Kinh tạng Tây Tạng (Kangyur Đại Học) — 061_མདོ་སྡེ།_ཙ

ས་པ་ལ་དོན་འདི་ཡོངས་སུ་དྲི་བར་སེམས་པ་ནི་ཁྱོད་ཡང་ལེགས་སོ། །དེའི་ཕྱིར་རིགས་ཀྱི་བུ་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །
བྱང་ཆུབ་སེམས་དཔའ་སེམས་དཔའ་ཆེན་པོ་རིའི་ཕུག་དང་། ཟོམ་དང་། རི་སུལ་དང་། གསེབ་དང་། སྨན་ལྗོངས་ན་སེང་གེའི་མཆོག་རྣམ་པར་བསྒྱིངས་ཤིང་། ང་རོ་རྣམ་པར་སྒྲོགས་པ་ལྟ་བུའི་མིའི་དབང་པོའི་གཙུག་གི་ནོར་བུས། བཅོམ་ལྡན་འདས་ལ་ལེགས་སོ་
ཞེས་གསོལ་ནས། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པས་དགེ་བ་བཅུའི་ལས་ཀྱི་ལམ་དག་ལ་མངོན་པར་བརྩོན་པར་བྱའོ། །རིགས་ཀྱི་བུ་དེ་

ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་བཅུའི་ལས་ཀྱི་ལམ་དག་ལ་ཇི་ལྟར་མངོན་པར་བརྩོན་པར་བྱེད་ཅེ་ན་རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྲོག་གཅོད་པ་སྤངས་པ་ཡིན། ལོག་པར་ལྟ་བའི་བར་དག་སྤངས་པ་ཡིན་ནོ། །རིགས་ཀྱི་
བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། སྲོག་ཅེས་བྱ་བ་ནི་ཐ་ན་སྲོག་ཆགས་གྲོག་སྦུར་ཡན་ཆད་ལ་ཡང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ།
བདག་ལ་ཡང་སྲོག་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱིས་སུ་ཡང་བདག་ལ་གསོད་པ་འམ། གསོད་དུ་འཇུག་པའམ། བསད་པ་ལ་རྗེས་སུ་ཡི་རང་བར་མ་གྱུར་ཅིག་བདག་གིས་ཀྱང་སུ་ལ་ཡང་བསད་པར་མི་བྱ། གསོད་དུ་གཞུག་པར་མི་བྱ། གསོད་པ་ལ་
རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། མངལ་ན་གནས་པ་ཡན་ཆད་ཀྱང་། །ཀུན་ལ་སྲོག་ནི་སྡུག་པའི་ཕྱིར། །བདག་གི་སྲོག་ཕངས་གང་
ཡིན་པ། །དེ་ནི་སྲོག་ཆགས་གསོད་མི་བྱེད། །དེ་ལ་མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ནོར་ཞེས་བྱ་བ་ནི་ཐ་ན་རིགས་ངན་དང་། གཡུང་པོ་ཡན་ཆད་ལ་ཡང་སྡུག་ཅིང་ཕངས་ལ་དགའ་ཞིང་ཡིད་དུ་
འོང་བ་ཡིན་ཏེ། བདག་ལ་ཡང་ནོར་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱིས་སུ་ཡང་བདག་ལ་འཕྲོག་པའམ། འཕྲོག་ཏུ་འཇུག་པའམ། ཕྲོགས་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་དབྲོག་པར་མི་བྱ། འཕྲོག་ཏུ་གཞུག་པར་མི་
བྱ། ཕྲོགས་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མ་བྱིན་པར་ལེན་པ་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། ཤིང་དང་བོང་བ་ཡན་ཆད་ལ། །གཞན་གྱི་བོར་བར་གྱུར་པ་ཡང་། །གང་ལ་ཕ་ཡི་ནོར་

སྡུག་པ། །དེ་ནི་ནོར་ལ་འཕྲོག་མི་བྱེད། །དེ་ལ་འདོད་པས་ལོག་པར་གཡེམ་པ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ཆུང་མ་ཞེས་བྱ་བ་ནི་ཐ་ན་དུད་འགྲོའི་སྐྱེ་གནས་སུ་གྱུར་པ་རྣམས་ལ་ཡང་།
སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ། བདག་ལ་ཡང་ཆུང་མ་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱིས། སུ་ཡང་བདག་ལ་འཕྲོག་པའམ། འཕྲོག་ཏུ་འཇུག་པའམ། ཕྲོགས་པ་ལ་རྗེས་སུ་ཡི་རང་བའམ། ནན་གྱིས་མནན་ཏེ། དགའ་
དགུར་ཡོངས་སུ་ལོངས་སྤྱད་པར་མ་གྱུར་ཅིག །བདག་གིས་ཀྱང་སུ་ལ་ཡང་དབྲོག་པར་མི་བྱ། འཕྲོག་ཏུ་གཞུག་པར་མི་བྱ། ཕྲོགས་པ་ལ་རྗེས་སུ་ཡི་རང་བར་མི་བྱ། ནན་གྱིས་མནན་ཏེ། དགའ་དགུར་ལོངས་སྤྱད་པར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་
སེམས་དཔའ་ཆེན་པོ་འདོད་པ་ལ་ལོག་པར་གཡེམ་པ་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། བྲན་མོར་གྱུར་པ་ཡན་ཆད་ཀྱང་། །གཞན་གྱི་བཞག་པར་གྱུར་པ་ལ། །གང་ལ་རང་གི་ཆུང་མ་སྡུག །དེ་ནི་ཆུང་མ་འཕྲོག་མི་བྱེད། །དེ་ལ་བརྫུན་དུ་སྨྲ་བ་སྤངས་པ་ཇི་ལྟ་བུ་ཡིན་
ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། བདེན་པ་ཞེས་བྱ་བ་དེ་ནི་ཐ་ན་གནོད་སྦྱིན་དང་། འབྱུང་པོ་དང་། ཤ་ཟ་རྣམས་ལ་ཡང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ། བདག་ལ་ཡང་བདེན་པ་འདི་སྡུག་ཅིང་ཕངས་ལ། དགའ་
ཞིང་ཡིད་དུ་འོང་བ་ཡིན་གྱིས། སུ་ཡང་བདག་ལ་བརྫུན་དུ་སྨྲ་བས་སུན་འབྱིན་པའམ། སུན་འབྱིན་དུ་འཇུག་པའམ། སུན་ཕྱུང་བ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་བརྫུན་དུ་སྨྲ་བས་སུན་དབྱུང་བར་མི་བྱ། སུན་འབྱིན་དུ་གཞུག་པར་མི་བྱ། སུན་
ཕྱུང་བ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྫུན་དུ་སྨྲ་བ་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། གནོད་སྦྱིན་འབྱུང་པོ་ཡན་ཆད་ཀྱང་། །གང་ལ་བདེན་པར་སྨྲ་བ་སྡུག །ཤེས་རབ་ཅན་དེ་བརྫུན་ཚིག་གིས། །

ལུས་ཅན་རྣམས་ལ་སུན་མི་འབྱིན། །དེ་ལ་ཕྲ་མའི་ཚིག་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ཕྲ་མའི་ཚིག་ཅེས་བྱ་བ་ནི། ཐ་ན་གང་ཟག་ཕྲ་མ་ཅན་རྣམས་ལ་ཡང་ཡིད་མི་སྡུག་ཅིང་མི་འདོད་ལ། མི་དགའ་ཞིང་ཡིད་
དུ་མི་འོང་བ་ཡིན་ཏེ། བདག་ལ་ཡང་ཕྲ་མའི་ཚིག་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་ཕྲ་མ་ཟེར་བས་གླེང་བའམ། གླེང་དུ་འཇུག་པའམ། གླེངས་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་ཕྲ་མ་
ཟེར་བས་གླེང་བར་མི་བྱ། གླེང་དུ་གཞུག་པར་མི་བྱ། གླེངས་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕྲ་མའི་ཚིག་སྤངས་པ་ཡིན་ནོ། །དེ་ལ་ངག་རྩུབ་པོ་སྨྲ་བ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་
འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ངག་རྩུབ་པོ་ཞེས་བྱ་བ་ནི་ཐ་ན་གང་ཟག་ངག་རྩུབ་པོ་དང་ལྡན་པ་རྣམས་ལ་ཡང་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་ངག་རྩུབ་པོ་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་
གྱིས། སུ་ཡང་བདག་ལ་ངག་རྩུབ་པོ་སྨྲ་བ་དང་། གཏུམ་པའི་ཚིག་དང་། བརླང་བའི་ཚིག་དང་། མི་བདེན་པའི་ཚིག་གིས་ཐོ་འཚམ་པའམ། ཐོ་འཚམ་དུ་འཇུག་པའམ། ཐོ་འཚམས་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་ངག་རྩུབ་པོ་སྨྲ་བ་
དང་། གཏུམ་པའི་ཚིག་དང་། བརླང་བའི་ཚིག་དང་། མི་བདེན་པའི་ཚིག་གིས་ཐོ་བཙམ་པར་མི་བྱ། ཐོ་བཙམ་དུ་གཞུག་པར་མི་བྱ། ཐོ་བཙམས་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ངག་རྩུབ་པོ་
སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། གང་དག་སུ་ཡང་རུང་བ་ལ། །ཕྲ་མ་ངག་རྩུབ་མི་སྡུག་པ། །དེ་ནི་ཕྲ་མ་མི་ཟེར་ཏེ། །རྩུབ་པའི་ཚིག་ཀྱང་སྲུང་བར་བྱེད། །དེ་ལ་ཚིག་ཀྱལ་པ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་

དཔའ་ཆེན་པོ་དེ་འདི་སྙམ་དུ་སེམས་ཏེ། ཚིག་ཀྱལ་པ་ཞེས་བྱ་བ་ནི་ཐ་ན་གང་ཟག་ཚིག་ཀྱལ་པ་ཅན་དག་ལ་ཡང་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་ཚིག་ཀྱལ་པ་འདི་མི་སྡུག་ཅིང་མི་འདོད་ལ། མི་དགའ་ཞིང་ཡིད་དུ་མི་འོང་
བ་ཡིན་གྱིས། སུ་ཡང་བདག་ལ་ཚིག་ཀྱལ་པ་སྨྲས་པས་དྲན་པར་བྱེད་པའམ། དྲན་པར་བྱེད་དུ་འཇུག་པའམ། དྲན་པར་བྱས་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་ཚིག་ཀྱལ་པ་སྨྲ་བས་དྲན་པར་མི་བྱ། དྲན་པར་བྱེད་དུ་མི་གཞུག །དྲན་པར་བྱས་པ་
ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་ཀྱལ་པ་སྤངས་པ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྣབ་སེམས་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་
འདི་སྙམ་དུ་སེམས་ཏེ། བརྣབ་སེམས་ཞེས་བྱ་བ་ནི་ཐ་ན་གང་ཟག་བརྣབ་སེམས་ཅན་རྣམས་ལ་ཡང་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་བརྣབ་སེམས་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་བརྣབ་
སེམས་ཀྱི་ཚིག་གིས་རྗོད་པའམ། རྗོད་དུ་འཇུག་པའམ། བརྗོད་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་བརྣབ་སེམས་ཀྱི་ཚིག་གིས་བརྗོད་པར་མི་བྱ། རྗོད་དུ་གཞུག་པར་མི་བྱ། བརྗོད་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་
ཆུབ་སེམས་དཔའ་སེམས་དཔའ་ཆེན་པོ་བརྣབ་སེམས་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། ཀྱལ་པའི་ཚིག་དང་བརྣབ་སེམས་གཉིས། །གང་ཞིག་བདག་ཉིད་མི་འདོད་པ། །དེ་ནི་ཀྱལ་པའི་ཚིག་མི་སྨྲ། །བརྣབ་སེམས་ཀྱང་ནི་སྲུང་བར་བྱེད། །དེ་ལ་གནོད་སེམས་
སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། གནོད་སེམས་ཞེས་བྱ་བ་ནི་ཐ་ན་གང་ཟག་གནོད་སེམས་སུ་གྱུར་པའི་སེམས་དང་ལྡན་པ་རྣམས་ལ་ཡང་། མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་

གནོད་སེམས་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་གནོད་སེམས་ཀྱི་ཚིག་གིས་འཆད་པའམ། འཆད་དུ་འཇུག་པའམ། བཤད་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་གནོད་སེམས་ཀྱི་ཚིག་གིས་བཤད་
པར་མི་བྱ། འཆད་དུ་གཞུག་པར་མི་བྱ། བཤད་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གནོད་སེམས་སྤངས་པ་ཡིན་ནོ། །དེ་ལ་ལོག་པར་ལྟ་བ་སྤངས་པ་ཇི་ལྟ་བུ་ཡིན་ཞེ་ན། རིགས་ཀྱི་བུ་འདི་ལ་
བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ལོག་པར་ལྟ་བ་ཞེས་བྱ་བ་ནི་ཐ་ན་གང་ཟག་ལོག་པར་ཞུགས་པ་རྣམས་ལ་ཡང་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་ལོག་པར་ལྟ་བ་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་
བ་ཡིན་གྱིས། སུ་ཡང་བདག་ལ་ལོག་པར་ལྟ་བའི་ཚིག་གིས་སྟོན་པའམ། སྟོན་དུ་འཇུག་པའམ། བསྟན་པ་ལ་རྗེས་སུ་ཡི་རང་བར་མ་གྱུར་ཅིག །བདག་གིས་ཀྱང་སུ་ལ་ཡང་ལོག་པར་ལྟ་བའི་ཚིག་གིས་བསྟན་པར་མི་བྱ། སྟོན་དུ་གཞུག་པར་མི་བྱ། བསྟན་པ་ལ་རྗེས་
སུ་ཡི་རང་བར་མི་བྱའོ་སྙམ་མོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་སྤངས་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། གནོད་སེམས་ལོག་པར་ལྟ་བ་གཉིས། །ཡོང་གིས་མི་འདོད་གང་ཡིན་པ། དེ་ནི་གནོད་སེམས་མི་བྱེད་དེ། །
གང་ལའང་ལོག་པར་མི་འཇུག་གོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དགེ་བ་བཅུའི་ལས་ཀྱི་ལམ་འདི་དག་ལ་མངོན་པར་བརྩོན་པར་བྱེད་དོ། །དགེ་བ་བཅུའི་ལས་ཀྱི་ལམ་བསྟན་པ་འདི་བཤད་པ་ན་སེམས་ཅན་དཔག་ཏུ་མེད་གྲངས་མེད་པ་དག་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སངས་རྒྱས་ཀྱི་ཆོས་ཐམས་ཅད་ཀྱི་རྒྱན་དང་། སྤུད་པ་དང་། ལྷབ་ལྷུབ་བཀོད་པ་ཞེས་བྱ་བ་ཐེག་པ་ཆེན་པོའི་མདོ་ལས་ལེའུ་དང་པོའོ།། །།རིགས་ཀྱི་བུ་གཞན་ཡང་བྱང་ཆུབ་སེམས་དཔའ་

སེམས་དཔའ་ཆེན་པོ་དང་པོ་སེམས་བསྐྱེད་པས་ནི་ཕ་རོལ་ཏུ་ཕྱིན་པ་བཅུ་ལ་མངོན་པར་བརྩོན་པར་བྱའོ། །བཅུ་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་
འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་
པ་བཅུ་པོ་དེ་དག་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྦྱིན་པ་སྦྱིན་པར་བྱེད། ཚུལ་ཁྲིམས་སྲུང་བར་བྱེད། བཟོད་པ་སྒོམ་པར་བྱེད། བརྩོན་འགྲུས་རྩོམ་པར་བྱེད། བསམ་གཏན་ལ་བསམ་གཏན་དུ་བྱེད།
ཤེས་རབ་འབར་བར་བྱེད། ཐབས་ལ་མཁས་པར་བྱེད། སྨོན་ལམ་འདེབས་པར་བྱེད། སྟོབས་ལ་འཇུག་པར་བྱེད། ཡེ་ཤེས་ལ་འཇུག་པར་བྱེད་དོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་ཇི་ལྟར་མངོན་པར་བརྩོན་པར་
བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཟས་དང་། སྐོམ་དང་། བཞོན་པ་དང་། གོས་དང་། རྒྱན་སྦྱིན་པ་ལ་མངོན་པར་བརྩོན་པར་བྱེད་པ་ནས་རྐང་སྦྱིན་པའི་བར་དག་ལ་མངོན་པར་བརྩོན་པར་བྱེད་དོ། །རིགས་ཀྱི་བུ་དེ་ལ་བྱང་ཆུབ་སེམས་
དཔའ་ཟས་སྦྱིན་པ་དག་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ཟས་སྦྱིན་པ་ཞེས་བྱ་བ་དེ་ནི་ཚེ་དང་། ཁ་དོག་དང་། སྟོབས་དང་། བདེ་བ་འགྲུབ་པར་འགྱུར་བའི་ཚིག་བླ་དགས་ཡིན་ནོ། །དེ་ལྟ་བས་ན་
བདག་གིས་ཟས་སྦྱིན་པ་ལ་མངོན་པར་བརྩོན་པར་བྱ་དགོས་ཏེ། བདག་གིས་ཟས་ཀྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེས་ཟས་ཀྱི་སྦྱིན་པ་དེ་བྱིན་པས་ཚེ་བྱིན་པ་དང་། བདེ་བ་བྱིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་

སྩལ་ཏོ། །ཁ་ཟས་སྦྱིན་པ་བྱིན་ན་ནི། །དེས་ན་ཚེ་དང་ཁ་དོག་དང་། །སྟོབས་དང་བདེ་བ་ལྔ་པ་སྤོབས། །ཤེས་རབ་ཅན་གྱིས་བྱིན་པ་ཡིན། །ཁ་ཟས་བྱིན་པས་དགའ་བ་དང་། །ཚེ་རིང་སྟོབས་ལྡན་བདེ་སྐྱིད་འགྱུར། །སྐྱིད་ཅིང་བརྟེན་པ་དེ་དག་ནི། །ཐོགས་མེད་
སྤོབས་དང་ལྡན་པར་འགྱུར། །ཕྱུག་ཅིང་ནོར་མང་དཔལ་དང་ལྡན། །མི་ནི་དེས་ཤིང་བློ་ལྡན་ལ། །བསོད་ནམས་ལྡན་ཞིང་མཁས་ལ་ཞི། །ཁ་ཟས་བྱིན་པས་དེ་ལྟར་འགྱུར། །དེ་ལ་སྐོམ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་
ཆུབ་སེམས་དཔའ་དེ་འདི་སྙམ་དུ་སེམས་ཏེ། སྐོམ་སྦྱིན་པ་ཞེས་བྱ་བ་དེ་ནི་ཉོན་མོངས་པའི་སྲེད་པ་ཐམས་ཅད་སེལ་བར་འགྱུར་བའི་ཚིག་བླ་དགས་ཡིན་ཏེ། དེ་ལྟ་བས་ན་བདག་གིས་སྐོམ་གྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་སྐོམ་གྱི་སྦྱིན་པ་དེ་སྦྱིན་པ་ན། སངས་རྒྱས་
ཀྱིས་བསྔགས་པའི་སྨོན་ལམ་བཞིན་དུ་སྐོམ་གྱི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་ཉོན་མོངས་པ་སྲེད་པའི་རྒྱ་མཚོ་ཐམས་ཅད་སྐེམས་པར་བྱེད་པར་གྱུར་ཅིག །རྣམ་པར་གྲོལ་བའི་རོའི་སྐོམ་གྱིས་ཀྱང་ཚིམ་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །འདི་
ལ་ཚིག་ཕྱི་མ་ཡང་ཡོད་དེ། རྒ་ཤིའི་ཆུ་སྲིན་གྱིས་དཀྲུགས་པའི། །ཉོན་མོངས་སྲེད་པའི་མཚོ་སྐེམས་ནས། །རྣམ་གྲོལ་རོ་ཡི་སྐོམ་གྱིས་ནི། །མི་རྣམས་བདག་གིས་ཚིམ་པར་བྱ། །སྐོམ་བྱིན་པས་ནི་མཁས་པ་དེ། །ཀུན་ཏུ་འབར་ཞིང་རབ་འབར་བའི། །ཡི་དགས་ཉམ་ངར་
མི་སྐྱེ་ཞིང་། །སྐོམ་པའི་གནོད་པ་འབྱུང་མི་འགྱུར། །དེ་ལ་བཞོན་པའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། བཞོན་པའི་སྦྱིན་པ་ཞེས་བྱ་བ་དེ་ནི་བདེ་བ་དང་། རྫུ་འཕྲུལ་གྱི་གཞི་ཐམས་ཅད་སྤུད་
པའི་ཚིག་བླ་དགས་ཡིན་གྱིས། བདག་གིས་བཞོན་པའི་སྦྱིན་པ་སྦྱིན་པར་བྱ་སྟེ། བཞོན་པ་ཤིང་རྟའམ། བཞོན་པ་ཁྱོགས་སམ། བཞོན་པ་རྟའམ། བཞོན་པ་གླང་པོ་ཆེའམ། ལྷ་མ་སྦྱིན་པར་བྱ་གོར་མ་ཆག་སྙམ་མོ། །དེ་བཞོན་པའི་སྦྱིན་པ་དེ་དག་སྦྱིན་པ་ན། སངས་

རྒྱས་ཀྱིས་བསྔགས་པའི་སྨོན་ལམ་བཞིན་དུ་བཞོན་པའི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་བདེ་བ་དང་། རྫུ་འཕྲུལ་གྱི་གཞི་ཐམས་ཅད་སྡུད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། བཞོན་པ་ཤིང་རྟ་བྱིན་པ་ཡིས། །
རྟག་ཏུ་སེམས་ཅན་ཐམས་ཅད་ཀྱིས། །ཐེག་པ་ཆེན་པོ་ཐོབ་གྱུར་ཅིང་། །རྫུ་འཕྲུལ་རྐང་པ་ཐོབ་པར་ཤོག །བཞོན་པ་སྦྱིན་པས་དྲང་སྲོང་ཆེ། །སངས་རྒྱས་ཞིང་ནས་ཞིང་དག་ཏུ། །བློ་ལྡན་བྱ་ཡི་ཤུགས་འདྲ་བར། །རྫུ་འཕྲུལ་གྱིས་ནི་མཁའ་ལ་འགྲོ། །དེ་ལ་གོས་སྦྱིན་པ་
ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། གོས་སྦྱིན་པ་ཞེས་བྱ་བ་དེ་ནི་ངོ་ཚ་ཤེས་པ་དང་། ཁྲེལ་ཡོད་པ་དང་། མདོག་ཡོངས་སུ་དག་པར་བྱེད་པའི་ཚིག་བླ་དགས་ཡིན་གྱིས། བདག་གིས་གོས་ཀྱི་
སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་གོས་ཀྱི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་གནང་བའི་སྨོན་ལམ་བཞིན་དུ་གོས་ཀྱི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་ངོ་ཚ་ཤེས་པ་དང་། ཁྲེལ་ཡོད་པ་དང་། མདོག་ཡོངས་སུ་དག་པར་བྱེད་པར་གྱུར་ཅིག་ཅེས་
སྨོན་ལམ་འདེབས་སོ། །འདི་ལ་ཚིག་ཕྱི་མ་ཡང་ཡོད་དེ། གོས་ཀྱི་སྦྱིན་པ་འདིས་ན་བདག །སེམས་ཅན་ཀུན་གྱི་ངོ་ཚ་ཤེས། །ཁྲེལ་ཡོད་པ་ནི་སྦྱོང་བ་དང་། །མདོག་ཀྱང་དག་པར་བྱེད་གྱུར་ཅིག །གོས་སྦྱིན་ཤིན་ཏུ་དཔལ་དང་ལྡན། །རྟག་ཏུ་རིགས་ལྡན་གཟུགས་
བཟང་ཞིང་། །མི་དེ་ངོ་ཚ་ཤེས་པར་འགྱུར། །མི་ནི་གྲགས་ལྡན་སྐལ་དང་ལྡན། །དེ་ལ་རྒྱན་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རྒྱན་བྱིན་པ་ཞེས་བྱ་བ་དེ་ནི་སྐྱེས་བུ་ཆེན་པོའི་མཚན་སུམ་
ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་རྒྱན་གྱི་སྦྱིན་པ་གསེར་གྱི་རྒྱན་ནམ། ནོར་བུའམ། མུ་ཏིག་གམ། བཻ་དཱུརྱའམ། དུང་ངམ། མན་ཤེལ་ལམ། བྱི་རུའི་རྒྱན་སྦྱིན་པ་སྦྱིན་པར་བྱ་

གོར་མ་ཆག་སྙམ་མོ། །དེ་རྒྱན་གྱི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་གསུངས་པའི་སྨོན་ལམ་བཞིན་དུ། རྒྱན་གྱི་སྦྱིན་པ་འདིས་ན་བདག་གིས་སེམས་ཅན་ཐམས་ཅད་ཀྱི་ལུས་མཚན་དང་དཔེ་བྱད་བཟང་པོ་དག་གིས་བརྒྱན་པ་མཐོང་བར་གྱུར་ཅིག་ཅེས་སྨོན་ལམ་འདེབས་སོ། །
དེ་ལ་ཚིག་ཕྱི་མ་ཡང་ཡོད་དེ། གསེར་གྱི་རྒྱན་ནི་བྱིན་པ་ཡིས། །མཚན་རྣམས་ཀྱིས་ནི་བརྒྱན་པ་ཡི། །སེམས་ཅན་ཐམས་ཅད་མཐོང་གྱུར་ཅིང་། །བདག་ཀྱང་བྱང་ཆུབ་ཚོལ་བར་ཤོག །ནོར་བུ་མུ་ཏིག་བྱིན་པས་ནི། །གང་དང་གང་དུ་དེ་སྐྱེ་བ། །སྐྱེ་གནས་དེ་དང་དེ་
དག་ཏུ། །རིན་ཆེན་ཆར་ནི་འབབ་པར་འགྱུར། །དེ་ལ་མར་མེ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མར་མེ་སྦྱིན་པ་ཞེས་བྱ་བ་དེ་ནི་ལྷའི་མིག་ཡོངས་སུ་དག་པར་འགྱུར་བའི་ཚིག་བླ་དགས་ཡིན་གྱིས།
བདག་གིས་མར་མེའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་མར་མེའི་སྦྱིན་པ་དེ་སྦྱིན་པ་ན་སངས་རྒྱས་ཀྱིས་བསྟན་པའི་སྨོན་ལམ་བཞིན་དུ་མར་མེ་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་ལྷའི་མིག་ཡོངས་སུ་དག་པར་འགྱུར་བའི་དོན་བྱེད་པར་གྱུར་ཅིག་ཅེས་སྨོན་ལམ་
འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། ཀུན་མཁྱེན་ཡེ་ཤེས་འགྱུར་བ་ཡི། །མར་མེ་སྦྱིན་པ་དེས་ན་བདག །སེམས་ཅན་ཀུན་གྱི་ལྷ་ཡི་མིག །རྣམ་པར་དག་པར་བྱེད་གྱུར་ཅིག །མི་དེ་མར་མེ་སྦྱིན་པ་ཡིས། །འཇིག་རྟེན་དག་ན་དུས་ཀུན་ཏུ། །སངས་རྒྱས་རྣམས་
ཀྱི་སྤྱན་ལྔ་དང་། །རིམ་གྱིས་སུ་ནི་ལྡན་པར་འགྱུར། །དེ་ལ་རོལ་མོའི་སྒྲ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རོལ་མོའི་སྒྲའི་སྦྱིན་པ་ཞེས་བྱ་བ་དེ་ནི་ལྷའི་རྣ་བ་ཡོངས་སུ་རྫོགས་པར་འགྱུར་བའི་ཚིག་
བླ་དགས་ཡིན་གྱིས། བདག་གིས་རོལ་མོའི་སྒྲའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་རོལ་མོའི་སྒྲའི་སྦྱིན་པ་དེ་སྦྱིན་པ་ན། སངས་རྒྱས་རྣམ་པར་རོལ་པའི་སྨོན་ལམ་བཞིན་དུ། རོལ་མོའི་སྒྲའི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་ལྷའི་རྣ་བ་ཡོངས་སུ་རྫོགས་པར་

བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། རོལ་མོའི་སྒྲ་བྱིན་དེས་ན་བདག །སེམས་ཅན་ཀུན་ལ་ལྷ་རྣ་དང་། །སངས་རྒྱས་བྱང་ཆུབ་འགྲོ་ཕན་པ། །རབ་ཏུ་རྫོགས་པར་བྱེད་གྱུར་ཅིག །རོལ་མོ་སྒྲ་ནི་བྱིན་པས་ན། །
རྫོགས་པའི་སངས་རྒྱས་གྲགས་ལྡན་པ། །དཔའ་བོ་རྣམས་ཀྱི་ལྷ་ཡི་སྙན། །གང་དུ་སྐྱེས་པ་དེ་ཡིས་འཐོབ། །དེ་ལ་སྤོས་དང་། ཕྱེ་མ་དང་། བྱུག་པ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ།
སྤོས་དང་། ཕྱེ་མ་དང་། བྱུག་པ་སྦྱིན་པ་ཞེས་བྱ་བ་དེ་ནི་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་གྱི་སྤོས་དང་། ཕྱེ་མ་དང་། བྱུག་པར་འགྱུར་བའི་ཚིག་བླ་དགས་ཡིན་གྱིས། བདག་གིས་སྤོས་དང་། ཕྱེ་མ་དང་། བྱུག་པ་སྦྱིན་པར་བྱ་གོར་མ་ཆག་སྙམ་མོ། །
དེ་སྤོས་དང་། ཕྱེ་མ་དང་། བྱུག་པའི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་དགོངས་པའི་སྨོན་ལམ་བཞིན་དུ་སྤོས་དང་། ཕྱེ་མ་དང་། བྱུག་པའི་སྦྱིན་པ་འདིས་ན་བདག་གིས་སེམས་ཅན་ཐམས་ཅད་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་གྱི་སྤོས་ཀྱིས་བྱུག་
པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། སྤོས་དང་ཕྱེ་མ་བྱིན་པ་དང་། བྱུག་པ་དག་ནི་བྱིན་པ་ཡིས། །ཚུལ་ཁྲིམས་ཐོས་དང་ཏིང་ངེ་འཛིན། །ལུས་ཅན་རྣམས་ཀྱིས་ཐོབ་གྱུར་ཅིག །སྤོས་དང་ཕྱེ་མ་བྱིན་པ་དང་། །བྱུག་པ་བྱིན་
པས་སྐྱོབ་རྣམས་ཀྱི། །ལྷ་ཡི་ཤངས་དང་ལྷ་ཡི་སྐུ། །སྐྱོན་མེད་དེ་ཡིས་འཐོབ་པར་འགྱུར། །དེ་ལ་མེ་ཏོག་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མེ་ཏོག་དང་། མེ་ཏོག་ཕྲེང་གི་སྦྱིན་
པ་ཞེས་བྱ་བ་དེ་ནི་གཟུངས་དང་། སྤོབས་པ་དང་། བྱང་ཆུབ་ཀྱི་ཡན་ལག་རིན་པོ་ཆེའི་མེ་ཏོག་ཐོབ་པར་འགྱུར་བའི་ཚིག་བླ་དགས་ཡིན་གྱིས། བདག་གིས་མེ་ཏོག་དང་། མེ་ཏོག་ཕྲེང་གི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་མེ་ཏོག་དང་། མེ་ཏོག་ཕྲེང་གི་སྦྱིན་པ་དེ་སྦྱིན་

པ་ན། སངས་རྒྱས་ཀྱིས་གསུངས་པའི་སྨོན་ལམ་བཞིན་དུ་མེ་ཏོག་དང་། མེ་ཏོག་ཕྲེང་གི་སྦྱིན་པ་འདིས་ན། བདག་གིས་སེམས་ཅན་ཐམས་ཅད་ཀྱི་ལུས་གཟུངས་དང་། སྤོབས་པ་དང་། བྱང་ཆུབ་ཀྱི་ཡན་ལག་རིན་པོ་ཆེའི་མེ་ཏོག་གིས་བརྒྱན་པར་བྱེད་པར་གྱུར་ཅིག་ཅེས་
སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། མེ་ཏོག་མེ་ཏོག་ཕྲེང་བྱིན་པས། །མྱུར་བར་རྣམ་པ་ཐམས་ཅད་དུ། །བྱང་ཆུབ་ཡན་ལག་མེ་ཏོག་གིས། །ལུས་ཅན་ཀུན་ལ་བརྒྱན་པར་ཤོག །མེ་ཏོག་མེ་ཏོག་ཕྲེང་བྱིན་པས། །གང་དང་གང་དུ་སྐྱེས་
པ་དེར། །རྒྱལ་པོ་བློན་པོ་ཞང་བློན་གྱིས། །རྟག་ཏུ་མཆོད་ཅིང་རིམ་གྲོ་བྱེད། །དེ་ལ་རོ་བྲོ་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རོ་བྲོ་བ་སྦྱིན་པ་ཞེས་བྱ་བ་དེ་ནི་རོ་བྲོ་བའི་མཆོག་ཏུ་
འགྱུར་བའི་སྐྱེས་བུ་ཆེན་པོའི་མཚན་དུ་འགྱུར་བའི་ཚིག་བླ་དགས་ཡིན་གྱིས། བདག་གིས་རོ་བྲོ་བའི་སྦྱིན་པ་རྒུན་གྱི་རོའམ། བུ་རམ་ཤིང་གི་རོའམ། སྦྲང་རྩིའི་རོའམ། མར་གྱི་རོའམ། འབྲུ་མར་གྱི་རོའམ། ལན་ཚྭའི་རོ་སྦྱིན་པར་བྱ་གོར་མ་ཆག་སྙམ་མོ། །དེ་
རོ་བྲོ་བའི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་བསྔགས་པའི་སྨོན་ལམ་བཞིན་དུ། རོའི་སྦྱིན་པ་འདིས་ན། བདག་གིས་སེམས་ཅན་ཐམས་ཅད་ལ་རོ་བྲོ་བའི་མཆོག་ཏུ་འགྱུར་བའི་སྐྱེས་བུ་ཆེན་པོའི་མཚན་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །
དེ་ལ་འདི་སྐད་ཅེས་བྱ་སྟེ། རོ་ཡི་སྦྱིན་པས་སེམས་ཅན་ཀུན། །ཀུན་མཁྱེན་རོ་ཡི་སྙིང་པོ་ཡིས། །རྫོགས་སངས་རྒྱས་པའི་བྱང་ཆུབ་ཀྱི། །སྤྱོད་པ་ཡོངས་སུ་རྫོགས་གྱུར་ཅིག །རོ་ཡི་སྦྱིན་པས་ཡིད་གཞུངས་ཤིང་། །དྲན་ལྡན་བློ་གྲོས་རྒྱ་མཚོ་བཞིན། །དེས་ནི་རོ་ཡི་
རྣམ་གྲངས་འཐོབ། །ལྷུན་གྱིས་གྲུབ་པར་ལོངས་སྤྱོད་ལྡན། །དེ་ལ་གནས་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། གནས་སྦྱིན་པ་ཞེས་བྱ་བ་དེ་ནི་སེམས་ཅན་ཐམས་ཅད་ཀྱི་གནས་དང་། སྐྱོབ་

པ་དང་། གླིང་དང་། སྐྱབས་དང་། དཔུང་གཉེན་དུ་འགྱུར་བའི་ཚིག་བླ་དགས་ཡིན་གྱིས། བདག་གིས་གནས་ཀྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་གནས་ཀྱི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་དམིགས་པའི་སྨོན་ལམ་བཞིན་དུ་གནས་
ཀྱི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་གནས་དང་། སྐྱོབ་པ་དང་། གླིང་དང་། སྐྱབས་དང་། དཔུང་གཉེན་དུ་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། གཞལ་མེད་ཁང་གནས་སྦྱིན་པ་ཡིས། །བདག་ནི་འཛམ་བུའི་གླིང་དག་ཏུ། །
ལུས་ཅན་རྣམས་ཀྱི་སྐྱོབ་དང་གླིང་། །སྐྱབས་དང་དཔུང་གཉེན་གྱུར་པར་ཤོག །གཞལ་མེད་ཁང་གནས་སྦྱིན་པ་ཡིས། །གང་དང་གང་དུ་སྐྱེས་པ་ན། །ཁྱིམ་དང་གནས་དང་ཡུལ་འཁོར་གྱི། །བདག་པོ་དང་ནི་གཙོ་བོར་འགྱུར། །དེ་ལ་མལ་དང་སྔས་སྦྱིན་པ་ལ་ཇི་ལྟར་མངོན་
པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མལ་དང་སྔས་ཀྱི་སྦྱིན་པ་ཞེས་བྱ་བ་དེ་ནི་སྒྲིབ་པ་ཐམས་ཅད་གཏན་སྤོང་བའི་འཕགས་པ་དང་། ལྷའི་ཚངས་པའི་གནས་དེ་བཞིན་གཤེགས་པའི་གཟིམས་མལ་དང་། འཕངས་སྦྱིན་པའི་
ཚིག་བླ་དགས་ཡིན་གྱིས། བདག་གིས་མལ་དང་སྔས་ཀྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་མལ་དང་སྔས་ཀྱི་སྦྱིན་པ་དེ་སྦྱིན་པ་ན། སངས་རྒྱས་ཀྱིས་བསྟན་པའི་སྨོན་ལམ་བཞིན་དུ་མལ་དང་སྔས་ཀྱི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་གཏན་སྤོང་
བའི་འཕགས་པ་དང་། ལྷའི་ཚངས་པའི་གནས་དེ་བཞིན་གཤེགས་པའི་གཟིམས་མལ་དང་། འཕངས་སྦྱིན་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། མལ་དང་སྔས་རྣམས་བྱིན་པས་བདག་ལ་ནི། །བསོད་ནམས་ཚོགས་ནི་ཅུང་ཟད་ཅི་ཡོད་
པ། །དེས་ན་བདག་གིས་སྐྱེ་བོའི་སྒྲིབ་པ་དག །སྡིག་པའི་བློ་གྲོས་ངན་པ་འཇོམས་པར་ཤོག །ལུས་ཅན་རྣམས་ཀྱི་ལྟ་བ་ངན་པ་ཡི། །དྲ་བ་ཤེས་རབ་མཚོན་གྱིས་གཅོད་པར་ཤོག །བདེ་བར་གཤེགས་པ་རྣམས་ལ་འོས་པ་ཡི། །མལ་མཆོག་ཚངས་གནས་བསྟེན་པ་སྦྱིན་

པར་ཤོག །མལ་དང་སྔས་རྣམས་སྦྱིན་པར་བྱེད་པའི་མི། །བསྟན་བཅོས་དག་ལ་མཁས་པར་སྐྱེ་བར་འགྱུར། །ཞི་གནས་འཐོབ་ཅིང་རྒྱ་ཆེར་སྦྱིན་པ་དང་། །པད་མ་ལས་བྱུང་གཟི་ཅན་གཞོན་ནུར་འགྱུར། །དེ་ལ་སྟན་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་
འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། སྟན་སྦྱིན་པ་ཞེས་བྱ་བ་དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་ས་གཞི་ལ། བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར་འགྱུར་བའི་ཚིག་བླ་དགས་ཡིན་གྱིས། བདག་གིས་སྟན་གྱི་སྦྱིན་པ་སྦྱིན་པར་
བྱ་གོར་མ་ཆག་སྙམ་མོ། །དེ་སྟན་གྱི་སྦྱིན་པ་དེ་སྦྱིན་པ་ན། དེ་བཞིན་གཤེགས་པ་དང་འཐུན་པའི་སྨོན་ལམ་བཞིན་དུ། སྟན་གྱི་སྦྱིན་པ་འདིས་ན་བདག་གིས་སེམས་ཅན་ཐམས་ཅད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་ས་གཞི་ལ་བྱང་ཆུབ་ཀྱི་སྙིང་པོ་
རྡོ་རྗེའི་གདན་ཐོབ་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། སྟན་གྱི་སྦྱིན་པ་འདི་ཡིས་ན། །བྱང་ཆུབ་སྙིང་པོའི་རྡོ་རྗེའི་གདན། །བཟང་ཞིང་སྲ་ལ་བརྟན་པ་དག །ལུས་ཅན་རྣམས་ལ་འབྱུང་བར་ཤོག །སྣ་ཚོགས་རིན་ཆེན་བདུན་ལས་བྱས། །
འཕང་དུ་དཔག་ཚད་གཉིས་ཡོད་ལ། །ཁོ་ར་ཁོར་ཡུག་དཔག་ཚད་གཅིག །རི་རབ་བཞིན་དུ་སྤ་བ་དང་། །རིན་ཆེན་ལྗོན་ཤིང་བརྒྱས་བསྐོར་ཅིང་། །གཞལ་མེད་ཁང་གིས་ལེགས་པར་བརྒྱན། །དྲིལ་བུ་གཡེར་ཀའི་དྲ་བས་བཀབ། །ནོར་བུ་རིན་ཆེན་སྤྲས་གསལ་བ། །
ཚངས་པ་མཚུངས་པར་སྤྱོད་རྣམས་ལ། །ཁྲིའུ་དང་སྟན་དང་སྟེགས་བྱིན་པས། །འཁོར་བ་དག་ན་འཁོར་བའི་ཚེ། །དེ་འདྲའི་སྟན་ནི་ཐོབ་པར་འགྱུར། །དེ་ལ་ཡོ་བྱད་ཀྱི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་
སེམས་ཏེ། ཡོ་བྱད་སྦྱིན་པ་ཞེས་བྱ་བ་དེ་ནི་བྱང་ཆུབ་ཀྱི་ཡོ་བྱད་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་ཡོ་བྱད་ཀྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ཡོ་བྱད་ཀྱི་སྦྱིན་པ་དེ་སྦྱིན་པ་ན། དེ་བཞིན་གཤེགས་པ་ལ་འོས་པའི་སྨོན་ལམ་བཞིན་དུ་

ཡོ་བྱད་བྱིན་པ་འདིས་ན་བདག་སེམས་ཅན་ཐམས་ཅད་ཀྱི་བྱང་ཆུབ་ཀྱི་ཡོ་བྱད་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། ཡོ་བྱད་ཡོངས་སུ་བཏང་བ་དེས། །བདག་གིས་ཀྱང་ནི་ལུས་ཅན་གྱི། །བྱང་ཆུབ་ཡོ་
བྱད་བཙལ་བ་དག །ཡོངས་སུ་རྫོགས་པར་བྱེད་གྱུར་ཅིག །ཡོ་བྱད་རབ་ཏུ་བྱིན་པ་ཡིས། །གང་དང་གང་དུ་སྐྱེས་པ་དེར། །རྣམ་པ་ཀུན་གྱི་མཆོག་ལྡན་པའི། །ཡན་ལག་ཐམས་ཅད་རྫོགས་པར་འགྱུར། །དེ་ལ་སྨན་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན།
རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། སྨན་གྱི་སྦྱིན་པ་ཞེས་བྱ་བ་དེ་ནི་སེམས་ཅན་ཐམས་ཅད་ཀྱི་རྒ་བ་དང་འཆི་བ་མེད་པའི་བདུད་རྩིའི་བདེ་བ་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་སྨན་གྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །
དེ་སྨན་གྱི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་བྱིན་གྱིས་བརླབས་པའི་སྨོན་ལམ་བཞིན་དུ། སྨན་བྱིན་པ་འདིས་ན་བདག་སེམས་ཅན་ཐམས་ཅད་ཀྱི་རྒ་བ་དང་། འཆི་བ་མེད་པའི་བདུད་རྩིའི་བདེ་བ་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་
བྱ་སྟེ། རྩི་དང་སྨན་གྱི་སྦྱིན་པ་ཡིས། །སེམས་ཅན་ཐམས་ཅད་ཚེ་དཔག་མེད། །ཐམས་ཅད་མཁྱེན་པའི་བདུད་རྩི་ཡང་། །མྱུར་བ་ཉིད་དུ་ཐོབ་གྱུར་ཅིག །རྩི་དང་སྨན་གྱི་སྦྱིན་པ་ཡིས། །ཟླ་བ་ཉ་ལྟར་ནད་མེད་ཅིང་། །གནོད་ཆུང་སྐྱིད་ཅིང་བདེ་བར་གནས། །མི་
རྣམས་ཚེ་ནི་རིང་བར་འགྱུར། །དེ་ལ་བྲན་དང་བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། བྲན་དང་། བྲན་མོ་དང་། ལས་
བྱེད་པ་དང་། ཞོ་ཤས་འཚོ་བ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་རང་དགའ་དང་། རང་དབང་དང་། རང་བྱུང་གི་ཡེ་ཤེས་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་བྲན་དང་། བྲན་མོ་དང་། ལས་བྱེད་

པ་དང་། ཞོ་ཤས་འཚོ་བ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་གསུངས་ཤིང་བསྟན་པའི་སྨོན་ལམ་བཞིན་དུ་བྲན་དང་།
བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་རང་དགའ་དང་། རང་དབང་དང་། རང་བྱུང་གི་ཡེ་ཤེས་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་
བྱ་སྟེ། བྲན་དང་བྲན་མོ་བཏང་བ་ཡིས། །མདོར་ན་ལུས་ཅན་ཐམས་ཅད་ཀྱི། །རང་བྱུང་གི་ནི་ཡེ་ཤེས་ཀྱི། །སྙིང་པོ་ཡོངས་སུ་རྫོགས་གྱུར་ཅིག །བྲན་དང་བྲན་མོ་བཏང་བ་ཡིས། །མི་ནི་བྲན་དུ་མི་སྐྱེ་ཞིང་། །བརྟན་པོ་རང་དབང་ཡོད་པས་འཚོ། །ཞུམ་པ་མེད་ཅིང་
འཇིགས་པ་མེད། །དེ་ལ་གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་
བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་ཡོངས་སུ་གཏོང་བ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་
སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་མཐའ་ཡས་མུ་མེད་པ་དག་ཏུ་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་སྣང་བར་འགྱུར་བའི་ཚིག་བླ་དགས་ཡིན་གྱིས། བདག་གིས་གསེར་
དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་།

དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་ཇི་ལྟར་མཁྱེན་ཅིང་བཤད་དེ་གསལ་བར་མཛད་པའི་སྨོན་ལམ་བཞིན་དུ་གསེར་དང་། དངུལ་དང་། ནོར་བུ་དང་། མུ་ཏིག་
དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་བྱིན་པ་དེས་ན་བདག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་མཐའ་ཡས་མུ་མེད་པ་དག་ཏུ་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་
དང་། དངུལ་གྱི་ཁ་དོག་ལྟ་བུས་སྣང་བར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། རིན་ཆེན་བྱིན་པ་དེས་ན་བདག །འོད་ཟེར་སྣ་ཚོགས་སྣང་བ་ཡིས། །སངས་རྒྱས་དྲང་སྲོང་ཆེ་རྣམས་ཀྱི། །ཞིང་རྣམས་ཐམས་ཅད་སྣང་བྱེད་ཤོག །རིན་ཆེན་
སྣ་ཚོགས་བྱིན་པ་ཡིས། །ངེས་པ་གང་དང་གར་སྐྱེས་པ། །འཇིག་རྟེན་མཚམས་མེད་ཡན་ཅད་དུ། །དེས་ནི་འོད་ཟེར་སྣང་བར་བྱེད། །དེ་ལ་རྟ་དང་། གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་
བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རྟ་དང་། གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་དང་། ཐེག་པ་མཆོག་དང་། ཐེག་པ་མི་མཉམ་པ་དང་མཉམ་པ་དང་། སངས་རྒྱས་ཀྱི་ཐེག་
པ་བླ་ན་མེད་པ། གཙོ་བོ་དམ་པ་རབ་མཆོག་སྡུད་པའི་ཚིག་བླ་དགས་ཡིན་གྱིས། བདག་གིས་རྟ་དང་། གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་རྟ་དང་། གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་
སྦྱིན་པ་ན་དེ་བཞིན་གཤེགས་པས་གསུངས་ཤིང་བསྒོམས་པའི་སྨོན་ལམ་བཞིན་དུ་རྟ་དང་། གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་འདིས་ན་བདག་གིས་སེམས་ཅན་ཐམས་ཅད་ཐེག་པ་ཆེན་པོ་དང་། ཐེག་པ་མཆོག་དང་། ཐེག་པ་མི་མཉམ་པ་དང་མཉམ་པ་དང་།

སངས་རྒྱས་ཀྱི་ཐེག་པ་བླ་ན་མེད་པ། གཙོ་བོ་དམ་པ། རབ་མཆོག་གིས་སྡུད་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། བདག་གིས་གླང་ཆེན་བྱིན་པ་ཡིས། །སངས་རྒྱས་ཐེག་པ་ཐེག་པ་ཆེ། །ཐེག་པ་མཆོག་གིས་ལུས་ཅན་རྣམས། །མྱུར་
དུ་སྡུད་པར་བྱེད་པར་ཤོག །གླང་ཆེན་བྱིན་ཞིང་རྟ་བྱིན་པས། །གསལ་ཞིང་མཁས་ལ་ཤེས་ཉེན་ཅན། །ཐེག་པ་ཆེ་ལ་མོས་པ་དང་། །མི་དེ་སྐལ་བ་ཅན་དུ་འགྱུར། །དེ་ལ་སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏོང་བའི་སྦྱིན་པ་ལ་ཇི་
ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཡན་
ལག་ཡོངས་སུ་རྫོགས་པར་བྱེད་པར་འགྱུར་བའི་ཚིག་བླ་དགས་ཡིན་གྱིས། བདག་གིས་སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་།
གཙུག་ལག་ཁང་ཡོངས་སུ་གཏོང་བའི་སྦྱིན་པ་སྦྱིན་པ་ན། སངས་རྒྱས་ཀྱིས་བསྟོད་ཅིང་བསྔགས་པའི་སྨོན་ལམ་བཞིན་དུ། སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏོང་བའི་སྦྱིན་པ་འདིས་ན་བདག་སེམས་ཅན་ཐམས་ཅད་ཀྱི་བསམ་གཏན་
གྱི་ཡན་ལག་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། ལྷ་གང་སྐྱེད་མོས་ཚལ་བྱིན་པས། །བདག་གིས་སེམས་ཅན་ཐམས་ཅད་ཀྱི། །བསམ་གཏན་ཡན་ལག་རིམ་བཞིན་དུ། །ཡོངས་སུ་རྫོགས་པར་བྱེད་པར་ཤོག །ལྷ་གང་སྐྱེད་
མོས་ཚལ་བྱིན་པས། །རྣལ་འབྱོར་ཅན་གྱི་མི་དེ་ནི། །བསམ་གཏན་ཡན་ལག་ཡོངས་རྫོགས་ཤིང་། །རྣལ་འབྱོར་སྤྱོད་ལ་དཀའ་ཐུབ་ཆེ། །དེ་ལ་ཆུང་མ་དང་བུ་དང་། བུ་མོ་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་

སྙམ་དུ་སེམས་ཏེ། ཆུང་མ་དང་བུ་དང་། བུ་མོ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་ཚིག་བླ་དགས་ཡིན་གྱིས་བདག་གིས་ཆུང་མ་དང་།
བུ་དང་། བུ་མོ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ཆུང་མ་དང་། བུ་དང་། བུ་མོ་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་བསྙེན་བཀུར་མཛད་མཛད་པའི་སྨོན་ལམ་བཞིན་དུ་ཆུང་མ་དང་། བུ་དང་། བུ་མོ་ཡོངས་སུ་
གཏོང་བའི་སྦྱིན་པ་འདིས་ན་བདག་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། བུ་ཡི་སྦྱིན་པ་དེས་ན་མྱུར་བར་ཡང་། །སེམས་ཅན་རྣམས་ནི་
རེ་རེའི་དོན་གྱི་ཕྱིར། །སེམས་ཅན་ཐམས་ཅད་བླ་ན་མེད་པ་ཡི། །བྱང་ཆུབ་དམ་པ་འཚང་རྒྱ་བྱེད་པར་ཤོག །ཆུང་མ་བུ་དང་བུ་མོ་གཏོང་བྱེད་པ། །དེ་ལ་བྱང་ཆུབ་ཟག་མེད་དགའ་བ་མེད། །བརྩོན་འགྲུས་ལྡན་པའི་མི་ནི་གང་ལ་ཡང་། །དཀའ་བ་ཅི་ཡང་མེད་པར་བལྟ་
བར་བྱ། །དེ་ལ་ནོར་དང་། འབྲུ་དང་། བང་མཛོད་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ནོར་དང་། འབྲུ་དང་། བང་མཛོད་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་
སེམས་དཔའ་རྣམས་ཀྱི་དམ་པའི་ཆོས་ཀྱི་མཛོད་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་ནོར་དང་། འབྲུ་དང་། བང་མཛོད་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ནོར་དང་། འབྲུ་དང་། བང་མཛོད་ཡོངས་སུ་གཏོང་བའི་སྦྱིན་
པ་དེ་སྦྱིན་པ་ན། དེ་བཞིན་གཤེགས་པས་གསུངས་པའི་སྨོན་ལམ་བཞིན་དུ་ནོར་དང་། འབྲུ་དང་། བང་མཛོད་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་དམ་པའི་ཆོས་ཀྱི་མཛོད་ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་

ཅེས་བྱ་སྟེ། ནོར་དང་དབྱིག་རྣམས་གཏོང་བའི་བསོད་ནམས་ནི། །མཁའ་ལས་ལྷག་པ་བདག་ལ་ཅི་ཡོད་པས། །མི་རྣམས་རྒྱུད་ནི་དམ་པའི་ཆོས་མཛོད་ཀྱིས། །རྒྱལ་པོའི་མཛོད་ལྟར་མྱུར་དུ་རྒྱས་གྱུར་ཅིག །ནོར་དང་འབྲུ་དང་བང་མཛོད་བུད་མེད་རྣམས། །གཏོང་བའི་བསོད་
ནམས་བདག་ལ་ཅི་ཡོད་པ། །དེས་ན་བདག་གིས་བྱང་ཆུབ་མྱུར་འཐོབ་ཅིང་། །དམ་པའི་ཆོས་ཀྱི་མཛོད་ནི་ཐོབ་པར་ཤོག །དེ་ལ་གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་
འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་དམ་པའི་ཆོས་ཀྱི་རྒྱལ་སྲིད་ཀྱི་དབང་ཕྱུག་འཐོབ་པར་འགྱུར་བའི་ཚིག་བླ་དགས་
ཡིན་གྱིས། བདག་གིས་གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་གཏོང་བའི་སྦྱིན་པ་དེ་སྦྱིན་
པ་ན། དེ་བཞིན་གཤེགས་པས་བསྟན་པའི་སྨོན་ལམ་བཞིན་དུ། གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་དམ་པའི་ཆོས་ཀྱི་རྒྱལ་སྲིད་ཀྱི་དབང་ཕྱུག་འཐོབ་པ་ཐོབ་པར་གྱུར་ཅིག་
ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། གླིང་བཞི་རིལ་གྱིས་བཏང་བ་འདི་དག་ལས། །བདག་གིས་བསོད་ནམས་ཅུང་ཟད་ཅི་བསྒྲུབས་པ། །དེས་ན་མི་རྣམས་འདི་དག་དམ་ཆོས་ཀྱི། །རྒྱལ་སྲིད་འཐོབ་པའི་མཐའ་ནི་ཐོབ་གྱུར་ཅིག །འཛམ་བུ་གླིང་ནི་བྱིན་པ་
ཡིས། །རིན་ཆེན་སྣ་བདུན་ལྡན་པ་ཡི། །རྒྱལ་པོ་གླིང་བཞི་དབང་བྱེད་པ། །དབང་ཕྱུག་རྣམ་པར་རྒྱལ་བར་འགྱུར། །དེ་ལ་གཙུག་གི་ནོར་བུ་དང་། ཅོད་པན་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་

སྙམ་དུ་སེམས་ཏེ། གཙུག་གི་ནོར་བུ་དང་། ཅོད་པན་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་སྤྱི་གཙུག་བལྟར་མི་མཐོང་བར་འགྱུར་བའི་ཚིག་བླ་དགས་ཡིན་གྱིས། བདག་གིས་གཙུག་གི་ནོར་བུ་དང་། ཅོད་པན་ཡོངས་སུ་གཏོང་
བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་གཙུག་གི་ནོར་བུ་དང་། ཅོད་པན་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་གསུངས་པའི་སྨོན་ལམ་བཞིན་དུ། གཙུག་གི་ནོར་བུ་དང་། ཅོད་པན་ཡོངས་སུ་གཏོང་བའི་སྦྱིན་པ་འདིས་ན་བདག་སེམས་
ཅན་ཐམས་ཅད་ཀྱིས་སྤྱི་གཙུག་བལྟར་མི་མཐོང་བ་ཐོབ་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། མགོ་བོའི་ནོར་བུ་ཅོད་པན་བྱིན་པ་ཡི། །བསོད་ནམས་ཚོགས་ནི་བདག་ལ་ཅི་ཡོད་པ། །དེས་ན་འདིར་ནི་སེམས་ཅན་ཐམས་ཅད་ཀྱི། །སྤྱི་གཙུག་
བལྟར་མེད་རྟག་ཏུ་ཐོབ་གྱུར་ཅིག །གཙུག་གི་ནོར་བུ་བྱིན་དེས་བདག །ནྱ་གྲོ་ད་ལྟར་ཆུ་ཞེང་གབ། །གསེར་དང་ནོར་བུ་བྱས་པ་ཡིས། །གཙུག་ཏོར་ཕུན་སུམ་ཚོགས་པར་ཤོག །དེ་ལ་རྐང་པ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་
དཔའ་དེ་འདི་སྙམ་དུ་སེམས་ཏེ། རྐང་པ་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་རྐང་པ་བྱང་ཆུབ་ཀྱི་སྙིང་པོར་འགྲོ་བའི་ཚིག་བླ་དགས་ཡིན་གྱིས། བདག་གིས་རྐང་པ་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ལ་རྐང་པ་སྦྱིན་པ་དེ་སྦྱིན་པ་ན། དེ་བཞིན་གཤེགས་
པས་བརྙེས་པའི་སྨོན་ལམ་བཞིན་དུ་རྐང་པ་སྦྱིན་པ་འདིས་ན། མི་རྣམས་དང་སེམས་ཅན་ཐམས་ཅད་རྟག་ཏུ་མྱུར་བར་ཁྱིམ་ནས་མངོན་པར་བྱུང་ནས་སྐྱེ་བ་དང་། རྒ་བ་དང་། ན་བ་དང་། འཆི་བའི་གནོད་པ་ཞི་བར་བྱ་བའི་དོན་གྱི་ཕྱིར་འདོད་བཞིན་དུ་བག་བརྐྱང་ནས་རབ་ཏུ་དགའ་ཞིང་དབང་པོ་ཞི་
ལ་སྐྱབས་སུ་འོས་པའི་ཟླ་བའི་འོད་ལྟར་གཟུགས་ཞི་བ་སྣང་བྱེད་ཉི་མ་སྣ་ཚོགས་ཀྱི་གཟི་བརྗིད་ལྟར་སྙིང་རྗེ་ལས་བྱུང་བའི་འོད་ཟེར་འཕྲོ་བས་མཚམས་མེད་པ་ཡན་ཅད་མུན་པར་ཞུགས་པས་ཉམ་ཐག་པའི་མི་རྣམས་ཀྱི་མུན་པ་སྣང་བར་བྱས་ནས་ལུས་རབ་ཏུ་ཚ་བའི་སྡུག་བསྔལ་རྣམས་སེལ་ཅིང་

པད་མའི་རྐང་པ་འཁོར་ལོ་རྩིབས་སྟོང་དང་ལྡན་པའི་མཚན་གྱིས་སྤྲས་ལ། མཉམ་ཞིང་འཇམ་པ་དང་། སོར་མོ་རིང་ཞིང་ངང་པའི་རྐང་པ་ལྟར་དྲ་བས་འབྲེལ་པ་དང་། སེན་མོ་མེ་ལོང་བཟང་པོ་དག་པར་ཕྱིས་པ་ལྟ་བུས་བརྒྱན་ཏེ། མེ་ཏོག་ཀུན་ད་ལྟར་འདུག་པ་དང་། ལོང་བུ་མི་
མངོན་པ་དང་། རྗེ་ངར་སྨྱིག་མ་དང་རི་དགས་ཨེ་ན་ཡའི་བྱིན་པ་འདྲ་བའི་ཡ་མཚན་གྱི་སྟབས་ཀྱིས་དལ་བུས་དལ་ནས་བྱང་ཆུབ་ཀྱི་སྙིང་པོའི་གདན་རྡོ་རྗེའི་སྟེགས་བུའི་གདན། ཆོས་ཀྱི་སེང་གེའི་ཁྲི་ལ་བདུད་རྣམ་པར་གཞོམ་པའི་ཕྱིར་ཤིན་ཏུ་གནོན་པར་གྱུར་ཅིག་ཅེས་སྨོན་ལམ་འདེབས་སོ། །
དེ་ལ་ཚིག་ཕྱི་མ་ཡང་ཡོད་དེ། རྐང་པ་བྱིན་པ་འདི་ཡིས་ན། །རྐང་ཐིལ་འཁོར་ལོའི་མཚན་ཅན་གྱིས། །བྱང་ཆུབ་སྙིང་པོའི་གདན་བཟངས་ལ། །བརྟན་པོས་ཤིན་ཏུ་གནོན་པར་ཤོག །རྐང་པ་སྦྱིན་པ་འདིས་ན་བདག །བྱང་ཆུབ་སྙིང་པོའི་གདན་མཆོག་ལ། །འདུག་ནས་བདུད་རྣམས་སྡེ་
དང་དཔུང་། །བཞོན་དང་བཅས་པར་འདུལ་བར་ཤོག །དེ་ལ་ལག་མཐིལ་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ལག་མཐིལ་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་
ཐམས་ཅད་ལ་ཆོས་ཀྱི་ལག་པ་སྦྱིན་པའི་ཚིག་བླ་དགས་ཡིན་གྱིས། བདག་གིས་ལག་མཐིལ་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ལ་ལག་མཐིལ་གྱི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་རྣམ་པར་མཁྱེན་པའི་སྨོན་ལམ་བཞིན་དུ་ལག་མཐིལ་སྦྱིན་པ་འདིས་ན།
བདག་སེམས་ཅན་དམན་པ་དང་། ལོང་བ་དང་། བཀྲེན་པ་དང་། མགོན་མེད་པ་དང་། སྡུག་བསྔལ་བ་དང་། དབུལ་པོ་དང་། གནས་མེད་པ་དང་། སྐྱབས་མེད་པ་དང་། དཔུང་གཉེན་མེད་པ་རྣམས་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་
འཇིག་རྟེན་དང་། ངན་སོང་ངན་འགྲོ་ལོག་པར་ལྟུང་བ་དང་། མི་ཁོམ་པར་སྐྱེས་པ་རྣམས་ལ་ཆོས་ཀྱི་ལག་པ་སྦྱིན་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། ལག་མཐིལ་སྦྱིན་པས་མྱུར་དུ་བདག །རྣམ་འདྲེན་ལག་ན་རིན་ཆེན་དང་། །

ལག་པ་རིང་ཞིང་གསེར་མདོག་ལྡན། །འཇིག་རྟེན་མཆོད་གནས་གྱུར་པར་ཤོག །སྙིང་རྗེས་ནོན་པར་གྱུར་ནས་ནི། །ཆོས་ཀྱི་ལག་པ་བསྟོད་བྱས་ལ། །ངན་སོང་ཀུན་ལས་ལུས་ཅན་རྣམས། །བདག་གིས་རྟག་ཏུ་འབྱིན་པར་ཤོག །དེ་ལ་རྣ་བ་དང་སྣ་ཡོངས་སུ་
གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རྣ་བ་དང་སྣ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་དབང་པོ་ཚང་བ་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་
གྱིས། བདག་གིས་རྣ་བ་དང་། སྣ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་རྣ་བ་དང་སྣ་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་རྣམ་པར་གཞག་པའི་སྨོན་ལམ་བཞིན་དུ། རྣ་བ་དང་སྣ་ཡོངས་སུ་གཏོང་བའི་སྦྱིན་པ་འདིས་ན། བདག་
སེམས་ཅན་ཐམས་ཅད་དབང་པོ་ཐམས་ཅད་དང་ལྡན་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་འདི་སྐད་ཅེས་བྱ་སྟེ། རྣ་བ་དང་ནི་སྣ་བཏང་བས། །སྲོག་ཆགས་རྣམས་ནི་ཐམས་ཅད་ཀྱང་། །དབང་པོ་ཀུན་དང་ལྡན་གྱུར་ཏེ། །ཡན་ལག་ཐམས་ཅད་རྫོགས་པར་ཤོག །རྣ་བ་
དང་ནི་སྣ་བཏང་བས། གང་དང་གང་དུ་སྐྱེས་པ་དེར། །བལྟ་ན་སྡུག་ཅིང་གཟུགས་བཟང་ལ། །མི་ནི་དེ་བཞིན་མཛེས་པར་འགྱུར། །དེ་ལ་མིག་གི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མིག་སྦྱིན་པ་ཞེས་བྱ་
བ་དེ་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་མིག་སྒྲིབ་པ་མེད་པ་ཡོངས་སུ་དག་པའི་ཚིག་བླ་དགས་ཡིན་གྱིས། བདག་གིས་མིག་གི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་མིག་གི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་དག་པར་མཛད་པའི་སྨོན་ལམ་བཞིན་དུ། མིག་
གི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་ཆོས་ཀྱི་མིག་སྒྲིབ་པ་མེད་པ་ཡོངས་སུ་དག་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། མིག་གི་སྦྱིན་པ་འདིས་ན་བདག །བླ་མེད་བྱང་ཆུབ་སངས་རྒྱས་ནས། །སེམས་ཅན་ཀུན་གྱི་ཆོས་ཀྱི་མིག །

རྣམ་པར་དག་པར་བྱེད་གྱུར་ཅིག །མིག་བྱིན་བརྟུལ་ཞུགས་བཟང་པོ་དེས། དྲི་མ་མེད་ཅིང་སྐྱོན་མེད་ལ། །དག་ཅིང་ཡངས་ལ་མཛེས་བཟངས་དང་། །ཞི་བའི་མིག་ནི་ཐོབ་པར་འགྱུར། །ཨུཏ་པལ་སྔོན་པོའི་འདབ་འདྲ་དང་། །བྱིའུ་ཀུ་ན་ལའི་མིག་འདྲ་ཞིང་། །མིག་གི་རྫི་མ་བ་ཡི་འདྲ། །
དེ་འདྲའི་མིག་ནི་དེ་ཡིས་འཐོབ། །དེ་ལ་མགོ་བོ་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མགོ་བོ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་ཁམས་
གསུམ་ཐམས་ཅད་ལས་ཁྱད་པར་དུ་འཕགས་པའི་མཆོག་ཐམས་ཅད་མཁྱེན་པའི་ཡེ་ཤེས་འཐོབ་པའི་ཚིག་བླ་དགས་ཡིན་གྱིས། བདག་གིས་མགོ་བོ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་མགོ་བོ་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་
པའི་རྐྱེན་དུ་བབ་པའི་སྨོན་ལམ་བཞིན་དུ་མགོ་བོ་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་འཇིག་རྟེན་གསུམ་ལས་ཁྱད་པར་དུ་འཕགས་པའི་མཆོག་ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་
ཡོད་དེ། མགོ་བོ་ཡོངས་སུ་གཏོང་བ་ཡིས། །བསོད་ནམས་བདག་ལ་ཅི་ཡོད་པ། །དེས་ན་སེམས་ཅན་ཀུན་མཁྱེན་གྱི། །གོ་འཕང་མི་གཡོ་ཐོབ་གྱུར་ཅིག །དེ་ལ་པགས་ཤུན་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་
དཔའ་དེ་འདི་སྙམ་དུ་སེམས་ཏེ། པགས་ཤུན་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་པགས་པ་འཇམ་ཞིང་སྲབ་ལ་གསེར་གྱི་མདོག་ལྟ་བུ་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་པགས་ཤུན་ཡོངས་སུ་གཏོང་བའི་སྦྱིན་
པ་སྦྱིན་པར་བྱ་གོར་མ་ཆག་སྙམ་མོ། །དེ་པགས་ཤུན་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པའི་སྨོན་ལམ་བཞིན་དུ། པགས་ཤུན་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་པགས་པ་འཇམ་ཞིང་སྲབ་ལ། གསེར་གྱི་ཁ་དོག་ལྟ་བུ་

ཡོངས་སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། པགས་ཤུན་ཡོངས་སུ་བཏང་བ་ཡིས། །བདག་གིས་སུ་ནི་ལུས་ཅན་རྣམས། །པགས་ཤུན་ལུས་ལས་སྐྱེས་པ་དག །འཇམ་སྲབ་གསེར་གྱི་མདོག་སྒྱུར་ཤོག །
དེ་ལ་ཤ་དང་ཁྲག་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ཤ་དང་ཁྲག་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི། བྱང་ཆུབ་སེམས་དཔའ་རྣམས་ཀྱི་སྙིང་པོ་མེད་པ་ཐམས་ཅད་ལས་སྙིང་
པོ་བླང་བའི་ཚིག་བླ་དགས་ཡིན་གྱིས། བདག་གིས་ཤ་དང་ཁྲག་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་ཤ་དང་ཁྲག་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་བསྐྱེད་པའི་སྨོན་ལམ་བཞིན་དུ། ཤ་དང་ཁྲག་ཡོངས་སུ་གཏོང་བའི་
སྦྱིན་པ་འདིས་ན་བདག་གིས་སེམས་ཅན་ཐམས་ཅད་སྙིང་པོ་མེད་པ་ཐམས་ཅད་ལས་སྙིང་པོ་ལེན་དུ་འཇུག་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། ཤ་དང་ཁྲག་གི་སྦྱིན་པ་ཡི། །རྣམ་སྨིན་བདག་ལ་ཅི་ཡོད་དེས། །སྙིང་པོ་མེད་པ་མ་ལུས་ལས། །
འགྲོ་ཀུན་སྙིང་པོར་ཐོབ་གྱུར་ཅིག །དེ་ལ་རྐང་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རྐང་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་ལུས་རྡོ་རྗེ་ལྟར་མི་ཤིགས་པ་ཡོངས་སུ་རྫོགས་པར་འགྱུར་
བའི་ཚིག་བླ་དགས་ཡིན་གྱིས་བདག་གིས་རྐང་གི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་རྐང་གི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་བསྐྱེད་པའི་སྨོན་ལམ་བཞིན་དུ། རྐང་གི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་ལུས་རྡོ་རྗེ་ལྟར་མི་ཤིགས་པ་ཡོངས་
སུ་རྫོགས་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །དེ་ལ་ཚིག་ཕྱི་མ་ཡང་ཡོད་དེ། རྐང་གི་སྦྱིན་པ་འདི་ཡིས་ན། །བདག་གིས་སེམས་ཅན་ཐམས་ཅད་ཀྱི། །རྣག་གི་ལུས་ཀྱི་ཟ་མ་ཏོག །རྡོ་རྗེ་མི་ཤིགས་རྫོགས་བྱེད་ཤོག །གཞན་ཡང་བྱང་ཆུབ་སེམས་དཔའ་དེ་འདི་སྙམ་

དུ་སེམས་ཏེ། ཁ་དོག་ཕུན་སུམ་ཚོགས་པ་བྱིན་པས་ནི། ཁ་དོག་དང་ལྡན་པར་འགྱུར་གྱིས་བདག་གིས་ཁ་དོག་ཕུན་སུམ་ཚོགས་པ་སྦྱིན་པར་བྱ་གོར་མ་ཆག་སྙམ་སེམས་ཤིང་དྲི་ཕུན་སུམ་ཚོགས་པ་བྱིན་པས་ནི་གྲགས་པའི་དྲི་དང་ལྡན་པར་འགྱུར། རོ་བྲོ་བ་ཕུན་སུམ་ཚོགས་པ་བྱིན་
པས་ནི་ཡོ་བྱད་གྱ་ནོམ་པ་རྣམས་འཐོབ་པར་འགྱུར། རེག་པ་ཕུན་སུམ་ཚོགས་པ་བྱིན་པས་ནི་རྐ་ལག་འཇམ་ལ་གཞོན་ཤ་ཆགས་པར་འགྱུར། རང་གི་ལག་ནས་བྱིན་པས་ནི་བསྙེན་བཀུར་བྱེད་པ་འཐོབ་པར་འགྱུར། གུས་པར་བྱས་ཏེ་བྱིན་པས་ནི་གཉེན་ལ་སོགས་པའི་ནང་དུ་གཞན་
གྱིས་བཀུར་སྟི་བྱ་བར་འགྱུར། དུས་སུ་བྱིན་པས་ནི་དེའི་ནོར་རྣམས་དུས་སུ་འགྲུབ་ཅིང་རྒྱས་པར་འགྱུར། འཐུན་པ་དང་ཡིད་དུ་འོང་བ་བྱིན་པས་ནི་མལ་དང་གོས་ལ་སོགས་པ་ལོངས་སྤྱོད་ཡིད་དུ་འོང་བ་རྣམས་ལ་སེམས་འཇུག་པར་འགྱུར། གཞན་ལ་མི་གནོད་པར་བྱིན་པས་ནི་ལོངས་སྤྱོད་
བརྟན་པ་དག་འཐོབ་པར་འགྱུར། མི་དགའ་བ་དང་དུ་ལེན་པའི་སྦྱིན་པས་ནི་འཁོར་སྙིང་ཉེ་བར་འགྱུར། ཟས་བྱིན་པས་ནི་སྟོབས་དང་ལྡན་པར་འགྱུར། སྐོམ་བྱིན་པས་ནི་སྐོམ་པ་མེད་པར་འགྱུར། གོས་བྱིན་པས་ནི་ཁ་དོག་དང་ལྡན་པར་འགྱུར། མར་མེ་བྱིན་པས་ནི་མིག་དང་ལྡན་
པར་འགྱུར། རོལ་མོའི་སྒྲ་བྱིན་པས་ནི་རྣ་བ་ཉམས་པ་མེད་པར་འགྱུར། བཞོན་པ་བྱིན་པས་ནི་བདེ་བ་དང་ལྡན་པར་འགྱུར། སྨན་བྱིན་པས་ནི་ནད་ཉུང་བར་འགྱུར། མེ་ཏོག་བྱིན་པས་ནི་གཞན་གྱིས་མཆོད་པར་འགྱུར། མེ་ཏོག་ཕྲེང་བྱིན་པས་ནི་གཞན་གྱིས་རིམ་གྲོ་བྱ་བར་འགྱུར།
བསྟོད་པ་བྱིན་པས་ནི་ཚངས་པའི་དབྱངས་དང་ལྡན་པར་འགྱུར། སྟན་བྱིན་པས་ནི་བླ་མའི་གནས་ཐོབ་པར་འགྱུར། བཞོན་པ་བྱིན་པས་ནི་རྫུ་འཕྲུལ་དང་ལྡན་པར་འགྱུར། བྱུག་པ་བྱིན་པས་ནི་རྨ་མེད་པར་འགྱུར། ཕྱག་དར་བྱ་བ་བྱིན་པས་ནི་རྡུལ་དང་བྲལ་བར་འགྱུར། དྲིལ་བུ་བྱིན་པས་
ནི་ཚེ་རབས་དྲན་པར་འགྱུར། གནས་བྱིན་པས་ནི་ཐམས་ཅད་བྱིན་པར་འགྱུར། ཆོས་བྱིན་པས་ནི་བདུད་རྩི་བྱིན་པར་འགྱུར་གྱིས་བདག་གིས་ཆོས་ཀྱི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །དེ་སྦྱིན་པ་དེ་ལྟ་བུ་སྦྱིན་པ་ན་ཆགས་པས་སྦྱིན་པར་མི་བྱེད། སྡང་བས་སྦྱིན་པར་མི་བྱེད། རྨོངས་

པས་སྦྱིན་པར་མི་བྱེད། ཚིག་པ་ཟ་ཞིང་སྦྱིན་པར་མི་བྱེད། བརྙས་བཞིན་དུ་སྦྱིན་པར་མི་བྱེད། རྡེག་ཅིང་སྦྱིན་པར་མི་བྱེད། ཚར་བཅད་དེ་སྦྱིན་པར་མི་བྱེད། ཁྱད་དུ་གསོད་ཅིང་སྦྱིན་པར་མི་བྱེད། སྨད་དེ་སྦྱིན་པར་མི་བྱེད། ང་རྒྱལ་གྱིས་ཁེངས་བཞིན་དུ་སྦྱིན་པར་མི་བྱེད། འགྱིང་བཞིན་དུ་སྦྱིན་པར་མི་
བྱེད། ལྷག་མར་གྱུར་པ་སྦྱིན་པར་མི་བྱེད། རུལ་ཅིང་མྱགས་པ་སྦྱིན་པར་མི་བྱེད་ཀྱི་སྦྱིན་པ་གང་དང་གང་སྦྱིན་པ་དེ་གུས་པར་བྱས་ཏེ་སྦྱིན་པར་བྱེད། བླ་མར་བྱས། རི་མོ་བྱས། མཆོད་པ་བྱས་ཤིང་བརྗོད་ནས་སྦྱིན་པར་བྱེད། མང་དུ་སྦྱིན་པར་བྱེད།
བཟང་པོ་སྦྱིན་པར་བྱེད། རབ་ཏུ་དགའ་བས་སྦྱིན་པར་བྱེད། དགའ་ཞིང་མགུ་བས་སྦྱིན་པར་བྱེད། གཙང་བ་དང་། རྒྱ་ཆེར་སྦྱིན་པར་བྱེད། རང་གི་ལག་ནས་སྦྱིན་པར་བྱེད་གུས་པ་དང་བཅས་པ་དང་། ཞེ་ས་དང་བཅས་པས་སྦྱིན་པར་བྱེད། བསམ་པ་དག་ཅིང་བཟང་ལ་དགེ་
བས་སྦྱིན་པར་བྱེད། སེར་སྣ་མེད་པར་སྦྱིན་པར་བྱེད། བརྐམ་པ་མེད་པར་སྦྱིན་པར་བྱེད། ཞུམ་པ་མེད་པར་སྦྱིན་པར་བྱེད། འཇིགས་པ་མེད་པར་སྦྱིན་པར་བྱེད། རྒྱ་ཆེ་ཞིང་ཡངས་པར་སྦྱིན་པར་བྱེད་དོ། །དེ་སྦྱིན་པ་དེ་ལྟ་བུ་དེ་སྦྱིན་པ་ན་འདི་སྙམ་དུ་འདི་ནི་ཚུལ་ཁྲིམས་དང་ལྡན་པ་
ཡིན་གྱིས། བདག་གིས་སྦྱིན་པར་བྱའོ། །འདི་ནི་ཚུལ་ཁྲིམས་འཆལ་པ་ཡིན་ནོ། །འདི་ནི་དགེ་བའི་ཆོས་དང་ལྡན་པ་ཡིན་ནོ། །འདི་ནི་དགེ་བའི་ཆོས་མ་ཡིན་པ་དང་ལྡན་པ་ཡིན་ནོ། །འདི་ལ་བྱིན་ན་ནི་འབྲས་བུ་ཆེ་བ་དང་། ཕན་ཡོན་ཆེ་བ་དང་། མཐུ་ཆེ་བར་འགྱུར་རོ། །འདི་ལ་
བྱིན་ན་ནི་འབྲས་བུ་མི་ཆེ་བ་དང་། ཕན་ཡོན་མི་ཆེ་བ་དང་། མཐུ་མི་ཆེ་བར་འགྱུར་རོ་སྙམ་དུ་མི་སེམས་སོ། །གཞན་ཡང་ཡང་དག་པའི་བློ་དང་ལྡན་གྱི་ཡང་དག་པ་མ་ཡིན་པ་མ་ཡིན་པའི་ཕྱིར་དེ་སྦྱིན་པ་དེ་སྦྱིན་པ་ན། འདི་སྙམ་དུ་སྦྱིན་པ་འདི་དང་དགེ་བའི་རྩ་བ་དང་། ཆོས་ཀྱི་སྦྱིན་པ་དེ་
ཡོངས་སུ་གཏོང་བ་འདིས་ན་བདག་རྒྱལ་པོར་གྱུར་ཅིག་ཅེའམ། རྒྱལ་པོ་གཞན་ནམ། བློན་པོ་ཆེན་པོའམ། ལྷའམ། ཀླུའམ། ལྷའི་བུའམ། ལྷ་གཞན་གང་ཡང་རུང་བ་ཞིག་ཏུ་གྱུར་ཅིག་ཅེས་སེམས་སྐྱེད་པར་མི་བྱེད་དོ། །འོ་ན་གང་དུ་ཞེ་ན། གཞན་དུ་ན་བླ་ན་མེད་པ་ཡང་དག་

པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དེ། དགེ་བའི་རྩ་བ་འདི་དང་ཆོས་ཀྱི་ཕྱིར་ཡོངས་སུ་གཏོང་བ་འདིས་ན། བདག་སེམས་ཅན་མ་རྒལ་བ་རྣམས་སྒྲོལ་བ་དང་། མ་གྲོལ་བ་རྣམས་དགྲོལ་བར་བྱེད་པ་དང་། དབུགས་མ་ཕྱིན་པ་རྣམས་དབུགས་འབྱིན་པ་དང་། ཡོངས་
སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བར་བྱེད་པ་དང་། འཇིག་རྟེན་ལོང་བ་འདྲེན་པ་མེད་པ་དང་། སྐྱོ་བ་མེད་པ་དང་། སྐྱབས་མེད་པ་དང་། གནས་མེད་པ་དང་། གླིང་མེད་པ་དང་། དཔུང་གཉེན་མེད་པ་རྣམས་ཀྱི་འདྲེན་པ་དང་། ཡོངས་སུ་འདྲེན་པ་དང་།
སྒྲོལ་བ་དང་། སྐྱབས་དང་། གནས་དང་། གླིང་དང་། དཔུང་གཉེན་དུ་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། ཆོས་ཕྱིར་སྦྱིན་པ་འདིས་ན་བདག །འཁོར་བ་ཡི་ནི་རྒྱ་མཚོ་ལས། །གཞན་མིན་ཐེག་པ་ཆེན་པོ་ཡིས། །སེམས་ཅན་རྣམས་ནི་
སྒྲོལ་གྱུར་ཅིག །སྐྱེ་བོ་ཐམས་ཅད་ཉོན་མོངས་པའི། །འཆིང་བ་དག་ལས་འགྲོལ་བར་ཤོག །དབུགས་མ་ཕྱིན་པ་དབུགས་འབྱིན་ཅིང་། །མྱ་ངན་འདས་ལམ་སྟོན་གྱུར་ཅིག །འཇིག་རྟེན་ལོང་བ་འདྲེན་མེད་པའི། །ཡོངས་སུ་འདྲེན་པར་བདག་གྱུར་ཅིག །ལུས་ཅན་རྣམས་ལ་
སྐྱོབ་པ་དང་། །དཔུང་གཉེན་གླིང་དང་སྐྱབས་གྱུར་ཅིག །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་མངོན་པར་བརྩོན་པར་བྱེད་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིའི་ཕུག་དང་། ཟོམ་དང་། རི་
སུལ་དང་། གསེབ་དང་། སྨན་ལྗོངས་ན་སེང་གེའི་མཆོག་རྣམ་པར་བསྒྱིངས་ཤིང་ང་རོ་རྣམ་པར་སྒྲོགས་པ་ལྟ་བུའི་མིའི་དབང་པོའི་གཙུག་གི་ནོར་བུས། བཅོམ་ལྡན་འདས་ལས་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་དབྱེ་བ་བཤད་པ་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་
དགའ་ཞིང་བདེ་བ་དང་། ཡིད་བདེ་བ་སྐྱེས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་

པའི་དབྱངས་ཀྱིས་ལེགས་སོ་ཞེས་བྱ་བ་གསོལ་ཏོ། །སྦྱིན་མཛད་ལེགས་སོ་རྟག་ཏུ་ཡབ་འདྲ་ཁྱོད་ལེགས་སོ། །སྦྱིན་མཛད་ལེགས་སོ་གསང་མཛད་བདེ་གཤེགས་ཁྱོད་ལེགས་སོ། །གཉེན་གྱུར་ལེགས་སོ་མཛའ་བོ་སྟོན་པར་གྱུར་པ་ལེགས། །གཅིག་
པུ་འདི་ན་དམྱལ་བ་སྐྱོབ་པ་ཁྱོད་ལེགས་སོ། །ཐུ་བོ་ལེགས་སོ་ལྷ་མི་རྣམས་ནང་བགྲེས་པ་ལེགས། །མཆོད་གནས་ལེགས་སོ་མི་རྣམས་ནང་ན་དཔའ་བོ་ལེགས། །གསུངས་པ་ལེགས་སོ་བདག་ཉིད་ཆེན་པོ་རབ་ཏུ་ལེགས། །མི་རྣམས་ཉོན་མོངས་དུག་སེལ་སྨན་པའི་རྒྱལ་
པོ་ལེགས། །གྲོལ་བ་ལེགས་སོ་སྲིད་པ་གསུམ་ལས་རྣམ་གྲོལ་ལེགས། །སྨན་པ་ལེགས་སོ་ཕན་བཞེད་དམ་པ་སྦྱིན་མཛད་ལེགས། །དཔལ་ཡོན་ཅན་ལེགས་བཀྲ་ཤིས་སྙོམས་པའི་ཐུགས་མངའ་ལེགས། །སྐལ་ལྡན་ཟླ་བ་ཉི་འདྲ་དྲི་མེད་ཞལ་མངའ་ལེགས། །
བློ་ལྡན་མཐོན་མཐིང་སྤྱན་ཡངས་རིང་བ་ལེགས། །དཔལ་ལྡན་ཤངས་འཚམ་ཆ་བྱད་རྨད་དུ་བྱུང་བ་ལེགས། །སྨྲ་མཁས་སྙན་ཤལ་གསེར་གྱི་འཕྱང་ཐག་འདྲ་བ་ལེགས། །མཆེ་བ་ཁ་བ་དུང་འདྲ་ལེགས་ལ་ཕྱག་འཚལ་ལོ། །གཙོ་བོ་བགྲེས་པ་མགོན་པོ་ཁྱོད་ཀྱིས་དེ་རིང་དུ། །
མི་རྣམས་སྦྱིན་པ་དབྱེ་བ་ལེགས་པར་གསུངས་པ་ལེགས། །སླར་ཞིང་ཚུལ་ཁྲིམས་བཟོད་པ་སྟོབས་དང་ཡེ་ཤེས་དང་། །ཐབས་དང་བསམ་གཏན་རྫུ་འཕྲུལ་སྨོན་ལམ་མཉན་པར་འཚལ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་འཇམ་དཔལ་
གཞོན་ནུར་གྱུར་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། རིའི་ཕུག་དང་། ཟོམ་དང་། རི་སུལ་དང་། གསེབ་དང་། སྨན་ལྗོངས་ན་སེང་གེའི་མཆོག་རྣམ་པར་བསྒྱིངས་ཤིང་ང་རོ་རྣམ་པར་སྒྲོགས་པ་ལྟ་བུའི་མིའི་དབང་པོའི་གཙུག་གི་ནོར་བུ་ལ་སོགས་པ། བྱང་ཆུབ་
སེམས་དཔའ་དེ་དག་དང་། ལྷའི་བུ་དེ་དག་དང་། རྒྱལ་པོ་ཆེན་པོ་བཞི་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྦྱིན་པའི་

ཕ་རོལ་ཏུ་ཕྱིན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
༄༅༅། །རྒྱ་གར་སྐད་དུ། ཨཱརྱ་དཱ་ནཱ་ནུ་ཤནྶ་ནིཪྡེ་ཤ། བོད་སྐད་དུ། འཕགས་པ་སྦྱིན་པའི་ཕན་ཡོན་བསྟན་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་
ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མཁས་པ་རྣམས་ཀྱིས་རྣམ་པ་སུམ་ཅུ་རྩ་བདུན་སྦྱིན་པ་སྦྱིན་ནོ། །སུམ་ཅུ་རྩ་བདུན་གང་ཞེ་ན། སེར་སྣ་
རྣམ་པར་སྤང་བའི་ཕྱིར་དད་པས་སྦྱིན་པ་སྦྱིན་ནོ། །དུས་སུ་སྦྱིན་པ་སྦྱིན་ནོ། །དེ་བཞིན་གཤེགས་པས་གནང་བའི་རུང་བ་དངོས་པོ་གསུམ་ཡོངས་སུ་དག་པར་སྦྱིན་པ་སྦྱིན་ནོ། །སེམས་ཀྱི་འཁྲུག་པའི་སྐྱོན་ཐམས་ཅད་སྤང་བའི་ཕྱིར་བསྟི་སྟང་དུ་བྱས་ཏེ་སྦྱིན་པ་སྦྱིན་ནོ། །སྙིང་པོ་མེད་
པའི་ལུས་ལས་སྙིང་པོ་བླང་བའི་ཕྱིར་རང་གི་ལག་ནས་སྦྱིན་པ་སྦྱིན་ནོ། །གཞན་ལ་མི་གནོད་པའི་སྦྱིན་པ་བྱིན་ན་རྣམ་པར་སྨིན་པ་གཏོང་བ་ཆེན་པོ་རབ་ཏུ་འཐོབ་པར་འགྱུར་རོ། །ཁ་དོག་ཕུན་སུམ་ཚོགས་པ་སྦྱིན་པ་བྱིན་ན་རྣམ་པར་སྨིན་པ་ཁ་དོག་མཛེས་པ་རབ་ཏུ་འཐོབ་པར་འགྱུར་རོ། །
དྲི་ཕུན་སུམ་ཚོགས་པ་སྦྱིན་པ་བྱིན་ན་རྣམ་པར་སྨིན་པ་གྲགས་པའི་དྲི་རབ་ཏུ་འཐོབ་པར་འགྱུར་རོ། །རོ་བྲོ་བ་ཕུན་སུམ་ཚོགས་པ་སྦྱིན་པ་བྱིན་ན་རྣམ་པར་སྨིན་པ་རོ་བྲོ་བ་མཆོག་གི་དཔེ་བྱད་བཟང་པོ་རབ་ཏུ་འཐོབ་པར་འགྱུར་རོ། །གྱ་ནོམ་པ་སྦྱིན་པ་བྱིན་ན་རྣམ་པར་སྨིན་པ་ལོངས་སྤྱོད་
གྱ་ནོམ་པ་རབ་ཏུ་འཐོབ་པར་འགྱུར་རོ། །རྒྱ་ཆེན་པོ་སྦྱིན་པ་བྱིན་ན་རྣམ་པར་སྨིན་པ་ལོངས་སྤྱོད་རྒྱ་ཆེན་པོ་རབ་ཏུ་འཐོབ་པར་འགྱུར་རོ། །བཟའ་བ་སྦྱིན་པ་བྱིན་ན་རྣམ་པར་སྨིན་པ་ཚེ་རབས་ཐམས་ཅད་དུ་བཀྲེས་པ་རྣམ་པར་གཅོད་པ་རབ་ཏུ་འཐོབ་པར་འགྱུར་རོ། །བཏུང་བ་སྦྱིན་པ་

བྱིན་ན་རྣམ་པར་སྨིན་པ་ཚེ་རབས་ཐམས་ཅད་དུ་སྐོམ་པ་རྣམ་པར་གཅོད་པ་རབ་ཏུ་འཐོབ་པར་འགྱུར་རོ། །བགོ་བ་སྦྱིན་པ་བྱིན་ན་རྣམ་པར་སྨིན་པ་གོས་ཀྱི་ལོངས་སྤྱོད་སྣ་ཚོགས་རབ་ཏུ་འཐོབ་པར་འགྱུར་རོ། །གནས་ཀྱི་སྦྱིན་པ་བྱིན་ན་རྣམ་པར་སྨིན་པ་པུ་ཤུ་དང་ཁང་པ་
བརྩེགས་པ་དང་། ཁྱམས་དང་། ཁང་པ་དང་། གཞལ་མེད་ཁང་དང་། སྐྱེད་མོས་ཚལ་དང་། ཀུན་དགའ་ར་བ་དང་། ཡུལ་རབ་ཏུ་འཐོབ་པར་འགྱུར་རོ། །མལ་ཆ་སྦྱིན་པ་བྱིན་ན་རྣམ་པར་སྨིན་པ་རིགས་མཐོན་པོ་རབ་ཏུ་འཐོབ་པར་འགྱུར་རོ། །བཞོན་པ་སྦྱིན་པ་བྱིན་ན་
རྣམ་པར་སྨིན་པ་རྫུ་འཕྲུལ་གྱི་རྐང་པ་བཞི་རབ་ཏུ་འཐོབ་པར་འགྱུར་རོ། །སྨན་སྦྱིན་པ་བྱིན་ན་རྣམ་པར་སྨིན་པ་རྒ་ཤི་མེད་ཅིང་མྱ་ངན་དང་ཀུན་ནས་ཉོན་མོངས་པ་འགོག་པའི་མྱ་ངན་ལས་འདས་པ་རབ་ཏུ་འཐོབ་པར་འགྱུར་རོ། །ཆོས་སྦྱིན་པ་བྱིན་ན་རྣམ་པར་སྨིན་པ་སྐྱེ་བ་དྲན་པ་
རབ་ཏུ་འཐོབ་པར་འགྱུར་རོ། །མེ་ཏོག་སྦྱིན་པ་བྱིན་ན་རྣམ་པར་སྨིན་པ་བྱང་ཆུབ་ཀྱི་ཡན་ལག་གི་མེ་ཏོག་རབ་ཏུ་འཐོབ་པར་འགྱུར་རོ། །ཕྲེང་བ་སྦྱིན་པ་བྱིན་ན་རྣམ་པར་སྨིན་པ་འདོད་ཆགས་དང་ཞེ་སྡང་དང་གཏི་མུག་གི་དྲི་མ་རྣམ་པར་དག་པ་རབ་ཏུ་འཐོབ་པར་འགྱུར་རོ། །བདུག་པ་
སྦྱིན་པ་བྱིན་ན་རྣམ་པར་སྨིན་པ་ཉོན་མོངས་པའི་དྲི་ང་བ་ཐམས་ཅད་མེད་པ་རབ་ཏུ་འཐོབ་པར་འགྱུར་རོ། །གདུགས་སྦྱིན་པ་བྱིན་ན་རྣམ་པར་སྨིན་པ་ཆོས་ལ་དབང་བའི་དབང་ཕྱུག་རབ་ཏུ་འཐོབ་པར་འགྱུར་རོ། །དྲིལ་བུ་སྦྱིན་པ་བྱིན་ན་རྣམ་པར་སྨིན་པ་སྒྲ་དབྱངས་ཡིད་དུ་འོང་བ་རབ་ཏུ་
འཐོབ་པར་འགྱུར་རོ། །སིལ་སྙན་སྦྱིན་པ་བྱིན་ན་རྣམ་པར་སྨིན་པ་ཚངས་པའི་སྒྲ་དབྱངས་ལྟ་བུ་རབ་ཏུ་འཐོབ་པར་འགྱུར་རོ། །མར་མེ་སྦྱིན་པ་བྱིན་ན་རྣམ་པར་སྨིན་པ་ལྷའི་མིག་སྒྲིབ་པ་མེད་ཅིང་རྣམ་པར་དག་པ་རབ་ཏུ་འཐོབ་པར་འགྱུར་རོ། །དར་སྦྱིན་པ་བྱིན་ན་རྣམ་པར་སྨིན་པ་ལྷ་
དང་མིའི་ནང་ན་རྣམ་པར་གྲོལ་བའི་དར་གྱིས་བཅིངས་པ་རབ་ཏུ་འཐོབ་པར་འགྱུར་རོ། །དེ་བཞིན་གཤེགས་པའི་མཆོད་རྟེན་ནམ། དེ་བཞིན་གཤེགས་པའི་སྐུ་གཟུགས་ལ་འབྲུ་མར་དྲི་ཞིམ་པོ་ཕུལ་ལམ། སྤོས་ཀྱི་ཁྲུས་ཆུ་དབུལ་བ་ཕུལ་ན་རྣམ་པར་སྨིན་པ་སྐྱེས་བུ་ཆེན་པོའི་མཚན་སུམ་

ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་རབ་ཏུ་འཐོབ་པར་འགྱུར་རོ། །ཁྲུས་ཀྱི་ཡོ་བྱད་སྦྱིན་པ་བྱིན་ན་རྣམ་པར་སྨིན་པ་ཚེ་རབས་ཐམས་ཅད་དུ་ནད་ཉུང་བ་དང་། རིགས་ཀྱི་མཆོག་ཏུ་སྐྱེ་ཞིང་ཀུན་ཏུ་མཛེས་པ་རབ་ཏུ་འཐོབ་པར་འགྱུར་རོ། །སྙིང་པོ་ལྔ་སྦྱིན་པ་བྱིན་ན་རྣམ་པར་སྨིན་པ་
ཚེ་རབས་ཐམས་ཅད་དུ་མཐུ་ཆེ་ཞིང་སྤྲོ་བ་ཆེན་པོ་མི་ཐུལ་བ་རབ་ཏུ་འཐོབ་པར་འགྱུར་རོ། །བྱམས་པ་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་གནོད་སེམས་མེད་པ་རབ་ཏུ་འཐོབ་པར་འགྱུར་རོ། །སྙིང་རྗེ་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་འཚེ་བ་མེད་པ་རབ་ཏུ་འཐོབ་པར་འགྱུར་
རོ། །དགའ་བ་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་མི་འཇིགས་པ་སྦྱིན་པ་རབ་ཏུ་འཐོབ་པར་འགྱུར་རོ། །བཏང་སྙོམས་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་མི་དགའ་བ་སྤོང་བ་རབ་ཏུ་འཐོབ་པར་འགྱུར་རོ། །རྣམ་པ་སྣ་ཚོགས་ཀྱི་སྦྱིན་པ་བྱིན་ན་རྣམ་པར་སྨིན་པ་ལོངས་
སྤྱོད་སྣ་ཚོགས་རབ་ཏུ་འཐོབ་པར་འགྱུར་རོ། །ལན་ལ་མི་རེ་བ་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་འཐོབ་པར་འགྱུར་ཏེ། དགེ་སློང་དག་མཁས་པ་རྣམས་ཀྱིས་རྣམ་པ་སུམ་ཅུ་རྩ་བདུན་པོ་དེ་དག་སྦྱིན་པ་སྦྱིན་ནོ། །བཅོམ་
ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྦྱིན་པའི་ཕན་ཡོན་བསྟན་པ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་
ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། ཨཱརྱ་བོ་དྷི་ས་ཏྭ་ཙརྱ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་
དཔའི་སྤྱོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་གནས་ན་དགེ་སློང་སྟོང་

ཐམ་པའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ།
བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ། སྤྱོད་ལམ་ཞི་བ་དང་། དུལ་བ་
དང་། རྣམ་པར་གྲོལ་བ་དང་། མ་བརྟགས་པ་དང་ལྡན་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་གང་ཟག་གཅིག་ནི་མ་གཏོགས་ཏེ། དེ་ཡང་བཅོམ་ལྡན་འདས་ཀྱིས་ཉམས་སུ་ལེན་པར་བཀའ་སྩལ་ཏེ། ཚེ་འདི་ཉིད་ལ་ལུང་བསྟན་པ་དང་། བྱང་ཆུབ་སེམས་
དཔའ་སྟོང་ཐམ་པ་ཐམས་ཅད་ཀྱང་ཕྱིར་མི་ལྡོག་པ། ཐམས་ཅད་ཀྱང་གཟུངས་ཐོབ་པ། ཐམས་ཅད་ཀྱང་མཉམ་པ་ཉིད་ཀྱི་བཟོད་པ་དང་ལྡན་པ། ཐམས་ཅད་ཀྱང་ཇི་སྐད་སྨྲས་པ་དེ་བཞིན་དུ་བྱེད་པའི་ས་ཐོབ་པ། མཁས་པ། དྲང་པོ། དད་པ་དང་ལྡན་པ། རྟོག་པ་མང་བ། དང་བ་གཙོ་
བོར་བྱེད་པ། བཞིན་འཛུམ་པ། ཁྲོ་གཉེར་མེད་པ། གཡོ་མེད་པ། བསྒྲུབ་པ་དང་ལ