Kinh tạng Tây Tạng (Kangyur Đại Học) — 061_མདོ་སྡེ།_ཙ

ལ་དེ་བཞིན་གཤེགས་པ་རྣམས་འདྲེས་པར་ཡང་མི་འགྱུར་ཏེ། ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་དེ་ལྟ་བུ་ཐམས་ཅད་ཀྱང་སྟོན་ཏོ། །ལུས་
གཅིག་གིས་མཉམ་པར་འཇོག་ལ་ལུས་དཔག་ཏུ་མེད་གྲངས་མེད་པ་དག་གིས་ལྡང་ཞིང་ལུས་དཔག་ཏུ་མེད་གྲངས་མེད་པ་དག་གིས་མཉམ་པར་གཞག་ལ་ལུས་གཅིག་གིས་ལྡང་ངོ་།། །།བམ་པོ་གསུམ་པ་སྟེ་ཐ་མ། འཇམ་དཔལ་
དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཀྱི་དབྱིངས་ལ་སྤྱོད་ཡུལ་བ་ཡང་ཡིན་ལ་སེམས་ཅན་གྱི་ཁམས་ལ་སྤྱོད་ཡུལ་བར་ཡང་སྣང་ངོ་། །སངས་རྒྱས་ཀྱི་སྤྱོད་ཡུལ་ལ་མངོན་པར་དགའ་བ་ཡང་ཡིན་ལ་བདུད་ཀྱི་སྤྱོད་ཡུལ་བར་

ཡང་རྣམ་པར་སྣང་ངོ་། །མྱ་ངན་ལས་འདས་པའི་སྤྱོད་ཡུལ་བ་ཡང་ཡིན་ལ་འཁོར་བའི་སྤྱོད་ཡུལ་བར་ཡང་སྣང་ངོ་། །ཐམས་ཅད་མཁྱེན་པའི་ཡེ་ཤེས་སྤྱོད་ཡུལ་བ་ཡང་ཡིན་ལ་བྱང་ཆུབ་སེམས་དཔའི་སྤྱོད་ཡུལ་བར་ཡང་སྣང་ངོ་། །ཞི་
བའི་སྤྱོད་ཡུལ་བ་ཡང་ཡིན་ལ་མ་ཞི་བ་དང་། རབ་ཏུ་མ་ཞི་བ་དང་། ཉེ་བར་མ་ཞི་བའི་སྤྱོད་ཡུལ་བར་ཡང་སྣང་སྟེ་སེམས་ཅན་རྣམས་ཀྱང་འདུལ་ལོ། །བླང་བ་མེད་པ་དང་། དོར་བ་མེད་པ་དང་། སྤྲོས་པ་མེད་པ་དང་། མ་སྤྲོས་པ་དང་། མཚན་མ་
མེད་པ་དང་། དངོས་པོ་མེད་པ་དང་། ཤེས་པར་བྱ་བ་མེད་པ་དང་། བར་སྣང་དང་མཚུངས་པ་སྤྱོད་ཡུལ་བ་ཡང་ཡིན་ལ་སྤྲོས་པ་དང་། མཚན་མ་དང་། དམིགས་པ་སྤྱོད་ཡུལ་བའི་སེམས་ཅན་ཐམས་ཅད་ཀྱི་ནང་ན་ཡང་སྣང་ངོ་། །སྟོབས་བཀོད་པའི་
སྤྱོད་ཡུལ་བ་ཡང་ཡིན་ལ་གཟུགས་བཟང་པོའི་སྤྱོད་ཡུལ་བར་ཡང་སྣང་ངོ་། །ཆོས་ཐམས་ཅད་སྐྱེ་བ་མེད་པ་དང་། འགག་པ་མེད་པས་གཉེན་པོ་སྤྱོད་ཡུལ་བ་ཡང་ཡིན་ལ་སེམས་ཅན་ཡོངས་སུ་སྨིན་པར་བྱེད་པའི་སྤྱོད་ཡུལ་བར་ཡང་སྣང་ངོ་། །ཡེ་ཤེས་དང་། རྣམ་པར་
ཐར་པ་དང་། མངོན་པར་ཤེས་པ་དང་། རིག་པ་དང་། རྣམ་པར་གྲོལ་བའི་སྤྱོད་ཡུལ་བ་ཡང་ཡིན་ལ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་
དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། སྲིན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། སྲུལ་པོ་དང་། ལུས་སྲུལ་པོ་དང་། སེམས་ཅན་དམྱལ་བ་དང་།
དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་པ་དང་། སྒོ་ང་ལས་སྐྱེས་པ་དང་། མངལ་ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། གཟུགས་ཅན་དང་། གཟུགས་ཅན་མ་ཡིན་པ་དང་། འདུ་ཤེས་ཅན་དང་། འདུ་ཤེས་

ཅན་མ་ཡིན་པ་དང་། འདུ་ཤེས་མེད་འདུ་ཤེས་མེད་མིན་ནས་གཟུགས་མེད་པའི་བར་གྱི་སེམས་ཅན་རྣམས་ཡོངས་སུ་སྨིན་པར་བྱེད་པར་ཡང་སྣང་ངོ་། །དེ་བཞིན་གཤེགས་པའི་སྤྱོད་པ་དང་། མངོན་པར་རྫོགས་པར་བྱང་ཆུབ་པ་དང་། སངས་རྒྱས་ཀྱི་བཀོད་པ་ཐམས་
ཅད་ཀྱི་སྤྱོད་ཡུལ་ཐོབ་པ་ཡང་ཡིན་ལ་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཆོ་ག་དང་སྤྱོད་ལམ་ཡང་ཀུན་ཏུ་སྟོན་ཏོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སྒྲ་སེམས་ཅན་གཅིག་
གི་སྒྲར་འཇུག་པར་བྱེད་ལ། སེམས་ཅན་གཅིག་གི་སྒྲ་སེམས་ཅན་ཐམས་ཅད་ཀྱི་སྒྲར་འཇུག་པར་བྱེད་ཅིང་། སྒྲ་རྣམས་འདྲེས་པར་ཡང་མི་འགྱུར་ལ་སེམས་ཅན་གང་གི་སྒྲ་ལ་ཡང་སྒྲིབ་པར་མི་འགྱུར་རོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་
བྱང་ཆུབ་སེམས་དཔའ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་རང་གི་ལུས་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་སུ་བྱིན་གྱིས་རློབ་བོ། །འཇམ་དཔལ་དགེ་བའི་
བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་གྱི་ལུས་ལ་ཞིང་གི་ལུས་ཀུན་ཏུ་སྟོན་ཀྱང་སེམས་ཅན་གྱི་ལུས་དང་འདྲེས་པར་ཡང་མི་བྱེད། ཞིང་གི་ལུས་ལ་སེམས་ཅན་གྱི་ལུས་ཀུན་ཏུ་སྟོན་ཀྱང་ཞིང་གི་ལུས་དང་འདྲེས་པར་ཡང་མི་བྱེད་དོ། །སངས་རྒྱས་
ཀྱི་སྐུ་ལ་ཉན་ཐོས་དང་། རང་སངས་རྒྱས་ཀྱི་ལུས་སུ་ཀུན་ཏུ་སྟོན་ཀྱང་སངས་རྒྱས་ཀྱི་སྐུ་དམན་པར་ཡང་མི་བྱེད་དོ། །ཉན་ཐོས་དང་། རང་སངས་རྒྱས་ཀྱི་ལུས་ལ་སངས་རྒྱས་ཀྱི་སྐུ་ཀུན་ཏུ་སྟོན་ཀྱང་ཉན་ཐོས་དང་། རང་སངས་རྒྱས་ཀྱི་ལུས་རྒྱ་ཆེན་པོར་ཡང་མི་བྱེད་དོ། །
སྤྱོད་པའི་ལུས་ལ་མངོན་པར་རྫོགས་པར་བྱང་ཆུབ་པའི་སྐུ་ཀུན་ཏུ་སྟོན་ཀྱང་སྤྱོད་པའི་རྒྱུན་ཆད་པར་ཡང་མི་བྱེད་དོ། །མངོན་པར་རྫོགས་པར་བྱང་ཆུབ་པའི་སྐུ་ལ་སྤྱོད་པའི་ལུས་ཀུན་ཏུ་སྟོན་ཀྱང་མངོན་པར་རྫོགས་པར་བྱང་ཆུབ་པའི་སྐུ་ཉམས་པར་ཡང་མི་བྱེད་དོ། །མྱ་ངན་ལས་འདས་

པ་ལ་འཁོར་བའི་རྒྱན་དུ་སྟོན་ཀྱང་མྱ་ངན་ལས་འདས་པ་ལ་མངོན་པར་ཞེན་པ་ཡང་མི་སྐྱེད་དོ། །འཁོར་བ་མྱ་ངན་ལས་འདས་པར་ཀུན་ཏུ་སྟོན་ཀྱང་གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་ཡང་མི་བྱེད་དོ། །མཉམ་པར་ཡང་
བཞག་ལ་བྱ་བ་ཐམས་ཅད་ཀྱང་སྟོན་ཏེ། འདི་ལྟ་སྟེ། འོང་བ་དང་། འགྲོ་བ་དང་། འགྲེང་བ་དང་། ཉལ་བར་བྱེད་དོ། །སྤྱོད་ལམ་ཐམས་ཅད་ཀྱང་ཀུན་ཏུ་སྟོན་ལ་ཏིང་ངེ་འཛིན་རྣམ་པར་འཁྲུགས་པར་ཡང་མི་བྱེད་དོ། །དེ་བཞིན་གཤེགས་པ་གཅིག་གི་ཞབས་ཀྱི་དྲུང་ན་ཆོས་ཉན་
པར་ཡང་སྣང་ལ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དག་ན་གཟུགས་དང་། ལུས་དང་། ཁ་དོག་ཡོངས་སུ་འགྲུབ་པ་གཞན་དང་གཞན་དག་གིས་ཀྱང་ཆོས་ཉན་ལ་ཏིང་ངེ་འཛིན་ཐ་དད་པར་
ཡང་མི་བྱེད་ཅིང་ཆོས་ཀྱང་ལེན་ལ་འཛིན་ཏེ་འདོན་ཅིང་ཀུན་ཆུབ་པར་ཡང་བྱེད་ལ་སངས་རྒྱས་དེ་དག་ལས་ཆོས་ཉན་པའི་རྒྱུན་ཆད་པར་ཡང་མི་བྱེད་དོ། །ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་གཟུགས་དང་། ལུས་དང་། ཁ་དོག་ཡོངས་སུ་འགྲུབ་པ་ཐ་དད་པས་
སེམས་ཅན་རྣམས་ཡོངས་སུ་སྨིན་པར་ཡང་བྱེད་ལ་ལུས་ཐ་དད་པར་མི་བྱེད་ཅིང་གནས་ནས་ཀྱང་མི་གཡོའོ། །ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་བྱ་བ་ཐམས་ཅད་ཀུན་ཏུ་སྟོན་ཀྱང་ཏིང་ངེ་འཛིན་ཐ་དད་པར་ཡང་མི་བྱེད་དོ། །སེམས་ཀྱི་སྐད་ཅིག་སེམས་
ཀྱི་སྐད་ཅིག་ལ་ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཀྱང་མངོན་པར་སྒྲུབ་ལ་ཏིང་ངེ་འཛིན་ཐ་དད་པར་ཡང་མི་བྱེད་དེ། འཇམ་དཔལ་རྣམ་གྲངས་དེས་ན་རྣམ་པར་ཐར་པ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པའི་བྱང་ཆུབ་སེམས་
དཔའ་སངས་རྒྱས་ཀྱི་ཞིང་གི་མཐས་ཀླས་པའི་བསྐལ་པར་ཏིང་ངེ་འཛིན་གྱི་སྒོ་བསྒྲུབ་པ་མངོན་པར་སྒྲུབ་ཀྱང་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་བསྒྲུབ་པ་རྣམས་ཀྱི་མཐར་ཐུག་པར་མི་འགྱུར་རོ། །འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཕུན་སུམ་ཚོགས་པ་

དེ་དག་ཐམས་ཅད་ནི་དགེ་བའི་བཤེས་གཉེན་ལས་ངེས་པར་འབྱུང་ངོ་། །འཇམ་དཔལ་དེ་བཞིན་དུ་གཟུངས་ཀྱི་སྒོ་བརྗོད་དུ་མེད་པ་མངོན་པར་བསྒྲུབ་པ་མཐའ་ཡས་དཔག་ཏུ་མེད་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད་པ་དག་དང་
གཟུངས་ཐོབ་པ་ཕུན་སུམ་ཚོགས་པ་དེ་དག་ཐམས་ཅད་ཀྱང་དགེ་བའི་བཤེས་གཉེན་ལས་ངེས་པར་འབྱུང་ངོ་། །སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད།
ཚད་མེད། བརྗོད་དུ་མེད་པ་ཕུན་སུམ་ཚོགས་པ་རྣམས་ཀྱང་དེ་བཞིན་ནོ། །འཇམ་དཔལ་མདོར་བསྡུ་ན་དེ་ལྟར་བྱང་ཆུབ་སེམས་དཔའི་སངས་རྒྱས་ཀྱི་ཆོས་བསྒྲུབ་པ་མཐའ་ཡས་པ་ཐམས་ཅད་དང་། སངས་རྒྱས་ཀྱི་ཆོས་ཕུན་སུམ་ཚོགས་པ་ཐམས་ཅད་ནི་དགེ་བའི་བཤེས་གཉེན་ལས་
ངེས་པར་བྱུང་བ་ཡིན་ནོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཀྱི་དབྱིངས་མཐའ་ཡས་པའི་སྒོ་ལ་འཇུག་པ་སེམས་ཅན་ལ་ཀུན་ཏུ་སྟོན་པའི་ཡུལ་དང་། འཇིག་རྟེན་གྱི་ཁམས་ཐམས་ཅད་ཀྱི་རྒྱན་སྣ་ཚོགས་སུ་མངོན་པར་
སྒྲུབ་པ་འགྲོ་བ་ཐམས་ཅད་ཤེས་པར་བྱེད་པའི་ཡུལ་དང་། འཇིག་རྟེན་གྱི་ཁམས་ཐམས་ཅད་དུ་སྤྲུལ་པ་མངོན་པར་བསྒྲུབ་པའི་ཡུལ་དང་། དེ་བཞིན་གཤེགས་པའི་སྐུ་བྱང་ཆུབ་སེམས་དཔའི་ལུས་སུ་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ལུས་དེ་བཞིན་གཤེགས་
པའི་སྐུར་མངོན་པར་བསྒྲུབ་པའི་ཡུལ་དང་། ནམ་མཁའི་ཁམས་འཇིག་རྟེན་གྱི་ཁམས་སུ་མངོན་པར་བསྒྲུབ་པ་དང་། འཇིག་རྟེན་གྱི་ཁམས་ནམ་མཁའི་ཁམས་སུ་མངོན་པར་བསྒྲུབ་པའི་ཡུལ་དང་། འཁོར་བ་མྱ་ངན་ལས་འདས་པར་མངོན་པར་བསྒྲུབ་པ་དང་། མྱ་ངན་
ལས་འདས་པ་འཁོར་བར་མངོན་པར་བསྒྲུབ་པའི་ཡུལ་དང་། སེམས་ཅན་གྱི་སྐད་བརྗོད་པ་གཅིག་གིས་སངས་རྒྱས་ཀྱི་ཆོས་ཐམས་ཅད་བསྟན་པའི་ཡུལ་དང་། གདོང་དང་ལུས་མཐའ་ཡས་པ་ཀུན་ཏུ་བསྟན་པ་ལུས་གཅིག་ཏུ་བྱིན་གྱིས་རློབ་ཅིང་ལུས་ཀྱི་རིམ་པ་ཐམས་ཅད་མངོན་པར་

བསྒྲུབ་པའི་ཡུལ་དང་ལུས་གཅིག་གིས་ཆོས་ཀྱི་དབྱིངས་རྒྱས་པར་འགེངས་པའི་ཡུལ་དང་། སེམས་ཅན་གཅིག་གིས་སེམས་བསྐྱེད་པ་རྣམས་ལ་སེམས་ཀྱི་སྐད་ཅིག་སེམས་ཀྱི་སྐད་ཅིག་རེ་རེ་ལ་ཡང་སྒོ་མཐའ་ཡས་པས་བསྒྲུབ་པའི་བྱང་ཆུབ་རྣམ་པར་མི་རྟོག་པའི་ཡུལ་
དང་། འཇམ་དཔལ་དེ་ལ་སོགས་པ་ཡུལ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད། གྲངས་མེད། བསམ་གྱིས་མི་ཁྱབ་པ་དེ་དག་བྱང་ཆུབ་སེམས་དཔའ་ལ་ཡང་དག་པར་འགྲུབ་བོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་
དཔའ་ནི་འཇིག་རྟེན་གྱི་ཁམས་ཐམས་ཅད་འཇིག་རྟེན་གྱི་ཁམས་གཅིག་ཏུ་མོས་ཤིང་འཇུག་གོ། །འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་ཐམས་ཅད་དུ་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་པད་མའི་གདན་གཅིག་དང་། དེ་བཞིན་གཤེགས་
པའི་སྐུ་གཅིག་གིས་ཡོངས་སུ་ཁྱབ་པར་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་ནམ་མཁའི་ངོ་བོ་ཉིད་དུ་ཀུན་ཏུ་སྟོན་པར་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་རྒྱན་དུ་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་
བྱང་ཆུབ་སེམས་དཔའི་ལུས་ཀྱིས་ཡོངས་སུ་ཁྱབ་པར་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་སྐྲ་ཙམ་གྱི་ཁྱོན་གཅིག་ལ་འཇོག་པར་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་ལུས་གཅིག་ཏུ་འཇུག་པ་དང་ལྡན་པར་མོས་ཤིང་འཇུག་གོ། །
འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པ་གཅིག་གི་བྱང་ཆུབ་ཀྱི་ཤིང་དང་བྱང་ཆུབ་ཀྱི་སྙིང་པོས་ཡོངས་སུ་ཁྱབ་པར་མོས་ཤིང་འཇུག་གོ། །འཇིག་རྟེན་གྱི་ཁམས་ཐམས་ཅད་སྒྲ་སྐད་གཅིག་གིས་གོ་བར་བྱེད་ཅིང་སེམས་ཅན་གྱི་ཁམས་སྣ་ཚོགས་ཀྱི་སྒྲ་ལ་འཇུག་པས་
ཚིམ་པར་བྱེད་པར་མོས་ཤིང་འཇུག་གོ། །སེམས་ཅན་ཐམས་ཅད་ཀྱི་ངོ་བོ་ཉིད་དང་ལུས་སུ་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ལུས་ལ་འཇུག་པ་དང་ལྡན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་བྱང་ཆུབ་

སེམས་དཔའི་ཁོང་དུ་སོང་བར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་ཁོང་དུ་ཞུགས་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ལུས་ལ་རྟེན་པར་མོས་ཤིང་འཇུག་གོ། །སེམས་ཅན་གྱི་ཁམས་
ཐམས་ཅད་སངས་རྒྱས་ཀྱི་ཆོས་ཀྱི་སྣོད་དུ་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་བརྒྱ་བྱིན་དང་ཚངས་པ་དང་། འཇིག་རྟེན་སྐྱོང་བ་གང་འདོད་པ་དང་མོས་པའི་གཟུགས་དང་། ལུས་དང་། ཁ་དོག་དང་རྟགས་ལ་མངོན་དུ་ཕྱོགས་པ་སྟོན་པར་མོས་ཤིང་འཇུག་གོ། །
སེམས་ཅན་གྱི་ཁམས་ཐམས་ཅད་ཉན་ཐོས་དང་། རང་སངས་རྒྱས་ཀྱི་གཟུགས་དང་། ལུས་དང་། ཁ་དོག་དང་། རྟགས་དང་། ཚུལ་དུ་སྟོན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཡོན་ཏན་གྱིས་ལེགས་པར་བརྒྱན་པའི་བྱིན་
གྱི་རླབས་ཀུན་ཏུ་སྟོན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་གཟུགས་དང་། མཚན་དང་། དཔེ་བྱད་བཟང་པོ་དང་། གཟུགས་དང་། ལུས་དང་། ཁ་དོག་སྣ་ཚོགས་དང་། སྤྱོད་ལམ་དང་། སྤྱོད་པ་ཀུན་ཏུ་སྟོན་པ་གཞན་
ཤེས་པར་བྱེད་པར་མོས་ཤིང་འཇུག་གོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འདོད་པའི་ཁམས་ནས་ཀྱང་མི་གཡོ་ལ་གཟུགས་དང་གཟུགས་མེད་པ་ན་སྤྱོད་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་།
སྙོམས་པར་འཇུག་པ་རྣམས་ལ་ཡང་སྙོམས་པར་འཇུག་ཅིང་དེ་དག་གི་དབང་གིས་ཀྱང་མི་སྐྱེའོ། །ཉན་ཐོས་ཀྱི་ལམ་མངོན་དུ་ཤེས་པ་ལ་ཞུགས་པ་ཡང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །རང་སངས་རྒྱས་ཀྱི་ལམ་མངོན་དུ་ཤེས་ཤིང་མཐོང་བ་ལ་མཁས་པ་
ཡང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །གཡོག་འཁོར་མང་པོས་ཡོངས་སུ་བསྐོར་བ་ཡིན་ལ་ལྷ་དང་མིའི་གཡོག་འཁོར་མང་པོ་རྣམ་པར་དག་པ་དང་ཡང་ལྡན་ནོ། །ལྷའི་བུ་མོ་འབུམ་དག་གླུ་དབྱངས་རྗེས་སུ་སྒྲོགས་ཤིང་སིལ་སྙན་འབུམ་དག་སིལ་ཁྲོལ་

འབྱིན་པ་དང་ཡང་ལྡན་ལ་བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱང་མི་འདོར་རོ། །འགྲོ་བའི་དགའ་བ་དང་། རྩེ་བ་དང་། བཞད་གད་དང་། འཇོ་སྒེག་ཐམས་ཅད་དང་། སེམས་
ཅན་བརྐམ་ཆགས་པའི་འདུ་འཛི་ཐམས་ཅད་ཀྱི་ནང་ན་གནས་པ་ཡང་ཡིན་ལ་སེམས་ཀྱི་སྐད་ཅིག་གཅིག་ལ་ཡང་བྱང་ཆུབ་ཀྱི་སེམས་ཀྱི་མཉམ་པ་ཉིད་ཀྱང་མི་འདོར་རོ། །འཇིག་རྟེན་ལས་འདས་པ་ཡང་ཡིན་ཏེ་འཇིག་རྟེན་ཐམས་ཅད་དང་མ་འདྲེས་ལ་ཕ་རོལ་ཏུ་འགྲོ་བའི་ལམ་ལ་
སློབ་པར་ཡང་སྣང་ཞིང་ལས་དང་ཉོན་མོངས་པར་བྱིང་བའི་སེམས་ཅན་རྣམས་ཡོངས་སུ་སྨིན་པར་ཡང་བྱེད་དོ། །ལམ་ལ་གནས་ཤིང་ལམ་ཇི་ལྟ་བ་བཞིན་དུ་ཤེས་པ་མཐོང་བ་ལ་ཞུགས་པ་ཡང་ཡིན་ལ། ལམ་ངན་པར་ལྷུང་བའི་སེམས་ཅན་ཡོངས་སུ་སྨིན་པར་བྱ་བའི་
ཕྱིར་ལམ་ངན་པ་ན་ཡང་སྣང་ཞིང་ལམ་དེ་ལ་སྙིང་པོར་འདུ་ཤེས་པ་ཡང་མ་ཡིན་ལ་དེས་དག་པར་འདོད་པ་ཡང་མ་ཡིན་ནོ། །ལུས་དང་། ངག་དང་། ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པ་ཡང་ཡིན་ཏེ། རྟག་ཏུ་ཚུལ་ཁྲིམས་ལེགས་པར་བསྲུངས་ཤིང་དེ་བཞིན་
གཤེགས་པའི་ཚུལ་ཁྲིམས་རྣམ་པར་དག་པ་ལ་ཡང་གཞོལ་ལ་སེམས་ཅན་ཚུལ་ཁྲིམས་འཆལ་པ་ཡོངས་སུ་སྨིན་པར་བྱ་བའི་ཕྱིར་བྱིས་པ་སོ་སོའི་སྐྱེ་བོ་ཕལ་པའི་སྤྱོད་ཡུལ་བ་ལ་ཡང་ཀུན་ཏུ་སྣང་ངོ་། །བསོད་ནམས་དང་ཡེ་ཤེས་ཀྱི་ཚོགས་བསགས་ཤིང་བྱང་ཆུབ་སེམས་
དཔའི་འགྲོ་བ་ལ་ཡང་གཞོལ་ལ་ངན་འགྲོར་སྐྱེས་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་ཁོམ་པ་དང་། དབུལ་པོའི་ཁྱིམ་དུ་སྐྱེ་བའི་འགྲོ་བ་ཡང་ཀུན་ཏུ་སྟོན་ལ་འགྲོ་བ་དེར་
ཡང་དག་པར་གཞོལ་བ་ཡང་མ་ཡིན་ནོ། །ཡེ་ཤེས་དང་སྤོབས་པ་ཐོགས་པ་མེད་པའི་སངས་རྒྱས་ཀྱི་ཆོས་ལ་ཞུགས་པས་གཞན་གྱི་དྲིང་ལ་མི་འཇོག་པའི་ཡེ་ཤེས་ལ་མཁས་པ་ཡང་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ་དང་།

སངས་རྒྱས་ཐམས་ཅད་ཀྱི་སྐུ་དང་ལུས་གཟུགས་གཅིག་ཏུ་གྱུར་པ་དང་། སེམས་ཅན་ཐམས་ཅད་དང་ཐུན་མོང་མ་ཡིན་པའི་ཆོས་ཀྱི་ཚུལ་དང་དགོངས་པ་སྣང་བ་རྟོགས་པ་དང་། ཐེག་པ་ཐམས་ཅད་མཉམ་པ་ཉིད་ཀྱིས་བྱིན་གྱིས་བརླབས་པ་དང་། སངས་རྒྱས་ཐམས་ཅད་ཀྱི་སྤྱོད་
ཡུལ་ལ་མངོན་དུ་ཕྱོགས་པ་དང་། འགྲོ་བ་ཐམས་ཅད་ཀྱིས་བསྔགས་པར་འོས་པ་དང་། སེམས་ཅན་གྱི་ཁམས་ཐམས་ཅད་ཀྱིས་གདོང་དུ་ལྟ་བ་དང་། འགྲོ་བ་ཐམས་ཅད་ཀྱི་སློབ་དཔོན་དུ་གྱུར་པ་དང་། ཟབ་ཅིང་བརྟན་པའི་རྒྱ་མཚོའི་ཆུའི་དུས་རླབས་ལྟ་བུའི་ཏིང་ངེ་འཛིན་
གྱིས་རྣམ་པར་རྩེ་བ་དང་། སངས་རྒྱས་ཀྱི་སྐུ་དང་། ཁ་དོག་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ཐོབ་པ་ཡང་ཡིན་ལ་ཆོས་ཡོངས་སུ་ཚོལ་བའི་རྒྱུན་ཡང་མི་གཅོད་དོ། །ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་གྱི་སློབ་དཔོན་
དམ་པ་ཡང་ཡིན་ལ། ཙོག་ཙོག་པོར་འདུག་སྟེ་ཐལ་མོ་སྦྱར་ནས་མཁན་པོ་དང་། སློབ་དཔོན་ལས་ཆོས་ལེན་པར་ཡང་ཀུན་ཏུ་སྟོན་ཅིང་གུས་པར་བྱ་བ་ཐམས་ཅད་ཀྱི་ཉེ་བར་གནས་པར་ཡང་སྣང་སྟེ། བྱང་ཆུབ་སེམས་དཔའི་ལམ་ལ་གནས་ནས་ཐབས་གང་དང་གང་གིས་
སེམས་ཅན་རྣམས་ཡོངས་སུ་སྨིན་པའམ་འདུལ་བར་འགྱུར་བའི་ཐབས་དེ་དང་དེ་ཉིད་སེམས་ཅན་རྣམས་ལ་སྟོན་ཏོ། །དགེ་བའི་རྩ་བ་ཐམས་ཅད་ཤིན་ཏུ་བསྡུས་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྩེ་མོར་ཕྱིན་པ་དང་། དེ་བཞིན་གཤེགས་པ་ཐམས་ཅད་
ཀྱིས་དབང་བསྐུར་བས་དབང་བསྐུར་བ་དང་། ཆོས་ཀྱི་དབང་ཕྱུག་གི་བདག་པོ་དམ་པའི་མཆོག་ཐོབ་པ་དང་། ཆོས་ཀྱི་ཅོད་པན་ཐོགས་པ་མེད་ཅིང་དྲི་མ་མེད་པས་བཅིངས་པ་དང་། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་དེ་བཞིན་གཤེགས་པའི་སྐུ་ཀུན་ཏུ་སྟོན་པ་
དང་། ཐོགས་པ་མེད་པར་ཆོས་ཀྱི་འཁོར་ལོ་སྐོར་བའི་བྱིན་གྱི་རླབས་དང་ལྡན་པ་དང་། ལུས་གཟུགས་འཇིག་རྟེན་གྱི་ཁམས་ཐམས་ཅད་དུ་ཞུགས་པ་དང་ལྡན་པ་དང་། ཆོས་ཐམས་ཅད་ཀྱི་དབང་ཕྱུག་དམ་པའི་མཆོག་ཐོབ་པ་དང་ལྡན་པ་དང་། བྱང་ཆུབ་སེམས་དཔའི་དབང་

ཐམས་ཅད་ཐོབ་པ་དང་། འགྲོ་བའི་ཞིང་ཐམས་ཅད་དུ་སྐྱེ་བ་སྟོན་པའི་ཤེས་པ་དང་ལྡན་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་དང་ཡུལ་གཅིག་ཏུ་གྱུར་པ་ཡང་ཡིན་ལ་བྱང་ཆུབ་སེམས་དཔའི་སྤྱོད་པའི་
རྒྱུན་ཡང་མི་གཅོད། བྱང་ཆུབ་སེམས་དཔའི་མངོན་པར་འདུ་བྱ་བའི་སྟོབས་ལས་ཀྱང་ཡོངས་སུ་མི་ཉམས། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ལས་ཀྱང་ཐག་རིང་དུ་མི་འགྱུར། བྱང་ཆུབ་སེམས་དཔའི་ཆོས་ཉིད་ཀྱང་མི་འདོར། བྱང་ཆུབ་སེམས་དཔའི་ལས་
ཀྱི་མཐའ་ལས་ཀྱང་མི་འདའ། བྱང་ཆུབ་སེམས་དཔའི་ལམ་ལས་ཀྱང་ཕྱིར་མི་ལྡོག་བྱང་ཆུབ་སེམས་དཔའི་བྱ་བ་ལ་ཞུམ་པར་ཡང་མི་བྱེད་དེ། འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་བླང་བ་མེད་པ་དང་།
དོར་བ་མེད་པ་དང་། འདེག་པ་མེད་པ་དང་། འཇོག་པ་མེད་པ་དང་། སྒྱུ་མ་དང་། སྨིག་རྒྱུ་དང་། རྨི་ལམ་དང་། མིག་ཡོར་དང་། གཟུགས་བརྙན་དང་། ཆུ་ཟླ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱ་བ་མེད་པ་དང་། བརྗོད་དུ་
མེད་པ་དང་། སྨྲར་མེད་པ་དང་། བསྙད་དུ་མེད་པ་དང་། དེ་བཞིན་ཉིད་དང་། ཡང་དག་པའི་མཐའ་དང་། རྣམ་པར་འཇིག་པ་མེད་པ་དང་། མཉམ་པ་ཉིད་དང་། དབྱེར་མེད་པ་དང་། གཉིས་སུ་མེད་པ་ཞེས་བྱ་བ་དེ་ནི་དེའི་དམིགས་པ་ཡིན་ཏེ། ཆོས་ཐམས་ཅད་ནི་གཉེན་
པོ་མེད་པའི་ཕྱིར་རོ། །ཆོས་ཐམས་ཅད་ཅེས་བྱ་བ་དེ་ནི་དེའི་དམིགས་པ་སྟེ། འདུ་ཤེས་པ་འཛིན་པའི་ཕྱིར་དམིགས་པའོ། །དེ་ཅིའི་ཕྱིར་ཞེ་ན། སེམས་མེད་པ་ལ་སེམས་སུ་དམིགས་པ་ནི་འདུ་ཤེས་ཕྱིན་ཅི་ལོག་ཡིན་པའི་ཕྱིར་ཏེ། སེམས་ཕྱིན་ཅི་ལོག་ཏུ་གྱུར་ན་སེམས་མྱོས་
པར་འགྱུར་རོ། །སེམས་མྱོས་ན་སེམས་བསླད་པར་འགྱུར་རོ། །སེམས་བསླད་པ་ལས་སེམས་སྐྲག་པར་འགྱུར་རོ། །སེམས་སྐྲག་པ་ལས་བྱང་ཆུབ་ཀྱི་སེམས་ཉམས་པར་འགྱུར་རོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་སེམས་ལ་སེམས་ཀྱིས་རྗེས་སུ་

བལྟ་བར་བྱའོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་དབང་བཅུ་འཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཚེ་ལ་དབང་བ་དང་། སེམས་ལ་དབང་བ་དང་། ཡོ་བྱད་ལ་དབང་བ་དང་། ལས་ལ་དབང་བ་དང་། སྐྱེ་བ་
ལ་དབང་བ་དང་། མོས་པ་ལ་དབང་བ་དང་། སྨོན་ལམ་ལ་དབང་བ་དང་། རྫུ་འཕྲུལ་ལ་དབང་བ་དང་། ཆོས་ལ་དབང་བ་དང་། ཡེ་ཤེས་ལ་དབང་བའོ། །རྣམ་པར་འཕྲུལ་པ་བཅུ་ཡང་འཐོབ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་རྣམ་པར་སྤྲུལ་པ་དང་། ཞིང་
རྣམ་པར་སྤྲུལ་པ་དང་། ཆོས་རྣམ་པར་སྤྲུལ་པ་དང་། ལུས་རྣམ་པར་སྤྲུལ་པ་དང་། སྨོན་ལམ་རྣམ་པར་སྤྲུལ་པ་དང་། སྤྱོད་ཡུལ་རྣམ་པར་སྤྲུལ་པ་དང་། ཡེ་ཤེས་རྣམ་པར་སྤྲུལ་པ་དང་། མངོན་པར་ཤེས་པ་རྣམ་པར་སྤྲུལ་པ་དང་། རྫུ་འཕྲུལ་རྣམ་པར་སྤྲུལ་པ་དང་། སྟོབས་
རྣམ་པར་སྤྲུལ་པའོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་གྱི་ཁམས་ཐམས་ཅད་ཀྱི་མོས་པ་ལ་འཇུག་པ་དང་། སངས་རྒྱས་ཀྱི་ཞིང་ཐ་དད་པ་ཉིད་ལ་འཇུག་པ་དང་། ཕྱོགས་ཐམས་ཅད་ཀྱི་དྲི་བ་རྣམ་པར་འབྱེད་
པ་ལ་འཇུག་པ་དང་། འཇིག་རྟེན་གྱི་ཁམས་སྟེང་གཡོགས་མེད་ཅིང་གཞི་ཕྱལ་བའི་རྒྱུད་ཐམས་ཅད་ལ་འཇུག་པ་དང་། ཆོས་ཐམས་ཅད་གཅིག་པ་དང་ཐ་དད་པ་ཉིད་རབ་འབྱམ་རྣམ་པར་གཞག་པ་ལ་མཁས་པ་ལ་འཇུག་པ་དང་། ལས་ཐམས་ཅད་བསྒྱུར་བར་གཞུག་པ་
ལ་འཇུག་པ་དང་། འདུ་ཤེས་ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་པའི་འཇིག་རྟེན་གནས་པ་ཐ་དད་པ་ཉིད་ཀྱི་འདུ་ཤེས་ཅན་ཐ་དད་པ་ཉིད་ལ་འཇུག་པ་དང་། ཆོས་ཐམས་ཅད་བསྒྱུར་བ་ལ་འཇུག་པའི་མཐའ་ངེས་པར་འབྱུང་བ་གཅིག་ལ་འཇུག་པ་དང་། ཆོས་ཀྱི་དབྱིངས་ཐམས་
ཅད་དེ་བཞིན་གཤེགས་པའི་རྣམ་པར་སྤྲུལ་པར་བྱིན་གྱིས་རློབ་པ་ལ་འཇུག་པ་དང་། འགྲོ་བ་ཐམས་ཅད་དུས་གསུམ་ལ་འཇུག་པ་དང་། སངས་རྒྱས་ཐམས་ཅད་ཀྱི་གདུང་རྒྱུན་མི་འཆད་པ་ལ་ཞུགས་པའི་ཡེ་ཤེས་མངོན་པར་བསྒྲུབ་བོ། །འཇམ་དཔལ་དགེ་བའི་བཤེས་གཉེན་

གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ལས་དགེ་བའི་རྩ་བ་བསྐྱེད་པ་སྦྱིན་པ་ལས་བྱུང་བ་དང་། མཆོད་པ་ལས་བྱུང་བ་དང་། དེ་དག་གི་ཐད་ནས་བསླབ་པ་བཟུང་བ་ལས་བྱུང་བ་
རྣམས་སྔ་དྲོ་གཅིག་གིས་ཟིལ་གྱིས་གནོན་ཏེ། འཇམ་དཔལ་དེ་ལྟར་དགེ་བའི་བཤེས་གཉེན་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་རྣམས་ནི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པ་མུ་མེད་པ་དག་ཏུ་འཇིག་རྟེན་གྱི་ཁམས་རེ་རེ་ན་ཡང་རྡུལ་ཕྲ་རབ་ཀྱི་རྡུལ་རེ་རེ་ལ་དུས་གསུམ་ལ་འཇུག་ཅིང་བསྐལ་པའི་ཕྱི་མའི་མཐའི་མུར་ཐུག་པར་བསྐལ་པར་བྱིན་
གྱིས་བརླབས་ཏེ། དུས་གསུམ་ལ་འཇུག་པའི་ཆོས་སྟོན་ཏོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྟག་པ། བརྟན་པ། ཐེར་ཟུག་པ་ཡིན་པའི་ཕྱིར་རོ། །འཇམ་དཔལ་དགེ་བའི་བཤེས་
གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་རྣམས་ཀྱི་འདུ་ཤེས་ཕྱིན་ཅི་ལོག་ཏུ་མི་འགྱུར་རོ། །འཇམ་དཔལ་འདུ་ཤེས་ཕྱིན་ཅི་ལོག་གིས་སེམས་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་འདི་དག་ནི་སངས་རྒྱས་ཀྱི་ཆོས་སོ། །འདི་དག་ནི་སངས་རྒྱས་ཀྱི་ཆོས་མ་ཡིན་ནོ། །
ཞེས་མངོན་པར་ཞེན་ནས་ཆོས་སྤོང་བར་བྱེད་དོ། །མི་དགེ་བའི་ལས་སྣ་ཚོགས་ཀྱང་བྱེད་དོ། །འཇམ་དཔལ་སངས་རྒྱས་ཀྱི་ཆོས་རྣམས་ནི་སྐྱེ་བའམ། འགག་པ་མེད་དེ། འཇམ་དཔལ་སངས་རྒྱས་ཀྱི་ཆོས་རྣམས་ནི་མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་
པ། གཉིས་སུ་མེད་པ། གཉེན་པོ་མེད་པ། སྒྲ་ལས་ཡང་དག་པར་འདས་པའོ། །དེ་ཅིའི་ཕྱིར་ཞེ་ན། གཉེན་པོ་མེད་པའི་ཕྱིར་རོ། །འཇམ་དཔལ་འདི་དག་ནི་སངས་རྒྱས་ཀྱི་ཆོས་སོ། །འཇམ་དཔལ་འདི་དག་ནི་སངས་རྒྱས་ཀྱི་ཆོས་མ་ཡིན་ནོ། །ཞེས་བྱ་བ་འདི་གཉིས་

ནི་མཐའ་སྟེ། འཇམ་དཔལ་མཐའ་གང་ཡིན་པ་དེ་ནི་སངས་རྒྱས་ཀྱི་ཆོས་མ་ཡིན་ཏེ། འཇམ་དཔལ་སངས་རྒྱས་ཀྱི་ཆོས་ནི་མཐའ་མེད་པའི་ངོ་བོ་ཉིད་དོ། །འཇམ་དཔལ་མཐའ་མེད་པའི་ངོ་བོ་ཉིད་ནི་མི་སྐྱེ་མི་འགག་གོ། །འཇམ་དཔལ་མི་སྐྱེ་མི་འགག་པ་གང་ཡིན་པ་དེ་ནི་མཐའ་དང་
མཐའ་མེད་པ་ཡོངས་སུ་སྤངས་པ་སྟེ། ཡི་གེ་མེད་པ། སྒྲ་མེད་པ། སྒྲ་ལས་ཡང་དག་པར་འདས་པ། གདགས་པར་བྱ་བ་མ་ཡིན་པ། གཉིས་སུ་མེད་པ། གཉེན་པོ་མེད་པའོ། །འཇམ་དཔལ་གང་གཉེན་པོ་མེད་པ་དེ་ནི་མི་སྐྱེ་མི་འགག་གོ། །གང་མི་སྐྱེ་མི་འགག་
པ་དེ་ནི་སངས་རྒྱས་ཀྱི་བཀའ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཆོས་ཀྱི་སྐུ་སྟེ། ཤིན་ཏུ་མ་སྐྱེས་པ། མ་བྱུང་བ། མ་འགགས་པའོ། །དེ་ལ་ནི་ཚིགས་མེད་མོད་ཀྱི་སྔོན་གྱི་དགེ་བའི་རྩ་བ་དང་། སྤྱོད་པ་དང་། སྨོན་ལམ་གྱི་སྟོབས་
བསྐྱེད་པའི་བྱིན་གྱི་རླབས་ཀྱིས་སེམས་ཅན་དག་གིས་དེ་བཞིན་གཤེགས་པ་མཐོང་ངོ་། །འཇམ་དཔལ་དཔེར་ན་ནོར་བུ་རིན་པོ་ཆེ་ཆུ་འདང་བར་བྱེད་པ་ཆུའི་ནང་དུ་བཅུག་མ་ཐག་ཏུ་འདམ་རྫབ་དང་རྙོག་པ་ཐམས་ཅད་འདང་བར་བྱེད་ཀྱང་འཇམ་དཔལ་ནོར་བུ་རིན་པོ་ཆེ་ཆུ་འདང་བར་བྱེད་པ་ནི་མི་རྟོག །
རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་བྱུང་མ་ཐག་ཏུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་སེམས་ཅན་ཐམས་ཅད་ཀྱི་ཉོན་མོངས་པའི་འདམ་
རྫབ་དང་རྙོག་པ་ཐམས་ཅད་དང་བར་བྱེད་ཀྱང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ་། །འཇམ་དཔལ་དཔེར་ན། རྫ་མཁན་གྱི་འཁོར་ལོ་ཤིན་ཏུ་མྱུར་ཞིང་སྟོབས་ཀྱི་ཤུགས་ཀྱིས་
འཕངས་པ་ནི་རྫ་མཁན་གྱི་དབང་གིས་སྣོད་སྤྱད་སྣ་ཚོགས་མངོན་པར་འདུ་བྱེད་ཀྱང་འཇམ་དཔལ་རྫ་མཁན་གྱི་འཁོར་ལོ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྔོན་གྱི་དགེ་བའི་རྩ་བ་དང་། སྤྱོད་པ་དང་། སྨོན་ལམ་གྱི་སྟོབས་ཀྱི་བྱིན་གྱི་རླབས་ཀྱི་ཤུགས་ཀྱིས་སེམས་ཅན་གྱི་དབང་གིས་སེམས་ཅན་རྣམས་ལ་དགེ་བའི་རྩ་བ་སྣ་ཚོགས་མངོན་པར་འདུ་མཛད་ཀྱང་དེ་བཞིན་
གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་སྟེ། སངས་རྒྱས་ཀྱི་ཆོས་མ་འདྲེས་པ་དང་ལྡན་པའི་ཕྱིར་རོ། །འཇམ་དཔལ་སེམས་ཅན་གང་དག་དེ་བཞིན་གཤེགས་པ་ལ་བཤོས་གསོལ་བ་
དང་། གང་དག་བཤོས་མི་གསོལ་བ་དང་། གང་དག་གིས་མཐོང་བ་དང་། གང་དག་གིས་མ་མཐོང་བ་དང་། གང་དག་སྟོད་པ་དང་། གང་དག་མི་སྟོད་པ་དང་། གང་དག་གཤེ་བ་དང་། གང་དག་མི་གཤེ་བ་དང་། གང་དག་ཞུ་བ་བྱེད་པ་དང་། གང་དག་ཞུ་བ་མི་བྱེད་
པ་དེ་དག་ཐམས་ཅད་ཀྱི་བྱ་བ་རྣམས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ལྷུན་གྱིས་གྲུབ་ཅིང་རྣམ་པར་མི་རྟོག་པར་འབྱུང་ངོ་། །འཇམ་དཔལ་དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་ཐམས་ཅད་ཀྱང་དགེ་བའི་བཤེས་གཉེན་གྱིས་ཡོངས་སུ་ཟིན་པ་ལས་འབྱུང་ངོ་། །འཇམ་
དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་སངས་རྒྱས་ཀྱི་སྐུ་དང་ཁ་དོག་མཐའ་ཡས་པ་ཡོངས་སུ་འགྲུབ་པ་གྲུབ་པའི་གཟུངས་འཐོབ་སྟེ། གཟུངས་དེ་ཐོབ་པས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་སྐུས་ཁྱབ་པར་བྱེད་
དོ། །འཇིག་རྟེན་གྱི་ཁམས་རེ་རེར་ཡང་མངོན་པར་རྫོགས་པར་བྱང་ཆུབ་པའི་སྐུ་སྟོན་ཏོ། །ལྷུན་གྱིས་གྲུབ་ཅིང་རྣམ་པར་མི་རྟོག་པར་ཆོས་ཀྱི་འཁོར་ལོ་བསྐོར་བ་གྲངས་མེད་པ་དང་། ཆོས་ཐ་དད་པ་ཉིད་གྲངས་མེད་པ་སྟོན་ཏེ་གནས་ནས་ཀྱང་མི་གཡོའོ། །འཇམ་དཔལ་དེ་ལྟར་ན་
དགེ་བའི་བཤེས་གཉེན་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་དེ་བཞིན་གཤེགས་པ་ལ་བྱ་བ་བཞིན་དུ་དགེ་བའི་བཤེས་གཉེན་རྣམས་ལ་བསྟེན་པར་བྱའོ། །བསྙེན་པར་བྱའོ། །བསྙེན་བཀུར་བྱའོ། །

འཇམ་དཔལ་མི་དགེ་བའི་བཤེས་གཉེན་རྣམས་ནི་བྲག་གི་བྱ་སྐྱིབས་རབ་ཏུ་འབར་བ་བཞིན་དུ་ཡོངས་སུ་སྤང་བར་བྱའོ། །དེ་ཅིའི་ཕྱིར་ཞེ་ན། འཇམ་དཔལ་མི་དགེ་བའི་བཤེས་གཉེན་ལ་བསྟེན་ན་བྱང་ཆུབ་སེམས་དཔའི་སེམས་དང་འདུ་ཤེས་ཕྱིན་ཅི་ལོག་ཏུ་འགྱུར་རོ། །སེམས་ཕྱིན་
ཅི་ལོག་ཏུ་གྱུར་ན་ཀུན་དུ་འཁྲུལ་པར་འགྱུར་རོ། །སེམས་ཀུན་དུ་འཁྲུལ་པར་གྱུར་ན་རྣམ་པར་རྨོངས་པར་འགྱུར་རོ། །སེམས་རྣམ་པར་རྨོངས་ན་སྐྲག་པར་འགྱུར་རོ། །སེམས་སྐྲག་པར་གྱུར་ན་བྱང་ཆུབ་ཀྱི་སེམས་འདོར་བར་འགྱུར་རོ། །བྱང་ཆུབ་ཀྱི་སེམས་བོར་ན་ལྷ་ཡོངས་
སུ་གཏོང་བར་འགྱུར་རོ། །ལྷ་ཡོངས་སུ་བཏང་ན་ལྷ་རྣམས་ཀྱང་དེ་ལ་བསྔགས་པ་མ་ཡིན་པ་སྨྲ་བར་འགྱུར་རོ། །ཀླུ་རྣམས་དང་། གནོད་སྦྱིན་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། མི་རྣམས་དང་། མི་མ་ཡིན་པ་རྣམས་
ནས་སངས་རྒྱས་ཀྱི་བར་དག་ཀྱང་དེ་ལ་བསྔགས་པ་མ་ཡིན་པ་སྨྲ་བར་འགྱུར་རོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་དགེ་བའི་བཤེས་གཉེན་རྣམས་ལ་བསྟེན་པར་བྱའོ། །བསྙེན་པར་བྱའོ། །བསྙེན་བཀུར་བྱའོ། །འཇམ་དཔལ་དཔེར་ན་སྐྱབས་ཞེས་བྱ་བའི་སྨན་ནི་
གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པས་མཐོང་ཡང་རུང་སྟེ། ཐ་ན་དུད་འགྲོའི་སྐྱེ་གནས་སུ་སོང་བ་དེ་དག་གི་ནད་ཐམས་ཅད་མེད་པར་འགྱུར་ཡང་སྐྱབས་ཞེས་བྱ་བའི་སྨན་ནི་མི་རྟོག །རྣམ་པར་མི་རྟོག་སྟེ། མ་འདྲེས་པའི་ཆོས་དང་ལྡན་པའི་ཕྱིར་ལྷུན་
གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ་། །འཇམ་དཔལ་དེ་བཞིན་དུ་གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པ་གང་གིས་དེ་བཞིན་གཤེགས་པའི་སྐུ་རི་མོར་བྲིས་པའམ། གཟུགས་སུ་བྱས་པ་མཐོང་ན་ཐ་ན་དུད་འགྲོའི་སྐྱེ་གནས་སུ་
སོང་བ་ཡང་རུང་སྟེ། དེ་དག་གིས་ཉོན་མོངས་པའི་ནད་ཐམས་ཅད་མེད་པར་འགྱུར་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་དེ་ལྟ་བུ་དེ་འབྱུང་ངོ་། །འཇམ་དཔལ་དཔེར་ན་ཉི་

མའི་དཀྱིལ་འཁོར་རྒྱ་མཚོ་ཆེན་པོ་ལས་མངོན་པར་འཕགས་ཏེ། ནམ་མཁའི་སྤྱོད་ཡུལ་ལ་གནས་ནས་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་བཏང་བས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་
ཕོ་བྲང་འཁོར་ཐམས་ཅད་དུ་མཐོང་བ་སྦྱིན་པར་བྱེད་ཅིང་མུན་པ་སེལ་བར་བྱེད། འདམ་རྫབ་དང་། རྙོག་པ་ཐམས་ཅད་སྐེམས་པར་བྱེད། པད་མ་རྣམས་ཀྱང་ཁ་འབྱེ་བར་བྱེད། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་ཀྱང་སྐྱེ་བར་བྱེད། སྨན་ཐམས་ཅད་
ཀྱང་ཡོངས་སུ་སྨིན་པར་བྱེད། ལས་ཀྱི་གནས་ཐམས་ཅད་ནི་གནས་པར་བྱེད་ལ། ཆུ་ཀླུང་དང་། མཚེའུ་དང་། མཚོ་བྲན་ཐམས་ཅད་ལ་ཡང་དུས་གཅིག་ཏུ་སྣང་བ་ཐོབ་པར་འགྱུར་ཡང་གནས་ལས་ཀྱང་མི་གཡོ་ཞིང་འཇམ་དཔལ་ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ།
འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་རྟག་ཏུ་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྲིད་པའི་རྒྱ་མཚོ་ལས་མངོན་པར་འཕགས་ཏེ། ཆོས་
ཀྱི་དབྱིངས་ཀྱི་ནམ་མཁའི་སྤྱོད་ཡུལ་ལ་གནས་ནས་ཡེ་ཤེས་ཀྱི་འོད་ཟེར་བྱེ་བ་ཁྲག་ཁྲིག་གྲངས་མེད་པ་བཏང་བས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་སྣང་བ་སྦྱིན་པར་མཛད་ཅིང་སེམས་ཅན་ཐམས་ཅད་ཀྱི་མ་རིག་པའི་མུན་པ་མུན་ནག་དང་། རབ་རིབ་དང་། ལིང་ཏོག་
རྣམས་རྣམ་པར་སེལ་བར་མཛད། ཉོན་མོངས་པའི་འདམ་རྫབ་དང་། རྙོག་པ་ཐམས་ཅད་སྐེམས་པར་མཛད། ཡུན་རིང་པོ་ནས་གཉིད་ཀྱིས་ལོག་པའི་སེམས་ཅན་གྱི་ཁམས་ནི་སད་པར་མཛད། སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ནི་སྐྱེ་བར་མཛད། སེམས་
ཅན་ཐམས་ཅད་ཀྱི་དགེ་བའི་རྩ་བའི་ཚོགས་ཐམས་ཅད་ནི་ཡོངས་སུ་སྨིན་པར་མཛད། དགེ་བའི་རྩ་བའི་སྒོ་ཐམས་ཅད་ནི་རབ་ཏུ་འཇོག་པར་མཛད་དེ། དུས་གཅིག་ཏུ་དེའི་མཛད་པ་ཐམས་ཅད་འབྱུང་ཡང་གནས་ནས་ཀྱང་མི་གཡོ་ཞིང་འཇམ་དཔལ་དེ་བཞིན་གཤེགས་པ་ནི་མི་རྟོག་རྣམ་

པར་མི་རྟོག་སྟེ། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་མཛད་པ་དེ་ལྟ་བུ་དེ་འབྱུང་ངོ་། །འཇམ་དཔལ་དེ་ལྟར་དེ་བཞིན་གཤེགས་པའི་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་ཡོངས་སུ་སྨིན་པར་མཛད་པའི་གནས་རྣམས་ཀྱང་དགེ་
བའི་བཤེས་གཉེན་གྱིས་ཡོངས་སུ་ཟིན་པ་ལས་འབྱུང་ངོ་། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་རབ་ཏུ་རྣམ་པར་འབྱེད་ཅིང་དཔྱོད་པ་ལ་མཁས་པར་འགྱུར་ཏེ། དེ་ཆོས་རྣམས་ལ་འདི་ལྟར་དཔྱོད་དོ། །མིག་ནི་གཟུགས་ཀྱི་དམིགས་
པའི་རྒྱུ་མ་ཡིན། གཟུགས་ཀྱང་མིག་གི་དམིགས་པའི་རྒྱུ་མ་ཡིན་ལ་དམིགས་པའི་རྒྱུ་རྐྱེན་ཉིད་ཀྱིས་ཀྱང་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་དེ་ཡང་མིག་ལས་ཀྱང་མ་བྱུང་། གཟུགས་ལས་ཀྱང་མ་བྱུང་ཞིང་རྣམ་པར་ཤེས་པ་དེ་ནི་བྱུང་ནས་ཞིག་ལ་ཞུ་ཞིང་མི་གནས་པའོ། །
རྣ་བ་དང་། སྣ་དང་། ལྕེ་དང་། ལུས་ཀྱང་དེ་བཞིན་ནོ། །ཡིད་ཀྱང་ཆོས་ཀྱི་རྐྱེན་མ་ཡིན་ཞིང་ཆོས་ཀྱང་ཡིད་ཀྱི་རྐྱེན་མ་ཡིན་ལ། དམིགས་པའི་རྒྱུ་རྐྱེན་ཉིད་ཀྱིས་ཀྱང་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་དེ་ནི་ཡིད་ལས་ཀྱང་མ་བྱུང་། ཆོས་རྣམས་ལས་ཀྱང་མ་བྱུང་ཞིང་།
ཡིད་ཀྱི་རྣམ་པར་ཤེས་པ་དེ་ནི་བྱུང་ནས་ཞིག་ལ་ཞུ་ཞིང་མི་གནས་པའོ། །དེ་བཞིན་དུ་དགེ་བའི་རྩ་བ་ཡང་བྱང་ཆུབ་ཀྱི་རྐྱེན་མ་ཡིན། བྱང་ཆུབ་ཀྱང་དགེ་བའི་རྩ་བའི་རྐྱེན་མ་ཡིན་མོད་ཀྱི། དགེ་བའི་རྩ་བ་དེ་ཡང་བྱང་ཆུབ་ཀྱི་རྐྱེན་ལ་དམིགས་པ་ལས་སེམས་སྐྱེ་བ་རྣམས་ཀྱིས་སྐྱེ་སྟེ། དེ་དག་
ཀྱང་སྐྱེས་ནས་ཞིག་ཅིང་ཞུ་ལ་མི་གནས་པའོ། །དེ་ལ་སེམས་གང་གིས་དགེ་བའི་རྩ་བ་མངོན་པར་འདུས་བྱས་པ་དང་། སེམས་གང་གིས་བྱང་ཆུབ་ཏུ་ཡོངས་སུ་བསྔོས་པ་དེ་གཉིས་ནི་ཕན་ཚུན་མི་སྦྱོར་རོ། །དཔེར་ན་མེ་ནི་གང་ནས་ཀྱང་མི་འོང་གང་དུ་ཡང་མི་འགྲོ་སྟེ། འོན་ཀྱང་རྒྱུ་དང་
རྐྱེན་གྱིས་འབར་རོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའི་ཤེས་རབ་ཀྱི་མེ་འབར་བ་ཡང་གང་ནས་ཀྱང་མི་འོང་གང་དུ་ཡང་མི་འགྲོ་སྟེ། འོན་ཀྱང་དགེ་བའི་རྩ་བའི་རྒྱུ་ལ་བརྟེན་ནས་བྱང་ཆུབ་སེམས་དཔའི་ཤེས་རབ་ཀྱི་མེ་འབར་ཏེ། ཤེས་པ་དེ་ལྟ་བུ་དང་ལྡན་པ་དེ་ནི་མྱུར་དུ་

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །འཇམ་དཔལ་དེ་ལྟར་ན་དགེ་བའི་བཤེས་གཉེན་རྣམས་ནི་ཡོན་ཏན་རྒྱ་མཚོ་ཚད་མེད་པ་ཡིན་ནོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་
འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའ་དང་བཅས། ཉན་ཐོས་དང་བཅས་པ་རྣམས་ལ་རྟག་པར་ཉིན་གཅིག་བཞིན་དུ་ཞལ་ཟས་རོ་བརྒྱ་དང་ལྡན་པ་དང་། ལྷའི་ན་བཟའ་དག་ཕུལ་ལ། དེ་ལྟར་འབུལ་བ་བསྐལ་པ་གང་གཱའི་
ཀླུང་གི་བྱེ་མ་སྙེད་དག་ཏུ་ཕུལ་ཞིང་དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པའི་རེ་རེའི་ཕྱིར་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇིག་རྟེན་གྱི་ཁམས་རེ་རེར་ཡང་མཆོད་རྟེན་འཛམ་བུའི་ཆུ་བོའི་གསེར་ལས་བྱས་པ་ནོར་བུ་
རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་སྟེགས་བུས་ཡོངས་སུ་བསྐོར་བ། ནོར་བུ་དང་། མུ་ཏིག་དང་། རིན་པོ་ཆེའི་ཕྲེང་བས་མཛེས་པར་བྱས་པ། གདུགས་དང་། རྒྱལ་མཚན་དང་། བ་དན་བསྒྲེང་བ། དྲིལ་བུ་གཡེར་ཀའི་དྲ་བའི་བླ་རེ་
བྲེས་པ། ཙན་དན་སྦྲུལ་གྱི་སྙིང་པོའི་བྱུག་པས་བྱུགས་པ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་ཁེབས་པར་བྱས་པ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་བྱས་ཏེ། མཆོད་རྟེན་དེ་དག་ལ་སྟོང་གསུམ་གྱི་སྟོང་ཆེན་པོའི་ཚད་ཙམ་གྱི་ལྷའི་ན་བཟའ་དག་
དང་། གདུགས་ཀྱི་སྤྲིན་དག་དང་། རྒྱལ་མཚན་གྱི་སྤྲིན་དག་དང་། བ་དན་གྱི་སྤྲིན་དག་དང་། མེ་ཏོག་གི་སྤྲིན་དག་དང་། སྤོས་ཀྱི་སྤྲིན་དག་དང་། ནོར་བུ་རིན་པོ་ཆེ་དབང་གི་རྒྱལ་པོའི་སྤྲིན་དག་དང་། ཡིད་བཞིན་གྱི་ནོར་བུ་རིན་པོ་ཆེའི་སྤྲིན་དག་གིས་གཏོར། མངོན་པར་གཏོར་ལ་
ཉིན་གཅིག་བཞིན། དེ་ལྟར་མཆོད་ཅིང་བསྐལ་པ་གང་གཱའི་ཀླུང་གི་བྱེ་མ་སྙེད་དག་ཏུ་མཆོད་ལ། སེམས་ཅན་གཞན་དཔག་ཏུ་མེད་གྲངས་མེད་པ་དག་ཀྱང་མཆོད་པ་དེ་ཉིད་ལ་འགོད་པ་བས་འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གཞན་གང་གིས་དེ་བཞིན་གཤེགས་པའི་ཡོན་ཏན་

དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་ཐ་ན་མོས་པར་བྱེད་ན་འདི་ཉིད་དེ་བས་བསོད་ནམས་ཆེས་གྲངས་མེད་པར་སྐྱེད་དོ། །འཇམ་དཔལ་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ནི་ཕ་རོལ་ཏུ་ཕྱིན་པ་བྱེ་བ་ཁྲག་ཁྲིག་འབུམ་
ཕྲག་དཔག་ཏུ་མེད་གྲངས་མེད་པ་དག་ཡོངས་སུ་རྫོགས་པར་བྱེད་དོ། །ས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་གནོན་ཏོ། །བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཕྱིར་སྙིལ་བར་བྱེད་དོ། །སངས་རྒྱས་ཀྱི་རྣམ་པར་རོལ་པ་བྱེ་བ་ཁྲག་
ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་རབ་ཏུ་ཤེས་སོ། །ང་རྒྱལ་གྱི་རི་དཔག་ཏུ་མེད་གྲངས་མེད་པ་དག་རྣམ་པར་འཇིག་པར་བྱེད་དོ། །ཕྲག་དོག་དང་སེར་སྣའི་རྒྱལ་མཚན་དཔག་ཏུ་མེད་གྲངས་མེད་པ་དག་སྙོལ་བར་བྱེད་དོ། །སྲིད་པའི་ཆུ་ཀླུང་དཔག་ཏུ་མེད་གྲངས་མེད་པ་དག་
སྐེམས་པར་བྱེད་དོ། །སྐྱེ་བའི་རྒྱ་མཚོ་དཔག་ཏུ་མེད་གྲངས་མེད་པ་དག་ལས་རྒལ་བར་བྱེད་དོ། །བདུད་ཀྱི་ཞགས་པ་དཔག་ཏུ་མེད་གྲངས་མེད་པ་དག་གཅོད་དོ། །ཉི་ཟླ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱི་གཟི་བརྗིད་ཟིལ་གྱིས་མནན་ཏེ་
འདུག་གོ། །སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོའོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་རྣམས་ཀྱི་སྐྱབས་སུ་འགྱུར་རོ། །སངས་རྒྱས་རྣམས་དང་བྱང་ཆུབ་སེམས་དཔའ་
རྣམས་དང་ཡང་ཕྲད་པར་འགྱུར་རོ། །རྒྱ་མཚོའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ཡང་དག་པར་འདུ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྣམ་པར་བཀོད་པ་ཞེས་
བྱ་བའི་ཏིང་ངེ་འཛིན་ཀྱང་འཐོབ་བོ། །རིན་པོ་ཆེ་འབྱུང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དགའ་བར་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །པད་མ་བཀོད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ནམ་མཁའ་མཛོད་ཅེས་བྱ་བའི་ཏིང་ངེ་འཛིན་ཀྱང་འཐོབ་བོ། །

འཇིག་རྟེན་ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དམ་པའི་ཆོས་པད་མ་དཀར་པོ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཡུལ་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆེར་བསྒྱིངས་ཞེས་བྱ་བའི་ཏིང་ངེ་འཛིན་ཀྱང་འཐོབ་
བོ། །རྣམ་པ་དང་སེམས་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སེང་གེ་བསྒྱིངས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཉི་མའི་སྒྲོན་མ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །མཐའ་ཡས་འཁྱིལ་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རབ་ཏུ་གཡོ་བའི་
རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེའི་དཀྱིལ་འཁོར་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེའི་རྒྱལ་མཚན་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེ་ལྟེ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །
ས་འཛིན་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ལྷུན་པོ་སྒྲོན་མ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ལྷུན་པོ་རྒྱལ་མཚན་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རིན་པོ་ཆེའི་མཛོད་ཅེས་བྱ་བའི་ཏིང་ངེ་འཛིན་ཀྱང་འཐོབ་བོ། །སེམས་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་
ཀྱང་འཐོབ་བོ། །སེམས་ཅན་ཐམས་ཅད་ཀྱི་སེམས་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྤྱོད་པ་ཐམས་ཅད་ཀྱི་ཡུལ་ལ་ངེས་པར་འབྱུང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྦྱོར་བ་ཟབ་ཅིང་གསང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྣ་ཚོགས་
སྣང་བའི་སྤོབས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །བལྟར་མི་མཐོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ལ་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །མངོན་པར་ཤེས་པ་
ཐམས་ཅད་ལས་ངེས་པར་སྐྱེས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །བདུད་ཀྱི་དཀྱིལ་འཁོར་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །གཟུགས་ཐམས་ཅད་ཀུན་ཏུ་སྟོན་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །གཟུགས་ཐམས་ཅད་ཀྱི་ཁྱད་པར་ཞེས་བྱ་བའི་

ཏིང་ངེ་འཛིན་ཀྱང་འཐོབ་བོ། །ལུས་རྣམ་པར་འཇིག་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྤྱོད་པ་ཐམས་ཅད་ལ་འཇུག་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཤེས་རབ་སྒྲོན་མ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །མངོན་སུམ་དུ་བྱང་ཆུབ་སྣང་བ་ཞེས་བྱ་བའི་ཏིང་ངེ་
འཛིན་ཀྱང་འཐོབ་བོ། །སོ་སོ་ཡང་དག་པར་རིག་པ་རིན་པོ་ཆེ་བསྟན་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཡོན་ཏན་གྱི་རྣམ་པ་ཐམས་ཅད་ལ་འཇུག་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་འདུལ་བར་རྣམ་པར་ངེས་པར་བསྟན་པ་ཞེས་བྱ་བའི་ཏིང་ངེ་འཛིན་
ཀྱང་འཐོབ་བོ། །རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཟབ་ཅིང་བརྟན་པའི་རྒྱ་མཚོའི་ཆུའི་དུས་རླབས་ཞེས་བྱ་བའི་ཏིང་ངེ་འཛིན་ཀྱང་འཐོབ་སྟེ། དེ་དག་ལ་སོགས་པའི་
ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་དག་འཐོབ་བོ། །སངས་རྒྱས་ཀྱི་སྐུ་དང་ཁ་དོག་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ཀྱང་འཐོབ་བོ། །ཡེ་ཤེས་དང་ལྡན་པ་ཞེས་བྱ་བའི་གཟུངས་ཀྱང་འཐོབ་བོ། །སྒྲ་དབྱངས་རྣམ་པར་དག་པ་ཞེས་བྱ་བའི་གཟུངས་ཀྱང་
འཐོབ་བོ། །མི་ཟད་པའི་ཟ་མ་ཏོག་ཅེས་བྱ་བའི་གཟུངས་ཀྱང་འཐོབ་བོ། །མཐའ་ཡས་འཁྱིལ་པ་ཞེས་བྱ་བའི་གཟུངས་ཀྱང་འཐོབ་བོ། །རྒྱ་མཚོའི་ཕྱག་རྒྱ་ཞེས་བྱ་བའི་གཟུངས་ཀྱང་འཐོབ་བོ། །པད་མ་བཀོད་པ་ཞེས་བྱ་བའི་གཟུངས་ཀྱང་འཐོབ་བོ། །ཆགས་པ་མེད་པའི་སྒོར་འཇུག་པ་ཞེས་བྱ་
བའི་གཟུངས་ཀྱང་འཐོབ་བོ། །སོ་སོ་ཡང་དག་པར་རིག་པ་རྣམ་པར་ངེས་པ་ལ་འཇུག་པ་ཞེས་བྱ་བའི་གཟུངས་ཀྱང་འཐོབ་བོ། །སངས་རྒྱས་ཀྱི་རྒྱན་གྱིས་བྱིན་གྱིས་བརླབས་པ་ཞེས་བྱ་བའི་གཟུངས་ཀྱང་འཐོབ་བོ། །སངས་རྒྱས་ཀྱི་སྐུ་དང་། ཁ་དོག་མཐའ་ཡས་ཡོངས་སུ་འགྲུབ་པ་ཞེས་བྱ་
བའི་གཟུངས་ཀྱང་འཐོབ་སྟེ། དེ་དག་ལ་སོགས་པ་གཟུངས་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་དག་ཀྱང་འཐོབ་བོ། །ཆོས་ཐམས་ཅད་ལ་སྤྱོད་པའི་ཁྱད་པར་ཉིད་ཀྱང་འཐོབ་བོ། །ཆོས་ཐམས་ཅད་ལ་གཞན་ལ་རག་མ་ལས་པའི་ཤེས་པ་ཡང་འཐོབ་བོ། །ཆོས་ཐམས་ཅད་ལ་

སོམ་ཉི་གཅོད་པ་ཉིད་ཀྱང་འཐོབ་བོ། །སངས་རྒྱས་ཀྱི་རྣམ་པར་རོལ་པ་སྟོང་ཕྲག་གྲངས་མེད་པ་དག་ཀྱང་འཐོབ་བོ། །སེམས་ཅན་ཐམས་ཅད་ཀྱི་སྤྱོད་པའི་བྱེ་བྲག་ལ་མཁས་པ་ཡང་འཐོབ་བོ། །འཇམ་དཔལ་དཔེར་ན་རིའི་རྒྱལ་པོ་རི་རབ་ནི་རི་ཐམས་ཅད་ཟིལ་གྱིས་
གནོན་ནས་ལམ་མེ། ལྷན་ནེ་ལྷང་ངེའོ། །འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ཟིལ་གྱིས་གནོན་ནས་ལམ་མེ་ལྷན་ནེ་ལྷང་ངེའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་
དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔས་གང་དག་ལ་མོས་པས་ཡོན་ཏན་གྱི་ཁྱད་པར་འདི་དག་དང་གཞན་དག་ཀྱང་འཐོབ་པའི་ཆོས་ཀྱི་བྱེ་བྲག་གཞན་དག་ཀྱང་ཡོད་དམ། དེ་སྐད་ཅེས་སྨྲས་
པ་དང་། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བྱང་ཆུབ་སེམས་དཔའ་གང་དག་ལ་མོས་ན། ཡོན་ཏན་གྱི་ཁྱད་པར་འདི་དག་དང་། གཞན་དཔག་ཏུ་མེད་པ་དག་ཀྱང་འཐོབ་པའི་ཆོས་
ལྔ་པོ་འདི་དག་སྟེ། ལྔ་གང་ཞེ་ན། ཆོས་ཐམས་ཅད་གཉེན་པོ་མེད་པ་དང་། མ་སྐྱེས་པ་དང་། མ་འགགས་པ་དང་། བརྗོད་དུ་མེད་པར་མོས་པ་དང་། རྟག་ཏུ་རྒྱུན་མི་འཆད་པར་སྐད་ཅིག་སྐད་ཅིག་ལ་དེ་བཞིན་གཤེགས་པའི་སྤྱོད་པ་དང་སྤྱོད་ལམ་ལ་འཇུག་པའི་གནས་འཛམ་བུའི་
གླིང་གི་རྡུལ་ཕྲ་རབ་ཀྱི་རྡུལ་ལས་ཀྱང་ལྷག་པ་དག་ལ་ལྷུན་གྱིས་གྲུབ་ཅིང་རྣམ་པར་མི་རྟོག་པར་འཇུག་པར་མོས་པ་དང་། སེང་གེ་བྲན་བཟངས་ཀྱི་བུའི་རྟོགས་པ་བརྗོད་པས་སེམས་ཅན་ཡོངས་སུ་སྨིན་པར་བྱེད་པ་དེ་བཅོམ་ལྡན་འདས་ཤཱཀྱ་ཐུབ་པས། བསྐལ་པ་གང་གཱའི་ཀླུང་གི་བྱེ་
མ་སྙེད་ནས་མངོན་པར་རྫོགས་པར་སངས་རྒྱས་ཏེ། མཛད་པར་མོས་པ་དང་། མར་མེ་མཛད་ཀྱིས་ལུང་བསྟན་པ་ནས་བཟུང་སྟེ། མངོན་པར་རྫོགས་པར་བྱང་ཆུབ་པའི་བར་དེར་བཅོམ་ལྡན་འདས་ཤཱཀྱ་ཐུབ་པའི་བྱང་ཆུབ་སེམས་དཔའི་སྤྱོད་པ་གང་ཡིན་པ་དེ་ཐམས་ཅད་སངས་རྒྱས་ཀྱི་

ཡུལ་གྱི་མཐས་ཀླས་པའི་བསྐལ་པ་ནས་མངོན་པར་རྫོགས་པར་སངས་རྒྱས་ནས་བསྟན་པ་ཡིན་པར་མོས་པ་དང་། ཤཱཀྱ་ཐུབ་པས་བསྟན་པས་སེམས་ཅན་ཡོངས་སུ་སྨིན་པར་བྱས་པ་གང་ཡིན་པ་དེ། སངས་རྒྱས་ཀྱི་ཡུལ་གྱི་མཐས་ཀླས་པའི་བསྐལ་པ་ནས། བཅོམ་ལྡན་འདས་
ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས་མཛད་པ་ཡིན་པར་མོས་པ་སྟེ། འཇམ་དཔལ་ལྔ་པོ་དེ་དག་ནི་བྱང་ཆུབ་སེམས་དཔས་གང་དག་ལ་མོས་པས་ཡོན་ཏན་གྱི་ཁྱད་པར་འདི་དག་དང་། གཞན་དཔག་ཏུ་མེད་པ་དག་ཀྱང་འཐོབ་པ་ཡིན་ནོ། །འཇམ་དཔལ་
རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་དགྲ་བཅོམ་པ་མངོན་པར་ཤེས་པ་དྲུག་དང་ལྡན་པ། རྣམ་པར་ཐར་པ་བརྒྱད་ལ་བསམ་གཏན་པ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་དང་། ལྷའི་གོས་
དག་བྱིན་ཏེ། དེ་ལྟར་བྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དག་ཏུ་བྱིན་པ་བས་འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་གིས་རང་སངས་རྒྱས་གཅིག་ལ་ཉི་མ་གཅིག་ཟས་བྱིན་ན། དེ་ནི་དེ་བས་བསོད་ནམས་ཆེས་གྲངས་མེད་པར་སྐྱེད་དོ། །འཇམ་
དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་འཇིག་རྟེན་གྱི་ཁམས་རེ་རེར་ཡང་གཙུག་ལག་ཁང་འཛམ་བུའི་ཆུ་བོའི་གསེར་ལས་བྱས་པ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་སྟེགས་བུས་ཡོངས་སུ་
བསྐོར་བ། ནོར་བུ་དང་། མུ་ཏིག་དང་། རིན་པོ་ཆེའི་ཕྲེང་བས་མཛེས་པར་བྱས་པ། གདུགས་དང་། རྒྱལ་མཚན་དང་། བ་དན་བསྒྲེང་བ། དྲིལ་བུ་གཡེར་ཀའི་དྲ་བའི་བླ་རེ་བྲེས་པ། ཙན་དན་སྦྲུལ་གྱི་སྙིང་པོའི་བྱུག་པས་བྱུགས་པ། ནོར་བུ་རིན་པོ་ཆེ་དབང་གི་རྒྱལ་
པོས་ཁེབས་པར་བྱས་པ། རྒྱ་མཚོ་ན་གནས་པའི་རིན་པོ་ཆེ་རྣམ་པར་དག་པ་བཀོད་པ་ཀུན་ནས་འོད་ཟེར་སྣང་བའི་ནོར་བུ་རིན་པོ་ཆེའི་ཀ་བ་མང་པོས་དཀྲིགས་པ། ནོར་བུ་རིན་པོ་ཆེ་སེང་གེ་རལ་པ་ཞེས་བྱ་བའི་སྤང་ལེབ་བྲེས་པ། ནོར་བུ་རིན་པོ་ཆེ་སེང་གེ་རྒྱལ་མཚན་གྱི་རྩེ་

མོ་ལས་བྱས་པའི་སྒོ་གང་དང་། རྟ་བབས་དང་། སྐར་ཁུང་གིས་བརྒྱན་པ། དར་གྱི་ལྡ་ལྡི་མང་པོས་བྲེས་པ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་བྱས་ཏེ། རང་སངས་རྒྱས་ཀྱི་གནས་སྟོང་ཕྲག་གྲངས་མེད་པ་དག་དང་།
རང་སངས་རྒྱས་དེ་དག་ལ་ཉིན་གཅིག་བཞིན་ལྷའི་ཟས་རོ་བརྒྱ་དང་ལྡན་པ་དང་། ལྷའི་གོས་དག་ཀྱང་བྱིན་ཞིང་དེ་ལྟར་བྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དག་ཏུ་བྱིན་པ་བས་འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་གིས་སངས་རྒྱས་
ཞེའམ། འཇིག་རྟེན་གྱི་མགོན་པོ་ཞེའམ། དེ་བཞིན་གཤེགས་པ་ཞེའམ། ཐམས་ཅད་མཁྱེན་པ་ཞེས་བྱ་བའི་སྒྲ་ཐོས་ན་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་ན་གང་གིས་དེ་བཞིན་གཤེགས་པའི་སྐུ་རི་མོར་བྲིས་པའམ། གཟུགས་སུ་བྱས་པ་
མཐོང་བ་ལྟ་ཅི་སྨོས་ཏེ། འདི་ཉིད་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །གང་གིས་མར་མེ་ཕུལ་བའམ། བདུག་པའམ། སྤོས་སམ། མེ་ཏོག་དག་གམ། རོལ་མོའི་སྒྲའམ། མཆོད་པ་སྣ་ཚོགས་གཞན་དག་བྱེད་པ་ལྟ་ཅི་སྨོས་ཏེ། འདི་ཉིད་
དེ་བས་ཆེས་བསོད་ནམས་གྲངས་མེད་པར་སྐྱེད་དོ། །གང་གིས་དེ་བཞིན་གཤེགས་པའི་ཕྱིར་ཉི་མ་གཅིག་བསླབ་པ་གཅིག་བསྲུང་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་
གང་ལ་ལ་ཞིག་གིས་དེ་བཞིན་གཤེགས་པ་བྱང་ཆུབ་སེམས་དཔའ་དང་བཅས་པ། ཉན་ཐོས་དང་བཅས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་སྙེད་རྣམས་ལས་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་དང་། ལྷའི་ན་བཟའ་དག་ཀྱང་
འབུལ་ལ། དེ་ལྟར་འབུལ་བ་བསྐལ་པ་གང་གཱའི་ཀླུང་གི་བྱེ་མ་སྙེད་དག་ཏུ་འབུལ་ཞིང་སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་དེ་བཞིན་གཤེགས་པ་རེ་རེའི་ཕྱིར་མཆོད་རྟེན་ཚད་གླིང་བཞི་པ་ཙམ་རྣམ་པ་ཐམས་ཅད་ཀྱི་མཆོག་དང་ལྡན་པ་ཡོན་

ཏན་ཐམས་ཅད་ཡོངས་སུ་རྫོགས་པ་དང་ལྡན་པ་དང་། འཛམ་བུའི་ཆུ་བོའི་གསེར་ལས་བྱས་པ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་སྟེགས་བུས་ཡོངས་སུ་བསྐོར་བ། ནོར་བུ་དང་། མུ་ཏིག་དང་། རིན་པོ་
ཆེའི་ཕྲེང་བས་མཛེས་པར་བྱས་པ། གདུགས་དང་། རྒྱལ་མཚན་དང་། བ་དན་བསྒྲེང་བ། དྲིལ་བུ་གཡེར་ཀའི་དྲ་བའི་བླ་རེ་བྲེས་པ། ཙན་དན་སྦྲུལ་གྱི་སྙིང་པོའི་བྱུག་པས་བྱུགས་པ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་གཡོགས་པ། ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་སྙེད་དག་བྱས་ཏེ། མཆོད་རྟེན་དེ་དག་ལ་ཉིན་གཅིག་བཞིན་དུ་སྟོང་གསུམ་གྱི་སྟོང་ཆེན་པོའི་ཚད་ཙམ་གྱི་ལྷའི་གོས་དག་དང་། གདུགས་ཀྱི་སྤྲིན་དག་དང་། རྒྱལ་མཚན་གྱི་སྤྲིན་དག་དང་། བ་དན་གྱི་སྤྲིན་དག་དང་། མེ་ཏོག་གི་སྤྲིན་དག་དང་། སྤོས་ཀྱི་སྤྲིན་
དག་དང་། རིན་པོ་ཆེའི་སྤྲིན་དག་དང་། རོལ་མོའི་སྒྲའི་སྤྲིན་དག་དང་། རྒྱན་གྱི་སྤྲིན་དག་དང་། སེང་གེ་རྒྱལ་མཚན་གྱི་རྩེ་མོའི་ཟླ་བའི་སྤྲིན་དག་དང་ལྷའི་སིལ་སྙན་དང་། ཕེག་རྡོབ་པ་དང་། གླུ་དབྱངས་ཀྱི་སྒྲའི་སྤྲིན་རྣམས་ཀྱིས་གཏོར། མངོན་པར་གཏོར་ལ་ཆོས་ཀྱི་རྣམ་
གྲངས་འདི་ལ་མོས་པ་བས་འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་དེ་བཞིན་གཤེགས་པའི་ཡོན་ཏན་དང་། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་མོས་ཤིང་ཐ་ན་དུད་འགྲོའི་སྐྱེ་གནས་
སུ་སོང་བའི་སེམས་ཅན་གཅིག་ལ་ཟན་ཁམ་གཅིག་བྱིན་ན་འདི་ཉིད་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་མདོ་སྡེ་འདི་ལ་མོས་པའི་བྱང་ཆུབ་སེམས་དཔའ་གང་ལ་ལ་ཞིག་གིས། མདོ་འདི་ལས་ཇི་སྐད་སྨོས་པའི་དེ་བཞིན་གཤེགས་པ་རྣམས་
ལ་མཆོད་པ་བྱེད་པ་བས། བྱང་ཆུབ་སེམས་དཔའ་མདོ་འདི་ཉིད་ལ་མོས་པ་གཞན་གང་ཞིག་གིས་མདོ་འདི་ཉིད་ལ་མོས་པའི་བྱང་ཆུབ་སེམས་དཔའ་གཞན་ཞིག་མཐོང་ནས་བྱང་ཆུབ་སེམས་དཔའ་འདི་ནི་མདོ་འདི་ཉིད་ལ་མོས་པའོ་སྙམ་སྟེ་དགའ་བ་དང་། མཆོག་ཏུ་དགའ་བ་

ཆེན་པོ་རྙེད་ལ། དེ་སེམས་དང་བས་ལངས་ཏེ། དེ་ལ་ཐལ་མོ་སྦྱར་ནས་ཕྱག་འཚལ་ཏེ། ཅི་ནུས་ཅི་ལྕོགས་སུ་དེ་ལ་ཡོངས་སུ་བཟུང་བ་བྱས་ན། འདི་ཉིད་དེ་བས་ཆེས་སངས་རྒྱས་ཀྱི་ཡེ་ཤེས་ཐོབ་པར་འགྱུར་བའི་བསོད་ནམས་གྲངས་མེད་པ་སྐྱེད་དོ། །
འཇམ་དཔལ་དེ་ལྟ་བས་ན་སངས་རྒྱས་ཀྱི་ཡེ་ཤེས་འདོད་པའི་བྱང་ཆུབ་སེམས་དཔས་ཆོས་ཀྱི་རྣམ་གྲངས་འདི་མཉན་པའི་ཕྱིར་འཇིག་རྟེན་གྱི་ཁམས་མེས་ཡོངས་སུ་གང་བ་གང་གཱའི་ཀླུང་གི་བྱེ་མ་སྙེད་དག་ཀྱང་རྒལ་ཏེ་འགྲོ་བར་བྱའོ། །འཇམ་དཔལ་བྱང་ཆུབ་སེམས་དཔའ་གང་
ལ་ལ་ཞིག་གིས་བསྐལ་པ་བྱེ་བ་སྟོང་ཕྲག་བརྒྱད་དུ་ཕ་རོལ་ཏུ་ཕྱིན་པ་ལྔ་ལ་སྤྱད་པ་བས། འཇམ་དཔལ་བྱང་ཆུབ་སེམས་དཔའ་གཞན་གང་ཞིག་དེ་བཞིན་གཤེགས་པ་ནི་རྟག་པའོ་སྙམ་དུ་མོས་པར་བྱེད་ན་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་
དཔལ་བྱང་ཆུབ་སེམས་དཔའ་གང་ལ་ལ་ཞིག་གིས་སངས་རྒྱས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་དག་ལ་ལྷའི་ཟས་རོ་བརྒྱ་དང་ལྡན་པ་དང་། ལྷའི་ན་བཟའ་དག་ཉིན་གཅིག་བཞིན་དུ་འབུལ་ཞིང་། དེ་ལྟར་འབུལ་བ་བསྐལ་པ་གང་
གཱའི་ཀླུང་གི་བྱེ་མ་སྙེད་དག་ཏུ་འབུལ་བ་བས། འཇམ་དཔལ་བྱང་ཆུབ་སེམས་དཔའ་གཞན་གང་ཞིག་དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ལ་ངོ་
མཚར་དུ་འཛིན་པར་གྱུར་ནས། ཁྱོད་ཆོས་ཀྱི་རྣམ་གྲངས་འདི་ལ་མོས་པ་ལེགས་སོ་ལེགས་སོ། །ཁྱོད་ནི་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བའི་འོས་ཡིན་ནོ་ཞེས་བསམ་པ་ཐག་པ་ནས་ལེགས་སོ་ཞེས་བྱ་བ་བྱིན་ལ། ཁྱོད་དེ་བཞིན་གཤེགས་པ་ཐམས་ཅད་ཀྱི་
གསང་བའི་གནས་རྣམས་སུ་ཞུགས་ལ་ཆོས་ཀྱི་འཁོར་ལོ་སྐོར་ཅིག་ཅེས་བྱས་ན། འཇམ་དཔལ་བྱང་ཆུབ་སེམས་དཔའ་ནི་དེ་བས་ཆེས་བསོད་ནམས་གྲངས་མེད་པར་འཕེལ་ཏེ། བསོད་ནམས་མངོན་པར་འདུ་བྱ་བ་འདི་ལ་སྦྱིན་པ་ལས་བྱུང་བའི་བསོད་ནམས་སྔ་མ་དེས་

བརྒྱའི་ཆར་ཡང་ཉེ་བར་མི་འགྲོ་སྟོང་གི་ཆ་དང་། འབུམ་གྱི་ཆ་དང་། བྱེ་བའི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་འབུམ་གྱི་ཆ་དང་། བྱེ་བ་ཁྲག་ཁྲིག་ཕྲག་འབུམ་གྱི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། ཟླ་དང་། རྒྱུར་
ཡང་མི་བཟོད་དོ། །བཅོམ་ལྡན་འདས་ཀྱིས་གནང་སྟེ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་དེ་སྐད་ཅེས་སྨྲས་ནས། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་
པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་
འཇུག་པ་སྟོན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་གརྦྷ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་བུད་དྷ་བ་ལ་
ཝརྡྷ་ན་པྲཱ་ཏི་ཧཱརྱ་བི་ཀུརྦཱ་ཎ་ནིར་དེ་ཤ་ནཱ་མ་མ་ཧཱ་ཡཱ་ན་སཱུཏྲ། བོད་སྐད་དུ། འཕགས་པ་སངས་རྒྱས་ཀྱི་སྟོབས་སྐྱེད་པའི་ཆོ་འཕྲུལ་རྣམ་པར་འཕྲུལ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་ཆུ་བོ་ཆེན་པོ་ཀླུང་ནཻ་རཉྫ་ནཱའི་འགྲམ་ན། འཕགས་པ་སྤྱན་རས་གཟིགས་དབང་ཕྱུག་དང་། ལག་ན་རྡོ་རྗེ་དང་། བྱམས་པ་དང་། འཇམ་དཔལ་ལ་སོགས་པ་བྱང་ཆུབ་སེམས་དཔའ་བདུན་སྟོང་དང་། རབ་འབྱོར་དང་། ཤཱ་རིའི་བུ་
དང་། མཽད་གལ་གྱི་བུ་ལ་སོགས་པ་ཉན་ཐོས་ཆེན་པོ་ཐམས་ཅད་དང་ཐབས་ཅིག་ཏུ་བཞུགས་ཏེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་དང་། རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་ཐམས་ཅད་ཀྱིས་བསྐོར་ཅིང་། མདུན་

དུ་བདར་ཏེ། ཞལ་ཟས་ཀྱི་བྱ་བ་བྱས་ནས་འཁོར་གྱི་དཀྱིལ་འཁོར་དེ་དག་ཆོས་དང་ལྡན་པའི་གཏམ་གྱིས་ཚིམ་པར་བྱས། བསྐུལ། གཟེངས་བསྟོད། ཡང་དག་པར་དགའ་བར་བྱས་ཏེ། འཁོར་གྱི་དཀྱིལ་འཁོར་དང་། ཐབས་ཅིག་ཏུ་དེ་བཞིན་གཤེགས་
པའི་རྫུ་འཕྲུལ་ཆེན་པོས་གྲོང་ཁྱེར་གཱ་རཱ་ཎ་སཱིའི་གཤེགས་ཏེ། བཱ་རཱ་ཎ་སཱིའི་ཤིང་ཨ་མྲ་སྲུང་བའི་ཚལ་ན་བཞུགས་སོ། །དེ་ནས་དེའི་ཚེ་ན་ས་ཆེར་གཡོས་པར་གྱུར་ནས་སེང་གེའི་ཁྲི་ཆེན་པོ་རིན་པོ་ཆེ་སྣ་བདུན་ལས་བྱས་པ། འཕང་དུ་དཔག་ཚད་གཅིག་ཙམ། ཞེང་དུ་
དཔག་ཚད་ཕྱེད་ཙམ་གྱི་ཚད་ལེགས་པར་སྤྲས་པ། ཤིན་ཏུ་དགའ་བར་འགྱུར་བ། ཡིད་དུ་འོང་བ་དར་གྱི་ཆུན་པོ་བཏགས་ཤིང་དཔྱངས་པ། ལྷའི་ན་བཟའ་བརྒྱ་སྟོང་དུ་མ་བཏིང་བ། ལྷའི་མེ་ཏོག་གི་ཆུན་པོ་བྱེ་བ་དུ་མ་རབ་ཏུ་དཔྱངས་པ། ལྷའི་དྲི་དང་ལྡན་པ། ཁ་དོག་
དང་ལྡན་པ། དེ་བཞིན་གཤེགས་པའི་སྔོན་གྱི་དགེ་བའི་རྩ་བ་ལས་སྐྱེས་པ། དེ་མཐོང་མ་ཐག་ཏུ་སེམས་ཅན་ཐམས་ཅད་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་བ་ཞིག་བྱུང་ངོ་། །དེ་ནས་བཅོམ་ལྡན་འདས་སེང་གེའི་ཁྲི་དེ་ཉིད་ལ་བཞུགས་ཏེ་སངས་རྒྱས་ཕལ་པོ་ཆེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། ལག་ན་རྡོ་རྗེ་ལ་བཀའ་སྩལ་པ། སྤྱན་རས་གཟིགས་དབང་ཕྱུག་ཁྱོད་སོང་ལ་མི་མཇེད་ཀྱི་འཇིག་རྟེན་གྱི་ཁམས་འདི་དང་། ཕྱོགས་བཅུའི་འཇིག་
རྟེན་གྱི་ཁམས་གཞན་དག་ན། ཁྱོད་ཀྱིས་འདུལ་བར་འགྱུར་བའི་སེམས་ཅན་སྙིགས་མའི་རང་བཞིན་ཅན་མ་དད་པ། སྡིག་པ་སྤྱོད་པ། ཉོན་མོངས་པ་དང་། ཉེ་བའི་ཉོན་མོངས་པ་དག་གིས་བསྒྲིབས་པ། མར་མི་ཤེས་པ། ཕར་མི་ཤེས་པ། དགེ་སྦྱོང་ལ་
དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། དཀོན་མཆོག་གསུམ་ལ་མངོན་པར་མ་དད་པ། དེ་དག་ཐམས་ཅད་ལག་ན་རྡོ་རྗེ་དང་། གཉིས་ཀྱིས་རྫུ་འཕྲུལ་ཆེན་པོ་དང་། ཏིང་ངེ་འཛིན་གྱི་སྟོབས་ཀྱི་ཤུགས་ཀྱིས་འཁོར་གྱི་དཀྱིལ་འཁོར་འདིར་བསྡུས་ཤིག །དེ་ནས་བྱང་

ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་ལག་ན་རྡོ་རྗེས་དེ་བཞིན་གཤེགས་པ་ལས་ཚིག་འདི་ཐོས་ན། སེམས་ཅན་ཐམས་ཅད་ལ་བལྟ་བ་དང་། ཡང་དག་པར་སྐུལ་བར་འགྱུར་བ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་སོ། །ཏིང་ངེ་འཛིན་དེའི་མཐུས་ས་ཆེན་པོ་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཡང་དག་པར་རབ་ཏུ་གཡོས་སོ། །དེ་ནས་ལུས་ལས་འོད་ཟེར་བརྒྱ་སྟོང་དུ་མ་བྱུང་ངོ་། །བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
འདི་ཀུན་ཏུ་སྣང་བར་བྱས་ཏེ། ཚངས་པའི་འཇིག་རྟེན་མན་ཆད་གཟུགས་ཡོད་པ་དང་། གཟུགས་ཀྱིས་ཁྱབ་པ་མན་ཆད་དུ་སྣང་བར་བྱས་ཏེ། འོད་ཟེར་དེ་དག་ལས་ཀྱང་ཡང་དག་པར་སྐུལ་བའི་ཚིགས་སུ་བཅད་པ་འདི་དག་བྱུང་ངོ་། །བག་ཡོད་པ་དང་ཉོན་མོངས་
མེད་པར་བྱོས། །བག་མེད་པ་ཡི་དབང་དུ་མ་འགྲོ་ཞིག །སྐྱེ་དང་རྒ་ཤིས་གཙེས་པའི་སྡུག་བསྔལ་ཏེ། །བདེ་བར་གཤེགས་པའི་བསྟན་པ་འབྱུང་བར་དཀོན། །བསྐལ་པ་བྱེ་བ་ཕྲག་བརྒྱ་གྲངས་མེད་དུ། །སྲིད་པའི་རྒྱ་མཚོར་ངེས་པར་འཁོར་བ་དང་། །ཉོན་མོངས་དོག་པར་
རྟག་ཏུ་འཁོར་བ་ན། །འཚོ་བ་མ་རུངས་པ་ནི་སྐྲག་མི་འགྱུར། །རྙེད་དང་ཆགས་དང་བུད་མེད་རྟག་པ་མིན། །རྟག་ཏུ་གླུ་གར་སྒྱུ་མའི་ཆོས་དང་ལྡན། །བསྐལ་པ་དུ་མར་བདེ་བ་མྱོང་ནས་ཀྱང་། །ཕྱིས་ནི་སྡུག་བསྔལ་རྗེས་སུ་ཐོབ་པར་འགྱུར། །རྣམ་པར་སླུ་བར་
གྱུར་པ་འདི་ལ་ལྟོས། །འདི་ལ་མར་གྱུར་པ་ཡང་ཆུང་མར་འགྱུར། །དེ་ཡི་ཤ་དག་ཡོངས་སུ་ཟོས་ནས་ཀྱང་། །མི་མཁས་པ་དག་མི་ཤེས་དགའ་བར་འཛིན། །སྲིད་པའི་སྡུག་བསྔལ་རྒྱ་མཚོར་སྐྱེ་བ་དེ། །མིས་ནི་མ་མྱོང་མེད་ལ་སྐྲག་པ་མེད། །མི་རྣམས་ཀྱི་ནི་
དམ་པའི་ཆོས་འཆད་ཀྱིས། །བདེ་བར་གཤེགས་ལ་མཆོད་པར་འདོད་རྣམས་དེང་། །མི་འདུལ་ཁ་ལོ་སྒྱུར་བ་དེ་མཐོང་ནས། །ཏིང་འཛིན་ཞི་བ་བསྒོམ་པ་ཐོབ་འགྱུར་གྱི། །དེ་ཕྱིར་སྡུག་བསྔལ་རྒྱ་མཚོར་མི་གང་རྣམས། །སྐྲག་པར་གྱིས་ལ་ཐར་པ་འདོད་པར་བྱོས། །

མི་རྣམས་ཀྱིས་ནི་དམ་པ་དེ་ལ་མཆོད། །གཞན་གྱི་སྲོག་ནི་མ་གཅོད་དེ་བཞིན་དུ། །གཞན་གྱི་ནོར་དག་མ་བྱིན་ལེན་མ་བྱེད། །གཞན་གྱི་བུད་མེད་དག་ལ་འཚེ་མ་བྱེད། །སངས་རྒྱས་ཆོས་ལ་རྟག་ཏུ་གུས་པར་བྱོས། །ང་རྒྱལ་རྒྱགས་དང་བརླང་
བ་སྤངས་ནས་ཀྱང་། །བཱ་རཱ་ཎ་སཱི་ཞེས་ནི་བྱ་བ་ཡི། །ཨ་མྲ་སྲུང་བ་མོ་ཡི་ཚལ་དུ་དེང་། །མི་མཆོག་ལ་ནི་མྱུར་དུ་བལྟ་བར་གྱིས། །དེ་ཡི་བཀོད་པ་རྒྱ་ཆེར་ཡིད་དུ་འོང་། །དགེ་སློང་དགེ་འདུན་རྟག་ཏུ་རྫུ་འཕྲུལ་ལྡན། །བྱང་ཆུབ་སེམས་དཔའ་རྒྱ་ཆེན་རྫུ་འཕྲུལ་ཆེ། །
སེམས་ཅན་མི་མཁས་ཁོང་དུ་ཆུད་བྱ་དང་། །སེམས་ཅན་བྱེ་བ་མང་པོ་ཐར་བྱའི་ཕྱིར། །འོད་ཟེར་རྟག་ཏུ་གང་གིས་བཏང་བ་དེ། །མཚན་ནི་སྤྱན་རས་གཟིགས་ཀྱི་དབང་ཕྱུག་གོ། །གང་དག་ང་རྒྱལ་རྒྱགས་ཁེངས་བགྱིད་གྱུར་ཅིང་། །སངས་རྒྱས་ཆོས་ལ་རིམ་
གྲོ་མི་བྱེད་པ། །ལག་ན་རྡོ་རྗེ་མགོན་པོ་སེམས་ཅན་མཆོག །རྟག་ཏུ་འོད་ཟེར་གཏོང་ཞིང་གོ་བར་བྱེད། །དེ་ཡི་གཟུགས་ནི་ཡངས་ཤིང་རྫུ་འཕྲུལ་ཆེ། །བསྐལ་པ་བྱེ་བར་དེ་ནི་བཤད་མི་རྫོགས། །འདིར་ནི་བདེ་བར་གཤེགས་ལ་མཆོད་པའི་ཕྱིར། །དྲི་དང་ཕྲེང་
བ་གོས་མཆོག་རྒྱན་ཁྱེར་ལ། །མི་ཡི་འདྲེན་པ་འདི་ལ་མཆོད་པར་བྱོས། །སངས་རྒྱས་འབྱུང་བར་འགྱུར་བ་རབ་དཀོན་ནོ། །འདོད་ཕྱིར་བསྐལ་པ་བྱེ་བ་མང་པོར་ཡང་། །རྟག་ཏུ་སྡུག་བསྔལ་ཐོབ་ཅིང་འཐོབ་པར་འགྱུར། །མཁས་པས་རྟག་ཏུ་ཐར་པ་འདོད་པར་
གྱིས། །མི་མཆོག་སངས་རྒྱས་ལ་ནི་མཆོད་པར་བྱོས། །བུ་དང་བུ་མོ་དེ་བཞིན་གཉེན་རྣམས་དང་། །ཕ་མ་ཆུང་མ་བཤེས་མང་སྐྱེ་བོ་རྣམས། །ཐམས་ཅད་སྒྱུ་མ་འདྲ་བས་དོན་མེད་དེ། །རྟག་པར་གཞན་དང་གཞན་དུ་སྐྱེ་བར་འགྱུར། །དེ་ལྟར་གསེར་དང་དངུལ་ཡང་
གློག་དང་འདྲ། །འདི་ལ་སྙིང་པོ་འགའ་ཡང་སྣང་བ་མེད། །བྱང་ཆུབ་གོ་འཕང་ཐོབ་པར་བྱ་བའི་ཕྱིར། །མི་རྣམས་འདྲེན་པ་ལ་ནི་མཆོད་པར་བྱོས། །དེ་ནས་དེའི་ཚེ་ན་འོད་ཟེར་ལས་བྱུང་བའི་ཚིགས་སུ་བཅད་པས་བསྐུལ་བ་གཅིག་ནས་གཅིག་ཏུ་བརྒྱུད་པ་འདིས་སྟོང་གསུམ་གྱི་སྟོང་

ཆེན་པོའི་འཇིག་རྟེན་གྱི་ཁམས་སྒྲས་གང་བར་གྱུར་ནས་སེམས་ཅན་ཐམས་ཅད་ལ་བསྐུལ་བར་གྱུར་ཏེ། སེམས་ཅན་གང་དག་ལོག་པར་ལྟ་བ་དེ་དག་ནི་ཡང་དག་པའི་ལྟ་བ་ལ་བཀོད་པར་གྱུར། གང་དག་ང་རྒྱལ་དང་། རྒྱགས་པ་དང་། ཁེངས་པ་དང་། འགྱིང་བ་དེ་དག་
ནི་ང་རྒྱལ་དང་། རྒྱགས་པ་དང་། ཁེངས་པ་རྣམས་དང་བྲལ་བར་བྱེད་པར་འགྱུར། གང་དག་འདོད་ཆགས་ལ་རྗེས་སུ་སྤྱོད་ཅིང་བག་མེད་པར་གྱུར་པ། དེ་དག་ནི་འདོད་ཆགས་དང་བྲལ་བར་གྱུར། གང་དག་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་
ལོག་པར་གཡེམ་པ་དང་། མི་དགེ་བའི་ཆོས་བརྒྱད་ལ་གནས་པ་དེ་དག་ཐམས་ཅད་ལུས་དང་། ངག་དང་། ཡིད་ཀྱི་སྤྱོད་པ་རྣམས་འཕགས་པའི་ལམ་ཡན་ལག་བརྒྱད་པ་ལ་གནས་པར་གྱུར། ཐམས་ཅད་ཀྱང་རྒོད་པ་དང་། ཀུ་རེ་དང་། དགའ་བ་དང་། རྩེ་བ་དང་། འདོད་
པ་དང་། ཁྲོ་བ་དང་། ཕྲག་དོག་དང་། ཆགས་པ་ཡོངས་སུ་སྤངས་ནས་དེ་བཞིན་གཤེགས་པ་ལ་བལྟ་བ་དང་། བསྟེན་པ་དང་། བསྙེན་བཀུར་བྱ་བ་ལ་སྤྲོ་བར་གྱུར། ཐམས་ཅད་ཀྱང་ཆོས་ཉན་པར་འདོད་པར་གྱུར་ཏོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་
མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དང་། ཀླུའི་རྒྱལ་པོ་དང་། རྒྱལ་པོ་མཁར་གྱི་བདག་པོ་དང་། རྒྱལ་ཕྲན་དང་། སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་
བསྙེན་མ་དེ་དག་ཐམས་ཅད་ཀྱིས་དེ་བཞིན་གཤེགས་པ་ལ་མཆོད་པའི་ཕྱིར་ལྷའི་མེ་ཏོག་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། སིལ་སྙན་དང་། དར་གྱི་ཆུན་པོ་རྣམས་ཐོགས་ཏེ་གྲོང་ཁྱེར་ཆེན་པོ་བཱ་རཱ་ཎ་སཱི་ཞེས་བྱ་བ་གང་
ན་བ་དང་། ཨ་མྲ་སྲུང་བ་མོའི་ཚལ་གང་ན་བ་དེར་དོང་ནས་བདག་གི་བསོད་ནམས་ལས་སྐྱེས་པའི་དགེ་བའི་རྩ་བས་དེ་བཞིན་གཤེགས་པ་དང་འཁོར་གྱི་དཀྱིལ་འཁོར་རྣམས་ལ་མངོན་པར་མཆོད་དེ། མེ་ཏོག་གི་ཆར་དང་། དྲིའི་ཆར་ཆེན་པོ་མངོན་པར་ཕབ་བོ། །དེ་ནས་དེའི་

ཚེ་ན་བཅོམ་ལྡན་འདས་འཛམ་བུའི་གླིང་དང་། ཨ་མྲ་སྲུང་བ་མོའི་ཚལ་དེ་དཔག་ཚད་ཁྲག་ཁྲིག་བརྒྱ་སྟོང་དུ་མ་སྲིད་དུ་རྒྱ་ཆེ་བར་བྱིན་གྱིས་བརླབས་ཏེ། ས་གཞི་ལག་མཐིལ་ལྟར་མཉམ་ལ། ལྷའི་ཡིད་དུ་འོང་བ་ཁ་དོག་དང་ལྡན་པ། དྲི་དང་ལྡན་པ།
ལྷའི་མེ་ཏོག་གི་ཤིང་དང་། འབྲས་བུའི་ཤིང་དང་། སྤོས་ཀྱི་ཤིང་དང་། རིན་པོ་ཆེའི་ཤིང་དང་། དཔག་བསམ་གྱི་ཤིང་དང་། གོས་ཀྱི་ཤིང་རྣམས་ཀྱིས་མཛེས་པར་བྱས་པ། ལྷའི་སེང་གེའི་ཁྲི་དང་ལྡན་པ། རིན་པོ་ཆེ་དང་། དར་དང་། མེ་ཏོག་གི་ཆུན་པོ་རབ་
ཏུ་དཔྱངས་པ། ལྷའི་དྲིལ་བུའི་སྒྲས་བརྒྱན་པར་གྱུར་ཏེ། འདི་ལྟ་སྟེ། དཔེར་ན་བདེ་བ་ཅན་གྱི་འཇིག་རྟེན་གྱི་ཁམས་དེ་བཞིན་དུ་ཡིད་འཕྲོག་པར་བྱེད་པ། ཚིམ་པར་བྱེད་པ། མགུ་བར་བྱེད་པ། མངོན་པར་དགའ་བར་བྱེད་པ། བྱང་ཆུབ་སེམས་དཔའ་དང་། ཉན་
ཐོས་དང་། རང་སངས་རྒྱས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ནས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྒྱལ་པོ་དང་། བློན་
པོ་དང་། བྲམ་ཟེ་དང་། ཁྱིམ་བདག་རྣམས་ཀྱི་བར་དུ་དེ་དག་གིས་གང་བར་བྱིན་གྱིས་བརླབས་སོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་ལག་ན་རྡོ་རྗེ་ཏིང་ངེ་འཛིན་དེ་ལས་ལངས་ནས་བཅོམ་ལྡན་
འདས་ག་ལ་བ་དེར་སོང་སྟེ་ཕྱིན་པ་དང་། ལན་གསུམ་དུ་བསྐོར་བ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་ཐབས་མཁས་པ་དང་སེམས་ཅན་རྣམས་ཡོངས་སུ་སྨིན་པར་བགྱི་བ་ནི་མང་ངོ་། །བདེ་བར་
གཤེགས་པ་མང་ངོ་། །བཅོམ་ལྡན་འདས་དེ་བཞིན་གཤེགས་པའི་གཟི་བརྗིད་དང་རྫུ་འཕྲུལ་གྱི་མཐུས་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ཉན་ཐོས་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་

དང་། མིའམ་ཅི་དང་། ལྟོ་འཕྱེ་ཆེན་པོ་དང་། རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་མང་དུ་འདུས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་
སོ་ལེགས་སོ། །ཀྱེ་རྒྱལ་བའི་བུ་དག་དེ་བཞིན་ཏེ་དེ་བཞིན་གཤེགས་པའི་ཐབས་མཁས་པ་དང་སེམས་ཅན་ཡོངས་སུ་སྨིན་པར་བྱ་བ་ནི་མང་ངོ་། །སེམས་ཅན་རྣམས་ཀྱི་བསམ་པ་ཇི་ལྟ་བུ་དང་། ཇི་ལྟར་འདུལ་བ་དང་། དགེ་བའི་རྩ་བ་ཇི་ལྟ་བུ་དང་། སེམས་ཅན་རྣམས་
ཀྱི་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་དཔས་འདུལ། ཁ་ཅིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་
ཚངས་པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་
ངན་ལས་འདའ་བས་འདུལ། ཁ་ཅིག་ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་གཞུག་པ་དང་། གཙུག་ལག་ཁང་དང་། འཆག་ས་དང་། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་
དུ་གཞུག་པ་དང་། རི་མོ་དང་། གསེར་དང་། དངུལ་དང་། ར་གན་གྱི་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་སྟི་བྱ་བའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་
མདོ་སྡེ་འདྲི་བ་དང་། འདྲིར་གཞུག་པ་དང་། བཀླག་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང་། སྤོས་དང་། མེ་ཏོག་དང་། དྲི་དང་། ཕྲེང་བ་དང་། བྱུག་པ་དང་། དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ། དོན་དམ་པ་ལ་མཁས་

པའི་ཆོས་དང་ལྡན་པ་དང་། མྱ་ངན་ལས་འདས་པའི་ཆོས་དང་ལྡན་པ་ནི་མ་ཡིན་ནོ། །ཀྱེ་རྒྱལ་བའི་བུ་དག་ཡང་དེ་བཞིན་གཤེགས་པ་དག་ལ་མི་མཁྱེན་པ་དང་། མི་གཟིགས་པའམ། མི་གསན་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་
སྟེ། འོངས་པ་ཡང་མཁྱེན། མ་འོངས་པ་ཡང་མཁྱེན། འདས་པ་ཡང་མཁྱེན། ད་ལྟར་བྱུང་བ་ཡང་མཁྱེན། སེམས་ཅན་ཐམས་ཅད་ཀྱི་སྤྱོད་ལམ་ཡང་མཁྱེན། སྤྱོད་པ་ཡང་མཁྱེན། ཁམས་ཀྱང་མཁྱེན། སྐྱེ་བ་ཡང་མཁྱེན། འབྱུང་བ་ཡང་མཁྱེན་ཏོ། །ཀྱེ་རྒྱལ་
བའི་སྲས་དག་འདི་ལྟ་སྟེ། དཔེར་ན་སྨན་པ་ལེགས་པར་བསླབས་པ། ཚེའི་རིག་པ་ཡན་ལག་བརྒྱད་པ་ཐམས་ཅད་ལ་ཆེས་མཁས་ཤིང་། ཁམས་ཐམས་ཅད་ལ་མཁས་པ། སྨན་དང་ཡོ་བྱད་སྦྱོར་བ་ལ་བརྩོན་པ་ནི་སེམས་ཅན་ནད་པ་ནད་སྣ་ཚོགས་ཀྱིས་ལུས་ཡོངས་སུ་གཟིར་བ་རྣམས་
ཀྱི་ཁམས་ཀྱང་ཤེས། དུས་ཀྱང་ཤེས། ཚོད་ཀྱང་ཤེས། སྨན་ཡང་ཤེས། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། ཁྲག་ལས་གྱུར་པ་དང་། མ་ཞུ་བ་ལས་གྱུར་པ་དང་། སྐྲན་དང་། དམུ་རྫིང་དང་། སྙིང་
ནད་དང་། མཛེ་དང་། གཡན་པ་དང་། ཤུ་བ་དང་། འབྲས་ལ་སོགས་པ་དང་དུག་དང་མེ་དབལ་ལ་སོགས་པ་ཡང་ཤེས་སོ། །དེས་ཐམས་ཅད་ཤེས་ནས་སྨན་གྱི་རྫས་སྣ་ཚོགས་ཀྱིས་སྐྱུག་པ་དང་། བཀྲུ་བ་དང་། ཕྱེ་མ་སྦྱར་བ་དང་། སྣ་ནས་བླུག་པའི་ལས་དང་།
གཏར་ཀ