Kinh tạng Tây Tạng (Kangyur Đại Học) — 064_མདོ་སྡེ།_ཝ

་བ་དང་། སྒྱུ་མ་ལྟ་བུ་དང་འདྲ་ཞེས་བྱ་བ་ནི་ཉོན་མོངས་པ་ཟད་པ་ལ་གསུངས་ཀྱི་ཆོས་
ཐམས་ཅད་ལ་མ་གསུངས་ཏེ། ཆོས་ལ་ལ་ནི་རྟག །ཆོས་ལ་ལ་ནི་མི་རྟག་ཅེས་ང་སྨྲའོ། །ཡང་བཀའ་སྩལ་པ། ཇི་ལྟ་ཞེ་ན། སེམས་ཅན་གང་དག་ཐར་པའི་ཕྱོགས་སུ་གཏོགས་པ་དེ་དག་ནི་རྟག་པའི་ཆོས་ཅན་ཡིན་ནོ། །གང་དག་སེམས་ཅན་མེད་པ་དང་། སྲོག་མེད་པའི་ཕྱོགས་སུ་
གཏོགས་པ་དེ་དག་ནི་མི་རྟག་པའི་ཆོས་ཅན་ཞེས་ང་སྨྲའོ། །གསོལ་པ། དངོས་པོ་མ་མཆིས་པའི་ཚུལ་དུ་བཀའ་སྩལ་ལགས་ན། ཅི་ལས་དགོངས་ཏེ་བཅོམ་ལྡན་འདས་དེ་བཞིན་གཤེགས་པས་ལྕགས་ཀྱི་མར་མེ་གུམ་པ་ལྟ་བུའི་ཚུལ་དུ་བསྟན་པ་མཛད། བཀའ་སྩལ་པ། དེ་ལ་དངོས་པོ་ཅི་ཞིག་
ཡོད། གསོལ་པ། འབྲུ་མར་གྱི་སྣོད་དང་། ལྕགས་ཀྱི་རང་བཞིན་མཆིས་སོ། །བཀའ་སྩལ་པ། སྤྲིན་ཆེན་སྙིང་པོ་ལེགས་སོ། །ལེགས་སོ། །དེ་ལྟར་ལྟ་བར་འདོད་པའི་བྱང་ཆུབ་སེམས་དཔས་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་དངོས་པོའི་རང་བཞིན་དང་འདྲ་བར་
བལྟ་བར་བྱའོ། །གལ་ཏེ་འབྲུ་མར་གྱི་སྣོད་དང་། ལྕགས་ཀྱི་རང་བཞིན་དང་ལྷན་ཅིག་ཏུ་མར་མེ་གུམ་པ་ལྟ་བུ་དེ་ཐར་པའི་ཚུལ་ཡིན་ནོ་ཞེས་དེ་བཞིན་གཤེགས་པས་བཤད་པར་གྱུར་ན་ནི་དེ་ལྟར་ན་དེ་བཞིན་གཤེགས་པ་ཆད་པར་སྨྲ་བར་ཡང་འགྱུར་བ་ཞིག་ན། སྤྲིན་ཆེན་སྙིང་པོ་ངས་ནི་དེ་སྐད་མ་བཤད་

ཀྱི་དངོས་པོ་མེད་པའི་ཚུལ་དུ་བཤད་དེ། ལྕགས་ཀྱི་མར་མེ་ཤི་བའི་ཚུལ་དུ་བཤད་པ་གང་ཡིན་པ་དེ་ནི་ཉོན་མོངས་པ་རབ་ཏུ་ཞི་བའི་ཐ་ཚིག་སྟེ་དངོས་པོ་ནི་ཡོད་ཅེས་བྱ་བའི་ཐ་ཚིག་གོ། །གསོལ་པ། སངས་རྒྱས་ཐམས་ཅད་ཀྱིས་རབ་ཏུ་བསྒྲིམས་ཏེ་བསྐལ་པ་བྱེ་བ་ཕྲག་མང་པོར་བཙལ་
ཀྱང་མི་རྙེད་དོ་ཞེས་གསུངས་པའི་དོན་འདི་ཡང་བཅོམ་ལྡན་འདས་དེ་བཞིན་གཤེགས་པས་བཤད་དུ་གསོལ། བཀའ་སྩལ་པ། སྤྲིན་ཆེན་སྙིང་པོ་དེ་དེ་བཞིན་ཏེ། དེ་བཞིན་གཤེགས་པ་ཐམས་ཅད་ཀྱིས་སྲིད་པ་ཐམས་ཅད་དུ་བསྐལ་པ་བྱེ་བ་ཕྲག་གྲངས་མེད་པ་ལ་སོགས་པར་རབ་ཏུ་བསྒྲིམས་ཏེ་
བཙལ་ཀྱང་སེམས་ཅན་དུ་འདུ་ཤེས་པ་རྙེད་པར་འགྱུར་བ་དེ་ནི་གནས་མེད་དོ། །འདི་ལྟ་སྟེ་དཔེར་ན། རྒྱལ་པོ་ཞིག་རང་གི་ཁང་བཟངས་ཀྱི་བཙུན་མོའི་འཁོར་ནས་བྱུང་སྟེ། གནས་གཞན་ཞིག་ཏུ་སོང་བར་མཐོང་བ་ལ་རྒྱལ་པོ་བཙུན་མོའི་འཁོར་གྱི་ནང་ན་འདུག་གོ་ཞེས་བྱ་བ་དེ་ནི་གནས་མེད་དོ། །དེ་བཞིན་
དུ་ཏིང་ངེ་འཛིན་འདི་ལ་གནས་པ་བདག་དང་། སེམས་ཅན་དང་ལྡན་པ་སྲིད་པ་ཐམས་ཅད་སྤངས་པ་ཀུན་ནས་ཉོན་མོངས་པ་མེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་གྱི་དོན་ལ་སྲིད་པའི་ཉེས་པ་དང་རྣམ་པར་འདྲེས་ཤིང་འདུག་གོ་ཞེས་བྱ་བ་དེ་ནི་གནས་མེད་དོ། །དེ་བས་ན་བཅོམ་
ལྡན་འདས་ཀྱིས་སྲིད་པ་ཐམས་ཅད་ན་ཡང་རྟག་པར་གནས་པའི་ཆོས་ཡུངས་འབྲུ་ཙམ་ཡང་མེད་དོ་ཞེས་བྱ་བ་དེ་ནི་བདག་དང་སེམས་ཅན་དང་སྲོག་དང་། གང་ཟག་མེད་དོ་ཞེས་བསྟན་པ་ཡིན་ཏེ་ཤིན་ཏུ་ཡུན་རིང་དུ་གནས་པ་ནི་སངས་རྒྱས་ཀྱི་ཆོས་ལ་གནས་པ་ཡིན་པར་འདུ་ཤེས་བསྐྱེད་པར་བྱའོ། །ཏིང་ངེ་
འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཆགས་པ་ཡང་མ་ཡིན། མ་ཆགས་པ་ཡང་མ་ཡིན། ཉེ་བར་ལེན་པའི་ཆོས་ལ་གནས་པ་ཡང་མ་ཡིན་ཏེ། རྟག་པ་དང་། ཐེར་ཟུག་པ་དང་། བརྟན་པ་དང་། བདེ་བ་དང་། འཇིགས་པ་མེད་པ་དང་། ང་རྒྱལ་མེད་པ་དང་། ཀུན་ནས་ཉོན་མོངས་
པ་མེད་པ་དང་། བདག་དང་། སེམས་ཅན་དང་། སྲོག་དང་། གང་ཟག་ཉིད་ཡིན་ཏེ། སྤྲིན་ཆེན་སྙིང་པོ་དེ་བས་ན་རྟག་པ་དང་། ཐེར་ཟུག་པ་དང་། བརྟན་པའོ་ཞེས་ང་སྨྲའོ། །སྤྲིན་ཆེན་སྙིང་པོ་ངས་ཉན་ཐོས་ཀྱི་ཐེག་པར་དགེ་སློང་དག་ཡོངས་སུ་གཟུང་བར་བྱ་བ་གང་ཡིན་པ་དེ་ཡོངས་སུ་

གཟུང་བར་གྱིས་ཤིག །ཡོངས་སུ་གཟུང་བར་བྱ་བ་རྟག་པ་དང་། ཐེར་ཟུག་པ་དང་། བརྟན་པ་དང་། བདག་བླང་བར་བྱ་བ་བླང་བར་གྱིས་ཤིག །ལྟ་བའི་རྟེན་དུ་གྱུར་པ་རྟག་པ་དང་། ཐེར་ཟུག་པ་དང་། བརྟན་པ་དེ་ལ་རྟེན་ཅིག་ཅེས་བསྟན་ཏེ། གསལ་བའི་དོན་མི་མངོན་པར་བྱས་ནས་
གསལ་བར་ངས་བསྟན་པ་དེ་འཇིག་རྟེན་གྱིས་ཁོང་དུ་མི་ཆུད་དེ། སེམས་ཅན་བསོད་ནམས་ཆུང་ངུ་དག་ནི་ཐར་པ་ལ་ཟད་པར་སེམས་ཤིང་དེ་བཞིན་གཤེགས་པ་ཡོད་བཞིན་དུ་ཡོངས་སུ་མྱ་ངན་འདས་སོ་ཞེས་ཡོངས་སུ་མྱ་ངན་ལས་འདས་པའི་འདུ་ཤེས་ལ་འཇུག་སྟེ། སྲོག་ཆགས་ཕྱེ་མ་ལེབ་མར་
མེའི་ནང་དུ་ལྟུང་བ་བཞིན་ནོ། །འདི་ལྟ་སྟེ་དཔེར་ན་ཚོང་པའི་བུ་ཐམས་ཅད་དཔྱིད་ཀྱི་དུས་ཚིགས་སུ་ག་ཞིག་ཏུ་འདུས་ནས་རྫིང་བུ་ཆུ་ཆེན་པོའི་ནང་དུ་ཁྲུས་བྱེད་ལ། དེའི་ནང་དུ་གཅིག་གིས་ནོར་བུ་རིན་པོ་ཆེ་འོད་ཐམས་ཅད་དང་ལྡན་པ་ཞེས་བྱ་བ་བོར་ནས། ནོར་བུ་རིན་པོ་ཆེ་དེའི་གཟི་བརྗིད་ཀྱི་མཐུས་ཀྱང་རྫིང་
བུའི་ཆུའི་ཕུང་པོ་དང་། རུས་པ་དང་། གསེག་མ་དང་། གྱོ་མོ་དང་། རྡོ་ཡོད་པ་གང་ཡིན་པ་དེ་དག་ཐམས་ཅད་རྣམ་པར་མཛེས་པར་གྱུར་ཏེ། དེར་ཟླ་བ་དང་། ཉི་མའི་འོད་ཀྱང་ལྷན་ནེ། ལྷང་ངེར་མི་འདུག་གོ། །དེ་ནས་སྐྱེ་བོ་མང་པོས་ནོར་བུ་དེ་བཙལ་བའི་ཕྱིར་བརྐོ་བ་དག་གིས་རྐོ་བར་བྱེད་དེ། །
དེའི་ནང་ནས་ཅི་ཡང་རུང་བ་ཞིག་བླངས་ནས་ནོར་བུ་དེ་རྙེད་དོ་སྙམ་དུ་སེམས་ཏེ། ཡིད་རབ་ཏུ་དགའ་བར་བྱེད་དོ། །དེ་ནས་སེམས་ཅན་དེ་དག་རྫིང་བུའི་འགྲམ་དུ་འཁོད་ནས་སོ་སོར་རློམ་སེམས་སུ་གྱུར་ན། འདི་ཇི་སྙམ་དུ་སེམས་བདག་ཅག་གིས་མ་རྙེད་དོ་སྙམ་དུ་སེམས་པར་འགྱུར་རམ། དེ་ནས་སེམས་ཅན་
དེ་དག་ཐམས་ཅད་ཀྱིས་ནོར་བུ་རིན་པོ་ཆེ་མ་རྙེད་ཀྱང་ཀྱེ་མ་ནོར་བུ་རིན་པོ་ཆེ་མ་རྙེད་དོ་ཞེས་ནོར་བུ་མེད་པའི་འདུ་ཤེས་འཇུག་ཅིང་རྟོག་པར་བྱེད་དམ། དེའི་ནང་ན་ཐབས་ལ་མཁས་ཤིང་ཡིད་གཞུངས་པ་གཅིག་གིས་ནི་ནོར་བུ་རིན་པོ་ཆེ་དེ་བཙལ་ཏེ་རྙེད་དོ། །དེ་བཞིན་དུ་མདོ་དང་། ཏིང་ངེ་འཛིན་ཐམས་ཅད་ཀྱི་ལྡེམ་པོ་དག་
གི་ཚིག་མི་ཤེས་པའི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ནི་ཐམས་ཅད་མི་རྟག་པ་དང་། སྟོང་པའི་འདུ་ཤེས་དང་། སེམས་ཅན་མེད་པ་སྒོམ་པར་བྱེད་དེ། དེ་བཞིན་གཤེགས་པའི་རྟག་པ་ཉིད་མ་ཐོབ་པས་སེམས་ཅན་ཐམས་ཅད་འཁོར་ལོ་བཞིན་དུ་འཁོར་གྱི། ཏིང་ངེ་འཛིན་འདི་ལ་གནས་

པའི་རིགས་ཀྱི་བུའམ། རིགས་ཀྱི་བུ་མོས་ནི་དེ་བཞིན་གཤེགས་པའི་ལྡེམ་པོ་ངག་ནོར་བུ་བཞིན་དུ་རྙེད་པར་འགྱུར་རོ། །སྤྲིན་ཆེན་སྙིང་པོ་དེ་བས་ན་དེ་བཞིན་གཤེགས་པ་རྣམས་ཀྱི་ཤིན་ཏུ་ལྷག་པ་ཡང་དག་པར་མཐོང་བར་འདོད་པས་ནི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་
དཔའ་ལ་རྟག་པ་དང་། བདག་དང་། སེམས་ཅན་དུ་འདུ་ཤེས་བསྐྱེད་པར་བྱ་ཞིང་ཐར་པའི་འདུ་ཤེས་བསྐྱེད་པར་བྱའོ།། །།འཕགས་པ་སྤྲིན་ཆེན་པོའི་མདོ། བམ་པོ་བཅུ་པ་སྟེ་ཐ་མ། རིགས་ཀྱི་བུ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་
དཔའ་ནི་ཤིང་གི་གྲིབ་མ་དང་འདྲ་བར་བལྟ་བར་བྱའོ། །དེ་ཅིའི་ཕྱིར་ཞེ་ན། ཤིང་ཡོད་ན་གྲིབ་མ་འབྱུང་ལ། གྲིབ་མ་ཡོད་ན་ལམ་དུ་ཞུགས་པར་གྱུར་ཏེ། ངལ་བར་གྱུར་པའི་སེམས་ཅན་དེར་འདུག་པ་རྣམས་དབུགས་ཕྱིན་པར་འགྱུར་རོ། །དེ་བཞིན་དུ་དེ་བཞིན་གཤེགས་པའི་ཆོས་འདོད་པའི་
སེམས་ཅན་རྣམས་ཀྱང་སྐྱབས་སུ་འགྲོ་བར་འགྱུར་རོ། །སེམས་ཅན་གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་ལྟ་བའི་སེམས་ཅན་དེ་དག་ལ་ནི་སྐྱབས་སུ་འགྲོ་བ་ཙམ་ཡང་མེད་དོ་ཞེས་ང་སྨྲའོ། །གང་དག་དེ་ལྟར་ཡང་དག་པར་མཐོང་བ་དེ་དག་ནི་བསྟན་པ་འདི་ལ་འཕྲོ་བར་མི་བྱེད་དོ། །
གང་དག་ཡོངས་སུ་མྱ་ངན་ལས་འདའ་བའི་འདུ་ཤེས་སུ་ལྟ་བའི་སེམས་ཅན་དེ་དག་ནི་མྱ་ངན་དུ་བྱ་བ་ཡིན་ནོ་ཞེས་ཡང་དང་ཡང་དུ་ང་སྨྲའོ། །དེ་ནས་དེའི་ཚེ་ནུབ་ཕྱོགས་ནས་གསེར་གྱི་འོད་ཆེན་པོ་ཞིག་སྣང་བར་གྱུར་ཏེ། གསེར་གྱི་འོད་ཆེན་པོ་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཐམས་ཅད་ནོར་བུ་རིན་པོ་ཆེའི་མེའི་འོད་སྣང་བ་ཆེན་པོས་སྣང་བར་བྱས་ཏེ། དེའི་སྐབས་སུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་དེ་བཞིན་གཤེགས་པའི་འོད་གཅིག་པུ་མ་གཏོགས་པར་དེ་ལས་གཞན་པ་ཟླ་བ་དང་། ཉི་མ་རྣམས་ཀྱི་འོད་དང་། བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་རྣམས་ཀྱི་འོད་དང་། ཀླུ་དང་། གནོད་སྦྱིན་དང་། ནམ་མཁའ་ལྡིང་རྣམས་ཀྱི་འོད་ཐམས་ཅད་མོག་མོག་པོར་གྱུར་ཏེ། རྩིག་པ་དང་། ཤིང་དང་། ཚལ་གྱི་ནང་དང་། ལྷུན་པོ་དང་། ལྷུན་པོ་ཆེན་པོ་དང་། དེ་བཞིན་དུ་འཇིག་རྟེན་གྱི་བར་མཚམས་དེ་དག་ཐམས་ཅད་

འོད་དེས་སྣང་བར་བྱས་སོ། །སེམས་ཅན་དམྱལ་བ་པའི་སེམས་ཅན་གང་དག་གི་ལུས་ལ་འོད་དེས་ཕོག་པ་དེ་དག་ཐམས་ཅད་ཀྱང་སྡུག་བསྔལ་རྩེ་ཞིལ་བར་གྱུར་ཏོ། །བཅོམ་ལྡན་འདས་དང་འཁོར་གྱི་དཀྱིལ་འཁོར་ཆེན་པོའི་ནང་དུ་ཡང་པད་མ་བཀྲ་ཞིང་བལྟ་ན་སྡུག་ལ་ཁ་དོག་བཟང་ཞིང་ཡིད་དུ་འོང་བ་
འདབ་མ་བྱེ་བ་བརྒྱ་སྟོང་ཕྲག་དུ་མ་དང་ལྡན་པ། སྟེང་རིན་པོ་ཆེའི་དྲ་བ་དྲི་བསུང་དང་ལྡན་ཞིང་འཇམ་ལ་ཀ་ཙ་ལིན་དིའི་གོས་ལྟར་རེག་ན་བདེ་བ། བཀྲ་ཞིང་བལྟ་ན་སྡུག་པ་དག་གིས་ཀུན་ཏུ་ཁེབས་པ་བྱེ་བ་ཕྲག་དྲུག་ཅུ་ས་གཞི་བརྟོལ་ཏེ་མངོན་པར་འཐོན་པར་གྱུར་ཏོ། །པད་མ་དེ་དག་རེ་རེ་ལས་དྲི་
ངད་བྱུང་བ་གང་ཡིན་པ་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དྲིས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་རྣམས་ཀྱི་སྤོས་གང་ཡིན་པ་དེ་དག་ཐམས་ཅད་ཀྱང་པད་མའི་དྲི་དེས་ཁྱབ་
པར་གྱུར་ཏོ། །ལྷ་དང་། མི་རྣམས་དང་། ལྷ་མ་ཡིན་དང་། ནམ་མཁའ་ལྡིང་དང་། ཀླུ་དང་། གནོད་སྦྱིན་དང་། དྲི་ཟ་རྣམས་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་གིས་སྣར་པད་མའི་དྲི་དེ་སོང་བ་དེ་དག་ཐམས་ཅད་ཀྱང་ཆོས་ཀྱི་དགའ་བ་དང་། ཆོས་མཉན་པའི་རྒྱུ་དང་ལྡན་པར་
གྱུར་ཏེ་བདག་ཉིད་ཉོན་མོངས་པ་དང་བྲལ་བ་སྙམ་དུ་ཤེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་ཆེན་སྙིང་པོས་ཆོས་ཀྱི་འོད་ཀྱི་བཀོད་པ་དེ་མཐོང་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཕྱོགས་བཅུར་འོད་གདའ་བ་འདི་དང་པད་མའི་
བཀོད་པ་བྱུང་བ་འདི་སུའི་སྔ་ལྟས་ལགས། དེ་ནས་ལྷ་མོ་དྲི་མ་མེད་པའི་འོད་ཀྱིས་སྤྲིན་ཆེན་སྙིང་པོ་ལ་འདི་སྐད་ཅེས་སྨྲས་སོ། །འཕགས་པ་སྤྲིན་ཆེན་སྙིང་པོ་ཅིའི་ཕྱིར་བཅོམ་ལྡན་འདས་འདི་སུའི་སྔ་ལྟས་ལགས་ཞེས་སྨྲ། མཚན་མ་མེད་པའི་ཆོས་རྨི་ལམ་ལྟ་བུ་ཡིན་ཡང་འདྲི་བར་བྱེད་དམ་ཁྱོད་ལ་ནི་ད་
དུང་ཡང་ཕྱིན་ཅི་ལོག་ཡོད་པ་འདྲའོ། །སྨྲས་པ། ལྷ་མོ་ལེགས་སོ། །ལེགས་སོ། །དེ་དེ་བཞིན་ཏེ། ལྷ་མོ་ཁྱོད་ལེགས་སོ། །ཁོ་བོ་ནི་རྨི་ལམ་ལྟ་བུའི་ཡུལ་དག་ལ་མཚན་མར་ལྟ་བ་འཛིན་པའི་འདུ་ཤེས་བཅོམ་ལྡན་འདས་ལ་ཞུ་བར་བྱེད་དོ། །སྨྲས་པ། འཕགས་པ་སྤྲིན་ཆེན་སྙིང་པོ་སུའི་དོན་

གྱི་ཕྱིར་མཚན་མར་ལྟ་བ་འཛིན་པའི་འདུ་ཤེས་སྨྲ་བར་བྱེད། སྨྲས་པ། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་རོ། །སྨྲས་པ། གང་བདག་གི་ལྟ་བ་བསལ་བར་མི་ནུས་པ་དེས་གཞན་གྱི་ལྟ་བ་སེལ་བར་འགྱུར་བ་དེ་ནི་གནས་མེད་དོ། །བཅོམ་ལྡན་འདས་ཀྱིས་བཀའ་སྩལ་
པ། སྤྲིན་ཆེན་སྙིང་པོ་དེ་ནི་ལྷ་མོས་ཇི་སྐད་སྨྲས་པ་བཞིན་ཏེ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་གང་ཡིན་པ་དེ་ནི་མཚན་མ་མེད་པའི་འདུ་ཤེས་ཡང་དག་པར་མཐོང་བ་ཡིན་ནོ། །གསོལ་པ། བཅོམ་ལྡན་འདས་འདི་ལ་གནས་པའི་བྱང་ཆུབ་སེམས་དཔའ་རིགས་ཀྱི་བུའམ།
རིགས་ཀྱི་བུ་མོ་མཚན་མ་མ་མཆིས་པའི་འདུ་ཤེས་ཡང་དག་པར་བལྟ་བར་འཚལ་བས་ཇི་ལྟར་ཡང་དག་པར་བལྟ་བར་བགྱི། བཀའ་སྩལ་པ། སྤྲིན་ཆེན་སྙིང་པོ་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་
བདག་ཉིད་རྣམ་པ་དུ་མར་སྟོན་པར་བྱེད་དོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་བདག་ཉིད་རྣམ་པ་དུ་མར་ཇི་ལྟར་སྟོན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་
སྙིང་པོ་འདི་ལྟ་སྟེ། དཔེར་ན་སྒྱུ་མ་མཁན་ནམ། སྒྱུ་མ་མཁན་གྱི་སློབ་མ་ནན་ཏན་དུ་སྦྱངས་པ་མཁས་པས་རོལ་མོའི་ནང་དུ་བདག་ཉིད་རོར་གྱུར་པར་སྟོན་པར་བྱེད། བུད་མེད་ཀྱི་ལུས་རྣམ་པ་སྣ་ཚོགས་སུ་ཡང་སྟོན་པར་བྱེད། གཅན་གཟན་གྱིས་ཟིན་པ་དང་། ལུས་ཞུ་བ་དང་། ལུས་མི་སྣང་བ་
དང་། ཚིག་པ་དང་། བཅད་པ་དང་། གཏུབ་པའི་རྣམ་པས་ཕ་རོལ་འདྲིད་པ་ལྟ་བུར་གསང་བ་རྣམ་པ་སྣ་ཚོགས་ཀྱི་ཚུལ་དུ་བདག་ཉིད་སྟོན་པ་དག་ཀྱང་མཐོང་ན། དེར་རྒྱུས་ཤེས་པའི་མིས་འཇིགས་པར་མི་བྱ། མྱ་ངན་དུ་མི་བྱ་བར་དེ་ལ་རིག་སྔགས་ཀྱི་རང་བཞིན་དུ་བལྟ་བར་བྱའོ། །དེ་བཞིན་དུ་
ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་རྟག་པ་ཉིད་ཀྱི་ལམ་ལ་ནན་ཏན་དུ་སྦྱངས་པས་སེམས་ཅན་རྣམས་ངེས་པར་བསྒྲལ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་བདག་ཉིད་རྣམ་པ་སྣ་ཚོགས་ཀྱི་ཚུལ་དུ་སྟོན་པར་བྱེད་དེ། ཏིང་ངེ་འཛིན་འདི་ལ་གནས་པའི་བྱང་

ཆུབ་སེམས་དཔའ་བདག་ཉིད་རྣམ་པ་སྣ་ཚོགས་ཀྱི་ཚུལ་དུ་སྟོན་པ་མཐོང་ན། བསྟན་པའི་རྒྱུས་ཤེས་ཤིང་མཁས་པས་སྐྲག་པར་མི་བྱ། ཀུན་ཏུ་སྐྲག་པར་མི་བྱ། དངང་བར་མི་བྱ། འཇིགས་པར་མི་བྱ། མྱ་ངན་དུ་མི་བྱ་བར་དེ་ལ་སེམས་ཅན་རྟག་པ་ཉིད་ཀྱི་རང་བཞིན་དུ་བལྟ་བར་བྱའོ། །སྤྲིན་
ཆེན་སྙིང་པོ་གཞན་ཡང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་འཇིག་རྟེན་དང་འཐུན་པར་འཇུག་པའི་བྱ་བ་རྣམ་པ་གྲངས་མེད། དཔག་ཏུ་མེད་པ་བགྲང་བ་ལས་འདས་པ་རྣམ་པ་སྣ་ཚོགས་སུ་བདག་ཉིད་སྟོན་ཏོ། །འཛམ་བུའི་གླིང་བྱེ་
བ་ཕྲག་སུམ་ཁྲི་དག་ཏུ་ཡང་གོང་མ་བཞིན་དུ་སྦྱར་རོ། །དེ་ལྟ་བུའི་ཚུལ་དུ་བྱེ་བ་ཕྲག་བརྒྱར་བསྒྲེ་བར་བྱ་སྟེ། གོང་མ་བཞིན་དུ་སྦྱར་རོ། གསོལ་པ། བཅོམ་ལྡན་འདས་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་སུ་འཇིག་རྟེན་དང་འཐུན་པར་འཇུག་པར་བྱ་བའི་རྣམ་པའི་གྲངས་མ་མཆིས་དཔག་ཏུ་མ་མཆིས་པ་རྣམ་པ་སྣ་ཚོགས་སུ་བདག་ཉིད་ཇི་ལྟར་སྟོན་པར་བགྱིད། བཀའ་སྩལ་པ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔས་འཛམ་བུའི་གླིང་ལ་ལར་བདག་ཉིད་མངལ་ནས་སྐྱེ་བ་ལྟ་
བུར་སྟོན་ཏེ། སེམས་ཅན་རྣམས་ཀྱིས་བུ་བཙས་པར་ཤེས་ཀྱང་འཁྲིག་པ་ལ་བརྟེན་ནས་བྱུང་བ་ཡང་མ་ཡིན་ཞིང་བུའི་རང་བཞིན་ཡང་མ་ཡིན་ནོ། །འཛམ་བུའི་གླིང་ལ་ལར་མངོན་པར་འབྱུང་བ་ཡང་སྟོན་ཏེ། སེམས་ཅན་རྣམས་ཀྱིས་མངོན་པར་འབྱུང་བར་ཤེས་ཀྱང་དེ་ལ་མངོན་པར་འབྱུང་བའི་
འདུ་ཤེས་འཇུག་པ་ཡང་མེད་དོ། །འཛམ་བུའི་གླིང་ལ་ལར་ནི་གཙུག་ཕུད་འབྲེག་པའི་ལས་ལྟ་བུར་སྟོན་ཏེ། སེམས་ཅན་རྣམས་ཀྱིས་གཙུག་ཕུད་འབྲེག་པའི་ལས་བྱེད་པར་ཤེས་ཀྱང་དེ་ལ་དེའི་འདུ་ཤེས་འཇུག་པ་ཡང་མེད་དོ། །འཛམ་བུའི་གླིང་ལ་ལར་ནི་མཁན་པོའི་ཁྱིམ་དུ་འགྲོ་བ་ལྟ་བུར་
སྟོན་ཏེ། བསླབ་པར་བྱ་བའི་ཡི་གེ་སློབ་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་དུ་མར་བསླབ་པའི་བྱ་བ་ཤིན་ཏུ་ཚར་ཕྱིན་པར་བྱས་ཤིང་། བསྐལ་པ་བྱེ་བ་ཕྲག་བརྒྱ་སྟོང་དུ་མ་ནས་བཟོའི་བྱ་བ་ཐམས་ཅད་ཀྱང་མཐར་ཕྱིན་ཏོ། །འཛམ་བུའི་གླིང་ལ་ལར་ནི་མིའི་སེང་གེ་དང་ངང་པའི་

སྟབས་སུ་འགྲོ་བ་ལྟ་བུར་སྟོན་ཏེ། སེམས་ཅན་རྣམས་ཀྱིས་མིའི་སེང་གེ་དང་། ངང་པའི་སྟབས་སུ་འགྲོ་བར་ཤེས་ཀྱང་བསྐལ་པ་བྱེ་བ་ཕྲག་དུ་མ་ལ་སོགས་པ་ནས་ངང་པའི་སྟབས་ཀྱི་འདུ་ཤེས་དེ་ཡང་སྤངས་སོ། །འཛམ་བུའི་གླིང་ལ་ལར་ནི་བུ་དང་ཆུང་མ་ཡང་སྟོན་པར་
བྱེད་དེ། སེམས་ཅན་རྣམས་ཀྱིས་འདོད་པ་ལ་ཡོངས་སུ་སྤྱོད་པར་ཤེས་ཀྱང་དེའང་རྟག་ཏུ་ཆོས་འདོད་པ་ལ་ཡོངས་སུ་སྤྱོད་ཀྱི་ཉོན་མོངས་པ་དང་འདོད་པ་ལ་གནས་པ་མ་ཡིན་ནོ། །འཛམ་བུའི་གླིང་ལ་ལར་ནི་བཤང་བ་དང་། གཅི་བ་ལྟ་བུར་སྟོན་པར་བྱེད་དེ། སེམས་ཅན་རྣམས་ཀྱིས་བཤང་བ་དང་།
གཅི་བ་བྱེད་པར་ཤེས་ཀྱང་བསྐལ་པ་བྱེ་བ་ཕྲག་གྲངས་མེད་པ་ནས་བཤང་བ་དང་གཅི་བའི་འདུ་ཤེས་ཀྱང་རྣམ་པར་སྤངས་ཏེ་འདུ་ཤེས་དེ་ཡང་འཇུག་པ་མེད་དོ། །འཛམ་བུའི་གླིང་ལ་ལར་ནི་ས་ཤིང་སྤྱོད་པ་ལྟ་བུར་སྟོན་ཏེ། སོ་ཤིང་འཆའ་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་
གྲངས་མེད་པ་ནས་ཉོན་མོངས་པའི་སོ་ཤིང་རྣམ་པར་སྤངས་ཏེ་ཁ་ཡང་ཨུད་པ་ལའི་དྲི་དང་ལྡན་ནོ། །འཛམ་བུའི་གླིང་ལ་ལར་ནི་གདུགས་དང་། ལྷམ་འཆང་བ་ལྟ་བུར་སྟོན་ཏེ། གདུགས་དང་ལྷམ་འཆང་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་དུ་མ་ནས་ཉོན་མོངས་པའི་
གདུགས་དང་ལྷམ་གྱི་འདུ་ཤེས་དེ་ཡང་རྣམ་པར་སྤངས་ཏེ། ལུས་དག་ཅིང་རྟག་ཏུ་ཆོས་ཀྱི་བདེ་བ་དང་ཏིང་ངེ་འཛིན་གྱི་གདུགས་འཆང་ཞིང་རིན་པོ་ཆེའི་གདུགས་དུ་མ་དང་པད་མའི་ལྷམ་ཐམས་ཅད་སྟོན་པར་བྱེད་དོ། །འཛམ་བུའི་གླིང་ལ་ལར་ནི་ཁྲུས་བྱེད་པ་ལྟ་བུར་སྟོན་ཏེ། ཁྲུས་བྱེད་
པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་ཁྲུས་ཀྱི་འདུ་ཤེས་དེ་རྣམ་པར་སྤངས་ཏེ། མདོ་དུ་མ་ནས་བྱུང་བའི་ཆུས་རྟག་ཏུ་ཁྲུས་བྱེད་ཅིང་སེམས་ཅན་ཐམས་ཅད་ཀྱི་མུ་སྟེགས་སུ་གྱུར་པ་ཡིན་ནོ། །འཛམ་བུའི་གླིང་ལ་ལར་ནི་ནད་ཀྱི་རང་བཞིན་ལྟ་བུར་སྟོན་ཏེ། སྨན་ལ་སྟེན་
པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་ཉོན་མོངས་པ་ཐམས་ཅད་དང་བྲལ་ཞིང་ནད་རྣམས་བསལ་བ་སྟེ། སེམས་ཅན་ནད་ཀྱིས་ཐེབས་པ་རྣམས་དང་འདོད་ཆགས་ཀྱི་རང་བཞིན་དག་ལས་ཀྱང་གསོ་བར་བྱེད་དོ། །འཛམ་བུའི་གླིང་ལ་ལར་ནི་གྲང་བ་དང་ཚ་བ་ལ་སྟེན་པ་

ལྟ་བུར་སྟོན་ཏེ། གྲང་བ་དང་ཚ་བ་ལ་སྟེན་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ལ་སོགས་པ་ནས་གྲང་བ་དང་ཚ་བའི་འཇིགས་པ་ཡང་རྣམ་པར་སྤངས་སོ། །འཛམ་བུའི་གླིང་ལ་ལར་ནི་བཀྲེས་པ་དང་སྐོམ་པས་སྲེད་ཅིང་ཞེན་པ་དང་ལྡན་པར་སྟོན་ཏེ། བཀྲེས་ཤིང་སྐོམ་
པས་གདུངས་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་བཀྲེས་པ་དང་སྐོམ་པའི་འདུ་ཤེས་ཀྱིས་འཇིགས་པའི་ཀླུང་གི་རྒྱུན་ལས་ཀྱང་རྒལ་ནས་རྟག་ཏུ་བཀྲེས་པ་དང་སྐོམ་པས་སྲེད་པར་གྱུར་པའི་འབྱུང་པོ་ཐམས་ཅད་ཀྱི་ཁ་ཟས་སུ་གྱུར་ཅིག་ཅེས་ཟེར་རོ། །འཛམ་བུའི་གླིང་ལ་
ལར་ནི་སྦྱིན་པའི་ཕ་རོལ་ཏུ་ཕྱིན་པ་སྤྱོད་པ་ལ་རྩོམ་པ་ལྟ་བུར་སྟོན་ཏེ། ཀྱེ་མ་སྦྱིན་པ་ལ་བརྩོན་པའི་སེམས་ཅན་ཡིན་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་ཀྱང་ཕ་རོལ་ཏུ་ཕྱིན་པ་དུ་མ་རྟག་ཏུ་སྤྱད་པས་ཕ་རོལ་ཏུ་ཕྱིན་པ་བཅུ་པོ་རྣམས་ལ་སེམས་ཅན་རྣམས་སྡུད་པའི་རྒྱུར་གྱུར་ཏོ། །
འཛམ་བུའི་གླིང་ལ་ལར་ནི་འཁོར་ལོས་སྒྱུར་བའི་རྒྱལ་སྲིད་ཀྱི་ཚུལ་སྟོན་ཏེ། འཁོར་ལོས་སྒྱུར་བའི་རྒྱལ་པོར་སེམས་ཅན་རྣམས་ཀྱིས་ཤེས་ཀྱང་དེ་འཁོར་ལོས་སྒྱུར་བའི་རྒྱལ་པོ་ཕལ་གྱི་སྤྱད་པ་ཡང་མི་སྤྱོད་དེ། རྟག་ཏུ་ཕྱིར་མི་ལྡོག་པའི་ཆོས་ཀྱི་འཁོར་ལོས་སྒྱུར་བའི་རྒྱལ་པོ་བྱེད་ཅིང་སེམས་ཅན་
ཐམས་ཅད་ཀྱང་བྱེད་དུ་འཇུག་གོ། །འཛམ་བུའི་གླིང་ལ་ལར་ནི་དེ་ལྟ་བུའི་རྒྱལ་སྲིད་ཕུན་སུམ་ཚོགས་པ་ཤིན་ཏུ་རྒྱ་ཆེ་བ་དག་ཀྱང་རྩྭ་བཞིན་དུ་བོར་ནས་རབ་ཏུ་བྱུང་བའི་གཟུགས་དང་མཚན་མ་སྟོན་པར་བྱེད་དེ། ལ་ལར་ནི་རབ་ཏུ་བྱུང་བ་ལྟ་བུ། ལ་ལར་ནི་རབ་ཏུ་མ་བྱུང་བ་ལྟ་བུར་སེམས་ཅན་རྣམས་
ཀྱིས་ཤེས་སོ། །འཛམ་བུའི་གླིང་ལ་ལར་ནི་ཡ་མཚན་ཅན་ཐམས་ཅད་ཀྱི་རབ་ཏུ་བྱུང་བ་ལྟ་བུར་ལྟ་བ་ངན་པ་རབ་ཏུ་འབྱུང་བ་ལ་རབ་ཏུ་བྱུང་བར་སེམས་ཅན་རྣམས་ཀྱིས་ཤེས་ཀྱང་ཡ་མཚན་ཅན་ཐམས་ཅད་འཐུན་པར་རབ་ཏུ་བྱུང་བ་ཡང་མ་ཡིན་ཏེ་དེ་དག་ངེས་པར་བསྒྲལ་བའི་ཕྱིར་རབ་ཏུ་འབྱུང་ངོ་། །འཛམ་
བུའི་གླིང་ལ་ལར་ནི་དེ་བཞིན་གཤེགས་པ་རབ་ཏུ་འབྱུང་བར་རྩོམ་པ་ལྟ་བུར་སྟོན་ཏེ། དེ་བཞིན་གཤེགས་པ་རབ་ཏུ་འབྱུང་བས་རབ་ཏུ་འབྱུང་བར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་དེ་བཞིན་གཤེགས་པའི་རབ་ཏུ་འབྱུང་བའི་བྱ་བ་ཡང་མཐར་ཕྱིན་པར་

བྱས་སོ། །འཛམ་བུའི་གླིང་ལ་ལར་ནི་སྦྱངས་པའི་ཡོན་ཏན་བཅུ་གསུམ་ཡང་དག་པར་འཛིན་པ་ལྟ་བུར་སྟོན་ཏེ། སྦྱངས་པའི་ཡོན་ཏན་ཅན་ཡོ་བྱད་བསྙུངས་པ་ཡིན་པར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་སྦྱངས་པའི་ཡོན་ཏན་རྫོགས་ཤིང་རྟག་ཏུ་མཉམ་པར་
བཞག་པ་ཡང་ཡིན་ནོ། །འཛམ་བུའི་གླིང་ལ་ལར་ནི་བྱང་ཆུབ་ཀྱི་སྙིང་པོར་རྩྭ་བཏིང་བ་ལ་འདུག་པ་ལྟ་བུར་སྟོན་ཏེ། བྱང་ཆུབ་ཀྱི་སྙིང་པོ་ལ་འདུག་པར་སེམས་ཅན་རྣམས་ཀྱིས་ཤེས་ཀྱང་། རྟག་ཏུ་བྱང་ཆུབ་ཀྱི་བྱ་བ་མཐར་ཕྱིན་པར་བྱས་པ་ཡང་ཡིན་ནོ། །འཛམ་བུའི་གླིང་ལ་ལར་ནི་བསམ་གཏན་དང་
ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པ་ལྟ་བུར་སྟོན་ཏེ། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་སྙོམས་པར་འཇུག་པའི་སྤྱོད་པ་དུ་མ་ལ་སྤྱོད་པ་ཡང་ཡིན་ནོ། །འཛམ་བུའི་གླིང་
ལ་ལར་ནི་ཡན་ལག་དགུ་པའི་མདོ་འཆད་པ་ལྟ་བུར་སྟོན་ཏེ། བཅོམ་ལྡན་འདས་ཀྱིས་ཡན་ལག་དགུ་པའི་མདོ་གསུངས་པ་འཆད་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་མདོ་དུ་མ་ལ་སོགས་པ་ཡང་འཆད་དོ། །འཛམ་བུའི་གླིང་ལ་ལར་ནི་བསླབ་པའི་གཞིའི་ཚད་ངེས་པར་བྱེད་པ་ལྟ་བུར་སྟོན་
ཏེ། བསླབ་པའི་གཞིའི་ཚད་ངེས་པར་འཆའ་བར་བྱེད་པར་སེམས་ཅན་རྣམས་ཀྱིས་ཤེས་ཀྱང་། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་མདོ་དག་ཀྱང་རྟག་ཏུ་བྱེད་ཅིང་། བསླབ་པའི་གཞི་དུ་མ་དག་ཀྱང་རྟག་ཏུ་འཆའ་བར་བྱེད་དོ། །འཛམ་བུའི་གླིང་ལ་ལར་ནི་བྱང་ཆུབ་ཀྱི་ཤིང་དྲུང་དུ་བདུད་
འདུལ་བ་ལྟ་བུར་སྟོན་ཏེ། བདུད་ཀྱི་སྡེ་ཕམ་པར་བྱས་པར་སེམས་ཅན་རྣམས་ཀྱིས་ཤེས་ཀྱང་། བདུད་ཀྱི་འདུ་ཤེས་གཅིག་ཀྱང་མི་འབྱུང་སྟེ། ཉོན་མོངས་པའི་བདུད་དང་། ཕུང་པོའི་བདུད་ལ་སོགས་པ་བདུད་བྱེ་བ་ཕྲག་དུ་མ་དག་ཀྱང་རྟག་ཏུ་ཟད་པར་བྱེད་དོ། །འཛམ་བུའི་གླིང་ལ་ལར་ནི་
རྒྱུན་ཏུ་ཞུགས་པའི་འབྲས་བུ་ལ་སོགས་པ་འབྲས་བུ་བཞི་ཐོབ་པ་ལྟ་བུར་སྟོན་ཏེ། འབྲས་བུ་བཞི་ཐོབ་པར་སེམས་ཅན་རྣམས་ཀྱིས་ཤེས་ཀྱང་འབྲས་བུ་བཞིའི་འདུ་ཤེས་ཀྱང་མི་འབྱུང་སྟེ། འབྲས་བུའི་བྱ་བ་དུ་མ་དག་ལ་ཡང་སྤྱོད་ཅིང་ཕྱིར་མི་འོང་བ་ཡང་མ་ཡིན་ལ། སེམས་ཅན་

རྣམས་ངེས་པར་བསྒྲལ་བའི་ཕྱིར་རྟག་ཏུ་སྲིད་པའི་ཡན་ལག་རྣམས་སུ་ཡང་འོང་ངོ་། །འཛམ་བུའི་གླིང་ལ་ལར་ནི་ཡོན་གནས་ལྟ་བུར་སྟོན་ཏེ། འཇིག་རྟེན་གྱི་ཡོན་གནས་ཡིན་པར་སེམས་ཅན་རྣམས་ཀྱིས་ཤེས་ཀྱང་། ཡོན་གནས་ཀྱི་ང་རྒྱལ་ལ་ཡང་མི་སྤྱོད་དེ་ནམ་སེམས་ཅན་ཐམས་ཅད་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་ཡོན་གནས་སུ་གྱུར་པ་དེའི་ཚེ་བདག་ཡོན་གནས་ཀྱི་འདུ་ཤེས་ལ་འཇུག་གོ་སྙམ་ནས་མ་གོས་པའི་སྤྱད་པ་ལ་སྤྱོད་དེ། འཛམ་བུའི་གླིང་ལ་ལར་ནི་དགེ་འདུན་གྱི་དབྱེན་བྱེད་པ་ལྟ་བུར་སྟོན་ཏེ། དགེ་འདུན་གྱི་དབྱེན་བྱེད་པར་སེམས་ཅན་རྣམས་ཀྱིས་ཤེས་
ཀྱང་། སྔོན་གྱི་བསྐལ་པ་བྱེ་བ་ཕྲག་གྲངས་མེད་པ་ནས་དགེ་འདུན་གྱི་དབྱེ་ན་སྔོན་ཅད་ཀྱང་མ་བྱས་ཏེ་དགེ་འདུན་ལ་ཕན་པར་བསྒྲུབ་པར་སྤྱོད་པ་ཡིན་ནོ། །འཛམ་བུའི་གླིང་ལ་ལར་ནི་དེ་བཞིན་གཤེགས་པའི་ཞབས་ཀྱིས་རེག་པའི་རྡུལ་གུད་དུ་འདོར་བར་བྱེད་པ་ལྟ་བུར་སྟོན་ཏེ། ཀྱེ་མ་ངུར་སྨྲིག་ཙམ་
འཆང་ཞིང་མི་བཟད་པའི་ལས་བྱེད་པ་ཞིག་ཡིན་པར་སེམས་ཅན་རྣམས་ཀྱིས་ཤེས་ཀྱང་ངུར་སྨྲིག་ཙམ་འཆང་བ་ཡང་མ་ཡིན་ཏེ། སེམས་ཅན་ཐམས་ཅད་ལ་ཕན་པ་དང་། བདེ་བ་སྟོན་པ་ཡང་ཡིན་ནོ། །དེ་ལ་སོགས་པ་གཞན་ཡང་དེ་བཞིན་གཤེགས་པའི་ཞབས་ཀྱི་དྲུང་དུ་ཆོས་མཉན་པ་ཐོས་ན། ཀྱེ་
མ་དགེ་སྦྱོང་གཽ་ཏ་མ་ནི་བརྡ་ཕྲད་དཀའ་བ་ཤ་སྟག་ཟེར་རོ་ཞེས་འཕྱ་བ་ལྟ་བུར་སྟོན་ཏེ། ཀྱེ་མ་གཡེངས་པ་ཤེས་རབ་རྟུལ་བའི་དགེ་སྦྱོང་ཞིག་ཡིན་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་དེ་བཞིན་གཤེགས་པ་ལ་ཕན་པ་དང་། བདེ་བ་བྱེད་པ་ཡང་ཡིན་ནོ། །འཛམ་
བུའི་གླིང་ལ་ལར་ནི་དེ་བཞིན་གཤེགས་པ་ལ་ཟས་དུག་ཅན་འབུལ་ཞིང་བསླབ་པའི་གཞི་དང་། ཕམ་པའི་འགལ་བ་བྱེད་པ་ལྟ་བུར་སྟོན་ཏེ། ཕམ་པ་ཅན་དུ་སེམས་ཅན་རྣམས་ཀྱིས་ཤེས་ཀྱང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་སྡོམ་པ་སྐྱེད་པར་བྱེད་པ་ཡང་ཡིན་ནོ། །འཛམ་བུའི་གླིང་ལ་
ལར་ནི་དེ་བཞིན་གཤེགས་པ་རྣམས་ཀྱི་མཛད་པ་མང་པོ་སྟོན་པ་ལྟ་བུར་སྟོན་ཏེ། ཡང་དག་པར་སྟོན་པ་པོ་ཡིན་པར་སེམས་ཅན་རྣམས་ཀྱིས་ཤེས་ཀྱང་ཡང་དག་པར་སྟོན་པ་པོ་ཡང་མ་ཡིན་ཏེ། དེ་བཞིན་གཤེགས་པའི་རྒྱན་བྱེད་པ་ཡང་ཡིན་ནོ། །འཛམ་བུའི་གླིང་ལ་ལར་ནི་ཉན་ཐོས་དང་། རང་

སངས་རྒྱས་ཐམས་ཅད་ལྟ་བུར་བདག་ཉིད་སྟོན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཡིན་པར་སེམས་ཅན་རྣམས་ཀྱིས་ཤེས་སོ། །འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་བདག་ཉིད་སྟོན་ཏེ། ཡོངས་སུ་མྱ་ངན་ལས་འདས་པར་སེམས་ཅན་རྣམས་ཀྱིས་
ཤེས་ཀྱང་སྔན་ཆད་གཏན་དུ་ཡོངས་སུ་མྱ་ངན་ལས་འདས་པས་ནི་ནམས་ཀྱང་ཡོངས་སུ་མྱ་ངན་ལས་མ་འདས་སོ། །ལན་ཅིག་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདས་པ་ཡང་མ་ཡིན་ཏེ། ལན་མང་དུ་ཡང་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའོ། །ལན་
གྲངས་བྱེ་བ་ཕྲག་བརྒྱད་ཁྲི་བཞི་སྟོང་དུ་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་བྱེད་དེ། ལན་བྱེ་བ་ཕྲག་ཉི་ཁྲི་ཆིག་སྟོང་དུ་འདོད་ཆགས་ལས་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་འགྱུར་ལ། འདོད་ཆགས་ལས་བརྟེན་ཏེ་ཡོངས་སུ་མྱ་ངན་
ལས་འདས་པ་ཡང་མ་ཡིན་ནོ། །ལན་བྱེ་བ་ཕྲག་ཉི་ཁྲི་ཆིག་སྟོང་དུ་ཞེ་སྡང་ལས་ཡོངས་སུ་མྱ་ངན་ལས་འདའོ། །ལན་བྱེ་བ་ཕྲག་ཉི་ཁྲི་ཆིག་སྟོང་དུ་གཏི་མུག་ལས་ཡོངས་སུ་མྱ་ངན་ལས་འདའོ་ལན་བྱེ་བ་ཕྲག་ཉི་ཁྲི་ཆིག་སྟོང་དུ་ཆ་མཉམ་པ་ལས་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་
འདའ་བར་བྱེད་དེ། རྣམ་པ་བཞི་པོ་འདི་ལྟ་བུས་ཡོངས་སུ་མྱ་ངན་ལས་འདས་པ་ཆེན་པོར་ཡོངས་སུ་མྱ་ངན་ལས་འདའ་བར་འགྱུར་ལ། འདོད་ཆགས་དང་། ཞེ་སྡང་དང་། གཏི་མུག་དང་། ཆ་མཉམ་པ་ལ་ཡང་མི་རྟེན་ཏོ། །དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་བཞི་པོ་དག་གིས་
བསྐལ་པ་བྱེ་བ་ཕྲག་དུ་མ་ནས་བྱ་བ་མཐར་ཕྱིན་ཏེ་འདུལ་བའི་དབང་གིས་ཡོངས་སུ་མྱ་ངན་ལས་འདའ་བ་ལྟ་བུར་སྟོན་ཏེ། མི་དགེ་བའི་ཕྱོགས་ཇི་སྙེད་ཡོད་པར་ཡོངས་སུ་མྱ་ངན་ལས་འདས་པ་ཡང་དེ་སྙེད་དེ། རྟག་ཏུ་སྐད་ཅིག་དང་། ཐང་ཅིག་དང་། ཡུད་ཙམ་གྱིས་ཡོངས་སུ་མྱ་ངན་ལས་འདའོ། །དེ་
བས་ན་རྣམ་པ་མང་པོ་དག་གིས་ཡོངས་སུ་མྱ་ངན་ལས་འདའ་བར་བྱེད་ལ་གཏན་དུ་ཡོངས་སུ་མྱ་ངན་ལས་འདའ་བའི་མིང་ཡང་མེད་པའི་ཕྱིར་ཡོངས་སུ་མྱ་ངན་ལས་མི་འདའོ། །འཛམ་བུའི་གླིང་ལ་ལར་ནི་བདུད་ཀྱི་ལས་བྱེད་པར་བདག་ཉིད་སྟོན་ཏེ། བདུད་སྡིག་ཅན་ཡིན་པར་སེམས་ཅན་རྣམས་ཀྱིས་ཤེས་

ཀྱང་བདུད་ཀྱི་ལས་ཀྱང་མི་བྱེད་དོ། །འདོད་ཆགས་དང་། ཞེ་སྡང་དང་། གཏི་མུག་གི་འཇིགས་པ་ལ་སོགས་པ་མི་དགེ་བའི་ཕྱོགས་ཇི་སྙེད་པ་དེ་སྙེད་ཀྱི་བདུད་ཀྱི་ལས་རྟག་ཏུ་བྱེད་ལ། ཤིན་ཏུ་གཅོད་པར་བྱེད་པའི་བདུད་ཀྱི་ལས་ལ་རྟེན་པ་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་བདག་ཉིད་མངལ་
ནས་སྐྱེས་པ་ལྟ་བུར་སྟོན་ཏེ། སེམས་ཅན་རྣམས་ཀྱིས་བུ་བཙས་པར་ཤེས་ཀྱང་འཁྲིག་པ་ལ་བརྟེན་ནས་བྱུང་བ་ཡང་མ་ཡིན་ཞིང་བུའི་རང་བཞིན་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་མངོན་པར་འབྱུང་བ་ཡང་སྟོན་ཏེ། སེམས་ཅན་རྣམས་ཀྱིས་མངོན་པར་འབྱུང་བར་ཤེས་ཀྱང་། དེ་ལ་མངོན་པར་
འབྱུང་བའི་འདུ་ཤེས་འཇུག་པ་ཡང་མེད་དོ། །བྱང་གི་སྒྲ་མི་སྙན་ལ་ལར་ནི་གཙུག་ཕུད་བྲེག་པའི་ལས་ལྟ་བུར་སྟོན་ཏེ། སེམས་ཅན་རྣམས་ཀྱིས་གཙུག་ཕུད་འབྲེག་པའི་ལས་བྱེད་པར་ཤེས་ཀྱང་དེ་ལ་དེའི་འདུ་ཤེས་འཇུག་པ་ཡང་མེད་དོ། །བྱང་གི་སྒྲ་མི་སྙན་ལ་ལར་ནི་མཁན་པོའི་ཁྱིམ་དུ་འགྲོ་བ་ལྟ་བུར་སྟོན་ཏེ།
བསླབ་པར་བྱ་བའི་ཡི་གེ་སློབ་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་དུ་མར་བསླབ་པའི་བྱ་བ་ཤིན་ཏུ་ཚར་ཕྱིན་པར་བྱས་ཤིང་བསྐལ་པ་བྱེ་བ་ཕྲག་བརྒྱ་སྟོང་དུ་མ་ནས་བཟོའི་བྱ་བ་ཐམས་ཅད་ཀྱང་མཐར་ཕྱིན་ཏོ། །བྱང་གི་སྒྲ་མི་སྙན་ལ་ལར་ནི་མིའི་སེང་གེ་དང་། ངང་པའི་སྟབས་སུ་འགྲོ་བ་ལྟ་བུར་སྟོན་ཏེ།
སེམས་ཅན་རྣམས་ཀྱིས་མིའི་སེང་གེ་དང་། ངང་པའི་སྟབས་སུ་འགྲོ་བར་ཤེས་ཀྱང་བསྐལ་པ་བྱེ་བ་ཕྲག་དུ་མ་ལ་སོགས་པ་ནས་ངང་པའི་སྟབས་ཀྱི་འདུ་ཤེས་དེ་ཡང་སྤངས་སོ། །བྱང་གི་སྒྲ་མི་སྙན་ལ་ལར་ནི་བུ་དང་ཆུང་མ་ཡང་སྟོན་པར་བྱེད་དེ། སེམས་ཅན་རྣམས་ཀྱིས་འདོད་པ་ལ་ཡོངས་སུ་སྤྱོད་པར་
ཤེས་ཀྱང་། དེའང་རྟག་ཏུ་ཆོས་འདོད་པ་ལ་ཡོངས་སུ་སྤྱོད་ཀྱི་ཉོན་མོངས་པ་དང་། འདོད་པ་ལ་གནས་པ་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་བཤང་བ་དང་། གཅི་བ་ལྟ་བུར་སྟོན་པར་བྱེད་དེ། སེམས་ཅན་རྣམས་ཀྱིས་བཤང་བ་དང་། གཅི་བ་བྱེད་པར་ཤེས་ཀྱང་བསྐལ་པ་བྱེ་བ་ཕྲག་གྲངས་མེད་པ་
ནས་བཤང་བ་དང་། གཅི་བའི་འདུ་ཤེས་ཀྱང་རྣམ་པར་སྤངས་ཏེ་འདུ་ཤེས་དེ་ཡང་འཇུག་པ་མེད་དོ། །བྱང་གི་སྒྲ་མི་སྙན་ལ་ལར་ནི་སོ་ཤིང་སྤྱོད་པ་ལྟ་བུར་སྟོན་ཏེ། སོ་ཤིང་འཆང་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་གྲངས་མེད་པ་ནས་ཉོན་མོངས་པའི་སོ་ཤིང་རྣམ་པར་སྤངས་ཏེ། ཁ་ཡང་

ཨུད་པ་ལའི་དྲི་དང་ལྡན་ནོ། །བྱང་གི་སྒྲ་མི་སྙན་ལ་ལར་ནི་གདུགས་དང་། ལྷམ་འཆང་བ་ལྟ་བུར་སྟོན་ཏེ། གདུགས་དང་། ལྷམ་འཆང་བར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་ཉོན་མོངས་པའི་གདུགས་དང་། ལྷམ་གྱི་འདུ་ཤེས་ཀྱང་རྣམ་པར་སྤངས་ཏེ་ལུས་
དག་ཅིང་རྟག་ཏུ་ཆོས་ཀྱི་བདེ་བ་དང་། ཏིང་ངེ་འཛིན་གྱི་གདུགས་འཆང་ཞིང་རིན་པོ་ཆེའི་གདུགས་དང་། པད་མའི་ལྷམ་ཐམས་ཅད་སྟེན་པར་བྱེད་དོ། །བྱང་གི་སྒྲ་མི་སྙན་ལ་ལར་ནི་ཁྲུས་བྱེད་པ་ལྟ་བུར་སྟོན་ཏེ། ཁྲུས་བྱེད་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་ཁྲུས་ཀྱི་འདུ་
ཤེས་དེ་རྣམ་པར་སྤངས་ཏེ། མདོ་དུ་མ་ནས་བྱུང་བའི་ཆུས་རྟག་ཏུ་ཁྲུས་བྱེད་ཅིང་སེམས་ཅན་ཐམས་ཅད་ཀྱི་མུ་སྟེགས་སུ་གྱུར་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་ནད་ཀྱི་རང་བཞིན་ལྟ་བུར་སྟོན་ཏེ། སྨན་ལ་སྟེན་པར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་ཉོན་
མོངས་པ་ཐམས་ཅད་དང་བྲལ་ཞིང་ནད་རྣམས་བསལ་བ་སྟེ། སེམས་ཅན་ནད་ཀྱིས་ཐེབས་པ་རྣམས་དང་། འདོད་ཆགས་ཀྱི་རང་བཞིན་དག་ལས་ཀྱང་གསོ་བར་བྱེད་དོ། །བྱང་གི་སྒྲ་མི་སྙན་ལ་ལར་ནི་གྲང་བ་དང་། ཚ་བ་ལ་སྟེན་པ་ལྟ་བུར་སྟོན་ཏེ། གྲང་བ་དང་། ཚ་བ་ལ་སྟེན་པར་སེམས་ཅན་རྣམས་
ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ལ་སོགས་པ་ནས་གྲང་བ་དང་། ཚ་བའི་འཇིགས་པ་ཡང་རྣམ་པར་སྤངས་སོ། །བྱང་གི་སྒྲ་མི་སྙན་ལ་ལར་ནི་བཀྲེས་པ་དང་། སྐོམ་པས་སྲེད་ཅིང་ཞེན་པ་དང་ལྡན་པར་སྟོན་ཏེ། བཀྲེས་ཤིང་སྐོམ་པ་ལ་སྐོམ་པས་གདུངས་པར་སེམས་ཅན་རྣམས་ཀྱིས་ཤེས་ཀྱང་།
བསྐལ་པ་བྱེ་བ་ཕྲག་དུ་མ་ནས་བཀྲེས་པ་དང་། སྐོམ་པའི་འདུ་ཤེས་ཀྱི་འཇིགས་པའི་ཀླུང་གི་རྒྱུན་ལས་ཀྱང་རྒལ་ནས་རྟག་ཏུ་བཀྲེས་པ་དང་། སྐོམ་པས་སྲེད་པར་གྱུར་པའི་འབྱུང་པོ་ཐམས་ཅད་ཀྱི་ཁ་ཟས་སུ་གྱུར་ཅིག་ཅེས་ཟེར་རོ། །བྱང་གི་སྒྲ་མི་སྙན་ལ་ལར་ནི་སྦྱིན་པའི་ཕ་རོལ་ཏུ་ཕྱིན་པ་སྤྱོད་པ་ལ་
རྩོམ་པ་ལྟ་བུར་སྟོན་ཏེ། ཀྱེ་མ་སྦྱིན་པ་ལ་བརྩོན་པའི་སེམས་ཅན་ཡིན་པར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་ཀྱང་ཕ་རོལ་ཏུ་ཕྱིན་པ་དུ་མ་རྟག་ཏུ་སྤྱད་པས་ཕ་རོལ་ཏུ་ཕྱིན་པ་བཅུ་པོ་རྣམས་ལ་སེམས་ཅན་རྣམས་སྡུད་པའི་རྒྱུར་གྱུར་ཏོ། །བྱང་གི་སྒྲ་མི་སྙན་ལ་ལར་ནི་འཁོར་

ལོས་སྒྱུར་བའི་རྒྱལ་སྲིད་ཀྱི་ཚུལ་སྟོན་ཏེ། འཁོར་ལོས་སྒྱུར་བའི་རྒྱལ་པོར་སེམས་ཅན་རྣམས་ཀྱིས་ཤེས་ཀྱང་དེ་འཁོར་ལོས་སྒྱུར་བའི་རྒྱལ་པོ་ཕལ་གྱི་སྤྱད་པ་ཡང་མི་སྤྱོད་དེ་རྟག་ཏུ་ཕྱིར་མི་ལྡོག་པའི་ཆོས་ཀྱི་འཁོར་ལོ་སྐོར་བའི་རྒྱལ་པོ་བྱེད་ཅིང་སེམས་ཅན་ཐམས་ཅད་ཀྱང་བྱེད་དུ་འཇུག་གོ། །བྱང་
གི་སྒྲ་མི་སྙན་ལ་ལར་ནི་དེ་ལྟ་བུའི་རྒྱལ་སྲིད་ཕུན་སུམ་ཚོགས་པ་ཤིན་ཏུ་རྒྱ་ཆེ་བ་དག་ཀྱང་རྩྭ་བཞིན་དུ་བོར་ནས་རབ་ཏུ་བྱུང་བའི་གཟུགས་དང་། མཚན་མ་སྟོན་པར་བྱེད་དེ། ལ་ལར་ནི་རབ་ཏུ་བྱུང་བ་ལྟ་བུ། ལ་ལར་ནི་རབ་ཏུ་མ་བྱུང་བ་ལྟ་བུར་སེམས་ཅན་རྣམས་ཀྱིས་ཤེས་སོ། །བྱང་གི་སྒྲ་མི་སྙན་ལ་ལར་ནི་
ཡ་མཚན་ཅན་ཐམས་ཅད་ཀྱི་རབ་ཏུ་བྱུང་བ་ལྟ་བུར་ལྟ་བ་ངན་པ་རབ་ཏུ་འབྱུང་བ་ལ་རབ་ཏུ་བྱུང་བར་སེམས་ཅན་རྣམས་ཀྱིས་ཤེས་ཀྱང་། ཡ་མཚན་ཅན་ཐམས་ཅད་དང་འཐུན་པར་རབ་ཏུ་བྱུང་བ་ཡང་མ་ཡིན་ཏེ། དེ་དག་ངེས་པར་བསྒྲལ་བའི་ཕྱིར་རབ་ཏུ་འབྱུང་ངོ་། །བྱང་གི་སྒྲ་མི་སྙན་ལ་ལར་ནི་དེ་བཞིན་
གཤེགས་པའི་རབ་ཏུ་འབྱུང་བར་རྩོམ་པ་ལྟ་བུར་སྟོན་ཏེ། དེ་བཞིན་གཤེགས་པའི་རབ་ཏུ་འབྱུང་བས་རབ་ཏུ་འབྱུང་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་དེ་བཞིན་གཤེགས་པའི་རབ་ཏུ་འབྱུང་བའི་བྱ་བ་ཡང་མཐར་ཕྱིན་པར་བྱས་སོ། །བྱང་གི་སྒྲ་མི་སྙན་ལ་ལར་ནི་སྦྱངས་
པའི་ཡོན་ཏན་བཅུ་གསུམ་ཡང་དག་པར་འཛིན་པ་ལྟ་བུར་སྟོན་ཏེ། སྦྱངས་པའི་ཡོན་ཏན་ཅན་ཡོ་བྱད་བསྙུངས་པ་ཡིན་པར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་སྦྱངས་པའི་ཡོན་ཏན་རྫོགས་ཤིང་རྟག་ཏུ་མཉམ་པར་གཞག་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་བྱང་ཆུབ་
ཀྱི་སྙིང་པོར་རྩྭ་བཏིང་བ་ལྟ་བུར་སྟོན་ཏེ། བྱང་ཆུབ་ཀྱི་སྙིང་པོ་ལ་འདུག་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་བྱང་ཆུབ་ཀྱི་བྱ་བ་མཐར་ཕྱིན་པར་བྱས་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པ་ལྟ་བུར་སྟོན་
ཏེ། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་སྙོམས་པར་འཇུག་པའི་སྤྱོད་པ་དུ་མ་སྤྱོད་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་ཡན་ལག་དགུའི་མདོ་འཆད་པ་ལྟ་བུར་སྟོན་ཏེ། བཅོམ་ལྡན་འདས་ཀྱིས་ཡན་

ལག་དགུའི་མདོ་གསུངས་པ་འཆད་པར་སེམས་ཅན་རྣམས་ཀྱིས་ཤེས་ཀྱང་། རྟག་ཏུ་མདོ་དུ་མ་ལ་སོགས་པ་ཡང་འཆད་དོ། །བྱང་གི་སྒྲ་མི་སྙན་ལ་ལར་ནི་བསླབ་པའི་གཞི་ཚད་ངེས་པར་བྱེད་པ་ལྟ་བུར་སྟོན་ཏེ། བསླབ་པའི་གཞི་ཚད་ངེས་པར་འཆའ་བར་བྱེད་པར་སེམས་ཅན་རྣམས་ཀྱིས་
ཤེས་ཀྱང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་མདོ་དག་ཀྱང་རྟག་ཏུ་བྱེད་ཅིང་བསླབ་པའི་གཞི་དུ་མ་དག་ཀྱང་རྟག་ཏུ་འཆའ་བར་བྱེད་དོ། །བྱང་གི་སྒྲ་མི་སྙན་ལ་ལར་ནི་བྱང་ཆུབ་ཀྱི་ཤིང་དྲུང་དུ་བདུད་འདུལ་བ་ལྟ་བུར་སྟོན་ཏེ། བདུད་ཀྱི་སྡེ་ཕམ་པར་བྱས་པར་སེམས་ཅན་རྣམས་ཀྱིས་ཤེས་ཀྱང་། བདུད་ཀྱི་
འདུ་ཤེས་གཅིག་ཀྱང་མི་འབྱུང་སྟེ། ཉོན་མོངས་པའི་བདུད་དང་། ཕུང་པོའི་བདུད་ལ་སོགས་པ་བདུད་བྱེ་བ་དུ་མ་དག་ཀྱང་རྟག་ཏུ་ཟད་པར་བྱེད་དོ། །བྱང་གི་སྒྲ་མི་སྙན་ལ་ལར་ནི་རྒྱུན་དུ་ཞུགས་པའི་འབྲས་བུ་ལ་སོགས་པ་འབྲས་བུ་བཞི་ཐོབ་པ་ལྟ་བུར་སྟོན་ཏེ། འབྲས་བུ་བཞི་ཐོབ་པར་སེམས་ཅན་
རྣམས་ཀྱིས་ཤེས་ཀྱང་འབྲས་བུ་བཞིའི་འདུ་ཤེས་ཀྱང་མི་འབྱུང་སྟེ། འབྲས་བུའི་བྱ་བ་དུ་མ་དག་ལ་ཡང་སྤྱོད་ཅིང་ཕྱིར་མི་འོང་བ་ཡང་མ་ཡིན་ལ་སེམས་ཅན་རྣམས་ངེས་པར་བསྒྲལ་བའི་ཕྱིར་རྟག་ཏུ་སྲིད་པའི་ཡན་ལག་རྣམས་སུ་ཡང་འོང་ངོ་། །བྱང་གི་སྒྲ་མི་སྙན་ལ་ལར་ནི་ཡོན་གནས་ལྟ་བུར་སྟོན་ཏེ།
འཇིག་རྟེན་ན་ཡོན་གནས་ཡིན་པར་སེམས་ཅན་རྣམས་ཀྱིས་ཤེས་ཀྱང་ཡོན་གནས་ཀྱི་ང་རྒྱལ་ལ་ཡང་མི་སྤྱོད་དེ། ནམ་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོན་གནས་སུ་གྱུར་པ་དེའི་ཚེ་བདག་ཡོན་གནས་ཀྱི་འདུ་ཤེས་ལ་འཇུག་གོ་སྙམ་ནས་མ་གོས་པའི་སྤྱད་པ་
ལ་སྤྱོད་དོ། །བྱང་གི་སྒྲ་མི་སྙན་ལ་ལར་ནི་དགེ་འདུན་གྱི་དབྱེན་བྱེད་པ་ལྟ་བུར་སྟོན་ཏེ། དགེ་འདུན་གྱི་དབྱེན་བྱེད་པར་སེམས་ཅན་རྣམས་ཀྱིས་ཤེས་ཀྱང་། སྔོན་གྱི་བསྐལ་པ་གྲངས་མེད་པ་ནས་དགེ་འདུན་གྱི་དབྱེན་སྔོན་ཆད་ཀྱང་མ་བྱས་ཏེ་དགེ་འདུན་ལ་ཕན་པར་སྒྲུབ་པ་སྤྱོད་པ་ཡིན་ནོ། །བྱང་གི་སྒྲ་མི་
སྙན་ལ་ལར་ནི་དེ་བཞིན་གཤེགས་པའི་ཞབས་ཀྱིས་རེག་པའི་རྡུལ་གུད་དུ་འདོར་བར་བྱེད་པ་ལྟ་བུར་སྟོན་ཏེ། ཀྱེ་མ་ངུར་སྨྲིག་ཙམ་འཆང་ཞིང་མི་ཟད་པའི་ལས་བྱེད་པ་ཞིག་ཡིན་པར་སེམས་ཅན་རྣམས་ཀྱིས་ཤེས་ཀྱང་། ངུར་སྨྲིག་ཙམ་འཆང་བ་ཡང་མ་ཡིན་ཏེ། སེམས་ཅན་ཐམས་ཅད་ལ་ཕན་པ་དང་།

བདེ་བ་སྟོན་པ་ཡང་ཡིན་ནོ། །དེ་ལ་སོགས་པ་གཞན་ཡང་དེ་བཞིན་གཤེགས་པའི་ཞབས་ཀྱི་དྲུང་དུ་ཆོས་ཉན་པ་ཐོས་པ་ནས། ཀྱེ་མ་དགེ་སྦྱོང་གཽ་ཏ་མ་ནི་བརྡ་ཕྲད་དཀའ་བ་ཤ་སྟག་ཟེར་རོ་ཞེས་བྱ་བ་ལྟ་བུར་སྟོན་ཏེ། ཀྱེ་མ་གཡེངས་པ་ཤེས་རབ་རྟུལ་བའི་དགེ་སློང་ཞིག་ཡིན་པར་སེམས་ཅན་རྣམས་
ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་དེ་བཞིན་གཤེགས་པ་སེམས་ཅན་ལ་ཕན་པ་དང་། བདེ་བ་བྱེད་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་དེ་བཞིན་གཤེགས་པ་ལ་ཟས་དུག་ཅན་འབུལ་ཞིང་བསླབ་པའི་གཞི་དང་། ཕམ་པའི་འགལ་བ་བྱེད་པ་ལྟ་བུར་སྟོན་ཏེ།
ཕམ་པ་ཅན་དུ་སེམས་ཅན་རྣམས་ཀྱིས་ཤེས་ཀྱང་། སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་སྡོམ་པ་སྐྱེད་པར་བྱེད་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་དེ་བཞིན་གཤེགས་པ་རྣམས་ཀྱི་མཛད་པ་མང་པོ་སྟོན་པ་ལྟ་བུར་སྟོན་ཏེ། ཡང་དག་པར་སྟོན་པ་པོ་ཡིན་པར་སེམས་ཅན་རྣམས་ཀྱིས་
ཤེས་ཀྱང་ཡང་དག་པར་སྟོན་པ་པོ་ཡང་མ་ཡིན་ཏེ་དེ་བཞིན་གཤེགས་པའི་རྒྱན་བྱེད་པ་ཡིན་ནོ། །བྱང་གི་སྒྲ་མི་སྙན་ལ་ལར་ནི་ཉན་ཐོས་དང་། རང་སངས་རྒྱས་ཐམས་ཅད་ལྟ་བུར་བདག་ཉིད་སྟོན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཡིན་པར་སེམས་ཅན་རྣམས་ཀྱིས་ཤེས་སོ། །བྱང་གི་སྒྲ་མི་
སྙན་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་བདག་ཉིད་སྟོན་ཏེ། ཡོངས་སུ་མྱ་ངན་ལས་འདས་པར་སེམས་ཅན་རྣམས་ཀྱིས་ཤེས་ཀྱང་སྔོན་ཆད་གཏན་དུ་ཡོངས་སུ་མྱ་ངན་ལས་འདས་པས་ནི་ནམས་ཀྱང་ཡོངས་སུ་མྱ་ངན་ལས་མ་འདས་སོ། །ལན་ཅིག་ཡོངས་སུ་མྱ་ངན་ལས་འདས་པས་ཡོངས་
སུ་མྱ་ངན་ལས་འདས་པ་ཡང་མ་ཡིན་ཏེ། ལན་མང་དུ་ཡང་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའོ། །ལན་གྲངས་བྱེ་བ་ཕྲག་བརྒྱད་ཁྲི་བཞི་སྟོང་དུ་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་བྱེད་དེ་ལན་བྱེ་བ་ཕྲག་ཉི་ཁྲི་ཆིག་སྟོང་དུ་འདོད་ཆགས་ལས་
ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་འགྱུར་ལ་འདོད་ཆགས་ལས་བརྟེན་ཏེ་ཡོངས་སུ་མྱ་ངན་ལས་འདའ་བ་ཡང་མ་ཡིན་ནོ། །ལན་བྱེ་བ་ཕྲག་ཉི་ཁྲི་ཆིག་སྟོང་དུ་ཞེ་སྡང་ལས་ཡོངས་སུ་མྱ་ངན་ལས་འདའོ། །ལན་བྱེ་བ་ཕྲག་ཉི་ཁྲི་ཆིག་སྟོང་དུ་གཏི་མུག་ལས་ཡོངས་སུ་མྱ་ངན་

ལས་འདའོ། །ལན་བྱེ་བ་ཕྲག་ཉི་ཁྲི་ཆིག་སྟོང་དུ་ཆ་མཉམ་པ་ལས་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་བྱེད་དེ། རྣམ་པ་བཞི་པོ་འདི་ལྟ་བུས་ཡོངས་སུ་མྱ་ངན་ལས་འདས་པ་ཆེན་པོར་ཡོངས་སུ་མྱ་ངན་ལས་འདའ་བར་འགྱུར་ལ། འདོད་ཆགས་དང་། ཞེ་སྡང་དང་།
གཏི་མུག་དང་། ཆ་མཉམ་པ་ལ་ཡང་མི་བརྟེན་ནོ། །དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་བཞི་པོ་དག་གིས་བསྐལ་པ་བྱེ་བ་ཕྲག་དུ་མ་ནས་བྱ་བ་མཐར་ཕྱིན་ཏེ། འདུལ་བའི་དབང་གིས་ཡོངས་སུ་མྱ་ངན་ལས་འདའ་བ་ལྟ་བུར་སྟོན་ཏོ། །མི་དགེ་བའི་ཕྱོགས་ཇི་སྙེད་ཡོད་པར་ཡོངས་སུ་མྱ་ངན་ལས་འདས་
པ་ཡང་དེ་སྙེད་དེ། རྟག་ཏུ་སྐད་ཅིག་དང་། ཐང་ཅིག་དང་། ཡུད་ཙམ་གྱིས་ཡོངས་སུ་མྱ་ངན་ལས་འདའོ། །དེ་བས་ན་རྣམ་པ་མང་པོ་དག་གིས་ཡོངས་སུ་མྱ་ངན་ལས་འདའ་བར་བྱེད་ལ་གཏན་དུ་ཡོངས་སུ་མྱ་ངན་ལས་འདའ་བའི་མིང་ཡང་མེད་པའི་ཕྱིར་ཡོངས་སུ་མྱ་ངན་ལས་མི་འདའོ། །བྱང་གི་སྒྲ་མི་སྙན་
ལ་ལར་ནི་བདུད་ཀྱི་ལས་བྱེད་པ་ལྟར་བདག་ཉིད་སྟོན་ཏེ། བདུད་སྡིག་ཅན་ཡིན་པར་སེམས་ཅན་རྣམས་ཀྱིས་ཤེས་ཀྱང་། བདུད་ཀྱི་ལས་ཀྱང་མི་བྱེད་དོ། །འདོད་ཆགས་དང་། ཞེ་སྡང་དང་། གཏི་མུག་གི་འཇིགས་པ་ལ་སོགས་པ་མི་དགེ་བའི་ཕྱོགས་ཇི་སྙེད་པ་དེ་སྙེད་ཀྱི་བདུད་ཀྱི་ལས་རྟག་ཏུ་བྱེད་ལ།
ཤིན་ཏུ་གཅོད་པར་བྱེད་པའི་བདུད་ཀྱི་ལས་ལ་རྟེན་པ་ཡང་མ་ཡིན་ནོ། །འཛམ་བུའི་གླིང་དང་། བྱང་གི་སྒྲ་མི་སྙན་ཇི་ལྟ་བ་དེ་བཞིན་དུ་གླིང་ཐམས་ཅད་ལ་ཡང་སྦྱར་བར་བྱའོ། །རྒྱལ་ཆེན་བཞི་ལ་ལ་དག་ཏུ་འམ། དེ་བཞིན་དུ་སུམ་ཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བའི་ནང་དུ་ལྷའི་དབང་པོ་བརྒྱ་བྱིན་
ལྟ་བུར་བདག་ཉིད་སྟོན་ཏེ། ལྷ་རྣམས་ཀྱི་དབང་པོ་བརྒྱ་བྱིན་ཡིན་པར་སུམ་ཅུ་རྩ་གསུམ་པའི་ལྷ་རྣམས་ཀྱིས་ཤེས་སོ། །འཇིག་རྟེན་སྐྱོང་བ་བཞི་ལ་ཡང་དེ་བཞིན་དུ་སྦྱར་རོ། །སྲིད་པ་ཐམས་ཅད་དུ་ཡང་སྲིད་པ་ཐམས་ཅད་ཀྱི་ཚུལ་དུ་མངལ་དུ་སྐྱེ་བ་རྣམ་པར་སྟོན་ཏེ། སྲིད་པ་ཐམས་ཅད་ཀྱི་སེམས་ཅན་རྣམས་རང་རང་གི་
གཟུགས་དང་འདྲ་བར་སེམས་སོ། །དེ་བཞིན་དུ་སྲིད་པའི་ཡན་ལག་བཅུ་གཉིས་ཀྱི་རང་བཞིན་ཐམས་ཅད་དུ་ཡང་བདག་ཉིད་སྟོན་ཅིང་སེམས་ཅན་ཐམས་ཅད་ཀྱང་ཁམས་ཀྱི་འདུ་ཤེས་ལ་འཇུག་པར་བྱེད་ལ། སེམས་ཅན་གྱི་ཁམས་ལ་ཡང་མི་གནས་ཤིང་ཆོས་ཀྱི་དབྱིངས་ཡིན་ལ། རྟག་ཏུ་ཆོས་ཀྱི་གཏམ་བྱེད་

པར་ཡང་སེམས་ཅན་རྣམས་ཀྱིས་ཤེས་སོ། །སྤྲིན་ཆེན་སྙིང་པོ་དེ་བས་ན་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་ནི་འཇུག་པའི་གནས་ཀྱི་གཞི་གཅིག་ཏུ་ཆད་པ་མེད་དེ། ཉན་ཐོས་དང་། རང་སངས་རྒྱས་ཀྱི་ཡུལ་གྱི་རྒྱུ་བ་ལ་རྒྱུ་བར་མི་བྱེད་དོ། །འཇིག་རྟེན་
དང་འཐུན་པར་འཇུག་པའི་བྱ་བ་དུ་མ་དང་། སེམས་ཅན་ཐམས་ཅད་ངེས་པར་བསྒྲལ་བའི་ཕྱིར་ནི་རྒྱུ་བར་ཡང་བྱེད་དེ། རྟག་ཏུ་འཇིག་རྟེན་ཐམས་ཅད་དང་འཐུན་པར་འཇུག་ཅིང་གང་དང་གང་དུ་གདུལ་བར་བྱ་བ་རྣམས་སྣང་བ་དེ་དང་དེར་ཡང་བདག་ཉིད་སྟོན་ཏེ། དེ་བས་ན་མཚན་མ་མེད་པའི་འདུ་ཤེས་ལ་སྤྱོད་པ་ཞེས་བྱའོ། །
གང་གིས་མཚན་མའི་དངོས་པོ་ངན་པའི་འདུ་ཤེས་མཐོང་བ་དེས་ནི་ཡང་དག་པར་མཐོང་ངོ་ཞེས་ང་སྨྲའོ། །ལྷ་མོ་དྲི་མ་མེད་པའི་འོད་འདི་མཚན་མ་མེད་པའི་ཡེ་ཤེས་སྟོན་པ་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་འདི་སྟོན་པར་མཛད་དོ། །དེ་ནས་སྤྲིན་ཆེན་སྙིང་
པོས་གསོལ་པ། ཀྱེ་མ་བཅོམ་ལྡན་འདས་ལྷ་མོ་དྲི་མ་མེད་པའི་འོད་འདི་ནི་ཤིན་ཏུ་མཁས་ཏེ་ཕྲ་བ་ཤེས་པ་དང་ལྡན་ཞིང་མཚན་མ་མ་མཆིས་པའི་ཡེ་ཤེས་ཀྱི་ཡུལ་བསམ་གྱིས་མི་ཁྱབ་པ་ལ་སྒོམ་པར་བགྱིད་དེ། ཤིན་ཏུ་ལེགས་པར་ཡང་དག་པར་མཐོང་བ་ལགས་སོ། །དེ་ནས་དེའི་ཚེ་བཅོམ་ལྡན་འདས་ཐམས་
ཅད་མཁྱེན་ཅིང་ཐམས་ཅད་མཁྱེན་པ་དང་ལྡན་པས་འཛུམ་པ་མཛད་ནས་འོད་འཕྲོ་བ་སྔོན་པོ་དང་སེར་པོ་དང་། དམར་པོ་དང་། དཀར་པོ་དང་། ལེབ་རྒན་དང་། ཤེལ་དང་། དངུལ་གྱི་ཁ་དོག་ཅན་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་མཐའ་ཡས་མུ་མེད་པར་འོད་ཀྱིས་ཁྱབ་པར་གྱུར་
ནས་ཚངས་པའི་འཇིག་རྟེན་ལ་ཐུག་པའི་བར་དུ་སོང་སྟེ་སླར་ཡང་ལོག་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱི་གཙུག་ཏུ་མི་སྣང་བར་གྱུར་ཏོ། །དེའི་ཚེ་ས་རྣམ་པ་དྲུག་ཏུ་གཡོས་རབ་ཏུ་གཡོས། ལྡེག་རབ་ཏུ་ལྡེག་པར་གྱུར་ཏེ། རིགས་ཀྱི་བུ་དཔེར་ན། བྱང་གི་སྒྲ་མི་སྙན་
གྱི་གླིང་རྟག་ཏུ་ཤིན་ཏུ་བརྒྱན་ཅིང་ཁོ་ར་ཁོར་ཡུག་ནས་ཡོངས་སུ་མཛེས་པར་བྱས་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལེགས་པར་བརྒྱན་པར་མཐོང་ངོ་། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་ཆེན་སྙིང་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་

ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་དོན་མ་མཆིས་པར་འཛུམ་པ་མི་མཛད་ན། འཛུམ་པ་མཛད་པའི་རྒྱུ་གང་ལགས། རྐྱེན་གང་ལགས། ཅིའི་སླད་དུ་ནི་
འོད་ཟེར་རྣམས་བྱུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། འདི་ནི་སྔ་མའི་ཚེ་ནུབ་ཕྱོགས་ནས་བྱང་ཆུབ་སེམས་དཔའི་མར་གྱུར་པའི་འོད་ཆེན་པོ་བྱུང་བ་མཐོང་ནས་ཁྱོད་ཀྱི་ཡིད་ལ་ངོ་མཚར་དུ་གྱུར་ཏེ། བཅོམ་ལྡན་འདས་འདི་སུའི་སྔ་ལྟས་ལགས་ཞེས་ཟེར་བ་དེ་ཉིད་ཀྱི་དོན་དང་།
སེམས་ཅན་ཐམས་ཅད་ལ་ཕན་པའི་ཕྱིར་ང་འཛུམ་པ་མཛད་དོ། །གསོལ་པ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མི་མཆོག་དེ་མཆི་ཤིག་པར་བཀའ་སྩལ་དུ་གསོལ། བཀའ་སྩལ་པ། བྱང་ཆུབ་སེམས་དཔའ་འདི་ནི་ནུབ་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འོད་དཔག་མེད་ཅེས་བྱ་བ་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་དེ་ན་ད་ལྟར་འཚོ་ཞིང་གཞེས་ཏེ་ཆོས་ཀྱང་སྟོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་བཏང་སྟེ། བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་གྱི་ཁམས་མི་མཇེད་ན་ད་
ལྟར་འཛམ་བུའི་གླིང་པའི་མི་བསོད་ནམས་ཆུང་ངུ་རྣམས་ལ་ཕན་པ་དང་། བདེ་བ་དང་། ཡིད་དང་བ་སྐྱེ་བར་བྱ་བའི་ཕྱིར་སྤྲིན་ཆེན་པོ་ཞེས་བྱ་བའི་སངས་རྒྱས་ཐམས་ཅད་ཀྱི་ཚུལ་གྱི་ཆོས་ཆེན་པོ་སྟོན་གྱིས་སོང་ལ་ཏིང་ངེ་འཛིན་འདི་ཡང་ཟུང་ཤིག་ཅེས་གསུངས་སོ། །སྤྲིན་ཆེན་སྙིང་པོ་ཁྱོད་ཀྱིས་འདིའི་རང་བཞིན་གྱི་
ལུས་མཐོང་ངམ། གསོལ་པ་བཅོམ་ལྡན་འདས་འདིའི་རང་བཞིན་གྱི་ལུས་ཀྱི་ངོ་བོ་ལ་དཔག་ཚད་ས་ཡ་ཕྲག་དགུ་དང་དགུ་འབུམ་མཆིས་ཏེ། ལུས་ཆེ་ཞིང་སྣང་བ་ཆེན་པོར་གདའ་བ་མཐོང་ལགས་ན། བཅོམ་ལྡན་འདས་ཀྱེ་མ་བྱང་ཆུབ་སེམས་དཔའ་ལུས་ཆེ་བ་འདིའི་མིང་ནི་ཅི་ཞེས་བགྱི། གལ་ཏེ་ཐ་མལ་
པའི་ལུས་འདི་འདྲ་བ་ལགས་ན་བསྒྱུར་བའི་ལུས་ཅི་འདྲ་བར་འགྱུར། ཇི་ལྟར་སེམས་ཅན་ཐམས་ཅད་ལ་སྨན་པའི་སླད་དུ་མཆིས་པ། སེམས་ཅན་ཐམས་ཅད་ལ་སྨན་པའི་སླད་དུ་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་འོད་མཐའ་ཡས་ཞེས་བྱ་བ་

ཐབས་ལ་མཁས་པ་འདི་ནི་ལྷ་མོ་དྲི་མ་མེད་པའི་འོད་འདི་ལུང་བསྟན་པ་ཡོངས་སུ་གཟུང་བ་དང་། སེམས་ཅན་ཐམས་ཅད་ཡིད་དང་བར་བྱ་བ་དང་། སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བ་དང་། ངེས་པར་བསྒྲལ་བ་དང་། ཏིང་ངེ་འཛིན་འདི་ལ་མཆོད་པ་བྱ་བའི་ཕྱིར་འོངས་སོ། །གསོལ་པ། ལྷ་མོ་དྲི་
མ་མེད་པའི་འོད་གང་དུ་བུད་མེད་ཀྱི་ལུས་ལས་ལྡོག་པར་འགྱུར་བ་བཅོམ་ལྡན་འདས་དེ་བཞིན་གཤེགས་པས་ལུང་བསྟན་ཏུ་གསོལ། བཀའ་སྩལ་པ། སྤྲིན་ཆེན་སྙིང་པོ་བུད་མེད་ཀྱི་ལུས་ལས་གང་དུ་ལྡོག་པར་འགྱུར་ཞེས་དེ་ལྟར་མ་ལྟ་ཤིག་གསོལ་པ། བཅོམ་ལྡན་འདས་འོ་ན་ཇི་ལྟ་བུ་ལགས། བཀའ་སྩལ་པ།
འདི་ནི་བུད་མེད་མ་ཡིན་ཏེ། ལྷ་མོ་དྲི་མ་མེད་པའི་འོད་འདི་ནི་བསྐལ་པ་བྱེ་བ་ཕྲག་གྲངས་མེད་པ་ནས་བྱང་ཆུབ་སེམས་དཔའི་བྱ་བ་བྱེད་པ་ཡིན་ཏེ། སེམས་ཅན་འདུལ་བའི་དབང་གིས་བུད་མེད་ཀྱི་ལུས་འཛིན་པས་ན་འདི་ནི་ཐབས་ཀྱི་ལུས་ཡིན་པར་བལྟའོ། །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་ནི་རྟག་ཏུ་ཐབས་ཐམས་ཅད་ལ་འཇུག་པའི་ཕྱིར་སེམས་ཀྱི་སྨོན་ལམ་གྱིས་སྨོན་པར་བྱེད་དེ་འདོད་བཞིན་དུ་བུད་མེད་ཀྱི་ལུས་ཀྱི་འདུ་ཤེས་ལ་འཇུག་གོ། །དེ་ལྟར་བུད་མེད་ཀྱི་ལུས་བསྒྲུབ་པའི་བསམ་པ་ལས་འཇུག་ཀྱང་འདོད་པའི་སེམས་ཀྱིས་གོས་པར་མི་འགྱུར་ཞིང་འདྲེས་པར་ཡང་མི་འགྱུར་རོ། །
གསོལ་པ། སེམས་ཅན་ཐམས་ཅད་ཀྱི་དོན་གྱི་སླད་དུ་ལྷ་མོ་དྲི་མ་མེད་པའི་འོད་ལུང་བསྟན་པ་རིགས་དང་། གྲོང་དང་བཅས་པར་ཆོ་ག་བཞིན་དུ་བཅོམ་ལྡན་འདས་ཀྱིས་འདིར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་དྲི་མ་མེད་པའི་འོད་འདི་ནི་ང་ཐབས་ཀྱིས་ཡོངས་སུ་མྱ་ངན་ལས་འདས་པའི་
འོག་ཏུ་ལོ་བདུན་བརྒྱ་ལོན་པ་ན་ལྷོ་ཕྱོགས་ཀྱི་རྒྱུད་དུ་ཡུལ་འཁོར་མུན་པ་ཅན་ཞེས་བྱ་བ་ཞིག་འབྱུང་བར་འགྱུར་ཏེ། ཡུལ་འཁོར་ཆེན་པོ་དེ་ན་ཆུ་ཀླུང་ནག་པོ་བཟང་ཞེས་བྱ་བ་ཞིག་ཡོད་པ་དེའི་ལྷོ་ཕྱོགས་ཀྱི་འགྲམ་ན་གྲོང་ཁྱེར་དཔལ་ཡོན་ཅན་ངེས་པ་ཞེས་བྱ་བར་ཁམས་ཀྱི་རྒྱལ་པོ་བདེ་སྤྱོད་ཅེས་བྱ་བའི་རིགས་
སུ་འབྱུང་བར་འགྱུར་ཏེ། ཁམས་ཀྱི་རྒྱལ་པོ་དེའི་རིགས་རབས་གསུམ་ལོན་པ་ན་རྒྱལ་པོ་དཔལ་འཕེལ་ཞེས་བྱ་བ་ཞིག་འབྱུང་བར་འགྱུར་ཏེ། རྒྱལ་པོ་དེའི་བུ་མོ་སྙིང་དུ་སྡུག་ཅིང་བྱམས་ལ་ཡིད་དུ་འོང་བ་དང་། གནང་བ་དང་མཆོག་ཏུ་མཛེས་ཤིང་གཟུགས་བཟང་ལ་རིགས་ཀྱི་སྤྱོད་པའི་ཚུལ་ཕུན་སུམ་ཚོགས་པ་སྐྱོང་

བའི་རང་བཞིན་ཅན་དུ་སྐྱེ་བར་འགྱུར་ཏེ། དེའི་ཚེ་དེའི་དུས་ན་བུ་མོ་དེ་ཇི་ཙམ་དུ་སྐྱེས་པ་དེ་ཙམ་དུ་བདག་ཉིད་ཀྱི་རྒྱལ་པོའི་ཕོ་བྲང་འཁོར་འཕེལ་བར་བྱེད་དེ། རྒྱལ་པོའི་ཕོ་བྲང་འཁོར་དེ་འབྱོར་ཅིང་རྒྱས་པར་འགྱུར་རོ། །དེ་བཞིན་དུ་མུན་པ་ཅན་གྱི་ཡུལ་འཁོར་ཡང་དེའི་ཚེ་འབྱོར་ཅིང་རྒྱས་པར་འགྱུར་ཏེ་སྐྱེ་བོ་མང་པོས་ཀྱང་གང་བར་འགྱུར་རོ། །
འབྲུ་རྣམས་ཀྱི་ལོ་ཏོག་ཀྱང་ཤིན་ཏུ་ཕུན་སུམ་ཚོགས་པར་འགྱུར་རོ། །མི་རྣམས་ཀྱང་བདེན་པར་སྨྲ་བར་འགྱུར་རོ། །ནད་མེད་པ་དང་། འཇིགས་པ་མེད་པ་དང་། བདེ་བར་ཡང་འགྱུར་རོ། །དེ་ནས་བུ་མོའི་ཕ་རྒྱལ་པོ་དཔལ་འཕེལ་གྱིས་བདག་ཉིད་ཀྱི་བསོད་ནམས་ཀྱིས་གྲོང་ཁྱེར་དང་། ཡུལ་འཁོར་འབྱོར་ཅིང་རྒྱས་ལ་ཡུལ་གྱི་མི་རྣམས་ཤིན་
ཏུ་ལེགས་པར་འཁོད་པ་དང་། འབྲུ་ཤིན་ཏུ་ཚོགས་པར་མཐོང་ནས་བདག་ཉིད་ཀྱི་བུ་མོའི་མིང་ལོ་ཏོག་འབྱོར་མ་ཞེས་ཡོན་ཏན་དང་འཐུན་པའི་མིང་འདོགས་སོ། །དེ་ནས་རིམ་གྱིས་རྒྱལ་པོ་དཔལ་འཕེལ་རང་གི་བསོད་ནམས་ཟད་ནས་འཆི་བའི་དུས་བྱེད་པར་འགྱུར་རོ། །དེ་ནས་གྲོང་ཁྱེར་དང་། གྲོང་རྡལ་དང་། ཡུལ་གྱི་མི་རྣམས་འདུས་ཏེ།
གཞོན་ནུ་རྒྱལ་པོ་ནུས་པ་འགའ་ཡང་མེད་ཀྱིས་ལྷ་མོ་ལོ་ཏོག་འབྱོར་མ་འདི་ཉིད་རྒྱལ་པོར་དབང་བསྐུར་ལ་རྒྱལ་པོའི་ཕོ་བྲང་དུ་དེ་འདྲ་བའི་གཞོན་ནུ་འགའ་ཞིག་མིང་ཁྱེར་ཙམ་དུ་བཞག་སྟེ། དེ་ལྟར་བྱས་ན་ལེགས་སོ་སྙམ་མོ། །དེ་ནས་ལྷ་མོ་དེ་དང་། རྒྱལ་བུ་གཞོན་ནུ་དེ་རྒྱལ་པོ་བྱེད་དུ་བཅུག་སྟེ། ཕོ་འུད་ཏི་མོ་འུད་ཏི་བཞིན་དུ་སྙད་
བཏགས་ནས་བདག་ཉིད་ཀྱི་ཡུལ་དུ་བདག་ཉིད་ཀྱིས་བུད་མེད་ཀྱི་གཟུགས་ཀྱིས་རྒྱལ་སྲིད་ཆེན་པོ་ཡོངས་སུ་སྤྱད་དེ། མུ་སྟེགས་ཅན་ངན་པའི་སྡེ་མངོན་པར་འདུལ་བར་བྱེད་ཅིང་འཛམ་བུའི་གླིང་གི་ས་གཞི་ཐམས་ཅད་དེ་བཞིན་གཤེགས་པའི་མཆོད་རྟེན་གྱི་མངོན་མཚན་ཅན་དུ་བྱས་ནས་བཀུར་སྟིར་བྱེད། བླ་མར་བྱེད། རིམ་གྲོར་བྱེད། མཆོད་
པར་བྱེད་དེ། རིན་པོ་ཆེ་ཐམས་ཅད་ཀྱི་གདུགས་ཆེན་པོ་དང་། རིན་པོ་ཆེ་ཐམས་ཅད་ཀྱི་བ་དན་རྣམས་དང་། རིན་པོ་ཆེ་ཐམས་ཅད་ཀྱི་རྣམ་པར་རྒྱལ་བའི་བ་དན་རྣམས་དང་། སྤོས་ཐམས་ཅད་ཀྱིས་བསྒོས་པའི་ཙན་དན་གྱི་ཕྱེ་མ་དང་། སྤོས་དང་། མེ་ཏོག་ཐམས་ཅད་དང་། རྔ་པ་ཊ་ཧ་དང་། ཁར་རྔ་དང་། རྫ་རྔ་དང་། པི་བང་དང་། གླིང་
བུ་དང་། སིལ་སྙན་བརྒྱ་ཕྲག་ཐམས་ཅད་ཀྱིས་མཆོད་པ་བྱས་ནས་འཛམ་བུའི་གླིང་ཐམས་ཅད་བསྐོར་ཏེ། དགེ་སློང་ཚུལ་ཁྲིམས་དང་ལྡན་པ་དང་། ཡོན་ཏན་དང་ལྡན་པ་རྣམས་ལ་ཆོས་གོས་དང་། བསོད་སྙོམས་དང་མལ་སྟན་དང་། ན་བའི་གསོས་སྨན་དང་། ཡོ་བྱད་རྣམས་དང་ལྡན་པར་བྱས་ཏེ། ཕ་རོལ་ཏུ་ཕྱིན་པ་བཅུའི་སྤྱད་པ་སྤྱོད་ཅིང་རྟག་ཏུ་

བསླབ་པའི་གཞི་ལྔ་བཟུང་ནས་དབུལ་པོ་ལ་སོགས་པ་ཁྱིམ་བཀོལ་གྱི་སེམས་ཅན་ཐམས་ཅད་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་ལ་དེ་དང་དེ་བྱིན་ནས་འདུ་ཤེས་བཅུའི་བསྡུ་བས་བསྡུས་ཏེ་སྤྱོད་པར་བྱེད་ཅིང་། སེམས་ཅན་བྱེ་བ་ཕྲག་མང་པོ་དག་རིམ་བཞིན་དུ་བཏུལ་ཏེ་སེམས་ཅན་དེ་དག་གི་དགེ་བའི་རྩ་བ་ཡོངས་སུ་སྨིན་པར་
ཤེས་ནས། སྤྲིན་ཆེན་སྙིང་པོའི་མདོ་འདི་ལ་སོགས་པ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་མཚུངས་པ་མེད་པའི་མདོ་རིན་པོ་ཆེའི་དམ་པའི་ཆོས་བསྟན་པ་འབྱུང་བར་བྱ་བའི་ཕྱིར་ཅིའི་ཐབས་ཀྱིས་ཀྱང་མཚུངས་པ་མེད་པའི་སྒྲ་སྒྲོགས་པར་བྱེད་ཅིང་། མཚུངས་པ་མེད་པའི་གླེགས་བམ་བྲིས་པའི་སྣོད་སངས་རྒྱས་ཀྱིས་གང་དང་
གང་དུ་བྱིན་གྱིས་བརླབས་པའི་གནས་རྣམས་སུ་འཇོག་པར་བྱེད་དེ། དེ་ལྟར་མཚུངས་པ་མེད་པའི་ས་བོན་བསྐྱེད་ནས་དེའི་འོག་ཏུ་འཆི་བའི་དུས་བྱེད་པར་འགྱུར་རོ། །དེའི་ཚེ་ལྷ་མོ་ལོ་ཏོག་འབྱོར་མ་ཤེས་རབ་ཆེན་མོ་ཐབས་མཁས་པ་ཟབ་མོ་ཤེས་པ་དང་ལྡན་པའི་ལྷ་མོས་བུད་མེད་ཀྱི་ལུས་ལས་ལྡོག་པར་འགྱུར་རོ། །སྤྲིན་ཆེན་སྙིང་
པོས་གསོལ་པ། བཅོམ་ལྡན་འདས་ཅི་ལྷ་མོ་འདི་སེམས་ཅན་ཐམས་ཅད་ཀྱི་དད་པ་བསྐྱེད་པའི་སླད་དུ་ཆོ་འཕྲུལ་ཆེན་པོ་བགྱིས་ནས་ཡོངས་སུ་མྱ་ངན་ལས་འདའ་བར་འགྱུར་རམ། བཀའ་སྩལ་པ། སྤྲིན་ཆེན་སྙིང་པོ་ཅི་ལྷ་མོ་འདི་ཆོ་འཕྲུལ་ཆེན་པོ་བྱེད་མི་ནུས་ཞེས་ཁྱོད་སྨྲའམ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ།
སྤྲིན་ཆེན་སྙིང་པོ་ལྷ་མོ་འདི་ཆོ་འཕྲུལ་ཆེན་པོ་སྟོན་མི་ནུས་སོ་ཞེས་དེ་སྐད་མ་ཟེར་ཅིག །འོན་ཀྱང་འདུལ་བའི་དབང་གིས་ནི་མི་འདོད་དོ། །དེ་ཅིའི་ཕྱིར་ཞེ་ན། འཛམ་བུའི་གླིང་འདི་ན་ལྷ་མོ་འདི་ལ་སོགས་པ་དགེ་སློང་ངམ། དགེ་སློང་མ་ཚུལ་ཁྲིམས་དང་ལྡན་པར་གྱུར་ནས་ཡོངས་སུ་མྱ་ངན་ལས་འདའ་བར་མི་འགྱུར་བའི་སེམས་ཅན་
དེ་གང་ཡང་མེད་དེ་དེ་ནི་གནས་མེད་དོ། །སྤྲིན་ཆེན་སྙིང་པོ་དེ་བས་ན་མ་འོངས་པའི་སེམས་ཅན་བསོད་ནམས་ཆུང་ངུ་ཐམས་ཅད་ཀྱི་དད་པ་བསྐྱེད་པའི་ཕྱིར་མདོ་འདི་ལས་བྱང་ཆུབ་སེམས་དཔའ་རྣམས་ལུང་བསྟན་པར་བྱེད་དོ་ཞེས་ང་སྨྲའོ། །སྤྲིན་ཆེན་སྙིང་པོ་དེའི་ཚེ་ལྷ་མོ་འདི་བུད་མེད་ཀྱི་ལུས་ལས་བཟློག་ནས་དེ་བཞིན་
གཤེགས་པ་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བ་ལེན་པར་འགྱུར་ཏེ། འཇིག་རྟེན་གྱི་ཁམས་དེར་བདེ་བ་ཉམས་སུ་མྱོང་ནས་རིམ་གྱིས་སངས་རྒྱས་སུ་འགྱུར་རོ། །གསོལ་པ། བཅོམ་ལྡན་འདས་ཐབས་ལ་མཁས་པ་དང་ལྡན་པའི་ལྷ་མོ་འདི་ཡུན་ཇི་སྲིད་ཅིག་ན་སངས་རྒྱས་སུ་

འགྱུར་འདིའི་མིང་ཡང་ཇི་སྐད་ཅེས་བགྱི་བར་འགྱུར། བཅོམ་ལྡན་འདས་དེའི་འཇིག་རྟེན་གྱི་ཁམས་ནི་ཅི་འདྲ་བར་འགྱུར། བཀའ་སྩལ་པ། ལྷ་མོ་འདི་ནི་བསྐལ་པ་གྲངས་མེད་པ་ཕྲག་ལྔ་བརྒྱ་འདས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གཙང་ཞིང་བདེན་
པའི་མཚམས་འཕེལ་བར་མཛད་པ་ཞེས་བྱ་བར་འགྱུར་རོ། །འཇིག་རྟེན་གྱི་ཁམས་མི་མཇེད་འདི་ཡང་འཇིག་རྟེན་གྱི་ཁམས་གཙང་མ་སྦྱོང་བ་ཞེས་བྱ་བར་འགྱུར་རོ། །བསྐལ་པ་ནི་གཙང་ཞིང་བདེན་པའི་མཚམས་ཞེས་བྱ་བར་འགྱུར་ཏེ། འཇིག་རྟེན་གྱི་ཁམས་གཙང་མ་སྦྱོང་བ་དེ་འབྱོར་པར་འགྱུར། རྒྱས་པར་འགྱུར། བདེ་བ་དང་།
ཉམས་དགའ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་བར་འགྱུར་རོ། །འབྱོར་ཅིང་རྒྱས་པར་གྱུར་པ་དེའི་ཚེ་འཛམ་བུའི་གླིང་འདིར་གྲོང་ཁྱེར་གཙང་མ་བསུང་ལྡན་ཞེས་བྱ་བ་ཞིག་འབྱུང་བར་འགྱུར་ཏེ། གྲོང་ཁྱེར་གཙང་མ་བསུང་ལྡན་དུ་མི་བྱེ་བ་བརྒྱ་སྟོང་ཕྲག་དགུ་བཅུ་རྩ་བརྒྱད་འབྱུང་བར་འགྱུར་རོ། །དཔེ་
མེད་པའི་གྲོང་ཁྱེར་དེར་ར་བ་དང་། ཡང་ཏོག་དང་། བླ་འཚོགས་དང་། འོབས་དཔེ་མེད་པ་དག་ཀྱང་འབྱུང་བར་འགྱུར་རོ། །དག་ཅིང་ཉོན་མོངས་པ་ཞི་བར་བྱེད་པའི་ཆུའི་ཀླུང་ནག་པོ་བཟང་ཞེས་བྱ་བ་ནི་དེའི་ཚེ་གཙང་མ་བཟང་པོ་ཞེས་བྱ་བར་འགྱུར་ཏེ། འགྲམ་ཕ་རོལ་ཚུ་རོལ་དཔེ་མེད་པའི་ཤིང་ལྗོན་པའི་ཀུན་དགའ་ར་བ་ཉམས་
དགའ་བ་དང་ལྡན་པར་འགྱུར་རོ། །འཇིག་རྟེན་གྱི་ཁམས་གཙང་མ་སྦྱོང་བ་དེ་ཡང་འདི་ལྟ་སྟེ་དཔེར་ན་དགའ་ལྡན་གྱི་ལྷ་རྣམས་ཀྱི་ལོངས་སྤྱོད་དང་། ཡོངས་སུ་སྤྱོད་པ་བཞིན་ཏེ། རི་དང་། རྡོ་དང་། བོང་བ་དང་། གྱོ་མོ་དང་། གསེག་མ་ལ་སོགས་པ་མེད་པར་འགྱུར་ཞིང་མུ་སྟེགས་ཅན་གྱི་མིང་ཡང་མེད་པར་འགྱུར་རོ། །ཉན་ཐོས་དང་། རང་
སངས་རྒྱས་ཐམས་ཅད་ཀྱི་མིང་ཡང་མི་གྲག་པར་འགྱུར་རོ། །སྐྱེས་པ་དང་བུད་མེད་དག་གི་བྱང་ཆུབ་སེམས་དཔའི་དགེ་འདུན་ཡང་འབྱུང་བར་འགྱུར་རོ། །དེ་ན་ཉན་ཐོས་དང་། རང་སངས་རྒྱས་ཤེས་པའི་གཏམ་གྱི་མིང་ཡང་མེད་དེ། ཐེག་པ་ཆེན་པོའི་མདོའི་གཏམ་རྒྱས་པར་སྟོན་པར་འགྱུར་རོ། །བདུད་དང་ཕྱིར་རྒོལ་བ་བཅོམ་པའི་

སེམས་ཅན་རྣམས་འབྱུང་བར་འགྱུར་རོ། །དག་ཅིང་བཟོད་པ་ཆེན་པོའི་རྙེད་པ་ཐོབ་པ་དག་འབྱུང་བར་འགྱུར་རོ། །ས་གཞི་ཡང་ནོར་བུ་རིན་པོ་ཆེ་ཐམས་ཅད་ལས་གྲུབ་པར་འགྱུར་ཏེ། འཛམ་བུའི་ཆུ་བོའི་གསེར་གྱི་མེ་ཏོག་དང་། པད་མ་ཐམས་ཅད་ཀྱིས་སྤྲོས་པར་འགྱུར་རོ། །དེ་བཞིན་གཤེགས་པ་དེ་ཡང་ཚེ་དཔག་ཏུ་
མེད་པར་འགྱུར་རོ། །དེ་བཞིན་དུ་མི་རྣམས་ཀྱི་ཚེ་ཡང་ཚད་མེད་པར་འགྱུར་རོ། །དེ་བཞིན་གཤེགས་པ་དེ་ནི་གྲོང་ཁྱེར་གཙང་མ་བསུང་ལྡན་དུ་བཞུགས་པར་འགྱུར་རོ། །བཅོམ་ལྡན་འདས་དེའི་སྨོན་ལམ་གྱི་ཁྱད་པར་གྱིས་ན་མ་འོངས་པའི་སེམས་ཅན་གྱི་ཚོགས་མང་པོ་དག་གིས་དེ་བཞིན་གཤེགས་པ་དེའི་མཚན་ཐོས་པ་
ཙམ་གྱིས་རང་གི་ལུས་ལས་ཤི་འཕོས་མ་ཐག་ཏུ་འཇིག་རྟེན་གྱི་ཁམས་གཙང་མ་སྦྱོང་བ་དེར་གྲོང་ཁྱེར་གཙང་མ་བསུང་ལྡན་དུ་སྐྱེ་བར་འགྱུར་ཞེས་ང་སྨྲའོ། །ངན་སོང་བཞི་ཡང་དེ་དག་གི་སྤྱོད་ཡུལ་གྱི་སར་མི་འགྱུར་རོ། །སྤྲིན་ཆེན་སྙིང་པོ་དེ་བས་ན་ང་ནི་བཅོམ་ལྡན་འདས་དེའི་འཇིག་རྟེན་གྱི་ཁམས་གཙང་མ་སྦྱོང་བ་དང་།
བསྐལ་པ་གཙང་ཞིང་བདེན་པའི་མཚམས་ཞེས་བྱ་བ་དང་། དེ་བཞིན་གཤེགས་པ་གཙང་ཞིང་བདེན་པའི་མཚམས་འཕེལ་བར་མཛད་པ་ཞེས་བྱ་བ་ཡོན་ཏན་གཟུང་བ་སྨྲའོ། །དེ་ནས་འཁོར་ཆེན་པོའི་ནང་ནས་ལྷ་དང་མིའི་ཚོགས་ཚད་མེད་པས་བཅོམ་ལྡན་འདས་ལ་མཆོད་པ་ཆེན་པོའི་ལས་བྱས་ཏེ་གར་བྱས། གླུ་བླངས་
ནས་བཅོམ་ལྡན་འདས་དེའི་བྱང་ཆུབ་སེམས་དཔའི་སྤྱོད་པ་ལ་སེམས་བསྐྱེད་དོ། །འདི་ནི་མ་འོངས་པའི་སེམས་ཅན་བྱེ་མ་སྙེད་དག་ལུང་སྟོན་པ་སྤྲིན་ཆེན་པོའི་མདོ་ཚེག་བར་བརྒྱད་པར་སྦྱར་བའི་ལེའུ་འབུམ་པ་ལས་ལུང་བསྟན་པའི་རྒྱུད་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། སྤྲིན་ཆེན་
སྙིང་པོ་ལ་སོགས་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྤྲིན་
ཆེན་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་མ་ཧཱ་མེ་གྷ་སཱུ་ཏྲཱ་ད་ད་ཤ་དིག་བོ་དྷི་ས་ཏྭ་ས་མུ་དྲ་སན་ནི་བ་ཏི་མ་ཧོཏྶ་བ་བི་ཀྲཱི་ཌི་ཏ་ནཱ་མ་པ་རི་བརྟ། བོད་སྐད་དུ། འཕགས་པ་སྤྲིན་ཆེན་པོའི་མདོ་ལས་ཕྱོགས་བཅུའི་བྱང་ཆུབ་སེམས་དཔའ་རྒྱ་མཚོ་འདུས་པའི་དགའ་སྟོན་ཆེན་པོ་ལ་རྩེ་བ་ཞེས་བྱ་བའི་ལེའུ། སངས་
རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་འོད་སྲུང་ཆེན་པོ་ལ་སོགས་པ་དགེ་སློང་གི་དགེ་འདུན་ཆེན་པོ་ས་ཡ་ཕྲག་བརྒྱད་དང་། སྐྱེ་དགུའི་བདག་མོ་ཆེན་མོ་ལ་
སོགས་པ་དགེ་སློང་མ་ས་ཡ་ཕྲག་དྲུག་དང་ལྔ་འབུམ་དང་། བྱང་ཆུབ་སེམས་དཔའ་སྤྲིན་ཆེན་སྙིང་པོ་ལ་སོགས་པ་བྱང་ཆུབ་སེམས་དཔའ་ས་ཡ་ཕྲག་དྲུག་དང་། བརྒྱད་འབུམ་དང་། སེང་གེ་ལ་སོགས་པ་ལིད་ཙ་བཱི་གཞོན་ནུ་ས་ཡ་ཕྲག་ལྔ་དང་། བརྒྱད་འབུམ་དང་ཐབས་ཅིག་ཏུ་བཞུགས་སོ། །
དེའི་ཚེ་རྒྱལ་པོ་ཆེན་པོ་འཕགས་སྐྱེས་པོ་ལ་སོགས་པ་རྒྱལ་ཆེན་བཞི་པའི་ལྷའི་བུ་འབུམ་ཕྲག་ཚད་མེད། གྲངས་མེད་པ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ལྷའི་བུ་དེ་དག་ཐམས་ཅད་
ཀྱང་ཐེག་པ་ཆེན་པོ་ལ་མངོན་དུ་ཕྱོགས་པ་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་གོ། །ཡང་དེའི་ཚེ་སུམ་ཅུ་རྩ་གསུམ་གྱི་གནས་ནས་ལྷའི་དབང་པོ་བརྒྱ་བྱིན་ལ་སོགས་པ་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་འབུམ་ཕྲག་ཚད་མེད་གྲངས་
མེད་པ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ལྷའི་བུ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་མངོན་དུ་ཕྱོགས་པ་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་ཤ་སྟག་གོ ། ཡང་དེའི་ཚེ་འཕྲུལ་དགའི་ལྷའི་རིས་ནས་ལྷའི་རྒྱལ་པོ་རབ་འཕྲུལ་དགའ་ལ་སོགས་པ་ལྷའི་བུ་འབུམ་ཕྲག་ཚད་མེད་གྲངས་མེད་པ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

ཕྱོགས་གཅིག་ཏུ་འཁོད་དོ། །ལྷའི་བུ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་མངོན་དུ་ཕྱོགས་པ་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་གོ། །ཡང་དེའི་ཚེ་གཞན་འཕྲུལ་དབང་བྱེད་ཀྱི་ལྷའི་རིས་ནས་ལྷའི་རྒྱལ་པོ་དབང་སྒྱུར་ལ་སོགས་
པ་ལྷའི་བུ་འབུམ་ཕྲག་ཚད་མེད་གྲངས་མེད་པ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ལྷའི་བུ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་མངོན་དུ་ཕྱོགས་པ་དང་། ཐེག་པ་ཆེན་པོ་ལ་ཡང་དག་པར་
ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་གོ། །ཡང་དེའི་ཚེ་ན་ཀླུའི་རྒྱལ་པོ་པད་མ་ཅན་ལ་སོགས་པ་ཀླུའི་རྒྱལ་པོ་ས་ཡ་ཕྲག་གཉིས་དང་བརྒྱད་འབུམ་ལ་ཀླུའི་རྒྱལ་པོ་རེ་རེ་ལ་ཡང་འཁོར་ཀླུ་འབུམ་ཕྲག་གྲངས་མེད་པ་དག་དང་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་
ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཀླུའི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་ཐོབ་པ་ཤ་སྟག་གོ། །ཡང་དེའི་ཚེ་གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་ལ་སོགས་པ་གནོད་སྦྱིན་གྱི་རྒྱལ་པོ་
ས་ཡ་ཕྲག་གསུམ་དང་དྲུག་འབུམ་ལ་གནོད་སྦྱིན་གྱི་རྒྱལ་པོ་རེ་རེ་ཡང་འཁོར་གནོད་སྦྱིན་འབུམ་ཕྲག་གྲངས་མེད་པ་དག་དང་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །གནོད་སྦྱིན་གྱི་རྒྱལ་པོ་དེ་དག་
ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་དྲི་ཟའི་རྒྱལ་པོ་དགའ་བ་ལ་སོགས་པ་དྲི་ཟའི་རྒྱལ་པོ་ས་ཡ་ཕྲག་གཉིས་དང་བརྒྱད་འབུམ་ལ་དྲི་ཟའི་རྒྱལ་པོ་རེ་རེ་ཡང་འཁོར་དྲི་ཟ་འབུམ་ཕྲག་གྲངས་མེད་པ་
དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དྲི་ཟའི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་

སྟག་གོ། །ཡང་དེའི་ཚེ་ལྷ་མ་ཡིན་གྱི་རྒྱལ་པོ་ཐགས་ཟངས་རིས་ལ་སོགས་པ་ལྷ་མ་ཡིན་གྱི་རྒྱལ་པོ་ས་ཡ་ཕྲག་བརྒྱད་དང་། བརྒྱད་འབུམ་ལ་ལྷ་མ་ཡིན་གྱི་རྒྱལ་པོ་རེ་རེ་ཡང་འཁོར་ལྷ་མ་ཡིན་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་
ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ལྷ་མ་ཡིན་གྱི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་ནམ་མཁའ་ལྡིང་གི་རྒྱལ་པོ་དྲི་ཟའི་
གླང་པོ་ལ་སོགས་པ་ནམ་མཁའ་ལྡིང་གི་རྒྱལ་པོ་ས་ཡ་ཕྲག་བཞི་དང་དགུ་འབུམ་ལ་ནམ་མཁའ་ལྡིང་གི་རྒྱལ་པོ་རེ་རེ་ལ་ཡང་འཁོར་ནམ་མཁའ་ལྡིང་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།
ཕྱོགས་གཅིག་ཏུ་འཁོད་དོ། །ནམ་མཁའ་ལྡིང་གི་རྒྱལ་པོ་དེ་དག་ཐམས་ཅད་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་མི་འམ་ཅིའི་རྒྱལ་པོ་ལེགས་མཐོང་ལ་སོགས་པ་མི་འམ་ཅིའི་རྒྱལ་པོ་ས་ཡ་ཕྲག་དགུ་དང་བརྒྱད་
འབུམ་ལ་མི་འམ་ཅིའི་རྒྱལ་པོ་རེ་རེ་ཡང་འཁོར་མི་འམ་ཅི་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །མི་འམ་ཅིའི་རྒྱལ་པོ་དེ་དག་ཐམས་ཅད་
ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་ལྟོ་འཕྱེ་ཆེན་པོའི་རྒྱལ་པོ་ཡོན་ཏན་ཟླ་བ་ལ་སོགས་པ་ལྟོ་འཕྱེ་ཆེན་པོའི་རྒྱལ་པོ་འབུམ་ཕྲག་མང་པོ་ལ་ལྟོ་འཕྱེ་ཆེན་པོའི་རྒྱལ་པོ་རེ་རེ་ཡང་འཁོར་ལྟོ་འཕྱེ་ཆེན་པོ་འབུམ་ཕྲག་གྲངས་
མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ལྟོ་འཕྱེ་ཆེན་པོའི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་

རྩེ་བ་ཤ་སྟག་གོ། །ཡང་དེའི་ཚེ་སྲིན་པོའི་རྒྱལ་པོ་འབྲོག་གནས་ལ་སོགས་པ་སྲིན་པོའི་རྒྱལ་པོ་ས་ཡ་ཕྲག་བརྒྱད་དང་བརྒྱད་འབུམ་ལ་སྲིན་པོའི་རྒྱལ་པོ་རེ་རེ་ཡང་འཁོར་སྲིན་པོ་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་
ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །སྲིན་པོའི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་གྲུལ་བུམ་གྱི་རྒྱལ་པོ་དྲོད་ལྡན་ལ་སོགས་པ་གྲུལ་བུམ་གྱི་རྒྱལ་པོ་ས་ཡ་ཕྲག་བདུན་དང་
བརྒྱད་འབུམ་ལ་གྲུལ་བུམ་གྱི་རྒྱལ་པོ་རེ་རེ་ཡང་འཁོར་གྲུལ་བུམ་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །གྲུལ་བུམ་གྱི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་
སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་པར་རྩེ་བ་ཤ་སྟག་གོ། །ཡང་དེའི་ཚེ་གཅོད་བྱེད་ཀྱི་བུའི་རྒྱལ་པོ་གློག་ལེགས་བཙུན་ལ་སོགས་པ་གཅོད་བྱེད་ཀྱི་བུའི་རྒྱལ་པོ་ས་ཡ་ཕྲག་བརྒྱད་ལ་གཅོད་བྱེད་ཀྱི་བུའི་རྒྱལ་པོ་རེ་རེ་ཡང་འཁོར་གཅོད་བྱེད་ཀྱི་བུ་འབུམ་ཕྲག་གྲངས་
མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །གཅོད་བྱེད་ཀྱི་བུའི་རྒྱལ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ཐ་དད་པ་དག་ལ་རྣམ་
པར་རྩེ་བ་ཤ་སྟག་གོ། །ཡང་དེའི་ཚེ་རིག་སྔགས་འཆང་གི་རྒྱལ་པོ་རིན་ཆེན་འཛིན་ལ་སོགས་པ་རིག་སྔགས་འཆང་གི་རྒྱལ་པོ་ས་ཡ་ཕྲག་དྲུག་ལ་རིག་སྔགས་འཆང་གི་རྒྱལ་པོ་རེ་རེ་ཡང་འཁོར་རིག་སྔགས་འཆང་འབུམ་ཕྲག་གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ།
ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཡང་དེའི་ཚེ་འབྱུང་པོའི་རྒྱལ་པོ་གླང་པོའི་སྙིང་པོ་ལ་སོགས་པ་འབྱུང་པོའི་རྒྱལ་པོ་ས་ཡ་ཕྲག་གསུམ་དང་། བརྒྱད་འབུམ་ལ་འབྱུང་པོའི་རྒྱལ་པོ་རེ་རེ་ཡང་འཁོར་འབྱུང་པོ་འབུམ་ཕྲག་

གྲངས་མེད་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་དྲང་སྲོང་མེས་སྦྱིན་ལ་སོགས་པ་དྲང་སྲོང་ས་ཡ་ཕྲག་དགུ་ལ་དྲང་སྲོང་དེ་དག་ཐམས་ཅད་ཀྱང་མངོན་
པར་ཤེས་པ་ལྔ་དང་ལྡན་པ་ཤ་སྟག་སྟེ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཡང་དེའི་ཚེ་མཉན་ཡོད་ཀྱི་གྲོང་ཁྱེར་ཆེན་པོ་ནས་ཀོ་ས་ལའི་རྒྱལ་པོ་གསལ་རྒྱལ་འཁོར་འབུམ་ཕྲག་དུ་མ་
དང་དཔུང་གི་ཚོགས་ཡན་ལག་བཞི་པ་དག་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། དེ་བཞིན་གཤེགས་པ་ལ་རྒྱལ་མཚན་དང་བ་དན་རྣམས་དངར་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཡང་དེའི་ཚེ་ཡུལ་ཙམ་
པ་ནས་ཁྱིམ་བདག་ལེགས་སྦྱིན་ཁྱིམ་བདག་འབུམ་ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཡང་དེའི་ཚེ་གྲོང་དང་། གྲོང་ཁྱེར་དང་། གྲོང་རྡལ་
དང་། རྒྱལ་པོའི་ཕོ་བྲང་ཐམས་ཅད་ནས་ཡུལ་བཅུ་དྲུག་གི་མི་རྣམས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །དེ་དག་ཐམས་ཅད་ཀྱང་བྱང་ཆུབ་སེམས་དཔའ་སེམས་དཔའ་
ཆེན་པོ་ཤ་སྟག་གོ། །ཡང་དེའི་ཚེ་མཉན་ཡོད་ཀྱི་གྲོང་ཁྱེར་ཆེན་པོ་ནས་བཙུན་མོ་མ་ལི་ཀ་ལ་སོགས་པ་བཙུན་མོ་ཁྲི་དྲུག་སྟོང་དང་། དགེ་བསྙེན་མ་ས་ག་ལ་སོགས་པ་དགེ་བསྙེན་མ་འབུམ་ཕྲག་དུ་མ་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཤ་སྟག་བཅོམ་ལྡན་འདས་ཀྱི་ཞབས་ལ་མགོ་
བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷ