Kinh tạng Tây Tạng (Kangyur Đại Học) — 080_རྒྱུད་འབུམ།_ང

ང་
བ་དེ་དག་གི་མདུན་དུ་གད་རྒྱངས་ཆེན་པོ་བྱའོ། །བུད་མེད་གང་ཞིག་ཙམ་པའི་མེ་ཏོག་ལྟར་དཀར་ཞིང་སྐད་འཇམ་ལ་མིག་རིང་བ་སོ་རི་ལྟ་བུ་དྲི་ཞིམ་པོ་ལ་དགའ་ཞིང་བཞིན་ཅུང་ཟད་འཛུམ་པ། ཟུར་མིག་ལྟ་བ་མཉམ་པར་མ་བཞག་པར་དེ་ལྟ་བུ་བྱེད་པ་དེའི་མདུན་དུ་ཅང་མི་སྨྲ་བར་ས་ལ་བལྟ་ཞིང་
མྱུར་བ་མྱུར་བར་གཡོན་ངོས་སུ་འགྲོ་བར་བྱའོ། །དེ་ལྟ་བུའི་དུས་སུ་སྙིང་པོའི་སྔགས་ཟློས་ཤིང་ཕྲེང་བ་བགྲང་བར་བྱའོ། །བུད་མེད་གང་ཞིག་སོར་མོ་གཅིག་ནི་མཛུབ་མོ་བརྐྱང་སྟེ། གཟུགས་སྔོན་པོ་དགའ་བར་ལྟ་བ་གོས་དཔུང་པའི་ངོས་སུ་འཕྱང་བ། སྨིན་མའི་དབུས་ན་དངོས་སུ་ཕྱག་རྒྱ་
པདྨའི་དབྱིབས་སམ་འཁྲིལ་ཤིང་ངམ། ཡང་ན་ཨ་ཤོ་ཀ་མཉེན་པོའི་རྩེ་མོ་དང་འདྲ་བ་མཇུག་མ་དེ་དང་ལྷན་ཅིག་འབད་པས་འདུས་པ་བྱའོ། །དེས་ནི་ཐམས་ཅད་འགྲུབ་པར་བྱེད་པ་དང་། འབྲས་བུ་ཐམས་ཅད་བྱེད་པ་དགའ་བ་ཆེན་པོ་སྐྱེད་པར་བྱེད་པས། དེ་དང་ལྷན་ཅིག་གཏོར་མ་ཆེན་
པོ་སེམས་ཅན་ཐམས་ཅད་ལ་ཕན་པའི་དོན་དུ་རྒྱ་ཆེན་པོའི་སེམས་ཀྱིས་རྟོག་པ་མེད་པར་སྦྱིན་པར་བྱའོ། །ཤིན་ཏུ་རྒྱ་ཆེའི་སྣོད་དག་ཏུ། །ཆོ་ག་ཡིས་ནི་དགོད་པར་བྱ། །དབུས་སུ་དཔལ་ལྡན་འཇིགས་པའི་གཟུགས། །སྣ་ཚོགས་རུས་པའི་རྒྱན་དང་བཅས། །ཁྲག་ཆེན་པོས་ནི་ཡང་

དག་བཀང་། །ཀ་པཱ་ལ་ནི་ཕྱག་གཡས་སུའོ། །ལྷ་ཆེན་སྣ་ཚོགས་གཟུགས་དང་ལྡན། །ལངས་པ་ཕྱག་ནི་གཡོན་པས་སོ། །ནག་པོ་མེ་ཡི་དྲག་པོ་ཤར། །ནག་པོ་ཆེན་པོ་ལྷོ་ཕྱོགས་སུ། །ནུབ་ཀྱི་ཕྱོགས་སུ་འཇིགས་བྱེད་དང་། །དྲག་པོ་ཆེན་པོ་བྱང་གི་
ཕྱོགས། །མེ་ཡི་མཚམས་དྲག་རལ་བ་ཅན། །ཆུ་བདག་མཚམས་སུ་དབྱུག་ནག་པོ། །རླུང་གི་མཚམས་སུ་རོ་ལངས་དྲག །དབང་ལྡན་ཧེ་རུ་ཀ་ནི་གནག། །པགས་མགོ་མ་དང་། སྒྲ་མ་དང་། དྲག་མ་དང་། ཐོད་པ་མ་དང་། ནག་མོ་དང་། ཤ་ལི་དང་། གཏུམ་མོ་དང་། རིགས་
མ་དང་། སྐོམ་མ་དང་། ཕག་མོ་དང་། ཤ་བ་རི་དང་། བྲམ་ཟེ་མོ་དང་། རལ་པ་གསུམ་མ་དང་། རལ་དྲག་མ་དང་། དྲག་མིག་མ་དང་། སྡུག་མ་དང་། གཡས་སྐོར་གཡོན་སྐོར་སྡུད་པ་ཡིས། སྣོད་རློན་པར་རིམ་པས་གཞག་གོ། །དེའི་ཕྱི་རོལ་དུ་འཇིག་རྟེན་སྐྱོང་བ་བརྒྱད་
ཚོགས་མང་པོ་དང་བཅས་པས་བསྐོར་བའོ། །ཀླུ་ཆེན་པོ་བརྒྱད། ཕོ་ཉ་དང་། ཕོ་ཉ་མོ་དང་། ཙེ་ཏ་དང་། ཙི་ཏི་འཁོར་དང་བཅས་པའོ། །མཁའ་འགྲོ་དང་། མཁའ་འགྲོ་མ་དུ་མ་དང་། མ་མོ་མང་པོ་དང་། འབྱུང་པོ་དང་། ཡི་དགས་དང་།
ཤ་ཟ་དང་། ཨུནྨཱ་ད་དང་། བརྗེད་བྱེད་དང་། གདུག་ངན་ཅན་གྲངས་མེད་པ་ཛཿཧཱུྃ་བྃ་ཧོཿ། གསོལ་ཅིག་གསོལ་ཅིག །དམ་ཚིག་བསྐྱང་བར་མཛོད་ཅིག །འཐུང་ཤིག །བདག་གི་ལས་ཐམས་ཅད་གྲུབ་པར་མཛོད་ཅིག །དམ་ཚིག་ཟུང་ཤིག །ཧཱུྃ་ཧཱུྃ་
ཕཊ་ཕཊ་སྭཱ་ཧཱ། དཔལ་ཡེ་ཤེས་ཐིག་ལེ་ལས་ཚོགས་ཀྱི་འཁོར་ལོའི་ཆོ་ག་དང་། གཏོར་མ་ཆེན་པོ་དང་། རྣལ་འབྱོར་མའི་མཚན་ཉིད་དང་། གསང་བའི་ཚིག་དང་། ཕྱག་རྒྱའི་བརྡ་ཞེས་བྱ་བའི་ལེའུ་སྟེ་དགུ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་
ཕྱུག་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་ཞབས་ལ་མགོ་བོས་གཏུགས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་ཡེ་ཤེས་རྒྱལ་དབང་པོ། །དཀྱིལ་འཁོར་མདོར་ནི་བསྟན་པ་གསུངས། །

འདི་རུ་ངེས་བསྟན་ཇི་ལྟར་ལགས། །མངའ་བདག་ཆེན་པོ་ཉིད་བཀའ་སྩོལ། །བཅོམ་ལྡན་འདས་ཀྱིས་བཀའ་སྩལ་པ། །དཀྱིལ་འཁོར་གྱི་ནི་ངེས་བསྟན་པ་སྟེན་པ། །ཇི་བཞིན་དེ་ཉིད་དཔའ་བོ་ཉོན། །སྔར་གསུངས་པ་ཡི་རྒྱུད་དོན་ལས། །ཨཱ་ལི་ཀཱ་ལི་བདེ་བ་ཆེ། མྃ་ཧཱུྃ་
གཉིས་ལས་ཐིག་ལེའི་ཚུལ། །དེ་གཉིས་ལས་ནི་གྲི་གུག་པད། །ཡེ་ཤེས་མེ་འོད་ལས་ཡེ་ཤེས། །སྙིང་པོའི་བདག་ཉིད་ཞུ་ལས་བྱུང་། །ཆར་སྤྲིན་དང་ནི་མཉམ་པའི་མདོག །ཕྱག་ནི་བརྒྱད་གཉིས་པ་ཡིས་བརྒྱན། །བཅུ་དྲུག་ཕྱེད་ཀྱི་ཞལ་འཇིགས་པ། །ཞབས་བཞི་
ཡིས་ནི་རབ་ཏུ་མཛེས། །ཉི་ཤུ་རྩ་བཞི་སྤྱན་གྱིས་ཕྱག །གཏི་མུག་གསུམ་གྱི་མུན་ནག་འཇོམས། །དཀར་པོ་སེར་པོ་དམར་པོའི་ཞལ། །སྟེང་ཞལ་བུང་བའི་བྱད་གཟུགས་ཅན། །གཡོན་བརྐྱང་གཡས་བརྐྱང་ཞབས་ཀྱིས་ནི། །འཇིགས་བྱེད་ཟླ་ཉི་ཤིན་ཏུ་མནན། །འཇིགས་
བྱེད་མ་ལྡན་ཀ་པཱ་ལ། །ཁྲག་གིས་བཀང་བ་ཕྱག་ན་བསྣམས། །ཞི་བའི་པགས་པ་ན་བཟའ་མཆོག །ཕྱག་གཉིས་ཀྱིས་ནི་གྱེན་དུ་བརྒྱངས། །ཚངས་པའི་པགས་པས་ཤམ་ཐབས་བྱས། །ཕྱག་རྒྱ་དྲུག་གིས་སྐུ་ལ་བཅིངས། །ཕྱག་རྒྱ་ཆེ་དང་གཉིས་མེད་སྦྱོར། །གར་དང་
ལྡན་པའི་ཚངས་སྤྱོད་བཞུགས། །ཚངས་པའི་ཡུལ་ས་བྱེ་བ་གསོལ། །ཚངས་པའི་ཡུལ་སའི་ཞལ་གྱིས་བརྒྱན། །ཕྱག་རྒྱ་ཆེན་པོ་ནམ་མཁའ་སྔོ། །ཕྱག་གཉིས་པ་ནི་ན་བཟའ་གྲོལ། །གྲི་གུག་སྣོད་བསྣམས་ཞི་བའི་ཞལ། །སྤྱན་གསུམ་པ་དང་སྐྲ་བཀྲོལ་བ། །
མགྲིན་པར་འཁྱུད་པ་གསང་བ་མཆོག །དཔའ་བོ་ལ་ནི་རང་བཞིན་བཞུགས། །དཔའ་བོ་མཆོག་གི་རྣམ་པ་དགྱེས། །སྣ་ཚོགས་རྡོ་རྗེའི་རལ་པས་བརྒྱན། །མགོན་པོ་སྣ་ཚོགས་ཟླ་ཅོད་པན། །སྣ་ཚོགས་ཚངས་པའི་ཆང་དང་ལྡན། །སྣ་ཚོགས་པདྨའི་གདན་ལ་བཞུགས། །སྣ་
ཚོགས་བདག་ཉིད་སྣ་ཚོགས་འབྱུང་། །སྣ་ཚོགས་རུས་པའི་རྒྱན་དང་ལྡན། །སྣ་ཚོགས་མགོ་བོའི་ཕྲེང་བས་མཛེས། །སྣ་ཚོགས་གར་གྱི་རོ་དང་ལྡན། །སྣ་ཚོགས་གཏི་མུག་གཅོད་པར་མཛད། །སྣ་ཚོགས་སྒྱུ་འཕྲུལ་བདག་ཉིད་མགོན། །སྣ་ཚོགས་སྒྱུ་འཕྲུལ་འཇོམས་པར་མཛད། །

དུར་ཁྲོད་བརྒྱད་ཀྱི་དབུས་སུ་ནི། །དཔའ་བོ་རྣལ་འབྱོར་མ་ཡིས་བསྐོར། །འཇིག་རྟེན་སྐྱོང་བ་བརྒྱད་དང་ལྡན། །ཤིང་གི་རྒྱལ་པོ་བརྒྱད་ཀྱིས་བསྐོར། །དཀྱིལ་འཁོར་དགྱེས་པ་འཕར་མ་གཉིས། །ལྷ་ཡི་དབང་ཕྱུག་འདིར་བདག་རོལ། །དཔའ་བོ་རྣལ་
འབྱོར་མ་དཀྱིལ་འཁོར། །ཇི་ལྟར་བདག་གིས་རོལ་བ་འདིར། །དེ་རུ་རེ་ཞིག་རིམ་པར་དགྱེས། །རྩེ་གཅིག་སེམས་ཀྱིས་ཁྱོད་ཉོན་ཅིག །དང་པོར་རེ་ཞིག་འཕར་མ་གཅིག །སྒོ་ལ་སོགས་པ་ཀ་བས་བརྒྱན། །གནས་དང་ཉེ་བའི་གནས་ཀྱི་རིམ། །ལྷ་ཡི་དབང་ཕྱུག་
བདག་གིས་བཤད། །སྣ་ཚོགས་པདྨའི་འདབ་མའི་ཤར་གྱི་ཨཽཌྱན་གྱི་གནས་སུ་ནམ་མཁའ་དྲི་མེད་དང་། ཟླ་བ་ཁ་དོག་ནག་པོའོ། །བྱང་དུ་ཛ་ལན་དྷ་རང་ཤིན་དུ་སྟོབས་ཆེན་དང་གཡོན་པ་མ་དཀར་པོའོ། །ནུབ་ཏུ་པུ་ལི་རར་ལྷའི་དབང་ཕྱུག་དང་ཉི་མཉམ་མ་སྐུ་མདོག་དམར་མོའོ། །
ལྷོར་ཀཱ་མ་རཱུ་པར་གསང་བའི་བདག་པོ་དང་། རླུང་ཟ་མ་ཨུཏྤ་ལ་སྔོན་པོའི་མདོག་གོ། །མེ་མཚམས་སུ་མཱ་ལ་ཝར་ཉེ་བའི་གནས་སུ་འོད་དྲག་དང་བསིལ་སྦྱིན་མ་ལྗང་ཁུའོ། །གནོད་སྦྱིན་གྱི་མཚམས་སུ་སིན་དྷུའི་ཡུལ་དུ་ཉིད་གྲ་དང་། སྙིང་པོའི་འདབ་མ་སྐུ་མདོག་པདྨ་སྔོན་པོ་དང་
འདྲ་བའོ། །རླུང་གི་མཚམས་སུ་ན་གར་ར་མཆོད་དགའ་དང་། བག་ཡོད་ཐོར་ཅོག་མ་ཟླ་བ་ལྟར་དཀར་མོའོ། །དབང་ལྡན་གྱི་མཚམས་སུ་ཐམས་ཅད་ཀྱི་བྱེད་པ་པོ་དང་ཉི་འདུལ་མ་ཉི་མའི་འོད་ལྟ་བུའོ། །ཤར་སྒོར་མུམྨུ་ནིའི་ཞིང་དུ་ཨུཏྤ་ལའི་སྙིང་པོ་དང་། ཞི་བ་འཆི་བའི་ཕོ་ཉ་མོ་
སྔོན་མོ་ཆེན་མོའོ། །བྱང་སྒོར་དེ་བི་ཀོ་ཊིར་ཞི་བ་ཆེན་པོའི་བདག་པོ་དང་ལྗང་བརྩོན་མ་གུར་གུམ་གྱི་མདོག་གོ། །ནུབ་སྒོར་ཉེ་ཞིང་ཀུ་ལུ་ཏར་ནག་པོ་འདུལ་མ་དང་འོད་བདུན་མ་དུད་པ་ནག་པོའི་མདོག་གོ། །ལྷོ་སྒོར་ཨར་བུ་དར་རྨད་དུ་བྱུང་བ་དཔའ་མོ་དང་ཚངས་པའི་མ་དུ་བའི་མདོག་གོ། །
ཤར་ལྷོའི་མཚམས་སུ་ཚནྡོ་ཧ་ཧ་རི་ཀི་ལ་བར་དྲག་ཆེན་དང་ཁྱབ་འཇུག་མ་སྤྲིན་གྱི་མདོག་གོ། །བྱང་མཚམས་སུ་ཀུ་ཏ་བར་དྲེགས་འཇོམས་དང་ཁམ་གསེར་གྱི་མདོག་གོ། །ནུབ་མཚམས་སུ་ཉེ་བའི་ཚནྡོ་ཧ་ར་ལཱ་མ་ཀར་རི་རབ་བརྟན་མ་དང་ཐམས་ཅད་སྐྱེད་བྱེད་མ་དམར་ནག་གོ། །ལྷོ་

མཚམས་སུ་ཀནྩི་ཀར་ནམ་མཁའི་ཞལ་དང་དཔའ་བོའི་ཡུམ་གསེར་གྱི་མདོག་གོ། །ཐབས་དང་ཤེས་རབ་གཉིས་སུ་མེད་པའི་སྦྱོར་བའི་འཁྱུད་པ་དང་། སྐུ་མདོག་དང་བཞུགས་སྟབས་འདྲ་བའོ། །དཔའ་བོ་རྣམས་ནི་ཞལ་བཞི་དང་ཕྱག་བཞིན་ཁ་ཊྭཱྃ་ག་དང་། ཀ་པཱ་ལ་དང་། དྲིལ་བུ་
དང་། རྔེའུ་ཆུང་བསྣམས་པའོ། །སྣ་ཚོགས་རྡོ་རྗེའི་གདན་པདྨའི་སྟེང་དུ་འཇིགས་བྱེད་ཀྱི་གདན་ལ་རྒྱལ་པོའི་བཞུགས་སྟབས་ཀྱིས་ཟླ་བ་དང་ཉི་མ་ཞབས་ཀྱིས་མནན་པ། མེའི་དཀྱིལ་འཁོར་གྱི་ནང་ན་ཉི་མ་བྱེ་བའི་འོད་པས་གསལ་བ་སྣང་བར་སྤྲོ་བའོ། །འཕར་མ་གཉིས་པར་སྣ་
ཚོགས་པདྨ་འདབ་མ་བརྒྱད་པ་དང་། སྒོ་དང་རྟ་བབས་ལ་སོགས་པ་དང་། དུར་ཁྲོད་བརྒྱད་དང་ལྡན་པའོ། །དེའི་ཤར་གྱི་འདབ་མར་འདུས་པའི་གནས་ལས་ཀྱི་ཡུལ་དུ་སྐམ་པ་མ་སྤྲིན་མདོག་གོ། །བྱང་དུ་གསེར་གྱི་གླིང་དུ་འཇིགས་མ་ཁ་དོག་དམར་མོ་ཆེན་མོའོ། །ནུབ་ཏུ་ཉེ་
བའི་འདུས་པ་ཀུ་ལུ་ཏར་འོད་མ་དམར་མོའོ། །ལྷོ་རབ་ནི་དུར་མཆུ་འཕྱངས་མ་པླ་ཀྴའི་མདོག་གོ། །མེའི་མཚམས་སུ་དུར་ཁྲོད་དུ་ཡི་དགས་འདུས་པར་རི་རབ་སོ་མ་ཟླ་བའི་མདོག་གོ། །གནོད་སྦྱིན་གྱི་མཚམས་ཆུ་ངོགས་སུ་དུས་ཀྱི་བདེ་བ་མར་མེའི་འོད་ཀྱི་མདོག་གོ། །རླུང་མཚམས་
ཉེ་བའི་དུར་ཁྲོད་དུ་ཙ་རི་ཊར་ཉི་མིག་མ་གསེར་མདོག་གོ། །དབང་ལྡན་གྱི་མཚམས་གཞོན་ནུའི་གྲོང་ཁྱེར་དུ་མེའི་ཞལ་མ་གསེར་བཙོ་མའི་མདོག་གོ། །ཤར་སྒོར་པི་ལ་བ་ཀ་སྨིརར་འདོད་པའི་མ་སེར་མོའོ། །བྱང་སྒོར་ཀི་ར་ཏར་ལྕེ་རིངས་མ་དཀར་མོའོ། །ནུབ་སྒོར་ཉེ་བའི་པི་ལ་བ་ནེ་པཱ་ལེར་
ཆོས་དཀར་མ་ཟླ་བ་ལྟར་དཀར་མོའོ། །ལྷོ་སྒོར་ཀམྦ་ཛར་བ་དན་མདོག་མ་མར་ཀ་ཏའི་མདོག་གོ། །ཤར་མཚམས་ལམ་གནས་ཤར་གྱི་ལུས་འཕགས་སུ་མིག་སྟོང་པ་རྡོ་རྗེ་ས་ལའི་མདོག་གོ། །བྱང་མཚམས་སུ་བྱང་གི་སྒྲ་མི་སྙན་དུ་སྟག་མོ་བཻཌཱུཪྻའི་མདོག་གོ། །ནུབ་མཚམས་སུ་བ་ལང་
སྤྱོད་དུ་གཏུམ་མོ་མུས་ར་བའི་མདོག་གོ། །ལྷོ་མཚམས་སུ་ཉེ་བའི་ལམ་འཛམ་བུའི་གླིང་དུ་འདོད་པའི་གཟུགས་མ་སྣ་ཚོགས་མདོག་གོ། །རྣལ་འབྱོར་མ་ཐམས་ཅད་ཞལ་བཞི་མ། སྤྱན་གསུམ་གསུམ་ཕྱག་བཞི་མ། སྐྲ་དང་ན་བཟའ་གྲོལ་བ། རལ་གྲི་དང་ཀ་པཱ་ལ་དང་། ཁ་ཊྭཱྃ་ག་དང་།

རྔེའུ་ཆུང་བསྣམས་པའོ། །རོའི་སྟེང་དུ་གཡོན་བརྐྱང་པས་བཞུགས་པའོ། །ཡང་ན་རྒྱལ་པོའི་བཞུགས་སྟབས་སུ་རང་འོད་ཀྱི་ཐབས་ལ་འཁྱུད་པ། རུས་པའི་རྒྱན་གྱིས་བརྒྱན་པ་བསྒོམ་པར་བྱའོ། །དེ་ལྟའི་དཀྱིལ་འཁོར་རྒྱལ་དབང་པོ། །རྒྱུད་ཀུན་དུ་ནི་རྙེད་པ་དཀའ། །
ལུས་དང་བྷ་ག་བྱང་ཆུབ་སེམས། །དཀྱིལ་འཁོར་གསུམ་ནི་རབ་མཆོག་གོ། །ཡང་ན་སྙིང་པོ་དཀྱིལ་འཁོར་བསྟན། །རང་གི་བདེ་བ་ལེན་པའི་ཕྱིར། །མ་ཡི་ཡིག་འབྲུ་འདབ་མར་བརྗོད། །ཎ་ཡི་ཡིག་འབྲུ་ལྟེ་བར་དྲན། །ཌ་ཡི་ཡིག་འབྲུ་གེ་སར་དག །ལ་ཡི་ཡིག་འབྲུ་དེ་
བདེ་འདྲ། །མ་ཡི་ཡིག་འབྲུ་རིན་ཆེན་གྲགས། །ཎ་ཡི་ཡིག་འབྲུ་མདུད་པར་བརྗོད། །ཌ་ཡི་ཡིག་འབྲུ་རིང་པོའི་དངོས། །ལ་ཡི་ཡིག་འབྲུ་ཁར་བརྗོད་དོ། །མ་ཡི་ཡིག་འབྲུ་ཤུ་ཀྲའི་གཟུགས། །ཎ་ཡི་ཡིག་འབྲུ་ཞུ་བའི་དངོས། །ཌ་ཡི་ཡིག་འབྲུ་འོད་དང་ལྡན། །ལ་
ཡི་ཡིག་འབྲུ་བདེ་བའི་གཟུགས། །མ་ནི་སྣང་བའི་འདུ་ཤེས་གྲགས། །ཎ་ནི་ཡིག་འབྲུ་སྣང་བ་མཆེད། །ཌ་ནི་སྣང་བ་སྣང་བ་ཐོབ། །ལ་ནི་ཡང་དག་དྲི་མེད་མཆོག །མ་ཡི་ཡིག་འབྲུ་དགའ་བར་གྲགས། །ཎ་ཡི་ཡིག་འབྲུ་མཆོག་ཏུ་དྲན། །ཌ་ཡི་ཡིག་འབྲུ་དགའ་
བྲལ་དགའ། །ལ་ནི་ལྷན་ཅིག་སྐྱེས་པར་དྲན། །མ་ཡི་ཡིག་འབྲུས་ཞེས་བྱ། །ཎ་ཡི་ཡིག་འབྲུ་ཆུ་རུ་བསྟན། །ཌ་ཡི་ཡིག་འབྲུ་དེ་ནི་མེ། །ལ་ཡི་ཡིག་འབྲུ་རླུང་གི་གཟུགས། །གཡོ་བའི་ཕྱིར་ནི་རླུང་དུ་བརྗོད། །ཡང་ན་ཁྱབ་པའི་ཕྱིར་ནི་དྲན། །ཡེ་ཤེས་རྙེད་པ་ཡི་
ནི་ཕྱིར། །བདེ་བ་ཡི་ནི་ཆེན་པོ་ལེན། །ཡེ་ཤེས་ངོ་བོ་བདེ་བ་ཆེ། །དཀྱིལ་འཁོར་དུ་ནི་ཡང་དག་བཞུགས། །དཀྱིལ་འཁོར་སངས་རྒྱས་རིན་ཆེན་གཙོ། །ཐིག་ལེའི་ངོ་བོ་ཡི་གེ་བྲལ། །རྣམ་པ་ཐམས་ཅད་རྣམ་པ་མེད། །ཕྱག་རྒྱ་དང་ནི་སྔགས་དང་བྲལ། །སྔགས་ཆེན་
ཀུན་དགའ་ར་བའི་ལམ། །དབྱངས་དང་གསལ་བྱེད་དང་བྲལ་བ། །དྲི་མ་མེད་པ་བཅོས་མ་མེད། །རྒྱུ་མཚན་དང་ནི་གཞི་མེད་པ། །ཡང་དག་དྲི་མེད་གནས་དག་པ། །རང་བཞིན་གྲགས་པ་སྐྱེ་མེད་མཁའ། །དཔའ་བོའི་ངོ་བོར་གྲགས་པ་བདག །རྣམ་པ་ཀུན་ཏུ་ཡང་དག་

བཞུགས། །དཀྱིལ་འཁོར་དཀྱིལ་འཁོར་པ་དང་བདག །དཀྱིལ་འཁོར་གྱི་ནི་བདག་པོ་བདག །དཔའ་བོ་འཆང་དང་ཉན་པ་བདག །བྱེད་དང་འཕྲོག་དང་མངའ་བདག་བདག །ཆོས་ཀུན་གྱི་ནི་རང་ངོ་བདག །སྟོང་དང་སྙིང་རྗེ་གཉིས་སུ་མེད། །སྟོང་པ་ཆེན་པོ་རང་ངོ་གྲགས། །
གང་དུ་མི་དམིགས་པ་ནི་བདག །དངོས་པོ་མ་ཡིན་བསམ་མི་བྱ། །དངོས་བདག་དེ་ཡང་དེ་ཉིད་མིན། །དངོས་དང་དངོས་མིན་རྣམ་པར་གྲོལ། །དངོས་དང་དངོས་མེད་བདག་ཉིད་བད་བདག །དངོས་དང་དངོས་མེད་གཉིས་ལས་འབྱུང་། །དངོས་དང་དངོས་མེད་ནང་ཡོད་དོ། །དུར་
ཤིང་གི་ནི་རོ་ཇི་བཞིན། །ཇི་ལྟར་ཏིལ་གྱི་ནང་གི་མར། །ཇི་ལྟར་ཤིང་གི་ནང་གི་མེ། །དེ་བཞིན་ཐམས་ཅད་བདག་ཉིད་བཞུགས། །འོན་ཀྱང་ཡེ་ཤེས་སེམས་དཔའ་ཡིས། །བདག་ཏུ་འཛིན་པར་མི་བྱའོ། །བདག་འཛིན་པ་ནི་ཉོན་མོངས་ཆེ། །སེམས་ཅན་དོན་ལས་ཉེ་
བར་ཉམས། །སེམས་ཅན་དོན་ལས་བསོད་ནམས་གཞན། །ཆེ་བ་གང་ན་ཡང་ནི་མེད། །རང་དོན་སྒྲུབ་ལ་བསོད་ནམས་མིན། །སྐྱེས་བུ་ཆེན་པོས་འདི་ལྟ་བུ། །རང་དོན་མ་རུངས་པ་ནི་དོར། །གཞན་ལ་སྡང་ཉམས་ཉན་ཐོས་སེམས། །རང་དོན་གཏི་མུག་འཛིན་པས་
ནོན། །སེམས་ཅན་དོན་ལ་རྒྱབ་ཀྱིས་ཕྱོགས། །གྲུབ་པ་ཆེན་པོ་འདོད་པ་ཡིས། །དེ་དང་ལྷན་ཅིག་གནས་མི་བྱ། །དེ་ལ་གཏམ་ཡང་མི་བྱ་སྟེ། །ཐབས་དང་མི་ལྡན་འཇིགས་པ་ཡིས། །མགོ་ལ་ནོར་བུས་བརྒྱན་ཀྱང་ནི། །སྦྲུལ་ནག་བཞིན་དུ་དོར་བར་བྱ། །ཉན་
ཐོས་དེ་དང་ནམ་ཡང་མིན། །དེ་བས་མུ་སྟེགས་འདུས་པ་མཆོག །ཇི་ལྟར་འཐིང་ཤིང་སྣོད་ཆག་པ། །དེ་ནི་གང་དུའང་དགོས་པ་མེད། །དེ་བཞིན་ཉན་ཐོས་ཚུལ་ཁྲིམས་ཉམས། །གང་ཚེ་རང་གི་ཆོས་ཀྱི་ནི། །ལྟ་བ་བསྟན་ཀྱང་དྲི་མ་ཅན། །དེ་ཚེ་དེ་ལ་དགོས་པ་མེད། །
བྱང་ཆུབ་སེམས་དཔའ་ཁྲིམས་ཉམས་ཀྱང་། །དེ་ལ་ལྟུང་བ་འབྱུང་བ་མིན། །ཡང་དག་ལྟ་དང་གཞན་དོན་ཅན། །དེ་འདྲའི་ཐབས་དང་ལྡན་པས་ན། །ཉེས་པས་གོས་པར་མི་འགྱུར་ཏེ། །ཆུ་ཡིས་པདྨ་ཇི་བཞིན་ནོ། །མུ་སྟེགས་པ་འམ་ཉན་ཐོས་ལ། །དམན་ཡང་དེ་ལ་སྨད་མི་

བྱ། །ཡེ་ཤེས་དཀྱིལ་འཁོར་མཐར་ཕྱིན་པས། །དད་པས་དེ་དག་མཆོད་མི་བྱ། །ཕྱི་ཡི་འཕར་མ་གཅིག་གནས་སུ། །དཀྱིལ་འཁོར་འདིར་བཞུགས་རྣལ་འབྱོར་མ། །རྟག་ཏུ་མེ་ཏོག་སྤོས་ལ་སོགས། །སྔགས་འདི་ཡིས་ནི་མཆོད་པར་བྱ། །ཨོྃ་ནི་དང་པོར་ཧཱུྃ་
ཕཊ་མཐར། །བར་དུ་མིང་ནི་སྤེལ་བར་བྱ། །སྣ་ཚོགས་ལྔ་ཡི་མཆོད་སྦྱིན་གྱིས། །དཀྱིལ་འཁོར་ས་ལ་རབ་ཏུ་མཆོད། །མཆོད་ན་ཐེ་ཚོམ་མེད་པར་ནི། །གྲུབ་པ་ཆེན་པོ་རྙེད་པར་འགྱུར། །དཔལ་ཡེ་ཤེས་ཐིག་ལེ་ལས་རྣམ་པ་དང་བཅས་པའི་དཀྱིལ་འཁོར་སྒོམ་པ་ཞེས་
བྱ་བའི་ལེའུ་སྟེ་བཅུ་པའོ།། །།དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །ཡེ་ཤེས་ཉི་མ་བཅོམ་ལྡན་འདས། །སྙིང་གའི་པདྨ་ཁ་འབྱེད་པ། །གང་ཞིག་
བདག་ནི་ཅི་ཞུ་བ། །བདག་ལ་ཐུགས་རྗེ་ཆེན་པོས་གསུངས། །སྔགས་ཀྱི་བཟླས་པ་དང་། མཆོད་སྦྱིན་དང་། མཆོད་པ་དང་། དབང་བསྐུར་བ་དང་། གནས་ཀྱི་མདོར་བསྟན་པ་དང་། སྦྱིན་སྲེག་དང་། གཏོར་མ་ཆེན་པོའི་རིམ་པས་འདིར་བཅོམ་ལྡན་འདས་ཀྱིས་བདག་ལ་ངེས་པའི་
དོན་བསྟན་པ་བཀའ་སྩལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །སྔགས་ཀྱི་བཟླས་པའི་ངེས་པའི་དོན། །ཉོན་ཅིག་ཡང་དག་བདག་གིས་བཤད། །དགའ་བ་ལ་སོགས་པ་ལས་འབྱུང་། །ཡིད་ནི་སྔགས་ཞེས་བརྗོད་པ་ཡིན། །ཡང་ནི་སྲུབ་དང་བསྲུབས་པའི་སྔགས། །
སྔགས་ནི་བདུད་རྩིར་བསྟན་པའོ། །ལམ་གྱི་ཐར་པ་དེ་ནི་སྔགས། །ཚིགས་རྒྱས་པ་ནི་དེ་བཞིན་ནོ། །ཕྲད་པ་གཉིས་ཀྱི་དབུས་ན་གནས། །དེ་ནི་དོན་དམ་པ་ཡི་སྔགས། །སྔགས་ནི་ཨཱ་ལི་ཀཱ་ལི་ཡིན། །བརྗོད་པ་དེ་ནི་བཟླས་པའོ། །བསྐྱེད་དང་རྫོགས་དང་བྱེ་བྲག་ཏུ། །སྔགས་ཀྱི་
བཟླས་པ་རབ་ཏུ་གྲགས། །གང་དུ་རྐེ་དང་རྐན་ནི་གཉིས། །བསྐྱོད་པ་གང་དུ་མི་འབྱུང་བ། །སྲོག་གི་རྩ་བའི་ནང་ཡོད་པ། །ལུགས་དང་ལུགས་མིན་རྒྱུན་མི་འཆད། །ཐིག་ལེ་གསུམ་དང་ཡིག་གསུམ་དག །རང་འོད་མ་བཅོས་བརྗོད་པར་བྱ། །རྐན་གྱི་ནང་དུ་ལྕེ་འཇུག་པ། །

རོ་མ་ཡིས་ནི་མནན་པར་བྱ། །ཡང་ནི་རྩེ་མོའི་ཆ་ཡིས་རེག །མཉམ་སྦྱོར་རྣམ་པའི་བསམ་གཏན་གྱིས། །གྲགས་པ་ཡོད་པའི་བདུད་རྩི་བཞིན། །དེ་ནས་ཚུལ་ནི་འབྱུང་བར་འགྱུར། །སྤྲུལ་པའི་རིམ་པའི་བྱེ་བྲག་ཏུ། །ཐིག་ལེ་དྲངས་པ་བདེ་བའི་སྐུ། །མཆོད་སྦྱིན་དཀྱིལ་
འཁོར་གྱིས་ནི་བརྒྱན། །དེ་ཡི་བསྐྱེད་རིམ་བདག་གིས་བཤད། །དཔལ་ལྡན་རྡོ་རྗེ་འཛིན་པ་ཡིས། །དགྱེས་པའི་གནས་བསྟེན་མཆོད་སྦྱིན་ནོ། །མཆོག་དགའ་འབྱུང་བའི་མཆོད་སྦྱིན་ནི། །རབ་ཀྱི་དཀྱིལ་འཁོར་དེ་རུ་བྱ། །མཆོག་གི་དགའ་བ་འཁོར་བར་བསྟན། །ཀཱ་
ལི་ཡེ་ཤེས་མཚན་ཉིད་དོ། །སྐུ་བརྒྱད་བདག་ཉིད་མཆོད་སྦྱིན་ནི། །གནས་བརྒྱད་པར་ནི་མཆོད་པར་བྱ། །ཇི་བཞིན་རྣལ་འབྱོར་མ་ཡི་འབྱུང་། །དེ་ཡི་དོན་ནི་བདག་གིས་བཤད། །སུམ་ཅུ་རྩ་གཉིས་ཡིག་གཟུགས་ཀྱིས། །ཀཱ་ལིའི་ཐིག་ལེས་གཙོ་བོའི་ཕྱིར། །
སྒོམ་པའི་དབང་པོས་གནས་ལ་སོགས། །ལྷ་མོ་བཅས་པས་མཆོད་པར་བྱ། །ལྷ་མོ་ཀུན་དང་གནས་ལ་སོགས། །ལྷ་ཡི་དབང་ཕྱུག་སྐྱབས་ཡིན་ནོ། །ལྷ་མོ་འདི་རུ་རྩ་ཡིན་ཏེ། །འབྱུང་བ་དང་ནི་གནས་ས་བྱེད། །སྐྱབས་ལས་རྣམ་པར་རྫོགས་པ་ཡིན། །མཚན་དང་
དཔེ་བྱད་ལྡན་པའོ། །གྲུ་གསུམ་དབུས་སུ་བཅོམ་ལྡན་འདས། །ཨུཏྤལ་སྔོན་པོའི་མདོག་དང་འདྲ། །སྣ་ཚོགས་པདྨའི་གདན་དབུས་སུ། །བདུད་བཞི་ཡི་ནི་སྟེང་ན་བཞུགས། །ཞལ་ནི་བཅུ་དྲུག་ཕྱག་བཅུ་དྲུག །ཞལ་ནི་སོ་སོར་སྤྱན་གསུམ་མོ། །སེར་པོ་དམར་པོ་
ལྗང་ཁུའི་ཞལ། །རི་བོང་ཅན་ནི་གཡོན་སྐོར་ཞིང་། །ཞལ་གཞན་ཀུན་ནི་བུང་བ་བཞིན། །སྟེང་གི་ཞལ་ནི་འཇིགས་པའོ། །གཤིན་རྗེའི་པགས་པས་རྣམ་དཀྲིས་བྱས། །དམ་བཅས་དོན་ཕྱིར་བརྟུལ་ཞུགས་དོན། །སངས་རྒྱས་ཕྲེང་བའི་དོ་ཤལ་བྱས། །མགོ་བོ་ཡི་ནི་ཆུན་
འཕྱང་བརྒྱན། །གར་དགུ་ཡི་ནི་རོ་དང་ལྡན། །སྐུ་ནི་ཕྱག་རྒྱ་དྲུག་གིས་མཛེས། །སྣ་ཚོགས་རུས་པའི་རྒྱན་དང་ལྡན། །སྣ་ཚོགས་འོད་ཀྱི་སྣང་བས་འབར། །ཡེ་ཤེས་མཁའ་འགྲོ་བདེ་བ་ཆེན། །ལེགས་དགྱེས་དབང་མོ་གཉིས་མེད་སྦྱོར། །དུར་ཁྲོད་ཀྱི་ནི་ཐལ་བས་བྱུགས། །

སྟེང་དུ་བགྲད་པས་བདེ་བར་བཞུགས། །གཡས་བརྐྱང་བ་ཡི་གར་དང་ལྡན། །གསང་བའི་དོན་གནས་བརྡ་བྱེད་པ། །མཁའ་འགྲོ་མ་ཡི་ཚོགས་ཀྱིས་བསྐོར། །དུར་ཁྲོད་བརྒྱད་ཀྱི་དབུས་ན་བཞུགས། །རྡོ་རྗེ་དྲིལ་བུ་གཉིས་མེད་སྦྱོར། །ཚངས་པ་ཡི་ནི་
པགས་པས་ཁེབས། །མདའ་གཞུ་འཁོར་ལོ་རིན་པོ་ཆེ། །རལ་གྲི་རྩེ་གསུམ་རྔེའུ་ཆུང་དང་། །ཟླ་བ་ཉི་མ་སྟ་རེ་སྣོད། །ཁ་ཊྭཱྃ་ག་དང་ཐོད་པའོ། །བཅོམ་ལྡན་འདས་མ་དེ་དང་འདྲ། །ཡང་ན་ཕྱག་ནི་གཉིས་མའོ། །རྡོ་རྗེ་གྲི་གུག་འཛིན་པས་འཁྱུད། །ཞི་བ་སྤྱན་ནི་
གསུམ་པའོ། །ནང་གི་འཕར་མ་དགྱེས་པ་ནི། །ཟླ་བ་གང་བ་བཞིན་དུ་དག །སྣ་ཚོགས་པདྨ་ཡི་ནི་གཞི། །འདབ་མ་བརྒྱད་ཀྱིས་རྣམ་པར་མཛེས། །ཕྱི་མ་གྲུ་བཞི་རུ་ནི་གྲགས། །སྣ་ཚོགས་རྡོ་རྗེའི་སྟེང་དུའོ། །ཡི་དགས་ཆེན་པོའི་ཕྲེང་བས་ལྡན། །སྣ་ཚོགས་
དཔའ་བོས་ཉེ་བར་མཛེས། །སྣ་ཚོགས་པ་ཡི་ཤིང་གིས་བསྐོར། །སྣ་ཚོགས་རྣལ་འབྱོར་མ་དང་ལྡན། །དེའི་ནང་དུ་གྲུ་གསུམ་གྱི་ཕྱག་རྒྱའི་གྲྭ་ནི་དཔལ་ཨཽ་རྒྱན་དང་ཛ་ལན་དྷར་དང་། པུ་ལཱི་ར་སྟེ། མགོ་བོ་དང་། གཙུག་པུད་དང་། སྤྱི་བོར་ལེགས་དགྱེས་རྡོ་རྗེ་མ་དང་། རྡོ་རྗེ་
འཚེད་མ་དང་། རྡོ་རྗེ་གླང་ཆེན་མ་བཅོམ་ལྡན་འདས་ལ་སྐུལ་བར་བྱེད་ཅིང་ཕྱག་གི་འཕར་མ་འབར་བར་རོ་མཆོག་ཆེན་པོའི་སྣོད་ཀྱིས་མཆོད་སྦྱིན་འབུལ་བར་བྱེད་ཅིང་ཚངས་པའི་བུ་གར་རྩེ་སྦྱར་གྱི་ཕྱག་རྒྱ་བྱེད་པ་སྟེ་མཐེའུ་ཆུང་ལུ་གུ་རྒྱུད་དུ་སྦྲེལ་ཏེ་ལྷག་མས་མཐེ་བོང་མནན་ནས།
མཛུབ་མོ་སྦྱར་བ་འོག་ཏུ་བཅིངས་པའི་སྐུ་ཡི་དགས་ཆེན་པོའི་སྟེང་ན་གཡོན་བརྐྱང་བས་གནས་པ། སྤྱན་གསུམ་པ། སྐྲ་གྲོལ་ཞིང་ན་བཟའ་གྲོལ་བ། ཆུ་སྐྱེས་རྒྱས་པ། བཅོམ་ལྡན་འདས་ལ་བལྟ་ཞིང་བཞུགས་པའོ། །ཤར་གྱི་ཕྱོགས་སུ་སྣ་ཚོགས་པདྨ་འདབ་མ་བརྒྱད་
པའི་ལྟེ་བར་ཀཱམ་རཱུ་པ་སྟེ། སྨིན་མའི་དབུས་སུ་འཇིགས་མའོ། །དེའི་ཤར་གྱི་འདབ་མར་མཱ་ལ་ཝ་སྟེ་སྣའི་རྩེ་མོར་དཔའ་མོའོ། །བྱང་གི་འདབ་མར་སིན་དྷུ་སྟེ་མིག་གཉིས་སུ་ཆང་འཐུང་མའོ། །ནུབ་ཀྱི་འདབ་མར་ནཱ་ག་ར་སྟེ་རྣ་བ་གཉིས་སུ་འཇིགས་བྱེད་མའོ། །ལྷོ་ཡི་འདབ་

མར་སིང་ག་ལ་སྟེ་ཁའི་པདྨར་ཕོ་ཉ་མའོ། །བྱང་མཚམས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་མུམྨུ་ནི་སྟེ། ཀོས་ཀོར་སྟོབས་ཆེན་མའོ། །དེའི་ཤར་གྱི་འདབ་མར་དེ་བི་ཀོ་ཊི་སྟེ། སྐེའི་གླིང་བུར་རྟ་མགྲིན་མའོ། །བྱང་གི་འདབ་མར་ཀུ་ལུ་ཏ་སྟེ། རྒྱབ་ཀྱི་གླིང་བུར་རྟ་རྣ་མའོ། །
ནུབ་ཀྱི་འདབ་མའི་ཨར་བུ་ཏར་ནུ་མ་གཉིས་སུ་གླང་ཆེན་སྣ་མའོ། །ལྷོའི་འདབ་མར་ཏ་ལི་ཀི་ལི་བ་སྟེ། སྙིང་གར་གླང་ཆེན་ལྟོ་བ་མའོ། །ནུབ་ཕྱོགས་ཀྱི་སྣ་ཚོགས་པདྨ་འདབ་མ་བརྒྱད་པའི་ལྟེ་བར་གོད་པ་རི་སྟེ། ལྟེ་བའི་གནས་སུ་མེ་མའོ། །དེའི་ཤར་གྱི་འདབ་མར་ལམ་པ་ཀ་སྟེ། གསང་
བའི་པདྨར་ཆུ་རྒྱུན་མའོ། །བྱང་གི་འདབ་མར་ཀཉྩི་ཀ་སྟེ། མཚན་གྱི་དབུས་སུ་རི་བོང་ཅན་མའོ། །ནུབ་ཀྱི་འདབ་མར་ལས་ཀྱི་ཡུལ་ཏེ། མཚན་རྩེར་ཉི་མའི་འོད་མའོ། །ལྷོ་ཡི་འདབ་མར་གསེར་གླིང་སྟེ། བཤང་ཁའི་གནས་སུ་དུང་སྣ་མའོ། །ལྷོ་ཕྱོགས་ཀྱི་པདྨ་འདབ་མ་བརྒྱད་
པའི་ལྟེ་བར་ཀོང་ཀ་ན་སྟེ། བརླ་གཉིས་སུ་དུང་གཙུག་མའོ། །ཤར་གྱི་འདབ་མར་བིན་དྷུ་སྟེ། པུས་མོ་གཉིས་སུ་དུང་ལྟེ་མའོ། །བྱང་གི་འདབ་མར་ཡི་དགས་འདུས་པ་སྟེ། རྗེ་ངར་གཉིས་སུ་སྟོབས་ཆེན་མའོ། །ནུབ་ཀྱི་འདབ་མར་རྒྱ་མཚོའི་ངོགས་ཏེ། རྐང་པ་གཉིས་སུ་བྱ་
རྒོད་མའོ། །ལྷོའི་འདབ་མར་ཙ་རི་ཊ་སྟེ། སོར་མོ་ལ་རྒོད་ཁ་མའོ། །དེའི་སྣ་ཚོགས་པདྨ་འདབ་མ་བརྒྱད་པ་བཞིའི་འདབ་མ་ལ་དགོད་དོ། །འདབ་མ་ལྷག་མ་ཀུན་ལ་ཁྲག་ཆེན་པོས་ཤིན་ཏུ་གང་བའི་ཀ་པཱ་ལ་དང་ལྡན་པའི་སྣ་ཚོགས་ཆེན་པོའི་བུམ་པ་ཁ་རྒྱན་བཙུགས་པ། བདུད་
རྩི་ཆེན་པོས་ལྟོ་བ་གང་བ། དར་སྣ་ཚོགས་ཀྱིས་མགྲིན་པ་མཐོ་བར་བསྐོར་བའོ། །ཤར་མཚམས་སུ་ཀུ་མཱ་ར་པུ་རི་དང་། ཀསྨི་ར་སྟེ་མཐེ་བོང་དང་ལུས་ཐམས་ཅད་ལ་ཧོར་པ་མ་དང་ཧོར་མིག་མའོ། །བྱང་མཚམས་སུ་ཀི་ར་ཏ་དང་། ནེ་པཱ་ལ་སྟེ་རྐང་པ་གཉིས་ལ་ལྷག་པར་ཧོར་
མགོ་མ་དང་དེ་བཞིན་དུ་དམར་མོའོ། །ནུབ་མཚམས་སུ་ཀམ་བུ་ཛ་དང་། ཤར་གྱི་ལུས་འཕགས་ཏེ་རྐེད་པ་དང་། སྙིང་གར་མིག་དམར་དང་སྲོག་མའོ། །ལྷོ་མཚམས་སུ་བྱང་གི་སྒྲ་མི་སྙན་དང་བན་ལང་སྤྱོད་དེ་ལྟེ་བའི་ལྟེ་བ་དང་། སྤྲུལ་པའི་སྙིང་པོར་འཛིན་མ་དང་རོ་མའོ། །

འཛམ་བུའི་གླིང་དུ་གདགས་པའི་པདྨའི་སྣར་བཅོམ་ལྡན་འདས་དང་ཨ་བདྷཱུ་ཏཱིའོ། །དེ་ལྟ་བུ་ནི་ནང་གི་འཕར་མས་བདེ་བ་ཆེན་པོའི་འཁོར་ལོ་ན་ཡོད་པའི་རྩ་སུམ་ཅུ་རྩ་གཉིས་རྣམ་པར་དག་པར་ཕྱི་མ་ཕྱི་མར་རྒྱུད་ཀྱི་གོ་རིམས་རྣལ་འབྱོར་མ་རྣམས་ཀྱི་ནང་གི་དག་པའོ། །
བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ཕྱི་རོལ་ཏུ་མཚན་དང་དཔེ་བྱད་དང་ལྡན་པ་རྣམ་པ་དང་བཅས་པ་བརྒྱད་གཉིས་ཀྱི་ལོའོ། །བྱད་གཟུགས་མཛེས་པ་ཆེན་པོའི་ཤ་རྒྱས་པས་དྲེགས་པ། སྒེག་པའི་ང་རྒྱལ་ཅན་ཕྱག་བཞི་པ་སྤྱན་གསུམ་པ། སྲ་ཞིང་མཐོ་བའི་
ནུ་མ་དང་། རུས་པ་སྣ་ཚོགས་ཀྱི་རྒྱན་གྱིས་བརྒྱན་པ། ཕྱག་རྒྱ་ལྔ་འཛིན་པ། གཡོན་བརྐྱང་བས་རོའི་སྟེང་ན་གནས་པ། ཀ་པཱ་ལ་དང་། ཁ་ཊྭཱྃ་ག་དང་། མདའ་གཞུ་ཁེངས་པར་འགེངས་པ། བདུད་གྲངས་མེད་པ་འཇོམས་པ་ཁོ་ན། སྐུ་མདོག་སྣ་ཚོགས་པ་མཛེས་པའི་གཟུགས་འཛིན་
པ། ཐུགས་རྗེ་ཆེན་པོས་སེམས་ཅན་འགུགས་མ། སེམས་ཅན་གྱི་དོན་མཛད་པ་ལ་བརྩོན་པ། བྲེལ་བ་དང་མི་མཁྱེན་པ་མེད་པའི་སེམས་དང་ལྡན་པའོ། །ཕྱིའི་འཕར་མ་ཤར་དང་བྱང་དང་ནུབ་དང་ལྷོ་མཚམས་རེ་རེར་ནང་གི་ལྷ་མོ་བཞིན་དུ་ལྷ་མོ་གཉིས་གཉིས་ཏེ། སྐྲ་དམར་མ་དང་།
རིན་ཆེན་མ་དང་། ཕུག་རོན་མ་དང་། སེར་མོ་དང་། ནག་མོ་དང་། རི་བོང་མ་དང་། རི་དགས་མོ་དང་། ར་མ་མོའོ། ཤར་དང་། བྱང་དང་། ནུབ་དང་། ལྷོའི་སྒོ་རེ་རེར་སྒོ་སྐྱོང་མ་གཉིས་གཉིས་ཏེ། དེ་དག་ཀྱང་དྲེགས་པ་ཆེན་པོ་འཇིགས་པ་ཆེན་མོ་མཆོག་གི་ལེགས་དགྱེས་ཀྱིས་
རིངས་པ། སྣ་ཚོགས་ཀྱི་ཉམས་ཀྱིས་སྐུ་ཁྱབ་པའོ། །ཤར་སྒོར་རྡོ་རྗེ་རོ་ལངས་མ་དང་། རྡོ་རྗེ་དྲ་བ་མ་སྐུ་མདོག་ནག་པོ། ཕྱག་བཞི་མ་མདའ་གཞུ་འགེངས་ཤིང་ཆུ་སྲིན་དང་ཉ་བསྣམས་པ། ཀ་པཱ་ལ་དང་ཁ་ཊྭཱྃ་ག་འཛིན་པ། སྤྱན་གསུམ་པ། ཕྱག་རྒྱ་ལྔས་བརྒྱན་པ། གཅེར་བུ་
སྒྲ་གྲོལ་བ། མིའི་རུས་པ་སྣ་ཚོགས་ཀྱི་རྒྱན་གྱིས་བརྒྱན་པ། གཡོན་བརྐྱང་བ། མགོ་བོའི་ཆུན་འཕྱང་རྒྱུ་མ་ལས་བརྒྱུས་པ་འཆང་བའོ། །བྱང་སྒོར་རྡོ་རྗེ་རྩེ་མོ་མ་དང་། དེ་བཞིན་དུ་རྡོ་རྗེ་ཟླུམ་པ་མ་སྐུ་མདོག་སེར་མོ། སེང་གེ་དང་། བྱ་ཁྱུང་བསྣམས་པའོ། །ནུབ་སྒོར་རྡོ་ར་སྐེ་

རགས་མ་དང་། རྡོ་རྗེ་སེར་མོ་མ་སྐུ་མདོག་དམར་མོ། གླིང་བུ་དང་། རྫ་རྔ་ཆེན་པོའི་སྒྲ་ཁོ་ནའོ། །ལྷོ་སྒོར་རྡོ་རྗེ་དགོད་མ་དང་། རྡོ་རྗེ་ཉི་མ་མོ་སྐུ་མདོག་ལྗང་གུ། རྫ་རྔ་དང་པི་ཝང་གི་རོལ་མོའི་སྒྲ་ཁོ་ན་སྟེ། ཇི་ལྟར་ཤར་སྒོར་བཞུགས་པའི་རྣལ་འབྱོར་མ་དེ་ལྟར་ཐམས་ཅད་ཀྱང་རུས་
པ་ལ་སོགས་པའི་རྒྱན་དང་། བཞུགས་སྟབས་དང་། ཕྱག་མཚན་དང་ལྡན་པའོ། །ལོངས་སྤྱོད་ཀྱི་འཁོར་ལོའི་ནང་ན་ཡོད་པའི་རྩ་བརྒྱད་གཉིས་ཀྱི་གྲངས་ནི་དེ་དག་ཀུན་གྱི་རྣམ་པར་དག་པའོ། །སྐུ་བརྒྱད་བདག་ཉིད་ཀྱི་ནི་མགོན། །མཆོད་སྦྱིན་སྒྲ་ཡིས་ཀུན་ཏུ་བརྟགས། །མཆོད་
པ་དེ་ནི་མཆོད་སྦྱིན་བརྗོད། །རྩ་ནི་ཀུན་གྱི་གནས་རབ་མཆོག །གནས་ནི་གདན་ལ་སོགས་པའི་དགྱེས། །གནས་ཀུན་གྱི་ནི་བླ་ན་མེད། །གསང་ཆེན་དག་པ་པདྨ་ཡི། །འདབ་མ་བརྒྱད་པ་ལྟེ་བར་བཅས། །བདེ་བ་ཡི་ནི་ཡངས་པའི་སར། །རྩ་ཡི་དཀྱིལ་འཁོར་གྱིས་
བརྒྱན་ནོ། །གནས་ནི་གདན་ལ་བྱ་བར་གྲགས། །གནས་ནི་རྟེན་དུ་བརྗོད་པའོ། །བདེ་བ་འབྱུང་བའི་ངལ་སོས་ནི། །དེ་ཡི་ཞིང་ནི་དོན་དམ་པར། །བདེ་བའི་ཡེ་ཤེས་འབྱུང་བ་སྟེ། །ཚནྡོ་ཧར་ནི་འདི་རུ་བཤད། །ཐིག་ལེ་གསུམ་གྱི་ཡེ་ཤེས་བདེ། །གཅིག་བྱེད་པ་ཡི་གཏན་
ཚིགས་ཀྱིས། །དེ་ཡི་འདུས་སར་བསྟན་པ་ཡིན། །རྣལ་འབྱོར་རྒྱུད་དུ་རྙེད་དཀའ་བ། །གང་དུ་ཚོར་བ་ཡོད་པ་སྟེ། །བདེ་བ་འབྱུང་བའི་ཐིམ་དེ་བཞིན། །དེ་ནི་འདི་རུ་དུར་ཁྲོད་བརྗོད། །ཡང་ན་བདེ་བའི་རྣམ་ཤེས་སོ། །གང་དུ་བདེ་བ་ཡང་དག་རྙེད། །དེ་ནི་པི་ལ་བ་རུ་གྲགས། །
སྐྱེ་དང་ཐིམ་པའི་ཡེ་ཤེས་ཏེ། །གང་དུ་བདེ་བའི་ཟླ་བ་སྐྱེ། །དེ་ནི་ལམ་རབ་ཏུ་ནི་བསྟན། །འགྲོ་བའི་བདག་ཉིད་ལམ་ཡིན་ནོ། །བདེ་བའི་རྒྱལ་པོ་གང་ཞིག་འགོག །དེ་ནི་སྦྱོར་བའི་ཡེ་ཤེས་རབ། །དེ་ནི་གནས་བརྒྱད་དགྱེས་པ་ཡིན། །སྐུ་བརྒྱད་རང་གི་ངོ་བོ་ཅན། །ཡེ་ཤེས་བརྒྱད་
ཀྱི་བདག་ཉིད་དག །སངས་རྒྱས་ཀུན་གྱིས་རྙེད་དཀའ་བ། །རྩ་ཀུན་གྱི་ནི་དག་པའི་གཞི། །དེ་ལ་ཡང་ནི་རྩ་ཀུན་གནས། །ཉེ་བའི་གནས་ནི་ཐམས་ཅད་ཀུན། །ལྷ་ཡི་དབང་ཕྱུག་རྣམ་པར་སྨིན། །བསྐྱེད་དང་རྫོགས་པའི་སྦྱོར་བ་ཡིས། །ཐིག་ལེ་དྲུག་ནི་རབ་ཏུ་གྲགས། །

ཐིག་ལེའི་དབུས་ན་ཡེ་ཤེས་ཡོད། །ངག་གི་ལམ་གྱིས་རྙེད་པར་དཀའ། །བསྐྱེད་པ་དང་ནི་རྫོགས་པ་མེད། །དྲུག་མིན་དེ་བཞིན་གསུམ་པ་མིན། །གསུམ་དང་བྲལ་བ་གསུམ་པར་གྲགས། །ཡེ་ཤེས་རང་བཞིན་དེ་སྐྱེ་མེད། །ཉི་མའི་ཐིག་ལེའི་ཡེ་ཤེས་ཤར། །
འབད་པ་ཡིས་ནི་མཆོད་སྦྱིན་བྱ། །གང་ཚེ་མཆོག་བྱུང་མ་ཤར་བར། །དེ་ཚེ་ཉི་མ་འབྱུང་མི་འགྱུར། །ཟླ་བ་དེ་ནི་དགའ་བྲལ་དགའ། །ཆགས་པ་འདི་རུ་ཐིམ་པར་བྱེད། །ཉི་མའི་དབུས་ནས་ཟླ་བ་འབྱུང་། །ཟླ་བའི་དབུས་ནས་ཉི་མ་འཆར། །དྲི་མ་མེད་ཕྱིར་ཡངས་པར་འགྲོ། །
ཤེས་རབ་བདག་ཉིད་གཟུགས་ཀྱི་ཕྱིར། །ཐམས་ཅད་ལ་ནི་ཚིམ་པར་བྱེད། །ཐམས་ཅད་ཀྱི་ནི་སྐྱེ་བའི་རྒྱུ། །འབྲས་བུ་བྱེད་པའི་བདག་ཉིད་ཟླ། །རྒྱུ་བྱེད་བདག་ཉིད་ཟླ་བ་སྟེ། །འབྲས་བུ་བྱེད་བདག་ཉི་མའོ། །རྒྱུ་དང་འབྲས་བུ་གཉིས་མེད་པའི། །བདེ་བ་ཆགས་ཆེན་
བདག་ཉིད་དོ། །ཆགས་པ་ཆེན་པོ་དངོས་མེད་ན། །ཇི་ལྟར་བདེ་བ་འབྱུང་བར་འགྱུར། །བདེ་བ་ཡེ་ཤེས་དྲི་མེད་གྲགས། །ཐ་མལ་བདེ་ཉིད་བདེ་བ་མིན། །བྱོལ་སོང་བག་ཆགས་རབ་རྨོངས་པ། །དབང་པོ་གཉིས་ཀྱི་བདེ་བར་འདོད། །བདེ་བ་མཆོག་གི་རང་རིག་པ། །
ཆགས་པ་དང་ནི་ཆགས་བྲལ་མེད། །བདེ་བ་ཐིག་ལེའི་ནང་དུ་ནི། །ཆར་ཡང་ནང་དུ་བདེ་བ་ཆེ། །དེ་གཉིས་ཡེ་ཤེས་ཚུལ་གྱི་ནང་། །རྣམ་པར་ཤེས་པའི་ཚུལ་ཅན་དང་། །རྣམ་པར་ཤེས་དང་ཡེ་ཤེས་བྲལ། །གཞན་དང་གཞན་མིན་ནང་ཡོད་པའོ། །སྦྱོར་དྲུག་གྱེས་པ་རྣམ་
པར་ཤེས། །ཆར་ཡང་རྩ་བ་ཀུན་བརྟག་བྲལ། །རྟོག་པ་སྤངས་པ་དེ་ཉིད་ནི། །བསམ་གཏན་འཛིན་པ་མེད་པའོ། །ཚོར་བྱ་ཚོར་བྱེད་གཉིས་ལས་གྲོལ། །སྲིད་དང་མྱ་ངན་འདས་དག་པའི། །དེ་ནི་གསང་ཆེན་དེ་ཉིད་དོ། །གང་དུ་ཡང་ནི་གསལ་མ་བྱས། །འབད་པ་ཡིས་ནི་
སྦ་བར་བྱ། །སྨྲ་བར་མི་བྱ་གང་ལ་ལར། །རྣལ་འབྱོར་རྒྱུད་དུ་མོས་གྱུར་པ། །ལྷ་ཡི་དབང་ཕྱུག་གསལ་མི་བྱ། །དཔལ་ཡེ་ཤེས་ཐིག་ལེ་ལས་སྔགས་ཀྱི་བཟླས་པའི་རིམ་པ་དང་། མཆོད་སྦྱིན་གྱི་ཆོ་ག་དང་། དཀྱིལ་འཁོར་སྐྱེད་པའི་རིམ་པ་དང་། གནས་ཀྱི་དོན་དང་། རྩའི་

འཁོར་ལོ་འབྱུང་བ་དང་། དེ་ཁོ་ན་ཉིད་ཀྱི་དོན་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་མཆོད་པའི་ཆོ་ག་འདིའི། །ངེས་པར་བསྟན་པ་བདག་གིས་བཤད། །ཐིམ་དང་ལོངས་སྤྱོད་དག་གིས་ནི། །ཡིད་འཕྲོག་ཡང་དག་མཆོད་པའོ། །ཟླ་བ་ཉི་མ་མེ་ཏོག་གིས། །
སྐུ་ཡི་རྒྱལ་པོ་ཉིད་ལ་མཆོད། །འདོད་པ་འདི་ནི་དཔྲལ་བ་རུ། །མར་ངོ་ཚེས་ཀྱི་དང་པོ་དབང་། །ཡིད་ལས་དེ་རུ་འདོད་པར་འགྱུར། །ངེས་པར་ཨ་ཡི་ཐིག་ལེ་ལས། །ཐིམ་པ་འདི་ཡི་ཚེས་གཉིས་པ། །བདུད་རྩི་འདི་ནི་སྨིན་ཕྲག་ཏུ། །དགའ་བས་དེ་ལས་འདའ་བར་འགྱུར། །
ཨཱ་ལིའི་ཐིག་ལེ་གཉིས་པས་སོ། །བདེ་བའི་མཁུར་ཚོས་གཉིས་ནས་སུ། །ཚེས་གསུམ་པ་ལ་ལོངས་སྤྱོད་འགྱུར། །དེ་ལ་རྣམ་པར་སྨིན་པས་འགྲོ། །ཨཱ་ལིའི་ཐིགས་པ་གསུམ་པས་སོ། །བདུད་རྩི་ཀོས་ཀོའི་གནས་སུ་ནི། །ཚེས་བཞི་བ་ལ་ཐིམ་པར་འབྱུང་། །དེ་ལ་མགུ་
བ་ལས་དགའ་བ། །བཞི་པའི་ཡེ་ཤེས་ཐིག་ལེས་སོ། །བདེ་བ་ཡི་ནི་མགྲིན་གནས་སུ། །ཚེས་ལྔ་པ་ལ་ལོངས་སྤྱོད་འབྱུང་། །དེ་ལ་དགྱེས་པས་རྒྱས་པར་འགྱུར། །ཐིག་ལེ་ལྔ་པའི་ཁེངས་པས་སོ། །འདོད་པ་བྲང་གི་གནས་སུ་ནི། །ཚེས་དྲུག་པ་ལ་ཐམ་པར་འབྱུང་། །
དེ་ལ་བསམ་གཏན་ལས་དྲག་པོ། །ཐིག་ལེ་དྲུག་ལ་གང་བས་སོ། །བདེ་བའི་ནུ་མའི་གནས་སུ་ནི། །ཚེས་བདུན་པ་ལ་དབང་ནི་འབྱུང་། །དེ་ལ་བདུན་པས་འབྱུང་བ་ཡིན། །ཐིགས་པ་བདུན་པས་ཁེངས་པས་སོ། །འདོད་པའི་རྩི་བ་ལོགས་གནས་སུ་ནི། །ཚེས་བརྒྱད་
པ་ལ་ཐིམ་པ་འབྱུང་། །དེ་ལ་ཆགས་པས་མཆོག་གི་དགའ། །ཐིག་ལེ་བརྒྱད་པ་གང་བས་སོ། །བདེ་བའི་ལྟེ་བའི་གནས་སུ་ནི། །ཚེས་དགུ་པ་ལ་ལོངས་སྤྱོད་འབྱུང་། །དེ་ལ་རྣམ་སྨིན་ལས་འབར་འབྱུང་། །ཐིག་ལེ་དགུ་པ་ཁེངས་པས་སོ། །འདོད་པའི་མདོམས་ཀྱི་
གནས་སུ་ནི། །ཚེས་བཅུ་པ་ལ་ཐིམ་པ་འབྱུང་། །དེ་ལ་བརྟན་ལས་ཐིག་ལེར་འགྱུར། །ཐིག་ལེ་བཅུ་པ་གང་བས་སོ། །བདེ་བའི་སྤྱི་བོའི་གནས་སུ་ནི། །བཅུ་གཅིག་པ་ལ་དབང་ནི་འབྱུང་། །དེ་ཡི་སྟོབས་ལས་མྱོས་པར་འགྱུར། །བཅུ་གཅིག་ཐིག་ལེས་ཁེངས་

བས་སོ། །བདེ་བའི་རྡོ་རྗེའི་རྩ་གནས་སུ། །བཅུ་གཉིས་ཚེས་ལ་ཐིམ་པ་འབྱུང་། །དེ་ལ་འོད་ལས་དགའ་བྲལ་དགའ། །བཅུ་གཉིས་ཐིག་ལེ་གང་བས་སོ། །རྒྱས་པའི་རྡོ་རྗེའི་དབུས་གནས་སུ། །བཅུ་གསུམ་ཚེས་ལ་ལོངས་སྤྱོད་འབྱུང་། །དེ་ལས་མང་
པས་ཨུར་ཏར་འགྱུར། །ཨཱ་ལིའི་བཅུ་གསུམ་ཐིག་ལེས་སོ། །བདེ་བའི་མདུད་པའི་གནས་སུ་ནི། །བཅུ་བཞི་བར་ཐིམ་པ་ཤར། །དེ་ལ་རེག་བྱ་ལས་ཆུར་འགྱུར། །བཅུ་བཞིའི་ཟླ་བའི་ཐིག་ལེས་སོ། །བདེ་བའི་ནོར་བུའི་དབུས་སུ་ནི། །ཉ་གང་པ་ལས་དབང་ནི་ཤར། །དེ་
ལས་ཕྲད་པས་གཉིད་དུ་འགྱུར། །བཅྭ་ལྔ་པ་ཡི་ཐིག་ལེས་སོ། །དབང་པོ་བཅུ་དྲུག་པ་ཡི་ཆ། །གཞན་ནི་གང་དུའང་མི་དམིགས་སོ། །དེ་བཞིན་དུ་ནི་སོ་སོར་གཟུགས། །རང་བཞིན་དེ་ནི་ཡོད་པ་མིན། །དགའ་བའི་བྱེ་བྲག་ལྷན་སྐྱེས་དགའ། །བཅུ་དྲུག་པ་ཡི་དོན་དུ་
ཡོད། །ཆར་ཡང་བཅུ་དྲུག་འདི་རུ་ནི། །ཡོད་པ་མ་ཡིན་མེད་པ་མིན། །དེ་བཞིན་དུ་ནི་ཡེ་ཤེས་ཆེ། །ལྷ་ཡི་དབང་ཕྱུག་རང་བཞིན་ནོ། །གཡས་གཡོན་ཡན་ལག་གཉིས་སུ་ནི། །ཁུ་བ་ཡི་ནི་འབྱུང་བར་དྲན། །མར་ངོ་དེ་བཞིན་ཡར་ངོ་ཡི། །འདོད་པ་ཡིས་ནི་འབྱུང་བའི་
ཚེ། །བཅུ་དང་ལྔ་ཡིས་གཉིས་མེད་སྦྱོར། །བདེ་བ་འདི་ཡི་འབྱུང་བ་མིན། །དེ་ཉིད་གསུམ་ཤེས་བཅུ་དང་ལྔ། །ཤེས་རབ་དང་བྲལ་བདེ་བ་ཆེ། །བླ་མའི་ཞལ་སྔའི་བཀའ་དྲིན་གྱིས། །གཉིས་སུ་མེད་པའི་བདེ་བ་ཤེས། །རྟག་ཏུ་མོས་པ་ཡིས་ནི་ཤར། །བསམ་གཏན་
གྱིས་ནི་ཤེས་པའོ། །བཅུ་དྲུག་གི་ནི་ཡི་གེའི་གཟུགས། །ཨཱ་ལིའི་ཐིག་ལེ་རང་ངོ་བོ། །ཨ་སོགས་ཡིག་འབྲུའི་ཆར་ཡང་འབྱུང་། །ཨཱ་ལིའི་ཡེ་ཤེས་བདེ་བདག་ཉིད། །ཀཱ་སོགས་ཡིག་འབྲུའི་ཆར་ཡང་འབྱུང་། །ཀཱ་ལིའི་ཡེ་ཤེས་བདེ་བ་ཆེ། །ཨཱ་ལི་ཀཱ་ལི་གཉིས་སྦྱོར་ལས། །
མཆོད་སྦྱིན་གྱིས་ནི་རབ་མཆོད་བྱ། །མཆོད་པ་ཡང་ནི་དེ་བཞིན་ཏེ། །གསང་པའི་པདྨའི་སྙིང་གར་རོ། །གསང་བ་དེ་ཉིད་གསུམ་ཞེས་བྱ། །ལ་ལ་འདའ་ལ་གཉིས་སྦྱོར་ལས། །མཆོད་སྦྱིན་གྱིས་ནི་རབ་མཆོག་བྱ། །མཆོད་པ་ཡང་ནི་དེ་བཞིན་ཏེ། །གསང་བའི་པདྨའི་སྙིང་

གར་རོ། །གསང་བ་དེ་ཉིད་གསུམ་ཞེས་བྱ། །ཐིམ་དང་ལོངས་སྤྱོད་སོགས་བྱེ་བྲག །ཐིམ་པ་དང་ནི་ལོངས་སྤྱོད་དབང་། །དགའ་བ་གསུམ་དུ་བསྟན་པའོ། །དེ་ཡི་ཐིག་ལེ་གསུམ་ཞེས་བྱ། །སྐུ་གསུམ་ཡིག་གསུམ་བདག་ཉིད་དོ། །ཚངས་པའི་བུ་ག་དེ་བཞིན་
མགྲིན། །སྙིང་ག་རུ་ནི་ཐིག་ལེ་གསུམ། །དེ་ཡིས་བསྐྱེད་པའི་རིམ་ཤེས་བྱ། །མདུད་པའི་ནང་ནི་མན་ཆད་དོ། །བཟློགས་པ་ཡི་ནི་ཐིག་ལེ་གསུམ། །གྱེན་དུ་རྫོགས་པའི་རིམ་པ་ཡིན། །རྒྱུ་འབྲས་རྣམ་དག་བྱེ་བྲག་ཏུ། །ཐིག་ལེ་དྲུག་ནི་རབ་ཏུ་གྲགས། །དྲི་མེད་ཡེ་
ཤེས་ཆེར་ཡང་དྲུག །དེ་ནི་རྣམ་ཤེས་སྦྱོར་དྲུག་བཤད། །དེ་ཡི་དབུས་སུ་དེ་ཉིད་བཞུགས། །ལྷན་སྐྱེས་དགའ་བའི་བདེ་བ་ཆེ། །མཆོད་པའི་ལས་སྦྱོར་ཆེ་བ་ཡིས། །ཐེ་ཚོམ་མེད་པར་རྙེད་པར་འགྱུར། །མཆོད་པའི་དམ་ཚིག་དུས་སུ་ནི། །གསང་བའི་སྒྲ་ནི་འབད་པ་ཡིས། །
གང་ཞིག་འདོད་པ་གྲུབ་པ་ཆེ། །དམ་ཚིག་སེམས་དཔས་བརྗོད་པར་བྱ། །ལ་ལ་རྡོ་རྗེ་ལ་ལ་པད། །ཨཱ་ལི་ཟླ་པ་ཀཱ་ལི་ཉི། །རི་བོང་ཅན་ནི་ཁུ་བའོ། །ཉི་མ་ཁྲག་ཏུ་རབ་ཏུ་གྲགས། །ཁུ་བ་ག་པུར་ཤེས་བྱ་སྟེ། །ཁྲག་ནི་སི་ཧླ་ཞེས་སུ་དྲན། །སྤྲུལ་ནི་ནག་པོ་གཉིས་ཀ་ཡིན། །
འདུས་པ་ཕུང་པོར་བརྗོད་པའོ། །ནཱ་ར་ཀ་པཱ་ལ་རུ་བརྗོད། །ཆགས་པ་ཆང་དུ་རབ་ཏུ་གྲགས། །ཞེ་སྡང་དེ་ནི་ཤ་ཡིན་ཏེ། །གཏི་མུག་ཚོད་མ་རུ་ནི་དྲན། །ང་རྒྱལ་འདི་རུ་ཤ་ཆེན་པོ། །ཟན་ནི་ཕྲག་དོག་ཉིད་དུ་དྲན། །གཅི་འཁོར་བཤང་བ་མྱ་ངན་འདས། །མཐོ་རིས་གཟུགས་
ཞེས་དྲན་པའོ། །མི་ཡི་ཡུལ་ནི་སྒྲ་ཞེས་བསྟན། །ས་འོག་རོ་རུ་བཤད་པའོ། །དྲི་ནི་རི་རབ་རྩེ་མོའོ། །གླིང་བཞི་པོ་ནི་རེག་བྱའོ། །ས་ནི་བ་རུ་རབ་ཏུ་གྲགས། །ཆུ་ནི་སྲིང་མོ་ཡིན་པར་དྲན། །མེ་ནི་ཡུམ་སྟེ་བུ་མོ་ནི། །རླུང་དུ་རབ་ཏུ་གྲགས་པའོ། །ནམ་མཁའ་སྒྱུག་མོར་
ཤེས་པར་བྱ། །བཅིངས་པ་མེད་པ་ནམ་མཁའ་ཡིན། །སྐལ་ལྡན་མ་ཡིན་ཀྲུང་ཀྲུང་མོ། །སྐལ་ལྡན་ངང་པ་འོན་པ་མཚོ། །འོན་པ་མིན་པ་རྒྱ་མཚོར་བརྗོད། །དབང་བསྐུར་གྲོང་ཁྱེར་པ་རུ་དྲན། །དབང་བསྐུར་མིན་པ་གྲོང་པ་བཞིན། །གསང་བ་སྙིང་ག་ཡིན་པར་བརྗོད། །ཁྱེར་

ཤོག་དྲི་མ་མེད་པར་བརྗོད། །གསལ་བྱེད་ནམ་མཁའ་ཡིན་པར་དྲན། །གཞང་ཁ་དགྱེས་པ་ཌྃ་ཌི་འབྲས། །མ་རུངས་ལྕགས་སུ་ཀུན་ཏུ་གྲགས། །སྟན་ནི་པདྨ་ཡིན་པར་བརྗོད། །སྦྱིན་པ་གེ་སར་དྲན་པའོ། །གཞོན་ནུ་མ་ནི་མཚེ་འུར་གྲགས། །རྒན་
མོ་གཙང་བར་དྲན་པའོ། །གནས་པ་རྣ་བ་ཞེས་སུ་བརྗོད། །འགྲོ་བ་འདི་ནི་ཨར་བུ་ཏ། །དུས་ནི་དབྱུག་པ་བདེ་བ་ཉིད། །ཐལ་བ་མིན་དགའ་དགའ་སྟོབས་སོ། །དེ་དག་ཚོགས་ཀྱི་མཆོད་སྦྱིན་གྱི། །དུས་སུ་འབད་པས་བརྗོད་པར་བྱ། །ཁྲུང་ཁྲུང་ལ་སོགས་འཇུག་
མིན་ཕྱིར། །གསང་བའི་ཚིག་ནི་སྨྲ་བར་བྱ། །རྣལ་འབྱོར་མའམ་རྣལ་འབྱོར་པ། །ཤིན་ཏུ་དགྱེས་པས་གསང་སྐད་སྨྲ། །དཔལ་ཡེ་ཤེས་ཐིག་ལེ་ལས་མཆོད་པའི་རིམ་པ་དང་གསང་བའི་སྐད་ཅེས་བྱ་བའི་ལེའུ་སྟེ་བཅུ་གཉིས་པའོ།། །།དབང་བསྐུར་ལ་སོགས་ངེས་
བསྟན་ནི། །ལྷ་ཡི་དབང་ཕྱུག་ངས་འདིར་བཤད། །རྒྱུད་གསུམ་གྱི་ནི་རིམ་པ་ཡིས། །དབང་དྲུག་དབྱེ་བ་བསྟན་པའོ། །ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལས་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་
ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ལྟར་དེ་བཞིན་ནོ། །དགུ་ཡི་
བྱེ་བྲག་དབང་ལ་སོགས། །འབྲས་བུའི་ཕྱིར་ན་བརྒྱད་དབྱེར་འགྱུར། །བཞི་པ་དེ་ལྟར་དེ་བཞིན་བརྗོད། །ཤེས་རབ་ཡེ་ཤེས་དེ་ཡི་འབྲས། །དངོས་པོ་སོ་སོར་ཤེས་མི་བྱ། །དེ་ལྟར་ཞེས་ནི་ཚད་མེད་དོ། །དེ་བས་འབྲས་བུའི་ཚིག་དོན་ནི། །རིགས་པ་མ་ཡིན་པ་ཡི་སེམས། །
དེ་བཞིན་རེ་ཞིག་དགའ་བའི་སེམས། །དེ་བཞིན་རེ་ཞིག་དགའ་བའི་རིམ། །ཇི་ལྟ་བུར་ནི་ཡོད་པར་འགྱུར། །དགའ་བ་ལུས་སུ་གྲགས་པ་སྟེ། །མཆོག་ཏུ་དགའ་བ་འདི་རུ་གང་། །ཡིད་ནི་དགའ་བྲལ་ཤེས་པར་བྱ། །ལྷན་སྐྱེས་དེ་ནི་གང་ན་ཡོད། །ཀུན་ན་ཡོད་པའི་ཡེ་

ཤེས་སེམས། །སེམས་ལས་གཞན་ནི་ཡོད་པ་མིན། །གང་ཞིག་ཅི་ཞིག་འདི་ཐམས་ཅད། །དེ་ནི་ཐམས་ཅད་སེམས་ཡིན་ནོ། །སེམས་ལས་ཐམས་ཅད་འབྱུང་བ་སྟེ། །སེམས་ཀྱིས་ལོངས་སུ་འདས་པའོ། །ལུས་ཀྱི་མགོ་བོ་དགའ་བའི་གནས། །ངག་ནི་མགྲིན་པ་
མཆོག་ཏུ་དགའ། །སེམས་ནི་སྙིང་གར་ཤེས་བྱ་བ། །ཆགས་པའི་དགའ་བརྟག་ཏུ་ཤར། །ལུས་རྒྱུ་འབྲས་བུ་དེ་ནི་ངག །ངག་ནི་རྒྱུ་སྟེ་འབྲས་བུ་ཡིད། །ཡིད་ཉིད་ཡོངས་སུ་ཤེས་པ་ནི། །འབྲས་བུ་དེ་ནི་དོན་དམ་པར། །དེ་ཉིད་གསུམ་བདག་ཡེ་ཤེས་གང་། །རྩ་གསུམ་
ནང་གི་དབུས་ན་བཞུགས། །གནས་གསུམ་ཁྱབ་པ་སྐྱེ་བ་མེད། །འོད་གསུམ་སྲིད་པ་གསུམ་དང་བྲལ། །འོད་རབ་གནས་ནི་རབ་ཀྱི་མཆོག །དེ་ནི་བཞི་པ་མཆོག་གི་དབང་། །བདུན་གཉིས་བྱེ་བྲག་ཏུ་ནི་ཡོད། །ཡན་ལག་རབ་ཀྱི་མདོར་བསྡུས་ལ། །ཆུ་ཡི་དབང་
བསྐུར་དགའ་བའོ། །གསང་བའི་དབང་བསྐུར་མགྲིན་པ་རུ། །མཆོག་ཏུ་དགའ་བའི་བདག་ཉིད་མཆོག །ཤེས་རབ་ཡེ་ཤེས་ཀྱི་ནི་དབང་། །སྙིང་ག་རུ་ནི་དགའ་བྲལ་དགའ། །གསང་བ་པདྨའི་ལྟེ་བ་རུ། །བཞི་པའི་རང་བཞིན་བདག་ཉིད་དོ། །དེ་ལྟར་དབང་
ནི་བཞི་རུ་དབྱེ། །བསྐྱེད་པའི་རིམ་པའི་ཕྱོགས་ཡིན་ནོ། །ཆུ་ཡི་དབང་ནི་མངོམས་སུ་སྟེ། །སྣ་ཚོགས་འབྲས་བུ་སྦྱིན་པའོ། །གསང་བའི་དབང་ནི་གཉིས་པ་སྟེ། །རྣམ་པར་སྨིན་པའི་འབྲས་བུ་སྟེར། །རྡོ་རྗེ་ཡི་ནི་རྩ་བའི་གནས། །རྩ་བ་དང་ནི་མདོམས་ཀྱི་
འོག །ཤེས་རབ་ཡེ་ཤེས་ཀྱི་ནི་དབང་། །མདུད་པའི་གནས་སུ་རྟག་ཏུ་དྲན། །དབང་རྣམས་ཀུན་གྱི་བླ་མའི་བླ། །རྣམ་པར་འཇོམས་པའི་འབྲས་བུ་སྟེར། །ཤེས་རབ་ཡེ་ཤེས་ནོར་བུའི་ཁར། །ཤེས་རབ་པདྨའི་ཡིད་འགྲོའི་ཕྱིར། །རླུང་མ་དང་ནི་གཉིད་སྐྱེའི་རྩ། །གཉི་
ག་རྒྱས་པ་ཡིས་ནི་བདེ། །གྱེན་གྱི་ལམ་གྱིས་བཟློག་པར་བྱ། །མདུད་པའི་ནང་གི་གནས་སུ་འགྲོ། །དེ་ལྟར་བཞི་པ་རབ་ཏུ་བསྟན། །མཚན་ཉིད་དང་བྲལ་འབྲས་བུར་གྲགས། །མདུད་པའི་གནས་སུ་རིམ་པ་ཡིས། །ཚངས་པའི་སྤྲུལ་པ་སྙིང་མན་ཆད། །དེ་ཙམ་དུ་ནི་ལྷན་

སྐྱེས་དགའ། །རླབས་དང་བྲལ་བ་དཔེ་མེད་དོ། །དེ་ནི་དེ་ཀུན་དོན་དམ་པར། །དབང་གི་ཡེ་ཤེས་ངེས་བསྟན་ཏོ། །རྡོ་རྗེ་ཀ་བ་དེ་བཞིན་གསང་། །སྡོམ་དང་བསྡོམས་པའི་རྒྱ་མཚོ་དང་། །རིགས་ཆེན་ཡེ་ཤེས་སྙིང་པོ་དང་། །ཀྱེ་རྡོར་འཇིགས་བྱེད་རྡོ་
རྗེ་དང་། །མཚན་དང་གསང་བ་འདུས་པ་རུ། །ལྷ་ཡི་དབང་ཕྱུག་བདག་གིས་སྤས། །ཁྱོད་ཀྱི་ངོར་མཛད་དབང་གི་དོན། །རྒྱུད་འདི་རུ་ནི་རབ་ཏུ་གསལ། །རྟོག་གེ་བ་དང་རྒན་པོ་དང་། །དགེ་སློང་མོས་པར་གནས་པ་ལ། །ཡང་དག་ལམ་ཤེས་སློབ་དཔོན་གྱིས། །
དེ་རྣམས་དེ་ཉིད་བཤད་མི་བྱ། །ཨ་ཡི་ཡིག་འབྲུ་དགའ་བ་ཡིན། །བྷི་ཡི་ཡིག་འབྲུ་མཆོག་ཏུ་དགའ། །ཥེ་ཡི་ཡིག་འབྲུ་དགའ་བྲལ་དགའ། །ཀ་ཡི་ཡིག་འབྲུ་ལྷན་སྐྱེས་སོ། །གང་དུ་ཡང་ནི་མི་དམིགས་ཤིང་། །ཨ་ནི་སྐྱེ་མེད་རང་བཞིན་ཏེ། །ཀུན་གྱི་རྒྱུ་ནི་ཡིན་ཕྱིར་
རོ། །ཥེ་ཡི་ཡིག་འབྲུར་ཡང་དག་བརྗོད། །གཙུག་ཏོར་གསང་བའི་པདྨ་ར་བྷི། །བསྐུར་དང་ཁྲུས་ནི་བྱེད་པའི་ཕྱིར། །ཀ་ནི་རྣམ་རྟོག་དངོས་པོར་གྲགས། །འགྲོ་བ་ཆད་པའི་བདག་ཉིད་དོ། །གསང་བའི་པདྨའི་སྙིང་ག་ཨ། །རྩ་ཀུན་གྱི་ནི་འབིགས་པ་གང་། །དེ་ཕྱིར་
མངོན་པར་དགའ་བ་མཆོག །བྷི་ཡི་ཡིག་འབྲུ་ཐིག་ལེ་འབིགས། །ཥེ་བདེ་ཡེ་ཤེས་ཀུན་བརྟགས་བྲལ། །ཡང་དག་དོན་གྱིས་གསལ་བར་བྱེད། །དང་པོའི་དགའ་བ་རྒྱུ་ཡི་དངོས། །ཨ་ཡི་ཡིག་འབྲུ་མཆོག་གི་གནས། །མཆོག་དགའ་དགའ་བྲལ་དགའ་བར་
གྲགས། །དབང་བསྐུར་རབ་ཏུ་གྲགས་པའོ། །དེ་གཉིས་དབུས་སུ་དེ་ཉིད་བཞུགས། །རང་བཞིན་དགའ་བ་བཞི་དང་བྲལ། །མངོན་པར་དགའ་དང་དགའ་བྲལ་དགའི། །གང་ཞིག་རང་བཞིན་མི་ཤེས་ན། །དཔལ་ལྡན་རྡོ་རྗེ་སེམས་དཔའ་ཡིས། །སངས་རྒྱས་
ཡིན་ཡང་མི་བསྟོད་དོ། །རྡོ་རྗེ་འཛིན་པ་ཐམས་ཅད་ཀྱི། །ཐམས་ཅད་ཁྱབ་པར་མངའ་བདག་བདག །སངས་རྒྱས་ཐམས་ཅད་རྒྱལ་ཆེན་པོ། །སངས་རྒྱས་ཐམས་ཅད་ཡིད་ལྟར་མགྱོགས། །ཐམས་ཅད་ཀུན་གྱི་དབང་ཕྱུག་བདག །འབྱུང་བ་ཀུན་གྱི་བདག་ཉིད་དོ། །

དཔལ་ཡེ་ཤེས་ཐིག་ལེ་ལས་དབང་བསྐུར་བའི་ངེས་པ་བསྟན་པའི་ལེའུ་ཞེས་བྱ་བ་སྟེ་བཅུ་གསུམ་པའོ།། །།དེ་ནས་ཡང་ནི་བཤད་བྱ་བ། །ནང་གི་མཚན་ཉིད་སྦྱིན་སྲེག་གོ། །ཁ་ནི་ཧོམ་ཁུང་དགང་གཟར་ལག །ཚུལ་ནི་རང་བྱུང་མེ་ཡིན་ནོ། །ང་རྒྱལ་ཕྲག་དོག་བསྲེག་
རྫས་ཡིན། །བཟླས་པ་དེ་ནི་ཁམ་དུ་བརྗོད། །ས་འོག་དང་ནི་སྲིང་མོ་མར། །དེ་ཡི་བསྲེག་རྫས་རབ་ཏུ་དབུལ། །ཡེ་ཤེས་བདུད་རྩི་རྣམ་དག་པས། །ཕྲག་དོག་ལ་སོགས་བསང་གཏོར་བྱ། །དུམ་བུ་གསུམ་པའི་སྣོད་མདུན་དུ། །ཕྲག་དོག་བདུད་རྩིས་རབ་ཏུ་ཚིམ། །
རྡོར་གསུམ་ཡེ་ཤེས་ས་བོན་གྱིས། །དག་བྱས་དཀར་བྱས་རིམ་གྱིས་སོ། །རླུང་མས་བསྐུལ་བྱས་འབར་བས་བྱས། །བདུད་རྩི་མཆོག་ནི་ཞུ་བར་བྱེད། །ཧ་ཡི་མ་མོའི་སྔགས་ཀྱིས་ནི། །འཁོར་ལོ་དྲུག་ནི་རབ་ཚིམ་བྱ། །རི་བོའི་མ་མོ་དང་བྲལ་བས། །ཕྱི་ནང་རྟག་ཏུ་རབ་ཚིམ་བྱ། །
དེ་ལྟའི་སྦྱིན་སྲེག་ལས་ཀྱིས་ནི། །ལྷ་ཡི་སྐུ་རུ་ངེས་པར་འགྱུར། །ལྷ་ཡི་སྐུ་ནི་བདེ་ཆེན་པོ། །དོན་དམ་པར་ནི་ཤེས་པའོ། །ལྷ་ཡི་ཡིག་འབྲུ་ཡིས་འབྱུང་གང་། །དེ་ནི་དོན་དམ་སྦྱིན་སྲེག་གོ། །དཔའ་བོ་གཉིས་ཀྱི་མཉམ་སྦྱོར་བ། །དུས་ཀྱི་གང་དུ་བདེ་དབང་པོ། །ལྟེ་སྙིང་བདེ་
བའི་པདྨ་ཡིས། །རྟག་པར་ཤེས་རབ་མས་ནི་བརྗོད། །དེ་ནི་སྦྱིན་སྲེག་བསྲེག་རྫས་ལྡན། །མངོན་པར་དགའ་ལས་འབྱུང་བའོ། །ཀུན་རྫོབ་རྣམ་པའི་གཟུགས་སུ་ནི། །ཤེས་རབ་ཐབས་ནི་ཕྲད་པ་ལས། །སྦྱིན་སྲེག་ལས་ཀྱི་འབྲས་བུ་མཆོག །མྱུར་བ་རུ་ནི་རྙེད་པའོ། །ཧོམ་
ཁུང་དྷ་ལ་དགྱེས་པ་ཆེ། །ལ་ལ་འདི་རུ་དགང་གཟར་དྲན། །བླུགས་གཟར་གསང་པད་སྣ་ཡི་རྩེ། །མར་ནི་ཁུ་བ་ཟླ་འོད་མཉམ། །གསང་པད་ཟླུམ་པོའི་རྣམ་པ་བཞིན། །མར་གྱི་སྣོད་དུ་རྣམ་པར་གྲགས། །བླུགས་གཟར་དགང་གཟར་མར་གྱི་སྣོད། །རྩ་གསུམ་དུ་ནི་
བརྗོད་པའོ། །སྲུབ་དང་བསྲུབས་པའི་སྦྱོར་བ་ཡིས། །རླུང་མ་དང་ནི་གཉིད་མ་གཉིས། །གཅིག་པུའི་དངོས་པོ་ཡང་དག་པས། །ཡེ་ཤེས་མེ་ནི་མཆོག་ཏུ་འབར། །པདྨའི་འཁོར་ལོ་དྲུག་རིམ་པས། །གཞན་མིན་བདེ་ཆེན་མན་ཆད་དོ། །མཆོག་གི་བདུད་རྩི་རྒྱུན་ནི་འཛག །

ཇི་ལྟར་མཁའ་ལས་ཆུ་འབབ་པ། །རྩ་ཡི་དྲ་བ་དུ་མ་ཡིས། །འཁོར་ལོ་དྲུག་སྙིང་ཁྱབ་པའོ། །སྐུ་གསུམ་ཡེ་ཤེས་རྡོ་རྗེ་མཆོག །རྟག་ཏུ་བསྲེག་རྫས་མཆོད་པར་བྱ། །མེ་ཡི་ཁ་རུ་དགང་གཟར་ནི། །མར་གྱིས་བཀང་བ་དབུལ་བར་བྱ། །མེ་ནི་མཆོག་
ཏུ་དགའ་བ་སྟེ། །རྣམ་རྟོག་ཧོམ་ཤིང་ཚིག་པར་བྱེད། །མདུད་པའི་ཧོམ་ཁུང་གི་ནི་མེ། །དེ་ནི་མཆོག་ཏུ་དགའ་རང་བཞིན། །ཞི་བའི་ཟླུམ་པོའི་རྣམ་པ་བཞིན། །ལོངས་སྤྱོད་དང་ནི་གྲོལ་བ་བཞིན། །སྐུ་ཡི་རྡོ་རྗེ་རིན་ཆེན་ཁར། །གསུང་གི་རྡོ་རྗེ་དབུས་ཀྱི་དཀྱིལ། །ཐུགས་
ཀྱི་རྡོ་རྗེ་མདུད་སྙིང་པོ། །དགའ་བ་ཡིས་ནི་མཆོད་པར་བྱ། །གསུང་གི་རྡོ་རྗེ་བླུགས་གཟར་མཆོག །དགའ་བྲལ་དགའ་བ་སྐུ་རྡོ་རྗེ། །ལྷན་སྐྱེས་དགའ་བའི་ཡེ་ཤེས་ཀྱི། །དགང་བླུགས་ཀྱིས་ནི་མཆོད་པར་བྱ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པས། བྱེ་བ་
ཕྲག་བདུན་ཅུ་རྩ་གཉིས་ཀྱི་གྲངས་ཀུན་བརྒྱལ་པདང་ས་ལ་འགྱེལ་བར་གྱུར་ཏོ། །དེ་ནས་ཡུན་རིང་པོ་ཞིག་ནས་འདི་སྐད་ཅེས་གསོལ་ཏོ། །ལྷན་ཅིག་སྐྱེས་པའི་དགའ་བ་ལ་འདིར་ཡེ་ཤེས་ཡོད་དམ་ཅི་ཞེས་ཡང་ཡ་མཚན་དུ་གྱུར་ཏོ། །ཡང་དེའི་དུས་སུ་བཅོམ་ལྡན་འདས་མས་
ཕྱག་རྒྱ་ཆེན་པོས་དམ་པོར་འཁྱུད་ནས་མ་མཆུ་བཏུང་བའི་བདུད་རྩིའི་མཆོད་སྦྱིན་ཕུལ་ཏེ། གསང་བའི་པདྨའི་བསྐོར་བ་དམ་པོའི་སྙིམ་པ་མཉམ་པར་སྦྱོར་བ་བཅིངས་ནས་གུས་པས་ཞུས་པ། སངས་རྒྱས་ཀུན་གྱི་བླ་མ་མགོན། །ཡེ་ཤེས་ཟབ་མོ་དྲི་མ་མེད། །ཅི་ཡི་དོན་ཕྱིར་
དེ་ལྟའི་ཚིག །འཁོར་ཀུན་གྱི་ནི་ནང་དུ་གསུངས། །ལྷན་ཅིག་སྐྱེས་དགའི་ཡེ་ཤེས་གང་། །དགང་བླུགས་ཀྱི་ནི་མཆོད་པ་ལ། །བདག་ཀྱང་འདིར་ནི་བཅོམ་ལྡན་འདས། །ཐེ་ཙོམ་ཆེན་པོ་སྐྱེས་པར་གྱུར། །གསང་བ་ཡི་ནི་གསང་བ་མཆོག །རྣལ་འབྱོར་མ་
རྒྱུད་དུ་མ་རུ། །མགོན་པོས་གང་དུའང་མ་གསུངས་སོ། །དེ་ཙམ་ཡང་ནི་བརྡར་མ་མཛད། །ལྷན་ཅིག་ལ་ནི་ཡེ་ཤེས་ཡོད། །མ་གསུངས་བདག་གིས་ཐོས་མ་ལགས། །དེ་རིང་དེ་ལྟར་ཐེ་ཚོམ་དག །མངའ་བདག་ཆེན་པོས་གཅད་དུ་གསོལ། །བཅོམ་ལྡན་

འདས་ཀྱིས་བཀའ་སྩལ་པ། །ཨ་ལ་ལ་རབ་ཏུ་ངོ་མཚར་ཏོ། །ལྷན་ཅིག་སྐྱེས་པའི་དགའ་བ་ལ་ཅིའི་ཕྱིར་ཡེ་ཤེས་མེད། དད་པ་ཆེན་པོ་དང་བརྩོན་འགྲུས་ཅན་དང་ཡེ་ཤེས་དང་ལྡན་པ་ཡང་རྨོངས་པར་འགྱུར་ན། ཡེ་ཤེས་མེད་པས་ལྷན་ཅིག་སྐྱེས་པའི་དགའ་བ་ཇི་ལྟར་
རྙེད། དེ་བཞིན་དུ་ཡང་འདིར་གཞན་པ་དེ་མ་ཡིན་པའི་དཔེར་ཉོན་ཅིག །ཇི་ལྟར། དུ་བ་ལས་ནི་མེར་ཤེས་ཏེ། །ཆུ་སྐྱར་ལས་ནི་ཆུ་ཡིན་ནོ། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་རྣམས་ལས་ཤེས། །དེ་བཞིན་དུ་ལྷན་ཅིག་སྐྱེས་པའི་དགའ་བ་རྙེད་པའི་
དོན་གྱི་ཕྱིར་སྐྱབས་སྦྱིན་གྱི་ངོ་བོ་ཡེ་ཤེས་སོ། །ཡེ་ཤེས་ནི་ཚོར་བར་ཡོངས་སུ་ཤེས་པས་དཔྱོད་པའི་བདག་ཉིད་ཀྱི་ཐབས་དེ་ནི་ཡེ་ཤེས་སུ་བདག་གིས་བཤད་དོ། །དེ་བཞིན་དུ་ཇི་ལྟར་མུན་ནག་ཏུ་རིན་པོ་ཆེ་ཕྲ་མོའི་ཕྲ་མོ་ཡོད་པ་དེ་ནི་རིན་པོ་ཆེ་མར་མེ་མ་ཡིན་པས་རྙེད་པར་མི་འགྱུར་
བདེ་བས་ན་བློ་གྲོས་ཅན་གྱིས་རིན་པོ་ཆེ་མར་མེ་ཁྱེར་ནས་ཚོལ་བར་བྱེད་ལ། གལ་ཏེ་དེ་རྙེད་ན་དེ་ཅི་མར་མེ་ལས་རིན་པོ་ཆེ་སྐྱེའམ། འོན་ཀྱང་མར་མེའི་ཐབས་ཀྱིས་མཐོང་བ་དང་རྙེད་པ་དེ་བཞིན་དུ་ཡེ་ཤེས་ཀྱི་མར་མེས་ལྷན་ཅིག་སྐྱེས་པའི་དགའ་བའི་རིན་པོ་ཆེའི་རྒྱལ་པོ་མཐོང་
ཞིང་རྙེད་ཀྱི་ཡེ་ཤེས་ལས་སྐྱེ་བ་ནི་མ་ཡིན་ནོ། །དེ་བས་ན་ཡེ་ཤེས་ཀྱི་སྒྲ་འདི་ནི་དོན་མི་ཤེས་པའི་ཕྱིར་མཁས་པས་འདིར་ཐེ་ཚོམ་མི་བྱའོ། །དཔལ་ཡེ་ཤེས་ཐིག་ལེ་ལས་མཆོད་པ་སྣ་ཚོགས་ངེས་པར་བསྟན་པ་དང་ནང་གི་སྦྱིན་སྲེག་ཅེས་བྱ་བའི་ལེའུ་སྟེ་བཅུ་བཞི་པའོ།། །།དེ་
ནས་གཏོར་མ་ཆེན་པོའི་ལས་ཀྱི་ངེས་པར་བསྟན་པའི་དོན་བཤད་དོ། །སེམས་ཅན་ཐམས་ཅད་བསྲུང་དོན་དུ། །འབད་པ་ཡིས་ནི་གཏོར་མ་སྦྱིན། །བྷ་ཡི་ཡིག་འབྲུ་བྷ་གར་བརྗོད། །ལིང་གི་ཡིག་འབྲུ་ལིང་གར་བསྟན། །ལིང་ག་བྷ་གར་མཉམ་སྦྱོར་བས། །སེམས་
ཅན་ཐམས་ཅད་ཀྱི་ནི་ཚོགས། །དེ་ལས་འབྱུང་བར་འགྱུར་བ་སྟེ། །ལྷ་མོ་དེ་ཉིད་ཤེས་བྱ་སྟེ། །ཐམས་ཅད་སྒྲ་ནི་དགའ་བ་ཡིན། །སེམས་ཅན་དོན་ནི་མཆོག་ཏུ་འགྱུར། །ཚོགས་པ་དེ་ནི་དགའ་བྲལ་དགའ། །གཏོར་མ་དེ་ཡིས་བསྲུང་བའི་དོན། །དུར་ཁྲོད་ཡང་

ནི་ཆུ་ཡི་ངོགས། །ཡེ་ཤེས་ལྡན་པས་སྦྱིན་པར་བྱ། །དུར་ཁྲོད་དབུགས་བྱུང་གི་ནི་གནས། །གསང་བའི་པདྨའི་བྱ་གདོང་ངོ་། །ཤ་ཡི་ཡིག་འབྲུ་པདྨ་དག །ཝ་ཡི་ཡིག་འབྲུ་ལྟེ་བར་ཡིན། །ས་ཡི་ཡིག་འབྲུ་བདེ་ངོ་བོ། །ན་ཡི་ཡིག་འབྲུ་
བཅོས་པ་མེད། །དྲི་མེད་མ་ཡི་ཞུ་བའི་དགའ། །ཐིག་ལེའི་ངོ་བོ་ཡི་གེ་བྲལ། །དུར་ཁྲོད་དབུགས་འབྱུང་དུ་ནི་གྲགས། །ཞལ་བཟང་བདག་གིས་བཤད་པ་ཡིན། །ཆུ་ཡི་ངོགས་ནི་རིན་ཆེན་ཁ། །ཡང་ན་དེ་ནི་རྟོག་མེད་མ། །འབྱུང་བ་རྣམས་ནི་བསྲུང་བའི་ཕྱིར།
དེ་ལ་གཏོར་མ་སྦྱིན་པར་བྱ། །འབྱུང་བ་ཁུ་བ་རུ་ནི་གྲགས། །ཁུ་བ་སེམས་ཅན་འདི་རུ་བསྟན། །སེམས་ཅན་སྙིང་པོ་ཡེ་ཤེས་བདེ། །བྷ་ག་ལིང་ག་གཉིས་ལས་འབྱུང་། །དེ་ལ་བསྲུང་བའི་དོན་དུ་ནི། །གཏོར་མ་ཀུན་ཏུ་འབད་དེ་སྦྱིན། །དཔལ་ཡེ་ཤེས་
ཐིག་ལེ་ལས་འབྱུང་བ་བསྲུང་བའི་དོན་ཏུ་གཏོར་མ་ཆེན་པོ་ངེས་པར་བསྟན་པ་ཞེས་བྱ་བའི་ལེའུ་སྟེ་བཅྭ་ལྔ་པའོ།། །།དེ་ནས་བཅོམ་ལྡན་འདས་མ་ཕྱག་རྒྱ་ཆེན་པོས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་དབང་ཕྱུག་ལ་བོས་ཏེ། ཀྱཻ་དཔའ་བོ་ཆེན་པོ་ལྷའི་དབང་
ཕྱུག་འདིར་དེ་ཁོ་ན་ཉིད་གསུམ་གྱི་བདག་ཉིད་ཀྱི་དང་། ཟླ་བའི་བདེ་བ་མཆོག་དང་། ཕྱག་རྒྱ་ཆེན་པོའི་མཐའི་རྒྱས་པ་ངེས་པར་བསྟན་པའི་དོན་དུ་རང་གི་ངོ་བོ་ཉིད་དང་། ཚད་དང་། རྣམ་པ་དེ་དག་བཅོམ་ལྡན་འདས་ཀྱི་ཐད་དུ་ལེགས་པར་ཞུས་ཤིག །བྱང་ཆུབ་སེམས་དཔའ་
སེམས་དཔའ་ཆེན་པོ་ལྷའི་དབང་ཕྱུག་གིས་གསོལ་བ། མཆོག་གི་དབང་ཕྱུག་མ་མཆོག་གི་བདེ་བ་ཆེན་པོའི་འོད་ཀྱི་རང་གི་ངོ་བོ་སངས་རྒྱས་ཐམས་ཅད་ཀྱི་ཡུམ། སྡིག་པ་ཐམས་ཅད་ཟད་པར་བྱེད་མ། བདུད་ཐམས་ཅད་འཇོམས་པར་བྱེད་མ། དགའ་བ་ཐམས་ཅད་དང་།
སྐད་ཅིག་དང་། རོ་དང་། ཡེ་ཤེས་ཀྱི་མཐར་ཁྱབ་པ་ལྟེ་བའི་པདྨའི་དབུས་ནས་བཞེངས་ནས་བདེ་བ་ཆེན་པོ་རབ་ཏུ་ཚིམ་མཛད་མ། བཅོམ་ལྡན་འདས་མ་བཟང་མོ་མཆོག་དྲི་མ་མེད་པའི་སྐུ་ནམ་མཁའི་ངོ་བོ་ལེགས་སོ་ལེགས་སོ། །ཡང་བྱང་ཆུབ་སེམས་དཔའ་སེམས་

དཔའ་ཆེན་པོ་ལྷའི་དབང་ཕྱུག་གིས་བཅོམ་ལྡན་འདས་མས་གསུངས་པ་དེ་ཁོང་དུ་ཆུད་པས་མཆོག་ཏུ་དགའ་བ་ཆེན་པོའི་སེམས་ཀྱིས་རྫུ་འཕྲུལ་དང་ཆོ་འཕྲུལ་རྨད་དུ་བྱུང་བ་ཆེན་པོ་སྤྲུལ་ཏེ། རྣམ་པ་དུ་མ་སྣ་ཚོགས་པའི་མཆོད་པ་ཆེན་པོས་མཆོད་པ་བྱས་ནས་སྔར་གྱི་དྲི་བ་དེ་དག་
ཞུས་སོ། །བཅོམ་ལྡན་འདས་དེ་ཁོ་ན་ཉིད་གསུམ་གྱི་བདག་ཉིད་དང་། ཟླ་བའི་བདེ་བ་མཆོག་དང་། ཕྱག་རྒྱ་ཆེན་པོའི་མཐའི་རྒྱས་པ་ངེས་པར་བསྟན་པའི་དོན་དུ་རང་གི་ངོ་བོ་ཉིད་དང་། ཚད་དང་། རྣམ་པ་དེ་དག་བདག་ལ་བཀའ་སྩལ་དུ་གསོལ། བཅོམ་ལྡན་འདས་
ཀྱིས་བཀའ་སྩལ་པ། དྲི་བ་ཤིན་ཏུ་ཟབ་ལས་ཟབ། །ཐམས་ཅད་མཁྱེན་པས་རྙེད་དཀའ་བ། །ཇི་ལྟར་དེ་ཉིད་མཚན་ཉིད་ནི། །ཉོན་ཅིག་ང་ཡིས་བཤད་པར་བྱ། །མཚན་ཉིད་ལས་སྐྱེས་དེ་ཉིད་ནི། །དེ་ལྟ་མིན་ན་མི་མཐུན་ནོ། །རང་རིག་པ་ནི་བདག་ཉིད་ཕྱིར། །དེ་བས་བརྗོད་
པར་མི་ནུས་སོ། །དེ་ཉིད་གསུམ་བདག་དེ་སྣང་བ། །མཚན་མོའི་འདུ་ཤེས་རང་ངོ་བོ། །ཟླ་བའི་བདེ་མཆོག་སྣང་བ་མཆེད། །ཉིན་མོའི་འདུ་ཤེས་རང་ངོ་བོ། །ཕྱག་རྒྱ་ཆེན་པོ་སྣང་བ་ཐོབ། །མཚམས་ཀྱི་འདུ་ཤེས་རང་ངོ་བོ། །མཐའ་ཡི་དེ་ནི་འོད་ཀྱི་རབ། །ཉིན་མོ་
མཚན་མོ་སོགས་དང་བྲལ། །དེ་ནི་གནས་མཆོག་ཡེ་ཤེས་ཏེ། །བལྟ་བར་དཀའ་བའི་མཚན་ཉིད་དོ། །ཆར་ཡང་དང་ནི་ཐིག་ལེའི་ཚུལ། །དེ་ཉིད་གསུམ་བདག་རྗོད་པའོ། །འཁོར་ལོ་གསུམ་ཡོད་མེ་རླུང་ཆུ། །དངོས་པོའི་འདུ་ཤེས་རང་ངོ་བོ། །ཚུལ་ཙམ་ཟླ་བ་ཡི་ནི་
བདེ། །ས་ཡི་འཁོར་ལོར་བདེ་ནི་མཆོག །དེ་ནི་རྟེན་གྱི་འདུ་ཤེས་ཅན། །ལྷ་ཡི་དབང་ཕྱུག་ཤེས་པར་བྱ། །ཕྱག་རྒྱ་ཆེན་པོ་འདི་ནི་མཆོག །ནམ་མཁར་ཡེ་ཤེས་འདུ་ཤེས་སོ། །དེ་ཡི་མཐའ་ཡི་གཞན་གྱི་མཆོག །བདེ་ཆེན་མཆོག་གི་ནམ་མཁར་རོ། །དེ་ནི་རྣམ་
འབྱེད་ངོ་བོར་གྲགས། །གཉིས་སུ་མེད་པའི་ཡེ་ཤེས་རབ། །དེ་ནི་འཁོར་ལོ་དྲུག་དབུས་གནས། །རྣམ་ཤེས་དྲུག་གི་རང་ངོ་བོ། །དངོས་པོ་རྟེན་ལ་སོགས་བྱེ་བྲག །བཞིར་ནི་དབྱེ་བར་ཡོད་པའོ། །དེ་ཉིད་གསུམ་བདག་བྱེ་བྲག་གིས། །དེ་ནི་རྣམ་པ་གསུམ་དུ་དབྱེ། །

མཚན་མོ་ཉིན་མོ་མཚམས་བྲལ་ཕྱིར། །གཅིག་པུ་ཡི་ནི་བདེ་བ་ཆེ། །རང་བཞིན་བསྟན་པ་གང་ལ་ལར། །མཆོག་གི་ནམ་མཁའ་གང་ལ་ལར། །ལ་ལར་འོད་རབ་ཀྱིས་ནི་གནས། །ལ་ལར་དགའ་བར་དྲན་པའོ། །ལ་ལར་མཆོག་གི་དགའ་བ་སྟེ། །ལ་
ལར་དགའ་བྲལ་དགའ་བའོ། །སྣ་ཚོགས་དུ་མ་ལ་སོགས་དབྱེ། །ལྷན་སྐྱེས་གཅིག་པུ་རྟག་ཏུ་ཤར། །དུ་མར་སྨྲ་བས་ཅི་ཞིག་བྱ། །འདི་ཀུན་བདག་ཉིད་ལྷན་ཅིག་སྐྱེས། །ཀུན་རྫོབ་རྣམ་པའི་གཟུགས་ཀྱིས་ནི། །ཆུ་ཡི་ཟླ་བ་བཞིན་དུ་མཐོང་། །དོན་དམ་པ་ཡི་རང་བཞིན་
ནི། །ཡང་དག་རྟོག་པའི་གནས་མེད་དོ། །ཐབས་ལ་སོགས་པའི་རིམ་པ་ཡིས། །བླ་མའི་ཞལ་ནས་རྙེད་པར་འགྱུར། །བླ་མ་མཐོ་རིས་ཐར་པའི་བླ། །བླ་མ་ཡེ་ཤེས་བླ་མ་བདེ། །བླ་མ་སྟོན་པ་བླ་མ་མགོན། །བླ་མ་རྡོ་རྗེ་འཛིན་པ་ཉིད། །བླ་མའི་ཞལ་སྔའི་བཀའ་དྲིན་
ལས། །མཆོག་གི་གནས་ནི་རྙེད་པར་འགྱུར། །ཚེ་འདི་ཡིས་ནི་ཕྱག་རྒྱ་ཆེ། །དངོས་གྲུབ་རྙེད་པར་ཐེ་ཚོམ་མེད། །ས་བཅུ་ཡི་ནི་དབང་ཕྱུག་བདག །དེ་ཡི་བཀའ་དྲིན་གྱིས་ནི་སླ། །དེ་བས་བླ་མ་ལས་ལྷག་གཞན། །སྟོན་པ་ཆེན་པོ་ག་ལ་ཡོད། །གང་ཞིག་
བླ་མས་བསྟན་བཅོས་ནི། །མཛད་དམ་བཤད་པ་གང་ཡིན་ཡང་། །དེ་ནི་བསྟན་བཅོས་དེ་ཚད་མ། །དེ་ནི་དེ་ཉིད་འཁྲུལ་པ་མེད། །སློབ་དཔོན་གསུང་དང་བདག་གིས་སྨྲས། །དེ་ལ་བྱེ་བྲག་མི་དབྱེའོ། །རྣལ་འབྱོར་རྣལ་འབྱོར་མ་རྒྱུད་ཤེས། །བླ་མས་མཛད་པའི་
བསྟན་བཅོས་གང་། །དེ་ལ་སྒྲ་དང་སྒྲ་ངན་དུ། །ལྷ་ཡི་དབང་ཕྱུག་བརྟག་མི་བྱ། །སྙན་དང་གས་ཟློས་གར་བསྟན་བཅོས་ལས། །སྒྲ་དང་སྒྲ་ངན་བརྟག་བྱ་ཡི། །སྔགས་ཀྱི་བསྟན་བཅོས་གཏན་ལ་ཕབ། །ཅི་ཡི་ཕྱིར་ན་བརྟག་པར་བྱ། །བརྟག་པར་བྱེད་པས་གཏི་
མུག་བྱེད། །རྩ་བའི་དོན་ནི་ཟད་པར་འོང་། །དེ་ཕྱིར་སྒྲ་དང་རྟོག་གེ་ཤེས། །དེ་ལ་དེ་ཉིད་བཤད་མི་བྱ། །དེ་ཀུན་ལ་ནི་དབང་མི་བསྐུར། །ཕྱི་ཡི་དོན་ལ་མོས་པའི་ཕྱིར། །ཐབས་དང་ཐབས་ལས་བྱུང་མཚན་ཉིད། །འབྲས་བུ་སྦྱིན་པ་གང་ཞིག་ཕྱིར། །དེ་ནི་ཐམས་

ཅད་དངོས་རིག་པ། །མཆོག་གི་དོན་ནི་སྟེར་ཕྱིར་རོ། །དེ་ལྟར་ཡང་དེ་ལོན་ཉིད་གསུམ་གྱི་བདག་ཉིད་དང་། ཟླ་བ་དང་བདེ་བ་མཆོག་དང་། ཕྱག་རྒྱ་ཆེན་པོའི་མཐའ་རེད་པའི་དོན་དུ། རྣམ་པ་དང་། ཚད་དང་། རང་གི་ངོ་བོ་ངས་སྨྲས་སོ། །ཡང་འདིར་དེ་ཁོ་ན་ཉིད་ཀྱི་བདག་ཉིད་
ནི་ཀུན་གཞིའི་རྣམ་པར་ཤེས་པ་སྟེ་རྣམ་པའོ། །ཟླ་བ་བདེ་བ་མཆོག་ནི་ཚོགས་ཀྱི་རྣམ་པར་ཤེས་པ་སྟེ་མཐའི་ཚད་དོ། །ཕྱག་རྒྱ་ཆེན་པོ་ནི་ཡིད་ཀྱི་རྣམ་པར་ཤེས་པ་སྣང་བ་སྟེ། དེ་ནི་རང་གི་ངོ་བོའི་དེའི་མཐའ་ལ་རྣམ་པ་མེད་པའི་རྣམ་པར་ཤེས་པ་ནམ་མཁའོ། །ཡང་ན་སྤྲུལ་པ་དང་། །
ཆོས་དང་། ལོངས་སྤྱོད་དང་། བདེ་བ་ཆེན་པོའི་རྣམ་པའི་དོན་ཁོང་དུ་ཆུད་པར་བྱའོ། །ཡང་ན་རྩ་བཞིའི་དོན་དུ་རྣམ་པ་ལ་སོགས་པར་ཤེས་པར་བྱའོ། །དཔལ་ཡེ་ཤེས་ཐིག་ལེ་ལས་དེ་ཁོ་ན་ཉིད་གསུམ་ལ་སོགས་པའི་རྒྱས་པ་ངེས་པར་བསྟན་པའི་རང་བཞིན་གྱི་དོན་ཞེས་བྱ་
བའི་ལེའུ་སྟེ་བཅུ་དྲུག་པའོ།། །།དེ་ནས་ལྷ་མོ་རབ་དགྱེས་ནས། །རང་བཞིན་དོན་ནི་གསལ་བའི་ཕྱིར། །དམ་པོ་རུ་ནི་འཁྱུད་བྱས་ནས། །པདྨ་དམ་པོར་རབ་ཏུ་བསྐོར། །དུར་ཁྲོད་ལ་སོགས་པ་ཡི་དོན། །རྡོ་རྗེ་རྒྱལ་པོ་ལ་ནི་ཞུས། །སྲུབ་དང་བསྲུབས་པའི་སྦྱོར་བ་
པས། །དཔལ་བདག་དགྱེས་ནས་བཀའ་སྩལ་ཏོ། །དུར་ཁྲོད་ལ་སོགས་པ་ཡི་དོན། །སྐལ་ལྡན་ལྷ་མོ་ཁྱོད་ཉོན་ཅིག །མི་བཟད་འདི་རུ་རྣམ་ཁྱབ་པ། །ལྷ་མོ་ཁ་ལ་རབ་ཏུ་གྲགས། །གཡས་པའི་སྣ་ཡི་བུ་ག་ནི། །མི་སྡུག་པ་ནི་ཤིན་ཏུ་ཙིག །ཅེ་སྤྱང་ཚོགས་
ནི་ཕྱེད་ཚིག་པ། །སྣ་བུག་གཡོན་པ་རུ་ནི་དྲན། །རྣ་བ་གཡས་པ་འཇིགས་སུ་རུང་། །སྭ་སྭ་དང་ནི་ཙིག་ཙེག་གོ། །ཤ་ཟའི་ཁ་ནི་རྣ་བ་གཡོན། །དུམ་བུ་མགོ་བོ་ལ་སོགས་རྒྱན། །ལྷ་མོ་གཡས་པ་ཡི་ནི་མིག །ཧ་ཧར་རྒོད་པར་རབ་ཏུ་གྲགས། །རྣམ་པ་དང་
བཅས་ཡི་དགས་ལྡན། །འཇིགས་པ་ཤིན་ཏུ་འཇིགས་པར་བྱེད། །གཡོན་པ་ཕོ་ཉ་ནག་པོ་མེ། །མེ་ལྕེ་འབར་བའི་ཕྲེང་བས་ཁྱབ། །རྡོ་རྗེའི་ཁ་རུ་འཇིགས་པར་བྱེད། །རུས་པ་དཀར་པོས་རབ་ཁྱབ་པ། །ཁུ་བ་གཞན་མིན་རུས་དཀར་འདི། །ངེས་པར་ལྷ་མོ་ཤེས་

པར་བྱ། །དེ་ནི་ཤིན་ཏུ་ཚ་བ་སྐྱེ། །དེ་ཚེ་འབར་ཕྲེང་ཁྱད་པར་ཆེ། །བྱང་ཆུབ་སེམས་ནི་བདེ་བ་ཆེ། །མི་བརྟན་མ་ཡིན་པ་རུ་བཞུགས། །དེ་ཚེ་རྣམ་བཅས་ཡི་དགས་ཀྱིས། །ལྡན་པར་རབ་ཏུ་གྲགས་པའོ། །གསུམ་དབྱེ་བཞིར་དབྱེ་དྲུག་དབྱེ་འམ། །
མཆོག་གི་བདུད་རྩི་གང་དུ་གཤེགས། །དེ་ནི་དུམ་མགོ་ལ་སོགས་བསྟན། །གང་ཚེ་ཐིམ་ལ་ལོངས་སྤྱོད་འགྲོ། །དེ་ཚེ་སྭ་སྭ་ཙེག་ཙེག་གོ། །གང་གི་ཚེ་ནི་དབང་མ་འགྲུབ། །དེ་ཕྱེད་ཚིག་ལྡན་དྲན་པའོ། །སྲོག་གི་རླུང་ནི་ནུབ་པའི་ཕྱིར། །ཤིན་ཏུ་ཚིག་པར་བརྟག་པའོ། །ཁུ་
བ་ཉེ་བའི་ཤར་མ་ཐག །བཀྲམ་པར་བདག་གིས་བཤད་པའོ། །ལྷ་མོ་ཤིན་ཏུ་གསང་བ་ཆེ། །དུར་ཁྲོད་བརྒྱད་ནི་རབ་མཆོག་གོ། །དེ་ནི་ཤིང་བརྒྱད་དང་ལྡན་པ། །ནང་གི་བདག་སྦྱོར་མཚན་ཉིད་དོ། །དཔལ་གྱི་མེ་ཏོག་མིག་རྩི་དང་། །ནཱ་ག་གེ་སར་ཝ་རྟ་དང་། །པ་ལ་ཤིང་
དང་ཤར་ཤིང་། །ཁང་པ་དང་ནི་ཤ་མི་ཡོ། །ཡལ་ག་དུ་མ་ལ་སོགས་དང་ལྡན་བརྒྱད། །འབྲས་བུས་དུད་པའི་གཟུགས་ཀྱིས་ཤིན་ཏུ་བརྒྱན། །འདོད་མ་རྒྱས་མ་གླུ་སྟོབས་མ་དངས། །མཚོ་སྐྱེས་སྙིང་པོ་འཛིན་མ་བྱ་གདོང་མ། །མགྱོགས་དང་བྲལ་མོ་ཞིག་གཉིས་ཀུན་དུ་བརྟགས། །
ཤིང་མཆོག་ཆེན་པོ་རྩ་བརྒྱད་ཀྱི་ནི་གཟུགས། །ཡང་ནི་དུར་ཁྲོད་ཆེན་པོ་ནི་སྤྲུལ་པའི་འཁོར་ལོའི་ཆུ་སྐྱེས་ཆོས་ཀྱི་འབྱུང་གནས་ཀྱི་ནང་གསང་བ་ཆེན་པོ་འདུས་པའི་གནས་དང་ཉེ་བའི་གནས་ལ་སོགས་པའི་གནས་ནས་རྣལ་འབྱོར་མ་རེ་རེས་ཤིང་རེ་ཁྱེར་ནས་སོང་ངོ་། །ལྷ་མོས་གསོལ་
བ། བཅོམ་ལྡན་འདས་འདིར་ནི་རྣལ་འབྱོར་མ་ནི་གང་ལགས། ཤིང་རྣམས་ཀྱི་མིང་ནི་ཅི་ལགས། ཇི་ལྟར་ན་སྤྲུལ་པའི་འཁོར་ལོའི་ཆུ་སྐྱེས་དེ་ཀུན་གྱི་འདུས་པ་ལགས་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཡན་ལག་ཆེ་མ་དང་། དྲག་མིག་
མ་དང་། འཇིགས་མ་དང་། ཁྲོ་གདོང་མ་དང་། ཟླུམ་མིག་མ་དང་། སྣ་ཉམས་མ་དང་། ལྕེ་བསྐྱོད་མ་དང་། སྤྲུལ་གདོང་མ་དང་། བྱ་རྒོད་གདོང་མ་དང་། གསེར་མིག་མ་དང་། མཆེ་གཙིགས་མ་དང་། སོ་རིངས་མ་དང་། ཉ་གདོང་མ་དང་། མགྲིན་རིངས་མ་དང་།

རྣ་འཕྱངས་མ་དང་། སྒུར་མོ་དང་། བྱིན་ཆེན་མ་དང་། སྤུ་ལྡན་མ་དང་། སེན་རིངས་མ་དང་། ཡན་ལག་གནག་མ་དང་། སྔོ་མ་དང་། ཡན་ལག་དམར་མོ་དང་། གུར་གུམ་འོད་མཉམ་མ་དང་། རྟ་གདོང་མ་དང་། གདོང་ཆེན་མ་དང་། རལ་གཅིག་མ་དང་། རལ་རིངས་
མ་དང་། བོང་རྣ་མ་དང་། གླང་ཆེན་ལྟེ་བ་མ་དང་། བུང་མིག་མ་དང་། མེ་ཏོག་དགའ་མ་དང་། སྣ་རིངས་མ་དང་། རྨ་བྱའི་མགྲིན་མ་དང་། སྦྲུལ་ལྕེ་མ་དང་། ནེའུ་ལེའི་གདོང་མ་དང་། ནུ་འཕྱངས་མ་དང་། གསུས་འཕྱངས་མ་དང་། སྨད་ཆེ་མ་དང་། གདོང་སྐམ་
མ་དང་། རླུང་མགྱོགས་མ་དང་། དལ་འགྲོ་མ་དང་། སྤྱན་རིངས་མ་དང་། དགོད་གདོང་མ་དང་། དུ་མ་དང་། འཐབ་དགའ་མ་དང་། གར་མ་དང་། དགའ་འགྲོ་མ་དང་། ཆོག་མེད་མ་དང་། མང་ཟ་མ་དང་། ཆང་དགའ་མ་དང་། ཤ་དགའ་མ་དང་། ཕར་འགྲོ་ཚུར་འགྲོ་
མ་དང་། བྲམ་ཟེ་མོ་དང་། རྒྱལ་པོའི་སྲས་མོ་དང་། ཆང་འཚོང་མ་དང་། ཐོད་པ་མ་དང་། ལྟོ་བི་དང་། གཏུམ་མོ་དང་། ཁྲུས་མཁན་མོ་དང་། ཚོས་མ་དང་། ཤ་བ་རི་དང་། ལེགས་མ་དང་། ཁྲག་དགའ་མ་དང་། སྐྱབས་སྦྱིན་མའོ། །དེ་ཀུན་ལྷ་མོ་རྣལ་འབྱོར་མ། །ཤིན་
ཏུ་དྲག་ལ་ཡང་དག་འཇིགས། །དེ་ཀུན་ལག་ན་གང་ཞིག་ཤིང་། །ཁྱེར་ནས་འོང་བ་ཁྱོད་ཉོན་ཅིག །ཙམ་པ་ཀ་དང་། པ་ཏྲ་ལི་དང་། ཀ་འུན་ཙ་དང་། པ་ཏ་དང་། པདྨ་དང་། ཤ་ར་དང་། ཤི་མྱ་དང་། པ་ལ་ཤ་དང་། ནཱ་ག་གེ་སར་དང་། སཱ་ལ་དང་། ཨ་རོ་དྷ་ཀ་དང་། གྷ་ན་དང་།
པི་ས་ལ་དང་། བུང་བའི་དྲ་བ་དང་། ཨ་ཤྭཏྠ་དང་། ཨ་ཏ་པུ་ཏ་དང་། ཧ་ཡ་དང་། ས་ཧ་ཀ་ར་དང་། འོ་མའི་ཤིང་དང་། ཆུ་ཤིང་དང་། ན་ལི་གི་ར་དང་། ཨུ་དུམ་བཱ་ར་དང་། ཨེ་རཎྜ་དང་། ཀ་པིཏྠ་དང་། ཨ་མྲ་དང་། ཛ་མ་ར་དང་། ཁ་དིར་དང་། ཙནྡན་དམར་པོ་དང་། བདྡ་
ཀ་དང་། ཙནྡན་དང་། ལི་ཤི་དང་། ཛཱ་ཏི་ཤིང་དང་། གོརྴིར་ཥ་དང་། བིལ་པ་དང་། སྐྱུ་རུ་ར་དང་། བ་རུ་ར་དང་། རྒུན་འབྲུམ་དང་། ཁ་རྫུ་ར་དང་། ད་ག་ར་དང་། ཀམྤི་ལ་དང་། བེནྟི་དཀར་དང་། གོ་ཡུའི་ཤིང་དང་། འདོད་པའི་མདའ་གཞུ་དང་། ཕྲ་མོའི་ལོ་མ་དང་། གུ་

གུལ་དང་། ས་རྫར་ས་དང་། པ་ལ་ཀ་དང་། མ་ད་ནའི་ཤིང་དང་། ཀརྨྨ་རི་དང་། པུཎྜ་རཱི་ཀ་དང་། འབྲས་བུ་ཆེ་བ་དང་། ཚེར་འབྲས་དང་། ཀླུའི་མགོ་ཤིང་དང་། སུ་དར་ཤན་དང་། ཏ་ལའི་ཤིང་དང་། ཆོས་ཀྱི་རྒྱལ་མཚན་དང་། གཤིན་རྗེའི་གདུགས་དང་། ཨ་
ཤོ་ཀ་དང་། ཨར་ག་དང་། ཀ་ར་བཱིར་དང་། རུ་དྲཱ་ཀྵ་དང་། ཨརྫུ་ན་དང་། རྡོ་རྗེའི་མིག་སྟེ། ཤིང་དེ་དག་ཀུན་ནི་ཆུ་ཞེང་གབ་པ། མེ་ཏོག་དང་འབྲས་བུ་དང་ལྡན་པ་སྟེ། འདུས་པ་ཆེན་པོའི་གནས་སུ་རྣལ་འབྱོར་མ་རྣམས་ཀྱིས་ཁྱེར་ཏེ་འོངས་ནས། དམ་ཚིག་གི་སྤྱོད་པ་ཆེན་པོ་བྱེད་
དོ། །འདུས་པ་ཆེན་པོའི་གནས་བརྒྱད་པ། །བརྒྱད་ཀྱི་འདབ་མ་དང་ལྡན་ནོ། །འདབ་མ་རེ་རེ་ལ་རྣལ་འབྱོར་མ་དེ་དག་དང་གཉིས་པ་ནི་ཤིང་སྟེ། དེ་གཉིས་གཅིག་ལ་གཅིག་མཉམ་པར་གནས་སོ། །དེ་ལྟར་ཤིང་གི་རྣམ་པ་ཉིད་ཀྱི་རྩལ་བཞུགས་པའི་ཕྱིར་རོ། །རྣལ་
འབྱོར་མ་དང་ཤིང་གི་སྦྲས་རྩ་དྲུག་ཅུ་རྩ་བཞི་ཁོང་དུ་ཆུད་པའོ། །འདི་ལ་རྩའི་འཁོར་ལོའི་ལྟེ་བར་སྲོག་གི་རྩ་བའི་ནང་དང་ལྷན་ཅིག་རྩ་གསུམ་དང་ལྡན་པའི་འདབ་མ་གསུམ་གྱི་པདྨའི་གཡས་ངོས་སུ་པིང་ག་ལའོ། །གཡོན་ངོས་སུ་ཨི་ཌཱའོ། །དབུས་སུ་བདེ་ལེགས་ཡིད་
འོང་མ་དང་། འཇུག་པ་དང་། གནས་པ་དང་། འགྲོ་བ་འགྲུབ་པར་བྱེད་དོ། །དེ་དག་གི་དངོས་པོ་དང་། རྟེན་དང་། ཡེ་ཤེས་དང་། རྣམ་པར་འབྱེད་པ་ལས་ཞལ་བཟང་མོ་དེ་རུ་ཤེས་པར་བྱ། ཤར་བ་དང་ནུབ་པའི་དུས་སུ་རྩའི་འཁོར་ལོའི་འབྱུང་བ་ཐམས་ཅད་འབད་
པས་བཙལ་བར་བྱའོ། །གང་གི་ཕྱིར་རྩའི་འབྱུང་བ་མེད་པར་གྱུར་ན། བྱང་ཆུབ་ཀྱི་སེམས་ཀྱི་བདུད་རྩི་བདེ་བའི་ཡེ་ཤེས་འདི་འཇུག་པ་དང་། གནས་པ་དང་། འགྲོ་བའི་སྐྱེ་བ་ཤེས་པ་མ་ཡིན་ནོ། །མ་ཤེས་ན་ཇི་ལྟར་ཕྱག་རྒྱ་ཆེན་པོའི་གྲུབ་པ་རྙེད་པར་འགྱུར་ཏེ། དེ་བས་ན་
ཕྱག་རྒྱ་ཆེན་པོའི་གྲུབ་པའི་དོན་འདོད་པའི་རྣལ་འབྱོར་གྱི་དབང་ཕྱུག་གིས་བསམ་གཏན་ལ་མི་གཡེང་བས་བརྩོན་པར་བྱའོ། །ལྷ་མོས་གསོལ་བ། བཅོམ་ལྡན་རྣལ་འབྱོར་དབང་ཕྱུག་གིས། །བསམ་གཏན་འདིར་ནི་ཇི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །རྣལ་

འབྱོར་དབང་ཕྱུག་བསམ་གཏན་ནི། །ཉོན་ཅིག་ལྷ་མོ་ངས་རབ་བཤད། །ཀུན་རྫོབ་ཡེ་ཤེས་རྟེན་པ་ལས། །གཉིས་སུ་མེད་པའི་གནས་རབ་རྙེད། །ཉེར་འགྲོ་བསམ་གཏན་མཆོག་གིས་ནི། །གྲུབ་པ་ཆེན་པོ་རྙེད་པར་འགྱུར། །སྐྱོན་ནི་ཐམས་ཅད་བྲལ་བ་ཡི། །ཡིད་
དང་མཐུན་པའི་རང་གནས་སུ། །ལུས་ནི་མ་བསྒྲིམས་པ་ཡིས་ནི། །སྤྲོས་པ་མེད་པར་སྟན་བདེར་བསྡད། །ལྟེ་བའི་དབུས་ན་ཡོད་པའི་ཚུལ། །ཧཱུྃ་གི་ཡིག་འབྲུ་གྲགས་ཆེན་གྲགས། །རྣམ་པར་རྟོག་པ་དང་བྲལ་བ། །བསྐལ་པའི་མེ་ཡི་འོད་དང་མཉམ། །ལངས་ནས་
ཆོས་ཀྱི་འཁོར་ལོ་ཡི། །མཁའ་འགྲོ་བསྲེགས་ནས་སྨིན་མཚམས་ཀྱི། །དབུས་ན་གང་ཞིག་འཁོར་ལོ་ཡོད། །རང་གི་ངོ་བོ་སྲོག་གི་རླུང་། །སྙིང་གར་འོངས་ནས་དེ་གནས་སུ། །རྟག་ཏུ་དེ་ནི་བཞུགས་པའོ། །དེ་ནི་ཨོྃ་ཡིག་ངོ་བོར་གྲགས། །སྐུ་ཡི་རྒྱལ་པོ་རྣམ་པར་
ཤེས། །སྲོག་དང་རྔུབ་པ་འགོག་པ་ཡིས། །སྲོག་དང་རྔུབ་པའི་བཟའ་བ་གསོལ། །སྲོག་དང་རྔུབ་པ་གཉིས་ཟོས་ནས། །དེས་ནི་རྫོགས་པར་འགྱུར་བ་ཡིན། །དེ་ནས་དེ་ལ་རྟགས་ནི་ཀུན། །མཚན་མ་འདི་ལྟ་བུ་དག་འབྱུང་། །འདར་དང་རྔུལ་དང་བ་སྤུ་ལངས། །
དབྱངས་ཀྱི་བྱེ་བྲག་དེ་ནས་མདངས། །ཁ་དོག་འགྱུར་དང་མཆི་མ་དང་། །ལྷ་མོ་དེ་ལས་དེ་ཉིད་སྐྱེའོ། །དེ་ནས་རྣལ་འབྱོར་དབང་ཤེས་ནས། །རྣམ་པར་ཤེས་པའི་ཡི་གེ་མཆོག །ནང་དུ་ལྟ་བ་བྱས་པས་ན། །སྟེང་མཚམས་རྩེ་མོ་ཟབ་པ་རུ། །མཆོག་གི་ནམ་
མཁའ་བདེ་ཆེན་དུ། །ཡི་གེ་མཆོག་ནི་ཤེས་བྱས་ནས། །ཚངས་པའི་པདྨར་བྱོན་ཏེ་རྒྱས། །ཆགས་པ་དང་བྲལ་གནས་སུ་འགྲོ། །དཔལ་ལྡན་རྡོ་རྗེ་འཛིན་པ་ཡིས། །ལྷ་མོ་གནས་དེར་ཤེས་པར་བྱ། །འདི་ལྟ་བུ་ཡི་འདུས་པ་ཡིས། །ས་ཡི་དུར་ཁྲོད་ཆེན་
པོ་ནི། །ཆོས་ཀྱི་འབྱུང་གནས་ཀྱི་ནི་གཞིར། །གྲངས་མེད་པ་ཡི་རྣལ་འབྱོར་པ། །ཕྱག་རྒྱ་ཆེན་པོའི་དངོས་གྲུབ་ཐོབ། །ཉེ་བར་འགྲོ་བའི་བསམ་གཏན་ལས། །ངེས་པར་འགྲུབ་པའི་དབང་པོ་མཆོག །སྤྲོས་མེད་འོད་ཀྱི་གནས་རྙེད་དོ། །དཔལ་ཡེ་ཤེས་ཐིག་ལེ་ལས་

དུར་ཁྲོད་ཀྱི་ངེས་པར་བསྟན་པའི་དོན་དང་། ནང་གི་བསམ་གཏན་གྱི་ཉེ་བར་འགྲོ་བ་བསྟན་པའི་ལེའུ་སྟེ་བཅུ་བདུན་པའོ།། །།བཅོམ་ལྡན་འདས་མ་ཕྱག་རྒྱ་ཆེན་པོར་པདྨའི་མཆོག་བསྐྱེད་ཅིང་ཤིན་ཏུ་དགའ་བས་ཡང་ཞུས་པ། ཀྱཻ་བཅོམ་ལྡན་འདས་དཔལ་ཡེ་
ཤེས་ཐིག་ལེའི་རྒྱུད་འདིའི་ཚད་ནི་ཅི་ལགས། གནས་ནི་གང་ལགས། མཆོག་གི་དབང་ཕྱུག་བདག་ལ་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་དྲི་བ་མཆོག་བྱས་པ། །སྤྱན་བཟང་མ་ནི་ཁྱོད་ཉོན་ཅིག །དཔལ་ལྡན་ཡེ་ཤེས་ཐིག་ལེ་ཡི། །
དེ་ཡི་ཚད་ནི་དོན་དམ་པར། །སུས་ཀྱང་སྨྲ་བར་ནུས་མ་ཡིན། །ཞལ་བཟང་དེ་ནི་བདེན་མ་ཡིན། །འོན་ཀྱང་ཅུང་ཟད་སྐལ་ལྡན་མོ། །གསང་བའི་ཡེ་ཤེས་རབ་མཆོག་ནི། །གང་ཞིག་རྒྱལ་བས་ཡང་མི་ཤེས། །ཁྱོད་ཀྱི་ངོར་བྱས་བདག་གིས་བཤད། །སྲོག་གི་དབྱུག་པའི་
གང་ཞིག་སྟེ། །སོར་བཅུ་གཉིས་ནི་མདུད་པ་མེད། །འོག་གི་ཆ་ནི་བཅུ་གཉིས་ཕྱེད། །དེ་བཞིན་སྤྲུལ་པའི་པདྨར་ནི། །དྲུག་ཕྱེད་པདྨ་མིག་དང་འདྲ། །རྩ་བ་དང་བཅས་ལྟེ་ནང་དུ། །རྩ་བ་རྩ་བའི་ནང་འོངས་ནས། །འདབ་མའི་སྐེ་རུ་བཅར་ཏེ་གནས། །དབྱུག་པའི་རྣམ་པའི་ངོ་
བོར་གྲགས། །བུ་ག་ཕྲ་མོས་ནང་ན་ལྡན། །དེ་ནི་སྲོག་པ་རྩ་ཉིད་ཡིན། །ཁམས་གསུམ་གྱི་ནི་རྟེན་ཡིན་ནོ། །རྒྱུ་དང་འབྲས་བུ་གཉིས་མེད་ཀྱིས། །རྩ་དང་འབྲས་བུ་རྒྱ་ཡིས་བཏབ། །དྲུག་ཕྱེད་རྩ་བ་དང་ལྡན་ནི། །རྩ་བའི་སྐུད་པ་བྱད་གཟུགས་གསལ། །བཅུ་དྲུག་ཕྱེད་
ཕྱེད་བྱེ་བྲག་ཏུ། །རྩ་བའི་སྐུད་པ་གཅིག་པུའོ། །རྩ་བ་གསུམ་དབྱེ་སྐལ་ལྡན་མོ། །འབྲས་བུ་ཡབ་ནི་དེ་བཞིན་ནོ། །རྩ་བ་འབྲས་བུ་གཉིས་ཀྱི་གནས། །བཅུ་གཉིས་ཕྱེད་ཀྱི་གཅིག་པའོ། །དེ་ནི་ཤིན་ཏུ་ཕྲ་མོ་འཇམ། །རིན་ཆེན་ཁ་ནང་མན་ཆོད་དོ། །དེ་ཙམ་ཡེ་ཤེས་ཐིག་
སྐུད་ཡོད། །རྣམ་ཤེས་དྲུག་པོའི་རྟེན་མཆོག་གོ། །ཆར་ཡང་དང་ནི་ཐིག་ལེ་ཚུལ། །ཚུལ་ཙམ་མཆོག་དང་གཞན་མཆོག་གོ། །ཤྲཱི་ནི་གཞན་མིན་འདི་རུ་ཆར། །ཐིག་ལེ་ཛྙཱ་ཞེས་སུ་ནི་དྲན། །ཚུལ་ནི་ན་ཡི་ཡིག་འབྲུ་ཡིན། །ཏི་ཡི་ཡི་གེ་ཚུལ་ཙམ་མོ། །མཆོག་ནི་

ལ་ཡི་ཡིག་འབྲུར་བསྟན། །གཞན་མཆོག་ཀ་རུ་དྲན་པའོ། །གུག་མའི་རྣམ་པའི་ཁ་རུ་ནི། །ཡུངས་ཀར་ཆེ་བའི་སྦོམ་པོ་ཙམ། །གཉིས་སུ་མེད་པའི་ཡེ་ཤེས་དཔལ། །ཆར་ཡང་དུ་གྲགས་མཆོག་དབང་ཕྱུག །དེ་ཡི་སྙིང་གའི་དབུས་སུ་ནི། །ཡེ་ཤེས་ཐིག་ལེ་གྲུབ་པ་
བཞུགས། །ཚུལ་ནི་མདུད་པའི་མགྲིན་པར་གནས། །ན་ཡི་ཡི་གེ་མཚན་ཞེས་མཆོག །གཡོན་གློ་ཡི་ནི་འདབ་མའི་ནང་། །ཏི་ནི་ཐིག་ལེའི་ཚུལ་ཙམ་གནས། །གཡས་སུ་ལ་ཡི་ཡིག་འབྲུར་གྲགས། །ལྷ་མོ་མཆོག་ནི་རྟག་ཏུ་བཞུགས། །སྟེང་དུ་གཞན་མིན་ཀུན་གྱི་
མཆོག །ཁ་ཡི་གནས་སུ་རྩེ་མོའི་ཆ། །དེ་ཚད་ཡུངས་ཀར་རུས་པ་ཙམ། །ག་ཡི་རྣམ་པའི་ཡི་གེ་མཆོག །བདེ་བ་ཆེན་པོའི་རང་ངོར་གྲགས། །རང་གི་ངོ་བོའི་མཚན་ཉིད་ཅན། །དཔལ་ལྡན་ཡེ་ཤེས་ཐིག་ལེ་འདི། །མཁའ་འགྲོ་མ་ཡི་འཁོར་ལོས་སྒྱུར། །ནམ་མཁར་འགྲོ་བ་
ཡི་ནི་ཕྱིར། །མཁའ་འགྲོ་མ་ནི་རྩ་ཀུན་དྲན། །འཇུག་པའི་གནས་ས་ལོངས་སྤྱོད་ཡིན། །ཐིམ་པའི་འགྲོ་བའི་གནས་སུ་ཡོད། །འབྱུང་བ་དབང་གི་གནས་སུ་སྟེ། །རང་བཞིན་དེ་ནི་མཆོག་གཞན་མཆོག །གཡོན་གྱི་གློ་རུ་ཨི་ཌཱའི་རྩ། །པིཾ་ག་ལ་ནི་གཡས་སུ་གནས། །རྟོག་
མེད་མ་ནི་སྟེང་དུ་གནས། །ཕྱག་རྒྱ་ཆེན་པོའི་རང་བཞིན་ནོ། །སྟེང་དང་འོག་གནས་ཡོད་པའི་རྩ། །སྲིད་དང་མྱ་ངན་འདས་དག་བྱེད། །གཡོན་གློ་རུ་ནི་ཡོད་པས་ཡང་། །དེ་བཞིན་འདི་ནི་དྲན་པའོ། །དེ་རྣམས་ལྟེ་བའི་དབུས་སུ་ནི། །སྐྲ་རྩེ་བྱེ་བ་བརྒྱ་ཡི་ཆ། །དེ་ཡི་ཚད་ནི་དེ་
བཞིན་གནས། །ཞལ་བཟང་ཡེ་ཤེས་ཐིག་ལེའོ། །རྣལ་འབྱོར་མ་ཡི་ཡེ་ཤེས་རབ། །གསང་བ་མཆོག་ནི་བདག་གིས་བཤད། །ཐོས་པ་ཡིས་ནི་སྡིག་པ་ཟད། །དེ་ནས་དེ་ལ་དགའ་བ་སྐྱེ། །དྲན་པ་ཡིས་ནི་བསོད་ནམས་སྐྱེ། །དེ་ནས་དེ་ལ་མཆོག་དགའ་སྐྱེ། །ལྟ་བ་ཡིས་ནི་
འགྲུབ་པར་འགྱུར། །དགའ་བྲལ་དགའ་བ་རབ་ཏུ་སྐྱེ། །རེག་པ་ཡིས་ནི་ལྷན་སྐྱེས་དགའ། །དེ་ནས་ཡང་དག་རབ་འོད་གནས། །འོད་རབ་གནས་ལས་ཐམས་ཅད་འདི། །གནས་ལ་སོགས་པའི་དག་ཀུན་ནོ། །ལྷ་མོས་གསོལ་པ། གནས་ལ་གྲངས་ནི་ཇི་ཙམ་དུ། །མཆོག་

གི་དབང་ཕྱུག་ཁྱོད་དབང་མཛད། །བཅོམ་ལྡན་འདས་ཀྱིས་བཀའ་སྩལ་པ། །རྟག་ཏུ་སྤྲུལ་པ་ཡི་ནི་སྐུས། །ས་ནི་བཅུ་གཅིག་པ་རུ་དྲན། །ལོངས་སྤྱོད་རྫོགས་སྐུ་བཅུ་གཉིས་པ། །ཆོས་ཀྱི་སྐུས་ནི་བཅུ་གསུམ་མོ། །བདེ་བ་ཆེན་པོས་བཅུ་བཞི་པ། །གང་ཞིག་
བཅྭ་ལྔ་ཡི་ནི་ས། །དེ་ནི་ཡེ་ཤེས་ས་ཞེས་བྱ། །བཅུ་དྲུག་པ་ནི་བརྟགས་པ་མིན། །ཁྱོད་དང་ལྷན་ཅིག་ཞལ་བཟང་མོ། །དེ་ཀུན་ས་ཡི་དབང་ཕྱུག་བདག །གནས་ལ་སོགས་པ་དགའ་བའི་གནས། །ས་ཡི་སྒྲ་ཡིས་བརྗོད་པ་ཡིན། །ས་དང་པོ་མོས་པས་སྤྱོད་པ། གཉིས་
པ་རབ་ཏུ་དགའ་བ། གསུམ་པ་དྲི་མ་མེད་པ། བཞི་པ་འོད་བྱེད་པ། ལྔ་པ་འོད་འཕྲོ་བ། དྲུག་པ་སྦྱང་དཀའ་བ། བདུན་པ་མངོན་དུ་གྱུར་པ། བརྒྱད་པ་རིང་དུ་སོང་བ། དགུ་བ་མི་གཡོ་བ། བཅུ་པ་ལེགས་པའི་བློ་གྲོས། དེ་རྣམས་ནི་བྱང་ཆུབ་སེམས་དཔའི་སའོ། །ཆོས་ཀྱི་སྤྲིན་
ནི་སངས་རྒྱས་ཀྱིས། །ཀུན་ཏུ་འོད་ནི་ཡང་དག་པར་རྫོགས་པའི་སངས་རྒྱས་ཀྱིས། ཀུན་དུ་སྡང་བ་མཆེད་པའི་འོད་ནི་དཔལ་རྡོ་རྗེ་སེམས་དཔའ་བཅོམ་ལྡན་འདས་ཀྱི་སྤྲུལ་པའི་སྐུའི་ས། ཀུན་དུ་སྣང་བ་ཐོབ་པའི་འོད་ནི་ལོངས་སྤྱོད་རྫོགས་པའི་སྐུའི་ས། །ཡང་དག་འོད་རབ་ཆོས་ཀྱི་སྐུའི་ས། བརྗོད་
དུ་མེད་པ་ཚད་མེད་པ་ནི་བདེ་བ་ཆེན་པོའི་ས་སྟེ། དེ་ཀུན་དགའ་བའི་བྱེ་བྲག་ལ། །སར་ནི་ཀུན་ཏུ་བཏགས་པའོ། །ལྷ་མོས་གསོལ་པ། རྡོ