Kinh tạng Tây Tạng (Kangyur Đại Học) — 080_རྒྱུད་འབུམ།_ང

་རྗེ་སེམས་དཔའ་མངའ་བདག་ཆེ། །སྐུ་ནི་འདི་རུ་ཅི་རུ་གྲགས། །བཅོམ་ལྡན་འདས་ཀྱིས་བཀའ་སྩལ་པ། །སྐུ་ནི་དེ་བཞིན་གཤེགས་སྐྱབས་
སྦྱིན། །སེམས་ནི་རྡོ་རྗེ་འཛིན་པར་དྲན། །ཕུང་པོ་ལྔ་ལས་གྲུབ་པའི་སྐུ། །རིགས་ལྔ་ཡི་ནི་བདག་ཉིད་མཆོག །རིགས་ནི་དྲུག་པ་ཐུགས་རྡོ་རྗེ། །གྲངས་མེད་རིགས་ཀྱི་གཙོ་བོའོ། །འཁོར་ལོ་རིན་ཆེན་དེ་བཞིན་པད། །རལ་གྲི་རྡོ་རྗེ་ལྔ་པའོ། །གཟུགས་དང་ཚོར་བ་འདུ་ཤེས་
དང་། །འདུ་བྱེད་རྣམ་ཤེས་དེ་བཞིན་ནོ། །གཟུགས་ནི་རྣམ་པར་སྣང་མཛད་གྲགས། །གཏི་མུག་རྡོ་རྗེའི་ངོ་བོ་ཉིད། །ཚོར་བ་རིན་ཆེན་རྒྱལ་པོ་ནི། །ང་རྒྱལ་རྡོ་རྗེའི་ངོ་བོ་ཉིད། །འདུ་ཤེས་དེ་ནི་སྣང་མཐའ་ཡས། །ཆགས་པ་རྡོ་རྗེར་རབ་ཏུ་གྲགས། །འདུ་བྱེད་དོན་ཡོད་གྲུབ་པ་

སྟེ། །ཕྲག་དོག་རྡོ་རྗེ་རུ་ནི་གྲགས། །རྣམ་པར་ཤེས་འདིར་མི་བསྐྱོད་པ། །ཞེ་སྡང་རྡོ་རྗེ་རབ་ཏུ་བསྒོམ། །ནམ་མཁའ་རྡོ་རྗེ་སེམས་དཔར་གྲགས། །རྣམ་པ་དང་བྲལ་གྲུབ་མངའ་བདག །གཏི་མུག་མེ་ལོང་ཡེ་ཤེས་ལྟ། །ང་རྒྱལ་མཉམ་པ་ཉིད་དུ་དྲན། །སོ་སོར་རྟོག་པ་འདོད་
ཆགས་ཡིན། །བྱ་བ་གྲུབ་པ་ཕྲག་དོག་ཆེ། །ཞེ་སྡང་ཆོས་དབྱིངས་རྣམ་པར་དག །བདེ་ཆེན་གཅིག་པུ་ལས་ནི་འདིར། །བྱེ་བྲག་ལྔ་རུ་གྱུར་པར་གྲགས། །བདེ་བ་དཀར་པོ་བསྲུབས་པ་ལས། །ཞལ་བཟངས་མོ་ནི་སྲ་བ་གང་། །དེ་ནི་རྣམ་པར་སྣང་མཛད་ཅེས། །གཏི་མུག་
ཆོས་ཀྱི་མཚན་ཉིད་ཅན། །བདེ་བ་ནག་པོ་ཞུ་བའི་གཟུགས། །དེ་ནི་མི་བསྐྱོད་པ་རུ་དྲན། །བདེ་བ་དམར་པོའི་འོད་ཀྱི་ཕྱིར། །འོད་དཔག་མེད་པ་དེ་བཞིན་གཤེགས། །རླུང་གིས་ཁྱབ་ཕྱིར་བདེ་བ་སྔོན། །དོན་ཡོད་གྲུབ་པ་དེ་རབ་བསྟན། །ང་རྒྱལ་ལས་ནི་འདིར་བདེ་སེར། །དེ་ནི་
རིན་ཆེན་འབྱུང་ལྡན་ཡིན། །ནམ་མཁའ་དང་བྲལ་གྲུབ་མགོན་པོ། །རྡོར་སེམས་རྒྱལ་བ་ཀུན་མངའ་བདག །སྤྱན་རིངས་བཟང་མོ་དེ་ཕྱིར་སྐུ། །ལྷ་ཡི་རྣམ་པ་རབ་ཏུ་མཆོག །འབད་པ་ཡིས་ནི་དེ་མཆོད་བྱ། །ནམ་ཡང་སྨད་པར་མི་བྱའོ། །ཤ་དང་། ཁྲག་དང་།
བཤང་བ་དང་། གཅི་བ་དང་། མིག་རྔུ་དང་། སྣབས་དང་། སེན་མོ་དང་། སོ་དང་། སྐྲ་དང་། སྤུ་དང་། རུས་པ་དང་། རྒྱུས་པ་དང་། མཁལ་མ་དང་། སྙིང་དང་། མཁྲིས་པ་དང་། གློ་བ་དང་། རྒྱུ་མ་དང་། དྲི་མ་དང་། ཚིལ་དང་། རྣག་དང་། ཨང་ཁྲི་ནི་དང་། གཉེ་མ་དང་། ལྟོ་
བ་དང་། ཁ་ལྦུ་དང་། བད་ཀན་དང་། རྔུལ་དང་། མཆི་མ་དང་། ཀླད་པ་དང་། རྐང་མར་དང་། ཁུ་བ་དང་། ཁྲག་དང་། ཤ་མ་འདི་ཡང་ལྷའི་གཟུགས་ཀྱིས་གནས་པ་སྟེ། གཞན་མ་ཡིན་ནོ། །དེ་བས་ན་ཤིང་དང་། རྡོ་བ་དང་། ས་ལས་གྲུབ་པ་དང་། དངུལ་དང་། ཟངས་དང་།
འཁར་བ་ལས་གྲུབ་པའི་ལྷ་དང་། མཆོད་རྟེན་དང་། བྲིས་སྐུ་དང་། པོ་ཏི་ལ་སོགས་པ་རྣམས་ལ་ཕྱག་མི་བྱའོ། །གང་གི་ཕྱིར་ཡེ་ཤེས་ཀྱི་སྐུ་སྤངས་ནས་ཕྱིའི་དོན་གྱིས་ཅིའི་ཕྱིར་གནས། ཕྱི་ཡི་ཐམས་ཅད་སྐད་ཅིག་མ། །དགའ་མོ་སེམས་ཀྱི་རྫུ་འཕྲུལ་ཡིན། །དེ་ལྟར་སེམས་ལས་

གཞན་པ་ཡིན། །སེམས་ཉིད་ནམ་མཁའ་ལྟ་བུའོ། །གཟུགས་སོགས་ཁ་དོག་གནས་པའི་ཕྱིར། །ཐ་མལ་པ་ཡི་ལུས་སུ་སྣང་། །རྣམ་པར་དག་པས་ལྟ་ཉིད་དུ། །བླ་མའི་ཞལ་སྔའི་བཀའ་དྲིན་ནོ། །ལྷ་མོས་གསོལ་བ། མགོན་པོ་བླ་མ་ཇི་ལྟ་བུ། །སློབ་མ་
ཡང་ནི་ཅི་འདྲ་བ། །རྒྱུད་ཀྱི་རིམ་པ་ཇི་ལྟར་ལགས། །རེ་ཞིག་རྒྱུད་ནི་ཇི་ལྟར་གསུངས། །དཔལ་ཡེ་ཤེས་ཐིག་ལེ་ལས། དཔལ་ཡེ་ཤེས་ཐིག་ལེའི་ཚད་དང་། གནས་དང་། ས་བསྟན་པའི་དོན་དང་། ཕུང་པོ་རྣམ་པར་དག་པ་ཞེས་བྱ་བའི་ལེའུ་སྟེ་བཅྭ་བརྒྱད་པའོ།། །།དེ་
ནས་ཡང་ནི་བཤད་བྱ་བ། །བླ་མ་སློབ་མའི་མཚན་ཉིད་ནི། །བླ་མ་ཐ་མ་པ་དངོས་བྲལ་ཡོན་ཏན་ལྡན། །གཞན་མིན་མཆོག་གི་དབང་གིས་དབང་བསྐུར་སྐུ། །ཐུགས་རྗེ་དང་ལྡན་ཤིན་དུ་རླབས་ཆེའི་སེམས། །དེ་ཉིད་ཤེས་པ་ལོག་པའི་ང་རྒྱལ་མེད། །བླ་མ་ཡུལ་གྱིས་མ་
གོས་དམུ་རྒོད་མ་ཡིན་པ། །རྒྱུད་ལུང་བསྟན་བཅོས་དུ་མའི་ཕ་རོལ་ཕྱིན། །ཡན་ལག་མཚན་མཆོག་ཀུན་གྱིས་ཤིན་ཏུ་བརྒྱན། །དཀྱིལ་འཁོར་འདྲི་དང་དབང་གི་རིམ་ལ་མཁས། །བླ་མ་ཡིད་ཐུབ་སྲིད་པའི་འཇིགས་བྲལ་ཞིང་། །མྱ་ངན་འདས་ལ་འདོད་པའི་ཡིད་དང་
བྲལ། །དངོས་པོ་ཆུ་ཟླ་ལྟ་བུར་ཉིད་ཀྱིས་མཐོང་། །དྲུག་ལྷག་བཅུ་ཡིས་སྟོང་ལ་གཅིག་ཏུ་སེམས། །བླ་མཆོག་ཉོན་མོངས་མེད་ཅིང་སྐྱེ་བ་མེད། །ཕུང་པོ་ལ་སོགས་སྐྱེ་མཆེད་ཁམས་དང་བྲལ། །མཆོག་དང་དགའ་བྲལ་གཉིས་ཀའི་དབུས་ན་བཞུགས། །དེ་ལྟའི་དཔལ་
བླ་རྡོ་རྗེ་རྒྱལ་པོ་ཉིད། །སློབ་མ་ཁྲིམས་ལྡན་དུལ་ཞིང་དད་པ་ཅན། །རླབས་ཆེན་ཟབ་མོའི་ཐེག་པ་བསྙེན་པར་བྱེད། །རྣམ་རྟོག་འདམ་གྱིས་རྟག་ཏུ་མ་གོས་ཤིང་། །མཁས་ཤིང་བློ་རྣོ་ཐུགས་རྗེའི་བདག་ཉིད་ཅན། །སྤྱན་རིངས་བཟང་མོ་འདི་ལྟ་བུ་དག་གི། །བླ་མ་དང་
ནི་སློབ་མ་རྣམ་གཉིས་ཀྱི། །མཚན་ཉིད་དང་ནི་ལེགས་པར་བརྟག་པ་ནི། །ཇི་ལྟའི་དོན་གྱིས་རབ་ཏུ་གསལ་བའོ། །དཔལ་ཡེ་ཤེས་ཐིག་ལེ་ལས་བླ་མ་དང་སློབ་མའི་མཚན་ཉིད་བརྟག་པ་ཞེས་བྱ་བའི་ལེའུ་སྟེ་བཅུ་དགུ་པའོ།། །།དེ་ནས་གཞན་ཉོན་བདག་གིས་བཤད། །

ཇི་ལྟར་རྒྱུད་ཀྱི་རིམ་པ་བཞུགས། །དཔལ་དང་ལྡན་པའི་རིགས་ཆེན་རྒྱུད། །འབུམ་བདུན་གྱི་ནི་མཚན་ཞེས་བྱ། །དེ་ནི་གཙོ་བོ་རྩ་བའི་རྒྱུད། །སྐུ་བརྒྱད་བདག་ཉིད་རབ་ཀྱི་མཆོག །དེ་བརྟག་ཀྱེ་ཡི་རྡོ་རྗེ་ནི། །འབུམ་ལྔ་ཡི་ནི་མཚན་ཞེས་བྱ། །དཔལ་ལྡན་ཕྱག་རྒྱ་ཆེན་ཐིག་ལེ། །
དེ་ཡི་ཕྱི་མའི་རྒྱུད་དུ་དྲན། །ཡེ་ཤེས་སྙིང་པོར་གྲགས་པའི་རྒྱུད། །དེ་ཡི་ཕྱི་མའི་ཕྱི་མའོ། །དགའ་མོ་ཡེ་ཤེས་ཐིག་ལེའི་སྒྲ། །བཤད་པའི་རྒྱུད་ནི་གསང་བ་ཆེ། །གྲུབ་པའི་ངེས་བསྟན་ཐིག་ལེ་ནི། །ཞལ་བཟང་མོ་དེ་སྙིང་པོ་དང་། །དེ་ཁོ་ན་ཉིད་སྒྲོན་མའི་མཚན། །འབྲས་བུའི་
རྒྱུད་གྲགས་འཆད་པར་འགྱུར། །དེ་བདུན་དུ་ནི་བདག་གིས་བཤད། །ཤིན་ཏུ་རྨད་དུ་བྱུང་བའི་རྒྱུད། །ལྷ་མོ་བརྒྱད་པ་སྐུ་དང་བྲལ། །དེ་ཕྱིར་སྨྲ་བར་མི་བཏུབ་བོ། །དེ་ལྟར་རིམ་པ་ཐམས་ཅད་ནི། །ལྷ་མོ་དེ་ཉིད་ཤེས་པར་བྱ། །ས་བོན་ལས་ནི་མྱུ་གུ་བཞིན། །རྒྱུད་
ཀུན་རིམ་ཤེས་རིམ་པས་སོ། །རྒྱུད་ནི་རིམ་པས་འདི་རུ་གྲགས། །ཡང་ན་ཡེ་ཤེས་འཁོར་ལོ་རྒྱུད། །ཡང་ན་དོན་ནི་རྒྱུད་ཡིན་ཏེ། །ཡང་ན་རིམ་པ་གཉིས་ནི་རྒྱུད། །ལྷ་མོ་གང་དུ་སྐལ་ལྡན་མོ། །ཤེས་རབ་ཐབས་གཉིས་ཕྲད་པའི་ས། །དེ་ནི་རྒྱུད་དུ་བཤད་པ་ཡིན། །
ཡང་ན་ཡེ་ཤེས་ལས་བྱུང་བ། །ཏ་ཡི་ཡིག་འབྲུ་སྐུ་རུ་གྲགས། །ན་ནི་དེ་ཉིད་དྲི་མ་མེད། །ཏ་ཡི་ཡིག་འབྲུ་ཁུ་བ་ཡབ། །ར་ནི་ཡུམ་སྟེ་ཁྲག་ཡིན་ནོ། །དེ་གཉིས་འདྲེས་པ་ཐིག་ལེ་ཡིན། །གཞན་མིན་རྣམ་ཤེས་ངོ་བོའོ། །དེ་ཡི་ཐིག་ལེ་ཨའི་རྣམ་པ། །ཟླ་བའི་དཀྱིལ་
འཁོར་ཉ་གང་ངོ་། །ཏ་ཡིག་དང་ནི་ར་ཡིག་འབྲུ། །ཚུལ་ཙམ་གྱིས་ནི་གཉི་ག་ལྡན། །དེ་ནི་རབ་མཆོག་ཨ་ཡིག་འབྲུ། །རྩ་དང་དགའ་བདག་ཉིད་སྐྱེ་མེད། །ལྷ་མོ་འདི་ལྟར་རྒྱུད་ཀྱི་རིམ། །རྒྱུད་ཀྱི་དོན་ཡང་ཤིན་ཏུ་བཤད། །དཔལ་ཡེ་ཤེས་ཐིག་ལེ་ལས་རྩ་བའི་
རྒྱུད་ལ་སོགས་པའི་རིམ་པ་དང་། དོན་ཞེས་བྱ་བའི་ལེའུ་སྟེ་ཉི་ཤུ་པའོ།། །།བཅོམ་ལྡན་ཡེ་ཤེས་ཐིག་ལེ་ལགས། །ཉི་མ་བྱེ་བའི་འོད་དང་མཉམ། །བདག་གི་ཞུ་བ་གང་ཞིག་ཅི། །རྒྱལ་བའི་མངའ་བདག་དེ་བདག་གསུངས། །མངའ་བདག་རང་གི་ངོ་བོ་ཉིད། །

གང་ལས་སྐྱེས་ཤིང་ཅི་ལས་འོངས། །དེ་ནི་མདོར་བསྡུས་པ་ཡི་ཆིག །ཐུབ་པ་ཆེན་པོས་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །དྲི་བ་འདི་ནི་ཤིན་ཏུ་ཟབ། །ཡེ་ཤེས་ཀྱིས་རྙེད་གསང་བའོ། །ལྷ་མོ་ཁྱོད་ནི་འབྱུང་བ་མིན། །
སྐྱེ་བ་དང་ནི་འཕོ་མེད་རབ། །མཆོག་གི་རྣམ་རྟོག་རླབས་དང་བྲལ། །རང་གི་ངོ་བོ་ཡེ་ཤེས་འོད། །བདག་རང་གི་ནི་ཡེ་ཤེས་སྐུའི། །མཆོག་གི་དབང་ཕྱུག་མ་ཁྱོད་འོང་། །གཞན་མིན་བདག་དང་ཁྱོད་མེད་ན། །སངས་རྒྱས་ཀུན་གྱིས་རྙེད་དཀའ་པ། །ཁྱོད་མེད་ན་ནི་
ཁམས་གསུམ་ཀུན། །མགོ་བོ་ཆད་པའི་མི་བཞིན་དུ། །གྲངས་མེད་འཇིག་རྟེན་གྱི་ནི་ཁམས། །ཁྱོད་ནི་ཡེ་ཤེས་འོད་བྱེད་པ། །ཁྱོད་ནི་ཐམས་ཅད་དངོས་ཀུན་གྱི། །ཐམས་ཅད་བདག་ཉིད་འབྱུང་བ་ཀུན། །ཆོས་ཀུན་ཡོངས་སུ་ཤེས་ནས་ནི། །དེ་ནི་ཐམས་ཅད་
མཁྱེན་པར་གྲགས། །དེ་ཡང་ལྷ་མོ་ཁྱོད་ཀྱི་དྲིན། །བརྗོད་པར་མི་ནུས་ཡང་དག་དོན། །ཁྱོད་ཀྱི་དྲིན་གྱིས་གྲངས་མེད་པས། །དེ་བཞིན་གཤེགས་པའི་གནས་རྙེད་འགྱུར། །མཆོག་གི་ནམ་མཁའི་གནས་ནས་བྱོན། །མཆོག་གི་ནམ་མཁའི་གནས་སུ་གཤེགས། །མཆོག་
གི་ནམ་མཁའ་རང་ངོ་ཁྱོད། །མཆོག་གི་ནམ་མཁའི་ངལ་བསོ་གནས། །མཆོག་གི་ནམ་མཁར་རྟག་ཏུ་བཞུགས། །ཀུན་རྫོབ་རྣམ་པའི་མཆོག་ཏུ་ནི། །པདྨའི་སྐུད་པ་ཇི་བཞིན་དུ། །གསང་བའི་སྣ་རྩེ་སྙིང་པོར་གནས། །ལངས་ནས་བདེ་བའི་པདྨར་ནི། །ཐིག་ལེ་ཁོང་དུ་
ཆུད་པའི་ཕྱིར། །གཤེགས་ནས་བརྟེན་པ་ཐམས་ཅད་སྲེག །རྒྱས་པས་ཐིག་ལེ་ཁྱེར་ནས་སུ། །ཡང་ནི་ཁྱོད་འདིར་བྱོན་པའི་དོན། །ལྟེ་བ་སྤྲུལ་པའི་པདྨ་ཡི། །ལྷ་མོ་གང་ཚེ་ཁྱོད་ཀྱི་གནས། །དེ་ཚེ་ཁྱོད་ནི་ཤེས་རབ་གྲགས། །ལེགས་དགྱེས་རབ་མཆོག་རྨད་དུ་བྱུང་། །
བདག་དང་ལྷན་ཅིག་གཉིས་མེད་སྦྱོར། །ལེགས་དགྱེས་དབང་མོ་ཁྱོད་ནི་བཞུགས། །ཚངས་པའི་ཡུལ་ས་བྱེ་བ་མཐར། །ལེགས་དགྱེས་ཁྱོད་ཀྱི་རྒྱ་ཡིས་བཏབ། །གྲངས་མེད་པ་ལ་རྒྱས་བཏབ་སྟེ། །དེ་ཕྱིར་ཕྱག་རྒྱ་ཆེ་ཁྱོད་གྲགས། །དཔལ་ཡེ་ཤེས་ཐིག་ལེ་ལས། །

དཔལ་ཕྱག་རྒྱ་ཆེན་པོ་བཅོམ་ལྡན་འདས་མའི་རང་གི་ངོ་བོ་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ།། །།གསང་བའི་པད་སྙིང་རྒྱས་འབྱེད་པ། །རྡོ་རྗེ་ཉི་མ་གཞན་ཡང་ཞུ། །རེ་ཞིག་ཅིའི་ཡང་གསང་བ་གསུངས། །གནས་ནི་གང་ན་ཡོད་པ་ལགས། །བཅོམ་
ལྡན་འདས་ཀྱིས་བཀའ་སྩལ་པ། །བྱང་ཆུབ་སེམས་ནི་གསང་བ་ཡིན། །ཁུ་བའི་ངོ་བོ་ཆང་དང་བྲལ། །དེ་ཡི་གནས་ནི་མངལ་ཡིན་ཏེ། །ཕྱག་རྒྱ་དགའ་བ་སྦྱིན་པ་མོ། །བཅོམ་ལྡན་འདས་མས་གསོལ་པ། བྱང་ཆུབ་སེམས་ནི་ཁུ་བའི་གཟུགས། །དེ་ནི་ཇི་ལྟར་གསང་
བར་བརྗོད། །གསང་བའི་གནས་ནི་མངལ་ཡིན་ཏེ། །གཞུང་དེ་བདག་ལ་འཐད་མ་ལགས། །དེ་ལྟ་ན་ནི་གང་ཟག་ཀུན། །ངེས་པར་གསང་བ་ཤེས་པར་འགྱུར། །དེ་ཡང་དབང་བསྐུར་ལ་སོགས་ནི། །སུ་ལ་ཡང་ནི་མི་དགོས་ལགས། །བཅོམ་ལྡན་འདས་ཀྱིས་བཀའ་
སྩལ་པ། །སངས་རྒྱས་ཀུན་གྱི་ཡུམ་ཁྱོད་དེ་ནི་བདེན། །གང་ཞིག་ཁྱོད་ཀྱིས་ངེས་པར་བཟུང་བའི་དོན། །འོན་ཀྱང་དྲང་བའི་དོན་གྱི་ཚིག་གིས་ལྡན། །རྟེན་གྱི་དོན་ཕྱིར་ཡང་ན་ངེས་པའི་དོན། །རྟེན་མེད་ན་ནི་འབྲས་བུ་རྙེད་མི་འགྱུར། །ལུས་ཀྱི་དངོས་མེད་ཇི་ལྟར་འདི་
རུ་སེམས། །ཇི་ལྟར་དོན་མཐུན་གསང་ཚིག་དེ་ནི་གསང་། །དྲང་བའི་དོན་མིན་ངེས་པའི་དོན་ཡང་མིན། །དངོས་མེད་ཡང་མིན་དངོས་པོའི་གཟུགས་མ་ཡིན། །བདེན་རིམ་འབྱུང་བ་ཐིམ་རྣམས་ཀྱི་ནི་གཞན། །སྐུ་གཟུགས་གང་དུ་དེ་ནི་ཡོད་མ་ཡིན། །ཁྲག་ཀྱང་ཡིན་པར་ཇི་ལྟར་
ཡང་ནི་མིན། །མཆོག་དགའ་དགའ་བྲལ་ལྷན་སྐྱེས་དགའ་བ་མིན། །གནས་མངལ་དེ་ལ་ནམ་ཡང་ཡོད་མ་ཡིན། །རྡོ་རྗེ་རྩ་བ་བདེ་ཆེན་ལ་སོགས་མིན། །དྲུག་ཕྱེད་རྩ་དང་མཚོ་སྐྱེས་སྙིང་པོ་མིན། །རིག་མིན་ཡང་མིན་རིག་པ་ནམ་ཡང་མིན། །བརྗོད་མེད་ནམ་མཁའི་རང་
གི་ངོ་བོའོ། །འདི་ལྟ་བུ་ནི་དོན་དམ་པར། །ལྷ་མོ་གསང་བར་རབ་ཏུ་གསལ། །ཡང་ནི་འབྲིང་གི་དོན་གྱིས་སུ། །བདག་གིས་གསང་བཤད་ཁྱོད་ཉོན་ཅིག །འབྲིང་དོན་དེ་ནི་དོན་གྱི་མཆོག །མཆོག་གི་དགའ་བ་སྦྱིན་པའོ། །འབད་པས་དགའ་བྲལ་སྲུང་བར་བྱེད། །དགའ་

བྲལ་དགའ་བས་ལྷན་སྐྱེས་འགྱུར། །ནོར་མདུད་སྙིང་ག་ཡི་ནི་གསང་། །བྱང་ཆུབ་ཀྱི་ནི་སེམས་དང་ལྡན། །དེ་ནི་ཐབས་ཀྱི་གསང་བའི་དོན། །ཤེས་རབ་མ་ཡི་དེ་བཞིན་ནོ། །གསང་བ་ཤེས་རབ་དབང་གཉིས་ལས། །དགའ་མོ་གསང་བའི་དོན་ཤེས་སོ། །
དཔལ་ཡེ་ཤེས་ཐིག་ལེ་ལས་གསང་བའི་དོན་ཞེས་བྱ་བའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་འཇམ་པའི་དབྱངས་ལ་ཡང་ཞུ་བ་ཞུས་པ། མགོན་པོ་ཐམས་ཅད་གཏན་ཕབ་པ། །རང་བཞིན་ཇི་ལྟར་ལགས་པ་གསུངས། །བཅོམ་
ལྡན་འདས་ཀྱིས་དེ་ལྟ་བུའི་ཚིག་གསན་པ་དང་ཅང་མི་གསུང་བའི་དངོས་པོས་སྐད་ཅིག་ཙམ་བཞུགས་ཏེ། དེ་ནས་མི་སྣང་བའི་རང་གི་ངོ་བོར་བཞུགས་སོ། །དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་བདག་རང་རྟེན་མེད་པར་མཐོང་ནས་ཞུས་པས་ཤིན་ཏུ་འགྱོད་ནས་ཅང་མི་སྨྲ་བར་
བཞུགས་སོ། །དེའི་དུས་སུ་སྣ་ཚོགས་པདྨ་ལ་བཞུགས་པའི་འཁོར་བྱེ་བ་ཕྲག་བདུན་ཅུ་རྩ་གཉིས་ཀྱི་གྲངས་རྣམས་ཀྱིས་ཆོས་ཀྱི་འབྱུང་གནས་སྟོང་པར་མཐོང་ནས་ཤིན་ཏུ་ཡ་མཚན་དུ་གྱུར་པས་ཀུན་སྨྲེ་ཞིང་བརྒྱལ་བར་གྱུར་ཏོ། །ཀྱཻ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་
དབང་ཕྱུག་བཅོམ་ལྡན་འདས་དཔལ་རྡོ་རྗེ་སེམས་དཔའ་གང་ན་བཞུགས། གར་གཤེགས། ཀུན་དུ་སྟོང་པར་བདག་ཅག་གིས་མཐོང་ལགས་སོ། །ལྷའི་དབང་ཕྱུག་གིས་གསོལ་པ། འཁོར་ཆེན་པོ་རྣམས་ཉོན་ཅིག །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་བཅོམ་ལྡན་
འདས་དཔལ་ཕྱག་རྒྱ་ཆེན་པོས་འདི་ལྟར་ཞུས་ཏེ། མགོན་པོ་ཐམས་ཅད་གཏན་ལ་ཕབ། །རང་བཞིན་ཇི་ལྟར་ལགས་པ་གསུངས། །དེ་ལྟ་བུའི་ཚིག་གསན་པ་དང་བཅོམ་ལྡན་འདས་ཅང་མི་གསུང་བར་མི་སྣང་བར་གྱུར་ཏོ། །དེ་ཅིའི་ཕྱིར་ཞེ་ན། རང་བཞིན་དེ་ནི་བརྗོད་དུ་མེད་པ་
དང་། རྟོག་གེ་མེད་པ་དང་། བཙལ་དུ་མེད་པ་དང་། གྲངས་མེད་པ་དང་། སྐྱེ་བ་མེད་པ་དང་། གཟུགས་མེད་པ་དང་། རིག་པ་མེད་པ་ལ་དྲིས་པས། དེ་ཉིད་སྨྲར་མི་བཏུབ་པའི་ཕྱིར། བཅོམ་ལྡན་འདས་སྣང་བ་མེད་པར་གྱུར་ཏོ། །ཡང་འཁོར་ཐམས་ཅད་ཀྱིས་གསོལ་

པ། ཀྱཻ་བློ་གྲོས་ཆེན་པོ་ཆོས་ཀྱི་མཛོད། སྣང་བ་མེད་ཅིང་དངོས་པོ་མེད་པ་ཆད་པར་མི་འགྱུར་རམ། དེའི་དོན་ལ་ཤིན་ཏུ་འཇིགས་ཤིང་ཡང་དག་པར་ཡིད་ཞུམ་པར་གྱུར་ཏོ། །ལྷའི་དབང་ཕྱུག་གིས་བཀའ་སྩལ་པ། སྣང་བ་མེད་པར་འདུ་ཤེས་གང་། །དེ་ནི་དངོས་མེད་ཤེས་མི་བྱ། །
ནང་གི་རང་ངོར་འགྲོ་བའི་ཕྱིར། །སྣང་བ་མེད་པར་འདི་རུ་བརྗོད། །དེ་བས་འཁོར་ཆེན་མ་འཇིགས་ཤིག །ཡིད་སྐྱོ་བ་ནི་ཡོངས་སུ་སྤོངས། །དེ་ལ་ཐབས་ནི་གཅིག་ཡོད་དེ། །གང་གི་རྡོ་རྗེ་འཛིན་པ་ཉིད། །སྔར་ནི་ཁྱོད་ཀྱིས་མཐོང་བ་བཞིན། །པདྨའི་དབུས་བཞུགས་མཐོང་བར་
འགྱུར། །དེའི་ཚེ་འཁོར་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་མཐོང་བར་བྱ་བའི་ཕྱིར་ཐབས་ཞུས་པ། ཀྱཻ་བློ་གྲོས་ཆེན་པོ་དཔའ་བོ་ཆེན་པོ་ཐབས་ཅི་ཡོད་པ་བདག་ལ་བསྟན་དུ་
གསོལ། །དཔའ་བོ་ཆེན་པོས་བཀའ་སྩལ་པ། དུས་གཅིག་ཏུ་མགྲིན་གཅིག་གིས་སྙན་པའི་གླུས་མཆོད་པ་གྱིས་ཤིག །དེ་ལྟ་བུའི་ཐབས་ཀྱི་ཚིག་ཐོས་ནས་ཐམས་ཅད་དགའ་ཞིང་མགུ་ལ་ཡི་རངས་པས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གི་ཞབས་
ལ་མགོ་བོས་ཕྱག་འཚལ་ཏེ། དེ་ནས་དྲུག་ལྡན་ལ་སོགས་པའི་གླུ་ཐམས་ཅད་ལེན་ནོ། །ཀྱཻ་སྐུ་རབ་མཆོག་གི་ངོ་བོའི་མཚན་ཉིད་ནི། །གང་ན་བཞུགས་པ་མྱ་ངན་འདས་མཚན་ཉིད། །དེ་ཉིད་དང་བྲལ་ཆད་པའི་སྟོང་དེ་ནི། །གཉིས་མེད་བདེ་བས་མཁྱེན་པར་མི་འགྱུར་རམ། །རྡོ་
རྗེ་མཚོ་སྐྱེས་མཆོག་སྦྱོར་ཡོངས་སུ་གཟིགས། །གང་ཞིག་དངོས་མེད་དངོས་དེ་དཔྱད་པར་མཛོད། །དེ་ནས་རང་བཞིན་ལས་བཅོམ་ལྡན། །ཆུ་ལས་ཉ་ནི་བཞིན་དུ་བཞེངས། །མཆོག་གི་དགའ་བའི་གཟུགས་བདག་ཉིད། །མཆོག་གི་དགའ་བའི་སྦྱིན་པའི་བདག །དངོས་
དང་དངོས་མིན་གཉིས་ཀྱི་སྟེང་། །གྱེན་བལྟས་པདྨའི་ལྟེ་བར་ནི། །ཞལ་བཞི་དང་ནི་ཕྱག་བཞི་པ། །ཤིན་ཏུ་ངོ་མཚར་སྐུ་དང་ལྡན། །རྒྱལ་པོ་ཡི་ནི་བཞུགས་སྟབས་བཞུགས། །བརྒྱད་གཉིས་བློ་ལྡན་བྱད་གཟུགས་ཅན། །སྤྱན་གསུམ་མཆོག་གི་རྣམ་པ་ཅན། །ཟླ་བ་ཉི་

མ་ཞབས་ཀྱིས་མནན། །རྔེའུ་ཆུང་ཐོད་པ་ཁ་ཊྭཱྃ་ག། །རྡོ་རྗེ་འབར་བ་ཕྱག་ན་བསྣམས། །དེ་ལྟ་བུའི་རྨད་དུ་བྱུང་བའི་གཟུགས་མཐོང་ནས་འཁོར་ཐམས་ཅད་དང་ལྷན་ཅིག་བཅོམ་ལྡན་འདས་མ་ཕྱག་རྒྱ་ཆེན་མོ་ལངས་ནས་ལན་གསུམ་དུ་བསྐོར་བ་བྱས་ཏེ། དམ་པོར་
འཁྱུད་ནས་བསྟོད་པས་བསྟོད་པ། མཆོག་ཏུ་རྨད་བྱུང་ཆེན་པོའི་སྐུ་ནི་རྒྱལ་གྱུར་ཅིག །ཡེ་ཤེས་ཟབ་མོ་རྒྱ་མཚོའི་སྙིང་པོ་རྒྱལ་གྱུར་ཅིག །བརྗོད་བྲལ་བལྟར་མེད་དངོས་མེད་སྐུ་མི་མངའ། །གཏི་མུག་ཆེན་པོ་འཇོམས་དེ་རྒྱལ་གྱུར་ཅིག །མཆོག་དང་གཞན་མཆོག་དེ་ནི་མཆོག་
གཞན་མཆོག །མཁའ་མཆོག་འོད་མཆོག་གི་ཡེ་ཤེས་སྣང་། །མཆོག་གི་བདུད་རྩིའི་སྙིང་པོ་གང་གཱའི་རྒྱུན། །མི་འཆད་རྒྱུན་འབབ་བྱེད་པ་རྒྱལ་གྱུར་ཅིག །ཤིན་ཏུ་ལྐོག་གྱུར་དབང་པོས་བལྟར་མེད་པ། །སྐྱེ་འགག་འདུ་བྱེད་མཚན་མེད་རྒྱལ་གྱུར་ཅིག །དེ་ལྟ་བུའི་བསྟོད་པའི་
རྒྱལ་པོ་བྱས་ནས་ཡང་ཕྱག་རྒྱ་ཆེན་པོ་ལྷ་མོ་ཆེན་མོས་བཅོམ་ལྡན་འདས་ལ་དད་པས་ཞུ་བ་ཞུས་པ། ཀྱཻ་བཅོམ་ལྡན་འདས་དཀྱིལ་འཁོར་གྱི་ལྷ་རྣམས་ཅིའི་ཕྱིར་མ་གསུངས་ལགས། བཅོམ་ལྡན་འདས་ཀྱིས་བཀའ་སྩལ་པ། །སྲུབ་དང་བསྲུབས་པའི་སྦྱོར་བ་ལས། །ལྷ་རྣམས་འབྱུང་བའི་
རིམ་པའོ། །དང་པོ་རྩོམ་པ་ཤིན་ཏུ་འདར། །རྣམ་པར་ཤེས་པས་ལྷ་མོ་སྐྱེ། །དེ་ནི་གྲོང་ལས་ཁ་དོག་དཀར། །འདོད་པའི་གཏི་མུག་རྣམ་པར་ཐོས། །གྲོང་ཁྱེར་ལས་ནི་ལོངས་སྤྱོད་ཡིན། །སྤྱོད་ལམ་ལྷ་མོ་རྒྱལ་བའི་འོད། །བསྐུམ་པ་ལས་ནི་སྣང་བ་མཆེད། །སྣང་བ་མཆེད་
ལས་ཡེ་ཤེས་འོད། །བགྲད་པ་ལ་སི་ནི་སྐྱེ་བ་སྦྱོར། །སྦྱོར་ལས་དགའ་བའི་སྐྱེ་མ་སྟེ། །མཉམ་སྦྱོར་ལས་ནི་ཡེ་ཤེས་སྐྱེ། །ཡེ་ཤེས་ལས་མི་དངོས་ཟད་མ། །ཁྱོད་ལས་འདི་རུ་དངོས་པོ་སྟེ། །དངོས་ལས་ལོངས་སྤྱོད་ཟླ་བ་མ། །དཀར་པོ་ལས་ནི་རྟེན་ཤེས་བྱ། །རྟེན་ལས་པདྨའི་ལྟེ་བ་
མ། །བྲང་བརྡབས་ལས་ནི་རྣམ་པར་འབྱེད། །རྣམ་པར་འབྱེད་ལས་པད་མིག་མ། །ནག་དང་ལྗང་དང་གུར་ཀུམ་མདོག །དམར་དང་སྔོན་པོ་ཡི་ནི་གཟུགས། །ཟླ་བ་དཀར་དང་དམར་གྱི་སྔོན། །སྒོ་ལ་སོགས་དང་མཚམས་ན་བཞུགས། །ཞལ་གཅིག་པ་ལ་སྤྱན་གསུམ་པ། །

ཕྱག་རྒྱ་ལྔ་ཡིས་རྣམ་པར་བརྒྱན། །སྣོད་དང་གྲི་གུག་གིས་ཕྱག་བྲེལ། །ན་བཟའ་གྲོལ་བ་ཕྱག་གཉིས་པ། །དེ་ནི་ཉི་ཟླའི་གདན་ལ་བཞུགས། །རུས་པ་སྣ་ཚོགས་རྒྱན་དང་ལྡན། །ཁྱོད་ཀྱི་བཞུགས་སྟབས་ཇི་ལྟ་བར། །ལྷ་མོ་རྣམས་ཀྱང་དེ་བཞིན་ནོ། །དེ་རྣམས་ཐབས་ནི་བཞི་
གཉིས་ཀྱི་ནི་གྲངས། །མཉམ་པའི་བཞུགས་སྟབས་ཕྱག་དང་ཞབས་ལ་སོགས། །རབ་ཏུ་དགའ་བའི་ཡིད་ལྡན་ཞི་བའི་གཟུགས། །རྟག་ཏུ་སེམས་ཅན་དོན་བྱེད་ཁོ་ན་བརྩོན། །ལྷ་མོས་གསོལ་བ། དཔའ་བོ་རྣམས་ཀྱི་མིང་གི་བརྡ། །དེ་བཞིན་ཉིད་ཀྱི་རྡོ་རྗེས་གསུངས། །བཅོམ་
ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་ང་ལ་གང་ཞུས་པ། །སྐལ་ལྡན་ལྷ་མོ་དེ་ནི་ཉོན། །འདི་ཡི་རྒྱུད་ལ་བདག་ལ་གཞན། །མཚན་ནི་ཡོད་པ་གང་ལ་ལར། །ན་ནི་ལྟེ་བ་གསང་བའི་པད། །དགའ་བྲལ་དགའ་བ་སྦྱིན་པའོ། །མ་ཞེས་ནོར་བུ་བསྲུབས་པ་ནི། །མཆོག་
གི་དགའ་བ་སྦྱིན་པའོ། །གང་ཞིག་དེ་ཡི་དབུས་ནས་ལངས། །དེ་ནི་བདག་གི་རང་བཞིན་མཚན། །དཔའ་བོ་རྣམས་ནི་བདག་གིས་བཤད། །ཤེས་རབ་ཕ་རོལ་ཕྱིན་མ་ཉོན། །ལྷ་ཆེན་པོ་དང་ཁྱབ་འཇུག་དང་། །པདྨའི་ལྟེ་བ་ཤིན་ཏུ་བལྟ། །ལྷ་ཡི་དབང་དང་འདོད་པའི་ལྷ། །པདྨའི་
མིག་དང་གཞོན་ནུ་མ། །རེ་ཞིག་དེ་ནི་དཀྱིལ་འཁོར་པ། །རང་གི་ཕྱག་རྒྱ་མཚོན་ཆ་འཛིན། །དཔལ་ཡེ་ཤེས་ཐིག་ལེ་ལས་བསྐུལ་བ་ཞེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།བཅོམ་ལྡན་འདས་མ་ས་གསོལ་པ། ཀྱེ་བཅོམ་ལྡན་འདས་དབང་བསྐུར་བའི་དུས་སུ་དཀྱིལ་
འཁོར་རྣམས་ཇི་ལྟ་བུ་ལགས། ཆོ་ག་གང་གིས་དབང་བསྐུར་བ་སྦྱིན་ཞིང་བླང་། བཅོམ་ལྡན་འདས་ཀྱིས་བཀའ་སྩལ་པ། །ཆུ་ལ་སོགས་པའི་དབང་དུས་སུ། །རྡུལ་ཚོན་ལ་སོགས་དཀྱིལ་འཁོར་མཛེས། །གསང་བའི་དབང་བསྐུར་དུས་སུ་ནི། །མེ་ཏོག་སྣ་ཚོགས་མཆོག་
གིས་སོ། །ཤེས་རབ་ཡེ་ཤེས་དབང་བསྐུར་དུས། །སྣ་ཚོགས་དྲི་ཞིམ་པོ་ཡིས་བརྒྱན། །ལས་དང་པོ་ཡི་དང་པོ་ལ། །ངེས་པའི་དོན་གྱི་ཆུ་ལ་སོགས། །དབང་བསྐུར་ཤེས་པས་སྦྱིན་བྱ་སྟེ། །དེ་ལྟར་མིན་ན་སྐྱོན་དུ་འགྱུར། །ཤེས་རབ་ཅན་གྱིས་དྲང་དོན་དེར། །སྦྱིན་ནོ་དེ་ནས་དམ་

ཚིག་སྦྱིན། །ནོར་བུ་མགྲིན་པར་བྱང་ཆུབ་སེམས། །བླ་མ་ཉིད་ཀྱིས་རང་རིག་བྱེད། །ཤེས་རབ་ལྷན་ཅིག་གནས་ལས་ལངས། །སློབ་མའི་ཁ་ཡི་པདྨ་རུ། །ཉིད་ཀྱི་རྡོ་རྗེ་རབ་ཏུ་སྦྱིན། །དེ་ནས་བདེ་བའི་བདུད་རྩིས་དཀྲོལ། །མགྲིན་པའི་དབུས་སུ་རྩ་གཉིས་ནི། །
གཡས་དང་གཡོན་ན་ཡོད་པའོ། །སྦོམ་མ་ཡངས་མར་འདི་རུ་གྲགས། །སྲོག་དང་ཉེ་བའི་རང་ངོ་བོ། །གཡོན་ནི་སྲོག་ཏུ་ཤེས་པར་བྱ། །ཉེ་བའི་སྲོག་ནི་གཡས་ནའོ། །དེ་རུ་བདེ་བར་འཇུག་པར་བྱ། །མཐེ་བོང་སྲིན་ལག་གཉིས་ཀྱིས་མནན། །དེ་ནས་ཡེ་ཤེས་འབྱུང་བར་འགྱུར། །
བུ་མོས་རྙེད་པའི་བདེ་ཇི་བཞིན། །རེག་བྱ་ཆེན་པོས་དགའ་བ་ཆེ། །དགའ་བ་ཆེན་པོས་བདེ་བ་ཆེ། །བདེ་བ་ཆེན་པོས་བྱང་ཆུབ་སེམས། །ཤེས་རབ་བྱ་གདོང་མ་ཡི་ཁར། །ནོར་བུའི་ཁ་ལས་ཐིགས་པ་གཅིག །ཤེས་རབ་ཡེ་ཤེས་ཞལ་བཟང་མོ། །ཤེས་རབ་བྱ་གདོང་
ལས་བདེ་བ། །རྡོ་རྗེ་རིན་ཆེན་ཁ་རུ་འགྲོ། །དེ་ནི་དབང་གི་མཆོག་རབ་ཡིན། །སངས་རྒྱས་གྲུབ་པའི་འབྲས་སྦྱིན་བདག །ཤེས་རབ་གཟུགས་བཟང་བྷ་ག་རབ། །ཤིན་ཏུ་ལང་ཚོ་དབང་བསྐུར་ལྡན། །དགའ་སོགས་བྱེ་བྲག་མགུ་བར་བྱས། །དེ་ནས་སློབ་མ་ལ་སྦྱིན་བྱ། །
སེམས་དཔའ་ཆེན་པོ་ཤེས་རབ་འདི། །ཡང་དག་ཡེ་ཤེས་རབ་ཏུ་སྟེར། །གང་ཞིག་བཀའ་ལུང་སྐྱབས་སྦྱིན་ཏེ། །དེ་ནི་བུ་ཁྱོད་དད་པར་བྱ། །དེ་ཡི་མངལ་གྱི་གཡོན་ལོགས་ན། །ཨི་ཌཱ་བྱ་གདོང་མ་ནི་བཞུགས། །དེ་རྙེད་ཙམ་གྱིས་རང་བཞིན་ནི། །ཤེས་རབ་བསྙེན་པས་
རྙེད་པར་འགྱུར། །དེ་ནི་གཞན་མིན་ཡོངས་སུ་ཤེས། །བཞི་པའི་འབྲས་བུའི་ངོ་བོ་ཡིན། །རང་རིག་པ་དང་མཆོག་ཡེ་ཤེས། །ངག་གི་ལམ་གྱིས་རྙེད་དང་བྲལ། །དེ་ན་ལྷ་མོ་སྐལ་ལྡན་མོ། །གསང་བ་ལས་ནི་ཤིན་ཏུ་གསང་། །རྒྱུད་ཀུན་དུ་ནི་བདག་གིས་སྦས། །མཐའ་
ཡི་མཐའ་རུ་རབ་ཏུ་གསལ། །བཅོམ་ལྡན་འདས་མས་གསོལ་བ། མཐའ་དང་མཐའ་ཡི་དོན་ནི་ཅི། །མཆོག་གི་དབང་ཕྱུག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །མཐའ་ནི་རྣམ་པར་འབྱེད་པར་ཤེས། །རྣམ་པར་འབྱེད་པ་བཅོམ་པའི་ཕྱིར། །

རྣམ་པར་འབྱེད་པ་བཅོམ་པའི་མཐར། །རྣམ་པར་འབྱེད་པ་མཐར་གསལ་འགྱུར། །རྣམ་པར་འབྱེད་མཐར་ཡེ་ཤེས་ཆེ། །དེ་རང་ངོ་བོའི་རང་བཞིན་ནོ། །ལྷ་མོས་གསོལ་པ། དགྱེས་པ་རྡུལ་ཚོན་དཀྱིལ་འཁོར་ནི། །མངའ་བདག་ཇི་ལྟའི་རྣམ་པས་བྲི། །བཅོམ་ལྡན་འདས་
ཀྱིས་བཀའ་སྩལ་པ། །གང་ཞིག་ཁྱོད་ཀྱིས་ཡོངས་སུ་ཞུས། །ཉོན་ཅིག་ལྷ་མོ་བདག་གིས་བཤད། །ཕྱག་རྒྱའི་དཀྱིལ་འཁོར་འདི་རུ་ནི། །ལས་ལ་མཁས་པས་བྲི་བར་བྱ། །པདྨ་འདབ་མ་བརྒྱད་པར་བྱ། །པདྨའི་ནང་དུ་ཆར་ཡང་བྱ། །ཆར་ཡང་དང་ལྡན་སྣ་ཚོགས་འདབ། །
ཆར་ཡང་གི་ནང་ཐིག་ལེ་སྟེ། །དེ་ཡི་སྟེང་དུ་རྡོ་རྗེ་བྲི། །སྣ་ཚོགས་པདྨའི་ཟེ་འབྲུ་ལྡན། །རྡོ་རྗེ་གྲི་གུག་གིས་ནི་བསྐོར། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །སྣ་ཚོགས་བུམ་པ་དང་ལྡན་པ། །དཀྱིལ་འཁོར་རབ་ཀྱི་མཆོག་ནི་བྱ། །ཤར་གྱི་
འདབ་མར་འཁོར་ལོ་བྲི། །བྱང་དུ་དེ་བཞིན་པདྨའོ། །ནུབ་ཀྱི་འདབ་མར་རིན་པོ་ཆེ། །ལྷོ་རུ་རལ་གྲི་བསྒྲེང་བའོ། །པདྨ་གཞན་རྣམས་ཐོད་པ་ནི། །བདུད་རྩི་ལྔ་ཡིས་རབ་ཏུ་གང་། །དུང་གཞུ་དེ་བཞིན་རི་རབ་དང་། །རབ་ཏུ་འབར་བ་ཡི་ནི་མེ། །མེ་མཚམས་ལ་སོགས་རིམ་
བཞིན་བྱ། །འབད་པ་ཡིས་ནི་ཡོངས་སུ་བསྐོར། །ཤར་གྱི་སྒོར་ནི་དཔག་བསམ་ཤིང་། །བྱང་དུ་འབྲས་བུ་ས་བོན་དང་། །ནུབ་ཏུ་རིན་ཆེན་སྡོང་བུ་དང་། །ལྷོ་རུ་སྣ་ཚོགས་རྡོ་རྗེའོ། །སྒོ་ཡི་ཕྱི་རོལ་རྡོ་རྗེའི་ཕྲེང་། །འོད་དང་ལྡན་པས་བསྐོར་བར་བྱ། །ལྷ་མོ་ཆེན་མོ་དེ་ལྟ་བུའི། །
དཀྱིལ་འཁོར་ཡེ་ཤེས་སྦྱིན་བདག་པོ། །དམ་ཚིག་ཆེན་པོ་དང་ལྡན་པས། །རབ་ཏུ་འབད་པ་ཡིས་ནི་བྱ། །དཀྱིལ་འཁོར་གྱི་ནི་བདག་པོའི་ཕྱིར། །དེས་ན་བདག་ནི་རབ་ཚིམ་བྱ། །དཔལ་ཡེ་ཤེས་ཐིག་ལེ་ལས་དབང་བསྐུར་བ་བླང་བ་དང་། ཕྱག་རྒྱའི་དཀྱིལ་འཁོར་ཞེས་བྱ་བའི་ལེའུ་
སྟེ་ཉི་ཤུ་རྩ་བཞི་པའོ།། །།བཅོམ་ལྡན་འདས་མས་གསོལ་བ། ཀྱཻ་བཅོམ་ལྡན་འདས། དགའ་བ་བཞི་ཡི་ངོ་བོ་དང་། །བསྐྱེད་པའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དགའ་བ་ལས་ནི་མཆོག་དགའ་བ། །མཆོག་དགའ་བ་ལས་དགའ་བྲལ་

དགའ། །དགའ་བྲལ་ལས་ནི་ལྷན་ཅིག་སྐྱེས། །དགའ་བ་ཀུན་གྱི་དེ་ཉིད་དོ། །བཅོམ་ལྡན་འདས་མས་གསོལ་བ། །དེ་ལྟའི་རིག་པ་མགོན་ཆེན་པོ། །རིག་པ་སྔར་གྱི་གཞུང་ངམ་ཅི། །མངོན་སུམ་དང་ནི་རྗེས་སུ་དཔག །ས་བོན་དང་འདྲ་འབྲས་བུ་ཡིན། །ཀཱོ་
ཊ་པ་ལས་ཧཱ་ལུ་ནི། །གང་དུ་ཡང་ནི་མཐོང་མི་འགྱུར། །དགའ་བྲལ་ལས་ནི་ལྷན་ཅིག་སྐྱེས། །བདེ་མིན་དགའ་བྲལ་སྡུག་བསྔལ་དེས། །དགའ་བ་ཀུན་ནི་འཇོམས་པར་བྱེད། །མཆོག་གི་དབང་ཕྱུག་དགའ་བྲལ་འདི། །དགའ་བ་ཀུན་དང་མི་མཐུན་ནོ། །དགའ་བ་ལས་ནི་མཆོག་
དགའ་བ། །མཆོག་དགའ་བ་ལས་ཤིན་ཏུ་དགྱེས། །བཅོམ་ལྡན་མཁའ་འགྲོ་དེ་རིགས་ལགས། །ཡང་ན་མཆོག་ལས་ལྷན་སྐྱེས་སོ། །བཅོམ་ལྡན་འདས་ཀྱིས་བཀའ་སྩལ་པ། །རྡོ་རྗེ་མཁའ་འགྲོ་མ་དེ་བདེ་ན། །དགའ་བྲལ་ལས་ནི་ལྷན་སྐྱེས་མིན། །འོན་ཀྱང་དེ་བསྲུངས་བ་
ལས་ཡོད། །དེ་མིན་ལྷན་སྐྱེས་གང་དུ་གནས། །དགའ་བ་ཀུན་དང་མི་མཉམ་སྟེ། །དགའ་བ་ཀུན་ནི་འཇོམས་བྱེད་པ། །འདི་སྐད་སྨྲ་བ་ཤིན་ཏུ་མཆོག །དོན་དམ་པ་ཡི་ཚིག་ཡིན་ནོ། །དགའ་ཀུན་འགྲོ་བ་ཡང་གཅིག་པུ། །ཡིད་འཕྲོག་ལྷན་ཅིག་སྐྱེས་པའོ། །སྤྲིན་མེད་སྙིང་གའི་
ནམ་མཁའ་རུ། །ཡེ་ཤེས་ཉི་མང་པ་མཛེས་ཤིང་། །དཔལ་ལྡན་ཡེ་ཤེས་ཐིག་ལེའི་རྒྱུད། །ནམ་ཡང་དེ་ནི་ཐོས་མ་ཡིན། །དེ་བཞིན་གཤེགས་པའི་གནས་ནི་མཆོག །ལྷ་མོ་དེ་ནི་གང་ལས་རྙེད། །རྣལ་འབྱོར་མ་དང་ལྷན་ཅིག་ཏུ། །དུ་མའི་རྒྱུད་དུ་བཤད་ན་ཡང་། །དེ་ལྟ་མོད་ཀྱི་
རྒྱུད་འདི་ཡི། །བཅུ་དྲུག་ཆར་ཡང་མི་ཕོད་དོ། །དེ་སྐད་སྨྲ་ཡི་རྒྱུད་གཞན་ཀུན། །དགེ་བའི་ཡིད་དང་ལྡན་ཡང་ཡིན། །འདི་རུ་དད་པ་མེད་གྱུར་ན། །དམྱལ་བ་ལ་སོགས་འགྲོ་བར་འགྱུར། །མདོ་སྡེ་ལ་སོགས་གསུང་རབ་ཀུན། །དད་ཅིང་གུས་པས་ཁོ་ན་ཡིན། །གང་ཕྱིར་རྒྱུད་ཀུན་གྱི་
སྙིང་པོ། །དེ་ཕྱིར་རྒྱུད་འདི་རབ་ཀྱི་མཆོག །བཅོམ་ལྡན་འདས་མས་གསོལ་བ། སྦས་པའི་ཡི་གེ་དྲང་བ་གང་། །སྙིང་བོ་ཡེ་ཤེས་འབྲས་བུ་སྟེར། །ཉེ་བའི་སྙིང་པོ་དེ་ནི་མགོན། །དེ་ནི་དེ་རིང་གསལ་བར་མཛོད། །བཅོམ་ལྡན་འདས་ཀྱིས་བཀའ་སྩལ་པ། །སྔགས་ནི་ཤིན་ཏུ་

གསལ་བ་མཆོག །དེ་ལྟ་ན་ཡང་གསལ་བར་བྱས། །སྔགས་ཀྱི་བཟླས་ལས་འགྲུབ་པར་འགྱུར། །གྲུབ་པ་རྙེད་པས་སངས་རྒྱས་སྲས། །ཧཱ་སྭཱ་ཊ་ཕ་ཧཱུྃ་ཧཱུྃ་ཀ་ལ་ཏི་ན་ཛྙཱ་ཛྲ་བ་ཧཱ་མ་ཤྲཱི་ཨོྃ། །ཧཱ་སྭཱ་ཊ་ཕ་ཊ་ཕ་ཧཾ་ཧཾ་ཧཱུྃ་ཧཱུྃ་ཧུྃ་ཧྲིཾ་ཧྲིཾ་ཨོཾ། །ཧཱ་སྭཱ་ཊ་ཕ་ཧཱུྃ་ཧཱུྃ་ཡི་མཱ་ཀྵར་ལ་བ་ཧཱ་མ་ཡེད་མ་ཛྲེ་བ་ཨོྃ། །ཧཱ་སྭཱ་
ཊ་ཕ་ཧཱུྃ་ཧཱུྃ་རས་བི་རས་ཨོྃ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འཇིག་རྟེན་གྱི་ཁམས་གྲངས་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་གྲངས་མེད་པ་དང་། དེ་བཞིན་གཤེགས་པ་གྲངས་མེད་པ་རྣམས་ཀྱིས་རྫུ་འཕྲུལ་གྱིས་མེ་ཏོག་རྣམ་པ་སྣ་
ཚོགས་པ་མན་དཱ་ར་བ་དང་། མན་དཱ་ར་བ་ཆེན་པོ་དང་། སྔོན་མེད་པའི་མེ་ཏོག་རྣམ་པ་སྣ་ཚོགས་རྣམས་ཀྱི་ཆུན་པོ་འཕྱང་བ་དང་། རོལ་མོ་སྣ་ཚོགས་དང་། གར་དང་། གླུ་དང་། མཆོད་པ་དང་། རིག་པ་འཛིན་པས་བྱས་པ་རྨད་དུ་བྱུང་བའི་ཆོས་གོས་དང་། རིན་པོ་ཆེ་རྣམ་པ་སྣ་ཚོགས་དང་།
གསེར་དང་། ནམ་མཁའ་ལས་ནོར་བུའི་ཆར་བཅོམ་ལྡན་འདས་ཀྱི་ཞབས་ཀྱི་རྩར་བབས་པར་གྱུར་ཏོ། །དེ་ནས་ནམ་མཁའ་ལས་དེ་བཞིན་གཤེགས་པ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྟོད་པས་བསྟོད་པ། །སངས་རྒྱས་ཀུན་གྱི་སྐུ་གཅིག་པུ། །ལེགས་སོ་
ལེགས་སོ་བཅོམ་ལྡན་འདས། །ཤིན་ཏུ་རྨད་བྱུང་ཡེ་ཤེས་ཆེ། །མཆོག་གི་དབང་ཕྱུག་གཏན་ལ་ཕབ། །འདི་ཡི་འཁོར་ནི་དག་བྱེད་དགེས། །སྡིག་པ་ཐམས་ཅད་འཇིག་པར་བྱེད། །ཡང་དག་མཆོག་གི་གསང་བ་འདི། །རྙེད་པར་དཀའ་བ་དོན་དམ་པ། །དཔལ་ལྡན་ཡེ་
ཤེས་ཐིག་ལེའི་རྒྱུད། །ཡེ་ཤེས་རྒྱ་མཚོ་གཏན་ལ་ཕབ། །དེ་ལྟ་བུའི་ཚོགས་ཀྱི་མཆོད་པ་བྱས་ནས། ནམ་མཁའ་ལ་གནས་པའི་དེ་བཞིན་གཤེགས་པ་ལ་སོགས་པ་རྣམས་དེ་ཁོ་ན་ཉིད་ཀྱི་བསམ་གཏན་ལ་བཞུགས་སོ། །བཅོམ་ལྡན་འདས་མས་གསོལ་བ། ཀྱཻ་བཅོམ་ལྡན་
འདས། བདེ་བ་ཆེན་པོ་གཅིག་པུའི་སྐུ། །ཚིག་རྒྱས་པ་ཡི་སྙིང་པོའི་དོན། །མཆོག་གི་དབང་ཕྱུག་བདག་ལ་གསུངས། །མཆོག་གི་དབང་ཕྱུག་གིས་བཀའ་སྩལ་པ། ཉོན་ཅིག་ལྷ་མོ་གསང་བའི་མཆོག །རྒྱུད་ཀུན་དུ་ནི་རྙེད་དཀའ་བ། །གསང་སྣ་པདྨའི་སྙིང་པོ་ནི། །ཚོགས་ཀྱི་

གནས་སུ་འདི་རུ་བརྗོད། །རྡོ་རྗེའི་རྩེ་མོ་ཁ་ཕྱེའི་ཕྱིར། །དེ་ནི་རྒྱས་པར་བརྗོད་པའོ། །ཡང་ན་ཐམས་ཅད་ཀྱི་ནི་ཚོགས། །སྙིང་པོ་བྱ་ཡི་གདོང་མར་དྲན། །དེ་ལ་རྡོ་རྗེ་རྩེ་མོ་ཡིས། །ཕྱེ་བ་དེ་ནི་རྒྱས་པར་བརྗོད། །ཨི་ཌཱ་པིང་ག་ལ་གཉིས་ཀྱི་དབུས། །རྟོག་མེད་ཡེ་
ཤེས་ངོ་བོ་ཉིད། །སྲུབ་དང་བསྲུབས་པའི་སྦྱོར་བ་ཡིས། །རྡོ་རྗེའི་མཐེ་ཆུང་རྩེ་མོ་ལས། །རེག་བྱས་གང་གིས་བདེ་བར་འཛག །ཞལ་བཟང་དེ་ནི་ཚིག་རྒྱས་པའོ། །ལྟེ་བའི་གནས་ནས་སྨིན་འཁོར་ལོ། །དེ་ནས་གནས་པའི་རྣ་བའོ། །སྤྱི་རྩེ་ཚངས་པའི་བུ་ག་ནི། །ཚིག་རྒྱས་
པ་ནི་གསུམ་དུ་དྲན། །མ་ནི་སྲུབ་དང་བསྲུབས་པ་སྟེ། །ར་ནི་དགའ་བ་ཡིན་པར་བརྗོད། །མུ་ནི་ལྷ་མོ་སྒྲོལ་མ་ཡིན། །ད་ཡི་ཡིག་འབྲུ་ཞུ་བའི་གཟུགས། །གྷ་ཡི་ཡིག་འབྲུ་སྒྲ་རུ་གྲགས། །ཏ་ཡི་ཡིག་འབྲུ་གསལ་བར་བྱེད། །ན་ནི་ལྟེ་བའི་གསང་བའི་མཐར། །དེ་ཡི་དབུས་
སུ་རྟག་ཏུ་ཤར། །ཟླ་བའི་སྐུ་དང་འདྲ་བ་གསལ། །ཉི་མ་བྱེ་བ་མཉམ་པའི་འོད། །རྡོ་རྗེ་སེམས་དཔའ་བདེ་བ་ཆེ། །བྱང་ཆུབ་ཀྱི་ནི་ལམ་རབ་སྟེར། །དེ་ནི་གསང་བ་ཡེ་ཤེས་ཆེ། །རང་བཞིན་ཚིག་གིས་རབ་གསལ་བྱས། །འབད་པ་ཡིས་ནི་སྦ་བར་བྱ། །སུ་ལའང་སྦྱིན་པར་མི་
བྱའོ། །དཔལ་ཡེ་ཤེས་ཐིག་ལེ་ལས་ཚིག་རྒྱས་པར་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་གཞན་ཉོན་བདག་གིས་བཤད། །ཡེ་ཤེས་རབ་མཆོག་གང་གིས་སྨྲས། །དེ་ཁོ་ན་ཉིད་བདག་དོན་ཟབ། །ངེས་བསྟན་ལ་སོགས་བྱེ་བྲག་ཏུ། །སྲོག་གི་དབྱུག་པ་བཞུགས་
ཐབས་ནས། །རྩ་དང་ལྡན་པའི་སྦྱོར་བ་དྲུག །ཐིག་ལེའི་ཤར་བ་ནུབ་པ་དང་། །འཕོ་བ་སྦྱོར་བའི་མཚན་ཉིད་དང་། །རྩ་ཡི་འཁོར་ལོ་འབྱུང་བར་དགྱེས། །དབང་གི་རིམ་པ་དེ་བཞིན་ནོ། །སྲུང་བའི་འཁོར་ལོ་ལྷ་མོ་ཆེ། །སྙིང་པོ་སྔགས་ཀྱི་རྒྱལ་པོ་ཉིད། །སྐུ་བརྒྱད་བདག་ཉིད་མཆོད་
སྦྱིན་དང་། །ཐིམ་དང་ལོངས་སྤྱོད་དང་ནི་དཔང་། །རྡོ་རྗེ་ལྷ་མོ་ཡེ་ཤེས་སྐུ། །གསང་བའི་སྒྲ་ཡང་དེ་བཞིན་ནོ། །སྲུང་བའི་དམ་ཚིག་ལ་སོགས་དང་། །དཔལ་ལྡན་སྦྱིན་སྲེག་དོན་དམ་པར། །སྲུབ་དང་བསྲུབས་པའི་དགྱེས་པ་དང་། །སྔགས་ཀྱི་བཟླས་པ་མཆོད་སྦྱིན་དང་། །གནས་བརྒྱད་

སྐུ་ཡི་ངོ་བོ་དང་། །དགའ་བ་ལ་སོགས་པ་ཡི་མཆོག །དུར་ཁྲོད་རྣམ་རྟོག་མེད་པར་གྲགས། །ཆུ་ངོགས་རྟོག་པ་མེད་པ་དང་། །སྣང་བ་ལ་སོགས་མཆོག་ཡེ་ཤེས། །དངོས་པོ་ལ་སོགས་བདེ་བ་ཆེ། །ཐོག་མ་ཐ་མ་དུར་ཁྲོད་བརྒྱད། །ཞིང་ལ་སོགས་པ་བསྟན་པ་དང་། །རླུང་གི་དེ་
ཉིད་སྙིང་པོའི་དོན། །འཇུག་པ་གནས་པ་འགྲོ་བ་དང་། །ཉེར་འགྲོ་སྦྱོར་བ་རབ་མཆོག་དང་། །ཉིད་ནི་ཡེ་ཤེས་ཐིག་ལེ་དང་། །རང་གི་ངོ་བོ་རྣམ་པ་མཆོག །ས་ལ་སོགས་པའི་བདག་པོ་དང་། །དེ་བཞིན་གཤེགས་པའི་སྐུ་སྐྱབས་དང་། །རྒྱུད་ཀྱི་རིམ་པ་བསྟན་པ་དང་། །ཕྱག་
རྒྱ་ཆེན་པོའི་རང་བཞིན་ནོ། །གསང་བ་ཡི་ནི་དོན་དམ་པར། །དེ་ཉིད་མཆོད་པས་བསྐུལ་བ་དང་། །ཤེས་རབ་ཡེ་ཤེས་ཇི་བཞིན་ནོ། །གསང་བའི་དཀྱིལ་འཁོར་འཁོར་ལོ་སོགས། །ཞལ་བཟང་ཚིག་རྒྱས་བསྟན་པའོ། །གཏོར་མ་འབྱུང་ལ་ཕན་དོན་དུ། །སྡིག་པ་ཐམས་ཅད་འཇིག་
པར་བྱེད། །དེ་ནི་བདེ་བ་ཆེན་པོའི་མཐའ། །དེ་ཉིད་བསྡུས་པའི་སྙིང་པོའི་དོན། །བཞི་བཅུའི་བདག་ཉིད་དེ་ཉིད་དོན། །གསང་ཆེན་བདག་གིས་རབ་ཏུ་བཤད། །དེ་ཉིད་སུམ་ཅུ་དྲུག་བདག་པོ། །ཆར་ཡང་ཡེ་ཤེས་ཚོར་བྱེད་དོ། །ཐིག་ལེ་ཡེ་ཤེས་བདག་ཉིད་ཚོར། །དེ་ནི་སུམ་ཅུ་
བདུན་དབང་ཕྱུག །ཚུལ་གྱིས་ཡེ་ཤེས་བདག་ཉིད་ཚོར། །དེ་ནི་སུམ་ཅུ་བརྒྱད་དབང་ཕྱུག །ཚུལ་ཙམ་ཡེ་ཤེས་ཚོར་བྱེད་པ། །དགུ་ལྷག་སུམ་ཅུ་དེ་ཉིད་དོ། །མཆོག་ཤེས་པ་ཡི་རྣལ་འབྱོར་གང་། །བཞི་བཅུའི་མངའ་བདག་ཆེན་པོའོ། །གཞན་མཆོག་གསུང་ལམ་བརྗོད་དུ་མེད། །
རྣམ་པར་དག་པ་དེ་ཉིད་མཆོག །ཐམས་ཅད་དེ་ཁོའི་བདག་ཉིད་ཕྱིར། །དེ་བས་བྱེ་བྲག་མི་བྱའོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་ཀྱི་སྙིང་པོ་བསྡུས་པ་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།། །།ལྷ་མོས་གསོལ་པ། བཅོམ་ལྡན་འདས་ནི་མཆོག་དགའ་བ། །ཀུན་དགའ་
བ་ཡི་རྣམ་པ་སྐུ། །དེ་ཁོ་ན་ཉིད་ཞལ་བརྒྱད་པའི། །རྣམ་པར་དག་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་སྒོམ་པ་རྣམ་པར་དག །སྐལ་ལྡན་ལྷ་མོ་ཁྱོད་ཉོན་ཅིག །ཞལ་བརྒྱད་རྣམ་པར་ཐར་པ་བརྒྱད། །ནང་གི་སྟོང་པ་དེ་ཉིད་དོ། །སྤྱན་ནི་ཉི་ཤུ་

རྩ་བཞི་ནི། །ས་དང་སྟོབས་དང་ཡེ་ཤེས་སོ། །ཕྱག་རྣམས་སྟོང་ཉིད་རྣམ་པར་དག །བརྒྱད་གཉིས་ཕྱག་ནི་སྟོང་པ་ཉིད། །སྦྱངས་པའི་ཡོན་ཏན་སྡེ་དང་ལྡན། །ཐོད་པ་རྣམས་ཀྱི་ངོ་བོ་ཉིད། །སངས་རྒྱས་ཆོས་ནི་མ་འདྲེས་པ། །འཇིགས་བྱེད་མ་ནི་བརྒྱད་གཉིས་དབྱེ། །
བསྡུ་བའི་དངོས་པོ་བཞི་པོ་ནི། །ཞབས་བཞི་རུ་ནི་དྲན་པའོ། །ཆགས་སྡང་དེ་བཞིན་གཏི་མུག་ནི། །ལེགས་དགྱེས་ཟླ་ཉི་འཇིགས་བྱེད་དོ། །གང་ཞིག་སྲིད་པའི་གནས་སུ་བཞུགས། །ཞལ་བཟང་དེ་ཕྱིར་གཡས་བརྐྱང་བ། །ལྷ་མོ་གཡོན་བརྐྱང་མྱ་ངན་འདས། །ཡེ་ཤེས་སྐུ་ཉིད་
བཞུགས་པའོ། །སྲིད་དང་མྱ་ངན་འདས་མིན་ཕྱིར། །ལྷ་མོ་དེ་ཕྱིར་བཞེངས་པའོ། །གཟུགས་བརྒྱད་རྣམ་པར་དག་པ་ཡིས། །སྣ་ཚོགས་པདྨ་འདབ་མ་བརྒྱད། །གཟུགས་མེད་གཉིས་ཀྱི་འདུ་ཤེས་ཕྱིར། །ཤེས་རབ་ཐབས་གཉིས་བདག་ཉིད་དོ། །གར་དགུའི་རོ་དང་ལྡན་
པའི་ཕྱིར། །ཞལ་བཟང་མོ་ནི་སྣ་ཚོགས་གཟུགས། །ལྷ་མོས་གསོལ་པ། ཐམས་ཅད་མཁྱེན་པ་མཆོག་དབང་ཕྱུག །བཅོམ་ལྡན་བདག་གིས་རྣམ་དག་ཤེས། །གསང་བའི་དོན་གྱིས་འདི་ལྟར་མགོན། །རྡོ་རྗེ་འཛིན་པ་བཀའ་དྲིན་གསོལ། །བཅོམ་ལྡན་འདས་ཀྱིས་བཀའ་
སྩལ་པ། །གསང་བའི་སྒོམ་པ་རྣམ་པར་དག །ལྷ་མོ་ཤེས་རབ་ཆེན་མོ་ཉོན། །ཞལ་དང་ལྷན་ཅིག་པ་ཡི་སྤྱན། །ཞལ་བཟང་གནས་ལ་སོགས་པའོ། །ལོངས་སྤྱོད་རྫོགས་པར་ཡོད་པའི་རྩ། །བཅུ་དྲུག་ཕྱག་ནི་བཅུ་དྲུག་པའོ། །ཨཱ་ལི་ཐིག་ལེ་རྣམ་དག་པའི། །ཐོད་པ་ཡིན་པར་
འདི་རུ་བསྟན། །འཇིགས་བྱེད་རྣམ་པར་འཇིགས་བྱེད་མ། །ལེགས་དགྱེས་དགའ་བ་བཅུ་དྲུག་གོ། །སྐད་ཅིག་བཞི་ཡི་སྦྱོར་བ་ཡིས། །ཞབས་ནི་བཞི་རུ་དྲན་པའོ། །གཡས་བརྐྱང་བ་ནི་མཆོག་གི་དགའ། །གཡོན་བརྐྱང་དགའ་བ་དགའ་བ་ཡིན། །བཞེངས་པ་ལྷན་སྐྱེས་དགའ་བའོ། །
ཕྱག་རྒྱ་ཕ་རོལ་ཕྱིན་པར་དྲན། །དབང་གི་རང་གི་ངོ་བོའོ། །ཐིམ་པ་སྨད་ཀྱི་ཚངས་པའི་རས། །ལོངས་སྤྱོད་ཞི་བའི་པགས་པའི་གོས། །ལེགས་དགྱེས་དབང་ཕྱུག་ཡང་ན་གནས། །བསྐྱེད་པ་ཚངས་པའི་པགས་པར་གྲགས། །བོང་བུའི་ཞལ་ནི་འཇིགས་པའི་སྒྲ། །ཕྱག་རྒྱ་ཤེས་རབ་ཐབས་

ནི་ཆེ། །ཐབས་དང་ཤེས་རབ་གཉིས་མེད་དྲན། །བྱང་ཆུབ་སེམས་ཀྱི་རྣམ་དག་པས། །རུས་པ་སྣ་ཚོགས་རྒྱན་ལ་སོགས། །ནམ་མཁའ་རུ་ནི་འགྲོ་བའི་ཕྱིར། །གྱེན་དུ་འབར་བའི་དབུ་སྐྱེས་སོ། །རང་གི་ངོ་བོ་བདེ་ཆེན་ཕྱིར། །སྐུ་མདོག་ནག་པོ་མཁའ་དང་མཚུངས། །དགའ་བྲལ་གྱི་
ནི་བདུད་ཆེན་པོ། །འཇིགས་པར་བྱེད་ཕྱིར་འཇིགས་པ་ཆེ། །དཔལ་ཡེ་ཤེས་ཐིག་ལེ་ལས་རྣམ་པར་དག་པ་ཞེས་བྱ་བའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་བཅོམ་ལྡན་འདས་མས་མ་མཆུའི་བདུད་རྩིའི་རོ་ཕུལ་ཏེ། །ཉི་མ་དང་ཟླ་བའི་མེ་ཏོག་གིས་མཆོད་ནས། བཅོམ་ལྡན་འདས་རབ་ཏུ་
ཚིམ་པར་མཛད་ནས་འདི་སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་མ་འོངས་པའི་དུས་སུ་ཡང་དག་པར་གསང་བའི་རྒྱུད་འདི་སྐལ་བ་དང་ལྡན་པའི་སེམས་ཅན་རྣམས་ལ་སུས་འཆད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དཔལ་ཕྱག་ན་རྡོ་རྗེ་མགོན་པོས་བཤད་པར་བྱེད་དོ། །བཅོམ་
ལྡན་འདས་མས་གསོལ་པ། ཡེ་ཤེས་བདུད་རྩི་ཆར་བ་ཆེ། །མགོན་པོ་ཁྱོད་ཀྱིས་རྨད་འབྱུང་སྦྱིན། །ཕྱག་ན་རྡོ་རྗེ་མགོན་པོ་ཆེ། །དེ་ཡི་བསྐྱེད་པ་ཇི་ལྟར་ལགས། །རྒྱལ་བའི་མངའ་བདག་ཡེ་ཤེས་རྒྱལ། །དེ་ནི་ཚིག་གཅིག་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་
པ། །གང་ཞིག་ཁྱོད་ཀྱིས་ཡོངས་ཞུས་པ། །བཅོམ་ལྡན་མ་དེ་ཡང་དག་ཉོན། །ཕྱག་ན་རྡོ་རྗེ་མགོན་ཆེན་པོ། །རྡོ་རྗེ་འཛིན་པ་ཀུན་གྱི་བདག །མཐའ་ཡས་པ་ཡི་འཇིག་རྟེན་ཁམས། །སྐྱེ་དང་འཇིག་པའི་རྒྱུ་ཡིན་ནོ། །དེ་ལས་སྐྱེ་བ་གང་ཡང་མེད། །རང་བྱུང་མཆོག་གི་དབང་ཕྱུག་
གོ། །དེ་ཡི་ཕྱག་གི་རྡོ་རྗེ་ནི། །ཡེ་ཤེས་བཅུ་གཉིས་སྐྱེ་བ་མེད། །ཐོག་མ་ཡི་ནི་རྭ་ལྔ་ལས། །དེ་བཞིན་གཤེགས་པ་ལྔ་འབྱུང་ངོ་། །མཐའ་ནས་འབྱུང་བ་ཆེན་པོ་ལྔ། །དབུས་ནས་འགྲོ་བའི་རིས་དྲུག་འབྱུང་། །ལྟ་བ་ཀུན་ནི་བསྐུང་དོན་ཕྱིར། །སྣ་ཚོགས་པ་ཡི་གཟུགས་སུ་
སྤྱོད། །ལ་ལར་རྡོ་རྗེ་འཛིན་པ་དང་། །ལ་ལར་སངས་རྒྱས་ཀྱི་ནི་གཟུགས། །ལ་ལར་ཧེ་རུ་ཀ་ཡི་གཟུགས། །ལ་ལར་དེ་བཞིན་གཤེགས་པ་དང་། །ལ་ལར་བྱང་ཆུབ་སེམས་དཔའི་གཟུགས། །ལ་ལར་ཉན་པ་ལྟ་བུར་བཞུགས། །ལ་ལར་འཆད་དོ་དགྱེས་པདྨ། །ལ་

ལར་ཀློག་པའི་ཚུལ་དུ་བཞུགས། །ལ་ལར་རྒྱུད་དང་བསྟན་བཅོས་ནི། །མཛད་པ་དང་ནི་ལ་ལར་འཛིན། །མང་དུ་བརྗོད་ལྟ་ཅི་ཞིག་དགོས། །དེ་སྟོན་ཕྱག་ན་རྡོ་རྗེ་རྒྱལ། །ལྷ་མོས་གསོལ་པ། དཀྱིལ་འཁོར་དང་ནི་འཁོར་ལ་སོགས། །དེ་ལ་མདོར་བསྡུས་ཇི་
ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཀྱིལ་འཁོར་རྡོ་རྗེ་འཛིན་པ་ཡིས། །མཁའ་འགྲོ་དབང་ཕྱུག་མ་དགྱེས་མཛོད། །གྲུ་བཞི་ལ་སོགས་དང་ལྡན་པ། །དུར་ཁྲོད་ཀྱི་ནི་རྒྱན་གྱིས་བརྒྱན། །ཤིང་བརྒྱད་ཀྱིས་ནི་ཆལ་པར་བཀྲམ། །རྫིང་བརྒྱད་ཀྱིས་ནི་
བརྒྱན་པའོ། །དེ་དབུས་སྣ་ཚོགས་ཆུ་སྐྱེས་ནི། །འདབ་མ་དང་ནི་གེ་སར་བཅས། །དེ་ཡི་དགུས་སུ་ལྷ་ཐོད་པ། །དུམ་བུ་གསུམ་པ་ཀུན་དང་བཞི། །རང་གི་ངོ་བོ་ཆོས་ཀྱི་དབྱིངས། །བདུད་རྩི་ལྔས་ནི་ཤིན་ཏུ་གང་། །ཧཱུྃ་གི་ཡིག་འབྲུ་དེ་དབུས་གནས། །ཡེ་ཤེས་མེ་ཡི་འོད་དང་
མཉམ། །ཟླ་བ་ཉི་མའི་གདན་ལ་བཞུགས། །སྡིག་པ་ཐམས་ཅད་འཇིག་པར་བྱེད། །ཧཱུྃ་ལ་སོགས་པ་ཡོངས་གྱུར་ལས། །སྐད་ཅིག་གཅིག་གིས་རྨད་དུ་བྱུང་། །ལྷ་མོ་བཅུ་གཉིས་དང་ལྡན་པ། །ཕྱག་ན་རྡོ་རྗེ་རྒྱལ་པོ་བཞེངས། །ཞལ་གཅིག་པ་ལ་སྤྱན་གསུམ་པ། །ཆར་སྤྲིན་གྱི་ནི་
མདོག་དང་མཉམ། །ཕྱག་བཞི་པ་ནི་རྟ་ལ་ཆིབས། །ཉི་མའི་འོད་དང་མཉམ་པའི་སྤྱན། །བསྐལ་པ་ཆེན་པོའི་མེ་དང་འདྲ། །ཉི་མ་བྱེ་བའི་འོད་དང་མཉམ། །གདུལ་དཀའ་ཆེན་པོ་འདུལ་བར་མཛད། །སྙིང་རྗེའི་རླན་གྱིས་བརླན་པར་མཛད། །ཕྱག་རྒྱ་ལྔ་འཛིན་དཔའ་བོ་ཆེ། །རལ་བའི་དབུ་
རྒྱན་གྱིས་ནི་བརྒྱན། །རལ་པ་སྣ་ཚོགས་རྒྱན་དང་ལྡན། །སྣ་ཚོགས་རྡོ་རྗེ་ཟླ་ཅོད་པན། །ཕྱག་གཡས་པས་ནི་རྡོ་རྗེ་འཛིན། །སྣ་ཚོགས་ཀྱི་ནི་འོད་ཟེར་འཕྲོ། །གཡོན་ནི་ཐོད་པ་ཁ་ཊྭཱཾ་ག །གཞན་པས་རྡོ་རྗེའི་མདའ་དང་གཞུ། །རྟ་ནི་འདི་རུ་སྔོན་པོའི་གཟུགས། །སྤྱན་གསུམ་
པ་ལ་དྲག་པོའི་འོད། །ཞི་བའི་པགས་པས་སྒ་ཆ་བྱས། །དགོད་པའི་ང་རོ་གཤོག་པ་ཅན། །སྣ་ཚོགས་པདྨའི་འདབ་མ་ལ། །ཤར་དང་ལྷོ་དང་ནུབ་དང་བྱང་དུ་རྡོ་རྗེ་འཇིགས་བྱེད་མ་དང་། རྡོ་རྗེ་དྲག་མོ་དང་། རྡོ་རྗེ་གཏུམ་མོ་དང་། རྡོ་རྗེ་ནག་མོ་སྟེ། གནག་པ་དང་། དམར་བ་

དང་། ལྗང་བ་དང་། དཀར་པོ་སྟེ་ངང་པ་ལ་ཆིབས་པའོ། །ཕྱག་དང་མཚོན་ཆ་ལ་སོགས་པ་ནི་གཙོ་བོ་བཞིན་ནོ། །མཚམས་ཀྱི་འདབ་མ་བཞིར་བདུད་རྩི་སྣ་ཚོགས་པས་གང་བའི་བུམ་པའི་སྟེང་ན་ཐོད་པའོ། །མཚམས་སུ་རྡོ་རྗེ་འདོད་མ་དང་། རྡོ་རྗེ་རྩགས་བུ་མ་དང་། རྡོ་རྗེ་ཕྲེང་བ་མ་དང་།
རྡོ་རྗེ་བརྩོན་མ་རྣམས་ནི་གཟུགས་གཉིས་པའི་སྐུ། ནམ་མཁའ་ལྡིང་ལ་ཆིབས་པ་གཙོ་བོ་ལྟ་བུའོ། །ཤར་སྒོ་ལ་སོགས་པར་རྡོ་རྗེ་ཤ་བ་རི་དང་། རྡོ་རྗེ་རོ་ལངས་མ་དང་། རྡོ་རྗེ་རབ་ཏུ་གཏུམ་མ་དང་། རྡོ་རྗེ་ཌོམ་བི་ནཱི་སྟེ། ནམ་མཁའ་སྔོན་པོ་དང་། ཉི་མའི་འོད་དང་། མེའི་ཁ་དོག་དང་། དུ་བའི་
མདོག་བྱ་རྒོད་ལ་ཆིབས་པ་མཚམས་ཀྱི་བཞིན་ནོ། །དཀྱིལ་འཁོར་གྱི་ཕྱོགས་བཞིའི་སྣམ་བུ་ལ་ཚངས་པ་དང་། བརྒྱ་བྱིན་དང་། དྲག་པོ་དང་། མི་མཆོག་ལ་སོགས་པ་འདྲེའི་རྒྱལ་པོ་རང་རང་གི་མཚོན་ཆ་ཕྱག་ན་བསྣམས་པ་དུ་མ་བྱའོ། །ལྷ་མོས་གསོལ་པ། ཕྱག་ན་རྡོ་རྗེ་གཙོ་བོའི་གསང་
སྔགས་ནི་གང་། སེམས་ཅན་རྣམས་ཀྱིས་ཇི་ལྟར་བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་སྔགས་ནི་ཡི་གེ་དྲུག །ཐམས་ཅད་འདོད་པའི་དོན་གྲུབ་བྱེད། །གདུག་པ་ཐམས་ཅད་འཇིགས་བྱེད་ཅིང་། །ནང་རྣམས་ཀུན་ནི་ཟད་པར་བྱེད། །དངོས་
གྲུབ་ཐམས་ཅད་རབ་ཏུ་སྦྱིན། །ཐམས་ཅད་མཁྱེན་པས་མི་ཐུབ་བོ། །ཨོཾ་བཛྲ་བཱ་ཎི་ཧཱུྃ། རྣལ་འབྱོར་ཁྲོ་བོའི་ལྟ་བས་བཟླས། །སྐད་ཅིག་གཅིག་གིས་ཁམས་གསུམ་གསོད། །ཡང་ན་ཞི་བའི་ལྟ་བས་བཟླས། །མཐའ་ཡས་པ་ཡི་ནད་ཞི་བྱེད། །མཆོད་སྦྱིན་ཡང་དག་ཆེར་
བྱས་ན། །སྔོན་དུ་བསྙེན་པ་བྱེ་བ་བྱ། །ཞི་བ་ལ་སོགས་སྦྱིན་སྲེག་བྱ། །ཇི་ལྟར་སྔར་ནི་བདག་གིས་སྨྲས། །དུར་ཁྲོད་ཡང་ན་ཆུ་ངོགས་སུ། །ཕྱག་ན་རྡོ་རྗེ་བསྒྲུབ་པར་བྱ། །དུང་ཆེན་གྱི་ནི་ཕྲེང་བ་ཡིས། །འགྲུབ་པའི་དོན་ཕྱིར་བྱེ་བ་བཟླས། །ཞི་བ་ཞི་བའི་སེམས་ཀྱིས་
ནི། །དྲག་པོ་དྲག་པོ་སྒྲུབ་པར་དཀའ། །དབང་བསྐུར་མེད་པའི་སེམས་ཅན་ལ། །སྔགས་འདི་སྦྱིན་པར་མི་བྱ་སྟེ། །མཁས་པས་བྲིས་སྐུ་གླེགས་བམ་ནི། །ནམ་ཡང་དེ་ལ་བསྟན་མི་བྱ། །དེ་ལྟ་མིན་ན་འགྲུབ་མི་འགྱུར། །ཀུན་ནས་ཀུན་དུ་རབ་ཏུ་བལྟ། །གསང་བ་

ཡིས་ནི་འགྲུབ་པར་འགྱུར། །ཀུན་ནས་ཀུན་དུ་ཞལ་བཟང་མོ། །པདྨ་འདབ་མ་བརྒྱད་གྱེས་པ། །འདབ་མ་སྣ་ཚོགས་པ་ཡིས་མཛེས། །ཉི་མའི་དཀྱིལ་འཁོར་དབུས་སུ་ནི། །མངའ་བདག་ཕྱག་ན་རྡོ་རྗེ་རྒྱལ། །རྒྱལ་པོའི་བཞུགས་སྟབས་ཀྱིས་ནི་
བཞུགས། །ནམ་མཁའི་མདོག་ལྟར་སྔོ་བ་སྟེ། །ཕྱག་བཞི་པ་ལ་ཞལ་གཅིག་པ། །སྤྱན་གསུམ་པ་ལ་ཞི་བའི་གཟུགས། །གཡས་དང་གཡོན་པའི་ཕྱག་གཉིས་ནི། །རྡོ་རྗེ་ཐོད་པ་ཁ་ཊྭཱཾ་ག། །ཆོས་ཀྱི་དོན་ནི་འཆད་པའི་ཕྱིར། །ཕྱག་གཉིས་ཆོས་ཀྱི་ཕྱག་རྒྱའོ། །
འདབ་མ་བདུན་ལ་སངས་རྒྱས་བདུན། །བརྒྱད་པ་ལ་ན་བྱམས་པའོ། །པ་ཏི་ལ་སོགས་ཤིང་ལ་བརྟེན། །ཐམས་ཅད་ཟླ་བའི་གདན་དུ་དྲན། །གཤིན་རྗེའི་གཤེད་ལ་སོགས་པ་བཞི། །གཞན་མིན་སྒོ་ལ་སོགས་པར་དགོད། །རྡོ་རྗེ་ལྕགས་ཀྱུ་ལ་སོགས་བཞི། །སྒོ་ཡི་
མཚམས་སུ་གནས་པའོ། །སྒོ་ཡི་ཕྱི་རོལ་སྣམ་བུའི་གནས། །ཡང་དག་ལྷ་ཆེན་ལ་སོགས་པའོ། །རྡོ་རྗེ་ཕྲེང་བས་ཀུན་དུ་མཆོག །མཁས་པས་ཡོངས་སུ་བསྐོར་བྱའོ། །དཔལ་ཡེ་ཤེས་ཐིག་ལེ་ལས་དཔལ་ཕྱག་ན་རྡོ་རྗེའི་དཀྱིལ་འཁོར་བསྐྱེད་པའི་སྒོམ་པ་ཞེས་བྱ་
བའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་དེའི་དུས་སུ་འཁོར་ཐམས་ཅད་སྟན་ལས་ལངས་ཏེ། ལན་གསུམ་དུ་བསྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཚིགས་སུ་བཅད་པ་འདི་དག་བརྗོད་དོ། །མགོན་ཁྱོད་བཀའ་དྲིན་
གྱིས་ནི་བདག་ཅག་དག །གཞན་དང་མི་མཉམ་རྒྱལ་བས་རྙེད་དཀའ་བ། །བལྟ་བར་དཀའ་བ་ཤེས་དཀའ་གཟུང་བར་དཀའ། །གསང་བའི་གསང་བ་མཆོག་གི་མཆོག་རབ་ཉིད། །དཔའ་བོ་དབང་ཕྱུག་ཆོས་དབྱིངས་ཕྱག་འཚལ་བསྟོད། །ལོག་ཤེས་མུན་ནག་འཇོམས་ལ་
ཕྱག་འཚལ་ལོ། །དང་པོའི་སངས་རྒྱས་མཆོག་ཆར་གྲགས་ལ་འདུད། །ཡིག་བྲལ་ཐིག་ལེ་སྐྱེ་མེད་ལ་ཕྱག་འཚལ། །ནམ་མཁའི་རང་བཞིན་ཚུལ་གྲགས་ལ་ཕྱག་འཚལ། །གཉིས་སུ་མེད་པའི་ཚུལ་ཙམ་ལ་ཕྱག་འཚལ། །མཆོག་གི་རང་བཞིན་ཕྱག་འཚལ་ཕྱག་

འཚལ་འདུད། །གཞན་མ་ནི་གཞན་མཆོག་རང་བཞིན་ཕྱག་འཚལ་ལོ། །དཔལ་ཡེ་ཤེས་ཐིག་ལེ་ལས་བསྟོད་པའི་རྒྱལ་པོ་ཞེས་བྱ་བའི་ལེའུ་སྟེ་ཉི་ཤུ་རྩ་དགུ་པའོ།། །།ཡང་བཅོམ་ལྡན་འདས་ཀྱིས་འཁོར་ཐམས་ཅད་དང་བཅས་པའི་བཅོམ་ལྡན་འདས་མ་ལ་བོས་ཏེ། ཀྱཻ་
བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྦྱོར་དྲུག་གི་གྲགས་པ་བཅུ་དང་བྲལ་བ་བཅུ་གསུམ་གྱི་བདག་ཉིད། དཔལ་མཆོག་གི་བླ་མའི་ཞལ་སྔ་ནས་པདྨ་བཙལ་ཏེ། བསམ་གཏན་ལ་སོགས་པ་ཡིས་ཡང་དག་པར་མཐོང་བ་ཞེས་གཏན་ལ་ཕབ་པའོ། །དཔལ་ཡེ་ཤེས་
ཐིག་ལེ་ལས་མཆོག་ཏུ་གསང་ཞིང་ཤིན་ཏུ་གསང་བ་ཐམས་ཅད་མཁྱེན་པ་རྣམས་ཀྱིས་ཀྱང་རྙེད་པར་དཀའ་བ། རྣལ་འབྱོར་མའི་རྒྱུད་ཀྱི་རྨད་དུ་བྱུང་བ། མཆོག་ཆེན་པོ་ནང་གི་རྣམ་པར་ཤེས་པ་དྲུག་གི་བསྟོད་པའི་རྒྱལ་པོ་ཞེས་བྱ་བའི་ལེའུ་སྟེ་སུམ་ཅུ་པའོ།། །།དཔལ་ཡེ་ཤེས་ཐིག་
ལེ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་ཤྲཱི་པྲཛྙཱ་གུཔྟས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།སླད་ཀྱིས་དཔལ་ས་སྐྱའི་དབེན་གནས་སུ་ཞུ་ཐིག་གཡར་ཁྲལ་བགྱིས་སོ།། །།
༄༅༅། །རྒྱ་གར་སྐད་དུ། ཤྲཱི་ཏཏྭ་པྲ་དཱི་པཾ་ནཱ་མ་མ་ཧཱ་ཡོ་གི་ནཱི་ཏནྟྲ་རཱ་ཛཱ། བོད་སྐད་དུ། དཔལ་དེ་ཁོ་ན་ཉིད་ཀྱི་སྒྲོན་མ་ཞེས་བྱ་བ་རྣལ་འབྱོར་ཆེན་མོའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དཔའ་བོ་ཆེན་པོ་དང་། དཔའ་མོའི་དབང་ཕྱུག་མས་ཡང་དག་པར་བསྐོར་ནས། ཤེས་རབ་ཀྱི་བྷ་ག་ལ་བཞུགས་སོ། །དེར་བཅོམ་ལྡན་འདས་མ་རྡོ་རྗེ་དབྱིངས་ཀྱི་དབང་ཕྱུག་མས་ལེགས་དགྱེས་
ཆེན་པོའི་རོལ་པ་སྒེག་པས་ཉེ་བར་ལོངས་སྤྱོད་པ་དང་། མ་མཆུའི་བདུད་རྩིའི་བཏུང་བས་བཅོམ་ལྡན་འདས་མ་ཉེས་པར་བྱས་ཏེ། ཁ་སྦྱོར་གྱི་ཐབས་ཀྱི་སྦྱོར་བ་ལས་ལངས་ནས། རི་རབ་ཀྱི་ཉི་རྡུལ་གྱི་གྲངས་ཀྱི་རྣལ་འབྱོར་མ་དང་ལྷན་ཅིག་པས་ལན་གསུམ་དུ་བསྐོར་བ་བྱས་ནས་

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། འདི་སྐད་ཅེས་གསོལ་ཏོ། །བཅོམ་ལྡན་ཡེ་ཤེས་ཟླ་བར་གྲགས། །ལྟེ་བའི་ཀུ་མུད་ཁ་འབྱེད་པ། །གང་ཞིག་བདག་གི་ཞུ་བ་ཀུན། །མངའ་བདག་ཆེན་པོས་བདག་ལ་གསུངས། །དཔལ་
ལྡན་བླ་ན་མེད་པའི་རྒྱུད། །རྣལ་འབྱོར་མ་ཞེས་རབ་གྲགས་པ། །ཨེ་བྃ་མ་ཡཱ་ལ་སོགས་སྒྲའི། །དོན་ནི་ཇི་ལྟ་བུར་ནི་བརྗོད། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ལྷ་མོ་སྤྱན་བཟང་རིང་། །ཁྱོད་ཀྱིས་ང་ལག་པ་ཞུས་པ། །ཨེ་བྃ་མ་ཡཱ་སོགས་སྒྲ་
ཡིས། །ཁམས་གསུམ་འགྲོ་དང་མི་འགྲོ་བཅས། །ཤེས་རབ་ཐབས་ཀྱི་རང་བཞིན་གྱིས། །ཐམས་ཅད་རྒྱས་བཏབ་གཞན་གྱིས་མིན། །དེ་ཁོ་ན་ཉིད་སྒྲོན་མར་གྲགས། །དྲི་མེད་རྫོགས་པའི་འབྲས་བུའི་གཟུགས། །ཨེ་བྃ་མ་ཡཱ་དེ་ཉིད་གསུམ། །ཐོག་མར་བདག་
བཅས་པ་དང་ནི། །རང་བཞིན་བཞི་ཡི་བྱེ་བྲག་ཏུ། །དོན་དམ་པར་ནི་ཤེས་པར་བྱ། །ཐོས་པའི་དོན་ནི་ཟླ་བ་བདེ། །དེ་ནི་ནམ་མཁའ་བཞིན་དུ་མཆོག །གཅིག་ཅེས་བྱ་བ་གཞན་མཆོག་རབ། །སྲིད་དང་མྱ་ངན་འདས་པ་སྤངས། །དུས་ནི་ཕྱག་རྒྱ་ཆེན་པོ་སྟེ། །བསྐྱེད་
པ་དང་ནི་རྫོགས་དང་བྲལ། །བཅོམ་ལྡན་འདས་ནི་མཐའ་ཞེས་བྱ། །རང་དགའ་ཉམས་སུ་མྱོང་བའི་དངོས། །ཐམས་ཅད་ཡེ་ཤེས་གསུམ་སྟོང་ཉིད། །དེ་ཉིད་དེ་ཉིད་ཀྱིས་ནི་སྤངས། །དེ་བཞིན་གཤེགས་པ་རྣམ་འབྱེད་གྲགས། །དང་པོའི་གནས་ནི་རབ་གྲུབ་བྱེད། །
སྐུ་ནི་དགའ་བའི་གཟུགས་སུ་གྲགས། །དབང་པོ་གཉིས་བྱུང་དང་བྲལ་བ། །གསུང་ནི་མངོན་པར་དགའ་ཞེས་བྱ། །དམ་ཚིག་ལས་བྱུང་གིས་ནི་སྤངས། །ཐུགས་ནི་དགའ་བྲལ་དགའ་ཞེས་བྱ། །ཡེ་ཤེས་ལས་བྱུང་བདེ་དང་བྲལ། །རྡོ་རྗེ་ལྷན་སྐྱེས་ཞེས་སུ་བསྟན། །རང་
བཞིན་གྱིས་ནི་སྤངས་པའོ། །ལྷ་མོ་དཔལ་ཆེན་ཉི་མ་སྐྱེས། །ཞུ་བ་དགའ་བྲལ་དང་བྲལ་ལོ། །དཔའ་མོའི་དབང་ཕྱུག་མ་བདེ་རྟེན། །དང་པོའི་བདུད་རྩི་ལས་སྐྱེས་སོ། །ཡན་ལག་ཀུན་གྱིས་ཡང་དག་བསྐོར། །ཁྱབ་པ་སྲོག་གི་པདྨ་བཞིན། །ཤེས་རབ་ཚངས་པའི་སྒོ་ལྔའི་ཁྱིམ། །

ཚངས་པའི་ཡེ་ཤེས་འཛིན་ཕྱིར་རོ། །བྷ་ག་དངོས་པོ་འཇིག་པ་ཡིས། །ཡང་ན་ལོངས་སྤྱོད་མྱོང་བས་སོ། །བཞུགས་པ་རང་གི་ངོ་བོ་ལ། །གནས་པ་ཡང་ན་གཤེགས་པའོ། །དེ་ལྟ་བུ་ནི་དོན་དམ་པར། །འདི་སྐད་བདག་ལ་སོགས་པར་བཤད། །ཐམས་ཅད་རྣལ་
འབྱོར་རྒྱུད་དུ་སྦས། །དེ་བཞིན་རྣལ་འབྱོར་བླ་མར་ཡང་། །ངེས་དང་དྲང་དོན་བྱེ་བྲག་ཏུ། །ཨེ་བྃ་མ་ཡཱ་ལ་སོགས་གནས། །རྒྱུད་ཤེས་པ་ཡི་དོན་ཕྱིར་ཏེ། །གཉིས་སུ་དབྱེ་བའི་རྒྱུད་རབ་བསྟན། །འབྲས་བུ་ཡེ་ཤེས་ཆེན་པོའི་རོ། །རང་གིས་ཉམས་མྱོང་ངོ་བོ་ཉིད། །རང་
རིག་དག་གིས་མི་རྙེད་པས། །རྟོག་པ་ཐམས་ཅད་རྣམ་པར་སྤངས། །ལྷ་མོས་གསོལ་བ། བཅོམ་ལྡན་ཡེ་ཤེས་རྒྱལ་པོ་ཉིད། །ལོག་པའི་ཡེ་ཤེས་མུན་འཇོམས་པ། །དེ་ཉིད་ཉི་ཤུ་གཉིས་བདག་ཉིད། །གང་ཞིག་ཡེ་ཤེས་ཐིག་ལེར་གསུངས། །དེ་ལ་ཡང་ནི་ངེས་པའི་
དོན། །མཆོག་གི་དབང་ཕྱུག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་དེ་ཉིད་ངེས་དོན་དུ། །ཞལ་བཟང་དེ་ནི་གསང་བའོ། །ཁྱོད་ཀྱི་ངོར་བྱས་བདག་གིས་བཤད། །དེ་ལྟ་མིན་ན་སྦས་པའོ། །ཨེ་བྃ་རྣམ་པའི་དབུས་སུ་ནི་གང་ཞིག་དྲུག་
ཅུ་རྩ་བཞིའི་འདབ་མའི་དབྱིབས་ཀྱི་རྩའི་འཁོར་ལོ་དེ་ནི་རྣམ་པ་དང་བཅས་པའི་རྣམ་པར་ཤེས་པའོ། །དེའི་ནང་དུ་གང་དུ་རྩ་སུམ་ཅུ་རྩ་གཉིས་ཀྱི་བདག་ཉིད་ཨུཏྤ་ལའི་རྣམ་པའི་འཁོར་ལོ་དེ་ནི་མཐའ་སྟེ། དེ་ལ་གང་ཞིག་ཟུར་བརྒྱད་པའི་རྣམ་པའི་ལྟེ་བ་དེ་ནི་སྣང་བའོ། །གང་ཞིག་ལྟེ་བའི་
དབུས་ཡངས་པ་དེ་ནི་ནམ་མཁའོ། །དེར་ནི་ལྔ་གཉིས་ནས་བཟུང་སྟེ། བཅོ་ལྔའི་བར་གྱི་སའམ། དབང་ཕྱུག་གི་མངའ་བདག་བཞུགས་སོ། །དེར་གང་ཞིག་དེ་ཁོ་ན་ཉིད་གསུམ་གྱི་བདག་ཉིད་དེ་ནི་ལན་གསུམ་འབབ་པའི་ཕུང་པའི་རྣམ་པར་ཤེས་པ་སེམས་དང་སེམས་ལས་བྱུང་
བ་དང་མ་རིག་པའི་གཟུགས་ཀྱིས་གསུམ་དུ་དབྱེ་བ་ཟུར་དང་པོ་ལ་ཐུན་ཚོད་གཅིག་གི་བར་དུ་འབར་བའོ། །གང་ཞིག་སྲོག་གི་དབྱིག་པ་དེ་ནི་ལུ་གུ་རྒྱུད་ཀྱི་རྣམ་པའི་མདུད་པ་སུམ་ཅུ་རྩ་གཉིས་སུ་སློ་མ་བ་དང་ཕྲ་བའི་ཐིག་ལེ་རོ་གཅིག་པའི་གཟུགས་ཀྱིས་དབྱིག་པའི་བདུད་རྩི་ཟུར་གཉིས་པ་ལ་

ཐུན་ཚོད་གཉིས་ཀྱི་བར་དུ་ཞུ་བའོ། །དྲུག་པོ་དེ་ནི་བསྐྱེད་པ་དང་རྫོགས་པའི་གྲགས་པ་དགའ་བ་དྲུག་ཟུར་གསུམ་པ་ལ་ཐུན་ཚོད་གསུམ་གྱི་བར་དུ་འཛག་པའོ། །གང་ཞིག་ཐིག་ལེ་ཤར་བ་དང་ནུབ་པ་དེ་ནི་ཐིམ་པ་དང་ལོངས་སྤྱོད་དུ་གྲགས་པའི་སྲོག་དེ་ནི་ཟུར་བཞི་པ་ལ་ཐུན་
ཚོད་བཞིའི་བར་དུ་འབར་བའོ། །གང་ཞིག་འཕོ་བའི་སྦྱོར་བ་དེ་ནི་སྟེང་དང་འོག་གི་འདབ་མ་ཡོད་པར་བྱང་ཆུབ་ཀྱི་སེམས་འདུས་པའི་དབང་ནི་ཟུར་ལྔ་པ་ལ་ཐུན་ཚོད་ལྔའི་བར་དུ་ཞུ་བའོ། །གང་ཞིག་རྩའི་འཁོར་ལོ་འབྱུང་བ་དེ་ནི་ཡན་ལག་ཐམས་ཅད་ལ་བདུད་རྩི་རྒྱས་པ་ཟུར་དྲུག་པ་
ལ་ཐུན་ཚོད་དྲུག་གི་བར་དུ་འཛག་པའོ། །གང་ཞིག་དབང་གི་རིམ་པ་དེ་ནི་གཅིག་ཉིད་སྲོག་གི་ཁ་རུ་སྲོག་ལ་འབབ་པ་དང་། འཕུར་བ་དང་ཁྱབ་པ་དེ་ཡང་ཟུར་བདུན་པ་ལ་ཐུན་ཚོད་བདུན་པའི་བར་དུ་འབར་བའོ། །གང་ཞིག་སྲུང་བའི་འཁོར་ལོ་དེ་ནི་མཐེའུ་ཆུང་གི་མདུད་
པའི་ནང་དུ་བདུད་རྩི་ལ་བསྐོར་བ་ཟུར་བརྒྱད་པ་ལ་ཐུན་ཚོད་བརྒྱད་ཀྱི་བར་དུ་ཞུ་བའོ། །དེ་དག་ནི་གཡོན་དུ་བསྐོར་བའི་སྲོག་གི་རླུང་ལ་ཞོན་པ་ཉི་མ་སྐྱེ་བ་ལ་མཚན་མོ་དང་ཉིན་མོའི་བར་དུ་སུམ་ཅུ་རྩ་གཉིས་ཀྱི་ཚ་རྒྱས་པར་འགྱུར་རོ། །སུམ་ཅུ་རྩ་གཉིས་ཀྱི་ནང་ན་བཅུ་དྲུག་བྲལ་བའི་
མཚན་ཉིད་མི་གསལ་བ་དང་། དགའ་བའི་མཚན་ཉིད་བཅུ་དྲུག་གསལ་བ་དེའི་དོན་གྱི་ཕྱིར་དགའ་བྲལ་གྱི་དགའ་བའི་མཚན་ཉིད་ཨཱ་ལིའི་རང་གི་ངོ་བོ་ཟླ་བའོ། །ཕྱི་དང་ཕྱིའི་དོན་རྣམས་ཀྱིས་ནི་ནང་དང་ནང་གི་དོན་གནས་པར་ཤེས་པར་བྱའོ། །དེ་ཡང་ཕྱིའི་ཚེས་ཀྱི་གྲངས་ཀྱིས་
སོ། །ནང་སྲོག་གི་རླུང་གི་གྲངས་ཀྱིས་སོ། །ལྷ་མོས་གསོལ་པ། སུམ་ཅུ་རྩ་གཉིས་ཀྱི་ཆུ་སྐྱེས་ཀྱི་ཨུཏྤ་ལའི་རྣམ་པ་ལ་བདེ་བ་ཆེན་པོའི་ཀུན་དུ་སྤྱོད་པ་ངེས་པའི་དོན་གྱིས་གནས་པ་དེ་མཆོག་གི་དབང་ཕྱུག་གི་བཀའ་དྲིན་བསྐྱབ་ཏུ་གསོལ། །བཅོམ་ལྡན་འདས་ཀྱིས་
བཀའ་སྩལ་པ། །ཉོན་ཅིག་ལྷ་མོ་སྐལ་ལྡན་མོ། །གསང་བ་ཆེན་པོ་ཡེ་ཤེས་མཆོག །གང་ཞིག་ཤེས་པ་ཙམ་གྱིས་ནི། །ཐམས་ཅད་ས་ཡི་དབང་ཕྱུག་འགྱུར། །གང་ཞིག་སྙིང་པོའི་སྔགས་ནི་ཉིད། །དེ་ནི་བདག་ཉིད་བཅུ་དྲུག་བདེ། །ཀུན་རྫོབ་རི་བོང་ཅན་གྱི་

འོད། །དོན་དམ་པར་ནི་ནམ་མཁའ་བཞིན། །གང་ཞིག་སྐུ་བརྒྱད་མཆོག་སྦྱིན་ནི། །དེ་ནི་མཚན་མོ་བརྒྱད་མཆོག་གོ། །ལྷ་མོ་ཡང་ན་ཡེ་ཤེས་བརྒྱད། །མཚན་མོ་ཉིན་མོ་གཉིས་ལས་འབྱུང་། །གང་ཞིག་ཐིམ་དང་ལོངས་སྤྱོད་དབང་། །དེ་ནི་ངེས་པར་བསྐྱེད་རིམ་མོ། །
ལྷ་མོ་བསྐྱེད་རིམ་གསལ་བ་སྟེ། །རིམ་ལས་བྱུང་བའི་བདེ་བ་ཆེ། །སྐལ་ལྡན་མོ་གང་ཡེ་ཤེས་སྐུ། །དེ་ནི་རིམ་སོགས་ཡན་ལག་སྤངས། །ཡན་ལག་བཞིར་དབྱེ་དྲུག་དབྱེ་འམ། །བསྐྱེད་དང་རྫོགས་པའི་རིམ་པའོ། །ལྷ་མོ་གང་ཞིག་གསང་བའི་སྒྲ། །དེ་ནི་ཡེ་ཤེས་གསུམ་
དང་བྲལ། །ཡང་ན་གཞན་མིན་བདག་ཉིད་གསུམ། །མཚམས་ཀྱི་ཡེ་ཤེས་ཡོད་པའི་ཕྱིར། །ལྷ་མོ་གང་ཞིག་དམ་ཚིག་ནི། །སྲུང་བ་ལ་སོགས་ངེས་པར་རོ། །དེ་ནི་བདེ་བ་དབུས་གནས་སུ། །གཟུང་བྱ་ཡང་ན་གང་ནང་དུ། །གང་ཞིག་སྦྱིན་སྲེག་དོན་དམ་པར། །
དེ་ནི་ཧ་ཞེས་གློ་བུར་ཏེ། །ཆར་ཡང་དབུས་ཡོད་ཐིག་ལེ་ནི། །གང་དུ་སྐད་ཅིག་གིས་ཐིམ་མོ། །གང་ཞིག་སྲུབ་དང་བསྲུབས་ཐབས་ནི། །དེ་ནི་ཐོག་མའི་དགའ་བ་སྤངས། །ལྷ་མོ་དེ་བཞིན་ཐ་མའང་མིན། །ཐོག་མ་ཐ་མ་གཉིས་དང་བྲལ། །སྐལ་ལྡན་མོ་གང་སྔགས་
ཀྱི་བཟླས། །དེ་ནི་སྲིད་པ་འདས་པའི་ཡིད། །མྱ་ངན་འདས་པའི་གནས་ཀྱང་མིན། །གཉིས་ཀྱི་ངོ་བོ་གཉིས་དང་བྲལ། །གང་ཞིག་གནས་ནི་བརྒྱད་དུ་བསྟན། །དེ་ནི་ཉི་སྐྱེས་མ་རྒྱས་པ། །གནས་ཀྱི་དབང་གིས་ཤར་བ་ལ། །ཉེ་བས་མྱུར་དུ་རྒྱས་པའོ། །གང་
ཞིག་དགའ་བ་ལ་སོགས་རིམ། །དེ་ནི་རིམ་པ་གཉིས་སུ་དབྱེ། །རྣམ་བཅས་ལས་ནི་དང་པོ་པ། །རྣམ་བྲལ་བཅུ་ཡི་དབང་ཕྱུག་གོ། །གང་ཞིག་དུར་ཁྲོད་རྣམ་རྟོག་བྲལ། །དབུགས་དབྱུང་ལ་སོགས་རྣམ་པར་སྤངས། །བྱང་ཆུབ་ཀྱི་ནི་སེམས་རོལ། །རྣམ་པར་ཞུ་བ་
དམ་ཚིག་ཕྱིར། །ལྷ་མོ་གང་ཞིག་ཆུ་ཡི་ངོགས། །དེ་ནི་རྟོག་མེད་མ་ཡི་མཐར། །ཡང་ན་དེ་རུ་སྲོག་གི་རྩ། །བདེ་བའི་ཆུ་བོ་འབབ་པའི་ཕྱིར། །གང་ཞིག་སྣང་བ་སོགས་ཡེ་ཤེས། །དེ་ནི་དགའ་བ་དང་ལྡན་ཡིད། །ས་དང་ཆུ་དང་འོད་ཀྱི་གཟུགས། །དེ་བཞིན་རླུང་གི་ངོ་

བོ་དང་། །གང་ཞིག་དངོས་པོ་རྟེན་ལ་སོགས། །དེ་ནི་བདེ་བའི་དང་པོར་རིག །རང་གི་རྣམ་པའི་བྱེ་བྲག་གམ། །རྣམ་པར་དཔྱོད་པས་ངེས་པར་དཔྱོད། །ལྷ་མོ་གང་ཞིག་དུར་ཁྲོད་བརྒྱད། །དེ་ནི་བདེ་བ་ལ་ཐིམ་ཞེས། །རྣམ་པར་རྟོག་པ་འཛིན་པའི་
སྐུ། །དེ་ལ་ཐིམ་ཞིང་ཐིམ་པའོ། །གང་ཞིག་ཤིང་ལ་སོགས་པའི་དོན། །དེ་ནི་དང་པོའི་བདུད་རྩི་རྒྱུ། །རྩ་དེ་བརྟེན་པའི་གཟུགས་སུ་གྲགས། །ཐམས་ཅད་རྣམ་པའི་བདེ་སྦྱིན་མ། །གང་རླུང་དེ་ཉིད་སྙིང་པོའི་དོན། །དེ་ནི་རིན་ཆེན་གདུ་བུའི་བདེ། །འཛུམ་པ་ཡིས་ནི་
ཡང་དག་པར། །པདྨའི་ཞལ་དེ་མྱོང་བའོ། །ལྷ་མོ་གང་ཞིག་མཛུབ་ལ་སོགས། །དེ་ནི་གྱེན་དུ་གཟུང་བའི་རླུང་། །ཡང་ན་རྩ་ཡི་ཀུན་སྤྱོད་ལས། །འགྲོ་བའི་བདུད་རྩི་འཛིན་པའོ། །གང་ཞིག་ཉེར་འགྲོའི་བསམ་གཏན་སྦྱོར། །དེ་ནི་ཟླ་བ་གྱེན་དུ་བྱེད། །ཡང་ན་ཚངས་བཞི་
རྣམ་དབྱེ་བྱས། །རྣམ་པར་ཤེས་པ་ལས་གཤེགས་གསོལ། །གང་ཉིད་ཡེ་ཤེས་ཐིག་ལེ་ནི། །དེ་ནི་དྲུག་ཕྱེད་གསུམ་དང་བྲལ། །བཅུ་དང་ལྔ་ཡི་ས་རྣམས་ནི། །དབང་ཕྱུག་འཕོ་མེད་སྐྱེ་མེད་དོ། །གང་ཞིག་བདག་གི་རང་ངོ་མཆོག །དེ་ནི་ངེས་པར་བཞི་པའི་འབྲས། །
ཡང་ན་ཏོར་ཡ་ཉམས་སུ་མྱོང་། །འབྲས་བུའི་སྒྲས་ནི་བརྗོད་པའོ། །གང་ཞིག་ས་ཡི་དབང་བྱེད་པ། །དེ་ནི་དེ་ཉིད་དྲུག་རང་བཞིན། །དེ་ཉིད་དྲུག་ལས་དེ་ཉིད་གསུམ། །དེ་ཉིད་གསུམ་ལས་རང་བཞིན་གཅིག །གང་ཞིག་དེ་བཞིན་གཤེགས་པའི་སྐུ། །དེ་ནི་མྱ་ངན་
འདས་མཚན་ཉིད། །ཡང་ན་དགའ་བ་དང་ནི་བྲལ། །དགའ་བྲལ་དགའ་མིན་རང་ངོ་བོ། །ལྷ་མོ་གང་ཞིག་རྒྱུད་བསྟན་པ། །དེ་ནི་བདེ་བ་ཤིན་ཏུ་འཕེལ། །བདེ་དང་བྲལ་བའི་བདེ་བ་ནི། །ཡང་ན་དེ་ཉིད་རྙེད་པའོ། །གང་ཞིག་ཕྱག་རྒྱ་ཆེ་རང་བཞིན། །དེ་ནི་ཐིམ་
སོགས་ཡིད་ལས་འདས། །རང་གིས་ཉམས་མྱོང་རང་ངོ་བོ། །བསམ་གཏན་འཛིན་པ་སྤངས་པའོ། །གང་ཞིག་གསང་བ་དོན་དམ་པར། །དེ་ནི་དགའ་བ་དགའ་དང་བྲལ། །ཡང་ན་ནང་གི་རེག་བྱ་སྟེ། །རེག་བྱ་དང་བྲལ་རྟོག་པ་མེད། །གང་ཞིག་བསྐུལ་

བའི་མཆོད་པའི་དོན། །དེ་ནི་དྲི་མེད་བདེ་བ་འབྱུང་། །འདས་པ་ལས་ནི་ཡང་སྐྱེ་བ། །སྐྱེ་བ་དེ་ལ་འཕེལ་བའོ། །ལྷ་མོ་ཤེས་རབ་ཡེ་ཤེས་གང་། །དེ་ནི་ཁ་ལ་སྙིང་གར་བདེ། །ཁ་ནི་རྟག་ཏུ་ཤེས་རབ་ཡིན། །སྙིང་ག་ཡེ་ཤེས་བརྗོད་པའོ། །གང་ཞིག་
གསང་བའི་དཀྱིལ་འཁོར་འཁོར། །དེ་ནི་ཁུ་བ་འཕོ་མེད་དགེ། །ཡང་ན་བདེ་ཆེན་རང་ངོ་བོ། །བདེ་བའི་རྣམ་པར་རྟོག་དང་བྲལ། །ལྷ་མོ་ཚིགས་རྒྱས་གང་ཞིག་ནི། །བྱ་གདོང་མ་དེ་ཁོང་དུ་ཆུད། །ཡང་ན་ཚིགས་ནི་ཞུ་མེད་ཁུ། །དགའ་མོ་རྒྱས་པ་མཆོག་ཡིན་
ནོ། །འབྱུང་བ་བསྲུང་དོན་གཏོར་མ་གང་། །དེ་ནི་སྲོག་ཆགས་བསད་པའོ། །བཅད་པ་དེ་ནི་མཆོག་གི་གནས། །འགྲོ་བ་འགོག་པར་བྱེད་པའོ། །དེ་དག་ནི་མཆོག་གི་གསང་བ་ཆེན་པོའི་གསང་ཆེན་བཅོམ་ལྡན་འདས་མ་བཞི་བཅུའི་བདག་ཉིད་ཀྱི་དེ་ཁོ་ན་ཉིད་བདེ་བ་
ཆེན་པོའི་རྒྱལ་པོའི་བདུད་རྩིའི་གཏེར་ལ་ངེས་པའི་དོན་ཏོ།། །།ལྷ་མོས་གསོལ་བ། བཞི་བཅུའི་བདག་ཉིད་དེ་ཉིད་ནི། །ཤིན་ཏུ་རེག་མེད་གཟུང་བར་དཀའ། །ས་ཡི་དབང་ཕྱུག་དུ་ཙམ་ཞིག །མཆོག་གི་དབང་ཕྱུག་གིས་མཁྱེན་ལགས། །བཅོམ་ལྡན་འདས་ཀྱིས་བཀའ་སྩལ་
པ། །སྣ་ཚོགས་རྙེད་པ་སུམ་ཅུ་དྲུག །བཅུ་གཅིག་ས་ཡི་བདག་པོའོ། །དགའ་བ་རྙེད་པ་སུམ་ཅུ་བདུན། །བཅུ་གཉིས་ས་ཡི་བདག་པོར་བརྗོད། །མཆོག་དགའ་རྙེད་པ་སུམ་ཅུ་བརྒྱད། །དེ་ནི་བཅུ་གསུམ་པ་ཡིས། །སུམ་ཅུ་དགུ་ལྷག་མཐར་ཐུག་པ། །ས་
ནི་བཅུ་བཞི་རྙེད་པའོ། །བཞི་བཅུ་དེ་ནི་ལྷན་སྐྱེས་སོ། །བཅྭ་ལྔ་རྙེད་པའི་མངའ་བདག་གོ། །གང་ཞིག་བཅུ་དྲུག་པ་ཡིས། །བརྗོད་དུ་མེད་པ་ནམ་མཁའ་བཞིན། །དེ་ལ་དབང་ཕྱུག་མཆོག་གི་མཁའ། །ཐམས་ཅད་མཁྱེན་པ་རྙེད་དཀའ་བ། །ཟག་མེད་འཕོ་མེད་ཞི་
བ་སྟེ། །སྐྱེ་མེད་རྨད་བྱུང་བས་རྨད་བྱུང་། །ལྷ་མོས་གསོལ་པ། ཀྱཻ་བཅོམ་ལྡན་འདས་སུམ་ཅུ་རྩ་གཉིས་ཀྱི་བདག་ཉིད་བདེ་བ་ཆེན་པོའི་བདུད་རྩིའི་རྒྱལ་པོའི་བདུད་རྩིའི་གཏེར་དེ་ཁོ་ན་ཉིད་དེ་ལ་ཀུན་དུ་སྤྱོད་པའི་དུས་ནི་གང་ལགས། འདུས་པ་ནི་ཅི་ཞིག་ལགས། ཉམས་

སུ་མྱོང་བ་དེ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སུམ་ཅུ་རྩ་གཉིས་ཀྱི་བདག་ཉིད་ལ་སུམ་ཅུ་རྩ་གཉིས་ཀྱི་ཆུ་ཚོད་ཀྱི་བར་དུ་སྲོག་དང་རྩོལ་པའི་རླུང་གཉིས་ཤར་བ་ནི་ཀུན་དུ་སྤྱོད་པའོ། །རྩོལ་པའི་རླུང་འབྱུང་བའི་དུས་སུ་གང་ཞིག་ཡན་ལག་ཐམས་ཅད་ལ་
ཁྱབ་པའི་སྲོག་དེ་ནི་གཡོན་སྐོར་དུ་འབྱུང་བ་ཡིས་ཨུཏྤ་ལའི་རྣམ་པ་འཛུམས་ཤིང་ནང་གི་ལྟེ་བའི་སྙིང་པོ་རྩ་བའི་སྡོང་བུས་འཇུག་པའོ། །འཇུག་པ་ཙམ་གྱིས་ཟུར་བརྒྱད་པའི་ནང་ན་ཡོད་པའི་བདེ་བ་ཆེན་པོའི་སྲོག་གི་རྒྱལ་པོ་ལ་གང་ཞིག་རོ་གཅིག་པའི་མཚན་ཉིད་དེ་ནི་འདུས་པའོ། །དེའི་
དུས་སུ་གང་ཞིག་བདག་དང་གཞན་གྱིས་བྱེ་བྲག་མེད་པ་གཉིས་སུ་མེད་པའི་སྒྲོས་པ་དང་བྲལ་བའི་ཡེ་ཤེས་ཀྱིས་ཐམས་ཅད་གཟིགས་པ་དེ་ནི་ཉམས་སུ་མྱོང་བའོ། །ལྷ་མོས་གསོལ་པ། གང་ཞིག་ཉམས་མྱོང་ལས་རྙེད་དེ། །མངའ་བདག་དེ་ནི་ཇི་ལྟར་ལགས། །ཉམས་སུ་
མྱོང་བས་གང་རྙེད་པ། །དེ་ཉིད་མདོར་བསྡུས་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །དྲིས་པ་དེ་ནི་རྨད་བྱུང་མཆོག །ཉོན་ཅིག་ལྷ་མོ་སྤྱན་བཟང་རིང་། །ཉམས་སུ་མྱོང་བས་གང་རྙེད་པ། །དགའ་བའི་དབང་མོ་དེ་བརྗོད་མེད། །བླ་མའི་
ཞལ་ནས་ཉམས་སུ་མྱོང་། །དབང་བསྐུར་ལས་ནི་རྙེད་པའོ། །ལྷ་མོས་གསོལ་བ། དབང་བསྐུར་བ་ནི་དུ་མ་ཞིག །རྒྱུད་རྒྱུད་ནང་བུར་བ་ཏུ་གསལ། །འདི་རུ་བྱེ་བྲག་ཅི་འདྲ་བ། །སུ་ལ་སྦྱིན་པར་བགྱི་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །
དགའ་བའི་འབྲས་བུ་བྱེ་བྲག་ཏུ། །དབང་ནི་རེ་ཞིག་བཞི་རུ་དབྱེ། །དང་པོ་དགའ་བ་དང་ལྡན་པ། །ལས་དང་པོ་ལ་སྦྱིན་པར་བྱ། །གཉིས་པ་མཆོག་དགའ་དང་ལྡན་པ། །སྣང་བ་གསུམ་ནི་ཐོབ་པ་ལ། །དགའ་བ་གསུམ་པ་དང་ལྡན་པ། །ཆོས་ཀྱི་སྤྲིན་རྙེད་ངེས་
བས་སོ། །ཀུན་དུ་བོད་ས་ཞེས་བྱ་བ། །རྙེད་པ་བཞི་ལ་སྦྱིན་པར་བྱ། །ལྷ་མོས་གསོལ་བ། ཀྱཻ་བཅོམ་ལྡན་འདས་སྣང་བ་ལ་སོགས་པ་དང་ཆོས་ཀྱི་སྦྱིན་དང་ཀུན་དུ་འོད་རྙེད་པ་ལ་དེ་ལྟ་བུའི་དབང་གི་རིམ་པ་ལགས་ན། ས་ལ་སོགས་པ་མ་རྙེད་པ་ལ་ཇི་ལྟར་ལགས། བཅོམ་ལྡན་འདས་

ཀྱིས་བཀའ་སྩལ་པ། །ས་ལ་སོགས་པ་མ་རྙེད་པ་རྣམས་ལ་ཐོག་མར་རང་གི་ངོ་བོས་སོ། །ས་ལ་སོགས་པ་རྙེད་པ་རྣམས་ལ་མཐར་ཐུག་པའི་རང་གི་ངོ་བོས་སོ། །གང་གི་ཕྱིར་ཞེ་ན། དེ་རྣམས་ལ་བརྩོན་འགྲུས་ཀྱི་སྟོབས་ཀྱིས་ཤིན་ཏུ་བསོད་ནམས་ཀྱི་བྱིན་གྱིས་བརླབས་ཀྱིས་བྱ་བ་ལ་སོགས་
པ་དང་བྲལ་བའི་ཡེ་ཤེས་ཆེན་པོ་མཐོང་བ་ཙམ་གྱིས་ཐོབ་བོ། །ཇི་ལྟར་པདྨ་ཡོངས་སུ་སྨིན་པ་ཉི་མའི་འོད་ཀྱིས་རེག་པ་ཙམ་གྱིས་རྒྱས་སོ། །མ་སྨིན་པ་དེ་བཞིན་དུ་མ་ཡིན་ནོ། །ལྷ་མོས་གསོལ་པ། མ་སྨིན་པ་རྣམས་ལ་ཡོངས་སུ་སྨིན་པའི་དུས་གང་ལགས། །བཅོམ་ལྡན་འདས་ཀྱིས་
བཀའ་སྩལ་པ། །སྦྱིན་སོགས་བསོད་ནམས་བསགས་པ་ཡིས། །མཆོག་གི་བླ་མས་གཏན་ལ་ཕབ། །སྐལ་ལྡན་མོ་དེ་སྨིན་པའི་དུས། །དེ་ལས་བླ་མེད་བྱང་ཆུབ་ནི། །བླ་མེད་གནས་ནི་ཐོབ་པ་གང་། །ཕྱི་ནས་ཅི་ཡང་བསླབ་མི་དགོས། །བླ་མེད་ཡེ་ཤེས་ཆེན་པོའི་གནས། །
འབད་མིན་དེ་ནི་མཐོང་བའོ། །ཇི་ལྟར་ཉི་མ་ཤར་ཙམ་གྱིས། །སྣ་ཚོགས་གཟུགས་ནི་མཐོང་བར་འགྱུར། །དེ་བཞིན་བླ་མེད་འོད་ཀྱིས་ནི། །ཡེ་ཤེས་ཆེན་པོ་མཐོང་བར་འགྱུར། །ཡེ་ཤེས་ཆེན་པོ་སྐུ་དང་བྲལ། །གཉིས་སུ་མེད་པ་ནམ་མཁའ་བཞིན། །ལུས་དང་
ངག་དང་ཡིད་གཟུགས་མིན། །སྒྲ་ལ་སོགས་པ་རྣམ་པར་སྤངས། །དཔེ་མེད་ནམ་མཁའ་དང་བྲལ་བ། །སྲིད་དང་མྱ་ངན་འདས་པ་སྤངས། །སྦོམ་དང་ཕྲ་ལ་སོགས་ལས་འདས། །ཆར་ཡང་ཐིག་ལེ་དང་བྲལ་བ། །ཚུལ་དང་ཚུལ་ཙམ་མ་ཡིན་ཏེ། །མཆོག་དང་གཞན་
མཆོག་གནས་ལས་གྲོལ། །སྐྱེ་བ་མེད་དང་འཆི་མེད་པ། །རྨད་བྱུང་ཆེན་པོའི་འདུ་ཤེས་སོ། །ལྷ་མོས་གསོལ་པ། ཀྱཻ་བཅོམ་ལྡན་འདས་ཡེ་ཤེས་ཆེན་པོའི་དབང་ཕྱུག་བླ་ན་མེད་པའི་ཡང་དག་པའི་བྱང་ཆུབ་རྙེད་པ་ལ་ཡེ་ཤེས་ཆེན་པོ་བརྗོད་དུ་མེད་པའི་གནས་གཞན་རྙེད་པ་ཡོད་དམ་
ཅི། བཅོམ་ལྡན་འདས་ཀྱིས་བཀའ་སྩལ་པ། གྲངས་མེད་པའི་སངས་རྒྱས་རྣམས་ཀྱི་ཡུམ་ཁྱོད་ཅི་ལ་དེ་ལྟ་བུར་འདྲི། བརྗོད་དུ་མེད་པའི་ཡེ་ཤེས་ཆེན་པོ་ཁྱོད་ཀྱིས་ཅིའི་ཕྱིར་མི་ཤེས། དེ་ལྟར་ཡིན་ན་བདག་གི་རང་གི་ངོ་བོ་ཡང་དག་པར་ཁྱོད་ཀྱིས་མི་ཤེས་སོ། །ལྷ་མོས་གསོལ་པ། ཁྱོད་

ཀྱི་ངོ་བོ་བདག་གིས་ཤེས། །འོན་ཀྱང་བདག་གིས་གཞན་ཞིག་ཞུས། །སེམས་ཅན་བྱང་ཆུབ་ལས་གཞན་ཅི། །མཆོག་གི་དབང་ཕྱུག་རྙེད་པ་འམ། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་རྙེད་ལས་གཞན་ཅི་ཞིག །ཞལ་བཟང་མོ་དེ་རྙེད་ཡོད་དམ། །འོན་ཀྱང་དེ་ལ་
མཐོང་བ་ཡོད། །ཚིལ་ལ་བདུད་རྩི་ཇི་བཞིན་ནོ། །ལྷ་མོས་གསོལ་པ། བཅོམ་ལྡན་དཔའ་བོའི་དཔའ་དབང་ཕྱུག །རང་བཞིན་ཡེ་ཤེས་སྦྱིན་པའོ། །བདག་གིས་གཞན་ཞིག་ཞུ་བ་བགྱིད། །དེ་ལ་བཀའ་དྲིན་བདག་ལ་སྩོལ། །དབང་གི་རིམ་པའི་ཡེ་ཤེས་གང་། །བཞི་པ་དེ་ལྟར་དེ་བཞིན་
ནོ། །དེ་ལ་རེ་ཞིག་ཇི་བཞིན་དོན། །རྡོ་རྗེ་འཛིན་པ་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །བཞི་པ་དེ་ཉིད་ངོ་བོར་གྲགས། །དེ་ལྟར་ཡེ་ཤེས་འདུ་ཤེས་སོ། །དེ་བཞིན་ཡེ་ཤེས་ལས་བྱུང་ཞེས། །ཡེ་ཤེས་ལས་བྱུང་ལྟེ་བར་བདེ། །ལྷ་མོ་ཡེ་ཤེས་ཁ་ལ་ཡོད། །
ཡེ་ཤེས་ལས་བྱུང་སྐེ་རུ་སྟེ། །སྐེ་རུ་ལོངས་སྤྱོད་ངོ་བོར་གྲགས། །སྙིང་ག་རུ་ནི་དབང་ཞེས་བྱ། །ཐིམ་པ་ཁ་རུ་ཤེས་བྱ་སྟེ། །བསྐྱེད་པའི་རིམ་པ་ཡི་ནི་ཕྱོགས། །ཡང་ན་དེ་བཞིན་གྱི་ནི་སྒྲ། །ཇི་བཞིན་ཤེས་རབ་ལ་སྔར་ཐལ། །དེ་ལྟར་ཡེ་ཤེས་ལྟ་བ་ཡིས། །བཀུག་ནས་རང་
གི་ཁ་ལ་བཀོད། །རང་གི་སྙིང་གའི་པད་གནས་སུ། །བྱས་ནས་ཉིད་ཀྱིས་ཉམས་སུ་མྱོང་། །དེ་ཡི་སྐད་ཅིག་ཡེ་ཤེས་བདེ། །སྤྲོས་པ་དང་བྲལ་རྟོག་མེད་པ། །སེམས་ཀྱིས་ཐམས་ཅད་མཐོང་ནས་སུ། །ནམ་མཁའ་བཞིན་དུ་བསམ་པར་བྱ། །དེ་ཡང་བསམ་པ་བོར་ནས་
སུ། །ཕྱི་ནས་བསམ་པ་ཅི་ཡང་མེད། །ཉིད་ནི་བདེ་ཆེན་ཡེ་ཤེས་ཏེ། །ནམ་མཁའ་ཟླ་བ་བཞིན་དུ་མཐོང་། །ལྷ་མོ་དེ་ནི་རྫོགས་པའི་རིམ། །དོན་དམ་པར་ནི་ཤེས་པར་བྱ། །ལྷ་མོས་གསོལ་པ། བཅོམ་ལྡན་ཡེ་ཤེས་རིན་ཆེན་ཉི། །འདོད་པ་ཐམས་ཅད་རབ་གྲུབ་པ། །སྣང་བ་
བཞི་ལ་གོ་རིམས་གནས། །མངའ་བདག་ཆེན་པོས་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །སྣང་བ་བཞི་ལ་གོ་རིམས་གནས། །སེམས་དང་སེམས་བྱུང་འདུ་ཤེས་སོ། །དེ་དག་ལས་ནི་མ་རིག་འབྱུང་། །མཚམས་ཀྱི་འདུ་ཤེས་མཚན་ཉིད་ཅན། །ཉིན་མོའི་རང་

བཞིན་སེམས་ལས་འབྱུང་། །སེམས་ནི་མཚན་མོའི་ངོ་བོ་ཉིད། །ཡང་དག་འོད་ནི་གསུམ་དང་བྲལ། །ལྷན་སྐྱེས་ཡེ་ཤེས་མཚན་ཉིད་དོ། །གང་ཚེ་ཚངས་པའི་ཚིགས་སུ་སེམས། །ལྷ་མོ་དེ་ཚེ་ཉིན་མོར་འགྱུར། །གང་ཚེ་དེ་ལས་སྲོག་འཕོ་བ། །དེ་ཚེ་མཚན་མོ་འོག་ན་
གནས། །སྟེང་ཡང་མ་ཡིན་འོག་ཡང་མིན། །དེ་ཚེ་མཚམས་ཤེས་དྲན་པར་བྱ། །དེ་ཡང་མེ་ཡི་རང་བཞིན་གྲགས། །ཉི་མ་ལ་ནི་སྲོག་འཛིན་མ། །གང་གིས་ཉི་མ་ཡོད་པ་ནི། །སྣང་བ་ལས་ནི་ཤར་དུ་འགྱུར། །སྣང་བ་ཟླ་བ་ཞེས་པར་བསྟན། །ཡོངས་སུ་ཞུ་བའི་བདུད་རྩི་
གཡོ། །ལྷ་མོ་ཆེན་མོ་གཡོ་བའི་ཕྱིར། །དགའ་བྲལ་དགའ་བར་རབ་ཏུ་གྲགས། །གང་དུ་ཆད་པ་ལས་ནི་ཐིམ། །མཆོག་གི་དགའ་བ་ཤར་བའི་དུས། །དེ་ནི་སྣང་བ་དང་པོའི་དགའ། །དེ་ལས་མཆོག་ནི་གསལ་བར་འགྱུར། །གསང་ཕྱིར་སྣང་བ་མཆེད་པར་གྲགས། །
ཞུ་མེད་གཡོ་མེད་སྐ་བའོ། །སྐ་བ་ལ་ནི་ཕྲ་མོའི་དངོས། །བདེ་སྦྱིན་ཡང་ན་ཀུན་སྤྱོད་དོ། །ཀུན་སྤྱོད་ལས་ནི་ཐོབ་པ་ཡིན། །ཞལ་བཟང་མོ་ནི་སྣང་བས་སོ། །དེ་ནི་མཚམས་ཞེས་གྲགས་པ་སྟེ། །དབུས་ཀྱི་གནས་སུ་ཡོད་པའི་ཕྱིར། །དབུས་ཀྱི་གནས་ན་ཡོད་པ་ན། །དེ་ཕྱིར་
ཀུན་དུ་སྤྱོད་བྱེད་པའོ། །དབུས་ནི་དངོས་པོ་ཐམས་ཅད་ལ། །འདུས་པར་བྱེད་པ་དྲན་པའོ། །ཡང་ན་གང་དུ་མཚན་མོ་ནི། །མ་བྱུང་ཉི་མ་ནུབ་པའོ། །དེ་ནི་དབུས་ཀྱི་མཚམས་ཞེས་གྲགས། །རང་བཞིན་དགའ་བ་སྦྱིན་བྱེད་མ། །དེ་ཉིད་སྣང་བ་ཐོབ་པ་ཡིན། །ཐམས་ཅད་སྐྱེ་བའི་རྒྱུ་
ཡིན་ནོ། །གང་དུ་དབུས་མཚམས་སྐད་ཅིག་གིས། །བདེ་བའི་ཚོར་བ་མ་ཤེས་ན། །སྐལ་ལྡན་ལྷ་མོ་དེ་རུ་ནི། །དགའ་བྲལ་གསལ་བར་འགྱུར་བའོ། །དེ་ཡི་ཉམས་སུ་མྱོང་ཤེས་པ། །སྐྱོན་ནི་ཅུང་ཟད་མི་བྱེད་དོ། །མི་ཤེས་པས་ནི་སྐལ་ལྡན་མོ། །རྩ་བ་དང་བཅས་མེད་
པར་བྱེད། །རྩ་བ་སྣང་བ་ཞེས་བྱར་དྲན། །ཁུ་བའི་གཟུགས་ནི་ཟླ་བའོ། །བདེ་བ་ཆེན་པོའི་བདུད་རྩིའི་གཏེར། །བསྲུབས་ལས་སྐྱེ་བ་ཡིན་པའི་ཕྱིར། །ལྷ་མོ་མེ་ཏོག་སྣང་བ་མཆེད། །དམར་བའི་ཕྱིར་ནི་ཉི་མར་བརྗོད། །བདེ་ཆེན་རྣམ་པར་སྨིན་པའི་ཕྱིར། །དམར་བའི་

གཟུགས་ནི་སྔར་འགྱུར་རོ། །འབྲས་བུ་ཐོབ་པའི་གྲགས་པ་སྟེ། །མཚན་དང་དཔེ་བྱད་དང་ལྡན་ནོ། །དངོས་དང་དངོས་མིན་བྲལ་བའི་ཕྱིར། །ཞལ་བཟང་མཚམས་ཀྱི་ཡེ་ཤེས་སོ། །ཉིན་མོ་སྣང་བ་མཆེད་འཁོར་གྲགས། །མཚན་མོ་སྣང་བ་མྱ་ངན་
འདས། །སྲིད་དང་མྱ་ངན་འདས་བྲལ་བ། །མཚམས་ནི་སྣང་བ་ཐོབ་པའོ། །དེ་ལྟ་བུ་ཡི་གསང་ཆེན་མཆོག །གང་དུ་ཡང་ནི་གསལ་མ་བྱས། །སྐལ་ལྡན་ཁྱོད་ཀྱི་ངོར་བྱས་པས། །ཡེ་ཤེས་རིན་ཆེན་གསལ་བྱས་སོ། །ལྷ་མོས་གསོལ་པ། འབྲས་བུ་དེ་ཉིད་རིན་ཆེན་
གང་། །མངའ་བདག་དེ་ནི་ཇི་ལྟར་རྙེད། །བཅོམ་ལྡན་འདས་ཀྱིས་བཀའ་སྩལ་པ། །འབྲས་བུ་དེ་ནི་རིན་ཆེན་གང་། །དེ་ནི་གཉིས་སུ་དབྱེ་བར་གནས། །མཆོག་གི་དགའ་བའི་ངོ་བོ་གཅིག །མཆོག་གི་དགའ་བ་དང་བྲལ་བ། །མཆོག་དགའ་ངོ་བོར་གྲགས་པ་
ནི། །ཉམས་སུ་མྱོང་བས་རྙེད་པ་ཡིན། །མཆོག་གི་དགའ་བ་དང་བྲལ་བ། །རང་ལས་རབ་ཏུ་གསལ་བར་འགྱུར། །སྐལ་ལྡན་མོ་གང་ཉམས་སུ་མྱོང་། །དེ་ནི་རྫོགས་པའི་རང་བཞིན་ནོ། །ཉམས་སུ་མྱོང་མིན་རྫོགས་པ་ནི། །གང་དུ་སུས་ཀྱང་མི་ཤེས་སོ། །ཇི་ལྟར་བུ་
མོ་ལང་ཚོར་བབ། །སྐྱེས་བུ་མེད་ན་ནམ་ཡང་མིན། །ལེགས་དགྱེས་ཀྱི་ནི་བདེ་མྱོང་བ། །ལེགས་དགྱེས་དབང་མོ་མི་ཤེས་སོ། །གང་ཞིག་བསམ་པ་ལ་སོགས་ཀྱིས། །དེ་ནི་བསྐྱེད་པའི་མཚན་ཉིད་དོ། །བསྐྱེད་པ་དང་ནི་རྫོགས་བྲལ་བ། །དེ་ནི་འབྲས་མཆོག་རང་
བཞིན་ནོ། །དེ་རུ་གང་ཞིག་སྒོམ་པ་ནི། །ཕྲ་མོའི་ཕྲ་མོ་ཡང་དག་མཆོག །གང་གིས་བླ་ན་མེད་པ་རྙེད། །འགྲོ་བའི་མ་དེ་ཡོད་པ་མིན། །བླ་ན་མེད་པའི་ཡེ་ཤེས་ཆེ། །བཞི་དང་བྲལ་བ་རྟག་ཏུ་ཤར། །རྟག་ཏུ་ཤར་བ་ལས་གཞན་ཅི། །གང་དུ་ཡང་ན་སྒོམ་ཡོད་དམ། །
གལ་ཏེ་གང་གིས་སྒོམ་པ་དེ། །ཁྱད་པར་ཅན་དུ་ཡོང་མི་སྐྱེ། །མི་སྐྱེའི་ཕྱིར་ན་བསམ་གཏན་ལ། །གལ་ཏེ་ཁྱད་པར་འོང་འགྱུར་ན། །དེ་ནི་དེ་ཉིད་རང་བཞིན་མིན། །དེ་ཉིད་མིན་པར་ཐེ་ཚོམ་མེད། །དེ་ཉིད་མི་སྒོམ་དེ་ཉིད་ནི། །སུ་ཞིག་དེ་ལ་རྙེད་པར་འདོད། །

དེ་ནི་མཁའ་ལ་རི་མོ་ནི། །མཆོག་གི་དབང་མོ་འདྲི་བའོ། །ལྷ་མོས་གསོལ་པ། གསང་བ་ཆེན་པོའི་རྒྱུད་འདི་ནི། །ཤེས་པ་དང་ནི་བཤད་བསུ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཕྱོགས་སུ་དཔལ་རྡོ་རྗེའི་གནས་ཨཽ་རྒྱན་དུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་
བས་ཤེས་པ་དང་བཤད་པ་དང་། སེམས་ཅན་ལ་གསལ་བར་བྱེད་དོ། །ལྷ་མོས་གསོལ་པ། ཀྱེ་བཅོམ་ལྡན་འདས་རྒྱལ་པོ་ཆེན་པོ་ཨིནྡྲ་བྷཱུ་ཏི་ཞེས་བྱ་བ་དེས་དུའི་དབང་ཕྱུག་ལགས། བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། དཔལ་ཡེ་ཤེས་
ཐིག་ལེའི་རྒྱུད་ཀྱི་རྒྱལ་པོ་ལས་གང་ཞིག་ངས་བསྟན་པའི་ཕྱག་ན་རྡོ་རྗེའི་རྒྱལ་པོ་དེ་ཉིད་ཨིནྡྲ་བྷཱུ་ཏི་སྤྲུལ་པའི་སྐུས་ས་བཅུའི་དབང་ཕྱུག་ཡེ་ཤེས་ཀྱི་སྐུ་ས་བཅུ་བཞིའི་དབང་ཕྱུག་གོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། རི་རབ་ཀྱི་ཉི་རྡུལ་གྱི་གྲངས་
བཅོམ་ལྡན་འདས་མ་དང་ལྷན་ཅིག་ཏུ་སྟན་ལས་ལངས་ཏེ། ལན་གསུམ་དུ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ། རང་རང་གི་རྫུ་འཕྲུལ་གྱིས་སྣ་ཚོགས་པའི་མཆོད་པས་མཆོད་སྦྱིན་བྱས་ནས་བསྟོད་པ། དེ་ཁོ་ན་ཉིད་བདུད་རྩིའི་རྒྱ་མཚོའི་སྙིང་པོ་རབ་
མཆོག་རྒྱལ་གྱུར་ཅིག །ཡེ་ཤེས་ནམ་མཁའ་སྐྱེ་མེད་གཟུགས་མེད་བརྗོད་མེད་སྐུ་རབ་རྒྱལ་གྱུར་ཅིག །དངོས་དང་དངོས་མིན་རོ་གཅིག་ངོ་བོའི་རྨད་བྱུང་དེ་ཉིད་རབ་གཏེར་རྒྱལ་གྱུར་ཅིག །སྟོང་ཉིད་སྟོང་པ་ཉིད་མིན་མཆོག་དང་གཞན་མཆོག་འོད་
ཀྱིས་གྲུབ་པ་རྒྱལ་གྱ