Kinh tạng Tây Tạng (Kangyur Đại Học) — 064_མདོ་སྡེ།_ཝ

ི་བུ་དག་ང་འདས་པའི་འོག་ལོ་བརྒྱ་ཕྲག་མང་པོ་འདས་པ་ན་ལྷོ་ཕྱོགས་ཀྱི་རྒྱུད་དུ་མཁར་གྱི་རྒྱལ་པོ་
བདེ་སྤྱོད་ཅེས་བྱ་བ་འབྱུང་བར་འགྱུར་ཏེ། དེའི་ཚེ་ལོ་བརྒྱད་ཅུ་ན་དམ་པའི་ཆོས་ནུབ་པར་འགྱུར་བའི་ལྷག་མ་ཙམ་དུ་ལུས་པའི་དུས་ལ་བབ་པ་དེའི་ཚེ་ངའི་ཉན་ཐོས་འབྱུང་བར་འགྱུར་ཏེ། དམ་པའི་ཆོས་ཀྱང་འབྱིན་པར་འགྱུར། ཆོས་ཀྱི་འཁོར་ལོ་ཡང་བསྐོར་བར་འགྱུར། ཐེག་པ་ཆེན་པོ་ཡང་
གཞན་དག་ལ་རྒྱས་པར་འཆད་པར་འགྱུར་རོ། །མདོ་སྡེ་འདི་ལྟ་བུ་དག་བཤད་པ་ཐོས་ནས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ལས་གང་དག་ཐོས་པ་དེ་དག་ཀྱང་ཕྱི་མའི་དུས་ཀྱི་ཚེ་འཛིན་པར་འགྱུར། ཀུན་ཆུབ་པར་བྱེད་པར་འགྱུར། འཆང་བར་འགྱུར། ཀློག་པར་འགྱུར།

ཡིད་ཆེས་པར་འགྱུར་རོ། །སེམས་ཅན་གང་དག་དེ་བཞིན་གཤེགས་པའི་མཚན་འདི་དག་ཐོས་ན་ཡིད་མི་ཆེས་པ་དང་། མ་དད་པ་དང་། ཁ་ཏོན་མི་བྱེད་པ་དང་། མི་ཀློག་པ་དང་། མི་འདྲི་བ་དེ་དག་ནི་བདུད་ཀྱིས་བྱིན་གྱིས་བརླབས་པ་ཡིན་ནོ། །སེམས་ཅན་གང་དག་དེ་བཞིན་གཤེགས་པའི་
མཚན་འདི་དག་ཐོས་ན་ཡིད་ཆེས་པར་བྱེད་ཅིང་དད་པར་འགྱུར་བ་དང་། ཁ་ཏོན་བྱེད་པ་དང་། ཀློག་པ་དང་། འདྲི་བ་དེ་དག་ནི་སངས་རྒྱས་མང་པོས་ཡོངས་སུ་བཟུང་བ་ཡིན་ནོ། །དེ་ནས་དེའི་ཚེ་ལྷའི་བུ་མཐོང་ན་དགའ་བ་དྲི་ཟའི་རྒྱལ་པོས་བཅོམ་ལྡན་འདས་ལ་བསྐོར་བ་བྱས་ཏེ། ལན་ས་ཡར་
ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་སྲུང་ཆེན་པོ་དང་འདྲ་བ་དེ་བཞིན་གཤེགས་པ་དང་མིང་འཐུན་པ། བྱམས་པ་ཆེན་པོ་ལ་གནས་པ། ཚུལ་ཁྲིམས་ཆེན་པོ་ལ་དྲག་ཏུ་བརྩོན་པ་ཤིན་ཏུ་མཆོག་ཏུ་མཛེས་པ། རིགས་
ཆེན་པོར་སྐྱེས་པ། ཚུལ་ཁྲིམས་དང་ལྡན་པ་ཆེན་པོ་དགེ་སློང་གིས་ཡོངས་སུ་བསྐོར་བ། དུས་དང་བཅས། གྲོང་དང་བཅས་པ་དང་། རྣམ་པ་ཅི་འདྲ་བ་ཡང་བཅོམ་ལྡན་འདས་ཀྱིས་རྒྱས་པར་བཤད་དུ་གསོལ། བཅོམ་ལྡན་འདས་དགེ་སློང་དེ་བདག་གིས་ཇི་སྲིད་འཚོའི་བར་དུ་བསྲུང་བར་
བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། མཐོང་ན་དགའ་བ་དྲི་ཟའི་རྒྱལ་པོ་དགེ་སློང་དེ་ལུང་བསྟན་པ་ཉོན་ཅིག །དེ་ནི་ང་ལ་དབེན་པ་དང་། ངའི་བསྟན་པ་འབྱུང་བར་བྱེད་ཅིང་ཁུར་ཆེན་པོ་ཁྱེར་བ་དང་། ངའི་ཤཱཀྱ་གཞོན་ནུ་ཡིན་ཏེ། མཐོང་ན་དགའ་བ་དྲི་ཟའི་རྒྱལ་པོ་ང་འདས་
པའི་འོག་ཏུ་ལྷོ་ཕྱོགས་ཀྱི་རྒྱུད་དུ་དྲང་སྲོང་བྱི་བོ་ཞེས་བྱ་བའི་ཡུལ་འཁོར་དུ་བསོད་ནམས་ཀྱི་གྲོང་ཁྱེར་བྱེ་མ་ཆེན་པོ་ཞེས་བྱ་བ་འབྱུང་སྟེ། གྲོང་དེའི་འབབ་ཆུ་མཛེས་འབྱོར་ཅེས་བྱ་བ་དེའི་བྱང་ཕྱོགས་ཀྱི་འགྲམ་དུ་འབྱུང་བར་འགྱུར་རོ། །དེར་རྗེའུ་རིགས་ཆེན་པོ་རྣམ་པར་དག་པ་འབྲ་གོ་ཅན་ཞེས་བྱ་བའི་
སའི་ཕྱོགས་སུ་འབྱུང་བར་འགྱུར་ཏེ། ཤཱཀྱའི་རིགས་གཞོན་ནུ་ལིད་ཙ་བཱིའི་བུ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་དེ་ངའི་ཆོས་འབྱུང་བར་བྱ་བའི་ཕྱིར་ལིད་ཙ་བཱིའི་བུ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་བྱང་ཆུབ་སེམས་དཔའ་མི་མཆོག་དེ་དེར་རིགས་ཆེན་པོར་སྐྱེ་བར་

འགྱུར་ཏེ། དེའི་ཕ་མ་དང་གཉེན་སྡེ་རྣམས་ཀྱིས་ངའི་མིང་དེའི་མིང་དུ་འདོགས་པར་འགྱུར་རོ། །འབྲ་གོ་ཅན་གྱི་རྗེའུ་རིགས་ཆེན་པོའི་རིགས་ཀྱང་དེ་བཞིན་གཤེགས་པའི་རིགས་ཡིན་པར་བལྟའོ། །དེའི་ཚེ་དྲང་སྲོང་བྱི་བོའི་ཡུལ་འཁོར་ཡང་འབྱོར་ཅིང་རྒྱས་ལ་སྐྱེ་བོ་མང་པོས་
གང་བར་འགྱུར་རོ། །དེ་བཞིན་གཤེགས་པ་དང་མིང་འཐུན་པའི་ཁྱེའུ་དེ་ཡང་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་ཞིང་སྐྱེ་བོ་མང་པོ་ཐམས་ཅད་ཀྱིས་བཀུར་བར་འགྱུར་རོ། །གང་གི་ཚེ་ཁྱེའུ་དེ་རབ་ཏུ་བྱུང་བ་ན་ཚངས་པ་མཚུངས་པར་སྤྱོད་པའི་འཁོར་དང་། དགེ་སློང་གི་ཚོགས་རྣམས་
ཁྲིད་དེ། རང་གི་སྲོག་དང་བསྡོས་ནས་དམ་པའི་ཆོས་སྟོན་ཅིང་། དེ་བཞིན་གཤེགས་པའི་སྤྱོད་པ་འབྱུང་བར་བྱེད་དེ། མཆོག་ཏུ་དགའ་བ་སྤྱོད་པར་འགྱུར་རོ། །དགེ་སློང་དམ་པའི་ཆོས་འདོད་པ་དེའི་འཁོར་གང་ཡིན་པ་རྣམས་ཀྱང་རང་གི་སྲོག་གི་བསམ་པ་ཡོངས་སུ་བཏང་ནས་དམ་པའི་
ཆོས་སྲུང་བར་འགྱུར་ཏེ། དགེ་སློང་གི་ཚོགས་དེ་དག་ཀྱང་མཆོག་ཏུ་དཀའ་བ་བྱེད་པ་དང་། ང་ལ་དབེན་པ་དང་། ཚུལ་ཁྲིམས་ཡོངས་སུ་དག་པར་འགྱུར་ཞིང་སོ་སོར་ཐར་པའི་སྡོམ་པས་བསྡམས་ལ་སྤྱོད་པ་དང་། སྤྱོད་ཡུལ་ཕུན་སུམ་ཚོགས་པ་དང་། ཁ་ན་མ་ཐོ་བ་ཕྲ་རབ་ཙམ་ལ་ཡང་
འཇིགས་པར་ལྟ་བར་འགྱུར་རོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་ངའི་ཉན་ཐོས་མཆོག་ཏུ་དཀའ་བ་བྱེད་པའི་ཚིག་ལ་ཡིད་ཆེས་པ་དེ་དག་ཐམས་ཅད་ཀྱང་སྤྲིན་ཆེན་སྙིང་པོ་དང་འདྲ་བར་བལྟའོ། །མཐོང་ན་དགའ་བ་དྲི་ཟའི་རྒྱལ་པོ་གཞན་
ཡང་སྐྱེ་བོ་དགེ་བསྙེན་གང་དག་གིས་ངའི་ཉན་ཐོས་ཀྱི་ཚིག་ཐོས་ནས་དམ་པའི་ཆོས་ཀྱི་ཕྱོགས་འཛུགས་པར་བྱེད་པའི་སེམས་ཅན་དེ་དག་ཀྱང་ང་ལ་བྱས་པ་གཟོ་བ་དང་། ང་ལ་དབེན་པ་ཡིན་ཏེ། དམ་པའི་ཆོས་ཀྱི་ཕྱིར་རང་གི་སྲོག་གི་བསམ་པ་ཡང་བཏང་། ནོར་དང་བཅས་པ་དང་། བུ་
དང་བཅས་པ་དང་། ཆུང་མ་དང་བཅས་པ་དང་། བུ་མོ་དང་བཅས་པའི་སྡེ་ཕྱོགས་རྣམས་ཀྱི་སྲོག་གི་བསམ་པ་ཡང་བཏང་ནས་དམག་གི་དཔུང་ཆེན་པོའི་གཡུལ་དུ་འཇུག་ཅིང་། དམག་གི་དཔུང་ཆེན་པོའི་གཡུལ་ཟད་པར་བྱེད་དོ། །བདུད་ཀྱི་ཕྱོགས་ཀྱི་སྟོབས་འཇོམས་པར་བྱེད་དོ། །

བདུད་ཀྱི་སྟོབས་རྣམ་པར་འཇིག་པར་བྱེད་དོ། །ཇི་ལྟ་བུའི་ཐབས་ཀྱིས་ཀྱང་དམ་པའི་ཆོས་འཛུགས་པར་བྱེད་དེ། ངའི་དམ་པའི་ཆོས་ཀྱི་མཐུ་ཡང་སྐྱེད་པར་འགྱུར་རོ། །སེམས་ཅན་ཆེན་པོ་དེ་དག་གིས་ནི་རྙེད་པ་ལེགས་པར་རྙེད་པར་འགྱུར་ཏེ། དེ་དག་ནི་བྱང་ཆུབ་སེམས་དཔའ་མི་མཆོག་ཡིན་
པར་བལྟ་བར་བྱའོ། །དགེ་སློང་ངམ། དགེ་སློང་མ་དེ་དག་ནི་སྦྱིན་གནས་ཡོངས་སུ་དག་པར་འགྱུར་རོ། །དགེ་འདུན་ཡོངས་སུ་དག་པར་ཡང་འགྱུར་རོ། །དགེ་བསྙེན་གྱི་སྡེ་ཚན་དང་། དགེ་བསྙེན་མའི་སྡེ་ཚན་དེ་དག་ནི་སངས་རྒྱས་འབྱུང་བ་དང་ཕྲད་པར་འགྱུར། དམ་པའི་ཆོས་ལ་ཡང་ནན་
ཏན་དུ་སྒྲུབ་པར་འགྱུར་མོད་ཀྱི། འོན་ཀྱང་མཐོང་ན་དགའ་བ་དྲི་ཟའི་རྒྱལ་པོ་ངའི་ཉན་ཐོས་ཀྱི་ཚིག་ལ་ཡིད་ཆེས་པའི་སེམས་ཅན་དེ་དག་ནི་ཉུང་སྟེ། ཤིན་ཏུ་ཕལ་ཆེར་ནི་མོས་པར་མི་འགྱུར་རོ། །མཐོང་ན་དགའ་བ་དྲི་ཟའི་རྒྱལ་པོ་རྣམ་པ་བཞི་དང་ལྡན་ན་ངའི་ཉན་ཐོས་དེ་བཞིན་གཤེགས་པ་དང་མིང་
འཐུན་པའི་དགེ་སློང་གི་ཚིག་ལ་ཡིད་ཆེས་པར་འགྱུར་ཏེ། བཞི་གང་ཞེ་ན། སྔོན་གྱི་མཐར་ཡང་ཡང་དག་པར་རྫོགས་པའི་སངས་རྒྱས་སྔ་མ་རྣམས་ལས་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་འདི་ཐོས་པ་དང་། དགེ་བའི་བཤེས་གཉེན་གྱིས་ཡོངས་སུ་གཟུང་བ་དང་།
ལྷག་པའི་བསམ་པ་ལ་ཞུགས་ཤིང་དགེ་བའི་རྩ་བ་ཉེ་བར་བརྟན་པ་དང་། རྒྱ་ཆེན་པོ་ལ་མོས་པ་ལུས་ཀྱིས་མངོན་སུམ་དུ་བྱས་པ་སྟེ། མཐོང་ན་དགའ་བ་དྲི་ཟའི་རྒྱལ་པོ་རྣམ་པ་བཞི་པོ་དེ་དག་གིས་ན་ངའི་ཉན་ཐོས་ཀྱི་ཚིག་ལ་ཡིད་ཆེས་པར་འགྱུར་རོ། །གང་དག་ཡིད་མི་ཆེས་པ་དེ་དག་ཐམས་ཅད་
ནི་བདུད་ཀྱིས་བྱིན་གྱིས་བརླབས་པའི་མི་གཏི་མུག་ཅན་ཡིན་པར་རིག་པར་བྱའོ། །སེམས་ཅན་གང་དག་མོས་པར་འགྱུར་བ་དེ་དག་ནི་སངས་རྒྱས་མང་པོས་ཡོངས་སུ་གཟུང་བ་ཡིན་པར་རིག་པར་བྱའོ། །ཀྱེ་མ་མ་འོངས་པའི་སེམས་ཅན་རྣམས་ནི་སངས་རྒྱས་འབྱུང་བ་ཐམས་ཅད་དང་ཕྲད་པར་འགྱུར་
རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དང་མིང་འཐུན་པའི་དགེ་སློང་སངས་རྒྱས་མང་པོས་ཡོངས་སུ་གཟུང་བ་ནི་འཁོར་ཤིན་ཏུ་རྣམ་པར་དག་པ་དང་། དགེ་སློང་གི་ཚོགས་དང་། དགེ་སློང་མའི་ཚོགས་དང་ལྡན་པའི་ཕྱིར་རོ། །གང་དག་ངའི་ཚིག་ལ་མངོན་པར་ཡིད་ཆེས་པ་དེ་དག་ནི་རྡོ་རྗེའི་

རང་བཞིན་ཡིན་པར་རིག་པར་བྱའོ། །མཐོང་ན་དགའ་བ་དྲི་ཟའི་རྒྱལ་པོ་གཞན་ཡང་དེ་བཞིན་གཤེགས་པ་དང་མིང་འཐུན་པའི་དགེ་སློང་གི་ཆེ་བ་ཉིད་ལ་ལྟོས། གང་གི་ཕྱིར་དགེ་སློང་དེ་ནི་དེ་བཞིན་གཤེགས་པ་ཀླུའི་རིགས་སྒྲོན་མའི་ཐད་དུ་དམ་བཅས་ཤིང་སྨོན་ལམ་བཏབ་ལ།
བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་ཡང་དམ་པའི་ཆོས་བསྲུང་བའི་ཕྱིར་བདག་གི་སྲོག་ཡོངས་སུ་བཏང་ངོ་། །ཞེས་བྱས་ནས་དམ་པའི་ཆོས་ཀྱི་སྒྲ་ལན་གསུམ་དུ་མངོན་པར་བསྒྲགས་པས་ན་འདས་པའི་དུས་ན་ཡང་ངའི་ཉན་ཐོས་དཀའ་བ་བྱེད་བྱེད་པ་ཡིན་ལ་ད་ལྟར་ཡང་དཀའ་བ་བྱེད་པ་ཡིན་
ནོ། །རྒྱལ་པོ་བརྩོན་འགྲུས་ཆེན་པོའི་ཀླུ་དེ་ནི་ད་ལྟར་ལིད་ཙ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་ཡིན་ནོ། །ལིད་ཙ་བཱིའི་བུ་འདི་ནི་དེ་བཞིན་གཤེགས་པ་དང་མིང་འཐུན་པའི་དགེ་སློང་དུ་འགྱུར་བར་རིག་པར་བྱའོ། །མཐོང་ན་དགའ་བ་དྲི་ཟའི་རྒྱལ་པོ་གཞན་ཡང་དེ་བཞིན་
གཤེགས་པ་དང་མིང་འཐུན་པའི་དགེ་སློང་གི་ཆེ་བ་ཉིད་རྣམ་པར་དག་པ་ལ་ལྟོས། དགེ་སློང་དེ་ལ་སེམས་ཅན་གང་དག་གིས་བསྙེན་བཀུར་བྱས་པ་དེ་དག་གིས་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་བསྐལ་པ་གྲངས་མེད་པར་བསྙེན་བཀུར་བྱས་
པ་ཡིན་ནོ། །སེམས་ཅན་གང་དག་གིས་དགེ་སློང་འདོད་པ་དེ་ལ་བཀུར་སྟིར་བྱ་བ་དང་། བླ་མ་ལ་རིམ་གྲོ་བྱ་བས་རྟག་ཏུ་མཆོད་པ་བྱེད་པ་དེ་དག་གིས་ནི་དེ་བཞིན་གཤེགས་པ་ཐམས་ཅད་ལ་མཆོད་པ་བྱས་པ་ཡིན་ནོ། །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་
གིས་རང་གི་སྲོག་གི་བསམ་པ་ཡོངས་སུ་བཏང་སྟེ། དགེ་སློང་འདོད་པ་དེའི་ཐད་དུ་ངན་ངོན་གྱིས་ཆོག་པར་འཛིན་ཅིང་གནས་པར་བྱེད་པ་དེ་དག་གིས་ནི་དེ་བཞིན་གཤེགས་པ་ཐམས་ཅད་ལ་བླ་མ་ལ་ཤིན་ཏུ་རིམ་གྲོར་བྱ་བ་ཕུལ་བ་ཡིན་ནོ། །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་
བསྙེན་མ་གང་དག་དགེ་སློང་འདོད་པ་དེས་བསྒོ་བ་བཞིན་བྱེད་པ་དེ་དག་གིས་ནི་དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་དུ་བྱས་པ་ཡིན་ནོ། །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་གིས་སྡང་བ་མེད་པའི་སེམས་ཀྱིས་དགེ་སློང་དེ་ལས་དམ་པའི་

ཆོས་བཤད་པ་དང་། མཉན་པ་དང་། འབེལ་བའི་གཏམ་གྱི་ཁུར་བླངས་ནས་སྟོན་པར་བྱེད་པ་དེ་ནི་ཐབས་ཀྱི་སྲས་བསླབ་པ་ལ་གུས་པ་སྒྲ་གཅན་ཟིན་དང་འདྲ་བར་བལྟ་བར་བྱའོ། །དགེ་སློང་གིས་ལུང་བསྟན་པ་འདི་ཐོས་ནས་སེམས་ཅན་བསོད་ནམས་ཆུང་བ་དགེ་སློང་དང་། དགེ་སློང་མ་དང་།
དགེ་བསྙེན་དང་། དགེ་བསྙེན་མ་རྣམས་འདི་སྙམ་དུ་སེམས་བསྐྱེད་པར་འགྱུར་ཏེ། ཀྱེ་མ་དགེ་སློང་ལྟར་བཅོས་པ་དེ་བཞིན་གཤེགས་པ་དང་མིང་འཐུན་པའི་དགེ་སློང་འདིས་ནི་སྤྲིན་ཆེན་པོའི་མདོ་སངས་རྒྱས་ཀྱིས་མ་གསུངས་པར་བདག་ཉིད་ཀྱིས་བྱས་ནས་བདག་ཉིད་ལུང་བསྟན་པ་ཡང་བཅུག་སྟེ།
སངས་རྒྱས་ཀྱིས་མ་གསུངས་པར་རང་བཟོའི་བསླབ་པའི་གཞི་ཐ་དད་པ་བདག་ཉིད་ཀྱིས་བསྟན་པ་འཆད་པར་བྱེད་དོ། །ཚེ་དང་ལྡན་པ་དག་ད་དགེ་སློང་འདི་ཕྱིན་ཅི་ལོག་ཏུ་གྱུར་ཏེ། ཚེ་དང་ལྡན་པ་དག་འོ་བུ་ཅག་ནི་བྲན་ཕོ་དང་། བྲན་མོ་དང་། བ་ལང་དང་། མ་ཧེ་ལ་སོགས་པ་ཡོངས་སུ་
འཛིན་པ་ཡིན་ནོ་ཞེའོ། །དེས་ནི་ཁྱེད་དང་བདག་ཅག་སྤངས་པ་ཡིན་ནོ། །དགེ་སློང་ཕྱིན་ཅི་ལོག་ཏུ་གྱུར་པ་འདིའི་ཚིག་གིས་ན་འོ་བུ་ཅག་གིས་སྲོག་དང་བསྡོས་ཏེ། འདིའི་ཕྱོགས་བླངས་ནས་ཁྱེད་དང་བདག་ཅག་གིས་ཀྱང་མཆོག་ཏུ་དཀའ་བ་བྱེད་པར་འགྱུར་སྐད་ལོ། །འདི་ལ་ཅི་བྱས་པ་དང་།
ཅི་བྱིན་པའི་རྣམས་ནི་ཚེ་འདི་དང་། ཚེ་ཕྱི་མ་ལ་བདག་ཅག་གིས་ཉམས་སུ་མྱོང་བར་འགྱུར་བ་ཙམ་ཚོད་ན་ཇི་ལྟར་བྱ་ཞེས་སྟིང་ཞིང་ལྐོག་ཏུ་སོང་ནས་ཕན་ཚུན་དབྱེན་བྱེད་པར་འགྱུར་ཏེ། སེམས་ཅན་དེ་དག་ནི་མུན་པའི་དབང་དུ་གྱུར་ཅིང་བསོད་ནམས་ཆུང་བ་ཡིན་པར་རིག་པར་བྱའོ། །མཐོང་ན་དགའ་བ་
དྲི་ཟའི་རྒྱལ་པོ་སྤྲིན་ཆེན་པོའི་མདོ་རྟོགས་པར་དཀའ་བ་ལ་ལྟོས། སེམས་ཅན་གང་དག་དགེ་བའི་རྩ་བ་བྱས་པ་དང་། བྱང་ཆུབ་སེམས་དཔའི་ཐབས་ལ་བརྟེན་པའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དག་ངའི་ཉན་ཐོས་ཀྱི་ལུང་བསྟན་པ་ཐོས་ན་འདི་ལྟར་སེམས་བསྐྱེད་
དེ། ཀྱེ་མ་དགེ་སློང་མཁས་པ་འདི་གལ་ཏེ་བྱང་ཆུབ་སེམས་དཔའ་མ་ཡིན་དུ་ཟིན་ན་སྐྱེ་བོ་ཕལ་པས་རྒྱ་མཚོ་ཆེན་པོ་འདི་ལྟ་བུ་དཀྲུག་པར་ག་ལ་ནུས། ཚེ་དང་ལྡན་པ་དག་ཁྱེད་དང་བདག་ཅག་དེའི་གཏམ་ཟླར་གྱུར་ན་ནི་བདག་ཅག་གིས་སྐྱེས་པ་དང་། འཚོ་བ་དང་། རབ་ཏུ་བྱུང་བའི་འབྲས་བུ་རྙེད་པ་ལེགས་པར་

རྙེད་དོ། །དེ་ནི་སའི་སྟེང་དུ་གྲགས་པའི་དེ་བཞིན་གཤེགས་པའི་ཞབས་ཀྱི་དྲུང་ནས་ལུང་བསྟན་པ་ཐོབ་ཅིང་། ལྷའི་མིག་གིས་ལེགས་པར་མཐོང་བའི་ཆོས་ཐོབ་པ་ཡིན་ནོ་ཞེས་གྲག་པས་བདག་ཅག་གིས་སྲོག་གི་བསམ་པ་ཡོངས་སུ་བཏང་ལ། འདི་བདག་ཅག་ལ་སྟོན་པའི་
སློབ་དཔོན་དུ་བྱ་སྟེ། ཆོས་བསྟན་པ་གཟུང་བའི་རིགས་སོ། །བདག་ཅག་བཞི་ཡང་རུང་། གསུམ་ཡང་རུང་སྟེ། སློབ་དཔོན་གྱི་གྲོགས་བྱའོ། །ཚེ་དང་ལྡན་པ་དག་དམ་པའི་ཆོས་དབྱུང་བའི་ཕྱིར་ནི་སྲོག་ཡོངས་སུ་གཏང་ཡང་སླའོ་ཞེས་ཟེར་རོ། །མཐོང་ན་དགའ་བ་དྲི་ཟའི་རྒྱལ་པོ་དེའི་ཚེ་དམ་
པའི་ཆོས་ལ་དགའ་བའི་རིགས་ཀྱི་བུ་དེ་དག་ལ་ཀུན་ཏུ་བསྲུང་བར་གྱིས་ཤིག །རིགས་ཀྱི་བུ་གང་དག་ཆོས་འདོད་པ་དང་། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མང་པོ་ཡང་རུང་། གཉིས་ཀྱང་རུང་། གཅིག་ཀྱང་རུང་སྟེ། ངའི་ཉན་ཐོས་ལུང་བསྟན་པ་ཐོས་
ནས་ངའི་ཉན་ཐོས་ཆོས་སྟོན་པའི་ཕྱོགས་བྱ་བའི་ཕྱིར་འཁོད་པའི་སེམས་ཅན་དེ་དག་ནི་དེ་བཞིན་གཤེགས་པ་ཐམས་ཅད་ཀྱི་སྤྱོད་པ་ཐམས་ཅད་ཀྱི་ཕྱོགས་དང་། དམ་པའི་ཆོས་འཛུགས་པ་ཡིན་ནོ། །སེམས་ཅན་དེ་དག་ནི་ལྷ་མ་ཡིན་གྱི་དབང་པོའི་ཡུལ་མ་ཡིན་པའི་ལུས་དང་། བསམ་གྱིས་མི་ཁྱབ་པའི་
ལུས་དང་ལྡན་ཞིང་གཟུགས་ཐམས་ཅད་ཡང་དག་པར་མཐོང་བ་ཡིན་ནོ། །མཐོང་ན་དགའ་བ་དྲི་ཟའི་རྒྱལ་པོ་གཞན་ཡང་ངའི་ཉན་ཐོས་དེ་བཞིན་གཤེགས་པ་དང་མིང་འཐུན་པའི་དགེ་སློང་ཆོས་ཀྱི་སྒྲ་ཆེན་པོ་ལན་གསུམ་མངོན་པར་བསྒྲགས་ནས་འཆི་བའི་དུས་བྱེད་པར་འགྱུར་བའི་ཆེ་བ་ཉིད་ལ་ལྟོས། མཐོང་
ན་དགའ་བ་དྲི་ཟའི་རྒྱལ་པོ་དེའི་ཚེ་ངའི་དམ་པའི་ཆོས་ཀྱི་ཕྱོགས་ནུབ་པར་འགྱུར་རོ། །དེ་ནི་མཐའ་མར་འབྱུང་བར་འགྱུར་ལ། དེ་དང་འདྲ་བའི་སེམས་ཅན་གཞན་མེད་དེ་མི་སྲིད་དོ། །གསོལ་པ་བཅོམ་ལྡན་འདས་དགེ་སློང་དེ་འདི་ནས་ཤི་འཕོས་ནས་གང་དུ་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་
སྩལ་པ། མཐོང་ན་དགའ་བ་དྲི་ཟའི་རྒྱལ་པོ་ངའི་ཉན་ཐོས་དེ་ནི་འདི་ནས་ཤི་འཕོས་ནས་སངས་རྒྱས་སུ་འགྱུར་རོ། །གསོལ་པ། བཅོམ་ལྡན་འདས་སེམས་ཅན་ཐམས་ཅད་ལ་སྨན་པའི་སླད་དུ་བཤད་དུ་གསོལ། བཀའ་སྩལ་པ། རིགས་ཀྱི་བུ་ལེགས་སོ། །ལེགས་སོ། །རིགས་ཀྱི་

བུ་ཁྱོད་ལེགས་ཀྱིས་རིགས་ཀྱི་བུ་ངའི་ཉན་ཐོས་ཀྱི་ཆེ་བ་ཉིད་ཉོན་ཅིག །རིགས་ཀྱི་བུ་བསྐལ་པ་བཟང་པོ་འདི་འདས་ཏེ། སངས་རྒྱས་སྟོང་ཡོངས་སུ་མྱ་ངན་ལས་འདས་པའི་འོག་ཏུ་བསྐལ་པ་དྲུག་ཅུ་རྩ་གཉིས་སུ་སངས་རྒྱས་འབྱུང་བར་མི་འགྱུར་ཏེ། རང་སངས་རྒྱས་བྱེ་བ་ཕྲག་འབུམ་འབྱུང་བར་འགྱུར་
རོ། །རིགས་ཀྱི་བུ་བསྐལ་པ་དྲུག་ཅུ་རྩ་གཉིས་པོ་དེ་དག་འདས་ནས་སངས་རྒྱས་གཞན་བདུན་འབྱུང་བར་འགྱུར་རོ། །དེ་ནས་བདུན་པ་ཡོངས་སུ་མྱ་ངན་ལས་འདས་པ་དེའི་ཚེ་དེའི་དུས་ན་འཇིག་རྟེན་གྱི་ཁམས་འདི་འཇིག་རྟེན་གྱི་ཁམས་མངོན་པར་དང་བ་ཞེས་བྱ་བར་འགྱུར་ཏེ། འཇིག་རྟེན་གྱི་ཁམས་མངོན་
པར་དང་བ་དེར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། །དེ་བཞིན་གཤེགས་པ་དེའི་སངས་རྒྱས་ཀྱི་ཞིང་ན་སེམས་ཅན་འཁོད་པ་དེ་དག་ཐམས་ཅད་མཛེས་པར་འགྱུར་ཞིང་དང་བ་ཐོབ་པར་འགྱུར་རོ། །
གང་དག་དམ་པའི་ཆོས་ཀྱི་ཕྱོགས་བྱེད་པ་དང་། དམ་པའི་ཆོས་འབྱུང་བར་བྱེད་པ་དེ་དག་ཐམས་ཅད་ཀྱང་དེའི་ཚེ་འཇིག་རྟེན་གྱི་ཁམས་མངོན་པར་དང་བ་དེར་སྐྱེ་བར་འགྱུར་རོ། །དེར་སྐྱེས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་འོད་དེའི་ཉན་ཐོས་ཀྱི་མཆོག་ཏུ་འགྱུར་ཏེ།
དེ་དག་ཐམས་ཅད་ཀྱང་བྱང་ཆུབ་སེམས་དཔའ་མི་མཆོག་ཏུ་འགྱུར་རོ། །དེ་ན་སེམས་ཅན་སུ་ལ་ཡང་འདོད་ཆགས་ཀྱི་སེམས་ཀུན་ནས་ལྡང་བ་འབྱུང་བར་མི་འགྱུར་རོ། །ཞེ་སྡང་གི་སེམས་ཀུན་ནས་ལྡང་བ་འབྱུང་བར་མི་འགྱུར་རོ། །གཏི་མུག་གི་སེམས་ཀུན་ནས་ལྡང་བ་འབྱུང་བར་མི་འགྱུར་
རོ། །སེམས་ཅན་དེ་དག་ཐམས་ཅད་ཀྱང་ཆོས་ལ་དད་པ་ཐོབ་ཅིང་ཆོས་སྤྱོད་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཀྱི་ཚེའི་ཚད་ནི་བར་གྱི་བསྐལ་པ་བཅྭ་ལྔར་འགྱུར་རོ། །སེམས་ཅན་རྣམས་ཀྱང་ཐེག་པ་གསུམ་
གྱིས་ངེས་པར་འབྱུང་བར་འགྱུར་རོ། །དེ་ན་བྱང་ཆུབ་སེམས་དཔའ་རྣམས་ཀྱང་ཚད་མེད་དེ། རིགས་ཀྱི་བུ་དེའི་ཚེ་དེའི་དུས་ན་བདུད་དང་བདུད་ཀྱི་རིས་ཀྱི་ལྷ་འབྱུང་བ་གང་ཡིན་པ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་ཞུགས་པར་འགྱུར་ཏེ། སེམས་ཅན་ལ་སྙིང་བརྩེ་བར་གནས་སོ། །

སངས་རྒྱས་ཀྱི་ཞིང་དེ་ན་ངན་སོང་གསུམ་ཡང་མེད་དོ། །མི་ཁོམ་པ་བརྒྱད་ཀྱང་མེད་དེ་རྟག་ཏུ་བརྒྱན་པར་འགྱུར་ལ། བྱང་གི་སྒྲ་མི་སྙན་གྱི་གླིང་དང་འདྲའོ། །སངས་རྒྱས་ཀྱི་ཞིང་དེར་བདུད་དང་ཕྱིར་རྒོལ་བ་ཡང་བཅོམ་པར་འགྱུར་རོ། །ལྟ་བ་ཐམས་ཅད་ཀྱང་མེད་དོ། །བཅོམ་
ལྡན་འདས་ཡོངས་སུ་མྱ་ངན་ལས་འདས་ནས་ཀྱང་བདེ་བར་གཤེགས་པས་གསུངས་པའི་དམ་པའི་ཆོས་ལོ་བྱེ་བ་ཕྲག་སྟོང་དུ་གནས་པར་འགྱུར་རོ། །དེ་ནས་དེའི་ཚེ་འཁོར་ཆེན་པོའི་ནང་ནས་ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དུ་མས་དེ་བཞིན་གཤེགས་པ་
ལ་མེ་ཏོག་སིལ་མས་གཏོར་ཏོ། །སིལ་སྙན་ཀྱང་དཀྲོལ་ཏོ། །ཙན་དན་གྱི་ཕྱེ་མ་དང་། བྱུག་པ་དག་གིས་ཀྱང་གཏོར་ཏོ། །ཉན་ཐོས་ཆེན་པོ་དེ་དག་གིས་རང་རང་གི་བླ་གོས་དེ་བཞིན་གཤེགས་པའི་སྐུ་ལ་གསོལ་ཏོ། །བྱང་ཆུབ་སེམས་དཔའ་དེ་དག་གིས་ཀྱང་མེ་ཏོག་གི་རིམ་པ་རི་རབ་ཙམ་དང་།
མེ་ཏོག་དང་། ཕྲེང་བ་དང་། ཕྱེ་མ་དང་། སྤོས་དང་། བྱུག་པ་དག་གིས་བཅོམ་ལྡན་འདས་ལ་བསམ་གྱིས་མི་ཁྱབ་པའི་མཆོད་པའི་ལས་བྱས་ནས་དེ་བཞིན་གཤེགས་པ་ཡེ་ཤེས་འབྱུང་གནས་འོད་དེའི་བྱང་ཆུབ་སེམས་དཔའི་སྤྱོད་པ་ལ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་བྱང་
ཆུབ་སེམས་དཔའ་སྤྲིན་ཆེན་སྙིང་པོས་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་འདི་མ་འོངས་པའི་སེམས་ཅན་བསོད་ནམས་ཆུང་ངུ་རྣམས་ལ་སངས་རྒྱས་མང་པོ་འབྱུང་བར་བགྱིད་ཅིང་། དགེ་བའི་རྩ་བ་ཚུལ་བཞིན་དུ་བགྱིས་པའི་
སེམས་ཅན་རྣམས་ལུང་བསྟན་པས་ལུང་སྟོན་པར་བགྱིད་པ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་མ་འོངས་པའི་སེམས་ཅན་རྣམས་བསོད་ནམས་ཆུང་ཞེས་དེ་སྐད་མ་ཟེར་ཅིག །དེ་ཅིའི་ཕྱིར་ཞེ་ན། སྤྲིན་ཆེན་སྙིང་པོ་སངས་རྒྱས་འབྱུང་བ་ནི་དཀོན་ནོ། །སྤྲིན་
ཆེན་པོའི་མདོ་འདི་ནི་དེ་བས་ཀྱང་ཆེས་དཀོན་ནོ། །སྤྲིན་ཆེན་པོའི་མདོ་འདི་ལས་ཏིང་ངེ་འཛིན་ནམ། གཟུངས་སམ། ཚིགས་སུ་བཅད་པ་གང་ཡང་རུང་བའི་ཚིག་གི་ཕྱེད་ཐོས་ནས་ཡིད་ཆེས་པར་བྱེད་པ་གང་ཡིན་པའི་སེམས་ཅན་དེ་དག་ཀྱང་ཆེས་དཀོན་པ་ཡིན་ནོ་ཞེས་ང་སྨྲ་སྟེ། དེ་བས་ན་མ་འོངས་

པའི་སེམས་ཅན་རྣམས་ནི་བསོད་ནམས་ཆུང་བ་མ་ཡིན་ནོ་ཞེས་ང་སྨྲའོ། །སྤྲིན་ཆེན་སྙིང་པོ་གཞན་ཡང་མ་འོངས་པའི་སེམས་ཅན་གང་དག་སྤྲིན་ཆེན་པོའི་མདོ་འདི་ལས་ཚིགས་སུ་བཅད་པའམ། ཚིག་གི་ཕྱེད་ཐོས་ན་ཡིད་ཆེས་པར་བྱེད་པའི་སེམས་ཅན་དེ་དག་ལས་གུད་ན་ཆེས་དཀོན་པ་མེད་དོ་ཞེས་ང་
སྨྲའོ། །གསོལ་པ་བཅོམ་ལྡན་འདས་དེ་བཞིན་གཤེགས་པས་ཅི་ལ་དགོངས་ཏེ་དེ་སྐད་བཀའ་སྩལ། བཀའ་སྩལ་པ། དེ་བཞིན་གཤེགས་པའི་གསུངས་པའི་མདོ་ལས་ཚིག་གམ། ཚིག་གི་ཕྱེད་ལ་ཡང་ཡིད་ཆེས་པར་བྱེད་པ་གང་ཡིན་པ་དེ་དག་ལས་གུད་ན་ཆེས་དཀོན་པ་མེད་དོ། །ཞེས་ང་སྨྲ་བ་
དེ་ལ་ཐེ་ཙོམ་མེད་དོ། །དེ་ཅིའི་ཕྱིར་ཞེ་ན། སྤྲིན་ཆེན་པོའི་མདོ་འདིའི་ཏིང་ངེ་འཛིན་ནམ། གཟུངས་སམ། ཆོས་ཀྱི་སྒོ་གང་ཡང་རུང་བ་ལ་ང་ལ་བྱས་པ་གཟོ་བ་རྣམས་ལ་ཡང་དག་པའི་དོན་ལུང་བསྟན་པས་ལུང་བསྟན་ཏེ། དེ་བཞིན་གཤེགས་པས་ལུང་བསྟན་པ་ཐོབ་པའི་སེམས་ཅན་
རྣམས་ནི་ཀྱེ་མ་དགེ་བའི་རྩ་བ་བྱས་པ་ཡིན་ནོ་སྙམ་དུ་འཛིན་ཅིང་ཡིད་ཆེས་པར་བྱེད་པ་མ་འོངས་པའི་སེམས་ཅན་དེ་དག་ནི་ཤིན་ཏུ་ཆེས་དཀོན་པ་ཡིན་པར་ང་སྨྲ་སྟེ། སྤྲིན་ཆེན་སྙིང་པོ་དེ་ལས་དགོངས་ནས་མ་འོངས་པའི་སེམས་ཅན་རྣམས་བསོད་ནམས་ཆུང་བ་མ་ཡིན་ནོ་ཞེས་ང་སྨྲའོ། །གསོལ་པ་བཅོམ་ལྡན་
འདས་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའི་བསོད་ནམས་མི་ཟད་པ་ཉན་ཐོས་དང་རང་སངས་རྒྱས་ཐམས་ཅད་ཀྱིས་གཏིང་དཔག་པར་མི་ནུས་པ་ནི་ཀྱེ་མ་ངོ་མཚར་ཏོ། །བཀའ་སྩལ་པ། སྤྲིན་ཆེན་སྙིང་པོ་དེ་དེ་བཞིན་ཏེ། ཏིང་ངེ་འཛིན་འདི་ལ་གནས་
པའི་བྱང་ཆུབ་སེམས་དཔའི་བསོད་ནམས་མི་ཟད་པ་ཤེས་པ་འམ་ཚད་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། སྤྲིན་ཆེན་སྙིང་པོ་དཔེར་ན་རྒྱ་མཚོ་ཆེན་པོའི་ཆུའི་ནང་དུ་ཆུ་བབ་པ་ཟད་པར་མི་འགྱུར་བའི་གཏིང་དཔག་པར་ནུས་སམ། གསོལ་པ་བཅོམ་ལྡན་འདས་དེ་ནི་དེ་ལྟ་མ་ལགས་ཏེ་ནུས་པར་
མི་འགྱུར་རོ། །སྤྲིན་ཆེན་སྙིང་པོ་སྤྲིན་ཆེན་པོའི་མདོའི་ཆུ་འབབ་པ་དེའི་གཏིང་ཡང་དཔག་པར་མི་ནུས་ལ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའི་བསོད་ནམས་མི་ཟད་པའི་གཏིང་ཡང་དཔག་པར་མི་ནུས་སོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་

སེམས་དཔའ་སེམས་དཔའ་ཆེན་པོ་ནི་རྐང་པའི་མཐེ་བོའི་བ་སྤུ་གཅིག་གིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དཀྲིས་ཏེ། འཇིག་རྟེན་གྱི་ཁམས་དཀྲིགས་ཕྲག་མཐའ་ཡས་པ་བཟླས་ནས་འཕེན་པར་བྱེད་དེ། དེ་ལྟ་བུའི་བྱ་བ་ཀུན་ཏུ་སྟོན་ཀྱང་སེམས་ཅན་སུ་
ལ་ཡང་གནོད་པར་མི་འགྱུར་ལ། སེམས་ཅན་དེ་དག་གིས་ཀྱང་མི་ཤེས་མི་མཐོང་ངོ་། །སེམས་ཅན་གཞན་དག་གིས་ནི་བྱ་བ་དེ་ལྟ་བུ་བསྟན་པར་ཤེས་ཤིང་མཐོང་ངོ་། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འཇིག་རྟེན་གྱི་
ཁམས་གང་གཱའི་ཀླུང་གི་བྱེ་མ་སྙེད་དག་ཁབ་ཀྱི་རྩེ་མོས་རྒྱ་ཤུག་གི་ལོ་མ་སྟེང་གི་ཕྱོགས་སུ་འདོར་བ་བཞིན་དུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་དཀྲིགས་ཕྲག་མཐའ་ཡས་པ་བཟླས་ནས་གྱེན་དུ་འདོར་བར་བྱེད་དེ། འོན་ཀྱང་སེམས་ཅན་སུ་ལ་ཡང་གནོད་པར་མི་འགྱུར་ཏེ། སེམས་ཅན་དེ་
དག་གིས་ཀྱང་བདག་ཅག་གར་ཁྱེར་བ་དང་། བདག་ཅག་གར་སོང་བ་ཡང་མི་ཤེས་མི་མཐོང་ངོ་། །ཕྱིར་ཡང་ཁྱེར་ཏེ་འོངས་ནས་སྔ་མའི་གནས་སུ་བཞག་ཀྱང་འགྲོ་བ་དང་འོང་བར་ཡང་མི་མངོན་ལ། སེམས་ཅན་གཞན་དག་གིས་ནི་འདི་ནི་བྱང་ཆུབ་སེམས་དཔའི་རྣམ་པར་འཕྲུལ་པ་ཡིན་ནོ་
ཞེས་ཤེས་ཤིང་མཐོང་ངོ་། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཁབ་ཀྱི་རྩེ་མོས་རྒྱ་ཤུག་གི་ལོ་མ་ལ་བྱ་བ་བཞིན་དུ་ཕྱོགས་དགུར་འཇིག་རྟེན་གྱི་ཁམས་དེ་ལྟར་གྱེན་དུ་བོར་ནས་འཇིག་རྟེན་གྱི་ཁམས་ལྷག་མ་གཅིག་གི་
ནང་དུ་འཇིག་རྟེན་གྱི་ཁམས་ཐམས་ཅད་ཆུད་པར་བྱེད་ཀྱང་སེམས་ཅན་སུ་ལ་ཡང་གནོད་པར་མི་འགྱུར་ལ་སེམས་ཅན་དེ་དག་གིས་ཀྱང་བདག་ཅག་གར་ཁྱེར་བ་དང་། བདག་ཅག་གར་སོང་བ་ཡང་མི་ཤེས་མི་མཐོང་ངོ་། །ཕྱིར་ཡང་ཁྱེར་ཏེ་འོངས་ནས་སྔ་མའི་གནས་སུ་བཞག་ཀྱང་འགྲོ་བ་
དང་། འོང་བར་ཡང་མི་མངོན་ལ། སེམས་ཅན་གཞན་དག་གིས་ནི་བྱ་བ་དེ་ལྟ་བུ་བསྟན་པར་ཤེས་ཤིང་མཐོང་ངོ་། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་འཇིག་

རྟེན་གྱི་ཁམས་གཅིག་གི་ནང་དུ་བརྟུལ་ནས་སྲན་ཆུང་གི་འབྲུ་གཅིག་གི་ནང་དུ་ཆུད་པར་བྱེད་དེ་འོན་ཀྱང་སེམས་ཅན་སུ་ལ་ཡང་གནོད་པར་མི་འགྱུར་ལ། སེམས་ཅན་དེ་དག་གིས་ཀྱང་བདག་ཅག་གང་དུ་ཁྱེར་བ་དང་། གང་དུ་སོང་བ་དང་། གང་དུ་བཅུག་པ་མི་ཤེས་མི་མཐོང་ངོ་། །སེམས་ཅན་གཞན་དག་
གིས་ནི་ཤེས་ཤིང་མཐོང་སྟེ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུལ་བའི་དབང་གིས་བྱ་བ་དེ་ལྟ་བུ་དག་སྟོན་པར་བྱེད་དོ། །བྱང་ཆུབ་སེམས་དཔའ་སྤྲིན་ཆེན་སྙིང་པོས་གསོལ་པ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་
དཔའ་ཆེན་པོའི་བཀོད་པའི་གཙོ་བོ་ནི་བཅོམ་ལྡན་འདས་ཀྱིས་བཀའ་སྩལ་པ་ཏིང་ངེ་འཛིན་འདིའི་བསོད་ནམས་བགྱི་བའི་དངོས་པོའི་ཆེ་བ་ཉིད་ཀྱི་བསོད་ནམས་ཀྱི་ཕུང་པོ་ཇི་ཙམ་མཆིས་པ་ཡང་སེམས་ཅན་རྣམས་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་
པོ་ལེགས་སོ་ལེགས་སོ། །སྤྲིན་ཆེན་སྙིང་པོ་ཁྱོད་ལེགས་ཀྱིས་ཏིང་ངེ་འཛིན་འདིའི་རྒྱུ་ལས་བྱུང་བའི་བསོད་ནམས་བྱ་བའི་དངོས་པོ་དེ་དཔེ་ཙམ་དུ་བསྟན་པར་བྱ་སྟེ། རིགས་ཀྱི་བུ་དཔེར་ན་ཆུ་ཀླུང་ཆེན་པོ་དང་། འབབ་ཆུ་དང་། མཚེའུ་དང་། མཚོ་བྲན་དང་། ཆུ་བྲན་ཐམས་ཅད་ནི་རྒྱ་མཚོ་
ཆེན་པོའི་ཁོངས་སུ་གཏོགས་ཤིང་དེའི་ནང་དུ་འདུས་སོ། །སྤྲིན་ཆེན་སྙིང་པོ་དེ་བཞིན་དུ་མདོ་འདི་ལས་གཞན་པའི་མདོ་དག་གི་བྱ་བ་གང་ཅི་ཡང་རུང་བ་རྣམས་ནི་ཏིང་ངེ་འཛིན་འདིའི་ཁོངས་སུ་གཏོགས་ཤིང་འདིའི་ནང་དུ་འདུས་པར་བལྟ་བར་བྱའོ། །སྤྲིན་ཆེན་སྙིང་པོ་གཞན་ཡང་མདོ་འདི་ལ་མ་
གཏོགས་པའི་མདོ་དང་། ཏིང་ངེ་འཛིན་དང་། བསོད་ནམས་བྱ་བའི་དངོས་པོ་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་བྱ་བའི་དངོས་པོ་དེ་དག་ཐམས་ཅད་གཅིག་ཏུ་བསྡུས་པ་ནི་དེ་བཞིན་གཤེགས་པ་རྟག་པ་ཉིད་ཀྱི་ཏིང་ངེ་འཛིན་འདི་ཐང་ཅིག་ཙམ་ཐོས་
པའི་བྱང་ཆུབ་ཀྱི་སེམས་ཀྱི་ཁོངས་སུ་གཏོགས་ཤིང་དེའི་ནང་དུ་འདུས་པར་བལྟ་བར་བྱའོ། །སྤྲིན་ཆེན་སྙིང་པོ་དེ་བས་ན་ཐམས་ཅད་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པའི་བསོད་ནམས་འདོད་པའི་སེམས་གཟུང་བར་འདོད་པ་དང་། བླ་ན་མེད་པ་ཡང་དག་པར་རྫོགས་

པའི་བྱང་ཆུབ་མངོན་པར་གཟུང་བར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ནི་ཟབ་མོ་བསྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་འདི་ལ་སེམས་བསྐྱེད་པར་བྱའོ། །དེ་བཞིན་གཤེགས་པའི་རྟག་པ་དང་། ཐེར་ཟུག་པ་དང་། བརྟན་པ་དང་། ཞི་
བའི་ཡོན་ཏན་ཡང་དག་པར་བཤད་པ་ཐོས་ན་སྐྲག་པར་མི་བྱའོ། །དེ་བཞིན་གཤེགས་པའི་རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བ་དང་། བསིལ་བའི་ཡོན་ཏན་ཡང་དག་པར་གཟུང་བར་བྱའོ། །གཞན་དག་ལ་ཡང་རྒྱས་པར་བསྟན་པར་བྱ་སྟེ། ཅི་ནས་བསྟན་པ་ནུབ་
པར་མི་འགྱུར་བར་བརྩོན་པར་བྱའོ། །འདི་ལྟ་སྟེ་དཔེར་ན་འགྲོ་བ་སྲོག་ཆགས་འབྱུང་པོ་གང་ཅི་ཡང་རུང་བ་རྣམས་ཀྱི་རྗེས་སུ་བྱུང་བ་དེ་དག་ཐམས་ཅད་ནི་གླང་པོ་ཆེའི་རྗེས་ཀྱི་ནང་དུ་འདུ་བར་འགྱུར་རོ། །དེ་བཞིན་དུ་མདོ་འདི་ལས་གཞན་པའི་ཏིང་ངེ་འཛིན་ཐམས་ཅད་དང་། བསོད་ནམས་བྱ་བའི་
དངོས་པོ་ཐམས་ཅད་ཀྱང་ཏིང་ངེ་འཛིན་འདིའི་ནང་དུ་འདུ་བར་འགྱུར་བར་རིག་པར་བྱའོ། །སྤྲིན་ཆེན་སྙིང་པོ་གཞན་ཡང་འདི་ལྟ་སྟེ། དཔེར་ན་ལྷུན་པོ་ལ་སོགས་པའི་རིའི་རྒྱལ་པོ་རྣམས་དང་། གཞན་ཡང་རི་ནག་པོ་རྣམས་དང་། རྩྭ་དང་། ཤིང་གེལ་བ་དང་། སྨན་དང་། ཤིང་ཇི་སྙེད་
ཡོད་པ་དང་། འཛམ་བུའི་གླིང་དང་། གླིང་བཞི་དང་བཅས་པའི་འཇིག་རྟེན་གྱི་ཁམས་ཉི་མ་དང་ཟླ་བར་བཅས་པ་དེ་དག་ཐམས་ཅད་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ནང་དུ་འདུས་པར་བལྟ་བར་བྱའོ། །སྤྲིན་ཆེན་སྙིང་པོ་དེ་བཞིན་དུ་སོ་སོའི་སྐྱེ་བོའི་བསོད་ནམས་ཀྱི་རྒྱུན་
ནམ། ཉན་ཐོས་ཀྱི་བསོད་ནམས་ཀྱི་རྒྱུན་ནམ། རང་སངས་རྒྱས་ཀྱི་བསོད་ནམས་ཀྱི་རྒྱུན་ནམ། བྱང་ཆུབ་སེམས་དཔའི་བསོད་ནམས་ཀྱི་རྒྱུན་ནམ། དེ་བཞིན་གཤེགས་པའི་བསོད་ནམས་ཀྱི་རྒྱུན་ནམ། མདོ་དང་ཏིང་ངེ་འཛིན་ཐམས་ཅད་ཀྱི་བསོད་ནམས་ཀྱི་རྒྱུན་ཇི་སྙེད་ཡོད་པ་རྣམས་ནི་ཏིང་
ངེ་འཛིན་འདི་ལ་གནས་པའི་བྱང་ཆུབ་སེམས་དཔས་དེ་བཞིན་གཤེགས་པ་ནི་རྟག་པ་ཡིན་ནོ་ཞེས་སེམས་གཅིག་བསྐྱེད་པའི་ནང་དུ་ཆུད་ཅིང་འདུས་སོ། །འདི་ལྟ་སྟེ། དཔེར་ན་སྟོན་གྱི་དུས་ན་སྤྲིན་མེད་པའི་ནམ་མཁའ་ལས་ཉི་མ་ཤར་ན་ནམ་མཁའ་ལ་དྲི་མར་གྱུར་ཅིང་སྒྲིབ་པའི་རང་བཞིན་ཇི་སྙེད་ཡོད་པ་

དེ་དག་ཐམས་ཅད་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེར་འདུག་གོ། །སྤྲིན་ཆེན་སྙིང་པོ་དེ་བཞིན་དུ་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་འདི་ལས་དེ་བཞིན་གཤེགས་པ་རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བ་དང་། བསྟན་པ་ནུབ་པར་མི་
འགྱུར་བའི་འོད་ཟེར་མཐའ་ཡས་པ་དང་ལྡན་པའི་ཉི་མ་རྟག་པ་ཤར་བ་ན་ལྡེམ་པོ་ངག་གི་ནམ་མཁའ་ལ་ཇི་སྙེད་ཡོད་པ་ཐམས་ཅད་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེར་གསལ་བར་འགྱུར་རོ། །སྤྲིན་ཆེན་སྙིང་པོ་གཞན་ཡང་འདི་ན་མི་ལ་ལ་ཞིག་རླུང་གི་རྒྱལ་པོ་བཞིའི་མཐུ་ཅན། སྟོབས་
དང་ལྡན་པ། ལྷའི་ལོ་བརྒྱ་ཐུབ་པ་ཞིག་བྱུང་ལ་མི་དེ་ཡང་ཉིན་པར་ལམ་དུ་ཞུགས་ཏེ། འཇིག་རྟེན་གྱི་ཁམས་དུ་མར་སོང་ནས་ཕྱིར་རང་གི་གནས་སུ་ལྡོག་པར་བྱེད་ཅིང་ནུབ་མོ་ཡང་ལམ་དུ་ཞུགས་ནས་འཇིག་རྟེན་གྱི་ཁམས་དུ་མ་བསྐོར་ཏེ། ཕྱིར་རང་གི་གནས་སུ་ལྡོག་པར་བྱེད་པ་དེ་ལྟ་བུར་ཉིན་
མཚན་དུ་ལམ་དུ་ཞུགས་པས་ཇི་ཙམ་ཕྱིན་པ་དེ་སྙེད་རིན་པོ་ཆེ་སྣ་བདུན་གྱིས་རང་གི་ལུས་ཀྱི་འཕང་ཙམ་དུ་གང་བར་བྱས་ནས་སྦྱིན་པ་བྱིན་ཏེ། ཐབས་དེ་དག་ལྟ་བུར་བར་ཆད་དང་། སྐྱོན་མ་བྱུང་བར་སྦྱིན་པ་བྱིན་ན་སྤྲིན་ཆེན་སྙིང་པོ་ཅི་གཞི་དེ་ལས་དེ་བསོད་ནམས་མང་དུ་སྐྱེད་དམ། གསོལ་པ།
བཅོམ་ལྡན་འདས་ཚད་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་དེ་ལྟ་བུའི་སྦྱིན་པ་དེ་ལས་བྱུང་བའི་བསོད་ནམས་ཀྱི་ཕུང་པོ་གང་ཡིན་པ་དེ་ནི་ཏིང་ངེ་འཛིན་འདི་ལས་དེ་བཞིན་གཤེགས་པ་རྟག་པའི་ཆེ་བ་ཉིད་ཀྱི་ཡོན་ཏན་ནུབ་པར་མི་འགྱུར་བའི་བསྟན་པ་འཁོར་བཞི་
ལས་གང་ཡང་རུང་བའམ། སྤྱོད་པ་པ་འམ། ཀུན་ཏུ་རྒྱུ་འམ། གཅེར་བུ་པ་ལ་སོགས་པ་ལ་འཆད་ཅིང་སྟོན་པར་བྱེད་དམ། ཡང་ན་འཕྱ་བ་འམ། བསྟིང་བ་འམ། གཞན་གྱི་གཡམ་ལ་བྱ་བ་འམ། འཚོ་བའི་ཐབས་ཀྱི་རྒྱུར་བྱ་བའི་ཕྱིར་རམ། རྙེད་པ་དང་། བཀུར་སྟི་དང་། ཚིགས་སུ་
བཅད་པ་འདོད་པའི་ཕྱིར་དེ་བཞིན་གཤེགས་པ་རྟག་གོ་ཞེས་ཚིག་ཏུ་བརྗོད་པ་ཙམ་གྱིས་བསོད་ནམས་ཀྱི་ཕུང་པོ་གང་ཡིན་པའི་བརྒྱའི་ཆར་ཡང་མི་ཕོད། སྟོང་གི་ཆར་ཡང་མི་ཕོད་པ་ནས་རྒྱུའི་བར་དུ་ཡང་མི་བཟོད་དོ། །སྤྲིན་ཆེན་སྙིང་པོ་འདི་ལྟ་སྟེ། དཔེར་ན་སྨན་གྱི་རྒྱལ་པོ་རྩིའི་སྡོང་བུ་དེའི་

རྩ་བ་ཁྱེར་རམ། ཤུན་པྲགས་སམ། པྲིའམ། ལོ་མ་འམ། མེ་ཏོག་གམ། འབྲས་བུ་འམ། མགོ་ཐོགས་སམ། སྡོང་བུ་འམ། ཡལ་ག་འམ། བུར་མ་འམ། རྩ་བ་དག་ཁྱེར་ཡང་རུང་སྟེ། དེ་འདི་སྙམ་དུ་བདག་གི་རྩ་བ་ཁྱེར་རོ། །བདག་གི་ཤུན་
ཕྲགས་ཁྱེར་རོ། །བདག་གི་པྲི་ཁྱེར་རོ། །བདག་གི་ལོ་མ་ཁྱེར་རོ། །བདག་གི་མེ་ཏོག་ཁྱེར་རོ། །བདག་གི་འབྲས་བུ་ཁྱེར་རོ། །བདག་གི་མགོ་ཐོགས་ཁྱེར་རོ། །བདག་གི་སྡོང་བུ་ཁྱེར་རོ། །བདག་གི་ཡལ་ག་ཁྱེར་རོ། །བདག་གི་བུར་མ་ཁྱེར་རོ། །བདག་གི་རྩ་བ་དག་ཁྱེར་རོ་
སྙམ་དུ་མི་སེམས་སོ། །རྩིའི་སྡོང་བུ་ལ་རྣམ་པར་རྟོག་པ་ཡོང་མེད་དོ་རྣམ་པར་རྟོག་པ་མེད་དུ་ཟིན་ཀྱང་སེམས་ཅན་རབ་འབྲིང་ཐ་མ་ཐམས་ཅད་ལ་འོ་མའམ། ཞོའམ། མར་རམ། འབྲུ་མར་རམ། སྨན་ཅིའང་རུང་བ་དག་དང་སྦྱར་བའམ། སྨན་ཐམས་ཅད་དང་བསྲེས་པའི་འདེ་གུ་འམ།
བཏུང་བ་འམ། ལུས་བསྐུ་བས་ནད་སེལ་བར་བྱེད་དོ། །དེ་བཞིན་དུ་ཏིང་ངེ་འཛིན་འདི་ཉན་པ་ཡང་རྩ་བ་འམ། རྒྱུད་དམ། ཚིགས་སུ་བཅད་པ་འམ། ཚིག་གམ། ཚིག་གི་ཕྱེད་དམ། མིང་ངམ། དེ་བཞིན་གཤེགས་པ་རྟག་གོ་ཞེས་བྱ་བའི་ཡི་གེ་འབྲུ་གཉིས་ཀྱིས་ཉན་པ་ན། དེ་འདི་
སྙམ་དུ་བདག་གིས་རྩ་བ་ལས་ཏིང་ངེ་འཛིན་བཟུང་ངོ་། །རྒྱུད་ལས་བཟུང་ངོ་། །ཚིགས་སུ་བཅད་པ་ལས་བཟུང་ངོ་། །ཚིག་ལས་བཟུང་ངོ་། །ཚིག་ཕྱེད་ལས་བཟུང་ངོ་། །མིང་ལས་བཟུང་ངོ་། །དེ་བཞིན་གཤེགས་པ་རྟག་གོ་ཞེས་བྱ་བའི་ཡི་གེ་འབྲུ་གཉིས་ལས་བཟུང་ངོ་སྙམ་དུ་མི་སེམས་
ཏེ། རྣམ་པར་རྟོག་པ་དེ་དག་མེད་དོ། །རྣམ་པར་རྟོག་པ་མེད་དུ་ཟིན་ཀྱང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལས་གང་ཡང་རུང་བའམ། སྤྱོད་པ་པའམ། ཀུན་ཏུ་རྒྱུའམ། གཅེར་བུ་པ་ལ་སོགས་པའམ། ལུས་ཡོངས་སུ་མ་སྦྱངས་པའམ། ཤེས་
རབ་ཡོངས་སུ་མ་སྦྱངས་པ་འམ། སེམས་ཡོངས་སུ་མ་སྦྱངས་པ་ཡང་རུང་སྟེ། འཕྱ་བའམ། བསྟིང་བའི་ཕྱིར་རམ། རང་གི་ཁ་ནས་བྱུང་ངམ། གཞན་གྱི་གཡམ་ལ་བྱུང་བ་འམ། རྙེད་པ་དང་། བཀུར་སྟི་དང་། ཚིགས་སུ་བཅད་པ་འདོད་པའི་ཕྱིར་ཡང་རུང་སྟེ། མཉན་ཏམ་བཟུང་

ན་དེ་དག་གི་སྡིག་པ་གྲངས་མེད་པ་བྱས་པ་དང་། ལས་དེ་དག་ལུས་འདི་ཉིད་ཀྱི་ཚེ་བྱང་བར་འགྱུར་ལ། འདོད་ཆགས་དང་། ཞེ་སྡང་དང་གཏི་མུག་གི་ཉོན་མོངས་པ་ལ་སོགས་པའི་ནད་འབྱང་བའི་ཕྱིར་ཞུགས་པ་ཡང་མ་ཡིན་ནོ། །སྤྲིན་ཆེན་སྙིང་པོ་དཔེར་ན་ཉི་མ་ཤར་མ་ཐག་ཏུ་ཁ་བ་དང་།
མུན་པའི་ཚོགས་ཆེན་པོ་རྨེག་མེད་པར་འགྱུར་རོ། །དེ་བཞིན་དུ་ཏིང་ངེ་འཛིན་གྱི་ཉི་མ་རྟག་པ་འདི་ཤར་མ་ཐག་ཏུ་སེམས་ཅན་ཐམས་ཅད་ཀྱི་སྡིག་པ་དང་། ལས་ཀྱི་ཚོགས་ཀྱི་ཁ་བ་དང་། མུན་པ་དང་། སྤྲིན་དང་། སྒྲིབ་པ་རྣམས་རྨེག་མེད་པར་འགྱུར་རོ།། །།
འཕགས་པ་སྤྲིན་ཆེན་པོའི་མདོ། བམ་པོ་དགུ་པ། སྤྲིན་ཆེན་སྙིང་པོ་གཞན་ཡང་དཔེར་ན་རླུང་ནི་ནམ་མཁའ་ལ་ལངས་ནས་སེམས་ཅན་ཐམས་ཅད་ལ་རང་དབང་མེད་པར་སྤུ་དང་། ལུས་ཀྱི་ཡན་ལག་ཐམས་ཅད་ཀྱི་རྩ་བའི་ནང་དུ་ཞུགས་ནས་མེའི་ཕུང་པོ་འཇིལ་བར་བྱེད་དོ། །དེ་བཞིན་དུ་འདིར་ཡང་
ཏིང་ངེ་འཛིན་གྱིས་དེ་བཞིན་གཤེགས་པའི་ཡོན་ཏན་རྟག་པ་ཉིད་ཀྱི་ཡོན་ཏན་གྱིས་བསྒོས་པའི་རླུང་ཉོན་མོངས་པའི་ནམ་མཁའ་ལ་ལྡང་བར་བྱེད་ཅིང་། སེམས་ཅན་ཐམས་ཅད་ལ་རང་དབང་མེད་པར་སྤུ་དང་། ཡན་ལག་ཐམས་ཅད་ཀྱི་རྩ་བའི་ནང་དུ་ཞུགས་ནས་སྡིག་པ་གྲངས་མེད་པ་བྱས་པ་རྣམས་དང་།
ལས་ཀྱི་མེའི་ཕུང་པོ་རྣམས་སེལ་བར་བྱེད་དོ། །སྤྲིན་ཆེན་སྙིང་པོ་གཞན་ཡང་འདི་ལ་གནས་པའི་བྱང་ཆུབ་སེམས་དཔའ་ནི་རྒྱུན་དུ་ཞུགས་པའི་འབྲས་བུའི་ཕྱིར་ཡང་ཚུལ་ཁྲིམས་མི་སྲུང་ངོ་། །ལན་ཅིག་ཕྱིར་འོང་བའི་འབྲས་བུའི་ཕྱིར་ཡང་ཚུལ་ཁྲིམས་མི་སྲུང་ངོ་། །ཕྱིར་མི་འོང་བའི་འབྲས་བུའི་
ཕྱིར་ཡང་ཚུལ་ཁྲིམས་མི་སྲུང་ངོ་། །དགྲ་བཅོམ་པའི་འབྲས་བུའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་མཚན་མཐའ་ཡས་པའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་དཔེ་བྱད་བཟང་པོའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་
པའི་བསམ་གྱིས་མི་ཁྱབ་པའི་གནས་ཀྱི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་དཔག་ཏུ་མེད་པ་ཉིད་ཀྱི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་མཚུངས་པ་མེད་པ་ཉིད་ཀྱི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་མཚན་གྱི་ཕྱིར་ཡང་

སེམས་གནས་པར་མི་སྒོམ་མོ། །དེ་བཞིན་གཤེགས་པའི་དཔེ་བྱད་བཟང་པོའི་ཕྱིར་ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་བསམ་གྱིས་མི་ཁྱབ་པའི་གནས་ཀྱི་ཕྱིར་ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་དཔག་ཏུ་མེད་པའི་
ཕྱིར་ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་མཚུངས་པ་མེད་པའི་ཕྱིར་ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་གྲངས་མེད་པའི་ཕྱིར་ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་ཡོན་ཏན་དཔག་ཏུ་མེད་པ་དང་ལྡན་པའི་ཕྱིར་
ཡང་སེམས་གནས་པར་མི་སྒོམ་མོ། །དེ་བཞིན་གཤེགས་པའི་མཚན་གྱི་ཕྱིར་ཡང་སེམས་སྐྱེད་པར་མི་འདོད་དོ། །དེ་བཞིན་གཤེགས་པའི་དཔེ་བྱད་བཟང་པོའི་ཕྱིར་ཡང་སེམས་སྐྱེད་པར་མི་འདོད་དོ། །དེ་བཞིན་གཤེགས་པའི་བསམ་གྱིས་མི་ཁྱབ་པའི་གནས་ཀྱི་ཕྱིར་ཡང་སེམས་སྐྱེད་པར་མི་
འདོད་དོ། །དེ་བཞིན་གཤེགས་པའི་དཔག་ཏུ་མེད་པའི་ཕྱིར་ཡང་སེམས་སྐྱེད་པར་མི་འདོད་དོ། །དེ་བཞིན་གཤེགས་པའི་མཚུངས་པ་མེད་པའི་ཕྱིར་ཡང་སེམས་སྐྱེད་པར་མི་བྱེད་དོ། །དེ་བཞིན་གཤེགས་པའི་གྲངས་མེད་པའི་ཕྱིར་ཡང་སེམས་སྐྱེད་པར་མི་བྱེད་དོ། །དེ་བཞིན་གཤེགས་
པའི་ཡོན་ཏན་དཔག་ཏུ་མེད་པ་དང་ལྡན་པའི་ཕྱིར་ཡང་སེམས་སྐྱེད་པར་མི་བྱེད་དོ། །དེ་བཞིན་གཤེགས་པའི་རྣམ་པར་འཕྲུལ་པ་དང་ཆོ་འཕྲུལ་གྱི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་མི་འཇིགས་པའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་
གསང་བའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་མཆོད་པའི་གནས་བླ་ན་མེད་པའི་ཕྱིར་ཡང་ཚུལ་ཁྲིམས་མི་སྲུང་ངོ་། །དེ་བཞིན་གཤེགས་པའི་སྙིང་པོའི་ཕྱིར་ཡང་ཚུལ་ཁྲིམས་མི་སྲུང་གི་སེམས་ཅན་ཐམས་ཅད་སྐྱེ་བ་དང་། རྒ་བ་དང་། ན་བ་དང་། འཆི་བ་དང་།
མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཐར་བར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་ཀྱིས་བདེ་བ་ཐོབ་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་གྲུབ་པ་དང་བདེ་བར་

འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་བྱང་ཆུབ་ཀྱི་ཡོན་ཏན་ལ་དགོད་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་སངས་རྒྱས་སུ་བསྒྲུབ་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་ཆོས་ཀྱི་འཁོར་ལོ་སྐོར་དུ་གཞུག་པར་འདོད་
པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་འཕགས་པའི་དགེ་འདུན་ཡོངས་སུ་སྡུད་དུ་གཞུག་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་སངས་རྒྱས་ཀྱི་གདུང་མི་འཆད་པར་བྱ་བར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་ལ་ཆོས་
ཀྱི་རྒྱུན་མི་གཅད་པར་བྱ་བར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་ལ་དགེ་འདུན་གྱི་རིགས་བསྒྲུབ་པའི་ཕྱིར་ཚུལ་ཁྲིམས་སྲུང་ངོ་། །སེམས་ཅན་ཐམས་ཅད་ལ་ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་བསྒྲུབ་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །སེམས་
ཅན་ཐམས་ཅད་ཀྱི་ཚུལ་ཁྲིམས་མ་ཉམས་པ་དང་། སྐྱོན་མེད་པ་དང་། མ་འདྲེས་པ་དང་། མ་འཁྲུགས་པར་འདོད་པའི་ཕྱིར་ཚུལ་ཁྲིམས་སྲུང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་ཆེན་སྙིང་པོས་འདི་སྐད་ཅེས་གསོལ་ཏོ། །འདི་ལ་གནས་པའི་བྱང་
ཆུབ་སེམས་དཔའ་ནི་དེ་བཞིན་གཤེགས་པའི་མཚན་གྱི་སླད་དུ་ཚུལ་ཁྲིམས་མི་སྲུང་ངོ་ཞེས་བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་དེ་སྐད་གསུངས། བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་འདི་ལ་གནས་པའི་བྱང་ཆུབ་སེམས་དཔའ་ལ་སངས་རྒྱས་ཀྱི་ཡོན་
ཏན་བསྒྲུབ་པ་དེ་དག་ཐམས་ཅད་ཡོད་པའི་ཕྱིར་རོ། །དེ་ཅིའི་ཕྱིར་ཞེ་ན། ཏིང་ངེ་འཛིན་འདི་ནི་སངས་རྒྱས་ཀྱི་ཡོན་ཏན་ཐམས་ཅད་ཀྱི་འབྱུང་གནས་ཡིན་པའི་ཕྱིར་རོ། །སྤྲིན་ཆེན་སྙིང་པོ་དཔེར་ན་ནོར་བུ་རིན་པོ་ཆེ་བཻ་དཱུརྱ་དུ་མ་དང་། ནོར་ཐམས་ཅད་ཀྱི་བདག་པོར་གྱུར་པ་དེ་བདག་ཉིད་ལ་ཡོད་བཞིན་དུ་
བཻ་དཱུརྱའི་ཕྱིར་འདོད་པའི་སེམས་དང་ཐེ་ཙོམ་སྐྱེད་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདི་ལ་གནས་པའི་བྱང་ཆུབ་སེམས་དཔའ་བདག་ཉིད་ལ་ཡོད་བཞིན་དུ་མཚན་གྱི་ཕྱིར་འདོད་པའི་སེམས་སྐྱེད་པ་དེ་ནི་གནས་མེད་

དོ། །སྤྲིན་ཆེན་སྙིང་པོ་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་བསམ་གྱིས་མི་ཁྱབ་པའི་ཡུལ་དང་ཡོན་ཏན་ཐམས་ཅད་དང་ལྡན་པར་རིག་པར་བྱའོ། །གསོལ་པ། བཅོམ་ལྡན་འདས་ཅི་བགྱི་བ་མཐར་ཕྱིན་པ་དང་ལྡན་པ་ལགས་པར་རིག་པར་བགྱིའམ། བཀའ་
སྩལ་པ། སྤྲིན་ཆེན་སྙིང་པོ་དེ་སྐད་མ་ཟེར་ཅིག །འདི་ལ་གནས་པའི་བྱང་ཆུབ་སེམས་དཔའ་ནི་གང་གི་ཚེ་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བྱས་པ་ན་བྱ་བ་མཐར་ཕྱིན་པར་འགྱུར་ཏེ། དེའི་ཚེ་འདི་ལ་གནས་པའི་
བྱང་ཆུབ་སེམས་དཔའི་བྱ་བ་ཐམས་ཅད་མཐར་ཕྱིན་པར་འགྱུར་རོ། །གསོལ་པ། བཅོམ་ལྡན་འདས་གང་དག་ཏིང་ངེ་འཛིན་འདིའི་ཡུལ་བཤད་པ་ཐོས་ནས་སྤོང་བར་མི་བགྱིད་པ་ནི་ཀྱེ་མ་ངོ་མཚར་ཏེ། སེམས་ཅན་དེ་དག་ནི་མྱ་ངན་དུ་བགྱི་མི་འཚལ་བ་ལགས་སོ། །བཀའ་སྩལ་པ། སྤྲིན་ཆེན་
སྙིང་པོ་དེ་དེ་བཞིན་ཏེ། མ་འོངས་པའི་དུས་ན་ཏིང་ངེ་འཛིན་བསྟན་པ་འདི་བཤད་པ་ན་གང་དག་སྤོང་བར་མི་བྱེད་པའི་སེམས་ཅན་དེ་དག་ལ་ནི་མྱ་ངན་བྱ་མི་དགོས་སོ། །འདི་ལྟ་སྟེ། དཔེར་ན་རྒྱལ་པོའི་བུ་རིགས་ཆེ་ཤིང་སྟོབས་དང་ལྡན་ལ་འཁོར་སྙིང་ཉེ་བ་དང་། ཚུལ་དུ་བསྲུང་བར་བྱ་བ་དང་། ཡོན་
ཏན་དང་ལྡན་ཞིང་རྒྱལ་པོ་ཆེན་པོར་དབང་བསྐུར་བའི་སྤུ་ལ་བབ་པ་ནི་གནས་དམའ་བའི་ལས་ལ་འདོད་པའི་སེམས་མི་སྐྱེད་དེ། རྒྱ་ཆེན་པོའི་རྒྱལ་སྲིད་ཀྱི་གནས་ལ་སེམས་སོ། །དེ་བཞིན་དུ་ཏིང་ངེ་འཛིན་བསྟན་པ་འདི་བཤད་པ་ཐོས་ན་སྤོང་བར་མི་བྱེད་ཅིང་ཁ་ཏོན་དུ་བྱེད་པ་དག་ནི་ཆོས་ཀྱི་ཡོན་ཏན་ཐམས་
ཅད་དང་ལྡན་ཞིང་བྱང་ཆུབ་ཆེན་པོར་དབང་བསྐུར་བའི་འོས་ཡིན་ཏེ། ཏིང་ངེ་འཛིན་འདི་ཐོས་ནས་ཏིང་ངེ་འཛིན་གྱི་མཆོག་འདི་ལས་གཞན་པ་གནས་དམའ་བ་ལ་འདོད་པའི་སེམས་མི་སྐྱེད་དེ་དེ་ནི་གནས་མེད་དོ། །ཏིང་ངེ་འཛིན་རྒྱ་ཆེན་པོའི་གནས་འདི་ཡང་རྐྱེན་དུ་བབ་པ་ཡིན་ནོ། །སྤྲིན་ཆེན་སྙིང་པོ་
གཞན་ཡང་དཔེར་ན་གདོལ་པ་ཟོལ་པ་ནི་མཆོད་པ་ཆེན་པོས་དབང་བསྐུར་བའི་འོས་མ་ཡིན་ནོ། །དེ་བཞིན་དུ་གདོལ་པ་ཟོལ་པ་དང་འདྲ་བའི་སེམས་ཅན་དག་ཀྱང་ཏིང་ངེ་འཛིན་གྱི་རྒྱལ་པོ་འདིའི་དབང་བསྐུར་བའི་འོས་སུ་མི་འགྱུར་རོ། །དེ་ཅིའི་ཕྱིར་ཞེ་ན། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་

དཔའ་རྣམས་ནི་སངས་རྒྱས་མང་པོ་ལ་བསྙེན་བཀུར་བྱས་པ་ཡིན་པར་རིག་པར་བྱ་བའི་ཕྱིར་རོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའི་ཡུལ་ལ་ལྟོས། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་
པའི་ཡོན་ཏན་རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བ་བསྟན་པར་བྱ་བའི་ཕྱིར་ཏིང་ངེ་འཛིན་འདི་མི་ཤེས་པའི་སེམས་ཅན་རྣམས་ལ་ཁོང་དུ་ཆུད་པར་བྱའོ་སྙམ་ནས། སེམས་ཅན་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་དག་ལ་དེ་དང་དེ་སྦྱིན་པར་བྱའོ་སྙམ་དུ་དམ་བཅས་
ནས་སྨོན་ལམ་གྱི་ཕྱིར་ཚུལ་ཁྲིམས་སྲུང་སྟེ། ལག་པ་འདོད་པ་རྣམས་ལ་ནི་ལག་པ་སྦྱིན་ནོ། །རྐང་པ་འདོད་པ་རྣམས་ལ་ནི་རྐང་པ་སྦྱིན་ནོ། །མིག་འདོད་པ་རྣམས་ལ་ནི་མིག་སྦྱིན་ནོ། །ཤ་འདོད་པ་རྣམས་ལ་ནི་ཤ་སྦྱིན་ནོ། །ཁྲག་འདོད་པ་རྣམས་ལ་ནི་ཁྲག་སྦྱིན་ནོ། །རྐང་འདོད་པ་རྣམས་ལ་ནི་རྐང་
སྦྱིན་ནོ། །ཡན་ལག་རེ་རེ་ནས་འདོད་པ་རྣམས་ལ་ཡང་ཡན་ལག་རེ་རེ་ནས་སྦྱིན་ནོ། །བྲན་ཕོ་དང་། བྲན་མོ་འདོད་པ་རྣམས་ལ་ཡང་བྲན་དུ་འགྲོ་བར་བར་བྱ་ན་ནོར་རམ་འབྲུ་རྣམས་ཡོངས་སུ་བཏང་བ་ལྟ་ཅི་སྨོས་ཏེ། དེ་ལྟར་གྱུར་ཅིག་ཅེས་དེའི་ཕྱིར་ཚུལ་ཁྲིམས་སྲུང་ངོ་། །གཞན་ཡང་འཇིག་རྟེན་
དང་འཐུན་པའི་བྱ་བ་དུ་མ་དག་གིས་སེམས་ཅན་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་ལ་དེ་དང་དེ་སྦྱིན་པར་བྱའོ། །མི་དགའ་བ་མེད་པར་ཡོངས་སུ་གཏང་བར་བྱའོ། །ཕྱིས་འགྱོད་པ་མེད་པར་སྦྱིན་པར་བྱའོ། །རྣམ་པར་སྨིན་པ་ལ་རེ་བ་མེད་པར་སྦྱིན་པར་བྱའོ། །སེམས་ཅན་ལ་
ཕན་གདགས་པ་དང་། སེམས་ཅན་ལ་སྙིང་བརྩེ་བ་དང་། དེ་བཞིན་གཤེགས་པའི་རྟག་པ་ཉིད་བསྟན་པའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་སྤྱད་དེ། སེམས་ཅན་ཐམས་ཅད་ལ་བསྡུས་ནས་དེ་བཞིན་གཤེགས་པའི་རྟག་པ་ཉིད་ཁོང་དུ་ཆུད་པར་བྱའོ་སྙམ་མོ། །སྤྲིན་ཆེན་སྙིང་པོ་གཞན་ཡང་ཏིང་ངེ་
འཛིན་འདི་ལ་གནས་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་དེ་བཞིན་གཤེགས་པའི་རྟག་པ་ཉིད་ཡང་དག་པར་ཁོང་དུ་ཆུད་པར་བྱེད་དོ། །དེ་ཅིའི་ཕྱིར་ཞེ་ན། དེ་འདི་སྙམ་དུ་གཞན་གྱི་དོན་གྱི་ཕྱིར་ལག་པ་འམ། རྐང་པ་འམ། བྲན་ཕོ་དང་། བྲན་མོ་ཡང་རུང་སྟེ། སེམས་

ཅན་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་སྦྱིན་པར་བྱ་སྟེ། བདག་གི་ལུས་དོན་མེད་པར་མ་གྱུར་པར་སེམས་ཅན་རྣམས་ཀྱི་ལོངས་སྤྱོད་ཀྱི་རྒྱུར་གྱུར་ཅིག་ཅེས་སེམས་སྐྱེད་པར་བྱེད་དོ། །གསོལ་པ། བཅོམ་ལྡན་འདས་ཀྱིས་མདོའི་གཞུང་ལུགས་གཞན་དག་ལས་
དགེ་སློང་དག་མིའི་ལུས་ནི་ཤག་ཤིག་ཏུ་གྱུར་པ་ལྟ་བུ་རྣག་ཅན་གྱི་ལུས་ཡིན་ཏེ། རྫ་མཁན་གྱི་ཕུབ་མ་མི་གཅེས་པ་བོར་བཞིན་དུ་དགོས་པའི་དོན་དག་ལ་དོན་དུ་འགྱུར་བ་མེད་དོ་ཞེས་བཀའ་སྩལ་ན། འདི་ལ་གནས་པའི་བྱང་ཆུབ་སེམས་དཔས་བདག་གི་ལུས་དོན་མེད་པར་མ་གྱུར་ཅིག་ཅེས་ལུས་
ཡོངས་སུ་གཏོང་ངོ་ཞེས་བགྱི་བ་བཅོམ་ལྡན་འདས་ཀྱིས་ཅི་ལས་དགོངས་ཏེ་དེ་སྐད་གསུངས། བཀའ་སྩལ་པ། སྤྲིན་ཆེན་སྙིང་པོ་དེ་ལྟར་མ་ལྟ་ཤིག་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའི་ལུས་ནི་ཆོས་ཀྱི་ལུས་སོ། །དེ་ཅིའི་ཕྱིར་ཞེ་ན། འདི་ལ་གནས་པའི་བྱང་ཆུབ་སེམས་དཔའི་
ལུས་ནི་རུས་པ་དང་། ཤ་དང་། ཁྲག་འདུས་པ་མ་ཡིན་ཏེ། ཆོས་ཀྱི་དབྱིངས་ཡིན་པས་ན་ཆོས་ཀྱི་ལུས་ཡིན་གྱི་ཤའི་ལུས་མ་ཡིན་ནོ་ཞེས་འདུ་ཤེས་བསྐྱེད་པར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ། ཆོས་ཀྱི་ལུས་ཡིན་གྱི་ཤའི་ལུས་མ་
ཡིན་ནོ་ཞེས་དེ་སྐད་བསྟན་པ་མཛད། གལ་ཏེ་ཆོས་ཀྱི་ལུས་ལགས་ན་ནི་སེམས་ཅན་རྣམས་ལ་ཡང་དགོས་པར་མི་འགྱུར་རོ། །དེ་ཅིའི་སླད་དུ་ཞེ་ན། གཞུང་ལུགས་གཞན་དག་ལས་བཅོམ་ལྡན་འདས་ཀྱིས་ནམ་མཁའི་བྱ་རྗེས་ནི་ཤིན་ཏུ་བསྒྲིམས་ཏེ་བཙལ་ཀྱང་རྙེད་པར་མི་འགྱུར་རོ་ཞེས་
བཀའ་སྩལ་ཏེ། དེ་ལྟ་ལགས་པས་གལ་ཏེ་འདི་ལ་གནས་པའི་བྱང་ཆུབ་སེམས་དཔའི་ལུས་དེ་འདྲ་བ་ཞིག་ཏུ་གྱུར་ན། དེ་ལྟ་བུའི་མཚན་ཉིད་ཀྱི་ཆོས་ཀྱི་ལུས་ལ་ནི་སེམས་ཅན་ཐམས་ཅད་ཀྱིས་ཀྱང་ནམ་མཁའི་བྱའི་རྗེས་བཞིན་དུ་གཞོམ་པ་འམ་དབྱེ་བར་མི་ནུས་སོ། །བཀའ་སྩལ་པ། སྤྲིན་
ཆེན་སྙིང་པོ་དེ་སྐད་མ་ཟེར་ཅིག །འདི་ལ་གནས་པའི་བྱང་ཆུབ་སེམས་དཔའི་ལུས་སེམས་ཅན་རྣམས་ལ་དགོས་པ་དེ་ནི་བྱིན་གྱིས་བརླབས་པའི་ལུས་ཡིན་པར་ངེས་པར་རིག་པར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་བྱིན་གྱིས་བརླབས་པའི་

ལུས་ཡིན་ནོ་ཞེས་གསུང་། གལ་ཏེ་བྱིན་གྱིས་བརླབས་པའི་ལུས་ལགས་ན་ནི་སེམས་ཅན་རྣམས་ལ་སྩལ་བ་ན་ཡང་འདི་ལྟར་ཆོས་ཀྱི་ལུས་སུ་བཞག་པས་དེར་འགལ་བ་ཆེན་པོར་འགྱུར་རོ། །ཀྱེ་མ་འདི་ལ་གནས་པའི་བྱང་ཆུབ་སེམས་དཔའ་ནི་ཤའི་ལུས་སེམས་ཅན་རྣམས་ལ་སྩོལ་བར་བགྱིད་དོ་ཞེས་
གདའ་བས་ན་ཤོ་བེ་ལགས་སོ་ཞེས་མཆི་བར་འགྱུར་རོ། །བཀའ་སྩལ་པ། སྤྲིན་ཆེན་སྙིང་པོ་དེ་སྐད་མ་ཟེར་ཅིག་འདི་ལ་གནས་པའི་བྱང་ཆུབ་སེམས་དཔའི་ལུས་བྱིན་གྱིས་བརླབས་པ་གང་ཡིན་པ་དེ་ནི་སྒྱུ་མ་མཁན་གྱིས་སྤྲུལ་པའི་ལུས་བཞིན་དུ་བལྟ་བར་བྱའོ། །གསོལ་པ། བཅོམ་ལྡན་འདས་
དེ་བཞིན་གཤེགས་པས་ཅི་ལས་དགོངས་ཏེ་ཕྱིན་ཅི་ལོག་གི་འདུ་ཤེས་དང་། ཕྱིན་ཅི་མ་ལོག་པའི་འདུ་ཤེས་དང་། ཉོན་མོངས་པ་ཅན་གྱི་ཆོས་དང་། ཉོན་མོངས་པ་ཅན་མ་ཡིན་པའི་ཆོས་ཞེས་ཡང་དང་ཡང་དུ་དེ་སྐད་གསུང་། བཀའ་སྩལ་པ། སྤྲིན་ཆེན་སྙིང་པོ་དེ་ལྟར་རྣམ་པ་གཞན་དུ་མ་སེམས་ཤིག །
འདི་ལ་གནས་པའི་བྱང་ཆུབ་སེམས་དཔའི་ལུས་བྱིན་གྱིས་བརླབས་པ་གང་ཡིན་པ་དེ་དག་ནི་རྩིའི་སྡོང་བུ་ལྟ་བུའི་ལུས་ཡིན་ནོ། །འདི་ལ་གནས་པའི་བྱང་ཆུབ་སེམས་དཔའ་ནི་རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་བུར་བསྒོམ་སྟེ། ཀྱེ་མ་བདག་གི་ལུས་ནི་
སྤྱོད་པ་མེད་ཅིང་བྱེད་པ་མེད་པ་སྟེ། སེམས་མེད་པ་ཅན། སྙིང་པོ་མེད་པའི་ལུས། ཁམས་སུ་མ་གཏོགས་པ་སྟེ། ཅི་སྟེ་འདི་ལ་ལ་ལ་ཞིག་གཅོད་པར་བྱེད་དམ། འབྱེད་པར་བྱེད་དམ། འཕྲོག་པར་བྱེད་དམ། རྐུ་བར་བྱེད་ཀྱང་རུང་སྟེ། བདག་གི་ལུས་རྩིའི་སྡོང་བུ་ལྟར་དོན་མེད་པར་མ་
གྱུར་ཅིག་ཅེས་སྒོམ་པར་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་ལུས་སུ་བཞག་པའི་ཕྱིར་རོ། །སྤྲིན་ཆེན་སྙིང་པོ་གཞན་ཡང་དཔེར་ན་རྩིའི་སྡོང་བུ་དེའི་རྩ་བ་ཁྱེར་ན་ཡང་འདི་སྙམ་དུ་བདག་གི་རྩ་བ་ཁྱེར་རོ་སྙམ་དུ་མི་སེམས་སོ། །ཤུན་ལྤགས་སམ། པྲིའམ། ལོ་མའམ། མེ་ཏོག་གམ།
འབྲས་བུ་འམ། མགོ་ཏོགས་སམ། སྡོང་བུ་འམ། ཡལ་ག་འམ། བུར་མ་འམ། རྩ་བ་དག་ཁྱེར་ཡང་རུང་སྟེ། དེ་འདི་སྙམ་དུ་བདག་གི་ཤུན་ལྤགས་ཁྱེར་རོ། །བདག་གི་པྲི་ཁྱེར་རོ། །བདག་གི་ལོ་མ་ཁྱེར་རོ། །སྙམ་དུ་མི་སེམས་སོ། །དེ་བཞིན་དུ་འདི་ལ་གནས་པའི་བྱང་

ཆུབ་སེམས་དཔའི་ལུས་རྩིའི་སྡོང་བུ་ལས་ལག་པ་ཁྱེར་རམ། རྐང་པ་ཁྱེར་རམ། མིག་ཁྱེར་རམ། ཤ་ཁྱེར་རམ། ཁྲག་ཁྱེར་རམ། རྐང་ཁྱེར་རམ། ཡན་ལག་རེ་རེ་ནས་ཁྱེར་རམ། བྲན་ཕོ་དང་། བྲན་མོ་ཁྱེར་རམ། ནོར་རམ་འབྲུ་ཁྱེར་ཡང་དེ་འདི་སྙམ་དུ་བདག་གི་
ལག་པ་ཁྱེར་རོ། །བདག་གི་རྐང་པ་ཁྱེར་རོ། །བདག་གི་མིག་ཁྱེར་རོ། །བདག་གི་ཤ་ཁྱེར་རོ། །བདག་གི་ཁྲག་ཁྱེར་རོ། །བདག་གི་རྐང་ཁྱེར་རོ། །བདག་གི་ཡན་ལག་རེ་རེ་ནས་ཁྱེར་རོ། །བདག་གི་བྲན་ཕོ་དང་། བྲན་མོ་ཁྱེར་རོ། །བདག་གི་ནོར་དང་འབྲུ་ཁྱེར་རོ་སྙམ་དུ་མི་སེམས་
ཏེ། དེ་ནི་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནད་བསལ་བའི་ཕྱིར་ཞུགས་པ་ཡིན་ནོ། །འདི་ལ་གནས་པའི་བྱང་ཆུབ་སེམས་དཔའི་ལུས་ནི་ཕལ་པ་ཐ་མའི་ལུས་མ་ཡིན་གྱི་བྱིན་གྱིས་བརླབས་པའི་ལུས་དང་། བདུད་རྩིའི་ལུས་ཡིན་པར་རིག་པར་བྱའོ། །
སྤྲིན་ཆེན་སྙིང་པོ་གཞན་ཡང་འདི་ལ་གནས་པའི་བྱང་ཆུབ་སེམས་དཔའ་ནི་གང་གི་ཚེ་བྱིན་གྱིས་བརླབས་པའི་ལུས་ཟད་པར་བྱེད་པ་དེའི་ཚེ་བྱ་རྒོད་དང་། ཆུན་ལག་ལ་སོགས་པ་སྲོག་ཆགས་རྣམས་ཀྱིས་དེའི་རོ་རྩིའི་སྡོང་བུ་བཞིན་དུ་ཟས་སུ་ཟ་བར་འགྱུར་ལ། སེམས་ཅན་དེ་དག་ཐམས་ཅད་ཀྱང་ངན་སོང་
དུ་འགྲོ་བར་འགྱུར་བ་དེ་ནི་གནས་མེད་དེ། ལྷ་དང་མིའི་ནང་དུ་སྐྱེ་ཞིང་སངས་རྒྱས་མང་པོ་མཉེས་པར་བྱེད་པར་འགྱུར་རོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་མྱུར་དུ་རྟོགས་པར་འདོད་པའི་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མས་ནི་འདི་ལྟར་སེམས་བསྐྱེད་
པར་བྱ་སྟེ། དེ་བཞིན་གཤེགས་པ་ནི་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པ་དང་། དམ་པའི་ཆོས་ཀྱི་མདོ་ནུབ་པར་མི་འགྱུར་བར་བྱ་བའི་ཕྱིར་སེམས་ཅན་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་ལ་དེ་དང་དེ་སྦྱིན་པར་བྱའོ་སྙམ་སྟེ། ལག་པ་འདོད་པ་རྣམས་ལ་ནི་ལག་པ་
སྦྱིན་ནོ། །རྐང་པ་འདོད་པ་རྣམས་ལ་ནི་རྐང་པ་སྦྱིན་ནོ། །མིག་འདོད་པ་རྣམས་ལ་ནི་མིག་སྦྱིན་ནོ། །ཤ་འདོད་པ་རྣམས་ལ་ནི་ཤ་སྦྱིན་ནོ། །ཁྲག་འདོད་པ་རྣམས་ལ་ནི་ཁྲག་སྦྱིན་ནོ། །རྐང་འདོད་པ་རྣམས་ལ་ནི་རྐང་སྦྱིན་ནོ། །ཡན་ལག་རེ་རེ་ནས་འདོད་པ་རྣམས་ལ་ཡང་ཡན་ལག་རེ་རེ་ནས་སྦྱིན་ནོ། །

བྲན་འདོད་པ་རྣམས་ལ་ཡང་བྲན་དུ་འགྲོ་བར་བྱའོ། །དམ་པའི་ཆོས་བསྟན་པ་དང་བཤད་པའི་ཕྱིར་ཡང་བདག་གི་ལག་པ་ཁྱེར་བར་གྱུར་ཅིག །བདག་གི་རྐང་པ་ཁྱེར་བར་གྱུར་ཅིག །དེ་བཞིན་དུ་སྣ་དང་། རྣ་བ་དང་། ཡན་ལག་སོ་སོ་རྣམས་དང་། དེའི་འོག་ཏུ་བདག་གི་སྲོག་ཀྱང་ཡོངས་
སུ་གཏོང་བར་གྱུར་ཅིག་ཅེས་སེམས་བསྐྱེད་པར་བྱ་སྟེ། བདག་ཉིད་རྩིའི་སྡོང་བུ་བཞིན་དུ་རྟག་ཏུ་བསྐྱེད་པར་བྱ་ཞིང་ཇི་སྲིད་འཚོའི་བར་དུ་ཡང་སེམས་བསྐྱེད་པར་བྱས་ན་སེ་གོལ་གཏོགས་པ་ཙམ་དུ་སེམས་བསྐྱེད་པར་བྱ་བ་ལྟ་ཅི་སྨོས། སྤྲིན་ཆེན་སྙིང་པོ་གཞན་ཡང་དཔེར་ན། རྟའི་རྒྱལ་པོ་རྔོག་
ཁྱེར་དང་ལྡན་པ་སྤྲིན་གྱི་ཤུགས་ཅན་ནི་གྲུ་ཞིག་པའི་མི་རྣམས་ཀྱི་ཕྱིར་བརྟན་པའི་སེམས་ཀྱིས་ཆས་ཏེ། རི་མ་ལ་ཡའི་དབུས་སུ་འདུག་ནས་སྒྲ་ཆེན་པོ་བསྒྲགས་ཏེ། གང་དག་ངའི་རྒྱབ་བམ། ཕོངས་སམ། བྱ་ལ་འམ། ཐ་ན་སྤུའི་ཉག་མ་ཙམ་ལས་འཇུ་བའི་སེམས་ཅན་གང་ཡིན་པ་དེ་དག་ཐམས་ཅད་
བསྒྲལ་བར་བྱའོ། །ཞེས་ཟེར་བ་དེ་བཞིན་དུ་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་སྤྱོད་པ་ཅན་དང་། ཀུན་ཏུ་རྒྱུ་དང་། སེམས་ཅན་གཞན་དག་ལ་འཕྱ་བའི་ཕྱིར་རམ། བསྟིང་བའི་ཕྱིར་ཏིང་ངེ་འཛིན་འདི་
ལས་དེ་བཞིན་གཤེགས་པ་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པ་དང་། ཟབ་པའི་ཚིག་གི་དོན་ནམ། ཚིགས་སུ་བཅད་པ་འམ། ཐ་ན་ཚིག་གི་ཕྱེད་ཀྱང་རུང་སྟེ། རྣ་ལམ་དུ་ཐོས་པར་བྱེད་པ་དག་དང་། གང་དག་འཆད་པ་ཡང་རུང་བའི་སེམས་ཅན་གྲུ་ཞིག་པར་གྱུར་པ་དང་འདྲ་
བ་དེ་དག་ངན་སོང་ངན་འགྲོ་ལོག་པར་ལྟུང་བའི་དྲ་བ་ལས་གྲོལ་བར་བྱེད་དོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་རྣ་ལམ་དུ་གྲག་པ་ཙམ་གྱིས་དེ་དག་མིའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །ལྷའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །
ཚངས་པའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །སངས་རྒྱས་འབྱུང་བའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །མདོ་འདིའི་ཏིང་ངེ་འཛིན་གྱི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །གསོལ་པ། བཅོམ་ལྡན་འདས་ཇི་ལྟར་ན་ཏིང་ངེ་འཛིན་འདི་ལ་

གནས་པའི་བྱང་ཆུབ་སེམས་དཔའ་ཤིན་ཏུ་ཡང་དག་པའི་ལྟ་བ་ཅན་ལགས། བཀའ་སྩལ་པ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་དེ་ཁོ་ན་དང་། རྟག་པ་དང་། བདག་དང་སེམས་ཅན་དུ་འདུ་ཤེས་པ་ཡང་དག་པར་མཐོང་བ་
དག་ནི་ཤིན་ཏུ་ཡང་དག་པའི་ལྟ་བ་ཅན་ཡིན་ཞེས་ང་སྨྲའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་འཇིག་རྟེན་པའི་འདུ་ཤེས་བརྫུན་པ་རྣམས་རྫོགས་པར་བཤད་ཅིང་དེ་སྐད་བཀའ་སྩལ། བཀའ་སྩལ་པ། སྤྲིན་ཆེན་སྙིང་པོ་དེ་ཁོ་ན་དང་། རྟག་པ་དང་།
བདག་དང་། སེམས་ཅན་དུ་འདུ་ཤེས་པ་ཞེས་བྱ་བ་ནི་ཐར་པའི་དོན་གྱི་ཚིག་བླ་དགས་སོ། །དེ་བཞིན་གཤེགས་པ་ཐམས་ཅད་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པ་ཞེས་བྱ་བ་ནི་དམ་པའི་ཆོས་ནུབ་པར་མི་འགྱུར་བའི་ཚིག་བླ་དགས་སོ། །གསོལ་པ། བཅོམ་ལྡན་འདས་
ཀྱིས་ཅི་ལས་དགོངས་ཏེ་བྱིས་པ་བཞིན་དུ་དེ་ཁོ་ན་དང་། རྟག་པ་དང་། བདག་དང་། སེམས་ཅན་དུ་འདུ་ཤེས་བསྐྱེད་པར་བྱའོ་ཞེས་གསུང་། བཀའ་སྩལ་པ། སྤྲིན་ཆེན་སྙིང་པོ་དར་གྱི་སྲིན་བུ་བཞིན་དུ་བདག་ཉིད་མ་དཀྲི་ཤིག །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་
ཆེན་པོའི་རང་བཞིན་ནི་དེ་ཡིན་ནོ། །གསོལ་པ། བཅོམ་ལྡན་འདས་ཀྱིས་དེ་སྙེད་ཅིག་མཛད་དེ། ཟློས་བུ་དང་འདྲེན་མར་དེ་ལྟར་བཀའ་སྩལ་ཏེ་ཅི་བགྱི། བདག་མེད་པའི་ཆོས་ཉིད་ཐུགས་སུ་ཆུད་བཞིན་དུ་ལམ་དྲང་པོ་དང་མི་འཐུན་པ། རྟག་པ་དང་། བདག་དང་། སེམས་ཅན་དུ་འདུ་ཤེས་
ཅིའི་སླད་དུ་སྐྱེད་དུ་སྩལ། བཅོམ་ལྡན་འདས་ཀྱིས་དགེ་སློང་དག་ཐར་པ་ནི་ནམ་མཁའི་མཚན་ཉིད་དེ་དེ་ཡང་མཚན་ཉིད་མེད་པའོ། །གདགས་པར་བྱ་བའི་ཐབས་ཀྱང་མེད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱང་དེ་བཞིན་ཏེ་ནམ་
མཁའ་དང་མཚུངས་སོ་ཞེས་ཀྱང་བཀའ་སྩལ། དེ་བཞིན་གཤེགས་པ་བྱེ་བ་སྙེད་ཀྱང་ཆུའི་ཟླ་བ་དང་འདྲའོ། །སྒྱུ་མ་དང་འདྲའོ། །དངོས་པོ་མེད་པའོ། །ཡ་མ་བརླའོ། །རྨི་ལམ་ལྟ་བུའི་རང་བཞིན་ཅན་ནོ། །ཆུ་ཤིང་གི་སྡོང་པོ་ལྟར་སྙིང་པོ་མེད་པའོ། །གློག་དང་སྤྲིན་ལྟར་མི་བརྟན་

པའོ། །ཆོས་ཐམས་ཅད་ནི་སྟོང་པ་དང་མཚན་མ་མེད་པའོ། །ཆོས་རྣམས་ཀྱི་བྱ་བ་དུ་མ་དག་ནི་ནམ་མཁའི་རླུང་གི་རྗེས་ཀྱི་རང་བཞིན་ཅན་ནོ་ཞེས་ཀྱང་བཅོམ་ལྡན་འདས་ཀྱིས་བཀའ་སྩལ། ཡང་འཇིག་རྟེན་ན་སེམས་ཅན་ཐམས་ཅད་ནི་བསམ་གྱིས་མི་ཁྱབ་པའི་ཆོས་སུ་ཡང་དག་པར་འདུའོ་ཞེས་ཀྱང་
བཅོམ་ལྡན་འདས་ཀྱིས་བཀའ་སྩལ་ན། བཅོམ་ལྡན་འདས་མི་རྟག་པའི་མཚན་ཉིད་ཀྱི་རང་བཞིན་ཐུགས་སུ་ཆུད་པ་བཞིན་དུ་རྟག་པ་དང་། བདག་དང་། སེམས་ཅན་དུ་འདུ་ཤེས་ཇི་ལྟར་སྐྱེད་དུ་སྩལ། རྟག་པའི་སྤྱོད་པ་ཡང་ཇི་ལྟར་བསྒོམ་པར་བགྱི། སྤྱོད་པ་འདིའི་རྗེས་སུ་ཡང་ཇི་ལྟར་བསླབ་པར་
བགྱི། ཡང་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སངས་རྒྱས་ཐམས་ཅད་ཀྱིས་ཤིན་ཏུ་བསྒྲིམས་ཏེ། འདུས་བྱས་ཀྱི་ཆོས་ཐམས་ཅད་ཁོངས་སུ་གཏོགས་པའི་ནང་དུ་སྩལ་ཀྱང་། བདག་ཏུ་འདུ་ཤེས་པ་མ་རྙེད་དོ་ཞེས་བདག་མེད་པ་དང་། སྲོག་མེད་པ་དང་། གང་ཟག་
མེད་པར་བཀའ་སྩལ་ཏེ། འགྲོ་བ་འདི་དག་ཐམས་ཅད་སྟོང་པར་ཡང་དག་པར་གསུངས་ན་རྟག་པ་དང་། བདག་དང་། སེམས་ཅན་དུ་འདུ་ཤེས་ཞེས་བཀའ་སྩལ་པ་འདི་ལ་དོན་ཅི་ཞིག་མཆིས། བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་ཁྱོད་གར་འབྲོས། ཁྱོད་གང་དུ་འཕྱན།
ད་ཕྱིན་ཅད་དེ་སྐད་མ་ཟེར་ཅིག །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་མི་འཐུན་ནོ་ཞེས་སྐྲག་པར་མི་བྱེད་ལ། ཆོས་ཐམས་ཅད་མི་འཐུན་པ་མེད་པའི་ཕྱིར་ཡང་ཚུལ་ཁྲིམས་རྒྱ་ཆེར་མི་སྲུང་ཞིང་སེམས་ཀྱང་སྒོམ་པར་མི་བྱེད་དེ། ཆོས་ཐམས་ཅད་མི་འཐུན་པ་མེད་
པས་རབ་ཏུ་དགའ་ནས་བྱང་ཆུབ་སེམས་དཔའི་བྱ་བ་རྩོམ་པ་ལས་ནུར་བར་མི་བྱེད་དོ། །ཆོས་ཐམས་ཅད་ཆད་དོ་ཞེས་ཀྱང་སྐྲག་པར་མི་བྱེད་ལ། ཆོས་ཐམས་ཅད་ཆད་པ་མེད་པའི་ཕྱིར་ཡང་ཚུལ་ཁྲིམས་མི་སྲུང་ཞིང་སེམས་ཀྱང་སྒོམ་པར་མི་བྱེད་དོ། །ཆོས་ཐམས་ཅད་ཆད་པ་མེད་པས་རབ་ཏུ་
དགའ་ནས་བྱང་ཆུབ་སེམས་དཔའི་བྱ་བ་རྩོམ་པ་ལས་ནུར་བར་མི་བྱེད་དོ། །དེ་བཞིན་དུ་རྟག་པ་དང་། མི་རྟག་པ་ཡང་གོང་མ་བཞིན་དུ་སྦྱར་བར་བྱའོ། །རློམ་སེམས་དང་། རློམ་སེམས་མེད་པ་དང་གཡོ་བ་དང་། མི་གཡོ་བ་དང་། མངོན་པར་འདུ་བྱེད་པ་དང་། མངོན་པར་འདུ་བྱེད་པ་མེད་པ་དང་།

དབེན་པ་དང་། མི་དབེན་པ་དང་། དམིགས་པ་དང་། མི་དམིགས་པ་དང་། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། རིག་པ་དང་། མ་རིག་པ་དང་། མིང་དང་། མིང་མེད་པ་དང་། ཉེ་བར་ལེན་པ་དང་། ཉེ་བར་ལེན་པ་མེད་པ་དང་། འཇིགས་པ་དང་།
འཇིགས་པ་མེད་པ་དང་། མཚན་ཉིད་དང་། མཚན་ཉིད་མེད་པ་དང་། འཆི་བ་དང་། འཆི་བ་མེད་པ་དང་། བྱང་ཆུབ་དང་། བྱང་ཆུབ་མེད་པ་ཡང་གོང་མ་བཞིན་དུ་སྦྱར་རོ། །ཆོས་ཐམས་ཅད་མྱ་ངན་ལས་འདས་སོ་ཞེས་སྐྲག་པར་མི་བྱེད། དངང་བར་མི་བྱེད་ལ། ཆོས་ཐམས་ཅད་ཡོངས་སུ་
མྱ་ངན་ལས་འདས་པ་མེད་པའི་ཕྱིར་ཡང་ཚུལ་ཁྲིམས་མི་སྲུང་ཞིང་སེམས་ཀྱང་སྒོམ་པར་མི་བྱེད་དེ། ཆོས་ཐམས་ཅད་ཡོངས་སུ་མྱ་ངན་ལས་འདས་པ་མེད་པས་རབ་ཏུ་དགའ་ནས་བྱང་ཆུབ་སེམས་དཔའི་བྱ་བ་རྩོམ་པ་ལས་ནུར་བར་མི་བྱེད་དེ། ཡང་དང་ཡང་སྨོས་ཅི་དགོས། ཏིང་ངེ་འཛིན་འདི་ལ་
གནས་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པ་མེད་པ་དང་། དེ་བཞིན་གཤེགས་པ་རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བའི་ཆོས་ནུབ་པར་མི་འགྱུར་བར་བྱ་བའི་ཕྱིར་རབ་ཏུ་གནས་ཤིང་ཚུལ་ཁྲིམས་སྲུང་སྟེ་སེམས་སྒོམ་མོ། །སྤྲིན་
ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་བདག་ཉིད་མྱུར་དུ་གནས་པར་འདོད་པས་ནི་བདག་ཏུ་འདུ་ཤེས་པ་བསྒོམ་པར་བྱའོ། །གང་ཟག་ཏུ་འདུ་ཤེས་པ་བསྒོམ་པར་བྱའོ། །སྲོག་ཏུ་འདུ་ཤེས་པ་བསྒོམ་པར་བྱའོ། །དེ་ལྟར་སྒོམ་པའི་བྱང་ཆུབ་སེམས་དཔས་ནི་ཏིང་ངེ་འཛིན་འདི་མྱུར་བ་ཉིད་དུ་
ཐོབ་པར་འགྱུར་རོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་མཁྱེན་བཞིན་དུ་དེ་སྐད་གསུང་བཀའ་སྩལ་པ། སྤྲིན་ཆེན་སྙིང་པོ་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་འཇིག་རྟེན་པའི་བདག་ཏུ་འདུ་ཤེས་པ་སྒོམ་པར་བྱེད་དོ། །
གསོལ་པ། བཅོམ་ལྡན་འདས་ཅི་འཇིག་རྟེན་ལས་འདས་པའི་ཆོས་ལ་ཡང་བདག་གི་མིང་མཆིས་སམ། བཀའ་སྩལ་པ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་རྟག་པ་དང་། བདག་ཏུ་འདུ་ཤེས་པ། འཇིག་རྟེན་ལས་འདས་པའི་འདུ་ཤེས་སུ་བསྟན་པར་འདོད་

པས་རྣམ་པ་ལྔས་ཡང་དག་པར་བསྟན་པར་བྱའོ། །ལྔ་གང་ཞེ་ན། འབྲུའི་ས་བོན་ལྟ་བུ་དང་། ཤིང་གི་ས་བོན་ལྟ་བུ་དང་། སྣུམ་གྱི་ཁུ་བ་ལྟ་བུ་དང་། རིན་པོ་ཆེའི་རྣམ་པ་ལྟ་བུ་དང་། སྦྲུལ་གྱི་པགས་པ་རྙིང་པ་ལྟ་བུའོ། །འདི་ལྟ་སྟེ་དཔེར་ན། འབྲས་སཱ་ལུ་ལ་སོགས་པའི་འབྲུ་འབྲས་བུ་
ནས་འབྲུ་ཉིད་དུ་མ་གྱུར་གྱི་བར་དུ་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་བྱ་བའི་དོན་ཡང་མི་བྱེད་ལ། ཕུབ་མ་མེད་པའི་རང་བཞིན་དུ་གྱུར་ནས་ནི་སེམས་ཅན་རྣམས་ཀྱི་བྱ་བའི་དོན་ཡང་བྱེད་ཅིང་ས་བོན་བརྟན་པའི་ཆོས་ཀྱི་རྣམ་གྲངས་སུ་ཡང་བགྲང་བར་
འགྱུར་རོ། །དེ་བཞིན་དུ་ཆོས་ཐམས་ཅད་མི་འཐུན་པར་སྤྱོད་ཅིང་ནམ་ཏིང་ངེ་འཛིན་འདི་མ་ཐོབ་ཀྱི་བར་དུ་ནི་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་སྐྱབས་བྱེད་པར་ཡང་མི་འགྱུར་ལ། ལྟ་བ་དང་། ཐེ་ཙོམ་དང་། ཡོངས་སུ་མྱ་ངན་ལས་འདའ་བའི་འདུ་
ཤེས་དང་། མི་རྟག་པ་དང་། མི་བརྟན་པའི་རང་བཞིན་གྱི་ཉོན་མོངས་པའི་ཕུབ་མ་ཐམས་ཅད་དང་བྲལ་བའི་རང་བཞིན་དུ་གྱུར་ནས་དེ་ཕྱིན་ཅད་ནི་སེམས་ཅན་རྣམས་ཀྱི་ཐེ་ཙོམ་ཐམས་ཅད་ཀྱང་གཅོད་པར་བྱེད་ཅིང་སྐྱབས་སུ་གྱུར་པ་ཡང་ཡིན་ལ། རྟག་པ་དང་། ཐེར་ཟུག་པ་དང་། བརྟན་པ་དང་། ཞི་
བར་གྱུར་པའི་རང་བཞིན་གྱི་ས་བོན་དུ་ཡང་འགྱུར་ཞིང་སེམས་ཅན་དུ་འདུ་ཤེས་པ་ལ་ཡང་འགོད་པར་འགྱུར་ཏེ། དེ་ལྟར་ན་ཆོས་ཐམས་ཅད་འབྲུའི་ས་བོན་དང་འདྲ་བ་ཡིན་ནོ། །སྤྲིན་ཆེན་སྙིང་པོ་གཞན་ཡང་འདི་ལྟ་སྟེ་དཔེར་ན། ཤིང་ཏ་ལ་དང་། ཨ་མྲ་དང་། སྤའི་འབྲས་བུ་
ལ་སོགས་པ་ནི་དང་པོ་ལྕུག་གུ་སྐྱེ་བ་ནས་ནམ་འབྲས་བུའི་རང་བཞིན་དུ་མ་གྱུར་གྱི་བར་དུ་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་བྱ་བའི་དོན་ཡང་མི་བྱེད་ལ། ཤུན་ལྤགས་དང་བྲལ་བའི་རང་བཞིན་དུ་གྱུར་ནས་ནི་སེམས་ཅན་རྣམས་ཀྱི་བྱ་བའི་དོན་ཡང་བྱེད་དེ།
ས་བོན་བརྟན་པའི་ཆོས་སུ་ཡང་དག་པར་འདུ་ཞིང་བགྲང་བར་འགྱུར་རོ། །དེ་བཞིན་དུ་ཆོས་ཐམས་ཅད་མི་འཐུན་པར་སྤྱོད་ཅིང་ནམ་ཏིང་ངེ་འཛིན་འདི་མ་ཐོབ་ཀྱི་བར་དུ་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་སྐྱབས་བྱེད་པར་ཡང་མི་འགྱུར་ལ། ལྟ་བ་དང་། ཐེ་

ཙོམ་དང་། ཡོངས་སུ་མྱ་ངན་ལས་འདའ་བའི་འདུ་ཤེས་དང་། མི་རྟག་པ་དང་། མི་བརྟན་པའི་རང་བཞིན་གྱི་ཉོན་མོངས་པའི་ཤུན་ལྤགས་ཐམས་ཅད་དང་བྲལ་བའི་རང་བཞིན་དུ་གྱུར་ནས་དེ་ཕྱིན་ཅད་ནི་སེམས་ཅན་རྣམས་ཀྱི་ཐེ་ཙོམ་ཐམས་ཅད་ཀྱང་གཅོད་པར་བྱེད་ཅིང་སྐྱབས་སུ་
གྱུར་པ་ཡང་ཡིན་ལ། རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བར་གྱུར་པའི་རང་བཞིན་གྱི་ས་བོན་དུ་ཡང་འགྱུར་ཞིང་སེམས་ཅན་དུ་འདུ་ཤེས་པ་ལའང་འགོད་པར་འགྱུར་རོ། །སྤྲིན་ཆེན་སྙིང་པོ་གཞན་ཡང་འདི་ལྟ་སྟེ་དཔེར་ན། བུ་རམ་ཤིང་དང་། ཏིལ་དང་། ཁྲེ་དང་། ཁྲེ་རྒོད་དང་།
བའི་འོ་མ་ལ་སོགས་པའི་སྣུམ་གྱི་ཁུ་བ་ལྟ་བུ་ནི་མྱུ་གུ་དང་། འོ་མ་བྱུང་བ་ནས་ནམ་སྣུམ་གྱི་ཁུ་བ་ཉིད་དུ་མ་གྱུར་གྱི་བར་དུ་མི་བརྟན་པའི་ཆོས་སུ་ཡང་དག་པར་འདུ་ཤིང་བགྲང་སྟེ། སེམས་ཅན་རྣམས་ཀྱི་བྱ་བའི་དོན་ཡང་མི་བྱེད་དོ། །དེ་བཞིན་དུ་ཆོས་ཐམས་ཅད་མི་འཐུན་པར་སྤྱོད་ཅིང་། ནམ་ཏིང་ངེ་
འཛིན་འདི་མ་ཐོབ་ཀྱི་བར་དུ་ནི་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་སྐྱབས་བྱེད་པར་ཡང་མི་འགྱུར་ལ། ལྟ་བ་དང་། ཐེ་ཙོམ་དང་། ཡོངས་སུ་མྱ་ངན་ལས་འདའ་བའི་འདུ་ཤེས་དང་། མི་རྟག་པ་དང་། མི་བརྟན་པའི་རང་བཞིན་གྱི་ཉོན་མོངས་པའི་ཤུན་
ལྤགས་དང་བྲལ་ཏེ། བསྐུས་པའི་རང་བཞིན་དུ་གྱུར་ནས། དེ་ཕྱིན་ཅད་ནི་སེམས་ཅན་རྣམས་ཀྱི་ཐེ་ཙོམ་ཐམས་ཅད་ཀྱང་གཅོད་པར་བྱེད་ཅིང་སྐྱབས་སུ་གྱུར་པ་ཡང་ཡིན་ལ། རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བར་གྱུར་པའི་རང་བཞིན་གྱི་ས་བོན་དུ་ཡང་འགྱུར་ཞིང་སེམས་
ཅན་དུ་འདུ་ཤེས་པ་ལ་ཡང་འགོད་པར་འགྱུར་རོ། །སྤྲིན་ཆེན་སྙིང་པོ་གཞན་ཡང་འདི་ལྟ་སྟེ་དཔེར་ན། རོ་ཉེའི་མགར་བའམ། ཟངས་མགར་རམ། དབྱིག་དང་། གསེར་གྱི་མགར་བའམ། རིན་པོ་ཆེ་བྱེད་པ་གཞན་གང་ཡང་རུང་བ་ས་རྡོ་དང་། གྱོ་མོ་དང་། གསེག་མ་ལ་སོགས་པ་
ལེགས་པར་བརྫིས་པ་ལས། ཞིག་བྱས་ཏེ། སོ་གཏོང་བ་ནས། ནམ་སྣ་ཅིག་གི་རང་བཞིན་ནམ། རིན་པོ་ཆེར་མ་གྱུར་གྱི་བར་དུ་མི་བརྟན་པའི་ཆོས་སུ་ཡང་དག་པར་འདུ་ཞིང་བགྲང་སྟེ། སེམས་ཅན་རྣམས་ཀྱི་བྱ་བའི་དོན་ཡང་མི་བྱེད་ལ། གསེག་མ་དང་། གྱོ་མོ་དང་། སོ་དོག་མེད་

པའི་རང་བཞིན་དུ་གྱུར་ནས་ནི་སེམས་ཅན་རྣམས་ཀྱི་དོན་ཡང་བྱེད་ཅིང་། རིན་པོ་ཆེའི་རང་བཞིན་ཐེར་ཟུག་པ་དང་། བརྟན་པ་དང་། རྟག་པའི་ཆོས་སུ་ཡང་དག་པར་འདུ་བར་འགྱུར་རོ། །དེ་བཞིན་དུ་ཆོས་ཐམས་ཅད་མི་འཐུན་པར་སྤྱོད་ཅིང་། ནམ་ཏིང་ངེ་འཛིན་འདི་མ་ཐོབ་ཀྱི་
བར་དུ་ནི་མི་བརྟན་པའི་ཆོས་སུ་ཡང་དག་པར་འདུ་སྟེ། སེམས་ཅན་རྣམས་ཀྱི་སྐྱབས་བྱེད་པར་ཡང་མི་འགྱུར་ལ། ལྟ་བ་དང་། ཐེ་ཙོམ་དང་། ཡོངས་སུ་མྱ་ངན་ལས་འདའ་བའི་འདུ་ཤེས་དང་། མི་རྟག་པ་དང་། མི་བརྟན་པའི་རང་བཞིན་གྱི་ཉོན་མོངས་པའི་སྐྱོན་ཐམས་ཅད་དང་བྲལ་བའི་རང་
བཞིན་དུ་གྱུར་ནས། དེ་ཕྱིན་ཅད་ནི་སེམས་ཅན་རྣམས་ཀྱི་ཐེ་ཙོམ་ཐམས་ཅད་ཀྱང་གཅོད་པར་བྱེད་ཅིང་སྐྱབས་སུ་གྱུར་པ་ཡང་ཡིན་ལ། རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བར་གྱུར་པའི་རང་བཞིན་གྱི་ས་བོན་དུ་ཡང་འགྱུར་ཞིང་སེམས་ཅན་དུ་འདུ་ཤེས་པ་ལ་ཡང་འགོད་པར་འགྱུར་རོ། །
སྤྲིན་ཆེན་སྙིང་པོ་གཞན་ཡང་འདི་ལྟ་སྟེ་དཔེར་ན། སྦྲུལ་རྒས་པའི་པགས་པ་རྙིང་པ་ནམ་མ་རྗེས་ཀྱི་བར་དུ་མི་བརྟན་པའི་ཆོས་སུ་ཡང་དག་པར་འདུའོ། །དེ་བཞིན་དུ་ཆོས་ཐམས་ཅད་མི་འཐུན་པར་སྤྱོད་ཅིང་། ནམ་ཏིང་ངེ་འཛིན་འདི་མ་ཐོབ་ཀྱི་བར་དུ་སྦྲུལ་རྒས་པའི་པགས་པ་རྙིང་པ་བཞིན་དུ་མི་བརྟན་པའི་
ཆོས་སུ་ཡང་དག་པར་འདུ་བར་འགྱུར་ལ། སྦྲུལ་རྒས་པའི་པགས་པ་རྙིང་པ་དང་འདྲ་བའི་ལྟ་བ་དང་། ཐེ་ཙོམ་དང་། ཡོངས་སུ་མྱ་ངན་ལས་འདའ་བའི་འདུ་ཤེས་དང་། མི་རྟག་པ་དང་། མི་བརྟན་པའི་རང་བཞིན་གྱི་ཉོན་མོངས་པའི་ཤུན་ལྤགས་ཐམས་ཅད་དང་བྲལ་བའི་རང་བཞིན་དུ་གྱུར་ནས་དེ་
ཕྱིན་ཅད་ནི་སེམས་ཅན་རྣམས་ཀྱི་ཐེ་ཙོམ་ཐམས་ཅད་ཀྱང་གཅོད་པར་བྱེད་ཅིང་སྐྱབས་སུ་གྱུར་པ་ཡང་ཡིན་ལ། རྟག་པ་དང་། ཐེར་ཟུག་པ་དང་། བརྟན་པ་དང་། ཞི་བ་དང་། བསིལ་བ་དང་། བདེ་བ་དང་། འཇིགས་པ་མེད་པར་ཡང་འགྱུར་ཞིང་སེམས་ཅན་རྣམས་ཀྱང་བདག་དང་། སེམས་
ཅན་དུ་འདུ་ཤེས་པའི་ཏིང་ངེ་འཛིན་གྱི་སྤྱོད་པ་འདི་ལ་འགོད་པར་འགྱུར་རོ། །སྤྲིན་ཆེན་སྙིང་པོ་དེ་བས་ན་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་རྣམ་པ་ལྔ་པོ་འདི་དག་གིས་བདག་དང་། སེམས་ཅན་དང་། སྲོག་དང་། གང་ཟག་ཏུ་གྱུར་པ་ཉིད་དུ་ཡང་དག་པར་མཐོང་བར་འདོད་པའི་

རིགས་ཀྱི་བུའམ། རིགས་ཀྱི་བུ་མོས་ནི་དོན་འདི་ལྟ་བུར་བལྟ་བར་བྱའོ། །གང་དག་དེ་ལྟར་མི་ལྟ་བ་དེ་དག་ནི་ཡང་དག་པ་མཐོང་བ་མ་ཡིན་ནོ་ཞེས་ང་སྨྲའོ། །སེམས་ཅན་དེ་དག་ནི་འཇིག་རྟེན་པའི་ཆོས་ཅན་དང་། རྨོངས་པའི་ཆོས་ཅན་ཡིན་པར་ང་སྨྲའོ། །གསོལ་བ། བཅོམ་
ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ། འདི་སྐད་དུ་དཔེ་ལྔ་པོ་འདི་དག་ནི་དེ་ཁོ་ན་ཡིན་ཞེས་གསུང་། གལ་ཏེ་དེ་བཞིན་གཤེགས་པ་དེ་སྐད་གསུང་ན་ནི་འདིའི་གཏན་ཚིགས་བཀའ་སྩལ་འཚལ་ལོ། །འདི་ནི་སེམས་ཅན་རྣམས་ལ་ཡང་འགལ་བ་ཆེན་པོར་འགྱུར་རོ། །དེ་
ཅིའི་སླད་དུ་ཞེ་ན། བཅོམ་ལྡན་འདས་ཀྱིས་འཇིག་རྟེན་གྱི་བྱ་བ་ཐམས་ཅད་ནི་མི་རྟག་པའི་ཆོས་ཡིན་ནོ་ཞེས་ཀྱང་བཀའ་སྩལ་ན། དཔེ་ལྔ་བོ་འབྲུ་དང་། ཤིང་ལ་སོགས་པ་འབྲས་བུ་ཉིད་དུ་གྱུར་པ་ན་དེ་དག་ཇི་ལྟར་སླར་འཇིག་པར་མི་འགྱུར། གལ་ཏེ་འཇིག་པར་འགྱུར་ན་ནི་སེམས་ཅན་ཡང་འཇིག་
པར་འགྱུར་བས་དེ་དང་འདྲ་བར་ཆོས་ཐམས་ཅད་ཀྱང་མི་རྟག་པར་ཡང་དག་པར་འདུ་བར་འགྱུར་རོ་ཞེས་བདག་མཆི་སྟེ། ཞིག་གོ་འཚལ་ནི་སླར་སྐྱེའོ་ཞེས་བདག་མཆིའོ། །བདག་ནི་སེམས་ཅན་རྣམས་ལ་རྣམ་པ་གཉིས་སུ་མི་རྟོག་སྟེ། འདིར་གུམ་པ་རྣམས་གཞན་དུ་སྐྱེ་བ་སོ་སོར་ལེན་པར་
འགྱུར་རོ་ཞེས་བདག་མཆིའོ། །དེ་བས་ན་ཆོས་ཐམས་ཅད་ནི་མི་རྟག་གོ་ཞེས་བདག་མཆི་སྟེ། འཇིག་རྟེན་འདི་ན་རྟག་པའི་ཆོས་ཅིའང་ཡང་དག་པར་མ་མཐོང་ངོ་། །གལ་ཏེ་དེ་ལྟར་གྱུར་ན་རྟག་པ་དང་། མི་རྟག་པའི་དོན་གཉིས་ཀ་མ་མཆིས་སོ་ཞེས་བདག་མཆི་མོད་ཀྱི། བཅོམ་ལྡན་
འདས་ཀྱི་ཞལ་ནས་ཤོ་བེ་བྱུང་ངོ་ཞེས་ཀྱང་ཇི་སྐད་བགྱི། བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་ཅི་དར་གྱི་སྲིན་བུ་ལྟར་བདག་ཉིད་དཀྲི་བར་སེམས་སམ། འདི་ན་མི་ལ་ལ་དེ་འདྲ་བའི་ཕྱིར་ཀྱེ་མ་ཁྱོད་ཀྱི་བཞིན་ཟླ་བ་འདྲའོ་ཞེས་ཟླ་བ་ལས་དཔེ་ལེན་པར་བྱེད་ལ། མི་གཞན་ཞིག་
གིས་ནི་ཀྱེ་མ་གླང་པོ་ཆེའི་དབང་པོ་རི་དང་འདྲའོ་ཞེས་རི་ལས་དཔེ་ལེན་པར་བྱེད་ན། ཅི་ཟླ་བ་བཞིན་དང་འདྲ་བར་འགྱུར་རམ། རི་ཡང་གླང་པོ་ཆེ་དང་འདྲ་བར་འགྱུར་རམ་ཞེས་བརྗོད་དགོས་སོ། །གསོལ་པ། འདི་ནི་དཔེར་བགྱི་བ་ལགས་ཞེས་བདག་མཆིའོ། །བཀའ་སྩལ་པ། སྤྲིན་ཆེན་

སྙིང་པོ་བརྟན་པའི་དཔེ་ནི་འཇིག་རྟེན་ཐམས་ཅད་ན་མེད་དེ། དེ་དང་འདྲ་བ་ཙམ་གྱི་ཕྱིར་དཔེ་རྣམ་པ་ལྔ་པོ་འདི་དག་ངས་དཔེར་བྱས་མོད་ཀྱི། འདི་ལ་གནས་པའི་བྱང་ཆུབ་སེམས་དཔའ་ལ་ནི་དཔེ་མེད་པར་རིག་པར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་
དགོངས་ཏེ་ཐར་པ་ལ་ལྕགས་ཀྱི་མར་མེ་གུམ་པའི་ཚུལ་དང་འདྲ་ཞེས་གསུང་། བཀའ་སྩལ་པ། ང་ནི་ཐར་པ་ལ་ལྕགས་ཀྱི་མར་མེ་ཤི་བའི་ཚུལ་དང་འདྲ་ཞེས་མི་ཟེར་གྱི་ཉོན་མོངས་པ་ཟད་པ་ལ་ཟེར་རོ། །གསོལ་པ། བཅོམ་ལྡན་འདས་ཅི་མཁྱེན་བཞིན་དུ་ཐར་པ་ལ་མི་གསུང་གི། །ཉོན་མོངས་པ་ཟད་
པ་ལ་གསུང་ངོ་ཞེས་ཤོ་བེ་གསུང་ངམ། ད་ལྟར་ནི་འདི་སྐད་གསུང་ལ་ཆོས་ཐམས་ཅད་ཆུ་ཟླ་དང་འདྲ་སྟེ། སྒྱུ་མ་ལྟ་བུའོ་ཞེས་ཀྱང་དེ་བཞིན་གཤེགས་པས་གསུངས་སོ། །བཀའ་སྩལ་པ། ཆུ་ཟླ་དང་འདྲ