Kinh tạng Tây Tạng (Kangyur Đại Học) — 073_མདོ་སྡེ།_ཧ

་སོའི་སྐྱེ་བོ་གང་ཡིན་པ་དེ་དག་ནི་ཁྱིམ་པར་གྱུར་ཏོ། །དེ་ནས་དེར་གཡར་འདྲེན་པ་དེ་དག་གིས་དགེ་སློང་གཅིག་ཀྱང་མ་རྙེད་ནས། རྒྱལ་པོ་ཀྲྀ་ཀཱིས་དགེ་སློང་དེ་དག་གར་དོང་ཞེས་
སྨྲས་པ་དང་། བློན་པོ་རྣམས་ཀྱིས་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་ཏེ་ཞག་བདུན་ལོན་ནས་བསྟན་པ་ནུབ་ལགས་སོ་ཞེས་གསོལ་ཏོ། །རྒྱལ་པོས་བཀའ་སྩལ་པ། དེའི་དགེ་སློང་གང་གིས། དེའི་བསྟན་པ་འཛིན་པར་འགྱུར་བ་དེ་ལྟ་བུ་གཅིག་

ཀྱང་མེད་དམ་ཞེས་བྱས་ནས། རྒྱལ་པོ་ཀྲྀ་ཀཱིས་མཆོད་རྟེན་དེ་ལ་བཀུར་སྟི་བྱས་ཏེ་སོང་ངོ་། །བློན་པོའི་བུ་དེས་ཀྱང་མཆོད་རྟེན་དེ་ལ་བཀུར་སྟི་བྱས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་གང་དང་གང་དུ་སྐྱེ་བར་འགྱུར་བ་དེ་དང་དེར་ཕྱུག་ཅིང་ནོར་མང་ལ་
ལོངས་སྤྱོད་ཆེ་བའི་རིགས་སུ་སྐྱེ་བར་གྱུར་ཅིག །ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །དེ་ཁོ་ནའི་བསྟན་པ་
ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་གྱུར་ཅིག །གཞན་ཡང་བདག་གིས་དེ་ཡོངས་སུ་མྱ་ངན་ལས་འདས་ནས། བསྟན་པ་འཛིན་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་བློན་པོའི་བུ་གང་ཡིན་
པ་དེ་ནི་དགེ་སློང་འོད་སྲུང་འདི་ཁོ་ན་ཡིན་ཏེ། འདིས་དེར་སྨོན་ལམ་བཏབ་བོ།། །།ལས་བརྒྱ་ཐམ་པ། བམ་པོ་ཉི་ཤུ་བཞི་པ། འཛིན་བྱེད་ཀྱི་བུ་ཞེས་བྱ་བ་ནི། གླེང་གཞི་རྒྱལ་པོའི་ཁབ་ན་བཞུགས་ཏེ། དེའི་ཚེ་རྒྱལ་པོའི་ཁབ་ན་བྲམ་ཟེ་ཆེ་ཞིང་མཐོ་བ་འཛིན་བྱེད་ཅེས་
བྱ་བ་ཞིག་གནས་སོ། །འདམ་བུ་སྦྱིན་ཞེས་བྱ་བའི་གྲོང་ན་ནི་བྲམ་ཟེ་རྒྱལ་ཞེས་བྱ་བ་ཞིག་གནས་ཏེ། དེ་གཉིས་མཛའ་ཞིང་བཤེས་ལ་གཅུགས་པར་གྱུར་ཏོ། །དེ་ནས་བྲམ་ཟེ་རྒྱལ་ཆུང་མ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་པ་ལས། ཆུང་མ་ལ་བུ་ཆགས་ནས་དེ་ཟླ་
བ་དགུའམ་བཅུ་ལོན་པ་དང་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ཏེ། དེའི་བཙས་སྟོན་རྒྱས་པར་བྱས་ནས། མིང་ཤཱ་རིའི་བུ་ཞེས་བྱ་བ་དང་ཉེ་རྒྱལ་ཞེས་བྱ་བར་བཏགས་སོ། །དེ་ནས་ཕྱི་ཞིག་ན་བྲམ་ཟེ་འཛིན་བྱེད་ཀྱི་ཆུང་མ་ལ་ཡང་བུ་ཆགས་ནས།
དེ་ཟླ་བ་དགུའམ་བཅུ་ལོན་པ་དང་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ཏེ། དེའི་བཙས་སྟོན་རྒྱས་པར་བྱས་ནས། ཁྱེའུ་འདིའི་མིང་ཇི་སྐད་གདགས་ཞེས་མིང་འདོགས་པར་བྱེད་དེ། ཁྱེའུ་འདི་བྲམ་ཟེ་ཆེ་ཞིང་མཐོ་བ་འཛིན་བྱེད་ཀྱི་བུ་ཡིན་པས་ན། ཁྱེའུ་

འདིའི་མིང་འཛིན་བྱེད་ཀྱི་བུ་ཞེས་གདགས་སོ་ཞེས་ཟེར་རོ། །དེ་ནས་ཁྱེའུ་འཛིན་བྱེད་ཀྱི་བུ་འོ་མ་དང་མར་དང་ཞོ་དང་ཞུན་མར་དང་མར་གྱི་ཉིང་གུས་བསྐྱེད་བསྲིངས་ནས། གང་གི་ཚེ་དེ་གཉིས་ཆེར་སྐྱེས་པ་དེའི་ཚེ་དེ་གཉི་ག་བྱིས་པ་སློབ་པའི་གྲྭར་གཏད་ནས། དེ་གཉི་ག་ཡང་ཡི་གེ་མཐར་ཕྱིན་པར་
ལོབས་ཏེ། དེ་གཉི་གས་བསྟན་བཅོས་ཐམས་ཅད་ལོབས་སོ། །ཉེ་རྒྱལ་གྱིས་ནི་ལོ་བཅུ་དྲུག་ལོན་ནས་དབང་པོའི་བརྡ་སྤྲོད་པ་ཡང་ལོབས་ཏེ་གཞུང་གིས་རྒོལ་བ་ཐམས་ཅད་ཚར་གཅད་དོ། །དེ་ནས་ཕྱི་ཞིག་ན་དཀའ་ཐུབ་ཀྱི་ནགས་ཚལ་དུ་རྟེན་བཅས་ནས། དེ་ཀུན་དུ་རྒྱུ་
དག་གི་ནང་དུ་རབ་ཏུ་བྱུང་ངོ་། །དེར་གང་གི་ཚེ་སངས་རྒྱས་འཇིག་རྟེན་དུ་བྱུང་བ་དེའི་ཚེ་བྲམ་ཟེའི་བུ་ཤཱ་རིའི་བུ་དང་མཽད་གལ་གྱི་བུ་གཉིས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། དེར་དེ་གཉིས་ཀྱིས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་
བྱས་ནས། བཅོམ་ལྡན་འདས་ཀྱིས་དེ་གཉིས་ལས་གཅིག་ནི་ཤེས་རབ་ཆེ་བ་རྣམས་ཀྱི་མཆོག་ཏུ་བསྟན་ཏོ། །གཅིག་ནི་རྫུ་འཕྲུལ་ཅན་རྣམས་ཀྱི་མཆོག་ཏུ་བསྟན་ཏོ། །བྲམ་ཟེའི་ཁྱེའུ་འཛིན་བྱེད་ཀྱི་བུ་ནི་རྒྱལ་པོའི་ཞམ་རིང་བ་དཔའ་བོར་གྱུར་ཏེ། རྒྱལ་པོའི་ཕོ་བྲང་དེར་རྟག་ཏུ་འགྲོ་བ་
ལས་དེ་ཤེས་རབ་དང་ལྡན་པའི་ཕྱིར། རྒྱལ་པོ་གཟུགས་ཅན་སྙིང་པོས་བློན་པོའི་མཆོག་ཏུ་བསྐོས་ནས། ལོངས་སྤྱོད་ཀྱི་གཞི་ཆེན་པོ་ཡང་བྱིན་ཏེ། འཇིག་རྟེན་དག་ནི་འབྱོར་པ་འདོད་པ་ཡིན་ནོ། །དེ་ནས་ཕྱི་ཞིག་ན། དེས་ཀྱང་ཐབས་ཟླར་བབ་པ་ལས་ཆུང་མ་བླངས་ནས་དེ་དེ་དང་
ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་ལ། དེས་ཁྱིམ་གྱི་འབྱོར་པ་རྒྱས་པར་བྱས་ཏེ་བཞག་གོ། །དེ་ནས་དེས་རྒྱལ་པོའི་ཁབ་དེར་རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པར་བྱེད་དོ། །བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་
ལེན་པར་བྱེད་དོ། །དེ་ནས་ཕྱི་ཞིག་ན། ཚེ་དང་ལྡན་པ་ཤཱ་རིའི་བུས། འཛིན་བྱེད་ཀྱི་བུ་གདུལ་བའི་དུས་ལ་བབ་པར་མཐོང་ནས། སྔ་དྲོ་ཤམ་ཐབས་དང་ཆོས་གོས་བགོས་ཏེ་ལྷུང་བཟེད་ཐོགས་ནས་བྲམ་ཟེ་འཛིན་བྱེད་ཀྱི་བུའི་ཁྱིམ་ག་ལ་བ་དེར་སོང་ངོ་། །དེའི་ཚེ་བྲམ་ཟེ་འཛིན་

བྱེད་ཀྱི་བུ་ཤིང་མ་ལ་ལི་ཀའི་འདབ་ན་བ་འཇོ་བའི་ཞལ་ཏ་བྱེད་ཅིང་འདུག་པ་ལས། བྲམ་ཟེ་འཛིན་བྱེད་ཀྱི་བུས་ཐག་རིང་པོ་ཞིག་ནས་ཚེ་དང་ལྡན་པ་ཤཱ་རིའི་བུ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུ་ལ་ཡན་
ལག་ཐམས་ཅད་ཀྱིས་འཁྱུད་ནས་ཁྱིམ་གྱི་ནང་དུ་ཁྲིད་དེ། སྟན་བཤམས་པ་ལ་འདུག་ཏུ་བཅུག་སྟེ། ཀྱེ་ཤཱ་རིའི་བུ་བཤོས་གསོལ་ལ་འོ་མ་ཡང་གསོལ་ཅིག་ཅེས་བྱས་སོ། །ཤཱ་རིའི་བུ་ན་རེ་འཛིན་བྱེད་ཀྱི་བུ་ང་ལ་སེམས་དགའ་བར་བྱས་ཟིན་གྱིས་དེས་ཆོག་གོ། །འཛིན་བྱེད་ཀྱི་
བུས་སྨྲས་པ། ཀྱེ་ཤཱ་རིའི་བུ་ཁྱོད་ཡུན་རིང་མོ་ཞིག་ན་གདོད་བདག་གི་ཁྱིམ་དུ་ཕྱིན་ན། ཅིའི་ཕྱིར་ཟན་གཅིག་ཙམ་ཡང་ཟར་མི་བཏུབ། ཤཱ་རིའི་བུས་སྨྲས་པ། འཛིན་བྱེད་ཀྱི་བུ་འདི་ལྟར་ཁྱོད་ནི་ངང་ཚུལ་འཆལ་ཅིང་ངང་ཚུལ་ཉམས་པ་ཡིན་ཏེ། རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་
བདག་རྣམས་ཀྱི་ནོར་ལེན་པར་བྱེད་ལ། བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད་པའི་ཕྱིར་རོ། །འཛིན་བྱེད་ཀྱི་བུས་སྨྲས་པ། ཀྱེ་ཤཱ་རིའི་བུ་བདག་ནི་ཁྱིམ་པ་སྟེ། ཁྱིམ་ན་གནས་པ་ལགས་པས་ན། བདག་གིས་ནི་བདག་ཉིད་དང་ཕ་མ་དང་བུ་
དང་ཆུང་མ་དང་བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་དང་མཛའ་བོ་དང་སྙིང་ཉེ་བ་དང་ཉེ་དུ་དང་རྒན་རབས་ཀྱང་ཡང་དག་པར་བདེ་བས་ཚིམ་པར་བྱ་དགོས་སོ། །རྒྱལ་པོ་ལ་ཡང་ས་གཞིའི་རག་ལུས་ལ། ལྷ་ཡང་རྗེད་དགོས། སྔོན་གྱི་མཚུན་དག་ཀྱང་གཏོར་དགོས། དགེ་
སྦྱོང་དང་བྲམ་ཟེ་རྣམས་ཀྱང་ཟན་སྦྱིན་དགོས་ཏེ། བདག་གིས་ནི་ཆོས་བཞིན་དུ་བྱེད་པ་འབའ་ཞིག་གིས་བདེ་བླག་ཏུ་འབྱོར་པར་མི་ནུས་སོ། །ཤཱ་རིའི་བུས་སྨྲས་པ། འཛིན་བྱེད་ཀྱི་བུ་འོ་ན་ཁྱོད་ཉིད་ལ་དྲི་བར་བྱས། ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་དེའི་ལན་ཐོབ་ཤིག །དཔེར་ན་མི་
ཞིག་གིས་ཕ་མ་གཉིས་ཀྱི་ཕྱིར་ཆོས་མ་ཡིན་པ་སྤྱོད་ཅིང་ལོག་པར་སྤྱོད་དེ། དེ་ཆོས་མ་ཡིན་པ་སྤྱོད་ཅིང་ལོག་པར་སྤྱོད་པ་དེས་ལུས་དང་བྲལ་ཏེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེས་ནས། དེ་སེམས་ཅན་དམྱལ་བའི་སྲུངས་མ་རྣམས་ཀྱིས་

བཟུང་སྟེ། སྡུག་བསྔལ་དྲག་པ་དང་མི་བཟད་པ་དང་ཚ་བ་དང་ཡིད་དུ་མི་འོང་བའི་ཚོར་བ་མྱོང་དུ་བཅུག་ནས། དེ་ན་རེ་སེམས་ཅན་དམྱལ་བའི་སྲུངས་མ་དག་བདག་ལ་གནོད་པ་འདི་དང་འདི་ལྟ་བུ་དག་མ་བྱེད་ཅིག །དེ་ཅིའི་ཕྱིར་ཞེ་ན། བདག་གིས་ཕ་མའི་ཕྱིར་ཆོས་མ་ཡིན་པ་སྤྱད་ཅིང་ལོག་པར་
སྤྱད་པས། བདག་ཆོས་མ་ཡིན་པ་སྤྱད་ཅིང་ལོག་པར་སྤྱད་པ་དེས། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེས་པར་ཟད་དོ་ཞེས་ཟེར་ན། འཛིན་བྱེད་ཀྱི་བུ་དེ་ཇི་སྙམ་དུ་སེམས། མི་དེ་སེམས་ཅན་དམྱལ་བའི་སྲུངས་མ་རྣམས་
ལས་དོན་དེ་འགྲུབ་པར་འགྱུར་རམ། འཛིན་བྱེད་ཀྱི་བུས་སྨྲས་པ། ཤཱ་རིའི་བུ་དེ་ནི་མི་འགྲུབ་བོ། །ཤཱ་རིའི་བུས་སྨྲས་པ། འཛིན་བྱེད་ཀྱི་བུ་དད་པ་དང་ལྡན་པའི་རིགས་ཀྱི་བུས་ཆོས་དང་ལྡན་པ་དང་ལས་ཀྱི་ཡོན་ཏན་དག་གིས་ལོངས་སྤྱོད་རྣམས་བསྒྲུབས་ཏེ། ཕ་མ་གཉིས་ལ་དུས་
དུས་སུ་ཡང་དག་པར་རི་མོ་བྱེད་པ་དང་། ཡང་དག་པར་བསྙེན་བཀུར་བྱེད་པ་དང་། ཡང་དག་པའི་བདེ་བས་སྟེན་པར་བྱེད་དེ། སྡིག་པའི་ལས་ཀྱང་ཅུང་ཟད་ཀྱང་མི་བྱེད་ལ། བསོད་ནམས་ཀྱི་ལམ་ཡང་དག་པར་བླངས་ཏེ། འདུག་ན་དེ་ལ་ཕ་མ་ཡང་འདི་སྙམ་དུ་སེམས་ཏེ། རིགས་
ཀྱི་བུ་འདི་ནི་དད་པ་དང་ལྡན་ཞིང་སྒྲུབ་ཕོད་ལ་རིགས་པས་འཚོ་བ་ཡིན་ཏེ། རིགས་ཀྱི་བུ་འདིས་ནི་ཆོས་དང་ལྡན་པ་དང་། ལས་ཀྱི་ཡོན་ཏན་དག་གིས་ལོངས་སྤྱོད་རྣམས་བསྒྲུབས་ནས། དུས་དུས་སུ་བདག་ཅག་ལ་ཡང་ཡང་དག་པར་རི་མོ་བྱེད། ཡང་དག་པར་བསྙེན་བཀུར་བྱེད། ཡང་དག་
པར་བདེ་བས་སྟེན་པར་བྱེད་དེ། སྡིག་པའི་ལས་ཀྱང་ཅུང་ཟད་ཀྱང་མི་བྱེད་ལ། བསོད་ནམས་ཀྱི་ལམ་ཡང་ཡང་དག་པར་བླངས་ཏེ་འདུག་གོ་སྙམ་མོ། །རིགས་ཀྱི་བུ་ཕ་མ་ལ་སླར་སྙིང་བརྩེ་བར་བྱེད་པ་དེ་ནི། དགེ་བའི་ཆོས་རྣམས་འཕེལ་བ་འབའ་ཞིག་ཏུ་འགྱུར་བར་རེ་བར་བྱ་སྟེ། ཡོངས་
སུ་འགྲིབ་པར་མི་འགྱུར་རོ། །འཛིན་བྱེད་ཀྱི་བུ། དཔེར་ན་མི་ཞིག་གིས་བུ་དང་ཆུང་མ་དང་བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་རྣམས་དང་མཛའ་བོ་དང་སྙིང་ཉེ་བ་དང་ཉེ་དུ་དང་རྒན་རབས་རྣམས་དང་རྒྱལ་པོ་དང་ལྷ་རྣམས་དང་དགེ་སྦྱོང་དང་བྲམ་ཟེ་རྣམས་ཀྱི་ཕྱིར་ཆོས་མ་ཡིན་པ་

སྤྱོད་ཅིང་ལོག་པར་སྤྱོད་དེ། དེ་ཆོས་མ་ཡིན་པ་སྤྱོད་ཅིང་ལོག་པར་སྤྱོད་པ་དེས། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེས་ནས། དེ་སེམས་ཅན་དམྱལ་བའི་སྲུངས་མ་རྣམས་ཀྱིས་བཟུང་སྟེ། སྡུག་བསྔལ་དྲག་པ་དང་མི་
བཟད་པ་དང་ཚ་བ་དང་ཡིད་དུ་མི་འོང་བའི་ཚོར་བ་མྱོང་དུ་བཅུག་ནས། དེ་ན་རེ་སེམས་ཅན་དམྱལ་བའི་སྲུངས་མ་དག་བདག་ལ་གནོད་པ་འདི་དང་འདི་ལྟ་བུ་དག་མ་བྱེད་ཅིག །དེ་ཅིའི་ཕྱིར་ཞེ་ན། བདག་གིས་དགེ་སྦྱོང་དང་བྲམ་ཟེ་རྣམས་ཀྱི་ཕྱིར་ཆོས་མ་ཡིན་པ་སྤྱད་ཅིང་ལོག་པར་སྤྱད་པར་ཟད་དོ་ཞེས་
ཟེར་ན། འཛིན་བྱེད་ཀྱི་བུ་ཇི་སྙམ་དུ་སེམས། མི་དེ་སེམས་ཅན་དམྱལ་བའི་སྲུངས་མ་རྣམས་ལས་དོན་དེ་འགྲུབ་པར་འགྱུར་རམ། འཛིན་བྱེད་ཀྱི་བུས་སྨྲས་པ། ཤཱ་རིའི་བུ་དེ་ནི་མི་འགྲུབ་བོ། །ཤཱ་རིའི་བུས་སྨྲས་པ། འཛིན་བྱེད་ཀྱི་བུ་དད་པ་དང་ལྡན་པའི་རིགས་ཀྱི་བུས་ཆོས་དང་ལྡན་པ་དང་། ལས་ཀྱི་
ཡོན་ཏན་དག་གིས་ལོངས་སྤྱོད་རྣམས་བསྒྲུབས་ཏེ། དགེ་སྦྱོང་དང་བྲམ་ཟེ་རྣམས་ལ་ཟས་སྦྱིན་པར་བྱེད་དེ། སྡིག་པའི་ལས་ཀྱང་ཅུང་ཟད་ཀྱང་མི་བྱེད་ལ། བསོད་ནམས་ཀྱི་ལམ་ཡང་ཡང་དག་པར་བླངས་ཏེ། འདུག་ན་དེ་ལ་དགེ་སྦྱོང་དང་བྲམ་ཟེ་རྣམས་ཀྱིས་དགེ་བའི་སེམས་ཀྱིས་སླར་སྙིང་བརྩེ་བར་
བྱེད་དོ། །འཛིན་བྱེད་ཀྱི་བུ་དེ་ལྟར་དགེ་སྦྱོང་དང་བྲམ་ཟེ་རྣམས་ཀྱིས་དགེ་བའི་སེམས་ཀྱིས་སླར་སྙིང་བརྩེ་བར་བྱས་པའི་སྐྱེས་བུ་གང་ཟག་དེའི་ནི། དགེ་བའི་ཆོས་རྣམས་འཕེལ་བ་འབའ་ཞིག་ཏུ་འགྱུར་བར་རེ་བར་བྱས་ཏེ་ཡོངས་སུ་འགྲིབ་པར་མི་འགྱུར་རོ། །དེ་སྐད་ཅེས་སྨྲས་ནས་བྲམ་ཟེ་འཛིན་
བྱེད་ཀྱི་བུ་ངུས་ཏེ་མཆི་མ་བླགས་སོ། །དེ་ནས་བྲམ་ཟེ་འཛིན་བྱེད་ཀྱི་བུས་གོས་ཀྱི་མཐའ་མས་མཆི་མ་ཕྱིས་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཀྱེ་ཤཱ་རིའི་བུ་འདི་ནི་བདག་གི་མཆིས་བྲང་བག་སར་བླངས་ནས་རིང་པོ་མ་ལགས་པ་ཞིག་མཆིས་ཏེ། དེའི་སླད་དུ་བདག་གིས་
བག་མ་མཆིས་པར་སྡིག་པ་ཁ་ན་མ་ཐོ་བ་མང་པོ་བགྱིས་ཀྱིས། བཙུན་པ་ཤཱ་རིའི་བུ་བག་སར་འདི་བདག་གིས་གཏན་དུ་སླར་བཏང་ལ། དེང་སླན་ཆད་བཙུན་པ་ཤཱ་རིའི་བུ་ལས་ཚངས་པར་སྤྱོད་པ་ལྔ་པའི་བསླབ་པའི་གཞི་རྣམས་ཡང་དག་པར་ནོད་པར་འཚལ་ལོ། །དེ་ནས་ཚེ་དང་

ལྡན་པ་ཤཱ་རིའི་བུས་བྲམ་ཟེ་འཛིན་བྱེད་ཀྱི་བུ་ཚངས་པར་སྤྱོད་པ་ལྔ་པའི་བསླབ་པའི་གཞི་རྣམས་ལ་གནས་པར་བྱས་ནས་སྟན་ལས་ལངས་ཏེ་སོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུ་ལྷོ་ཕྱོགས་ཀྱི་རིའི་ནགས་ཁྲོད་ག་ལ་བ་དེར་སོང་བ་ལས། དགེ་སློང་གཞན་ཞིག་འོད་མའི་ཚལ་བྱ་ཀ་ལན་ད་ཀ་
གནས་པ་ནས། ལྷོ་ཕྱོགས་ཀྱི་རིའི་ནགས་ཁྲོད་ག་ལ་བ་དེར་སོང་ནས་དགེ་སློང་དེས་ཐག་རིང་པོ་ཞིག་ནས་ཚེ་དང་ལྡན་པ་ཤཱ་རིའི་བུ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུའི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་
གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་དགེ་སློང་དེ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ད་གདོད་ག་ལས་འོངས། དགེ་སློང་དེས་སྨྲས་པ། བཙུན་པ་ཤཱ་རིའི་བུ་བདག་ད་གཟོད་འོད་མའི་ཚལ་བྱ་ཀ་ལན་ད་ཀ་གནས་པ་ནས་མཆིས་སོ། །ཤཱ་རིའི་བུས་སྨྲས་པ།
བྲམ་ཟེ་འཛིན་བྱེད་ཀྱི་བུ་ཤེས་སམ། ཚེ་དང་ལྡན་པ་ཤཱ་རིའི་བུ་བདག་འཚལ་ཏེ། ཚེ་དང་ལྡན་པ་ཤཱ་རིའི་བུའི་སྔོན་གྱི་ཁྱིམ་ན་གནས་པའི་ཚེའི་གྲོགས་པོ་ལགས་སོ། །ཤཱ་རིའི་བུས་སྨྲས་པ། ཚེ་དང་ལྡན་པ་བྲམ་ཟེ་འཛིན་བྱེད་ཀྱི་བུ་གནོད་པ་ཆུང་ངམ། ཉམ་ང་བ་ཉུང་ངམ། བདེ་བ་དང་ལྡན་ནམ། ནད་
མེད་དམ། སྟོབས་དང་ལྡན་པར་རྒྱལ་པོའི་ཁབ་ན་གནས་སམ། སྟོན་པ་མཐོང་བར་དགའ་འམ། ཆོས་མཉན་པར་དགའ་འམ། དགེ་སློང་དེས་སྨྲས་པ། ཚེ་དང་ལྡན་པ་ཤཱ་རིའི་བུ་བྲམ་ཟེ་འཛིན་བྱེད་ཀྱི་བུ་ནི་སྟོན་པ་བལྟ་བར་ཡང་དགའ། ཆོས་མཉན་པར་ཡང་དགའ་མོད་ཀྱི། གནོད་པ་དང་
ལྡན་ཞིང་སྡུག་བསྔལ་དང་ལྡན་ཏེ་ནད་པར་གྱུར་པས་གལ་ཏེ་ན་ནད་དེ་ཁོ་ནས་འཆི་བར་འགྱུར་ཡང་སྲིད་དོ། །དེ་ནས་ཚེ་དང་ལྡན་པ་ཤཱ་རིའི་བུས་ཆོས་གོས་སྣམ་སྦྱར་བགོས་ཏེ། བྲམ་ཟེ་འཛིན་བྱེད་ཀྱི་བུའི་ཁྱིམ་ག་ལ་བ་དེར་སོང་བ་ལས་བྲམ་ཟེ་འཛིན་བྱེད་ཀྱི་བུས་ཐག་རིང་པོ་ཞིག་ནས་ཚེ་དང་ལྡན་པ་
ཤཱ་རིའི་བུ་མཐོང་ངོ་། །མཐོང་ནས་ཀྱང་ཁྲི་ལས་ལྡང་དུ་སྩོལ་ལོ། །དེ་ནས་ཚེ་དང་ལྡན་པ་ཤཱ་རིའི་བུས། བྲམ་ཟེ་འཛིན་བྱེད་ཀྱི་བུ་ཁྲི་ལས་ལྡང་བར་སྩོལ་བ་མཐོང་ནས་བྲམ་ཟེ་འཛིན་བྱེད་ཀྱི་བུ་ལ་སྨྲས་པ། འཛིན་བྱེད་ཀྱི་བུ་ང་འདུག་པའི་སྟན་གཞན་དག་ཀྱང་ཡོད་ཀྱིས། ཁྱོད་ཁྲི་ལས་མ་ལྡང་

ཅིག་ཅེས་བྱས་ནས་ཚེ་དང་ལྡན་པ་ཤཱ་རིའི་བུ་སྟན་བཤམས་པ་ལ་འདུག་གོ། །འདུག་ནས་ཀྱང་ཚེ་དང་ལྡན་པ་ཤཱ་རིའི་བུས་བྲམ་ཟེ་འཛིན་བྱེད་ཀྱི་བུ་ལ་འདི་སྐད་ཅེས་སྨྲས་སོ། །འཛིན་བྱེད་ཀྱི་བུ་ཅི་ཁྱོད་བཟོད་པ་དང་ལྡན་ནམ། འཚོ་འམ། ཅི་ཁྱོད་ཀྱི་སྡུག་བསྔལ་དྲག་པ་དང་།
མི་བཟད་པ་དང་། ཚ་བ་དང་། ཡིད་དུ་མི་འོང་བའི་ཚོར་བ་དྲག་པོ་རྣམས་མེད་པར་གྱུར་ཏམ། ཕྱིར་ཐུ་བར་མ་གྱུར་ཏམ། མེད་པར་གྱུར་པར་མངོན་ནམ། ཕྱིས་ཐུ་བར་གྱུར་པར་མི་མངོན་གྲང་། འཛིན་བྱེད་ཀྱི་བུས་སྨྲས་པ། བཙུན་པ་ཤཱ་རིའི་བུ་བདག་ནི་བཟོད་པ་དང་ལྡན་པ་མ་ཡིན། འཚོ་བ་
དང་ལྡན་པ་མ་ཡིན་ཏེ། བདག་གི་ལུས་ལ་སྡུག་བསྔལ་དྲག་པ་དང་། མི་བཟད་པ་དང་། ཚ་བ་དང་། ཡིད་དུ་མི་འོང་བའི་ཚོར་བ་ཚབས་ཆེན་པོ་དག་གིས་ཐེབས་ཏེ། བདག་གི་ཚོར་བ་དེ་དག་ཕྱིས་ཐུ་ཞིང་ཕྱིས་ན་བར་མངོན་གྱི་མེད་པར་མ་གྱུར་ཏོ། །བཙུན་པ་ཤཱ་རིའི་བུ་དཔེར་ན་མི་སྟོབས་
ཆེ་རབ་ཅིག་གིས་མི་ཉམ་ཆུང་རབ་ཅིག་གི་མགོ་བོ་འབྲེང་བ་བཟང་པོ་རིང་པོས་དམ་དུ་བཅིངས་ན་དེའི་མགོ་བོ་མི་བཟད་པར་ན་བར་འགྱུར་བ་དེ་བཞིན་དུ་བཙུན་པ་ཤཱ་རིའི་བུ་བདག་གི་མགོ་བོ་ལ་ཚོར་བ་མི་བཟད་ཅིང་འདུག་སྟེ། བདག་གི་ཚོར་བ་དེ་དག་ཕྱིས་ཐུ་ཞིང་ཕྱིས་ལ་ན་བར་མངོན་གྱི་མེད་
པར་མ་གྱུར་ཏོ། །བཙུན་པ་ཤཱ་རིའི་བུ་དཔེར་ན་བ་ལང་གསོད་པའམ། བ་ལང་གསོད་པའི་སློབ་མས་བ་ལང་བཤའ་བའི་གྲི་རྣོན་པོས་བ་ལང་གི་ལྟོ་དྲལ་ན་དེའི་ལྟོ་བའི་ཚོར་བ་མི་བཟད་པར་འགྱུར་བ་དེ་བཞིན་དུ་བཙུན་པ་ཤཱ་རིའི་བུ་བདག་གི་ལྟོ་བའི་ནད་མི་བཟད་པར་འདུག་སྟེ་བདག་གི་ཚོར་
བ་དེ་དག་ཕྱིས་ཐུ་ཞིང་ཕྱིས་ལ་ན་བར་མངོན་གྱི་མེད་པར་མ་གྱུར་ཏོ། །བཙུན་པ་ཤཱ་རིའི་བུ་དཔེར་ན་མི་སྟོབས་ཆེ་རབ་གཉིས་ཀྱིས་མི་སྟོབས་ཆུང་རབ་ཅིག་དཔུང་པ་གཡས་གཡོན་ནས་བཟུང་སྟེ། མེ་མདག་གི་ནང་དུ་སྲེག་པར་བྱེད་ན་དེའི་ལུས་མི་བཟད་པར་ཚ་བར་འགྱུར་བ་དེ་བཞིན་དུ་བཙུན་
པ་ཤཱ་རིའི་བུ་བདག་གི་ལུས་ཤིན་ཏུ་ཚ་ཞིང་འདུག་སྟེ། བདག་གི་ཚོར་བ་དེ་དག་ཕྱིས་ཐུ་ཞིང་ཕྱིས་ལ་ན་བར་མངོན་གྱི་མེད་པར་མ་གྱུར་ཏོ། །བཙུན་པ་ཤཱ་རིའི་བུ་དེས་ན་བདག་ནི་བཟོད་པ་དང་ལྡན་པ་མ་ཡིན། འཚོ་བ་དང་ལྡན་པ་མ་ཡིན་ཏེ། བདག་གི་ལུས་ལ་སྡུག་བསྔལ་དྲག་པ་དང་། མི་བཟད་པ་

དང་། ཚ་བ་དང་། ཡིད་དུ་མི་འོང་བའི་ཚོར་བ་ཚབས་ཆེན་པོ་དག་གིས་ཐེབས་ཏེ། བདག་གི་ཚོར་བ་དེ་དག་ཕྱིས་ཐུ་ཞིང་ཕྱིས་ལ་ན་བར་མངོན་གྱི་མེད་པར་མ་གྱུར་ཏོ། །ཤཱ་རིའི་བུས་སྨྲས་པ། འཛིན་བྱེད་ཀྱི་བུ་འོ་ན་ཁྱོད་ཉིད་ལ་དྲི་བར་བྱས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །འཛིན་
བྱེད་ཀྱི་བུ་ཇི་སྙམ་དུ་སེམས། སེམས་ཅན་དམྱལ་བ་དང་དུད་འགྲོ་གང་བདམ། བཙུན་པ་ཤཱ་རིའི་བུ་སེམས་ཅན་དམྱལ་བ་པས་ནི་དུད་འགྲོ་བདམ་མོ། །དུད་འགྲོ་དང་ཡི་དགས་གང་བདམ། བཙུན་པ་ཤཱ་རིའི་བུ་དུད་འགྲོ་བས་ནི་ཡི་དགས་བདམ་མོ། །ཡི་དགས་དང་མི་གང་བདམ། བཙུན་པ་ཤཱ་རིའི་
བུ་ཡི་དགས་པས་ནི་མི་བདམ་མོ། །མི་དང་རྒྱལ་ཆེན་བཞིའི་རིས་ཀྱི་ལྷ་གང་བདམ། བཙུན་པ་ཤཱ་རིའི་བུ་མི་བས་རྒྱལ་ཆེན་བཞིའི་རིས་ཀྱི་ལྷ་བདམ་མོ། །རྒྱལ་ཆེན་བཞིའི་རིས་ཀྱི་ལྷ་དང་སུམ་ཅུ་རྩ་གསུམ་པའི་ལྷ་གང་བདམ། བཙུན་པ་ཤཱ་རིའི་བུ་རྒྱལ་ཆེན་བཞིའི་རིས་ཀྱི་ལྷ་བས་ནི་
སུམ་ཅུ་རྩ་གསུམ་པའི་ལྷ་བདམ་མོ། །སུམ་ཅུ་རྩ་གསུམ་པའི་ལྷ་དང་འཐབ་བྲལ་གྱི་ལྷ་གང་བདམ། བཙུན་པ་ཤཱ་རིའི་བུ་སུམ་ཅུ་རྩ་གསུམ་པའི་ལྷ་བས་ནི་འཐབ་བྲལ་གྱི་ལྷ་བདམ་མོ། །འཐབ་བྲལ་གྱི་ལྷ་དང་དགའ་ལྡན་པའི་ལྷ་གང་བདམ། བཙུན་པ་ཤཱ་རིའི་བུ་འཐབ་བྲལ་བའི་ལྷ་བས་
ནི་དགའ་ལྡན་པའི་ལྷ་བདམ་མོ། །དགའ་ལྡན་པའི་ལྷ་དང་འཕྲུལ་དགའི་ལྷ་གང་བདམ། བཙུན་པ་ཤཱ་རིའི་བུ་དགའ་ལྡན་པའི་ལྷ་བས་ནི་འཕྲུལ་དགའ་བའི་ལྷ་བདམ་མོ། །འཕྲུལ་དགའ་བའི་ལྷ་དང་གཞན་འཕྲུལ་དབང་བྱེད་པའི་ལྷ་གང་བདམ། བཙུན་པ་ཤཱ་རིའི་བུ་འཕྲུལ་དགའི་ལྷ་བས་
ནི་གཞན་འཕྲུལ་དབང་བྱེད་པའི་ལྷ་བདམ་མོ། །གཞན་འཕྲུལ་དབང་བྱེད་པའི་ལྷ་དང་ཚངས་པའི་འཇིག་རྟེན་ལ་གང་བདམ། བཙུན་པ་ཤཱ་རིའི་བུ་གཞན་འཕྲུལ་དབང་བྱེད་པའི་ལྷ་བས་ནི་ཚངས་པའི་འཇིག་རྟེན་བདམ་མོ། །འཛིན་བྱེད་ཀྱི་བུ་ཚངས་པའི་འཇིག་རྟེན་བདམ་ཞེས་ཟེར་རམ།
བཙུན་པ་ཤཱ་རིའི་བུ་ཚངས་པའི་འཇིག་རྟེན་བདམ་ཞེས་མཆིའོ། །དེ་ནས་བྲམ་ཟེ་འཛིན་བྱེད་ཀྱི་བུ་ཡུད་ཙམ་ཞིག་ཅང་མི་ཟེར་བར་འདུག་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་དེ་ལྟར་གཞན་འཕྲུལ་དབང་བྱེད་ཀྱི་ལྷ་བས་ཚངས་པའི་འཇིག་རྟེན་བདམ་

པར་གྱུར་ན་ཚངས་པའི་འཇིག་རྟེན་དུ་སྐྱེ་བར་འགྱུར་བའི་ལམ་མཆིས་སམ། འཛིན་བྱེད་ཀྱི་བུ་ལམ་ཡང་ཡོད། སྲང་ཡང་ཡོད་དེ། རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བསྒོམས་ན་འདོད་པའི་འདུན་པ་སྤངས་ནས་དེ་ལ་ཤས་ཆེར་གནས་པས་ཚངས་
པའི་འཇིག་རྟེན་དུ་སྐལ་བ་མཉམ་པར་སྐྱེ་བར་འགྱུར་བ་དེ་ངས་བཤད་ན་དེ་ཁྱོད་ཀྱིས་ཤེས་པར་ནུས་སམ། བཙུན་པ་ཤཱ་རིའི་བུ་ཁྱོད་ཀྱིས་ཤོད་ཅིག་དང་བདག་གིས་མཉན་ཏོ། །ཤཱ་རིའི་བུས། སྨྲས་པ། འཛིན་བྱེད་ཀྱི་བུ་འདི་ན་འཕགས་པ་ཉན་ཐོས་ནི་འདོད་པའི་ཡོན་ཏན་ལྔ་སེམས་ཀྱི་ཉེ་བའི་ཉོན་
མོངས་པ་སྐྱེད་པ། ཤེས་རབ་ཀྱི་གནས་ངན་ལེན་སྐྱེད་པ། ཕོངས་པར་འགྱུར་བའི་ཕྱོགས་མྱ་ངན་ལས་འདའ་བར་མི་འགྱུར་བ་སྤངས་ནས་བྱམས་པ་དང་ལྡན་པའི་སེམས་འཁོན་མེད་པ། དགྲ་ཟླ་མེད་པ། གནོད་པ་མེད་པ། ཡངས་པ་ཆེན་པོར་གྱུར་པ། གཉིས་སུ་མེད་པ། ཚད་མེད་པ། ཤིན་
ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་བཞིན་དུ་ཕྱོགས་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་ཀར་རྣམ་པ་ཐམས་ཅད་དུ་འཇིག་རྟེན་འདི་དག་ཐམས་ཅད་བྱམས་པ་དང་ལྡན་
པའི་སེམས་འཁོན་མེད་པ། དགྲ་ཟླ་མེད་པ། གནོད་པ་མེད་པ། ཡངས་པ། ཆེན་པོར་གྱུར་པ། གཉིས་སུ་མེད་པ། ཚད་མེད་པ་ཤིན་ཏུ་བསྒོམས་པས་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་བཞིན་དུ་སྙིང་རྗེ་དང་། དགའ་བ་དང་། བཏང་སྙོམས་ཆེན་པོར་
གྱུར་པའི་བར་དུ་རྒྱས་པར་བརྗོད་པར་བྱས་ཏེ། འཛིན་བྱེད་ཀྱི་བུ་འདི་ནི་ལམ་ཡིན། འདི་ནི་སྲང་ཡིན་ཏེ། རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བསྒོམས་ན་འདོད་པའི་འདུན་པ་སྤངས་ནས་དེ་ལ་ཤས་ཆེར་གནས་པས་ཚངས་པའི་འཇིག་རྟེན་དུ་སྐལ་བ་མཉམ་པར་སྐྱེ་བར་
འགྱུར་རོ་ཞེས་བྱས་སོ། །དེ་ལྟར་ཚེ་དང་ལྡན་པ་ཤཱ་རིའི་བུས་བྲམ་ཟེ་འཛིན་བྱེད་ཀྱི་བུ་ཚད་མེད་པ་བཞི་ལ་གནས་པར་བྱས་ནས་སོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུ་སོང་ནས་རིང་པོ་མ་ལོན་པར་བཅོམ་ལྡན་འདས་ཀྱིས་དགོངས་པ། དགེ་སློང་ཤཱ་རིའི་བུས་བྲམ་ཟེ་འཛིན་བྱེད་ཀྱི་བུ་

ལ་དེའི་སྟེང་དུ་བདེན་པ་རྣམས་མ་བཤད་པ་ནི་ཚར་ཕྱིན་པ་མ་ཡིན་ནོ་སྙམ་དུ་དགོངས་ནས་འོད་མའི་ཚལ་ནས་མི་སྣང་བར་གྱུར་ཏེ། བྲམ་ཟེ་འཛིན་བྱེད་ཀྱི་ཁྱིམ་དུ་བཞུགས་པར་གྱུར་ཏོ། །དེ་ནས་བྲམ་ཟེ་འཛིན་བྱེད་ཀྱི་བུས་བཅོམ་ལྡན་འདས་གདན་ལ་བཞུགས་པར་མཐོང་ངོ་། །མཐོང་
ནས་ཀྱང་བཅོམ་ལྡན་འདས་ལ་ཤིན་ཏུ་དགའ་བར་གྱུར་ཏོ། །དགའ་བར་གྱུར་ནས་ཀྱང་ཁྲི་ལས་ལངས་ཏེ་འདུག་གོ། །དེ་ནས་བཅོམ་ལྡན་འདས་ཀྱིས་དེ་ལ་དེ་དང་འཐུན་པའི་ཆོས་བསྟན་ཏེ། དེ་ནས་བྲམ་ཟེ་འཛིན་བྱེད་ཀྱི་བུས་སྟན་དེ་ཉིད་ལ་འདུག་བཞིན་དུ་ཕྱིར་མི་འོང་བའི་འབྲས་
བུ་མངོན་སུམ་དུ་བྱས་སོ། །དེ་ལྟར་བཅོམ་ལྡན་འདས་ཀྱིས་བྲམ་ཟེ་འཛིན་བྱེད་ཀྱི་བུ་ཕྱིར་མི་འོང་བའི་འབྲས་བུ་ལ་གནས་པར་མཛད་ནས་འཛིན་བྱེད་ཀྱི་བུའི་ཁྱིམ་ནས་མི་སྣང་བར་གྱུར་ཏེ། ཚེ་དང་ལྡན་པ་ཤཱ་རིའི་བུ་འོད་མའི་ཚལ་དུ་མ་ཕྱིན་པར་བཅོམ་ལྡན་འདས་ཆེས་སྔར་འོད་མའི་ཚལ་
དུ་གཤེགས་ནས་ཉིད་ཀྱི་གདན་ལ་བཞུགས་སོ། །དེ་ནས་བཅོམ་ལྡན་འདས་གཤེགས་ནས་རིང་པོ་མ་ལོན་པར་བྲམ་ཟེ་འཛིན་བྱེད་ཀྱི་བུ་ཤི་སྟེ་དུས་ལས་འདས་ནས་ཚངས་པའི་འཇིག་རྟེན་དུ་སྐྱེས་སོ། །དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས། དེར་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱོད་ད་གཟོད་ག་ལས་འོངས། ཤཱ་རིའི་བུས་གསོལ་པ། བཙུན་པ་བདག་གིས་བྲམ་ཟེ་འཛིན་བྱེད་ཀྱི་བུ་ཚངས་
པའི་གནས་བཞི་ལ་གནས་པར་བགྱིས་ན་ད་གཟོད་དེ་ནས་མཆིས་ལགས་སོ། །བཀའ་སྩལ་པ། ཤཱ་རིའི་བུ་ཅིའི་ཕྱིར་ཁྱོད་ཀྱིས་བྲམ་ཟེ་འཛིན་བྱེད་ཀྱི་བུ་ལ་དེའི་སྟེང་དུ་བདེན་པ་རྣམས་མ་བསྟན། ཇི་སྟེ་བསྟན་དུ་ཟིན་ན་ཆོས་འདུལ་བ་འདི་རྟོགས་པ་ཞིག །ཤཱ་རིའི་བུ་དེ་ལྟ་མོད་ཀྱི་ཁྱོད་
སོང་བའི་འོག་ཏུ་ང་འོད་མའི་ཚལ་འདི་ནས་མི་སྣང་བར་གྱུར་ཏེ། བྲམ་ཟེ་འཛིན་བྱེད་ཀྱི་བུའི་ཁྱིམ་དུ་འདུག་ནས་ངས་དེ་ལ་དེའི་སྟེང་དུ་བདེན་པ་རྣམས་བསྟན་ཏེ། དེས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ནས་དེ་ཤི་སྟེ་དུས་ལས་འདས་ནས་ཚངས་པའི་འཇིག་རྟེན་དུ་སྐྱེས་

སོ། །དེ་ལྟར་ངས་འཛིན་བྱེད་ཀྱི་བུ་བདེན་པ་རྣམས་ལ་གནས་པར་བྱས་ནས་ཁྱོད་འོད་མའི་ཚལ་དུ་མ་ཕྱིན་པར་ང་ཐོག་མར་ཕྱིན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་སངས་རྒྱས་བཅོམ་ལྡན་འདས་རྣམས་དེ་ལྟར་ངོ་མཚར་
ཀྱི་ཆོས་དང་ལྡན་པ་ནི་ངོ་མཚར་ལགས་སོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བྲམ་ཟེ་འཛིན་བྱེད་ཀྱི་བུས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ལ། བཅོམ་ལྡན་
འདས་ཀྱང་དེས་མཉེས་པར་བགྱིས་ཏེ་མི་མཉེས་པར་མ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་ལས་གྱུར་ཏོ། །བཙུན་པ་དེས་སྨོན་ལམ་གང་དུ་བཏབ་ལགས། བཀའ་སྩལ་པ། དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་
འཐབ་མེད་ཅེས་བྱ་བ་ན་རྒྱལ་པོ་ཀླུ་ལྷ་ཞེས་བྱ་བ་རྒྱལ་པོ་བྱེད་དེ། དེའི་རིང་ལ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱ་བོ་དང་མི་མང་པོས་གང་བ་དང་། རྩོད་པ་དང་འཐབ་པ་ཞི་བ་དང་འཁྲུག་པ་དང་ནང་འཁྲུག་དང་། ཆོམ་རྐུན་དང་། ནད་དང་མུ་གེ་
མེད་པ་དང་། འབྲས་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་དང་ལྡན་པར་འདུག་སྟེ། གནོད་པ་མེད་ཅིང་ཚེར་མ་དཀྲུགས་ལ་བུ་གཅིག་པ་སྡུག་པ་ལ་བྱ་བ་བཞིན་དུ་ཆོས་བཞིན་དུ་རྒྱལ་སྲིད་བྱེད་དོ། །དེའི་ཚེ་གྲོང་ཁྱེར་འཐབ་མེད་ན་རྒྱལ་པོ་ཀླུ་ལྷའི་མདུན་ན་འདོན་ཕྱུག་ཅིང་
ནོར་མང་ལ་ལོངས་སྤྱོད་ཆེ་བ། ནོར་དང་གསེར་དུ་མ་དང་ལྡན་པ། ཡོངས་སུ་འཛིན་པ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་འདུག་པ་དེས་རྒྱལ་པོ་ལ་བརྟེན་ཅིང་བྲམ་ཟེ་དང་། ཁྱིམ་བདག་རྣམས་ཀྱི་ནོར་ལེན་པར་བྱེད། བྲམ་
ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད་དོ། །དེ་ནས་དེའི་ཚེ་བྲམ་ཟེ་དབུལ་པོ་གཞན་ཞིག་བྲམ་ཟེ་མདུན་ན་འདོན་དེའི་ཐད་ནས་ཐག་མི་རིང་བ་ཞིག་ན་འདུག་པ་དེས། བྲམ་ཟེ་མདུན་ན་འདོན་དེས་རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་

ལེན་པར་བྱེད་བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད་དེ། གཞི་དེས་ན་ཁང་བཟངས་ཀྱི་སྟེང་ན་འདུག་ཅིང་སྐྱེས་པ་མེད་པར་བུད་མེད་འབའ་ཞིག་དང་སིལ་སྙན་རྣམས་ཀྱིས་རྩེ་ཞིང་དགའ་ལ་དགའ་མགུར་སྤྱོད་པར་རིག་གོ། །དེ་ནས་བྲམ་ཟེ་དབུལ་པོ་དེས་བསམས་པ། འདི་དཔལ་
འདི་ལྟ་བུ་དག་ཉམས་སུ་མྱོང་བ་ཅི་ཡང་རུང་བ་དེ་དག་ཐམས་ཅད་ནི་སྦྱིན་པ་དང་། དུལ་བ་དང་། ཡང་དག་པར་སྡོམ་པའི་ལས་རྣམ་པ་གསུམ་གྱི་འབྲས་བུ་ཡིན་གྱིས། མ་ལ་བདག་གིས་ཀྱང་དགེ་བའི་རྩ་བའི་ཆོས་ཅུང་ཟད་ཙམ་ཡང་དག་པར་བླངས་ཏེ་གནས་པར་བྱ་གོར་མ་ཆག །འོན་ཀྱང་དེས་
དབུལ་བ་ཆད་པར་འགྱུར་རོ་སྙམ་དུ་དེ་ལྟ་བུའི་སེམས་སྐྱེས་སོ། །སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་མི་འབྱུང་བའི་ཚེ་རང་སངས་རྒྱས་རྣམས་འཇིག་རྟེན་དུ་འབྱུང་སྟེ། རང་སངས་རྒྱས་ཞིག་དེའི་ཁྱིམ་སྒོར་འོངས་སོ། །དེ་ནས་བྲམ་ཟེ་དབུལ་པོ་དེས་ཐག་རིང་པོ་ཞིག་
ནས་རང་སངས་རྒྱས་དེ་མཐོང་ངོ་། །མཐོང་ནས་ཀྱང་དེ་ལ་ཤིན་ཏུ་དགའ་བ་སྐྱེས་སོ། །དགའ་བ་སྐྱེས་ནས་བྲམ་ཟེ་དེས་རང་སངས་རྒྱས་དེ་ལ་བསོད་སྙོམས་ཕུལ་ལོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་པར་བྱེད་ཀྱི་ངག་གིས་མ་ཡིན་ཏེ། དེས་བསོད་སྙོམས་དེ་བླངས་ནས་
དེ་ཁོ་ན་ནས་ནམ་མཁའ་ལ་སོང་ངོ་། །དེ་ནས་བྲམ་ཟེ་དེ་ལྷག་པར་ཡང་དགའ་བ་སྐྱེས་ནས་རྐང་པ་ལ་དམིགས་ཏེ་ཕྱག་འཚལ་ནས་སྨོན་ལམ་བཏབ་པ། ཀྱེ་མ་དགེ་བའི་རྩ་བ་འདིས་ན་བདག་གང་དང་གང་དུ་སྐྱེ་བ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་
བར་གྱུར་ཅིག །བདག་གིས་ཀྱང་རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པ་དང་། བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པ་དང་འདི་བས་ཀྱང་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་པར་གྱུར་ཅིག །མི་མཉེས་
པར་བྱེད་པར་མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་བྲམ་ཟེ་དབུལ་པོར་གྱུར་པ་གང་ཡིན་པ་དེ་ནི་འཛིན་བྱེད་ཀྱི་བུ་འདི་ཁོ་ན་ཡིན་ཏེ། དེས་རང་སངས་རྒྱས་དེ་ལ་བསོད་སྙོམས་ཕུལ་ནས་སྨོན་ལམ་བཏབ་པའི་ལས་དེའི་རྣམ་པར་སྨིན་པ་དེས་ན་གང་དང་

གང་དུ་སྐྱེས་པ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། དེས་དེར་བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད། རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པར་བྱེད་ལ། དགེ་སློང་དག་
ང་རང་སངས་རྒྱས་བྱེ་བ་ཕྲག་འབུམ་བས་ཀྱང་ཆེས་ལྷག་པར་ཁྱད་པར་དུ་འཕགས་པ་ང་ལྟ་བུ་འདིས་མཉེས་པར་བྱས་ཏེ་མི་མཉེས་པར་མ་བྱས་སོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་དགེ་བསྙེན་དུ་གྱུར་ཏེ། དེས་དེར་ཚེ་གཅིག་ཏུ་སྐྱབས་
སུ་འགྲོ་བ་དང་བསླབ་པའི་གཞི་རྣམས་བསྲུངས་ནས་འཆི་ཀར་སྨོན་ལམ་བཏབ་པ། ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་
མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དགེ་བསྙེན་དུ་གྱུར་པ་གང་ཡིན་པ་དེ་ནི་འཛིན་བྱེད་ཀྱི་བུ་འདི་ཁོ་ན་ཡིན་ཏེ། དེས་ཚེ་གཅིག་ཏུ་སྐྱབས་སུ་འགྲོ་བ་དང་བསླབ་པའི་གཞི་རྣམས་བསྲུངས་ནས་འཆི་ཀར་སྨོན་ལམ་བཏབ་སྟེ། ཡང་དག་པར་རྫོགས་པའི་
སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་གང་ཡིན་པ་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག་ཅེས་བྱས་པ་དེས་ན། དགེ་སློང་དག་ང་ཡང་དག་པར་རྫོགས་པའི་སངས་རྒྱས་
འོད་སྲུང་དང་ཤིན་ཏུ་མཉམ་པ་དང་། ཤུགས་མཉམ་པ་དང་། མཛད་པ་མཉམ་པ་དང་། ཐབས་མཉམ་པ་བརྙེས་པར་གྱུར་ནས་འདིས་ང་མཉེས་པར་བྱས་ཏེ་མི་མཉེས་པར་མ་བྱས་སོ།། །།རབ་བཟང་ཞེས་བྱ་བ་ནི་སུམ་ཅུ་རྩ་གསུམ་པའི་ལྷའི་ནང་ནས་ལྷའི་དབང་པོ་བརྒྱ་བྱིན་ལ་དྲི་ཟའི་
རྒྱལ་པོ་རབ་དགའ་ཞེས་བྱ་བ་ཞིག་ཡོད་དེ། དེས་ལྷའི་དབང་པོ་བརྒྱ་བྱིན་དགའ་བར་བྱ་བའི་ཕྱིར་དེ་དང་འབྲེལ་བའི་གླུ་དབྱངས་སྦྱོར་བ་ལ་ཞུགས་སོ། །དེ་ནས་གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ལས་རྣམ་པ་བཞིའི་གཟིགས་པས་འཇིག་རྟེན་ལ་གཟིགས་

ནས་ཡུམ་གྱི་ལྷུམས་སུ་གཤེགས་པ་དེའི་ཚེ་ལྷའི་དབང་པོ་བརྒྱ་བྱིན་གྱིས་དྲི་ཟའི་རྒྱལ་པོ་རབ་དགའ་ལ་སྨྲས་པ། རབ་དགའ་བྱང་ཆུབ་སེམས་དཔའ་ལྷའི་རིས་དགའ་ལྡན་ནས་ཤི་འཕོས་ཏེ། ཡུམ་གྱི་ལྷུམས་སུ་ཉིང་མཚམས་སྦྱར་ནས་གང་གི་ཚེ་དེ་བལྟམས་ཏེ། ཆེར་སྐྱེས་པ་དེའི་ཚེ་བདུད་རྩི་
བརྙེས་ནས་དེས་འགྲོ་བ་རྣམས་ཚིམ་པར་མཛད་པར་འགྱུར་གྱིས། ཁྱོད་ཀྱིས་ཀྱང་འཛམ་བུའི་གླིང་དུ་ཉིང་མཚམས་སྦྱོར་ཅིག་དང་། ཁྱོད་ལ་ཡང་དེས་བདུད་རྩིའི་སྐལ་བ་སྦྱིན་པར་འགྱུར་རོ། །རབ་དགས་སྨྲས་པ། ཀཽ་ཤི་ཀ་བདག་གིས་གླུ་དབྱངས་སྦྱར་བ་བརྩམས་ལགས་ཏེ། རེ་ཞིག་དེ་
ལགས་པར་བགྱིས་ན་སླད་ཀྱིས་སླེབས་སོ་ཞེས་ཟེར་རོ། །དེ་ནས་དེའི་ཚེ་གྲོང་ཁྱེར་ཀུ་ཤི་ན་ཀུན་ཏུ་རྒྱུ་རབ་བཟང་ཞེས་བྱ་བ་རྫུ་འཕྲུལ་ཅན་གྲོང་ཁྱེར་ཀུ་ཤི་ན་གནས་པའི་གྱད་ཀྱི་བུ་ཐམས་ཅད་ཀྱིས་བཀུར་སྟི་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་དགྲ་བཅོམ་པར་བཀུར་བ་
ཞིག་ཡོད་དེ། དེ་མཚོ་མ་དྲོས་པའི་འགྲམ་ན་ཉིན་པར་གནས་སོ། །དེར་ཡང་དེ་ལ་ལྷ་དང་ཀླུ་རྣམས་ཀྱིས་བཀུར་སྟི་བྱེད། བླ་མར་བྱེད། རི་མོར་བྱེད་མཆོད་པར་བྱེད་དོ། །དེ་རེས་འགའ་ནི་མཚོ་མ་དྲོས་པའི་འགྲམ་དེ་ཉིད་ན་ཉིན་པར་གནས་ཤིང་འདུག་གོ། །རེས་འགའ་ནི་མཚོ་མ་དྲོས་
པ་དེ་ཉིད་ནས་ཐག་མི་རིང་བ་ཞིག་ན་ཤིང་ཨུ་དུམ་བཱ་རའི་ཚལ་ཞིག་ཡོད་པ་དེར་སོང་ནས་འདུག་གོ། །དེ་ནས་གང་གི་ཚེ་བྱང་ཆུབ་སེམས་དཔའ་བལྟམ་པ་དེའི་ཚེ་ལྷའི་དབང་པོ་བརྒྱ་བྱིན་གྱིས་དྲི་ཟའི་རྒྱལ་པོ་རབ་དགའ་ལ་སྨྲས་པ། རབ་དགའ་བྱང་ཆུབ་སེམས་དཔའ་བལྟམ་གྱིས་ཚུར་དང་
བདག་ཅག་གིས་དེའི་མཆོད་པའི་ལས་ལ་བརྩོན་པར་བྱའོ། །རབ་དགས་སྨྲས་པ། ཀཽ་ཤི་ཀ་བདག་གིས་གླུ་དབྱངས་སྦྱར་བ་བརྩམས་ལགས་ཏེ། དེ་རེ་ཞིག་དེ་ལགས་པར་བགྱིས་ནས་སླད་ཀྱིས་སླེབས་སོ་ཞེས་ཟེར་རོ། །དེ་ནས་བྱང་ཆུབ་སེམས་དཔའི་ཆེ་བ་ཉིད་ཀྱིས་ཨུ་དུམ་བཱ་རའི་
ཚལ་དེར་ཨུ་དུམ་བཱ་རའི་མེ་ཏོག་རྣམས་ཁ་འབུས་པར་གྱུར་ཏོ། །དེ་ནས་ཀུན་ཏུ་རྒྱུ་རབ་བཟང་གིས་ཤིང་ཨུ་དུམ་བཱ་རའི་མེ་ཏོག་ཁ་འབུས་པ་མཐོང་ནས། མཐོང་མ་ཐག་ཏུ་ཡིད་དགའ་བར་གྱུར་ཏེ་དེས་བསམས་པ། ག་ནའི་ཀུན་ཏུ་རྒྱུ་རྒས་ཤིང་འཁོགས་ལ་གཏུགས་པ། སྡེ་ཚན་གྱི་

སློབ་དཔོན་ཆེན་པོ་དག་ལས་བདག་གིས་ཐོས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། འཁོར་ལོས་སྒྱུར་བའི་རྒྱལ་པོ་དང་། ཨུ་དུམ་བཱ་རའི་མེ་ཏོག་ནི་བརྒྱ་ལམ་ན་འབྱུང་བར་ཟད་དོ་ཞེས་ཟེར་བ་ལས་ན། ཨུ་དུམ་བཱ་
རའི་ཚལ་འདིར་ཡང་བདག་གི་བསོད་ནམས་ཀྱིས་ཨུ་དུམ་བཱ་ར་རྣམས་ཀྱི་མེ་ཏོག་ཁ་འབུས་པར་གྱུར་ཏོ་སྙམ་མོ། །དེར་གང་གི་ཚེ་བྱང་ཆུབ་སེམས་དཔའ་རྒན་པོ་དང་། ནད་པ་དང་། ཤི་བ་གཟིགས་ནས་ནགས་ཁྲོད་དུ་གནས་བཅས་པ་དེའི་ཚེ་ལྷའི་དབང་པོ་བརྒྱ་བྱིན་གྱིས་དྲི་ཟའི་རྒྱལ་པོ་རབ་
དགའ་ལ་སྨྲས་པ། རབ་དགའ་བྱང་ཆུབ་སེམས་དཔའ་དེ་ནི་རྒན་པོ་དང་། ནད་པ་དང་། ཤི་བ་གཟིགས་ནས་ནགས་ཁྲོད་དུ་གནས་བཅས་ཀྱིས། བདག་ཅག་དོང་ལ་དེའི་མཆོད་པའི་ལས་ལ་བརྩོན་པར་བྱའོ། །རབ་དགས་སྨྲས་པ། ཀཽ་ཤི་ཀ་བདག་གིས་གླུ་དབྱངས་སྦྱར་བ་བརྩམས་ལགས་
ཏེ། དེ་རེ་ཞིག་ལགས་པར་བགྱིས་ནས་སླད་ཀྱིས་སླེབས་སོ་ཞེས་ཟེར་རོ། །དེར་གང་གི་ཚེ་བྱང་ཆུབ་སེམས་དཔས་བླ་ན་མེད་པའི་ཡེ་ཤེས་བརྙེས་ནས་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་ཆོས་བཞིན་དུ་བསྐོར་བ་དེའི་ཚེ་བརྒྱ་བྱིན་གྱིས་ཡང་དྲི་ཟའི་རྒྱལ་པོ་རབ་དགའ་
ལ་སྨྲས་པ། རབ་དགའ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་ནས་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་བསྐོར་བར་བཞེད་ཀྱིས་ཚུར་བདག་ཅག་སོང་ལ་ཆོས་མཉན་པར་བྱའོ། །རབ་དགས་སྨྲས་པ། ཀཽ་ཤི་ཀ་བདག་གིས་གླུ་དབྱངས་སྔར་བརྩམས་
ལགས་ཏེ། རེ་ཞིག་དེ་ལགས་པར་བགྱིས་ནས་སླད་ཀྱིས་སླེབས་སོ་ཞེས་ཟེར་རོ། །དེར་གང་གི་ཚེ་བཅོམ་ལྡན་འདས་ཀྱིས་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་བསྐོར་བ་དེའི་ཚེ་ཨུ་དུམ་བཱ་རའི་ཚལ་དེ་དག་རྣམ་པ་ཐམས་ཅད་དུ་མེ་ཏོག་རྒྱས་པར་གྱུར་ཏེ། དེས་ན་དཔག་
ཚད་མང་པོར་དྲི་བསུང་གིས་རྒྱས་པར་གྱུར་ཏེ། རྒྱུ་དེས་ན་ཀུན་དུ་རྒྱུ་རབ་བཟང་ལྷག་པར་ཡང་ཡིད་དགའ་བར་གྱུར་ནས་འདི་དག་ནི་བདག་གི་བསོད་ནམས་ལས་གྱུར་པ་ཡིན་ནོ་སྙམ་མོ། །དེར་གང་གི་ཚེ་བཅོམ་ལྡན་འདས་ཀྱིས་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་

ཆོས་བཞིན་དུ་བསྐོར་བ་དེའི་ཚེ་ལྔ་སྡེ་དང་། ཉེ་བའི་ལྔ་སྡེ་རྣམས་དང་། གྲོང་གི་བྱིས་པ་མགོ་མཐོ་མཐོ་ལྔ་བཅུ་བཏུལ་ཏོ། །ཤིང་བལ་གྱི་ཤིང་གི་ནགས་ཁྲོད་དུ་གཤེགས་ནས་བཟང་སྡེ་དྲུག་ཅུའི་ཕ་ཚན་བདེན་པ་རྣམས་ལ་བཀོད་དོ། །སྡེ་པའི་གྲོང་དུ་གཤེགས་ནས་གྲོང་ན་གནས་པའི་བུ་
མོ་དགའ་མ་དང་། དགའ་སྟོབས་མ་གཉིས་བདེན་པ་རྣམས་ལ་བཀོད་དོ། །ལྟེང་རྒྱས་སུ་གཤེགས་ནས་རལ་པ་ཅན་སྟོང་རབ་ཏུ་ཕྱུང་སྟེ་བསྙེན་པར་རྫོགས་པར་མཛད་དོ། །ག་ཡཱའི་རྩེ་མོའི་མཆོད་རྟེན་གྱི་དྲུང་དུ་གཤེགས་ནས་དགེ་སློང་སྟོང་པོ་དེ་དག་ཆོ་འཕྲུལ་རྣམ་པ་གསུམ་གྱིས་ཡིད་ཆེས་
པར་མཛད་དེ་གཡུང་དྲུང་གི་མཐར་ཐུག་པ། བླ་ན་མེད་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་དོ། །སྨྱིག་མའི་ནགས་ཁྲོད་དུ་གཤེགས་ནས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་། ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་འབུམ་ཕྲག་
དུ་མ་དང་ཐབས་ཅིག་ཏུ་བདེན་པ་རྣམས་ལ་གནས་པར་མཛད་དོ། །རྒྱལ་པོའི་ཁབ་ཏུ་གཤེགས་ནས་འོད་མའི་ཚལ་བཞེས་ཏེ། ཤཱ་རིའི་བུ་དང་། མཽད་གལ་གྱི་བུ་གཡོག་འཁོར་ཉིས་བརྒྱ་ལྔ་བཅུ་དང་ལྡན་པ་གཉིས་རབ་ཏུ་ཕྱུང་ནས་བསྙེན་པར་རྫོགས་པར་མཛད་དོ། །མཉན་དུ་ཡོད་པར་གཤེགས་
ནས་རྒྱལ་བུ་རྒྱལ་བྱེད་ཀྱི་ཚལ་བཞེས་ཏེ་ཆོ་འཕྲུལ་ཆེན་པོ་བསྟན་ནས་དགེ་ཚུལ་སྐུལ་བྱེད་རབ་ཏུ་ཕྱུང་སྟེ་དེས་ཀྱང་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་ཏེ། དེ་རྫུ་འཕྲུལ་གྱིས་འགྲོ་ཞིང་གནས་གཞན་དང་གཞན་དག་ནས་དུས་མ་ཡིན་པའི་མེ་ཏོག་དང་འབྲས་
བུ་རྣམས་བླངས་ཤིང་མཁན་པོ་དང་དགེ་འདུན་ལ་འབུལ་བར་བྱེད་དོ། །དེ་ནས་ཕྱི་ཞིག་ན་དེ་མཚོ་མ་དྲོས་པའི་འགྲམ་དུ་སོང་ནས་དེ་དེར་དགའ་བར་གྱུར་ཏེ། དེས་དེར་ཉིན་བར་གྱི་གནས་བཏབ་པ་ལས་ཀུན་ཏུ་རྒྱུ་རབ་བཟང་གིས་སྨྲས་པ། གྲོགས་པོ་འདི་ནི་ངའི་ཉིན་བར་གྱི་གནས་ཡིན་གྱིས་
འདིར་མ་འདུག་ཤིག །དགེ་ཚུལ་སྐུལ་བྱེད་ཀྱིས་སྨྲས་པ། འདི་ནི་ཐམས་ཅད་ཀྱི་ཐུན་མོང་ཡིན་ནོ། །ཀུན་ཏུ་རྒྱུ་རབ་བཟང་གིས་སྨྲས་པ། ང་དང་རྫུ་འཕྲུལ་གྱིས་འགྲན་པར་གྱིས་ཤིག་དང་། དེ་ནས་འདི་འོ་བུ་ཅག་གཉིས་གང་རྒྱལ་བ་དེའི་ཉིན་བར་གྱི་གནས་སུ་བྱའོ་ཞེས་བྱས་ནས་དེ་གཉིས་རྫུ་འཕྲུལ་

སྟོན་པ་ལ་ཞུགས་པ་ལས་དེར་དགེ་ཚུལ་སྐུལ་བྱེད་ཀྱིས་ཀུན་ཏུ་རྒྱུ་རབ་བཟང་ཕམ་པར་བྱས་ནས་དེ་ཡུལ་ཡུལ་པོར་གྱུར་ཏེ། ཨུ་དུམ་བཱ་རའི་ཚལ་དེ་ཉིད་དུ་སོང་ནས་འདུག་གོ། །དེར་གང་གི་ཚེ་བཅོམ་ལྡན་འདས་ཀྱིས་སངས་རྒྱས་ཀྱི་ཕྲིན་ལས་ཐམས་ཅད་མཛད་ནས་ཀུ་ཤའི་གྲོང་
ཁྱེར་དུ་གཤེགས་ཏེ། གཟིམས་མལ་གྱི་ཐ་མར་ཞུགས་ནས་བཞུགས་སོ། །དེ་ནས་དེར་བཅོམ་ལྡན་འདས་ཀྱིས་དགོངས་པ། ད་ནི་དེ་བཞིན་གཤེགས་པས་གདུལ་བར་བྱ་བ་ཀུན་ཏུ་རྒྱུ་རབ་བཟང་དང་། དྲི་ཟའི་རྒྱལ་པོ་རབ་དགའ་གཉིས་ལུས་སོ་སྙམ་དུ་དགོངས་སོ། །དེ་ནས་ཡང་
བཅོམ་ལྡན་འདས་ཀྱིས་དགོངས་པ། ཀུན་ཏུ་རྒྱུ་རབ་བཟང་ངས་གདུལ་བར་སླ་ན་དྲི་ཟའི་རྒྱལ་པོ་རབ་དགའ་ནི་རྒྱགས་ཤིང་བག་མེད་པར་གནས་ཏེ་དེ་ངའི་ཐད་དུ་མི་འོང་གིས། ང་ཉིད་དེའི་ཐད་དུ་འགྲོའོ་སྙམ་དུ་དགོངས་ཏེ། བཅོམ་ལྡན་འདས་ཀྱིས་དེར་སྤྲུལ་པ་ཞིག་བཞག་ནས་ཤིང་ས་ལ་ཟུང་གི་
ཚལ་ནས་མི་སྣང་བར་གྱུར་ཏེ། སུམ་ཅུ་རྩ་གསུམ་པའི་ལྷའི་ནང་དུ་གཤེགས་ནས་དྲི་ཟའི་རྒྱལ་པོ་རབ་དགའི་ཕོ་བྲང་གི་སྒོར་བྱོན་ཏེ། དེར་བཅོམ་ལྡན་འདས་ཀྱིས་དགོངས་པ། འདིའི་ང་རྒྱལ་བཅག་ནས་གདོད་དེའི་འོག་ཏུ་བདེན་པ་རྣམས་ཀྱི་སྣོད་དུ་རུང་ངོ་སྙམ་དུ་དགོངས་ཏེ། བཅོམ་ལྡན་
འདས་ཀྱིས་དེ་གདུལ་བའི་ཕྱིར་དྲི་ཟའི་རྒྱལ་པོ་ཞིག་ཏུ་སྤྲུལ་ནས་བཻ་དཱུརྱའི་པི་བང་རྒྱུད་སྟོང་པ་ཞིག་བསྣམས་ཏེ། དྲི་ཟའི་རྒྱལ་པོ་རབ་དགའི་སྒོ་དྲུང་དུ་གཞེས་ནས་ཕྲིན་གྱིས་བཟླུགས་ཏེ་དྲི་ཟའི་རྒྱལ་པོ་ཞིག་སྒོ་ན་སྡོད་དེ། དེ་ཁྱོད་དང་ལྷན་ཅིག་ཏུ་པི་བང་ལེན་པར་འདོད་དོ་ཞེས་བྱས་སོ། །དེ་ནས་དེ་
ཐོས་མ་ཐག་ཏུ་དྲི་ཟའི་རྒྱལ་པོ་རབ་དགས་བསམས་པ། མ་ལ་དྲི་ཟའི་རྒྱལ་པོ་གཞན་འགའ་ཞིག་མ་བྱུང་གྲང་། དེ་ནི་བདག་གིས་ཚར་གཅད་པར་བྱའོ་སྙམ་དུ་བསམས་ནས་སྨྲས་པ། ནང་དུ་བོས་ཤིག་དང་བདག་གིས་ཅི་ནུས་པ་བསྟན་ཏོ་ཞེས་བྱས་ཏེ་དེས་དེ་ནང་དུ་བོས་ནས་པི་བང་ལེན་པ་ལ་
ཞུགས་སོ། །དེ་ནས་བཅོམ་ལྡན་འདས་ཀྱིས་དེ་གདུལ་བའི་ཕྱིར་པི་བང་གི་རྒྱུད་གཅིག་བཅད་པ་དང་། དྲི་ཟའི་རྒྱལ་པོ་རབ་དགས་ཀྱང་དེ་མཐོང་ནས་ཀྱང་རྒྱུད་གཅིག་བཅད་དོ། །དེ་ནས་བཅོམ་ལྡན་འདས་ཀྱིས་མཐར་གྱིས་རྒྱུད་ཐམས་ཅད་བཅད་དེ་རྒྱུད་གཅིག་པུ་ལུས་པར་གྱུར་ནས་དེ་ལས་

ཀྱང་སྒྲ་ཐམས་ཅད་འབྱུང་བར་མཛད་དོ། །དེ་ནས་རབ་དགས་ཀྱང་རྒྱུད་ཐམས་ཅད་བཅད་དེ་དེས་ཀྱང་རྒྱུད་གཅིག་པུ་དེ་ལས་སྒྲ་ཐམས་ཅད་འབྱུང་བར་བྱས་སོ། །དེ་ནས་བཅོམ་ལྡན་འདས་ཀྱིས་རྒྱུད་གཅིག་པུ་དེ་ཡང་བཅད་དེ་སྒྲ་ཐམས་ཅད་ཀྱང་འབྱུང་བར་མཛད་དོ། །དེ་ནས་དྲི་ཟའི་རྒྱལ་པོ་རབ་
དགས་བསམས་པ། བདག་གིས་ནི་དེ་ལས་ལྷག་པར་ཆུང་ཟད་ཀྱང་བསྟན་པར་མི་ནུས་པས་ན། འདི་ནི་བདག་པས་ཆེས་ཁྱད་པར་དུ་འཕགས་པ་ཞིག་གོ་སྙམ་མོ། །དེ་ནས་དེའི་སྐབས་སུ་བཅོམ་ལྡན་འདས་ཀྱིས་དགོངས་པ། འདི་ང་རྒྱལ་ང་དང་མཚུངས་པ་སུ་ཡང་མེད་དོ་སྙམ་དུ་དེ་
ལྟར་འཛིན་པ་དེ་མེད་པར་གྱུར་ཏོ་སྙམ་དུ་ཐུགས་སུ་ཆུད་དེ། བཅོམ་ལྡན་འདས་ཀྱིས་དེ་ང་རྒྱལ་བཅག་ནས་རང་བཞིན་གྱི་སྐུར་བསྒྱུར་ཏོ། །དེ་ནས་དེས་བཅོམ་ལྡན་འདས་མཐོང་ནས་དེ་ཤིན་ཏུ་དགའ་བ་སྐྱེས་ཏེ་དགའ་བར་གྱུར་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ།
ཆོས་མཉན་པའི་ཕྱིར་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས་དེ་དང་འཐུན་པའི་ཆོས་བསྟན་ཏེ། དེས་ན་དྲི་ཟའི་རྒྱལ་པོ་རབ་དགའ་སྟན་དེ་ཉིད་ལ་འདུག་བཞིན་དུ་འཇིག་ཚོགས་
ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་ནས་བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་ནང་ནས་མི་སྣང་བར་གྱུར་ཏོ། །དེའི་ཚེ་ཨུ་དུམ་བཱ་རའི་ཚལ་དེའི་མེ་ཏོག་རྣམས་རྙིས་པར་གྱུར་ཏེ། ཀུན་ཏུ་རྒྱུ་རབ་བཟང་གིས་
ཨུ་དུམ་བཱ་རའི་ཚལ་དེའི་མེ་ཏོག་རྣམས་རྙིས་པར་གྱུར་པ་མཐོང་ངོ་། །མཐོང་ནས་ཀྱང་དེ་མྱ་ངན་ཆེན་པོ་སྐྱེས་ཏེ་དེས་བསམས་པ། བདག་གི་བསོད་ནམས་ཀྱིས་ཨུ་དུམ་བཱ་རའི་ཚལ་འདི་རྣམ་པ་ཐམས་ཅད་དུ་མེ་ཏོག་རྒྱས་པར་གྱུར་པ་ལས། ད་ནི་བདག་རྒས་ཤིང་འཁོགས་ལ་གཏུགས་
པར་གྱུར་ཏེ། ན་ཚོད་ལོ་བརྒྱ་ཉི་ཤུ་ལོན་ན་ཨུ་དུམ་བཱ་རའི་ཚལ་གྱི་མེ་ཏོག་འདི་དག་རྙིས་པར་གྱུར་པ་ལས་ན། བདག་རིང་པོ་མི་ཐོགས་པར་འཆི་བར་འགྱུར་རོ་སྙམ་ནས་རྒྱུ་དེས་ན་ཤིན་ཏུ་མྱ་ངན་བྱེད་ཅིང་སྡུག་བསྔལ་ལ་སྨྲེ་སྔགས་འདོན་པར་བྱེད་དོ། །དེ་ནས་དེ་ལ་དགའ་བའི་ལྷ་ཞིག་གིས་རབ་

བཟང་ལ་སྨྲས་པ། ཨུ་དུམ་བཱ་རའི་ཚལ་འདི་ནི་ཁྱོད་ཀྱི་བསོད་ནམས་ཀྱིས་རྣམ་པ་ཐམས་ཅད་དུ་མེ་ཏོག་རྒྱས་པར་གྱུར་པ་མ་ཡིན་གྱི། ས་ཕྱོགས་འདི་ནི་འཁོར་ལོས་སྒྱུར་བའི་རྒྱལ་པོའི་སྐྱེད་མོས་ཚལ་གྱིས་ཡིན་ཏེ། གང་གི་ཚེ་འཁོར་ལོས་སྒྱུར་བའི་རྒྱལ་པོ་འབྱུང་ངམ། བྱང་ཆུབ་སེམས་དཔའ་འབྱུང་བར་འགྱུར་
བ་དེའི་ཚེ་ནི་ཨུ་དུམ་བཱ་རའི་ཚལ་འདིར་མེ་ཏོག་རྣམས་ཁ་འབུ་བར་འགྱུར་རོ། །གང་གི་ཚེ་འཁོར་ལོས་སྒྱུར་བའི་རྒྱལ་པོ་རྒྱལ་སར་ཞུགས་པའམ། བྱང་ཆུབ་སེམས་དཔས་བླ་ན་མེད་པའི་ཡེ་ཤེས་བརྙེས་པར་གྱུར་པ་དེའི་ཚེ་ནི་ཨུ་དུམ་བཱ་རའི་ཚལ་འདི་རྣམ་པ་ཐམས་ཅད་དུ་མེ་ཏོག་རྒྱས་པར་འགྱུར་རོ། །གང་གི་ཚེ་འཁོར་
ལོས་སྒྱུར་བའི་རྒྱལ་པོ་གྲོངས་སུ་ཉེ་བའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདར་ཉེ་བར་གྱུར་པ་དེའི་ཚེ་ནི་ཨུ་དུམ་བཱ་རའི་ཚལ་གྱི་མེ་ཏོག་འདི་རྣམས་རྙིས་པར་འགྱུར་རོ། །གང་གི་ཚེ་འཁོར་ལོས་སྒྱུར་བའི་རྒྱལ་པོ་གྲོངས་སམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གྱུར་པ་དེའི་ཚེ་ནི་
ཨུ་དུམ་བཱ་རའི་ཚལ་འདིའི་མེ་ཏོག་རྣམས་སྐམ་པར་འགྱུར་ཏེ། ད་ལྟར་ཡང་དེ་བཞིན་གཤེགས་པ་འཇིག་རྟེན་དུ་བྱུང་ནས་དེ་གཟིམས་མལ་གྱི་ཐ་མར་ཞུགས་ཏེ། དོ་ནུབ་ནམ་ཕྱེད་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པར་འགྱུར་ཏེ། དེའི་དབང་གིས་ཨུ་དུམ་བཱ་རའི་ཚལ་དེ་རྙིས་
པར་གྱུར་གྱིས་ཁྱོད་དེའི་རྒྱུས་ཧ་ཅང་མྱ་ངན་མ་བྱེད་ཅིག །སྡུག་བསྔལ་བར་མ་བྱེད་ཅིག །སྨྲེ་སྔགས་མ་འདོན་ཅིག་ཅེས་བྱས་སོ། །དེ་ནས་ཀུན་ཏུ་རྒྱུ་རབ་བཟང་འདི་སྙམ་དུ་སེམས་ཏེ། བདག་ཆོས་རྣམས་ལ་ཡང་ཐེ་ཙོམ་ཡོད། བདག་ལ་རེ་བ་ཡང་ཡོད་ལ། བཅོམ་ལྡན་འདས་གཽ་ཏ་མ་དེས་ཀྱང་བདག་གི་ཐེ་ཙོམ་དེ་སེལ་བར་ནུས་ཀྱིས།
མ་ལ་བདག་བཅོམ་ལྡན་འདས་གཽ་ཏ་མ་དེ་ག་ལ་བ་དེར་སོང་ལ་དེར་ཕྱིན་ནས་ཞུ་བ་ལུང་བསྟན་པར་གནང་ན་ཕྱོགས་འགའ་ཞིག་ཞུའོ་སྙམ་ནས་ཨུ་དུམ་བཱ་རའི་ཚལ་ནས་མི་སྣང་བར་གྱུར་ཏེ་གྲོང་ཁྱེར་ཀུ་ཤི་ན་གྱད་ཀྱི་ཉེ་འཁོར་ཤིང་ས་ལ་ཟུང་གི་ཚལ་དུ་ཕྱིན་པར་གྱུར་ཏོ། །དེའི་ཚེ་ཚེ་དང་ལྡན་པ་ཀུན་དགའ་བོ་ནི་ཀུན་དགའ་ར་
བའི་སྒོའི་ཐད་ཀྱི་འཆག་ས་ན་འཆག་ཅིང་འདུག་གོ། །དེ་ནས་ཀུན་ཏུ་རྒྱུ་རབ་བཟང་གིས་ཚེ་དང་ལྡན་པ་ཀུན་དགའ་བོ་ཐག་རིང་པོ་ཞིག་ནས་མཐོང་ངོ་། །མཐོང་ནས་ཀྱང་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བདག་གིས་

ཐོས་ན་བཅོམ་ལྡན་འདས་གཽ་ཏ་མ་དོ་ནུབ་ནམ་ཕྱེད་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་གྲག་ན། བདག་ཆོས་རྣམས་ལ་ཡང་ཐེ་ཙོམ་མཆིས། བདག་ལ་རེ་བ་ཡང་མཆིས་ལ། བཅོམ་ལྡན་འདས་གཽ་ཏ་མ་དེས་ཀྱང་
བདག་གི་ཐེ་ཙོམ་དེ་སེལ་བར་ནུས་ན། གལ་ཏེ་བཙུན་པ་ཀུན་དགའ་བོ་འོ་མི་བརྒྱལ་ན་བཅོམ་ལྡན་འདས་གཽ་ཏ་མ་དེ་ག་ལ་བཞུགས་པ་དེར་བཞུད་ལ། དེར་ཕྱིན་ནས་གལ་ཏེ་ཞུ་བའི་བཀའ་ལན་སྩལ་བར་གནང་ན་ཕྱོགས་འགའ་ཞིག་ཞུའོ་ཞེས་བྱས་སོ། །ཚེ་དང་ལྡན་པ་ཀུན་དགའ་བོ་ཡང་
ལྟས་ལ་མཁས་ཏེ། དེས་བསམས་ན་བཅོམ་ལྡན་འདས་ཀྱི་སྤྲུལ་པ་ཞིག་བཞག་སྟེ་འདུལ་བའི་དབང་གིས་ག་ཞིག་ཏུ་གཤེགས་པར་རིག་ནས་ཀུན་ཏུ་རྒྱུ་རབ་བཟང་ལ་སྨྲས་པ། རབ་བཟང་ཐོང་། བཅོམ་ལྡན་འདས་ནི་སྐུ་མཉེལ། བདེ་བར་གཤེགས་པ་ནི་སྐུ་མཉེལ་གྱིས། དེ་བཞིན་གཤེགས་
པ་ལ་གནོད་པ་མ་བྱེད་ཅིག་ཅེས་བྱས་སོ། །དེ་ནས་ཀུན་དུ་རྒྱུ་རབ་བཟང་གིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་སྔོན་གྱི་ཀུན་དུ་རྒྱུ་རྒས་ཤིང་འཁོགས་ལ་གཏུགས་པ་རྣམས་ལས་བདག་གིས་ཐོས་ན། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ནི་བརྒྱ་ལམ་བརྒྱ་ལམ་ན་འཇིག་རྟེན་དུ་འབྱུང་བར་ཟད་དེ། དཔེར་ན་ཨུ་དུམ་བཱ་རའི་མེ་ཏོག་བཞིན་ནོ་ཞེས་མཆི་ལ། བཅོམ་ལྡན་འདས་གཽ་ཏ་མ་དེ་ཡང་དོ་ནུབ་ནམ་ཕྱེད་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་
ལས་འདའ་བར་འགྱུར་ན། བདག་ཆོས་རྣམས་ལ་ཡང་ཐེ་ཙོམ་མཆིས། བདག་ལ་རེ་བ་ཡང་མཆིས་ལ། བཅོམ་ལྡན་འདས་གཽ་ཏ་མ་དེས་ཀྱང་བདག་གི་ཐེ་ཙོམ་སེལ་བར་ནུས་ན། གལ་ཏེ་བཙུན་པ་ཀུན་དགའ་བོ་འོ་མི་བརྒྱལ་ན། བཅོམ་ལྡན་འདས་གཽ་ཏ་མ་དེ་ག་ལ་བཞུགས་པ་དེར་བཞུད་
ལ། དེར་ཕྱིན་ནས་གལ་ཏེ་ཞུ་བའི་བཀའ་ལན་སྩལ་བར་གནང་ན་ཕྱོགས་འགའ་ཞིག་ཞུའོ་ཞེས་བྱས་སོ། །དེ་ནས་ལན་གསུམ་གྱི་བར་དུ་ཚེ་དང་ལྡན་པ་ཀུན་དགའ་བོས་ཀུན་ཏུ་རྒྱུ་རབ་བཟང་ལ་སྨྲས་པ། རབ་བཟང་ཐོང་། བཅོམ་ལྡན་འདས་ནི་སྐུ་མཉེལ། བདེ་བར་གཤེགས་པ་ནི་སྐུ་མཉེལ་གྱིས།

དེ་བཞིན་གཤེགས་པ་ལ་གནོད་པ་མ་བྱེད་ཅིག་ཅེས་བྱས་སོ། །དེ་ནས་དེའི་སྐབས་སུ་བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་ནང་ནས་མི་སྣང་བར་གྱུར་ཏེ། གཟིམས་མལ་དུ་ཞུགས་ནས། བཅོམ་ལྡན་འདས་ཀྱིས་ལྷའི་སྙན་རྣམ་པར་དག་པ་མི་ལས་འདས་པ་མངའ་
བས་ཚེ་དང་ལྡན་པ་ཀུན་དགའ་བོ་ཀུན་ཏུ་རྒྱུ་རབ་བཟང་དང་དེ་ལྟ་བུའི་ཚིག་བརྗོད་པ་གསན་ཏོ། །གསན་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང་། ཀུན་ཏུ་རྒྱུ་རབ་བཟང་མ་དགག་པར་ནང་དུ་ཐོང་ལ་ཅི་དང་ཅི་འདོད་པ་འདྲིར་ཆུག་ཤིག །དེ་ཅིའི་ཕྱིར་
ཞེ་ན། འདི་ནི་ང་གཞན་མུ་སྟེགས་ཅན་ཀུན་ཏུ་རྒྱུ་དག་དང་བར་སྐབས་ཀྱི་གཏམ་བརྗོད་པའི་ཐ་མ་ཡིན་ནོ། །འདི་ལྟ་སྟེ། ཀུན་ཏུ་རྒྱུ་རབ་བཟང་འདི་ནི་ངས་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་བ་རྣམས་ཀྱི་ཐ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་སྐབས་ཕྱེ་ནས་ཀུན་ཏུ་རྒྱུ་
རབ་བཟང་དགའ་ཞིང་མགུ་ལ་ཡི་རངས་ཤིང་མགུ་ལ་རབ་ཏུ་དགའ་སྟེ། ཡི་རངས་ཤིང་དགའ་བ་དང་བདེ་བ་སྐྱེས་ནས། བཅོམ་ལྡན་འདས་ག་ལ་བཞུགས་པ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་ཏུ་མངོན་སུམ་དུ་ཡང་དག་པར་དགའ་བ་དང་། ཡང་དག་པར་མགུ་བར་
འགྱུར་བའི་གཏམ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཀུན་ཏུ་རྒྱུ་རབ་བཟང་གིས་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་འཇིག་རྟེན་ན་མུ་སྟེགས་ཀྱི་གནས་ཐ་དད་པ་འདི་དག་ནི་འདི་ལྟ་སྟེ། འོད་སྲུང་རྫོགས་བྱེད་དང་། ཀུན་ཏུ་རྒྱུ་གནག་
ལྷས་ཀྱི་བུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་དེ་རྣམས་ཀྱིས་རང་རང་གིས་དམ་བཅས་པ་ལགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། རབ་བཟང་ང་ནི་ན་
ཚོད་ཉི་ཤུ་དགུ་ལོན་ན། །ལེགས་པ་གང་ཡིན་ཚོལ་ཕྱིར་རབ་ཏུ་བྱུང་བར་གྱུར། །རབ་བཟང་ང་ནི་རབ་ཏུ་བྱུང་བའི་ཕྱིན་ཅད་ནས། །ལོ་གྲངས་ལྔ་བཅུའི་བར་དུ་ཏིང་འཛིན་བསྒོམ་པ་བྱས། །ང་ནི་ཚུལ་ཁྲིམས་རྣམས་དང་ཞབས་དང་རིག་པ་དང་། །སེམས་ཀྱི་རྩེ་གཅིག་བཏུད་པ་དག་ཀྱང་བསྒོམ་

པ་བྱས། །རིགས་པར་ལྡན་པའི་ཆོས་ཀྱི་ཕྱོགས་ཙམ་བརྗོད་པ་ཡང་། །འདི་ལས་ཕྱི་རོལ་པ་ཡི་དགེ་སྦྱོང་གཞན་ལ་མེད། །རབ་བཟང་ཆོས་འདུལ་བ་གང་ལ་འཕགས་པའི་ལམ་ཡན་ལག་བརྒྱད་པ་མེད་པ་དེ་ལ་ནི་དགེ་སྦྱོང་དང་པོ་ཡང་མེད་དོ། །དེ་ལ་ནི་དགེ་སྦྱོང་གཉིས་པ་དང་། གསུམ་པ་དང་།
བཞི་པ་ཡང་མེད་དོ། །རབ་བཟང་ཆོས་འདུལ་བ་གང་ལ་འཕགས་པའི་ལམ་ཡན་ལག་བརྒྱད་པ་ཡོད་པ་དེ་ལ་ནི་དགེ་སྦྱོང་དང་པོ་དང་། གཉིས་པ་དང་། གསུམ་པ་དང་། བཞི་པ་ཡང་ཡོད་དེ། དེ་བས་ན་འདི་ལས་ཕྱི་རོལ་པའི་དགེ་སྦྱོང་རྣམས་སམ་བྲམ་ཟེ་རྣམས་ནི་མེད་དེ། ཕ་རོལ་རྒོལ་བའི་
དགེ་སྦྱོང་རྣམས་སམ་བྲམ་ཟེ་རྣམས་ཀྱིས་སྟོང་ངོ་ཞེས་ང་ནི་དེ་སྐད་དུ་འཁོར་འདིར་སེང་གེའི་སྒྲ་ཡང་དག་པར་སྒྲོགས་སོ་ཞེས་གསུངས་སོ། །ཆོས་ཀྱི་རྣམ་གྲངས་འདི་བཤད་པ་ན་ཀུན་ཏུ་རྒྱུ་རབ་བཟང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ལ་རྣམ་པར་དག་སྟེ། ཀུན་ཏུ་རྒྱུ་ཆོས་མཐོང་
ལ་ཆོས་རྙེད་པ། ཆོས་རྟོགས་པ། ཆོས་ཀྱི་གཏིང་སླེབས་པ། སོམ་ཉི་ལས་རྒལ་བ། ཐེ་ཙོམ་ལས་རྒལ་བ། གཞན་གྱི་དྲིང་མི་འཇོག་པ། གཞན་གྱིས་བཀྲིར་མེད་པ། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་པར་གྱུར་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་
ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཚེ་དང་ལྡན་པ་ཀུན་དགའ་བོ་ལ་སྨྲས་པ། བཙུན་པ་ཀུན་དགའ་བོས་ནི་རྙེད་པ་ལེགས་པར་རྙེད་དོ། །བཙུན་པ་ཀུན་དགའ་བོ་སློབ་དཔོན་ཆེན་པོས་སློབ་དཔོན་ཆེན་པོའི་ཉེ་གནས་སུ་དབང་བསྐུར་བ་ལགས་སོ། །བདག་ཀྱང་
རྙེད་པ་ལེགས་པར་རྙེད་པ་ལགས་ཏེ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན། བདག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱད་པ་སྤྱོད་པར་འཚལ་ལོ་ཞེས་བྱས་སོ། །དེ་ནས་ཚེ་དང་ལྡན་པ་ཀུན་དགའ་
བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཀུན་ཏུ་རྒྱུ་འདི་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་

གི་དངོས་པོར་འགྱུར་བར་འཚལ་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་རབ་ཏུ་འབྱུང་བར་མཛད་པར་གསོལ། དེ་ནས་བཅོམ་ལྡན་འདས་ཀྱིས་ཀུན་ཏུ་རྒྱུ་རབ་བཟང་ལ་དགེ་སློང་ཚུར་ཤོག་ཚངས་པར་སྤྱོད་ཅིག་ཅེས་བཀའ་སྩལ་ནས། ཚིག་དེ་ཐོས་མ་ཐག་ཏུ་སྐྲ་དང་ཁ་སྤུ་
ནི་བྲེགས་ནས་ཞག་བདུན་ལོན་པ་ཙམ་དུ་གྱུར། ཆོས་གོས་སྣམ་སྦྱར་ནི་གྱོན། སྤྱོད་ལམ་ནི་བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུར་འདུག་པར་གྱུར། ལག་ན་ནི་ལྷུང་བཟེད་དང་ཆུ་སྣོད་ཐོགས་པར་གྱུར་ཏོ། །འདིར་སྨྲས་པ། དེ་བཞིན་གཤེགས་པས་ཚུར་ཞེས་བཀའ་སྩལ་པས། །དེ་ནི་སྐྲ་བྲེགས་
ལུས་ལ་སྣམ་སྦྱར་གྱོན། །སངས་རྒྱས་ཀྱིས་ནི་དགོངས་པས་གོས་བགོས་ནས། །མོད་ལ་དབང་པོ་རབ་ཏུ་ཞི་བར་གནས། །དེ་ནས་བཅོམ་ལྡན་འདས་ཀྱིས་དེ་ལ་ལུང་ཕོག་སྟེ། དེས་ཀྱང་བརྩོན་པ་དང་བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་
དུ་བྱས་ཏེ། དེ་དགྲ་བཅོམ་པ་ཁམས་གསུམ་པའི་འདོད་ཆགས་དང་བྲལ་བར་གྱུར་ནས་གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་འདྲ་བའི་སེམས་དང་ལྡན་པ། ཙན་དན་སྦངས་པ་ལྟ་བུར་བསིལ་བར་གྱུར་པ། རིག་པས་སྒོ་ངའི་སྦུབས་བཅོམ་པ། རིག་པ་དང་། མངོན་པར་ཤེས་པ་དང་།
སོ་སོ་ཡང་དག་པར་རིག་པ་ཐོབ་པ། སྲིད་པའི་རྙེད་པ་དང་། ཆགས་པ་དང་། བཀུར་སྟི་ལ་མི་ལྟ་བ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་པ་དང་གུས་པར་སྨྲ་བའི་གནས་སུ་གྱུར་ཏོ། །དེ་ནས་ཚེ་དང་ལྡན་པ་རབ་བཟང་འདི་སྙམ་དུ་སེམས་ཏེ། བདག་གིས་སྟོན་པ་ཡོངས་སུ་མྱ་
ངན་ལས་འདའ་བ་མཐོང་བར་བྱ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་བྱིན་གྱི་རླབས་རྣམ་པ་ལྔ་བྱིན་གྱིས་བརླབས་ལ། དེ་བས་སྔར་ཡོངས་སུ་མྱ་ངན་ལས་འདས་པར་བྱའོ་སྙམ་ནས་ཚངས་པ་མཚུངས་པར་སྤྱོད་པ་རྣམས་ཀྱིས་ནི་བདག་དགེ་སློང་གི་ཆ་ལུགས་སུ་མཐོང་བར་གྱུར་ཅིག །མུ་སྟེགས་པ་
གཞན་རྣམས་ཀྱིས་ནི་མུ་སྟེགས་པའི་ཆ་ལུགས་སུ་མཐོང་བར་གྱུར་ཅིག །ཚངས་པ་མཚུངས་པར་སྤྱོད་པ་རྣམས་ཀྱིས་ནི་བདེ་བླག་ཏུ་བདག་གི་ཐད་དུ་འོང་ནུས་པར་གྱུར་ཅིག །མུ་སྟེགས་པ་གཞན་དག་ཞིག་གིས་ནི་ཆུ་ཆེན་པོས་བསྐོར་བར་མཐོང་བར་གྱུར་ཅིག །ཚངས་པ་མཚུངས་པར་སྤྱོད་པ་རྣམས་ཀྱིས་ནི་བདག་

གི་རུས་བུ་ཁྱོགས་སུ་ཁྱེར་ནུས་པར་གྱུར་ཅིག །འདི་ལས་ཕྱི་རོལ་པ་རྣམས་ཀྱིས་ནི་བརྒྱའམ་སྟོང་གིས་ཀྱང་ཁྱེར་མི་ནུས་པར་གྱུར་ཅིག །ཚངས་པ་མཚུངས་པར་སྤྱོད་པ་རྣམས་ཀྱིས་ནི་བདག་གི་རུས་བུ་བསྲེག་པའི་མེ་སྦར་ནུས་པར་གྱུར་ཅིག །འདི་ལས་ཕྱི་རོལ་པ་རྣམས་ཀྱིས་ནི་བརྒྱའམ་སྟོང་གིས་ཀྱང་སྦར་མི་ནུས་
པར་གྱུར་ཅིག །ཚངས་པ་མཚུངས་པར་སྤྱོད་པ་རྣམས་ཀྱིས་ནི་བདག་གི་རུས་བུ་མཐོང་བར་གྱུར་ལ། མཐོང་ནས་ཀྱང་རུས་བུ་ལ་མཆོད་པ་བྱེད་པར་གྱུར་ཅིག །མུ་སྟེགས་པ་གཞན་རྣམས་ཀྱིས་ནི་མཐོང་བར་མ་གྱུར་ཅིག་ཅེས་བྱས་ནས་དེར་ཚེ་དང་ལྡན་པ་རབ་བཟང་གིས་བྱིན་གྱི་རླབས་རྣམ་པ་ལྔ་བྱིན་གྱིས་བརླབས་
ཏེ་ཡོངས་སུ་མྱ་ངན་ལས་འདས་སོ། །དེ་ནས་ཀུ་ཤིའི་གྲོང་ཁྱེར་དུ་ལྷ་རྣམས་ཀྱིས་རབ་བཟང་ཡོངས་སུ་མྱ་ངན་ལས་འདས་སོ་ཞེས་སྒྲ་བསྒྲགས་སོ། །དེ་ནས་དེ་ཐོས་མ་ཐག་ཏུ་མུ་སྟེགས་པ་གཞན་ཀུན་ཏུ་རྒྱུ་རྣམས་ཀྱིས་རས་ཀྱི་བ་དན་དག་བསྒྲེང་སྟེ། ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་
རྣམས་སུ་སྒྲ་བསྒྲགས་པ། དགེ་སྦྱོང་གཽ་ཏ་མ་ན་རེ་ཕྱི་རོལ་པའི་དགེ་སྦྱོང་དང་བྲམ་ཟེ་མེད་དེ། ཕ་རོལ་སྨྲ་བ་རྣམས་ནི་དགེ་སྦྱོང་ངམ་བྲམ་ཟེས་སྟོང་ངོ་ཞེས་དེ་སྐད་དུ་འཁོར་འདིར་ང་ཡང་དག་པའི་སེང་གེའི་སྒྲ་སྒྲོགས་སོ་ཞེས་ཟེར་ལ། ད་ནི་བདག་ཅག་གི་ཚངས་པ་མཚུངས་པར་སྤྱོད་པ་འདི་ཡང་ཡོངས་སུ་
མྱ་ངན་ལས་འདས་སོ་ཞེས་ཀུ་ཤིའི་གྲོང་ཁྱེར་ཐོག་ཐག་ཏུ་བསྒྲགས་ནས་ཤིང་ས་ལ་ཟུང་གི་ཚལ་དུ་དོང་སྟེ་རབ་བཟང་ག་ལ་འདུག་པ་དེར་ཆས་པ་ལས་དེའི་ཐད་དུ་འགྲོ་མ་ནུས་སོ། །དེ་ནས་དགེ་སློང་རྣམས་ཀྱིས་དེ་དག་མཐོང་ནས། ཀྱེ་ཁྱེད་རྣམས་འདིར་ཅི་ལ་འོངས། དེ་དག་གིས་སྨྲས་པ། བདག་ཅག་
གི་ཚངས་པ་མཚུངས་པར་སྤྱོད་པ་ཡོངས་སུ་མྱ་ངན་ལས་འདས་ཏེ། བདག་ཅག་གིས་དེའི་རུས་བུ་ལ་མཆོད་པ་བྱའོ། །དགེ་སློང་རྣམས་ཀྱིས་སྨྲས་པ། འདི་ནི་ངེད་ཀྱི་ཚངས་པ་མཚུངས་པར་སྤྱོད་པ་ཡིན་གྱིས་ཁྱེད་ཀྱི་མ་ཡིན་ནོ། །ཅི་ཁྱེད་ཀྱིས་སྐྲ་བྲེགས་ལ་ཆོས་གོས་སྣམ་སྦྱར་གྱོན་པ་མ་མཐོང་ངམ། དེ་དག་
གིས་སྨྲས་པ། བདག་ཅག་གིས་ནི་དབྱུག་གུ་གསུམ་དང་། རིལ་བ་སྤྱི་བླུགས་ཐོགས་པ་དེ་ལྟ་བུར་མཐོང་ངོ་། །དགེ་སློང་རྣམས་ཀྱིས་སྨྲས་པ། གལ་ཏེ་འདི་ཁྱེད་ཀྱི་ཚངས་པ་མཚུངས་པར་སྤྱོད་པ་ཡིན་ཞེ་ན། འདིའི་ཐད་དུ་ཤེག་ལ་མཆོད་པ་གྱིས་ཤིག །དེ་ནས་དེ་ཐོས་མ་ཐག་ཏུ་མུ་སྟེགས་

པ་གཞན་དག་རབ་བཟང་གི་ཐད་དུ་འགྲོ་འདོད་པ་ལས་ཆུ་ཆེན་པོས་བསྐོར་བར་མཐོང་ནས་འགྲོ་མ་ནུས་སོ། །དེ་ནས་དགེ་སློང་རྣམས་ཀྱིས་སྨྲས་པ། འདི་ནི་ངེད་ཀྱི་ཚངས་པ་མཚུངས་པར་སྤྱོད་པ་ཡིན་གྱིས་ཁྱེད་ཀྱི་མ་ཡིན་ནོ། །འདི་ལྟར་ངེད་ནི་འདིའི་ཐད་དུ་བདེ་བླག་ཏུ་འགྲོ་ནུས་པ་ཡིན་
ཏེ། ཁྱེད་ཀྱང་ངེད་ཀྱི་མཐུས་འདིའི་ཐད་དུ་ཤེག་ཅིག་ཅེས་བྱས་ནས་དེ་དག་ཐམས་ཅད་རབ་བཟང་གི་རུས་བུའི་ཐད་དུ་དོང་ངོ་། །དེ་ནས་དགེ་སློང་རྣམས་ཀྱིས་སྨྲས་པ། གལ་ཏེ་ཁྱེད་ཀྱི་ཚངས་པ་མཚུངས་པར་སྤྱོད་པ་ཡིན་ཞེ་ན། འདིའི་ཁྱོགས་ཁྱེར་ཅིག །དེ་ནས་དེ་ཐོས་མ་ཐག་ཏུ་མུ་སྟེགས་པ་གཞན་
ཀུན་ཏུ་རྒྱུ་དེ་དག་གིས་ཁྱོགས་བསྐུར་ཞེས་བྱས་ན། གདེག་པར་མ་ནུས་སོ། །དེ་ནས་དགེ་སློང་རྣམས་ཀྱིས་སྨྲས་པ། འདི་ནི་ངེད་ཀྱི་ཚངས་པ་མཚུངས་པར་སྤྱོད་པ་ཡིན་ཏེ། ངེད་ཀྱིས་འདིའི་ཁྱོགས་ཁྱེར་ཏེ་བཀུར་སྟི་བགྱིས་ལྟོས་ཤིག་ཅེས་བྱས་ནས་དགེ་སློང་རྣམས་ཀྱིས་ཁྱོགས་ཁྱེར་ཏེ་གང་དུ་བསྲེག་
པའི་གནས་སུ་བཞག་ནས་དགེ་སློང་རྣམས་ཀྱིས་སྨྲས་པ། གལ་ཏེ་འདི་ཁྱེད་ཀྱི་ཚངས་པ་མཚུངས་པར་སྤྱོད་པ་ཡིན་ཞེ་ན། རུས་བུ་བསྲེག་པའི་མེ་བུས་ཤིག །དེ་ནས་མུ་སྟེགས་པ་གཞན་དག་གིས་རུས་བུ་བསྲེག་པའི་མེ་སྦར་ཞེས་བྱས་ན་སྦར་མ་ནུས་སོ། །དེ་ནས་དགེ་སློང་རྣམས་ཀྱིས་སྨྲས་པ།
འདི་ནི་ངེད་ཀྱི་ཚངས་པ་མཚུངས་པར་སྤྱོད་པ་ཡིན་ཏེ། འདིའི་རུས་བུ་བསྲེག་པའི་མེ་བདག་ཅག་གིས་སྦར་རོ་ཞེས་བྱས་ནས་དགེ་སློང་རྣམས་ཀྱིས་དེའི་རུས་བུ་བསྲེག་པའི་མེ་སྦར་རོ། །རུས་བུ་བསྲེག་པའི་མེ་སྦར་ནས་ཡང་སྨྲས་པ། གལ་ཏེ་འདི་ཁྱོད་ཀྱི་ཚངས་པ་མཚུངས་པར་སྤྱོད་པ་ཡིན་ཞེ་ན།
ཁྱོད་ཀྱིས་འདིའི་རུས་བུ་བསྲེགས་པའི་མེ་འོ་མས་སོད་ཅིག་ཅེས་བྱས་ནས། མུ་སྟེགས་པ་གཞན་དག་གིས་དེའི་རུས་བུ་བསྲེགས་པའི་མེ་བསད་ཅེས་བྱས་ན་གསོད་མ་ནུས་སོ། །དེ་ནས་དགེ་སློང་རྣམས་ཀྱིས་སྨྲས་པ། འདི་ནི་ངེད་ཀྱི་ཚངས་པ་མཚུངས་པར་སྤྱོད་པ་ཡིན་ཏེ། ངེད་ཀྱིས་འདིའི་རུས་
བུ་བསྲེགས་པའི་མེ་བསད་དོ་ཞེས་བྱས་ནས་དགེ་སློང་རྣམས་ཀྱིས་དེའི་རུས་བུ་བསྲེགས་པའི་མེ་བསད་དོ། །མེ་བསད་ནས་ཡང་སྨྲས་པ། གལ་ཏེ་འདི་ཁྱེད་ཀྱི་ཚངས་པ་མཚུངས་པར་སྤྱོད་པ་ཡིན་ཞེ་ན། འདིའི་རུས་བུ་འདི་རྣམས་ལོང་ལ་མཆོད་པ་གྱིས་ཤིག །དེ་ནས་མུ་སྟེགས་པ་གཞན་ཀུན་ཏུ་

རྒྱུ་རྣམས་ཀྱིས་རུས་བུ་བླང་ཞེས་བྱས་ནས་རུས་བུ་མ་མཐོང་ངོ་། །དེ་ནས་དགེ་སློང་རྣམས་ཀྱིས་རུས་བུ་དེ་དག་བླངས་ཏེ། རུས་བུ་མཆོད་རྟེན་གྱི་ནང་དུ་བཞག་ནས་བདུག་པ་དང་། ཕྱེ་མ་དང་། མེ་ཏོག་རྣམས་ཀྱིས་བཀུར་སྟི་བྱས་ཏེ་དོང་ངོ་།། །།ལས་བརྒྱ་ཐམ་པ། བམ་པོ་ཉི་ཤུ་ལྔ་པ། དེ་ནས་
དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་ཚེ་དང་ལྡན་པ་རབ་བཟང་འདི་ཀུན་གྱི་འོག་ཏུ་རབ་ཏུ་བྱུང་ལ་ཐོག་མ་ཁོ་ནར་ཡོངས་སུ་མྱ་ངན་ལས་འདས་ཏེ། དེའི་འོག་ཏུ་གདོད་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་འགྱུར་བ་ལ་གཟིགས། བཅོམ་ལྡན་འདས་
ཀྱིས་བཀའ་སྩལ་པ། སྨོན་ལམ་གྱི་དབང་ལས་གྱུར་ཏོ། །གསོལ་པ། བཙུན་པ་འདིས་སྨོན་ལམ་གང་དུ་བཏབ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་གྲོང་ཁྱེར་བཱ་རཱ་ཎ་སཱི་ན་
རྒྱལ་པོ་ཀྲྀ་ཀཱི་ཞེས་བྱ་བ་རྒྱལ་པོ་བྱེད་དེ། དེའི་ཚེ་རྒྱལ་པོ་ཀྲྀ་ཀཱིའི་མདུན་ན་འདོན་གྱི་བུ་གཟུགས་བཟང་ཞིང་བལྟ་ན་སྡུག་ལ་མཛེས་པ། མདོག་བཟང་བ་གསེར་གྱི་མདོག་ཅན། མགོ་བོ་གདུགས་ལྟར་འདུག་པ། ལག་པ་རིང་བ། དཔྲལ་བའི་དབྱེས་ཆེ་བ། སྣ་མཐོ་བ། སྣ་ལེགས་པ། སྨིན་མ་སྟུག་པ།
ལུས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་མཛེས་པར་བྱས་པ་ཞིག་བཙས་ཏེ། དེའི་བཙས་སྟོན་རྒྱས་པར་བྱས་ནས་ཁྱེའུ་འདིའི་མིང་ཇི་སྐད་གདགས་ཞེས་མིང་འདོགས་པར་བྱེད་དེ། ཁྱེའུ་འདིའི་རུས་འོད་སྲུང་ཡིན་པས་ན་ཁྱེའུ་འདིའི་མིང་
འོད་སྲུང་ཉིད་དུ་གདགས་སོ་ཞེས་ཟེར་རོ། །དེ་ནས་ཁྱེའུ་འོད་སྲུང་འོ་མ་དང་། ཞོ་དང་མར་དང་ཞུན་མར་དང་མར་གྱི་ཉིང་གུས་བསྐྱེད་བསྲིངས་ནས། དེ་གང་གི་ཚེ་ཆེར་སྐྱེས་པ་དེའི་ཚེ་མཚན་མཁན་བྱེ་བྲག་ཕྱེད་པ་དག་གིས་ལུང་བསྟན་པ། ཁྱེའུ་འོད་སྲུང་འདི་གལ་ཏེ་རབ་ཏུ་མ་བྱུང་ན་ནི་འཁོར་ལོས་སྒྱུར་བའི་
རྒྱལ་པོར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ནས་ཆོས་གོས་ཚོན་ཅན་གྱོན་ཏེ་ཡང་དག་པའི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་ཏེ། འཇིག་རྟེན་དུ་གྲགས་པ་ཆེན་པོ་དང་ལྡན་པར་འགྱུར་རོ་ཞེས་

ཟེར་རོ། །དེ་ནས་བྱང་ཆུབ་སེམས་དཔའ་འོད་སྲུང་གི་མཛའ་བོ་བཤེས་པ་བྲམ་ཟེའི་ཁྱེའུ་མྱ་ངན་མེད་ཅེས་བྱ་བ་ཞིག་ཡོད་པ་དེས་དེའི་ལུང་བསྟན་པ་དེ་ཐོས་ནས་དེ་ཐོས་མ་ཐག་ཏུ་སྨྲས་པ། གྲོགས་པོ་ཤེས་པར་གྱིས་ལ་ང་དང་མ་འགྲོགས་པར་ཁྱེད་དཀའ་ཐུབ་ཀྱི་ཚལ་དུ་མ་འགྲོ་ཤིག་ཅེས་བྱས་སོ། །
དེ་ནས་བྱང་ཆུབ་སེམས་དཔའ་མྱ་ངན་ལས་འདའ་བ་ལ་དགོངས་ནས་ང་ཁྱོད་དང་མ་འགྲོགས་ཀྱི་བར་དུ་མི་འགྲོའོ་ཞེས་བྱས་སོ། །དེ་ནས་དེར་གང་གི་ཚེ་བྱང་ཆུབ་སེམས་དཔའ་འོད་སྲུང་གིས་རྒན་པོ་དང་། ནད་པ་དང་ཤི་བ་གཟིགས་ནས་ནགས་ཚལ་གྱི་ནང་དུ་གཤེགས་པ་དེའི་ཚེ་མྱ་ངན་མེད་མི་དགའ་བར་གྱུར་ཏེ།
དེས་ཇི་ལྟར་དམ་བཅས་པ་བཞིན་དུ་མ་བྱས་སོ་སྙམ་མོ། །དེ་ནས་གང་གི་ཚེ་བྱང་ཆུབ་སེམས་དཔའ་འོད་སྲུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བཱ་རཱ་ཎ་སཱིར་གཤེགས་པ་དེའི་ཚེ། དེས་དེར་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་
ཆོས་བཞིན་དུ་བསྐོར་ནས་དེ་རྒྱལ་པོ་ཀྲྀ་ཀཱིས་བཤོས་ལ་སྤྱན་དྲངས་ཏེ། རྒྱལ་པོས་དེ་ཁོ་ནའི་མཚན་མོ་ལམ་ཡང་མཛེས་པར་བྱེད་དུ་བཅུག །དེ་ཁོ་ནའི་མཚན་མོ་བཟའ་བ་དང་བཅའ་བ་གཙང་མ་བཟང་པོ་རྣམས་ཀྱང་སྦྱར་ཏེ་གདན་བཤམས་ནས་ཆུ་ར་བཀང་སྟེ། བཅོམ་ལྡན་འདས་ལ་ཕྲིན་གྱིས་གདུགས་
ཚོད་བསྐུལ་ནས་རྒྱལ་པོ་དེ་ཉིད་ཀྱིས་བདུག་པ་དང་། ཕྱེ་མ་དང་སྤོས་དང་མེ་ཏོག་དང་། གདུགས་དང་། རྒྱལ་མཚན་དང་། བ་དན་རྣམས་ཁྱེར་ཏེ། སིལ་སྙན་གྱི་སྒྲ་ཆེན་པོ་སྒྲོགས་ཤིང་དྲང་སྲོང་སྨྲ་བ་ནས་ཡང་དག་པར་རྫོགས་པའི་སངས་རྒྱས་འོད་སྲུང་བསུ་ནས་འབྱོར་པ་ཆེན་པོས་བཱ་རཱ་ཎ་སཱིར་སྤྱན་དྲངས་
སོ། །དེ་ནས་བྲམ་ཟེའི་ཁྱེའུ་མྱ་ངན་མེད་ཀྱིས་ཀྱང་བྱང་ཆུབ་སེམས་དཔའ་འོད་སྲུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བཱ་རཱ་ཎ་སཱིར་གཤེགས་ཏེ། དེ་རྒྱལ་པོ་ཀྲྀ་ཀཱིས་བཤོས་ལ་སྤྱན་དྲངས་ནས་རྒྱལ་པོ་དེས་དེ་ཁོ་ནའི་མཚན་མོ་ལམ་ཡང་མཛེས་པར་
བྱེད་དུ་བཅུག །དེ་ཁོ་ནའི་མཚན་མོ་བཟའ་བ་དང་བཅའ་བ་གཙང་མ་བཟང་པོ་མང་པོ་རྣམས་ཀྱང་སྦྱར་ཏེ་གདན་བཤམས་ནས་ཆུ་ར་བཀང་སྟེ། བཅོམ་ལྡན་འདས་ལ་ཕྲིན་གྱིས་གདུགས་ཚོད་བསྐུལ་ནས་རྒྱལ་པོ་དེ་ཉིད་ཀྱིས་བདུག་པ་དང་། ཕྱེ་མ་དང་། སྤོས་དང་། མེ་ཏོག་དང་། གདུགས་དང་།

རྒྱལ་མཚན་དང་། བ་དན་རྣམས་ཁྱེར་ཏེ། སིལ་སྙན་གྱི་སྒྲ་ཆེན་པོ་སྒྲོགས་ཤིང་དྲང་སྲོང་སྨྲ་བ་ནས་ཡང་དག་པར་རྫོགས་པའི་སངས་རྒྱས་འོད་སྲུང་བསུ་ནས་འབྱོར་པ་ཆེན་པོས་བཱ་རཱ་ཎ་སཱིར་སྤྱན་དྲངས་སོ་ཞེས་ཐོས་སོ། །ཐོས་ནས་ཀྱང་སྔོན་གྱི་མི་དགའ་བར་གྱུར་པས་ཐག་མི་རིང་བ་ཞིག་ཏུ་འདུག་སྟེ་ལྟ་བར་
བྱེད་ལ་དྲུང་དུ་ལྟར་འགྲོར་མི་འདོད་དོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱིས་དགོངས་ནས། ཕྱག་གླང་པོ་ཆེའི་སྣ་ལྟ་བུ་བརྐྱང་སྟེ་ཕྱག་གིས་བཟུང་ནས་དྲངས་ཏེ་བཀའ་སྩལ་པ། མྱ་ངན་མེད་ཁྱོད་ཅིའི་ཕྱིར་ང་དང་ཕྲད་དུ་འོང་བར་མི་འདོད། དེས་གསོལ་པ། སྔོན་བདག་ལ་དམ་བཞེས་པ་ནི་
ང་གང་དུ་འགྲོ་བ་དེར་ཁྱོད་ཁྲིད་དེ་འགྲོའོ་ཞེས་ཁྱོད་ཀྱིས་དམ་བཅས་པ་ལས་གཅིག་པུ་དཀའ་ཐུབ་ཀྱི་ནགས་ཚལ་དུ་བཞུད་དེ། སྔོན་བདག་མི་དགའ་བའི་གཞི་མཆིས་པའི་སླད་དུ་མཆི་མི་འཚལ་ལོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་བཀའ་སྩལ་པ། ངས་ནི་མྱ་ངན་ལས་འདའ་བ་
ལས་བསམས་ཏེ་སྨྲས་པ་ཡིན་ན། ཡོང་ཡང་ཁྱོད་དེར་ཕྱིན་དུ་ཟིན་ན་ཅི་ལ་ཕན་ཏེ་ད་ནི་དམ་བཅས་པ་དེའི་དུས་ལ་བབ་བོ། །མྱ་ངན་མེད་ཀྱིས་གསོལ་པ། བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན།
བདག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ་བསྙེན་པར་རྫོགས་པར་མཛད་ནས་དེ་ལ་ལུང་ཡང་ཕོག་སྟེ། དེས་ལུང་དེ་མནོས་པའི་འོག་ཏུ་ལེ་ལོ་བྱེད་
ཅིང་འདུག་པ་ལས་དེར་གང་གི་ཚེ་ཡང་དག་པར་རྫོགས་པའི་སངས་རྒྱས་ཀྱིས་དགོན་པའི་བསྔགས་པ་བསྟན་པ་དེའི་ཚེ། དེས་ཡིད་ལ་བྱ་བ་མནོས་ནས་དགོན་པའི་གནས་ཤིག་ཏུ་སོང་སྟེ། འདུག་པ་ལས་གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་ཕྲིན་ལས་ཐམས་
ཅད་མཛད་ནས་གཟིམས་མལ་གྱི་ཐ་མར་ཞུགས་པ་དེའི་ཚེ་ལྷ་རྣམས་ཀྱིས་ཀུན་ཏུ་སྒྲ་བསྒྲགས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་དོ་ནུབ་ནམ་ཕྱེད་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་སྒྲ་བསྒྲགས་སོ། །དེ་ནས་

དགེ་སློང་མྱ་ངན་མེད་ཀྱིས་ལྷ་ནམ་མཁའ་ལ་འགྲོ་བ་དེ་དག་གི་སྒྲ་ཐོས་སོ། །ཐོས་ནས་ཀྱང་དེ་སྡུག་བསྔལ་ཆེན་པོ་སྐྱེས་ཏེ། བཅོམ་ལྡན་འདས་ནི་མྱ་ངན་ལས་འདའ་བར་འགྱུར་ལ། བདག་གིས་ནི་ཁྱད་པར་ཅི་ཡང་མ་ཐོབ་བོ་སྙམ་ནས་དེ་གཞི་དེ་ལས་ཤིན་ཏུ་མྱ་ངན་བྱེད་ཅིང་སྡུག་བསྔལ་ལ་སྨྲེ་སྔགས་
འདོན་པར་བྱེད་དོ། །དེ་ནས་དེ་ལ་དགའ་བའི་ལྷས་དེ་མཐོང་ནས་སྨྲས་པ། མྱ་ངན་མེད་ཅིའི་ཕྱིར་ཁྱོད་ཤིན་ཏུ་མྱ་ངན་བྱེད་ཅིང་སྡུག་བསྔལ་ལ་སྨྲེ་སྔགས་འདོན་པར་བྱེད། གལ་ཏེ་ཁྱོད་ཡང་དག་པར་རྫོགས་པའི་སངས་རྒྱས་འོད་སྲུང་མཐོང་ན་དེ་ལ་བྱ་བ་ཅི་ཞིག་ཡོད། མྱ་ངན་མེད་ཀྱིས་སྨྲས་པ། ཡང་དག་པར་
རྫོགས་པའི་སངས་རྒྱས་འོད་སྲུང་གི་བསྟན་པ་ལ་བྱ་བ་གང་ཡིན་པ་དེ་དག་ཐམས་ཅད་བྱའོ། །དེ་ནས་དེ་ཐོས་མ་ཐག་ཏུ་ལྷ་དེས་ཁྱེར་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བབ་པར་བཞག་ནས། དེས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ་ཕྱིན་ནས།
ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་དེ་དང་འཐུན་པའི་ཆོས་བསྟན་ཏེ། དེས་ན་མྱ་ངན་མེད་ཀྱིས་སྟན་དེ་ལ་འདུག་བཞིན་དུ་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །དེ་ནས་
མྱ་ངན་མེད་ཀྱིས་དགྲ་བཅོམ་པ་ཉིད་ཐོབ་ནས་འདི་སྙམ་དུ་མ་ལ་བདག་གིས་སྟོན་པ་ཡོངས་སུ་མྱ་ངན་ལས་འདའ་བ་མཐོང་བར་བྱ་བ་ནི་བདག་གི་ཆ་མ་ཡིན་གྱིས། བདག་སྔར་ཡོངས་སུ་མྱ་ངན་ལས་འདའ་བར་བྱའོ་སྙམ་མོ། །དེ་ནས་མྱ་ངན་མེད་ཡོངས་སུ་མྱ་ངན་ལས་འདས་ནས་དེའི་འོག་ཏུ་ཡང་དག་པར་
རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་སོ། །དེ་ནས་ལྷ་དེས་བསམས་པ་འདིས་ཁྱད་པར་འདི་ལྟ་བུ་ཐོབ་པ་ཅི་ཡང་རུང་བ་དེ་དག་ཐམས་ཅད་ནི་བདག་གི་མཐུ་ཡིན་ནོ་སྙམ་ནས། ཀྱེ་མ་དགེ་བའི་རྩ་བ་འདིས་ན་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་
བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །དེ་ཁོ་ནའི་བསྟན་པ་ལ་རབ་ཏུ་བྱུང་ནས་བདག་དེ་བས་སྔར་ཡོངས་སུ་མྱ་ངན་ལས་འདའ་བར་གྱུར་ལ། དེའི་འོག་ཏུ་སྟོན་པ་ཡོངས་སུ་མྱ་ངན་ལས་

འདའ་བར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་ལྷར་གྱུར་པ་གང་ཡིན་པ་དེ་ནི་རབ་བཟང་འདི་ཁོ་ན་ཡིན་ཏེ། དེས་དེར་སྨོན་ལམ་བཏབ་སྟེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་
བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །དེ་ཁོ་ནའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་གྱུར་ལ། བདག་སྔར་ཡོངས་སུ་མྱ་ངན་ལས་འདས་ནས་དེའི་འོག་ཏུ་སྟོན་པ་
ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་བྱས་པ་དེས་ན། དགེ་སློང་དག་ང་ཡང་དག་པར་རྫོགས་པའི་སངས་རྒྱས་འོད་སྲུང་དང་ཤིན་ཏུ་མཉམ་པ་དང་། ཤུགས་མཉམ་པ་དང་། མཛད་པ་མཉམ་པ་དང་། ཐབས་མཉམ་པ་བརྙེས་པར་གྱུར་ནས། འདིས་ང་མཉེས་པར་བྱས་ཏེ་མི་མཉེས་པར་མ་
བྱས་ལ། ང་ཉིད་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་སོ། །བདག་སྔར་ཡོངས་སུ་མྱ་ངན་ལས་འདས་ནས་དེའི་འོག་ཏུ་སྟོན་པ་ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་དེས་དེར་སྨོན་ལམ་དེ་ལྟར་བཏབ་པ་དེས་ནི་འདི་སྔར་ཡོངས་སུ་
མྱ་ངན་ལས་འདས་ནས་དེའི་འོག་ཏུ་ང་ཡོངས་སུ་མྱ་ངན་ལས་འདའ་བར་འགྱུར་རོ། །དགེ་སློང་དག་གཞན་ཡང་འདས་པའི་དུས་ན་ནགས་ཁྲོད་ཅིག་ན་དྲང་སྲོང་ལྔ་བརྒྱ་ཙམ་གནས་སོ། །ནགས་ཁྲོད་དེ་ན་ལྷ་ཞིག་ཀྱང་གནས་ཏེ། དེ་དྲང་སྲོང་དེ་དག་ལ་ཤིན་ཏུ་དགའ་བར་གྱུར་ཏོ། །དེའི་ཚེ་ཡང་དག་པར་
རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཁོར་བ་འཇིག་ཅེས་བྱ་བ་འཇིག་རྟེན་དུ་བྱུང་སྟེ། དེར་གང་གི་ཚེ་ཡང་
དག་པར་རྫོགས་པའི་སངས་རྒྱས་འཁོར་བ་འཇིག་གིས་འདུ་བ་ཆེན་པོ་བསྟན་པ་དེའི་ཚེ། ལྷ་དེ་ཡང་འདུ་བ་ཆེན་པོ་དེར་འདུས་ཏེ། དེས་ཡང་དག་པར་རྫོགས་པའི་སངས་རྒྱས་འཁོར་བ་འཇིག་ལས་ཆོས་ཐོས་ནས་ནགས་ཁྲོད་དུ་སོང་སྟེ། དེས་དྲང་སྲོང་དེ་དག་གི་མདུན་དུ་ཡང་དག་པར་

རྫོགས་པའི་སངས་རྒྱས་འཁོར་བ་འཇིག་གི་བསྔགས་པ་བརྗོད་དོ། །དེ་ནས་དེ་ཐོས་མ་ཐག་ཏུ་དྲང་སྲོང་དེ་དག་ཡང་དག་པར་རྫོགས་པའི་སངས་རྒྱས་འཁོར་བ་འཇིག་མཐོང་འདོད་ཆེས་པའི་སེམས་སྐྱེས་ནས་དེ་དག་གིས་ལྷ་དེ་ཉིད་ཀྱི་མདུན་དུ་བདར་ཏེ།