Kinh tạng Tây Tạng (Kangyur Đại Học) — 080_རྒྱུད་འབུམ།_ང

བ་དཔོན་ཇི་ལྟ་བུ། །མཆོད་པ་རྣམས་ནི་ཇི་ལྟར་ལགས། །

བླ་མའི་ཡོན་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་བདག་ལ་གང་ཞུས་པ། །ལྷ་མོ་ཉོན་ཅིག་བདག་གིས་བཤད། །མཚན་མའི་སློབ་མའི་མོས་པས་སོ། །ཡང་ན་ཇི་ལྟར་དཀྱིལ་འཁོར་གྱི་སློབ་དཔོན་གྱི་ཡིད་དང་
འཐད་པའོ། །དེ་བཞིན་མཐེ་བོའི་སོར་གསུམ་ལྷག་པའི་ཁྲུ་ཕྱེད་དང་དོའི་དཀྱིལ་འཁོར་བྱའོ། །དེ་ནི་རེ་ཞིག་མཚན་མའི་དཀྱིལ་འཁོར་ཡིན་ཏེ། དེའང་རྣལ་འབྱོར་མའི་རྒྱུད་ཀྱི་གོ་རིམས་ཀྱིས་བྱའོ། །དེ་ཡང་ཡན་ལག་ཐམས་ཅད་ཚང་བའོ། །དེའི་དབུས་སུ་ཉི་མའི་དཀྱིལ་
འཁོར་བྲིའོ། །དེའི་སྟེང་དུ་སྣ་ཚོགས་རྡོ་རྗེ་སྟེ། སྣ་ཚོགས་རྡོ་རྗེའི་ལྟེ་བའི་ནང་དུ་ཧཱུྃ་གི་རྣམ་པ། ཕྱི་རོལ་དུ་སྣ་ཚོགས་པདྨ་འདབ་མ་བརྒྱད་དང་ལྡན་པ། རྡོ་རྗེའི་ཕྲེང་བས་རྣམ་པར་བརྒྱན་པར་བྱའོ། །དེའི་ཤར་གྱི་འདབ་མ་ལ་འཁོར་ལོ་མདོག་དཀར་པོ་དང་།
ལྷོར་རིན་པོ་ཆེ་མདོག་སེར་པོ་དང་། ནུབ་ཏུ་པདྨ་མདོག་དམར་པོ་དང་། བྱང་དུ་རལ་གྲི་མདོག་ལྗང་གུ་དང་། མེའི་མཚམས་སུ་རིན་པོ་ཆེའི་ཤིང་དང་། ཆུའི་མཚམས་སུ་སེ་འབྲུ་དང་། རླུང་གི་མཚམས་སུ་རྒྱལ་མཚན་དང་། དབང་ལྡན་གྱི་མཚམས་སུ་ཀ་པཱ་ལའོ། །ཤར་སྒོར་རྡོ་རྗེ་
ལྕགས་ཀྱུ་དང་། ལྷོར་རྡོ་རྗེ་ཞགས་པ་དང་། ནུབ་ཏུ་རྡོ་རྗེ་ལྕགས་སྒྲོག་དང་། བྱང་དུ་རྡོ་རྗེ་དྲིལ་བུའོ། །མཚམས་རྣམས་སུ་མེ་ཏོག་གི་ཆུན་འཕྱང་དང་། བདུག་སྤོས་ཀྱི་རེང་བུ་དང་། མར་མེ་དང་། དྲིའི་དུང་ཆོས་སོ། །དེའི་ཕྱི་རོལ་དུ་རྡོ་རྗེ་ཕྲེང་བའོ། །སྣ་ཚོགས་རྡོ་རྗེའི་ལྟེ་
བའི་ནང་དུ་ཧཱུྃ་གི་རྣམ་པ་ཡོངས་སུ་གྱུར་པ་ལས་རྡོ་རྗེ་འཛིན་པ་ཆེན་པོ་ཞལ་གསུམ་པ། སྤྱན་གསུམ་པ། ཕྱག་བཞི་པ། རྒྱལ་པོའི་བཞུགས་ཐབས་ཀྱིས་གནས་པ། རང་འོད་ཀྱི་རིག་མས་འཁྱུད་པ། ནམ་མཁའ་སྔོན་པོའི་མདོག་ཅན། རྒྱན་ཐམས་ཅད་ཀྱིས་བརྒྱན་པ། བརྒྱད་གཉིས་
ཀྱི་ལོ་དང་ལྡན་པ། ཉི་མ་བྱེ་བའི་འོད་དང་ལྡན་པ། རལ་པའི་དབུ་རྒྱན་གྱིས་བརྒྱན་པ། རྡོ་རྗེ་དང་། དྲིལ་བུ་དང་། རྔེའུ་ཆུང་དང་། ཀ་པཱ་ལ་དང་། ཁ་ཊཱྃ་ག་འཛིན་པའི་བདག་པོའོ། །མཚན་མའི་སྐབས་སུ་དབུས་སུ་རྡོ་རྗེ་དང་། དྲིལ་བུས་བྱའོ། །དེ་ནས་སློབ་མ་སྟ་གོན་

བྱས་ལ་སྨན་སྣ་ཚོགས་ཀྱིས་ཁྲུས་བྱས་པ། རྣམ་པར་སྣང་མཛད་ཀྱི་ངོ་བོས་སློབ་མ་གཟུང་བར་བྱའོ། །ལས་ཀྱི་སློབ་དཔོན་ནི་བསྟན་བཅོས་ཐམས་ཅད་ལ་མཁས་པ། སེར་སྣ་མེད་པ། མཚན་མ་ཅུང་ཟད་ཐོབ་པའོ། །དེར་མཆོད་པ་པོ་རྣམས་ཤིན་ཏུ་མཁས་པ། ཆགས་པ་ལ་
སོགས་པ་དང་བྲལ་བ། མཚན་མ་རྙེད་པ། དབང་གསུམ་ཐོབ་པའོ། །སློབ་དཔོན་ལ་དབང་བསྐུར་བའི་དུས་སུའམ། རྒྱུད་ཐོས་པའི་དུས་སུ་ཤིན་ཏུ་གཅེས་པའི་ཆུང་མ་དང་། བུ་མོ་དང་། གཞན་ཡང་གསེར་དང་། མུ་ཏིག་དང་། ནོར་བུ་དང་། གླང་པོ་ཆེ་དང་། རྟ་དང་།
ཞིང་དང་། བྲན་དང་། བྲན་མོ་དང་། ན་བཟའ་དུ་མ་ལ་སོགས་པ་ཅི་ཙམ་ནུས་པ་དབུལ་བར་བྱའོ། །ནོར་ལ་སོགས་པ་ཡོད་ནས་གང་ཞིག་མི་འབུལ་བ་དེ་ནི་བསྐལ་པ་སྟོང་གི་བར་དུ་དམྱལ་བར་སྐྱེ་བར་འགྱུར་རོ། །ལོངས་སྤྱོད་མེད་པར་གྱུར་པས་ཀྱང་རང་གི་ལུས་པོ་དབུལ་བར་བྱ་
སྟེ་བྲན་དུ་བྱའོ། །དེས་ནི་ཚེ་འདི་ཉིད་ལ་སངས་རྒྱས་ཉིད་དམ། ཡང་ན་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །ལྷ་མོས་གསོལ་བ། བཅོམ་ལྡན་འདས་སྦྱིན་པ་ལ་སོགས་པ་ཙམ་གྱིས་སངས་རྒྱས་སམ་རྡོ་རྗེ་འཛིན་པར་འགྱུར་རམ་ཅི། བཅོམ་ལྡན་འདས་ཀྱིས་བཀའ་
སྩལ་པ། ལྷ་མོ་སྦྱིན་པ་ལ་སོགས་པ་ཙམ་གྱིས་སངས་རྒྱས་སམ་རྡོ་རྗེ་འཛིན་པར་མི་འགྱུར་ཏེ། འོན་ཀྱང་བླ་མ་ལ་མཆོད་པས་བསོད་ནམས་ཆེན་པོའི་ཚོགས་སྐྱེའོ། །བསོད་ནམས་ཆེན་པོའི་ཚོགས་བསགས་པ་ལས་སྡིག་པའི་ཕུང་པོ་ཟད་དེ། བླ་མའི་མཆོག་སངས་རྒྱས་ཐམས་ཅད་ཀྱི་རང་
བཞིན་རང་གི་ལྷའི་སྐུ་ཡང་དག་པ་དང་ཕྲད་པ་ཐོབ་བོ། །ཕྲད་པས་ཡང་དག་པའི་མན་ངག་གནང་བར་འགྱུར་རོ། །མན་ངག་ཐོབ་པ་ལས་བརྩོན་འགྲུས་ཆེན་པོ་དང་ལྡན་པ་ཡིན་ནོ། །དེས་ཚེ་འདི་ཉིད་ལ་སངས་རྒྱས་སམ་རྡོ་རྗེ་འཛིན་པ་ཐོབ་པར་འགྱུར་རོ། །དཔལ་ཡེ་ཤེས་སྙིང་པོ་ལས་དབང་བསྐུར་
བ་དང་། དཀྱིལ་འཁོར་གྱི་དོན་ཞེས་བྱ་བའི་ལེའུ་སྟེ་གསུམ་པའོ།། །།བཅོམ་ལྡན་འདས་ནས་གསོལ་པ། ཁྱོད་ཀྱི་དཀྱིལ་འཁོར་ཇི་ལྟར་ལགས། །མངའ་བདག་ཆེན་པོ་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །བདག་གི་དཀྱིལ་འཁོར་དགེ་བ་ནི། །ཉོན་

ཅིག་ལྷ་མོ་རབ་ཏུ་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲ་བ་དྲ་ཕྱེད་ཆུན་འཕྱང་དང་། །འདོད་ཡོན་རིན་ཆེན་ལ་སོགས་བརྒྱན། །དེ་ཡི་དབུས་སུ་གཞན་མིན་བདག །ཞལ་བཟངས་ཁྱོད་དང་ལྷན་ཅིག་གོ། །ཕྱག་བཞི་པ་ལ་
ཞལ་བཞི་པ། །སྤྱན་གསུམ་ཨུཏྤལ་སྔོན་པོའི་མདོག །ཕྱག་རྒྱ་དྲུག་དང་ལྡན་པ་དང་། །སྣ་ཚོགས་རུས་པའི་རྒྱན་དང་ལྡན། །ཞི་བ་ཆེན་པོའི་རང་བཞིན་ཅན། །སྣ་ཚོགས་པདྨའི་སྟེང་དུ་ནི། །འཇིགས་བྱེད་དུས་མཚན་ཞབས་ཀྱིས་མནན། །རྒྱལ་པོའི་བཞུགས་སྟབས་ཀྱིས་
ནི་བཞུགས། །རྡོ་རྗེ་དྲིལ་བུ་རྔེའུ་ཆུང་དང་། །ཀ་པཱ་ལ་དང་ཁ་ཊྭཱྃ་བསྣམས། །ཞལ་གཞན་སེར་དང་དམར་དང་ལྗང་། །ལྷ་མོ་ཁྱོད་ཀྱང་བདག་གི་མདོག །ཞལ་གསུམ་མ་ལ་སྤྱན་གསུམ་པ། །ཕྱག་གཉིས་གྲི་གུག་པད་སྣོད་འཛིན། །སྣ་ཚོགས་རྒྱན་གྱིས་བརྒྱན་པའོ། །བཅོམ་
ལྡན་འདས་མས་གསོལ་བ། འདི་ཡི་དཀྱིལ་འཁོར་འཁོར་ལོ་ལ། །འཁོར་ནི་གང་ལགས་གྲངས་དུ་མཆིས། །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་ཁྱོད་ཀྱིས་བདག་ལ་ཞུས། །ཉོན་ཅིག་ལྷ་མོ་བདག་གིས་བཤད། །དཀྱིལ་འཁོར་ཕྱོགས་བཞིར་
དཔའ་ཆེན་པོ། །ཤེས་རབ་ཡན་ལག་མས་འཁྱུད་ཅིང་། །མཚམས་སུ་རྡོ་རྗེ་མ་མོ་བཞི། །སྒོར་ནི་ཁྲོས་པའི་ལྷ་མོ་བཞིའོ། །བཅོམ་ལྡན་འདས་མས་གསོལ་པ། དེ་རྣམས་ལ་བསྐྱེད་པའི་ཆོག་ནི་གང་། མདོག་དང་ཕྱག་རྒྱ་དང་བཞུགས་ཐབས་ལ་སོགས་པ་ཇི་ལྟར་
ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱོད་དང་བདག་རོལ་པ་མཛད་ཅིང་། སྲུབ་པ་དང་བསྲུབ་པའི་ཐབས་ཆེན་པོའི་སྦྱོར་བའི་དགའ་བའི་རྟགས་ལས་དཔའ་བོ་ཆེན་པོ་ཚངས་པ་ཞེས་བྱ་བ་ཕྱག་བཞི་པ། ཞལ་གསུམ་པ། སྤྱན་གསུམ་པ། གསེར་གྱི་མདོག་ཉི་མའི་དཀྱིལ་
འཁོར་གྱི་སྟེང་དུ་རྒྱལ་པོའི་བཞུགས་ཐབས་ཀྱིས་གནས་པ། རལ་བའི་ཅོད་པན་གྱིས་བརྒྱན་པ། ཤེས་རབ་མའི་ཡན་ལག་གིས་འཁྱུད་པ། ཕྱག་རྒྱ་ལྔ་འཛིན་པ། རྒྱན་སྣ་ཚོགས་ཀྱིས་བརྒྱན་པའོ། །རྡོ་རྗེ་དང་། དྲིལ་བུ་དང་། རྡེའུ་ཆུང་དང་། ཀ་པཱ་ལ་དང་། ཁ་ཊྭཱྃ་ག་བསྣམས་

པ། ཤར་གྱི་འདབ་མར་རོ། །ཡང་སྲུབ་པ་དང་བསྲུབ་པའི་ཐབས་ཀྱི་མཆོག་གི་དགའ་བའི་རྟགས་ལས་དཔའ་བོ་ཆེན་པོ་ཁྱབ་འཇུག་ཅེས་བྱ་བ། མར་ཀ་ཏའི་མདོག་ལྷག་མ་ནི་ཚངས་པ་བཞིན་དུ་བྱང་དུའོ། །ཡང་སྲུབ་པ་དང་བསྲུབ་པའི་ཐབས་ཀྱི་དགའ་བྲལ་གྱི་དགའ་བའི་རྟགས་ལས་དཔའ་
བོ་ཆེན་པོ་དྲག་པོ་ཞེས་བྱ་བ་མདོག་ནག་པོ་ཁྱབ་འཇུག་བཞིན་ནུབ་ཏུའོ། །ཡང་སྲུབ་པ་དང་བསྲུབ་པའི་ཐབས་ཀྱི་ལྷན་ཅིག་སྐྱེས་པའི་དགའ་བའི་རྟགས་ལས་དཔའ་བོ་ཆེན་པོ་དབང་ཕྱུག་ཅེས་བྱ་བ་མདོག་དཀར་པོ་ཁྱབ་འཇུག་བཞིན་ལྷོ་ཕྱོགས་སུའོ། །པདྨའི་མཚམས་སུ་དྲི་ཞིམ་པ་དང་ལྡན་པའི་
ཆུས་གང་བའི་བུམ་པའི་སྟེང་དུ་བདུད་རྩི་ལྔས་བཀང་བའི་ཀ་པཱ་ལ་བཞིའོ། །ཡང་སྲུབ་པ་དང་བསྲུབ་པའི་ཐབས་ཀྱི་རོ་བརྒྱད་ལས་མེའི་མཚམས་སུ་དཔའ་མོ་ཆེན་མོ་མདོག་དཀར་མོའོ། །ཆུའི་མཚམས་སུ་གཞན་གྱིས་མི་ཐུབ་མ་བཻ་ཌཱུརྱའི་མདོག་གོ། །རླུང་གི་མཚམས་སུ་དུས་མཚན་མ་
ནམ་མཁའ་སྔོན་པོའི་མདོག་གོ། །དབང་ལྡན་གྱི་མཚམས་སུ་གཽ་རཱི་མདོག་སེར་པོའོ། །ཐམས་ཅད་ཀྱང་ཤིན་ཏུ་ལང་ཚོ་ལ་བབ་པ་ཞལ་གཅིག་པ། སྤྱན་གསུམ་པ། ཕྱག་བཞི་པ། ཉི་མའི་དཀྱིལ་འཁོར་གྱི་སྟེང་དུ་རྒྱལ་པོའི་བཞུགས་སྟབས་ཀྱིས་བཞུགས་པ། ཕྱག་རྒྱ་ལྔ་འཛིན་
པ། ཕྱོགས་ཀྱི་གོས་ཅན། གྲི་གུག་དང་། ཀ་པཱ་ལ་དང་། ཁ་ཊྭཱྃ་ག་དང་། རྔེའུ་ཆུང་བསྣམས་པའོ། །ཤར་ཕྱོགས་ཀྱི་སྒོར་རྡོ་རྗེ་གཏུམ་མོ་ནི་ནག་མོ་ཆེན་མོའི་མདོག་གོ། །བྱང་སྒོར་རྡོ་རྗེ་འཇིགས་བྱེད་མ་སེར་མོའི་མདོག་གོ། །ནུབ་སྒོར་རྡོ་རྗེ་སྒྲ་མ་དམར་མོ་ཆེན་མོའི་མདོག་གོ། །
ལྷོ་སྒོར་རྡོ་རྗེ་ཙ་རྩི་ཀཱ་ལྗང་གུའི་མདོག་གོ། །ཕྱག་བཞི་པ། ཞལ་གཅིག་པ། སྤྱན་གསུམ་པ། གཡོན་བརྐྱང་བ། ན་བཟའ་སྤངས་པ་རིམ་པ་བཞིན་དུ་ནམ་མཁའ་ལྡིང་དང་། སེང་གེ་དང་། སྟག་དང་། མ་ཧེའི་སྟེང་ན་གནས་པའོ། །ཕྱག་རྒྱ་ལྔས་བརྒྱན་པ། མགོ་ཆེན་པོའི་
ཆུན་པོ་འཕྱང་བ་འཛིན་པ། འཇིགས་བྱེད་ཆེན་པོ་མཆེ་བ་གཙིགས་པ། ལྗགས་འདྲིལ་བ། དབུ་སྐྱེས་འབར་བ། སྒྲ་ཆེན་པོའི་སྒྲ་སྒྲོགས་པ། རལ་གྲི་དང་། རྩེ་གསུམ་པ་དང་། ཀ་པཱ་ལ་དང་། ཁ་ཊྭཱྃ་ག་བསྣམས་པ། རང་འོད་ཀྱི་ཐབས་དང་འཁྱུད་པའོ། །བཅོམ་

ལྡན་འདས་མས་གསོལ་པ། བཅོམ་ལྡན་འདས་དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་མ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་རང་རང་གི་མདོག་དང་མཚུངས་
པ་སྟེ། འོན་ཀྱང་ཁྱོད་བཞིན་དུ་ཞལ་གཅིག་པའོ། །དེ་ལྟའི་དཀྱིལ་འཁོར་རྒྱལ་པོ་ནི། །རྣལ་འབྱོར་རྒྱུད་དུ་རྙེད་པར་དཀའ། །དགྱེས་པ་ཐམས་ཅད་གྲུབ་བྱེད་ཅིང་། །སྡིག་པ་ཐམས་ཅད་འཇིག་པར་མཛད། །བཅོམ་ལྡན་འདས་མས་གསོལ་པ། བཅོམ་ལྡན་
ཁྱོད་དང་བདག་བསྐྱེད་པའི། །ས་བོན་གང་ལགས་སྙིང་པོ་ཅི། །ཉེ་པའི་སྙིང་པོ་ཇི་ལྟ་བུ། །འཁོར་གྱི་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་བདག་ལ་གང་ཞིག་ཞུས། །ཉོན་ཅིག་ལྷ་མོ་བདག་གིས་བཤད། །ས་བོན་ཡ་སྡེའི་
བདུན་པ་ནི། །དབྱངས་ཡིག་ལྔ་པ་དང་ལྡན་པ། །ལྷ་མོ་ཆེན་མོ་ཐིག་ལེ་ལྡན། །ཁྱོད་ཀྱི་ས་བོན་རབ་མཆོག་གོ། །ཡ་སྡེའི་ས་བོན་བརྒྱད་པ་ནི། །དབྱངས་ཡིག་དྲུག་པ་དང་ལྡན་པ། །དབུ་ནི་ཐིག་ལེ་ཡིས་ནི་བརྒྱན། །བདག་གི་ས་བོན་རབ་མཆོག་གོ། །དེ་ནི་ས་བོན་གཉིས་
ཀ་རབ། །ཐམས་ཅད་དབང་དུ་བྱེད་པ་ནི། །ལུས་ཅན་ཀུན་གྱི་སྙིང་ལ་བཞུགས། །སྐྱེ་བ་དང་ནི་སྡུད་བྱེད་དོ། །དྲུག་པ་བརྒྱད་པ་བཞི་པ་དང་། །བཅུ་གཉིས་པ་དང་བཅུ་དང་ཉི། །དང་པོར་ཨོཾ་དང་ཧཱུྃ་ཕཊ་མཐར། །བདག་གི་སྙིང་པོ་རབ་ཏུ་མཆོག །ཉི་ཤུ་པ་དང་བཅུ་གཉིས་
མཁའ། །དང་པོ་དང་ནི་བཅུ་དྲུག་ཉི། །དབང་པོ་ཚངས་པ་ཧཱུྃ་ཕཊ་མཐར། །ཁྱོད་ཀྱི་སྙིང་པོ་དགྱེས་པ་མཆོག །དང་པོར་ཨོཾ་དང་ཧཱུྃ་ཕཊ་མཐར། །དབུས་སུ་མིང་དང་སྤེལ་བ་ནི། །ཚོགས་ཀུན་གྱི་ནི་སྲགས་ཡིན་ཏེ། །མཆོད་པའི་དུས་སུ་མཆོད་པར་བྱ། །ཨོཾ་སརྦྦ་མཱ་ར་བི་མརྡྡ་
ན་མ་ཧཱ་པཱ་རི་རཱ་ཛ་ཧཱུྃ་ཧཱུྃ་ཕཊ་ཕཊ། སྐལ་ལྡན་མོ་དེ་ཁྱོད་ཀྱི་ནི། །ཉེ་བའི་སྙིང་པོ་དྲག་པོ་ཆེ། །ཨོཾ་ཧྃ་ཧྃ་ཧྃ་ཧྃ་ཧྃ། ཀེ་ལེ་ཀེ་ལེ་སརྦྦ་དོ་སྟ་པྲ་བྷ་ཛ་ཀ་ཧཱུྃ་ཧཱུྃ་ཕཊ་ཕཊ། པདྨའི་ཞལ་དེ་བདག་གི་ནི། །འོད་ཆེན་ཉེ་བའི་སྙིང་པོའོ། །བཅོམ་ལྡན་འདས་མས་གསོལ་པ། སྔགས་འདི་ལ་ནུས་པའི་

མཐུ་ཅི་ཙམ་ཞིག་མཆིས་ལགས། །བཅོམ་ལྡན་འདས་ཀྱིས་བཀའ་སྩལ་པ། གྲུབ་པ་ཙམ་གྱིས་ཁམས་གསུམ་ཐམས་ཅད་དབང་དུ་བྱེད་པར་འགྱུར་རོ། །རྣལ་འབྱོར་པ་ཁྲོ་བོའི་ལྟ་བས་འབུམ་ཕྲག་གཅིག་བཟླས་པ་བྱེད་ན། ལྷ་མ་ཡིན་གྱི་དབང་པོ་ལྟ་བུ་ལ་འབུམ་ཕྲག་
གཅིག་གིས་གསོད་པར་བྱེད་དོ། །ཞི་བའི་ཚུལ་གྱིས་བཟླས་པ་བྱས་ན་གྲངས་མེད་པའི་ནད་དང་། ཉོན་མོངས་པ་དང་། དབུལ་པོ་དང་། མཛེ་དང་། ཕོལ་མིག་འཇིག་པར་བྱེད་དོ། །ཕྲ་མོའི་གྲུབ་པ་བརྒྱད་སྐད་ཅིག་གིས་བྱེད་དོ། །གཞན་ཡང་ལས་དུ་མ་རྗེས་སུ་འབྲང་བར་
བྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་མ་ལེགས་དགྱེས་དབང་མོ་སྟན་ལས་ལངས་ནས་མགོ་བོས་ཕྱག་འཚལ་ཏེ། འཁོར་ཐམས་ཅད་དང་ལྷན་ཅིག་ཏུ་ལན་གསུམ་དུ་བསྐོར་བ་བྱས་ནས་རང་རང་གི་རྫུ་འཕྲུལ་གྱིས་མཆོད་པ་བྱས་ཏེ། བཅོམ་
ལྡན་འདས་མཆོག་གི་དབང་ཕྱུག་ལེགས་སོ་ལེགས་སོ་ཞེས་བརྗོད་ནས་ཡང་གཉིས་སུ་མེད་པའི་སྦྱོར་བས་བཞུགས་སོ། །དེའི་དུས་སུ་ནམ་མཁའ་ལ་མེ་ཏོག་རྣམ་པ་སྣ་ཚོགས་པའི་ཆར་དང་། རིན་པོ་ཆེ་སྣ་ཚོགས་ཀྱི་ཆར་ཆེན་པོ་བཅོམ་ལྡན་འདས་ཀྱི་ཞབས་ཀྱི་དྲུང་དུ་བབས་པར་གྱུར་ཏོ། །
དེ་ནས་བཅོམ་ལྡན་འདས་མེ་ཏོག་དང་རིན་པོ་ཆེ་དེ་དག་གི་ཐོག་ཏུ་ཆིབས་ཏེ། འཁོར་དང་བཅས་པ་མི་སྣང་བར་གྱུར་ཏོ། །དཔལ་ཡེ་ཤེས་སྙིང་པོ་ལས་གསང་བའི་དཀྱིལ་འཁོར་འབྱུང་བའི་དོན་ཞེས་བྱ་བའི་ལེའུ་སྟེ་བཞི་པའོ།། །།དཔལ་ཡེ་ཤེས་སྙིང་པོ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་
ཀྱི་རྒྱལ་པོའི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་དཔལ་ཤེས་རབ་གསང་བའི་ཞལ་སྔ་ནས་བསྒྱུར་བའོ། །དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོའི་ཕྱི་མའི་ཕྱི་མའོ།། ༄༅། །རྒྱ་གར་སྐད་དུ། ཤྲཱི་ཛྙཱ་ན་ཏི་ལ་ཀ་
ཡོ་གི་ནཱི་ཏནྟྲ་རཱ་ཛ་པ་ར་མ་མ་ཧཱ་ཨདྦྷུ་ཏྃ་ནཱ་མ། བོད་སྐད་དུ། དཔལ་ཡེ་ཤེས་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་མཆོག་ཏུ་རྨད་དུ་བྱུང་བ་ཞེས་བྱ་བ། དཔལ་ཡེ་ཤེས་ཐིག་ལེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་

གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་སྙིང་པོ་དཔའ་བོ་ཆེན་པོ་དང་། དཔའ་མོའི་དབང་ཕྱུག་མས་རྣམ་པར་བསྐོར་ནས་རྡོ་རྗེ་བཙུན་མོའི་བྷ་ག་ལ་བཞུགས་སོ། །དེར་དཔལ་ནམ་མཁའ་དྲི་མེད་དང་། ཤིན་ཏུ་སྟོབས་ཆེན་པོ་དང་། ལྷའི་དབང་ཕྱུག་
དང་། གསང་བའི་བདག་པོ་དང་། འོད་དྲག་དང་ཉི་དགྲ་དང་། མཆོག་དགའ་དང་། ཐམས་ཅད་ཀྱི་བྱེད་པ་པོ་དང་། ཨུཏྤ་ལའི་སྙིང་པོ་དང་། ཞི་བ་ཆེན་པོའི་བདག་པོ་དང་། ནག་པོ་འདུལ་བ་དང་། རྨད་དུ་བྱུང་བའི་དཔའ་བོ་དང་། དྲེགས་ཆེན་དང་། ནག་པོ་ཆེན་པོ་དྲེགས་འཇོམས་དང་།
རི་རབ་བརྟན་པ་དང་། ནམ་མཁའི་ཞལ་ལོ། །ཡང་དཔའ་མོའི་དབང་མོའི་དབང་ཕྱུག་མ་རྣམས་ལ་འདི་ལྟ་སྟེ། ཟླ་བ་མོ་དང་། གཡོན་པ་མ་དང་། མི་མཉམ་མ་དང་། རླུང་ཟབ་མ་དང་། བསིལ་སྦྱིན་མ་དང་། སྙིང་པོའི་འདབ་མ་དང་། བག་ཡོད་ཐོར་ཅོག་མ་དང་། ཉི་མ་འདུལ་
མ་དང་། ཞི་བ་འཆི་བའི་ཕོ་ཉ་མ་དང་། ལྗང་བརྩོན་མ་དང་། འོད་འདུན་མ་དང་། ཚངས་པའི་མ་དང་། ཁྱབ་འཇུག་གི་མ་དང་། ཐོག་ཁ་མ་དང་། ཐམས་ཅད་སྐྱེད་མ་དང་། དཔའ་བོའི་ཡུམ་མོ། །ཡང་མ་མོའི་བཙུན་མོ་རྣམས་ལ་འདི་ལྟ་སྟེ། སྐམ་མ་དང་། འཇིགས་མ་དང་། འོད་
མ་དང་། མཆུ་འཕྱང་མ་དང་། རི་རབ་སོ་མ་དང་། དུས་ཀྱི་བདེ་བྱེད་མ་དང་། ཉི་མིག་མདང་། མེ་ཞལ་མདང་། འདོད་པའི་མ་དང་། ལྕེ་རིང་མ་དང་། ཆོས་དགའ་མ་དང་། འདོད་བདེན་མ་དང་། མིག་སྟོང་མ་དང་། སྟག་མ་དང་། གཏུམ་མོ་དང་། འདོད་གཟུགས་མའོ། །དེ་ལྟ་
བུའི་རབ་ཞལ་ལ་སོགས་པ་དཔའ་བོ་ཆེན་པོ་དང་། དཔའ་མོའི་དབང་ཕྱུག་མ་དང་། མ་མོའི་བཙུན་མོ་བྱེ་བ་ཕྲག་བདུན་ཅུ་རྩ་གཉིས་ཀྱི་གྲངས་ཀྱི་འཁོར་གྱི་དབུས་སུ་ལེགས་དགྱེས་ཆེན་པོའི་སྦྱོར་བ་ལ་བཞུགས་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ལ་
བོས་ཏེ། ཀྱཻ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་དེ་ཁོ་ན་ཉིད་གསུམ་གྱི་བདག་ཉིད་ཀྱི་དང་། ཟླ་བའི་བདེ་བ་མཆོག་དང་། ཕྱག་རྒྱ་ཆེན་པོའི་མཐའ་དང་། དེ་ལ་རང་གི་ངོ་བོ་དང་། རྣམ་པ་དང་། ཚད་དག་དཔལ་ཡེ་ཤེས་ཐིག་ལེར་གྲགས་པ་ཉོན་ཅིག །བཅོམ་ལྡན་

འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་འཁོར་ཐམས་ཅད་དང་ལྷན་ཅིག་ཏུ་ལན་གསུམ་དུ་བསྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ས་ལ་བལྟ་ཞིང་ཅང་མི་སྨྲ་བར་འདུག་གོ། །
དེའི་ཚེ་ནམ་མཁའ་ལ་མེ་ཏོག་མནྡཱ་ར་བ་དང་། མནྡཱ་ར་བ་ཆེན་པོ་དང་། ཨུཏྤལ་དང་། ཉི་མའི་འོད་མཉམ་པ་དང་། ཆུ་སྐྱེས་དང་། པཎྜ་རཱི་ཀ་དང་། ཨ་ཤོ་ཀ་དང་། ཙམ་པ་ཀ་དང་། ཨརྫུ་ན་དང་། ནཱ་ག་གེ་སར་ལ་སོགས་པ་དྲི་ཞིམ་པའི་མེ་ཏོག་རྣམ་པ་སྣ་ཚོགས་པ་དང་། རིན་
པོ་ཆེའི་ཆར་དུ་མ་བཅོམ་ལྡན་འདས་ཀྱི་ཞབས་ཀྱི་དྲུང་དུ་བབས་སོ། །ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ལ་བོས་ཏེ། ཁྱོད་ཅི་ཞིག་ལ་ཡ་མཚན་དུ་གྱུར། ལྷའི་དབང་ཕྱུག་གིས་གསོལ་བ། བཅོམ་ལྡན་འདས་དེ་ཁོ་ན་ཉིད་གསུམ་གྱི་
བདག་ཉིད་ཀྱི་དང་། ཟླ་བ་བདེ་བ་མཆོག་དང་། ཕྱག་རྒྱ་ཆེན་པོའི་མཐའ་དང་། དེ་ལ་རང་གི་ངོ་བོ་དང་། ཚད་དང་། རྣམ་པ་ཡོད་དམ་ཅི་ལགས་ཞེས་བདག་ཡ་མཚན་དུ་གྱུར་ལགས་སོ། །དཔའ་བོ་ཆེན་པོ་ལྷའི་དབང་ཕྱུག་ལ་རྡོ་རྗེ་འཛིན་པའི་མཆོག་གིས་འདི་སྐད་ཅེས་བཀའ་སྩལ་ཏོ། །ཨེ་
མ་ཧོ། །དེ་ཁོ་ན་ཉིད་གསུམ་གྱི་བདག་ཉིད་ཀྱི་དང་། ཟླ་བའི་བདེ་བ་མཆོག་དང་། ཕྱག་རྒྱ་ཆེན་པོའི་མཐའ་ལ་དེའི་རང་གི་ངོ་བོ་དང་། རྣམ་པ་དང་། ཚད་མེད་དམ་ཅི། དེ་ལྟར་མ་ཡིན་ན་ཆོས་ཐམས་ཅད་ཀྱི་ངོ་བོ་སྟོང་པ་ཉིད་འདི་ག་ལ་ཤེས། མིག་ཡོར་ཙམ་གྱི་རྒྱུའི་རྟེན་ནི་ཆོས་ཐམས་
ཅད་དོ། །དེ་ལྟར་གླ་རྩི་ལ་བརྟེན་ནས་དྲི་འབྱུང་བ་གླ་རྩིའི་དངོས་པོ་མེད་ན་དྲི་ཇི་ལྟར་རྙེད་པར་འགྱུར། དེ་བཞིན་དུ་རང་གི་ངོ་བོ་དང་། ཆོས་ཀྱི་ཚད་དང་། རྣམ་པ་དག་མེད་པར་གྱུར་ན། དེ་ཁོ་ན་ཉིད་གསུམ་གྱི་བདག་ཉིད་དང་། ཟླ་བའི་བདེ་བ་མཆོག་དང་། ཕྱག་རྒྱ་ཆེན་པོའི་སྐུའི་རྙེད་
པ་མེད་དོ། །དེ་བས་ན་ཁྱབ་དང་ཁྱབ་བྱེད་བྱེ་བྲག་ཏུ། །གཉིས་སུ་མེད་པའི་བདེ་བ་ཆེ། །བདེ་བ་སྐུ་ལ་བརྟེན་པའི་ཕྱིར། །བདེ་བ་བསྟེན་ན་དེ་ཉིད་འགྱུར། །བདེ་སྐུ་རྣམ་པར་ཤེས་ཡིན་ན། །ཐམས་ཅད་གཉིས་སུ་མེད་པའི་དངོས། །དྲུག་གི་བདེ་བ་ཡེ་ཤེས་མཆོག །

བདེ་དང་སྐུ་ནི་གཉིས་ལས་འབྱུང་། །འཁོར་ལོ་དྲུག་གི་དབུས་ན་བཞུགས། །དེ་ཉིད་གསུམ་གྱི་བདག་ཉིད་མཆོག །ཟླ་བ་ལ་སོགས་འབྲལ་བདག་ཉིད། །དེ་ཉིད་གསུམ་བདག་རྒྱུ་རུ་གྲགས། །ལུས་བརྟེན་སྲོག་གི་དབྱུག་པ་ལ། །སྦྱོར་བ་དྲུག་གི་ཡེ་ཤེས་
བཞུགས། །འཁོར་ལོ་དྲུག་གི་ལྟེ་བའི་དབུས། །ཕྲ་མོའི་ལུས་ལྡན་རྩ་ནི་དྲུག །ཐིག་ལེ་དང་བཅས་དེ་རྣམས་སྦྱོར། །སྲོག་གི་དབྱུག་བའི་ནང་དུའོ། །བདེ་ཆེན་འཁོར་ལོའི་ལྟེ་བ་ཡི། །ཟླ་མོ་ཚེ་དང་ལྡན་པ་སྟེ། །དེ་ནི་སྲོག་དབྱུག་རྩ་བ་ཡིན། །ཟུར་གསུམ་གྱི་ནི་རྣམ་
པའི་ཚུལ། །ལོངས་སྤྱོད་རྫོགས་པའི་ལྟེ་བ་ཡི། །ལྕེ་མ་བདེ་བ་ལྡན་པ་ནི། །དེ་ནི་སྲོག་གི་དབྱུག་པའི་སྟེ། །རིགས་ཀྱི་མེ་ཏོག་དང་འདྲ་བ། །ཆོས་ཀྱི་འཁོར་ལོའི་ལྟེ་བ་ལ། །ནམ་མཁའ་མ་ནི་ཡེ་ཤེས་ལྡན། །དེ་ནི་སྲོག་གི་དབྱུག་པའི་སྙིང་། །བ་ཡི་མིག་གི་རྣམ་པའི་
གཟུགས། །ལྟེ་བ་སྤྲུལ་པའི་འཁོར་ལོའི་ནང་། །འོད་མདང་ནི་དུས་ལྡན་མ། །དེ་ནི་སྲོག་གི་དབྱུག་པའི་སྟེ། །པདྨ་རྒྱས་པའི་རྣམ་པ་བཞིན། །མེ་ཡི་འཁོར་ལོའི་སྙིང་ག་ཡི། །འདོད་པ་དང་ལྡན་རབ་འོད་མ། །དེ་ནི་སྲོག་གི་དབྱུག་པའི་མདོམས། །རྡོ་རྗེའི་རྣམ་པ་བཞིན་དུ་གསལ། །
རླུང་གི་འཁོར་ལོའི་ལྟེ་བ་ལ། །སྟོབས་ནི་བརྩོན་འགྲུས་མ་དང་ལྡན། །སྲོག་གི་དབྱུག་པ་དེ་ཡི་མཐའ། །ཏིལ་གྱི་མེ་ཏོག་རྒྱས་པ་བཞིན། །དེ་ནི་སྦྱོར་དྲུག་གི་རྣམ་ཤེས། །རྩ་དང་ཐིག་ལེ་དང་ལྡན་ནོ། །རྟོག་མེད་མས་ནི་འཁྱུང་ཡིན་ཕྱིར། །དེ་ཚེ་ཚངས་པའི་དབྱུག་པ་ཡིན། །
དེ་ཡི་དུས་ནི་བདག་གིས་བཤད། །ཤར་དང་ནུབ་པ་རྣམ་གཉིས་སོ། །གང་གི་ཚེ་ཚངས་པའི་དབྱུག་པ་ལ་མདུད་པ་སུམ་ཅུ་རྩ་གཉིས་ཡོད་དེ། དེ་ལ་ལྟེ་བའི་འོག་ཏུ་འཕོ་བ་བཅུ་དྲུག །སྟེང་དུ་འཕོ་བ་བཅུ་དྲུག །བྱང་ཆུབ་ཀྱི་སེམས་དང་རླུང་གཉིས་ཕྲད་པའི་ཕྱིར་འཕྲོ་བ་སྟེ། སྟེང་འོག་
གཅིག་པུའི་དངོས་པོ་སྦྱོར་བའི་རྩ་སུམ་ཅུ་རྩ་གཉིས་སོ། །བྱང་ཆུབ་ཀྱི་སེམས་དགའ་བ་དང་ལྡན་པའི་གདུ་བུའི་རྣམ་པ་སྐུ་དང་གསུང་དང་ཐུགས་ཀྱི་ངོ་བོ་གཅིག་པུའི་རྟོག་མེད་བདེ་ལེགས་ཡིད་མས་ཚངས་པའི་དབྱུག་པ་ལ་འཁྱུད་ནས། བདེ་བ་ཆེན་པོའི་གཙུག་ཏོར་ནས་གསང་བ་བདེ་བ་ཆེན་

པོའི་ནོར་བུའི་ཁ་རླུང་གི་འཁོར་ལོ་ཡན་ཆད། ཇི་ལྟར་ཙནྡན་གོ་ཤི་རཱའི་ཤིང་ལ་སྤྲུལ་ཆེན་པོ་ཡོད་པ་ལྟ་བུའོ། །ལྷའི་དབང་ཕྱུག་དེ་ལ་ཇི་ལྟར་རང་གི་ངོ་བོ་བཤད་པར་བྱ་སྟེ། ཚངས་པའི་རུས་པའི་དབྱུག་པའི་སྙིང་པོའི་དང་པོ་ཟུར་གསུམ་གྱི་རྣམ་པ་མདུད་པ་ལྟེ་བའི་སྲོག་གི་རླུང་དང་ལྡན་པའི་བྱང་ཆུབ་
ཀྱི་སེམས་འོད་ཀྱི་ཐིག་ལེ་ཤེས་རབ་མའི་ལྟེ་བས་ཟླ་བ་ཡར་ངོའི་ཚེས་དང་པོའི་ཆུ་ཚོད་གཅིག་གི་བར་དུ་འདོད་པའི་དགའ་བ་ཤར་བའོ། །པདྨའི་འབྲས་བུའི་འདོད་པ་ལས་འདར་བ་ཉེ་བ་དང་ལྡན་པ་ཚེས་གཉིས་ཀྱི་ཆུ་ཚོད་གཉིས་ཀྱི་བར་དུ་སྟོབས་ནུབ་པའོ། །དྲག་པོའི་མིག་གི་འདུས་པ་ལས་འགྲོ་བ་མཉམ་པ་
དང་ལྡན་པ་ཚེས་གསུམ་གྱི་ཆུ་ཚོད་གསུམ་གྱི་བར་དུ་སྤྲིན་གྱི་ཐིག་ལེ་ཤར་བའི་དུས་སུའོ། །རིགས་ཀྱི་མེ་ཏོག་གི་ནུ་མ་རེག་པ་ལས་དགའ་བ་གྱེན་དུ་འགྲོ་བ་དང་ལྡན་པའི་ཚེས་བཞིའི་ཆུ་ཚོད་བཞིའི་བར་དུ་ནུབ་པའོ། །ཚངས་པའི་མིག་མ་མཆུའི་བདུད་རྩི་བཏུང་བ་སྦྱིན་པ་ལས་རྒྱས་པ་ཐུར་དུ་བྱུང་
བ་དང་ལྡན་པ་ཚེས་ལྔའི་ཆུ་ཚོད་ལྔའི་བར་དུ་དབུགས་ཤར་བའི་དུས་སོ། །དུང་གི་མིག་གིས་སེན་མོ་བཏབ་པ་ལས་དྲག་པོ་འཇིགས་པའི་ཚུལ་དང་ལྡན་པའི་ཚེས་དྲུག་གི་ཆུ་ཚོད་དྲུག་གི་བར་དུ་ཨུཏྤ་ལའི་ནུབ་པའི་དུས་སོ། །རྣ་བའི་མིག་གི་སྦྱོར་བ་ལས་བྱུང་བའི་ཁྱབ་བྱེད་དང་ལྡན་པའི་ཚེས་བདུན་གྱི་ཆུ་
ཚོད་བདུན་གྱི་བར་དུ་མགོ་ཀ་ལ་ཤར་བའི་དུས་སོ། །བའི་མིག་གིས་འབྲས་བུའི་བསྐྱོད་པ་ལས་མཆོག་གི་དགའ་བ་བཞི་དང་ལྡན་པ་ཚེས་བརྒྱད་ཀྱི་ཆུ་ཚོད་བརྒྱད་ཀྱི་བར་དུ་ཡིད་ནུབ་པའི་དུས་སོ། །དུང་གི་ལྟེ་བའི་ནུ་མ་དམ་པོར་འཁྱུད་པ་ལས་འབར་བ་ལྷོད་པ་དང་ལྡན་པའི་ཚེས་དགུའི་ཆུ་ཚོད་དགུའི་
བར་དུ་སྙིང་པོ་ཤར་བའི་དུས་སོ། །གླང་པོ་ཆེའི་ལྟེ་བའི་སྐེའི་སྒྲ་ལས་ཐིག་ལེ་མཐའ་དང་ལྡན་པའི་ཚེས་བཅུའི་ཆུ་ཚོད་བཅུའི་བར་དུ་ཟླ་བ་ནུབ་པའི་དུས་སོ། །ཨུཏྤ་ལའི་ལྟེ་བའི་མིག་གི་འོ་ལས་མྱོས་པ་ཁྲུང་ཁྲུང་དང་ལྡན་པའི་ཚེས་བཅུ་གཅིག་གི་ཆུ་ཚོད་བཅུ་གཅིག་གི་བར་དུ་ཉི་མ་ཤར་བའི་དུས་སོ། །པདྨའི་
ལྟེ་བའི་སྤྲུག་ཅིང་བསིགས་པ་ལས་དགའ་བྲལ་གྱི་དགའ་བ་ཀྲོ་དྷ་དང་ལྡན་པའི་ཚེས་བཅུ་གཉིས་ཀྱི་ཆུ་ཚོད་བཅུ་གཉིས་ཀྱི་བར་དུ་དྲག་པོ་ནུབ་པའི་དུས་སོ། །བུང་བའི་ཁའི་གྲོང་ཁྱེར་ལས་ཨུ་ང་མི་རེམ་པ་དང་ལྡན་པའི་ཚེས་བཅུ་གསུམ་གྱི་ཆུ་ཚོད་བཅུ་གསུམ་གྱི་བར་དུ་མཆོག་གི་ཤར་བའི་དུས་སོ། །རྨ་བྱའི་ཁའི་

བསྐུམ་པ་ལས་ཚུལ་འབྱེད་པ་དང་ལྡན་པའི་ཚེས་བཅུ་བཞིའི་ཆུ་ཚོད་བཅུ་བཞིའི་བར་དུ་སྒྲ་ནུབ་པའི་དུས་སོ། །རྡོ་རྗེའི་ཁ་རུ་མཉམ་པར་སྦྱོར་བ་ལས་གཉིད་འོན་པ་དང་ལྡན་པའི་ཉའི་ཆུ་ཚོད་བཅྭ་ལྔའི་བར་དུ་རོའི་ཤར་བའི་དུས་སོ། །རྣམ་པར་རྒྱས་པའི་ཏིལ་གྱི་མེ་ཏོག་ཧ་བརྗོད་པ་ལས་ཚེས་
བཅུ་དྲུག་གི་ཆུ་ཚོད་བཅུ་དྲུག་གི་བར་དུ་ལྷན་ཅིག་སྐྱེས་པའི་དགའ་བ་གསལ་བ་དང་ལྡན་པའི་ཐོག་གི་ནུབ་པའི་དུས་སོ། །ཐོག་ནི་སྔགས་འཇིགས་བྱེད་པ་སྟེ། །དེ་ལ་ནུབ་པ་བཅུ་དྲུག་ཡིན། །ཤར་དང་ནུབ་པ་གང་ལ་ལར། །ལྷན་ཅིག་སྐྱེས་ལ་དེ་ཡོད་མིན། །ཡོན་པོའི་གདུ་བུའི་རྣམ་པ་ཡི། །
རྩ་ཡི་ལྟེ་དབུས་ཐིག་ལེ་དང་། །དགའ་བ་ལ་སོགས་ཤར་བ་དང་། །དེ་ནི་ནུབ་པའི་དུས་སུའོ། །དེ་ལྟའི་བདེ་ཆེན་རྣམ་པ་ནི། །འཕོ་བ་རུ་ནི་བདག་གིས་བཤད། །དངོས་དང་རྟེན་དང་རྣམ་པར་འབྱེད། །ཡེ་ཤེས་དགའ་བྲལ་ལྷན་རྟག་བཞུགས། །དངོས་པོ་རོ་མཉམ་ལྟ་བ་ཡིན། །འདོད་
པ་ཆགས་པའི་རྣམ་དག་བྱེད། །འདུས་པ་རེག་བྱེད་པ་ཡི། །དངོས་ནི་སྲིད་པ་མེད་པར་བྱེད། །འོ་དང་འཁྱུད་པའི་ལོངས་སྤྱོད་རྣམས། །དངོས་ནི་དངོས་པོ་རབ་གཅོད་བྱེད། །པུཎྜ་རཱི་ཀའི་འབྱུང་ས་ཡིས། །ཟུར་གསུམ་ལ་སོགས་བརྟེན་པ་ཡིས། །རྟེན་ནི་བསམ་དུ་མེད་པ་སྟེ། །
ཆོས་དབྱིངས་རང་གི་ངོ་བོ་ཡིན། །སྟེང་དང་འོག་ནི་མཉམ་པའི་རྟེན། །མྱ་ངན་འདས་པ་རྟོག་མེད་བྱེད། །བདེ་བ་ཆེན་པོའི་བདུད་རྩིའི་རྟེན། །རིགས་ལྔ་ཡི་ནི་མཆོག་གི་གཞི། །ཡེ་ཤེས་འདོད་པ་ལྷུན་གྱིས་གྲུབ། །འདར་བ་དགའ་བ་མཆོག་གི་དགའ། །ཡེ་ཤེས་ཤེས་པ་ལྷུན་གྱིས་
གྲུབ། །གཞི་མེད་པ་ཡི་ལྷན་ཅིག་སྐྱེས། །གཞི་དང་བཅས་པ་དགའ་བྲལ་དགའ། །ཡེ་ཤེས་ང་རྒྱལ་མེད་པར་བྱེད། །ཆོས་ཀུན་རྣམ་པར་ཤེས་པ་སྟེ། །ཡེ་ཤེས་ཤེས་བྱ་དོན་གྲུབ་བྱེད། །རྣམ་པར་འབྱེད་པ་འོད་གཟུགས་གྲགས། །ཚུལ་དང་སྤྲིན་དང་སྟོབས་བདག་ཉིད། །
རྣམ་པར་འབྱེད་པ་དངོས་ཀུན་དུ། །རྣམ་པའི་གཞི་དང་བཅས་པ་ཐིམ། །སྐྱེ་དང་གནས་པ་སྒྱུ་འཕྲུལ་གྱི། །རྣམ་པར་འབྱེད་པ་གཏི་མུག་གསོད། །འཁོར་ལོ་སྔགས་དང་བྱ་བ་ལ། །འཇོམས་བྱེད་དེ་ནི་རྣམ་པར་འབྱེད། །རྩ་ཡི་སྙིང་པོ་ཐམས་ཅད་ནི། །བཅོམ་པའི་ཕྱིར་ན་

རྣམ་པར་འབྱེད། །ཡེ་ཤེས་ཀྱི་ནི་སྙིང་པོའི་མཐའ། །རྣམ་པར་འབྱེད་པ་གསོལ་བ་ཡིན། །ཡེ་ཤེས་ཤིན་ཏུ་བདེ་བྱེད་ཕྱིར། །རྣམ་པར་འབྱེད་པར་དེ་ཕྱིར་བརྗོད། །གཉིས་སུ་མེད་པ་མཆོག་ཞི་བ། །ཆགས་པ་དང་ནི་ཆགས་བྲལ་མིན། །དྲི་མ་མེད་པ་བཅོས་མེད་པ། །རྒྱུད་དང་
སྔགས་དང་རིམ་པ་བྲལ། །རང་རིག་པ་དང་བརྗོད་དུ་མེད། །ཐམས་ཅད་ཁྱབ་ཅིང་དཔེ་བྱད་མེད། །དེ་ལྟ་བུ་ནི་དོན་དམ་པ། །ལྷ་ཡི་དབང་ཕྱུག་རྣམ་པར་འབྱེད། །སངས་རྒྱས་བྱང་ཆུབ་སེམས་ཀུན་གྱི། །ཐུགས་ཀར་རྟག་ཏུ་བཞུགས་པའོ། །རྣམ་པར་འབྱེད་ལ་སྒོམ་པ་མེད། །ཕུང་པོ་
ཁམས་ལ་སོགས་དང་བྲལ། །སྒྲ་ལ་སོགས་པའི་ཆོས་ཀྱིས་སྟོང་། །སྟོང་དང་སྙིང་རྗེའི་བདག་ཉིད་ཡིན། །ཚངས་པ་ཁྱབ་འཇུག་དྲག་པོ་དང་། །དབང་ཕྱུག་རྟག་ཏུ་ཞི་བ་དང་། །དེ་རྣམས་ཀུན་གྱི་ཡབ་ཡིན་ནོ། །འབྱེད་པ་དང་ནི་མཆོག་རྨད་འབྱུང་། །དེ་ཉིད་ཡེ་ཤེས་ཐིག་ལེ་འདིར། །
མཆོག་རྣམས་གྲུབ་པའི་མངའ་བདག་གོ། །འབྱུང་བ་ཀུན་གྱི་ནང་ཡོད་པ། །སྐུ་ལྔའི་བདག་ཉིད་རབ་མཆོག་ཡིན། །མཁའ་འགྲོ་དབང་ཕྱུག་ལྔ་བདག་པོ། །ནམ་མཁའ་བདག་ཉིད་སྐྱེ་མེད་དོ། །ནམ་མཁའ་ལྔ་ཡི་ནང་དུ་ཐིམ། །སངས་རྒྱས་ཀུན་གྱིས་ཕྱག་བྱས་པ། །དེ་ལྟའི་གསང་ཆེན་ཡེ་
ཤེས་ནི། །ཡེ་ཤེས་དབང་པོ་རྙེད་དཀའ་བ། །ཇི་ལྟར་ནོར་ནི་རྐུན་མོ་ཡིས། །མ་རྙེད་བྱེད་ལྟར་འབད་པས་སྦ། །དཔལ་ཡེ་ཤེས་ཐིག་ལེ་ལས་འཕོ་བའི་དུས་ཤར་བ་དང་ནུབ་པ་ཞེས་བྱ་བའི་ལེའུ་སྟེ་དང་པོའོ།། །།ལྷའི་དབང་ཕྱུག་གིས་གསོལ་བ། ཀྱཻ་བཅོམ་ལྡན་འདས། དེ་ཉིད་
གསུམ་བདག་ང་རོ་ཅི། །དེ་བཞིན་ཟླ་བ་བདེ་བ་མཆོག །ཕྱག་རྒྱ་ཆེན་པོའི་རྣམ་པ་ཅི། །དེ་ཡི་མཐའ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་གསུམ་ནི་སྐུ་གསུང་ཐུགས། །རྡོ་རྗེ་གསུམ་ནི་ཡེ་ཤེས་མཆོག །ཟླ་བ་བདེ་བ་མཆོག་ཅེས་པ། །དེ་ཡི་ཕུང་པོ་
དབང་པོ་ཁམས། །ཕྱག་རྒྱ་ཆེན་པོ་རྡོར་སྙིང་པོ། །དེ་ཡི་མཐའ་ནི་བྷ་གར་དྲན། །མཐའ་དང་སྣང་བ་རྣམ་པར་ཤེས། །ཆུ་ཡི་ཟླ་བ་བཞིན་དུ་མཐོང་། །ཆོས་ཀུན་རང་བཞིན་དྲི་མ་མེད། །སྣང་བ་ལས་ནི་ཐམས་ཅད་འབྱུང་། །སྐྱེ་བ་དང་ནི་འགག་པ་མེད། །ཡང་དག་འོད་ལས་ཐམས་ཅད་

འབྱུང་། །དེའི་ཕྱི་རོལ་ཆོས་ཐམས་ཅད་ཀྱི་བདག་ཉིད་ནི་བཅོམ་ལྡན་འདས་དཔལ་ཡེ་ཤེས་ཐིག་ལེའོ། །དེ་ལ་དང་པོ་རྣམ་པ་དང་བཅས་པའི་དཀྱིལ་འཁོར་གྱི་འཁོར་ལོའི་བསྐྱེད་པ་བསྒོམ་པ་དང་། སྔགས་དང་བཟླས་པ་དང་། །སྦྱིན་སྲེག་དང་མཆོད་སྦྱིན་དང་། གཏོར་
མ་དང་མཆོད་པ་དང་། གནས་ཀྱི་བརྗོད་པ་དང་། དབང་བསྐུར་གྱི་རིམ་པ་དེ་དག་བཤད་དོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་གསུམ་གྱི་བདག་ཉིད་དང་ཟླ་བ་མཆོག་གི་བདེ་བ་དང་ཕྱག་རྒྱ་ཆེན་པོའི་མཐའ་ལ་སོགས་པའི་ཕྱོགས་ཙམ་བསྟན་པའི་ལེའུ་སྟེ་གཉིས་པའོ།། །།ལྷའི་
དབང་ཕྱུག་གིས་གསོལ་པ། ཚངས་པའི་རུས་པ་སྲོག་གི་དབྱུག་པའི་སྟེང་དང་འོག་གི་འཕོ་བ་ཆ་གཉིས་སུ་རྩ་སུམ་ཅུ་རྩ་གཉིས་ཀྱི་རང་བཞིན་ལས་ལེའུ་དང་པོར་གང་གསུངས་པ་ནི་དེ་རྣམས་ཀྱི་ནང་ནས་གཅིག་ཏུ་རྟོག་མེད་བདེ་ལེགས་ཡིད་མ་གཅིག་པུ་ངེས་པར་བསྟན་པར་མཛད་ཀྱི། བཅོམ་
ལྡན་འདས་རྩ་གཞན་རྣམས་ཅིའི་དོན་གྱི་ཕྱིར་འདིར་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། གཅིག་པུ་རྟོག་མེད་བདེ་ལེགས་ཡི་དམ་དེ་ནི་བྱེ་བ་ཕྲག་བདུན་ཅུ་རྩ་གཉིས་ཀྱི་རྩ་ཕྲ་མོའི་དྲ་བ་རྣམས་རོལ་མོའི་དོན་དུ་བྱས་ནས། སྣ་ཚོགས་ཀྱི་བདུད་རྩི་བསམ་གྱིས་མི་ཁྱབ་པ་ཆོས་ཀྱི་
འབྱུང་གནས་ཆེན་པོའི་ས་སྟེངས་སུ་འབྱུང་ཞིང་སྐྱེའི་ཆར་འབབ་པའི་དོན་དུ་བསྟན་པའོ། །ལྷའི་དབང་ཕྱུག་གིས་གསོལ་པ། དེ་ལྟར་ལགས་མོད་ཀྱིས་ཀྱང་། རྩ་སུམ་ཅུ་རྩ་གཅིག་པོ་རྣམས་ཀྱི་མཚན་དང་གྲངས་འདིར་མཆོག་གི་དབང་ཕྱུག་ལ་བཀའ་དྲིན་ཞུའོ། །བཅོམ་ལྡན་འདས་ཀྱིས་
བཀའ་སྩལ་པ། ལྷའི་དབང་ཕྱུག་སུམ་ཅུ་རྩ་གཅིག་གི་མིང་རྣམས་ཉོན་ཅིག །གསང་བ་དང་། ཟབ་པ་དང་། སྲེད་པ་དང་། ཕྲ་མོ་དང་། བདུད་རྩི་མ་དང་། བདུད་རྩི་ཁྲི་མ་དང་། དག་པ་མ་དང་། བདེ་བ་མ་དང་། སྟོབས་མ་དང་། ཐབས་མ་དང་། ཧྲུད་ཧྲུད་མ་དང་། སེར་མ་
དང་། འོ་རྒྱུན་མ་དང་། དགའ་མ་དང་། སྣུམ་མ་དང་། ཁྲོ་མ་དང་། མངར་མ་དང་། སྐྱུར་མ་དང་། ཁབ་མ་དང་། བསྐ་མ་དང་། ཚ་མ་དང་། ལན་ཚྭ་མ་དང་། རྩུབ་མ་དང་། དད་མ་དང་། སྟོབས་མ་དང་། དགའ་བྱེད་མ་དང་། དགའ་སྦྱིན་མ་དང་། གཉིད་མ་དང་།

བཅད་སྐྱེད་མ་དང་། ཁོང་ཆུད་མ་དང་། ཚེ་མ་སྟེ། དེ་དག་ནི་རྩ་སུམ་ཅུ་རྩ་གཅིག་སྟེ། སྟེང་དང་འོག་ཏུ་འཕྲོ་བ་གཉིས་ཀྱི་ཟླ་བ་དང་ཉི་མ་གཟས་ཟིན་པའི་དུས་སུ་ཚིགས་རྒྱས་པའོ། །དེ་ནས་དབང་གི་རིམ་པ་བཤད་དེ། ཇི་ལྟ་ཡི་ནི་གོ་རིམས་སུ། །དབང་བསྐུར་མཆོག་ནི་རྙེད་པ་གང་། །
ཐམས་ཅད་དུ་ནི་ནུས་པར་འགྱུར། །ཡོན་ཏན་ཚུལ་ཁྲིམས་ལྡན་པའི་བུ། །བླ་མས་དང་པོར་དབང་བསྐུར་བྱ། །ཁྲུས་བྱས་མིག་དག་རས་ཀྱིས་དགབ། །སྙིམ་པ་མེ་ཏོག་གིས་བཀང་ལྡན། །ཡོན་ཕུལ་ནས་ནི་དགའ་དང་བཅས། །ལྷ་ཡི་དབང་ཕྱུག་དབང་བསྐུར་བྱ། །དབང་བསྐུར་
ལས་ནི་སངས་རྒྱས་ས། །ཐེ་ཚོམ་མེད་པར་རྙེད་པར་འགྱུར། །དེ་བས་ཀུན་ཏུ་རབ་འབད་དེ། །དཔལ་ལྡན་དབང་རྒྱལ་བླང་བར་བྱ། །དབང་བསྐུར་བཞི་རུ་ཕྱེ་པ་ནི། །སློབ་དཔོན་ལ་སོགས་དབྱེ་བ་ཡིན། །དང་པོར་སློབ་དཔོན་གྱི་ནི་དབང་། །གཉིས་པ་དེ་ནི་གསང་བའི་
དབང་། །གསུམ་པ་ཤེས་རབ་ཡེ་ཤེས་དབང་། །དེ་ལྟར་དེ་བཞིན་བཞི་པའོ། །བཞི་གཉིས་རབ་དུང་བྱེ་བ་ནི། །སློབ་དཔོན་དབང་ལ་སོགས་པར་བསྐུར། །རྡོ་རྗེ་སློབ་དཔོན་དབང་གསུམ་དུ། །ནམ་མཁའ་མཉམ་དུ་བདག་གིས་བཤད། །དེ་གཉིས་ལ་ནི་བཅུ་གཅིག་བྱ། །
རྡོ་རྗེ་སློབ་དཔོན་དབང་རྒྱལ་པོ། །དབང་བསྐུར་དེ་ནི་རིན་པོ་ཆེ། །ཁམས་གསུམ་གྱིས་ནི་ཕྱག་བྱས་པ། །ཐར་པར་འགྲོ་བ་འགྲུབ་དོན་དུ། །འདི་རུ་རིམ་པས་བདག་གིས་བཤད། །ཆུ་དང་དབུ་རྒྱན་རྡོ་རྗེ་དང་། །དྲིལ་བུ་མིང་དང་བརྟུལ་ཞུགས་དང་། །ལུང་བསྟན་པ་དང་
སྐྱབས་སྦྱིན་དང་། །ཕྱག་རྒྱ་སྔགས་དང་ཡེ་ཤེས་སོ། །རྣལ་འབྱོར་རྒྱུད་ལ་མོས་པ་ལ། །དབང་བརྒྱད་ཕྱེ་ལ་སྦྱིན་པར་བྱ། །རྣལ་འབྱོར་བླ་མ་ལ་མོས་ལ། །བཅུ་གཅིག་བདག་ཉིད་སྦྱིན་པར་བྱ། །རྣལ་འབྱོར་མ་ལ་མོས་པ་རྣམས། །གསང་བའི་དབང་ནི་སྦྱིན་པའོ། །གསང་བ་
གཉིས་སུ་དབྱེ་བར་གསུངས། །དེ་ནི་ཕྱི་དང་ནང་གིས་སོ། །རྣལ་འབྱོར་རྣལ་འབྱོར་བླ་མའི་ཕྱིར། །དབང་བསྐུར་ཤེས་པས་སྦྱིན་པར་བྱ། །ནང་གི་རྣལ་འབྱོར་མ་ཡི་རྒྱུད། །གསང་བའི་དབང་ནི་རབ་ཏུ་སྦྱིན། །དེ་ནི་གསང་བ་གསུམ་དུ་དབྱེ། །སྐྱེ་དང་མདུད་དང་དེ་བཞིན་སད། །

ཤེས་རབ་རྣམ་པ་གཉིས་སུ་དབྱེ། །བསྐྱེད་དང་རྫོགས་པའི་བྱེ་བྲག་གོ། །ཤེས་རབ་བརྒྱད་གཉིས་ལོ་དང་ལྡན། །སྤྱན་རིངས་ཆ་ལ་མཁས་པ་དང་། །ཡན་ལག་ཙནྡན་སར་པའི་དྲི། །ཤིན་ཏུ་འཇམ་པའི་ཁུ་བས་ཚིམ། །གཟུགས་བཟང་སྔོ་ལ་སྐལ་ལྡན་མ། །འོ་འཛིན་
མཁྲང་ཞིང་འཇམ་ལ་མཐོ། །བསམ་གཏན་སྔགས་ལ་དད་ཅིང་ཞི། །དབང་བསྐུར་དང་ལྡན་ཐུགས་རྗེ་གྲུབ། །དེ་ལྟའི་རབ་གྲགས་འབད་དེ་བཙལ། །དབང་གི་དོན་དུ་བླ་མ་ཞུ། །དེ་ཀུན་མཚན་ཉིད་དང་ལྡན་པ། །ཆུང་མ་ཡང་ན་སྲིང་མོའམ། །བུ་མོ་ཡང་ན་མནའ་མའམ། །མཁས་
པས་འབད་དེ་བླང་བར་བྱ། །རང་གི་རིགས་ནི་ཇི་བཞིན་རྙེད། །ཁུ་བ་དང་བཅས་གཞོན་ནུ་མ། །སྣ་ཚོགས་རྒྱན་གྱིས་ལེགས་པར་བརྒྱན། །མཁས་པས་བླ་མ་ལ་ནི་འབུལ། །དབང་གི་མན་ངག་གསུམ་དུ་བཞུགས། །ནང་གི་ཡིས་ནི་བརྡ་བྱེད་པ། །བཞི་པ་འབྲས་བུའི་ངོ་བོར་
གྲགས། །གསུམ་དང་བྲལ་བའི་གསུམ་བདག་ཉིད། །དགའ་བ་ལ་སོགས་བྱེ་བྲག་ཏུ། །རྡོ་རྗེ་གཞོན་ནུ་མས་གསལ་དབྱེ། །དབང་བསྐུར་གྱིས་ནི་འཁོར་ལོས་སྒྱུར། །ཐེ་ཚོམ་མེད་པར་ཡིན་པར་འགྱུར། །དབང་གིས་དྲི་མ་མེད་པར་བྱེད། །ཆུ་ལ་སོགས་པས་རས་བཀྲུས་
བཞིན། །ཆོ་ག་ཐམས་ཅད་རྫོགས་པའི་དབང་། །ཡན་ལག་དེ་ཉིད་དང་ནི་བཅས། །གཅིག་ནས་གཅིག་ཏུ་རིམ་པས་བརྒྱུད། །བླ་མ་རབ་ཀྱི་ཞལ་ནས་བླང་། །གཞན་དུ་རྟོག་གེའི་ཚོགས་ལ་མཁས། །སྒྲ་ཡི་བསྟན་བཅོས་རྟག་མོས་ལ། །དབང་གི་མཆོག་ནི་རྣམ་པ་གསུམ། །
བླང་བར་མི་བྱ་སྦྱིན་མི་བྱ། །ཡང་དག་འབྲས་བུ་འདོད་པ་ན། །དེ་ནི་རིང་དུ་སྤང་བར་བྱ། །དེ་ལྟར་ཡང་བྱེ་མ་དུ་མ་བསྡུས་པའི་ཕུང་པོ་ལ་འབད་དེ་རྣམ་པར་བཙིར་བས་མར་ཁུའི་ཐིགས་པ་ཕྱེད་ཀྱང་མི་འབྱུང་ངོ་། །དེ་བཞིན་དུ་རྟོག་གེ་མང་པོ་དང་། ངག་གི་དྲ་བ་དང་ལྡན་པ་བསྟན་པའམ། ཉན་
པ་ལས་ནི་དེ་ལ་ཉོན་མོངས་པ་འབའ་ཞིག་ལས་གཞན་འབྲས་བུ་ནི་རྙེད་པ་མེད་དོ། །དེ་བས་ན་གཅིག་ནས་གཅིག་ཏུ་རིམ་པས་བརྒྱུད་དེ་རྙེད་པའི་དབང་ཤེས་པ་དེ་ནི་རྡོ་རྗེ་སློབ་དཔོན་བླ་མ་ཆེན་པོའོ། །མི་གསལ་མཆོག་གི་བཀྲ་ཤིས་ཅན། །སངས་རྒྱས་འབྲས་བུ་སྦྱིན་པའི་སྦྱིན། །བླ་མའི་གཟུགས་

སོ་གཞན་མ་ཡིན། །བསོད་ནམས་ཐམས་ཅད་ཀྱི་ནི་གནས། །སངས་རྒྱས་བྱང་ཆུབ་སེམས་དཔའ་དང་། །ཚངས་པ་བརྒྱ་བྱིན་ཁྱབ་འཇུག་ལྷ། །དེ་ཀུན་གྱིས་ནི་བདག་མཆོད་འོས། །མ་གྲགས་ཀྱང་ནི་གྲགས་གཟུགས་ཡིན། །དེ་ལྟར་ཤེས་ནས་སྒྲུབ་པ་པོས། །འབད་
པ་ཡིས་ནི་མཆོད་པར་བྱ། །བླ་མའི་ཞལ་སྔ་མཆོད་བྱས་ན། །ཅི་འདོད་པ་ཡི་འབྲས་བུ་རྙེད། །རྒྱུད་ཀྱི་དོན་ནམ་དབང་གི་དོན། །ཤེས་ནས་བླ་མ་མི་མཆོད་པ། །ས་སྟེངས་ཉི་ཟླ་ཡོད་པར་དུ། །དེ་ནི་མནར་མེད་པ་རུ་འགྲོ། །དེ་བས་ཀུན་ཏུ་འབད་པ་ཡིས། །གུས་པས་བླ་མ་
མཆོད་པར་བྱ། །རིན་ཆེན་སྣ་ཚོགས་བཟོར་བྱས་ལེགས། །གསེར་གྱི་པདྨ་དྲི་མ་མེད། །མུ་ཏིག་དོ་ཤལ་རིན་ཐང་མེད། །སྣ་ཚོགས་དུ་མ་ཡི་ནི་གོས། །གཅེས་པའི་བཙུན་མོ་བུ་དང་བཅས། །གླང་ཆེན་རྟ་དང་བྲན་ལ་སོགས། །དཔལ་ལྡན་བླ་མའི་སྤྱན་སྔ་རུ། །དད་གུས་བརྟན་
པས་དབུལ་བར་བྱ། །དཔལ་ཡེ་ཤེས་ཐིག་ལེ་ལས་ཡོན་དབུལ་བ་དང་བཅས་པའི་དབང་གི་རིམ་པ་ཞེས་བྱ་བའི་ལེའུ་སྟེ་གསུམ་པའོ།། །།དེ་ནས་གཞན་ཡང་རབ་བཤད་ཉོན། །གནས་ཀྱི་རྙེད་པ་ཇི་བཞིན་དོན། །ཀ་བ་གཅིག་དང་སྒོ་དགུར་ལྡན། །རྡོ་རྗེ་རྩིག་པའི་རྒྱན་དང་ལྡན། །རྡོ་
རྗེའི་ཐིག་དང་བླ་རེས་ནི། །ཀུན་ཏུ་ཡོངས་སུ་བསྐོར་བ་ཡིན། །རླུང་ལ་སོགས་པའི་རིམ་པས་དབྱེ། །འབྱུང་བ་བཞི་དང་ལྡན་པ་ཡིན། །ཇི་སྙེད་ནམ་མཁའི་མཐའ་ཀུན་ཏུ། །ཐམས་ཅད་བདག་ཉིད་རྟག་ཏུ་བཞུགས། །རྡོ་རྗེ་གུར་གྱི་དབུས་སུ་ནི། །སྲུང་བའི་འཁོར་ལོ་འཁོར་བཞིན་
པ། །རྩིབས་བཅུ་པ་ལ་གསེར་གྱི་མདོག །ཁྲོ་བོ་བཅུ་དང་བཅས་པའོ། །ཁྲོ་བོ་ཐམས་ཅད་ཞལ་གསུམ་པ། །སྤྱན་གསུམ་པ་ལ་ཕྱག་དྲུག་པ། །གཡས་བརྐྱང་བས་བཞུགས་པ་གསུས་པ་རློབ། སྦྲུལ་གྱི་རྒྱན་གྱིས་བརྒྱན་པ། ལྗགས་འདྲིལ་བ། མཆེ་བ་འཇིགས་
པ་གཙིགས་པ། དབུ་སྐྲ་སེར་པོ་གྱེན་དུ་འགྲེང་བ། ཨག་ཚོམ་དང་སྨིན་མཆེ་ཞིང་རིང་བ་སྟེ། ཤར་གྱི་འཁོར་ལོའི་རྩིབས་ལ་གཤིན་རྗེའི་གཤེད་སྐུ་མདོག་ནག་པོ་གཡས་དང་གཡོན་པའི་ཞལ་གཉིས་ནི་སེར་བ་དང་དམར་པོ། ཕྱག་གཡས་གཉིས་ན་རལ་གྲི་དང་རྩེ་གསུམ་པ། ཕྱག་

གཡོན་གཉིས་ན་ཐོད་པ་དང་དབྱུག་པའོ། །ལྷོ་ཕྱོགས་ཀྱི་རྩིབས་ལ་ཤེས་རབ་མཐར་བྱེད་དཀར་པོ་གཡས་ཀྱི་ཞལ་དམར་བ། གཡོན་སྔོ་བ། ཕྱག་གཡས་པ་གཉིས་ཀྱིས་དབྱུག་པ་དང་རལ་གྲི། །ཕྱག་གཡོན་པ་གཉིས་ན་མཚོན་རྩེ་གཅིག་པ་དང་མགོ་བོའོ། །ནུབ་
ཏུ་པདྨ་མཐར་བྱེད་དམར་པོ་ཞལ་གཡས་དཀར་ཞིང་གཡོན་སྔོན་པོ། གཡས་དང་གཡོན་གྱི་ཕྱག་བཞིན་རལ་གྲི་དང་། འཁོར་ལོ་དང་། ཟླ་བ་ཕྱེད་པ་དང་། རི་རབ་ཟུར་བརྒྱད་པའོ། །བྱང་དུ་བགེགས་མཐར་བྱེད་སྔོན་པོ་གཡས་དང་གཡོན་གྱི་ཞལ་གཉིས་ནི་དཀར་པོ་དང་དམར་པོའོ། །གཡས་
དང་གཡོན་གྱི་ཕྱག་བཞིན་རྡོ་རྗེ་རྒྱ་གྲམ་དང་། རལ་གྲི་དང་། མདུང་ཐུང་དང་དུང་ངོ་། །མེའི་མཚམས་སུ་འདོད་པའི་རྒྱལ་པོའི་གཟུགས་ཅན་གཡས་དང་གཡོན་གྱི་ཞལ་གཉིས་ནི་དཀར་བ་དང་དམར་བ། གཡས་ཀྱི་ཕྱག་གཉིས་ན་རལ་གྲི་དང་རིན་པོ་ཆེ། ཕྱག་གཡོན་ན་སྟ་རེ་དང་མདུང་ཐུང་ངོ་། །
སྲིན་པོའི་མཚམས་སུ་དབྱུག་བ་སྔོན་པོ་ཆུ་སྲིན་འཛིན་སེར་པོའི་གཟུགས། གཡས་དང་གཡོན་གྱི་ཞལ་ལྗང་བ་དང་དམར་བ། ཕྱག་གཡས་གཉིས་ན་རྒྱ་གྲམ་རྩེ་གསུམ་དང་རལ་གྲི། ཕྱག་གཡོན་གཉིས་ན་སཱ་ལའི་ཤིང་ཆེན་པོ་དང་། དེ་བཞིན་དུ་མེའོ། །རླུང་མཚམས་སུ་སྟོབས་པོ་
ཆེ་དུ་བའི་མདོག །གཡས་པ་དང་། གཡོན་པའི་ཞལ་གཉིས་ནི་སེར་བ་དང་དམར་པོ། ཕྱག་བཞི་ལ་རལ་གྲི་དང་དུང་དང་དགྲ་སྟ་དང་རྔ་མའོ། །དབང་ལྡན་གྱི་མཚམས་སུ་མི་གཡོ་མགོན་དཀར་ནག་ཞལ་གཡོན་དམར་པོ་དང་། གཡས་སྔོན་པོ། གཡས་གཡོན་གྱི་ཕྱག་བཞི་ན་
རལ་གྲི་དང་ལྕགས་ཀྱུ་དང་པི་ཝང་དང་རྔེའུ་ཆུང་ངོ་། །སྟེང་དུ་གཙུག་ཏོར་འཁོར་ལོས་སྒྱུར་བ་སྐུ་མདོག་སེར་པོ་གཡས་དང་གཡོན་པའི་ཞལ་གཉིས་ནི་སྔོ་བ་དང་དཀར་བ། ཕྱག་བཞི་ན་འཁོར་ལོ་དང་། རལ་གྲི་དང་། ཀ་པཱ་ལ་དང་། ཁྭ་ཊྭཱྃ་གའོ། །འོག་ཏུ་སུམ་བྷའི་རྒྱལ་པོ་སྐུ་མདོག་ནམ་
མཁའ་ལྟར་སྔོ་བ། གཡས་ཀྱི་ཞལ་མཐོན་མཐིང་ཆེན་པོའི་འོད་ཅན། གཡོན་པ་ནི་ཉི་མ་གཞོན་ནུའི་འོད་ཅན། གཡས་ཀྱི་ཕྱག་གཉིས་ན་རལ་གྲི་དང་ལྕགས་ཀྱུ། གཡོན་གཉིས་ན་གྲི་གུག་དང་ཐོད་པའོ། །ཐམས་ཅད་ཀྱི་རྩ་བའི་ཕྱག་གཉིས་ཀྱིས་རྡོ་རྗེ་དང་པདྨ་བསྣམས་པ། རང་གི་

འོད་ཀྱི་ཤེས་རབ་མ་ལ་འཁྱུད་པའོ། །འདོད་པའི་རྒྱལ་པོ་ལ་སོགས་པ་ནི་འཇིག་རྟེན་སྐྱོང་བ་བརྒྱད་ཀྱི་སྟེང་དུའོ། །གཙུག་ཏོར་འཁོར་ལོས་སྒྱུར་བ་དང་སུམ་བྷའི་རྒྱལ་པོ་ནི་ཟླ་བ་དང་ཉི་མའི་སྟེང་དུ་ཤེས་པར་བྱའོ། །འདིའི་འཁོར་ལོའི་ལྟེ་བ་གྲུ་གསུམ་གྱི་གཟུགས་ཏེ་རི་བོང་ཅན་དཀར་པོའི་
འོད་ཆོས་ཀྱི་འབྱུང་གནས་སོ། །དེའི་དབུས་སུ་སྔར་བསྟན་པའི་འབྱུང་བ་བཞི་ཇི་ལྟ་བུའི་རིམ་པས། རྣམ་པར་སྣང་མཛད་ཡོངས་སུ་གྱུར་པ་ལས་དུར་ཁྲོད་བརྒྱད་དང་ལྡན་པའི་གཞལ་ཡས་ཁང་ཡངས་པ་ཆེན་པོའི་འཕར་མ་གཉིས་ཉི་མའི་གདན་དུ་སྣ་ཚོགས་པདྨ་འདབ་མ་བརྒྱད་ཀྱི་ལྟེ་
བར་འཇིགས་བྱེད་དང་དུས་མཚན་གྱི་བདེ་བྱེད་མའི་སྟེང་དུ་ཚུལ་དང་ཐིགས་པའི་རང་གི་ངོ་བོ་ཨཱ་ལི་དང་ཀཱ་ལི་གཉིས་ལས་བྱུང་བ། མྃ་ཧཱུྃ་ལས་དཔལ་ཡེ་ཤེས་ཐིག་ལེ་ཕྱག་རྒྱ་ཆེན་པོས་འཁྱུད་ཅིང་ཞལ་བརྒྱད་པ། ཕྱག་བརྒྱད་གཡས་བརྐྱང་བ། ཞལ་བཞི་ནི་གནག་པ་དང་སེར་བ།
དམར་བ་དང་ལྗང་གུའོ། །གཞན་བཞི་ནི་ཨུཏྤ་ལ་སྔོན་པོའི་འདབ་མ་ལྟ་བུའོ། །རྡོ་རྗེ་དང་། དྲིལ་བུ་དང་། རྔེའུ་ཆུང་དང་། ཀ་པཱ་ལ་དང་། ཁ་ཊྭཱྃ་ག་དང་། རལ་གྲི་དང་། མདའ་གཞུའོ། །སྣ་ཚོགས་རྡོ་རྗེ་དང་ཟླ་བ་ཚེས་པས་རལ་པའི་དབུ་རྒྱན་དང་དཔྲལ་བར་ཐོ་པའི་སྟེང་དུ་མི་
བསྐྱོད་པའི་ཅོད་པན་ཅན་ནོ། །ཕྱག་རྒྱ་དྲུག་གིས་སྐུ་བཅིངས་པ། རྒྱུ་མས་བརྒྱུས་པའི་མགོ་བོ་ཆེན་པོའི་དོ་ཤལ་གྱིས་སྐུ་བརྒྱན་པ། ཚངས་པའི་པགས་པས་རྐེད་པའི་ཤམ་ཐབས་ཅན་གྱི་སྐུར་བཞེངས་ཤིང་ཧ་ཧའི་གད་རྒྱངས་དང་ཕེྃ་ཀ་རའི་ཚོལ་བའི་སྒྲ་ཆེན་པོའི་ང་རོ་བསྒྲགས་ཤིང་བརྗོད་པ་
ཙམ་གྱིས་ཚངས་པའི་ཡུལ་ས་བྱེ་བའི་གྲངས་ཀྱི་ཐོད་པའི་ལྟོ་བརླག་པར་མཛད་པ། མི་བཟད་པ་དང་། མི་སྡུག་པ་དང་། ཅེ་སྤྱང་གི་ཚོགས་འཇིགས་སུ་རུང་བ་དང་། ཤ་ཟའི་ཚོགས་ཧ་ཧར་རྒོད་པ་དང་། ནག་པོའི་མེ་ཅན་གྱི་དུར་ཁྲོད་ཆེན་པོ་བརྒྱད་ན་འཇིགས་བྱེད་ཀྱི་ཉམས་དགུ་དང་ལྡན་
པའི་གར་བྱེད་པའོ། །དཔལ་ཡེ་ཤེས་ཐིག་ལེ་ལས་དཀྱིལ་འཁོར་གྱི་འཁོར་ལོ་བསྐྱེད་པ་ཞེས་བྱ་བའི་ལེའུ་སྟེ་བཞི་པའོ།། །།ད་ནི་སྔགས་མཆོག་བཤད་བྱ་བ། །སྒྲུབ་པ་པོ་ནི་འགྲུབ་འགྱུར་བ། །ས་ཡི་ཆ་ནི་མཉམ་པའི་མཆོག །སྦྲང་རྩི་ག་བུར་གྱིས་ནི་བྱུག །དྲི་ཞིམ་པ་ཡི་མེ་ཏོག་

བཀྲམ། །མེ་ཏོག་གིས་ནི་ཆལ་བར་དགྲམ། །ཆུ་ངོགས་ཡང་ན་ཐང་སྟོང་དུ། །རྡོ་རྗེ་སྐུད་པ་ཡིས་ནི་བསྐོར། །མིག་མཛེས་རྡོ་རྗེ་གཞོན་ནུ་མ། །ཟླ་བ་ཉི་མས་པདྨ་ཁེངས། །ལང་ཚོ་གསར་ལ་རེག་བྱ་འཇམ། །དང་པོ་མཁས་པས་འཇུག་པར་བྱ། །སྔགས་ཀྱི་
གནས་སུ་ལུགས་ཇི་བཞིན། །ལེགས་དགྱེས་ཤིན་ཏུ་སྦྱོར་བར་བྱ། །དེ་ཡི་སྦྱོར་བས་གང་ཞིག་འབྱུང་། །ཁ་དང་ས་སོགས་མཆོད་པར་བྱ། །པདྨ་འདབ་མ་བརྒྱད་པ་བྱ། །རྡོ་རྗེ་ཡི་ནི་ཕུར་བུ་བཅུ། །མཁས་པས་ཁྲོ་བོའི་སྔགས་ཀྱིས་གདབ། །ཨཱ་ལི་ཀཱ་ལི་མཉམ་བྱས་ནས། །འདབ་
མ་ཀུན་ལ་རིམ་པས་དགོད། །ཨཱ་ལི་ཡེ་ཤེས་འདབ་མར་གཅིག །ཀཱ་ལི་འདབ་མ་བདུན་དུ་དྲན། །འདབ་མ་རེ་རེ་ཡི་གེ་ལྔ། །ལྔ་པ་ལྔ་ནི་ལྔ་ལའོ། །འདབ་མ་གཉིས་སུ་བཞི་གཉིས་ཏེ། །ཀྵཿཡི་ཡིག་འབྲུ་ལྟེ་ནང་ངོ་། །དབྱངས་ཡིག་གསལ་ཡིག་བྱེ་བྲག་ཏུ། །ཨཱ་ལི་ཀཱ་ལི་
འདུ་ཤེས་ཡིན། །གཉིས་ཀྱི་ཡི་གེ་འདབ་མ་ཡིས། །སྔགས་ཀྱི་རྒྱལ་པོ་དེ་ཉིད་དྲན། །དང་པོའི་གཟུགས་ཀྱིས་རྒྱལ་པོའི་དབང་། །དེ་ནས་འདབ་གཉིས་ཀྱི་དང་པོར། །བཞི་པའི་དབྱངས་ཡིག་དང་བཅས་པ། །འོག་ཏུ་རེ་ཕ་ཡིས་ནི་བརྒྱན། །དེ་ནས་ཉི་ཤུ་རྩ་ལྔ་ནི། །འདབ་
མ་གཉིས་པའི་བཞི་བའོ། །དབྱངས་ཡིག་གཉིས་པ་དང་ལྡན་པ། །ཁྲོ་བའི་ངན་འགྲོ་དག་བྱེད་པ། །འདབ་གཉིས་དང་པོ་བཞི་པ་ཡིན། །དེ་ནས་གསལ་བྱེད་པ་ཡིས་བརྒྱན། །འདབ་གཉིས་དང་པོའི་གཉིས་པ་ཡིན། །ལྡན་པ་ཐམས་ཅད་རིམས་འགྲོག་བྱེད། །གསལ་བྱེད་
པ་ལ་གསུམ་པ་སྟེ། །བཅུ་པས་ཡང་དག་ལྡན་པའོ། །དབྱངས་ཀྱི་ཡི་གེ་གཉིས་པ་ཡིས། །ལྷ་ཡི་དབང་ཕྱུག་བརྒྱན་པའོ། །བཞི་པའི་ལྔ་པ་གང་ཡིན་དང་། །དེ་ནས་དེ་ཡི་དང་པོའོ། །བཅུ་དྲུག་པ་ལ་གསུམ་པས་ལྡན། །ཐམས་ཅད་སྔགས་ཀྱི་ཚིག་གི་གཞི། །དེ་ནས་ས་ནི་དག་པ་
དང་། །དེ་བཞིན་གསལ་བྱེད་དང་པོའོ། །ཡན་ལག་གསལ་བྱེད་སུམ་ཅུ་གསུམ། །དབྱངས་ཡིག་དྲུག་པ་ཡང་དག་ལྡན། །ཐམས་ཅད་ཀྱི་ནི་འབྱུང་བའི་གཞི། །ཟླ་ཚེས་ཐིག་ལེས་རྣམ་པར་བརྒྱན། །དེ་ནི་དེ་དང་ཉེ་བར་གནས། །སེམས་ཀྱི་དབང་ཕྱུག་ཡི་གེ་མཆོག །གང་ཞིག་

ལྔ་པའི་གཉིས་པ་དང་། །གསུམ་པའི་དང་པོ་དང་ལྡན་པ། །མཐར་ནི་སྭཱ་ཧཱ་ལྡན་པ་སྟེ། །སྙིང་པོའི་སྔགས་ནི་རྨད་བྱུང་མཆོག །དང་པོ་རུ་ནི་གཟུགས་ཀྱི་མཆོག །འདབ་མ་གཉིས་པའི་བཞི་པའོ། །འོག་ཏུ་རེ་བ་ཡང་དག་ལྡན། །དབྱངས་ཀྱི་ཡི་གེ་བཞི་པས་སྦྱར། །རིག་པའི་
རྒྱལ་པོའི་ཡི་གེ་མཆོག །ཐིག་ལེ་ཡིས་ནི་མགོ་བོ་མནན། །དེ་རང་དུ་ནི་ཉེ་བར་གནས། །ཐམས་ཅད་ཞི་བ་ཞི་བའི་མཆོག །ཐིགས་པས་མནན་པས་སུམ་ཅུ་གསུམ། །བཅུ་དྲུག་པ་ནི་གཉིས་པར་ལྡན། །ཡང་ནི་དེ་ཉིད་ཡི་གེ་མཆོག །ཁམས་གསུམ་མུན་པ་སེལ་བར་བྱེད། །
ཧཱུྃ་ཕཊ་དེ་ནི་གཉི་ག་སྦྱར། །ཐ་མར་སྭཱ་ཧཱ་ཡིས་ནི་ལྡན། །ཉེ་བའི་སྙིང་པོའི་སྔགས་ཞེས་བྱ། །བཅོམ་ལྡན་ཡེ་ཤེས་ཐིག་ལེས་སོ། །དང་པོར་རྣམ་པར་སྣང་མཛད་དག །ཉི་ཤུ་རྩ་དགུ་དེ་ནས་སོ། །གསལ་བྱེད་པ་ནི་བཞི་གཉིས་པ། །ཉི་ཤུ་རྩ་བདུན་པས་ནི་ལྡན། །ཉི་ཤུ་རྩ་
གཉིས་པ་ཡི་གཞན། །དབྱངས་ཀྱི་ཡི་གེ་བདུན་པས་ལྡན། །བཞི་པ་ལས་ནི་གསུམ་པའོ། །དེ་དང་ཉེ་བར་རླུང་ཡིན་ནོ། །དབྱངས་ཡིག་བཅུ་གཅིག་པ་དང་ལྡན། །འབྲས་བུ་ཐམས་ཅད་དོན་སྦྱིན་ནོ། །ལྔ་པ་ཡི་ནི་ལྔ་པ་དང་། །ཧ་ཡི་ཡིག་འབྲུ་དེ་དང་ཉེ། །ལྔ་པ་ཡི་ནི་
གསུམ་པ་དང་། །ཉི་ཤུ་རྩ་བརྒྱད་དེ་ནས་སོ། །ལྔ་པ་ཡི་ནི་དང་པོ་དང་། །ཉི་ཤུ་རྩ་བདུན་དེ་ནས་སོ། །དབྱངས་ཡིག་གི་ནི་གཉིས་པས་ལྡན། །ཁམས་གསུམ་དགུག་པར་ནུས་པའོ། །གསལ་བྱེད་ཀྱི་ནི་དང་པོ་དང་། །ཉི་ཤུ་རྩ་བདུན་པ་ནི་ལྡན། །ཉི་ཤུ་རྩ་ལྔ་པ་དག་དང་། །
དབྱངས་ཀྱི་ཡི་གེ་གཉིས་པས་ལྡན། །ཉི་ཤུ་རྩ་དྲུག་ཡི་གེ་མཆོག །དབྱངས་ཀྱི་ཡི་གེ་བཅུ་གཅིག་ལྡན། །སྭཱ་ཧཱ་མཐའ་རུ་ལྡན་པ་ནི། །ཧཱུྃ་ཧཱུྃ་ཕཊ་ཀྱིས་སྤེལ་བར་བྱ། །དེ་ནི་ཕྱག་རྒྱ་ཆེ་སྙིང་པོ། །ཡིད་བཞིན་རིན་ཆེན་མཉམ་པའི་འོད། །དང་པོ་ཡི་ནི་པྲ་ཎ་པ། །དེ་ནས་
འདབ་གཉིས་པ་ཡི་གསུམ། །ཡ་ཡི་སྡེ་ཚན་གཉིས་པ་དང་། །ཉི་ཤུ་རྩ་དགུ་དེ་ནས་སོ། །དབྱངས་ཀྱི་ཡི་གེ་གསུམ་པ་ཡིས། །སྙིང་ལ་ཁོང་དུ་ཆུད་པར་བྱ། །དྲུག་ཅུ་རྩ་བཞི་ཕྱེད་དག་པ། །ར་ཡི་ཡིག་འབྲུ་དེ་དང་མཉམ། །ཐ་མར་སྭཱ་ཧཱ་དང་ལྡན་པ། །ཧཱུྃ་ཧཱུྃ་ཕཊ་ནི་སྤེལ་བ་

ཡིན། །ཉེ་བའི་སྙིང་པོ་སྔགས་ཆེན་པོ། །ཐམས་ཅད་སྔགས་ཀྱི་བདག་པོ་མཆོག །ཨོྃ་ཤྲཱི་མ་ཧཱ་ཀཱ་རུ་ཎ་ཀྲུ་ཏ། མ་ཏཱ་བེ་བེད། སྥཱ་ར་ཎ་མ་ཧཱ་ཀ་ལྤཱ་ནྟཱ་གྣེ། སམ་པྲ་བྷ་ཛ་ཡ་བི་ཛ་ཡ། ཨཊྚཱཊྚ་ཧཱ་ས། མ་ཧཱ་གྷོ་ར་གྷོ་རེ་ཤྭ་ར་མ་ཧཱ་བཱི་ར་བཱི་རེ་ཤྭ་ར་མ་ཧཱ་རུ་དྷི་རཱཾ་ཏྲ་མཱ་ལ་དྷ་ར།
སཽ་མ་སཱུརྱ་མགྣི་ལོ་ཙ་ན། ཨཱ་ཀཱ་ཤོད་ར། མ་ཧཱ་སཱ་ས་གང་ཀོགྒོ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། མ་ཐ་མ་ཐ། བིདྷྭཾས་ཡ་བིདྷྭཾས་ཡ། ཨཱཀརྵ་ཡ་ཨཱ་ཀེརྵ་ཡ། བྷཱཉྫ་ཡེ་བྷཱེཾཉྫ་ཡ། ཙཱུརྞྞ་ཡ་ཙཱུརྞྞ་ཡ། ཧ་ཧ་ཧ་ཧ། ཧི་ཧི་ཧི་ཧི། མ་ཧཱ་རུ་དྷི་ར། པཱ་ཎི་མརྡཱ་ཡ། ཧཱུྃ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་
ཕཊ་སྭཱ་ཧཱ། ཨོྃ་མ་ཧཱ་ཀྲོ་དྷེ་ཤྲ་རཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་བཻ་བེ་ཌེ་སྥཱ་ར་ཎཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་ཀལྤཱནྟ་ཨགྣིས་མ་པྲ་བྷཱ་ཡ་ཧཱུྃ་ཕཊ་སྭཱ་ཧཱ། ཨོྃ་ཛ་ཡ་བི་ཛ་ཡ་ཨཊྚཱཊྚ་ཧཱ་སཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་གྷོ་ར་གྷོ་རེ་ཤཱ་རཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་བཱི་རེ་ཤྭ་རཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་རུ་དྷི་རཱནྟ་
མཱ་ལ་དྷ་རཱ་ཡ་ཧཱུྃ་ཕཊ་སྭཱ་ཧཱ། ཨོྃ་སཽ་མ་སཱུརྱ་ཨགྣི་ལོ་ཙ་ནཱ་ཡ་ཧཱུྃ་ཕཊ་སྭཱ་ཧཱ། ཨོྃ་ཨཱ་ཀཱ་ཤོད་རཱ་ཡ་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་སཱ་ས་ག་ར་ཀོཀྐེ་ནི་ཧཱུྃ་ཕཊ་སྭཱ་ཧཱ། ཨོྃ་ཧ་ན་ཧ་ཧཱུྃ་ཕཊ་སྭཱ་ཧཱ། ཨོྃ་ད་ཧ་ད་ཧ་ཧཱུྃ་ཕཊ་སྭཱ་ཧཱ། ཨོྃ་པ་ཙ་པ་ཙ་ཧཱུྃ་ཕཊ་སྭཱ་ཧཱ། ཨོྃ་མ་ཐ་མ་ཐ་ཧཱུྃ་ཕཊ་སྭཱ་ཧཱ། ཨོྃ་བི་དྷཾས་ཡ་བིདྷྭཾ་ས་ཡ་ཧཱུྃ་
ཕཊ་སྭཱ་ཧཱ། ཨོྃ་ཨཱ་ཀཪྵ་ཡ་ཨཱ་ཀརྵ་ཡ་ཧཱུྃ་ཕཊ་སྭཱ་ཧཱ། ཨོྃ་བྷཱཉྫ་ཡ་བྷཱཉྫ་ཡ་ཧཱུྃ་ཕཊ་སྭཱ་ཧཱ། ཨོྃ་ཙཱུརྞྞ་ཡ་ཙཱུརྞྞ་ཡ་ཧཱུྃ་ཕཊ་སྭཱ་ཧཱ། ཨོྃ་ཧ་ཧ་ཧ་ཧ་ཧཱུྃ་ཕཊ་སྭཱ་ཧཱ། ཨོྃ་ཧི་ཧི་ཧི་ཧི་ཧཱུྃ་ཕཊ་སྭཱ་ཧཱ། ཨོྃ་མ་ཧཱ་རུ་དྷིར་པཱ་ཎི་མརྔཱ་ཡ་ཧཱུྃ་ཕཊ་སྭཱ་ཧཱ། ཨོྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོྃ་ཕཊ་ཕཊ་ཕཊ་ཕཊ་ཧཱུྃ་ཕཊ་
སྭཱ་ཧཱ། །ཕྲེང་བའི་སྔགས་ནི་མཆོག་གི་ལྷ། །ལས་ཐམས་ཅད་ནི་རབ་གྲུབ་བྱེད། །ཨོྃ་མ་ཧཱ་ཀཱ་མ་རཱུ་པི་ཎཱི་ཡེ་སར་སར། བི་སར་བི་སར། ཨཱ་གཙྪ་ཨཱ་གཙྪ། སརྦྦཱ་རྠཾ་སཱ་དྷ་ཡ་སཱ་དྷ་ཡ། སརྦྦཱ་མཱ་རཾ། ནིརྨྨ་ཐ་ནིརྨྨ་ཐ། མ་ཧཱ་བཱི་རེ་བཱི་རེ་ཤྭ་ར་ས་པྟ་པཱ་ཏཱ་ལ། བ་ད་རེ་ཎེ། སཔྟསཱ་ག་ར། ཤུ་ཥ་
ཎེ་རུ་ཥ་ཎེ་མུ་ཧ་ཎ། ཛཾ་བྷ་ནེ། སྟཾ་བྷ་ནེ། ཏྲེ་ལོ་ཀྱ་བྷ་ཡཾ་ཀ་རེ། ཧཾ་ཧཾ་ཧིཾ་ཧིཾ་ཧཱུྃ་ཧཱུྃ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། ཌི་ལི་ཌི་ལི། མ་ཧཱ་ཀཁྦཱགྣེ་ས་མ་པྲ་བྷཱ་ཡ་ཧཱུྃ་ཧཱུྃ་ཕཊ་སྭཱ་ཧཱ། ཕྲེང་བའི་སྔགས་ནི་མཆོག་གི་ལྷ། །བཅོམ་ལྡན་མོ་ཡི་བདག་གིས་བསྟན། །ཧ་དྷཱུྃ་དྷཱུྃ། ཀྲུྃ་ཀྲུྃ། གྷྲཽཾ་གྷྲཽཾ།

མྲོྃ་མྲོྃ། ཛྲོྃ་ཛྲོྃ། ཊཱྃ་ཊཱྃ། པྲྃ་པྲྃ། སྲོྃ་སྲོྃ། ཏྲོྃ་ཏྲོྃ། ཊུྃ་ཊུྃ། ཕྲོྃ་ཕྲོྃ། བྲོྃ་བྲོྃ། ཡོྃ་ཡོྃ། ཧྲོྃ་ཧྲོྃ། ཤྲོྃ་ཤྲོྃ། ཀུྃ་ཀུྃ། འཁོར་ལོའི་སྔགས་ནི་སྔགས་ཆེན་པོ། །དཔའ་བོ་རྣམས་ཀྱི་སྙིང་པོ་མཆོག །ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨྃ་ཨཿ དཔའ་བོའི་ཡན་ལག་མ་སྙིང་སྔགས། །ལྷ་ཡི་དབང་
ཕྱུག་བདག་གིས་བཤད། །དང་པོར་ཨོྃ་དང་མཐའ་ཧཱུྃ་ཕཊ། །བར་དུ་མིང་ནི་སྤེལ་བའོ། །གསང་བའི་སྔགས་ཀྱི་དགོད་པ་ནི། །མཆོད་པའི་དུས་སུ་མཆོད་པར་བྱ། །ཨོྃ་ནཱ་ད་ནི་རྨ་ལཱ་ཡ་ཧཱུྃ་ཧཱུྃ་ཕཊ། ཨོྃ་བནྡིུརྠ་ག་མེ་ཧཱུྃ་ཧཱུྃ་ཕཊ། ཨོྃ་མ་ཧཱ་ཀཱ་ལཱ་གྲཱ་ཡ་ཧཱུྃ་ཧཱུྃ་ཕཊ། ཨོྃ་ན་ད་མ་ཏྲ་སྭ་རཱུ་པཱ་ཡ་ཧཱུྃ་ཧཱུྃ།
ཕཊ། ཨོྃ་པར་ཤུ་རཱུ་པཱ་ཡ་ཧཱུྃ་ཧཱུྃ་ཕཊ། ཨོྃ་ཨ་པརཱ་མ་ན་བུྃ་གཱ་ཡ་ཧཱུྃ་ཧཱུྃ་ཕཊ། ཡེ་ཤེས་དྲུག་གི་མཆོག་སྔགས་དབང་། །འཁོར་ལོ་དྲུག་པའི་ནང་ན་བཞུགས། །གསང་བའི་དཀྱིལ་འཁོར་རྒྱལ་དབང་པོ། འདི་ཡི་སྔགས་ཀྱིས་མཆོད་པར་བྱ། །ཨ་ཀ་ཙ་ཊ་ཏ་པ་ཡ་ཤ་སྒྲ་ནི་གྲགས། །སྡེ་ཚན་
བརྒྱད་ཀྱི་གཙོ་བོ་ཡིན། །རྩ་བའི་སྡེ་ཚན་གཏོར་མ་གཏང་། །བརྟག་པ་གཉིས་ཀྱི་ཇི་བཞིན་ནོ། །རྡོ་རྗེའི་ཕྱག་རྒྱའམ་སྙིང་པོ་ཡིས། །མིག་མི་འཛུམས་པའི་ལྟ་བས་སྦྱིན། །བསྲུང་འཁོར་ཡོད་པའི་ཁྲོ་བོ་ཡི། །དེ་ཡི་སྔགས་ནི་བདག་གིས་བཤད། ཛྲེམྦྷ་ཛྲེམྦྷ། གྷུ་གྷུ་རོ་གྷུ་གྷུ་
རོ། །དྷ་ར་དྷ་ར། བི་དྷ་ར་བི་དྷ་ར། ཊ་གྷེ་ཊ་ཊ་གྷེ་ཊ། སྥོ་ལིཾ་གི་སྥོ་ལིཾ་གི། ཨ་ཏ་ཨ་ཏ་ཧཱ་ས། ཨཊྚ་མཊྚ་ཧཱས། ཧཱུ་ལུ་ཧཱུ་ལུ། བིཀྲ་མ་བི་ཀྲ་མ། ཧཱུྃ་ཕཊ་ཀྱིས་ནི་མཐའ་མར་ལྡན། །བར་དུ་མིང་ནི་སྤེལ་བའོ། །རྡོ་རྗེ་གསུམ་པ་ཡེ་ཤེས་རྒྱལ། །ཨོཾ་ཨཱཿཧཱུྃ་ནི་སྔགས་ཀྱི་མཆོག །དཔལ་
ཡེ་ཤེས་ཐིག་ལེ་ལས་སྔགས་བཏུབ་ཞེས་བྱ་བའི་ལེའུ་སྟེ་ལྔ་པའོ།། །།དེ་ནས་མཆོད་སྦྱིན་རབ་བདེ་ག་བཤད། །གནས་ལ་སོགས་པའི་རིམ་པས་སྦྱོར། །བསྐྱེད་པའི་བྱེ་བྲག་ཐིགས་པ་གསུམ། །རྫོགས་པའི་རིམ་གསུམ་དེ་ལྟར་རོ། །རྣམ་ཤེས་ལ་སོགས་བྱེ་བྲག་ཏུ། །མཆོད་
སྦྱིན་ཚངས་པའི་ཡུལ་ས་ཆེ། །རྣམ་པར་ཤེས་བ་ལོངས་སྤྱོད་དང་། །སྣང་དང་ནམ་མཁའ་ཡེ་ཤེས་བཞིན། །སྐུ་བརྒྱད་ཀྱི་ནི་བྱེ་བྲག་ཏུ། །དངོས་པོ་རྟེན་དང་རྣམ་པར་འབྱེད། །ཇི་བཞིན་འདོད་པ་སྡུག་པ་ནི། །མཆོད་སྦྱིན་རྣལ་འབྱོར་མ་དཀྱིལ་འཁོར། །ཨཽ་རྱ་ན་ལ་སོགས་གནས་སུ་

ནི། །ལེགས་དགྱེས་མ་སོགས་ལྷ་མོ་ཀུན། །ཀཱ་ལི་ཡེ་ཤེས་ཡིག་མཆོག་སྦྱིན། །ཕྱི་དང་ནང་དུ་བྱ་བའོ། །མཆོད་སྦྱིན་བྱས་ན་སྦྱིན་པ་ཆེ། །འབྲས་བུ་བཀྲ་ཤིས་ལྡན་པ་སྐྱེ། །སེམས་ཅན་རྣམས་ཀྱིས་བྱེ་བྲག་ཏུ། །སྣ་ཚོགས་ཐབས་ནི་རབ་ཏུ་བཤད། །ཁ་ཅིག་
རྣམས་ལ་འབུལ་བའི་ཐབས། །ཁ་ཅིག་རྣམས་ལ་མདོ་སྡེའོ། །ལ་ལ་ཕ་རོལ་ཕྱིན་པའི་ལམ། །ཁ་ཅིག་ལ་ནི་སྔགས་ཀྱི་མཆོག །རབ་འབྲིང་ཐ་མའི་བྱེ་བྲག་ཏུ། །ཐར་པར་འགྲོ་བའི་ཐབས་ཡིན་ནོ། །བློ་གྲོས་ཆེ་ཡང་ཐེག་གཞན་གྱིས། །གྲངས་མེད་གསུམ་གྱིས་སངས་རྒྱས་
ཡིན། །སྔགས་ཀྱི་ཐེག་པ་ལ་མོས་ན། །ཚེ་འདི་ལ་ནི་སངས་རྒྱས་སོ། །ཡང་ནི་རྡོ་རྗེ་འཛིན་པ་ཉིད། །རྣལ་འབྱོར་མ་ཁྱོད་སྨོས་ཅི་དགོས། །ཡང་ན་ལུས་ནི་སྤངས་མ་ཐག །བླ་ན་མེད་པའི་ཡེ་ཤེས་དག །བརྩོན་པར་མི་ལྡན་པས་ཀྱང་རྙེད། །བརྩོན་འགྲུས་ལྡན་པས་སྨོས་ཅི་དགོས། །
བརྟན་པའི་བརྩོན་པས་དོན་ཐམས་ཅད། །འབད་པ་མེད་ཀྱང་འགྲུབ་པ་ཡིན། །དོན་ཀུན་གྲུབ་པའི་བསོད་ནམས་ཅན། །རྟོག་མེད་ཉོན་མོངས་མེད་པའོ། །གང་ཞིག་ལས་ནི་ཅི་བྱེད་པ། །དེ་ནི་བསོད་ནམས་འཕེལ་བ་ཡིན། །འདོད་པའི་ལོངས་སྤྱོད་གང་གང་སྤྱོད། །དེ་ཀུན་མཆོད་པ་ལ་
སོགས་ཡིན། །དེ་ནི་མཆོད་སྦྱིན་འཕེལ་བ་ཡིན། །མཆོད་ལས་ཡེ་ཤེས་འབྲས་བུ་རྙེད། །དེ་ནི་མཆོད་སྦྱིན་ཡང་དག་པ། །རྒྱུད་ཀུན་དུ་ནི་རྙེད་དཀའ་བ། །འབྲས་བུ་ཆེན་པོ་ཐམས་ཅད་སྦྱིན། །རྣལ་འབྱོར་མ་ཡི་གཞི་ཡི་མཆོག །དཔལ་ཡེ་ཤེས་ཐིག་ལེ་ལས་མཆོད་སྦྱིན་གྱི་ཆོ་ག་
ཞེས་བྱ་བའི་ལེའུ་སྟེ་དྲུག་པའོ།། །།དེ་ནས་མཆོད་པའི་ཆོ་ག་ནི། །སྡིག་པ་ཐམས་ཅད་འཇིག་བྱེད་པ། །ཡིད་འཕྲོག་ལྷ་ཡི་མེ་ཏོག་གིས། །ཟླ་བ་ཉི་མའི་འོད་དང་ལྡན། །མེ་དང་སྒྲོན་མ་རྨད་དུ་བྱུང་། །མཆོད་སྦྱིན་དཀྱིལ་འཁོར་ལ་མཆོད་བྱ། །དབང་ནི་མར་ངོའི་དང་པོ་ཡི། །
བཅུ་དྲུག་པ་ཡི་དང་པོ་ཡིས། །གཉིས་པ་ཡི་ནི་རབ་ཐིམ་གསུམ། །བཅུ་དྲུག་དང་པོའི་འོག་མ་ཡིས། །གསུམ་པ་ཡི་ནི་ལོངས་སྤྱོད་ཡིན། །བཅུ་དྲུག་པ་ཡི་གསུམ་པས་སོ། །བཞི་པ་ཡི་ནི་ཐིམ་པ་འབྱུང་། །གསུམ་པ་ཡི་ནི་འོག་མས་སོ། །ལྔ་པ་ཡི་ནི་ལོངས་སྤྱོད་ཡིན། །བཅུ་དྲུག་

པ་ཡི་ལྔ་པས་སོ། །དྲུག་པ་ཡི་ནི་ཐིམ་པ་འབྱུང་། །བཅུ་དྲུག་པ་ཡི་དྲུག་པས་སོ། །འདུན་པ་ཡི་ནི་རབ་མཆོད་དབང་། །མར་ངོ་ཡི་ནི་བརྒྱད་པ་དང་། །དབྱངས་ཡིག་བརྒྱད་པོས་མཆོད་པར་བྱ། །དགུ་པ་ཡི་ནི་ལོངས་སྤྱོད་འབྱུང་། །བཅུ་དྲུག་པ་ཡི་དགུ་པས་སོ། །བཅུ་བ་ཡི་ནི་ཐིམ་པ་
འབྱུང་། །དབྱངས་ཡིག་གི་ནི་བཅུ་པས་སོ། །བཅུ་གཅིག་པ་ཡི་དབང་ཡིན་ཏེ། །བཅུ་གཅིག་པ་ཡིས་མཆོད་པར་བྱ། །བཅུ་གཉིས་ཀྱི་ནི་ཐིམ་པ་འབྱུང་། །དབྱངས་ཡིག་བཅུ་གཉིས་པོ་ཡིས་སོ། །བཅུ་གསུམ་པ་ཡི་ལོངས་སྤྱོད་ནི། །དེ་གཉིས་ཀྱིས་ནི་མཆོད་པར་བྱ། །བཅུ་བཞི་
ཡིས་ནི་ཐིམ་པར་འགྱུར། །དབྱངས་ཡིག་བདུན་པ་གཉིས་ཀྱིས་མཆོད། །ཉ་གང་བ་ལ་དབང་ཡིན་ཏེ། །དབྱངས་ཡིག་བཅྭ་ལྔ་པ་ཡིས་སོ། །བྱང་ཆུབ་སེམས་འབྱུང་མཆོད་པ་ཡིན། །ཡར་ངོ་མར་ངོ་བྱེ་བྲག་ཏུ། །ཤེས་རབ་ཐབས་ནི་རབ་ཏུ་སྦྱོར། །སྐུ་གསུམ་ཡེ་ཤེས་དཀྱིལ་
འཁོར་ནི། །ཚེས་དང་ཡི་གེ་སྔགས་ཀྱིས་སུ། །རི་བོང་ཅན་ནི་འཕེལ་བར་འགྱུར། །ཐིག་ལེའི་ནམ་མཁའ་འགོག་པ་ཡིས། །རང་བཞིན་དེ་ནི་འབྱུང་བར་འགྱུར། །ཐིག་ལེའི་རང་བཞིན་ཡེ་ཤེས་ནི། །སངས་རྒྱས་ཀུན་གྱིས་ཀྱང་རྙེད་དཀའ། །བདག་གིས་བཀའ་དྲིན་རང་
བཞིན་མྱུར། །ཐེ་ཚོམ་མེད་པར་རྙེད་པ་ཡིན། །བླུན་པོ་གང་གིས་བདག་མི་ཤེས། །བསམ་གཏན་རགས་ལ་རྟག་མོས་པ། །དེ་རྣམས་ཀུན་ནི་གྲུབ་པ་མེད། །ལྷ་ཡི་དབང་ཕྱུག་བདེན་པའོ། །ས་ཀུན་དབང་ཕྱུག་གིས་བདག་པོ། །ས་ཀུན་དབང་ཕྱུག་མངའ་བདག་པོ། །ས་ཀུན་
དབང་ཕྱུག་གི་རྒྱལ་པོ། །ཐམས་ཅད་བདག་ཉིད་ཀུན་ནང་བདག །ཐམས་ཅད་ཁྱབ་པ་རྟག་ཏུ་སྟོང་། །སངས་རྒྱས་ཀུན་གྱིས་ཕྱག་མཛད་པ། །ཤེས་རབ་ཐབས་ཀྱི་རང་བཞིན་གྲགས། །འགྲོ་མེད་འགྲོ་ལ་བདག་ཉིད་རོལ། །མཆོག་གི་ནམ་མཁའ་མཐའ་མེད་པ། །མཚན་ཉིད་
དང་བྲལ་གཞི་དང་བྲལ། །ལྷ་ཡི་དབང་རྣམས་ཐུབ་དབང་རྣམས། །རྡོ་རྗེ་ཅན་ཡང་རྙེད་དཀའ་བ། །ཆོས་དང་ལོངས་སྤྱོད་བདག་གིས་མཐའ། །ཡེ་ཤེས་རྣམ་ཤེས་ངོ་བོ་དག །རྡོ་རྗེ་ཅན་དང་སངས་རྒྱས་ཀུན། །ལྷ་ཡི་དབང་ཕྱུག་རྙེད་པར་སླ། །རྣམ་པ་མཆོག་གི་ཡེ་ཤེས་སྐུ། །སུས་

ཀྱང་སླ་བ་མ་ཡིན་ནོ། །དཔལ་ཡེ་ཤེས་ཐིག་ལེ་ལས་མཆོད་པའི་ཆོ་ག་ཞེས་བྱ་བའི་ལེའུ་སྟེ་བདུན་པའོ།། །།དེ་ནས་ཡང་ནི་བཤད་བྱ་བ། །སྦྱིན་སྲེག་སྡིག་པ་འཇིག་བྱེད་པ། །ཞི་བ་དང་ནི་རྒྱས་པ་དང་། །དེ་བཞིན་དབང་དང་དྲག་པོའོ། །ཞི་བའི་ཧོམ་ཁུང་ཟླུམ་
པོ་སྟེ། །རྒྱས་པ་ཡི་ནི་གྲུ་བཞིའོ། །དབང་ནི་གཞུ་ཡི་རྣམ་པ་བཞིན། །དྲག་པོ་ཡི་ནི་གྲུ་གསུམ་མོ། །དཀར་པོ་སེར་དང་དེ་བཞིན་དམར། །ནག་པོ་འདི་ནི་རིམ་པས་སོ། །རྒྱ་མཚོ་མེ་དང་མིག་ཟླ་བ། །ལྷ་ཡི་དབང་ཕྱུག་ཚད་ཡིན་ནོ། །གཞན་ཀུན་གྱི་ནི་རིམ་པས་གཅིག །
སྔར་གྲུབ་ཀྱིས་ནི་གཞན་མ་འགྲུབ། །ཧོམ་ཁུང་རེ་རེར་སྙིང་གར་པད། །རིགས་ཀྱི་ལས་ཀྱི་གོ་རིམས་སོ། །དེ་སྟེང་སྣ་ཚོགས་རྡོ་རྗེ་སྟེ། །འོད་ཟེར་ལྔ་དང་ལྡན་པའོ། །ལྟེ་བའི་ནང་དུ་མེ་ལྷ་ནི། །ཞལ་གསུམ་པ་དང་ཕྱག་བཞི་པ། །སྐུ་མདོག་སེར་པོ་སྤྱན་ཟླུམ་པ། །རལ་བའི་
ཅོད་པན་གྱིས་ནི་བརྒྱན། །འབར་བའི་མཆེ་བ་འཇིགས་པ་ཆེ། །རྡོ་རྗེ་སྐྱིལ་ཀྲུང་དུ་ནི་བཞུགས། །བ་དན་གསུམ་དང་བགྲང་ཕྲེང་གཡས། །གཡོན་ན་དབྱིག་གུ་སྤྱི་བླུགས་སོ། །སྙིང་ག་རུ་ནི་མེ་ཡི་ལྷ། །ལྕེ་བདུན་འོད་ལྡན་གསལ་བར་འབྱུང་། །ཅོད་པན་རིན་ཆེན་འབྱུང་ལྡན་
མགོན། །ཐིག་ལེའི་དབུས་སུ་མེ་ཡིན་ནོ། །ཚུར་གཤེགས་འོད་ཟེར་ཆེར་ལྡན་པ། །འདོད་པའི་དོན་ཀུན་སྒྲུབ་དབང་པོ། །ཨོྃ་བྷཱུར་བྷུ་བ་སྭཱ་ཧཱ། རང་བྱུང་ཆེན་པོ་བཅོམ་ལྡན་འདས། །འདོད་པའི་དབང་ཕྱུག་འདོད་པ་སྟེར། །མེ་ལྷ་ལས་ཀུན་སྒྲུབ་བྱེད་པ། །འདིར་ནི་བདག་ལ་
ཉེ་བར་བཞུགས། །མེ་ལྷ་སྤྱན་དྲང་བའི་སྔགས་སོ། །དེ་ནས་མཆོད་ཡོན་དང་ཉེ་རེག་དང་། འཐོར་འཐུང་ངོ་། །ཨོྃ་ཧྲིཾ་ཧྲིཾ། མཆོད་ཡོན་གྱི་སྔགས་སོ། །ཨོྃ་བྷཱི་བྷཱི་ཉེ་རེག་གི་སྔགས་སོ། །ཨ་བྷོ་ཀྵ་ཨ་བྷོ་ཀྵ་འཐོར་འཐུང་གི་སྔགས་སོ། །དེ་ནས་གདན་དབུལ་བ་ནི། མཛུབ་
མོ་ལུ་གུ་རྒྱུད་བྱས་ནས། །བར་མ་སྦྱར་བྱེད་ཀྱི་ནི་གཟུགས། །སྲིན་ལག་མིག་གི་བྱེ་བྲག་ཏུ། །མཐེ་ཆུང་མཐེ་བོང་ཟླུམ་པོ་སྟེ། །གདན་དབུལ་བ་ཡི་ཕྱག་རྒྱའོ། །མཁས་པ་ཡིས་ནི་ཡོ་བྱད་ཀུན། །དང་པོ་ཉེ་བ་ཉིད་དུ་བྱ། །དཀའ་བ་མེད་པར་ཇི་ལྟར་རྙེད། །དེ་ནི་དེ་ཉིད་རབ་

གྲུབ་བྱ། །སྒྲུབ་པའི་དབང་པོ་ཡོན་ཏན་ལྡན། །སྔགས་དང་རྒྱུད་ཀྱི་ཐོས་པ་ཆེ། །སྔགས་ཀྱི་བཟླས་ལ་གཅིག་ཏུ་མོས། །ཡིད་མི་འཕྲོགས་ཤིང་གསལ་བའོ། །ཐིག་ལེ་ཚུལ་ནི་ཡེ་ཤེས་ཆེ། །བྱེ་བྲག་ཤེས་པ་རིན་ཆེན་རིགས། །རིགས་ལྔའི་གཞོན་ནུ་མ་ཡི་ལྔ། །ཡི་དག་
ཁུ་བ་ཡིས་ནི་ཚིམ། །སྤྱན་རིངས་མ་དང་དག་པ་མ། །འོ་འཛིན་སྲ་ཞིང་འཇམ་ལ་མཐོ། །སྦྱིན་སྲེག་གནས་སུ་གར་དང་ལྡན། །གཅེར་བུ་དང་ནི་སྐྲ་གྲོལ་བ། །སྦྱིན་སྲེག་ལས་སུ་དོན་བསྒྲུབ་ཕྱིར། །རིགས་ལྔའི་བུ་མོ་གཞུག་པར་བྱ། །ཤེས་རབ་ཐབས་ཀྱི་ཆོ་ག་ཡིས། །བླ་མ་ཉིད་ཀྱིས་
དང་པོར་མཆོད། །བརྟགས་པ་དང་ནི་མ་བརྟགས་པའི། །འཛིན་པ་འདིར་ནི་མི་བྱའོ། །རྟོག་པའི་འབྱུང་པོས་ཟིན་པ་ལ། །སྣ་ཚོགས་ཐབས་ནི་བདག་གིས་བསྟན། །དོན་དམ་དུ་ནི་ཕྱི་དོན་མེད། །ནང་གི་མ་ཡིན་པར་མ་མིན། །རྡུལ་མེད་རྣམ་པར་རྡུལ་མེད་དག །སྟོང་པ་དང་ནི་སྟོང་མིན་
བྲལ། །རང་རིག་ངོ་བོ་རང་རིག་བྲལ། །ངག་གི་ལམ་གྱིས་མི་རྙེད་དོ། །ཕུང་པོ་ཁམས་ནི་རྣམ་པར་རྟོག །ལྷ་ཡི་དབང་ཕྱུག་གང་ཞིག་སྲེག །དེ་ནི་མེ་ཡི་དོན་དམ་པར། །ལུས་གནས་ལུས་ལས་མ་སྐྱེས་པའོ། །ཐམས་ཅད་རྣམ་པ་མཆོག་གིས་རྫོགས། །ཆོས་ཀུན་གྱི་ནི་ནང་ན་བཞུགས། །
ཀུན་རྫོབ་རྣམ་པས་གཟུགས་སུ་ནི། །ལྷ་ཡི་དབང་ཕྱུག་ཀུན་བརྟགས་ཡིན། །ཀུན་བརྟགས་ཡེ་ཤེས་སྦྱོར་བ་ཡིས། །རིམ་པས་གནས་ནི་རྙེད་པར་འགྱུར། །དེ་བས་ཀུན་ནས་འབད་པ་ཡིས། །རྣམ་པ་ཐམས་ཅད་མཆོག་གི་རྒྱུར། །རང་དང་གཞན་གྱི་གྲུབ་དོན་དུ། །མཆོད་སྦྱིན་སྦྱིན་
སྲེག་གཏོར་མ་བྱ། །བསོད་ནམས་ཚོགས་ནི་འཕེལ་ཕྱིར་དང་། །སེམས་ཅན་ཕན་དོན་དེ་དག་བྱ། །ནས་དང་། ཏིལ་དང་། འབྲས་སོ་བ་དང་། གྲོ་དང་། འབྲས་དང་། བོ་ཀ་ལིངྒ་དང་། ཡུངས་ཀར་དང་། སྨན་ཐམས་ཅད་དང་། ཛཱ་ཏི་ཕ་ལ་དང་། གོ་ཡུའི་འབྲས་བུ་དང་། དཔལ་འབྲས་དང་།
ནཱ་ག་གེ་སར་དང་། གུར་ཀུམ་དང་། ཙནྡན་དང་། ག་པུར་དང་། འོ་མ་དང་། ཞོ་དང་། ཐུག་པ་དང་། བསྐ་པ་དང་། ལ་དུ་དང་། འཁུར་བ་ལ་སོགས་པ་དང་། གུ་གུལ་དང་། སི་ཧླ་དང་། གུ་གུལ་དཀར་པོ་དང་། ཡན་ལག་བཅུ་པ་ལ་སོགས་པ་དང་། མེ་ཏོག་དང་། སྤོས་དང་། མར་མེ་དང་།

དྲི་དང་། ལྷ་བཤོས་དང་། མདའ་དང་དར་ལ་སོགས་པ་དང་ལྡན་པ་དང་། མེ་ཐབ་ཀྱི་དཀྱིལ་འཁོར་གྱི་ཕྱོགས་མཚམས་ཀྱི་བྱེ་བྲག་ཏུ་བུམ་པ་ཀུན་ལ་སྨན་སྣ་ཚོགས་དང་། ཁ་རྒྱན་གྱིས་བརྒྱན་ཅིང་དྲི་ཞིམ་པའི་ཆུས་ལྟོ་བ་བཀང་ལ། དར་སྣ་ཚོགས་ཀྱིས་མགྲིན་པ་བརྒྱན་
པའོ། །ཞི་བ་ལ་སོགས་པའི་ལས་ཐམས་ཅད་ལ་བྱའོ། །རྒྱས་པ་ལ་ནི་གསེར་གྱི་འོད། །ཐམས་ཅད་ཀུན་གྱིས་རབ་ཏུ་བརྟག །དབང་ལ་ཐམས་ཅད་འོད་དམར་པོ། །ཞོ་དང་འོ་མ་གཉིས་སྤངས་པ། །ཡུངས་ནག་དང་ནི་སྦྲུལ་ནག་པོའི། །པགས་བ་བྱ་རོག་གི་ནི་མཆུ། །བྱ་རོག་
ནག་པོ་ཡི་ནི་སྙིང་། །ཀླད་པ་རྒྱུ་མ་རྐང་མར་མགོ། །ཐམས་ཅད་ནག་པོ་ཡི་ནི་མདོག །ཁྱི་དག་གི་ནི་མཇུག་མའོ། །ཡུངས་ནག་མར་ཁུ་མར་ཁུ་ཆེ། །ཡི་དགས་གཞི་དང་མར་ཁུ་དང་། །ཕྱེད་ཚིག་ཡི་དྭགས་ཀྱི་ནི་རས། །རུས་ཚིག་བུད་ཤིང་ཚིག་པ་དང་། །ཚེར་མ་རྣོ་ལ་བཟང་བ་དང་། །
ཚེར་མའི་མེ་ཏོག་བ་རུ་ར། །ཐུག་པ་ནག་པོ་མ་བསྲེས་པ། །དྲག་པོ་ལ་ནི་རབ་ཏུ་བརྟག །གཞན་མིན་དཔའ་བོའི་དབང་ཕྱུག་བསམ། །དྲག་པོ་ལ་སོགས་སུ་ནི་བྱ། །རང་གི་དེ་ཉིད་ཞི་ལ་སོགས། །ཕྱག་རྒྱ་ལ་སོགས་རྒྱན་དང་ལྡན། །མར་སར་དྲི་མ་མེད་པ་དང་། །སྐྱོན་དང་བྲལ་བའི་མེ་ཏོག་
ཤིང་། །གསར་པ་སྐམ་ཞིང་དྲི་ཞིམ་པ། །དུ་བ་མེད་ཅིང་སྐྱོན་དང་བྲལ། །ཐམས་ཅད་ལ་ནི་ཁྲུ་རེའི་ཚད། །ལས་ལ་མཁས་པས་དེ་ལྟར་བྱ། །ཡང་ནི་ཡམ་ཤིང་རབ་ཏུ་བསྟན། །ཇི་ལྟར་རྙེད་པ་འབད་པས་སོ། །ཤ་མི་ཤ་དང་། །ཤ་མོ་ཀ་དང་། །ཤམ་བག་ཀ་དད། ཨ་ཤྭཏྠ་དང་། བླ་ཀྵ་
དང་། །ནྱ་གྲོ་དྷ་དང་། དཱུར་བ་དང་། ཨ་པ་མ་རྐ་དང་། པིས་པ་ལ་དང་། ཁ་དིར་དང་། ཙམ་པ་ཀ་དང་། ཨ་ཤོ་ཀ་དེ་རྣམས་སོར་བརྒྱད་པའི་ཚད་དོ། །དགང་གཟར་བླུགས་གཟར་མར་གྱི་སྣོད། །རིན་པོ་ཆེ་རུ་ཇི་ལྟར་བསྟན། །ལག་པ་ཡི་ནི་དབྱུག་པ་ཚད། །འབད་པ་ཡིས་ནི་དགང་གཟར་བྱ། །
དགང་གཟར་ཇི་བཞིན་བླུགས་གཟར་ཏེ། །མར་ཁུའི་སྣོད་ནི་དེ་དང་མ་ཉམ། །གྲུ་གསུམ་ཟླུམ་པོའི་རྣམ་པ་དང་། །རྡོ་རྗེ་ཡིས་ནི་རྣམ་པར་བརྒྱན། །དགང་གཟར་གྱི་ནི་ཁ་ཞེས་བྱ། །སོར་དྲུག་པ་ཡི་ཚད་དུ་ནི། །མགོ་བོ་ཡང་ནི་དེ་བཞིན་བྱ། །ཐམས་ཅད་ཀུན་དུ་གྲུ་བཞི་བྱ། །སྣ་ཚོགས་རྡོ་རྗེ་སྙིང་

ག་རུ། །ལྟེ་བ་པདྨ་ཡིས་ནི་བརྒྱན། །ཆུ་སྲིན་ཁ་ནས་བྱུང་བ་ཡི། །རྩེ་དགུ་པ་ཡི་རྡོ་རྗེ་ཡིས། །དགང་གཟར་གྱི་ནི་མཐའ་རུ་ལྡན། །བླུགས་གཟར་བ་ཡི་མིག་དང་འདྲ། །ཡང་ན་དེ་ནི་པདྨས་སོ། །ནང་གི་གཏིང་རིང་གསལ་བ་དང་། །ཧ་ཅང་རིང་དང་ཐུང་མ་ཡིན། །རྡོ་རྗེ་ཕྲ་མོས་ནང་དུ་
བརྒྱན། །མར་ཞུའི་སྣོད་ནི་ཟླུམ་པོར་གྲགས། །ལྟེ་བ་རིང་ཞིང་དྲི་མ་མེད། །རྡོ་རྗེ་ལ་སོགས་རྒྱན་དང་ལྡན། །ལྕི་བ་དང་ནི་ཡང་བ་སྤང་། །ཞི་བ་ལ་སོགས་བྱེ་བྲག་ཏུ། །བཞི་རུ་དབྱེ་བ་བདག་གིས་བས་བསྟན། །དྲུག་པོ་དེ་ནི་དུར་ཁྲོད་དུ། །དབང་ནི་ཆུ་ཡི་ངོགས་སུ་བྱ། །རྒྱས་པ་
ཞིང་གི་དབུས་སུ་སྟེ། །ཡང་ན་དགོན་པ་ཆེན་པོ་རུ། །ཞི་བ་དེ་ནི་གྲོང་ཁྱེར་དུ། །ཡང་ན་རྒྱལ་པོ་ཡི་ནི་ཁབ། །རྟ་དང་གླང་པོ་ཆེན་པོ་དང་། །གཞོན་ནུ་མ་དང་བ་ལ་སོགས། །སྦྱིན་སྲེག་དུས་སུ་འབད་པ་ཡིས། །སྔགས་པས་སློབ་དཔོན་ལ་དབུལ་བྱ། །ཞ་བོ་འོན་པ་དམན་པ་
ལའང་། །ཅི་ནུས་ཀྱིས་ནི་སྦྱིན་པར་བྱ། །དཔལ་ཡེ་ཤེས་ཐིག་ལེ་ལས་སྦྱིན་སྲེག་གི་ཆོ་ག་ཞེས་བྱ་བའི་ལེའུ་སྟེ་བརྒྱད་པའོ།། །།དེ་ནས་ཡང་ནི་བཤད་བྱ་བ། །ཚོགས་ཀྱི་འཁོར་ལོའི་གཏོར་མ་ཆེ། །ཁྱིམ་ནི་སུམ་ཐོག་གི་ནི་གནས། །ཆོམ་རྐུན་ཀུན་དང་བྲལ་བ་ཡི། །ཕྱི་རོལ་
ཡུལ་མིན་ནང་གི་མིན། །སློབ་དཔོན་འདུས་ལས་བརྒྱན་པ་དང་། །རྡོ་རྗེ་མདའ་ནི་རྣམ་པར་གཟུགས། །རྡོ་རྗེ་སྐུད་ལ་སོགས་པས་བསྐོར། །དེ་ལྟ་བུ་ཡི་ཁང་མཆོག་ནི། །སྣ་ཚོགས་མེ་ཏོག་ལ་སོགས་ཀྱིས། །དཀྱིལ་འཁོར་ཐམས་ཅད་རྫོགས་པར་བྱ། །སི་ཧླ་ག་བུར་གྱིས་ནི་
མཛེས། །དེ་རུ་མཆོད་སྦྱིན་དོན་དུ་ནི། །བྱོལ་སོང་གཟུགས་ནི་རབ་ཏུ་བླང་། །སྐྱེ་བ་གཅིག་གམ་གཉིས་པ་འམ། །ཡང་ན་གསུམ་པ་ལང་ཚོ་སར། །ནད་ཀུན་མེད་པའི་བདེ་གྲུབ་པ། །དྲི་ཞིམ་རྡུལ་ནི་འབྱུང་བ་ཅན། །གང་ཞིག་མིག་ནི་ཡུན་རིངས་འཛུམས། །མཁས་པས་འབད་
དེ་བླང་བར་བྱ། །སྣ་ཚོགས་པ་ཡི་མཆོད་སྦྱིན་གྱིས། །གྲི་གུག་རུང་བས་བརྟག་པར་བྱ། །ཡན་ལག་རབ་ཀྱི་པདྨའི་སྣོད། །བཏུང་བའི་དོན་དུ་བླ་མའི་མདུན། །ཕྱེད་ནི་འཁོར་ལོ་ལ་བྲི་མ་སྟེ། །ཕྱེད་ནི་གཏོར་མར་གཏང་བར་བྱ། །ཁྲག་ཆེན་དང་ནི་ཤ་ཆེན་པོ། །ཅི་རྙེད་པ་ནི་བརྟག་པ་

ཡིན། །གཞན་ནི་སྣ་ཚོགས་མཆོག་བྱེ་བྲག །ཉ་དང་ཤ་ལ་སོགས་པར་ལྡན། །མི་འཚེ་བ་དང་སྐྱོན་ཀུན་བྲལ། །སྡིག་པ་མེད་དང་མ་བསླངས་པའོ། །ཆང་ནི་ཆེན་པོ་དང་ལྡན་པ། །གླུ་དང་རོལ་མོས་རབ་ཏུ་མཛེས། །སྒྲོན་མ་ལྔ་དང་བསྲེས་པས་ནི། །དེ་བཞིན་
གཤེགས་པ་ལྔ་དང་ལྡན། །སྣ་ཚོགས་དབུས་སུ་ཡན་ལག་མཆོག །གང་བས་དཀྱིལ་འཁོར་མདུན་དུ་བཞག །ཇི་ལྟར་བླ་མ་མཆོད་དུས་སུ། །ཇི་བཞིན་པ་ཡི་ཕྱག་རྒྱ་བཅིང་། །དེ་བཞིན་དུ་ནི་སྣ་ཚོགས་ཀྱིས་ཀྱང་། །རྩེ་གཅིག་གིས་ནི་བཅིང་བར་བྱ། །ལྡང་བའམ་ནི་འདུག་པའི་
ཚེ། །ཚོགས་ཀྱི་གཙོ་ལ་ཕྱག་འཚལ་ལོ། །ཤིན་ཏུ་དབྱངས་ནི་སྙན་པ་ཡིས། །ཡིད་འཕྲོག་པ་ཡི་གླུ་བླང་བྱ། །ཐེ་ཚོམ་དང་ནི་ཚིགས་བཅད་མིན། །མ་གནང་རྡོ་རྗེ་གར་མི་བྱ། །རྐང་པ་རྐྱོང་དང་གཉིད་ལོག་པ། །ཚོགས་ཀྱི་འཁོར་ལོར་མི་བྱའོ། །དཔལ་ལྡན་རྡོ་རྗེ་སེམས་ཇི་
བཞིན། །དཔལ་ལྡན་ལས་ཀྱི་རྡོ་རྗེའོ། །ཅི་མཛད་པ་དང་ཅི་གསུང་བ། །དེ་ནི་མཁས་པས་འབད་དེ་བསྒྲུབ། །དེ་ལྟར་མིན་ན་ཆད་པ་འབབ། །ཇི་ཙམ་ནུས་པ་ཡོད་པ་ཡིས། །དེ་རུ་དམ་ཚིག་དག་པ་ནི། །རྟག་ཏུ་བདག་ཉིད་བཞིན་བསྲུང་བྱ། །དམ་ཚིག་བསྲུངས་ན་འགྲུབ་
པ་ནི། །ལྷ་ཡི་དབང་ཕྱུག་རྙེད་པའོ། །དམ་ཚིག་མཆོག་གི་ཡེ་ཤེས་ཏེ། །དད་པ་ཡིས་ནི་རྟག་ཏུ་བཟའ། །དགྱེས་པའི་དམ་ཚིག་ཟིན་ནས་སུ། །འཁོར་ལོ་དང་བཅས་རིགས་རབ་ཚིམ། །རབ་ཚིམ་བྱས་ནས་གཏོར་མ་དབུལ། །ནམ་ཕྱེད་ལམ་གྱི་བཞི་མདོར་རོ། །ཡང་ན་
སུམ་མདོ་གྱེས་པ་རུ། །དུར་ཁྲོད་དམ་ནི་ཆུ་ངོགས་སུ། །ལྷག་མ་འམ་ནི་ཡང་ན་ཕུད། །དེ་ཀུན་བསྲེས་ཏེ་ཆུ་ཡིས་སྦྱང་། །གཞན་རྣམས་ཀུན་ནི་སོ་སོར་བཞག །རྩ་བ་ཇི་བཞིན་རིམ་པས་བཞག །རང་གནས་ཕྱིན་པ་ཙམ་གྱིས་ནི། །འཁོར་ལོ་ལ་ནི་སྣོད་གཅིག་བརྟག །སློབ་
དཔོན་ལ་ནི་དུམ་བུ་གཅིག །འབད་པ་ཡིས་ནི་བསྲུང་བར་བྱ། །རང་གི་ཚོགས་ལའང་སྦྱིན་མི་བྱ། །རང་དབང་བསྐུར་བའང་དེ་བཞིན་ནོ། །གཡོན་གྱི་ཡན་ལག་ཕྱག་རྒྱས་གར། །གཡོན་གྱི་ལག་པས་མཆོད་པའོ། །གཡོན་གྱི་རྐང་པས་སྡུན་བྱས་ནས། །གཡོན་མིག་གིས་ནི་བལྟ་བྱའོ། །

གལ་ཏེ་རེ་ཞིག་དེའི་དུས་སུ་རྣལ་འབྱོར་མས་བརྟག་པའི་དོན་གྱི་ཕྱིར་འོངས་ན་འཇིགས་པར་མི་བྱ་སྟེ། །སེང་གེ་ལྟ་བུའི་ཚུལ་གྱིས་ཡོངས་སུ་བརྟག་གོ། །དེ་ལྟར་ཡང་རྣལ་འབྱོར་མ་ཀུན་གཟུགས་སྣ་ཚོགས་པ་དང་། ཕྱག་རྒྱ་སྣ་ཚོགས་པ་དང་། སྐད་སྣ་ཚོགས་པ་རབ་ཏུ་བྱེད་དོ། །གང་གི་ཚེ་
དང་པོར་རྒྱང་རིང་པོ་ནས་ཧ་ཧར་རྒོད་པ་དེའི་ཚེ་ཁམས་གསུམ་རྣམ་པར་རྒྱལ་བའི་ཕྱག་རྒྱ་སྦྱིན་ནོ། །དེའི་དུས་སུ་ཧའི་ཡིག་འབྲུ་ལྔ་སྒྲ་ཆེན་པོས་བརྗོད་པར་བྱའོ། །ཅུང་ཟད་ཉེ་བར་འོངས་ན་ཨ་ལ་ལ་ཞེས་སྨྲ་བར་བྱའོ། །གང་གི་ཚེ་ཕྲད་ཙམ་ན་ལག་པ་བསྐོར་ན་དེའི་ཚེ་གྱེན་དུ་ལག་པའི་དབྱུག་
པ་བསྒྲེང་བའི་མཛུབ་མོ་སྦྱིན་ནོ། །གང་གི་ཚེ་སྨིན་མ་འབྱེད་པར་བྱེད་ན་དེའི་ཚེ་འཇིགས་པར་ལྕེ་བསྒྲིལ་བར་བྱའོ། །གང་གི་ཚེ་སྟེང་དུ་བལྟ་བ་དེའི་ཚེ་གཡོན་བརྐྱང་བས་མནན་པར་བྱའོ། །གང་གི་ཚེ་རྒྱབ་ནས་བལྟ་བ་དེའི་ཚེ་གཡས་བརྐྱང་བས་མནན་པར་བྱའོ། །གང་གི་ཚེ་རྣམ་པར་རྒོད་པ་
དེའི་ཚེ་ཕེཾ་ཀ་ར་ཞེས་བརྗོད་པར་བྱའོ། །གང་གི་ཚེ་ངུ་བ་དེའི་ཚེ་རྒོད་པར་བྱའོ། །གང་གི་ཚེ་གར་བྱེད་པ་དེའི་ཚེ་སྟོང་ཁེངས་བྱའོ། །གང་གི་ཚེ་སྐྲ་བཀྲོལ་བ་དེའི་ཚེ་གཙུག་པུད་དགྲོལ་ལོ། །གང་གི་ཚེ་གོས་བོར་བར་བྱེད་པ་དེའི་ཚེ་ལངས་ཏེ་གཅི་བ་གཏང་བར་བྱའོ། །གང་གི་ཚེ་གཅི་བ་
འཐུང་བ་དེའི་ཚེ་རྐང་པ་གཡོན་པའི་མཐེ་བོང་གིས་རྩྭ་བཏོག་པར་བྱའོ། །གང་གི་ཚེ་གཏམ་འདྲི་བ་དེའི་ཚེ་སྨྲ་བར་མི་བྱའོ། །གང་གི་ཚེ་འཕྲུག་པ་དེའི་ཚེ་རལ་པ་མདུད་པར་བྱའོ། །གང་གི་ཚེ་དཔྲལ་བར་རེག་པ་དེའི་ཚེ་སྟེང་གི་མཚམས་ཀྱི་མཐར་རེག་གོ། །གང་གི་ཚེ་རྣ་བར་རེག་པ་དེའི་ཚེ་
མགྲིན་པ་ལ་རེག་པར་བྱའོ། །གང་གི་ཚེ་སྣ་ལ་རེག་པ་དེའི་ཚེ་ལྕེ་ཕྱིར་དབྱུང་ངོ་། །གང་གི་ཚེ་མགྲིན་པ་སྟོན་པ་དེའི་ཚེ་ལག་པ་བརྐྱང་བར་བྱའོ། །གང་གི་ཚེ་ནུ་མ་སྟོན་པ་དེའི་ཚེ་མིག་བསྲུབས་བསྐྱོད་པར་བྱའོ། །གང་གི་ཚེ་ལྟེ་བ་སྟོན་པ་དེའི་ཚེ་སེ་གོལ་སྦྱིན་པར་བྱའོ། །གང་གི་
ཚེ་རྐེད་པ་བསྒུལ་པ་དེའི་ཚེ་མཚན་བསྟན་པར་བྱའོ། །གང་གི་ཚེ་རྐང་པ་རྐྱོང་བ་དེའི་ཚེ་མཐེའུ་ཆུང་གཉིས་ཁ་གདང་བར་བྱ་བ་དང་། མཛུབ་མོས་མིག་ཀྱང་དེ་བཞིན་ནོ། །སྣའི་ཕུར་མ་བར་མའི་ལྕེ་ཕྱི་རང་བྱུང་བར་བྱ་ཞིང་གཡས་བརྐྱང་དང་གཡོན་བརྐྱང་སྦྱིན་ནོ། །གང་གི་ཚེ་སྣ་

ཚོགས་པའི་གཟུགས་བསྟན་པ་དེའི་ཚེ་འཁོར་ལོ་བཅུའི་སྔགས་བརྗོད་པར་བྱའོ། །གང་གི་ཚེ་ཡི་གེའི་དོན་བརྗོད་པ་དེའི་ཚེ་ཡི་གེས་ལན་བརྗོད་པར་བྱའོ། །གང་གི་ཚེ་ཕྱིར་བརྗོད་པ་དེའི་ཚེ་ཤའི་ལན་སྨྲ་བར་བྱའོ། །གང་གི་ཚེ་རྒྱལ་མཚན་ཞེས་སྨྲ་བ་དེའི་ཚེ་
མཚན་ཞེས་སླར་བརྗོད་པར་བྱའོ། །གང་གི་ཚེ་པདྨ་བརྗོད་པ་དེའི་ཚེ་མངལ་ཞེས་བརྗོད་པར་བྱའོ། །གང་གི་ཚེ་གཤོལ་ཞེས་སྨྲ་བ་དེའི་ཚེ་ལག་པ་ཞེས་བརྗོད་པར་བྱའོ། །གང་གི་ཚེ་འདོད་པའི་ལེན་པ་དེའི་ཚེ་ཤ་ལི་ཞེས་སྨྲ་བར་བྱའོ། །གང་གི་ཚེ་ཚོ་ན་རྩི་ཞེས་བརྗོད་པ་དེའི་ཚེ་ཟན་ཞེས་བརྗོད་
པར་བྱའོ། །གང་གི་ཚེ་སྲོག་ཅེས་བརྗོད་པ་དེའི་ཚེ་ཆུ་ཟླ་ཞེས་སྨྲ་བར་བྱའོ། །གང་གི་ཚེ་རྙེད་པ་ཞེས་བརྗོད་པ་དེའི་ཚེ་ཡིད་ཅེས་བསྟན་ནོ། །གང་གི་ཚེ་མི་དགའ་བ་བརྗོད་པ་དེའི་ཚེ་ལམ་བསྟན་ནོ། །གང་གི་ཚེ་ཁྲོ་བ་ཞེས་བརྗོད་པ་དེའི་ཚེ་ཆང་བཏུང་ཞིང་སླར་བརྗོད་དོ། །གང་གི་ཚེ་མོད་པ་
ཞེས་བརྗོད་པ་དེའི་ཚེ་ངལ་སོ་ཞེས་སྨྲའོ། །གང་གི་ཚེ་བརྟན་པ་ཞེས་བརྗོད་པ་དེའི་ཚེ་གཉིད་ཅེས་སྨྲའོ། །གང་གི་ཚེ་དུས་བརྗོད་པ་དེའི་ཚེ་དགའ་བ་ཞེས་སྨྲའོ། །གང་གི་ཚེ་ཟླ་བ་ཞེས་བརྗོད་པ་དེའི་ཚེ་གོས་ཞེས་སྨྲའོ། །གང་གི་ཚེ་ཉི་མ་དྲན་ནོ་ཞེས་བརྗོད་པ་དེའི་ཚེ་སྐོམ་ཞེས་སྨྲའོ། །གང་
གི་ཚེ་མེ་ཞེས་བརྗོད་པ་དེའི་ཚེ་གྲིབ་མ་ཞེས་སྨྲའོ། །གང་གི་ཚེ་ཉ་ཞེས་བརྗོད་པ་དེའི་ཚེ་འོང་ཞེས་སྨྲའོ། །གང་གི་ཚེ་གླུའི་སྒྲ་བརྗོད་པ་དེའི་ཚེ་གསེར་ཞེས་སྨྲའོ། །གང་གི་ཚེས་ལེ་སྦྲ་མ་ཞེས་སྨྲ་བ་དེའི་ཚེ་ཁྱེར་ཞེས་སྨྲའོ། །གང་གི་ཚེ་རོ་ཞེས་བརྗོད་པ་དེའི་ཚེ་ས་ཞེས་སྨྲའོ། །གང་གི་ཚེ་ང་
རྒྱལ་ཞེས་བརྗོད་པ་དེའི་ཚེ་རླུང་ཞེས་སྨྲའོ། །གང་གི་ཚེ་མཚོ་ཞེས་སྨྲ་བ་དེའི་ཚེ་ལེགས་ཞེས་བརྗོད་དོ། །གང་གི་ཚེ་མདའ་ཞེས་བརྗོད་པ་དེའི་ཚེ་ཁྲིམས་འཆལ་ཞེས་སྨྲའོ། །གང་གི་ཚེ་ཆགས་པའི་སྒྲ་བྱེད་པ་དེའི་ཚེ་འོང་ཞེས་སྨྲའོ། །གང་གི་ཚེ་འོ་མ་ས་ཞེས་བརྗོད་པ་དེའི་ཚེ་སོང་ཞེས་སྨྲའོ། །
གང་གི་ཚེ་སེར་སྣ་ཞེས་བརྗོད་པ་དེའི་ཚེ་གྲུབ་ཅེས་སྨྲའོ། །གང་གི་ཚེ་ཉལ་ཞེས་བརྗོད་པ་དེའི་ཚེ་མེད་ཅེས་བརྗོད་དོ། །གང་གི་ཚེ་འབྲུ་ཞེས་བརྗོད་པ་དེའི་ཚེ་ཡང་དགེ་ཅེས་སྨྲའོ། །གང་གི་ཚེ་རྒྱས་པ་ཞེས་བརྗོད་པ་དེའི་ཚེ་དྲི་ཆུ་ཞེས་བརྗོད་དོ། །གང་གི་ཚེ་རི་བོང་ཞེས་བརྗོད་པ་དེའི་ཚེ་དྲི་ཆེན་ཞེས་

བརྗོད་དོ། །གང་གི་ཚེ་གཤོལ་ཞེས་བརྗོད་པ་དེའི་ཚེ་བྲག་ཅེས་སྨྲའོ། །གང་གི་ཚེ་གྲང་ཞེས་སྨྲ་བ་དེའི་ཚེ་ཁུ་བ་ཞེས་བརྗོད་དོ། །གང་གི་ཚེ་ཟླ་བ་ཞེས་བརྗོད་པ་དེའི་ཚེ་དགའ་བ་ཕྲད་ཅེས་སྨྲའོ། །གང་གི་ཚེ་པ་ལ་ཤ་ཞེས་བརྗོད་པ་དེའི་ཚེ་ངལ་ཞེས་སྨྲའོ། །གང་གི་ཚེ་སིན་དྷུ་བརྗོད་
པ་དེའི་ཚེ་མི་ཁོམ་ཞེས་སྨྲའོ། །གཞན་ན་རང་གི་ཡི་གེའི་རྩ་བའི་དོན་ཤེས་པར་བྱའོ། །བུད་མེད་གང་ཞིག་རྐང་ལག་ཆེན་པོ་དེ་ནི་གཡོན་དུ་གཏང་ངོ་། །བུད་མེད་གང་ཞིག་མིག་སེར་ཞིང་སྣ་ཉམས་པ་དེ་དག་གཡས་ཀྱི་ཆར་བཏང་། བུད་མེད་གང་ཞིག་སྣ་རིང་ལ་ལག་པ་དང་སོར་
མོ་རིང་བ། སྤུ་མང་བ་དེ་དག་གི་མདུན་དུ་སེ་གོལ་གསུམ་སྦྱིན་པར་བྱའོ། །བུད་མེད་གང་ཞིག་ཁ་དོག་གནག་ཅིང་གསུས་ཁྱིམ་སྨད་དུ་འཕྱང་ལ་ནུ་མ་འཇོལ་ཞིང་སོ་ཆེ་བ་དེ་དག་གི་མདུན་དུ་གཅིབ་བཏང་ངོ་། །བུད་མེད་གང་ཞིག་སྐྲ་སེར་ཞིང་མིག་ཟླུམ་ལ། སེན་མོ་རིང་བ་མགྲིན་པ་རི