེམས་མེད་པ། །བདུད་རྩིའི་ཡི་གེར་རྣམ་པར་བརྟག །ཡེ་ཤེས་ལྷ་དང་མཉམ་པའི་དངོས། །
སྔོན་གྱི་མཚན་ཉིད་ལྟ་བུར་རོ། །ལེའུ་ལྔ་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །སྔགས་དང་རྒྱུད་ཀྱི་དབྱེ་བ་ཉིད། །ཏི་ལ་ཏི་ལ་ཡི་ནི་མཐའ། །སྟོང་པ་སྒྲ་དང་ཡང་དག་ལྡན། །སྟེང་དུ་བདུད་རྩིའི་ཐིག་ལེ་སྦྱིན། །མཆོག་གི་
ཡི་གེར་ཡང་དག་ཤེས། །སྟོང་ཕྲག་གཅིག་དང་སུམ་བརྒྱ་བརྒྱད། །དེ་ཡི་མཚན་ཉིད་བཟླས་པའོ། །བདག་ཉིད་ལུས་ལ་དགོད་པ་ནི། །དེ་བཞིན་ལྷ་ནི་བསྐྱེད་ཅིང་བསྐྲུན། །ལས་བརྒྱད་དང་ནི་མཉམ་པ་ཡི། །རེའུ་མིག་བརྒྱད་ཀྱི་དབྱེ་བའོ། །ལས་བཞི་ཡི་ནི་བློ་
ཅན་གྱི། །དེ་བཞིན་ས་བོན་སྔོན་དུ་བསྙེན། །ཨོྃ་ཨཱ་གཙྪཾ་ཏུ་དེ་བསམ་ཡེ་ཨཱ་ཀརྵ་ཡ་ཧཱུྃ་ཕཊ། སྤྱན་དྲང་བའི་སྔགས་སོ། །ལེའུ་དྲུག་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །ཡེ་ཤེས་ཅན་གྱིས་སྤྱན་དྲང་བ། །ཨོྃ་ཨ་ཀྵོ་ནི་ཏྱཾ་མ་

ཧཱ་ནཱ་ག་ཏ་ཀྵ་ཀ་ཝ་ས་ཝ་ཏ་ན་ཧཱུྃ་ག་ཧཱུྃ་ག་སྭཱ་ཧཱ། ཀླུའིའོ། །ཨོྃ་དྷ་ནཱ་དྷི་པིཾ་ཨཱཛྙཱ་ན་ཡ་ཀྵ་ཎོ། མཱ་ག་ཙྪ་ས་མ་ཡ་ཨུ་ད་བྷཱ་པ་ཀྲུྃ་ཀྲུྃ་ཀྲུྃ་ཧྲཱིཿསྭཱ་ཧཱ། གནོད་སྦྱིན་གྱི་སྔགས་སོ། །ཨོྃ་བྷཱ་ཏ་ཀྲོ་དྷེ་ནཱ་བྷེ་ཨཱ་གཙྪ་སམ་ཡ་ཨུད་མ་ཧེ་ཕུ་ཕུ་ཕུྃ་ཛཿ། འབྱུང་པོའི་སྔགས་སོ། །ཨོྃ་གྷུ་རུ་གྷུ་རུ་
ཨཱ་ཀརྵ་ཡ་ཧཱུྃ་ཧྲི་ཛཿ། འབྱུང་པོ་དགུག་པའི་དམ་ཚིག་གི་སྔགས་སོ། །ལེའུ་བདུན་པ་ཞེས་བྱ་བའོ།། །།དེ་ནས་གཞན་ཡང་བཤད་བྱ་བ། །གང་གིས་མཆོག་གི་ཆོས་ཤེས་ཤིང་། །གང་གིས་རྣམ་པར་མི་རྟོག་ཤེས། །གང་ཞིག་ལྷ་ཉིད་རྣམ་ཤེས་པ། །
གང་ཤེས་དེ་ནི་རྣལ་འབྱོར་པའོ། །གང་ཞིག་གསང་བ་མི་ཤེས་པ། །མཆོག་གི་ཆོས་ནི་མཆོག་ཕྲ་བ། །ཐམས་ཅད་ལུས་ལ་གནས་པའི་མཆོག །རང་ལུས་མཆོད་པས་ཕ་རོལ་མཆོད། །གཞན་དུ་བྱས་ན་ལྷ་ཉིད་བརླག །མཆོད་པའི་བདག་ཉིད་དེ་ཉིད་མཆོད། །ཐམས་
ཅད་ལུས་ལས་ཤེས་འགྱུར་བས། །ཐམས་ཅད་ལྷ་ཉིད་ཚིམ་པའོ། །དེ་ཉིད་ཡེ་ཤེས་ལྷར་གྱུར་པས། །བདག་ཉིད་ལས་ནི་ཐམས་ཅད་པའི། །རྟག་ཏུ་ཉོན་མོངས་རྣམ་སྤངས་ནས། །ཡེ་ཤེས་ཅན་གྱི་སྐུ་རུ་གྱུར། །དེ་ཡི་མིང་ནི་དེ་བཞིན་དག །རྣལ་འབྱོར་སྦྱོར་
བའི་བློ་ལྡན་པས། །ཚེ་རབས་གཞན་དུ་བྱས་པའི་སྡིག །བཀླགས་པ་ཙམ་གྱིས་ཐག་བསྲིངས་པའོ། །བརྒྱད་པ་སྟེ་དེ་རྣམས་ཀྱི་བདེ་བར་གཤེགས་པས་གསུངས་པ་རབ་ཏུ་བྱེད་པ་བཅྭ་བརྒྱད་ལས་རྩ་བའི་འཁོར་ལོ་ཞེས་བྱ་བ་དྲུག་ཅུ་རྩ་བཞིའི་རྣམ་པར་དབྱེ་བ་
རྫོགས་སོ།། །།ཐམས་ཅད་མཁྱེན་པ་ལ་ཕྱག་འཚལ་ལོ། །རྣལ་འབྱོར་རྣལ་འབྱོར་དབང་ཕྱུག་ཉིད། །དེ་བཞིན་སྦྱོར་བའི་བསྟན་བཅོས་དང་། །དྲང་སྲོང་རྣམས་ཀྱི་ཡེ་ཤེས་དབང་། །གནས་གཙང་གནས་ན་བཞུགས་ནས་སུ། །ཐམས་
ཅད་མཁྱེན་པས་འདི་སྐད་གསུངས། །རྩ་ཡི་འཁོར་ལོ་རྣམ་བཤད་པ། །སྟོང་པ་ཉིད་ལ་མཆོག་ཏུ་བརྩོན། །ཡེ་ཤེས་དབང་ཕྱུག་ཡང་དག་ལྡན། །གཉིས་མེད་གཉིས་མེད་ལ་བརྟན་པ། །ཁམས་བཞི་ཡི་ནི་ངོ་བོ་དང་། །རྩ་དགུ་ཡི་ནི་དབྱེ་བ་དང་། །དེ་བཞིན་

ལྷ་དགུ་ལྷག་པ་ཉིད། །སྔགས་དང་ལས་ནི་གསུམ་ཉིད་ཀྱིས། །རྒྱལ་པོ་དབང་དུ་འགྱུར་བའོ། །ཡུལ་འཁོར་སྐྱེ་མཆེད་ལུས་རྒྱལ་ཉིད། །སྒོ་ལྔ་ནས་ནི་དྲང་བར་བྱ། །ཆུ་དང་མེ་དང་ནམ་མཁའ་རླུང་། །འདི་ནི་ལུས་ལ་གནས་པ་ཉིད། །
ཆུ་ནི་དབང་ཕྱུག་རྒྱལ་ཆེན་པོ། །དེ་བཞིན་བདུད་རྩི་དཀར་པོའི་རྩ། །མེ་ནི་དུ་བར་འབར་བཞིན་དྲག །དེ་བཞིན་མྱ་ངན་འབར་བའོ། །དབང་ཆེན་དུང་གི་རང་བཞིན་རྩ། །མི་རྟག་པས་ནི་ཡང་དག་གནས། །ནམ་མཁའ་ནམ་མཁའི་རྩ་ཉིད་ནི། །པདྨ་དེ་བཞིན་
བརྟན་ཞིང་རྟག །གི་ཝང་རྣམ་པར་རྨོངས་པའི་རྩ། །ལུས་པོ་བསྐྱེད་ཅིང་སྡུག་བསྔལ་གནས། །དྲི་མེད་གསུམ་ནི་གཡོ་བའི་རྩ། །སྒྲ་ནི་བསྒྲུབ་པར་དཀར་བའོ། །འབྱེད་པ་ཉོན་མོངས་ཉིད་ཀྱི་རྩ། །སྡིག་པའི་རྩ་དང་སྡིག་པའི་གནས། །མི་ཤེས་པ་དང་
ཕྱུགས་ཉིད་ཡིན། །ས་གདུགས་རྩ་ནི་དབང་ཕྱུག་མཆོག །དཀར་པོ་མྱུ་གུ་རབ་དབྱེ་དང་། །དེ་བཞིན་དུ་དཔས་མི་བཟད་ཕྱིར། །ས་ནི་དུང་དུ་གསུངས་པའོ། །ནམ་མཁའ་གཡོ་ཞིང་འགྲོ་བའོ། །རྨོངས་པས་སྲེད་ཅིང་འཇིགས་པའི་དངོས། །དེ་བཞིན་ཉོན་
མོངས་སྡིག་པའི་གནས། །གཡོ་ཞིང་གཡོ་བའི་བློ་ཉིད་ནི། །མི་ཤེས་ཕྱུགས་ཀྱི་རྩ་ཉིད་ལ། །དགུ་ཡི་ལྷ་ནི་ཅི་ཞེས་བརྗོད། །དབྱེ་བས་རྣམ་པ་བཅྭ་བརྒྱད་ནི། །དེ་བཞིན་འཕགས་པ་ཡེ་ཤེས་དབང་། །འགྲོ་བའི་བསོད་ནམས་སྡིག་གི་གཞི། །དེ་བཞིན་སེམས་
ཅན་སྲིད་པའི་ལས། །དེ་བཞིན་ཉོན་མོངས་དམྱལ་བར་བཤད། །སྲིད་པ་ཕ་དང་མ་ཡི་དངོས། །གཞན་དུ་དུ་མའི་ཤེས་པ་ཉིད། །རྒྱལ་པོ་ཞེས་པ་ཅི་ཞེས་བརྗོད། །དབང་པོའི་ཡུལ་ནི་རྒྱལ་པོའོ། །ཕན་ཚུན་བསྟེན་ཅིང་བསྟེན་པ་ལས། །ལུས་ཀྱི་འཁྲུལ་འཁོར་
རྣམ་པར་སྐྱེ། །ཉོན་མོངས་བ་སྤུ་སོགས་པའི་ལུས། །ལུས་པོ་ཡི་ནི་གཞི་ཉིད་དོ། །འཁོར་བར་འགྱུར་བའི་ཞགས་པ་ཡིས། །གླང་ཆེན་གནད་དུ་བརྒྱབ་པ་བཞིན། །ཚེ་རབས་སྔ་མར་སྟོབས་ཆུང་བའི། །རྣལ་འབྱོར་པ་ནི་སྟོང་ལ་དགའ། །རབ་ཏུ་བྱེད་པ་

ཞེས་བྱ་བའི་ལེའུ་སྟེ་དང་པོའོ།། །།དེ་ནས་གཞན་ཡང་རབ་བཤད་པ། །རྩ་ཡི་ལྷ་ནི་དེ་བཞིན་རིམ། །བཅུ་གཉིས་པ་ནི་མངོན་དུ་བྲི། །དཀར་པོ་འབྱུང་བའི་དབྱིབས་ཀྱི་ནི། །ཆ་བཞི་ལག་པའི་རིགས་པ་ཡིས། །སྤྱི་བོར་དཀར་པོའི་གནས་
རང་བཞིན། །རྒྱས་པ་ལྔ་ཡི་སྟེང་དུ་ནི། །འབར་བའི་རྩེ་ནི་སྟེང་དུའོ། །སྨིན་དབུས་དེ་བཞིན་ཐིག་ལེ་དང་། །མིག་ནི་བཅིངས་པ་ཉིད་དང་ཡང་། །རྣ་བ་ཉན་པ་ཡི་ནི་རྩ། །གཡོན་པའི་དབུགས་ནི་བུད་མེད་ཉིད། །དེ་བཞིན་སྐྱེས་བུ་གཡས་པ་ཉིད། །དུད་པ་
སྔོན་གྱི་དབུགས་དང་ནི། །ལྕེ་དང་རོ་ཡི་རྩ་ཉིད་དོ། །བདུད་རྩི་རྣམ་པ་དགུར་བཤད་པ། །དཀར་པོའི་རྩར་ནི་ཡོངས་སུ་གྲགས། །སྔོན་དུ་དུ་བའི་མཚན་ཉིད་ནི། །དུད་པ་འབར་པའི་རྩ་ཆེན་པོ། །དཔུང་པའི་ངོས་སུ་ཡང་དག་གནས། །བྲང་དང་རུས་སྦལ་
མཚམས་སུ་ནི། །རྩ་ནི་མཚམས་ཀྱི་དབུས་སུའོ། །ལག་པའི་སོར་མོའི་དབྱིབས་ལྟ་བུ། །སོར་མོ་དང་ནི་སེན་མོའི་རྒྱབ། །དུད་པ་ལྷག་མའི་རྩ་ཉིད་ནི། །བྲང་ཉིད་དུ་ནི་ཡོངས་སུ་གྲགས། །ལོགས་དང་དེ་བཞིན་ཉེ་བ་ཡི། །དེ་བཞིན་ཇི་ལྟར་ཚིགས་དང་ཚིགས། །
ལུད་པ་དྲི་ང་མཆན་ཁུང་མཉམ། །རོ་སྟོད་ལག་པའི་རྩ་བ་དང་། །རྐེད་པའི་རྒྱབ་ཀྱི་རྩ་ཉིད་ནི། །དུང་ཉིད་དུ་ནི་ཡོངས་སུ་གྲགས། །དང་པའི་མཚམས་དང་རྐེད་པ་ཉིད། །བརླ་དང་བརླར་ནི་ཉེ་བར་མཚོན། །འགྲོ་བ་ཡི་ནི་ལྟོ་བའི་རྩ། །རྐང་པ་
དུས་ཀྱི་མེ་དང་ནི། །པདྨ་རྐང་པ་མངའ་བདག་ཉིད། །རྩར་ནི་བློ་དང་ལྡན་པས་ཤེས། །གི་ཝང་འདོད་པའི་གནས་ཀྱི་གནས། །རྟག་ཏུ་ལྕི་བར་མཚན་པར་གསུངས། །བླ་མའི་ཕ་རོལ་འགྲོ་བའི་རྩ། །དེ་བཞིན་སྲིན་བུ་འབྱུང་བའོ། །གི་ཝང་དཀུ་ཡི་གནས་
སུ་ནི། །གཙོ་བོའི་དབྱིངས་སུ་གྲགས་པ་ཉིད། །རི་མེད་རྐང་པ་གཡོན་པར་གནས། །རྐང་པའི་གནད་དང་སྣ་ཡི་རྩེ། །པུས་མོའི་རྗེས་སུ་སྐྱོད་པའོ། །ཡི་དགས་བརྟུལ་ཞུགས་མེར་བཤད་པའོ། །རྩ་ཉིད་དུ་ནི་ཡོངས་སུ་གྲགས། །གཙོ་བོའི་འགྱེད་པ་གཡོན་

པའི་རྩ། །མཆན་ཁུང་དང་ནི་མཆན་ཁུང་མིད། །དྲག་པའི་ཚོགས་ཀྱི་དེ་བཞིན་རྩ། །དྲ་བར་གནས་པའང་དེ་བཞིན་ནོ། །ནུ་མའི་ཁུང་གི་གྲངས་ཀྱིས་ནི། །སྟོང་གི་ཆ་རུ་དེ་བཞིན་བཤད། །དེ་རྣམས་འབྱེད་པའི་རང་བཞིན་རྩས། །ལུས་སུ་ཡོངས་
སུ་གྲགས་པ་ཉིད། །ས་གདུགས་དཔུང་པ་གཡོན་པ་དང་། །དེ་བཞིན་བྲང་དུ་ཡང་དག་གནས། །མཚམས་དང་ཚིགས་ཀྱི་རྩ་ཡི་མཐའ། །དེ་བཞིན་འགྲོ་བའི་ལག་པ་དང་། །སྐྱེ་མཆེད་དྲུག་གི་དབྱེ་བ་ཡིས། །རང་བཞིན་གྱིས་ནི་གྲུ་བཞི་དང་། །རང་བཞིན་གྱིས་
ནི་འབབ་པའི་གནས། །རང་དང་སྐྱེས་བུ་ལ་ཡང་སྐྱེ། །དོན་དམ་ཉིད་དུ་དངོས་མེད་ཅིང་། །འཇིག་རྟེན་ལ་ཕན་སྙིང་བརྩེ་བས། །ཀུན་ཏུ་འབྱུང་བ་སྐྱོན་མེད་པའོ། །འགྲོ་བའི་གནས་ཀྱི་ཡེ་ཤེས་ཆོག་མཆོག །དངོས་མེད་དག་པ་དོན་དམ་དབུ་མ་པ། །མ་རིག་ནས་
བརྩམས་བཅུ་གཉིས་ས་དབང་ཕྱུག །བྲི་ཥ་བྷ་སོགས་རེ་བ་ནི། །བདུད་རྩི་སྦྱོར་བ་མི་སྐྱེའོ། །དབུས་སུ་ཡང་དག་སྦྱོར་བ་གནས། །སྲིད་པའི་ཉེས་པ་རྣམ་པར་སྤངས། །བཅུ་གཉིས་སྦྱོར་བའི་གནས་སུ་ནི། །རྣལ་འབྱོར་པ་ནི་མཁས་པས་ཤེས། །རྩའི་འཁོར་
ལོ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་གཞན་ཡང་བཤད་བྱ་བ། །ཀུན་ནས་སྐྱེ་བའི་དབྱེ་བའི་ཆ། །སྐྱེས་བུ་སོ་སོར་གནས་པ་དང་། །རྩ་དང་དབུགས་ནི་སོ་སོ་ཡི། །གཞན་གྱི་རྐང་པ་ཆད་པ་ན། །རྣམ་པ་མང་དུ་བདག་པོའི་རླུང་། །
འབྱུང་བའི་རླུང་ནི་ཆད་པར་འགྱུར། །བྲང་གི་འོག་དང་རྐེད་པའི་གོང་། །རླུང་གི་དཀྱིལ་འཁོར་གྱིས་བསྐོར་བ། །དངོས་མེད་དངོས་པོ་ཡང་དག་གནས། །ཁ་དོག་མེད་ལ་མཚོན་ཀུན་དངོས། །གཟུགས་མེད་ཡེ་ཤེས་གཟུགས་ཅན་དང་། །སྟོང་དང་སྟོང་མིན་
དོན་གྱི་གནས། །ཡེ་ཤེས་དབང་ཕྱུག་རྒྱལ་པོ་ཆེ། །རླུང་གི་དཀྱིལ་འཁོར་ལ་བརྟེན་ཅིང་། །རྣམ་ཤེས་ལས་ནི་བྱེད་པ་ཉིད། །བཅུ་གཉིས་དངོས་པོ་བསྒྱུར་བའི་བདག །སུམ་བརྒྱ་དེ་བཞིན་དྲུག་ཅུ་ཡི། །ཆུ་ཚོད་དབུགས་ནི་རྩ་བཞིན་ནོ། །སྔ་དྲོ་དཀར་པོ་

རྒྱུ་བ་ནས། །ཉིན་དང་མཚན་དུ་ཤེས་པར་བྱ། །འཕོ་བ་བཅུ་གཉིས་བདག་ཉིད་ནི། །ཉིན་མཚན་དུ་ཡང་དེ་བཞིན་ནོ། །བཅུ་གཉིས་ས་ལ་ཆད་པ་ཡིས། །བྱང་དུ་བགྲོད་པའི་མཚན་མོའོ། །ལྷོ་ཕྱོགས་སུ་ཡང་སྔོན་བཞིན་དུ། །ཉིན་མོའི་རླུང་ནི་ཆད་པའོ། །བི་
ཤུའི་བར་དུ་ཟས་སྦྱར་བ། །རིམ་བཞིན་རབ་ཏུ་གྲགས་པ་ཉིད། །དབུགས་ཀྱི་སྦྱོར་བའི་རིམ་པ་འདི། །ཡེ་ཤེས་ཅན་གྱིས་ལས་ལ་སྦྱར། །མཐའ་མའི་ཡུལ་དང་ཡུལ་འཁོར་གྱི། །རིམ་བཞིན་འཁོར་ལོས་སྒྱུར་བའོ། །རོ་ཧི་ཏ་དང་མོ་ཧི་ཏ། །བཟང་པོ་ཁྱུ་མཆོག་
བླ་མ་དང་། །ཀུར་མ་མ་ག་རནྡྷ་དང་། །དེ་བཞིན་རྨི་ལམ་ལྐུགས་པ་དང་། །ཀུན་རྨོངས་འཇིགས་དང་འདོད་པ་ཡི། །བཅུ་གཉིས་ས་ནི་སྲིད་པའི་སྐྱོན། །རོ་ཧི་ཏ་ལ་ལྷ་མཆོད་བྱ། །མོ་ཧི་ཏ་ལ་ནོར་རྙེད་ཅིང་། །བཟང་པོ་ལ་ནི་མཛེས་པར་བཟའ། །མང་དུ་ཁྲོ་བ་བྷེ་ཥ་
བ། །ཀུར་མ་མཆོག་ཏུ་སེམས་ཁྲལ་ཅན། །མ་ཀ་ར་ལ་གཏམ་གྱི་གཞི། །བླ་མ་བསྒྲུབ་པའི་དངོས་པོ་ནི། །རནྡྷ་ལ་ནི་སྡིག་པའི་བློ། །བྱཱ་ཀུ་ལི་དང་ཉིད་དང་ནི། །སྭ་པྣ་ལ་རྨི་ལམ་ཚུལ། །རྨོངས་པ་སེམས་ཁྲལ་མཆོག་དང་ནི། །གླུ་དང་རིག་པ་ཀློག་ལ་མཁས། །
འདོད་པ་ལ་ནི་འཁྲིག་པར་བཤད། །བཅུ་གཉིས་སྲིད་པའི་ཉེས་སྐྱོན་ནོ། །ཤེལ་ལྟ་བུར་ནི་གཅིག་གིས་གཙོ། །རྒྱས་པར་ཚོན་རྩི་བདུན་གྱིས་སོ། །དེ་ཡི་རྣམ་ཤེས་སྲིད་པའི་དངོས། །ཡུལ་ནི་དངོས་པོ་མེད་པར་གནས། །ཡེ་ཤེས་ཀྱི་ལེའུ་ཞེས་བྱ་སྟེ། གསུམ་
པའོ།། །།དེ་ནས་གཞན་ཡང་བཤད་བྱ་བ། །སྐུ་གསུམ་ཇི་ལྟར་སྟོང་པ་ནི། །འདི་ནི་དམིགས་པ་བཅས་པས་གཟུང་། །རང་བཞིན་དང་བྲལ་མ་ཡིན་པ། །དངོས་པོ་ན་མ་མཁའ་བརྟག་པར་བྱ། །དངོས་པོའི་ཉེས་པ་སྤངས་པ་ཡིས། །གཟུགས་སུ་མི་
གནས་ཟད་པའོ། །ལམ་ལ་གནས་པའི་རྣལ་འབྱོར་པས། །གཟུགས་ནི་མི་གནས་ཟད་པར་བྱེད། །ཕྱི་སྟོང་འོག་ཀྱང་སྟོང་པ་ཉིད། །སྐྱོན་མེད་དབུས་ནི་སྟོང་པའོ། །ཐམས་ཅད་སྟོང་པ་ཉིད་དང་ནི། །འགྲོ་བའང་སྟོང་པ་ལྔ་པའོ། །ཡུལ་ལྔ་ཡང་ནི་སྟོང་པ་ཉིད། །དེ་

བཞིན་དབང་པོ་ལ་སོགས་པའང་། །སྟོང་པར་མི་བརྟག་ཡང་དག་གནས། །དེ་ཕྱིར་རྡུལ་མེད་སྟོང་པའི་ཚུལ། །ཇི་ལྟར་ཞིང་པས་ཞིང་ནི་ཐབས་ཀྱིས་ཡང་སྦྱངས་ནས། །ཐོང་པས་རྨོ་ཞིང་ཐོང་པས་ཀུན་དུ་རབ་བསྒྱུར་བས། །ཞིང་ལ་གནོད་པའི་རྩྭ་
དང་ལྗོན་ཤིང་རྒྱ་ཆེར་སེལ། །དེས་ན་རྣམ་དག་གཙང་སྦྲ་ཅན་ཞེས་བརྗོད་དེ་བཞིན། །དེ་བས་མཆོག་ཏུ་སྦྱོར་བའི་བདག །གཉིས་པ་ཡང་ནི་གཞག་པར་བྱ། །དེ་ལྟར་དེ་བཞིན་ཕྱི་ཉིད་བཀྲུ། །དེ་ཕྱིར་མཁས་པས་སྟོང་པ་ཉིད། །གསུམ་གྱི་ཚུལ་གྱིས་དག་པར་བྱ། །
དེ་བཞིན་གཟུགས་དང་སྟོང་པ་བཞིན། །དབུས་སུ་རྣམ་ཤེས་ས་བོན་ནོ། །ས་བོན་ས་བོན་མྱུ་གུ་དང་། །གཟུགས་དང་དབང་པོ་རྩ་ཡི་གཞི། །རང་བཞིན་ཚུལ་གྱིས་ཆ་ཤས་མཚན་ཉིད་ནི། །སྐྱོན་མེད་རྡོ་རྗེའི་རང་བཞིན་ཡང་དག་གནས། །དབང་པོ་དྲུག་དང་ཆོ་ག་
དྲུག་ནི་ཡང་དག་འབྱུང་། །ལྷ་གནས་བཅུ་གཉིས་ས་ནི་སརྦ་དང་། །སྔགས་ཀྱི་ཡི་གེ་མཆོག་ཉིད་ནི། །ཡིད་ཀྱི་འཕྲུལ་པས་བསྒྲུབ་པར་བྱ། །ཨེ་མའོ་སེམས་ཅན་ཉོན་རེ་མོངས། །སྔགས་ནི་ཨུ་གུ་ཨུ་གུ་དང་། །ཉམས་པའི་གཟུགས་བརྙན་མཉམ་བསྒོམ་
པ། །སྙིང་པོ་ཉིད་ཀྱིས་རྣམ་པར་སྤངས། །སྔགས་ཀྱི་ཡི་གེ་དམ་པ་ནི། །དེ་ཕྱིར་ཡིད་ཀྱིས་རྗེས་སུ་འབྲང་། །སེམས་ཅན་ཐམས་ཅད་བསྐྱེད་ཅིང་གཡོ་ཞིང་བསྐྱེད་པ་ཡི། །སྔགས་ནི་བློ་དང་ལྡན་པས་ངེས་པར་ཤེས་པར་བྱ། །དེ་ཉིད་མེད་པའི་སྔགས་ཀྱིས་འགྲོ་བ་
རྨོངས་པར་བཟོད། །ལོག་པར་སྨྲ་བ་ཡི་ནི་གཟུགས་བརྙན་སེམས་དང་ནི། །སྔགས་ཀྱི་བདག་ཉིད་དོན་དམ་མཆོག་གི་ཡི་གེ་ཡིས། །ལས་བཞི་ཡི་ནི་ཆོ་ག་ཡོངས་སུ་གྲགས་པའོ། །སྟོང་པ་ཉིད་ཀྱི་ལེའུ་ཞེས་བྱ་སྟེ་བཞི་པའོ།། །།དེ་ནས་གཞན་ཡང་
བཤད་བྱ་བ། །སྐྱོན་དང་ཡོན་ཏན་སྤངས་གྱུར་པའོ། །དབུ་མའི་གནས་ནི་སྐྱོན་མེད་པའོ། །རང་བཞིན་དག་པའི་ཡིད་ལས་འབྱུང་བའི་ལུས། །བདག་མེད་རྣལ་འབྱོར་གཅིག་གི་ཡིད་ཀྱིས་སྦྱར་བར་བྱ། །ཇི་ལྟར་མ་བསྲེགས་སྣོད་ཀྱི་ཆུ་བཞིན་དུ། །ཁྱོད་ཀྱིས་ནང་གི་རྣལ་འབྱོར་

མང་དུ་འཇིག་པའོ། །ཇི་ལྟར་རྫ་མཁན་གྱིས་ནི་མེ་ནི་ཀུན་ཏུ་གང་བས་འགེངས། །དུ་མ་དབུས་སུ་ཟད་པར་བྱས་པས་རང་གི་གཟུགས་བཞིན་ནོ། །ནང་གི་ཡེ་ཤེས་དབང་ཕྱུག་མེ་ནི་འབར་བ་ཡིས། །དེ་ཡི་གཞིག་པས་འདིར་ནི་གཟུགས་ནི་གྲོལ་བ་བཞིན། །རང་བཞིན་
དག་པས་དག་པའི་ཆོས། །དག་པའི་དབྱངས་ཀྱི་ལམ་ཆེན་པོ། །མ་དག་རྨོངས་པའི་རྒྱ་མཚོ་ནི། །རྣམ་རྟོག་བཅས་པ་རྣམ་པར་སྤང་། །དག་པའི་ཆོས་ནི་མཆོག་ཏུ་ཞི། །དག་པའི་ཆོས་ནི་སྐྱོན་མེད་པའོ། །དག་པས་བྱང་ཆུབ་ཐོབ་པའི་ཕྱིར། །དག་པའི་ཆོས་
ནི་རབ་ཏུ་བསྟན། །དང་པོར་གཞུ་ལས་རྒྱལ་བ་ཉིད། །གཤེར་བ་ནུབ་ཏུ་མཆོག་ཏུ་བརྩོན། །སྐུ་གསུམ་མ་ནི་ལྷན་ཅིག་གནས། །བློ་དང་ལྡན་པས་ས་བོན་བསྐྲུན། །དེ་ཡི་གནས་སུ་སྲོག་གསུངས་པ། །སྔ་དྲོ་སྐྱེས་བུ་གནས་པ་ཉིད། །དབུགས་ནི་ཡང་དག་
འཕོ་བའི་ཚེ། །རིམ་བཞིན་བཅུ་གཉིས་སྦྱར་བར་བྱ། །ལྟེ་བར་ཕྱུགས་ཀྱི་ཞགས་པ་ནི། །དེ་ཡི་ས་བོན་ཕྱུགས་སུ་གསུངས། །ཆུ་ཤིང་མེ་ཏོག་ལྟེ་བར་གནས། །སྙིང་གར་འགྲེང་བར་གནས་པ་ཉིད། །ཁ་ནི་འོག་ཏུ་ཟླུམ་པ་ཉིད། །མཁས་པ་ཡིས་ནི་རྒྱས་པར་བྱ། །བདུད་
རྩིའི་ཡི་གེ་སྒྲ་ཡིས་ནི། །ཡིད་འོང་ལྷན་ཅིག་དགྲམ་པར་བྱ། །དེ་ཡི་དབང་ཕྱུག་ཡེ་ཤེས་རྒྱལ། །སྒོང་སྐྱེས་བཅུ་གསུམ་དབང་ཕྱུག་གོ། །ཁ་དོག་བདུན་པར་རྣམ་མང་པོ། །དེ་བཞིན་འོད་ཟེར་ཉི་མ་བརྒྱ། །ཡེ་ཤེས་ཀྱིས་ནི་ཤེས་བྱ་བརྟག །ཤེས་བྱས་འགྲོ་བ་བརྟག་
པའོ། །ཇི་ལྟར་དར་གྱི་མིག་གི་ངར། །བློ་མེད་ཐ་དད་འགྱུར་བའོ། །ཇི་ལྟར་རྨོངས་པའི་མི་ཤེས་པ། །ཡེ་ཤེས་ཀྱིས་ནི་ཉོན་མོངས་གཅོད། །དེ་དག་མར་མེའི་རྒྱ་མཚོ་ཡིས། །ཡེ་ཤེས་ཅན་གྱིས་རང་འདོད་ལམ། །དེ་ནས་སེམས་ཅན་ཀུན་རང་བཞིན། །ཡན་ལག་
རླུང་གིས་གཟིར་བ་དང་། །རང་དབང་ཉིད་དང་རླུང་དང་ནི། །དེ་བཞིན་བ་སྤུའི་བུ་ག་འདི། །རླུང་དང་མཉམ་པའི་ལུས་མེད་ཅིང་། །རླུང་གི་སེམས་ལའང་མེད་པའོ། །ལུས་ཀྱི་དབྱིབས་ཉིད་ལ་ཡང་ནི། །སྟོང་པ་ཡན་ལག་ཀུན་ལ་གནས། །ཐམས་ཅད་ཆུ་ཡི་རང་བཞིན་

ཉིད། །ལུས་པོ་ཡང་ནི་སེམས་ཀྱི་ནི། །ཐམས་ཅད་ཤ་ནི་ཆུ་རང་བཞིན། །ཆུ་ཡིས་ཐམས་ཅད་ཁྱབ་པའོ། །ས་དང་ཆུ་ཡང་མཚུངས་པར་ནི། །ཕྱི་རོལ་ཁྱབ་པར་བརྟགས་པའོ། །དེ་བཞིན་ལུས་པོ་ཡི་ནི་ཆུ། །ཐམས་ཅད་ཁྱབ་པར་ཡང་དག་
གནས། །ལུས་ལ་མེ་ནི་དྲོད་བཅས་པས། །དབྱིབས་ལ་ཐམས་ཅད་ཀུན་ནས་འབར། །ས་ཡིས་ཐམས་ཅད་ཀུན་དུ་ནི། །གཟུགས་ལ་ཡོན་ཏན་དབང་པོས་བརྒྱན། །དེ་ཕྱིར་འབྱུང་བ་བཞི་ཡི་ལུས། །ཁམས་དང་རྩ་ཡིས་ཁྱབ་པའོ། །རྩ་ནི་མཉམ་པའི་ཆ་ཡི་
དངོས། །མཉམ་པའི་དབྱིབས་སུ་རྣལ་འབྱོར་པས། །ལྷ་བསྒོམ་པའི་ལེའུ་ཞེས་བྱ་སྟེ་ལྔ་པའོ།། །།དེ་ནས་གཞན་ཡང་བཤད་བྱ་བ། །ལྷ་རྣམས་ལྔ་ནི་གང་དུ་གནས། །བུག་པ་གསུམ་དང་སྒོ་དགུ་ཡི། །དེ་བཞིན་བདག་ཉིད་ལྷ་ཡི་གནས། །
རླུང་བསྡམས་སྐུ་ཡི་མེར་བཅས་པའི། །སྙིང་གའི་སྒོང་སྐྱེས་ཀྱི་ནི་གནས། །ཕྲ་རབ་རྡུལ་གྱི་རྣམ་པ་ལྟར། །དེ་བཞིན་སྒོ་ནས་མཚོན་པའོ། །སྒོ་དགུ་ཡི་ནི་དབྱིབས་ཉིད་དང་། །འདབ་མ་བརྒྱད་པར་ཡང་དག་གྲགས། །ཕྲ་རབ་རྡུལ་གྱི་རྣམ་པ་བཞིན། །དེ་ལྟར་
ལྷ་ནི་ཕྲ་ཞིང་ཕྲ། །ལྔ་པ་ལྔ་ཡི་ལྔ་བདག་ལྷ། །རང་བཞིན་གྱིས་ཁྱབ་རྣམ་པར་སྤང་། །སོ་ཏི་ཀེ་ནི་གཅིག་ཉིད་དང་། །དེ་བཞིན་ཆུ་དང་ཆུ་མིན་གཉིས། །དེ་བཞིན་ཇི་ལྟར་བུག་པ་ཉིད། །ཚིགས་དགུ་དང་ནི་སྒོ་དགུ་དང་། །རྩ་དགུར་ཡང་དག་གྲགས་པ་ཉིད། །དང་
པོར་སྟོང་པ་ཉིད་ཀྱི་དངོས། །སྟེང་དང་དབུས་དང་མཉམ་པའི་གནས། །གཟུགས་དང་ཚོར་བ་མཉན་པ་ཡང་། །དངོས་མེད་སྟོང་པའི་ངོ་བོའོ། །རྒྱ་མཚོ་ཆུ་ཡི་དབྱིབས་དང་ནི། །དེ་དབུས་གེ་སར་བཅས་པའོ། །དགུ་རུ་ཆུ་ནི་སྦྱར་བར་བྱ། །དེ་བཞིན་པདྨ་ཆུ་ཤིང་
གི། །དེ་ཡི་ཡེ་ཤེས་དབང་ཕྱུག་ལྷ། །སྒོང་སྐྱེས་ཁྱིམ་པ་མཉམ་པར་བརྟེན། །འདབ་མ་བརྒྱད་ལ་ས་བོན་ནི། །རིམ་པ་ཇི་བཞིན་རྩ་ཡི་ལྷ། །དེ་ཡི་རྒྱབ་ཀྱིས་རྩ་ལ་ཡང་། །བདག་ཉིད་སྒོ་ནི་ཕྲ་བ་བཞིན། །ཕྱེ་ནས་བདག་ཉིད་བརྒྱན་པ་ནི། །ཀུན་ནས་ལྷ་ཡི་

ལྷག་པར་བརྒྱན། །དེ་ཡི་བདག་ཉིད་ལྷར་སྦྱངས་པ། །སྦྱོར་བའི་ལུས་སོགས་ཉིད་ཀྱི་དབྱིབས། །སྦྱོར་མེད་གལ་ཏེ་སྦྱོར་བྱས་པས། །སྔོན་བཞིན་ཕུན་སུམ་ཚོགས་པར་འགྱུར། །རྡོ་རྗེ་སྙིང་པོའི་ལུས་ལ་ནི། །ལྷག་པར་ལྷ་དང་ལྷ་ཡིས་བརྒྱན། །ཇི་ལྟར་
གདལ་བའི་ཁང་པ་མེས་བསྲེགས་ན། །ལྷ་ལ་སོགས་པའི་གནས་སུ་རབ་བྱེད་པ། །དགེ་དང་རིགས་ཅན་མཁས་པ་མཉམ་པར་བསྟེན། །དེ་བཞིན་རྨོངས་པ་རྒྱ་མཚོ་ལྷ་ཡི་གཞི། །སྒོང་སྐྱེས་ཀྱི་ལེའུ་ཞེས་བྱ་སྟེ་དྲུག་པའོ།། །།དེ་ནས་
གཞན་ཡང་བཤད་བྱ་བ། །ངེས་པར་རྣལ་འབྱོར་པས་རྔུབ་པ། །ཇི་ལྟར་རྔུབ་པའི་བདག་ཉིད་ནི། །སྒོ་ནི་ས་བོན་གྱིས་བསྡམ་བྱ། །ས་བོན་དགུ་ཡིས་བསྡམས་པ་ཡིས། །རྣལ་འབྱོར་དགུ་ཡི་བདག་ཉིད་དོ། །ཇི་ལྟར་ཚངས་པའི་སྒོ་བསྡམ་ཞིང་། །མཆོད་
རྟེན་གྱི་ཡང་སྒོ་དགུ་ཡང་། །དབུགས་མི་གཡོ་བའི་དངོས་པོ་ཡིས། །བདུད་རྩིའི་ཡི་གེ་བསྡམ་པར་བྱ། །བསྡུས་ནས་གནས་པའི་མཐའ་རུ་ནི། །རང་བཞིན་གྱིས་ནི་གཡོ་བ་ཉིད། །གཞན་ཡང་དྲག་པོའི་མིང་གཉིས་ནི། །དུད་པའི་ས་བོན་གྱིས་ནི་རྩེ། །
དེ་ལྟར་རྔུབ་པ་མཉམ་པ་ཉིད། །ཡི་གེ་ཕྱེད་དང་གཉིས་སྦྱང་བྱ། །ཧཱུྃ་གི་རྣམ་པ་གཡོ་བའི་དབྱིབས། །མཉམ་པར་རྔུབ་པའི་འབར་བ་ཉིད། །འཚེ་མེད་རྣམ་པར་རྩེ་བ་ཡིས། །འཁོར་བ་འཇིགས་པ་བསྟེན་པར་བྱ། །བཅུ་གཉིས་ས་ཡི་དབང་ཕྱུག་མ། །དེ་བཞིན་དབུགས་
ནི་རྔུབས་པ་ཡིས། །ཚེ་རབས་སྔོན་གྱི་སྡིག་པ་དང་། །ཡུལ་དང་དབང་པོ་ཉེ་གནས་པ། །བདེ་སྦྱོར་རྔུབ་པའི་རྒྱ་མཚོ་ཡིས། །ཡེ་ཤེས་ཅན་གྱིས་སྡིག་པ་གཅོད། །ཇི་བཞིན་སྔོན་དུ་མཉམ་དྲངས་ནས། །མཐའ་ཡི་གཅིག་ནི་གཟུང་བྱས་ལ། །ས་བོན་ཡི་གེ་གཅིག་
བཟུང་བས། །དེ་ཡིས་སྒོ་བརྒྱད་མཉམ་པའོ། །བཅུ་གཉིས་སྤངས་པའི་བསྒོམ་པ་ཡིས། །སྒོ་བརྒྱད་རྣམ་པར་རྩེ་བའོ། །ཇི་ལྟར་རྒྱལ་པོ་སྦྱངས་པས་རབ་བསྒྱུར་བ། །དྲོད་དང་བ་ལང་རང་བཞིན་ལུས་ཀྱི་ལས། །བྱིས་ནི་རང་འདོད་རྦ་རླབས་རྒྱ་ཆེན་པོ། །དེ་

བཞིན་ལུས་ནི་རང་འདོད་མཚོན་གྱི་གཙོ། །འཕོ་བ་སྦྱང་བའི་ལེའུ་ཞེས་བྱ་སྟེ་བདུན་པའོ།། །།དེ་ནས་གཞན་ཡང་བཤད་བྱ་བ། །འབྱིན་བྱེད་ཚོགས་ནི་དགུ་པ་ཉིད། །ཕྲ་བའི་རྣམ་པར་བཤད་པ་ཉིད། །རླུང་གི་དཀྱིལ་འཁོར་
གྱིས་བསྐོར་བའོ། །བཅུ་གཉིས་དགུ་ཡི་རིམ་པ་ནི། །དགུ་ཡི་སྦྱོར་བ་ལ་རབ་བརྟེན། །འདི་ཡི་དགུ་ཡི་རླུང་ཇི་བཞིན། །རྣམ་ཤེས་རླུང་གི་དཀྱིལ་འཁོར་ལ། །རླུང་གི་དབུས་སུ་མེ་ཡི་དབྱིབས། །མེ་ཡི་དུ་བའི་ཡིག་དེ་བཞིན། །ཨུ་ནི་རེ་ཕར་ཡང་དག་ལྡན། །
སྨྲ་ནི་རྒྱ་མཚོར་བཤད་པའོ། །དེ་བཞིན་ཐིག་ལེ་ཡེ་ཤེས་གནས། །སྒྲ་དང་སྒྲ་ཡིས་བསྒོམ་པའོ། །བཤང་བའི་སྒོ་ནས་དེ་བཞིན་དུ། །སྲིད་པའི་ཉེས་ལས་ཡང་དག་འཕོ། །སྣ་དང་རྣ་བ་མིག་ལས་མི། །མི་རྣམས་ཀྱི་ནི་རྒྱལ་པོར་འགྱུར། །ལྟེ་བའི་ཐིག་ལེ་
དེ་བཞིན་སྟེང་། །གོང་གི་གནས་ནི་ཤེས་པར་བྱ། །སེམས་ཀྱི་རྩ་དང་འདྲ་བ་ཡི། །སྙིང་གར་དེ་བཞིན་སྦྱོང་བའོ། །འཕྱར་བར་རླུང་གི་ས་བོན་ནི། །མཉམ་པའི་གནས་སུ་ཤེས་པར་བྱ། །དེ་ལྟར་ང་ཡིས་མཚན་ཉིད་བཤད། །གཞན་དུ་བླ་མ་སྟོན་པའོ། །སྟེང་
དུ་ཚངས་པའི་སྒོ་འདི་ནི། །མོད་ལ་འཕོ་བའི་མིང་དུ་བཤད། །ཇི་ལྟར་བུང་བ་མེ་ཏོག་བུ་གར་ནི། །རྒྱགས་པས་མྱོས་ནས་སེམས་ནི་ཞུ་བ་ལྟར། །དེ་བཞིན་ཡེ་ཤེས་དབང་ཕྱུག་སྒོར་གནས་པ། །ཨུད་ཏྲན་ཏྲ་ཡི་མནན་པས་འཇིག་པའོ། །ཨེ་མའོ་ཆོས་ནི་མཆོག་གི་
ལམ། །ཨེ་མའོ་འཁོར་བ་གཅོད་བྱེད་པ། །ཨེ་མའོ་གྲོལ་བའི་གོ་འཕང་གནས། །ཨེ་མའོ་ཡེ་ཤེས་ངོ་མཚར་ཆེ། །འཕོ་བ་སྦྱོར་བའི་ལེའུ་ཞེས་བྱ་སྟེ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །སྔོན་དུ་གསུངས་པའི་མཚན་ཉིད་
ལྡན། །དང་པོར་གཟུགས་ནི་སྦྱང་བར་བྱ། །བདག་ཉིད་མདུན་དུ་ཡང་དག་གནས། །བདག་ཉིད་ལྷ་དང་དེ་བཞིན་གཞན། །ཤེས་པ་གཞན་ལ་རྨོངས་པ་རྣམས། །མིང་གི་ཡི་གེ་མཉམ་པོར་དྲང་། །འདི་ཡི་ཡེ་ཤེས་དབང་ཕྱུག་ལྷ། །སྒོང་སྐྱེས་ཀྱི་ནི་

དབུས་སུ་ཐིམ། །ཡེ་ཤེས་ལུས་ལ་བསྒོམ་བྱས་པས། །བློ་ལྡན་ལུས་ནི་རྣམ་པར་འཕོ། །སྔོན་དུ་རྔུབ་ཅིང་འབྱིན་པ་ཡིས། །སྔོན་བཞིན་ལྷན་ཅིག་འཕོ་བའོ། །སྡིག་བྲལ་སྤྱོད་པ་མེད་པ་ཉིད། །སྡིག་སྤངས་སྤྱོད་པས་ཡང་དག་གནས། །ཉོན་མོངས་རྒྱ་
མཚོའི་སྡིག་པ་སྦྱོང་། །སྡིག་སྤོང་དེ་བཞིན་རྨོངས་པ་དང་། །སྦྱོར་བ་ཡིས་ནི་སྡིག་པ་སྦྱོང་། །སྤྱོད་མེད་སྡིག་པ་སྦྱོང་བའོ། །རྟག་ཏུ་སྡིག་སྦྱོང་ལམ་ལ་གནས། །སྦྱོར་བའི་ལུས་ནི་སྐྱོན་མེད་པའོ། །དབུགས་ཀྱི་མཐར་ནི་གནས་པ་ཡིས། །འདི་ཡིས་སྟེང་དུ་གོལ་
བར་གནས། །དབུགས་ནི་ལྟེ་བར་གཏོང་བ་ཡིས། །སེམས་ནི་གཟུགས་མེད་སྲིད་པར་རོ། །སྡིག་པ་ཀུན་ནས་མི་གནས་པའོ། །ཉེས་པ་ཀུན་གྱི་གོས་པ་ནི། །འཕོ་བར་སྦྱོར་བ་སྦྱར་བར་གྲོལ། །ཕ་དང་མ་ནི་གསད་བྱ་ཞིང་། །རྒྱལ་པོ་དང་ནི་གཙང་སྦྲ་གཉིས། །
ཡུལ་འཁོར་བཅས་པ་བཅོམ་བྱས་ན། །མི་དེ་དག་པ་ཞེས་སུ་བརྗོད། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ཇི་སྲིད་ཡུན་རིང་འཚོ་ཞིང་ཆོས་སྤྱོད་པ། །དེ་སྲིད་དགེ་བའི་རྒྱུན་ནི་འཕེལ་བའོ། །ཇི་ལྟར་བུམ་པ་མཁན་ནི་མཁས་
པ་ཡིས། །ལོ་ཟླས་གནས་ནི་སྣོད་ནི་དུ་མས་འགེངས། །མིག་དང་དབྱིབས་མེད་འཁོར་ལོ་འཇི་བའང་མེད། །རྣམ་ཤེས་ཡེ་ཤེས་རྣམ་པ་ཀུན་དུ་བརྟག །ལུས་ཡང་དག་པར་འཕོ་བའི་ལེའུ་ཞེས་བྱ་སྟེ་དགུ་པའོ།། །།དེ་ནས་གཞན་ཡང་
བཤད་བྱ་བ། །སྦྱོར་བའི་བསྟན་བཅོས་སྒྲུབ་པ་པོས། །རྔུབ་པའི་བདག་ཉིད་དབྱེ་བ་ནི། །སོར་བཞི་ལས་ནི་ནམ་མཁའོ། །ནམ་མཁའ་ལས་ནི་སྐར་མ་དང་། །གོང་བུ་མེ་ཡི་ཕུང་པོ་ཉིད། །མེ་ཡི་དབུས་སུ་ཡི་གེ་ཨ། །ནམ་མཁའ་དང་ནི་ཟླ་བ་འདི། །
དབུས་སུ་བདུད་རྩིའི་ཐིགས་པའོ། །འཁོར་ལོ་ཉི་མའི་དྲ་བ་ཅན། །བདུད་རྩིའི་ཐིགས་པ་རྣམ་པར་འབྱིན། །ས་བོན་འབར་ཞིང་འབར་བ་ཡིས། །དབུས་སུ་བདུད་རྩིའི་ཡི་གེའོ། །དབུས་སུ་ཨ་ཡིག་སྔོན་པོའོ། །འོད་ཟེར་ལྔ་ནི་དེ་བཞིན་ཕྱོགས། །རི་རབ་

དབུས་སུ་འབར་བ་ནི། །ཐིག་ལེའི་སྒོ་རུ་སྣང་བའོ། །ཨ་ཡིག་རྣམ་པའི་བདུད་རྩིའི་ཆུ། །ཁ་དོག་གཉིས་པའི་ལྷ་ཉིད་དོ། །ཇི་ལྟར་བུག་པ་སྟོང་པ་ཉིད། །རྟག་ཏུ་སྟོང་པའི་ལྷ་ཉིད་དོ། །སྣ་བུག་ཇི་ལྟར་བཟེད་པ་ཡིས། །ལྕེ་ཡི་ཡང་ནི་བདུད་
རྩིའོ། །ཡི་གེ་གསུམ་ནི་སྦྱར་བར་བྱ། །རྨོངས་པ་མགྲིན་པ་དབྱངས་ཡིག་སྦྱར། །ཨུ་ནི་རྣམ་པ་རིམ་བཞིན་མཆོག །ཀུན་ནས་ཉོན་མོངས་ལྷག་པར་སེལ། །ཧཱུྃ་གི་ཡི་གེ་དབང་ཕྱུག་མཆོག །སྔོན་དུ་པདྨ་མཉམ་པ་ཉིད། །སྒོང་སྐྱེས་སྔོན་དུ་བཟོད་པའོ། །དེའི་
ལྷ་ནི་ལྷག་པར་རྫོགས། །འོད་ཟེར་བྱེ་བ་རྣམ་མང་པོ། །དེ་ཡི་ཡེ་ཤེས་དབང་ཕྱུག་རྒྱལ། །དབུགས་མི་གཡོ་བར་བསྒོམ་པར་བྱ། །སྟོབས་འཇིགས་པ་ཡི་དབྱུག་པ་ཅན། །ཧུྃ་གི་རྣམ་པ་མངའ་བདག་དབང་། །ལྟེ་བར་ཇི་ལྟར་གཙོ་བོ་ཉིད། །ཨེ་ཡི་རྣམ་པ་བརྡ་
ཡི་ལུས། །ཀུན་ནས་དགོད་པ་རྣམ་པར་བཤད། །བདག་ཉིད་ལྷ་དང་ལྷ་གཞན་ནི། །བདག་ཉིད་ལྷ་ནི་མཆོག་ཡིན་ནོ། །བདག་ཉིད་གདན་དུ་གྲགས་པ་ཡིས། །བདག་ཉིད་ལྷ་ནི་མཆོད་པར་བྱ། །བདག་གི་གདན་གྱི་ལེའུ་བྱ་བ་སྟེ་བཅུ་པའོ།། །།དེ་ནས་གཞན་ཡང་
བཤད་བྱ་བ། །འོད་ཟེར་གྱི་ནི་མཚན་ཉིད་དག །རྡོ་རྗེ་ལྕགས་སྒྲོག་གི་ཕྱག་རྒྱས། །ས་ནི་སྦྱང་བར་བྱ་བའོ། །ཧཱུྃ་གི་རྣམ་པས་པདྨ་བསྒྱུར། །ཉི་མའི་དཀྱིལ་འཁོར་གཞི་ལ་ནི། །ཅོད་པན་རབ་ཏུ་དགོད་པར་བྱ། །གལ་ཏེ་བདག་ཉིད་ལྷར་འདོད་པས། །
དབུགས་ལས་ལྷ་ནི་དབྱུང་བར་བྱ། །གཟུགས་རྫོགས་ཡིད་དུ་འོང་བ་ཉིད། །མཆོག་གི་གོ་འཕང་བསྒོམ་པར་བྱ། །གནས་བརྒྱད་སོ་སོ་ལྷ་ལ་ནི། །ཕྱག་རྒྱ་བརྒྱད་ནི་བསྟན་པར་བྱ། །ལས་དང་ལས་ཀྱི་ཁྱད་པར་ལ། །སྔགས་པས་འདི་ཡི་ས་བོན་བཟླས། །
ས་ཡི་རྣམ་བཞི་པ་ཉིད། །དེ་བཞིན་ཀྵ་ཡི་རྣམ་པས་རྒྱས། །དབང་ལ་ཡྃ་གི་ཡི་གེ་ཤིས། །ཧ་ཡི་རྣམ་པ་མངོན་པར་སྤྱོད། །མཆོད་པ་ཆོག་ཀུན་རྫོགས་པ། །གཞན་དུ་བལྟས་ནས་ཤེས་པར་བྱ། །ཕྱིས་ནི་ལས་ལ་རབ་ཏུ་འཇུག །རང་གི་ལུས་ལ་ཐིམ་པར་བྱ། །

གཞན་གྱི་གདན་གྱི་ལེའུ་ཞེས་བྱ་བ་སྟེ་བཅུ་གཅིག་པའོ།། །།དེ་ནས་གཞན་ཡང་རབ་བཤད་པ། །སྟོང་ཕྲག་བདུན་ཅུ་རྩ་གཉིས་ཉིད། །ལུས་ཀྱི་རྩར་ནི་རབ་ཏུ་ངེས། །སྟོང་ཕྲག་དགུ་ཡི་གྲངས་ལས་ནི། །བྱེ་བ་བརྒྱ་སོགས་དགའ་བར་གནས། །
སྟོང་པའི་དབྱིབས་ནི་སྔོན་འགྲོ་བས། །བློ་དང་ལྡན་པས་ས་བོན་བསྐྲུན། །ཟག་པའི་ལུས་ནི་བཅོམ་ནས་ཀྱང་། །དེ་ཡི་སྙིང་གར་པདྨ་ཉིད། །སྒོང་སྐྱེས་སྟོང་པ་ཡི་ནི་གཞི། །དེ་ལྟར་གནས་ལ་མཉམ་སྦྱོར་བས། །དེ་ཡི་གནས་སུ་ཤེས་པར་བྱ། །ཉི་མ་འཆར་བའི་
འོད་ཟེར་གྱིས། །ཕྲ་རབ་རྡུལ་བཞིན་གནས་པ་ཉིད། །པདྨའི་རྩ་ནི་སོ་སོར་བསྡམ། །དེ་བཞིན་འོད་ཟེར་འབར་བ་དང་། །ཀུན་ཏུ་རྫོགས་པའི་ལུས་པོ་འབྱུང་། །ཀུན་ཏུ་རྫོགས་པ་ལྷ་ཡི་སྐུ། །རྣལ་འབྱོར་པ་ཡི་ཀུན་དུ་བལྟ། །འདོད་ཁམས་སྲིད་པའི་གཟུགས་ཅན་སོགས། །
རྒྱུན་དུ་རྣལ་འབྱོར་ལ་བརྟེན་པས། །རྟེན་གྱི་ཡེ་ཤེས་དེས་མཐོང་ངོ་། །རླུང་གི་དཀྱིལ་འཁོར་དབུས་གནས་པར། །མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་གནས་པར། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་གནས་པར། །
ཟླ་བའི་དཀྱིལ་འཁོར་མཚུངས་པའོ། །དེ་དབུས་ཇི་སྐད་གསུངས་པ་ཡི། །སྦྱོར་བའི་གདན་ཞེས་བྱ་བའི་མིང་། །དངོས་པོ་མི་གཡོ་བར་བསྒོམས་པས། །ཉོན་མོངས་སྲིད་པའི་རྒྱ་མཚོ་ཟད། །ཡེ་ཤེས་ཉོན་མོངས་ཀྱིས་བསྒྲིབས་པས། །དེ་ཡི་ཡེ་ཤེས་དེ་དབང་ཕྱུག །
ཇི་ལྟར་བྱིས་པ་ཕ་མའི་གནས་སུ་རྩེ་བ་ནི། །ཚེག་ཉིད་དང་ནི་ལུས་ནི་འབར་ཞིང་གཡོ་བ་ཡིས། །ཕྱི་ནས་འདི་ཡི་ཡེ་ཤེས་དེ་ནི་ཤིན་ཏུ་བསྒྲིམ། །དེ་ལྟར་རྣལ་འབྱོར་བླ་མས་བསྟན་པ་བདེ་ཡང་། །སྦྱོར་བའི་གདན་གྱི་ལེའུ་ཞེས་བྱ་བ་སྟེ་བཅུ་གཉིས་པའོ།། །།
དེ་ནས་གཞན་ཡང་བཤད་བྱ་བ། །སྦྱོར་བ་མཆོག་ནི་མཉམ་བཤད་པ། །རང་བཞིན་མེད་པ་བྱ་བའི་ཚིག །ལྷག་པའི་གནས་སུ་ལུས་བྲལ་བ། །ཕྲ་བའི་དངོས་པོ་གོས་པ་མེད། །རྒྱས་པའི་སྒོ་ནི་བསྡམ་པར་བྱ། །དེ་བཞིན་མཆོད་རྟེན་དབང་ཕྱུག་གོ། །ཆུ་མིན་ནས་ནི་

གྱེན་དུ་དབུགས། །དེ་བཞིན་ལྟོ་བ་རླུང་གིས་གང་། །ཡེ་ཤེས་ཐིག་ལེ་གནས་ནས་གནས། །རྣམ་པར་ཤེས་པ་ངེས་པར་ཐིམ། །འཇིག་པ་མེད་ཅིང་འཚེ་མེད་པར། །མཉམ་པར་གཞག་པའི་ངོ་བོས་སྒོམ། །རླུང་གི་དཀྱིལ་འཁོར་རྔུབས་པ་ཡིས་
དབུས་སུ་ཡེ་ཤེས་སྐྱོན་མེད་པའོ། །བླ་མས་བཤད་པའི་ལམ་གྱིས་ནི། །རྟག་ཏུ་ངེས་པར་བལྟ་བའོ། །ཇི་ལྟར་བུ་མོ་གཞོན་ནུ་གཏམ་གྱིས་རྨོངས་ནས་སུ། །གཉི་ག་འཐམ་པ་སྲད་ནས་གཏམ་གྱིས་སྨྲས་པ་དང་། །ལམ་ནི་ཇི་ལྟར་བསྟན་ཀྱང་བཟུང་པར་མི་ནུས་པ། །
ལྟར་རྣལ་འབྱོར་བ་ནི་ལམ་ངན་བསྟན་པ་བཞིན། །གསང་བའི་གདན་གྱི་ལེའུ་ཞེས་བྱ་བ་སྟེ་བཅུ་གསུམ་པའོ།། །།དེ་ནས་གཞན་ཡང་བཤད་བྱ་བ། །མ་བསྒྲལ་བ་རྣམས་བསྒྲལ་བར་བྱ། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་
བརྩེ་བའི་ཕྱིར། །བདག་གི་སྦྱོར་བའི་བསམ་གཏན་བྱ། །ལུས་ནི་རྣམ་པ་གསུམ་ཉིད་དང་། །ངག་གི་ཡང་ནི་རྣམ་པ་བཞི། །ཡིད་ཀྱི་རྣམ་པ་གསུམ་ཉིད་ནི། །ལུས་ཀྱིས་བསྲུང་ཞིང་རབ་ཏུ་བསྡམ། །གཉིས་ཀྱི་གནས་ནི་མངོན་པར་སྤང་། །ཡེ་ཤེས་ཅན་གྱིས་ཐར་
པ་བསྟེན། །སྐད་ཅིག་ལོངས་སྤྱོད་དེ་བཞིན་སྡུག །གཉིས་མེད་ལྷན་ཅིག་བསྟན་པར་བྱ། །ཚེ་འདི་ཉིད་ལ་སེམས་ཅན་རྣམས། །སྐད་ཅིག་ཕུན་ཚོགས་སྐད་ཅིག་རྐུད། །དེ་བཞིན་རྨོངས་པའི་ལོངས་སྤྱོད་ནི། །རྣལ་འབྱོར་པ་ཡིས་ལྟོས་མི་བྱ། །དེ་ཕྱིར་ཉེས་པ་
ཡི་ནི་གནས། །འགྲོ་བའི་ཉེས་པ་སྲིད་པའི་དངོས། །ལོངས་སྤྱོད་ལྷག་པའི་གནས་གཅིག་གི། །འབྲས་བུ་འདོད་པ་གོ་བཟློག་པའོ། །སེམས་ཅན་སྦྱིན་ལ་སྲེད་པ་ཡི། །ལོངས་སྤྱོད་ཀྱི་ནི་གནས་སུ་བརྗོད། །དེ་ཕྱིར་གཉིས་པའི་ལམ་སྤངས་ལ། །རྣལ་འབྱོར་
བ་ཡིས་དེ་བཞིན་དབུས། །སྦྱོར་བའི་ཆོས་ནི་མཉམ་དམིགས་པས། །སྤྱོད་པའི་ཆོས་ཞི་སྐྱོན་མེད་པའོ། །བདག་མེད་ལུས་ནི་ཡང་དག་གནས། །བདག་མེད་ལ་ནི་མཉམ་པར་བརྟེན། །བསླབ་བྱ་རྟོགས་པའི་ལེའུ་ཞེས་བྱ་བ་སྟེ་བཅུ་བཞི་པའོ།། །།དེ་ནས་གཞན་ཡང་

བཤད་བྱ་བ། །སྙིང་གར་ཟླ་བ་གཞག་བྱས་ལ། །དེ་དབུས་བདུད་རྩི་ཡི་གེ་ནི། །རྣམ་པ་ཀུན་ཏུ་བདུད་རྩི་སྔགས། །འོད་ཟེར་འབར་བ་བསྒོམ་པར་བྱ། །ཞི་བའི་གནས་སུ་སྦྱར་བ་ཡིས། །རྣལ་འབྱོར་པར་ནི་ཡོངས་སུ་གྲགས། །ཇི་ལྟར་དེ་ཡི་ཟླ་བ་ཉིད། །ཅི་ཙའི་ཡི་གེས་རྣམ་པར་
བརྒྱན། །གསེར་གྱི་མདོག་ལྟར་ཡིད་འོང་གཟུགས། །འོད་ཟེར་སྣ་ཚོགས་བསྒོམ་པ་ཡིས། །དོན་འདོད་པ་ཡི་རྣལ་འབྱོར་པས། །དེ་ལྟར་སངས་རྒྱས་སྦྱོར་བའོ། །ཧཱུྃ་གི་རྣམ་པ་དབང་གི་དངོས། །ཉི་མའི་དཀྱིལ་འཁོར་ལ་བརྟེན་པ། །འོད་ཟེར་དུ་མའི་ཆོ་ག་ཉིད། །དབང་
ཉིད་དུ་ནི་ཡོངས་སུ་གྲགས། །རླུང་གི་དཀྱིལ་འཁོར་དབུས་སུ་ནི། །རླུང་གི་དཀྱིལ་འཁོར་མཉམ་པའི་གཞི། །ཇི་བཞིན་འོད་ཟེར་སྔོན་པོ་འབར། །མངོན་པར་སྤྱོད་པར་རབ་ཏུ་གྲགས། །ལས་ཀྱི་ལེའུ་ཞེས་བྱ་སྟེ་བཅྭ་ལྔ་པའོ།། །།དེ་ནས་གཞན་ཡང་བཤད་བྱ་བ། །སྦྱོར་
པའི་ཟས་སྨན་ཞེས་བྱ་ཡོད། །འདབ་མ་འོ་མ་འཛག་པ་དང་། །དེ་བཞིན་མེ་ཏོག་ཨ་ཛ་ག། །དྲི་ནི་དྲི་ཞིམ་རྣམ་པར་འབྱེད། །མདོག་ནི་ལྗང་དང་སེར་བ་ཉིད། །རྩ་བ་གཅིག་གི་དབང་ཉིད་དང་། །ཇི་ལྟར་མེ་བཞིན་འཚེར་བའོ། །བདུད་རྩིའི་ཡི་གེ་སྒོམ་པ་ཡིས། མཆོད་དང་བཟླས་
པའི་ཚ་གར་སྦྱར། །མར་དང་སྦྲང་རྩི་མཉམ་པའི་ཆར། །སྲང་ནི་རེ་རེ་བཟའ་བ་ཉིད། །བརྒྱ་དང་དེ་བཞིན་བརྒྱད་ཅུ་ཉིད། །མཁས་པ་ཡིས་ནི་བཟའ་བར་བྱ། །རྣལ་འབྱོར་པ་ཡིས་ལོ་བརྒྱ་རུ། །དབེན་པའི་རི་ལ་གནས་ན་ནི། །ཡེ་ཤེས་ཅན་གྱིས་ཡེ་ཤེས་ལུས། །ངེས་པར་ཡོངས་
སུ་རྒྱས་པར་འགྱུར། །དབང་པོ་རྣམས་ཀྱི་སྲེད་པ་དང་། །བཀྲེས་པ་ལ་སོགས་མེད་པར་འགྱུར། །གནས་ནི་ངེས་པ་ཉིད་ཀྱི་མཆོག །རྩ་བ་རྣལ་འབྱོར་སྦྱོར་བར་བཅས། །དེ་ལྟར་ཐོས་པའི་བདག་ཉིད་ཆེ། །སྦྱོར་བའི་བསྟན་བཅོས་སྐྱོན་མེད་པའོ། །ཐ་མལ་འགྲོ་བར་ངེས་པ་
ནི། །བདེ་བར་གཤེགས་པའི་གོ་འཕང་འཛིན། །དེ་ནི་ཡང་སོས་རྣལ་འབྱོར་པ། །ཡེ་ཤེས་ཅན་གྱིས་ཡེ་ཤེས་རྟོག །ལྔ་པའི་ལྔ་པ་ཞེས་བྱ་བའི་ལེའུ་སྟེ་བཅུ་དྲུག་པ་རྫོགས་སོ།། །།མཁའ་འགྲོ་མ་ལ་ཕྱག་འཚལ་ལོ། །དཔལ་ལྡན་ཤེས་རབ་དབང་པོ་

སྦས་པ་ཉི་མའི་འོད་ཀྱིས་འཇིག་རྟེན་ཁམས་སུ་སྣང་བར་མཛད། །དངོས་པོ་དུ་མའི་ཁྱད་པར་བསགས་པའི་རབ་རིབ་གང་གི་མཐུ་ཡིས་འཇིག་མཛད་པ། །རྟག་ཏུ་ཀུན་ནས་རྔུབས་པའི་ང་རྒྱལ་མི་མཐུན་དགྲ་ནི་དུས་དང་དུས་སུ་གཡུལ་འགྱེད་པའོ། །ཆགས་མེད་ཡེ་ཤེས་རི་བོ་
མཉམ་ཉིད་མཉམ་པའི་ས་བོན་ཆེན་པོ་གཅིག་གིས་མཛད། །ཧཱུྃ་གི་རྣམ་པ་འབྱིན་བྱེད་དངོས། །ཧཱུྃ་གི་རྣམ་པ་མཆོག་གི་ལྷ། །ཧཱུྃ་གི་རྣམ་པ་སྟོང་གྱུར་པ། །ཡི་གེ་ཧཱུྃ་ལ་ཕྱག་འཚལ་བསྟོད། །ཡི་གེ་བརྒྱད་ཀྱིས་ངོ་བོ་ཉིད། །སྤྱོད་བཅས་མི་སྤྱོད་གསང་པ་དང་། །ཆུ་དང་མེ་
དང་དེ་བཞིན་རླུང་། །ས་ནི་མིག་གི་ཡི་གེའོ། །སྒོ་བཞི་དང་ནི་ཕུང་པོ་བཞི། །སྒོང་སྐྱེས་ཛ་ལར་གནས་པ་ཉིད། །བཞི་བོ་ཉོན་མོངས་མིང་དང་ནི། །ཡི་གེ་བཞི་པ་དེ་བཞིན་དུ། །རྨོངས་པས་ས་དང་ཉོན་མོངས་དང་། །སྔོན་དུ་ཕྱུགས་ན་མཉམ་པ་དང་། །ཆུ་ཤིང་མེ་ཏོག་པདྨ་
ནི། །འདི་ཡིས་སྟོང་སྐྱེས་སྟན་ཉིད་དོ། །བ་ལང་རྨིག་པའི་སྟེང་དུ་ནི། །བདུད་རྩི་བརྒྱན་ཀྱིས་རྣམ་པར་དབྱེ། །ཤེལ་བཞིན་དུ་ནི་དག་པ་ཡི། །སྙིང་པོ་ཡི་ནི་སྙིང་པོའི་མཆོག །ལྕེ་ལ་ཆུ་ནི་འདི་ཉིད་དང་། །ནམ་མཁའ་རྣ་བ་སྣ་དག་ལའོ། །ས་ནི་མིག་ལ་སྦྱར་བྱ་སྟེ།།
ཚངས་པར་མེ་ནི་དེ་བཞིན་འབར། །རྨོངས་པ་ཡིས་ནི་མགྲིན་པར་རོ། །གཡོ་བའི་སྙིང་ལ་གནས་པ་དང་། །ཐམས་ཅད་ཉོན་མོངས་བྲང་དང་ནི། །ཕྱུགས་ནི་ལྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ཡིས། །འདི་ཡིས་ལྷ་ཉིད་ཡང་ངག་ཤེས། །ཡི་གེ་
བརྒྱད་ཀྱི་སྔགས་འདི་ནི། །ཕྱག་རྒྱ་བརྒྱད་དུ་རབ་ཏུ་གྲགས། །དཀར་དང་སེར་དང་དེ་བཞིན་དམར། །གནག་ཅིང་འབར་བའི་ལས་ལ་ནི། །ལས་རྣམས་བཞི་ལ་ལྷ་མོ་ཡིས། །མཁས་པས་འབུམ་ཕྲག་གསུམ་དུ་བཟླས། །ཡེ་ཤེས་དབང་ཕྱུག་སྙིང་པོ་ཉིད། །
མཆོག་ཏུ་རྟག་ཅིང་ཞི་བ་དང་། །ཕྲ་ཞིང་རགས་པའི་འགྲོ་བ་ཀུན། །ལས་དང་ལས་ཀྱི་རྣམ་པར་གྲོལ། །ཐམས་ཅད་ཆུ་ཡི་དབྱིབས་དང་ནི། །མཉམ་པར་འཇིག་བྱེད་མེ་དང་ཡང་། །ཇི་ལྟར་རྟག་པ་རླུང་དག་དང་། །དད་པའི་དོན་དངས་དབང་པོ། །ལྷག་མས་

བཞིན་བརྩེགས་པ་ནི། །བཞི་པ་ཡི་གེ་དྲུག་པའོ། །འགྲོ་བའི་དོན་ཕྱིར་ཡི་གེ་བརྒྱད། །ལྷ་བརྒྱད་དུ་ནི་ཡོངས་སུ་གྲགས། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །བ་དན་གསུམ་པའི་ཕྱག་རྒྱ་ཡིས། །སྔོན་དུ་རེག་ཅིང་རེག་པ་
ཉིད། །འཇིག་རྟེན་འདིར་ན་བདེ་བ་དང་། །རྟག་ཏུ་མཆོད་པ་རྙེད་པར་འགྱུར། །འཆི་བའི་དུས་སུ་ཡེ་ཤེས་ནི། །གཟུགས་མེད་སྲིད་པར་རབ་ཏུ་གནས། །བདག་གི་དེ་ཉིད་མནན་པ་ཡིས། །ཇི་ལྟར་སྔགས་འདི་འགྲུབ་པར་འགྱུར། །དེ་ཕྱིར་ནན་ཏན་ཐམས་ཅད་ཀྱིས། །སྦྱོར་
པའི་བསྟན་བཅོས་རྟོགས་པར་བྱ། །དྲི་ཞིམ་རབ་གྲགས་མེ་ཏོག་ཀུན་ནས་གནས་པ་དང་། །ནག་པོའི་ཨ་ཀ་རུ་དང་གུ་གུལ་མར་མེ་དང་། །གཉིས་མེད་གཏོར་མ་གཅིག་གིས་ཡིད་ནི་ལྡན་པ་ཡིས། །ལྷ་མོ་མ་མོ་རྣམ་པ་ཀུན་ནས་རབ་ཏུ་མཆོད། །ཡི་གེ་བརྒྱད་པའི་ལེའུ་ཞེས་བྱ་སྟེ་དང་
པོའོ།། །།དེ་ནས་གསང་བའི་ཡན་ལག་གི། །ཐིག་ལེ་ལ་ནི་བདག་ཕྱག་འཚལ། །ཁམས་གསུམ་སྐྱེས་པ་ཟད་བྱས་ནས། །ཡེ་ཤེས་དངོས་པོ་གནས་པ་བཞིན། །ལྷ་ཡི་དངོས་པོ་དབྱེར་མེད་པས། །སྟེང་དང་འོག་དང་དབུས་སུ་ནི། །ཐམས་ཅད་ཀུན་ནས་སྟོང་པ་ཉིད། །རི་རབ་གླིང་གཞན་
བདེ་བྱས་ནས། །མཉམ་ཉིད་སྦྱོར་བ་ཀུན་དུ་བསམ། །ཐམས་ཅད་སྡེམ་པའི་དབྱེ་བ་ཡིས། །དེ་ཡིས་མེ་ཏོག་ཐིག་ལེ་ཡི། །ཐིག་ལེའི་དབུས་སུ་གསལ་བའོ། །ཡེ་ཤེས་རྔུལ་ནི་རྣམ་པར་ཐིམ། །ཡེ་ཤེས་བློ་དང་ལྡན་པས་ཤེས། །ཁ་དོག་མེད་ཅིང་མཚོན་ཀུན་དངོས། །གཟུགས་མེད་
ཡེ་ཤེས་གཟུགས་བཞིན་ནོ། །རིང་བ་མ་ཡིན་ཐུང་བ་མིན། །མི་ལྡན་པ་དང་ལྡན་པ་ཉིད། །གཟུགས་དང་སྟོང་པའི་དེ་བཞིན་དབུས། །ལྷན་ཅིག་ཡེ་ཤེས་གཟུང་བར་བྱ། །ཉོན་མོངས་དེ་བཞིན་མུན་པ་ནི། །རྣམ་ཤེས་ལྷན་ཅིག་སྣང་བའོ། །ཡེ་ཤེས་རྡོ་རྗེ་བཅོམ་བྱས་ནས། །སྣང་བའི་
དངོས་གྲུབ་ཐོབ་པར་འགྱུར། །རླུང་གི་དཀྱིལ་འཁོར་དབུས་སུ་ནི། མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་བསྒོམ་པར་བྱ། །དེ་དབུས་ཇི་

སྐད་གསུངས་པ་ཡི། །ཡེ་ཤེས་དང་ནི་རྣམ་ཤེས་སེམས། །འཇིག་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །ཡེ་ཤེས་ཀྱི་ཐིག་ལེའི་སྦྱོར་བའི་ལེའུ་ཞེས་བྱ་སྟེ་གཉིས་པའོ།། །།ཀ་པ་གཅིག་དང་སྒོ་གསུམ་གྱིས། །ཡེ་
ཤེས་དབུས་སུ་ཐིམ་པ་ཉིད། །བཟློག་པར་བྱ་བའི་ས་བོན་ཉིད། །སྦྱང་བྱའི་ཡི་གེ་ཕྱེད་དང་གཉིས། །བརྒྱད་ཀྱི་མཐའ་ལ་གསུམ་པས་དྲང་། །ས་བོན་འདི་ནི་དྲག་པོའི་མེ། །རླུང་གི་དཀྱིལ་འཁོར་ལ་བརྟེན་པ། །སྔོན་གསུངས་མཚན་ཉིད་དང་ལྡན་པས། །སྔོན་དུ་ལྷན་ཅིག་བསྒོམས་
པ་ཡིས། །དཀར་པོས་ལུས་ནི་བསྡམ་པར་བྱ། །མཉམ་པའི་གནས་སུ་འབར་བ་ཡིས། །ཇི་སྐད་སྔོན་དུ་གསུངས་པའི་རླུང་། །དབུས་སུ་མཆོད་རྟེན་སྦྱང་བར་བྱ། །རླུང་དང་མེ་ཡི་མདུན་དོན་ལ། །རྡོ་རྗེའི་ས་བོན་བསྒོམ་བྱས་ལ། །སྒྲ་དང་ཐིག་ལེས་རྣམ་པར་བརྒྱན། །ཆར་གྱི་
རྒྱུན་ནས་བཤད་པ་ཡིན། །རྒྱས་པ་ལྔ་ཡི་སྒོ་ཉིད་ལ། །ཁ་དོག་དཀར་པོ་བསྒོམ་པར་བྱ། །སྒོ་གཉིས་མངོན་པར་བསྟན་པ་ནི། །དེ་བཞིན་ཆུ་དང་ཆུ་མིན་གཉིས། །ཡི་གེ་ཉིས་འགྱུར་ཐིགས་པ་དང་། །རྩ་བར་སྒྲ་ནི་སྦྱར་བར་བྱ། །འདི་ཡིས་ལུས་ནི་བསྡམ་བྱ་ཞིང་། །མེ་ནི་སྒོ་
རུང་སམ་པར་བྱ། །སེམས་འདི་ཡིས་ནི་དམིགས་པར་བྱ། །སྟེང་དུ་ཚངས་པའི་སྒོ་འདི་ནི། །ཚིགས་དགུ་ཡི་ནི་མཆོག་གི་གདན། །ལུས་མེད་སེམས་ཀྱི་ངོ་བོ་ཡིས། །དངོས་པོས་དངོས་པོ་བསྒོམ་པར་བྱ། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་
པ་ཉིད། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་སྒྲོལ། །འཕོ་བར་སྦྱོར་བའི་ལེའུ་ཞེས་བྱ་བ་སྟེ་གསུམ་པའོ།། །།སྔོན་གསུངས་མཚན་ཉིད་ལྡན་པར་ནི། །སྔོན་དུ་སྟོང་པའི་མཚན་ཉིད་ཀྱིས། །དེ་ཡི་ལུས་ནི་སྦྱང་བར་བྱ། །སྦྱོར་བས་བསྒོམ་
པའི་ལུས་ཅན་ནི། །དངོས་པོ་མེད་པར་བསྒོམ་པའི་དངོས། །གང་ཞིག་དངོས་པོ་རྣམ་རྟོག་པའི། །དངོས་པོར་བསྒོམ་པའི་ས་བོན་གྱིས། །སྟེང་པའི་དབུས་སུ་བསྒོམ་པར་བྱ། །དགོང་བྱའི་ཡི་གེ་རྣམ་བཀོད་པ། །སངས་རྒྱས་ལྔ་ཡིས་མངོན་པར་བརྒྱན། །དབྱིག་པ་འཇིག་རྟེན་དབང་ཕྱུག་གིས། །ཞབས་སྐྱེད་ཕྱག་ན་རྡོ་

རྗེ་དང་། །ལུས་ནི་དྲིལ་བུ་འཇམ་པའི་དབྱངས། །དེ་བཞིན་མགོ་ནི་བྱམས་པ་དང་། །མ་ཡི་རྣམ་པ་སྟེང་འབར་བ། །འཁོར་བ་རྣམ་པར་གྲོལ་བར་མཛད། །འོད་ཟེར་འབར་བ་རྣམ་མང་པོར། །ཀུན་ནས་སྟོང་པའི་དབུས་སུ་བསམ། །རྣམ་ཤེས་ཡེ་ཤེས་ས་བོན་གྱིས། །དབུས་དང་དབུས་སུ་རྣམ་
པར་དཀྲིས། །བཟླས་དང་བསམ་གཏན་མཆོག་བརྩོན་པས། །རླུང་གི་སྟེང་དུ་བསམ་པར་བྱ། །དང་པོ་དཀར་པོ་ཀུན་ནས་བསམ། །གཉིས་པད་བཞིན་སེར་པོའོ། །གསུམ་པར་གང་ཞིག་དམར་པོ་དང་། །བཞི་པ་ལ་ནི་སྔོན་པོ་ཉིད། །མཉམ་བཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་
ཚོམ་མེད། །སྦྱོར་བའི་གདན་གྱི་མིང་ཞེས་པ། །གསང་ཞིང་གསང་བ་གསང་ཆེན་པོ། །བདག་གི་གདན་གྱི་ལེའུ་ཞེས་བྱ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །ཚ་བའི་ས་བོན་བྱེ་བྲག་ནི། །ལྟོ་བའི་ཐབ་ཁུང་འདི་ཡི་མེ། །ལྟོ་བའི་མེ་རུ་ཤེས་པར་བྱ། །ཤར་གྱི་ཆ་
ནི་དཀར་པོའོ། །བྱང་གི་དེ་བཞིན་སེར་པོ་ཉིད། །ནུབ་ཀྱི་ཕྱོགས་སུ་དམར་པོ་སྟེ། །ལྷོ་ཕྱོགས་སུ་ནི་ནག་པོར་གྲགས། །དབུས་སུ་མཉམ་པའི་ཁ་དོག་ཉིད། །མེ་ལྔ་རུ་ནི་བསམ་པར་བྱ། །རྡོ་རྗེ་མཁའ་འགྲོའི་མིང་ཞེས་པ། །ཤར་གྱི་མེར་ནི་རབ་ཏུ་བརྟག །དྲག་མོ་མཁའ་འགྲོ་ཞེས་བྱ་བ། །
བྱང་གི་ཕྱོགས་སུ་རྣམ་པར་བརྟག །རོ་ལངས་མ་ཞེས་བཤད་པ་ནི། །ནུབ་ཀྱི་ཕྱོགས་སུ་རབ་ཏུ་དགོད། །མཁའ་འགྲོ་གཏུམ་མོ་ཞེས་བྱའི་མིང་། །ལྷོ་ཕྱོགས་ཀྱི་ནི་མེ་ཡི་མིང་། །དབུས་སུ་ཡེ་ཤེས་མེ་འདི་ནི། །ཡེ་ཤེས་མཁའ་འགྲོ་ཞེས་བྱའི་མིང་། །པདྨའི་གདན་ལ་བཞུགས་པ་
ནི། །ཉི་མའི་དཀྱིལ་འཁོར་གྱིས་བརྒྱན་ཅིང་། །ལག་ན་རྡོ་རྗེ་ཁ་ཊྭཱྃ་དང་། །མེ་འབར་བ་དང་མཉམ་པའི་འོད། །གཟུགས་ནི་མཐེ་བོའི་རྣམ་པ་ཙམ། །ཁྲོ་བོའི་གཟུགས་སུ་བསྒོམ་པར་བྱ། །ན་ལི་ལས་ནི་ཡི་གེ་བརྒྱད། །འཕྱང་པ་པོ་ཡི་སྒོར་ནི་ཐིམ། །མཁས་པས་ཕྱིས་ནི་བདག་
ཉིད་ལྔས། །གནས་ལྔ་རུ་ནི་སྦྱིན་སྲེག་བྱ། །སེམས་ཀྱིས་དབུགས་ནི་རབ་བསྡམས་ནས། །དངོས་པོས་དངོས་པོ་བསྒོམ་པར་བྱ། །གང་ཞིག་ཅུང་ཟད་བཟའ་བཏུང་རྣམས། །སྦྱིན་སྲེག་ཏུ་བརྟགས་བཟའ་བར་བྱ། །དང་པོ་སྒྲ་ཡི་ཡི་གེ་དང་། །དེ་བཞིན་གཉིས་པ་གཉིས་

འགྱུར་གཉིས། །གསུམ་པ་གློ་རུ་རེ་ཕ་དང་། །བཞི་པའི་སྟེང་དུ་ཐིག་ལེར་བཅས། །ལྔ་པ་སྟེང་དུ་འབར་བ་ཉིད། །ས་བོན་ལྔ་ལ་བཟླས་ཤིང་བསྲེག །དེ་ལྟར་བསྒོམས་པའི་བདག་ཉིད་ཀྱིས། །རྒྱས་པའི་སྦྱོར་བར་གྲགས་པའོ། །སྦྱིན་སྲེག་གི་ལེའུ་སྟེ་དང་
པོའོ།། །།དེ་ནས་དག་པ་རྣམ་གསུམ་བྱ། །སྭ་བྷཱ་བ་ཤུདྷཱཿསརྦ་དྷརྨཱཿསྭབྷཱ་བ་ཤུདྡྷོ྅ཧཾ། བཛྲ་ཤུདྡྷཱཿསརྦདྷརྨཱ་བཛྲ་ཤུདྡྷོ྅ཧཾ། ཨོ་ག་ཤུདྡྷཱཿསརྦ་དྷརྨཱ་ཡོ་ག་ཤུདྡྷོ྅ཧཾ། དེ་ལྟར་སྤྱོད་པའི་སྦྱོར་བས་ནི། །ཡིད་ནི་དག་པར་བྱེད་པའོ། །ཐམས་ཅད་ཀུན་ནས་སྟོང་ཉིད་ཀྱིས། །དེར་ནི་ཆུ་འདི་བསམ་པར་བྱ། །ཀུན་
ནས་ཆུ་ཡི་གཟུགས་དང་ནི། །དེ་ཡི་དབུས་སུ་པདྨ་ནི། །རྒྱ་ཆེན་ཡིད་ལ་འདོད་བཞིན་དུ། །གསེར་གྱི་གྲོང་ཁྱེར་འབྱུང་བ་ནི། །རིན་ཆེན་བདུན་གྱིས་རྣམ་པར་བརྒྱན། །སེང་གེ་གདན་གྱིས་གདན་གྱི་ནི། །ཉི་མའི་དཀྱིལ་འཁོར་གྱིས་བརྒྱན་པ། །དབུས་སུ་ཡེ་ཤེས་བསམ་པ་ནི། །ཡེ་ཤེས་མཁའ་འགྲོའི་
མིང་ཉིད་དེ། །ཁ་ཊྭཱྃ་ག་དང་རྣལ་འབྱོར་སྣོད། །རབ་ཏུ་བཞད་པས་འཇིགས་པར་བྱེད། །ན་བཟའ་དམར་པོ་གཙིགས་པའོ། །དབུ་སྐྲ་སིལ་བུར་ཏུ་དྲག །ཡེ་ཤེས་མཁའ་འགྲོ་ཞེས་བྱའི་མིང་། །སེམས་དཔའི་སྐྱིལ་མོ་ཀྲུང་གིས་བཞུགས། །ཇི་སྐད་གསུངས་པའི་ཕྱིར་རོལ་དུ། །དེ་ཡི་གཟུགས་ཀྱི་ལོགས་
གཉིས་སུ། །ཇི་ལྟར་ཕྱོགས་ཀྱི་མདོག་ཉིད་ནི། །ཀུན་ནས་དེ་ཡི་ཕྱག་རྒྱ་རིགས། །ལྔ་པའི་བདག་ཉིད་བསྒོམས་ནས་ནི། །རྟག་ཏུ་མཆོད་དང་གཏོར་མ་དབུལ། །ཆུ་ཉ་ཡི་ནི་བདག་ཉིད་རྣམས། །ཆུ་དང་མེ་དང་དེ་བཞིན་གཡོ། །ཇི་ལྟར་རླུང་དུ་དུ་བ་བཟུང་། །ཡེ་ཤེས་རྡོ་རྗེས་དཀྲིས་པ་ནི། །ལྔ་པའི་
ལྷ་ཉིད་འབྱུང་བ་ནི། །ལྔ་པ་ཉིད་དུ་བསྒོམ་པར་བྱ། །གི་ཝང་གཉིས་ནི་མཱ་མ་ཀཱི། །དེ་ཡི་གཅིག་ནི་བདུད་རྩིའོ། །ཨཱ་ལི་ཀཱ་ལིར་བ་སྦྱོར་བས། །གཉིས་ཀྱི་དེ་ཉིད་རབ་ཏུ་བྱ། །ཨཱ་ལི་ཞེས་བྱ་བུང་བར་གསུངས། །ཀཱ་ལི་དེ་བཞིན་གཤེགས་མ་ཉིད། །ཇི་ལྟར་སྡེ་ཚན་གསུམ་པ་ཡི། །ཡི་གེ་
གསུམ་པ་གཟུང་བྱས་ཏེ། །རྡོ་རྗེ་ཡིས་ནི་དབྱུག་པ་ཉིད། །འོག་པག་སོགས་པས་དཀྲི་བར་བྱ། །ས་བོན་ཏེ་ནི་མཆོག་བསམ་པ། །རྣལ་འབྱོར་པ་ཡིས་སྡིག་པ་གཅོད། །པདྨའི་དབང་ཕྱུག་སྐུ་ནི་གསེར་གྱི་མདོག །དྲི་ཡི་ངོ་བོ་ཤིན་ཏུ་སྣང་མཛད་དང་། །རོ་ནི་རྡོ་རྗེ་དབང་ཕྱུག་

རྡོ་རྗེའི་ཕྱག །ལྷ་གསུམ་དག་གི་ཆོག་ཤེས་པར་བྱ། །ཧ་ཞེས་བྱ་བས་ཁ་དོག་འཕྲོག །ཧོ་ཞེས་བྱ་བས་དྲི་མེད་ཅིང་། །དཔའ་བོ་ཧྲཱིཿཡིས་འཇོམས་པ་ནི། །རིམ་པ་འདི་བཞིན་ཤེས་པར་བྱ། །ཐབས་ཤེས་སྦྱོར་བའི་ལེའུ་སྟེ་གཉིས་པའོ།། །།དེ་ནས་གཞན་ཡང་
གཞན་གྱི་གདན། །དང་པོར་རེ་ཞིག་མཚན་ཉིད་ཀྱིས། །བདག་ཉིད་རབ་ཏུ་སྦྱར་བར་བྱ། །ཇི་ལྟར་མེ་ཡིས་ཐམས་ཅད་མཉམ་པར་བསྲེག་པ་དང་། །ཇི་ལྟར་ཉི་མས་ཁྱབ་པར་འཆར་བར་སྟོན་པ་དང་། །ཇི་ལྟར་རླུང་གིས་དྲི་ནི་མཉམ་ཕར་ལེན་པ་ལྟར། །རྣམ་རྟོག་རིང་དུ་སྤངས་
པའི་རྣལ་འབྱོར་པས། །སྔོན་གསུངས་མཚན་ཉིད་ལྡན་པར་ནི། །ཉི་མའི་དབུས་སུ་ཆུ་དཀྱིལ་འཁོར། །ཆུ་ཡི་དབུས་སུ་པདྨ་ནི། །རབ་འདོད་པདྨ་བསམ་པར་བྱ། །གཞལ་ཡས་ཁང་ནི་མཛེས་པའི་དངོས། །རིན་ཆེན་བདུན་གྱིས་རྣམ་པར་བརྒྱན། །སེང་གེའི་གདན་གྱི་
གདན་ལ་ནི། །ཉི་མའི་དཀྱིལ་འཁོར་གྱིས་བརྒྱན་པའོ། །ན་བཟའ་སྣ་ཚོགས་རབ་ཏུ་འཕྱང་། །གདུགས་དཀར་པོ་ཡིས་མངོན་པར་གཡོགས། །དགོད་བྱའི་ཡི་གེ་རྣམ་པར་བཀོད། །ཉི་མའི་དཀྱིལ་འཁོར་དབུས་སུ་ཡང་། །དབུས་སུ་ཡེ་ཤེས་རྣམ་ཤེས་ནི། །གཟུགས་
ལ་ཡོན་ཏན་དབང་པོས་བརྒྱན། །དང་པོའི་སྒྲ་ཡིག་དང་པོ་དང་། །དེ་བཞིན་གཉིས་པར་ཉིས་འགྱུར་ཉིད། །གསུམ་ལ་ལོགས་སུ་རེ་ཕ་དང་། །བཞི་པའི་སྟེང་དུ་ཐིག་ལེར་བཅས། །ཕྱོགས་ཀྱི་མདོག་ཏུ་དགོད་པ་ནི། །འོད་ཟེར་འབར་བ་རྣམ་མང་པོ། །མཚམས་
སུ་ཡི་དགས་གདན་ལ་ནི། །མ་ནིང་ཡི་གེ་བཞི་པ་ཉིད། །དབང་ལྡན་སེང་གེ་ཞེས་བྱ་བ། །དེ་བཞིན་མེ་རུ་སྟག་མོ་དང་། །བདེན་བྲལ་འུག་པ་ཧཱུྃ་སྒྲོགས་པ། །ཅེ་སྤྱང་རླུང་དུ་དགོད་པར་བྱ། །དབུགས་ཀྱིས་དངོས་པོ་ཐམས་ཅད་དང་། །དེ་ཡི་ཕྱག་རྒྱའང་བརྟག་པར་
བྱ། །དངོས་པོས་དངོས་པོ་བསྒོམ་པ་ཡིས། །མཁའ་འགྲོ་བརྒྱད་ཀྱིས་རྣམ་པར་བསྐོར། །ལོགས་སུ་ལྔ་བའི་བདག་ཉིད་དང་། །དབུས་སུའང་ཡེ་ཤེས་རྣམ་པར་དགོད། །བདག་ཉིད་ལུས་ཀྱི་ལུས་ཅན་ནི། །གཉིས་མེད་མཆོད་པས་མཆོད་པར་བྱ། །

ཡིད་ཀྱི་མེ་ཏོག་དགྲམ་པ་དང་། །ཡིད་ཀྱི་བདུག་པས་བདུག་པ་དང་། །ཡིད་ཀྱི་བྱུག་པས་མངོན་པར་བྱུག །ཡིད་ཀྱི་མར་མེ་སྤར་བར་བྱ། །སྔོན་དུ་རྫས་ནི་ལྔ་པ་ལ། །སངས་རྒྱས་ལྔ་ཡིས་བྱིན་གྱིས་བརླབས། །སྔོན་དུ་གསུངས་པའི་
བདུད་རྩི་ནི། །དཔའ་བེའི་ལུས་ལ་གཟུང་བར་བྱ། །ལྕགས་ཀྱུས་ལྷ་རྣམས་ཐམས་ཅད་ནི། །བདུད་རྩིའི་ཡི་གེ་ཚིམ་པར་བྱ། །ཨཱ་ལི་ཀཱ་ལི་རབ་སྦྱོར་ལས། །དཔའ་བོའི་དབུས་སུ་བྱིན་གྱིས་བརླབས། །ཨཱ་ལིར་ཤེས་པ་མཱ་མ་ཀཱི། །སྐྱེས་བུ་རྡོ་རྗེ་འཇིགས་བྱེད་དོ